‘Caij Tos Huab Tais’ yog ntxeev los ntawm lo lus Las Tis Nas tias ‘Adventus’ txhais tias lub caij cov dab Los Mas nqes los nyob hauv cov tsev teev dab. Tab sis txij thaum tus vaj Koos Taas Tis Nus tso lus rau cov Los Mas muaj cai twj lij ntseeg txog Yes Xus, mas tas lub teb chaws tau tso kev teev dab tseg tig los teev Tswv Ntuj, ces tsoom pej xeem hauv lub teb chaws tau ntxeev lo lus ‘Adventus’ lub ntsiab los hais tias yog ‘lub caij Tswv Ntuj Leej Tub tab tom los xeeb ua ib lub cev neeg kom xwv tau nrog Tswv Ntuj haiv neeg nyob’.

Cov ntseeg txheej thaud tau saib muaj 2 yam tseem ceeb nyob hauv caij Tos Huab Tais: 1) Leej Pleev xeeb los ua ib lub cev neeg, thiab 2) Leej Pleev rov los zaum ob.

Leej Pleev xeeb los ua ib lub cev neeg, yog lub hauv paus chiv kev cawm ntiaj teb neeg. Leej Pleev kev cawm ntiaj teb neeg yuav tiav txhij yog thaum Leej Pleev rov los zaum ob.

Thaum tiam 4 yuav tas, lub Koom Txoos Sab Hnub Tuaj yuav tshwj 3 lub Lis Piam ua ntej hnub Leej Pleev tawm tuaj (Epiphany) cia ua lub caij Tos Huab Tais. Peb lub Lis Piam ntawd, cov ntseeg yuav ua hauj lwm them txim thiab coj cov kab ke yoo; mas lub Koom Txoos Sab Hnub Poob thiaj hu lub caij Tos Huab Tais ua ‘caij yoo tos Yes Xus yug los’ (Nativity Fast).

Caij Tos Huab Tais thiaj yog lub caij cov neeg tig los yuav lub siab tshiab yuav npaj tu lub cev thiab lub siab kom huv tos txais lub Cim Ntxuav.

Txog tiam 5 mas cov neeg ua Ntuj kev cai ua lub caij Tos Huab Tais tom qab hnub tim 11 lub 11 hlis ua hmoov nco txog Leej Ntshiab Mas Tis Nus. Lawv coj kab ke yoo ib lub Lis Piam yog 5 hnub, lawv ua li ntawd 4 lub Lis Piam sib law.

Tiam 6 mas lub Koom Txoos nyob Los Mas thiaj mam pib ua lub caij Tos Huab Tais. Thaum ntawd, Vaj Qhia Nqes Nkos Lis (Pope Gregory the Great) hais tias cov neeg ntseeg txog Yes Xus yuav tau ua lub caij Tos Huab Tais ua ntej Yes Xus yug li 4 lub Lis Piam. Lub caij Tos Huab Tais, mas sawv daws yuav ua cov hauj lwm them txim tos Huab Tais Yes Xus los zaum ob. Nyob hauv lub Txoos, sawv daws yuav tsis hais zaj cav txog Tswv Ntuj lub koob meej (Gloria), zaj As Les Lus Yas, thiab zaj ua Tswv Ntuj tsaug (Te Deum). Leej Choj yuav hnav tsoos tsho tsam xem.

Los txog tiam 12 lub Koom Txoos kheev cia hais zaj ‘As Les Lus Yas’ thiab tsis txwv kom sawv daws tsum coj kab ke yoo. Sawv daws thiaj coj li ntawd los txog lub ntuj nyem no.

Zim txwv no, thaum peb ua lub caij Tos Huab Tais, mas peb hais tias yog peb npaj tos ua hmoov Yes Xus yug los thiab kuj yog peb npaj tos Huab Tais Yes Xus los zaum ob. Yog li thaum peb ua cov hauj lwm ncaj (xws li pub cuab tam, teev Ntuj, coj kab ke yoo), mas peb thiaj yuav xyiv fab vim tias peb tab tom tos tus Huab Tais yuav tuaj.

Caij Tos Huab Tais, lub Koom Txoos muab 3 leej neeg los coj peb mus ntsib Leej Pleev: yog Yaj Saub His Xais tus tshaj txog ‘kev vam khom’ rau sawv daws, nws tshaj tias ‘txoj kev cawm los txog ze nej lawm’; tus ob yog Zam Ntxuav Plig tus ntuas sawv daws kom ‘hloov siab tshiab’; thiab tus peb yog niam Mab Liab tus ‘txais’ Tswv Ntuj Leej Tub los nyob hauv nws.

Lawv 3 leeg no, ua tus piv txwv rau peb cov neeg ntseeg yoog raws lawv tus yam ntxwv nyob hauv lub caij Tos Huab Tais zoo li no:

1. Zov hmo; yog kom peb teev Ntuj tsis tseg thiab nrhiav lub cim qhia peb tias Huab Tais Yes Xus tuaj nyob hauv peb.

2. Taug Tswv Ntuj txoj kev; yog kom peb hloov siab tshiab los raws Huab Tais Yes Xus, mas peb thiaj yuav mus tau hauv Tswv Ntuj lub Ceeb Tsheej.

3. Hom khaj; yog kom peb zoo siab nyiam lwm tus, ua zoo rau lawv, thiab qhib siab mloog cov nyob ib puag ncig lub suab.

4. Ua siab pluag; yog rub peb lub siab kom pluag thiab nqha lug mas peb thiaj yuav nqhis lub Moo Zoo thiab txais tau Huab Tais Yes Xus.

Yog li nyob hauv caij Tos Huab Tais, cov ntseeg thiaj yuav mloog Tswv Ntuj Lo Lus zoo li no:

1. Nyob hauv Hnub Chiv, peb yuav nyeem tus Yaj Saub His Xais tej zaj hais txog kev tos Huab Tais Yes Xus yuav los nyob ntiaj teb no thiab yuav tsim ib lub Ceeb Tsheej ri mus puv tas lub ntiaj teb. Peb yuav nyeem tus Hauv Paus Xa Lus cov tsab ntawv ntuas cov neeg ntseeg kom xyuam xim thiab coj lub neej kom haum lub Moo Zoo. Peb nyeem Ntawv Moo Zoo piav txog lub caij ntiaj teb kawg, piav txog tus Ntxuav Plig Zam qhuab qhia sawv daws kom yuav siab tshiab tsim nyom txais tus Huab Tais yuav tuaj, thiab piav txog cov xwm ua ntej Yes Xus yug; xws li xyoo ib (A) tus Tshiab qhia Yos Xes hauv npau suav txog tus me nyuam yuav yug, xyoo ob (B) tus Tshiab xa xov rau Mab Liab, thiab xyoo peb (C) Mab Liab mus xyuas tus phauj Es Lis Xas Npes.

Nyob hauv cov zaj hu nkauj, peb yuav hais cov zaj Nkauj Paj Nruag cav txog Huab Tais yuav tuaj cawm lub ntiaj teb. Peb hu tej zaj nkauj seev yees tos txog Huab Tais. Peb tsis hais zaj cav txog Tswv Ntuj lub koob meej tias ‘Nyob Pem Ntuj’, vim yog ib zaj zoo siab lom zem uas Tswv Ntuj cov Tshiab muab los cav txog Yes Xus yug los.

Leej Choj yuav hnav tsoos tsho tsam xem, vim tsho tsam xem yog tsho tsis qab siab. Peb tsis qab siab vim peb yog ib co neeg tos tus Huab Tais yuav tuaj. Cov ntaub vov lub tsev tsam phooj kuj yog tsam xem. Yog peb xav sau duab phim lub caij Tos Huab Tais, mas peb yuav sau tej yam uas Ntawv Ntshiab hais txog; zoo li lub hnub ziab saum ib lub roob, los lwm yam raws li tus Yaj Saub His Xais hais.

Peb yuav npaj ib lub siab tshiab tsim nyog txais Huab Tais Yes Xus tuaj nyob hauv peb. Peb nrog tas lub ntiaj teb neeg tos kom Huab Tais Yes Xus lub Ceeb Tsheej tuaj txog sawv daws. Peb thov kom cov kwv tij tseem tsis tau paub Huab Tais Yes Xus tau ntsib Huab Tais Yes Xus nyob hauv lawv txoj sia.

2. Nyob hauv 11 hnub ua ntej, peb yuav mloog tus Yaj Saub His Xais tej lus thiab txij Hnub Tsib hauv lub Lis Piam Ob mus, mas yuav hais txog tus Ntxuav Plig Zam. Hnub 1 txog hnub 16 hauv lub 12 hlis lub Moo Zoo piav txog Huab Tais Yes Xus yuav rov los zaum ob. Hnub 17 txog 24 lub 12 hlis lub Moo Zoo piav txog Tswv Ntuj Leej Tub xeeb los ua neeg lub cev nqaij raws li Lus Kas thiab Mas Tais phau ntawv Moo Zoo.

Nyob hauv lub Txoos Teev Ntuj, sawv daws yuav npaj 4 tug tswb ciab cia tau taws ib lub Lis Piam 1 tug. Plaub tug tswm ciab no muaj lub ntsiab zoo li no:

Tus tswm ciab tim 1 yog Yaj Saub His Xais tus tswm ciab, yog tsom txog kev vam khom (hope) rau ntiaj teb neeg tias Tswv Ntuj Leej Tub yuav los cawm neeg.

Tus tswm ciab tim 2 yog tus tswm ciab nyob Npes Les Hes, yog tsom txog Tswv Ntuj kev hlub (love) mas Tswv Ntuj thiaj xa Leej Tub nqes los xeeb ua neeg nyob hauv lub dab nyuj.

Tus tswm ciab tim 3 yog cov zov yaj tus tswm ciab, yog tsom txog cov zov yaj hom khaj (joy) thaum lawv pom Tswv Ntuj Leej Tub yug los. Tus tswm ciab no cov tsos yog paj yeeb.

Tus tswm ciab tim 4 yog cov Tshiab tus tswm ciab, yog tsom txog txoj kev thaj yeeb nyab xeeb, los yog nyob kaj lug (peace).

Dhau ntawd, tseem muaj ib tug tswm ciab dawb, yog Leej Pleev tus tswm ciab. Tus tswm ciab dawb no yuav cig tsom kev kaj nyob hauv hmo Yes Xus yug. Tus twg txais tus tswm ciab dawb no, mas yog nws txais Huab Tais Yes Xus los tsom kev hauv nws txoj sia, nws txais Huab Tais Yes Xus tuaj nyob hauv nws lub siab, ces nws yuav ntshiab huv dua cov daus.

Vam txog:       – Txoj Tuam Kev Teev Ntuj (TP. Nyiaj Pov)
– เอกสารสอนปีพิธีกรรม (คุณพ่อเชษฐา ไชยเดช) http://www.kamsonbkk.com/interesting-catechism/007/2216-007
– เทศกาลเตรียมรับเสด็จพระคริสตเจ้า