Cov neeg tshaj Yes Xus lub Moo Zoo mas tsis yog cov Hauv Paus Xa Lus xwb, vim txij li xyoo tim 60 mus txog xyoo tim 120 mas cov neeg uas ntseeg Yes Xus thiab cov tsis ntseeg coob leej tau sib tham txog txoj kev saib Yes Xus yog tus Huab Tais cawm ntiaj teb neeg. Cov xub tau hnov Yes Xus lub Moo Zoo yog cov Yus Das. Lawv hnov lub Moo Zoo nyob Yes Lus Xas Les thiab nyob Yus Das teb, lawv kuj tau hnov nyob Das Mas thiab nyob As Ntias Kias. Cov Yus Das yog ib co neeg ua lag luam nyob tas ntiaj teb, ces lawv tau piav qhov uas lawv ntseeg rau luag tej mloog, nyob tas qhov txhia chaw; xws li Phas Khas, Mab Liab Mas Ntas Las, Mas Tas, Tis Tos, Tis Mos Tes.

Hais txog ‘Phas Khas’ (Pancras) mas nws txiv tau coj nws mus mloog Yes Xus tshaj lub Moo Zoo nyob Yes Lus Xas Les, ces Pas Khas tau paub Pob Zeb. Thaum Yes Xus mus saum ntuj lawm, Phas Khas lawv tsev neeg thiaj txais Cim Ntxuav nyob hauv As Nthias Kias. Tom qab nws txiv tuag, Phas Khas khiav mus nyob Poos Tus teb (Pontus), nws mus nyob hauv ib lub qhov tsua. Pob Zeb tuaj ntsib Phas Khas thiab xa nws mus tshaj lub Moo Zoo nyob hauv lub pov txwv Xis Xis Lias (Sicily) ces nws raug cov neeg hauv lub pov txwv muab pob zeb txawb tuag ua tim khawv hauv xyoo 40.

Muaj tej zaj kwv huam piav tias tom qab Yes Xus mus saum ntuj tas, ‘Mab Liab Mas Ntas Las’ nrog Zam mus tshaj lub Moo Zoo nyob Es Fes Xos. Xyoo 50 cov Yus Das hiam cov ntseeg Yes Xus, ces lawv muab Mab Liab Mas Ntas Las ntes tso hauv ib lub nkoj cia dej tshoob mus txog lub zos Mas Xes hauv daim av Fab Kis. Mab Liab thiaj tshaj lub Moo Zoo nyob Pos Vees (Provence) thiab nws nyob ua Twj Cuab hauv ib lub qhov tsua tau 30 xyoo ces nws thiaj tuag thaum muaj 79 xyoos.

Thaum  cov Yus Das muab pob zeb txawb Tes Fas Nos ntawd, ‘Las Ntxas Los’ coj nws ob tug muam yog ‘Mas Tas’ thiab ‘Mab Liab’ tsiv mus nyob Kws Plos. Thaum Npas Nas Npes thiab Paj Lug tuaj txog Kws Plos, nkawd tau tsa Las Ntxas Los ua tus saib cov ntseeg nyob lub zos Kis Tis Os (Kittion) hauv Kws Plos. Las Ntxas Los tshaj lub Moo Zoo 30 xyoo nyob ntawd.

Tab sis muaj tej zaj kwv huam hais tias Las Ntxas Los thiab Mas Tas nrog Mab Liab Mas Ntas Las caij nkoj tuaj txog daim av Fab Kis. Las Ntxas Los mus tshaj lub Moo Zoo nyob Mas Xes thiab nws raug tus vaj Das Mas Xias txiav caj dab hauv lub tsev loj faj. Mas Tas mus nyob Tas Las Nkos (Tarascon) ces nws tshaj lub Moo Zoo rau cov neeg hauv tham tsam ntawd mus txog hnub nws tuag.

Ntawm cov Tub Tsob Hwb, mas thaum cov ntseeg txog Yes Xus nyob Yes Lus Xas Les raug hiam thiab Tes Fas Nos tuag tas, lawv ri mus lwm lub xeev. Lus Kas piav txog ‘Fis Lis Pos’ tias nws mus nram ib lub nroog nyob Xas Mas Lias teb, nws tshaj lus txog Yes Xus nyob ntawd.  Tswv Ntuj tshoj nws kom mus nram Nkas Xas. Fis Lis Pos ua lub Cim Ntxuav rau ib tug nom Es Thias Pias, thiab nws mus tshaj lub Moo Zoo nyob zos As Ntxos mus txog Xes Ntxas Les.

Cov kwv huam piav txog lwm tus Tub Tsob Hwb xws li ‘Plos Kos Los’ tias Pob Zeb xa nws mus saib cov ntseeg nyob Nis Kos Mes Dias (Nicomedia). ‘Nis Kas Nos’ yog haiv neeg Yus Das yug nyob hauv lub pov txwv Kws Plos, ces thaum Yes Xus cov thwj tim raug hiam, nws rov mus nyob Kws Plos. ‘Tis Moos’ nws txawj hais lus Hes Las ces cov Hauv Paus Xa Lus xa nws mus tshaj lub Moo Zoo nyob Hes Las teb. ‘Pas Mes Nas’ mus tshaj lub Moo Zoo nyob hauv As Xias Me thiab Mas Xes Dos Nias. Hais txog ‘Nis Kos Las’ mas muaj ib hnub nws ntaus nws tus poj niam thiab nws ntsauj tus poj niam, ces cov Hauv Paus Xa Lus tsawm nws. Nis Kos Las thiaj ncaim ntawm lub Koom Txoos mus txhim lub koom txoos Nis Kos Lais.

Yog vim cov ntseeg txog Yes Xus sib pab tshaj lub Moo Zoo, ces thaum txog xyoo tim 120 Yes Xus kev cai thiaj mus txog As Xias Me, Es Des Xias teb (Edessa) thiab Pes Xis teb (Persia). As Xias Me mas nyem no yog Tws Kis teb (Turkey). Es Des Xias thiab Pes Xis mas nyem no hu ua ‘Is Las’ (Iraq) thiab ‘Is Laas’ (Iran). Nyob Aws Los Pas teb kuj muaj cov nroog nyob Hes Las teb thiab nyob Mas Xes Dos Nias teb, lub pov txwv Kws Plos, thiab Khes Tas. Nyob Is Tas Lias teb muaj ob peb lub nroog kuj paub Yes Xus lub Moo Zoo. As Fis Kas Tuam Teb mas muaj Hais Nkws Tos teb.

Xyoo tim 120 ntawd, muaj ib tug neeg ua Ntuj kev cai nyob Los Mas hu ua ‘Hes Mas’ (Hermas) sau phau ntawv ‘Tus Tswv Zov Yaj’ (The hepherd of Hermas), nws hais tias lub Koom Txoos yog zoo li ib tug ntoo loj ncau tej ceg ntxoov tas lub ntiaj teb uas cov Los Mas paub.