Cov neeg ntseeg txog Yes Xus coob zuj zus tuaj, ces cov ntseeg uas hais lus Hes Las yws yws rau cov hais lus Hes Nplaws, lawv hais tias niaj hnub thaum faib mov rau sawv daws noj, mas tsis muaj neeg nco txog lawv cov poj ntsuam. Cov Hauv Paus Xa Lus hu tas tsoom thwj tim tuaj thiab hais rau lawv tias “Tsis phim peb yuav tso Tswv Ntuj Lo Lus pov tseg, mus saib cov rooj noj mov. Kwv tij, nej yuav nrhiav 7 leej uas yog cov neeg thoob tsib, nto moo zoo, thiab muaj Leej Ntuj Plig Ntshiab puv hauv lawv. Peb yuav tsa lawv ua txoj hauj lwm ntawd. Ntawm peb, mas peb yuav muab siab npuab txoj kev teev Ntuj thiab tshaj Ntuj Lus.”
Sawv daws pom zoo, ces lawv xaiv tau 7 leej los ua Tub Tsob Hwb yog: Tes Fas Nos (Stephen), Fis Lis Pos(Phillip), Plos Kos Los(Prochorus), Nis Kas Nos(Nicanor), Tis Moos(Timon), Pas Mes Nas(Parmenas), thiab Nis Kos Las (Nicolas) uas yog ib tug neeg ntseeg nyob As Nthias Kias. Thaum teev Ntuj tas mas cov Hauv Paus Xa Lus tsa tes rau saum 7 leej ntawd.
‘Tes Fas Nos’ yog ib tug neeg muaj txiaj ntsim thiab hwj chim, nws ua tej yam hwj huam loj nyob ntawm tsoom sid, ces muaj ib co neeg nyob Xis Les Nas thiab As Xias teb tuaj, lawv tuaj nrog Tes Fas Nos sib cav. Tiam sis lawv cav tsis yeej Tes Fas Nos, vim nws yog neeg thoob tsib thiab Leej Ntuj Plig Ntshiab qhia nws hais lus. Lawv txib ib co neeg tuaj liam Tes Fas Nos tias “Peb tau hnov tus ntawd hais tej lo lus thuam Mais Xes thiab thuam Tswv Ntuj.”
Lawv cia li nyiag tuaj ntes Tes Fas Nos, coj nws mus rau lub tsev txiav xim. Nyob ntawd, lawv coj ib co tim khawv cuav tuaj liam tias “Tus neeg ntawd niaj hnub hais lus phem txog lub Tuam Tsev Teev Ntuj thiab txog Mais Xes txoj cai. Peb tau hnov nws hais tias Yes Xus Nas Xas Les yuav rhuav lub Tuam Tsev no thiab yuav hloov txoj cai uas Mais Xes muab rau peb.”
Tas cov neeg tuaj zaum nyob hauv tsev txiav txim sawv daws ntsia ntsoov Tes Fas Nos, lawv pom nws lub ntsej muag zoo li Tswv Ntuj ib tug Tshiab. Tus Thawj Leej Choj nug Tes Fas Nos tias “Puas muaj zoo li ntawd tiag?”
Ces Tes Fas Nos piav txog cov paj tshab uas Tswv Ntuj pub rau Has Nplas, His Xas Has, Yas Kos, Yos Xes, Mais Xes, thiab Das Vis. Nws piav txog cov Yaj Saub uas Tswv Ntuj xa tuaj qhia cov His Xas Lais. Tsis tag li ntawd, Tes Fas Nos tseem hais ntxiv tias “Thaum ub, nej cov yawg koob zoo li cas, ces zaum no nej kuj zoo li ntawd thiab. Puas muaj ib tug Yaj Saub uas nej cov yawg koob tsis tau hiam? Lawv tua cov Yaj Saub xub hais txog tus siab ncaj uas yuav tuaj. Tus siab ncaj yog tus uas nej nyuam qhuav ntxeev siab rau nws thiab nej muab nws tua nyob saum ntoo cuam.”
Thaum cov His Xas Lais hnov cov lus no mas lawv npau taws heev kawg, lawv zim hniav zog rau Tes Fas Nos. Leej Ntuj Plig Ntshiab nyob puv Tes Fas Nos lub siab, Tes Fas Nos tsa muag ntsia saum ntuj, nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis, ces nws hais tias “Kuv pom lub ntuj qhib lug, thiab pom Leej Neeg tus Tub sawv nyob ntawm Tswv Ntuj sab xis.”
Thaum ntawd, cov Yus Das nthe nrov nrov, lawv pos pob ntseg. Sawv daws ua ib tsaug khiav mus ntes Tes Fas Nos. Lawv thawb Tes Fas Nos mus rau sab nroog nraud, ces lawv txawb pob zeb tua nws.
Thaum lawv tab tom txawb pob zeb tua Tes Fas Nos, mas Tes Fas Nos hu txog Ntuj, nws hais tias “Huab Tais Yes Xus, thov koj txais kuv tus plig.”
Tes Fas Nos txhos caug, nws qw ib suab nrov nrov tias “Huab Tais, koj txhob muab qhov txhaum ntawd rau lawv ris.” Tes Fas Nos hais li ntawd tas, nws txoj sia tu.
Hnub ntawd lub Koom Txoos nyob Yes Lus Xas Les raug hiam phem kawg. Tas sawv daws tawg mus nyob nruab liaj nruab teb, nyob hauv cov xeev Yus Das, thiab Xas Mas Lias. Tsuas tshuav cov Hauv Paus Xa Lus thiaj tsis khiav xwb.
Tus Tub Tsob Hwb ‘Fis Lis Pos’ thiaj li mus nram ib lub nroog nyob Xas Mas Lias teb, nws tshaj lus txog Yes Xus nyob ntawd. Tas tsoom sid sawv daws zoo siab ntseeg qhov Fis Lis Pos tau qhia. Nyob hauv lub nroog ntawd sawv daws zoo siab tas nrho. Tswv Ntuj tus Tshiab hais rau Fis Lis Pos tias “Koj mus tos ntawm txoj kev uas nqes ntawm Yes Lus Xas Les mus nram Nkas Xas.”
Fis Lis Pos mus tos ntawm txoj kev ntawd. Thaum ntawd ib tug Es Thias Pias los txog ntawd, nws mus teev Ntuj pem Yes Lus Xas Les rov qab los. Nws caij ib lub tsheb rov qab mus nws teb chaws. Nws tab tom nyeem tus Yaj Saub His Xais cov ntawv. Leej Ntuj Plig Ntshiab hais qhia rau Fis Lis Pos tias “Koj khiav mus caum lub tsheb ntawd.”
Fis Lis Pos thiaj khiav ntsuj mus caum, nws hnov tus nom Es Thias Pias nyeem tus Yaj Saub His Xais cov ntawv hais tias: Nws zoo li ib tug yaj uas luag cab mus rau hauv tsev tua tsiaj. Nws tsis qhib ncauj. Nws zoo li ib tug me nyuam yaj tsis hais lus rau tus muab nws cov plaub chais, nws poob ua tus tsis muaj tsim, luag tsis xav ua ncaj rau nws. Lawv rhuav nws txoj sia kom txhob nyob ntiaj teb no ntxiv.
Fis Lis Pos nug nws tias “Koj puas to taub qhov koj nyeem?” Tus nom teb tias “Yog tsis muaj neeg qhia kuv mas kuv yuav ua cas paub” Ces tus nom caw kom Fis Lis Pos nce los zaum ntawm nws ib sab. Tus nom thiaj nug Fis Lis Pos tias “Thov koj qhia kuv saib, tus Yaj Saub hais txog leej twg zoo li ntawd?”
Fis Lis Pos muab tus Yaj Saub cov lus ntawd los piav txog Yes Xus rau tus nom Es Thias Pias mloog. Thaum nkawd taug kev los txog ib qho chaw muaj dej, tus nom kom lub tsheb nres. Nkawd ob leeg nqes mus hauv dej. Fis Lis Pos ua lub Cim Ntxuav rau nws.
Thaum nkawd tawm hauv dej los, Fis Lis Pos mus rau lub zos As Ntxos, nws hla lub tsheej twg nws tshaj lub Moo Zoo rau lub zos ntawd. Nws ua li ntawd mus txog Xes Ntxas Les.
‘Plos Kos Los’ yog Tes Fas Nos tus xeeb ntxwv. Thaum cov ntseeg txog Yes Xus khiav mus nyob lwm lub zos, Pob Zeb thiaj xa nws mus saib cov ntseeg nyob Nis Kos Mes Dias (Nicomedia).
‘Nis Kas Nos’ yog haiv neeg Yus Das yug nyob hauv lub pov txwv Kws Plos, ces thaum Yes Xus cov thwj tim raug hiam, nws thiaj rov mus nyob Kws Plos.
‘Tis Moos’ nws txawj hais lus Hes Las ces cov Hauv Paus Xa Lus xa nws mus tshaj lub Moo Zoo nyob Hes Las teb.
‘Pas Mes Nas’ mus tshaj lub Moo Zoo nyob hauv As Xias Me thiab Mas Xes Dos Nias.
Hais txog ‘Nis Kos Las’ mas muaj kwv huam piav tias muaj ib hnub nws ntaus nws tus poj niam thiab nws ntsauj tus poj niam, ces cov Hauv Paus Xa Lus tsawm nws. Nis Kos Las thiaj ncaim ntawm lub Koom Txoos mus txhim lub koom Txoos Nis Kos Lais.
