Tus sau: Tuam Lis, Zoo Tswv Zov Yaj, Thaib teb. TSEB NPLEJ 2014)
Nyob zoo cov niam cov txiv, cov kwv cov tij thiab cov nkauj cov muam sawv daws! Kuv yog Xib Hwb Tuam Xeem Lis. Xyoo no, peb lub Koom Haum Zoo Tswv Zov Yaj, zoo siab rov qab tuaj ntsib nej nyob rau hauv phau ntawv Tseb Nplej no dua. Kuv yog ib tug Xib Hwb Hmoob pab Txiv Plig Tos Mas Thossapon ua hauj lwm nyob rau hauv lub Koom Haum Zoo Tswv Zov Yaj no. Kuv tau faib tej lub caij nyoog mus pab Txiv Plig ua hauj lwm tshaj Ntuj Lus hauv tej lub zos Hmoob. Kuv tau nrog Txiv Plig Tos Mas Thossapon thiab Txiv Plig Frank nkawd mus tshaj Ntuj Lus nyob rau hauv ntau lub zos Hmoob, nyob thaj tsam xeev Phetchabun thiab xeev Phitsanoulok. Xws li lub zos Nav Qham (Ban Khunnamkhab), zos Nav Cuas (Ban Namcuang), zos Looj Kauj (Ban Romklao), zos Pam Dees (Pa Deng), zos Nav Xais (Ban Huaynamsai), zos Npab Maim (Ban Mai) thiab zos Fib Xaim (Ban Huaysai). Feem ntau lub zos kuv tau mus heev dua cov, mas yog lub zos Nav Qham. Hos lwm lub zos kuv tsuas tau mus zaum puav xwb.
Ntawm no, kuv yuav piav txog kev tshaj Ntuj Lus nyob rau lub zos Nam Qham pub rau nej sawv daws tau paub txog. Vam tias, yuav pab txhawb peb cov kwj tij Hmoob sawv daws txoj kev ntseeg tsis tau ntau los tsawg.
Lub zos Nav Qham, yog ib lub zos Hmoob me me muaj li 200 tawm yim neeg. Feem coob tseem yog coj qub kev cai, hos tsuas muaj cov neeg ntseeg Ntuj Kav Tos Liv 5 yig xwb. Tab txawm tias, muaj cov neeg ntseeg tsawg tsawg kawg, tsis kav lawv kuj muaj txoj kev ntseeg Ntuj ruaj khov. Vim lawv paub tias lawv pawg neeg ntseeg muaj tsawg tsawg, ces lawv txawj sib hlub sib pab thiab sib koom tes zoo dua. Zoo xws li tej laus xij hais tias tsawg tus neeg, tsawg lub ncauj, tsawg txoj kev sib cav. Ces thaum yuav npaj tej lub ntees lom zem dab tsi, los sawv daws sib pab nroos ua xwb, ib me ntsis kuj tiav tas lawm. Hos yog thaum coob leej, ces ib txhia hais ib txhia tsis yeem, ib txhia ua ib txhia tsis kam ua, ces qhov kawg yuav muaj kev sib khib sib cav, ces txoj hauj lwm yuav mus tau qeeb dua.
Ib qho kuj yog vim cov neeg ntseeg hauv lub zos Nav Qham muaj tus txwj laus coj noj coj ua, los sis yuav hu tias tus thawj coj cov ntseeg hauv lub zej zog kuj tau. Ces zoo xws li lawv sib mloog hais thiab ua dab tsi los yooj yim dua. Tus thawj coj ntawd, tsis yog Xib Hwb, tab sis nws yog ib tug neeg kub siab rau txoj kev ntseeg, nws muab siab rau los pab hauj lwm hauv tsev teev Ntuj, thiab nws hais lus sawv daws mloog. Tab yog Txiv Plig thiab Xib Hwb tsis tuaj, tsis kav nws yeej muaj peev xwm coj sawv daws teev Ntuj tau. Li ntawd, txoj kev ntseeg thiaj yuav nyob ruaj khov. Cov neeg ntseeg nyob rau lub zos Nav Qham feeb coob, pom zoo kom coj kev cai Ntuj raws li yav thaum ub Txiv Plig Nyiaj Pov thiab Txiv Plig Tshaj Sawm lawv ua kam los. Xav kom cov neeg ntseeg coj tib tug txhooj txhob hloov. Nyob rau hauv lawv lub zos ntawd, lawv xav kom cov Txiv Plig thiab cov Xib Hwb yuav tsum siv ntawv Hmoob thiab lus Hmoob ua Thaj Txi Ntuj. Hu nkauj Hmoob thiab coj kev cai Hmoob. Li ntawd, ntau zaus cov txwj laus kuj tau nrog cov Txiv Plig sib tham, sib tuav tswv yim txog kev ntseeg Ntuj ua kom haum nyob rau hauv kev cai Hmoob. Xws li cov Txiv Plig thiab Xib Hwb yuav tsum txawj hais lus ua luag tsaug, txawj foom hmoov zoo, txawj txaum yim, txawj pe. Yog tias Txiv Plig yog lwm haiv neeg, nws tsis txawj, los tus Xib Hwb yuav tsum yog Xib Hwb Hmoob thiab nws yuav tsum txawj, yog tsis txawj yuav tsum kawm.
Tej txuj Hmoob los sis tej yam kab ke zoo, uas peb Hmoob ib txwm coj los, yam uas zoo yuav tsum tsis txhob muab pov tseg, tsuas pov qhov tias tsis tiam dab, tsis teev xwm kab lawm xwb. Yam li kev hu plig, kev tsav hlua khi tes, kev foom hmoov zoo, kev tshoob kev kos, kev pam tuag, tej yam no yeej tseem yog ib co kab ke zoo, tsuas yog yus muab kho yam puav kom haum txoj kev ntseeg Ntuj xwb. Xws li nyob rau hauv lub Rooj Ncauj Lus Vas Tis Kas 2, Vaj Qhia tau tshaj tias yuav tshaj Yes Xus lub Moo Zoo mus rau hauv txhua txhia haiv neeg, thiab yuav tsum haum nrog lwm haiv neeg tej kab lis kev cai. Txhua tsav txhua yam no, yuav tsum muaj cov Txiv Plig los ua zoo saib ua zoo xyuas, kom txhob yuam kev, txhob txhaum rau Tswv Ntuj.
Txhais tias peb yuav tsum faib kom meej tias ua li kev ntseeg yog dab tsi tiag? Hos kev cai Hmoob ho yog dab tsi tiag? Kev cai dab qhuas thiab kev ntseeg nyias muaj nyias, peb txhob muab los tso sib xyaws. Tab sis peb xaiv tej yam zoo thiab tsis txhaum mus ua ke tau.
Li ntawd, muaj 3 yam uas cov Txiv Plig yuav tsum xyaum kom paub nyob rau hauv kev tshaj Ntuj Lus mus rau tej zej zog Hmoob, yam li:
- Yuav tsum kawm ntawv Hmoob thiab hais lus Hmoob.
- Yuav kawm kev cai Hmoob.
- Yuav tsum paub kev ntseeg zoo.
3 yam no yuav tsum mus ua ke, mas thiaj yuav haum tau cov Hmoob lub siab. Thiab yog ua tau li no, mas txoj kev ntseeg Ntuj thiaj yuav ri mus tau rau hauv peb cov Hmoob. Vim tias kuv tau nrog cov niam txiv Hmoob coob leej tham, mas qhov kawg thiaj muab tau lub ntsiab tias qhov uas lawv tsis tshua xav los coj kev ntseeg Ntuj, kuj yog vim lawv tsis xav tso lawv tej txuj Hmoob uas tej poj yawm txwv koob muab ua puav pheej rau lawv tseg.
Lawv txhawj nyob tsam lub caij muaj mob muaj nkeeg, tsis muaj Txiv Plig los sis tsis muaj Xib Hwb nyob ruaj chaw pab lawv. Lawv txhawj nyob tsam lub caij thaum muaj ib siab ob qig los sis muaj ib tug neeg tuag, lawv tsis pom qab yuav ua lub ntees zoo li cas. Yuav cia li ua raws tej mab sua kev cai, los ntshai cov kwv tij lub siab yuav tsis kheev, vim peb tseem tshuav ib co kwv tij neej tsa nkauj muam nyob rau tom qab, uas lawv tseem coj qub kev cai, peb yuav txiav tsis tau lawv. Qhov no, yog qhov teeb meem loj tshaj plaws nyob rau hauv kev tshaj Ntuj Lus rau peb cov kwv tij Hmoob. Vim tias peb Hmoob yeej ib txwm muaj tej kab lis kev cai zoo zoo, uas tej laus yeej ib txwm coj los, yog cia li yuav muab tso pov tseg huv tib si, los ib txhia siab tsis kheev. Yog peb coj peb txoj kev ntseeg nruj dhau, peb mus koom tsis tau luag thiab luag tuaj koom tsis tau peb, ces kuj yuav ua ib qho chaw rau luag tej hnyos peb. Li ntawd, txoj kev tshaj Ntuj Lus nyob rau hauv peb haiv Hmoob, mas thiaj tsis yooj yim kiag.
Kwv tij Hmoob, kev tshaj Ntuj Lus nyob rau hauv peb haiv Hmoob yog ib qho nyuaj kawg, tab sis txawm li cas los xij, peb yuav maj mam ua ntxiv mus raws li peb ua tau. Peb tso siab rau Tswv Ntuj, peb yuav tsis tso txoj kev ntseeg Ntuj pov tseg, vim Tswv Ntuj tau hu kom peb los ua Tswv Ntuj cov me nyuam lawm. Tswv Ntuj pub txiaj ntsim rau peb ntau yam. Tswv Ntuj pub txoj kev cawm tuaj txog peb, txij hnub peb txais lub Cim Ntxuav, mas Tswv Ntuj tau pub ib txoj hauj lwm rau peb, yog txoj hauj lwm tshaj Ntuj Lus. Li ntawd, peb yuav tsis txhob tos Txiv Plig thiab Xib Hwb lawv xwb. Peb yeej paub zoo tias muaj Tswv Ntuj nyob nraim hauv peb siab. Vim Tswv Ntuj yog tus Tswv tsim peb los ua neeg, nws yog peb tus Huab Tais. Txoj kev ntseeg yog peb txoj, tsis yog leej twg txoj. Peb yeej paub tias ua ntej peb yuav los txais kev ntseeg, twb xub muaj Tswv Ntuj nrog peb nyob lawm. Txiv Plig thiab Xib Hwb lawv tsuas yog qhia kom peb paub Tswv Ntuj zoo dua xwb. Hos Tswv Ntuj yeej ib txwm nyob txawm hauv peb txhua txhia tus neeg, tsis hais cov tseem coj qub kev cai los cov ntseeg Ntuj, vim Tswv Ntuj yeej yog tus Tswv tsim tib neeg tiag tiag.
Txawm li cas los txij, thov kom peb cov kwv tij Hmoob txawj sib nyiam sib hlub, peb txawj sib pab sib zam xwb, ces yeej zoo kawg li lawm. Peb yuav tsis yuam kom lawv los ntseeg, peb yuav tsis yuam ib tug kom ua raws ib tug siab, tab sis peb yuav coj Tswv Ntuj Lo Lus zoo mus pub rau luag thiab ua qhov zoo rau luag pom. Peb qhia kom luag paub txog Tswv Ntuj lub siab khuv leej neeg thiab hlub neeg, ces yeej zoo heev lawm. Qhov luag yuav txais kev ntseeg thiab tsis txais ntawd, nyob rau ntawm luag txoj kev txiav txim siab. Peb yuav tsis maj tsis tsib, tsis quab yuam luag dab tsi. Qhov kawg yog luag pom Tswv Ntuj tej hauj lwm zoo, thiab yog Tswv Ntuj hu, ces luag yeej yuav los nrog yus ntseeg xwb.
Peb Haiv Hmoob yog ib haiv neeg tsawg tsawg xwb, peb yuav tsum txawj sib hlub sib pab tiag. Peb yuav tsum sib nyiam, peb yuav txawj sib zam sib hais lus zoo. Ib tug yuav saib ib tug rau nqi, ib tug tsis thuam ib tug, peb Hmoob lub neej yav pem suab thiaj yuav vam meej zuj zus. Kuv tsuas tuaj ntsib nej li xwb, lwm lub caij nyoog peb mam rov sib ntsib dua!
Thov Tswv Ntuj foom hmoov zoo rau nej sawv daws txhua leej txhua tus. Kom nej tsuas ntsib kev noj qab nyob zoo, nyob thaj yeeb nyab xeeb mus li. Ua li.
