Los Xas muaj lub npe tias ‘Is Xas Npes Las’ (Isabel Flores de Oliva), yug hnub tim 20 lub 4 hlis xyoo 1586 hauv nroog Lis Mas, Pes Lus teb. Lawv tsev neeg yog haiv neeg Xyis Pas Yas.
Thaum Is Xas Npes Las tseem mos liab, muaj ib hnub tus ntxhais qhev pom tias Is Xas Npes Las lub ntsej muag hloov ua ib lub paj ntshua nplam, ces nws thiaj hu Is Xas Npes Las ua ‘Los Xas’ txhais tias ‘paj ntshua nplaim.’
Xyoo 1597 thaum Is Xas Npes Las muaj 11 xyoos, nws txais Cim Txhab Zog, nws thiaj hloov lub npe hu ua ‘Los Xas’ raws li tus poj qhev nyiam nyiam hu nws.
Los Xas niam nyiam muab lub kauj paj ntoos rau Los Xas ntoo, tab sis Los Xas tsis nyiam, nws thiaj nyiag muab cov ntsia hlau ntsia rau hauv cov paj ntoos kom chob nws tawv taub hau.
Los Xas xa qee nws lub neej ua niam nkauj xwb mus tas nws sid, nws thiaj muab hwj txob los txhuam nws tej plhu kom liab thiab sawv tej pob khaus kom tsis txhob muaj cov hluas nyiam nws. Los Xas nyiam nyiam hu nws tias ‘niam Mab Liab lub paj ntshua nplaim’ vim nws hwm lub Cim Yug thiab nyiam niam Mab Liab tshaj tas puas tsav yam, ces nws thiaj mob siab tu cov neeg txom nyem thiab cov ua luag qhev.
Thaum Los Xas muaj 20 xyoo, nws cog lus nyob hauv lub koom haum cov Leej Phauj Dos Mis Nis Kas (Dominican Order) tias nws yuav coj lub neej tab seeb mus tas nws sim neej. Los Xas xav coj lub neej xws li Leej Ntshiab Kas Tas Lis Nas nyob Xis As Nas, ces Los Xas thiaj pib yoo mov ib lis piam peb hnub, nws mus txais lub Cim Yug txhua hnub, nws muab nws cov plaub hau txiav luv luv thiab hnav tsoos tsho ntxhib. Los Xas ua tej hauj lwm hnyav xws li cov ntxhais qhev ua rau nws nyob txom txom nyem ces xyoo 1617 Los Xas thiaj tuag,thaum ntawd Los Xas muaj 31 xyoos.
Leej Ntshiab Los Xas yog thawj tus Leej Ntshiab hauv taum teb As Mes Lis Kas.