Nyob As Mes Lis Kas teb, muaj ib tug thawj coj cov As Mes Lis Ntias xeem Mos Haws (Mohawk) coj nws cov neeg mus ntes cov As Mes Lis Ntias xeem As Nkoos Nqus Is (Algonquin), ces nws ntes tau ib tug ntxhais As Mes Lis Ntias ua Ntuj kev cai hu ua ‘Nkas Hees Tas’ (Kahenta). Nws yuav tus ntxhais ntawd ua poj niam, ces xyoo 1656 nws poj niam yug tau ‘Tes Nkas Vis Tas’.
Thaum Tes Nkas Vis Tas muaj 4 xyoos, lawv tsev neeg mob qhua taum (smallpox) ua rau nws niam nws txiv thiab nws tus nus lawv tuag tas, hos Tes Nkas Vis Tas tsis tuag tab sis nws lub ntsej muag caws pliav thiab lub qhov muag faj pom kev tsis zoo, nws tus phauj thiaj tuaj coj nws mus tu.
Thaum Tes Nkas Vis Tas muaj 10 xyoo, cov neeg Fab Kis tuaj hlawv cov As Mes Lis Ntias tej zos, ces tus phauj thiab tus yawg laus coj Tes Nkas Vis Tas lawv tsis mus nyob lwm qhov.
Xyoo 1667 muaj peb tug tub tshaj Ntuj Lus hauv lub koom haum Yes Xus Is hu ua ‘Yas Kos Fes Mis, Yas Kos Npuas Yas, thiab Zam Pis Loos’ (Jacques Frémin, Jacques Bruyas, and Jean Pierron) tuaj tshaj lub Moo Zoo txog hauv lawv lub zos, tab sis Tes Nkas Vis Tas tseem tsis tau txais kev ntseeg vim nws tus yawg laus tsis xav kom nws tig mus ua Ntuj kev cai.
Xyoo 1669 thaum Tes Nkas Vis Tas muaj 13 xyoos, cov Mos His Kas (Moshican) tuaj ntaus lub zos lawv nyob. Tes Nkas Vis Tas thiab cov phooj ywg ua hauj lwm pab Txiv Plig Zam Pis Loos saib xyuas cov neeg raug mob, pab faus cov neeg tuag, thiab nrhiav dej nrhiav mov pub rau cov neeg tshaib noj.
Thaum Tes Nkas Vis Tas muaj 17 xyoo, lawv nrhiav ib tug hluas yuav nws ua poj niam, Tes Nkas Vis Tas tsis yeem ces nws khiav mus nkaum tom ib daim teb. Tus phauj hais npaum cas los Tes Nkas Vis Tas tsis yuav, ces tus phauj thiaj tsum tsis yuam nws mus yuav txiv.
Ib xyoos tom qab, muaj dua ib tug Txiv Plig tuaj txog lawv lub zos, yog Txiv Plig Las Npaws Vis (Jacques de Lamberville). Tes Nkas Vis Tas piav rau Txiv Plig Las Npaws Vis paub tias nws xav ua Ntuj kev cai, ces Txiv Plig Las Npaws Vis thiaj qhia kev ntseeg rau Tes Nkas Vis Tas.
Tes Nkas Vis Tas kawm kev ntseeg tau ib xyoos txwm nkaus, Txiv Plig Las Npaws Vis thiaj pub lub Cim Ntxuav rau nws nyob hauv Hnub Hla tim 18 lub 4 hlis 1676. Nws yuav lub npe hu ua ‘Nkas Tes Lis’ (Kateri) raws Leej Ntshiab Kas Tas Lis Nas nyob Xis As Nas (St. Catherine of Siena).
Nyob ntawd, muaj coob leej tsis pom zoo rau nws txoj kev ua Ntuj kev cai, ces Txiv Plig Las Npaws Vis thiaj xa Tes Nkas Vis Tas mus nyob nrog cov ua Ntuj kev cai hauv Kas Nas Vas Kes (Kahnawake), xeev Mos Tis Os (Montreal).
Hnub ua hmoov tsuj xeeb Yes Xus xyoo 1677 Tes Nkas Vis Tas txais lub Cim Yug thawj zaug thiab xyoo 1679 nws cog lus coj lub neej tab seeb ib sim neej.
Tes Nkas Vis Tas yuam nws lub cev thiab niaj hmo thov Ntuj pab kom cov neeg txheeb ze tig los yuav siab tshiab ua Ntuj kev cai thiab zam txim pub rau nws. Tes Nkas Vis Tas yuam lub cev raws li cov As Mes Lis Ntias cov kab ke, yog muab cov pos los pua pw, mas thiaj muaj ib txhia Leej Choj tsis tshua pom zoo cia nws ua li ntawd, vim yuav ua rau nws muaj mob. Tab sis Tes Nkas Vis Tas hais tias “Kuv yuav coj lub cev nqaij no mus tso cia hauv kev tshaib thiab kev txom nyem, mas kuv tus ntsuj plig thiaj yuav loj hlob tau.”
Tes Nkas Vis Tas kev yuam nws lub cev hnyav ua rau nws lub cev tsis muaj zog, ces xyoo 1680 lub 4 hlis tim 17 yog Hnub Plaub lub Lis Piam Ntshiab, Tes Nkas Vis Tas mob, nws hais tias “Huab Tais Yes Xus, niam Mab Liab, kuv nyiam neb”. Hais li ntawd tas nws txoj sia tu nrho. Nws tuag thaum muaj 24 xyoos. Thaum Tes Nkas Vis Tas tuag mas Txiv Plig Chos Les Nes (Cholenec) kuj nyob ntawd thiab, nws pom tias Tes Nkas Vis Tas cov caws pliav cia li ploj tas, nws lub ntsej muag dawb thiab tshiab.