Npos Nas Vees Tus Las yug los xyoo 1221 nyob ze Los Mas. Thaum nws yav yau mas nws lub npe yog ‘Ntsis Os Vas Nis des Fis Daas Ntxas’ (Giovanni di Fidanza).
Thaum tseem yau nws mob hnyav, ces Fas Ntshis Kus nyob As Xis Xis (Francis of Assisi) tuaj pab thov Ntuj pub rau ces nws tus mob zoo, Fas Ntshis Kus thiaj hais tias ‘Ab! Npos Nas Vees Tus Las’, txhais tias ‘hmoov zoo’. Txij ntawd los lawv thiaj hu Ntsis Os Vas Nis ua ‘Npos Nas Vees Tus Las’.
Xyoo 1243 Npos Nas Vees Tus Las cog lus ua Leej Tij nyob hauv Fas Ntshis Kus lub koom haum thiab mus kawm txuj nyob Pas Lis. Nyob ntawd, Npos Nas Vees Tus Las nrog Tos Mas As Kis Nos ua phooj ywg. Npos Nas Vees Tus Las ua Xib Hwb qhia txuj txheej siab tau 9 xyoos, ces lub koom haum xaiv nws ua tus thawj tswj Fas Nthsis Kus lub koom haum uas muaj ntau txhiab tus tub koom haum nyob hauv lub tuam teb Aws Los Pas.
Thaum ntawd muaj lus sib cav nyob hauv lub koom haum vim tias Fas Ntshis Kus tau tsim txoj cai kav nws lub koom haum, tab sis nws nthuav txoj cai luv dhau ces tsoom tub koom haum ib txhia xav ntxiv txoj cai meej pem kom nruj dua yav tas, ib txhia xav coj txoj cai li qub. Npos Nas Vees Tus Las ua tus thawj tswj lub koom haum, nws sau txoj cai tshiab kom tsis nruj dhau thiab kuj tsis taug dhau. Yog txoj cai zoo kav ib lub koom haum ri mus nyob ntau lub teb chaws. Vaj Qhia Nqes Nkos Lis tim 10 (Gregory X) tsa Npos Nas Vees Tus Las ua Tswv Qhia Liab coj lub Ceeb Koom Txoos nyob As Npas Nos (Albano). Xyoo 1274 lub Koom Txoos ua Rooj Ncauj Lus nyob Lis Yoos, nyob Fab Kis teb. Vaj Qhia xa Npos Nas Vees Tus Las mus koom lub Rooj Ncauj Lus, tab sis Npos Nas Vees Tus Las ua dej nuj hnyav heev ces nws tau mob thiab tuag nyob hauv lub nroog Lis Yoos.