Yos Xes Kas Las Xas (Jose, Giuseppe) yug hnub tim 11 lub 9 hli xyoo 1556 nyob hauv kuj cuab As Las Nkos (Aragon), Xyis Pas Yas teb. Yos Xes yog tus yau hauv lawv yim kwv tij. Yos Xes txiv yog noob nom tswj lub nroog, ces Yos Xes thiaj tau kev kawm txuj nyob hauv lub nroog. Xyoo 1569 lawv xa Yos Xes mus kawm nyob hauv cov Leej Tij hwm Peb Leeg Huab Tais lub tsev kawm txuj nyob Es Tas Dis Las (Estadilla).
Thaum muaj 14 xyoos Yos Xes xav kawm ua Leej Choj tab sis nws niam thiab txiv tsis pom zoo ces Yos Xes thiaj kawm cov txuj kws lij choj. Tom qab Yos Xes niam thiab tus tij laug tuag tas, nws txiv xav kom nws yuav poj niam, tab sis xyoo 1582 Yos Xes tau ib tug mob hnyav ua rau nws yuav luag tuag ces Yos Xes txiv thiaj tso lus rau Yos Xes ua Leej Choj raws li Yos Xes lub siab nyiam. Yos Xes txais Cim Tiag Tes nyob hauv xyoo 1583 thaum lub 12 hlis tim 17.
Txiv Plig Kas Las Xas pib ua txoj hauj lwm tshaj lub Moo Zoo nyob hauv lub Ceeb Koom Txoos As Npas Las Xis (Albarracin) qhov chaw uas nws txais Cim Tiag Tes. Tom qab Tswv Qhia tshais chaw mas Txiv Plig Kas Las Xas kuj nrog nws tshais chaw mus nyob Lais Das (Lleida). Nyob ntawd nws txhim tsa ib lub koom haum los pub zaub mov rau cov neeg pluag.
Xyoo 1586 Txiv Plig Kas Las Xas rov los hauv nws lub zos kom tau xa nws txiv mus cuag Tswv Ntuj. Txiv Plig Kas Las Xas txiv tuag tas mas Tswv Qhia hauv Us Nkes (Urgel) thov kom Txiv Plig Kas Las Xas ua tus saib cov ntseeg hauv Tes (Tremp).
Xyoo 1592 Txiv Plig Kas Las Xas tshais chaw mus nyob hauv Los Mas, ces Tswv Qhia Liab Kos Loos Nas (Marcoantonio Colonna) txhib kom Txiv Plig Kas Las Xas ua tus tswj cov tub lis dej num. Txiv Plig Kas Las Xas pom tias muaj cov me nyuam ntsuag nyob hauv lub nroog coob ces nws thiab ib pab Leej Tij thiaj sau cov me nyuam ntsuag los ua ib pab thiab xa lawv mus kawm ntawv, tab sis cov xib hwb qhia ntawv tsis kam txais lawv. Txiv Plig Kas Las Xas thiaj nrhiav chaw txhim tsa lub tsev qhia txuj dawb pub rau cov me nyuam.
Xyoo 1598 muaj ib yam xwv txheej loj tuaj raug lub nroog, yog dej nyab ua rau muaj neeg tuag txog ob txhiab leej, ces Txiv Plig Kas Las Xas tau nrog cov neeg tawm mus pab cov neeg raug txom nyem. Txiv Plig Kas Las Xas qhib lub tsev qhia ntawv nyob hauv plawv nroog Los Mas. Txiv Plig Kas Las Xas saib xyuas cov me nyuam ntsuag txog 1,000 leej, ces nws thiaj txhim tsa lub haum xeeb los saib xyuas cov me nyuam thiab qhib ntau lub tsev qhia txuj dawb rau cov me nyuam tau kawm ntawv. Cov tsev qhia ntawv uas Txiv Plig Kas Las Xas txhim tsa mas lawv qhia lus Las Tis Nas thiab haiv neeg xeem lus raws li thaj tsam ntawd, ces cov me nyuam thiaj txuag tau lawv xeem lus kom tsis txhob ploj.
Txiv Plig Kas Las Xas nrog cov tus tshuaj xwm sib fim ces ua rau muaj ib co Leej Choj hauv lub Koom Txoos tsis nyiam nws, tsis kav nws ua siab ncaj rau lub Koom Txoos mus txog hnub nws txoj sia tu yog xyoo 1648.