Peb ua neeg nyob mas muaj ib yam peb sawv daws yeej ntshai, yam ntawd yog thaum peb txoj sia yuav tu. Tab sis qhov ntshai no yog lub paj tshab Huab Tais Ntuj pub rau peb, kom peb muaj cuab kav tim ntsej tim muag nrog yam yuav tshwm sid, thiab yog kom paub nyiam Huab Tais Ntuj. Peb pib hlob, mas peb pib paub tias yuav nyiam Huab Tais Ntuj li cas; peb yim muaj hnub nyoog ntau, peb kev ntshai tuag yim yau mus zuj zus. Peb pom tias cov neeg muaj lub siab ntseeg ruaj, mas lawv yuav niaj hnub xav tswv yim txog kev tuag xws li Leej Ntshiab Paj Lug nyiam hais ntuas cov neeg ntseeg.
Tsis muaj tus twg yuav qhia tau rau peb tias thaum kev tuag tuaj txog, mas zoo li cas. Nyob hauv Ntawv Ntshiab thiab nyob hauv Koom Txoos cov zaj xa plig tsuas hais tias kev tuag zoo li kev tsaug ib tsig zog. Peb niaj hnub pw tab sis peb qhia tsis tau tias thaum peb ua zog toog ntawd, peb tab tom nyob rau qhov twg tiag, peb kuj nco tsis tau tias lub caij peb tsaug zog ntawd zoo li cas.
Peb yuav npaj kom txhij tas mam pw, tab sis kev tsaug zog mus li mas nyaj yuav tuaj nphav peb thaum tsis nco faj, txawm tias tus npaj txhij los tsis tau npaj, mas yeej tsis paub tias nws lub caij tuag yuav tuaj txog thaum twg.
Thaum txog lub caij xaus hauv txoj pa, tej tus yuav huaj cheej, tej tus yuav ntsaj, yuav quaj; tab sis txhua yam yuav yaj ntshis mus thaum txoj pa tu hlo. Tsuas yog tib zaug xwb uas peb tsaug zog, peb yuav tsis muaj qhov ntshai ntxiv. Yog kev tsaug zog uas tus twg los yeej yuav hla tsis dhau. Li ntawd, thov kom peb ua siab lees txais peb kev tuag no.
‘Kev tuag’ yog lub caij neeg tus ntsuj plig ncaim ntawm neeg lub cev mus. Neeg lub cev yuav lwj rov mus ua av tab sis neeg tus ntsuj tus plig yuav sawv kev mus cuag Huab Tais Ntuj. Neeg tus ntsuj plig yuav mus nyob tos lub caij rov sawv los muaj txoj sia nyob mus li. Lub Koom Txoos tau qhia peb zoo li ntawd.
Thaum txog lub caij ntawd, Huab Tais Ntuj yuav tsim ib lub cev tshiab rau peb, Huab Tais Ntuj yuav hu peb tus ntsuj plig los nyob ntxaws hauv lub cev tshiab ntawd. Yog vim Huab Tais Yes Xus sawv hauv qhov tuag rov los, mas txhua txoj sia thiaj yuav sawv rov los thiab. Thaum tseem ua neej nyob, tus twg ua cov hauj lwm zoo mas nws yuav tau txais txoj sia nyob mus li, tus twg ua qhov phem nws yuav raug txiav txim.
Huab Tais Yes Xus sawv rov los lawm tiag, mas tas tsoom neeg tuag thiaj yuav sawv rov los nrog Huab Tais Yes Xus txais kev nto moo.
Tsis yooj yim kiag li, kom peb nkag siab tias peb yuav txais txoj sia nyob mus li tau li cas, yog peb tsis muaj lub cev cia rau tus ntsuj plig nyob. Leej Ntshiab Zam thiaj sau tseg tias ‘peb tsis paub tias txoj sia nyob mus li zoo li cas, qhov peb paub mas yog Huab Tais Tswv Ntuj yuav pub kom peb zoo li nws. Neeg yog tsav muaj txhaum thiab nyiam nrhiav kev ua txhaum, tab sis yuav muaj dab tsi muaj nqis tshaj qhov tias Huab Tais Ntuj zam txhaum rau peb kom peb ntshiab tuaj xws li Huab Tais Ntuj. Yog li nej zoo siab mog, vim Huab Tais Ntuj tau pub txoj sia tshiab rau nej lawm.’
Muaj lo lus nug tias ‘yog peb tau mus saum ntuj, mas peb yuav pom leej twg nyob saud?’
Lub Koom Txoos qhia tias cov neeg tuag nyob hauv Ntuj lub txiaj ntsim, lawv tau nyob npuab Huab Tais Ntuj, lawv raug ntxuav huv lawm, lawv yuav tau mus nyob nrog Huab Tais Yes Xus, lawv yuav tau koom nyob ua ke hauv Peb Leeg Huab Tais, nrog niam Mab Liab, nrog tsoom Tshiab, thiab tas tsoom Leej Ntshiab. Lawv sawv daws yuav nyob ua ke saum Ntuj Ceeb Tsheej.
Ntuj Ceeb Tsheej yog thaj chaw sawv daws vam txog, yog thaj chaw sawv daws ntshaw mus nyob. Lawv yuav tau mus nyob nrog Huab Tais Yes Xus.
Ntawv Ntshiab pab peb kom to taub tias Ntuj Ceeb Tsheej yog qhov chaw ci ntsa iab, Ntuj Ceeb Tsheej yog qhov chaw ciaj sia, Ntuj Ceeb Tsheej yog qhov chaw kaj nrig, Ntuj Ceeb Tsheej yog tsoom Leej Ntshiab koom tib roog qav lom zem, Ntuj Ceeb Tsheej yog qhov zoo txhij zoo txhua, Ntuj Ceeb Tsheej yog Huab Tais Leej Txiv lub Tuam Tsev, yog lub tsheej Yes Lus Xas Les tshiab.
Kawg peb tsum taug txoj kev muaj txoj sia nyob mus li xwb, peb thiaj pom tau Huab Tais Ntuj thiab tas tsoom neeg peb nyiam uas lawv xub ua peb ntej mus.
Peb txoj sia nyob ib plig hauv yaj ceeb no dua tas, peb yuav pib txoj sia tshiab nyob hauv yeeb ceeb. Nyob ntawd, peb tsis muaj lub cev, tsis muaj qhov muag; yog li peb yuav pom sawv daws tau li cas. Puas yog?
Nej sim qi ob sab qhov muag, nej muab lub tswv yim los xav txog tus neeg nej nco txog, nej yuav pom nws nyob hauv nej lub tswv yim. Nej to taub lawm puas yog!
Qhov tseeb tos peb pom tau lwm tus, vim tias peb nco tau lawv, peb paub lawv thiab peb xyiv fab nrog lawv.
Txawm tias peb yuav tuag nyob hauv Ntuj lub txiaj ntsim, tsis kav peb tus ntsuj plig tseem yuav raug ntxuav kom huv thiab ntshiab txaus mas thiaj yuav mus cuag tau Huab Tais Ntuj. Lub Koom Txoos hais tias yog ntxhua tus ntsuj plig hauv teb chaws them txim.
Tej hais los saum no yog lub neej tom qab peb tuag tas, tab sis qhov tseeb mas tej no yeej muaj los ntev lawm, thiab tob tshaj qhov peb lub tswv yim yuav ntsuas tau. Thaum peb ntsib Huab Tais Ntuj thiab nyob nrog Huab Tais Ntuj laws, Huab Tais Ntuj yuav txiav txim rau peb xws li peb yog ib tug me nyuam yaus. Peb yuav tsis txhob ntshai, txhob nrhiav kev npog peb cov txhaum uas peb tau ua, vim tias Huab Tais Ntuj paub peb tej txhaum zoo xws li tej niam tej txiv paub ntsoov lawv cov me nyuam kev txhaum, tsis tas yuav tos lawv lees li.
Thaum peb sawv ntawm Huab Tais Ntuj xub ntiag, mas kev ntshai thiab kev zoo siab puav leej zoo xws tib yam. Huab Tais Ntuj yuav ntxuav peb cov txhaum pov tseg. Kwv tij, thaum ntawd peb muaj kev ntshai tab sis peb kuj yuav muaj kev tso siab tias Huab Tais Ntuj tsim peb los mas Huab Tais Ntuj yuav pab peb. Peb yuav tau ntxub peb cov txhaum thiab ntseeg txog Huab Tais Ntuj kev hlub peb mog!
Hais txog kev thov Ntuj rau tus tuag, mas peb lub Koom Txoos Kav Tos Liv ntsia pom tias kev tuag yuav tseg kev nco cia, mas peb thiaj nrhiav tau kev tawm hauv qhov txhaum mus, peb thiaj thov Ntuj rau cov tuag ntawd, thiab peb thiaj thov Leej Choj ua ib Thaj Txi Ntuj pub rau lawv cov dua nra ntawd. Yog li mas Koom Txoos thiaj hais tias yog ib txog hau kev Huab Tais Ntuj npaj tseg rau peb sawv daws. Li ntawd, peb lub Koom Txoos thiaj ntuas cov kwv tij ua txhaum sawv daws kom lawv tig los yuav lub siab tshiab, kom lawv tu siab rau kev txhaum thiab ua hauj lwm them txim mas lawv tus ntsuj plig thiaj yuav huv tuaj.
Lub Koom Txoos Kav Tos Liv tseem qhia tias tsoom Leej Ntshiab yuav sib koom ntuj lub txiaj ntsim. Tsoom Leej Ntshiab sawv daws yuav mloog peb cov tseem muaj txoj sia nyob li lus thov.
Thaum kawg txoj kev tuag nphav peb, yog peb ua neeg muaj txhaum, peb tsis tu siab rau qhov txhaum, peb tsis hloov siab tshiab, peb tsis lees txais Tswv Ntuj ua peb tus Huab Tais; mas peb yuav poob mus rau dab phem cov hluav taws. Nyob ntawd, peb yuav ncaim ntawm Ntuj Ceeb Tsheej mus li.