Thaum Lus Kas pib sau phau ntawv Cov Hauv Paus Xa Lus Cov Hauj Lwm, nws hais txog Pob Zeb ntau hauj sim. Tiam sis txij thaum Paj Lug mus tshaj lub Moo Zoo, mas Lus Kas cia li hais txog Paj Lug tej hauj lwm lawm xwb. Yog vim li ntawd, peb thiaj li tsis paub ntau yam txog Pob Zeb sim neej. Peb tsuas paub hais tias Pob Zeb mus qhia kev cai nyob As Nthias Kias, nws kuj tau mus ib zaug txog Kos Lis Nthos thiab; yog vim Paj Lug tau sau ib tsab ntawv mus rau cov ua Ntuj kev cai nyob Kos Lis Nthos tias kom lawv tsis txhob sib cav tias ib co yog Paj Lug cov thwj tim thiab ib co yog Pob Zeb cov thwj tim. Yog vim Pob Zeb tau mus tshaj lub Moo Zoo ib zaug nyob Kos Lis Nthos thiaj li muaj lus sib cav zoo li ntawd.

Tiam sis txij xyoo 40 los txog xyoo 60 mas Pob Zeb tau nyob Los Mas ntau. Nws kawg tau tso Los Mas tseg ob peb zaug xwb; yam li thaum cov Hauv Paus Xa Lus mus ua lub Rooj Ncauj Lus nyob Yes Lus Xas Les.

Thaum ntawd, lub nroog Los Mas yog ib lub nroog loj tas nrho, muaj ib plhom leej neeg nyob ntawd; ib nrab yog cov tseem Los Mas, thiab ib nrab yog cov neeg pej kum teb. Lawv tuaj nyob Los Mas coob kawg; tej tus neeg dub kuj muaj, tej tus neeg As Xias kuj muaj. Thaum cov Los Mas mus ua rog nyob ntawm cov teb chaws nyob ncig dej hiav txwv Mes Dis Tes Las Nes, mas lawv coj tau ntau tus qhev tuaj ua hauj lwm nyob Los Mas, ces nyob Los Mas thiaj muaj txhua haiv neeg tuaj nyob.

Cov Yus Das nyob Los Mas lawv kuj coob kawg, kwv yees muaj 40,000 los 50,000 leej. Cov Yus Das ntawd, lawv ncaim tas nyob hauv lub nroog, lawv ua luam. Cov Yus Das muaj kaum tawm lub tsev txoos thiab plaub lub toj ntxas.

Cov Yus Das nyob Los Mas uas lawv xub ntseeg txog Yes Xus yog tej tus Yus Das uas lawv tau mus ua hmoov nyob Yes Lus Xas Les, lawv tau ntsib cov pleev nyob Yes Lus Xas Les, ces lawv kuj ntseeg thiab. Tiam sis tus tuaj qhia Yes Xus kev cai nyob Los Mas yog Pob Zeb; yog vim li ntawd, mas thaum txog xyoo tim 60 Paj Lug tuaj nyob txim nyob Los Mas, cov ntseeg txog Yes Xus tuaj tos Paj Lug coob.

Thaum xyoo tim 58 Paj Lug tseem tshaj lub Moo Zoo nyob Kos Lis Nthos, nws kuj paub tias cov neeg ntseeg txog Yes Xus nyob Los Mas lawv coob, ces Paj Lug sau ib tsab ntawv ntev ntev rau lawv; nws hais rau lawv tias nws xav tuaj xyuas lawv.

Hnub uas Paj Lug tuaj txog Los Mas, ntshai Pob Zeb tsis nyob Los Mas lawm, Lus Kas thiaj tsis hais ib lo lus txog Pob Zeb. Tiam sis thaum txog xyoo tim 62 los 63 mas Pob Zeb rov qab mus nyob Los Mas. Thaum ntawd, Pob Zeb yog ib tug neeg laus hauj sim lawm, nws muaj 60 los 70 xyoo; nws yog ib tug neeg plaub hau dawb dawb, ib tug neeg twb tau pom ntau lub teb chaws los. Tas Pob Zeb sim neej, Pob Zeb tau tshaj Ntuj lus nyob ntau lub nroog; tus twg tau pom nws tuaj txog mas tus twg kuj zoo siab tas, vim sawv daws tau pom ib tug nrog Yes Xus nyob, pom ib tug neeg thoob tsib pab sawvd aws kom tau nyob thaj yeeb.

Xyoo tim 62 Paj Lug mus txog Is Npes Lias (Espain), ces nws rov qab mus txog As Xias xeev ntuj, nyob Hes Las teb, nyob Kos Lis Nthos, nyob Es Fes Xos, nyob hauv lub pov txwv Khes Tas. Yog thaum lub caij ntawd, mas Paj Lug thiaj sau peb tsab ntawv uas niaj hnub peb tseem twm los txog tav no; yog tej tsab ntawv Paj Lug sau rau ob tug Tswv Qhia Tis Mos Tes thiab Tis Tos nkawd. Nyem no Paj Lug yog ib tug neeg laus lawm, nws paub hais tias tshuav tsis ntev nws yuav tuag, ces nws ntuas ob tug Tswv Qhia kom muab siab rau saib cov neeg ua Ntuj kev cai zoo.

Xyoo tim 64 lub xya hli, tas 6 hnub thiab 6 hmo hluav taws kub tas lub nroog Los Mas ib sab; tej tsev ntoo kub hnyiab tas, tej tsev pob zeb kuj vau tas, cov neeg tuag ntau txhiab leej. Tej lub tsev nom thiab tej lub tsev teev dab uas cov Los Mas ua tau ob peb puas xyoo los, mas tsis tshuav ib qho dab tsi li; tas ib sab nroog kub hnyiab tas.

Lub caij ntawd, tus vaj kav Los Mas teb yog ib tug vaj siab phem kawg, nws lub npe hu ua ‘Nes Los’ (Nero). Nws twb muab nws niam tua pov tseg, vim nws kav teb chaws tsis ncaj, mas nws niam xav nrog nws kav. Niaj hnub Nes Los kom cov tub rog muab tej tus nom loj tua pov tseg, vim nws ntshai cov nom loj ntawd. Nes Los muaj ib tug poj niam zoo nkauj kawg, tiam sis nws nrauj tus poj niam thiab nws muab tus poj niam tua vim nws xav yuav dua lwm tus tshiab. Tus poj niam uas nws muab tua zoo li ntawd, yog tus vaj thaud ib tug ntxhais; Nes Los kom nws ib tug tub rog mus txiav nws poj niam lub taub hau thiab nqa los cev rau nws tus poj niam tshiab. Cov pej xeem hnov lub moo ntawd, mas lawv ntxub lawv tus vaj siab phem kawg nkaus.

Ua li mas thaum lub nroog kub hnyiab, tas sawv daws xav hais tias ntshai yog vim tus vaj siab phem dhau mas Ntuj thiaj li xav rhuav lub nroog Los Mas. Muaj tej tus Los Mas hais tias lawv pom tus vaj thiab nws cov qhev lawv nqa hluav taws mus hlawv lub nroog. Thaum hluav taws tab tum kub lub nroog mas tus vaj Nes Los kuj hais tej lo lus xws li nws zoo siab.

Tas cov pej xeem sawv daws thiaj pib hais zom zaws tias yog tus vaj Nes Los hlawv lub nroog xwb. Tus vaj hnov sawv daws yws txog nws heev zuj zus, ces nws thiaj ntshai. Nes Los nrhiav saib nws yuav muab qhov xwv txheej ntawd liam rau leej twg ris. Nes Los pom ib pab neeg me thiab tsis muaj zog, lawv coj tus yam ntxwv txawv luag tej, lawv yog cov neeg ntseeg txog Yes Xus. Nyob hauv cov Yus Das coj Mais Xes txoj cai muaj ib nrab ntxub cov Yus Das uas ntseeg txog Yes Xus. Tsis tag li ntawd, Nes Los tus poj niam tshiab kuj yog ib tug nyiam cov neeg Yus Das uas coj Mais Xes txoj cai, ces nws nrog cov Yus Das coj Mais Xes txoj cai ntxub cov neeg ntseeg Yes Xus. Tus vaj Nes Los cia li tso neeg mus hais nyob hauv lub nroog tias yog cov neeg ntseeg Yes Xus ua cov hlawv lub nroog Los Mas, ces sawv daws ntseeg sai heev.

Tus vaj Nes Los tso tub rog mus ntes cov neeg ntseeg Yes Xus. Tsis ntev, muaj ntau txhiab leej neeg ntseeg raug kaw hauv tsev loj faj. Nes Los muab cov neeg ntseeg Yes Xus uas nws ntes tau los tsim txom tas zog kom txom nyem thiab mob mob, nws muab lawv txiav caj dab, los muab lawv ntsia rau saum ntoo cuam. Nyob hauv Nes Los lub tshav ua si uas nyob hauv plawv nroog, muaj tej zaug nws ua txuj nrog nws cov phooj ywg sib twv tua tej tsiaj txhu. Lawv ua si li ntawd rau cov nom me, los tsoom pej xeem saib. Tab sis nyob hauv cov tsiaj txhu uas lawv sib twv tua, thiab tso dev mus tom ntawd, mas muaj ib txhia yog cov neeg ntseeg txog Yes Xus. Cov tub rog laws tej tawv tsiaj coj los qhwv cov neeg ntseeg, ces lawv hais tias yog tsiaj, lawv muab tua, tiam sis yog tua cov neeg uas ntseeg txog Yes Xus xwb. 

Tseem muaj ntau hmo uas tus vaj Nes Los nrog nws cov phooj ywg mus coj cov ntxhais neeg ntseeg uas tseem tsis tau muaj txiv tuaj ua si, ua dev ua npua. Thaum lawv ua tag, lawv muab cov ntxhais ntawd tua pov tseg.

Muaj ntau zaus, tus vaj thiab nws cov neeg lawv sib tw caij tsheb ua si hmo ntuj, lawv muab ib cov neeg ntseeg hauv tsev loj faj coj laus pav rau saum tej tus ncej, nyob ze ntawm tej ntug kev, lawv muab roj pleev cov neeg ntawd, ces lawv caij tsheb sib tw zes taws rau saum cov neeg uas lawv muab pleev roj ntawd kom cig.

Nyob hauv lub tuam tsheej Los Mas tus vaj Nes Los ua phem li ntawd rau cov neeg ntseeg, nws tseem kom ntau tus nom tsim txom cov neeg ntseeg Yes Xus tib yam nkaus li nws ua nyob hauv lub nroog Los Mas. 

Lub caij tus vaj Nes Los ua tej yam phem li ntawd, mas Pob Zeb kuj nyob Los Mas thiab. Pob Zeb thiaj sau ib tsab ntawv rau cov neeg ntseeg nyob As Xias xeev ntuj, nws ntuas kom lawv ua siab loj siab tawv. Pob Zeb hais tias tab txawm cov nom tswv hiam cov ntseeg, los cov ntseeg yuav tsis txhob tso Yes Xus Lo Lus pov tseg. 

Xyoo 65 los yog 66 cov nom tswv Los Mas ntes Pob Zeb thiab Paj Lug nkawd. Lawv ntes Pob Zeb nyob Los Mas, hos ntes Paj Lug nyob As Xias teb. lawv coj Paj Lug tuaj txog Los Mas. Muaj kwv huam piav tias cov Los Mas ntes nkawd tua nyob ntawm ob tsob qab ntoo faj khaum. Zaj kwv huam xav qhia tias hnub ntawd mas ob tug ntoo siab dua cov nyob hauv lub Koom Txoos vau lawm.

Lawv yuav muab Pob Zeb tua nyob saum ntoo cuam, tiam sis Pob Zeb xav tias nws tsis tsim nyog tuag xws li Yes Xus, ces Pob Zeb thov kom lawv tsa nws nyob saum ntoo cuam, muab ko taw tig rov saud, hos taub hau tig rov hauv av.

Nyem no nyob Los Mas, muaj ib lub tsev teev Ntuj loj nyob ntawm qhov chaw Paj Lug tuag. Nyob saum Pob Zeb lub ntxa, lub Koom Txoos txhim lub Tuam Tsev Teev Ntuj hu ua ‘Pob Zeb’ rau. 

Paj Lug yog ib tug Los Mas, ces lawv tsis muab nws tua nyob saum ntoo cuam, lawv xuas ntaj txiav Paj Lug caj dab. Zaj kwv huam piav tias lawv txiav Paj Lug taub hau poob rau pem teb, tseem rov dhia peb plaws ces txawv 3 lub qhov dej; vim xav qhia tias tab yog Paj Lug tuag lawm los nws tseem nqa txoj sia tuaj rau neeg.

Nes Los lub tshav ua si uas nws muab cov ua Ntuj kev cai tua, mas nyem no yog Leej Ntshiab Pob Zeb lub tshav puam, thiab tus ncej zeb uas thaum ub nyob hauv Nes Los lub tshav ua si, mas nyem no tus ncej zeb ntawd tseem nyob.