TIM 30 LUB 7 HLI – NCO TXOG LEEJ NTSHIAB POB ZEB KHIS XOS LOS NKUS (ST. PETER CHRYSOLOGUS)

Leej Ntshiab Pob Zeb Khis Xos Los Nkus yug xyoo 380 hauv Is Mos Las (Imola), Is Tas Lias teb.

Thaum Vas Les Tis Nis As Peb (Valentiniam III) tswj lub teb chaws, Pob Zeb tau txais Cim Tiag Tes ua Leej Choj thiab Vaj Qhia Xis Tus Peb (Sixtus III) yog tus tsa Pob Zeb ua Tswv Qhia nyob Las Vees Nas uas yog lub Koom Txoos sab hnub poob.

Kwv huam piav tias Vaj Qhia Xis Tus Peb npau suav pom tus Hauv Paus Xa Lus Pob Zeb thiab Leej Ntshiab As Pos Lis Nas Lis los nrhiav nws, nkawd taw tes kom Vaj Qhia xaiv ib tug Txiv Plig hluas ua tus Tswv Qhia tshiab tuav lub Koom Txoos nyob Las Vees Nas.

Thaum Txiv Plig Khos Les Nis Us (Cornelius) thiab Txiv Plig Pob Zeb nrog ib co Leej Choj hluas tuaj txog. Vaj Qhia cim tau tias tus hluas nws npau suav pom yog Txiv Plig Pob Zeb, ces nws thiaj tsa Txiv Plig Pob Zeb ua Tswv Qhia nyob hauv xyoo 433.

Tswv Qhia Pob Zeb nyiam nthuav Tswv Ntuj Lo Lus luv luv tab sis ntxaws nkaus cov ntsiab lus ua rau sawv daws nyiam mloog nws, ces sawv daws thiaj hu nws tias ‘tus kws nthuav Ntuj Lus’.

Thaum tus poj vaj Nkas Las Plas Cis Ntias (Galla Placidia) hnov Tswv Qhia Pob Zeb ntuas tas mas nws cev lub npe rau Tswv Qhia Pob Zeb tias ‘Khis Tos Los Nkus’ txhais tias ‘lus nyiaj lus kub’, thiab nws pub nws lub cuab tam los pab Tswv Qhia Pob Zeb txoj hauj lwm tshaj lub Moo Zoo nyob Las Vees Nas.

Tswv Qhia Pob Zeb ntuas tsoom ntseeg kom kub siab txais Yes Xus lub Cev txhua hnub, nws ntuas sawv daws kom tso siab rau kev daws txhaum. Tswv Qhia Pob Zeb qhia cov neeg ntseeg hauv lub Koom Txoos tias niam Mab Liab yog tus nkauj ntshiab, thiab sawv daws yuav ntseeg tias tsoom Leej Ntshiab sib koom ntuj lub txiaj ntsim tiag.

Xyoo 450 Tswv Qhia Pob Zeb mus tsham nws lub zos Is Mos Las, ces nws tuag nyob ntawd.

Leave a Comment

Your email address will not be published. Required fields are marked *

Translate »
Scroll to Top