1 Kuv yog Paj Lug, Tswv Ntuj tus tub txib, thiab Yes Xus Pleev tus Hauv Paus Xa Lus, uas coj cov neeg Tswv Ntuj xaiv los txais kev ntseeg, thiab txais txoj kev paub qhov tseeb uas qhia kev hwm Ntuj, 2 vim peb vam txoj sia nyob mus li. Puag thaum tsis tau muaj lub zim txwv, tus Tswv Ntuj tsis txawj dag twb cog lus tias nws yuav pub txoj sia nyob mus li. 3 Thaum txog lub caij teem, Tswv Ntuj ceeb toom nws lo lus. Tus Tswv Ntuj cawm peb tau txib kuv kom ua tus saib nws lo lus.
4 Kuv sau ntawv tuaj rau Tis Tos, kuv tus tseem tub nyob hauv peb txoj kev ntseeg. Thov kom Leej Txiv Tswv Ntuj, thiab Yes Xus Pleev, uas yog tus cawm peb, pub txiaj ntsim thiab kev thaj yeeb rau koj.
5 Tos kuv tau tso koj tseg nyob Khes Tas, yog vim koj yuav npaj tus txheej txheem tsa ib co Txwj Laus nyob hauv txhua lub nroog, raws li kuv tau qhia koj. 6 Tus koj yuav tsa ua Txwj Laus yuav tsum yog ib tug tsis muaj chaw xyeej, nws muaj ib tug poj niam xwb. Nws cov me nyuam yog neeg ntseeg, uas luag hais tsis tau tias, lawv coj tus yam ntxwv tsis zoo, thiab lawv tsis mloog lus.
7 Vim tias, tus txiv soj ntsuam, nws tswj Tswv Ntuj cov hauj lwm, mas nws yuav yog ib tug neeg tsis muaj chaw xyeej, nws tsis muab hlob, nws tsis yog neeg siab ceev, tsis quav cawv, tsis nrog luag sib ntaus, tsis ntshaw noj nyiaj raws tej txoj kev tsis ncaj. 8 Tus saib tsoom sid mas nws zoo siab txais qhua, nws nyiam ua zoo, nws txawj xav tom ntej tom qab, nws ua ncaj, nws nyiam teev Ntuj, nws txawj kav nws lub siab. 9 Nws dai rau qhov tseeb haum txoj kev cai. Ua li mas nws thiaj yuav muaj peev xwm ntuas sawv daws raws li txoj kev cai tseem ceeb, thiab yeej cov neeg tiv nws.
10 Cov neeg ntxeev siab, cov ncauj ntau, cov haub luag, muaj coob. Cov coob tshaj yog cov txais lub cim txiav. 11 Yuav tsum kaw lawv lub ncauj. Cov neeg ntawd ua kom tej yim neeg ntxeev siab tas. Lawv qhia luag thiab noj tej nyiaj txiag uas lawv tsis muaj cai noj.
12 Lawv ib tug yaj saub tau hais txog lawv tias : ‘Cov Khes Tas, nej yog ib co neeg dag tas nej sid. Nej yog ib co tsiaj phem, thiab ib co plab tub nkeeg.’
13 Lo lus pov thawj no hais tseeb kawg. Li ntawd, mas koj yuav cem lawv hnyav, kom lawv nyob tus yees hauv txoj kev ntseeg zoo, 14 tsis txhob quav ntsej mloog tej dab neeg Yus Das, thiab txhob mloog cov neeg uas tig nraub qaum rau txoj kev tseeb.
15 Cov neeg siab huv, mas lawv pom tas puas tsav yam huv. Cov neeg uas lub siab tsuas tas, thiab cov tsis ntseeg, mas lawv tsis pom ib yam dab tsi huv li. Lawv lub tswv yim thiab lawv tej nplooj siab tsuas tas. 16 Lawv lees tias lawv paub Tswv Ntuj, tab sis lawv tus yam ntxwv nrauj Tswv Ntuj. Lawv yog ib cov neeg tsiv saib, ntxeev siab, tsis txawj ua ib txog hauj lwm zoo.

1 Ntawm koj, mas koj qhia txoj kev haum txoj kev cai tseem ceeb. 2 Kom cov laus txawj yoog noj yoog haus, ua neeg tsim nyog hwm, xav tom ntej tom qab, nyob ruaj nreb hauv txoj kev ntseeg, kev nyiam, thiab kev rub lub siab ntev.
3 Koj qhia cov pog laus kom coj tus yam ntxwv phim cov neeg siab ntshiab : kom lawv txhob hais lus xaiv, txhob quav cawv, thiab txawj ntuas luag zoo. 4 Cov pog laus ua li ntawd, mas lawv pab qhia cov poj niam tseem hluas kom txawj hlub lawv tus txiv thiab lawv cov me nyuam, 5 kom cov poj niam hluas tsis txhob ua neeg liam, kom lawv ua neeg tsim txiaj, ua niam tsev tu lub vaj lub tsev, ua neeg siab zoo, mloog tus txiv lus, ces luag thiaj tsis thuam Tswv Ntuj lo lus.
6 Koj qhuab ntuas cov hluas kom lawv xav tom ntej tom qab nyob hauv txhua yam lawv ua.
7 Koj yuav coj tus yam ntxwv zoo, kom luag tau ib tug piv txwv qhia cov dej num zoo raws li txoj cai huv thiab muaj tsim, 8 koj qhia yam ncaj uas tsis muaj chaw xyeej, kom tus neeg tiv peb hais tsis tau dab tsi phem txog peb, nws kawg yuav poob ntsej muag xwb.
9 Cov qhev yuav tsum mloog lawv cov tswv lus txhua lub sij hawm, lawv yuav nrhiav ua xis cov tswv siab, lawv yuav tsis txhob ua twm cov tswv. 10 Lawv tsis txhob ua ib yam tsis ntxim cov tswv siab, lawv yuav cia lawv lub siab npuab lawv cov tswv. Yog lawv ua li ntawd, mas lawv ua kom tus Tswv Ntuj cawm peb txoj cai nto koob meej.
11 Sawv daws yuav coj tus yam ntxwv zoo, vim Tswv Ntuj lub txiaj ntsim yog lub qhov dej uas txhawv txoj kev cawm txhua leej txhua tus. Tswv Ntuj lub txiaj ntsim tawm los rau sawv daws pom xyeem. 12 Tswv Ntuj lub txiaj ntsim qhia peb kom tso kev tsis hwm Ntuj pov tseg, tso txoj kev ntshaw txog lub sim ceeb no tseg, kom tiam neej no, peb ua neej nyob hauv txoj kev cheem peb lub siab, hauv txoj kev ncaj, thiab kev hwm Ntuj. 13 Vim peb tos thiab peb vam ntsoov txoj kev kaj siab lug. Peb tos kom peb tus Tswv Ntuj loj, Yes Xus Pleev uas yog tus cawm peb lub hwj chim tawm los rau qhov muag pom xyeem.
14 Yes Xus Pleev, nws muab nws rau luag ntes, kom nws txhiv tau peb ntawm txhua txoj kev phem. Nws ntxuav ib haiv neeg kom huv los ua nws tug, thiab kub siab ua cov dej num zoo.
15 Koj yuav hais cov lus ntawd, koj yuav ntuas lawv. Koj yuav hais lus muaj peev xwm. Txhob cia leej twg thuam koj.

1 Koj hais sawv daws kom nco ntsoov hwm kev nom kev tswv, kom lawv xyaum mloog lus, thiab npaj siab ua txhua yam hauj lwm zoo. 2 Lawv yuav tsis txhob ua tub qaug leej twg, yuav maim txoj kev sib cav, yuav xav qhov zoo txog luag, yuav hlub tsoom sid mos nyoos. 3 Vim tias yav thaud peb kuj yog ib co neeg tsis paub tab, neeg ntxeev siab, neeg poob zoo, neeg ua qhev zwm rau ntau txoj kev ntshaw, zwm rau txoj kev ua si. Peb ua neej nyob hauv txoj kev phem kev ntshaw. Peb sib ntxub, vim li ntawd tsim nyog luag yuav ntxub peb.
4 Tab sis, hnub uas tus Tswv Ntuj cawm peb qhib nws lub siab zoo tawm los thiab nws txoj kev nyiam tsoom sid tawm los rau qhov muag pom xyeem, 5 mas nws tsis tshuaj tias peb puas tau ua cov dej num ncaj los tsis tau. Nws tsuas mloog nws lub siab khuv leej neeg. Nws cawm peb nyob hauv cov dej ntxuav neeg, kom peb rov yug los tshiab, thiab rov tshiab tuaj nyob hauv Leej Ntuj Plig Ntshiab.
6 Tswv Ntuj tso Leej Ntuj Plig los nyob puv hauv peb ntau kawg, nyob hauv Yes Xus Pleev, tus cawm peb. 7 Leej Pleev lub txiaj ntsim ua kom peb ntshiab tuaj, ces peb tso siab tau tias peb yuav txais txoj sia nyob mus li los ua peb lub cuab tam.
8 Lo lus kuv hais rau koj, yog ib lo lus tseem ceeb. Kuv txhob koj tsis tseg, kom koj qhia lo lus ntawd meej. Ces cov neeg txiav siab tias lawv yuav ntseeg txog Tswv Ntuj, mas lawv thiaj rau siab ntso ua cov hauj lwm zoo. Qhov ntawd yog ib qho zoo thiab muaj qab hau rau neeg.
9 Hos tej kev vwm tshawb nrhiav txuj ci, kev kawm neeg tej caj ces, los kev sib cav txog Txoj Cai, mas koj maim kom dhau mog. Tej ntawd yeej tsis muaj qab hau, thiab tsis coj dab tsi zoo rau yus.
10 Hais txog tus neeg uas ncaim mus rau ib tog lawm, mas koj qhuab qhia nws ib zaug, ob zaug tas, koj yuav txiav tu nrho tsis fim nws ntxiv. 11 Koj paub tias ib tug neeg zoo li ntawd, mas nws yuam kev, nws yog ib tug neeg txhaum, nws rov muab txim rau nws.
12 Kuv yuav xa As Tes Mas, los Tws Sis Kos tuaj cuag koj. Thaum nws tuaj txog, mas koj tuaj cuag kuv nyob Nis Kos Pos Lis sai mog. Kuv tau txiav tias, lub caij ntuj tsaug kuv yuav nyob ntawd.
13 Koj npaj txhua yam pab tus kws txoj cai Ntxes Nas, thiab As Pos Los, kom nkawd tau kev yooj yim mus, kom nkawd txhob tshaib dab tsi.
14 Peb pab neeg yuav tsum xyaum ua cov dej num zoo tshaj kom muaj txhua yam zoo pab lub neej, peb cov dej num thiaj yuav txi txiv. 15 Cov nrog kuv nyob, lawv sawv daws xa lawv lus hmov tshua tuaj rau koj. Koj xa peb cov lus hmov tshua rau cov neeg uas nyiam peb nyob hauv txoj kev ntseeg.
Lub txiaj ntsim nrog nej sawv daws nyob !