TSWV NTUJ LO LUS NIAJ HNUB

His Xais (HX 2: 1-5)

Lo lus ua tus Yaj Saub His Xais, As Mos tus tub paub txog Yus Das teb thiab Yes Lus Xas Les. Yav tom ntej, yuav muaj ib hnub lub roob uas HUAB TAIS tsa tsev nyob yuav txawb saum cov roob lub ncov, nws yuav sawv siab dua cov pov roob. Tas ib tsoom kuj cuab yuav khiav ua npoj ntws tuaj saum HUAB TAIS lub roob; ntau haiv neeg yuav tuaj. Lawv yuav hais tias “Nej tuaj! Peb nce mus pem Yas Kos tus Tswv Ntuj lub tsev! Kom nws qhia nws tej kev rau peb, thiab kom peb mus taug nws tej kev. Tswv Ntuj yuav txiav txim hauv nruab nrab cov kuj cuab. Nws yuav xaiv nyob hauv ntau haiv neeg. Lawv yuav muab lawv rab ntaj ob sab ntse los ntaus ua voom, muab lawv rab hmuv ntaus ua liag. Thaum ib lub kuj cuab sawv los ntaus lwm lub kuj cuab, lawv yuav tsis tsa rab ntaj ob sab ntse. Lawv yuav tsis kawm kev ntaus rog ntxiv. Yas Kos tsev neeg, nej tuaj! Peb mus taug HUAB TAIS txoj kev kaj.”

Lub Moo Zoo Raws Li Mas Tais (MT 8: 5-11)

Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias “Huab Tais, kuv tus tub txib pw tom tsev, nws tes taw tuag tas. Nws mob heev kawg.” Yes Xus teb tias “Kuv yuav mus kho nws.” Tus xab txheeb hais ntxiv tias “Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo. Txawm tias kuv yog ib tug neeg zwm rau luag tej, kuv kuj muaj ib co tub rog zwm rau kuv thiab. Yog kuv hais rau ib tug tias ‘Koj mus!’ nws cia li mus, kuv ho hais rau lwm tus tias ‘Koj los,’ nws kuj cia li los. Kuv hais rau kuv tus tub txib tias ‘Koj ua qhov no!’ nws cia li ua.” Yes Xus hnov nws hais li ntawd, Yes Xus qhuas. Yes Xus hais rau cov neeg raws nws tias “Kuv hais tseeb rau nej, kuv tsis tau pom ib tug neeg ntseeg npaum li ntawd hauv cov His Xas Lais. Kuv hais rau nej, yuav muaj neeg coob tuaj sab hnub tuaj tuaj thiab sab hnub poob tuaj nrog Has Nplas Has, nrog His Xas Has thiab Yas Kos noj rooj qav hauv Ntuj lub Ceeb Tsheej.”

Lo lus ntuas.

His Xais (HX 11: 1-10)

Ib tug ceg yuav hlav ntawm Yes Xes lub hauv paus los, ib tug ntsuag yuav hlav ntawm Yes Xes cov cag los. HUAB TAIS lub tswv yim yuav nyob txawm saum nws. Yog ib lub tswv yim thoob tsib thiab ntse, ib lub tswv yim pab xav tom ntej tom qab thiab pab ua siab loj, ib lub tswv yim paub txuj thiab hwm HUAB TAIS. Nws yuav nrhiav kev hwm HUAB TAIS. Nws yuav tsis txiav txim raws li qhov muag pom sab nraud, nws yuav tsis xaiv kev taug raws li hnov lus moo cua hais. Nws yuav txiav txim ncaj rau cov tsis muaj zog, nws yuav pab cov neeg hauv txheej qis nyob hauv lub teb chaws, nws lub ncauj cov lus txiav yuav ntaus cov siab ceev, nws di ncauj yuav tshuab pa tua cov lim hiam. Kev ncaj yuav yog nws txoj siv sia duav, kev hais qhov muaj tseeb yuav yog nws txoj siv sia ntawm ntsag. Tus hma yuav nrog tus thav yaj nyob, tus tsov pom txwv yuav nrog tus thav tshis nyob ib nkuaj. Tus xyuas nyuj thiab tus tsov ntxhuav yuav ua ke nog zaub, ib tug me nyuam tub yuav caij nkawd. Tus maum nyuj thiab tus maum dais ntaus phooj ywg, nkawd cov me nyuam yuav nyob hauv ib lub nkuaj, tus tsov ntxhuav yuav noj quav nplej xws li tus nyuj. Tus me nyuam mos yuav ua si nyob ze ntawm tus nab liab tsaig, tus me nyuam nyuam qhuav cais mis yuav cev tes mus hauv nab ntsuab lub qhov. Nyob saum kuv lub roob ntshiab, yuav tsis ua phem tsis ua nkhaus, vim kev paub HUAB TAIS yuav nyob puv ntiaj teb, ib yam li dej vov lub hiav txwv. Hnub ntawd, Yes Xes tus xeeb ntxwv yuav sawv siab xws li ib tug chij rau sawv daws pom thiab ua chaw nto koob meej rau sawv daws nkaum, ces cov haiv neeg yuav nrhiav Yes Xes tus cag.

Lub Moo Zoo Raws Li Lus Kas (LK 10: 21-24)

Yes Xus zoo siab tas nrho nyob hauv Leej Ntuj Plig Ntshiab, nws hais tias “Txiv, kuv cav lus zoo txog koj, Huab Tais kav ntuj kav teb, koj tau zais qhov ntawd rau cov neeg thoob tsib thiab cov neeg ntse, koj qhib rau cov neeg me, Txiv, vim koj nyiam ua li ntawd. Kuv Txiv muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv thiaj paub. Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab yog tus uas Leej Tub xav qhia rau kom paub.” Yes Xus tig los rau nws cov thwj tim, thaum lawv nyob rau ib cag, nws hais rau lawv tias “Ob lub qhov muag uas pom tej yam nej pom no tau txoj hmoov zoo! Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis tsis tau hnov.”

Lo lus ntuas.

His Xais (HX 25: 6-10)

Nyob saum lub roob no, tsoom tub rog tus HUAB TAIS yuav ua ib rooj nqaij ib rooj hno rau tas cov haiv neeg huv tib si, yog ib rooj qav muaj hlwb puv pob txha, ib rooj cawv ntshiab tsis muaj txo. Nyob saum lub roob no, HUAB TAIS yuav yaws daim ntaub vov tsoom neeg tib si, yuav rhuav chaws ntaub qhwv tsoom kuj cuab. Nws yuav rhuav kev tuag ib txhiab ib txhis. HUAB TAIS Tswv Ntuj yuav so cov kua muag ntws saum sawv daws lub ntsej muag, nws yuav thau nws haiv neeg chaw poob tsim nyob thoob ntiaj teb, vim HUAB TAIS tau hais li ntawd. Hnub ntawd sawv daws yuav hais tias “Nej ntsia peb tus Tswv Ntuj uas peb vam tias nws yuav cawm peb, yog tus HUAB TAIS uas peb tos. Peb kav tsij dhia hom khaj, kav tsij xyiv fab lom zem!” Vim HUAB TAIS yuav tso nws txhais tes nyob saum lub roob no.

Lub Moo Zoo Raws Li Mas Tais (MT 15: 29-37)

Yes Xus tuaj txog ntawm ntug dej ntuj Nkas Lis Lais. Nws nce mus saum roob, nws zaum. Tej pab neeg coob tuaj cuag nws, lawv coj tej tus ceg tawv, tej tus tuag ceg, tej tus dig muag, tej tus nplaig txhav, thiab tseem coj lwm cov mob tuaj tso ntawm Yes Xus ko taw, Yes Xus kho sawv daws zoo tas huv tib si. Ib zeej tsoom sawv daws qhuas kawg, vim lawv pom cov nplaig txhav hais tau lus, cov tuag ceg rov muaj zog, cov deeg pauv rov mus taus kev, hos cov dig muag rov pom kev tuaj. Ces lawv cav txog His Xas Lais tus Tswv Ntuj lub koob meej.
Yes Xus hu cov thwj tim los cuag nws, nws hais rau lawv tias “Kuv hlub pab neeg no, vim lawv twb nrog kuv nyob tau peb hnub lawm, lawv tsis muaj dab tsi noj. Kuv tsis xav cia lawv tshaib plab rov mus tsev. Tsam lawv tsaus muag tom kev.” Cov thwj tim hais rau nws tias “Peb yuav nrhiav mov qhov twg hauv lub teb chaws quav poj no kom txaus ib pab neeg coob npaum no noj?” Yes Xus hais rau lawv tias “Nej muaj pes tsawg lub ncuav mov?” Lawv teb tias “Muaj xya lub thiab ob peb tug me nyuam ntses.” Yes Xus kom tsoom sid zaum pem teb. Nws tuav xya lub ncuav mov thiab cov ntses, nws ua Ntuj tsaug. Nws muab cov ncuav mov ntais, nws cev rau cov thwj tim, ces cov thwj tim coj mus faib rau tsoom sid. Thaum sawv daws noj tsau tas, lawv khaws tej sab mov seem puv xya tawb!

Lo lus ntuas.

His Xais (HX 26: 1-6)

Hnub ntawd, nyob Yus Das teb lawv yuav hu zaj nkauj no “Peb muaj ib lub tsheej khov, HUAB TAIS tsom kwm, nws tsa ntsa zeb ntsa tsua thiab tsa phab ntsa siab. Nej qhib rooj loog mas! Cia lub kuj cuab siab ncaj thiab ncawg Tswv Ntuj chaws los hauv. Nws tus xeeb ceem khov, koj cia nws nyob thaj yeeb, vim nws tso siab rau koj. Nej tso siab rau HUAB TAIS mus ib txhiab ib txhis! Vim HUAB TAIS yog lub tsua nyob tiam dhau tiam. HUAB TAIS ua kom cov nyob chaw siab poob rau hauv qhov chaw qis, nws ua kom lub tsheej uas neeg ncav tsis cuag poob hauv pem teb. Nws muab pov hauv plua tshauv. Cov neeg me thiab cov neeg pluag tsuj lawv.”

Lub Moo Zoo Raws Li Mas Tais (MT 7: 21, 24-27)

Yes Xus hais rau cov thwj tim tias “Tsis yog cov uas hu kuv ua ‘Huab Tais, Huab Tais’, yuav tau mus hauv Ntuj lub Ceeb Tsheej. Yog cov ua raws li kuv Txiv nyob saum ntuj lub siab nyiam. Leej twg mloog cov lus uas kuv nyuam qhuav hais, thiab nws ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua. Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. Hos leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam txhim tsev rau saum tej av suab puam. Thaum los nag hlob, dej sab siv huam, cua tshuab ntsawj lub tsev, ces lub tsev vau. Nws raug xwv txheej loj.”

Lo lus ntuas.

His Xais (HX 29: 17-24)

Tshuav tsis ntev ntxiv lawm, ces lub roob zoov Lis Npaas yuav hloov ua ib lub vaj txiv ntoo, hos lub vaj txiv ntoo yuav hloov ua hav zoov. Hnub ntawd, cov neeg lag ntseg yuav hnov cov lus nyob hauv phau ntawv, cov dig muag qhov muag yuav pom kev, yuav dim ntawm qhov tsaus ntuj dub nciab. Cov neeg me yuav zoo siab tuaj nyob hauv HUAB TAIS, cov pluag yuav dhia daj dhia luag nyob hauv His Xas Lais tus Ntshiab. Yuav tsis muaj neeg ua nruj ua tsiv ntxiv, tus thuam luag yuav ploj mus, tsoom neeg nyas kev phem yuav ploj ntais. Cov neeg uas hais ib lo lus ua tau kom luag raug txim, cov neeg cuab ntxiab rau tus txiav txim nyob ntawm lub rooj loog, cov lam ua phem rau tus siab ncaj, lawv yuav ploj tas huv tib si. Vim li ntawd, HUAB TAIS, Yas Kos tsev neeg tus Tswv Ntuj, tus cawm Has Nplas Has dim nws hais li no : Txij no mus, Yas Kos yuav tsis raug kev txaj muag ntxiv. Lawv yuav pom cov hauj lwm kuv ob txhais tes ua nyob nruab nrab hauv Yas Kos, lawv yuav tshaj tias kuv lub npe ntshiab. Lawv yuav tshaj tias Yas Kos tus Ntshiab nws Ntshiab tiag. Lawv yuav ntshai His Xas Lais tus Tswv. Cov tswv yim yuam kev yuav rov thoob tsib. Cov neeg yws taus yuav paub txuj.

Lub Moo Zoo Raws Li Mas Tais (MT 9: 27-31)

Thaum Yes Xus tawm ntawm qhov chaw ntawd mus, muaj ob tug neeg dig muag raws nws qab. Nkawd qw qw hais tias “Das Vis Leej Tub, thov koj khuv leej wb.” Thaum Yes Xus los txog hauv tsev, ob tug dig muag los ze Yes Xus, ces Yes Xus hais rau nkawd tias “Neb puas ntseeg tias kuv ua tau qhov ntawd?” Nkawd teb tias “Huab Tais, wb ntseeg.” Ces Yes Xus kov nkawd qhov muag, nws hais tias “Xav kom muaj rau neb raws li neb ntseeg.” Ces nkawd qhov muag qhib los. Yes Xus txwv nkawd nruj nruj tias “Neb ceev faj! Kom txhob muaj neeg paub!” Tab sis, thaum nkawd tawm mus lawm, nkawd tshaj rau ib cheeb tsam ntawd paub tas huv si.

Lo lus ntuas.

His Xais (HX 30: 19-21, 23-26)

Muaj tseeb, Xis Yoos haiv neeg uas nyob Yes Lus Xas Les, tsis tas koj yuav quaj ntxiv; nws hnov koj lub suab quaj quaj. Nws nyuam qhuav hnov koj, nws yuav teb rau koj sai. Thaum Huab Tais muab cov mov txhawj xeeb thiab cov dej iab dej daw rau koj tas lawm, mas tus qhia koj yuav tsis nyob nrug deb ntawm koj ntxiv, koj qhov muag yuav pom tus qhia koj. Koj pob ntseg yuav hnov ib lo lus ntawm koj nraub qaum tuaj tias “Ntsia txoj kev ntawm no, koj taug mus mas! Koj mus rau sab xis los mus rau sab laug kuj tau.” Tswv Ntuj yuav pub nag los ywg cov noob koj tseb rau hauv av. Ces cov mov ntawd yuav qab thiab zoo yug koj lub cev. Tas koj cov tsiaj yuav noj cov npluag qab ntsev uas xuas vab tsoov. Thaum txog hnub sib tua ua lwj liam uas cov sam thiaj siab vau tas, mas yuav muaj tej qhov dej thiab tej kwj deg ntws saum cov roob siab thiab saum cov hauv pes tib si los. Lub hli qhov pom kev yuav zoo li lub hnub qhov pom kev. Lub hnub qhov pom kev yuav muaj zog dua xya npaug, ib yam li xya hnub qhov pom kev. Hnub ntawd HUAB TAIS yuav qhwv nws haiv neeg cov pob txha lov, yuav kho lawv cov qhov txhab.

Lub Moo Zoo Raws Li Mas Tais (MT 9: 35-36, 10: 1, 5-8)

Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov. Yes Xus thiaj hais rau nws cov thwj tim tias “Qoob loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob.” Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim. Yes Xus xa kaum ob leeg no mus tshaj lub Moo Zoo, nws qhia lawv tias “Nej xub mus cuag cov yaj ploj hauv haiv His Xas Lais. Thaum nej mus kev, nej ceeb toom tias Ntuj lub Ceeb Tsheej tuaj txog ze lawm. Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej rov pub dawb.”

Lo lus ntuas.

His Xais (HX 35: 1-10)

Cov teb chaws suab puam thiab teb quav poj, nej kav tsij zoo siab mog. Lub tiaj maj sab, koj kav tsij dhia daj dhia luag, thiab tawg paj xws li cov paj iab, tawg ib phaum tas, ib phaum tuaj! Kom nws kav tsij dhia hom khaj zoo siab luag ntxhwb ntxhi, ua suab ntas ntua. Ntuj pub Lis Npas lub koob meej rau lub tiaj maj sab. Lawv yuav pom Lis Npas lub koob meej, yuav pom peb tus Tswv Ntuj lub hwj chim ci ntsa iab. Nej ua kom cov tes qaug zog rov muaj zog, ua kom cov hauv caug ntshaus raws rov khov. Nej hais rau cov siab muag tias “Nej ua siab loj! Nej txhob ntshai! Ntsia saib! Nej tus Tswv Ntuj nyob ntawm no!” Kev rob caub tab tom tuaj, Tswv Ntuj cov txim pauj neeg cov txhaum tuaj cawm peb. Ces cov dig muag ob lub qhov muag rov rua hlo, cov pob ntseg lag yuav qhib plho. Tus neeg ceg tawv dhia nrawm xws li tus muas lwj. Tus nplaig txhav qw tej suab zoo siab. Vim ib co dej txhawv hauv cov teb chaws suab puam los, tej tus dej ntws hla cov teb chaws maj sab. Thaj av kub ntaiv yuav hloov ua pas dej. Lub teb chaws tuag dej yuav txhawv tej tus kaus dej txaws txua tawm los. Thaj chaw uas hma ua zes nyob, yuav hloov ua tiaj tauj thiab tiaj ncaug zom ntawv. Nyob ntawd, yuav muaj ib txog kev ntshiab huv, tis npe hu ua “Kev Qee.” Tsis muaj ib tug neeg tsis huv yuav mus tau txoj kev ntawd, yuav tsis muaj tsov, tsis muaj tsiaj tom neeg taug txoj kev ntawd ntxiv, cov uas Ntuj txhiv lawv thiaj tau taug xwb. Cov neeg uas HUAB TAIS txhiv yuav rov qab los, lawv yuav chaws mus hauv Xis Yoos thiab nqua suab zoo siab, ib txog kev zoo siab ib txhiab ib txhis roos lawv taub hau. Kev luag ntsuag qees thiab kev lom zem ua lawv luag, kev iab kev khwv thiab kev ntsaj ploj ntais mus.

Lub Moo Zoo Raws Li Lus kas (LK 5: 17-26)

Thaum Yes Xus tab tom qhia sawv daws, muaj ib cov Fas Lis Xais thiab ib co Kws Txoj Cai tuaj ntawm tej lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj. Lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo. Muaj ib pab neeg kwv ib tug tuag ceg saum ib lub txaj tuaj. Lawv nrhiav kev nqa tus tuag ceg mus hauv tsev, coj nws mus tso ntawm Yes Xus xub ntiag. Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ruv tsev, lawv dawj cov thwv cib vov tsev, lawv dauv tus tuag ceg pw hauv nws lub txaj nqes mus hauv nruab nrab, rau ntawm Yes Xus xub ntiag. Yes Xus pom lawv ntseeg, nws hais tias “Me kwv, kuv daws koj cov txhaum tas lawm.” Cov Kws Ntawv Ntshiab thiab cov Fas Lis Xais xav twj ywm rau nruab siab tias “Tus neeg ntawd yog leej twg, nws thiaj thuam Ntuj? Leej twg yuav daws txhaum tau? Kawg yog Tswv Ntuj tib leeg xwb.” Yes Xus twb paub qhov lawv xav hauv nruab siab, nws hais rau lawv tias “Vim li cas nej thiaj xav tej zaj tswv yim li ntawd hauv nej siab? Lo lus twg yog lo hais yooj yim dua, lo lus tias ‘Kuv daws koj cov txhaum’ los yog lo lus tias ‘Koj sawv, koj mus kev?’ Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb.” Ces Yes Xus hais rau tus tuag ceg tias “Kuv hais rau koj; koj sawv, koj nqa koj lub txaj, koj rov mus tsev.” Tam sis ntawd, tus tuag ceg sawv tsees ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj. Sawv daws yoob tas, lawv cav txog Tswv Ntuj. Lawv ntshai kawg, lawv hais tias “Hnub no, peb pom tej yam txawv heev!”

Lo lus nthuav.

His Xais (HX 40: 1-11)

Nej tus Tswv Ntuj hais tias “Nej nplij kuv haiv neeg, nej nplij lawv mas! Nej hais lus rau hauv Yes Lus Xas Les nruab siab. Nej hais nrov nrov rau nws tias nws lub caij ua qhev dhau lawm. Nws them txim txhaum tas lawm. Cov xwm uas nws txais ntawm HUAB TAIS txhais tes los them nws cov txhaum twb tshaj nws cov txhaum ob npaug lawm.” Muaj ib lub suab qw tias “Nej npaj ib txog kev hauv teb chaws suab puam rau Tswv Ntuj taug. Nej ncaws ib txog kev ncaj hauv cov teb chaws quav poj rau peb tus Tswv Ntuj. Nej txhub cov hav tob kom siab, kom cov roob thiab cov hauv toj cia li qis, kom cov tiaj muaj pov toj, hloov ua hav tiaj tus yees, kom cov toj ntxhab hloov ua tshav puam. HUAB TAIS lub hwj chim yuav tawm los. Txhua tus muaj lub cev nqaij puav leej yuav pom lub hwj chim, vim HUAB TAIS lub ncauj tau hais lus. Ib lub suab nrov tuaj tias “Koj qw mas!” Kuv hais tias “Kuv yuav qw dab tsi?” HUAB TAIS hais tias “Txhua tus muaj lub cev nqaij zoo ib yam li lub paj nroj tom tej nras. Thaum HUAB TAIS tshuab pa tuaj mas tsob nroj qhuav, ces lub paj ntsws. Tsob nroj qhuav, lub paj zeeg, tab sis peb tus Tswv Ntuj lo lus yuav nyob mus li.” Koj yog tus fi tsab xov zoo no mus rau Xis Yoos. Koj nce mus saum ib lub roob siab, koj tsa suab qw nrov nrov mas! Koj yog tus fi tsab xov zoo mus rau Yes Lus Xas Les, koj txhob ntshai cuab suab. Koj hais rau cov nroog Yus Das tias “Ntsia ntawm no saib, yog nej tus Tswv Ntuj.” Saib HUAB TAIS Tswv Ntuj nyob ntawm no. Nws tuaj txog, nws muaj hwj huam! Nws txhais npab ua tswv kav sawv daws. Nej ntsia tus nqi zog nrog nws. Cov nyiaj nws them nyob ntawm nws xub ntiag. Cov neeg HUAB TAIS Tswv Ntuj cawm lawv mus ua nws ntej. Nws zoo li ib tug tswv saib nws cov zaj nog zaub, nws puag cov me nyuam yaj nyob hauv nws xub ntiag, nws coj cov maum yaj rov mus so hauv nkuaj.

Lub Moo Zoo Raws Li Mas Tais (MT 18: 12-14)

Yes Xus hais rau cov thwj tim tias “Raws li nej xav, yog ib tug neeg muaj ib puas tus yaj, ib tug mus poob zoo lawm. Nws puas yuav tsis tso cuaj caum cuaj tug ntawd cia saum roob, mus nrhiav tus uas poob zoo lawd? Kuv hais tseeb rau nej, thaum nws nrhiav tau tus yaj poob zoo, mas nws zoo siab rau tus ntawd tshaj rau cuaj caum cuaj tug uas tsis tau poob zoo. Nej Txiv nyob saum ntuj, kuj zoo ib yam li ntawd thiab; nws tsis xav kom ib tug me nyuam yaus no ploj li.”

Lo lus ntuas.

His Xais (HX 40: 25-31)

Tus Ntshiab hais tias “Nej yuav muab kuv los piv rau leej twg, nej thiaj hais tau tias kuv loj ib yam li tus ntawd? Nej tsa muag ntsia puag saud saib leej twg tsim cov txheej ntuj? Tus tau ua kom tsoom hnub qub tawm los tas huv tib si, nws tuav lawv lub npe hu kom los tas tib si; nws lub zog loj npaum no, nws lub hwj huam loj npaum no. Yeej tsis muaj ib lub uas tsis tawm los. Yas Kos, vim li cas koj hais lo lus no “Kuv txoj hmoov nyob nraim ntawm HUAB TAIS.” His Xas Lais, vim li cas koj hais tsis tseg tias “Kuv tus Tswv Ntuj tsis pom kuv lub peev xwm?” Puas yog koj tseem tsis tau paub tsis tau hnov qhov no? Yam li HUAB TAIS yog ib tug Tswv Ntuj nyob mus ib txhiab ib txhis. Nws tsim cov npoo ntiaj teb. Nws tsis qaug zog tsis sab. Neeg ntsuas tsis tau nws txoj kev ntse. Tswv Ntuj ntxiv zog rau tus neeg qaug zog, nws ntxiv zog kaum npaug rau tus tsis muaj zog. Cov me nyuam hluas txawj qaug zog txawj sab, cov hluas qhov kawg lawv kuj ntog. Tab sis cov neeg tos txog HUAB TAIS, lawv lub zog rov tshiab tuaj, lawv tej tis tej tw hlav xws li tis tw dav, lawv khiav tsis paub sab, lawv mus kev tsis paub qaug zog.”

Lub Moo Zoo Raws Li Mas Tais (MT 11: 28-30)

Yes Xus hais tias “Tas nej sawv daws uas nej khwv, thiab ris nra hnyav, nej tuaj cuag kuv mog! Kuv yuav cia nej so los siav. Nej txais kuv tus quab. Nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav. Vim kuv tus quab kwv yooj yim, thiab kuv lub nra sib.”

Lo lus ntuas.

His Xais (HX 41: 13-20)

Vim tias kuv yog HUAB TAIS, yog koj tus Tswv Ntuj, kuv tuav koj txhais tes xis, kuv hais rau koj tias koj txhob ntshai, kuv tuaj tsom kwm koj.  Koj txhob txhawj! Yas Kos thiab His Xas Lais, kuv tuaj tsom kwm koj. Yog lo lus uas Huab Tais ceeb toom. Koj saib, kuv muab koj los ua ib lub tshuab ntaus nplej tshiab muaj ob leej hniav. Koj yuav zom cov roob kom ua hmoov. Koj yuav muab cov hauv roob txiav ua xim quav nyab. Thaum koj tsoov, cua yuav pus cov quav nplej mus. Nthwv cua hlob yuav siv zog ntsawj. Ntawm koj mas koj yuav zoo siab nyob hauv HUAB TAIS, koj yuav muaj koob meej nyob hauv His Xas Lais tus HUAB TAIS Ntshiab. Cov neeg txom nyem thiab cov neeg pluag nrhiav dej haus, tab sis lawv nrhiav tsis tau dab tsi li. Lawv tus nplaig qhuav vim lawv nqhis dej. Kuv yog HUAB TAIS, kuv yuav mloog lawv cov lus thov kuv. Kuv yog His Xas Lais tus Tswv Ntuj, kuv yuav tsis tso lawv pov tseg. Kuv yuav ua kom muaj tej tus dej txhawv nyob saum cov hauv roob do cuas. Yuav ua kom tej lub qhov dej txhawv hauv cov hav tiaj. Kuv yuav ua kom cov av quav poj hloov ua qhov dej txhawv. Nyob hauv cov teb chaws suab puam kuv yuav cog ntoo ciab, cog paj huab poob, cog ntoo qhib, cog txiv ntoo roj thiab cog thuv rau. Kom lawv pom thiab paub, kom lawv muab siab rau, lawv to taub tias HUAB TAIS txhais tes tau ua tej yam ntawd. His Xas Lais tus Ntshiab tau tsim tej ntawd.

Lub Moo Zoo Raws Li Mas Tais (MT 11: 11-15)

Yes Xus hais rau tsoom sid tias “Kuv hais tseeb rau nej, tas cov tub uas tsoom poj niam yug huv tib si, tsis muaj ib tug sawv loj dua Zam Ntxuav Plig. Tab sis, tus me tshaj hauv Ntuj lub Ceeb Tsheej, tseem loj dua Zam thiab. Txij Zam Ntxuav Plig los txog tav no, Ntuj lub Ceeb Tsheej raug luag sib txeeb; cov neeg siab ceev txeeb lub Ceeb Tsheej. Cov yaj saub thiab Txoj Cai puav leej tau ceeb toom lo lus los txog lub caij Zam tuaj. Nej ntseeg kuv mog! Zam yog tus Es Lias uas yuav rov los. Leej twg muaj pob ntseg, cia nws mloog.”

Lo lus ntuas.

His Xais (HX 48: 17-19)

HUAB TAIS, tus txhiv koj, His Xas Lais tus Ntshiab, nws hais cov lus no “Kuv yog koj tus HUAB TAIS, yog koj tus Tswv Ntuj, kuv yog tus qhia yam muaj qab hau rau koj. Kuv yog tus coj koj mus taug txoj kev koj mus. Ab! Kheev lam koj muab siab rau mloog kuv cov lus qhia, mas koj kev vam meej yuav zoo li ib tug niam dej, koj txoj kev ncaj yuav zoo li cov dej nyob hauv hiav txwv. Koj tsoom xeeb ntxwv yuav coob ib yam li cov suab puam, cov tawm hauv koj nrog cev yuav coob ib yam li cov tsig av.”

Lub Moo Zoo Raws Li Mas Tais (MT 11: 16-19)

Yes Xus hais rau tsoom sid tias “Kuv yuav muab tiam neeg no piv rau leej twg? Tiam neeg no zoo li ib pab me nyuam yaus zaum tom tshav puam; lawv rov sib hu tias ‘Peb twb tshuab raj, nej tsis dhia! Peb cuab suab nyiav, nej tsis ntaus hauv siab!’ Zam tuaj, nws tsis noj mov, tsis haus cawv, luag hais tias ‘Nws raug dab!’ Neeg Leej Tub tuaj, nws noj mov haus cawv, luag hais tias ‘Saib tus ntawd! Nws hu dab thiab quav cawv, nws nrog cov sau se thiab cov neeg txhaum ua phooj ywg!’ Tab sis, Tus Thoob Tsib cov hauj lwm ua kom luag pom tias nws yog txoj kev ncaj.”

Lo lus ntuas.

Npes Xis Las (NXL 48: 1-4, 9-11)

Tus Yaj Saub Es Lias sawv tsees xws li ntshua nplaim taws, nws lo lus kub cuag li ib teg tsau. Nws ua kom kev tshaib tuaj raug cov His Xas Lais, nws lub siab kub lug ua kom lawv tshuav tsawg. Nws hais Huab Tais lo lus los muab cov dej nag saum ntuj kaw ntom nti. Nws kuj ua hluav taws nqes saum ntuj los peb zaug. Es Lias, koj cov hwj huam yees ntxwv ua kom koj muaj koob meej loj. Leej twg yuav khav tau tias nws loj ib yam li koj? Ib lub khaub zeeg hluav taws nqa koj mus, koj caij ib lub tsheb uas yog ib co nees hluav taws luab. Ntuj xaiv koj ua tus qhuab qhia tib neeg thaum lub caij kawg. Thaum Ntuj yuav npau taws, koj yuav yog tus ua kom Ntuj siab nqig. Koj yog tus coj phaj txiv lub siab rov los npuab phaj tub. Koj yuav rov tuaj tsav cov xeem Yas Kos. Cov neeg uas yuav pom koj, mas lawv txoj hmoov zoo. Cov neeg uas tuag nyob hauv kev sib hlub lawv txoj hmoov kuj zoo, vim peb yuav muaj txoj sia nyob tiag.

Lub Moo Zoo Raws Li Mas Tais (MT 17: 9a, 10-13)
Thaum lawv nqes saum roob los, cov thwj tim nug Yes Xus li no “Ua cas cov thoob xwm ntawv hais tias Es Lias yuav xub los tso?” Yes Xus teb tias “Yog. Es Lias yuav los, nws yuav kho ib puas tsav yam. Thiab kuv hais rau nej; Es Lias twb los lawm, tab sis lawv zeem tsis tau nws, lawv ua lwj ua liam rau nws raws lawv siab. Neeg Leej Tub kuj yuav raug lawv tsim ib yam nkaus.” Ces cov thwj tim thiaj to taub tias Yes Xus hais txog Zam Ntxuav Plig.

Lo lus ntuas.

Xam Phaj (XP 24: 2-7, 15-17a)

Npas Las Has tsa muag ntsia, nws pom cov His Xas Lais nyob ua tej pawg, raws lawv cov xeem. Tswv Ntuj lub tswv yim los nyob hauv nws, ces nws hais nws cov lus paj huam li no “Npas Las Has, uas yog Npes Os tub, nws tshaj nws cov lus. Tus uas pom tau hauv neeg nruab siab tshaj nws cov lus, tus mloog Tswv Ntuj hais, tshaj nws cov lus. Nws pom raws li Sas Dais pub nws pom, nws hnov Tswv Ntuj lo lus teb, ces nws qhov muag qhib los.” Yas Kos, koj cov tsev tsam phooj zoo tis ua zoo, His Xas Lais, koj tej tsev nyob zoo saib tas npaud! Zoo cuag li tej lub tiaj dav, cuag li tej lub vaj ntsuab xiab ntawm ntug dej, zoo cuag li tej hav tshuaj uas HUAB TAIS cog cia, zoo nkauj puav tam li cov ntoo ciab loj siab uas txawm nyob ze dej! Muaj ib tug thawj sawv hauv koj tsoom xeeb ntxwv los, nws yuav kav ntau haiv ntau xeem neeg . Koj tus vaj loj dua vaj As Nkas, nws lub hwj chim hlob zuj zus lawm. Kuv pom His Xas Lais tus Vaj, tab sis nws tseem tsis tau ua vaj tam sis no, kuv pom nws, tab sis nws tsis nyob ze. Ib lub hnub qub sawv hauv Yas Kos tuaj, ib rab cwj ua vaj sawv hauv His Xas Lais los.

Lub Moo Zoo Raws Li Mas Tais (MT 21: 23-27)

Yes Xus mus hauv lub Tuam Tsev Teev Ntuj. Thaum nws qhia sawv daws, cov thawj leej choj thiab pej xeem cov laus neeg txav los ze Yes Xus, lawv hais rau nws tias “Koj muaj cai qhov twg los, koj thiaj ua tej ntawd? Leej twg pub cai rau koj ua li ntawd?” Yes Xus teb lawv tias “Hos ntawm kuv, mas kuv kuj yuav nug nej ib los thiab. Yog nej teb kuv, kuv mam yuav qhia nej tias leej twg pub cai rau kuv ua li ntawd. Zam lub cim ntxuav tuaj qhov twg tuaj? Puas tuaj ntawm Ntuj tuaj los tuaj ntawm neeg tuaj?” Cov thawj leej choj thiab cov laus neeg xav tswv yim hauv siab tias “Yog peb hais tias ‘tuaj ntawm Ntuj tuaj’; nws yuav nug peb tias “Yog li, uas cas nej tsis ntseeg nws?” Hos yog peb hais tias ‘Tuaj ntawm neeg tuaj,’ peb kuj ntshai tsoom pej xeem, vim sawv daws saib Zam yog ib tug yaj saub.” Ces lawv teb rau Yes Xus li no “Peb tsis paub.” Yes Xus teb rau lawv tias “Kuv kuj ib yam, kuv tsis qhia nej tias kuv tau cai ntawm leej twg los ua tej ntawd.”

Lo lus ntuas.

Xos Fos Nias (XFN 3: 1-3, 9-13)

Yes Lus Xas Les, lub nroog ntxeev siab, lub nroog vuab tsuab, nroog quab yuam tib neeg, nws yuav raug txoj hmoov phem! Nws tsis tau mloog Tswv Ntuj lub suab hu nws. Nws tsis txais lo lus qhuab qhia nws. Nws tsis tau tso siab rau HUAB TAIS. Nws tsis tau txav los ze nws tus Tswv Ntuj. Yes Lus Xas Les cov vaj txheeb zoo li ib co tsov ntxhuav nyooj laws. Nws cov nom txiav txim zoo li ib co hma nrhiav ncauj hmo ntuj, thaum kaj ntug tsis tshuav dab tsi li. Muaj tiag! Kuv yuav ntxuav cov haiv neeg di ncauj kom huv, kom lawv tau tuav txog HUAB TAIS lub npe, kom lawv tau tsob hwb nws thiab txais nws tus quab. Cov teev kuv yuav hla cov dej nyob Nus Npias teb sab tid tuaj, lawv yuav nqa lawv cov txim tuaj txi rau kuv. Yes Lus Xas Les, hnub ntawd koj yuav tsis txaj muag ntxiv, txawm tias koj tau ua qhov phem rau kuv. Vim kuv yuav ntiab cov neeg muab hlob kom tawm hauv koj mus. Koj yuav tsis tau nyob piav yeev saum kuv lub roob ntshiab ntxiv. Cov neeg kuv yuav cia nyob hauv koj lub loog ntxiv yog ib haiv neeg tsis muab hlob, tsis khav theeb. Pab Seem His Xas Lais yuav nrhiav chaw vam khom nyob hauv HUAB TAIS lub npe. Pab Seem His Xas Lais yuav tsis coj kev nkhaus ntxiv. Lawv yuav tsis hais lus dag lawm. Yuav tsis pom ib tug nplaig nkhaus nyob hauv lawv ntxiv. Lawv yuav tau kev nog zaub, tau kev so. Tsis muaj leej twg yuav ua ntxhov lawv siab.

Lub Moo Zoo Raws Li Mas Tais (MT 21: 28-32)

Yes Xus hais tias “Nej sim hais saib, nej xav li cas. Ib tug neeg muaj ob tug tub. Nws hais rau thawj tug tias : “Me tub, hnub no koj mus ua num tom teb txiv cawv.” Tus tub ntawd teb tias “Kuv tsis xav mus.” Tab sis, ib me ntsis, nws khuv xim, ces nws cia li mus ua teb. Leej txiv kuj hais rau lwm tus tub ib yam li rau thawj tug thiab. Tus tub ntawd teb tias “Huab tais, kuv yuav mus.” Tab sis nws tsis mus. Ob tug tub no, tus twg tau ua raws li leej txiv xav kom ua?” Lawv teb tias “Yog thawj tug.” Yes Xus hais rau lawv tias “Kuv hais tseeb rau nej, cov sau se thiab cov niam ntiav xub mus hauv Ntuj lub Ceeb Tsheej dua nej. Vim tias, Zam tuaj qhia Txoj Kev ncaj rau nej, tab sis nej tsis ntseeg txog nws. Hos cov sau se, thiab cov niam ntiav ntseeg txog nws. Tab txawm nej pom lawv tus qauv zoo, tom qab no, nej kuj tsis hloov siab los ntseeg txog nws.”

Lo lus ntuas.

His Xais (HX 45: 6-8, 18, 21, 25)      

Kom txij hnub tuaj mus txog hnub poob, paub tias dhau kuv lawm mas tsis muaj dab tsi li. Kuv yog HUAB TAIS, tsis muaj dua lwm tus HUAB TAIS. Kuv puab qhov pom kev, kuv tsim qhov tsaus ntuj, kuv tsim kev noj qab nyob zoo, kuv tsim kev txom nyem. Kuv yog HUAB TAIS, kuv tsim tag txhua yam ntawd. Cuaj txheej ntuj, nej tso txoj kev ncaj nqes txheej saud los. Kom cov huab tso kev ncaj nqes los xws li dej nag. Kom lub ntiaj teb qhib plho, ces txoj kev cawm neeg yuav tawg paj, thiab kev yeej nthaw kaus. Kuv yog HUAB TAIS, kuv tau tsim tag txhua yam ntawd.

HUAB TAIS yog tus tsim cuaj txheej ntuj. Nws yog Tswv Ntuj, nws puab thiab txawb lub ntiaj teb. Nws tsis tau tsim lub ntiaj teb ua ntxhov quav niab. Nws puab lub ntiaj teb kom xis nyob. Nws hais tias “Kuv yog HUAB TAIS, tsis muaj lwm tus HUAB TAIS loj li kuv. His Xas Lais tsoom xeeb ntxwv yuav yeej thiab yuav nto koob meej nyob hauv HUAB TAIS.

Lub Moo Zoo Raws Li Lus Kas  (LK 7: 18-23)

Zam cov thwj tim qhia txhua yam ntawd rau Zam. Ces Zam hu nws ob leeg thwj tim, nws xa nkawd mus nug Huab Tais tias “Koj puas yog tus yuav tuaj, los peb yuav tos dua lwm tus?” Thaum ob tug thwj tim tuaj txog ntawm Yes Xus, nkawd hais tias “Zam Ntxuav Plig xa wb tuaj nug koj tias koj puas yog tus yuav tuaj, los peb yuav tos dua lwm tus?” Lub sij hawm ntawd, Yes Xus nyuam qhuav kho coob leej muaj txiab nkeeg, raug mob, raug dab phem, thiab nws ua kom ntau tus dig muag rov pom kev. Ces Yes Xus teb rau ob tug uas Zam xa tuaj tias “Neb rov mus qhia Zam txog qhov neb tau pom thiab tau hnov; cov dig muag rov pom kev, cov tuag ceg mus taus kev, cov mob ruas rov huv, cov lag ntseg hnov lus, cov tuag sawv rov los, hos lub Moo Zoo tuaj txog cov neeg pluag. Tus uas yuav tsis ntog vim kuv, mas nws txoj hmoov zoo.”

His Xais (HX 54: 1-10)

Yes Lus Xas Les, koj tsis muaj tub ki, koj tsis yug me nyuam, tab sis koj dhia daj dhia luag nqua suab zoo siab. Koj tsis tau paub kev mob plab, koj qw zoo siab mog! Vim tus uas luag tso pov tseg muaj tub coob dua tus muaj ib tug txiv. HUAB TAIS hais li ntawd. Koj ua koj lub tsev tsam phooj dav dua mas! Koj nthuav koj cov ntaub, koj txhob cuaj khaum, koj txuas koj cov hlua kom ntev, koj npuj cov tswg kom khov khov, vim koj yuav ri mus rau sab xis thiab sab laug. Koj tsoom xeeb ntxwv yuav muaj ib co kuj cuab ua lawv tug, lawv yuav mus nyob hauv tej lub nroog uas luag tau muab rhuav. Yes Lus Xas Les, koj tsis txhob txhawj, koj yuav tsis ntsib kev txaj muag, koj tsis txhob ntshai, koj yuav tsis poob tsim. Koj yuav hnov qab txoj kev txaj muag thaum koj yav hluas, koj yuav tsis nco txog txoj kev poob tsim thaum koj ua poj ntsuam. Vim koj tus txiv yog tus tsim koj. Nws lub npe yog tus HUAB TAIS Nyob Siab. Tus txhiv koj yog His Xas Lais tus Ntshiab, nws hu ua Tswv Ntuj kav lub ntiaj teb. Muaj tseeb! Koj tus plig nyob hauv txoj kev lwj siab, xws li tus poj niam uas luag tso pov tseg. HUAB TAIS rov hu koj. Tus Tswv Ntuj hais tias “Tus poj niam uas yus yuav thaum hluas, yus puas yuav ntiab tau nws? Kuv tso koj tseg ib nyuag me ntsis, tab sis kuv lub siab hlub koj heev, kuv rov sau koj. Kuv tau npau taws heev rau koj, kuv thiaj nraim kuv lub ntsej muag ib nyuag chim, tab sis kuv lub siab npuab koj mus tas ib txhis, kuv khuv leej koj. Tus HUAB TAIS txhiv koj, hais li ntawd. Thaum Nos Hes tseem nyob, kuv cog lus tias dej yuav tsis nyab ntiaj teb ntxiv. Nyem no, kuv rov cog lus zoo li ntawd, kuv yuav tsis npau taws rau koj, Yes Lus Xas Les kuv yuav tsis tso hem thawj rau koj. Cov roob txawj txav mus, cov hauv toj txawj vau, tab sis kuv lub siab npuab koj yuav tsis nrug deb koj, kuv kev cog lus nyob thaj yeeb yuav tsis ntshaus. Tus HUAB TAIS khuv leej koj hais li ntawd.”

Lub Moo Zoo Raws Li Lus Kas (LK 7: 24-30)

Thaum ob tug thwj tim Zam xa tuaj rov mus lawm, Yes Xus thiaj pib hais txog Zam rau tsoom sid tias “Nej tawm mus saib dab tsi hauv teb chaws suab puam? Puas yog nej mus nuam ib tsob tauj raug cua tshuab? Nej mus xyuas dab tsi? Nej puas mus xyuas ib tug neeg hnav tsoos tsuj tsoos npuag? Tab sis cov neeg hnav tsoos zoo nkauj thiab noj qab hnav zoo, mas lawv nyob hauv cov tuam tsev vaj ntxwv. Ua li nej mus xyuas dab tsi? Puas yog nej mus xyuas ib tug yaj saub? Muaj tseeb. Kuv hais rau nej, nws tseem loj dua ib tug yaj saub. Nws yog tus uas Ntawv sau tseg tias ntsia saib, kuv xa kuv tus tub tshaj xo mus ua koj ntej, nws yuav npaj txoj kev tom hauv ntej rau koj.
Kuv hais rau nej tias tas cov me nyuam uas yug ntawm tsoom poj niam los, tsis muaj ib tug loj dua Zam. Tsis kav tus me tshaj hauv Tswv Ntuj lub Ceeb Tsheej tseem loj dua Zam thiab. Tas tsoom neeg uas tau hnov Zam cov lus, tab txawm lawv yog neeg sau se, lawv lees tias Tswv Ntuj yog tus ncaj, vim lawv txais kab ke ntxuav ntawm Zam. Hos cov Fas Lis Xais thiab cov Kws Lij Choj muab Tswv Ntuj zaj tswv yim uas nws npaj rau lawv xyeeb pov tseg, lawv tsis kam txais Zam cov kab ke ntxuav.”

His Xais (HX 56: 1-8)

HUAB TAIS hais li no “Nej mloog kev kawm Txoj Cai, nej coj kev haum pheej mog! Kuv txoj kev cawm neeg tuaj yuav txog, kuv txoj kev yeej yuav tawm tuaj rau nej pom xyeem. Tus neeg txawj tuag ua li ntawd mas nws txoj hmoov zoo, leej tib neeg tus tub uas nyob khov kho hauv txoj kev ntawd mas nws txoj hmoov zoo, vim nws caiv hnub xas npas tos, nws hwm hnub xas npas tos, nws cheem nws txhais tes kom txhob ua ib yam hauj lwm phem. Tus pej kum neeg txhob hais tias ‘HUAB TAIS yuav ntiab kuv tawm hauv nws haiv neeg xwb!’ Tus neeg sam txhob hais tias ‘Ntsia saib! Kuv yog ib tsob ntoo qhuav.” Cov pej kum neeg tuaj cuag HUAB TAIS, kom lawv tsob hwb HUAB TAIS, kom lawv nyiam HUAB TAIS lub npe, lawv ciaj ua HUAB TAIS cov tub txib. Vim lawv caiv hnub Xas Npas Tos, thiab lawv nyob khov kho hauv txoj kev nrog kuv cog lus. Kuv yuav coj lawv mus saum kuv lub roob Ntshiab. Kuv yuav ua kom lawv zoo siab nyob hauv kuv lub tsev teev Ntuj. Kuv yuav zoo siab txais cov thaj hlawv tsiaj thiab txi Ntuj nyob saum kuv lub thaj txi Ntuj. Vim kuv lub tsev yuav hu ua txhua haiv neeg lub tsev teev Ntuj. Tus HUAB TAIS Tswv Ntuj uas rov sau cov His Xas Lais raug ntiab, nws ceeb toom tias  “Kuv yuav sau cov raug ntiab rov los ntxiv cov uas kuv twb sau tas lawm.”

Lub Moo Zoo Raws Li Zam (Z 5: 33-36)

Yes Xus hais rau lawv tias “Nej xa ib co tub coj xo mus cuag Zam. Zam ua tim khawv txog qhov tseem ceeb. 34 Kuv mas kuv tsis txais lus zeem tseeb ntawm ib tug neeg, kuv hais tej ntawd kom nej txais kev cawm. Zam yog lub teeb cig thiab ci tuaj, ces nej xyiv fab hom khaj ib ntus nyob hauv nws qhov pom kev. Kuv cov lus ua tim khawv loj dua Zam cov; yog cov hauj lwm Leej Txiv muab rau kuv ua, kuj yog tib co hauj lwm kuv ua no rov ua tim khawv txog kuv, thiab ua tim khawv tias yog Leej Txiv xa kuv tuaj.”

Hauv Paus (HP 49: 2, 8-10)

Yas Kos hu nws cov tub los, nws hais tias “Nej tuaj sib sau ua ke ntawm no, kuv yuav qhia nej txog tej yam uas yuav tshwm sim tuaj rau nej lub caij tom ntej. Yus Das, koj cov kwv tij yuav cav lus zoo txog koj, koj txhais tes yuav tuav rawv koj cov yeeb ncuab lub xwb qwb, hos koj txiv cov tub yuav khoov cev hwm koj. Yus Das yog ib tug thav tsov. Me tub, koj twb mus tom nqaij los, nws los so, nws pw zoo li ib tug tsov, nws tsiv li ib tug maum tsov, leej twg yuav muaj cuab kav tsa nws? Tus cwj ua vaj yuav tsis ncaim ntawm Yus Das txhais tes. Rab cwj tswj luag yuav tsis txav ntawm nws ko taw, mus txog thaum luag tuaj them se tas rau nws, thiab thaum tas txhia haiv neeg mloog nws lus.”

Lub Moo Zoo Raws Li Mas Tais (MT 1: 1-17)

Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub: Has Nplas Has yug His Xas Has, His Xas Has yug Yas Kos, Yas Kos yug Yus Das thiab nws cov kwv tij. Yus Das poj niam hu ua Thas Mas yug Fas Les thiab Ntxas Las. Fas Les yug Es Xas Los, Es Xas Los yug As Las, As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos, Xas Moos poj niam hu ua Las Has yug Npuag Oos, Npuag Oos poj niam hu ua Luv yug Os Npes, Os Npes yug Yes Xes, Yes Xes yug tus vaj Das Vis. Das Vis yuav Us Lis tus poj niam, nws yug Xas Los Moos, Xas Los Moos yug Los Npuag, Los Npuag yug As Npias, As Npias yug As Xas, As Xas yug Yos Xa Fas, Yos Xas Fas yug Yos Las, Yos Las yug Os Xias, Os Xias yug Yos As Thas, Yos As Thas yug As Kas, As Kas yug Es Xes Kias, Es Xes Kias yug Mas Nas Xes, Mas Nas Xes yug As Moos, As Moos yug Yos Xias, Yos Xias yug Yes Kos Nias thiab Yes Kos Nias cov kwv tij. Thaum ntawd yog lub caij raug txim nyob Npas Npis Los. Dhau lub caij raug txim nyob Npas Npis Los lawm, Yes Kos Nias yug Xas Las Thias, Xas Las Thias yug Ntxos Los Npas Npes, Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos, As Ntxos yug Xas Dos, Xas Dos yug As Khis, As Khis yug Es Lis Us, Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos, Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev. Tas cov tiam neeg huv tib si. Txij Has Nplas Has los txog Das Vis, muaj kaum plaub tiam; txij Das Vis los txog lub caij raug txim nyob Npas Npis Los, muaj kaum plaub tiam; txij lub caij raug txim nyob Npas Npis Los txog lub caij Leej Pleev tuaj, muaj kaum plaub tiam.

Lo lus ntuas.

Yes Les Mias (YLM 23: 5-8)

HUAB TAIS ceeb toom li no “Nej ntsia saib! Twb txog lub caij uas kuv yuav tsa ib tug kaus siab ncaj hauv Das Vis tsev neeg. Tus kaus ntawd yuav ua vaj nws yuav xyuam xim, nws yuav ua raws kev ncaj kev ncees nyob hauv lub teb chaws no. Lub caij nws ua vaj mas Yus Das teb yuav txais txoj kev cawm, His Xas Lais yuav tau nyob nyab xeeb. Lub npe uas luag yuav tis rau nws yog ‘HUAB TAIS, peb txoj kev ncaj.

Ntsia saib! Nyem no txog lub caij yuav tsis hais ntxiv tias ‘Tus HUAB TAIS muaj txoj sia coj tsoom tub ki His Xas Lais nyob nram Hais Nkws Tos teb rov los.’ Tab sis sawv daws yuav hais tias ‘Tus HUAB TAIS muaj txoj sia sau His Xas Lais tsev neeg uas nyob teb chaws pej fab thiab nyob txhua teb chaws uas lawv raug luag caum kom lawv rov los nyob khov kho hauv lawv thaj av.”

Lub Moo Zoo Raws Li Mas Tais (MT 1: 18-24)

Yes Xus Pleev lub keeb chiv zoo li no; Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias “Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. Nws yuav yug ib tug tub, koj yuav tis nws npe hu ua Yes Xus vim nws yuav cawm nws haiv neeg ntawm lawv cov txhaum.” Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias Tswv Ntuj nrog peb nyob. Thaum Yos Xes tsim los, nws ua raws li Huab Tais tus Tshiab qhia rau nws; nws coj nws poj niam los nyob hauv nws tsev.

Lo lus ntuas.

Txwj Laus Tiv Thaiv (TLTT 13: 2-7, 24-25)

Muaj ib tug txiv neej xeem Daas nyob Kos Les As, nws hu ua Mas Nos As. Nws poj niam tsis muaj me nyuam. HUAB TAIS tus Tshiab tuaj xyuas tus poj niam thiab hais rau nws tias “Koj tsis tau muaj me nyuam. Tab sis, nyem no, koj yuav ceev faj. Koj yuav tsis txhob haus cawv txiv ntoo los cawv txhuv, tsis txhob noj tej yam tsis huv. Koj yuav xeeb tub, koj yuav yug ib tug tub. Koj yuav tsis txhob chais nws plaub hau ib zaug li. Tus me nyuam ntawd, txij nruab thiab los, nws yuav ua Tswv Ntuj ib tug Nas Ntxis. Yog nws yuav cawm cov His Xas Lais ntawm cov Fis Lis Tis.” Tus poj niam thiaj mus hais rau nws tus txiv tias “Tswv Ntuj ib tug neeg tau hais lus rau kuv. Zoo li yog ib tug Tshiab, vim nws tus yam ntxwv muaj hwj chim kawg. Kuv tsis tau nug nws tias nws tuaj qhov twg tuaj. Nws tsis tau qhia nws npe rau kuv paub. Tab sis nws hais rau kuv tias koj yuav xeeb tub, koj yuav yug ib tug tub. Mas koj yuav txhob haus cawv txiv ntoo los cawv txhuv li. Tsis txhob noj tej yam tsis huv. Koj tus me nyuam, txij nruab thiab los, nws yuav ua Tswv Ntuj ib tug Nas Ntxis mus txog hnub tuag!”
Tus poj niam yug tau ib tug tub, nws tis npe hu ua Xas Xoos. Tus tub hlob zuj zus. HUAB TAIS pub txoj hmoov zoo rau nws. HUAB TAIS lub tswv yim tuaj tshoj nws nyob hauv lub yeej Daas uas nyob ib nrab ke ntawm Xos Les As mus rau Es Tas Os.

Lub Moo Zoo Raws Li Lus Kas (LK 1: 5-25)

Lub zim txwv Hes Los ua vaj kav Yus Das teb, muaj ib tug Leej Choj hu ua Ntxas Kas Lias, nws yog phiaj Leej Choj As Npias. Nws poj niam hu ua Es Lis Xas Npes, yog As Loos ib tug ntxhais xeeb ntxwv. Nkawd ob niam txiv yog neeg ncaj nyob ntawm Tswv Ntuj xub ntiag. Nkawd ua raws nraim li Huab Tais cov lus qhia thiab cov cai tas huv si, tsis muaj ib qho xyeej. Nkawd tsis muaj me nyuam li, vim Es Lis Xas Npes xeeb tub tsis tau, thiab nkawd hnub nyug kuj laus lawm. Muaj ib hnub, Ntxas Kas Lias tab tom leg Leej Choj txoj kab xwm nyob ntawm Tswv Ntuj xub ntiag, vim txog lub caij nws phiaj Leej Choj rov leg kab xwm. Lawv ntaus txheeb raws li cov Leej Choj kev cai ua kam, ces Ntxas Kas Lias raug ua tus chaws mus hlawv xyab hauv Huab Tais Kem Ntshiab. Lub caij hlawv xyab, tas tsoom pej xeem teev Ntuj nyob sab nraud. Huab Tais tus Tshiab tawm tuaj sawv ntsug nyob ntawm lub thaj xyab sab xis rau nws pom. Ntxas Kas Lias pom dheev, nws ua siab nphau npog, nws ntshai kawg. Tab sis tus Tshiab hais rau Ntxas Kas Lias tias “Ntxas Kas Lias, koj txhob ntshai, vim Ntuj mloog koj cov lus thov. Koj poj niam Es Lis Xas Npes yuav yug ib tug tub rau koj, koj yuav tis nws npe hu ua Zam. Nws yuav ua kom koj kaj siab thiab zoo siab tas nrho. Thaum nws yug los, coob leej kuj yuav zoo siab. Vim nws yuav yog ib tug loj nyob ntawm Huab Tais xub ntiag. Nws yuav tsis haus kua txiv cawv, tsis haus cawv ntsim. Txij nruab thiab los, Leej Ntuj Plig Ntshiab yuav nyob puv hauv nws. Nws yuav coj coob leej tub His Xas Lais rov los rau Huab Tais, lawv tus Tswv Ntuj. Nws yuav taug kev mus ntawm Huab Tais hauv ntej. Nws yuav tau Es Lias lub tswv yim thiab lub hwj huam, kom nws coj cov ua txiv lub siab rov los rau lawv cov me nyuam, coj cov neeg qig lus rov los taug cov neeg ncaj txoj kev thoob tsib. Nws yuav npaj ib haiv neeg qhib siab lug tos Huab Tais.”
Ntxas Kas Lias hais rau tus Tshiab tias “Dab tsi yuav ua kom kuv paub tias yuav muaj tuaj li ntawd? Vim kuv yog ib tug neeg laus, hos kuv poj niam kuj muaj hnub nyoog lawm.” Tus Tshiab teb tias “Kuv yog Nkas Nplias. Kuv sawv nraim ntawm Tswv Ntuj xub ntiag. Nws xa kuv tuaj hais lus rau koj thiab fi tsab xov zoo no rau koj. Vim koj tsis ntseeg kuv cov lus uas thaum txog sij hawm yuav tsheej xeeb, mas koj yuav nyob ntsiag to hais tsis tau lus mus txog hnub tej xwm ntawd tshwm sim tuaj.” Tsoom pej xeem tos Ntxas Kas Lias, lawv xav tsis thoob tias vim li cas Ntxas Kas Lias thiaj nyob ntev hauv kem ntshiab. Thaum nws tawm los, nws hais tsis tau lus rau lawv, ces lawv to taub tias nyob hauv kem ntshiab nws tau pom ib yam yees tawm tuaj. Ntxas Kas Lias piav tes rau lawv, nws hais tsis tau lus. Thaum tas nws lub sij hawm leg kab xwm lawm, ces nws rov mus tsev. Tsis ntev tom qab, Ntxas Kas Lias poj niam Es Lis Xas Npes xeeb tub. Es Lis Xas Npes tsiv nraim nyob hauv tsev tau tsib hlis. Nws hais tias “Huab Tais ua qhov no rau kuv, txog caij nws dauv muag ntsia kuv, nws thau kuv txoj kev txaj muag ntawm zeej tsoom.”

His Xais (HX 7: 10-14)

HUAB TAIS kom His Xais rov mus hais rau As Kas “Koj thov koj tus HUAB TAIS Ntuj kom nws ua ib lub cim rau koj nyob puag hauv qab ntuj txias teb tsaus, los nyob saum cov chaw siab, puag saum ub.” As Kas hais tias “Kuv yuav tsis thov. Kuv yuav tsis sim HUAB TAIS.” His Xais hais tias “Das Vis tsev neeg, nej mloog mas! Nej ua kom tej tib neeg sab tas nrho, los tsis txaus nej siab! Nej tseem yuav ua kom Tswv Ntuj sab thiab. Vim li ntawd, Huab Tais yuav pub ib lub cim rau nej. Nej ntsia saib! Tus poj niam hluas xeeb tub lawm. Nws yuav yug ib tug tub. Nws yuav tis npe rau nws tus tub hu ua Es Mas Nus Es.

Lub Moo Zoo Raws Li Lus Kas (LK 1: 26-38)

Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab. Tus Tshiab chaws mus hauv Mab Liab tsev, nws hais rau Mab Liab tias “Koj nyob kaj lug, tus tau txiaj ntsim puv siab! Huab Tais nrog koj nyob.” Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. Tus Tshiab hais rau Mab Liab tias “Mab Liab, koj tsis txhob ntshai. Tswv Ntuj saib koj ntxim Tswv Ntuj siab. Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg.”
Mab Liab hais rau tus Tshiab tias “Qhov ntawd yuav muaj tuaj zoo li cas, vim kuv tsis paub ib tug txiv neej.” Tus Tshiab teb rau Mab Liab tias “Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. Saib! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau.” Ces Mab Liab hais tias “Kuv yog Huab Tais tus ntxhais txib. Kuv xav kom muaj raws li koj hais.” Tus Tshiab thiaj tso Mab Liab tseg.

Kwv Txhiaj (KwT 2: 8-14)

Kuv hnov tus kuv hlub! Saib! Nws tuaj lawm! Nws dhia hla toj roob hauv pes khiav tuaj. Tus kuv hlub zoo puav tam li tus kauv, puav tam li tus muas lwj. Ntsia saib! Nws tuaj sawv nraum ntsa loog. Nws xauj nraum qhov rais tuaj. Nws nyob nraum laj kab ntsia ntsoov tuaj. Tus kuv hlub tsa suab hais rau kuv tias “Koj sawv tsees! Kuv leej muam zoo nkauj! Los mas! Nyem no lub caij ntuj no dhau lawm, nag twb tu lawm. Paj tawg puv tas lub teb chaws. Yog lub caij seev lus paj lus taum. Tus nquab tsug twb pib quaj hauv peb cov teb tuaj. Cov txiv cev ua cos ntsuab vog, cov paj txiv cawv tsw qab ntxiag. Sawv tsees los mas! Kuv leej muam zoo nkauj, sawv los! Kuv me nkauj nquab, koj los hauv cov qhov tsua, hauv tej toj ntxhab. Cev koj lub ntsej muag los rau kuv pom yuad! Pub kuv hnov koj lub suab mas! Koj lub suab zoo mloog, koj lub ntsej muag zoo nyiam!”

Lub Moo Zoo Raws Li Lus Kas (LK 1: 39-45)

Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. Ces Es Lis Xas Npes tsa suab hlo hais nrov nrov tias “Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. Ua cas Ntuj thiaj pub kom kuv tus Huab Tais leej niam tuaj xyuas kuv? Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo!”

Xas Muas, Phau Ib (1 XM 1: 24-28)

Thaum tus me nyuam txawj noj mov lawm, As Nas coj nws mus hauv HUAB TAIS lub tsev txi Ntuj uas nyob Xis Laus. As Nas cab ib tug heev nyuj muaj peb xyoos, ib tawb hmoov nplej thiab ib hwj cawv nrog. Lawv muab tus heev nyuj tua txi Ntuj tas ces As Nas mus hauv Es Lis tsev. Nws hais tias “Txiv tswv, kuv yog tus poj niam uas tau txhos caug nyob ze koj ntawm no thov HUAB TAIS. Thaum ntawd kuv thov kom Ntuj pub tus me nyuam no rau kuv. HUAB TAUS tau mloog kuv lo lus thov. Mas nyem no kuv tso tus me nyuam no rau HUAB TAIS kom nws nrog HUAB TAIS mus txog hnub tuag. Kuv muab nws rau HUAB TAIS.” Ces tus poj niam cia tus me nyuam nyob ntawd, nws muab pub rau Tswv Ntuj.

Lub Moo Zoo Raws Li Lus Kas (LK 1: 46-56)

Mab Liab hais tias “Kuv tus plig cav txog Huab Tais lub hwj chim, kuv lub tswv yim hom khaj nyob hauv Tswv Ntuj, tus Cawm kuv, vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, vim tus Muaj Hwj Huam ua tej yam loj rau kuv, nws lub npe Ntshiab. Nws lub siab hlub roos cov neeg hwm nws tiam dhau tiam. Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg. Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis.” Mab Liab nrog Es Lis Xas Npes nyob peb lub hlis tej, ces nws rov mus tsev.

Mas Las Kis (MLK 3: 1-4)

Kuv yuav xa kuv tus tub tshaj xov mus tho kev ua kuv ntej. Ib sij huam, tus Huab Tais uas nej nrhiav nws yuav chaws los hauv nws kem tsev ntshiab. Tus Tshiab tuav lo lus cog uas nej nyiam nws tuaj txog ntawd lawm! Yog tsoom tub rog tus HUAB TAIS hais li ntawd. Hnub nws tuaj txog, leej twg yuav nyob taus? Thaum nws yuav tawm tuaj leej twg yuav sawv taus ntsug tos nws? Nws yuav zoo li tus nchuav hlau cov hluav taws. Nws zoo li tshuaj ntxhua khaub ncaws. Nws yuav tuaj nchuav nyiaj kom huv tuaj. Nws yuav ua kom Les Vis cov tub huv tuaj, ib yam nchuav kub thiab nchuav nyiaj kom tau cov tseem kub tseem nyiaj. HUAB TAIS yuav saib lawv yog cov cev thaj txi Ntuj raws kev ncaj. Ces HUAB TAIS yuav pom zoo txais Yus Das thiab Yes Lus Xas Les thaj txi Ntuj ib yam li lub hauv paus thaud.

Lub Moo Zoo Raws Li Lus Kas (LK 1: 57-66)

 Ntawm Es Lis Xas Npes, mas txog lub caij nws daws cev, nws yug tau ib tug tub. Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes loj kawg. Lawv nrog Es Lis Xas Npes zoo siab. Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe raws li nws txiv Ntxas Kas Lias lub npe. Nws niam hais tias “Tsis yog. Tus me nyuam yuav hu ua Zam.” Lawv hais rau leej niam tias “Tsis muaj ib tug hauv koj cov txheeb ze hu li ntawd.” Ces lawv piav tes rau leej txiv saib nws xav kom lawv tis tus me nyuam npe li cas. Leej txiv kom lawv muab ib daim txiag los, nws sau ntawv tias “Nws lub npe hu ua Zam.” Sawv daws ceeb tas. Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. Tsoom neeg nyob ze nkawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. Cov uas tau hnov luag tham txog tej xwm no, muab khaws cia rau nruab siab, lawv hais tias “Tus me nyuam ntawd yuav yog ib tug zoo li cas?” Huab Tais txhais tes yeej nrog nraim tus me nyuam ntawd tiag.

Xas Muas, Phau Ob (2XM 7: 1-5, 8-12, 14, 16)

Thaum Das Vis tuaj nyob hauv nws tsev thiab HUAB TAIS pab nws rhuav cov yeeb ncuab nyob ib ncig ntawm nws tib si, ces tus vaj Das Vis hais rau tus Yaj Saub Nas Taas tias “Koj ntsia saib ! Kuv nyob hauv ib lub tsev ntoo faj khaum, hos Tswv Ntuj lub Xab Cog Lus nyob hauv ib lub Tsev Tsam Phooj xwb!” Nas Taas teb rau tus vaj tias “Koj ua raws li koj siab nyiam, vim HUAB TAIS nrog koj nyob.” Hmo ntawd, Nas Taas hnov Tswv Ntuj lo lus no “Koj mus hais rau kuv tus tub txib Das Vis tias HUAB TAIS hais li no; Puas yog koj yuav txhim ib lub tsev rau kuv nyob txawm hauv? Nas Taas, nyem no koj mus hais rau kuv tus tub txib Das Vis tias “HUAB TAIS Xas Npas Os hais li no; kuv yog tus tau rho koj hauv cov tshav zaub thiab hauv nruab nrab pab yaj los tsa ua tus tswv saib kuv tsoom pej xeem His Xas Lais. Kuv tau nrog koj ua tas puas tsav yam hauj lwm. Kuv tau rhuav koj cov yeeb ncuab tib si nyob ntawm koj xub ntiag. Kuv yuav pub kom koj lub npe nto moo loj cuag li cov vaj loj tshaj nyob thoob tas ntiaj teb. HUAB TAIS yuav ua kom koj loj. HUAB TAIS yuav tsim ib tsev neeg los pub rau koj. Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb. Kuv yuav ua nws txiv, nws yuav yog kuv leej tub. Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.”

Lub Moo Zoo Raws Li Lus Kas (LK 1: 67-79)

Leej Ntuj Plig Ntshiab los nyob puv hauv tus me nyuam leej txiv Ntxas Kas Lias. Ntxas Kas Lias ua yaj saub hais tias “His Xas Lais tus Huab Tais Tswv Ntuj nto koob meej, vim nws tuaj xyuas thiab tuaj npo nws haiv neeg. Nws tsa ib txog kev cawm muaj zog rau peb nyob hauv nws tus tub txib Das Vis tsev neeg. Nws ua raws li nws kom cov yaj saub ntshiab txheej thaud xub qhia tias nws yuav cawm peb ntawm peb cov yeeb ncuab, thiab ntawm cov neeg ntxub peb txhais tes. Nws tau hlub peb cov yawg koob. Nws nco ntsoov txog cov lus ntshiab nws nrog lawv cog, nws nco ntsoov txog lo lus nws cog rau peb txiv Has Nplas Has tias nws yuav ua kom peb txhob ntshai, nws yuav npo peb ntawm peb cov yeeb ncuab txhais tes, peb thiaj tau kev tsob hwb nws hauv txoj kev ntshiab thiab txoj kev ncaj nyob ntawm nws xub ntiag tas peb sid. Hos koj, me tub, luag yuav hu koj ua Leej Nyob Siab tus yaj saub. Koj yuav mus tom Huab Tais hauv ntej, koj yuav npaj nws txoj kev. Koj yuav qhia nws haiv neeg paub txoj kev cawm, uas tawm ntawm txoj kev zam txhaum los. Peb tus Tswv Ntuj lub siab hlub mos nyoos, nws xa lub hnub saum txheej siab tuaj xyuas peb. Nws kaj cov neeg zaum hauv qhov tsaus ntuj thiab cov nyob hauv kev tuag tus duab ntxoo. Nws hwj peb txhais taw mus taug txoj kev thaj yeeb.”

Cov lus nyob hauv ntawv Hauv Paus (HP 2: 7-9, 3: 1-7)
HUAB TAIS Tswv Ntuj muab av luaj los puab ua tib neeg. Nws tshuab ib pas muaj sia rau hauv tib neeg qhov ntswg, ces tib neeg sawv ua ib tug ciaj sia. HUAB TAIS Tswv Ntuj cog tau ib lub vaj nyob Es Dees, nyob sab hnub tuaj; nws muab tus txiv neej uas nws tau puab tso rau hauv lub vaj ntawd. HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv av tuaj; tus ntoo muaj txoj sia tuaj nyob hauv nruab nrab lub vaj, ces tus ntoo paub qhov zoo qhov phem kuj tuaj thiab. Tus nab yog tus ntse lim hiam tshaj tas txhua hom tsiaj nyob nruab nrag uas HUAB TAIS Tswv Ntuj tau tsim los. Nab hais rau tus poj niam tias “Li ntawd, Tswv Ntuj hais tias neb yuav tsis txhob noj ib lub txiv ntoo hauv lub vaj no li, puas yog?” Tus poj niam teb rau tus nab tias “Wb noj tau cov txiv txi saum cov ntoo hauv lub vaj no tib si. Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias neb tsis txhob noj, tsis txhob kov, yog neb noj neb kov, mas neb yuav tuag.” Tus nab teb ntua tus poj niam tias “Tsis muaj li ntawd ib zaug! Neb yuav tsis tuag. Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.” Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws muab rau nws tus txiv uas nrog nws nyob, ces tus txiv kuj noj thiab, ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los xaws ua tiab hnav.

Paj Lug tsab ntawv xa mus rau cov ntseeg nyob Los Mas (LM 5: 12-19)
Kwv tij sawv daws, yog tim ib tug neeg xwb, mas kev txhaum tau tshwm los nyob ntiaj teb no, ces kev txhaum coj kev tuag los. Txoj kev tuag raug tas ib zeej tsoom, vim sawv daws ua txhaum. Kev txhaum xub tshwm los nyob ntiaj teb ua ntej Txoj Cai, tab sis thaum tsis tau muaj Txoj Cai, mas kev txhaum tsis muab txim rau yus. Txij As Das los txog Mais Xes, kev tuag ua vaj kav sawv daws: Tab yog cov neeg uas tsis tau ua txhaum zoo nkaus li As Das ua, los kev tuag yeej ua vaj kav lawv, vim As Das yog tus duab qhia txog tus yuav tuaj. Tab sis Ntuj cov paj tshab tsis zoo li kev txhaum; yog tias ib tug neeg xwb tau ua txhaum, ces tas zeej tsoom tuag, mas Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev tib leeg, haj yam ntws ntau los rau zeej tsoom.  Ntuj cov paj tshab tsis zoo li lub txim tawm ntawm qhov txhaum uas ib tug neeg tau ua. Vim ib tug neeg xwb ua txhaum, mas txoj kev txiav txim ua kom tas zeej tsoom poob rau  kev raug txim; tab sis Ntuj cov paj tshab ua kom cov neeg uas  tau ua ntau yam txhaum ncaj tuaj. Yog tias ib tug neeg tau ua txhaum, kev tuag thiaj tau ua vaj vim tus ntawd tib leeg, mas cov neeg uas txais txiaj ntsim ntau thiab txais cov paj tshab ntawm kev ncaj,  haj yam yuav ua vaj nyob hauv txoj sia, vim Yes Xus Pleev tib leeg.  Li ntawd, yog ib tug neeg qhov txhaum pus tas ib zeej tsoom mus raug txim; mas ib tug neeg  cov hauj lwm ncaj kuj coj kev ncaj rau tas ib zeej tsoom kom tau txoj sia thiab. Vim ib tug neeg tsis mloog lus, ces tas zeej tsoom thiaj ua neeg txhaum. Li ntawd, kuj yog vim ib tug neeg mloog lus, mas tas zeej tsoom thiaj tau ua neeg ncaj.

Lub Moo Zoo raws li Mas Tais (MT 4: 1-11)
Thaum ntawd, Leej Ntuj Plig coj Yes Xus mus rau teb chaws suab puam kom raug dab phem ntxias. Yes Xus yoo mov tau plaub caug hnub plaub caug hmo, mas nws tshaib plab.   Ces niag ntxias neeg txav los, nws hais rau Yes Xus tias “Yog tias koj yog Tswv Ntuj Leej Tub no, koj hais kom cov pob zeb no txia ua mov!” Yes Xus teb tias “Ntawv sau cia tias neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug siav thiab.” Dab phem tseem coj Yes Xus nrog nws mus hauv lub Nroog Ntshiab, ces dab phem coj Yes Xus mus tso puag saum lub ruv Tuam Tsev Teev Ntuj, dab phem hais tias “Yog tias koj yog Tswv Ntuj Leej Tub no, koj dhia lawm puag hauv, vim Ntawv sau cia tias Ntuj yuav txib nws cov Tshiab tuaj pab koj, kom lawv nqa koj nyob hauv lawv txhais tes, kom koj txhais taw txhob dawm ib lub pob zeb li.” Yes Xus hais rau dab phem tias “Ntawv tseem sau cia tias:  Koj yuav tsis txhob ntxias Huab Tais, koj tus Tswv Ntuj.” Dab phem tseem coj Yes Xus mus txog saum ib lub roob siab siab. Nws taw cov ceeb tsheej nyob ntiaj teb uas muaj koob meej tas tib si rau Yes Xus. Nws hais rau Yes Xus tias “Yog koj txhos caug, khoov pe hawm kuv, mas kuv yuav muab tej ntawd tas huv si rau koj.” Yes Xus hais rau dab phem tias “Xas Tas, koj khiav mus! Vim Ntawv sau cia tias tus koj yuav pe hawm, yog koj tus Huab Tais Tswv Ntuj. Koj yuav teev hawm nws tib leeg xwb.” Dab phem thiaj tso Yes Xus tseg, ces cov Tshiab txav los, lawv tsob hwb Yes Xus.

Lo lus ntuas.

Cov lus nyob hauv ntawv Les Vis (LV 19: 1-2, 11-18)
HUAB TAIS hais rau Mais Xes tias “Koj yuav hais rau tsoom tub ki His Xas Lais tias nej yuav ua neeg ntshiab, vim kuv yog nej tus HUAB TAIS, nej tus Tswv Ntuj, kuv yog Tus Ntshiab. Nej yuav tsis txhob ntxub nej tus kwv tij nyob hauv koj nruab siab. Nej yuav qhuab qhia tus uas nrog nej ua ib haiv neeg, nej thiaj yuav tsis tau ris nws qhov txhaum. Nej yuav tsis txhob rob caub thiab yuav tsis txhob chim ntev rau tus uas nws yog nej haiv neeg. Nej yuav nyiam tus nyob ze nej ib yam li nej nyiam nej. Vim kuv yog HUAB TAIS.

Lub Moo Zoo raws li Mas Tais (MT 25: 31-46)
Yes Xus hais rau cov thwj tim tias “Thaum Neeg Leej Tub yuav rov los, nws yuav muaj koob meej. Tas tsoom Tshiab yuav nrog nws los. Nws yuav zaum saum nws lub theej kiab muaj koob meej. Tas ib tsoom haiv neeg yuav sib sau nyob ntawm nws xub ntiag. Nws yuav cais tsoom neeg xws li tus zov yaj cais cov yaj ntawm cov tshis. Nws yuav cia cov yaj rau ntawm nws sab xis, cia cov tshis rau ntawm nws sab laug. Ces tus Vaj yuav hais rau cov nyob sab xis tias ‘Nej los mog! Nej yog cov uas kuv Txiv pub txoj hmoov zoo rau. Nej txais lub Ceeb Tsheej uas Ntuj npaj tseg rau nej txij puag thaum pib tsim lub sim ceeb los ua nej tug. Vim tias kuv tshaib plab, nej pub rau kuv noj; kuv nqhis dej, nej pub rau kuv haus, kuv yog ib tug pej kum neeg, nej txais kuv; kuv liab qab, nej muab rau kuv hnav; kuv mob, nej tuaj xyuas kuv; kuv nyob hauv tsev loj faj, nej tuaj tsham kuv.”

Lo lus ntuas.

Cov lus nyob hauv ntawv His Xais (HX 55 :10-11)
HUAB TAIS hais tias “Cov nag, cov daus uas poob saum ntuj los, yog lawv tsis tau pub dej rau ntiaj teb haus, mas lawv tsis rov mus saum ntuj. Cov nag thiab cov daus ua kom cov noob lwj thiab nthaw kaus, ua kom lub ntiaj teb txi txiv rau tus tseb, pub mov rau neeg noj, ces cov nag mam rov mus lawm saum ntuj. Cov lus tawm ntawm kuv lub ncauj los kuj zoo li ntawd thiab. Nws tsis tau ua hauj lwm, mas nws tsis rov los cuag kuv. Kuv lo lus tsis tau leg qhov kuv xav, mas nws tsis rov los cuag kuv. Kuv lo lus tsis tau ua tiav qhov kuv xa nws mus ua, mas nws tsis rov los cuag kuv.”

Lub Moo Zoo raws li Mas Tais (MT 6: 7-15)
Yes Xus hais rau cov thwj tim tias “Thaum nej teev Ntuj, nej txhob ntuas mus ntuas los zoo li cov neeg teev dab; cov neeg teev dab xav tias yog lawv hais lus ntau, mas dab yuav mloog lawv zoo dua. Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nws twb xub paub lawm. Nej yuav teev Ntuj zoo li no ‘Peb Txiv nyob saum ntuj, koj lub Npe ntshiab nto moo lug. Koj lub Ceeb Tsheej los txog. Kom muaj raws li koj nyiam nyob ntiaj teb no li nyob saum ntuj. Thov koj pub mov txaus peb noj hnub no. Koj zam peb cov nuj nqis zoo li peb zam rau cov tshuav nqi ntawm peb. Koj txhob tso peb raug kev ntxias. Thov koj npo peb dim ntawm kev phem.’ Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab. Hos yog nej tsis zam txhaum rau luag, mas nej Txiv kuj yuav tsis zam rau nej.”

Cov lus nyob hauv ntawv Yos Nas (YN 3: 1-10)
HUAB TAIS lub suab nrov tuaj rau Yos Nas yog zaum ob tias “Yos Nas, koj yuav mus kom txog lub tuam tsheej Nis Nis Vas. Tej lus uas koj yuav hais rau lawv mas kuv mam qhia rau koj hais.” Yos Nas mloog HUAB TAIS lus. Yos Nas sawv kev tsees mus lawm Nis Nis Vas. Lub tsheej Nis Nis Vas yog ib lub tsheej loj thiab zoo saib. Yuav mus peb hnub thiaj hla dhau lub tsheej. Yos Nas mus txog, nws mus ib hnub kev nws thiaj tuaj txog hauv plawv tsheej. Nws hais rau sawv daws tias “Tshuav plaub caug hnub, mas lub tsheej Nis Nis Vas yuav raug rhuav tas.” Tam sim ntawd, cov neeg nyob Nis Nis Vas ntseeg Tswv Ntuj. Ces lawv ceeb toom rau tsoom sid tias “Tsis hais tus laus los tus hluas, tus hlob los tus yau, sawv daws yuav yoo mov thiab hnav ntaub tsaj them txim.” Thaum tus vaj kav lub tsheej Nis Nis Vas tau hnov cov lus ntawd, nws sawv ntawm nws lub theej kiab mus hle nws tej ris tsho muaj hwj chim ua vaj tseg. Nws muab ntaub tsaj los hnav, nws mus zaum hauv qhov tshauv. Tus vaj hais ib lo lus ceeb toom rau cov neeg nyob hauv lub tsheej Nis Nis Vas tias “Tej neeg, tej tsiaj txhu, cov hlob, cov yau sawv daws yuav tsis txhob noj tsis txhob haus li. Tus twg kuj yuav hnav ntaub tsaj ntaub ntxhib thiab yuav hu txog Tswv Ntuj tas zog. Tsis hais leej twg, nyias yuav tso nyias txoj kev txhaum pov tseg tas huv si. Tus twg los yuav tsis txhob ua ib qhov txhaum ntxiv, nyaj tej zaus Tswv Ntuj siab yuav nqig, ces peb sawv daws yuav tsis tuag.” Tswv Ntuj pom cov neeg nyob Nis Nis Vas muab siab rau tso txoj kev txhaum tseg tig los yuav lub siab tshiab, ces Tswv Ntuj hloov siab, nws tsis nplua lub tsheej Nis Nis Vas.

Lub Moo Zoo raws li Lus Kas (LK 11: 29-32)
Thaum tej pab neeg coob coob tuaj sib txiv nyob ua ke, Yes Xus pib hais lus li no “Tiam neeg no yog ib tiam neeg phem. Lawv taij ib lub cim, tab sis lub cim lawv yuav pom kawg yog Yos Nas lub cim xwb. Vim tias Neeg Leej Tub yog ib lub cim rau tiam neeg no, xws li Yos Nas yog ib lub cim rau cov neeg nyob Nis Nis Vas. Hnub txiav txim, tus poj vaj nyob Naj Fab yuav nrog tiam neeg no sawv, nws yuav muab txim rau tiam neeg no, vim nws tuaj puag tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos! Hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thov txhaum, hos nyob ntawm no twb muaj tus loj dua Yos Nas!”

Cov lus nyob hauv ntawv Es Thes (ET 14: 3-5, 12-14)
Es Thes thov His Xas Lais tus HUAB TAIS Tswv Ntuj li no “HUAB TAIS, koj tib leeg yog peb tus Vaj ! Thov koj tuaj pab kuv mas! Vim kuv nyob kuv ib leeg xwb, kuv tsuas vam txog koj tuaj pab kuv. Txog lub caij kuv yuav tuag los kuv txoj sia yuav dim, los kuv tsis paub! HUAB TAIS, thaum kuv tseem nyob hauv kuv niam xub ntiag kuv twb tau kawm tias yog koj xaiv His Xas Lais nyob hauv tas txhia haiv neeg los, yog koj xaiv peb cov yawg koob nyob hauv lawv cov neeg txheej thaud los kom lawv ua koj tug mus li. Koj tau qhia tau coj lawv xws li koj yeej ib txwm cog lus. HUAB TAIS, nyem no peb raug txom nyem, thov koj nco ntsoov tuaj pab peb! Thov koj txhab zog rau kuv. HUAB TAIS Tswv Ntuj, uas koj lub hwj chim kav tas txhia leej muaj hwj chim. Thaum kuv nyob ze tus tsov, thov koj pub tswv yim rau kuv kom kuv txawj hais lus ua kom tus tsov siab nqig. Thov koj ua kom nws lub siab tig mus ntxub peb tus yeeb ncuab, kom peb tus yeeb ncuab nrog nws cov neeg lawv sawv daws ploj mus. Thov koj cev tes tuaj cawm peb. HUAB TAIS, koj tuaj pab kuv, vim kuv nyob kuv ib leeg xwb, kuv tsuas tshuav koj ib leeg xwb yog tus yuav tuaj pab kuv.

Lub Moo Zoo raws li Mas Tais (MT 7: 7-12)
Yes Xus hais rau cov thwj tim tias “Nej thov, ces nej yuav tau txais, nej nrhiav, ces nej yuav ntsib, nej khob qhov rooj, ces luag yuav qhib rau nej. Vim tias leej twg thov, nws yuav tau txais; leej twg nrhiav, nws yuav ntsib; leej twg khob qhov rooj, mas yuav muaj tus qhib qhov rooj rau nws. Nej leej twg tus tub taij mov, nej puas yuav muab ib lub pob zeb rau nws noj? Yog nej tus tub taij ib tug ntses, nej puas yuav muab ib tug nab rau nws? Txawm tias nej yog neeg phem, tsis kav nej txawj pub tej yam zoo rau nej cov me nyuam. Li ntawd nej Txiv nyob saum ntuj haj yam txawj pub qhov zoo tshaj rau cov neeg thov nws. Tas ib puas tsav yam uas nej xav kom luag ua rau nej, mas nej yuav xub ua rau luag. Txoj Cai thiab cov Yaj Saub qhia li ntawd.”

Cov lus nyob hauv ntawv Es Xes Kias (EXK 18: 21-28)
HUAB TAIS hais tias “Tus muaj ib lub siab phem yog nws tseg tsis ua txhaum, nws coj cov lus qhia thiab nws ua raws nraim txoj kev ncaj kev ncees, mas nws yuav muaj txoj sia, nws yuav tsis tuag. Kuv yuav tsis nco txog nws cov txhaum, nws yuav ciaj vim nws ua raws txoj kev ncaj.”
HUAB TAIS Tswv Ntuj hais tias “Yog kuv pom cov neeg txhaum tuag, mas kuv yuav zoo siab puas tau? Kuv kawg xav pom tus neeg txhaum hloov siab kom nws tau muaj txoj sia nyob. Tab sis yog tus neeg siab ncaj nws ncaim ntawm txoj kev ncaj thiab nws mus ua txhaum xws li cov neeg tsis hwm Ntuj lawv ua kam, mas tus neeg ntawd nws puas tsim nyog muaj txoj sia nyob? Nws cov hauj lwm zoo uas thaum ub nws ua, mas kuv yuav tsis nco txog. Nws yuav tuag nyob hauv nws txoj kev ntxeev siab thiab hauv nws txoj kev txhaum. Tim li cas nej yuav muaj cuab kav hais tias HUAB TAIS ua tsis ncaj? His Xas Lais, nej mloog zoo zoo, puas yog kuv ua tsis ncaj? Ntshai yog nej ua tsis ncaj los tsis sub? Tus neeg siab ncaj nws ncaim ntawm nws txoj kev tsis ncaj lawm, nws ua txhaum, nws yuav tuag nyob hauv nws txoj kev ua txhaum. Tus neeg siab phem nws tso nws txoj kev phem pov tseg, nws los ua qhov ncaj qhov tsim nyog ua, nws txoj sia yuav nyob. Nws pom dheev nws cov txhaum thiab nws tso nws txoj kev phem pov tseg, mas nws yuav tsis tuag. 

Lub Moo Zoo raws lis Mas Tais (MT 5: 20-26)
Yes Xus hais rau cov thwj tim tias “Kuv hais rau nej; yog nej tsis ua siab ncaj dua cov thoob xwm ntawv thiab cov Fas Lis Xais, mas nej yuav mus tsis tau hauv Ntuj lub Ceeb Tsheej. Nej hnov cov lus qhia rau tej laus thaud tias “Koj tsis txhob tua neeg. Tus twg tua neeg, nws yuav raug luag txiav txim rau nws. Hos kuv, mas kuv hais rau nej; leej twg npau taws rau nws tus kwv, nws yuav raug txim ntawm tsev hais plaub. Yog nws hais rau nws tus kwv tias ‘Niag ruam!’, mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tias ‘Niag vwm’, mas nws yuav raug txim nyob hauv dab phem cov hluav taws. Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim. Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.

Cov lus nyob hauv ntawv Txoj Cai Ob (TCO 26: 16-19)
Mais Xes hais rau cov His Xas Lais tias “Hnub no, HUAB TAIS, koj tus Tswv Ntuj ceeb toom rau koj tias koj yuav coj nws tej kev cai lij choj. Koj yuav coj tej kev cai ntawd, koj yuav muab tas koj lub siab lub tswv yim los ua raws li ntawd. Hnub no, koj tau hnov HUAB TAIS hais tias nws yuav ua koj tus Tswv Ntuj, tab sis yuav yog koj taug nws txoj kev, coj nws tej kev cai lij choj, khaws nws cov lus qhia thiab mloog nws lub suab. Hnub no HUAB TAIS hnov koj teb tias koj yuav ua nws haiv neeg, xws li nws tau hais, tiam sis koj yuav tsum coj nws tej lus qhia tas huv tib si. Koj ua li ntawd, mas HUAB TAIS yuav ua kom koj muaj ntsej muag, nto koob meej, muaj hwj chim loj tshaj lwm cov haiv neeg uas nws tsim los. Koj yog haiv neeg uas HUAB TAIS qee ua nws tug, xws li HUAB TAIS tau hais rau koj.”

Lub Moo Zoo raws li Mas Tais (MT 5: 43-48)
Yes Xus hais rau cov thwj tim tias “Nej hnov tej lus qhia tias koj yuav nyiam tus nyob ze koj, koj yuav ntxub koj tus yeeb ncuab. Tab sis, kuv hais rau nej tias nej yuav nyiam nej cov yeeb ncuab, nej yuav thov Ntuj rau cov tsim txom nej; nej thiaj yog nej Txiv nyob saum ntuj cov tub; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus. Yog nej nyiam cov neeg nyiam nej, mas nej yuav tau koob haum dab tsi? Tab yog cov sau se, lawv kuj txawj nyiam li ntawd. Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag? Tab yog cov neeg teev pej kum dab, los lawv kuj txawj ua li ntawd. Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj.”

Cov lus nyob hauv ntawv Hauv Paus (HP 12: 1-4)
HUAB TAIS hais rau Has Nplas tias “Tso koj lub teb chaws tseg, tso koj tsev neeg, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj. Kuv yuav tsa koj ua ib haiv neeg loj, kuv yuav foom hmoov zoo rau koj, thiab kuv yuav ua kom koj lub npe nto moo loj. Koj yuav nqa txoj hmoov zoo rau txhua leej txhua tus. Kuv yuav foom hmoov zoo rau cov neeg uas foom hmoov zoo rau koj, kuv yuav foom hmoov phem rau cov uas foom phem rau koj. Tas txhua haiv neeg nyob ntiaj teb yuav muab koj lub npe los sib foom hmoov zoo.” Has Nplas sawv kev mus raws li HUAB TAIS kom nws mus. Los kuj nrog nws mus thiab. Thaum Has Nplas tsiv hauv Has Laas teb mus, nws muaj xya caum tsib xyoos.

Tsab ntawv Paj Lug sau rau Tis Mos Tes, tsab Ob (2TMT 1: 8-10)
Tus kwv zoo nyiam. Koj yuav zoo siab nrog kuv raug txom nyem rau lub Moo Zoo, Tswv Ntuj lub zog  yuav nres koj. Tswv Ntuj yog tus cawm peb, nws hu peb los ua ib lub neej ntshiab huv, nws hu peb tsis yog vim peb cov dej num, Tswv Ntuj hu peb raws li nws tau xub npaj puag thaum tseem tsis tau muaj lub zim txwv, thiab raws li lub txiaj ntsim uas nws pub rau peb nyob hauv Yes Xus Pleev. Nyem no, lub txiaj ntsim ntawd tshwm los rau qhov muag pom thaum peb tus cawm seej Yes Xus Pleev tawm tuaj; nws yog tus rhuav txoj kev tuag, yog tus ua kom txoj sia thiab txoj kev tsis txawj tuag ci ntsa iab nyob hauv lub Moo Zoo.

Lub Moo Zoo raws li Mas Tais (MT 17: 1-9)
Yes Xus coj Pob Zeb, Yas Kos thiab nws tus kwv Zam mus rau ib qho, ces lawv nce mus saum ib lub roob siab. Yes Xus ib ce hloov tas nyob ntawm lawv xub ntiag, nws lub ntsej muag ci ntsa iab zoo li lub hnub, nws cov ris tsho ci dawb paug li qhov pom kev. Ces Mais Xes thiab Es Lias nkawd tawm los rau lawv pom. Nkawd nrog Yes Xus tham. Pob Zeb hais rau Yes Xus tias “Huab Tais, peb nyob ntawm no mas zoo tas nrho. Yog koj kheev, no kuv yuav ua peb 3 lub tsev tsam phooj; ib lub rau koj, ib lub rau Mais Xes, ib lub rau Es Lias.” Pob Zeb tseem tab tom hais li ntawd, ces muaj ib tw huab ci dawb paug los ntxoov npog nkaus lawv, ces ib lub suab hais hauv twv huab tuaj tias “Tus no yog kuv Leej Tub uas kuv nyiam, nws yog kuv qhov chaw zoo siab, nej mloog nws mog!” Cov thwj tim hnov lub suab ntawd, lawv khoov ntsej muag ti av, lawv ntshai kawg. Tab sis Yes Xus txav los plhws lawv, thiab nws hais rau lawv tias “Nej sawv, nej txhob ntshai.” Ces lawv tsa muag ntsia, tsis pom leej twg li, kawg tshuav Yes Xus tib leeg xwb. Thaum lawv nqes saum roob los, Yes Xus txwv lawv tias “Nej txhob qhia qhov nej tau pom no rau leej twg li, nej tos kom Neeg Leej Tub sawv hauv cov tuag rov los tso.”

Cov lus nyob hauv ntawv Das Nias (DN 9: 4b-10)
Das Nias thov Tswv Ntuj thiab lees txhaum zoo li no “Kuv tus HUAB TAIS Tswv Ntuj, koj thiaj loj thiab muaj hwj xyeej! Koj ua raws li lo lus koj cog thiab koj pub koj txiaj ntsim rau cov neeg uas nyiam koj thiab coj koj cov lus qhia. Peb tau ua txhaum, tau ua tsis ncaj, peb tau ua phem, peb ntxeev siab, peb tau ncaim ntawm koj cov lus qhia thiab ntawm cov lus koj txiav. Peb tsis tau mloog koj cov tub txib, cov Yaj Saub, uas lawv sawv koj chaw hais lus rau peb cov vaj peb cov nom, rau peb cov yawg koob rau tas haiv neeg nyob hauv lub teb chaws.
Huab Tais, yog koj tau kev ncaj, yog peb tau kev txaj muag, peb sawv daws uas nyob Yus Das, nyob Yes Lus Xas Les, tas cov His Xas Lais nyob deb nyob ze nyob tas qhov txhia chaw uas koj ntiab peb mus nyob, vim peb tsis mloog koj lus. Peb sawv daws tau kev txaj muag.
HUAB TAIS, tos peb thiab peb cov vaj, peb cov nom, peb cov yawg koob sawv daws tau kev txaj muag los yog vim peb tau ua txhaum rau koj. Peb thov kom peb tus Huab Tais Tswv Ntuj khuv leej peb thiab zam txhaum rau peb, vim peb tau ntxeev siab rau nws. Peb tsis mloog peb tus HUAB TAIS Tswv Ntuj lub suab. Peb tsis tau mus raws li nws tej kev cai lij choj uas cov Yaj Saub, nws cov tub txib, tau qhia rau peb.

Lub Moo Zoo raws li Lus Kas (LK 6: 36-38)
Yes Xus hais rau cov thwj tim tias “Nej yuav hlub luag tej ib yam li nej Txiv hlub neeg. Nej tsis txhob txiav txim, Ntuj thiaj yuav tsis txiav txim rau nej. Nej tsis txhob muab txim, Ntuj thiaj yuav tsis muab txim rau nej. Nej zam txhaum mog, Ntuj thiaj yuav zam rau nej. Nej pub, Ntuj thiaj yuav pub rau nej. Ntuj yuav xuas ib lub tawb loj los luj, yuav muab tswm muab co kom ceev thiab ntim nco lug ces Ntuj yuav muab hliv rau hauv nej nqaws tsho. Vim Ntuj yuav xuas lub tawb uas nej luj rov los luj rau nej.”

Cov lus hauv ntawv His Xais (HX 1: 10, 16-20)
Cov nom tswv tswj Xos Dos Mas, nej mloog Huab Tais cov lus mog! Pej xeem nyob Nkos Mos Las, nej mloog peb tus Tswv Ntuj cov lus qhia mog! Nej rov ntxuav nej kom nej huv tuaj mas! Nej dawj nej lub siab phem mus kom kuv qhov muag txhob pom. Nej tso txoj kev ua phem tseg! Nej xyaum ua zoo, nej nrhiav kev haum pheej, nej pab tus raug luag hiam, nej txiav txim ncaj rau tus tub ntsuag, nej tuaj tus poj ntsuam tog.
HUAB TAIS hais tias “Nej tuaj! Nej txiav plaub txiav ntug mog! Txawm tias nej tej txhaum liab ploog, los nej yuav rov dawb li daus. Tab yog nej tej txhaum liab vog, los kom tej txhaum cia li hloov xws li plaub yaj. Yog nej muaj siab tiag thiab nej mloog lus, mas nej yuav tau noj lub teb chaws cov qoob. Tiam sis yog nej nyob hauv kev ntxeev siab, mas hniav ntaj yuav hlais nej.” HUAB TAIS lub ncauj hais li ntawd.

Lub Moo Zoo raws li Mas Tais (MT 23: 1-12)
Yes Xus qhia tsoom sid thiab cov thwj tim. Nws hais tias “Cov thoob xwm ntawv thiab cov Fas Lis Xais zaum Mais Xes lub theej kiab lawm. Nej ua tas txhua yam lawv qhia nej, thiab nej khaws huv tib si tseg, tab sis nej txhob ua raws li lawv. Vim lawv qhia, tab sis lawv tsis ua raws. Lawv nog nra hnyav yuam rau tsoom sid xwb pwg, tab sis lawv tsis kam cev ib tug ntiv tes los kov. Lawv ua txhua tsav txhua yam kom luag qhuas. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. Thaum lawv mus noj nqaij haus cawv, lawv nyiam zaum thawj lub rooj. Nyob hauv cov tsev txoos, lawv nyiam zaum cov rooj pem hauv ntej. Lawv nyiam kom luag hawm lawv tom tej tshav puam, nyiam hnov sawv daws hu lawv ua Xib Hwb. Hos nej, mas nej txhob cia luag hu nej ua Xib Hwb, vim nej tsuas muaj tib tug Xib Hwb xwb, thiab nej sawv daws yog ib co kwv tij. Nej txhob hu leej twg nyob ntiaj teb no ua Txiv, vim nej tsuas muaj tib leeg Txiv xwb, yog tus nyob saum ntuj. Nej txhob cia luag hu nej ua Thawj Tswj, vim nej tsuas muaj tib tug Tswj xwb, yog Leej Pleev. Tus loj dua cov nyob hauv nej, yuav ua nej tus tub txib. Tus twg tsa nws siab, Ntuj yuav txo nws qis. Tus twg txo nws qis, Ntuj yuav tsa nws siab.”

Cov lus nyob hauv ntawv Yes Les Mis (YLM 18: 18-20)
Yes Les Mias cov yeeb ncuab hais li no “Nej tuaj! Peb sab laj saib peb yuav ua li cas rau Yes Les Mias! Tab yog tus ntawd tsis nyob lawm, cov Leej Choj kuj tseem yuav txawj qhia, cov txwj laus tseem yuav xyuam xim, cov Yaj Saub tseem yuav txawj tshaj lus. Peb kav tsij muab nws cov lus los ntaus nws. Peb kav tsij rau siab mloog cov lus nws hais.”
HUAB TAIS, thov koj mloog kuv. Thov koj! Koj yuav hnov cov lus lawv liam rau kuv.  Koj puas yuav cia lawv ua tej yam phem los pauj tej yam zoo uas kuv ua rau lawv? Lawv khawb ib lub qhov taub tos kuv. HUAB TAIS, thov koj nco ntsoov tias kuv twb tau sawv ntsug nyob ntawm koj xub ntiag, kuv tau cav lus zoo txog lawv kom koj txhob npau taws rau lawv. 

Lub Moo Zoo raws li Mas Tais (MT 20: 17-28)
Thaum Yes Xus lawv mus pem Yes Lus Xas Les, Yes Xus coj Pab Kaum Ob mus rau ib cag. Lawv tab tom mus kev, ces Yes Xus hais rau lawv tias “Peb mus pem Yes Lus Xas Les. Neeg Leej Tub yuav raug luag muag rau cov thawj leej choj thiab cov thoob xwm ntawv. Lawv yuav txiav lub txim tuag rau nws. Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws tsa saum ntoo cuam. Hnub peb, nws yuav sawv rov los.”
Thaum ntawd, niam Ntxes Npes Dais nrog nws ob tug tub los ze Yes Xus, niam Ntxes Npes Dais txhos caug thov ib yam ntawm Yes Xus. Yes Xus hais rau nws tias “Koj xav tau dab tsi?” Leej niam hais rau Yes Xus tias “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” Yes Xus teb tias “Nej tsis paub qhov nej thov. Neb puas haus taus lub ntim uas kuv yuav haus?”
Nkawd teb tias “Wb haus taus.” Yes Xus hais rau nkawd tias “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug.”

Cov lus nyob hauv ntawv Yes Les Mis (YLM 17: 5-10)
HUAB TAIS hais li no “Tus neeg uas tso siab rau lwm tus neeg mas nws txoj hmoov yuav phem. Nws muab lub cev nqaij los ua nws lub zog, hos nws lub siab txav mus nyob deb ntawm HUAB TAIS. Nws zoo li ib tsob pos tuaj nyob hauv hav maj sab. Nws tsis pom txoj kev noj qab nyob zoo tuaj txog. Nws nyob hauv ib lub teb chaws suab puam qhuav, nyob hauv ib thaj av daw ntsev tsis muaj neeg nyob. Hos tus neeg tso siab rau HUAB TAIS thiab npuab HUAB TAIS, mas nws txoj hmoov yuav zoo. Nws zoo li ib tsob ntoo cog ze ntug dej. Nws nrhau cag mus txog tus dej. Thaum txog lub caij ntuj qhua nws tsis ntshai. Nws cov nplooj ntsuab mos nyoos mus li. Thaum txog lub xyoo ntuj qhuav qhawv nws tsis txhawj, nws txi txiv tsis tseg. Neeg lub siab nkhaus tshaj, kho tsis tau nws. Leej twg yuav paub tau nws?
Kuv yog HUAB TAIS, kuv pom tau hauv neeg nruab siab, kuv tsom tau hauv neeg lub cev. Kuv pub rau neeg raws li nws tus yam ntxwv. Kuv pub nqi zog rau neeg raws li nws cov hauj lwm.”

Lub Moo Zoo raws li Lus Kas (LK 16: 19-31)
Yes Xus hais lus rau cov Fas Lis Xais tias “Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj tej rooj qav zoo kawg. Muaj ib tug pluag hu ua Las Ntxas Los, nws ib ce mob kiav txhab tas, nws pw ze ntawm tus nplua nuj lub rooj loog. Las Ntxas Los ntshaw noj tej yam poob ntawm tus nplua nuj lub rooj mov kom tsau nws plab. Dev tseem tuaj yaim nws tej qhov txhab thiab. Muaj ib hnub, tus pluag tuag, cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus faus. Tus nplua nuj nyob hauv ntuj txiag teb tsaus, nws txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv nws xub ntiag. Nws hu nrov tias ‘Txiv Has Nplas Has, thov koj khuv leej kuv, thov koj xa Las Ntxas Los tuaj muab nws ntsis ntiv tes tub dej rau kuv tus nplaig kom txias, vim kuv raug tsim txom nyob hauv cov hluav taws no.’ Tab sis Has Nplas Has hais tias ‘Kuv tub, koj nco ntsoov tias thaum ua neej nyob koj tau txais koj cov nyiaj txiag, hos Las Ntxas Los tau txais kev mob. Zaum no Las Ntxas Los txais kev nplij nyob ntawm no, hos koj raug tsim txom. Thiab tsis tag li ntawd, muaj ib lub qhov ntuj tob kawg kem peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no.’  Ces tus nplua nuj hais tias ‘Txiv, kuv thov koj xa Las Ntxas Los mus hauv kuv txiv tsev, vim kuv muaj tsib tug kwv tij, kom Las Ntxas Los mus ua pov thawj qhia lawv, kom lawv tsis txhob tuaj nyob hauv qhov chaw raug tsim txom no.’ Has Nplas Has hais tias ‘Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia.’ Tab sis tus nplua nuj hais tias ‘Txiv Has Nplas Has, yog tias ib tug hauv cov tuag mus cuag lawv, mas lawv yuav hloov siab.’ Has Nplas Has hais rau nws tias ‘Yog lawv tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv, lawv kuj yuav tsis ntseeg nws.’”

Cov lus nyob hauv ntawv Hauv Paus (HP 37: 3-4, 12-13, 17-28)
His Xas Lais hlub Yos Xes tshaj nws cov tub huv si, vim Yos Xes yug thaum nws twb laus lawm. Ces nws kom lawv xaws ib lub tsho ntev txaij zoo nkauj rau Yos Xes hnav. Nws cov tij laug pom tias nws txiv hlub nws tshaj nws cov tij laug txhua tus, mas lawv sawv daws ntxub nws, lawv tsis xav nrog nws hais ib lo lus zoo li. Yos Xes cov tij laug mus zov lawv txiv pab yaj noj zaub nyob Xis Kes. His Xas Lais hais rau Yos Xes tias “Koj cov tij laug mus zov tsiaj dua tom lub tshav zaub Xis Kes lawm puas yog? Los, kuv xa koj mus xyuas lawv.” Yos Xes mus nrhiav nws cov tij laug, nws nrhiav tau lawv nyob Dos Tas. Lawv pom nws tseem tuaj txog deb. Thaum nws tuaj tsis tau txog, lawv sib tuav tswv yim tias yuav ua kom nws tuag. Lawv sib tham tias “Nej saib! Niag ua npau suav tuaj lawm! Zaum no, peb muab nws tua kiag thiab muab nws pov rau hauv ib lub qhov tim thaj, ces peb mus hais tias yog ib tug tsiaj qus tom nws lawm. Peb yuav pom tias nws cov npau suav leej tas nrho!” Tiam sis Lus Npees hnov lawv tham, nws xav pab kom Yos Xes dim ntawm lawv tes. Nws hais tias “Peb tsis txhob txo nws txoj sia.” Lus Npees hais rau lawv tias “Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes rau saum nws.” Lus Npees hais li no, vim nws xav cawm Yos Xes, nws thiaj li yuav coj tau Yos Xes rov mus rau nws txiv. Ua li mas thaum Yos Xes tuaj txog ntawm nws cov tij laug lawm, lawv muab nws lub tsho ntev txaij zoo nkauj uas nws hnav hle. Lawv txhom nws thiab muab nws pov rau hauv lub qhov dej. Yog ib lub qhov dej qhuav tsis muaj dej.
Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es thauj ib co nra, lawv tuaj Nkas Las As tuaj. Lawv cov ntxhuav thauj ib co tshuaj tsw qab uas lawv yuav coj mus muag rau Hais Nkws Tos teb. Yus Das hais rau nws cov kwv tij tias “Yog peb muab peb tus kwv tua thiab muab nws cov ntshav faus, peb yuav tau dab tsi? Nej los, peb muab nws muag rau cov neeg Is Mas Es xwb, peb txhob tsa peb txhais tes rau saum nws vim nws twb yog peb tus kwv, tawm ntawm tib lub cev nqaij los xwb.” Ces nws cov kwv tij mloog nws hais.
Thaum ntawd muaj ib co neeg tuaj hla ntawd, yog ib co tub luam Mas Dias, ces lawv rub Yos Xes tawm hauv lub qhov tim thaj los. Lawv muab nws muag nees nkaum lub txiaj nyiag, rau cov neeg Is Mas Es. Cov neeg ntawd coj nws mus Hais Nkws Tos teb lawm.

Lub Moo Zoo raws li Mas Tais (MT 21: 33-43, 45-46)
Yes Xus hais rau cov thawj leej choj thiab pej xeem cov laus neeg tias “Nej mloog dua ib zag paj lug li no. Muaj ib tug tswv teb, nws cog tau ib thaj txiv cawv. Nws xov laj kab ncig nws thaj teb. Nws txaug ib lub zeb zom txiv cawv, thiab tseem txhim tau ib lub lawj siab siab cia. Nws ntiav ib co neeg zov, ces nws tawm rooj mus kev deb.  Thaum yuav txog caij de txiv, nws xa nws cov tub txib mus nqa txiv cawv ntawm cov zov teb. Cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag.  Tus tswv rov xa ib co tub txib coob dua thawj cov mus, cov zov teb kuj ua ib yam li lawv ua rau thawj cov. Qhov kawg, nws xa nws tus tub mus cuag lawv, nws xav tias ‘Lawv yuav hwm kuv tus tub.’ Tab sis cov zov teb pom dheev tus tub, lawv sib tham tias ‘Tus ntawd yog tus yuav txais cuab tam. Tsuag tsuag! Peb muab nws tua. Lub cuab tam thiaj yuav yog peb tug.’ Ces lawv ntes ntho tus tub, coj nws mus pov rau tom ntug teb thiab muab nws tua. Thaum tus tswv teb txiv cawv tuaj txog, nws yuav ua dab tsi rau cov zov teb?” Lawv teb rau Yes Xus tias “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.”
Yes Xus hais rau lawv tias “Nej puas tau nyeem ib zaug li txog cov lus hauv Ntawv tias lub pob zeb uas cov tub txhim tsev muab pov tseg, yog lub pob zeb txheem lub ncov ruv tsev. Qhov ntawd yog tuaj ntawm Huab Tais tuaj. Yog ib yam zoo nkauj zoo saib rau ntawm peb qhov muag. Vim li ntawd, kuv hais rau nej; Ntuj yuav thau lub Ceeb Tsheej ntawm nej los cev rau ib haiv neeg uas yuav muab siab rau tu kom txi txiv.” Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv. Lawv nrhiav kev ntes Yes Xus. Tab sis lawv ho ntshai tsoom sid, vim sawv daws saib Yes Xus yog ib tug yaj saub.

Cov lus nyob hauv ntawv Mis Kes (MiK 7: 14-15, 18-20)

Lub Moo Zoo raws li Lus Kas (LK 15: 1-3, 11-32)
Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais. Ces cov Fas Lis Xais thiab cov Kws Ntawv Ntshiab nroo zom zaws tias “Tus neeg ntawd txais cov neeg txhaum, nws tseem nrog lawv noj mov thiab!” Yes Xus thiaj hais zaj paj lug no rau lawv li no “Ib tug neeg muaj ob tug tub. Tus tub ntxawg hais rau nws txiv tias ‘Txiv, koj muab koj lub cuab tam feem uas yog kuv tug faib rau kuv.’ Ces leej txiv thiaj muab nws lub cuab tam faib rau nws ob tug tub.
Ob peb hnub tom qab, tus tub ntxawg sau feem uas yog nws tug tas huv si, nws khiav mus ib lub teb chaws deb. Nyob ntawd nws muab nws lub cuab tam phob vim nws coj ib lub neej tsis tsim txiaj. Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj. Nws lub siab mam li ras dheev tias ‘Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. Kuv xav mus cuag kuv txiv, kuv yuav hais rau nws tias txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv. Thov koj saib kuv ib yam li koj ib tug tub zog.’
Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tub tub ntev loo. Tus tub hais rau leej txiv tias ‘Txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.’ Tab sis leej txiv hais rau cov tub txib tias ‘Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib nti nplhaib los ntxig nws ntiv tes, thiab ib nkawg khau los ntxig nws ko taw. Nej cab tus xyuas nyuj rog los tua. Peb noj, peb ua lom zem. Vim tias kuv tus tub no tuag lawm, nyem no nws ciaj rov los. Nws ploj lawm, nyem no rov nrhiav tau nws.’ Ces lawv sawv daws noj haus lom zem.
Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. Nws hu ib tug tub txib kom tawm mus cuag nws, nws nug saib lub suab ntawd yog dab tsi. Tus tub txib hais rau nws tias ‘Yog koj tus kwv rov qab los tsev, koj txiv tua tus xyuas nyuj rog, vim nws tau koj tus kwv rov los, noj qab nyob zoo.’ Ces tus tub hlob npau taws, nws tsis kam los hauv tsev. Leej txiv tawm tuaj thov kom nws los hauv tsev.
Tab sis tus tub hlob teb rau nws txiv tias ‘Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li, koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem. Hos koj niag tub ntawd, mus nrog cov niam ntiav muab koj lub cuab tam nqos tas, thaum nws rov los tsev, koj tua tus xyuas nyuj rog rau nws!’ Leej txiv hais rau tus tub hlob tias ‘Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug. Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm, nyem no nrhiav tau nws rov los.”

Ntawv Kev Tsiv (KT 17: 3-7)
Thaum ntawd, tsoom pej xeem nqhis dej, lawv yws yws rau Mais Xes tias “Ua cas koj thiaj coj peb tawm Hais Nkws Tos teb los? Puas yog koj xav kom peb, thiab peb cov me nyuam, peb cov tsiaj tuag dej tas huv si?” Ces Mais Xes tsa suab hu HUAB TAIS hais tias “Kuv yuav ua li cas rau haiv neeg no? Tshuav me me xwb ces lawv yuav txawb pob zeb tua kuv.” HUAB TAIS hais rau Mais Xes tias “Koj mus ua tsoom pej xeem ntej, koj coj ib co txwj laus His Xas Lais nrog koj mus, koj nqa koj rab pas nrig ntawm tes, rab pas uas koj tau siv los ntaus tus dej Nis nyob Hais Nkws Tos teb. Kuv yuav mus sawv ntawm koj hauv ntej, saum lub tsua, nyob saum roob Hos Les. Koj yuav ntaus lub tsua, ces dej yuav txhawv tawm los rau tsoom pej xeem haus.” Mais Xes thiaj ua li ntawd rau cov txwj laus His Xas Lais ntsia. Mais Xes tis npe rau thaj chaw ntawd hu ua Mas Xas thiab Mes Lis Npas, vim nyob ntawd, cov His Xas Lais cem nws thiab lawv sim HUAB TAIS, lawv hais tias “HUAB TAIS puas nrog peb nyob los tsis nrog?”

Tsab ntawv Paj Lug sau mus rau cov ntseeg nyob Los Mas (LM 5: 1-8)
Kwv tij sawv daws. Yog vim peb txais kev ncaj ntawm txoj kev ntseeg los, mas peb thiaj nrog Tswv Ntuj nyob kaj siab lug hauv peb tus Huab Tais Yes Xus Pleev. Vim peb ntseeg txog Huab Tais Yes Xus Pleev, ces nws coj peb mus nyob ruaj hauv lub txiaj ntsim, peb thiaj muaj cuab kav cia siab tias peb yuav tau Tswv Ntuj lub hwj chim. Txoj kev tso siab tsis ua kom peb plam qhov uas peb vam tias yuav tau, vim Leej Ntuj Plig Ntshiab uas peb tau txais, nws twb hliv Tswv Ntuj txoj kev nyiam rau hauv peb lub siab lawm. Vim tias thaum peb tseem tsis tau muaj zog, thiab thaum txog lub caij teem, mas Leej Pleev tuag kom tau pab cov neeg tsis hwm Ntuj. Yeej yuav luag tsis muaj leej twg kam tuag kom tau pab ib tug neeg ncaj; nyaj tej zaum, yuav muaj tej tus kam tuag kom tau pab ib tug neeg siab dawb siab zoo. Li ntawd, qhov ua kom peb pom tias Tswv Ntuj nyiam peb tiag, yog qhov tias thaum peb tseem yog neeg txhaum, Leej Pleev tuag kom tau pab peb.”

Lub Moo Zoo raws li Zam (Z 4: 5-42)
Yes Xus mus kev, nws sab, nws zaum ntawm lub qhov dej. Kwv yees tav su lawm. Ib tug poj niam Xas Mas Lias tuaj ce dej. Yes Xus hais rau nws tias “Koj muab dej rau kuv haus.” Nws cov thwj tim mus yuav txhiam xws noj hauv nroog lawm. Tus poj niam Xas Mas Lias hais rau Yes Xus tias “Ua li cas koj yog ib tug Yus Das, koj tseem yuav thov dej haus ntawm kuv? Kuv yog ib tug poj niam Xas Mas Lias.” Vim tias cov Yus Das tsis nrog cov Xas Mas Lias sib fim. Yes Xus teb rau tus poj niam tias “Yog koj paub Tswv Ntuj lub txiaj ntsim, thiab paub tus uas hais rau koj tias ‘koj muab dej rau kuv haus,’ mas yog koj yuav thov nws, ces nws yuav muab ib co dej muaj txoj sia rau koj.”
Tus poj niam hais rau Yes Xus tias “Huab Tais, koj tsis muaj dab tsi ce dej, hos lub qhov dej los kuj tob. Koj yuav ua li cas muab tau cov dej muaj txoj sia ntawd? Koj puas loj dua peb yawg koob Yas Kos uas nws muab lub qhov dej no rau peb? Nws thiab nws cov tub, nws cov tsiaj puav leej tau haus lub qhov dej no.” Yes Xus teb rau tus poj niam hais tias “Leej twg haus cov dej no tas tseem yuav rov nqhis dua. Hos tus haus cov dej uas kuv muab rau nws, mas nws yuav tsis nqhis ib zaug ntxiv. Cov dej uas kuv muab, yuav txia ua ib tug dej txhawv muaj txoj sia nyob mus li nyob hauv nws.”
Tus poj niam hais rau Yes Xus tias “Huab Tais, koj pub cov dej ntawd rau kuv, kom kuv tsis txhob nqhis dej ntxiv, kom kuv txhob tau rov tuaj ce dej ntawm no ntxiv.”
Yes Xus hais rau nws tias “Koj mus, koj hu koj tus txiv, koj rov tuaj ntawm no.” Tus poj niam teb hais tias “Kuv tsis muaj txiv.” Yes Xus hais rau nws tias “Koj hais tias ‘Kuv tsis muaj txiv,’ koj hais yog lawm, vim koj twb yuav tsib tug txiv, hos tus uas koj muaj tam sis no, tsis yog koj tus txiv. Qhov koj hais no muaj tseeb.”
Tus poj niam hais rau Yes Xus tias “Huab Tais, kuv pom tias koj yog ib tug yaj saub. Peb cov yawg koob teev Ntuj saum lub roob no, hos nej, mas nej hais tias qhov chaw uas sawv daws yuav tsum mus teev Ntuj yog Yes Lus Xas Les.”
Yes Xus hais rau tus poj niam tias “Phauj, koj ntseeg kuv mog, lub caij nyoog los txog lawm, tsis yog nyob saum lub roob no los nyob Yes Lus Xas Les uas nej yuav teev Leej Txiv. Nej teev qhov uas nej tsis paub. Peb teev qhov uas peb paub, vim txoj kev cawm tuaj ntawm cov Yus Das tuaj. Tab sis txog sij hawm lawm, yog tam sis no ntag, uas cov neeg hawm Ntuj haum kev tseeb, lawv hawm Leej Txiv nyob hauv lub tswv yim thiab nyob hauv txoj kev tseeb. Leej Txiv nrhiav cov neeg zoo li ntawd los teev nws. Tswv Ntuj yog tswv yim, cov neeg teev Tswv Ntuj yuav tsum teev nyob hauv lub tswv yim thiab hauv qhov tseeb.”
Tus poj niam hais rau Yes Xus tias “Kuv paub hais tias tus Mes Xias, uas luag hu ua Leej Pleev, yuav tuaj. Thaum tus ntawd tuaj txog, nws yuav tshaj ib puas tsav yam rau peb.”
Yes Xus hais rau nws tias “Kuv yog tus ntawd, tus uas hais lus rau koj.”
Thaum ntawd, Yes Xus cov thwj tim los txog, lawv poob siab rau qhov tias Yes Xus nrog ib tug poj niam hais lus. Tsis kav tsis muaj leej twg hais tias “Koj xav tau dab tsi ntawm nws?” los hais tias “Vim li cas koj nrog nws tham?” Ces tus poj niam tso nws lub hub tseg rau ntawd, nws rov mus hauv lub nroog. Nws hais rau zeej tsoom tias “Nej tuaj xyuas ib tug neeg saib, nws hais tej uas kuv tau ua tas huv tib si rau kuv. Tej zaum nws yog Leej Pleev?”
Lawv tawm hauv nroog tuaj cuag Yes Xus. Thaum ntawd, cov thwj tim txhib Yes Xus, lawv hais tias “Las Npis, los noj mov.” Tab sis Yes Xus hais rau lawv tias “Kuv muaj ib cov txhiam xws noj uas nej tsis paub.” Cov thwj tim sib tham tias “Ntshai muaj neeg nqa mov tuaj rau nws noj lawm?”
Yes Xus hais rau lawv tias “Kuv cov txhiam xws noj yog ua raws tus xa kuv tuaj lub siab, thiab leg nws tej dej num kom tiav. Puas yog nej hais tias tshuav plaub hlis ntxiv, mam txog caij sau qoob? Tab sis kuv hais rau nej, nej tsa muag ntsia tej nras teb saib, nplej siav daj vog, zoo hlais lawm. Tus sau nplej yuav txais nqi zog, nws yuav sau cov qoob mus rau txoj sia nyob mus li. Tus sau nplej yuav nrog tus tseb nplej ib txhij zoo siab. Vim zaj paj lug no hais qhov tseeb tias tus sau nplej nws muaj nws ib tug, tus tseb nplej nws muaj nws ib tug. Kuv tau xa nej mus sau tej qoob uas nej tsis tau khwv cog. Lwm cov tau khwv, hos nej khaws xyeem qhov lawv khwv tau.”
Coob leej Xas Mas Lias hauv lub nroog no ntseeg txog Yes Xus, vim tus poj niam lo lus ua tim khawv tias “Nws hais tas puas tsav yam kuv tau ua rau kuv.” Thaum cov Xas Mas Lias tuaj cuag Yes Xus, mas lawv thov kom nws nrog lawv nyob. Yes Xus thiaj nrog lawv nyob ob hnub, ces haj yam muaj neeg coob ntseeg txog nws vim nws cov lus.

Ntawv Vaj, phau Ob (2V 5: 1-15)
Nas Maas, yog tus tswj saib tus vaj As Las Mais pab tub rog nyob Xis Lias teb. Yog ib tug neeg uas tus vaj hwm nws thiab nyiam nws zoo. Yog HUAB TAIS pab nws mas cov As Las Mais thiaj ua rog yeej. Tab sis tus neeg siab loj ntawd mob ruas. Muaj ib zaug cov As Las Mais tuaj lwg His Xas Lais teb. Lawv coj tau ib tug me nyuam ntxhais mus lawm. Tus ntxhais ntawd mus ua Nas Maas tus poj niam tus ntxhais txib. Nws hais rau nws tus niam tsev hais tias “Kuv tus tswv kheev lam mus thov tus Yaj Saub nyob Xas Mas Lias teb, mas tus Yaj Saub yuav cawm nws dim ntawm nws tus mob xwb !” Nas Maas mus qhia nws tus huab tais tias “Tus ntxhais tuaj teb chaws His Xas Lais tuaj hais qhov no thiab qhov no.” Tus vaj As Las Mais teb tias “Koj mus, kuv yuav xa ib tsab ntawv mus rau tus vaj His Xas Lais.”
Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam. Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no “Kuv xa kuv tus tub txib Nas Maas nrog tsab ntawv no. Thov koj kho nws tus mob kom zoo.” Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias “Kuv puas yog ib tug tswv ntuj txawj ua kom neeg ciaj los tuag ywj kuv siab? Ua cas tus ntawd thiaj yuav kom kuv kho ib tug neeg mob ruas? Qhov tseeb mas yog nws xav nrhiav lus rau kuv xwb.” Tab sis thaum Es Lis Xais hnov tias tus vaj dua nws cov ris tsho, mas nws tso neeg mus hais rau tus vaj tias “Vim li cas koj dua koj cov ris tsho? Kom nws tuaj cuag kuv saib ! Nws thiaj yuav paub tias muaj ib tug Yaj Saub nyob His Xas Lais teb.”
Nas Maas caij tsheb tuaj txog, nws theem ntawm Es Lis Xais qhov rooj. Es Lis Xais tso neeg mus hais rau nws tias “Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab huv tuaj.” Nas Maas npau taws. Nws rov mus. Nws hais tias “Kuv vam tias ntshai nws yuav tawm tuaj, nws yuav hu txog nws tus HUAB TAIS Tswv Ntuj lub npe thiab nws yuav plhws kuv qhov nqaij mob, ces kuv yuav zoo hlo no. Tus dej As Npas Nas thiab tus dej Pas Pas nyob Das Mas teb tsis zoo dua cov dej nyob His Xas Lais teb lod? Yog kuv mus da cov dej nyob Das Mas teb kuv yuav tsis zoo tuaj sai dua lod?”
Ces Nas Maas lem loo nees rov qab. Nws npau taws heev. Tab sis nws cov tub txib txav los hais rau nws tias “Txiv, yog tus Yaj Saub kom koj ua ib yam nyuaj dua mas koj twb yuav ua xwb puas yog? Tab yog nws hais tias koj mus da dej ces koj yuav zoo mas koj haj yam yuav zoo siab ua lod?” Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Es Lis Xais hais, ces nws cov nqaij rov zoo tuaj xws li tus me nyuam mos tej nqaij. Nws huv tas lawm. Nas Maas nrog nws cov tub txib rov los tom Tswv Ntuj tus neeg xub ntiag, nws hais tias “Txij no mus, kuv paub tias tsis muaj dua lwm tus Tswv Ntuj nyob tas ntiaj teb. Tsuas kawg muaj ib tug xwb nyob His Xas Lais teb! Nyem no, kuv thov koj txais cov paj tshab uas koj tus tub txib cev rau koj no!”

Lub Moo Zoo raws li Lus Kas (LK 4: 24-30)
Yes Xus tseem hais ntxiv tias “Kuv hais tseeb rau nej, tsis muaj ib tug yaj saub uas luag yuav txais nws zoo hauv lub zos nws hlob. Kuv hais tseeb rau nej; lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb. Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv, tsuas yog tus mob ruas Xis Lias hu ua Nas Maas thiaj rov huv.”
Tas cov neeg hauv lub tsev txoos hnov cov lus ntawd, mas lawv npau taws kawg. Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib phab toj saum lub roob uas lawv txhim lub nroog, lawv yuav thawb Yes Xus kom poob lawm hauv lub qab toj ntxhab. Tab sis Yes Xus hla plaws hauv nruab nrab lawv, nws taug nws kev mus lawm.

Ntawv Das Nias (DN 3: 25, 34-43)
As Ntxas Lias sawv hauv nplaim taws, nws cav txog Huab Tais tias “Huab Tais, koj tsis txhob tso peb pov tseg mus li. Koj nco ntsoov txog koj lub npe. Koj tsis tso lo lus koj tau cog pov tseg. Koj txhob thim koj lub txiaj ntsim. Koj nco txog koj tus phooj ywg Has Nplas Has, txog koj tus tub txib His Xas Has thiab koj tus Ntshiab His Xas Lais. Koj tau cog lus rau lawv tias lawv yuav muaj tub ki coob cuag li cov hnub qub nyob saum ntuj, cuag li cov suab zeb nyob ntawm ntug hiav txwv. Huab Tais, hnub no peb yog haiv neeg me tshaj, nyob tas ntiaj teb peb txaj muag vim peb cov txhaum. Nyem no, peb tsis muaj tswv, tsis muaj Yaj Saub, tsis muaj vaj. Peb tsis muaj tsiaj, tsis muaj xyab los txi Ntuj, peb tsis muaj qhov chaw yuav cev paj tshab rau koj, thiab yuav vam txog koj lub txiaj ntsim. Tab sis thov koj ntsia txog peb lub siab txom nyem. Peb tus plig tsis muab hlob, thov koj txais ib yam li koj txais cov nyuj cov tshis thiab cov yaj txi rau koj. Hnub no peb thaj txi Ntuj yog zoo li ntawd. Peb thov kom koj zoo siab cia peb los raws koj. Cov tso siab rau koj yuav tsis raug kev poob ntsej muag. Nyem no peb muab tas peb lub siab los raws koj, los hwm koj thiab nrhiav koj lub ntsej muag. Koj tsis txhob cia peb poob hauv qhov txaj muag, koj mloog koj lub siab zoo thiab khuv leej. Koj ua zoo rau peb. Koj ua hwj huam loj los cawm peb. Huab Tais, koj ua kom sawv daws cav txog koj lub npe.” 

Lub Moo Zoo raws li Mas Tais (MT 18: 21-35)
Thaum ntawd, Pob Zeb txav los hais rau Yes Xus tias “Huab Tais, yog kuv tus kwv ua txhaum rau kuv, kuv yuav zam pes tsawg zaus? Kuv puas yuav zam txog xya zaus?” Yes Xus hais rau Pob Zeb tias “Kuv tsis hais rau koj tias ‘xya zaus’. Kuv hais rau koj tias, ‘xya caum xya zaus’. Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. Tus tub txib txhos caug ntua ntawm tus tswv ko taw, nws pe tus tswv, nws hais tias ‘Thov koj ua siab ntev rau kuv, kuv yuav them kom tas rau koj.’ Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias ‘Them koj cov nqi.’ Nws tus npawg txhos caug ntua ntawm nws ko taw thov tias ‘Thov koj ua siab ntev rau kuv, kuv yuav them rau koj.’ Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws.
Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv, ces tus vaj hu tus tub txib tuaj, nws hais rau tus tub txib ntawd tias ‘Tub txib siab phem dab tsi! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. Ua cas koj tsis hlub koj tus npawg zoo li kuv tau hlub koj?’ Ces tus vaj npau taws heev, nws muab tus tub txib rau cov tub hiam neeg mus txog hnub nws them nws cov nuj nqis tas huv tib si.
Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.

Ntawv Txoj Cai Ob (TCO 4: 1, 5-9)
Mais Xes hais lus rau tsoom His Xas Lais tias “Cov His Xas Lais, zaum no nej mloog txoj cai lij choj, thiab tej kab lis kev cai uas kuv qhia nej hnub no, kom nej coj raws nraim txoj cai ntawd. Ces nej yuav muaj txoj sia, thiab nej yuav tau mus nyob hauv lub teb chaws uas nej cov yawg koob tus HUAB TAIS Tswv Ntuj muab rau nej nyob, kom nej tau txais los ua nej tug. Nej yuav mloog, yuav coj raws nraim cov lus qhia ntawd, nej thiaj yuav ua neeg thoob tsib, ua neeg ntse nyob ntawm cov pej kum neeg xub ntiag. Thaum lawv hnov hais txog txoj cai no, lawv yuav tsa suab hlo hais tias tsuas muaj ib haiv neeg xwb thiaj thoob tsib thiab ntse, yog haiv neeg loj ntawd! Haiv neeg twg thiaj muaj ib tug Huab Tais nyob ze lawv li peb tus HUAB TAIS Tswv Ntuj nyob ze peb niaj zaus peb hu txog nws? Haiv neeg twg thiaj muaj ib txog cai lij choj thiab ib co kab lis kev cai ncaj npaum li Txoj Cai uas kuv muab cev rau nej hnub no?”

Lub Moo Zoo raws li Mas Tais (MT 5: 17-19)
Yes Xus hais rau cov thwj tim tias “Nej txhob xav tias kuv tuaj rhuav Txoj Cai thiab cov Yaj Saub. Kuv tsis tuaj rhuav, kuv tuaj qhia ntxiv kom thoob. Vim tias qhov kuv hais rau nej muaj tseeb; lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.”

Ntawv Yes Les Mis (YLM 7: 23-28)
HUAB TAIS hais li no “Ntawm no yog qhov kuv qhia kom lawv ua. Kuv tau hais rau lawv tias ‘Nej mloog kuv lub suab, ces kuv yuav yog nej tus Tswv Ntuj thiab nej yuav yog kuv haiv neeg. Nej yuav taug nraim txoj kev uas kuv qhia kom nej mus, nej thiaj yuav nyob kaj siab lug.’ Tab sis lawv tsis mloog, lawv tsis tig pob ntseg los, lawv ua raws lawv lub siab xav. Lawv ua neeg twm xeeb mloog lawv lub siab phem. Lawv thaub qab, tsis tig lawv lub ntsej muag los. Txij hnub nej cov yawg koob tawm hauv Hais Nkws Tos teb los txog hnub no, kuv tau xa kuv cov tub txib Yaj Saub tuaj rau nej sawv daws. Kuv niaj hnub xa tsis tseg. Tab sis lawv tsis tig ntsej mloog kuv, lawv qig lus kawg, lawv tseem ua phem dua lawv cov yawg koob. Koj yuav hais cov lus no tas huv si rau lawv, lawv yuav tsis mloog koj. Koj yuav hu lawv, tab sis lawv yuav tsis teb koj, ces koj yuav hais rau lawv tias nej yog haiv neeg uas tsis mloog nws tus HUAB TAIS Tswv Ntuj thiab tsis kam txais cov lus qhia nws. Kev hais qhov tseeb ploj lawm. Kev hais qhov tseeb tsis nyob hauv lawv lub ncauj lawm.

Lub Moo Zoo raws li Lus Kas (LK 11: 14-23)
Yes Xus ntiab ib tug dab phem, yog tus dab ua kom neeg tsis txawj hais lus. Thaum tus dab tawm lawd, ces tus neeg nplaig txhav hais tau lus. Tej pab neeg coob ntawd ua siab poob nthav. Tab sis, nyob hauv cov neeg ntawd, ib txhia hais tias “Nws hu txog tus vaj dab phem Npes Ntxes Npus los ntiab dab.” Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj. Tab sis Yes Xus paub qhov lawv xav, nws hais rau lawv tias “Lub teb chaws twg sib tawm tsam, mas nws kawg raug kev puas tsuaj. Tej vaj tse, ib lub vau lawv ib lub qab. Yog tias Xas Tas rov tawm tsam rau Xas Tas, mas nws lub ceeb tsheej yuav ua cas nyob tau ruaj? Ua cas nej hais tias kuv hu txog Npes Ntxes Npus los ntiab dab? Yog kuv vam txog Npes Ntxes Npus los ntiab dab no, nej cov tub ho vam txog leej twg los ntiab dab? Ua li mas, nej cov tub yuav txiav txim rau nej. Hos yog tias kuv vam txog Tswv Ntuj tus ntiv tes los ntiab dab, mas Tswv Ntuj lub Ceeb Tsheej los txog nej lawm. Thaum tus neeg muaj zog tuav ntaj tuav hmuv zov nws lub tuam tsev, mas nws lub cuab tam nyob nyab xeeb. Tab sis, thaum twg lwm tus muaj zog dua nws tuaj ntaus yeej nws, txeeb tau nws cev ris tsho hlau uas yog nws lub chaw tso siab, ces luag muab nws tej cuab yeej cuab tam sib faib. Leej twg tsis nrog kuv, nws tiv kuv. Leej twg tsis nrog kuv sau, mas nws ua txhua yam ploj.”

Ntawv Os Xes (OX 14: 2-10)
HUAB TAIS hais tias “Cov His Xas Lais, nej rov qab los nrog nej tus HUAB TAIS Tswv Ntuj nyob mas! Nej tau ua txhaum, nej thiaj ntog. Nej yuav hais tej lo lus tseem ceeb thov txhaum. Nej yuav los nrog HUAB TAIS mog! Nej yuav hais rau nws tias thov koj thau peb cov txhaum pov tseg, koj tsuas xaiv qhov zoo nyob hauv peb. Peb yuav tsis muab heev nyuj rau koj, peb di ncauj yuav cav lus zoo rau koj. As Xws yuav tsis cawm peb. Peb yuav tsis caij nees mus ua rog, peb yuav tsis hais rau peb cov mlom tias nej yog peb tus Tswv Ntuj! Vim yog peb txhais tes ua xwb. Yog nyob hauv koj ces tus me nyuam ntsuag thiaj tau txais kev khuv leej. Ces HUAB TAIS yuav teb tias kuv yuav kho cov His Xas Lais kev ntxeev siab kom lawv zoo hlo. Kuv yuav hlub lawv tas siab tas ntsws. Kuv yuav tsis npau taws rau lawv. Kuv yuav los pov hwm His Xas Lais xws li ib co lwg, lawv yuav hlob xws li tej lub paj zoo nkauj, lawv yuav nrhau cag xws li tej tus ntoo faj khaum. Lawv yuav hla kaus ncauj deg mus deb deb, lawv yuav zoo saib xws li tej tsob txiv ntoo roj, lawv yuav tsw qab xws li cov hav zoo Lis Npas. Lawv yuav rov los zaum hauv kuv qhov ntxoov. Lawv tej qoob loo yuav ntsu. Lawv yuav cog tej hom txiv ntoo ua cawv qab nto moo xws li cov nyob Hes Nploos. Cov Es Fais yuav tsis mus teev dab lawm, kuv thiaj mloog lawv thov kuv, kuv ntsia ntsoov lawv. Kuv zoo puav tam li ib tug ntoo thuv ntsuab mus li. Yog vim muaj kuv, lawv thiaj txi txiv tau. Tus neeg txawj xav tswm yim nws yuav paub xav cov lus saum no, tus neeg ntse yuav to taub zoo. HUAB TAIS txoj kev yog txoj kev ncaj. Cov neeg siab ntshiab taug nws txoj kev tau. Cov neeg txhaum ntog hauv txoj kev ntawd.”

Lub Moo Zoo raws li Mas Kos (MK 12: 28-34)
 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias “Nyob hauv cov lus qhia tas huv tib si, lo lus qhia twg yog thawj lo lus qhia?” Yes Xus teb rau nws tias “Thawj lo lus qhia yog lo lus no; His Xas Lais, koj mloog mog! Peb tus Huab Tais Tswv Ntuj tib leeg xwb yog Huab Tais. Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. Lo lus qhia ob yog lo lus no; Koj yuav nyiam tus nyob ze koj ib yam li koj nyiam koj. Tsis muaj lwm lo lus qhia loj dua ob lo lus no.”
Tus kws Ntawv Ntshiab hais rau Yes Xus tias “Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws. Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog zoo tshaj tej tsiaj hlawv thiab tej thaj txi Ntuj huv tib si.”
Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias “Koj nyob tsis deb ntawm Tswv Ntuj lub Ceeb Tsheej lawm.” Ces tsis muaj leej twg muaj cuab kav nug Yes Xus ntxiv.

Yaj Saub Os Xes phau ntawv (OX 5: 15c, 6: 1-6)
 HUAB TAIS hais tias “Thaum nej txom nyem, nej yuav mob siab nrhiav kuv.” Cov His Xas Lais hais tias “Nej tuaj, peb rov qab los cuag HUAB TAIS. Nws tau dua peb pov tseg, tab sis nws yuav rov kho peb. Nws tau nplawm peb, tab sis nws yuav qhwv peb cov qhov txhab. Nws tos ob hnub ces nws yuav rov muab txoj sia rau peb. Hnub peb, nws yuav tsa peb sawv rov los. Peb yuav tau ua lub neej nrog nws nyob. Peb kav tsij nrhiav kom paub HUAB TAIS. Nws yeej yuav tuaj tiag tiag, ib yam li lub hnub tawm thaum sawv ntxov. Nws yuav tuaj xws li cov kob nag, xws li cov nag poob los ywg av lub caij ntuj tshiab.”
HUAB TAIS hais tias “Kuv yuav ua dab tsi rau koj, Es Fais? Kuv yuav ua dab tsi rau koj, Yus Das? Nej txoj kev nyiam kuv yog zoo li cov huab thaum sawv ntxov, zoo li cov lwg uas qhuav sai sai. Yog vim li ntawd kuv thiaj kom cov Yaj Saub faib lawv ua ntau pawg, kuv lub ncauj hais cov lus muab lawv tua, kuv kev txiav txim tawm plaws xws li qhov pom kev. Vim yog kev nyiam thiaj xis kuv siab. Cov thaj txi Ntuj tsis xis kuv siab. Kev paub Tswv Ntuj xis kuv siab dua cov thaj hlawv tsiaj.”

Lub Moo Zoo raws li Lus Kas (LK 18: 9-14)
Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej li no “Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog neeg sau se. Tus Fas Lis Xais sawv ntsug, nws teev Ntuj li no nyob hauv siab ‘Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo li tus sau se ntawd. Ib lis piam, kuv yoo mov ob zaug. Kuv pub ib feem kaum ntawm tas txhia yam uas kuv khwv tau.’ Tus sau se nyob deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias ‘Aub! Tswv Ntuj, thov koj khuv leej kuv, vim kuv yog neeg txhaum!’ Kuv hais rau nej; tus sau se nqes rov mus tsev, nws ntshiab huv lawm, hos tus Fas Lis Xais tsis tau ntshiab huv. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa nws siab.”

Ntawv Xas Muas, phau Ib (1XM 16: 1, 6-7, 10-13)
HUAB TAIS hais rau Xas Muas tias “Koj ntim roj kom puv koj tus kub nyuj, koj sawv kev mus. Kuv xa koj mus tom Yes Xes  tsev nyob Npes Les Hes, vim nyob hauv nws cov tub kuv xaiv ib tug los ua vaj.”  Thaum Yes Xes thiab nws cov tub tuaj txi ntuj, Xas Muas xub pom Es Lias Npaws,  nws xav tias “HUAB TAIS tus pleev tuaj nyob ntawm HUAB TAIS xub ntiag lawm.” Tab sis HUAB TAIS hais rau Xas Muas tias “Koj txhob ntsia nws tus yam ntxwv sab nraud,  thiab nws lub cev loj siab. Kuv tsis yuav nws, vim Tswv Ntuj tsis ntsia li neeg ntsia,  neeg pom tus yam ntxwv sab nraud, hos HUAB TAIS pom hauv lub siab lub plawv.” Yes Xes coj nws xya leej tub tuaj rau ntawm Xas Muas xub ntiag, tab sis Xas Muas hais rau Yes Xes tias “HUAB TAIS tsis xaiv cov no ib tug li.” Xas Muas nug Yes Xes tias “Koj cov tub tas li no lawm lod?” Yes Xes teb tias  “Tshuav tus tub ntxawg. Nws zov cov tsiaj noj zaub.” Xas Muas hais rau Yes Xes tias  “Koj tso neeg mus hu nws los. Peb yuav tsis noj tsum mov no ua ntej nws los txog.”  Yes Xes thiaj tso neeg mus hu tus tub ntxawg los. Tus tub ntawd cov plaub hau liab daj,  nws lub ntsej muag zoo nraug, nws lub cev zoo saib. HUAB TAIS hais tias “Yog tus no,  koj sawv tsees mus pleev roj rau nws mas!”  Xas Muas nthos nkaus tus kub ntim roj, nws pleev roj rau tus tub ntxawg nyob ntawm  cov tij laug xub ntiag. Ces HUAB TAIS lub tswv yim ya ntxiag los nyob hauv Das Vis  txij hnub ntawd los lawm. 

Tsab ntawv Paj Lug sau mus rau cov ntseeg nyob Es Fes Xos (EFX 5: 8-14)
Kwv tij sawv daws, yav thaud nej yog qhov tsaus ntuj. Nyem no, nej nyob hauv Huab Tais, nej yog qhov pom kev. Nej yuav ua neej raws li qhov pom kev cov me nyuam. Lub txiv ntawm qhov pom kev, yog txhua txoj kev ua zoo, txoj kev ua ncaj, thiab txoj kev  nyiam qhov tseeb. Nej ua tib zoo nrhiav yam uas xis Huab Tais siab. Nej txhob nrog luag koom tes ua cov hauj lwm nyob hauv qhov tsaus ntuj uas tsis txi txiv, nej muab cov hauj lwm ntawd nthuav tawm mas zoo dua. Vim tej hauj lwm uas luag nyiag ua, mas yus twb txaj muag hais txog. Tab sis yog muab txhua yam ntawd nthuav rau saum qhov pom kev, mas sawv daws  yuav pom qhov tseeb. Txhua yam uas tshwm los rau qhov muag pom, mas yog qhov pom kev, thiaj muaj lo lus hais tias neeg tsaug zog, koj cia li tsim dheev mas, cia li sawv tsees hauv tsoom tuag los, mas Leej Pleev yuav ci pom kev lug rau saum koj.

Lub Moo Zoo raws li Zam (Z 9: 1-41)
Thaum Yes Xus tab tom taug kev, nws pom ib tug neeg ib txwm dig muag nruab thiab los. Nws cov thwj tim nug nws hais tias “Las Npis, leej twg ua txhaum, puas yog nws los yog nws niam nws txiv, nws thiaj yug los dig muag?” Yes Xus teb tias “Tsis yog nws tau ua txhaum, thiab kuj tsis yog nws niam nws txiv tau ua txhaum. Nws yug los zoo li no kom xwv Tswv Ntuj cov hauj lwm tawm hauv nws los rau sawv daws pom. Thaum tseem yog nruab hnub, peb yuav tsum ua Tus uas Xa kuv tuaj cov hauj lwm. Thaum tsaus ntuj lawm, mas tsis muaj leej twg ua tau hauj lwm ntxiv. Thaum kuv tseem nyob hauv lub qab ntuj no, mas kuv yog lub qab ntuj neeg qhov pom kev.” Yes Xus hais li ntawd tas, nws nti qaub ncaug rau hauv av, nws muab nws cov qaub ncaug ua ib qho av nkos. Nws muab qhov av nkos ntawd pleev tus dig muag ob lub qhov muag. Nws hais rau tus dig muag tias “Koj mus ntxuav muag tom lub pas dej Xis Los Es.” Lo lus no txhais tias Ntuj Xa.
Tus dig muag mus ntxuav tas, nws rov los, nws cia li pom kev tseeb lawm. Cov neeg nyob sib ze thiab cov uas tau pom nws yav dhau los, vim nws yog ib tug neeg thov khawv, lawv hais tias “Puas yog tus uas pheej zaum thov khawv?” Ib txhia hais tias “Yog tus ntawd.” Ib txhia hais tias “Tsis yog, yog ib tug zoo xws li tus ntawd.” Tus dig muag hais tias “Yog kuv los mas.”
Lawv hais rau nws tias “Ua li cas koj ob lub qhov muag ho qhib lawm? ” Tus dig muag teb tias “Tus hu ua Yes Xus, nws ua ib qho av nkos, nws muab pleev kuv qhov muag, ces nws hais rau kuv tias ‘Koj mus tom lub pas dej Xis Los Es, koj ntxuav muag.’ Kuv thiaj mus tod, kuv ntxuav muag tas, kuv cia li pom kev lawm.” Lawv hais rau tus dig muag tias “Nws dua qhov twg lawm?” Tus dig muag hais tias “Kuv tsis paub.”
Lawv coj tus uas thaud nws dig muag, mus rau cov Fas Lis Xais. Hnub uas Yes Xus ua av nkos los qhib tus neeg ntawd ob lub qhov muag yog hnub xas npas tos. Cov Fas Lis Xais rov qab nug tus dig muag saib ua cas nws thiaj li pom kev. Tus dig muag hais rau lawv tias “Nws muab av nkos pleev kuv qhov muag, kuv mus ntxuav muag tas ces kuv pom kev.” Muaj ib co Fas Lis Xais hais tias “Yeej tsis yog ib tug neeg tuaj ntawm Tswv Ntuj tuaj, vim nws tsis caiv hnub xas npas tos.” Lwm cov hais tias “Ib tug neeg txhaum ua puas tau tej lub cim loj li ntawd?” Ces lawv hais tsis sib haum.
Lawv thiaj rov hais rau tus dig muag tias “Koj ne, koj hais dab tsi txog tus uas qhib koj qhov muag?” Tus dig muag hais tias “Nws yog ib tug yaj saub.” Cov Yus Das tsis ntseeg tias nws yog tus uas yav thaud dig muag, zaum no nws pom kev lawm, ces lawv thiaj hu nws niam nws txiv tuaj. Lawv nug nws niam nws txiv tias “Tus no puas yog neb tus tub uas neb hais tias nws yug los nws yeej dig muag? Ua li cas nyem no nws thiaj pom kev?” Tus dig muag niam thiab txiv teb hais tias “Wb paub tias nws yog wb tus tub, thiab nws yug los nws yeej dig muag. Tab sis ua cas nyem no nws ho pom kev, mas wb tsis paub; leej twg qhib nws qhov muag, wb kuj tsis paub li. Nej nug nws mas, nws twb muaj hnub nyoog lawm: nws mam teb rau nej.”
Tus dig muag niam thiab txiv hais li ntawd vim nkawd ntshai cov Yus Das. Vim cov Yus Das tau hais haum tias leej twg lees tias Yes Xus yog Leej Pleev, mas lawv yuav ntiab nws tawm hauv lub tsev txoos. Yog vim li ntawd, nws niam nws txiv thiaj hais tias “Nws twb muaj hnub nyoog lawm; nej nug nws.”
Cov Yus Das rov hu tus neeg dig muag kom tuaj dua ib zaug ntxiv, lawv hais rau nws tias “Koj kav tsij cav txog Tswv Ntuj lub koob meej! Hos peb, mas peb paub tias tus neeg ntawd yog neeg txhaum.” Tus dig muag teb hais tias “Kuv tsis paub tias nws yog neeg txhaum los tsis yog. Kuv tsuas paub ib qho xwb, yog qhov tias thaud kuv dig muag, hos nyem no kuv pom kev lawm.” Lawv hais rau tus dig muag tias “Nws tau ua dab tsi rau koj? Nws qhib koj ob lub qhov muag li cas?” Tus dig muag teb rau lawv tias: “Kuv twb hais qhia nej tas lawm, nej tsis mloog. Vim li cas nej xav rov qab mloog dua? Puas yog nej xav los ua nws thwj tim thiab?” Ces lawv cem nws tias “Koj thiaj yog tus neeg ntawd thwj tim ntag; peb li, peb yog Mais Xes cov thwj tim. Peb paub tias Tswv Ntuj tau hais lus rau Mais Xes. Hos tus ntawd, mas peb tsis paub nws tuaj qhov twg tuaj.”
Tus dig muag teb rau lawv tias “Qhov no nej ua rau kuv xav tsis thoob, rau qhov nej tsis paub tias nws tuaj qhov twg tuaj, tab sis nws ho yog tus qhib tau kuv qhov muag. Peb paub tias Tswv Ntuj tsis mloog cov neeg txhaum. Tab sis yog leej twg teev nws thiab ua raws li nws lub siab xav, mas Tswv Ntuj mloog tus ntawd. Tsis tau muaj leej twg hnov dua hais txog ib tug neeg uas qhib tau tus neeg ib txwm dig muag lub qhov muag, yog tus neeg ntawd tsis tuaj ntawm Tswv Ntuj tuaj, mas nws yuav ua tsis tau dab tsi.” Lawv teb rau nws tias “Koj yug los, koj yeej yog neeg txhaum xwb, koj tseem qhuab qhia peb thiab?” Ces lawv muab nws thawb rau nraum zoov.
Yes Xus hnov tias lawv muab tus dig muag thawb rau nraum zoov. Thaum Yes Xus pom nws, Yes Xus hais tias “Koj puas ntseeg txog Neeg Leej Tub?” Tus dig muag teb hais tias “Huab Tais, Neeg Leej Tub yog leej twg? Koj qhia nws rau kuv, kom xwv kuv ntseeg txog nws.” Yes Xus hais rau nws tias “Koj twb pom nws lawm, yog tus uas tab tom nrog koj hais lus.” Tus dig muag hais tias “Huab Tais, kuv ntseeg.” Ces nws txhos caug pe Yes Xus.
Yes Xus hais tias “Kuv tuaj hauv lub qab ntuj no yog tuaj txiav txim kom xwv cov neeg uas tsis pom kev, pom kev tuaj, hos kom cov neeg pom kev ua neeg dig muag.” Cov Fas Lis Xais uas nrog Yes Xus nyob ntawd, hnov cov lus no, lawv hais rau nws tias “Peb ne, peb puas yog neeg dig muag thiab?” Yes Xus hais rau lawv tias “Yog tias nej dig muag, mas nej yuav tsis muaj txhaum. Tab sis nyem no, nej hais tias ‘Peb pom kev’, mas nej cov txhaum nyob li qub.”

Yaj Saub His Xais phau ntawv (HX 65: 17-21)
Saib ntawm no, kuv tsim cov txheej ntuj tshiab thiab ib lub ntiaj teb tshiab. Yuav tsis nco txog yav tas los lawm. Yav tas lawd, yuav tsis ntsawv lub siab ntxiv. Kuv tsim ib txog kev hom khaj mus ib txhiab ib txhis. Ntsia saib ! Kuv tsim Yes Lus Xas Les kom nws dhia hom khaj, kuv tsim nws tsoom pej xeem kom dhia zoo siab. Kuv yuav dhia zoo siab cav txog Yes Lus Xas Les, yuav dhia hom khaj cav txog kuv haiv neeg. Nyob hauv Yes Lus Xas Les yuav hnov suab lom zem. Nyob Yes Lus Xas Les, yuav tsis muaj cov me nyuam mos yug los nyob ob peb hnub xwb. Tsis muaj ib tug neeg laus uas nyob tsis puv nws lub hnub nyoog. Tus tuag hluas tshaj, mas nws lub hnub nyoog twb puv ib puas xyoo. Tus nyob tsis puv ib puas xyoo yog vim nws raug tsawm. Nyob Yes Lus Xas Les, lawv yuav txhim tsev rau lawv nyob. Lawv yuav cog ib co ntoo txiv cawv, lawv yuav tau noj cov txiv.

Lub Moo Zoo raws li Zam (Z 4: 43-54)
Dhau ob hnub ntawd lawm, Yes Xus sawv kev ntawm qhov chaw ntawd mus rau Nkas Lis Lais. Yes Xus yeej hais meej tias ib tug yaj saub tsis raug luag saib muaj nqis nyob hauv lub zos nws hlob. Tsis kav, thaum Yes Xus los rau Nkas Lis Lais, cov Nkas Lis Lais txais nws zoo, vim lawv tau pom tas txhia yam nws ua nyob Yes Lus Xas Les lub caij nqaum paj nqaum nruas. Vim lawv kuj tau mus nqaum paj nqaum nruas ped thiab. Yes Xus thiaj rov tuaj Kas Nas xeev Nkas Lis Lais, lub zos uas nws muab dej los txia ua cawv. Tus vaj ib tug nom muaj ib tug tub mob nyob Kas Fas Naus. Nws hnov tias Yes Xus los Yus Das teb los txog Nkas Lis Lais lawm, ces nws mus cuag Yes Xus, nws thov Yes Xus kom nqes mus kho nws tus tub, vim tus tub twb yuav tuag. Yes Xus hais rau nws tias “Yog nej tsis pom ib co cim thiab tej yam hwj huam, mas nej tsis ntseeg.”
Vaj ntxwv tus nom hais rau Yes Xus tias “Huab Tais, thov koj nqes mus, cheem kuv tus me nyuam tsis tau tuag.” Yes Xus hais rau nws tias “Koj rov mus mog, koj tus tub zoo lawm.” Tus neeg ntawd ntseeg lo lus Yes Xus hais rau nws, ces nws sawv kev mus. Thaum nws tab tom nqes mus, nws cov tub txib tuaj tos nws. Lawv hais rau nws tias nws tus tub zoo neej lawm. Nws nug lawv saib yog lub sij hawm twg tus tub thiaj rov zoo. Lawv hais rau nws tias “Nag, thaum ib teev hnub qaij, ces tus mob kub cev thim hlo lawm.” Leej txiv thiaj pom tias yog lub sij hawm uas Yes Xus hais rau nws tias ‘Koj tus tub zoo lawm.’ Ces nws ntseeg, nws thiab tas nws tsev neeg huv si ntseeg. Thaum Yes Xus los ntawm xeev Yus Das mus rau Nkas Lis Lais, mas nws ua lub cim ob zoo li ntawd.

Yaj Saub Es Xes Kias phau ntawv (EXK 47: 1-9, 12)
Tus neeg ntawd coj kuv rov los txog ntawm lub qhov rooj mus hauv lub Tuam Tsev Teev Ntuj. Ua ciav muaj ib tug dej ntws hauv taw rooj los dua sab hnub tuaj lawm, vim lub Tuam Tsev tig mus rau sab hnub tuaj lawm. Dej txhawv ntawm sab qab tsuas lub Tuam Tsev Teev Ntuj sab xis nram lub qab thaj txi Ntuj. Tus neeg coj kuv tawm ntawm lub qhov rooj nyob sab pej los, nws coj kuv ncig sab Tuam Tsev nraud los txog ntawm lub rooj vag uas tig rau sab hnub tuaj. Nyob ntawd, dej ntws ntawm sab xis los. Tus neeg ntawd txav mus dua sab hnub tuaj lawm, nws nqa ib txog hlua ntawm tes, nws ntsuas ntev li ib txhiab tshim, ces nws kom kuv hla dej. Dej vov kuv qij taw tas. Nws rov ntsuas ib txhiab tshim ntxiv thiab kom kuv hla. Dej nce txij kuv hauv caug. Nws rov ntsuas dua ib txhiab tshim. Nws kom kuv hla. Dej txij kuv duav lawm. Nws tseem rov qab ntsuas dua ib txhiab tshim ntxiv. Thaum ntawd cia li yog ib tug dej loj kuv hla tsis taus vim tus dej hlob thiab tob lawm, yog ib tug dej hla tsis tau li. Ces tus neeg hais rau kuv tias ” Neeg leej tub, Koj puas pom?” Nws thiaj coj kuv rov los rau tim ntug dej. Thaum kuv los txog, mas nyob ntawm ob sab ntug dej muaj ib co ntoo ntau ntau. Tus neeg ntawd hais rau kuv tias “Cov dej no ntws mus rau toob fab mus nram lub hav As Las Npas, yuav mus tshwm rau hauv lub hiav txwv. Cov dej no mus ua kom lub hiav txwv cov dej huv tuaj. Tus dej no ntws txog qhov twg mas tas puas tsav yam muaj txoj sia mus mus los los yuav ciaj nyob hauv cov dej no. Yuav muaj ntses ntau heev vim tus dej no ntws mus txog qhov twg mas yam twg yuav huv tuaj thiab txoj sia hlob taus. Nyob ntawm ob sab ntug dej yuav tuaj tas puas tsav yam txiv ntoo, lawv cov nplooj yuav tsis zeeg ib zaug thiab lawv yuav txi txiv mus li. Niaj hli lawv yuav txi ib co txiv tshiab, vim cov dej ntws ntawm thaj chaw ntshiab los. Cov txiv yuav yog ib co txhiam xws, cov nplooj yuav yog ib co tshuaj.”

Lub Moo Zoo raws li Zam (Z 5: 1-3a, 5-16)
Dhau tej ntawd tas lawm, txog cov Yus Das ib lub hnub nyoog nqaum paj nqaum nruas, ces Yes Xus nce mus pem Yes Lus Xas Les. Nyob Yes Lus Xas Les, muaj ib lub pas dej nyob ze lub Qhov Rooj Yaj, uas lus Hes Nplaws hu ua Npes Xas Thas. Lub pas dej no muaj tsib lub ruv vov. Ib pab neeg coob kawg pw hauv cov qab ruv no; ib co mob, ib co dig muag, ib co ceg tawv, ib co tuag ceg. Muaj ib tug txiv neej nyob ntawd, nws mob tau peb caug yim xyoo. Yes Xus pom nws pw, Yes Xus paub tias nws mob li ntawd tau ntev los, nws hais rau tus neeg mob tias “Koj puas xav kom koj tus mob zoo?” Tus neeg mob teb rau Yes Xus tias “Huab Tais, thaum dej npau, kuv tsis muaj leej twg pab muab kuv tso rau hauv dej. Thaum kuv tab tom mus, twb muaj lwm tus xub nqes ua kuv ntej lawm.” Yes Xus hais rau nws tias “Koj sawv! Nqa koj daim pua chaw, koj mus kev.” Tam sis ntawd tus neeg mob zoo hlo. Nws nqa nws daim pua chaw, ces nws sawv mus kev. Hnub ntawd yog hnub Xas Npas Tos. Cov Yus Das hais rau tus neeg uas zoo lawd tias “Hnub no yog Xas Npas Tos, txwv tsis pub koj nqa koj daim pua chaw.” Tab sis nws hais rau lawv tias “Tus uas kho kuv zoo, nws hais rau kuv tias : Nqa koj daim pua chaw, koj mus kev.” Lawv nug nws tias “Leej twg yog tus hais rau koj tias : Nqa koj daim pua chaw, koj mus kev?” Tab sis tus neeg mob uas zoo ntawd tsis paub yog leej twg, vim Yes Xus twb ploj lawm, thiab muaj neeg coob coob nyob ntawd. Ib tsam, Yes Xus pom nws hauv lub Tuam Tsev Teev Ntuj, Yes Xus hais rau nws tias “Nyem no, koj tus mob zoo lawm, koj txhob ua txhaum ntxiv, tsam ib yam phem tshaj ho rov raug koj dua.” Tus neeg mus hais rau cov Yus Das tias tus kho nws zoo yog Yes Xus. Vim li ntawd, cov Yus Das thiaj hiam Yes Xus : vim Yes Xus ua qhov ntawd hnub Xas Npas Tos. 

Lo lus ntuas.
Lub pas dej Npes Xas Thas nyob ze lub qub ntsa zeb xov Yes Lus Xas Les yav thaud. Yog ib lub pas dej uas neeg khawb tob li 14 mev. Lawv khawb ob lub pas dej. Lub dav dua yog ntev li 55 mev, dav li 48 mev. Niaj hnub peb tseem mus pom tau. Lub pas dej nyob ze lub rooj loog yaj; yog lub qhov rooj lawv cab cov yaj uas lawv yuav muab tua ua cov thaj txi Ntuj, vim lub Tuam Tsev Teev Ntuj nyob ze ntawd.
Huab Tais Yes Xus hla ze ntawm lub pas dej yuav mus hauv lub Tuam Tsev Teev Ntuj. Muaj neeg coob coob, vim yog ib lub hnub nyoog nqaum paj nqaum nruas.
Nyob ze lub pas dej, Huab Tais Yes Xus pom muaj ntau tus neeg mob pw nyob ntawd. Muaj ib tug uas nws nyob twm zeej. Luag tej muaj tus pab; lawv pom dej yuav npau, lawv tsuag tsuag pab tso lawv tus neeg mob kom xub nqes hauv dej. Hos tus uas Huab Tais Yes Xus yuav kho, tsis muaj neeg pab nws vim nws nyob ntawd tau 38 xyoo lawm, sawv daws xav tias tab txawm ua li cas tus neeg ntawd tus mob yog ib tug mob uas kho tsis tau, ces nws cov neeg cia li tso nws nyob nws. Huab Tais Yes Xus pom nws txom nyem dua cov, nws tsis muaj chaw tso siab tias nyaj muaj ib hnub nws yuav nqes tau hauv dej kom nws tus mob zoo hlo. Huab Tais Yes Xus hlub nws.
Huab Tais Yes Xus tsis hais rau nws tias “Kuv yuav pab koj nqes hauv dej.” Huab Tais Yes Xus lub hwj huam loj dua cov dej ntawd thiab leej dua. Huab Tais Yes Xus tsuas hais lo lus no “Koj sawv mas! Nqa koj daim lev pua pw, koj mus!” Ces tus neeg tuag ceg cia li zoo hlo. Huab Tais Yes Xus ua li ntawd tas, nws tsis tos kom cov neeg nyob ntawd qhuas txog nws lub hwj huam. Nws cia li mus ntxiv txog lub Tuam Tsev Teev Ntuj. Tus tuag ceg twb tsis paub tias tus kho nws zoo hlo yog leej twg.
Hnub uas Huab Tais Yes Xus kho tus neeg tuag ceg, mas yog hnub Xas Npas Tos. Vim Huab Tais Yes Xus xav qhia peb tias kev pab cov neeg txom nyem thiab cov neeg muaj mob muaj nkeeg, mas loj dua kev caiv ub caiv no. Yus hais tsis tau tias yus pab tsis tau lwm tus nyob hauv Hnub Chiv los yog lub caij teev Ntuj vim tias ua ib txoj hauj lwm hlub luag tej, yog zoo ib yam li yus tau ua ib txoj hauj lwm nyiam Tswv Ntuj.

Yaj Saub His Xais phau ntawv (HX 49: 8-15)
HUAB TAIS hais li no “Thaum txog lub caij ntuj pub txiaj ntsim, kuv tau mloog koj thov. Thaum txog hnub cawm neeg, kuv tau tsob hwb koj. Kuv tau puab koj, kuv tau xaiv koj ua tus tsim haiv neeg cog lus, ua tus tsa lub teb chaws rov sawv, tus faib cov cuab tam uas luag tau muab rhuav. Ua tus hais rau cov neeg kaw nyob pej kum teb tias ‘Nej tawm los mog!’ Ua tus hais rau cov neeg nyob hauv qhov tsaus ntuj tias ‘Nej tawm tuaj kom sawv daws pom nej mog!’ Lawv yuav coj tej tsiaj mus nog zaub ntawm tej ntug kev, cov roob do hau yuav tuaj tej roob zaub. Lawv yuav tsis tshaib, tsis nqhis, cov cua kub thiab lub hnub yuav tsis ntaiv lawv. Vim tus hlub lawv yuav coj lawv kev, nws yuav coj lawv mus rau cov dej txhawv. Kuv yuav muab tas cov roob huv si los ua tej txoj kev, kuv yuav txhub tej kev kom siab tuaj. Ntsia saib! Tej pab neeg sawv kev deb tuaj. Saib! Ib co tuaj pej fab tuaj, ib co tuaj xib fab tuaj. Cov ntawd tuaj Xis Nim teb tuaj. Cuaj txheej ntuj, nej qw suab lom zem mas! Ntiaj teb nrag cais, koj dhia daj dhia luag mas! Cov toj roob hauv pes, nej dhia hom khaj seev suab zoo siab, vim HUAB TAIS nplij nws haiv neeg, nws hlub nws cov neeg txom nyem. Yav nram ntej ub, Xis Yoos hais tias “HUAB TAIS tso kuv pov tseg ! HUAB TAIS hnov qab kuv lawm!” Ib tug poj niam puas hnov qab tus me nyuam noj nws mis? Nws yuav tsis hlub tus uas tawm hauv nws lub cev los lod? Tab txawm tej niam ntawd hnov qab lawv cov me nyuam, mas kuv yuav tsis hnov qab Xis Yoos ib zaug li!”

Lub Moo Zoo raws li Zam (Z 5: 17-30)
Yes Xus teb rau lawv tias “Kuv Txiv ua hauj lwm txog tav no, kuv kuj ua hauj lwm thiab.” Yog vim li ntawd, cov Yus Das yim huab xav muab Yes Xus tua, tsis yog tim nws tsis caiv hnub xas npas tos xwb, nws tseem hu Tswv Ntuj ua nws Txiv, nws tsa nws nrog Tswv Ntuj loj sib luag. Yes Xus thiaj tsa ncauj hais rau lawv tias “Kuv hais qhov muaj tseeb tiag rau nej; Leej Tub ua yam twg, nws tsis ua nws xwb, nws tsuas ua tau qhov nws pom Leej Txiv ua. Vim tias Leej Txiv ua yam twg, Leej Tub kuj ua raws nraim li ntawd. Leej Txiv nyiam Leej Tub, nws muab ib puas tsav yam nws ua rau Leej Tub saib. Nws tseem yuav muab ib co hauj lwm loj tshaj cov no rau Leej Tub saib, kom nej qhuas. Leej Tub ua kom leej twg muaj txoj sia kuj tau, nyob ntawm nws xav, xws nkaus li Leej Txiv tsa cov tuag sawv, thiab ua kom lawv rov muaj txoj sia. Leej Txiv tsis txiav txim rau leej twg : nws tso txoj hauj lwm txiav txim huv tib si rau Leej Tub, kom sawv daws hwm Leej Tub ib yam li hwm Leej Txiv. Tus tsis hwm Leej Tub, kuj tsis hwm Leej Txiv uas yog tus xa Leej Tub tuaj. Kuv hais qhov muaj tseeb tiag rau nej : tus twg mloog kuv lo lus, thiab ntseeg txog tus xa kuv tuaj, nws tau txoj sia nyob mus li, nws tsis raug txiav txim, nws hla txoj kev tuag mus rau hauv txoj sia. Kuv hais qhov muaj tseeb tiag rau nej tias lub zim txwv los txog lawm – yog nyem no ntag! – txog lub caij cov tuag yuav hnov Tswv Ntuj Leej Tub lub suab. Cov uas yuav hnov, yuav muaj txoj sia nyob. Leej Txiv pub kom Leej Tub muaj txoj sia nyob hauv nws, ib yam li Leej Txiv uas nws muaj txoj sia nyob hauv nws. Leej Txiv pub hwj huam rau Leej Tub kom txiav txim tau, vim nws yog Neeg Leej Tub. Nej tsis txhob poob siab, vim txog lub sij hawm uas tas ib tsoom neeg nyob hauv qhov ntxa yuav hnov Neeg Leej Tub lub suab, ces lawv yuav tawm los. Cov tau ua zoo, yuav sawv rov los txais txoj sia, hos cov tau ua phem, yuav sawv rov los raug txim. Kuv ua yam twg, kuv ua tsis tau kuv ib leeg. Kuv txiav txim raws li lo lus kuv hnov, thiab kuv cov lus txiav txim ncaj, vim kuv tsis nrhiav kom tau ua raws li kuv lub siab xav, kuv tsuas nrhiav kom tau ua raws li tus xa kuv tuaj lub siab xav.”

Lo los ntuas.
Huab Tais Yes Xus hu Tswv Ntuj ua nws Txiv, ces peb yuav hwm Yes Xus li peb hwm Tswv Ntuj tiag. Vim Huab Tais Yes Xus nrog nraim nws Leej Txiv uas yog Tswv Ntuj. Peb nyiam Huab Tais Yes Xus, mas zoo li peb nyiam Tswv Ntuj thiab. Cov nom Yus Das tsis xav qhuas txog Huab Tais Yes Xus uas nws tau kho ib tug neeg tuag ceg tau 38 xyoo. Lawv kaw lawv lub siab thiab lawv lub tswv yim, ces lawv tsis tso siab tos thiab tsis txais cov hwj huam yees ntxwv uas Huab Tais Yes Xus tau ua yog vim tuaj ntawm Tswv Ntuj tuaj. Peb pom Huab Tais Yes Xus ua ntau yam zoo nyob hauv neeg nruab siab thiab Huab Tais Yes Xus tau pab kho ntau leej neeg mob, mas peb tsis txhob ua li cov Yus Das uas tsis muaj kev tso siab thiab tsis txais cov hauj lwm Huab Tais Yes Xus ua. Thaum Huab Tais Yes Xus kho ib tug neeg muaj mob kom zoo hlo, mas kuj yog Huab Tais Yes Xus kho tus neeg ntawd lub siab kom rov kaj tuaj. Huab Tais Yes Xus cov hwj huam txawj kho neeg tus mob thiab neeg tus ntsuj plig kom zoo thiab rov huv tuaj. Huab Tais Yes Xus kho tus tuag ceg thiab lwm tus neeg mob, yog vim Huab Tais Yes Xus hlub cov neeg txom nyem thiab muaj txiab nkeeg. Yog ib lub cim qhia peb tias tab txawm peb tau ua txhaum los lawm 20 xyoo thiab 30 xyoo, tsis kav Huab Tais Yes Xus tuaj yeem pab cawm peb kom dim ntawm peb tej kev ua txhaum tau. Huab Tais Yes Xus pab kom peb txawj sawv mus taug txoj kev ua cov hauj lwm nyiam Tswv Ntuj.
Peb hais ntau ntau txog cov neeg muaj txiab muaj nkeeg thiab muaj txhaum, tsis yog tias Huab Tais Yes Xus hlub cov neeg muaj mob muaj nkeeg los hlub cov neeg txom nyem xwb. Huab Tais Yes Xus yeej hlub txhua leej txhua tus sib npaug zos, tab sis yog vim Huab Tais Yes Xus hlub neeg, ces nws cov hauj lwm thiaj nyob ntau ntau ntawm cov neeg muaj mob muaj nkeeg thiab cov neeg txom nyem. Vim Huab Tais Yes Xus paub tias cov neeg noj qab nyob zoo, mas lawv tsis vam txog cov kws tshuaj. Tsuas yog cov neeg muaj mob muaj nkeeg xwb, thiaj vam txog cov kws tshuaj los kho lawv. Lub caij thaum Huab Tais Yes Xus tseem ua neej nyob, mas cov neeg muaj mob muaj nkeeg feem coob yog cov raug luag saib tsis taus thiab muaj tej tus mob phem uas cov kws tshuaj kho tsis tau, ces lawv tos ntsoov saib puas muaj ib tug neeg yuav cawm tau kom lawv dim ntawm lawv tus mob. Tsuas muaj Huab Tais Yes Xus tib leeg xwb, uas pab kho lawv zoo hlo. Huab Tais Yes Xus tsis vam txog cov kws tshuaj los yog cov txiv dab kho. Huab Tais Yes Xus vam txog lub hwj huam tuaj ntawm Tswv Ntuj tuaj kho neeg xwb. Vim Huab Tais Yes Xus yog Tswv Ntuj Leej Tub, ces nws muaj Tswv Ntuj lub hwj huam nrog nraim nws. Huab Tais Yes Xus thiaj muaj cuab kav kho tau ntau tus neeg mob thiab tsa tau cov neeg tuag kom ciaj sawv rov los.

Ntawv Kev Tsiv (KT 32: 7-14)
HUAB TAIS hais rau Mais Xes tias “Koj kav tsij nqes mus sai, vim koj haiv neeg uas koj tau coj tawm ntawm Hais Nkws Tos teb los, twb ua phem lawm. Lawv tos tsis taus, lawv twb maj ncaim ntawm txoj kev uas kuv nyuam qhuav qhia kom lawv taug. Lawv twb nchuav tau ib tug mlom nyuj rau lawv teev, lawv pe, thiab lawv tua tsiaj txi tus mlom. Lawv hais tias ‘Cov His Xas Lais, nej ntsia, tus no yog nej tus Tswv Ntuj uas tau coj nej tawm ntawm Hais Nkws Tos teb los.'” HUAB TAIS hais ntxiv rau Mais Xes tias “Kuv pom tias haiv neeg ntawd yog ib haiv neeg xwb qwb txhav dhau. Zaum no, koj cia kuv npau taws rau lawv, kuv yuav muab lawv rhuav pov tseg kom tas, kuv mam li muab koj mus tsim dua ib haiv neeg loj.” Mais Xes ua tib zoo thov nws tus HUAB TAIS Tswv Ntuj kom Huab Tais zoo siab, nws hais tias “HUAB TAIS, vim li cas koj thiaj li npau taws rau haiv neeg uas koj lub zog loj thiab koj txhais tes muaj hwj huam tau coj tawm ntawm Hais Nkws Tos teb los? Vim li cas koj xav kom cov Hais Nkws Tos tau kev hnyos tias ‘Yog koj siab phem koj txhob txwm coj lawv los tuag kom tas nyob pem roob kom lawv txhob tshuav ib tug nyob ntiaj teb ntxiv?’ Koj thim koj lub siab npau taws ceev thiab tso qhov phem uas koj xav ua rau koj haiv neeg pov tseg mas. Thov koj nco ntsoov txog koj cov tub txib Has Nplas Has, His Xas Has thiab His Xas Lais, uas koj tau cog lus ruaj rau lawv tias ‘Kuv yuav ua kom nej cov xeeb ntxwv huam vam coob npaum li cov hnub qub, thiab kuv yuav muab lub teb chaws uas kuv tau hais rau nej, pub rau nej cov xeeb ntxwv, ua lawv tug mus ib txhis.’” Ces HUAB TAIS thim xav, nws tsis ua phem rau nws haiv neeg raws li nws tau hais.

Lub Moo Zoo raws li Zam (Z 5: 31-47)
Yes Xus hais rau cov Yus Das tias “Yog kuv rov ua tim khawv zeem txog kuv, mas kuv cov lus pov thawj tsis yog lus tseeb. Yog lwm tus ua tim khawv zeem txog kuv, mas kuv paub tias nws cov lus pov thawj zeem txog kuv ntawd yog lus tseeb. Nej xa ib co tub coj xo mus cuag Zam. Zam ua tim khawv txog qhov tseem ceeb. Kuv mas kuv tsis txais lus zeem tseeb ntawm ib tug neeg, kuv hais tej ntawd kom nej txais kev cawm. Zam yog lub teeb cig thiab ci tuaj, ces nej xyiv fab hom khaj ib ntus nyob hauv nws qhov pom kev. Kuv cov lus ua tim khawv loj dua Zam cov : yog cov hauj lwm Leej Txiv muab rau kuv ua, kuj yog tib co hauj lwm kuv ua no rov ua tim khawv txog kuv, thiab ua tim khawv tias yog Leej Txiv xa kuv tuaj. Leej Txiv uas xa kuv tuaj, nws kuj ua tim khawv txog kuv thiab. Nej tsis tau hnov Leej Txiv lub suab ib zaug, tsis tau pom nws ntsej muag, thiab nej tsis muaj nws lo lus nyob hauv nej, vim nej tsis ntseeg tus uas Leej Txiv xa tuaj. Nej tshawb hauv Ntawv, vim nej xav tias nej yuav tau txoj sia nyob mus li ntawm cov Ntawv los. Twb yog Ntawv ua tim khawv txog kuv. Tab sis nej tsis xav los cuag kuv kom tau txoj sia. Kuv tsis txais koob meej ntawm neeg, kuv paub tias nej tsis muaj ib pluaj siab nyiam Tswv Ntuj nyob hauv nej. Kuv tuaj ntawm Leej Txiv lub npe tuaj, tab sis nej tsis txais kuv. Hos lwm tus, nws tuaj nws xwb, nej ho txais nws. Nej yuav ua cas ntseeg tau, vim nej tsuas rov nrhiav lub koob meej nyob hauv nej. Nej tsis nrhiav lub koob meej tuaj ntawm Tswv Ntuj tib leeg tuaj. Nej txhob xav tias yog kuv yuav kom nej rau Leej Txiv. Tus yuav kom nej yog Mais Xes, nws yog tus nej tso siab rau. Yog nej ntseeg Mais Xes, nej kuj yuav ntseeg kuv thiab, vim Mais Xes sau ntawv hais txog kuv. Yog nej tsis ntseeg tej lus Mais Xes sau, mas nej yuav ua cas ntseeg kuv tej lus?”

Ntawv Thoob Tsib (ThT 2: 1a, 12-22)
Cov neeg tsis hwm Ntuj hais tias “Peb kav tsij cuab ntxiab rau tus neeg ncaj, vim nws ua ntxhov peb siab, nws txiav txim rau peb tus yam ntxwv, nws cem peb tias peb ua txhaum rau Txoj Cai, ua txhaum rau txoj kev peb tau kawm. Nws khav tias nws paub Tswv Ntuj, nws rov hu nws ua Huab Tais tus me nyuam. Tus siab ncaj yog ib tug txiav txim rau peb zaj tswv yim, peb ceeb laj pom nws hwv lawm. Nws txoj kev ua neej tsis xws luag txoj, nws tej xub ke txawv luag. Nws saib peb zoo li tej yam cuav. Nws txav ntawm peb txoj kev cuag li peb txoj kev yog tej yam qias. Nws tshaj tias hnub kawg cov neeg ncaj yuav tau txoj hmoov zoo, nws khav tias nws txiv yog Tswv Ntuj. Peb sim saib qhov nws hais saib puas muaj tseeb. Peb sim ntsia saib nws yuav tuag zoo li cas. Yog tus siab ncaj yog Tswv Ntuj tus tub tiag, mas Tswv Ntuj yuav pab nws, thiab yuav npo nws ntawm cov ntxub nws txhais tes. Peb yuav sim nws, peb ua tub qaug nws, peb hiam nws saib. Kom peb paub nws lub siab zoo npaum li cas, thiab saib nws puas ua siab ntev nyiaj kom dhau. Peb kav tsij txiav txim kom nws tuag raws ib txog kev poob koob meej, vim nws twb hais tias yuav muaj tus tuaj npo nws. Cov tsis hwm Ntuj xav tswv yim li ntawd, tab sis lawv yuam kev, lawv lub siab phem mooj lawv lub qhov muag. Lawv tsis paub Tswv Ntuj cov txuj zais tob tob. Lawv tsis tso siab tias Ntuj yuav pub nqi zog rau cov neeg ntshiab, lawv tsis ntseeg tias cov neeg siab huv yuav tau txais paj tshab.

Lub Moo Zoo raws li Zam (Z 7: 1-2, 10, 25-30)
Yes Xus mus ncig hauv xeev Nkas Lis Lais. Nws tsis xav mus hauv xeev Yus Das, vim cov Yus Das nrhiav kev muab nws tua. Yuav txog lub hnub nyoog nqaum paj nqaum nruas tsa tsev tsam phooj. Thaum Yes Xus cov kwv tij nce mus nqaum paj nqaum nruas tas lawm, ces nws kuj nce mus thiab, tab sis nws mus nraim nkoos tsis pub leej twg pom. Muaj ib co neeg nyob Yes Lus Xas Les hais tias “Tus ntawd tsis yog tus uas lawv nrhiav nws tua lod? Saib, zaum no nws tab meeg hais lus, luag tsis hais dab tsi rau nws li. Cov thawj coj puas tau lees tias nws yog Leej Pleev tiag? Tab sis, peb paub nws nyob qhov twg tuaj. Hos Leej Pleev, thaum nws tuaj, mas tsis muaj neeg yuav paub tias nws nyob qhov twg tuaj.” Thaum Yes Xus qhia nyob hauv lub Tuam Tsev Teev Ntuj nws hais nrov nrov tias “Nej paub kuv thiab paub tias kuv nyob qhov twg tuaj. Tsis yog kuv tuaj kuv. Tus xa kuv tuaj, nws yog ib tug tseem ceeb, nej tsis paub nws. Hos kuv paub nws, vim kuv tuaj ntawm nws tuaj, thiab yog nws xa kuv tuaj.” Lawv nrhiav kev ntes Yes Xus, tab sis tsis muaj leej twg tsa tes tuav nws, vim nws lub zim txwv los tsis tau txog.

Yaj Saub Yes Les Mias phau ntawv (YLM 11: 18-20)
HUAB TAIS xub qhia kuv mas kuv thiaj paub tias lawv ua dab tsi rau kuv. Kuv zoo xws li tus thav yaj uas luag cab mus hauv lub tsev tua tsiaj. Kuv tsis paub tias lawv xav ua phem rau kuv. Lawv hais tias “Peb muab tus ntoo ntawd rhuav pov tseg kom nws txhob nrog cov neeg ciaj nyob, kom txhob muaj ib tug neeg nco txog nws lub npe.” Tsoom tub rog tus HUAB TAIS, koj yog tus txiav txim raws txoj kev ncaj, koj yog tus tsom hauv neeg nruab siab thiab tsom neeg tus duab, kuv thov koj pub kuv pom tias koj yuav txiav txim li cas, vim kuv cia koj ua tus tu rooj plaub no.

Lub Moo Zoo raws li Zam (Z 7: 40-53)
Thaum tsoom neeg ntawd hnov Yes Xus hais cov lus no, mas coob leej hais tias “Tus no yog tus Yaj Saub tiag!” Ib txhia hais tias “Yeej yog Leej Pleev lawm tiag!” Lwm cov hais tias “Leej Pleev puas yuav tuaj Nkas Lis Lais tuaj? Ntawv tsis tau hais tias Leej Pleev yog Das Vis xeeb ntxwv thiab nws yuav tawm hauv Das Vis lub zos Npes Les Hes tuaj, no lod?” Li ntawd, tsoom sid sib faib, tsis sib haum tim Yes Xus. Lawv ib txhia xav ntes Yes Xus, tab sis tsis muaj leej twg tsa tes nthos Yes Xus. Cov zov keeb thiaj rov los cuag cov thawj leej choj thiab cov Fas Lis Xais. Lawv hais rau cov zov keeb tias “Vim li cas nej tsis coj nws los?” Cov zov keeb teb hais tias “Tsis tau muaj leej twg hais lus zoo cuag li tus neeg ntawd ib zaug!” Cov Fas Lis Xais hais rau cov zov keeb tias “Puas yog nej raug nws haub tau nej lawm thiab? Nyob hauv cov thawj coj, puas muaj ib tug ntseeg txog nws? Los nyob hauv cov Fas Lis Xais, puas muaj ib tug ntseeg txog nws? Hos tsoom niag neeg tsis tsim txiaj ntawd, lawv tsis paub Txoj Cai li, lawv yog cov uas Ntuj foom phem rau.
Nis Kos Des Mos, yog ib tug Fas Lis Xais uas yav dhau los nws tau tuaj cuag Yes Xus, nws hais rau lawv tias “Peb txoj cai puas kheev kom cia li muab txim rau ib tug neeg uas peb tsis tau xub hnov nws thiab paub tej yam nws ua tso?” Lawv teb rau Nis Kos Des Mos tias “Koj puas yog ib tug nyob Nkas Lis Lais tuaj thiab? Koj soj ntsuam zoo zoo mas, koj yuav pom tias tsis muaj ib tug yaj saub sawv hauv Nkas Lis Lais tuaj li.” Ces lawv nyias rov mus nyias tsev.

HL 2: 14, 22-32

MT 28: 8-15
Ob tug poj niam tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim. Yes Xus tuaj tos ob tug poj niam kev, nws hais tias “Neb nyob kaj lug”.
Ces nkawd txav los ze Yes Xus, nkawd puag Yes Xus ko taw, nkawd pe nws. Yes Xus hais rau nkawd tias “Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ntawd.” Lub sij hawm ob tug poj niam tab tom rov mus, cov zov keeb ob peb leeg kuj rov mus hauv nroog. Lawv mus qhia tej xwm uas lawv tau pom rau cov thawj leej choj. Cov thawj leej choj nrog cov txwj laus sib sau tuav xam. Lawv muab nyiaj ntau rau cov zov keeb, lawv hais tias “Nej hais li no; ‘Hmo ntuj, thaum peb tsaug zog, Yes Xus cov thwj tim tuaj nyiag nws lub cev.’ Yog tias tej lus no nrov txog tus nom tswj teb chaws pob ntseg, peb yuav npliag kom nej tsis txhob raug dab tsi nyuaj.” Cov zov keeb khaws cov nyiaj, lawv ua raws li cov hlob qhia lawv. Cov lus no thiaj ri mus hauv cov Yus Das txog niaj hnub no.

HL 2: 36-41

Z 20: 11-18
Mab Liab sawv ze lub ntxa sab nraud, nws quaj. Thaum nws quaj, nws khoov rau hauv lub ntxa, ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem yav taub hau, ib tug zaum nram yav ko taw. Ob tug Tshiab hais rau Mab Liab tias “Phauj, ua cas koj quaj?” Mab Liab hais rau nkawd tias “Vim lawv nqa kuv tus Huab Tais lawm. Kuv tsis paub lawv muab nws tso qhov twg.” Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus. Yes Xus hais rau Mab Liab tias “Phauj, ua cas koj quaj? Koj nrhiav leej twg?” Mab Liab xav tias yog tus saib lub vaj, ces Mab Liab hais rau nws tias “Huab tais, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los.” Yes Xus hais rau Mab Liab tias “Mab Liab!” Mab Liab tig hlo mus. Nws ua lus Hes Nplaws hais tias “Las Npus Nis!” Txhais tias ‘Xib Hwb.’ Yes Xus hais rau Mab Liab tias “Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj.” Mab Liab Mas Ntas Las thiaj los tshaj rau cov thwj tim hais tias “Kuv pom Huab Tais lawm. Nws hais cov lus no rau kuv.”

HL 3:1-10

LK 24: 13-35
Tib hnub ntawd, ob leeg hauv cov thwj tim taug kev mus rau ib lub zos hu ua Es Mas Ws, deb li rau caum ncuas kev ntawm Yes Lus Xas Les. Nkawd sib tham txog txhua tsav yam xwm uas tau tshwm sim tuaj. Thaum nkawd piav thiab sib tham txog tej ntawd, Yes Xus caum tau nkawd, nws nrog nkawd mus kev. Tab sis nkawd qhov muag zeem tsis tau Yes Xus. Ces Yes Xus hais rau nkawd tias “Neb sib tham txog tej lus dab tsi taug kev?” Ces nkawd nres, nkawd ntsej muag ntshaus tas. Tus hu ua Khes Os Fas qhib ncauj hlo hais tias “Tas cov neeg tuaj pem Yes Lus Xas Les, ntshai koj tib leeg xwb thiaj tsis paub txog qhov uas tau tshwm sim ob peb hnub no!” Yes Xus hais rau nkawd tias “Muaj dab tsi?” Nkawd hais rau Yes Xus tias “Tej xwm uas hais txog Yes Xus Nas Xas Les. Nws yog ib tug yaj saub ua tau tej hauj lwm thiab hais tau tej lus muaj hwj huam, nyob ntawm Tswv Ntuj thiab tsoom pej xeem xub ntiag. Tab sis peb cov Thawj Leej Choj thiab peb cov nom tswv ntes nws rau luag, kom luag txiav lub txim tuag rau nws thiab muab nws dai saum ntoo cuam. Peb mas peb vam tias nws yog tus yuav txhiv His Xas Lais. Tsis tag li ntawd, tej xwm no tshwm sim tau peb hnub, ces ob peb tug poj niam uas yog peb cov neeg, tseem ua rau peb poob siab tas. Tag kis no, lawv sawv ntxov mus tom ntxa, lawv nrhiav tsis tau nws lub cev. Lawv rov los hais rau peb tias ib cov Tshiab tawm los rau lawv pom. Cov Tshiab hais tias Yes Xus muaj txoj sia nyob. Cov nrog peb, ob peb leeg kuj tau mus txog tom lub ntxa, lawv pom txhua yam raws li cov poj niam hais, tab sis lawv kuj tsis pom nws lub cev thiab.” Ces Yes Xus hais rau nkawd tias “Ua cas nej lub siab yuav ruam ua luaj, thiab yuav ntseeg qeeb ua luaj txog tas txhua yam uas cov Yaj Saub tau tshaj los! Tej ntawd tsis yog txoj kev tsim txom uas Leej Pleev yuav tsum raug tso, nws mam li mus hauv nws lub koob meej lod?” Yes Xus txhais cov Ntawv uas sau txog nws, txij Mais Xes los txog cov Yaj Saub tas huv tib si rau nkawd. Thaum lawv tuaj yuav txog lub zos uas ob tug thwj tim mus, Yes Xus ua txuj yuav mus ntxiv. Tab sis nkawd cheemYes Xus tias “Nrog wb nyob mas! Yuav tsaus ntuj, lub hnub twb yuav poob qho.” Yes Xus thiaj chaws mus hauv tsev, nws nrog nkawd nyob. Thaum nws nrog nkawd zaum ntawm rooj mov, nws tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd. Ces nkawd qhov muag qhib plho, nkawd zeem tau Yes Xus. Tab sis Yes Xus ploj ntais ntawm nkawd xub ntiag lawm. Ces nkawd rov sib tham tias “Thaum nws hais lus rau wb tom kev, thiab nws txhais Ntawv rau wb, mas wb lub siab kub lug hauv nrog cev, puas yog?” Ces nkawd sawv tsees tam sis ntawd, rov mus Yes Lus Xas Les. Nkawd los pom Pab Kaum Ib nrog lawv cov npawg sib txoos ua ke. Lawv hais tias “Huab Tais sawv rov los lawm tiag, nws tawm los rau Xis Moos pom!” Ces nkawd piav qhov uas tshwm tuaj nyob tom kev, thiab piav tias Huab Tais ua dab tsi, nkawd thiaj zeem tau nws thaum nws ntais lub ncuav mov.

HL 3:11-26

LK 24: 36-48
Thaum lawv tseem sib tham txog tej lus ntawd, Yes Xus sawv ntsug hauv nruab nrab lawv, nws hais rau lawv tias “Nej nyob kaj lug.” Cov thwj tim ceeb nkaus, lawv ntshai kawg, lawv xav tias lawv pom ib tug dab. Ces Yes Xus hais rau lawv tias “Vim li cas nej poob siab? Vim li cas tej zaj ua xyem xyav li ntawd sawv los nyob hauv nej lub siab? Nej ntsia kuv ob txhais tes thiab ob txhais taw; yog kuv tiag! Nej xuas kuv saib! Nej ntsia mas, dab tsis muaj nqaij tsis muaj pob txha, xws li nej pom kuv muaj.” Yes Xus hais li ntawd tas, nws muab nws ob txhais tes ob txhais taw rau lawv saib. Lawv zoo siab dhau, lawv tseem tsis tau xav ntseeg. Lawv yoob tas. Yes Xus hais rau lawv tias “Nyob ntawm no, nej muaj dab tsi noj?” Lawv muab ib ya ntses txhiab rau Yes Xus. Yes Xus tuav, nws noj yav ntses ntawd nyob ntawm lawv xub ntiag. Yes Xus hais rau lawv tias “Thaum kuv tseem nrog nej nyob, kuv hais cov lus no rau nej. Tas ib puas tsav yam uas Mais Xes Txoj Cai, cov Yaj Saub, thiab cov Nkauj Paj Nruag sau txog kuv, yuav tsum tshwm sim kom tiav.” Ces Yes Xus qhib lawv lub tswv yim kom lawv to taub Ntawv. Nws hais rau lawv tias “Ntawv sau hais tias Leej Pleev yuav raug luag tsim txom. Hnub peb, nws yuav sawv hauv cov tuag rov los. Thiab Ntawv tseem hais tias yuav tsum tshaj txoj kev tig los hloov siab ntxub kev txhaum kom Ntuj zam txhaum rau ib tsoom haiv neeg nyob hauv Leej Pleev lub Npe. Yuav xub tshaj nyob Yes Lus Xas Les. Nej yuav ua tim khawv txog tej ntawd.

HL 4: 1-12

Z 21: 1-14
Dua li ntawd, Yes Xus rov tawm los rau cov thwj tim pom nyob ntawm ntug dej ntuj Tis Npes Lias. Thaum Yes Xus tawm los mas muaj zoo li no. Cov nyob ua ke ntawd yog Xis Moos Pob Zeb, Tos Mas uas hu ua Dis Dws Mos, Nas Tas Nais uas nyob Kas Nas hauv xeev Nkas Lis Lais, Ntxes Npes Dais ob tug tub, thiab ob tug thwj tim ntxiv. Xis Moos Pob Zeb hais rau lawv tias “Kuv yuav mus puav ntses.” Lawv hais rau nws tias “Peb nrog koj mus thiab.” Lawv tawm mus nce rau hauv lub nkoj. Hmo ntawd lawv puav tsis tau dab tsi li. Thaum kaj ntug lawm, Yes Xus nyob tim ntug dej. Tab sis cov thwj tim tsis paub tias yog Yes Xus. Yes Xus thiaj hais rau lawv tias “Cov me nyuam, nej puas muaj dab tsi noj?” Lawv teb rau Yes Xus tias “Tsis muaj.” Nws hais rau lawv tias “Nej pov vas rau ntawm lub nkoj sab xis, nej yuav tau ntses.” Lawv thiaj pov vas mus, ces lawv rub tsis tau lub vas rov los, vim mag tau ntses ntau kawg. Tus thwj tim uas Yes Xus nyiam thiaj hais rau Pob Zeb tias “Yog Huab Tais!” Xis Moos Pob Zeb hnov dheev tias yog Huab Tais, nws muab ib daim khaub ncaws khi ntawm duav, vim nws liab qab, ces nws dhia mus hauv dej. Lwm cov thwj tim mam li caij nkoj thiab cab lub vas puav ntses los. Lawv nyob tsis deb ntawm ntug nqhuab lawm, kwv yees deb li ob puas tshim. Thaum lawv nqes los txog saum av, lawv pom ib cub tawg thee nyob ntawd, hos muaj ib co ntses tso rau saud, thiab ib co ncuav mov. Yes Xus hais rau lawv tias “Nej nqa ib co ntses uas nej nyuam qhuav puav tau los.” Xis Moos Pob Zeb nce mus hauv nkoj, nws rub lub vas mag ntses loj puv nkaus los rau saum av. Tau ib puas tsib caug peb tus ntses! Txawm tias puav tau ntses ntau npaum ntawd, tsis kav lub vas tsis ntuag. Yes Xus hais rau lawv tias “Nej los noj tshais.” Tsis muaj ib tug thwj tim muaj cuab kav nug Yes Xus tias ‘Koj yog leej twg?’ Vim lawv yeej paub tseeb tias yog Huab Tais. Yes Xus txav los muab cov ncuav mov cev rau lawv. Nws kuj muab cov ntses cev rau lawv thiab. Txij thaum Yes Xus sawv hauv cov tuag rov los, mas nws tawm los rau cov thwj tim pom, zaum no yog zaum peb.

(HL 4: 23-31; Z 3: 1-8)
Nyob hauv cov Fas Lis Xais, muaj ib tug hu ua Nis Kos Des Mos. Nws yog cov Yus Das ib tug thawj coj. Nws tuaj cuag Yes Xus hmo ntuj, nws hais rau Yes Xus tias “Las Npis, peb paub tias koj tuaj ntawm Tswv Ntuj tuaj ua Kws Xib Hwb. Yeej tsis muaj leej twg ua tau cov cim koj ua, yog Tswv Ntuj tsis nrog nws.” Yes Xus teb rau Nis Kos Des Mos tias “Kuv hais qhov muaj tseeb tiag rau koj; tus tsis yug saum txheej siab los, mas nws pom tsis tau Tswv Ntuj lub Ceeb Tsheej.” Nis Kos Des Mos hais rau Yes Xus tias “Ib tug neeg laus lawm, nws yuav ua li cas rov yug los tau? Nws puas rov mus tau rau hauv nws niam plab ib zaug ntxiv, mam rov yug los dua?” Yes Xus teb hais tias “Kuv hais qhov muaj tseeb tiag rau koj; tus tsis yug ntawm dej thiab ntawm Leej Ntuj Plig los, mas nws yuav mus tsis tau hauv Tswv Ntuj lub Ceeb Tsheej. Tus uas yug ntawm lub cev nqaij los, mas nws yog nqaij. Tus uas yug ntawm Leej Ntuj Plig los, mas nws yog ntsuj plig. Koj txhob poob siab vim kuv hais rau koj tias ‘Nej yuav tsum yug ntawm txheej siab los.’ Cua xav tshuab lawm seem twg kuj tau. Koj hnov cua nrov, tab sis koj tsis paub cua tuaj qhov twg tuaj, thiab cua mus qhov twg. Tus uas yug ntawm Leej Ntuj Plig los kuj zoo ib yam li ntawd thiab.”

(HL 4: 32-37; Z 3: 7-15)
Yes Xus hais rau Nis Kos Des Mos tias “Koj txhob poob siab vim kuv hais rau koj tias ‘Nej yuav tsum yug ntawm txheej siab los.’ Cua xav tshuab lawm seem twg kuj tau. Koj hnov cua nrov, tab sis koj tsis paub cua tuaj qhov twg tuaj, thiab cua mus qhov twg. Tus uas yug ntawm Leej Ntuj Plig los kuj zoo ib yam li ntawd thiab.” Nis Kos Des Mos teb rau Yes Xus tias “Qhov ntawd yog zoo li cas?” Yes Xus teb rau Nis Kos Des Mos tias “Koj yog cov His Xas Lais ib tug xib hwb, koj tseem tsis paub tej ntawd lod? Kuv hais qhov muaj tseeb tiag rau koj, peb hais yam peb paub, peb ua tim khawv txog tej uas peb pom, tab sis nej tsis txais peb cov lus ua tim khawv. Thaum kuv hais txog tej yam nyob ntiaj teb no rau nej, nej twb tsis ntseeg. Yog kuv hais txog tej yam nyob saum ntuj rau nej, mas nej yuav ua cas ntseeg tau? Tsis muaj leej twg tau nce mus saum ntuj, tsuas yog tus nqes saum ntuj los, uas yog Neeg Leej Tub nyob saum ntuj. Neeg Leej Tub yuav tsum raug luag tsa nws siab xws li Mais Xes tsa tus nab nyob teb chaws suab puam, kom xwv tus ntseeg txog nws, muaj txoj sia nyob mus li.”

(HL 5: 17-26; Z 3: 16-21)
Yes Xus hais rau Nis Kos Des Mos tias “Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li. Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg, nws xa Leej Tub tuaj cawm lub qab ntuj neeg. Tus ntseeg txog Leej Tub, nws tsis raug txiav txim. Tus tsis ntseeg, nws twb raug txiav txim lawm, vim nws tsis ntseeg txog Tswv Ntuj Leej Tub twm zeej lub npe. Kev txiav txim yog zoo li no ‘Qhov pom kev tuaj nyob hauv lub qab ntuj neeg, tab sis tsoom neeg nyiam qhov tsaus ntuj dua qhov pom kev, vim lawv cov hauj lwm phem.’ Tus twg ua qhov phem, mas nws ntxub qhov pom kev, ces nws tsis los nyob hauv qhov pom kev, vim nws ntshai tsam nws cov hauj lwm phem yuav qhib los. Hos tus ua qhov tseeb, mas nws los nyob hauv qhov pom kev, kom luag pom tias nws ua nws cov hauj lwm nyob hauv Tswv Ntuj.”

(HL 5: 27-33; Z 3: 31-36)
Yes Xus hais ntxiv rau Nis Kos Des Mos tias “Tus tuaj saum txheej saud tuaj, nws nyob siab dua sawv daws. Tus tuaj hauv ntiaj teb tuaj, nws yog ntiaj teb tug, nws hais txog tej yam nyob ntiaj teb. Tus tuaj saum ntuj tuaj, nws ua tim khawv txog qhov nws pom thiab nws hnov, tab sis tsis muaj leej twg txais nws cov lus tim khawv. Tus uas txais nws cov lus tim khawv, nws lees meej tias Tswv Ntuj yog tus tseeb. Tus uas Tswv Ntuj xa tuaj, nws hais Tswv Ntuj cov lus, vim Tswv Ntuj pub Leej Ntuj Plig tsis xuas dab tsi luj. Leej Txiv nyiam Leej Tub, nws tso tas ib puas tsav yam rau hauv Leej Tub txhais tes. Tus ntseeg txog Leej Tub, mas nws muaj txoj sia nyob mus li. Hos tus tsis kam ntseeg txog Leej Tub, nws yuav tsis pom txoj sia, ces Tswv Ntuj lub siab npau taws yuav nyob saum nws.”

(HL 5: 34-42; Z 6: 1-15)
Dhau tej no lawm, Yes Xus mus rau sab dej ntuj Nkas Lis Lais tim ub, uas tseem hu ua dej ntuj Tis Npes Lias. Ib pab neeg coob raws nws mus, vim lawv tau pom cov cim nws ua kho neeg mob. Yes Xus nce saum lub roob, nws nrog nws cov thwj tim zaum nyob saud. Yuav txog lub Ntees Hla uas yog cov Yus Das lub ntees nqaum paj nqaum nruas. Yes Xus tsa muag ntsia pom ib pab neeg coob tuaj cuag nws, nws hais rau Fis Lis Pos tias “Peb yuav ua li cas muas ncuav mov txaus cov neeg ntawd noj?” Yes Xus hais li ntawd sim Fis Lis Pos, tab sis Yes Xus yeej paub tias nws yuav ua dab tsi. Fis Lis Pos teb rau Yes Xus tias “Muab ob puas lub txiaj nyiag muas mov los tseem yuav tsis txaus kom ib leeg tau ib qho me me.” Yes Xus ib tug thwj tim hu ua As Nres, yog Xis Moos Pob Zeb tus kwv, hais rau Yes Xus tias “Ib tug me tub nyob ntawm no muaj tsib lub ncuav mov qib thiab ob tug ntses me me, tab sis qhov ntawd yuav ua cas txaus rau npaum no leej neeg noj?” Yes Xus hais tias “Nej kom cov neeg zaum.” Nyob ntawm qhov chaw ntawd muaj nroj ntau, ces cov neeg zaum, kwv yees muaj tsib txhiab leej neeg. Yes Xus tuav cov ncuav mov, nws ua ntuj tsaug tas, nws muab faib rau cov neeg uas zaum ntawd. Nws kuj ua ib yam li ntawd rau cov ntses me me kom txaus lawv noj thiab. Thaum lawv noj tsau tas, Yes Xus hais rau nws cov thwj tim tias “Nej khaws cov sab mov seem kom txhob sem ib qho li.” Thaum lawv noj tsau tas, lawv thiaj khaws cov mov seem uas ntsu ntawm tsib lub ncuav mov qib los, lawv ntim puv kaum ob tawb. Tsoom sid pom lub cim Yes Xus ua, ces lawv hais tias “Tus no yog tus Yaj Saub uas yuav tuaj nyob hauv lub qab ntuj neeg tiag.” Yes Xus to taub hais tias lawv yuav tuaj ntes nws mus tsa ua vaj, ces nws mus nws tib leeg twj ywm rau pem roob.

(HL 6: 1-7; Z 6: 16-21)
Thaum tsaus ntuj, Yes Xus cov thwj tim nqes mus nram dej ntuj, lawv nce hauv ib lub nkoj, lawv hla dej mus rau Kas Fas Naus, nyob sab ntug dej tid. Thaum ntawd twb tsaus ntuj lawm, tab sis Yes Xus tseem tsis tau los txog ntawm lawv. Muaj ib nthwv cua hlob ntsawj, ces dej ntuj nphau nphwv sawv tuaj. Thaum cov thwj tim nquam nkoj deb li nees nkaum los peb caug ntsua muag lawm, ces lawv txawm pom Yes Xus mus kev saum dej ntuj, los ze zuj zus rau ntawm lub nkoj, ces lawv ntshai. Tab sis Yes Xus hais rau lawv tias “Yog kuv. Nej txhob ntshai!” Lawv thiaj mus tos nws los rau hauv nkoj, ces tam sis ntawd lub nkoj cia li txog qhov chaw lawv yuav mus.

(HL 6: 8-15; Z 6: 22-29)
Tag kis kaj ntug, tsoom neeg uas nyob sab dej ntuj tim ub pom tias nag hmo tsuas muaj ib lub nkoj nyob ntawd xwb. Lawv kuj pom tias Yes Xus tsis nrog nws cov thwj tim nce mus hauv nkoj, cov thwj tim lawv mus lawv xwb. Tab sis, muaj ib co nkoj tuaj Tis Npes Lias tuaj, cov nkoj los ze ntawm qhov chaw lawv noj cov mov uas thaum Huab Tais ua Ntuj tsaug tas, nws muab rau lawv noj. Tab sis tsoom neeg pom tias Yes Xus tsis nyob ntawd lawm, nws cov thwj tim kuj tsis nyob lawm thiab, ces lawv nce mus hauv cov nkoj ntawd, lawv mus nrhiav Yes Xus tim Kas Fas Naus. Lawv tuaj nrhiav tau Yes Xus rau sab ntug dej tid, lawv hais rau nws tias “Las Npis, thaum twg koj tuaj ntawm no lawm?” Yes Xus teb rau lawv tias “Kuv hais qhov tseeb tiag rau nej; nej nrhiav kuv, tsis yog vim nej tau pom ib co cim, yog vim nej tau noj cov ncuav mov tsau nej plab. Nej txhob ua hauj lwm nrhiav cov txhiam xws txawj ploj. Nej ua hauj lwm nrhiav cov txhiam xws pub txoj sia nyob mus li. Cov txhiam xws ntawd yog cov uas Neeg Leej Tub yuav pub rau nej. Vim nws yog tus uas Leej Txiv Tswv Ntuj ntaus thwj rau.” Lawv hais rau Yes Xus tias “Peb yuav ua dab tsi, peb thiaj ua tau Tswv Ntuj cov hauj lwm?” Yes Xus teb rau lawv hais tias “Tswv Ntuj txoj hauj lwm yog zoo li no; kom nej ntseeg txog tus nws xa tuaj.”

(HL 7: 51-59, 8: 1a; Z 6: 30-35)
Tsoom sid hais rau Yes Xus tias “Koj yuav ua lub cim dab tsi rau peb pom, kom peb ntseeg koj? Koj ua hauj lwm dab tsi? Peb cov yawg koob noj cov mov mas nas nyob teb chaws suab puam, raws li cov lus sau cia hais tias nws pub cov mov tuaj saum ntuj tuaj rau lawv noj.” Yes Xus thiaj hais rau lawv tias “Kuv hais qhov tseeb tiag rau nej; tsis yog Mais Xes pub cov mov tuaj saum ntuj tuaj rau nej, yog kuv Txiv pub rau nej. Cov mov tuaj saum ntuj tuaj yog tseem mov. Vim Tswv Ntuj cov mov yog cov mov nqes saum ntuj los, yog cov mov pub txoj sia rau lub qab ntuj neeg.” Lawv thiaj hais rau Yes Xus tias “Huab Tais, thov koj pub cov mov ntawd rau peb noj mus li.” Yes Xus hais rau lawv tias “Kuv yog cov mov muaj txoj sia. Tus tuaj cuag kuv nws yuav tsis tshaib ib zaug, tus ntseeg txog kuv nws yuav tsis nqhis ib zaug li.”

(HL 8: 1b-8; Z 6: 35-40)
Yes Xus hais rau lawv tias “Kuv yog cov mov muaj txoj sia. Tus tuaj cuag kuv nws yuav tsis tshaib ib zaug, tus ntseeg txog kuv nws yuav tsis nqhis ib zaug li. Kuv hais rau nej tias nej pom kuv, tab sis nej tsis ntseeg. Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov. Vim kuv nqes saum ntuj los, tsis yog los ua ywj kuv siab, yog los ua raws li tus xa kuv tuaj lub siab. Tus xa kuv tuaj lub siab xav, yog zoo li no; kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los. Qhov uas kuv Txiv nyiam yog zoo li no; leej twg pom Leej Tub thiab ntseeg txog Leej Tub, mas nws muaj txoj sia nyob mus li, thiab hnub kawg, kuv yuav tsa nws sawv rov los.”

(HL 8: 26-40; Z 6: 44-52)
Yes Xus hais rau tsoom sid tias “Tsis muaj leej twg tuaj cuag kuv tau, yog Leej Txiv uas xa kuv tuaj tsis rub nws los. Hos kuv, mas Hnub Kawg, kuv yuav tsa nws sawv rov qab los. Cov Yaj Saub Phau Ntawv sau hais tias ‘Tswv Ntuj yuav qhia sawv daws huv tib si.’ Tus twg hnov Leej Txiv lub suab thiab txais nws lo lus qhia, mas tus ntawd tuaj cuag kuv. Tsis muaj leej twg tau pom Leej Txiv. Tsuas yog tus tuaj ntawm Tswv Ntuj tuaj thiaj tau pom Leej Txiv. Kuv hais qhov muaj tseeb tiag rau nej; tus ntseeg, nws muaj txoj sia nyob mus li. Kuv yog cov mov muaj txoj sia. Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm. Cov mov nqes saum ntuj los yog zoo li no; ‘Tus noj cov mov no, nws tsis tuag.’ Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij.” Cov Yus Das thiaj li sib cav zom zaws tias “Tus neeg ntawd yuav ua li cas muab tau nws cev nqaij los rau peb noj?”

(HL 9: 1-20; Z 6: 52-59)
Cov Yus Das sib cav zom zaws tias “Tus neeg ntawd yuav ua li cas muab tau nws cev nqaij los rau peb noj?” Yes Xus thiaj hais rau lawv tias “Kuv hais qhov tseeb tiag rau nej; yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej. Hos tus noj kuv lub cev nqaij thiab haus kuv cov ntshav, nws muaj txoj sia nyob mus li. Hnub kawg, kuv yuav tsa nws sawv rov qab los. Vim kuv lub cev nqaij yog ib co tseem txhiam xws noj, thiab kuv cov ntshav yog ib yam zoo haus tiag. Tus noj kuv cev nqaij thiab haus kuv cov ntshav, nws nyob hauv kuv thiab kuv nyob hauv nws. Leej Txiv uas nws muaj txoj sia, nws xa kuv tuaj, ces kuv muaj txoj sia vim Leej Txiv. Li ntawd, tus noj kuv, nws kuj yuav muaj txoj sia, vim kuv. Cov mov nqes saum ntuj los yog zoo li ntawd. Cov mov no tsis zoo li cov uas cov yawg koob tau noj, tab sis lawv tuag tas lawm. Hos tus noj cov mov no, mas nws yuav ciaj nyob mus li.” Yes Xus hais cov lus ntawd thaum nws qhia nyob hauv lub tsev txoos nyob Kas Fas Naus.

(HL 11: 1-18; Z 10: 11-18)
Yes Xus hais tias “Kuv yog tus tswv zov yaj, yog tus zoo tswv. Tus zoo tswv zov yaj siv nws txoj sia los pab nws cov yaj. Tus ntiav zov, nws tsis yog tswv, cov yaj tsis yog nws li, thaum nws pom hma tuaj, nws tso cov yaj pov tseg, nws khiav lawm. Hma muab cov yaj kwv mus, ua pab yaj tawg tas. Vim nws tsuas yog tus ntiav zov xwb, nws tsis txhawj dab tsi txog cov yaj. Kuv yog tus zoo tswv zov yaj. Kuv paub kuv cov yaj, kuv cov yaj paub kuv, ib yam li Leej Txiv paub kuv thiab kuv paub Leej Txiv. Kuv siv kuv txoj sia rau kuv cov yaj. Kuv tseem muaj ib co yaj uas tsis nyob hauv lub nkuaj no. Kuv yuav tsum coj cov ntawd mus thiab. Lawv yuav mloog kuv lub suab, ces yuav muaj ib pab yaj, thiab ib tug tswv zov xwb. Tos Leej Txiv nyiam kuv, yog vim kuv siv kuv txoj sia, thiab kuv muab txoj sia rov los rau kuv. Tsis muaj leej twg txo kuv txoj sia, yog kuv muab pub. Kuv muaj hwj huam siv tau kuv txoj sia, thiab muaj hwj huam muab tau kuv txoj sia rov los. Qhov no yog lo lus qhia kuv txais ntawm kuv Txiv los.”

(HL 11: 19-26; Z 10: 22-30)
Thaum ntawd txog lub hnub nyoog nqaum paj nqaum nruas ntxuav lub Tuam Tsev Teev Ntuj nyob Yes Lus Xas Les, yog lub caij ntuj no. Yes Xus mus mus los los hauv lub Tuam Tsev Teev Ntuj nyob hauv lub qab ru tsev Xas Los Moos. Cov Yus Das los ntsauv ncig nws, ces lawv hais rau nws tias “Koj yuav cia peb lub siab ua xyem xyav txog thaum twg? Saib koj yog Leej Pleev no, koj tab meeg hais rau peb!” Yes Xus teb rau lawv tias “Kuv twb hais qhia nej lawm, uas nej tsis ntseeg. Cov hauj lwm uas kuv hu txog kuv Txiv lub npe los ua, zeem tseeb txog kuv. Tab sis nej tsis ntseeg vim nej tsis yog kuv cov yaj. Kuv cov yaj mloog kuv lub suab, kuv paub lawv, lawv raws nraim kuv. Kuv pub txoj sia nyob mus li rau lawv, lawv yuav tsis tuag ib zaug li. Tsis muaj leej twg yuav chua tau lawv ntawm kuv txhais tes. Kuv Txiv yog tus loj tshaj txhua tsav txhua yam, nws muab cov yaj no rau kuv, mas yeej tsis muaj leej twg yuav chua tau dab tsi ntawm kuv Txiv txhais tes li. Leej Txiv thiab kuv, wb yog ib tug xwb.”

(HL 12: 24-13: 5a; Z 12: 44-50)
Yes Xus hais nrov nrov tias “Leej twg ntseeg txog kuv, mas tsis yog nws ntseeg txog kuv, yog ntseeg txog tus xa kuv tuaj. Leej twg pom kuv, mas nws pom tus xa kuv tuaj. Kuv yog qhov pom kev, kuv tuaj nyob hauv lub qab ntuj no kom xwv tus ntseeg txog kuv tsis txhob nyob hauv qhov tsaus ntuj. Leej twg hnov kuv cov lus tab sis nws tsis ua raws, mas tsis yog kuv txiav txim rau nws; vim kuv tsis tuaj txiav txim rau lub qab ntuj neeg, kuv tuaj cawm lub qab ntuj neeg. Tus xyeeb kuv thiab tsis txais kuv cov lus, mas nws muaj nws ib tug txiav txim; hnub kawg yog lo lus uas kuv tau hais yuav txiav txim rau nws. Vim tias tsis yog kuv hais kuv xwb. Leej Txiv uas yog tus xa kuv tuaj, nws txib kuv kom hais dab tsi thiab qhia dab tsi. Kuv paub tias Leej Txiv lo lus qhia yog txoj sia nyob mus li. Li ntawd, qhov kuv hais, kuv hais raws nraim cov lus uas Leej Txiv tau qhia rau kuv.”

(HL 13: 13-25; Z 13: 16-20)
Yes Xus ntxuav cov thwj tim taw tas, nws hais rau lawv tias “Kuv hais qhov muaj tseeb tiag rau nej; tus tub txib tsis loj dua nws tus tswv, tus xa lus tsis loj dua tus uas txib nws mus. Nej paub qhov no, yog nej ua raws, mas nej txoj hmoov zoo. Kuv tsis hais txog nej txhua leej txhua tus. Kuv paub cov uas kuv xaiv. Tab sis vim yuav tsum tshwm sim raws li Ntawv sau cia tias ‘Tus noj kuv cov mov tig luj taws rau kuv.’ Nyem no, kuv xub hais rau nej, cheem tej xwm no tseem tsis tau tshwm sim tuaj, kom xwv thaum tej ntawd tshwm tuaj, nej ntseeg tias ‘Kuv Yog Tus Nyob.’ Kuv hais qhov muaj tseeb tiag rau nej; leej twg txais ib tug uas kuv xa mus, yog nws txais kuv. Leej twg txais kuv, yog txais tus xa kuv tuaj.”

(HL 13: 26-33; Z 14: 1-6)
Yes Xus hais rau cov thwj tim tias “Nej tsis txhob ntxhov siab mog! Nej ntseeg txog Tswv Ntuj, nej ntseeg txog kuv thiab mog! Nyob hauv kuv Txiv tsev, muaj ntau chav. Yog tsis muaj, mas kuv yuav tsis hais rau nej tias kuv mus npaj ib qho chaw rau nej. Thaum kuv mus npaj tau ib qho chaw rau nej lawm, kuv yuav rov los coj nej mus nyob ze kuv, kom xwv kuv nyob qhov twg, nej nrog kuv nyob qhov ntawd. Nej paub txoj kev mus txog qhov chaw kuv yuav mus.” Tos Mas hais rau Yes Xus tias “Huab Tais, peb tsis paub koj yuav mus qhov twg. Peb yuav ua cas paub txoj kev?” Yes Xus hais rau Tos Mas tias “Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis los ntawm kuv.”

(HL 13: 44-52; Z 14: 7-14)
Yes Xus hais rau cov thwj tim tias “Yog nej paub kuv, mas nej kuj paub kuv Txiv thiab. Nyem no, nej twb paub nws thiab twb pom nws lawm.” Fis Lis Pos hais rau Yes Xus tias “Huab Tais, koj pub peb pom Leej Txiv, mas peb thiaj txaus siab.” Yes Xus hais rau Fis Lis Pos tias “Fis Lis Pos, kuv nrog nej nyob ntev npaum no, koj tseem tsis paub kuv thiab lod? Tus twg pom kuv, mas nws pom Leej Txiv. Ua cas koj thiaj hais tau tias ‘Koj pub peb pom Leej Txiv.’ Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod? Cov lus uas kuv hais rau nej, tsis yog kuv hais kuv; yog Leej Txiv uas nyob txawm hauv kuv nws ua nws cov hauj lwm. Nej ntseeg kuv mog. Kuv nyob hauv Leej Txiv, thiab Leej Txiv nyob hauv kuv. Txawm li cas, los nej yuav tsum ntseeg, vim kuv cov hauj lwm. Kuv hais qhov muaj tseeb tiag rau nej; tus ntseeg txog kuv, nws kuj yuav ua cov hauj lwm kuv ua. Nws tseem yuav ua tej yam loj dua, vim kuv mus cuag Leej Txiv. Txhua yam uas nej tuav txog kuv lub npe thov, mas kuv yuav ua huv tib si, kom xwv Leej Txiv muaj koob meej nyob hauv Leej Tub. Yog nej tuav txog kuv lub npe thov ib yam dab tsi, mas kuv yuav ua yam ntawd.”

(HL 14: 5-18; Z 14: 21-26)
Yes Xus hais rau cov thwj tim tias “Tus muaj kuv cov lus qhia, thiab nws coj rawv kuv cov lus qhia, nws thiaj yog tus nyiam kuv. Tus nyiam kuv, mas kuv Txiv yuav nyiam nws, kuv kuj yuav nyiam nws thiab. Kuv yuav muab kuv rau nws pom.” Yus Das hais rau Yes Xus tias “Huab Tais, ua cas koj thiaj yuav muab koj rau peb pom xwb, tsis cia lub qab ntuj neeg pom koj?” Yes Xus teb rau Yus Das tias “Yog leej twg nyiam kuv, nws yuav coj rawv kuv lo lus, ces kuv Txiv yuav nyiam nws. Kuv Txiv wb yuav los nyob ze nws, wb yuav ua tsev nyob hauv nws. Tus tsis nyiam kuv, nws tsis khaws kuv cov lus. Lo lus uas nej hnov, tsis yog kuv lo lus, yog Leej Txiv uas xa kuv tuaj lo lus. Thaum kuv tseem nyob ze nej, kuv hais tej no rau nej. Tab sis Leej Nplij Neeg, uas yog Leej Ntuj Plig Ntshiab, mas Leej Txiv yuav xa nws tuaj vim kuv lub npe, nws yuav qhia tas ib puas tsav yam rau nej, thiab nws yuav pab nej rov nco txog tas txhua yam uas kuv tau hais rau nej.”

LUS NTUAS
Muaj ib zaug ib tug kws lij choj nug Huab Tais Yes Xus tias nyob hauv Txoj Cai, lo lus qhia twg loj dua cov. Huab Tais Yes Xus teb li no rau nws; “Koj yuav muab tas koj lub siab, tas koj tus ntsuj plig, tas koj lus tswv yim los nyiam koj tus Huab Tais Tswv Ntuj.” Lo lus no kuj yog lo lus qhia loj tshaj hauv peb txoj kev ntseeg txog Yes Xus thiab. Li ntawd, lub Koom Txoos thiaj ntuas peb tsis tseg kom niaj lis piam hnub chiv, peb mus koom lub Txoos Txi Ntuj; niaj hnub peb muab ib lub sij hawm los teev Ntuj mloog Tswv Ntuj Lo Lus. Vim lo lus hais ntawm ncauj tias “Kuv nyiam Tswv Ntuj, kuv nyiam Huab Tais Yes Xus”, mas tus twg yeej hais tau, tab txawm tus ntseeg thiab tus tsis ntseeg.
Tab sis hnub no, Huab Tais Yes Xus qhia tseeb kawg tias yog peb nyiam nws, peb yuav ua li cas. Huab Tais Yes Xus hais li no “Tus muaj kuv cov lus qhia thiab nws coj rawv kuv cov lus qhia, nws thiaj yog tus nyiam kuv”, txhais tias tus twg nyiam Huab Tais Yes Xus, nws yuav ua raws li Huab Tais Yes Xus cov lus.
Yog li ntawm peb, peb puas nyiam Huab Tais Yes Xus tiag? Peb puas mloog thiab ua raws li cov lus niaj hnub Huab Tais Yes Xus hais rau peb nruab siab? Peb mus koom lub Txoos Txi Ntuj tas, peb puas khaws Huab Tais Yes Xus cov lus Txiv Plig nthuav coj los ua raws?
Peb yog me nyuam neeg, yog neeg muaj txhaum, yog neeg tsis muaj zog. Peb yuav tau vam txog Huab Tais Tswv Ntuj xa Leej Ntuj Plig tuaj ntxiv zog rau peb, tuaj pab peb kom nco tau cov lus Huab Tais Yes Xus hais rau peb, thiab ua lub neej raws li Huab Tais Yes Xus qhia peb.
Huab Tais Tswv Ntuj hlub peb, nws xa Leej Tub tuaj qhia txoj kev tshiab rau peb taug, nws xa Leej Ntuj Plig Ntshiab tuaj tsom kev rau peb siab, kom peb txhob plam ntawm Tswv Ntuj txoj kev. Li ntawd, tsim nyog peb yuav kub siab twm Ntawv Ntshiab thiab thov Leej Ntuj Plig Ntshiab.
Ua cas thiaj yuav twm Ntawv Ntshiab? Vim tias Ntawv Ntshiab yog phau ntawv ntim Tswv Ntuj cov lo lus. Yog peb tsis muaj sij hawm ntau, peb nyeem Ntawv Moo Zoo hauv Ntawv Ntshiab kuj tau. Ntawv Moo Zoo yog cov phau ntawv piav txog Huab Tais Yes Xus cov hauj lwm cawm neeg thiab cov lus qhia neeg ua lub neej xis Tswv Ntuj siab. Huab Tais Yes Xus cov lus yog Tswv Ntuj Lo Lus vim Huab Tais Yes Xus yog Leej Lo Lus tuaj ntawm Tswv Ntuj tuaj. Lub Moo Zoo hnub no Huab Tais Yes Xus twb hais tias “Lo lus uas nej hnov, tsis yog kuv lo lus; yog Leej Txiv uas xa kuv tuaj lo lus.”
Thaum peb mloog Tswv Ntuj lo lus, peb thov Leej Ntuj Plig kaj peb lub siab, peb coj mus xav thiab khaws coj mus ua raws, kom Tswv Ntuj lo lus txi txiv hauv nej.
Peb ua li ntawd, mas peb thiaj yuav yog tus nyiam Huab Tais Yes Xus tiag.

(HL 14: 19-28; Z 14: 27-31)
Yes Xus hais rau cov thwj tim tias “Kuv tso txoj kev thaj yeeb rau nej. Yog kuv txoj kev thaj yeeb uas kuv muab pub rau nej. Kuv tsis pub txoj kev thaj yeeb xws li lub qab ntuj neeg pub. Nej tsis txhob ntxhov siab, tsis txhob ntshai. Nej tau hnov kuv hais rau nej tias kuv mus, tab sis kuv yuav rov los cuag nej. Yog nej nyiam kuv, nej yuav zoo siab cia kuv mus cuag Leej Txiv, vim Leej Txiv loj dua kuv. Kuv xub hais tej ntawd rau nej nyem no, cheem tseem tsis tau tshwm sim tuaj, mas thaum tej ntawd tshwm sim tuaj, nej thiaj yuav ntseeg. Kuv yuav tsis tau nrog nej tham ntau ntxiv, vim tus Tswj lub qab ntuj neeg tuaj txog lawm. Nws tsis muaj hwj huam ua tau dab tsi rau kuv; tab sis kuv ua raws li Leej Txiv txib kom kuv ua, kom lub qab ntuj neeg paub tias kuv nyiam Leej Txiv.”

LUS NTUAS
Huab Tais Yes Xus cov lus hauv Ntawv Moo Zoo hnub no yog cov lus Huab Tais Yes Xus hais rau cov thwj tim nyob hauv hmo lawv noj Pluas Hla. Hmo ntawd, Huab Tais Yes Xus qhia rau cov thwj tim tias yuav muaj ib tug hauv lawv ntxeev siab rau nws thiab muab nws cob rau cov phem, ces qhov kawg nws yuav ncaim ntawm sawv daws mus. Hmo ntawd, Huab Tais Yes Xus kuj qhia tias cov thwj tim yuav tso nws pov tseg, Pob Zeb yuav tsis kam lees nws txog 3 zaug.
Thaum cov thwj tim hnov cov lus no, lawv ntxhov siab kawg, lawv tsis paub yuav ua li cas ntxiv. Huab Tais Yes Xus thiaj li hais cov lus hnub no los nplij lawv tias “Kuv tso txoj kev thaj yeeb rau nej, yog kuv txoj kev thaj yeeb. Kuv tsis pub txoj kev thaj yeeb xws li lub qab ntuj neeg pub. Nej tsis txhob ntxhov siab, tsis txhob ntshai.”
Tus ntxhov siab tshaj sawv daws, yog Huab Tais Yes Xus. Muab xav saib; yog peb paub tias ib tug phooj ywg peb nyiam tshaj yuav rov ntxeev siab tig los ua phem rau peb. Peb nyiam nws dhau, ces peb pauj rov rau nws tsis tau, mas peb los nws tus twg yuav yog tus ntxhov siab dua?
Huab Tais Yes Xus ntxhov siab npaum ntawd, tsis kav nws tseem hais tau tias “Kuv muab kev thaj yeeb rau nej.” Kev thaj yeeb Huab Tais Yes Xus muab rau cov thwj tim yog dab tsi? Yog ‘kev kaj siab’ vim Huab Tais Yes Xus yeem sawv los nres qhov ntxhov siab kom tau yeej. Huab Tais Yes Xus kev thaj yeeb thiaj txawv qab ntuj neeg kev thaj yeeb; neeg xav tias lawv lub siab yuav kaj tau yog thaum lawv tso tes khiav kom deb yam ua kom lawv ntxhov siab. Piv li peb paub tias tus phooj ywg yuav ua phem rau peb, ces peb yeem tsis mus ntsib nws kom txhob raug nws ua phem. Thaum ntawd, peb kaj siab, peb nyob thaj yeeb.
Yog peb yeem cia tus phooj ywg ua phem rau peb, peb raug kev mob siab, tu siab tiag; tab sis qhov ntawd yuav pab tau kom peb tus phooj ywg ntsia pom nws qhov txhaum. Peb ntsia li ntawd, ces peb siab kaj.
Nyob hauv peb lub neej, muaj ntau yam xwv txheej tuaj nphav peb; yog peb khiav mus li, mas peb puas yuav tau kev thaj yeeb; yog peb sawv los nres los daws. Qhov twg yuav tau kev thaj yeeb dua?
Yog li Huab Tais Yes Xus thiaj hais tias “Kuv tsis pub txoj kev thaj yeeb xws li lub qab ntuj neeg pub.”
Cov thwj tim kev ntxhov siab yuav hloov ua kev kaj siab, lawv yuav txais kev thaj yeeb yog thaum lawv rov pom Huab Tais Yes Xus sawv rov los, ces Huab Tais Yes Xus thiaj hais rau cov thwj tim tab tom ntxhov siab tias “Kuv mus, tab sis kuv yuav rov los cuag nej. Yog nej nyiam kuv, mas nej yuav zoo siab cia kuv mus cuag Leej Txiv.”
Huab Tais Yes Xus twb pub nws kev thaj yeeb rau peb lawm, nyob ntawm peb saib yuav ntsia pom los tsis pom.

(HL 15: 1-6; Z 15: 1-8)
Yes Xus hais rau cov thwj tim tias “Kuv yog tsob tseem txiv cawv. Kuv Txiv yog tus tswv teb txiv cawv. Nyob hauv kuv, txoj hmab twg tsis txi txiv, kuv Txiv muab txiav pov tseg. Txoj hmab twg txi txiv, kuv Txiv tav nws ntsis kom txi ncw dua. Kuv Txiv twb tav nej lub ntsis lawm, vim lo lus kuv tau hais rau nej. Nej nyob hauv kuv, ib yam li kuv nyob hauv nej. Yog nej tsis nyob hauv kuv, mas nej txi tsis taus txiv, xws li txoj hmab uas tsis txuas rau tus kav, mas nws txi tsis taus txiv. Kuv yog tsob txiv cawv, nej yog cov ceg. Tus uas nyob hauv kuv thiab kuv nyob hauv nws, mas nws txi txiv ncw. Yog nej ncaim ntawm kuv, nej ua tsis tau dab tsi. Yog leej twg tsis nyob hauv kuv, luag yuav muab nws pov tseg rau sab nraud xws li tus ceg khaub, nws yuav qhuav. Luag yuav sau cov ceg qhuav mus pov rau hauv hluav taws kom kub hnyiab. Yog nej nyob ruaj hauv kuv, thiab kuv cov lus nyob ruaj hauv nej, mas nej thov dab tsi, nej yuav tau raws li nej thov. Qhov ua kom kuv Txiv muaj koob meej, mas yog nej txi txiv ntau thiab nej los ua kuv thwj tim.”

LUS NTUAS
Hnub no Huab Tais Yes Xus tab tom qhia peb tias peb lub neej hauv txoj kev ntseeg yuav hlob thiab huam tsis tau yog peb tsis npuab Huab Tais Yes Xus xws li cov ceg txiv cawv tsis txuas rau tsob txiv cawv.
Peb cov Hmoob tsis cog txiv cawv, ces peb tsis paub zoo, yog Ii thov muab piv rau cov ntoo txiv. Peb muab lub noob mus cog, yog peb xav kom txi txiv sai, mas peb yuav tos tsob ntoo loj me ntsis, ces peb yuav txiav cov ceg mos ntawm tus ntoo twb txi txiv thiab cov txiv qab xis ncauj los txuas rau tsob ntoo peb xuas noob cog. Yog tus ceg twg txuas tau zoo, tus ceg ntawd yuav hlob thiab txi taus txiv. Cov Yus Das lawv ua vaj txiv cawv, lawv kuj txuas cov ceg txiv cawv li ntawd. Huab Tais Yes Xus xav kom cov thwj tim to taub zoo txog lo lus qhia kom lawv npuab nws, mas lawv thiaj hlob taus, ces nws thiaj muab piv rau tsob txiv cawv thiab cov ceg.
Peb cov neeg ntseeg txog Yes Xus, peb yuav npuab Huab Tais Yes Xus li ntawd; peb yuav ua tus ceg tsis txuas rau tsob ntoo tsis tau. Cov ceg txais cov dej cov chiv ntawm tsob ntoo li cas kom hlob taus, mas peb kuj yuav txais Tswv Ntuj kev nyiam thiab Tswv Ntuj lub txiaj ntsim ntawm Huab Tais Yes Xus los yug peb lub neej ua neeg ntseeg li ntawd. Peb txhob xav tias “Kuv yog ib tug neeg ntseeg txais lub Cim Ntxuav, mas txaus lawm”, tsis yog li ntawd. Yog peb tsis kam txais Tswv Ntuj kev nyiam, peb tsis kam yuav Tswv Ntuj lub txiaj ntsim, mas peb zoo li tus neeg xav tiv nag tab sis kwv kaus. Peb tsum muab lub kaus tua, peb thiaj tiv tau nag. Peb xav txais Tswv Ntuj kev nyiam xav txais Tswv Ntuj lub txiaj ntsim, mas peb tsum siv zog npuab Huab Tais Yes Xus.
Huab Tais Yes Xus hais tias “Kuv Txiv yog tus tswv teb txiv cawv, txoj hmab txiv cawv twg tsis txi txiv, mas kuv Txiv muab txiav pov tseg. Txoj hmab twg txi txiv, mas kuv Txiv tav nws ntsis kom txi ncw dua”; yog Huab Tais Yes Xus tab tom qhia tias cov neeg ntseeg txog nws, lawv yuav tsum hlob nyob hauv txoj kev ntseeg, mas lawv thiaj yuav muaj txoj sia ntxiv. Ntau zaus Tswv Ntuj yuav sim cov neeg ntseeg kom lawv yim hlob mus; yam li Tswv Ntuj pub lawv raug txom nyem, ntsib xwm phem.
Yog peb nyob ruaj hauv Huab Tais Yes Xus, peb npuab Huab Tais Yes Xus, mas thaum Tswv Ntuj sim peb siab, peb yuav tsis ntog, tsis tso kev ntseeg pov tseg. Yog peb tsis npuab Huab Tais Yes Xus, yam li peb tsis muaj Huab Tais Yes Xus cov lus nyob hauv peb; thaum peb raug sim siab, peb yuav ua xyem xyav, ces peb cia li thim kev ntseeg rov mus coj qub kev cai los yog ntseeg lwm yam li lawm. Li ntawd, xav kom peb cov Hmoob ntseeg txog Yes Xus sawv daws muab siab rau mloog Huab Tais Yes Xus cov lus thiab coj rawv, mas peb thiaj yuav npuab tau Huab Tais Yes Xus mus li, peb thiaj hlob thiab huam taus. Txawm Tswv Ntuj sim peb los peb tsis qaij, dab phem ntxias peb los peb tsis qaug.

(HL 15: 7-21)
Lawv sib cav ntev loo, ces Pob Zeb mam li sawv ntsug hais rau lawv tias “Kwv tij sawv daws, nej paub hais tias thaum lub hauv paus, Tswv Ntuj tau xaiv kuv nyob hauv nruab nrab nej los, kom cov teev dab tau hnov lub Moo Zoo ntawm kuv lub ncauj, thiab kom lawv txais kev ntseeg. Tswv Ntuj uas nws paub neeg lub siab, nws twb qhia peb tias nws nyiam cov neeg teev pej kum dab, nws twb pub Leej Ntuj Plig Ntshiab rau lawv ib yam li rau peb. Nws tsis saib lawv thiab peb yog ib co neeg sib txawv, vim tias nws ntxuav lawv lub siab nyob hauv txoj kev ntseeg lawm. Tim li cas nyem no nej thiaj li xav sim Tswv Ntuj. Tim li cas nej xav muab rab quab uas peb cov yawg koob thiab peb twb tsis muaj zog ris, mus nog rau cov thwj tim
lub caj dab? Thiab peb kuj ntseeg tias yog Huab Tais Yes Xus lub txiaj ntsim xwb cawm peb ib yam li cawm
lawv.” Ces sawv daws nyob ntsiag to. Lawv mloog Paj Lug thiab Npas Nas Npes nkawd piav txog cov hauj lwm muaj hwj huam uas Tswv Ntuj kom nkawd ua nyob hauv tsoom neeg teev pej kum dab.
Thaum nkawd hais lus tas, ces Yas Kos qhib ncauj hais tias “Kwv tij, nej mloog kuv hais. Xis Moos nyuam qhuav piav tias txij lub hauv paus los, Tswv Ntuj yeej xaiv tej tus nyob hauv cov neeg teev dab los ua ib haiv neeg hwm nws lub npe. Qhov ntawd raug cov Yaj Saub cov lus, raws li Ntawv sau cia tias ‘Thaum ntawd, kuv yuav rov qab los, kuv yuav rov tsa Das Vis lub tsev tsam phooj uas vau lawm, tej vaj tse
uas pob tas lawm, kuv yuav rov kho, kuv yuav rov txhim kom sawv ntseg; kom lwm cov neeg nrhiav Huab Tais, kom tas ib tsoom haiv neeg uas kuv npaj lawv cia hwm kuv lub npe, nrhiav tau kuv.’ Tus hais li no yog tus Huab Tais uas tau qhia tej yam ntawd tau ntau txheej ntau tiam los lawm. Vim li no, mas kuv thiaj pom zoo tias kom tsis txhob ua ntxhov rau cov neeg teev dab uas tig los ntseeg Tswv Ntuj. 20 Peb tsuas qhia
lawv kom caiv cov nqaij txi dab, caiv kev ua dev ua npua, caiv cov nqaij pos tuag, thiab caiv ntshav xwb. Vim tias txij puag txheej thaud los, muaj neeg tshaj Mais Xes txoj kev cai nyob tas txhia lub nroog. Lawv nyeem cov kev cai ntawd niaj hnub nyob hauv cov Tsev Txoos.”

(Z 15: 9-11)
Yes Xus hais rau cov thwj tim tias “Kuv nyiam nej ib yam li Leej Txiv nyiam kuv. Nej nyob hauv kuv txoj kev nyiam mog. Yog nej coj kuv cov lus qhia, mas nej nyob ruaj hauv kuv txoj kev nyiam, ib yam li kuv coj kuv Txiv cov lus qhia thiab kuv nyob ruaj hauv nws txoj kev nyiam. Kuv hais tej no rau nej kom kuv txoj kev kaj siab nyob hauv nej, nej thiaj txais kev kaj siab puv nej.”

LO LUS NTUAS

(HL 15: 22-31; Z 15: 12-17)
Yes Xus hais rau cov thwj tim tias “Kuv lo lus qhia yog lo lus no: nej sis nyiam sis hlub zoo li kuv tau nyiam tau hlub nej. Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg. Yog nej ua qhov kuv qhia nej, mas nej yog kuv cov phooj ywg. Kuv tsis hu nej ua kuv cov tub txib, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim tas ib puas tsav yam kuv hnov ntawm kuv Txiv, mas kuv qhia nej paub tas huv si. Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. Lo lus qhia uas kuv muab rau nej yog kom nej sis nyiam sis hlub.”

LUS NTUAS
Hnub no peb rov hnov Huab Tais Yes Xus hais txog kev sis nyiam sis hlub ntxiv. Huab Tais Yes Xus hais tias “Kuv lo lus qhia yog lo lus no; nej sis nyiam sis hlub zoo li kuv tau nyiam tau hnub nej.”
Thaum peb nyiam tus neeg twg, mas peb nyob ruaj hauv nws. Thaum tus twg nyiam peb, mas nws kuj nyob ruaj hauv peb. Yog li mas thaum peb sis nyiam sis hlub, yog peb ib tug nyob ruaj hauv ib tug, ces peb thiaj tsis sib tawg tsis sib cais.
Txhua tus neeg nyiam kev thaj yeeb sib haum xeeb, lawv puav leej qhia kom sawv daws ua neej nyob sis nyiam sis hlub. Tab sis muaj ib yam Huab Tais Yes Xus qhia txawv luag tej; yog qhov tias tus muaj txoj kev nyiam loj tshaj yog tus yeem muab nws txoj sia rau nws cov phooj ywg. Huab Tais Yes Xus tsis yog lam hais lo lus kom zoo mloog tab sis Huab Tais Yes Xus ua raws li nws tau hais tiag. Peb pom nyob saum tus Ntoo Cuam tias Huab Tais Yes Xus nyiam ntiaj teb neeg tas npaud, mas nws thiaj yeem tuag txom nyem saum Ntoo Cuam kom tau cawm tas sawv daws. Huab Tais Yes Xus muab sawv daws saib ua nws cov phooj ywg; txawm tias lawv ib txhia yuav tso nws pov tseg, ib txhia thuam nws, ib txhia liam lub txim rau nws, ib txia raus tes muab nws tua.
Peb pom li no lawm, peb puas xav nyiam Huab Tais Yes Xus ib yam li nws tau nyiam peb. Raws li xav, mas tsim nyog peb yuav nyiam Huab Tais Yes Xus tas siab tas ntsws tiag tiag, tsis xav ua kom nws tu siab los khuv xim tias tau muab tas nws txoj sia los nyiam peb. Peb kuj yuav lees tias peb yog neeg tsis muaj zog, mas ntau zaus peb tsis nco txog tias Huab Tais Yes Xus saib peb yog nws phooj ywg, ntau zaus peb cia kev phem kev tsis zoo tuaj plooj peb qhov muag kom txhob ntsia pom Huab Tais Yes Xus tuag txhiv peb, ntau zaus peb cia kev txhaum tuaj tsuas peb lub tswv yim kom tsis nco xav txog tias Huab Tais Yes Xus xaiv peb los ua nws tug.
Huab Tais Yes Xus nyiam peb tiag, nws xaiv peb thiab xa peb mus tshaj txoj kev nyiam rau lub ntiaj teb neeg paub, kom peb txi txiv. Peb cov txiv yog kev sis nyiam sis hlub. Yog peb sis nyiam sis hlub, mas peb tuav txog Huab Tais Yes Xus lub npe thov dab tsi ntawm Tswv Ntuj, mas Tswv Ntuj yuav muab rau peb.
Huab Tais Yes Xus tseem hais rau cov thwj tim tias “Luag tej yuav paub tias nej yog kuv cov thwj tim los tsis yog, mas yog luag saib qhov tias nej puas sis nyiam sis hlub.” Li ntawd, peb cov neeg ntseeg txog Yes Xus kav tsij sib nyiam raws li Huab Tais Yes Xus tau nyiam peb txog qhov nws muab tas nws txoj sia rau peb. Peb yuav thov Leej Ntuj Plig Ntshiab pab peb kom ntsia pom txog qhov no thiab kom peb txawj nyiam cov neeg nyob ncig peb, kom nyob hauv peb ib tsoom neeg ntseeg tsuas muaj kev sis nyiam sis hlub mus li tsis txhob ploj.

(HL 16: 1-10; Z 15: 18-21)
Yes Xus hais rau cov thwj tim ntxiv tias “Yog lub qab ntuj neeg ntxub nej, mas nej yuav paub tias lawv twb ntxub kuv ua ntej. Yog nej yog lub qab ntuj neeg tug, mas qab ntuj neeg yuav nyiam yam uas yog nws tug. Tab sis lub qab ntuj neeg ntxub nej, vim nej tsis yog qab ntuj neeg tug, rau qhov kuv xaiv nej thiab thau nej hauv lub qab ntuj neeg los. Nej nco ntsoov txog lo lus uas kuv hais rau nej tias: tus tub txib tsis loj dua nws tus tswv. Yog lawv hiam kuv, mas lawv kuj yuav hiam nej. Yog lawv khaws kuv lo lus, mas lawv kuj yuav khaws nej lo lus thiab. Tiam sis lawv yuav ua tas puas tsav yam no rau nej vim kuv lub npe, rau qhov lawv tsis paub tus xa kuv tuaj.

LUS NTUAS
Zam sau nws phau Ntawv Moo Zoo, nws siv lo lus tias ‘qab ntuj neeg’ los hais txog neeg zaj tswv yim nyiam nrhiav tej yam los yug neeg lub cev ntshaw kom tau txaus siab. Yam li neeg ntshaw tau zoo, ces neeg ua tiag nrhiav nyiaj ntau ntau cia; neeg ntshaw noj kom tsau plab, ces neeg huas noj yam li npua huas qhauv; neeg lub cev ntshaw lom zem, ces neeg nriav kev ua plees. Hnub no Huab Tais Yes Xus thiaj qhia cov thwj tim tias cov neeg muab tswv yim ib rau kev ntshaw fab cev nqaij, mas lawv yuav tsis nyiam Huab Tais Yes Xus zaj tswv yim vim Huab Tais Yes Xus zaj tswv yim tsis haum lub tswv yim ntshaw ntawd. Huab Tais Yes Xus cov thwj tim tsum yuav Huab Tais Yes Xus zaj tswv yim, lawv txhob npuab niaj teb zaj tswv yim.
Muaj ntau zaus Huab Tais Yes Xus muab ntiaj teb zaj tswv yim piv rau qhov tsaus ntuj, hos nws zaj tswv yim piv rau qhov pom kev, kom cov thwj tim pom tias ob zaj tswv yim no mus ua ke tsis tau. Los Huab Tais Yes Xus hais tias ib tug neeg twg yuav tsob hwb nyiaj txiag thiab Tswv Ntuj ib txhij tsis tau.
Huab Tais Yes Xus xav qhia cov thwj tim ntxiv tias tos qab ntuj neeg ntxub lawv, vim qab ntuj neeg twb xub ntxub Huab Tais Yes Xus ua ntej lawm, yog li cov thwj tim thaum lawv yuav Huab Tais Yes Xus zaj tswv yim, mas lawv tsis txhob xav ntau ntau txog tej yam lawv yuav ntsib.
Peb yeej pom muaj tseeb li ntawd tiag. Peb pom tias nyob hauv peb haiv Hmoob muaj ntau leej tsis nyiam txoj kev ntseeg Ntuj, lawv thuam thiab hais ntau yam tsis zoo txog Huab Tais Yes Xus. Yog peb nrog cov neeg ntxub txoj kev ntseeg sib cav, mas tsis muaj qhov zoo dab tsi tuaj. Txawm li ntawd, los thov peb tsis txhob npau taws rau lawv, txhob ntxub lawv; peb thov Ntuj rau lawv kom muaj ib hnub twg lawv pom qhov tseeb, pom tias kawg yog Huab Tais Yes Xus xwb thiaj ua tau txoj kev rau lawv taug, kawg yog Huab Tais Yes Xus xwb thiaj kaj tau lawv lub tswv yim kom pom kev tuaj.
Peb pom tias tus neeg ua zoo, mas nws nyiam nyiam raug cov neeg phem hiam. Txawm li ntawd, los peb txhob tag siab rau kev ua zoo.
Peb pom tias tus neeg hlub zeej tsooom, mas nws nquag nquag raug sawv daws ntxias siv. Txawm li ntawd, los peb txhob tso tseg kev hlub lwm tus.
Peb pom tias cov neeg siab ncaj nyiam nyiam raug ntxeev siab. Txawm li ntawd, los peb txhob ua siab nkhaus pauj rov.
Txhua yam no peb pom nyob hauv Huab Tais Yes Xus lub neej, nws yog tus zoo txhij tsis kav nws raug cov Fas Lis Xais thiab pej xeem cov laus neeg hiam tias nws vam txog dab tuaj pab tsoom sid. Lawv hiam tias Huab Tais Yes Xus tsa nws txij Tswv Ntuj. Huab Tais Yes Xus hlub tas ib zeej tsoom tab sis tsoom sid tsuas vam kom nws pab lawv tau raws li lawv lub siab ntshaw. Huab Tais Yes Xus ua siab ncaj rau cov thwj tim tab sis lawv ntxeev siab rau nws nyob hauv hmo kawg.
Txawm tias Huab Tais Yes Xus raug zoo li ntawd, tsis kav nws kuj yeem tuag kom tau cawm sawv daws. Huab Tais Yes Xus tsis tso sawv daws pov tseg, nws zoo siab ua qhov pom kev kaj lub qab ntuj neeg. Yog li mas peb tsoom neeg ntseeg sawv daws kuj yuav taug Huab Tais Yes Xus tus lw no vim Huab Tais Yes Xus xaiv peb thiab thau peb hauv lub qab ntuj neeg los.

XYOO A
(HL 8: 5-8, 14-17)

(1PZ 3: 15-18)

(Z 14: 15-21)
Yes Xus hais rau nws cov thwj tim tias “Yog nej nyiam kuv, mas nej yuav coj kuv cov lus qhia. Kuv yuav thov Leej Txiv, ces nws yuav xa dua ib Leej Nplij Neeg los rau nej, kom nws nrog nej nyob mus li. Tus ntawd yog Leej Ntuj Plig qhia qhov tseeb. Lub qab ntuj neeg txais tsis tau nws, vim lub qab ntuj neeg tsis pom nws thiab tsis paub nws. Hos nej, mas nej paub nws, vim nws tsa tsev nrog nej nyob, thiab nws yuav los nyob hauv nej.
Kuv yuav tsis cia nej ua ntsuag. Kuv yuav los cuag nej. Tshuav tsis ntev ces lub qab ntuj neeg yuav tsis pom kuv ntxiv. Tab sis nej yuav pom kuv, vim kuv muaj txoj sia, nej kuj yuav muaj txoj sia thiab. Hnub ntawd, nej yuav paub tias kuv nyob hauv kuv Txiv, nej nyob hauv kuv, thiab kuv nyob hauv nej. Tus muaj kuv cov lus qhia thiab coj kuv cov lus qhia, mas nws yog tus nyiam kuv. Tus nyiam kuv, mas kuv Txiv yuav nyiam nws, kuv kuj yuav nyiam nws thiab, ces kuv yuav ua kom nws pom kuv.”

(HL 16: 11-15; Z 15: 26-16: 4)
Yes Xus hais rau nws cov Thwj Tim tias “Leej Nplij Neeg yuav tuaj. Nws yog tus uas kuv yuav xa ntawm Leej Txiv tuaj rau nej. Nws yog Leej Ntuj Plig qhia qhov tseeb uas tawm hauv Leej Txiv los, nws yuav ua tim khawv txog kuv. Nej kuj ua tim khawv thiab, vim nej nrog kuv txij lub hauv paus los. Kuv hais tej no rau nej kom nej txhob dawm ko taw. Luag yuav ntiab nej tawm hauv cov tsev txoos. Luag haj tseem yuav ua phem tshaj, vim txog lub sij hawm uas tus muab nej tua, nws yuav xav tias nws ua ib qho los hawm Tswv Ntuj. Lawv yuav ua li ntawd vim lawv tsis paub Leej Txiv thiab tsis paub kuv. Kuv hais tej no rau nej, kom thaum txog lub sij hawm ntawd, nej nco ntsoov tias kuv twb xub qhia nej lawm. Thaum chiv thawj, kuv tsis tau hais tej no rau nej, vim kuv tseem nrog nej nyob.”

LUS NTUAS
Xyoo 45 Paj Lug thiab Npas Nas Npes caij nkoj ntawm As Nthias Kias nyob Xis Lias teb hla mus rau lub pov txwv Kos Plos. Lub nkoj coj nkawd tuaj txog Xas Las Mis ((Salamine), ces nkawd pib tshaj lub Moo Zoo mus txog lub nroog Pas Fos (Paphos). Nyob ntawd, Paj Lug hloov nws lub npe tshiab hu ua ‘Paj Lug’ raws li tus vaj txheeb Xias Zus Paj Lug lub npe.
Paj Lug, Npas Nas Npes, Mas Kos lawv ho caij nkoj hla mus rau lub nroog Pes Zes (Perge) nyob Pas Fis Lias teb (Pamphilie) Txog ntawd, Mas Kos rov los Yes Lus Xas Les, tsuas tshuav Paj Lug thiab Npas Nas Npes xwb thiaj nyob ntxiv. Nkawd mus ntxiv rau As Nthias Kias nyob Pis Xis Dias (Pisidie), Is Kos Nias, Lis Ros, thiab Des Npes nyob Lis Kos Nias.
Thaum nkawd tshaj lub Moo Zoo nyob Des Npes tas, nkawd rov qab los xyuas cov ntseeg nyob hauv cov nroog nkawd tau tshaj lub Moo Zoo rau. Nkawd los caij nkoj ntawm As Tas Lias rov los rau As Nthias Kias nyob Xis Lias teb. Thawj lwm Paj Lug thiab Npas Nas Npes mus tshaj lub Moo Zoo, nkawd mus 3 xyoos.
Tom qab Paj Lug lawv mus ua lub Rooj Ncauj Lus nyob Yes Lus Xas Les tas, Paj Lus rov los nyob As Nthias Kia sob peb lub hlis, nws xav mus xyuas cov ntseeg hauv cov nroog nws thiab Npas Nas Npes tau mus tshaj lub Moo Zoo, ces xyoo 50 Paj Lug thiaj li coj Xis Las nrog nws mus. Nkawd mus taw rau Tas Xis, Des Npes, thiab Lis Ros. Nyob Lis Ros, Paj Lug ua lub cim txiav rau Tis Mos Tes thiab coj nws nrog nkawd mus tshaj lub Moo Zoo. Paj Lug lawv hla Fis Zias thiab Nkas Las Tias mus txog Mis Xias, ces lawv nqes mus nram lub tsheej Thuas. Nyob ntawd, Paj Lug yees pom ib tug neeg hu nws kom hla hiav txwv mus tshaj lub Mo Zoo rau cov Mas Xes Dos Nias, ces Paj Lug lawv thiaj caij nkoj hla mus rau Mas Xes Dos Nias teb. Lawv tuaj txog ntawm Xas Mos Thas Kes, lawv so ntaws ib hmos, ces rov caij nkoj mus nqes ntawm Nias Pos Lis hauv Mas Xes Dos Nias. Lawv mam mus taw ntxiv rau Fis Lis Pos uas yog thawj lub tsheej nyob Mas Xes Dos Nias teb.
Paj Lug tsis paub leej twg nyob Fis Lis Pos, ces nws tos kom rov txog hnub Xas Npas Tos uas yog hnub cov Yus Das sib sau teev Ntuj. Tab sis nyob Fis Lis Pos, cov Yus Das tsis muaj lub tsev txoos, yog li cov Yus Das thiaj sib sau tuaj teev Ntuj ua ke nyob ntawm ib tug dej ntawm lub nroog sab nraud xwb. Tos lawv sib sau teev Ntuj nyob ntawm ntug dej, vim tias raws Mais Xes txoj cai, lawv tsum xub ntxuav lawv kom huv tso, thiaj tsim nyog sib txoos teev Ntuj tau.
Paj Lug lawv mus nrog sawv daws teev Ntuj, Paj Lug pib tshaj Yes Xus lub Moo Zoo rau cov poj niam. Nyob hauv pab poj niam tuaj mloog Paj Lug, muaj ib tug yog Lis Dias. Lis Dias yog ib tug poj niam ua luam muag ntaub, nws tsis yog haiv Yus Das tab sis nws ntseeg txog Tswv Ntuj xws li cov Yus Das, nws kuj yog ib tus neeg hwm Tswv Ntuj zoo thiab. Lus Kas tus sau phau ntawv Hauj Lwm hais tias ‘Lis Dias teev Tswv Ntuj’ (Her worshipped God).
Lis Dias niaj lis piam nrog cov Yus Das sib txoos mloog Ntawv Ntshiab thiab hu nkauj teev Tswv Ntuj. Tswv Ntuj qhib Lis Dias siab; yam li Leej Ntuj Plig ua hauj lwm nyob hauv Lis Dias, ces nws txais Paj Lug cov lus, nws ntseeg tias Huab Tais Yes Xus yog Tswv Ntuj Leej Tub tuag kom tau ntxuav ntiaj teb neeg cov txhaum, nws ntseeg tias Huab Tais Yes Xus tuag thiab sawv rov qab los kom tau pub txoj sia tshiab rau cov ntseeg txog nws tiag, ces Lis Das thiab nws tsev neeg thov txais lub Cim Ntxuav los ntseeg txog Yes Xus. Lis Dias tseem qhib nws tsev rau Paj Lug lawv tau so.
Yog peb hnov Yes Xus lub Moo Zoo, peb qhib siab mloog thiab ntseeg, mas Leej Ntuj Plig kuj yuav ua hauj lwm nyob hauv peb ib yam li tau ua nyob hauv Lis Dias, ces peb yuav hloov siab tshiab ua tus neeg tshiab nyiam thiab hlub cov neeg nyob ib ncig peb.
Lis Dias qhib nws tsev txais Paj Lug lawv, mas lub Koom Txoos thiaj li pib sawv nyob hauv lub nroog Fis Lis Pos. Yog peb zoo siab txais Huab Tais Yes Xys cov tub tshaj Ntuj Lus, mas peb kuj tau koom nrog Huab Tais Yes Xus tsa nws lub Koom Txoos tib yam li ntawd.
Huab Tais Yes Xus hais qhia cov thwj tim tias yog nws raug hiam, mas cov thwj tim kuj yuav raug hiam li nws thiab. Huab Tais Yes Xus xav qhia lawv kom paub vim tsam txog thaum lawv raug hiam, lawv yuav xav tias ua cas lawv thiaj yeem raug luag hiam. Yog lawv paub li no lawm, hnub Lawv raug hiam, mas lawv thiaj yuav nco tau tias Huab Tais Yes Xus twb xub hais rau lawv lawm.
Niaj hnub no peb ntsib kev txom nyem, peb raug luag lwm tus ua phem ua tsis ncaj, mas peb yuav zoo siab vim Huab Tais Yes Xus twb xub qhia peb thiab raug ua ntej peb lawm. Qhov Huab Tais Yes Xus tau txais tom qab tej ntawd dhau, mas yog kev zoo siab; peb paub li no, mas peb lub siab thiaj kaj.
Yog peb nyeem hauv phau ntawv cov Hauv Paus Xa Lus cov Hauj Lwm, peb yuav pom tias tom qab Huab Tais Yes Xus mus saum ntuj tas, cov thwj tim raug hiam tab sis lawv zoo siab thiab lawv ua Tswv Ntuj tsaug rau qhov Tswv Ntuj cia lawv raug hiam kom tau ua tim khawv txog Huab Tais Yes Xus.
Cov neeg ntseeg nyob Yes Lus Xas Les raug cov Thawj Leej Choj thiab cov txwj laus hiam, mas lawv khiav mus nyob thoob Los Mas tuam teb ua rau lub Moo Zoo ri mus txhua qhov chaw. Yog thaum cov ntseeg raug hiam, lawv thim kev ntseeg mas ntshai niaj hnub no txoj kev ntseeg txog Yes Xus twb tuag lawm.
Nyob hauv cov teb chaws tseem hwv hiam lub Koom Txoos, mas muaj ntau lub teb chaws txoj kev ntseeg tsuag tab sis muaj ntau lub, mas txoj kev ntseeg yim muaj zog thiab huam vam mus sai.
Thaum peb ntsib kev txom nyem, thaum peb raug tsim txom, mas kom peb nco tias Huab Tais Yes Xus twb xub raug ua ntej thiab twb xub hais txog tas lawm.
Peb pom tias cov neeg tsis kam thim lawv txoj kev ntseeg mus txog qhov kawg, lawv tuag, mas lawv tau txais txoj sia nyob mus li pem Tswv Ntuj lub Ceeb Tsheej lawm. Peb pom lawv lub cev tuag, tab sis peb ntseeg tias lawv txoj sia tsis tuag.
Hnub no, peb zoo siab rau qhov tias nyob hauv cov teb chaws peb nyob, tseem hwv los nom tswv, cov neeg koom zos nrog peb, lawv tsis liam dab tsi rau peb kev ntseeg, lawv tsis hiam peb; tab sis tseem tshuav ntau qhov chaw hauv lub ntiaj teb no uas cov neeg ntseeg tseem raug tsim txog, peb yuav thov Ntuj rau lawv. Tsis tas li, peb kuj pom tias nyob ntau thaj tsam muaj kev sib ntaus sib tua, ua rau tsoom pej xeem ntsib xwv txheej kev txom nyem; peb kuj thov Ntuj rau lawv, thov Tswv Ntuj xa Leej Nplij Neeg tuaj pab nplij lawv siab kom rov muaj zog, thov Tswv Ntuj xa Leej Nplij Neeg tuaj tshoj cov nom tswv kom lawv ras pom tias kev siv riam phom sib tua tsis muaj qab hau dab tsi rau lub ntiaj teb; kawg yog kev tuav tes tsim kev thaj yeeb xwb thiaj yuav ua tau kom lub teb chaws vam meej sawv daws muaj tsim.

(HL 16: 22-34; Z 16: 5-11)
Yes Xus hais cov thwj tim ntxiv tias “Nyem no kuv mus cuag Tus Xa kuv tuaj. Nej tsis muaj leej twg nug kuv tias ‘Koj mus qhov twg?’ Ziag no, nej tu siab tas, vim kuv hais tej ntawd rau nej. Tab sis kuv hais qhov tseeb rau nej tias cia kuv mus mas yuav zoo dua rau nej. Yog kuv tsis mus, mas Leej Nplij Neeg yuav tsis tuaj rau hauv nej. Hos yog kuv mus, mas kuv yuav xa Leej Nplij Neeg tuaj rau nej. Thaum Leej Nplij Neeg tuaj txog, nws yuav ua kom qab ntuj neeg pom tias lawv ua txhaum, ua tsis ncaj, thiab txiav txim yuam kev. Lub qab ntuj neeg ua txhaum, vim lawv tsis ntseeg txog kuv. Lub qab ntuj neeg ua tsis ncaj, vim kuv mus cuag Leej Txiv, ces nej tsis pom kuv ntxiv. Lub qab ntuj neeg txiav txim yuam kev, vim tus Tswj lub qab ntuj neeg raug txim lawm.”

LUS NTUAS
Paj Lug lawv mus nyob hauv Lis Dias tsev. Niaj lis piam hnub Xas Npas Tos lawv qhia txog Yes Xus rau cov Yus Das thiab rau lwm cov neeg zoo siab txais Yes Xus lub Moo Zoo. Tos tsis ntev muaj ib pab neeg teev dab tig los ntseeg txog Yes Xus coob hauj sim, ces ib co txiv dab lawv tsis zoo siab rau Paj Lug thiab Xis Las, lawv mus kom Paj Lug thiab Xis Las nkawd tom cov nom tswv. Cov nom tswv coj nkawd musk aw hauv tsev loj faj. Tos cov txiv dab tsis zoo siab vim tias Paj Lug tau ntiab ntau tus dab ntaus txheeb, ua rau cov txiv dab poob nyiaj.
Paj Lug thiab Xis Las raug nplawm sab kawg, tsis kav nyob hauv tsev loj faj, Paj Lug thiab Xis Las nkawd tseem zoo siab laug ntxhi hu nkauj cav txog Tswv Ntuj. Nkawd zoo siab vim tias nkawd tau paub Huab Tais Yes Xus, tau koom nrog Huab Tais Yes Xus ris kev txom nyem. Ntawm peb cov neeg ntseeg, peb yuav yoog raws li Paj Lug thiab Xis Kas nkawd, thaum peb ntsib kev txom nyem los muaj tej yam xwv txheej tuaj nphav raug peb; peb zoo siab, peb ua Tswv Ntuj tsaug.
Nyob hauv thaj tsam Fis Lis Pos, mas ntiaj teb qeeg ntau zaus. Tab sis Lus Kas tus sau phau ntawv Hauj Lwm saib tias yog Tswv Ntuj txhob txwm ua kom ntiaj teb qeeg, vim Tswv Ntuj xav pab Paj Lug thiab Xis Las kom tau kev tshaj lub Moo Zoo rau tus saib tsev loj faj.
Cov Los Mas muaj ib txog cai txiav tias thaum twg tus zov tsev loj faj cia ib co neeg nyob txim dim, mas nws yuav tsum raug ib lub txim zoo li cov neeeg khiav dim, yog li mas thaum tus saib tsev loj faj pom cov qhov rooj qhib lug, nws xav tias cov neeg nyob txim khiav tas lawm, mas nws rho ntab yuav muab nws tua. Paj Lug hais rau nws tias lawv tseem nyob li qhov qub, nws tsis txhob muab nws tua.
Tus saib tsev loj faj yeej tau hnov Paj Lug thiab Xis Las nkawd hu nkauj cav txog Tswv Ntuj ua ntej no los lawm, nws xav tias nkawd muaj ib tug Huab Tais siab zoo tas nrho pub kom nkawd ua siab loj, pub kom nkawd nyob kaj siab lug hauv tsev loj faj, pub ib lub siab zoo rau nkawd. Nws tsis tau pom ib zaug ib co neeg raug txim zoo xws li Paj Lug thiab Xis Las. Nws tseem pom tias Paj Lug nkawd yuav khiav tawm mus los yeej tau, tab sis nkawd tsis khiav, nkawd pab kom nws tsis txhob tuag; zoo li nkawd pub ib lub txiaj ntsim loj rau nws. Tus saib tsev loj faj nug nkawd tias “Kuv yuav ua li cas, Ntuj thiaj yuav cawm kuv?” Yog nws xav muaj ib lub siab zoo li Paj Lug nkawd. Paj Lug teb tus saib tsev loj faj tias “Koj ntseeg txog Huab Tais Yes Xus, ces Ntuj yuav cawm koj thiab koj tsev neeg” (HL 16: 31). Paj Lug thiaj qhia nws txog Yes Xus lub Moo Zoo.
Zoo li yog Tswv Ntuj lub txiaj ntsim tuaj tshoj tus saib tsev loj faj lub siab, ces nws zoo siab ntseeg cov lus Paj Lug piav txog Huab Tais Yes Xus, ces nws thiab tas tsev neeg ntseeg txog Yes Xus. Nws ntxuav Paj Lug thiab Xis Las cov qhov txhab, nws coj nkawd nce mus saum nws tsev, nws rau mov rau nkawd noj.
Tus ntseeg txog Yes Xus, nws ua tus neeg tshiab tso lub qub neej pov tseg. Tus saib tsev loj faj ua zoo li ntawd. Nws paub Huab Tais Yes Xus, nws ntseeg txog Huab Tais Yes Xus, ces nws hlub Paj Lug thiab Xis Las, nws ua zoo rau nkawd. Leej Ntuj Plig Ntshiab ua hauj lwm hauv nws.
Huab Tais Yes Xus hais rau cov thwj tim tias nws yuav mus cuag Leej Txiv Tswv Ntuj, yuav tsis nrog lawv nyob ntxiv, yog li mas cov thwj tim tsum xyaum ua neej nyob nrog qab ntuj neeg. Lawv yuav tsis plam rau ntiaj teb zaj tswv yim yog tias lawv vam txog Leej Ntuj Plig ua tus nplij lawv.
Peb muab Leej Ntuj Plig piv rau dab tsi thiaj yuav to taub zoo? Yam li yog Huab Tais Yes Xus txoj pa. Tus Hauv Paus Xa Lus Zam hais tias thaum Huab Tais Yes Xus txoj sia tu, nws nyo taub hau, ces nws tus plig tawm mus. Thaum Huab Tais Yes Xus sawv rov los, nws tshuab pa pub Leej Ntuj Plig rau cov thwj tim, ces lawv lub siab loj tuaj thiab lawv muaj cuab kav tawm mus tshaj lub Moo Zoo.
Huab Tais Yes Xus hais tias “Leej Nplij Neeg yuav ua kom qab ntuj neeg pom tias lawv ua txhaum, ua tsis ncaj, thiab txiav txim yuam kev.” Yog Leej Ntuj Plig yuav qhib lub tswv yim rau sawv daws pom tias txhaum yog dab tsi, qhov ncaj thiab tsis ncaj yog li cas, kev txiav txim ne ho yog mus raws li cas tiag. Yog li mas cov neeg vam txog Leej Ntuj Plig, lawv tsis yuam kev. Li ntawd, peb sawv daws thiaj yuav thov Leej Ntuj Plig tsis tseg kom niaj hnub kaj peb siab thiab tsom kev rau peb taug.
Tus ntseeg thiab ua raws li Huab Tais Yes Xus cov lus qhia, tus ntawd tsis raug txim. Tus twg tsis yuav Huab Tais Yes Xus thiab tsis mloog Huab Tais Yes Xus hais, tus ntawd yuav raug txim.
Hnub no, Leej Ntuj Plig nyob saum peb, tos peb qhib siab rau Leej Ntuj Plig los tsa tsev hauv peb, los coj peb kom txhob poob rau hauv qhov txhaum, los hlawv peb kom kub lug nyob hauv Tswv Ntuj kev nyiam, mas peb thiaj xa thaum kev nyiam mus pub rau lwm tus.

(HL 17: 15, 22-18: 1; Z 16: 12-15)
Yes Xus qhia cov thwj tim tias “Kuv tseem tshuav ntau yam yuav hais rau nej, tab sis nyem no nej ris tsis taus. Thaum Leej Ntuj Plig qhia qhov tseem ceeb tuaj txog, nws yuav coj nej mus rau qhov tseeb tas huv si. Vim nws yuav tsis hais nws cov lus, nws yuav hais qhov nws hnov, thiab nws yuav xub qhia nej txog tej xwm uas yuav tshwm sim tuaj. Nws yuav ua kom kuv muaj koob meej, vim nws yuav coj yam uas yog kuv tug tuaj qhia rau nej. Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias Leej Nplij Neeg yuav coj yam uas yog kuv tug tuaj qhia rau nej.”

LUS NTUAS
Lub caij uas Paj Lug tuaj txog As Thes Nas, mas lub tsheej As Thes Nas zwm rau tus tuam vaj Los Mas yuav luag muaj 200 xyoo los lawm. Tsis kav As Thes Nas tseem yog lub tsheej uas muaj cov kws txuj, cov neeg thoob tsib, thiab cov tsev qhia txuj zoo tshaj nyob hauv cov teb chaws uas zwm rau Los Mas. Cov Los Mas lawv kuj tuaj kawm lus Hes Las thiab kawm cov txuj Hes Las nyob As Thes Nas coob leej.
Li ntawd, thaum Paj Lug tuaj txog As Thes Nas, nws ntsib cov neeg paub txuj ntau tshaj nyob Toob Fab, nws ua tus tsis ntshai lawv vim nws saib tias nws txoj kev ntseeg txog Yes Xus muaj nqes tshaj lawv cov txuj. Nws nrog lawv tham ntawm tej tshav puam. Cov neeg ntawd yog cov kws txuj Es Pis Kws thiab Tos Es Xias.
Cov Es Pis Kws (Epicureans) lawv ntseeg raws li tus kws txuj Es Pis Kws Lus (Epicurus) cov lus qhia. Lawv ntseeg tias cov dab (gods) tsis quav ntseg txog neeg txoj sia, ces lawv qhia kom neeg kav tsij nrhiav kev lom zem rau neeg lub cev raws li neeg yuav nrhiav tau.
Cov Tos Es Xias (Stoics) ntseeg raws li tus kws txuj Ntxes Nos (Zeno) qhia. Lawv ntseeg txog ib tug tuam dab (a chief god), lawv hais tias txhua yam tshwm sim los raws li txoj hmoo (fate), lawv tsis tso siab rau lub neej pem suab.
Thaum lawv caw Paj Lug kom cev nws zaj rau lawv nyob hauv lub tsev sab laj As Les Os Pas (Areopagus), mas Paj Lug tsis yig. Paj Lug npaj ib zag phim cov neeg tsis paub Mais Xes txoj cai. As Les Os Pas yog cov As Thes Nas lub rooj txwj laus, lawv yog cov daws cov cai lij choj, kev kawm txuj, thiab cov kev teev hawm.
Paj Lug zaj muaj ib tug txheej txheem zoo li no:
1. Paj Lug hais tias hauv cov As Thes Nas cov tsev teev dab, mas muaj ib lub thaj cia rau lawv txi tus dab lawv tsis paub” (HL 17: 22-23).
2. Paj Lug hais tias tus dab uas cov As Thes Nas tsis paub ntawd yog tus dab tsim thiab kav lub sim ceeb; yog Tswv Ntuj. Tswv Ntuj tsis tos kom peb txi dab tsi rau nws, vim Tswv Ntuj yog tas txhua yam hauv lub sim ceeb no tus tswv. Tswv Ntuj yog tus pub txhuam yam rau peb. Tswv Ntuj pub txoj sia rau peb thiab nws txuag peb txoj sia cia. (HL 17: 24-29). Paj Lug hais li ntawd, vim cov As Thes Nas hais tias lawv tus tuam dab yog tus dab Ntxaws. Tus tuam dab Ntxaws tsis pub txoj sia rau tib neeg, hos Tswv Ntuj yog tus pub txoj sia. Cov As Thes Nas hais kam tias lawv muaj tsim dua lwm haiv neeg, tab sis Paj Lug xav qhia lawv tias txawm cov As Thes Nas uas yog haiv Hes Las, los lwm haiv neeg nyob ntiaj teb no, sawv daws muaj tsim sib luag vim sawv daws tawm ntawm tib lub hauv paus los. Tswv Ntuj tsim tib neeg los nrhiav Tswv Ntuj thiab paub Tswv Ntuj. Tswv Ntuj nyob ze ze peb.
Paj Lug hais tias peb yog Tswv Ntuj caj ces, yam li yog Tswv Ntuj cov me nyuam. Li ntawd, peb thiaj tsis txhob xav tias Tswv Ntuj zoo li ib thooj kub, ib thooj nyiaj, los ib thooj pob zeb uas neeg muab ob txhais tes puab ua ib tug mlom. Paj Lug tsis xav thuam tias cov As Thes Nas to taub yuam kev, mas lawv thiaj txua cov mlom dab ntau ntau, ces Paj Lug tsis tab meeg hais rau lawv tias “Nej’, nws txhob txwm hais tias “Peb”. Qhov no zoo qhia peb tias thaum peb tshaj Ntuj Lus rau cov kwv tij tseem coj dab qhuas, mas peb txhob thuam lawv txoj kev ntseeg, peb tsum hwm lawv thiab hais lus zoo nrog lawv.
Tswv Ntuj tsis xav kom neeg nyob hauv txoj kev tsis paub Tswv Ntuj, mas Tswv Ntuj thiaj li xa ib tug tuaj qhia neeg. Tus ntawd tuag, ces Tswv Ntuj tsa nws sawv rov los (HL 17: 30-31).
Paj Lug ntuas tias yog lawv kam hloov siab los thov txhaum, lawv tsis txhob teev cov mlom dab ntxiv, tab sis lawv yuav tau tig los teev Tswv Ntuj. Lawv paub Tswv Ntuj, yog lawv paub txog Huab Tais Yes Xus tus uas Tswv Ntuj xa tuaj.
Thaum Paj Lug hais txog ib tug tuag sawv rov los, mas cov As Thes Nas tsis kam mloog ntxiv, vim lawv yog ib co neeg khav tias lawv paub txuj, mas lawv ntseeg tsis tau ib yam uas lub tswv yim xav tsis tau. Lawv hais tias neeg tuag yuav tsis sawv rov los. Lawv tsis kam ntseeg txog ib tug Tswv Ntuj uas yuav ncaj qha tuaj ua ib yam hauj lwm nyob ntiaj teb no. Lawv hais tias cia lwm zaus lawv mam rov tuaj mloog Paj Lug zaj lus.
Tos lawv hais li ntawd vim lawv tsis xav txiav txim kiag tias cov lus Paj Lug hais yog tseeb los yog cuav, lawv xav tau ib lub sij hawm coj mus khaws xav thiab xav tswv yim txog. Nyob hauv kev tshaj lub Moo Zoo yeej zoo li ntawd, yog li peb thiaj yuav tau thov Ntuj pab cov neeg mloog peb.
Tab sis muaj tus puav tuaj hais rau Paj Lug tias lawv ntseeg Paj Lug zaj lus. Cov ntawd yog Dias Nws Xyos, Das Mas Lis, thiab tus puav ntxiv. Yog Tswv Ntuj tshoj lawv siab kom lawv nyiam hwm Tswv Ntuj thiab Tswv Ntuj Leej Tub Yes Xus. Lawv cov no xav tias yog ib txog kev zoo dua txoj kev sib tham tsis paub tas txog kev thoob tsib xws li cov As Thes Nas ua tas sim neej.
Paj Lug nyob As Thes Nas tsis ntev vim nws pom tias cov As Thes Nas muab hlob, lawv yuav txais tsis tau Tswv Ntuj Lo Lus. Paj Lug kuj xav tias ntshai nws txoj kev tshaj lub Moo Zoo li no tsis pab tau kom cov neeg tig los yuav siab tshiab, ces nws yuav hloov lub tswv yim tshaj lub Moo Zoo tshiab; peb pom nyob hauv Paj Lug kev tshaj lub Moo Zoo rau cov neeg nyob Kos Lis Nthos.
Thaum cov thwj tim hnov Huab Tais Yes Xus hais tias nws yuav ncaim sawv daws, mas lawv tsis qab siab. Txawm Huab Tais Yes Xus qhia lawv tias yog vim li cas nws thiaj yuav tau ncaim lawv, tsis kav zoo li lawv tsis xav nkag siab txog yam Huab Tais Yes Xus hais. Huab Tais Yes Xus thiaj hais rau lawv tias nws yuav xa Leej Ntuj Plig los qhia lawv txog qhov tseeb.
Thaum ntawd, cov thwj tim tsis to taub cov lus Huab Tais Yes Xus hais, tab sis tom qab Huab Tais Yes Xus tuag thiab sawv rov los, nws mus saum ntuj lawm, ces Leej Ntuj Plig nqes los rau saum cov thwj tim, lawv to taub tas txhua yam Huab Tais Yes Xus hais thiab ua, ces lawv tawm mus tshaj lub Moo Zoo. Cov thwj tim qhia tias yog tim dab tsi Huab Tais Yes Xus thiaj tsum tuag saum Ntoo Cuam. Lawv tshaj txog kev sawv rov los thiab txoj kev coj sawv daws mus txog txoj sia tshiab; yog ntseeg txog Yes Xus. Lawv nco txog cov hwj huam Huab Tais Yes Xus ua, lawv nco tau Huab Tais Yes Xus cov lus thiab lawv to taub lub ntsiab lus.
Leej Ntuj Plig Ntshiab pab peb tau ib yam. Leej Ntuj Plig Ntshiab pab kom peb to taub cov zaj hauv Ntawv Ntshiab. Leej Ntuj Plig Ntshiab qhib peb lub tswv yim kom pom tias cov zaj hauv Ntawv Ntshiab zoo ntuas dab tsi rau peb. Yog peb thov Tswv Ntuj, mas Tswv Ntuj yuav hais lus rau peb nyob hauv peb lub tswv yim. Tej lo lus los tej qib lus hauv Ntawv Ntshiab muaj txiaj ntsim qab hau rau peb. Leej Ntuj Plig Ntshiab yuav tsom kev rau peb thaum peb nyeem Ntawv Ntshiab. Leej Ntuj Plig Ntshiab yuav pab peb kom paub tias qhov twg yom thiab tsis yog.
Huab Tais Yes Xus hais tias “Leej Ntuj Plig yuav xub qhia nej txog tej yam uas yuav tshwm sim tuaj”, lo lus no tsis tau hais tias Leej Ntuj Plig yuav qhib cov xwm yav tom ntej rau cov thwj tim pom, tab sis lo lus no txhais tias cov thwj tim yuav paub tias cov hauj lwm Tswv Ntuj tos ntawm lawv yog dab tsi.
Peb ntseeg txog Yes Xus, peb txais lub Cim Ntxuav, peb txais Cim Txhab Zog, peb txais Yes Xus lub Cev; peb muaj Leej Ntuj Plig Ntshiab nyob hauv peb, peb yuav paub tias yam Tswv Ntuj tos ntawm peb yog kev tshaj Tswv Ntuj txoj kev nyiam mus kom thoob qab ntuj.
Hnub no, peb pom tias tus Hauv Paus Xa Lus Paj Lug mus tshaj lub Moo Zoo rau cov As Thes Nas, nws siv tej lo lus kom haum cov As Thes Nas lub tswv yim los qhia txog Tswv Ntuj txoj kev nyiam qab ntuj neeg. Ntawm peb kuj ib yam, peb yuav nrhiav cov lus los cov zaj kom phim cov neeg tuaj mloog peb.

Huab Tais Yes Xus hais qhov tseeb tias Leej Ntuj Plig yuav coj cov thwj tim mus rau qhov tseeb tas huv si. Li ntawd, tus thwj tim twg txais Leej Ntuj Plig, nws yuav ua neej mus raws qhov tseeb. Qhov tseeb ntawd yog Huab Tais Yes Xus.
Yog peb muaj Leej Ntuj Plig nyob nrog peb, mas peb yuav to taub Huab Tais Yes Xus cov lus qhia, peb yuav muaj lub siab nyiam thiab hlub sawv daws, peb zam tau rau tus ua phem rau peb, peb ntsia pom Huab Tais Yes Xus kev nyiam peb, ces peb lub neej hloov dua tshiab.
Thaum peb txais Cim Ntxuav tas, peb txais Cim Txhab Zog. Thaum ntawd, Leej Choj yuav thov Tswv Ntuj tso Leej Ntuj Plig los roos peb. Tsis yog tias Leej Ntuj Plig yuav los ib zaug, ces cia li tas li ntawd. Peb tsum thov Leej Ntuj Plig tuaj nyob hauv peb tsis tseg, thiab peb tsum kub siab nrhiav kev paub Tswv Ntuj tsis tseg thiab; yam li peb nquag teev Ntuj, thov Ntuj, nyeem Ntawv Ntshiab, twm Ntawv Ntshiab, xav tswv yim txog Tswv Ntuj Lo Lus, ua raws li Tswv Ntuj Lo Lus tshoj peb siab kom peb nyiam cov nyob ze peb, zam txhaum rau tus ua phem rau peb, tsob hwb cov neeg txom nyem, pub yam peb muaj rau tus tsis muaj.
Peb ua li no thiaj yog peb cia Leej Ntuj Plig ua hauj lwm hloov peb lub neej. Leej Ntuj Plig tuaj ntawm Leej Txiv thiab Leej Tub tuaj. Leej Ntuj Plig koom nrog Leej Txiv thiab Leej Tub ua tib tug Tswv Ntuj.
Huab Tais Yes Xus thiab cov Hauv Paus Xa Lus qhia peb tias Tswv Ntuj yog tus zoo tshaj, yog kev nyiam. Tswv Ntuj tawm tuaj nrhiav peb ntiaj teb neeg kom tau nrog peb nyob, Tswv Ntuj tso lub hwj chim Tswv Ntuj nqes los ua leej tib neeg xws li peb, thiab Tswv Ntuj tseem yeem tuag kom tau ris peb cov txim txhaum. Li ntawd, thaum peb txais Leej Ntuj Plig uas yog ib tug Huab Tais nyob peb leeg Huab Tais koom tib tug Tswv Ntuj lawm, peb kuj yuav yuam peb kom taug txoj kev ua zoo, kev nyiam, kev nrauj tus kheej tawm mus fim luag lwm tus thiab.
Qhov tseeb yog qhov tiag tsis muaj qhov cuav xyaw. Huab Tais Yes Xus hais tias nws yog qhov tseeb, yog li mas nyob hauv Huab Tais Yes Xus thiaj yog qhov tiag tsis tsuas kev cuav, ces peb ntseeg tau tias txhua yam Huab Tais Yes Xus qhia rau peb ntawd puav leej yog qhov tseeb. Tab sis muaj ntau zaus peb ua xyem xyav, peb xav tias puas yuav muaj li ntawd tiag. Hnub no Huab Tais Yes Xus qhia peb kom thov Leej Ntuj Plig tus qhia qhov tseem ceeb tuaj tshoj peb lub siab lub tswv yim kom tsis txhob ua xyem xyav ntxiv.

(HL 18: 2-8; Z 16: 16-20)
Yes Xus hais tias “Tshuav me ntsis ntxiv lawm xwb, ces nej yuav tsis pom kuv. Tab sis ib me ntsis ntxiv, nej yuav rov pom kuv.” Muaj ob peb tug thwj tim sib tham tias “Nws hais dab tsi li ntawd rau peb tias tshuav me ntsis ntxiv lawm xwb, ces nej yuav tsis pom kuv, tab sis ib me ntsis ntxiv, nej yuav rov pom kuv; thiab lo lus tias kuv mus cuag Leej Txiv.” Cov thwj tim hais tias “Lo lus tias ‘me ntsis’, uas nws hais ntawd yog dab tsi? Peb tsis paub nws xav hais dab tsi.” Yes Xus paub tias lawv xav nug nws, ces nws hais rau lawv tias “Nej rov sib nug txog lo lus kuv hais tias tshuav me ntsis lawm xwb, nej yuav tsis pom kuv, tab sis ib me ntsis ntxiv, nej yuav rov pom kuv. Kuv hais qhov muaj tseeb tiag rau nej tias nej yuav quaj thiab nej yuav seev, hos lub qab ntuj neeg yuav zoo siab. Nej yuav tu siab, tab sis nej txoj kev tu siab yuav hloov ua kev zoo siab.”

LUS NTUAS
Paj Lug nyob As Thes Nas tsis ntev vim cov neeg nyob As Thes Nas nyiam cov txuj Hes Las, lawv tsis xav mloog Paj Lug piav txog Yes Xus yog Tswv Ntuj Leej Tub nqes los ua neeg, raug kev tuag thiab sawv rov los. Paj Lug thiaj li txiav siab ncaim ntawm As Thes Nas mus rau Kos Lis Nthos hauv lub xeev As Kas Yas uas nyob nrug deb ntawm As Thes Nas rau sab hnub poob li 145 km.
Kos Lis Nthos yog ib lub nroog ua luam heev thiab loj, vim cov nkoj tuaj theem ntau nyob ntawd. Cov neeg uas nyob Kos Lis Nthos tuaj ntawm ntau lub teb chaws tuaj, lawv ua tas puas tsav yam hauj lwm, lawv coj ntau txoj kev teev dab qhuas.
Nyob ntawd muaj ib lub roob siab, ces cov Kos Lis Nthos txhim ib lub tsev teev tus dab As Fos Dias (Aphrodite). Cov Hes Las ntseeg tias As Fos Dias yog tus dab tuav txoj kev sib nyiam thiab sib deev (the goddess of love and sex), yog li mas nyob hauv lub tsev teev tus dab As Fos Dias thiaj muaj ib cov niam ntiav coob coob. Thaum tsaus ntuj cov niam ntiav yuav nqes saum lub roob los nrog cov txiv neej hauv lub nroog ua dev ua npua ywj siab, ces lub nroog Kos Lis Nthos thiaj nto moo tsis tsim txiaj pes tsawg.
Xyoo 49 nyob Los Mas muaj cov Yus Das ntseeg txog Yes Xus tuaj nyob coob, ces tus vaj Kaus Dias thiaj li ceeb toom kom cov Yus Das ntseeg txog Yes Xus tawm hauv Los Mas mus, As Kis Las thiab Phis Xis Las, nkawd yog ob niam txiv ntseeg txog Yes Xus, ces nkawd tsiv los nyob Kos Lis Nthos.
Paj Lug paub tias As Kis Las thiab Phis Xis Las ntseeg txog Yes Xus, ces nws mus nyob hauv nkawd tsev. Nws nrog nkawd ua hauj lwm ntos ntaub ua tsev tsam phooj. Niaj hnub Xas Npas Tos, Paj Lug qhia Tswv Ntuj Lo Lus nyob hauv cov Yus Das lub tsev txoos. Tsis ntev, Xis Las thiab Tis Mos Tes nkawd tuaj ntawm Mas Xes Dos Nias teb tuaj nrog Paj Lug nyob, nkawd nqa ib co nyiaj uas cov ntseeg nyob Fis Lis Pos hauv Mas Xes Dos Nias teb sau los pab Paj Lug hauv nws txoj kev tshaj lub Moo Zoo.
Cov Yus Das hnov Paj Lug tshaj tias Huab Tais Yes Xus yog Leej Pleev, mas lawv tsis xav mloog, ces Paj Lug thiaj li nchos nws cov ris tsho thiab hais rau cov Yus Das tias yog tus yuav raug txim, mas yog cov Yus Das tsis yog nws, vim nws coj txoj kev cawm tuaj txog lawv lawm, tab sis lawv tsis yuav. Paj Lug hais ntxiv tias txij no mus nws yuav tig mus tshaj lub Moo Zoo rau cov pej kum neeg lawm, ces Paj Lug lawv thiaj mus nyob hauv tus Hes Las hu ua Yus Tus tsev. Nyob ntawd thiaj muaj tej tus tuaj kawm Tswv Ntuj Lo Lus ntawm Paj Lug.
Paj Lug rau siab qhia cov ntseeg txog Yes Xus, lawv sawv daws ua ib lub Koom Txoos kub siab, lawv txais cov txiaj ntsim pab tuav hauj lwm nyob hauv lub Koom Txoos, lawv kuj ua lub Txoos Cav Txiaj Ntsim xws li Huab Tais Yes Xus qhia (1KLN 11: 17-34).
Nyob Kos Lis Nthos, Paj Lug sau nws ob tsab ntawv mus qhuab qhia cov ntseeg nyob Tes Xas Los Nis.

Thaum Huab Tais Yes Xus qhia tias nws yuav raug kev txom nyem loj, mas tas sawv daws ntxhov siab. Yog peb yog ib tug koom rooj mov hauv hmo ntawd, mas ntshai peb kuj yuav ntxhov siab thiab xav tsis thoob ib yam li cov thwj tim. Sawv daws tseem nyob hab nuv li ntawd, tsis kav Huab Tais Yes Xus tseem hais dua ib co lus tsis to taub ntxiv tias tshuav me ntsis ntxiv xwb, lawv yuav tsis pom nws lawm, tab sis ib me ntsis ntxiv lawv yuav rov pom nws dua.
Cov thwj tim thiaj sib nug tias cov lus no yog Huab Tais Yes Xus xav qhia dab tsi.
Tom qab no peb mam to taub tias cov lus no yog Huab Tais Yes Xus hais txog nws txoj kev tuag thiab sawv rov los. Tshuav tsis puas tsawg teev, mas yuav muaj neeg tuaj ntes Huab Tais Yes Xus, ces cov thwj tim yuav tso tes khiav, lawv yuav tsis pom Huab Tais Yes Xus mus txog hnub nws tuag. Tab sis Huab Tais Yes Xus tuag 3 hnub xwb, nws sawv rov los. Thaum ntawd, Huab Tais Yes Xus tawm tuaj xyuas cov thwj tim, lawv mam rov pom Huab Tais Yes Xus dua.
Huab Tais Yes Xus zoo li lub hnub uas coj qhov pom kev tuaj rau lub ntuj tab sis tsis ntev mas lub hnub yuav poob, ces lub ntuj yuav tsaus. Thaum Huab Tais Yes Xus nrog lawv nyob, mas lawv lub tswv yim kaj, lawv muaj kev zoo siab. Thaum Huab Tais Yes Xus raug txom nyem thiab tuag, mas lawv lub tswv yim tsaus nti, lawv yuav quaj yuav seev. Tab sis lub hnub poob tsis tau txhais tias lub hnub yuav tsis sawv ntxiv, Huab Tais Yes Xus tuag, nws kuj yuav rov sawv thiab. Thaum ntawd, cov thwj tim lub suab quaj yuav hloov ua suab luag, lub suab seev yuav hloov ua lub suab hu nkauj, lawv kev tu siab hloov ua kev zoo siab.
Lub neej paub Huab Tais Yes Xus mas zoo li ntawd, yog lub neej muaj kev zoo siab.
Muaj ntau yam tshwm sim nyob hauv peb lub neej yam xav tsis txog tsis to taub, ua rau peb quaj peb seev tab sis peb tso siab rau Huab Tais Tswv Ntuj, ces peb lub siab kaj tuaj, peb zoo siab txawm tias nyob hauv kev tu siab.
Hnub no, thov hais rau peb ib tsoom Hmoob tab tom ntsib kev txom nyem; yam li kev mob nkees, kev tu siab, kev quaj ntsuag tias thov kom nej tsa muag ntsia Huab Tais Yes Xus tus Ntoo Cuam, nej yuav pom Huab Tais Yes Xus tsa tes puag nej, Huab Tais Yes Xus yuav daws nej kev txom nyem thiab tsa nej sawv los nrog Huab Tais Yes Xus zoo siab mus li.

(HL 18: 9-18; Z 16: 20-23)
Yes Xus hais rau cov thwj tim ntxiv tias “Kuv hais qhov muaj tseeb tiag rau nej tias nej yuav quaj thiab nej yuav seev, hos lub qab ntuj neeg yuav zoo siab. Nej yuav tu siab, tab sis nej txoj kev tu siab yuav hloov ua kev zoo siab. Thaum ib tug poj niam daws cev, mas nws ntxhov siab, vim txog caij lawm. Tab sis thaum nws yug nws tus me nyuam lawm, nws tsis nco ntxhov siab, rau qhov tias ib tug neeg yug los nyob hauv lub qab ntuj no lawm. Nej kuj zoo li ntawd, nyem no nej ntxhov siab, tab sis kuv yuav rov pom nej dua, ces nej lub siab yuav kaj. Yuav tsis muaj leej twg rhuav tau nej txoj kev kaj siab. Hnub ntawd, nej yuav tsis nug kuv txog dab tsi ntxiv lawm.”

LUS NTUAS
Nyob hauv phau ntawv Hauj Lwm hais txog cov Yus Das kom Paj Lug rau tus nom kav lub xeev As Kas Yas. Tos cov Yus Das ntxub Paj Lug, vim Paj Lug tshaj tias Huab Tais Yes Xus yog Tswv Ntuj Leej Tub, yog Leej Pleev tuaj cawm ntiaj teb neeg. Paj Lug hais rau lawv tias nyem no cov Yus Das tseem yuav Mais Xes thiab cov Yaj Saub cov lus qhuab qhia, tab sis nyem no ntau yam kab ke His Xas Lais dua tas lawm, vim Huab Tais Yes Xus tuaj qhia Tswv Ntuj Lo Lus kom thoob, thiab Huab Tais Yes Xus tuag, nws sawv rov qab los, mas nws yog tus tseem Huab Tais tiag. Cov Yus Das tsis kam mloog cov lus ntawd.
Cov Yus Das nyob Kos Lis Nthos ntxub Paj Lug, ces Huab Tais Yes Xus tawm los rau Paj Lug pom hauv npau suav. Huab Tais Yes Xus hais rau Paj Lug tias “Koj tsis txhob ntshai, vim kuv nrog koj nraim, tsis muaj leej twg yuav ua phem rau koj tau” (HL 18: 9-10). Ces Paj Lug thiaj nyob thiab tshaj lub Moo Zoo ntxiv nus.
Paj Lug muab cov Ntawv Ntshiab los piav rau cov Yus Das tias Huab Tais Yes Xus yog Leej Pleev uas haiv His Xas Lais ib txwm tos txog.
Cov Yus Das cav tsis yeej, ces lawv ntxub Paj Lug, lawv xav ntiab nws khiav ntawm lub nroog mus, ces lawv mus kom Paj Lug rau tus nom.
Tus nom hu ua Nkas Loos, nws tsis kam txiav txim raws li cov Yus Das thov, nws hais tias “Yog nej hais txog kev ua tub sab, los kev ua phem, mas kuv yuav nrog nej tu plaub tu ntug. Tab sis yog nej tsib cav txog tej lo lus, tej lub npe, thiab txog ib txog cai uas yog nej li, mas cia nej ua nej” (HL 18: 14-15). Tos Nkas Loos hais li ntawd, vim txoj cai Los Mas kheev cia cov Yus Das teev Ntuj raws li lawv txoj kev cai teev hawm.
Cov Yus Das pom tias law ua dab tsi tsis tau rau Paj Lug, ces qhov kawg lawv ntes Xos Tes Nes uas yog ib tug saib cov Yus Das lub tsev txoos thiab muab nws tua nyob ze ntawm lub tsev txiav txim.
Paj Lug nyob Kos Lis Nthos 18 lub hli, nws pom tias yog nyob ntev ntxiv mus, mas ntshai yuav muaj lus, ces Paj Lug txiav siab txav mus ib ntus. Paj Lug nrog As Kis Las thiab Phis Xis Las caij nkoj mus, nws xav rov mus rau Yes Lus Xas Les thiab As Nthias Kias.
Thaum Paj Lug ncaim ntawm Kos Lis Nthos, mas lawv lub Koom Txoos muaj ib co txwj laus uas Paj Lug tau tiag tes rau saum lawv, kom lawv tau muaj cai ua lub Txoos Cav Txiaj Ntsim.

Ua ntej no Huab Tais Yes Xus twj xub qhia cov thwj tim 3 lwm tias nyob pem Yes Lus Xas Les, cov txwj laus yuav muab nws tua. Tab sis cov thwj tim zoo li tsis to taub, lawv kuj tsis nug nws thiab. Hmo no Huab Tais Yes Xus rov hais dua, los lawv kuj tseem tsis to taub, lawv tsuas sib nug tias xyov yog Huab Tais Yes Xus hais txog dab tsi.
Huab Tais Yes Xus thiaj li phua lub ntsiab rau lawv tias ib me ntsis yuav muaj ib cov xwm tshwm sim, cov xwm ntawd yuav ua rau cov thwj tim ntxhov siab, lawv yuav quaj yuav seev, vim lawv tsis muaj nws nrog lawv nyov ntxiv. Thaum lawv ntxhov siab li ntawd, mas yuav muaj ib txhia zoo siab luag ntxhi, cov ntawd yog cov ntxub nws, lawv xav pom nws tuag.
Txawm li ntawd, los cov thwj tim txoj kev ntxhov siab yuav nyob tsis ntev, vim lawv yuav rov tau pom nws dua ib zaug ntxiv. Txoj kev sawv rov los ua kom Huab Tais Yes Xus thiab cov thwj tim rov sib ntsib, ces lawv yuav muaj kev luag kev hu nkauj lom zem, ces peb thiaj muab piv rau peb lub neej uas muaj kev tu siab tab sis kom peb tso siab rau Huab Tais Yes Xus, ces peb yuav muaj kev zoo siab.
Hnub no, Huab Tais Yes Xus nthuav ntxiv tias nws txoj kev tuag, zoo li tus poj niam daws cev. Thaum tus poj niam mob plab yuav yug me nyuam, thaum kws tshuaj coj tus poj niam mus yug me nyuam lawm, tus txiv ntxhov siab tas nrho, tsis paub tias xyov poj niam yug puas tau, xyov me nyuam yug nyuaj los tsis nyuaj. Ntawm tus poj niam, nws ntsaj tas zog vim mob nws plab dhau lawm. Tab sis thaum yug hlo tus me nyuam tawm los, tus niam qhov mob hloov hlo ua kev zoo siab; tus txiv qhov ntxhov siab hloov hlo ua kev kaj siab. Nkawd ob leeg lub siab loj tuaj. Nkawd xav pom nkawd tus me nyuam.
Huab Tais Yes Xus kev tuag thiab sawv rov los zoo li ntawd.
Peb paub tias thaum Huab Tais Yes Xus raug ntes thiab raug ntsia nyob saum Ntoo Cuam, mas cov thwj tim ntxhov siab tas nrho, lawv lub ntuj tsaus nti. Txog hnub chiv lub lis piam, cov poj niam dhia los qhia lawv tias Huab Tais Yes Xus sawv rov los, mas lawv tsis ntseeg, tab sis thaum lawv rov pom Huab Tais Yes Xus nyob nruab nrab hauv lawv, lawv mam ntseeg, lawv zoo siab.
Nyob hauv peb lub neej yeej zoo li ntawd, peb txhua tus neeg yeej hla tsis dhau kev ploj kev tuag, tsis hais ntawm tus nyob ze yus los ntawm yus ntiag tug.
Thaum peb ib tug neeg txheej ze txoj sia tu, peb tu siab, peb quaj nyiav vim peb hlub tshua txog nws, peb tsis xav kom nws ncaim peb mus.
Peb ua neej nyob, mas peb ntshai txoj kev tuag, ntshai ncaim ntawm sawv daws, ntshai lub neej tom qab ntawd tias yuav mus tshwm rau qhov twg. Peb khuv xim ntau yam uas peb tsis tau ua, tsis tau muaj. Peb hlub cov txheeb ze, peb txhawj txog lawv.
Txoj kev tuag zoo li ntawd tiag, tab sis Huab Tais Yes Xus qhia rau peb kom ntsia txoj kev tuag dua tshiab. Huab Tais Yes Xus twb yeej txoj kev tuag lawm, yog peb taug raws li tus lw Huab Tais Yes Xus npaj rau peb, mas peb yuav muaj kev zoo siab txais kev ploj tuag nyob hauv peb thiab cov txheeb ze. Peb muaj kev tso siab tias peb thiab lawv yuav tau sib ntsib pem Ntuj Ceeb Tsheej.

(HL 18: 23-28; Z 16: 23b-28)
Yes Xus hais rau cov thwj tim tias “Kuv hais qhov muaj tseeb tiag rau nej. Nej tuav txog kuv lub npe thov dab tsi ntawm Leej Txiv, mas nws yuav pub rau nej. Los txog tav no, nej tsis tau tuav txog kuv lub npe thov ib yam dab tsi. Nej thov ces nej yuav tau txais, nej txoj kev kaj siab thiaj yuav puv phwj yaws. Kuv tau siv tej zaj paj lug los hais tej no rau nej. Txog lub caij uas kuv yuav tsis siv tej zaj paj lug los hais rau nej ntxiv. Kuv yuav ncaj qha qhia meej txog Leej Txiv rau nej. Txog hnub ntawd, nej yuav tuav txog kuv lub npe los thov. Kuv tsis hais rau nej tias kuv yuav thov Leej Txiv rau nej. Leej Txiv twb nyiam nej lawm, vim nej nyiam kuv, thiab nej ntseeg tias kuv tuaj ntawm Tswv Ntuj tuaj. Kuv tawm ntawm Leej Txiv tuaj nyob hauv lub qab ntuj no. Kuv tso lub qab ntuj neeg tseg, kuv rov mus cuag Leej Txiv.”

LUS NTUAS

XYOO A (MT 28: 16-20)
Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv. Lawv pom Yes Xus, lawv pe; ib txhia tseem ua xyem xyav. Yes Xus txav los ze lawv, nws hais cov lus no rau lawv “Ntuj pub ib puas tsav yam hwj huam rau kuv nyob saum ntuj thiab nyob ntiaj teb no. Nej mus, nej ua kom tas ib tsoom haiv neeg los ua kuv thwj tim. Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv. Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog lub zim txwv ntiaj teb kawg.”

(HL 19: 1-8; Z 16: 29-33)
Yes Xus cov thwj tim hais tias “Zaum no koj ncaj qha hais, koj tsis siv tej zaj paj lug lawm. Zaum no peb paub tias koj paub tas ib puas tsav yam, tsis tas leej twg yuav nug koj. Yog vim li ntawd peb thiaj ntseeg tias koj tuaj ntawm Tswv Ntuj tuaj.” Yes Xus teb rau lawv tias “Nyem no nej ntseeg lawm lod? Yuav txog sij hawm, -twb txog lub caij- uas nej sawv daws yuav sib ncaim tas, ib leeg yuav mus ib qho, nej yuav tso kuv pov tseg. Tab sis kuv tsis nyob kuv ib leeg, vim Leej Txiv nrog kuv. Kuv hais tej ntawd rau nej kom nej nyob thaj yeeb hauv kuv. Nej yuav raug luag hiam hauv lub qab ntuj no, tab sis nej ua siab loj mog! Kuv twb yeej lub qab ntuj neeg lawm!”

LUS NTUAS
Paj Lug pom tias lub nroog Es Fes Xos yog lub nroog loj tshaj cov nyob As Xias Me, ces Paj Lug txiav siab tias nws yuav rov tuaj tshaj Ntuj Lus nyob Es Fes Xos. Yog li thaum Paj Lug rov los txog As Nthias Kias, nws nyob ib xyoos, ces nws rov sawv kev mus tshaj lub Moo Zoo. Paj Lug sawv kev mus xyuas Nkas Las Tias thiab Fis Zias teb. Xyoo 54 Paj Lug hla lub teb chaws toj siab mus rau Es Fes Xos. Cov neeg nyob Es Fes Xos lawv kawm kev ntseeg ntawm As Pos Los (HL 18: 24-28). As Pos Los yog Zam Ntxuav Plig ib tug thwj tim, nws paub Zam Ntxuav Plig cov lus zoo, nws ua lub Cim Ntxuav raws li Zam Ntxuav Plig txoj kev ua rau cov neeg ntseeg nws cov lus qhia. Thaud, As Pos Los tau tso Yus Das teb tseg ntxov, nws mus nyob hauv lub tsheej As Les Xas Nrias nyob Hais Nkws Tos teb, ces As Pos Los tsis paub txog Huab Tais Yes Xus txoj kev tuag thiab sawv rov los, tsis paub txog Huab Tais Yes Xus lub Cim Ntxuav, tsis paub tias muaj Leej Ntuj Plig Ntshiab. Tsis kav As Pos Los kuj saib tias Huab Tais Yes Xus yog Leej Pleev cawm ntiaj teb neeg raws li cov Ntawv Ntshiab His Xas Lais xub hais tseg. As Pos Los qhia cov Yus Das kom lawv ntseeg tias Huab Tais Yes Xus yog Leej Pleev. Cov txais kev ntseeg ntawm As Pos Los lawv tsuas paub xws li As Pos Los xwb, ces thaum Paj Lug tuaj txog Es Fes Xos, nws nug lawv tias lawv puas tau txais Leej Ntuj Plig Ntshiab. Cov ntseeg nyob Es Fes Xos teb tias lawv tsis paub tias muaj Leej Ntuj Plig Ntshiab, ces Paj Lug thiaj qhia Yes Xus lub Moo Zoo rau lawv ntxiv kom lawv paub tiav.
Paj Lug kub siab qhia lawv tias Huab Tais Yes Xus lub Cim Ntxuav yog ntxuav neeg cov txhaum tiag, tsis zoo li Zam Ntxuav Plig cov kab ke uas tsuas ntxuav kom sawv daws thov txhaum xwb. Tus txais lub Cim Ntxuav nyob hauv Huab Tais Yes Xus lub npe, nws yuav khaub zig Huab Tais Yes Xus tej koob hmoov. Huab Tais Yes Xus faib Tswv Ntuj lub txiaj ntsim rau nws, Tswv Ntuj yuav saib nws yog Tswv Ntuj tub ki.
Paj Lug ua lub Cim Ntxuav rau lawv tas, nws tsa tes thov Leej Ntuj Plig Ntshiab rau lawv, ces Leej Ntuj Plig Ntshiab thiaj nqes los thiab ua kom lawv txawj hais tej xeem lus tshiab.
Huab Tais Yes Xus nrog cov thwj tim tham, nws hais ntau yam ua paj lug, ces cov thwj tim tsis to taub. Tab sis tom qab Huab Tais Yes Xus sawv rov los, thiab Leej Ntuj Plig Ntshiab nqes los nyob saum cov thwj tim lawm, mas lawv mam to taub cov paj lug Huab Tais Yes Xus hais txog ntawd. Thaum ntawd, lawv pib to taub, ces lawv ntseeg tias Huab Tais Yes Xus yog tus paub txhua yam. Huab Tais Yes Xus paub tias neeg xav dab tsi thiab Huab Tais Yes Xus paub tias nyob hauv lawv nruab siab zoo li cas. Lawv pom tias Tswv Ntuj lub hwj huam roos Huab Tais Yes Xus. Li ntawd, lawv thiaj li ntseeg tias Huab Tais Yes Xus tuaj ntawm Tswv Ntuj tuaj. Tab sis thaum Leej Ntuj Plig nqes los, lawv lub siab ntseeg yuav hlob loj ntxiv.
Huab Tais Yes Xus ntuas lawv tias nws yuav tsum tuag. Huab Tais Yes Xus hais rau lawv tias lawv yuav tu siab. Huab Tais Yes Xus tseem hais ntxiv tias tab sis tom qab ntawd tsis ntev, lawv yuav rov tau ntsib Huab Tais Yes Xus, ces lawv yuav muaj kev zoo siab. Huab Tais Yes Xus paub tias tshuav tsis ntev yuav muaj neeg tuaj ntes nws, cov thwj tim yuav tawg tas vim lawv ntshai. Cov thwj tim yuav tso Huab Tais Yes Xus tseg, lawv yuav khiav nkaum, zoo li Huab Tais Yes Xus tib leeg xwb raug txom nyem, tab sis qhov tseeb Huab Tais Yes Xus tsis nyob ib leeg, vim Huab Tais Yes Xus muaj Leej Txiv nrog nws.
Hmo ntawd, Huab Tais Yes Xus hais txog ntau yam rau cov thwj tim mloog. Huab Tais Yes Xus ntuas lawv tab sis qhov ntau Huab Tais Yes Xus txhawb zog rau lawv lub siab. Huab Tais Yes Xus cog lus ntau yam rau lawv. Lawv yuav raug txom nyem, lawv yuav nyob ib leeg tab sis yuav tsis ntev, Huab Tais Yes Xus yuav rov los nrog lawv nyob, ces Huab Tais Yes Xus mam li mus cuag Leej Txiv. Huab Tais Yes Xus mus cuag Leej Txiv mas Leej Ntuj Plig thiaj yuav los nrog cov thwj tim nyob. Leej Ntuj Plig yuav nrog nraim lawv tsis hais lawv mus nyob qhov twg.
Huab Tais Yes Xus cov lus no yog nws cog nrog cov neeg ntseeg txog nws txhua tus. Peb nyob ntiaj teb no, peb raug ntau yam kev txom nyem, kom peb nco tias Huab Tais Yes Xus xub raug dua peb, thiab nws twb yeej tas los lawm. Txoj kev tuag los Huab Tais Yes Xus twb yeej tau. Li ntawd, peb tsis txhob ntshai dab tsi ntxiv. Tab txawm muaj dab tsi tuaj nphav tuaj raug peb, los peb muaj peev xwm nyob tau kaj siab lug.

Peb hnov cov thwj tim hais rau Huab Tais Yes Xus tias nyem no lawv ntseeg lawm tias Huab Tais Yes Xus tuaj ntawm Tswv Ntuj tuaj. Tos lawv ntseeg, vim nyob hauv hmo ntawd, Huab Tais Yes Xus qhia ncaj ncaj rau lawv tias nws yog leej twg thiab nws tuaj ua txoj hauj lwm dab tsi. Hmo Huab Tais Yes Xus hais cov lus no yog hmo lawv noj pluas Hmo Hla, ces Huab Tais Yes Xus ntxuav cov thwj tim taw. Huab Tais Yes Xus qhia lawv tias yuav muaj ib tug muab nws muag, qhov kawg nws yuav tuag tab sis peb hnub nws yuav sawv rov los. Huab Tais Yes Xus qhia ib zaj tshiab rau lawv; yog kom lawv sis nyiam sis hlub. Tus twg pom Huab Tais Yes Xus, mas tus ntawd pom Leej Txiv. Tus twg xav paub tias Tswv Ntuj zoo li cas, mas nws ntsia Huab Tais Yes Xus cov hauj lwm, ces nws yuav paub tias Tswv Ntuj zoo li cas.
Huab Tais Yes Xus mus lawm, nws kuj yuav xa Leej Ntuj Plig tuaj nyob hauv cov thwj tim, Leej Ntuj Plig yuav qhib lawv lub tswv yim kom nco tau txhua yam. Huab Tais Yes Xus kuj hais ntxiv tias ntiaj teb neeg nyiam ua phem, lawv ntxub qhov zoo, ces lawv ntxub Huab Tais Yes Xus; yog li cov ntseeg txog Huab Tais Yes Xus kuj yuav raug lub qab ntuj ntxub, tab sis lawv ua siab loj. Lawv yuav tu siab tab sis tom dab lawv yuav zoo siab.
Huab Tais Yes Xus hais tej lus li piav no, ces cov thwj tim pom tias Huab Tais Yes Xus cov lus tsis yog ntiaj teb neeg li lus, lawv thiaj ntseeg tias Huab Tais Yes Xus tuaj ntawm Tswv Ntuj tuaj tiag.
Cov thwj tim ntseeg, tab sis lawv yog neeg xwb, mas lawv yeej tsis muaj zog nyiaj ris kev txom nyem, lawv yeej yuav tiv tsis tau dab phem kev ntxias. Li ntawd, Huab Tais Yes Xus thiaj hais rau lawv tias tos nws qhia tej ntawd rau lawv kuj yog nws xav kom lawv paub, ces thaum lawv poob rau kev ntxias, lawv nco tau tej no, mas lawv yuav nyob thaj yeeb, lawv yuav rov tig los yuav siab tshiab tau. Lawv kuj yuav muaj ib lub zog loj, yog lawv vam txog Huab Tais Yes Xus vim Huab Tais Yes Xus yog tus yeej lub qab ntuj neeg.
Peb cov ntseeg nyob rau lub zim txwv no, mas peb paub Huab Tais Yes Xus zoo dua cov thwj tim, vim peb muaj cov Ntawv Moo Zoo qhia peb txog Huab Tais Yes Xus. Li ntawd, peb thiaj ntseeg txog Huab Tais Yes Xus zoo dua lub caij thaum cov thwj tim nrog Huab Tais Yes Xus nyob. Lawv txoj kev ntseeg ruaj nreb tuaj yog thaum lawv pom Huab Tais Yes Xus sawv rov los lawm, hos peb, mas peb tsis pom tab sis peb ntseeg. Huab Tais Yes Xus hais tias tus tsis pom tab sis nws ntseeg, mas nws tau txoj hmoov zoo.
Peb tau txoj hmoov zoo tiag. Tab sis peb kuj tseem zoo li cov thwj tim uas yog neeg tsis muaj zog, nyiam nyiam raug dab phem kev ntxias. Ntau zaus peb kuj tso tes khiav, tsis nco txog Huab Tais Yes Xus.
Txawm li ntawd, los Huab Tais Yes Xus xav kom peb nco tias thaud nws qhia cov thwj tim meej tias nws yog Tswv Ntuj, tsis kav lawv kuj tau ntog hauv kev ntxias vim lub siab ntshai, vim lub zog ntaug. Tab sis lawv nco txog Huab Tais Yes Xus cov lus, ces lawv tig los yuav siab tshiab, lawv siab kaj tuaj, lawv tau nyob thaj yeeb. Ntawm peb, mas zoo tib yam, peb paub Huab Tais Yes Xus, peb ntseeg txog Huab Tais Yes Xus, peb ntog hauv txoj kev txhaum, thaum peb nco txog Huab Tais Yes Xus mas peb tig los nrhiav, los khaub zig Huab Tais Yes Xus dua, vam txog Huab Tais Yes Xus pab, ces Huab Tais Yes Xus yuav pub kev thaj yeeb rau peb.

(Z 17: 1-11a)
Yes Xus hais li ntawd tas, nws tsa muag ntsia saum ntuj, nws hais tias “Txiv, txog sij hawm lawm ! Koj ua kom koj Leej Tub muaj koob meej mas! Ces koj Leej Tub yuav ua kom koj muaj koob meej. Vim koj muab hwj huam rau nws kav tas txhua leej txhua tus, kom nws pub txoj sia nyob mus li rau txhua leej uas koj muab rau nws. Txoj sia nyob mus li yog zoo li no; kom lawv paub koj, uas yog tus tseem Tswv Ntuj, thiab paub Yes Xus Pleev uas yog tus koj xa tuaj. Kuv ua kom koj muaj koob meej nyob ntiaj teb no, vim tias cov hauj lwm uas koj muab rau kuv ua, mas kuv ua tiav lawm. Txiv, nyem no koj ua kom kuv muaj koob meej nyob ntawm koj xub ntiag, yog lub koob meej uas kuv muaj txawm rau ntawm koj xub ntiag thaum lub sim ceeb tsis tau xeeb los nyob. Cov neeg koj rho hauv lub qab ntuj los pub rau kuv, mas kuv ua kom lawv pom xyeem koj lub Npe. Cov neeg no yog koj tug, koj muab lawv pub rau kuv, ces lawv coj rawv koj lo lus. Nyem no lawv paub tias tas txhua yam uas koj muab rau kuv yog tuaj ntawm koj tuaj. Vim tias cov lus uas koj muab rau kuv, mas kuv muab pub rau lawv lawm. Lawv txais koj cov lus, ces lawv paub tseeb tias kuv tuaj ntawm koj tuaj, thiab lawv ntseeg tias yog koj xa kuv tuaj. Kuv thov koj rau lawv. Kuv tsis thov koj rau lub qab ntuj neeg, kuv thov koj rau cov uas koj muab pub rau kuv, vim lawv yog koj tug. Txhua yam uas yog kuv tug, kuj yog koj tug; txhua yam uas yog koj tug, kuj yog kuv tug thiab. Kuv muaj koob meej nyob hauv lawv. Kuv tsis nyob hauv lub qab ntuj no ntxiv lawm, tab sis lawv tseem nyob hauv lub qab ntuj no. Hos kuv, mas kuv los cuag koj. 

LUS NTUAS
Nyob hauv Zam Ntawv Moo Zoo, zaj 17 yog cov lus Huab Tais Yes Xus thov Ntuj rau cov thwj tim thiab rau cov neeg ntseeg yuav tuaj tom qab. Lub ntsiab hauv cov zaj thov Ntuj yog cav txog Leej Txiv lub koob meej thiab thov Leej Txiv pub kom cov thwj tim tau txais txoj sia nyob mus li.
Huab Tais Yes Xus hais tias “Txoj sia nyob mus li yog zoo li no; kom lawv paub koj uas yog tus tseem Tswv Ntuj, thiab paub Yes Xus Pleev uas yog tus koj xa tuaj.”
Tus paub Tswv Ntuj thiab paub Huab Tais Yes Xus, mas nws yuav ntseeg txog Tswv Ntuj, ces nws ua raws li cov lus Huab Tais Yes Xus qhia. Tus ntawd yog tus tau txoj sia nyob mus li.
Huab Tais Yes Xus hais tias “Txog sij hawm lawm”, yog lub caij nws yuav tuag. Thaum Huab Tais Yes Xus tuag, mws Leej Txiv thiaj yuav muaj koob meej. Huab Tais Yes Xus tuag saum Ntoo Cuam mas ntiaj teb neeg saib yog Huab Tais Yes Xus poob hwj chim, lawv xav tias yog Tswv Ntuj txoj hauj lwm cawm neeg swb txoj kev txhaum, tab sis nyob ntawm Tswv Ntuj mas tsis zoo li ntiaj teb neeg xav. Huab Tais Yes Xus tuag saum Ntoo Cuam yog Huab Tais Yes Xus kev ua vaj, yog Tswv Ntuj txoj hauj lwm cawm neeg yeej kev txhaum, yog cov lus Tswv Ntuj tau hais tseg txij lub hauv paus los tsheej xeeb lawm.
Nyob hauv peb ib txhia Hmoob mas lawv hais tias ua cas cov neeg ntseeg thiaj ntseeg txog tus Yes Xus raug lub txim tuag nyob saum Ntoo Cuam zoo li ib tug neeg muaj txim. Cov Hmoob ntseeg txog Yes Xus mas ruam tiag tiag.
Peb cov kwv tij hais li ntawd, mas vim lawv tsis paub zoo txog Huab Tais Yes Xus tias, nws taug li ntawd vim nws nyiam peb tas npaud, nws yeem ris peb lub txim, nws yeem mloog Leej Txiv lus kom txhob poob hauv kev txhaum.
Thaud ob niam txiv hauv paus tsis mloog lus, mas ntiaj teb thiaj muaj txhaum; tsis kav Tswv Ntuj hlub neeg ntiaj teb, mas Tswv Ntuj cog lus yuav xa tus tuaj npo sawv daws hauv qhov txhaum kom rov tau mus cuag Tswv Ntuj, tus ntawd yog nws Leej Tub Yes Xus. Tus paub Huab Huab Tais Yes Xus, nws paub Huab Tais Tswv Ntuj, nws pom Huab Tais Tswv Ntuj lub siab hlub thiab nyiam neeg, nws thiaj ntseeg thiab ua raws li cov lus Huab Tais Yes Xus qhia kom sis nyiam sis hlub.
Li ntawd, cov Hmoob ntsia pom li no, lawv thiaj zoo siab hlo ntseeg txog tus Yes Xus raug dai tuag saum Ntoo Cuam, lawv zoo siab yoog raws li Huab Tais Yes Xus tus lw.
Huab Tais Yes Xus thov Leej Txiv rau ntiaj teb neeg, kom ntseeg txog nws, lawv thiaj yuav tau txais txoj sia nyob mus li, lawv thiaj yuav rov tau mus cuag Tswv Ntuj nyob hauv hnub ntiaj teb kawg.
Huab Tais Yes Xus nyiam peb tas npaum no, nws tsis thov Ntuj rau nws kom hla dhau kev txom nyem, nws thov Ntuj rau sawv daws. Li ntawd, puas tsim nyog peb tig los ntseeg txog nws. Nyob zoo sawv daws.

(HL 20: 28-38; Z 17: 11-19)
Yes Xus teev Ntuj tias “Leej Txiv Ntshiab, koj zov lawv nyob hauv koj lub Npe uas koj muab rau kuv, kom xwv lawv ua ib leeg xws li wb ua ib leeg. Thaum kuv nrog lawv nyob, kuv zov lawv nyob hauv koj lub Npe uas koj muab rau kuv. Kuv txuag lawv, ces tsis muaj ib tug ploj li, tsuas muaj kev ploj tus tub, kom tshwm sim raws li Ntawv sau cia. Zaum no kuv los cuag koj, kuv hais tej no rau hauv lub qab ntuj neeg, kom xwv lawv tau kuv txoj kev kaj siab phwj yaws los nyob hauv lawv. Kuv muab koj lo lus pub rau lawv, lub qab ntuj neeg thiaj li ntxub lawv, vim lawv tsis yog qab ntuj neeg tug, ib yam li kuv tsis yog qab ntuj neeg tug. Kuv tsis thov kom koj rho lawv hauv lub qab ntuj neeg mus, kuv thov kom koj txuag lawv ntawm tus Phem. Lawv tsis yog lub qab ntuj neeg tug ib yam li kuv tsis yog lub qab ntuj neeg tug. Thov koj qee lawv mus nyob hauv txoj kev tseeb : koj lo lus yog qhov tseeb. Kuv xa lawv mus nyob hauv lub qab ntuj neeg, ib yam li koj xa kuv los nyob hauv lub qab ntuj neeg. Kuv rov qee kuv, kom lawv ntshiab tuaj nyob hauv qhov tseeb.”

LUS NTUAS
Nyob hauv zaj Ntawv Moo Zoo hnub no, peb rov hnov Huab Tais Yes Xus cov lus thov Ntuj rau cov thwj tim, thov Huab Tais Leej Txiv txuag lawv ntawm tus phem ntxias neeg mus poob rau kev phem, ntxias lawv kom koom ua ib tug tsis tau. Nyob hauv zaj thov Ntuj no Huab Tais Yes Xus kuj qhia peb tias Huab Tais Tswv Ntuj yog tus zov sawv daws, Huab Tais Tswv Ntuj yuav tsis rho lawv tawm hauv lub qab ntuj tab sis Huab Tais Tswv Ntuj yuav pab lawv kom yeej lub qab ntuj.
Muaj ib yam rub tau sawv daws kom los koom ib lub siab ib lub tswv yim; yam ntawd yog kev sis nyiam sis hlub. Qhov twg muaj kev sis nyiam sis hlub mas Tswv Ntuj tuaj nyob qhov ntawd. Yog peb cov neeg ntseeg peb sib tawg, peb sib cais, peb tsis sib nyiam mas peb yuav hais tsis tau tias peb muaj Tswv Ntuj nrog peb nyob. Yog vim li no, niaj hnub no lub Koom Txoos Kav Tos Liv thiaj hloov lub tswv yim txawv ntau puas xyoo tas los.
Nyob hauv tiam 11 lub Koom Txoos tawg ua Koom Txoos sab hnub tuaj thiab Koom Txoos sab hnub poob vim lawv hais tsis sib haum. Sab hnub tuaj yog lub Koom Txoos Os Thos Dos, sab hnub poob yog lub Koom Txoos Kav Tos Liv. Txog tiam 16 muaj ib cov neeg ntseeg ncaim ntawm lub Koom Txoos Kav Tos Liv mus, cov ntawd yog Plos Tes Taas. Thaum zoo li ntawd, nyias lub Koom Txoos hais lus saib tsis tau lwm lub Koom Txoos, lawv muaj lus sib cav muaj lus tsis sib raug zoo.
Tab sis tom qab no sawv daws pom tias yog lawv yim tawg mas lawv yim ua tsis haum Huab Tais Yes Xus cov lus qhia, lawv yim ua kom Huab Tais Yes Xus lub cev muaj qhov txhab xwb, ces cov Koom Txoos thiaj pib tig rov los tsim kev haum xeeb nyob hauv kev sib nyiam. Txawm tias niaj hnub no tas cov Koom Txoos tig los sib npuab siab tseem tsis tau tau, los nyob hauv txhua txhua xyoo lawv nrhiav tej lub caij nyoog teev Ntuj ua ke kom muaj kev sib haum xeeb.
Nyob hauv peb tsoom pej xeem ntseeg, tsis hais nyob rau lub Koom Txoos twg, xav kom peb muab kev nyiam saib ua qhov hlob, peb tig los sib pab li yuav pab tau, tshwj xeeb mas yog kev pab cov neeg txom nyem. Paub tias yog hais txog tej kab ke kev cai mas kawg yuav muaj lus hais tsis haum, ces thaum nyob ua ke peb tso tseg qhov yuav ua rau muaj lus ntawd.
Hnub no, Huab Tais Yes Xus thov Leej Txiv tias “Leej Txiv Ntshiab, koj zov lawv nyob hauv koj lub npe uas koj muab rau kuv, kom xwv lawv ua ib leeg xws li wb ua ib leeg.”
Nyob hauv peb kev ua neej mas muaj ntau zaus, peb xav kom peb txhob raug xwv txheej, ces thaum peb ntsib teeb meem meb yws Tswv Ntuj tias ua cas Tswv Ntuj tsis pab peb. Hnub no Huab Tais Yes Xus hais tias “Txiv, kuv tsis thov kom koj rho lawv hauv lub qab ntuj neeg mus, kuv thov koj koj txuag lawv ntawm tus phem”, yam li Huab Tais Yes Xus saib kev ntxias neeg poob rau kev txham loj dua tej yam xwm phem tej yem tsis zoo tuaj nphav tuaj raug peb. Peb ua neej nyob mas peb yeej yuav ntsib tus neeg phem tus neeg zoo, ntsib ntau tsav ntau yam. Tej ntawd yog pab peb kom ua tau ib tug neeg ntshiab, pab peb koj coj tau Tswv Ntuj kev nyiam mus pub rau lawv, tej ntawd xyaum peb kom ua tau tus neeg ncaj.
Peb saib Huab Tais Yes Xus lub neej, nws tsis thov kom tau nyob dawb tsis raug kev txom nyem, tsis thov kom txhob raug cov neeg phem hiam. Qhov Huab Tais Yes Xus thov yog kom nws muaj ib lub zog loj ua tau cov hauj lwm Leej Txiv pom zoo rau nws ua, Huab Tais Yes Xus thov kom Leej Txiv pab nws yeej lub siab ntxias kom txhob ua xis Leej Txiv siab.
Ntawm peb mas kuj ib yam, peb yuav thov xws li Huab Tais Yes Xus thov rau cov thwj tim. Thaum peb ntsib kev txom nyem, peb tsis thov Huab Tais Tswv Ntuj rho peb ntawm tej kev txom nyem ntawd, peb yuav thov Huab Tais Tswv Ntuj pab peb kom txhob poob rau tus dab phem tuaj ntxias peb.

(HL 22: 30, 23: 6-11; Z 17: 20-26)
Yes Xus teev Ntuj tias “Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus, kom lawv sawv daws koom ua ib leeg. Ib yam li koj, Leej Txiv, koj nyob hauv kuv, kuv nyob hauv koj, kom lawv nyob hauv wb. Lub qab ntuj neeg thiaj ntseeg tias yog koj xa kuv tuaj. Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xws li wb ua ib leeg. Kuv nyob hauv lawv, koj nyob hauv kuv, lawv thiaj li ua tsheej ib leeg tiag, lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv. Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, txij thaum tsis tau tsim lub sim ceeb. Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. Kuv twb ua kom lawv paub koj lub npe lawm. Kuv tseem yuav ua kom lawv paub ntxiv, kom txoj kev nyiam uas koj muab los nyiam kuv, nyob hauv lawv, thiab kom kuv nyob hauv lawv.”

LUS NTUAS
Nyob hauv nej cov mloog lub Moo Zoo hauv hnub no mas muaj coob tus yog niam yog txiv, nej muaj me nyuam tab sis nej cov me nyuam mus kawm ntawv los yog ua hauj lwm deb nej lawm, thaum nej hnov ib yam xwm dab tsi mas nej yuav nco txog nej cov me nyuam, nej muaj kev zoo siab los tu siab mas nej xav qhia rau nej cov me nyuam; nyob hauv nej cov mloog lub Moo Zoo hauv hnub no kuj muaj ib txhia yog me nyuam tso niam tso txiv tuaj ua hauj lwm deb, los yog niam txiv tso nej tseg lawm, nej kuj yuav nco ntsoov txog lawv. Ib yam peb pom zoo tshaj hauv peb cov Hmoob lub neej, yog qhov tias peb nco txog cov tau tso ntiaj teb tseg; peb muaj noj mas peb nco txog lawv, peb thov Ntuj rau lawv. Qhov peb ua li no mas yog vim peb nyiam thiab hlub lawv.
Peb ua neej nyob, peb puas zoo siab thaum paub tias muaj ib tug tseem nco txog peb, nug txog peb moo mus li, tshwj xeeb tseem thov Ntuj rau peb tsis tseg thiab.
Hnub no peb hnov cov lus Huab Tais Yes Xus thov Ntuj rau cov ntseeg txog nws, tsis yog cov thwj tim nrog nws ua neej nyob lub caij thaud xwb, tseem yog rau cov ntseeg tuaj puag tom qab xws li peb thiab.
Huab Tais Yes Xus hais rau Tswv Ntuj tias “Txiv. Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus.”
Hais tau tias tab yog peb tseem tsis tau yug los, mas Huab Tais Yes Xus twb nyiam peb, nco txog peb lawm. Li ntawd, peb yuav tsum zoo siab uas peb tus Huab Tais Yes Xus hlub peb tas npaum no.
Huab Tais Yes Xus thov dab tsi rau peb? Huab Tais Yes Xus thov Tswv Ntuj rau peb kom peb koom ua ib leeg ib yam li Huab Tais Yes Xus thiab Leej Txiv koom ua ib tug.
Niam txiv kev zoo siab yog pom cov me nyuam sib nyiam sib hlub, lawv muaj kev haum xeeb koom siab koom ntsws. Huab Tais Yes Xus kuj xav pom peb cov ntseeg txog nws muaj kev haum xeeb li ntawd.
Peb yuav koom ua ib leeg tsis tau yog tias peb tsis txawj sib nyiam. Peb yuav sib haum xeeb tsis tau yog peb tsis muaj kev mloog lus.
Ob niam txiv sib sau los ua ib cuab vim nkawd sib nyiam. Lub txiv txi hauv nkawd txoj kev sib nyiam yog nkawd cov me nyuam. Tus txiv thiab tus niam nkawd nyob haum xeeb tau vim nkawd ib tug mloog ib tug hais.
Huab Tais Yes Xus nyiam thiab hlub peb, nws xub thov Ntuj ob txhiab xyoo ua ntej rau peb kom nyob hauv peb tsoom neeg ntseeg, peb koom siab tau ua ib leeg; yog kom peb txawj sis nyiam sis hlub, txawj sib mloog hais.
Niaj hnub no, peb mus teev Ntuj hauv tsev teev Ntuj, peb sim tig ntsia ib ncig saib tshuav tus twg peb tseem tsis tau nrog nws haum xeeb, peb thiab nws tseem niaj hnub muaj lus tsis sib haum, tseem sib dub muag. Xav kom peb hloov siab tshiab los nyiam nws, hais lus zoo rau nws, mloog nws hais, rov nrog nws tsim kev koom siab.
Nyuaj kawg uas ib tug neeg yuav koom siab tau nrog tus uas nws tsis nyiam, nyuaj kawg nkaus uas ib tug neeg yuav koom siab tau nrog tus tsis mloog hais. Tab sis peb muaj Huab Tais Yes Xus ua tus pab peb, nws thov Ntuj rau peb, nws ntxiv zog rau peb kom peb hle tau lub siab ntxub pov tseg los hnav lub siab nyiam. Peb vam txog Huab Tais Yes Xus pab.
Xav kom peb sib nyiam mas peb thiaj yuav koom ua tau ib leeg. Yog peb tsis sib nyiam, Huab Tais Yes Xus tuaj nyob hauv peb tsis tau, peb los peb kuj yuav nrog Huab Tais Yes Xus nyob tsis tau thiab.
Yog peb nyiam Huab Tais Yes Xus, peb yuav nyiam cov nyob puag ncig peb, peb nrog lawv ua ib leeg, ces Huab Tais Yes Xus yuav nyob hauv peb, thiab peb yuav nrog Huab Tais Yes Xus nyob.

(HL 25: 13-21; Z 21: 15-19)
Thaum lawv noj tshais tas, Yes Xus hais rau Xis Moos Pob Zeb tias “Xis Moos, Zam tus tub, koj puas nyiam kuv dua lawv cov ntawd?” Pob Zeb hais rau Yes Xus tias “Huab Tais, koj paub tias kuv nyiam koj tiag.” Yes Xus hais rau Pob Zeb tias “Koj coj kuv cov me nyuam yaj mus noj zaub mog.” Yes Xus rov hais zaum ob tias “Xis Moos, Zam tus tub, koj puas nyiam kuv?” Pob Zeb hais rau Yes Xus tias “Huab Tais, koj paub tias kuv nyiam koj tiag.” Yes Xus hais rau nws tias “Koj zov kuv cov yaj mog.” Yes Xus tseem rov hais dua zaum peb rau Pob Zeb tias “Xis Moos, Zam tus tub, koj puas nyiam kuv tiag?” Pob Zeb tu siab rau qhov Yes Xus hais rau nws zaum peb tias ‘Koj puas nyiam kuv tiag?’ Pob Zeb hais rau Yes Xus tias “Huab Tais, koj paub tas ib puas tsav yam, koj paub tias kuv nyiam koj tiag.” Yes Xus hais rau Pob Zeb tias “Koj coj kuv cov yaj mus noj zaub mog! Kuv hais qhov muaj tseeb tiag rau koj. Thaum koj tseem hluas zog, koj muab koj txoj siv, koj sia koj, koj xav mus qhov twg los koj mus koj. Tiam sis thaum koj laus, koj yuav tsa tes cia ib tug muab siv rau koj sia, cia luag coj koj mus hauv qhov chaw uas koj tsis xav mus.” Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. Yes Xus hais li tas, nws hais rau Pob Zeb tias “Koj raws kuv mus.”

LUS NTUAS
Oug neeg thaum nkawd hais tsis haum, nkawd sib cav, nkawd sib ntxub; mas nkawd puas yuav rog sib raug zoo tau. Raws li peb xav mas ntshai yuav pua tau lawm. Tab sis nyob ntawm Tswv Ntuj, mas nkawd rov sib raug zoo, rov sib nyiam sib hlub li qhov qub tau. Peb pom nyob hauv lub Moo Zoo hnub no.
Hmo lawv ntes Huab Tais Yes Xus, Xis Moos Pob Zeb ntshai ces nws hais rau cov nug nws tias nws tsis paub Huab Tais Yes Xus. Pob Zeb tsis lees Huab Tais Yes Xus 3 zaug. Nyob hauv cov Yus Das yog koj hais lo lus twg txog 3 zaug mas txhais tias koj yeej hais tuag nthi tias koj yuav li lo lus koj tau hais ntawd tiag, yog li mas Xis Moos Pob Zeb hais 3 lwm tias nws tsis paub Huab Tais Yes Xus, mas yog nws yeej twv ntuj twv teb hais rau cov nug nws tias ciaj los tuag nws yeej tsis paub Huab Tais Yes Xus.
Thaum koj raug teeb mee, koj tus phooj ywg yeej tsis lees paub koj npaum li Xis Moos Pob Zeb, mas puas yuav txaus chim thiab txaus tu siab! Ntshai koj yuav hais tias txij no mus kuv thiab nws wb kev phoojo ywg ces tsuas xaus li no xwb.
Xis Moos Pob Zeb hnov qaib lub suab qua, ces nws nco dheev tias Huab Tais Yes Xus twb xub tau hais tej ntawd rau nws lawm; Xis Moos Pob Zeb ras tau tias nws ua txhaum loj kawg, ces nws tu siab.
Hnub no, Xis Moos Pob Zeb rov pom Huab Tais Yes Xus dua, nws rov tau nrog Huab Tais Yes Xus nyob ib cag xws li hauv hmo lawv noj pluas Hla. Nyob hauv hmo ntawd, Xis Moos Pob Zeb hais rau Huab Tais Yes Xus tias “Huab Tais, kuv tuaj yeem siv kuv txoj sia rau koj.” Hnub no Huab Tais Yes Xus hais rau Pob Zeb tias “Koj puas nyiam kuv tiag.”
Huab Tais Yes Xus cov lus tsis yog vim nws chim, npau taws, los tu siab rau Xis Moos Pob Zeb. Tab sis Huab Tais Yes Xus xav paub tias Xis Moos Pob Zeb puas tseem ruaj siab rau nws lo lus tau hais nyob hauv hmo lawv noj pluas Hla, Xis Moos Pob Zeb lub siab nyiam puas yuav ruaj nreb xws li lub npe Huab Tais Yes Xus xub tau tis rau nws tias ‘Pob Zeb’.
Huab Tais Yes Xus nug 3 lwm kom Xis Moos Pob Zeb teb 3 lwm, yog kom Xis Moos Pob Zeb lees tuag nthi tias nws tseem nyiam thiab yeem muab tas nws txoj sia pub rau Huab Tais Yes Xus tiag.
Lub caij Hla xyoo no tab tom yuav dhau, xav kom Huab Tais Yes Xus lo lus nug Xis Moos Pob Zeb hnub no yog tab tom nug peb, saib peb puas nyiam Huab Tais Yes Xus tiag. Yog peb teb tias peb nyiam tiag, mas xav kom ob hnub no peb muab ua tib zoo xav saib tshuav tus neeg twg peb tseem chim rau, npau taws rau, muaj lus tsis sib haum rau; mas peb zam rau nws, ua siab dav rau, nrog nws tsim kev sib nyiam. Thiaj tsim nyog lo lus peb hais rau Huab Tais Yes Xus tias “Huab Tais, kuv nyiam koj tiag.”

(HL 28: 16-20, 30-31; Z 21: 20-25)
Pob Zeb tig ntsia tom qab, nws pom tus thwj tim uas Yes Xus nyiam lawv nkawd qab. Yog tus uas thaum lawv noj hmo, nws tig mus pheeb rau ntawm Yes Xus hauv siab, thiab nug tias ‘Huab Tais, tus muab koj rau luag yog leej twg’. Pob Zeb pom tus thwj tim ntawd, Pob Zeb hais rau Yes Xus tias “Huab Tais, tus ntawd ned?” Yes Xus hais rau Pob Zeb tias “Yog kuv xav kom nws nyob mus txog hnub kuv rov los kuj xij, tsis yog koj hauj lwm. Hos koj, mas koj raws kuv mus.” Lo lus no ncha mus hauv cov kwv tij tias tus thwj tim ntawd yuav tsis tuag. Tab sis Yes Xus tsis tau hais rau Pob Zeb tias ‘Nws yuav tsis tuag’. Yes Xus tsuas tau hais tias ‘Yog kuv xav kom nws nyob txog hnub kuv rov los, kuj xij, tsis yog koj hauj lwm.’ Yog tus thwj tim ntawd ua tim khawv txog tej xwm no thiab yog nws muab sau cia. Peb paub tias nws cov lus ua pov thawj muaj tseeb. Tseem tshuav ntau yam kawg uas Yes Xus tau ua. Yog yuav sau ib yam zuj zus tas huv tib si, mas kuv xav tias lub ntiaj teb yuav ntim tsis tas cov ntawv uas sau txog nws tej hauj lwm.

LUS NTUAS
Peb ua lub caij Hla los xaus rau hnub no, tag kis mus peb yuav pib dua lwm lub caij; yog caij Nyob Nruab Xyoo. Nyob hauv lub caij Hla ntev li 50 hnub, peb tau mloog cov zaj Ntawv Moo Zoo hais txog Huab Tais Yes Xus kev nyiam, thiab txhib peb kom nyiam Huab Tais Yes Xus xws li Huab Tais Yes Xus tau nyiam tau hlub peb. Nag hmo lub Koom Txoos thiaj cev cov zaj Huab Tais Yes Xus nug peb tias “Koj puas nyiam kuv tiag.” Peb teb tias “Huab Tais, kuv nyiam koj tiag”, ces Huab Tais Yes Xus yuav pub ib txog hauj lwm rau peb thiab hais ntxiv rau peb tias “Koj raws kuv mus” xws li tau muab txoj kab xwm ua tus tswv zov yaj rau Pob Zeb thiab hais rau Pob Zeb.
Huab Tais Yes Xus qhia rau Pob Zeb tias nws lub neej lawm tom ntej mas yuav zoo li cas, ces Pob Zeb paub nws txoj hauj lwm thiab paub nws lub neej lawm, tshuav tus thwj tim uas Huab Tais Yes Xus nyiam mas tsis paub yuav zoo li cas, ces Pob Zeb txhawj txog nws, Pob Zeb thiaj nug saib yog li ne tus thwj tim ntawd yuav zoo li cas. Huab Tais Yes Xus hais li no rau Pob Zeb “Qhov ntawd tsis yog koj hauj lwm, ntawm koj mas koj raws kuv mus.”
Yog Huab Tais Yes Xus xav kom Pob Zeb txhob muab siab khuam rau dab tsi ntxiv, kav tsij rau siab ntso raws Huab Tais Yes Xus xwb vim Pob Zeb twb hais tias nws nyiam Huab Tais Yes Xus tiag.
Huab Tais Yes Xus kuj hais li ntawd rau peb thiab, nws hais tias “Koj hais tias koj nyiam kuv tiag, mas hnub no mus koj kav tsij rau siab raws kuv, txhob ntxhov siab, txhob siab fab txog dab tsi ntxiv.” Ib yam li ob tug hluas sib sib nyiam, nkawd yeej yuav zoo siab sib qaws ua txij nkawm, nkawd yeej zoo siab tsim nkawd txoj kev tshiab txawm tias ib siab mas nkawd tseem muaj txhawj, los ntxhov siab txog niam txiv. Qhov no tsis yog kom nkawd tso niam txiv pov tseg.
Huab Tais Yes Xus kuj kom Pob Zeb zoo siab hlo lis nws cov hauj lwm raws Huab Tais Yes Xus mus, tab sis tsis tau kom Pob Zeb txhob tso tus thwj tim Huab Tais Yes Xus nyiam pov tseg. Tab sis yog tso yam khuam Pob Zeb siab pov tseg.
Peb lub neej nyob hauv txoj kev ntseeg zoo li ntawd, peb txiav siab raws Huab Tais Yes Xus, peb tso peb kev ntxhov siab txog lwm tus rau Huab Tais Yes Xus ua tus nres, peb zoo siab lis cov hauj lwm Huab Tais Yes Xus txhib kom peb ua, ces peb rau siab thiab muab siab rau ua, tsis txhob xav ntau ntau, txhob muab yus piv rau luag tej tias ua cas kuv ua ntau, nws ua tsawg, ua cas kuv ua hnyav nws ua sib. Huab Tais Yes Xus yeej muab rau sawv daws raws li nyias rab peev xwm thiab nyias lub tswv yim.

XYOO TAB: COV LUS HAUV PHAU NTAWV HES NPLAWS (HN 1: 1-6)

Puag thaum ub, Tswv Ntuj kom cov Yaj Saub siv ntau txoj kev los cev nws cov lus rau peb cov yawg koob ntau zaus kawg. Lub zim txwv no, txog lub zwj ceeb kawg lawm, Tswv Ntuj thiaj tso nws Leej Tub tuaj cev nws cov lus rau peb. Tswv Ntuj tsa Leej Tub ua tus txais lub cuab tam tas huv tib si, thiab nws nrog Leej Tub tsim lub sim ceeb. Leej Tub yog Tswv Ntuj lub hwj chim ci ntsa iab, yog Tswv Ntuj tus duab. Leej Tub lo lus muaj zog, Leej Tub nres tas lub sim ceeb huv tib si. Nws ntxuav txhua txoj kev txhaum pov tseg tas huv tib si, ces nws zaum ntawm tus Tswv Ntuj muaj hwj huam sab xis nyob txheej ntuj saud. Nws loj dua ib tsoom Tshiab, vim nws tau txais ib lub npe zoo, muaj hwj chim loj dua cov Tshiab tej npe huv tib si. Nej xav saib puas muaj ib tug Tshiab uas Tswv Ntuj tau hais rau nws tias “Koj yog kuv Leej Tub, hnub no kuv xeeb koj.” Thiab Tswv Ntuj tseem hais rau nws tias “Kuv yog nws Txiv, nws yog kuv Leej Tub.” Thaum Tswv Ntuj xa nws Leej Tub tuaj ua tus Xub Yug los nyob hauv lub sim ceeb no, mas nws tseem rov qab hais dua tias “Kuv xav kom tas Tswv Ntuj tsoom Tshiab hawm nws.”

XYOO TXOOJ: PHAU NTAWV XAS MUAS PHAU IB (1XM 1: 1-8)

Thaud, muaj ib tug txiv neej nyob Las Mas. Nws tuaj ntawm lub roob Es Fais tuaj. Nws hu ua Es Kas Nas. Nws yuav ob tug poj niam. Ib tug hu ua As Nas, ib tug hu ua Pes Nis Nas. Pes Nis Nas muaj me nyuam, tab sis As Nas tsis muaj. Niaj xyoo tus txiv neej ntawd mus teev Ntuj thiab txi Ntuj pem Xis Laus. Nyob ped, yog Es Lis ob tug tub hu ua Hos Nis thiab Pis Nas nkawd ua Leej Choj. Muaj ib hnub Es Kas Nas mus txi Ntuj. Thaum nws txi Ntuj nws faib kam tej thooj nqaij rau Pes Nis Nas, rau Pes Nis Nas cov tub thiab cov ntxhais. Nws tsuas tseg ib thooj rau As Nas xwb. Nws nyiam As Nas dua, tab sis HUAB TAIS ho tsis pub As Nas xeeb tub. Pes Nis Nas ua tej yam kom tu As Nas siab, ua kom As Nas npau taws, vim As Nas tsis muaj me nyuam. Niaj xyoo thaum lawv mus pem lub tsev txi Ntuj mas Pes Nis Nas ua zoo li ntawd kom tu As Nas siab. Ces As Nas quaj quaj, nws tsis noj mov. Ces nws tus txiv Es Kas Nas hais rau nws tias “As Nas, vim li cas koj quaj quaj koj tsis noj mov? Vim li cas koj tu siab? Koj tau kuv, tsis zoo dua koj tau kaum leej tub lod?”

LUB MOO ZOO RAWS LI MAS KOS (MK 1: 14-20)

Thaum luag ntes Zam lawm, ces Yes Xus mus Nkas Lis Lais teb. Nws tshaj lub Moo Zoo qhia txog Tswv Ntuj, nws hais tias “Txog lub caij teem lawm, Tswv Ntuj lub Ceeb Tsheej los txog ze lawm; nej hloov siab, nej ntseeg txog lub Moo Zoo mog.” Yes Xus taug ntug dej ntuj Nkas Lis Lais, nws pom Xis Moos, thiab Xis Moos tus kwv As Nres. Nkawd tab tom pov vas rau hauv dej ntuj, vim nkawd yog tub puav ntses. Yes Xus hais rau nkawd tias “Neb raws kuv mus, kuv yuav muab neb hloov ua tub puav neeg.” Nkawd tso plhuav cov vas puav ntses tseg tam sis ntawd, nkawd raws Yes Xus mus. Yes Xus mus ntxiv me ntsis tom ntej, nws pom Yas Kos, uas yog Ntxes Npes Dais tus tub, thiab Yas Kos tus kwv Zam. Nkawd kuj nyob hauv nkoj thiab, nkawd tseem tab tom ntxiv cov vas ntses. Yes Xus hu nkawd. Tam sim ntawd, nkawd tso plhuav nkawd txiv Ntxes Npes Dais thiab cov tub zog rau hauv nkoj, nkawd raws Yes Xus mus.

Los lus ntuas.

XYOO TAB: COV LUS HAUV PHAU NTAWV HES NPLAWS (HN 2: 5-12)

Lub sim ceeb fab lwm tiam uas peb hais txog, mas Tswv Ntuj tsis muab zwm rau ib co Tshiab. Muaj ib tug tau sau lo lus zeem tseeb no “Neeg yog dab tsi koj thiaj nco txog? Leej tib neeg tej tub ki yog dab tsi, koj thiaj muab nws saib siab? Koj tau tso nws qis dua cov Tshiab ib ntus. Tab sis koj muab hwj chim thiab koob meej los rau nws ntoos. Koj tso puas tsav puas yam rau hauv nws qab xib taws.” Txij thaum Tswv Ntuj tso txhua yam zwm rau Leej Tub, mas Tswv Ntuj tsis pub ib yam dab tsi uas yuav nyob taus tsis zwm rau Leej Tub. Lub zim txwv no, peb tseem tsis tau pom meej tias txhua yam zwm rau Leej Tub. Yes Xus tau txo nws qis dua cov Tshiab ib me ntu, ces peb pom nws tau lub hwj chim thiab lub koob meej roos nws, vim nws tau txais txoj kev tuag. Nws yuav tsum saj txoj kev tuag, nws thiaj pab tau txhua tus neeg. Tswv Ntuj lub txiaj ntsim mus li ntawd. Vim tias, tus tsim tas puas tsav yam los kom puas tsav yam ntawd tsob hwb nws, mas nws xav coj neeg tej tub ki coob coob mus txais koob meej thiab txais kev cawm. Phim nws yuav cia tus Ntaus Thawj raug txom nyem kom nws ntshiab tuaj. Vim tus ua tau kom luag ntshiab, thiab cov txais kev ntshiab, lawv puav leej tawm ntawm ib lub hauv paus los. Vim li ntawd, tus ua tau kom luag ntshiab, thiaj tsis txaj muag hu cov txais kev ntshiab ua nws cov kwv. Thiab nws hais tias “Kuv yuav tshaj koj lub npe rau kuv cov kwv. Kuv yuav hu nkauj cav txog koj nyob hauv lub txoos.”

XYOO TXOOJ: PHAU NTAWV XAS MUAS PHAU IB (1XM 1: 9-20)

Thaum lawv noj mov hauv kem tsev pw tas, As Nas sawv, nws mus nyob ntawm HUAB TAIS xub ntiag. Tus Leej Choj Es Lis zaum nyob hauv nws lub rooj zaum uas ib ntawm lub qhov rooj tsev txi Ntuj. As Nas tu siab tas nrho, nws thov HUAB TAIS thiab nws quaj heev kawg. As Nas thiaj fiv ib lub yeem zoo li no “HUAB TAIS Xas Npas Os! Yog koj xav ntsia koj tus ntxhais txib txoj kev txom nyem, yog koj nco txog nws, yog koj muab ib tug tub rau kuv, mas kuv yuav muab nws rau HUAB TAIS tas nws sid. Rab chais yuav tsis chwv nws taub hau.” As Nas teev Ntuj ntev loo. Es Lis ntsia ntsoov As Nas qhov ncauj. As Nas hais lus ntxhi xwb. Pom nws di ncauj ua zog, tab sis tsis hnov nws lub suab. Ces Es Lis xav tias As Nas vwm cawv. Es Lis mus hais rau As Nas tias “Koj yuav vwm cawv txog thaum twg? Koj ua kom koj zoo cawv sai mas!” Tab sis As Nas teb tias “Txiv tswv, kuv kawg yog ib tug poj niam ua neej lwj siab ntsuav xwb. Kuv tsis tau haus cawv txiv ntoo los cawv txhuv li. Kuv hais kuv txoj kev lwj siab rau HUAB TAIS xwb. Thov koj tsis txhob xav tias koj tus ntxhais txib yog neeg tsis tsim txiaj dab tsi. Yog vim tu kuv siab dhau thiab mob kuv siab dhau mas kuv thiaj hais lus txog tav no.” Ces Es Lis teb tias “Koj mus, koj ua siab kaj lug. His Xas Lais tus Tswv Ntuj yuav pub rau koj raws li koj thov.” Tus poj niam hais tias “Thov kom koj tus ntxhais txib tau ua neeg xis koj siab.” Ces As Nas mus lawm. Nws mus hauv kem tsev pw, nws noj mov tas nws lub ntsej muag tsis zoo li lub qub lawm. Lawv sawv ntxov ntxov, lawv pe Tswv Ntuj tas ces lawv rov qab mus tsev nyob Las Mas lawm. Es Kas Nas nrog nws poj niam As Nas koom cev. HUAB TAIS nco txog As Nas. Ces As Nas xeeb tub, nws yug tau ib tug tub, nws muab tis npe hu ua Xas Muas. As Nas hais tias “Kuv hu li ntawd, vim kuv thov ntawm HUAB TAIS los.”

LUB MOO ZOO RAWS LI MAS KOS (MK 1: 21-28)

Yes Xus lawv mus hauv Kas Fas Naus. Hnub xas npas tos, Yes Xus mus hauv lub tsev txoos, nws qhia sawv daws tam sim ntawd. Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab. Nyob hauv lawv lub tsev txoos, tam sim ntawd, muaj ib tug neeg raug ib tug dab tsis huv nthe nthe tias “Yes Xus Nas Xas Les, koj xav ua dab tsis rau wb? Puas yog koj tuaj rhuav wb? Kuv paub koj yog leej twg; koj yog Tswv Ntuj tus Ntshiab.” Yes Xus cem nws tias “Ua twj ywm, koj cia li tawm hauv tus neeg no mus.” Dab tsis huv siv zog muab tus neeg ntawd co heev heev, nws nthe ib suab nrov nrov ces nws tawm hauv tus neeg mus. Tas sawv daws ntshai, lawv sib nug zom zaws tias qhov ntawd yog dab tsi, Puas yog ib txog kev qhuab qhia tshiab muaj peev xwm? Tab yog dab tsis huv, los nws tswj lawv, ces lawv mloog nws lus. Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais.

Lo lus ntuas.

XYOO TAB: COV LUS HAUV PHAU NTAWV HES NPLAWS (HN 2: 14-18)

Vim cov me nyuam koom ib co ntshav, ib ce nqaij, mas Yes Xus kuj nrog lawv koom, kom nws txoj kev tuag yeej tus tuav txoj kev tuag lub hwj huam, tus ntawd yog tus dab phem Xas Tas. Yes Xus npo cov uas mag kev tuag muab lawv ua qhev nyob hauv txoj kev ntshai tuag tas ib sim neej. Yes Xus tsis tuaj cawm cov Tshiab. Nws tuaj cawm Has Nplas Has tsoom xeeb ntxwv. Vim li no, nws thiaj yuav tsum yug los zoo ib yam li nws cov kwv, nws thiaj ua tau ib tug Leej Choj uas ib txhij khuv leej neeg thiab npuab Tswv Ntuj. Nws so tsoom pej xeem cov txhaum pov tseg. Vim nws tau raug kev sim siab, mas nws thiaj txawj pab cov raug kev sim siab.

XYOO TXOOJ: PHAU NTAWV XAS MUAS PHAU IB (1XM 3: 1-10, 19-20)

Tus me nyuam Xas Muas tsob hwb HUAB TAIS nyob ntawm Es Lis xub ntiag. Lub zim txwv ntawd, HUAB TAIS hais lus tsawg zaus kawg. Nws tsis tawm tuaj rau neeg pom xyeem ntau zaus. Tab sis muaj ib hnub, Es Lis pw hauv nws lub paim. Thaum ntawd, nws qhov muag tsis tshua pom kev lawm. Tswv Ntuj lub teeb tseem tsis tau tuag. Xas Muas pw hauv HUAB TAIS Kem Ntshiab uas Tswv Ntuj lub Xab Cog Lus nyob. HUAB TAIS hu Xas Muas tias “Xas Muas! Xas Muas!” Tus me nyuam teb tias “Kuv nyob ntawm no!” Ces nws khiav mus hais rau Es Lis tias “Koj hu kuv, kuv thiaj los.” Es Lis hais tias “Tub, kuv tsis tau hu koj. Koj rov mus pw.” Xas Muas rov mus pw. HUAB TAIS rov hu nws dua tias “Xas Muas! Xas Muas!” Ces Xas Muas mus txog ntawm Es Lis, nws hais rau Es Lis tias “Koj hu kuv, kuv thiaj los ntawm no.” Es Lis hais tias “Tub, kuv tsis tau hu koj. Koj rov mus pw.” Xas Muas tseem tsis tau paub HUAB TAIS. Vim tsis tau muaj leej twg qhia HUAB TAIS lo lus rau nws. HUAB TAIS rov hu Xas Muas zaum peb. Xas Muas sawv mus txog ntawm Es Lis, nws hais tias “Koj hu kuv, kuv thiaj los ntawm no.” Ces Es Lis thiaj mam to taub tias yog HUAB TAIS hu tus me nyuam ntawd. Es Lis hais rau Xas Muas tias “Koj mus pw. Yog muaj tus hu koj mas koj yuav hais tias HUAB TAIS, koj hais lus mas. Koj tus tub txib mloog koj!” Ces Xas Muas rov mus pw qhov chaw qub. HUAB TAIS tuaj nyob ntawd. HUAB TAIS hu nws xws li thawj peb zaug ua ntej tias “Xas Muas! Xas Muas!” Xas Muas teb tias “Koj hais lus mas! Koj tus tub txib mloog koj!” Xas Muas hlob. HUAB TAIS nrog nws nyob. HUAB TAIS tau hais dab tsi rau Xas Muas lawm mas HUAB TAIS tsis ua yam ntawd poob li! Txij Daas mus txog Npes Xas Npes mas, tas tsoom His Xas Lais paub tias Xas Muas yog tus yuav nce ua HUAB TAIS tus Yaj Saub.

LUB MOO ZOO RAWS LI MAS KOS (MK 1: 29-39)

Yes Xus tawm hauv tsev txoos, nws nrog Yas Kos thiab Zam nkawd mus hauv Xis Moos thiab As Nres nkawd tsev. Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv. Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. Tas lub nroog sau nthwv tuaj nyob ua ke ntawm nws qhov rooj. Yes Xus kho neeg coob coob, cov uas nyias raug nyias hom mob, thiab nws tseem ntiab ntau tus dab tawm. Nws tsis pub dab hais lus li, vim cov dab paub nws. Thaum sawv ntxov, thaum tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. Xis Moos thiab nws cov npawg raws Yes Xus qab. Thaum lawv nrhiav tau Yes Xus, lawv hais rau nws tias “Sawv daws nrhiav koj.” Yes Xus hais rau lawv tias “Peb mus lwm qhov chaw, hauv cov zej zog nyob tsis deb ntawm no, kom kuv tau kev tshaj lus nyob ntawd thiab, yog vim li ntawd, kuv thiaj tawm tuaj.” Ces Yes Xus mus thoob lub xeev Nkas Lis Lais, nws tshaj lus nyob hauv cov tsev txoos, thiab nws ntiab dab phem.

Yes Xus mus noj su nyob hauv nws tus thwj tim Pob Zeb lub tsev. Pob Zeb niam tais raug ib tug mob npaws. Yes Xus tuav niam tais tes tsa nws sawv. Tus mob npaws thim hlo tam sim ntawd.
Hnub ntawd yog Hnub Xas Npas Tos, yog lis piam hnub xya, yog hnub uas sawv daws caiv, sawv daws nyob hauv tsev mus txog lub caij hnub poob qhov, ces dua lub caij caiv. Yuav tsaus ntuj cov neeg nyob Kas Fas Naus thiaj tuaj cuag Yes Xus nyob hauv Pob Zeb lub tsev. Ib me ntsis tsev puv neeg lawm, sawv daws ntsauv lub qhov rooj. Lawv coj lawv cov neeg mob los cov neeg raug dab tuaj rau Yes Xus. Yes Xus kho ntau leej thiab nws ntiab ntau tus dab phem.
Tab sis Mas Kos, tus piav zaj ntawd nyob hauv nws phau ntawv Moo Zoo, nws hais ib lo lus zoo li no: Yes Xus txwv cov dab kom txhob hais lus, vim lawv paub tias Yes Xus yog leej twg (MK 1: 34).
Yes Xus hais ntau zaus rau cov neeg nws kho zoo hlo, kom lawv txhob mus tshaj rau teb chaws tias nws kho lawv zoo hlo. Vim li cas Yes Xus thiaj txwv cov dab kom txhob hais lus, thiab txwv cov neeg kom txhob mus cav txog Yes xus ua hwj huam?
Yog vim qhov no: Thaum Yes Xus kho cov neeg mob, los thaum nws ntiab cov dab phem, los thaum nws ua lwm yam hwj huam nws tsis ua tej ntawd kom luag qhuas txog nws. Hos nws ua tej ntawd kom zeej tsoom tso siab tias nws tuaj ntawm Tswv Ntuj tuaj. Yes Xus cov zaj hwj huam yog tej lub cim pab zeej tsoom ntseeg cov lus uas nws hais txog Tswv Ntuj.
Tab sis cov neeg pom Yes Xus muaj lub hwj huam loj npaum no mas lawv yog ib co neeg tos ib tug huab tais txawj ua kom nyob hauv lawv lub teb chaws sawv daws noj qab nyob zoo, tau mov txaus noj seem noj sos mus li, tsis khwv ncaws av ua qoob ua loo. Yes Xus yeej ua tau kom muaj li ntawd, tab sis lub neej tsim txiaj uas Yes Xus nqa tuaj rau lub ntiaj teb tsis yog ib lub neej xws li sawv daws tos. Lub neej tshiab uas Yes Xus coj tuaj rau sawv daws yog lub neej tig los yuav lub siab tshiab nyiam luag tej thiab nyiam Tswv Ntuj. Yes Xus xav kom peb muab peb lub siab phem tua, nws xav kom peb lub siab xyaum coj lub neej ntshiab thiab huv. Yes Xus tuaj yeem tuag nyob saum ntoo cuam thiab nws yuav rov sawv muaj txoj sia nyob mus li : Yes Xus txoj kev ua Huab Tais yog coj ntiaj teb neeg kom xyaum ua raws li nws xub ua rau peb pom : xyaum muab lub siab phem tua, xyaum ua neeg siab ntshiab.
Yes Xus tsis tuaj ua tus Huab Tais pub lub neej zoo npaum li ua npau suav. Yes Xus tuaj qhia peb kom peb tig los xyaum ua lub neej kaj siab lug nyob hauv txoj kev sib nyiam sib hlub, nyob hauv txoj kev nyiam peb Txiv Tswv Ntuj.
Hmo ntawd Yes Xus kho cov neeg mob ntau leej, nws ntiab ntau tus dab phem. Nws kuj qhia lawv kom tig los yuav lub siab nyiam Tswv Ntuj thiab hlub neeg. Hmo ntawd Yes Xus pw lig lig.
Tag kis ntuj tsis tau kaj, Yes Xus mus nyob qhov xu kev, nws teev nws Leej Txiv Tswv Ntuj, vim Yes Xus xav ua piv txwv zoo kom peb nquag teev Tswv Ntuj zoo li nws.
Yes Xus cov thwj tim nrhiav tau nws nyob qhov chaw nws teev Ntuj. Lawv hais tias : “Sawv daws nrhiav koj.” Lawv hais li ntawd rau Yes Xus, vim tseem muaj tej tus neeg nyob Kas Fas Naus tuaj thov kom Yes Xus pab kho lawv.
Yes Xus teb lo lus no “Peb mus lwm qhov chaw hauv cov zej zog ib ncig ntawm no kom kuv tau tshaj kuv lub Moo Zoo rau lawv thiab.”
Yes Xus xub paub tias nws yuav tsis tau kev qhia zej zog ntev xyoo vim cov neeg siab nkhaus yuav muab nws tua.
Lub caij maj caij nrawm. Yes Xus maj mus qhia ntau lub zos. Nws yuav mus tas zog li ntawd peb xyoos, tsis muaj caij so twj ywm.
Yes Xus tseem hais ib lo lus ntxiv rau nws cov thwj tim tuaj tos nws. Yes Xus hais tias “Peb mus lwm qhov chaw, yog vim qhov ntawd kuv thiaj tawm tuaj.”
Yes Xus tawm qhov twg tuaj? Ntshai Pob Zeb lawv to taub tias Yes Xus tawm ntawm nws lub zos Nas Xas Les tuaj kom nws tau mus tshaj nws lub Moo Zoo hauv ntau lub zos.
Tab sis Yes Xus lo lus tias ‘yog vim qhov ntawd kuv thiaj tawm tuaj’, muaj ib lub ntsiab tob zoo li no: Yog vim kuv yuav tshaj lub Moo Zoo rau ntiaj teb paub, ces kuv thiaj tawm ntawm kuv Leej Txiv Tswv Ntuj tuaj (MK 1: 38).
Yes Xus yog Tswv Ntuj Leej Tub ib txwm nrog Leej Txiv nyob tsim lub ntuj lub teb thiab kav lub ntuj lub teb. Yog vim Tswv Ntuj xav cawm peb tsoom neeg, nws thiaj tso nws Leej Tub nqes los ua neeg, yug los nyob Npes Les Hes, hlob nyob Nas Xas Les, tawm mus tshaj Leej Txiv cov lus peb xyoos, ua Leej Txiv cov hauj lwm peb xyoos kom sawv daws paub Tswv Ntuj.
Thaum Yes Xus hais lo lus ‘yog vim qhov ntawd kuv thiaj tawm tuaj’, mas peb yuav to taub tias Yes Xus nqes los ua neeg, nws tawm ntawm Leej Txiv tuaj, yog vim nws xav kom tas ntiaj teb paub Tswv Ntuj.
Yes Xus tawm ntawm Leej Txiv tuaj vim nws xav kom peb tsoom Hmoob paub Leej Txiv Tswv Ntuj.
Yes Xus txhob txwm tawm ntawm nws Leej Txiv tuaj vim nws xav kom nej paub nws. Nej puas yuav qhib nej lub siab los txais Yes Xus cov lus?

Lo lus ntuas.

XYOO TAB: COV LUS HAUV PHAU NTAWV HES NPLAWS (HN 3: 7-14)

Vim li no, muaj raws li Leej Ntuj Plig Ntshiab qhia tias “Hnub no, yog nej hnov Huab Tais lub suab, mas nej tsis txhob ua nej lub siab txhav xws li thaum ub, thaud nej lub siab txhav nej thiaj sib ceg, thiab xws li hnub uas nej raug sim siab nyob teb chaws suab puam. Nyob ntawd, nej cov yawg koob twb pom kuv cov hauj lwm, tsis kav lawv tseem sim kuv plaub caug xyoo. Kuv thiaj npau taws rau tiam neeg ntawd, kuv hais tias ‘Lawv lub siab niaj hnub yuam kev, lawv tsis paub kuv tej kev.’ Ces kuv npau taws, kuv cog lus tias lawv yuav tsis tau mus nyob hauv kuv lub chaw so.” Kwv tij, nej yuav ceev faj, tsam nyob hauv nej muaj ib tug siab phem tsis xav ntseeg, ces nws txav mus deb ntawm tus Tswv Ntuj muaj txoj sia. Nej yuav niaj hnub sib txhawb. Nej tsis txhob muaj ib tug cia kev txhaum ntxias nws kom nws ua siab txhav. Vim peb los nrog Leej Pleev koom, mas peb yuav tso siab thiab yuav nyob ruaj nreb mus txog hnub kawg.

XYOO TXOOJ: PHAU NTAWV XAS MUAS PHAU IB (1XM 4: 1-11)

Es Lis laus heev lawm. Nws cov tub coj tus yam ntxwv phem rau HUAB TAIS li qhov qub. Thaum ntawd, cov Fis Lis Tis sib sau los ua rog ntaus cov His Xas Lais. Cov His Xas Lais thiaj sawv kev mus ua rog. Lawv tuaj tsa lawv tej tsev tsam phooj nyob ze Es Npees Has Ntxes. Cov Fis Lis Tis tsa lawv tej tsev tsam phooj nyob As Fes. Cov Fis Lis Tis nthuav ua ib leej tuaj vij cov His Xas Lais. Lawv nias tsam qees, ces cov His Xas Lais swb cov Fis Lis Tis. His Xas Lais tog kwv yees muaj plaub txhiab leej tuag nyob nruab liaj nruab teb. Tsoom tub rog His Xas Lais rov los hauv lub yeej. Tas tsoom kev txwj kev laus hais tias “Ua cas hnub no HUAB TAIS cia peb swb cov Fis Lis Tis? Peb yuav mus tom Xis Laus mus kwv Tswv Ntuj lub Xab Cog Lus tuaj nyob hauv nruab nrab peb kom nws cawm peb ntawm tsoom yeeb ncuab.” Cov tug rog xa neeg mus tom Xis Laus, lawv mus muab HUAB TAIS lub Xab uas nws lub theej kiab yog cov Tshiab Kes Lus Npis kwv tuaj. Es Lis ob tug tub hu ua Hos Nis thiab Pis Nas, nkawd nrog lub Xab Cog Lus mus. Thaum lub Xab Cog Lus tuaj txog lub yeej, tas tsoom His Xas Lais qw suab nrov nroo ntws, tas ib cheeb tsam ze ntawd nrov ntsuag qees, qeeg tas. Cov Fis Lis Tis hnov cov suab nrov nroo ntws lawv hais tias “Vim li cas yuav hnov suab nrov npaum no hauv cov His Xas Lais tuaj.” Ces lawv hnov moo tias HUAB TAIS lub Xab Cog Lus tuaj txog hauv cov His Xas Lais lub yeej lawm. Cov Fis Lis Tis thiaj ntshai. Lawv hais tias “Tswv Ntuj tuaj nyob hauv lawv lub yeej. Peb yuav raug xwv txheej xwb. Tsis zoo li thaud lawm! Peb yuav raug xwv txheej! Leej twg yuav pab peb dim ntawm tus Tswv Ntuj muaj hwj huam ntawd txhais tes? Nws yog tus xa tas puas tsav yam xwv txheej tuaj rau Hais Nkws Tos teb. Tsoom Fis Lis Tis, nej sawv daws ua siab loj mas! Nej ua tseem txiv neej mas! Kom nej txhob poob ua cov His Xas Lais qhev xws li thaud lawv ua nej qhev. Nej ua siab tawv qhawv ntaus tsam. Ces cov Fis Lis Tis pib tuaj nias tsam. Cov His Xas Lais swb, lawv tso tes khiav rov mus tom lawv tej tsev tsam phooj. Lawv raug kev poob tsag loj kawg. Tog His Xas Lais tuag peb caug txhiab leej. Cov Fis Lis Tis txeeb tau Tswv Ntuj lub Xab Cog Lus. Es Lis ob tug tub Hos Nis thiab Pis Nas nkawd kuj tuag.

LUB MOO ZOO RAWS LI MAS KOS (MK 1: 40-45)

Muaj ib tug neeg mob ruas tuaj cuag Yes Xus, nws thov Yes Xus, nws txhos caug taij tias “Yog koj xav, mas koj yeej ua tau kom kuv rov huv.” Yes Xus hlub tus neeg ntawd, Yes Xus cev tes tuav nws thiab hais rau nws tias “Kuv xav. Koj rov huv mas.” Tam sim ntawd, tus mob ruas tso tus neeg ntawd tseg, nws cia li huv hlo. Yes Xus qhuab qhia nws nruj nruj thiab kom nws rov mus tam sis ntawd. Yes Xus hais rau nws tias “Koj ua twj ywm, txhob qhia dab tsi rau leej twg li. Koj mus thws koj lub cev rau tus leej choj saib, thiab mus cev paj tshab ntxuav koj raws li Mais Xes qhia, ua puav pheej rau luag pom.” Tab sis tus neeg ntawd tawm plaws mus, nws pib tshaj tej ntawd thiab mus hais rau txhua qhov. Ces Yes Xus tsis tau kev tab meeg mus hauv ib lub nroog li. Nws nyob sab nroog nraud, ntawm tej qhov chaw tsis muaj neeg. Neeg tseem tuaj tas qhov txhia chaw tuaj cuag nws.

Los lus ntuas.

XYOO TAB: COV LUS HAUV PHAU NTAWV HES NPLAWS (HN 4: 1-5, 11)

Nyem no txoj kev cog lus tseem qhib lug rau peb mus hauv Tswv Ntuj lub chaw so. Ua li mas, nej tsis txhob muaj ib tug xav hais tias lig dhau rau nws lawm. Vim peb kuj tau txais ib lub moo zoo ib yam li lawv cov thaud. Tab sis lo lus lawv tau hnov tsis pab lawv dab tsi, vim lawv tsis nrog cov neeg uas tau ntseeg koom siab. Peb cov ntseeg, peb kuj tau mus hauv ib lub chaw so, zoo li Tswv Ntuj tau hais “Kuv npau taws, kuv thiaj cog lus tias lawv yuav tsis tau mus nyob hauv kuv lub chaw so.” Tswv Ntuj tej hauj lwm yeej tiav tas puag thaum ntuj tsim teb raug lawm, rau qhov muaj ntawv hais tias “Hnub xya, Tswv Ntuj tso hauj lwm tseg tas tib si.” Thiab tseem muaj lwm lo lus tias “Lawv yuav tsis tau mus nyob hauv kuv lub chaw so.” Ua li mas peb kav tsij mus nyob hauv lub chaw so ntawd, kom tsis txhob muaj ib tug ntog vim nws yoog lawv tus piv txwv tawv ncauj thaum ub.

XYOO TXOOJ: PHAU NTAWV XAS MUAS PHAU IB (1XM 8: 4-7, 10-22)

Tas tsoom txwj laus His Xas Lais sib sau tuaj cuag Xas Muas nyob Las Mas. Lawv hais rau Xas Muas tias “Koj laus lawm, koj cov tub tsis raws koj tus lwj lwm. Thov koj tsa ib tug vaj rau peb kom nws coj peb xws li luag tej haiv neeg.” Xas Muas tsis zoo siab rau qhov lawv hais tias ‘Koj muab ib tug vaj rau peb kom nws coj peb.’ Ces Xas Muas hu txog HUAB TAIS. HUAB TAIS hais tias “Koj ua tas puas tsav yam raws li tsoom pej xeem thov. Tsis yog lawv yuav tso koj tseg. Yog lawv yuav tso kuv tseg. Lawv tsis xav kom kuv ua vaj kav lawv ntxiv.” Xas Muas hais tas HUAB TAIS cov lus rau tsoom pej xeem uas lawv thov ib tug vaj ntawm nws. Nws hais tias “Ntawm tus vaj yuav kav nej mas nws yuav muaj cai ua zoo li no. Tus vaj yuav sau nej tej tub mus saib nws cov tsheb rog thiab tu nws cov nees. Lawv khiav mus ua tus vaj ntej. Nws yuav vam txog nej cov tub los pab nws tswj tej pab txhiab leej neeg, tswj tej pab tsib caug leej neeg. Tus vaj yuav kom nej cov tub laij nws cov teb, hlais nws cov nplej, ntaus ntaj ntaus hmuv ua rog. Tus vaj yuav coj nej cov ntxhais mus ua cov poj niam pleev tshuaj tsw qab rau nws, ua zaub ua mov rau nws noj. Tus vaj yuav muab nej tej teb tej vaj txiv cawv zoo tshaj los pub rau nws cov tub rog. Nws yuav kom nej them cov se ib feem kaum ntawm nej tej qoob loo thiab ntawm cov txiv cawv, nws yuav muab pub rau nws cov neeg sam thiab nws cov thawj tub rog. Nej tej ntxhais txib tub txuas nquag dua cov, nej tej nyuj tej nees, tus vaj yuav coj mus ua hauj lwm rau nws. Nej yuav tsum them cov se ib feem kaum ntawm nej tej tsiaj, thiab nej haj tseem yuav ua nws cov qhev thiab. Ces hnub ntawd nej yuav qw suab vim tus vaj uas nej tau xaiv. Tab sis hnub ntawd HUAB TAIS yuav tsis teb rau nej!” Tsoom sid tsis mloog Xas Muas cov lus ntuas lawv. Lawv hais tias “Peb yuav tsum muaj ib tug vaj xwb, kom xwv peb thooj li luag tej haiv neeg. Peb tus vaj yuav txiav txim rau peb. Nws yuav mus ua peb ntej coj peb mus ntaus rog.” Xas Muas hnov cov lus ntawd tas tib si, nws hais qhia rau HUAB TAIS. Tab sis HUAB TAIS hais tias “Koj ua raws li lawv hais. Koj tsa ib tug vaj kav lawv.” Ces Xas Muas hais rau cov His Xas Lais tias “Nej sawv daws nyias rov mus nyias lub nroog.”

LUB MOO ZOO RAWS LI MAS KOS (MK 2: 1-12)

Ob peb hnub tom qab, Yes Xus rov los hauv Kas Fas Naus, sawv daws paub tias Yes Xus nyob hauv tsev. Ces neeg tuaj sib sau coob coob ua ke, tsis tshuav chaw seem ntawm qhov rooj li. Yes Xus qhia Lo Lus rau sawv daws. Muaj plaub leeg nqa ib tug tuag ceg tuaj rau Yes Xus. Lawv tsis tau kev nqa tus tuag ceg los rau Yes Xus vim neeg coob dhau, ces lawv yaws lub ruv tsev ncaj qhov chaw Yes Xus nyob, lawv tho qhov saum ruv tsev, lawv dauv lub txaj uas tus tuag ceg pw nqes los. Yes Xus pom lawv lub siab ntseeg, nws hais rau tus tuag ceg tias “Me kwv, koj cov txhaum daws tas lawm.” Muaj ib co kws Ntawv Ntshiab nrog tsoom neeg zaum nyob ntawd, lawv xav hauv nruab siab tias “Tus neeg ntawd hais dab tsi li ntawd? Nws thuam Ntuj! Leej twg thiaj daws txhaum tau? Tsuas kawg Tswv Ntuj tib leeg xwb.” Tab sis Yes Xus lub tswv yim paub tam sis ntawd tias lawv xav qhov ntawd hauv siab, nws thiaj hais rau lawv tias “Ua cas nej xav tej zaj zoo li no hauv nej siab? Lo lus twg yog lo hais yooj yim dua rau tus tuag ceg: Yog lo tias ‘Koj cov txhaum daws tas’, los yog lo tias ‘Koj sawv, nqa koj lub txaj, koj mus’? Ua li mas, nej yuav paub tias Neeg Leej Tub muaj hwj huam daws txhaum tau nyob ntiaj teb no.” Ces Yes Xus hais rau tus tuag ceg tias “Kuv hais rau koj, koj sawv, nqa koj lub txaj, koj rov mus tsev.” Tus tuag ceg sawv tsees. Nws nqa hlo nws lub txaj tam sim ntawd, nws hla sawv daws xub ntiag tawm mus. Cov neeg nyob ntawd yoob tas, lawv cav txog Tswv Ntuj, thiab lawv hais tias “Peb tsis tau pom dua ib yam zoo li ntawd ib zaug li.”

• Lo lus ntuas xyoo tab.
• Lo lus ntuas xyoo txooj.

XYOO TAB: COV LUS HAUV PHAU NTAWV HES NPLAWS (HN 4: 12-16)

Tswv Ntuj lo lus muaj txoj sia. Tswv Ntuj lo lus ua tau hauj lwm. Tswv Ntuj lo lus ntse dua ib rab ntaj ob sab hniav. Nws txeem mus tau hauv tus plig thiab hauv nruab nrab lub tswv yim. Nws mus tau rau hauv cov pob qij txha thiab cov paj hlwb. Tswv Ntuj lo lus txawj txiav txim rau lub siab ntshaw, thiab rau tej zaj tswv yim nyob hauv nruab siab. Tas puas tsav yam Ntuj tsim los, mas yeej tsis muaj ib yam uas Tswv Ntuj lo lus pom tsis tau. Txhua yam nqha nrig thiab du lug nyob ntawm Tswv Ntuj xub ntiag. Peb yuav tsum cev peb tej hauj lwm huv tib si rau nws pom. Vim peb muaj Tswv Ntuj Leej Tub Yes Xus ua Tuam Leej Choj thiab ua Vaj, nws hla dhau yim txheej cuaj txheej ntuj, mas peb yuav nyob ruaj nreb hauv txoj kev lees ntseeg. Peb tus Tuam Leej Choj tsis yog ib tug Leej Choj tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam li peb. Tsuas tshuav txoj kev txhaum xwb, nws thiaj tsis raug. Peb kav tsij rhais ruam mus lawm tom ntej. Peb tso siab lug mus kom txog lub theej kiab muaj txiaj ntsim, kom peb tau txais kev khuv leej, kev zam, thiab kev pab ntawm lub theej kiab.

XYOO TXOOJ: PHAU NTAWV XAS MUAS PHAU IB (1XM 9: 1-4, 17-19, 10: 1)

Nyob hauv lub xeem Npes Yas Mis, muaj ib tug txiv neej hu ua Kis, nws yog ib tug neeg siab loj. Nws muaj ib tug tub hu ua Xas Ws tab tom tiav hluas, thiab zoo nraug. Tsis muaj ib tug tub His Xas Lais zoo nraug npaum nws. Nws siab dua sawv daws tib si. Nws lub xub pwg siab tshaj sawv daws huv tib si. Muaj ib zaug Xas Ws txiv cov maum luj ploj lawm. Ces leej txiv hais rau nws tus tub Xas Ws tias “Koj coj ib tug tub txib nrog koj, neb mus nrhiav cov maum luj.” Nkawd mus hla lub roob Es Fais thiab lub teb chaws Sas Lis Sas, nkawd tsis pom dab tsi. Nkawd hla teb chaws Sas As Lis los tsis pom, teb chaws Npes Yas Mis los tsis pom. Thaum Xas Muas pom Xas Ws, HUAB TAIS qhia Xas Muas tias “Tus ntawd, yog tus kuv hais rau koj tias nws yuav ua tus tswj kuv haiv neeg.” Txog ntawm qhov rooj, Xas Ws txawm hais rau Xas Muas tias “Kuv thov koj qhia tus neeg txawj ua hwj huam lub tsev rau kuv.” Xas Muas teb Xas Ws tias “Kuv yog tus ua hwj huam ntawd ntag. Koj nce ua ntej mus saum lub ncov roob. Hnub no, neb yuav nrog kuv noj mov. Tag kis sawv ntxov kuv mam tso koj mus thiab qhia koj tias koj lub siab ntxhov txog dab tsi. Tag kis kaj ntug, Xas Muas muab lub tais roj los hliv rau saum Xas Ws taub hau thiab nws puag Xas Ws, nws hais tias “Yog HUAB TAIS pleev koj ua tus tswj nws lub cuab tam. Koj yuav ua tus txiav txim rau HUAB TAIS haiv neeg. Koj yuav cawm lawv ntawm cov yeeb ncuab uas nyob ncig lawv.”

LUB MOO ZOO RAWS LI MAS KOS (MK 2: 13-17)

Yes Xus rov qab tawm mus taug ntug dej ntuj, tas tsoom sid tuaj ntsauv nws, ces nws qhia lawv. Yes Xus mus ntxiv. Nws pom Les Vis, uas yog As Fas Yos tus tub. Les Vis zaum ntawm rooj sau se, ces Yes Xus hais rau Les Vis tias “Koj los raws kuv.” Les Vis sawv, nws raws Yes Xus mus. Thaum Yes Xus noj mov hauv Les Vis tsev, mas muaj ib co sau se thiab ib co neeg txhaum coob nrog Yes Xus thiab cov thwj tim noj mov vim cov sau se thiab cov neeg txhaum coob coob raws Yes Xus. Cov kws Ntawv Ntshiab uas yog tog fas lis xais pom Yes Xus nrog cov neeg txhaum thiab cov sau se noj mov, lawv hais rau cov thwj tim tias “Vim li cas nws nrog cov sau se thiab cov neeg txhaum noj mov?” Yes Xus hnov, nws hais rau lawv tias “Tsis yog cov neeg noj qab nyob zoo yuav vam txog kws kho mob, yog cov neeg mob. Kuv tsis tuaj hu cov neeg ncaj, kuv tuaj hu cov neeg txhaum.”

Cov neeg ntoj kev tuaj Aws Los Pas teb mus rau As Fis Kas teb mas lawv yuav tau hla Nkas Lis Lais teb, cov yuav mus rau As Las Npias teb los lawv kuj yuav tau hla Nkas Lis Lais teb sib yam. Nyob hauv Nkas Lis Lais teb, lub nroog Kas Fas Naus yog thawj lub nroog cov hla kev yuav tuaj them se hla lub teb chaws. Les Vis uas yog As Fas Yos tus tub ua hauj lwm sau se nyob ntawd. Nws muaj ib lub npe hu ua ‘Mas Tais’. Les Vis tsis yog sau se rau cov Los Mas, tab sis nws sau se rau Hes Los As Tis Pas tus vaj txheeb kav Nkas Lis Lais xeev ntuj.
Cov Yus Das ntxub cov neeg sau se, lawv tsis nrog cov sau se tham, lawv tsis nug tias yuav them se npaum cas. Tus neeg sau se hais li cas ces lawv kawg them li ntawd, tus sau se thiaj yuav tsum sau kom tshaj tus se mas lawv thiaj tau qhov tshaj ntawd ua lawv tus nqe zog. Huab Tais Yes Xus pom tus sau se tas zeej tsoom tsis nyiam, mas Huab Tais Yes Xus xav ua phooj ywg nrog nws.
Thaum ntawd, nyob hauv Les Vis nruab siab mas ntshai mob cuag raug riam tsuav. Tej zaum Les Vis tau hnov tsoom sid tham me ntsis txog Huab Tais Yes Xus lawm; los tej zaum nws tau mloog Huab Tais Yes Xus lo lus nyob tom tej ntug zos, ces ntshai muaj ntau lub tswv yim sib ntaus rog nyob hauv nws siab. Les Vis xav mus cuag cov neeg zoo los tsis tau vim tias lawv saib nws yog ib tug neeg tsis huv (unclean), lawv tsis xav txuas lus nrog nws.
Huab Tais Yes Xus mus raws ntug dej ntuj, nws nrhiav saib puas yuav muaj tus zoo siab raws nws, ces nws pom Les Vis. Huab Tais Yes Xus hu Les Vis kom raws nws mus, ces Les Vis tso tas txhua yam, nws raws Huab Tais Yes Xus mus. Pob Zeb, As Nres, Yas Kos thiab Zam lawv tseem rov mus nrhiav ntses li yav ua ntej lawv tsis tau paub Huab Tais Yes Xus tau, tiam sis Les Vis mas nws yuav rov mus ua tus sau se li qub tsis tau ntxiv. Les Vis tso puas tsav yam rau hauv Huab Tais Yes Xus txhais tes, nws xaiv tau qhov raug lawm.
Les Vis txiav siab zaum no, mas nws tau txais 3 yam:
1) Les Vis yuav ua neeg pluag thiab coj lub neej txom nyem tab sis nws ob txhais tes yuav huv, ces nws lub siab tau nyob tus.
2) Les Vis yuav plam nws txoj hauj lwm tab sis nws yuav tau txais ib txog kab xwm loj dua ntawd. Tshuav ib yam Les Vis tsis tso tseg, yog nws tus cwj mem. Les Vis muab tus cwj mem nws sau cov neeg tej se los sau lub Moo Zoo tseg cia rau ntiaj teb neeg tau nyeem.
3) Thaum Les Vis hnov Huab Tais Yes Xus hu nws, nws cia li txiav siab tam sim ntawd tso txhua yam pov tseg, hais tau tias nws tsis xyuam xim (reckless) li. Vim Les Vis tsis xav dab tsi ntau txog nws kev txiav siab zaum no mas Les Vis lub moo thiaj nyob txog tav no. Sawv daws paub tias Les Vis yog tus kws piav Huab Tais Yes Xus lub neej. Yog Les Vis tsis txiav siab raws Huab Tais Yes Xus mas niaj hnub no luag tsuas cav txog Les Vis moo phem.
Les Vis caw Huab Tais Yes Xus mus tom nws tsev. Nws xav kom cov phooj ywg sau se tau ntsib Huab Tais Yes Xus vim cov phooj ywg sau se thiab cov neeg txhaum puav leej muaj kev ntxhov siab xws li nws. Huab Tais Yes Xus zoo siab mus hauv Les Vis tsev, mus nrog cov sau se thiab cov neeg txhaum nyob ua ke. Qhov no yog qhov Huab Tais Yes Xus txawv cov kws ntawv, cov Fas Lis Xais thiab cov uas lawv hais tias lawv yog neeg zoo. Cov neeg txhaum tsis xav mus nrhiav lawv vim tias lawv saib tsis tau cov neeg txhaum thiab lawv thuam cov neeg txhaum.
Raws li cov Fas Lis Xais qhia mas cov neeg tsis hla txoj cai yuav tsis mus fim cov neeg sau se thiab cov neeg txhaum, tsis nrog lawv tham, tsis nrog lawv mus kev ua ke, tsis nrog lawv ua luam, tsis qhib qhov rooj txais lawv los so hauv yus tsev thiab tsis chaw mus hauv tus neeg txhaum lub ruv tsev. Tab sis Huab Tais Yes Xus tsis yog nrog cov neeg txhaum tham xwb, nws tseem mus hauv lawv tej tsev thiab nrog lawv koom rooj mov thiab.
Lo lus ‘neeg txhaum’ (Sinner) tsis yog hais txog tus neeg ‘tsis tsheej haj’ (unmoral) xwb, tseem hais txog tus neeg tsis mloog txoj cai thiab. Tus neeg zes luag txij nkawm thiab tus neeg noj nqaij npua thiab yog neeg txhaum zoo tib yam. Tus tub sab, tus tua neeg, thiab tus tsis ntxuav tes ua ntej yuav noj mov thiaj yog neeg txhaum zoo tib yam. Li ntawd, cov neeg txhaum Les Vis caw tuaj nrog nws noj mov thiaj tsis yog cov neeg tsis tsheej haj xwb, tseem muaj tej tus yog cov hla txoj cai thiab.
Thaum cov kws ntawv thiab cov Fas Lis Xais hais tias ua cas Huab Tais Yes Xus nrog cov sau se thiab cov neeg txhaum noj mov, mas Huab Tais Yes Xus thiaj hais tias tus kws kho mob yuav mus qhov chaw cov neeg muaj mob vam txog. Tus neeg noj qab nyob zoo yuav tsis vam txog tus kws kho mob; tus neeg mob xwb thiaj vam txog kws kho mob. Nws tuaj nrhiav cov neeg muaj mob hauv tus plig thiab vam txog nws.
Nyob hauv qib 17 zoo li Huab Tais Yes Xus tsis muaj txiaj ntsim dab tsi rau cov neeg zoo. Tab sis kom peb pom tias Huab Tais Yes Xus yuav ua dab tsi tsis tau rau tus neeg xav tias nws zoo txaus lawm tsis tas yuav vam txog Huab Tais Yes Xus lawm; tsuas muaj cov neeg txhaum thiab vam txog Huab Tais Yes Xus pab lawv xwb uas Huab Tais Yes Xus yuav ua hauj lwm nyob hauv lawv tau.
Cov Yus Das txheej thaud saib tias cov neeg txhaum yog neeg ruam (ignorant), lawv yuav tig los ua ib tug neeg ruaj hauv txoj kev ntseeg tsis tau. Cov Yus Das txheej thaud ntshai kis txhaum ntawm cov neeg txhaum mas lawv thiaj tsis mus fim cov neeg txhaum. Tab sis Huab Tais Yes Xus tsis zoo li lawv, Huab Tais Yes Xus tsis muab nws saib hlob, nws muaj lub siab kub lug xav tawm mus pab cov neeg txhaum.

XYOO TAB: Cov lus hauv tsab ntawv Hes Nplaws (HN 5: 1-10)

Tsis hais tus Tuam Leej Choj twg, nws tsuas yog ib tug tawm hauv zeej tsoom los, mas nws ua Leej Choj pab neeg nyob hauv txoj kev fim Tswv Ntuj, pab cev paj tshab txi Ntuj them txim txhaum. Tus Leej Choj hlub taus cov neeg tsis paub dab tsi thiab cov neeg yuam kev, vim tias nws kuj txawj ua txhaum xws li lawv. Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum. Tsis muaj leej twg yuav rov tsa nws ua leej choj tau. Yog Tswv Ntuj hu nws mas nws thiaj ua leej choj tau, ib yam nkaus li Tswv Ntuj tau hu As Loos. Leej Pleev, kuj tsis tau rov tsa nws ua Tuam Leej Choj muaj hwj chim, nws txais lub hwj chim ntawd ntawm tus hais rau nws tias “Koj yog kuv Leej Tub. Hnub no, kuv xeeb koj.” Tswv Ntuj tseem hais tias “Koj ua leej choj mus ib txhiab ib txhis, raws li Mes Kis Xes Des txoj kev.” Leej Pleev, thaum nws ua neej nyob hauv nws lub cev nqaij, nws tau tsa suab quaj thov tus muaj peev xwm cawm tau nws ntawm txoj kev tuag. Leej Txiv mloog Leej Pleev lus thov, vim Leej Pleev yog tus hwm Leej Txiv zoo. Txawm tias Leej Pleev twb yog tus Tub cag, tsis kav nws kuj raug txom nyem. Nws tau kawm tias kev mloog lus yog dab tsi. Nyem no, Leej Pleev yog tus zoo txhij zoo txhua. Leej Pleev los ua lub hauv paus uas cawm cov neeg mloog nws lus mus li. Vim Tswv Ntuj tsa Leej Pleev ua Tuam Leej Choj raws li Mes Kis Xes Des txoj kev.

XYOO TXOOJ: Cov lus hauv phau ntawv Xas Muas Phau Ib (1XM 15: 16-23)

Xas Muas hais rau Xas Ws tias “Koj nyob twj ywm! Cia kuv qhia koj txog qhov HUAB TAIS hais rau kuv nag hmo.” Xas Ws hais tias “Koj hais.” Ces Xas Muas hais tias “Koj yog ib tug neeg me kawg, tab sis koj tsis yog tus tswj cov xeem His Xas Lais lod? HUAB TAIS tsis tau pleev koj ua vaj kav His Xas Lais lod? Nws xa koj mus ntaus rog, nws hais rau koj tias koj mus muab lub txim rhuav cov As Mas Les kom lawv ploj tas huv si. Vim li cas koj tsis mloog HUAB TAIS lus? Vim li cas koj tau nyiag khaws lawv tej cuab yeej cuab tam? Koj ua tej yam tsis ntxim HUAB TAIS siab.” Xas Ws teb tias “Kuv twb mloog HUAB TAIS! Kuv twb mus ntaus rog raws li HUAB TAIS qhia, kuv coj tau tus vaj As Mas Les hu ua As Nkas los lawm. Thiab kuv muab lub txim rhuav cov As Mas Les kom lawv ploj tas tib si. Nyob hauv cov As Mas Les tej cuab yeej cuab tam kuv tsoom pej xeem kawg khaws cov tsiaj me thiab loj zoo tshaj coj los txi rau koj tus HUAB TAIS Tswv Ntuj nyob Zis Nkas xwb.” Tab sis Xas Muas teb tias “Yog dab tsi yuav xis HUAB TAIS siab zoo dua? Puas yog cov thaj tua tsiaj thiab hlawv tsiaj txi Ntuj? Los puas yog txoj kev mloog lus thiaj muaj nqis dua cov thaj txi Ntuj zoo nkauj? Txoj kev ua siab sib muaj nqis dua cov roj tshis! Koj tau nug cov txiv yaig txiv muam. Koj hla Tswv Ntuj lus. Yog zoo li koj tau teev dab. Vim koj tso HUAB TAIS lo lus tseg, ces HUAB TAIS thiaj tso koj tseg. Nws tsis cia koj ua vaj ntxiv!”

Lub Moo Zoo raws li Mas Kos (MK 2: 18-22)

Thaum Zam cov thwj tim thiab cov fas lis xais tab tom yoo mov, muaj neeg tuaj hais rau Yes Xus tias “Vim li cas Zam cov thwj tim thiab cov fas lis xais cov thwj tim yoo mov, hos koj cov thwj tim tsis yoo?” Yes Xus hais rau lawv tias “Thaum nraug vauv tseem nrog nws cov kwv luag nyob, lawv puas yoo mov tau? Tas lub caij uas nraug vauv nrog lawv nyob, lawv yoo mov tsis tau. Tab sis, muaj ib hnub luag yuav coj nraug vauv mus deb lawv, ces hnub ntawd lawv yuav yoo mov. Tsis muaj leej twg ntxiv ib daim ntaub tshiab rau lub khaub tsho tshaj sab, vim daim ntaub ntxiv yuav rub lub tsho, daim tshiab rub daim qub, ces haj yam ntuag loj. Kuj tsis muaj leej twg ntim cawv tshiab rau hauv ib co hnab tawv qub; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd luag thiaj muab cawv tshiab ntim rau hauv cov hnab tawv tshiab.

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus nyob hauv tsab ntawv Hes Nplaws (HN 6: 10-20)

Tswv Ntuj tsis yog ib tug siab nkhaus. Nws nco ntsoov tej yam nej ua, nco ntsoov nej txoj kev nyiam nws lub npe thiab pab cov ntshiab. Peb tsuas xav kom nej txhua leej muaj lub siab kub mus li kom txoj kev tso siab nyob ruaj mus txog hnub kawg xwb. Peb tsis xav kom nej ua ib co neeg qaug zog. Peb xav kom nej yoog cov uas lawv ntseeg thiab lawv lub siab ruaj xwm yeem, vim lawv tau txais Tswv Ntuj lo lus cog. Thaum Tswv Ntuj cog lus rau Has Nplas Has, nws tuav tsis tau ib tug loj dua nws lub npe, ces nws thiaj rov tuav nws lub npe los cog lus li no “Kuv yuav foom hmoov zoo ntau rau koj, thiab kuv yuav ua kom koj huam vam coob tas nrho.” Vim Has Nplas Has tau ua lub siab ruaj xwm yeem, mas nws thiaj tau pom raws li Tswv Ntuj hais. Tej tib neeg, thaum lawv cog lus, mas lawv tuav txog ib tug loj dua lub npe los cog lus thiab los ua pov thawj kom txhob muaj chaw sib cav ntxiv. Vim Tswv Ntuj xav kom cov yuav txais lub cuab tam paub tias nws lo lus yuav tsis hloov li, mas nws tau ua ib zag twv ntuj twv teb. Li ntawd, nyob hauv ob lo lus ruaj no, yam li ob lo lus uas Tswv Ntuj dag tsis tau, mas peb muaj kev tso siab lug, vim peb nrhiav tau ib qho chaw nkaum, ces peb tuav ruaj ruaj txoj kev cia siab uas Ntuj cev los rau peb. Kev tso siab yog zoo li tus nqe lauj nkoj tuav peb tus plig khov thiab ruaj. Kev tso siab txeem mus dhau daim ntaub thaiv kem ntshiab. Yes Xus ua peb ntej mus nyob hauv kem ntshiab, vim nws ua Tuam Leej Choj mus li, raws nraim Mes Kis Xes Des txoj kev.

XYOO TXOOJ: Cov lus hauv phau ntawv Xas Muas Phau Ib (1XM 16: 1-13)

HUAB TAIS hais rau Xas Muas tias “Koj tseem yuav quaj txog Xas Ws hov ntev ntxiv? Kuv twb tso nws pov tseg lawm. Kuv tsis xav kom nws kav His Xas Lais ntxiv. Koj ntim roj puv tus kub nyuj, koj mus. Kuv xa koj mus tom Yes Xes tsev nyob Npes Les Hes, vim nyob hauv nws cov tub kuv xaiv ib tug los ua vaj.” Xas Muas hais tias “Kuv yuav ua zoo li cas mus? Yog Xas Ws hnov, mas nws yuav muab kuv tua.” HUAB TAIS teb tias “Koj yuav cab ib tug xyuas nyuj. Koj hais tias koj mus txi tus nyuj rau HUAB TAIS. Koj yuav caw Yes Xes tuaj txi Ntuj. Kuv yuav qhia koj tias koj yuav ua zoo li cas. Koj yuav sawv kuv chaw pleev tus kuv yuav qhia rau koj.” Xas Muas ua raws li HUAB TAIS qhia. Thaum nws tuaj txog Npes Les Hes, cov txwj laus nyob hauv tsheej sawv daws ntshai tshee na, lawv tuaj cuag Xas Muas, lawv nug nws tias “Yaj Saub, koj tuaj li no. Koj puas coj txoj hmoov zoo tuaj rau peb?” Xas Muas teb tias “Kuv coj txoj hmoov zoo tuaj, kuv tuaj cev ib thaj txi HUAB TAIS.” Xas Muas kom Yes Xes thiab nws cov tub huv tib si tuaj, ces nws caw lawv tuaj txi Ntuj. Thaum lawv tuaj txog, Xas Muas xub pom Es Lis, nws xav tias “Yog HUAB TAIS tus pleev tuaj txog lawm.” Tab sis HUAB TAIS hais rau Xas Muas tias “Koj txhob saib nws tus yam ntxwv sab nraud los nws lub cev siab. Kuv tsis yuav nws. HUAB TAIS nws ntsuas tas txhia yam, nws tsis ntsuas zoo li neeg. Neeg saib tus yam ntxwv sab nraud, hos HUAB TAIS saib hauv lub siab lub plawv.” Yes Xes hu As Npis Nas Das tuaj nyob ntawm Xas Muas xub ntiag. Xas Muas hais tias “Tsis yog tus uas HUAB TAIS xaiv thiab!” Yes Xes coj Sas Mas tuaj, Xas Muas hais tias “Tsis yog tus HUAB TAIS xaiv.” Yes Xes coj nws xya leej tub ib tug zuj zus tuaj nyob ntawm Xas Muas xub ntiag, tab sis Xas Muas hais tias “HUAB TAIS tsis xaiv cov no ib tug li.” “Koj puas tshuav tub ntxiv?” Yes Xes teb tias “Tshuav tus tub ntxawg. Nws zov cov tsiaj nyob tom tshav zaub.” Xas Muas hais rau Yes Xes tias “Koj tso neeg mus hu nws los. Peb yuav zaum ntawm tsum mov no tos nws los tso.” Yes Xes thiaj tso neeg mus hu tus tub ntxawg los. Tus tub ntawd cov plaub hau liab daj. Nws lub ntsej muag zoo nraug. Nws sawm txhiaj kawg! HUAB TAIS hais rau Xas Muas tias “Yog tus no. Koj pleev nws mas!” Xas Muas nthos nkaus tus kub ntim roj, nws pleev tus tub ntxawg nyob hauv nruab nrab nws cov kwv tij. Txij hnub ntawd los HUAB TAIS lub tswv yim ya los nyob hauv Das Vis. Ces Xas Muas mam sawv kev rov mus Las Mas.

Lub Moo Zoo raws li Mas Kos (MK 2: 23-28)

Muaj ib zaug, yog hnub xas npas tos, Yes Xus hla ib thaj nplej, cov thwj tim taug kev, lawv pib de tej hnab nplej. Cov Fas Lis Xais hais rau Yes Xus tias “Saib! Vim li cas lawv ua tej yam txwv tsis pub ua hnub xas npas tos?” Yes Xus hais rau lawv tias “Nej tsis tau nyeem ib zaug txog qhov Das Vis ua thaum nws tsis muaj dab tsi noj, ces nws thiab nws cov kwv luag tshaib plab lod? Nws mus hauv Tswv Ntuj lub tsev li cas, thiab noj cov ncuav mov txi Ntuj uas kawg yog cov leej choj thiaj noj tau xwb, nws tseem muab rau nws cov kwv luag noj thiab. Thaum ntawd yog lub caij As Npias Thas ua tuam leej choj.” Ces Yes Xus hais rau lawv tias “Ntuj tsim hnub xas npas tos rau neeg, tsis yog tsim neeg rau hnub Xas npas tos, Neeg Leej Tub kuj yog tus tswv kav hnub xas npas tos thiab.”

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus hauv tsab ntawv Hes Nplaws (HN 7: 1-3, 15-17)

Mes Kis Xes Des yog tus vaj kav Xas Les, yog tus Tswv Ntuj nyob siab tus leej choj. Thaum Has Nplas Has mus ntaus cov vaj, nws yeej lawv, nws rov los tsev, ces Mes Kis Xes Des tuaj cuag Has Nplas Has, nws foom hmoov zoo rau Has Nplas Has. 2 Has Nplas Has qee ib feem kaum hauv nws tej toob xib tib si pub rau Mes Kis Xes Des. Mes Kis Xes Des lub npe txhais tias ‘Vaj kav txoj kev ncaj.’ Tab sis nws ua vaj kav Xas Les, qhov ntawd txhais tias Vaj kav kev thaj yeeb! Nws tsis muaj niam tsis muaj txiv, tsis muaj keeb kwm. Nws lub neej tsis muaj hnub pib tsis muaj hnub xaus. Mes Kis Xes Des zoo li Tswv Ntuj Leej Tub, nws ua leej choj mus ib txhiab ib txhis. Tseem muaj ib qho tseeb kawg, yog qhov no: tus uas sawv ua leej choj tshiab raws Mes Kis Xes Des txoj kev, mas nws txoj kev ua leej choj tsis los ntawm nws lub keeb los, nws txoj kev ua leej choj los ntawm lub hwj huam muaj txoj sia uas rhuav tsis tau. Vim muaj ib lo lus zeem tseeb txog tus ntawd hais tias “Koj ua leej choj mus li raws nraim Mes Kis Xes Des txoj kev.”

XYOO TXOOJ: Cov lus hauv phau ntawv Xas Muas Phau Ib (1XM 17: 32-33, 37, 40-51)

Das Vis hnov Nkaus Lias tsawm haiv His Xas Lais, nws hais rau tus vaj Xas Ws tias “Peb txhob muaj leej twg ntaus siab me vim tus Fis Lis Tis ntawd. Koj tus tub txib yuav mus ntaus nws.” Xas Ws teb Das Vis tias “Kuv mus ntaus tsis tau tus Fis Lis Tis ntawd. Koj yog ib tug me nyuam yaus, hos tus neeg ntawd txij nws yav hluas los nws yeej yog ib tug tub rog.”Das Vis tseem hais tias “HUAB TAIS twb npo kuv ntawm tsov thiab dais cov rau tes rau taw, nws yeej yuav npo kuv ntawm tus Fis Lis Tis ntawd txhais tes thiab.” Das Vis nthos nkaus nws rab qws. Nws xaiv tsib lub qe zeb du du nram hav dej los ntim rau hauv lub hnab uas nws ris zov yaj, nws cia li mus cuag tus Fis Lis Tis. Tus Fis Lis Tis txav los ze Das Vis zuj zus. Muaj ib tug nqa ib lub vab hlau ua nws ntej. Tus Fis Lis Tis tig los pom Das Vis, nws cem Das Vis vim Das Vis hluas hluas, Das Vis cov plaub hau daj liab, thiab nws zoo nraug zoo saib kawg. Tus Fis Lis Tis hais rau Das Vis tias “Kuv puas yog ib tug dev. Ua cas koj nqa ib rab qws tuaj tiv kuv?” Ces tus Fis Lis Tis tuav txog nws cov dab lub npe los tsawm Das Vis. Tus Fis Lis Tis hais rau Das Vis tias “Koj txav los ze kuv mas! Kuv yuav muab koj tej nqaij rau cov noog ya saum ntuj thiab cov tsiaj nyob nruab nrag noj.”  Das Vis teb rau tus Fis Lis Tis tias “Koj tuav ntaj tuav hmuv tuaj tiv kuv, hos kuv tuav txog HUAB TAIS Xas Npas Os lub npe tuaj tiv koj. HUAB TAIS yog tsoom tub rog His Xas Lais tus Tswv Ntuj uas koj thuam. Hnub no HUAB TAIS yuav muab koj rau hauv kuv txhais tes. Kuv yuav muab koj tua, kuv yuav txiav koj taub hau. Hnub no kuv yuav muab koj lub cev thiab tsoom tub rog Fis Lis Tis lub cev rau cov noog ya saum ntuj thiab cov tsiaj nruab nrag noj. Ces tas lub qab ntuj neeg yuav paub tias muaj ib tug Tswv Ntuj saib His Xas Lais. Tas ib zeej tsoom nyob ntawm no yuav pom tias tsis tas HUAB TAIS yuav siv ntaj siv hmuv los pub txoj kev yeej, vim HUAB TAIS yog tus tswv coj tsam rog no. Nws yuav muab nej rau hauv peb xib teg.” Tus Fis Lis Tis Nkaus Lias pib tshais ruam tuaj cuag Das Vis. Das Vis thiaj txav tawm ntawm phiaj tub rog His Xas Lais khiav mus thawj tus Fis Lis Tis. Nws cev tes hauv nws lub hnab, nws thau tau ib lub qe zeb los, nws xuas hlua txawb lub qe zeb mus raug tus Fis Lis Tis hauv pliaj. Lub pob zeb nkag kiag hauv tus Fis Lis Tis Nkaus Lias hauv pliaj, Nkaus Lias cia li vau hlo khwb rwg ntsuav rau hauv av. Ces Das Vis xuas hlua thiab pob zeb xwb, nws ntaus yeej tus Fis Lis Tis. Das Vis tua tus Fis Lis Tis tuag, nws txhais tes tsis tau tuav ntaj tuav hmuv li.

Lub Moo Zoo raws li Mas Kos (MK 3: 1-6)

Yes Xus rov mus hauv ib lub tsev txoos dua. Nyob ntawd, muaj ib tug neeg uas ib sab tes qhuav. Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub xas npas tos, kom lawv tau kev liam rau Yes Xus. Yes Xus hais rau tus neeg qhuav tes tias “Koj los sawv hauv nruab nrab.” Thiab Yes Xus hais rau lawv tias “Hnub xas npas tos, puas kheev kom ua qhov zoo los cia ua qhov phem, cawm ib txog sia los txo ib txog sia?” Sawv daws nyob ntsiag to. Yes Xus ntsia lawv ib muag npau taws vog, nws tu siab vim lawv lub siab txhav, ces nws hais rau tus neeg qhuav tes tias “Koj xyab tes.” Ces nws xyab, nws txhais tes rov zoo hlo. Thaum cov Fas Lis Xais tawm mus, lawv nrog cov Hes Los Dias sab laj saib yuav ua li cas thiaj tau kev muab Yes Xus tua.

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus nyob hauv tsab ntawv Hes Nplaws (HN 7: 25-28, 8: 6)

Leej Pleev muaj peev xwm cawm tau cov neeg vam txog nws kom mus cuag Tswv Ntuj. Vim nws muaj txoj sia mus li, ces nws thov Ntuj pab lawv. Tsim nyog peb yuav tsum muaj ib tug tuam Leej Choj zoo li ntawd, ib tug tuam Leej Choj ntshiab, tsis muaj chaw xyeej, tsis muaj ib yam tsuas nws, tsis nyob xyaw cov neeg txhaum, nws nyob siab dua cuaj txheej ntuj. Tsis tas nws yuav niaj hnub tua tsiaj txi Ntuj mus them nws cov txim txhaum thiab them tsoom pej xeem cov txim txhaum, xws li cov thawj leej choj uas lawv yuav tsum ua. Nws txi Ntuj ib zaug xwb, yog thaum nws rov muab nws txi rau Ntuj. Txoj Cai tsa ib co neeg zog me ua leej choj. Tiam sis Txoj Cai twb dua lawm. Tswv Ntuj lo lus cog tsa Leej Tub uas yog tus zoo txhij zoo txhua kom ua leej choj mus ib txhiab ib txhis.Nyem no, Leej Pleev tau txais ib txog kab xwm siab dua. Nws cev ib txog kev cog lus zoo dua. Txoj kev cog lus no txawb rau saum ib co lus khov dua.

XYOO TXOOJ: Cov lus hauv phau ntawv Xas Muas Phau Ib (1XM 18: 6-9, 19: 1-7)

Thaum Das Vis mus tua tus Fis Lis Tis Nkaus Lias rov qab los, mas cov poj niam tuaj txhua lub nroog His Xas Lais tuaj cuag tus vaj Xas Ws. Lawv dhia daj dhia luag hu nkauj, ntaus nruas, ntaus thaj cheej thiab nqua suab lom zem. Cov poj niam hu nkauj dhia tias “Xas Ws tua ntau txhiab leej neeg. Hos Das Vis tua ntau vam leej neeg.” Xas Ws npau taws heev kawg vim tej lus ntawd tsis ntxim nws siab. Nws hais tias “Lawv muab ntau vam leej neeg rau Das Vis, muab txhiab leej neeg rau kuv xwb. Tshuav qhov lawv tsis tau hu nws ua vaj xwb!” Ces txij hnub ntawd los, Xas Ws pib khib thiab ntxub Das Vis. Xas Ws hais rau nws tus tub Yos Nas Thas thiab rau cov thawj tub rog tias nws xav muab Das Vis tua pov tseg. Tab sis Xas Ws tus tub Yos Nas Thas nyiam Das Vis kawg. Nws qhia Das Vis tias “Kuv txiv Xas Ws nrhiav kev tua koj. Koj yuav ceev faj zoo. Tag kis sawv ntxov koj tsiv nraim nyob twj ywm. Kuv yuav nrog kuv txiv tawm mus nraum daim teb. Kuv yuav hais zoo txog koj rau nws. Saib nws yuav ua dab tsi kuv mam rov los hais qhia koj.” Yos Nas Thas hais zoo txog Das Vis rau nws txiv Xas Ws. Yos Nas Thas hais tias “Tus vaj yuav tsis txhob ua txhaum rau nws tus tub txib Das Vis, vim Das Vis tsis tau ua txhaum dab tsi rau koj. Qhov nws tau ua mas yog ib yam pab koj ntau kawg xwb. Nws muab nws txoj sia mus tiv rog, nws tua tus Fis Lis Tis, ces HUAB TAIS pub kom His Xas Lais yeej loj kawg. Koj pom tias His Xas Lais yeej mas koj yuav zoo siab. Vim li cas koj thiaj yuav ua txhaum? Ua cas koj yuav ua kom ib tug neeg siab dawb tej ntshav ntws? Ua cas koj yuav lam tau lam muab Das Vis tua?” Xas Ws mloog Yos Nas Thas, nws cog lus tias “Yog HUAB TAIS muaj txoj sia tiag, mas Das Vis yuav tsis tuag.” Ces Yos Nas Thas hu Das Vis tuaj, nws hais tej ntawd qhia Das Vis tib si. Tas ces Yos Nas Thas coj Das Vis mus cuag Xas Ws. Das Vis rov ua nws txoj hauj lwm li qub.

Lub Moo Zoo raws li Mas Kos (MK 3: 7-12)

Yes Xus nrog nws cov thwj tim mus nram ntug dej ntuj. Muaj ib pab neeg coob kawg nyob xeev Nkas Lis Lais raws nws. Thiab tej pab neeg coob coob nyob Yus Das teb, nyob Yes Lus Xas Les, nyob Is Dus Mias, nyob sab dej Yos Las Das tim ub, nyob ib ncig Tws Los thiab Xis Doos tuaj cuag Yes Xus, vim lawv tau hnov txog tas ib puas tsav yam nws ua. Yes Xus hais kom cov thwj tim muab ib lub nkoj dab rau nws, kom lawv txhob tsuj nws, vim neeg coob. Yog vim nws kho ntau leej zoo, ces tas cov neeg uas muaj txiab muaj nkeeg sawv daws phoom kom tau kov Yes Xus. Niaj zaus, cov dab tsis huv pom Yes Xus, lawv khoov ti av nyob ntawm nws xub ntiag, lawv qw tias “Koj yog Tswv Ntuj Leej Tub!” Yes Xus txwv lawv nruj tsis pub lawv ua kom muaj neeg paub nws.

XYOO TAB: Cov lus nyob hauv tsab ntawv Hes Nplaws (HN 8: 6-13)

Nyem no, Leej Pleev tau txais ib txog kab xwm siab dua. Nws cev ib txog kev cog lus zoo dua. Txoj kev cog lus no txawb rau saum ib co lus khov dua. Yog tias txoj kev cog lus thawj zaug zoo nto ntsis lawm, mas tsis tas yuav rov cog lus dua. Tswv Ntuj tau cem qhuab qhia lawv hais tias “Yav tom ntej, yuav muaj ib hnub, kuv yuav nrog His Xas Lais tsev neeg thiab Yus Das tsev neeg cog dua ib lo lus tshiab. Kuv yuav tsis cog lus xws li kuv nrog lawv cov yawg koob cog lus thawj zaug, hnub uas kuv tuav lawv tes, coj lawv tawm hauv Hais Nkws Tos teb los. Vim lawv nyob tsis ruaj hauv kuv lo lus cog. Kuv thiaj tsis liam fab pab lawv. Kuv yuav nrog His Xas Lais tsev neeg rov cog lus li no; dhau lub sij hawm ntawd, mas kuv yuav muab kuv cov kev cai lij choj cog rau hauv lawv lub tswv yim, kuv yuav muab txaug rau hauv lawv lub siab. Kuv yuav ua lawv tus Tswv Ntuj, lawv yuav ua kuv haiv neeg. Tsis tas yuav muaj leej twg qhia rau lwm tus, tsis tas ib leeg yuav hais rau ib leeg tias ‘Koj paub Huab Tais mas.’ Vim tias tus hlob tus yau, sawv daws yuav paub kuv txhua. Kuv yuav zam rau lawv, kuv yuav tsis nco txog lawv cov txhaum ntxiv.” Thaum Tswv Ntuj hais tias ‘Kev cog lus tshiab,’ mas lo lus ntawd ua kom thawj txoj kev cog lus thaum ub, qub tuaj. Tej yam uas pib qub thiab pib khaub seeb, mas tshuav tsis ntev yuav ploj mus.

XYOO TXOOJ: Cov lus hauv phau ntawv Xas Muas Phau Ib (1XM 24: 3-21)

Xas Ws thiaj sau peb txhiab leej neeg nyob hauv tsoom His Xas Lais, nws kom lawv mus nrhiav Das Vis thiab Das Vis pab neeg ntawm cov pob tsuas Sai. Xas Ws tuaj txog ntawm cov nkuaj yaj uas nyob ntawm ntug kev. Nyob ntawd muaj ib lub qhov tsua. Xas Ws mus so nyob hauv. Das Vis thiab nws pab tub rog twb nkaum hauv lub qhov tsua ntawd lawm thiab. Cov tub rog hais rau Das Vis tias “Txog hnub HUAB TAIS qhia koj tias ‘Kuv tso koj tus yeeb ncuab rau hauv koj txhais tes. Koj ua rau nws ywj koj siab mas.” Das Vis sawv, nws nyiag mus txiav Xas Ws ib sab tw tsho tshaj sab. Nws ntshai, nws lub plawv dhia heev, vim nws txiav tau Xas Ws ib sab tw tsho tshaj sab lawm. Nws hais rau nws pab tub rog tias “Thov kom HUAB TAIS txhob cia kuv ua phem rau kuv tus Huab Tais! Kuv txhob tua Xas Ws, vim Xas Ws yog HUAB TAIS tus pleev.” Ces Das Vis hais tej lo lus tawv txwv tsis pub nws pab tub rog dhia mus tua Xas Ws. Xas Ws sawv, nws tawm hauv qhov tsua, nws mus taug nws txoj kev ntxiv. Das Vis thiaj sawv, nws kuj tawm hauv qhov tsua mus, nws hu Xas Ws nrov nrov tias “Kuv tus tswv huab tais!” Xas Ws tig ntsia rov tom qab. Das Vis khoov thiab pe Xas Ws. Das Vis hais rau Xas Ws tias “Ua cas koj ntseeg cov neeg uas lawv hais rau koj tias Das Vis nrhiav ua phem rau koj? Hnub no, koj qhov muag pom tias HUAB TAIS muab koj rau hauv kuv txhais tes lawm nyob hauv lub qhov tsua no. Kuv tsis kam muab koj tua. Kuv cia koj ciaj. Kuv tau hais tias kuv txhais tes yuav tsis tua kuv tus huab tais, vim nws yog HUAB TAIS tus pleev. Txiv, koj ntsia koj lub tsho ib sab nyob hauv kuv txhais tes no. Kuv tau txiav koj lub tsho ib sab, tab sis kuv tsis tau muab koj tua. Koj yuav tsum lees tias kuv lub siab tsis xav ua phem rau koj, tsis xav muab neeg tua. Kuv tsis tau ua txhaum rau koj, hos koj nrhiav kev ntes kuv thiab txo kuv txoj sia. Kuv thov kom HUAB TAIS txiav saib puas yog kuv los yog koj muaj txhaum. Kuv thov kom HUAB TAIS pauj rau koj. Tab sis kuv txhais tes yuav tsis kov koj li. Tej laus qhia hais tias cov neeg phem rho txoj kev phem tawm los. Ua li mas kuv yuav tsis tsa tes ntaus koj.  Vaj His Xas Lais, koj taug txoj kev ntaus rog, koj xav tua leej twg? Koj caum leej twg? Koj caum ib tug dev lod? Los koj caum ib tug nyuag dev mub? Cia HUAB TAIS ua tus txiav txim rau wb. Kuv thov kom nws ntsuas kuv cai thiab npo kuv ntawm koj txhais tes.” Thaum Das Vis hais li ntawd tas rau Xas Ws, mas Xas Ws hais tias “Kuv me tub Das Vis, puas yog koj lub suab tiag?” Ces Xas Ws quaj nrov nrov. Nws hais rau Das Vis tias “Koj siab ncaj dua kuv. Vim koj ua zoo rau kuv, hos kuv kawg ua phem rau koj xwb. Hnub no koj tseem tau ua zoo tshaj rau kuv, vim HUAB TAIS twb muab kuv rau hauv koj txhais tes, tab sis koj tsis muab kuv tua. Thaum ib tug neeg ntsib nws tus yeeb ncuab, nws puas yuav cia nws tus yeeb ncuab mus taug nws txoj kev ntxiv? Kuv thov kom HUAB TAIS pub paj tshab rau koj pauj qhov zoo uas hnub no koj tau ua rau kuv. Nyem no kuv paub tseeb tias koj yuav ua vaj, thiab txoj kev ua vaj tswj His Xas Lais yuav nyob ruaj nreb hauv koj txhais tes.”

Lub Moo Zoo raws li Mas Kos (MK 3: 13-19)

Yes Xus nce mus saum lub roob, nws hu cov uas nws xav hu kom los ntawm nws. Ces lawv los nyob ze nws. Nws tsa kaum ob leeg los ua nws cov kwv luag, kom nws tau xa lawv mus tshaj Lo Lus, thiab kom lawv tau hwj huam ntiab dab phem. Nws thiaj tsa Pab Kaum Ob: yog Xis Moos uas Yes Xus tis nws npe hu ua Pob Zeb, Yas Kos, Ntxes Npes Dais tus tub, Zam, Yas Kos tus kwv, Yes Xus tis nkawd npe hu ua Npuas Nes Nkes, txhais tias Yawm Xob cov tub, As Nres, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fas Yos tub, Thas Das Yos, Xis Moos tus Ntxes Las Tes, thiab Yus Das Kas Lis Yaus, tus muab Yes Xus muag.

XYOO TAB: Cov lus nyob hauv tsab ntawv Hes Nplaws (HN 9: 2-3, 11-14)

Lawv tau tsa thawj lub tsev tsam phooj. Nyob hauv, muaj tus ncej txawb tswm ciab, muaj lub rooj, thiab cov ncuav mov. Lawv hu chav tsev ntawd ua lub Tsev Ntshiab. Chav tsev ob muaj ib daim ntaub thaiv, chav ntawd hu ua cov Ntshiab Kem Ntshiab tshaj.Tab sis Leej Pleev tuaj lawm, nws yog tus Tuam Leej Choj kav lub cuab tam tom ntej. Nws hla ib lub tsev tsam phooj loj dua, thiab zoo dua, uas tsis yog neeg txhais tes ua, tsis yog lub sim ceeb no ib lub tsev. Leej Pleev mus hauv lub tsev Ntshiab, nws tsis nqa ntshav tshis los ntshav heev nyuj, nws hliv kiag nws cov ntshav, ces nws txhiv tau peb mus li. Yog ntshav tshis, thiab ntshav heev nyuj, los ib co tshauv maum nyuj uas luag muab tsuag rau saum cov neeg tsis huv, ua tau kom cov tsis huv ntshiab tuaj, thiab lub cev nqaij rov huv tuaj tiag, mas Leej Pleev cov ntshav haj yam ua tau kom peb lub siab huv tuaj thiab kom peb dim tau ntawm peb cov hauj lwm txhaum los teev tus Tswv Ntuj muaj txoj sia, vim Leej Pleev uas nrog Leej Ntuj Plig nyob mus li, Leej Pleev uas tsis muaj ib qho xyeej, nws rov muab nws txi rau Tswv Ntuj

XYOO TXOOJ: Cov lus hauv phau ntawv Xas Muas Phau Ob (2XM 1: 1-4, 11-12, 17, 19, 23-27)

Thaum Xas Ws tuag tas, mas Das Vis mus tua cov As Mas Les rov los txog. Nws nyob Xis Las teb ob hnub. Hnub peb, ib tug neeg khiav ntawm Xas Ws lub yeej los. Nws cov khaub ncaws ntuag tas, nws taub hau paug hmoov av tas. Thaum nws los txog ntawm Das Vis, nws txhos caug hauv av pe Das Vis. Das Vis hais rau nws tias : “Koj tuaj qhov twg tuaj?” Nws teb tias “Kuv khiav ntawm lub yeej His Xas Lais los.” Das Vis nug tias “Ua cas lawm? Koj qhia kuv saib!” Tus khiav los teb tias “Tsoom pej xeem khiav tas tso tsam rog tseg. Muaj coob leej kawg tuag. Xas Ws thiab nws tus tub Yos Nas Thas kuj tuag huv tib si lawm.” Ces Das Vis dua rhe nws lub tsho. Cov neeg nrog nws lawv kuj dua lawv tej tsho. Sawv daws nyiav, sawv daws quaj thiab yoo mov mus txog tsaus ntuj. Lawv quaj Xas Ws thiab nws tus tub Yos Nas Thas. Lawv quaj txog HUAB TAIS haiv neeg thiab txog cov His Xas Lais uas lawv poob tsam. Das Vis thiaj nyiav zoo li no “Aub! His Xas Lais lub koob meej koj nyob lwj ntsuav saum koj cov roob! Cov tub rog, ua cas nej thiaj ploj tas lawm? Xas Ws thiab Yos Nas Thas, thaud, nkawd ua nkawd lub neej zoo nyiam thiab zoo hlub. Nyem no, nkawd tuag, nkawd tuag ua ke. Nkawd nrawm dua dav. Nkawd muaj zog dua tsov. Cov ntxhais His Xas Lais, Xas Ws yog tus muab ntaub tsuj ntaub npuag rau nej hnav. Nws dai lias nyiaj lias kub rau nej tej tsoos tsho. Zaum no nej nyiav Xas Ws mas! Cov tub rog, ua li cas lawv thiaj tuag nyob hauv tsam rog ntawd? Yos Nas Thas, koj tuag lawm, cas yuav mob kuv lub siab ua luaj no! Kuv tu siab vim koj, kuv tus kwv Yos Nas Thas! Kuv hlub koj tas nrho. Kuv nrog koj ua phooj ywg! Kuv tseem hlub koj heev dua hlub ib tug poj niam. Vim li cas cov tub rog thiaj li tuag? Vim li cas rab ntaj thiab rab hmuv thiaj poob ntawm lawv tes?”

Lub Moo Zoo raws li Mas Kos (MK 3: 20-21)

Yes Xus los tsev, ces rov muaj neeg coob tuaj sib sau, Yes Xus lawv tsis xyeej noj mov li. Yes Xus cov neeg hnov li ntawd, lawv tawm tuaj ntes nws, vim lawv hais tias “Nws tsis meej pem lawm.”

XYOO TAB: Cov lus nyob hauv tsab ntawv Hes Nplaws (HN 9: 15, 24-28)

Yog vim li ntawd mas Leej Pleev thiaj sawv peb chaw rov cog lus dua. Nws txoj kev tuag txhiv peb ntawm cov txhaum peb tau ua thaum kev cog qub lus kav. Cov neeg uas Ntuj hu, mas lawv yuav txais lub cuab tam uas Ntuj cog lus tias yuav pub. Leej Pleev chaws mus hauv ib lub tsev Ntshiab uas tsis yog neeg txhais tes txhim, thiab tsis yog ib lub tsev ua piv txwv txog lub saum ntuj: Leej Pleev mus saum ntuj lawm tiag. Leej Pleev thiaj tawm los nyob ntawm Tswv Ntuj xub ntiag, nws cev lus pab peb. Tsis tas Leej Pleev yuav rov cev nws rau Tswv Ntuj ob peb zaug, xws li tus tuam leej choj uas niaj xyoo nws yuav tsum rov mus cev ib co ntshav uas tsis yog nws cov ntshav nyob hauv Kem Ntshiab. Yog Leej Pleev tsuas ua leej choj xws li lwm cov xwb, mas txij ntuj tsim teb raug los nws yuav tsum raug txom nyem ntau zaus. Tab sis thaum txog lub zwj ceeb kawg, nws tawm los ib zaug xwb, nws los ua nws thaj txi Ntuj rhuav kev txhaum pov tseg. Leej tib neeg tsuas tuag ib zaug xwb, dhau qhov tuag lawm, yog lub caij txiav txim. Leej Pleev rov muab nws txi Ntuj ib zaug xwb, kom nws tau ris ib zeej tsoom cov txhaum. Nws yuav tawm rov los zaum ob: zaum ntawd, nws yuav tsis ris kev txhaum, nws yuav tawm los rau cov neeg tos nws, nws yuav cawm lawv.

XYOO TXOOJ: Cov lus nyob hauv phau ntawv Xas Muas Phau Ob (1XM 5: 1-7)

Cov xeem His Xas Lais tib si tuaj cuag Das Vis nyob Hes Nploos. Lawv hais rau nws tias “Peb nrog koj koom ib co pob txha ib ce nqaij. Yav thaud, Xas Ws ua vaj, twb yog koj coj His Xas Lais mus los. HUAB TAIS tau hais rau koj tias koj yuav coj kuv tsoom pej xeem His Xas Lais mus nog zaub. Koj yuav ua His Xas Lais tus tswv.” Tsoom txwj laus His Xas Lais thiaj tuaj cuag Das Vis nyob Hes Nploos. Tus vaj Das Vis nrog lawv cog lus nyob Hes Nploos, nyob ntawm Tswv Ntuj xub ntiag. Lawv pleev roj tsa Das Vis ua vaj His Xas Lais. Thaum Das Vis nce ua vaj, nws lub hnub nyoog muaj peb caug xyoo. Nws tswj lub teb chaws plaub caug xyoo. Nws ua vaj nyob Hes Nploos kav cov Yus Das xya xyoo thiab rau hli. Nws ua vaj nyob Yes Lus Xas Les kav cov His Xas Lais thiab cov Yus Das peb caug peb xyoos. Das Vis nrog nws pab tub rog sawv kev mus pem Yes Lus Xas Les, lawv mus ntaus cov Zes Npws uas ib txwm nyob txawm teb chaws ntawd. Cov Zes Npws hais rau Das Vis tias “Koj txhob tuaj teb chaws no! Tab yog cov dig muag thiab cov ceg tawv los, lawv yeej ntiab tau koj.” Tab sis Das Vis mus txeeb tau lub yeej Xis Yoos. Yog Das Vis lub tsheej.

Lub Moo Zoo raws li Mas Kos (MK 3: 22-30)

Cov thoob xwm uas tuaj pem Yes Lus Xas Les tuaj, lawv hais tias “Nws raug dab Npes Ntxes Npus.” Lawv tseem hais tias “Nws hu txog tus tuam thawj dab los ntiab dab tawm.” Yes Xus hu lawv los ntawm nws, ces nws ua paj lug hais rau lawv tias “Xas Tas yuav ua cas ntiab tau Xas Tas? Yog ib lub teb chaws rov ua kom nws sib tawg, mas lub teb chaws ntawd nyob tsis ruaj. Yog ib tse neeg rov ua kom nws sib tawg, mas lub tsev ntawd yuav nyob tsis tau. Ua li yog Xas Tas rov sawv tiv Xas Tas, mas nws tawg, ces nws yuav nyob tsis tau, nws kawg yuav piam sij tas. Tsis muaj leej twg nkag tau mus hauv tus neeg muaj zog tsev, mus lwg nws lub cuab tam, yog tsis xub muab tus muaj zog khi tso, mas nws yuav lwg tsis tau tus muaj zog lub tsev. Kuv hais tseeb rau nej, Ntuj yuav zam ib puas tsav yam txhaum rau neeg tej tub ki, tsis hais tej txhaum los tej lus thuam Ntuj lawv tau tsawm. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws ib zaug li: nws ua ib qho txhaum nyob mus li.” Vim lawv hais tias “Yes Xus raug ib tug dab tsis huv.”

XYOO TAB: Cov lus nyob hauv tsab ntawv Hes Nplaws (HN 10: 1-10)

Txoj Cai tsuas ua tus duab zeem txog tej yam nyob saum ntuj, tsis yog kiag tej yam ntawd, mas Txoj Cai thiaj ua tsis tau kom cov neeg uas tuaj cuag Tswv Ntuj zoo tiav, txawm tias lawv niaj xyoo txi Ntuj. Yog tias Txoj Cai ua tau kom neeg zoo tiav lawm, mas lawv yuav tsis txi Ntuj ntxiv, vim tias lawv txi ib zaug tas mas lawv tsis pom tias lawv muaj txhaum ntxiv lawm. Tiam sis niaj xyoo lawv txi Ntuj kom lawv rov nco txog lawv cov txhaum. Vim ntshav nyuj ntshav tshis daws txhaum tsis tau. Vim qhov ntawd, thaum Leej Pleev los nyob ntiaj teb no, nws thiaj hais tias “Tswv Ntuj, cov thaj txi Ntuj thiab cov paj tshab, mas koj tsis xav yuav; koj thiaj puab ib lub cev rau kuv. Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais. Kuv thiaj hais tias “Tswv Ntuj, kuv tuaj ua raws li koj nyiam, raws li kauj Ntawv sau hais txog kuv.” Leej Pleev xub hais tias “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis zoo siab txais: tej ntawd yog tej yam uas Txoj Cai qhia kom cev. Leej Pleev hais ntxiv tias “Kuv tuaj ua raws li koj nyiam.” Li ntawd, Leej Pleev rhuav thawj txoj cai, nws tsa ib txog tshiab los hloov. Vim nws tau ua qhov zoo no, mas peb thiaj ntshiab tuaj. Yes Xus Pleev cev nws lub cev ib zaug xwb, ces peb ntshiab mus li.

XYOO TXOOJ: Cov lus nyob hauv phau ntawv Xas Muas Phau Ob (1XM 6: 12-15, 17-19)

Luag hais rau Das Vis tias HUAB TAIS tso txoj hmoov zoo rau Os Npes Es Doos yim neeg thiab lub cuab tam tib si, vim Tswv Ntuj lub Xab Cog Lus nyob ntawd. Ces Das Vis mus, nws kom lawv coj Tswv Ntuj lub Xab Cog Lus hauv Os Npes Es Doos tsev mus rau saum Das Vis lub loog. Sawv daws zoo siab tas. Thaum cov nqa HUAB TAIS lub Xab mus kaum ruam kev lawm, mas Das Vis txi ib tug nyuj thiab ib tug yaj rog. Das Vis siv zog dhia ua si nyob ntawm HUAB TAIS xub ntiag, nws npua ib daig ntaub pag. Das Vis thiab tas tsoom His Xas Lais coj HUAB TAIS lub Xab Cog Lus los rau pem Yes Lus Xas Les, ces sawv daws qw suab thiab tshuab hom. Lawv coj HUAB TAIS lub Xab Cog Lus los nyob hauv lub Tsev Tsam Phooj uas Das Vis tau npaj txais lub Xab Cog Lus. Lawv tso lub Xab Cog Lus rau hauv lub tuam Tsev Tsam Phooj ntawd. Das Vis hlawv tsiaj txi Ntuj nyob ntawm HUAB TAIS xub ntiag, thiab nws ua tej thaj txi Ntuj uas sawv daws noj cov txim ua ke. Thaum Das Vis hlawv tsiaj thiab ua thaj txi Ntuj tas mas nws tuav txog HUAB TAIS lub npe los foom hmoov zoo rau cov His Xas Lais. Das Vis faib txhiam xws rau tsoom His Xas Lais, tsis hais txiv neej los poj niam huv tib si. Nws faib ib leeg ib lub mov, ib co txiv ntoo thiab ib lub ncuav qab zib. Tas ces sawv daws nyias rov mus nyias tsev.

Lub Moo Zoo raws li Mas Kos (MK 3: 31-35)

Yes Xus niam thiab nws cov kwv tij tuaj txog, lawv nyob nraum zoov, lawv kom luag mus hu Yes Xus. Muaj ib pab neeg zaum ncig Yes Xus, lawv hais rau nws tias “Koj niam nrog koj cov kwv thiab cov muam tuaj nyob nraud, lawv nrhiav koj.” Yes Xus teb rau lawv tias “Leej twg yog kuv niam? Leej twg yog kuv kwv tij?” Yes Xus ntsia cov neeg zaum ncig nws, nws hais tias “Kuv niam thiab kuv cov kwv tij nyob ntawm no. Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam.”

XYOO TAB: Cov lus nyob hauv tsab ntawv Hes Nplaws (HN 10: 11-18)

Cov leej choj niaj hnub sawv ntsug leg lawv txoj kab xwm, lawv rov cev cov thaj txi Ntuj ntau zaus, tab sis cov thaj txi Ntuj tsis muaj hwj huam daws txhaum tau. Hos Leej Pleev, mas nws tsuas cev thaj txi Ntuj daws txhaum ib zaug xwb, ces nws zaum ntawm Tswv Ntuj phab xis mus li. Nws tos kom Ntuj muab nws cov yeeb ncuab los ua rooj rau nws tiag taw lawm xwb. Leej Pleev tsuas cev paj tshab ib zaug xwb, ces nws ua tau kom cov uas nws tau ntxuav lawv huv lawd zoo tiav nto ntsis. Leej Ntuj Plig Ntshiab zeem tseeb li ntawd thiab, vim nws hais tias “Lub caij ntawd, kuv yuav nrog lawv cog lus zoo li no: Huab Tais hais tias kuv yuav tso kuv txoj cai lij choj rau hauv lawv lub siab, kuv yuav txaug kuv txoj cai lij choj rau hauv lawv lub tswv yim. Kuv yuav tsis nco txog lawv cov txhaum thiab lawv tej kev hla txoj cai.” Thaum Ntuj zam txhaum tas, mas tsis tas yuav rov ua thaj txi Ntuj them txhaum ntxiv.

XYOO TXOOJ: Cov lus nyob hauv phau ntawv Xas Muas Phau Ob (1XM 7: 4-17)

Hmo ntawd, Nas Taas hnov Tswv Ntuj lo lus no “Koj mus hais rau kuv tus tub txib Das Vis tias HUAB TAIS hais li no: Puas yog koj yuav txhim ib lub tsev rau kuv nyob txawm hauv? Txij hnub kuv tau coj tsoom His Xas Lais nyob Hais Nkws Tos teb los rau ntawm no los txog tav no, kuv tsis tau nyob hauv ib lub tsev ib zaug. Kuv tau tshais chaw mus li. Kuv kawg tau nyob hauv ib lub Tsev Tsam Phooj xwb. Tas lub zim txwv kuv tau nrog tas tsoom His Xas Lais tshais chaw mus los, kuv puas tau hais rau ib tug nom tswv His Xas Lais uas coj cov His Xas Lais kev tias ‘Ua cas nej tsis txhim ib lub tsev ntoo faj khaum rau kuv nyob?’ Nas Taas, nyem no koj mus hais rau kuv tus tub txib Das Vis tias HUAB TAIS Xas Npas Os hais li no: Kuv yog tus tau rho koj hauv cov tshav zaub thiab hauv nruab nrab pab yaj los tsa ua tus tswv saib kuv tsoom pej xeem His Xas Lais. Kuv tau nrog koj ua tas puas tsav yam hauj lwm. Kuv tau rhuav koj cov yeeb ncuab tib si nyob ntawm koj xub ntiag. Kuv yuav pub kom koj lub npe nto moo loj cuag li cov vaj loj tshaj nyob thoob tas ntiaj teb. HUAB TAIS yuav ua kom koj loj. HUAB TAIS yuav tsim ib tsev neeg los pub rau koj. Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb. Kuv yuav ua nws txiv, nws yuav yog kuv leej tub. Yog nws ua qhov phem, kuv yuav xuas ib tug pas los muab txim rau nws, kuv yuav ntaus nws xws li neeg ntaus neeg. Tab sis kuv yuav tsis thau kuv lub txiaj ntsim ntawm nws los xws li kuv tau thau tus xub ua vaj dua koj. Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.” Nas Taas qhia cov lus nws tau hnov ntawm HUAB TAIS los tib si rau Das Vis mloog.

Lub Moo Zoo raws li Mas Kos (MK 4: 1-20)

Yes Xus rov qhia dua nyob ntawm ntug dej ntuj. Ib pab neeg coob kawg sis sau nyob ze nws, nws thiaj nce mus hauv ib lub nkoj nyob saum dej ntuj, nws zaum hauv, hos tas ib tsoom neeg nyob saum av, tim ntug nqhuab. Yes Xus ua paj lug qhia ntau yam rau lawv. Thaum nws qhia lawv, nws hais tias “Nej mloog saib! Tus neeg tseb nplej tawm mus tseb. Thaum nws tseb, muaj ib co noob poob ntawm ntug kev, ces noog ya tuaj noj lawm. Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob. Thaum hnub tuaj ziab, cov yub ntsws tas, vim cov yub tsis muaj cag, ces cov yub cia li qhuav. Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus. Hos muaj ib co noob poob rau hauv thaj av zoo. Cov yub nplej ntawd hlob thiab huam, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub.” Ces Yes Xus hais tias “Leej twg muaj pob ntseg mloog, mas cia nws mloog.” Thaum Yes Xus nyob ntawm ib qho xu kev lawm, cov neeg nrog nws ua ke thiab Pab Kaum Ob nug nws txog cov paj lug ntawd. Yes Xus hais rau lawv tias “Ntuj pub cov lus tob qhia txog Tswv Ntuj lub Ceeb Tsheej rau nej. Hos cov neeg no, lawv nyob sab nraud, ces ib puas tsav yam yog paj lug rau lawv. Kom xwv lawv sib zog ntsia, los lawv tsis pom, lawv mloog ntsoov, los lawv tsis to taub, tsam lawv yuav tsum hloov siab, ces Ntuj ho yuav zam rau lawv.” Yes Xus hais rau lawv tias “Nej tsis to taub zaj paj lug no lod? Yog li, nej yuav ua cas to taub cov paj lug tas huv si? Tus tseb noob, nws tseb Lo Lus. Cov uas nyob ntawm ntug kev txais Lo Lus, yog cov neeg uas tau hnov Lo Lus. Tam sim ntawd, Xas Tas tuaj rho Lo Lus uas nyuam qhuav tseb rau hauv lawv. Cov uas txais cov noob tseb rau hauv thaj av pob zeb, yog cov neeg uas thaum lawv hnov Lo Lus, lawv zoo siab txais. Tab sis lawv tsis muaj cag nyob nruab siab, thiab lawv yog neeg tsis ruaj: thaum muaj kev txom nyem los kev raug luag hiam vim Lo Lus, mas lawv ntog tam sim ntawd. Tseem muaj ib co txais cov noob tseb rau hauv cov pos: yog cov neeg uas tau hnov Lo Lus. Tab sis ntiaj teb kev txob xeeb, nyiaj txiag kev ntxias, thiab lub siab ntshaw ntau yam txeem mus laum Lo Lus, ces Lo Lus txi tsis taus txiv. Hos cov uas txais cov noob tseb rau hauv thaj av zoo yog cov neeg uas hnov Lo Lus, lawv txais, thiab lawv txi txiv. Ib tug txi peb caug lub, ib tug txi rau caum lub, lwm tus txi ib puas lub.”

XYOO TAB: Cov lus nyob hauv tsab ntawv Hes Nplaws (HN 10: 19-25)

Kwv tij, peb tso siab lug tias peb muaj ib txog kev mus txog hauv lub tsev Ntshiab, vim Yes Xus cov ntshav. Yes Xus rhawv txoj kev tshiab, yog txoj kev muaj txoj sia rau peb taug: nws siv nws lub cev nqaij mus rhawv txoj kev ntawd. Ces peb muaj ib tug Leej Choj loj tas nrho saib Tswv Ntuj lub tsev. Ua li mas peb kav tsij nqa ib lub siab ncaj thiab ib lub siab ntseeg ruaj txav mus ze Tswv Ntuj, nqa ib lub siab huv tsis tsuas kev phem, coj ib lub cev ntxuav hauv dej ntshiab mus. Peb kav tsij tso siab lug lees khov kho, vim tus tau cog lus rau peb, nws pheej xeeb. Peb yuav muab siab rau sib hwm, sib txhib kom sib nyiam thiab ua tau cov hauj lwm zoo. Nej tsis txhob ncua mus nrog lub txoos sib sau, xws li tej tus tau ua kam los. Nej yuav tsum sib pab ua siab loj, vim nej yeej pom tias Tswv Ntuj lub Hnub Nyoog los txog ze lawm.

Lub Moo Zoo raws li Mas Kos (MK 4: 21-25)

Yes Xus hais rau lawv tias “Thaum yus taws ib lub teeb nqa los, yus puas muab txawb hauv qab txees los hauv qab txag? Tsis yog yuav muab txawb saum tus ncej teeb lod? Vim tsis muaj ib yam zais ntshis cia, uas yuav tsis tshwm rau luag pom, tsis muaj ib yam npog rawv uas yuav tsis tawm los rau luag paub. Leej twg muaj pob ntseg mloog, mas cia nws mloog!” Ces Yes Xus hais rau lawv tias “Nej ceev faj txog tej yam uas nej hnov! Ntuj yuav xuas lub tawb uas nej luj rov los luj rau nej, thiab Ntuj tseem yuav ntxiv rau nej. Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov nws muaj.”

XYOO TAB: Cov lus nyob hauv tsab ntawv Hes Nplaws (HN 10: 32-39)

Nej nco ntsoov txog hnub uas nej nyuam qhuav txais txoj kev pom kev: Thaum ntawd, nej tau ua siab ntev ris ntau hom kev txom nyem. Nej tau raug luag tsawm thiab luag hiam, los nej nrog cov uas raug tej ntawd koom ib lub siab. Nej tau mus hlub cov nyob hauv tsev loj faj. Luag tuaj lwg nej tej cuab yeej cuab tam, los nej zoo siab, vim nej paub tias nej muaj ib lub cuab tam zoo tshaj thiab yuav nyob mus li. Ua li mas nej yuav tsis txhob ntaus siab me. Vim nej yuav tau txais paj tshab loj. Nej yuav tsum ua siab ntev nyiaj ntxiv, mas nej thiaj ua tau raws li Tswv Ntuj lub siab nyiam, ces nej yuav tau txais raws li Tswv Ntuj cog lus. Vim tias “tshuav tsis ntev, tshuav tsis ntev li lawm, ces tus yuav tuaj, nws tuaj yuav txog, nws yuav tsis ncua ntev. Kuv tus neeg siab ncaj yuav muaj txoj sia vim nws ntseeg. Tab sis yog nws ntxeev siab mas kuv lub siab yuav tsis nyiam nws.” Peb li mas peb tsis yog cov yuav ncaim mus taug kev ploj. Peb yog cov ntseeg uas mus taug txoj kev cawm peb tus plig.

Lub Moo Zoo raws li Mas Kos (MK 4: 36-34)

Yes Xus hais tias “Tswv Ntuj lub Ceeb Tsheej zoo xws li ib tug neeg pov ib co noob rau nruab a. Nws txawm pw los nws sawv, hmo ntuj los nruab hnub, lub noob tuaj kaus thiab hlob, nws tsis paub tias lub noob hlob zoo li cas. Av xwb tim txawj xeeb kom hloov: xub ua yub tas, ua plab nab, ces nplej txhawv puv hnab. Thaum nplej siav, tus neeg ntawd xuas liag hlais tam sis ntawd, vim qoob siav lawm.” Yes Xus hais tias “Peb yuav muab Tswv Ntuj lub Ceeb Tsheej piv rau dab tsi? Thiab peb yuav ua paj lug qhia txog Tswv Ntuj lub Ceeb Tsheej zoo li cas? Tswv Ntuj lub Ceeb Tsheej yog zoo li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no. Tab sis thaum tseb tas lawd, lub noob hlob, nws siab dua lwm cov zaub huv si; nws ncau ceg deb, ces tej noog ya saum ntuj tau kev los nkaum hauv nws qhov ntxoov.” Yes Xus siv ntau hom paj lug zoo li no los qhia Lo Lus rau lawv, raws li lawv mloog tau. Tsis muaj ib yam uas nws tsis ua paj lug hais. Thaum tshuav cov thwj tim nrog nws nyob xwb, nws txhais txhua yam huv tib si rau lawv.

XYOO TAB: Cov lus nyob hauv tsab ntawv Hes Nplaws (HN 11: 1-2, 8-19)

Txoj kev ntseeg yog txoj kev zeem tau meej tias peb yuav txais yam uas peb tos txog. Kev ntseeg ua puav pheej tias yam uas peb tsis pom, yeej muaj tseeb tiag. Yog txoj kev ntseeg ua kom cov poj yawm txwv koob nto moo zoo. Yog vim Has Nplas Has ntseeg, mas nws thiaj mloog Ntuj hu nws kom sawv kev mus ib lub teb chaws uas nws yuav txais los ua nws lub cuab tam. Ces nws sawv kev, nws tsis paub tias nws yuav mus txog qhov twg. Yog vim Has Nplas Has ntseeg, mas nws thiaj tsiv mus nyob hauv thaj av uas yog pej kum neeg av, yog thaj av uas Ntuj cog lus tias yuav pub rau nws. Has Nplas Has ua neej nyob hauv tsev tsam phooj xws li His Xas Has thiab Yas Kos. Nkawd nrog Has Nplas Has txais Tswv Ntuj lo lus cog. Has Nplas Has tos txog lub tsheej muaj taw ntsa uas Tswv Ntuj yuav txhim thiab yuav tsa. Yog vim Xas Las ntseeg, mas tab nws txawm laus heev lawm, nws muaj peev xwm xeeb tub. Xas Las ntseeg tias tus tau cog lus rau nws, yuav tsis fav xeeb. Vim li ntawd, tus neeg uas twb yuav txog nws lub caij tuag tseem yug tau ib co xeeb ntxwv coob npaum li cov hnub qub nyob saum ntuj thiab cov suab zeb nyob ntawm ntug hiav txwv uas suav tsis txheeb. Cov neeg ntawd, thaum lawv tuag, lawv tseem tsis tau txais txhua yam uas Tswv Ntuj cog lus tias nws yuav pub. Tab sis yog vim lawv ntseeg, mas lawv nyob deb pom thiab tshua txog txhua yam ntawd, thiab lawv zeem tseeb tias lawv tsuas yog ib co pej kum neeg tuaj hla lub ntiaj teb no xwb. Lawv qhia li no kom pom tias lawv nrhiav ib lub teb chaws nyob. Yog lawv nco txog lub teb chaws uas lawv yug los, mas lawv tseem muaj caij rov mus nyob lawv qub teb qub chaw. Tab sis lawv tos txog ib lub teb chaws zoo dua, yog lub nyob saum ntuj. Vim li ntawd Tswv Ntuj tsis txaj muag cia lawv hu nws ua lawv tus Tswv Ntuj, ces nws npaj ib lub tsheej rau lawv tiag. Yog vim Has Nplas Has ntseeg, mas thaum Tswv Ntuj sim nws, nws cia li muab His Xas Has txi rau Ntuj, txawm tias His Xas Has yog nws tib leeg tub twm zeej. His Xa Has twb yog tus yuav txais tej yam uas Tswv Ntuj cog lus tias yuav pub. Tswv Ntuj twb hais txog His Xas Has tias ‘koj yuav muaj ib co xeeb ntxwv tawm ntawm His Xas Has.’ Has Nplas Has xav tias Tswv Ntuj tsa tau cov neeg tuag kom ciaj rov los. Ces Has Nplas Has rov tau nws tus tub. Zaj hais txog His Xas Has no yog ib zag paj lug.

XYOO TXOOJ: Cov lus nyob hauv phau ntawv Xas Muas Phau Ob (2XM 12: 1-7, 10-17)

HUAB TAIS xa tus Yaj Saub Nas Taas tuaj cuag Das Vis. Nas Taas chaws mus hauv Das Vis tsev, nws hais rau Das Vis tias “Muaj ob tug txiv neej nyob hauv ib lub nroog, ib tug yog neeg nplua nuj, ib tug yog neeg pluag. Tus nplua nuj muaj tsiaj txhu coob, muaj tsiaj loj tsiaj me, muaj nyuj muaj tshis coob kawg. Hos tus pluag nws kawg muaj ib tug yaj nkaus xwb uas nws muas los. Nws yug nws tus yaj ntawd hlob, nws cia tus yaj nrog nws thiab nws cov me nyuam nyob. Tus yaj nrog nws noj mov, nrog nws haus dej, nrog nws pw ua ib txag, cuag li yog nws tus ntxhais. Muaj ib tug qhua tuaj hauv tus nplua nuj tsev, tus nplua nuj tsis xav siv nws ib tug tsiaj los tua rau tus qhua noj. Ces nws mus nyiag tus pluag tus yaj los tua txais tus qhua ntawd.” Das Vis hnov Nas Taas lo lus, nws npau taws heev, nws hais rau Nas Taas tias “Yog HUAB TAIS muaj txoj sia tiag mas tus niag ua li ntawd tsim nyog tuag! Nws yuav tsum them tus yaj ntawd plaub npaug, vim nws tau ua phem thiab nws tsis txawj hlub neeg.” Nas Taas hais rau Das Vis tias “Tus neeg ntawd yog koj! Ua li mas txij no mus, hniav ntaj yuav tsis zam koj tsev neeg ntxiv lawm, vim koj tsis nco txog kuv. Koj coj tus His Tis Us Lis poj niam los ua koj poj niam. HUAB TAIS hais li no: Kuv yuav ua kom muaj ib co xwv txheej tawm hauv koj tsev neeg tuaj raug koj. Kuv yuav ua kom cov txheeb ze koj txeeb koj cov poj niam los ua lawv poj niam rau ntiaj teb neeg pom. Ntawm koj, mas koj nyiag zais ntshis ua txhaum, tab sis kuv yuav tab meeg ua tej yam ntawd kom tawm los rau tsoom His Xas Lais pom thiab rau lub ntiaj teb pom.” Ces Das Vis hais rau Nas Taas tias “Kuv ua txhaum rau HUAB TAIS lawm!” Nas Taas hais rau Das Vis tias “HUAB TAIS zam rau koj, koj yuav tsis tuag. Tab sis koj tau ua kom HUAB TAIS tu siab li no, mas koj tus me nyuam yuav tuag.” Nas Taas hais li ntawd tas nws rov mus lawm. HUAB TAIS tso xwv txheej tuaj rau Das Vis tus me nyuam uas yug ntawm Us Lis tus poj niam los. Tus me nyuam pib mob heev. Das Vis thov Ntuj rau nws tus me nyuam. Nws yoo tsis noj ib lub mov. Nws nyob hauv tsev. Hmo ntuj nws muab ib lub hnab tsaj pua nws pw xwb. Cov nom nyob hauv nws tsev, lawv sawv daws tuaj sawv ntsug ncig nws, xav tsa kom nws sawv, tab sis nws tsis kam. Nws tsis nrog lawv noj ib lub mov li.

Lub Moo Zoo raws li Mas Kos (MK 4: 35-41)

Hnub ntawd, thaum tsaus ntuj zuag, Yes Xus hais rau lawv tias “Peb hla mus sab ntug dej tid.” Ces lawv tso tsoom sid tseg. Lawv coj Yes Xus mus, nws cia li mus zoo li ntawd rau hauv nkoj. Muaj ib co nkoj nrog nws mus thiab. Muaj ib nthwv khaub zeeg cua loj kawg sawv tuaj. Dej nphau nphwv los rau hauv nkoj, ces lub nkoj twb puv dej tas lawm. Yes Xus nyob tom tw nkoj, nws tsaug zog saum lub hauv ncoo. Lawv tsa Yes Xus, lawv hais rau nws tias “Xib Hwb, peb yuav tuag, koj tsis quav ntsej lod?” Yes Xus tsim dheev, nws txwv cua, nws hais rau dej ntuj tias “Tswm seeb! Koj nyob twj ywm!” Ces cua tu nrho, dej ntuj rov tus yees. Yes Xus hais rau lawv tias “Ua cas nej ntshai ua luaj? Nej tseem tsis tau ntseeg lod? Lawv ntshai kawg, lawv sib tham hais tias “Tus ntawd yog leej twg? Txawm tias yog cua thiab dej ntuj los yeej mloog nws lus?”

XYOO TAB: Cov lus nyob hauv tsab ntawv Hes Nplaws (HN 11: 32-40)

Kuv yuav hais txog dab tsi ntxiv? Kuv tsis muaj sij hawm piav txog Zes Des Oos, Npas Las, Xas Xoos, Zes Faws Tes, Das Vis, Xas Muas thiab cov Yaj Saub. Vim lawv ntseeg, mas lawv thiaj ntaus rog yeej ntau lub teb chaws, lawv ua ncaj, lawv tau pom Tswv Ntuj ua raws li nws cog lus, lawv tau pav tsov lub qhov ncauj, lawv tua cov hluav taw kub hauv sab, lawv dim ntawm hniav ntaj, lawv yeej kev mob kev nkeeg, lawv rov muaj zog, lawv ua siab tawv qhawv ntaus tsam, lawv caum tsoom tub rog pej kum rov qab. Ib txhia poj niam tau pom lawv cov neeg tuag ciaj rov los. Hos ib txhia yeem cia luag rub lawv tes taw tu, tsis yeem thov luag kom tso, vim lawv tos txog ib lub caij sawv rov los muaj ib txog sia zoo dua. Hos lwm cov txaus siab cia luag thuam thiab luag nplawm, los cia luag pav lawv mus kaw hauv tsev loj faj. Lawv raug luag muab pob zeb txawb tua lawv, mag luag rab kaw txiav lawv, lawv raug ntaj tua tuag, lawv khiav rau ub rau no, lawv hnav tawv yaj tawv tshis, yoo tshaib yoo nqhis, tsis muaj hnav, lawv raug luag tsim txom, thiab raug luag hiam. Lub ntiaj teb twb tsis tsim nyog txais lawv, tsis kav lawv yuav tsum khiav nkaum pem tej toj siab teb xyw, pem tej roob, hauv tej qhov tsua, thiab tej qhov taub. Tas cov neeg ntawd puav leej nto moo vim lawv ntseeg. Tsis kav lawv tsis tau txais txhua yam zoo uas Tswv Ntuj cog lus tias yuav pub. Yog vim Tswv Ntuj npaj ib txog kev zoo tshaj tej ntawd rau peb, ua li mas yog lawv tsis nrog peb, lawv yuav mus txog qhov chaw uas txhua yam zoo txhij zoo txhua tsis tau.

XYOO TXOOJ: Cov lus nyob hauv phau ntawv Xas Muas Phau Ob (2XM 15: 13-14, 30, 16: 5-13)

Muaj ib tug neeg tuaj qhia Das Vis tias “Cov His Xas Lais cia siab rau As Ntxas Loos lawm.” Ces Das Vis hais rau nws cov thawj tub txib nyob Yes Lus Xas Les tias “Peb khiav mus! Yog tsis khiav mas peb yuav tsis dim ntawm As Ntxas Loos. Nej tsuag tsuag mus, tsam As Ntxas Loos tuaj ntaus peb sai, ces peb raug xwv txheej thiab nws yuav xuas ntaj tua tas lub nroog huv tib si.” Das Vis quaj nce phab toj pem Roob Txiv Ntoo Roj. Nws qhwv taub hau thiab mus ko taw do. Tas tsoom pej xeem sawv daws nrog nws nce mus pem lub roob. Lawv kuj muab ntaub npog taub hau thiab lawv quaj.Thaum Das Vis tuaj txog Npas Hus Lis, muaj ib tug txiv neej tawm tuaj. Nws yog Xas Ws xeem. Nws hu ua Xis Mes Is. Nws hais tej lo lus tsawm Das Vis. Nws txawb pob zeb rau Das Vis thiab rau Das Vis cov tub txib siab loj. Sawv daws thaiv tus vaj zoo, lawv thaiv ntawm nws sab xis thiab sab laug huv si. Xis Mes Is tsawm Das Vis tias “Khiav mus! Kav tsij khiav mus, Niag tes lo ntshav! Niag neeg tsis tsim txiaj! HUAB TAIS ua kom Xas Ws tsev neeg cov ntshav rov poob los tsuam koj, vim koj tau txeeb nws tus vaj ua. Nyem no HUAB TAIS thiaj cia koj tus tub As Ntxas Loos ua vaj. Nyem no koj yuav raug txom nyem vim koj tes lo ntshav.” As Npis Sais, hais rau tus vaj tias “Ua cas yuav cia niag dev tuag aws no tsawm tus vaj? Cia kuv mus txiav nws taub hau saib!” Tab sis Das Vis teb tias “Xes Lus Yas, kuv yog ib tug tsis muaj tsim dab tsi rau nej! Nws tsawm los ntshai yog HUAB TAIS hais rau nws tias ‘Koj tsawm Das Vis.’ Li ntawd, mas leej twg kuj hais tsis tau rau nws tias ‘Ua cas koj ua li ntawd?” Das Vis hais rau As Npis Sais thiab nws cov tub txib tias “Nej saib! Tus tub kuv yug kiag twb xav muab kuv tua, mas phim tus Npes Yas Mis ntawd haj yam yuav ntxub kuv! Nej cia nws tsawm kuv ntxiv. Ntshai yog HUAB TAIS qhib nws ncauj kom tsawm. Nyaj tej zaud HUAB TAIS yuav pom kuv txoj kev txom nyem ces nws yuav muab ib yam zoo los pauv cov lus tsawm uas hnub no kuv raug.” Ces Das Vis thiab nws cov neeg mus ntxiv.

Lub Moo Zoo raws li Mas Kos (MK 5: 1-20)

Lawv tuaj txog sab ntug dej ntuj tim ub, yog Nkes Las Xes teb chaws. Thaum Yes Xus nqes plhuav nkoj, tam sis ntawd, muaj ib tug neeg raug ib tug dab tsis huv tawm hauv cov ntxa tuaj cuag Yes Xus: Nws yeej nyob hauv cov ntxa, tab yog xuas saw hlau khi nws, los tsis muaj leej twg pav tau nws li, vim lawv twb muab saw hlau pav nws, rau cuab rau nws, tsis kav nws ua saw hlau tu tas, ua cuab lov tas, yeej tsis muaj leej twg muaj peev xwm tswj tau nws. Niaj hnub niaj hmo, nws nyob hauv ntxa thiab nyob pem tej roob, nws nqov ntuj tsis tseg, thiab nws muab pob zeb los hlais nws. Thaum nws pom Yes Xus tseem nyob deb, nws khiav tuaj tos, nws txhos caug ntawm Yes Xus xub ntiag, ces nws qw nrov nrov tias “Yes Xus, Tswv Ntuj Nyob Siab Leej Tub, koj xav ua dab tsi rau kuv? Kuv hu txog Tswv Ntuj los thov, koj txhob tsim txom kuv.”  Vim Yes Xus hais rau nws tias “Dab tsis huv, koj tawm ntawm tus neeg no mus!” Yes Xus nug nws tias “Koj lub npe hu ua li cas?” Nws teb tias “Kuv lub npe hu ua Npoj, vim peb coob kawg.” Nws thov Yes Xus heev kawg kom txhob ntiab nws tawm hauv lub teb chaws. Thaum ntawd, muaj ib pab npua coob coob tab tom noj zaub saum lub roob. Cov dab tsis huv thov Yes Xus tias “Koj xa peb mus hauv cov npua ntawd, cia peb nkag mus hauv cov npua.” Yes Xus tso lus rau lawv. Ces cov dab tsis huv tawm mus, lawv nkag hauv cov npua. Ces tas pab npua dhia puag saum tsag rau hauv dej ntuj. Pab npua ntawd kwv yees muaj ob txhiab tus, tuag tas rau hauv dej ntuj. Cov zov npua tso tes khiav, lawv mus qhia lub moo ntawd rau hauv nroog thiab hauv cov zos. Ces neeg tuaj mus xyuas saib muaj xwm zeej dab tsi. Thaum lawv tuaj txog ze ntawm Yes Xus, lawv pom tus neeg raug dab Npoj hnav ris tsho, thiab nws meej pem lawm, mas lawv ntshai. Cov uas tau pom, lawv piav txog qhov Yes Xus ua rau tus raug dab, hos pab npua raug li cas. Ces lawv thov Yes Xus kom txav mus deb ntawm lawv teb chaws. Thaum Yes Xus nce mus hauv nkoj, tus neeg raug dab thov kom Yes Xus cia nws nrog Yes Xus mus. Tab sis Yes Xus tsis kheev, nws hais rau tus raug dab tias “Koj rov mus tsev, rov mus nrog koj tsev neeg nyob, koj qhia lawv txog tas txhua yam uas Huab Tais tau ua rau koj thiab nws tau khuv leej koj li cas.” Tus raug dab rov mus, nws tshaj txhua yam uas Yes Xus ua rau nws nyob lub xeev Des Kas Pos Lis. Sawv daws qhuas kawg.

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus nyob hauv tsab ntawv Hes Nplaws (HN 12: 1-4)

Li ntawd, muaj tim khawv coob kawg nyob ncig peb, mas peb yuav muab txhua lub nra txo pov tseg, thiab muab tej kev txhaum uas thaiv peb kev xyeeb hlo pov tseg. Peb kav tsij dhia mus txais txoj kev sim siab uas Ntuj npaj rau peb. Peb yuav ntsia ntsoov Yes Xus uas yog tus ntaus thawj coj cov ntseeg. Nws pab peb ntseeg kom tom thawj. Yes Xus tsis kam taug txoj kev lom zem uas luag cev rau nws, nws yeem kwv ntoo cuam, nws tsis ntshai luag thuam, tsis ntshai poob ntsej muag. Nyem no nws zaum ntawm Tswv Ntuj lub theej kiab sab xis. Nej nco ntsoov txog Yes Xus uas raug cov neeg txhaum tiv nws, nej thiaj yuav tsis ntaus siab me. Nej tseem tsis tau tawm tsam tiv kev txhaum txog thaum nqaij ntuag ntshav nrog.

XYOO TXOOJ: Cov lus nyob hauv phau ntawv Xas Muas Phau Ob (2XM 18: 9-10, 14, 24-25, 30-19: 3)

As Ntxas Loos khiav mus thawj tau Das Vis ib co neeg. As Ntxas Loos caij ib tug luj, tus luj cia li chaws mus hauv ib tsob qab ntoo qhib loj ces As Ntxas Loos lub taub hau daig saum cov ceg qhib, nws dai viav vias nyob ib nta ntoo. Hos tus luj dhia mus lawm. Muaj ib tug neeg pom, nws mus hais qhia Yuas tias “Kuv nyuam qhuav pom As Ntxas Loos dai saum ib tsob ceg qhib.” Ces Yuas nqa peb rab hmuv, nws nkaug As Ntxas Loos hauv siab uas As Ntxas Loos tseem ciaj dai saum cov ceg qhib. Das Vis zaum nyob ze ntawm lub qhov rooj. Tus peeb zov yeej nce mus tuaj saum ntsa zeb ntsia, nws pom ib tug neeg khiav khiav los. Tus peeb qw rau tus vaj, tus vaj hais tias “Yog nws ib leeg xwb mas yog nws coj ib lub moo zoo los xwb.” Ces tus Kus Xis los txog ze ntawm tus vaj, nws hais rau tus vaj tias “Vaj, koj mloog lub moo no. Hnub no HUAB TAIS ua zoo rau koj, nws cawm koj ntawm cov neeg sawv ntxeev siab rau koj.” Tus vaj nug tus Kus Xis tias “Tus hluas As Ntxas Loos puas nyob zoo?” Tus Kus Xis teb tias “Xav kom HUAB TAIS cov yeeb ncuab thiab cov neeg xav ntxeev siab rau koj tau tuag xws li tus hluas ntawd!” Ces tus vaj Das Vis ib ce muag tas. Nws nce mus saum kem tsev siab, ces nws quaj quaj. Nws quaj hu quaj hu tias “Kuv me tub As Ntxas Loos! Kuv me tub! Kheev lam kuv sawv koj chaw tuag! As Ntxas Loos! Kuv tus me tub!” Lawv mus hais qhia Yuas tias “Tus vaj quaj quaj txog As Ntxas Loos.” Hnub ntawd lawv yeej, tab sis sawv daws zoo li ntoo xyom tas, vim cov tub rog hnov tias tus vaj quaj quaj txog nws tus tub.

Lub Moo Zoo raws li Mas Kos (MK 5: 21-43)

Thaum Yes Xus caij nkoj rov los txog sab ntug dej tim no, ib pab neeg coob tuaj sib sau ntsauv nws. Thaum ntawd, Yes Xus tseem nyob ntawm ntug dej ntuj. Muaj ib tug hauv cov tswj tsev txoos hu ua Yais Los tuaj txog. Thaum nws pom dheev Yes Xus, nws txhos caug ntua ntawm Yes Xus ko taw. Nws thov Yes Xus tias “Kuv tus me ntxhais txoj sia yuav tu, thov koj tuaj tsa tes cawm nws kom nws ciaj.” Yes Xus nrog Yais Los mus. Ib pab neeg coob raws Yes Xus mus thiab, lawv sawv daws txiv Yes Xus. Muaj ib tug poj niam tsob ntshav tau kaum ob xyoos los lawm. Ntau tus kws tshuaj tau ua kom nws txom nyem kawg. Nws siv tas nws lub cuab tam los kho tsis tau nws zoo. Nws mob heev zuj zus ntxiv. Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum. Nws kov Yes Xus lub tsho. Vim nws xav hauv siab tias “Tsuav yog kuv tau kov nws lub tsho xwb, mas kuv yeej yuav dim.” Ces tam sis ntawd, nws qhov tsob ntshav tu nrho, nws hnov nws lub cev zoo hlo ntawm tus mob. Tam sim ntawd, Yes Xus kuj hnov ib lub zog tawm hauv nws mus; ces Yes Xus tig los nug pab neeg ntawd tias “Leej twg kov kuv lub tsho?” Cov thwj tim hais rau nws tias “Koj ntsia saib, tas tsoom sid txiv koj txhua sab tuaj, koj tseem hais tias “Leej twg kov kuv?” Yes Xus ntsia ib ncig kom pom tus neeg uas tau kov nws. Ces tus poj niam ntshai, nws tshee tshee, vim nws paub qhov uas nyuam qhuav tshwm sim hauv nws. Nws los txhos caug ntawm Yes Xus taw thiab qhia qhov tseeb rau Yes Xus. Yes Xus hais rau tus poj niam tias “Phauj, koj lub siab ntseeg cawm koj lawm. Koj rov mus kaj siab lug, koj tus mob zoo lawm.” Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias “Koj tus ntxhais twb tuag lawm, koj tseem yuav txob Xib Hwb ua dab tsi?” Tab sis Yes Xus twb hnov lo lus lawv nyuam qhuav hais, nws hais rau tus tswj tsev txoos tias “Koj txhob ntshai, tsuav koj ntseeg xwb.” Yes Xus tsis kheev leej twg nrog nws mus li. Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. Lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo: ib txhia quaj, ib txhia qw nrov nrov. Yes Xus los hauv tsev, nws hais tias “Ua cas sawv daws ua ntxhov hnyo thiab quaj zom zaws? Tus me ntxhais tsis tuag, nws tsaug zog xwb.” Ces lawv luag Yes Xus. Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj, nyob xwb. Nws chaws mus hauv kem uas tus me nyuam nyob. Yes Xus tuav tus me nyuam txhais tes, nws hais rau tus me nyuad tias “Tas lis tas kus” txhais tias “Me ntxhais, kuv hais koj, koj sawv!” Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Tam sim ntawd, sawv daws ntshai kawg. Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus nyob hauv tsab ntawv Hes Nplaws (HN 12: 4-7, 11-15)

Nej tseem tsis tau tawm tsam tiv kev txhaum txog thaum nqaij ntuag ntshav nrog. Nej puas nco qab lo lus uas Ntuj hais rau nej xws li hais rau ib co tub tias “Me tub, koj txhob thuam Huab Tais lo lus qhuab. Thaum nws cob qhia koj, koj txhob ua siab me. Vim tias tus uas Huab Tais nyiam mas Huab Tais cob nws, thiab Huab Tais nplawm tus uas Huab Tais txais los ua nws tus tub.” Kev raug luag hiam, yog ib txog kev cob nej. Tswv Ntuj cob nej xws li nws cov tub. Puas muaj ib tug tub uas nws txiv tsis cob qhia nws? Txoj kev cob qhia yeej tsis ua kom leej twg zoo siab tam sim ntawd, tsuas muaj ua kom chim siab xwb. Tsuas yog yav tom ntej, mas txoj kev cob qhia thiaj txi txiv rau hauv txoj kev thaj yeeb thiab txoj kev ncaj. Ua li mas nej kav tsij rov tsa nej ob txhais tes tsaug leeg, rov sawv ntseg saum nej lub hauv caug ntshaus raws. Thiab nej ua kom tej kev nkhaus ncaj tuaj rau nej ob txhais taw, kom tus ceg tawv txhob lem ko taw, nws thiaj yuav zoo taus. Nej yeej meem nrhiav kom tau nrog sawv daws nyob thaj yeeb, thiab nrhiav txoj kev ntshiab. Yog tsis muaj kev ntshiab mas tsis muaj leej twg yuav pom tau Tswv Ntuj. Nej ceev faj kom txhob muaj ib tug tsis tau Tswv Ntuj lub txiaj ntsim, kom tsis txhob muaj ib tug cag iab hlav kaus tuaj tsim kev ntxhov thiab ua kom coob leej tsis huv.

XYOO TXOOJ: Cov lus nyob hauv phau ntawv Xas Muas Phau Ob (2XM 24: 2, 9-17)

Tus vaj hais rau Yuas uas yog nws tus thawj tub rog tias “Nej mus ncig xyuas cov xeem His Xas Lais txij Das mus rau Npes Xas Npes, nej txheeb cov neeg tas tib si, kom kuv paub meej saib muaj pes tsawg leej neeg.” Yuas mus txheeb neeg tas, nws los hais qhia rau Das Vis tias muaj pes tsawg leej. Cov His Xas Lais muaj yim pua txhiab leej tub rog uas lawv leeg muaj rab ntaj. Cov Yus Das muaj tsib puas txhiab leej. Das Vis kom Yuas txheeb neeg li ntawd tas mas Das Vis lub siab nyob tsis tus, nws hais rau HUAB TAIS tias “Kuv tau ua ib qho txhaum loj kawg! Nyem no, HUAB TAIS, thov koj zam rau koj tus tub txib, vim kuv tau yuam kev loj kawg.” Tag kis sawv ntxov, thaum Das Vis sawv los, tus Yaj Saub Nkas hnov HUAB TAIS lo lus qhia nws tias “Koj mus hais rau Das Vis tias HUAB TAIS hais li no: Kuv hais peb yam rau koj. Koj xaiv ib yam ces kuv yuav ua yam ntawd rau koj.” Ces tus Yaj Saub Nkas mus cuag Das Vis, nws hais rau Das Vis tias “Koj puas nyiam cia koj lub teb chaws tshaib plab xya xyoo? Los koj puas yeem swb cov yeeb ncuab peb hlis, cia koj khiav lawv? Los koj puas yeem cia koj lub teb chaws raug mob aws peb hnub? Nyem no, koj xav tswv yim ces koj thiaj hais saib kuv yuav teb dab tsi rau tus xa kuv tuaj.” Das Vis hais rau Nkas tias “Kuv nyuaj siab kawg! Ntshai yeem cia peb poob nyob hauv HUAB TAIS txhais tes zoo dua. Vim nws kheev hlub neeg kawg. Kuv tsis xav poob nyob hauv neeg txhais tes.” Ces Das Vis yeem xaiv tus mob aws. Thaum ntawd yog lub caij hlais nplej. HUAB TAIS tso aws los rau cov His Xas Lais txij thaum sawv ntxov mus txog lub caij nws teem. Tas sawv daws raug tus mob aws. Muaj xya caum txhiab leej neeg tuag nyob hauv lub teb chaws Das mus rau Npes Xas Npes. Tus Tshiab xyab tes tso aws mus rau Yes Lus Xas Les thiab. Tab sis HUAB TAIS ho rov khuv leej, nws hais rau tus Tshiab rhuav txoj sia tias “Txaus lawm! Nyem no koj nkaum koj txhais tes rov qab.” Tus Tshiab thiaj mus nyob ze ntawm As Laus Nas uas yog cov Zes Npws lub tshav ntaus nplej. Thaum Das Vis pom tus Tshiab uas tso aws tuaj rau tsoom pej xeem, Das Vis hais rau HUAB TAIS tias “Yog kuv tau ua txhaum, yog kuv tau ua tsis zoo xwb. Cov ntawd yog pab yaj. Lawv tsis tau ua phem dab tsi. Thov kom koj txhais tes ntaus kuv thiab kuv tsev neeg xwb mas!”

Lub Moo Zoo raws li Mas Kos (MK 6: 1-6)

Yes Xus tawm hauv qhov chaw ntawd mus, nws rov mus lub zos nws nyob hlob, cov thwj tim kuj nrog nws mus thiab. Hnub xas npas tos, Yes Xus qhia hauv tsev txoos. Muaj neeg coob tuaj mloog, lawv hnov nws cov lus, lawv qhuas, lawv hais tias “Nws tau tej ntawd qhov twg los? Lub siab thoob tsib thiab cov hwj huam yees ntxwv loj uas nws ob txhais tes ua, yog leej twg pub rau nws? Tus ntawd tsis yog tus kws ntoo, Mab Liab tus tub lod? Nws tsis yog Yas Kos, Yos Xes, Yus Das thiab Xis Moos lawv kwv tij lod? Hos nws cov muam, tsis yog cov nrog peb nyob ua ke lod? Yes Xus ua lawv poob siab. Ces Yes Xus hais rau lawv tias “Ib tug Yaj Saub, tsuas yog nyob hauv lub zos nws hlob, hauv nws cov txheeb ze thiab nws tsev neeg, mas luag thiaj saib nws tsis muaj nqis.” Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag ceg los tuag tes kom zoo. Nws xav tsis thoob txog qhov lawv tsis ntseeg. Yes Xus mus hauv cov zos nyob ib ncig, nws qhia lawv.

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus nyob hauv tsab ntawv Hes Nplaws (HN 12:18-19, 21-24)

Nej tsis tau txav mus ze ib yam uas nej kov tau, xws li cov hluav taws kub kub, twv huab dub, qhov tsaus ntuj nti, thiab cua daj cua dub, lub suab hom los tej suab hais lus nrov doog diaj. Cov thaum ub tau hnov, lawv thov kom txhob hais lus ntxiv rau lawv. Tej yam lawv pom ntawd txaus ntshai tas nrho. Mais Xes kuj hais tias “Kuv ntshai tshee na.” Tab sis nej, mas nej tau txav los ze lub roob Xis Yoos, ze tus Tswv Ntuj muaj txoj sia lub tsheej Yes Lus Xas Les saum ntuj, ze txhiab vam tus Tshiab uas sib txoos ua ntees lom zem, ze ib tsoom tub hlob uas muaj npe sau nyob saum ntuj, ze tus Tswv Ntuj txiav txim rau tas lub qab ntuj neeg, ze cov neeg ncaj cov plig uas Ntuj twb ua kom lawv zoo txhij zoo txhua tas. Nej tau txav los ze Yes Xus uas yog tus sawv peb chaw cog lus tshiab, yog tus tsuag nws cov ntshav uas txawj hais lus zoo dua As Npes cov ntshav.

Lub Moo Zoo raws li Mas Kos (MK 6: 7-13)

Nws hu Pab Kaum Ob los cuag nws, ces nws xa lawv ua tej pab ob leeg mus. Nws pub hwj huam ntiab dab tsis huv rau lawv. Yes Xus qhia lawv kom txhob nqa dab tsi taug kev li, tsuas nqa tib rab pas nrig xwb. Txhob ntim mov, txhob nqa hnab ruas, txhob ntim xim nyiaj rau hauv duav siv. Nws hais tias “Nej rau khau khiab xwb, txhob hnav ob lub tsho.” Yes Xus tseem hais rau lawv tias “Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab. Yog qhov chaw twg tsis txais nej, thiab luag tsis mloog nej, nej tso qhov chaw ntawd tseg, nej nchos cov plua av lo nej qab xib taws pov tseg, cia ua tim khawv txiav txim rau lawv.” Cov thwj tim tawm mus, lawv tshaj kom tsoom sid tig los hloov siab tshiab. Lawv ntiab ntau tus dab phem, thiab lawv muab roj los pleev ntau leej tuag tes tuag taw, thiab kho ntau tus neeg mob zoo.

• Lo lus ntuas xyoo tab.
• Lo lus ntuas xyoo txooj.

XYOO TAB: Cov lus nyob hauv tsab ntawv Hes Nplaws (HN 13: 1-8)

Nej yuav nyob ruaj mus li hauv txoj kev sib hlub xws li ib pab kwv tij. Nej nco ntsoov txog txoj kev txais qhua. Vim txoj kev txais qhua, mas cov neeg thaum ub thiaj tau txais tej tus Tshiab tuaj so hauv lawv tsev, lawv twb tsis paub tias yog Ntuj ib tug Tshiab. Nej nco ntsoov txog cov neeg nyob hauv tsev loj faj, ib yam li yog nej nrog lawv kaw rau hauv tsev loj faj. Nej nco ntsoov txog cov raug luag hiam, vim nej yog tib lub cev. Nej sawv daws yuav hwm lub neej ua txij ua nkawm, nej yuav txuag lub txaj ua txij ua nkawm tsis pub tsuas ib qho txhaum. Vim Tswv Ntuj yuav txiav txim rau cov ua dev ua npua, thiab cov zes luag txij luag nkawm. Nej yuav coj tus yeeb yam tsis ntshaw nyiaj txiag, kom nej txhob qaug rau kev phem. Nej muaj li cas mas nej yuav txaus siab yuav li ntawd. Vim Tswv Ntuj hais tias “Kuv yuav tsis ntiab koj, yuav tsis tso koj pov tseg.” Ces peb thiaj muaj cuab kav hais tias “Huab Tais yog kuv qhov chaw vam khom. Kuv tsis ntshai. Leej twg yuav ua tau dab tsi rau kuv?” Nej nco ntsoov txog nej cov thawj coj. Lawv tau tshaj Tswv Ntuj lo lus rau nej. Nej ntsia saib lawv lub neej mus tshwm rau qhov twg, ces nej yoog lawv txoj kev ntseeg mog! Yes Xus Pleev yog tus zoo li qub mus li: nws yog tus thaud, yog tus tam sim no, thiab yog tus yuav nyob mus li.

Lub Moo Zoo raws li Mas Kos (MK 6: 14-29)

Tus vaj Hes Los hnov hais txog Yes Xus, vim Yes Xus lub npe nto moo loj, ces luag tej hais tias “Zam Ntxuav Plig sawv hauv cov tuag rov qab los, vim li ntawd, cov hwj huam yees ntxwv thiaj tawm hauv nws tuaj.” Hos ib txhia hais tias ‘Yog Es Lias.’ Lwm cov hais tias ‘Yog ib tug yaj saub xws li tej yaj saub.’ Tab sis Hes Los hnov hais txog Yes Xus, nws hais tias “Yog tus Zam uas kuv txiav nws caj dab, nws sawv rov los.” Yog tim Hes Los Dias Hes, mas Hes Los thiaj xa neeg mus ntes Zam thiab muab saw hlau khi Zam rau hauv tsev loj faj. Hes Los Dias yog Hes Los tij laug Fis Lis Pos tus poj niam, tab sis Hes Los yuav los ua nws poj niam. Zam hais rau Hes Los tias “Koj tsis muaj cai yuav koj tij laug tus poj niam.” Ces Hes Los Dias ntxub Zam tas siab tas ntsws. Nws xav muab Zam tua, tab sis nws tua tsis tau, vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas nws ntxhov siab kawg. Hes Los kuj nyiam mloog Zam thiab. Muaj ib lub zoo sij hawm los txog, yog hnub tsuj xeeb Hes Los yug. Hes Los ua ib roog qav caw cov nom tswv hauv nws lub tuam tsev, cov thawj tub rog, thiab cov nom loj hauv xeev Nkas Lis Lais tuaj koom. Thaum ntawd, Hes Los Dias tus ntxhais chaws los dhia seev cev; nws dhia tau ntxim Hes Los thiab cov qhua koom rooj qav ntawd siab kawg. Ces tus vaj hais rau tus ntxhais tias “Koj thov saib koj xav yuav dab tsi, kuv yuav muab rau koj.” Ces tus vaj cog lus rau tus ntxhais tias “Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav!” Tus ntxhais tawm plaws mus nug nws niam tias “Kuv yuav thov dab tsi?” Leej niam hais tias “Zam Ntxuav Plig lub taub hau.” Tam sim ntawd, tus ntxhais rov ntsuj los ntawm tus vaj, nws hais tias “Kuv xav kom koj muab Zam Ntxuav Plig lub taub hau tso hauv ib lub phaj, cev rau kuv tam sim no.” Tus vaj tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. Ces tus vaj txib ib tug zov keeb tam sim ntawd, kom mus nqa Zam lub taub hau los. Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais. Tus ntxhais muab rau nws niam. Zam cov thwj tim hnov li ntawd, lawv tuaj kwv Zam lub cev mus tso rau hauv ib lub ntxa.

XYOO TAB: Cov lus nyob hauv tsab ntawv Hes Nplaws (HN 13: 15-17, 20-21)

Peb nrog Yes Xus cev ib thaj cav txiaj ntsim rau Tswv Ntuj txhua lub sij hawm: lub txiv uas txi ntawm peb lub ncauj yog tshaj Tswv Ntuj lub npe. Hais txog kev ua dej num pab luag tej thiab kev koom cuab yeej cuab tam, mas nej yuav tsis txhob hnov qab ua, vim Tswv Ntuj nyiam tej txoj kev txi Ntuj zoo li ntawd. Nej yuav mloog cov coj nej. Nej mloog lawv hais mog. Lawv saib nej tus plig, lawv yuav mus lees ntawm Ntuj tias lawv tau saib zoo li cas. Nej mloog lus kom lawv zoo siab coj nej, lawv thiaj tsis muaj chaw ntsaj chaw nroo: yog lawv nroo mas tsis muaj txiaj ntsim zoo los rau nej. Thov kom tus Tswv Ntuj pub kev thaj yeeb, tus tau coj peb tus Huab Tais Yes Xus Pleev hauv cov tub rov los, ua kom nej txawj leg txhua yam raws nraim nws lub siab xav. Thov kom Tswv Ntuj tso Yes Xus uas yog tus Thawj Tswv Zov Yaj, thiab yog tus tau muab nws cov ntshav ua lub cim cog lus nyob ib txhiab ib txhis, tuaj ua cov hauj lwm ntxim Tswv Ntuj siab nyob hauv nej. Lub koob meej nyob txhiab tiam mus dhau fab lwm txheej yog Yes Xus Pleev tug. Ua li.

Lub Moo Zoo raws li Mas Kos (MK 6: 30-34)

Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia. Ces Yes Xus hais rau lawv tias “Nej los rau ib qho chaw xu kev tsis muaj neeg, nej so me ntsis.” Vim cov neeg tuaj thiab cov rov mus coob, ces cov Hauv Paus Xa Lus tsis xyeej noj mov. Lawv thiaj caij nkoj mus rau ib qho chaw xu ke, tsis muaj neeg. Tsoom sid pom cov Hauv Paus Xa Lus caij nkoj mus, coob leej twb mem tau lawm. Ces sawv daws khiav ko taw hauv cov nroog tuaj mus. Lawv xub mus txog chaw. Thaum Yes Xus nqes nkoj, nws pom ib pab neeg coob, nws hlub lawv, vim lawv zoo li cov yaj uas tsis muaj tswv zov. Ces Yes Xus qhia lawv ntev loo.

XYOO TAB: HP 1: 1-19

Thaum chiv lub keeb, Tswv Ntuj tsim lub ntuj thiab lub ntiaj teb, mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej.  Tswv Ntuj hais tias “Kom muaj qhov pom kev.” Ces txawm muaj qhov pom kev tuaj. Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. Tswv Ntuj hu qhov pom kev ua “nruab hnub” thiab hu qhov tsaus ntuj ua “hmo ntuj.” Txawm muaj tsaus ntuj thiab muaj kaj ntug : yog thawj hnub. Tswv Ntuj hais tias “Kom muaj ib lub ntuj ntsuab nyob hauv nruab nrab cov dej thiab kom nws quas cov dej ntawm cov dej”. Ces txawm muaj li ntawd tuaj. Tswv Ntuj ua lub ntuj ntsuab los quas cov dej nyob hauv qab ntuj ntsuab ntawm cov dej nyob saum qaum ntuj ntsuab. Tswv Ntuj hu lub ntuj ntsuab ua “ntuj.” Txawm muaj tsaus ntuj thiab muaj kaj ntug : yog hnub ob. Tswv Ntuj hais tias “Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los.” Ces txawm muaj li ntawd tuaj. 10 Tswv Ntuj hu cov av qhuav ua “ntiaj teb” thiab hu cov dej ua “hiav txwv.” Tswv Ntuj pom tias qhov ntawd zoo. Tswv Ntuj hais tias “Kom lub ntiaj teb tuaj nroj tsuag ntsuab xiab; kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob.” Ces txawm muaj li ntawd tuaj. Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. Txawm muaj tsaus ntuj thiab muaj kaj ntug : yog hnub peb. Tswv Ntuj hais tias “Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo, kom tej lub ci ci nyob saum lub ntuj ntsuab ua kom ntiaj teb pom kev.” Ces txawm muaj li ntawd tuaj. Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. Tswv Ntuj muab lawv txawb rau saum lub ntuj ntsuab saud kom ntiaj teb pom kev, cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. Txawm muaj tsaus ntuj thiab muaj kaj ntug : yog hnub plaub.

MK 6: 53-56

Cov thwj tim hla dhau dej ntuj, lawv tuaj txog Nkes Nes Xas Les, lawv nqes nkoj. Thaum lawv nqes plhuav nkoj, muaj neeg cim tau Yes Xus tam sis ntawd. Cov neeg uas cim tau Yes Xus khiav thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj lev tuaj rau Yes Xus. Lawv hnov luag hais tias Yes Xus nyob qhov twg, mas lawv kwv cov neeg mob tuaj rau ntawd. Yes Xus mus txhua txhia qhov chaw, hauv cov zos, cov nroog, thiab cov tsev twj cuab, lawv coj neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, tab yog kov nws tw tsho xwb kuj tau. Cov neeg uas tau kov Yes Xus puav leej dim ntawm lawv tus mob.

XYOO TAB: HP 1: 20-2: 4A

Tswv Ntuj hais tias “Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab.” Ces txawm muaj li ntawd tuaj. Tswv Ntuj tsim cov nab hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. Tswv Ntuj foom lus zoo rau lawv tias “Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb.” Txawm muaj tsaus ntuj thiab muaj kaj ntug : yog hnub tsib. Tswv Ntuj hais tias “Kom lub ntiaj teb txawj muaj tej yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom.” Ces txawm muaj li ntawd tuaj. Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo. Tswv Ntuj hais tias “Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av.  Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. Tswv Ntuj foom lus zoo rau nkawd thiab hais rau nkawd tias “Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av.” Tswv Ntuj hais tias “Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj.” Ces txawm muaj li ntawd tuaj. Tswv Ntuj ntsia tas txhua yam nws tau ua : txhua yam ntawd zoo kawg. Txawm muaj tsaus ntuj thiab muaj kaj ntug : yog hnub rau. Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua nws txoj num tiav tas. Tswv Ntuj foom lus zoo rau hnub xya thiab muab hnub xya ua hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so. Zaj kwv huam piav txog lub ntuj thiab lub ntiaj teb, thaum ntuj tsim teb raug, mas yog zoo li saum no.

MK 7: 1-13

Cov fas lis xais thiab tus puav kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus. Lawv pom tus puav thwj tim xuas tes tsis huv noj mov, yam li lawv tsis xub ntxuav tes, vim tias cov fas lis xais, thiab tas cov Yus Das huv tib si, mas lawv tsis noj mov yog lawv tsis xub ntxuav tes zoo zoo tso. Thaum lawv mus kav kiab kav khw rov los, yog lawv tsis tau xub pov dej rau tso, mas lawv tsis noj mov. Tseem muaj ntau yam uas cov Yus Das ua raws li tej laus qhia kom ua : ntxuav khob, ntxuav hub, thiab ntxuav tais tooj dag. Vim li ntawd, cov fas lis xais thiab cov kws Ntawv Ntshiab thiaj nug Yes Xus tias “Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov?” Yes Xus hais rau lawv tias “Neeg zoo sab nraud, His Xais hais raug nej kawg, Ntawv thiaj sau tseg tias : Haiv neeg no tsuas hwm kuv saum di ncauj, lawv lub siab nyob deb kuv. 7 Lawv lam teev kuv dag, lawv muab neeg tej kab ke los nthuav xws li yog Ntuj lus qhia! Nej tso Tswv Ntuj lo lus qhia tseg, nej muab nej khi rau neeg tej kev cai.” Thiab Yes Xus hais rau lawv tias “Nej rhuav Tswv Ntuj lo lus qhia pov tseg, nej coj tej laus cov kab ke. Mais Xes yeej tau qhia tias : Koj yuav hwm koj niam koj txiv : tus tsawm niam tsawm txiv, yuav raug lub txim tuag!  Tab sis nej, mas nej hais tias : Yog ib tug hais rau nws niam nws txiv tias cov nyiaj txiag uas yuav muab los pab koj, mas yog -kos npas- txhais tias muab qee rau Ntuj lawm, ces nej tsis hais kom nws ua dab tsi ntxiv rau nws niam nws txiv. Nej muab tej kab ke nej txais ntawm tej laus los rhuav Tswv Ntuj lo lus. Nej tseem ua ntau yam ntxiv zoo li ntawd!”

Nthuav

XYOO TAB: HP 2: 4B-9, 15-17

Thaum lub caij HUAB TAIS Tswv Ntuj tsim lub ntiaj teb thiab lub ntuj, tseem tsis tau muaj ib tug me yub ntoo, ib tug nroj tsuag tuaj li, vim HUAB TAIS Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av. Tab sis muaj dej txhawv hauv av los ywg tas nrho daim npoo av. HUAB TAIS Tswv Ntuj muab ib thooj av nplaum los puab ua tib neeg. HUAB TAIS Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia. HUAB TAIS Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj. HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem. HUAB TAIS Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj. HUAB TAIS Tswv Ntuj qhia tus txiv neej li no “Koj noj tau cov txiv txi ntawm tas txhua tsob ntoo hauv lub vaj no tib si. Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj hnub twg, mas hnub ntawd koj yuav tuag.”

MK 7: 14-23

Yes Xus rov hu tsoom sid los ntawm nws, ces nws hais rau lawv tias “Tas nej sawv daws, nej mloog kuv kom nej to taub mog! Tsis muaj dab tsi nyob sab nraum neeg lub cev, uas nkag rau hauv neeg, yuav ua kom neeg tsis huv. Yam ua kom neeg tsis huv yog yam tawm hauv neeg los.  Thaum Yes Xus rov los tsev thiab nyob nrug deb ntawm tsoom sid, cov thwj tim nug Yes Xus txog zaj paj lug ntawd. Yes Xus hais rau lawv tias “Nej tsis muaj tswv yim li thiab lod? Nej tsis to taub tias tej yam nyob sab nraum no, nkag rau hauv neeg ua tsis tau kom neeg tsis huv.  Vim tias tej yam ntawd tsis nkag mus hauv neeg lub siab, tsuas nkag rau hauv plab, tas ces tawm mus rau nraum chaw plob.” Yes Xus hais tias “Yam uas tawm hauv neeg los yog yam ua kom neeg tsis huv. Vim tej yam phem uas txhawv hauv neeg nruab siab los yog : kev ua dev ua npua, ua tub sab, tua neeg, deev luag txij nkawm, cuaj khaum, lim hiam, ua cuav, ntxias luag ua plees ua yi, ntshaw, xyav luag moo, muab hlob, ywj fab ywj fwj. Txhua hom kev phem no tawm sab hauv los, mas thiaj ua kom neeg tsis huv.”

XYOO TAB: HP 2: 18-25

HUAB TAIS Tswv Ntuj hais tias “Cia txiv neej nyob ib leeg mas tsis zoo. Kuv yuav ua ib tug pab nws kom phim nws.” HUAB TAIS Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj yuav muaj lub npe raws li tus txiv neej tis rau. Tus txiv neej tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis nws nrhiav tsis tau ib tug pab nws thiab phim nws. HUAB TAIS Tswv Ntuj tso ib tug dab ntub hlob laum tus txiv neej, ces nws tsaug zog lawm. Tswv Ntuj rho nws ib tug tav tawm los, nws rov kaw lub qhov zoo li qub. HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam. Tswv Ntuj coj los rau tus txiv neej saib. Tus txiv neej nqua suab hlo tias “Zaum no, tus no yog tseem txha ntawm kuv txha thiab tseem nqaij ntawm kuv nqaij tiag ! Tus no yuav hu ua ‘poj niam,’ vim tus no tawm ntawm txiv neej los!” Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb. Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd ib leeg tsis txaj muag rau ib leeg.

MK 7: 24-30

Yes Xus sawv kev ntawd mus rau Tws Los xeev ntuj. Nws mus hauv ib lub tsev, nws tsis xav kom muaj neeg paub, tab sis nws tsiv nraim tsis tau. Tam sim ntawd, muaj ib tug poj niam uas nws tus ntxhais raug ib tug dab tsis huv, nws tau hnov luag hais txog Yes Xus, nws tuaj txhos caug ntawm Yes Xus taw. Tus poj niam ntawd yog ib tug Hes Las, yug los nyob Xis Lias Fes Nis Xias xeev ntuj, nws thov kom Yes Xus ntiab tus dab tawm hauv nws tus ntxhais. Yes Xus hais rau nws tias “Koj cia cov me nyuam noj kom tsau tso, vim yuav muab cov me nyuam cov mov los pub me nyuam dev noj mas tsis zoo.” Tab sis tus poj niam teb rau Yes Xus tias “Huab Tais, yog li koj hais! Tab sis, cov me nyuam dev nyob hauv qab rooj, lawv noj tej tsig mov poob ntawm cov me nyuam neeg los.” Ces Yes Xus hais rau tus poj niam tias “Vim koj hais lo lus no, koj rov mus mog, tus dab twb tawm hauv koj tus ntxhais lawm.” Tus poj niam rov mus txog tsev, nws pom tus me nyuam pw saum txaj, tus dab tawm lawm.

XYOO TAB: HP 3: 1-8

Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias “Li ntawd, Tswv Ntuj hais tias neb yuav tsis txhob noj txhua yam txiv ntoo hauv lub vaj no puas yog?” Tus poj niam teb rau tus nab tias “Wb noj tau cov txiv txi saum cov ntoo hauv lub vaj no tib si. Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias “Neb tsis txhob noj, tsis txhob kov, yog neb noj neb kov, mas neb yuav tuag.” Tus nab teb ntua tus poj niam tias “Tsis muaj li ntawd ib zaug! Neb yuav tsis tuag. Vim Tswv Ntuj paub tias hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.” Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua. Thaum cua tuaj ntxiag, nkawd hnov HUAB TAIS Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim HUAB TAIS Tswv Ntuj hauv cov ntoo nyob hauv lub vaj.

MK 7: 31-37

Yes Xus tso Tws Los teb tseg, nws taug txoj kev hla Xis Doos mus rau dej ntuj Nkas Lis Lais, uas nyob hauv xeev Des Kas Pos Lis. Luag coj ib tug neeg lag ntseg, hais lus txhav qhi, tuaj rau Yes Xus. Lawv thov kom Yes Xus tsa tes rau saum nws. Yes Xus coj nws tawm ntawm tsoom sid mus rau ib cag, Yes Xus muab nws ntiv tes ntxig rau tus lag ntseg ob lub qhov ntsej, nws muab aub ncaug pleev tus neeg ntawd tus nplaig. Yes Xus tsa muag ntsia saum ntuj, nws xyu ib suab, nws hais rau tus lag ntseg tias “Es fas tas,” txhais tias “Koj qhib los.” Tus lag ntseg ob lub qhov ntsej qhib hlo, hos cov hlua khi nws tus nplaig kuj plam plaws tam sim ntawd, ces nws hais lus meej. Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj. Qhov ntawd raug lawv siab tshaj txhua yam, ces lawv hais tias “Nws ua tau ib puas tsav yam zoo : nws ua kom cov lag ntseg hnov lus, thiab ua kom cov nplaig txhav hais lus tau.”

XYOO TAB: HP 3: 9-24

HUAB TAIS Tswv Ntuj hu tus txiv neej hais tias : “Koj nyob qhov twg ?” Tus txiv neej teb tias “Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim.” Tswv Ntuj rov hais ntxiv tias “Leej twg qhia koj tias koj liab qab? Yog koj noj lub txiv uas kuv txwv tsis pub noj lawm puas yog?” Tus txiv neej teb tias “Yog tus poj niam uas koj tso nyob ze kuv, muab lub txiv rau kuv, ces kuv thiaj noj!” HUAB TAIS Tswv Ntuj hais rau tus poj niam tias “Koj ua dab tsi li ntawd?” Tus poj niam teb tias “Yog niag nab ntxias kuv, kuv thiaj noj.” Ces HUAB TAIS Tswv Ntuj hais rau tus nab hais tias “Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws.” Tswv Ntuj hais rau tus poj niam hais tias “Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj.” Tswv Ntuj hais rau tus txiv neej hais tias “Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj! Koj yuav siv zog khwv tas koj lub neej koj thiaj tau noj. Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb. Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj.” Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam. HUAB TAIS Tswv Ntuj muab tawv los ua tsoos rau tus txiv neej thiab nws poj niam hnav. Thiab HUAB TAIS Tswv Ntuj hais tias “Zaum no tib neeg zoo li peb lawm, nws paub qhov phem thiab qhov zoo. Yuav tsis pub kom nws cev tes mus de tau tsob txiv muaj txoj sia los noj ntxiv, tsam nws muaj txoj sia nyob mus li.” HUAB TAIS Tswv Ntuj thiaj tshem neeg tawm hauv lub vaj Es Dees, kom neeg mus cog cov av uas muab los puab nws. Tswv Ntuj ntiab tib neeg tawm, nws tso ib co Tshiab Kes Lus Npis zov lub vaj Es Dees. Tswv Ntuj tsa ib rab ntaj nplaim taws thaiv txoj kev mus txog tus ntoo muaj txoj sia.

MK 8: 1-10

Lub sij hawm ntawd, rov qab muaj dua ib pab neeg coob, lawv tsis muaj dab tsi noj. Yes Xus hu cov thwj tim los, nws hais rau lawv tias “Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj. Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb tuaj.” Cov thwj tim teb rau Yes Xus tias “Qhov chaw no, tsis muaj neeg nyob, yuav muab mov qhov twg rau cov neeg ntawd noj kom tsau? Ces Yes Xus nug lawv tias “Nej muaj pes tsawg lub ncuav mov?” Lawv hais tias “Xya lub.” Yes Xus kom tsoom sid zaum pem teb. Nws tuav xya lub ncuav mov, nws ua Ntuj tsaug, nws muab cov ncuav mov ntais, nws cev rau cov thwj tim kom nqa mus rau sawv daws. Ces cov thwj tim muab rau pab neeg ntawd noj. Lawv muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus rau sawv daws noj thiab. Lawv noj tsau tas, sawv daws khaws tej sab mov seem : tau xya tawb! Cov neeg ntawd kwv yees muaj plaub txhiab leej. Ces Yes Xus kom lawv rov mus tsev. Yes Xus nrog cov thwj tim nce mus hauv nkoj tam sis ntawd. Nws mus rau thaj tsam Das Mas Nus Thas.

(MK 10: 17-27)
Thaum Yes Xus yuav sawv kev mus, muaj ib tug neeg khiav los txhos caug ntawm Yes Xus xub ntiag, nws nug tias “Xib Hwb siab zoo, kuv yuav ua dab tsi thiaj yuav tau txais txoj sia nyob mus li los ua cuab tam?” Yes Xus hais rau nws tias “Vim li cas koj hais tias kuv siab zoo? Tsis muaj leej twg siab zoo, tsuas kawg Tswv Ntuj tib leeg xwb. Koj paub cov lus qhia tias koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob ua luam cuav, hwm koj niam koj txiv.” Tus neeg ntawd teb rau Yes Xus tias “Xib Hwb, txij thaum kuv yav hluas los, kuv yeej coj raws nraim li ntawd.” Yes Xus ntsia nws, ces Yes Xus nyiam nws. Nws hais rau tus neeg ntawd tias “Tsuas tshuav ib yam xwb koj tsis tau ua; koj mus, koj muab koj lub cuab tam muag, muab tus nqi pub rau cov pluag, koj yuav tau ib lub cuab tam muaj nqis nyob saum ntuj. Ces koj los raws kuv.” Tus neeg ntawd hnov lo lus no, nws lub ntsej muag ntshaus tas, ces nws rov mus tu siab nrho, vim nws muaj cuab yeej cuab tam ntau. Ces Yes Xus ntsia ib ncig nws, nws hais rau cov thwj tim tias “Cov neeg nplua nuj mus hauv Tswv Ntuj lub Ceeb Tsheej mas nyuaj npaum no!” Cov thwj tim yoob tas rau cov lus no. Tab sis Yes Xus rov hais rau lawv tias “Kuv cov me nyuam, kev mus hauv Tswv Ntuj lub Ceeb Tsheej mas yeej nyuaj npaum no! Ib tug ntxhuav yuav nkag hauv lub qhov koob yooj yim dua ib tug nplua nuj nkag mus hauv Tswv Ntuj lub Ceeb Tsheej.” Cov thwj tim yim huab yoob heev. Lawv sib tham tias “Leej twg thiaj yuav txais kev cawm?” Yes Xus ntsia lawv, nws hais tias “Yog neeg ua neeg xwb, mas yeej tsis tau li, tab sis Tswv Ntuj ua tau. Vim Tswv Ntuj ua tau tas ib puas tsav yam.”

LUS NTUAS
Hnub no peb hnov hais tias muaj ib tug hluas xav tau txoj sia nyob mus li ces nws thiaj tuaj thov Huab Tais Yes Xus pab qhia rau nws paub. Lo lus Huab Tais Yes Xus hais rau nws mas yog lo lus tias “Koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob ua luam cuav, hwm koj niam koj txiv.”
Peb pom tias cov lus Huab Tais Yes Xus hais no yog nyob hauv Huab Tais 10 Lo Lus Qhia.
Tus hluas hnov cov lus no mas nws hais tias txij thaum yau los mas nws yeej coj rawv cov lus ntawd tag tib si. Huab Tais Yes Xus hnov tus hluas cov lus mas Huab Tais Yes Xus nyiam nws vim nws yeej yom ib tug neeg zoo tiag thiab nws yeej nyiam Tswv Ntuj tiag mas nws thiaj ua tau raws li cov lus qhia.
Huab Tais Yes Xus xav kom nws ua ntau dua qhov ntawd, xav kom nws tau txais paj tshab ntau dua txoj sia nyob mus li; yog Tswv Ntuj lub Ceeb Tsheej, ces Huab Tais Yes Xus thiaj hais kom nws los raws Huab Tais Yes Xus qab.
Tus raws tau Huab Tais Yes Xus mas nws yuav tso txhua yam tseg raws li lo lus Huab Tais Yes Xus hais rau tus hluas no tias “Koj mus, koj muab koj lub cuab tam muag, koj muab tus nqi pub rau cov pluag ces koj los raws kuv.”
Thaum tus hluas hnov li no mas nws ua ntsej muag ntshaus tas vim nws tseem tso siab rau nws lub cuab tam, nws tseem muab nws khi rau cov cuab tam, nws ua siab tso tsis tau.
Zaj no zoo qhia peb tias txojsia nyob mus li tsis yog tus raws Huab Tais Yes Xus xwb thiaj yuav tau, tus neeg zoo hwm ntuj hwm neeg mas nws yeej tau txais txoj sia nyob mus li ib yam li tus neeg raws Huab Tais Yes Xus.
Tab sis tus yuav tau Tswv Ntuj lub Ceeb Tsheej los ua nws tug, kawg yog tus txiav siab tso txhua yam khi nws cia pov tseg, nws tsis muab qhov ub qhov no los ua chaw khuam nws cia, nws tsuas tso siab rau Huab Tais Yes Xus thiab zoo siab pub yam nws muaj rau tus tsis muaj.
Hnub no, peb hais tias peb ntseeg txog Yes Xus, txhais tias peb tso siab rau Huab Tais Yes Xus, peb raws Huab Tais Yes Xus qab lawm tiag; yog li peb puas tseem saib lwm yam loj thiab tseem ceeb dua Huab Tais Yes Xus, peb puas muaj ib lub siab nyiam luag tej ib yam li peb nyiam peb tiag.
Huab Tais Yes Xus hais tias kev mus hauv Tswv Ntuj lub Ceeb Tsheej yog ib yam nyuaj kawg rau tib neeg tab sis kuj yooj yim kawg rau tus neeg qhib siab txais Huab Tais Yes Xus thiab tso siab rau Huab Tais Yes Xus xws li cov me nyuam.
Li ntawd mas kwv tij Hmoob, peb ua neeg zoo mas peb tau txoj sia nyob mus li lawm, peb tsum nrhiav Tswv Ntuj lub Ceeb Tsheej thiab mas thiaj tsim nyog rau peb txoj sia nyob mus li mog.

(MK 10: 28-31)
Pob Zeb hais rau Yes Xus tias “Peb, mas peb tso ib puas tsav yam tseg, peb los raws koj.” Yes Xus hais tias “Kuv hais tseeb rau nej, tsis muaj ib tug neeg uas tau tso vaj tse, kwv tij, muam, niam thiab txiv, me tub me nyuam, thiab liaj teb tseg vim kuv thiab vim lub Moo Zoo, uas yuav tsis tau txais ib puas npaug ntawm vaj tse, kwv tij, muam, niam, txiv, me tub me nyuam, liaj teb, ntxiv rau kev raug luag hiam txij hnub ntawd mus, thiab lwm tiam, nws yuav txais txoj sia nyob mus li. Coob leej ua luag ntej, yuav tuaj puag tom qab. Hos coob leej ua luag qab, yuav ua ntej.”

LUS NTUAS
Hnub no peb tau hnov Yes Xus lub Moo Zoo yog ib co lus Huab Tais Yes Xus hais meej thiab tseeb kawg tias “Tus tso txhua yam tseg ces nws los raws kuv, tus ntawd yuav tau txais rov ib puas npaug ntxiv rau kev raug luag hiam thiablwm tiam nws yuav tau txais txoj sia nyob mus li.”
Txhais tias tus neeg ua Yes Xus thwj tim mas lawv nthuav law lub siab dav mus hlub tas sawv daws, lawv saib txhua tus neeg yog lawv tsev neeg, lawv kwv tij tsis yog cov koom niam koom txiv, koom ib caj ces nrog lawv xwb; tab sis yog tas txhua tus neeg Tswv Ntuj tau tsim los. Tus ua Yes Xus thwj tim nws tau txais qhov no nyob rau lub neej tiam no, thiab muaj ib yam nws yuav tau txais ntxiv; yog txoj kev raug hiam.
Yog nej nyeem los yog mloog Ntawv Moo Zoo tsis tu ncua mas nej yuav pom tias Huab Tais Yes Xus hais 3 zaug tias nws yuav raug cov txwj laus hiam thiab tua nyob pem Yes Lus Xas Les. Txog qhov kawg muaj li ntawd, Huab Tais Yes Xus raug ntes, raug tsim txom, raug hiam thiab muab dai tuag saum ntoo cuam. Yog li mas tus neeg raws Huab Tais Yes Xus, mas nws kuj yuav raug zoo tib yam li ntawd.
Txhua zaus Huab Tais Yes Xus hais txog nws kev tuag, mas nws kuj yuav xaus rau qhov tias hnub peb nws yuav rov sawv los txais txoj sia tshiab nyob mus li. Qhov no yog ib lo lus zeem tseeb rau cov neeg raws Huab Tais Yes Xus kom lawv vam khom tias tom qab tej xwm phem dhau mus mas lawv yuav txais qhov zoo tshaj ua lawv paj tshab.
Tab sis yog tus twg nws tsis yeem ris kev raug hiam vim Yes Xus lub npe mas tus ntawd kuj yuav tsis tau txoj sia tshiab, Huab Tais Yes Xus thiaj hais tias “Coob leej ua luag ntej yuav tuaj tom qab, coob leej ua luag qab yuav tuaj tom ntej.”
Nyob rau lub neej nyem no peb pom tseem muaj ntau qhov chaw cov neeg ntseeg txog Yes Xus raug hiam raug tua tsis tseg, tab sis kuj muaj ntau qhov chaw cov ntseeg nyob sov siab tsis raug kev iab hiam, yog li mas lawv puas yuav hais tau tias lawv raws Huab Tais Yes Xus qab taug Huab Tais Yes Xus lw.
Kev raug hiam muaj ntau yam, muaj ntau txoj kev, tsis yog raug luam siv zog los tsim txom los raug luag txov txoj sia xwb. Kev raug lwm tus thuam kuj yog raug luag hiam, kev raug lwm tus ntxub kuj yog kev raug luam hiam, kev raug lwm ua tsis ncaj rau kuj yog raug luag hiam; tseem muaj ntau yam ntxiv.
Huab Tais Yes Xus xav kom peb txaus siab txais yam li hnub Huab Tais Yes Xus txaus siab rau cov Yus Das hiam nws.
Peb tsis txhob tias luag hais lus saib tsis tau ces tsa kiag ncauj nrog luag sib cav, peb tsis txhob tias raug lwm tus ntxub ces ua kiag yeeb ncuab tsa rog nrog tus ntawd, peb tsis txhob tias raug lwm tus caij tsuj ces sawv kiag los khaj cai mua lawv ntxeev kiag tuaj hauv. Peb ua li no tsis tau dab tsi.

(MK 10: 32-45)
Yes Xus thiab cov thwj tim taug kev nce mus pem Yes Lus Xas Les. Yes Xus mus ua lawv ntej. Lawv ua siab nyias ntsais, hos cov neeg raws lawv mus kuj ntshai. Yes Xus rov hu Pab Kaum Ob los ze nws, ces nws pib hais txog tej yam uas yuav tuaj raug nws li no “Zaum no, peb nce mus pem Yes Lus Xas Les, mas luag yuav muab Neeg Leej Tub rau cov thawj leej choj thiab cov kws Ntawv Ntshiab. Lawv yuav txiav lub txim tuag rau nws, yuav muab nws rau cov neeg teev pej kum dab. Lawv yuav thuam nws, nto aub ncaug rau nws, muab nws nplawm thiab muab nws tua. Peb hnub tom qab, nws yuav sawv rov los.” Ntxes Npes Dais ob tug tub hu ua Yas Kos thiab Zam txav los ze Yes Xus, nkawd hais rau Yes Xus tias “Xib Hwb, qhov wb yuav thov ntawm koj, mas wb xav kom koj ua rau wb.” Yes Xus hais rau nkawd tias “Neb xav kom kuv ua dab tsi rau neb?” Nkawd hais tias “Thov koj pub wb ib tug zaum ntawm koj sab xis, ib tug zaum ntawm koj sab laug nyob hauv koj lub hwj chim.” Yes Xus hais rau nkawd tias “Neb tsis paub neb thov dab tsi. Neb puas haus taus lub ntim uas kuv yuav haus? Thiab txais taus lub cim ntxuav uas kuv yuav txais?” Nkawd teb tias “Wb ua tau.” Yes Xus hais rau nkawd tias “Lub ntim uas kuv yuav haus, neb kuj yuav haus, thiab lub cim ntxuav uas kuv yuav txais, neb kuj yuav txais. Hos qhov yuav zaum ntawm kuv sab xis los sab laug, tsis yog kuv yuav muab rau neb. Ntuj npaj qhov ntawd rau leej twg, mas yog leej twg tug.” Kaum leej thwj tim hnov li ntawd, lawv tsis txaus siab rau Yas Kos thiab Zam nkawd. Yes Xus hu cov thwj tim los ntawm nws. Nws hais rau lawv tias “Nej paub tias cov uas luag saib lawv yog thawj coj hauv cov kuj cuab, mas lawv kav sawv daws xws li ib co tswv. Thiab cov loj yuam sawv daws nruj. Nyob hauv nej, mas yuav tsis zoo li ntawd; leej twg xav ua tus loj nyob hauv nej, nws yuav ua nej tus tub txib. Hos leej twg xav ua tus ntaus thawj hauv nej, nws yuav ua sawv daws tus qhev. Vim tias, Neeg Leej Tub tsis tuaj kom luag tsob hwb nws, nws tuaj tsob hwb sawv daws thiab muab nws txoj sia los ua nqi txhiv coob leej.”

LUS NTUAS
Hnub no peb hnov Huab Tais Yes Xus qhia rau cov thwj tim tias lawv nce mus pem Yes Luas Xas Les zaum no, mas nws yuav raug ntes thiab muab tua kom tuag, tab sis peb hnub nws yuav sawv rov los.
Huab Tais Yes Xus hais li ntawd rau cov thwj tim, tab sis zoo li cov thwj tim tsis quav ntsej txog Huab Tais Yes Xus cov lus no, lawv pom Huab Tais Yes Xus ua hwj huam, pom tias tsis muaj tus twg yuav muaj cuab kav cuag lawv tus xib hwb, ces lawv xav raws li cov Yus Das sawv daws xav xwb. Cov Yus Das xav tias muaj ib hnub twg mas Huab Tais Tswv Ntuj yuav xa tus Pleev tuaj coj lawv caum cov pej kum neeg tawm hauv lub teb chaws, tus Pleev yuav sawv ua vaj kav tas tsoom His Xas Lais.
Cov thwj tim xav zoo li ntawd, lawv xav tias mus Yes Lus Xas Les zaum no, mas yog Huab Tais Yes Xus yuav mus txais lub hwj chim ua vaj Pleev. Lawv xav li ntawd, lawv pib xav tias thaum Huab Tais Yes Xus sawv ua vaj lawd, tus twg yuav tau yog tus nyob sab xis thiab sab laug, sawv ntawm lub theej kiab ib sab.
Mas Kos sau piav tias As Nres thiab Zam txav los hais rau Huab Tais Yes Xus tias “Xib Hwb, thov koj pub wb ib tug zaum ntawm koj sab xis, ib tug zaum ntawm koj sab laug nyob hauv koj lub hwj chim.” Nkawd thov li ntawd, vim nkawd yog thawj pab thwj tim thiab Zam tseem yog tus thwj tim Huab Tais Yes Xus nyiam thiab.
Huab Tais Yes Xus hais rau nkawd tias nkawd tab tom nkag siab yuam kev txog lub luag hauj lwm zaum no. Yog nkawd paub tias Huab Tais Yes Xus lub hwj chim yog txoj kev tuag, mas xyov nkawd puas kam thov.
Huab Tais Yes Xus qhia rau cov thwj tim tias tas lawv sawv daws thiab peb sawv daws tib si, peb muaj feem koom tau Huab Tais Yes Xus lub hwj chim nyob hauv kev sawv rov los; yog tias peb txo lub hwj chim ua ib tug neeg los ua sawv daws tus qhev, los ua sawv daws tus tub txib.
Peb thov ntau yam ntawm Huab Tais Tswv Ntuj raws li peb lub siab ntshaw, peb tsis paub tias xyos puas yog yam ntxim los tsis ntxim Huab Tais Tswv Ntuj siab, tab sis muaj ib yam yog peb thov mas Huab Tais Tswv Ntuj zoo siab pub rau peb; yam ntawd yog ua tus tub txib tsob hwb lwm tus. Nyob ntawm peb sawv daws, saib peb puas kam txais.

(MK 10: 46-52)
Lawv tuaj txog Yes Lis Kos. Thaum Yes Xus nrog cov thwj tim thiab ib pab neeg coob tawm hauv Yes Lis Kos mus, muaj ib tug neeg dig muag thov khawv zaum ntawm ntug kev. Nws hu ua Npas Tis Mes, yog Tis Mes tus tub. Thaum nws hnov tias yog Yes Xus Nas Xas Les, nws pib hu tias “Yes Xus, Das Vis Leej Tub, thov koj khuv leej kuv!” Muaj ntau leej cem nws kom ua twj ywm, tab sis tus dig muag haj yam hu nrov tias “Das Vis Leej Tub, thov koj khuv leej kuv.” Yes Xus nres, nws hais tias “Nej hu nws los.” Lawv hu tus dig muag tias “Koj tso siab mog! Koj sawv mus. Yes Xus hu koj.” Ces tus dig muag pov rhees nws lub tsho ntev cia, dhia mus cuag Yes Xus. Yes Xus hais rau nws tias “Koj xav kom kuv ua dab tsi rau koj?” Tus dig muag teb rau Yes Xus tias “Kuv tus Xib Hwb, kuv thov kom kuv qhov muag rov pom kev!” Yes Xus hais rau nws tias “Koj mus mog! Koj lub siab ntseeg cawm koj lawm.” Tam sis ntawd, tus dig muag rov pom kev, ces nws taug kev lawv Yes Xus qab.

LUS NTUAS
Lub Moo Zoo hnub no piav txog thaum Huab Tais Yes Xus lawv tuaj txog lub nroog Yes Lis Kos. Nyob ntawd, muaj ib tug dig muag thov khawv lub npe hu ua Npas Tis Mes. Nws hnov zej zog cav tias Huab Tais Yes Xus tuaj txog lawm, nws ntseeg tias Huab Tais Yes Xus ua tau hwj huam kho nws kom rov pom kev, ces nws qw nrov nrov kom Huab Tais Yes Xus hnov thiab pab kho nws. Thaum kawg nws rov pom kev raws li nws lub siab ntseeg.
Zaj no zoo qhia dab tsi rau peb?
Zaj no qhia peb tias niaj hnub no peb ntiaj teb neeg ua neej nyob hauv txoj kev tsaus, tsis yog vim peb dig muag tab sis vim peb ntsia tsis pom lwm tus thiab tsis liam fab hlub lwm tus; zoo li thaum cov neeg hnov tus dig muag hu nrov nrov mas lawv ib txhia tseem cem nws kom ua twj ywm thiab, ua cas lawv tsis pab tuav tes coj tus dig muag mus nrhiav Huab Tais Yes Xus.
Peb coob leej zoo li ntawd tiag. Peb ntsia tsis pom lwm tus kev txom nyem!
Peb tig los saib tus dig muag, saib nws ua zoo li cas. Nws ntseeg tias Huab Tais Yes Xus pab tau nws, nws tsis pom kev thiab tseem tsis muaj leej twg pab nws, tsis kav nws tsis cia li; nws haj yam hu kom nrov dua qub, nws ua tiag raws li nws lub peev xwm yuav ua tau. Thaum muaj neeg los hais rau nws tias “Yes Xus hu koj. Koj sawv mus tom Yes Xus”, mas nws muab lub tsho ntev pov rhees, ces nws cia li mus cuag Huab Tais Yes Xus.
Peb puas yuav ua zoo li tus dig muag Npas Tis Mes no, peb puas muab siab rau nrhiav Huab Tais Yes Xus, peb puas tso tag nrho peb lub cuab tam es sawv tsees mus cuag Huab Tais Yes Xus, peb puas hle tus qub neeg pov tseg es ho hnav dua tus neeg tshiab Huab Tais Yes Xus pub rau peb.
Hnub no, peb yuav thov Huab Tais Yes Xus qhib peb lub qhov muag, kom peb ntsia pom Huab Tais Tswv Ntuj thiab ntsia pom cov neeg nyob puag ncig peb.

(MK 11: 11-25)
Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ncig nws. Thaum ntawd twb lig lawm, nws tawm mus. Nws nrog Pab Kaum Ob leeg mus Npes Tas Nias. Hnub tom qab, thaum lawv tawm hauv Npes Tas Nias mus, Yes Xus tshaib plab. 13 Nws tuaj deb pom ib tsob txiv ncuav pias muaj nplooj, nws mus xyuas saib puas muaj dab tsi noj. Tab sis thaum nws mus txog ze, tsob ncuav pias tsuas muaj nplooj xwb vim tsis yog lub caij txi txiv. Yes Xus hais rau tsob txiv ncuav pias tias “Txij no mus, kom txhob muaj neeg noj koj tej txiv ib zaug ntxiv li!” Cov thwj tim hnov Yes Xus hais li ntawd. Lawv tuaj txog Yes Lus Xas Les. Yes Xus chaws mus hauv lub Tuam Tsev Teev Ntuj, nws ntiab cov tub luam tuaj muag thiab cov tuaj yuav toob xib hauv lub Tuam Tsev Teev Ntuj. Nws ntxeev cov tub pauv nyiaj tej rooj, thiab cov muag nquab tej tog zaum. Nws tsis kheev leej twg nqa toob xib hla hauv lub Tuam Tsev. Yes Xus qhia lawv, nws hais rau lawv tias “Ntawv tau sau tseg tias kuv lub tsev yuav hu ua tsev teev Ntuj, cia rau ib tsoom haiv neeg? Tab sis, nej muab kuv lub tsev ua tub sab lub qhov nkaum!” Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai Yes Xus thiab, vim tas tsoom pej xeem zoo siab rau Yes Xus cov lus qhia. Thaum tsaus ntuj, Yes Xus tawm hauv nroog mus sab nraud. Tag kis sawv ntxov, Yes Xus lawv hla mus, lawv pom tsob txiv ncuav pias qhuav ti nkaus cag. Pob Zeb nco dheev txog, nws hais rau Yes Xus tias “Xib Hwb, koj saib; tsob txiv ncuav pias uas koj tsawm qhuav tas lawm.” Yes Xus teb rau lawv tias “Nej ntseeg Tswv Ntuj mog. Kuv hais tseeb rau nej, yog leej twg hais rau lub roob no tias “Koj txav, koj dhia lawm hauv dej ntuj,” yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tsheej xeeb rau nws tau. Vim li ntawd, kuv thiaj hais rau nej tias tas puas tsav yam uas thaum nej teev Ntuj, nej thov, nej cia li ntseeg tias nej twb tau txais lawm, ces Ntuj yuav pub yam ntawd rau nej. Hos thaum nej tab tom sawv ntsug teev Ntuj, yog nej muaj ib lo lus tsis txaus siab rau ib tug, mas nej zam rau nws, kom xwv nej Txiv nyob saum ntuj zam txhaum rau nej thiab.

LUS NTUAS
Lub Moo Zoo piav tias Yes Xus tshaib plab, ces nws mus tom tsob txiv ncuav pias saib puas muaj tej lub txiv cia rau noj kom tsis txhob tshaib, tab sis Huab Tais Yes Xus tsis pom tsob txiv ncuav pias txi txiv, ces Huab Tais Yes Xus thiaj tsawm tsob txiv ncuav pias ntawd kom txhob txi txiv ntxiv lawm.
Puas yog lub plab tshaib ua rau Huab Tais Yes Xus vwm lawm, nws thiaj mus tsawm rau tsob txiv ncuav pias.
Twb tsis tau txog caij txi txiv, tsob txiv ncuav pias yuav muaj txiv tau li cas, puas yog Huab Tais Yes Xus txhob txwm nrhiav teeb meem rau tsob txiv ncuav pias ntawd.
Yog peb lam nyeem laug lub sij hawm xwb mas tej zaus peb yuav xav li ntawd tiag, tiam sis yog peb nyeem kom pom lub ntsiab tob zais nyob hauv lub Moo Zoo mas peb yuav pom tias yog Huab Tais Yes Xus tab tom qhia ib yam dab tsi tseem ceeb rau cov thwj tim raws nws.
Tos peb hais li, vim tias tib hnub ntawd thaum tuaj txog lub Tuam Tsev Teev Ntuj, Huab Tais Yes Xus tau ntiab cov tub luam, tub ceev nyiaj kom tawm hauv lub Tuam Tsev Teev Ntuj mus.
Li ntawd, peb thiaj to taub tias yog Huab Tais Yes Xus tab tom qhia cov thwj tim kom lawv hloov lawv lub neej, lawv yuav tau ntxav lawv lub siab kom ntshiab, mas lawv thiaj yuav txi txiv tau txhua lub caij txhua lub sij hawm.
Hnub no Huab Tais Yes Xus hu peb kom tso siab, txhob ua xyem xyav rau qhov peb ntseeg, peb yuav tso txoj kev tsis txaus siab rau luag tej pov tseg; mas peb lub siab uas yog Leej Ntuj Plig lub tsev thiaj yuav ntshiab, peb thiaj yuav txi tau txiv pab lwm tus kom txhob tshaib.

(MK 11: 27-33)
Yes Xus lawv rov qab los hauv Yes Lus Xas Les. Thaum Yes Xus mus mus los los hauv lub Tuam Tsev Teev Ntuj, ces cov thawj leej choj, cov kws Ntawv Ntshiab thiab cov txwj laus tuaj cuag nws. Lawv hais rau nws tias “Koj tau cai qhov twg los, koj thiaj ua tej ntawd? Leej twg muab cai rau koj kom ua li ntawd?” Yes Xus teb rau lawv tias “Kuv kuj yuav nug nej ib lo thiab. Nej teb kuv, kuv mam li qhia nej tias kuv tau cai ntawm leej twg los ua tej ntawd. Zam lub cim ntxuav puas tuaj ntawm Ntuj los ntawm neeg tuaj? Nej teb kuv saib.” Ces lawv sib tham tias “Yog peb hais tias ‘Tuaj ntawm Ntuj tuaj,’ nws yuav hais tias ‘Ua cas nej tsis ntseeg txog nws?’ Yog peb hais tias ‘Tuaj ntawm neeg tuaj?’ Lawv kuj ntshai tsoom sid, vim tas sawv daws saib Zam yog ib tug yaj saub tiag. Ces lawv teb li no rau Yes Xus “Peb tsis paub.” Yes Xus hais rau lawv tias “Kuv kuj yuav tsis qhia nej tias kuv tau cai ntawm leej twg los ua tej ntawd thiab.”

LUS NTUAS
Hnub no yog qhib lub hli tshiab, lub 6 hli. Hnub no peb cov neeg ntseeg nco txog Leej Ntshiab Yus Tis Nus tus tuag ua tim khawv nyob hauv xyoo 166.
Lub Moo Zoo hnub no piav txog thaum Huab Tais Yes Xus lawv nce mus txog pem Yes Lus Xas Les. Huab Tais Yes Xus mus hauv lub Tuam Tsev Teev Ntuj, nws qhia tsoom sid thiab kho cov neeg mob. Cov leej choj, cov kws ntawv thiab cov txwj laus nug tias Huab Tais Yes Xus ua tej ntawd, mas yog tus twg muab cai rau Huab Tais Yes Xus kom ua li. Huab Tais Yes Xus ceeb laj nrog lawv sib cav, nws thiaj hais tias yog lawv qhia tau tias Zam lub cim ntxuav yog tuaj qhov twg tuaj, yog lawv teb tau mas nws mam qhia rau lawv tias leej twg muab cai rau Huab Tais Yes Xus qhia tsoom sid thiab khob lawv tej mob.
Peb paub tias lawv teb tsis tau, mas Huab Tais Yes Xus thiaj tsis hais rau lawv tias nws tau cai ntawm leej twg los ua nws tej hauj lwm. Tab sis niaj hnub nyem no peb paub lawm tias Huab Tais Yes Xus yog Tswv Ntuj Leej Tub, nws thiaj muaj cai qhia thiab kho sawv daws. Peb paub li no, mas peb thiaj yuav tau ntseeg thiab ua raws lo lus Huab Tais Yes Xus hais rau peb.
Huab Tais Yes Xus tsis ncaj qha hais rau peb xwb, ntau zaus Huab Tais Yes Xus hais thiab ntuas peb nyob hauv lwm tus neeg li lus, hauv lawv cov hauj lwm sis niam sis hlub, ib yam li thaum Leej Ntshiab Yus Tis Nus tab tom nrhiav tej lo lus los daws nws zaj ntxhov siab, ces nws ntsib ib tug yawg laus ntseeg txog Yes Xus. Tus yawg laus hais lus rau Yus Tis Nus tias “Koj xyaum nyob ntsiag to, thiab koj txais Ntuj lus twj ywm hauv koj nruab siab, ces koj lub siab lub ntsws yuav rov kaj lug. Saib koj puas kam ua zoo li no: koj maj mam twm Tswv Ntuj Lo Lus, koj yuav qhib koj lub siab los txais Ntawv Ntshiab uas ntim cov Yaj Saub lawv tej lus thiab Huab Tais Yes Xus Pleev lub Moo Zoo thiab tej tsab ntawv uas cov Hauv Paus Xa Lus tau sau tseg. Koj maj mam twm kom nkag siab, koj ib txhij thov Tswv Ntuj pub txoj kev pom kev los kaj koj, yog tias koj ua ob yam no mas koj yuav rov muaj ib lub tswv yim nyob tiaj nyob tus.”
Lo lus tuaj ntawm ib tug neeg ntseeg tuaj, mas nej yuav muab siab rau mloog, tsam nws lo lus ho yuav yog Huab Tais Yes Xus cov lus hais rau nej.

Mas Tais Ntawv Moo Zoo (MT 10: 34-11: 1)
Yes Xus hais rau cov thwj tim tias “Nej txhob xav tias kuv coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. Yus cov yeeb ncuab yog cov neeg nyob hauv yus tsev. Tus nyiam nws niam nws txiv dua kuv, nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv. Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. Tus nrhiav nws txoj sia, nws ua nws txoj sia ploj, hos tus ua nws txoj sia ploj vim kuv, mas nws nrhiav tau nws txoj sia lawm. Tus txais nej, mas yog nws kuj txais kuv. Tus txais kuv, mas yog nws txais Tus xa kuv tuaj. Tus txais ib tug yaj saub, vim tus ntawd yog yaj saub, nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj. Kuv hais tseeb rau nej, leej twg pub dej rau ib tug neeg me me no haus, vim tus no yog ib tug thwj tim, tab yog ib khob dej txiag xwb, tsis kav, nws yuav tau txais koob haum.” Thaum Yes Xus qhia nws kaum ob leeg thwj tim tas lawd, nws tso qhov chaw ntawd tseg, nws mus qhia thiab nthuav lub Moo Zoo rau hauv lawv cov nroog.

Mas Tais Ntawv Moo Zoo (MT 11: 20-24)
Yes Xus cem cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab “Kos Las Ntxis, koj txoj hmoov phem! Npes Xais Das, koj txoj hmoov phem! Vim tias, cov hwj huam yees ntxwv uas kuv tau ua hauv neb, kheev lam yog ua nyob Tws Los thiab nyob Xis Doos, mas ob lub nroog ntawd twb hnav ntaub tsaj thiab muab plua av los nphoo lawv, lawv twb hloov siab lawm ntxov. Kuv hais meej rau neb, hnub txiav txim, Tws Los thiab Xis Doos yuav raug txim sib dua neb. Thiab koj, Kas Fas Naus, koj xav tias koj yuav sawv siab txij ntuj puas yog? Koj twb nqes yuav txog tub tuag teb. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd tseem yuav nyob txog tav no. Kuv hais meej rau koj, hnub txiav txim, Xos Dos Mas teb yuav raug txim sib dua koj.”

Mas Tais Ntawv Moo Zoo (MT 11: 25-27)
Lub caij ntawd, Yes Xus hais tias “Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus. Muaj tseeb tiag, Txiv, koj lub siab nyiam li ntawd. Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub.”

Mas Tais Ntawv Moo Zoo (MT 11: 28-30)
Yes Xus hais rau cov tuaj mloog nws tias “Tas nej sawv daws uas nej khwv, thiab ris nra hnyav, nej tuaj cuag kuv mog ! Kuv yuav cia nej so los siav. Nej txais kuv tus quab. Nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav. Vim kuv tus quab kwv yooj yim, thiab kuv lub nra sib.”

Mas Tais Ntawv Moo Zoo (MT 12: 1-8)
Muaj ib hnub xas npas tos, Yes Xus hla ib co teb npleg. Cov thwj tim tshaib plab, ces lawv pib de tej hnab nplej los noj. Cov Fas Lis Xais pom qhov ntawd, lawv hais rau Yes Xus tias “Saib, koj cov thwj tim ua tej yam txwv tsis pub ua hnub xas npas tos!” Tab sis, Yes Xus hais rau lawv tias “Nej tsis tau nyeem qhov Das Vis ua thaum Das Vis thiab nws cov npawg tshaib plab lod? Lawv tau chaws mus hauv Tswv Ntuj lub tsev li cas, thiab lawv noj cov ncuav mov txi Ntuj, tab sis Das Vis thiab nws cov npawg noj tsis nyog cov mov ntawd, kawg yog cov leej choj xwb thiaj noj tau? Nej puas tau nyeem hauv Txoj Cai tias, hnub xas npas tos, cov leej choj uas nyob hauv lub Tuam Tsev Teev Ntuj tsis caiv hnub xas npas tos, tsis kav lawv tsis txhaum. Kuv qhia meej rau nej, nyob ntawm no, muaj ib yam loj dua lub Tuam Tsev Teev Ntuj. Lo Lus hais tias ‘Qhov kuv xav yuav, yog txoj kev khuv leej, tsis yog thaj txi Ntuj.’ Yog nej paub lo lus no lub ntsiab, mas nej yuav tsis muab txim rau cov neeg tsis txhaum. Vim tias, Neeg Leej Tub yog tus tswv kav hnub xas npas tos.”

Mas Tais Ntawv Moo Zoo (MT 12: 14-21)
Cov Fas Lis Xais tawm mus sab laj nrhiav saib yuav muab Yes Xus tua zoo li cas. Yes Xus paub qhov lawv xav ua, ces nws tawm mus. Muaj neeg coob raws nws, Yes Xus kho lawv sawv daws zoo tas. Nws txwv tsis pub lawv qhia leej twg paub. Ua li mas, muaj raws li Yaj Saub His Xais tau hais tseg tias “Nej ntsia, tus Tub Txib uas kuv xaiv. Nws yog tus kuv nyiam, kuv lub siab nyiam nyob hauv nws. Kuv yuav tso kuv lub Tswv Yim rau saum nws. Nws yuav tshaj Txoj Kev Ncaj rau tsoom kuj cuab. Nws yuav tsis cav, tsis nthe nrov, tsis muaj leej twg hnov nws lub suab tom tej tshav puam. Tus tauj qaug, nws tsis muab lov, tus teeb xeeb cig qauj les, nws tsis muab tshuab. Nws yuav ua li ntawd mus txog hnub nws coj Txoj Kev Ncaj mus txais kev yeej. Tsoom kuj cuab tso siab lug rau nws lub npe.”

Mas Tais Ntawv Moo Zoo (MT 12: 38-42)
Ib co Kws Ntawv Ntshiab thiab ib co Fas Lis Xais hais rau Yes Xus tias “Xib Hwb, peb xav kom koj ua ib lub cim rau peb pom.” Yes Xus teb rau lawv hais tias “Tiam neeg phem thiab fav xeeb! Lawv taij ib lub cim, tab sis lub cim uas lawv yuav pom, kawg yog Yaj Saub Yos Nas lub cim xwb. Raws nkaus li Yos Nas tau nyob peb hnub peb hmos hauv tus vaj ntses lub plab, Neeg Leej Tub kuj yuav nyob hauv plawv av peb hnub peb hmos thiab. Hnub Txiav Txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim thaum Yos Nas ntuas lawv, lawv hloov siab. Hos nyob ntawm no twb muaj ib qho loj dua Yos Nas! Hnub Txiav Txim, tus poj huab tais nyob Qab Teb kuj yuav nrog phaj neeg no sawv los, nws yuav muab txim rau lawv, vim nws tuaj tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj ib qho loj dua Xas Los Moos!”

Mas Tais Ntawv Moo Zoo (MT 12: 46-50)
Yes Xus tseem tab tom hais lus rau tej pab neeg, ces Yes Xus niam thiab nws cov kwv tij tuaj sawv nraum zoov, lawv xav nrog nws txuas lus. Muaj ib tug hais rau Yes Xus tias koj niam thiab koj cov kwv tij tuaj txog nraud, lawv xav nrog koj txuas lus. Yes Xus teb rau tus neeg tuaj qhia nws tias “Leej twg yog kuv niam, thiab leej twg yog kuv cov kwv tij?” Yes Xus taw tes rau nws cov thwj tim, nws hais tias “Kuv niam thiab kuv kwv tij yog cov ntawd. Vim tias tus twg ua raws kuv Txiv nyob saum ntuj lub siab, tus ntawd yog kuv ib tug kwv, ib tug muam, los ib leeg niam.”
Kwv tij Hmoob sawv daws, zaj Ntawv Moo Zoo peb mloog tas los ntawd, yog Huab Tais Yes Xus xav qhia peb kom to taub zoo txog peb txoj kev nrog Huab Tais Yes Xus sib txheeb tias yog zoo li cas?

Mas Tais Ntawv Moo Zoo (MT 13: 10-17)
Cov thwj tim txav los ze Yes Xus, lawv hais rau nws tias “Vim li cas koj ua paj lug hais rau lawv?” Yes Xus teb rau lawv tias “Vim Ntuj pub kom nej paub tej yam tob hauv Ntuj lub Ceeb Tsheej, tab sis Ntuj tsis tau pub rau cov ntawd. Tus uas twb muaj lawm, mas Ntuj yuav pub rau nws kom nws muaj ntau tshaj. Hos ntawm tus tsis muaj, ces Ntuj tseem yuav thau qhov nws muaj tawm mus. Vim li ntawd, kuv thiaj ua paj lug hais rau lawv vim tias lawv ntsia, los lawv tsis pom, lawv mloog, los lawv tsis hnov, thiab tsis to taub. Li ntawd, thiaj muaj raws li cov lus uas Yaj Saub His Xais xub hais tseg tias ‘Nej pob ntseg hnov, los nej yuav tsis to taub; nej ntsia, tab sis nej yuav tsis pom. Yog vim haiv neeg no lub siab qhwv lawm, lawv pos pob ntseg, lawv qi qhov muag, lawv ntshai tsam lawv qhov muag pom, tsam lawv pob ntseg hnov, ces lawv lub siab to taub. Tsam lawv yuav tsum hloov siab, thiab kuv yuav kho tau lawv zoo.’ Hos nej, mas nej qhov muag tau txoj hmoov zoo, vim nej qhov muag pom kev. Nej pob ntseg tau txoj hmoov zoo, vim nej pob ntseg hnov lus. Kuv hais tseeb rau nej, cov yaj saub thiab cov neeg siab ncaj thaud coob leej ntshaw pom yam uas nej pom, tab sis lawv tsis tau pom, ntshaw hnov yam uas nej hnov, tab sis lawv tsis tau hnov!”

Mas Tais Ntawv Moo Zoo (MT 13: 18-23)
Yes Xus hais rau cov thwj tim tias “Nej mloog zaj paj lug hais txog tus tseb nplej lub ntsiab. Tus neeg uas tau hnov Lo Lus qhia txog Ntuj lub Ceeb Tsheej, nws tsis to taub, tus Phem tuaj txog, nws txeeb yam uas Ntuj tseb hauv tus ntawd lub siab, tus ntawd yog tus txais cov noob poob ntawm ntug kev. Cov noob poob rau hauv cov av pob zeb, yog tus neeg uas thaum nws hnov Ntuj Lo Lus, nws zoo siab txais. Tab sis nws tsis muaj cag nyob hauv nws, vim nws yog neeg tsis ruaj. Thaum muaj kev txom nyem, los muaj kev raug luag hiam vim Lo Lus, ces nws ntog tam sis ntawd. Cov noob uas poob rau hauv cov pos, yog tus uas hnov Lo Lus, tab sis ntiaj teb kev txob xeeb, nyiaj txiag tej kev ntxias laum Lo Lus, ces Lo Lus txi tsis taus txiv. Cov noob uas poob rau hauv cov av zoo, yog tus uas hnov Lo Lus, nws to taub Lo Lus ntawd, ces nws txi txiv. Ib tug txi ib puas lub, ib tug txi rau caum lub, hos lwm tus txi peb caug lub.”

Mas Tais Ntawv Moo Zoo (MT 13: 31-35)
Yes Xus tseem hais ib zag paj lug li no “Ntuj lub Ceeb Tsheej zoo li ib lub noob zaub roj uas ib tug neeg nqa mus tseb hauv nws daim teb. Lub noob ntawd me tshaj txhua hom noob, tab sis thaum nws hlob, nws siab dua lwm cov zaub huv si. Nws luaj li ib tsob ntoo. Ces tej noog ya saum ntuj los nkaum hauv nws cov ceg.”
Yes Xus tseem hais ib zag paj lug tias “Ntuj lub Ceeb Tsheej zoo li ib co poov xab uas ib tug poj niam muab tso rau hauv peb kawg hmoov nplej mus txog thaum uas tas cov hmoov ntawd su tuaj.”
Yes Xus qhia ib puas tsav yam ntawd rau zeej tsoom, mas nws ua paj lug hais. Tsis muaj ib yam uas nws tsis ua paj lug hais. Li ntawd, mas muaj raws li tus yaj saub cov lus tias ‘Kuv yuav qhib ncauj hais ib co paj lug. Tej yam zais txij thaum ntuj tsim teb raug los, kuv yuav muab tshaj tawm.’

Mas Tais Ntawv Moo Zoo (MT 13: 36-43)
Yes Xus tso tsoom sid tseg, nws rov los tsev. Cov thwj tim txav los hais rau nws tias “Koj txhais zaj paj lug hais txog nroj tuaj hauv daim teb rau peb saib.” Yes Xus teb rau lawv tias “Tus tseb cov noob zoo, yog Neeg Leej Tub. Daim teb, yog lub qab ntuj neeg. Cov noob zoo, yog cov tub hauv lub Ceeb Tsheej. Cov nroj, yog tus Phem cov tub. Tus yeeb ncuab uas tseb cov noob nroj, yog Dab Phem. Lub caij sau nplej, yog lub zim txwv kawg. Cov tub sau nplej, yog cov Tshiab. Lawv yuav sau cov nroj los hlawv. Lub zim txwv kawg, yuav zoo ib yam li ntawd, Neeg Leej Tub yuav xa nws cov Tshiab, lawv yuav thau tej kev ntxias ua txhaum thiab cov neeg ua phem tas huv si tawm hauv nws lub Ceeb Tsheej. Cov Tshiab yuav muab lawv pov rau hauv lub qhov hluav taws. Nyob hauv, sawv daws yuav quaj tom hniav nkawv. Ces cov neeg siab ncaj yuav ci ntsa iab zoo li lub hnub nyob hauv lawv Txiv lub Ceeb Tsheej. Leej twg muaj pob ntseg, cia nws mloog.”

Mas Tais Ntawv Moo Zoo (MT 13: 47-53)
Yes Xus hais ntxiv tias “Ntuj lub Ceeb Tsheej tseem zoo li ib lub vas uas luag pov rau hauv dej ntuj. Lub vas puav tau ntau tsav ntau hom ntses. Thaum lub vas puv lawd, cov tub puav ntses rub lub vas los tim ntug nqhuab, lawv zaum, lawv mam li xaiv cov zoo rau hauv tawb, hos muab cov tsis zoo pov tseg. Thaum lub zim txwv kawg, kuj yuav zoo ib yam li ntawd thiab; cov Tshiab tuaj txog, lawv yuav cais cov neeg phem ntawm cov neeg ncaj. Lawv yuav muab cov neeg phem pov tseg rau hauv lub qhov hluav taws; nyob hauv, sawv daws yuav quaj tom hniav nkawv. Nej puas to taub tas ib puas tsav yam ntawd?”
Lawv teb rau Yes Xus tias “Peb to taub.” Yes Xus hais rau lawv tias “Ua li mas, thaum ib tug thoob xwm ntawv los ua thwj tim hauv Ntuj lub Ceeb Tsheej, nws zoo li ib tug tswv tsev uas rho tau tej yam qub thiab tej yam tshiab hauv nws lub cuab tam los.”
Thaum Yes Xus hais cov paj lug no tas, nws tso qhov chaw ntawd tseg.

Mas Tais Ntawv Moo Zoo (MT 13: 54-58)
Yes Xus rov mus txog lub zos nws hlob, nws qhia tsoom sid nyob hauv lawv lub tsev txoos. Lawv qhuas, ces sawv daws hais tias “Lub tswv yim thoob tsib, thiab cov hwj huam yees ntxwv ntawd, nws tau qhov twg los? Tus ntawd, tsis yog tus kws ntoo tus tub lod? Nws niam tsis yog tus hu ua Mab Liab no lod? Thiab nws cov kwv tij tsis yog Yas Kos, Yos Xes, Xis Moos thiab Yus Das lawv lod? Hos tas nws cov muam tib si, tsis yog cov nrog peb nyob ua ke ntawm no lod? Tas ib puas tsav yam nws ua tau ntawd, los qhov twg los?”
Yes Xus ua lawv poob siab. Nws hais rau lawv tias “Ib tug yaj saub, tsuas yog nyob hauv lub zos nws hlob thiab nyob hauv nws tsev neeg, luag thiaj saib nws tsis muaj nqis.” Yes Xus tsis ua hwj huam yees ntxwv ntau nyob ntawd, vim lawv tsis ntseeg.

Mas Tais Ntawv Moo Zoo (MT 14: 1-12)
Muaj ib ntus, Yes Xus lub moo nto ncha mus txog vaj txheeb Hes Los pob ntseg, ces Hes Los hais rau nws cov tub txib tias “Tus ntawd yog Zam Ntxuav Plig! Nws sawv hauv cov tuag rov los vim li ntawd cov hwj huam yees ntxwv thiaj tawm hauv nws los.” Ua ntej ntawd, Hes Los kom lawv ntes Zam, thiab xuas saw hlau khi Zam mus kaw hauv tsev loj faj vim Hes Los Dias. Hes Los Dias yog Hes Los tij laug Fis Lis Pos tus poj niam. Vim Zam hais rau Hes Los tias “Koj tsis muaj cai yuav tus poj niam ntawd.” Hes Los twb xav muab Zam tua, tab sis nws ho ntshai tsoom pej xeem, vim sawv daws saib Zam yog ib tug yaj saub. Ua li mas, thaum txog Hes Los hnub tsuj xeeb, Hes Los Dias tus ntxhais tuaj dhia seev cev rau sawv daws saib, nws dhia tau ntxim Hes Los siab kawg. Hes Los thiaj cog lus tias yuav pub yam nws thov rau nws. Leej niam cob tus ntxhais, ces tus ntxhais hais tias “Thov koj muab Zam Ntxuav Plig lub taub hau txawb hauv ib lub phaj nqa los rau kuv ntawm no.” Tus vaj tu siab, tab sis vim nws tau cog lus, thiab cov qhua tuaj koom rooj qav kuj tau hnov. Tus vaj thiaj txib kom lawv muab rau tus ntxhais raws li nws thov. Ces tus vaj xa neeg mus txiav Zam caj dab hauv tsev loj faj. Lawv muab Zam lub taub hau txawb hauv ib lub phaj cev rau tus ntxhais, tus ntxhais nqa mus cev rau nws niam. Zam cov thwj tim tuaj nqa Zam lub cev mus faus, ces lawv mus hais qhia Yes Xus.

Mas Tais Ntawv Moo Zoo (MT 14: 22-36)
Tam sis ntawd, Yes Xus txhib cov thwj tim kom nce nkoj ua nws ntej mus lawm sab ntug dej tim ub, hos nws nyob xa tsoom sid rov qab. Thaum Yes Xus xa zeej tsoom rov qab mus tas lawd, nws nce mus saum roob, rau ib qho chaw xu kev, ces nws teev Ntuj. Thaum tsaus ntuj, tshuav nws tib leeg xwb. Lub nkoj twb mus deb ntawm ntug nqhuab lawm ntau ntsua muag. Dej nphau nphwv tuaj nplawm lub nkoj, vim cua tshuab tom hauv ntej tuaj. Thaum yuav kaj ntug, Yes Xus mus ko taw saum nplaim dej, nws tuaj caum cov thwj tim. Lawv pom Yes Xus mus ko taw saum dej ntuj, lawv ib ce xob; lawv hais tias “Yog poj ntxoog”. Lawv ntshai kawg, ces lawv qw qw. Tam sis ntawd Yes Xus hais rau lawv tias “Nej tso siab mas! Yog kuv. Txhob ntshai!” Pob Zeb teb rau Yes Xus tias “Huab Tais, yog koj tiag no, koj kheev kom kuv tsuj nplaim dej tuaj cuag koj.” Yes Xus teb tias “Tuaj mas!” Ces Pob Zeb nqes nkoj tso ko taw tsuj saum nplaim dej mus cuag Yes Xus. Tab sis nws pom cua hlob, nws ntshai, ces nws pib tog hauv dej, nws qw tias “Huab Tais, cawm kuv mas!” Yes Xus cev tes tam sis ntawd tuav Pob Zeb, nws hais rau Pob Zeb tias “Neeg ntseeg tsawg, ua cas koj ua xyem xyav?” Thaum Yes Xus nkawd nce hlo rau hauv nkoj, ces cua tu nrho. Cov nyob hauv nkoj pe Yes Xus, lawv hais tias “Koj yog Tswv Ntuj Leej Tub tiag!” Yes Xus lawv hla dhau dej, lawv mus nqes rau Zes Nes Xas Les. Cov neeg nyob txawm ntawd cim tau Yes Xus, ces lawv mus qhia ib thaj tsam ntawd paub. Sawv daws coj lawv cov neeg mob tuaj rau Yes Xus. Lawv thov Yes Xus kom nws cia cov neeg mob kov Yes Xus tw tsho. Txhua tus uas tau kov, puav leej dim ntawm lawv tus mob.

Mas Tais Ntawv Moo Zoo (MT 15: 1-2, 10-14)
Ib co Fas Lis Xais thiab ib co Kws Ntawv Ntshiab nyob Yes Lus Xas Les tuaj cuag Yes Xus, lawv hais rau Yes Xus tias “Vim li cas koj cov thwj tim hla cov yawg koob tej kab ke, vim thaum lawv noj mov, lawv tsis xub ntxuav tes?” Yes Xus hu tsoom sid kom txav los ze nws. Nws hais rau lawv tias “Nej mloog kom nej to taub! Tsis yog tej yam nkag hauv neeg lub ncauj ua kom neeg tsis huv; yog tej yam uas tawm hauv lub ncauj los ua kom neeg tsis huv.” Cov thwj tim txav ze Yes Xus, lawv hais tias “Koj puas paub tias cov Fas Lis Xais hnov koj hais li ntawd, mas lawv tsis txaus siab?” Yes Xus teb tias “Tus yub twg tsis yog kuv Txiv nyob saum ntuj cog, mas yuav muab dob pov tseg. Cia lawv chim lawv, lawv yog ib co neeg dig muag coj ib pab dig muag kev! Vim tias yog ib tug dig muag coj lwm tus dig muag kev, mas nkawd ob leeg yuav ua ke mus poob qhov.”

Mas Tais Ntawv Moo Zoo (MT 15: 21-28)
Yes Xus tawm ntawm qhov chaw ntawd, nws mus rau Tws Los thiab Xis Doos teb. Muaj ib tug poj niam Kas Nas Has nyob hauv teb chaws ntawd tuaj. Nws hu nrov tias “Huab Tais, Das Vis Leej Tub, thov koj khuv leej kuv; kuv tus ntxhais raug ib tug dab phem tsiv kawg.” Yes Xus tsis teb ib los li. Cov thwj tim txav los thov tias “Koj ua rau nws, vim nws pheej hu nrov nrov lawv peb qab.” Yes Xus teb rau lawv tias “Ntuj xa kuv tuaj cawm cov yaj ploj hauv His Xas Lais tsev neeg xwb.” Tab sis tus poj niam twb tuaj txog ze lawm, nws txhos caug ntawm Yes Xus xub ntiag, nws thov tias “Huab Tais, thov koj pab kuv!” Yes Xus teb rau nws tias “Tsis phim muab me nyuam tej mov pov rau me nyuam dev.” Tus poj niam teb tias “Huab Tais, yog li koj hais. Tab sis cov me nyuam dev tsuas noj tej tsig mov txeej ntawm lawv tus tswv lub rooj los xwb!” Ces Yes Xus teb rau nws tias “Niam phauj, koj lub siab ntseeg loj kawg. Kom koj tau raws li koj lub siab xav.” Ces nws tus ntxhais zoo hlo tam sis ntawd.

Mas Tais Ntawv Moo Zoo (MT 16: 24-28)
Yes Xus hais rau nws cov thwj tim tias “Yog leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab. Vim leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv, mas nws yuav rov tau nws txoj sia. Yog ib tug neeg txeeb tau tas lub ntiaj teb huv tib si los ua nws tug, tab sis yog nws txoj sia ploj lawm, mas nws tau dab tsi? Neeg yuav muab dab tsi los pauv tau nws txoj sia? Vim tias Neeg Leej Tub yuav nrog nws cov Tshiab los, muaj Leej Txiv lub hwj chim, ces nws yuav pauj rau nyias raws li nyias cov hauj lwm. Kuv hais tseeb rau nej; nej ib txhia uas nyob ntawm no, yuav tsis tau saj txoj kev tuag, lawv yuav xub tau pom Neeg Leej Tub nrog nws lub Ceeb Tsheej los txog tso.”

Mas Tais Ntawv Moo Zoo (MT 17: 14-21)
Thaum lawv rov los nrog tsoom sid, muaj ib tug neeg tuaj txog ntawm Yes Xus, nws txhos caug ntua hais rau Yes Xus tias “Huab Tais, thov koj hlub kuv tus tub, nws qaug dab peg heev kawg. Nws ntog rau hauv hluav taws thiab rau hauv dej ntau zaus. Kuv twb coj nws tuaj rau koj cov thwj tim, tab sis lawv kho tsis tau.” Yes Xus teb tias “Caj ces neeg tsis ntseeg thiab siab phem, kuv yuav nrog nej nyob txog tav twg? Kuv yuav nyiaj nej txog thaum twg? Nej coj nws los rau kuv ntawm no.” Yes Xus cem tus dab, ces tus dab phem tawm hauv tus me nyuam mus. Tus me nyuam zoo hlo tam sis ntawd.
Thaum cov thwj tim thiab Yes Xus lawv nyob ib cag, cov thwj tim txav los ze Yes Xus, lawv nug twj ywm tias “Vim li cas peb ntiab tsis tau tus dab ntawd?” Yes Xus hais rau lawv tias “Vim nej ntseeg tsawg. Li ntawd, kuv hais tseeb rau nej, yog nej ntseeg luaj li lub noob zaub roj, mas nej hais rau lub roob ntawd tias ‘koj txav ntawm no mus lawm tod saib,’ lub roob kuj yuav txav mus. Yuav tsis muaj ib yam uas nej ua tsis tau.”

Mas Tais Ntawv Moo Zoo (MT 18: 1-5, 10, 12-14)
Lub caij ntawd cov thwj tim los cuag Yes Xus, lawv hais rau nws tias “Leej twg yog tus loj dua nyob hauv Ntuj lub Ceeb Tsheej?” Yes Xus hu ib tug me nyuam los ntawm nws, nws coj tus me nyuam los nyob hauv nruab nrab lawv, nws hais tias “Kuv hais tseeb rau nej, yog nej tsis hloov rov los ua xws li ib co me nyuam, mas nej yuav mus tsis tau hauv Ntuj lub Ceeb Tsheej. Leej twg rov saib nws me xws li tus me nyuam no, tus ntawd yog tus loj dua nyob hauv Ntuj lub Ceeb Tsheej. Leej twg txais ib tug me nyuam zoo li tus no, vim kuv lub npe, mas yog nws txais kuv. Nej ceev faj, tsis txhob thuam ib tug me nyuam yaus li. Kuv hais rau nej li ntawd, vim nyob saum ntuj, cov Tshiab zov lawv ntsia ntsoov kuv Txiv nyob saum ntuj lub ntsej muag mus li. Raws li nej xav, yog ib tug neeg muaj ib puas tus yaj, ib tug mus poob zoo lawm. Nws puas yuav tsis tso cuaj caum cuaj tug ntawd cia saum roob, mus nrhiav tus uas poob zoo lawd? Kuv hais tseeb rau nej, thaum nws nrhiav tau tus yaj poob zoo, mas nws zoo siab rau tus ntawd tshaj rau cuaj caum cuaj tug uas tsis tau poob zoo. Nej Txiv nyob saum ntuj, kuj zoo ib yam li ntawd thiab, nws tsis xav kom ib tug me nyuam yaus no ploj li.”

Mas Tais Ntawv Moo Zoo (MT 18: 15-20)
Yes Xus hais rau cov thwj tim tias “Yog koj ib tug kwv tij ua txhaum, koj yuav mus cuag nws. Thaum neb ob leeg nyob ua ke, koj yuav ntuas nws. Yog nws mloog koj, mas koj pab tau nws lawm. Yog nws tsis mloog koj, koj yuav coj ib leeg los ob leeg nrog koj mus dua, kom ob tug los peb tug tim khawv nrog tu tej lus ntawd. Yog nws tsis mloog cov nrog koj thiab, koj yuav qhia lub Koom Txoos paub. Yog nws tseem tsis mloog lub Koom Txoos hais thiab, ces koj yuav saib nws zoo li ib tug neeg teev pej kum dab los ib tug sau se. Kuv hais tseeb rau nej; nej khi yam twg nyob ntiaj teb no, mas Ntuj yuav saib yam ntawd yog khi nyob saum ntuj. Nej daws yam twg nyob ntiaj teb no, mas Ntuj kuj yuav saib yam ntawd yog daws nyob saum ntuj. Kuv hais tseeb rau nej tias yog muaj ob leeg hauv nej koom suab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd. Thaum ob leeg los peb leeg sib sau ua ke tuav txog kuv lub npe, mas kuv nyob hauv nruab nrab lawv.”

Mas Tais Ntawv Moo Zoo (MT 18: 21-19: 1)
Thaum ntawd, Pob Zeb txav los hais rau Yes Xus tias “Huab Tais, yog kuv tus kwv ua txhaum rau kuv, kuv yuav zam pes tsawg zaus? Kuv puas yuav zam txog xya zaus?” Yes Xus hais rau Pob Zeb tias “Kuv tsis hais rau koj tias ‘xya zaus’. Kuv hais rau koj tias ‘xya caum xya zaus’. Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. Tus tub txib txhos caug ntua ntawm tus tswv ko taw, nws pe tus tswv, nws hais tias “Thov koj ua siab ntev rau kuv, kuv yuav them kom tas rau koj.” Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias “Them koj cov nqi.” Nws tus npawg txhos caug ntua ntawm nws ko taw thov tias “Thov koj ua siab ntev rau kuv, kuv yuav them rau koj.” Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws. Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv, ces tus vaj hu tus tub txib tuaj, nws hais rau tus tub txib ntawd tias “Tub txib siab phem dab tsi! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. Ua cas koj tsis hlub koj tus npawg zoo li kuv tau hlub koj?” Ces tus vaj npau taws heev, nws muab tus tub txib rau cov tub hiam neeg mus txog hnub nws them nws cov nuj nqis tas huv tib si. Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.” Thaum Yes Xus hais cov lus ntawd tas, nws tso Nkas Lis Lais teb tseg, nws mus rau Yus Das teb sab dej Yos Las Das tim ub.

Mas Tais Ntawv Moo Zoo (MT 19: 3-12)
Ib co Fas Lis Xais los cuag Yes Xus, lawv xav sim nws, lawv hais rau nws tias “Puas muaj cai nrauj yus poj niam vim qhov ub qhov no? ” Yes Xus teb tias “Nej tsis tau nyeem tias, thaum chiv lub keeb, tus Tsim neeg, nws tsim kom muaj txiv neej thiab poj niam, thiab nws hais tias vim qhov ntawd, mas txiv neej yuav tso nws niam nws txiv tseg mus npuab nws poj niam, ob tug ntawd yuav ua ib lub cev nqaij xwb? Vim li ntawd, nkawd tsis yog ob leeg lawm, nkawd yog ib lub cev nqaij xwb. Qhov uas Tswv Ntuj sau los ua ke, mas neeg tsis txhob muab cais.” Lawv teb rau Yes Xus tias “Vim li cas Mais Xes ho hais kom ua ntawv nrauj thaum yus nrauj yus poj niam?” Yes Xus hais rau lawv tias “Yog vim nej lub siab twm xeeb, ces Mais Xes thiaj kheev kom nej nrauj poj niam. Tab sis thaum chiv lub keeb, mas tsis yog li ntawd. Kuv hais rau nej; tus twg nrauj nws poj niam, nws ho rov yuav dua ib tug, nws yog ib tug muaj txij nkawm mus deev hluas. Qhov no tsis hais txog tus poj niam uas mus nrog lwm tus txiv neej ua dev ua npua.” Cov thwj tim hais rau Yes Xus tias “Yog txiv neej yuav tsum ua zoo li ntawd rau nws tus poj niam, mas txhob yuav poj niam zoo dua.” Yes Xus hais rau lawv tias “Tsis yog sawv daws yuav to taub cov lus no, tsuas yog cov uas Ntuj pub rau, mas lawv thiaj to taub. Muaj ib co neeg nyob tab seeb, vim lawv yug los ua tsis taus txiv neej. Muaj ib co nyob tab seeb, vim neeg muab lawv sam. Hos muaj ib co neeg txhob txwm nyob tab seeb vim Ntuj lub Ceeb Tsheej. Leej twg txawj to taub, mas cia nws to taub.”

Mas Tais Ntawv Moo Zoo (MT 19: 13-15)
Thaum ntawd, muaj neeg coj ib co me nyuam yaus tuaj rau Yes Xus kom Yes Xus tsa tes thov Ntuj rau lawv, tab sis cov thwj tim cem cov neeg ntawd. Yes Xus thiaj hais tias “Nej cia cov me nyuam no tuaj cuag kuv mas, nej txhob txwv lawv; vim cov yuav tau Ntuj lub Ceeb Tsheej yog cov neeg zoo li cov me nyuam no.” Ces Yes Xus tsa tes rau saum cov me nyuam ntawd tas, nws mam mus ntxiv.

Zaj ntawv Moo Zoo uas peb nyuam qhuav mloog tas los no, yog Lus Kas tib leeg sau tseg xwb. Lub nroog Nas Ees nyob tsis deb ntawm lub zos Nas Xas Les mus rau sab xib fab naj. Muaj 3 zaug uas Yes Xus tsa tej tus neeg tuag kom sawv rov los thiab muaj txoj sia ua lub neej ntxiv mus. Zaum tim 1 yog zaj Yes Xus tsa Yais Los tus ntxhais. Zaum tim 2 yog zaj no. zaum tim 3 yog Yes Xus tsa Las Ntxas Los.
Peb moog thiab peb yuav xav tswv yim kom zoo, peb thiaj tsis yuam kev. Yam li thaum Yes Xus tsa 3 tug neeg tuag ntawd kom rov sawv los thiab ua lub neej ntxiv mus, mas lawv muaj ib lub cev nqaij zoo li qhov qub xwb, lawv tsuas ua lub neej ib ntus, ces lawv rov qab tuag zoo li ib zeej tsoom neeg. Tsuas muaj Yes Xus tib neeg xwb, uas nws tuag thiab sawv rov qab los, ces nws muaj lub cev txawv tib neeg lub cev nqaij. Vim Yes Xus tsis txawj rov tuag ntxiv, nws nrog Leej Txiv Tswv Ntuj nyob mus ib txhiab ib txhis.
Thaum Yes Xus hais tias hnub ntiaj teb kawg, nws yuav tsa peb sawv rov qab los muaj txoj sia nyob mus li. Yog tias Yes Xus tsa peb sawv rov qab los ib yam li nws tau tuag thiab sawv rov qab los, mas peb yeej yuav tau nrog nws nyob mus li, nyob ntawm Tswv Ntuj xub ntiag. Qhov uas Yes Xus tsa tus tub twm zeej uas tuag ntawd, kom nws sawv rov qab los thiab ua lub neej ntxiv mus, yog vim Yes Xus hlub tus poj ntsuam ntawd. Nws muaj tib tug tub twm zeej xwb. Yog nws tus tub twm zeej tuag mus lawm, mas nws yeej yuav txom nyem. Yes Xus khuv leej nws, ces Yes Xus thiaj ua hwj huam kom tus tub rov muaj txoj sia thiab tau ua lub neej pab nws niam ntxiv mus. Zaj no zoo qhia peb tias Yes Xus hlub thiab khuv leej cov neeg raug kev txom nyem mus li.
Zaj no kuj tseem muaj dua ib lub ntsiab lus tob dua thiab, yog qhov tias Yes Xus tau ua ib lub cim tias nws txawj pub txoj sia tshiab rau peb lub siab thiab peb lub tswv yim. Ib yam li nws tau pub txoj sia tshiab rau cov neeg tuag lub cev.
Txoj sia uas Yes Xus pub rau peb lub siab yog ib txog sia zoo li cas?
Txoj sia tshiab uas Yes Xus xav pub rau peb, yog qhov tias nws txawj ua kom peb lub siab uas tsis tau nyiam Tswv Ntuj pib nyiam Tswv Ntuj zuj zus, thiab nws ua kom peb lub tswv yim paub Tswv Ntuj zoo tuaj, nws ua kom peb lub siab nyiam zeej tsoom xws li Tswv Ntuj nyiam zeej tsoom.
Yes Xus hais tias leej tib neeg twg tsis nyiam Tswv Ntuj mas leej tib neeg ntawd lub siab tuag lawm, tsis muaj sia lawm. Yog yam xwm txheej phem tshaj tuaj nphav neeg.
Yes Xus tuaj tshaj nws lub Moo Zoo kom peb nyiam Tswv Ntuj thiab nyiam zeej tsoom. Yog peb txais Yes Xus lub Moo Zoo mas peb lub siab thiab peb lub tswv yim muaj ib txog sia tshiab, nws rov yug los dua tshiab.
Yes Xus tsa tus tub tuag kom rov sawv vim nws xav qhia tias nws xav pub txoj sia tshiab rau peb tus plig, rau peb lub siab, rau peb lub tswv yim. Yog txoj sia ua kom peb txawj nyiam; peb lub siab thiaj nyob thaj yeeb. Tab txawm muaj yam xwm dab tsis tuaj nphav peb, mas peb lub siab thiab lub tswv yim nyob thaj yeeb, nyob tiaj tus, nyob nyab xeeb.
Dhau ntawd, Yes Xus kuj ua kom cov neeg uas ncaim ntawm Tswv Ntuj mus thiab zoo li lawv txoj sia tu lawm, mas Yes Xus ua kom lawv rov nyiam Tswv Ntuj. Nws tsa cov neeg ncaim ntawm Tswv Ntuj lub tswv yim thiab lub siab kom rov sawv los npuab Tswv Ntuj thiab nyiam Tswv Ntuj tiag.
Thaum Yes Xus tsa tus poj ntsuam tus tub twm zeej ciaj rov los nyob hauv lub nroog Nas Ees, mas cov neeg nyob ntawd qhuas tias “Tswv Ntuj tuaj xyuas nws haiv neeg.” Lawv xav tias Yes Xus yog ib tug Yaj Saub loj uas Tswv Ntuj xa tuaj xyuas neeg xwb. Tab sis qhov tseeb tiag, mas Yes Xus yog Tswv Ntuj Leej Tub nqes los ua neeg. Peb lub Koom Txoos Kav Tos Liv kuj paub tias Yes Xus yog Tswv Ntuj Leej Tub.

Nyob rau hauv zaj hais txog Yes Xus kho 10 tus neeg mob ruas no, yog xav qhia kom peb txawj ua neeg nco txiaj ntsim, txawj ua Tswv Ntuj tsaug. Ces nws thiaj cawm tau peb lub siab xws li nws cawm peb lub cev. Yes Xus saib tias thaum nws cawm peb lub siab, mas nws pub ib lub txiaj ntsim rau peb loj dua thaum nws kho peb lub cev kom zoo hlo. Peb yuav tsum to taub zoo txog cov lus no; yam li Yes Xus hlub cov neeg mob ntawm lawv lub cev, ces nws thiaj kho lawv tus mob kom zoo. Tab sis qhov Yes Xus kho cov neeg mob, yog ib lub cim qhia peb tias Yes Xus txawj kho neeg lub siab kom rov huv tuaj thiab. Tus qhua uas nws rov qab los ua Yes Xus tsaug, Yes Xus hais rau nws tias “Koj lub siab ntseeg cawm koj lawm.” Lo lus no, yog ib lo lus tseem ceeb qhia peb tias Yes Xus cawm tus neeg mob ntawd 2 zaug.
Thawj zaug, yog Yes Xus kho nws dim ntawm nws tus mob ruas. Zaum 2 yog kho nws lub siab thiab lub tswv yim kom muaj txoj sia tshiab, vim nws txawj pom Tswv Ntuj lub txiaj ntsim, nws txawj ua Tswv Ntuj tsaug. Yes Xus saib tias kev kho tus neeg mob ntawd lub tswv yim, yog ib yam muaj nqis dua kho nws lub cev thiab yog cawm tus neeg ntawd tiag. Muaj 9 leeg zoo li lawv tsis tau txais Yes Xus kev cawm, vim lawv tsis ua Yes Xus tsaug. Yes Xus thiaj hais rau tus rov qab los ua Yes Xus tsaug tias “Koj lub siab ntseeg cawm koj lawm.”
Txhais tias tsuas muaj tib tug ntawd xwb thiaj tau txais Tswv Ntuj kev cawm.
Tus rov qab los ua Yes Xus tsaug, yog ib tug qhua, vim nws neeg Xas Mas Lias, nws tsis yog cov neeg Yus Das. Ntau zaus cov Yus Das tsis ua tsaug, hos cov ua tsaug, mas yog cov qhua xwb. Vim lawv nco ntsoov txog Tswv Ntuj lub txiaj ntsim uas lawv tau txais, ces lawv nco ntsoov ua tsaug. Cov neeg txais lub Cim Ntxuav nyob hauv lub Koom Txoos kuj yuav tsum ceev faj, kom lawv tsis txhob ua xws li cov Yus Das. Cov neeg ntseeg yuav tsum nco thiab pom txog Tswv Ntuj lub txiaj ntsim uas tau pub rau sawv daws. Yog peb ua neeg txawj pom txog Tswv Ntuj lub txiaj ntsim, mas peb kuj yuav txawj ua Tswv Ntuj tsaug thiab.