HNUB PLAUB LUB LIS PIAM 13 CAIJ NYOB NRUAB XYOO
28Thaum Yes Xus tuaj txog sab ntug dej tim ub, txog rau Nkas Das Las teb, muaj ob tug neeg raug dabx tawm hauv cov qhov ntxa tuaj cuag Yes Xus. Nkawd tsiv tsaim kawg, tsis muaj leeg twg muaj cuab kav taug txoj kev ntawd li. 29Ob tug ntawd qw nrov nrov tias “Tswv Ntuj Leej Tub, koj xav ua dab tsi rau wb? Tsis tau txog lub caij, koj txawm siv tuaj tsim txom wb lod?” 30Nyob tsis deb ntawd, muaj ib pab npua coob tab tom noj zaub. 31Cov dab thov Yes Xus tias “Yog koj ntiab peb tawm, thov koj cia peb mus nyob hauv pab npua tod.” 32Yes Xus teb tias “Kav tsij mus!” Cov dab tawm plaws nkag mus nyob hauv cov npua; ces tas pab npua dhia puag saum tsag rau hauv dej ntuj. Pab npua tuag tas rau hauv dej. 33Cov tub zov npua tso tes khiav mus hauv nroog, lawv mus piav tej xwm tshwm sim rau ob tug neeg raug dab ntawd huv tib si. 34Tas lub nroog tawm tuaj cuag Yes Xus. Thaum lawv pom nws, lawv thov kom nws tawm hauv lub teb chaws mus.
Lub zos Nkas Das Las nyob 10 km. hauv qab ncauj dej Yos Las Das, nyob ntawm lub hiav txwv Nkas Lis Lais sab hnub tuaj. Cov neeg nyob ntawd yug npua, lawv coj pej kum kev cai xws li lawv teev cov Los Mas tus dab ‘Ntsus Pis Taws’ (Jupiter), los yog cov Hes Las tus dab ‘Ntxaws’ (Zeus) thiab tus poj dab ‘As Tes Mis’ (Artemis).
Mas Tais piav tias thaum lawv mus txog Nkas Das Las mas muaj 2 tug neeg raug dab tawm hauv qhov ntxa tuaj cuag Huab Tais Yes Xus. Ob tug dab nyob hauv ob tug neeg ntawd paub tias Huab Tais Yes Xus yog Tswv Ntuj Leej Tub, nkawd hais tias tsis tau txog lub caij Huab Tais Yes Xus yuav rov los txiav txim. Nkawd xav tias nkawd yuav tseem hiam neeg tau nyob ntawm nkawd siab mus kom txog hnub kawg. Tab sis nyem no cov dab tsum paub tias Tswv Ntuj lub Ceeb Tsheej pib tuaj lawm, txoj kev cawm tuaj txog lawm.
Mas Tais piav ntxiv tias cov pej kum neeg nyob ntawd tsis xav paub Huab Tais Yes Xus, lawv tsuas xav txog lawv lub cuab tam uas yog pab npua dhia saum tsua mus hauv dej ntuj xwb, lawv tsis xav paub tias Huab Tais Yes Xus muaj hwj huam tas npaud, Huab Tais Yes Xus qhia tau ib yam zoo rau lawv. Niaj hnub no peb pom ib co neeg zoo li ntawd, lawv mem tau tias Yes Xus yog tus Huab Tais loj, tab sis lawv tsis xav tig ntsej los mloog Huab Tais Yes Xus, lawv xav kom Huab Tais Yes Xus txav mus nyob deb lawv.