Kev ntseeg yog cov lus uas Tswv Ntuj tau hais qhia rau lub ntiaj teb. Hnub no peb kawm saib thaum Tswv Ntuj xa Es Lias tuaj, nws xav qhia dab tsi rau peb. Vim tus vaj Xas Los Moos tsis tau nyiam Tswv Ntuj tshaj tas puas tsav yam, mas thaum tus vaj Xas Los Moos tuag lawm, His Xas Lais teb tawg ua 2 lub teb chaws. Cov vaj His Xas Lais haj yam teev dab thiab hla Tswv Ntuj lus qhia. Tswv Ntuj haiv neeg fav xeeb rau Tswv Ntuj, tab sis Tswv Ntuj pheej xeeb rau nws haiv neeg, ces Tswv Ntuj xa tus Yaj Saub Es Lias tuaj ntuas cov His Xas Lais.

Cov Yaj Saub His Xas Lais yog tej tus neeg zoo li cas? Lawv yog tej tus neeg ntseeg txog Tswv Ntuj zoo, ces Tswv Ntuj tuaj tshoj lawv kom lawv mus ntuas cov vaj His Xas Lais thiab tsoom pej xeem kom sawv daws nco tias lawv yog haiv neeg tau nrog Tswv Ntuj cog lus; yuav tsum nco ua raws li lo lus cog ntawd. Cov lus cov His Xas Lais cog nrog Tswv Ntuj mas yog cov lus no: Huab Tais Tswv Ntuj hais tias “Txij no mus, yog nej mloog kuv lus thiab nej khaws nraim kuv lo lus kuv cog rau nej, mas kuv yuav saib nej yog kuv tug nyob hauv tas txhua haiv neeg, vim lub ntiaj teb yog kuv li tas huv si. Kuv yuav saib nej yog ib haiv neeg ua leej choj thiab yog ib haiv neeg qee rau Ntuj. Cov lus no yog cov uas koj yuav hais rau cov His Xas Lais.”

Tswv Ntuj hais cov lus no tias “Kuv yog HUAB TAIS, koj tus Tswv Ntuj, yog tus ua kom koj dim ntawm Hais Nkws Tos teb los, dim ntawm txoj kev ua luag qhev.
Koj yuav tsis txhob muaj dua lwm tus tswv ntuj. Koj yuav tsis txhob puab ib tug mlom los ib tug duab zoo li tej yam nyob saum ntuj, los tej yam nyob hauv ntiaj teb no, los tej yam nyob hauv qab thu dej. Koj yuav tsis txhob pe cov mlom ntawd, txhob tsob hwb lawv, vim kuv yog HUAB TAIS thiab yog koj tus Tswv Ntuj, kuv yog ib tug Tswv Ntuj muaj khib, cov uas ntxub kuv, mas kuv rau txim rau phaj tub thiab phaj xeeb ntxwv thiab phaj xeeb ntxwv cov xeeb ntxwv tom qab, vim phaj txiv tau ua txhaum rau kuv.  Hos cov nyiam kuv thiab ua raws kuv cov lus qhia, mas kuv hlub lawv thiab pub txiaj ntsha txiaj ntsim ntau rau txhiab leej vam leej mus tiam dhau tiam. Koj yuav tsis txhob hu txog koj tus HUAB TAIS Tswv Ntuj lub npe mus ua tej yam tsis zoo, vim HUAB TAIS yuav tsis zam txim rau tus neeg uas tuav txog nws lub npe dog dig. Koj yuav nco ntsoov caiv hnub xas npas tos, koj yuav muab saib ua ib hnub ntshiab. Koj ua hauj lwm rau hnub, tab sis hnub xya yog hnub caiv xas npas tos rau koj tus HUAB TAIS Tswv Ntuj. Koj yuav tsis txhob ua ib yam hauj lwm dab tsi li. Koj thiab koj tus tub, koj tus ntxhais, koj tus tub txib, koj tus ntxhais txib, koj cov tsiaj txhu, tus qhua uas tuaj nyob hauv koj tsev, nej sawv daws yuav tsis txhob ua hauj lwm li. Vim tias HUAB TAIS tau ua hauj lwm rau hnub los tsim lub ntuj, lub ntiaj teb, lub hiav txwv, thiab tas puas tsav yam nyob hauv, tiam sis hnub xya nws so, vim li ntawd HUAB TAIS tau foom hmoov zoo rau hnub xya, nws muab hnub xya qee ua ib hnub ntshiab. Koj yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub ntiaj teb uas koj tus HUAB TAIS Tswv Ntuj muab pub rau koj. Koj yuav tsis txhob tua neeg. Koj yuav tsis txhob zes luag txij luag nkawm. Koj yuav tsis txhob ua tub sab tub nyiag. Koj yuav tsis txhob liam rau luag tej. Koj yuav tsis txhob ntshaw txeeb luag vaj luag tsev. Koj yuav tsis txhob ntshaw txeeb luag tus poj niam, luag tus tub txib, luag tus ntxhais txib, luag tus nyuj los tus luj, los ib yam dab tsi uas yog luag tug.”

Mais Xes rov los hais HUAB TAIS cov lus thiab cov kev cai qhia rau tsoom pej xeem, tas sawv daws pom zoo koom ib lub suab teb tias “Cov lus uas HUAB TAIS tau hais mas peb yuav coj tas huv tib si.”

Mais Xes muab HUAB TAIS cov lus sau rau hauv ib phau ntawv cia, ces tag kis, nws sawv ntxov, nws txhim ib lub thaj txi Ntuj rau ntawm taw roob thiab kaum ob tug ncej zeb rau kaum ob lub xeem His Xas Lais. Ces nws xa ib co tub hluas His Xas Lais mus txi Ntuj, lawv coj tej tus thav nyuj mus hlawv txi rau HUAB TAIS. Mais Xes cug cov tsiaj ntawd cov ntshav, nws muab ib nrab rau hauv phiab, nws muab ib nrab hliv ywg lub thaj txi Ntuj. Ces nws muab phau ntawv cog lus los nyeem rau tsoom pej xeem mloog, lawv qw tias “Txhua yam HUAB TAIS tau hais, peb yuav coj thiab peb yuav mloog” (KT 19: 5-8, 20: 1-17, 24: 3-7).

Tus vaj His Xas Lais hu ib co Yaj Saub cuav tuaj teev ib cov pej kum dab nyob hauv nws lub teb chaws, mas Tswv Ntuj thiaj tuaj tshoj Es Lias kom mus hais rau tus vaj tias “Kuv tuav txog Yas Ves lub npe uas kuv tsob hwb, nws yog tus muaj txoj sia, yog His Xas Lais tus Tswv Ntuj. Kuv ceeb toom tias yuav tsis muaj lwg muaj nag ob peb xyoos, tsuas kawg yuav muaj thaum kuv kom muaj xwb” (1V 17: 1). Es Lias ua raws li Tswv Ntuj hais, nws mus tsiv nraim nyob hauv ib lub hav dej nyob xu kev. Es Lias haus dej nyob ntawd thiab Tswv Ntuj kom cov uab lag nqa mov nqa nqaij rau nws noj. Tas peb xyoos thiab rau hli, Es Lias thov Ntuj kom nag rov qab los ces nag thiaj rov qab los.

Tswv Ntuj ua li no rau cov His Xas Lais vim Tswv Ntuj xav pab lawv nco ntsoov tias lawv yuav tso kev teev dab pov tseg, lawv yuav rov los teev Tswv Ntuj ib tug xwb vim Tswv Ntuj yog tus cheem tau kom nag txhob los thiab tso tau nag los. Tswv Ntuj muaj hwj huam, yog nws ua kom ntuj qhuav ntuj los nag raws li nws pom zoo. Cov dab uas tus vaj His Xas Lais nyiag teev mas lawv ua tsis tau tus dab tsi.

Muaj ib hnub, Tswv Ntuj tuaj tshoj Es Lias kom mus hais rau tus vaj His Xas Lais kom tus vaj hu nws cov Yaj Saub cuav huv tib si tuaj nrog Es Lias sib twv. Tus vaj hu nws cov Yaj Saub tuaj, lawv sawv daws mus nyob saum lub roob Kas Mes, ces lawv sib twv nyob ntawm tus vaj thiab tsoom pej xeem xub ntiag.

Tus vaj hu tas tsoom His Xas Lais thiab lawv cov yaj saub tuaj nyob saum lub roob Kas Mes. Es Lias txav los ze tsoom sid, nws hais tias “Nej yuav xuas ob txhais ceg deeg pauv mus txog thaum twg? Yog tias Yas Ves yog Tswv Ntuj ces nej raws nws mas! Yog tias Npas Has yog Tswv Ntuj ces nej raws Npas Has mas!”

Tsoom sid teb tsis tau dab tsi rau Es Lias. Es Lias hais ntxiv tias “Tshuav kuv ib leeg ua Yas Ves tus Yaj Saub xwb, hos Npas Has cov yaj saub muaj plaub puas tsib caug leej. Nej coj ob tug thav nyuj tuaj rau peb. Cov yaj saub Npas Has yuav xaiv ib tug rau lawv. Thaum lawv tua thiab phais tas lawm, mas lawv yuav muab tso rau saum ib co taws, tab sis tsis txhob rauv taws li. Kuv kuj yuav npaj ib tug ntsuag nyuj thiab, kuv kuj yuav tsis rauv taws hlawv. Nej yuav xub hu txog nej tus tswv ntuj lub npe, hos kuv yuav hu txog Yas Ves lub npe. Tus tswv ntuj uas tso hluav taws los hlawv cov tsiaj mas tus ntawd thiaj yog tus tseem Tswv Ntuj tiag.”

 Tsoom sid teb tias “Zoo kawg.” Ces Es Lias hais rau Npas Has cov yaj saub tias “Nej xaiv ib tug ntsuag nyuj, nej ua ua ntej vim nej yog cov coob. Nej hu txog nej tus tswv ntuj lub npe xwb, nej tsis txhob rauv taws li.”

Lawv muab tus nyuj tua, thaum lawv tseev tas, mas lawv hu txog Npas Has lub npe txij sawv ntxov mus txog tav su, lawv hais tias “Npas Has, thov koj teb peb mas!”

Tab sis tsis hnov ib lub suab li. Lawv dhia, lawv kim caug ntawm lub thaj txi ntuj uas lawv txhim. Thaum txog tav su, Es Lias thuam lawv tias “Nej qw nrov dua mas! Nws yog ib tug tswv ntuj, ntshai nws muaj chaw ntxhov siab ntau los nws muaj hauj lwm ntau. Los ntshai nws muaj chaw tawm rooj lawm. Los tej zaus nws tsaug zog lawm. Nej hu tiag mas nws yuav tsim los, nws yeej yuav teb nej xwb!”

Lawv haj yam qw nrov dua tuaj thiab lawv xuas ntaj xuas riam los hlais lawv kom ntshav los raws li lawv kev cai ua kam. Thaum tav su dua lawm, lawv cov yaj saub hais li ub li no mus txog lub caij yuav cev cov txim. Tab sis tsis hnov ib lub suab los ib lo lus teb li. Es Lias thiaj hais rau tsoom sid tias “Nej sawv daws txav los ze kuv.”

Sawv daws thiaj txav los ntawm Es Lias. Es Lias thiaj rov tsa Yas Ves lub thaj uas puas tas lawm. Es Lias muab kaum ob lub pob zeb raws li Yas Kos kaum ob leeg tub. Es Lias muab cov pob zeb ntawd los txhim ua ib lub thaj rau Yas Ves. Nws khawb ib tug kwj ntim taus ob kawg noob ncig lub thaj. Nws teeb cov taws rauv, nws muab tus thav nyuj phais thiab tso rau saum cov taws. Ces nws hais tias “Nej ntim plaub hub dej thiab nej nqa los nchuav rau saum tus nyuj thiab cov taws.” Lawv ua li ntawd tas. Es Lias hais tias “Nej ua zaum ob mas!”

Lawv tseem ywg dej zaum ob. Es Lias tseem rov hais tias “Nej ua zaum peb ntxiv mas!” Lawv thiaj ua zaum peb ntxiv. Dej nyab lub thaj txi Ntuj tas, tus kwj kuj puv dej tas.

Thaum txog lub caij txi Ntuj, tus Yaj Saub Es Lias txav los hais tias “Yas Ves, uas koj yog Has Nplas Has, His Xas Has thiab His Xas Lais tus Tswv Ntuj, koj ua kom tsoom sid paub tias koj yog tus Tswv Ntuj nyob hauv His Xas Lais mas! Koj ua kom lawv paub tias kuv yog koj tus tub txib! Yog vim koj qhia mas kuv thiaj ua tej no. Yas Ves, thov koj teb kuv! Ces tas tsoom pej xeem nyob ntawm no thiaj yuav paub tias koj yog Tswv Ntuj, koj yog tus ua kom lawv lub siab rov tig los cuag koj.”

Ces Tswv Ntuj cov hluav taws nqes los hlawv tus nyuj thiab cov taws thiab los nqus cov dej nyob hauv tus kwj tas. Tas tsoom sid ntshai poob siab nthav. Tas sawv daws ntog khwb rwg hauv av, lawv hais tias “Yas Ves yog Tswv Ntuj tiag! Yas Ves yog tus tseem Tswv Ntuj tiag!” (1V 18: 20-39).

Cov Yaj Saub cuav ua ntau yam nyob sab nraud kom sawv daws qhuas, tab sis lawv teev ib co dab tsis muaj hwj huam. Es Lias thiaj teev tus Tswv Ntuj muaj hwj huam tswj lub ntuj lub teb.

Muaj ib zaug Es Lias ntaus siab me, Es Lias xav kom rov qab tau ib lub zog tshiab pab nws ntuas sawv daws, nws thiaj mus txog lub roob uas Tswv Ntuj qhia Mais Xes, ces Es Lias thov ib lub zog tshiab ntawm tus Huab Tais muaj hwj huam. Tab sis Tswv Ntuj txhob txwm los nyob hauv ib co cua tuaj ntxuaj ntxiag. Tswv Ntuj tsis hais lus nrov nrov rau Es Lias, nws hais lus ntxhi hauv Es Lias nruab siab tuaj. Ntawv Ntshiab piav tias: Tus vaj As Kas qhia rau nws poj niam Zes Xas Npes txog tas puas tsav yam uas Es Lias tau ua. Nws qhia tias Es Lias tau xuas ntaj tua cov yaj saub cuav tas tib si. Ces Zes Xas Npes tso ib tug neeg xa xov mus rau Es Lias tias “Yog tag kis tav li lub caij no kuv tseem tsis tau ua kom koj raug tua li lawv, mas tseev kom cov dab tso tas ib puas tsav yam xwv txheej txom nyem los raug kuv!”

Ces Es Lias tau ntshai. Nws thiaj khiav mus kom tau cawm nws txoj sia. Thaum nws mus txog Npes Xas Npes nyob Yus Das teb, nws tso nws tus tub txib nyob ntawd. Nws mus ib hnub ke nyob hauv teb chaws suab puam ntxiv. Nws thiaj mus so hauv ib tsob qab ntoo. Nws xav tuag, nws hais tias “Yas Ves, kuv txom nyem txaus lawm! Thov koj thau kuv txoj sia rov qab mas! Vim kuv kuj tsis zoo dua kuv cov yawg koob!”

Es Lias cia li tso cev pw pem teb ces nws tsaug zog. Tab sis ib tug Tshiab los tsa nws thiab hais rau nws tias “Sawv los noj mov.” Es Lias rua muag ntsia, nws pom ib lub ncuav mov nyob saum cov pob zeb thiab pom ib plhuaj taub dej. Nws noj lub ncuav mov thiab haus dej tas ces nws rov qab pw dua. Tab sis Tswv Ntuj tus Tshiab rov qab los tsa nws tias “Sawv los noj mov! Koj tseem tshuav ib ntus kev deb kawg.”

Es Lias thiaj sawv tsees los noj mov thiab haus dej tas ces nws rov muaj zog tuaj. Nws thiaj mus kev plaub caug hnub thiab plaub caug hmo, ces nws mus txog Tswv Ntuj lub roob Hos Les.

Thaum Es Lias mus txog ntawm Tswv Ntuj lub roob, nws chaws mus hauv lub qhov tsua. Nws pw nyob ntawd. Muaj ib lub suab hais rau nws tias “Koj tawm mus saum lub roob, koj tos Yas Ves.” Ces Tswv Ntuj tuaj. Muaj ib nthwv cua ua Tswv Ntuj ntej. Yog ib nthwv cua hlob tas nrho phua cov roob thiab ua cov pob tsuas tawg tas. Tab sis Tswv Ntuj tsis nyob hauv nthwv cua. Dua li ntawd mas ntiaj teb qeeg tas, tab sis Tswv Ntuj tsis nyob hauv qhov qeeg ntawd thiab.

Thaum ntiaj teb qeeg dua lawm, muaj ib co hluav taws hla ze ntawd, tab sis Tswv Ntuj tsis nyob hauv cov hluav taws. Cov hluav taws dua tas, muaj ib nthwv cua tuaj ntxuj ntxiag.

Thaum Es Lias hnov cov cua ntawd mas tam sim ntawd nws muab nws lub tsho tshaj sab los thaiv nws ntsej muag. Ces Es Lias tawm los nyob ntawm rooj tsuas. Nws hnov ib lub suab hu nws tias “Es Lias, koj ua dab tsi ntawm no?”

Es Lias teb tias “Kuv kub siab lug rau Yas Ves Xas Npas Os, vim cov His Xas Lais tso koj pov tseg. Lawv rhuav koj cov thaj txi Ntuj thiab lawv xuas ntaj tua koj cov Yaj Saub tas. Tshuav kuv ib leeg xwb. Lawv tseem nrhiav kuv tua thiab.”

Tswv Ntuj hais rau Es Lias tias “Koj rov mus, koj taug txoj qub ke rov qab mus tom lub hav suab puam Das Mas. Koj mus tsa Has Xas Es ua vaj kav As Las. Koj tsa Yes Hus ua vaj kav His Xas Lais thiab koj pleev Es Lis Xais ua Yaj Saub hloov koj” (1V 19: 1-16).

Tswv Ntuj tau hu Es Lias tuaj ua nws tus Yaj Saub thiab Tswv Ntuj pab Es Lias kom ua tau hwj huam, yog vim Tswv Ntuj xav pab haiv neeg His Xas Lais kom ntseeg txog Tswv Ntuj zoo dua. Tswv Ntuj xav qhia cov His Xas Lais tias Tswv Ntuj tib leeg xwb thiaj yog tus muaj hwj huam kav lub ntuj lub teb thiab tas lub sim ceeb. Tswv Ntuj yog tus ua kom nag los thiab ua kom ntuj qhuav. Tswv Ntuj yog tus ua kom xyoob ntoo thiab qoob loo tuaj. Tswv Ntuj ua tau kom ntiaj teb qeeg, kom tej nthwv cua hlob phua roob, los ua kom cua tuaj ntxuj ntxiag. Tswv Ntuj pub txoj sia rau sawv daws. Tus peb yuav vam txog kom nws pov hwm peb mas yog Tswv Ntuj. Tswv Ntuj yog tus Huab Tais kav tas puas tsav yam, nws yog sawv daws tus Tswv.

Tswv Ntuj xav kom peb teev nws tib leeg xwb, Tswv Ntuj tsis xav kom peb teev lwm cov dab. Teev dab yog yuam kev, vim dab tsis muaj hwj huam saib yam twg nyob saum ntuj los nyob ntiaj teb no. Tswv Ntuj tsis kheev kom peb ib txhij teev dab thiab teev Tswv Ntuj; txoj kev ntawd yog ib txog kev deeg pauv.

Thaum Tswv Ntuj ua hwj huam mas nws tsis ua hwj huam kom yuam neeg los hwm nws, Tswv Ntuj cia neeg tig los yuav lub siab tshiab nyob ntawm siab. Kev cai, mas Tswv Ntuj tsis ua hwj huam, Tswv Ntuj tsuas hais lus nyob hauv neeg nruab siab xwb, Tswv Ntuj cia tus neeg txiav saib nws puas yuav mloog Tswv Ntuj Lo Lus los tsis mloog. Tswv Ntuj hais lus twj ywm xws li ib co cua tuaj ntxuj ntxiag. Yog cov neeg mob siab rau mloog, mas lawv thiaj hnov tau.

Nyob hauv peb txoj kev ntseeg, mas hais txog cov dab zoo li cas?

Cov dab xws li Hmoob hais mas ib txhia tsis muaj; xws li dab noj hli, dab peg, thiab cov dab ua kom neeg mob. Yog vim Hmoob paub Ntuj tsis txaus, mas Hmoob thiaj hais tias yog dab ua li ntawd. Cov dab Hmoob mas ib txhia yog vim txheej laus thaud xav txwv yam ub tam no, ces lawv thiaj hais tias muaj dab; xws li dab qhov cub, dab qhov txos. Ib txhia mas yog niam txiv poj yawm, tab sis lawv tsis yog dab, lawv tus plig kuj tsis txawj ua xws li niaj hnub Hmoob hais; yog Hmoob lam ntseeg li ntawd thiab xav tias muaj li ntawd tiag.

Txoj kev ntseeg hauv Yes Xus, tsuas hais txog tib tug dab xwb; yog tus dab Xas Tas, nws yog ib tug ntxias neeg kom ua xyem xyav los kom tsis tso siab rau Tswv Ntuj los kom nyiam ua txhaum rau Tswv Ntuj cov lus qhia. Tus dab Xas Tas muaj ib co dab ntxias neeg li nws, tab sis lawv puav leej zoo ib yam; lawv tsuas xav kom neeg ncaim ntawm kev hwm Tswv Ntuj xwb.

Lwm cov dab looj koov, los txawj tom neeg kom mob, los cov dab ua npoj; mas peb ntseeg tsis tau tias muaj, peb tsis xav txog qhov tias muaj los tsis muaj. Peb tsuas tso siab rau Tswv Ntuj lub hwj huam xwb. Peb teev Huab Tais Yes Xus ib yam li Huab Tais Leej Txiv, vim Huab Tais Yes Xus yog Tswv Ntuj Leej Tub. Huab Tais Yes Xus tuaj yeem tuag kom tau mloog Leej Txiv lus; vim li ntawd Tswv Ntuj thiaj tsa Huab Tais Yes Xus ua ib tug loj nyob siab siab. Tus twg hnov tuav txog Huab Tais Yes Xus lub npe nyob saum yaj thiab nyob nruab yeeb, mas tus twg kuj txhos caug hwm. Tas txhua haiv neeg cav tias Huab Tais Yes Xus Pleev yog tseem Huab Tais (FLP 2: 9-11).

Ib txwm Hmoob xav tias yog leej twg muaj hwj huam kav tas lub ntuj lub teb? Leej twg ua tswv qhia cua qhia xob? Leej twg pov hwm tau neeg kom noj qab nyob zoo? Hmoob puas ib txhij teev ntau leej? Thaum Hmoob txais kev ntseeg lawm, Hmoob puas ntseeg tias Tswv Ntuj muaj hwj huam? Lawv puas muaj tej lub caij xav rov teev dab me ntsis, yog thaum twg lawv thiaj xav li ntawd, thiab vim li cas lawv thiaj xav ua li ntawd?

Hmoob puas xav pom Tswv Ntuj lub hwj huam tawm tuaj nyob sab nraud tso lawv thiaj mam tso siab? Hmoob puas txawj pom tias Tswv Ntuj nyiam ua hwj huam nyob hauv neeg nruab siab ntau dua nyob sab nraud? Thaum Hmoob muaj mob, yog Tswv Ntuj cia tus mob li qhov qub, mas Hmoob puas txawj nco tias tej zaum yog vim Tswv Ntuj xav ua hwj huam nyob hauv nws siab, tsis xav ua nyob hauv nws lub cev?

Peb kawm tau Tswv Ntuj cov lus zaum no tas, peb yuav ua dab tsi kom tig los yuav lub siab tshiab, kawm Tswv Ntuj cov lus?

Peb yuav nyiam vam txog Huab Tais Yes Xus vim Tswv Ntuj tau tsa Huab Tais Yes Xus nyob siab dua tas txhua tus neeg txhua tus Tshiab. Huab Tais Yes Xus lub txiaj ntsim pab peb tso siab rau Leej Txiv lub hwj huam. Tas Huab Tais Yes Xus sid, nws tau yeej tus dab phem Xas Tas ntxias nws thiab tiv nws. Huab Tais Yes Xus ua tau kom peb nrog nws yeej Xas Tas.

Peb yuav tso kev teev dab thiab vam txog dab pov tseg, vim tias peb ntseeg meej tias Tswv Ntuj tib leeg yog tus Huab Tais muaj hwj huam, peb tsis mloog yam twg los leej twg ntxias peb kom rov vam txog dab. Li ntawd, kev ua neeb, ua khawv koob, saib xyab thiab tas txhua yam uas yog vam txog dab mas peb yuav tso pov tseg mus li.

Peb tso siab tias yog Tswv Ntuj tib leeg thiaj pov hwm pov yawm tau peb. Thaum peb raug xwv txheej los raug mob, peb vam txog Tswv Ntuj pab tas, ces tus mob los yam xwv txheej nyob li qub, mas peb txhob xav tias yog Tswv Ntuj pab tsis tau los tsis xav pab. Peb yuav xav tias Tswv Ntuj xav pub ib lub txiaj ntsim loj dua thiab muaj nqe dua kom peb ntsiab tuaj thiab mloog Tswv Ntuj lus; Tswv Ntuj xav pub ib co paj tshab neeg qhov muag tsis pom, Tswv Ntuj xav pub ib co paj tshab rau hauv neeg nruab siab.

Lub caij peb ntaus siab me mas peb muab siab rau mloog Tswv Ntuj lub suab tuaj tshoj peb, vim tias peb yeej yuav muaj tej lub caij uas peb ntaus siab me xws li Es Lias. Muaj tej lub caij peb xav rov vam txog dab. Muaj tej lub caij peb xav tias kev ntseeg tsis muaj qab hau dab tsi. Muaj tej lub caij peb raug ntau yam tuaj laum peb lub siab ces peb thiaj pom txoj kev ntseeg me me. Thaum peb raug tej lub caij li ntawd, peb yuav ua xws li Es Lias; nws mus txog Tswv Ntuj lub roob, yam li peb tuaj cuag Tswv Ntuj thiab thov Tswv Ntuj; ces peb yuav hnov Tswv Ntuj hais lus nyob hauv cov cua tuaj ntxuj ntxiag, yam li peb kuj yuav hnov Tswv Ntuj hais lus rau peb thiab rov ntxiv zog rau peb lub siab, ces peb rov tso siab rau Tswv Ntuj lub hwj huam. Li ntawd, peb yuav nco ntsoov tias Tswv Ntuj rov ntxiv zog rau cov neeg ua twj ywm mloog nws lub suab nrov hauv lawv nruab siab tuaj.

Muaj ib hnub His Xais nyob hauv lub Tuam Tsev Teev Ntuj nyob Yes Lus Xas Les. Tswv Ntuj tuaj tshoj nws kom nws ua Tswv Ntuj tus Yaj Saub. His Xais (HX 6: 1-8) piav zoo li no tias: Xyoo tus vaj Os Xias tuag, kuv pom Huab Tais zaum saum ib lub theej kiab siab siab. Nws tw tsho dauv mus puv nkaus lub Tuam Tsev tas huv tib si. Nyob ntawm nws txheej saud, muaj ib co Tshiab Xes Las Fis sawv ntsug. Lawv nyias muaj nyias rau txhais tis. Ob txhais thaiv ntsej muag, ob txhais vov ko taw, ob txhais cia ya. Lawv ib leeg hu nkauj nrov nrov rau ib leeg tias “Tsoom tub rog tus HUAB TAIS ntshiab, ntshiab, ntshiab. Nws lub koob meej nyob puv lub ntiaj teb.”

Lub suab ntawd nrov ua cov taw ncej qhov rooj ua zog koog, pa taws ncho puv lub tsev. Kuv hais tias “Kuv hmoov phem! Kuv yuav tuag! Kuv yog ib tug neeg di ncauj tsis huv. Kuv nyob nruab nrab ib haiv neeg di ncauj tsis huv. Kuv qhov muag tau pom tus Vaj, tus HUAB TAIS kav tsoom tub rog!”

Ib tug Tshiab Xes Las Fis ya ntxiag los txog ntawm kuv, nws txhais tes tuav ib lub pob zeb kub lug uas nws xuas ib rab ciaj tais ntawm lub thaj txi Ntuj los. Nws coj lub pob zeb los so kuv di ncauj, nws hais tias “Saib! Qhov no twb chwv koj di ncauj lawm, nws tshem koj qhov yuam kev tas huv si. Nws them koj cov txhaum tas lawm.”

Ces kuv hnov Huab Tais lub suab hais tias “Kuv yuav xa leej twg mus? Leej twg yuav sawv peb cev mus?” Kuv teb tias “Kuv nyob ntawm no. Koj xa kuv mus”. 

Peb pom ntsoov tias His Xais pom cov Tshiab hawm Tswv Ntuj, lawv hu Tswv Ntuj ua ‘tus Ntshiab’ (Holy). His Xais pom Tswv Ntuj tawm tuaj rau nws pom xyeem, nws ntshai tuag vim nws pom tias nws yog tus muaj txhaum hos Tswv Ntuj yog tus Ntshiab. His Xais tsis tsim nyog pom Tswv Ntuj, nws yuav tuag xwb. Ib tug Tshiab los muab ib co hluav ncaim los ntxuav His Xais cov txhaum ces His Xais tsis tuag.

Tswv Ntuj xav kom neeg ntshiab tuaj xws li Tswv Ntuj. His Xais niaj hnub ua hauj lwm nyob hauv lub Tuam Tsev Teev Ntuj, nws pom cov His Xas Lais nquag tuaj teev Tswv Ntuj nyob hauv lub Tuam Tsev Teev Ntuj, tab sis cov His Xas Lais ntawd tsis muab siab rau ua neeg siab ncaj hauv lawv tsev neeg thiab hauv lawv zos, ces His Xais ceeb toom Tswv Ntuj cov lus ntuas cov His Xas Lais li no tias “HUAB TAIS hais tias ‘Nej cov txim txi Ntuj uas muaj ntau ntau suav tsis txheeb, zoo dab tsi rau kuv? Cov laug tshis uas nej muab los hlawv mas dhuav kuv kawg. Cov xyuas nyuj tej roj uas nej cev rau kuv kuj dhuav kuv. Cov laug tshis, cov yaj thiab cov heev nyuj tej roj ntsha, kuv tsis xav yuav. Thaum nej tuaj nyob ntawm kuv xub ntiag, yog leej twg kom nej tuaj tsuj kuv lub tshav? Nej tsis txhob nqa tej txim tuaj rau kuv ntxiv! Pa xyab yog ib yam kuv ntxub. Nej tej hli xiab tshiab, nej cov hnub xas npas tos, nej cov txoos, nej cov hnub nyoog nqaum paj nqaum nruas, mas kuv nyiaj tsis taus lawm. Nej tej hli xiab tshiab, nej tej kev tawm rooj mus teev Ntuj, kuv ntxub tas siab nrho. Kuv ceeb laj ris kawg, sab kuv tas nrho, kuv nyiaj tsis taus lawm.

Thaum nej tsa tes hu txog kuv, kuv fee plhu. Txawm nej hais nej tej zaj teev Ntuj ntau npaum li cas, los kuv tsis mloog li. Nej txhais tes lo ntshav puv tas. Nej rov ntxuav nej kom nej huv tuaj mas! Nej dawj nej lub siab phem mus kom kuv qhov muag txhob pom. Nej tso txoj kev ua phem tseg! Nej xyaum ua zoo, nej nrhiav kev haum pheej, nej pab tus raug luag hiam, nej txiav txim ncaj rau tus tub ntsuag, nej tuaj tus poj ntsuam tog’” (HX 1: 11-17).

Cov thaj txi Ntuj thiab txoj kev caiv, yog peb xav kom tej ntawd xis Tswv Ntuj siab mas peb yuav ua ‘neeg siab ncaj’ rau luag tej tso, mas Tswv Ntuj thiaj zoo siab txais peb tej zaj teev ntawd. Yog peb xyaum thau peb lub siab phem pov tseg, mas peb thiaj tsim nyog txav los teev Tswv Ntuj Ntshiab.

Muaj ib hnub Tswv Ntuj tshoj His Xais kom nws ceeb toom rau cov His Xas Lais tias Tswv Ntuj yog tus pab neeg kom neeg ntshiab tuaj. Tswv Ntuj xav pab neeg kom neeg ntshiab tuaj, mas Tswv Ntuj qhia nws txoj cai nyob hauv nws haiv neeg, yam li nyob hauv haiv neeg ntseeg txog Tswv Ntuj. Tswv Ntuj txoj cai ua kom neeg ntshiab tuaj lub ntsiab yog qhov tias ‘yuav sib nyiam sib hlub nyob hauv Tswv Ntuj’.

Kwv tij, Tswv Ntuj yog tus Ntshiab, yam li Tswv Ntuj yog ib tug zoo li cas?

Tswv Ntuj yog tus Ntshiab; yam li Tswv Ntuj yog tus ‘muaj hwj huam’ tas nrho, nws tsim tau lub ntuj lub teb, peb hu Tswv Ntuj ua ‘Huab Tais’; Tswv Ntuj yog tus ‘siab zoo’ saib tag txhua tus neeg thiab ‘hlub’ sawv daws, peb hu Tswv Ntuj ua ‘Txiv’; Tswv Ntuj yog tus ‘muaj hwj chim’ loj tas nrho, peb ntsia tsis tau Tswv Ntuj tab sis Tswv Ntuj kuj yog tus ‘nyiam’ cov neeg me, nws nyiam mloog neeg cov lus thov, ces nws tso nws Leej Tub nqes los ua neeg me xws li peb; Tswv Ntuj yog tus ‘siab ncaj’ tsis nyiam yam nkhaus, nws pub yam zoo rau cov ua zoo, nws muab txim rau cov ua phem, tab sis Tswv Ntuj kuj yog tus ‘zam’ rau neeg, ces Tswv Ntuj tso nws Leej Tub tuaj ris peb cov txhaum thiab sawv peb chaw them peb cov txim txhaum; Tswv Ntuj yog tus ‘nyob mus li’, nws muaj txoj sia tsis txawj tuag, nws tsis tas yuav vam txog leej twg, nws tsis saib leej twg kuj tau tab sis Tswv Ntuj xav pub nws txoj sia rau peb, nws xav cawm peb kom peb txhob tuag mus li, nws nrog peb cog lus. Li ntawd, Tswv Ntuj txawv peb tsoom neeg tas nrho, peb tsis pom ib tug neeg uas nws ib txhij zoo nyob hauv tas txhua yam txoj kev. Hos Tswv Ntuj nws ib txhij zoo nyob hauv tas txhua yam, nws yog tus ‘Ntshiab’.

Tswv Ntuj xav kom peb ua neeg ntshiab yog dab tsi? Ua neeg ntshiab yog ‘mloog’ Tswv Ntuj Lo Lus thiab ‘npuab’ Tswv Ntuj lub siab. Tswv Ntuj yog tus Ntshiab, peb yuav ‘yoog’ raws li Tswv Ntuj lub siab mas peb thiaj li yuav ntshiab.

            Yog li peb yuav ua dab tsi thiaj npuab Tswv Ntuj? Peb yuav ‘mloog Huab Tais 10 Lo Lus Qhia’ raws li Tswv Ntuj qhia nyob saum lub roob Xis Nais. Yes Xus hais tias thawj lo lus qhia yog ‘nyiam Tswv Ntuj thiab nyiam luag tej nyob hauv Tswv Ntuj’, lwm cov lo lus qhia tib si puav leej yog pab ua raws li lo lus qhia ntawd. Li ntawd, txoj kev ua neeg ntshiab lub ntsiab mas yog ‘nyiam Tswv Ntuj thiab nyiam luag tej’, ces thaum peb xav ua ib co neeg ntshiab mas peb tsis xub xav txog txoj cai; peb xub xav txog kev nyiam Tswv Ntuj thiab nyiam luag tej.

Peb nyob peb mas peb yuav ua neeg ntshiab puas tau? Peb ua tsis tau, vim peb niaj hnub ua txhaum; yuav tsum muaj ib tug thau peb cov txhaum pov tseg. Yes Xus yog tus ‘thau’ peb cov txhaum pov tseg. Thaum peb vam txog Yes Xus, nws ntxuav peb cov txhaum kom peb ntshiab tuaj nyob ntawm Tswv Ntuj xub ntiag. Yes Xus tuaj yeem tuag nyob saum Ntoo Cuam kom tau ‘them’ peb cov txim txhaum.

Peb yuav mus taug txoj kev npuab Tswv Ntuj lub siab tsis tau. Peb yuav tsum muaj Tswv Ntuj lub txiaj ntsim nres peb lub zog mas peb thiaj yuav mus taug kev ntshiab tau.

Thaum peb ntseeg txog Yes Xus thiab txiav siab txais lub Cim Ntxuav thiab yoog raws li Yes Xus tus lwj lwm mas peb muaj Yes Xus lub txiaj ntsim; peb xav txia ua zoo li Yes Xus, ces peb yuav ntshiab tuaj zuj zus nyob hauv Yes Xus. Huab Tais Leej Txiv kuj saib peb yog neeg ntshiab nyob hauv Yes Xus.

Tswv Ntuj lub txiaj ntsim yog dab tsi? Tswv Ntuj lub txiaj ntsim yog ‘cov paj tshab koob hmoov Tswv Ntuj pub rau peb dawb dawb, kom peb coj tau lub neej ua neeg ntseeg’; yam li peb txia ua Tswv Ntuj cov me nyuam, ua Yes Xus cov kwv cov muam, peb lub cev ua lub Tuam Tsev rau Leej Ntuj Plig Ntshiab.

Hmoob puas saib Tswv Ntuj zoo li ib tug xav pauj rau neeg? Los xws li thawj tug dab tab sis nws tsis looj koov neeg xws li cov dab? Neeg puas xav saib Tswv Ntuj zoo li ib tug faib paj tshab rau tus thov nws thiab nrog neeg sib pauv ub pauv no? Puas muaj tej tus neeg lawv ua zoo li lawv saib Tswv Ntuj ruam dua lawv? Puas muaj tej tus ua zoo li lawv saib Tswv Ntuj ntshaw ub ntshaw no? Puas muaj tej tus ua zoo li lawv saib Tswv Ntuj yog ib tug peb hla nws lus tau kuj tsis ua li cas? Peb puas pom tseeb tias vim peb teev Tswv Ntuj mas peb yuav tsum yoog raws li Tswv Ntuj? Puas muaj tej tus neeg uas niaj hnub chiv, lawv mus teev Ntuj tab sis lawv rov mus tsev mas lawv ua xws li ib co neeg tsis teev Ntuj? Cov ntseeg yuav ua li cas lawv tej zaj teev Ntuj thiaj yuav xis Tswv Ntuj siab?

Yus ib txhij hwm thiab nyiam Tswv Ntuj vim Tswv Ntuj ib txhij yog tus Huab Taus muaj hwj huam tas nrho thiab Tswv Ntuj yog sawv daws Txiv.

Tswv Ntuj yog Huab Tais mas yus yuav hwm nws, txhob ntshai Tswv Ntuj. Tswv Ntuj yog Leej Txiv, yus yuav nyiam nws, txhob ntshai Tswv Ntuj.

Peb yuav ‘hwm’ Tswv Ntuj zoo li cas? Peb saib Tswv Ntuj loj, peb tso siab rau Tswv Ntuj lub hwj huam, peb teev Tswv Ntuj zoo, peb cav txog Tswv Ntuj, peb hais lus zoo txog Tswv Ntuj, peb hwm Tswv Ntuj lub npe.

Peb yuav ‘nyiam’ Tswv Ntuj zoo li cas? Peb xav ua tas txhua yam xws li Tswv Ntuj tos kom peb ua, peb paub Tswv Ntuj cov lus qhia ces peb ua raws li Tswv Ntuj cov lus qhia.

Peb yuav ib txhij ntxub kev ua txhaum thiab tso siab tias Tswv Ntuj zam txhaum rau peb. Peb ntxub kev txhaum vim peb paub tias peb cov txhaum ua kom peb tsis tsim nyog txav los cuag tus Tswv Ntuj Ntshiab. Peb tso siab tias Tswv Ntuj zam txhaum rau peb vim peb paub tias peb tus Huab Tais Ntshiab nyiam zam txhaum rau peb nyob hauv Tswv Ntuj Leej Tub. Peb yuav thov kom Tswv Ntuj pab peb ua neeg ntshiab vim peb paub tseeb tias peb nyob peb mas peb ua neeg ntshiab tsis tau.

Peb yoog raws li Yes Xus tus lwj lwm vim Yes Xus yog Tswv Ntuj Leej Tub Ntshiab, nws nqes los qhia txoj kev ntshiab rau peb, ces peb yuav kawm ntawm Yes Xus thiab cia Yes Xus tuaj ua nws cov hauj lwm nyob hauv peb.

Peb thov Ntuj ua ke: “Huab Tais Tswv Ntuj, koj yog tus Ntshiab, tas txhua yam zoo yog nyob hauv koj. Koj yog tus ib txhij muaj hwj huam tas nrho thiab hlub sawv daws, koj yog tus ib txhij muaj hwj chim thiab hlub cov neeg me, koj yog tus ib txhij siab ncaj thiab kheev zam rau peb. Peb thov koj pab peb ua neeg ntshiab, koj pab peb yoog raws li Yes Xus vim nws yog koj Leej Tub Ntshiab.

Peb vam txog peb tus Huab Tais Pleev thov koj. Ua li.”

Peb cov tub ntxhais Hmoob mus kawm txuj lawv puas nco txog kev teev dab xws li cov laus Hmoob? Vim li cas lawv thiaj tsis nco? Nyob hauv ib lub zos Hmoob, cov neeg teev dab yog lawv tsis muaj ib co loj los ib co laus mas lawv puas yuav teev dab? Cov teev dab mas lawv puas teev dab vim lawv nyiam dab nyob hauv lawv nruab siab? Muaj dab tsi txhib lawv kom lawv thiaj teev dab?

Ib tug Hmoob txais kev ntseeg, nws puas tseem teev dab? Yog nws teev mas vim li cas nws thiaj teev? Yog nws tsis teev mas vim li cas nws thiaj tsis teev?

Ib co Hmoob ntseeg, lawv puas nco teev Ntuj? Ib tug neeg ntseeg nyob hauv lub zos tsis muaj neeg ntseeg mas nws puas yuav muab siab rau ua raws li lub Moo Zoo? Leej twg qhia kom tus neeg ntseeg ua raws li lub Moo Zoo?

Lub caij Yes Les Mias tshaj Tswv Ntuj Lo Lus yog zoo li no: Cov His Xas Lais yog Tswv Ntuj haiv neeg, lawv muaj vaj, muaj lub Tuam Tsev Teev Ntuj, muaj cov Leej Choj. Tsis kav cov vaj thiab cov Leej Choj tsis muab siab rau qhia Tswv Ntuj haiv neeg kom ntseeg txog Tswv Ntuj zoo, ces cov His Xas Lais teev Tswv Ntuj ntawm lub ncauj xwb; lawv tsis mloog Huab Tais Lo Los Qhia, lawv nyiag teev dab ntau.

Vim li ntawd, Tswv Ntuj thiaj ua kom xwv txheej tuaj raug lawv, saib lawv puas yuav tig los mloog Tswv Ntuj lus zoo dua tuaj; ces lub caij Yes Les Mias nyob Yes Lus Xas Les, cov vaj Npas Npis Los tuaj ntaus His Xas Lais teb; cov His Xas Lais ntshai tsam Yes Lus Xas Les tawg. Cov vaj thiab tsoom pej xeem ntau leej hais tias Tswv Ntuj yuav txuag Yes Lus Xas Les vim nyob hauv Yes Lus Xas Les muaj lub Tuam Tsev Teev Ntuj. Lawv xav tias Tswv Ntuj yuav tsis kheev kom Yes Lus Xas Les tawg vim Tswv Ntuj xav kom nws haiv neeg tau kev teev Tswv Ntuj mus li.

Lawv xav tias tus Yaj Saub Yes Les Mias yuav pab lawv tso siab tias Yes Lus Xas Les yuav tsis tawg, tab sis Yes Les Mias ceeb toom tias Yes Lus Xas Les yuav tawg xwb. Yes Les Mias tseem muaj cuab kav hais rau sawv daws tias Yes Lus Xas Les yuav tsum tawg thiaj zoo, ces lawv ntes Yes Les Mias mus pov hauv ib lub qhov tim thaj qhuav thiab lawv kaw nws nyob hauv.

Vim li cas tus Yaj Saub Yes Les Mias thiaj hais tias tsis muaj lub tsheej Yes Lus Xas Les thiab tsis muaj cov vaj mas Tswv Ntuj haiv neeg tseem yuav ua tau Tswv Ntuj haiv neeg ntxiv?

Vim niaj hnub Tswv Ntuj tuaj tshoj Yes Les Mias kom nws hais tej lo lus zoo li no tias “Tswv Ntuj Lo Lus hais tias ‘lub hnub nyoog uas kuv yuav nrog His Xas Lais thiab Yus Das cog lus tshiab tuaj yuav txog. Tsis yog cog lus zoo li kuv tau nrog lawv cov yawg koob cog, hnub uas kuv tau tuav lawv tes coj lawv tawm hauv Hais Nkws Tos teb los. Lawv txiav kuv lo lus kuv nrog lawv cog ntawd lawm, ces kuv thiaj ua kom lawv pom tias kuv yog tus Tswv. Tab sis kuv yuav rov nrog His Xas Lais cog lus dua. Thaum ntawd mas yuav zoo li no: Kuv yuav muab kuv txoj cai los cog rau hauv lawv, kuv yuav sau kuv txoj cai rau ntawm lawv hauv siab; ces kuv yuav yog lawv tus Tswv Ntuj, lawv yuav yog kuv haiv neeg’” (YLM 31: 31-33).

Yes Les Mias cov lus lub ntsiab yog zoo li no: Cov His Xas Lais, nyem no nej tuaj txi Ntuj nyob hauv lub Tuam Tsev Teev Ntuj tas, mas nej xav tias nej tau mloog Tswv Ntuj Lus tas lawm. Nej ua raws li cov Leej Choj thiab cov vaj qhia rau nej, nej mloog txoj cai nyob sab nraud xwb. Nyem no kuv yuav sau kuv txoj cai rau hauv nej lub siab, yam li nej yuav paub hauv nej nruab siab tias kuv nyiam dab tsi thiab nej lub siab yuav qhia nej kom nej mloog kuv. Kuv xav kom nej mloog kuv tsis yog vim muaj tus tswj nej kom nej mloog, tab sis yog vim nej siab nyiam thiab nej pom zoo mloog kuv.

Yes Les Mias tau hais li ntawd ntev xyoo. Yes Lus Xas Les kuj tawg tas xws li nws xub hais tiag. Cov His Xas Lais mus nyob txim lawm pej kum teb nyob Npas Npis Los, lawv tsis muaj vaj tsis muaj Leej Choj qhia lawv thiaj tswj lawv. Yog cov mloog Tswv Ntuj tshoj lawv hauv nruab siab mas lawv thiaj teev Tswv Ntuj li qhov qub; Tswv Ntuj sau nws txoj cai tseg rau hauv nruab siab; lawv mloog Tswv Ntuj lub suab nrov hauv lawv nruab siab tuaj. Ces cov His Xas Lais tab lawv txawm nyob pej kum teb, lawv nyob xyaw cov neeg teev pej kum dab, lawv tseem muaj ntau leej hwm Tswv Ntuj zoo dua thaud lawv nyob Yes Lus Xas Les uas lawv tso siab rau cov txoj cai nyob sab nraud ntau dhau.

Thaum Tswv Ntuj hu yus los ntseeg txog nws, Tswv Ntuj nrog yus cog lus nyob hauv yus nruab siab. Tswv Ntuj xav kom yus txiav siab nyob hauv yus nruab siab tias yus yuav mloog Tswv Ntuj, yus yuav saib Tswv Ntuj yog yus tus Huab Tais. Tswv Ntuj tuaj tshoj yus lub siab, Tswv Ntuj xav kom yus cog lus rau Tswv Ntuj nyob hauv yus nruab siab. Li ntawd, yus mloog Tswv Ntuj lus, yus tso siab rau Tswv Ntuj, yus nyiam Tswv Ntuj vim nyob hauv yus nruab siab yus nyiam ua li ntawd; yus pom zoo ua li ntawd. Tos yus coj Ntuj kev cai thiab mloog Tswv Ntuj cov lus qhia mas tsis yog vim luag tej nrog yus nyob lawv ua li ntawd; tsis yog vim ib pab neeg qhia yus ua li ntawd. Yog vim Tswv Ntuj tau tuaj tshoj yus lub siab thiab yus tau pom zoo cog lus rau Tswv Ntuj nyob hauv yus nruab siab.

Thaum yus pib hnov hais txog kev ntseeg yog hnov tuaj ntawm luag tej tuaj, tab sis thaum ntawd Tswv Ntuj tuaj tshoj yus lub siab zuj zus.

Thaum twg yus thiaj yog ib tug neeg ntseeg tiag?

Li ntawd yus saib txoj cai zoo li cas?

Yus saib Huab Tais 10 Lo Lus Qhia zoo li cas?

Yus saib lub Koom Txoos cov lus qhia zoo li cas?

Yus saib tej txoj cai ntawd yog zoo li tej lo lus zoo pab qhia yus kom yus paub tias Tswv Ntuj tos dab tsi ntawm yus. Yus mloog tej txoj cai ntawd, vim nyob hauv yus nruab siab yus pom tias txoj cai qhia txoj kev nyiam Tswv Ntuj. Thaum yus mloog txoj cai, yus tsis zwm rau luag tej uas lawv qhia txoj cai rau yus. Yog yus yeej zoo siab ua raws txoj cai ntawd vim yus pom tias yog txoj kev nyiam Tswv Ntuj. Yus taug txoj kev nyiam Tswv Ntuj, yus tsis taug txoj kev zwm rau txoj cai.

Thaum yus nrog ib co neeg uas lawv tsis ntseeg txog Tswv Ntuj nyob thiab mus taug txoj kev Tswv Ntuj tsis nyiam, mas yus mus taug txoj kev uas Tswv Ntuj nyiam. Vim tias yus tau nrog Tswv Ntuj cog lus nyob hauv nruab siab; Tswv Ntuj tsis tso nws lo lus pov tseg, yus kuj tsis tso pov tseg thiab. Tab yog luag tej tsis mloog Tswv Ntuj lus mas yus xav txiav siab mloog Tswv Ntuj lus mus li vim yus nyiam Tswv Ntuj mus li.

Tab sis muaj tsev teev Ntuj, muaj Leej Choj nyob ze, muaj neeg hu yus mus teev Ntuj; mas yus ntseeg ntxiv, yus mloog Tswv Ntuj lus hauv yus nruab siab, yus coj tus yam ntxwv raws li lub Moo Zoo, yus saib Tswv Ntuj yog yus tus Tswv mus li vim thaum yus txais kev ntseeg mas Tswv Ntuj thiab yus sib cog lus hauv nruab siab. Li ntawd, tsis muaj dab tsi thiab tsis muaj leej twg yuav ua tau kom peb ncaim ntawm Tswv Ntuj.

Peb yuav ua li ntawd puas tau? Yog peb niaj hnub tso siab rau Tswv Ntuj, niaj hnub rov nco txog Tswv Ntuj tas zog hauv yus nruab siab mas yus muaj Tswv Ntuj lub zog, yus nyob hauv txoj kev nyiam Tswv Ntuj mus li.

Cov yeeb ncuab yuav ua kom peb ncaim ntawm txoj kev cog lus rau Tswv Ntuj yog cov yeeb ncuab twg?

Muaj ib co yeeb ncuab yog cov ntxias thiab hem kom peb txhob ntseeg txog Tswv Ntuj; yog peb vam txog Tswv Ntuj pab peb ntseeg mus li mas peb yuav yeej lawv; peb nyob hauv txoj kev nrog Tswv Ntuj cog lus.

Tab sis muaj lwm cov yeeb ncuab uas peb yuav ceev faj tiv; yog tas txhua yam uas peb cia txeem los nyob hauv peb lub siab, yam li kev nyiam yam ub yam no ntau dhau Tswv Ntuj. Tej ntawd tsis ua ncha, tej ntawd nyiag chaws los hauv peb lub siab thiab ua kom peb tsis nco tias peb tau nrog Tswv Ntuj cog lus. Li ntawd, cov yeeb ncuab peb yuav ceev faj tiv dua yog tej kev ntshaw ub ntshaw no.

Tus ua peb ntej nyob hauv txoj kev mloog Tswv Ntuj lus mus li yog ‘Yes Xus’. Nws tau mloog Tswv Ntuj lus mus li txog qhov kawg. Yog peb vam txog Yes Xus mas nws yuav pub nws cov txiaj ntsim pab peb kom peb nrog Huab Tais Leej Txiv cog lus ruaj.

Peb yuav nco pom tias txij hnub peb pib ntseeg txog Tswv Ntuj los, mas nws niaj hnub tuaj tshoj peb kom peb nrog nws cog lus. Yus puas tau nrog Tswv Ntuj cog lus tias yus txais Tswv Ntuj los ua yus tus Tswv vim yus pom tias Tswv Ntuj xub nyiam yus?

Tas yus sid, yus yuav nco tias yus tau nrog Tswv Ntuj cog lus thiab yus niaj hnub rov cog lus ruaj dua; yus cog lus tias yus zoo siab nyiam Tswv Ntuj mus li, zoo siab mloog Tswv Ntuj lus.

Txhob tos kom luag tej coj yus ces yus mam nco txog Tswv Ntuj; yus xub txiav siab, yus xub ua tas txhua yam uas Tswv Ntuj qhia. Yus yeej zoo siab teev Tswv Ntuj raws txoj cai, yus yeej zoo siab nyiam luag tej ib yam li yus nyiam yus.

Niaj hnub tab yus pom dab tsi los hnov dab tsi, tab muaj dab tsi xav ntxias yus los pus yus kom ncaim ntawm Tswv Ntuj, mas yus nco ntsoov hauv yus nruab siab tias yus tau nrog Tswv Ntuj cog lus lawm, ces yus ua yam uas Tswv Ntuj nyiam, yus tsis ua yam tsis xis Tswv Ntuj siab.

Yus nrhiav yus kev zoo siab thiab yus kev kaj siab lug nyob hauv txoj kev nrog Tswv Ntuj tham hauv yus nruab siab vim Tswv Ntuj yog tus nrog yus cog lus, yog yus tus Huab Tais, yog yus Txiv los yus tus phooj ywg, Tswv Ntuj pub kev kaj siab lug rau tus nco txog Tswv Ntuj.

Peb niaj hnub thov Huab Tais Yes Xus pab peb mloog Huab Tais Leej Txiv xws li nws tau mloog.

Peb thov Ntuj ua ke.

“Leej Txiv Tswv Ntuj, koj tau xaiv peb los ntseeg txog koj, peb zoo siab peb ua koj tsaug. Leej Txiv Tswv Ntuj, koj tos kom peb nrog koj cog lus, koj xav sau koj txoj cai nyob hauv peb nruab siab, thov koj pab peb nrog koj cog lus. Leej Txiv Tswv Ntuj, peb zoo siab cog lus mloog koj, thov koj pab peb yeej tas txhua yam pus peb kom ncaim ntawm koj.

Huab Tais Yes Xus, koj yog tus tau mloog Leej Txiv lus hauv nruab siab tas koj sid, peb thov kom koj lub zog tuaj pab peb ua raws li peb cog lus.”

Cov qhuab ke hais txog kev tsim ntuj tsim teb, tsim tas puas tsav yam; cov qhuab ke hais dab tsi?

Hmoob puas saib tias cov qhuab ke qhia ib qho tseem ceeb yuav tsum ntseeg, los puas saib tias yog ib co dab neeg?

Hmoob hais kam tias “Thaum ntuj tsim teb raug”, nej hnov lo lus ntawd zoo li cas? Hmoob puas xav tias muaj ib tug tsim ntuj tsim teb? Nej puas tau hnov dua cov laus piav ib tug tsim ntuj tsim teb? Lawv hu nws zoo li cas?

Hmoob puas saib cov dab muaj hwj huam loj tiag?

Hmoob puas muaj kwv huam cav txog dab ua hwj huam los pab haiv Hmoob txog tav no? Puas muaj ib tug dab los ib tug huab tais coj los kav haiv Hmoob?

Cov Hmoob kawm txuj puas ntseeg tej yam uas cov dab neeg los cov qhuab ke hais txog kev tsim ntuj tsim teb, tsim tas puas tsav yam?

Thaum Hmoob hais txog Ntuj ua ub ua no mas Ntuj yog dab tsi? Lawv puas nyiam thiab tso siab rau Ntuj zoo dua rau dab?

Cov His Xas Lais mus nyob txim lawm pej kum teb; lawv nyob Npas Npis Los tau 70 xyoo. Nyob ntawd, cov siab txias tsis nco qab tias lawv yog Has Nplas Has tsoom xeeb ntxwv, lawv tsis nco qab tias lawv tau nrog Tswv Ntuj cog lus. Lawv pom cov Npas Npis Los teev dab, lawv kuj nrog cov Npas Npis Los teev dab, lawv tso kev mloog Tswv Ntuj lus tseg.

Cov kub siab mloog Tswv Ntuj, lawv nco ntsoov mus li tias lawv yog Tswv Ntuj haiv neeg, lawv tsis fav xeeb rau Tswv Ntuj. Tab lawv pom luag tej teev dab, mas lawv tseem mloog Tswv Ntuj tshoj lawv lub siab. Tswv Ntuj txoj cai nyob hauv lawv siab, lawv nyiam Tswv Ntuj mus li, lawv xyiv fab ua raws li Tswv Ntuj nyiam; txoj cai lub ntsiab uas lawv coj yog 10 Lo Lus Qhia uas Mais Xes txais ntawm Tswv Ntuj los.

Dhau 70 xyoo lawm cov His Xas Lais tseem kub siab teev Tswv Ntuj, lawv tau kev rov los nyob His Xas Lais teb, ces lawv rov los. Lawv rov tsim haiv neeg teev Tswv Ntuj nyob Yes Lus Xas Les. Lawv rov kho lub Tuam Tsev Teev Ntuj, lawv rov sib pab coj Mais Xes txoj cai. Yog nyob ze xyoo 500 ua Yes Xus ntej. Lawv nyob ntau pua xyoo li ntawd, lawv tsis muaj vaj, lawv zwm rau cov pej kum vaj. Tab sis lawv nyob ruaj nreb coob hauv txoj kev hwm Tswv Ntuj.

Cov His Xas Lais ua zoo li ib haiv neeg ntseeg hlob tiav txuj zuj zus. Lawv pom tas txhia yam uas Tswv Ntuj tau ua los pab lawv txog tav no. Lawv cav txog cov hwj huam uas Tswv Ntuj ua los pab nws haiv neeg.

Cov hauj lwm loj uas niaj hnub lawv cav txog yog zoo li no:

1. Tswv Ntuj tau hu Has Nplas Has kom nws tau ua thawj tug neeg ntseeg thiab cog lus rau nws tias nws yuav ua haiv neeg ntseeg tus yawg koob.

2. Tswv Ntuj tau pub kom Has Nplas Has cov xeeb zeej xeeb ntxwv huam vam nyob Hais Nkws Tos teb ntau pua xyoo.

3. Tswv Ntuj pub Mais Xes rau haiv His Xas Lais, kom pab His Xas Lais dim ntawm Hais Nkws Tos teb, ces thaum ntawd Tswv Ntuj tau ua tej yam hwj huam loj tas nrho; yam li Tswv Ntuj pab cov His Xas Lais hla lub hiav txwv Liab, Tswv Ntuj tso twv huab thiab nplaim taws coj lawv kev, Tswv Ntuj pub dej pub Mas Nas thiab nqaij yij rau lawv noj, Tswv Ntuj pub txoj cai rau lawv nyob saum roob Xis Nais thiab nrog lawv cog lus, Tswv Ntuj qhuab qhia lawv 40 xyoo nyob hauv teb chaws suab puam kom lawv txhob mus taug kev fav xeeb.

4. Tswv Ntuj pub ib lub teb chaws rau nws haiv neeg nyob; yog Kas Nas Has. Tswv Ntuj pab lawv yeej cov vaj thiab cov haiv neeg xub nyob ntawd, ces Kas Nas Has teb hloov los ua His Xas Lais teb.

5. Tswv Ntuj pab lawv ua ib haiv neeg muaj hwj chim, muaj tej tus vaj xws li Das Vis, muaj lub tsheej Yes Lus Xas Les, muaj lub Tuam Tsev Teev Ntuj.

6. Tswv Ntuj tuaj tshoj tej tus neeg kom ua Yaj Saub qhuab qhia haiv His Xas Lais; xws li tus Yaj Saub Es Lias uas nws qhuab qhia lawv kom lawv teev Tswv Ntuj tib leeg xwb, thiab tus Yaj Saub His Xas uas nws qhuab qhia lawv kom lawv ua neeg ntshiab vim Tswv Ntuj ntshiab, thiab tus Yaj Saub Yes Les Mias uas nws qhuab qhia lawv tias nyias yuav nrog Tswv Ntuj cog lus nyob hauv nyias nruab siab.

7. Tab yog Tswv Ntuj tso cov pej kum neeg tuaj ntaus cov His Xas Lais los kuj tseem yog Tswv Ntuj xav qhuab qhia lawv kom lawv pom lawv cov txhaum thiab kom lawv txhob ntxeev siab rau Tswv Ntuj; yam li thaum lawv nyob txim nyob Npas Npis Los teb mas Tswv Ntuj ua hwj huam loj nyob hauv lawv nruab siab kom lawv nyob ruaj nreb hauv txoj kev teev Tswv Ntuj.

8. Tswv Ntuj tshoj cov Yaj Saub kom lawv tshaj rau tsoom His Xas Lais tias yav tom ntej ib tug vaj yuav sawv hauv lawv los; yog ib tug vaj tsa sawv daws nyob hauv kev thaj yeeb, kev haum pheej, qhov tseeb. Thiab lawv qhia tias yav tom ntej tas txhua haiv neeg yuav tuaj txais qhov tseeb ntawm Yes Lus Xas Les; tas txhua haiv neeg yuav los nrog cov His Xas Lais ua Tswv Ntuj haiv neeg.

Tseem tshuav ib yam hwj huam loj uas Tswv Ntuj tau ua; yam li Tswv Ntuj tsim thiab coj tas lub sim ceeb thiab cov His Xas Lais sib qhia ib txheej dhau ib txheej hais txog zaj Tswv Ntuj tsim ntuj tsim teb tsim tas ib puas tsav yam xws li lawv txais ntawm cov yawg koob His Xas Lais los. Lawv muaj 2 zag piav txog Tswv Ntuj tsim.

Zaj ib hais tias: Thaum chiv lub keeb, Tswv Ntuj tsim lub ntuj thiab lub ntiaj teb, mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj cais qhov pom kev ntawm qhov tsaus ntuj (HP 1: 1-2, 4).

Zaj ob hais tias: Thaum lub caij Yas Ves Tswv Ntuj tsim lub ntiaj teb thiab lub ntuj, tseem tsis tau muaj ib tug me yub ntoo, ib tug nroj tsuag tuaj li, vim Yas Ves Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av. Yas Ves Tswv Ntuj muab ib thooj av nplaum los puab ua tib neeg. Yas Ves Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia. Yas Ves Tswv Ntuj muab av los puab tas puas tsav yam tsiaj qus thiab tas puas tsav yam noog ya saum ntuj. Yas Ves Tswv Ntuj tso ib tug dab ntub hlob laum tus txiv neej, ces nws tsaug zog lawm. Tswv Ntuj rho nws ib tug tav tawm los, nws rov kaw lub qhov zoo li qub. Yas Ves Tswv Ntuj muab tus tav uas nws rho ntawm tus txiv neej los puab ua ib tug poj niam (HP 2: 5-25).

Peb pom ntsoov tias thaum cov His Xas Lais piav txog Tswv Ntuj tsim lub sim ceeb zoo li ntawd mas lawv qhuas txog 2 yam:

1. Tswv Ntuj muaj hwj huam loj tas nrho; tas txhua yam nyob saum ntuj thiab nyob ntiaj teb no yog tuaj ntawm Tswv Ntuj tuaj.

2. Tswv Ntuj siab zoo tas nrho; nws tsim lub ntuj lub teb zoo kawg.

Cov yawg koob piav txog Tswv Ntuj mas lawv piav li ntawd vim lawv muaj lub tswv yim to taub kev tsim zoo li ntawd. Nyem no neeg paub txuj ntau dual yog peb xav piav tias muaj lub ntuj lub teb tuaj zoo li cas mas peb yuav piav txawv, tab sis muaj 2 yam uas peb kuj yuav hais ib yam li cov His Xas Lais; yam li ‘tus tsim lub sim ceeb yog tus Tswv Ntuj muaj hwj huam tas nrho thiab siab zoo tas nrho’.

Cov His Xas Lais txawj pom cov hwj huam yees ntxwv uas Tswv Ntuj ua raws li piav saum no, mas lawv ua li no:

1. Lawv hwm Tswv Ntuj, vim lawv pom Tswv Ntuj loj, ces lawv txi Ntuj, lawv xav hais rau Tswv Ntuj tias lawv saib Tswv Ntuj ua lawv tus ‘Huab Tais’ tiag.

2. Lawv cav txog Tswv Ntuj lub koob meej, ces lawv ua tej zaj hu nkauj cav txog Tswv Ntuj lub koob meej vim Tswv Ntuj muaj hwj huam thiab siab zoo. Lawv xav kom Tswv Ntuj lub koob meej nto mus puv tas lub ntiaj teb.

3. Lawv tso siab rau Tswv Ntuj, vim Tswv Ntuj muaj hwj huam ua tau tas puas tsav yam los pov hwm lawv, thiab Tswv Ntuj siab zoo; tab yog Tswv Ntuj muab txim nyem no mas nws tseem hlub nws haiv neeg, Tswv Ntuj yeej xav ua zoo rau nws haiv neeg xwb.

4. Lawv nyiam Tswv Ntuj, vim ib txhij Tswv Ntuj muaj hwj huam thiab siab zoo. Tswv Ntuj ib txhij yog Tswv Ntuj thiab yog Leej Txiv. Lawv pom tias Tswv Ntuj nyiam thiab hlub lawv kawg, ces lawv nyiam Tswv Ntuj thiab.

Thaum ub Tswv Ntuj ua hwj huam yees ntxwv li ntawd, tab sis nyem no Tswv Ntuj tseem ua ntau thiab; yam li Tswv Ntuj tuaj tshoj peb lub siab kom peb txais kev ntseeg txog nws, Tswv Ntuj xa nws cov lus tuaj txog peb, Tswv Ntuj tso ib co neeg tuaj tshaj nws cov lus rau peb, Tswv Ntuj qhuab qhia peb kom peb hlob mus hauv txoj kev ntseeg txog nws thiab mloog nws, Tswv Ntuj pub kom muaj lub Koom Txoos nres peb thiab pab peb ua Tswv Ntuj haiv neeg.

Niaj hnub nyem no yog peb nco dheev xav tswv yim mas peb kuj yuav pom tau tias Tswv Ntuj nres tas lub ntuj lub teb thiab tas puas tsav yam nyob ncig peb. Tas txhua yam thiab txhua leej nyob ib ncig ntawm peb yog Tswv Ntuj nres, yog Tswv Ntuj pub rau peb pom, yog Tswv Ntuj ib co paj tshab. Tswv Ntuj nres neeg lub tswv yim kom neeg tu tau lub ntiaj teb zuj zus.

Nyem no muaj ib yam hwj huam loj tshaj uas peb pom, hos cov His Xas Lais tseem tsis tau pom; yam li Yes Xus tuaj lawm, nws tau pub nws txoj kev cawm neeg rau peb, nws coj lub neej xws li peb lub kom tau ua piv txwv qhia peb.

Peb niaj hnub yuav xyaum pom Tswv Ntuj cov hwj huam yees ntxwv; pom cov hwj huam Tswv Ntuj ua thaum ub thiab cov nws niaj hnub ua nyob ntawm peb xub ntiag. Peb yuav xyaum pom Tswv Ntuj lub hwj huam thiab lub siab zoo nyob hauv cov xwm tshwm sid. Peb yuav xyaum pom Tswv Ntuj lub hwj huam thiab lub siab zoo nyob hauv cov neeg nyob ncig peb. Peb thiaj yuav muaj lub siab zoo li no; yam li peb yuav hwm Tswv Ntuj, peb yuav cav txog Tswv Ntuj lub koob meej, peb yuav tso siab rau Tswv Ntuj, thiab peb yuav nyiam Tswv Ntuj.

Peb xyaum nco ntsoov tias peb nyob ntawm Tswv Ntuj xub ntiag; nyob hauv peb nruab siab peb hais cov lus hwm Tswv Ntuj, cav txog Tswv Ntuj, tso siab rau Tswv Ntuj, nyiam Tswv Ntuj. Peb lub ncauj kuj yuav hais cov lus ntawd, peb tej hauj lwm kuj yuav phim kev hwm thiab nyiam Tswv Ntuj.

Peb los teev Ntuj raws li zaj Nkauj Paj Nruag 135 tias:

“As Les Lus Yas! Nej cav txog HUAB TAIS lub npe.

HUAB TAIS cov tub txib, nej cav txog nws mas. Nej uas sawv nyob hauv HUAB TAIS tsev, nej uas nyob hauv peb tus Tswv Ntuj cov tshav loog, nej cav txog nws mas. As Les Lus Yas! HUAB TAIS siab zoo ua luaj!

Nej hu nkauj cav txog nws lub npe, nws zoo nyiam tas nrho! Vim HUAB TAIS xaiv Yas Kos ua nws tug, xaiv His Xas Lais ua nws ntiag tug.

Kuv mas, kuv paub tias HUAB TAIS loj; peb tus HUAB TAIS nyob siab dua tas ib tsoom tswv ntuj. HUAB TAIS tau ua tas puas tsav yam xis nws siab, nyob saum ntuj thiab nyob ntiaj teb, nyob hauv dej ntuj thiab hauv qab thu hiav txwv. Nws ua kom huab sawv puag tim npoo ntiaj teb los, nws tsim cov kab xob laim ua kom dej nag nqes los; nws tso cua tawm hauv nws cov txhab cua los. Nws yog tus tua cov tub hlob nyob Hais Nkws Tos teb, tsis hais neeg los tsiaj txhu.

Hais Nkws Tos, nyob hauv koj teb chaws, Huab Tais xa ib co cim thiab ib co hwj huam tuaj yuam Fas Las Oos thiab yuam nws cov tub txib tas huv si. Nws ntaus ib co kuj cuab coob kawg, nws tua ib co vaj muaj peev xwm loj. Nws muab lawv cov teb chaws los pub ua cuab tam rau nws haiv neeg His Xas Lais.

HUAB TAIS, tas zeej tsoom yuav hais txog koj lub npe mus li. HUAB TAIS, tas zeej tsoom yuav nco txog koj tiam dhau tiam. HUAB TAIS ua ncaj rau nws haiv neeg, nws ua siab muag, nws rov hlub nws cov tub txib.

Pej kum cuab cov mlom dab, yog xuas nyiaj thiab kub ua, yog neeg ob txhais tes puab. Lawv muaj qhov ncauj, tab sis tsis txawj hais lus; lawv muaj qhov muag, tab sis tsis pom kev; lawv muaj pob ntseg, tab sis tsis hnov lus; tsis muaj ib txog pa tawm hauv lawv qhov ncauj los! Xav kom cov neeg puab mlom, thiab cov tso siab rau mlom, lawv zoo li cov mlom ntawd kiag!

Nej cov uas hwm HUAB TAIS, nej cav lus zoo txog HUAB TAIS.

As Les Lus Yas!”

Kwv tij Hmoob sawv daws, peb los thov Ntuj ua ke:

“Tswv Ntuj muaj hwj huam, koj nyiam lub ntiaj teb neeg; koj thiaj tau ua hwj huam yees ntxwv ntau, koj tau sau ib haiv neeg ntseeg txog koj, koj niaj hnub xaiv neeg nyob tas ntiaj teb ntxiv, kom lawv ntseeg txog koj thiab ntseeg txog koj Leej Tub Yes Xus.

Koj yog tus muaj hwj huam tsim ntuj tsim teb, koj yog tus nres tas puas tsav yam nyob hauv lub sim ceeb, peb hwm koj, peb cav txoj koj lub koob meej, peb tso siab rau koj, peb nyiam koj.”

Peb haiv Hmoob uas tseem tsis tau paub kev ntseeg, lawv hais tias ‘txhaum’ yog dab tsi?

Peb hais 10 tus piv txwv uas Hmoob hais tias yog txhaum puas tau?

Thaum Hmoob ua txhaum mas yog ua txhaum rau leej twg?

Hmoob puas hais tias yog vim li cas thiaj muaj kev txhaum nyob ntiaj teb no?

Leej twg qhia tias yam ub thiab yam no yog txhaum?

Thaum Hmoob yuav ntxuav txhaum mas Hmoob ua zoo li cas ntxuav?

Kev txhaum puas ua kom neeg raug xwv txheej?

Vim li cas Hmoob thiaj zam kev ua txhaum?

Hmoob puas hais txog tias muaj ib tug yuav pab kom dim ntawm kev ua txhaum los yuav tuaj yeem sawv peb chaw ris peb cov txhaum thiab them peb txim txhaum?

Cov His Xas Lais mas lawv pom ‘kev txhaum’ nyob hauv lawv haiv neeg thiab nyob tas ntiaj teb; yam li:

– Has Nplas Has cov xeeb ntxwv ntxeev siab rau Huab Tais Tswv Ntuj nyob Hais Nkws Tos teb; lawv rov teev dab.

– Nyob ze ntawm lub roob Xis Nais, cov His Xas Lais nyuam qhuav cog lus rau Tswv Ntuj tias lawv yuav teev Tswv Ntuj tib leeg tab sis lawv ntxeev siab teev tus mlom nyuj.

– Nyob hauv teb chaws suab puam, cov His Xas Lais yws rau Tswv Ntuj tas zog; lawv xav mus teev pej kum dab, lawv ua ib haiv neeg xwb qwb txhav.

Cov Yaj Saub qhuab qhia cov His Xas Lais tas zog vim cov His Xas Lais ua tej yam txhaum zoo li no:

1. Cov vaj His Xas Lais coj sawv daws mus taug kev teev dab thiab taug kev ua tub qaug rau luag.

2. Cov Leej Choj nyob hauv lub Tuam Tsev Teev Ntuj nrhiav txoj kev noj tsoom pej xeem cov nyiaj.

3. Cov pej xeem muab lawv cov tub tua los txi rau dab.

4. Cov His Xas Lais nyiag mus teev cov dab Npas Has thiab cov As Tas Tes nyob saum cov ncov roob, ces cov Yaj Saub thiaj muab cov His Xas Lais piv rau tej tus poj niam ntxeev siab rau lawv tus txiv; yam li lawv tso Tswv Ntuj pov tseg mus teev cov dab xws li cov haiv neeg nyob tsis deb tsis ze lawv.

5. Cov His Xas Lais tsis mloog Tswv Ntuj lus qhia, mas Tswv Ntuj thiaj tso lawv mus ua raws li lawv siab ntshaw, ces lawv sib ntaus sib tua, ua tub sab tub nyiag, txiav txim tsis ncaj, dag rau luag, zes luag poj luag sev, sib cog lus dag thiab tso lus cog pov tseg, nyiag tua neeg, txais nyiaj rau luag kom tau noj paj ntau, noj cov me nyuam ntsuag thiab poj ntsuam lub zog, txi Ntuj dag, tsis txiav siab tig los yuav lub siab tshiab.

Cov His Xas Lais hnov cov Yaj Saub qhuab qhia lawv tau ntau pua xyoo los, mas lawv ntau leej hauj sim pom tias haiv His Xas Lais muaj txhaum tiag; lawv hais tias tsis pom muaj kev sib nyiam nyob hauv lawv lub teb chaws lawm, tsis pom muaj kev paub Tswv Ntuj lawm, tsuas pom muaj kev dag, kev tua neeg, kev ua tub sab, kev plees.

Cov His Xas Lais paub tias kev txhaum ri mus li ntawd, mas tsis yog vim Tswv Ntuj tab sis yog vim neeg xaiv kev ntxeev siab. Lawv yeej paub tias Tswv Ntuj siab zoo mas Tswv Ntuj tau tsim neeg muaj tsim. Ib txwm cov yawg koob His Xas Lais tau qhia lawv tias Tswv Ntuj tsim neeg muaj tsim zoo li Tswv Ntuj me ntsis, Tswv Ntuj tau tsa neeg ua tswv saib lub ntiaj teb, Tswv Ntuj tau ua tus siab dav tas nrho rau neeg.

Tswv Ntuj tau tsim neeg ‘zwm’ rau Tswv Ntuj nyob hauv ‘txoj kev nyiam’ tsis yog zwm rau Tswv Ntuj nyob hauv txoj kev ntshai.

Tab sis txij lub hauv paus los, neeg tsis tau tso siab tias Tswv Ntuj nyiam neeg. Cov yawg koob His Xas Lais muaj ib zag kwv huam qhia tias neeg tau ntxeev tswv yim thiab ntxeev siab rau Tswv Ntuj; yog zaj nyob hauv ntawv Hauv Paus (HP 3: 1-15) hais tias: Tus nab hais rau tus poj niam tias “Tswv Ntuj hais tias neb yuav tsis txhob noj txhua yam txiv ntoo hauv lub vaj no puas yog?” Tus poj niam teb rau tus nab tias “Wb noj tau cov txiv txi saum cov ntoo hauv lub vaj no tib si. Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias kom wb txhob noj, yog wb noj mas wb yuav tuag.”

Tus nab teb ntua tus poj niam tias “Tsis muaj li ntawd ib zaug! Neb yuav tsis tuag. Vim Tswv Ntuj paub tias hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.”

Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab, ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua.

Thaum cua tuaj ntxiag, nkawd hnov Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim hauv cov ntoo nyob hauv lub vaj. Tswv Ntuj hu tus txiv neej hais tias “Koj nyob qhov twg?” Tus txiv neej teb tias “Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim.”

Tswv Ntuj rov hais ntxiv tias “Leej twg qhia koj tias koj liab qab? Yog koj noj lub txiv uas kuv txwv tsis pub noj lawm puas yog?” Tus txiv neej teb tias “Yog tus poj niam uas koj tso nyob ze kuv, muab lub txiv rau kuv, ces kuv thiaj noj!”

Tswv Ntuj hais rau tus poj niam tias “Koj ua dab tsi li ntawd?” Tus poj niam teb tias “Yog niag nab ntxias kuv, kuv thiaj noj.”

Zaj kwv huam no qhia 4 yam no:

1. Ob niam txiv hauv paus tau hloov tswv yim muab tus Tswv Ntuj siab zoo siab dav los ua ib tug Tswv Ntuj neeg ntshai.

2. Ob niam txiv hauv paus tsis kam nyob hauv txoj kev nyiam thiab mloog Tswv Ntuj.

3. Ob niam txiv hauv paus kuj pib ntshai Tswv Ntuj; nkawd txaj muag ces nkawd mus tsiv nraim.

4. Ob niam txiv hauv paus tsis kam nyob hauv txoj kev mloog Tswv Ntuj mas tam sim ntawd nkawd kuj pib tsis sib tso siab; ib tug hais tias yog lwm tus ua txhaum.

Cov His Xas Lais pom sawv daws mus taug kev ua txhaum, mas lawv kuj paub tias yog vim ‘neeg xub ntxeev siab tsis kam saib Tswv Ntuj yog tus siab zoo’.

Cov His Xas Lais tseem muaj kwv huam piav tias ob niam txiv hauv paus cov tub ki kuj tau yoog raws li nkawd nyob hauv txoj kev ua txhaum; yog zaj kwv huam hais txog Kas Ees thiab As Npes. Zaj ntawd xav qhia tias ib txwm neeg xav sib tua vim neeg tsis yeem mloog Tswv Ntuj. Zaj kwv huam (HP 4: 1-12) piav zoo li no: As Das paub nws poj niam, ces tus poj niam xeeb tub thiab yug tau Kas Ees. Nws kuj yug tau As Npes, yog Kas Ees tus kwv.

As Npes hlob, nws ua ib tug tub yug tsiaj hos Kas Ees ua liaj ua teb. Ntev tom qab, Kas Ees txawm muab nws cov qoob los txi rau Tswv Ntuj. Hos As Npes muab thawj tus me nyuam uas nws cov tsiaj yug tau los txi Ntuj. Tswv Ntuj zoo siab rau As Npes, ces nws txais As Npes cov txim. Tab sis Tswv Ntuj tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab. Tswv Ntuj hais rau Kas Ees tias “Vim li cas koj thiaj npau taws thiab ua ntsej muag dub nciab li ko? Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.”

Kas Ees yaum As Npes mus yos. Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua.

Tswv Ntuj nug Kas Ees hais tias “Koj tus kwv As Npes nyob qhov twg?” Kas Ees teb tias “Kuv tsis paub. Kuv puas yog tus zov rawv kuv tus kwv?”

Tswv Ntuj rov hais tias “Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv! Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav.”

Cov His Xas Lais ib txwm tso siab tias Tswv Ntuj yuav xa ib tug tuaj ‘cawm’ lub ntiaj teb neeg ntawm txoj kev txhaum. Lawv hais tias Tswv Ntuj tau cog lus rau ob niam txiv hauv paus tias ib tug yuav tuaj pab neeg kom yeej dab phem, vim thaum Tswv Ntuj hais rau ob niam txiv hauv paus tias nkawd yuav tuag, mas Tswv Ntuj hais rau tus nab tias “Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws” (HP 3: 15).

Zoo li tus poj niam ib tug xeeb ntxwv yuav tsuj dab phem taub hau thiab yuav pab lub ntiaj teb neeg kom tsuj tau dab phem taub hau.

Cov His Xas Lais saib tas txhia yam hwj huam uas Tswv Ntuj tau ua los pab haiv His Xas Lais mas yog vim Tswv Ntuj xav npaj ib txog kev cawm neeg kom dim ntawm kev txhaum, kom tau rov qab tsa neeg nyob hauv txoj kev nyiam Tswv Ntuj. Tswv Ntuj thiaj tau hu Has Nplas Has, Mais Xes, cov Yaj Saub, thiab Tswv Ntuj tau qhuab qhia nws haiv neeg tas zog. Tswv Ntuj xa lawv mus nyob txim lawm pej kum teb vim Tswv Ntuj xav cawm lawv ntawm kev txhaum.

Tab sis cov His Xas Lais pheej pom tias tab yog Tswv Ntuj pab npaum li cas mas lawv dim tsis tau ntawm kev ua txhaum. Lawv pom tias yog Tswv Ntuj yuav tsum npo lawv ntawm kev ua txhaum mas lawv thiaj yuav dim tau ntawm kev txhaum. Lawv hais rau Tswv Ntuj tias “Yog koj yuav coj peb rov qab los nrog koj mas peb thiaj yuav rov qab los.” Cov His Xas Lais thov kom Tswv Ntuj ‘ntxuav’ lawv cov txhaum, lawv thov kom Tswv Ntuj ‘rov pub’ ib lub siab tshiab rau lawv, lawv thov kom Tswv Ntuj ‘kwv’ nws cov yaj rov qab los nrog nws nyob. Lawv tos coob zuj zus txog ib tug yuav tuaj cawm lawv. Tus ntawd lawv hais tias yog ‘ib tug vaj siab ncaj’ yuav coj lawv mus taug kev ncaj. Lawv kuj hais tias tus ntawd yog ‘Tswv Ntuj ib tug tub txib’, nws yuav raug txom nyem raug hiam, tab sis Tswv Ntuj tus tub txib txoj kev txom nyem yuav them tas tsoom sid cov txhaum.

Cov His Xas Lais siab ncaj thiab nco cov Yaj Saub tej lus mas lawv tos txog tus tub txib ntawd.

Nyem no peb ua txhaum vim peb tsis tso siab rau Tswv Ntuj. Peb tsis tso siab tias txoj kev Tswv Ntuj qhia kom peb taug yog txoj kev zoo dua, yog txoj kev pub kev kaj siab lug tseem ceeb rau peb, ces peb mus nrhiav tej yam zoo nyob hauv kev txhaum. Qhov kawg mas peb tsuas ntsib ‘kev tuag’ raws li cov lus tus Hauv Paus Xa Lus Paj Lug ntuas cov neeg ntseeg nyob Los Mas tias “Tus nqi tawm ntawm kev txhaum los, yog txoj kev tuag” (LM 6: 23).

Li ntawd, tos neeg ua txhaum vim peb ‘tsis tso siab’ thiab ‘tsis ntseeg txog Tswv Ntuj’. Yog peb nyob peb mas peb zam kev txhaum tsis tau; yuav tsum muaj Yes Xus lub txiaj ntsim pab, yuav tsum muaj Yes Xus npo peb. Tus cawm peb yog ‘Yes Xus’.

Yog vim peb xav dim ntawm kev ua txhaum mus li thiab peb xav muaj txoj sia mas peb thiaj vam txog Yes Xus.

Nyem no kev txhaum kuj muaj puv ntiaj teb; peb pom qhov ntawd tseeb kawg, peb ntsia nyob ncig peb thiab nyob hauv peb mas peb pom.

Tas zeej tsoom ua txhaum vim txij lub hauv paus los neeg lub tswv yim thiab neeg lub siab sab lawm, neeg ntseeg txog Tswv Ntuj tsis txaus thiab neeg nyob hauv kev ntshaw lawm.

Tej tus nug tias “Vim li cas Tswv Ntuj kheev kom neeg ua txhaum?”

Peb teb li no tias “Tswv Ntuj tsis tau kheev kom neeg ua txhaum, tab sis Tswv Ntuj xav kom neeg txiav siab nyiam Tswv Ntuj. Ib txwm neeg txiav siab tsis zoo vim neeg tsis tso siab rau Tswv Ntuj. Li ntawd, neeg ua txhaum vim neeg tso neeg lub siab mus ntshaw yam ub yam no zoo dua nyiam Tswv Ntuj.”

Peb yuav nco pom tias kev txhaum vij peb thiab nyob hauv peb, ces peb xyaum ‘tso siab rau Tswv Ntuj’ thiab ‘nyiam Tswv Ntuj’, peb thiaj zam tau kev txhaum ntau. Peb ‘vam txog Yes Xus’ pab peb ntxuav peb cov txhaum, peb ‘yoog raws li Yes Xus tus piv txwv’ kom zam tau kev xhaum ntau, peb ‘tso siab rau Yes Xus’ pab peb dim ntawm kev txhaum, peb tsis tso siab rau peb.

Hmoob puas tos ib tug huab tais yuav tuaj pab peb?

Yog Hmoob tos tus huab tais tuaj pab Hmoob, mas nws yuav pab zoo li cas?

Tus huab tais uas Hmoob tos puas yuav muaj hwj chim?

Thaum nej tau hnov hais thawj zaug txog Yes Xus, mas nej tau hnov tias Yes Xus yog ib tug zoo li cas, nws xav ua dab tsi rau peb?

Tam li nej xav, Tswv Ntuj yuav xa ib tug muaj hwj chim loj los cawm tsoom sid mas thiaj tau cawm sai, los yuav xa ib tug coj lub neej me xws li sawv daws thiaj yuav zoo dua?

Tus cawm neeg, nws yuav cawm neeg ntawm dab tsi? Thaum tus cawm neeg tuaj txog, tab sis yog yus tsis kam siv zog kom yus tau rov cawm yus thiab, mas tus cawm neeg cawm puas tau yus? Yus puas yuav muab siab rau txais nws txoj kev cawm yus?

Lub caij Hmoob tseem nyob Suav Tuam Tshoj teb, Hmoob tseem zwm rau cov vaj Ham Tshoj, Hmoob tseem teev dab, hwm niam txiv poj yawm txwv koob ib yam li Khoov Fus Txws kev cai. Thaum ntawd, nyob rau sab hnub poob mas cov Los Mas tseem kav ntau lub teb chaws, lawv muaj nom nyob hauv cov tsheej loj. Nyob hauv lub teb chaws His Xas Lais los kuj zwm rau cov vaj Los Mas. Cov His Xas Lais muaj lawv ib tug vaj yog Hes Los, tab sis lawv tus vaj tsuas yog sawv tus tuam vaj Los Mas chaw xwb. Thaum ntawd Yes Xus thiaj yug los.

Huab Tais Tswv Ntuj twb xub hu Has Nplas Has 1800 xyoo ua ntej kom los ua Huab Tais Tswv Ntuj haiv neeg; yog Huab Tais Tswv Ntuj tau siv sij hawm 1800 xyoo los npaj haiv His Xas Lais kom tau txais Yes Xus.

Yes Xus yug los nyob qhov twg? Nws yug los nyob His Xas Lais teb.

His Xas Lais teb yog lub teb chaws Huab Tais Tswv Ntuj pub rau Has Nplas Has nyob, thaum Has Nplas Has nyob mas lawv hu lub teb chaws ua ‘Kas Nas Has’.

His Xas Lais teb nyob ze lub hiav txwv Mes Dis Tes Las Nes. Cov Los Mas nyob hauv nruab nrab cov teb chaws nyob ncig Mas Dis Tes Las Nes; lawv kav tas cov teb chaws nyob ib ncig ntawm lub hiav txwv no.

His Xas Lais teb muaj ib lub nroog loj hu ua ‘Yes Lus Xas Les’, muaj peb lub xeev loj yog Nkas Lis Lais, Xas Mas Lias, thiab Yus Das.

Li ntawd, lub caij Yes Xus yug los thiab lub teb chaws nws yug thiaj yog tej yam peb paub meej kawg. Yes Xus cov hwj huam tsis yog tej zaj dab neeg, tab sis yog tej zaj tseeb tiag.

Thaum txog lub caij Tswv Ntuj ib txwm teem, Tswv Ntuj ua kom nws Leej Tub nqes los ua neeg nyob hauv tus ntxhais hluas nkauj Mab Liab.

Ua ntej Tswv Ntuj yuav xa Leej Tub tuaj nyob hauv Mab Liab, mas Tswv Ntuj xub nug Mab Liab ua ntej tso saib Mab Liab puas yeem ua Leej Tub niam. Mab Liab hais tias “Kuv yog Huab Tais tus ntxhais txib. Kuv xav kom muaj raws li koj hais”, ces Mab Liab thiaj xeeb tub. Li ntawd, peb pom tias Tswv Ntuj ‘hwm’ neeg kawg; Tswv Ntuj yuav ua ib yam loj rau ib tug neeg, mas Tswv Ntuj tsis yuam, Tswv Ntuj nug tias puas zoo siab nrog Tswv Ntuj ua.

Tus Tshiab Nkas Nplias xa lus tuaj rau Mab Liab tas lawm, mas 9 hli tom qab yuav txog lub caij Mab Liab so, ces muaj cov xwm raws li nyob hauv Lus Kas phau ntawv Moo Zoo; yam li lawv txheeb tsoom mej hwm, mas txhua leej txhua tus sawv kev mus sau npe hauv lub nroog sawv daws nyob. Mab Liab tus txiv Yos Xes coj Mab Liab sawv kev hauv Nas Xas Les mus sau npe pem lub nroog Npes Les Hes nyob Yus Das teb. Thaum nkawd tuaj txog Npes Les Hes, tsis muaj tsev txais qhua rau nkawd so. Mab Liab mob plab yuav yug me nyuam, ces Yos Xes coj Mab Liab mus so nyob hauv ib lub tsev nyuj. Mab Liab yug me nyuam, nws muab tus me nyuam pw hauv lub dab nyuj. Tib lub caij ntawd, tus Tshiab tawm tuaj qhia cov neeg zov yaj tias tus cawm neeg yug los nyob hauv lub nroog Npes Les Hes, ces cov zov yaj thiaj tuaj mus xyuas. Lawv pom muaj raws li tus Tshiab hais, lawv zoo siab.

Yes Xus yug los zoo li cov neeg pluag tshaj thiab raug kev nyuaj tiag. Co neeg me xws li cov zov yaj nyob nruab teb yog cov xub pom Yes Xus yug los. Tswv Ntuj ua hwj huam pab lawv kom paub tias tus cawm seej yug los lawm.

Yes Xus yug los xws li ib tug neeg me, tab sis Tswv Ntuj ua hwj huam pab cov neeg ncaj kom lawv zeem tau tias tus me nyuam ntawd yog tus cawm lub ntiaj teb. Tswv Ntuj xa ib co Tshiab tuaj qhia cov zov yaj. Nyem no, Tswv Ntuj xa ib lub hnub qub tuaj qhia cov kws txuj nyob pej kum teb kom lawv tuaj hawm Yes Xus.

Tswv Ntuj hu ib cov pej kum neeg tuaj hawm Yes Xus xws li hwm ib tug vaj; yog Tswv Ntuj xav qhia sawv daws tias Yes Xus yog tus Huab Tais pab tas txhiab haiv neeg, tsis yog pab cov His Xas Lais xwb.

Yes Xus nyuam qhuav yug los, tus vaj siab nkhaus hnov, mas nws xav muab Yes Xus tua, nws xa neeg mus tua cov me nyuam nyob Npes Les Hes thiab ib ncig.

Yes Xus tus cawm lub ntiaj teb neeg, cov neeg siab ncaj nyiam nws thiab hwm nws, ntawm cov neeg siab nkhaus thiab muab hlob mas lawv ntxub nws thiab xav muab nws tua.

Zaj Yes Xus yug los qhia dab tsi rau peb?

1. Tswv Ntuj ua raws li lo lus nws ib txwm cog. Ib txwm Tswv Ntuj cog lus rau As Das thiab Es Vas tias ib tug poj niam yuav yug ib tug tub; tus tub ntawd yog tus yeej dab phem. Mab Liab yug Yes Xus uas yog tus yeej kev tuag kev txhaum. Cov Yaj Saub kuj hais rau cov His Xas Lais tias ib tug Huab Tais siab ncaj yuav yug los nyob Npes Les Hes. Lawv tseem hais tias Tswv Ntuj tus Tub Txib yuav tuaj cawm Tswv Ntuj haiv neeg. Thaum Yes Xus yug los mas Tswv Ntuj tau ua raws li lo lus nws cog. Yes Xus yug los, yog Tswv Ntuj Leej Tub nqes los yuav ib lub cev neeg; yog Tswv Ntuj yam hwj huam loj tshaj.

2. Tus cawm lub ntiaj teb yug los xws li ib tug neeg me thiab pluag. Vim ntiaj teb neeg hwm kev ua thawj ua tus loj thiab hwm nyiaj txiag ntau dhau, mas Yes Xus yug los ua tus me thiab pluag kom tau ntuas ntiaj teb neeg tias cov neeg muaj nqe nyob ntawm Tswv Ntuj xub ntiag yog cov neeg mloog Tswv Ntuj lus.

3. Tswv Ntuj xub hu cov neeg me thiab siab ncaj tuaj cuag Yes Xus. Cov neeg ntawd yuav ntsib Tswv Ntuj txoj kev cawm.

4. Yes Xus ib txhij yog Tswv Ntuj Leej Tub thiab yog neeg xws li peb. Vim Yes Xus yog Tswv Ntuj Leej Tub tuaj ntawm Tswv Ntuj tuaj, Yes Xus yuav qhia tau Tswv Ntuj zaj tswv yim rau peb thiab nws yuav cev tau peb lus rau Tswv Ntuj. Vim Yes Xus yog neeg xws li peb, ces nws yuav ua piv txwv rau peb yoog. Peb muaj ib tug xws li peb mus ua peb ntej, yog peb mus raws nws qab mas peb ua Tswv Ntuj cov tub cov ntxhais xws li Yes Xus. Peb yoog raws li Yes Xus tus piv txwv, mas Tswv Ntuj txoj sia tuaj nyob hauv peb.

5. Peb niaj xyoo muaj ib lub hnub nyoog nco txog Yes Xus yug los. Hnub ntawd yog hnub tim 25 lub 12 hlis, peb cav txog lub txiaj ntsim Yes Xus pub rau peb nyob hauv nws txoj kev yug los ua neeg. Lub 12 hlis, peb kuj muaj ib lub caij ntev li 4 lis piam npaj ua hnub nyoog Yes Xus yug los; yog lub caij Tos Huab Tais.

Peb tso siab rau Tswv Ntuj thiab ua Tswv Ntuj tsaug vim nws xa Yes Xus tuaj cawm peb xws li nws ib txwm cog lus. Peb nyiam ua ib co neeg me ua sawv daws cov tub txib xws li Yes Xus. Peb tsis saib nyiaj txiag loj vim peb tus Huab Tais Yes Xus yug los nyob hauv ib lub tsev teb; qhov peb saib loj yog mloog Tswv Ntuj lo lus, yog muab siab rau ua txoj hauj lwm Tswv Ntuj pub rau peb. Peb tso siab tias peb tus Huab Tais Yes Xusyug los ua neeg me li ntawd yog tus cawm tas txhia haiv neeg; nws yog tus yuav cawm peb haiv neeg ntawm kev txhaum kev tuag; nws yog tus yuav cawm cov haiv neeg nyob ncig peb; peb yuav pab peb haiv neeg thiab hwm cov neeg kom lawv ntseeg txog Yes Xus.

Peb thov Ntuj ua ke “Huab Tais Yes Xus, koj yug los nyob hauv ib lub tsev teb, peb thov cog lus rau koj tias peb yuav nyiam ua neeg me, peb nyiam mloog luag tej, peb yuav tsis saib nyiaj txiag loj.

Leej Txiv Tswv Ntuj, koj xa Yes Xus tuaj ua neeg xws li peb, peb ua koj tsaug, peb ntseeg tias koj nyiam peb.”

Thawj yam uas ib co me nyuam yuav muab siab rau ua thiaj zoo yog dab tsi?

Thawj yam uas ib tug niam yuav muab siab rau ua yog dab tsi?

Thawj yam uas tus txiv yuav muab siab rau ua yog dab tsi?

Nyob hauv yus sim neej, yav me nyuam muaj qab hau dab tsi?

Tam li nej xav mas Yes Xus yav me nyuam puas zoo qhia yam puav rau peb, yog qhia dab tsi?

Yes Xus yug los ua neeg tab sis nws yog Tswv Ntuj thiab. Ua li mas nws tus piv txwv puas zoo qhia peb?

Peb yuav ua raws nws tus piv txwv puas tau?

Nej puas hnov Yes Xus yog ib tug piv txwv uas nyob deb peb los nyob ze peb?

Yuav ua li cas thiaj hnov nws nyob ze peb?

Yes Xus lub neej yav thaum me, mas peb hais tias yog lub neej zais ntshis vim tias Ntawv Moo Zoo tsuas piav me ntsis luv luv xwb. Lus Kas piav tseg li no: Thaum txog lub caij yuav ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Tswv Ntuj. Nkawd tseem yuav cev ib co txim rau Ntuj raws li Huab Tais Txoj Cai.

Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos tus yuav tuaj nplij His Xas Lais. Leej Ntuj Plig Ntshiab nyob roos nws. Leej Ntuj Plig coj nws tuaj nyob hauv lub Tuam Tsev Teev Ntuj. Thaum Mab Liab thiab Yos Xes nkawd coj tus me nyuam mos Yes Xus tuaj ua cov kab ke raws Txoj Cai, Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj tias “ Txiv Tswv, nyem no koj tso koj tus tub txib mus kaj lug, raws li koj lo lus, vim kuv qhov muag tau pom koj txoj kev cawm neeg, uas koj npaj nyob ntawm ib tsoom haiv neeg xub ntiag, yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej.”

Tseem muaj ib tug yaj saub poj niam, hu ua As Nas, yog Fas Nus Ees tus ntxhais, xeem As Ntxes. Nws lub hnub nyoog laus kawg. Dhau lub caij nws nyob ua nkauj xwb lawm, mas nws nrog nws tus txiv nyob xya xyoo, ces nws ua poj ntsuam laus li ntawd txog yim caum plaub xyoos. Nws tsis nrug ntawm lub Tuam Tsev Teev Ntuj li. Nws yoo mov thiab hais cov zaj teev Ntuj los hawm Tswv Ntuj thawm hnub thawm hmo. Tib lub sij hawm ntawd, As Nas kuj tuaj nyob ntawd thiab, nws cav lus zoo txog Tswv Ntuj, nws hais txog tus me nyuam rau txhia leej txhia tus uas tos txog txoj kev txhiv Yes Lus Xas Les.

 Thaum lawv ua txhua yam raws li Huab Tais Txoj Cai tas lawm, lawv rov mus Nkas Lis Lais, hauv lawv lub nroog Nas Xas Les. Hos ntawm tus me nyuam, nws hlob, nws muaj zog zuj zus, kev thoob tsib puv nws siab ntsws. Tswv Ntuj lub txiaj ntsim nyob saum nws (LK 2: 22-40).

Tswv Ntuj Leej Tub yug los ua neeg nyob Yus Das teb, nws mloog txoj cai xws li sawv daws vim nws pom xeeb yug los ua neeg mas nws xav ua xws li luag tej kom tom thawj.

Xis Mes Oos yog cov His Xas Lais siab ncaj, nws yog tus sawv lawv chaw zoo siab pom tus cawm lub ntiaj teb yug los lawm. Tus cawm lub ntiaj teb yog ib tug me nyuam, tab sis Xis Mes Oos ntseeg vim nws to taub cov Yaj Saub tej lus uas xub hais tias tus cawm lub ntiaj teb yog Tswv Ntuj tus Tub Txib, thiab Leej Ntuj Plig qhia nws.

As Nas kuj yog cov poj niam His Xas Lais siab ncaj tus sawv chaw, nws ntseeg tias Yes Xus yog tus cawm lub ntiaj teb.

Yes Xus yug los tau ib ntus tsis ntev, cov kws hnub qub tuaj hawm Yes Xus. Tus vaj Hes Los hnov cov kws hnub qub hais tias lawv tuaj hawm tus me nyuam vaj yug los nyob Npes Les Hes mas tus vaj xav muab Yes Xus tua.

Thaum cov kws hnub qub rov qab mus lawm, tus Tshiab tawm tuaj ua npau suav rau Yos Xes kom coj Mab Liab thiab Yes Xus khiav mus tsiv nraim nyob Hais Nkws Tos teb, ces Yos Xes sawv, nws coj lawv khiav hmo ntuj mus Hais Nkws Tos teb. Lawv nyob Hais Nkws Tos teb mus txog hnub Hes Los tuag, mas lawv mam los nyob ruaj hauv Nas Xas Les. Mas Tais sau piav tias Yos Xes hnov tias As Kes Los ua vaj hloov nws txiv Hes Los chaw kav Yus Das teb, ces Yos Xes ntshai mus Yus Das teb. Nws thiaj tsiv mus nyob lub zos Nas Xas Les hauv xeev Nkas Lis Lais (MT 2: 19-23).

Yos Xes thiab Mab Liab nkawd sib pab saib Yes Xus, lawv ua Yim Neeg Ntshiab. Yos Xes ua tus txiv tsev xyuam xim. Mab Liab tu tus me nyuam kom hlob xws li ib tsoom niam nyob ntiaj teb no ua, Ntawv Ntshiab hais tias Mab Liab ua tib zoo khaws txhua yam nws pom thiab hnov Tswv Ntuj ua rau tus me nyuam huv si cia rau nruab siab (LK 2: 19); vim Mab Liab paub thiab ntseeg tias tus me nyuam nws tu yog tus tuaj cawm lub ntiaj teb. Mab Liab tsis paub tias yuav zoo li cas tab sis nws tso siab rau Tswv Ntuj, ntawm Mab Liab mas nws tsuas ua Tswv Ntuj tus ntxhais txib xwb.

Ntawv Ntshiab piav ntxiv tias Yes Xus hlob, nws muaj zog zuj zus, kev thoob tsib puv nws siab ntsws, Tswv Ntuj lub txiaj ntsim nyob saum Yes Xus (LK 2: 40).

Thaum Yes Xus muaj 12 xyoos, nws nrog Mab Liab thiab Yos Xes mus pem Yes Lus Xas Les. Lus Kas piav zaj no tias thaum Yes Xus muaj kaum ob xyoos lawm, lawv mus ua lub Ntees Hla pem Yes Lus Xas Les raws li kev cai ua Ntees Hla. Dhau cov hnub ntawd tas, ces Yos Xes thiab Mab Liab nkawd sawv kev rov mus, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg. Nkawd nrhiav tsis tau, nkawd rov mus nrhiav nws pem Yes Lus Xas Les.

Nkawd nrhiav peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws Txoj Cai, nws mloog lawv thiab nug lawv. Cov neeg uas tau hnov Yes Xus hais lus, puav leej yoob tas rau nws lub tswv yim ntse thiab nws cov lus teb. Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias “Me tub, vim li cas koj ua li ntawd rau wb? Saib! Koj txiv wb nrhiav koj, wb ntxhov siab tas nrho.”

Yes Xus hais rau nkawd tias “Vim li cas neb nrhiav kuv? Neb tsis paub tias kuv yuav leg kuv Txiv cov hauj lwm lod?”

Mab Liab thiab Yos Xes nkawd tsis to taub lo lus uas Yes Xus hais rau nkawd.
Yes Xus nrog nkawd rov mus Nas Xas Les. Nws mloog nkawd lus. Yes Xus niam khaws tej ntawd huv tib si cia rau nruab siab. Hos Yes Xus hlob hauv kev thoob tsib, nws hlob cev thiab hlob hauv Ntuj lub txiaj ntsim, nyob ntawm Tswv Ntuj thiab ntawm zeej tsoom xub ntiag (LK 2: 41-52).

Zaj no pom tias Yes Xus lawv tsev neeg ua xws li ib yim neeg His Xas Lais xyiv fab teev Ntuj. Lawv nyob Nas Xas Les mas lawv yuav mus txog Yes Lus Xas Les uas deb li tsib hnub los rau hnub ke; tsis kav lawv mus.

Mab Liab thiab Yos Xes, nkawd muab siab rau qhia Yes Xus xws li tas tsoom niam thiab txiv uas muab siab rau qhia lawv tej me nyuam. Nkawd paub tias nkawd tus tub yog tus cawm lub ntiaj teb tab sis nkawd tsis paub tias yuav yog zoo li cas, ces nkawd qhia tus me nyuam xws li nkawd txawj qhia xwb.

Yes Xus kuj maj mam hlob xws li ib tsoom me nyuam; nws to taub zuj zus tias nws tuaj ua nws Leej Txiv cov hauj lwm. Nws to taub sai, tsis kav nws ua ib tug tub mloog niam thiab txiv lus.

Lub caij Yes Xus ua me nyuam nyob Nas Xas Les mas cov His Xas Lais nyob hauv lub teb chaws ntawd lawv teev Ntuj zoo li cas?

Peb yuav piav me ntsis txog 5 yam:

1. Lawv coj Mais Xes kev cai. Lawv kawm cov kev cai nyob hauv Ntawv Ntshiab. Lawv kuj kawm cov Yaj Saub tej lus nyob hauv Ntawv Ntshiab thiab. lawv saib phau Ntawv Ntshiab loj.

2. Cov kawm phau Ntawv Ntshiab thiab nthuav yog cov Fas Lis Xais thiab cov Thoob Xwm Ntawv los peb hais tias ‘Kws Ntawv Ntshiab’. Lawv muab siab rau kawm Mais Xes txoj cai thiab kawm cov Yaj Saub tej lus. Vim lawv paub Ntawv Ntshiab zoo mas tsoom pej xeem hwm lawv, sawv daws saib cov Fas Lis Xais thiab cov Thoob Xwm Ntawv loj. Cov Fas Lis Xais thiab cov Thoob Xwm Ntawv lawv coj tus yam ntxwv zoo nyob hauv tsoom sid, tab sis lawv ntau leej pom tsoom sid hwm lawv ces lawv muab hlob. Lawv kuj ntxiv tej yam rau Mais Xes txoj cai thiab lawv kom tsoom sid coj tej txoj cai ntawd.

3. Ib txog cai uas cov Fas Lis Xais kom tsoom pej xeem saib loj tshaj mas yog caiv hnub xya; hnub ntawd hu ua ‘hnub Xas Npas Tos’. Hnub ntawd lawv tsis pub ua ib yam hauj lwm me me li. Thiab hnub Xas Npas Tos lawv sib sau nyob hauv cov Tsev Txoos. nyob hauv cov Tsev Txoos mas lawv hu nkauj cav txog Tswv Ntuj raws li cov zaj Nkauj Paj Nraug thiab lawv nyeem cov Yaj Saub tej ntawv; tus twg txawj dua cov mas nws nthuav rau luag tej mloog.

4. Tsoom pej xeem His Xas Lais yog ib co neeg ua liaj ua teb ntau, tus puav ua luam los ua tub tseem hwv, los ntaus ntses nyob hauv lub pas dej Tis Npes Lias. Lawv tsis kawm txuj, lawv txais Mais Xes kev cai ntawm cov Fas Lis Xais thiab ntawm cov Thoob Xwm Ntawv nyob hauv cov Tsev Txoos. Lawv tsis yog ib co neeg muaj, lawv khwv nrhiav noj nrhiav hnav. Lawv paub tej yam loj nyob hauv Mais Xes txoj cai, lawv tos ib tug Huab Tais Pleev yuav tuaj pab cov His Xas Lais tab sis cov ntau tsis tshua paub tias yuav pab zoo li cas; lawv xav tias yuav pab caum cov Los Mas kom rov qab vim cov Los Mas yog ib co pej kum neeg tuaj sau se nyob hauv lawv teb chaws. Tej tus siab ncaj thiab paub Ntawv Ntshiab ntau mas lawv thiaj tos Leej Pleev heev dua thiab lawv paub tias Leej Pleev yuav qhia kev ncaj kev tseem ceeb.

5. Cov His Xas Lais saib lub nroog Yes Lus Xas Les loj vim yog tus vaj Das Vis lub tsheej, thiab nyob Yes Lus Xas Les muaj lub Tuam Tsev Teev Ntuj. Lawv sawv daws nyiam tuaj ua Hmoov nyob Yes Lus Xas Les; yog lawv tau kev tuaj niaj xyoo mas lawv kuj niaj xyoo tuaj. Lub hnub nyoog loj tshaj uas cov His Xas Lais tuaj pem Yes Lus Xas Les mas yog lub hnub nyoog Hla. Hnub ntawd lawv cav txog Tswv Ntuj tau cawm lawv ntawm Hais Nkws Tos teb.

Yes Xus yav yau yav hluas mas nws tau pom tas tsoom sid coj Mais Xes kev cai li ntawd; nws nrog lawv caiv hnub Xas Npas Tos, nws tau pom cov Fas Lis Xais.

Mab Liab thiab Yos Xes kuj muab siab rau pab Yes Xus kom nws tau paub Mais Xes txoj cai tib si.

Lub caij Yes Xus ua me nyuam yog ib tug piv txwv zoo qhia cov me nyuam li no:

1. Cov me nyuam thawj txoj cai yog ‘mloog niam thiab txiv lus’. Thaum lawv mloog lus mas lawv mus taug txoj kev Tswv Ntuj xav kom lawv mus. Cov me nyuam txoj kev mloog lus yog lawv txoj kev xyaum ua neeg thoob tsib.

2. Cov me nyuam yuav muab siab rau saib txhia yam, kawm tas txhua yam uas nyob ncig lawv, kawm cov txuj uas luag qhia. Lawv yuav kawm li ntawd kom lawv lub tswv yim loj tiav sai xws li Yes Xus lub tswv yim ua kom cov Thoob Xwm txoj cai qhuas txog nws nyob hauv lub Tuam Tsev Teev Ntuj.

Mab Liab tus piv txwv qhia tsoom sid tias lawv yuav hlub lawv cov me nyum vim me nyuam yog tej lub txiaj ntsim Ntuj pub rau lawv; lawv yuav nyiam tu cov me nyuam, saib cov me nyuam, qhuab qhia cov me nyuam kom mloog lus thiab thoob tsib tuaj; lawv yuav txawj pom cov hauj lwm Tswv Ntuj ua los pab cov me nyuam, cov niam yuav khaws tej txiaj ntsim ntawd tseg rau nruab siab, yuav nco ntsoov tas txhia yam txiaj ntsim uas Tswv Ntuj pub rau lawv tus me nyuam xws li Mab Liab.

Yos Xes tus piv txwv qhia cov ua txiv tias lawv yuav hlub poj niam me nyuam, pab lawv hla dhau kev iab kev khwv, kev raug xwv txheej; yuav ua tus xyuam xim xav tom ntej tom qab, mloog tas txhia yam xwm kom nws lub tsev neeg txhob raug xwv txheej thiab tau nyob thaj yeeb ua noj ua haus; yuav ua siab loj tiv cov xwm nyuaj, nws zoo li tus ncej txheem tsev, yog nws ruaj nreb mas nws tsev neeg yuav tsis ntshai, sawv daws ib rau nws.

Mab Liab thiab Yos Xes nkawd tus piv txwv zoo qhia ob niam txiv kom sib hlub, sib haum xeeb, sib koom siab saib tej me nyuam, sib koom siab qhuab qhia tej me nyuam kom tsim txiaj thiab kom hwm Tswv Ntuj, kom hwm me nyuam txoj hmoov vim yuav tsis txhob coj me nyuam ntau dhau, niam thiab txiv yuav tsum paub tias cov me nyuam lawv muaj lawv hmoov; lawv lub neej yog lub neej uas Tswv Ntuj npaj rau lawv tsis yog lub neej niam thiab txiv yuav npaj rau.

Qhov tias Yes Xus xaiv txoj kev yug los xws li peb thiab maj mam hlob xws li peb, kuj yog ib qho zoo ntuas peb tej tsev neeg tib si tias yav ua me nyuam yog ib yav muaj nqes kawg nyob hauv neeg lub neej, vim yav me nyuam yog yav uas tus me nyuam kawm ntau yam kawg, yog yav puab tus me nyuam lub tswv yim thiab lub siab, yog yav uas muaj ntau lo lus nkag hauv nws lub tswv yim, ntau zaj zoo los phem puav leej nkag hauv nws lub tswv yim. Li ntawd, cov qhuab qhia cov me nyuam muab siab rau qhuab qhia yam zoo xwb rau cov me nyuam, muab siab rau hais cov lus zoo xwb rau cov me nyuam, muab siab rau pab cov me nyuam kom lawv txawj pom tas txhuam yam nyob ncig lawv thiab txawj txiav txim rau tas txhia yam.

Yog nej yog cov me nyuam mas nej txiav siab mloog lus, txiav siab kawm txuj kawm hauj lwm; yog nej yog niam mas nej txiav siab hlub cov me nyuam thiab nyiam tu thiab qhuab qhia me nyuam; yog nej yog tus txiv mas nej hlub nej poj niam tub se, nej ua neeg xyuam xim, ua neeg siab ruaj nreb.

Cov ua niam ua txiv, mas nej yuav sib hlub sib hwm thiab sib nres.

Cov muaj hauj lwm saib cov me nyuam, mas nej yuav xyiv fab qhia tas puas tsav yam txuj me loj rau cov me nyuam, thiab nej kuj yuav hwm cov me nyuam txoj hmoov.

Peb teev Ntuj ua ke “Huab Tais Yes Xus, peb thov koj pab peb sawv daws vim peb xav ua neeg mloog lus xws li koj, peb xav ua neeg kawm tas txhia yam txuj li koj.

Leej Ntshiab Mab Liab, peb xav ua neeg hlub cov me nyuam xws li koj, nco ntsoov txog Tswv Ntuj cov txiaj ntsim.

Leej Ntshiab Yos Xes, peb xav ua neeg xyuam xim, xav muaj lub siab ruaj nreb.

Yes Xus, Mab Liab, Yos Xes, peb xav nco txog nej ntau kom peb tau hnov nej nyob ze peb, peb thiaj yuav txais ib lub zog tshiab tuaj ntawm nej tuaj.”

Peb sim tsom peb lub neej, saib tam li peb hnov sawv daws sib tham mas cov hauj lwm twg thiaj muaj nqe dua?

Saib tam li nej xav mas cov hauj lwm twg thiaj muaj nqe dua?

Ib tug neeg ua hauj lwm nyob hauv nws lub zos, mas nws puas pab tsim teb tsim chaw?

Thaum ib tug neeg ua ib txog hauj lwm nrhiav rau nws noj, puas yog ib co hauj lwm mloog Tswv Ntuj lus?

Thaum ib tug Hmoob coj kev cai dab qhuas ua hauj lwm, nws xav dab tsi?

Thaum ib tug Hmoob ntseeg txog Yes Xus, nws khwv ua hauj lwm mas nws yuav xav txog dab tsi?

Yus puas yuav saib tas zeej tsoom nrog yus nyob, lawv lub neej yog zoo nyiam los yus yuav tsis nyiam kuj tau nyob ntawm yus siab; qhov twg zoo dua?

Yog yus xav tshaj lub Moo Zoo rau ib pab neeg mas yus puas yuav tsum xub paub lawv lub neej tso, vim li cas?

Mas Tais piav txog Yes Xus ua kws ntoo nyob Nas Xas Les tias muaj ib hnub, Yes Xus rov qab los rau hauv nws teb chaws. Yes Xus qhia sawv daws nyob hauv cov Tsev Txoos, sawv daws poob siab nthav, lawv hais tias “Tus no tsis yog tus kws ntoo tus tub lod? Lub siab thoob tsib thiab tej hwj huam ntawd mas nws txais qhov twg los?” (MT 13: 54-55).

Txij lub caij Yes Xus muaj 12 xyoos los txog lub caij nws muaj 30 xyoo, lub Moo Zoo tsuas hais lo lus no xwb!

Sawv daws nyob Nas Xas Les saib Yes Xus yog Yos Xes tus tub, nws nrog Yos Xes ua kws ntoo. Ib ntus 18 xyoo Yes Xus yog ib tug kws ntoo nyob hauv lub zos Nas Xas Les hauv Nkas Lis Lais teb.

Yes Xus nrog Yos Xes ua rooj noj mov, rooj zaum, ua qhov rooj, ua khais laij liag, ua nra nog luj, ua tsheb, ua phij xab nkaub ncaws los twj taig.

Yes Xus kuj ua teb zaub vim Nas Xas Les yog ib lub zos me, ntshai Yes Xus kuj yug ob peb tug yaj los tshis thiab, los nws yug ib tug luj luab tsheb; Yes Xus mus hlais zaub luj. Yes Xus mus nrog luag tej pauv zog thiab ua hauj lwm nyob hauv luag tsev.

Thaum Yos Xes tuag lawm, Yes Xus ua hauj lwm tib leeg. Nws niam ua mov noj, tu vaj tu tsev, ua teb zaub, nqa dej, txiav taws, yug qaib. Yes Xus coj lub neej xws li cov neeg nyob Nas Xas Les.

Ntev niaj ntev xyoo Yes Xus coj ib lub neej xws li tsoom sid nyob hauv ib lub zos me, nws pom tsoom sid nyias coj nyias lub neej.

Cov ntau nyob hauv lub teb chaws yog cov ua liaj ua teb; lawv cog nplej mov mog, lawv zom nplej, lawv ncu ncuav mov mog. Lawv nyias muaj nyias lub vaj txiv ntoo cawv; lawv zom cov txiv kom tau kua los ua cawv. Lawv yug yaj ntau. Lawv xuas luj los luab tsheb los thauj nra. Lawv kuj yug qaib yug npua.

Nyob hauv Nas Xas Les, Yes Xus kuj pom cov tub tseem hwv; muaj cov nom tswv His Xas Lais, muaj cov tub rog Los Mas saib teb chaws kom txhob ntxeev siab rau tus vaj, muaj cov nom sau se tsa cov tub His Xas Lais pab lawv nqus cov nyiaj hauv lub teb chaws xa mus rau lub tuam tseem hwv Los Mas.

Thaum Yes Xus mus txog lub pas dej Tis Npes Lias, nws pom cov neeg ntaus ntses thiab puav ntses.

Yes Xus txawj pom tas txhia yam sawv daws ua, nws txawj hnov tas txhia yam lawv hais; ces Yes Xus khaws tas txhia yam tseg hauv nws nruab siab.

Thaum txog lub caij Yes Xus yuav mus tshaj nws txoj kev cawm rau sawv daws, mas nws yuav txawj hais txog cov hauj lwm sawv daws ua, txog tus tseb nplej, tus ua mov, tus ntaus ntses thiab puav ntses. Yes Xus yuav txawj hais li no rau sawv daws vim nws tau muab siab rau saib tas sawv daws uas nyob ncig nws.

Yes Xus nyiam tas tsoom sid nyob ze nws, nyob ncig nws; Yes Xus nyiam lawv lub neej, nws nyiam nrog lawv nyob ua neej. Tos Yes Xus nyiam nrog lawv nyob vim nws ‘hlub’ sawv daws. Tsis tau txog lub caij Yes Xus yuav tshaj kev cawm, tab sis niaj hnub nws paub ntsoov tias nws tuaj cawm lawv.

Yes Xus nyiam cov hauj lwm nws ua. Nws paub tias thaum lub hauv paus Tswv Ntuj tsim lub ntuj lub teb thiab tas txhia yam, Tswv Ntuj tsim As Das thiab Es Vas, ces nws tso nkawd nyob ntiaj teb no, Tswv Ntuj pub lub ntiaj teb rau nkawd ua nkawd lub vaj lub tsev kom nkawd tau cog tas txhia yam hauv lub vaj thiab zov lub vaj. Li ntawd, Yes Xus paub tias Nas Xas Les yog lub vaj, yog lub teb chaws uas cov neeg nyob ntawd yuav saib yuav tu, yuav tsim kom vam meej. Yes Xus muab siab rau ua tus kws ntoo txawj thiab ntse kom nws tau pab tsim teb chaws raws li ib tug kws ntoo ua tau.

Yes Xus kuj nyiam lub neej uas nws coj vim nws paub tias thaum nws coj lub neej ntawd mas nws ua raws li Leej Txiv Tswv Ntuj lub siab. Tab nws ua txoj hauj lwm twg mas nws ua tas siab tas ntsws, vim nws ua los cev rau Huab Tais Leej Txiv. Yes Xus kuj paub tias kev iab kev khwv yog ib yam zoo txi rau Tswv Ntuj, yog ib yam zoo them ntiaj teb neeg txim txhaum.

Yes Xus siab ntev; nws ua siab ntev tos kom nws hlob. Yes Xus yeej paub tias nws yuav mus tshaj lub Moo Zoo, nws paub tias nws yuav tshaj dab tsi rau tsoom sid. Tab sis yog nws mus tshaj lub Moo Zoo sai dhau, mas tsoom sid yuav tso siab tsis tau rau nws vim nws hluas dhau, ces Yes Xus tos kom txog ib nrab neej, nws thiaj mam tawm mus tshaj lus rau tsoom sid. Yes Xus pom xeeb nqes los ua neeg, nws coj lub neej xws li sawv daws, nws tos kom nws laus zog mas nws thiaj mus tshaj lub Moo Zoo.

Yes Xus tau ua kws ntoo thiab tau coj lub neej nyob hauv ib lub zos me, mas nws tus piv txwv zoo qhia peb tias:

1. Peb tej hauj lwm muaj nqe, vim thaum peb ua peb tej hauj lwm mas peb mloog Tswv Ntuj lus (LK 11: 27-28), thiab peb pab tsim lub ntiaj teb kom zoo tuaj; nyias pab raws li nyias pab tau. Yog peb nco txog li hais los no, mas peb pom peb tej hauj lwm muaj nqe, yog peb tsis nco mas peb tsuas txawj pom peb tas peb sid xwb.

2. Peb nyiam tsoom sid uas lawv nrog peb nyob, vim lawv kuj xws li peb thiab peb kuj xws li lawv. Peb ua ke mloog Tswv Ntuj lus, ua ke tsim zej zog.

3. Peb ua siab ntev txawj tos lub caij zoo pib ua tej yam Tswv Ntuj muab rau peb ua, ua siab ntev tos lub caij zoo pib ua peb lub neej thiab hloov cov hauj lwm loj.

4. Kev iab kev khwv yog ib txog kev zoo cawm neeg, vim tias thaum peb zoo siab ris kev iab kev khwv mas yog xws li ib lub cim tias peb nyiam mloog Tswv Ntuj lus mas Tswv Ntuj zam txhaum rau peb thiab pub txiaj ntsim pab peb ua neeg nyiam nws zoo dua, ces peb tau ntsib kev kaj siab lug, peb ntsib kev cawm neeg.

Peb yuav tig los yuav lub siab tshiab li cas?

1. Tab yus ua txoj hauj lwm twg yus yuav saib yus cov hauj lwm muaj nqe nyob ntawm Tswv Ntuj xub ntiag thiab nyob ntawm neeg xub ntiag, vim tias yog yus txoj kev mloog Tswv Ntuj lus thiab vim yog yus txoj kev pab tsim teb tsim chaw.

2. Yus yuav ua neeg nquag, muab siab rau ua yus cov hauj lwm, thiab muab siab rau xyaum kom txawj kom ntse nyob hauv yus cov hauj lwm.

3. Yus yuav nyiam nrog luag tej nyob hauv zej zog sib fim vim lawv yog cov phooj ywg pub rau yus tas yus sid.

4. Yus yuav zoo siab kawm ntev thiab tos ntev mus txog lub caij yus yuav txawj ua yus tej hauj lwm thiab txog lub caij lawv yuav txais tau yus.

peb thov Ntuj ua ke “Huab Tais Yes Xus, koj tau ua kws ntoo, koj tau coj lub neej xws li sawv daws nyob hauv ib lub zos me. Koj ua li ntawd mus txog lub caij koj muaj 30 xyoo. Peb ua koj tsaug, peb xav nyiam peb tej hauj lwm xws li koj tau nyiam koj cov hauj lwm. Peb xav nyiam cov neeg nyob hauv peb zos xws li koj tau nyiam cov nrog koj nyob Nas Xas Les. Koj tau ua piv txwv rau peb yoog. Thov koj xa koj Leej Ntuj Plig tuaj pab peb ua xws li koj.”

Puas muaj tej tus neeg xav tias lawv yeej zoo lawm, lawv tsis muaj txhaum?

Lawv puas yuav nrhiav Yes Xus txoj kev cawm lawv?

Puas muaj tej tus lawv hais tias Hmoob txoj kev teev dab twb zoo tshaj lawm, tsis tas yuav vam txog lwm txoj kev pab peb ua neeg zoo dua?

Lawv puas yuav tig ntsej los mloog Yes Xus lub Moo Zoo?

Puas muaj tej tus tsis kam faib dab tsi rau luag tej, tsis kam nco txog luag tej?

 Lawv puas yuav txais Yes Xus lub Moo Zoo?

Thaum nej tseem tsis tau ntsib Yes Xus nej puas puv siab lawm?

Puas yog vim nej tos txog ib yam zoo dua txoj kev nej ib txwm taug los, ces nej xub tau txais Yes Xus lub Moo Zoo sai?

Nej hais puas tau tias yog zoo li nej hnov tias Tswv Ntuj nyob ze nej, yog nej nrhiav mas nej yuav tau nyob hauv Tswv Ntuj lub Ceeb Tsheej?

Yog nej hnov me ntsis tias Tswv Ntuj lub Ceeb Tsheej nyob ze nej, mas nej xav tias yog vim dab tsi nej thiaj hnov tau qhov ntawd?

Tswv Ntuj ua hwj huam npaj ib tug yug los ua Yes Xus ntej thiab tuaj ntuas tsoom sid kom tos Yes Xus. Lus Kas piav zoo li no tias lub zim txwv Hes Los ua vaj kav Yus Das teb, muaj ib tug Leej Choj hu ua Ntxas Kas Lias, nws yog phiaj Leej Choj As Npias. Nws poj niam hu ua Es Lis Xas Npes, yog As Loos ib tug ntxhais xeeb ntxwv. Nkawd ob niam txiv yog neeg ncaj nyob ntawm Tswv Ntuj xub ntiag. Nkawd ua raws nraim li Huab Tais cov lus qhia thiab cov cai tas huv si, tsis muaj ib qho xyeej. Nkawd tsis muaj me nyuam li, vim Es Lis Xas Npes xeeb tub tsis tau, thiab nkawd hnub nyug kuj laus lawm.

 Muaj ib hnub, Ntxas Kas Lias tab tom leg Leej Choj txoj kab xwm nyob ntawm Tswv Ntuj xub ntiag, vim txog lub caij nws phiaj Leej Choj rov leg kab xwm. Lawv ntaus txheeb raws li cov Leej Choj kev cai ua kam, ces Ntxas Kas Lias raug ua tus chaws mus hlawv xyab hauv Huab Tais Kem Ntshiab. Lub caij hlawv xyab, tas tsoom pej xeem teev Ntuj nyob sab nraud.

Huab Tais tus Tshiab tawm tuaj sawv ntsug nyob ntawm lub thaj xyab sab xis rau nws pom. Ntxas Kas Lias pom dheev, nws ua siab nphau npog, nws ntshai kawg. Tab sis tus Tshiab hais rau Ntxas Kas Lias tias “Ntxas Kas Lias, koj txhob ntshai, vim Ntuj mloog koj cov lus thov. Koj poj niam Es Lis Xas Npes yuav yug ib tug tub rau koj, koj yuav tis nws npe hu ua Zam. Nws yuav ua kom koj kaj siab thiab zoo siab tas nrho. Thaum nws yug los, coob leej kuj yuav zoo siab. Vim nws yuav yog ib tug loj nyob ntawm Huab Tais xub ntiag. Nws yuav tsis haus kua txiv cawv, tsis haus cawv ntsim. Txij nruab thiab los, Leej Ntuj Plig Ntshiab yuav nyob puv hauv nws. Nws yuav coj coob leej tub His Xas Lais rov los rau Huab Tais, lawv tus Tswv Ntuj. Nws yuav taug kev mus ntawm Huab Tais hauv ntej. Nws yuav tau Es Lias lub tswv yim thiab lub hwj huam, kom nws coj cov ua txiv lub siab rov los rau lawv cov me nyuam, coj cov neeg qig lus rov los taug cov neeg ncaj txoj kev thoob tsib. Nws yuav npaj ib haiv neeg qhib siab lug tos Huab Tais.”

Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe raws li nws txiv Ntxas Kas Lias lub npe. Nws niam hais tias “Tsis yog. Tus me nyuam yuav hu ua Zam.”

Lawv hais rau leej niam tias “Tsis muaj ib tug hauv koj cov txheeb ze hu li ntawd.”

Ces lawv piav tes rau leej txiv saib nws xav kom lawv tis tus me nyuam npe li cas. Leej txiv kom lawv muab ib daim txiag los, nws sau ntawv tias “Nws lub npe hu ua Zam.”

Sawv daws ceeb tas. Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. Tsoom neeg nyob ze nkawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. Cov uas tau hnov luag tham txog tej xwm no, muab khaws cia rau nruab siab, lawv hais tias “Tus me nyuam ntawd yuav yog ib tug zoo li cas?”

Huab Tais txhais tes yeej nrog nraim tus me nyuam ntawd tiag. Ces Leej Ntuj Plig Ntshiab los nyob puv hauv tus me nyuam leej txiv Ntxas Kas Lias. Ntxas Kas Lias ua yaj saub hais tias “His Xas Lais tus Huab Tais Tswv Ntuj nto koob meej, vim nws tuaj xyuas thiab tuaj npo nws haiv neeg. Nws tsa ib txog kev cawm muaj zog rau peb nyob hauv nws tus tub txib Das Vis tsev neeg. Nws ua raws li nws kom cov yaj saub ntshiab txheej thaud xub qhia tias nws yuav cawm peb ntawm peb cov yeeb ncuab, thiab ntawm cov neeg ntxub peb txhais tes. Nws tau hlub peb cov yawg koob. Nws nco ntsoov txog cov lus ntshiab nws nrog lawv cog, nws nco ntsoov txog lo lus nws cog rau peb txiv Has Nplas Has tias nws yuav ua kom peb txhob ntshai, nws yuav npo peb ntawm peb cov yeeb ncuab txhais tes, peb thiaj tau kev tsob hwb nws hauv txoj kev ntshiab thiab txoj kev ncaj nyob ntawm nws xub ntiag tas peb sid.

Hos koj, me tub, luag yuav hu koj ua Leej Nyob Siab tus yaj saub. Koj yuav mus tom Huab Tais hauv ntej, koj yuav npaj nws txoj kev. Koj yuav qhia nws haiv neeg paub txoj kev cawm, uas tawm ntawm txoj kev zam txhaum los. Peb tus Tswv Ntuj lub siab hlub mos nyoos, nws xa lub hnub saum txheej siab tuaj xyuas peb. Nws kaj cov neeg zaum hauv qhov tsaus ntuj thiab cov nyob hauv kev tuag tus duab ntxoo. Nws hwj peb txhais taw mus taug txoj kev thaj yeeb.”

Tus me nyuam hlob, nws lub tswv yim muaj zog zuj zus. Nws nyob hauv teb chaws suab puam mus txog hnub nws tawm los rau cov His Xas Lais pom (LK 1: 5-17, 59-80).

Peb pom ntsoov tias Tswv Ntuj hlub ntiaj teb neeg, nws xaiv tej txoj kev zoo pab sawv daws tos nws Leej Tub yuav tuaj. Tswv Ntuj xaiv cov neeg siab ncaj xws li Ntxas Kas Lias thiab Es Lis Xas Npes los ua cov neeg coj txoj kev cawm tuaj nyob ntiaj teb. Tswv Ntuj ua hwj huam xa ib tug tuaj li ntawd, nws piav zoo kawg tias Zam yuav tuaj ua dab tsi.

Tis Npes Xes Ntxas ua vaj ntxwv tau kaum tsib xyoos, Poos Xyus Pis Las Tos ua tswj kav Yus Das, Hes Los ua vaj txheeb kav Nkas Lis Lais, Hes Los tus tij laug Fis Lis Pos ua vaj txheeb kav Is Tus Lias thiab Thas Kos Nis Tis. Lis Xas Nias ua vaj txheeb kav As Npis Les Nas. As Nas thiab Kais Fas nkawd ua Tuam Leej Choj. Thaum ntawd, Tswv Ntuj Lo Lus nrov tuaj txog Zam nyob hauv teb chaws suab puam. Zam yog Ntxas Kas Lias tus tub. Ces Zam tuaj mus ncig thoob thaj tsam ntawm dej Yos Las Das, nws tshaj ib co kab ke ntxuav pab lees txhaum kom Ntuj zam txhaum, raws li cov lus sau tseg rau hauv Yaj Saub His Xais phau ntawv tias tus qw hauv teb chaws quav poj lub suab hais tias nej npaj kev rau Huab Tais, nej ua kom nws txoj lw ncaj tuaj. Yuav txhub av rau txhua lub kwj ha, yuav ncaws txhua lub roob txhua lub pov toj kom qis, yuav tho tej kev cuam kawb kom ncaj, tej kev qawj, yuav hloov ua kev tiaj. Ces tas ib tsoom uas muaj lub cev nqaij yuav pom Tswv Ntuj txoj kev cawm.

Zam hais rau tsoom neeg uas tuaj txais kab ke ntxuav ntawm nws tias “Caj ces nab liab tsaig, leej twg qhia nej kom nej khiav dim ntawm txoj kev Npau Taws uas tuaj yuav txog? Nej cia li txi ib co txiv phim tus neeg lees txhaum. Nej txhob xav hauv nruab siab tias ‘Peb muaj Has Nplas Has ua peb txiv’, kuv hais rau nej tias Tswv Ntuj xav ua kom Has Nplas Has ib co tub ki tawm hauv cov pob zeb no los kuj tau. Zaum no rab taus twb nyob ntawm cag ntoo lawm, tsob ntoo twg tsis txi txiv zoo nkauj, yuav muab ntov, muab pov rau hauv hluav taws.

Ces tsoom neeg nug Zam tias “Peb yuav ua dab tsi?”

Zam teb rau lawv tias “Tus muaj ob lub tsho, yuav faib rau tus tsis muaj. Tus muaj mov noj, nws kuj yuav ua li ntawd thiab.”

Ib co sau se kuj tuaj txais kab ke ntxuav, lawv hais rau Zam tias “Xib Hwb, peb yuav ua dab tsi?”

Zam hais rau lawv tias “Nej tsis txhob kom luag them tshaj txoj cai txiav.”

Ib co tub rog kuj nug Zam tias “Peb ne, peb yuav ua dab tsi?”

Zam hais rau lawv tias “Nej txhob quab yuam leej twg, txhob ntxias yuav dab tsi. Nej nyiaj hli raug npaum li cas, mas nej yuav txaus siab txais li ntawd.”

Tsoom pej xeem vam vam tos ntsoov, sawv daws ua xyem xyav txog Zam rau nruab siab tias tej zaum Zam yog Leej Pleev. Ces Zam hais rau sawv daws tias “Ntawm kuv, mas kuv muab dej los ntxuav nej, tab sis tus muaj zog dua kuv yuav tuaj. Kuv tsis tsim nyog daws txoj hlua khi nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab hauv hluav taws. Nws txhais tes tuav lub vab, nws yuav ntxuaj nws lub tshav ntaus nplej. Nws yuav yawm nplej rau hauv nws lub txhab. Hos cov npluag, nws yuav muab hlawv hauv lub cub tawg tsis txawj kug.”

Zam tseem hais ntau zaj qhuab qhia ntxiv los tshaj lub Moo Zoo rau tsoom pej xeem (LK 3: 1-18).

Lus Kas cov lus saum no, mas peb pom tias muaj 3 yam piav txog Zam; yam li 1) Zam tus yam ntxwv, 2) Zam ntuas tsoom sid kom tig los yuav siab tshiab, thiab 3) Zam xub tshaj txog Yes Xus yuav tuaj.

Zam ntuas sawv daws, mas nws hais 3 yam no:

1. Yus yuav txais lub Cim Ntxuav kom yus ua ib lub cim meej tias yus xav tig los yuav siab tshiab tsis nyiam kev ua txhaum.

2. Yus ua tej yam hauj lwm tshiab phim kev ncaj.

3. Yus yuav nrhiav Tswv Ntuj lub Ceeb Tsheej thiab npaj txais tus yuav tuaj.

Mas Kos piav txog Zam kev tuag zoo li no tias yog tim Hes Los Dias, mas Hes Los thiaj xa neeg mus ntes Zam thiab muab saw hlau khi Zam rau hauv tsev loj faj. Hes Los Dias yog Hes Los tij laug Fis Lis Pos tus poj niam, tab sis Hes Los yuav los ua nws poj niam. Zam hais rau Hes Los tias “Koj tsis muaj cai yuav koj tij laug tus poj niam.”

Ces Hes Los Dias ntxub Zam tas siab tas ntsws. Nws xav muab Zam tua, tab sis nws tua tsis tau, vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas nws ntxhov siab kawg. Hes Los kuj nyiam mloog Zam thiab.

Muaj ib lub zoo sij hawm los txog, yog hnub tsuj xeeb Hes Los yug. Hes Los ua ib roog qav caw cov nom tswv hauv nws lub tuam tsev, cov thawj tub rog, thiab cov nom loj hauv xeev Nkas Lis Lais tuaj koom. Thaum ntawd, Hes Los Dias tus ntxhais chaws los dhia seev cev; nws dhia tau ntxim Hes Los thiab cov qhua koom rooj qav ntawd siab kawg. Ces tus vaj hais rau tus ntxhais tias “Koj thov saib koj xav yuav dab tsi, kuv yuav muab rau koj.”

Ces tus vaj cog lus rau tus ntxhais tias “Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav!”

Tus ntxhais tawm plaws mus nug nws niam tias “Kuv yuav thov dab tsi?”

Leej niam hais tias “Zam Ntxuav Plig lub taub hau.”

Tam sim ntawd, tus ntxhais rov los ntawm tus vaj, nws hais tias “Kuv xav kom koj muab Zam Ntxuav Plig lub taub hau tso hauv ib lub phaj, cev rau kuv tam sim no.”

Tus vaj tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. Ces tus vaj txib ib tug zov keeb tam sim ntawd, kom mus nqa Zam lub taub hau los. Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais. Tus ntxhais muab rau nws niam. Zam cov thwj tim hnov li ntawd, lawv tuaj kwv Zam lub cev mus tso rau hauv ib lub ntxa (MK 6: 17-29).

Yog vim Zam tshaj kev ncaj, nws thiaj raug tuag li ntawd; tab yog ib tug nom loj ua txhaum mas Zam ntuas nws vim Zam nyiam kev ncaj. Yes Xus kuj yuav tuag vim qhov ntawd thiab.

Tswv Ntuj xa Zam tuaj thiab tshoj Zam kom nws ntuas sawv daws mas yog vim Tswv Ntuj xav qhia dab tsi rau peb?

Tswv Ntuj xav qhia peb tias ‘Tswv Ntuj lub Ceeb Tsheej nyob ze peb’.

Tswv Ntuj lub Ceeb Tsheej yog dab tsi?

Tswv Ntuj lub Ceeb Tsheej yog Yes Xus zaj tswv yim, yog Yes Xus lub hwj huam ua hauj lwm nyob ntiaj teb no thiab nyob saum ntuj; yam li Yes Xus lub hwj huam nyob ze ntawm peb lub tswv yim, yog peb muab siab rau nrhiav mas peb yuav tau txais Tswv Ntuj lub Ceeb Tsheej; peb yuav los nyob hauv Yes Xus lub tswv yim uas ri mus puv tas ntiaj teb.Ttxhia yam hauj lwm zoo thiab ntshiab uas neeg ua nyob ntiaj teb no mas yog Yes Xus lub hwj huam ua; yog Tswv Ntuj lub Ceeb Tsheej ri mus. Thaum yus lub siab nrhiav txoj kev zoo taug mas yus nyob ze ntawm Tswv Ntuj lub Ceeb Tsheej; yus pib nyob hauv lawm.

Yog yus xav kom tau Tswv Ntuj lub Ceeb Tsheej mas yus txhob tso siab tias yus twb zoo lawm, txhob xav tias yus twb zoo tas lawm vim yus yog ib tug nto moo, txhob xav tias yus twb zoo tas lawm vim yus paub txuj los yus ua nom, txhob xav tias yus twb zoo tas lawm vim yus yog haiv neeg loj los yus yug haiv neeg ntse los vim nyob hauv yus haiv neeg tej laus tau qhia ib txog kev zoo tas lawm rau yus taug, txhob xav tias yus twb zoo tas lawm vim yus paub kev teev dab qhuas paub kev ua neeb ua khawv koob thiab yus yeej tau tas txhua yam phem lawm. Yog yus xav hauv nruab siab tias yus thiab yus haiv neeg paub kev zoo tas lawm mas yus nrhiav Yes Xus lub Ceeb Tsheej tab sis yus yuav tsis ntsib vim yus twb puv siab tas lawm, yus twb kaw yus lub siab rau lwm yam.

Yus xav kom yus tau Tswv Ntuj lub Ceeb Tsheej mas yus yuav tsum pom tias yus yog ib tug neeg muaj txhaum. Tej zaum yus tsis tau tua neeg tsis zes luag txij luag nkawm tsis ua tub sab tub nyiag, tab sis yus tsis txhob khav tam sim ntawd tias yus lub siab zoo mas yus yuav pom tias yus ua ntau yam yuav luag zoo li kev zes luag txij nkawm los zoo li kev ua tub sab los zoo li kev tua neeg. Tseem muaj lwm yam txhaum; xws li muab hlob, ntxub luag, txhob txwm tsis pab luag, hais lus xaiv, tsis hlub yus tsev neeg, tsis nrog luag koom siab tsim ib yam zoo, tub nkeeg, tsis hwm Tswv Ntuj, thiab lwm yam ntxiv.

Yog cov neeg lees tias lawv ua kam txhaum li ntawd, mas lawv thiaj yuaj nrhiav Yes Xus lo lus pab lawv dim ntawm kev txhaum.

Yus yuav tig los yuav lub siab tshiab, tso yus tej kev txhaum pov tseg. Muaj tej yam txhaum yus ua vim yus tsis nco qab txog luag tej; yus yuav tsum saib yus yuav pab luag tej zoo li cas. Muaj tej yam txhaum yus ua vim yus muab hlob los yus tsis saib luag; yus yuav tsum nyiam ua tus me zoo siab tsob hwb luag tej. Tsis yog yus lub ncauj hais tias yus tig los yuav lub siab tshiab xwb, yus kuj yuav ua tej yam hauj lwm tshiab tiag thiab yus ua tej lub cim nyob sab nraud pab yus txiav siab xws li cov neeg nrog Zam txais lub CIm Ntxuav nyob hauv dej.

Yus yuav tso siab rau Yes Xus vim nws yog tus ntxuav peb nyob hauv Leej Ntuj Plig Ntshiab thiab nyob hauv dej. Yes Xus ntxuav peb nyob hauv Leej Ntuj Plig Ntshiab; yam li nws xa Leej Ntuj Plig tuaj tshoj peb kom peb pom txog kev zoo yuav tiag. Yes Xus ntxuav peb nyob hauv hluav taws; yam li Yes Xus xav pub lub siab nyiam Tswv Ntuj thiab nyiam tsoom sid, peb lub siab thiaj yuav kub li hluav taws mus txaug txoj kev tshiab.

Tswv Ntuj pub peb hnov Zam tej kwv huam mas peb yuav txiav siab zoo li no:

1. Txij no mus peb tso siab rau Yes Xus lub Moo Zoo. Txoj kev peb yuav taug mas peb tsis tos kom luag tej qhia peb, peb nug Yes Xus lub Moo Zoo.

2. Peb ua ncaj, peb tsom peb lub siab kom peb tau pom cov txhaum uas peb ua kam.

3. Peb ua cov hauj lwm ntshiab los hloov cov txhaum uas peb ua kam.

4. Peb vam txog Yes Xus kom nws pab peb mloog nws Leej Ntuj Plig Ntshiab thiab kom nws pub lub siab nyiam kub li hluav taws rau peb.

Peb thov Ntuj ua ke “Huab Tais Yes Xus, koj lub Ceeb Tsheej nyob ze peb, thov koj coj peb los nyob hauv koj lub Ceeb Tsheej, koj coj peb los zwm rau koj lub hwj huam.

Huab Tais Yes Xus, peb xav tig los yuav lub siab tshiab, peb xav txi txiv zoo, koj pab peb mloog koj Leej Ntuj Plig Ntshiab, koj pub ib lub siab nyiam Tswv Ntuj, nyiam tsoom sid, koj pub ib lub siab kub li hluav taws rau peb.”

Thaum Yes Xus tuaj cuag tus Ntxuav Plig Zam, muaj tej tus Yus Das xub nyob ntawd mloog Zam ntuas lawv. Muaj ib tug hluas hu ua ‘Zam’ thiab; yog tus yuav ua Hauv Paus Xa Lus, thaum nws laus lawm nws piav txog Yes Xus tuaj cuag tus Ntxuav Plig Zam tias: Zam pom Yes Xus tuaj ze ntawm nws, nws hais tias “Nej ntsia Tswv Ntuj tus Yaj, tus daws qab ntuj neeg cov txhaum. Tus ntawd yog tus uas kuv hais txog nws tias muaj ib tug neeg lawv kuv qab, nws yuav tuaj, nws twb huas kuv ntej lawm, vim nws xub nyob dua kuv. Kuv tsis tau paub nws, tab sis kuv tuaj ua kab ke ntxuav nyob hauv dej kom xwv nws tawm los rau His Xas Lais pom xyeem.” Ces Zam ua tim khawv hais tias “Kuv pom Leej Ntuj Plig nqes saum ntuj xws li ib tug nquab los rau saum nws. Kuv tseem tsis tau paub nws, tab sis Tus xa kuv tuaj ua kab ke ntxuav hauv dej, nws hais rau kuv tias tus uas koj yuav pom Leej Ntuj Plig nqes los nyob saum nws, mas nws yog tus ua kab ke ntxuav nyob hauv Leej Ntuj Plig Ntshiab. Kuv tau pom, ces kuv ua tim khawv tias nws yog Tswv Ntuj tus Xaiv” (Z 1: 29-34).

Tus Ntxuav Plig Zam tsis xub paub tias Yes Xus yog tus tuaj cawm lub ntiaj teb neeg. Yog thaum Zam pom Leej Ntuj Plig nqes los rau saum Yes Xus mas nws thiaj paub. Txij thaum Zam paub lawm, mas tam sim ntawd Zam ua tim khawv tias Yes Xus yog tus yuav tuaj ntxuav sawv daws.

Yes Xus xub tuaj cuag Zam vim nws xav hais tias nws pom cov Yaj Saub His Xas Lais tej hauj lwm. Zam yog cov His Xas Lais tus Yaj Saub kawg, cov ua nws ntej, lawv tas huv si puav leej tau ntuas cov His Xas Lais kom mloog Tswv Ntuj thiab npaj tos Leej Pleev yuav tuaj. Zam kuj ua li lawd, nws yog tus kawg.

Yes Xus tuaj xyuas Zam thiab thov Zam ntxuav nws. Yog zoo li Yes Xus tuaj hais tias nws zoo siab rau Zam thiab rau cov Yaj Saub ua ntej huv tib si. Lawv tau ua lawv lub luag hauj lwm zoo. Nyem no Yes Xus tuaj ua ntxiv kom tiav.

Li ntawd, peb txhob hais tias nyem no peb muaj Yes Xus qhia peb, peb tsis saib cov Yaj Saub ua Yes Xus ntej kuj tau. Vim tias Yes Xus tsis rov hais dua cov lus uas cov Yaj Saub tau hais txog Tswv Ntuj; Yes Xus hais ib co lus tshiab ntxiv: nws xav tias peb xub tau kawm cov Yaj Saub.

Peb haiv Hmoob puas yuav hais tias peb tsis muaj ib co Yaj Saub uas Ntuj xa tuaj, ces peb tsis muaj hmoov, peb yuav kawm Yes Xus xwb thiab yuav kawm cov Yaj Saub His Xas Lais uas lawv yog ib haiv neeg deb peb kawg?

Peb txhob hais li ntawd!

Tswv Ntuj tau pab thiab qhia cov His Xas Lais ntau dua luag tej vim lawv yog haiv neeg uas Yes Xus yug los nyob hauv lawv. Tab sis peb haiv Hmoob kuj tau tej tus neeg thoob tsib tau qhia ntau yam zoo pab Hmoob ua ib haiv neeg paub kev paub cai, muaj kev sib hwm thiab hwm dab qhuas.

Thaum peb pom Yes Xus tuaj cuag tus Yaj Saub Zam mas peb yuav xav tias Zam kuj yog tus sawv peb cov yawg koob thoob tsib lawv chaw. Yes Xus tuaj xyuas Zam zoo li nws pom peb cov yawg koob thoob tsib lawv tej lus qhuab qhia zoo. Li ntawd, peb cov neeg txais Yes Xus kev ntseeg yuav paub tias Yes Xus xav kom peb khaws peb cov yawg koob thoob tsib tej txuj. Nyob hauv tas txhua yam uas peb txais ntawm peb cov yawg koob, muaj tej yam uas peb yuav tsum tso pov tseg vim tej yam ntawd tsis haum txheej tshiab kev paub txuj, los tsis haum kev tseeb.

Tab sis yam twg hauv kev ntseeg txog Tswv Ntuj los twm kev ntseeg mas peb khaws tseg zoo. Peb yuav lwm cov txuj uas peb txais ntawm kev txwj kev laus los; vim Leej Ntuj Plig tau tuaj tshoj lawv; lawv cov txuj yog ib lub txiaj ntsim uas Tswv Ntuj pub rau peb haiv Hmoob.

Yes Xus xav txais lub Cim Ntxuav vim nws xav pab peb cov neeg txhaum kom yeej kev txhaum. Yes Xus nqes los ua neeg; nws yug los zoo li ib tug me nyuam nyob hauv ib tsev neeg me, nws ua hauj lwm zoo li cov kws ntoo txheej thaud; nws tau saj kev sab kev nkees vim nws nqes los ua neeg xws li peb tiag.

Tab sis nws yog tus siab ntshiab; vim li cas thiaj xav txais Zam lub cim ntxuav?

Yog vim Yes Xus xav hais tias nws yuav coj zeej tsoom kom dim ntawm kev txhaum. Luag tej tuaj txais Zam lub cim ntxuav vim lawv xav hais tias lawv xav tig los yuav ib lub siab tshiab. Yes Xus txais lub cim ntxuav vim nws xav hais rau peb tias “Kuv tuaj nyob xyaw nej cov neeg txhaum vim kuv yog tus yaj yuav tuag kom tau them nej txim txhaum, thiab kuv yuav qhia txog kev ntxiv zog rau nej kom nej yeej kev txhaum. Kuv tuaj ris nej cov txhaum vim kuv xav thau nej cov txhaum.”

Peb yuav ua Yes Xus tsaug tsis tseg vim nws tuaj nyob ze peb cov neeg txhaum, nws tuaj xyaw peb kom peb tau hnov nws nyob ze peb thiab kom peb tso siab tias peb yuav yeej kev txhaum. Tab yog peb rov poob hauv kev txhaum ntau zaus, mas peb yuav tso siab tias Yes Xus tseem nyob ze peb xws li nws tau nyob xyaw cov neeg txhaum nyob hauv tus dej Yos Las Das.

Leej Txiv thiab Leej Ntuj Plig tuaj hais tias Yes Xus yog tus uas ntiaj teb neeg yuav mloog. Yes Xus yog tus uas Tswv Ntuj nyiam; Leej Txiv lub suab hais li ntawd.

Yes Xus yog tus tuaj ua neeg nyob ntiaj teb no kom nws tau ua Leej Txiv thiab Leej Ntuj Plig cov hauj lwm. Leej Ntuj Plig tau tuaj nyob saum Yes Xus kom peb paub. Tej hauj lwm uas ib txwm Leej Ntuj Plig tuaj ua nyob hauv cov haiv neeg nyob ntiaj teb no mas Yes Xus yog tus yuav piav rau zeej tsoom hnov tseeb.

Yog peb xav paub tias Leej Ntuj Plig xav coj lub ntiaj teb neeg mus taug txoj kev twg mas peb mloog Yes Xus, peb taug nws tus lwj lwm.

Leej Txiv, Leej Ntuj Plig Ntshiab thiab Yes Xus koom siab koom ntsws vim Yes Xus yog Huab Tais Leej Tub.

Peb yuav muab siab rau txais cov Yaj Saub His Xas Lais cov lus. Vim cov lus lawv tau hais yog tej zaj zoo pab peb txais Yes Xus zoo, Yes Xus nyiam lawv cov lus. Yes Xus xav kom peb paub lawv cov lus qhia txog Tswv Ntuj. Li ntawd, peb yuav nquag nyeem thiab mloog Ntawv Cog Lus Qub. Thaum peb ua cov Txoos Teev Ntuj, peb nyeem Ntawv Ntshiab mas peb muab siab rau txais cov Yaj Saub tej lus.

Peb yuav hwm cov yawg koob Hmoob thoob tsib cov txuj, vim Yes Xus pom zoo peb ua li ntawd.

Peb yuav saib Yes Xus yog tus tuaj thau peb cov txhaum. Yog peb npuab Yes Xus thiab taug Yes Xus tus lwj lwm mas peb yuav yeej kev txhaum. Li ntawd, peb txiav siab taug Yes Xus tus lwj lwm kom peb tau ua neeg ntshiab zuj zus, kom peb dim ntawm kev ua qhev nyob ntiaj teb no.

Peb los thov Ntuj ua ke “Huab Tais Yes Xus, koj yog tus Yaj thau lub sim ceeb cov txhaum, koj tuaj nyob xyaw peb cov neeg txhaum, peb ua koj tsaug. Leej Ntuj Plig Ntshiab, ib txwm koj tau pab peb haiv neeg kom peb paub me ntsis kev thoob tsib, peb ua koj tsaug. Huab Tais Leej Txiv, Yes Xug yog koj Leej Tub uas koj nyiam, peb xav mloog nws lus.”

Tshaj tawm: Tim 22 lub 12 hlis 2024

Ob tug sib nyiam sib hlub, nkawd tseem tsis tau ntsib dua tej xwm nyuaj, nkawd puas tau sim nkawd kev sib nyiam?

Ib tug txiv nyiam nws cov me nyuam, nws puas sim lawv siab los tso lawv ua ywj siab nyob hauv txoj kev yooj yim xwb?

Cov dab phem cov hauj lwm yog dab tsi, raws li Hmoob hais?

Raws li kev ntseeg, dab phem hauj lwm yog dab tsi?

Sim neeg siab puas yuav zoo li ntxias neeg?

Puas yuav thov Xas Tas kom nws txhob tuaj ntxias yus? Vim li cas?

Thaum Yes Xus yuav pib tshaj nws txoj kev cawm neeg, Tswv Ntuj xav sim Yes Xus siab, ces Leej Ntuj Plig coj Yes Xus mus nyob teb chaws suab puam. Tswv Ntuj kheev kom dab phem tuaj ntxias Yes Xus. Mas Tais piav zoo li no tias Leej Ntuj Plig coj Yes Xus mus rau teb chaws suab puam kom raug dab phem ntxias. Yes Xus yoo mov tau plaub caug hnub plaub caug hmo, ces nws tshaib plab. Ces niag ntxias neeg txav los, nws hais rau Yes Xus tias “Saib, koj yog Tswv Ntuj Leej Tub no, koj hais kom cov pob zeb no txia ua mov!” Tab sis Yes Xus teb tias “Muaj lus sau cia tias neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug txoj sia thiab.”

Dab phem tseem coj Yes Xus nrog nws mus hauv lub Nroog Ntshiab, ces dab phem coj Yes Xus mus tso puag saum lub ruv Tuam Tsev Teev Ntuj, dab phem hais tias “Saib, koj yog Tswv Ntuj Leej Tub no, koj dhia lawm puag hauv, vim muaj lus sau cia tias Ntuj yuav txib nws cov Tshiab, kom lawv nqa koj nyob hauv lawv txhais tes, kom koj ko taw txhob dawm ib lub pob zeb li.” Yes Xus hais rau dab phem tias “Tseem muaj lus sau cia tias koj yuav tsis txhob ntxias koj tus Huab Tais Tswv Ntuj.”

Dab phem tseem coj Yes Xus mus txog saum ib lub roob siab siab. Nws taw cov ceeb tsheej muaj koob meej nyob ntiaj teb rau Yes Xus ntsia. Nws hais tias “Yog koj txhos caug pe kuv, mas kuv yuav muab tej ntawd tas huv si rau koj.” Yes Xus hais rau dab phem tias “Xas Tas, koj khiav mus! Vim muaj lus sau cia tias tus koj yuav pe, yog koj tus Huab Tais Tswv Ntuj. Koj yuav teev nws tib leeg xwb.”

Dab phem thiaj khiav ntawm Yes Xus mus, ces cov Tshiab txav los tsob hwb Yes Xus (MT 4: 1-11).

Nyob hauv zaj no peb pom tias Leej Ntuj Plig coj Yes Xus mus txog teb chaws suab puam, cia dab phem tuaj ntxias Yes Xus. Yam li Leej Txiv Tswv Ntuj pom zoo sim Yes Xus siab vim Tswv Ntuj xav kom Yes Xus rov qab muaj ib lub caij rov ‘xaiv’ txoj kev mloog Leej Txiv, Yes Xus yuav ua piv txwv rau peb kom peb xaiv mloog Tswv Ntuj.

Tab sis Tswv Ntuj tos kom Yes Xus xaiv kev mloog lus, hos dab phem xav kom Yes Xus poob hauv kev txhaum, mas dab phem thiaj ‘ntxias’ Yes Xus.

Dab phem ntxias zoo li cas?

Dab phem xav kom Yes Xus tso txoj kev ua Leej Pleev thiab Tswv Ntuj tub txib cawm ntiaj teb pov tseg, dab phem xav kom Yes Xus xaiv txoj kev nrhiav koob meej, kev noj qab nyob zoo.

Tswv Ntuj sim Yes Xus siab mas tsis yog sim ib zaug xwb; Tswv Ntuj sim Yes Xus siab tas Yes Xus sim neej, txij hnub yug los mus txog hnub tuag. Yes Xus tau xaiv txoj kev mloog Leej Txiv mus li.

Yes Xus nyiam Leej Txiv ces nws yug los ua neeg pluag nyob Npes Les Hes. Yes Xus nyiam Leej Txiv ces nws coj lub neej khwv nyob Nas Xas Les. Yes Xus nyiam Leej Txiv ces lub caij tshaj Ntuj Lus mas nws ua sawv daws tus tub txib. Yes Xus nyiam Leej Txiv ces nws txais txoj kev tuag nyob saum Ntoo Cuam.

Mas Tais piav Yes Xus raug kev sim siab hmo luag yuav tuaj ntes nws, zoo li no tias Yes Xus nrog cov thwj tim mus txog ib qho chaw hu ua Nkes Txes Mas Nis. Nws hais rau lawv tias “Nej zaum ntawm no, kuv yuav mus teev Ntuj nyob tod.”

Yes Xus coj Pob Zeb thiab Ntxes Npes Dais ob tug tub nrog nws mus. Nws pib tu siab thiab pib txhawj. Nws hais rau lawv tias “Kuv tus plig tu siab yuav tuag, nej nyob ntawm no, nej nrog kuv zov hmo.”

Yes Xus mus deb me ntsis ntawm lawv, nws khoov ntsej muag ti av. Nws thov Ntuj li no “Kuv Txiv, yog koj kheev no, thov kom lub ntim no hla mus deb ntawm kuv! Tab sis, txhob ua raws li kuv xav, koj ua raws li koj xav.”

Yes Xus rov los ntawm nws cov thwj tim. Nws pom lawv tsaug zog. Nws hais rau Pob Zeb tias “Ua li mas, nej tsis muaj peev xwm nrog kuv zov hmo ib teev. Nej zov hmo mas, nej teev Ntuj kom nej txhob poob rau hauv txoj kev ntxias. Lub tswv yim kub lug, tab sis lub cev nqaij tsis muaj zog.”

Yes Xus rov mus teev Ntuj dua, zaum ob. Nws hais tias “Kuv Txiv, yog kuv tsis haus, lub ntim no yuav tsis hla mus, mas cia ua raws li koj lub siab xav.”

Yes Xus rov qab los, nws pom cov thwj tim rov tsaug zog, vim lawv qhov muag tawv. Yes Xus cia lawv nyob lawv, nws rov mus. Nws rov teev Ntuj dua zaum peb. Nws rov hais tib co lus li qub. Yes Xus rov los ntawm cov thwj tim, nws hais rau lawv tias “Nej tseem tsaug zog. Nej so mas. Yuav txog lub sij hawm uas luag muab Neeg Leej Tub rau hauv cov neeg txhaum txhais tes. Nej sawv! Peb mus. Tus muab kuv rau luag tuaj yuav txog” (MT 26: 36-46).

Peb pom ntsoov tias Tswv Ntuj sim Yes Xus siab hnub ntawd; yam sim Yes Xus siab yog qhov Yes Xus yuav raug txom nyem loj. Ntawv Ntshiab tsis hais tias dab phem tuaj ntxias Yes Xus. Vim Leej Txiv nyiam Yes Xus tshaj thiab xav kom Yes Xus ua piv txwv zoo tshaj rau ntiaj teb neeg, Leej Txiv thiaj sim Leej Tub siab li ntawd.

Yes Xus tau pab ntiaj teb neeg ua siab loj nyob hauv txoj kev sim siab, vim Yes Xus hais tias “Kuv txiv, txhob ua li kuv nyiam, koj ua li koj nyiam.”

Yes Xus thiaj yog tus lwj lwm peb yoog taug tas peb sid.

Yes Xus nyiam Leej Txiv zoo, nws tsuas xaiv txoj kev uas Leej Txiv xav kom nws taug. Nyob hauv cov lus Yes Xus hnov ntawm cov neeg nrog nws nyob, Yes Xus txawj pom cov lus twg yog dab phem cov lus ntxias. Mas Tais piav tias Yes Xus pib qhia nws cov thwj tim tias nws yuav tsum mus Yes Lus Xas Les. Nyob ped, nws yuav raug cov txwj laus, cov thawj leej choj thiab cov thoob xwm ntawv tsim nws. Lawv yuav muab nws tua. Hnub peb, nws yuav sawv rov los.

Pob Zeb rub Yes Xus los ntawm nws, nws nroo rau Yes Xus tias “Huab Tais, xav kom Tswv Ntuj txuag koj! Tsis pub kom tej yam ntawd tuaj raug koj!”

Tab sis, Yes Xus fee hlo, nws hais rau Pob Zeb tias “Xas Tas, koj lawv kuv qab. Koj thaiv kuv kev. Vim qhov koj xav, tsis yog qhov Tswv Ntuj xav, yog tej yam neeg xav xwb” (MT 16: 21-23).

Pob Zeb cov lus tsis yog ib co lus tuaj ntawm Tswv Ntuj tuaj; yog ib co lus tuaj ntawm dab phem tuaj ntxias Yes Xus. Pob Zeb tsis paub, tab sis dab phem paub; dab phem xuas Pob Xeb lub ncauj los ntxias Yes Xus kom tso txoj kev mloog Leej Txiv pov tseg.

Cov neeg ntseeg mas tas lawv sid yog ib lub caij sim siab; Tswv Ntuj sim saib peb puas ntseeg tiag. Thawj tus neeg ntseeg yog Has Nplas Has. Tswv Ntuj sim Has Nplas Has siab, nws qhia kom Has Nplas Has tso Has Nplas Has lub teb chaws tseg. Has Nplas Has tsuas muaj ib tug tub xwb; Tswv Ntuj sim saib Has Nplas Has puas nyiam Tswv Ntuj dua nws tus tub.

            Tswv Ntuj sim cov His Xas Lais lub siab nyob teb chaws suab puam, nyob Npas Npis Los, thiab ntau zaus ntxiv.

Nyem no Tswv Ntuj tseem sim peb cov neeg ntseeg. Tswv Ntuj tso 2 txog kev nyob ntawm peb xub ntiag; yam li txoj kev tuag thiab txoj kev muaj txoj sia. Tswv Ntuj sim saib peb puas xaiv txoj kev muaj txoj sia.

Vim li cas Tswv Ntuj thiaj sim peb siab?

Yog vim Tswv Ntuj xav pab peb kom peb pom tias peb puas nyiam Tswv Ntuj los tsis nyiam.

Thaum txoj kev mloog Tswv Ntuj yog ib txog kev yooj yim xwb, yus taug txoj kev yooj yim ntawd, yus tsis tau paub tias yus puas nyiam Tswv Ntuj tiag. Hos tej lub caij yus raug txom nyem, yus nyiam Tswv Ntuj li qub, mas yus thiaj paub tias yus nyiam Tswv Ntuj tiag.

Tswv Ntuj sim peb xws li lawv sim nyiaj sim kub saib puas yog tseem nyiaj tseem kub. Lawv sim nyob hauv hluav taws, Tswv Ntuj kuj sim peb nyob hauv kev nyiam.

Yog vim Tswv Ntuj xav kom peb ua nws cov me nyuam hlob tiav, siab loj, siab tawv, Tswv Ntuj thiaj sim peb siab. Yes Xus hais tias “Nyob hauv kuv, tus ceg twg tsis txi txiv zoo mas kuv Txiv tav nws ntsis kom nws txi txiv ncw dua.” Kev txom nyem, kev nyuaj, kev sim siab mas thaum peb txais tau lawm mas yus zoo tuaj ntxiv.

Peb hais txog Tswv Ntuj sim peb tas lawm. Txuas no mus peb hais txog dab phem ntxias peb kom peb poob hauv kev txhaum.

Tus uas Ntawv Ntshiab hu ua ‘dab phem’ los ‘Xas Tas’ mas tsis yog cov dab xws li Hmoob hais kam. Xas Tas yog tus dab ntxeev siab tsis kam hwm Tswv Ntuj txij lub hauv paus los. Xas Tas txoj hauj lwm yog ‘ntxias’ peb kom peb tsis txhob mloog Tswv Ntuj lus. Yog Xas Tas tuaj ntxias Yes Xus nyob hauv teb chaws suab puam; nws ua kom Yes Xus lub tswv yim pom tas txhua yam ntxias Yes Xus xws li Mas Tais piav.

Dab phem ua zoo li cas ntxias neeg? Dab phem tsis ua hwj huam yees ntxwv los yuam neeg, los hem neeg, los haub neeg; peb tsis pom xyeem ntawm qhov muag, tsis hnov ntawm pob ntseg. Zaum puav dab phem ua hwj huam yees ntxwv, tab sis yog tsawg zaus kawg; yuav luag tsis muaj.

Dab phem nyas peb lub siab thiab peb lub tswv yim, nws ua kom peb ‘ntshaw’; yam li ntshaw noj qab nyob zoo, ntshaw nyiaj txiag, ntshaw muaj koob meej, ntshaw kev plees kev yi, ntshaw nyob dag. Dab phem ntxias lub siab kom peb mloog peb lub siab ntshaw thiab ncaim ntawm txoj kev uas Tswv Ntuj xav kom peb xaiv. Dab phem tau kev yooj yim ntxias peb vim peb twb yeej ntshaw ua ntau yam phem.

Dab phem vam txog tas puas tsav yam los ntxias peb; yam li vam txog kev hnav, kev noj, kev haus, kev ua si, kev ntaus phooj ywg. Dab phem paub tias peb yuav tsum siv tej ntawd, peb yuav ntsib tej ntawd, ces dab phem vam txog tej ntawd los ntxias peb. Dab pheem tseem vam txog cov neeg mloog nws lus kom lawv tsim tej yam ntxias neeg siab; yam li tsim tej yam ua sib hem, los tsim tej phau ntawv coj neeg mus taug txoj kev phem. Cov neeg pab dab phem ua tej yam ntxias neeg li ntawd, mas peb saib lawv yog zoo li dab phem tes taw kuj tau.

Yog li Tswv Ntuj puas kheev kom dab phem ntxias peb? Peb yuav teb li no: Dab phem ua yam twg mas yog vim Tswv Ntuj kheev mas dab phem thiaj ua tau. Tswv Ntuj kheev kom dab phem tuaj ntxias Yes Xus. Ntawv Moo Zoo hais tias “Leej Ntuj Plig coj Yes Xus mus rau teb chaws suab puam, cia dab phem tuaj ntxias Yes Xus.” Thaum peb raug dab phem ntxias, mas kuj yog vim Tswv Ntuj kheev.

Vim li cas Tswv Ntuj thiaj kheev kom dab phem ua li ntawd? Vim yog ib txog kev sim siab. Dab phem ntxias, Tswv Ntuj xav sim siab kom peb xaiv kev zoo ces peb hlob mus hauv txoj kev nyiam, peb yeej dab phem, yeej txoj kev tuag.

Yog li peb puas yuav ntshai dab phem ntxias? Kwv tij Hmoob, peb yuav thov kom Tswv Ntuj txhob kheev dab phem ntxias. Yog Tswv Ntuj pom zoo cia peb raug kev ntxias mas peb yuav thov kom nws pab peb yeej kev ntxias, peb yuav hais nqe lus hauv zaj peb Txiv tias “Koj txhob tso peb raug kev ntxias, koj npo peb dim ntawm kev phem.”

Thaum Tswv Ntuj sim peb siab, peb yuav xyiv fab xav yam uas Tswv Ntuj nyiam, vim tias:

1) Yog kev peb yuav muaj txoj sia,

2) Yog lub cim tias peb nyiam Tswv Ntuj,

3) Yog txoj kev uas peb hlob tuaj hauv kev nyiam,

4) Yog txoj kev yoog raws li Yes Xus thiab tas tsoom Leej Ntshiab.

Peb yuav thov kom peb txhob raug kev ntxias vim peb ntshai tsam peb tsis yeej. Thaum peb raug kev ntxias, peb thov kom Tswv Ntuj pab peb yeej xws li Yes Xus uas nws niaj zaus yeej. Yog peb ntog, yam li peb swb kev ntxias mas peb thov txhaum ntawm Yes Xus thiab thov Yes Xus lub txiaj ntsim pab peb rov sawv sai mus taug kev nyiam Tswv Ntuj.

Peb thov Ntuj ua ke “Huab Tais Yes Xus tas koj sim neej, koj tau mloog Leej Txiv. Thaum txog lub caij sim peb siab, thov koj pab peb xaiv txoj kev Tswv Ntuj nyiam. Huab Tais Leej Txiv, thov koj txuag peb kom peb txhob raug kev ntxias. Thaum dab phem tuaj ntxias peb siab, thov koj pab peb xaiv txoj kev nyiam koj. Huab Tais Yes Xus, thaum peb ntog hauv kev txhaum, thov koj tsa peb nyob hauv txoj kev nyiam Tswv Ntuj. Ua li.”

Nyob hauv Hmoob cov kev cai lawv txais ntawm txheej thaud los mas puas muaj xib hwb thiab puas muaj thwj tim?

Yog muaj mas tus xib hwb ua dab tsi, thiab tus thwj tim ua dab tsi?

Thaum nej txais kev ntseeg lawm, nej xav coj lub neej tshiab; nej yuav nyiam txoj kev twg zoo dua?

Nyiam kawm ib zag kev cai thiab mloog txoj kev cai, los nej nyiam ntsia ib tug huab tais thiab yoog raws nws?

Nej puas xav tias cov xav txais kev ntseeg yuav tsum muaj cim xeeb zoo thiaj kawm tau kev ntseeg?

Yog nej tsis xav li ntawd mas nej xav tias tus ntseeg yuav muaj lub tswv yim zoo li cas thiaj zoo?

Nej puas tau hnov dua Hmoob hais tias ‘peb tsis xav ua Yes Xus kev cai vim yuav tsum kawm ntau yam dhau’, yog nej hnov mas nej yuav teb zoo li cas?

Nej yuav nyiam lub npe twg dua: peb yog cov neeg lawb dab, peb yog neeg ua Ntuj kev cai, peb yog neeg ntseeg, los peb yog Yes Xus cov thwj tim?

Phau ntawv Moo Zoo piav tias thaum Yes Xus tseem nyob ze tus dej Yos Las Das, nws nyuam qhuav txais lub Cim Ntxuav tas, mas Yes Xus npaj mus ncig teb ncig chaw tshaj lub Moo Zoo, ces Yes Xus ntsib thawj 4 tug thwj tim; yog Xis Moos Pob Zeb, As Nres, Yas Kos, thiab Zam.

Plaub tug thwj tim ntawd, lawv pom Yes Xus thiab hnov Yes Xus cov lus, lawv tso siab rau Yes Xus tam sim ntawd. Yog vim Yes Xus sawm txhiaj thiab hais ib co lus raug lawv siab; lawv tseem tsis tau paub Yes Xus tab sis lawv hnov Yes Xus cov lus mas lawv lub siab txawv tuaj tas. Lawv tso siab rau Yes Xus, kuj yog vim Leej Ntuj Plig tuaj tshoj lawv siab, ces lawv yog ib co neeg tos txog Leej Pleev tus yuav tuaj cawm tsoom His Xas Lais; tus Tswv Ntuj cog lus tias yuav xa tuaj.

Yes Xus nrhiav nws cov thwj tim nyob hauv tej tus neeg sib paub, tej tus ua kwv tij, lawv nyob ib lub teb chaws tsis deb ntawm Yes Xus lub teb chaws. Yes Xus twb paub tias nws yuav tshaj lub Moo Zoo rau tas ntiaj teb; tab sis nws maj mam pib ua nyob hauv lub teb chaws nws nyob tso.

Yog zoo li cov ntawd tsis tau tuaj nrog Yes Xus tam sim ntawd, yog hnub puav tom qab ntxiv lawv thiaj tso tas txhua yam thiab mus lawv Yes Xus qab.

Lus Kas piav zoo li no tias thaum Yes Xus nyob ntawm ntug pas dej Nkes Nes Xas Les, ib pab neeg coob sib txiv mloog Tswv Ntuj Lo Lus ntawm nws. Yes Xus pom ob lub nkoj nres ntawm ntug dej. Cov tub puav ntses nqes nkoj tas lawm, lawv ntxuav lawv cov vas. Yes Xus nce mus hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis. Yes Xus zaum hauv nkoj qhia tsoom sid. Thaum Yes Xus hais lus tas, nws hais rau Xis Moos tias “Koj nquam nkoj mus lawm tom qhov dej tob, nej tso nej cov vas nqes mus puav ntses.” Xis Moos teb tias “Xib Hwb, peb twb khwv ib hmos tsis tau dab tsi. Tab sis yog vim koj hais, mas kuv yuav pov cov vas nqes mus.”

Ces lawv pov vas. Lawv puav tau ntses ntau kawg ua lawv cov vas ntuag kiag. Lawv co tes rau cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog.

Xis Moos Pob Zeb pom li ntawd, nws txhos caug ntua pe Yes Xus, nws hais tias “Huab Tais, koj txav mus deb kuv, vim kuv yog ib tug neeg txhaum.”

Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau. Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug npawg, nkawd kuj ntshai kawg. Yes Xus hais rau Xis Moos tias “Koj txhob ntshai, txij no mus, koj yuav puav neeg.” Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus (LK 5: 1-11).

Nyob hauv zaj peb nyuam qhuav nyeem rau nej mloog ntawd, mas yuav pom tias Yes Xus ua hwj huam yees ntxwv pab cov nws yuav hu los lawv nws qab kom lawv ‘tso siab’.

Txij hnub ntawd, Pob Zeb thiab ob tug nrog Pob Zeb tso lawv txoj hauj lwm tseg, tso vaj tse tseg. Lawv nrog Yes Xus mus ncig teb ncig chaw, lawv txiav siab pib ua Yes Xus thwj tim, ua lub neej tshiab nrog Yes Xus mus tshaj lub Moo Zoo.

Yes Xus hais rau lawv tias “Txij no mus nej yuav puav neeg.” Yog ib lo lus paj lug xav qhia lawv tias lawv txoj hauj lwm yav tom ntej yog dab tsi; yam li sau neeg los ua Tswv Ntuj haiv neeg.

Muaj ib zaug, thaum Yes Xus tab tom mus kev, nws pom Mas Tais zaum ntawm lub rooj sau se. Yes Xus hais rau nws tias “Koj raws kuv mus!” Ces Mas Tais sawv tsees raws Yes Xus mus tam sim ntawd (MT 9: 9). Mas Tais tau caw Yes Xus thiab thawj cov thwj tim xub nrog Yes Xus nyob tuaj noj ib pluag mov hauv nws tsev, ces Mas Tais ua Yes Xus thwj tim. Thaum Mas Tais laus lawm mas nws sau tas txhua yam nws pom thiab hnov ntawm Yes Xus ua tej phau cia.

Yes Xus ncig teb ncig chaw tshaj lub Moo Zoo rau tsoom sid mloog, muaj ntau pua ntau txhiab leej tuaj mloog Yes Xus. Ntau leej xav raws Yes Xus qab hnub puav kom lawv tau hnov Yes Xus cov lus, tab sis lawv yuav tsum rov mus tsev ua rau lawv tsev neeg noj. Zoo li muaj ntau leej hauj sim tau raws Yes Xus qab ib ntus. Ntawv Moo Zoo tau hais txog 72 leeg ua Yes Xus thwj tim mus qhia zej zog kom lawv tos Yes Xus.

Tab sis nyob hauv cov neeg zoo siab ua Yes Xus cov thwj tim, zoo siab txais Yes Xus cov lus thiab tshaj rau tsoom sid hnov, Yes Xus xaiv lawv 12 leeg ua cov Hauv Paus Xa Lus (MT 10: 1-4).

Yes Xus paub tias nws yuav nyob ntiaj teb no tsis ntev, thiab Yes Xus yog ib tug neeg; nws ib txhij yuav mus tshaj Leej Txiv lus puv tas ntiaj teb tib sit sis tau. Yes Xus thiaj xaiv 12 tug thwj tim uas niaj hnub yuav nrog nws nyob, lawv paub nws, lawv yoog raws nws tus lwj lwm, thiab lawv ua tseem thwj tim tiag. Thaum Yes Xus yuav tso ntiaj teb no tseg mas yog lawv yuav ua txoj hauj lwm uas Yes Xus pib ua lawm ntxiv mus. Li ntawd, Yes Xus nrhiav ib co neeg ntseeg txog nws zoo, kawm nws lub ntsiab; cov neeg ntseeg zoo tshaj lawv yuav coj kev ntseeg mus txog luag tej. Yes Xus xav vam txog ib co neeg kom lawv ua cov tub tshaj Ntuj Lus mus cawm tas tsoom sid.

Cov neeg xav ua Yes Xus thwj tim, lawv yuav ua ib co neeg zoo li cas?

Muaj ib hnub Yes Xus xa nws cov thwj tim mus tshaj nws cov lus rau zeg zog, Yes Xus hais rau lawv tias ‘lawv tsuas yuav nrhiav txoj hauj lwm tshaj lub Moo Zoo’ (MT 10: 7-16), ‘lawv yuav npaj siab raug luag hiam’ (MT 10: 17-23), ‘lawv yuav tsis txhob ntshai’ (MT 10: 26-33).

Ua Yes Xus thwj tim yog ib txog hauj lwm nyuaj tab sis Yes Xus tau coj lub neej ntawd ua ntej. Cov thwj tim tsuav yog lawv ‘yoog raws Yes Xus tus lwj lwm’ xwb mas lawv yuav ua ib co thwj tim zoo. Cov thwj tim lub zog nyob hauv Yes Xus vim ‘Yes Xus nrog nws cov thwj tim ua hauj lwm’; yam li Yes Xus nres cov thwj tim lub siab thiab nws xa Leej Ntuj Plig tuaj tshoj cov neeg mloog cov thwj tim.

Cov neeg txais kev ntseeg, lawv puav leej yog Yes Xus cov thwj tim. Hnub uas Yes Xus tso ntiaj teb no tseg, nws tso pab 12 tseg, Yes Xus hais zoo li no “Ntuj pub ib puas tsav yam hwj huam rau kuv nyob saum ntuj thiab nyob ntiaj teb no. Nej mus, nej ua kom tas ib tsoom haiv neeg los ua kuv thwj tim. Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv. Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog lub zim txwv ntiaj teb kawg” (MT 28: 18-20).

Peb pom ntsoov tias pab 12 yog pab thwj tim siv tas lawv lub neej thiab lawv lub zim txwv mus tshaj Yes Xus lub Moo Zoo; lawv yog cov thwj tim ua Hauv Paus Xa Lus. Tas ib zeej tsoom txais kev ntseeg, lawv ua Yes Xus cov thwj tim, lawv ua thwj tim raws txoj kev phim lawv lub neej.

Cov neeg ntseeg txog Yes Xus lawv puav leej ua Yes Xus cov thwj tim. Thaum Yes Xus tuaj tshoj lawv lub siab kom lawv ntseeg thiab txiav siab yuav Yes Xus ua lawv tus Huab Tais mas lawv kuj txiav siab ua Yes Xus thwj tim; Yes Xus yog lawv tus Xib Hwb.

Nyob hauv tsoom thwj tim, Yes Xus xaiv tej tus kom lawv nrog nws mus, kom lawv tso lawv txoj hauj lwm ua noj tseg. Thaud, yog cov Hauv Paus Xa Lus; nyem no, yog cov tub tshaj Ntuj Lus tsis hais poj niam los txiv neej, lawv thawj txoj hauj lwm yog ub tub tshaj Ntuj Lus.

Nyob hauv cov neeg ntseeg tshiab, Yes Xus kuj xaiv tus yuav ua thwj tim zoo li ntawd.

Ua thwj tim yog ua dab tsi?

Ua thwj tim yog mus lawv Yes Xus qab, yog npuab Yes Xus, yog saib Yes Xus tus lwj lwm thiab txiav siab mus raws Yes Xus tus lwj lwm; Yes Xus tau ‘mloog Leej Txiv lus’ mas cov thwj tim kuj yuav mloog Leej Txiv lus, Yes Xus tau ‘tshaj lub Moo Zoo’ mas cov thwj tim kuj yuav tshaj lub Moo Zoo, Yes Xus tau ‘raug luag hiam vim kev ncaj’ mas cov thwj tim yuav raug luag hiam vim kev ncaj, Yes Xus tau ‘mus nrog Leej Txiv nyob’ mas cov thwj tim kuj yuav mus nrog Leej Txiv nyob. Li ntawd, cov neeg ntseeg tsis yog ib co neeg kawm ib co kev cai tshiab thiab mloog cov kev cai ntawd; cov neeg ntseeg yog ib co thwj tim ‘npuab’ tus Xib Hwb Yes Xus.

Thaum peb txais kev ntseeg, peb mloog ib co txoj cai, tab sis kev mloog txoj cai tsis yog qhov ua ntej nyob hauv peb lub tswv yim; qhov ua ntej uas peb nrhiav yog kev ua thwj tim yoog raws li Yes Xus peb tus Xib Hwb thiab Huab Tais. Yog peb yoog raws Yes Xus mas tsis tas peb yuav nco tias peb yuav coj txoj kev cai vim peb twb coj lawm.

Yes Xus yog ib tug Xib Hwb uas peb yoog raws nws tus lwj lwm, tsis yog ib tug Xib Hwb uas peb yuav kawm nws lus qhia xwb; vim Yes Xus tau hais rau cov thwj tim tias “Nej lawv kuv qab.” Yes Xus tsis tau hais tias “Nej kawm kuv zaj”. Li ntawd, tsuav yog peb txiav siab tias peb yuav npuab Yes Xus, mas peb ua thwj tim tau; tsis tas peb yuav yog ib co neeg muaj cim xeeb kawm tau tej zaj qhia.

Peb ua thwj tim tsis yog peb xub txiav siab tias peb yuav ua thwj tim. Yog Yes Xus xub hu xub xaiv thiab xub tuaj tshoj ces peb txiav siab txais Yes Xus lus hu. Thiab tsis yog Yes Xus tib leeg hu, vim yog Leej Txiv muab cov thwj tim rau Yes Xus. Li ntawd, yog vim Leej Txiv xaiv peb thiab xav muab peb rau Yes Xus, ua nws cov thwj tim mas Yes Xus thiaj hu peb.

Cov thwj tim yuav ua txawv tus Xib Hwb tsis tau. Yes Xus hais tias “Tus thwj tim tsis loj dua tus Xib Hwb. Tus tub txib tsis loj dua nws tus tswv.” Li ntawd, peb kawm Yes Xus, peb raws Yes Xus, peb tsuas yuav Yes Xus los ua tus coj peb kev xwb.

Nej tig los yuav lub siab tshiab, nej yuav txiav siab ua thwj tim; yam li yuav kawm kom tau paub Yes Xus zoo, thiaj yuav yoog raws li Yes Xus. Nej yuav tsis xav tias nej yog ib tug neeg kawm kev cai; nej xav tias nej yog ib tug thwj tim yoog raws li Yes Xus tus lwj lwm thiab npuab Yes Xus lub siab. Nej npaj siab ntsib ntau yam nyuaj vim nej yog ib tug ntseeg, nej npaj siab ntsib tej yam nyuaj ntawd vim nej yog Yes Xus thwj tim, nej tus Xib Hwb Yes Xus xub tau ntsib los lawm. Nej tso siab txais Yes Xus txoj sia, nej yuav txais Tswv Ntuj lub Ceeb Tsheej ua nej lub cuab tam vim nej yog Yes Xus thwj tim; tas txhua yam tus Xib Hwb tau txais mas nej yuav nrog nws txais. Yog nej hnov Yes Xus hu nej ua ib tug thwj tim xaiv lub neej ua tub tshaj Ntuj Lust as nej sid, mas nej yuav qhib nej lub siab mloog; thaum nej paub tseeb tias Yes Xus hu nej mas nej txiav siab npaj mus taug txoj kev ua tub tshaj Ntuj Lus.

Nej los peb thov Ntuj ua ke “Huab Tais Yes Xus, koj hu peb los ua koj cov thwj tim, peb xav raws koj mus, peb xav yoog raws li koj tus lwj lwm. Huab Tais Leej Txiv, koj tau xaiv peb los ua cov neeg ntseeg txog koj, koj muab peb rau Yes Xus kom peb ua nws cov thwj tim, peb ua koj tsaug. Huab Tais Yes Xus, peb yog koj cov thwj tim, peb yuav tau ntsib kev nyuaj zoo li koj xub ntsib, peb yuav nrog koj txais Tswv Ntuj lub Ceeb Tsheej ua peb tug, peb zoo siab mus raws koj tus lwj lwm. Ua li.”