Nyob hauv phau ntawv Vaj phau 1 zaj 8 qib 1-7, 9-13 hais tias: Thaum Xas Los Moos txhim tau lub tuam Tsev Teev Ntuj tiav lawm, nws hu cov txwj laus His Xas Lais sawv daws tuaj sib sau nyob Yes Lus Xas Les, vim yuav nqa HUAB TAIS lub Xab Cog Lus ntawm Das Vis lub tsheej Xis Yoos mus rau hauv lub Tuam Tsev Teev Ntuj. Tas tsoom txiv neej His Xas Lais tuaj sib sau nyob ib ncig ntawm tus vaj. Yog thaum nqaum paj nqaum nruas lub xya hli. Cov Leej Choj nqa lub Xab Cog Lus thiab lub Tsev Tsam Phooj sib ntsib, thiab cov twj txi Ntuj huv si mus txog hauv lub Tuam Tsev. Tus vaj Xas Los Moos thiab tas tsoom His Xas Lais sawv daws nrog nws tua yaj tua nyuj suav tsis txheeb los txi Ntuj nyob ze ntawm lub Xab Cog Lus. Cov Leej Choj coj HUAB TAIS lub Xab Cog Lus los txawb rau nws qhov chaw, nyob hauv lub Tuam Tsev Teev Ntuj hauv Kem Ntshiab, hauv cov Tshiab Kes Lus Npis qab tis. Cov Tshiab Kes Lus Npis nthuav lawv cov tis los roos qhov chaw uas txawb lub Xab Cog Lus. Tsis muaj dab tsi nyob hauv lub Xab Cog Lus, kawg muaj ob daim txiag zeb uas Mais Xes muab rau hauv thaum nyob saum lub roob Hos Les xwb. Yog ob daim txiag zeb uas thaum cov His Xas Lais tawm ntawm Hais Nkws Tos teb los, HUAB TAIS nrog lawv cog lus Thaum cov Leej Choj tawm hauv Kem Ntshiab los, muaj ib twv huab los roos HUAB TAIS lub Tuam Tsev tas tib si. Cov Leej Choj ua tsis tau cov kab ke ntxiv mus, vim twv huab. HUAB TAIS lub hwj chim los nyob puv HUAB TAIS lub Tuam Tsev! Ces Xas Los Moos hais tias “HUAB TAIS pom zoo tsa tsev nyob hauv twv huab dub. HUAB TAIS, kuv ua tau ib lub tsev rau koj nyob lawm, yog lub tsev koj yuav nyob mus li.”
Xas Los Moos yog leej twg? Xas Los Moos yog cov His Xas Lais tus vaj Das Vis tus tub. Thaum Xas Los Moos nyuam qhuav ua vaj, nws kub siab rau kev teev Ntuj xws li nws txiv Das Vis. Xas Los Moos muaj nyiaj txiag ntau, nws muab los siv ua ib lub Tuam Tsev Teev Ntuj nyob Yes Lus Xas Les. Xas Los Moos xyiv fab teev Huab Tais Tswv Ntuj, tab sis thaum nws txhim lub Tuam Tsev ntawd, nws kuj nrhiav ib txog kev ua kom nws nto koob meej thiab. Li ntawd, hauv Xas Los Moos nruab siab tsis tshua ntshiab thiab huv.
Xas Los Moos nplua nuj kawg, nws teb chaws thaj yeeb, nws txawj nws ntse, nws nto koob meej mus deb kawg. Cov vaj nyob ib ncig xav nrog Xas Los Moos ua phooj ywg. Phau ntawv Vaj phau 1 hais txog ib tug poj vaj txhob txwm tuaj xyuas Xas Los Moos zoo li no tias: Xas Los Moos lub koob meej ncha mus txog tus poj vaj nyob Xas Npas. Tus poj vaj xav tuaj nug tej zaj txhais los sim Xas Los Moos. Nws coj ib npoj ntxhais txib tub txuas coob tuaj. Nws xuas ntxhuav thauj tej nras nyiaj nras kub, thauj tej nras tshuaj tsw qab, tej nras hlaws npliag deg muaj nqi tuaj. Thaum tus poj vaj tuaj txog Xas Los Moos, nws piav rau Xas Los Moos txog tas puas tsav yam uas tau ntev los nws tau xav nyob hauv nws nruab siab. Tab sis Xas Los Moos piav meej pem txog tas txhia yam nws nug, tsis muaj ib lo lus uas Xas Los Moos yuav piav tsis tau kom meej. Tus poj vaj Xas Npas pom tias Xas Los Moos yog ib tug neeg thoob tsib kawg, nws pom Xas Los Moos lub tsev, pom cov thawj tub rog, pom cov tub txib tej tsoos, thiab pom Xas Los Moos ua tej thaj txi Ntuj nyob hauv lub Tuam Tsev Teev Ntuj, mas nws poob siab. Nws hais rau Xas Los Moos tias “Tej yam uas kuv tau hnov hais nyob hauv kuv lub teb chaws txog koj thiab txog koj lub tswv yim thoob tsib, mas muaj tiag! Thaum kuv qhov muag tsis tau pom mas kuv tsis xav ntseeg. Tab sis luag hais txog ib nrab xwb. Koj tseem nplua nuj thiab thoob tsib dua qhov kuv tau hnov. Koj cov poj niam muaj txoj hmoov zoo, thiab koj cov tub txib muaj txoj hmoov zoo vim lawv tau nyob ze koj mus li, lawv tau mloog koj cov lus thoob tsib! Koj tus HUAB TAIS Tswv Ntuj nto koob meej! Nws tsa koj tswj tsoom His Xas Lais, vim HUAB TAIS nyiam His Xas Lais. Nws tsa koj ua vaj mus li kom koj tswj lawv mus raws txoj kev ncaj kev ncees.” Tus poj vaj muab ib puas nees nkaum nras keev kub, muab tshuaj tsw qab, los pub ua tshav ntuj rau Xas Los Moos. Tus poj vaj Xas Npas pub tshuaj tsw qab ntau ntau tsis tau pom dua ib zaug ntau npaum li ntawd (1V10: 1-10).
Peb pom ntsoov tias Tswv Ntuj pub nyiaj, pub teb chaws zoo, thiab pub tswv yim loj rau Xas Los Moos. Xas Los Moos paub tias nws txais tej ntawd ntawm Tswv Ntuj los. Tab sis Xas Los Moos rov saib nws loj, nws rov muag nws lub koob meej; ces nws nrhiav nyiaj heev zuj zus, nws nrhiav koob meej heev zuj zus, nws xav kom tau muaj hwj chim loj zuj zus. Xas Los Moos tsis nco qab tias nws yuav tsum nyiam Huab Tais Tswv Ntuj tshaj tas puas tsav yam.
Yog vim Xas Los Moos nco txog nyiaj txiag ntau dhau thiab nrhiav nws lub koob meej ntau dhau, ces nws yuav ntau tus poj niam nyob pej kum teb kom pej kum teb hwm nws. ntev mus, Xas Los Moos lub siab lwj, nws tsis txawj cheem nws lub siab, ces ntev mus nws poob hauv qhov txhaum loj zuj zus; nws nrog nws cov poj niam pej kum teev lawv cov dab. Phau ntawv Vaj phau 1 hais tias: Thaum Xas Los Moos laus lawm, nws cov poj niam coj nws ntxeev siab mus teev lwm cov dab, nws lub siab tsis hwm HUAB TAIS tib leeg xws li nws txiv Das Vis. Xas Los Moos mus teev cov neeg nyob Xis Doos tus dab As Tas Tes, thiab teev cov As Mos tus dab Mis Kos. Xas Los Moos ua tej yam tsis ntxim HUAB TAIS siab, nws tsis mloog HUAB TAIS lus xws li nws txiv Das Vis. Ces Xas Los Moos txhim ib lub tsev teev tus dab Kes Mos uas yog cov Muas tus dab. Nws txhim lub tsev ntawd nyob saum lub roob, nyob ntawm Yes Lus Xas Les toob fab. Nws kuj txhim ib lub tsev teev cov As Mos tus dab Mis Kos. Nws ua li ntawd rau nws cov poj niam uas nws yuav nyob pej kum teb los. Nws cov poj niam hlawv xyab thiab ua tej lub thaj txi lawv cov dab. HUAB TAIS npau taws rau Xas Los Moos, vim Xas Los Moos fee plhu rau HUAB TAIS, uas yog His Xas Lais tus Tswv Ntuj. Tswv Ntuj tawm tuaj xyuas Xas Los Moos ob zaug. Tswv Ntuj twb tau qhia Xas Los Moos kom nws tsis txhob mus teev pej kum dab. Tab sis Xas Los Moos tsis mloog lo lus qhia ntawd. Ces HUAB TAIS hais rau Xas Los Moos tias “Koj ua li ntawd, koj tsis mloog kuv cov lus kuv tau qhia koj, kuv yuav thau koj lub teb chaws ntawm koj tes thiab kuv yuav muab rau koj ib tug tub txib kav. Kuv tsis xav kom koj txiv Das Vis poob ntsej muag mas kuv yuav tsis ua li ntawd thaum koj tseem ua neej nyob. Tab sis kuv yuav thau koj lub teb chaws ntawm koj tus tub tes. Kuv yuav tso ib xeem rau koj tus tub kav, vim kuv nco kuv tus tub txib Das Vis thiab vim Yes Lus Xas Les uas kuv xaiv los ua kuv lub tsheej” (1V 11: 4-13).
Xas Los Moos xav ib txhij ua tau yam; yam li teev Huab Tais Tswv Ntuj, saib nyiaj loj, nrhiav kom muaj koob meej loj, nrhiav kev ua si, kev plees kev yi, teev dab. Tswv Ntuj kheev tsis tau kom neeg faib neeg lub siab thiab dag li ntawd. Vim Xas Los Moos xub nco txog nws, nws tsis nco txog Tswv Ntuj, nws thiaj ua txhaum loj.
Thaum Xas Los Moos tuag lawm, nws lub teb chaws tawg ua 2 lub; yam li ‘qaum teb’ thiab ‘qab teb’. Nyias sab muaj nyias tus vaj. Cov vaj ntawd ntau leej ua raws li Xas Los Moos tus piv txwv, muaj tsawg leej ua raws li Das Vis tus piv txwv. Muaj ntau leej His Xas Lais lawv cov vaj tus lwj lwm; lawv ib txhia teev Huab Tais Tswv Ntuj thiab teev dab. Cov ua ncaj rau Tswv Ntuj xws li Has Nplas Has thiab Mais Xes cog lus, mas lawv tsawg dua cov ntxeev siab rau Huab Tais Tswv Ntuj.
Thaum peb hnov zaj piav txog Xas Los Moos mas peb nco txog Tswv Ntuj cov lus qhia no:
- Tus neeg uas nws nrhiav qhov zoo rau nws ua ntej, mas nws ncaim ntawm Tswv Ntuj ntau zaus; vim nws tsa nws nyob hauv Tswv Ntuj qhov chaw.
- Tus neeg saib nws loj, nws tsis tau Tswv Ntuj pab nws. Tswv Ntuj tso nws ua raws li nws lub zog ua tau; vim Tswv Ntuj tiv cov neeg uas lawv saib lawv loj. ‘Cov neeg uas lawv lub siab muab hlob, Huab Tais Tswv Ntuj ntaus lawv kom lawv tawg. Cov neeg uas lawv saib lawv me, mas Huab Tais Tswv Ntuj tsa lawv nyob qhov chaw siab’.
- Tus nyiam nyiaj yuav poob hauv kev txhaum. Yes Xus hais tias “Tsis muaj leej twg yuav ib txhij tsob hwb ob tug tswv tau; nws yeej yuav ntxub ib tug, nyiam ib tug; nws yeej yuav npuab ib tug, thuam ib tug. Nws yuav ib txhij txhoj tsob hwb Tswv Ntuj thiab nyiaj txiag tsis tau” (MT 6: 24). Tus nyiam nyiaj txiag ua ntej, nws txawj ua tas puas tsav yam txhaum rau neeg thiab rau Tswv Ntuj kom tau nyiaj ntxiv.
- Yuav xub nrhiav kom Tswv Ntuj nto koob meej, yuav txhob nrhiav kom yus nti koob meej. Zoo li Yes Xus, nws nrhiav kom Huab Tais Leej Txiv nto koob meej, nws tsis nrhiav kom nws nto koob meej. Zoo li Leej Ntshiab Paj Lug, nws nrhiav kom Yes Xus nto koob meej, nws tsis nrhiav kom nws muaj koob meej.
- Tswv Ntuj tso cov neeg uas lawv saib lawv loj kom lawv ua tau raws li lawv lub zog ua tau; ces lawv poob hauv txoj kev ua neeg lwj, kev plees kev yi, kev noj haus ntau dhau, kev ua si dhau kev cai; lawv kuj ncaim ntawm Tswv Ntuj zuj zus. Tab yog lawv lub ncauj tseem hais tias lawv hwm Tswv Ntuj mas lawv lub siab ncaim ntawm Tswv Ntuj lawm, lawv tsis nco tias lawv tau cog lus tias lawv yuav teev Tswv Ntuj ib tug xwb; lawv rov teev lawv xwb vim lawv rov mloog lawv lub siab ntshaw, lawv rov tsa lawv ua huab tais.
Peb sim tsom hauv peb lub neej, saib peb puas paub tej tus neeg uas lawv saib lawv loj, lawv tus yam ntxwv zoo li cas? Vim li cas lawv thiaj saib tias lawv loj? Peb puas paub tej tus neeg ntshaw txog nyiaj txiag ntau, lawv puas hlub tsoom txheeb ze? Peb puas pom lawv ua tej yam phem kom tau nyiaj ntxiv? Ib txwm Hmoob puas paub tias kev ntshaw nyiaj txiag coj neeg mus ua txhaum? Puas muaj cov laus tej lo lus ntuas txog qhov ntawd? Hmoob kev cai puas tso lus kom nrhiav kev noj qab nyob zoo, kev ua si, kev plee, kev ua ywj siab? Peb puas pom tej tus neeg uas lawv ib txhij xav hwm Tswv Ntuj thiab ntshaw txog nyiaj txiag? Thaum lawv teev Ntuj, lawv lo lus thov puas xis Tswv Ntuj siab? Kwv tij, nej puas saib Tswv Ntuj loj tshaj, puas saib Tswv Ntuj yog Huab Tais tiag, los nej saib nej lub koob meej loj dua, los nej puas saib nyiaj txiag loj dua, nej puas saib kev ua si loj dua?
Peb yuav nyiam ua tej yam pab peb kom peb txhob zwm rau nyiaj txiag, txhob saib nyiaj ua tswv kav peb, txhob muab nyiaj saib ua peb tus huab tais; vim peb tsuas xav mloog tib tug tswv xwb yam li Tswv Ntuj. Peb yuav ua tej yam zoo li no los pab peb; yam li pab luag tej dawb dawb, pub tej yam peb muaj rau cov tsis muaj, siv yus cov nyiaj los pab luag tej. Peb yuav ua tej yam kom pab peb dim ntawm kev zwm rau kev plees kev yi; vim peb xav nyiam Tswv Ntuj tshaj txhua yam. Peb yuav ua tej yam xws li no: hlub tus nrog peb ua txij ua nkawm, ua ncaj rau peb tus txij nkawm, saib tsoom poj niam zoo hwm. Peb yuav nyiam ua tej yam pab peb dim ntawm kev saib yus loj; yam li peb nyiam ua tej hauj lwm me, peb nyiam cov neeg me, peb cia luag tej saib peb me; peb txhob khib. Peb xyaum tsa Tswv Ntuj nyob thawj qhov chaw nyob hauv peb siab, peb pom yam twg yuav txeeb Tswv Ntuj chawn nyob hauv peb nruab siab mas peb muab yam ntawd pov tseg.
Hnub no peb xav kom nej khaws lo lus no tseg rau hauv nej nruab siab: ‘Tsis muaj leej twg yuav ib txhij tsob hwb ob tug tswv tau; nws yeej yuav ntxub ib tug, nyiam ib tug; nws yeej yuav npuab ib tug, thuam ib tug. Nws yuav ib txhij txhoj tsob hwb Tswv Ntuj thiab nyiaj txiag tsis tau’ (MT 6: 24).