KOOM TXOOS LIV XWM 1

Lo lus ‘Koom Txoos’ ntxeev los ntawm lo lus Hes Las tias ‘ekklesia’ txhais tias ‘hu los sib txoos ua ke’. Yog li Yes Xus lub Koom Txoos yog dab tsi? Yes Xus lub Koom Txoos yog tas cov neeg Yes Xus hu lawv kom los sib txoos ua ib npoj.

Tus twg yog tus Yes Xus hu? Yog tus txais lub Cim Ntxuav thiab ntseeg txog Yes Xus, lawv saib Yes Xus yog lawv tus Huab Tais. Yes Xus hu lawv los ua nws lub cev tes taw raws li Leej Ntshiab Paj Lug hais tias ‘Leej Pleev yog lub taub hau nyob saum lub cev. Lub cev yog lub Koom Txoos’ (KLX 1: 18).

Yes Xus tsim nws lub Koom Txoos nyob ntiaj teb no, mas Yes Xus xub hu 12 leeg thwj tim nrog nws nyob, Yes Xus qhia tas puas tsav yam rau lawv, ces ze ze lub caij Yes Xus yuav txais kev tuag, mas nws tsa Pob Zeb ua tus saib lub Koom Txoos nyob ntiaj teb no. Yes Xus hais rau Peb Zeb tias “Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis taus lub pob zeb no. Kuv yuav muab Ntuj lub Ceeb Tsheej cov yawm sij rau koj”  (MT 16: 18-19).

Ntawv Cov Hauv Paus Xa Lus Cov Hauj Lwm lub ntsiab yog zoo li no: Hnub uas cov Yus Das ua lub hnub nyoog Tsib Caug, cov Hauv Paus Xa Lus nyob ua ke nyob Yes Lus Xas Les; Leej Ntuj Plig Ntshiab nqes los nyob hauv lawv. Tam sim ntawd, Pob Zeb pib qhia txog Yes Xus rau sawv daws mloog. Pob Zeb hais tias “Cov His Xas Lais, nej mloog cov lus no: Yes Xus Nas Xas Les tau ua ntau yam hwj huam yees ntxwv rau nej pom. Yog Tswv Ntuj pub nws ua tej ntawd kom nej ntseeg txog nws tau. Nej tau muab nws tua, nej tau vam txog cov neeg tsis hwm Ntuj los ntsia Yes Xus rau saum ntoo cuam. Tiam sis Tswv Ntuj twb tsa nws sawv rov los lawm. Peb sawv daws ua taus tim khawv. Nyem no Tswv Ntuj txhais tes xis tsa Yes Xus nyob siab. Nws tau txais Leej Ntuj Plig Ntshiab ntawm Leej Txiv, vim Leej Txiv yeej cog lus li ntawd. Yes Xus thiaj tso Leej Ntuj Plig nqe los rau saum sawv daws raws li nej pom thiab hnov. Tas tsoom Hais Xas Lais, nej yuav paub tseeb tias tus Yes Xus uas nej muab tua saum ntoo cuam, mas Tswv Ntuj tsa nws ua Huab Tais thiab ua Leej Pleev.”

Pob Zeb cov lus raug sawv daws siab. Lawv nug Pob Zeb tias lawv yuav ua dab tsi, ces Pob Zeb teb rau lawv tias “Nej yuav thov txhaum ntawm Ntuj. Thiab nej sawv daws yuav thov txais lub Cim Ntxuav nyob hauv Yes Xus Pleev lub npe, kom tau daws nej cov txhaum, ces nej yuav txais Leej Ntuj Plig Ntshiab lub txiaj ntsim.”

Hnub ntawd, muaj txog 3,000 leej tau ntseeg txog Yes Xus.

Cov Hauv Paus Xa Lus ua hwj huam yees ntxwv, niaj hnub muaj neeg ntseeg txog Yes Xus ntxiv. Cov Leej Choj pom cov pej xeem ntseeg cov Hauv Paus Xa Lus coob zuj zus, mas lawv xav txwv cov Hauv Paus Xa Lus kom lawv txhob tshaj Yes Xus lus ntxiv. Cov Hauv Paus Xa Lus teb tias lawv yuav nyob twj ywm tsis tau. Lawv hais tias “Peb yuav tsum xub mloog Tswv Ntuj lus dua mloog neeg lus.” 

Cov txwj laus Yus Das mus ntes Pob Zeb coj los kaw, ces ib tug Tshiab tuaj pab Pob Zeb kom dim ntawm tsev loj faj. Cov txwj laus muab cov Hauv Paus Xa Lus nplawm, mas cov Hauv Paus Xa Lus zoo siab vim Huab Tais Tswv Ntuj saib lawv tsim nyog raug txom nyem kom Yes Xus lub npe nto moo loj zuj zus. 

Cov neeg ntseeg niaj hnub tuaj mloog cov Hauv Paus Xa Lus, lawv ua ke teev Ntuj thiab ua cov kab ke ‘lov mov’ xws li Yes Xus qhia kom lawv ua. Lawv koom siab koom ntsws xws li ib pab kwv tij. Lawv muab lawv tej cuab yeej cuab tam muag, thiab coj los tso ua ke, lawv muab faib rau txhia leej raws li nws tej chaw siv. Niaj hnub sawv daws koom ib lub siab, sawv daws zoo siab noj luag ntxhwb ntxhi xws li cov neeg siab kaj, lawv cav txog Tswv Ntuj. 

Cov Hauv Paus Xa Lus qhia kev cai thiab faib mov rau sawv daws noj, lawv kov tsis yeej mas lawv thiaj tsa ib co Thoob Xwm pab lawv. Cov Hauv Paus Xa Lus hais tias “Tsis phim peb yuav tso Tswv Ntuj lo lus pov tseg, mus saib cov rooj noj mov. Kwv tij, nej yuav nrhiav 7 leej uas yog cov neeg thoob tsib, nto moo zoo, thiab muaj Leej Ntuj Plig Ntshiab puv hauv lawv. Peb yuav tsa lawv ua txoj hauj lwm ntawd. Ntawm peb, mas peb yuav muab siab npuab txoj kev teev Ntuj thiab tshaj Ntuj lus.”

Sawv daws pom zoo, ces lawv xaiv tau 7 leej los; yog Tes Fas Nos, Fis Lis Pos, Plos Kos Los, Nis Kas Nos, Tis Moos, Pas Mes Nas, thiab Nis Kos Las uas yog ib tug neeg ntseeg nyob As Nthias Kias (Stephen, Phillip, Prochorus, Nicanor, Timon, Parmenas, Nicolas). Thaum teev Ntuj tas mas cov Hauv Paus Xa Lus tsa tes rau saum 7 leej ntawd, tsa lawv ua ‘Tub Tsob Hwb’.

Tes Fas Nos yog ib tug neeg muaj txiaj ntsim thiab hwj chim, nws kub siab qhia kev cai, ces cov Yus Das muab nws tua. Tes Fas Nos thiaj yog thawj tus neeg tuag ua Yes Xus tim khawv. 

Cov Yus Das hiam cov neeg ntseeg txog Yes Xus nyob Yes Lus Xas Les, tus vaj Hes Los kuj muab tus Hauv Paus Xa Lus Yas Kos tua. Cov ntseeg txog Yes Xus thiaj li tso Yes Lus Xas Les tseg, lawv tsiv mus nyob Das Mas, nyob Xas Mas Lias, nyob tom lub pov txwv Kws Plos, thiab nyob As Nthias Kias. 

Pob Zeb ua lub Cim Ntxuav rau tus Xab Txheeb Los Mas hu ua ‘Kos Nes Lias’ nyob Yos Pes. Fis Lis Pos kuj ua lub Cim Ntxuav rau ib tug nom Es Thes Pias. 

Nyob As Nthias Kias, cov neeg teev dab pib hu cov neeg ntseeg txog Yes Xus ua ‘Cov Pleev’ (Christian).

Ib tug Yus Das hu ua Xauv hiam cov neeg ntseeg txog Yes Xus. Muaj ib hnub Yes Xus yees hu Xauv kom yuav ib lub siab tshiab, Xauv thiaj ntseeg txog Yes Xus thiab tas nws sim neej mas nws qhia kev cai rau cov Yus Das thiab rau cov coj pej kum kev cai.

Xyoo tim 49 cov Hauv Paus Xa Lus ua thawj lub Rooj Ncauj Lus nyob Yes Lus Xas Les, lawv txiav hais tias cov pej kum neeg xav ua Yes Xus kev cai mas lawv tsis coj Mais Xes kev cai xws li cov Yus Das kuj tau. 

Xauv thaum nws mus qhia kev cai nyob pej kum teb, nws yuav ib lub npe tshiab hu ua ‘Paj Lug’; nws mus tshaj lub Moo Zoo peb zaug rau cov pej kug teb. Cov Yus Das ntau leej ntxub Paj Lug vim nws qhia cov pej kum neeg, ces lawv muab Paj Lug ntes, lawv xav muab nws tua. Paj Lug thov cov nom tswv kom xa nws mus txiav txim nyob Los Mas. Paj Lug thiaj nyob ob peb xyoos hauv tsev loj faj nyob Los Mas.

Phau ntawv Cov Hauv Paus Xa Lus Cov Hauj Lwm hais zoo li ntawd. Tus sau phau ntawv no yog Lus Kas, nws paub Paj Lug zoo dua, ces nws piav txog Paj Lug tej hauj lwm ntau dua cov; tab sis cov Hauv Paus Xa Lus sawv daws puav leej tau tshaj lub Moo Zoo nyob ntau lub teb chaws.

Thaum Lus Kas pib sau phau ntawv Cov Hauv Paus Xa Lus Cov Hauj Lwm, nws hais txog Pob Zeb ntau hauj sim. Tiam sis txij thaum Paj Lug mus tshaj lub Moo Zoo, mas Lus Kas cia li hais txog Paj Lug tej hauj lwm lawm xwb. Yog vim li ntawd, peb thiaj li tsis paub ntau yam txog Pob Zeb sim neej. Peb tsuas paub hais tias Pob Zeb mus qhia kev cai nyob As Nthias Kias, nws kuj tau mus ib zaug txog Kos Lis Nthos thiab; yog vim Paj Lug tau sau ib tsab ntawv mus rau cov ua Ntuj kev cai nyob Kos Lis Nthos tias kom lawv tsis txhob sib cav tias ib co yog Paj Lug cov thwj tim thiab ib co yog Pob Zeb cov thwj tim. Yog vim Pob Zeb tau mus tshaj lub Moo Zoo ib zaug nyob Kos Lis Nthos thiaj li muaj lus sib cav zoo li ntawd.

Tiam sis txij xyoo 40 los txog xyoo 60 mas Pob Zeb tau nyob Los Mas ntau. Nws kawg tau tso Los Mas tseg ob peb zaug xwb; yam li thaum cov Hauv Paus Xa Lus mus ua lub Rooj Ncauj Lus nyob Yes Lus Xas Les.

Thaum ntawd, lub nroog Los Mas yog ib lub nroog loj tas nrho, muaj ib plhom leej neeg nyob ntawd; ib nrab yog cov tseem Los Mas, thiab ib nrab yog cov neeg pej kum teb. Lawv tuaj nyob Los Mas coob kawg; tej tus neeg dub kuj muaj, tej tus neeg As Xias kuj muaj. Thaum cov Los Mas mus ua rog nyob ntawm cov teb chaws nyob ncig dej hiav txwv Mes Dis Tes Las Nes, mas lawv coj tau ntau tus qhev tuaj ua hauj lwm nyob Los Mas, ces nyob Los Mas thiaj muaj txhua haiv neeg tuaj nyob.

Cov Yus Das nyob Los Mas lawv kuj coob kawg, kwv yees muaj 40,000 los 50,000 leej. Cov Yus Das ntawd, lawv ncaim tas nyob hauv lub nroog, lawv ua luam. Cov Yus Das muaj kaum tawm lub tsev txoos thiab plaub lub toj ntxas.

Cov Yus Das nyob Los Mas uas lawv xub ntseeg txog Yes Xus yog tej tus Yus Das uas lawv tau mus ua hmoov nyob Yes Lus Xas Les, lawv tau ntsib cov pleev nyob Yes Lus Xas Les, ces lawv kuj ntseeg thiab. Tiam sis tus tuaj qhia Yes Xus kev cai nyob Los Mas yog Pob Zeb; yog vim li ntawd, mas thaum txog xyoo tim 60 Paj Lug tuaj nyob txim nyob Los Mas, cov ntseeg txog Yes Xus tuaj tos Paj Lug coob.

Thaum xyoo tim 58 Paj Lug tseem tshaj lub Moo Zoo nyob Kos Lis Nthos, nws kuj paub tias cov neeg ntseeg txog Yes Xus nyob Los Mas lawv coob, ces Paj Lug sau ib tsab ntawv ntev ntev rau lawv; nws hais rau lawv tias nws xav tuaj xyuas lawv.

Hnub uas Paj Lug tuaj txog Los Mas, ntshai Pob Zeb tsis nyob Los Mas lawm, Lus Kas thiaj tsis hais ib lo lus txog Pob Zeb. Tiam sis thaum txog xyoo tim 62 los 63 mas Pob Zeb rov qab mus nyob Los Mas. Thaum ntawd, Pob Zeb yog ib tug neeg laus hauj sim lawm, nws muaj 60 los 70 xyoo; nws yog ib tug neeg plaub hau dawb dawb, ib tug neeg twb tau pom ntau lub teb chaws los. Tas Pob Zeb sim neej, Pob Zeb tau tshaj Ntuj lus nyob ntau lub nroog; tus twg tau pom nws tuaj txog mas tus twg kuj zoo siab tas, vim sawv daws tau pom ib tug nrog Yes Xus nyob, pom ib tug neeg thoob tsib pab sawvd aws kom tau nyob thaj yeeb.

Xyoo tim 62 Paj Lug mus txog Is Npes Lias (Espain), ces nws rov qab mus txog As Xias xeev ntuj, nyob Hes Las teb, nyob Kos Lis Nthos, nyob Es Fes Xos, nyob hauv lub pov txwv Khes Tas. Yog thaum lub caij ntawd, mas Paj Lug thiaj sau peb tsab ntawv uas niaj hnub peb tseem twm los txog tav no; yog tej tsab ntawv Paj Lug sau rau ob tug Tswv Qhia Tis Mos Tes thiab Tis Tos nkawd. Nyem no Paj Lug yog ib tug neeg laus lawm, nws paub hais tias tshuav tsis ntev nws yuav tuag, ces nws ntuas ob tug Tswv Qhia kom muab siab rau saib cov neeg ua Ntuj kev cai zoo.

Xyoo tim 64 lub xya hli, tas 6 hnub thiab 6 hmo hluav taws kub tas lub nroog Los Mas ib sab; tej tsev ntoo kub hnyiab tas, tej tsev pob zeb kuj vau tas, cov neeg tuag ntau txhiab leej. Tej lub tsev nom thiab tej lub tsev teev dab uas cov Los Mas ua tau ob peb puas xyoo los, mas tsis tshuav ib qho dab tsi li; tas ib sab nroog kub hnyiab tas.

Lub caij ntawd, tus vaj kav Los Mas teb yog ib tug vaj siab phem kawg, nws lub npe hu ua ‘Nes Los’ (Nero). Nws twb muab nws niam tua pov tseg, vim nws kav teb chaws tsis ncaj, mas nws niam xav nrog nws kav. Niaj hnub Nes Los kom cov tub rog muab tej tus nom loj tua pov tseg, vim nws ntshai cov nom loj ntawd. Nes Los muaj ib tug poj niam zoo nkauj kawg, tiam sis nws nrauj tus poj niam thiab nws muab tus poj niam tua vim nws xav yuav dua lwm tus tshiab. Tus poj niam uas nws muab tua zoo li ntawd, yog tus vaj thaud ib tug ntxhais; Nes Los kom nws ib tug tub rog mus txiav nws poj niam lub taub hau thiab nqa los cev rau nws tus poj niam tshiab. Cov pej xeem hnov lub moo ntawd, mas lawv ntxub lawv tus vaj siab phem kawg nkaus.

Ua li mas thaum lub nroog kub hnyiab, tas sawv daws xav hais tias ntshai yog vim tus vaj siab phem dhau mas Ntuj thiaj li xav rhuav lub nroog Los Mas. Muaj tej tus Los Mas hais tias lawv pom tus vaj thiab nws cov qhev lawv nqa hluav taws mus hlawv lub nroog. Thaum hluav taws tab tum kub lub nroog mas tus vaj Nes Los kuj hais tej lo lus xws li nws zoo siab.

Tas cov pej xeem sawv daws thiaj pib hais zom zaws tias yog tus vaj Nes Los hlawv lub nroog xwb. Tus vaj hnov sawv daws yws txog nws heev zuj zus, ces nws thiaj ntshai. Nes Los nrhiav saib nws yuav muab qhov xwv txheej ntawd liam rau leej twg ris. Nes Los pom ib pab neeg me thiab tsis muaj zog, lawv coj tus yam ntxwv txawv luag tej, lawv yog cov neeg ntseeg txog Yes Xus. Nyob hauv cov Yus Das coj Mais Xes txoj cai muaj ib nrab ntxub cov Yus Das uas ntseeg txog Yes Xus. Tsis tag li ntawd, Nes Los tus poj niam tshiab kuj yog ib tug nyiam cov neeg Yus Das uas coj Mais Xes txoj cai, ces nws nrog cov Yus Das coj Mais Xes txoj cai ntxub cov neeg ntseeg Yes Xus. Tus vaj Nes Los cia li tso neeg mus hais nyob hauv lub nroog tias yog cov neeg ntseeg Yes Xus ua cov hlawv lub nroog Los Mas, ces sawv daws ntseeg sai heev.

Tus vaj Nes Los tso tub rog mus ntes cov neeg ntseeg Yes Xus. Tsis ntev, muaj ntau txhiab leej neeg ntseeg raug kaw hauv tsev loj faj. Nes Los muab cov neeg ntseeg Yes Xus uas nws ntes tau los tsim txom tas zog kom txom nyem thiab mob mob, nws muab lawv txiav caj dab, los muab lawv ntsia rau saum ntoo cuam. Nyob hauv Nes Los lub tshav ua si uas nyob hauv plawv nroog, muaj tej zaug nws ua txuj nrog nws cov phooj ywg sib twv tua tej tsiaj txhu. Lawv ua si li ntawd rau cov nom me, los tsoom pej xeem saib. Tab sis nyob hauv cov tsiaj txhu uas lawv sib twv tua, thiab tso dev mus tom ntawd, mas muaj ib txhia yog cov neeg ntseeg txog Yes Xus. Cov tub rog laws tej tawv tsiaj coj los qhwv cov neeg ntseeg, ces lawv hais tias yog tsiaj, lawv muab tua, tiam sis yog tua cov neeg uas ntseeg txog Yes Xus xwb. 

Tseem muaj ntau hmo uas tus vaj Nes Los nrog nws cov phooj ywg mus coj cov ntxhais neeg ntseeg uas tseem tsis tau muaj txiv tuaj ua si, ua dev ua npua. Thaum lawv ua tag, lawv muab cov ntxhais ntawd tua pov tseg.

Muaj ntau zaus, tus vaj thiab nws cov neeg lawv sib tw caij tsheb ua si hmo ntuj, lawv muab ib cov neeg ntseeg hauv tsev loj faj coj laus pav rau saum tej tus ncej, nyob ze ntawm tej ntug kev, lawv muab roj pleev cov neeg ntawd, ces lawv caij tsheb sib tw zes taws rau saum cov neeg uas lawv muab pleev roj ntawd kom cig.

Nyob hauv lub tuam tsheej Los Mas tus vaj Nes Los ua phem li ntawd rau cov neeg ntseeg, nws tseem kom ntau tus nom tsim txom cov neeg ntseeg Yes Xus tib yam nkaus li nws ua nyob hauv lub nroog Los Mas. 

Lub caij tus vaj Nes Los ua tej yam phem li ntawd, mas Pob Zeb kuj nyob Los Mas thiab. Pob Zeb thiaj sau ib tsab ntawv rau cov neeg ntseeg nyob As Xias xeev ntuj, nws ntuas kom lawv ua siab loj siab tawv. Pob Zeb hais tias tab txawm cov nom tswv hiam cov ntseeg, los cov ntseeg yuav tsis txhob tso Yes Xus Lo Lus pov tseg. 

Xyoo 65 los yog 66 cov nom tswv Los Mas ntes Pob Zeb thiab Paj Lug nkawd. Lawv ntes Pob Zeb nyob Los Mas, hos ntes Paj Lug nyob As Xias teb. lawv coj Paj Lug tuaj txog Los Mas. Muaj kwv huam piav tias cov Los Mas ntes nkawd tua nyob ntawm ob tsob qab ntoo faj khaum. Zaj kwv huam xav qhia tias hnub ntawd mas ob tug ntoo siab dua cov nyob hauv lub Koom Txoos vau lawm.

Lawv yuav muab Pob Zeb tua nyob saum ntoo cuam, tiam sis Pob Zeb xav tias nws tsis tsim nyog tuag xws li Yes Xus, ces Pob Zeb thov kom lawv tsa nws nyob saum ntoo cuam, muab ko taw tig rov saud, hos taub hau tig rov hauv av.

Nyem no nyob Los Mas, muaj ib lub tsev teev Ntuj loj nyob ntawm qhov chaw Paj Lug tuag. Nyob saum Pob Zeb lub ntxa, lub Koom Txoos txhim lub Tuam Tsev Teev Ntuj hu ua ‘Pob Zeb’ rau. 

Paj Lug yog ib tug Los Mas, ces lawv tsis muab nws tua nyob saum ntoo cuam, lawv xuas ntaj txiav Paj Lug caj dab. Zaj kwv huam piav tias lawv txiav Paj Lug taub hau poob rau pem teb, tseem rov dhia peb plaws ces txawv 3 lub qhov dej; vim xav qhia tias tab yog Paj Lug tuag lawm los nws tseem nqa txoj sia tuaj rau neeg.

Nes Los lub tshav ua si uas nws muab cov ua Ntuj kev cai tua, mas nyem no yog Leej Ntshiab Pob Zeb lub tshav puam, thiab tus ncej zeb uas thaum ub nyob hauv Nes Los lub tshav ua si, mas nyem no tus ncej zeb ntawd tseem nyob.

Muaj tej kwv huam piav tias txij hnub Leej Ntuj Plig nqes los rau saum cov thwj tim tas. ‘Yas Kos’ uas yog Zam tus tij laug, nws mus tshaj lub Moo Zoo txog Is Npes Lias teb, ces nws rov los txog Yes Lus Xas Les. Xyoo 44 tus vaj Hes Los muab nws tua tuag nyob Yes Lus Xas Les.

Cov Hauv Paus Xa Lus tawm mus tshaj lub Moo Zoo rau pej kum teb, ‘Mab Liab’ nrog cov thwj tim caij nkoj hla mus rau lub pov txwv Kws Plos, tab sis cua ntsawj tuaj coj lub nkoj mus txog Es Thos (Athos), Mas Xes Dos Nias teb. Niam Mab Liab tau tshaj lub Moo Zoo rau cov neeg nyob ntawd, nws hais rau lawv tias “Kuv pub Leej Tub thiab kuv tus Tswv Ntuj rau nej!”

Xyoo 48 Mab Liab rov qab los Yes Lus Xas Les, muaj ib hnub tus Tshiab Nkas Nplias tawm tuaj qhia Mab Liab tias nws yuav nyob hauv ntiaj teb 3 hnub ntxiv xwb, ces Mab Liab hu cov Hauv Paus Xa Lus tuaj nrog nws nyob tsuas tshuav Tos Mas thiaj tsis nrog lawv nyob ntawd.

Peb hnub tom qab cov Hauv Paus Xa Lus coj Mab Liab lub cev mus zais hauv qhov ntxa tas, Tos Mas rov los txog, nws tu siab tias nws tsis tau pom Mab Liab txoj sia tu. Tos Mas hais kom cov Hauv Paus Xa Lus coj nws mus qhib lub qhov ntxa xyuas Mab Liab tus qauv tab sis lawv tsis pom Mab Liab lub cev.

Yav tsaus ntuj, Mab Liab tawm los rau lawv pom thiab hais lus rau lawv tias “Nej nyob kaj lug mog! Kuv yuav nrog nej nyob mus li.”

Cov Hauv Paus Xa Lus paub tias Tswv Ntuj nqa Mab Liab lub cev mus nrog nws tus plig nyob saum ntuj lawm, ces sawv daws mam rov tawm mus tshaj lub Moo Zoo.

Xyoo 67 ‘Zam’ mus nyob Es Fes Xos. Nws paub cov neeg ntseeg nyob As Xias me teb, thiab lawv tej nroog zoo. Nws zoo li ib tug yawg koob saib xyuas sawv daws. Thaum tus vaj Dos Mis Xias hiam cov neeg ntseeg xyoo 92 mas cov nom tswv ntes Zam thiab muab nws kaw hauv tsev loj faj nyob Los Mas. Tiam sis Tswv Ntuj lub hwj huam txuag Zam, ces nws tsis tuag.

Nyob nyob, muaj ib tug nom tso Zam tawm hauv tsev loj faj los, ces Zam rov qab los nyob Es Fes Xos. Thaum ntawd nws laus laus lawm, niaj hnub nws mus xyuas tas cov neeg ntseeg nyob As Xias xeev ntuj. Nws tsa tej tus Leej Choj ua Tswv Qhia, nws tsim tej lub Koom Txoos, nws xaiv tej tus neeg los ua Leej Choj.

Thaum ntawd Zam sau nws phau ntawv Moo Zoo, nws kuj sau tej tsab ntawv mus ntuas cov neeg ntseeg. Zam kheev hais rau sawv daws hais tias “Cov me nyuad! Nej sawv daws yuav sib nyiam sib hlub. Tswv Ntuj lo lus qhia yog zoo li ntawd.”

Txog xyoo 100 tej, ces Zam thiaj tag sim neej lawm.

Xyoo 60 tus Hauv Paus Xa Lus ‘Npas Nas Npes’, mus tshaj lub Moo Zoo nyob hauv lub pov txwv Kws Plos (Cyprus) ces nws  raug tua tuag nyob ntawd.

‘As Nres’ mus tshaj Ntuj Lus nyob Lav Xias qab teb, nyob Xis Thias teb. Nws tshaj Ntuj Lus nyob ntau lub teb chaws. Muaj ib zaug ib tug nom txwv tsis kheev As Nres tshaj Ntuj Lus ntxiv. As Nres tsis nyob twj ywm, nws kuj tshaj tas zog, qhia tas zog ntxiv. Ces tus nom ntawd thiaj muab As Nres tua nyob saum ntoo cuam xws li Yes Xus, yog xyoo 61. Thaum As Nres pom tus ntoo cuam uas lawv npaj rau nws, mas nws hais tias “Ntoo cuam, koj tau nqa kuv tus Huab Tais lawm. Tau ntev los, kuv tos txog koj. Kuv xav nce los dai saum koj. Kuv thiaj li yuav mus cuag tau kuv tus Huab Tais.”

As Nres dai ntawm tus ntoo cuam 2 hnub, tsis kav nws kuj tseem tshaj Tswv Ntuj Lo Lus mus txog thaum nws txoj sia tu nrho.

‘Yas Kos’ tus txheeb Yes Xus ua tus tuav lub Koom Txoos nyob Yes Lus Xas Les, txog xyoo 62 Yas Kos raug tus vaj txheeb Los Mas nyob Yes Lus Xas Les ntes thiab tua tuag nyob Yes Lus Xas Les.

Muaj tej zaj kwv huam piav tias ‘Mas Tais’ mus tshaj Tswv Ntuj Lo Lus nyob Es Thias Pias teb, muaj ib zaug tus vaj Es Thias Pias tus ntxhais tuag lawm, Mas Tais tau pab tsa tus ntxhais kom sawv rov qab los. Ces ua rau tus vaj txais kev ntseeg thiab tas lub teb chaws ntawd kuj txais kev ntseeg coob leej. Thaum uas tus vaj laus thiab tuag lawm, tus sawv los ua vaj tshiab nws xav yuav tus ntxhais uas Mas Tais tau tsa sawv rov los, mus ua nws tus poj niam. Tiam sis tus ntxhais twb cog lus hais tias nws yuav pab lub Koom Txoos, nws tsis yuav txiv. Tus vaj tshiab hnov hais tias yog Mas Tais pab tus ntxhais kom tau cog lus tias tsis yuav txiv, ces tus vaj thiaj muab Mas Tais tua nyob hauv xyoo 65.

Xyoo 67 ‘Xis Moos tus siab kub’ thiab ‘Yus Das Thas Des As’ tau mus tshaj lub Moo Zoo txog Paws Xias. Nyob ntawd Xis Moos raug lawv xuas kaw los kaw nws thiab lawv muab hmuv nkaug Yus Das ces nkawd tuag nyob hauv Paws Xias teb.

Hais txog ‘Mas Kos’ mas xyoo 68 nws mus tshaj lub Moo Zoo nyob Hais Nkws Tos teb, nws ntuas sawv daws kom txhob teev cov mlom dab ua rau tsoom pej xeem tsis txaus siab, lawv muab Mas Kos khi rau nees cab tuag nyob hauv lub nroog As Les Xas Nrias.

Muaj kwv huam piav txog tus Hauv Paus Xa Lus ‘Nas Tas Nais’ tias Nas Tais Nais tau mus tshaj Ntuj lus nyob Is Ntias teb, ntau leej ntseeg txog nws cov lus qhia. Tab sis muaj ib co yeeb ncuab xav hiam Nas Tais Nias. Li ntawd, nws thiaj hloov mus tshaj Ntuj Lus nyob As Mes Nias teb. Tus vaj kav As Mes Nias tus poj niam thiab 12 lub nroog txais Yes Xus lub Moo Zoo, lawv ntseeg Yes Xus. Tus vaj ntawd nws muaj ib tug kwv, tus kwv pom tias muaj cov neeg ntseeg Yes Xus coob coob, nws thiaj nrog cov txiv dab muab Nas Tais Nais hlais, thiab lawv txiav nws taub hau tuag xyoo 72.

Zaj kwv huam hais txog tus Hauv Paus Xa Lus ‘Tos Mas’ tias nws mus tshaj Ntuj Lus nyob Is Ntias teb ces xyoo 72 nws tuag nyob ntawd. Xyoo 1200 muaj ib co neeg Aws Los Pas mus ua luam nyob Is Ntias teb, lawv ntsib ib co neeg txais kev ntseeg nyob hauv lub xeev Mas Las Npas, nyob Is Ntias teb. Cov neeg ntawd hais tais thaud yog tus Hauv Paus Xa Lus Tos Mas qhia kev ntseeg rau lawv lub teb chaws. Niaj hnub no cov ntseeg nyob Is Ntias teb tseem hwm Tos Mas lub ntxa nyob hauv lawv lub teb chaws.

Muaj kwv huam piav txog tus Hauv Paus Xa Lus ‘Fis Lis Pos’ tias nws tshaj lub Moo Zoo mus txog Hes Las teb, ces xyoo 80 lawv muab Fis Lis Pos dai tuag saum ntoo cuam.

Nyob hauv xyoo 80 ntawd, ‘Mas Thias’ kuj raug cov Yus Das nyob Yes Lus Xas Les ntes thiab muab pob zeb txawb tab sis nws tsis tuag, ces lawv thiaj muab nws txiav caj dab. Hais txog cov Hauv Paus Xa Lus mas lawv sawv daws puav leej ua siab loj siab tawv thiab muaj lub siab kub lug, ces tas lawv sim neej lawv tau siv zog tshaj Yes Xus lub Moo Zoo.

Cov neeg tshaj Yes Xus lub Moo Zoo mas tsis yog cov Hauv Paus Xa Lus xwb, vim txij li xyoo tim 60 mus txog xyoo tim 120 mas cov neeg uas ntseeg Yes Xus thiab cov tsis ntseeg coob leej tau sib tham txog txoj kev saib Yes Xus yog tus Huab Tais cawm ntiaj teb neeg. Cov xub tau hnov Yes Xus lub Moo Zoo yog cov Yus Das. Lawv hnov lub Moo Zoo nyob Yes Lus Xas Les thiab nyob Yus Das teb, lawv kuj tau hnov nyob Das Mas thiab nyob As Ntias Kias. Cov Yus Das yog ib co neeg ua lag luam nyob tas ntiaj teb, ces lawv tau piav qhov uas lawv ntseeg rau luag tej mloog, nyob tas qhov txhia chaw; xws li Phas Khas, Mab Liab Mas Ntas Las, Mas Tas, Tis Tos, Tis Mos Tes.

Hais txog ‘Phas Khas’ (Pancras) mas nws txiv tau coj nws mus mloog Yes Xus tshaj lub Moo Zoo nyob Yes Lus Xas Les, ces Pas Khas tau paub Pob Zeb. Thaum Yes Xus mus saum ntuj lawm, Phas Khas lawv tsev neeg thiaj txais Cim Ntxuav nyob hauv As Nthias Kias. Tom qab nws txiv tuag, Phas Khas khiav mus nyob Poos Tus teb (Pontus), nws mus nyob hauv ib lub qhov tsua. Pob Zeb tuaj ntsib Phas Khas thiab xa nws mus tshaj lub Moo Zoo nyob hauv lub pov txwv Xis Xis Lias (Sicily) ces nws raug cov neeg hauv lub pov txwv muab pob zeb txawb tuag ua tim khawv hauv xyoo 40.

Muaj tej zaj kwv huam piav tias tom qab Yes Xus mus saum ntuj tas, ‘Mab Liab Mas Ntas Las’ nrog Zam mus tshaj lub Moo Zoo nyob Es Fes Xos. Xyoo 50 cov Yus Das hiam cov ntseeg Yes Xus, ces lawv muab Mab Liab Mas Ntas Las ntes tso hauv ib lub nkoj cia dej tshoob mus txog lub zos Mas Xes hauv daim av Fab Kis. Mab Liab thiaj tshaj lub Moo Zoo nyob Pos Vees (Provence) thiab nws nyob ua Twj Cuab hauv ib lub qhov tsua tau 30 xyoo ces nws thiaj tuag thaum muaj 79 xyoos.

Thaum  cov Yus Das muab pob zeb txawb Tes Fas Nos ntawd, ‘Las Ntxas Los’ coj nws ob tug muam yog ‘Mas Tas’ thiab ‘Mab Liab’ tsiv mus nyob Kws Plos. Thaum Npas Nas Npes thiab Paj Lug tuaj txog Kws Plos, nkawd tau tsa Las Ntxas Los ua tus saib cov ntseeg nyob lub zos Kis Tis Os (Kittion) hauv Kws Plos. Las Ntxas Los tshaj lub Moo Zoo 30 xyoo nyob ntawd.

Tab sis muaj tej zaj kwv huam hais tias Las Ntxas Los thiab Mas Tas nrog Mab Liab Mas Ntas Las caij nkoj tuaj txog daim av Fab Kis. Las Ntxas Los mus tshaj lub Moo Zoo nyob Mas Xes thiab nws raug tus vaj Das Mas Xias txiav caj dab hauv lub tsev loj faj. Mas Tas mus nyob Tas Las Nkos (Tarascon) ces nws tshaj lub Moo Zoo rau cov neeg hauv tham tsam ntawd mus txog hnub nws tuag.

Ntawm cov Tub Tsob Hwb, mas thaum cov ntseeg txog Yes Xus nyob Yes Lus Xas Les raug hiam thiab Tes Fas Nos tuag tas, lawv ri mus lwm lub xeev. Lus Kas piav txog ‘Fis Lis Pos’ tias nws mus nram ib lub nroog nyob Xas Mas Lias teb, nws tshaj lus txog Yes Xus nyob ntawd.  Tswv Ntuj tshoj nws kom mus nram Nkas Xas. Fis Lis Pos ua lub Cim Ntxuav rau ib tug nom Es Thias Pias, thiab nws mus tshaj lub Moo Zoo nyob zos As Ntxos mus txog Xes Ntxas Les.

Cov kwv huam piav txog lwm tus Tub Tsob Hwb xws li ‘Plos Kos Los’ tias Pob Zeb xa nws mus saib cov ntseeg nyob Nis Kos Mes Dias (Nicomedia). ‘Nis Kas Nos’ yog haiv neeg Yus Das yug nyob hauv lub pov txwv Kws Plos, ces thaum Yes Xus cov thwj tim raug hiam, nws rov mus nyob Kws Plos. ‘Tis Moos’ nws txawj hais lus Hes Las ces cov Hauv Paus Xa Lus xa nws mus tshaj lub Moo Zoo nyob Hes Las teb. ‘Pas Mes Nas’ mus tshaj lub Moo Zoo nyob hauv As Xias Me thiab Mas Xes Dos Nias. Hais txog ‘Nis Kos Las’ mas muaj ib hnub nws ntaus nws tus poj niam thiab nws ntsauj tus poj niam, ces cov Hauv Paus Xa Lus tsawm nws. Nis Kos Las thiaj ncaim ntawm lub Koom Txoos mus txhim lub koom txoos Nis Kos Lais.

Yog vim cov ntseeg txog Yes Xus sib pab tshaj lub Moo Zoo, ces thaum txog xyoo tim 120 Yes Xus kev cai thiaj mus txog As Xias Me, Es Des Xias teb (Edessa) thiab Pes Xis teb (Persia). As Xias Me mas nyem no yog Tws Kis teb (Turkey). Es Des Xias thiab Pes Xis mas nyem no hu ua ‘Is Las’ (Iraq) thiab ‘Is Laas’ (Iran). Nyob Aws Los Pas teb kuj muaj cov nroog nyob Hes Las teb thiab nyob Mas Xes Dos Nias teb, lub pov txwv Kws Plos, thiab Khes Tas. Nyob Is Tas Lias teb muaj ob peb lub nroog kuj paub Yes Xus lub Moo Zoo. As Fis Kas Tuam Teb mas muaj Hais Nkws Tos teb.

Xyoo tim 120 ntawd, muaj ib tug neeg ua Ntuj kev cai nyob Los Mas hu ua ‘Hes Mas’ (Hermas) sau phau ntawv ‘Tus Tswv Zov Yaj’ (The hepherd of Hermas), nws hais tias lub Koom Txoos yog zoo li ib tug ntoo loj ncau tej ceg ntxoov tas lub ntiaj teb uas cov Los Mas paub.

Ob txhiab xyoo ua ntej no, mas lub Tuam Teb Los Mas nto koob meej npaum li lub tuam teb Suav. Cov kws txuj sau ntawv tseg hais tias yog xyoo tim 753 ua Yes Xus ntej, mas lub nroog Los Mas pib muaj nom muaj tswv. Tsuas yog nyob hauv tiam 1 ua Yes Xus ntej, ces lub nroog Los Mas thiaj muaj tej pab tub rog zoo heev mus ntaus tsam, thiab txeeb tau cov teb chaws nyob ib ncig ntawm lub hiav txwv Mes Dis Tes Las Nes, lawv kuj txeeb tau tej teb chaws dav nyob hauv Aws Los Pas Xib Fab.

Yog xyoo tim 27 ua Yes Xus ntej, mas tus vaj kav lub nroog Los Mas thiaj tau tsim tej txoj cai tshiab zoo, kav tas huv si cov teb chaws nyob Aws Los Pas xib fab nrog cov teb chaws nyob ncig lub hiav txwv Mes Dis Tes Las Nes. Tus vaj Los Mas uas tsim txoj cai tswj cov teb chaws zwm rau lub Tuam Tsheej Los Mas hu ua Xes Ntxas Aus Nkus. Nws tau ua tuam vaj kav Los Mas tuam teb 41 xyoo. Lub caij uas Yes Xus yug los, mas Xes Ntxas Aus Nkus yog tus vaj kav cov teb chaws zwm rau Los Mas. Li ntawd, Xes Ntxas Aus Nkus kuj kav Yus Das teb thiab kav Nkas Lis Lais teb, yog ob lub xeev uas Yes Xus loj hlob nyob ntawd.

Thaum tus nom Los Mas hu ua Pis Las Tos txiav txim rau Yes Xus tias Yes Xus yuav tsum tuag nyob saum ntoo cuam, mas yog xyoo tim 30.

Xyoo tim 30 ntawd, tus vaj Xes Ntxas Aus Nkus twb tuag tau 13 xyoo lawm. Cov vaj Los Mas kav cov teb chaws zwm rau Los Mas ib ntus ntev li 300 tawm xyoo, lawv kav cov teb chaws zwm rau Los Mas zoo hauj sim. Lawv sau 20 tawm lub teb chaws los ua tib lub Tuam Teb. Lawv kav ib puas tawm haiv neeg, hais tej xeem lus sib txawv. Ib ntus ntev tshaj 300 xyoo, Los Mas Tuam Teb nyob thaj yeeb, tsis muaj tsov rog loj li. Zeej tsoom hu lub caij ntawd ua ‘Kev thaj yeeb Los Mas’ (Roman Peace).

Xyoo 30 uas yog lub caij Yes Xus tuag, muaj cov teb chaws zwm rau tseem hwv Los Mas dav li 3 plhom kis los mev xwm fab ntawm lub nroog Los Mas.

Muaj cov pej xeem zwm rau tseem hwv Los Mas hais qhov tsawg ntshai muaj 60 plhom leej neeg. Nyob tas cov teb chaws ncig ntug dej hiav txwv Mes Dis Tes Las Nes, sawv daws puav leej zwm rau tus vaj Los Mas. Nyob Los Mas sab hnub poob, lub hiav txwv As Laas Tiv ua ciam teb. Nyob sab hnub tuaj, cov teb chaws suab puam nyob As Las Npias teb thiab nyob Pes Xis teb ua ciam teb. Nyob pej fab, muaj tus dej Lees thiab tus dej Das Nws ua ciam teb. Nyob naj fab, tus ciam teb yog cov teb chaws suab puam As Fis Kas. Cov haiv neeg nyob ncig Los Mas ciam teb, yog tej haiv neeg tsis muaj zog thiab tsis vam meej. Li ntawd, cov tseem hwv Los Mas tsis ntshai leej twg. Tau ib ntus ntev li 300 txog 400 xyoo, cov Los Mas mus ntaus rog nyob lub teb chaws twg, mas lawv kuj yeej lub teb chaws ntawd. Tas cov haiv neeg uas cov Los Mas paub, haiv twg los kuj zwm rau tseem hwv Los Mas, haiv neeg twg los kuj tuaj thov tseem hwv Los Mas pov hwm lawv. Haiv neeg twg kuj xa nyiaj xa kub, xa tej tub txib, xa tej tus qhev tuaj pub rau tseem hwv Los Mas kom lawv nrog tswj fwm thiab nrog saib xyuas.

Cov neeg nyob hauv cov teb chaws zwm rau tus vaj Los Mas, mas lawv kuj txaus siab hauj sim. Vim tias cov teb chaws zwm rau Los Mas tsis muaj tsov rog, tsis muaj tub sab. Tseem hwv Los Mas txawj kav teb chaws, txawj txuag teb chaws. Tsis muaj leej twg yuav muaj cuab kav ntxeev siab ua rog, los ua tub sab. Cov teb chaws ntawd tsis tau nyob twj lij, tiam sis lawv tau nyob thaj yeeb dua.

Cov teb chaws nyob ib ncig ntawm lub hiav txwv Mes Dis Tes Las Nes tau nyob thaj yeeb zoo, Tswv Ntuj Lo Lus tau kev ncha mus tas qhov txhia chaw. Cov nom tswv tsis ua rog, lawv thiaj khoom zov teb chaws thiab saib cov pej xeem zoo, lawv muab siab rau kom tau ua raws li txoj cai lij choj. Lawv txoj cai tsis pub neeg ua tub sab, tsis pub neeg sib tua, tsis pub cov nom tswv me txiav txim tsis ncaj.

Yog vim li ntawd, tus hauv paus xa lus Paj Lug thiaj li tau kev tshaj Ntuj lus ntev xyoo hauj sim. Yog tsis txhob muaj cov nom tswv Los Mas saib cov nroog kom neeg tsis txhob sib tua, mas ntshai cov Yus Das twb muab Paj Lug tua pov tseg puag ntxov lawm. Nyob Yes Lus Xas Les, nyob Es Fes Xos, nyob Kos Lis Nthos thiab nyob Xes Ntxas Les, yog cov nom tswv Los Mas txuag Paj Lug xwb.

Tsis yog vim Paj Lug coj kev ntseeg lawv thiaj txuag nws, tab sis yog vim Paj Lug yog ib tug pej xeem Los Mas nyob hauv lub Tuam Teb Los Mas, ces lawv thiaj txuag Paj Lug xws li lawv tau txuag txhua tus pej xeem Los Mas.

Cov nom tswv Los Mas ua li ntawd, mas cov neeg mus tshaj Ntuj Lus thiaj li tsis ntshai cov neeg ntxub lawv, tsis ntshai cov xav liam ub liam no rau lawv. Lawv paub tias cov nom tswv yuav ua ncaj rau Yes Xus cov tub tshaj Ntuj Lus. Tab yog lawv mus txog qhov twg, los lawv yeej nyob hauv cov teb chaws uas zwm rau Los Mas, cov tub tshaj Ntuj Lus tsuas pom ib co nom yuav ua ncaj rau lawv, kom cov neeg teev dab ua tsis tau dab tsi rau lawv.

Tseem hwv Los Mas tsim tej txoj kev zoo, mas cov tub tshaj Ntuj Lus thiaj tau kev tawm rooj mus tshaj Yes Xus lub Moo Zoo rau qhov ub qhov no.

Cov vaj Los Mas ua tej txoj kev dav dav, hla tas cov teb chaws zwm rau lawv. Cov tub tshaj Ntuj Lus thiaj tau kev zoo mus qhia sawv daws. Cov kev ntawd hla Is Tas Lias teb, Xyis Pas Yas teb, Fab Kis teb, Mas Xes Dos Nias teb, thiab As Xias teb.

Cov kev ntawd yog ib cov kev dav dav, ncaj ncaj, meem txiag zeb zoo zoo. Cov neeg xav mus kev deb deb lawv tsis ntshai, lawv tau tej txoj kev zoo mus. Lawv tsis ntsib tub sab ntawm tej kev. Vim cov tub rog Los Mas niaj hnub taug tej txoj kev ntawd mus los.

Tseem hwv Los Mas kuj muaj nkoj mus txog tas qhov txhia chaw. Cov tub tshaj Ntuj Lus thiaj tau nkoj caij. Nyob saum dej hiav txwv cov nkoj mus los tsis tseg. Tus twg xav mus txog lub teb chaws uas nyob ncig ntug dej hiav txwv kuj tau tas. Cov Los Mas muaj tej lub nkoj ntim tau 600 leej. Ib lub teb chaws twg kuj muaj tej lub nroog rau cov nkoj tuaj so. Nyob hauv cov nroog ntawd kuj muaj tej tus laus pav thiab tej tus tswv uas lawv muaj ntau pua lub nkoj sawv kev mus tas txhia lub teb chaws. Yog vim li ntawd, Tswv Ntuj Lo Lus thiaj xub mus txog cov nroog nyob ze ntawm ntug hiav txwv.

Tseem hwv Los Mas tau sau tas cov teb chaws uas zwm rau lawv los ua ib lub teb chaws. Nyob tas hauv cov teb chaws nyob ncig lub hiav txwv Me Dis Tes Las Nes, kuj yog tib cov nom tswv xwb, siv ib co nyiaj, hais ib xeem lus uas sawv daws paub: yog lus Hes Las. Cov tub tshaj Ntuj lus mus txog qhov twg, mas lawv hais lus Hes Las kuj tau. Nyob teb chaws twg kuj muaj ntau leej paub lus Hes Las.

Tseem hwv Los Mas npaj ib haiv neeg paub txuj ci, qhov ntawd yog ib yam zoo rau lub Koom Txoos. Cov nom tswv Los Mas paub ntau lub teb chaws, lawv xav kav txog ntau lub teb chaws. Cov pej xeem kuj paub ntau haiv neeg. Ua li, mas Tswv Ntuj Lo Lus tau ntsib ib co nom paub txuj ci thiab paub lub ntiaj teb zoo. Tswv Ntuj Lo Lus tau hlob nyob hauv ib haiv neeg paub txuj ci. Yog vim tseem hwv Los Mas tau npaj ib co neeg zoo li ntawd, mas zoo li cov tseem hwv Los Mas tau npaj ib co neeg ntse rau lub Koom Txoos.

Nyob hauv Los Mas txoj kev cai thiab nyob hauv lawv teb chaws, muaj ntau yam zoo pab lub Koom Txoos raws li nyuam qhuav piav tas los no. Tab sis cov Los Mas muaj tej txoj cai thiab ib tug cwj pwm yuav ua kom tseem hwv Los Mas thiab lub Koom Txoos ua yeeb ncuab tsis sib haum.

Tseem hwv Los Mas teev tus vaj Los Mas xws li yog ib tug Tswv Ntuj. Lawv tsis hwm tus vaj xws li ib tug neeg kav teb chaws xwb. Lawv muab tus vaj piv rau Tswv Ntuj kiag, thiab lawv saib tus vaj yog zoo li ib tug Tswv Ntuj uas yug los nyob hauv lub ntiaj teb no kom tau kav lub ntiaj teb. Tseem hwv Los Mas kom cov pej xeem teev tus vaj xws li teev Tswv Ntuj. Lawv ua tej lub tsev teev tus vaj, lawv ua tej lub thaj txi tus vaj, lawv muaj ib co Leej Choj teev tus vaj. Thaum tseem hwv pib teev tus vaj zoo li ntawd, mas muaj tej tus vaj tsis tshua nyiam. Tsis ntev, mas ntau leej tsis xav teev tus vaj xws li yog Tswv Ntuj. Cov nom tswv Los Mas pom cov neeg tsis teev tus vaj, mas lawv hais tias  tus ntawd ntxub tus vaj. Ua li, mas cov neeg teev Tswv Ntuj tiag, lawv ua tsis tau li ntawd. Lawv tsis ntseeg tias tus vaj yog Tswv Ntuj. Lawv tsis xav muab tus vaj los piv rau Tswv Ntuj. Lawv tsis xav txi dab tsi nyob saum lub thaj txi tus vaj Los Mas.

Cov tseem hwv Los Mas saib ntau tus pej xeem zoo li tsis yog neeg. Nyob Los Mas teb lawv muaj ntau plhom tus qhev, lawv saib cov qhev ntawd xws li ib co tsiaj txhu. Lawv muag neeg nyob tom khw ib yam li luag muag nyuj muag nees. Tswv Ntuj Lo Lus tsis kheev ua li ntawd. Qhov ntawd yog ib qho ua kom tseem hwv Los Mas thiab lub Koom Txoos tsis sib haum. Cov nom Los Mas muaj lub tswv yim txawv Yes Xus lub tswv yim tiag.

Qhov loj tshaj yog qhov tias cov nom Los Mas tau zoo nyob dhau, lawv muaj nyiaj muaj kub ntau dhau. Thaum lawv ua rog yeej, mas lawv tau kev nqus nyiaj nqus kub nyob tas ntiaj teb los ua lawv tug. Niaj xyoo, tas cov teb chaws zwm rau Los Mas tso neeg nqa nyiaj tuaj xiab tseem hwv thiab xiab cov vaj. Li ntawd, nyob Los Mas teb muaj ib co nom tswv muaj nyiaj txiag ntau, lawv ua si ntau, lawv tsis ua hauj lwm, lawv twv txiaj, lawv tsis paub hlub cov neeg me, lawv tsis hwm cov poj niam, lawv tsis hlub lawv yim neeg. Lawv ua li ntawd, mas tsis haum Tswv Ntuj  10 los lus qhia.

Tseem hwv Los Mas tau pab lub Koom Txoos ntau hauj sim. Tiam sis, yog tus twg txawj xav tswv yim, mas tus ntawd yeej xub paub tias tshuav tsis ntev ntshai txoj kev ntseeg Yes Xus yuav tsis haum ntau yam nyob hauv cov kev cai Los Mas. Yeej yuav muaj ib hnub uas cov vaj Los Mas yuav hiam cov neeg ntseeg Yes Xus.

Tim li cas cov vaj Los Mas thiaj hiam cov neeg ntseeg Yes Xus?

1. Cov vaj Los Mas hiam cov neeg ntseeg Yes Xus, vim cov neeg ntseeg tsis kam teev tus vaj Los Mas xws li teev ib tug Tswv Ntuj.

Cov neeg ntseeg Yes Xus mloog thiab hwm cov vaj, tiam sis cov vaj Los Mas xav kom cov pej xeem teev tus vaj yog ib tug Tswv Ntuj, mas cov neeg ntseeg hais tias lawv teev lawv ib tug Tswv Ntuj xwb, lawv tsis yeem hlawv tshuaj hlawv ntawv los teev tus vaj Los Mas. Cov nom pom cov neeg ntseeg tsis teev tus vaj, mas lawv saib cov neeg ntseeg yog ib co neeg ntxub tus vaj Los Mas. Tej lub caij uas teb chaws nyob tiaj tus, mas cov vaj Los Mas kuj tsis tshua hiam cov neeg ntseeg Yes Xus. Tab sis, thaum twg lawv ntshai tsam tsoom pej xeem ntxeev siab, mas lawv tso cov tub ceev xwm mus nrhiav cov neeg ntxeev siab. Cov tub ceev xwm saib cov neeg ntseeg yog tus vaj ib co yeeb ncuab, ces cov tub ceev xwm thiab cov tub rog ntes cov ntseeg thiab muab lawv tua.

2. Cov nom tswv thiab cov pej xeem ib txhia ntxub cov neeg ntseeg Yes Xus, mas yog vim lawv pom cov neeg ntseeg coj ib tug yam ntxwv zoo dua lawv.

Lawv pom cov neeg ntseeg hlub cov qhev thiab hwm cov poj niam, cov neeg ntseeg tsis nyiam kev plees kev yi, cov neeg ntseeg tsis nyiam cov nom tswv muab neeg tua ua si, cov neeg ntseeg tsis nyiam cov neeg siv nyiaj ntau ntau ua dog dig thiab tsis pab cov neeg pluag. Thaum cov neeg teev dab pom ib co neeg coj ib txog kev cai dawb huv, mas lawv kuj khib kawg, lawv thiaj li hais lus xaiv txog cov neeg ntseeg Yes Xus. Lawv hais tias cov ntseeg noj nqaij neeg. Lawv muab lub Cim Yug los ntxeev hais li ntawd. Cov neeg ntseeg sib sau teev Ntuj hmo ntuj, mas cov ua dab liam tias cov neeg ntseeg sau los ua dev ua npua tsheej hmo. Li ntawd, thaum lawv pom cov vaj hiam cov neeg ntseeg Yes Xus, mas lawv haj yam liam ntau yam txog kev ntseeg ntxiv.

3.Tej tus nom muab cov neeg ntseeg txog Yes Xus tua pov tseg, kom tau yuav lawv lub cuab tam los ua nws tug.

Ntau tus nom siv nyiaj ntau ntau nyob hauv lawv txoj kev ua si. Lawv nrhiav nyiaj los ua tej yam lom zem rau tsoom pej xeem saib, kom lawv tau ntsej muag.

Cov vaj Los Mas hiam cov neeg ntseeg Yes Xus ib ntus ntev li 250 xyoo. Thaum cov vaj hiam cov ntseeg nyob hauv lub nroog Los Mas, mas lawv kuj ceeb toom kom cov nom hiam cov ntseeg nyob hauv tas cov teb chaws uas zwm rau tus tuam vaj Los Mas. Li ntawd, cov neeg ntseeg tau tuag ua Yes Xus tim khawv nyob hauv ntau lub teb chaws coob kawg. Cov tuag ua Yes Xus tim khawv nyob Los Mas teb muaj ntau vam leej.

Thawj tus vaj xub hiam cov neeg ntseeg Yes Xus yog tus vaj Nes Los, nws pib hiam cov ntseeg xyoo 64. Thaum Nes Los ua vaj, mas muaj cov neeg ntseeg tuag ua tim khawv coob, xws li cov neeg nram no:

 ‘Pus Des’ (Pudens) yog tus xab txheeb Kos Nes Lias (Cornelius) nyob Xes Ntxas Les tus tub. Lawv yog thawj pab neeg Los Mas hloov siab tshiab. Thaum tus vaj Nes Los hiam cov neeg ntseeg nyob tuam ceeb Los Mas, mas Pus Des thiaj tuag ua tim khawv hauv xyoo 60 tshuav nws 2 tug tub thiab 2 tug ntxhais uas yav tom ntej yuav tuag ua tim khawv nyob hauv tiam ob, yog Nos Vas Tus (Novatus), Tis Mos Thes Us (Timotheus), Pas Xes Ntes (Paxedes), thiab Pus Ntes Tias Nas (Pudentiana).

Tus vaj Nes Los muaj ib tug tub rog nyob nrog nws nraim, yog ‘Tos Pes Tis Us’ (Torpetius). Thaum nws hnov tus Hauv Paus Xa Lus Paj Lug cov lus tshaj Yes Xus lub Moo Zoo tas, ces nws thov kom Paj Lug ua Cim Ntxuav rau nws.

Muaj ib hnub nyob hauv xyoo 65 tus vaj Nes Los ua kab ke tsa Ntis As Nas (Diana) ua tus tswv tsim lub sim ceeb, Tos Pes Tis Us nyob ntawd, nws tsis kam pe tus dab Ntis As Nas. Tus vaj pom li ntawd, nws ntxias kom Tos Pes Tis Us tso txoj kev ntseeg pov tseg, tab sis Tos Pes Tis Us tsis kam thim kev ntseeg ces tus vaj thiaj hais kom cov tub rog coj nws mus txiav caj dab.

‘Es Vos Dis Us’ (Evodius) yog ib tug hauv Yes Xus pab 72 thwj tim. Tom qab Pob Zeb mus rau Los Mas, ces Es Vos Dis Us ua Tswv Qhia saib xyuas cov ntseeg hauv As Nthias Kias. Xyoo 66 tus vaj Nes Los hiam cov neeg ntseeg, ces Es Vos Dis Us raug tua tuag ua tim khawv. Muaj tej zaj piav tias Es Vos Dis Us yog tus hais rau cov neeg ntseeg tias ‘Mab Liab yug Yes Xus thaum nws muaj 15 xyoos.’

Npas Xis Lis Xas (Basilissa) thiab As Nas Tas Xias (Anatasia) yog 2 tug niam tsev haiv neeg Los Mas hloov siab tshiab. Nkawd txais Cim Ntxuav ntawm tus Hauv Paus Xa Lus Pob Zeb thiab Paj Lug thiab nkawd tau muab nkawd thaj av los ua chaw cia ob tug Hauv Paus Xa Lus tus qauv, ziag no yog qhov chaw tsa 2 lub Tuam Tsev Teev Ntuj nyob yog Tuam Tsev Teev Ntuj hwm Leej Ntshiab Pob Zeb thiab Tuam Tsev Teev Ntuj hwm Leej Ntshiab Paj Lug nyob Vas Tis Kas.

Npas Xis Lis Xas thiab As Nas Tas Xias raug ntes vim muaj neeg mus kom tias nkawd pub chaw cia faus cov neeg ntseeg uas raug cov nom tswv tua tuag. Cov nom tswv Los Mas tsuav kom nkawd thim kev ntseeg xwb, mas nkawd thiaj yuav tsis tuag. Npas Xis Lis Xas thiab As Nas Tas Xias tsis yeem, ces nkawd mag txiav caj dab tuag nyob hauv xyoo 68. Thaum nkawd tuag lawm, cov nom tswv tau muab nkawd tus nplaig dua, muab liag los hlais lub cev thiab nkawd lub cev raug txhoov ua tej ya coj mus hlawv.

Muaj ib zaj kwv huam piav tias thaum Pob Zeb thiab Paj Lug raug cov nom Los Mas ntes kaw hauv tsev loj faj, mas muaj ib pab tub rog zov nkawd. Nyob hauv pab tub rog zov lub tsev loj faj kaw nkawd, muaj 2 tug tau mloog nkawd cov lus thiab pom nkawd ua hwj huam kom dej txhawv hauv lub tsev loj faj tag ces cia li hloov siab tshiab; yog ‘Mas Tis Nias’ (Martinia) thiab ‘Pos Xes Xus’ (Processus). Nkawd raug tua tom qab Paj Lug raug txiav caj dab tas.

Xyoo 68 muaj ib pab neeg ntseeg nyob Kos Los Xais raug tus vaj Nes Los tua tuag ua tim khawv, yog ‘Fis Les Moos’ (Philemon), nws poj niam ‘As Phias’ (Apphia), ‘As Kis Pos’ (Archippus) thiab tus tub txib ‘Os Nes Xis Mos’ (Onesimus). Fis Les Moos yog tus uas Paj Lug sau tsab ntawv tuaj thov kom zam rau Os Nes Xis Mos. Fis Les Moos yog neeg nplua nuj muaj tub txib coob, nws muab nws lub tsev ua chaw cia rau cov neeg ntseeg tau sib sau ua kab ke lov mov.

Dua tus vaj Nes Los tiam lawm, ces muaj ib ntus ntev li 20 xyoo uas cov nom tswv tsis ua dab tsi rau cov neeg ntseeg. Kev ntseeg txog Yes Xus thiaj vam meej me ntsis, tab sis tseem muaj tej tus neeg ntseeg tuag ua Yes Xus tim khawv xws li: ‘Vaj Qhia Lis Nos’ (Linus) tus sawv Pob Zeb chaw ua Vaj Qhia nyob Los Mas nws raug tua tuag xyoo 76 tus Tub Tsob Hwb ‘Nis Kas Nos’ (Nicanor), ‘Os Nes Xis Fos Los’ (Onesiphorus).

Tus vaj rov qab hiam lub Koom Txoos yog Dos Mis Xias (Domitian), nws ua vaj txij xyoo 81-96. Yog xyoo 92 twb muaj neeg ntseeg Yes Xus nyob hauv tus vaj Dos Mis Xias lub tsev lawm. Dos Mis Xias ob tug kwv kuj ntseeg Yes Xus thiab.

Tus vaj Dos Mis Xias muab cov neeg ntseeg tua, thiab nws tseem muab ntau leej tsis ntseeg Yes Xus tua, vim nws ntshai tias lawv tsis xav mloog nws. Lub caij Dos Mis Xias ua vaj, cov ntseeg raug kev tsim txom kom tuag muaj tshaj 2,000 leej, xws li: ‘Fes Lis Khus Las’ (Felicula) thawj tus nkauj xwb tuag ua tim khawv, ‘Pes Tos Nis Las’ (Petronilla), ‘Nes Les As’ thiab ‘As Kis Las’ (Nereus, Achilleus), ‘Dos Mis Xis Las (Domitilla),  ‘Nis Kos Mes Des’ (Nicomedes), ‘Vaj Qhia Nkes Tus’ (Cletus), ‘Os Nes Xes Mus’ (Onesimus), ‘Pis Nkas’ (Prisca), ‘Fas Vis Us Nkes Mees’ (Flavius Clemens), thiab ‘Vaj Qhia Nkes Mees Ib’ (Clement I)

Nyob hauv xyoo 100 txog xyoo 200 los yog tiam ob, cov Hauv Paus Xa Lus tuag tas, cov coj lub Koom Txoos tsuas yog cov Hauv Paus Xa Lus cov thwj tim xwb. Lub Koom Txoos tau xaiv ‘Hnub Chiv’ los ua ‘Tswv Ntuj Hnub’ (Lord’ s Day). Txog Tswv Ntuj Hnub, cov neeg ntseeg yuav sib txoos nyeem Ntawv Ntshiab thiab ua kab ke lov mov 2 zaug; yog thaum sawv ntxov thiab thaum lub hnub yuav poob qho, los peb hais tias ‘Qhib Hnub’ thiab ‘Xaus Hnub’. Niaj hnub hauv lub lis piam, lawv yuav sib sau teev Ntuj qhib hnub thiab teev Ntuj xaus hnub nyob hauv cov tsev teev Ntuj (church).

Koom Txoos sab hnub poob thiab Koom Txoos hauv As Xias Me (Asia Minor) hais tsis sib haum txog Hnub Hla (Easter) vim tias cov neeg ntseeg hauv xeev ntuj As Xias Me ua hmoov Hla hauv hnub tim 14 lub hli qoob loo siav (Nisan) ncaj rau caij nplooj ntoos hlav (Spring season) raws li cov Yus Das kab ke, tiam sis cov neeg ntseeg sab hnub poob ua hmoov Hla hauv Hnub Chiv tom qab hnub tim 14 lub hli qoob loo siav, ces Vaj Qhia Vis Tos (Pope Victor I) uas yog tus Tswv Qhia nyob Los Mas thiaj tshaj tias cov tseem ua hmoov Hla hauv hnub tim 14 lub hli qoob loo siav yog cov ntseeg cuav (Heretic). Is Les Nes thiab Pov Lis nyob Es Fes Xos (Irenaeus, Polycrates of Ephesus) thiaj sau ntawv tuaj ntuas Tswv Qhia Vis Tos. Thaum kawg Tswv Qhia Vis Tos thiaj thim nws cov lus, ces Koom Txoos sab hnub poob thiab Koom Txoos hauv As Xias Me thiaj rov sib haum xeeb.

            Ib yam xwv txheej loj hauv lub zim txwv no, mas yog txoj kev ntseeg ncau ua ntau pab ntau pawg. Muaj tej pab ua xyem xyav tias Yes Xus puas yog tseem Tswv Ntuj. Cov ua xyem xyav li ntawd, mas lub Koom Txoos hu lawv ua cov ntseeg cuav los yog ‘Hes Les Tis’. Cov Hes Les Tis nto npe tshaj lwm pab, mas yog cov ‘Nos Tiv’ (Gnosticsm), lawv tsis ntseeg Yes Xus cov lus raws li cov txwj laus hauv lub Koom Txoos qhia, lawv hais tias tib neeg txhua tus paub txog Tswv Ntuj qhov tseeb tau; cov ‘Mas Xis Os Nis’ (Marcionism) hais tias tus Tswv Ntuj uas Yes Xus hais txog tsis yog cov Yus Das tus Tswv Ntuj; cov ‘Moos Tas Nis’ (Montanism) hais txog Leej Ntuj Plig Ntshiab txoj hauj lwm ua yaj saub qhia Tswv Ntuj Lo Lus; cov ‘As Dos Tis’ (Adoptionism) hais tias Yes Xus tsis yog Tswv Ntuj Leej Tub; cov ‘Dos Ces Tis’ (Docetism) hais tias Yes Xus yog tus plig dawb huv nws tsis muaj lub cev nqaij.

Nyob hauv tiam ob no, kev iab hiam tsoom neeg ntseeg txog Yes Xus tsuas yog nyob hauv tuam ceeb Los Mas xwb, tab sis thaum tiam ob yuav tag, tus vaj Xes Tis Mis Us (Septimius Severus) txwv tsis pub tsoom pej xeem txais lub Cim Ntxuav ua Yes Xus thwj tim ces kev hiam tsoom neeg ntseeg thiaj pib ri mus txog As Fis Kas Pej.

Xyoo 105 Vaj Qhia Es Vas Lis Tus (Evaristus) yog tus Tswv Qhia nyob Los Mas raug tua tuag. Nyob Yes Lus Xas Les, Tswv Qhia Xis Mes Oos (Simeon of Jerusalem) kuj raug tua tuag ua tim khawv thiab.

Is Nyas Xyus (Ignatius of Antioch) yog Tswv Qhia tus tim 3 nyob As Nthias Kias, uas nyob Xis Lias teb. Thaum ntawd Xis Lias teb zwm rau tus tuam vaj nyob tim Los Mas. Lub caij ntawd, tus Hauv Paus Xas Lus Pob Zeb tsa ‘Is Nyas Xyus’ ua Tswv Qhia. Tus Tswv Qhia Is Nyas Xyus yog neeg siab loj siab tawv, nws tshaj Tswv Ntuj Lo Lus, mas nws tsis ntshai leej twg. Nws sau ntau tsab ntawv mus ntuas cov neeg ntseeg, ntau zaus nws hais rau cov ntseeg hais tias “Nej ua yam twg, mas nej yuav nco ntsoov tias Tswv Ntuj nyob hauv nej.”

Xyoo 107 cov nom Los Mas ntes Is Nyas Xyus, lawv txiav txim rau nws nyob As Nthias Kias, lawv txiav tias yuav muab nws rau tsov noj nyob tim lub nroog Los Mas. Lawv muab nkoj xa Is Nyas Xyus mus rau Los Mas.

Thaum Is Nyas Xyus tuaj txog lub nroog Xaws Mws Nos (Smyrna), nws sau ib tsab ntawv mus rau cov ntseeg nyob Xaws Mws Nos, nws hais rau lawv tias “Tab yog luag muab ntaj los txiav kuv caj dab, los yog luag muab kuv rau tsov tom, mas kuv yuav nyob ze ntawm Tswv Ntuj mus li.”

Nyob hauv Xaws Mws Nos, Is Nyas Xyus pib siv lo lus ‘Kav Tos Liv’ los hais txog cov ntseeg txog Yes Xus. Is Nyas Xyus sau tias “Thaum tus Tswv Qhia tuaj ntsib tsoom neeg, mas lawv yuav ua xws li tias Yes Xus nrog lawv nyob ntawd thiab lawv yuav yog lub Koom Txoos Kav Tos Liv.”

Is Nyas Xyus tuaj txog lub nroog twg tsuav yog nws ntsib cov ntseeg, mas nws ntuas lawv sawv daws kom lawv ua siab loj, tsis txhob teev tus vaj Los Mas ua tswv ntuj.

Thaum Is Nyas Xyus tuaj yuav txog lub nroog Los Mas, nws ntshai tsam cov ntseeg nyob Los Mas pab nws dim ntawm cov nom tswv Los Mas txhais tes. Ces nws sau ntawv mus hais rau cov ntseeg tias “Kwv tij, lawv twb npaj lub rooj txi Ntuj tas lawm. Nej cia kuv tuag nyob saum lub rooj txi Ntuj ntawd. Nej cia cov tsov tom kuv. Lawv yuav pab kom kuv mus cuag Huab Tais Tswv Ntuj. Kuv xav txia ua ib co mov dawb dawb xws li Yes Xus pleev nyob hauv lub Cim Yug. Mas nej cia tsov xuas hniav zom kuv xws Ii ib lub zeb zom hmoov nplej.”

Ces lawv muab Is Nyas Xyus tua nyob Los Mas. Yog xyoo uas tus vaj Ras Zas Nus (Trajan) nyuam qhuav ua tau lub tshav ua si hu ua Kos Lis Xes (Colosseum). Tus vaj Ras Zas Nus muab 10 txhiab tus neeg thiab 11 txhiab tus tsiaj qus tua nyob hauv lub tshav Kos Lis Xes ntawd. Cov neeg raug kev tuag ntawd feem coob yog cov neeg ntseeg Yes Xus.

Muaj tej lub caij uas cov nom tswv hiam cov neeg ntseeg heev, mas cov neeg ntseeg mus teev Ntuj nyob hauv cov ntxa, vim txoj cai Los Mas tsis kheev mus ntes cov neeg nyob hauv cov qhov ntxa. Cov qhov ntxa ntawd tsis yog cia log cov neeg tuag xwb, kuj yog qhov chaw uas thaum ub cov neeg ntseeg sib sau teev Ntuj thiab.

Nyob hauv cov qhov ntxa ntawd muaj ntau lub ntxa uas yog tej tus neeg ntseeg tuag ua Yes Xus tim khawv. Yog tej tus Tswv qhia, los tej tus Vaj Qhia, los tej tus Leej Choj, los tej tub Tub Tsob Hwb, los tej tus Xib Hwb, los tej tus neeg ntseeg nto koob meej, lawv tuag ua Yes Xus tim khawv.

Cov neeg ntseeg khawb tej kem dab dav nyob hauv qhov av, ze ntawm cov ntxa kom tau kev sib sau teev Ntuj. Lawv muab hmoov zeb sib los leem rau kom zoo nkauj, lawv sau duab rau ntawm phab ntsa.

Cov neeg ntseeg Yes Xus raug hiam thiab raug tua heev kawg, luag tej thuam lawv thiab ua phem rau lawv. Tiam sis cov neeg ntseeg ua siab zoo rau sawv daws. Lawv txawj ua neeg tsim txiaj, mas cov teev dab tus twg siab ncaj, tus ntawd yeej pom Yes Xus txoj kev yog zoo dua cov tiag. Cov neeg ntseeg nco ntsoov Yes Xus lo lus tias “Cov neeg muaj txoj hmoo zoo yog cov neeg pluag, Tswv Ntuj yuav pub nws lub ceeb tsheej rau lawv.”

Qee zaus, cov neeg ntseeg ua Thaj Txi Ntuj nyob hauv cov ntxa, hauv qab thu av, tiam sis muaj tej ntu uas lawv sib sau teev Ntuj nyob hauv tej yim neeg ntseeg lub tsev. Ib yim neeg ntseeg twg muaj tej kem tsev dav, mas nws pub nws kem tsev rau sawv daws sib sau ua Thaj Txi Ntuj. Ntev mus lawv kuj ua tej lub tsev cia teev Ntuj. Muaj ntawv piav tias ob peb zaug, mas cov vaj Los Mas xa cov tub rog tuaj rhuav cov tsev teev Ntuj ntawd pov tseg.

Xyoo 107 Tswv Qhia Is Nyas Xyus tuag ua tim khawv nyob Los Mas, mas Tswv Qhia Is Nyas Xyus pom Tswv Qhia ‘Pov Lis Kas Pos’ (Polycarp).

Pov Lis Kas Pos yog tus Hauv Paus Xa Lus Zam thwj tim, nws ua Tswv Qhia nyob Xaws Mws Nos, nyob As Xias me. Thaum txog xyoo 155 lawv mam li ntes Pov Lis Kas Pos. Pov Lis Kas Pos muaj 86 xyoo lawm. Xyoo ntawd, cov nom tswv ntes 15 tus neeg ntseeg nyob As Xias me. Thaum cov nom tswv txiav txim rau cov neeg ntseeg ntawd, mas cov neeg ntseeg tau teb tej yam ua kom cov nom tswv npau taws heev, lawv thiaj li mus ntes tus Tswv Qhia Pov Lis Kas Pos. Cov nom tswv xav muab Pov Lis Kas Pos hlawv nyob hauv lub tshav ua si, nyob Xaws Mws Nos. Thaum Pov Lis Kas Pos tuaj nyob hauv lub tshav, tus nom xav kom Pov Lis Kas Pos thim kev ntseeg Yes Xus. Nws hais rau Pov Lis Kas Pos hais tias “Koj hu txog tus vaj Xes Ntxas lub npe, koj hais nrov nrov rau sawv daws mloog tias koj xav kom cov neeg tsis hwm Huab Tais tuag kom tas!”

Pov Lis Kas Pos tig los ntsia tas ib tsoom neeg nyob ntawd, thiab nws hais tias “Xav kom cov neeg tsis hwm Huab Tais tuag kom tas!”

Ces ib me ntsis, tus nom mam nco dheev tias Pov Lis Kas Pos hais zoo li ntawd, mas yog nws hais txog Huab Tais Tswv Ntuj, nws tsis yog hais txog tus huab tais Xes Ntxas. Ces tus nom hais tias “Koj thim Yes Xus mas! Koj tsawm Yes Xus, kuv thiaj yuav tso koj mus.”

Pov Lis Kas Pos teb tias “Kuv tsob hwb Yes Xus tau 86 xyoo los lawm, nws tsis tau ua ib qho phem rau kuv. Ua li cas kuv yuav tsawm tus Huab Tais cawm kuv?”

Tus nom teb tias “Koj pe Xes Ntxas mas!”

Pov Lis Kas Pos teb tias “Koj xav ntxias kuv. Tiam sis kuv hais meej meej rau koj paub hais tias kuv hwm Yes Xus.”

Tus nom hais tias “Kuv muaj ib co tsov nyob tod!”

Pov Lis Kas Pos teb tias “Koj xav ua li cas rau kuv kuj tau. Peb tsis ua ib co neeg yuav hloov siab. Tsuas yog thaum peb xav tso qhov phem pov tseg, los ua qhov zoo, mas peb thiaj hloov siab xwb.”

Tus nom hais tias “Yog koj tsis ntshai tsov, mas kuv yuav muab koj hlawv.”

Pov Lis Kas Pos teb tias “Koj xav hem kuv, koj hais txog ib co hluav taws ciaj nplaim ib teev xwb ces kuv tuag lawm. Koj puas paub tias cov neeg tsis hwm Ntuj lawv yuav raug txim zoo li cas? Koj txhob tos ntev, koj muaj peev xwm tua kuv, mas koj tua kuv sai sai.”

Ces tus nom kom nws cov tub rog npaj rauv taws. Pov Lis Kas Pos thiaj mus nruab nrab hauv cov nplaim taws. Ib ntsis cov nplaim taws cig hlob hlob tuaj hlawv Pov Lis Kas Pos.

Xyoo 133 ‘Yus Tis Nus’ (Justin) pom tias muaj ib co kws qhia kev thoob tsib thuam cov neeg ntseeg Yes Xus hauv lub Koom Txoos, Yus Tis Nus thiaj sau tej phau ntawv nthuav kev ntseeg, Yus Tis Nus siv Ntawv Ntshiab los qhia cov neeg thuam lub Koom Txoos txog txoj kev cawm lub qub neej ntawm qhov txhaum. Yus Tis Nus hais tias “Tsuas muaj ib txoj hau kev mus raws qhov tseeb xwb, yog txoj kev ntseeg txog Tswv Ntuj, tus tsim lub ntuj lub teb, thiab yog txoj kev ntseeg txog Yes Xus Pleev, tus Huab Tais Cawm Seej.”

Yus Tis Nus tau mus ua tub tshaj Ntuj Lus hauv ob peb lub kuj cuab. Nws tau mus hauv lub tuam ceeb Los Mas, nyob ntawd Yus Tis Nus ua tim khawv txog qhov tseeb rau ntau pab neeg. Yus Tis Nus qhuab qhia sawv daws tias “Niaj Hnub Chiv, peb sib sau los teev Ntuj thiab cav lus zoo txog Tswv Ntuj lub npe. Hnub Chiv yog hnub zoo, rau qhov peb nco ntsoov tias yog hnub uas Yes Xus sawv ntawm cov tub tuag rov los. Peb ntseeg tias Yes Xus Pleev yog lub hnub ziab lub qab ntuj neeg. Nws npo peb dim ntawm qhov tsaus ntuj. Nws yog tus coj peb kev, peb thiaj taug tau txoj kev pom kev.  Hnub Chiv, thaum peb sib sau ua Thaj Txi Ntuj, mas cov mov thiab cov cawv txias ua Leej Pleev lub Cev thiab cov Ntshav uas muaj nqes tas nrho. Yog vim peb ntseeg khov kho txog tej yam npog nrees no, mas peb thiaj paub tias tus tib neeg uas nws txais tau Leej Pleev lub Cev, nws yog tus tib neeg uas Tswv Ntuj daws nws tej txhaum nyob hauv lub Cim Ntxuav. Tsis tas li ntawd xwb, tus tib neeg uas tau txais lub Cim Ntxuav, mas Hnub Chiv nws yuav lees tias nws coj ib lub neej kom haum Yes Xus lub Moo Zoo.”

Xyoo 166 Yus Tis Nus mus hauv Los Mas yog zaum ob, muaj ib cov tub rog tuaj ntes Yus Tis Nus nrog 5 tus txiv neej thiab ib tug poj niam. Cov tub rog hais tias nws tshaj lus kom neeg tsis txhob saib tus vaj Los Mas ua tus tswv ntuj, thiab tsis txhob coj lub neej zwm rau cov dab li qub. Yog cia Yus Tis Nus ua nws tej dej num ntxiv mus, ces lwm hnub cov neeg ntseeg yuav coob tuaj, ces cov tub rog coj lawv 7 leej mus cuag lub rooj txiav txim. Tus kws txiav txim Lus Tis Kus hais rau Yus Tis Nus tias “Peb tus vaj kav tsoom pej xeem Los Mas, mas tsoom pej xeem yuav tsum teev hawm nws tib leeg. Peb tus vaj yog peb tus tswv ntuj ntag, nej yuav tsum coj peb tej kev teev hawm, thiab nej yuav muab ib cov tsiaj los txi cov dab uas pov hwm peb lub teb chaws. Yog tias nej tsis ua li ntawd, mas nej yuav raug txiav txim thiab nej yuav raug txiav taub hau. Thaum ntawd, saib nej puas muaj peev xwm nce mus pem Ntuj lub Ceeb Tsheej?”

Yus Tis Nus teb tias “Yawg hlob, thov txim ntawm koj, tsis muaj li koj hais. Cia kuv mam ua tiag nyiaj ris tej yam kev nyuaj koj hais no, ces Huab Tais Tswv Ntuj yuav pub paj tshab rau kuv, nws yuav txais kuv mus hauv nws lub teb chaws lom zem!”

Tus nom txiav txim hais ntxiv tias “Koj hais dab tsi li kod? Koj lam xav lam hais xwb!”

Yus Tis Nus teb tias “Koj txhob xav tias kuv lam xav lam hais, kuv yeej ntseeg ruaj nreb tias yuav muaj li kuv nyuam qhuav hais rau koj no tiag!”

Tus nom txiav txim Lus Tis Kus hais tias “Nej yuav tsum tua ib cov tsiaj los txi dab, peb thiaj kam tso nej rov qab mus!” 

Yus Tis Nus teb tias “Ib tug neeg nrhiav tau qhov tseeb, mas nws yuav tsis tso qhov tseeb pov tseg ib zaug. Yog tias koj ntsib ib tus neeg uas nws thim qhov tseeb pov tseg, mas koj yuav hais rau nws tias cas koj yog neeg ruam ua luaj!”

Qhov kawg lub rooj txiav txim thiaj li muab lub txim tuag rau Yus Tis Nus thiab nws cov thwj tim. Cov tub rog coj lawv 7 leej ntawd mus tom lub tshav tua neeg thiab xuas ntaj txiav lawv taub hau.

Xyoo 177 nyob hauv lub nroog Lis Yoos (Lyons), cov nom tswv Los Mas thiab cov pej xeem huab hwm ua ib lub ntees loj kawg. Lawv kuj muaj ntau yam ua si nyob hauv lawv lub tshav ua si. Thaum lawv ua si zoo li ntawd, mas lawv ntes cov neeg ntseeg, lawv ntes cov tswv tsev thiab cov qhev huv tib si. Lawv muab cov qhev tsim txom kom cov qhev liam ub liam no rau lawv cov tswv tsev. Muaj tej tus qhev lawv kuj lam tau lam liam lawv tus tswv tsev thiab tiag. Cov nom nyob Lis Yoos thiaj tsim txom ib tug ntxhais txib nyuam qhuav txais lub cim ntxuav, nws lub npe hu ua ‘Dawb’ (St. Blandina). Lawv ua phem kawg rau Dawb, tiam sis Dawb siab tawv thiab Leej Ntuj Plig Ntshiab tuaj pab nws, ces nws teb rau cov nom tsim txom nws tias “Nyob hauv peb cov tswv tsev, tsis tau muaj ib tug yuav ua ib qho phem dab tsi.”

Luag muab Dawb tsim txom npaum li cas, los Dawb teb li qub xwb. Cov tswv pom lawv tus ntxhais txib ua siab loj siab tawv, mas lawv qhuas kawg.

Cov nom tswv xub muab txim rau tus Tswv Qhia nyob Lis Yoos hu ua ‘Pos Tees’ (St. Pothinus), nws twb laus laus lawm. Lawv hu tej tus neeg uas ntxub txoj kev ntseeg Yes Xus los ncaws Pos Tees thiab los ntaus nws. Lawv ua ib co neeg tsis paub hwm tej tus neeg laus laus. Thaum tus Tswv Qhia Pos Tees yuav tuag, mas lawv coj nws mus hauv lub tsev loj faj. Nws nyob ntawd ob hnub ntxiv, nws thiaj tuag rau ntawd.

Dawb thiab Pos Tees nkawd ua siab loj zoo li ntawd, mas tas cov neeg ntseeg nyob ntawd thiaj xav tuag ua tim khawv xws li lawv tus Tswv Qhia Pos Tees. Thaum lawv mus txog qhov chaw lawv yuav tuag, mas lawv zoo siab, lawv luag nyav, lawv saib cov hlua khi lawv tes lawv taw zoo li ib co npauj nyiaj npauj kub. Ntawv hais tias lawv lub cev tsw qab cuag li muab tshuaj los pleev.

Nyob hauv lub tshav ua si, mas tas tsoom sid ntsia cov tub rog tsim txom cov neeg ntseeg Yes Xus. Cov ntseeg nyob hauv lub tshav kwv yees muaj 50 leej. Qee tus, lawv muab ntsia rau saum ntoo cuam. Qee tus, lawv muab txiav taub hau. Qee tus, lawv muab rau cov tsiaj qus tom. Lawv tseem nrhiav tej zaj tswv yim txawv txhia zaus kom tau tsim txom cov neeg ntseeg heev dua. Lawv muab tej txoj saw hlau los hlawv liab liab, lawv muab los khaub zig lub cev, ua rau cov neeg ntseeg tej tawv txoom zom zaws thiab tsw kub hnyiab ntxiag mus puv tas lub tshav ua si. Thaum luag ua zoo li ntawd rau cov ntseeg, mas luag muab tus ntxhais txib Dawb los khi rau ntawm ib tug ncej nyob hauv nruab nrab lub tshav ua si. Lawv xav tias Dawb pom nws cov tswv thiab pom cov neeg ntseeg tuag zoo li ntawd lawm, nyaj Dawb yuav ntshai, ces Dawb yuav thim kev ntseeg Ntuj. Tiam sis, Dawb nyob ntawm tus ncej zoo li nyob saum ntoo cuam. Nws hais lus nrov nrov thov Ntuj pab cov neeg raug luag tsim txom. Cov ntseeg sawv daws tseem haj yam ua siab loj dua. Thaum tshuav Dawb tib leeg lawm xwb, lawv muab hlua los nplawm nws tas zog. Ces lawv muab Dawb los cam rau ntawm ib daig txiag thiab lawv muab nws txhiab nyob saum ib lub cub tawg. Dawb tseem tsis tau tuag, ces lawv thiaj muab nws qhwv rau hauv ib lub vas thiab lawv tso nws rau ntawm ib tug heev nyuj xub ntiag. Tus heev nyuj muab Dawb ncaws tej niag teg pov rau saum ntuj. Dawb tseem ua pa, cov tub rog thiaj muab Dawb caj dab txiav. Ntawv hais tias tas tsoom neeg pom Dawb raug txom nyem loj luaj li ntawd. Tab yog cov neeg teev dab los lawv qhuas tias Dawb siab loj tiag.

Thaum luag muab cov neeg ntseeg tua tas, mas luag tseem muab cov neeg tuag ntawd lub cev los hlawv ua tshauv thiab muab pov hauv tus niam dej uas hla lub nroog Lis Yoos. Thaum luag muab cov tshauv pov tseg rau hauv tus niam dej zoo li ntawd, mas luag hais ib co lus zoo li no los thuam kev ntseeg “Saib, nyem no, lawv tus Huab Tais puas yuav txawj mus tsa lawv sawv rov qab los?”

Pov Lis Kas Pos muaj ib tug thwj tim hu ua ‘Is Les Nes’ (Irenaeus) tau tsiv los nyob hauv lub nroog Lis Yoos, nyob Nkas Lias (Fab Kis teb), Tswv Qhia Pos Tees ua lub cim tiag tes tsa Is Nes Les ua Leej Choj.

Xyoo 177 thaum cov nom Los Mas muab cov neeg ntseeg hauv Lis Yoos tua yuav luag tas, Is Les Nes tab tom ua dej num nrog Vaj Qhia nyob Los Mas, ces Is Les Nes tsis nrog Pos Tees lawv tuag.

Tswv Qhia Pos Tees thiab cov ntseeg tuag tas, Is Les Nes thiaj los ua Tswv Qhia coj cov ntseeg nyob Lis Yoos. Lub caij ntawd muaj ib co neeg qhia tej zaj yuam  kev, lawv qhia tias muaj ntau tus Huab Tais, ntau txheej Huab Tais, cov Huab Tais ntawd muaj hwj chim dua Yes Xus, ces Tswv Qhia Is Les Nes thiaj sau cov ntawv nthuav Yes Xus lub Moo Zoo.

Thaum ntawd muaj 4 lub Koom Txoos loj dua cov, yog lub Koom Txoos nyob Yes Lus Xas Les, lub Koom Txoos nyob As Nthias Kias, lub Koom Txoos nyob As Les Xas Nrias, thiab lub Koom Txoos nyob Los Mas. Cov Koom Txoos no nyias siv nyias phau Ntawv Moo Zoo, ces Tswv Qhia Is Les Nes thiaj ua pov thawj tias tsuas muaj 4 phau Ntawv Moo Zoo, yog Mas Tais Ntawv Moo Zoo, Mas Kos Ntawv Moo Zoo, Lus Kas Ntawv Moo Zoo thiab Zam Ntawv Moo Zoo thiaj yog cov tseem Ntawv Moo Zoo tiag.

Xyoo 189 Tswv Qhia Is Les Nes sau ntawv ntuas cov Koom Txoos kom saib lub Koom Txoos nyob Los Mas ua hauv paus thiab kom cov Tswv Qhia mloog tus Tswv Qhia nyob Los Mas vim yog tus sawv los tam Leej Ntshiab Pob Zeb xws li Lis Nus (Pope Linus), As Nas Nkes Tus (Pope Anacleutus), Nkes Mees (Pope Clement I), Es Vas Lis Tus (Pope Evaristus), As Les Xas Nros (Pope Alexander), thiab Xis Tus (Pope Sixtus I).

Xyoo 200 Tswv Qhia Is Les Nes thiaj raug tua tuag nyob hauv Lis Yoos.

Nyob hauv lub Koom Txoos nyob As Les Xas Nrias, muaj ib co neeg ntseeg raug ntes coj mus rau cov tsiaj tom, yog tus xib hwb ‘Xab’, ‘Poj Sua’ thiab tus ntxhais qhev hu ua ‘Fes Lis Xis Tis’ (Saturus, Perpetua, Felicity).

Xyoo 202 lawv raug ntes mus kaw hauv tsev loj faj nyob Kas Tas Nkes (Carthage). Lub tsev loj faj ti ti thiab tsaus tsaus ntuj, Poj Sua hais tias thaum nws raug kaw, mas yog ib lub caij nws ntshai heev vim nyob kem tsev loj faj, mas sov sov thiab nws ntxhov siab txog nws tus me nyuam mos. Poj Sua thov kom coj nws tus me nyuam tuaj nrog nws nyob hauv tsev loj faj ces nws siab thiaj nqig, cov neeg ua Ntuj kev cai thiaj mus xiab cov neeg zov lub tsev loj faj, ces lawv kheev cia coj Poj Sua tus me nyuam tuaj nrog Poj Sua nyob.

Poj Sua niam thiab txiv thiab cov nus muag tuaj xyuas nws. Poj Sua txiv ntxias kom nws thim kev ntseeg, nws txiv ke cem ke thov. Poj Sua tsis kam thim Ntuj kev cai, nws hais tias “Txiv! Koj ntsia lub twj no, peb puas yuav hu lwm lub npe rau tau. Yeej tsis tau! Ntawm kuv los zoo ib yam li ntawd, kuv yuav hu kuv ua lwm yam tsis tau, tsuas hu kuv tau tias tus neeg ntseeg Tswv Ntuj xwb.”

Cov nom coj Poj Sua lawv mus sawv hauv lub rooj txiav txim, tus nom hais rau Poj Sua tias “Koj puas yuav hlub koj txiv nws cov plaub hau dawb dawb, koj puas yuav hlub koj tus me tub, koj teev dab mog!” Poj Sua teb tias “Kuv tsis xav txi dab.”

Tus nom hais tias “Koj puas yog ib tug neeg ua Yes Xus kev cai?” Poj Sua teb tias “Kuv ua tiag!”

Poj Sua txiv nyob ntawd, nws thov Poj Sua kom thim Ntuj kev cai, tab sis Poj Sua tsis hloov siab, ces tus nom hais tias Poj Sua yuav tuag nyob hauv lub tshav ua si.

Thaum ntawd, Poj Sua lub cev xeeb tub tau 6 lub hli lawm, txoj cai tsis pub tua cov poj niam xeeb tub rau hauv lub cev, ces lawv tsis tau maj muab Poj Sua lawv 3 leeg tua.

Thaum Poj Sua yug tus me nyuam hauv tsev loj fab, nws ntsaj ntsaj ces tus zov tsev loj fab thuam Poj Sua tias “Koj yug me nyuam xwb koj twb ntsaj ntsaj. Lwm hnub koj ypom cov tsiaj qus tuaj tom neeg, koj yuav ua zoo li cas?”

Poj Sua teb tias “Nyem no yog kuv tib leeg xwb nyiaj mob. Lwm hnub, thaum cov tsiaj yuav tom kuv tsis yog kuv tib leeg xwb nyiaj mob, muaj ib tug uas nws nyob hauv kuv nws yuav pab kuv ua tiag nyiaj, kuv yuav zoo siab  raug mob raws li nws tus lwj lwm.

Xyoo 203 lub 3 hlis tim 7 cov nom tswv coj lawv mus rau cov tsiaj qus tom hauv lub tshav ua si. Thawj tug yog tus xib hwb Xab, nws raug tus twm tswb tsuj rau hauv av tab sis nws tsis tuag, ces cov tub rog thiaj coj nws tawm los.

Thaum txog Poj Sua thiab Fes Lis Xis Tis, mas tus kav luab tshav puam muab nkawd cov ris tsho hle, muab nkawd kauv rau hauv lub vas coj mus sawv nyob nruab nrab hauv lub tshav puam. Tsoom pej xeem pom Poj Sua lub mis los los kua ces lawv tsis xav ntsia thiab qw kom rov muab ris tsho rau nkawd hnav.

Poj Sua thiab Fes Lis Xis Tis hnav tsho tas lawv coj nkawd rov mus sawv hauv lub tshav thiab tso ib tug maum nyuj tuaj nrau nkawd, nkawd ntog hauv av tab sis nkawd tsis tuag. Poj Sua sawv taus, nws mus tsa Fes Lis Xis Tis.

Thaum cov neeg nyob txim raug tsiaj tom tuag tas, lawv thiaj rov coj Xab los sawv hauv lub tshav. Zaum no lawv tso tsov los muab Xab tom, Xab thiaj mam tuag. Ntawm Poj Sua thiab Fes Lis Xis Tis, mas lawv muab nkawd txiav txaj dab tuag.

Saws Ves Lus (Marcus Aurelius Severus Alexander) ua vaj nyob Los Mas xyoo 222-235 nws tso cai rau cov neeg ntseeg tsim tej cov tsev txoos cia rau lawv tau tuaj sib koom teev Ntuj, tsis kav cov nom tswv Los Mas tseem niaj hnub hiam cov neeg ntseeg hauv lub Koom Txoos, ces thiaj muaj ntau tus poj niam raug tua tuag ua tim khawv.

Xyoo  228 ‘Mas Tis Nas’ (Martina of Rome) raug cov nom ntes thiab yuam kom teev cov dab Los Mas. Mas Tis Nas tsis kam ces lawv thiaj coj nws mus rau cov tsiaj qus tom ua si tab sis cov tsiaj tsis ua dab tsi rau Mas Tis Nas. Cov nom muab nws hlawv los tsis kub ces lawv thiaj coj nws mus txiav caj dab tuag ua tim khawv. Xyoo 230 Xes Xis Lias thiab Diav tuag ua tim khawv.

‘Xes Xis Lias’ (Cecillia) yog ib tug ntxhais noob nom nyob Los Mas. Xes Xis Lias txais lub Cim Ntxuav thaum tseem yau, tiav hluas nkauj, nws niam thiab txiv muab nws khaib rau tus hluas ‘Vas Les Lias’ (Valerian) tab sis Xes Xis Lias xav ua ib tus ntxhais nkauj xwb. Vim li ntawd, Xes Xis Lias thiaj yoo mov thiab thov Tswv Ntuj tsoom Tshiab pab nws. Muaj ib hnub, Xes Xis Lias hais rau Vas Les Lias tias “Kuv yuav qhia kuv txoj kev zais rau koj, kuv muaj ib tus Tshiab pov hwm kuv. Kuv tus Tshiab no yuav rhuav cov neeg los zes kuv.”

Thaum Vas Les Lias hnov li ntawd, Vas Les Lias thiaj kom Xes Xis Lias hais tus Tshiab tawm los rau Vas Les Lias pom. Xes Xis Lias thiaj xa Vas Les Lias mus cuag Tswv Qhia nyob Los Mas yog Aws Npas (Pope Urban I). Vas Les Lias kawm Ntuj kev cai ntawm Tswv Qhia, nws pom ib tug yawg laus ci ntsa iab los cev ib phau ntawv rau nws. Nyob hauv phau ntawv sau cov lus tias “Muaj ib tug Huab Tais xwb, muaj ib zaj zoo ntseeg xwb, muaj ib lub Cim Ntxuav cawm tau neeg xwb.”

Vas Les Lias nyeem cov lus no tag, nws thiaj txais lub Cim Ntxuav ntawm Tswv Qhia. Vas Les Lees rov qab los txog tsev, nws pom Xes Xis Lias tab tom thov Ntuj nyob hauv chav tsev siab, muaj ib tus Tshiab nrog Xes Xis Lias nyob. Tus Tshiab ntawd ob txhais tis cig cuag plaim taws, hauv tus Tshiab txhais tes tuav ib lub kaus mom paj ntshua nplaim thiab paj nroj. Tus Tshiab muab lub kaus mom paj los ntoo rau nkawd tas ces nws thiaj yaj ntshis lawm.

Vas Les Lias tus kwv hu ua ‘Tis’ (Tiburce/ Tiburtius) tuaj xyuas nkawd, ces nws hnov tswv tswv qab nyob hauv Vas Les Lias thiab Xes Xis Lias nkawd lub tsev. Tis nug nkawd, ces Xes Xis Lias thiaj piav tias qhov tsw qa ntawd yog Yes Xus cov lo lus. Xes Xis Lias piav txog Yes Xus rau Tis mloog tas, Tis thiaj mus cuag tus Tswv Qhia thov kom Tswv Qhia ua Cim Ntxuav rau nws.

Vas Les Lias thiab Tis qhib nkawd lub loog cia npaj ua lub toj ntxas faus cov coj Ntuj kev cai tus qauv, thiab nkawd hu tsoom ntseeg tuaj teev Ntuj hauv nkawd tsev. Tsis ntev ces muaj neeg mus hais rau cov nom tswv, nkawd thiaj raug ntev mus txiav caj dab tuag ua tim khawv.

Tom qab Vas Les Lias tuag, Xes Xis Lias tau tawm mus qhia Ntuj kev cai rau tsoom sid ua rau muaj neeg hloov siab tshiab txog 400 leeg. Xes Xis Lias raug ntes, cov nom kom Xes Xis Lias thim Ntuj kev cai, ces Xes Xis Lias hais rau cov nom tias “Peb hwm ib tug Huab Tais muaj ib lub npe ntshiab. Peb yuav tsis thim peb tus Huab Tais ib zaug. Peb ua tsis tau li ntawd, peb yeem tuag zoo dua.”

Cov nom hnov li ntawd, lawv thiab coj nws mus kaw hauv lub tsev da dej tsaus ntuj nti thiab rauv taws txhiab lub tsev da dej kom vaum vaum. Txawm li ntawd los Xes Xis Lias tsis quaj thiab tsis thov ib los li.

Tus nom pom li ntawd, nws thiaj coj Xes Xis Lias los txiav caj dab. Txawm tias Xes Xis Lias raug txiav caj dab txog 3 zaug los nws taub hau tsis tu, tsuas muaj ntshav nws tawm los ntawm caj dab xwb. Xes Xis Lias raug tsim txom li ntawd tau 3 hnub ces nws thiaj mam tuag.

Hais txog ‘Diav’ (Tatiana) nws yog ntxhais nom coj Ntuj kev cai ntsiag ntsiag. Muaj ib hnub tus nom txiv txim ntes tau Diav thiab yuam kom Diav teev tus dab As Pos Los. Diav tsis kam, nws thov Ntuj ces av txawm qeeg ua rau tus mlom dab As Pos Los vaus los tawg tas.

Cov nom muab Diav ob lub qhov muag dawj thiab tsim txom nws tau ob hnub sib law. Diav tsis npau taws rau cov neeg hiam nws, nws thov Ntuj qhib lawv lub siab kom lawv hloov siab tshiab xws li nws tsis tseg, ces muaj 8 leej neeg hauv pab neeg tsim txom nws tau hloov siab tshiab, lawv tu siab rau lawv cov txhaum. Lawv thiaj raug txiav caj dab tuag nrog Diav ua ke.

Xyoo 250 nyob Los Mas muaj kab mob sib kis coob, ces tus vaj Des Xis Us (Decius) hais kom tas tsoom pej xeem ua kab ke txi cov dab Los Mas tab sis cov neeg ntseeg tsis kam ces Des Xis Us thiaj tso cai rau cov nom tswv tuaj ntes cov neeg ntseeg nyob hauv Los Mas, Kas Tas Nkes, thiab As Les Xas Nrias.

Tus Tswv Qhia nyob Los Mas hu ua ‘Fas Npias Nus’ (Fabian) raug tua tuag, hos muaj ib pab neeg ntseeg coob raug ntes kaw hauv tsev loj faj.

Nyob hauv lub pov txwv Xis Xis Lias (Sicily) kuj muaj ib tug ntxhais tuag ua tim khawv, nws lub npe hu ua ‘As Nkas Thas’ (Agatha of Sicily).

As Nkas Thas yug xyoo 231 nws yog ib tus ntxhais zoo nkauj heev, cov txiv neej hauv lub pov txwv sawv daws los xav yuav nws ua lawv poj niam, tab sis As Nkas Thas nyiam coj lub neej ntshiab rau Tswv Ntuj. As Nkas Thas tsis kam yuav tus txiv neej twg, nws thiaj raug tsim txom. Lawv muab nws lub txiv mis txiav thiab xa mus nrog cov niam ntiav nyob.

As Nkas Thas yim raug tsim txom nws lub siab yim npuab Tswv Ntuj, nws thov Ntuj tias “Yes Xus Pleev, kuv tus Huab Tais, koj pom hauv kuv nruab siab, koj paub tias kuv yog koj tus yaj. Thov koj pab kom kuv muaj siab tawv yeej dab phem kev ntxias.”

As Nkas Thas tsiv mus nyob hauv lub pov txwv Mes Lis Tas (Malta) tau ib ntus, ces xyoo 251 nws rov qab mus rau Xis Xis Lis. As Nkas Thas raug ntes mus hlawv hauv hluav taws tuag ua tim khawv txog txoj kev ntseeg.

Thaum yuav tuag As Nkas Thas thov Ntuj li no tias “Huab Tais, koj yog tus tsim kuv, koj tau tiv thaiv kuv hauv hluav taws, koj tau rho kuv tawm hauv ntiaj teb kev hlub, thiab koj pub ib lub siab tawv rau kuv hnav, thov koj txais kuv tus plig mus nrog koj nyob.”

Nyob hauv lub nroog Kas Tas Nkes, cov nom tswv Los Mas nrhiav cov neeg ntseeg Yes Xus tua pov tseg. Thaum ntawd Tswv Qhia ‘Xis Nplias Nus’ (Cyprian) xav tias yog nws tuag tam sim ntawd ces yuav tsis muaj neeg pab lub Koom Txoos nyob Kas Tas Nkes. Ces Xis Nplias Nus thiaj khiav mus tsiv nraim ib ntus.  Tau ib ntus, cov nom tswv tsis quav ntsej txog cov neeg ntseeg txog Yes Xus lawm, nws mam li rov qab los kav lub Koom Txoos nyob Kas Tas Nkes.

Thaum txog xyoo 257 cov nom tswv rov qab nrhiav cov neeg ntseeg ntes. Thaum ntawd Xis Nplias Nus xav tias cia nws tuag ua Yes Xus tim khawv, mas sawv daws lub siab thiaj yuav loj li nws. Ces nws nyob hauv tsev tos cov neeg tuaj ntes nws. Xis Nplias Nus yog ib tug neeg muaj hwj chim, tas nws tsev neeg kuj yog neeg muaj hwj chim nyob hauv lub teb chaws ntawd. Cov nom tswv ntshai muab Xis Nplias Nus tua, lawv thiaj xa nws mus nyob ib lub teb chaws deb deb, thiab muab nws kaw hauv tsev loj faj.

Xyoo tom qab yog xyoo 258 cov nom tswv nyob Kas Tas Nkes mloog tus vaj Xes Ntxas, lawv thiaj tso tub rog mus coj Xis Nplias Nus rov qab los nyob Kas Tas Nkes, kom tau muab Xis Nplias Nus tua nyob ntawd. Tus nom kav Kas Tas Nkes tsis pom qab yuav txiav txim zoo li cas rau Xis Nplias Nus. Nws ntshai nug Xis Nplias Nus, vim sawv daws paub tias Xis Nplias Nus yog ib tug neeg muaj hwj chim. Thaum Xis Nplias Nus tuaj nyob hauv tus nom lub tsev, tus nom hais rau Xis Nplias Nus tias “Koj twb paub tias peb tus vaj ntxwv xav kom koj hlawv ntawv teev peb tus huab tais Los Mas.”

Xis Nplias Nus teb tias “Kuv paub, tiam sis kuv yuav tsis ua.” Tus nom hais tias “Koj ceev faj, koj xav tswv yim kom zoo zoo.” Xis Nplias Nus teb tias “Koj tsis txhob hais ntau. Yog leej twg qhia koj ua yam twg, mas koj yuav tsum ua yam ntawd sai.”

Tus nom txiav txim pom Xis Nplias Nus tsis hloov siab. Nws khuv xim, nws sau ntawv tseg hais tias “Peb txiav txim hais tias Xis Nplias Nus yuav tuag, peb yuav txiav nws caj dab.” Ces tus Tswv Qhia Xis Nplias Nus teb hais tias “Kuv ua Ntuj tsaug.”

Tshuav ob peb hnub thiaj txog hnub yuav txiav Xis Nplias Nus caj dab, luag coj Xis Nplias Nus mus txog ntawm ib lub hav, nyob ze lub nroog Kas Tas Nkes. Ib pab neeg ntseeg coob kawg xa Xis Nplias Nus mus txog ntawm lub hav ntawd. Cov nom tsis muaj cuab kav yuav ntiab sawv daws rov qab. Muaj ntau leej qw qw tias “Peb xav nrog Xis Nplias Nus tuag. Peb sawv daws yog Xis Nplias Nus. Peb sawv daws puav leej ntseeg zoo li Xis Nplias Nus ntag.”

Cov neeg teev dab pom Xis Nplias Nus ua siab loj thiab nws teev Ntuj ntawm kev, nws ntuas cov neeg ntseeg kom sawv daws ua siab loj. Thaum txog chaw lawm, luag yuav muab Xis Nplias Nus tua. Xis Nplias Nus txhos caug, nws maj mam hle nws cev ris tsho Tswv Qhia cev rau cov Leej Choj uas xa nws tuaj. Tus tub rog yuav txiav nws caj dab yog ib tug xab txheeb, thaum tus xav txheeb tuaj txog, Xis Nplias Nus tuav tus xab txheeb tes. Xis Nplias Nus hais rau cov Leej Choj kom lawv muab 25 txiag kub ua nqe tes rau tus xab txheeb. Ces Xis Nplias Nus rov qab txhos caug. Nws muab ib daig ntaub los vov nws qhov muag. Ces nws nyo taub hau tos tus xab txheeb txiav nws caj dab. Cov neeg ntseeg kuj muab ib daig ntaub los pua ntawm qhov chaw uas luag yuav txiav Xis Nplias Nus caj dab. Lawv tsis xav kom Xis Nplias Nus cov ntshav poob rau saum cov av uas cov neeg tsis huv txhais taw tau tsuj.

Thaum tsaus ntuj cov neeg ntseeg mus nqa Xis Nplias Nus lub cev. Lawv sawv daws tuav tej tes tsau, tej tes tswm ciab liag vog. Sawv daws hu nkauj cav txog Tswv Ntuj. Lawv kwv lawv tus Tswv Qhia mus txog lub ntxa nyob ze lub nroog. Cov nom tswv paub hais tias lawv kwv lawv tus Tswv Qhia xws li ib tus neeg muaj hwj chim. Tiam sis, cov nom tswv kuj hais tsis tau dab tsi rau lawv. Cov nom tswv kuj tsis txwv, yog vim lawv txwv tsis tau. Cov nom tswv paub hais tias zaum no, mas Yes Xus lub Moo Zoo yuav yeej cov vaj Los Mas xwb. Tiam sis, cov nom tswv tseem mloog cov vaj Los Mas. Cov nom tswv paub tias cov neeg ntseeg lawv tsis muaj txhaum dab tsi. Ntshai muaj ib hnub tas lub teb chaws yuav txais kev ntseeg txog Yes Xus xwb.

Xyoo 287 Maus Lis (Maurice) ua lwm txheeb kav ib co tub rog nyob Nkas Lias teb, tus vaj Los Mas xa ib co lus tuaj kom nws hiam cov neeg ua Ntuj kev cai. Maus Lis thiab nws cov tub rog ib nrab twb ua Ntuj kev cai, ces Maus Lis thiaj tsis mloog tus vaj cov lus. Tus vaj Los Mas thiaj xa tub rog tuaj tua Maus Lis lawv taug tas.

Xyoo 288 tus vaj Dias Les Xias Nus (Diocletianus) ib tug tub rog hu ua ‘Xes Npas Tias Nus’ (Sebastianus) ua kab xwm loj nyob hauv tus vaj lub tuam tsev. Dias Les Xias Nus hiam cov neeg ntseeg, ces Xes Npas Tias Nus nqa khaub ncaws thiab txhiam xws mus pab cov neeg ntseeg yam ntsiag ntsiag. Xes Npas Tias Nus tseem nyiag tshaj txoj kev ntseeg rau nws cov phooj ywg tub rog. Muaj ib co tub rog tsis nyiam Xes Npas Tias Nus, lawv mus hais qhia rau tus vaj, ces Xes Npas Tias Nus raug muab hneev tua kom tuag.

Lawv muab Xes Npas Tias Nus khi rau ntawm ib tug ntoo, ces lawv xuas hneev tua nws. Xub ntsia nws ib ce lo ntshav tas. lawv xav tias nws tuag lawm, ces lawv tso nws lub cev nyob ntawd. Muaj ib tug poj niam thiab ib cov neeg ntseeg tuaj nqa Xes Npas Tias Nus lub cev mus faus, tab sis lawv pom tias nws tsis tau tuag, lawv coj nws los kho.

Xes Npas Tias Nus cov qhov txhab zoo tas, nws mus tos tus vaj kev thiab thov kom tus vaj khuv leej cov neeg ntseeg txom txom nyem, cov laus, cov poj niam thiab cov me nyuam. Tus vaj hnov li ntawd, nws yim npau taws dua qub. Tus vaj kom lawv ntes Xes Npas Tias Nus coj mus tsim txom. Lawv xuas saw hlau nplawm thiab xuas pas ntoo ntaus Xes Npas Tias Nus kom tuag. Xes Npas Tias Nus ib ce lo ntshav liab vog, nws tsa ncauj thov Tswv Ntuj tias “Kuv tus Huab Tais Ntuj, thov koj zam txhaum rau lawv.” Xes Npas Tias Nus tsa suab thov li ntawd tas, nws mam tuag.

Xyoo 304 ib tug me nyuam hluas nkauj muaj 13 xyoos raug yuam yuav ib tug txiv ua dab, nws tsis yeem, nws hais tias kawg yog Yes Xus xwb thiaj yog nws tus txiv, ces lawv muab nws kaw rau hauv ib lub tsev niam ntiav. Ib tsam lawv yuav tuaj zes nws tiam sis lawv tsis pom nws lawm; yog Tswv Ntuj ib tug Tshiab los thaiv nws. Lawv xav tuaj zes nws, tab sis lawv ua tsis tau, ces lawv thiaj muab nws txiav caj dab. Tus ntxhais hluas nkauj no hu ua ‘As Nyes’ (Agnes).

Tib lub caij ntawd, nyob Xis Xis Lis kuj muaj ib tug ntxhais hluas hu ua ‘Lus Xis As’ (Lucia) raug tua tuag ua tim khawv ib yam. Lus Xis As tau muab nws lub cuab tam faib rau cov neeg pluag, ces sawv daws paub tias nws yog ib tug neeg ua Ntuj kev cai, cov nom tswv thiab muab nws ntes. Lawv tseev kom Lus Xis As thim kev ntseeg, nws tsis yeem, lawv xav coj nws mus nyob hauv ib lub tsev rau cov txiv neej tuaj zes nws. Lawv rub npaum cas los rub tsis tau Lus Xis As mus hauv lub tsev, ces lawv thiaj nqa ib co taws los tso ncig nws thiab zes hluav taws rau. Lawv rauv taws npaum cas los ua tsis tau dab tsi rau Lus Xis As, ces qhov kawg lawv muab ntaj txiav nws caj dab tuag.

Nyob As Fis Kas teb, muaj ib tug Tswv Qhia hu ua ‘Fes Lis’ (Felix of Thibiuca) muab Ntawv Moo Zoo thiab Paj Lug cov tsab ntawv zais, cov nom tswv kom nws nqa cov ntawv hais txog Ntuj kev cai tuaj rau lawv. Fes Lis hais rau lawv tias “Kuv tsis nqa cov ntawv ntawd tuaj rau nej hlawv. Yog nej xav hlawv, mas nej muab kuv hlawv kuj tau.” Ces lawv thiaj muab nws hlawv.

Nyob Xis Lias teb, ‘As Fis Nos’ (Apphianos) thiab ‘Es Das Xias’ (Aedesius) kawm ntawv nyob hauv ib lub tsev kawm. Nkawd siab kub rau Ntuj kev cai, ces nkawd mus qhia Ntuj kev cai rau nkawd cov npawg. Muaj ib hnub cov nom tswv ua hmoov, As Fis Nos pom tus kav lub nroog tab tom yuav hliv cawv txi dab raws li kev cai Los Mas. As Fis Nos cia li hla cov tub rog zov qhov chaw txi dab, nws tuav tus nom txhais test sis kheev tus nom hliv cawv txi dab, thiab hais rau tus txi dab hais tias “Koj tsis txhob txi dab tsi rau ib co dab tsis muaj txoj sia.” Cov tub rog muab As Fis Nos thiab nws tus npawg ntes, lawv muab ntaub tub roj los qhwv nkawd ob txhais taw ces lawv muab nkawd hlawv.

Cov neeg ua Ntuj kev cai tuag ua tim khawv zoo li ntawd coob, ntev mus cov vaj Los Mas kuj tsis pom qab yuav ua zoo li cas rau cov neeg ua Ntuj kev cai. Lawv ib lub siab xav kheev cia ua Ntuj kev cai nyob ntawm siab, ib lub siab xav muab cov ua Ntuj kev cai tua kom tas. Tiam sis lawv muab neeg tua npaum li cas, mas neeg ua Ntuj kev cai kuj tsis txawj tas.

Cov pej xeem muaj ntau leej kuj tsis xav pom cov nom tswv muab cov neeg ua Ntuj kev cai tua thiab, yog vim sawv daws pom cov neeg ua Ntuj kev cai yog ib co neeg pab luag tej zoo dua cov.

Muaj ib zaug nyob Los Mas, thaum lawv nyuam qhuav muab ib co neeg ua Ntuj kev cai tua tas, mas xob cia li quaj ntws thiab xob tua cov phab ntsa zeb xov ncig lub tshav ua si, ces cov phab ntsa ntawd tawg pleb tas. Nyob hauv cov ua dab muaj ntau leej tau ntshai kawg, lawv hais tias “Peb cov dab khiav tas, lawv tsis pov hwm peb lawm.” Lawv hais zoo li ntawd, yog vim muaj ntau leej pom Los Mas teb muaj txhaum loj kawg, vim Los Mas teb muab neeg tua tas zog.

Lub caij ntawd, cov ua Ntuj kev cai nyob sib xyaws nrog cov ua dab nyob hauv ib tsev neeg; qee zaus tus txiv ua dab, tus poj niam ua Yes Xus kev cai; los nyob hauv cov me nyuam muaj ob peb tug ntseeg txog Yes Xus. Qee zaus tus tswv tsev ua dab, ib tug qhev ua Ntuj kev cai.

  Sawv daws sib xyaws nyob hauv zos; nyob hauv ib pawg muaj 50 los 100 lub tsev, mas muaj ob peb lub tsev ua Yes Xus kev cai. Qee zaus sawv daws paub hais tias ob peb lub tsev ntawd ntseeg txog Yes Xus, qee zaus tsis muaj leej twg paub.

 Lawv sib xyaws nyob ntawm qhov chaw ua hauj lwm; nyob hauv ib lub tsev ua kab xwm, qee zaus yog tus thawj ua Ntuj kev cai, luag tej tsis ua. Nyob hauv ib pab tub rog muaj ib co ua Ntuj kev cai. Nyob hauv ib lub tsev kawm muaj ib co me nyuam ua Ntuj kev cai, los tus Xib Hwb ntseeg txog Yes Xus.

 Nyob hauv tus vaj Los Mas lub tuam tsev kuj muaj neeg ua Ntuj kev cai. Tus vaj Dias Les Xias Nus (Diocletianus) nws poj niam ua Ntuj kev cai. Tej vaj Los Mas muaj ib tug los ob tug ua Ntuj kev cai kuj muaj.

Thaum txog xyoo 220 los 230 ib tug Xib Hwb qhia Ntuj kev cai hu ua ‘Tes Tus Lias Nus’ (Tertulianus) sau tej phau ntawv ntuas cov ntseeg kom lawv ua siab loj, thiab nws sau tej phau ntawv teb rau cov neeg teev dab uas lawv liam ub liam no txog cov neeg ua Ntuj kev cai; nws hais tias “Peb cov neeg ua Ntuj kev cai, peb tsis yog ib co neeg nyob ib cag. Peb niaj hnub mus tom khw, peb nyob hauv cov tshav nyob hauv nroog, peb mus nyob hauv cov tsev teev dab, peb nyob hauv cov tsev tsim tshuab, peb nyob hauv cov tsev luam, peb nyob hauv cov txwj laus, peb nyob hauv pab neeg kav teb chaws. Peb ua tas ib puas tsav yam hauj lwm; peb ua tus ntswj nkoj, peb ua tub rog, peb ua liaj ua teb, peb ua luam.”

Cov ua Ntuj kev cai nyob xyaw cov ua dab, mas ntau zaus nyuaj hauj sim. Nyob hauv cov tsev kawm ntawv, mas cov ua dab thuam thiab luag cov ua Ntuj kev cai. Nyob Los Mas tus vaj ua ib lub tsev kawm rau cov nom tswv cov me nyuam tau kawm ntawv. Nyob hauv cov me nyuam muaj ib tug hu ua ‘As Les Xis Mes Nos’ (Aleximenos) nws ua Ntuj kev cai, nws muaj ib tug npawg ua dab. Tus npawg xav luag As Les Xis Mes Nos, ces tus npawg sau ib tug duab nyob ntawm phab ntsa hauv tsev kawm; yog ib tug duab ntoo cuam thiab ib tug luj dai ntawm tus ntoo cuam, thiab muaj ib lo lus sau tias “As Les Xis Mes Nos tsev tus Huab Tais.” Tiam sis hnub tom qab, nyob hauv cov qab lo lus ntawd, As Les Xis Mes Nos ntxiv cov lus no rau tias “As Les Xis Mes Nos yuav teev nws tus Huab Tais ntawd mus li.” Tus duab thiab cov lo lus tseem nyob txog tav no (The Alexamenos graffito). Ua li, mas peb thiaj paub hais tias tab yog nyob hauv cov me nyuam, mas lawv kuj muaj lus sib cav txog Ntuj kev cai; cov ua dab thuam tiam sis cov ua Ntuj kev cai ua siab tawv ntseeg zoo li qhov qub.

Nyob hauv ib lub tsev tus txiv tsev tsis ua Ntuj kev cai, tus poj niam ua, mas ntau zaus tus txiv zoo siab rau qhov tias nws tus poj niam ua ib tug poj niam siab ncaj thiab mloog lus zoo. Tiam sis tus txiv tsis tshua zoo siab tso nws poj niam mus teev Ntuj thaum ib tag hmo Hnub Xya; tus txiv kuj hnov luag tej hais ntau lo lus phem txog cov neeg ntseeg txog Yes Xus lawv txoj kev mus teev Ntuj thaum ib tag hmo. Ib tug tswv kuj tsis zoo siab tso nws cov qhev mus teev Ntuj hmo ntuj, ces ntau zaus cov qhev nyiag mus teev Ntuj.

Ib tug tub luam ua Ntuj kev cai, nws xav mus txais nyiaj ntawm ib tug tub luam ua dab, mas tus ua dab xav kom tus ua Ntuj kev cai hu txog dab los cog lus hais tias nws yuav them rov qab xwb, tiam sis tus ua Ntuj kev cai yuav hu txog dab tsis tau, mas nws yuav ua zoo li cas. Ib tug neeg ntaus hlau, nws ua Ntuj kev cai, thaum cov ua dab tuaj thov kom nws ntaus tej twj teev dab, mas nws yuav ua zoo li cas. Ib tug txawj nhcuav nyiaj ua Ntuj kev cai, cov ua dab thuaj thov kom nws nchuav tej tus mlom teev dab, mas nws yuav ua zoo li cas.

Ib tug Xib Hwb qhia ntawv tiam sis nws kuj yuav tsum qhia kev cai nyob hauv nws lub tsev kawm thiab, nws puas yuav qhia txog kev teev dab los tsis qhia. Nyob hauv lub nroog uas muaj cov neeg ua Ntuj kev cai nyob, lawv nquam paj nquam nruas nyob hauv cov tshav ua si, lawv yuav muab neeg tua pov tseg; yog cov ua Ntuj kev cai tsis mus xyuas, mas yog zoo li lawv xav ntuas cov mus xyuas hais tias cov mus xyuas tej yam zoo li ntawd, mas lawv kuj ua phem. Ua li, mas cov neeg ntseeg txog Yes Xus puas yuav mus xyuas.

Muaj tej yam hauj lwm cov neeg ntseeg ua tsis tau kiag thiab cov Tswv Qhia txwv tsis kheev ua; yam li: Tsis kheev ua tswv tsev niam ntiav, tsis kheev puab mlom teev dab, tsis kheev sau duab teev dab, tsis kheev ua yees siv, tsis kheev ua Xib Hwb nyob hauv tseem hwv tsev kawm, tsis kheev ua neeg sib twv ntaj twv riam nyob hauv cov tshav ua si, tsis kheev ua Leej Choj teev dab, tsis kheev zov cov tsev teev dab, tsis kheev ua nom txiav txim, tsis kheev ua txiv neeb, tsis kheev ua tus saib lub hnub los saib kab teg, los ua tus txhais zaj npau suav.

Ua li, mas muaj ntau yam hauj sim uas cov neeg ua Ntuj kev cai ua tsis tau xws li cov teev dab.

Cov neeg ua Ntuj kev cai nyob xyaw cov neeg teev dab, mas lawv yuav tsum muaj ib lub cim pab lawv sib zeem; yog lawv ua Ntoo Cuam lub Cim me me nyob saum hauv pliaj, los nyob ntawm hauv siab, los nyob ntawm caj npab, los nyob ntawm di ncauj.

Cov tsev ua Ntuj kev cai ntau zaus lawv kuj muaj tej lub cim sib zeem; ntau zaus lawv sau ib tug ntses. Tus ntses lus Hes Las lawv hais tias ‘IKTUS’. Tsib tug tsiaj ntawv ntawd kuj yog tsib lo lus hais tias ‘Yes Xus, Tswv Ntuj Leej Tub, Cawm’.

Cov ua Ntuj kev lawv tsis hlawv lawv cov neeg tuag xws li cov ua dab, vim lawv xav tias lawv yuav tsis txhob hlawv tej lub cev uas Tswv Ntuj yuav tsa kom sawv rov qab los, los puas tej zaum lawv xav ua raws li Yes Xus; thaum Yes Xus tuag, mas luag muab nws zwm hauv lub qhov ntxa, ces cov neeg ntseeg txog Yes Xus xav ua raws li ntawd. Cov ua Ntuj kev cai thiaj muab lawv cov neeg tuag zwm rau hauv ntxa. Lawv tsis ua toj ntxas nyob saum npoo av, lawv ua ntxa nyob hauv av. Cov ntxa ntawd hu ua ‘Nkas Tas Nkoos’ (Catacomb).

Nyob ntiaj teb no, muaj cov haiv neeg xub ua ntxa nyob hauv tiv txwv av dua cov neeg ua Ntuj kev cai; yog cov Hais Nkws Tos. Tiam sis cov ua Ntuj kev cai nyob Los Mas lawv ua ntau tshaj tej, lawv coob zuj zus, mas lawv cov neeg tuag kuj ntau zuj zus. Tas peb puas tawm xyoo lawv muab lawv cov neeg tuag tas huv tib si los zwm hauv tej ntxa nyob hauv av. Vim li ntawd, mas cov ntxa nyob hauv av thiaj loj loj tas nrho.

Lawv khawb tej txoj kev ntev ntev nyob hauv av, lawv muab lawv cov neeg tuag log nyob ntawm ob sab ntsa kev, ib sab kuj muaj ob peb txheej. Nyob Los Mas xwb cov ntxa ua tej txoj kev ntev li 1,200 Kis Los Mev.

Cov ntxa ntawd, muaj ib tug tswv; yog ib tug neeg muaj nws ua Ntuj kev cai, nws muaj av, muaj ib lub loog. Nws pib ua ib lub ntxa rau nws tsev neeg ua Ntuj kev cai. Nws pab cov neeg pluag ua Ntuj kev cai, nws kheev lawv coj lawv cov neeg tuag tuaj zwm nyob hauv nws thaj ntxa. Sawv daws sib pab khawb kom luj zuj zus ntxiv, ntev zuj zus. Tas ob puas los peb puas xyoo, mas lawv sib pab khawb ntxiv zuj zus, ces thiaj tau tej txoj kev ntev ntev puv cov ntxa tas. Ncauj ke lawv ua los tshwm nyob hauv ib tug neeg muaj nws lub loog.

Qee zaus yog ib pab neeg ua Ntuj kev cai lawv sib pab yuav ib thaj av nyob sab nroog nraud. Lawv thiaj khawb av, lawv ua lawv txoj kev mus puv hauv cov ntxa, lawv ua ncauj ke tshwm sab nraud, lawv kuj ua zoo nkauj thiab.

Cov ntxa ntawd tsis yog ib qho chaw log cov neeg tuag xwb, kuj yog qhov chaw uas sawv daws nyiam tuaj sib sau nyiam tuaj teev Ntuj.

Cov neeg tuag nyob hauv ntxa ntawd, mas ntau leej yog tej tus neeg tuag ua Yes Xus tim khawv, yog tej tus Tswv Qhia, los tej tus Vaj Qhia, los tej tus Leej Choj, los yog Xib Hwb, los tej tus neeg nto koob meej zoo tuag ua Yes Xus tim khawv. Ua li, mas cov neeg ua Ntuj kev cai khawb tej kev dav dav nyob ze cov tim khawv lawv tej ntxa. Lawv muab hmoov zeb sib los leem rau, lawv sau duab rau ntawm phab ntsa.

Thaum cov neeg ua Ntuj kev cai mus hauv cov ntxa ntawd, mas lawv lub siab nco ntsoov txog Ntuj zoo dua, lawv hnov Yes Xus cov tim khawv nyob ze ze lawv. Lawv pom cov duab haus txog Yes Xus ua hwj huam yees ntxwv, los hais txog Yes Xus tsim lub Cim Yug, los hais txog Yes Xus kwv ib tug yaj, los hais txog Yes Xus sawv rov los.

Lawv mus xyuas cov ntxa ntawd thaum twg, mas lawv lub siab rov qab kuj tuaj thaum twg.

Cov nom tswv tsis muaj cuab kav yuav nkag mus hauv cov ntxa ntawd, lawv txoj cai kuj tsis kheev mus ntes cov neeg mus nyob hauv cov ntxa ntawd. Ua li mas tej lub caij uas nom tswv hiam cov neeg ua Ntuj kev cai heev, mas lawv mus teev Ntuj nyob hauv cov ntxa ntawd, lawv sib ntsib nyob ntawd, lawv sib ntuas, sib pab ua siab loj nyob hauv cov ntxa ntawd.

Yog vim li cas thiaj muaj neeg xav ua Ntuj kev cai?

Ntau leej lawv pom tas tsoom neeg teev dab sawv daws lam tau lam ua lwj ua liam tsis mloog kev cai dab tsi li; ntau leej xav yuav ib co kev cai pab ua neeg siab dawb siab huv, lawv ntsib Yes Xus kev cai, mas lawv zoo siab yuav. Tas cov neeg me, cov neeg txom nyem, cov neeg ua qhev, thiab cov neeg pluag lawv hnov Yes Xus cov lus hlub cov neeg me cov neeg pluag; lawv hnov Yes Xus hais tias “Cov neeg muaj txoj hmoov zoo yog cov pluag, vim Ntuj lub Ceeb Tsheej yog lawv li.” Txog tav no, cov neeg txom nyem, cov neeg pluag lawv kawg hnov sawv daws cem lawv thiab thuam lawv, muab lawv ntaus thiab muab lawv tua, ces thaum lawv ntsib Yes Xus kev cai, tam sim ntawd lawv lub neej zoo li rov tshiab tuaj; lawv ua Huab Tais Tswv Ntuj cov me nyuam, lawv muaj ib tug Huab Tais tuag nyob saum ntoo cuam pab lawv ris lawv txoj kev txom nyem.

Tas sawv daws cov neeg siab ncaj nyob hauv tas tsoom neeg ua dab, lawv pom cov neeg ua Ntuj kev cai zoo siab tuag kom tau teev Yes Xus mus li, lawv pom cov neeg ntseeg pab sawv daws thiab hlub sawv daws, lawv pom cov ua Ntuj kev cai yog ib co neeg tsis thuam leej twg; luag tej thuam lawv, ua phem rau lawv; tiam sis lawv ua siab zoo rau sawv daws, ua neeg tsim txiaj, mas tus twg siab ncaj tus twg pom hais tias Ntuj kev cai zoo dua cov tiag.

Yog vim li ntawd, mas neeg thiaj ua Ntuj kev cai coob zuj zus. Cov neeg pluag kuj ua, cov neeg muaj kuj ua, cov qhev kuj ua, cov ua tswv kuj ua. Tus twg yug los muaj ib lub siab ncaj, nws txoj hmoov ntsib Ntuj kev cai, mas nws cia li yuav Ntuj kev cai, cov vaj txwv tsis tau.

Tus xav ua Ntuj kev cai nws yuav ua zoo li cas?

Ib tug neeg nws hloov siab, nws xav ua Ntuj kev cai, mas nws tsis tau txais lub Cim Ntxuav tam sim ntawd. Nws kawm Ntuj kev cai ib ntus tso. Lawv kawm Yes Xus tej lus teej qav teej num cawm ntiaj teb, lawv kawm Ntawv Moo Zoo, kawm Paj Lug cov tsab ntawv, kawm Ntawv Ntshiab. Muaj tej tus Tswv Qhia kuj tau sau ntawv ntuas tas tsoom sid, cov neeg ua Ntuj kev cai lawv rov qab sau cia nyob hauv lawv tej tsev. Cov paub Yes Xus cov lo lus qhia ntau lawv kuj qhia, sawv daws sib pab sib qhia.

Lub caij uas lawv nyiam txais lub Cim Ntxuav dua, mas yog hnub nyoog Hla, vim lawv xav nrog Yes Xus sawv rov qab los muaj ib txog sia tshiab. Thaum yuav txog lub caij ua Hmoov Hla, cov Leej Choj thiab cov Xib Hwb rov qab nug cov pej xeem saib lawv puas paub Ntuj kev cai zoo, ces lawv thiaj pib ua cov kab ke ntxuav rau; lawv ua Ntoo Cuam lub Cim rau, lawv cev zaj ntseeg rau, lawv ua zaj ntiab dab. Hnub ua lub Cim Ntxuav, mas lawv ua nyob hauv ib tug dej ntws, los nyob hauv ib lub pas dej, los lawv muab dej los hliv rau saum tus txais lub Cim Ntxuav. Ntau zaus tus ua lub Cim Ntxuav yog ib tug Tswv Qhia.

Kev cai, thaum lawv ua lub Cim Ntxuav tas, mas lawv muab roj los ua lub Cim Txhab Zog tam sim ntawd; lawv thiaj tau Ntuj lub txiaj ntsim pab ua tim khawv.

Lawv ua lub Cim Yug zoo li cas?

Cov neeg ua Ntuj kev cai puag thaud, lawv nyob ze lub caij Yes Xus nyuam qhuav tuag thiab sawv rov los. Yes Xus nyob hauv lawv lub siab, lawv nco txog Yes Xus tsis tseg, lawv thiaj xa ua lub Cim Yug raws li Yes Xus qhia.

Thaum lawv ua lub Cim Yug, mas lawv xav rov qab nco txog Yes Xus. Yes Xus twb tau hais tias “Thaum nej xav nco txog kuv, mas nej yuav rov qab ua zoo li kuv nyuam qhuav qhia rau nej.” Thaum lawv ua lub Cim Yug lawv kuj xav noj Yes Xus lub Cev thiab haus nws cov Ntshav. Tswv Qhia Is Nyas Xyus sau ntawv hais tseg tias “Lub Cim Yug yog Yes Xus lub Cev. Yog lub Cev raug txom nyem kom tau them peb cov txim txhaum. Yog lub Cev uas Huab Tais Leej Txiv tsa kom sawv rov qab los.” Tswv Qhia Yus Tis Nus sau hais tias “Lub Cim Yug yog ib hom txhiam xws yug neeg lub siab, kawg yog cov neeg ntseeg thiab txais lub Cim Ntxuav lawm, thiab mloog Yes Xus cov lus qhia, mas lawv thiaj li txais tau hom txhiam xws ntawd. Peb tsis noj cov mov ntawd thiab haus cov cawv ntawd xws li peb niaj hnub no mov haus cawv. Yog vim cov mov thiab cov cawv muab los ua lub Cim Yug yog Yes Xus lub Cev thiab yog Yes Xus cov Ntshav. Thaum Yes Xus yug los, nws yuav ib lub Cev thiab ib co Ntshav xws li peb. Thaum peb ua lub Cim Yug, nws kuj tseem ua kom cov mov thiab cov cawv ntawd txia ua nws lub Cev thiab cov Ntshav.”

Cov neeg ua Ntuj kev cai puag thaud lawv ntseeg zoo li ntawd, lawv ntseeg zoo li Paj Lug, lawv ntseeg zoo li cov Hauv Paus Xa Lus, lawv ntseeg zoo li peb. Yog vim li ntawd, mas niaj hnub Chiv lawv xav ua lub Cim Yug; lawv xav nco txog Yes Xus thiab txais Yes Xus lub Cev.

Cov neeg ua Ntuj kev cai, thaum txog hnub Chiv thaum ib tag hmo, mas lawv sawv daws los sib sau nyob hauv cov tsev teev Ntuj. Thaum lawv pib ua, mas lawv xub hais ib zag thov kom Huab Tais Tswv Ntuj hlub lawv thiab daws lawv cov txhaum, lawv hais zaj ‘Huab Tais Leej Txiv aib! Koj ua siab hlub peb cov me yaus.”

Lawv thov Ntuj zoo li ntawd tas, mas lawv nyeem Ntawv Ntshiab Cog Lus Qub, nyeem Ntawv Moo Zoo, nyeem cov tsab ntawv, thiab tej zaj hais txog cov neeg tuag ua Yes Xus tim khawv. Thaum lawv nyeem ntawv zoo li ntawd tas, mas tus Tswv Qhia los Leej Choj, los puas tus Xib Hwb thiaj ntuas sawv daws. Thaum ntuas tas lawm, mas lawv tso cov neeg tsis tau txais lub Cim Ntxuav rov qab mus tsev, yog vim cov ntawd tsis tau txais lub Cim Ntxuav, mas lawv tsis muaj cai txi Ntuj ntxiv thiab txais tsis tau Yes Xus lub Cev.

Thaum cov tsis tau txais lub Cim Ntxuav rov qab mus tsev tas lawm, mas lawv mam pib ua lub Cim Yug. Lawv nqa cov mov thiab cov cawv los tso rau saum lub thaj txi Ntuj, ces cov Xib Hwb mus pab txais cov mov thiab cov cawv los tso rau saum lub thaj. Tus Tswv Qhia thiaj cev mov cev cawv rau Tswv Ntuj txais.

Tus Tswv Qhia hais zaj “Tsim nyog peb yuav cav txog peb tus Huab Tais Tswv Ntuj”, ces sawv daws hais zaj “Faj Tim Huab Tais Ntshiab.” Hais tas, mas tus Tswv Qhia hais cov lus xws li thaud Yes Xus qhia “Thaum tshuav ib hmos Yes Xus yuav tuag….” Thaum ntawd, Yes Xus tuaj nyob saum lub rooj txi Ntuj, sawv daws txi Yes Xus rau Huab Tais Leej Txiv, ces sawv daws npaj siab yuav txais Yes Xus lub Cev.

Thaum lawv tuaj txais Yes Xus lub Cev, mas ib leeg tuaj zuj zus ze ntawm tus Tswv Qhia los ntawm tus Leej Choj. Tswv Qhia foom ib lo lus kom tau nyob kaj lug rau ib tug zuj zus, thiab nws tso ib lo mov zuj zus rau hauv ib tug neeg txhais tes. Cov Xib Hwb kuj cev lub ntim rau sawv daws txais Yes Xus cov ntshav thiab.

Ua li ntawd tas, mas sawv daws ua Tswv Ntuj tsaug, ces sawv daws nyias rov mus nyias tsev. Thaum ua tas zoo li ntawd, mas twb yuav kaj ntug, sawv daws rov mus nyias mus ua nyias txoj hauj lwm.

Ib txwm, cov ua Ntuj kev cai lawv kuj xyaum nco txog Ntuj tas hnub tas hmo. ‘Nkes Mees nyob As Les Xas Nrias’ sau ntawv tseg hais tias “Yog zoo li peb zoo siab ua hmoov tas peb sim neej, vim peb nco ntsoov hais tias Huab Tais Tswv Ntuj nyob tas qhov txhia chaw; peb niaj hnub nrog Huab Tais Tswv Ntuj tham. Tab yog peb lub ncauj tsis hais lus nrov, mas nyob hauv peb lub siab peb teev Ntuj. Tus neeg ntseeg txog Tswv Ntuj, tab yog nws mus yos ua si, los nws tham, los nws so, los nws ua hauj lwm, los nws saib ntawv, mas nws nco txog Tswv Ntuj mus li.”

Xyoo 140 ib tug hu ua ‘As Lis Tis’ (Aristide) sau ntawv tseg hais tias “Niaj tag kis thiab tas hnub, cov neeg ua Yes Xus kev cai lawv hu nkaujcav txog Ntuj, lawv ua Ntuj tsaug vim Huab Tais Tswv Ntuj ua siab zoo rau lawv. Lawv noj mov thaum twg, mas lawv kuj ua Huab Tais Tswv Ntuj tsaug.”

Ntau zaus thaum lawv teev Ntuj, lawv tig ntsia sab hnub tuaj, vim Yes Xus tuaj sab ntawd tuaj, thiab Yes Xus yog lub hnub ua kom lub ntiaj teb neeg pom kev.

Thaum lawv teev Ntuj, lawv hais zaj ‘Peb Txiv’, hais cov ‘Nkauj Paj Nruag’, thiab lawv xev tej zaj tshiab yog tej zaj yuav cov lo lus nyob hauv Ntawv Ntshiab ntau; cov cov zaj cav txog Tswv Ntuj ntau dua qhov thov Ntuj.

Lub zim txwv ntawd, lawv ua lub hnub nyoog Hla xwb, tiam sis tsis ntev, mas lawv kuj pib ua lub hnub nyoog Yes Xus yug los thiab lub hnub nyoog Leej Ntuj Plig nqes los. Niaj hnub Chiv lawv rov nco txog lub hnub nyoog Hla. Hnub Xya lawv yoo mov npaj siab ua hnub Chiv.

Thaum lawv sib yuav los ua txij ua nkawm, lawv kuj hu txog Tswv Ntuj. Thaum lawv muaj neeg tuag, lawv kuj pab lawv tus tuag xws li ib co neeg xav xa lawv tus neeg mus nrog Huab Tais Leej Txiv nyob mus li. Ua li mas cov neeg ua Ntuj kev cai puag thaud, lawv kuj xyaum nyob ntawm Huab Tais Tswv Ntuj xub ntiag tas lawv sim neej, lawv ua yam twg, mas lawv ua nyob ntawm Huab Tais Tswv Ntuj xub ntiag.

Cov ua Ntuj kev cai nyob xyaw tsoom sid Los Mas, lawv coj ib tug yam ntxwv txawv luag tej. Yog vim lawv xav ua raws nraim Yes Xus tus lwj lwm, lawv muaj ib tug piv txwv uas niaj hnub lawv yoog raws; yog Yes Xus. Lawv xav ua zoo li Yes Xus. Lawv niaj hnub mloog Paj Lug tej lo lus ntuas zoo li no “Nej yuav cia nej lub cev tsim txiaj, vim nej tes nej taw yog Yes Xus tes taw. Nej yuav ua neeg siab dav siab huv xws li Leej Pleev uas nws muab tas ib puas tsav yam rau peb, nws muab nws txoj sia rau peb.”

Ua li mas cov ua Ntuj kev cai nyob xyaw cov Los Mas tiam sis lawv xyaum yuav ib tug yam ntxwv zoo li Yes Xus tus yam ntxwv, lawv coj ib tug yam ntxwv txawv cov Los Mas tus yam ntxwv.

Hais txog txoj kev sib yuav ua txij ua nkawm, mas cov Los Mas tsis muaj cai dab tsi li. Cov neeg muaj, mas lawv hloov poj niam tas zog thiab lawv nrog cov ntxhais qhev ua si. Cov ua Ntuj kev cai hais tias “Cov sib yuav ua txij ua nkawm, lawv yuav lub Koom Txoos ua tim khawv, lawv hu txog Huab Tais Leej Txiv tuaj pab lawv kom lawv ua txij ua nkawm mus tas ib sim neej tiag.” Cov ua Ntuj kev cai thiaj saib txoj kev sib yuav yog ib txog kev uas ob tug neeg yuav sib pab nyob hauv txoj kev nco txog Ntuj thiab yuav sib pab kom yeej kev ntxhov siab lwj plawv, kev txhawj xeeb.

Hais txog nyiaj txiag thiab tas ib puas tsav yam zoo nyob ntiaj teb no, mas cov ua Ntuj kev cai kuj ua txawv cov Los Mas thiab. Yog Ntuj pub dab tsi rau cov ua Ntuj kev cai, mas lawv kuj muab dab tsi los siv thiab lawv ua Ntuj tsaug. Tiam sis lawv paub hais tias muaj ib yam zoo tiag, yog Huab Tais Tswv Ntuj lub Ceeb Tsheej. Muaj ib tug hais tias “Thaum ub peb nyiam nyiaj txiag, nyem no peb pub peb lub cuab tam rau luag tej.” Cov Tswv Qhia kuj ntuas sawv daws hais tias “Peb cov nyiaj txiag thiab peb lub cuab tam kuj yog tas tsoom sid tug. Yog peb muaj ib lub cuab tam, mas peb yuav nco ntsoov hais tias lub cuab tam ntawd tsis yog yuav cia ua kom yus ua ib tug neeg nplua nuj, yus yuav saib thiab faib yus lub cuab tam ntawd kom muaj ntau leej tau nyob zoo.”

Cov neeg ua Ntuj kev cai, thuam lawv ua txhaum tas, yog lawv xav them txim txhaum, mas lawv yuav yoo mov, lawv muab lawv cov nyiaj los pub rau cov neeg pluag, lawv thov Ntuj, thiab lawv daws txhaum ntawm cov Leej Choj los ntawm tus Tswv Qhia.

Lawv ua lub Cim Daws Txhaum nyuaj dua peb nyem no: Thaum ib tug tau ua txhaum tiag, mas lawv thov txhaum nyob hauv cov tsev teev Ntuj, lawv pe sawv daws; lawv ua li ntawd ob peb zaug, los ta sob peb hlis kuj muaj, los tas ib xyoos kuj muaj. Lawv txi Ntuj tsis tau; thaum lawv teev Ntuj, mas lawv ua ntu txais Ntuj Lus xwb, thaum txog ntu txi Ntuj, mas lawv yuav tawm mus.

Tswv Qhia los cov Leej Choj pom cov neeg muaj txhaum lawv ntxub lawv cov txhaum tiag, mas Tswv Qhia thiaj tsa tes rau saum lawv taub hau, ces nws rov qab yuav lawv los nrog tas lub txoos teev Ntuj.

Lawv ua zoo li ntawd, mas sawv daws thiaj paub hais tias Ntuj kev cai yog ib co kev cai xyaum ua neeg siab dawb siab huv tig.

Thaum lub hauv paus, lawv muaj 3 txheej neeg nyob hauv lub Koom Txoos; yog cov Xib Hwb thiab cov Phauj, cov Leej Choj, thiab cov Tswv Qhia.

1. Cov Xib Hwb, lawv pab txi Ntuj, pab txais cov mov cov cawv uas cov neeg ua Ntuj kev cai nqa tuaj. Lawv kuj mus xyuas cov neeg nyob hauv tsev loj faj, cov neeg mob, lawv xa ub xa no mus rau cov neeg pluag. Lawv qhia kev cai ntau.

Cov Phauj, lawv kuj sawv lub Koom Txoos chaw mus pab cov neeg pluag txom nyem, lawv kuj qhia kev cai thiab.

Cov Xib Hwb thiab cov Phauj kuj muaj ntau leej tuag ua Yes Xus tim khawv.

2. Cov Leej Choj, lawv pab cov Tswv Qhia, ua Tswv Qhia cov xov thawj, hloov Tswv Qhia chaw txi Ntuj.

3. Tus Tswv Qhia yog tus kav lub Koom Txoos. Nyob hauv nws lub nroog yog tus saib xyuas sawv daws, nws ua 4 yam hauj lwm no:

– Nws yog tus hauv paus teev Ntuj.

– Nws yog tus qhia kev cai thiab tso sawv daws mus qhia kev cai.

– Nws yog tus saib Koom Txoos lub cuab tam.

– Nws saib xyuas sawv daws kom ua Ntuj kev cai zoo.

Tus Tswv Qhia muaj hwj huam kawg. Cov neeg ua Ntuj kev cai pheej coob zuj zus, mas cov Tswv Qhia kuj muaj hwj chim zuj zus thiab.

Thaum yuav txog xyoo tim 300 los 400 cov Tswv Qhia muaj hwj chim cuag li cov nom kav teb chaws.

Xyoo 106 tus Tswv Qhia Is Nyas Xyus sau ntawv hais tias “Lub Koom Txoos nyob Los Mas yog lub Koom Txoos ua thawj coj luag tej, yog lub Koom Txoos ua tswj coj cov neeg sib nyiam sib hlub raws li Yes Xus lus qhia.”

Xyoo 140 tus Xib Hwb Hes Mas thaum nws sau nws phau ntawv hais txog tus Tswv Zov Yaj tas lawm, nws muab nws phau ntawv ntawd rau tus Tswv Qhia nyob Los Mas kom pab xa mus rau tas txhua lub Koom Txoos nyob tas ntiaj teb; nws saib tus Tswv Qhia nyob Los Mas muaj cai xa ntawv mus ntuas tas cov Koom Txoos nyob ntiaj teb.

Xyoo 150 ib tug Tswv Qhia nyob Fis Zias teb tau ua ib phau ntawv piav tas nws sim neej nws tau ua dab tsi. Nws hais tias nws tau mus xyuas tus Tswv Qhia nyob Los Mas ib zaug, nws hu tus Tswv Qhia nyob Los Mas ua ‘Tus Zoo Tswv Zov Yaj’ vim nws saib tus Tswv Qhia nyob Los Mas yog ib tug Tswv Qhia loj dua cov tiag.

Xyoo 180 Tswv Qhia Is Les Nes nyob Lis Yoos kuj tau sau ib phau ntawv teb rau cov neeg xav ncaim ntawm lub Koom Txoos. Thaum nws sau nws phau ntawv yuav tas, nws hais tias “Sawv daws yuav saib lub Koom Txoos nyob Los Mas yog lub Koom Txoos ua sawv daws ntej. Lub Koom Txoos twg nyob ntiaj teb no yuav tsum yuav lub Koom Txoos nyob Los Mas zaj. Tus twg ntseeg txog Tswv Ntuj nyob ntiaj teb no, yuav tsum mloog lub Koom Txoos nyob Los Mas. Yog vim cov Hauv Paus Xa Lus lawv tej lus nyob hauv lub Koom Txoos nyob Los Mas.”

Tos sawv daws saib tus Tswv Qhia nyob tim Los Mas ua tus loj dua cov, vim sawv daws paub hais tias nws yog tus hloov Pob Zeb, thiab nws yog tus Tswv Qhia saib lub nroog uas Pob Zeb thiab Paj Lug nkawd tuag. Sawv daws tuaj xyuas Pob Zeb lub ntxa, tuaj xyuas qhov chaw uas nws tuag ua Yes Xus tim khawv.

Yog vim ib txwm sawv daws yeej hwm cov Tswv Qhia uas hloov Pob Zeb, mas sawv daws thiaj cia cov Tswv Qhia nyob Los Mas los nyob ib qho chaw nyob ntawm txoj ntug kev As Pias, sawv daws tuaj xyuas lub ntxa ntawd ntau tshaj tej, lawv saib cov Tswv Qhia nyob Los Mas yog cov muaj cai khaws cov Hauv Paus Xa Lus thiab Yes Xus cov lo lus tseg.

Yes Xus qhia kev cai 3 xyoos, cov neeg tau nrog Yes Xus nyob lawv nco ntsoov nws tej lus tseg. Yes Xus tuag tau 20 xyoo, mas lawv tseem tsis tau sau Yes Xus cov lo lus los ua tej phau ntawv loj tseg; lawv nco nyob hauv lawv lub siab ntau, thiab muaj qee leej sau tej zaj tseg kom nco ntsoov, ces thiaj tau kev mus qhia luag tej.

Tiam sis ntev mus, mas cov neeg ntseeg lawv coob zuj zus thiab lawv mus nyob ntau lub teb chaws. Yog vim li ntawd, thiaj muaj 4 leeg sau Yes Xus cov lus tseg; lawv sau Ntawv Moo Zoo.

Yog xyoo tim 50 Mas Tais thiaj sau nws phau ntawv. Nws sau nyob Yus Das teb, nws sau rau cov Yus Das twm. Yog vim li ntawd, Mas Tais thiaj li piav zoo li ib tug neeg paub Yus Das kev cai zoo.

Xyoo tim 55 los 60 Mas Kos thiaj sau nws phau ntawv. Mas Kos mus nrog Pob Zeb nyob Los Mas, ces nws ua tus pab sau ntawv thiab ua Xib Hwb pab Pob Zeb. Mas Kos nrog Pob Zeb nyob 7 xyoo los 8 xyoo tej, nws paub lus Hes Las zoo hauj sim. Mas Kos sau Yes Xus cov lus raws li niaj hnub nws hnov Pob Zeb piav rau sawv daws.

Xyoo tim 63 los 65 Lus Kas sau nws phau ntawv. Lus Kas yog ib tug kws tshuaj, nws paub lus Hes Las zoo thiab nws txawj sau ntawv, txawj piav tej zaj zoo mloog.

Nyob ze xyoo tim 100 Zam mam sau nws phau ntawv. Nws sau zoo li ib tug neeg txawj xav tswv yim tob, yog vim nws xub tau qhia kev cai tas 60 xyoo thiab nws xub tau xav txog Yes Xus cov lo lus tas 60 xyoo nws mam li tau sau ib phau ntawv zoo li ntawd. Zam tseem tau sau ib phau ntawv yog phau ntawv ‘Qhib Yav Tom Ntej’ (As Pos Kas Lis).

Txij xyoo tim 50 los txog xyoo tim 100 cov Hauv Paus Xa Lus kuj tau sau tej tsab ntawv; xws li Paj Lug, Pob Zeb, Zam, Yas Kos thiab Yus Das.

Cov ntawv Moo Zoo, cov tsab ntawv, thiab phau ntawv Qhib Yav Tom Ntej ua ke ua ‘Phau Ntawv Cog Lus Tshiab’. Tas cov neeg ua Ntuj kev cai nyob ncig lub hiav txwv Mes Dis Tes Las Nes sawv daws nquag twm cov ntawv Cog Lus Tshiab ntawd.

Thaum cov Hauv Paus Xa Lus tuag tas, niaj hnub cov nom tswv hiam cov neeg ntseeg txog Yes Xus, tiam sis muaj tej tus neeg ua Ntuj kev cai lawv sau ntawv teb rau cov nom tswv thiab sau ntawv teb rau cov neeg tsis ntseeg txog Yes Xus. Lawv piav rau cov nom tswv hais tias Ntuj kev cai yog ib co kev cai zoo. Lawv hais tias cov neeg liam ub liam no rau cov neeg teev Yes Xus, mas yog ib co neeg lam tau lam hais dab hais tuag xwb.

Tas ob puas tawm xyoo muaj tej tus ua Ntuj kev cai lawv sau ntawv nrog cov neeg teev dab cav kom yeej. Ntau leej yog tej tus txawj sau ntawv kawg, lawv tau kawm txuj tsis ntau. Lawv cov ntawv tseem nyob txog tav no. Peb hu cov neeg ntawd ua ‘Koom Txoos cov Txiv’ (Fathers of the Church)

Koom Txoos cov Txiv kuj tau sau tej phau ntawv qhia kev cai thiab ntuas cov neeg ntseeg, vim tias cov Ntawv Cog Lus Tshiab hais Yes Xus cov lus lub ntsiab xwb. Muaj ntau tus Tswv Qhia thiab ntau tus Xib Hwb lawv niaj hnub qhia kev cai, mas lawv kuj sau ntawv tseg. Ua li mas ib tug ua ntawv piav kev cai, mas cov Leej Choj thiab cov Xib Hwb thiab cov Phauj nyob lub teb chaws ntawd kuj yuav nws tej ntawv los qhia luag tej thiab.

Nyob hauv cov neeg ua Ntuj kev cai muaj tej tus lawv tsis xav mloog cov Tswv Qhia, lawv yuav Yes Xus cov lo lus ib nrab xwb, thiab lawv yuav lwm zaj los ntxiv rau Yes Xus cov lus qhia, los qee zaus lawv muab Yes Xus kev cai los xyaw rau lwm cov kev cai. Lawv thiaj pib ncaim ntawm lub Koom Txoos. Lawv kuj tuav txog Yes Xus lub npe, tiam sis lawv ntseeg tej yam tsis haum Yes Xus lus qhia, vim li ntawd, mas cov Tswv Qhia thiab cov Xib Hwb thiaj sau tej phau ntawv tiv cov ncaim ntawd. Lawv qhia rau sawv daws kom tsis txhob mus ntseeg cov Xib Hwb cuav qhia ib co kev cai cuav.

Muaj ib tug sau ntawv ntau tshaj tej; yog Is Les Nes uas yog tus Tswv Qhia nyob Lis Yoos. Is Les Nes sau 5 phau ntawv tuab tuab hais txog Ntuj kev cai; nws piav Ntuj kev cai thiab nws tiv cov ncaim ntawm lub Koom Txoos. Cov uas tau sau ntawv lawv Is Les Nes qab, lawv rov qab yuav Is Les Nes cov lus ntau. Is Les Nes yog zoo li ib tug ntaus thawj nyob hauv cov neeg sau ntawv piav txog Ntuj kev cai puag thaum ub.

Yes Xus tuag tau 250 tawm xyoo lawm, tseem hwv Los Mas hiam lub Koom Txoos heev zuj zus. Tiam sis lub Koom Txoos kuj hlob zuj zus thiab. Tas sawv daws niaj hnub pom cov neeg ntseeg txog Yes Xus coj ib tug yam ntxwv zoo dua luag tej. Cov neeg siab ncaj tsis muaj cuab kav hais ib lo lus phem txog txoj kev ntseeg Yes Xus. Yog tus twg xav ua ncaj tiag, mas nws kuj cia li txais Yes Xus lub Moo Zoo. Sawv daws pom cov neeg ntseeg Yes Xus tsis ntshai tuag, mas sawv daws kuj qhuas kawg. Cov Los Mas pheej muab cov neeg ntseeg tua, tab sis luag tej pom luag pheej xav txais Yes Xus lub Moo Zoo coob zuj zus raws nraim li Tes Tus Lias Nus hais tseg tias “Cov Tim Khawv lawv cov roj ntsha yog lub Koom Txoos lub noob.” Cov neeg paub txuj uas tsis tau txais Yes Xus lub Moo Zoo, mas lawv kuj niaj hnub nyeem cov ntawv hais txog txoj kev ntseeg Yes Xus. Lawv pom tej tus neeg ntseeg txog Yes Xus txawj teb tej lo lus zoo rau cov ua dab, thiab txawj piav Tswv Ntuj Lo Lus rau cov neeg paub txuj ci, mas muaj coob leej cov neeg paub txuj ci pib txais kev ntseeg. Thaum lawv ntseeg lawm, lawv kuj sau ntawv pab lub Koom Txoos ntxiv, ua li mas lub Koom Txoos hlob zuj zus tuaj. Yog tseem hwv Los Mas xav rhuav lub Koom Txoos, mas lawv yuav tsum rhuav tas cov pej xeem ib nrab.

Puas yuav muaj ib tug vaj txawj pom hais tias lub Koom Txoos yog ib pab neeg zoo, tsis yog ib pab neeg xav ua phem rau tseem hwv?

Puas yuav muaj ib tug vaj yuav nyiam cov neeg ntseeg txog Yes Xus, los yuav kheev kom lawv yuav lawv txoj kev cai teev Ntuj nyob ntawm siab?

Lub 5 hlis xyoo 235 tus vaj Saws Ves Lus (Alexander Severus) raug nws ib tug tub rog tua tuag, ces tas cov vaj txheeb nyob tuam teb Los Mas sawv los sib txeeb lub teb chaws ua rau tuam teb Los Mas nyob tsis thaj yeeb. Txog xyoo 284 tus vaj txheeb Dias Les Xias Nus (Diocletian) thiaj sau tas lub teb chaws rov los nyob hauv kev thaj yeeb, ces nws sawv ua tuam vaj kav Los Mas sab hnub tuaj. Nyob sab hnub poob, muaj Mas Xis Mis As Nus (Maximian) ua tuam vaj hos tus vaj mas yog Koos Taas (Constantius Chlorus).

Xyoo 280 Koos Taas yug tau ib tug tub nyob hauv lub xeev Lus Mas Nias. Koos Taas tis npe rau tus me tub hu ua Koos Taas Tis Nus (Constantine). Koos Taas teev cov dab Los Mas, tab sis nws poj niam ‘Hes Les Nas’ (Helena) yog ib tug ntseeg Yes Xus.

Thaum Koos Taas Tis Nus muaj 15 xyoo, nws pib ua tub rog. Thaum muaj 18 xyoo Koos Taas Tis Nus twb tau ua lwm txheeb. Nws mus ua rog, nws tsis ntshai, nws mus ntaus rog qhov twg, mas nws yeej, ces xyoo 300 Koos Taas Tis Nus thiaj mus pab nws txiv Koos Taas ua rog nyob Aav Kiv teb.

Xyoo 306 Koos Taas tuag, ces cov nom tswv nyob Los Mas tsa tus tuam vaj Mas Xis As Nus tus tub hu ua Mas Xaas (Maxentius) ua vaj kav cov teb chaws Los Mas sab hnub poob, thiab lawv tsa Koos Taas Tis Nus ua vaj txheeb. Koos Taas Tis Nus ua twj ywm xws li ib tug neeg zoo siab lawm.

Xyoo 310 tus tuam vaj Mas Xis Mis As Nus tuag, ces Mas Xaas thiaj sawv ua tuam vaj Los Mas sab hnub poob. Mas Xaas pom tias muaj ntau lub teb chaws nyiam Koos Taas Tis Nus, Mas Xaas thiaj xav muab Koos Taas Tis Nus tua. Tiam sis Koos Taas Tis Nus poj niam pab Kos Taas Tis Nus, ces Koos Taas Tis Nus thiaj tsis tuag.

Xyoo 312 Koos Taas Tis Nus nyob ze tus dej Lees, nws sau plaub vam tus tub rog Nkas Lias, Zes Mas Nias, thiab Aas Kiv, nws sawv kev mus ntaus kaum vam tus tub rog uas nyob Los Mas. Nws hla cov roob As Paws, nws mus txog lub nroog twg, mas lub nroog twg kawg thov nws xwb.

Hnub tim 27 lub 10 hli, Koos Taas Tis Nus tuaj txog ze ntawm Los Mas. Txog tav no, mas nws tsis tau pom dua Los Mas li. Nws pom cov ntsa zeb xov lub tsheej Los Mas. Nws pom cov tuam choj xa dej mus rau hauv lub nroog. Nws xav tias yog nws ntaus tau Los Mas ces nws yuav tau ua vaj. Yog nws tsis yeej, mas nws yuav tuag xwb.

Thaum Koos Taas Tis Nus tab tom npaj yuav mus ntaus rog, nws tau hu txog cov neeg ntseeg Yes Xus tus Huab Tais tuaj pab nws. Ces nruab hnub nws tau pom ib tug ntoo cuam nyob saum ntuj, nyob sab hnub poob thiab nws tau pom ib co lus sau nyob sum ntuj hais tias “Koj yuav tus chij no koj yuav yeej.”

Ib tsam tsaus ntuj, nws pom Yes Xus tawm tuaj xyuas nws. Yes Xus qhia nws kom nws muab tus ntoo cuam rau saum cov chij mus ua cov tub rog ntej.

Hnub tim 28 Mas Xaas nyob hauv lub tsheej Los Mas, nws nrog nws cov tub rog tawm tuaj ntaus Koos Taas Tis Nus. Nws hla tus dej Tis Nplaws, ces ob tog pib sib tua. Mas Xaas cov tub rog tiv tsis taus cov tub rog Nkas Lias, lawv thiaj thaub qab. Ces Koos Taas Tis Nus caij nees ua ntej. Nws nrog nws cov tub rog caum Mas Xaas cov tub rog. Mas xaas xav hla dej rov qab mus rau hauv lub tsheej Los Mas. Tiam sis tus choj uas lawv nyuam qhuav tuam nyob saum tus dej Tis Nplaws puas tas. Ces Koos Taas Tis Nus lawv tua Mas Xaas cov tub rog tuag coob tas nrho. Mas Xaas kuj tuag. Tag kis los, lawv thiaj tuaj nrhiav tau Mas Xaas lub cev nyob hauv tus dej Tis Nplaws. Hnub ntawd, Koos Taas Tis Nus yeej Mas Xaas. Txog tav no, twb muaj ntau tus vaj Los Mas sib tua nyob Los Mas. Yog ib tug tuag, mas lwm tus hloov tus tuag ntawd. Tiam sis lub teb chaws kuj nyob zoo li qhov qub.

Hnub tim 29 Koos Taas Tis Nus tau ua vaj nyob hauv lub tsheej Los Mas. Tam sim ntawd, nws rhuav txoj cai teev cov dab Los Mas pov tseg. Nws cov tub rog coj ib tug chij muaj ntoo cuam. Txij hnub ntawd los, tseem hwv kuj nchuav ib cov nyiaj tshiab uas muaj tus “X” thiab tus “R” yog ob tug tsiaj ntawv hais txog Leej Pleev (XRISTOS).

Koos Taas Tis Nus sau ntawv mus rau tus vaj txheeb nyob Yus Das teb thiab tus vaj txheeb nyob As Fis Kas teb kom lawv tsis txhob hiam cov neeg ntseeg Yes Xus ntxiv. Yav tas los lawd, tseem hwv tau nyiag lub Koom Txoos yam twg lawm, mas nws kom tseem hwv xa rov qab mus rau lub Koom Txoos huv tib si. Koos Taas Tis Nus tus poj niam hu ua Faus Taas nws muab Koos Taas Tis Nus ib lub tuam tsev rau tus Vaj Qhia nyob, yog lub tuam tsev Las Ras Nos.

Lub 1 hlis xyoo 313 tus vaj Los Mas hu ua Lis Xis Nus (Licinius) kav cov teb chaws Los Mas sab hnub tuaj, nws tuaj yuav Koos Taas Tis Nus tus muam nyob hauv lub nroog Mis Las Nos. Thaum lawv tuaj ua tshoob, Kos Taas Tis Nus thiab Lis Xis Nus nkawd tau sab laj ob hlis hais txog tej kev cai tshiab uas lawv yuav tsa los kav lub teb chaws kom tau nyob tiaj nyob tus. Txij hnub ntawd los sawv daws hu txoj cai ntawd ua “Txoj Cai Mis Las Nos.”

Nyob hauv Mis Las Nos txoj cai muaj ob nqes loj. Thawj nqe, yog ib txoj cai tso lus rau cov pej xeem huab hwm huv tib si txij sab hnub tuaj mus txog sab hnub poob, leej twg xav ntseeg Yes Xus los xav teev dab kuj tau nyob ntawm nyias siab. Txoj cai hais li no:

Tseem hwv tsis muaj cai yuav yuam cov pej xeem mus teev Ntuj los mus teev dab. Cia nyias ua nyob ntawm nyias siab. Ua li mas tus twg xav yuav Yes Xus kev cai kuj tau. Tsis muaj leej twg yuav hiam nws, los yuav quab yuam li yav tas los lawd. Cov neeg ntseeg Yes Xus, lawv xav ntseeg Yes Xus nyob ntawm lawv siab kuj tau. Peb kheev coj txoj kev ntseeg txog Yes Xus lawm. Tiam sis tus twg xav yuav txoj kev cai teev dab los lwm yam zoo li cas kuj tau. Peb xav kom peb lub teb chaws tau nyob thaj yeeb tiaj tus. Peb thiaj tso lus li ntawd rau sawv daws.

Txoj cai Mis Las Nos nqe ob, hais txog tej yam uas yog lub Koom Txoos tug. Yav thaud, tseem hwv Los Mas tau nyiag yam twg ntawm lub Koom Txoos lawm, mas tseem hwv yuav tsum xa yam ntawd rov qab rau lub Koom Txoos. Cov neeg teev dab hnov txoj cai tshiab ntawd, mas sawv daws xav hais tias Yes Xus yeej cov dab Los Mas lawm. Sawv daws hais tias Koos Taas Tis Nus yeej Mas Xaas, yog vim Yes Xus pab Koos Taas Tis Nus.

Ua li mas cov neeg teev dab ntau leej lawv kuj tsis tso siab rau cov dab Los Mas lawm. Lawv tso lawv cov dab pov tseg ntau zuj zus. Tseem yuav muaj neeg teev cov dab los ib ntus ntev li 200 xyoo ntxiv, tiam sis lawv yuav tsawg zuj zus. Ua li mas cov neeg tuag ua Yes Xus tim khawv, lawv tau yeej tseem hwv Los Mas. Tus ntoo cuam tau yeej cov qub kev cai Los Mas, yeej cov tseem hwv uas ntxub lub Koom Txoos.

Koos Taas Tis Nus xav raws Yes Xus lub Moo Zoo, tiam sis ntau zaus nws tau ua tej yam tsis haum Tswv Ntuj Lo Lus. Nws kav lub teb chaws Los Mas uas cov neeg teev dab tseem coob dua cov neeg ntseeg Yes Xus. Nws tau pab txhim tej tsev teev dab.

Nws cia cov neeg teev dab teev nws xws li ib txwm cov vaj Los Mas ua los. Nws ntshai hais rau sawv daws tias nws tsis tshua nyiam pom sawv daws teev nws. Nws tseem tau ua tej yam phem dua no thiab. Vim li ntawd nws lub siab tseem tsis tau yuav raws lub Moo Zoo tas huv tib si tiag. Koos Taas Tis Nus maj mam xav txog Ntuj Lo Lus ntev ntev, ces nws maj mam yuav ib tug yeeb yam tshiab zuj zus.

Nws cov txhaum uas sawv daws xyeej ntau tshaj yav tas los lawd thiab muaj tej yam tshiab ntxiv yog nws tau muab neeg tua pov tseg. Muaj ib zaug nws ua rog, nws ntes tau 6,000 tus tub rog, nws muab tua tas huv tib si raws li cov vaj Los Mas ib txwm ua kam. Muaj ib zaug nws nrog tus vaj Lis Xis Nus ua rog nws yeej. Tam sim ntawd nws zam rau Lis Xis Nus, vim Lis Xis Nus tus poj niam yog nws tus muam. Tiam sis tos rau hli ntxiv, mas nws muab Lis Xis Nus tua. Nws tseem tau ua ib qho phem dua qhov ntawd thiab. Yam li nws tau muab nws ib tug tub tua thiab nws muab nws tus poj niam Faus Tas tua.

Xyoo 326 Koos Taas Tis Nus tau mus nyob sab hnub tuaj tau ntev lawm. Thaum nws rov qab los nyob Los Mas, mas muaj ntau tus nom Los Mas tsis tshua zoo siab rau nws, vim nws xav tsim ib lub tsheej loj ib yam lub tsheej Los Mas nyob sab hnub tuaj. Thaum ntawd sawv daws hais tias Koos Taas Tis Nus tus tub hu ua Khis Pus, yog ib tug neeg siab zoo dua Koos Taas Tis Nus. Khis Pus yog Koos Taas Tis Nus thawj tus poj niam tus tub. Tsis yog Faus Tas tus tub. Faus Tas kuj hais rau Koos Taas Tis Nus hais tias Khis Pus xav nce ua vaj hloov nws txiv. Ces muaj ib hnub tas teb chaws tau hnov hais tias Koos Taas Tis Nus tau muab Khis Pus kaw rau hauv ib lub tsev loj faj thiab khis Pus tuag nyob hauv lub tsev loj faj ntawd. Ces tam sim ntawd, tau hnov ncha tas ntiaj teb hais tias Koos Taas Tis Nus tau muab nws tus tub tua tuag lawm. Cov neeg teev dab hnyos Koos Taas Tis Nus kawg.

Hes Les Nas uas yog Koos Taas Tis Nus niam, nws kuj tuaj cem cem nws tus tub. Koos Taas Tis Nus ntxhov ntxhov siab tag nrho. Nws npau npau rau nws tus poj niam Faus Tas. Ces nws thiaj tso nws ib cov tub rog mus muab Faus Tas tua pov tseg nyob hauv kem tsev da dej.

Koos Taas Tis Nus swb txoj kev txhaum ob peb zaug, tiam sis nws tsis swb mus li. Tas Koos Taas Tis Nus sim neej nws ntxub nws cov txhaum. Ntau hmo nws tsis tsaug zog, nws xav them txim txhaum, ces nws thiaj tso nws niam Hes Les Nas mus xyuas lub teb chaws uas Yes Xus tuag nyob Yes Lus Xas Les.

Thaum Hes Les Nas caij nkoj mus txog Yes Lus Xas Les, mas nws lub hnub nyoog twb muaj 78 xyoo lawm. Hes Les Nas tuaj txog, nws hu cov neeg paub Yes Lus Xas Les yav thaud zoo thiab hu cov Leej Choj tuaj. Nws nug lawv tias qhov chaw thaum ub lawv muab Yes Xus tua nyob saum ntoo cuam yog nyob qhov chaw twg.

Muaj kwv huab piav tias nyob ntawm qhov chaw uas Yes Xus tuag, mas twb muaj tej lub tuam tsev teev dab, muaj ib lub ntsa zeb xov lub nroog Yes Lus Xas Les. Hes Les Nas kom lawv rhuav pov tseg tas huv tib si. Thaum lawv rhuav tas puas tsav yam zoo li ntawd, lawv thiaj pom ib lub ncov roob me me, yog lub ncov roob Nkos Nkos Tas. Lawv tseem khawb ntxiv. Ces muaj ib hnub lawv pom peb tug ntoo cuam nyob ua ke nyob hauv ib tug kwj.

Tus Tswv Qhia nyob Yes Lus Xas Les xav paub peb tug ntoo cuam ntawd saib Yes Xus tus yog tus twg. Nyob ntawd muaj ib tug poj niam mob mob yuav tuag. Lawv nqa cov ntoo cuam los chwv tus poj niam mob mob yuav tuag. Lawv nqa cov ntoo cuam los chwv tus poj niam mob ntawd. Ob tug ntoo cuam ua ntej tsis ua dab tsi. Tus ntoo cuam tim peb nyuam qhuav los chwv kiag tus poj niam ntawd xwb, mas tam sim ntawd nws cia li zoo hlo, ces sawv daws thiaj li paub hais tias tus ntoo cuam ntawd yog Yes Xus tus tiag. Lawv thiaj li fi xov mus rau Koos Taas Tis Nus paub hais tias lawv nrhiav tau Yes Xus tus ntoo cuam lawm. Koos Taas Tis Nus zoo siab kawg, nws qhia lawv kom lawv ua peb lub tsev teev Ntuj rau ntawd. Ib lub cia tau hwm Yes Xus txoj kev txom nyem, ib lub cia tau hwm Yes Xus tus ntoo cuam, ib lub cia tau hwm Yes Xus sawv rov qab los.

Hes Les Nas muab Yes Xus tus ntoo cuam los faib ua peb ya. Nws xa ib ya mus rau Los Mas. Nws cia ib ya rau lub nroog Koos Taas Tis Nos Pos Lis (Constantinople) uas Koos Taas Tis Nus tab tom txhim, thiab nws cia ib ya nyob Yes Lus Xas Les.

Nyob tas ntiaj teb, sawv daws thov Yes Xus tus ntoo cuam ib qhov me me. Yog vim li ntawd, mas lawv thiaj muab faib ua tej qho me me nyob tas qhov txhia chaw nyob ncig lub hiav txwv Mes Dis Tes Las Nes.

Hes Les Nas ua nws txoj hauj lwm nyob Yes Lus Xas Les tas lawm. Nws thiaj rov los nrog nws tus tub Koos Taas Tis Nus nyob hauv lub nroog Koos Taas Tis Nos Pos Lis. Thaum ntawd nws muaj 80 xyoo lawm, ces nws mam tuag.

Koos Taas Tis Nus hwm nws niam zoo, nws kom lawv tsa ib tug mlom siab siab nyob Koos Taas Tis Nos Pos Lis, kom tau nco txog nws niam. Nws muab ib co pob zeb zoo nkauj los txhaum ua ib lub hleb zoo saib rau nws niam nyob hloov ua tsev teev Ntuj. Nws muab nws niam faus hauv lub tsev ntawd, nyob ze tus Vaj Qhia lub tuam tsev Las Ras Nos.

Koos Taas Tis Nus lub siab zoo tsis tas, tab sis nws yog tus nom tsim tej txoj cai tshiab kom haum Yes Xus lub Moo Zoo. Tej txoj cai lij choj uas Koos Taas Tis Nus tsim tshiab, mas muaj zoo li no:

– Koos Taas Tis Nus txiav hais tias txij hnub no lawm yav tom ntej, mas hnub chiv tas cov teb chaws uas Los Mas kav yuav nco txog Yes Xus sawv rov qab los. Hnub chiv sawv daws so, sawv daws caiv, ib yam li yav thuad lawv muaj tej hnub caiv los teev cov dab Los Mas.

– Koos Taas Tis Nus txwv tsis pub muab cov neeg nyob txim tua nyob saum ntoo cuam ntxiv.

– Koos Taas Tis Nus txwv tsis kheev hlawv hlau los ntaus cim rau saum cov neeg nyob txim hauv pliaj, yog vim nws hais tias “Huab Tais Ntuj tau tsim neeg lub ntsej muag kom zoo li Huab Tais Ntuj lub.”

– Nyob hauv ib tsev neeg, nyem no tus txiv yuav tsum saib sawv daws yog neeg. Tus txiv yuav tsum tso nyias coj nyias lub siab me ntsis. Tus tswv tsev yuav tsis saib cov neeg nyob hauv nws lub tsev zoo li lub cuab tam uas yog nws tug xwb. Nws yuav nco ntsoov hais tias tas sawv daws muaj tsim zoo li nws.

– Kom tseem hwv pab cov me nyuam tsis muaj niam muaj txiv.

– Koos Taas Tis Nus tshaj hais tias cov qhev lawv yeej muaj ib lub siab ib lub ntsws zoo li tus tswv, yog li yuav tsis kheev cov tswv yuam cov qhev uas lawv sib yuav ua txij ua nkawm kom sib tso tseg, tsis kheev cov tswv coj cov qhev tej me nyuam mus muag rau luag tej nyob ntawm cov tswv siab.

– Muab txim hnyav rau cov neeg mus zes luag poj luag sev, cov yuav niam yau, cov nyiag luag tej ntxhais coj mus ua poj niam.

Thaum ntawd, ‘As Lis Yus’ tshaj tias tus tseem Tswv Ntuj kawg yog Huab Tais Leej Txiv tib leeg xwb, hos Yes Xus tsuas yog ib tug neeg muaj lub siab ntshiab dawb huv xws li ib tug neeg xwb, nws tsis yog Tswv Ntuj. Hais txog Leej Ntuj Plig Ntshiab, mas yog ib lub zog uas Huab Tais Leej Txiv xa tuaj pab tsoom neeg nyob ntiaj teb no xwb, Leej Ntuj Plig Ntshiab tsis yog Tswv Ntuj.

As Lis Yus cov lus qhia no tsis haum rau txoj kev ntseeg txog Peb Leeg Huab Tais, ces thiaj muaj lus sib cav nyob hauv lub Koom Txoos. Koos Taas Tis Nus pom tias ntev mus, mas qhov teeb meem no yuav ua kev kub ntxhov rau lub teb chaws, nws thiaj hu tas cov Tswv Qhia tuaj sib txoos ua lub Rooj Ncauj Lus nyob Nis Kes (Nicaea) hauv xyoo 325.

Lub Rooj Ncauj Lus zaum no hu tias Rooj Ncauj Lus Nis Kes Ib (The First Council of Nicaea), muaj Tswv Qhia As Les Xas Nros hauv As Les Xas Nrias (Alexander I of Alexandria) ua tus thawj pwm tsav lub Rooj Ncauj Lus, nws tsis pom zoo nrog As Lis Yus zaj tswv yim, ces lub Rooj Ncauj Lus thiaj zeem tseeb tias “Yes Xus yog Tswv Ntuj tseem Leej Tub yug los ua neeg xws li peb tsoom neeg”, thiab tshaj tias “Leej Ntuj Plig Ntshiab kuj yog tseem Tswv Ntuj, vim nws muaj hwj chim loj sib npaug li Huab Tais Leej Txiv.”

Lub Rooj Ncauj Lus tau faib lub Koom Txoos ua 3 lub Cheeb: yog Ceeb Koom Txoos nyob Los Mas, Ceeb Koom Txoos nyob As Les Xas Nros, thiab Ceeb Koom Txoos nyob As Nthias Kias.

Koos Taas Tis Nus muab nyiaj los pab lub Koom Txoos txhim tej lub tsev teev Ntuj zoo nkauj. Nws kom tej tus Leej Choj thiab tej tus Tswv Qhia tuaj nyob hauv nws lub tuam tsev.

Koos Taas Tis Nus nco ntsoov tias nws yuav ua ncaj rau cov neeg teev dab ib yam li nws tau ua rau cov neeg ntseeg Yes Xus, mas nws cia cov Tswv Qhia thiab cov Vaj Qhia kav lub Koom Txoos ntau.

Xyoo 324 Koos Taas Tis Nus txiav tias nws yuav tsim ib lub tsheej tshiab nyob sab hnub tuaj, yog lub tsheej nyob deb ntawm lub nroog Los Mas.

Muaj ib phau ntawv piav tias muaj ib hmo Koos Taas Tis Nus ua npau suav pom ib tug dav kwv ib lub pob zeb, nws tso lub pob zeb poob ncaj rau hauv thaj chaw yuav txhim lub tsheej Koos Taas Tis Nos Pos Lis. Ces  Koos Taas Tis Nus thiaj xaiv thaj chaw ntawd los tsim lub nroog Koos Taas Tis Nos Pos Lis. Tag kis ntawd Koos Taas Tis Nus nqa nws rab ntaj, nws kos ib txog kab nyob hauv av. Yog txoj kab qhia kom txhim lub ntsa zeb xov lub tsheej. Nws kos ib txog kab ntev ntev tsis txawj tag, ces cov neeg nrog nws nyob hais rau nws tias kom nws txhob kos txoj kab ntev dhau. Nws teb tias “Tus ua kuv ntej mus txog qhov twg, mas kuv yuav kos txoj kab kom txog qhov ntawd.” Ua li ntawd tas Koos Taas Tis Nus pib txhim lub nroog.

Tas 6 xyoo, muaj 50 txhiab tawm leej ua hauj lwm tas zog kom tau tsim lub nroog sai sai. Cov teb chaws nyob ib ncig lub hiav txwv Mes Dis Tes Les Nes, tus twg txawj ua tsev zoo, mas Koos Taas Tis Nus hu tuaj ua tsev nyob hauv lub tsheej Koos Taas Tis Nos Pos Lis. Cov nkoj thauj cov pob zeb zoo nkauj tshaj tej, tuaj tas qhov txhia chaw tuaj. Cov txawj txaug mlom nyob ze ntawd, lawv tuaj ua hauj lwm nyob Koos Taas Tis Nos Pos Lis. Koos Taas Tis Nus kuj tso neeg mus sau cov mlom zoo nkauj nyob ntau lub teb chaw thiab lawv nqa tuaj rau Koos Taas Tis Nos Pos Lis. Lawv txhim lub ntsa zeb loj loj ntev li 7 Kis Los Mev xov lub nroog. Nyob Koos Taas Tis Nos Pos Lis tsis muaj dej, lawv ua ib tug ciav dej los rau hauv lub nroog. Tus ciav dej ntawd ntev li 20 km. Nyob hauv lub nroog, lawv txhim ib lub rhawv zeb dav dav ntim dej. Lawv txawb lub rhawv zeb ntawd rau puag saum ib co ncej zeb siab siab. Lub rhawv zeb ntawd tseem nyob txog niaj hnub no.

Thaum lawv ua hauj lwm tas 6 xyoo lawm, mas kuj txhim lub tsheej tiav ntau yam lawm. Tas qhov txhia chaw pom tej lub tsev npauj kub, pom tej lub tshav ua si, pom tus vaj cov tsev, pom cov nom tswv tej tsev zoo nkauj tshiab tshiab. Ces hnub tim 11 lub 5 hlis xyoo 330 tus vaj kom cov Leej Choj thiab cov Tswv Qhia foom hmoov rau saum lub nroog. Sawv daws nquam paj nquam nruas 40 hnub los qhib lub tsheej tshiab Koos Taas Tis Nos Pos Lis.

Tom qab lub nroog Koos Taas Tis Nos Pos Lis tseem muaj lwm lub npe hu ua ‘Npis Xaas’ (Byzantium). Zim txwv no nws hu ua ‘Is Taas Npus’ (Istanbul), zwm rau cov tseem hwv Tws Kis.

Txij xyoo 330 mus, Koos Taas Tis Nus nyob hauv lub nroog Koos Taas Tis Nos Pos Lis ntau. Xyoo 333 nws paub tias tshuav tsis ntev nws yuav tuag, ces nws faib lub teb chaws rau nws 3 tug tub, thiab nws tus kwv ob tug tub. Thaum ntawd Koos Taas Tis Nus muaj 53 xyoo xwb, tsis kav nws faib nws lub teb chaws rau nws cov tub.

Thaum nws ua li ntawd tas, mas nws npaj ib lub ntxa rau nws, nyob hauv lub tsev teev Ntuj, hauv lub tsheej Koos Taas Tis Nos Pos Lis. Niaj hnub nws nco ntsoov tias nws yuav tuag. Tsis nws kav niaj hnub pab nws cov tub kav teb chaws. Xyoo 337 nws tus tub Koos Taas mus ua rog nyob sab hnub tuaj, ces Koos Taas Tis Nus thiaj tso Koos Taas Tis Nos Pos Lis tseg, nws yuav mus pab nws tus tub ua rog. Nws mus tsis txog chaw ua rog, vim tus vaj tuaj ua rog ntawd ntshai Koos Taas Tis Nus, nws tso rog tseg, nws rov qab mus lawm. Thaum ntawd txog lub caij ua lub ntees Hla, Koos Taas Tis Nus thiaj los ua lub Ntees Hla nyob hauv lub tsheej Koos Taas Tis Nos Pos Lis. Yog thaum ntawd nws thiaj pib ua npaws.

Koos Taas Tis Nus mus kho nws tus mob nyob hauv ib lub nroog muaj dej zoo tshuaj, ces nws mus xyuas Yes Xus ib tug tim khawv lub ntxa nyob As Nthias Kias. Koos Taas Tis Nus mob heev zuj zus, nws npaj txais lub Cim Ntxuav. Nws hle nws cov tsho ua vaj tseg, nws hnav cov ntaub dawb xws li cov neeg txais lub Cim Ntxuav, ces tus Tswv Qhia ua lub Cim Ntxuav rau nws. Koos Taas Tis Nus tseem hais tias “Hnub no, kuv thiaj zoo siab tiag. Kuv lub siab tiaj tus.” Ob peb hnub ntxiv, txog hnub tim 22 lub 5 hlis ntuj, xyoo 337 nws tau tas sim neej lawm. Lawv coj Koos Taas Tis Nus lub cev rov qab los rau hauv lub tsheej Koo Taas Tis Nos Pos Lis. Lawv muab nws tso rau hauv  lub ntxa uas nws xub npaj tseg tau 3 xyoos los lawm.

Txij Koos Taas Tis Nus los, mas cov vaj Los Mas yuav nyob Koos Taas Tis Nos Pos Lis ntau, ua li mas cov vaj Los Mas yuav tsis nyob ze Vaj Qhia lawm. Vaj Qhia yuav tau kev ua hauj lwm ywj siab ntau dua. Tab sis cov Tswv Qhia nyob Koos Taas Tis Nos Pos Lis, lawv yuav saib lawv loj cuag li tus Vaj Qhia nyob tim Los Mas. Li ntawd ntev mus thaum muaj chaw sib cav, lawv yuav tsis mloog tus Vaj Qhia nyob tim Los Mas lus.

Thaum ub tseem hwv tsim txom cov neeg ntseeg heev, mas cov neeg txais Yes Xus lub Moo Zoo yog cov neeg nyiam Tswv Ntuj tiag. Tab sis thaum tseem hwv pab lub Koom Txoos, mas coob leej lam txais lub Cim Ntxuav xwb, lawv lub siab tsis tseeg, lawv coj tus yam ntxwv dog dig, lawv tsis tig los yuav lub siab tshiab tiag. Lub Koom Txoos yuav raug xwv txheej phem vim nyem no cov neeg txais lub Cim Ntxuav tsis yog cov neeg muaj lub siab zoo, siab ncaj, xws li yav thaud.

Thaum tseem hwv pab lub Koom Txoos, mas tseem hwv kuj xav kav lub Koom Txoos thiab. Thaum ntawd kuj muaj ntau leej lam txais lub Cim Ntxuav kom tseem hwv cia lawv ua nom, thiab lawv lam ntseeg kom tau kev pab ntawm lub Koom Txoos xwb. Muaj ntau leej hauv lub Koom Txoos thov kom tseem hwv yuam cov neeg tsis ntseeg, kom lawv ntseeg Yes Xus. Lawv thov kom tseem hwv txwv txhob pub cov pej xeem teev tus dab As Pos Los, lawv thov kom tseem hwv tsis txhob kheev cov pej xeem teev cov dab tshiab uas tuaj ntawm cov teb chaws nyob sab hnub tuaj, tuaj.

Yog vim tej no, mas thiaj muaj ib pab neeg ntseeg Yes Xus ncaim ntawm lub Koom Txoos; yam li nyob As Fis Kas teb muaj ib tug hu ua Dos Nas (Donat) nws ncaim ntawm lub Koom Txoos yog vim nws xa xov rau lub koom Txoos nyob As Fis Kas teb kom sawv daws tsis txhob zwm rau lub Koom Txoos nyob tim Los Mas. Thaum lub hauv paus, mas lawv thuam tus Tswv Qhia nyob Kas Tas Nkes (Carthage) tias thaum cov vaj Los Mas hiam lub Koom Txoos, mas cov neeg ntseeg Yes Xus nyob Kas Tas Nkes muaj ntau leej npog tias lawv tsis yog neeg ntseeg, thiab muaj ntau leej tso txoj kev ntseeg pov tseg ib ntus. Tiam sis tus Tswv Qhia nyob Kas Tas Nkes nco ntsoov tias Yes Xus yog ib tug Huab Tais zam txhaum rau neeg, ces nws thiaj li zam rau cov neeg tso kev ntseeg ib ntus.

Tiam sis Dos Nas thuam lub Koom Txoos nyob Kas Tas Nkes, thiab cov koom Txoos nyob tas ntiaj teb. Nws hais tias lub Koom Txoos yog cov neeg tsis tau ua txhaum xwb. Cov neeg uas lawv tau ua txhaum ib zaug lawm, mas lawv tsis nyob hauv lub Kom Txoos lawm. Hais tiag, mas cov nrog Dos Nas lawv kuj muaj txhaum ib yam li luag tej. Tiam sis lawv ua li ntawd vim lawv xav nrhiav ib zag tswv yim kom tau ncaim ntawm lub Koom Txoos xwb. Dos Nas txawj hais lus, txawj ntxias, nws haub tau ntau leej nyob As Fis Kas teb, ces lawv thiaj tsim ib pab ncaim ntawm lub Koom Txoos.

Zaum puav muaj tej pab neeg ncaim yog vim lawv xav txhais Yes Xus lub Moo Zoo raws li lawv lub siab nyiam. Muaj tej tus tsis xav ntseeg Yes Xus cov lus uas nyob hauv phau Ntawv Moo Zoo, ces lawv xaiv saib lawv yuav ntseeg dab tsi thiab tso dab tsi pov tseg. Muaj ib tug hu ua As Lis Yus (Arisus) nyob phab hnub tuaj, nws ntxias tej tus Tswv Qhia uas lawv xav txeeb ua tus hlob, ces lawv tsim ib pab ncaim ntawm lub Koom Txoos.

As Lis Yus yug los ze ntawm xyoo 256 nyob Lis Npias teb uas yog ib lub teb chaws nyob As Fis Kas pej. Xyoo 308 nws ua ib tug Tub Tsob Hwb nyob hauv nws lub Koom Txoos nyob Lis Npias teb. Xyoo 310 nws txais lub cim Tiag Tes tsa nws ua Leej Choj. Xyoo 313 As Lis Yus tuaj nyob hauv lub nroog As Les Xas Nrias, nyob Hais Nkws Tos teb. As Les Xas Nrias yog lub nroog loj dua cov nyob Hais Nkws Tos teb thiab yog lub nroog muaj neeg teev hawm Yes Xus coob tshaj. As Lis Yus ua Leej Choj coj ib pawg neeg ntseeg nyob hauv thaj tsam Npos Kas Lis uas nyob ntug nroog As Les Xas Nrias.

As Lis Yus yog ib tug neeg ntse, txawj nthuav Ntawv Ntshiab yam uas cov ntseeg nyiam tas siab. Nws pib qhia tej yam txawv txog Yes Xus. Nws kuj tsim tej zaj hu nkauj uas yog cov lus nws qhia tej yam tshiab me ntsis txog Yes Xus. Cov  tub hluas ntxhais hluas zoo siab kawm As Lis Yus cov zaj nkauj, lawv tsis to taub zoo pes tsawg tias As Lis Yus qhia tej zaj tsis raug qhov tseeb txog Yes Xus.

As Lis Yus tsuas muab siab rau lo lus tias Huab Tais Leej Txiv lub hwj chim loj tshaj tas txhuas tus tswv ntuj (gods) uas ntau haiv neeg teev nyob ib ncig ntawm lub hiav txwv Mes Dis Tes Las Nes. As Lis Yus thiaj qhia tias tsuas muaj tus Tswv Ntuj tsim lub ntuj lub teb thiaj muaj lub hwj chim ua Leej Txiv. Leej Txiv tib leeg xwb thiaj yog tus Tswv Ntuj ib txwm nyob thiab tsim tas puas tsav yam. Hos Yes Xus tsis yog ib tug Huab Tais ib txwm nyob xws li Leej Txiv. Yes Xus tsuas yog ib tug neeg siab dawb siab huv thiab thoob tsib xwb, tsis yog tseem Tswv Ntuj Leej Tub. Qhov yuam kev loj uas As Lis Yus qhia yog qhov ntawd. Nws txawj siv tej lo lus muaj lub ntsiab tsis meej ces muaj tej tus ntseeg nws cov lus qhia.

As Lis Yus ua zoo li ntawd xya yim xyoo nyob hauv nws lub tsev teev Ntuj.

Xyoo 313 ib tug Tswv Qhia tshiab tuaj coj tas cov Koom Txoos nyob As Les Xas Nrias. Tus Tswv Qhia ntawd hu ua ‘As Les Xas Nros’ (Alexander of Alexandria). As Lis Yus tsis nyiam nws vim As Lis Yus xub vam tias nws yuav tau ua Tswv Qhia saib lub Koom Txoos nyob As Les Xas Nrias.

Tus Tswv Qhia As Les Xas Nros pom meej tias As Lis Yus yuam kev. Cov neeg ntseeg nyob As Les Xas Nrias thov kom tus Tswv Qhia As Les Xas Nros txiav txim rau As Lis Yus. Tus Tswv Qhia tsuas xav kom As Lis Yus rov los ntseeg qhov tseeb txog Yes Xus. Tus Tswv Qhia tsis rawm txiav txim, vim As Lis Yus yog ib tug Leej Choj coj tus yam ntxwv zoo thiab txawj coj ib co kab ke yuam nws lub cev xws li cov neeg nyiam Yes Xus.

Tus Tswv Qhia hu cov Tswv Qhia nyob Hais Nkws Tos teb thiab nyob Aws Los Pas sab hnub poob tuaj sib sau ua ib lub rooj tuav xam nyob As Les Xas Nrias. Muaj 100 tawm tus Tswv Qhia tuaj koom tuav xam. As Lis Yus kuj tuaj. Ob peb tug Tswv Qhia nyiam As Lis Yus zaj kuj tuaj.

Lub rooj tuav xam hais tias yog muaj xws li As Lis Yus qhia, mas tus uas Mab Liab yug yog ib tug neeg xwb. Yes Xus tsis yog Tswv Ntuj Leej Tub. Tus tuag nyob saum Ntoo Cuam yog ib tug neeg xwb. Ib tug neeg yuav them tas ntiaj teb cov txim txhaum puas tau? Tus Yes Xus sawv rov los muaj txoj sia nyob mus li yog ib tug neeg xwb; nws yuav pub txoj sia nyob mus li puas tau rau tsoom neeg ntseeg txog nws? Cov neeg ntseeg xws li As Lis Yus twb tsis ntseeg tias Yes Xus yog ib tug Huab Tais muaj lub hwj chim thiab lub hwj huam loj xws li Huab Tais Leej Txiv, mas lawv tus Yes Xus ntawd yuav ua tus cawm tas ntiaj teb neeg puas tau?

Cov Tswv Qhia tuaj sib sau ua lub rooj tuav xam nyob As Les Xas Nrias tas sawv daws 100 tawm leej pom tias yog Yes Xus tsis ua ib tug Tswv Ntuj xws li As Lis Yus hais, mas lub Koom Txoos txoj kev ntseeg tsis muaj qab hau. Tsuas muaj 3 tug Tswv Qhia tsis to taub As Lis Yus zaj thiaj tuaj As Lis Yus tog. Muaj ib tug hu ua Aws Xes (Eusebius of Nicomedia) thiaj yuav pab As Lis Yus. Aws Xes ua Tswv Qhia nyob hauv lub nroog Nis Kos Mes Dis uas nyob As Xias me, yam li nyob Tws Kis teb. As Lis Yus pom tias cov Tswv Qhia tsis pom zoo txais nws zaj, mas nws tsis nyob As Les Xas Nrias ntxiv. Nws tsiv mus nrog tus Tswv Qhia Aws Xes nyob Nis Kos Mes Dis.

As Lis Yus thiab Aws Xes nyob Nis Kos Mes Dis. As Lis Yus txawj nrhiav tej lo lus mos lus muag cev nws zaj rau ntau tus Tswv Qhia nyob As Xias me. Nws sau tej phau ntawv hais tias cov neeg ntseeg nws zaj yog Tswv Ntuj ib co tseem tub ki, yog Leej Ntuj Plig tshoj lawv lub siab lawv thiaj tuaj nws tog.

Aws Xes xav ua ib tug Tswv Qhia loj dua cov nyob As Xias me, nws rau siab pab nws tus phooj ywg As Lis Yus kom muaj suab npe ncha loj zuj zus. Yog xyoo 313 nkawd thiaj pib ua li ntawd.

Xyoo 313 kuj yog lub xyoo uas cov vaj Los Mas tsa txoj cai tso lus rau tsoom pej xeem xaiv kev teev hawm ywj siab. Tus vaj Los Mas Koos Taas Tis Nus nyiam kev ntseeg Yes Xus. Nws saib cov Tswv Qhia yog tej tus loj ib yam li cov tub tseem hwv txheej siab. Tsoom pej xeem Los Mas thiaj txais kev ntseeg sai kawg. Nyob As Xias me, cov pej xeem 50 feem pua yog cov ua Ntuj kev cai.

Tus vaj Koos Taas Tis Nus kub siab saib lub Koom Txoos zoo li ntawd, nws tsis xav kom tsoom neeg ntseeg sib ncaim ua ob peb tog. Nws yug los nyob ze lub nroog Nis Kos Mes Dis thiab. Nws paub tias muaj lus sib cav nyob hauv cov neeg ntseeg. Nws tsis tsaug zog, vim nws xav kom nws cov pej xeem sib haum xeeb.

Koos Taas Tis Nus yog ib tug vaj txawj kav teb chaws, tab sis nws tsis to taub zoo tias As Lis Yus yuam kev tiag. Nws sau ib tsab ntawv ntev kawg qhuab qhia As Lis Yus thiab tus Tswv Qhia nyob As Les Xas Nrias kom nkawd txhob sib cav. Nws hais tias nkawd ob leeg muaj lub siab ntseeg txog Yes Xus zoo ib yam, vim li cas yuav sib cav sib ceg txog tej lo lus sib txawv me me uas tsoom pej xeem tsis to taub.

Tus vaj Koos Taas Tis Nus sau ib co lus zoo li ntawd, tab sis cov Tswv Qhia pom tias tus vaj tsis to taub zoo txog kev ntseeg Yes Xus. Muaj tej tus pej xeem pib ua ntxhov hnyo nyob hauv tej lub nroog loj. Tus vaj thiaj xa tej tsab ntawv hu cov Tswv Qhia tas huv tib si nyob hauv cov teb chaws zwm rau nws nyob sab hnub tuaj thiab sab hnub poob kom lawv tuaj sib sau ua ib lub ‘Tuam Rooj Ncauj Lus hauv lub nroog Nis Kes’ uas nyob As Xias Me, thaum ntawd yog xyoo 325.

Thaum lub Koom Txoos ua Rooj Ncauj Lus nyob hauv lub nroog Nis Kes. Tus vaj Koom Taas Tis Nus kuj tuaj nrog lawv tuav xam. Lawv hu tas cov Tswv Qhia nyob ntiaj teb tuaj, muaj 318 leej tuaj nyob ua ke. Cov nyob sab hnub tuaj lawv nyob ze, lawv tuaj coob dua cov nyob sab hnub poob. Tab sis cov nyob sab hnub poob yog tej tus neeg tau ua ib lub neej muaj tsim tas nrho, xws li tus Tswv Qhia hu ua Os Xyus (Ossius) uas nws yug los nyob Xyis Pas Yas teb. Yav uas cov vaj Los Mas quab yuam lub Koom Txoos nws tau raug lawv ua phem rau nws lub cev. Sawv daws pom tias nws tej tes tej taw muaj tej kab caws pliav. Os Xyus lub cev muaj zog kawg nws ua neej nyob 100 tawm xyoo. Os Xyus kuj yog ib tug tim xyoob pab tus vaj Koos Taas Tis Nus xav tswv yim. Os Xyus pom tseeb kawg tias As Lis Yus yuam kev.

Thaum cov Tswv Qhia sawv daws tuaj txog Nis Kes tus vaj Koos Taas Tis Nus zoo siab. Nws tso siab rau cov Tswv Qhia muaj hwj chim uas yav tas lawm lawv tau nyob ruaj nreb tiv kev quab yuam.

As Lis Yus tsis tuaj nrog lawv tuav xam nyob Nis Kes, tiam sis nws muaj ob peb tug npawg ua Tswv Qhia tuaj. Cov Tswv Qhia saib As Lis Yus cov ntawv hais txog Yes Xus, mas lawv tsis nyiam. Vim As Lis Yus xav qhia sawv daws hais tias Yes Xus tsis yog ib tug Huab Tais muaj hwj chim li Huab Tais Leej Txiv. Yes Xus yog neeg xwb. Yog muaj li ntawd tiag, mas Yes Xus kawg yog ib tug neeg tuaj dag lub ntiaj teb thiab nws tsis tau them ntiaj teb neeg cov txhaum. Cov Tswv Qhia thiaj tau txiav tias yog leej twg xav nyob hauv lub Koom Txoos, mas tus ntawd yuav tsis txhob ntseeg As Lis Yus zaj.

Cov Tswv Qhia kuj sib pab tsim ib zag ntseeg uas tas lub Koom Txoos yuav hais nyob hauv cov txoos teev Ntuj niaj Hnub Chiv. Yog Nis Kes Zaj Ntseeg uas lub Koom Txoos Kav Tos Liv tseem siv txog tav no.

Thaum cov Tswv Qhia sab laj tas nyob Nis Kes lawv nyias rov mus nyias lub nroog. Sawv daws xav tias lub Koom Txoos yuav nyob thaj yeeb. Tab sis As Lis Yus tsis mloog lus. Nws qhia nws zaj mus ntxiv, ces As Lis Yus thiaj ncaim ntawm Yes Xus lub Koom Txoos. Muaj ntau leej mloog As Lis Yus. Muaj qee tus tab meeg qhia As Lis Yus zaj nyob hauv lub Koom Txoos, muaj qee tus nyiag qhia.

As Lis Yus cov thwj tim qhia As Lis Yus zaj mus txog xyoo 500 tej. Lawv muaj tej tus tseem hloov As Lis Yus zaj tswv yim kom ntxim lawv siab, xws li ‘Us Fis Las’ (Ulfila).

Us Fis Las yug los xyoo 311 nyob hauv haiv neeg Vis Xis Nkaus. Nws tau kawm cov txuj Las Tis Nas, cov txuj Hes Las thiab cov txuj Zes Mas Nias. Nws mus nrog tus Tswv Qhia Aws Xes nyob Nis Kos Mes Dis xyoo puav. Aws Xes tsa Us Fis Las ua ib tug Tswv Qhia nyiam As Lis Yus zaj ntseeg.

Us Fis Las rov mus nrog haiv neeg Vis Xis Nkaus nyob, nws txhais phau Ntawv Ntshiab los ua lus Vis Xis Nkaus thiab nws sau tej phau ntawv nthuav Ntawv Ntshiab. Nyob hauv cov Ntawv Ntshiab, Us Fis Las xaiv cov zaj txhib neeg lub siab kom ua siab loj siab tawv, vim cov Vis Xis Nkaus yog ib haiv neeg nyiam ntaus rog thiab nyiam mus txeeb lwm lub teb chaws nyob Aws Los Pas teb, ces cov haiv neeg Vis Xis Nkaus sawv daws kub siab txais kev ntseeg Yes Xus xws li Us Fis Las qhia. Lawv ntau leej tau txais lub Cim Tiag Tes ua Leej Choj. Lawv tsis kawm txuj ntau, tab sis lawv ntseeg ti txha. Lawv teev Ntuj hmo ntuj, lawv tuav tej tes tsau hu nkauj teev Ntuj. Lawv ntseeg tias Huab Tais Leej Txiv loj dua Leej Tub, vim lawv nyiam mloog lawv cov nom coj lawv mus ntaus rog.

Vim Us Fis Las tau tsim ib cov ntawv Vis Xis Nkaus thiab nws tsim Ntuj kev cai xis cov Vis Xis Nkaus siab, mas As Lis Yus kev ntseeg tau vam meej kawg 100 tawm xyoo nyob Aws Los Pas teb. Cov haiv neeg Vis Xis Nkaus mus txog qhov twg, mas lawv coj lawv txoj kev ntseeg Yes Xus raws li Us Fis Las tau qhia rau lawv. Lawv kho As Lis Yus zaj kom xis lawv siab, tab sis lawv hais tias lawv coj As Lis Yus kev ntseeg.

Yog thaum tus vaj Fab Kis Kaws Los Vis txais lub Cim Ntxuav nyob hauv lub Koom Txoos Kav Tos Liv ces As Lis Yus kev teev Ntuj thiaj ploj sai.

Nyob hauv tiam 4 ntawd, muaj ob tug Tswv Qhia tau sau ntawv qhia kev ntseeg ntau tshaj cov: Tus ib yog tus Tswv Qhia nyob As Les Xas Nrias hu ua As Thas Nas (Athanasius of Alexandria), tus ob yog Tswv Qhia His Las Yus (Hilary of Poitiers) nyob hauv lub nroog Puas Ces (Poitiers) Fab Kis teb.

As Thas Nas tiv cov As Lis Yus nyob As Les Xas Nrias. Thaum lawv ua Rooj Ncauj Lus nyob Nis Kes, As Thas Nas tuaj, tiam sis nws tsis tau ua Tswv Qhia, nws yog ib tug Xib Hwb xwb. Nws paub txuj ci ntau, nws lub siab ntse, nws pom meej dua sawv daws tias As Lis Yus yuam kev loj kawg. Thaum ntawd As Thas Nas muaj 30 xyoo. Thaum nws muaj 33 xyoos, tus Tswv Qhia nyob As Les Xas Nrias tuag, cov ntseeg mus nrhiav As Thas Nas los ua lawv tus Tswv Qhia. As Thas Nas ua Tswv Qhia ib ntus ntev li 45 xyoos nws thiaj li tuag.  Tas nws sim neej nws khwv kawg, nws tau tiv cov yeeb ncuab, nws tsis tau txoj kev nyob dawb nyob huv ib zaug li.

Thaum nws nyuam qhuav ua Tswv Qhia nyob As Les Xas Nrias, yog xyoo 328 cov As Lis Yus thiab tas cov ncaim ntawm lub Koom Txoos lawv paub tias As Thas Nas yog ib tug neeg tiv cov neeg ncaim heev tshaj luag tej, ces lawv ntxub As Thas Nas. Lawv mus hais tej tus Tswv Qhia nyob sab hnub tuaj tias yog tsis txo As Thas Nas, mas lub Koom Txoos nyob As Les Xas Nrias yuav kav tas cov Koom Txoos nyob sab hnub tuaj. Tog As Lis Yus thiaj tau tsa ib lub Rooj Ncauj Lus nyob Tws Los, yog xyoo 335. Lawv liam rau As Thaj Nas tias As Thas Nas tau hais kom luag muab ib tug neeg As Lis Yus tua pov tseg. Lawv kuj liam tias As Thas Nas nyiag yuav ib tug poj niam tuaj nrog nws nyob ib ntus. Ces lawv muab nyiaj los xiab ib tug poj niam kom nws liam rau As Thas Nas. Tiam sis cov neeg ntxub As Thas Nas yuav raug txaj muag loj kawg.

Muaj ib hnub lawv cia li pom tus neeg uas lawv hais tias As Thas Nas muab tua pov tseg, los tshwm. Thiab tus poj niam uas lawv muab nyiaj xiab kom nws hais tias nws tau nrog As Thas Nas nyob ib ntus, mas tus poj niam ntawd tau qhia sawv daws tias nws nrog ib tug Tswv Qhia uas tuaj txiav txim rau As Thas Nas.

Tab yog muaj li ntawd, mas cov ntxub As Thas Nas kuj yuav txo As Thas Nas xwb, ces lawv lub siab thiaj nqig. As Thas Nas thiaj mus txog Koos Taas Tis Nos Pos Lis, nws mus hais rau Koos Taas Tis Nus tias cov As Lis Yus siab nkhaus. Tiam sis nyob hauv tus vaj Koos Taas Tis Nus lub tsev twb muaj ntau leej tsis nyiam As Thas Nas, vim As Thas Nas ua tau dua lawv. Ces Koos Taas Tis Nus kom As Thas Nas mus nyob hauv lub nroog Res Vaws, (Treves) nyob Zes Mas Nias teb 2 xyoos. Yog zoo li Koos Taas Tis Nus muab txim rau As Thas Nas. Tiam sis As Thas Nas kuj tsis cav, nws thiaj mus tshaj Ntuj lus nyob Res Vaws. Tas nws sim neej nws tseem yuav mus nyob txim 4 zaug ntxiv.

Xyoo 337 As Thas Nas rov qab los ua Tswv Qhia nyob As Les Xas Nrias, cov yeeb ncuab rov qab ua lus rau nws. Tus vaj thiaj xa nws mus nyob Is Tas Lias teb sab pej 2 xyoos. As Thas Nas tsis ntshai. Thaum nws raug tej qho nyuaj zoo li ntawd, mas nws cia li luag ntxhi, nws hais tias “Tsis ntshai, kawg yog tej twv huab yuav dua ntais xwb.”

Thaum nws mus nyob Is Tas Lias teb thiab nyob Nkas Lias teb, zaum ntawd nws tau qhia tas teb chaws txog txoj kev ua Txiv Twj Cuab.  Thaum ntawd nyob Hais Nkws Tos teb muaj ntau leej pib xaiv lub neej ua Txiv Twj Cuab. As Thas Nas thiaj qhia txoj kev ua txiv twj cuab rau cov neeg ntseeg Yes Xus nyob sab hnub poob.

Xyoo 346 As Thas Nas rov qab los nyob As Les Xas Nrias, nws tau zoo nyob 10 xyoo, tsis muaj leeej twg ntiab nws. Yog lub caij ntawd, mas As Thas Nas thiaj tau sau ntawv ntau tas nrho. Nws tej ntawv hais txog yam twg, tsav twg, los muaj. Cov ntau yog cov ntawv teb rau cov ncaim ntawm lub Koom Txoos. Tiam sis nws tseem khoom ua tej phau ntawv hais txog txoj kev ua Nkauj Tsim Txiaj Nyob Tab Seeb. Nws sau tej ntawv nthuav cov zaj Nkauj Paj Nruag, tej ntawv piav txog tus Txiv Twj Cuab Tuam (Antony of Egype) lub neej, huv tib si.

Thaum lub Koom Txoos ua Rooj Ncauj Lus nyob Mis Las Nos xyoo 355 As Thas Nas cov yeeb ncuab ua zaj ua ntxeev kom Koos Taas Tis Nus rov txo As Thas Nas ib zaug ntxiv. As Thas Nas thiaj khiav mus tsiv nraim nyob teb chaws quav poj, nyob Hais Nkws Tos teb. Nws nrog cov Txiv Twj Cuab nyob tau 6 xyoo. Tus vaj cov tub rog nrhiav tsis tau nws. Niaj hnub As Thas Nas sau ntawv ntuas cov neeg ntseeg nyob Hais Nkws Tos teb thiab sau ntawv teb rau cov tuaj tog As Lis Yus. Nws tej ntawv mus txog qhov txhia chaw, tus twg kuj xav nyeem.

Thaum nws mus nyob teb chaws suab puam, mas nws kuj tau kav lub Koom Txoo ib yam li thaum nws nyob hauv lub nroog As Les Xas Nrias.

Thaum tus vaj Koos Taas Tis Yus Ob (Constantius II) tuag lawm, mas As Thas Nas rov qab los nyob As les Xas Nrias dua, nws hu cov Tswv Qhia coob coob tuaj ua lub Rooj Ncauj Lus nyob As Les Xas Nrias. Sawv daws tuaj. Cov tuaj, mas yog cov mob siab rau lub Koom Txoos txoj cai, thiab xav txuag Yes Xus lub Moo Zoo. Lawv ua Rooj Ncauj Lus, mas lawv sau ntawv mus hais rau tas ntiaj teb tias tus twg xav nyob hauv lub Koom Txoos, mas nws yuav tsis txhob ntseeg As Lis Yus zaj, yog xyoo 362 thaum ntawd As Thas Nas nto moo li ib tug Xib Hwb qhia tas lub Koom Txoos. Sawv daws paub tias lub Koom Txoos cov pej xeem  tsis tau ncaim mus ntseeg As Lis Yus zaj, yog vim muaj As Thas Nas tau siv nws lub tswv yim ntaus rog tas zog tiv cov As Lis Yus.

As Thas Nas tseem tau mus nyob txim ob zaug ntxiv, tsis ntev pes tsawg, tiam sis xyoo 373 nws tuag. Thaum nws tuag lawm, mas nws yog tus nto koob meej tshaj huv tib si hauv lub Koom Txoos. As Thas Nas sim neej nws tau ua ob yam meej kawg: Yam ib As Thas Nas sau ntawv tiv cov As Lis Yus, nws tsis hais tej lo lus tob tob, nws hais tej qhov ncaj ncaj uas sawv daws yuav mloog tau sai; yam ob, As Thas Nas hais rau cov Tswv Qhia sawv daws, kom lawv tsis txhob ua tus vaj Los Mas cov qhev. Tab yog thaum lawv tab tom ua lub Rooj Ncauj Lus nyob As Les Xas Nrias, tus vaj cov neeg kuj nyob ntawd, mas As Thas Nas tab meeg hais rau sawv daws tias “Cov vaj Los Mas tsis muaj cai kav lub Koom Txoos. Cov Tswv Qhia uas mloog cov vaj Los Mas, mas lawv zoo li tus vaj Los Mas cov neeg sam.” 

As Thas Nas yog thawj tus Tswv Qhia uas tab meeg tiv cov vaj Los Mas. Tiam sis yuav muaj ntau leej ua raws li As Thas Nas xub tau ua los lawm. 

Yog vim As Thas Nas ua siab tawv tas zog, nws tsis cia lub Koom Txoos swb cov yeeb ncuab ib zaug, mas lub Koom Txoos thiaj hwm As Tshas Nas ua Leej Ntshiab, txawm tias nws tsis tau tuag ua tim khawv.

Hais txog ‘His Las Yus’, nws yog tus tiv cov As Lis Yus nyob Nkas Lias teb (Gaul). His Las Yus yog ib tug Tswv Qhia. Xyoo 317 His Las Yus yug los nyob hauv lub nroog Puas Ces (Poitieres) nyob Nkas Lias teb, nws niam nws txiv teev dab. Nws txiv yog ib tug nom loj. His Las Yus tau kawm ntau yam txuj. Thaum His Las Yus tseem hluas nws tau nyeem ntawv piav txog ntau yam txuj. Muaj ib hnub nws ntsib ib phau ntawv txawv tej, yog Zam phau ntawv Moo Zoo. Thaum nws nyeem thawj zag tas, mas nws poob siab nthav. Lo lus ua kom nws poob siab yog lo lus no: “Leej Lo Lus yuav ib lub cev neeg. Leej Lo Lus nrog peb nyob.”

Niaj hnub His Las Yus xav txog Tswv Ntuj nqes los ua neeg, nws qhuas kawg. Tau ob peb xyoos tom qab no ces nws cia li txais lub Cim Ntxuav. Xyoo 355 tas cov neeg ntseeg txog Yes Xus nyob Puas Cas, sawv daws xav yuav His Las Yus los ua lawv tus Tswv Qhia. Thaum ntawd, nyob Nkas Lias teb muaj ib pab As Lis Yus tuaj haub ntxias sawv daws kom sawv daws yuav As Lis Yus zaj. His Las Yus thiaj li hu cov Tswv Qhia tuaj ua Rooj Ncauj Lus nyob Pas Lis (Paris). Cov Tswv Qhia txiav tias yuav tsis kheev leej twg tuaj qhia As Lis Yus zaj nyob Nkas Lias teb. Tiam sis tus vaj Koos Taas Tis Yus Ob nyiam tog As Lis Yus me ntsis, ces cov As Lis Yus mus thov tus vaj kom nws pab lawv. Tus vaj Los Mas thiaj xa His Las Yus mus nyob Fis Zias teb, nyob deb ntawm Nkas Lias teb.

His Las Yus nyob Fis Zias teb, nws sau ntawv tuaj ntuas cov neeg ua Ntuj kev cai nyob hauv nws lub tsheej Puas Ces. Nws kuj kawm cov Tswv Qhia nyob sab hnub tuaj tej ntawv hais txog kev ntseeg Yes Xus. Nyob nyob, His Las Yus nto koob meej loj zuj zus nyob sab hnub tuaj. Tus vaj Koos Taas Tis Yus Ob thiaj xav tias cia His Las Yus rov qab los nyob Puas Ces li qhov qub. His Las Yus thiaj rov qab mus nyob Puas Ces. Tam sim ntawd nws rov qab sau ntawv tiv tog As Lis Yus. Nws kuj ntuas teb chaws kom sawv daws nyiam txoj kev ua Txiv Twj Cuab nyob Nkas Lias. Nws mus xyuas cov zej zog nyob ncig Puas Ces.  Nws sau ntawv ntau ntau, yog tej ntawv qhia kev ntseeg, tej ntawv nthuav Ntawv Ntshiab. Tas nws sim neej nws ua hauj lwm tas zog, nws tsis so li. Thaum His Las Yus tuag lawm, mas sawv daws saib nws yog Leej Ntshiab. Muaj ntau lub zos thiab ntau lub nroog nyob Nkas Lias teb lawv yuav nws lub npe His Las Yus.

Yog vim muaj tej tus xav txhob txwm qhia qhov yuam kev txog Yes Xus, mas cov Tswv Qhia thiab cov Xib Hwb thiaj tau mob siab sau tej phau ntawv piav kev ntseeg txog Yes Xus meej meej. Yog vim muaj tej pab xav ncaim, mas cov Tswv Qhia thiaj tau sib sau los ua tej lub Rooj Ncauj Lus. Lawv tau sib ntsib, lawv tau sib pab tiv cov xav ncaim. Yog vim muaj tej pab ncaim, mas sawv daws thiaj paub tias yuav tsum muaj ib tug ua tus tswj loj dua sawv daws. Yog vim muaj tej pab ncaim, thiab vim tus vaj Los Mas xav mloog cov ncaim, ces cov Tswv Qhia thiab tas lub Koom Txoos thiaj li tau pom meej tias lub Koom Txoos yuav mloog tsis tau tus vaj Los Mas. Lub Koom Txoos yuav tsum mloog tus Vaj Qhia thiab cov Tswv Qhia xwb.

Yog vim muaj tej pab ncaim ntawm lub Koom Txoos, mas nyob hauv cov pab ncaim ntawd lawv kuj rov qab sib ncaim thiab sib ntxub, ces lub Koom Txoos thiaj tau pom meej tias sawv daws yuav tsum koom ib lub siab thiab ntseeg ib zag kev cai xwb. Sawv daws pom tias tus twg tsis mloog cov Tswv Qhia thiab tsis mloog tus Vaj Qhia, mas tus ntawd kuj tsis tau nyob ruaj hauv lub Koom Txoos ib zaug.

Yog thaum lub Koom Txoos mloog Vaj Qhia thiab mloog cov Tswv Qhia, mas lub Koom Txoos muaj zog dua thaum ub, thiab nyob ruaj nreb dua thaum ub.

Nyob Los Mas xeev ntuj, muaj qee teb chaws uas cov neeg ua Yes Xus kev cai yuav luag tas; yam li nyob Tws Kis teb thiab nyob Hais Nkws Tos teb, mas ib nrab ntau twb ua Yes Xus kev cai lawm. Nyob Is Tas Lias teb kuj yog zoo li ntawd thiab. Muaj qee teb chaws uas cov neeg teev dab coob dua cov neeg ua Yes Xus kev cai; yam li nyob Nkas Lias teb, nyob Is Npes Lias teb, nyob Is Tas Lias sab Pej.

            Cov nom tswv Los Mas lawv muab siab rau txheeb lawv cov pej xeem, tsis kav lawv tsis tau ceeb toom ib zaug hais tias lawv teb chaws muaj pes tsawg leej ntseeg txog Yes Xus. Tiam sis peb kwv yees tau hais tias nyob Los Mas xeev ntuj cov pej xem ib feem peb ua Yes Xus kev cai tas. Tas cov pej xeem huv tib si muaj 100 plhom leej neeg. Ua li mas cov ua Yes Xus kev cai ntshai muaj li 30 plhom tawm leej neeg.

            Dhau Los Mas xeev ntuj kuj tseem muaj neeg ua Yes Xus kev cai thiab. Ib haiv neeg ntseeg txog Yes Xus coob hauj sim yog cov Nkaus, tab sis lawv ua As Lis Ys tog ntau; vim thaum lawv pib ua Yes Xus kev cai, mas lawv tus Tswv Qhia mus ntsib cov As Lis Yus, ces thaum tus Tswv Qhia ntawd rov qab mus nws teb chaws, mas nws tsim ib lub Koom Txoos raws li cov As Lis Yus txoj cai. Tiam sis ntev mus, cov Nkaus yuav hloov los nyob hauv lub Koom Txoos. Cov Nkaus lawv nyob Zes Mas Nias teb, lawv yog ib haiv neeg siab tawv, lawv ua ib co tub rog muaj hwj xyeej kawg, lawv tuaj ntaus cov tub rog Los Mas zaum twg, mas lawv yeej xwb.

Yog xyoo tim 300 tus vaj As Mes Nias txais kev ntseeg txog Yes Xus, ces cov pej xeem muab lawv cov tsev teev dab los hloov ua tsev teev Ntuj. Thaum ntawd cov Txiv Dab tig los ntseeg, thiab lawv kawm Yes Xus lub Moo Zoo, lawv cia li ua Leej Choj ntseeg Yes Xus. 

Thaum ntawd nyob Is Laas teb muaj 40 tawm tus Tswv Qhia, tiam sis cov vaj yuam cov neeg ntseeg Yes Xus, ces muaj 16,000 leej tuag ua Yes Xus tim khawv. Thaum tiam 4 yuav tas, mas cov vaj thiaj tso lus tias tus twg xav ntseeg Yes Xus kuj tau.

Nyob Es Thias Pias teb (Ethiopia) lawv pib ntseeg Yes Xus. Muaj ntawv kwv huam piav txog kev ntseeg mus txog Es Thias Pias teb zoo li no: Muaj ib zaug, ib co Xib Hwb nyob Tws Los nrog ib co laus pav caij nkoj deg mus xyuas pej kum teb, lawv coj 2 tug hluas nrog lawv mus xyuas As Fis Kas teb. Thaum lawv rov qab los, lawv so nyob hauv ib lub nroog Es Thias Pias. Ob tug hluas ntawd mus yos ua si hauv lub nroog lawm, ces txawm muaj ib co tub sab tuaj lwg lub nkoj, thiab muab cov tub tswj nkoj tua tuag tas. Ob tug tub hluas ntawd ciai li tsis tau kev rov qab los lawv lub teb chaws lawm. Cov neeg nyob hauv lub nroog ntawd pom 2 tug hluas, mas lawv hlub kawg. Lawv coj nkawd mus rau tus vaj. Ob tug tub hluas ntawd paub lus Hes Las zoo, thiab nkawd paub txuj ci, ces tus vaj thiaj cia nkawd ua ob tug kws ntawv. Nkawd kawm lus Es Thias Pias. Ob tug hluas ib txwm yug los nyob hauv txoj kev ntseeg Yes Xus. Tus vaj nyiam nkawd, vim nkawd yog neeg ntse. Thaum tus vaj tuag lawm, tus poj vaj tsa tus tub hluas hu ua ‘Fus Maas’ (Frumentius) kav Es Thias Pias teb, thiab qhia txuj ci rau tus me nyuam vaj uas nws tseem yau yau. Fus Maas pab kav teb chaws, nws kuj qhia Yes Xus lub Moo Zoo rau ntau leej nyob hauv tus vaj lub tsev. Nyob nyob, Fus Maas thiaj thov mus xyuas Hais Nkws Tos teb. Nws mus cuag Tswv Qhia As Thas Nas nyob As Les Xas Nrias, nws piav rau As Thas Nas tias nyob Es Thias Pias teb muaj ntau leej ntseeg txog Yes Xus, thiab cov nom kuj muaj ntau leej ntseeg Yes Xus. Tab sis tsis muaj ib tug Leej Choj, ces tsis muaj ib tug yuav kav lub Koom Txoos nyob Es Thias Pias li. Fus Maas thov kom As Thas Nas xa ib co Tswv Qhia mus nyob Es Thias Pias teb. As Thas Nas cia li tsa Fus Maas ua Tswv Qhia, saib lub Koom Txoos nyob Es Thias Pias teb. Fus Maas rov qab los nyob Es Thias Pias teb, nws ua lub Cim Ntxuav rau tus vaj tshiab.

Tas Fus Maas sim neej nws tshaj Ntuj Lus, nws tau tsim lub Koom Txoos nyob Es Thias Pias teb. Es Thias Pias teb tseem ntseeg Tswv Ntuj los txog tav no. Tab sis lawv tau nyob ntau pua xyoo uas tsis nrog lub Koom Txoos sib fim, ces lawv ua neeg ntseeg txawv lub Koom Txoos me ntsis. Lawv muaj lawv cov kab ke teev Ntuj phim cov txuj nyob hauv lawv lub teb chaws, yog cov kab ke teev Ntuj Es Thias Pias.

Thaum tiam 4 ntawd, mas nyob As Las Npias teb kuj muaj tej pab neeg txais Yes Xus lub Moo Zoo. As Las Npias teb ntseeg txog Yes Xus, mas yog vim cov Es Thias Pias thiab cov Hais Nkws Tos tuaj qhia lawv. Tab sis nyob As Las Npias tsis muaj neeg ntseeg Yes Xus coob.

Cov neeg nyob nruab liaj nruab teb pib txais Yes Xus lub Moo Zoo. Lawv txais Yes Xus lub Moo Zoo lig dua cov nyob hauv nroog. Tos lawv zoo li ntawd kuj yog vim tsis muaj neeg mus qhia lawv, thiab lawv vam txog cov dab pab lawv ua liaj ua teb thiab pov hwm lawv. Thaum sawv daws tso txoj kev teev cov dab Los Mas nyob hauv nroog pov tseg, mas cov neeg nyob nruab liaj nuab teb tseem yuav teev lawv cov dab ntev xyoo ntxiv. Tsis kav lub Koom Txoos kuj tso neeg mus qhia cov nyob nruab lij nruab teb. Muaj ntau leej mus qhia Tswv Ntuj Lo Lus rau cov neeg teev dab. Thaum lawv nyuam qhuav mus, mas yuav muaj ntau leej tuag ua Yes Xus tim khawv. Tiam sis ntev mus, cov neeg nyob nruab liaj nruab teb kuj txais kev ntseeg txog Yes Xus. Tus qhia lawv ntau tshaj yog ‘Mas Tis Nus’ (Martin).

Thaum Koos Taas Tis Nus tso cai rau tsoom pej xeem hauv lub tuam teb Los Mas ntseeg txog Yes Xus lawd, kev tsim txom tsoom ntseeg muaj tsawg zuj zus tuaj, ces ua rau tsis muaj cov neeg tuag ua tim khawv ntxiv lawm. Tsoom ntseeg thiaj tig los xyaum ua lub neej ‘Txiv Twj Cuab’ (Hermit) thiab ‘Niam Twj Cuab” (Hermitess).

Cov Txiv Twj Cuab yog cov neeg yuam lawv lub siab kom mus taug txoj kev dawb huv. Lawv tsis ntshaw ntiaj teb lub cuab tam, thiab tso kwv tij neej tsa tseg, lawv nyiam teev Ntuj ntau ntau. Thaum ub cov His Xas Lais, muaj tej pab Txiv Twj Cuab hu ua ‘Es Xes Nias’. Lawv tau ua ib lub zos hu ua ‘Kws Maws Las’, nyob ze lub pas dej hiav txwv hu ua ‘Hiav Txwv Tuag’.

Cov Txiv Twj Cuab yog cov neeg tsis xav nyob xyaw tsoom sid, vim lawv xav kom lawv tau kev nco txog Tswv Ntuj ntau. Lawv tsis xav kom muaj ntau yam hauj lwm tuaj txob lawv, lawv tsis xav kom niaj hnub muaj tej pab neeg tuaj ntsib lawv los tuaj nrog lawv tham ua si tas zog. Lawv xav txais Ntuj lus kom ntau dua luag tej. Yog vim li ntawd, mas nyob hauv Yes Xus lub Koom Txoos thiaj muaj ib co neeg txiav siab ua Txiv Twj Cuab coob kawg. Nyob hauv Yes Xus lub Koom Txoos muaj ntau leej hauj sim xav mus ua Txiv Twj Cuab, yog vim lawv tsis xav kom muaj dab tsi tuaj txob lawv, ces lawv thiaj tau kev xav txog Ntuj ntau dua; lawv xav xaiv ib txoj kev them txim txhaum zoo li Yes Xus.

Thaum cov nom tswv Los Mas tseem hiam lub Koom Txoos, mas muaj cov Txiv Twj Cuab tsis tshua coob pes tsawg, yog vim cov neeg ntseeg twb tau kev them txim txhaum ntau, lawv tau kev tuag ua Yes Xus tim khawv. Txij thaum tsis muaj neeg tuag ua Yes Xus tim khawv lawm, mas thiaj li muaj ntau leej xav xaiv ib txog kev yuam lawv lub cev thiab yuam lawv lub siab kom nyob ze Tswv Ntuj heev dua.

Lub teb chaws xub muaj Txiv Twj Cuab coob dua, mas yog Hais Nkws Tos teb, lawv mus ua Txiv Twj Cuab nyob teb chaws suab puam.

‘Paj Lug nyob Tis Npis’ (Paul of Thebes)yog thawj tus Txiv Twj Cuab nyob hauv Hais Nkws Tos teb. Paj Lug yug xyoo 227 thaum muaj 16 xyoo nws txiv tuag ces nws tus yawm yij txeeb nws lub cuab tam, ces xyoo 250 Paj Lug thiaj khiav mus tsiv nraim nyob hav suab puam Tis Npis. Paj Lug ua lub neej twj cuab nyob hauv ib lub qhov tsua, nws noj cov txiv xyoob cawm siav thiab muab tej nplooj ntoos los ua tshoo tsho hnav. Thaum Paj Lug muaj 43 xyoos, thiaj muaj ib tug uab lag niaj hnub nqa ib sab ncuav mov tuaj rau Paj Lug noj mus txog thaum nws ncaim lub ntiaj teb.

Xyoo 342 Paj Lug los ua npau suav rau tus Txiv Twj Cuab ‘As Nthos Nyus’ (Anthony the Great) lus Hmoob hu ua ‘Tuam’, ces Tuam thiaj mus nrhiav tau Paj Lug hauv teb chaws suab puam Tis Npis. Nkawd koom ua kab ke lov mov thiab sib hloov tswv yim ib hnub ib hmos, ces Tuam thiaj mam rov qab los rau nws qhov chaw nyob.

 Tom qab ntawd Tuam rov mus xyuas Paj Lug, tab sis nws twb tuag lawm, Tuam thiaj muab Tswv Qhia As Thas Nas lub tsho coj los kho rau Paj Lug hnav thiab muab Paj Lug faus. Tuam nqa Paj Lug lub tsho nplooj kuj yem nrog nws los.

‘Tuam’ yog tus Txiv Twj Cuab nto moo loj tshaj nyob Hais Nkws Tos teb. Tuam yug los nyob hauv lub nroog Maas Fis, nyob Hais Nkws Tos teb, xyoo 250. Nws tsev neeg yog ib tsev neeg nplua nuj. Thaum nws muaj 20 xyoo lawm, nws txiv tuag, nws thiaj tau txais nws txiv lub cuab tam. Muaj ib hnub Tuam hnov luag tej nyeem zaj Ntawv Moo Zoo hais txog tus tub hluas tuaj nug Yes Xus tias “Xib Hwb, kuv yuav ua dab tsi kuv thiaj muaj Ntuj txoj sia?” Yes Xus teb rau tus tub hluas ntawd tias “Koj muab koj lub cuab tam los faib rau cov neeg pluag.”

Thaum Tuam hnov lo lus ntawd, mas yog zoo li nws hnov Yes Xus hais lus rau nws, ces tam sim ntawd nws muab nws cov av muag tas huv tib si, nws muab cov nyiaj los faib rau cov neeg pluag. Tuam hnov tias nyob ze ntawm nws lub nroog muaj ib tug yawg laus ua Txiv Twj Cuab, nws mus nrog tus yawg laus ntawd nyob. Niaj hnub nws nrog tus yawg laus xyaum kav nws lub tswv yim thiab yuam nws lub cev kom nco txog Tswv Ntuj mus li. Nkawd nyob hauv ib lub qhov tsua nyob ze ntawm ntug nroog. Tsis ntev, nkawd nto moo loj dhau, ces muaj neeg coob tuaj xyuas nkawd, tuaj thov kom nkawd qhia. Ntev mus muaj neeg xav ua Txiv Twj Cuab raws li nws. Lawv tuaj nrog nws nyob hauv nws lub yeej. Nws ua sawv daws txiv. Nws coj sawv daws ua lub neej nyob hauv txoj kev nyiam Ntuj.

Tiam sis ntev mus Tuam xav rov nyob nws tib leeg xwb, ces Tuam khiav mus peb hnub peb hmos, nyob hauv teb chaws suab puam. Nws mus txog ib lub qhov dej me me hu ua Kos Xus, nyob hauv plawv teb chaws suab puam. Tuam nyob ntawd tau 40 xyoo. Muaj ob tug thwj tim nrog nws nyob ua nws luag. Thaum txog xyoo 356 Tuam lub hnub nyoog muaj 105 xyoos lawm, ces nws tuag nyob ntawd.

Tswv Qhia As Thas Nas tau tuaj nrog Tuam nyob ib ntus, ces nws sau piav txog Tuam lub neej raug dab phem tuaj ntxias ntau zaus tias:

Dab phem txia ua nab, ua neeg, ua tej tus noog loj loj, ua zaj, ua tej tus tsiaj taub hau neeg lub cev nees tuaj ntxias Tuam. Dab phem xav hiam Tuam, mas dab phem ua lub ntiaj teb qeeg, los tseem ua lwm yam ntxiv. Dab phem txia ua zoo li ib tug neeg tuaj tsham Tuam.

Dab phem txia ua Xib Hwb tuaj qhia tej yam yuam kev txog Ntuj kev cai rau Tuam kom Tuam txhob ntseeg txog Ntuj kev cai zoo. Dab phem tuaj ntxias Tuam kom mus taug txoj kev plees kev yi.

Cov neeg mus ua Txiv Twj Cuab zoo li Tuam, mas lawv yuav tsum muaj ib lub siab loj siab tawv tiag, lawv thiaj yuav nyob tau mus tas ib sim neej. Lawv tsis tau kev nrog leej twg tham, tsis muaj leej twg pab lawv taug txoj kev nyiam Tswv Ntuj, tsis muaj leej twg ua lawv luag nyob hauv txoj kev xyaum ua neeg siab ntshiab. Yog vim li ntawd, mas cov Txiv Twj Cuab thiaj tau los sib sau ua tej pab tej pawg kom tau kev sib qhia sib pab. Tus xub tau tsim txoj kev ua Txiv Twj Cuab nyob ua tej npoj yog ‘Paj Kos’ (St. Pachomius the Great).

Paj Kos yug los xyoo 292 nyob Hais Nkws Tos teb, nws tsev neeg teev dab qhuas. Thaum Paj Kos muaj 20 xyoo tej nws paub Yes Xus lub Moo Zoo, nws txais lub Cim Ntxuav.

Xyoo 318-323 Paj Kos nrog ib pab npawg zoo siab ua Txiv Twj Cuab mus nyob hauv ib lub qub zos, lawv tsim lub zos npoj Txiv Twj Cuab (Monastery). Lawv nyias ua nyias me nyuam tsev nyob, lawv ua laj kab xov lub zos tsis pub cov nyob sab nraud tuaj hla lub laj kab, lawv hnav ib lub tsho ntaub maj ntev tsis muaj tes, lawv sia ib txog siv tawv nyuj, npua ib daig tawv tshis; lub caij ntuj no lawv kuj hnav ib lub tsho khuam.

Niaj hnub lawv ua hauj lwm, lawv muaj txoj cai tu lawv lub sij hawm nruab hnub thiab hmo ntuj, thiab tas niaj tas xyoo. Lawv muaj txoj cai yoo mov. Lawv yuam lawv lub cev thiab yuam lawv lub siab. Tab sis lawv txoj cai tsis pub yuam lub cev heev dhau, tsam yus muaj mob. Lawv muaj lub caij kawm ntawv, kawm txuj. Niaj lis piam lawv tuaj mloog cov Xib Hwb piav txog Ntawv Cog Qub Lus thiab piav txog Ntawv Cog Lus Tshiab. Niaj hnub lawv muaj tej lub caij uas nyias teev nyias Ntuj, muaj tej lub caij uas lawv ua ke teev Ntuj. Lawv sawv daws nyiam teev Ntuj tas ib sid.

Thaum Paj Kos tseem nyob nws pom nws npoj Txiv Twj Cuab huaj vam kawg. Tas huv tib si muaj tshaj 7,000 leej.

Txawm tias ntau zaus Paj Kos tuaj qhia Ntuj kev cai rau cov zov yaj nyob ib puag ncig nws lub zos, tsis kav nws tsis tau txais Cim Tiag Tes ua Leej Choj. Yog li thaum Tswv Qhia As Thas Nas tuaj tsham Paj Kos, nws xav kom Paj Kos txais Cim Tiag Tes ua Leej Choj, thaum ntawd yog xyoo 333 tiam sis Paj Kos tsis xav ua Leej Choj ces nws thiaj tsis kam ntsib Tswv Qhia As Thas Nas.

 Tsis yog Hais Nkws Tos teb xwb thiaj muaj Txiv Twj Cuab, tas cov teb chaws nyob sab hnub tuaj, mas kuj pom cov Txiv Twj Cuab tuaj nyob.

Nyob Pas Les Tis Nas, nyob ze ntawm lub roob Xis Nais, nyob Mes Xos Pos Tes Mias teb, cov Txiv Twj Cuab nyob ua tej npoj teev Ntuj thiab nyob ua neeg siab ntshiab raws li Leej Ntshiab Paj Kos qhia rau sawv daws. Nyob As Las Npias teb, kuj muaj tej pab Txiv Twj Cuab ua neeg zov yaj. Nyob hauv lub nroog Koos Taas Tis Nos Pos Lis lawv kuj xov tej lub loog cia rau cov Txiv Twj Cuab nyob.

Cov poj niam kuj tau ua Niam Twj Cuab, tab sis lawv pib ua lig dua cov txiv neej me ntsis xwb. Paj Kos tus muam hu ua ‘Mab Liab’ (Mary of Egypt)  tau tsim ob npoj Phauj Twj Cuab nyob Hais Nkws Tos teb. Nyob Yes Lus Xas Les, muaj ib tug poj niam hu ua ‘Mes Las Nias’ tau tsim ib npoj Phauj Twj Cuab nyob rau Yes Xus lub teb chaws.

Hais txog cov Txiv Twj Cuab nyob sab hnub tuaj, mas muaj Npas Xis (Basil the Great) ua tus tsim.

Tswv Qhia ‘Npas Xis’ yug xyoo 330 nyob hauv lub nroog Xes Ntxas Les (Caesarea) uas nyob Kas Pas Dos (Cappadocia), Tws Kis teb. Thaum Npas Xis hnub nyoog muaj 19 xyoos tej, nws mus kawm txuj nyob hauv lub tuam ceeb Koos Taas Tis Nos Pos Lis thiab lub nroog As Thes Nas. Thaum nws tab tom kawm ntawv, mas nws tsis tau txais lub Cim Ntxuav. Nws kawm ntawv tiav, mas nws rov los nyob hauv nws lub nroog, nws npaj siab ua ib tug nom kom nws lub npe thiaj yuav nto moo. Leej Ntshiab Npas Xis muaj ib tug muam hu ua Mas Qhis. Mas Qhis yog ib tug neeg ntseeg tau ntev xyoo los lawm. Nws ntseeg Ntuj zoo kawg. Nws muaj ib lub siab dawb huv. Nws ntuas Npas Xis tias “Ua cas koj lub siab pheej xeeb rau ntau yam nyob ntiaj teb no? Koj yuam kev loj kawg! Ua cas koj tsis nco qab txog peb tej yawg koob uas lawv tau ntseeg txog Yes Xus. Lawv tuaj yeem tuag ua tim khawv txog Yes Xus lub Moo Zoo?”

Mas Qhis cov lus ntawd raug Npas Xis siab kawg, ces Npas Xis swb nws tus muam cov lus. Li ntawd, Npas Xis thiaj txais lub Cim Ntxuav. Tom qab Npas Xis txais lub Cim Ntxuav tas, mas nws pib hnov tej yam tseeb hauv nws nruab siab zoo cuag li nws rov yug los tshiab. Ces nws muab tas nws lub cuab tam muag, nws mus nyob ib qho xu kev thiab nws pib coj lub neej twj cuab. Npas Xis txhob txwm ua li ntawd kom nws tau ua lub neej npuab Tswv Ntuj. Tsis ntev tom qab, mas muaj ib pab txiv neej tuaj nrog nws koom nyob ua ke. Lawv thiaj tsim ib pab Txiv Twj Cuab.

Npas Xis mus xyuas Paj Kos nyob Hais Nkws Tos, nws coj Paj Kos cov cai coj cov Txiv Twj Cuab los siv rau nws pab Txiv Twj Cuab. Tab sis Npas Xis kho tej qho ntxiv. Nws txiav hais tias cov Txiv Twj Cuab yuav tsis txhob nyob ua tej pab coob dhau, ua li mas tus tswj (Abbot) thiaj tau kev ntuas sawv daws zoo. Tswv Qhia Npas Xis xav kom sawv daws xyaum nyiam txoj kev ua neeg me, ua neeg siab ntev, ua neeg sis nyiam sis hlub. Tswv Qhia Npas Xis kuj tau txiav tias ib pab Txiv Twj Cuab twg kuj yuav tsum muaj ib lub tsev kawm ntawv nyob hauv lawv lub loog.

Xyoo 362 Npas Xis hnub nyoog muaj 33 xyoos. Tus Tswv Qhia uas saib pawg ntseeg hauv lub nroog Xes Ntxas Les hu Npas Xis tuaj nrog nws nyob, thiab kom Npas Xis pab saib pawg ntseeg. Npas Xis saib cov ntseeg tau ib ntus ces nws thiaj li txais lub Cim Tiag Tes ua Leej Choj.

Xyoo 370 tus Tswv Qhia hauv lub nroog Xes Ntxas Les tau tas sim neej, ces Npas Xis thiaj ua Tswv Qhia. Nws tsim tej txoj cai teev Ntuj thiab ua lub Txoos Txi Ntuj.

Npas Xis muab siab rau txhawb nqa cov neeg txom nyem thiab cov neeg pluag. Muaj ib hnub Npas Xis hnov tias nyob hauv nws lub nroog muaj ib tug yawg laus laus thiab pluag pluag, nws tsis muaj nyiaj los yug nws tsev neeg. Tus yawg laus ntawd thiaj muag nws ib tug tub mus ua luag qhev. Thaum Npas Xis hnov txog qhov ntawd, mas nws tu siab kawg, ces niaj hnub Chiv nws ntuas tsoom ntseeg nyob hauv tsev teev Ntuj hais tias “Cov mov seem, mas nej muaj ntau. Nej noj tsis tas li tiag! Thov nej muab nej cov mov seem pub rau cov neeg tshaib noj los mas. Nej cov mov seem yuav yog lawv tug. Tej ris tsho uas nej muaj, mas nej cia li muab pub rau cov neeg txom nyem uas tsis muaj ris tsho hnav. Nej tej nyiaj txiag uas nej muab faus hauv av, mas nej yuav muab pub rau cov neeg pluag. Hais qhov tseeb, mas nej tej nyiaj txiag yeej yog cov neeg pluag lawv ntiag tug thiab.”

Npas Xis txhib tsoom ntseeg thiab cov tsis tau ntseeg kom sawv daws tuaj sib sau ua zaub mov ua ke thiab nqa mus faib rau cov neeg txom nyem noj. Npas Xis kuj koom nrog sawv daws ua zaub ua mov thiab ua hauj lwm. Tsis tas li ntawd xwb, nws kuj npaj tej yam tshuaj mus pab kho cov neeg muaj mob thiab nws thov Ntuj pab rau cov neeg uas lawv yuav tso lub ntiaj teb no tseg.

Npas Xis nrog 200 tawm tus Tswv Qhia koom siab tiv cov yuav As Lis Yus zaj tswv yim. Npas Xis sau ntau phau ntawv los nthuav qhov tseeb hauv kev ntseeg. Cov phau ntawv ntawd qhia meej kawg nkaus, ces qhov kawg cov neeg uas lawv txoj kev ntseeg txawv thiaj tsawg zuj zus.

Npas Xis hais tias “Yog peb cia Leej Ntuj Plig Ntshiab kav peb tej siab ntsws, mas Leej Ntuj Plig Ntshiab yeej ua tau tej yam loj kawg nkaus hauv peb nruab siab, piv li nws pub kom peb tso siab rau peb Txiv tus uas khuv leej neeg tas nrho nyob saum ntuj. Leej Ntuj Plig Ntshiab tseem pub kom Tswv Ntuj kev pom kev ci ntsa iab hauv peb nruab siab. Qhov kawg, mas Leej Ntuj Plig Ntshiab tseem pub peb txais Tswv Ntuj lub hwj chim los ua peb ntiag tug nyob pem Tswv Ntuj lub Ceeb Tsheej thiab.” Npas Xis kuj hais txog cov Tshiab pov hwm neeg tias “Peb txhua tus neeg ntseeg nyias muaj nyias ib tug Tshiab uas pov hwm nyias tag mus li. Tus Tshiab ntawd yog tus tuav peb tes thiab coj peb kev kom xwv muaj ib hnub peb tau txais txoj sia nyob mus li nyob pem Tswv Ntuj lub Ceeb Tsheej.”

Npas Xis tau tas sim neej xyoo 379 yog 2 xyoos ua ntej lub Rooj Ncauj Lus nyob Koos Taas Tis Nos Pos Lis.

Cov Txiv Twj Cuab nyob sab hnub poob muaj Mas Tis Nus ua tus pib.

‘Mas Tis Nus’ (Martin) yug nyob Hoos Nqias teb (Hangary). Nws txiv yog ib tug thawj tub rog nrog tus vaj Los Mas. Tas nws tsev neeg teev dab. Thaum Mas Tis Nus muaj 10 xyoo nws nyiam Yes Xus, nws kawm Yes Xus lub Moo Zoo. Thaum nws muaj 14 xyoos, nws xav ua hauj lwm nyob hauv lub Koom Txoos. Tiam sis nws txiv kom nws ua tub rog.  Thaum Mas Tis Nus ua tub rog, nws kuj kawm Tswv Ntuj lo lus ntxiv, thiab nws nyiam Tswv Ntuj zoo heev. Muaj ib hnub thaum nws tuaj ua tub rog nyob hauv lub nroog As Mis Yees (Amiens) nyob Nkas Lias teb (Gaul), nws ntsib ib tug neeg thov khawv no no, tshee tshee, nyob ntawm kev. Mas Tis Nus nco ntsoov tias yog nws mloog Yes Xus lub Moo Zoo, mas phim nws yuav pab luag tej. Ces nws thiaj xuas nws rab ntaj los txiav nws lub tsho, nws muab ib sab rau tus neeg thov khawv hnav. Ib tsam tsaus ntuj Mas Tis Nus ua npau suav pom Yes Xus yees tawm tuaj xyuas nws, Yes Xus hnav lub tsho uas Mas Tis Nus tau muab rau tus neeg thov khawv hnav. Thaum Mas Tis Nus muaj 20 xyoo, nws txais lub Cim Ntxuav. Nws thov cov tub rog loj kom lawv tso nws tawm. Tus tub rog loj cem cem Mas Tis Nus tias vim nws ntshai ua tub rog, nws thiaj li yuav tawm. Mas Tis Nus teb tias “Kuv coj Yes Xus tus ntoo cuam, kuv tsis ntshai yeeb ncuab.”

Mas Tis Nus thiaj mus nrog tus Tswv Qhia His Las Yus nyob hauv lub nroog Puas Ces. Yog xyoo 323 nws nrog His Las Yus nyob, nws tau kawm Yes Xus cov lus ntau, nws paub txoj kev ua neeg siab ntshiab. His Las Yus xav tsa Mas Tis Nus ua Tub Tsob Hwb. Mas Tis Nus tsis kam, vim nws xav tias nws tsis tsim nyog ua Tub Tsob Hwb nyob hauv lub Koom Txoos. Niaj hnub nws pab His Las Yus tshaj Tswv Ntuj lo lus.

Muaj ib hnub, Mas Tis Nus rov qab nco txog nws niam nws txiv uas tseem ua dab nyob Hoos Nqias teb, nws cia li tso His Las Yes tseg, nws xav mus qhia nws niam nws txiv kom paub Tswv Ntuj Lo Lus, kom nkawd nrog nws ntseeg Yes Xus. Nws niam tau nrog nws ntseeg Yes Xus sai.

Mas Tis Nus yuav nyob ntxiv ze ntawm tus dej Das Nws. Tiam sis muaj ib hnub nws yuav tsum khiav mus nyob Is Tas Lias teb. Nyob Is Tas Lias teb sab pej, Mas Tias Nus ntsib cov neeg ntseeg coj tog As Lis Yus, nws nrog lawv sib cav ntau. Ntev mus, nws yuav nyob tsis tau ntawd, rau qhov cov As Lis Yus xav ua phem rau nws. Ces Mas Tis Nus thiaj tau mus nyob hauv ib lub pov txwv, nws thiaj xyaum ua Txiv Twj Cuab ib ntus. Mas Tis Nus hnov tias Tswv Qhia His Las Yus mus nyob txim nyob Tws Kis rov qab los nyob Puas Ces lawm, Mas Tis Nus thiaj rov los nrog His Las Yus nyob.

Mas Tis Nus qhia txoj kev ua Txiv Twj Cuab nyob Nkas Lias teb, nws tsim ob lub tsev ua Txiv Twj Cuab nyob Nkas Lias teb. Ib lub yog nyob Lis Nkws Zes (Liguge), ib lub yog nyob Mas Mus Ces (Marmoutier).

Nyob nyob, tus Tswv Qhia nyob hauv lub nroog Tuj (Tours) tuag, cov neeg ntseeg nyob Tuj thov kom  Mas Tis Nus tuaj ua Tswv Qhia nyob hauv lawv lub nroog. Mas Tis Nus hais tias nws tsis tsim nyog ua. Nws tsis mus. Tiam sis cov neeg nyob Tus tuaj nyiag ntes Mas Tis Nus coj mus txog Tuj. Ib co Tswv Qhia cia li tsa Mas Tis Nus ua Tswv Qhia. Tiam sis qee leej tsis tshua pom zoo, vim lawv ntshai tsam Mas Tis Nus ua ib tug Tswv Qhia tsis muaj hwj chim, nws hnav dab hnav tuag, tsis tu cev kom zoo. Tiam sis txog hnub nws ua Tswv Qhia mas nws kuj txawj ua tus neeg muaj hwj chim thiab. Tsis ntev Mas Tis Nus xav tias nws yuav mus tshaj Yes Xus lub Moo Zoo rau cov neeg nyob nruab liaj nruab teb, uas lawv nyob deb ntawm cov nroog loj. Cov neeg ntawd tseem coj dab xwb, ces Mas Tis Nus caij nees mus qhia cov neeg nyob tsis deb tsis ze ntawm lub nroog Tuj. Nws mus txog lub zos twg mas nws qhia sawv daws thiab nws tsa ib lub Koom Txoos me. Thaum cov pej xeem huab hwm mloog Mas Tis Nus tag, ob peb hnub lawv muab lawv tej lub tsev teev dab los hloov ua tej lub tsev ntseeg Yes Xus. Mas Tis Nus txawj ua hwj huam yees ntxwv ntau, nws lub koob meej nto mus txog tas qhov txhia chaw.

Thaum xyoo 397 Mas Tis Nus lub hnub nyoog muaj 81 xyoo lawm, nws mus tshaj Ntuj Lus nyob hauv ib lub zos hu ua Kaas, ces nws mob npaws, nws paub tias nws yuav tuag, nws pom nws cov thwj tim ntxhov siab nyob ncig nws, nws hais rau Tswv Ntuj tias “Huab Tais, yog koj tseem xav yuav kuv lub zog los qhia koj cov neeg, mas kuv tsis yig li.” Ces nws pom cov dab phem nyob ncig nws, nws hais rau cov dab phem tias “Nej ua dab tsi ntawm no? Nyob hauv kuv, tsis muaj dab tsis ua nej tug.” Ces Mas Tis Nus tuag.

Mas Tis Nus sim neej nws tau ua hauj lwm nyob hauv lub Koom Txoos ntau kawg. Nyob Nkas Lias teb cov ntseeg pib ua tej lub tsev Txiv Twj Cuab, yog vim Mas Tis Nus xub tsim txoj kev ua Txiv Twj Cuab. Cov zej zog nyob Nkas Lias teb pib txais kev ntseeg, yog vim Mas Tis Nus tau ua ib tug piv txwv zoo rau cov tub tshaj Ntuj Lus, kom sawv daws muab siab rau qhia cov neeg nyob nruab liaj nruab teb. Mas Tis Nus tau ua li ntawd, mas muaj ntau leej ua raws li nws tus lwj lwm. Tas Nkas Lias teb thiaj tau txais kev ntseeg, thiab lub Koom Txoos thiaj tau ri mus puv Nkas Lias teb.

Tas cov teb chaws nyob sab hnub poob sawv daws hwm Mas Tis Nus ua thawj tus ‘Txiv Lees Ntseeg’ (Confessor). Sawv daws cav txog nws sib npaug li cav txog cov Hauv Paus Xa Lus.

Muaj tej tus Txiv Twj Cuab kuj tau ua tej yam tsis zoo pe tsawg los ua piv txwv rau sawv daws yoog; yam li lawv noj dab noj tuag, lawv hnav phem dhau. Qee pab Txiv Twj Cuab lawv tsis tshua tseem neeg twj cuab kuj muaj, vim lawv cia cov neeg nruab zog tuaj tsham lawv ntau dhau. Qee leej Txiv Twj Cuab tsis tshua mloog cov Tswv Qhia, qee leej Txiv Twj Cuab tsis tau kawm Ntuj kev cai ntau thiab tsis tshua paub Ntawv Ntshiab zoo. Tab sis nyob hauv cov Txiv Twj Cuab cov ntau, lawv tau pab cov neeg ntseeg ntau kawg.

Nyem no nyob tas ntiaj teb, cov neeg xav mus raws txoj kev ua neeg siab ntshiab, mas niaj hnub lawv yuav ua txoj ntsuas siab. Cov xub xyaum ua dua yog cov Txiv Twj Cuab, lawv tau tsim ntau phau ntawv qhia sawv daws kom txawj ua txoj ntsuas siab.

Tau ntau pua xyoo los lawm, cov neeg ntseeg kuj tau hais rau cov xav ua Ntuj kev cai zoo, hais tias lawv yuav xaiv ib tug txiv coj ke.

Cov neeg xub xaiv tej tus txiv coj ke, mas yog cov Txiv Twj Cuab. Pab Txiv Twj Cuab twg kuj muaj ob peb tug txiv coj ke; cov txiv coj ke ntawd lawv txawj qhia txawj ntuas sawv daws kom mus raws txoj kev ua neeg siab ntshiab, lawv paub neeg lub siab lub tswv yim zoo, lawv kuj sau ntawv ntau hais txog txoj kev ua txiv coj ke. Los txog tav no, tsoom neeg ntseeg niaj hnub ntuas sawv daws kom vam txog cov txiv coj ke. Zaj txuj ci ntawd yog tuaj ntawm cov Txiv Twj Cuab tuaj.

Nyem no peb niaj hnub pom cov Leej Choj thiab cov Phauj ntau pab, lawv muaj tej phau ntawv teev Ntuj tas niaj tas xyoo, mas yog cov Txiv Twj Cuab tau tsim txoj kev teev Ntuj ntawd.

Thaum cov vaj Los Mas haim cov neeg ntseeg, mas cov neeg tuag ua Yes Xus tim khawv yog zoo li cov neeg thov Ntuj txiaj ntsim rau tas tsoom neeg ntseeg, lawv yog cov them Ntuj cov txiaj ntsim tus nqe. Thaum dua lub caij tseem hwv hiam cov neeg ntseeg lawm, mas cov Txiv Twj Cuab lawv yog cov neeg thov Ntuj txiaj ntsim tuaj pab tas tsoom neeg ntseeg, lawv yog pab neeg kub siab teev Ntuj.

Tiam 5 thiab tiam 6 muaj tej haiv neeg qus yuav txeem tuaj hauv cov teb chaws zwm rau Los Mas ua Ntuj kev cai. Txheej laus thaud tej ntawv thiab tej txuj ci yuav tsis ploj tas, yog vim cov Txiv Twj Cuab lawv ua tej lub tsev kawm ntawv mus li thiab lawv nyob xu kev. Yuav muaj ib lub caij uas xeev ntuj nyob ncig lub hiav txwv Mes Dis Tes Las Nes yuav ntxoov yuav tsaus, tiam sis tseem tshuav cov Txiv Twj Cuab yuav kawm txuj ci li qhov qub, mas cov neeg ntseeg thiaj li yuav muaj tej tus Tswv Qhia txawj coj sawv daws kev, sawv tseem hwv chaw los kav teb chaws. Cov Txiv Twj Cuab ntawd zoo li pab neeg uas tau cawm xeev ntuj Mes Dis Tes Las Nes ntawm txoj kev txom nyem, kev tsaus ntuj, kev ruam.

Thaum cov nom tswv tseem hiam lub Koom Txoos, cov neeg ua Ntuj kev cai nyias teev nyias Ntuj nyob hauv nyias lub teb chaws, lawv tsis sib sau los ua ke teev Ntuj nyob hauv tej lub nroog loj. Txog thaum Koos Taas Tis Nus tso lus teev Ntuj nyob ntawm siab tau, cov neeg ua Ntuj kev cai sib sau los ua tej pab loj teev Ntuj, lawv sib sau los ua tej lub txoos coob coob; tiam sis ib txwm nyias lub teb chaws hais nyias xeem lus los teev Ntuj. Yog vim li ntawd, mas thaum lub caij ntawd, ib lub teb chaws muaj dua ib hom kab ke teev Ntuj, tsis muaj tej lub txoos txawj tsim tej kab ke teev Ntuj zoo saib dua thiab zoo mloog dua.

Vim li ntawd, thaum tiam plaub yuav tas, nyob hauv lub Koom Txoos thiaj muaj 4 yam kab ke teev Ntuj loj uas sawv daws yuav zuj zus: yog cov kab ke teev Ntuj raws As Nthias Kias thiab Yes Lus Xas Les, cov kab ke teev Ntuj raws As Les Xas Nrias, cov kab ke teev Ntuj raws Nkas Lias teb, thiab cov kab ke teev Ntuj raws Los Mas.

Cov neeg ua Ntuj kev cai nyob As Xias teb yuav cov kab ke raws li As Nthias Kias, tiam sis ib lub teb chaws kuj tseem ua txawv ib lub teb chaws me ntsis thiab. Cov ua Ntuj kev cai nyob Es Thias Pias thiab nyob Hais Nkws Tos teb ua cov kab ke teev Ntuj raws li As Les Xas Nrias. Cov kab ke teev Ntuj raws Nkas Lias teb ri mus txog Is Tas Lias teb sab pej thiab Nplaws Tas teb, thiab Is Npes Lias teb.

Tas cov teb chaws ua Ntuj kev cai sawv daws saib zaj txi Ntuj yog thawj zaj teev Ntuj tiag xws li Yes Xus ib txwm qhia. Thaum lub hauv paus, tseem hwv tsis tso lus kheev ua Ntuj kev cai, mas cov ua Ntuj kev cai lawv ua Thaj Txi Ntuj nyob tej qhov chaw muaj neeg ua Ntuj kev cai nyob coob hauv cov nroog; ntau zaus yog cov Tswv Qhia ua Thaj Txi Ntuj xwb, cov Leej Choj nyob ncig Tswv Qhia nrog Tswv Qhia txi Ntuj.

Tiam plaub, mas cov zej zog thiab cov nroog lawv txi Ntuj tas qhov txhia chaw. Niaj hnub chiv cov Leej Choj txi Ntuj. Ces nyob nyob muaj tej pab neeg xav teev Ntuj ntau dua los lawv xav ua ib Thaj Txi Ntuj nco txog tej Leej Ntshiab, thiaj li muaj qee hnub tsis yog hnub chiv los lawv kuj txi Ntuj. Nyob nyob muaj ntau tus Leej Choj lawv niaj hnub txi Ntuj.

Ib Thaj Txi Ntuj muaj ib ntus txais Ntuj Lus thiab ib ntus txi Ntuj. Lawv ua ntu txais Ntuj Lus, mas muaj ib zag Nkauj Paj Nruag qhib lub Txoos Txi Ntuj, muaj zaj ‘Huab Tais Leej Txiv aib!, zaj ‘Nyob pem Ntuj’, nyeem ‘tsab ntawv’, nyeem ‘Ntawv Moo Zoo’, ntuas sawv daws, thiab hais zaj ‘kuv ntseeg txog Tswv Ntuj’. Ua li tas mam pib ua ntu txi Ntuj li niaj hnub no.

Thaum ua Thaj Txi Ntuj nyob hauv cov tsev teev Ntuj, lawv muab ntaub muab tswm ciab thiab muab ntau yam los ua kom zoo saib. Tiam sis tus Leej Choj tseem tsis tau muaj tej tsho txawv los hnav txi Ntuj, lawv hnav zoo li cov nom tswv Los Mas xwb. Tus Leej Choj tig ntsej muag ntsia tsoom neeg tuaj sib txoos txi Ntuj. Sawv daws sawv ntsug teev Ntuj kom tas ib Thaj Txi Ntuj.

Ib xyoos twg, mas lub Koom Txoos muab lub caij Yes Xus tuag thiab sawv rov los saib loj dua cov, sawv daws muab siab rau nco txog Yes Xus cawm lub ntiaj teb neeg. Ua ntej yuav txog hnub Yes Xus cawm ntiaj teb neeg, mas tsoom ntseeg npaj siab ua hmoov plaub caug hnub ua ntej. Plaub caug hnub ntawd lawv muaj kab ke yoo mov, lawv nquag txi Ntuj thiab kawm Ntuj cov lo lus nyob hauv Ntawv Ntshiab. Thaum txog lub lis piam Yes Xus tuag, lawv haj yam caiv; Hnub Rau, mas lawv tsis noj mov. Hmo Yes Xus sawv rov qab los, lawv zov hmo; ces thaum kaj ntug lawv zoo siab vim lawv tau ntseeg txog Yes Xus zoo dua lawm thiab lawv tau pom tej pab neeg tshiab nyuag qhuav txais lub Cim Ntxuav. Tas ib ntus tsib caug hnub lawv thiaj ua Thaj Txi Ntuj cav txog lub hnub nyoog Hla mus txog lub hnub nyoog Leej Ntuj Plig nqes los. Ua lub hnub nyoog Hla tas tau 40 hnub, cov coj Ntuj kev cai mam ua lub hnub nyoog Yes Xus mus saum ntuj.

Cov ua Ntuj kev cai nyob As Xias teb pib ua lub hnub nyoog Yes Xus yug los nyob hauv hnub tim 6 lub 1 hlis. Lawv cav txog Yes Xus yug los nyob hauv ib lub tsev teb, tiam sis lawv hais txog cov kws hnub qub tuaj hwm Yes Xus thiab lawv cav txog Yes Xus tawm tuaj rau lub ntiaj teb pom ntau dua. Ib hnub lawv cav txog 2 lub hnub nyoog; yog Yes Xus yug los thiab Yes Xus tawm tuaj.

Cov ua Ntuj kev cai nyob sab hnub poob cav txog Yes Xus yug los nyob hauv ib lub tsev teb ntau dua, lawv ua hmoov Yes Xus yug los nyob hauv hnub tim 25 lub 12 hlis. Lawv teem caij rau hnub ntawd vim yog hnub cov neeg teev dab nyob Los Mas nquam paj nquam nruas teev lub hnub yeej qhov tsaus ntuj. Ua li mas thaum teb chaws ua Ntuj kev cai coob zuj zus, cov neeg ua Ntuj kev cai thiaj muab lub hnub nyoog teev lub hnub los cav txog Yes Xus yug los vim Yes Xus yog lub hnub tuaj ua kom lub ntiaj teb yeej qhov tsaus ntuj.

Hais txog cov nkauj cav txog Tswv Ntuj, thaum lub hauv paus, yog ib tug hais nws zaj nkauj ua ntej, ces tas sawv daws rov qab hais ib lo lus txais zoo li qub; ntau zaus lawv hais ‘As Mees’ los hais ‘As Les Lus Yas’. Thaum tus ua ntej hais nws zaj tas, sawv daws ua ke hais zaj ‘Peb Leeg Huab Tais muaj koob meej’ tias “Huab Tais Leej Txiv, Huab Tais Leej Tub, Huab Tais Leej Ntuj Plig muaj koob meej nto moo lug, lub zim txwv no mus txog fab lwm txheej, xws li txheej laus thaud los. Ua li.”

Yog thaum cov As Lis Yus xav tias Yes Xus yog ib tug Huab Tais me dua Huab Tais Leej Txiv, mas lub Koom Txoos thiaj pib hais zaj ‘Peb Leeg Huab Tais muaj koob meej’, kom tau pab sawv daws hwm Huab Tais Leej Tub ib yam li Huab Tais Leej Txiv.

Txog tiam plaub, thaum lawv hais cov Nkauj Paj Nruag los teev Ntuj, lawv faib ua 2 sab; ib sab hais ib txog kab, lwm sab hais lwm txoj kab. Ob sab sib teb li ntawd mus li kom tas zaj.

Tab sis muaj tej tus Tswv Qhia pib tsim tej zaj tshiab. Tus tau tsim ntau dua cov yog tus Tswv Qhia As Npuag (Ambrose) nyob Mis Las Nos. Nws tau tsim ntau zaj uas peb tseem hais los txog tav no, zoo li cov zaj hu nkauj Qhib Hnub.

Thaum tseem hwv tsis kheev ua Ntuj kev cai, mas cov neeg ntseeg ua tsis tau tej lub tsev teev Ntuj loj, lawv tsuas npaj tej kem tsev me me nyob hauv lawv tsev kom sawv daws tau kev los sib sau teev Ntuj ua ke, lawv sau duab nyob ntawm phab ntsa los pab lawv kom ntseeg ruaj. Cov ua Ntuj kev cai kuj ua tej qhov chaw teev Ntuj nyob hauv cov toj ntxas ‘Nkas Tas Nkoos’ (Catacomb).

Muaj tej lub caij cov nom tswv Los Mas tsis tshua hiam cov neeg ua Ntuj kev cai, mas lawv thiaj pib ua tej lub tsev teev Ntuj loj hauj sim, tab yog lub caij Koos Taas Tis Nus tseem tsis tau tso lus ua Ntuj kev cai, mas lub nroog twg twb muaj tej lub tsev teev Ntuj lawm. Tab sis lub caij ntawd, cov neeg ua Yes Xus kev cai ua tsis tau nyob ntawm lawv siab; ua tsev teev Ntuj, mas lawv ua me me thiab ua tsawg.

Txog thaum Koom Taas Tis Nus tso lus, lawv thiaj pib ua cov tsev teev Ntuj loj nyob hauv cov tsheej muaj cov neeg ntseeg ntau. Qhov twg muaj ib pab neeg ntseeg txog Yes Xus, mas lawv ua tsev teev Ntuj. Nyob hauv cov tsheej lawv ua tej lub tsev teev Ntuj loj lojo. Lawv sib twv saib leej twg li yuav zoo nkauj dua. Yav thaud lawv muab siab rau ua tej lub tsev teev dab kom zoo saib, nyem no lawv muab siab rau ua tej lub tsev teev Ntuj.

Thaum lawv ua tsev teev Ntuj, lawv ua lub tsev ntev ntev zoo li cov tsev ua kab xwm thiab tej lub xwm fab xwm meem zoo li cov tsev txiav txim. Yam li nyob ze ntawm lub qhov rooj txuas; muaj ib kem cia rau ris tsho, ib kem cia tso yam ub yam no thaum yuav los hauv lub tsev. Tog rooj txuas no hu ua ‘kem rau ris tsho’. Nyob hauv lub nrog tsev muaj 2 leej ncej txheem lub ruv, lub nrog tsev no ntev ntev.

Thaum txog hnub sawv daws tuaj sib sau txi Ntuj nyob hauv lub tsev teev Ntuj, mas lawv sib faib zoo li no: cov neeg tab tom kawm kev cai thiab cov neeg tau ua txhaum, mas lawv tuaj sawv nyob ntawm tog rooj txuas, nyob hauv lub nrog tsev, mas tas tsoom neeg txais lub Cim Ntxuav thiab ua Ntuj kev cai nyob, nyob ntawm lub txoos sab hauv ntej ua 2 kem; ib kem cia rau cov Tub Tsob hwb thiab cov Xib Hwb nyob thiab ib kem cia rau cov Leej Phauj nyob, ntawm tog rooj tag muaj ib lub rooj nyob saum lub sam thiaj cia ua lub thaj txi Ntuj, nyob ntawm lub thaj txi Ntuj ob sab muaj lub rooj cia rau tus Leej Choj zaum, hos tus Tswv Qhia, mas zaum lub theej kiab tom tog tsev.

Cov ntsa tsev muaj duab sau txog ib puas tsav yam hauv Ntawv Ntshiab thiab cov Leej Ntshiab lub neej nyob sab hauv thiab sab nraud. Lawv txaug tej daim duab hais txog Yes Xus nqes los txiav txim rau lub ntiaj teb, los ua tej daim duab hais txog Yes Xus nrog cov thwj tim nyob. Cov ua Ntuj kev cai muab cov duab ntawd lo rau saum tej qhov muag tsev. Lawv kuj txaug tej tus mlom raws li cov zaj nyob hauv Ntawv Moo Zoo. Ua li mas nyob hauv tiam plaub no, sawv daws sib pab tsim ib lub teb chaws cav txog Huab Tais Ntuj.

Tiam plaub muaj coob leej paub txuj ci ntau, lawv pib ua Yes Xus kev cai. Lawv tau kawm txuj ci nyob hauv cov tsev kawm ntawv Los Mas, ntau zaus lawv tau kawm txoj kev ua nom tiam sis lawv ua Xib Hwb los ua Tswv Qhia. Cov Los Mas txheej thaud, lawv txawj sau tej lo lus zoo tas nrho uas los txog tav no tsis tau muaj neeg tau ua zoo dua lawv, cov ua Yes Xus kev cai kuj tau kawm lawv tej ntawv. Cov Xib Hwb thiab cov Tswv Qhia ua tej ntawv hais txog Yes Xus kev cai raws li Xis Xes Los (Marcus Tullius Cicero) thiab Vis Zis (Virgil) lawv tus piv txwv los xwb. Tiam plaub, mas cov neeg teev dab Los Mas lawv tsis muaj tus txawj ua ntawv muaj tsim xws li txheej thaud lawm; cov yuav ua ntawv nto moo loj kawg yog cov nyuam qhuav pib ua Yes Xus kev cai xwb. Yog zoo li neeg tej tswv yim ntse tshais chaw los nyob hauv tog ua Yes Xus kev cai lawm.

            Cov neeg ntseeg txog Yes Xus ua tej phau ntawv nto moo, mas muaj coob leej kawg. Tej tus sau Koom Txoos kwv huam xws li ‘Aws Xes’ (Eusebius of Caesarea). Kuj tseem muaj tej tus sau tej zaj hu nkauj cav txog Tswv Ntuj xws li ‘Plus Daas’ (Prudence). Kuj muaj tej tus sau ntawv ntuas kev cai xws li ‘Nqes Nkaus’ (Gregoire). Muaj 2 tus nto moo dua cov yog ‘Zam Ncauj Kub’ (John Chrysostom) thiab ‘Zes Laus’ (Jerome).

            Tos Zam tau lub npe tias ‘Ncauj Kub’ vim tias niaj hnub Chiv thaum cov ntseeg sib sau los teev Ntuj ua ke, mas nws siv tej lo lus meej thiab to taub yooj yim los nthuav Tswv Ntuj Lo Lus, ua rau sawv daws nkag siab zoo txog lub Moo Zoo. Thaum lawv teev Ntuj tas, lawv rov mus tsev, mas nyob hauv lawv nruab siab lawv zoo li ib co neeg nplua nuj, tsis yog vim lawv muaj nyiaj txiag ntau dua qhov qub, tab sis yog lawv nplua nuj Tswv Ntuj lub txiaj ntsim. Yog vim tej ntawd, mas cov ntseeg thiaj tis lub npe rau Zam hu ua ‘Zam Ncauj Kub’.

Zam Ncauj Kub yug xyoo 347 nyob As Nthias Kias (Antioch). Nws txiv yog nom tswv nrog tseem hwv Los Mas ua kab xwm (Military officer), tab sis nws tuag thaum Zam tseem me ces Zam niam As Nthus Xas (Anthusa) thiaj yog tus tu Zam. Ib txwm Zam yog neeg siab sib mloog nws niam lus.

Zam niam thiab Zam yog neeg ntseeg txog Yes Xus, tab sis nyob rau lub zim txwv ntawd, lawv tos cov me nyuam loj tiav niam tiav txiv tso, mam ua lub Cim Ntxuav rau, ces Zam muaj 20 xyoo, nws thiaj mam txais Cim Ntxuav.

Xyoo 373 Zam niam tuag, ces Zam khiav mus ua Txiv Twj Cuab nyob teb chaws suab puam Xis Lias. Zam nyob ib leeg hauv ib lub qhov tsua, niaj hnub nws noj dab noj tuag tas 5 xyoos, ces Zam muaj mob. Zam thiaj rov qab los nyob As Nthias Kias.

Tswv Qhia Mes Les Tias (Meletius) nyob As Nthias Kias tsa Zam ua Tub Tsob Hwb (Deagon). Zam xav tias txoj kev ua Txiv Twj Cuab kuj zoo kawg vim lawv thov Ntuj rau tas lub ntiaj teb, tiam tsis Tswv Ntuj tsis kheev kom sawv daws ua Txiv Twj Cuab tas huv si, yuav tsum muaj tej tus ua Leej Choj nyob nruab zog pab tsoom sid nco txog Ntuj. Zam thiaj sau ib phau ntawv hais txog txoj kev ua Leej Choj.

Xyoo 386 Tswv Qhia Fas Vias (Flavian) ua lub Cim Tiag Tes rau Zam ua Leej Choj thiab tsa Zam ua tus qhia kev cai nyob As Nthias Kias.

Lub nroog As Nthias Kias yog lub nroog sawv daws ua lag ua luam ntau, ces sawv daws siv nyiaj ua si ntau, sawv daws nrhiav txoj kev nyob zoo xwb, sawv daws nco txog lub ntiaj teb ntau nco txog Ntuj tsawg. Zam thiaj ntuas sawv daws kom yuav ib lub siab tshiab.

Zam sau ntau phau ntawv nthuav lub Moo Zoo hauv hnub Chiv hais txog ‘lub siab nyiam (charity) thiab cov neeg pluag kev ntshaw tias:

“Nej puas xav muab Leej Pleev lub cev saib rau lub sam xeeb? Nej txhob puam chawj rau tus tsis muaj khaub ncaws hnav. Nej txhob tso nws nyob tuag no nraum zoov. Vim tus hais tias ‘QHov no yog kuv lub cev’, yog tus yuav hais rau nej tias ‘Thaum koj pom kuv tshaib plab, koj tsis pub mov rau kuv noj’, thiab kuj yog tus hais rau nej tias ‘Koj tau ua npaum li cas rau ib tug me tshaj hauv kuv cov kwv tij, yog koj tau ua rau kuv’.

Puas yuav yog qhov zoo yog nej coj cov ntim nyiaj ntim kub tuaj tso rau saum lub thaj txi Ntuj tab sis nej tus kwv tij tab tom yuav tuag tshaib? Nej kav tsij cawm nej tus kwv tij qhov tshaib plab tso, nej mam tuaj tu nej lub thaj txi Ntuj kom zoo saib.”

Xyoo 397 tus Tswv Qhia nyob hauv lub nroog Koos Taas Tis Nos Pos Lis tau tas sim neej, ces cov Tswv Qhia thiaj xaiv Zam Ncauj Kub los ua Tswv Qhia saib pawg ntseeg nyob hauv lub nroog Koos Taas Tis Nos Pos Lis.

Thaum lawv ua raws li Tswv Qhia Zam Ncauj Kub ntuas tas, mas nws hais rau lwm tus tias “Yog nej pom ib tug neeg nplua nuj muab nyiaj pab cov neeg pluag, mas nej yuav qhuas txog tus neeg ntawd, vim qhov nws ua ntawd yog ib qhov zoo kawg nkaus. Tab sis tseem muaj ib qhov tseem ceeb dua qhov ntawd, yog qhov tias peb yuav kub siab pab kom peb cov kwv tij paub txog Tswv Ntuj thiab tig los yuav lub siab tshiab.”

Tswv Qhia Zam Ncauj Kub tsim tej kab ke teev Ntuj tshiab, thiab hais txog kev teev Ntuj tias “Ntau zaus peb xav tias txoj hauj lwm no nyuaj dhau, peb yuav ua tsis tau. Tab sis yog peb teev Ntuj ib pliag, ces peb rov muaj tswv yim los ua peb txoj hauj lwm.” Thiab hais ntxiv tias “Tswv Ntuj mloog peb tej zaj teev Ntuj, puas yog vim peb hais lus ntau ntau, ces Tswv Ntuj thiaj mloog? Qhov tseeb tshaj, mas yog peb yuav tau muab siab rau cev peb tej lus. Thaum lub caij peb cev lus rau Tswv Ntuj peb yuav tsis xav txog lwm yam nyob hauv peb siab, ces Tswv Ntuj thiaj yuav mloog peb cov lus thov.” Li ntawd, thaum txog hnub chiv cov ntseeg thiaj kub siab tuaj ua Thaj Txi Ntuj.

Tswv Qhia Zam Ncauj Kub hlub cov neeg pluag tas siab, yam li nws tab meeg yoo mov kom tau muab nyiaj rau cov neeg pluag uas tsis muaj dab tsi noj.

Tswv Qhia Zam Ncauj Kub kuj ntuas tus vaj kav teb chaws ntawd, kom tsis txhob nkim nyiaj txiag dag, yuav tsum siv nyiaj los txhim kho teb chaws.

Tswv Qhia Zam Ncauj Kub muab siab rau ntuas cov neeg ntseeg kom lawv coj lub neej haum lub Moo Zoo. Nyob hauv lub nroog Koos Taas Tis Nos Pos Lis muaj tej tus poj niam nplua nuj, lawv siv nyiaj txiag ntau los tu lawv lub cev kom zoo nkauj. Lawv coj npauj nyiag npauj kub thiab hnav khaub ncaws ci laim txias. Tswv Qhia Zam Ncauj Kub pom tej ntawd, nws ntuas cov poj niam ntawd kom lawv muab lawv tej nyiaj mus pub rau lwm tus yuav zoo dua qhov lawv coj mus ua tej yam dog dig. Tswv Qhia Zam Ncauj Kub cov lus no ua rau tus poj vaj Aws Dos Xias (Aelia Eudoxia) tsis zoo siab, nws xav tias yog Tswv Qhia Zam Ncauj Kub tab meeg hais txog nws.

Cov Leej Choj nyob Koos Taas Tis Nos Pos Lis nyiam muaj suab npe thiab ua neeg muab hlob, ces thaum twg lawv sib sau ua ke, mas Tswv Qhia Zam Ncauj Kub rov qab hais Yes Xus cov lus tas zog qhia lawv ua rau muaj ib txhia Leej Choj tsis nyiam tus Tswv Qhia Zam Ncauj Kub.

Dhau ntawd, Tes Os Fis Los (Theophilus) tus Tswv Qhia nyob As Les Xas Nrias xav coj lub Koom Txoos nyob Koos Taas Tis Nos Pos Lis rov qab los zwm rau Koom Txoos nyob As Les Xas Nrias, ces nws tsis pom zoo cia Zam Ncauj Kub ua Tswv Qhia nyob Koos Taas Tis Nos Pos Lis. Tes Os Fis Los ntes 4 tug Txiv Tab Seeb (Monk) Hais Nkws Tos poo Os Lis Ntses (Origen) zaj tswv yim, ua rau lawv tsiv mus txog Koos Taas Tis Nos Pos Lis. Tswv Qhia Zam Ncauj Kub pub chaw rau lawv so, ces Tswv Qhia Tes Os Fis Los thiaj liam tias Tswv Qhia Zam Ncauj Kub ib siab rau Os Lis Ntses zaj tswv yim thiab.

Qhov kawg tus vaj As Kas Dis (Arcadius) thiaj xa ib pab tub rog tuaj ntes Tswv Qhia Zam Ncauj Kub thiab muab nws ntiab mus nyob teb chaws As Mes Nias. Ces xyoo 407 nws thiaj tuag nyob As Mes Nias teb.

Tswv Qhia Zam hais tias “Tswv Ntuj tau pab nres kuv lub neej thiab kuv txoj sia txog ntau yam. Kuv cav lus zoo txog peb tus Huab Tais Tswv Ntuj lub npe thiab lub koob meej. Ua li.”

Tswv Qhia Zam Ncauj Kub kuj sau ob peb phau ntawv hais txog txoj kev ua Txiv Twj Cuab, hais txog txoj kev qhuab qhia cov me nyuam, hais txog txoj kev ua neeg tsim txiaj, thiab nws kuj ua tej phau ntawv teb rau cov neeg ntxub Ntuj kev cai, cov neeg thim kev ntseeg, cov teev dab, teb rau cov Yus Das.

Dhau ntawd, Tswv Qhia Zam Ncauj Kub txoj hauj lwm loj tshaj yog nws sau cov zaj qhia kev cai nyob hauv tsev teev Ntuj. Nws cov zaj qhia muaj 2 ntu; ntu ib yog nws nrhiav tej lo lus hauv Ntawv Ntshiab uas yuav zoo qhia qhov nws xav qhia, ntu ob yog nws cov lus ntuas cov neeg kom coj ib tug yam ntxwv phim cov lus qhia nyob hauv Ntawv Ntshiab.

Tswv Qhia Zam Ncauj Kub txawj nrhiav cov lus yuav phim rau sawv daws mloog; tab yog nws ntuas cov nom tswv los cov pej xeem, ntuas cov muaj los cov pluag, ntuas cov neeg tsa cuab los cov neeg xaiv lub neej cog lus; mas nws nrhiav cov lus yuav rub sawv daws mus rau txoj kev nyiam Tswv Ntuj thiab nyiam Yes Xus.

Tswv Qhia Zam Ncauj Kub txawj ntuas sawv daws kom coj ib lub neej raws li Yes Xus lub Moo Zoo: coj lub neej ntshiab, npuab Tswv Ntuj, kom sawv daws sis nyiam sis hlub, txawj sib pab, txhob muab nyiaj txiag saib hlob, kom sawv daws txawj ua tej hauj lwm them txim txhaum, kom sawv daws thov txhaum ntawm Tswv Ntuj.

Hais txog Zes Laus, mas nws yug xyoo 347 hauv Das Mes Tias (Dalmatia), zim txwv no yog Nkos Es Tshias teb (Croatia). Zes Laus txiv yog ib tus neeg ntseeg ces thiaj xa nws mus kawm txuj rau tuam ceeb Los Mas. Nyob Los Mas, Zes Laus poob rau txoj kev ua si lom zem, nws ntsib kev ntxias kev sim siab ntau yam. Muaj ib hnub thaum Zes Laus tab tom mus saib cov toj ntxas, mas nws xav tsis thoob txog nws lub neej, ces Zes Laus xav yuam nws lub cev kom tau ua ib tug neeg siab dawb siab huv.

Xyoo 360 Zes Laus muaj 25 xyoos nws txais Cim Ntxuav ntawm Tswv Qhia Lis Npes Lis Os (Liberius). Zes Laus tawm ntawm Los Mas mus rau Xis Lias teb, nws hla teb chaws suab puam, nws sau tias ‘Hav suab puam nthuav dav tsuas muaj cov av xuab zeb xws li yog dab teb, kuv tsum tawm tsam kom dhau mus, kuv xav ua Txiv Twj Cuab nyob ntawm no nrog tej me tsiaj’, ces Zes Laus thiaj coj lub neej ua Txiv Twj Cuab nyob hauv teb chaws suab puam Xis Lias.

Thaum Zes Laus ua Txiv Twj Cuab, nws kawm lus Hes Las, lus Hes Nplaws, thiab lus As Las Mais. Ces thaum Zes Laus muaj 38 xyoo, nws thiaj txais Cim Tiag Tes ua Leej Choj. Zes Laus mam rov los nyob Los Mas. Tus Tswv Qhia nyob Los Mas hu ua Das Mas Xus Ib (Damasus I) txib Zes Laus kom muab Ntawv Ntshiab ntxeev ua lus Las Tis Nas.

Zes Laus yog neeg siab ceev tiam sis nws khuv leej lwm tus, nws siab me tab sis nws mob siab rau lwm tus, nws coj nruj tab sis nws lub siab kub lug cuag hluav taws, nws tawv ncauj tab sis nws coj ncaj. Zes Laus tus cuj pwm no ua rau nws tsis haum nrog cov Leej Choj nyob Los Mas, ces Zes Laus thiaj tuaj nyob lub zos Npes Les Hes, ze lub qhov tsua Yes Xus yug. Zes Laus tsim ib pab Txiv Twj Cuab nyob ntawd. Zes Laus yuav ua nws txoj hauj lwm tas 35 xyoos nyob ntawm no. Zes Laus kawm cov Ntawv Cog Qub Lus thiab cov Ntawv Cog Lus Tshiab tas niaj tas xyoo, nws muab ntxeev ua lus Las Tis Nas. Phau Ntawv Ntshiab Zes Laus ua tiav yog phau ntawv hu ua ‘Vus Nkas Tas’ (Vulgate).

Zes Laus hais tias “Kuv tsis txhais Ntawv Ntshiab raws kuv xav, tab sis kuv txhais raws li Leej Pleev hais. Leej Ntshiab Paj Lug hais tias Leej Pleev yog lub zog thiab yog lub tswv yim, leej twg tsis paub Ntawv Ntshiab, mas nws yuav tsis paub Tswv Ntuj lub zog thiab tswv yim. Li ntawd, tus neeg twg tsis paub Ntawv Ntshiab ces nws yuav tsis paub peb tus Yes Xus Pleev.”

Lub Koom Txoos qhia txoj kev teev Ntuj rau tas teb chaws nyob ncig lub hiav txwv Mes Dis Tes Las Nes. Lub Koom Txoos loj zuj zus. Lub Koom Txoos tsim ib lub teb chaws tshiab; yog ib lub teb chaws ua Yes Xus kev cai, ib lub teb chaws cav txog Tswv Ntuj. Mus txog lub nroog twg kuj pom sawv daws muaj ib co kab ke teev Ntuj raws li Yes Xus qhia, pom tej lub tsev teev Ntuj tshiab, pom tej phau ntawv hais txog Yes Xus kev cai ntau zuj zus.

            Ua li mas tiam plaub muaj ib pab neeg tshiab tawm tuaj rau lub ntiaj teb pom; pab neeg ntawd lub Koom Txoos.

            Cov neeg nyob hauv lub Koom Txoos sawv daws kuj pom lub Koom Txoos muaj zog zuj zus. Tas sawv daws tsis hais xeem twg tsis hais tsav twg, sawv daws paub hais tias lub Koom Txoos yog zoo li ib tug niam qhia tswv yim rau sawv daws, lub Koom Txoos yog zoo li ib tug niam yug sawv daws, pub ib txog sia tshiab rau sawv daws. Cov neeg tawv dawb los yog, cov neeg tawv daj los yog, cov neeg tawv dub los yog; sawv daws paub hais tias sawv daws muaj ib tug niam yog lub Koom Txoos, yog pab neeg uas Yes Xus tsim.

            Yog vim li ntawd, thaum txog tiam plaub sawv daws thiaj pib hu lub Koom Txoos ua ‘Niam’. Sawv daws vam txog lub Koom Txoos xws li vam txog niam.

Yav thaud, cov Los Mas mus ntaus luag teb chaws, lawv txeeb tau ib lub teb chaws tshiab, mas lawv nqus cov nyiaj cov kub tas huv tib si nyob hauv lub teb chaws ntawd; lawv thiaj tau nyiaj txaus nyob ib ntus. Tiam sis nyem no, cov Los Mas tsis muaj zog yuav mus ntaus lwm lub teb chaws lawm, lawv teb chaws twb dav dhau lawv kav tsis yeej.

Ua li mas cov nom tswv nyiag cov pej xeem lawv tej nyiaj thiab lawv ua tseem hwv cov nyiaj poob nqe zuj zus, lawv ua kiab dub, lawv sau se ntau ntau; lawv suav saib ib lub tsev muaj pes tsawg tus neeg, pes tsawg tus tsiaj, lawv cog pes tsawg tsob txiv ntoo; lawv thiaj sau se hnyav hnyav. Cov muaj cov pluag, cov hluas cov laus yuav tsum them se tas huv si; tus twg tsis them, mas muab tus twg ntaus. Tus nws tsis muaj nyiaj them se, mas nws yuav tsum muab nws lub cuab tam muag, muab nws cov me tub me nyuam muag, kom tau nyiaj los txaus them se.

Tseem hwv xav saib tas ib puas tsav yam nyob hauv lawv lub teb chaws. Lawv xav sau se ntawm tas puas tsav yam, lawv xav ua ntawv rau cov neeg mus kev, lawv xav saib saib cov pej xeem ua yam hauj lwm twg. Ua li mas tseem hwv tsa ntau tus tub tseem hwv saib sawv daws. Tiam sis cov tub tseem hwv ntawd, tus twg kuj ua tub sab noj cov pej xeem zog dag xwb. Cov neeg uas lawv yuav tsum caug yuav tsum ntes cov tub sab, mas lawv twb ua tub sab thiab.

Thaum lub caij tsis muaj rog, lawv sawv daws zoo siab tuaj ua tub rog. Thaum txog lub caij yuav tsum mus ua rog, tus twg kuj xav khiav; tej tus lawv muab lawv ntiv tes txiav pov tseg kom tseem hwv yuav tsis tau lawv ua tub rog ntxiv, vim lawv tua hneev tsis tau. Cov thawj tub rog kuj xav khiav; tseem hwv yuav tsum hlawv hlau liab los ntaus cim rau lawv, kom lawv tsis tau kev khiav mus tsiv nraim. Tsis muaj leej twg xav txuag teb chaws lawm.

Cov nom tswv muaj cai yuam cov pej xeem, lawv muaj cai tua cov pej xeem. Tiam sis lawv yuav kom cov pej xeem mloog lawv lust sis tau, vim cov pej xeem sawv daws ua siab hnyav; cov nom tswv yuam tsis tau sawv daws. Cov pej xeem tsis ntseeg hais tias cov nom tswv yuav pab cov neeg me, lawv tsis ntseeg hais tias cov nom tswv yuav muab txim rau cov tub sab, lawv tsis ntseeg hais tias cov nom tswv yuav ua ncaj rau sawv daws. Vim niaj hnub cov pej xeem pom cov neeg muaj nqa nyiaj tuaj xiab cov nom tswv.

Cov pej xeem pom cov nom tswv sib txeeb nom ua, pom cov nom tswv xuas riam xuas hmuv sib tua, muab tshuaj lom lawv cov yeeb ncuab, lawv pom cov nom tswv noj mov haus cawv, nrauj poj niam, zes luag poj luag sev, tso lawv cov me nyuam pov tseg.

Cov pej xeem pom li ntawd, lawv muab lawv cov nom tswv los piv rau cov nom tswv txheej thaud; lawv pom cov nom tswv nyem no zoo tsis cuag cov thaud. Cov pej xeem muab lawv cov nom tswv los piv rau cov ua Ntuj kev cai cov nom tswv, mas lawv haj yam pom hais tias cov neeg siab ncaj thiab hlub luag tej, yog tog nyob hauv cov neeg ntseeg tas huv tib si.

Thaum Koos Taas Tis Nus tseem nyob, nws muab Los Mas teb chaws los faib rau nws peb tug tub. Xyoo tim 337 Koos Taas Tis Nus thiaj tuag. Tiam sis xyoo tim 340 tus tub hlob ua rog ntaus tus nrab, ces tus nrab tuag. Ua li mas tshuav ob tug tub xwb. Xyoo 350 Koos Taas Tis Nus tus tub ntxawg hu ua Koos Taas Ib (Constans I) kav Los Mas sab hnub poob, nws tsis txawj ua kab xwm, ces ib tug nom Nkas Lias (Gaul) sawv ua rog ntaus Los Mas sab hnub poob thiab muab nws tua tuag nyob ze ntawm cov roob Pis Les Nes. Ua li mas tsuas tshuav tus tub hu ua Koos Taas Tis Yus (Constantius II) xwb, nws kav tsis tas Los Mas teb, ces nws thiaj muab Los Mas teb faib rau ib tug kwv tij pab kav sab hnub poob; yog Ntsus Lis Nus (Julian).

Xyoo 361 Koos Taas Tis Yus tuag, ces tshuav Ntsus Lis Nus ib tug xwb tiam sis nws ua vaj ib xyoos thiab 8 hli xwb muaj neeg muab nws tua tuag hauv xyoo 363. Lawv xaiv ib tug tub rog los ua vaj, nws ua tau 8 lub hli xwb nws kuj tuag, ces txij xyoo 364 los txog xyoo 394 mas muaj 4 tug los 5 tug vaj sib hloov kav sab hnub poob, tab sis tsis muaj ib tug txawj ua kom lub teb chaws nyob thaj yeeb li.

Nyob sab hnub tuaj, txij xyoo 378 los, muaj ib tug vaj zoo yog Tes Os Dos (Theodosius I). Nws yug los nyob Is Npes Lias teb. Xyoo 380 lub 2 hlis hnub 28 Tes Os Dos tsa txoj cai tshiab tias txij no mus tsis kheev tsoom pej xeem Los Mas hu tus vaj ua Leej Choj ntxiv lawm, tsis pub hwm tus vaj zoo li yog ib tug tswv ntuj li yav tas los lawm. Tes Os Dos hais tias tas txhua haiv neeg nyob Los Mas teb chaws, sawv daws yuav teev Huab Tais Leej Txiv, Huab Tais Leej Tub, thiab Huab Tais Leej Ntuj Plig Ntshiab raws li tus Hauv Paus Xa Lus Pob Zeb tuaj qhia nyob Los Mas. Tus twg tsis mloog txoj cai mas yuav raug txim.

Tes Os Dos muab cov tsev teev dab hloov ua tsev teev Ntuj, ces txoj kev ntseeg txog Yes Xus thiaj ri mus sai nyob Los Mas teb.

Thaum ntawd, cov pej xeem ib nrab ua Ntuj kev cai tas. Muaj tej xeev ntuj kuj ua Ntuj kev cai yuav luag tas; zoo li cov teb chaws nyob Los Mas sab hnub tuaj. Hos nyob Los Mas sab hnub poob, cov nroog loj ua Ntuj kev cai ntau dua cov zos me los cov neeg nyob nruab liaj nruab teb.

Lub caij ntawd, cov nom tswv yuav Ntuj kev cai ntau vim cov vaj coj Ntuj kev cai ua ntej. Kuj muaj qee leej lam yuav Ntuj kev cai lub npe xwb, lawv coj ib tug yam ntxwv tsis tshua phim Ntuj kev cai; lawv tseem ntshaw ua nom. Cov coj Ntuj kev cai zoo mas yog cov Tswv Qhia; lawv tsis nrhiav txoj kev nyob zoo, tsis ntshaw nyiaj txiag, tsis nrhiav txoj kev ua tus loj; lawv xav ua ncaj rau tas tsoom sid, lawv txawj xav tom ntej tom qab, lawv kuj tsis yog ib co neeg txiav txim rau cov pej xeem, lawv tsis sau se; ces tsoom pej xeem tsis ntxub cov Tswv Qhia.

Xyoo 394 Tes Os Dos tau ua vaj kav tas Los Mas teb sab hnub poob thiab sab hnub tuaj. Tes Os Dos muaj mob, nws paub hais tias nws yuav tuag, nws muab lub teb chaws faib rau ob tug tub kav. As Kas Dis Yus (Arcadius) kav Los Mas sab hnub tuaj, Os Nos Lis Yus (Honorius) kav Los Mas sab hnub poob. Txog hnub tim 17 lub 1 hlis xyoo 395, Tes Os Dos thiaj tuag. Ua ntej yuav tuag, nws hais tias “Kuv nyiam Huab Tais vim Huab Tais mloog kuv tej lus thov.” Tes Os Dos tuag tas, cov neeg qus thiaj nkag tuaj nyab Los Mas teb xws li dej nyab.

Cov vaj Los Mas zoo, mas Tes Os Dos yog tus kawg, cov haiv neeg qus thiaj yuav tuaj nyab Los Mas teb xws li dej nyab, ces teb chaws thiaj tawg ua lwj ua liam tas. Thaum ntawd, mas yog cov neeg ua Ntuj kev cai thiab cov Tswv Qhia lawv cawm lub teb chaws.

Ib txom los, cov Los Mas hu lwm haiv neeg tsis yog Los Mas thiab tsis yog Hes Las ua ‘haiv neeg qus’ (Babarian); yam li cov haiv neeg nyob sab hnub tuaj, cov haiv neeg nyob Zes Mas Nias, nyob Nkas Lias, nyob Is Npes Lias, nyob As Fis Kas.

Thaum cov Los Mas ntaus tau Nkas Lias teb, Is Npes Lias teb, As Fis Kas teb, cov teb chaws nyob sab hnub tuaj, cov teb chaws nyob ze tus dej Das Nws sab no, mas muaj ntau haiv neeg qus nyob Los Mas teb chaws. Cov neeg qus ntawd, lawv kuj kawm txuj ci tib yam li cov Los Mas. Nyob nyob, lawv kuj tau ua nom ib yam li cov Los Mas, lawv ua pej xeem Los Mas.

Yog vim li ntawd, thaum tiam 4 yuav tas, mas nyob hauv cov nroog thiab nyob ntawm tej txoj kev Los Mas muaj tub rog muaj nom muaj tswv ntau ntau leej yog cov haiv neeg qus ntawd; lawv xyaw cov Los Mas, ntau zaus lawv tseem ua tswv kav tej tus Los Mas thiab.

Nyob hauv cov teb chaws zwm rau Los Mas, muaj tej xeev ntuj uas cov neeg qus nyob ua tsheej pab; lawv muaj lawv cov nom, lawv muaj lawv xeem lus, lawv muaj lawv cov kev cai, lawv kuj muaj zog. Cov nom tswv Los Mas kuj yuav tsum ntxias lawv kom lawv nyob twj ywm zoo. Cov Los Mas pheej ntxias cov neeg qus, mas lawv kuj pheej muaj zog tuaj.

Cov neeg Los Mas muaj ib lub siab ncaj thiab nquag, lawv pom cov haiv neeg qus yog tej tus neeg tsis tshua paub kev cai thiab tsis paub ntawv, tiam sis lawv yog ib cov neeg siab loj siab tawv, siab tsis nkhaus xws li cov nom Los Mas, mas muaj ntau tus neeg Los Mas xav hais tias cov neg qus zoo dua cov Los Mas, ces lawv qhuas cov haiv neeg qus.

Cov neeg qus tsis yog cov nyob hauv Los Mas teb chaws xwb, tseem tshuav cov nyob sab nraud. Cov haiv neeg nyob ntawm tus dej Lees (Rhine) thiab tus dej Das Nws (Danube) sab tim ub lawv coob tas nrho, lawv xav hla dej tuaj nyob Los Mas teb. Cov ntawd yog cov Os Thos Nkaus (Ostrogoths), cov Vis Xis Nkaus (Visigoths), cov Vaas Das (Vandales), cov As Las Maas (Alamans), cov Npws Nkoos (Burgondes), cov Fab Kis (Frances), cov Xas Xoos (Saxons).

Txij xyoo 300 los txog xyoo 360 lawv kuj tseem nyob sab tim ub. Lawv tau tuaj lwg cov teb chaws nyob sab no ob peb lwm, tiam sis cov Los Mas caum tau lawv kom hla dej rov qab mus. Txij xyoo 360 los, mas tseem muaj tej haiv neeg tuaj ntawm As Xias teb tuaj, yog cov Hees (Huns), lawv tuaj coob tas nrho nyob tas Lws Xias teb, lawv tuaj ntaus cov haiv neeg qus nyob Zes Mas Nias teb. Cov neeg qus nyob Zes Mas Nias thiaj tsis tau kev nyob, lawv kawg yuav tuaj nyob Los Mas teb. Niaj xyoo lawv hla dej, cov Los Mas tiv tau lawv mus txog xyoo 400.

Hais tiag, mas tsis yog cov Los Mas tiv tau lawv, yog cov neeg qus nyob Los Mas teb uas lawv ua tub rog pab tseem hwv Los Mas, tiam sis ntau zaus lawv yog ib haiv neeg zoo li cov xav hla dej; ua li mas lawv puas yuav pab cov Los Mas mus li, los lawv puas yuav pab lawv haiv neeg uas tseem khuam nyob sab dej tim ub?

Cov Los Mas lawv tsis muaj zog zuj zus tiag; nyob hauv lawv teb chaws, lawv cov nom tswv xav txog qhov ua si xwb. Cov tub rog yog cov pej kum neeg teb ntau. Cov vaj kav teb chaws lawv kav ob peb xyoo xwb, lawv sib tua tuag tas. Cov yeeb ncuab coob zuj zus tuaj ntsauv ciam teb, mas sawv daws paub hais tias tshuav tsis ntev Los Mas teb yuav puas tas. Leej twg yuav qhuab qhia cov haiv neeg qus, kom lawv tsis txhob muab neeg tua tas huv tib si? Leej twg yuav qhuab qhia ib lub tswv yim tshiab rau teb chaws uas ua lwj ua liam tas lawm?

Thaum tiam 4 yuav tas, mas muaj ib co neeg yuav pab tau sawv daws, yog cov Tswv Qhia kav cov ua Ntuj kev cai.

Cov Tswv Qhia tsis yog tseem hwv tsa, lawv kuj tsis yog ib cov neeg txiav txim rau cov pej xeem, lawv tsis sau se. Cov pej xeem muaj chaw ntxub cov tseem hwv, tiam sis lawv tsis muaj chaw ntxub ib co Leej Choj uas tsis tuaj ntawm tseem hwv tuaj.

Cov Tswv Qhia yog pej xeem xaiv. Nyob hauv cov ua Ntuj kev cai lub txoos, lawv pom muaj tej tus neeg siab ncaj dua cov, paub txuj ci dua cov, thiab hlub sawv daws dua cov; mas tsoom pej xeem ua Ntuj kev cai xaiv cov ntawd los ua lawv cov Tswv Qhia. Ua li mas tsoom pej xeem lawv nyiam cov Tswv Qhia dua, vim yog lawv xaiv cov Tswv Qhia ntawd, thiab cov Tswv Qhia kuj muaj ib lub meej yim zoo dua. Cov Tswv Qhia lawv tsis zoo li cov nom tswv Los Mas; cov nom tswv Los Mas tau ua nom vim lawv muaj nyiaj los yog vim muaj neeg thiab lawv. Cov Tswv Qhia, mas yog vim lawv zoo tshaj tiag, lawv thiaj tau ua Tswv Qhia.

Cov Tswv Qhia tsis zoo li cov nom tswv Los Mas; cov nom tswv Los Mas lawv tau ua nom vim lawv muaj nyiaj los yog muaj neeg coob. Tab sis cov Tswv Qhia mas yog cov zoo tshaj tiag thiaj tau ua.

Thaum teb chaws muaj mob ntau, mas cov nom tswv tsis txawj pab, tiam sis cov Tswv Qhia mas lawv hais ib lo lus rau cov neeg ua Ntuj kev cai ces tam sim ntawd muaj ntau pua ntau txhiab tus neeg sawv mus pab cov neeg mob, ces tas tsoom pej xeem nyiam cov Tswv Qhia dua cov nom tswv.

Thaum cov neeg qus tuaj ntaus ib lub teb chaws, mas cov nom tswv Los Mas xub tso tes khiav ua ntej. Tiam sis cov Tswv Qhia lawv nrog cov pej xeem nyob, lawv mus cuag cov neeg qus, lawv mus thov kom cov neeg qus txhob ua phem rau cov pej xeem. Cov neeg qus lawv kuj paub hais tias cov Tswv Qhia lawv muaj Ntuj lub hwj huam pab lawv, mas cov neeg qus kuj ntshai cov Tswv Qhia thiab.

Cov nom tswv xav yuam cov pej xeem, cov nom tswv xav kom cov pej xeem the se hnyav dhau, mas cov pej xeem mus qhia rau cov Tswv Qhia kom paub, ces cov Tswv Qhia mus hais rau cov nom tswv kom cov nom tswv ua raws txoj kev ncaj. Cov nom tswv kuj hla tsis tau cov Tswv Qhia lus thiab.

Cov pej xeem lawv nyiam ua lub Koom Txoos cov pej xeem dua ua tseem hwv cov pej xeem. Muaj tseem hwv lawm, mas cov neeg ua Ntuj kev cai mloog tseem hwv, tiam sis nyob hauv lawv lub siab, mas lawv nyiam vam txog cov Tswv Qhia dua vam txog cov nom tswv. Lawv ntsia hais tias cov ua niam ua txiv tsis yog cov nom tswv, tiam sis yog cov Tswv Qhia.

Yog vim li ntawd, cov pej xeem thiaj tau thov cov vaj Los Mas kom tsa cov Tswv Qhia ua cov ‘txiv txuag nroog’.

Tus vaj Los Mas thiaj tsa cov Tswv Qhia ua txiv txuag nroog raws li cov pej xeem thov. Tiam sis cov Tswv Qhia tsis xav ua txiv txuag nroog, lawv xaiv ib tug neeg ua Ntuj kev cai los ua txiv txuag nroog, tiam sis nyob nyob ntev mus, thaum tiam 4 yuav tas, mas yog tus Tswv Qhia ua txiv txuag nroog tiag. Lawv tsis tshua xav ua, vim lawv tsis xav nrog cov nom tswv ua plaub ua ntug, thiab lawv tsis xav ua ib co nom kav teb chaws; tiam sis lawv xav pab cov neeg pluag thiab cov neeg me, mas lawv thiaj yuav tsum ua txiv txuag nroog, lawv thiaj yuav thaiv tau cov neeg me cov neeg pluag txom nyem kom cov nom tswv txhob yuam tau lawv.

Cov txiv txuag nroog mtawd, lawv yuav cawm Los Mas teb. Thaum cov neeg qus yuav tuaj nyab Los Mas teb, mas cov neeg qus kuj yuav hwm cov Tswv Qhia.

Peb yuav hais txog ib tug Tswv Qhia tau pab teb chaws ntau thiab muaj koob meej los txog tav no; yog Tswv Qhia As Nplos Xyus.

Hais txog ‘As Nplos Xyus’ (Ambrose) mas nws yug xyoo 338 hauv lub tsheej Ris Es (Trewes) ze tus dej Lees, Zes Mas Nias teb. Lawv tsev neeg yog tsev neeg noob nom ua Ntuj kev cai, tab sis lawv tsev neeg ua Ntuj kev cai tsis tas; muaj tej tus lam lawv luag tej qab xwb. As Nplos Xyus kuj yog ib tug nyob hauv cov neeg ntawd.

As Nplos Xyus tuaj kawm cov txuj hais plaub nyob hauv lub tsheej Los Mas ces As Nplos Xyus thiaj ua txoj hauj lwm tuav tus vaj Los Mas cov kab xwm txheej siab nyob hauv lub nroog Mis Las Nos. As Nplos Xyus yog neeg siab ncaj thiab hlub tsoom pej xeem, ces tas sawv daws hwm nws zoo.

Xyoo 374 Aus Xes Tis Us (Auxentius) tus Tswv Qhia hauv Mis Las Nos tas sim neej, ces cov Leej Choj thiab cov ntseeg sib sau sab laj saib lawv yuav xaiv leej twg los ua Tswv Qhia tshiab, ib txhia xav tsa tej tus Tswv Qhia nyiam As Lis Yus kev cai, ib txhia xav tsa lwm tus; ces sawv daws hais tsis haum. Hnub uas lawv sib sau sab laj, As Nplos Xyus kuj nyob ntawd thiab, nws pab ntuas sawv daws kom txhob sib cav sib ceg thiab kom sawv daws muab siab rau xaiv tus Tswv Qhia tshiab. Lawv hais tsis sib haum, ces nyob hauv lub tsev teev Ntuj uas lawv sib sau muaj ib tug me nyuam tub hnub nyoog 8 xyoo tej, nws sawv tsees thiab tsa suab hlo qw tias “As Nplos Xyus ua Tswv Qhia! As Nplos Xyus ua Tswv Qhia!”

Tom qab ntawd muaj plaub tsib leeg pib qw li ntawd thiab, ces tas sawv daws qw nrov nrov hais tias “Peb yuav As Nplos Xyus ua peb tus Tswv Qhia! Peb yuav As Nplos Xyus ua peb tus Tswv Qhia!”

Thaum As Nplos Xyus hnov tsoom ntseeg tsa suab qw txog nws lub npe, mas nws poob siab loj. Nws sawv los hais rau sawv daws tias “Ua cas nej hais li ntawd? Vim kuv tseem tsis tau txais Cim Ntxuav.”

Tsoom ntseeg haj yam qw nrov. Ib ntsis ib tug neeg txav los ze ntawm As Nplos Xyus thiab hais rau nws tias “Tsoom ntseeg hais li cas, mas peb tus Huab Tais Tswv Ntuj kuj hais li ntawd.”

As Nplos Xyus thiaj lees ua lawv tus Tswv Qhia tshiab, ces tas tsoom ntseeg sawv daws zoo siab, lawv npuaj teg. Ob peb hnub tom qab As Nplos Xyus txais lub Cim Ntxuav thiab lub Cim Txhab Zog. Peb lub hlis tom qab nws thiaj ua Tswv Qhia, yog hnub tim 7 lub 12 hlis xyoo 374 thaum ntawd As Nplos Xyus muaj 36 xyoo.

Thaum sawv daws xaiv As Nplos Xyus ua Tswv Qhia lawm, nws mam tig los ua ib tug ntseeg ruaj nreb, nws tsis nrhiav lub koob meej, nws muab siab rau saib Tswv Ntuj haiv neeg nyob hauv lub nroog Mis Las Nos, nws fim cov neeg pluag, nws ntuas cov neeg nplua nuj kom lawv hlub cov neeg pluag. Muaj ib zaug As Nplos Xyus muab nws cov twj teev Ntuj hauv lub tsev teev Ntuj muag tas kom tau nyiaj los pab cov neeg pluag thiab cawm ib co neeg nyob hauv tsev loj faj.

Niaj lis piam Hnub Chiv, As Nplos Xyus nthuav Ntawv Ntshiab hauv tsev teev Ntuj. Nws tej lus meej tiag, ces tsoom ntseeg hauv lub nroog feem coob nquag tuaj mloog nws.

Nyob hauv lub caij ntawd, muaj tej tus neeg mloog As Lis Yus qhia ib zag yuam kev txog Yes Xus. Li ntawd, Tswv Qhia As Nplos Xyus thiaj sau tej phau ntawv piav meej txog txoj kev ntseeg, tsis muaj ib yam cuav xyaw txoj kev ntseeg. Thiab nws kuj sau tej zaj nkauj teev Ntuj rau cov ntseeg hais kom lawv txoj kev ntseeg nyob ruaj nreb.

As Nplos Xyus hais tias “Yes Xus yog Tswv Ntuj Leej Tub tiag. Nws ib txhij nrog Leej Txiv Tswv Ntuj tsim lub ntuj lub teb. Vim Yes Xus lo lus muaj hwj chim loj tas nrho, nws ua kom ib cov ncuav mov txia ua nws lub Cev Ntshiab. Li ntawd, nyob hauv peb Thaj Txi Ntuj tus Leej Choj uas nws tuav txog Huab Tais lub npe, mas nws hais Yes Xus cov lus ntag.”

As Nplos Xyus hais ntxiv tias “Niaj hnub peb yuav nco tias peb yog ib co neeg muaj mob muaj nkeeg, vim peb ua txhaum ntau. Hom tshuaj uas yuav ntxuav peb lub siab kom rov dawb huv tuaj yog lub Cim Yug. Yog vim peb ua txhaum ntau, mas peb yuav tsum mus txais lub Cim Yug los yug peb lub siab. Thaum peb teev Ntuj, mas zoo li peb nrog Tswv Ntuj tham. Thaum peb nyeem Ntawv Ntshiab, peb yuav qhib peb lub siab txais Tswv Ntuj Lo Lus.”

As Nplos Xyus ntuas cov ntseeg kom nquag hais zaj teev Ntuj ‘Peb Txiv nyob saum ntuj’, mas cov neeg ntseeg thiaj tsim nyog ua Leej Txiv Tswv Ntuj cov me nyuam zoo nyiam.

As Nplos Xyus kuj ntuas sawv daws kom txaus siab cev tus kheej rau Tswv Ntuj tias “Leej twg muab nws tus kheej los cev rau Tswv Ntuj, mas tus neeg ntawd thiaj yuav tsis ntshai nws cov yeeb ncuab, los dab phem txoj kev ntxias vim tias Tswv Ntuj yog tus txhawb nqa peb lub siab mus li, ces tsis muaj leej twg yuav muaj cuab kav tiv peb tau.”

As Nplos Xyus muaj ib lub tswv yim zoo li cov nom tswv Los Mas lub tswv yim, tiam sis nws lub tswv yim zwm rau Ntawv Moo Zoo, nws txoj cai mas yog txoj cai nyob hauv Ntawv Moo Zoo. Nws nyiam cov nom tswv, nyiam lub nroog, nyiam cov tseem hwv; ces As Nplos Xyus tau ua tus vaj Ras Xias (Gratien) ib tug phooj ywg zoo, nws tau ua tus vaj Vas Lees Tis Nias (Valentinien) tus txiv coj ke, nws ua tus vaj Tes Os Dos (Theodosius II) tus npawg tus phooj ywg, nws ua tus qhia Ntuj kev cai rau tus vaj Tes Os Dos.

Txawm tias Tswv Qhia As Nplos Xyus nyiam cov nom tswv Los Mas, tiam sis nws tsis swb rau lawv; thaum cov vaj thiab cov tseem hwv Los Mas tsis ua raws Ntuj kev cai, mas nws qhuab qhia thiab ntuas lawv, nws tsis ntshai lawv. Xws li nyob hauv xyoo 390 muaj tej pab neeg tau sawv los tiv cov tub rog hauv lub nroog Tes Xas Los Nis, ces tus thawj tub rog raug tua tuag. Tus vaj Tes Os Dos npau taws heev, nws xa 400 tus tub rog mus hauv lub nroog thiab muab 2,000 tawm tus neeg tua tuag tas. Tswv Qhia As Nplos Xyus hnov txog qhov ntawd, nws hais rau tus vaj tias “Nyem no mus, koj yuav tsis muaj cai chaws mus hauv tej tsev teev Ntuj ntxiv. Hnub Chiv koj mus teev Ntuj koj yuav txais tsis tau lub Cim Yug. Koj yuav nyob li ntawd mus txog hnub koj thov txim ntawm Tswv Ntuj tso.”

8 lub hlis tom qab tus vaj thiaj li mus txhos caug lees txhaum nyob ntawm Tswv Qhia As Nplos Xyus xub ntiag. Tswv Qhia As Nplos Xyus thiaj ua lub Cim Daws Txhaum rau tus vaj thiab ntuas kom nws tsis txhob ua tej yam phem zoo li ntawd ib zaug ntxiv.

As Nplos Xyus nyiam tseem hwv Los Mas, nws qhuab qhia cov vaj Los Mas. Nws ntuas tas tsoom pej xeem. As Nplos Xyus ua ib tug Tswv Qhia loj kawg, tiam sis zoo li nws tsis pom hais tias Los Mas teb nyob tsis ruaj lawm, nws tsis nco qab pom hais tias cov yeeb ncuab ntxub Los Mas teb muaj zog zuj zus. Yog thaum As Nplos Xyus yuav tuag, mas cov neeg qus tuaj ntaus Los Mas ciam teb coob coob. As Nplos Xyus thiaj mam pom hais tias Los Mas teb yuav tsis nyob ntev ntxiv.

As Nplos Xyus ua Tswv Qhia hauv Mis Las Nos tau 25 xyoos, ces txog hnub hwm Yes Xus dai saum Ntoo Cuam nyob hauv xyoo 397 nws thiaj tas sim neej.

Xyoo 354 nyob hauv lub nroog Thas Nkas (Thagaste), Nus Mis Dias teb (Numidia) hauv xeev ntuj As Fis Kas qaum teb; muaj ib tug poj niam ntseeg Yes Xus hu ua ‘Mos Nis Kas’ (Monica) yug tau 4 tug me nyuam. Mos Nis Kas tis npe rau tus tub hlob hu ua ‘Aus Nkus Tis Nus’ (Augustine).

Aus Nkus Tis Nus txiv coj nws mus ua luam, thiab coj mus taug kev plees kev yis ua si lom zem xws li tej tub luam. Mos Nis Kas pom tias nws tus tub Aus Nkus Tis Nus tswv yim ntse thiab cim xeeb zoo tas nrho. Nws xav qhuab qhia nws tus tub Aus Nkus Tis Nus kom ua neeg tsim txiaj, thiab kom kawm Yes Xus lub Moo Zoo. Aus Nkus Tis Nus hlub nws niam, tab sis nws tsis mloog nws niam qhuab qhia, nws xav taug kev ua si ntau xws li nws pom nws txiv ua. Mos Nis Kas tu siab 10 tawm xyoo, nws niaj hnub thov kom Tswv Ntuj tshoj nws tus txiv, kom tus txiv tig los yuav lub siab tshiab. Mos Nis Kas thov Ntuj tau 15 xyoos, ces nws tus txiv thiaj lees tias nws tau coj lub neej tsis tsim txiaj, tsis phim Mos Nis Kas lub neej tsim txiaj thiab thoob tsib. Tus txiv kawm Yes Xus lub Moo Zoo thiab txais lub Cim Ntxuav. Thaum ntawd Aus Nkus Tis Nus tab tom muaj 17 xyoo, nws xav ua si heev, nws tsis mloog nws niam cov lus ntuas nws. Nws pom nws niam los kua muag, hos nws tsis muaj peev xwm tso kev plees kev yi pov tseg, raws li nws niam qhia kom nws ua. Mos Nis Kas hais rau nws tus txiv tias nkawd tus tub Aus Nkus Tis Nus tswv yim zoo tshaj luag tej, tsis phim cia nws ua tub lag tub luam nyob Thas Nkas. Tus txiv thiaj pom zoo xa tus tub Aus Nkus Tis Nus mus kawm txuj nyob nram lub nroog Kas Tas Nkes (Carthage), nyob tom ntug hiav txwv Mes Dis Tes Las Nes. Aus Nkus Tis Nus muaj 18 xyoo lawm. Tau ib xyoos tom qab Aus Nkus Tis Nus txiv tas sim neej.

Kas Tas Nkes yog ib lub nroog zoo kawm ntau yam txuj. Aus Nkus Tis Nus zoo siab, nws kawm yam twg mas nws kawm tau sai tas nrho. Tab sis Kas Tas Nkes kuj yog ib lub nroog vam meej uas muaj tas txhia txoj kev teev dab thiab teev Ntuj, kuj yog lub nroog nto moo tias txiv neej poj niam tau zoo kev ua si ywj siab. Aus Nkus Tis Nus tab tom nyob hauv nws yav hluas, nws nrog ib tug hluas nkauj ua si, nws tau ib tug me nyuam tsaub.

Aus Nkus Tis Nus ua si heev, tab sis nws lub siab tsis tiaj tsis tus. Aus Nkus Tis Nus niam cov lus qhuab qhia nyob nraim hauv Aus Nkus Tis Nus nruab siab. Nyob Kas Tas Nkes, Aus Nkus Tis Nus nyeem ib tug Xib Hwb hu ua Mas Nis (Mani) cov ntawv, ces nws ntseeg Mas Nis zaj tswv yim (Manichaeism). Mas Nis zaj mas yog zoo li no: Muaj ob tug tswv ntuj kav lub ntuj lub teb, ib tug tswv ntuj tshoj tib neeg kom taug kev zoo, thiab lwm tug tswv ntuj tshoj tib neeg kom taug kev phem. Ob tug tswv ntuj sib twv coj lub ntuj lub teb, sib twv coj tib neeg lub siab.

Mas Nis zaj tswv yim xis Aus Nkus Tis Nus siab, vim Aus Nkus Tis Nus xav tias tos nws swb kev phem yog vim ib tug tswv ntuj kom nws ua phem xwb. Aus Nkus Tis Nus tsuas tos kom tus tswv ntuj siab zoo tshoj nws kom yeej tus phem, ces Aus Nkus Tis Nus thiaj yuav muaj zog ua qhov zoo. Aus Nkus Tis Nus muab nws cov txhaum rau tus tswv ntuj phem ris tas nrho.

Aus Nkus Tis Nus nyob Kas Tas Nkes 9 xyoos, nws ke kawm txuj ke ua xib Hwb qhia Mas Nis zaj tswv yim txog ob tug tswv ntuj sib twv coj lub ntuj lub teb. Aus Nkus Tis Nus pib nto moo vim nws txawj nthuav Mas Nis kev cai nyob Kas Tas Nkes. Aus Nkus Tis Nus tiv Yes Xus lub Koom Txoos, vim Mas Nis kev cai ua yeeb ncuab rau Yes Xus lub Moo Zoo.

Mos Nis Kas pom nws tus tub qhia ib zaj kev cai tiv Yes Xus kev cai mas nws tu siab nrho. Tab sis nws hais tsis tau ib lo lus rau tus tub. Mos Nis Kas teev Ntuj thiab nws quaj rau Tswv Ntuj pom, thiab rau Aus Nkus Tis Nus pom. Aus Nkus Tis Nus ua txuj tias nws coj ib lub neej lom zem. Nws nto koob meej zuj zus. Tab sis hauv Aus Nkus Tis Nus nruab siab muaj kev ntxhov tas nrho.

Aus Nkus Tis Nus ua Xib Hwb tshaj Mas Nis txoj kev ntseeg, tab sis Aus Nkus Tis Nus tswv yim ntse thiab thoob tsib dua Mas Nis lub tswv yim. Aus Nkus Tis Nus lub ncauj tshaj Mas Nis txoj cai, tab sis lub siab tsis ntseeg lawm. Aus Nkus Tis Nus lub siab paub tias tus ntseeg txoj kev tseem ceeb yog nws niam. Nws niam tsis txawj hais lus ntau npaum li nws, tab sis nws niam cov kua muag hais lus nchav, nyob puag hauv Aus Nkus Tis Nus nruab siab. Hos Aus Nkus Tis Nus lub siab tseem dai dhuam rau tej tus poj niam thiab tej tus phooj ywg pus nws mus taug kev ua si.

Xyoo 383 Aus Nkus Tis Nus muaj 29 xyoos lawm, nws cov phooj ywg coj Mas Nis txoj cai hais rau nws tias nws txawj nthuav Mas Nis txoj cai, tsim nyog nws mus tshaj Mas Nis kev cai nyob Los Mas, vim yog thawj lub tuam tsheej nyob tas teb chaws xib fab.

Aus Nkus Tis Nus caij nkoj mus txog Los Mas. Tab sis Aus Nkus Tis Nus tsis xis nyob, nws nyob hauv ib lub tsev tsis huv. Nws ua npaws ntau zaus. Aus Nkus Tis Nus tsis muaj nyiaj, nws yuav tsum ua Xib Hwb qhia txuj rau cov neeg nplua nuj tej me nyuam. Nws nyob hauv tej lub tsev tsis huv li qub.

Cov tub nrog nws kawm txuj dag nws, tus puav tsis muab nyiaj hli rau nws. Aus Nkus Tis Nus xav tias nws yuav rov mus nyob rau As Fis Kas teb. Nws nyob txom nyem li ntawd ze ntawm ib xyoos.

Xyoo 384 Aus Nkus Tis Nus muaj 30 xyoo lawm, nws cov phooj ywg coj Mas Nis kev cai hais rau nws tias nyob Is Tas Lias qaum teb, hauv lub nroog Mis Las Nos (Milan). Thawj tug nom tseem coj txoj kev teev dab Los Mas zoo siab txais Aus Nkus Tis Nus los ua ib tug Xib Hwb tshaj Mas Nis txoj cai nyob Mis Las Nos. Thawj tug nom Los Mas ntawd tsis coj Mas Nis txoj cai, tab sis yog lub caij uas kev ntseeg Yes Xus tab tom huam vam ri mus sai nyob tas Los Mas teb chaws. Tus nom Los Mas zoo siab pab Aus Nkus Tis Nus, vim Aus Nkus Tis Nus tiv kev ntseeg txog Yes Xus. Aus Nkus Tis Nus thiaj mus ua Xib Hwb nyob Mis Las Nos. Tab sis Aus Nkus Tis Nus tsis ntseeg Mas Nis txoj cai lawm. Nws tuaj txog Mis Las Nos, nws hnov zeej tsoom cav lus zoo txog tus Tswv Qhia hu ua As Nplos Xyus, ces Aus Nkus Tis Nus mus xyuas Tswv Qhia As Nplos Xyus.

Tswv Qhia As Nplos Xyus pom Aus Nkus Tis Nus yog ib tug neeg khav theeb, ces nws tso dag me ntsis rau Aus Nkus Tis Nus, nws txais Aus Nkus Tis Nus tiam sis nws tsis tau saib Aus Nkus Tis Nus zoo li ib tug phooj ywg. Aus Nkus Tis Nus rov mus tsev, nws tsis tshua txaus siab rau Tswv Qhia As Nplos Xyus. Tiam sis Aus Nkus Tis Nus paub tias Tswv Qhia As Nplos Xyus yog neeg tswv yim zoo, yog neeg muaj tsim. Niaj hnub Chiv, Aus Nkus Tis Nus tuaj mloog Tswv Qhia As Nplos Xyus nthuav Ntawv Moo Zoo.

Aus Nkus Tis Nus pom tias Tswv Qhia As Nplos Xyus thoob tsib dua nws, ces nws nyeem As Nplos Xyus tej phau ntawv tshaj Ntuj kev cai. Nws kuj tau nyeem tus kws txuj Hes Las hu ua ‘Plas Tos’ (Plato) tej ntawv hais ntau yam txog Huab Tais Ntuj tsim tas txhia yam thiab nres tas txhia yam, ces nws kub siab thiab ntseeg txog Tswv Ntuj. Tiam sis thaum ntawd Aus Nkus Tis Nus tseem tsis tau yuav Ntawv Moo Zoo los ua kev cai kav nws lub siab. Aus Nkus Tis Nus pom tias muaj ib tug Tswv Ntuj tiag yog tus tsim ntuj tsim teb. Aus Nkus Tis Nus lub siab muag, nws tso lub ntiaj teb tej kev qab siab pov tseg tsis tau, nws tso tsis tau kev pleev,  nws lub cev nqaij ntshaw cov poj niam.

Aus Nkus Tis Nus niam thiab cov me nyuam tuaj nrog Aus Nkus Tis Nus nyob, ces nws niam kom nws ntiab tus poj ntiav nrog nws nyob khiav. Aus Nkus Tis Nus mloog nws niam, ces nws nrauj poj ntiav. Tab sis tos tsis ntev Aus Nkus Tis Nus rov qab yuav lwm tus poj niam los nrog nws nyob. Nws tseg tsis tau txoj kev yos cov poj niam. Nws ua ywj fab ywj fwj li ntawd ob Xyoos.

Aus Nkus Tis Nus ntxhov siab kawg, nws hnov zoo li muaj ob tug neeg nyob hauv nws; ib tug neeg pom txoj kev zoo, ib tug neeg tog hauv txoj kev txhaum. Nws hais tias nws zoo li ib tug neeg tsaug zog, txog lub caij yuav sawv tiam sis nws ib lub siab pheej cheem nws cia, ces nws pheej tos pheej tos zoo li ntawd.

Aus Nkus Tis Nus paub tias nws ua tsis zoo, tsis phim lub txiaj ntsim Ntuj pub rau nws; ces muaj ib hnub Aus Nkus Tis Nus mus xyuas ib tug Txiv Plig. Nws piav qhov ntxhov siab rau tus Txiv Plig mloog, ces tus Txiv Plig piav txog ib tug neeg uas nyuam qhuav yuav Ntuj kev cai tau tsis ntev rau Aus Nkus Tis Nus mloog. Tus neeg ntawd yog Tswv Qhia As Nplos Xyus.

Muaj ib hnub Aus Nkus Tis Nus ntsib nws ib tug phooj ywg uas nyuam qhuav pib ua Ntuj kev cai. Tus phooj ywg piav txog cov Txiv Twj Cuab thiab cov Niam Twj Cuab nyob coob hauj sim tsis deb tsis ze ntawd. Nyob hauv cov Txiv Twj Cuab ntwd, muaj ob tug yog qub thawj tub rog; nkawd tau twm ntawv hais txog Ntuj kev cai, ces nkawd tso txoj hauj lwm ua nom pov tseg, nkawd tso nkawd tej hluas nkauj, tso niam tso txiv tseg tuaj mus ua Txiv Twj Cuab.

Aus Nkus Tis Nus hnov txog cov neeg ntawd lub siab nrauj ntiaj teb lub cuab tam, ces nws xav hauv siab tias ‘Ib co poj niam lawv txawj ua li ntawd, ib co tub rog lawv txawj tso tas puas tsav yam tseg kom tau xaiv txoj kev nyiam Huab Tais Ntuj tib leeg xwb. Ua cas kuv yuav tsis txawj ua li lawv?’ Tab sis nws kuj hnov ib lub suab nrov hauv nws siab tuaj tias ‘Yog koj xaiv ib txog kev tshiab, mas koj yuav tsum tso txoj kev plees kev yi tseg mus li; koj yuav rov qab taug tsis tau ib zaug ntxiv.’ Ces Aus Nkus Tis Nus yim ntxhov siab.

Muaj ib hnub hauv lub 3 hlis los lub 4 hlis xyoo 386 Aus Nkus Tis Nus nyob hauv nws lub vaj loog ntawm nws lub tsev nyob Mis Las Nos. Nws ntxhov siab tas nrho. Nws quaj vim nws tsis muaj zog txiav siab los mloog Yes Xus. Ces nws hnov ib tug me nyuam lub suab hu nkauj nyob hauv lub loog uas ti nws lub. Tus me nyuam hu nkauj tias “Koj tuav phau ntawv, koj nyeem mog! koj tuav phau ntawv, koj nyeem mog!”

Aus NkusTis Nus hnov cov lus ntawd, nws sawv tsees mus tuav Paj Lug cov tsab ntawv. Nws nthuav phau ntawv ncaj rau cov lus uas Paj Lug sau rau cov ntseeg nyob Los Mas zaj 13 qib 13. Yog ib co lus uas Paj Lug qhuab qhia cov ntseeg nyob Los Mas zoo li no “Nej txhob ua ib cov neeg quav cawv, neeg hu dab, neeg ua dev ua npua. Nej mloog Leej Pleev cov lus. Nej nrauj kev ntshaw mloog nej lub cev nqaij.”

Aus Nkus Tis Nus nyeem cov lus ntawd tas, phau ntawv plam plaws ntawm nws tes. Txoj kev kaj nyab los nyob puv hauv nws siab. Nyem no nws to taub meej tias nws yuav ua dab tsi. Aus Nkus Tis Nus tawm ntawm Mis Las Nos mus nyob rau hauv nws ib tug phooj ywg lub tsev nyob nruab teb. Nws nyob ntawd tau 9 lub hli. Tsuas muaj nws niam nws tus tub thiab tus tub leej niam nrog nws nyob. Thaum lub caij nws sau siab 9 lub hli ntawd nws sau ib phau ntawv tseg, nws piav tas txhia yam nws xav hauv nws nruab siab, nws thov kom Tswv Ntuj pab nws kom nws tig los yuav lub siab tshiab tiag.

Hnub tim 24 lub 4 hlis xyoo 387 Aus Nkus Tis Nus nrog tsoom neeg ntseeg txog Yes Xus nyob Mis Las Nos ua lub txoos cav txog Yes Xus sawv rov los, Nws txais lub Cim Ntxuav ntawm Tswv Qhia As Nplos Xyus txhais tes.

Aus Nkus Tis Nus rov mus As Fis Kas teb. Nws rov mus txog Kas Tas Nkes thiab txog Thas Nkas. Nws muab nws lub cuab yeej cuab tam muag tas huv si, nws muab cov nyiaj faib rau cov pluag, nws tsim ib lub tsev txais ib pab txiv neej nrog nws teev Ntuj. Aus Nkus Tis Nus xav nyob ntsiag to teev Ntuj, tsis xav tawm mus qhia Ntuj kev cai rau zeej tsoom, nws hais tias “Tsis muaj ib txog kev zoo dua txoj kev kawm Tswv Ntuj lub tswv yim nyob hauv ib thaj chaw ntsiag to. Yog yus yuav tsum ntuas sawv daws, qhuab qhia sawv daws, tswj sawv daws, yuav nrog sawv daws ntxhov siab tas zog; mas ntshai yuav ceeb laj kawg.”

Tiam sis nyob hauv xyoo 391 ib tug nom nyob lub nroog His Pos (Hippo) xav ua Ntuj kev cai, ces nws thov kom Aus Nkus Tis Nus tuaj pab qhia Ntuj kev cai rau nws. Aus Nkus Tis Nus ua tsis tau dab tsi, nws thiaj mus raws li tus nom thov.

Tus Tswv Qhia nyob His Pos yog ib tug neeg laus, nws yog neeg Hes Las, nws tsis paub lus Nus Mis Dias. Muaj ib hnub nws ntuas cov neeg nyob hauv lub tsev teev Ntuj, nws nroo tias cov Leej Choj nyob hauv lub nroog tsawg dhau, ces tas tsoom sid thiaj hais kom nws tsa Aus Nkus Tis Nus ua Leej Choj.

Aus Nkus Tis Nus hnov li ntawd, nws xav khiav rov qab mus nyob Thas Nkas, tiam sis sawv daws nthos nws cia thiab coj nws mus txog ze tus Tswv Qhia. Tswv Qhia nyob His Pos thiaj tsa Aus Nkus Tis Nus ua Leej Choj.

Xyoo 395 cov neeg ntseeg nyob His Pos thov kom Aus Nkus Tis Nus ua lawv tus Tswv Qhia, nws tsis tshua yeem, ces muaj ib tug hais rau Aus Nkus Tis Nus tias “Lub teeb ci ci xav nyob hauv ib qho chaw twj cuab, tiam sis lawv tsa nws nyob saum ib tug ncej siab.” Aus Nkus Tis Nus hnov li ntawd, nws thiaj ua ib siab ua tsoom neeg ntseeg hauv His Post us Tswv Qhia, Aus Nkus Tis Nus lub hnub nyoog muaj 40 xyoo.

Thaum Aus Nkus Tis Nus ua Tswv Qhia, nws tsis coj tus yam ntxwv li cov nom tswv, tab sis nws coj li cov Txiv Twj Cuab tus yam ntxwv. Nws kom tas nws tsev neeg noj mov ua ke, lawv kuj hnav xws li cov neeg me. Nyob ntawm phab ntsa tsev noj mov, Aus Nkus Tis Nus kom lawv sau lo lus no cia tias: ‘Yog koj tsis txawj hlub luag thiab koj lub ncauj kheev tom cov neeg nyob sab nraud, mas koj yuav paub tias cov neeg noj mov nyob ntawm lub rooj no lawv ntxub cov neeg nkawm xaiv.’

Nyob hauv nws lub tsev, mas sawv daws muaj ib lub caij teev Ntuj, ib lub caij txais Ntuj Lus, ib lub caij ua ntawv, ib lub caij ua hauj lwm tu vaj tu tsev.

Tswv Qhia Aus Nkus Tis Nus txoj hauj lwm mas yog niaj hnub yuav qhuab qhia thiab ntuas sawv daws kom mus raws Ntuj txoj kev cai, ua tus txiav txim rau tsoom ntseeg, ua hauj lwm pab cov neeg pluag, faib txhiam xws rau cov neeg tshaib plab noj, nrhiav nyiaj txhiv cov neeg nyob txim, saib tsoom ntseeg lub cuab tam hauv lub nroog. Ces sawv daws nyiam hais tej lo lus qhuas txog nws, tiam sis Aus Nkus Tis Nus hais rau lawv tias “Nej cov lus qhuas kuv yog zoo li tej nplooj tuaj nyob saum ntoo xwb, kuv xav kom nej ua tej tus ntoo txi txiv thiaj zoo dua.”

Dhau tej ntawd, mas Tswv Qhia Aus Nkus Tis Nus tseem uas txoj hauj lwm ntaus rog nrog cov neeg tawm tsam Ntuj kev cai xws li cov yuav Mas Nis kev cai, cov ntseeg ib siab rau Dos Nas zaj tswv yim, thiab cov mloog tus Txiv Twj Cuab Pes Las (Pelage) cov lus qhia.

Pes Las qhia tias tus twg xav taug txoj kev zoo los txoj kev txhaum kuj tau. Tus tsis taug txoj kev zoo mas vim nws tsis xav taug xwb. As Das ua txhaum tiam sis peb tsis ua txhaum kuj tau, vim peb muaj ib lub siab txawj zam kev ua txhaum. Ua li mas peb yuav tsis txais lub Cim Ntxuav kuj tau, peb yuav tsis vam txog Ntuj lub txiaj ntsim pab kuj tau. Yes Xus yog ib tug piv txwv zoo xwb. Yes Xus lam tuag nyob saum Ntoo Cuam xwb, nws txoj kev tuag tsis yog kev cawm peb.

Vim Tswv Qhia Aus Nkus Tis Nus tiv lub Koom Txoos cov yeeb ncuaj, mas nws thiaj sau 232 phau ntawv nthuav kev ntseeg; 400 zaj nthuav Ntawv Ntshiab hauv Hnub Chiv thiab 260 tsab ntawv xa mus rau tej tus neeg nug yam ub yam no.

 ‘Xis Lis’ (Cyril of Jerusalem) yug los nyob hauv lub tuam ceeb Yes Lus Xas Les, His Xas Lais teb xyoo tim 313 tuag xyoo 386.

Thaum Xis Lis muaj 30 tawm xyoo nws txais lub Cim Tiag Tes ua Leej Choj. Xyoo 350 Txiv Plig Xis Lis ua Tswv Qhia.

Tswv Qhia Xis Lis tshaj rau cov ntseeg tias tab txawm Yes Xus yog neeg, tsis kav Yes Xus lub hwj xyeej thiab lub hwj huam loj ib yam nkaus li Leej Txiv Tswv Ntuj. Tswv Ntuj Leej Tub yeej muaj txoj sia nyob txawm hauv Huab Tais Leej Txiv tiag.

Nyob hauv thaj tsam Xis Lis nyob, muaj tej pab neeg ntseeg As Lis Yus uas lawv tsis ntseeg tias Yes Xus muaj hwj huam loj npaum li Tswv Ntuj. Cov ntseeg As Lis Yus xav tias lawv yuav coj Tswv Qhia Xis Lis mus rau ib qho chaw xu kev, kom nws tsis txhob tau kev tshaj Ntuj Lus rau tej pawg ntseeg. Ces pab neeg ntawd tuaj ntes Tswv Qhia Xis Lis thiab coj nws mus kaw hauv tsev loj faj nyob deb ntawm teb chaws His Xas Lais. Tswv Qhia Xis Lis raug kaw nyob hauv tsev loj faj tau 16 xyoo. Nws yim raug tsim txom mas nws txoj kev ntseeg yim ruaj nreb dua qub.

Xyoo tim 381 Tswv Qhia Xis Lis nrog 200 tawm tus Tswv Qhia sib sau ua lub Rooj Ncauj Lus nyob hauv lub nroog Koos Taas Tis Nos Pos Lis, lawv tshaj tej qho tseem ceeb los txhawb nqa lub Koom Txoos. 

Tswv Qhia Xis Lis tau hais 6 nqe lus no tseg tias:

1. Yav thaud tseem tsis tau muaj ib yam dab tsi kiag, mas Tswv Ntuj Leej Tub yeej muaj txoj sia nyob txawm lawm. Yes Xus lub hwj huam loj cuag li Huab Tais Leej Txiv lub. Niaj hnub no Yes Xus uas yog Tswv Ntuj Leej Tub nws yog qhov pom kev thiab yog tseem Tswv Ntuj ib yam nkaus li Huab Tais Leej Txiv ntag.

2. Thaum nej ua Ntoo Cuam lub cim txhais tias nej los nkaum nyob hauv Tswv Ntuj xub ntiag thiab nej thov tus Huab Tais uas dai ntawm Ntoo Cuam kom nws siv nws lub hwj huam los ntxoov nej.

3. Txhua zaus uas nej hais zaj ‘Peb Txiv nyob saum ntuj’, mas nej yuav thov tias “Txiv khuv leej neeg tas nrho, thov koj nqes los kav tej lus kuv hais, kav tej dej tej num kuv ua, thiab tas tsoom neeg uas nrog kuv nyob ntawm no. Txiv siab zoo, yog tias koj pov hwm kuv mas kuv thiaj yuav muaj ib lub siab dawb huv zuj zus tuaj. Leej Txiv, kuv ua koj tsaug.”

4. Leej Ntuj Plig Ntshiab tau pov hwm thiab pleev Yes Xus lub siab zoo li cas, mas niaj hnub no Leej Ntuj Plig Ntshiab kuj pov hwm peb thiab pleev peb tej siab ntsws ib yam li ntawd thiab. Phim peb yuav ua Ntuj tsaug thiab nco txog nws tej txiaj ntsig.

5. Tswv Ntuj tau cog lus rau peb hais tias yav tom ntej nws yuav pub txoj sia nyob mus li rau peb. Txoj sia ntawd yog txoj sia nyob pem Tswv Ntuj lub Ceeb Tsheej, ces peb tso siab lug hais tias Tswv Ntuj yuav ua raws li nws tej lus uas nws tau cog tseg ntag.

6. Niaj Hnub Chiv thaum nej sib sau ua Thaj Txi Ntuj ua ke mas muaj ib yam tseem ceeb uas nej yuav muab siab rau ua yog qhov tias nej yuav nco txog tej tus neeg uas tso lub ntiaj teb no tseg lawm. Tsam lawv tseem muaj txhaum, ces nej yuav tau thov Yes Xus pab daws lawv tej txhaum pov tseg. Kom xwv lawv tau mus txog Tswv Ntuj lub Ceeb Tsheej.

Cov haiv neeg Fab Kis thiab cov Npws Nkoos tsiv los nyob coob hauv Los Mas teb. Lawv tsis xav ua rog, lawv thov tseem hwv Los Mas kom pub chaw rau lawv nyob. Tseem hwv Los Mas paub tias yuav laj nrog lawv ua rog, ces lawv txiav txoj cai tshiab tias cov haiv neeg uas lawv xav nrog Los Mas sib haum xeeb, mas lawv yuav tuaj nyob Los Mas teb kuj tau. Thaum cov Fab Kis thiab cov Npws Nkoos tuaj nyob hauv lub teb chaws twg mas cov neeg uas ib txwm nyob txawm ntawd yuav tsum faib lub cuab tam rau lawv yuav; cov neeg yuav faib ib feem rau lawv thiab tseg ob feem cia.

Hnub tim 31 lub 12 hlis xyoo 406 cov tub rog zov ntug dej Lees hnov nrov ncha ntws sab dej tim ub tuaj, ces ib me ntsis lawv pom ntau txhiab ntau vam leej neeg Vaas Das hla tus dej Lees tuaj. Cov tub rog Los Mas xav tiv cov neeg ri tuaj tab sis lawv tiv tsis yeej ces lawv khiav. Tas ib xyoos cov Vaas Das tsiv los nyob puv Nkas Lias teb. Lawv nyob tau ob peb xyoos ces lawv ho tsiv mus nyob Is Npes Lias teb (Espain) thiaj mam tsiv mus rau As Fis Kas.

Xyoo 410 cov Vis Xis Nkaus tus vaj hu ua ‘As Las Lis’ (Alaric I) ntxeev siab rau tseem hwv Los Mas, nws coj nws haiv neeg nyob ze ntawm tus dej Das Nws tuaj ntau lub nroog Los Mas. As Las Lis txeeb tau lub nroog Los Mas ces nws lwg lub nroog. Tab sis vim cov Vis Xis Nkausu a Ntuj kev cai raws li As Lis Yus zaj, mas thaum lawv pom cov tsev teev Ntuj lawv tsis hlawv tsis lwg. Yog cov tub rog nyiag cov ntim nyiaj ntim kub txi Ntuj, mas As Las Lis kom lawv sau cov ntim ntawd los nyob ua ke, nws hu cov Leej Choj hauv lub Koom Txoos kom tuaj nqa cov ntim ntawd rov qab. Lawv pom cov Tswv Qhia ntseeg txog Yes Xus xws li lawv, ces zaum puav lawv mloog cov Tswv Qhia lus thov kom txhob hlawv cov nroog thiab. Tiam sis cov Leej Choj As Lis Yus saib tias lub Koom Txoos kev cai tsis zoo, lawv kuj khib rau lub Koom Txoos thiab, vim lawv pom cov Tswv Qhia hauv lub Koom Txoos paub Ntuj kev cai thiab paub txuj ci zoo dua lawv. Ces ntau zaus lawv kom cov tub rog hiam lub Koom Txoos, lawv yuav cov tsev teev Ntuj los ua lawv tug, lawv txwv tsis kheev cov tub rog nrog cov ua Ntuj kev cai hauv lub Koom Txoos sib fim, lawv txwv tsis kheev yuav cov kev cai hauv lub Koom Txoos, lawv kuj txwv tsis kheev cov ua Ntuj kev cai hauv lub Koom Txoos ua tsev teev Ntuj.

Tsis ntev As Las Lis cov neeg tshaib plab, ces nws thiaj xav coj nws cov neeg mus rau As Fis Kas teb uas yog lub teb chaws muaj nplej ntau, tiam sis As Las Lis tuag ua ntej; nws tus dab laug hloov nws chaw los tswj cov Vis Xis Nkaus nyob Nkas Lias teb sab nraud, ces nws rov nrog cov Los Mas haum xeeb.

Cov Aas Kiv (Angles) uas lawv ib txwm nyob ze lub hiav txwv Npas Tis (Baltique) caij nkoj hla dej mus txeeb Nplaws Tas teb (Bretagne) hauv lub pov txwv Nplis Tas Nias (Britain). Cov Los Mas nyob ntawd twb xub khiav lawm, tiam sis cov neeg ib txwm nyob ntawd siv zog tiv cov Aas Kiv tas zog. Cov Aas Kiv muaj zog dua, ces cov neeg ib txwm nyob ntawd thiaj caij nkoj khiav hla los nyob ib lub teb chaws ntawm ntug hiav txwv hauv Nkas Lias qaum teb sab hnub poob, lawv hu lub teb chaws ntawd ua Nplaws Tas raws li lawv lub qub teb chaws hauv lub pov txwv Nplis Tas Nias.

Nyob hauv tiam plaub cov haiv neeg Hees (Huns) los yog Yoos Nus tuaj ntawm Moos Nkos Lias (Mongolia) tuaj ua tub rog Los Mas nyob hauv Mis Las Nos. Txog tiam tsib muaj ib tug tub rog Los Mas haiv neeg Hees hu ua ‘As Tis Las’ (Attila) tau sawv ua vaj kav nws haiv neeg, ces xyoo 450 As Tis Las npaj siab tuaj ntaus Los Mas teb. As Tis Las tso xov tuaj rau tus vaj Los Mas tias nws tau txais ib tsab ntawv ntawm tus vaj Los Mas tus ntxhais tias nws xav yuav As Tis Las ua nws tus txiv. As Tis Las hais rau tus vaj tias nws kuj xav yuav tus ntxhais ntawd thiab xav yuav tus ntxhais lub cuab tam yam li Los Mas teb ib nrab vim yog tus ntxhais tug.

Tus vaj Los Mas tau txais As Tis Las tsab ntawv ces nws kom tus ntxhais mus yuav txiv sai sai nyob Los Mas teb, ces nws teb ntawv rau As Tis Las tias tus ntxhais twb yuav txiv lawm. Yog li mas As Tis Las thiaj sawv kev tuaj ntaus Los Mas teb.

As Tis Las coj cov Hees hla Aws Los Pas teb tuaj, tsis muaj yuav tiv tau lawv li. muaj tej lub nroog uas As Tis Las tsis tau txeeb xws li lub nroog Pas Lis (Paris) yog vim cov Tswv Qhia tuaj thov As Tis Las kom txhob rhuav lawv lub nroog.

As Tis Las tuaj txog lub nroog Os Les Aas (Orleans) hauv nruab nrab Nkas Lias teb. Thaum ntawd tus lwm txheeb Los Mas hu ua As Es Xyus (Aetius) coj cov tub rog tuaj ntaus cov Hees. Cov Hees tsis ceev faj ces lawv thiaj swb rau cov Los Mas.

Vim As Es Xyus ntaus rog yeej cov Hees ces nws nto koob meej ua rau tus vaj Los Mas ntxub thiab ntshai nws, ces tus vaj thiaj muab As Es Xyus tua.

As Es Xyus tuag ces tsis muaj leej twg yuav pab tau cov vaj lawm, cov neeg qus thiaj tuaj txeeb lub teb chaws Los Mas, lawv muab tus vaj Los Mas ntes kaw nyob hauv xyoo 476.

            Xyoo 488 cov Os Thos Nkaus tuaj txeeb lub teb chaws Is Tas Lias, lawv tus vaj Tes Os Dos Lis (Theodoric the Great) ua vaj kav Is Tas Lias teb, ces tsis muaj Los Mas teb, tsis muaj tub rog Los Mas, tsis muaj vaj Los Mas lawm. Los Mas teb tawg ua ntau lub teb chaws zwm rau cov haiv neeg qus tas huv tib si.

Xyoo 500 Los Mas teb faib ua 9 lub teb chaws; yog Fab Kis teb, Aas Kiv teb, Nplaws Tas teb, Vis Xis Nkaus teb, Os Thos Nkaus teb, Npws Nkoos teb, Vaas Das teb, Xws Es teb (Sueves), thiab Los Mas teb sab hnub tuaj.

Tus vaj Tes Os Dos Lis tau kav Is Tas Lias teb thiab Hoos Nqias teb tas 33 xyoos. Nws xav kom lub teb chaws nyob thaj yeeb, ces nws faib nom rau cov Los Mas ua kev cai Kav Tos Liv ib yam li rau cov Os Thos Nkaus ua As Lis Yus kev cai. Cov Kav Tos Liv ntau leej pom tias teb chaws rov qab nyob thaj yeeb, lawv zoo siab ua Tes Os Dos Lis cov pej xeem.

Cov Leej Choj thiab cov Tswv Qhia Vis Xis Nkaus tsis paub txuj ci ntau, lawv khib cov nyob hauv lub Koom Txoos, lawv xav kom cov pej xeem ua As Lis Yus kev cai xws li tus vaj. Tab sis cov pej xeem hauv lub Koom Txoos ntau leej muab As Lis Yus cov kev cai los piv rau lawv li, ces tsis ntev lawv pib muaj lus sib cav.

Cov ua Ntuj kev cai hauv lub Koom Txoos nyob Los Mas xav nrog cov nyob sab hnub tuaj sib fi xov, ces tus vaj Tes Os Dos Lis xav tias yog lawv xav ntxeev siab thiab xav hu tus vaj nyob sab hnub tuaj, tuaj ntaus lub nroog Los Mas. Tsis ntev Tes Os Dos Lis pib yuam cov ua Ntuj kev cai hauv lub Koom Txoos nyob Los Mas.

Cov neeg Los Mas ib txwm nyob hauv lub teb chaws tsis nyiam cov neeg qus tuaj tshiab, lawv thuam lawv cem tias cov neeg tshiab ntawd tsw txhiab; tab sis lawv ntshai, ces lawv ua ib siab cia cov neeg tuaj tshiab nyob hauv lawv lub teb chaws. Cov Tswv Qhia kuj ntuas cov neeg Los Mas kom ua siab ntev, thiab cov Tswv Qhia saib cov haiv neeg qus yog neeg zoo li luag tej, lawv xav coj cov haiv neeg qus los nyob hauv lub Koom Txoos xws li luag tej, vim Yes Xus hais tias “Tas txhia haiv neeg yuav ntseeg txog Ntuj.”   

Cov Tswv Qhia tau ua tus piv txwv zoo thiab pab lub teb chaws ntawm cov haiv neeg qus mas muaj xws li Tswv Qhia Xis Nes Xus nyob Xis Les Nas, Tswv Qhia Pos Lis Nus nyob Nos Las, Tswv Qhia Zes Mas Nws nyob As Xes, Tswv Qhia Xis Lis nyob As Les Xas Nrias, thiab Tswv Qhia Les Os nyob Los Mas.

Tswv Qhia Xis Nes Xus (Synesius of Cyrene) yug xyoo 373. Nws yog ib tug noob nom thiab yog kws txuj, tiam sis xyoo 410 tsoom pej xeem nyob Xis Les Nas thov nws ua lawv tus Tswv Qhia, ces Xis Nes Xus thiaj tso nws kev ua si tseg, nws muab siab rau saib cov neeg ua Ntuj kev cai.

Thaum cov Vaas Das tuaj lwg lub nroog Xis Les Nas, Tswv Qhia Xis Nes Xus coj sawv daws tiv lawv tau 3 xyoos ces nws thiaj mam tuag.

Pos Lis Nus yug xyoo 354 hauv nroog Npos Dos (Bordeaux) Nkas Lias teb (Gaul). Nws ua ib tug nom tswj lub nroog.

Xyoo 390 Pos Lis Nus tus me nyuam yug los tau ib lub lis piam, ces tsis muaj siav lawm. Pos Lis Nus thiab nws poj niam tu siab, ces nkawd thiaj txiav siab ua lub Cim Ntxuav. Pos Lis Nus muab nws lub cuab tam faib rau cov neeg txom nyem thiab muab ib feem pub rau lub Koom Txoos, ces nkawd mus uas lub neej twj cuab.

Xyoo 393 Tswv Qhia hauv Npas Xes Los Nias pub lub Cim Tiag Tes rau Pos Lis Nus ua Leej Choj. Txiv Plig Pos Lis Nus thiaj tshais chaw mus nyob Nas Nplaws (Naples), Is Tas Lias teb.

Pos Lis Nus thiab nws poj niam sib pab txhim tsa ib lub haum xeeb. Nkawd muab nkawd cov liaj teb hauv Nkas Lias muag tau nyiaj los pub rau cov neeg pluag thiab coj los txhim tsa lub tsev teev Ntuj nyob hauv Foos Ntis (Fondi), tsa ib lub tsev kho mob txais cov neeg dhau kev, thiab pab ua tus kwj tso dej. Pos Lis Nus qhib nws lub tsev txais cov neeg mob thiab txom nyem tau chaw so nkaum nag nkaum tshav.

Txog xyoo 409 cov ua Ntuj kev cai nyob hauv Nos Las xaiv Pos Lis Nus ua lawv tus Tswv Qhia. Nws kub siab saib xyuas cov neeg ua Ntuj kev cai thiab sau ntau zaj kwv txhiaj paj nruag los cav txog Tswv Ntuj thiab cov Leej Ntshiab.

Thaum cov Vis Xis Nkaus tuaj txog lub nroog Nos Las, lawv lwg tas lub nroog, ces Tswv Qhia Pos Lis Nus ua siab loj mus qhia lawv. Cov Vis Xis Nkaus muab Tswv Qhia Pos Lis Nus hiam, tsis kav nws qhuab qhia lawv li qub. Tsis ntev Tswv Qhia Pos Lis Nus tuag thaum muaj 77 xyoo. Thaum ntawd yog xyoo 431.

Tswv Qhia Zes Mas Nus (Germanus of Auxerre) yug xyoo 378 hauv lub nroog Aus Xes. Nws yog ib tug nom loj nyob hauv lub teb chaws Nkas Lias. Xyoo 418 thaum Zes Mas Nus muaj 40 xyoo, cov pej xeem xaiv nws ua lawv tus Tswv Qhia. Zes Mas Nus hlub nws cov neeg, nws muab nws tej cuab tam faib rau cov neeg pluag, nws tsim ntau lub tsev pab cov neeg txom nyem, nws niaj hnub ncig zej ncig zos ntuas sawv daws thiab tshaj Ntuj Lus rau sawv daws. Tswv Qhia Zes Mas Nus hla hiav txwv mus pab cov ua Ntuj kev cai hauv Aas Kiv kom txhob ib siab rau Pes Las (Pelagius) zaj tswv yim vim Pes Las qhia cov pej xeem hauv Aas Kiv teb kom yuam kev tias neeg lub keeb txhaum tsis poob los txog rau cov xeeb ntxwv tom qab no.

Thaum cov neeg qus tuaj txog Nkas Lias teb, Tswv Qhia Zes Mas Nus mus cuag lawv, nws ntuas lawv kom txhob lwg lub teb chaws, mas cov neeg qus pom tias nws muaj hwj chim kawg thiab yog ib tug neeg siab dawb siab huv, ces lawv thiaj tsis ua phem rau lub teb chaws.

Xyoo 448 thaum Tswv Qhia Zes Mas Nus mus cuag cov tseem hwv Los Mas nyob lub nroog Las Ves Nas (Ravenna) mas nws tuag nyob nrad, ces tsoom pej xeem thiaj taws tsau kwv Tswv Qhia Zes Mas Nus lub cev rov los rau Aus Xes.

Tswv Qhia Xis Lis nyob As Les Xas Nrias (Cyril of Alexandria) yug xyoo 387. Xyoo 412 Tswv Qhia Tes Os Fis Los tas sim neej, lub Koom Txoos nyob As Les Xas Nrias xaiv nws los ua lawv tus Tswv Qhia.

Thawj xyoo Xis Lis coj lub Koom Txoos nyob As Les Xas Nrias, nws ntsib teeb meem ntau kawg hais txog tej yam hauv kev ntseeg, tshwj xeeb mas yog hais txog Yes Xus thiab niam Mab Liab, ces muaj ib zaug Tswv Qhia Xis Lis sau ntawv mus ntuas cov Txiv Twj Cuab hauv Hais Nkws Tos teb tias “Kuv poob siab thaum tseem muaj nej tej tus ua xyem xyav txog niam Mab Liab tias nws puas yog Tswv Ntuj Leej Niam. Leej Pleev twb yog tseem Tswv Ntuj, yog li ua cas tus nkauj ntshiab xeeb Leej Pleev thiaj yuav tsis yog Tswv Ntuj Leej Niam mas!”

Tus Tswv Qhia tau tshaj tej zaj yuam kev txog Yes Xus thiab ua xyem xyav mas yog tus Tswv Qhia nyob Koos Taas Tis Nos Pos Lis hu ua ‘Nes Tos Lis Yus’ (Nestorius).

Nes Tos Lis Yus yog ib tug muaj lub tswv yim ntse, tab sis nws lub siab ceev. Xyoo 428 cov hlob thiab tus vaj kav cov teb chaws uas zwm rau Koos Taas Tis Nos Pos Lis, tsa Nes Tos Lis Yus ua tus Tswv Qhia saib cov ntseeg nyob hauv lub nroog Koos Taas Tis Nos Pos Lis. Thaum chiv thawj Nes Tos Lis Yus qhia txoj kev ntseeg Yes Xus haum lub Koom Txoos. Tos tsis ntev mas Nes Tos Lis Yus qhia ib zag txawv, nws hais tias “Nyob hauv Yes Xus muaj ob leeg. Ib leeg yog Tswv Ntuj xws li Huab Tais Leej Txiv, thiab lwm leej yog tib neeg xwb. Ob leeg ntawd sib haum xeeb, tab sis ob leeg muaj hwj chim sib txawv: ib leeg yog tib neeg uas Mab Liab yug los thiab nws tuag nyob saum ntoo cuam, lwm leej yog tus uas muaj Tswv Ntuj lub hwj chim.”

Nes Tos Lis Yus hais tias vim Yes Xus yog ob leeg sib txawv li ntawd, mas peb hais tsis tau tias Yes Xus yog Tswv Ntuj Leej Tub tuag nyob saum ntoo cuam, tsis phim yuav hais tias Tswv Ntuj tuag, vim Tswv Ntuj nyob mus li. Thiab peb kuj hais tsis tau tias Mab Liab yog Tswv Ntuj Leej Niam, vim Mab Liab yog ib tug poj niam xeeb tsis tau Tswv Ntuj.

Thaum Nes Tos Lis Yus pib qhia cov ntseeg hauv nws lub Koom Txoos tias Mab Liab tsis yog Tswv Ntuj Leej Niam, mas cov ntseeg txais tsis tau Nes Tos Lis Yus; vim lawv hu kam Mab Liab ua Tswv Ntuj Leej Niam thiab lawv ntseeg tas siab tias Mab Liab yog Tswv Ntuj Leej Niam.

Cov ntseeg feem tsawg xav tswv yim xws li Nes Tos Lis Yus. Feem coob tsis kam yuav Nes Tos Lis Yus zaj tswv yim tshiab, ces ob tog sib cav thiab sib ntaus nyob hauv cov tsev teev Ntuj, thiab nyob ntawm tej tshav puam.

Xyoo 431 tus vaj Tes Os Dos Ob (Theodosius II) thiaj hu 250 tus Tswv Qhia tuaj sib sau ua lub Rooj Ncauj Lus nyob Es Fes Xos. Tswv Qhia Xis Lis ua tus coj lub Rooj Ncauj Lus nyob Es Fes Xos zaum no. Lawv txiav tias lub Koom Txoos yuav raws cov lus hauv Rooj Ncauj Lus nyob Koos Taas Tis Nos Pos Lis xyoo 381 thiab ntxiv ib lo lus ntseeg tias ‘Mab Liab yog Tswv Ntuj Leej Niam (Mother of Gos <Máter Déi>), vim Yes Xus yog tseem Tswv Ntuj’.

Xyoo 440 tus Tswv Qhia nyob Los Mas tuag, cov ua Ntuj kev cai xaiv Les Os (Pope Leo the Great) ua tus Tswv Qhia tshiab. Les Os tshaj tias txij no mus lub Koom Txoos yuav hu tus Tswv Qhia nyob Los Mas ua ‘Pas Pas’ (Papa) txhais tias ‘Txiv’. Lus Hmoob hu  tias ‘Vaj Qhia’ (Pope). Lo lus ‘Pas Pas’ yog lo lus lub Koom Txoos nyob As Les Xas Nrias hu lawv tus Txiv Tswv Qhia (Patriarch of Alexandria) hauv tiam peb.

Xyoo 451 Vaj Qhia Les Os pom tias cov ua Ntuj kev cai pheej xib rau As Lis Yus zaj tswv yim, ces Vaj Qhia Les Os thiaj hu 500 tus Tswv Qhia tuaj ua lub Rooj Ncauj Lus nyob hauv lub nroog Khas Tshaws Dos Nias (Calchedonia). Vaj Qhia Les Os tso siab tias cov Tswv Qhia yuav xav tswv yim txog txoj kev ntseeg mus raws qhov tseeb ces nws xa 2 tug tiam lis mus nrog cov Tswv Qhia sab laj, nkawd nqa Vaj Qhia tsab ntawv mus cuag tsoom Tswv Qhia. Tsab ntawv muaj lub ntsiab lus tias:

Cov neeg uas lawv tshaj tias Yes Xus tsuas yog Tswv Ntuj xwb, nws tsis yog tseem neeg; cov neeg ntawd yuam kev. Ib txwm los nyob hauv lub Koom Txoos peb tau khaws tej zaj zeem tseeb tseg tias ‘Tswv Ntuj xa nws Leej Tub nqes los ua neeg nyob hauv ntiaj teb no kom tau cawm neeg ntawm kev ua txhaum thiab kho neeg lub siab ntsws kom tiaj tus. Tus Hauv Paus Xa Lus Paj Lug kuj hais tias ‘nyob ntawm Tswv Ntuj thiab tib neeg kis nruab nrab, tsuas muaj ib tug cev lus xwb; yog Yes Xus Pleev. Nws yog tseem neeg, nws muab nws los ua nqe txhiv peb sawv daws’ (1TMT 2: 5).Yog vim tej lus tseeb ntawd, mas txij no mus peb yuav ntseeg khov kho tias Yes Xus Pleev muaj hwj chim ib yam nkaus Huab Tais Leej Txiv thiab Huab Tais Leej Ntuj Plig Ntshiab.

Cov Tswv Qhia pom muaj tseeb raws li Vaj Qhia Les Os cov lus, ces txij hnub ntawd los cov ua Ntuj kev cai thiaj ntseeg tias ‘Yes Xus yog tseem Tswv Ntuj thiab tseem tib neeg.’

Vaj Qhia Les Os tseem muab siab ntuas cov neeg ua Ntuj kev cai kom nyob nraim hauv txoj kev ntseeg, xws li thaum txog hnub hwm Yes Xus mus saum ntuj, mas Vaj Qhia Les Os ntuas sawv daws tias “Hnub no, Huab Tais Leej Txiv uas yog peb tus Huab Tais Tswv Ntuj. Nws yog tus ib txwm nyob thiab muaj txoj sia mus txog txhiab niag tim puas xyoo, nws txais nws Leej Tub Yes Xus Pleev mus nyob ntawm nws sab xis hauv nws lub Ceeb Tsheej lawm. Nej yuav nco ntsoov tias Yes Xus Pleev yog lub taub hau, hos peb yog nws tes taw. Niaj hnub Yes Xus pub txoj sia tuaj rau peb. Yes Xus nce mus pem Ntuj lub Ceeb Tsheej thiab nws tau txais lub hwj chim loj tshaj. Peb cov ntseeg uas koom siab nrog Yes Xus, mas hnub no peb kuj tau txais lub hwj chim loj tib yam nkaus li Yes Xus thiab. Tsis tas li ntawd, peb tso siab tias muaj ib hnub peb lub cev yuav tau nce mus pem Tswv Ntuj lub Ceeb Tsheej ib yam li Yes Xus thiab. Tab sis peb lub cev yuav txawv lub cev uas nyob ntiaj teb no.”

Vaj Qhia Les Os hais ntxiv tias “Hnub uas nej tau txais lub Cim Ntxuav mas Yes Xus tau cawm nej dim ntawm qhov tsaus ntuj. Nyob hauv Yes Xus, nej yuav tau txais Tswv Ntuj cov txiaj ntsim cawm neeg thiab txoj kev zam txhaum. Yog nej paub tias nej nyob hauv Yes Xus, mas nej yuav ceev faj kom nej tsis txhob zwm rau kev tsaus ntuj thiab kev txhaum. Cov ntseeg sawv daws! Niaj hnub, nej yuav nco ntsoov hais tias yav tas los lawd, nej tau txais lub Cim Ntxuav, ces nej txia ua ib lub tsev rau Leej Ntuj Plig Ntshiab nyob. Leej Ntuj Plig nyob txawm hauv nej nruab siab tiag. Yog vim Yes Xus hlub nej txhua tus, nws thiaj tuaj yeej ris kev raug txom nyem kom tau txhiv nej ntawm neeg cov txhaum thiab txoj kev raug dab phem ntxias. Niaj hnub, nej yuav ceev faj txog tas txhia yam uas nej tau ua. Yog tias nej ua txhaum, mas txhais tias nej muab Yes Xus tshem hauv nej siab lawm. Nej yuav nco ntsoov tias tus yeeb ncuab Xas Tas niaj hnub cuab ntxiab saib nej puas yuav mag nws rooj ntxiab. Yog ob yam no: kev ua neeg nplua nuj thiab kev ua neeg pluag.

‘Kev ua neeg nplua nuj’, vim tias tus neeg muaj mas nws yuav khav theeb tias nws ntse dua luag lwm leej lwm tus, nws txawj ua tej dej num zoo dua luag tej. ‘Kev ua neeg pluag’, rau qhov tias tus neeg pluag kuj yuav yws yws tias nws nyob ntawm txheej neeg qis tshaj, ces yuav ceev faj tsam nws yuav ntshaw lwm tus tej nyiaj txiag, nws yuav mus ua tub sab tub nyiag.

Yog vim li ntawd, mas nej yuav ceev faj kom nej tsis txhob mag dab phem Xas Tas ob roog ntxiab ntawd. Yog ib tug neeg ntseeg uas nws ‘kub siab teev Ntuj’, mas nws yuav tau txais Tswv Ntuj cov txiaj ntsim daws nws cov txhaum. Tus neeg ntseeg uas nws ‘pub mov’ los ‘pub nyiaj’ rau cov neeg pluag, mas nws kuj tau txhiv nws tus kheej ntawm nws tej txhaum thiab. Yog ib tug ntseeg uas nws kub siab ua 3 yam ntawd, mas Tswv Ntuj lub txiaj ntsim yuav ci kaj nws lub siab, ces nws yuav muaj lub siab kub lug nyob ruaj nreb hauv txoj kev teev Tswv Ntuj.”

Xyoo 452 Los Mas teb txom nyem loj, vim cov haiv neeg Hees tab tom tuaj txeeb lub teb chaws. Vaj Qhia Les Os yog neeg siab loj siab tawv, nws lub siab tus yees, nws tsis ntshai dab tsi li; nws pab sawv daws ua siab loj, ces tus vaj Vas Lees Tis Nus thov Vaj Qhia Les Os pab nrog tus vaj As Tis Las sib tham kom txhob rhuav lub nroog Los Mas.

Thaum lub 7 hli xyoo 452 Vaj Qhia Les Os thiab ib pab nom tswv Los Mas ua ke mus ntsib tus vaj As Tis Las. Thaum ntawd As Tis Las coj nws pab neeg tuaj txog tus dej Mees Xyos (Mancio), yuav hla tuaj rau Los Mas. As Tis Las pom ib pab Leej Choj ua Ntuj kev cai thiab ib pab Txiv Twj Cuab maj mam nquam ib tug ntoo cuam ua lawv ntej tuaj. Pab neeg ntawd hu nkauj cav txog Tswv Ntuj thiab teev Ntuj.

As Tis Las pom tias nyob hauv pab neeg ntawd, muaj ib tug yawg laus hwj txwv dawb paug caij nees. As Tis Las thiaj caij nws tus nees mus txog ib thaj suab puam nyob hauv plawv dej Mees Xyos, nws qw rau tus yawg laus tias “Koj lub npe hu li cas?” Tus yawg laus teb tias “Kuv yog Vaj Qhia Les Os.”

As Tis Las ua xyem xyav me ntsis, ces nws caij nees mus txog ntawm Vaj Qhia Les Os. Nkawd sib tham thiab nyob ua ke sab laj ob hnub, ces Vaj Qhia Les Os cev tus vaj Vas Lees Tis Nus pob nyiaj rau As Tis Las. Qhov kawg As Tis Las zoo siab ua raws li Vaj Qhia Les Os cov lus thov. Cov Hees thiaj thim rov qab mus Laws Xias teb.

Vaj Qhia Les Os thiaj hais rau sawv daws nyob hauv lub nroog Los Mas tias “Tsim nyog peb yuav ua Huab Tais Tswv Ntuj tsaug, vim Huab Tais Tswv Ntuj tau pab cawm peb dim ntawm kev raug xwv txheej.” Ces cov Los Mas tseem teev dab thiaj tsis tau chaw thuam cov ua Ntuj kev cai tias Ntuj kev cai tsis txawj pov hwm Los Mas teb xws li cov dab Los Mas thaud.

Vaj Qhia Les Os kuj tau pab cov neeg pluag; nws tawm mus faib hmoov nplej rau cov neeg tshaib plab. Nws kuj rau siab tshaj Ntuj Lus, nws tsim kab ke ua lub Cim Ntxuav. Vaj Qhia Les Os sau ntawv ntuas thiab sau cov Thaj Txi Ntuj ua ib phau kom txhij kom txhua. Nws tau sau Koom Txoos cov Cim thiab tej kab ke los ua tej phau ntawv cia.

Thaum cov Vaas Das hla lub hiav txwv Mes Dis Tes Las Nes tuaj txeeb Los Mas, tus vaj Los Mas nyuag qhuav tuag, ces Vaj Qhia Les Os ua tus mus ntsib tus vaj Vaas Das. Vaj Qhia Les Os thov kom cov Vaas Das txhob hlawv lub nroog thiab txhob tua neeg, cov Vaas Das lwg lub nroog tau 14 hnub ces lawv tso tseg.

Tim 10 lub 11 hlis xyoo 461 Vaj Qhia Les Os thiaj tuag, lawv muab nws zwm av nyob hauv Leej Ntshiab Pob Zeb lub Tuam Tsev Teev Ntuj. Lawv txaug cov lus nyob saum nws lub ntxa tias ‘Thov koj pov hwm peb mus li, kom cov hma nyas peb mus li tsis txhob tom tau pab yaj’.

Yog txhob muaj Vaj Qhia thiab cov Tswv Qhia sib pab mas cov haiv neeg qus haj yam tau ua lwj ua liam rau lub teb chaws, cov ua Ntuj kev cai yuav tau txom nyem heev, cov neeg qus kuj yauv tsis tau pom Yes Xus cov tim khawv zoo.

Thaum tiam tsib yuav tas, cov Os Thos Nkaus tuaj nyob hauv Is Tas Lias teb, cov Vaas Das tuaj yuam cov ua Ntuj kev cai nyob As Fis Kas pej, cov Vis Xis Nkaus tuaj nyob Is Npes Lias thiab Nkas Lias teb, cov Npws Nkoos tuaj nyob Nkas Lias teb sab hnub tuaj, thiab cov Fab Kis nyob Nkas Lias teb sab pej.

Cov haiv neeg qus lawv coob tsis cuag cov neeg ib txwm nyob, tab sis sawv daws ntshai lawv. Cov haiv neeg qus tsis txawj kav teb chaws xws li cov Los Mas ces lub teb chaws vam meej tsis cuag yav thaud, tab sis sawv daws ua twj ywm mloog cov nom tswv tshiab xwb.

Cov nom tswv thaud uas lawv nrog cov Los Mas kav teb chaws mas lawv tsis nyob lawm, los tej tus nyob mas kuj nyob twj ywm xwb. Cov neeg pab teb pab chaw tsuas yog cov Tswv Qhia, lawv tsis ntshai cov nom tswv tshiab.

Cov nom tswv tshiab kuj hwm cov Tswv Qhia me ntsis thiab. Cov Tswv Qhia thiaj tau kev ua lawv lub luag hauj lwm zoo li qhov qub. Tab sis lawv ua tsis tau nyob ntawm lawv siab. Lawv siab mas lawv xav kom cov haiv neeg qus tuaj tshiab thiab cov ib txwm nyob sawv daws yuav ib lub siab nyob hauv Yes Xus; thiaj yuav tsis muaj chaw sib ntxub. Tab sis cov haiv neeg qus tuaj tshiab lawv coj As Lis Yus kev cai, lawv ntsia tias As Lis Yus zaj zoo dua cov Kav Tos Liv zaj.

Cov Tswv Qhia tsis pom qab yuav ua li cas thiaj yuav ua tau kom haum cov haiv neeg tuaj tshiab thiab cov ib txwm nyob, lawv sib haum.

Nyob hauv cov neeg qus ntawd, muaj ib haiv neeg tseem teev dab; yog haiv neeg Fab Kis nyob Nkas Lias sab pej. Cov Tswv Qhia paub tias cov haiv neeg tseem teev dab mas lawv txais Ntuj Lus zoo dua cov yuav As Lis Yus kev cai, ces cov Tswv Qhia pib tso siab rau haiv neeg Fab Kis.

 Xyoo 481 ‘Kaws Los Vis’ (Clovis) muaj 15 xyoos, nws sawv ua cov Fab Kist us vaj. Tus Tswv Qhia nyob Leev (Reins) hu ua ‘Les Mis’ (Remy) sau ib tsab ntawv tuaj rau nws tias yog Kaws Los Vis xav kom nws lub teb chaws vam meej mas nws yuav tsum nrog cov Tswv Qhia sib haum zoo, nws yuav tsum vam txog cov Tswv Qhia nrog nws sab laj.

Xyoo 486 Kaws Los Vis muaj 20 xyoo, nws coj nws cov tub rog Fab Kis mus ntaus ib tug nom nyob hauv lub nroog Xuas Xoos (Soissons). Cov tub rog Fab Kis lwg cov tsev teev Ntuj, lawv nyiag tau ib lub ntim kub loj muaj nqe kawg, ces ib tug Tswv Qhia sau ntawv tuaj thov Kaws Los Vis kom pab xa lub ntim kub rov qab. Kaws Los Vis tos thaum tas sawv daws sib sau los nyob ua ke, ces nws hais rau cov tub rog tias tus twg nyiag lub ntim kub los, kom muab rau nws. Ib tug tub rog thiaj thau tawm los cev rau Kaws Los Vis. Muaj ib tug thawj tub rog hais rau Kaws Los Vis tias “Raws peb txoj cai, tas txhia yam uas peb txeeb tau mas peb yuav sib tw saib tus twg yuav tau dab tsi.”

Ces tus thawj tub rog ib taus rau lub ntim kub mluav tas, Kaws Los Vis ua twj ywm, nws yuav lub ntim mluav ntawd, nws xa mus rau tus Tswv Qhia.

Ib xyoos tom qab, Kaws Los Vis tuaj saib nws cov tub rog, nws rov pom tus thawj tub rog no, nws hais rau tus thawj tub rog tias “Ua cas koj tsis txawj tu cev. Saib koj rab taus koj rab hmuv phem ua luaj!” Ces Kaws Los Vis nthos nkaus tus thawj tub rog rab taus tib cuam rau ntawm nws xub ntiag.

Tus thawj tub rog khoov kiag yuav mus khaws rab taus, ib sij huam Kaws Los Vis ib taus rau saum tus thawj tub rog taub hau. Kaws Los Vis hais tias “Tsaib no, koj ua li ntawd rau lub ntim kub.”

Tas cov thawj tub rog pom, mas lawv zoo siab vim tus thawj tub rog ntawd tau ua rau lawv txaj muag rau lawv tus vaj.

Xyoo 493 Thaum Kaws Los Vis muaj 24 xyoo, tus vaj Npws Nkoos xav kom nws ib tug ntxhais ua Ntuj kev cai nyob hauv lub Koom Txoos npuab Vaj Qhia nyob Los Mas yuav tus vaj Kaws Los Vis, ces nws thiaj hais kom Tswv Qhia As Vis fi xov mus rau Tswv Qhia Les Mis pab nrog hais. Kaws Los Vis mloog Tswv Qhia Les Mis hais ces nws thiaj yuav tus vaj Npws Nkoos tus ntxhais hu ua ‘Kaws Los Tis Das’  (Clotilde).

Kaws Los Tis Das yog ib tug ua Ntuj kev cai zoo kawg, niaj hnub nws tham txog Ntuj kev cai rau Kaws Los Vis mloog, tab sis Kaws Los Vis tseem txoj kev cai dab li qhov qub.

Kaws Los Vis hlub nws tus poj niam, ces thaum nws tau ib tug tub, nws cia tus tub txais lub Cim Ntxuav raws li Kaws Los Tis Das hais, tab sis tus tub mob mob tuag lawm. Kaws Los Vis hais rau nws poj niam tias “Koj tus Tswv Ntuj tsis txawj cawm koj tus me nyuam, yog kuv cov dab mas lawv cawm tau xwb xwb.”

Kaws Los Tis Das rov yug tau ib tug tub rau Kaws Los Vis. Tus tub kuj raug mob thiab, tab sis nws rau siab ntso thov Ntuj pab, ces tus me nyuam tsis tuag.

Xyoo 496 ib haiv Zes Mas Nias tuaj ntaus Fab Kis teb nyob ze tus dej Lees. Kaws Los Vis paub tias yog nws swb ntsuj rog ntawd, mas yuav tsis muaj vaj Fab Kis ntxiv lawm. Lawv tab tom sib tua heev heev, cov Fab Kis yuav luag tsis yeej, ces Kaws Los Vis hu Ntuj pab, nws fiv yeem Ntuj tias “Kaws Los Tis Das tus Huab Tais, yog koj pab peb kom peb yeej mas kuv yuav txais lub Cim Ntxuav.” Ces cov Fab Kis thiaj li yeej cov Zes Mas Nias raws li Kaws Los Vis thov.

Kaws Los Vis ntaus ntsuj rog ntawd tas, nws npaj txais lub Cim Ntxuav. Nws nug cov thawj tub rog tias lawv puas pom zoo cia nws ua Ntuj kev cai. Tas sawv daws pom zoo, ces Kaws Los Vis thiaj mus kawm Ntuj kev cai ntawm ib tug Txiv Twj Cuab hu ua Ves Das (Vedast).

Thaum Kaws Los Vis hnov Ves Das piav txog luag txiav txim rau Yes Xus, Kaws Los Vis siab kub, nws hais tias “Kuv kheev lam nrog kuv cov tub rog Fab Kis nyob ntawd mas cov Yus Das tsis tau muab Yes Xus tua kiag!”

Thaum txog hmo hwm Yes Xus yug los, Kaws Los Vis nrog ob peb txhiab tus tub rog txais lub Cim Ntxuav ntawm tus Tswv Qhia Les Mis, nyob hauv lub nroog Lees Xaws.

Vaj Qhia nyob Los Mas xa ntawv tuaj rau tus Tswv Qhia Les Mis tias “Koj tau coj haiv neeg tshiab Fab Kis ntawd los txais txoj kev hwm Ntuj, mas koj tau ua hwj huam loj cuag li cov Hauv Paus Xa Lus thaud.”

Kaws Los Vis txais lub Cim Ntxuav vim nws pom tias tas cov Tswv Qhia nyob Nkas Lias teb yuav pab nws, nws pom tias Yes Xus yog tus Huab Tais tseeb tiag, thiab yog vim nws pom hais tias tus Tswv Ntuj uas nws poj niam teev txawj pab lub ntiaj teb; txawj pab cov neeg nyob hauv nws tsev; txawj ua kom muaj tej tus neeg zoo npaum li Kaws Los Tis Das thiab cov Tswv Qhia.

Niaj hnub cov ua Ntuj kev cai nyob hauv cov teb chaws zwm rau cov vaj ua As Lis Yus kev cai, mas lawv raug txim ntau. Thaum lawv hnov hais tias tus vaj Fab Kis txais lub Cim Ntxuav lawm, mas sawv daws xav kom nws tuaj ntaus cov vaj coj As Lis Yus kev cai, sawv daws thiaj tau kev coj Ntuj kev cai nyob ntawm siab. Kaws Los Vis kuj paub tias cov ua Ntuj kev cai ntawd tos txog nws, lawv yuav zoo siab txais nws, ces nws hais tias “Nkas Lias teb ib nrab coj As Lis Yus kev cai, kuv nyiaj tsis taus. Kuv yuav mus ntaus lawv. Yog Ntuj pab mas peb yuav kav tas lub teb chaws kom sawv daws tau nyob thaj yeeb.”

Txog xyoo 500 Kaws Los Vis mus pab tus vaj Npws Nkoos ntaus rog  nyob Npws Nkoos teb. Xyoo 507 nws mus ntaus haiv neeg Vis Xis Nkaus tus vaj As Las Lis Ob (Alaric II) nyob Nkas Lias qab teb raws li tus vaj nyob Koos Taas Tis Nos Pos Lis thov, ces Kaws Los Vis thiaj ua vaj kav tas Nkas Lias teb.

Thaum Kaws Los Vis ntaus rog yeej lub teb chaws twg, mas nws tsis yuam leej twg. Nws tsis xav kom cov neeg qus tsiv los nyob Nkas Lias teb vim cov ib txwm nyob lawv sib ntxub.

Thaum twg Kaws Los Vis hnov tias muaj ib tug thawj tub rog yuam ib co pej xeem, mas tam sim ntawd nws cia li xuas nws rab taus mus tua kiag tus neeg ntawd ntag.

Cov vaj uas coj kev teev hawm As Lis Yus tau muab tej tus txiv neej, tej tus poj niam, tej tus Leej Choj thiab tej tus Tswv Qhia kaw nyob hauv tsev loj faj. Lawv raug yuam ua haiv neeg Nkaus cov qhev, mas Kaws Los Vis tso lawv sawv daws tawm mus ua lawv lub neej nyob twj lij.

Ua li mas thaum Kaws Los Vis txeeb tau ib lub teb chaws, lub teb chaws ntawd zoo siab zwm rau nws. Cov haiv neeg ib txwm zwm rau Los Mas lawv kuj zoo siab. Cov haiv neeg coj As Lis Yus tog kuj zoo siab. Sawv daws rov sib haum xeeb zoo.

Xyoo 511 tus vaj Fab Kis Kaws Los Vis hu cov Tswv Qhia nyob Nkas Lias teb tas huv si tuaj ua thawj lub Rooj Ncauj Lus nyob Nkas Lias teb. Sawv daws sib sau nyob hauv lub nroog Os Les Aas (Orleans), muaj 32 tug Tswv Qhia sab laj txog txoj kev tshaj lub Moo Zoo nyob Nkas Lias teb.

Xyoo ntawd yuav tas, yog lub caij nws yuav mus ntaus cov neeg Nkaus uas tseem kav Is Tas Lias teb. Kaws Los Vis muaj 45 xyoos ces nws tas sim neej, nws cov tub yuav mus vim lawv kuj pab lub Koom Txoos xws li nws thiab. Lawv yuav ntaus cov vaj As Lis Yus nyob Is Tas Lias teb, nyob Is Npes Lias teb thiab nyob Zes Mas Nias teb.

Thaum Kaws Los Vis ntaus rog yeej cov teev dab thiab cov coj As Lis Yus kev cai, mas sawv daws thuam tsis tau cov ua Ntuj kev cai hauv lub Koom Txoos ntxiv. Lawv pom tias cov neeg ua Ntuj kev cai kuj muaj zog xws li luag tej thiab. Lawv kuj pom tias tus vaj ua Ntuj kev cai lawm, mas cov haiv neeg ib txwm nyob hauv sawv daws zoo siab, lub teb chaws nyob thaj yeeb tsis muaj lus sib ceg txog txoj kev cai yuav coj ntxiv. Vim li ntawd, thaum Kaws Los Vis yuav Ntuj kev cai lawm thiab nws mus ntaus rog yeej ntau lwm, mas sawv daws pom tias Ntuj muaj hwj huam, lawv xyeej tsis tau txog qhov ntawd lawm.

Thawj tug vaj ua raws Kaws Los Vis tus piv txwv yog tus vaj Npws Nkoos.

Xyoo 500 Tus vaj Npws Nkoos tus tub ‘Xis Zis Moos’ ua Ntuj kev cai, nws xaiv Tswv Qhia As Vis ua nws tus Txiv Coj Ke. Xis Zis Moos kub siab teev Ntuj tab sis nws cheem tsis tau nws lub siab ceev, ces thaum nws npau taws nws tua neeg. Tswv Qhia ntuas nws ces nws rov thov txhaum thiab ua tej txoj hauj lwm them txim. Tas sawv daws pom tias Xis Zis Moos tus yeeb yam hloov, ces muaj ntau txhiab leej Npos Nkoos tuaj nrog nws ua Ntuj kev cai. Ntev xyoo mus tas haiv neeg Npos Nkoos sawv daws yuav ib lub siab tsis muaj lus sib ntxub dab tsi lawm.

Cov Xws Es nyob Is Npes Lias sab hnub poob, lawv ua xyem xyav tsis paub yuav ua As Lis Yus kev cai los yuav ua Ntuj kev cai. Xyoo 450 tus vaj Lis Sias txiav siab ua Ntuj kev cai, tab sis nws tus tub yuav As Lis Yus kev cai.

Thaum txog xyoo 560 lawv teb chaws Xws Es muaj ib tug Tswv Qhia txhawj tshaj lus zoo, ces tus vaj thiaj ua Ntuj kev cai mas cov pej xeem thiaj pib hloov ua Ntuj kev cai raws tus vaj qab.

Nyob Is Tas Lias teb thiab Nkas Lias qab teb, cov Vis Xis Nkaus tus vaj Aws Lis ib txwm hiam cov ua Ntuj kev cai. Thaum Kaws Los Vis tuaj ntaus lawv hauv Nkas Lias qab teb, ces lawv tawg tas rov mus Is Tas Lias teb. Tom qab Kaws Los Vis tus tub kuj caum qab tuaj ntaus lawv nyob Is Tas Lias teb thiab muab tus vaj tua tuag, ces cov vaj Vis Xis Nkaus thiaj tu noob.

Xyoo 567 Laus Vis Zis sawv ua vaj Vis Xis Nkaus, nws caum cov Fab Kis tawm hauv Is Tas Lias teb, nws ntaus cov Xws Es ces nws rov kav tau Is Npes Lias teb. 

Laus Vis Zis xav kom tas nws lub teb chaws ua As Lis Yus kev cai, ces nws yuam cov ua Ntuj kev cai. Tab sis nws muaj ib tug tub hu ua ‘Es Mes Nes Zis’ uas yuav ib tug poj niam Fab Kis, ces Es Mes Nes Zis ua Ntuj kev cai raws nws poj niam. Laus Vis Zis hiam nws tus tub thiab tus nyab, nkawd thiaj khiav mus nyob lwm lub nroog.

Tas cov ua Ntuj kev cai, cov Xws Es, thiab cov tsis nyiam Laus Vis Zis sawv los tawm tsam nws, lawv xav tsa Es Mes Nes Zis ua vaj kav Is Npes Lias teb. Tab sis Es Mes Nes Zis siab zoo, nws tsis nyiam ua rog tiv nws txiv.

Ib co tiam lis tuaj thov kom Es Mes Nes Zis rov qab mus nrog nws txiv nyob, nws thiaj rov qab mus nrog nws txiv nyob. Laus Vis Zis ua txuj txais tus tub thiab tus nyab zoo, tab sis thaum nws tab tom txais nkawd zoo li ntawd, nws twb tso ib co tub rog tuaj ntes Es Mes Nes Zis mus kaw hauv tsev loj faj. Es Mes Nes Zis raug kaw hauv tsev loj faj tsaus tsaus ntuj, nws raug txom nyem loj. Niaj hnub nws txiv Laus Vis Zis tso neeg tuaj ntxias kom nws yuav As Lis Yus kev cai.

Lawv muab Es Mes Nes Zis natus, lawv txob nws npaum twg mas nws kuj coj Ntuj kev cai li qhov qub, ces Laus Vis Zis npau taws heev. Nyob hauv hmo ua Hmoov Hla xyoo 585 nws tso ib co neeg mus txiav Es Mes Nes Zis taub hau.

Xyoo tom qab tus vaj Laus Vis Zis tuag, tus vaj tshiab yog Les Kas Les, nws coj As Lis Yus kev cai xws li nws txiv Laus Vis Zis. Tab sis thaum nws ua vaj nws tau hloov los npuab lub Koom Txoos ces nws hu cov Tswv Qhia tuaj nrog cov As Lis Yus sib cav nyob hauv nws lub tuam tsev kom cov As Lis Yus poob ntsej muag. Nws coj ib pab nom tswv los poo lub Koom Txoos. Txij hnub ntawd los, cov vaj Vis Xis Nkaus nyob Is Npes Lias teb thiaj los nyob hauv lub Koom Txoos, ces tas cov haiv neeg ib txwm nrog cov Los Mas nyob thiab cov Vis Xis Nkaus pib sib haum.

Nyob hauv lub pov txwv Nplis Tas Nias thiab Ais Lis (Ireland) yog cov haiv neeg Xes Nthis lub teb chaws.

Xyoo 401 cov Xes Nthis uas nyob hauv lub pov txwv Ais Lis lawv cov neeg tsis txaus ua lawv tej hauj lwm, ces lawv thiaj caij nkoj mus ntes tej pab neeg nyob Nplaws Tas hauv Nplis Tas Nias coj los ua qhev nyob hauv lawv lub pov txwv. Nyob hauv cov neeg uas lawv ntes tau ntawd, muaj ib tug tub hluas hnub nyoog 16 xyoo hu ua ‘Pas This’ (Patrick).

Pas This ua qhev tau 6 xyoo nyob hauv lub pov txwv Ais Lis, ces nws khiav dim. Nws caij nkoj mus nyob Nkas Lias teb. Nws ua Txiv Twj Cuab nyob hauv lub pov txwv Les Lees (Lerins) nyob Nkas Lias qab teb. Tab sis nws nco ntsoov txog Ais Lis teb. Nws hais tias “Niaj hnub, kuv hnov cov me nyuam nyob Ais Lis teb lawv hu txog kuv.”

Pas This ua Txiv Twj Cuab tau 20 tawm xyoo, ces xyoo tim 432 Pas This muaj 40 tawm xyoo lawm, nws hais rau ib tug Tswv Qhia Nkas Lias tias nws hnov Tswv Ntuj tuaj tshoj kom nws mus tshaj Yes Xus lub Moo Zoo nyob hauv lub pov txwv Ais Lis. Tus Tswv Qhia Nkas Lias thiaj tsa Pas This ua Tswv Qhia thiab xa Pas This mus tshaj lub Moo Zoo rau cov Xes Nthis nyob hauv lub pov txwv Ais Lis.

Cov Xes Nthis nyob hauv lub pov txwv Ais Lis, mas lawv muaj cov txiv dab hu ua cov Nrws Is (Druids). Lawv nyob ua tej pab hauv tej lub loog nto koob meej.  Pas This mus nrog cov Nrws Is tham, nws nrog lawv sib cav txog lawv kev teev hawm. Pas This muaj hwj huam dua lawv, ces ntau pab Nrws Is tso lawv txoj kev cai teev dab pov tseg.

Cov Xes Nthis muaj cov kws hais kwv txhiaj nto koob meej tas nrho, nyob hauv lub pov txwv Ais Lis. Pas This nrog lawv sib twv tsim tej zaj kwv txhiaj qhia lub Moo Zoo, ces cov kws hais kwv txhiaj thiaj txais kev ntseeg, lawv cia li sib pab tsim cov kwv txhiaj thiab tej zaj nkauj tshaj lub Moo Zoo. Lawv mus hu nkauj tshaj Yes Xus lub Moo Zoo nyob tas hauv lawv lub teb chaws.

Cov poj niam Xes Nthis nyob Ais Lis teb txais Ntuj kev cai, lawv kuj coj lawv cov txiv los ua Ntuj kev cai thiab. Vim li ntawd, mas tas Ais Lis teb thiaj txais Tswv Ntuj Lo Lus sai.

Cov Xes Nthis nyob Ais Lis teb txais Tswv Ntuj Lo Lus zoo, vim lawv pom tias txoj kev ntseeg Ntuj zoo dua lawv cov qub kev cai. Lawv ntseeg Ntuj vim lawv nyiam tiag, lawv tej chaw thaum ub lawv teev dab mas lawv cia li muab los ua tej qhov chaw teev Ntuj. Lawv cov ncej zeb uas thaum ub yog chaw teev dab, lawv txaug Yes Xus tus duab rau, ces cov ncej zeb ntawd pab lub teb chaws nco txog Yes Xus yog tus cawm ntiaj teb neeg.

Xyoo tim 444 Pas This ua Tswv Qhia saib Ais Lis teb, nws tsa lub Tsev Hauv Paus Tshaj Ntuj Lus nyob lub nroog As Mas (Armagh). Pas This tsim ntau lub Tuam Tsev Txiv Twj Cuab nyob tas lub teb chaws ntawd. Qee lub tsev Txiv Twj Cuab muaj nto 200 los 300 leej Txiv Twj Cuab nyob ua ke. Ntev mus, cov Txiv Twj Cuab sib sau nyob ua tej lub zos, nyias muaj nyias ib lub me nyuam tsev nyob hauv lub zos Txiv Twj Cuab.

Cov Txiv Twj Cuab Ais Lis mas lawv tsis nyob hauv lawv lub loog tas niaj tas xyoo, lawv mus tshaj lub Moo Zoo rau cov teb chaws nyob ib ncig ntawm lawv. Los tej zaus lawv mus tshaj Yes Xus lub Moo Zoo nyob pej kum teb.

Cov tsev Txiv Twj Cuab nyob Ais Lis teb yog zoo li ib co tsev hauv paus tsim tej pab tub tshaj Yes Xus lub Moo Zoo; yog cov tsev hauv paus xyaum teev Ntuj, yog cov tsev hauv paus kav cov pej xeem coj kev ntseeg nyob ib ncig ntawm lawv. Tas cov teb chaws nyob Aws Los Pas tsis muaj lwm lub teb chaws uas sawv daws kub siab coj Tswv Ntuj Lo Lus thiab tshaj lub Moo Zoo npaum li Ais Lis teb. Cov ntseeg nyob hauv lub pov txwv Ais Lis lawv nquag mus tshaj Yes Xus lub Moo Zoo nyob tas ntiaj teb. Xyoo tim 461 Pas This thiaj mam tas sim neej.

Cov Xes Nthis nyob hauv lub pov txwv Ais Lis, piav ntau zaj hwj huam thiab ntau zaj muaj ntsis zoo li cov zaj dab neeg, los cav txog lawv cov neeg uas tshaj Ntuj Lus.Muaj qee leej cog lus tias tas lawv sim neej lawv yuav tsis rov qab los nyob hauv lawv lub teb chaws lawm. Luag hais tias cov Xes Nthis ib txwm yeej nyiam mus kev deb, nyiam mus tawm rooj deb deb. Txij thaum lawv kub siab tshaj Yes Xus lub Moo Zoo mas lawv haj yam ntoj kev heev dua. Cov ntawv Xes Nthis piav tias cov Txiv Twj Cuab Xes Nthis mus tshaj txoj kev ntseeg txog Yes Xus mas lawv lub siab loj kawg.

Ntawv piav tias muaj qee zaus, muaj tej pab Txiv Twj Cuab mus tshaj Yes Xus lub Moo Zoo nyob pej kum teb, mas lawv cia li zaum hauv lub nkoj, lawv tsis siv rab duav nquam nkoj li, lawv tsuas tso siab rau Tswv Ntuj xwb, ces Tswv Ntuj tso cua tshuab lawv lub nkoj mus rau lub teb chaws twg, mas lawv tshaj Yes Xus lub Moo Zoo nyob lub teb chaws ntawd.

Ntawv kuj piav tias cov Txiv Twj Cuab ua hwj huam yees ntxwv ntau kawg, muaj tej pab Txiv Twj Cuab xav hla dej mus tshaj Yes Xus lub Moo Zoo, lawv tsis muaj nkoj caij, lawv cia li khaws xyeem tej lub dab lug zeb los caij. Cov dab lug zeb ntawd kuj ntab saum nplaim dej, coj lawv mus txog pej kum teb. Tseem muaj ib pab Txiv Twj Cuab caij nkoj mus saum nplaim dej hiav txwv tau ntau hnub, lawv thiaj mus txog ib lub pov txwv me me. Lawv nqes nkoj, lawv txi Ntuj nyob ntawm lub pov txwv me me ntawd. Ciav lub pov txwv ntawd tsis yog av, yog ib lub nraub qaum vaj ntses xwb.

Lawv tseem piav tias lawv mus txog dab phem teb, lawv pom dab phem cov hluav taws tawm hauv plawv ntiaj teb, los tshwm saum nplaim dej hiav txwv. Qhov tseeb, mas yog lawv mus txog Ais Xis teb ces lawv pom muaj tej lub roob cig hluav taws.

Tej ntawv piav txog cov Txiv Twj Cuab mus tshaj Yes Xus lub Moo Zoo, tseem muaj tej zaj uas peb ntseeg tas tsis tau. Vim zaum puav lawv lam xev tswv yim hais ua kwv huam. Tab sis lawv tau ua ntau yam txaus qhuas thiab tiag.

Xyoo 440 los 450 cov Aas Kiv thiab cov Xas Xoos  tso Zes Mas Nias teb tseg, lawv hla dej tuaj txeeb Nplaws Tas teb, lawv tsis pub cov Xes Nthis nrog lawv nyob hauv lub teb chaws, ces cov Xes Nthis thiaj tsiv mus nyob pem hauv sab nyob sab hnub poob, ib cov hla hiav txwv tuaj nyob As Mos teb (Amor) hauv xeev ntuj Fab Kis.

Cov neeg ib txwm nyob As Mos teb tsawg tsawg kawg. Thaum cov Xes Nthis ua tsheej pab tsiv los nyob As Mos teb, mas lub teb chaws rov tshiab tuaj. Cov Xes Nthis tsiv los nyob As Mos teb lawv niaj hnub nrog lawv cov neeg Xes Nthis nyob Ais Lis, thiab nyob Nplis Tas Nias teb, sib fim. Lawv ua ib haiv neeg sib paub zoo.

Cov Xes Nthis tsiv los nyob As Mos teb ib ntus ntev li 200 xyoo, ces cov neeg nyob As Mos teb txais kev ntseeg coob tuaj. Tas tiam 5 thiab tiam 6 cov Xes Nthis nyob Nplaws Tas teb thiab nyob Ais Lis teb pheej caij nkoj los nyob As Mos teb tsis tseg. Cov Txiv Twj Cuab kuj tuaj coob kawg, lawv tsim ntau lub tsev Txiv Twj Cuab nyob As Mos teb. Yes Xus lub Moo Zoo ri mus puv tas lub teb chaws ntawd sai.

Los txog tav no, cov Xes Nthis nyob As Mos teb lawv tseem sib tham kwv huam hais txog lub caij thaum ub uas cov Txiv Twj Cuab tau tsim cov zos thiab cov nroog uas nyem no sawv daws nyob, yog tus Leej Ntshiab Zis Das (St. Gildas).

Zis Das yog ib tug vaj Xes Nthis tus tub. Nws tau mus kawm txuj ci nyob Nkas Lias teb, ces nws mus ua Txiv Twj Cuab nyob Ais Lis teb, nws sau Ais Lis cov kwv huam tseg ntau kawg. Nws thiaj caij nkoj rov los nyob As Mos teb, ces nws tau tshaj lub Moo Zoo mus txog hnub nws tas sim neej nyob hauv As Mos teb. Leej Ntshiab Zis Das yug los xyoo tim 510 nws tuag xyoo 570.

Ib tus Txiv Twj Cuab Ais Lis mus tshaj Yes Xus lub Moo Zoo nyob pej kum teb nto moo loj tshaj cov, yog Leej Ntshiab Kos Loos Npas (St. Columban).

Kos Loos Npas yug los nyob Ais Lis teb, ze ntawm xyoo 540. Kos Loos Npas yog ib tug hluas zoo nraug ntxiag, nws lub ntsej muag tsim txhiaj kawg. Cov ntxhais hluas nkauj lub siab dai ncuv rau nws lub meej mom zoo nraug.

Muaj ib hnub, ib tug Leej Phauj Twj Cuab hais rau nws tias “Yog koj xav dim ntawm txoj kev plees kev yi nyob ncig koj lub cev, mas koj kawg khiav mus nyob pej kum teb xwb.” Ces Kos Loos Npas tsis khiav mus pej kum teb, tab sis nws ua Txiv Twj Cuab nyob Ais Lis teb. Xyoo 563 Kos Loos Npas mus txog lub pov txwv Yaus Nas (Iona), ces nws tsim ib lub Tuam Tsev Txiv Twj Cuab nyob ntawd.

Ze ntawm xyoo 573 Kos Loos Npas thiaj nrog 12 tug phooj ywg caij nkoj hla lub hiav txwv tuaj txog As Mos teb. Lawv mus tshwm As Mos teb nyob ze Leej Ntshiab Miv Kas lub roob. Kos Loos Npas kuj tsis kam nyob As Mos teb, vim nws cog lus tias tas nws sid nws yuav ntoj kev tshaj Yes Xus lub Moo Zoo.

Kos Loos Npas xub ntoj kev 14 xyoos nyob Nkas Lias teb. Nws sam sim hla mus hla los nyob hauv Nkas Lias qaum teb. Muaj ib xyoos, Kos Loos Npas los nyob Npws Nkoos teb. Tus vaj Npws Nkoos muab ib thaj av dav dav pub rau Kos Loos Npas, ces Kos Loos Npas thiaj tsim nws thawj lub Tuam Tsev Txiv Twj Cuab, yog nyob As Naws Nqes (Annegray).

Xyoo 590 Kos Loos Npas tso nws cov thwj tim nyob rau As Naws Nqes, nws mus nrhiav dua lwm qhov chaw zoo, tsim dua ib lub Tuam Tsev Txiv Twj Cuab tshiab. Nws mus pom lub nroog Lws Xaws, ces Kos Loos Npas tsim ib lub Tuam Tsev Txiv Twj Cuab nyob Lws Xaws (Luxeuil).

Kos Loos Npas nyob hauv lub nroog Lws Xaws ntev xyoo. Kos Loos Npas nto koob meej kawg, tas sawv daws tuaj ntsib nws, lawv thov kev pab xav tswv yim ntawm nws. Cov vaj nyob ib ncig ntawm nws, kuj hwm nws, lawv ntshai nws cov lus qhuab qhia. Cov Tswv Qhia Fab Kis kuj ntshai nws me ntsis thiab, vim tus twg yuam kev mas nws ntuas tus ntawd nruj hauj sim.

Kos Loos Npas pab ib tug poj niam hu ua ‘Fas Las’ tsim ib lub tsev rau ib co Niam Twj Cuab nyob. Fas Las yog ib tug ntxhais nom, nws tsev neeg tsis tshua xav kheev kom nws ua Niam Twj Cuab. Tab sis nws tau tsim ib lub Tuam Tsev cia rau ib pab Niam Twj Cuab nrog nws nyob.

Kos Loos Npas tsis ntshai kev iab kev khwv, tsis ntshai cov nom cov tswv. Tiam sis muaj ib tug vaj Npws Nkoos siab phem kawg, nws nyiam tua neeg thiab nyiam zes luag poj luag sev. Muaj ib zaug, tus vaj ntawd kom Kos Loos Npas foom hmoov zoo rau nws cov me nyuam tsaub. Kos Loos Npas tsis kam, nws ntuas tus vaj, ces tus vaj npau taws heev. Kos Loos Npas xav tias txog nws lub caij tuag lawm, tab sis tus vaj kuj ntshai muab Kos Loos Npas tua thiab, nws kawg ntiab Kos Loos Npas kom txhob nyob Npws Nkoos teb xwb. Kos Loos Npas yuav tsum tso lub tsev Txiv Twj Cuab Lws Xaws tseg, tu nws siab kawg, nws thiaj ua ib siab tso Lws Xaws tseg, ces nws coj ib pab thwj tim nrog nws mus tshaj Yes Xus lub Moo Zoo nyob hauv cov teb chaws uas nyob tsis deb tsis ze ntawm tus dej Lees (Rhin). Kos Loos Npas thiaj rov tsim peb plaub lub Tuam Tsev Txiv Twj Cuab nyob Zes Mas Nias teb. Lub tsev loj dua cov yog lub nyob Nples Zees (Bregens).

Tab sis tus vaj Npws Nkoos tseem xa neeg tuaj tua Kos Loos Npas thiab. Kos Loos Npas thiaj tsiv mus deb dua qub. Nws mus tsim ob lub Tuam Tsev Txiv Twj Cuab ntxiv, ces nws thiaj raug mob, nws tuag nyob Is Tas Lias qaum teb, yog xyoo tim 615. Thaum ntawd Kos Loos Npas muaj 75 xyoos.

Thaum tiam 5 haiv neeg Xas Xoos uas nyob Zes Mas Nias qaum teb, lawv hla dej hiav txwv tsiv los nyob hauv lub pov txwv Nplis Tas Nias. Lawv hiam haiv neeg Xes Nthis uas xub nyob hauv. Cov Xes Nthis ib txhia thiaj caij nkoj tsiv mus nyob hauv lub pov txwv Ais Lis. Haiv neeg Xes Nthis nyob hauv lub pov txwv Ais Lis txais kev ntseeg txog Yes Xus lawm, mas lawv kub siab mus tshaj Yes Xus lub Moo Zoo nyob tej lub teb chaws nyob deb ntawm lub pov txwv Ais Lis. Tab sis lawv ntshai mus qhia kev ntseeg rau cov Xas Xoos uas tab tom tsiv los nyob coob zuj zus hauv Nplis Tas Nias teb. Lawv nco ntsoov tias cov Xas Xoos tau hiam lawv heev thiab tau muab lawv coob leej tua.

Cov Xas Xoos tsiv los nyob hauv lub pov txwv Nplaws Tas, lawv siab nqig, lawv tsis ntxub cov Xes Nthis xub ua Ntuj kev cai. Lawv nco lawv txoj kev teev cov dab Xas Xoos tsawg zuj zus. Tus vaj Xas Xoos yuav ib tug poj niam tuaj ntawm Fab Kis teb tuaj, yog ib tug poj niam ntseeg txog Yes Xus, nws lub npe hu ua ‘Npes Tas’ (Bertha). Tus poj vaj Npes Tas coj ib tug Leej Choj tuaj pab nws teev Ntuj thiab kawm Yes Xus lub Moo zoo nyob hauv tus vaj lub tsev. Haiv neeg Xas Xoos maj mam hloov lub npe tshiab hu ua haiv neeg ‘Aas Kiv’.

Vaj Qhia Nqes Nkos Lis (Pope Gregory I)nyob Los Mas mloog tej xwm tshwm sim nyob Nplis Tas Nias teb, ces nws nrhiav saib yuav tso leej twg mus tshaj Ntuj Lus rau cov Aas Kiv. Vaj Qhia xav xaiv ib tug tsim nyog tso siab rau, ces nws thiaj xaiv tus Txiv Tab Seeb Aus Nkus Tis Nus (Augustinin) hauv cov Txiv Twj Cuab Npes Nas Dis (Benedictines).

Xyoo 596 Vaj Qhia xa Aus Nkus Tis Nus nrog 40 tus Txiv Twj Cuab mus tshaj Yes Xus lub Moo Zoo nyob hauv tus vaj Aas Kiv lub nroog Kaas Tos Npes Lis (Canterbury).

Thaum Aus Nkus Tis Nus lawv sawv kev mus, mas lawv txhawj hauj sim vim yav nram ntej Aas Kiv teb nto moo phem. Muaj lus moo cua hais tias cov Aas Kiv noj lawv cov yeeb ncuab lub plawv, thiab lawv hais ib xeem lus uas tsis muaj neeg to taub. Luag hais kam tias Aas Kiv teb yog lub teb chaws uas cov neeg tuag tus ntsuj plig mus nyob txim mus li. Cov Txiv Twj Cuab hnov zeej tsoom hais tej lus xaiv lus ncua ntawd, mas lawv ntshai. Tab sis Vaj Qhia nyob Los Mas hais kom lawv mus, ces lawv 40 leej ua ib siab sawv kev mus.

Thaum Aus Nkus Tis Nus lawv tuaj txog Aas Kiv teb, mas tas txhia yam tsheej xeeb tuaj zoo heev. Tus vaj Aas Kiv hu ua ‘Es Thes Npes’ (Ethelbert) nrog nws poj niam Npes Tas thiab nws cov thawj tub rog lawv sawv daws zaum hauv tsob qab ntoo. Lawv pom Aus Nkus Tis Nus nrog cov Txiv Twj Cuab tuaj ua tej kab sab, lawv ke hu cov zaj nkauj teev Ntuj, ke nquam ib tug ntoo cuam nyiaj thiab Yes Xus ib daig duab loj loj.

Tus vaj Es Thes Npes nrog Aus Nkus Tis Nus lawv sib tham ib hnub, nws nug ntau yam hais txog Yes Xus cov lus thiab lub neej. Tus poj vaj Npes Tas ua tus txhais lus rau nws tus txiv. Tus vaj Es Thes Npes mloog Aus Nkus Tis Nus cov lus tas, nws thiaj tso lus kheev tshaj Yes Xus lub Moo Zoo rau nws tsoom pej xeem. Nws pub ib lub tsev rau Aus Nkus Tis Nus lawv nyob, ze ntawm nws lub tuam tsev.

Ib xyoos tom qab, yog hnub tim 1 lub 6 hli ntuj xyoo 597 yog hnub uas lub Koom Txoos ua lub ntees cav txog Leej Ntuj Plig nqes los, ces tus vaj Es Thes Npes nrog nws cov thawj tub rog feem coob txais lub Cim Ntxuav.

Lub 11 hlis xyoo 597 Vaj Qhia Nqes Nkos Lis nyob Los Mas xa ib tug Tswv Qhia tuaj tsa Aus Nkus Tis Nus ua Tswv Qhia saib lub Koom Txoos nyob Aas Kiv teb. Thaum txog hnub ua hmoov Yes Xus yug, muaj ib vam tus neeg Aas Kiv txais lub Cim Ntxuavnyob hauv ib tug dej. Tus vaj Es Thes Npes zoo siab tas nrho, nws muab nws lub tuam tsev hauv  lub nroog Kaas Tos Npes Lis pub rau Tswv Qhia Aus Nkus Tis Nus nyob.

Vaj Qhia Nqes Nkos Lis nyob Los Mas teb, nws lub tswv yim dav, nws xav tsim lub Koom Txoos kav tas Aas Kiv teb, ces nws ceeb toom tuaj rau Aus Nkus Tis Nus tias yav tom ntej yuav muaj 3 tug Tuam Tswv Qhia (Archbishop) saib cov ntseeg nyob tas Aas Kiv teb. Ib tug nyob Kaas Tos Npes Lis, ib tug nyob Loos Doos (London), thiab ib tug nyob Yob (York). Yuav muaj 12 tug Tswv Qhia nyob hauv cov nroog me pab tus Tuam Tswv Qhia.

Ib txwm los, cov tub tshaj Ntuj Lus nyiam ua raws lawv siab, tej tus mus qhia Ntuj kev cai rau cov neeg teev dab, ces lawv rhuav cov tsev teev dab pov tseg, los lawv xav tso lub teb chaws twg pov tseg ces lawv cia li tso. Ua li mas zaum puav cov tub tshaj Ntuj Lus qee leej yuam kev. Vaj Qhia Nqes Nkos Lis tsis xav kom Aus Nkus Tis Nus lawv ua li cov tub tshaj Ntuj Lus yav tas los, ces xyoo 601 lub 7 hli tim 18 nws thiaj sau ntawv mus ntuas lawv tias:

“Nej yuav tsis txhob rhuav cov tsev teev pej kum dab, nej yuav muab dej foom hmoov zoo los ntxuav lawv tej tsev teev dab, thiab nej yuav tsa thaj txi Ntuj rau hauv. Nej yuav muab cov Leej Ntshiab tej pob txha los rau sawv daws hwm.

Nyob tej qhov chaw uas yav thaud lawv nquam paj nquam nruas teev pej kum dab, mas nej yuav hu lawv tuaj mus nquam paj nquam nruas hwm peb tus Yes Xus.

Niaj xyoo, lawv muaj lub hnub nyoog ua tsev nplooj thiab ua rooj qav, mas nej yuav cia lawv ua li ntawd ntxiv mus, tab sis nej yuav qhia kom lawv hwm cov tim khawv ntshiab.

Nej cia lawv taug lawv txoj kev lom zem sab nraud li yav thaud, nej thiaj yuav tau kev ntuas kom lawv xyaum nyiam txoj kev lom zem nyob hauv nruab siab.

Tej haiv neeg uas ib txwm lawv yeej coj kam ib tug yam ntxwv qus, mas nej yuav kom lawv ua ib zaug tso pov tseg tas huv tib si tsis tau. Yuav xav nce mus saum ib lub roob, mas yuav dhia ib plhaws kom mus txog saum lub roob tsis tau; yus yuav maj mam tshais ruam zuj zus thiaj txog saum lub roob tau.”

            Xyoo 610 tas lub teb chaws nyob ncig Loos Doos txais kev ntseeg thiab lawv tsim ib lub tsev Txiv Twj Cuab loj nyob hauv Ves Nis Nthaws (Westninster).

            Nyob lub nroog Yob, ib tug Txiv Twj Cuab tuaj qhia Ntuj kev cai rau tus poj vaj thiab ib tug txwj laus, ces nkawd coj mus qhia rau tus vaj. Xyoo 627 tus vaj nyob lub nroog Yob thiaj yuav Ntuj kev cai.

            Cov neeg tau pab kom Aas Kiv teb tig los ua ib lub teb chaws koom siab thiab koom tswv yim yog cov Txiv Twj Cuab. Thaum txog xyoo 700 muaj ib puas tawm lub tsev Txiv Twj Cuab nyob puv Aas Kiv teb. Muaj ib tug nto npe dua cov, nws lub npe yog ‘Vis Fis’ (Wilfrid) tus Tswv Qhia nyob lub nroog Yob.

Cov Txiv Twj Cuab paub cov txuj Los Mas thiab qhia txuj rau cov nom thiab rau tsoom pej xeem. Aas Kiv teb thiaj nrog lub Koom Txoos nyob Los Mas koom siab koom ntsws mus txog tiam 16 uas yog lub caij tus vaj Hees Lis Yim nrog tus Vaj Qhia nyob Los Mas muaj plaub muaj ntug.

Ib txwm los cov Zes Mas Nias nyob plawv teb Aws Los Pas nrog cov Los Mas sib fim, lawv kuj nrog cov haiv Fab Kis, cov Npaws Nkoos tsiv mus nyob Los Mas teb ua kwv ua tij. Ces thaum tiam 7 thiaj muaj tej lub nroog nyob ze ciam teb Los Mas tau txais Yes Xus lub Moo Zoo, tab sis cov Zes Mas Nias kuj tsis ua xws li cov ua Ntuj kev cai tus piv txwv vim lawv pom cov ua Ntuj kev cai hais pej kum lus thiab coj pej kum tus yeeb yam.

Thaum ntawd, muaj tej tus tub tshaj Ntuj Lus haiv neeg Fab Kis, Ais Lis, Aas Kiv pib mus tshaj Yes Xus lub Moo Zoo nyob hauv cov Zes Mas Nias. Cov tub tshaj Ntuj Lus ntawd muaj 4 leeg nto moo loj dua cov; tus ib yog‘Kos Loos Npas’, tus ob yog ‘Nkas’, tus peb yog ‘Vis Lis Nplos’ thiab tus plaub yog ‘Vees Fis’.

Kos Loos Npas yug los xyoo 540 nyob hauv lub pov txwv Ais Lis. Nws xaiv lub neej ua Txiv Twj Cuab. Thaum muaj 35 xyoos, nws caij nkoj hla hiav txwv mus txog Fab Kis teb sab hnub poob. Muaj 12 tug Txiv Twj Cuab nrog Kos Loos Npas tshaj Ntuj lus. Lawv tsim 3 lub tsev Txiv Twj Cuab nyob Fab Kis teb sab hnub tuaj. Cov Txiv Twj Cuab tshaj lub Moo Zoo rau cov pej xeem nyob tsis deb tsis ze ntawm lawv cov tsev Txiv Twj Cuab. Lawv ua li ntawd tau 25 xyoos, ces Kos Loos Npas nto moo mus deb kawg. Muaj neeg coob nyob deb tuaj xyuas nws kom tau hnov nws lo lus qhuab qhia. Kos Loos Npas nyob ntau hauv lub tsev Txiv Twj Cuab uas nyob Lws Xaws.

Tab sis tus vaj uas nyob ze Lws Xaws coj ib tug yam ntxwv phem dhau. Tsis kav tus vaj tseem xav kom Kos Loos Npas foom hmoov zoo rau nws tsev neeg. Kos Loos Npas tsis kam. Tus vaj npau taws xav muab Kos Loos Npos tua. Kos Loos Npas nyob tsis taus thiaj khiav mus nyob Zes Mas Nias teb.

Kos Loos Npas rov tsim dua ob lub tsev Txiv Twj Cuab nyob Nples Zees. Kos Loos Npas lub tsev Txiv Twj Cuab nyob Nples Zees kuj tshaj Ntuj Lus nyob Zes Mas Nias sab hnub poob.

Nkas(Gall) yug xyoo 550 nyob hauv lub pov txwv Ais Lis xws li Kos Loos Npas. Nws nrog Kos Loos Npas tshaj Ntuj Lus nyob Fab Kis teb sab hnub tuaj, thiab nws nrog Kos Loos Npas mus nyob Zes Mas Nias teb sab hnub poob.

Lub caij ntawd, cov Txiv Twj Cuab tshaj Ntuj lus lawv lub siab kub lug. Zaum puav lawv txawj npau taws rau cov neeg teev dab xws li puag txheej thaud cov His Xas Lais npau taws rau cov neeg teev dab. Muaj ib zaug yog xyoo 610 Nkas nrog Kos Loos Npas nyob hauv nws lub tsev Txiv Twj Cuab, nkawd niaj hnub pom cov neeg nyob hauv ib lub zos; lawv teev lawv cov dab, lawv tua cov tsiaj txi dab, lawv ntseeg lawv cov txiv yaig, lawv mloog lawv cov yaj saub, lawv muaj ib lub tsev uas lawv sib sau ua lawv cov kab ke teev dab. Nkas pom lawv ua li ntawd, nws xav tias cov neeg ntawd ua txhaum loj thiab thuam ntuj.

Muaj ib hnub Nkas thiaj mus hlawv lawv lub tsev teev dab thiab nws muab lawv cov mlom dab pov tseg rau hauv ib lub pas dej uas nyob ze ntawd. Cov neeg teev dab npau taws rau Nkas thiab Kos Loos Npas. Lawv xav muab Nkas tua kiag, thiab lawv xav ntiab Kos Loos Npas kom txhob nyob hauv lawv teb chaws. Lawv muab nkawd ob leeg ntaus sab kawg.

Vis Lis Nplos (Willibrord) yog tus tshaj Ntuj Lus nyob Zes Mas Nias qaum teb. Vis Lis Nplos yug xyoo 658 nyob Aas Kiv teb. Cov Aas Kiv yog ib haiv neeg tuaj ntawm xeev ntuj Hos Laas (Holland), Zes Mas Nias qaum teb tuaj. Lub caij ntawd, haiv neeg nyob Hos Laas teb hu ua haiv neeg Fis Xoos (Frisians).

Vis Lis Nplos lub keeb chiv yog tuaj ntawm cov Fis Xoos tuaj. Vis Lis Nplos hlob nyob Aas Kiv teb, tab sis nws paub tias nws lub keeb puam yog haiv neeg Fis Xoos, ces nws thiaj muaj lub tswv yim xav coj lub Moo Zoo tuaj txog cov Fis Xoos nyob hauv Zes Mas Nias qaum teb.

 Vis Lis Npos tshaj Ntuj lus 25 xyoos, txij xyoo 695 mus txog xyoo 714 ces muaj tej pab neeg Fis Xoos txais Ntuj kev cai. Vis Lis Nplos thiaj nto moo tias ‘tus Hauv Paus Xa Lus rau cov Fis Xoos’ (the Apostle to the Frisians).

Thaum Vis Lis Npos tab tom kawm txuj ua tub tshaj Ntuj Lus, Es Npaws (Ecgberht of Ripon) xa Vis Lis Npos thiab nws cov phooj ywg tuaj tshaj Ntuj Lus rau cov Fis Xoos nyob thaj tsam ntug Hiav Txwv Pej (North Sea), ces Vis Lis Npos thiaj tau kev mus cuag Vaj Qhia nyob Los Mas 2 lwm. Vis Lis Npos mus ntsib Vaj Qhia Xaws Ntsis Us Ib (Pope Sergius I) yog nws xav kom Vaj Qhia tso cai rau nws mus tshaj Yes Xus lub Moo Zoo rau cov pej kum neeg (Gentiles), ces xyoo 695 thaum lub 11 hlis tim 21 Vaj Qhia thiaj tsa Vis Lis Npos ua tus Tswv Qhia saib cov Fis Xoos ua Ntuj kev cai. Vis Lis Npos thiaj tsim lub tsev teev Ntuj nyob hauv lub nroog Us Thes (Utrecht), xeev ntuj Hos Laas hauv Zes Mas Nias qaum teb.

Vis Lis Npos tshaj Yes Xus lub Moo Zoo nyob ntawd mus txog xyoo 714 ces muaj ib tug vaj Fis Xoos sawv los tshiab, nws tsis nyiam Ntuj kev cai, nws muab cov tsev teev Ntuj hlawv, nws tsis kheev kom muaj ib pawg neeg ntseeg nyob hauv nws lub teb chaws, ces tus vaj rov tsa cov mlom dab Fis Xoos nyob puv nws lub teb chaws. Nws ntiab Vis Lis Nplos kom txhob nyob hauv Fis Xoos teb ntxiv. Vis Lis Nplos thiaj mus tsim ib lub tsev Txiv Twj Cuab tshiab nyob Zes Mas Nias teb sab hnub poob.

Xyoo 719 tus vaj Fis Xoos siab phem ntawd tuag tas, Vis Lis Npos thiaj rov los tshaj Yes Xus lub Moo Zoo ib zaug ntxiv rau cov Fis Xoos, muaj tus vaj txheeb Fab Kis hu ua ‘Tshas Mas Tes’ (Charles Martel) ua tus pov hwm nws. Thaum ntawd, Vees Fis tuaj nrog Vis Lis Npos tshaj Yes Xus lub Moo Zoo.

Vees Fis (Winfrid) yog ib tug tub tshaj Ntuj Lus haiv neeg Aas Kiv, nws yug xyoo 675 hauv lub zos Khes Dis Toos (Crediton). Thaum Vees Fis muaj xya xyoo, nws mus kawm ntawv nyob hauv lub tsev Txiv Twj Cuab nyob Es Xes Tes (Exeter). Vees Fis yog ib tug neeg uas muaj lub tswv yim ntse, muaj lub tswv yim zoo thiab muaj lub siab thoob tsib.

Vees Fis coj lub neej xw li lub caij ntawd cov hluas ntau leej lawv ua, yam li nws txiav siab xaiv lub neej ua Txiv Twj Cuab. Nws kawm txuj nyob hauv cov Txiv Twj Cuab lub tsev qhia txuj nyob Nws Lees (Nursling). Vees Fis ua kws qhia ntawv mus txog thaum nws muaj 30 xyoo, nws thiaj txiav siab ua Leej Choj.

Xyoo 716 Vees Fis hnov Leej Ntuj Plig Ntshiab lub suab hu nws hauv nruab siab. Nws thiaj caij nkoj hla hiav txwv mus txog cov Fis Xoos lub teb chaws. Thaum ntawd cov Fis Xoos tus vaj Las Npaus (Radbod) tab tom ua rog ntaus tus vaj Fab Kis. Nws nyuam qhuav ntiab cov tub tshaj Ntuj Lus kom tawm hauv lub teb chaws.

Vees Fis yog ib tug Aas Kiv, ces tus vaj Las Npaus txais nws. Tab sis, tau tsis ntev, Vees Fis pom tias nws yog ib tug tub tshaj Ntuj Lus, yog nws tuaj nws xwb, tsis muaj ib tug loj xa  nws tuaj, mas luag tsis hwm nws, luag tsis mloog nws. Ces tib xyoos ntawd Vees Fis thiaj txiav siab tias nws yuav mus cuag Vaj Qhia nyob Los Mas, thov kom Vaj Qhia xa  nws mus Zes Mas Nias teb.

Xyoo 718 Vees Fis mus nyob Los Mas teb. Vees Fis ncaj qha mus Los Mas. Vees Fis tsis hla Fab Kis teb, vim nws tsis xav kom tus vaj Fis Xoos hais tias nws yog tus vaj Fab Kis ib tug neeg.

Vees Fis nyob Los Mas teb tas lub caij ntuj tsaug xyoo 718 txog xyoo 719. Vaj Qhia Nqes Nkos Lis Ob (Pope Gregory II) pom Vees Fis yog ib tug neeg muaj hwj chim, yog ib tug neeg siab ntshiab. Vaj Qhia tso siab rau Vees Fis, ces Vaj Qhia tsa Vees Fis ua tus Hauv Paus Xa Lus rau cov Zes Mas Nias (the Apostle to the Germans). Vaj Qhia hais rau Vees Fis tias “Koj txoj hauj lwm yog tu txoj kev tshaj Tswv Ntuj Lo Lus uas tas cov haiv neeg nyob Zes Mas Nias teb yuav taug.” Vaj Qhia tis npe Las Tis Nas tshiab rau Vees Fis hu ua ‘Npos Nis Fas’ (Boniface) raws li Npos Nis Fas tus tuag ua Yes Xus tim khawv nyob Tas Xis hauv tiam plaub.

Xyoo 719 txog xyoo 722. Vees Fis rov mus tshaj Ntuj Lus rau cov Fis Xoos nyob Zes Mas Nias teb, yog zaum ob. Vees Fis nrog Vis Lis Nplos tshaj Yes Xus lub Moo Zoo rau cov Fis Xoos, nws pom tias cov Fis Xoos leej puav xwb thiaj txais txoj kev ntseeg txog Yes Xus.

Xyoo 722 Vees Fis tso Vis Lis Npos tseg, nws mus tshaj Yes Xus lub Moo Zoo nyob Zes Mas Nias plawv teb. Vees Fis pom tias cov neeg Zes Mas Nias feem coob tseem teev lawv cov dab. Tab sis nws kuj pom tias muaj ntau pab neeg ntseeg Yes Xus. Nyob ntawd, kuj muaj ob kwv tij ua nom; nkawd yeej ib txwm txais lub Cim Ntxuav lawm, tab sis nkawd tsis coj Ntuj kev cai. Vees Fis thiaj qhia Ntuj kev cai rau nkawd, nkawd thiaj rov yuav txoj kev ntseeg txog Yes Xus. Nkawd muab ib thaj av nyob As Maws Npus (Amonebourg) rau Vees Fis, ces nws tsim ib lub tsev Txiv Twj Cuab nyob ntawd.

Muaj ib zaj kwv huam piav tias thaum Vees Fis tuaj txog Zes Mas Nias teb, cov neeg nyob hauv lub teb chaws teev ib tsob ntoo ntseej, lawv cav tias tsob ntoo ntseej ntawd yog tus txoov dab Ntxaws (Jupiter) tsob ntoo. Vees Fis muab taus ntov tsob ntseej ntawd pov tseg, sawv daws ntshai tab sis lawv tsis pom muaj ib tug dab qhov twg yuav los ua phem tau rau Vees Fis, ces lawv thiaj hloov siab los ua Ntuj kev cai tas. Lawv txhim ib lub tsev teev Ntuj hwm Leej Ntshiab Pob Zeb nyob rau ntawd.

Thaum muaj neeg ua Ntuj kev cai coob nyob Zes Mas Nias teb lawm, Vaj Qhia thiaj tsa Vees Fis ua Tswv Qhia saib xyuas tas Zes Mas Nias teb. Nyob Zes Mas Nias teb, muaj ntau tus tub tshaj Ntuj Lus haiv neeg Fab Kis. Lawv nyias tuaj nyias, thiab nyias qhia Ntuj kev cai raws li nyias paub xwb. Tswv Qhia Vees Fis thiaj rov qhia cov tub tshaj Ntuj Lus ntawd kom sawv daws qhia zoo ib yam thiab kom sawv daws coj ib tug yam ntxwv phim cov tub tshaj Ntuj Lus. Lawv sawv daws zoo siab mloog Tswv Qhia Vees Fis, vim lawv pom tias lawv tus Tswv Qhia coj tus yam ntxwv zoo heev.

Tas niaj tas xyoos Tswv Qhia Vees Fis coj tej pab Txiv Twj Cuab nrog nws mus ncig cov zej zog.  Thaum chiv thawj yog cov Txiv Twj Cuab tuaj Aas Kiv teb tuaj, vim nws sau ntawv mus hais kom cov thawj pab xa cov Txiv Twj Cuab tuaj pab nws. Tab sis tsis ntev mas kuj muaj tej tus Txiv Twj Cuab Fab Kis thiab Zes Mas Nias, ces lawv ua hauv paus qhia tej pab tub tshaj Ntuj Lus rau Zes Mas Nias teb.

Lub caij uas Vees Fis tshaj Ntuj Lus, mas Zes Mas Nias teb zwm rau cov vaj Fab Kis, ces muaj tej npoj tub rog Fab Kis saib xyuas Zes Mas Nias teb. Tswv Qhia Vees Fis thiaj thov cov vaj Fab Kis kom lawv kheev cov tub rog pab txuag cov tub tshaj Ntuj Lus, txhob pub kom cov tub tshaj Ntuj Lus raug tub sab los yog raug cov neeg teev dab tuaj ua phem rau lawv.

Tswv Qhia Vees Fis nquag sau ntawv mus rau tus Vaj Qhia nyob Los Mas, thov Vaj Qhia kom pab nws xav tswv yim. Nws kuj xa ntawv mus rau cov thawj Tswv Qhia uas nyob Aas Kiv teb thiab, nws kuj thov kom lawv pab nws xav tswv yim, nrog thov Tswv Ntuj nres cov hauj lwm nws ua nyob Zes Mas Nias teb, thiab nws thov kom xa me ntsis nyiaj tuaj. Vees Fis kuj sau ntawv rau tej lub koom haum Leej Phauj nyob Aas Kiv teb, ces muaj ib tug Leej Phauj hu ua ‘Lis Os Npas’ (Lioba) zoo siab tuaj tsim ib lub tsev Niam Twj Cuab nyob Zes Mas Nias teb.

Tswv Qhia Vees Fis tsa tej tus Tswv Qhia tshiab, ces xyoo 739 Vaj Qhia nyob Los Mas pub txoj hlab ntaub dawb tsa Vees Fis ua Tuam Tswv Qhia (Archbishop) tswj tas cov Tswv Qhia nyob Zes Mas Nias teb.

Xyoo 742 Tswv Qhia Vees Fis kuj tsim peb lub tsev Txiv Twj Cuab loj txais cov txiv neej Zes Mas Nias uas lawv txiav siab ua Txiv Twj Cuab. Lub tsev Txiv Twj Cuab nto moo tshaj yog lub nyob Fus Das (Fulda). Tswv Qhia Vees Fis zoo siab vim lub Koom Txoos hlob mus sai nyob tas Zes Mas Nias teb. Tab sis tshuav haiv neeg Fis Xoos uas nyob xeev ntuj Hos Laas, hauv Zes Mas Nias qaum teb.  Vees Fis nco ntsoov tias thaum nws tseem nyob Aas Kiv teb mas nws hnov Tswv Ntuj hu nws hauv nruab siab, kom nws tso Aas Kiv teb tseg thiab mus tshaj Ntuj Lus rau cov Fis Xoos. Ces Tswv Qhia Vees Fis thov kom Vaj Qhia tso nws mus tshaj Ntuj Lus nyob Hos Laas. Tab sis Vaj Qhia hais rau nws tias nws cov hauj lwm nyob Zes Mas Nias plawv teb tsis tau tiav, yog nws tso tseg mas ntshai tsam cov ua Ntuj kev cai yuav tsis vam meej lawm yav tom ntej. Vim li ntawd, Tswv Qhia Vees Fis thiaj yuav tos txog 15 xyoos nws thiaj rov tau mus cuag cov Fis Xoos.

Xyoo 754 Tswv Qhia Vees Fis yog ib tug laus neeg muaj 79 xyoos lawm, nws nrog 50 leej Txiv Twj Cuab caij nkoj taug tus dej Lees mus txog cov Fis Xoos uas lawv nyob pem tus hauv dej Lees. Lawv ua lub Cim Ntxuav rau tej lub zos nyob ze tus dej Lees. Hnub tim 5 lub 6 hli, lawv mus yuav luag txog cov xeev ntuj uas cov Fis Xoos nyob, ces ib sij huam muaj tej npoj neeg Fis Xoos tawm tuaj; lawv nqa ntaj nqa hmuv, yuav muab Tswv Qhia Vees Fis thiab cov Txiv Twj Cuab tua. Cov Txiv Twj Cuab sawv daws rho ntaj yuav nrog cov Fis Xoos ntawd sib tua thiab, ces Tswv Qhia Vees Fis hais rau nws cov Txiv Twj Cuab tias “Ntxig nej cov ntaj rov qab rau hauv hnab, txhob nrog lawv sib tua, vim Tswv Ntuj Lo Lus hauv phau Ntawv Ntshiab ntuas tias ‘txhob ua phem pauj qhov phem tiam sis yuav muab qhov zoo pauj qhov phem’.”

Ib tug neeg Fis Xoos xuas ntaj tib teg rau Tswv Qhia Vees Fis, ces nws muab phau Ntawv Ntshiab los thaiv nws taub hau. Rab ntaj thiaj txiav raug phau Ntawv Ntshiab ntuag ua ib kab. Tswv Qhia Vees Fis thiab 50 leej Txiv Twj Cuab raug cov Fis Xoos muab tua tuag tas huv si nyob rau ntawd; yog hauv lub nroog Dos Khoos (Dokkum) hauv Hos Laas teb.

Xyoo 330 Koos Taas Tis Nus txhim tau ib lub nroog tshiab nyob sab hnub tuaj, ces nws tsiv mus nyob hauv lub nroog tshiab uas nws nyuam qhuav tsim thiab nws nyiam dua. Thaum chiv thawj lub nroog tshiab muaj lub npe hu ua ‘Koos Taas Tis Nos Pos Lis’, tab sis xyoo 395 lawv rov tis npe tshiab rau lub nroog ntawd hu ua ‘Npis Xaas’.

Txij xyoo 400 los rau xyoo 500 ntau haiv neeg qus txeeb tau Los Mas teb nyob sab hnub poob, tab sis cov tub rog nyob Npis Xaas tau tiv cov tub rog qus tsis pub tuaj txeeb tau Los Mas sab hnub tuaj, ces Npis Xaas thiaj tsis poob rau cov haiv neeg qus tes.

Xyoo 532 lub Tuam Tsev Teev Ntuj uas Koos Taas Tis Nus txhim kub hnyiab, ces tus vaj Yus Tis Nias Nus (Justinian I) thiaj txhim dua ib lub tshiab. Hnub tim 27 lub 12 hlis xyoo 537 tus vaj thiab tus Tswv Qhia ua cov kab ke qhib lub Tuam Tsev Teev Ntuj tshiab. Lub Tuam Tsev Teev Ntuj no lub npe yog ‘Tuam Tsev Teev Ntuj hwm Tswv Ntuj txoj kev thoob tsib’ (Santa Sophia).

Yus Tis Nias Nus yog tus vaj Npis Xaas nto moo loj. Nws nce ua vaj thaum muaj 40 xyoo. Ua ntej yuav ua vaj, nws twb tau nrog nws txiv kav teb chaws tau kaum tawm xyoo los lawm. Yus Tis Nias Nus muaj ib tug poj niam hu ua ‘Tes Os Dos Las’ (Theodora), nws yog neeg siab loj siab tawv.

Thaum Yus Tis Nias Nus nce ua vaj, nws tus poj niam ua tus pab nws kom txawj ua siab loj, vim tias thaum ntawd tas lub nroog ntxeev siab rau Yus Tis Nias Nus, ces nws poj niam txhob nws kom ua siab tawv kav sawv daws.

Lub caij Yus Tis Nias Nus kav Npis Xaas mas Npis Xaas thiaj sawv ua ib lub nroog ua lag luam loj, lub teb chaws vam meej ces thiaj tsim ntau lub Tuam Tsev nyob tas lub teb chaws. Yus Tis Nias Nus xav tsa lub teb chaws Los Mas tshiab kom muaj hwj chim xws li txheej thaud, nws thiaj coj tsib puas lub nkoj; ib vam tus tub rog mus taw thiab tsib txhiab tus tub rog caij nees mus ntaus cov Vaas Das nyob As Fis Kas teb, ntaus cov Os Thos Nkaus nyob Is Tas Lias teb. Yus Tis Nias Nus kuj txeeb tau Is Npes Lias qab teb thiab, tab sis nws tsis tuaj nyob Nkas Lias vim tias lub caij ntawd cov Fab Kis tab tom muaj zog.

Xyoo 615 cov teb chaws ua Ntuj kev cai tau hnov lub moo tias tus vaj Pes Xis hu ua ‘Kos Los Es’ (Choroes) tuaj ntaus lub nroog Yes Lus Xas Les thiab muab cov tsev teev Ntuj hlawv. Tus vaj Pes Xis coj tsoom pej xeem hauv Yes Lus Xas Les mus ua qhev nyob hauv nws lub teb chaws, nws nqa Yes Xus tus Ntoo Cuam mus nyob hauv nws lub nroog ‘Tes Xis Foos’ (Ctesiphon). Cov ua Ntuj kev cai hnov li ntawd, mas lawv txaj muag thiab lawv quaj.

Lub caij ntawd, tus vaj Npis Xaas yog ‘Hes Las Kis Yus’ (Heraclius), mas tas Npis Xaas teb raug cov Pes Xis thiab cov Moos Ku tuaj ntaus. Cov Tswv Qhia nyob Npis Xaas muab lawv cov nyiaj cov kub rau tus vaj Hes Las Kis Yus muab coj mus xiab cov Moos Kus, ces lawv rov qab mus lawv teb chaws.

            Xyoo 622 tim 5 lub 4 hlis, Hes Las Kis Yus thiab nws cov tub rog sawv kev mus ntaus cov Pes Xis vim tus vaj Pes Xis tau nyiag Yes Xus tus Ntoo Cuam. Lawv caum cov Pes Xis mus txog Pes Xis teb, lawv muab cov Pes Xis li tsev teev dab hauv lub tsheej Es Lis Vaas (Erivan) hlawv.

            Tus vaj Pes Xis txhib nws cov tub rog thiab hu cov Moos Kus, cov Xas Las Vas, thiab cov Npws Nkas tuaj pab nws ntaus Npis Xaas teb. Lawv tuaj txog lub ntsa zeb xov Npis Xaas. Cov lwm txheeb Npis Xaas tsa niam Mab Liab tus duab nyob saum ntsa zeb kom pab cov tub rog ua siab tawv, ces Kos Los Es cov tub rog thiaj ntaus tsis yeej, lawv rov thaub qab.

Ces xyoo 627 vaj Hes Las Kis Yus thiaj rov mus ntaus Pes Xis teb. Hnub tim 25 lub 2 hlis xyoo tom qab, nws thiaj tso xov mus ceeb toom rau Npis Xaas teb tias “Nej sawv daws yuav zoo siab, vim tus thuam Yes Xus thiab thuam Yes Xus niam, nws poob lawm; nws lub teb chaws tawg lawm.”

Tos Hes Las Kis Yus ceeb toom li ntawd, vim Kos Los Es tus tub rov muab nws txiv tua, ces nws muab Yes Xus tus Ntoo Cuam rov qab rau Hes Las Kis Yus. Ces hnub tim 23 lub 3 hlis xyoo 630 Hes Las Kis Yus thiaj kwv Yes Xus tus Ntoo Cuam rov qab los nyob Yes Lus Xas Les.

Thaum ntawd, nyob sab hnub poob yog lub caij cov haiv neeg qus ri mus nyob tas Los Mas teb, ces kev ua Ntuj kev cai tau theem tas. Tab sis nyob Npis Xaas, kev ua Ntuj kev cai sawv los yuav luag thoob. Tab yog cov teb chaws nyob ncig Npis Xaas ciam teb; xws li As Las Npias teb, Es Thias Pias teb, Lis Npas teb, Mes Xos Pos Tas Mias teb, Pes Xis teb, As Mes Nias teb; lawv muaj ntau leej coj Ntuj kev cai.

Nyob hauv ib tsev neeg twg, lawv muab cov duab hais txog kev ntseeg Yes Xus los dai tas qhov txhia chaw. Nyob hauv ib lub nroog twg, lawv kuj txaug tej tus mlom hais txog txoj kev ntseeg, lawv tseem txhim tsev teev Ntuj, cov chaw hwm tsoom Leej Ntshiab.

Nyob hauv Npis Xaas, thaum lawv sawv mus ua rog, mas yog sawv daws mus ua rog txuag Ntuj kev cai, los tiv cov tawm tsam Ntuj kev cai. Cov nom tswv thiab cov tseem hwv mas lawv tab meeg ua Ntuj kev cai, lawv tsa nom tshiab mas lawv tsa nyob hauv cov tsev teev Ntuj. Cov pej xeem saib cov nom tswv yog ib co neeg txais lawv lub hwj chim kav teb kav chaw ntawm Tswv Ntuj los. Cov tseem hwv tsis pub cov pej xeem ntseeg tej yam los tshaj tej yam tsis haum Ntuj kev cai.

Nyob hauv cov vaj Npis Xaas tsev, muaj 3 tug ntxhais vaj coj ib lub neej zoo li cov Leej Phauj lub neej; lawv cog lus coj txoj kev tab seeb tas ib sid. Tus vaj Tes Os Dos Ob tau coj Ntuj kev cai zoo kawg. Tus vaj As Nas Tas Ib kuj coj ib tug yam ntxwv zoo. Tus vaj Mas Xias Nus ua ib tug tub rog siab tawv siab ncaj ntseeg txog Ntuj zoo, tas nws tsoom pej xeem hwm nws cuag li hwm ib tug Leej Ntshiab.

Ntau zaus nyob Npis Xaas, lawv tau pom tej tus tseem hwv tau hloov siab, nws tso txoj kev ua nom tseg, tso cuab tam nyiaj txiag tseg, cia li mus ua Txiv Twj Cuab, los mus nyob teb chaws suab puam ua tib txog hauj lwm teev Ntuj mus txog hnub tuag.

Muaj ntau tus Xib Hwb sau tej phau ntawv piav Ntuj kev cai, piav txog txoj kev xyaum ua Leej Ntshiab, txoj kev ua Tswv Ntuj tub txib ntxhais txuas zoo, piav txog neeg lub siab nyiam Ntuj, piav txog txoj kev mloog Leej Ntuj Plig.

Lub Koom Txoos nyob Npis Xaas tau tsim tej txoj tuam kev teev Ntuj txawv cov kab ke Los Mas. Lawv cov kab ke teev Ntuj mas lawv txais ntawm ib co neeg ib txwm ua Ntuj kev cai ntxov los lawm. Lawv muaj plaub tsib txog tuam kev teev Ntuj; xws li cov As Nthias Kias thiab cov As Les Xas Nrias.

Lub Koom Txoos nyob Npis Xaas muaj ntau lub tsev Txiv Twj Cuab thiab ib lub tsev kuj muaj txog pua tus Txiv Twj Cuab. Cov Txiv Twj Cuab ntawd, lawv tsis nyob xyaw cov neeg hauv lawv teb chaws, lawv tsis ua rog; lawv kawg teev Ntuj thiab coj kab ke yoo xwb. Muaj tej pab lawv sib hloov teev Ntuj tas hnub tas hmo tsis pub txoj hauj lwm teev Ntuj tu. Kuj muaj cov Txiv Twj Cuab ntau leej tau sau ntawv tshaj Ntuj Lus, ntau zaus lawv kuj tawm tuaj nyob hauv nroog kom tau hem cov nom tswv siab nkhaus ua txhaum, los cov poj ntiav.

Cov neeg nyob Npis Xaas xav taug txoj kev zoo, ces ntau zaus lawv ua dhau kev cai. Yam li qee tus Txiv twj Cuab tas lawv sid, lawv nyob saum tej tus ncej zeb, los lawv muab saw hlau hnyav hnyav khi lawv tes, los lawv cog lus tias tas lawv sid lawv yuav nyob sawv ntsug, los tej tus noj zaub xwb, tej tus vaj xav txuag Ntuj kev cai nyob hauv lawv teb chaws ces lawv muab cov yeeb ncuab tua, lawv coj cov duab hais txog Ntuj kev cai ntau dhau.

Cov neeg nyob Npis Xaas lawv nyiam sib cav txog Ntuj kev cai. Yam li ib txhia hais tias nyob hauv Yes Xus muaj ob leeg, ib leeg yog Tswv Ntuj thiab ib leeg yog neeg; ib txhia hais tias nyob hauv Yes Xus muaj ib leeg xwb. Tej pab sib cav vim ib tog hais tias Yes Xus muaj ib lub tswv yim, ib tog hais tias Yes Xus muaj ob lub tswv yim. Ib co sib cav tias Yes Xus muaj ib los ob lub siab, ib txhia kuj sib cav txog cov duab pab nco txog lawv txoj kev ntseeg, lawv kuj sib cav txog Leej Ntuj Plig tias tawm ntawm Leej Txiv los, los yog tawm ntawm Leej Tub los. Vim lawv sib cav dhau ces muaj ntau zaus lawv thiaj sib ceg sib ntaus.

Tsoom pej xeem nyob Npis Xaas, lawv hwm tus vaj cuag li hwm Tswv Ntuj, lawv tsis hais tias tus vaj yog Tswv Ntuj tiam sis lawv hais tias yog tus sawv Tswv Ntuj chaw. Cov vaj muaj hwj chim li ntawd, lawv thiaj xav kav tsoom pej xeem nyob Npis Xaas, lawv xav ua tus qhia Ntuj kev cai rau lub teb chaws.

Cov Tswv Qhia hauv Npis Xaas, ntau zaus lawv yog tus vaj cov neeg, lawv mloog tus vaj, lawv tsis muaj cuab kav qhuab qhia tus vaj ua tsis zoo.

Tej zaus, tus vaj thiab tus Tswv Qhia nyob Npis Xaas kuj tsis siab haum, yog ib tug vam txog tus Vaj Qhia nyob Los Mas pab, mas lwm tus xav ncaim ntawm tus Vaj Qhia nyob Los Mas. Tej lub caij, lawv kuj thuam tus Vaj Qhia nyob Los Mas thiab.

            Lub Koom Txoos nyob Los Mas teb xav kom cov neeg tshaj Yes Xus lub Moo Zoo siv lus Las Tis Nas. Hos cov Tswv Qhia nyob Npis Xaas xav kom tshaj Ntuj Lus thiab ua cov txoos teev Ntuj ua lus Hes Las.

Cov ua Ntuj kev cai nyob Npis Xaas lawv teev Ntuj nyob hauv tej lub tsev teev Ntuj zoo nkauj. Lawv siv lus Hes Las los teev Ntuj zoo saib thiab zoo mloog, lawv muaj ntau yam kab ke ua ntu zus. Lawv saib cov kab ke ntawd muaj nqes loj, ces lawv tsis tshua nco txog Tswv Ntuj.

Lub Koom Txoos nyob Npis Xaas xa ntau pua tus tub tshaj Ntuj Lus thiab ntau tus Tswv Qhia, thiab xa cov Leej Choj mus qhia txoj kev teev Ntuj raws li Npis Xaas tus piv txwv nyob Us Khas Zis Nas teb, thiab nyob Lav Xias teb

Lub caij ntawd, cov vaj nyob Npis Xaas vam meej tshaj, ces lawv xav ua neeg muaj hwj chim loj. Cov vaj saib lawv yog zoo li tus Tuam Leej Choj kav txoj kev teev Ntuj, thiab cov vaj kuj saib lawv yog ib co neeg kav tsoom pej xeem.

Ze ntawm xyoo 900 tus vaj Koos Tas Tis Nus Xya sau ib phau ntawv qhia cov kab ke uas sawv daws yuav tsum coj nyob hauv tus vaj lub tuam tsev, nyob Npis Xaas. Nws qhia cov kab ke ua lub Cim Ntxuav rau sawv daws, ua lub Cim Cog Lus ua txij ua nkawm, lawv tsa ib tug vaj tshiab pam cov vaj uas tas sim neeg lawm. Lawv tsim tej phau ntawv qhia tias yuav pe zoo li cas, yuav txhos caug zoo li cas, yuav nwj tus vaj ko taw zoo li cas. Lawv tis tej lub npe muaj hwj chim loj tas nrho rau cov vaj.

Cov vaj nyob Npis Xaas hais tias vaj lub tuam tsev yog ib lub tsev ntshiab xws li cov tsev teev Ntuj. Cov vaj hnav tej tsoos tsho yuav luag zoo ib yam li cov Tuam Tswv Qhia uas coj tsoom neeg ntseeg, cov vaj hnav ib lub tsho dawb ntev ntev, thiab tseem muaj ib lub tsho luv me ntsis, tshooj sab saud, yog tej lub tsho paj ntaub xaws xov nyiaj xov kub thiab dai hlaws. Tus vaj ntoo ib lub kaus mom kub loj thiab nyob saum lub kaus mom muaj ib tug ntoo cuam kub xws li cov Vaj Qhia uas kav Yes Xus lub Koom Txoos lub kaus mom.

Thaum cov neeg ntseeg ua lub ntees Hla nyob hauv thawj lub Tuam Tsev Teev Ntuj nyob Npis Xaas, mas tus vaj ua ib zaj yees siv tias nws yog Yes Xus Pleev sawv rov los. Tus vaj sawv ntsug tig los rau ntawm tsoom ntseeg xub ntiag, nws lub cev muaj cov hlab ntaub plooj kub, nws rau khau kub, nws txhais tes xis tuav ib tug cwj zoo li tus ntoo cuam, nws txhais tes laug tuav ib lub hnab ntim ib co hmoov av uas nqa ntawm Yes Xus lub ntxa los. Tseem muaj 12 tug nom sawv ncig tus vaj, hais tias yog Yes Xus 12 tug Hauv Paus Xa Lus.

Thaum cov vaj nyob Npis Xaas tsa ib tug neeg ua nom, los ua ib tug pwm tsav, mas cov vaj siv ib co lus zoo li no los tsa tus nom ntawd “Kuv muaj ib lub hwj chim tuaj ntawm Tswv Ntuj tuaj, kuv tsa koj ua tus nom tswj cov dej num no.”

Cov vaj nyob Npis Xaas muaj hwj chim ci ntsa iab, tab sis yog ib lub hwj chim cuav xwb. Tsoom ntseeg lub ncauj hu tej zaj nkauj zoo mloog cav txog Yes Xus, tab sis lawv puas to taub tias Yes Xus nyiam ua neeg me los tshaj nws lub Moo Zoo rau cov neeg khwv ua noj ua haus nyob nruab liaj nruab teb.

Thaum 9 txog tiam 10 mas Yes Xus lub Koom Txoos nyob Npis Xaas poob rau hauv lub hwj chim cuav. Cov vaj nyob Npis Xaas khav tias lawv sawv Tswv Ntuj chaw thiab lawv sawv Yes Xus chaw, ces lawv ua txhia yam ywj lawv siab; lawv yog neeg yuam kev.

Lub caij ntawd cov Tuam Tswv Qhia muaj tsawg leej kawg uas muaj cuab kav tiv cov vaj, vim twb yog cov vaj xaiv tus yuav ua Tuam Tswv Qhia kom tswj tas cov Koom Txoos zwm rau Npis Xaas. Thaum tus Tuam Tswv Qhia tiv tus vaj mas ntau zaus yog vim cov Tswv Qhia tau tsa txoj cai tsis kheev kom cov vaj yuav poj niam tshaj plaub zaug. Thaum lub hauv paus, tus Hauv Paus Xa Lus Paj Lug kheev kom cov neeg ua Ntuj kev cai uas lawv poj niam tuag lawm, rov yuav poj niam tau. Paj Lug tsis tau muaj txoj cai tias tus neeg uas poj niam tuag lawm, rov yuav poj niam tau pes tsawg zaus. Hos cov Tswv Qhia nyob Npis Xaas tsis kheev kom cov vaj rov yuav poj niam tshaj 4 zaug. Cov Tswv Qhia tsa txoj cai zoo li ntawd, tab sis lawv kuj foom hmoov zoo rau tej tus vaj uas muab thawj tus vaj tua pov tseg, ces nws tau txeeb nce ua vaj tshiab. Yog zoo li cov Tswv Qhia ua tej yam yuam kev.

Muaj ib tug Tuam Tswv Qhia nyob Npis Xaas ntxub ib tug vaj, mas tus Tswv Qhia ua ib yam phem tshaj; yog thaum ua Thaj Txi Ntuj tus vaj tuaj txais lub Cim Yug, mas tus Tswv Qhia muab ib lub ncuav mov xyaw tshuaj lom neeg rau tus vaj txais, ces tus vaj thiaj tuag.

Tseem muaj ib qho ua kom cov Tuam Tswv Qhia nyob Npis Xaas ua txhaum ntau zaus, yog qhov tias lawv nplua nuj kawg, lawv muaj lub cuab tam loj nyob hauv ntau lub nroog, ces lawv tau kev muab lawv lub cuab tam xiab cov nom. Cov Tuam Tswv Qhia ua ntau yam tsis haum Yes Xus lub Moo Zoo.

Lub caij ntawd nyob hauv cov teb chaws zwm rau cov vaj nyob Npis Xaas kuj muaj cov Txiv Twj Cuab coob kawg. Muaj tus puav Txiv Twj Cuab nyob txawm hauv cov nom tej tuam tsev, nyob hauv lub tuam tsheej Npis Xaas cov Txiv Twj Cuab ntawd kuj ua ntau yam nkhaus xws li cov nom tswv siab nkhaus. Tab sis cov Txiv Twj Cuab feem coob xav coj tus yam ntxwv ntshiab huv tiag, ces lawv thiaj txhob txwm tsis mus fim cov nom siab nkhaus. Lawv tsuas rau siab ntso teev Ntuj thiab kawm cov Ntawv Ntshiab xwb. Lawv nyob twj ywm tsis tawm mus ua dab tsi nyob sab nraud, vim lawv ntshai tsam nrog luag ua txhaum. Li ntawd cov neeg ntseeg thiaj tsis hnov tsoom Txiv Twj Cuab cov lus tshaj Yes Xus lub Moo Zoo tseem ceeb.

Thaum ntawd, cov vaj uas nyob Npis Xaas thiab ntau tus Tswv Qhia tsuas nrhiav txoj kev muaj hwj chim xwb. Lawv ua tsis thooj li Yes Xus nyiam, lawv ua tej yam tsis phim Yes Xus lub Moo Zoo. Cov neeg ua Ntuj kev cai nyob Npis Xaas kuj kub siab teev Ntuj kawg, thiab lawv coob leej muaj lub siab ntshiab, vim lawv nyiam Yes Xus tiag. Tab sis lawv coj tus yam ntxwv txawv cov ntseeg nyob Aws Los Pas sab hnub poob, lawv coj Yes Xus lub Moo Zoo raws ib txog kev txawv tiag.

Nyob sab hnub poob cov vaj ntseeg Yes Xus lub Moo Zoo ntau leej tiv cov Vaj Qhia uas nyob Los Mas. Tab sis cov vaj nyob sab hnub poob paub tias lawv muaj zog tsis cuag cov Vaj Qhia nyob Los Mas. Cov Txiv Twj Cuab nyob sab hnub poob kuj tsis ua xws li cov Txiv Twj Cuab nyob Npis Xaas teb thiab. Cov Txiv Twj Cuab nyob sab hnub poob nquag mus fim tsoom ntseeg, lawv tsim ntau lub tsev pab cov neeg pluag. Yog vim li ntawd mas lub Koom Txoos nyob Npis Xaas thiab lub Koom Txoos nyob sab hnub poob sib txawv loj zuj zus. Yog xyoo 1054 ob lub Koom Txoos thiaj li sib ncaim.

Txij lub caij ntawd los txog tav no mas cov Koom Txoos uas thaum ub lawv npuab Npis Xaas, mas zim txwv no lawv hu ua lub ‘Koom Txoos Os Thos Dos’ (Orthodox Church). Ib txwm, cov tseem hwv thiab lub Koom Txoos nyob Npis Xaas tsis nyiam fim cov neeg nyob Los Mas. Cov vaj nyob Npis Xaas tsis hwm cov vaj nyob Aws Los Pas sab hnub poob, lawv khav tias Npis Xaas teb thiaj yog ib lub teb chaws paub txuj ci thiab vam meej dua Los Mas.

Cov teb chaws nyob As Las Npias teb sab pej thiab naj, yog tej lub teb chaws vam meej hauj sim. Hos nyob As Las Npias nrab yog lub teb chaws suab puam ua toj roob ncuav pias. Cov neeg nyob As Las Npias teb yog tsav Xes Mis ib yam li cov Yus Das thiab. Lawv hais tias lawv yog Has Nplas Has tus tub Is Mas Es cov xeeb zeej xeeb ntxwv. Lawv teev cov dab ‘Ntsis’.

Nyob hauv lub nroog ‘Mes Kam’ uas yog lub nroog ua luam loj dua cov, lawv muaj ntau tus mlom dab uas sawv daws tuaj hwm. Nyob ntawd kuj muaj ib lub pob zeb dub loj loj xwm fab xwm meem hu ua ‘Kas Npas’. Tas lub teb chaws hwm lub Kas Npas ntawd. Lawv kuj paub Yes Xus kev cai me ntsis thiab, vim muaj tej tus tub tshaj Ntuj Lus tuaj txog ntawd, tab sis yog cov ncaim ntawm lub Koom Txoos. Thiab ib txwm kuj muaj tej pab Yus Das ua luam nyob ntawd, lawv tseem coj Mais Xes kev cai.

Xyoo tim 570 los 580 Mus Has Mas yug los nyob hauv lub nroog Mes Kam. Nws tsev neeg yog ib tsev neeg pluag. Thaum Mus Has Mas muaj 25 xyoos, nws yog ib tug tub hluas zoo nraug, nws yuav ib tug poj niam hlob nws 15 xyoos, hu ua Khas Dis Ntsas. Khas Dis Ntsas nplua nuj heev. Nkawd sib nyiam sib hlub zoo.

Mus Has Mas txoj hmoov zoo vim nws nrog nws poj niam ua ib lub neej nplua nuj. Mus Has Mas ua tus saib Khas Dis Ntsas lub cuab tam tas huv tib si. Nws kuj ua ib tug laus pav coj tej pab tub lag tub luam mus txog tej lub nroog, xws li Yes Lus Xas Les. Zaum puav nws ntsib tej tus neeg ua Ntuj kev cai thiab tej tus neeg Yus Das coj Mais Xes txoj cai.

Thaum Mus Has Mas muaj 30 xyoo tej, nws xav tswv yim ntau, nws tsis nyiam kev teev cov dab Ntsis. Nws nyiam kev teev tus tswv ntuj hu ua ‘As Los’.

Nyob hauv cov neeg ua laus pav muag toob xib, mas zaug puav Mus Has Mas pom muaj tej tus ua Ntuj kev cai thiab tej tus coj Mais Xes txoj cai. Lawv puav leej hais tias lawv teev Tswv Ntuj. Tab sis nws tsis fim lawv zoo. Nws pom lawv teev dab xyaw kev teev Tswv Ntuj. Mus Has Mas ntxhov siab kawg. Muaj tej hnub nws hais tias nws hnov tej lub suab nrov, los nws pom tej yam ci ntsa ua rau nws dias taub hau.

Mus Has Mas hais tias As Los ib tug Tshiab qhia ib zag ntseeg tshiab rau nws. Zaj ntseeg tshiab ntawd yog ib zag uas nyob hauv ib phau Ntawv Ntshiab nyob saum ntuj. Mus Has Mas xub qhia nws poj niam thiab nws ib co kwv tij txheeb ze thiab nws cov phooj ywg. Nws qhia lawv kom lawv tsuas teev As Los xwb. Nws kuj qhia tias tib neeg txawj tuag, tab sis tib neeg mus ua ib lub neej nyob mus li nyob saum ntuj. Nws qhia tias yuav ua ncaj rau cov neeg pluag.

Mus Has Mas poj niam Khas Dis Ntsas ntseeg nws tus txiv cov lus qhia. Nws cov txheeb ze kuj ntseeg. Tab sis cov neeg ua luam nyob hauv lub nroog Mes Kam thuam nws. Muaj tej tus ntxub nws.

Mus Has Mas pom tias cov tub lag tub luam nyob hauv lub nroog Mes Kam tsis kam ntseeg nws cov lus qhia. Lub caij ntawd muaj tej pab As Las Npias tuaj ntawm lub nroog Yas Rhis tuaj tsham lub nroog Mes Kam. Lawv mloog Mus Has Mas zoo dua cov neeg ib txwm nyob Mes Kam, ces Mus Has Mas thiaj txiav siab tias nws yuav tsiv mus nyob hauv lub nroog Yas Rhis.

Xyoo 622 Mus Has Mas lub hnub nyoog muaj ze ntawm 40 xyoo lawm. Mus Has Mas txiav siab tias cov neeg ntseeg nws yuav xaiv lub xyoo ntawd los ua thawj xyoo. Thiab cov neeg nyob Yas Rhis tis npe tshiab rau lawv lub nroog ua Mes Dis Nas txhais tias yog tus yaj saub lub nroog.

Lub nroog Mes Dis Nas yog lub nroog hauv paus chiv qhia Mus Has Mas kev ntseeg tshiab. Mus Has Mas ntuas cov pej xeem nyob Mes Dis Nas kom sawv daws txais nws txoj kev ntseeg tshiab ntawd. Cov tsis kam txais yuav tuag xwb. Mus Has Mas hais tias nws txoj kev ntseeg yog tuaj ntawm Has Nplas Has tus tub hlob Is Mas Es tuaj. Hos cov Yus Das txoj kev ntseeg yog tuaj ntawm Has Nplas Has tus tub yau His Xas Has tuaj.

Mus Has Mas qhia tias tsuas muaj tib tug tswv xwb yog As Los. As Los xa ntau tus Yaj Saub txij As Das los txog Mus Has Mas. Yes Xus yog ib tug Yaj Saub, tab sis nws tsis yog As Los tus tub. Mus Has Mas yog As Los tus tseem Yaj Saub, yuav tsis muaj lwm tus ntxiv.

Mus Has Mas hais tias “Yog koj ntseeg txog As Los thiab txog nws tus Yaj Saub Mus Has Mas, mas thaum koj tuag koj yuav mus pem lub nras lom zem nyob saum ntuj, koj yuav pw saum tej lub txaj zoo nkauj, koj yuav haus cov dej ntxiv siav, koj yuav tau nrog As Los cov ntxhais uas tsis tau raug txiv neej kov ib zaug li nyob. Yog koj tsis ntseeg txog As Los mas koj yuav mus nyob hauv cov hluav taws tsis txawj tuag. Koj yuav noj tej lub txiv qias neeg tas nrho.”

Cov coj Mus Has Mas kev cai muaj cai yuav 4 tug poj niam nrog nws nyob ua ke, thiab lawv tseem muaj cai mus nrog lwm cov poj niam pw ywj siab.

Mus Has Mas qhia tias tus xub teev As Los nyob ntawm lub pob zeb Kas Npas, yog Has Nplas Has, ces xyoo 629 nws nrog ib pab tub rog mus hauv lub nroog Mes Kam. Peb xyoo tom qab Mus Has Mas coj tsoom pej xeem As Las Npias mus hwm lub pob zeb Kas Npas.

Xyoo 632 lub 6 hli, hnub tim 8 Mus Has Mas thiaj tas sim neej nyob hauv lub nroog Mes Dis Nes. Mus Has Mas tuag tau 30 xyoo lawm ces tus nom Mawv Xim Lim hu ua Os Thaws Maas (Othmân) thiaj sau Mus Has Mas cov lus los ua ib phau ntawv, hu ua ‘Kos Las As’ (Qur’an).

Thaum Mus Has Mas tseem nyob, nws tshaj tias cov neeg mus ntaus tsam ntshiab, lawv tuag mas lawv yuav mus saum ntuj. Ces tom qab Mus Has Mas tuag tas, cov nom tswv As Las Npias thiaj sau cov tub rog npaj mus ntaus cov teb chaws nyob ib ncig uas zwm rau tus vaj Npis Xaas thiab tus vaj Pes Xis.

Xyoo 634 cov Mawv Xim Lim thiaj hla ciam teb mus ntaus cov teb chaws nyob pej fab. Lawv txeeb tau Pas Les Tis Nas thiab Xis Lias teb.

Xyoo 635 lawv tsa cov nom tswv Mawv Xim Lim nyob hauv lub nroog Das Mas, ces lawv sawv kev mus ntaus Pes Xis teb. ZCov Mawv Xim Lim ntaus Pes Xis teb tawg, lawv mam tig rov qab los ntaus lub nroog Yes Lus Xas Les, ces tus vaj Es Las Kis Yus thiaj sau ib co tub rog mus tiv cov Mawv Xim Lim.

Tim 20 lub 8 hli 636 cov tub rog Npis Xaas thiab cov tub rog Mawv Xim Lim sib tua, tab sis cov Npis Xaas kov tsis yeej ces lawv tawg tas.

Lub nroog Yes Lus Xas Les muaj lub ntsa zeb khov kho xov ib ncig, ces lawv thiaj tiv cov Mawv Xim Lim tau 2 xyoos. Lawv tsis pom cov tub rog Npis Xaas tuaj pab lawv, ces lub 2 hlis ntuj 638 lawv thiaj mus thawj xyam cov tub rog Mawv Xim Lim. Tus thawj tub rog Mawv Xim Lim hu ua ‘Os Mas’ (Omar) tuaj nyob hauv lub nroog Yes Lus Xas Les, nws tuaj teev As Los nyob hauv lub tshav uas thaum ub Xas Los Moos txhim lub Tuam Tsev Teev Ntuj.

Os Mas xav kom nws cov tub rog nyob saib cov teb chaws lawv txeeb tau, tab sis tus lwm txheeb hla nws lus coj plaub txhiab tus tub rog mus ntaus Hais Nkws Tos teb. Xyoo 640 lub 7 hli ntuj, nws ntaus tau cov nroog loj nyob Hais Nkws Tos teb, lawv mus nyob hauv lub nroog As Les Xas Nrias thiab Kais Los.

Cov Mawv Xim Lim tuaj txeeb As Fis Kas teb, lawv txwv tsis pub tsoom pej xeem ua Ntuj kev cai. Lawv txiav tias tus twg tsis yeem yuav Mawv Xim Lim txoj kev cai, mas tus ntawd tsum tsiv mus lawm pej kum teb. Lawv muab cov tsev teev Ntuj hloov ua chaw teev As Los, lawv tsis kheev muaj Tswv Qhia ntxiv.

Thaum txog xyoo 710 cov Mawv Xim Lim kav tas As Fis Kas sab qaum teb lawm. Lawv pib mus ntaus Is Npes Lias teb. thaum ntawd, Is Npes Lias faib ua 2 lub teb chaws: ib lub zwm rau Npis Xaas, ib lub yog cov vaj Vis Xis Nkaus kav. Ob lub teb chaws ua Ntuj kev cai tab sis lawv tsis sib haum, lawv tsis sib pab. Cov zwm rau Npis Xaas xav rhuav cov Vis Xis Nkaus nyob Is Npes Lias mas lawv koom tes nrog cov Mawv Xim Lim tuaj ntaus cov Vis Xis Nkaus.

Xyoo 711 lub 7 hli tim 17 Tas Lis (Tarik) coj cov tub rog Mawv Xim Lim hla dej tuaj txog Ntsis Nplas Tas. Tus vaj Vis Xis Nkaus hu ua ‘Los Nris’ (Rodrigue) kuj coj nws cov tub rog tuaj tiv cov Mawv Xim Lim. Tab sis lawv tiv tau ib hnub xwb, cov Mawv Xim Lim muab lawv ntaus tawg tas, ces cov Mawv Xim Lim thiaj nkag lus nyob hauv tus vaj lub tuam tsev nyob hauv lub nroog Tos Les Das (Tolede).

Thaum txeeb tau Is Npes Lias teb lawm, cov Mawv Xim Lim tsa cov Yus Das tau pab lawv ntaus tsam cov Vis Xis Nkaus ua tseem hwv. Lawv muab nom rau cov Is Npes Lias ua Mawv Xim Lim kev cai.

Nyob pem hauv sab tshuav ib co Is Npes Lias ua Ntuj kev cai, lawv tiv cov Mawv Xim Lim heev kawg, ces lawv rov txeeb tau ntau lub nroog. Lawv tsa lawv ib tug vaj nyob Is Npes Lias qaum teb, lawv txhim cov tsheej cov ntsa zeb.

Cov Mawv Xim Lim kuj txo tau tej lub teb chaws nyob ze lub tsheej Npis Xaas zuj zus, lawv kuj lwg cov pov txwv zwm rau Npis Xaas xws li Kws Plos, Khes Tas, Los Des.

Xyoo tim 673 cov Mawv Xim Lim tuaj ntaus lub tsheej Npis Xaas, tab sis cov ntsa zeb ruaj, ces cov Mawv Xim Lim tho tsis tau qhov chaws mus hauv lub tsheej. Txog xyoo 717 cov Mawv Xim Lim rov tuaj ntaus tsam ib xyoos, lawv caij 1,800 lub nkoj tsis kav lawv ua tsis tau dab tsi rau lub tsheej Npis Xaas.

Thaum cov Mawv Xim Lim swb rog loj nyob Npis Xaas teb, thiab nyob Puas Ces (Poitieres) hauv Fab Kis teb; mas cov Mawv Xim Lim thiaj khiav rov qab.

Xyoo 862 tus vaj uas kav Mos Los Vas (Moravia) hauv Tses Kos teb (Czech) nws xav ntseeg Yes Xus, tab sis tsoom pej xeem tsis paub lus Los Mas thiab Hes Las, lawv tsuas hais xeem lus Xas Las Vas xwb (Slavs), ces tus vaj thiaj xav kom cov neeg tshaj Yes Xus lub Moo Zoo hauv nws lub teb chaws siv xeem lus Xas Las Vas. Lub caij ntawd nyob Npis Xaas muaj ob kwv tij hu ua ‘Xis Lis’ thiab ‘Mes Tos’ (Cyril, Methodius). Nkawd loj hlob nyob hauv lub nroog Tes Xas Los Nis (Thessalonica), uas nyob ze ntawm Npis Xaas. Nkawd niaj hnub fim cov Xas Las Vas hauv lub nroog Tes Xas Los Nis, ces nkawd paub lus Xas Las Vas zoo heev. Cov hlob nyob Npis Xaas thiaj kom Xis Lis thiab Mes Tos mus tshaj Yes Xus lub Moo Zoo nyob Mos Las Vas teb.

Xyoo 863 Xis Lis thiab Mes Tos mus tshaj Yes Xus lub Moo Zoo nyob Mos Las Vas teb. Xis Lis kuj tau tsim ib hom ntawv los sau ua lus Xas Las Vas. Tsoom pej xeem Mos Las Vas pib siv cov ntawv Xas Las Vas, lawv kawm cov Yes Xus lub Moo Zoo ua lus Xas Las Vas, thiab lawv ua Thaj Txi Ntuj ua lus Xas Las Vas.

Xis Lis thiab Mes Tos rau siab qhia Yes Xus lub Moo Zoo, thiab qhia kev teev Ntuj 5 xyoos sib law, ces nkawd xav rov mus xyuas Npis Xaas. Nkawd mus ko taw txog lub nroog Ves Nis Xias, nyob Is Tas Lias qaum teb. Nkawd xav caij ib lub nkoj Ves Nis Xias mus txog Npis Xaas. Tab sis tus Vaj Qhia nyob Los Mas caw Xis Lis thiab Mes Tos nkawd kom mus tsham Vaj Qhia nyob tim Los Mas, thaum ntawd yog xyoo 868. Vaj Qhia ua zoo txais Xis Lis thiab Mes Tos thiab ib co Leej Choj tshiab. Vaj Qhia kheev kom nkawd siv lus Xas Las Vas ua Thaj Txi Ntuj nyob hauv 4 lub tsev teev Ntuj loj, nyob Los Mas.

Xis Lis raug ib tug mob nyob Los Mas, ces xyoo 869 nws tas sim neej. Hos Mes Tos nws mus nws tib leeg txog Npis Xaas. Ces nws rov mus tshaj Yes Xus lub Moo Zoo nyob Mos Las Vas teb. Xyoo 884 nws thiaj tuag. Nws tshaj Ntuj Lus nyob Mos Las Vas teb 21 xyoos, ces tas Mos Las Vas teb txais Yes Xus lub Moo Zoo.

Xyoo 880 Vaj Qhia Zam Yim (Pope John VIII) ua pov thawj txog kev teev Ntuj ua xeem lus Xas Las Vas tias “Kuv thov ua pov thawj txog txhua yam uas Xis Lis tau siv lus Xas Las Vas saulos cav txog Tswv Ntuj, thiab kuv tseem yuav kom tshaj Yes Xus lub Moo Zoo ua lus Xas Las Vas. Tsis yog xeem lus Hes Las, Las Tis Nas, thiab Xas Las Vas xwb, tseem yuav kom txhua tsav neeg tau siv lawv xeem lus los cav txog Tswv Ntuj thiab. Vim ntawv sau hais tias ‘tas txhua haiv neeg yuav cav txog Tswv Ntuj’ thiab Leej Ntshiab Paj Lug tau hais tias ‘txhua xeem lus yuav cav txog kuv lub koob meej tias Leej Pleev yog Huab Tais’, yog li thiaj yuav tsis txwv siv lus Xas Las Vas los hu nkauj thaum ua Thaj Txi Ntuj, los yog siv lus Xas Las Vas los nyeem Ntawv Ntshiab, los yog teev Ntuj; yog tias cov zaj ntawd txhais mus raws qhov tseeb.”

Tab sis cov Tswv Qhia Zes Mas Nias tsis zoo siab cia Mos Las Vas teb siv lus Xas Las Vas qhia Yes Xus lub Moo Zoo, ces thaum Mes Tos tuag lawm mas cov Tswv Qhia Zes Mas Nias kom cov ntseeg nyob Mos Las Vas teb siv lus Las Tis Nas los teev Ntuj. Vaj Qhia Tes Fas Nos Tsib (Pope Stephen V) kuj pom zoo xws li cov Tswv Qhia Zes Mas Nias, ces Xis Lis thiab Mes Tos cov thwj tim thiaj tsiv mus nyob Npus Nkas teb (Bulgaria), ces lawv thiaj siv lus Xas Las Vas los kawm Yes Xus lub Moo Zoo thiab ua cov txoos teev Ntuj.

Cov teb chaws hais lus Xas Las Vas tshuav ob lub teb chaws loj dua cov, yam li Us Khas Zis Nas teb (Ukraine) thiab Lav Xias teb (Russia) tseem tsis tau ua Ntuj kev cai, tab sis tshuav tsis ntev lawv yuav txais Yes Xus lub Moo Zoo thiab.

Thawj tus vaj txais lub Cim Ntxuav nyob Us Khas Zis Nas teb yog tus poj vaj Os Nkas (Olga). Nws thov kom tus vaj kav Npis Xaas teb xa neeg tuaj tshaj Ntuj Lus nyob hauv lub teb chaws Us Khas Zis Nas. Nws kuj thov kom cov tub tshaj Ntuj Lus nyob Zes Mas Nias teb tuaj thiab. Tab sis Us Khas Zis Nas teb yog ib lub teb chaws dav heev thiab tsoom pej xeem kub siab coj lawv txoj kev teev dab, lawv kheev tua tej tus neeg los txi rau lawv cov dab. Ib ntus ntev li 50 xyoo cov tub tshaj Ntuj Lus yuav tsum khiav tawm ntawm Us Khas Zis Nas teb rov mus lawv teb chaws ntau zaus, kom khiav dhau tej xwv txheej loj. Yog nyob ze ntawm xyoo 1,000 ces Us Khas Zis Nas teb thiaj li ua Ntuj kev cai. Lawv coj kev teev Ntuj raws li tus piv txwv uas ob kwv tij Xis Lis thiab Mes Tos xub tsim 100 tawm xyoo ua ntej. Vim qhov ntawd mas Us Khas Zis Nas teb thiab Lav Xias teb thiaj ib txhij txais kev ntseeg txog Yes Xus thiab txais cov ntawv Xas Las Vas uas lawv tseem siv los txog lub zim txwv no.

Tus vaj ua Ntuj kev cai nyob Us Khas Zis Nas teb yog tus vaj hu ua Vas Dis Mis (Vladimir the Great). Vas Dis Mis yog tus poj vaj Os Nkas ib tug xeeb ntxwv, nws nyiam mus ntaus rog tua cov vaj nyob ib ncig ntawm lub nroog Kis Yes (Kyiv). Nws lub siab liab khiv rau kev plees kev yi. Tab sis nws maj mam pom meej zuj zus tias yuav tsum coj tus yam ntxwv phim Yes Xus lub Moo Zoo, mas tsoom pej xeem thiaj kam hwm nws ua vaj.

Muaj ib zag kwv huam hais tias tus vaj Vas Dis Mis hu cov thawj coj kev teev hawm tuaj sib sau nyob hauv nws tsev, nws xa tej tus tub tseem hwv mus xyuas cov tsev teev Ntuj nto moo loj nyob ntau lub teb chaws. Thaum cov tub tseem hwv mus xyuas cov tsev teev Ntuj nyob Npis Xaas rov los txog, lawv hais rau tus vaj Vas Dis Mis tias “Thaum peb nyob Npis Xaas mas yog zoo li peb nyob hauv Tswv Ntuj lub vaj loog ci ntsa iab.”

Xyoo 987 thiab 988 tus vaj Vas Dis Mis thiaj tig los yuav lub siab tshiab ntseeg txog Yes Xus. Nws yuav tus vaj kav Npis Xaas ib tug ntxhais los ua nws poj niam. Tus vaj Vas Dis Mis txhim ntau lub tsev teev Ntuj raws li cov tsev teev Ntuj nyob Npis Xaas tus piv txwv. Cov Leej Choj tshaj Ntuj Lus tuaj ntawm Npis Xaas teb tuaj qhia cov pej xeem Us Khas Zis Nas coob kawg, lawv nqa cov Ntawv Ntshiab siv lus Hes Las tuaj qhia Tswv Ntuj Lo Lus.

Tus vaj Vas Dis Mis tas sim neej rau xyoo 1015. Nws tau ua kom lub nroog Kis Yes vam meej. Thaum ntawd lub nroog Kis Yes yog lub nroog vam meej tim ob nyob Aws Los Pas tuam teb. Npis Xaas yog lub nroog tim ib. Tab sis sawv daws siv lus Hes Las thiab siv kev teev Ntuj Hes Las xws li nyob hauv lub nroog Npis Xaas.

Tus vaj sawv los hloov Vas Dis Mis kav Kis Yes yog tus vaj Yas Laus Las (Yaroslav the Wise). Tus vaj Yas Laus Las zoo siab kheev kom muaj cov tsev teev Ntuj zoo nkauj nyob Us Khas Zis Nas teb. Tab sis nws xav kom sawv daws siv lus Xas Las Vas thiab siv kev teev Ntuj Xas Las Vas. Tus vaj Yas Laus Las kuj mus kav haiv neeg Lav Xias uas nyob ntawm Us Khas Zis Nas pej fab.

Cov neeg ntseeg nyob Mos Las Vas teb, nyob Npus Nkas teb, raug kev tsov kev rog tuaj ntawm cov Hoos Nqias tuaj, lawv tsiv mus nyob Lav Xias teb coob kawg. Lawv puav leej pom tias yog lawv siv lus Xas Las Vas los kawm kev ntseeg thiab ua cov txoos teev Ntuj, mas tsoom pej xeem kawm sai dua thiab lawv dim ntawm cov vaj Npis Xaas uas xa cov Tswv Qhia Npis Xaas tuaj coj lub Koom Txoos nyob Lav Xias teb. Vim tej ntawd tib si mas cov Koom Txoos nyob Lav Xias teb, Us Khas Zis Nas teb, Npus Nkas teb, Lus Mas Nias teb, thiab Hoos Nqias teb, sawv daws puav leej siv kev teev Ntuj Xas Las Vas xws li ob kwv tij Xis Lis thiab Mes Tos pib tsim xyoo 863.

Txij tiam 6 los txog tiam 8 cov Tswv Qhia nyob Npis Xaas, nyob As Nthias Kias, nyob Yes Lus Xas Les, nyob As Les Xas Nrias, lawv saib tus Vaj Qhia nyob Los Mas yog tus ntaus thawj nyob hauv tsoom Tswv Qhia. Thaum muaj xaiv muaj lus, lawv vam txog Vaj Qhia nyob Los Mas pab lawv tu plaub tu ntug. Thaum yuav tsa ib tug Tuam Tswv Qhia tshiab, mas lawv xub thov Vaj Qhia lus pom zoo tso. Yog txij tiam 9 Yes Xus lub Koom Txoo nyob Los Mas thiab lub Koom Txoos nyob Npis Xaas thiaj pib muaj lus tsis sib haum loj.

Thaum tiam 9 Fos Tis Yos (Photios the Great) tau ua tus vaj Npis Xaas ib tug tiam lis nyob Xis Lias teb ib ntus, ces nws tau los ua txoj kab xwm loj nyob hauv tus vaj Npis Xaas lub tsev. Nws yog ib tug neeg tau kawm txuj ci ntau, nws lub tswv yim ntse kawg, nws xyuam xim, nws txawj hlub luag tej thiab. Thaum Fos Tis Yos txog ib nrab neej lawm, lawv xav tsa nws ua tus Tuam Tswv Qhia nyob Npis Xaas. Thaum ntawd nws tsuas yog ib tug neeg ntseeg xwb, nws tsis tau ua Leej Choj. Niaj hnub, lawv tsa nws nce ib theem, los ob theem tshiab. Xyoo 858 lawv thiaj tsa nws ua tus Tuam Tswv Qhia.

Hnub tim 20 lub 12 hlis xyoo 858 lawv pib ua kab ke tsa Fos Tis Yos ua Leej Choj. Tab sis thaum ntawd yeej muaj ib tug Tuam Tswv Qhia nyob Npis Xaas lawm. Tus Tuam Tswv Qhia ntawd hu ua Is Nyas Xyus (Ignatios). Tus vaj kav Npis Xaas tsis nyiam Is Nyas Xyus, ces nws muab Is Nyas Xyus txo. Fos Tis Yos yuav ua Tuam Tswv Qhia, tiam sis nws yuav tsum xub tau Vaj Qhia nyob Los Mas lus pom zoo tso. Lub caij ntawd, tus Vaj Qhia nyob Los Mas yog Vaj Qhia Nis Kos Las (Pope Nicholas I), nws tsis pom zoo, vim twb muaj Is Nyas Xyus ua tus Tuam Tswv Qhia lawm. Vaj Qhia thiaj xa ob tug tiam lis mus txog Npis Xaas kom nkawd mus txo Fos Tis Yos, tsis pub ua Tuam Tswv Qhia. Thaum nkawd tuaj txog mas nkawd pom tias ntshai yuav tsum cia Fos Tis Yos ua Tuam Tswv Qhia, vim nyob Npis Xaas sawv daws xav cia Fos Tis Yos tuav txoj kab xwm ntawd. Fos Tis Yos hu cov Tswv Qhia uas zwm rau nws, kom lawv tuaj ua Rooj Ncauj Lus. Ob tug tiam lis uas Vaj Qhia xa tim Los Mas tuaj, kuj nrog lawv koom ua lub Rooj Ncauj Lus ntawd thiab. Nkawd lam ua siab nrog sawv daws pom zoo tias yuav rov txiav txim rau Is Nyas Xyus, thiab yuav cia Fos Tis Yos ua tus Tuam Tswv Qhia.

Vaj Qhia Nis Kos Las pom tias nws ob tug tiam lis swb Fos Tis Yos, ces Vaj Qhia txo nws ob tug tiam lis. Vaj Qhia rov fi xov tias nws tsis yuav Fos Tis Yos ua Tuam Tswv Qhia nyob Npis Xaas li, ces Fos Tis Yos haub sawv daws uas nyob Npis Xaas kom lawv hiam Vaj Qhia cov tiam lis. Fos Tis Yos hu sawv daws rov tuaj ua ib lub Rooj Ncauj Lus dua, lawv txiav tias yuav txo tus Vaj Qhia nyob Los Mas. Tab sis xyoo tim 867 Vaj Qhia Nis Kos Las tuag. Tus vaj Npis Xaas uas txuag Fos Tis Yos kuj tuag. Tus vaj tshiab ntxub Fos Tis Yos, ces nws txo Fos Tis Yos. Ua li mas yog zoo li lub Koom Txoos nyob Los Mas yeej lawm, Fos Tis Yos swb. Tab sis Fos Tis Yos ntse, nws nrog tus vaj tshiab rov sib haum zoo. Tos tsis ntev tus vaj Npis Xaas kuj hu Fos Tis Yos tuaj ua tus saib xyuas thiab qhia txuj rau vaj tus tub, ces thaum tus Tuam Tswv Qhia tuag lawm Fos Tis Yos rov tau ua Tuam Tswv Qhia.

Nyob sab nraud, luag tej pom yog zoo li Npis Xaas thiab Los Mas sib haum. Tab sis tshuav ntau yam teeb meem. Thaum Fos Tis Yos nrog Los Mas sib ceg, nws tau sau tej phau ntawv thuam Vaj Qhia. Nyob hauv lub Koom Txoos Npis Xaas muaj ntau leej tau nyeem Fos Tis Yos cov ntawv uas nws txwv kom txhob hwm Vaj Qhia. Tsis kav Npis Xaas thiab Los Mas kuj sib haum dog dig tau 100 tawm xyoo ntxiv thiab.

Thaum tiam 10 cov Vaj Qhia nyob Los Mas poob hwj chim loj kawg, vim lawv sib txeeb ua Vaj Qhia, thiab lawv tsa tej tus neeg tsis muaj tsim los ua Vaj Qhia, lub caij ntawd kuj muaj tej tus Vaj Qhia coj tus yam ntxwv tsis zoo. Cov Vaj Qhia thiaj tsis nto moo, lawv txiav tsis tau dab tsi nyob hauv lub Koom Txoos. Yog vim tej no mas lub Koom Txoos nyob Npis Xaas thiaj tsis xav nco txog lawv lawm.

Vim muaj tej xwm zoo li ntawd, ces tiam 11 lub Koom Txoo nyob Los Mas thiab lub Koom Txoos nyob Npis Xaas yuav ceeb laj sib haum xeeb ntxiv. Yog sawv daws txawj ua siab ntev sib zam, mas yuav nyob ua ke ntxiv. Yog tsis txawj sib zam kom ntau ntau, mas kawg yuav sib ncaim xwb.

Thaum ntawd muaj ib tug neeg xav cav kom yeej, nws lub npe hu ua Miv Kas Xes Lus Las Lis (Michael I Cerularius) los yog Kes Aws Las Lis (Keroularios). Nws ua neej nyob txij xyoo 1000 txog xyoo 1059. Thaum nws thawj yav neej, nws xav ua nom kav teb chaws. Nws lub keeb yeej yog noob nom, nws xav kav Npis Xaas teb tas huv si. Muaj ib ntus, nws nrog ib pab ntxeev siab nrhiav txoj kev yuav muab tus vaj Npis Xaas tua pov tseg, nws xav ua vaj kav Npis Xaas teb. Muaj ib ntus nws tso zaj tswv yim ntshaw ua vaj tseg, nws mus ua Txiv Twj Cuab, ces Xes Lus Las Lis ua ib tug neeg yuam nws lub cev heev thiab nws sau tej co ntawv cav lus zoo txog kev ntseeg. Tab sis nws tsis tso nws lub siab ntshaw ua tus loj tseg, nws xav ua tus Tuam Tswv Qhia nyob Npis Xaas. Nws yog neeg ntseeg thiab nto koob meej, lawv thiaj tsa nws ua tus Tuam Tswv Qhia nyob Npis Xaas.

Hnub lawv tsa nws, nws hais rau cov phooj ywg tias nws txoj kab xwm tsis yau dua tus vaj Npis Xaas txoj kab xwm. Thaum yuav tsum ua siab ntev, nws kuj txawj ua siab ntev. Nws kuj txawj ua nkhaus thiab txawj dag. Nws tus nru lus yog nws xav kom Npis Xaas ncaim ntawm lub Koom Txoos nyob Los Mas mus li, ces nws thiaj yuav tau ua Vaj Qhia.

Xes Lus Las Lis pib ua tus Tuam Tswv Qhia xyoo tim 1043 nyob hauv nws nruab siab nws tos ib lub caij zoo nrhiav lus rau lub Koom Txoos nyob Los Mas. Nyob ze xyoo 1050 Xes Lus Las Lis pib nrhiav lus rau lub Koom Txoos nyob Los Mas. Thaum ntawd tus Vaj Qhia nyob Los Mas hu ua Les Os Cuaj (Pope Leo IX). Vaj Qhia Les Os Cuaj tso ib co tiam lis mus cuag tus tuam vaj Zes Mas Nias, nws thov kom nkawd ob leeg sib koom siab sau tub rog mus ntaus cov Mawv Xim Lim. Ob tug tuam vaj pom zoo ua li ntawd.

Xes Lus Las Lis khib vim lawv 3 leeg tsis vam txog nws. Nws pom tias tus Vaj Qhia nyob Los Mas ua thawj coj tsam rog ntawd, tus Vaj Qhia muaj hwj chim dua nws. Xyoo ntawd, tus Tuam Tswv Qhia nyob As Nthias Kias hloov tshiab, nws lub Koom Txoos thov lus pom zoo ntawm tus Vaj Qhia nyob Los Mas. Xes Lus Las Lis kuj khib rau qhov ntawd thiab, vim luag tej saib Vaj Qhia yog tus loj, ces Xes Lus Las Lis xav tias yuav tsum nrhiav lus rau tus Vaj Qhia nyob Los Mas. Xes Lus Las Lis paub tias cov neeg nyob Npis Xaas saib cov kab ke teev Ntuj yog ib qho loj kawg, nws thiaj kom nws ob tug phooj ywg Tswv Qhia sau tej phau ntawv cem lub Koom Txoos nyob Los Mas hnyav kawg, vim tias lub Koom Txoos nyob Los Mas yuam kev ntau. Ob tug Tswv Qhia tej ntawv sau hais tias nyob Aws Los Pas hnub poob, cov Leej Choj ua lub Cim Yug mas lawv siv ib cov mov tsis muaj poov xab los ua, lawv ua phem kawg, vim lawv ua raws li cov His Xas Lais tus lwj lwm tsis zoo. Ob tug Tswv Qhia sau ntawv hais tias cov nyob sab hnub poob noj cov nqaij uas lawv tsis tau xub cug ntshav tas tso, lawv tsis caiv qhov ntawd, lawv ua txhaum, vim lawv tsis coj xws li cov His Xas Lais thaud. Lawv tseem hais tias cov nyob sab hnub poob ntau zaus lawv coj cov kab ke yoo hnub xya yam li lawv tseem caiv hnub xya xws li cov Yus Das. Lawv hais tias cov Leej Choj nyob sab hnub poob tsis tseg hwj txwv, cuag li lawv liab qab lawm. Xes Lus Las Lis thiab nws cov phooj ywg tshaj tej lus liam rau Los Mas zoo li ntawd tas zog.

Vaj Qhia paub tias tus ua hauv paus tshaj tej lus phem ntawd yog Xes Lus Las Lis. Thaum ntawd, Xes Lus Las Lis muab cov tsev teev Ntuj raws li txoj kev cai Los Mas nyob hauv lub tsheej Npis Xaas kaw. Muaj neeg Npis Xaas tsuj lub Cim Yug nyob hauv cov tsev teev Ntuj ntawd thiab.   Vaj Qhia thiaj xav teb ceev hauj sim rau Xes Lus Las Lis, Vaj Qhia thiaj xaiv tus Tswv Qhia Liab Hus Npes (Cardinal Humbert of Silva Candida) los sawv nws chaw teb lus rau Xes Lus Las Lis. Tswv Qhia Liab Hus Npes yog ib tug neeg tswv yim loj thiab siab loj siab tawv, nws niaj hnub pab Vaj Qhia kav lub Koom Txoos kom lub Koom Txoos rov coj ib tug yam ntxwv zoo. Tab sis nws siab muaj ntsis ceev, nws siv txoj cai nruj, nws tsis tshua txawj zam. Tswv Qhia Liab Hus Npes ua ntawv teb rau Xes Lus Las Lis, nws tsis nrog lawv sib cav txog cov kab ke me me xws li cov Npis Xaas. Nws hais tias ib txwm nyob hauv lub Koom Txoos, Vaj Qhia yog tus ntaus thawj, luag tej tsis muaj cai txiav txim rau Vaj Qhia, ib txwm lub Koom Txoos Npis Xaas yeej paub qhov ntawd lawm.

Tib lub caij ntawd Xes Lus Las Lis sau ntawv tuaj rau Vaj Qhia tias “Yog koj kom luag tej hwm kuv lub npe nyob hauv ib lub tsev teev Ntuj xwb nyob Los Mas, mas kuv yuav kom luag hwm koj lub npe nyob tas ntiaj teb.” Yog zoo li Xes Lus Las Lis xav hais tias nws loj ib yam li Vaj Qhia. Lub Koom Txoos nyob Los Mas tsuas teb tias Npis Xaas yuav tsum mloog cov hloov Pob Zeb nyob ntiaj teb no. Yog lawv tsis yeem mloog, mas lawv kawg yuav yog ib co niag yuam kev, ib co neeg ncaim ntawm lub Koom Txoos, lawv kawg yog Xas Tas tsev neeg. Ua li mas ob tog pib hais lus ntxhib kawg.

Vaj Qhia tso ob tug tiam li mus txog Npis Xaas, nws xaiv Tswv Qhia Liab Hus Npes thiab ib tug ntxiv. Ob tug tiam li ntawd puav leej yog neeg siab tawv siab kub dhau. Nkawd tuaj txog mas lawv pib sib cav txog cov mov ua lub Cim Yug, sib cav txog cov Leej Choj yuav poj niam, thiab yim cuaj yam ntxiv.

Xes Lus Las Lis txhob txwm coj sawv daws sib cav txog tej yam tsis muaj qab hau, vim nws paub tias cov neeg nyob Npis Xaas saib tej yam ntawd loj. Xes Lus Las Lis tsis hais lus ntau, nws cia luag tej sib cav tas zog. Tsis ntev sawv daws sib ceg, cov Npis Xaas thuam cov Los Mas tias ib txwm los txog tav no Los Mas txi Ntuj yuam kev, lawv txoj kev txi Ntuj tsis haum Yes Xus kev cai. Xes Lus Las Lis pom sawv daws sib ceg, nws zoo siab ntau, nws tos saib yog hnub twg cov tiam lis Los Mas thiaj yuav txiav txim rau Npis Xaas.

Hnub tim 16 lub 7 hli ntuj xyoo 1054 Vaj Qhia tus tiam lis txiav txim rau Npis Xaas. Hnub tim 16 ntawd tas lub caij cov Npis Xaas yuav teev Ntuj nyob hauv lub Tuam Tsev Teev Ntuj Thoob Tsib. Tswv Qhia Liab Hus Npes nrog lwm tus tiam lis nkawd mus hauv lub Tuam Tsev Teev Ntuj ntawd.  Hus Npes tsa suab hais rau sawv daws tias tus Tuam Tswv Qhia Xes Lus Las Lis ua dhau kev cai lawm, nws hla Vaj Qhia lus, nws ntxeev siab lawm. Ces Hus Npes muab daim ntawv nrauj ntawm lub Koom Txoos los tso rau saum lub Thaj Txi Ntuj. Thaum nws tawm hauv lub Tuam Tsev teev Ntuj mus lawm, nws nyob ntawm lub qhov rooj, nws nchos cov plua av lo nws nkawm khau, nws hais tias “Ntuj pom nej, Ntuj txiav txim rau nej.”

Hus Npes xav tias tus vaj Npis Xaas yuav txo Xes Lus Las Lis. Tab sis tsis yog li nws xav. Hus Npes tsis muaj cai txiav txim rau Xes Lus Las Lis. Tos nws tsis muaj cai txiav txim kuj yog vim ob yam no: Ib, Vaj Qhia tsis tau tso cov tiam lis mus txiav txim rau Xes Lus Las Lis. Ob, thaum Vaj Qhia Les Os Cuaj cov tiam lis txiav txim rau Xes Lus Las Lis, mas Vaj Qhia Les Os Cuaj twb tuag tau ib hlis ntau lawm.

Xes Lus Las Lis tau ib txog kev du lug taug, vim nyob Npis Xaas sawv daws saib nws yog tus pab cov Npis Xaas tiv cov nyob hnub poob uas lawv thuam Npis Xaas. Tus vaj Npis Xaas tsis xav ua lus rau Los Mas, nws xav cheem cov Npis Xaas kom lawv txhob ua plaub ua ntug. Tus vaj xav kom cov ntseeg nyob hnub poob pab nws tiv cov Mawv Xim Lim. Tab sis Xes Lus Las Lis haub cov pej xeem tas huv tib si kom lawv mus ua ntxhov ua ncha hem tus vaj, ces tus vaj thiaj ua twj ywm, nws rov mus nrhiav txoj kev nplij siab ntawm nws tus poj niam hluas nkauj tshiab lub xub ntiag. Xes Lus Las Lis txhib cov pej xeem nyob Npis Xaas kom lawv tsis txhob mloog lub Koom Txoos nyob Los Mas lo lus txiav txim.

Tus Tuam Tswv Qhia nyob As Nthias Kias uas nws yog ib tug neeg siab ntshiab, thov Xes Lus Las Lis cia nws mus pab hais lus kom sawv daws rov sib haum xeeb. Tab sis Xes Lus Las Lis kawg muaj lus hnyo tus Tswv Qhia As Nthias Kias xwb. Ces hnub tim 24 lub 7 hli xyoo 1054 Xes Lus Las Lis hu 12 tug Tswv Qhia tuaj sib txoos. Nws hu tas tsoom pej xeem tuaj, nws muab daim ntawv uas lub Koom Txoos nyob Los Mas nrauj nws tawm ntawm lub Koom Txoos los hlawv hauv lub tshav nyob hauv lub plawv nroog rau sawv daws pom. Xes Lus Las Lis thiab cov Tswv Qhia tseem ua ntawv ceeb toom rau teb chaws tias cov Los Mas ntxeev siab lawm, lawv hloov txoj kev ntseeg. Xes Lus Las Lis hais tias tus Tuam Tswv Qhia nyob Npis Xaas thiaj yog tus txuag thiab pov hwm txoj kev ntseeg nyob ntiaj teb no.

Dhau xyoo 1054 cov vaj Npis Xaas sib hloov sai, vim lawv muaj lus sib ntxub ntau yam. Muaj ib tug vaj tsis xav mloog Xes Lus Las Lis, vim Xes Lus Las Lis niaj hnub xav kav tas tsoom tub tseem hwv. Tab sis Xes Lus Las Lis nrog ib co neeg ntxeev siab txo tus vaj, lawv muab ib tug tshiab los hloov. Tus vaj tshiab zoo siab ua vaj, tab sis nws tsis kam ua me nyuam yaus nyob hauv Xes Lus Las Lis txhais tes.

Xyoo 1058 thaum Xes Lus Las Lis mus sau siab nyob hauv ib lub tsev Txiv Twj Cuab, nyob deb Npis Xaas, tus vaj tso ib pab tub rog mus ntes Xes Lus Las Lis. Tus vaj yuav txiav txim rau Xes Lus Las Lis, tab sis Xes Lus Las Lis tuag lawm. Tas tsoom sid tseem hwm Xes Lus Las Lis, lawv qaug siab npho rau nws. Lawv kom tus vaj coj Xes Lus Las Lis tus qauv rov los nyob Npis Xaas. Lawv pam nws xws li ib tug nom loj.

Tog Los Mas nrauj tog Npis Xaas. Tog Npis Xaas kuj nrauj tog Los Mas. Tog twg nyias kuj khav nyias tias peb yeej. Tab sis tog twg kuj tsis nco qab pom tias zaum no ob tog yuav sib ncaim mus li. Cov Vaj Qhia nrog cov vaj Npis Xaas tseem sib fim zoo hauj sim tas ib ntus. Cov vaj Npis Xaas kuj tseem pab cov Vaj Qhia thiab. Tab sis nyob Npis Xaas muaj tej tus Tswv Qhia meem txom, ces lawv tsis khuv xim kev sib ncaim. Lub Koom Txoos Npis Xaas thiaj tsis rov los zwm rau lub Koom Txoos Los Mas lawm.