KAB KE THAUM TAU ME NYUAM
Thaum tus poj niam yug tau tus me nyuam lawm, yuav npaj chaw rau leej niam thiab tus me nyuam pw kom sov so rau qhov twg los puav leej tau, tsis caiv leej niam ncauj nws xav noj yam twg los tau, thiab nws yuav tawm rooj mus nraum zoov los yeej tau tsuas yog kom zoo saib thiab tsis txhob muaj lus nrog cov kwv tij neej tsa coj kev cai dab qhuas xwb, yog muaj qhua tuaj los yus yuav caw los hauv tsev yeej tsis txhaum dab tsi.
Tsis muaj kab ke hu plig me nyuam tshiab lawm, vim peb tsis ntseeg tias thaum Tswv Ntuj tsim noob neej mas Tswv Ntuj tsim ib tug neeg muaj ib tug plig ib txog sia xwb, thiab thaum tus me nyuam pib xeeb rau hauv leej niam lub cev mas Tswv Ntuj yeej tso tus plig nqes los nyob nrog thooj nqaij hauv leej niam lub plab lawm, ces thaum ntawd tus me nyuam twb muaj sia thiab muaj tus ntsuj tus plig lawm.
1. Coj me nyuam mus txais Cim Ntxuav
Yuav xaiv ib lub npe Hmoob rau tus me nyuam thiab xaiv tus Leej Ntshiab los pov hwm tus me nyuam, xaiv ib tug neeg ntseeg los ua niam qhuav los txiv qhuav. Xaiv tau tas yuav mus nrog Txiv Plig los Xib Hwb tham teem caij ua lub Cim Ntxuav rau tus me nyuam. Txog lub caij mas cov kwv tij yuav sib sau mus pab thov Ntuj pab tus me nyuam thaum nws txais lub Cim Ntxuav. Ua lub Cim Ntxuav tas mam pib ua rooj qav noj lom zem khi tes thov Ntuj rau tus me nyuam tom tsev.
2. Khi tes thov Ntuj rau tus me nyuam
Thaum niam txiv npaj rooj qav khi tes thov Ntuj rau tus me nyuam tiav tas lawm, caw sawv daws los zaum ncig rooj qav. Niam txiv xub hais ob peb lo lus qhia tias niam txiv npaj rooj mov los thov Ntuj ua tus dab tsi rau leej twg, thiab hais tus me nyuam npe qhia rau sawv daws paub.
1. Tus coj yuav coj sawv daws ua Ntoo Cuam Lub Cim thiab hais tias:
“Auj! Tswv Ntuj peb Leej Txiv tus muaj hwj huam, hwj chim, tus muaj koob muaj hmoov ntshiab. Koj yog tus Tswv ntawm tas ib puas tsav yam nyob saum ntuj thiab nyob ntiaj teb no. Tas ib puas tsav yam tshwm sim tuaj tau los puav leej yog koj ua tus pub thiaj tshwm sim tuaj tau. Yam uas xeeb los tshiab ntawd, los koj tseem pub txiaj ntsim koob hmoov rau kom txawj hlob loj mus ntxiv kom mus txog hnub uas zoo ntxim koj lub siab.
Thaum lub hauv paus, koj tau tsim poj niam thiab txiv neej kom tau los tsim noob neej tu lub ntiaj teb no. Hnub no koj tau pub ib tug me tub/ntxhais los rau nkawd ob tug ua niam ua txiv, los ua nkawd me nyuam lawm. Thov koj pub koj txoj koob txoj hmoov tuaj pov hwm pov yawm nws thiab roos nws kom nws tsis txhob muaj mob muaj nkeeg, kom nws hlob loj dhia rhees nyob hauv nws niam nws txiv lub xub ntiag. Tswv Ntuj peb Leej Txiv siab zoo, koj yog tus tsim tus me nyuam no cev nqaij daim tawv, txoj sia thiab tus ntsuj plig. Thov koj nrog txuag kom nws hlob loj mos nyoos ntxim koj lub siab, kom nws muaj ib lub siab thoob tsib: ua yam twg los yog yam tsim nuj, kom nws txawj tu lub ntiaj teb no mus raws txoj kev zoo uas koj tau xav kom noob neej nyob ntiaj teb no ua. Tswv Ntuj! Yog li no peb muab tus me nyuam mos tsim txiaj kawg nkaus no, cob thiab fij rau rau koj ua tus kav nws, hwj xwm nws thiab txuag nws nyob rau hauv nws lub neej nws yuav ua nyob tiaj teb no. Ntuj Aib! Peb thov koj.”
Thaum thov Ntuj tas ces sawv daws hais zaj ‘PEB TXIV NYOB SAUM NTUJ’.
2. Thov niam Mab Liab pab cev peb zaj thov Ntuj rau nws Leej Tub Yes Xus thiab peb Leej Txiv Tswv Ntuj li no:
“Niam Mab Liab, koj yog ib leej niam muaj koob hmoov tshaj tas ib zeej tsoom ua niam sawv daws tib si nyob hauv lub sim ceeb no. Peb thov koj nrog cev zaj peb thov hnub no rau koj Leej Tub Yes Xus thiab rau peb Leej Txiv Tswv Ntuj kom koj Leej Tub Yes Xus thiab peb Leej Txiv Tswv Ntuj pub txoj koob txoj hmoov dawb huv los roos tus me nyuam no, kom nws tsuas tau loj hlob mos nyoos raws li noob neej ua lub neej nyob hauv lub sim ceeb no.”
Sawv daws hais zaj ‘KOJ NYOB KAJ LUG MAB LIAB’.
3. Txuas mus yog kab ke foom hmoov zoo rau cov xov paj li no:
“Tswv Ntuj, koj yog tus tsim peb ntiaj teb noob neej tus ntsuj plig thiab cev nqaij daim tawv uas peb qhov muag pom tau. Cov xov no yog ib lub cim rau peb noob neej pom tau tias koj nrog peb nyob nraim thiab ua kom peb ntseeg tau ruaj nyob hauv peb nruab siab. Yog li cov lus hauv peb txhua leej txhua tus yuav hais thiab yuav thov, puav leej yog ib lo lus nyiaj lus kub nrog koj lub hwj chim nqa txoj sia, nqa txiaj ntsim koob hmoov tuaj ntawm koj tuaj.
Thov koj uas yog Tswv Ntuj foom koob foom hmoov rau tus me nyuam no kom tau lub neej ntshiab, dawb huv li cov xov paj no uas peb yuav muab los khi cog rau saum nws. Thov kom Huab Tais Leej Txiv, Huab Tais Leej Tub, Huab Tais Leej Ntuj Plig tso ib lo lus foom hmoov zoo nqes los rau saum cov xov paj no, kom cov xov paj no txia ua ib co xov paj ntshiab dawb huv. Ua li.”
4. Tus coj faib cov xov paj rau sawv daws, nws pib khi tes rau tus me nyuam thiab hais cov lus li no:
“Auj! Hnub no yog hnub dawb hnub zoo, hnub no yog hnub ntshiab hnub huv. Niam zoo siab txiv zoo plawv, niam txiv muab rooj nqaij rooj hno los txhawb los nqa kev noj kev haus rau lub cev txoj sia tus ntsuj plig kom hlob loj, kom muaj sia muaj zog, kom lub cev yeej mob yeej nkeeg, yeej dab phem kev haub kev ntxias, yeej dab ntub npau suav phem. Hnub no Tswv Ntuj lub hwj chim yuav los roos koj, thiab nws tej txiaj ntsim koob hmoov ntshiab yuav los nyob saum koj, los pab txhawb nqa koj kom hlob mos nyoos. Txoj xov no peb yuav muab khi kom nqa koob hmoov, txiaj ntsim ntshiab dawb huv los rau saum koj. Thov kom Tswv Ntuj nrog nraim koj mus li. Kuv tuav txog Huab Tais Yes Xus lub npe thov. Ua li.”
5. Thaum khi tes tas mam los txhawb lub phaj thiab hais cov lus tias:
“Huab Tais Tswv Ntuj, ua koj tsaug ntau uas koj tau pub koob hmoov, txiaj ntsim ntshiab huv los rau saum …..(Npe)… Peb tseem thov koj tso koj lub txiaj ntsim ntshiab dawb huv tuaj nrog txhawb nqa lub phaj nqaij phaj hno no los rau saum …(Npe)… kom tej zaub mov, txhiam xws no nrog ua ke rau koj txoj koob hmoov tau yug tus me nyuam no lub cev nqaij daim tawv, tus ntsuj plig kom hlob mos nyoos nyob hauv koj Leej Tub Yes Xus lub npe ntshiab. Ua li.”
6. Thov Ntuj foom hmoov zoo rau rooj qav:
“Tswv Ntuj, peb ua koj tsaug txog txhua yam txiaj ntsim koob hmoov dawb huv uas peb thov ntawm koj los. Kawg no, peb tseem thov koj foom koob hmoov los rau saum cov txhiam xws peb ua ke yuav txais no.
Vim muaj koj tsim tej tsiaj txhu, qoob loo mas tej tsiaj txhu, qoob loo thiaj muaj tuaj yug neeg cev nqaij daim tawv. Koj tseem yog tus ua kom muaj dej nag, huab cua los yug tej qoob loo, tsiaj txhu no kom hlob taus, kom txawj tawg paj txi txiv, huam vam txaus los yug peb neeg txoj sia.
Hnub no, …(Tus txiv lub npe)… nkawd ob niam txiv tau muab tej tsiaj txhu, qoob loo no los ua txhiam xws rau peb noj ua chaw zoo siab rau nkawd tus me nyuam. Nkawd yeej nco ntsoov tias yog koj tsim los pub rau nkawd. Hnub no, nkawd thov muab rooj mov no cev rau koj, thov koj foom koob foom hmoov rau saum rooj qav no kom txia ntshis ua ib co txhiam xws ntshiab dawb huv.
Thaum sawv daws tau txais los noj tas lawd, yuav ua ib co txhiam xws los yug peb cev nqaij daim tawv kom peb noj yeej mob yeej nkeeg. Thaum peb tau txais cov txhiam xws no lawd, kom peb sawv daws muaj kev sib nyiam sib hlub. Peb tuav txog peb tus Huab Tais Yes Xus lub npe los thov koj. Ua li.”
Sawv daws hu zaj nkauj ‘Tswv Ntuj ntsia mov’ tas mam ua Ntoo Cuam Lub Cim thiab noj mov.
KHI TES FOOM HMOOV ZOO
Yav coj qub kev cai
Hmoob khi tes yog thaum haus ib tug laus cawv xeeb los yog hu plig me nyuam, thiab thaum muaj mob los ib tug neeg yuag yuag tsis muaj zog, mas Hmoob hais tias yog vim plig tsiv tsawv los plig mus thawj thiab lawm, mas yuav khi tes khi plig rau.
Thaum khi tes yog ib lub sij hawm muab rau txhua leej txhua tus mus foom koob hmoov lus zoo rau tus neeg kom nws tus ntsuj tus plig tsis txhob tu siab. Thaum tau txais cov lus lawd, yuav ua rau tus neeg ntawd muaj kev zoo siab. Kev zoo siab yuav ua yeeb ua tshuaj pab txhawb nws tus ntsuj tus plig thiab lub siab ntsws kom txhob txiab mob txiab ntsaj. Ua ntej yuav pib cov txheej txheem, saum lub rooj khi tes yuav tsum muab cov nqaij ntawm cov tsiaj siv hu plig coj los tso hauv phaj teeb kom txhua rau saum lub rooj; xws li ob tug qaib, ib ob taig nqaij npua los nyuj, tus tw npua (Lis T. Xyooj. 2004).
Yog li thiaj hais tau tias ‘kev khi tes’ yog 1) khi plig, 2) foom hmoov zoo, thiab 3) ua kev zoo siab lom zem.
Cov txheej txheem khi tes: ‘cheb’ vij sub vij sw kev dab kev npog kab mob kev nkeeg; ‘txhawb cov hlua’, ‘khi’, ‘txiav cov hlua’ coj mus hlawv thiab ntov pov tseg, ‘txhawb cov txhiaj txheej’ rau tus khi tes.
Yav coj Ntuj kev cai
Nyob hauv phau ntawv ‘lub Koom Txoos cov kab ke, 1981’ thiab XH. Vam Thaiv Lauj phau ntawv ‘Ua neeg ntseeg mus raws qhov tseem ceeb’ sau tseg tias: Thaummuaj mob,cov neeg coj Ntuj kev cai tsis ntseeg tias yog vim poob plig los yog plig mus ua si tsis rov los nyob hauv lub cev lawm, peb ntseeg hais tias neeg tus plig yog neeg lub tswv yim nrog rau neeg txoj sia nyob ua ke ua hauj lwm hauv neeg lub cev lub siab tib si. Yog tias neeg tus plig poob los tawm ntawm neeg lub cev mus mas neeg txoj sia yuav tsum tsis muaj lawm. Vim tus neeg tseem muaj txoj sia nyob, mas nws tus plig tseem nyob. Yog thaum ‘muaj mob’, cov coj Ntuj kev cai yuav ‘tsis khi tes’ rau, vim cov coj Ntuj kev cai tsis ntseeg tias khi tes yuav pab kom tus mob zoo tau, thiab tsis ntseeg tias khi tes kom tus neeg mob tus plig tsis txhob mus yos.
Kev khi tes yuav khi thaum ‘muaj ib qho lom zem’ los yog xav ‘foom hmoov zoo’ rau ib tus neeg twg; yam li thaum muaj ib tug me nyuam yug los, thaum ib tug me nyuam txais lub Cim Ntxuav, thaum ib tug neeg yuav mus kev deb, los thaum muaj ib tug nom tswv tuaj xyuas tsoom pej xeem, los thaum muaj ob tug sib yuav thiab txais lub Cim Cog Lus. Peb ua ib qho lom zem kom sawv daws zoo siab thiab xav thov Tswv Ntuj pov hwm lawv.
Neeg tus plig, lub cev, txoj sia mas yeej tshaib nqhis txog Tswv Ntuj lub txiaj ntsim tuaj pab cawm thiab ntxiv zog rau tiag. Yog li cov coj Ntuj kev cai thiaj yuav thov Ntuj lub txiaj ntsim foom hmoov los rau saum tus neeg, ces thiaj khi tes rau nws. Tab sis thaum khi tes mas yuav hu txog Tswv Ntuj lub npe thiab thov txiaj ntsim los rau tus neeg xwb, tsis hu txog ib tug dab los pov hwm nws, los yog hu tus plig kom rov los rau hauv nws. Yuav tsis khi li thaum tseem coj dab lawm, es yuav hais txog plig ub plig no, los yog hais txog nkawm niam txiv dab kab yeeb lawm. Tsuas yog thov Ntuj pab xwb.
Tus txheej txheem mas yuav rau rooj mov thov Ntuj khi tes, muab lub phaj; muaj tswm ciab paj ntoos thiab cov xov paj khi tes tso rau hauv, tso saum lub rooj mov. Caw sawv daws los zaum kom txhij, ces tus coj yuav coj sawv daws thov Ntuj ua ntej, mam khi tes thiab noj mov.
Tus tswv tsev xub hais ob peb lo lus ua ntej tias vim li cas nws thiaj ua rooj mov los khi tes. Hais tas ces tus coj thiaj coj sawv daws ua Tswv Ntuj tsaug thiab thov Ntuj.
Tus txheej txheem
1. Sawv daws ua Ntoo Cuam Lub Cim tas, tus coj yuav hais tias:
“Kwv tij sawv daws, peb ua ke tuaj ntawm no, yog …(npe)… tau caw peb tuaj koom nrog nws ua Tswv Ntuj tsaug, thiab ho pab thov Huab Tais Tswv Ntuj pov hwm …(npe)… ntxiv mus kom … (npe)… tsuas ntsib kev luag ntxhi mus li xwb. Yog li ntawd, peb sawv daws yuav zoo siab koom ntsws nqa tes ua ib suab los cav txog Tswv Ntuj lub hwj chim thiab tej txiaj ntsim koob hmoov uas dhau los Huab Tais Tswv Ntuj tau pub rau … (npe)… Peb kuj tseem yuav thov kom Huab Tais Tswv Ntuj txuag peb txhua tus kom peb txhua leej tsuas ntsib kev kaj siab lug mus li.”
2. Tus coj nyeem Ntawv Moo Zoo (MT 7: 7-11) rau sawv daws mloog.
3. Tus coj yuav coj sawv daws hais zaj ‘PEB TXIV NYOB SAUM NTUJ’. Thaum hais tas tus coj yuav hais cov lus thov tias:
“Huab Tais Leej Txiv, Huab Tais Leej Tub, Huab Tais Leej Ntuj Plig uas nej koom ua ib tug Tswv Ntuj muaj koob meej nto moo lug. Koj yog tus nyob siab. Thaum lub ntuj tsis tau muaj, lub teb tsis tau xeeb, koj yeej ib txwm nyob. Koj yog tus Tswv Ntuj Tswv Teb, koj yog peb tus Huab Tais, koj yog peb lub zog, yog tus ceev peb txoj sia, koj yog peb qhov chaw vam khom. Peb Leej Txiv siab zoo txawj khuv leej neeg, peb thov koj tso koj lub hwj chim, tus duab ntxoov ntxoo, tej txiaj ntsim koob hmoov ntshiab huv, muaj zog; nqes los saum …(npe)… thiab tsev neeg txhua tus, thiab peb txhua leej tuaj sib koom nyob ntawm no.
Peb thov kom …(npe)… thiab tsev neeg txhua tus tau txais txoj kev thaj yeeb, kev noj qab nyob zoo raws li lawv lo lus thov ntawm koj. Huab Tais Tswv Ntuj, thov koj pub koj lub zog, lub tswv yim, txoj kev thoob tsib tuaj nres …(npe)… lub siab lub cev kom nws ua ib tug tub txib ntxhais txuas nyob ruaj nreb hauv txoj kev tsob hwb koj mus li, thiab kom nws ua ib tug yam ntxwv zoo rau txhua leej pom; lawv thiaj yuav los nrog tu tau lub ntiaj teb no kom tiav li koj nyiam. Huab Tais Tswv Ntuj siab zoo tas nrho, koj tau zoo siab kawg nkaus, koj thiaj tau pub kom koj Leej Tub Yes Xus Pleev tsheej xeeb yug los ua ntiaj teb neeg tus cawm seej. Thov koj pub kom peb taug tau Huab Tais Yes Xus tus cwj pwm zoo.
Huab Tais Yes Xus, koj yog txoj kev tseem ceeb rau peb taug. Koj yog peb lub zog, koj yog tus npo peb txoj sia kom dim ntawm kev ua phem, koj yog peb qhov chaw vam khom. Thov koj nqes los pab …(npe)… thiab tsev neeg txhua tus kom lawv tau txais yam muaj nuj nqes, kev thoob tsib, kev txawj ntse raws li lawv lo lus thov. Peb sawv daws txhua tus yuav nco ntsoov nqa tes ua koj tsaug tsis txawj tas. Ua li.”
4. Thaum hais lo lus thov Ntuj tas, yuav tsa tes rau saum cov xov paj thiab ua Ntoo Cuam Lub Cim rau, thiab hais cov lus foom hmoov zoo rau cov xov paj tias:
“Huab Tais Leej Txiv, Huab Tais Leej Tub, Huab Tais Leej Ntuj Plig, uas nej koom ua ib tug Tswv Ntuj muaj hwj huam nyob mus li. Huab Tais Tswv Ntuj, koj yog txoj kev tseem ceeb, txoj kev pom kev. Koj yog txoj sia tus tswv, koj yog peb lub zog. Peb thov koj foom koob foom hmoov zoo nqes los rau saum cov xov no, kom yog ib co xov dawb huv, kom nqa koj lub zog, txiaj ntsim tuaj nrog peb lo lus khi …(npe)… thiab tsev neeg txhua tus, kom muab khi rau …(npe)… thiab tsev neeg txhua tus tsuas ntsib kev dawb kev huv, kev thoob tsib, kev noj qab nyob zoo mus txog txhiab niag tim puas xyoo. Ua li.”
5. Foom hmoov zoo rau cov xov tas ces yuav faib xov rau sawv daws coj los khi tes. Cov lus hais thaum khi mas nyias hais raws li nyias lub siab nyiam, yam li yus thov Ntuj ywj yus siab. Tsuas yog thawj lo lus qhib hais thiab lo lus xaus mas thiaj yuav hais zoo li no:
“Kuv hu txog Leej Txiv thiab Leej Tub thiab Leej Ntuj Plig Ntshiab lub npe; thov…………………… Tswv Ntuj nrog koj nyob ua koj siab kaj lug. Ua li.”
Los yuav hais raws tus piv txwv li no:
“Aud! Hnub no yog hnub dawb, hmo no yog hmo huv. Kuv tuav txog Huab Tais Leej Txiv, Huab Tais Leej Tub, Huab Tais Leej Ntuj Plig lub npe ntshiab. Kuv muab cov xov paj ntshiab dawb huv no los khi koj mas yog coj Huab Tais Tswv Ntuj lub hwj chim los cog rau hauv koj. Khi koj no los nrog niam txiv, nrog kwv nrog tij, nrog viv nrog ncaus. Thov kom Huab Tais Tswv Ntuj pov hwm koj, txuag koj kom koj tsuas nyob ntshiab li dej huv li txhuv, tsis txhob muaj mob muaj nkeeg. Pub kom koj tsuas tau lub laj lim tswv yim thoob tsib. Xav yam twg yog yam tseeb, ua yam twg kom tau raws li lub siab xav. Kawm txuj kom tau txuj kom los kav laj mej pej xeem lawm ib tog ntuj. Kawm ci kom tau ci kom los kav pej xeem huab hwm lawm ib tog teb. Zaum mas xws peb Hmoob, sawv mas xws tub tshoob. Sawv mas xws peb li, zaum mas xws ib tug tub kawm ci no ntag lauj!”
6. Tom qab khi tes tas mam li tsaws lub phaj khi tes rau tus neeg txais thiab tus coj tig los foom hmoov zoo rau cov txhiam xws:
“Huab Tais Tswv Ntuj tus muaj hwj huam loj tas nrho, thov koj foom koob foom hmoov zoo, foom kev dawb huv nqes los rau saum cov zaub cov mov, kom cov txhiam laj txhiam xws nyob ntawm lub rooj no txia ntshis ua ib cov zaub mov ntshiab. …(npe)… thiab tsev neeg, thiab peb sawv daws noj tag mus ua roj ua ntshav, ua lub zog loj zog nchav tiv thaiv kab mob kev nkeeg. Thaum peb noj tag, peb muaj lub tswv yim thoob tsib ua neej nyob hauv txoj kev sib nyiam sib hlub. Peb sawv daws tsoom neeg nyob hauv lub ntiaj teb no thiaj yuav tu tau lub ntiaj teb no kom tiav li koj nyiam. Peb tuav txog peb tus Huab Tais Yes Xus lub npe los thov koj. Ua li.”
7. Tus coj coj sawv daws hu zaj nkauj ‘Tswv Ntuj ntsia mov.’ Hu zaj nkauj tas ces sawv daws ua Ntoo Cuam Lub Cim thiab mam li pib noj mov.
THAUM MUAJ MOB
Thaum muaj neeg mob, cov ntseeg yuav nrhiav tshuaj kho, thiab vam txog Tswv Ntuj tuaj pab. Cov coj kev cai Ntuj ntseeg tias thaum ntuj tsim noob neej, ntuj tsim ib tus neeg muaj ib tug plig ib txog sia xwb. Neeg tus plig tsis txawj poob tsis txawj ploj; yog ploj thaum twg ces neeg kawg tuag xwb, ua li mas thaum peb muaj mob mas peb yuav txhob ntseeg tias yog tus plig poob. Neeg tus plig tsis txawj ua kom neeg lub cev mob ib zaug.
Thaum muaj kev txhawj xeeb, cov coj kev cai Ntuj yuav ua siab loj siab tawv, tso siab hlo rau Tswv Ntuj. Yog li ntawd, cov coj kev cai Ntuj yuav thov Txiv Plig los yog Xib Hwb tuaj pab ua zaj vam txog Tswv Ntuj pab. Cov txheeb ze yuav tuaj nyob ncig tus neeg mob. Sawv daws ua Ntoo Cuam Lub Cim, mloog Txiv Plig (Xib Hwb) hais zaj foom hmoov zoo rau saum tus neeg mob, thiab sib pab thov Ntuj rau tus neeg muaj kev txhawj xeeb, kev mob.
Cov coj Ntuj kev cai yuav ‘tsis hu plig, khi plig, ua neeb, saib yaig, los coj me nyuam mus puas cev puas xeem’ raws li yav coj qub kev cai lawm.
1. Thov Ntuj rau tus neeg mob
Vim neeg tsis muaj hwj chim, koob hmoov; tus muab koob hmoov pab neeg tau, mas yog tus tsim neeg, vim nws yog neeg txoj sia, yog tus cawm tau neeg. Neeg tsuas yog nrog thooj siab koom ntsws ua ke thov ntawm Tswv Ntuj ces neeg cov lus thov yuav haj yam muaj zog mus txog Tswv Ntuj dua ib leeg thov xwb, raws li Huab Tais Yes Xus hais qhia rau peb tias “Kuv hais tseeb rau nej tias yog muaj ob leeg hauv nej koom suab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd. Thaum ob leeg los peb leeg sib sau ua ke tuav txog kuv lub npe, mas kuv nyob hauv nruab nrab lawv” (MT 18: 19-20). Cov coj Ntuj kev cai thiaj tso siab tias thaum coob leej ua ke thov lawd, mas sawv daws cov lo lus muaj nqes ntau dua, vim Tswv Ntuj yuav pab raws li sawv daws thov ntag.
1.1. Tus neeg mob yog me nyuam yaus
1. Sawv daws ua Ntoo Cuam Lub Cim. Txiv Plig (Xib Hwb) muab cov dej foom hmoov zoo los pov rau sawv daws thiab hais tias:
“Huab Tais, koj ua kom lub tsev no nyob kaj lug, koj ua kom cov neeg nyob hauv lub tsev no tau nyob kaj nrig.”
2. Sawv daws yuav hais zaj ‘Huab Tais koj khuv leej yuad’, hais tas Txiv Plig (Xib Hwb) yuav laug suab hais cov lus zoo li no:
“Huab Tais, tas ib puas tsav yam txawj yug los vim koj, tas ib puas tsav yam txawj hlob los vim koj. Ziag no tus me nyuam no raug kev mob kev nkeeg, thov koj tsa koj txhais tes los vov nws mas! Ces nws yuav rov qab muaj zog tuaj. Thiab thaum nws lub hnub nyoog loj lawm, mas tas nws sim neej, niaj hnub nws yuav nco ntsoov tias ‘koj pub txiaj ntsim rau nws’ thiab nws yuav mloog koj cov lus. Peb thov koj; peb vam txog peb tus Huab Tais Pleev uas nws nrog koj thiab nrog Leej Ntuj Plig ua vaj, thiab muaj txoj sia nyob mus li. Ua li.”
3. Sawv daws tsa tes rau saum tus me nyuam, ces Txiv Plig (Xib Hwb) laug suab thov Ntuj zoo li no:
“Huab Tais Yes Xus, koj hais tias peb tsa tes rau saum cov neeg mob, ces lawv yuav zoo hlo. Huab Tais Pleev, peb thov koj uas yog Mab Liab Leej Tub tuaj cawm lub ntiaj teb neeg. Ob tug Hauv Paus Xa Lus Pob Zeb, Paj Lug; nkawd nrog peb thov koj. Tas tsoom Leej Ntshiab nyob saum ntuj nrog peb thov koj.
Koj mloog peb sawv daws mas! Koj pub koj cov txiaj ntsim rau tus me nyuam no.”
4. Sawv daws ua Ntoo Cuam Lub Cim rau saum tus me nyuam uas tsis zoo nyob, thiab Txiv Plig (Xib Hwb) hais tias:
“Peb thov kom Huab Tais Leej Txiv, thiab Huab Tais Leej Tub, thiab Huab Tais Leej Ntuj Plig tso ib lo lus foom hmoov zoo nqes los rau saum koj. Ua li.”
5. Thaum ua zaj thov Ntuj zoo li no tas mas Txiv Plig (Xib Hwb) muab cov dej foom hmoov zoo los pov rau saum tus me nyuam uas tsis zoo nyob, ces sawv daws ua ke hais zaj
– PEB TXIV NYOB SAUM NTUJ
– POJ HUAB TAIS
– KOJ NYOB KAJ LUG MAB LIAB.
1.2. Tus neeg mob yog neeg hluas
1. Sawv daws ua Ntoo Cuam Lub Cim. Txiv Plig (Xib Hwb) muab cov dej foom hmoov zoo los pov rau sawv daws thiab hais tias:
“Huab Tais, koj ua kom lub tsev no nyob kaj lug, koj ua kom cov neeg nyob hauv lub tsev no tau nyob kaj nrig.”
2. Sawv daws yuav hais zaj ‘Huab Tais koj khuv leej yuad’, hais tas Txiv Plig (Xib Hwb) yuav laug suab hais cov lus zoo li no:
“Huab Tais, koj dauv muag los ntsia koj tus tub (tus ntxhais) uas nws raug kev mob kev nkeeg no. Koj yog tus tsim nws txoj sia, thov koj tuaj nres nws txoj sia mas! Thaum nws rov zoo lawm, nws yuav nco ntsoov hais tias ‘tos nws zoo yog vim koj hlub nws’. Peb vam txog peb tus Huab Tais Pleev. Ua li.”
3. Sawv daws tsa tes rau saum tus neeg mob, ces Txiv Plig (Xib Hwb) laug suab thov Ntuj zoo li no:
“Peb thov kom peb tus Huab Tais Pleev nrog koj nyob, nws yuav txuag koj. Peb thov kom peb tus Huab Tais Plev los nyob saum koj, nws yuav ntxiv txoj sia rau koj. Peb thov kom peb tus Huab Tais Plev los nyob ntawm koj xub ntiag, nws yuav coj koj mus ua koj lub neej. Peb thov kom peb tus Huab Tais Plev los nyob ntawm koj nraub qaum, nws yuav zov koj.”
4. Sawv daws tsa tes raug saum tus neeg mob thiab Txiv Plig (Xib Hwb) hais tias:
“Peb thov kom Huab Tais Leej Txiv, thiab Huab Tais Leej Tub, thiab Huab Tais Leej Ntuj Plig tso ib lo lus foom hmoov zoo nqes los rau saum koj. Ua li.”
5. Txiv Plig (Xib Hwb) muab cov dej foom hmoov zoo los pov rau saum tus neeg mob, ces sawv daws ua ke hais zaj
– PEB TXIV NYOB SAUM NTUJ
– POJ HUAB TAIS
– KOJ NYOB KAJ LUG MAB LIAB.
1.3. Tus neeg ntseeg mus thov Ntuj rau tus neeg mob
Thaum yus ib leeg mus thov Ntuj rau tus neeg mob, mas yus yuav ua li no:
1. Ua Ntoo Cuam lub Cim thiab hais li no:
“Huab Tais Tswv Ntuj tus muaj hwj huam nyob mus li. Kuv thov koj dauv muag los ntsia koj tus tub/ ntxhais uas nws raug kev mob kev nkeeg nyob ntawm no. Thov koj hlub nws mas! Thov koj pub koj lub txiaj ntsim ntshiab huv los rhuav tshem nws tej kab mob kev nkeeg nyob hauv nws cev nqaij daim tawv, hauv nws tej roj ntsha thiab txoj sia kom yaj ntshis mus kom tag, kom nws lub cev nqaij daim tawv thiab txoj sia tau zoo nyob. Thaum nws dim ntawm nws tus mob lawd, nws yeej yuav nco ntsoov ua koj tsaug mus li. Li ntawd, kuv thov tuav koj lub npe ntshiab thov. Vam tias nws yuav tau txais txoj kev kaj siab lug li lo lus thov. Ua li.”
2. Hais zaj ‘KUV NTSEEG’.
3. Ua Ntoo Cuam Lub Cim hom rau saum tus mob hauv pliaj thiab hais tias:
“Huab Tais Ntuj nrog koj nyob ua koj siab kaj lug.”
4. Pov dej foom hmoov zoo rau saum tus neeg mob.
1.4. Tus neeg mob rov thov Ntuj rau nws tus kheej
Thaum peb muaj mob, peb yuav thov Ntuj li no tias:
“Kuv tus Tswv Ntuj, kuv tus Huab Tais! Ua cas koj tso kuv tseg? Kuv thov koj tig ntsej los mloog kuv lub suab hu txog koj: thov koj tig muag ci ntsa iab los ntsia txog kuv. Ua cas kuv yuav raug ib tug yeeb ncuab phem npaum no tsim txom kuv? Ua cas kuv yuav tau ib tug mob phem ua luaj no nyob hauv kuv cev nqaij daim tawv, kuv txoj sia lawm? Kuv tus Tswv Ntuj, kuv tus Huab Tais! Kuv thov koj pab rhuav tshem kuv tus yeeb ncuab, kuv tej mob nkeeg uas nyob hauv kuv lub cev, nyob hauv kuv tej roj ntsha ua rau kuv tau mob phem ua luaj no. Thov koj hlub kuv, thov koj pab muab rhuav tshem pov tseg kom yaj ntshis mus kom tag. Thov koj pab kuv, vim koj yog tus tsim kuv lub cev thiab kuv txoj sia. Thaum kuv tau txais kev noj qab nyob zoo lawd, kuv yuav muab siab rau tsim kev thaj yeeb, kev sib nyiam sib hlub kom tas siab tas ntsws raws li koj nyiam thiab koj tau qhia rau lub ntiaj teb neeg coj. Thiab kuv yuav nco ntsoov ua koj tsaug. Ua li.”
1.5. Thov Ntuj rau tus raug xwv txheej
1. Tus coj coj sawv daws ua Ntoo Cuam Lub Cim ua ke thiab hais zaj ‘PEB TXIV NYOB SAUM NTUJ’.
2. Hais tas nws yuav hais cov lus thov Ntuj tias:
“Leej Txiv Tswv Ntuj siab zoo, koj yog tus tsim tas sawv daws tsoom neeg txoj sia, cev nqaij daim tawv. Peb lub neej, peb txoj sia txhawv ntawm koj los: koj yog peb niam peb txiv. Peb zoo siab ua koj tub koj ki zoo nyiam nyob hauv koj Leej Tub Yes Xus lub npe. Peb nrog Yes Xus koom siab koom ntsws tuaj thov koj pab rau ….(hais lub npe)… uas yog koj tus me nyuam. Thov koj ua Txiv pab cawm nws ntawm nws txoj kev nyuaj siab, kev txhawj xeeb tas huv tib si. Yav tom ntej tsis ntev tom no nws yuav tau coj ib lub neej tshiab dawb huv mus ntxiv. Yav thaud, koj ua Txiv, koj tau siv koj lub hwj huam, lub hwj chim los pab cawm koj Leej Tub Yes Xus ntawm txoj kev tuag kom sawv rov los. Hnub no peb vam ntsoov hais tias koj yuav ua tib yam li ntawd los cawm …(hais npe)… uas yog koj tus me nyuam zoo nyiam no thiab. Thaud, Yes Xus ua lub neej nyob ntiaj teb no, nws thov koj tuaj cawm nws kom dim ntawm txoj kev tuag, koj tau mloog Yes Xus lo lus thov. Nyem no Yes Xus Pleev yog tus zoo tiav lawm. Hnub no peb nrog koj Leej Tub, peb tus Huab Tais Pleev rov tuaj thov koj dua. Yog vim peb sib koom siab koom ntsws ua ib tsev neeg nyob hauv nws lub npe, peb koom suab thov koj pab saib …(hais npe)… Thov kom koj hlub …(hais npe)… raws li koj Leej Tub Yes Xus. Thov koj pab …(hais npe)… kom raws li peb lub suab thov koj. Thov koj kho …(hais npe)… cev nqaij daim tawv kom zoo sai. Thov koj pab kom nws dim ntawm nws tej kev nyuaj siab ntxhov plawv, kev txhawj xeeb tas huv si. Peb sawv daws tsis ua xyem xyav txog qhov peb thov koj li. Peb tso siab lug rau koj ua Txiv siab zoo. Peb kawg ntseeg txog koj ib leeg xwb. Peb tso plhuav …(hais npe) lub neej txoj sia, cev nqaij daim tawv rau hauv koj txhais tes uas muaj hwj huam. Peb tuav txog peb tus Huab Tais Yes Xus lub npe los thov koj. Ntuj aib!”
Sawv daws txais tias:
“Peb thov koj, Huab Tais Leej Txiv siab zoo.”
3. Tus coj hais ntxiv tias:
“Peb tus Huab Tais Yes Xus Pleev, peb tsoom ntseeg nyob ntawm no puav leeg yog koj cov thwj tim.
Peb yog koj cov kwv cov muam. Peb qhov chaw vam khom yog koj tib leeg xwb. Peb ua koj tsaug ntau.
Tau ntev niaj ntau xyoo los lawm no, koj yog tus tau txhawb peb txoj kev ntseeg txog koj lo lus qhia
rau peb sawv daws. Huab Tais siab zoo, yav thaud koj tau cog lus zoo li cas tseg, mas niaj hnub nyem no koj ua raws li lo lus ntawd ntag. Koj tau tshaj 2-3 lo lus nplij peb lub siab kom zoo: Tas sawv daws uas nej raug kev iab kev khwv, nej tuaj cuag kuv mas! Nej yuav muaj chaw so los siav. Huab Tais siab zoo, peb ntseeg khov kho hais tias niaj hnub nyem no koj yog peb tus Huab Tais siab zoo, tus tso txiaj ntsim los yug peb txoj sia thiab cev nqaij daim tawv. Koj lub siab khuv leej neeg tas nrho. Koj yuav zoo li ntawd mus tas ib txhiab ib txhis. Thov koj pab tshem ..(hais npe).. tej kev txhawj xeeb kom tawm mus. Thov koj pab, koj hlub nws kom nws rov muaj sia muaj zog ua nws lub neej ntxiv mus. Ntuj aib!”
Sawv daws txais tias:
“Peb thov koj, Huab Tais Leej Txiv siab zoo.”
4. Tus coj hais ntxiav tias:
“Huab Tais Tswv Ntuj, peb Txiv muaj hwj huam nyob saum ntuj. Peb ntseeg khov ntseeg ruaj tias koj pom tas peb siab ntsws, koj paub tas zaj peb xav, tab ib lo lus peb tus nplaig tsis tau hais tawm los; koj yeej xub paub ua ntej lawm. Koj yog tus nyob tom peb hauv ntej, tom peb qub qab, thiab ib ncig peb. Koj txhais tes roos peb. Txawm li cas los peb yeej xav nthuav peb tej kev nyuaj siab rau koj. Nyob ib ncig ntawm peb mas peb nrhiav tsis tau ib tus neeg uas yuav paub qhov peb xav, tsuas kawg yog koj ib leeg xwb. Koj yog tus yuav pub cov dej tshuaj zoo pab ntxuav peb tej kev nyuaj siab ntxhov plawv kom yaj mus tag. Ua ntej no, peb hais qhia rau koj uas yog peb Txiv nyob saum ntuj paub hais tias peb lub neej yuav tau kev tsaus ntuj nti, peb cov me neeg yuav ua li cas peb thiaj paub tias tim li cas …(hais npe)… thiaj raug xwv txheej loj ua luaj no? Vim li cas peb tsev neeg no thiaj ntsib kev txom nyem? Peb Txiv siab zoo, koj pom peb lub kua muag ntws tawm, peb noj tsis qab pw tsis tsaug zog kiag li, peb lwj siab ntxhov plawv.
Hais rau koj ua Txiv paub, tab txawm peb tsom tsis tau koj tej kev, tsis kav peb ua ib siab tsis ncaim ntawm koj xub ntiag mus ua lwm yam kev cai. Tab peb txawm xav tswv yim yuam kev tias zoo li koj nyob deb deb ntawm peb, tsis kav peb tsis tso koj pov tseg ib zaug li. Tab txawm peb yws yws npaum li cas, tsis kav peb yuav tsis nrog koj ua Txiv sib cav ib zaug li. Peb tseem nco tias Tswv Ntuj nres cov neeg nyiam nws, nws nrog lawv ua tas ib puas tsav yam kom lawv tau zoo. Yog Tswv Ntuj pab peb, mas leej twg yuav tiv peb tau? Leej twg yuav ua tau kom peb ncaim ntawm Leej Pleev txoj kev nyiam peb, puas yog txoj kev raug xwv txheej? Puas yog txoj kev tshaib kev nqhis? Puas yog txoj kev pluag? Puas yog txoj kev poob tsag? Puas yog txoj kev raug luag hiam? Puas yog txoj kev tuag? Tab peb raug tej yam zoo li ntawd, los peb kuj paub tseeb tias tsis muaj ib yam dab tsi yuav thau peb tau ntawm Tswv Ntuj txoj kev nyiam peb los. Tab peb txawm nyob hauv qhov tsaus ntuj, tsis kav peb tseem nco ntsoov txog peb tus ntaus thawj Huab Tais Yes Xus Pleev. Peb tsa muag ntsia koj Leej Tub uas tau dai ntawm Ntoo Cuam, nws tau xav txog koj li cas, mas peb kuj xav ib yam li nws thiab. Yes Xus yim txom nyem, mas nws yim muab tas nws lub neej, nws txoj sia los khuam rau koj ua Leej Txiv nyob saum ntuj. Yes Xus raug luag hiam loj npaum li cas, nws haj yam hu koj ua Txiv los ua tus pab. Nws yim raug ntxub, nws yim nyob ti koj dua qhov qub. Nyob hauv peb nruab siab, koj Leej Tub Yes Xus peb tus Huab Tais Pleev yog tus rhawv txoj kev ntseeg, kev nyiam Ntuj, kev hlub neeg ua peb ntej kom peb yuav tau soj nws qab, taug nws lw. Peb Txiv Tswv Ntuj khuv leej neeg tas nrho nyob saum ntuj, thov koj tsuag tsuag pab peb mas! Thov koj tshem qhov txhawj xeeb kom tawm ntawm peb lub siab mus kiag. Peb ua koj tsaug. Ntuj aib!”
Sawv daws txais tias:
“Peb thov koj, Huab Tais Leej Txiv siab zoo.”
5. Sawv daws hais zaj ‘KOJ NYOB KAJ LUG MAB LIAB’
6. Ua Ntoo Cuam Lub Cim.
2. Fiv yeem
Cov coj Ntuj kev cai fiv yeem yuav txawv cov coj qub kev cai, cov neeg ntseeg thaum fiv mas yog fiv nyiaj pab rau lub tsev teev Ntuj, fiv Txiv Plig ua thaj txi Ntuj (Miv Xas), fiv yus lub zog mus pab cov neeg pluag txom nyem, fiv lub txoos teev Ntuj. Cov neeg ntseeg yuav tsis muab tsiaj los fiv tua txi ntuj. Yog yuav siv tsiaj mas tsuas yog muab tus tsiaj ciaj rau tej tsev neeg tsis muaj noj tau coj mus tua noj xwb.
Txawm tias fiv tas, zoo los tsis zoo yuav tsum tau pauj raws li yus tau fiv tseg. Thaum pauj yeem yuav muaj rooj qav ua lom zem los yeej tau, tiam sis qhov noj haus no tsis yog kev pauj yeem, yog kev caw sawv daws tuaj nrog noj pluas mov ua ke xwb.
LWM NYAB TSHIAB
Thaum niam txiv paub tias tub yuav coj nyab los mas yuav tau npaj 1 ntim dej ntshiab thiab 1 re nplooj kom zoo pov cov dej ntshiab, npaj 2 tug tswm ciab.
1. Tub coj nyab los txog ntawm qhov rooj, tus tos tub nyab yuav nug tus tub tias:
“Tub thiab ntxhais, tam sim no neb tau sib coj los txog ntawm no, puas yog neb lam sib raws ua si xwb, los neb ib tug yeem nyiam ib tug tiag?”
Nkawd yuav teb tias: “Wb sib nyiam tiag!”
2. Nug ntxiv tias:
“Neb los no, puas yog neb ib tug yuam ib tug, los neb nyias yeem nyias?”
Nkawd teb tias: “Wb ob leeg siab yeem.”
3. Nug tias:
“Yog li puas yog neb ob leeg yeej txiav siab meej tias neb yeej zoo siab tiag los sib sau ua txij ua nkawm
nyob hauv kev sib nyiam sib hlub mus kom txog hnub kawg?”
Nkawd teb tias: “Yog, wb yeej txiav siab meej lawm.”
4. Tus tos tub nyab ua Ntoo Cuam Lub Cim rau nkawd, thiab muab ntim dej ntshiab los tuav ntawm tes, thov Peb Leeg Huab Tais lub txiaj ntsim tuaj nrog ntxuav nrog ntiab kev phem pov tseg li no:
“Hnub no yog hnub dawb, hmo no yog hmo huv. Kuv tau tub tau nyab, tub nyab los txog vaj txog tsev.
Kuv hu txog Huab Tais Leej Txiv, Huab Tais Leej Tub, Huab Tais Leej Ntuj Plig tuaj nrog ntiab mob ntiab ntsaj, tuaj nrog ntxuav vij sub vij sw, sub tawg sub ntsha, ntxuav kev quaj kev nyiav. Ntiab hmab dawm tes hlua dawm taw, voj hmab voj hlua. Ntiab kev sib cav sib ceg, sib ntaus sib tua. Ntxuav kua muag iab kua muag daw. Ntiab plaub ntiab ntug, ntiab xaiv ntim lus kom poob nthav mus lawm zaj zeg, nqes nroos rau lawm zaj qho. Tseev kom me tub thiab nyab nkawd no ntsej tsis hnov, muag tsis pom no ntag lauj!”
5. Pov dej ntshiab rau saum tus tub thiab tus nyab, hais ntxiv tias:
“Tseev kom me tub me nyab no mas los ua neej yaj los kib txoob, cheb qab plag tse qawj, ntxuav qab yiag to. Tseev kom los ua neej ib nplooj nto ntuj, ib nqag nto ntsis. Huaj txhaij tsam vam kom nroo ntws xws xub ntab, vam ntws xws xub mu. Tu tub los puv vaj, tu ntxhais los puv tsev. Khwv nyiaj los puv nas, khwv tsoos los puv phav. Noj tsis tshaib haus tsis nqhis no ntag lauj!”
6. Muab 2 tug tswm ciab hlawv los lwm kiag saum tub nyab taub hau 3 lwm thiab hais tias:
“Kom tas ib puas tsav yam tsis zoo kub hnyiab kom tag mus, kom yaj ntshis ua pa ya mus rau cua,
cua tshuab kom ya plho lawm ntxeev ntuj nraum ub, poob nthav ntxeev teb nraum i. Tseev kom tub thiab nyab nkawd ntsej tsis hnov muag tsis pom ntag lauj! Txij no mus lawm tod mas tseev kom tub thiab nyab nkawd ua neej mas huaj txhaij tsav vam, txheeb nyeej los pem pov, txheeb pov los vam sawm, yaj los kib txoob. Cheb qab plag tse qawj, ntxuav qab yiag to, ua neej nplooj nto ntuj, nqag nto ntsis. Ua neej nroo ntws xws xub ntab, vam ntws xws xub mu. Tu tub tuaj nruab txag, tu ntxhais tuaj nruab le. Tu tub los puv vaj, tu ntxhais los puv tsev. Khwv nyiaj los puv nas, khwv tsoos los puv phav. Noj tsis tshaib haus tsis nqhis no ntag lauj!”
7. Cev kiag 2 tug tswm ciab rau tub thiab nyab, ib leeg txais ib tug, hais li no:
“Ob tug tswm ciab no yog ib lub cim qhia rau neb tias yog neb ua neej mus taug Tswv Ntuj txoj kev sib nyiam sib hlub, mas neb yuav tau txais kev kaj siab lug zoo li ob tug tswm ciab no.”
8. Kom tub nyab los hauv tsev.
ROOJ MOV TXAIS NYAB TSHIAB
Yuav tsis hu plig nyab tshiab, tab sis yuav npaj rooj mov raws li kab ke khi tes foom hmoov zoo. Cov zaj nyeem yuav tau hloov los nyeem cov lus hauv ntawv HAUV PAUS (HP 2: 21-24) Thaum noj rooj mov tas, yuav rov rau dua ib tom ntxuag tshiab tsa nkauj nyab nraug vauv, tub tshoob tub kos mus ntsuas dej ntsuas txhuv.
UA TSHOOB UA KOS
TSA TSEV TSHIAB
Cov coj Ntuj kev cai thaum ua tau lub tsev tshiab mas yuav thov Ntuj rau lub tsev, tus tswv tsev yuav caw sawv daws tuaj nrog thov Ntuj.
1. Tus coj coj sawv daws ua ‘Ntoo Cuam Lub Cim’
2. Hais zaj ‘KUV LEES TXHAUM’
3. Hais zaj ‘KUV NTSEEG’.
4. Nyeem Ntawv Moo Zoo (MT 4: 1-11, MT 9: 32-34, MT 12: 22-23, MK 5: 2-13)
5. Tus coj yuav nthuav 2-3 lo lus rau sawv daws mloog.
6. Tom qab nthuav tas mas yuav hais zaj ‘Ntiab Kev Phem’ li no:
“Huab Tais Leej Txiv, Huab Tais Leej Tub, thiab Huab Tais Leej Ntuj Plig Ntshiab. Nej peb leeg koom ua ib tug Tswv Ntuj loj muaj hwj huam tas nrho thiab ua vaj nyob mus li. Peb ua ke sib sau nyob hauv ….. lub tsev no los thov nej lub txiaj ntsim, lub hwj huam, lub hwj chim, lub zog loj zog nchav nqes los rau hauv lub tsev no thiab nqes los rau cov neeg nyob hauv lub tsev tshiab no. Thov nej los ntiab, los caum thiab rhuav tshem dab phem dab ntxwg nyoog tej kev haub kev ntxias, kev plees kev yi, kev ua dab ntub npau suav phem, kab mob kev nkeeg, vij sub vij sw, thiab tas ib puas tsav yam tsis zoo kom tsis txhob los paug,
los tais lub tsev no thiab cov neeg nyob hauv lub tsev no.”
7. Hais zaj ntiab kev phem tas, mam txuas zaj ‘Thov Tswv Ntuj Foom Hmoov Zoo’ li no:
“Peb sawv daws thov Huab Tais! Peb Txiv Tswv Ntuj muaj hwj huam, peb thov koj foom hmoov zoo rau saum lub tsev no mas! Thov kom cov neeg nyob hauv lub tsev no tsuas muaj ntsib kev noj qab nyob zoo,
tsis txhob muaj mob muaj nkeeg, kom sawv daws txawj txuag nyias lub cev lub siab kom ntshiab huv thiab tsim txiaj, kom sawv daws tau yeej dab phem, kom sawv daws txawj ua ib co neeg siab loj siab tawv,
kom sawv daws txawj sib nyiam sib hlub thiab txawj tsim kev thaj yeeb rau lub ntiaj teb, kom sawv daws txawj nco ntsoov txog Tswv Ntuj cov txiaj ntsim. Huab Tais, peb thov koj tso lub zog los roos lub tsev tshiab thiab roos cov neeg nyob hauv lub tsev no mus li. Peb vam txog peb tus Huab Tais Pleev. Ua li.”
8. Muab ‘dej ntshiab’ los pov foom hmoov zoo, thiab ib txhij hu zaj ‘Nkauj Paj Nruag 90’ tus ua tsev nyob hauv Huab Tais.
9. Thaum pov dej ntshiab tas mam thov Ntuj thiab ua Ntoo Cuam Lub Cim xaus li no:
“Peb thov kom Huab Tais Leej Txiv, thiab Huab Tais Leej Tub, thiab Huab Tais Leej Ntuj Plig
tso ib lo lus foom hmoov zoo nqes los rau saum nej.”
Sawv daws yuav teb tias: “Ua li.”
DAWS NPES LAUS
Thaum ua tau nqaij hno siav tag, rub rooj rau. Pib ua txheej xwm cawv. Thaum haus cawv tsuas yog rau ntxuag xwb. Raws kev cai mas tsuas haus 4 tug cawv xwb.
1. Rau lub rooj tis npe laus, yuav xub thov Ntuj ua ntej mam ua lwm yam ntxiv mus.
2. Tus coj yuav pib ua Ntoo Cuam Lub Cim ua ntej. Tag ces hu zaj nkauj ‘Lub Vaj Ci Ntsa’ thiab nyeem zaj nyeem hauv ntawv Hauv Paus (HP 12: 2-3) Nyeem tas ces tus nyeem yuav hais tias: “Yog Tswv Ntuj Lo Lus.” Sawv daws teb tias: “Nws lub txiaj ntsim.”
3. Tus coj hais zaj thov Ntuj foom hmoov zoo li no:
“Huab Tais Tswv Ntuj, koj yog tus tseem Tswv tiag. Kawg yog koj ib leeg tsim lub ntuj lub teb.
Peb txhua tus neeg muaj txoj sia, tau txoj hmoov zoo, puav leej yog koj foom pub rau. Hnub no peb sib sau nyob ntawm no kom tau tis npe laus rau …. Ib me chim saum no peb yuav nrhiav ib lub npe laus rau … Thov koj foom koob hmoov pub rau lub npe laus peb tseem yuav nrhiav no kom tsuas muaj zog mus xwb. Thov kom nkawd ob niam txiv ua neej nrog lub npe laus no mas tsuas muaj ua neej kom nyob dawb nyob huv, tsis ntsib xaiv ntsib lus, tsis muaj mob muaj nkeeg. Nkawd ua qoob ua loo los kom puv txhab, tu tub ki los kom puv tsev, khwv nyiaj txiag los kom puv nas, tu tsiaj txhu los kom puv nkuaj. Ua neej nyob huaj txhaij tsav vam kom nroo ntws xws xub ntab, vam ntws xws xub muv. Muaj ib lub siab thoob tsib
los coj kwv tij neej tsa ua lub neej sib nyiam sib hlub mus raws txoj kev ncaj ncees, sawv daws tsoom neeg thiaj yuav sib cog tu tau lub ntiaj teb no mus kom tiav raws li txoj kev Tswv Ntuj qhia.
Peb vam txog (yoj tes ua Ntoo Cuam Lub Cim rau saum ob tug niam txiv) Huab Tais Leej Txiv, thiab Huab Tais Leej Tub, thiab Huab Tais Leej Ntuj Plig, tso ib lo lus foom hmoov zoo nqes los rau saum neb ob niam txiv lub npe laus. Ua li.”
4. Sawv daws hu zaj nkauj ‘Leej Ntuj Plig, koj los mas’ tas ces mam zaum thiab pib txheej txheem cawv.
5. Txheej txheem cawv mas muaj li no:
– Tus ib yog cawv tos qhua,
– Tus ob yog cawv nce rooj (txum rooj),
– Tus peb cawv tis npe laus (tsa tus cawv tseg xwb, thaum xaiv tau lub npe lawm mam haus tus cawv tuaj)
6. Thaum tsa tus cawv tis npe laus lawm, tus vauv thiab cov kwv tij los tuaj nram qab rooj pe, thov kom sawv daws xaiv ib lub zoo npe rau nkawd ob niam txiv. Pe yawm txiv, niam tais thiab ib tug zuj zus kom txhua cov neeg zaum rooj.
7. Thaum xaiv tau lub npe lawm, yuav pe niam pog txiv yawg ua ntej mam pe niam tais yawm txiv, pe tus coj yawm txiv thiab ib tug zuj zus kom thoob cov zaum saum rooj.
Kev pe no yuav pe ib pes xwb txhob sawv, tos lawv haus cawv tag, lawv tsa thiab foom kom yus lub npe laus tas mam sawv.
8. Thaum tab tom pe mas yuav hais cov lus thov li no:
“Hnub no yuav vam koj ua …. (niam, txiv).. tuaj nrog tis lub npe no rau luag hu, rhawv kev rau luag mus.
Pub kom lub npe hu ua … (lub npe laus)… mas tsuas nyob muaj koob, zaum muaj meej, nyob dawb huv xwb. Muaj lus ua tsaug thov koj yuad!”
Tus teb yuav teb tus peb tias:
“Tsis txhob pe! Hais xwb tau lawm. Sawv os mog! Sawv lauj!”
Thaum haus lub cawv tis npe laus mas yuav hais tias:
“Sawv laid! Luag hais tias kuv yog …(niam, txiv)… , kuv tuaj tis lub npe hu ua …(npe laus)… no.
Kuv tuaj tis npe rau luag hu, rhawv kev rau luag taug. Muab hu ua …(npe laus).. mas kom lub npe no
tsuas nyob huaj txhaij tsav vam, nyob txheeb nyeej vam sawm, nyeej txheeb vam pov, nyob dawb hau paug, ua neej nroo ntsws xws xub ntab, vam ntws xws xub mu. Qas txhiab tsis muaj mob, qas puas xyoo tsis muaj nkeeg. Pub kom …. thiab … no tsuas nyob ntshiab li dej huv li txhuv. Tu tub ki los puv vaj, ua qoob ua loo los puv txhab. Khwv nyiaj txiag los puv nas, khwv tsoos tsho los puv phav. Noj tsis tshaib, haus tsis nqhis no ntag lauj!”
9. Cov pe sawv tsees los txais yim thiab teb tias:
“Zoo lauj! Pub kom zoo li koj lo lus foom ntag.”
10. Hais tas ces ho pe lwm tus ntxiv mus kom thoob cov neeg zaum saum lub rooj ntawd.
11. Thaum ua txheej txheem tis npe laus tiav tag, txog caij yawm txiv sawv kev, rau dua ib lub me nyuam rooj los haus 2 tug cawv: cawv piam sam lus thiab cawv tsa yawm txiv sawv kev.
Thaum tsa tus cawv piam sam lus mus txog tom kaum rooj ces mam pib tsa tus cawv sawv kev tom tog rooj chiv cawv. Tus coj yawm txiv thiaj ce cawv cev rau yawm txiv thiab pib tham cov lus cob ces npua rau yawm txiv, cob cev khaub ncaws laus, thiab mov su. Hos yawm txiv mas yuav muab ib kis nyiaj txais ces npua. Ntxhais vauv nrhiav neeg xa yawm txiv mus tsev ces mam tas tus txheej txheem.
*Ua tsaug diav thiab mov:
Kev ua tsaug yog txoj kev cai tseem ceeb qhia tau tias tus neeg ntawd puas paub tab los tsis paub. Kev ua tsaug yuav ua thaum muaj neeg tua tsiaj pub rau noj. Kev ua tsaug diav thiab mov muaj 2 hom li no:
1. Luag tsis cob diav rau yus; yus yuav hais lus ua tsaug tias:
“Ua tsaug nawj! Tsis cia li, tseem yuav siv me nqaij hno los rau peb noj thiab. Txhob xeeb koj ua …(tus neeg tua tsiaj ntawd phaj neeg)… Luab lim koj xwb laiv.”
2. Luag cob diav rau yus; yus yuav tuav rawv lub phaj thiab rab diav los yog txaum yim tuav kiag nws lub npe hais tias:
“Ua tsaug nawj! ……lub npe…………. Koj tsis cia li es, sawv daws twb ua lub neej saus saus los,
neb tseem muab kuv saib hlob, tseem siv tsiaj txhu qaib noog los rau kuv noj kuv haus thiab,
tsam neb muaj chaw siv ces neb tsis pom qab muab. Cuag li tseem yuav tuaj luab lim thiab txhob xeeb neb xwb. Ua tsaug nawj!”
3. Yog muaj txheej cawv saum lub rooj, mas tseem yuav ua tsaug cawv ib zaug thaum tus cawv los txog ntawm yus. Thaum txais tau khob cawv, sawv tsees ua tsaug tias:
“Ua tsaug nawj! …………………… Kuv tuaj pom nej sawv daws twb zoo zoo lawm. Tsis cia li, nej tseem yuav siv dej siv cawv los rau kuv noj haus thiab, cuag li tuaj luab lim nej xwb. Kuv rov dua, neb muaj chaw siv
los tsam neb tsis pom qab muab dej muab cawv los siv. Ua tsaug cawv nawj!”
PE TSIAB
Tej yam yuav xub tau npaj tseg: 1 nkawm qaib vom, 1 hwj cawv, 1 yam khoom plig npaj mus cev rau tus yus yuav mus thov koob hmoov ntawm nws.
Thaum mus txog tom tus yus yuav mus thov koob hmoov tsev: muab nkawm qaib vom txhoov kom zoo ua ntxuag, tseg kom tau 2 tug ncej puab. Muab cov nqaij coj los ua ntxuag rau saum rooj. Thaum rau tau tiav lawd, rub tus yus yuav thov koob hmoov los zaum thiab sawv daws los zaum kom txhij. Sawv daws sawv ntsug thiab pib thov Ntuj foom hmoov rau sawv daws thiab rooj qav.
1. Txheej Txheem
1. Sawv daws ua Ntoo Cuam Lub Cim
2. Nyeem cov lus hauv Ntawv Hauv Paus. (HP 27: 27-29)
3. Thov Ntuj sam koob hmoov rau cov laus tias:
“Huab Tais Tswv Ntuj, koj yog tus tseem tswv tiag. Tas txhua leej uas muaj txoj sia nyob laus,
puav leej yog koj pub rau lawv kom nyob laus nkoos. Li ntawd, peb ua ke nyob ntawm no
los koom suab thov koj (sawv daws tsa tes rau saum cov laus) foom koob foom hmoov los rau saum …(hais npe)… kom tsuas ntsib kev noj qab nyob zoo, kom ua peb niam peb txiv nyob dawb nyob huv,
kom nyob ntev niaj ntau xyoo, kom qas txhiab tsis muaj mob, qas puas xyoo tsis pub muaj nkeeg,
kom nyob kaj nyob zoo, kom nyob daj hau dawb txoob mus txog txhiab niag tim puas xyoo.
Huab Tais Tswv Ntuj, peb ntseeg tias yam peb thov peb yeej yuav tau txais. Peb vam txog koj lub npe ntshiab thov. Ua li.”
4. Tus laus thov Ntuj foom koob hmoov rau cov hluas li no tias:
“Huab Tais Tswv Ntuj, peb txhua tus neeg nyob hauv lub ntiaj teb no yuav tau txais yam zoo los puav leej yog koj foom pub rau. Peb thov koj (cov laus tsa tes rau saum cov hluas) dauv tes los foom koj txoj koob txoj hmoov ntshiab pub rau …(hais npe)… uas hnub no tuaj txhos caug thov koob hmoov nyob ntawm no
kom tawm plaws xyoo tshiab tuaj, txhua leej txhua tus tsuas ntsib kev kaj siab lug. Tus ntshaw yam twg, pub kom tau raws li nws lub siab xav. Tus mus kawm txuj, kom nws tau txuj los tsim nuj. Tus mus kawm ci, kom nws tau ci los tsim nqi. Thov koj nrog txuag txhua tus kom nyob ntshiab li dej, huv li txhuv, kom qas txhiab tsis muaj mob, qas puas xyoo tsis muaj nkeeg. Peb vam txog koj lub npe ntshiab thov. Ua li.”
5. Thov Ntuj rau rooj qav tias:
“Huab Tais Tswv Ntuj, tas txhua tsav txhua yam txhiam xws noj nyob hauv lub ntiaj teb no puav leej yog koj pub los yug neeg txoj sia. Thov koj foom koob hmoov rau saum cov txhiam xws no kom txia ntshis ua ib co txhiam xws ntshiab. Peb sawv daws txhua tus nyob ntawm no noj cov txhiam xws no mus ua roj ua ntshav yug cev nqaij daim tawv, txoj sia. Thov kom cov txhiam xws no txia ua ib hauv kuab muaj tsuas los tiv thaiv kab mob kev nkeeg. Thaum sawv daws noj tas lawd, sawv daws tsuas muaj lub tswv yim thoob tsib, ua neej muaj txoj kev txawj kev ntse, muaj kev sib nyiam sib hlub. Peb yuav cog tu tau lub ntiaj teb no mus kom tiav li koj qhia rau peb. Peb vam tias yam peb thov peb yuav tau txais. Peb vam txog koj lub npe ntshiab thov. Ua li”
6. Hu zaj nkauj ‘TSWV NTUJ NTSIA MOV COJ PEB NCE ROOJ’ thiab zaj ‘HUAB TAIS, THOV KOJ FOOM HMOOV ZOO RAU PEB’.
7. Sawv daws ua Ntoo Cuam Lub Cim.
8. Cov yuav thov koob hmoov yuav txav tuaj nram qab rooj. Muab ib tug ncej puab qaib, me ntsis mov kom txaus noj ob peb los, ib rab diav tso rau hauv ib lub phaj. Hliv 2 khob cawv rau hauv 1 lub phaj. Muab pob khoom plig cia saum lub phaj. Ib txhij cev 3 yam ntawd rau tus yus yuav thov koob hmoov. Yus hais li no:
“Aud! Hnub no zoo hnub zoo nyoog. Tawm plaws rau lub xyoo tshiab. Peb ua tub ua kiv tuaj nyob ntawm no koom siab ua ke thov Huab Tais Tswv Ntuj lub yeej koom yeej huam tuaj sam nqaij sam hno rau koj laus kom noj tsis tshaib haus tsis nqhis, kom nce toj muaj lub zog loj, nqes hav muaj lub zog nchav,
kom tsis muaj mob muaj nkeeg, kom zaum ua peb niam peb txiv, kom nyob txheej nyeem vam sawm, nyeej txheeb pov, kom nyob dawb hau paug no ntag lauj.”
9. Thaum hais ces cev kiag 3 yam ntawd rau tus yus mus thov koob hmoov. Nws txais mus cia ntawm xub ntiag, ces yus hais ntxiv tias:
“Niam…/ Txiv…, peb cov tub cov kiv muaj lus ua tsaug! Hnub no yog tawm lub xyoo tshiab tuaj.
Peb yuav nrog koj laus thov koob hmoov no mog. Thov koj laus”
10. Pe kiag tus laus, txhob sawv, tos kom tus laus haus cawv tag. Tus laus ce dua lwm cov cawv los tsa thiab foom rau tus pe. Nws foom tag mas tus pe mam sawv, thiab txais yim tias:
“Zoo lauj! Pub kom zoo li koj tus laus lo lus foom aud!”
11. Tus pe sawv, muab khob cawv sib faib ib leeg haus me ntsis kom txhua txhua tus. Ces mam pe lwm tus laus ntxiv mus. Thaum pe txhua lawm, mam sawv los zaum, haus tus puav cawv xaus xyoo laus qhib xyoo tshiab, rau mov noj.
NOJ MOV NPLEJ TSHIAB
1. Thaum ua nqaij ua mov yuav siav, tso ib tug neeg mus hu kwv tij neej tsa tuaj nrog noj. Thaum nqaij mov siav lawm, yuav coj los rau ua ib tsum mov loj. Tas sawv daws los sawv ncig tsum mov; tus tswv tsev coj sawv daws ua Ntoo Cuam Lub Cim.
2. Tus txiv tsev ntawd yuav hais tias:
“Huab Tais tus tswv ntuj tswv teb, hnub no kuv ua qoob tshiab siav; tsoom kwv tij sawv daws tau tuaj nrog noj nrog haus. Muaj lus ua koj tsaug. Huab Tais Tswv Ntuj, koj tau pov hwm kuv tsev neeg ib puas nees nkaum leej khwv nce toj nqes taug tiv tshav tiv nag ua tau noj tau haus. Huab Tais Tswv Ntuj, koj tau thaiv dab thaiv tsov thaiv mob thaiv ntsaj tau nyob dawb nyob huv dhau niaj dhau xyoo. Muaj lus nqa tes ua tsaug nco txog koj txiaj ntsha txiaj ntsim mus li. Ua li.”
3. Sawv daws hais zaj ‘PEB TXIV NYOB SAUM NTUJ’.
4. Hais zaj peb txiv nyob saum Ntuj tas, tus tswv tsev yuav ua ib teg tuav txog nws niam nws txiv, cov kwv cov tij thiab poj koob yawm txwv uas tuag lawm. Nws hais tias:
“Niam thiab txiv, pog thiab yawg, niam hlob txiv hlob, niam ntxawm txiv ntxawm….. nyem no kuv tsev neeg ua tau nplej tshiab siav, peb nco txog nej sawv daws. Niam thiab txiv; kuv tsev neeg ib puas nees nkaum leeg ua noj ua hnav nce toj nqes taug, ua tau tsum mov tsum nqaij; kuv yuav nco txog nej sawv daws huv si.”
5. Thaum hais li no tas, tus tswv tsev mam coj sawv daws hais zaj ‘CAV TXOG TSOOM LEEJ NTSHIAB’ (cov muaj hmoov zoo)
6. Thaum ua Ntuj tsaug thiab muaj ib lo lus nco txog niam txiv poj yawm tas, mas sawv daws mam noj mov. Yog muaj cawv ces xub haus cawv ua ntej.
7. Thaum ib tug yuav haus cawv mas nws ceeb toom rau sawv daws tias: ‘Kuv haus tseg nej os!’ ces nws mam li haus. Thaum haus tas nws yuav hais tias: ‘Tshaj tom ntej lawm mog!’