NTAWV NTSHIAB 2002

1 Thaum chiv lub keeb, Tswv Ntuj tsim lub ntuj thiab lub ntiaj teb, 2 mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej. 3 Tswv Ntuj hais tias : “Kom muaj qhov pom kev.” Ces txawm muaj qhov pom kev tuaj.
4 Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. 5 Tswv Ntuj hu qhov pom kev ua “nruab hnub” thiab hu qhov tsaus ntuj ua “hmo ntuj.” Txawm muaj tsaus ntuj thiab muaj kaj ntug : yog thawj hnub. 6 Tswv Ntuj hais tias : “Kom muaj ib lub ntuj ntsuab nyob hauv nruab nrab cov dej thiab kom nws quas cov dej ntawm cov dej”. Ces txawm muaj li ntawd tuaj.
7 Tswv Ntuj ua lub ntuj ntsuab los quas cov dej nyob hauv qab ntuj ntsuab ntawm cov dej nyob saum qaum ntuj ntsuab. 8 Tswv Ntuj hu lub ntuj ntsuab ua “ntuj.” Txawm muaj tsaus ntuj thiab muaj kaj ntug : yog hnub ob.
9 Tswv Ntuj hais tias : “Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los.” Ces txawm muaj li ntawd tuaj. 10 Tswv Ntuj hu cov av qhuav ua “ntiaj teb” thiab hu cov dej ua “hiav txwv.” Tswv Ntuj pom tias qhov ntawd zoo.
11 Tswv Ntuj hais tias : “Kom lub ntiaj teb tuaj nroj tsuag ntsuab xiab : kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob.” Ces txawm muaj li ntawd tuaj.
12 Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. 13 Txawm muaj tsaus ntuj thiab muaj kaj ntug : yog hnub peb.
14 Tswv Ntuj hais tias : “Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo, 15 kom tej lub ci ci nyob saum lub ntuj ntsuab ua kom ntiaj teb pom kev.” Ces txawm muaj li ntawd tuaj.
16 Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. 17 Tswv Ntuj muab lawv txawb rau saum lub ntuj ntsuab saud kom ntiaj teb pom kev, 18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. 19 Txawm muaj tsaus ntuj thiab muaj kaj ntug : yog hnub plaub.
20 Tswv Ntuj hais tias : “Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab.” Ces txawm muaj li ntawd tuaj. 21 Tswv Ntuj tsim cov nab hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. 22 Tswv Ntuj foom lus zoo rau lawv tias : “Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb.” 23 Txawm muaj tsaus ntuj thiab muaj kaj ntug : yog hnub tsib.
24 Tswv Ntuj hais tias : “Kom lub ntiaj teb txawj muaj tej yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom.” Ces txawm muaj li ntawd tuaj.
25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo.
26 Tswv Ntuj hais tias : “Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : “Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av.”
29 Tswv Ntuj hais tias : “Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj.” Ces txawm muaj li ntawd tuaj.
31 Tswv Ntuj ntsia tas txhua yam nws tau ua : txhua yam ntawd zoo kawg. Txawm muaj tsaus ntuj thiab muaj kaj ntug : yog hnub rau.

1 Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. 2 Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua nws txoj num tiav tas. 3 Tswv Ntuj foom lus zoo rau hnub xya thiab muab hnub xya ua hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so.
4 Zaj kwv huam piav txog lub ntuj thiab lub ntiaj teb, thaum ntuj tsim teb raug, mas yog zoo li saum no. Thaum lub caij HUAB TAIS Tswv Ntuj tsim lub ntiaj teb thiab lub ntuj, 5 tseem tsis tau muaj ib tug me yub ntoo, ib tug nroj tsuag tuaj li, vim HUAB TAIS Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av. 6 Tab sis muaj dej txhawv hauv av los ywg tas nrho daim npoo av.
7 HUAB TAIS Tswv Ntuj muab ib thooj av nplaum los puab ua tib neeg. HUAB TAIS Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia.
8 HUAB TAIS Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj. 9 HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem. 10 Ib tug dej txhawv hauv Es Dees ntws mus ywg lub vaj. Tus dej ntawd ncau ua plaub ceg. 11 Thawj tus dej, hu ua Dej Pis Soos. Nws chev hla thoob lub teb chaws Has Vis Las uas muaj kub. 12 Hom kub teb chaws ntawd yog tseem kub. Kuj muaj ib hom txab ntoo zoo thiab muaj hom pob zeb dub muaj nqis nyob ntawd.
13 Tus dej ob hu ua Dej Ntsis Hoos. Nws chev ncig lub teb chaws Kus Saws. 14 Tus dej peb hu ua Dej Tis Nkis : nws ntws nyob As Xws teb sab hnub tuaj. Tus dej plaub yog tus Dej Aws Fas Tes.
15 HUAB TAIS Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj. 16 HUAB TAIS Tswv Ntuj qhia tus txiv neej li no : “Koj noj tau cov txiv txi ntawm tas txhua tsob ntoo hauv lub vaj no tib si. 17 Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj hnub twg, mas hnub ntawd koj yuav tuag.”
18 HUAB TAIS Tswv Ntuj hais tias : “Cia txiv neej nyob ib leeg mas tsis zoo. Kuv yuav ua ib tug pab nws kom phim nws.”
19 HUAB TAIS Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj yuav muaj lub npe raws li tus txiv neej tis rau. 20 Tus txiv neej tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis nws nrhiav tsis tau ib tug pab nws thiab phim nws.
21 HUAB TAIS Tswv Ntuj tso ib tug dab ntub hlob laum tus txiv neej, ces nws tsaug zog lawm. Tswv Ntuj rho nws ib tug tav tawm los, nws rov kaw lub qhov zoo li qub. 22 HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam. Tswv Ntuj coj los rau tus txiv neej saib. 23 Tus txiv neej nqua suab hlo tias : “Zaum no, tus no yog tseem txha ntawm kuv txha thiab tseem nqaij ntawm kuv nqaij tiag ! Tus no yuav hu ua ‘poj niam,’ vim tus no tawm ntawm txiv neej los !” 24 Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb. 25 Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd ib leeg tsis txaj muag rau ib leeg.

1 Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias : “Li ntawd, Tswv Ntuj hais tias : Neb yuav tsis txhob noj txhua yam txiv ntoo hauv lub vaj no puas yog ?”
2 Tus poj niam teb rau tus nab tias : “Wb noj tau cov txiv txi saum cov ntoo hauv lub vaj no tib si. 3 Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias : “Neb tsis txhob noj, tsis txhob kov, yog neb noj neb kov, mas neb yuav tuag.”
4 Tus nab teb ntua tus poj niam tias : “Tsis muaj li ntawd ib zaug ! Neb yuav tsis tuag. 5 Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.” 6 Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. 7 Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua.
8 Thaum cua tuaj ntxiag, nkawd hnov HUAB TAIS Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim HUAB TAIS Tswv Ntuj hauv cov ntoo nyob hauv lub vaj. 9 HUAB TAIS Tswv Ntuj hu tus txiv neej hais tias : “Koj nyob qhov twg ?”
10 Tus txiv neej teb tias : “Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim.”
11 Tswv Ntuj rov hais ntxiv tias : “Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?”
12 Tus txiv neej teb tias : “Yog tus poj niam uas koj tso nyob ze kuv, muab lub txiv rau kuv, ces kuv thiaj noj !”
13 HUAB TAIS Tswv Ntuj hais rau tus poj niam tias : “Koj ua dab tsi li ntawd ?”
Tus poj niam teb tias : “Yog niag nab ntxias kuv, kuv thiaj noj.” 14 Ces HUAB TAIS Tswv Ntuj hais rau tus nab hais tias : “Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws.”
16 Tswv Ntuj hais rau tus poj niam hais tias : “Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj.” 17 Tswv Ntuj hais rau tus txiv neej hais tias : “Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj ! Koj yuav siv zog khwv tas koj lub neej koj thiaj tau noj. 18 Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb.
19 Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj.” 20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.
21 HUAB TAIS Tswv Ntuj muab tawv los ua tsoos rau tus txiv neej thiab nws poj niam hnav. 22 Thiab HUAB TAIS Tswv Ntuj hais tias : “Zaum no tib neeg zoo li peb lawm, nws paub qhov phem thiab qhov zoo. Yuav tsis pub kom nws cev tes mus de tau tsob txiv muaj txoj sia los noj ntxiv, tsam nws muaj txoj sia nyob mus li.”
23 HUAB TAIS Tswv Ntuj thiaj tshem neeg tawm hauv lub vaj Es Dees, kom neeg mus cog cov av uas muab los puab nws. 24 Tswv Ntuj ntiab tib neeg tawm, nws tso ib co Tshiab Kes Lus Npis zov lub vaj Es Dees. Tswv Ntuj tsa ib rab ntaj nplaim taws thaiv txoj kev mus txog tus ntoo muaj txoj sia.

1 As Das paub nws poj niam. Ces tus poj niam xeeb tub thiab yug tau Kas Ees. Nws hais tias : “Kuv tau ib tug tub ntawm HUAB TAIS los.”
2 Nws kuj yug tau As Npes, yog Kas Ees tus kwv. As Npes hlob, nws ua ib tug tub yug tsiaj hos Kas Ees ua liaj ua teb. 3 Ntev tom qab, Kas Ees txawm muab nws cov qoob los txi rau HUAB TAIS.
4 Hos As Npes, nws kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si. HUAB TAIS zoo siab rau As Npes, ces nws txais As Npes cov txim. 5 Tab sis HUAB TAIS tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab.
6 HUAB TAIS hais rau Kas Ees tias: “Vim li cas koj thiaj npau taws thiab ua ntsej muag dub nciab li ko ? 7 Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.”
8 Tab sis muaj ib zaug, Kas Ees hais rau nws tus kwv As Npes tias : “Wb mus yos.” Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua. 9 HUAB TAIS nug Kas Ees hais tias : “Koj tus kwv As Npes nyob qhov twg ?” Kas Ees teb tias : “Kuv tsis paub. Kuv puas yog tus zov rawv kuv tus kwv ?”
10 HUAB TAIS rov hais tias : “Koj tau ua dab tsi ? Koj sim mloog saib, koj tus kwv cov ntshav quaj qw hauv av tuaj rau kuv ! 11 Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. 12 Yog koj ua teb, av yuav tsis txi qoob rau koj lawm. Koj yuav ua neeg loj leeb ncig ntiaj teb.”
13 Kas Ees hais rau HUAB TAIS tias : “Kuv lub txim hnyav dhau, kuv ris tsis taus. 14 Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb !”
15 HUAB TAIS teb tias : “Yog leej twg tua Kas Ees mas yuav muaj tus ua pauj rau nws xya zaus.” Ces HUAB TAIS ntaus ib lub cim rau Kas Ees kom thawj tug neeg ntsib nws txhob muab nws tua. 16 Kas Ees thiaj txav mus deb ntawm HUAB TAIS xub ntiag. Nws mus nyob lub teb chaws Nos Daws, nyob ntawm lub vaj Es Dees, sab hnub tuaj.
17 Kas Ees paub nws poj niam, ces nws poj niam xeeb tub thiab yug tau Hes Nov. Kas Ees txhim ib lub nroog, nws tis npe rau lub nroog raws nws tus tub hu ua Hes Nov. 18 Hes Nov yug tau Is Lav. Is Lav yug tau Mes Hus Yas Ees. Mes Hus Yas Ees yug tau Mes Thus Sas Ees. Mes Thus Sas Ees yug Las Mev. 19 Las Mev yuav ob tug poj niam. Tus niam hlob hu ua As Dav, tus niam yau hu ua Xis Las. 20 As Dav yug tau Yas Npas, uas yog cov neeg nyob tsev tsam phooj thiab yug tsiaj tus yawg koob. 21 Nws tus kwv hu ua Yus Npas, yog cov neeg uas txawj qoj nkauj nog ncas thiab txawj tshuab raj tus yawg koob. 22 Xis Las yug tau Tus Npas Kas Ees. Nws yog tus xub muab tooj dub thiab muab hlau coj los nchuav ua toob xib. Tus Npas Kas Ees muaj ib tug muam hu ua Nas As Mas. 23 Las Mev hais rau nws ob tug poj niam tias :
“As Dav thiab Xis las, Las Mev ob tug poj niad, neb mloog kuv lub suab mog, neb mloog qhov kuv hais mog. Kuv tau tua ib tug txiv neej vim nws ua mob kuv, tua ib tug tub hluas vim nws ntaus kuv. 24 Yog luag twb ua pauj Kas Ees xya zaus, mas luag yuav ua pauj Las Mev xya caum xya zaus.”
25 As Das paub nws poj niam, ces nws poj niam yug tau ib tug tub ntxiv, thiab tis nws npe hu ua Xes Thes, nws hais tias : “Tswv Ntuj pub dua ib tug tub rau kuv los sawv As Npes chaw, vim Kas Ees muab nws tua lawm.”
26 Xes Thes kuj yug tau ib tug tub, hu ua Es Nos. Nws yog thawj tus neeg pib teev HUAB TAIS lub npe.

1 Ntawm no yog phau ntawv qhia txog As Das caj ces : Hnub uas Tswv Ntuj tsim tau As Das, nws tsim kom As Das muaj ntsis zoo li Tswv Ntuj. 2 Nws tsim tau txiv neej thiab poj niam, nws foom hmoov zoo rau nkawd. Hnub uas nws tsim nkawd, nws muab lub npe hu ua “Tib Neeg” rau nkawd.
3 Thaum As Das muaj ib puas peb caug xyoo, nws yug tau ib tug tub muaj ntsis zoo li nws thiab, zoo li nws tus duab. Nws tis npe rau hu ua Xes Thes.
4 Thaum As Das yug tau Xes Thes lawm, nws tseem ua neej nyob yim pua xyoo. Nws yug tau tub tau ntxhais. 5 Tas nrho As Das lub neej ntev txog cuaj pua peb caug xyoo, nws mam tuag.
6 Thaum Xes Thes muaj ib puas thiab tsib xyoos, nws yug tau Es Nos. 7 Thaum Xes Thes yug Es Nos lawm, nws tseem nyob yim pua thiab xya xyoo ntxiv, nws yug tau tub thiab tau ntxhais.
8 Tas nrho Xes Thes lub neej ntev txog cuaj pua kaum ob xyoos, nws mam tuag.
9 Thaum Es Nos muaj cuaj caum xyoo, nws yug tau Kes Naas. 10 Thaum Es Nos yug Kes Naas lawm, nws tseem nyob yim pua kaum tsib xyoos ntxiv. Nws yug tau tub thiab yug tau ntxhais. 11 Tas nrho Es Nos lub neej ntev txog cuaj pua tsib xyoos, nws mam tuag.
12 Thaum Kes Naas muaj xya caum xyoo, nws yug tau Mas Has Las Les Ees. 13 Thaum Kes Naas yug Mas Has Las Les Ees lawm, Kes Naas tseem nyob yim pua plaub caug xyoo ntxiv. Nws yug tau tub thiab tau ntxhais. 14 Tas nrho Kes Naas lub neej ntev txog cuaj pua kaum xyoo, nws mam tuag.
15 Thaum Mas Has Las Les Ees muaj rau caum tsib xyoos, nws yug tau Yes Les. 16 Thaum Mas Has Las Les Ees yug tau Yes Les lawm, Mas Has Las Les Ees tseem nyob yim pua peb caug xyoo ntxiv. Nws yug tau tub thiab tau ntxhais. 17 Tas nrho Mas Has Las Les Ees lub neej ntev txog yim pua cuaj caum tsib xyoos, nws mam tuag.
18 Thaum Yes Les muaj ib puas rau caum ob xyoos, nws yug tau Hes Nov. 19 Thaum Yes Les yug tau Hes Nov lawm, Yes Les tseem nyob yim pua xyoo ntxiv. Nws yug tau tub thiab tau ntxhais. 20 Tas nrho Yes Les lub neej ntev txog cuaj pua rau caum ob xyoos, nws mam tuag. 21 Thaum Hes Nov muaj rau caum tsib xyoos, nws yug tau Mas Thus Xas Les. 22 Thaum Hes Nov yug tau Mas Thus Xas Les lawm, Hes Nov tseem nyob peb puas xyoo ntxiv. Nws yug tau tub thiab tau ntxhais. 23 Tas nrho Hes Nov lub neej ntev txog peb puas rau caum tsib xyoos. 24 Hes Nov nrog nraim Tswv Ntuj, ces nws cia li ploj lawm xwb, vim Tswv Ntuj tuaj coj nws lawm. 25 Thaum Mas Thus Xas Les muaj ib puas yim caum xya xyoo, nws yug tau Las Mev. 26 Thaum Mas Thus Xas Les yug tau Las Mev lawm, Mas Thus Xas Les tseem nyob xya pua yim caum ob xyoos ntxiv. Nws yug tau tub thiab tau ntxhais.
27 Tas nrho Mas Thus Xas Les lub neej ntev txog cuaj pua rau caum cuaj xyoos, nws mam tuag. 28 Thaum Las Mev muaj ib puas yim caum ob xyoos, nws yug tau ib tug tub. 29 Nws muab tis npe hu ua Nos Hes, nws hais tias : “Tus no yuav nplij peb lub siab nyob hauv peb tej hauj lwm thiab peb tej kev khwv, yog kev nplij siab tawm hauv thaj av uas HUAB TAIS tau tsawm lus phem rau los.”
30 Thaum Nos Hes yug lawm, Las Mev tseem nyob tsib puas cuaj caum tsib xyoos ntxiv. Nws yug tau tub thiab tau ntxhais. 31 Tas nrho Las Mev lub neej ntev txog xya pua xya caum xya xyoo, nws mam tuag. 32 Thaum Nos Hes muaj tsib puas xyoo, nws yug tau Xees, Has, thiab Zas Fes.

1 Thaum tib neeg pib coob tuaj nyob hauv ntiaj teb lawm, thiab tib neeg yug tau ntxhais coob lawm, 2 mas Tswv Ntuj cov tub pom hais tias tib neeg cov ntxhais zoo ntxim lawv siab, ces lawv mus yuav tas nrho cov uas lawv nyiam coj los ua poj niam.
3 HUAB TAIS hais tias : “Kuv lub tswv yim yuav tsis nyob hauv tib neeg, yog vim tib neeg yog ib lub cev nqaij. Vim nws yog ib lub cev nqaij, mas nws lub neej yuav ntev ib puas nees nkaum xyoo xwb.”
4 Thaum ntawd, cov neeg Nes Fis Lis twb nyob lawm, (lawv kuj tseem nyob yav tom qab ntxiv thiab), yog lub sij hawm uas Tswv Ntuj cov tub yuav tib neeg cov ntxhais coj los yug me nyuam rau lawv, ces thiaj tau cov neeg muaj peev xwm thiab muaj koob meej nto lug txheej thaud. 5 HUAB TAIS pom hais tias nyob ntiaj teb, neeg siab phem tas nrho, thiab neeg lub siab tsuas xav qhov phem tas hnub xwb. 6 HUAB TAIS khuv xim hais tias nws tau tsim neeg los nyob ntiaj teb. HUAB TAIS tu siab.
7 Ces HUAB TAIS hais tias : “Kuv yuav muab cov neeg uas kuv tau tsim ntawd rhuav kom ploj tas saum daim npoo av, tsis hais neeg, los tsiaj nyeg, kab ntsaum los noog ya saum ntuj huv tib si, vim kuv khuv xim tias kuv tau tsim lawv los.”
8 Tiam sis Nos Hes yog ib tug neeg zoo xis HUAB TAIS siab. 9 Ntawm no yog Nos Hes zaj kwv huam : Nos Hes yog ib tug neeg ncaj dua tas tsoom neeg ua neej nyob lub sij hawm ntawd, thiab nws nrog Tswv Ntuj sib raug zoo. 10 Nos Hes yug tau peb tug tub, Xees, Has thiab Zas Fes. 11 Lub ntiaj teb ua phem zuj zus rau Tswv Ntuj thiab muaj kev ua nruj ua tsiv ntau zuj zus.
12 Tswv Ntuj pom tias ntiaj teb phem thiab qias kawg nkaus, vim txhua tus neeg uas muaj lub cev nqaij coj tus yeeb yam phem nyob ntiaj teb.
13 Tswv Ntuj hais rau Nos Hes tias : “Lub caij uas txhua tus muaj lub cev nqaij yuav ploj mus los txog lawm. Kuv tau txiav li ntawd, vim lub ntiaj teb muaj kev phem ntau dhau los ntawm neeg los, ces kuv yuav muab lawv rhuav kom ploj ntais hauv ntiaj teb mus. 14 Koj yuav xuas ntoo xwb cob txua ib lub nkoj. Koj yuav muab tauj los xov thiab muab roj hmab los leem sab hauv sab nraud rau. 15 Koj yuav txua raws li no : qhov ntev yog peb puas tshim, qhov dav yog tsib caug tshim, qhov siab yog peb caug tshim. 16 Koj yuav ua ib lub ruv rau lub nkoj kom siab li ib tshim tshaj saud. Koj yuav ua lub qhov rooj rau ntawm ib sab, thiab koj yuav ua kom muaj txheej ib, txheej ob thiab txheej peb. 17 Ntawm kuv mas kuv yuav ua kom dej loj loj los nyab lub ntiaj teb, kom txhua yam muaj txoj sia hauv lub qab ntuj ploj tas mus : tas puas tsav yam nyob hauv ntiaj teb yuav tsum tuag kom tas mus. 18 Tiam sis kuv yuav nrog koj cog lus. Koj yuav nkag mus lawm hauv lub nkoj, koj thiab koj cov tub, koj poj niam thiab koj cov tub cov poj niam nrog koj. 19 Tas puas tsav yam muaj txoj sia, tas puas tsav yam muaj lub cev nqaij, koj yuav muab kom tau ib hom ob tug nrog koj mus lawm hauv lub nkoj kom txuag lawv txoj sia : yuav tsum yog ib tug maum thiab ib tug txiv. 20 Ib hom ib nkawg ntawm cov noog, ib hom ib nkawg ntawm cov tsiaj nyeg, ib hom ib nkawg ntawm tej kab ntsaum nkag hauv av yuav nrog koj nkag mus kom txuag lawv txoj sia. 21 Ntawm koj, mas koj yuav tsum nrhiav tas puas tsav yam zoo noj coj los khaws cia kom ntau, ces thiaj li yuav muaj txhiam xws noj rau koj thiab rau lawv.”
22 Nos Hes ua raws li ntawd : tas puas tsav yam uas Tswv Ntuj kom ua, mas nws cia li ua.

1 HUAB TAIS hais rau Nos Hes tias : “Koj nkag mus hauv lub nkoj, koj thiab tas nrho koj tsev neeg, vim nyob hauv tiam neeg no, kuv tsuas pom koj ib leeg xwb thiaj li ncaj ncees. 2 Ntawm tas nrho cov tsiaj huv, koj yuav khaws xya nkawm, tus txiv nrog tus maum, ntawm cov tsiaj tsis huv, koj yuav khaws ib nkawg, ib tug txiv thiab ib tug maum. 3 Hos cov noog ya saum ntuj, koj khaws xya nkawm, ib tug lau nrog tus poj, kom tau ua noob rau ntiaj teb.
4 Tshuav xya hnub ntxiv xwb kuv yuav tso nag los nyab ntiaj teb plaub caug hnub plaub caug hmo, kuv yuav rhuav tas puas tsav yam kuv tau tsim los kom ploj ntais saum daim npoo av mus.”
5 Nos Hes ua tas puas tsav yam raws li HUAB TAIS kom nws ua. 6 Nos Hes muaj rau pua xyoo thaum dej nag los nyab ntiaj teb.
7 Nos Hes, nrog nws cov tub, nws poj niam thiab cov tub cov poj niam, lawv nkag mus hauv lub nkoj kom dim ntawm dej. 8 Hos cov tsiaj huv thiab cov tsiaj tsis huv, cov noog thiab cov kab nkag hauv av, 9 muaj ib yam ib nkawg nkag rau hauv Nos Hes lub nkoj, muaj ib tug maum ib tug txiv, raws li Tswv Ntuj tau hais rau Nos Hes.
10 Thaum dhau xya hnub lawm, ces dej nag nyab ntiaj teb. 11 Thaum Nos Hes muaj rau pua xyoo txwm nkaus, lub ob hlis, hnub tim kaum xya, hnub ntawd, txhua tus dej txhawv phwj hauv tiv txwv tuaj, hos cov qhov rooj thaiv dej saum ntuj qhib plho rau dej nchuav nthwv sis laub sis lug nqes los. 12 Nag los tsaus nti tau plaub caug hnub thiab plaub caug hmo rau ntiaj teb.
13 Hnub ntawd kiag, Nos Hes thiab nws cov tub, Xees, thiab Has, thiab Zas Fes, nrog Nos Hes poj niam thiab nws cov tub peb tug poj niam, lawv nkag hauv lub nkoj. 14 Txhua hom tsiaj qus, tsiaj nyeg, kab nkag hauv av, txhua yam tsiaj ya saum ntuj, txhua hom noog, txhua yam
muaj tis nrog Nos Hes nkag mus rau hauv nws lub nkoj. 15 Cov nyob ze ntawm Nos Hes muaj ib hom ib nkawg ntawm txhua yam tsiaj muaj lub cev nqaij thiab muaj txoj sia ua pa.
16 Txhua nkawm muaj lub cev nqaij nkag hauv nkoj ntawd muaj ib tug txiv nrog ib tug maum raws li Tswv Ntuj tau hais. Ces HUAB TAIS kaw nkaus lub qhov rooj nkoj lawv Nos Hes qab.
17 Los nag tsaus nti nyab ntiaj teb tau plaub caug hnub, cov dej nce tuaj, ces dej tshoom lub nkoj rau saum nplaim dej.
18 Cov dej puv zuj zus thiab ntau zuj zus tuaj, ua kom lub nkoj ntab yeev rau saum nplaim dej. 19 Cov dej nce tuaj puv ntiaj teb, ces cov roob siab tshaj nyob hauv lub qab ntuj txawm ploj hauv qab deg tas.
20 Dej tseem nce kaum tsib tshim siab tshaj cov ncov roob, thiab nyab cov roob tas huv tib si.
21 Ces txhua yam muaj lub cev nqaij txawj ua zog nyob hauv ntiaj teb tuag tas huv si : me noog, me tsiaj nyeg tsiaj qus, tas puas tsav yam muaj sia npau xi nyob hauv av, thiab tas ib tsoom tib neeg huv tib si. 22 Tas puas tsav yam ua pa ntawm qhov ntswg, los yog tas puas tsav yam nyob saum nruab nqhuab tuag tas. 23 Tas puas tsav yam muaj sia nyob saum npoo av, tsis hais tib neeg los tsiaj txhu, tej kab thiab tej noog saum ntuj, sawv daws ploj hauv ntiaj teb tas huv si, tsuas tshuav Nos Hes thiab puas tsav yam uas nrog nws nyob hauv nkoj xwb. 24 Dej puv tuaj nyab ntiaj teb tau ib puas tsib caug hnub txwm nkaus.

1 Tiam sis Tswv Ntuj nco ntsoov txog Nos Hes thiab tas cov tsiaj qus thiab tsiaj nyeg uas nrog Nos Hes nyob hauv lub nkoj, Tswv Ntuj tso ib nthwv cua tuaj tshuab lub ntiaj teb, ces cov dej thiaj nqig tas. 2 Cov dej txhawv hauv tiv txwv txhaws tas, hos cov qhov rooj thaiv dej saum ntuj kuj kaw tas huv tib si. Ces nag tsis tau kev poob los rau ntiaj teb ntxiv lawm.
3 Dej thiaj li nqig zuj zus hauv ntiaj teb. Dej siv ib puas tsib caug hnub thiaj mam nqig tas. 4 Ces thaum lub xya hli, hnub tim kaum xya hauv lub hli, lub nkoj los khuam rau saum cov ncov roob As Las Las.
5 Dej nqig mus txog lub kaum hli, ces hnub tim ib lub kaum hli cov ncov roob mam li tshwm tuaj. 6 Nos Hes tos plaub caug hnub, ces nws qhib lub qhov rai uas nws tau ua rau ntawm lub nkoj, 7 nws tso tus uab lag tawm mus. Uab lag ya mus ya los, tos kom dej qhuav hauv ntiaj teb tso. 8 Ces Nos Hes tso tus nquab tawm ntawm nws mus xyuas saib dej puas tau nqhuab hauv av.
9 Tiam sis tus nquab nrhiav tsis tau chaw tsaws li, ces nquab ya rov los rau ntawm lub nkoj, vim dej tseem nyab cov av hauv ntiaj teb thoob plaws. Nos Hes thiaj li xyab tes mus txais tus nquab thiab coj nquab los nrog nws nyob hauv lub nkoj. 10 Nws tos tau xya hnub ntxiv, nws rov qab tso tus nquab tawm ntawm lub nkoj mus dua. 11 Thaum tsaus ntuj, nquab ya rov los, ntawm nws kaus ncauj muaj ib tug ntsis txiv ntoo roj uas tus nquab nyuam qhuav de tshiab tshiab. Ces Nos Hes paub tias dej nqig lawm. 12 Nws rov tos tau xya hnub ntxiv, nws mam rov tso tus nquab tawm mus dua. Tus nquab tsis rov los ntxiv lawm. 13 Thaum Nos Hes muaj rau pua ib xyoos, lub ib hlis, xiab ib, dej qhuav tas hauv ntiaj teb lawm. Nos Hes yaws lub ruv npog lub nkoj, nws ntsia pom av tab tom pib qhuav. 14 Lub ob hlis, hnub tim nees nkaum xya, ntiaj teb qhuav tas lawm.
15 Ces Tswv Ntuj hais rau Nos Hes tias : 16 “Koj tawm hauv nkoj los, koj thiab koj poj niam, nrog koj cov tub thiab koj cov tub cov poj niam. 17 Nej yuav coj tas puas tsav yam tsiaj muaj sia muaj lub cev nqaij nrog nej tawm los: cov noog, cov tsiaj txhu, tas puas tsav yam txawj nkag uas nkag hauv av huv tib si, kom txhua yam coob mus puv ntiaj teb, kom txhua yam tsim noob thiab huam vam puv hauv ntiaj teb.”
18 Ces Nos Hes tawm hauv nkoj los, nrog nws cov tub thiab nws poj niam thiab nws cov tub thiab lawv cov poj niam. 19 Thiab txhua yam tsiaj, txhua yam txawj nkag, txhua yam noog, txhua yam txawj ua zog nyob hauv ntiaj teb, sawv daws tawm hauv nkoj los, nyias raws nyias npoj nyias pawg. 20 Ces Nos Hes tsa ib lub thaj txi Huab Tais. Nws muab txhua yam tsiaj huv thiab txhua yam noog huv los hlawv txi Ntuj saum lub thaj. 21 Thaum Huab Tais hnov cov pa ncho tsw qab, Huab Tais hais hauv nws nruab siab tias : “Txawm tias yog tim tib neeg, los kuv yuav tsis foom phem rau av ib zaug ntxiv lawm, vim tias neeg lub siab yeej xeeb tau phem puag thaum yau los. Thiab kuv yuav tsis ua kom txhua yam muaj sia tu noob li kuv tau ua no ib zaug ntxiv.” 22 Tsuav yog tseem muaj lub ntiaj teb, mas yuav muaj caij cog qoob thiab caij sau qoob, yuav muaj txias thiab muaj kub, yuav muaj caij sov caij no, yuav muaj nruab hnub thiab muaj hmo ntuj mus li.”

1 Tswv Ntuj foom hmoov zoo rau Nos Hes thiab rau nws cov tub, nws hais rau lawv tias : “Nej yeej meem tsim noob, kav tsij huam vam mus puv lub ntiaj teb. 2 Tas puas tsav yam tsiaj hauv ntiaj teb, puas tsav yam noog ya saum ntuj, puas tsav yam tsiaj nkag hauv av thiab puas tsav yam ntses hauv hiav txwv, sawv daws yuav hwm nej thiab ntshai nej. Lawv nyob hauv nej lub xib teg tas huv si. 3 Txhua yam txawj ua zog thiab muaj sia yog txhiam xws rau nej noj. Kuv tseem muab cov nroj ntsuab rau nej siv thiab txhua tsav puas yam tas tib si rau nej siv.
4 Tshuav ib qho xwb : Nej yuav tsis txhob noj nqaij nrog nws txoj sia, uas yog cov ntshav. 5 Vim hais tias, kuv yuav nug txog nej txhua tus cov ntshav, kuv yuav nug ntawm tsiaj thiab ntawm neeg, yuav nug ib tug txog lwm tus cov ntshav, kuv yuav nug txog tib neeg txoj sia. 6 Leej twg txo tib neeg txoj sia, yuav raug tib neeg txo nws txoj sia. Vim hais tias Tswv Ntuj tau tsim neeg los zoo xws li nws tus ntsuj duab. 7 Ntawm nej, mas nej yeej meem tsim noob, yeej meem huam vam coob puv ntiaj teb thiab kav ntiaj teb.” 8 Tswv Ntuj hais li no rau Nos Hes thiab rau nws cov tub : 9 “Ntawm no, kuv nrog nej cog lus cia, nrog nej thiab nej caj ces puag tom qab, 10 nrog txhua yam uas muaj txoj sia nyob, nrog cov noog, cov tsiaj nyeg, nrog txhua tsav txhua hom tsiaj hauv ntiaj teb uas tawm hauv lub nkoj los, cog lus.
11 Kuv cog lus rau nej tias : Tas puas tsav yam muaj sia yuav tsis raug dej nyab rhuav siav kom tu noob ib zaug ntxiv. Yuav tsis muaj dej los nyab ntiaj teb thiab rhuav ntiaj teb ib zaug ntxiv.” 12 Tswv Ntuj hais tias : “Lub cim no yuav qhia rau cov tiam neeg tom ntej paub tias kuv tau nrog nej thiab tas puas tsav yam muaj sia uas nrog nej muaj sia cog lus. 13 Kuv ua zaj sawv rau saum cov huab ; nws yuav ua lub cim nco txog tias kuv thiab lub ntiaj teb tau cog lus cia lawm. 14 Thaum kuv sau cov huab los ncaj rau saum lub ntiaj teb thiab pom zaj sawv saum cov huab, 15 ces kuv yuav nco dheev txog kuv cov lus cog rau nej thiab rau tas puas tsav yam muaj lub cev nqaij, ces dej yuav tsis hlob thiab tsis nyab tas puas tsav yam muaj sia ib zaug ntxiv. 16 Thaum muaj zaj sawv saum cov huab,
kuv yuav pom thiab yuav nco txog tias Tswv Ntuj nrog txhua tsav puas yam muaj lub cev nqaij nyob ntiaj teb tau cog lus cia ib txhis mus li.”
17 Tswv Ntuj hais rau Nos Hes tias : “Qhov ntawd yog lub cim qhia tias kuv tau nrog txhua yam muaj lub cev nqaij nyob ntiaj teb cog lus lawm.”
18 Nos Hes cov tub uas tawm hauv nkoj los yog Xees, Has, thiab Zas Fes. Has yog Kas Nas Has txiv. 19 Peb tug no yog Nos Hes peb tug tub. Lawv yog cov tsim noob los mus nyob puv ntiaj teb.
20 Nos Hes yog ib tug neeg ua liaj ua teb noj, yog thawj tug xub pib cog hmab txiv cawv. 21 Nws haus cawv ces nws qaug cawv. Nws muab ris tsho hle, nws pw liab qab hauv nws lub tsev ntaub.
22 Has, uas yog Kas Nas Has txiv, pom nws txiv liab qab, ces nws mus hais qhia nws ob tug tij laug nraum zoov. 23 Tiam sis Xees thiab Zas Fes nkawd muab lub tsho loj kwv saum nkawd xub pwg, ces nkawd thaub qab mus muab lawv txiv vov, nkawd tsis tig ntsej muag ntsia nkawd txiv liab qab. 24 Thaum Nos Hes zoo cawv lawm, nws hnov txog tias nws tus tub ntxawg tau ua li ntawd rau nws, 25 ces nws foom tias : “Kom Kas Nas Has hmoov phem, nws yuav ua nws ob tug kwv tij tus qhev uas qis tshaj plaws.”
26 Nws tseem hais li no ntxiv : “Kom kuv tus HUAB TAIS Tswv Ntuj muab koob hmoov zoo rau Xees, cia Kas Nas Has ua nws qhev. 27 Kom Tswv Ntuj pub chaw dav rau Zas Fes, thiab cia Zas Fes nyob hauv Xees cov tsev tsam phooj, cia Kas Nas Has ua nws qhev.”
28 Thaum dej nyab ntiaj teb tas, Nos Hes tseem nyob peb puas tsib caug xyoo ntxiv. Nos Hes lub neej ntev txog cuaj puas tsib caug xyoo. Ces nws tuag.

1 Ntawm no yog Nos Hes cov tub, Xees, Has thiab Zas Fes lawv cov caj ces. Lawv tau yug tub yug kiv txij thaum dej nyab ntiaj teb tas.
2 Zas Fes cov tub : Nkos Mes, Mas Nkos, Mas Dais, Yas Vas, Tus Npas, Mos Ses, thiab Tis Las. 3 Nkos Mes cov tub : As Kes Nas, Lis Fas, thiab Tos Nkas Mas.
4 Yas Vas cov tub : Es Lis Sas, Tas Xis, Kis Tis, thiab Los Das Nis. 5 Cov no yog cov uas tau ua neej nyob taug ntug dej. Lawv yog Zas Fes cov tub, nyias muaj nyias teb chaws nyob, nyias muaj nyias hom lus, nyias muaj nyias lub xeem thiab nyias haiv neeg.
6 Has cov tub : Kus Saws, Mis Khas Yees, Pus, thiab Kas Nas Has. 7 Kus Saws cov tub : Xes Npas Has Vis Las, Xas Tas, Las Mas, Xas Tes Kas. Las Mas cov tub : Ses Npas, thiab Des Das.
8 Kus Saws yug tau Nis Los uas nws yog thawj tus neeg kav teb chaws muaj peev xwm nyob hauv lub qab ntuj. 9 Nws kuj yog ib tug tub tua nqaij muaj peev xwm nyob ntawm HUAB TAIS xub ntiag. Vim li ntawd luag thiaj piv txoj lus tias : “Puav tam li Nis Los uas yog ib tug tub tua nqaij muaj peev xwm nyob ntawm HUAB TAIS xub ntiag.” 10 Cov nroog tseem ceeb nyob hauv nws lub tuam teb chaws yog cov nroog Nas Npes, Es Les thiab As Kas uas nyob tas nrho hauv lub teb chaws Sis Nes As. 11 As Xws tawm hauv lub teb chaws ntawd los thiab nws
tsim cov nroog Nis Nis Vas, Les Hos Npos Tis, Kas Las, 12 thiab Les Xees uas yog lub tuam ceeb, nyob nruab nrab ntawm Nis Nis Vas thiab Kas Las.
13 Mis Khas Yees yug tau cov haiv neeg Lus Dos, As Nas Mis, Les Has Npis, Nas Fas Tus, 14 Pas Rhos, Kas Xas Lus, thiab Kas Fas Tos, uas yog cov haiv neeg Fis Lis Tis lub keeb.
15 Kas Nas Has yug tau Xis Doos, yog tus tub hlob, thiab Hes Tes, 16 thiab cov neeg Zes Npus Xis, cov neeg As Mos, cov neeg Ntsis Nkas Sis, 17 cov neeg His Vis, cov neeg As Kis Tis, cov neeg Xis Nis, 18 cov neeg As Vas Dis, cov neeg Xes Mas Lis, thiab cov neeg Has Mas Tis.
Tom qab no, cov haiv neeg Kas Nas Has tau tawg mus nyob ntau qhov. 19 Cov neeg Kas Nas Has tus ciam teb yog txij ntawm Xis Doos ncaj rau Zes Las, mus rau Nkas Xas, thiab mus rau Xos Dos Mas, Nkos Mos Las, As Mas, Xes Npuas Yees, thiab mus txog ntua rau Les Sas.
20 Cov no yog Has cov tub, raws li lawv cov xeem thiab lawv cov lus, raws li lawv cov teb chaws thiab lawv cov haiv neeg.
21 Xees kuj muaj ib cov tub thiab. Nws yog Es Npes cov tub tus yawg koob, thiab yog Zas Fes tus tij laug hlob.
22 Xees cov tub : Es Las, As Xws, As Pas Xas, Lus Dis, thiab As Las. 23 As Las cov tub : Us, Hus, Ntses Tes thiab Mas. 24 As Pas Xas yug tau Ses Las ; Ses Las yug tau Es Npes. 25 Es Npes yug tau ob tug tub : thawj tug hu ua Pes Les, nws ua neej nyob rau lub caij uas ntiaj teb tawg tas. Nws tus kwv hu ua Yos Tas. 26 Yos Tas yug tau As Mos Das, Ses Les, Has Xas Mas Ves, Zes Las, 27 Has Dos Las, Us Xas, Dis Las, 28 Os Npas, As Npis Mas, Ses Npas, 29 Os Fis, Has Vis Las, thiab Zos Npas. Cov no yog Yos Tas cov tub.
30 Lawv lub teb chaws yog txij Mes Sas mus rau Xes Fas, yog ib lub teb chaws ua pov roob nyob sab hnub tuaj. 31 Cov no yog Xees cov tub, raws lawv cov xeem, lawv cov lus, lawv cov teb chaws, thiab lawv cov haiv neeg.
32 Cov saum no yog Nos Hes cov tub cov tsev neeg, raws lawv caj ces, lawv haiv neeg. Neeg tawm ntawm cov haiv neeg no los mus nyob thoob hauv ntiaj teb tom qab dej nyab ntiaj teb dhau tas.

1 Thaum ntawd, tas ntiaj teb sawv daws hais ib xeem lus xwb thiab siv ib cov lus xwb. 2 Thaum lawv tsiv sab toob fab los mus, lawv los txog ib lub tiaj nyob hauv teb chaws Sis Nes As, ces lawv los nyob ntawd.
3 Lawv sib hu tias : “Tuaj peb puab thwv cib, peb muab ci hauv hluav taws !”
Ces lawv siv cov thwv cib ntawd los ua pob zeb txhim tsev thiab siv roj hmab dub los leem. 4 Lawv hais tias : “Tuaj peb txhim ib lub nroog rau peb thiab ib tug pej thuam kom lub ntsis siab siab mus txog saum ntuj, ces peb lub npe yuav nrov thiab peb thiaj li tsis sib tawg mus nyob thoob ntiaj teb.”
5 HUAB TAIS nqes los xyuas lub nroog thiab tus pej thuam uas neeg tau tsa sawv.
6 Ces HUAB TAIS hais tias : “Ntsia saib, lawv yog ib haiv neeg thiab hais ib xeem lus xwb, ces lawv muaj peev xwm kawg, qhov no tsuas yog qhov lawv nyuam qhuav pib ua xwb, txij no mus yog lawv xav ua dab tsi thaum twg ces yuav tsis muaj ib yam uas lawv yuav ua tsis tau lawm. 7 Mus, peb sim nqes mus xyuas saib. Peb yuav ua kom lawv hais lus tsis sib to taub, ces lawv yuav tsis sib haum ntxiv lawm.”
8 HUAB TAIS ua kom lawv sib tawg mus nyob thoob ntiaj teb ces lawv tso tseg tsis txhim lub nroog ntxiv. 9 Vim li ntawd thiaj hu ua pej thuam Npas Npes, vim yog nyob ntawd, HUAB TAIS ua kom ntiaj teb neeg hais lus tsis sib to taub, thiab yog nyob ntawd, HUAB TAIS ua kom neeg tawg mus nyob thoob ntiaj teb.
10 Cov nram no yog Xees caj ces : Thaum dej nyab ntiaj teb tas tau ob xyoos lawm, mas Xees muaj ib puas xyoo, ces nws yug As Pas Xas. 11 Thaum As Pas Xas yug lawm, Xees tseem nyob tsib puas xyoo ntxiv, nws yug tau tub tau ntxhais. 12 Thaum As Pas Xas muaj peb caug tsib xyoos, nws yug Ses Las. 13 Thaum Ses Las yug los lawm, As Pas Xas tseem nyob plaub puas peb xyoos ntxiv, nws yug tau tub tau ntxhais. 14 Thaum Ses Las muaj peb caug xyoo, nws yug Es Npes.
15 Thaum Es Npes yug lawm, Ses Las tseem nyob plaub puas peb xyoos ntxiv, nws yug tau tub tau ntxhais. 16 Thaum Es Npes muaj peb caug plaub xyoos, nws yug Pes Les. 17 Thaum Pes Les yug lawm, Es Npes tseem nyob plaub puas peb caug xyoo ntxiv, nws yug tau tub tau
ntxhais. 18 Thaum Pes Les muaj peb caug xyoo, nws yug Les Us. 19 Thaum Les Us yug lawm, Pes Les tseem nyob ob puas cuaj xyoo ntxiv, nws yug tau tub tau ntxhais.
20 Thaum Les Us muaj peb caug ob xyoos, nws yug Xis Lws. 21 Thaum Xis Lws yug los, Les Us tseem nyob ob puas xya xyoo, nws yug tau tub tau ntxhais.
22 Thaum Xis Lws muaj peb caug xyoo, nws yug Nas Hos. 23 Thaum Nas Hos yug los lawm, Xis Lws tseem nyob ob puas xyoo ntxiv, nws yug tau tub tau ntxhais. 24 Thaum Nas Hos muaj nees nkaum cuaj xyoos, nws yug Tes Las. 25 Thaum Tes Las yus los lawm, Nas Hos nyob ib puas kaum cuaj xyoo ntxiv, nws yug tau tub tau ntxhais. 26 Thaum Tes Las muaj xya caum xyoo, nws yug Has Nplas, Nas Hos, thiab Has Laas.
27 Tes Las caj ces yog zoo li no : Tes Las yug tau Has Nplas, Nas Hos, thiab Has Laas. Has Laas yug tau Los. 28 Has Laas tuag nyob ntawm nws txiv Tes Las xub ntiag, nyob hauv lub teb chaws nws yug, uas yog Uj, nyob Kas Ntes teb. 29 Has Nplas thiab Nas Hos nkawd yuav poj niam. Has Nplas poj niam hu ua Xas Lais. Nas Hos poj niam hu ua Mis Las Kas, yog Has Laas tus ntxhais. Has Laas yog Mis Las Kas thiab Yis Xas Kas nkawd txiv. 30 Xas Lais tsis muaj me nyuam, nws yug tsis tau tub ki. 31 Tes Las coj nws tus tub Has Nplas, nws tus xeeb ntxwv Los uas yog Has Laas tus tub, thiab nws tus nyab Xas Lais uas yog Has Nplas poj niam, nws coj lawv tawm hauv cov Kas Ntes lub teb chaws Uj mus, lawv yuav tsiv mus nyob Kas Nas Has teb. Tiam sis nws tsiv los txog Has Laas teb, ces nws cia li nyob ntawd lawm. 32 Tes Las ua neej nyob txog ob puas tsib xyoos, ces nws tuag nyob Has Laas.

1 HUAB TAIS hais rau Has Nplas tias : “Tso koj lub teb chaws tseg, tso koj tsev neeg, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj.
2 Kuv yuav tsa koj ua ib haiv neeg loj, kuv yuav foom hmoov zoo rau koj, thiab kuv yuav ua kom koj lub npe nto moo loj. Koj yuav nqa txoj hmoov zoo rau txhua leej txhua tus. 3 Kuv yuav foom hmoov zoo rau cov neeg uas foom hmoov zoo rau koj, kuv yuav foom hmoov phem rau cov uas foom phem rau koj. Tas txhua haiv neeg nyob ntiaj teb yuav muab koj lub npe los sib foom hmoov zoo.”
4 Has Nplas sawv kev mus raws li HUAB TAIS kom nws mus. Los kuj nrog nws mus thiab. Thaum Has Nplas tsiv hauv Has Laas teb mus, nws muaj xya caum tsib xyoos. 5 Has Nplas coj
nws poj niam Xas Lais, thiab nws tus kwv tus tub hu ua Los nrog nws mus. Nws sau tas nws lub cuab tam uas nws tau tsim, thiab tas nws cov tub txib tub txuas uas nws tau muas los nyob Has Laas nrog nws mus. Lawv sawv kev mus, ces lawv tuaj txog lub teb chaws Kas Nas Has.
6 Has Nplas hla ntau lub teb chaws, nws thiaj mus txog thaj chaw ntshiab hu ua Xis Kes, ntawm qhov chaw uas muaj tus ntoo Ntseej nyob Mos Les. Thaum ntawd, cov neeg Kas Nas Has nyob hauv lub teb chaws.
7 HUAB TAIS tawm los rau Has Nplas pom, HUAB TAIS hais rau nws tias : “Kuv yuav muab lub teb chaws no rau koj tsoom xeeb ntxwv nyob.” Ces Has Nplas txhim ib lub thaj txi HUAB TAIS nyob ntawd, vim HUAB TAIS tawm los rau nws pom nyob ntawd. 8 Has Nplas hla mus rau pem roob, nyob ntawm Npes Thes sab hnub tuaj. Nws tsa nws lub tsev tsam phooj rau ntawd, Npes Thes nyob sab hnub poob, hos Ais nyob sab hnub tuaj. Nyob ntawd nws kuj tsa ib lub thaj txi HUAB TAIS thiab teev HUAB TAIS lub npe. 9 Ces Has Nplas maj mam tsiv ib thaj chaw dhau ib thaj, mus txog lub teb chaws Nes Zes.
10 Thaum ntawd lub teb chaws tshaib plab, ces Has Nplas thiaj nqes mus nyob rau Hais Nkws Tos teb, vim kev tshaib plab loj kawg nyob hauv lub teb chaws. 11 Thaum nws yuav hla mus hauv Hais Nkws Tos teb, nws hais rau nws poj niam Xas Lais tias :
“Kuv paub tias koj yog ib tug poj niam zoo nkauj. 12 Yog li ntshai tsam thaum cov Hais Nkws Tos pom koj ces lawv yuav hais tias : “Yog nws poj niam,” ces lawv yuav muab kuv tua thiab tseg koj txoj sia nyob. 13 Kuv thov koj, koj yuav tsum hais tias koj yog kuv tus muam no, kom lawv thiaj ua zoo rau kuv vim koj, thiab lawv thiaj tseg kuv txoj sia vim lawv saib koj.”
14 Txawm muaj raws li ntawd : thaum Has Nplas mus txog Hais Nkws Tos teb, cov neeg Hais Nkws Tos pom tias tus poj niam ntawd zoo nkauj kawg. 15 Huab tais Fas Las Oos cov tub rog pom, lawv mus qhuas rau Fas Las Oos. Ces Fas Las Oos tso neeg tuaj coj tus poj niam mus nyob hauv nws lub vaj loog. 16 Fas Las Oos ua zoo heev rau Has Nplas vim tus poj niam. Nws pub yaj, pub nyuj, pub txiv luj, pub tub qhe ntxhais qhev, pub maum luj, pub thauj rau Has Nplas.
17 Tiam sis HUAB TAIS tso xwv txheej thiab kev txom nyem ntau yam los raug Fas Las Oos thiab nws tsev neeg vim Xas Lais uas yog Has Nplas tus poj niam. 18 Fas Las Oos thiaj li hu Has Nplas mus, thiab nws hais tias : “Koj ua dab tsi li ntawd rau kuv ? Vim li cas koj thiaj tsis qhia kuv hais tias yog koj poj niam ? 19 Vim li cas koj thiaj hais rau kuv tias: “Nws yog kuv tus muam,” kuv thiaj li tau coj nws los yuav ua poj niam lawm ? Nws yog koj poj niam, koj cia li coj nws mus thiab koj khiav mus kom deb !”
20 Fas Las Oos tso neeg xa Has Nplas rov los mus rau ntawm ciam teb, nws thiab nws poj niam thiab tas puas tsav yam uas nws muaj.

1 Has Nplas tawm Hais Nkws Tos teb mus, nws coj nws poj niam thiab nws lub cuab tam tas huv si. Nws kuj coj Los nrog lawv rov mus nyob rau Nes Zes. 2 Has Nplas nplua nuj kawg, nws muaj tsiaj txhu, muaj nyiaj thiab muaj kub ntau. 3 Nws maj mam tshais chaw mus. Nws rov qab mus txog Npes Thes, ntawm thaj chaw uas thaud nws tau tsa tsev tsam phooj, nyob nruab nrab ntawm Npes Thes thiab Ais, 4 nyob ntawm qhov chaw uas yav nram ntej, nws tau txhim ib lub thaj txi Ntuj. Nyob ntawd, Has Nplas rov hu txog HUAB TAIS lub npe.
5 Los, uas nws nrog Has Nplas, nws kuj muaj yaj muaj nyuj thiab muaj tsev tsam phooj. 6 Lub teb chaws tsis txaus sawv daws tsa tsev, vim nkawd muaj cuab yeej cuab tam ntau dhau ces tsis tau kev rau sawv daws nyob ua ke ntxiv. 7 Has Nplas cov tub zov tsiaj thiab Los cov tub zov tsiaj tau sib ceg ib cuam. Lub caij ntawd cov neeg Kas Nas Has thiab cov neeg Pes Lis Xis nyob hauv lub teb chaws. 8 Vim li ntawd Has Nplas thiaj hais rau Los tias: “Wb tsis txhob muaj kev tsis sib haum xeeb. Kuv cov tub zov tsiaj thiab koj cov tub zov tsiaj los yuav tsis txhob muaj kev tsis sib haum xeeb, vim wb yog ob kwv tij. 9 Tas nrho lub teb chaws twb qhib lug rau ntawm koj hauv ntej, puas yog ? Koj ncaim kuv mus mog. Yog koj mus sab laug ces kuv yuav mus sab xis ; yog koj mus sab xis, ces kuv yuav mus sab laug.”
10 Los tsa muag ntsia, nws pom lub tiaj Yos Las Das yog ib lub tiaj muaj dej nyob ze qhov txhia chaw thiab dav dav mus txog ncua rau As Xos, zoo li HUAB TAIS lub vaj, thiab zoo li teb chaws Hais Nkws Tos. Thaum ntawd, HUAB TAIS tsis tau rhuav Xos Dos Mas thiab Nkos Mos Las. 11 Los xaiv lub tiaj Yos Las Das huv si rau nws. Ces nws muab xub ke mus rau sab hnub tuaj. Nkawd thiaj sib ncaim li ntawd. 12 Has Nplas nyob hauv lub teb chaws Kas Nas Has, hos Los mus nyob hauv cov nroog hauv lub Tiaj. Los tsa nws cov tsev tsam phooj mus txog Xos Dos Mas. 13 Cov neeg Xos Dos Mas yog ib co neeg phem tas nrho, thiab lawv ua txhaum rau HUAB TAIS.
14 Thaum Los ncaim mus lawm, HUAB TAIS hais rau Has Nplas tias : “Tsa qhov muag ntsia, txij ntawm qhov koj nyob ko mus rau sab pej thiab sab naj, mus rau toob fab thiab xib fab. 15 Tas nrho lub teb chaws uas koj pom ntawd, kuv yuav muab rau koj thiab rau koj tsoom xeeb zeej xeeb ntxwv nyob mus li. 16 Kuv yuav ua kom koj cov xeeb ntxwv coob npaum li cov plua av nyob ntiaj teb. Yog leej twg suav txheeb cov plua av hauv ntiaj teb mas nws thiaj yuav suav txheeb koj cov xeeb zeej xeeb ntxwv. 17 Koj sawv, koj mus ncig kom txhua thaj av qhov ntev thiab qhov dav, vim kuv yuav muab pub rau koj.”
18 Ces Has Nplas tshais nws cov tsev tsam phooj, nws tsiv mus nyob ze cov ntoo Ntseej ntawm Mas Nples, uas nyob Hes Nploos. Nyob ntawd nws txhim ib lub thaj txi HUAB TAIS.

1 Thaum ntawd, As Las Fes uas yog tus vaj nyob Sis Nes As, As Lis Yos uas yog tus vaj nyob Es Las Xas, Kes Dos Laus Mes uas yog tus vaj nyob Es Las, thiab Tis Das uas yog tus vaj nyob Nkaus Yis, 2 lawv tuaj ib tog ua rog rau Npes Las uas yog tus vaj nyob Xos Dos Mas, rau Npis Sas uas yog tus vaj nyob Nkos Mos Las, rau Sis Nas Npos uas yog tus vaj nyob As Das Mas, rau Ses Mes Npes uas yog tus vaj nyob Xes Npaus Yis, thiab rau tus vaj nyob Npes Las uas yog Xos As.
3 Tsib tug hais tom qab no sib koom zog nyob hauv lub hav tiaj Xis Dis uas yog lub Hiav Txwv Ntsev. 4 Cov Kes Dos Laus Mes kav lawv tau kaum ob xyoos, tiam sis xyoo kaum peb lawv sawv ntxeev siab. 5 Xyoo kaum plaub Kes Dos Laus Mes thiab cov vaj uas nrog nws koom siab tuaj txog. Lawv ntaus yeej cov Les Fais nyob As Tes Los Kas Nas Yis, cov Xus Xis nyob Has, cov Es Mis nyob hauv lub tiaj Kis Yas Tas Yis, 6 thiab cov Hos Lis nyob saum cov roob Xes Is mus rau Es Pas Las uas nyob ntawm ntug teb chaws suab puam. 7 Ces lawv tig rov qab mus txog tus Kaus Dej Txiav Txim uas nyob Kas Des. Lawv los ntaus tau lub teb chaws As Mas Les Xis tas nrho thiab ntaus yeej cov As Mos uas nyob Has Xas Xoos Tas Mas. 8 Ces tus vaj Xos Dos Mas, tus vaj Nkos Mos Las, tus vaj As Das Mas, tus vaj Xes Npus Yis, thiab t us vaj Npes Las (los yog Xos As), sawv tuaj mus ntaus rog hauv lub hav Xis Dis, 9 lawv koom ntaus tus vaj Kes Dos Laus Mes uas nyob Es Las, tus vaj Tis Das uas nyob Nkaus Yis, tus vaj As Las Fes uas nyob Sis Nes As, thiab tus vaj As Lis Yos uas nyob Es Las Xas, lawv plaub leeg sawv tiv tsib leeg. 10 Nyob hauv lub hav Xis Dis muaj qhov roj hmab dub, ces thaum cov vaj Xos Dos Mas thiab Nkos Mos Las khiav, lawv poob rau hauv cov qhov ntawd lawm, cov seem khiav mus nkaum nyob pem roob. 11 Tog yeej rog lwg Xos Dos Mas thiab Nkos Mos Las tej toob xib, tej txhiam xwm noj haus nqa mus tas huv si. 12 Lawv kuj ntes Los uas yog Has Nplas tus kwv tus tub uas nws nyob Xos Dos Mas, thiab lwg nws lub cuab tam tas huv si lawm, lawv mam rov mus. 13 Muaj ib tug neeg khiav dim mus hais qhia Has Nplas uas yog neeg Hes Nplaws. Has Nplas nyob ze tus As Mos Mas Nples cov Ntoo Ntseej. Mas Les yog Es Kos thiab As Nes nkawd kwv tij. Lawv nrog Has Nplas tuaj ib tog.
14 Thaum Has Nplas hnov tias nws tus tub xeeb ntxwv raug luag ntes lawm, nws sau nws cov tub rog thiab cov swm neeg tau peb puas kaum yim leej. Nws coj lawv caum luag qab mus txog Daas. 15 Has Nplas muab nws cov neeg faib, ces thaum tsaus ntuj lawm, nws mam li ntaus. Lawv ntaus yeej. Nws caum cov neeg tua Los mus txog Hos Npas, uas nyob pem qaum Das Mas. 16 Nws txeeb tau tas puas tsav yam rov qab. Nws coj nws tus tub Los thiab Los tej cuab yeej cuab tam, cov poj niam thiab cov neeg tas nrho rov los.
17 Thaum Has Nplas mus ntaus yeej Kes Dos Laus Mes lawm, Has Nplas nrog cov vaj uas tuaj nws tog tab tom rov los, ces tus vaj Xos Dos Mas tuaj ntsib nws hauv lub hav Sas Ves (uas hu ua Vaj Ntxwv lub Hav).
18 Mes Kis Xes Des, uas yog tus vaj nyob Xas Les nqa ncuav mov thiab cawv tuaj. Nws yog tus Tswv Ntuj nyob siab tus leej choj. 19 Nws hais cov lus foom hmoov no rau Has Nplas : “Thov kom tus Tswv Ntuj nyob siab uas tsim lub ntuj thiab lub ntiaj teb, foom hmoov zoo rau Has Nplas. 20 Thov kom tus Tswv Ntuj nyob siab nto koob meej, vim nws muab koj cov yeeb ncuab tso rau hauv koj lub xib teg lawm.”
Ces Has Nplas muab ib feem kaum ntawm tas puas tsav yam nws muaj, pub rau Mes Kis Xes Des. 21 Tus vaj Xos Dos Mas hais rau Has Nplas tias : “Koj muab cov neeg rau kuv, koj yuav tej cuab yeej cuab tam tib si mus ua koj tug.” 22 Tiam sis Has Nplas teb rau tus vaj Xos Dos Mas tias : “Kuv tsa tes cog lus rau tus Tswv Ntuj Nyob Siab uas tsim lub ntuj lub teb tias 23 kuv tsis yuav ib txoj xov los ib txoj hlua khau los ib yam dab tsi uas yog koj tug li, ces koj yuav hais tsis tau tias ‘kuv tau ua kom Has Nplas nplua nuj tuaj.’ 24 Kuv tsis yuav dab tsi rau kuv li. Kuv tsuas yuav tej yam noj rau kuv cov tub txib tau noj thiab yam puav ua dej siab rau cov neeg uas nrog kuv, xws li As Nes, Es Kos, thiab Mas Nples. Lawv yuav tsum tau txais ib qho nqe zog ua lawv tug.”

1 Thaum tej xwm no dhau tas lawm, HUAB TAIS yees tawm los hais lus rau Has Nplas hnov li no : “Koj txhob ntshai mog, Has Nplas! Kuv yog daim leem phiaj thaiv koj. koj yuav txais koob haum loj kawg.”
2 Has Nplas teb tias : “HUAB TAIS Tswv Ntuj, koj yuav muab dab tsi pub rau kuv ? Kuv twb yuav dua, kuv tsis muaj tub muaj kiv…”
3 Has Nplas hais ntxiv tias : “Koj tsis pub kom kuv muaj ib tsob noob li ces ib tug qhev uas yug hauv kuv tsev yuav los txais kuv lub cuab tam.”
4 HUAB TAIS lo lus tseem nrov tuaj rau Has Nplas tias : “Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj ib tug tub uas yog tseem koj roj ntsha tiag.”
5 HUAB TAIS coj Has Nplas mus nraum zoov thiab hais rau nws tias : “Koj tsa muag ntsia saum ntuj thiab suav cov hnub qub saib koj suav puas txheeb.” Ces nws hais tias : “Koj cov xeeb ntxwv yuav coob npaum li ntawd.”
6 Has Nplas ntseeg HUAB TAIS, ces HUAB TAIS muab Has Nplas lub siab ntseeg suav ua kev ncaj rau Has Nplas.
7 HUAB TAIS hais rau nws tias : “Kuv yog tus HUAB TAIS uas tau kom koj tawm hauv lub teb chaws Uj uas nyob Kas Ntes los mus nyob lub teb chaws uas kuv yuav muab rau koj, ua koj tug.”
8 Has Nplas teb tias : “HUAB TAIS Tswv Ntuj, dab tsi thiaj yuav qhia rau kuv paub tias kuv tau lub teb chaws ua kuv tug ?”
9 HUAB TAIS hais rau nws tias : “Koj mus coj ib tug xyuas nyuj muaj peb xyoos, ib tug nkauj tshis muaj peb xyoos, ib tug txiv yaj muaj peb xyoos, ib tug poj nquab thiab ib tug me nyuam nquab los rau kuv tso.”
10 Has Nplas coj cov tsiaj raws li hais los rau HUAB TAIS. Nws muab cov tsiaj phua nruab nrab, nws muab ib sab teeb rau sab xis ib sab teeb rau sab laug, tiam sis nws tsis phua cov noog. 11 Dav nyuj ya ntxiag los noj cov tsiaj, tab sis Has Nplas nplawm kom dav ya.
12 Thaum lub hnub tab tom poob qho, Has Nplas ib ce tsaug tas, thiab muaj ib qho ntshai loj kawg los laum Has Nplas. 13 Ces HUAB TAIS hais rau nws tias : “Kuv qhia rau koj paub tseeb tias koj tsoom tub ki yuav mus ua qhua nyob ib lub teb chaws uas tsis yog lawv lub. Lawv yuav ua qhev nyob ntawd thiab yuav raug luag quab yuam lawv plaub puas xyoo. 14 Tiam sis kuv yuav muab txim rau haiv neeg uas quab yuam lawv, ces tom qab ntawd lawv yuav dim los thiab yuav nqa cuab yeej cuab tam ntau nrog lawv los. 15 Ntawm koj, mas koj yuav tau mus nrog koj cov yawg koob nyob kaj lug, koj yuav nyob laus nkoos koj mam mus zwm av. 16 Lawv yuav nyob plaub tiam neeg, lawv mam li rov los nyob ntawm no, vim yav nram ntej ntawd, cov neeg As Mos txoj kev phem tseem phem tsis tau txaus.”
17 Thaum lub hnub poob qho lawm thiab tsaus ntuj lawm, ces muaj ib lub qhov txos ncho pa lug thiab ib teg tsau cig cig los hla ntawm cov sab nqaij kis nruab nrab. 18 Hnub ntawd, HUAB TAIS nrog Has Nplas cog lus li no : “Kuv muab lub teb chaws no rau koj tsoom xeeb ntxwv nyob, txij tus dej nyob Hais Nkws Tos teb mus txog ntua tus Dej Loj, tus dej Aws Fas Tes. 19 Yog lub teb chaws uas cov Kes Nis, cov Kes Nis Xis, cov Kas Moos, 20 cov His Tis, cov Pes Lis Xis, cov Les Fais, 21 cov As Mos, cov Kas Nas Has, cov Ntsis Nkas Sis, thiab cov Yes Npus Xis nyob.”

1 Xas Lais uas yog Has Nplas poj niam yug tsis tau me nyuam rau Has Nplas. Xas Lais muaj ib tug ntxhais txib, yog ib tug ntxhais Hais Nkws Tos hu ua As Nkas. 2 Xas Lais hais rau Has Nplas tias : “Koj twb pom tias HUAB TAIS tsis pub kuv muaj me nyuam li. Ua li mas koj mus yuav kuv tus ntxhais txib. Tej zaum nws yog tus yuav muab me nyuam rau kuv.” Ces Has Nplas mloog Xas Lais hais.
3 Thaum Has Nplas los nyob tau kaum xyoo hauv Kas Nas Has teb lawm, mas nws poj niam Xas Lais muab nws tus ntxhais txib Hais Nkws Tos cob rau Has Nplas, kom nws tus txiv yuav ua poj niam. 4 Has Nplas mus ntsib As Nkas ces As Nkas xeeb tub. Thaum As Nkas pom tias nws xeeb tub lawm, ces nws tsis hwm Xas Lais ua nws tus tswv ntxiv. 5 Xas Lais thiaj hais rau Has Nplas tias : “Nws ua saib tsis taus kuv li ntawd los yog tim koj kom ua. Twb yog kuv muab kuv tus ntxhais txib cob rau hauv koj xub ntiag, cas txij thaum nws pom tias nws xeeb tub lawd, nws cia li tsis hwm kuv ntxiv. Cia Tswv Ntuj txiav txim rau kuv thiab rau koj.”
6 Has Nplas hais rau Xas Lais tias : “Koj tus ntxhais txib nyob hauv koj lub xib teg, koj yuav ua li cas rau nws los nyob ntawm koj siab xav.”
Xas Lais thiaj ua nruj ua tsiv rau As Nkas, ces As Nkas khiav. 7 HUAB TAIS tus Tshiab mus ntsib As Nkas ze ntawm ib lub qhov dej txhawv nyob hauv tiaj suab puam, yog lub qhov dej uas nyob ntawm txoj kev mus rau lub zos Suj.
8 HUAB TAIS tus Tshiab nug tias : “As Nkas, Xas Lais tus ntxhais txib, koj los qhov twg los thiab koj yuav mus qhov twg ?”
As Nkas teb tias : “Yog kuv khiav kuv tus tswv Xas Lais.” 9 HUAB TAIS tus Tshiab hais rau As Nkas tias : “Koj rov qab mus nrog koj tus tswv nyob, koj mloog nws lus mog.”
10 HUAB TAIS tus Tshiab hais tias : “Kuv yuav ua kom koj cov xeeb ntxwv coob coob tsis muaj leej twg suav tau.” 11 HUAB TAIS tus Tshiab hais rau As Nkas tias : “Koj cev xeeb tub lawm, koj yuav yug ib tug tub, koj yuav tis nws npe hu ua Is Mas Es, vim HUAB TAIS hnov koj lub suab quaj lawm. 12 Nws yuav yog ib tug neeg zoo nkaus li ib tug luj qus, nws yuav tsa tes ntaus sawv daws thiab sawv daws yuav tsa tes ntaus nws. Nws yuav ua neej tsis haum nws tsoom kwv tsoom tij.”
13 As Nkas tis npe rau HUAB TAIS uas tau nrog nws hais lus hu li no: “Koj yog Es Los Is.”
Vim nws hais tias : “Ua cas thaum nws tawm los rau kuv pom tas lawm, kuv tseem muaj txoj sia thiab tseem pom thaj chaw no ntxiv ?”
14 Vim li ntawd lub qhov dej ntawd thiaj siav npe hu ua Las Hais Los Is, nyob nruab nrab ntawm Kes Des thiab Npes Les. 15 As Nkas yug tau ib tug tub rau Has Nplas. Has Nplas tis npe rau tus tub uas As Nkas yug hu ua Is Mas Es. 16 Has Nplas muaj yim caum rau xyoo thaum As Nkas yug Is Mas Es rau nws.

1 Thaum Has Nplas muaj cuaj caum cuaj xyoos, HUAB TAIS yees tawm los hais rau nws tias : “Kuv yog Es Sas Dais. Koj yuav mus kev ntawm kuv xub ntiag tsis tseg thiab yuav ua neeg ncaj. 2 Kuv nrog koj cog lus, thiab kuv yuav ua kom koj huam vam.”
3 Ces Has Nplas txhos caug pe, ntsej muag ti av. Tswv Ntuj hais li no rau Has Nplas : 4 “Ntawm kuv mas kuv nrog koj cog lus li no : Koj yuav ua txiv rau ntau haiv neeg. 5 Luag yuav tsis hu koj ua Has Nplas ntxiv. Koj yuav hu ua Has Nplas Has, vim kuv muab koj los ua txiv rau ntau haiv neeg. 6 Kuv yuav ua kom koj huam vam. Ntau haiv neeg yuav tawm hauv koj los, thiab ntau tus vaj yuav sawv hauv koj los. 7 Kuv yuav nrog koj cog lus thiab nrog haiv neeg uas tawm hauv koj cog lus; kuv lo lus cog yuav nyob mus li txheej dhau txheej tiam dhau tiam. Kuv yuav ua koj tus Tswv Ntuj thiab ua haiv neeg uas tawm hauv koj los tus Tswv Ntuj.
8 Kuv yuav muab lub teb chaws uas koj nyob no rau koj thiab rau haiv neeg uas tawm hauv koj los. Kuv yuav muab tas nrho lub teb chaws Kas Nas Has rau nej ua nej tug mus li tsis muaj caij kawg, thiab kuv yuav ua nej tus Tswv Ntuj.”
9 Tswv Ntuj hais rau Has Nplas Has tias : “Ntawm koj mas koj yuav ua raws li kuv lo lus uas kuv nrog koj cog, koj thiab haiv neeg uas tawm hauv koj los, nej yuav ua raws li ntawd mus tiam dhau tiam. 10 Kuv lo lus uas nrog koj cog, thiab nrog koj caj ces cog, thiab nej yuav tsum ua raws nraim, mas muaj li no: Tas nrho nej cov tub yuav tsum txais lub cim txiav tawv. 11 Nej yuav txiav nej daim tawv noov, qhov no yuav ua ib lub cim qhia tias kuv thiab nej tau cog lus.
12 Thaum nej cov tub yug los tau yim hnub lawm, mas nej yuav ua lub cim txiav tawv rau txhua tus, yuav ua li no mus tiam dhau tiam, rau txhua tus uas yug hauv nej tsev, rau tus uas nej muab nyiaj muas ntawm luag los huv tib si. 13 Nej yuav ua lub cim txiav tawv rau tus uas yug hauv tsev thiab tus uas nej muab nyiaj muas los huv si. Nej yuav khaws kuv lo lus kuv nrog nej cog nyob hauv nej cev nqaij tas mus ib txhis. 14 Tus uas tsis tau txais lub cim txiav tawv, tus tub uas luag tsis tau txiav nws daim tawv noov, tus ntawd yuav raug tshem tawm hauv nws tsev neeg mus, vim nws tau hla lo lus kuv nrog nej cog lawm.”
15 Tswv Ntuj hais rau Has Nplas Has tias : “Koj tus poj niam Xas Lais, koj yuav tsis hu nws ua Xas Lais ntxiv, koj yuav hu nws ua Xas Las. 16 Kuv yuav foom hmoov zoo rau nws thiab kuv yuav muab ib tug tub yug ntawm nws los rau koj. Kuv yuav foom hmoov zoo rau nws, ntau haiv neeg yuav sawv hauv nws los, ntau tus vaj kav tej haiv neeg yuav sawv hauv nws los.”
17 Ces Has Nplas Has pw nthi khwb rwg hauv av, nws tuaj dab ros, vim nws xav hauv nruab siab tias : “Ib tug tub puas yuav yug tau ntawm ib tug txiv neej muaj ib puas xyoo los ? Thiab Xas Las twb muaj cuaj caum xyoo lawm, nws puas tseem yuav muaj taus me nyuam ?”
18 Has Nplas Has hais rau Tswv Ntuj tias : “Thov kom Is Mas Es ua neej nyob ntawm koj xub ntiag.”
19 Tiam sis Tswv Ntuj rov teb tias : “Tsis yog nws, koj poj niam Xas Las yuav yug ib tug tub rau koj, koj yuav tis nws npe hu ua His Xas Has, kuv yuav nrog nws cog lus. Yog ib txog kev cog lus nyob mus li. Kuv yuav ua nws tus Tswv Ntuj thiab ua nws caj ces tus Tswv Ntuj.
20 Hais txog Is Mas Es los kuv tau hnov koj lo lus thov lawm. Kuv yuav foom hmoov zoo rau nws, kuv yuav ua kom nws tsim noob ntau, yuav ua kom nws huam vam. Nws yuav yug tau kaum ob tug ua hau, thiab kuv yuav ua kom nws yog ib haiv neeg loj. 21 Tus kuv yuav nrog cog lus mas yog His Xas Has uas lwm xyoo rov txog lub zim txwv no, Xas Las yuav yug rau koj.”
22 Thaum Tswv Ntuj nrog nws tham li no tas, mas Tswv Ntuj ncaim Has Nplas Has rov mus. 23 Ces Has Nplas Has muab nws tus tub Is Mas Es, tas cov tub uas yug hauv nws tsev, tas cov tub txib uas nws tau xuas nyiaj muas los, tas nrho cov txiv neej hauv nws tsev neeg tib si, nws muab sawv daws ua lub cim txiav tawv tib hnub uas Tswv Ntuj tau nrog nws tham ntawd. 24 Has Nplas Has muaj cuaj caum cuaj xyoos thaum nws ua lub cim txiav tawv rau nws, 25 hos nws tus tub Is Mas Es muaj kaum peb xyoos thaum nws ua lub cim txiav tawv rau.
26 Tib hnub ntawd kiag Has Nplas Has thiab nws tus tub Is Mas Es tau ua lub cim txiav tawv.
27 Thiab tas nrho cov txiv neej hauv nws tsev, cov yug hauv tsev, thiab cov xuas nyiaj muas ntawm luag los huv tib si puav leej tau nrog nws ua lub cim txiav tawv.

1 HUAB TAIS yees tawm los rau Has Nplas Has pom nyob hauv tsob qab ntoo qhib ntawm Maas Les, thaum nws tab tom zaum ntawm nws lub qhov rooj tsev ntaub, yog lub sij hawm
uas sov tshaj thaum nruab hnub nrig.
2 Nws tsa muag saib, nws pom peb tug txiv neej tuaj sawv ze ntawm nws. Nws pom dheev lawv, nws cia li sawv tsees ntawm nws lub qhov rooj tsev ntaub mus txais lawv, nws khoov hauv av pe lawv.
3 Nws hais tias : “Huab Tais, yog koj saib kuv muaj nqis no thov koj tsis txhob hla ntawm koj tus tub txib tsis nres xyuas kuv li. 4 Kuv mam li kom lawv nqa me ntsis dej los rau nej ntxuav ko taw, ces nej thiaj zoo so hauv tsob qab ntoos no. 5 Thiab kuv yuav nrhiav ib qho mov rau nej noj kom nej lub siab muaj zog ces nej mam li mus ntxiv, vim twb yog li no, nej thiaj hla ntawm kuv puas yog ?” Ces lawv teb nws tias : “Ua li koj hais.”
6 Has Nplas Has thiaj maj nrawm nroos mus hauv nws lub tsev ntaub mus cuag Xas Las thiab hais rau nws tias: “Koj tsuag tsuag mus luj peb taig hmoov nplej, cov hmoov nplej uas qab qab, koj muab do, muab puab ua ib co ncuav mov.”
7 Has Nplas Has tso sas ntws mus xyuas nws pab tsiaj, nws ntes kiag ib tug xyuas nyuj mos tab tom qab, nws muab cob kiag rau nws tus tub txib coj mus ua kom siav sai sai. 8 Ces Has Nplas Has nqa mis nyuj khov thiab mis nyuj haus thiab tus nyuj mos uas twb ua siav lawm coj los rau rau ntawm lawv xub ntiag. Nws sawv ntsug ze lawv nyob ntawm tsob qab ntoo, cia lawv noj mov.
9 Lawv nug nws tias : “Koj poj niam Xas Las mus qhov twg lawm ?”
Has Nplas Has teb tias : “Nws nyob hauv tsev tsam phooj.”
10 Ib tug thiaj hais tias : “Lwm xyoo tav lub zim txwv no, mas kuv yuav rov tuaj xyuas koj dua, thaum ntawd koj poj niam Xas Las yuav yug tau ib tug tub.” Xas Las hnov, vim nws nyob hauv sab qhov rooj tsev tsam phooj, ntawm tus txiv neej nrob qaum mloog. 11 Has Nplas Has thiab Xas Las nkawd twb laus laus thiab muaj hnub nyoog nchav heev lawm. Xas Las twb tsis ua li tej poj niam ntxiv lawm. 12 Ces Xas Las tuaj dab ros hauv nws nruab siab tias : “Zaum no kuv twb laus lawm thiab kuv tus txiv los twb laus laus, kuv tseem yuav rov paub txoj kev zoo siab thiab lod ?” 13 Tab sis HUAB TAIS hais rau Has Nplas Has tias : “Ua cas Xas Las thiaj luag hais tias : ‘Niag laus li kuv, tseem yuav yug tau me nyuam thiab ?’
14 Puas muaj ib yam uas HUAB TAIS ua tsis tau ? Lwm xyoo kuv yuav rov tuaj ntsib koj dua tib lub caij no raws li kuv tau teem, thaum ntawd Xas Las yuav muaj ib tug tub.”
15 Xas Las tsis kam lees, nws hais tias : “Kuv tsis tau luag.”
Nws hais li ntawd vim nws ntshai. Tiam sis HUAB TAIS hais tias : “Koj twb luag tiag.”
16 Thaum peb tug txiv neej tab tom sawv kev mus, lawv ntsia pom Xos Dos Mas. Has Nplas Has kuj nrog lawv mus thiab, nws coj lawv kev. 17 HUAB TAIS hais hauv nruab siab tias : “Kuv puas yuav zais tsis qhia Has Nplas Has txog qhov uas kuv npaj yuav ua ? 18 Vim hais tias nws yuav yog ib haiv neeg loj thiab muaj hwj chim, nws yuav yog lub chaw ua rau txhua haiv neeg hauv ntiaj teb tau kev sib foom hmoov zoo. 19 Kuv twb tau xaiv nws, kom nws qhia nws cov tub thiab nws tsev neeg yuav yug yav tom ntej, kom sawv daws ua lub neej raws nraim li HUAB TAIS txoj cai, yog yuav tsum txiav txim thiab coj raws txoj kev ncaj ncees. Yog lawv coj li ntawd mas HUAB TAIS thiaj li yuav pub kom Has Nplas Has tau raws li qhov nws tau cog lus.”
20 Ces HUAB TAIS hais tias : “Muaj ib lub suab cem Xos Dos Mas thiab Nkos Mos Las nrov kawg tuaj txog kuv vim lawv niaj hnub ua txhaum loj. 21 Yog li kuv yuav nqes mus xyuas saib lawv puas tau ua phem npaum li lub suab nrov tuaj los tsis tau, ces kuv thiaj paub.” 22 Ob tug txiv neej sawv kev mus rau Xos Dos Mas lawm. Tshuav HUAB TAIS tseem nrog Has Nplas Has nyob. 23 Has Nplas Has txav zog los ze, nws nug tias : “Koj puas yuav txo cov neeg ncaj nrog cov neeg txhaum ? 24 Tej zaum yuav muaj li tsib caug leej neeg ncaj nyob hauv lub nroog, koj puas yuav muab lawv rhuav, tsis zam rau lub nroog tab yog muaj lawv nyob hauv ? 25 Thov kom zaj tswv yim uas rhuav tus siab ncaj nrog tus txhaum ntawd nyob deb koj. Koj txhob cia tus siab ncaj nrog tus neeg txhaum tuag. Thov kom lub tswv yim ntawd nyob deb koj. Tus txiav txim rau lub ntiaj teb, nws yuav tsis txiav txim ncaj lod ?”
26 HUAB TAIS teb tias : “Yog kuv nrhiav tau tsib caug leej neeg ncaj nyob hauv lub nroog Xos Dos Mas, kuv yuav zam rau lub nroog tas huv si vim lawv.”
27 Has Nplas Has rov hais tias : “Kuv yog plua av xwb, tsis kav kuv tseem muaj cuab kav nrog kuv tus Huab Tais hais. 28 Vim tias, tej zaum tsis muaj txog tsib caug leej neeg ncaj, yog tsawg
tsib leeg, koj puas yuav rhuav lub nroog tas huv si vim tsawg tsib leeg ntawd ?” HUAB TAIS teb tias : “Kuv yuav tsis rhuav, yog tias kuv nrhiav tau plaub caug tsib leeg ncaj.”
29 Has Nplas Has rov hais dua tias : “Tej zaum muaj plaub caug leej ?” HUAB TAIS teb tias : “Kuv yuav tsis rhuav, vim plaub caug leej ntawd.”
30 Has Nplas Has hais tias : “Thov kom kuv tus Huab Tais txhob npautaws thiab cia kuv hais lus. Tej zaum muaj peb caug leej xwb ?”
HUAB TAIS teb tias : “Kuv yuav tsis rhuav, yog kuv nrhiav tau peb caug leej.”31 Has Nplas Has hais tias : “Kuv ua neeg muaj cuab kav tas zog, kuvthiaj nrog kuv tus Huab Tais hais ntxiv : Tej zaum nrhiav tau nees nkaum leej xwb?”
HUAB TAIS teb tias : “Kuv yuav tsis rhuav, vim nees nkaum leej ntawd.”32 Has Nplas Has hais tias : “Thov kom kuv tus Huab Tais tsis txhobnpau taws, kuv tseem yuav hais ib zaugntxiv yog zaum kawg : Tej zaum yuav nrhiav tau kaum leej xwb ?”
HUAB TAIS teb tias : “Kuv yuav tsis rhuav, vim kaum leej ntawd.”
33 HUAB TAIS nrog Has Nplas Hastham tas, nws mus lawm. Has Nplas Has rov qab mus tsev.

1 Ob tug Tshiab tuaj txog Xos Dos Mas thaum yuav tsaus ntuj, Los zaum ntawm lub rooj vag nkag chaws mus hauv lub nroog. Thaum Los pom dheev nkawd, nws sawv tsees mus txais nkawd, nws khoov ti av hawm nkawd. 2 Nws hais tias : “Ob tug txiv hlob, kuv thov neb nkag los hauv neb tus tub txib lub tsev, los pw ib hmos, los ntxuav ko taw, tag kis neb mam li mus ntxiv.” Nkawd teb tias : “Wb tsis los, wb mam mus pw tom tshav puam.”
3 Tiam sis Los cheem nkawd tas siab nrho. Nkawd yig tsis dhau, thiaj li ua siab nkag mus so hauv Los tsev. Los npaj ib pluag mov rau nkawd, nws ci ib co ncuav mov tsis xyaw poov xab, ces nkawd noj mov.
4 Lawv tseem tsis tau pw, cov neeg hauv lub nroog txawm siv tuaj vij Los lub tsev tag. Tas nrho cov neeg hauv Xos Dos Mas tuaj, cov hluas thiab cov laus tuaj huv tib si tsis seem ib tug li. 5 Lawv hu Los hais tias : “Ob tug txiv neej uas hmo no tuaj so hauv koj tsev nyob qhov twg lawm ? Koj coj nkawd tawm los cia peb muab nkawd txhom ua dev saib !”
6 Los tawm plaws ntawm qhov rooj mus nraum lawv, nws muab qhov rooj kaw nkaus, 7 nws hais tias : “Cov kwv tij, kuv thov nej tsis txhob ua phem li ntawd ! 8 Nej mloog kuv hais : Kuv muaj ob tug ntxhais tseem dawb huv, kuv mam coj nkawd tuaj rau nej. Nej xav ua li cas rau nkawd los nyob ntawm nej siab nyiam. Thov nej tsis txhob ua dab tsi rau ob tug txiv neej, vim nkawd tuaj so hauv kuv lub ru tsev xwb.”
9 Tiam sis lawv teb zom zaws tias : “Txav kev ! Nej ntsia saib, nws tuaj nyob peb av xwb, nws tseem cav yuav txiav txim rau peb thiab ! Peb yuav muab koj tsim kom pov khawv nkaus, kom tshaj qhov peb ua rau nkawd thiab ntag !” Ces lawv sib sib zog muab Los thawb kom lawv tau txav los tsoo lub qhov rooj. 10 Tiam sis ob tug txiv neej cev tes tuaj rub Los rau hauv tsev thiab kaw lub qhov rooj rau. 11 Nkawd ua kom cov neeg nyob nraum zoov qhov muag tsis pom kev, tsis hais cov yau los cov hlob huv tib si, ces lawv nrhiav tsis tau lub qhov rooj lawm.
12 Ob tug txiv neej hais rau Los tias : “Koj puas tseem muaj leej twg nyob ntawm no ntxiv thiab ? Koj cov tub, koj cov ntxhais, tas koj cov neeg nyob hauv lub nroog no, koj yuav tsum hais kom lawv cia li tawm hauv thaj chaw no mus. 13 Vim wb yuav muab thaj chaw no rhuav. Tau muaj ib lub suab qw tuaj rau HUAB TAIS hais txog lawv qhov phem, ces HUAB TAIS thiaj xa wb tuaj muab lawv rhuav kom tu noob.”
14 Los thiaj li mus nrog cov uas yuav ua nws vauv tham. Nws hais rau lawv tias : “Nej cia li sawv kev khiav tawm ntawm thaj chaw no mus, vim HUAB TAIS yuav rhuav lub nroog no.”
Tiam sis cov vauv xav hais tias nws dag xwb. 15 Thaum yuav kaj ntug, ob tug Tshiab rov hais rau Los tias : “Koj cia li sawv ! Coj koj poj niam thiab koj ob tug ntxhais ntawd mus, tsam ib ntsis nej yuav raug xwm txheej li lub nroog thiab.”
16 Los tseem ua xyem xyav, ces ob tug txiv neej nthos nkaus Los tes nrog nws poj niam thiab ob tug ntxhais, vim HUAB TAIS khuv leej lawv. Nkawd muab lawv cab tawm plaws rau sab nroog nraud.
17 Thaum lawv tab tom tawm, HUAB TAIS hais rau Los tias : “Koj cia li khiav cawm koj txoj sia! Koj tsis txhob tig ntsia rov tom qab, tsis txhob theem nram tiaj, koj khiav mus nkaum lawm pem roob ces koj thiaj yuav tsis tuag !”
18 Los teb nkawd tias : “Ntshai kuv yuav tsis mus ped, kuv thov koj, HUAB TAIS ! 19 Koj twb tau saib koj tus tub txib muaj nqe thiab koj twb tau hlub kuv kawg nkaus koj thiaj cawm kuv kom kuv tseem muaj sia nyob. Yog kuv khiav mus pem roob ces ntshai tsam kuv khiav tsis yeej ces kuv xub tuag lawm. 20 Muaj ib lub nroog nyob tsis deb, khiav kuj yuav txog sai. Thiab yog ib lub nroog me tsis tseem ceeb dab tsi. Thov cia kuv mus nkaum ntawd ; vim tsuas yog ib lub nroog me tsis tseem ceeb dab tsi, ces kuv yuav dim.
21 HUAB TAIS teb rau Los tias : “Kuv yuav cia koj ua li koj thov, kuv yuav tsis rhuav lub nroog uas koj hais ntawd. 22 Kav tsij maj zeeg khiav mus rau ntawd. Vim tias yog koj mus tsis tau txog, mas kuv yuav ua tsis tau dab tsi ua ntej li.”
Vim li no lub nroog ntawd thiaj muaj lub npe hu ua Xos As. 23 Thaum lub hnub tawm plaws, ces Los khiav nkag plaws rau hauv Xos As. 24 Ces HUAB TAIS nchuav kiag ib co nag leej faj xyaw hluav taws los hlawv Xos Dos Mas thiab Nkos Mos Las. 25 Nws muab cov nroog thiab lub tiaj rhuav du lug nrog rau cov neeg nyob hauv cov nroog thiab tej nroj tsuag tas huv tib si. 26 Los poj niam tig ntsia rov tom qab, nws cia li khov ua ib tug ncej ntsev lawm.
27 Thaum kaj ntug, Has Nplas Has sawv ntxov mus nyob ntawm thaj chaw uas nws tau nrog HUAB TAIS hais lus.
28 Nws tsa muag ntsia Xos Dos Mas, Nkos Mos Las thiab tas nrho lub tiaj, nws pom pa taws ncho lug cuag li tawm hauv ib lub qhov txos tuaj. 29 Ces thiaj hais tau tias, thaum Tswv Ntuj rhuav cov nroog nram tiaj, nws tseem nco ntsoov txog Has Nplas Has, thiab nws tau npo Los dim ntawm qhov tuag thaum nws rhuav cov nroog uas Los nyob.
30 Los tawm ntawm Xos As, nws nce mus nyob pem roob. Nws ob tug ntxhais kuj nrog nws mus, vim nws ntshai nyob Xos As. Los coj nws ob tug ntxhais mus nrog nws nkaum hauv ib lub qhov tsua. 31 Tus ntxhais hlob hais rau tus yau tias : “Wb txiv laus lawm, thiab teb chaws no tsis muaj neeg rau wb yuav ua txiv xws li sawv daws. 32 Yog li wb muab cawv rau wb txiv haus ces wb nrog nws pw. Wb ua li ntawd wb txiv thiaj li yuav muaj ib tsob noob cia.”
33 Hmo ntawd, nkawd muab cawv rau nkawd txiv haus kom qaug. Tus ntxhais hlob mus nrog nws txiv pw. Nws txiv tsis hnov thaum nws los pw los thaum nws sawv li. 34 Tag kid, tus ntxhais hlob hais rau tus yau tias : “Nag hmo, kuv tau nrog kuv txiv pw lawm. Hmo no wb rov qab muab cawv rau nws haus dua, ces koj mus nrog nws pw. Wb ua li ntawd wb txiv thiaj muaj ib tsob noob cia.”
35 Hmo ntawd nkawd rov qab muab cawv rau nkawd txiv haus, ces tus ntxhais yau mus nrog nws txiv pw. Nws txiv tsis hnov thaum nws los pw los thaum nws sawv mus li. 36 Los ob tug ntxhais thiaj muaj nkawd txiv me nyuam. 37 Tus hlob yug tau ib tug tub, nws muab tis npe hu ua Mos As. Nws yog cov neeg Muas niaj hnub no tus yawg koob. 38 Tus ntxhais yau kuj yug tau ib tug tub thiab, nws muab tis npe hu ua Npes Nas Mis. Nws yog cov neeg Npes Nes As Moos niaj hnub no tus yawg koob.

1 Has Nplas Has sawv kev mus rau lub teb chaws Nes Zes. Nws mus nyob thaj tsam nruab nrab ntawm Kas Des thiab Sus. Ces nws ho mus nyob Zes Las. 2 Has Nplas Has hais txog nws poj niam Xas Las tias: “Yog kuv tus muam.”
Ces tus vaj nyob Zes Las, hu ua As Npis Mes Les, tuaj coj Xas Las mus yuav lawm. 3 Tiam sis, hmo ntuj Tswv Ntuj tuaj xyuas As Npis Mes Les hauv npau suav thiab hais rau nws tias :
“Koj yuav tuag vim tus poj niam uas koj mus yuav los nws muaj txiv lawm.”
4 As Npis Mes Les tseem tsis tau chwv tus poj niam li, nws hais tias : “Kuv tus Huab Tais, koj puas yuav tua ib tug neeg tsis txhaum ? 5 Twb yog nws hais rau kuv tias : ‘Yog kuv tus muam’. Tus poj niam kiag los nws twb hais rau kuv tias: ‘Yog kuv tus nus’, Txawm kuv tau ua li ntawd los kuv lub siab yeej dawb paug thiab kuv tes tseem huv si.”
6 Tswv Ntuj teb nws hauv nruab npau suav hais tias : “Kuv yeej paub hais tias koj muaj lub siab dawb paug tiag, vim li ntawd kuv thiaj li tau cheem kom koj tsis txhob ua txhaum rau kuv, kuv thiaj li ua kom koj txhob mus chwv nws. 7 Zaum no, koj yuav tsum xa tus poj niam rov qab rau tus txiv neej : nws yog ib tug yaj saub, nws yuav thov ntuj zam rau koj ces koj yuav ciaj. Yog koj tsis xa nws rov qab, mas kuv hais tseeb rau koj tias koj yuav tuag xwb, thiab koj tsev neeg yuav tuag tas.”
8 As Npis Mes Les sawv ntxov ntxov, nws hu tas nrho nws cov neeg tuaj, nws piav zaj no rau lawv mloog. Cov neeg ntshai kawg. 9 Ces As Npis Mes Les hu Has Nplas Has tuaj, thiab nws hais rau Has Nplas Has tias : “Koj ua dab tsi li ntawd rau peb ? Kuv tau ua dab tsi txhaum koj, ua cas koj thiaj li rub ib lub txim loj tas npaud los rau kuv thiab kuv lub teb chaws ris ? Koj tsis muaj cai yuav ua li ntawd rau kuv.”
10 As Npis Mes Les tseem hais rau Has Nplas Has tias : “Vim li cas koj ua li ntawd rau peb ?”
11 Has Nplas Has teb tias : “Yog vim kuv xav hais tias ntshai yuav tsis muaj kev hwm Ntuj nyob qhov no li, ces luag yuav muab kuv tua pov tseg kom tau kuv poj niam xwb. 12 Thiab nws yeej yog kuv tus muam tiag thiab ; nws yog kuv txiv tus ntxhais tiam sis tsis yog kuv niam tus ntxhais, nws ho yog kuv poj niam thiab. 13 Thaum Tswv Ntuj tau cia kuv nyob tsis muaj chaw, deb ntawm kuv txiv lub tsev, kuv tau hais rau nws tias : Yog koj hlub kuv mas koj yuav ua li no : Txhua qhov chaw wb mus txog mas koj yuav hais tias kuv yog koj tus nus no.” 14 As Npis Mes Les muab yaj muab nyuj, muab tub qhe ntxhais qhev pub rau Has Nplas Has, thiab xa nws poj niam Xas Las rov qab rau nws.
15 As Npis Mes Les hais rau Has Nplas Has tias : “Kuv lub teb chaws qhib lug rau koj. Koj xav mus nyob qhov twg los nyob ntawm koj nyiam.”
16 Nws hais rau Xas Las tias : “Ntawm no yog ib txhiab lub txiaj nyiag uas kuv muab rau koj tus nus. Yog muab npog cov neeg uas koj nrog nyob lub qhov muag kom lawv pom tias kuv twb kho koj lawm.”
17 Has Nplas Has thov Ntuj rau As Npis Mes Les, ces Tswv Ntuj kho As Npis Mes Les, kho nws poj niam thiab nws cov ntxhais qhev kom lawv muaj taus me nyuam. 18 Vim HUAB TAIS tau ua kom tas nrho cov poj niam nyob hauv As Npis Mes Les lub tsev tsis txhob xeeb tub, vim qhov lawv coj Xas Las uas yog Has Nplas Has poj niam los lawm.

1 HUAB TAIS pub rau Xas Las raws li nws tau hais thiab ua rau Xas Las raws li nws tau cog lus. 2 Ces Xas Las xeeb tub, nws yug ib tug tub rau Has Nplas Has thaum nws laus lawm, yug rau lub caij uas Tswv Ntuj tau teem cia. 3 Has Nplas Has tis npe rau nws tus tub uas Xas Las yug hu ua His Xas Has. 4 Has Nplas Has ua lub cim txiav tawv rau His Xas Has thaum nws muaj yim hnub, raws li Tswv Ntuj tau hais kom ua. 5 Has Nplas Has muaj ib puas xyoo nkaus thaum nws tus tub His Xas Has yug los.
6 Ces Xas Las thiaj hais tias : “Tswv Ntuj tau pub kom kuv muaj chaw zoo siab luag ntxhi. Txhua leej uas tau hnov txog kuv yuav luag ntxhi thiab.”
7 Xas Las tseem hais tias : “Tsis muaj leej twg yuav hais tau rau Has Nplas Has tias Xas Las yeej yuav yug me nyuam xwb. Tiam sis zaum no, txawm tias nws laus lawm los kuv kuj yug tau ib tug tub rau nws thiab.”
8 Thaum tus me nyuam loj txaus lawm, lawv muab nws cais mis. Has Nplas Has ua ib pluag mov loj loj rau His Xas Has hnub cais nws mis ntawd. 9 Xas Las xauj pom Has Nplas Has tus tub uas yug ntawm tus poj Hais Nkws Tos los, nrog nws tus tub His Xas Has ua si.
10 Xas Las hais rau Has Nplas Has tias: “Ntiab koj niag ntxhais qhev ntawd thiab nws tus tub khiav mus. Tsis pub kom niag ntxhais qhev ntawd tus tub los nrog kuv tus tub His Xas Has sib txeeb lub cuab tam.”
11 Cov lus no ua rau Has Nplas Has tsis zoo siab, thiab ntxhov siab rau nws tus tub. 12 Tiam sis Tswv Ntuj hais rau nws tias : “Koj tsis txhob nyuaj siab txog tus me nyuam thiab koj tus ntxhais txib. Xas Las xav kom koj ua dab tsi mas koj ua raws li ntawd, vim His Xas Has thiaj yog tus yuav ua koj caj ces thiab yuav khaws koj lub npe kom nyob mus li. 13 Hos tus tub ntawm tus ntxhais qhev los kuv kuj yuav muab nws ua ib haiv neeg loj vim nws yog koj roj ntsha.”
14 Tag kis tom qab, Has Nplas Has sawv ntxov ntim mov thiab ib hnab tawv dej rau As Nkas, nws muab tus me nyuam tsaws rau saum As Nkas xub pwg, ces nws kom nkawd tawm mus. As Nkas mus poob zoo rau hauv lub tiaj suab puam Npes Xas Npes. 15 Thaum nws lub hnab tawv dej tas lawm, nws muab tus me nyuam tso tseg rau hauv ib tsob qab ntoos, 16 ces nws txav mus zaum deb ntawm tus me nyuam li ib ncua hneev. Nws xav twj ywm hais tias : “Kuv tsis xav pom tus me nyuad tuag.” Nws zaum ces nws quaj quaj. 17 Tswv Ntuj hnov tus me nyuam lub suab quaj, ces Tswv Ntuj tus Tshiab hu saum ntuj tuaj rau As Nkas tias :
“As Nkas, koj quaj dab tsi ? Koj tsis txhob txhawj vim Tswv Ntuj tau hnov tus me tub lub suab quaj lawm. 18 Koj cia li mus tsa tus me tub kom sawv los thiab koj yuav saib nws zoo, vim kuv yuav muab nws tsa ua ib haiv neeg loj.”
19 Tswv Ntuj qhib As Nkas qhov muag ces As Nkas pom ib lub qhov dej. Nws thiaj nqa hnab mus ntim dej coj los rau tus me nyuam haus. 20 Tswv Ntuj nrog nraim nws. Nws hlob tiav txuj hauv teb chaws suab puam. Ces nws ua ib tug neeg tua hneev. 21 Nws ua neej nyob hauv lub tiaj suab puam Pas Las. Nws niam muab ib tug nyab Hais Nkws Tos rau nws yuav.
22 Thaum lub caij ntawd, As Npis Mes Les nrog nws tus thawj tub rog Pis Kos tuaj hais rau Has Nplas Has tias : “Vim Tswv Ntuj pab koj nyob hauv txhua yam uas koj ua. 23 Ua li mas, zaum no koj cog lus rau kuv ntawm Tswv Ntuj xub ntiag tias koj yuav tsis dag kuv, thiab tsis dag kuv caj ces, kuv tsev neeg, thiab koj yuav nrog kuv ntaus phooj ywg, thiab ntaus phooj ywg rau lub teb chaws uas koj tuaj poob no, ib yam li kuv tau nrog koj ntaus phooj ywg.”
24 Has Nplas Has teb hais tias : “Kuv cog lus li ntawd !”
25 Has Nplas Has hais rau As Npis Mes Les txog lub qhov dej uas As Npis Mes Les cov tub txib tau liam cai siv. 26 As Npis Mes Les teb tias : “Kuv tsis paub leej twg yog tus tau ua li ntawd. Koj tsis tau hais qhia rau kuv ib zaug li. Kuv nyuam qhuav hnov txog qhov ntawd hnub no xwb.”
27 Has Nplas Has muab yaj muab nyuj ua paj tshab pub rau As Npis Mes Les, ces nkawd muaj kev sib cog lus. 28 Has Nplas Has muab xya tus me nyuam yaj los tso rau ib cag. 29 As Npis Mes Les nug nws tias : “Cas koj muab xya tus me nyuam yaj los tso rau ib cag li no ?”
30 Has Nplas Has teb tias : “Yog muab rau koj, koj yuav tsum yuav xya tus me nyuam yaj no los ua puav pheej tias kuv yog tus uas tau khawb lub qhov dej.”
31 Vim li no thaj chaw ntawd thiaj tau lub npe tias Npes Xas Npes, vim nkawd ob leeg sib cog lus nyob ntawd.
32 Thaum nkawd tau cog lus nyob Npes Xas Npes tas lawm, As Npis Mes Les sawv kev nrog nws tus thawj tub rog rov qab mus rau teb chaws Fis Lis Tis.
33 Has Nplas Has cog ib tsob ntoo rau ntawm Npes Xas Npes, ces nws hu txog tus HUAB TAIS Tswv Ntuj nyob mus li lub npe nyob ntawd.
34 Has Nplas Has nyob ntev xyoo hauv lub teb chaws Fis Lis Tis.

1 Thaum tej xwm no dhau tas lawm, Tswv Ntuj sim Has Nplas Has siab. Nws hu tias : “Has Nplas Has ! Has Nplas Has !” Has Nplas Has teb tias : “Kuv nyob ntawm no !”
2 Tswv Ntuj hais tias : “Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj.”
3 Tag kis, Has Nplas Has sawv ntxov, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag ntsia pom thaj chaw ntawd tseem nyob deb.
5 Has Nplas Has hais rau nws ob tug tub txib tias : “Neb nrog tus luj nyob ntawm no. Kuv tus me nyuam wb mus kom txog tid, wb yuav hawm Ntuj, wb mam rov los ntawm neb.”
6 Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus.
7 His Xas Has nug nws txiv Has Nplas Has tias : “Kuv txiv !”
Has Nplas Has teb tias : “Me tub, koj hais dab tsi !”
His Xas Has hais ntxiv tias : “Ua cas pom hluav taws thiab cov taws xwb, ua li tus yaj yuav coj los hlawv txi Ntuj nyob qhov twg ?”
8 Has Nplas Has teb tias : “Me tub, Tswv Ntuj mam li muab tus yaj uas yuav txi Ntuj rau wb.”
Ces nkawd ob leeg taug kev mus ntxiv. 9 Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum cov taws saum lub thaj txi Ntuj. 10 Has Nplas Has tsa tes mus nthos rab riam yuav coj los tua nws tus tub. 11 Tiam sis HUAB TAIS tus Tshiab hu saum ntuj tuaj rau nws tias : “Has Nplas Has ! Has Nplas Has !” Has Nplas Has teb tias : “Kuv nyob ntawm no !”
12 Tus Tshiab hais tias : “Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv.”
13 Has Nplas Has tsa muag ntsia pom ib tug laug tshis uas ob tug kub daig hauv ib koog pos. Ces nws mus muab tus laug tshis los hlawv txi Ntuj hloov nws tus tub chaw. 14 Has Nplas Has tis npe rau thaj chaw ntawd hu ua “HUAB TAIS yuav pub.” Ces zaum no thiaj muaj lo lus hais kam tias “Saum lub roob HUAB TAIS yuav pub.”
15 HUAB TAIS tus Tshiab rov hu zaum ob saum ntuj tuaj rau Has Nplas Has, 16 nws hais tias : “HUAB TAIS hais tias : Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub twm zeem los txi rau kuv, 17 mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog. 18 Tas txhua haiv neeg nyob ntiaj teb yuav tuav txog koj tsoom xeeb ntxwv lub npe los sib foom hmoov zoo, vim koj tau mloog kuv lus.”
19 Has Nplas Has rov qab los cuag nws ob tug tub txib, ces lawv sawv kev rov los rau Npes Xas Npes. Has Nplas Has nyob Npes Xas Npes.
20 Thaum tej xwm no dhau lawm, lawv qhia rau Has Nplas Has tias Mis Las Kas kuj yug tau ib co tub rau nws tus kwv Nas Hos thiab. 21 Tus tub hlob hu ua Us, Us tus kwv hu ua Npaws, cov yau tom qab muaj Kes Mus Es uas yog As Las txiv, 22 Kes Xes, Has Xos, Pis Das, Yis Las, Npes Tus Es. 23 Npes Tus Es yug Les Npes Kas. Cov no yog yim leej tub uas Mis Las Kas yug rau Nas Hos uas yog Has Nplas Has tus kwv. 24 Nas Hos muaj ib tug niam yau hu ua Les Us Mas. Nws kuj yug tau ib co tub thiab : yog Tes Npas, Nkas Has, Tas Has, thiab Mas As Kas.

1 Xas Las ua neej txog ib puas nees nkaum xya xyoo. 2 Ces nws tuag nyob Kis Lias As Npas uas yog Hes Nploos, nyob teb chaws Kas Nas Has. Has Nplas Has muab nws pam thiab quaj nws nyob ntawd. 3 Has Nplas Has mus hais rau Hes cov tub tias : 4 “Kuv yog ib tug qhua tuaj poob rau hauv nej. Kuv thov nej pub ib qho chaw rau kuv kom kuv tau coj kuv tus tuag mus zais.”
17 Ces Es Plhoos daim teb uas nyob Mas Pes Las nyob ze ntawm Mas Nples, daim teb thiab lub qhov tsua thiab tas cov ntoo nyob hauv daim teb huv tib si, 18 poob ua Has Nplas Has tug. Hes cov tub ua cov tau nrog paub nrog pom thiab tas nrho cov neeg uas hla ntawm lub qhov rooj vag mus hauv nws lub nroog tau nrog pom. 19 Ces Has Nplas Has coj Xas Las mus los rau hauv lub qhov tsua hauv daim teb Mas Pes Las, nyob ze ntawm Mas Nples, hauv teb chaws Kas Nas Has.

1 Thaum ntawd Has Nplas Has laus lawm, thiab muaj hnub nyoog nchav. HUAB TAIS tau foom hmoov zoo rau Has Nplas Has nyob hauv txhua yam tib si. 2 Has Nplas Has hais rau nws tus tub txib uas laus dua cov, thiab yog tus saib nws lub cuab tam tias : 3 “Koj cev tes npuab kuv plab hlaub, thiab koj cog lus rau HUAB TAIS uas yog tus Tswv lub ntuj thiab lub ntiaj teb hnov tias koj yuav tsis nrhiav ib tug poj niam Kas Nas Has rau kuv tus tub yuav. 4 Koj yuav mus pem kuv lub teb chaws, mus xaiv ib tug poj niam nyob hauv kuv tsev neeg coj los rau kuv tus tub His Xas Has yuav.”
5 Tus tub txib nug tias : “Ntshai tsam tus poj niam ntawd tsis kam nrog kuv los nyob teb chaws no, kuv puas yuav tsum coj koj tus tub mus lawm pem lub teb chaws uas koj yug los ?”
6 Has Nplas Has teb tias : “Koj yuav tsis txhob coj kuv tus tub mus. 7 HUAB TAIS, yog tus Tswv lub ntuj thiab lub ntiaj teb, nws tau coj kuv mus deb kuv lub teb chaws thiab nws tau cog lus rau kuv tias nws yuav muab lub teb chaws no rau kuv cov xeeb ntxwv, tus HUAB TAIS ntawd yuav xa nws tus Tshiab mus ua koj ntej, kom koj nrhiav tau ib tug poj niam nyob hauv kuv lub teb chaws rau kuv tus tub. 8 Yog tus poj niam tsis kam nrog koj los, mas koj yuav tsis txhaum dab tsi, tab sis koj yuav tsis txhob coj kuv tus tub mus.”
9 Tus tub txib cev tes mus npuab nws tus tswv Has Nplas Has plab hlaub thiab nws cog lus tias nws yuav ua txoj hauj lwm ntawd kom tau. 10 Tus tub txib thauj kaum tus ntxhuav, nws nqa nws tus tswv cov toob xib zoo tib si ces nws sawv kev mus. Nws mus txog lub nroog Nas Hos, nyob As Las Nas Has Las Yis teb.
11 Nws tso cov ntxhuav txhos caug nyob sab nroog nraud, nyob ze lub qhov tim thaj. Yog thaum tsaus ntuj, lub caij uas cov poj niam yuav tuaj nqa dej. 12 Tus tub txib hais tias : “Kuv tus tswv Has Nplas Has tus HUAB TAIS ! Hnub no kuv thov koj pab kuv. Koj ua rau kuv pom tias koj hlub kuv tus tswv Has Nplas Has tiag. 13 Kuv sawv nyob ze tus dej uas cov ntxhais nyob hauv nroog yuav tuaj ce dej. 14 Yog kuv hais rau ib tug hluas nkauj hais tias : ‘Koj qaij koj lub thoob rau kuv haus dej,’ yog nws teb tias : ‘Koj haus mas, thiab kuv tseem yuav muab dej rau koj cov ntxhuav haus thiab,’ mas tus ntawd yog tus uas koj xaiv rau koj tus tub txib His Xas Has ntag. Kuv thiaj yuav paub tias koj ua rau kuv pom tias koj hlub kuv tus tswv.”
15 Tus tub txib tseem hais lus tsis tau tas, Les Npes Kas twb tuaj lawm. Les Npes Kas yog Npes Tus Es, uas yog Mis Las Kas tus tub, tus ntxhais. Mis Las Kas yog Nas Hos uas yog Has Nplas Has tus kwv tus poj niam. Les Npes Kas nqa lub thoob saum xwb pwg. 16 Tus ntxhais ntawd zoo nkauj kawg, nws lub cev nkauj xwb tseem dawb huv, tsis tau muaj dua txiv neej txav ze nws. Nws nqes mus hauv hav dej, nws ce dej puv nws lub thoob ces nws rov qab los. 17 Tus tub txib khiav mus tos nws kev, hais rau nws tias : “Thov koj pub me ntsis dej hauv koj lub thoob rau kuv haus.”
18 Tus ntxhais teb tias : “Koj haus mas, txiv ntxawm.”
Nws txo plhuav lub thoob rau ntawm nws txhais npab thiab muab rau tus tub txib haus. 19 Thaum nws muab dej rau tus tub txib haus tas, nws hais tias : “Kuv yuav mus nqa dej los rau koj cov ntxhuav haus kom pov khawv thiab.”
20 Ces nws nchuav kiag nws thoob dej rau hauv lub dab thiab nws khiav ntsuj rov mus nram hav dej mus ce dej los rau cov ntxhuav haus huv tib si. 21 Tus tub txib ua twj ywm ntsia tus ntxhais ntawd, nws ua xyem xyav tias HUAB TAIS puas tau qhia tus ntxhais rau nws lawm los tsis tau. 22 Thaum cov ntxhuav haus dej tas lawm, tus tub txib muab ib lub kauj ntswg kub hnyav li kaum txiaj los ntxig rau tus ntxhais taub ntswg thiab nws muab ob lub kauj toog kub ntxig rau tus ntxhais ob sab npab. 23 Nws hais tias: “Koj yog leej twg tus ntxhais ? Thov koj qhia kuv paub. Puas muaj chaw nyob hauv koj txiv tsev rau peb so ib hmos ?”
24 Tus ntxhais teb tias : “Kuv yog Npes Tus Es tus ntxhais, Npes Tus Es yog Mis Las Kas tus tub uas nws yug rau Nas Hos.”
25 Nws tseem hais ntxiv tias : “Nyob hauv peb tsev muaj quav nyab thiab muaj zaub ntxhuav ntau, thiab muaj chaw pw.”
26 Ces tus tub txib txhos caug pe HUAB TAIS. 27 Nws hais tias: “Thov kom HUAB TAIS uas yog kuv tus tswv Has Nplas Has tus Tswv Ntuj nto koob meej. Nws hlub thiab ua siab zoo rau kuv tus tswv. HUAB TAIS tau coj kuv txoj hauv kev kom kuv ncaj qha tuaj txog ntua kuv tus tswv tus kwv lub tsev.” 28 Tus ntxhais khiav mus pem nws niam lub tsev mus piav tej uas nyuam qhuav muaj ntawd qhia rau lawv. 29 Les Npes Kas muaj ib tug nus hu ua Las Npaas. Las Npaas txawm khiav tawm mus nraum zoov mus ntsib tus tub txib tom hav dej. 30 Thaum nws pom dheev lub kauj ntswg thiab ob lub tooj npab uas nws tus muam coj, thiab hnov nws tus muam Les Npes Kas piav tias : “Tus txiv neej ntawd hais li no rau kuv,” Las Npaas cia li tawm tam sid mus tos tus tub txib uas tseem sawv ntsug ze ntawm cov ntxhuav nyob tom lub hav dej tos. 31 Las Npaas hais rau tus tub txib tias : “Tus tau txoj hmoov zoo ntawm HUAB TAIS, koj los tsev mog. Ua cas koj yuav nyob nraum zoov ? Kuv twb tu tsev tas lawm thiab npaj tau chaw rau cov ntxhuav nyob lawm.”
32 Tus tub txib thiaj chaws mus hauv lawv lub tsev. Las Npaas daws cov ntxhuav tej nra thiab nws muab dej rau tus tub txib thiab rau cov neeg nrog nws tuaj sawv daws ntxuav taw. 33 Lawv nqa mov los rau nws noj, tiam sis nws hais tias : “Kuv yuav tsis noj mov, yog kuv tsis xub hais qhov kuv tuaj tas tso.”
Las Npaas teb tias : “Koj hais saib.”
34 Tus tub txib hais tias: “Kuv yog Has Nplas Has tus tub txib. 42 Hnub no thaum kuv tuaj txog ntawm hav dej, kuv hais tias : ‘HUAB TAIS uas koj yog kuv tus tswv Has Nplas Has tus Tswv Ntuj, yog koj zoo siab coj kuv mus kom txog qhov zoo chaw mas thov koj ua rau kuv paub. 43 Kuv sawv nyob ze ntawm hav dej no, tus ntxhais twg tuaj kwv dej, yog kuv hais rau tias : ‘Thov koj muab me ntsis dej hauv koj lub thoob rau kuv haus.’ 44 Yog nws teb tias ‘Koj haus mas, thiab kuv yuav ce dej rau koj cov ntxhuav haus thiab.’ Mas tus ntawd yuav yog tus poj niam uas HUAB TAIS tau xaiv rau kuv tus tswv tus tub.’ 45 Kuv tseem tab tom hais zoo li no hauv siab tsis tau tas, ces Les Npes Kas twb nqa ib lub thoob saum xub pwg tuaj lawm. Les Npes Kas nqes mus hauv hav dej, nws ce tau dej, kuv hais rau nws tias : ‘Thov koj muab dej rau kuv haus.’ 46 Nws txo plhuav nws lub thoob thiab nws hais tias: ‘Koj haus mas, thiab kuv yuav muab dej rau koj cov ntxhuav haus thiab.’ Ces kuv tau haus dej thiab kuv cov ntxhuav kuj tau haus dej. 47 Kuv nug nws tias : ‘Koj yog leej twg tus ntxhais ?’ Nws teb tias : ‘Kuv yog Npes Tus Es tus ntxhais, Npes Tus Es uas yog Mis Las Kas yug rau Nas Hos.’ Ces kuv thiaj muab lub kauj no rau nws qhov ntswg thiab cov tooj npab rau nws ob txhais npab. 48 Kuv thiaj li pe HUAB TAIS thiab hawm nws, thiab kuv cav lus zoo txog HUAB TAIS, kuv tus tswv Has Nplas Has tus Tswv Ntuj uas nws lub siab zoo coj kuv kev tuaj yuav kuv tus tswv tus kwv tus ntxhais rau nws tus tub. 49 Zaum no, yog nej xav ua zoo rau kuv tus tswv mas nej hais rau kuv, yog nej tsis xav no los hais rau kuv paub, kuv thiaj paub mus lwm qhov.”
50 Las Npaas thiab Npes Tus Es hais tias : “Tej ntawd yog tuaj ntawm HUAB TAIS tuaj, peb tsis paub yuav hais li cas. 51 Les Npes Kas nyob ntawm koj xub ntiag, koj coj nws mus ua koj tus tswv tus tub poj niam raws li HUAB TAIS hais.” 52 Thaum Has Nplas Has tus tub txib hnov cov lus ntawd, nws txhos caug hauv av pe HUAB TAIS. 53 Nws thau ib co npauj nyiag npauj kub thiab ib co tsoos tsho los, nws muab pub rau Les Npes Kas. Nws kuj muab tej yam paj tshab muaj nqes pub rau Les Npes Kas tus nus thiab rau nws niam. 54 Ces tus tub txib thiab cov neeg nrog nws tuaj lawv thiaj noj mov thiab haus dej. Lawv pw ib hmos. Tag kis thaum lawv sawv, tus tub txib hais tias : “Nej cia kuv rov mus nram kuv tus tswv lub tsev.”
55 Ces Les Npes Kas tus nus thiab nws niam hais tias: “Cia tus ntxhais nrog peb nyob li kaum
hnub tej tso nws mam mus.”
56 Tiam sis tus tub txib teb tias : “Nej tsis txhob khuam kuv ntev. Yog HUAB TAIS coj kuv kev, kuv thiaj tuaj txog nej ; cia kuv rov qab mus kom txog kuv tus tswv lub tsev.”
57 Nkawd hais tias : “Cia peb hu tus ntxhais los nug saib nws hais li cas.”
58 Lawv hu Les Npes Kas los, lawv hais rau nws tias : “Koj puas xav nrog tus txiv neej ntawd mus ?”
Les Npes Kas teb tias : “Kuv xav.”
59 Ces lawv tso lawv tus muam Les Npes Kas thiab nws tus niam pub mis nrog Has Nplas Has tus tub txib thiab nws cov neeg mus. 60 Lawv foom lus zoo rau Les Npes Kas tias : “Peb leej muam ! koj mus mog. Thov kom koj huam vam mus nto txhiab ! Kom koj tsoom xeeb ntxwv mus txeeb tau lawv cov yeeb ncuab lub rooj loog.”
61 Les Npes Kas thiab nws cov ntxhais txib sawv kev, lawv caij cov ntxhuav thiab lawv raws tus txiv neej qab. Tus tub txib thiaj coj Les Npes Kas mus lawm. 62 His Xas Has rov tom lub qhov dej Las Hais Luas los, nws los nyob hauv lub teb chaws Nes Zes. 63 Thaum yav tsaus ntuj, nws tawm mus ncig ua si nraum zoov, nws ntsia pom ib co ntxhuav tuaj yuav txog. 64 Les Npes Kas kuj tsa muag ntsia pom His Xas Has thiab. Nws nqes plhuav saum tus ntxhuav rau hauv av. 65 Nws nug tus tub txib hais tias : “Tus txiv neej uas taug kev tuaj tos peb ntawd yog leej twg ?” Tus tub txib teb tias : “Yog kuv tus tswv.”
Ces Les Npes Kas thau nws daim ntaub khwb taub hau los vov nws. 66 Tus tub txib piav tas puas tsav yam txog txoj hauj lwm nws tau ua rau His Xas Has mloog. 67 Ces His Xas Has coj Les Npes Kas los nyob hauv nws lub tsev tsam phooj. Nws yuav Les Npes Kas ua nws poj niam. Nws nyiam Les Npes Kas. Ces nws tsis nco nws niam heev lawm.

7 Has Nplas Has ua neej txog ib puas xya caum tsib xyoos. 8 Ces Has Nplas Has mam tuag. Nws tau ua neej nyob laus nkoos, tau nyob ntev niaj ntau xyoo, nws mam mus cuag nws cov poj yawm txwv koob. 9 His Xas Has thiab Is Mas Es uas yog nws ob tug tub, nkawd muab nws coj mus los rau lub qhov tsua nyob Mas Pes Las, nyob hauv daim teb Es Plhoos, uas nyob ze Mas Nples. 10 Yog daim teb uas Has Nplas Has muas ntawm Hes cov tub los. Has Nplas Has thiab nws poj niam Xas Las nkawd ob lub ntxa nyob ntawd. 11 Has Nplas Has tuag tas, Tswv Ntuj foom hmoov zoo rau nws tus tub His Xas Has. Ces His Xas Has los ua tsev nyob ze ntawm lub qhov dej Las Hais Luas.
19 Nram no, yog zaj kwv huam hais txog His Xas Has uas yog Has Nplas Has tus tub. Has Nplas Has yug His Xas Has.
20 His Xas Has muaj plaub caug xyoo nws thiaj yuav Les Npes Kas, uas yog Npes Tus Es tus ntxhais thiab yog Las Npaas tus muam. 21 His Xas Has thov HUAB TAIS rau nws poj niam vim nws poj niam tsis muaj me nyuam. HUAB TAIS mloog His Xas Has zaj thov, ces nws poj niam Les Npes Kas xeeb tub.
22 Ob tug me nyuam sib ntaus nyob hauv Les Npes Kas plab, ces Les Npes Kas hais tias : “Yog zoo li no xwb mas puas tsim nyog ua neej nyob ntxiv ?”
Ces Les Npes Kas mus nug HUAB TAIS. 23 HUAB TAIS hais rau nws tias : “Muaj ob haiv neeg nyob hauv koj cev. Ob haiv neeg uas tawm ntawm koj los, yuav sib ncaim. Ib haiv neeg yuav kav ib haiv, tus hlob yuav tsob hwb tus yau.” 24 Thaum txog lub caij Les Npes Kas daws cev, nws yug tau ob tug tub ntxaib. 25 Tus hlob tawm los, nws yog neeg liab hau, thiab nws tuaj plaub thoob ib ce, zoo li nws hnav ib lub tsho plaub. Lawv tis nws npe hu ua Es Xas Ws. 26 Es Xas Ws tus kwv tawm los, nws txhais tes tuav rawv Es Xas Ws luj taws. Lawv tis nws npe hu ua Yas Kos. Thaum ob tug me nyuam ntawd yug los, His Xas Has muaj rau caum xyoo. 27 Ob tug tub hlob zuj zus. Es Xas Ws ua ib tug tub tua nqaij, nws nquag mus yos hav zoov. Yas Kos yog ib tug neeg nyob twj ywm, nws zov nws cov tsev tsam phooj. 28 His Xas Has hlub Es Xas Ws dua, vim nws nyiam noj nqaij. Les Npes Kas hlub Yas Kos dua.
29 Muaj ib zaug, Yas Kos tab tom ua zaub. Es Xas Ws mus yos rov los txog, nws sab kawg. 30 Es Xas Ws hais rau Yas Kos tias : “Kuv qaug zog npaum no, thov koj muab cov zaub liab liab ntawd rau kuv noj.” Tim qhov ntawd lawv thiaj hu nws ua Es Doos. 31 Yas Kos hais tias : “Koj muag koj txoj cai ua tub hlob rau kuv tso mas.”
32 Es Xas Ws hais tias : “Kuv twb yuav tuag ! Txoj cai ua tub hlob yuav muaj nqi dab tsi rau kuv ?”
33 Yas Kos hais tias : “Yog li no koj xub cog lus rau kuv tso. Ces Es Xas Ws cog lus thiab muag nws txoj cai ua tub hlob rau Yas Kos. 34 Ces Yas Kos muab nws tais noob taum thiab muab mov rau Es Xas Ws noj. Es Xas Ws noj mov haus dej tas ces nws sawv mus lawm. Es Xas Ws saib nws txoj cai ua tub hlob tsim txiaj li ntawd xwb.

1 His Xas Has laus lawm, nws qhov muag tsis pom kev. Nws hu nws tus tub hlob Es Xas Ws los cuag nws, nws hais tias : “Me tub !”
Tus tub teb tias : “Kuv txiv !”
2 His Xas Lais hais ntxiv tias : “Kuv laus lawm, kuv tsis paub hnub kuv yuav tuag. 3 Koj nqa ntaj nqa hmuv, nqa rab hneev thiab lub raj xub, koj mus yos tua nqaij los rau kuv noj. 4 Koj ua ib roog qav zoo li kuv xis rau kuv noj, ces kuv yuav foom hmoov zoo rau koj tso kuv mam tuag.”
5 Tab sis Les Npes Kas hnov His Xas Has hais li ntawd rau Es Xas Ws. Ces Es Xas Ws mus tua nqaij rau nruab tsuag lawm. 6 Les Npes Kas hais rau nws tus tub Yas Kos tias : “Kuv nyuam qhuav hnov koj txiv hais rau koj tij laug Es Xas Ws tias: 7 ‘Koj mus tua nqaij los ua ib pluag qav rau kuv noj tso kuv yuav foom hmoov zoo rau koj nyob ntawm HUAB TAIS xub ntiag tso kuv mam tuag no.’ 8 Nyem no, me tub, koj yuav tsum mloog kuv hais thiab ua
raws li kuv kom koj ua. 9 Koj mus xyuas cov tshis, koj ntes ob tug me nyuam thav tshis zoo nkauj los rau kuv npaj ib pluag mov rau koj txiv noj raws li koj txiv xis. 10 Koj yuav nqa tais nqaij mus rau koj txiv noj ces nws yuav foom hmoov zoo rau koj tas tso nws mam li tuag.”
11 Yas Kos hais rau nws niam Les Npes Kas tias : “Niad, kuv tij laug Es Xas Ws tuaj tuaj plaub, hos kuv daim tawv du du xwb. 12 Tej zaum ntshai kuv txiv yuav kov kuv, ces nws yuav paub tias kuv thuam nws, ces kuv yuav tau txais nws lo lus foom hmoov phem xwb tsis tau txais nws lo lus foom hmoov zoo.”
13 Nws niam teb tias : “Me tub, kuv mam ris lo lus phem ntawd. Nyem no, koj tsuas mloog kuv xwb. Kav tsij mus ntes ob tug thav tshis los rau kuv.”
14 Ces Yas Kos mus ntes ob tug thav tshis los rau nws niam npaj ib taig nqaij raws li nws txiv nyiam noj. 15 Les Npes Kas thiaj li muab Es Xas Ws cov khaub ncaws zoo tshaj rau nws tus tub ntxawg Yas Kos hnav. 16 Nws muab cov tawv tshis los qhwv Yas Kos ob txhais caj npab thiab lub caj dab. 17 Ces nws muab tais nqaij thiab phaj mov uas nws npaj tau rau Yas Kos tuav. 18 Yas Kos mus cuag nws txiv, nws hais tias : “Kuv txiv.”
Nws txiv nug tias : “Me tub, koj yog leej twg ?”
19 Yas Kos teb nws txiv tias : “Kuv yog koj tus tub hlob Es Xas Ws. Kuv twb ua tau tas raws li koj hais lawm. Koj sawv los zaum noj cov nqaij kuv tau mus tua, thiab koj foom hmoov zoo rau kuv.”
20 His Xas Has hais rau nws tus tub Yas Kos tias : “Ua cas koj ntsib nqaij sai ua luaj !” Yas Kos teb tias :
“Yog vim koj tus HUAB TAIS Tswv Ntuj pab kuv.”
21 His Xas Has thiaj hais rau Yas Kos tias : “Txav los ntawm no, kuv xuas koj saib koj puas yog kuv tus tub Es Xas Ws tiag.” 22 Yas Kos thiaj txav los rau nws txiv His Xas Has xuas nws. Nws txiv hais tias : “Lub suab yog Yas Kos lub, tab sis ob sab npab no yog Es Xas Ws ob sab !” 23 His Xas Has zeem tsis tau tias yog Yas Kos vim ob txhais npab tuaj plaub li Es Xas Ws li ces His Xas Has foom hmoov zoo rau Yas Kos. 24 Nws hais tias : “Koj puas yog kuv tus tub Es Xas Ws tiag ?”
Yas Kos teb tias : “Yog tiag.”
25 Ces His Xas Has hais tias : “Cev phaj rau kuv noj kuv tus tub cov nqaij saib, kuv yuav foom hmoov zoo rau koj.”
Yas Kos cev nqaij rau nws txiv noj, cev cawv rau nws txiv haus tas. 26 Nws txiv hais tias : “Me tub txav los ntawm no los nwj kuv saib.”
27 Yas Kos txav mus nwj nws txiv. Nws txiv tau hnia nws tus tub cov khaub ncaws tus ntxhiab, ces nws foom hmoov li no : “Kuv me tub ntxaib, koj zoo li ib daim teb av zoo uas HUAB TAIS tau foom hmoov zoo rau. 28 Thov kom Tswv Ntuj tso lwg los yug koj, thiab pub av zoo rau koj, pub nplej, pub cawv noj tsis tag haus tsis nqig rau koj. 29 Kom cov haiv neeg tsob hwb koj, kom cov teb chaws pe koj. Koj yuav yog ib tug thawj coj ntawm koj cov kwv tij, koj niam cov tub yuav khoov pe koj. Leej twg foom phem rau koj, mas nws yuav raug hmoov phem. Leej twg foom hmoov zoo rau koj, mas nws yuav tau txoj hmoov zoo !”

10 Yas Kos tso Npes Xas Npes teb tseg, nws sawv kev mus rau Has Laas teb. 11 Muaj ib hnub nws mus txog ib qho chaw, hnub twb poob qho lawm, nws thiaj pw ib hmos ntawd. Nws khaws ib lub pob zeb nyob ntawd los rau ncoo, nws pw tsaug zog nyob ntawd. 12 Nws ua ib zag npau suav : Nws pom ib tug ntaiv, tus taw txawb rau ntiaj teb, lub ntsis mus nto saum ntuj, hos Tswv Ntuj ib co Tshiab nce thiab nqes mus mus los los ntawm tus ntaiv. 13 Ces Yas Kos pom HUAB TAIS sawv ntawm nws xub ntiag thiab hais tias : “Kuv yog HUAB TAIS, kuv yog koj yawg Has Nplas Has tus Tswv Ntuj, thiab yog His Xas Has tus Tswv Ntuj. Thaj av uas koj tau los pw no, kuv muab rau koj thiab rau koj tsoom xeeb ntxwv. 14 Koj tsoom xeeb ntxwv yuav coob npaum li cov hmoov av nyob hauv av. Koj yuav nyob txij xib fab mus rau toob fab, pej fab mus rau naj fab. Txhua haiv neeg hauv ntiaj teb yuav sib foom hmoov zoo vim koj thiab vim koj tsoom xeeb ntxwv. 15 Kuv nrog koj nraim, txawm koj mus qhov twg los kuv yuav saib xyuas koj, thiab kuv yuav coj koj rov los nyob hauv lub teb chaws no, vim kuv yuav tsis tso koj pov tseg thiab yuav ua raws li kuv tau cog lus rau koj.”
16 Yas Kos tsim dheev nruab dab ntub los, nws hais tias : “HUAB TAIS nyob ntawm thaj chaw no tseeb tiag, ua cas kuv tsis paub !”
17 Yas Kos ntshai, ces nws hais tias : “Thaj chaw no muaj hwj xyeej kawg ! Yeej yog Tswv Ntuj ib lub tsev nyob thiab yog lub rooj ntug ntag !”
18 Yas Kos sawv ntxov, nws muab lub pob zeb uas nws siv ua hauv ncoo los teeb ua pej thuam, nws hliv roj ywg lub ntsis. 19 Nws tis npe rau thaj chaw ntawd hu ua Npes Thes. Hos yav thaud, mas lub nroog hu ua Lws.
20 Yas Kos fiv yeem zoo li no : “Yog Tswv Ntuj nrog nraim kuv thiab saib xyuas kuv ntawm txoj kev uas kuv taug, yog nws pub mov rau kuv noj, pub ris tsho rau kuv hnav, 21 yog kuv rov los txog kuv txiv tsev, tsis raug xwv txheej dab tsi, mas HUAB TAIS yuav ua kuv tus Tswv Ntuj, 22 hos daim pob zeb uas kuv muab teeb ua pej thuam no yuav yog Tswv Ntuj ib lub tsev nyob, thiab tas puas tsav yam uas koj pub rau kuv, mas kuv yuav muab ib feem kaum rov rau koj mus li.”

1 Yas Kos sawv kev mus rau lub teb chaws nyob sab hnub tuaj.
2 Nws pom ib lub qhov dej nyob ntawm cov nras teb, muaj peb pab yaj pw zom zaws ze ncig ntawd. Vim yog lub qhov dej uas lawv coj cov tsiaj tuaj haus dej ntawd. 4 Yas Kos nug cov tub zov yaj tias : “Cov kwv tij, nej tuaj qhov twg tuaj ?” Lawv teb tias : “Peb tuaj Has Laas tuaj.”
5 Nws hais rau lawv tias : “Nej puas paub Las Npaas, uas yog Nas Hos tus tub ?”
Lawv teb tias : “Peb paub.”
6 Nws nug lawv tias : “Nws puas noj qab nyob zoo ?” Lawv teb tias : “Nws nyob zoo thiab. Saib ! nws tus ntxhais Las Ses tab tom coj nws txiv pab yaj tuaj txog ntawd.”
9 Nws tseem nrog lawv tham, ces Las Ses coj nws txiv pab yaj tuaj txog, vim Las Ses yog ib tug neeg zov yaj. 10 Yas Kos pom dheev Las Ses uas yog nws dab laug Las Npaas tus ntxhais thiab pom nws dab laug pab yaj, nws txav los dov daim txiag zeb vov lub qhov dej thiab muab dej rau nws dab laug Las Npaas cov yaj haus. 11 Yas Kos nwj Las Ses, nws quaj kua muag poob dawb vog. 12 Nws thiaj qhia Las Ses tias nws txheeb Las Ses txiv thiab nws yog Les Npes Kas tus tub. Ces Las Ses khiav los hais qhia nws txiv. 13 Thaum Las Npaas hnov dheev tias yog Yas Kos, yog nws tus muam tus tub, mas Las Npaas khiav ceev ceev tuaj tos nws, muab nws puag rau hauv xub ntiag, nws nwj Yas Kos, thiab nws coj Yas Kos los tsev. Ces Yas Kos thiaj piav tas puas tsav yam rau Las Npaas mloog. 14 Las Npaas hais rau nws tias : “Koj yog kuv txha thiab kuv nqaij tiag tiag !”
Ces Yas Kos nrog Las Npaas nyob tau ib hlis nkaus.
15 Thaum ntawd Las Npaas hais rau Yas Kos tias : “Tsis yog vim koj txheeb ze kuv ces koj txawm yuav ua hauj lwm pub dawb rau kuv. Koj yuav tsum qhia kuv paub tias koj xav tau nqe zog npaum li cas.”
16 Las Npaas muaj ob tug ntxhais, tus hlob hu ua Les As, tus yau hu ua Las Ses.
17 Les As ob lub qhov muag zoo mos nyoos. Hos Las Ses lub cev xeeb tau xwm yeem, thiab lub ntsej muag zoo nkauj. 18 Yas Kos nyiam Las Ses, ces nws teb tias : “Kuv yuav ua hauj lwm pab koj xya xyoo kom tau koj tus ntxhais ntxawm Las Ses.”
19 Las Npaas hais tias : “Muab nws rau koj zoo dua muab rau ib tug qhua. Ua li mas koj nyob hauv kuv tsev mog.”
20 Ces Yas Kos ua hauj lwm tau xya xyoo kom tau Las Ses, tab sis nws mloog zoo li yog ob peb hnub xwb, vim nws nyiam Las Ses kawg. 21 Yas Kos hais rau Las Npaas tias : “Koj muab kuv poj niam rau kuv, vim kuv twb ua hauj lwm puv sij hawm lawm, kuv thiaj li mus nrog nws nyob tau.”
22 Las Npaas thiaj npaj ib rooj mov loj thiab caw tas nrho cov neeg ib cheeb tsam ntawd tuaj noj. 23 Thaum tsaus ntuj lawm, nws coj nws tus ntxhais Les As mus rau Yas Kos. Ces Yas Kos nrog tus ntxhais pw. 24 Las Npaas muab nws tus ntxhais txib Xis Pas pub rau nws tus ntxhais Les As ua ntxhais txib. 25 Tag kis kaj ntug, Yas Kos pom tias yog Les As. Yas Kos thiaj hais rau Las Npaas tias : “Koj ua dab tsi li ntawd rau kuv ? Kuv ua hauj lwm rau koj kom tau Las Ses. Ua cas koj dag kuv ?”
26 Las Npaas teb tias : “Nyob peb teb chaws, peb kev cai tsis pub tus niam hluas xub yuav txiv ua ntej tus niam laus. 27 Yog li koj ua ib lis piam tshoob tiav tso, ces kuv yuav muab tus niam hluas pub rau koj yuav thiab, tiam sis koj yuav tsum ua hauj lwm rau kuv xya xyoo ntxiv kom tau nws.”
28 Yas Kos thiaj ua raws li ntawd : Nws ua ib lis piam tshoob tiav, ces Las Npaas muab nws tus ntxhais Las Ses rau Yas Kos yuav ua poj niam. 29 Las Npaas muab nws tus ntxhais txib Npis Has pub rau nws tus ntxhais Las Ses ua ntxhais txib. 30 Yas Kos nrog Las Ses nyob. Nws nyiam Las Ses dua Les As. Nws nyob ua hauj lwm rau nws dab laug Las Npaas xya xyoo ntxiv.

23 Tib hmos ntawd, Yas Kos sawv, nws coj nws ob tug poj niam, nws ob tug ntxhais txib thiab nws kaum ib tug me nyuam, lawv hla tus dej Yas Npos. 24 Nws coj lawv hla tus dej, thiab coj tas puas tsav yam uas nws muaj nrog lawv hla dej mus rau sab tid. 25 Tshuav Yas Kos tib leeg nyob xwb. Hmo ntawd, muaj ib tug neeg nrog nws sib ntsuas zog ib hmos kaj ntug. 26 Nws kov tsis yeej Yas Kos, ces nws ntaus Yas Kos tus txha ntawm ntsag, tus qij txha ntawd qis lawm. 27 Nws hais rau Yas Kos tias : “Koj tso kuv, twb kaj ntug lawm.”
Tiam sis Yas Kos teb tias : “Yog koj tsis foom hmoov zoo rau kuv mas kuv tsis tso koj li.”
28 Tus neeg ntawd nug tias : “Koj hu li cas?”
Yas Kos teb tias : “Kuv hu ua Yas Kos.”
29 Nws hais ntxiv tias : “Koj yuav tsis hu ua Yas Kos ntxiv lawm, koj yuav hu ua His Xas Lais, vim koj muaj zog tiv tau Tswv Ntuj, thiab tiv tau neeg, thiab koj yeej lawm.”
30 Yas Kos thov tias : “Thov koj qhia koj lub npe rau kuv.” Tiam sis tus ntawd teb tias : “Vim li cas koj thiaj nug kuv lub npe ?”
Ib txhij ntawd nws foom hmoov zoo rau Yas Kos. 31 Yas Kos tis npe rau thaj chaw ntawd hu ua Pas Nws Es, nws hais tias : “Vim kuv tau pom Tswv Ntuj tim ntsej tim muag, tsis kav kuv txoj sia tseem nyob.”
32 Thaum hnub tuaj, Yas Kos twb hla dhau Pas Nws Es lawm. Nws mus kev qaij ntsag, nws deeg pauv. 33 Yog vim li no cov His Xas Lais thiaj caiv tsis noj txoj leeg ncej puab ntawm ntsag los txog niaj hnub no, vim Huab Tais ntaus Yas Kos txoj leeg ncej puab ntawm ntsag.

1 Tswv Ntuj hais rau Yas Kos tias: “Koj sawv, koj mus Npes Thes, koj mus nyob ntawd, koj yuav txhim ib lub thaj txi tus Tswv Ntuj uas thaum koj khiav koj tij laug Es Xas Ws, nws tau yees tawm los rau koj pom.”
2 Yas Kos hais rau nws tsev neeg thiab rau tas nrho cov neeg nrog nws tias : “Nej muab tej pej kum dab uas nyob hauv nej, pov tseg kom tas, nej ntxuav nej kom huv thiab hloov nej tej khaub ncaws. 3 Peb yuav nce mus pem Npes Thes ! Kuv yuav tsa ib lub thaj txi tus Tswv Ntuj uas thaum kuv ntxhov siab nws tau pab kuv, thiab thaum kuv mus kev nws tau pov hwm kuv.”
4 Lawv muab tas nrho cov pej kum dab uas lawv muaj thiab hle cov kauj ntseg uas lawv coj ntawm pob ntseg tas huv si rau Yas Kos, ces Yas Kos muab coj mus faus rau hauv tsob qab ntoos qhib uas nyob ze Xis Kes. 5 Ces lawv yaws lawv cov tsev tsam phooj. Ntuj ua kom cov nroog nyob ib ncig sawv daws ntshai : Tsis muaj neeg caum Yas Kos cov tub qab li. 6 Yas Kos tuaj txog Lws nyob teb chaws Kas Nas Has, uas yog Npes Thes, Yas Kos thiab tas nrho nws cov neeg huv tib si. 7 Nyob ntawd, Yas Kos txhim ib lub thaj txi Ntuj thiab nws tis lub npe Npes Thes rau thaj chaw ntawd, vim thaum nws khiav nws tij laug, Tswv Ntuj ua kom nws paub tias Tswv Ntuj nyob ntawd.
8 Thaum ntawd Des Npos Las uas yog Les Npes Kas tus niam pub mis, tuag nyob ntawd. Lawv muab nws faus rau nram qab Npes Thes, hauv tsob qab ntoo ntseej. Vim li no qhov chaw ntawd thiaj hu ua Tsob Ntoo Ntseej Kua Muag. 9 Tswv Ntuj tseem tau yees tawm los rau Yas Kos pom ntxiv, yog thaum nws rov ntawm Pas Das As Las los. Tswv Ntuj foom hmoov zoo rau nws. 10 Tswv Ntuj hais rau nws tias : “Koj lub npe yog Yas Kos, tab sis luag yuav tsis hu koj ua Yas Kos ntxiv, koj lub npe yuav hu ua His Xas Lais.”
Ces txij ntawd los, luag thiaj hu nws ua His Xas Lais. 11 Tswv Ntuj hais rau Yas Kos tias : “Kuv yog Es Sas Dais. Koj huam vam mus mog. Ib haiv neeg, thiab ib co haiv neeg yuav yug ntawm koj los, ib co vaj yuav tawm ntawm koj lub cev los.
12 Lub teb chaws uas kuv tau muab rau Has Nplas Has thiab muab rau His Xas Has, kuv muab rau koj, thiab kuv yuav muab rau koj tsoom xeeb ntxwv uas yuav los tom qab koj.”
13 Ces Tswv Ntuj rov mus lawm.
14 Yas Kos thiaj tsa ib lub thaj rau qhov chaw uas Tswv Ntuj nrog nws tham, nws muab pob zeb los ua lub thaj, nws txi Ntuj thiab hliv roj rau saum lub thaj. 15 Yas Kos tis lub npe Npes Thes rau thaj chaw uas Tswv Ntuj tau nrog nws hais lus.

2 Yos Xes zaj kwv huam yog zoo li no : Thaum Yos Xes muaj kaum xya xyoo, mas nws hluas kawg, nws mus nrog nws cov tij laug zov yaj, yog nrog nws txiv ob tug poj niam Npis Las thiab Xis Pas cov tub zov. Yos Xes rov los qhia lawv txiv txog tej yam phem uas nws cov tij laug ua. 3 His Xas Lais hlub Yos Xes tshaj nws cov tub huv si, vim Yos Xes yug thaum nws twb laus lawm. Ces nws kom lawv xaws ib lub tsho ntev txaij zoo nkauj rau Yos Xes hnav. 4 Nws cov tij laug pom tias nws txiv hlub nws tshaj nws cov tij laug txhua tus, mas lawv sawv daws ntxub nws, lawv tsis xav nrog nws hais ib lo lus zoo li. 5 Yos Xes ua ib zag npau suav, ces nws piav qhia nws cov tij laug. Ua li mas lawv haj yam ntxub nws heev. 6 Nws hais rau lawv tias : “Nej mloog saib, kuv nyuam qhuav ua ib zag npau suav zoo li no : 7 Kuv pom zoo li peb tab tom pav nplej ua tej tes nyob tom teb. Ua cas kuv tes nplej cia li sawv ntseg ntseg, hos nej cov tes nplej los nyob ncig kuv tes nplej, ces nej cov tes nplej pe kuv tes nplej.”
8 Yos Xes cov tij laug teb nws tias : “Puas yog koj xav ua vaj kav peb, los ua hau tswj peb ?”
Yog vim li ntawd, lawv haj yam ntxub nws, vim nws zaj npau suav thiab nws cov lus. 9 Nws tseem ua dua lwm zaj npau suav, uas nws piav rau nws cov tij laug. Nws hais tias : “Kuv rov ua dua ib zag npau suav : Kuv pom zoo li yog lub hnub, lub hli, thiab kaum ib lub hnub qub khoov ntawm kuv xub ntiag pe kuv.”
10 Nws piav li ntawd rau nws txiv thiab nws cov tij laug, ces nws txiv cem nws, thiab hais rau nws tias : “Koj ua tej zaj npau suav txawv ua luaj ! Koj xav tias kuv thiab koj niam thiab koj cov tij laug peb, yuav tsum khoov hauv av pe koj no ?”
11 Nws cov tij laug khib kawg li, tab sis nws txiv nco ntsoov cov lus ntawd cia rau nruab siab.
12 Yos Xes cov tij laug mus zov lawv txiv pab yaj noj zaub nyob Xis Kes. 13 His Xas Lais hais rau Yos Xes tias : “Koj cov tij laug mus zov tsiaj dua tom lub tshav zaub Xis Kes lawm puas yog ? Los, kuv xa koj mus xyuas lawv.” Yos Xes teb tias : “Kuv zoo siab mus.”
14 His Xas Lais hais tias : “Koj mus xyuas saib koj cov tij laug thiab cov tsiaj nyob li cas lawm, koj xa xov rov los rau kuv paub.”
Nws kom Yos Xes taug lub hav Hes Nploos mus. Ces Yos Xes mus txog Xis Kes. 15 Muaj ib tug neeg mus yos tom cov nras, nws ntsib Yos Xes. Tus neeg nug Yos Xes tias : “Koj nrhiav dab tsi ?”
16 Yos Xes teb tias : “Kuv nrhiav kuv cov tij laug. Thov koj qhia kuv saib lawv coj lawv cov tsiaj mus noj zaub rau qhov twg lawm.”
17 Tus neeg ntawd hais tias : “Lawv twb tshais chaw ntawm no mus lawm, kuv hnov lawv tham tias : ‘Peb mus Dos Tas’.”
Ces Yos Xes mus nrhiav nws cov tij laug, nws nrhiav tau lawv nyob Dos Tas. 18 Lawv pom nws tseem tuaj txog deb. Thaum nws tuaj tsis tau txog, lawv sib tuav tswv yim tias yuav ua kom nws tuag.
19 Lawv sib tham tias : “Nej saib ! Niag ua npau suav tuaj lawm ! 20 Zaum no, peb muab nws tua kiag thiab muab nws pov rau hauv ib lub qhov tim thaj, ces peb mus hais tias yog ib tug tsiaj qus tom nws lawm. Peb yuav pom tias nws cov npau suav leej tas nrho !” 21 Tiam sis Lus Npees hnov lawv tham, nws xav pab kom Yos Xes dim ntawm lawv tes. Nws hais tias : “Peb tsis txhob txo nws txoj sia.”
22 Lus Npees hais rau lawv tias : “Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes rau saum nws.” Lus Npees hais li no, vim nws xav cawm Yos Xes, nws thiaj li yuav coj tau Yos Xes rov mus rau nws txiv. 23 Ua li mas thaum Yos Xes tuaj txog ntawm nws cov tij laug lawm, lawv muab nws lub tsho ntev txaij zoo nkauj uas nws hnav hle. 24 Lawv txhom nws thiab muab nws pov rau hauv lub qhov dej. Yog ib lub qhov dej qhuav tsis muaj dej. 25 Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es thauj ib co nra, lawv tuaj Nkas Las As tuaj. Lawv cov ntxhuav thauj ib co tshuaj tsw qab uas lawv yuav coj mus muag rau Hais Nkws Tos teb. 26 Ces Yus Das hais rau nws cov kwv tij tias : “Yog peb muab peb tus kwv tua thiab muab nws cov ntshav faus, peb yuav tau dab tsi ? 27 Nej los, peb muab nws muag rau cov neeg Is Mas Es xwb, peb txhob tsa peb txhais tes rau saum nws : vim nws twb yog peb tus kwv, tawm ntawm tib lub cev nqaij los xwb.”
Ces nws cov kwv tij mloog nws hais. 28 Thaum ntawd muaj ib co neeg tuaj hla ntawd, yog ib co tub luam Mas Dias, ces lawv rub Yos Xes tawm hauv lub qhov tim thaj los. Lawv muab nws muag nees nkaum lub txiaj nyiag, rau cov neeg Is Mas Es. Cov neeg ntawd coj nws mus Hais Nkws Tos teb lawm. 29 Thaum Lus Npees rov mus xyuas tom lub qhov tim thaj, tsis pom Yos Xes nyob hauv lawm ! Nws dua rhe nws cov ris tsho, 30 nws rov los cuag nws cov kwv, nws hais tias : “Tus me nyuam tsis nyob lawm ! Ua li kuv yuav mus nrhiav lawm qhov twg ?” 31 Lawv khaws Yos Xes lub tsho ntev, lawv tua ib tug laug tshis, ces lawv muab lub tsho mus raus cov ntshav tshis. 32 Lawv muab lub tsho ntev xa los rau lawv txiv, lawv fi xov li no : “Peb nrhiav tau qhov no. Koj xyuas saib puas yog koj tus tub lub tsho ntev.”
33 Lawv txiv saib zoj, nws hais tias : “Yog kuv tus tub lub tsho ntev tiag ! Ib tug tsiaj qus muab nws noj lawm. Yos Xes raug muab dua ua daim tas lawm !” 34 Yas Kos dua rhe nws lub tsho, nws muab hnab tsaj los npua, thiab nws tu siab ntev kawg. 35 Nws cov tub cov ntxhais sawv daws tuaj nplij nws, tiam sis nws tsis kam lawv nplij nws li, nws hais tias : “Kuv yuav quaj kom kuv tuag, mus nrog kuv tus tub nyob xwb.”
Ces nws quaj quaj nws tus tub.
36 Thaum ntawd cov neeg Mas Dias coj Yos Xes mus muag nyob Hais Nkws Tos teb, mas lawv muab nws muag rau Pos Tis Fas uas yog vaj Fas Las Oos ib tug nom sam. Yog tus thawj tswj Fas Las Oos cov tub rog.

1 Lawv coj Yos Xes mus txog Hais Nkws Tos teb. Pos Tis Fas uas nws yog ib tug Hais Nkws Tos, nws yog Fas Las Oos ib tug nom sam thiab yog tus tswj Fas Las Oos cov tub rog, nws muas Yos Xes ntawm cov Is Mas Es. 2 HUAB TAIS pab Yos Xes, Yos Xes ua dab tsi los puav leej tau zoo, ces nws tau nyob hauv nws tus tswv Hais Nkws Tos lub tsev. 3 Yos Xes tus tswv pom tias HUAB TAIS pab Yos Xes, thiab nws ua yam twg mas tau yam ntawd, 4 ces tus tswv saib Yos Xes tsim txiaj. Tus tswv coj Yos Xes mus ua hauj lwm rau tus tswv, thiab tsa Yos Xes ua tus loj thiab tso tas puas tsav yam uas yog nws li rau Yos Xes saib xyuas. 5 Txij hnub uas tus Hais Nkws Tos muab nws lub tsev thiab lub cuab tam rau Yos Xes tuav, mas HUAB TAIS foom hmoov zoo rau nws lub tsev vim muaj Yos Xes nyob hauv. HUAB TAIS foom hmoov zoo rau Pos Tis Fas lub tsev thiab rau nws tej liaj teb huv si. 6 Ces nws tso plhuav ib puas tsav yam rau Yos Xes ua tus saib, nws tsis txob tsis txhawj txog dab tsi li, tsuas xav txog tias nws xav noj dab tsi xwb. Yos Xes yog ib tug neeg xeeb tau zoo, thiab nws lub ntsej muag zoo nraug.
7 Ib ntus tom qab, tus tswv ntawd tus poj niam pom tias Yos Xes zoo nraug, nws hais rau Yos Xes tias :
“Koj nrog kuv pw !”
8 Tab sis Yos Xes tsis kam, nws hais rau tus poj niam tias : “Vim muaj kuv, mas kuv tus tswv tsis tau ntxhov siab txog tias muaj dab tsi hauv nws tsev li, nws tso tas ib puas tsav yam rau kuv saib. 9 Txawm yog nws kiag los nws twb tsis muaj hwj chim tshaj kuv nyob hauv lub tsev no : Nws tsis tau txwv kuv dab tsi, tsuas txwv tsis pub kov
koj xwb vim koj yog nws poj niam. Vim li cas kuv yuav ua ib qho phem npaum li ntawd, thiab ua txhaum rau Tswv Ntuj ?” 10 Txawm tias tus poj niam niaj hnub nrog Yos Xes tham los Yos Xes tsis kam nrog nws pw li, tsis kam muab nws lub cev rau tus poj niam li.
11 Muaj ib hnub, Yos Xes los ua nws txoj hauj lwm hauv lub tsev, tsis muaj ib tug tub txib nyob ntawd li. 12 Tus poj niam tuav nkaus Yos Xes lub tsho ces nws hais tias : “Los nrog kuv pw !”
Tab sis Yos Xes hle hlo lub tsho tso pov tseg rau tus poj niam tes, ces nws tawm plaws khiav lawm. 13 Thaum tus poj niam pom tias Yos Xes tso nws lub tsho tseg rau nws tes, Yos Xes khiav mus nraum zoov lawm, 14 nws hu nws cov tub txib los, nws hais rau lawv tias : “Nej ntsia saib ! Kuv tus txiv coj ib tug niag Hes Nplaws los zes peb ! Niag ntawd los thab kuv, yuav nrog kuv pw, tiam sis kuv qw ib suab nrov nrov. 15 Nws hnov kuv qw thiab kuv hu ces nws hle nws lub tsho rau kuv tes, nws tawm khiav mus lawm.”
16 Tus poj niam muab lub tsho tso ntawm nws ib sab, nws nyob tos kom nws tus txiv los txog tsev. 17 Ces nws rov hais li qub rau tus txiv tias : “Niag qhev Hes Nplaws uas koj coj los ntawd, txav los ti kuv thiab yuav los zes kuv no, 18 tab sis kuv tsa suab hlo qw, ces nws hle nws lub tsho tso tseg ze ntawm kuv, nws tawm khiav lawm.”
19 Thaum tus txiv hnov nws poj niam hais tias : “Koj niag qhev ua li ntawd rau kuv,” mas nws npau taws tam sid.
20 Yos Xes tus tswv thiaj tso neeg mus ntes nws thiab coj nws mus kaw hauv tsev loj faj. Lawv coj Yos Xes mus kaw xyaw cov neeg uas tus vaj muab kaw. Ces Yos Xes nyob hauv tsev loj faj. 21 Tiam sis HUAB TAIS pab Yos Xes, nws hlub Yos Xes, nws ua kom tus tswv saib lub tsev loj faj muab Yos Xes saib rau qhov zoo. 22 Tus tswv saib tsev loj faj tsa Yos Xes ua tus saib xyuas tas nrho cov neeg nyob hauv tsev loj faj, tas puas tsav yam lawv ua nyob hauv, yog Yos Xes tso lus kom ua. 23 Tus tswv tsev loj faj tsis tshuaj txog Yos Xes cov hauj lwm li, vim HUAB TAIS pab Yos Xes thiab ua kom tej yam nws ua pheej mus zoo.

1 Ob xyoos tom qab, vaj Fas Las Oos ua ib zag npau suav tias : Nws nyob ntawm ntug dej Nis, 2 nws pom xya tus maum nyuj rog rog zoo nkauj tawm hauv tus dej Nis los noj zaub nyob hauv cov hav iav. 3 Ho muaj dua xya tus maum nyuj phem phem yuag yuag tawm hauv tus dej Nis, lawv thawj cov qab, lawv kuj los nrog thawj cov nyob ntawm ntug dej Nis thiab. 4 Ces cov maum nyuj phem phem yuag yuag txawm muab cov maum nyuj rog zoo nkauj noj. Thaum ntawd, Fas Las Oos tsim dheev los.
5 Nws rov qab tsaug zog, ces nws txawm ua dua ib zag npau suav. Nws pom ib tug kav nplej txhawv tau xya hnab nplej loj loj thiab puv zoo nkauj. 6 Ces ho pom tus kav nplej ntawd txhawv dua xya hnab nplej sib sib tsis puv thiab zoo li kub hnyiab tas vim raug cov cua toob fab nplawm. 7 Cov hnab nplej tsis puv ntawd muab cov hnab nplej puv puv nqos tas lawm. Ces Fas Las Oos tsim dheev los, ciav yog npau suav xwb !
8 Tag kis sawv ntxov, Fas Las Oos lub tswv yim nyob tsis kaj li, nws hu tas nrho cov txiv khawv koob thiab cov neeg thoob tsib nyob Hais Nkws Tos teb tuaj, nws piav nws zaj npau suav rau lawv, tiam sis tsis muaj ib tug yuav txhais tau rau Fas Las Oos mloog li.
14 Ces Fas Las Oos tso neeg mus hu Yos Xes. Lawv thiaj li tso Yos Xes tawm sai sai hauv tsev loj faj los. Nws chais hwj txwv, hloov ris tsho ces nws tuaj ntsib Fas Las Oos. 15 Fas Las Oos hais rau Yos Xes tias : “Kuv ua ib zag npau suav, tsis muaj ib tug neeg yuav txawj txhais li. Tab sis kuv hnov lawv hais tias yog koj hnov piav ib zaj npau suav, ces koj yeej txawj txhais no, puas yog ?”
16 Yos Xes teb rau Fas Las Oos tias : “Kuv tsis muaj peev xwm dab tsi li ! Tiam sis yog Tswv Ntuj thiaj yuav teb tau zoo rau Fas Las Oos xwb.”
25 Yos Xes hais rau Fas Las Oos hais tias : “Fas Las Oos ob zaj npau suav no, tsuas yog tib zag xwb. Tswv Ntuj qhia rau Fas Las Oos tias nws yuav npaj ua dab tsi. 26 Xya tus maum nyuj zoo nkauj, yog xya xyoo, xya hnab nplej zoo nkauj, kuj yog xya xyoo. Yog tib zag npau suav xwb. 27 Xya tus maum nyuj yuag yuag phem phem kuj yog xya xyoo, thiab xya hnab nplej sib sib tsis puv, zoo li kub hnyiab vim raug cov cua toob fab nplawm, los kuj yog xya xyoo. Yog Ntuj qhia tias yuav muaj tshaib plab xya xyoo. 28 Raws li kuv nyuam qhuav hais rau Fas Las Oos. Tswv Ntuj tau qhia rau Fas Las Oos tias Tswv Ntuj yuav npaj ua dab tsi. 29 Nyem no mus, yuav muaj xya xyoo uas qoob loo yuav ntsu ntsu nyob tas teb chaws Hais Nkws Tos. 30 Ces yuav muaj xya xyoo lawv qab uas neeg yuav tshaib plab, lawv yuav tsis nco qab txog cov qoob uas ntsu ntsu lawm, vim kev tshaib twb muab tej qoob ntawd noj tas lawm. 31 Thaum txoj kev tshaib ntawd tuaj mas neeg yuav tsis paub tias yog ib lub teb chaws uas ntsu qoob lawm, vim kev tshaib plab yuav loj kawg.
32 Tos Fas Las Oos tau ua npau suav ob zaug txog, los yog vim tias Tswv Ntuj yeej txiav meej tas lawm tias nws yuav ua qhov ntawd sai. 33 Nyem no, Fas Las Oos yuav tsum nrhiav ib tug neeg ntse thiab thoob tsib, yuav muab nws tsa los tuav lub teb chaws Hais Nkws Tos. 34 Fas Las Oos yuav tsum mob siab, yuav tsa ib co tub tseem hwv saib lub teb chaws. Nws yuav tsum kom lawv qee ib feem tsib ntawm cov qoob cia, yuav ua li ntawd tas xya xyoo uas ntsu qoob. 35 Lub caij xya xyoo uas yuav ntsu qoob, mas sawv daws yuav tsum khaws tej txhiam xws noj cia, yuav tsum ua txhab los rau nplej raws li Fas Las Oos ceeb toom, yuav tsum sau txhiam xws noj cia rau hauv tej nroog. 36 Ces xya xyoo uas yuav tshaib plab mas lub teb chaws no thiaj yuav tau cov qoob khaws cia ntawd los noj, ces lub teb chaws yuav tsis tuag tshaib.”
37 Yos Xes cov lus raug Fas Las Oos siab thiab raug Fas Las Oos cov tub tseem hwv siab. 38 Ces Fas Las Oos hais rau nws cov thawj tub tseem hwv tias : “Peb puas yuav nrhiav tau ib tug neeg zoo li tus ntawd, uas muaj Tswv Ntuj lub tswv yim nyob hauv nws ?”
39 Ces Fas Las Oos thiaj hais rau Yos Xes tias : “Tswv Ntuj pub kom koj paub tej ntawd, mas tsis muaj ib tug yuav ntse thiab yuav thoob tsib li koj. 40 Koj yog tus yuav tuav kuv lub tsev, kom kuv haiv neeg ua raws li koj ceeb toom kom ua, kuv tsuas loj dua koj vim kuv zaum saum lub theej kiab xwb.”
41 Fas Las Oos hais rau Yos Xes tias : “Zaum no, kuv tsa koj los tuav lub teb chaws Hais Nkws Tos tas huv tib si.” 42 Ces Fas Las Oos hle nws ntiv nplhaib ntawm tes, coj los ntxig rau Yos Xes ntiv tes, nws muab ib co ris tsho ntaub mos rau Yos Xes hnav thiab muab ib phiaj xauv kub rau nws coj. 43 Nws muab lub tsheb zoo tshaj plaws, yuav luag npaum nws lub, rau Yos Xes caij, lawv qw ua Yos Xes ntej tias : “As Nples!” Ces Yos Xes kav tas nrho Hais Nkws Tos teb. 44 Fas Las Oos hais rau Yos Xes tias : “Kuv yog Fas Las Oos, tiam sis yog koj tsis tso lus mas tsis muaj leej twg yuav tsa tau tes los tsa tau taw nyob hauv lub teb chaws Hais Nkws Tos.”
45 Ces Fas Loos tis ib lub npe tshiab rau Yos Xes hu ua Xos Nas Pas Nes As. Fas Las Oos muab As Xas Nas uas yog tus leej choj nyob Oos hu ua Pos Tis Fes Las tus ntxhais rau nws yuav ua poj niam. Ces Yos Xes sawv kev mus ncig teb chaws Hais Nkws Tos. 46 Thaum Yos Xes pib lis dej num rau Fas Las Oos uas yog tus vaj Hais Nkws Tos, mas nws muaj peb caug xyoo. Yos Xes tawm hauv Fas Las Oos mus, nws mus ncig thoob lub teb chaws Hais Nkws Tos. 47 Tas xya xyoo zoo niaj zoo xyoo ntawd, av ntsu qoob kawg. 48 Xya xyoo ntawd, Yos Xes qee tej qoob uas ntsu ntsu nyob Hais Nkws Tos teb cia. Nws muab ntim cia rau hauv cov nroog. Yos Xes sau tej qoob uas nyob ib ncig cov nroog, coj los khaws cia rau hauv lub nroog. 49 Yos Xes ua txhab los ntim nplej, nws sau qoob ntau kawg cia, ntau npaum cov xuab zeb ntawm ntug hiav txwv, ntau tas nrho suav tsis txheeb luj tsis tas, ces lawv tseg tsis suav ntxiv lawm.
50 Thaum tsis tau txog xyoo uas yuav tshaib plab, ob tug tub yug los rau Yos Xes, yog As Xas Nas uas yog tus leej choj nyob Oos hu ua Pos Tis Fes Las tus ntxhais yug. 51 Yos Xes tis tus hlob npe hu ua Mas Nas Xes, nws hais tias : “Tswv Ntuj ua kom kuv tsis nco txog kuv txoj kev txom nyem thiab kuv txiv tsev neeg.”
52 Tus yau nws tis npe rau hu ua Es Fais, nws hais tias : “Vim Tswv Ntuj ua kom kuv vam meej nyob hauv lub teb chaws uas kuv txom nyem.”
53 Xya xyoo ntsu qoob nyob Hais Nkws Tos teb dhau lawm, 54 ces pib xya xyoo uas sawv daws tshaib plab raws li Yos Xes hais. Tas txhua lub teb chaws puav leej raug kev tshaib loj. Tab sis nyob Hais Nkws Tos teb muaj mov noj. 55 Thaum muaj kev tshaib plab nyob thoob Hais Nkws Tos, cov pej xeem tuaj quaj thov mov noj ntawm Fas Las Oos.
Fas Las Oos hais rau cov neeg Hais Nkws Tos tias : “Nej mus cuag Yos Xes, nws hais dab tsi rau nej, mas nej ua li ntawd.”
56 Vim tas teb chaws tshaib plab, ces Yos Xes qhib cov txhab nplej nyob qhov txhia chaw, thiab muag mov rau cov Hais Nkws Tos sawv daws, vim muaj kev tshaib plab loj nyob teb chaws Hais Nkws Tos. 57 Tas ntiaj teb sawv daws kuj tuaj muas nplej ntawm Yos Xes nyob Hais Nkws Tos teb, vim tas ntiaj teb tshaib plab loj.

1 Yas Kos paub tias nyob Hais Nkws Tos teb lawv muaj mov muag, nw s hais rau nws cov tub tias : “Ua cas nej nyob sib ntsia xwb ? 2 Kuv hnov tias nyob Hais Nkws Tos teb lawv muaj mov muag no. Nej mus muas mov nrad los rau peb noj peb thiaj li yuav tsis tuag tshaib.”
3 Yos Xes kaum leej tij laug thiaj tuaj mus muas mov nyob Hais Nkws Tos teb. 4 Npes Yas Mis uas yog Yos Xes tus kwv tsis mus, Yas Kos tsis pub nws nrog lawv mus, nws xav twj ywm tias : “Kuv tsis xav kom nws raug txom nyem thiab.”
5 Ces His Xas Lais cov tub thiaj mus muas nplej, lawv nrog sawv daws tuaj nplawg ntia sib xyaws ntxaws, vim nyob Kas Nas Has teb, muaj kev tshaib plab loj. 6 Yos Xes yog tus tuav lub teb chaws, nws yog tus muag nplej rau sawv daws. Yos Xes cov tij laug tuaj txog, lawv khoov ti av pe Yos Xes. 7 Thaum Yos Xes pom nws cov tij laug, nws rov paub lawv tam sim ntawd. Tab sis nws ua txuj tsis paub thiab hais lus nchav rau lawv. Nws hais tias : “Nej tuaj qhov twg tuaj ?”
Lawv hais tias : “Peb tuaj Kas Nas Has teb tuaj, peb tuaj muas nplej mus noj.”
12 Tiam sis Yos Xes hais rau lawv tias : “Tsis yog ! Nej xav tuaj soj xyuas kom pom peb lub teb chaws tej qhov tsis zoo xwb !”
13 Lawv teb tias : “Koj cov tub txib muaj kaum ob leeg kwv tij, peb sawv daws koom ib tug txiv xwb, nws tseem nyob teb chaws Kas Nas Has. Peb tus kwv ntxawg nrog peb txiv nyob, hos muaj ib tug tsis nyob lawm.”
14 Tsis kav, Yos Xes rov hais rau lawv tias : “Yeej yog li kuv hais rau nej lawm : Nej yog ib co neeg tuaj soj teb chaws xwb ! 15 Mas nej yuav raug sim li no : Tsuav yog Vaj Fas Las Oos tseem muaj txoj sia nyob, mas nej yuav tsis dim ntawm no mus txog thaum nej tus kwv ntxawg tuaj txog thiab tso ! 16 Cia nej ib tug mus coj nej tus kwv tuaj, hos dua li cov, mas nej yuav tsum nyob hauv tsev loj faj tos. Peb yuav sim nej cov lus li no, mas peb thiaj yuav pom tias nej hais tseeb los hais cuav. Yog cuav xwb ces peb paub meej tias nej yog ib co neeg tuaj soj teb chaws, ib yam li peb paub meej tias Fas Las Oos tseem muaj txoj sia nyob !
17 Ces Yos Xes muab lawv sawv daws kaw tau peb hnub hauv tsev loj faj. 18 Hnub peb, nws hais rau lawv tias : “Kuv hwm Tswv Ntuj. Yog nej xav cawm nej txoj sia mas nej yuav ua li no. 19 Yog nej ncaj tiag, mas nej yuav tso nej ib tug nyob hauv tsev loj faj, hos cov mas nej rov qab mus, nej yuav ris nplej mus rau nej tsev neeg noj. 20 Nej rov mus coj nej tus kwv ntxawg tuaj rau kuv pom, thaum ntawd kuv paub tias nej hais tseeb lawm ces nej yuav tsis tuag.” Ces lawv ua raws li ntawd. 21 Lawv rov sib hais lawv tias : “Muaj tseeb lawm tiag, yog peb them lub txim txhaum uas thaud peb ua rau peb tus kwv xwb. Peb twb pom nws txoj kev txom nyem, nws thov thov peb, los peb tsis mloog nws li. Vim li ntawd peb thiaj raug kev nyuaj siab li no.”
22 Lus Npees thiaj teb lawv tias : “Kuv twb hais rau nej tias kom nej txhob ua phem rau tus me nyuam ! Nej tsis xav mloog kuv hais, ces zaum no luag thiaj nug peb txog nws cov ntshav.”
23 Lawv sib tham, lawv tsis paub tias Yos Xes to taub lawv xeem lus, vim muaj ib tug neeg nyob ntawd txhais lus rau Yos Xes. 24 Ces Yos Xes txav mus nraim lawv, nws quaj twj ywm. Yos Xes mam rov qab los ntawm lawv, nrog lawv hais lus. Yos Xes muab Xis Mes Oos khuav cia, nws khi Xis Mes Oos rau lawv ntsia.

1 Lub teb chaws raug kev tshaib hnyav kawg. 2 Ces thaum lawv noj tas cov nplej uas lawv thauj Hais Nkws Tos teb los lawd, lawv txiv hais rau lawv tias : “Nej rov mus muas mov los rau peb noj dua.”
15 Ces pab kwv tij thiaj nqa ib qho paj tshab, thiab ib npaug nyiaj tshaj qhov qub thiab coj Npes Yas Mis nrog lawv mus. Lawv sawv kev mus, lawv mus txog Hais Nkws Tos teb, ces lawv mus cuag Yos Xes. 16 Thaum Yos Xes pom lawv coj Npes Yas Mis nrog lawv, Yos Xes hais rau nws tus tim xyoob tias : “Koj coj cov neeg ntawd mus tom kuv tsev. Koj tua ib tug tsiaj thiab npaj ib pluag mov. Ib ntsis tav su cov neeg ntawd yuav nrog kuv noj mov.”
17 Tus txiv neej ua li Yos Xes hais, nws coj cov neeg ntawd mus tom Yos Xes tsev. 18 Lawv ntshai rau qhov luag coj lawv mus tom Yos Xes tsev, lawv sib tham tias : “Ntshai yog vim cov nyiaj uas peb rov nrhiav tau nyob hauv peb cov hnab nplej thawj zaug, ces lawv thiaj coj peb mus, lawv yuav muab peb ntaus, yuav yuam peb ua lawv qhev, ces lawv yuav yuav peb cov luj ntag lauj !”
19 Lawv thiaj txav mus ze Yos Xes tus tim xyoob uas nyob ntawm qhov rooj, lawv hais rau nws tias : 20 “Thov koj lauj, huab tais ! Peb twb tau tuaj muas mov ib zaug lawm. 21 Thaum peb rov mus txog tom chaw pw thawj hmos, peb qhib peb cov hnab nplej no, ua ciav nyias rov pom nyias cov nyiaj nyob ntawm ncauj hnab. Cov nyiaj ntawd yeej txaus nkaus tus nqi. Hnub no peb nqa rov tuaj. 22 Thiab peb tseem nqa dua ib co nyiaj tuaj muas nplej ntxiv. Peb tsis paub xyov yog leej twg muab peb cov nyiaj rov rau hauv peb cov hnab nplej.”
23 Tiam sis tus tim xyoob teb rau lawv tias : “Nej tso siab, txhob ntshai ! Yog nej tus Tswv Ntuj thiab nej txiv tus Tswv Ntuj muab ib thooj nyiaj rau hauv nej cov hnab nplej xwb. Kuv tau txais nej cov nyiaj lawm.”
Ces nws coj Xis Mes Oos los rau lawv. 24 Tus txiv neej coj lawv mus hauv Yos Xes tsev, muab dej rau lawv ntxuav taw thiab muab zaub rau lawv cov luj noj. 25 Lawv thiaj li thau lawv qhov paj tshab los npaj zoo zoo cia tos Yos Xes. Lawv paub tias nws yuav los nrog lawv noj sus. 26 Thaum Yos Xes los tsev, lawv cev qhov paj tshab rau Yos Xes thiab lawv pe nws. 27 Yos Xes hais tej lo lus zoo txais lawv thiab nws nug lawv tias : “Nej txiv laus laus lawm, nws puas nyob zoo ? Nej twb tau tham txog nws rau kuv lawm : Nws puas tseem muaj txoj sia nyob ?”
28 Lawv teb tias : “Koj tus tub txib uas yog peb txiv, nws noj qab nyob zoo thiab nws tseem muaj txoj sia nyob.”
Ces lawv txhos caug thiab khoov hauv av pe. 29 Yos Xes tsa muag ntsia, nws pom nws tus kwv Npes Yas Mis uas yog nws niam tus tub, nws nug tias : “Tus ntawd puas yog nej tus kwv ntxawg uas nej tau tham rau kuv ?”
Ces Yos Xes hais rau tus kwv ntxawg Npes Yas Mis tias: “Thov kom Tswv Ntuj pub txiaj ntsim ntau rau koj mog, me tub !”
30 Ces Yos Xes tawm mus sai sai, vim nws hlub nws tus kwv, ces nws kua muag poob : Nws mus nyob hauv nws chav pw, nws quaj. 31 Nws ntxuav nws ntsej muag, nws siv zog npo kua muag, ces nws ua tiag rov los, nws hu tias : “Nej rau mov los !”
32 Lawv thiaj rau mov rau Yos Xes noj ib qho, rau mov rau lawv noj lawv ib qho, hos cov Hais Nkws Tos uas noj mov hauv Yos Xes tsev lawv kuj noj lawv ib qho, vim cov Hais Nkws Tos nrog cov Hes Nplaws noj mov ua ke tsis tau : Lawv tsis nyiam nrog cov Hes Nplaws noj mov ua ke. 33 Lawv muab Yos Xes cov kwv tij zaum tuaj ntawm Yos Xes hauv ntej, nyias zaum raws nyias lub hnub nyoog hlob los yau, lawv xub pib tus hlob los mus rau tus yau, lawv sib ntsia zom zaws, lawv xav tsis thoob. 34 Ces Yos Xes faib tej yam zoo tshaj, qab tshaj ntawm nws lub phaj mus rau lawv noj kom txaus siab. Npes Yas Mis phaj mas ntau tshaj txhua leej txhua tus phaj lawm tsib npaug. Lawv kuj nrog Yos Xes haus dej haus cawv, ua rau lawv zoo siab.

1 Yos Xes hais rau nws tus tim xyoob tias : “Koj ntim nplej rau cov neeg ntawd cov hnab kom puv txaus nkaus lawv thauj, thiab koj rov muab nyias pob nyiaj tso rau hauv nyias lub ncauj hnab. 2 Koj muab kuv lub ntim nyiaj, tso rau hauv tus tub ntxawg lub ncauj hnab nrog nws pob nyiaj.”
Ces tus tim xyoob ua raws li Yos Xes hais. 3 Thaum kaj ntug, lawv cia Yos Xes cov kwv tij thauj lawv cov luj rov mus tsev. 4 Lawv nyuam qhuav tawm hauv nroog mus tsis deb, Yos Xes hais rau nws tus tim xyoob tias : “Koj sawv! Koj mus caum cov neeg ntawd, koj hais rau lawv tias : Tim li cas nej ua qhov phem pauj qhov zoo ? 5 Nej nqa lub ntim uas kuv tus tswv siv haus dej thiab siv los saib yav tom ntej lawm puas yog ? Nej ua ib qho phem kawg !”
6 Ces nws mus caum lawv thiab hais cov lus ntawd rau lawv. 11 Lawv maj zeeg nyias thau nyias hnab nplej nqes los tso hauv av, lawv muab qhib. 12 Tus txiv neej pib tshawb ib tog zus tuaj, xub pib ntawm tus hlob mus rau tus yau. Nws thiaj tshawb tau lub ntim nyob hauv Npes Yas Mis lub hnab ! 13 Ces lawv dua rhe lawv tej ris tsho, lawv rov nog nra rau lawv cov luj thiab tig rov los rau hauv lub nroog. 14 Thaum Yus Das thiab nws cov kwv tij chaws los hauv Yos Xes tsev, Yos Xes tseem nyob, ces lawv khoov ti av pe nws. 15 Yos Xes nug lawv tias :
“Yog vim li cas nej thiaj tau ua ib yam phem zoo li ntawd ? Nej tsis paub tias ib tug neeg zoo li kuv txawj paub tas txhua yam no lod ?”
16 Yus Das teb tias : “Peb yuav hais li cas rau huab tais ? Peb tsis paub yuav hais dab tsi, thiab yuav daws peb lub txim li cas. Tswv Ntuj tau ua kom koj cov tub txib qhov txhaum tshwm tawm los lawm. Cia peb sawv daws nrog tus uas lawv nrhiav tau lub ntim ntawm nws tes los ua huab tais qhev.”
17 Tiam sis Yos Xes teb tias : “Kuv yuav tsis ua li ntawd ! Cia tus uas peb nrhiav tau lub ntim nyob hauv nws lub hnab ua kuv tus qhev xwb, hos dua li cov mas nej tso siab lug rov mus tsev.”
18 Ces Yus Das txav los ntawm Yos Xes, nws hais rau Yos Xes tias : “Huab tais, koj tus tub txib thov koj pub nws hais ib lo lus thiab thov koj tsis txhob npau taws rau koj tus tub txib, vim koj yeej muaj hwj chim cuag li Fas Las Oos ! 19 Huab tais tau nug koj cov tub txib hais tias : ‘Nej txiv puas tseem nyob thiab nej puas tseem muaj ib tug kwv ?’ 20 Peb tau teb huab tais hais tias : ‘Peb tseem muaj peb txiv uas nws laus laus lawm thiab peb tshuav ib tug kwv ntxawg uas yug thaum nws twb laus lawm. Nws tus tij laug tuag lawm, cov tub uas nws niam yug mas tshuav nws tib leeg xwb, mas peb txiv hlub nws kawg !’
21 Ces koj tau hais rau koj cov tub txib tias : ‘Nej mus coj nws tuaj rau kuv, kom kuv pom nws.’ 22 Peb tau teb huab tais tias : ‘Tus me nyuam ncaim tsis tau ntawm nws txiv : yog nws ncaim mas nws txiv yuav tuag xwb.’ 23 Tiam sis koj tsis tseev, koj hais tias : ‘Yog nej tus kwv ntxawg tsis nrog nej tuaj mas kuv yuav tsis txais nej tuaj ntsib kuv ib zaug ntxiv.’ 24 Ces thaum peb rov qab mus txog ntawm koj tus tub txib uas yog kuv txiv, peb tau hais huab tais cov lus rau nws. 25 Thaum peb txiv rov hais rau peb tias : ‘Nej rov qab mus muas me ntsis nplej dua.’ 26 Peb tau teb nws tias : ‘Peb mus tsis tau, yog peb tus kwv ntxawg nrog peb thiab mas peb thiaj mus tau, vim tus txiv neej ntawd tsuas txais peb, yog peb nrog peb tus kwv ntxawg xwb.’ 27 Ces koj tus tub txib uas yog kuv txiv tau hais rau peb tias : ‘Nej twb paub lawm tias kuv poj niam tsuas yug ob tug me nyuam rau kuv xwb. 28 Ib tug ncaim kuv lawm, kuv tau hais tias : Ntshai nws raug muab dua ua daim tas lawm ! ces kuv yeej tsis rov pom nws ib zaug ntxiv los txog tav no li.
29 Yog nej tseem coj tus no mus deb ntawm kuv, yog nws raug dab tsi phem, mas nej yuav ua kuv tu siab tuag, thiab ua kom kuv cov plaub hau dawb mus nkag hauv qhov ntxa xwb.’ 30 Zaum no yog kuv mus txog koj tus tub txib uas yog kuv txiv lub tsev, tsis pom tus me nyuam uas nkawd ob tug ntsuj plig yeej nyob ua ke tas mus li, 31 mas txij thaum nws pom tias tus me nyuam tsis nrog peb los mas nws yeej yuav cia li tuag. Ces yog peb ua kom peb txiv tu siab tuag kiag, thiab yog peb muab nws cov plaub hau dawb mus ntsaws rau hauv qhov ntxa ntag. 32 Kuv uas yog koj tus tub txib tau cog lus rau peb txiv txog ntawm tus me nyuam li no : ‘Yog kuv coj tsis tau nws rov los rau koj mas cia kuv ris lub txim ntawd tas kuv sim neej.’
33 Yog li, cia kuv uas yog koj tus tub txib nyob ua huab tais qhev hloov tus me nyuam qhov chaw, tso cia nws nrog nws cov tij laug rov mus tsev. 34 Kuv yuav ua li cas rov mus tsev tau, yog tias tus me nyuam tsis nrog kuv mus ? Kuv tsis xav pom kuv txiv txom nyem.”

1 Ces Yos Xes nyiaj tsis taus ntxiv, nws nthe rau nws cov neeg tias : “Nej kom sawv daws tawm mus.” Sawv daws tawm tas tib si, ces Yos Xes thiaj qhia nws rau nws cov kwv tij.
2 Tab sis nws quaj nrov nrov ces tas cov neeg Hais Nkws Tos hnov, ces lub moo ntawd thiaj nrov mus txog hauv Fas Las Oos tsev. 3 Yos Xes hais rau nws cov kwv tij tias : “Kuv yog Yos Xes ! Kuv txiv puas tseem nyob ?” Nws cov kwv tij teb tsis taus nws ib los, vim lawv pom nws lawv poob siab tas.
4 Yos Xes hais rau nws cov kwv tij tias : “Nej txav los ze ze kuv mog !” Ces lawv txav los. Nws hais tias : “Kuv yog Yos Xes, yog nej tus kwv uas nej muab muag rau Hais Nkws Tos teb
thaud. 5 Tiam sis zaum no nej tsis txhob tu siab, nej tsis txhob khuv xim tias nej tau muag kuv rau ntawm no. Yog Tswv Ntuj xa kuv tuaj ua nej ntej kom tau cawm nej txoj sia. 6 Nyem no tas teb chaws tshaib plab tau ob xyoos los lawm, tseem tshuav tsib xyoos ntxiv uas yuav tsis tau kev cog qoob thiab tsis muaj qoob sau li. 7 Tswv Ntuj tau xa kuv ua nej ntej tuaj ntawm no kom tau cawm nej haiv neeg kom tsis txhob tuag tu noob nyob hauv lub teb chaws thiab kom tau cawm nej ntau leej txoj sia. 8 Ua li mas, tsis yog nej xa kuv tuaj ntawm no, yog Tswv Ntuj xa, nws tau muab kuv los ua txiv rau Fas Las Oos, thiab muab kuv tsa ua thawj nyob hauv Fas Las Oos lub tsev, thiab ua tus pwm tsav tswj tas nrho lub teb chaws Hais Nkws Tos. 9 Nej rov mus kom txog kuv txiv sai sai, nej hais rau nws tias : ‘Koj tus tub Yos Xes hais li no : Tswv Ntuj tau tsa kuv ua tus tswj tas nrho lub teb chaws Hais Nkws Tos. Koj tsis txhob tos ntev, koj cia li nqes los nrog kuv nyob nram no. 10 Koj yuav los nyob lub teb chaws Nkaus Sees, koj thiab koj cov me nyuam, koj cov xeeb ntxwv, koj cov tsiaj loj tsiaj me, thiab tas puas tsav yam uas yog koj tug, ces koj yuav tau nyob ze kuv. 11 Koj los nyob ntawd, kuv mam li pub rau koj noj koj haus, vim teb chaws tseem yuav tshaib plab tsib xyoos ntxiv, ces koj thiaj yuav tsis raug kev tshaib, koj thiab koj tsev neeg thiab tas txhia yam uas yog koj li yuav tsis txom nyem.’ 12 Nej qhov muag tau ntsia ntsoov kuv, hos kuv tus kwv Npes Yas Mis tau pom tias yog kuv lub qhov ncauj hais tej lus no rau nej tiag. 13 Nej piav rau kuv txiv txog kuv lub koob meej nyob Hais Nkws Tos teb, thiab txog tas puas tsav yam uas nej tau pom, nej tsuag tsuag coj kuv txiv nqes los nyob ntawm no.” 14 Ces Yos Xes puag nws tus kwv caj dab, nws quaj, Npes Yas Mis kuj quaj. 15 Nws nwj nws cov tij laug txhua tus tib si, ces sawv daws sib qawg quaj. Ua li ntawd tas ces nws cov tij laug nrog nws sib tham.
25 Ces lawv tawm hauv Hais Nkws Tos teb rov los txog lawv txiv Yas Kos, hauv teb chaws Kas Nas Has.
26 Lawv hais rau lawv txiv tias : “Yos Xes tseem muaj txoj sia nyob ! Nws yog tus loj saib tas nrho lub teb chaws Hais Nkws Tos ntag !”
Yas Kos yoob tas, nws tsis ntseeg lawv. 27 Tiam sis thaum lawv qhia rau nws txog Yos Xes cov lus uas Yos Xes hais rau lawv, thiab thaum nws pom cov tsheb uas Yos Xes xa nrog lawv los tos nws, mas lawv txiv Yas Kos rov cus plaws tuaj.
28 His Xas Lais hais tias : “Txhua yam txaus kuv siab lawm ! Yog kuv tus tub Yos Xes tseem muaj txoj sia nyob tiag, kuv yuav tsum mus kom pom nws tso, kuv mam tuag.”

1 His Xas Lais sau tas nrho nws lub cuab tam, nws sawv kev mus. Thaum nws tuaj txog Npes Xas Npes, nws cev ib co txim txi nws txiv His Xas Has tus Tswv Ntuj. 2 Hmo ntuj, Tswv Ntuj yees tawm los hais rau His Xas Lais tias : “Yas Kos ! Yas Kos !”
His Xas Lais teb hais tias : “Kuv nyob ntawm no !”
3 Tswv Ntuj rov hais tias : “Kuv yog Tswv Ntuj, yog koj txiv tus Tswv Ntuj, koj tsis txhob ntshai mus nyob Hais Nkws Tos teb, vim nyob nrad, kuv yuav tsa koj ua ib haiv neeg loj. 4 Kuv yuav nrog koj mus nyob Hais Nkws Tos teb, thiab kuv yuav coj koj nce rov los pem no. Yos Xes yog tus yuav kaw koj ob lub qhov muag laus.”
5 Ces Yas Kos sawv kev ntawm Npes Xas Npes mus. His Xas Lais cov tub muab lawv txiv Yas Kos thiab muab lawv cov poj niam me nyuam nce rau saum cov tsheb uas Fas Las Oos xa tuaj tos lawv. 6 Lawv coj lawv cov tsiaj thiab tas nrho lawv lub cuab tam uas lawv tsim tau nyob teb chaws Kas Nas Has, ces lawv tsiv mus nyob Hais Nkws Tos teb. Yas Kos thiab tas nrho nws cov xeeb ntxwv nrog nws mus: 7 nws coj nws cov tub, thiab nws cov tub cov tub, nws cov ntxhais thiab nws ntxhais cov tub cov ntxhais, tas nrho nws cov xeeb ntxwv huv tib si, nrog nws mus nyob Hais Nkws Tos teb.
28 His Xas Lais xub xa Yus Das ua ntej mus hais rau Yos Xes kom Yos Xes tuaj tos nws nyob Nkaus Sees. Ces lawv tuaj txog Nkaus Sees teb. 29 Yos Xes kom lawv nog nws lub tsheb, ces nws caij tsheb tuaj tos nws txiv His Xas Lais nyob Nkaus Sees. Thaum nws pom nws txiv, nws puag nws txiv caj dab, ces nws quaj ntev puag rawv nws txiv. 30 His Xas Lais hais rau Yos Xes tias : “Zaum no, kuv tuag kuj tau, vim kuv tau pom koj lub ntsej muag lawm, thiab koj tseem muaj txoj sia nyob.

1 Yas Kos hu nws cov tub los, nws hais tias : “Nej tuaj sib sau ua ke ntawm no, kuv yuav qhia nej txog tej yam uas yuav tshwm sim tuaj rau nej lub caij tom ntej. 3 Lus Npees, koj yog kuv tus tub hlob, yog kuv lub zog, yog thawj lub txiv txi ntawm kuv lub zog txiv neej, koj yog tus txaus siab rau koj, koj muaj zog puv koj cev, 4 koj zoo li cov dej phwj. Koj yuav tsis tau npaum li lub siab xav, vim koj tau nce saum koj txiv lub txaj, koj tau rhuav kuv chaw pw lub hwj chim.
5 Xis Mes Oos thiab Les Vis yog ob kwv tij, nkawd muaj ib pluaj siab phem.
6 Thov kom kuv tus ntsuj plig tsis txhob nrog nkawd koom ib lub tswv yim, thov kom kuv lub siab tsis txhob nrog nkawd koom ua ib pab. Vim thaum nkawd npau taws, nkawd tua neeg, thaum nkawd vwm tuaj, nkawd tau hlais cov tsiaj txhu ua dog ua dig. 7 Kuv foom phem rau nkawd txoj kev npau taws ceev, kuv foom phem rau nkawd lub siab lim hiam siab ceev. Kuv yuav ua kom neb sib ncaim nyob hauv Yas Kos, kuv yuav ua kom neb sib tawg nyob hauv His Xas Lais.
8 Yus Das, koj cov kwv tij yuav cav lus zoo txog koj, koj txhais tes yuav tuav rawv koj cov yeeb ncuab lub xwb qwb, hos koj txiv cov tub yuav khoov cev hwm koj. 9 Yus Das yog ib tug thav tsov. Me tub, koj twb mus tom nqaij los, nws los so, nws pw zoo li ib tug tsov, nws tsiv li ib tug maum tsov, leej twg yuav muaj cuab kav tsa nws ? 10 Tus cwj ua vaj yuav tsis ncaim ntawm Yus Das txhais tes. Rab cwj tswj luag yuav tsis txav ntawm nws ko taw, mus txog thaum luag tuaj them se tas rau nws, thiab thaum tas txhia haiv neeg mloog nws lus.
13 Xas Npus Loos yuav nyob ntawm ntug hiav txwv, nws yuav ua neeg tsav nkoj nyob hauv tej nkoj, Xis Doos yuav nyob ntawm nws ib sab.
14 Is Xas Kas yog ib tug luj muaj zog, nws pw hauv nkuaj. 15 Nws pom tias txoj kev tau so yog ib qho zoo, nws pom tias lub teb chaws ntxim nyob, nws cev nws lub xub pwg mus cug luag lub nra, nws thiaj li ciaj luag qhev.
16 Daas yuav txiav plaub txiav ntug rau nws haiv neeg ib yam li txiav rau lwm xeem His Xas Lais. 17 Xav kom Daas zoo li ib tug nab nyob ntawm kev, zoo li ib tug nab muaj taug nyob ntawm txoj kab uas tuaj tom kiag tus nees ntawm nws lub qhov raws, ces tus caij nees yuav vau hlo ntxeev tiaj. 18 HUAB TAIS, kuv tso siab rau koj txoj kev cawm neeg !
19 Nkas, mas yuav muaj ib co tub sab tuaj lwg nws, nws kuj yuav caum lawv lwg thiab.
20 As Ses muaj qoob loo ntau, nws txawj ua zaub ua mov qab phim rau tej vaj noj.
21 Nes Tas Lis zoo li ib tug maum kauv khiav nrawm nrawm, nws yug tau tej tus me nyuam kauv zoo nkauj kawg.
22 Yos Xes yog ib tsob ntoo txi txiv ncw nyob ntawm ntug dej, nws cov ceg hlob mus dhau saum qaum phab ntsa. 23 Cov tua hneev ntxub nws, lawv nta hneev thiab tua xub rau nws. 24 Tiam sis Yas Kos tus Huab Tais muaj hwj huam ob txhais tes ua kom Yos Xes rab hneev nyob khov kho. Tus Tswv Zov Yaj lub Npe, uas yog His Xas Lais lub Pob Zeb ua kom Yos Xes ob sab npab nrawm. Koj txiv tus Tswv Ntuj tuaj pab koj. 25 Kom Es Sas Dais foom hmoov zoo rau koj. Thov kom cuaj txheej ntuj nyob saud foom hmoov zoo rau, kom lub qab thu hiav txwv tob tob foom hmoov zoo rau koj, kom ob lub mis koj ntxais thiab lub txiv mis koj noj foom hmoov zoo rau koj, 26 Koj txiv cov lus foom hmoov zoo muaj zog dua cov roob uas nyob txheej dhau txheej tej lus foom hmoov, muaj zog dua cov roob txwj roob laus tej kev nplua nuj, kom tej koob hmoov zoo ntawd poob rau saum Yos Xes taub hau, poob rau saum nws hauv pliaj, nws uas yog tus Ntuj xaiv hauv tas nws cuab kwv tij ! 27 Npes Yas Mis zoo li ib tug hma tom nqaij, thaum sawv ntxov nws noj nws tus nqaij, thaum tsaus ntuj nws muab los faib rau luag.
28 Cov no tas huv tib si yog cov xeem His Xas Lais. Lawv muaj kaum ob xeem. Cov lus no yog lawv txiv hais rau lawv. Nws foom hmoov rau lawv, nws foom rau nyias raws li nyias txoj hmoo.
29 Ces Yas Kos thiaj ceeb toom rau lawv tias : “Txog caij kuv yuav rov mus cuag kuv cov yawg koob lawm. Nej yuav muab kuv coj mus los nrog kuv cov yawg koob nyob hauv lub qhov tsua hauv Es Plhoos uas yog ib tug neeg His Tis daim teb, 30 yog lub qhov tsua nyob hauv daim teb Mas Pes Las, ze Mas Nples, hauv teb chaws Kas Nas Has, uas Has Nplas Has tau muas ntawm tus His Tis hu ua Es Plhoos los ua toj ntxas. 31 Has Nplas Has thiab nws poj niam Xas Las nkawd ob lub ntxa nyob ntawd, His Xas Has thiab Les Npes Kas nkawd kuj nyob ntawd. Kuv kuj muab Les As faus rau ntawd lawm thiab. 32 Yog daim teb thiab lub qhov tsua uas thaud lawv muas ntawm Hes cov tub los.”
33 Thaum Yas Kos hais nws cov lus rau nws cov tub tas, nws tshem nws ob txhais ko taw rov los tso rau saum txaj, ces nws txoj sia tu, nws mus cuag nws cov poj yawm txwv koob.

1 Ces Yos Xes khoov mus rau nws txiv lub ntsej muag, nws hnia nws txiv thiab quaj kua muag poob ntub nws txiv lub ntsej muag. 2 Yos Xes hais rau cov kws tshuaj ua hauj lwm rau nws kom lawv muab nws txiv lub cev pleev tshuaj qhwv tuag. Ces lawv muab tshuaj qhwv tuag qhwv His Xas Lais lub cev. 3 Lawv siv plaub caug hnub los qhwv, vim yeej siv sij hawm ntev npaum li ntawd. Cov Hais Nkws Tos muab nws pam thiab nyiav nws tau rau caum hnub. 4 Thaum dhau lub ntees lawm, Yos Xes hais rau cov neeg hauv Fas Las Oos lub tuam tsev tias :
“Yog nej hlub kuv, thov nej mus piav qhia rau Fas Las Oos li no tias : 5 Kuv txiv tau kom kuv cog lus rau nws zoo li no: nws hais tias : ‘Kuv yuav tuag, kuv muaj ib lub qhov ntxa uas kuv khawb tau cia nyob teb chaws Kas Nas Has, koj yuav coj kuv mus los rau ntawd.’ Yog li thov koj tso kuv mus faus kuv txiv rau ped, tas kuv mam rov los.”
6 Fas Las Oos teb tias : “Koj nce mus faus koj txiv, raws li nws tau kom koj cog lus tseg.”
7 Yos Xes thiaj coj nws txiv mus sam sab. Fas Las Oos cov thawj tub rog kuj nrog Yos Xes mus. Cov nom loj nyob hauv Fas Las Oos tsev thiab cov nyob hauv teb chaws Hais Nkws Tos puav leej mus tib si. 8 Tas Yos Xes tsev neeg, nws cov kwv tij, thiab nws txiv tsev neeg sawv daws mus tib si. Lawv tsuas cia cov mus tsis taus kev nyob Nkaus Sees xwb thiab cia cov tsiaj txhu nyob xwb. 9 Tseem muaj cov tsheb thiab cov tsav tsheb nrog lawv mus : lawv mus ib pab muaj hwj chim kawg.
10 Thaum lawv tuaj txog Nkos Les As Tas, uas nyob dhau dej Yos Las Das lawm, lawv quaj ib zaug nyob ntawd. Yos Xes quaj nws txiv tau xya hnub nyob ntawd.
11 Cov Kas Nas Has, uas ib txwm nyob hauv lub teb chaws, pom lub ntees nyob Nkos Les As Tas, lawv hais tias : “Nej ntsia saib, cov Hais Nkws Tos lub ntees tuag loj kawg.”
Vim li no qhov chaw ntawd thiaj hu ua As Npes Mis Khas Yees, nyob ntawm dej Yos Las Das sab tim ub.
12 Yas Kos cov tub ua raws li nws tau kom lawv ua. 13 Lawv coj nws mus txog Kas Nas Has teb thiab muab nws los rau hauv lub qhov tsua uas nyob hauv daim teb Mas Pes Las, uas thaud Has Nplas Has tau muas ntawm tus neeg His Tis hu ua Es Plhoos los ua toj ntxas, nyob ze Mas Nples.
14 Ces Yos Xes thiab nws cov kwv tij thiab tas nrho cov neeg uas nrog nws tuaj faus nws txiv, sawv daws rov los rau Hais Nkws Tos teb lawm.
15 Thaum lawv txiv tuag tas lawm, Yos Xes cov tij laug sib tham tias: “Tsam Yos Xes saib peb yog nws cov yeeb ncuab, ces nws ua phem rau peb thiab pauj qhov peb tau ua rau nws ?” 16 Ua li mas, lawv xa lus mus rau Yos Xes tias: “Thaum koj txiv yuav tuag nws tau hais li no cia: 17 ‘Nej yuav hais rau Yos Xes tias: Koj zam txhaum rau koj cov tij laug, koj zam lawv lub txim thiab lawv qhov txhaum thiab tas puas tsav yam phem uas lawv tau ua rau koj.’ Zaum no peb thov koj zam txhaum rau koj txiv tus Tswv Ntuj cov tub txib.”
Yos Xes hnov lawv cov lus, nws kua muag poob nthav. 18 Nws cov tij laug tuaj ntsib nws kiag, lawv txhos caug ntawm nws ko taw pe nws tias: “Thov koj yuav peb ua koj cov qhev.” 19 Tiam sis Yos Xes teb rau lawv tias : “Nej tsis txhob ntshai !
Kuv puas yuav txeeb ua Tswv Ntuj ? 20 Qhov phem nej tau ua rau kuv, mas Tswv Ntuj muab hloov ua ib qho zoo lawm, ces thiaj muaj li niaj hnub no: yog cawm ib haiv neeg coob txoj sia. 21 Nyem no nej tsis txhob ntshai kiag li, kuv yog tus yuav yug nej kev noj kev haus thiab yug ib tsoom neeg uas los nrog nej nyob.” Yos Xes nplij lawv thiab hais lus mos lus zoo rau lawv.
22 Ces Yos Xes thiab nws txiv tsev neeg thiaj nyob ruaj rau Hais Nkws Tos teb. Yos Xes nyob tau ib puas kaum xyoo. 23 Nws tau pom nws cov xeeb ntxwv cov tub tib si, uas yog Es Fais cov tub. Nws kuj tau pom Mas Kis uas yog Mas Nas Xes tus tub cov tub yug los rau nws puag tib si.
24 Thaum kawg, Yos Xes hais rau nws cov kwv tij tias : “Txog kuv lub caij tuag lawm, kuv tseg nej nyob. Tswv Ntuj yuav tuaj xyuas nej thiab yuav coj nej nce rov qab mus hauv lub teb chaws uas nws tau cog lus muab rau Has Nplas Has, His Xas Has thiab Yas Kos.”
25 Ces Yos Xes kom His Xas Lais cov tub cog lus li no : “Thaum Tswv Ntuj tuaj coj nej mus, mas nej yuav tsum thauj kuv cov pob txha ntawm no nrog nej mus.”
26 Thaum Yos Xes tuag, nws muaj ib puas kaum xyoo. Lawv muab nws lub cev qhwv tshuaj thiab muab nws zwm rau hauv ib lub hleb nyob Hais Nkws Tos teb.

8 Muaj ib tug vaj tshiab sawv los kav Hais Nkws Tos teb. Nws tsis paub txog Yos Xes. 9 Nws hais rau nws cov neeg tias: “Cov neeg Is Xas Lais coob tshaj peb thiab muaj zog tshaj peb lawm. 10 Peb yuav tsum nrhiav ib zag tswv yim yuam kom lawv tsis txhob huam vam ntxiv. Yog tsis ua li ntawd mas ntshai tsam thaum muaj tsov rog, ces lawv mus nrog cov yeeb ncuab koom siab. Mas peb cov yeeb ncuab yuav coob heev, tsam lawv tig rov ntaus rog rau peb kom tau tawm hauv lub teb chaws no mus.”
11 Ces lawv tsa ib cov thawj saib hauj lwm yuam cov Is Xas Lais kom ua hauj lwm hnyav hnyav raws li lawv txib, kom cov Is Xas Lais lub neej txom nyem. Cov Is Xas Lais thiaj ua hauj lwm hnyav txhim tsa tau ob lub nroog muaj tej txhab ntim qoob rau Fas Las Oos, yog ob lub nroog Pis Toos thiab Las Mas Xes.
12 Tab sis lawv yim ua kom cov Is Xas Lais txom nyem, cov Is Xas Lais yim huam coob ntxiv, lawv nyob thoob qhov txhia chaw. Ces neeg ntshai cov Is Xas Lais.
11 Cov Hais Nkws Tos yuam kom cov Is Xas Lais ua hauj lwm tas mus li, 14 mas lawv lub neej txom nyem kawg, vim lawv ua hauj lwm hnyav : lawv do av, npaj av, puab thwv cib, thiab lawv ua ntau yam hauj lwm hnyav nyob nruab liaj nruab teb. Luag yuam lawv ua txhua tsav txhua yam hauj lwm.
22 Fas Las Oos ceeb toom li no rau nws cov neeg tias : “Cov Is Xas Lais yug tau pes tsawg leej tub, mas nej muab pov rau hauv tus Niam Dej, hos cov ntxhais mas, nej cia nyob.”

1 Muaj ib tug txiv neej yog Les Vis xeeb ntxwv mus yuav ib tug ntxhais kuj yog Les Vis xeeb ntxwv thiab, los ua txij nkawm. 2 Tus poj niam yug tau ib tug tub. Nws pom tias nws tus tub zoo nraug kawg, nws muab tus tub zais tau peb hlis. 3 Thaum nws zais tsis tau ntxiv lawm, nws npaj ib lub tawb xub yib, nws muab roj hmab dub thiab muab roj ntoo thuv leem zoo zoo rau. Nws tso tus me nyuam rau hauv lub tawb, nws coj mus tso rau hauv ib koog tauj deg ntawm ntug Niam Dej. 4 Tus me nyuam tus muam hlob nyob tsis deb ntawd, saib yuav muaj dab tsi tshwm sim rau tus me nyuam. 5 Thaum ntawd Fas Las Oos tus ntxhais nqes tuaj da dej hauv tus Niam Dej, nws cov ntxhais txib ncig ua si ntawm ntug dej. Tus ntxhais pom lub tawb ntab ntab hauv cov tauj deg, nws kom ib tug ntxhais txib mus muab los. 6 Nws muab qhib xyuas ces nws pom tus me nyuam : yog ib tug tub quaj quaj nyob hauv. Nws hlub tus me nyuam, nws hais tias : “Yog ib tug me nyuam tub Hes Nplaws.”
7 Tus me nyuam tus muam tawm los hais rau Fas Las Oos tus ntxhais tias : “Koj puas xav kom kuv mus nrhiav ib tug poj niam Hes Nplaws tuaj pab koj pub mis rau tus me nyuam noj ?
8 Fas Las Oos tus ntxhais teb tias : “Koj mus nrhiav tuaj.” Tus me ntxhais thiaj mus nrhiav tus me nyuam leej niam tuaj. 9 Fas Las Oos tus ntxhais hais tias : “Koj coj tus me nyuam no mus tu rau kuv, kuv yuav muab nqi zog rau koj.” Ces tus poj niam coj tus me nyuam mus tu lawm. 10 Thaum tus me nyuam loj lawm, nws coj tus me nyuam rov tuaj rau Fas Las Oos tus ntxhais. Fas Las Oos tus ntxhais hlub tus me nyuam ib yam li yog nws tus tub. Nws tis npe hu ua Mais Xes, nws hais tias : “Vim kuv tau npo nws hauv dej los.”
11 Thaum Mais Xes hlob lawm, muaj ib zaug, nws mus xyuas nws cov kwv tij. Nws pom tej hauj lwm uas luag yuam lawv ua. Nws kuj pom ib tug Hais Nkws Tos tab tom muab nws ib tug kwv tij Hes Nplaws ntaus. 12 Nws ntsia ib ncig tsis pom muaj leej twg, nws txawm muab tus Hais Nkws Tos tua, thiab muab zais rau hauv cov suab puam. 13 Hnub tom qab, nws rov tuaj, pom ob tug neeg Hes Nplaws tab tom sib ntaus. Nws hais rau tus xub thab tias : “Tim li cas koj ntaus koj tus npawg ?”
14 Tus ntawd teb tias : “Leej twg tsa koj ua txwj laus txiav txim rau wb ? Koj puas xav muab kuv tua xws li koj tua tus Hais Nkws Tos thiab ?” Mais Xes ntshai, nws xav tau tias : “Ntshai sawv daws paub tas lawm.”
15 Ces Fas Las Oos hnov hais txog qhov ntawd, nws nrhiav Mais Xes tua. Mais Xes thiaj khiav mus deb ntawm Fas Las Oos. Nws khiav mus txog Mas Dias teb. Nws mus zaum ntawm ib lub qhov dej. 16 Ib tug leej choj Mas Dias muaj xya leej ntxhais, cov ntxhais tab tom tuaj ce dej rau lawv txiv cov tsiaj haus. 17 Muaj ib pab neeg yug yaj nyob ntawd caum cov ntxhais kom khiav mus. Mais Xes sawv tsees mus tiv thaiv lawv. Nws ce dej rau lawv cov tsiaj haus. 18 Thaum lawv rov qab los txog tsev, lawv txiv nug lawv tias : “Ua cas hnub no nej yuav los tsev ntxov ua luaj ?”
19 Cov ntxhais teb hais tias : “Yog ib tug neeg Hais Nkws Tos pab peb, nws tiv thaiv peb ntawm ib pab neeg yug yaj, nws tseem pab ce dej rau peb cov tsiaj haus thiab”.
Lawv txiv nug ntxiv tias : 20 “Nws nyob qhov twg ? Ua cas nej tso nws pov tseg ? Nej kav tsij mus coj nws los nrog peb noj mov.” Mais Xes thiaj li txiav siab nrog tus leej choj ntawd nyob. Tus leej choj muab nws tus ntxhais hu ua Xis Pos Las rau Mais Xes yuav ua poj niam. 22 Xis Pos Las yug tau ib tug tub. Mais Xes tis nws npe hu ua Nkes Sos. Mais Xes hais tias vim “kuv yog ib tug neeg khiav tuaj nyob pej kum teb.”

1 Mais Xes niaj hnub mus zov nws yawm txiv Zes Raus pab yaj. Zes Raus yog ib tug leej choj Mas Dias. Mais Xes coj nws yawm txiv cov yaj mus noj zaub dhau teb chaws suab puam, ces nws mus txog Tswv Ntuj lub roob Hos Les. 2 HUAB TAIS tus Tshiab yees tawm los rau Mais Xes pom nyob hauv ib co nplaim taws cig cig nyob hauv ib tsob pos. Mais Xes ntsia ntsoov, tsob pos cig cig ntsa iab tab sis tsis txawj kug li. 3 Ces Mais Xes hais tias : “Kuv yuav lug kev mus xyuas yam txawv txawv ntawd saib yog dab tsi, ua cas tsob pos ntawd cig cig tsis txawj kug.”
4 HUAB TAIS pom nws lug kev tuaj xyuas, ces Tswv Ntuj hu nws hauv tsob ntoo tuaj tias :
“Mais Xes, Mais Xes.” Mais Xes teb tias : “Kuv nyob ntawm no.”
5 Tswv Ntuj hais tias : “Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab.”
6 Tswv Ntuj hais ntxiv tias : “Kuv yog koj cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj, thiab yog Yas Kos tus Tswv Ntuj.”
Ces Mais Xes thaiv nws lub ntsej muag, vim nws ntshai tsam nws qhov muag tau pom Tswv Ntuj.
7 HUAB TAIS hais tias : “Kuv pom, kuv pom kuv haiv neeg txoj kev txom nyem nyob Hais Nkws Tos teb. Kuv hnov lawv lub suab quaj vim luag quab yuam lawv. Kuv paub lawv tej kev txhawj xeeb tas huv si. 8 Kuv nqes los cawm lawv kom dim ntawm cov Hais Nkws Tos txhais tes. Kuv yuav coj lawv tawm hauv lub teb chaws ntawd rov los rau ib lub teb chaws dav thiab zoo qoob, lub teb chaws muaj mis nyuj thiab zib mu ntws sis laub sis lug, yog lub teb chaws uas cov Kas Nas Has, cov His Tis, cov As Mos, cov Pes Lis Xis, cov His Vis, thiab cov Zes Npws nyob. 9 Nyem no, cov Is Xas Lais lub suab quaj nrov tuaj txog kuv. Kuv pom cov Hais Nkws Tos txoj kev quab yuam lawv loj. 10 Nyem no, koj mus, kuv xa koj mus cuag Fas Las Oos. Koj mus ua kom kuv haiv Is Xas Lais tawm hauv Hais Nkws Tos teb los.”
11 Mais Xes hais rau Tswv Ntuj tias : “Kuv yog leej twg, kuv thiaj yuav mus cuag Fas Las Oos tau, thiab ua tau kom cov Is Xas Lais tawm hauv Hais Nkws Tos teb los ?”
12 Tswv Ntuj hais tias : “Kuv yuav nrog nraim koj, kuv muab lub cim no rau koj, kom koj paub tseeb tias yog kuv xa koj mus tiag : Thaum koj coj haiv Is Xas Lais tawm hauv Hais Nkws Tos teb lawm, mas nej yuav teev Tswv Ntuj saum lub roob no.”
13 Mais Xes hais rau Tswv Ntuj tias: “Thaum kuv mus cuag cov Is Xas Lais, thiab kuv hais rau lawv tias : ‘Nej cov yawg koob tus Tswv Ntuj xa kuv tuaj pab nej.’ Yog lawv hais rau kuv tias : ‘Nws lub npe hu li cas ?’ Kuv yuav hais li cas rau lawv ? 14 Tswv Ntuj hais rau Mais Xes tias : “Kuv yog tus kuv yuav yog.” Tswv Ntuj hais ntxiv tias : “Koj yuav hais rau cov Is Xas Lais li no : ‘Kuv yog tus kuv yuav yog’ xa kuv tuaj pab nej.”
15 Tswv Ntuj tseem hais ntxiv rau Mais Xes tias : 16 Koj mus, koj hu cov txwj laus Is Xas Lais tuaj sib sau, koj hais rau lawv tias: ‘HUAB TAIS uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj, tau yees tawm los rau kuv pom, nws hais rau kuv tias : Kuv tuaj xyuas nej, kuv pom txhua yam uas luag ua rau nej nyob Hais Nkws Tos teb. 17 Ces kuv hais tias kuv yuav coj nej tawm hauv txoj kev txom nyem nyob Hais Nkws Tos teb mus nyob hauv cov neeg Kas Nas Has daim av, thiab cov His Tis, cov As Mos, cov Pes Lis Xis, cov His Vis thiab cov Yes Npus Xis daim av, yog ib daig av uas muaj mis nyuj thiab zib mu ntws lug.’
18 Lawv yuav mloog koj cov lus. Koj yuav nrog cov txwj laus Is Xas Lais, nej yuav mus cuag tus vaj Hais Nkws Tos, nej yuav hais rau nws tias : ‘HUAB TAIS uas yog cov Hes Nplaws tus Tswv Ntuj tuaj xyuas peb lawm. Thov koj tso lus rau peb mus deb li peb hnub ke lawm hauv teb chaws suab puam, peb yuav mus txi peb tus HUAB TAIS Tswv Ntuj.’
19 Kuv paub zoo tias tus vaj Hais Nkws Tos yuav tsis tso nej mus yooj yim, yuav tsum muaj ib txhais tes muaj hwj huam yuam nws xwb, nws thiaj tso. 20 Vim li ntawd, kuv yuav tsa kuv txhais tes, thiab yuav ua ntau yam hwj huam yees ntxwv nyob Hais Nkws Tos los tiv nws, ces thaum kawg, nws yuav tso nej mus.
“Koj yuav hais li no rau cov Is Xas Lais : ‘ HUAB TAIS, uas yog nej cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj thiab yog Yas Kos tus Tswv Ntuj xa kuv tuaj pab nej. Lub npe no yog kuv lub npe mus ib txhis, neeg yuav tuav lub npe no hu txog kuv mus txheej dhau txheej.’

1 Mais Xes rov qab hais tias : “Tsam lawv tsis ntseeg kuv thiab tsis mloog kuv cov lus, lawv hais rau kuv tias : HUAB TAIS tsis tau yees tawm los rau koj pom ib zaug ?”
2 HUAB TAIS hais rau Mais Xes tias : “Koj tuav dab tsi ntawm koj tes ?” Mais Xes teb hais tias : “Ib rab pas.”
3 HUAB TAIS hais rau nws tias : “Pov koj rab pas rau pem teb.”
Mais Xes muab rab pas pov rhees hauv pem teb, rab pas txia ua ib tug nab, ces Mais Xes thaub qab. 4 HUAB TAIS hais rau Mais Xes tias : “Cev koj txhais tes mus tuav nab tus tw.” Mais Xes cev tes mus tuav nkaus, ces rov qab yog rab pas nrig nyob hauv nws tes.
5 “Koj ua li no ces lawv yuav ntseeg tias HUAB TAIS uas yog lawv cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj, tau yees tawm los rau koj pom tiag.”
6 HUAB TAIS tseem hais rau Mais Xes tias : “Muab koj txhais tes ntsaws rau hauv koj hauv siab.”
Mais Xes ntsaws nws txhais tes rau hauv nws hauv siab. Thaum Mais Xes thau nws txhais tes tawm los, nws txhais tes twb mob ruas dawb paug cuag daus lawm. 7 HUAB TAIS hais tias :
“Rov ntsaws koj txhais tes rau hauv koj hauv siab.”
Mais Xes rov ntsaws nws txhais tes rau hauv nws hauv siab, ces nws muab thau rov los, nws txhais tes rov qab zoo xws li nws lub cev nqaij lawm.
8 “Li ntawd, yog koj ua thawj yam hwj huam rau lawv pom tas, lawv tsis ntseeg koj, tseem tsis tau txaus lawv siab thiab, mas koj ua yam ob, ces lawv yuav ntseeg xwb. 9 Yog tias lawv tsis ntseeg koj li, txawm koj twb ua ob yam hwj huam no rau lawv pom tas, los lawv tsis mloog koj hais li, no ces koj mus ce ib qho dej hauv tus Niam Dej los, koj muab hliv rau hauv av, ces cov dej uas koj tau ce hauv tus Niam Dej los yuav hloov ua ntshav nyob saum cov av qhuav.”
10 Mais Xes hais rau HUAB TAIS tias : “Huab Tais, thov koj zam txim, kuv ib txwm tsis yog ib tug neeg txawj hais lus, yav tag los kuv yeej tsis txawj, tab yog zaum no, koj tau hais lus rau koj tus tub txib lawm, los kuv tseem tsis txawj, vim kuv lub ncauj qeeb thiab kuv tus nplaig txhav.”
11 HUAB TAIS hais rau Mais Xes tias : “Yog leej twg muab ib lub qhov ncauj rau tib neeg ? Leej twg thiaj ua tau kom neeg nplaig txhav los lag ntseg, kom neeg pom kev los dig muag ? Tsuas yog kuv xwb, vim kuv yog HUAB TAIS. 12 Koj cia li mus tam sis no, kuv yuav nyob ntawm koj qhov ncauj, kuv mam qhia cov lus uas koj yuav tsum hais.”
13 Mais Xes tseem hais ntxiv tias : “Huab Tais, thov zam txim, thov koj xa lwm tus mus.”
14 Ces HUAB TAIS npau taws rau Mais Xes, HUAB TAIS hais tias : “Twb muaj koj tus kwv As Loos uas yog ib tug Les Vis. Kuv paub tias nws txawj hais lus kawg. Nws tab tom tuaj cuag koj nyob ntawm no, nws pom koj mas nws yuav zoo siab. 15 Koj yuav nrog nws tham, thiab koj yuav qhia nws kom nws tshaj cov lus no. Kuv yuav nyob ntawm koj qhov ncauj thiab nyob ntawm nws qhov ncauj, thiab kuv yuav qhia neb paub tias neb yuav tsum ua dab tsi. 16 Nws yog tus yuav pab koj hais lus rau tsoom pej xeem, nws yog koj lub qhov ncauj, koj yog tus tshoj nws kom hais. 17 Rab pas no, koj yuav tuav rawv ntawm tes, vim koj yuav siv los ua hwj huam yees ntxwv.”

1 Dhau qhov ntawd lawm, Mais Xes thiab As Loos nkawd mus cuag Fas Las Oos, nkawd hais tias : “HUAB TAIS uas yog cov Is Xas Lais tus Tswv Ntuj hais li no : Koj tso kuv haiv neeg mus, kom lawv tau mus nqaum paj nqaum nruas cav txog kuv nyob hauv teb chaws suab puam.”
2 Fas Las Oos teb tias : “HUAB TAIS yog leej twg, kuv thiaj yuav tsum mloog nws lus thiab tso cov Is Xas Lais mus ? Kuv tsis paub HUAB TAIS, hos ntawm cov Is Xas Lais, mas kuv yuav tsis tso lawv mus kiag li !”
3 Nkawd hais tias : “Cov Hes Nplaws tus Tswv Ntuj tau tuaj xyuas peb. Thov koj cia peb mus nyob hauv teb chaws suab puam, deb li peb hnub ke, peb yuav mus txi peb tus HUAB TAIS Tswv Ntuj. Yog peb tsis ua li ntawd, mas nws yuav tso mob hnyav tuaj rau peb thiab tso ntaj los tua peb.”
4 Tus vaj Hais Nkws Tos hais rau nkawd tias : “Mais Xes thiab As Loos, vim li cas neb xav ua kom tsoom pej xeem khiav, tso lawv txoj hauj lwm pov tseg ? Neb cia li rov mus ua neb txoj hauj lwm thiab !”
5 Fas Las Oos hais tias : “Zaum no tsoom pej xeem coob tuaj nyob hauv lub teb chaws lawm, neb xav kom lawv tso lawv tej hauj lwm ntawd pov tseg lod ?”
6 Hnub ntawd kiag, Fas Las Oos ceeb toom rau cov thawj saib hauj lwm, rau cov pej xeem thiab rau cov thoob xwm ntawv tias : 7 “Nej tsis txhob muab quav nyab rau tsoom pej xeem ua thwv cib ntxiv raws li nej tau ua los lawm, nej cia lawv nyias yuav tsum mus nrhiav nyias kom txaus nyias siv. 8 Txawm li ntawd los nej yuav tseev kom lawv ua tau thwv cib ntau ib yam li qub, tsis pub ua tsawg dua. Lawv yog ib co neeg tub nkeeg xwb, lawv thiaj qw qw tias : ‘Peb yuav mus txi peb tus Tswv Ntuj.’ 9 Yeej meem tsub hauj lwm ntau ntxiv rau cov neeg ntawd ua, kom lawv txhob muaj caij so, lawv thiaj yuav tsis nco mloog tej lus haub lus ntxias ntawd.”
19 Thaum luag hais rau lawv tias : “Tsis pub kom nej ua tau thwv cib tsawg tshaj qhov qub.”
Mas cov thoob xwm ntawv Is Xas Lais pom tias lawv raug kev nyuaj loj kawg. 20 Thaum lawv tab tom tawm hauv Fas Las Oos tsev los, lawv ntsib Mais Xes thiab As Loos nkawd tuaj tos lawv kev. 21 Lawv cem nkawd tias : “Thov kom HUAB TAIS txiav txim rau neb ! Neb tuaj ua kom Fas Las Oos thiab nws cov tub ncig ntxub peb, neb tuaj muab ntaj rau lawv tes kom lawv muab peb tua.”
22 Mais Xes rov mus hais rau HUAB TAIS hais tias : “Huab Tais, ua cas koj ua kom haiv neeg ntawd raug txom nyem ua luaj ? Ua cas koj thiaj xa kuv tuaj ? 23 Txij thaum kuv tuaj txog, kuv mus cuag Fas Las Oos thiab kuv tuav txog koj lub npe hais lus rau nws tas, mas nws haj yam ua phem rau lawv, koj tsis ua dab tsi npo koj haiv neeg kom dim.”

1 Ces HUAB TAIS hais rau Mais Xes tias : “Zaum no, koj yuav pom kuv ua dab tsi rau Fas Las Oos. Ib txhais tes muaj zog yuav yuam kom nws tso lawv mus, ib txhais tes muaj zog yuav yuam kom nws ntiab lawv tawm hauv nws lub teb chaws mus.”

8 HUAB TAIS hais rau Mais Xes thiab As Loos tias : 9 “Yog Fas Las Oos kom neb ua ib yam hwj huam yees ntxwv, mas koj yuav hais rau As Loos tias : Tuav koj rab pas, muab pov rau ntawm Fas Las Oos xub ntiag kom nws txia ua ib tug nab.”
10 Mais Xes thiab As Loos mus cuag Fas Las Oos, nkawd ua raws li HUAB TAIS kom ua. As Loos muab nws rab pas pov rau ntawm Fas Las Oos thiab nws cov tub ncig xub ntiag, ces rab pas txia ua ib tug nab.
11 Fas Las Oos hu cov neeg txawj ntse thiab cov txiv khawv koob tuaj, ces cov txiv khawv koob Hais Nkws Tos siv lawv cov khawv koob, lawv kuj ua tau ib yam li ntawd thiab. 12 Lawv pov lawv cov pas kuj txia ua nab tas tib si, tiam sis As Loos rab pas nqos lawv cov pas tas huv si. 13 Txawm li ntawd los Fas Las Oos lub siab txhav qhi li qhov qub, nws tsis mloog lawv hais li, raws nraim li HUAB TAIS tau hais tseg.
14 Ces HUAB TAIS hais rau Mais Xes tias : “Fas Las Oos lub siab txhav qhi li qub, nws tsis kam tso kuv haiv neeg mus. 15 Tag kis sawv ntxov, koj mus cuag Fas Las Oos thaum nws mus tom ntug dej. Koj nyob ntawm ntug niam dej tos nws tuaj. Koj yuav tuav rawv rab pas uas tau txia ua nab ntawm tes. 16 Koj yuav hais rau nws tias : “Cov Hes Nplaws tus HUAB TAIS Tswv Ntuj xa kuv tuaj hais rau koj : kom koj tso kuv haiv neeg mus, kom lawv mus tsob hwb kuv nyob hauv teb chaws suab puam. Los txog lub zwj ceeb no, koj tsis kam mloog. 17 Mas HUAB TAIS hais li no : Yam no yuav ua rau koj paub tias kuv yog HUAB TAIS tiag. Kuv yuav siv rab pas uas kuv tuav ntawm tes, kuv yuav nplawm cov dej hauv tus niam dej, ces cov dej yuav hloov ua ntshav. 18 Cov ntses nyob hauv dej yuav tuag tas, tus dej yuav tsw lwj ntxiag, cov Hais Nkws Tos yuav haus tsis tau cov dej hauv tus niam dej li.”
19 HUAB TAIS hais rau Mais Xes tias : “Koj hais rau As Loos tias : Tuav koj rab pas, koj tsa tes rau saum cov dej nyob Hais Nkws Tos teb, saum cov dej txhawv, cov kwj deg, cov hav iav thiab cov pas dej teev tib si, kom dej hloov ua ntshav, ces tas teb chaws Hais Nkws Tos yuav puv ntshav, tej ntoo tej pob zeb los yuav puv ntshav.”
20 Mais Xes thiab As Loos ua raws li HUAB TAIS kom ua. As Loos tsa nws rab pas, nws ntaus cov dej hauv tus niam dej rau Fas Las Oos thiab nws cov tub ncig ntsia, ces cov dej hloov ua ntshav tas huv tib si. 21 Cov ntses nyob hauv tus dej tuag tas, tus dej tsw lwj ntxiag, cov Hais Nkws Tos haus tsis tau tus dej ntxiv, muaj ntshav nyob thoob teb chaws Hais Nkws Tos. 22 Cov txiv khawv koob Hais Nkws Tos kuj siv lawv cov khawv koob ua tau ib yam li ntawd thiab. Fas Las Oos lub siab tawv qhawv, tsis kam mloog nkawd hais, raws li HUAB TAIS tau hais tseg lawm. 23 Fas Las Oos rov mus tsev, nws tsis quav ntsej txog tej ntawd li. 24 Cov Hais Nkws Tos mus khawb qhov taug tus ntug dej kom tau dej ntshiab haus, vim lawv haus tsis tau cov dej hauv tus dej lawm.
26 HUAB TAIS hais rau Mais Xes tias : “Koj mus cuag Fas Las Oos, koj hais rau nws tias: HUAB TAIS hais li no : ‘Koj tso kuv haiv neeg mus, kom lawv tau kev tsob hwb kuv.’ 27 Yog koj tsis kam tso lawv mus mas kuv yuav tso qav los txom fav puv nkaus koj lub teb chaws. 28 Tus niam dej yuav muaj qav puv meem mias, qav yuav nce tawm los, yuav nkag los puv koj tsev, yuav muaj qav nyob hauv koj chav pw, nyob saum koj txaj, nyob hauv koj cov tub txib tej tsev, nyob hauv koj tsoom pej xeem tej tsev, nyob hauv koj tej qhov txos thiab tej tais do hmoov nplej tib si. 29 Qav tseem yuav nce rau saum koj, rau saum koj cov pej xeem thiab koj cov tub txib huv si.”

1 HUAB TAIS hais rau Mais Xes tias : “Koj hais rau As Loos tias : Tsa koj txhais tes uas tuav rawv rab pas rau saum cov niam dej, cov kwj deg thiab cov hav iav, kom qav nce tawm los nyob puv Hais Nkws Tos teb.”
2 As Loos tsa nws txhais tes rau saum cov dej Hais Nkws Tos, ces cov qav nce tuaj nyob puv nkaus Hais Nkws Tos teb.
3 Tiam sis cov txiv khawv koob siv lawv cov txuj ci los ua tau ib yam li ntawd, lawv kuj ua tau kom qav nce tawm los nyob saum av Hais Nkws Tos. 4 Fas Las Oos hu Mais Xes thiab As Loos nkawd tuaj, nws hais tias : “Neb thov kom HUAB TAIS ntiab cov qav ntawm kuv thiab ntawm kuv haiv neeg mus kom tas. Kuv cog lus tias kuv yuav tso nej haiv neeg mus kom lawv tau mus txi HUAB TAIS.”
8 Thaum Mais Xes thiab As Loos nkawd tawm hauv Fas Las Oos tsev mus, Mais Xes thov kom HUAB TAIS sau cov qav uas nws tau tso los txob Fas Las Oos rov qab. 9 Ces HUAB TAIS ua raws li Mais Xes thov : qav tuag pawg lug hauv tej tsev, tej tshav puam thiab tej liaj teb.
10 Lawv muab sau ua tej pawg nco lug, mas lub teb chaws tsw lwj ntxiag. 11 Fas Las Oos pom tias sawv daws rov tau nyob zoo lawm, nws rov ua siab tawv qhawv dua, nws rov tsis mloog nkawd hais, raws nraim li HUAB TAIS tau hais tseg.
12 HUAB TAIS hais rau Mais Xes tias : “Koj hais rau As Loos tias : Tsa koj rab pas thiab ntaus cov plua tshauv hauv av. Ces cov plua tshauv ntawd yuav txia ua yoov tshaj cum nyob thoob Hais Nkws Tos teb.”
13 As Loos tsa nws txhais tes uas tuav rawv rab pas, nws ntaus cov plua tshauv hauv av, ces cia li muaj yoov tshaj cum tom tej neeg thiab tej tsiaj txhu, vim cov plua tshauv hauv av txia ua yoov tshaj cum tas nyob thoob plaws Hais Nkws Tos teb. 14 Cov kws khawv koob Hais Nkws Tos siv lawv cov khawv koob los ua ib yam li ntawd kom muaj yoov tshaj cum tawm los, tiam sis lawv ua tsis tau. Yoov tshaj cum tom tej neeg thiab tej tsiaj tsis tseg. 15 Cov txiv khawv koob hais rau Fas Las Oos tias : “Yog Tswv Ntuj txhais tes ua tiag.” Tiam sis Fas Las Oos ua siab tawv qhawv, tsis kam mloog lawv hais, raws nraim li HUAB TAIS tau hais.
16 HUAB TAIS hais rau Mais Xes tias : “Tag kis koj sawv ntxov, koj mus tos Fas Las Oos kev thaum nws tuaj mus tom ntug dej. Koj hais rau nws tias : HUAB TAIS hais li no : Koj tso kuv haiv neeg mus kom lawv tau tsob hwb kuv.
17 Yog koj tsis tso kuv haiv neeg mus mas kuv yuav tso ib co nkawj tuaj plev koj, plev koj cov tub txib, koj haiv neeg, thiab tuaj rau hauv koj tej vaj tej tsev huv si. Cov neeg Hais Nkws Tos tej vaj tej tsev yuav muaj nkawj puv nkaus, cov av lawv tsuj los yuav muaj huv tib si.
18 Tab sis kuv yuav txuag lub xeev Nkaus Sees uas kuv haiv neeg nyob, tsis pub ib tug nkawj ya mus txog ntawd, kom koj paub tias kuv yog HUAB TAIS tiag, yog kuv ua rau lub teb chaws.
19 Kuv yuav ua cais npho koj haiv neeg ntawm kuv haiv neeg. Lub cim no yuav tshwm sim tuaj tag kis.”
20 HUAB TAIS ua raws li ntawd, ces muaj ib co nkawj coob coob ya los hauv Fas Las Oos tsev, hauv nws cov tub txib tej tsev thiab hauv tas nrho cov Hais Nkws Tos tej tsev. Cov nkawj tuaj ua lub teb chaws piam tas. 21 Fas Las Oos hu Mais Xes thiab As Loos nkawd tuaj, nws hais rau nkawd tias: “Nej txi nej tus HUAB TAIS nyob hauv lub teb chaws no kuj tau.”
22 Mais Xes teb tias: “Tsis phim kom peb ua li ntawd, vim thaum peb tua tsiaj txi peb tus HUAB TAIS Tswv Ntuj, mas cov neeg Hais Nkws Tos saib yog ib qho phem kawg nkaus. Yog peb txi Ntuj rau lawv pom, peb tua tsiaj tua txhuv ua rau lawv ntxub, ces lawv kawg yuav txawb pob zeb tua peb xwb. 23 Peb yuav tsum mus deb li peb hnub ke hauv teb chaws suab puam, peb mam txi peb tus HUAB TAIS Tswv Ntuj, raws li nws tau kom peb mus.”
24 Fas Las Oos hais tias : “Kuv yeej yuav tso nej mus txi nej tus Tswv Ntuj hauv teb chaws suab puam, tiam sis tsis pub nej mus deb. Neb thov Ntuj rau kuv thiab.”
25 Mais Xes hais tias : “Txij thaum kuv tawm plaws hauv koj mus, mas kuv yuav thov HUAB TAIS rau koj, ces tag kis cov nkawj yuav khiav ntawm Fas Las Oos cov tsev mus, ntawm nws cov tub txib thiab ntawm nws haiv neeg sawv daws mus tas huv tib si. Tiam sis Fas Las Oos yuav tsis txhob dag tias nws tso lus rau tsoom pej xeem tawm mus txi HUAB TAIS.”
26 Mais Xes tawm hauv Fas Las Oos tsev mus, nws thov HUAB TAIS.
27 HUAB TAIS ua raws li Mais Xes thov, ces cov nkawj ya tawm hauv Fas Las Oos thiab nws cov tub txib thiab nws haiv neeg mus tas tib si, tsis tshuav ib tug nyob li. 28 Tiam sis Fas Las Oos kuj tseem rov ua siab tawv qhawv dua, nws tsis kam tso tsoom pej xeem mus li.

1 HUAB TAIS hais rau Mais Xes tias: “Koj mus cuag Fas Las Oos, koj hais rau nws tias : Cov Hes Nplaws tus HUAB TAIS Tswv Ntuj hais li no : “Koj tso kuv haiv neeg mus, kom lawv tau tsob hwb kuv. 2 Yog koj tsis kam tso lawv mus, koj muab lawv khuam cia ntev ntxiv,
3 mas HUAB TAIS yuav tsa tes ntaus koj cov tsiaj txhu nyob hauv tej liaj teb, cov nees, cov luj, cov ntxhuav, cov nyuj thiab cov yaj cov tshis huv si kom tuag aws tas. 4 HUAB TAIS yuav cais cov Is Xas Lais tej tsiaj txhu ntawm cov Hais Nkws Tos tej tsiaj txhu, cov Is Xas Lais yuav tsis muaj ib tug tsiaj tuag li. 5 HUAB TAIS teem caij li no : Tag kis HUAB TAIS yuav ua qhov ntawd nyob hauv lub teb chaws.”
6 Tag kis, HUAB TAIS txawm ua li ntawd, cov Hais Nkws Tos cov tsiaj txhu tuag nplawg ntia, hos cov Is Xas Lais cov tsiaj txhu tsis tuag ib tug li. 7 Fas Las Oos tso neeg mus tshuaj xyuas cov Is Xas Lais, lawv pom tias cov Is Xas Lais cov tsiaj tsis tuag ib tug li. Tiam sis Fas Las Oos lub siab tseem tawv qhawv, tsis kam tso tsoom pej xeem mus.
8 HUAB TAIS hais rau Mais Xes thiab As Loos tias: “Neb tsuab ib leeg ib phoov tes nkhawb puv puv hauv qhov txos nqa mus, kom Mais Xes muab cov nkhawb ntawd pov saum ntuj rau Fas Las Oos ntsia. 9 Cov nkhawb yuav hloov ua hmoov mos mos ya mus puv lub teb chaws Hais Nkws Tos, yuav ua kom neeg thiab tej tsiaj mob rwj, ua paug ua kua yig thoob plaws Hais Nkws Tos teb.”
10 Mais Xes nkawd nqa nkhawb hauv qhov txos, ces nkawd mus sawv ntawm Fas Las Oos xub ntiag. Mais Xes muab w rau saum ntuj, ces tej tib neeg thiab tej tsiaj cia li mob kiav txhab, mob rwj ua paug ua kua yig thoob ib ce.
11 Cov txiv khawv koob tuaj tsis taus nrog Mais Xes sib tw, vim lawv kuj mob kiav txhab thoob ib ce ib yam li cov Hais Nkws Tos thiab. 12 Tab sis HUAB TAIS ua kom Fas Las Oos lub siab tawv qhawv, nws tsis kam mloog nkawd hais, raws nraim li HUAB TAIS tau hais rau Mais Xes.
13 HUAB TAIS hais rau Mais Xes tias : “Koj sawv ntxov, koj mus ntsib Fas Las Oos, koj hais rau nws tias: Cov Hes Nplaws tus HUAB TAIS Tswv Ntuj hais li no : Koj cia li tso kuv haiv neeg mus kom lawv tau kev tsob hwb kuv.
14 Zaum no, kuv yuav tso kuv cov xwv txheej tuaj raug koj, raug koj cov tub txib thiab koj haiv neeg, kom koj paub tias tsis muaj ib tug zoo li kuv nyob ntiaj teb no.
15 Yog kuv tsa kuv txhais tes, yog kuv tso mob aws tuaj raug koj thiab koj haiv neeg, ces koj twb ploj hauv lub ntiaj teb no lawm. 16 Tiam sis kuv tseg koj nyob, kom koj pom kuv lub zog thiab kom kuv lub npe nrov thoob ntiaj teb. 17 Koj saib koj loj diam, koj tsis kam tso kuv haiv neeg mus. 18 Ua li mas tag kis, tav lub sij hawm no, kuv yuav ua kom los ib kob lawg loj loj, tsis tau pom dua lawg loj li ntawd nyob Hais Nkws Tos teb txij thaum lub teb chaws pib muaj los txog tav no.”
22 HUAB TAIS hais rau Mais Xes tias : “Tsa koj txhais tes rau saum ntuj kom lawg poob los ntaus Hais Nkws Tos teb, ntaus cov neeg thiab cov tsiaj, ntaus tej nroj tsuag hauv tej teb nyob Hais Nkws Tos teb.”
23 Mais Xes tsa nws txhais tes rau saum ntuj, ces HUAB TAIS ua xob quaj nroo ntws thiab lawg poob nchuav lug los. Xob tua ntiaj teb nroo ntws, ces HUAB TAIS tso lawg los ntaus Hais Nkws Tos teb. 24 Lawg poob los thiab muaj hluav taws cig liab vog hauv cov lawg tuaj, yog ib kob lawg loj loj, tsis tau pom dua loj li ntawd nyob Hais Nkws Tos teb txij thaum pib muaj lub teb chaws los. 25 Los lawg thoob plaws Hais Nkws Tos teb, los ntaus tas puas tsav yam nyob hauv tej liaj teb lwj tas, puas tsuaj tas, tsis hais tib neeg los tsiaj txhu. Lawg los ntaus tej nroj tsuag hauv tej teb lwj tas, tej ntoo dam tas. 26 Tsuas yog lub xeev Nkaus Sees uas cov Is Xas Lais nyob xwb thiaj tsis los lawg. 27 Fas Las Oos hu Mais Xes thiab As Loos tuaj, nws hais rau nkawd tias : “Zaum no, kuv ua txhaum lawm, HUAB TAIS yog tus ncaj ncees, kuv thiab kuv haiv neeg peb tau ua txhaum. 28 Neb thov HUAB TAIS. Xob quaj ntev lawm thiab los lawg txaus lawm. Kuv txiav siab tso nej mus, nej yuav tsis tau nyob ntawm no ntev ntxiv.”
33 Thaum Mais Xes tawm hauv Fas Las Oos tsev thiab hauv lub nroog mus, nws tsa tes saum ntuj thov HUAB TAIS, ces xob ntsiag tsis nroo ntxiv thiab lawg tu tsis poob ntxiv, hos nag los kuj tu lawm.
34 Thaum Fas Las Oos pom tias nag tu lawm, lawg los tu, thiab xob tsis nroo ntxiv, nws rov qab ua txhaum dua, nws thiab nws cov tub txib rov ua siab tawv qhawv tuaj. 35 Fas Las Oos lub siab twm xeeb rov tawv tuaj, nws tsis kam tso cov tub ki Is Xas Lais mus, raws nraim li HUAB TAIS tau xub hais rau Mais Xes.

3 Mais Xes thiab As Loos nkawd mus cuag Fas Las Oos, nkawd hais rau Fas Las Oos tias : “Cov Hes nplaws tus HUAB TAIS Tswv Ntuj hais li no : Koj yuav tawv txog thaum twg koj mam li yuav txo koj lub siab los ua neeg me nyob ntawm kuv xub ntiag ? Koj cia li tso kuv haiv neeg mus kom lawv tau tsob hwb kuv. 4 Yog koj tawv, tsis tso lawv mus, mas tag kis kuv yuav ua kom muaj kooj txom fav tuaj nyob hauv koj lub teb chaws. 5 Kooj yuav tsaws ntom nti puv av, yuav tsis pom av li. Lawv yuav noj tas puas tsav yam uas tseem tshuav, tas puas tsav yam uas lawg tsis tau ntaus, lawv yuav noj tas tej ntoo uas tuaj hauv nej tej liaj tej teb huv si. 6 Kooj yuav nkag los puv koj tej vaj tsev, puv koj cov tub txib tej tsev thiab puv tas cov Hais Nkws Tos tej tsev. Yog ib qho uas koj cov yawg koob thiab koj cov yawg suab tsis tau pom dua, txij thaum lawv nyob hauv lub teb chaws los txog tav no.”
Ces Mais Xes tig rov qab, nws tawm hauv Fas Las Oos tsev mus. 12 HUAB TAIS hais tau Mais Xes tias : “Tsa koj txhais tes rau saum lub teb chaws Hais Nkws Tos kom kooj tuaj puv Hais Nkws Tos teb, tuaj noj kom tas cov nroj tsuag hauv lub teb chaws uas lawg tseg cia.”
13 Mais Xes tsa nws rab pas rau saum Hais Nkws Tos teb, ces HUAB TAIS ua kom ib nthwv cua tshuab sab toob fab tuaj hnub ntawd ib hnub, hmo ntawd ib hmos. Tag kis kaj ntug, nthwv cua toob fab tshuab tau ib co kooj tuaj. 14 Cov kooj dhia tuaj nyob thoob teb chaws Hais Nkws Tos, tuaj tsaws coob coob ntom nti puv nkaus hauv tej av nyob Hais Nkws Tos. Tsis tau muaj dua kooj coob npaum li no ib zaug, yav tom ntej los yuav tsis muaj ib zaug li no ntxiv lawm. 15 Cov kooj tsaws puv ntom nkaus hauv av, lawv noj lub teb chaws qhov txhia chaw do tas. Lawv noj tas nrho cov nroj hauv lub teb chaws thiab cov txiv ntoo uas lawg tseg cia. Tsis tshuav ib qho ntsuab seem nyob saum tej ntoo los hauv tej nroj tsuag uas tuaj hauv tej liaj teb hauv lub teb chaws.
16 Fas Las Oos hu Mais Xes thiab As Loos nkawd kom tuaj sai sai. Nws hais tias : “Kuv ua txhaum rau nej tus HUAB TAIS Tswv Ntuj thiab rau nej lawm. 17 Kuv thov koj zam txhaum rau kuv ib zaug ntxiv zaum no thiab, yuav yog zaum kawg, thiab koj thov nej tus Tswv Ntuj kom nws rhuav tshem qhov xwv txheej loj no ntawm kuv mus.”
18 Mais Xes tawm hauv Fas Las Oos tsev mus, nws thov HUAB TAIS.
19 HUAB TAIS thiaj ua kom cua hloov seem, ces cua tshuab xib fab tuaj nplawm ntws hlob hlob pus tas cov kooj mus, coj mus tso rau hauv lub Hiav Txwv Tauj lawm. Tsis tshuav ib tug kooj seem nyob hauv Hais Nkws Tos teb ntxiv. 20 Tab sis HUAB TAIS ua kom Fas Las Oos lub siab tawv qhawv ntxiv, tsis kam tso cov Is Xas Lais mus.
21 HAUB TAIS hais rau Mais Xes tias : “Tsa koj txhais tes rau saum ntuj, kom tas lub teb chaws Hais Nkws Tos tsaus ntuj nti dub nciab cuag twb yuav kov tau.”
22 Mais Xes tsa tes rau saum ntuj, ces Hais Nkws Tos teb tsaus ntuj nti dub nciab thoob plaws tau peb hnub. 23 Tej neeg ib leeg tsis pom ib leeg li, tsis muaj neeg txav tau ntawm nws qhov chaw mus qhov twg li tau peb hnub nkaus. Tiam sis thaj tsam uas cov Is Xas Lais nyob ho pom kev. 24 Fas Las Oos hu Mais Xes tuaj, nws hais tias : “Nej mus tsob hwb HUAB TAIS, tab sis cia nej cov tsiaj loj thiab tsiaj me nyob. Nej coj nej cov poj niam me nyuam mus tib si los tau.”
25 Mais Xes hais tias : “Koj yuav tsum pub tej yam rau peb tau tua hlawv txi rau peb tus HUAB TAIS Tswv Ntuj. 26 Peb cov tsiaj txhu yuav tsum nrog peb mus tib si, tsis tseg ib tug nyob li, vim cov tsiaj ntawd yog cov peb yuav muab coj los txi rau peb tus HUAB TAIS Tswv Ntuj, tab sis peb tsis xub paub tias peb yuav tsob hwb HUAB TAIS zoo li cas, peb yuav tsum mus txog chaw tso.
27 Tiam sis HUAB TAIS ua kom Fas Las Oos lub siab tawv qhawv, sis kam tso lawv mus. 28 Fas Las Oos hais rau Mais Xes tias : “Koj tawm ntawm no mus ! Koj ceev faj rau koj ! Koj tsis txhob tuaj cuag kuv ntxiv, hnub twg koj tseem tuaj mas koj yuav tuag xwb.”
29 Ces Mais Xes hais tias : “Yog li koj hais, kuv yuav tsis tuaj cuag koj ib zaug ntxiv.”

4 Ces Mais Xes hais tias : “HUAB TAIS hais li no : Thaum ib tag hmo, kuv yuav tuaj hla Hais Nkws Tos teb, 5 ces txhua tus uas yog tub hlob yuav tuag nyob Hais Nkws Tos, txawm yog Fas Las Oos tus tub hlob uas yuav zaum saum Fas Las Oos lub theej kiab, los yuav tuag, txawm yog tus poj niam zom zeb xwb tus tub hlob los yuav tuag, txawm yog tej tsiaj txhu thawj tug me nyuam los yuav tuag huv si. 6 Nyob tas Hais Nkws Tos teb, sawv daws yuav quaj yuav nyiav zom zaws. Tsis tau muaj dua ib zaug li ntawd thiab yuav tsis muaj li ntawd ib zaug ntxiv lawm. 7 Tab sis nyob hauv cov Is Xas Lais tsev, dev yuav tsis tom ib suab, dev yuav tsis tsem rau ib tug neeg los ib tug tsiaj li. Ces koj yuav paub tias HUAB TAIS cais cov Is Xas Lais ntawm cov Hais Nkws Tos.
8 Hos koj cov tub txib uas nyob nplawg ntia ntawm no yuav tuaj cuag kuv, lawv yuav khoov hauv av pe kuv tias : ‘Koj kav tsij khiav mus, koj coj haiv neeg uas caum koj mus huv tib si !’ Tej lus ntawd tu nrho, mas kuv yuav sawv kev mus tam sis ntawd.”
Ces Mais Xes tawm hauv Fas Las Oos tsev mus, nws npau taws heev.

1 HUAB TAIS hais rau Mais Xes thiab As Loos nyob Hais Nkws Tos teb tias : 2 “Lub hlis no nej yuav muab suav ua thawj lub hlis, nej yuav muab ua thawj lub hlis qhib lub xyoo. 3 Neb hais rau ib tsoom pej xeem Is Xas Lais tias: Lub hlis no xiab kaum, mas txhua yim neeg, nyias yuav tsum npaj nyias ib tug tsiaj me. 4 Yog yim neeg twg tsawg dhau noj tsis tas ib tug tsiaj me, mas nej yuav mus nrog lwm yim neeg uas nyob ze nej dua cov koom noj ib tug tsiaj. Nej yuav xaiv ib tug tsiaj kom txaus sawv daws noj tsis seem. 5 Nej yuav xaiv ib tug tsiaj zoo, tsis muaj chaw xyeej, yuav yog ib tug thav txiv yaj los thav txiv tshis, hnub nyoog ib xyoos. 6 Nej yuav ceev rau ib qho tos txog hnub xiab kaum plaub, lub hlis no. Hmo tim kaum plaub, tas tsoom Is Xas Lais, nyias yuav tua nyias tus tsiaj thaum tsaus ntuj zuag. 7 Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas nej noj tus tsiaj ntawd. 8 Hmo ntawd, nej yuav noj nqaij txhiab hauv hluav taws, nej yuav noj ntxuag ib co ncuav mov tsis xyaw poov xab, thiab ib cov zaub iab. 9 Nej tsis txhob noj ib yam nyoos, los ib yam hau xyaw dej. Nej tsuas noj nqaij ci hauv hluav taws, nrog lub taub hau, cov tes taw thiab plab hnyuv huv si. 10 Nej tsis txhob tseg ib qho seem rau tag kis. Tag kis, yog seem dab tsi, mas nej muab pov hlawv hauv hluav taws. 11 Thaum noj mov nej yuav ua zoo li no : Nej sia siv khov kho, nej rau khau, thiab tuav nej rab pas nrig ntawm tes. Nej yuav sawv ntsug noj, noj nrawm nroos, vim yog HUAB TAIS hmo hla. 12 Hmo ntawd, kuv yuav hla mus thoob Hais Nkws Tos teb. Kuv yuav ntaus neeg cov tub hlob, thiab tsiaj cov me nyuam hlob, kom ntog tas huv tib si. Thiab kuv yuav muab txim rau cov dab Hais Nkws Tos, vim kuv yog HUAB TAIS. 13 Cov ntshav yuav yog ib lub cim txuag nej hauv cov tsev uas nej nyob. Kuv pom lub cim ntawd, kuv yuav hla plaws mus, nej yuav tsis raug qhov xwv txheej loj ntawd, vim kuv yog tus ua rau Hais Nkws Tos teb.
14 Yav tom ntej, nej yuav cim ntsoov hnub ntawd cia, nej yuav nqaum paj nqaum nruas cav txog HUAB TAIS. Nej yuav muab hnub ntawd los ua ib txog cai nqaum paj nqaum nruas mus txheej dhau txheej rau nej coj.
21 Mais Xes hu cov txwj laus Is Xas Lais tuaj, nws hais rau lawv sawv daws tias : “Nej mus nrhiav ib tug tsiaj me rau nej tsev neeg, nej yuav tua tus tsiaj hmo hla.
22 Nej muab ib re nplooj los tub cov ntshav uas nej cug rau hauv phiab, ces nej muab cov ntshav ntawd pleev daim txiag tav saum lub qhov rooj thiab pleev ob tug ncej puab rooj. Nej yuav caiv ib hmos kaj ntug, tsis pub leej twg hla nej lub qhov rooj tawm mus li. 23 Thaum HUAB TAIS tuaj hla Hais Nkws Tos teb thiab tso xwv txheej rau, nws yuav pom cov ntshav ntawm daim txiag saum qhov rooj thiab ntawm ob tug ncej puab rooj, ces nws yuav hla plaws lub qhov rooj ntawd, tsis cia tus txo neeg txoj sia nkag mus hauv nej cov tsev, rhuav nej. 24 Nej yuav khaws cov kab ke no rau nej thiab nej cov me tub me nyuam kom coj mus ib txhis. 25 Thaum nej mus txog lub teb chaws uas HUAB TAIS muab rau nej nyob, raws li nws tau hais, nej kuj yuav ua cov kab ke no thiab. 26 Yog nej cov tub nug nej tias : ‘Cov kab ke no muaj lub ntsiab dab tsi ?’ 27 Mas nej yuav hais tias : ‘Yog cov kab ke txi HUAB TAIS hmo Hla, uas nws tau hla cov Is Xas Lais cov tsev nyob Hais Nkws Tos teb, thaum nws coj xwv txheej tuaj rau Hais Nkws Tos teb, nws txuag peb cov tsev.” Ces tsoom pej xeem txhos caug thiab khoov pe. 28 Cov Is Xas Lais rov mus tsev, lawv ua raws li HUAB TAIS tau hais rau Mais Xes thiab As Loos nkawd 29 Thaum ib tag hmo, HUAB TAIS tua txhua tus tub hlob nyob Hais Nkws Tos teb tuag tas huv si. Fas Las Oos tus tub hlob uas yuav zaum nws lub theej kiab kuj tuag, tus neeg raug txim nyob hauv tsev loj faj tus tub hlob kuj tuag, cov tsiaj txhu cov me nyuam thawj phaum kuj tuag tas tib si. 30 Ib tag hmo, Fas Las Oos sawv los, nws cov tub txib kuj sawv, tas tsoom Hais Nkws Tos sawv daws sawv los, ces suab quaj suab nyiav nrov nroo ntws thoob plaws Hais Nkws Tos teb, vim tsis muaj ib lub tsev uas tsis muaj ib tug tuag li. 31 Fas Las Oos hu Mais Xes thiab As Loos tuaj thaum ib tag hmo, nws hais rau nkawd tias : “Nej sawv, nej khiav tawm hauv kuv haiv neeg mus, tas nrho nej cov neeg Is Xas Lais tib si, nej mus tsob hwb HUAB TAIS raws li nej tau thov. 32 Nej sau nej cov tsiaj me thiab tsiaj loj nrog nej mus raws li nej tau thov, nej kav tsij tawm mus. Nej thov kom Ntuj foom hmoov zoo rau kuv.”
33 Cov Hais Nkws Tos kuj txhib cov Is Xas Lais kom tawm hauv lub teb chaws mus sai sai, lawv hais tias : “Tsam peb tuag tas tib si thiab.”
34 Ces cov Is Xas Lais sawb sim zoj zeeg, lawv sua lawv tej ncuav tseem tsis tau su, lawv muab khaub ncaws qhwv lawv tej tawb rau ncuav mov kwv saum xub pwg.
35 Cov Is Xas Lais ua raws li Mais Xes tau hais rau lawv, lawv thov tej yam uas yog nyiaj thiab yog kub ntawm cov Hais Nkws Tos thiab thov ris tsho. 36 HUAB TAIS ua kom cov Hais Nkws Tos ua siab zoo rau cov Is Xas Lais thiab kam muab txhua yam rau lawv. Ces cov Is Xas Lais thiaj txeeb tau cov Hais Nkws Tos tej nyiaj tej kub li no.
37 Cov Is Xas Lais sawv kev ntawm Las Xes mus rau Xws Kos, lawv muaj ze ntawm rau pua txhiab leej neeg mus ko taw, tsuas suav cov txiv neej xwb, tsis suav lawv tsev neeg. 38 Ib pab neeg coob coob sib xyaws daws nrog lawv mus. Tseem muaj tej pab tsiaj loj thiab tsiaj me coob coob nrog lawv mus thiab.
39 Lawv muab cov hmoov uas do tsis tau su ci tau tej lub ncuav tsis su noj : luag ntiab lawv tawm hauv Hais Nkws Tos teb mus sai sai, ces lawv tsis muaj sij hawm tos ntxiv thiab ntim tsis tau txhiam xws noj taug kev. 40 Cov Is Xas Lais nyob Hais Nkws Tos teb tau plaub puas peb caug xyoo. 41 Hnub uas puv plaub puas peb caug xyoo ntawd, HUAB TAIS tsoom tub ki tawm hauv Hais Nkws Tos teb mus. 42 Hmo ntawd HUAB TAIS tau hlub tsoom Is Xas Lais, nws ua kom lawv tawm ntawm Hais Nkws Tos teb mus, yog ib hmos uas tsoom tub ki Is Xas Lais yuav cav txog HUAB TAIS txheej dhau txheej tiam dhau tiam.

5 Thaum lawv hais rau tus vaj Hais Nkws Tos tias cov His Xas Lais twb khiav tas lawm, mas Fas Las Oos thiab nws cov tub txib hloov siab, lawv hais tias : “Peb ua dab tsi li ntawd ? Peb tso cov Is Xas Lais mus ces yuav tsis muaj neeg ua peb qhev lawm.”
6 Ces Fas Las Oos caij nws lub tsheb rog thiab coj nws cov tub rog. 7 Nws coj rau pua lub tsheb rog, uas yog cov zoo tshaj, thiab tas nrho cov tsheb rog nyob Hais Nkws Tos, lub tsheb twg kuj muaj tub rog puv nkaus.
8 HUAB TAIS ua kom Fas Las Oos uas yog tus vaj Hais Nkws Tos lub siab tawv qhawv tuaj. Ces nws sawv kev mus caum cov Is Xas Lais uas tawm hauv lub teb chaws mus lawm. 9 Cov Hais Nkws Tos mus caum tau cov Is Xas Lais ntawm ntug dej ntuj, uas lawv tsa tsev tsam phooj so nyob ntawd. Fas Las Oos cov nees, cov tsheb rog thiab cov tub rog tuaj txog, yog ze ntawm Pis Has His Los, nyob ncaj Npas Xes Foos. 10 Thaum Fas Las Oos tuaj txog ze lawm, cov Is Xas Lais ntsia pom cov Hais Nkws Tos tuaj caum lawv. Cov Is Xas Lais ntshai kawg, lawv quaj hu HUAB TAIS. 11 Lawv hais rau Mais Xes tias : “Puas yog vim nyob Hais Nkws Tos teb tsis muaj qhov ntxa rau peb, koj thiaj li coj peb los tuag rau hauv teb chaws suab puam no ? Koj coj peb tawm Hais Nkws Tos teb los zoo dab tsi ? 12 Thaum nyob Hais Nkws Tos teb, peb yeej hais rau koj tias cia peb nyob ua cov Hais Nkws Tos qhev twj ywm. Yog peb nyob ua lawv qhev twj ywm yuav zoo dua tuaj tuag nyob teb chaws suab puam.”
13 Mais Xes hais rau lawv tias : “Nej tsis txhob ntshai ! Nej ua siab ruaj nreb ces hnub no nej yuav pom HUAB TAIS ua dab tsi los cawm nej, vim cov Hais Nkws Tos uas nej pom hnub no, nej yuav tsis pom ib zaug ntxiv lawm.
14 HUAB TAIS yuav ntaus rog thaiv nej, hos nej, mas nej tsuas nyob twj ywm ntsia xwb.”
15 HUAB TAIS hais rau Mais Xes tias : “Vim li cas koj thiaj hu kuv cuag li ntawd ? Koj hais rau cov Is Xas Lais kom lawv rov sawv kev mus ntxiv.
16 Koj yuav tsa koj rab pas thiab xyab koj txhais tes rau saum dej ntuj, koj yuav faib dej ua ob sab, kom cov Is Xas Lais tau taug kev qhuav qhawv hauv qab thu dej mus. 17 Kuv yuav ua kom cov Hais Nkws Tos lub siab tawv qhawv tuaj, lawv yuav caum cov Is Xas Lais qab hla hauv qab thu dej mus thiab, ces kuv yuav siv Fas Las Oos thiab nws cov tub rog, nws cov tsheb rog thiab cov tsav tsheb los ua kom kuv nto koob meej. 18 Thaum kuv siv Fas Las Oos thiab nws cov tsheb rog thiab cov tsav tsheb ua kom kuv nto koob meej lawd, cov Hais Nkws Tos mam yuav paub tias kuv yog HUAB TAIS tiag.”
19 Tswv Ntuj tus Tshiab uas mus ua tsoom Is Xas Lais ntej, hloov chaw mus thaiv tom lawv qab : ces tus ncej huab nyob ntawm lawv hauv ntej txav chaw mus nyob tom lawv qub qab. 20 Nws mus nyob nruab nrab kem tog Hais Nkws Tos ntawm tog Is Xas Lais. Twv huab dub nciab tsaus nti ib hmos thaiv lawv, ces hmo ntawd ib hmos, ib tog txav tsis ti ib tog li. 21 Mais Xes tsa tes rau saum dej ntuj, ces HUAB TAIS ua cua hlob hlob ntsawj toob fab tuaj thawb cov dej ib hmos, qab thu dej tawm qhuav qhawv los, hos dej faib ua nyob ob sab. 22 Cov Is Xas Lais nkag hauv hiav txwv, lawv tsuj av qhuav qhawv mus, nyob ntawm lawv sab xis thiab sab laug muaj ob lub phab ntsa dej. 23 Cov Hais Nkws Tos caum lawv qab : Fas Las Oos cov nees, cov tsheb rog thiab cov tsav tsheb nkag mus hauv dej ntuj caum cov cov Is Xas Lais.
24 Thaum yuav kaj ntug, HUAB TAIS nyob saum tus ncej huab hluav taws, ntsia pom cov Hais Nkws Tos. Nws ua kom cov Hais Nkws Tos tau ntshai kawg.
25 Nws ua kom lawv cov log tsheb daig thiab ntog qeeb qeeb. Cov Hais Nkws Tos hais tias :
“Peb khiav mus deb ntawm cov Is Xas Lais vim HUAB TAIS pab lawv tawm tsam ntaus cov Hais Nkws Tos !”
26 HUAB TAIS hais rau Mais Xes tias : “Koj tsa tes rau saum dej ntuj, kom dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si.”
27 Mais Xes tsa tes rau saum dej ntuj, ces thaum pib kaj ntug, dej ntws rov los nyob qhov qub chaw. Cov Hais Nkws Tos tig khiav rov qab, tiam sis dej nphau nphwv los npog lawv, HUAB TAIS ua kom lawv ntxeev zom zaws rau hauv dej ntuj. 28 Cov dej nphau rov los nyob qhov qub, los npog cov tsheb thiab cov tsav tsheb Hais Nkws Tos uas tau nkag mus hauv qab thu dej caum cov Is Xas Lais, tsis dim ib tug li. 29 Hos cov Is Xas Lais tau taug kev qhuav nyob hauv plawv dej ntuj, cov dej ua ob sab phab ntsa nyob ntawm lawv sab xis thiab sab laug. 30 Hnub ntawd, HUAB TAIS cawm cov Is Xas Lais dim ntawm cov Hais Nkws Tos txhais tes. Cov Is Xas Lais pom cov Hais Nkws Tos tuag pawg lug ntawm ntug dej ntuj. 31 Cov Is Xas Lais pom HUAB TAIS lub peev xwm uas nws siv los tiv yeej cov Hais Nkws Tos. Tsoom pej xeem sawv daws hwm HUAB TAIS. Lawv tso siab rau HUAB TAIS thiab rau nws tus tub txib Mais Xes.

1 Ces Mais Xes thiab tsoom tub ki Is Xas Lais hu nkauj cav txog HUAB TAIS li no :
“Kuv hu nkauj cav txog HUAB TAIS, vim nws yeej thiab nws muaj koob meej, nws tau muab tus nees thiab tus caij nees pov rau hauv hiav txwv.
2 HUAB TAIS yog kuv lub zog, nws yog tus ua kom kuv zoo siab hu nkauj, nws npo kuv dim. Nws yog kuv tus Tswv Ntuj, kuv cav txog nws, vim nws yog kuv txiv tus Tswv Ntuj. 3 HUAB TAIS yog ib tug tseem tub rog, nws lub npe yog HUAB TAIS. 4 HUAB TAIS muab Fas Las Oos cov tsheb rog thiab cov tub rog pov rau hauv dej ntuj tas. Dej Ntuj Tiaj Tauj nqos nws cov thawj tub rog tas tib si.
8 Koj tshuab ib pas ntawm koj qhov ntswg, dej cia li nce siab zuj zus, dej sawv ntseg puav tam li ib sab phab ntsa zeb. Qab thu dej tawm plaws los qhuav qhawv. 9 Yeeb ncuab hais tias : “Kuv mus caum lawv, kuv yuav caum cuag xwb, kuv yuav faib lawv lub cuab tam. Kuv yuav zoo siab. Kuv yuav rho hlo kuv rab ntaj, kuv txhais tes yuav txo lawv txoj sia.”
10 Koj tshuab ib pas ntawm koj qhov ncauj, dej rov hlo los npog nkaus lawv, lawv tog ntsuag qees xws li ib co qe hlau nyob hauv cov dej nphau nphwv. 11 Nyob hauv tas tsoom dab, leej twg thiaj zoo li koj, HUAB TAIS ? Leej twg thiaj ntshiab cuag koj txoj kev ntshiab, txaus ntshai cuag koj, vim koj ua tau tej yam txaus qhuas ? 12 Koj xyab koj txhais tes xis, av nrib pleb nqos lawv tag.
13 Koj hlub haiv neeg uas koj tau cawm, koj coj lawv khiav mus, koj lub zog coj lawv kev, lawv thiaj mus txog thaj chaw ntshiab. 14 Cov haiv neeg hnov txog, lawv ntshai tshee na, cov neeg nyob Fis Lis Tis ntshai rwg. 15 Cov nom tswv nyob Es Dos poob siab tas, cov thawj coj nyob Muas tsis muaj zog tas, tas nrho cov neeg nyob Kas Nas Has ib ce tuag tas.
16 Tas sawv daws poob siab thiab ntshai kawg : HUAB TAIS, koj txhais npab muaj hwj chim ua kom lawv nyob txhav qhi ua tsis taus zog, thaum koj haiv neeg hla ntawm lawv, thaum haiv neeg uas koj tau txhiv los hla ntawm lawv.
17 HUAB TAIS, koj yuav coj koj haiv neeg mus, koj yuav muab lawv cog rau saum lub roob uas yog koj li, thaj chaw uas yog koj lub tsev nyob, qhov chaw uas yog koj ob txhais tes npaj cia. 18 HUAB TAIS yuav ua vaj nyob mus li tas ib txhiab ib txhis.”

1 Tas tsoom tub ki Is Xas Lais tso lub zos Es Lis tseg, lawv sawv daws mus txog lub hav suab puam Xees, nyob nruab nrab ntawm Es Lis thiab lub roob Xis Nais, yog hnub tim kaum tsib, lub hli ob txij hnub lawv tawm Hais Nkws Tos teb los. 2 Tas tsoom tub ki Is Xas Lais cem cem yws yws rau Mais Xes thiab As Loos nkawd nyob hauv teb chaws suab puam. 3 Cov Is Xas Lais hais rau nkawd tias : “Kheev lam HUAB TAIS txhais tes tua kom peb tuag tas nyob Hais Nkws Tos teb, thaum peb zaum ncig tej niag lauj kaub nqaij thiab peb muaj mov noj tsau plab npo mas ! Peb paub tseeb tias neb coj peb los nyob hauv lub hav suab puam no kom peb sawv daws tuag tshaib tas xwb !”
4 Ces HUAB TAIS hais rau Mais Xes tias : “Kuv yuav ua kom mov poob saum txheej ntuj saud los rau nej noj. Cov neeg yuav niaj tag kis tawm mus khaws kom txaus rau lawv noj hnub ntawd xwb, kuv xav sim lawv, kuv thiaj paub tias lawv puas mloog kuv txoj cai los tsis mloog.
5 Hnub rau, thaum lawv muab qhov lawv mus khaws tau lawm los ua noj, mas yuav tsum muaj npaum li qhov lawv niaj hnub khaws ob npaug.”
6 Mais Xes thiab As Loos nkawd hais rau tas tsoom Is Xas Lais tias : “Ib tsam tsaus ntuj, nej yuav paub tseeb tias yog HUAB TAIS coj nej tawm Hais Nkws Tos teb los, 7 ces tag kis sawv ntxov nej yuav pom HUAB TAIS lub hwj chim loj. Vim nws hnov nej cov lus yws lus cem txog nws lawm. Ntawm wb, mas wb ua tsis tau tus dab tsi, ua cas nej thiaj pheej yws thiab cem rau wb ?”
8 Mais Xes hais tias : “Ib tsam tsaus ntuj, HUAB TAIS yuav muab nqaij rau nej noj, hos tag kis sawv ntxov, nws yuav muab mov rau nej noj kom tsau nej plab, vim HUAB TAIS tau hnov nej yws nej cem txog nws. Ntawm wb, wb ua tau dab tsi ? Nej cov lus cem lus yws tsis raug wb, tab sis raug HUAB TAIS xwb.”
9 Mais Xes hais rau As Loos tias : “Koj hais rau tas tsoom Is Xas Lais tias : Nej cia li txav los ze ntawm HUAB TAIS xub ntiag, vim nws tau hnov nej cov lus yws lus cem lawm.”
10 Ces thaum As Loos tab tom hais lus rau tas tsoom Is Xas Lais, lawv tig mus ntsia tom sab hav suab puam, lawv pom HUAB TAIS lub hwj chim tawm los nyob saum cov huab. 11 HUAB TAIS hais lus rau Mais Xes hais tias : 12 “Kuv tau hnov cov Is Xas Lais tej lus yws lus cem lawm. Koj hais cov lus no rau lawv : Thaum yuav tsaus ntuj, nej yuav tau nqaij noj, thaum kaj ntug, nej yuav tau mov noj kom tsau plab. Ces nej yuav paub tias kuv yog HUAB TAIS nej tus Tswv Ntuj tiag.”
13 Thaum tsaus ntuj, muaj ib co yij ya tuaj tsaws puv thaj chaw lawv nyob, hos thaum sawv ntxov, muaj ib txheej lwg dawb paug puv ib ncig thaj tsam lawv nyob. 14 Thaum cov lwg ntawd qhuav tas, ces txawm pom ib co hmoov mos mos, ua tsig daws, zoo li ib co te, nyob saum npoo av suab puam. 15 Thaum cov Is Xas Lais pom li ntawd, lawv sib nug zom zaws tias : “Cov ntawd yog dab tsi ?”
Vim lawv yeej tsis paub tias yog dab tsi tiag. Mais Xes hais rau lawv tias : “Cov ntawd, yog cov mov uas HUAB TAIS muab pub rau nej noj. 16 HUAB TAIS tau ceeb toom li no : Nej yuav tsum nyias khaws kom txaus nyias noj xwb, khaws ib tug neeg ib taig xwb. Nej khaws kom txaus nej yim neeg hauv nej lub tsev tsam phooj xwb.”
17 Cov Is Xas Lais ua raws li ntawd, lawv ib txhia khaws ntau ib txhia khaws tsawg. 18 Thaum lawv muab tais luj, tus khaws ntau, nws kuj tsis tau ntau tshaj tus khaws tsawg, hos tus khaws tsawg, nws kuj khaws tau txaus noj thiab, lawv nyias khaws kom txaus nyias noj.
19 Mais Xes hais rau lawv tias : “Nej tsis txhob khaws tshaj coj los cia rau tag kis.”
20 Muaj ib txhia tsis mloog Mais Xes hais, lawv khaws tshaj coj los cia rau tag kis, ces txawm muaj kas noj thiab lwj tas. Mais Xes npau taws rau lawv kawg. 21 Lawv niaj tag kis mus khaws, nyias khaws kom txaus nyias noj xwb, thaum lub hnub tuaj sov lawm, cov ntawd txawj yaj tas mus. 22 Hnub rau, lawv khaws ob npaug, ib tug neeg ob taig, ces cov thawj coj mus hais qhia Mais Xes paub.
23 Mais Xes hais rau lawv tias : “HUAB TAIS hais li no : tag kis yog ib hnub uas nej yuav so tiag, yog ib hnub ntshiab rau HUAB TAIS, yog hnub xas npas tos. Nej xav ua noj li cas los nej ua, nej xav hau noj li cas los nej hau, qhov seem, nej muab khaws cia rau tag kis.”
24 Ces lawv khaws qhov seem cia rau tag kis li Mais Xes tau hais, txawm tsis lwj thiab tsis muaj kas nyob hauv. 25 Mais Xes hais tias : “Hnub no, nej noj qhov seem ntawd xwb, vim hnub no yog hnub xas npas tos, HUAB TAIS caiv, hnub no nej yuav mus nrhiav tsis tau nyob tom teb. 26 Rau hnub, mas nej niaj hnub mus khaws, tiam sis hnub xya, yog hnub xas npas tos, mas yuav tsis muaj rau nej khaws.”
27 Tiam sis hnub xya, muaj ib co neeg tseem tawm mus khaws thiab uas lawv nrhiav tsis tau dab tsi li. 28 HUAB TAIS hais rau Mais Xes tias : “Nej yuav tawv tsis mloog kuv cov lus qhia thiab kuv cov kev cai mus txog thaum twg ? 29 Nej yuav tsum to taub, HUAB TAIS muab hnub xas npas tos rau nej nyob, vim li ntawd, hnub rau nws thiaj muab mov kom txaus rau nej noj ob hnub. Hnub xya, nej yuav tsum so, nyias nyob twj ywm nyias qhov chaw, tsis pub kom leej twg tawm hauv nws tsev mus sab nraud li.”
30 Ces tsoom pej xeem thiaj li tsis ua hauj lwm hnub xya. 31 Tsev neeg Is Xas Lais hu cov mov ntawd ua Mas Nas. Cov mov Mas Nas zoo li ib co noob zaub txhwb, dawb dawb thiab qab li ib co ncuav xyaw zib mu. 32 Mais Xes hais tias : “HUAB TAIS hais li no : Nej yawm kom puv ib taig, nej muab khaws cia rau nej cov xeeb zeej xeeb ntxwv tom qab, kom lawv tau pom cov mov kuv muab rau nej noj nyob teb chaws suab puam, thaum kuv coj nej tawm hauv Hais Nkws Tos teb los.”
33 Mais Xes hais rau As Loos tias : “Koj muab ib lub hub me, koj luj ib taig Mas Nas los hliv rau hauv, koj coj mus txawb rau ntawm HUAB TAIS xub ntiag kom tsis txhob lwj, ces nej cov xeeb ntxwv tom qab thiaj yuav tau pom.”
34 As Loos ua raws li HUAB TAIS tau hais rau Mais Xes. Nws muab tais Mas Nas coj mus tso rau ntawm lub Xab Cog Lus, kom tsis txawj lwj.
35 Cov Is Xas Lais noj mov Mas Nas tau plaub caug xyoo, mus txog thaum lawv los tshwm rau lub teb chaws muaj neeg nyob. Lawv noj mov Mas Nas mus txog thaum lawv tsiv los txog ntawm ciam teb Kas Nas Has. 36 Ib taig yog ntau npaum li ib feem kaum ntawm ib kawg.

1 Tsoom tub ki Is Xas Lais tso lub hav suab puam Xees tseg, lawv mus ntxiv raws li HUAB TAIS tau hais kom lawv yuav tsum maj mam tsiv zuj zus ib qho rau ib qho. Lawv los tsa tsev nyob rau Les Fis Dis, nyob ntawd tsis muaj dej rau tsoom pej xeem haus. 2 Ces lawv npau taws rau Mais Xes, lawv hais tias : “Koj cia li muab dej los rau peb haus !” Mais Xes hais rau lawv tias : “Vim li cas nej npau taws rau kuv ? Vim li cas nej xav sim HUAB TAIS ?”
3 Tsoom pej xeem nqhis dej, lawv yws yws rau Mais Xes tias : “Ua cas koj thiaj coj peb tawm Hais Nkws Tos teb los ? Puas yog koj xav kom kuv tuag dej, kuv thiab kuv cov me nyuam thiab kuv cov tsiaj peb sawv daws tuag dej ?”
4 Mais Xes tsa suab hu HUAB TAIS hais tias : “Kuv yuav ua li cas rau haiv neeg no ? Tshuav me ntsis xwb ces lawv yuav xuas pob zeb txawb kuv.”
5 HUAB TAIS hais rau Mais Xes tias : “Koj mus ua tsoom pej xeem ntej, koj coj ob peb tug txwj laus Is Xas Lais nrog koj mus. Koj nqa koj rab pas nrig ntawm tes, yog rab pas uas koj tau siv los ntaus tus niam dej nyob Hais Nkws Tos, koj mus. 6 Kuv yuav mus ua koj ntej, saum lub tsua, nyob saum roob Hos Les tos koj tuaj. Koj yuav ntaus lub tsua, ces dej yuav txhawv tawm los rau tsoom pej xeem haus.”
Mais Xes ua raws li ntawd, cov txwj laus Is Xas Lais ntsia ntsoov nws ua. 7 Mais Xes tis npe rau thaj chaw ntawd hu ua Mas Xas thiab Mes Lis Npas, vim nyob ntawd, cov Is Xas Lais nrhiav lus rau nws thiab lawv sim HUAB TAIS, lawv hais tias : “HUAB TAIS puas nrog peb nyob los tsis nrog ?”
8 Cov As Mas Les tuaj ntaus cov Is Xas Lais, ces lawv sib tawm tsam nyob Les Fis Dis. 9 Mais Xes hais rau Yos Xuas tias : “Koj xaiv ib pab txiv neej nrog koj, tag kis koj tawm mus ntaus cov As Mas Les; hos kuv, mas kuv yuav mus nyob saum lub ncov roob, tuav rawv Tswv Ntuj rab pas ntawm tes.”
10 Yos Xuas ua raws li Mais Xes hais rau nws, nws tawm mus ntaus cov As Mas Les, hos Mais Xes, As Loos thiab Hwm lawv nce mus saum lub ncov roob.
11 Yog tias Mais Xes tsa nws ob txhais tes twj ywm, ces tog Is Xas Lais yeej, yog nws tso nws ob txhais tes dauv, ces tog As Mas Les yeej. 12 Thaum Mais Xes tsaug leeg npab lawm, lawv muab ib lub pob zeb los rau Mais Xes zaum. Mais Xes zaum saum lub pob zeb, hos As Loos thiab Hwm nkawd txheem nws ob txhais tes, ib leeg nyob ib sab. Lawv ua li ntawd ces nws ob txhais tes thiaj tsa tas mus li txog thaum hnub poob qho. 13 Ces Yos Xuas xuas ntaj los ntaus yeej As Mas Les thiab nws haiv neeg. 14 HUAB TAIS hais rau Mais Xes tias : “Koj muab tej ntawd sau cia rau hauv ib phau ntawv kom tau khaws tseg, thiab koj hais rau Yos Xuas tias kuv yuav rhuav As Mas Les kom ploj ntais hauv lub qab ntuj khwb no mus, yuav tsis muaj neeg nco qab txog nws ntxiv.”
15 Ces Mais Xes txhim ib lub thaj txi Ntuj, nws tis npe hu ua HUAB TAIS Nis Xis. 16 Lub npe no txhais tias : “Tuav rawv HUAB TAIS tus chij ntawm tes ! Vim HUAB TAIS tau tsa rog ntaus As Mas Les mus txheej dhau txheej.”

13 Tag kis tom qab, Mais Xes zaum ntawm lub rooj txiav txim rau tsoom pej xeem. Tsoom pej xeem tuaj sawv ntsug ze ntawm nws txij sawv ntxov txog tsaus ntuj. 14 Mais Xes yawm txiv pom nws ua ntau yam rau tsoom pej xeem, nws hais rau Mais Xes tias : “Koj ib leeg xwb, yuav ua cas thiaj ua tas tej hauj lwm ntawd rau tsoom pej xeem ? Ua cas koj ib leeg los zaum txiav txim rau lawv xwb, hos lawv tuaj zov koj txij sawv ntxov txog tsaus ntuj li ?”
15 Mais Xes teb rau nws yawm txiv tias : “Tsoom pej xeem tuaj cuag kuv, kom lawv paub tias Tswv Ntuj xav li cas. 16 Thaum lawv muaj ib qho teeb meem, mas lawv tuaj cuag kuv. Kuv txiav txim rau ib leeg zuj zus, thiab kuv qhia Tswv Ntuj cov txhooj thiab cov kev cai rau lawv.”
17 Mais Xes yawm txiv teb rau Mais Xes tias : “Koj ua li ntawd mas tsis zoo ! 18 Tsis ntev ces yuav dhuav koj, thiab yuav dhuav tsoom neeg nrog koj nyob, vim txoj hauj lwm ntawd hnyav dhau rau koj. Koj ib leeg xwb yuav ua tsis tas npaud.
19 Zaum no, koj mloog kuv qhia ib zaj tswv yim rau koj, thov kom Tswv Ntuj pab koj. Koj txoj hauj lwm yog sawv tsoom pej xeem chaw nyob ntawm Tswv Ntuj xub ntiag, yog cev lawv cov lus rau Tswv Ntuj. 20 Koj yog tus qhia Tswv Ntuj cov txhooj thiab cov kev cai rau lawv, yog tus qhia txoj kev lawv yuav tsum taug ua neej rau lawv thiab qhia tus yeeb yam zoo lawv yuav tsum coj. 21 Tiam sis koj yuav tsum xaiv ib cov txiv neej muaj peev xwm, uas lawv hwm Ntuj, thiab koj ntseeg tau lawv siab, thiab yuav tsis dag, koj tsa lawv ua thawj saib tsoom neeg. Koj tsa ib co saib txhiab leej, ib co saib pua leej, ib cov saib tsib caug leej hos ib co saib kaum leej. 22 Lawv yog cov yuav txiav txim rau tsoom pej xeem txhua lub sij hawm. Tej yam teeb meem loj, lawv mam tso rau koj txiav txim, tej yam teeb meem me, cia lawv txiav lawv. Li no mas koj hauj lwm yuav sib, vim muaj cov neeg pab koj nres. 23 Yog koj ua li no, thov kom Tswv Ntuj pom zoo thiab, mas koj thiaj li yuav ua taus ntev, thiab tas tsoom neeg uas tuaj ntawd thiaj yuav muaj siab kaj lug rov qab mus nyias vaj nyias tsev.”
24 Mais Xes yuav raws li nws yawm txiv hais, nws ua tas puas tsav yam raws li ntawd. 25 Mais Xes xaiv ib pab txiv neej muaj peev xwm, nws tsa lawv ua thawj coj saib tsoom pej xeem : ib co saib txhiab leej, ib co saib pua leej, ib co saib tsib caug leej, ib co saib kaum leej. 26 Lawv txiav txim rau tsoom neeg txhua lub sij hawm. Tej yam teeb meem loj, lawv xa los rau Mais Xes, hos tej yam teeb meem me, lawv txiav lawv rau tas huv si. 27 Ces Mais Xes tso nws yawm txiv rov qab mus, nws yawm txiv taug kev rov mus nws lub teb chaws lawm.

1 Tsoom tub ki Is Xas Lais tawm Hais Nkws Tos teb los tau peb lub hlis lawm. Lawv thiaj los txog lub teb chaws suab puam Xis Nais. 2 Lawv sawv kev Les Fis Dis los, lawv los txog lub hav suab puam Xis Nais, ces lawv tsa tsev nyob hauv lub hav suab puam, cov Is Xas Lais tsa tsev ncaj ntawm lub roob Xis Nais sab tid.
3 Ces Mais Xes nce mus ntsib Tswv Ntuj saum lub roob. HUAB TAIS hu saum roob tuaj rau Mais Xes tias : “Koj yuav hais li no rau Yas Kos tsev neeg, koj yuav tshaj rau cov Is Xas Lais tias : 4 Nej tau pom ntawm nej qhov muag tias kuv tau ua li cas rau cov Hais Nkws Tos, thiab kuv tau coj nej tawm xws li yog ya saum dav ob phab tis, kuv tau coj nej los cuag kuv. 5 Txij no mus, yog nej mloog kuv lus thiab nej khaws nraim kuv lo lus kuv cog rau nej, mas kuv yuav saib nej yog kuv tug nyob hauv tas txhua haiv neeg, vim lub ntiaj teb yog kuv li tas huv si. 6 Kuv yuav saib nej yog ib haiv neeg ua leej choj thiab yog ib haiv neeg qee rau Ntuj. Cov lus no yog cov uas koj yuav hais rau cov Is Xas Lais.”
7 Mais Xes thiaj hu cov txwj laus saib tsoom pej xeem tuaj, nws qhia lawv tas puas tsav yam uas HUAB TAIS tau hais rau nws. 8 Ces tas tsoom pej xeem sawv daws pom zoo ua ib lub suab teb tias : “Tas puas tsav yam HUAB TAIS tau hais, mas peb yuav ua tib si.”
Mais Xes qhia tsoom pej xeem cov lus rau HUAB TAIS.
9 HUAB TAIS hais rau Mais Xes tias : “Kuv yuav tuaj ntsib koj saum ib tauv huab tuab tuab tsaus nti, kom cov neeg hnov kuv nrog koj hais lus, ces lawv thiaj yuav ntseeg koj mus li.”
Ces Mais Xes qhia tsoom pej xeem cov lus rau HUAB TAIS. 10 HUAB TAIS hais rau Mais Xes tias : “Koj mus ntsib tsoom pej xeem, koj hais rau lawv kom hnub no thiab tag kis, lawv tu lawv kom lawv dawb huv ntshiab si, kom lawv ntxhua lawv cov ris tsho, 11 lawv ua tas puas tsav yam kom tiav tos nag kis, vim nag kis, HUAB TAIS yuav nqes los rau tsoom pej xeem txhua tus pom nyob saum lub roob Xis Nais.
12 Koj yuav tu ciam rau cov neeg kom txhob hla mus saum lub ncov roob, koj hais li no : ‘Nej yuav tsis txhob nce mus saum lub ncov roob li, tab yog txav ze xwb los tsis tau. Leej twg mus chwv lub ncov roob, mas tus ntawd yuav tuag. 13 Yuav tsis pub leej twg tsa tes tua tus neeg ntawd, yuav tsum xuas pob zeb txawb los yog xuas hneev tua nws xwb. Txawm yog neeg los yog tus tsiaj kuj xij, nws yuav tsum tuag.’ Thaum lub hom nrov ib suab ntev ntev, mas thaum ntawd txog caij cov neeg pib nce mus saum roob.”
14 Ces Mais Xes nqes saum roob los, nws mus cuag tsoom pej xeem. Nws hais sawv daws kom tu cev huv. Ces lawv thiaj ntxhua lawv tej ris tsho huv si. 15 Mais Xes hais rau tsoom pej xeem hais tias : “Nej npaj siab tos neeg kis, nej tsis txhob nrog poj niam pw.”
16 Neeg kis kaj ntug, thaum sawv ntxov, xob quaj nroo ntws thiab xob laim saum roob tuaj, muaj ib tauv huab tsaus nti ntsauv lub roob. Sawv daws hnov ib lub suab hom nrov muaj zog kawg, hos nyob hauv lub yeej, tsoom pej xeem sawv daws ntshai tshee na. 17 Mais Xes hais kom sawv daws tawm hauv yeej mus, yuav mus ntsib Tswv Ntuj, ces sawv daws mus nyob nram taw roob. 18 Lub roob Xis Nais ncho pa lug, vim HUAB TAIS txia ua hluav taws nqes los nyob saud. Pa taws ncho lug cuag li tawm hauv ib lub qhov txos loj los, hos tas lub roob co qeeg nkaws ua zog koog. 19 Hnov lub suab hom nrov loj zuj zus tuaj, Mais Xes hais lus rau Tswv Ntuj, Tswv Ntuj teb hauv lub suab xob nroo tuaj. 20 HUAB TAIS nqes los nyob saum lub roob Xis Nais, saum lub ncov roob. HUAB TAIS hu Mais Xes kom mus cuag nws, ces Mais Xes nce mus saum lub ncov roob.

1 Tswv Ntuj hais cov lus no : 2 “Kuv yog HUAB TAIS, koj tus Tswv Ntuj, yog tus ua kom koj dim ntawm Hais Nkws Tos teb los, dim ntawm txoj kev ua luag qhev.
3 Koj yuav tsis txhob muaj dua lwm tus tswv ntuj.
4 Koj yuav tsis txhob puab ib tug mlom los ib tug duab zoo li tej yam nyob saum ntuj, los tej yam nyob hauv ntiaj teb no, los tej yam nyob hauv qab thu dej.
5 Koj yuav tsis txhob pe cov mlom ntawd, txhob tsob hwb lawv, vim kuv yog HUAB TAIS thiab yog koj tus Tswv Ntuj, kuv yog ib tug Tswv Ntuj muaj khib, cov uas ntxub kuv, mas kuv rau txim rau phaj tub thiab phaj xeeb ntxwv thiab phaj xeeb ntxwv cov xeeb ntxwv tom qab, vim phaj txiv tau ua txhaum rau kuv. 6 Hos cov nyiam kuv thiab ua raws kuv cov lus qhia, mas kuv hlub lawv thiab pub txiaj ntsha txiaj ntsim ntau rau txhiab leej vam leej mus tiam dhau tiam. 7 Koj yuav tsis txhob hu txog koj tus HUAB TAIS Tswv Ntuj lub npe mus ua tej yam tsis zoo, vim HUAB TAIS yuav tsis zam txim rau tus neeg uas tuav txog nws lub npe dog dig. 8 Koj yuav nco ntsoov caiv hnub xas npas tos, koj yuav muab saib ua ib hnub ntshiab. 9 Koj ua hauj lwm rau hnub, 10 tab sis hnub xya yog hnub caiv xas npas tos rau koj tus HUAB TAIS Tswv Ntuj. Koj yuav tsis txhob ua ib yam hauj lwm dab tsi li. Koj thiab koj tus tub, koj tus ntxhais, koj tus tub txib, koj tus ntxhais txib, koj cov tsiaj txhu, tus qhua uas tuaj nyob hauv koj tsev, nej sawv daws yuav tsis txhob ua hauj lwm li.
11 Vim tias HUAB TAIS tau ua hauj lwm rau hnub los tsim lub ntuj, lub ntiaj teb, lub hiav txwv, thiab tas puas tsav yam nyob hauv, tiam sis hnub xya nws so, vim li ntawd HUAB TAIS tau foom hmoov zoo rau hnub xya, nws muab hnub xya qee ua ib hnub ntshiab.
12 Koj yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub ntiaj teb uas koj tus HUAB TAIS Tswv Ntuj muab pub rau koj.
13 Koj yuav tsis txhob tua neeg. 14 Koj yuav tsis txhob zes luag txij luag nkawm.
15 Koj yuav tsis txhob ua tub sab tub nyiag.
16 Koj yuav tsis txhob liam rau luag tej.
17 Koj yuav tsis txhob ntshaw txeeb luag vaj luag tsev. Koj yuav tsis txhob ntshaw txeeb luag tus poj niam, luag tus tub txib, luag tus ntxhais txib, luag tus nyuj los tus luj, los ib yam dab tsi uas yog luag tug.”
18 Tas tsoom pej xeem pom tias xob quaj xob nroo nrov doog diaj thiab xob laim liab vog, suab hom nrov doog diaj, hos lub roob ncho pa lug, ces lawv ntshai, lawv nyob nrug deb. 19 Lawv thiaj hais rau Mais Xes tias : “Cia koj hais lus rau peb xwb, peb yuav mloog koj hais, kom Tswv Ntuj txhob hais lus rau peb, yog nws hais mas peb yuav tuag.”
20 Mais Xes thiaj hais rau tsoom pej xeem tias : “Nej tsis txhob ntshai, yog Tswv Ntuj xav sim nej siab nws thiaj tuaj, nws xav kom txoj kev ntshai nws nyob rawv hauv nej nruab siab, ces nej thiaj yuav tsis ua txhaum.”
21 Tsoom pej xeem sawv nrug deb, hos Mais Xes txav mus ze ntawm twv huab dub nciab uas Tswv Ntuj nyob.
22 HUAB TAIS hais rau Mais Xes tias : “Koj yuav hais li no rau cov Is Xas Lais : Nej tau pom xyeem ntawm nej qhov muag lawm tias kuv nyob saum ntuj hais lus rau nej zoo li cas. 23 Nej yuav tsis txhob puab tej tus tswv ntuj uas yog nyiaj yog kub rau nej teev. 24 Nej yuav muab av los puab ib lub thaj txi Ntuj rau kuv. Nyob saud, nej yuav hlawv nej cov txim thiab tso nej cov tsiaj txi Ntuj, cov tsiaj loj thiab tsiaj me. Nyob txhua qhov chaw uas kuv xav kom nej nco txog kuv lub npe, mas kuv yuav tuaj thiab yuav foom hmoov zoo rau nej. 25 Yog nej ua ib lub thaj txi Ntuj pob zeb, mas nej tsis txhob siv pob zeb txaug, vim thaum nej siv rab txaug mas nej ua tsis huv rau lub thaj lawm. 26 Nej yuav tsis txhob ua ntaiv nce mus saum kuv lub thaj, vim thaum nej nce, cov qib ntaiv yuav pom nej qhov liab qab.”

20 “Koj yuav tsis txhob hiam, tsis txhob yuam tus pej kum neeg, vim thaud nej yog ib co pej kum neeg nyob Hais Nkws Tos teb. 21 Koj yuav tsis txhob lim hiam rau ib tug poj ntsuam los ib tug me nyuam ntsuag. 22 Yog koj lim hiam rau nws, nws hu txog kuv, mas kuv yuav mloog nws lub suab quaj.
23 Kuv yuav npau taws heev thiab yuav ua kom hniav ntaj txo koj txoj sia, ces koj poj niam yuav ua poj ntsuam thiab koj cov tub yuav ua tub ntsuag. 24 Yog koj qiv nyiaj rau tus kwv tij hauv koj haiv neeg, los rau ib tug pluag hauv koj haiv neeg, mas koj yuav tsis txhob noj nws, koj yuav tsis txhob tsub paj rau nws them.
25 Yog koj txais ib tug lub tsho ntev uas nws muab yuam nuj nqes rau koj, mas thaum hnub poob qho, koj yuav xa rov qab rau nws. 26 Nws tsuas muaj tib lub tsho ntawd ua pam vov thiab ua ris tsho hnav xwb, nws yuav pw zoo li cas ? Yog nws hu txog kuv, kuv yuav mloog nws lub suab quaj, vim kuv lub siab hlub neeg. 27 Koj yuav tsis txhob thuam Ntuj, tsis txhob foom lus phem rau ib tug thawj coj hauv koj haiv neeg.”

1 HUAB TAIS hais rau Mais Xes tias : “Nej tuaj cuag HUAB TAIS. Koj nrog As Loos, Nas Das, As Npis Hus thiab xya caum leej txwj laus Is Xas Lais, nej tuaj nyob nrug deb txhos caug pe hauv av.
2 Mais Xes ib leeg yuav txav los ze HUAB TAIS. Dua li cov yuav tsis txav los, tsoom pej xeem yuav tsis txhob nrog nej tuaj.”
3 Mais Xes rov los hais HUAB TAIS cov lus thiab cov kev cai qhia rau tsoom pej xeem, tas sawv daws pom zoo koom ib lub suab teb tias : “Cov lus uas HUAB TAIS tau hais mas peb yuav coj tas huv tib si.”
4 Mais Xes muab HUAB TAIS cov lus sau rau hauv ib phau ntawv cia, ces tag kis, nws sawv ntxov, nws txhim ib lub thaj txi Ntuj rau ntawm taw roob thiab kaum ob tug ncej zeb rau kaum ob lub xeem Is Xas Lais. 5 Ces nws xa ib co tub hluas Is Xas Lais mus txi Ntuj, lawv coj tej tus thav nyuj mus hlawv txi rau HUAB TAIS. 6 Mais Xes cug cov tsiaj ntawd cov ntshav, nws muab ib nrab rau hauv phiab, nws muab ib nrab hliv ywg lub thaj txi Ntuj. 7 Ces nws muab phau ntawv cog lus los nyeem rau tsoom pej xeem mloog, lawv qw tias : “Txhua yam HUAB TAIS tau hais, peb yuav coj thiab peb yuav mloog.”
8 Mais Xes txawm muab cov ntshav los nchos rau saum tsoom pej xeem sawv daws, nws hais tias : “Cov ntshav no yog ntshav cog lus, HUAB TAIS tau nrog nej cog lus raws li cov lus sau hauv phau ntawv.”
9 Ces Mais Xes nce mus saum roob, As Loos, Nas Das, As Npis Hus thiab xya caum leej txwj laus Is Xas Lais kuj nrog nws mus. 10 Lawv tau pom cov Is Xas Lais tus Tswv Ntuj. Nyob ntawm Tswv Ntuj qab xib taws, yog zoo li ib lub tiaj pov haum ntsuab xiab, tshiab cuag li lub ntuj ntsuab. 11 Tswv Ntuj tsis ua phem rau cov txwj laus Is Xas Lais. Lawv tau ntsia Tswv Ntuj, tau pom nws tseeb tseeb, lawv tseem noj mov thiab haus dej tib si.
12 HUAB TAIS hais rau Mais Xes tias : “Koj nce tuaj ntsib kuv saum roob, koj yuav tuaj nyob ntev saud. Kuv yuav muab ob daim txiag zeb rau koj. Kuv yuav muab txoj cai thiab kuv cov lus qhia sau rau saum ob daim txiag zeb kom koj tau qhia rau tsoom tub ki Is Xas Lais.”
13 Mais Xes sawv, nws tus tub txib Yos Xuas nrog nws mus. Nkawd ob leeg nce mus saum Tswv Ntuj lub roob. 14 Mais Xes hais rau cov txwj laus tias : “Nej nyob ntawm no tos wb rov qab los txog tso, As Loos thiab Hwm nrog nej nyob. Yog leej twg muaj lus dab tsi, nej nrog nkawd hais.”
15 Ces Mais Xes nce dua saum roob lawm. Pom twv huab ntsauv lub roob.
16 HUAB TAIS lub hwj chim tawm los nyob saum roob Xis Nais, ces huab los ntsauv lub roob tau rau hnub nkaus. Hnub xya, HUAB TAIS nyob hauv twv huab hu Mais Xes. 17 Cov Is Xas Lais pom HUAB TAIS lub hwj chim yog zoo li ib co hluav taws cig hlob hlob nyob saum lub ncov roob. 18 Mais Xes nkag hauv twv huab, nws nce mus saum roob lawm. Nws nyob saud plaub caug hnub plaub caug hmo.

1 HUAB TAIS nrog Mais Xes tham, nws hais tias : 2 “Koj hais rau cov tub ki Is Xas Lais kom lawv sau nyiaj txiag tuaj pub rau kuv. Tus twg muaj lub siab xav pub tiag, koj mam sau ntawm nws. 3 Tej yam uas koj yuav txais ntawm lawv mas yog cov no : kub, nyiaj thiab tooj dub, 4 ntaub xia tsam xem, ntaub liab paj yeeb, liab doog, ntaub maj mos, thiab cov plaub tshis, 5 cov tawv yaj zas liab, tej tawv tsiaj nyias nyias, thiab cov txiag ntoo ntseej, 6 tej roj teeb, tej tshuaj tsw qab uas zoo xyaw roj pleev taub hau, thiab cov hmoov xyab tsw qab. 7 Cov pob zeb liab, thiab lwm yam pob zeb muaj nqi uas yuav coj los xaws rau daim ntaub npua xub pwg thiab daim ntaub npua hauv siab. 8 Koj yuav ua ib qho chaw teev kuv, kuv thiaj yuav tau nrog lawv nyob. 9 Koj yuav ua qhov chaw ntawd raws li tus piv txwv uas qhia txog lub Tsev Nyob thiab tus piv txwv qhia txog tej rooj tog nyob hauv, uas kuv yuav qhia rau koj.
10 Koj yuav muab ntoo txua ib lub Xab ntev li ob tshim ib nrab, dav li ib tshim ib nrab, thiab siab li ib tshim ib nrab.
11 Koj yuav muab ib co tseem kub plooj lub Xab sab hauv thiab sab nraud, thiab koj yuav xuas kub ua ib tug ntug ncig lub Xab.

1 Lub Tsev Nyob mas koj yuav muab kaum pluaj ntaub los ua : koj xuas ntaub maj mos, ntaub xia tsam xem, ntaub liab paj yeeb thiab liab doog ua. Koj yuav ntos cov Tshiab Kas Lus Npis cov duab rau saum cov ntaub ntawd.
7 Koj yuav xuas plaub tshis ntos tej pluaj ntaub, ua ib lub tsev tsam phooj vov lub Tsev teev kuv, koj yuav ntos kaum ib pluaj. 15 Koj tws ib co txiag ntoo ntseej ua lub cuam khoov tsev. Koj tso cov txiag rov ntsug.

1 Koj yuav xuas ntoo ntseej ua lub thaj txi Ntuj. Koj yuav txua lub thaj xwm fab xwm meem, ntev tsib tshim, dav tsib tshim, hos siab li peb tshim. 2 Nyob plaub ces kaum, koj yuav ntsia plaub tug kub. koj yuav muab tooj dub plooj lub thaj. 3 Koj yuav ua ib co phiab cug cov tshauv xyaw roj. Koj yuav txua ib co duav yawm tshauv, ib co ntim rau dej foom hmoov zoo, ib co hmuv chob nqaij, thiab ib co tais hlawv hmoov xyab. Koj yuav muab tooj nchuav ua cov twj tais ntawd tas huv tib si.”

1 Thaum tsoom pej xeem pom tias Mais Xes tsis txawj nqes saum roob los, ces lawv tuaj ntsauv As Loos, lawv hais rau nws tias : “Koj cia li ua ib tug tswv ntuj rau peb teev, kom nws mus ua peb ntej, vim Mais Xes uas nws coj peb tawm Hais Nkws Tos teb los, mas peb tsis paub xyov nws dua twg lawm.”
2 As Loos teb rau lawv tias : “Hle nej cov kauj ntseg kub uas nej cov poj niam, cov tub, cov ntxhais coj ntawm pob ntseg, nej nqa tuaj rau kuv.”
3 Tsoom pej xeem sawv daws hle lawv tej kauj ntseg kub ntawm pob ntseg tib si nqa tuaj rau As Loos. 4 As Loos txais cov kub ntawm lawv tes los, nws muab nchuav hauv yeej vub ua ib tug mlom nyuj. Ces lawv hais tias : “Cov Is Xas Lais, nej ntsia ! Tus no yog nej tus Tswv Ntuj, tus uas tau coj nej tawm Hais Nkws Tos teb los !”
5 As Loos pom lawv ua li ntawd, mas nws tsa ib lub thaj txi mlom rau ntawm tus mlom hauv ntej thiab nws ceeb toom rau sawv daws tias : “Tag kis, nej nqaum paj nqaum nruas cav txog HUAB TAIS.”
6 Tag kis, lawv sawv ntxov, lawv tuaj hlawv tsiaj thiab nqa ib co txim tuaj txi lawv tus dab. Tsoom pej xeem tuaj zaum noj mov thiab haus dej, ces lawv sawv mus dhia daj dhia luag lom zem.
7 Ces HUAB TAIS hais rau Mais Xes tias : “Koj kav tsij nqes mus sai, vim koj haiv neeg uas koj tau coj tawm ntawm Hais Nkws Tos teb los, twb ua phem lawm.
8 Lawv tos tsis taus, lawv twb maj ncaim ntawm txoj kev uas kuv nyuam qhuav qhia kom lawv taug. Lawv twb nchuav tau ib tug mlom nyuj rau lawv teev, lawv pe, thiab lawv tua tsiaj txi tus mlom. Lawv hais tias : Cov Is Xas Lais, nej ntsia, tus no yog nej tus Tswv Ntuj uas tau coj nej tawm ntawm Hais Nkws Tos teb los.”
9 HUAB TAIS hais ntxiv rau Mais Xes tias : “Kuv pom tias haiv neeg ntawd yog ib haiv neeg xwb qwb txhav dhau. 10 Zaum no, koj cia kuv npau taws rau lawv, kuv yuav muab lawv rhuav pov tseg kom tas, kuv mam li muab koj mus tsim dua ib haiv neeg loj.”
11 Mais Xes ua tib zoo thov nws tus HUAB TAIS Tswv Ntuj kom Huab Tais zoo siab, nws hais tias : “HUAB TAIS, vim li cas koj thiaj li npau taws rau haiv neeg uas koj lub zog loj thiab koj txhais tes muaj hwj huam tau coj tawm ntawm Hais Nkws Tos teb los ?
12 Vim li cas koj xav kom cov Hais Nkws Tos tau kev hnyos tias : ‘Yog koj siab phem koj txhob txwm coj lawv los tuag kom tas nyob pem roob kom lawv txhob tshuav ib tug nyob ntiaj teb ntxiv ?’ Koj thim koj lub siab npau taws ceev thiab tso qhov phem uas koj xav ua rau koj haiv neeg pov tseg mas. 13 Thov koj nco ntsoov txog koj cov tub txib Has Nplas Has, His Xas Has thiab Is Xas Lais, uas koj tau cog lus ruaj rau lawv tias : ‘Kuv yuav ua kom nej cov xeeb ntxwv huam vam coob npaum li cov hnub qub, thiab kuv yuav muab lub teb chaws uas kuv tau hais rau nej, pub rau nej cov xeeb ntxwv, ua lawv tug mus ib txhis.’”
14 Ces HUAB TAIS thim xav, nws tsis ua phem rau nws haiv neeg raws li nws tau hais.
15 Mais Xes nqes saum roob rov los, nws nqa ob daig txiag zeb Tim Khawv ntawm tes, ob daig txiag zeb ntawd sau ob sab huv si, sab saud thiab sab hauv. 16 Ob daig txiag ntawd yog Tswv Ntuj txaug, cov npe ntawv los yog Tswv Ntuj sau, nws muab txaug rau saum ob daig txiag zeb. 17 Yos Xuas hnov tsoom pej xeem qw tsheej tsaug, nws hais rau Mais Xes tias : “Muaj suab nrov cuag li sib tua hauv lub yeej !”
18 Mais Xes teb tias : “Tsis yog lub suab qw yeej ib nthwv rog, kuj tsis yog lub suab quaj swb ib nthwv rog thiab. Kuv hnov zoo li yog suab hu nkauj sib teb.”
19 Thaum nkawd los txog ze lub yeej lawm, Mais Xes pom tus mlom nyuj thiab tej pab hu nkauj dhia daj dhia luag lom zem. Ces Mais Xes npau taws heev, nws muab ob daig txiag zeb ntawm nws tes pov tseg, ob daig txiag zeb tawg tas ntawm taw roob. 20 Nws muab tus mlom nyuj uas lawv nchuav, pov hlawv hauv hluav taws, nws muab coj los tuav ua hmoov mos mos, nws muab coj mus nphoo rau hauv dej, ces nws yuam cov Is Xas Lais haus cov dej ntawd.
21 Mais Xes hais rau As Loos tias : “Haiv neeg ntawd ua dab tsi rau koj, vim li cas koj thiaj cia lawv ua ib qho txhaum loj tas npaud ?”
22 As Loos teb tias : “Thov koj tus ua Hlob, tsis txhob npau taws, koj paub tias haiv neeg ntawd yeej nkhaus.
23 Lawv hais rau kuv tias : ‘Koj ua ib tug tswv ntuj rau peb teev, kom nws mus ua peb ntej, vim tus Mais Xes uas nws coj peb tawm ntawm Hais Nkws Tos teb los, mas peb tsis paub xyov nws dua twg lawm.’
24 Kuv hais rau lawv tias : ‘Leej twg muaj kub, kom nqa tuaj.’ Lawv muab tuaj rau kuv. Kuv coj mus pov rau hauv hluav taws, ces tus nyuj uas koj pom no thiaj tawm los.”
30 Tag kis tom qab, Mais Xes hais rau tsoom pej xeem tias : “Nej tau ua ib qho txhaum loj kawg. Kuv yuav nce mus pem roob mus cuag HUAB TAIS, kuv yuav thov HUAB TAIS, tej zaum nws yuav zam rau nej.”
31 Mais Xes thiaj rov nce mus cuag HUAB TAIS, nws hais tias : “Haiv neeg ntawd ua ib qho txhaum loj kawg. Lawv puab ib tug tswv ntuj kub rau lawv teev. 32 Tab sis thov koj, thov koj ua siab zam rau lawv qhov txhaum. Yog koj tsis kam zam, no thov koj rhuav kuv lub npe tawm hauv phau ntawv uas koj tau sau !”
33 HUAB TAIS hais rau Mais Xes tias : “Tus tau ua txhaum rau kuv, mas kuv yuav rhuav nws lub npe tawm hauv kuv phau ntawv mus. 34 Zaum no koj rov mus, koj coj haiv neeg ntawd mus rau qhov chaw uas kuv tau hais rau koj. Kuv tus Tshiab yuav mus ua koj ntej. Hnub kuv yuav tuaj xyuas lawv, kuv mam li muab txim rau lawv raws li lawv qhov txhaum.”
35 Ces HUAB TAIS muab txim rau tsoom pej xeem, vim lawv tau nchuav tus mlom nyuj, yog tus mlom uas As Loos nchuav rau lawv.

7 Mais Xes nqa lub Tsev Tsam Phooj, nws coj mus tsa rau sab yeej nraud, nrug deb ntawm lub yeej. Nws tis npe rau tias Tsev Tsam Phooj Sib Ntsib. Yog leej twg xav nug dab tsi ntawm HUAB TAIS, mas nws yuav tawm mus tom lub Tsev Tsam Phooj Sib Ntsib, nyob sab yeej nraud. 8 Niaj zaus thaum Mais Xes tawm mus nraum lub Tsev Tsam Phooj, mas tas sawv daws sawv, nyias sawv ntsug ntawm nyias lub qhov rooj tsev ntaub ntsia, lawv ntsia Mais Xes mus txog ntua ntawm lub Tsev Tsam Phooj. 9 Niaj zaus, thaum Mais Xes mus hauv lub Tsev Tsam Phooj, mas twv huab nqes los nyob ntawm qhov rooj, HUAB TAIS hais lus rau Mais Xes.
10 Tas sawv daws pom twv huab nyob ntawm lub qhov rooj Tsev Tsam Phooj, ces sawv daws sawv, thiab nyias txhos caug ntawm nyias lub qhov rooj tsev ntaub hawm. 11 HUAB TAIS hais lus rau Mais Xes, tim ntsej tim muag sib ntsia, ib yam li ib tug tib neeg nrog nws tus phooj ywg tham tas, ces Mais Xes mam rov los hauv lub yeej. Tab sis Mais Xes tus tub txib Yos Xuas uas yog Nuv tus tub, nyob rawv hauv lub Tsev Tsam Phooj tsis nrug li.
18 Mais Xes hais rau Huab Tais tias : “Thov koj pub kuv pom koj lub hwj chim.”
19 HUAB TAIS hais tias : “Kuv yuav ua kom kuv lub hwj chim ci ntsa iab hla ntawm koj xub ntiag, thiab kuv yuav hais lub npe HUAB TAIS rau koj mloog. Vim kuv hlub tus uas kuv hlub thiab kuv khuv leej tus uas kuv khuv leej.”
20 HUAB TAIS tseem hais tias : “Tab sis koj yuav tsis pom kuv lub ntsej muag, vim tias leej tib neeg pom tsis tau kuv lub ntsej muag yog nws tseem muaj txoj sia.”
21 HUAB TAIS hais ntxiv tias : “Ntawm no muaj ib qho chaw ze kuv, koj sawv saum lub pob zeb. 22 Thaum kuv lub hwj chim hla los, kuv yuav muab koj tso rau hauv kis pob zeb thiab kuv yuav muab tes los thaiv koj kom kuv mus dhau tso. 23 Ces kuv yuav tshem kuv txhais tes kom koj pom kuv lub nrob qaum, tab sis kuv lub ntsej muag, mas neeg pom tsis tau.”

5 HUAB TAIS nyob hauv ib twv huab nqes los, HUAB TAIS los nrog Mais Xes sawv ua ke. Mais Xes hu txog HUAB TAIS lub npe. 6 HUAB TAIS hla ntawm Mais Xes xub ntiag, ces Mais Xes qw nrov nrov tias: “HUAB TAIS, HUAB TAIS, tus Tswv Ntuj uas lub siab hlub mos nyoos, thiab khuv leej neeg, tus npau taws qeeb, tus pub paj tshab ntau, tus tsis fav xeeb. 7 Koj pub txiaj ntsim rau txhiab vam leej, koj ua siab ntev nyiaj ntsia neeg qhov phem, qhov yuam kev thiab qhov txhaum, tiam sis koj tsis cia leej twg dim txim. Thaum phaj txiv ua txhaum, koj nplua phaj tub thiab phaj xeeb ntxwv mus txog tiam peb tiam plaub huv si.”
8 Thooj txhij ntawd, Mais Xes txhos caug ntua pe hauv av pe. 9 Ces nws hais tias : “Huab Tais, yog koj saib kuv tsim nyog, thov koj nrog nraim peb mus, txawm tias peb yog ib haiv neeg xwb qwb txhav, los thov koj zam peb qhov yuam kev thiab zam txhaum rau peb, koj muab peb los ua koj tug.”
29 Thaum Mais Xes nqes saum roob Xis Nais rov los, nws tuav ob daig txiag zeb Ua Tim Khawv hauv nws tes. Nws tsis paub hais tias nws lub ntsej muag ci ntsa iab vim nws tau nrog HUAB TAIS tham.
30 As Loos thiab tas tsoom Is Xas Lais pom Mais Xes, lawv pom nws lub ntsej muag ci ntsa iab, lawv ntshai txav los ze nws. 31 Mais Xes hu lawv, ces As Loos thiab tas cov txwj laus thiaj txav los ze nws. Mais Xes nrog lawv tham. 32 Cov pej xeem Is Xas Lais mam txav los tom qab, ces Mais Xes qhia tas puas tsav yam uas HUAB TAIS tau hais nyob saum roob Xis Nais. 33 Thaum Mais Xes hais lus tas lawm, nws muab ib daig ntaub los npog nws ntsej muag. 34 Thaum Mais Xes yuav nkag mus nrog HUAB TAIS tham, nws mam tshem daim ntaub npog nws lub ntsej muag mus txog thaum nws yuav tawm los. Nws tawm los, nws tshaj rau cov Is Xas Lais paub txog HUAB TAIS cov lus ceeb toom. 35 Cov Is Xas Lais pom Mais Xes lub ntsej muag ci ntsa iab, ces Mais Xes rov muab ntaub los npog nws ntsej muag mus txog thaum nws yuav chaws rov mus nrog HUAB TAIS tham dua.

16 Mais Xes ua tas ib puas tsav yam ntawd raws nraim li HUAB TAIS kom ua. 17 Xyoo ob, lub ib hlis xiab ib, lawv tsa lub Tsev. 18 Mais Xes tsa lub Tsev, nws ntsia cov taw ntsa, nws tsa lub cuam khoov, nws ntsia cov nqaj thiab tsa cov ncej. 19 Ces nws tsa ib lub tsev tsam phooj vov lub Tsev. Mais Xes muab daim ntaub tsev tsam phooj vov sab saud raws li HUAB TAIS tau hais rau Mais Xes. 20 Mais Xes muab ob daig txiag zeb Ua Tim Khawv kaw rau hauv lub Xab. Nws muab cov nqaj tso saum lub Xab, thiab muab lub rooj zaum txawb rau saum lub Xab.
21 Nws nqa lub Xab mus tso rau hauv lub Tsev. Ces nws muab ib daim ntaub thaiv, nws muab ntaub thaiv lub Xab Cog Lus raws li HUAB TAIS tau hais rau Mais Xes. 34 Twv huab los ntsauv lub Tsev Tsam Phooj Sib Ntsib, ces HUAB TAIS lub hwj chim ci puv nkaus lub Tsev. 35 Mais Xes nkag tsis tau mus rau hauv lub Tsev Tsam Phooj Sib Ntsib, vim twv huab tseem ntsauv tsis txav chaw thiab HUAB TAIS lub hwj chim ci ntsa iab puv lub Tsev.
36 Thaum tsoom tub ki Is Xas Lais mus txog ntu kev twg, yog twv huab nce mus nyob siab saum lub Tsev lawm, mas lawv sawv kev mus ntxiv. 37 Yog twv huab tsis nce siab, mas lawv so nyob ntawd txog hnub uas twv huab nce siab rau saud. 38 Vim nruab hnub mas HUAB TAIS twv huab nyob saum lub Tsev, hos hmo ntuj mas muaj ib tug ncej hluav taws cig cig hauv twv huab rau tas tsoom Is Xas Lais pom kev. Lawv mus txog twg mas HUAB TAIS nrog nraim lawv zoo li ntawd.

1 HUAB TAIS hu Mais Xes tuaj nrog nws tham hauv lub Tsev Tsam Phooj Sib Ntsib, nws hais tias : 2 “Koj hais rau tsoom tub ki His Xas Lais tias : Yog nej leej twg xav cev ib yam rau HUAB TAIS, mas nej yuav muab tsiaj los txi, tsiaj loj tsiaj me los tau. 3 Yog tus twg xav hlawv ib tug tsiaj loj txi Ntuj, mas nws yuav xaiv ib tug phaw uas tsis muaj ib qho xyeej. Nws yuav coj tuaj hlawv ntawm qhov rooj Tsev Tsam Phooj Sib Ntsib, ces HUAB TAIS thiaj yuav zoo siab txais. 4 Nws yuav tso nws txhais tes rau saum tus tsiaj taub hau, ces tus tsiaj ntawd thiaj li yuav them nws cov txim txhaum. 5 Nws mam li tua tus tsiaj rau HUAB TAIS. As Loos cov tub uas yog cov leej choj, yuav muab cov ntshav txi Ntuj. Lawv yuav muab hliv ywg ib ncig lub thaj txi Ntuj uas nyob ze ntawm lub qhov rooj Tsev Tsam Phooj Sib Ntsib. 6 Ua li ntawd tas, tus tswv tsiaj yuav muab tus tsiaj laws tawv thiab muab txiav ua tej ces. 7 As Loos cov tub, uas yog cov leej choj, yuav nqa hluav taws los rauv saum lub thaj txi Ntuj. 8 Ces As Loos cov tub uas yog leej choj yuav muab cov ces nqaij, lub taub hau thiab cov roj coj mus teeb rau saum cov hluav taws nyob saum lub thaj txi Ntuj. 9 Tus tswv tsiaj yuav muab dej ntxuav tej plab hnyuv thiab tej tes taw, ces tus leej choj yuav coj mus hlawv tas huv tib si rau saum lub thaj. Tus tsiaj hlawv txi Ntuj ntawd yuav yog zoo li ib taig qav ncho pa tsw qab ntxiag mus ua kom HUAB TAIS lub siab nqig. 10 Yog tus twg xav hlawv ib tug tsiaj me txi Ntuj, ib tug yaj los ib tug tshis, mas nws yuav xaiv ib tug txiv uas tsis muaj chaw xyeej los txi. 11 Nws yuav muab tus tsiaj tua pem qaum thaj txi Ntuj, ntawm HUAB TAIS xub ntiag. Ces As Loos cov tub uas yog cov leej choj yuav muab cov ntshav hliv ncig lub thaj. 12 Tus tswv tsiaj muab tus tsiaj hlais ua tej ces, ces leej choj yuav nqa cov ces ntawd nrog lub taub hau thiab cov roj mus teeb rau saum cov hluav taws uas rauv saum lub thaj. 13 Tus tswv yuav muab dej ntxuav cov plab hnyuv thiab cov tes taw, ces tus leej choj yuav nqa mus hlawv huv tib si saum lub thaj. Tus tsiaj hlawv txi Ntuj no yuav yog ib taig qav ncho pa tsw qab ntxiag mus ua kom HUAB TAIS lub siab nqig. 14 Yog tus twg xav muab noog los hlawv txi Ntuj, mas nws yuav muab ib tug nquab tsug los ib tug nquab lwb rwg. 15 Leej choj yuav nqa tus nquab mus saum lub thaj txi Ntuj, nws yuav zawm nquab caj dab, ces nws dam lub taub hau los hlawv kom ncho pa saum lub thaj txi ntuj. Nws tsi cov ntshav los pleev ib sab ntawm lub thaj. 16 Nws de lub txia thiab dob cov plaub rau hauv lub tais cug cov tshauv xyaw roj uas nyob sab hnub tuaj ntawm lub thaj. 17 Nws muab tus noog phua ob sab, ib sab nrog ib phab tis, tiam sis nws tsis txiav kom tu nrho. Tus leej choj mam li muab tus noog hlawv saum lub cub tawg uas nyob saum lub thaj txi Ntuj. Tus tsiaj hlawv txi Ntuj li no yuav yog ib taig qav ncho pa tsw qab ntxiag mus ua kom HUAB TAIS zoo siab.

1 Yog leej twg muab qoob loo los txi rau HUAB TAIS, mas nws yuav muab ib co hmoov nplej, nws hliv roj rau thiab nphoo hmoov xyab rau saud. 2 Nws yuav nqa cov hmoov nplej ntawd tuaj rau As Loos cov tub uas yog cov leej choj. Nws yuav tsuab ib phoov tes hmoov nplej xyaw roj thiab xyaw hmoov xyab cev rau leej choj kom coj mus hlawv saum lub thaj txi Ntuj, ua ib roog qav ncho pa lug mus ua kom HUAB TAIS siab nqig. 3 Qhov seem, yuav muab rau As Loos thiab nws cov tub, vim yog ib qho seem ntshiab huv ntawm HUAB TAIS rooj qav. 4 Yog koj xav muab cov ncuav ci hauv qhov txos los cev txi Ntuj, mas koj yuav ntse hmoov nplej xyaw roj thiab puab ncuav tsis xyaw poov xab, los koj yuav xub puab ncuav tsis xyaw poov xab, koj mam li pleev roj rau kuj tau. 5 Yog koj muab cov ncuav ci saum daim hlau los cev txi Ntuj, mas koj yuav muab hmoov nplej ntse xyaw roj puab tsis xyaw poov xab. 6 Koj yuav muab ntais ua tej daim, mam muab roj ywg rau. Qhov no yog tus kev cai cev qoob loo txi Ntuj. 7 Yog koj muab cov ncuav ci hauv tais los cev txi Ntuj, mas koj yuav muab cov hmoov nplej do xyaw roj puab.

1 Yog leej twg xav ua ib thaj txi Ntuj noj cov txim, mas nws yuav tua ib tug tsiaj loj, txiv los maum kuj tau, tus tsiaj yuav tsum tsis txhob muaj ib qho xyeej. Nws yuav cev txi rau HUAB TAIS. 2 Nws yuav tso nws txhais tes rau saum tus tsiaj taub hau, thiab yuav tua tus tsiaj nyob ntawm lub qhov rooj Tsev Tsam Phooj Sib Ntsib. Ces As Loos cov tub uas yog cov leej choj yuav muab cov ntshav ywg ncig lub thaj. 3 Nws yuav muab tej yam no ntawm tus tsiaj noj txim mus hlawv ua ib rooj qav rau HUAB TAIS : xws li cov roj uas lo ntawm cov plab hnyuv thiab daim roj npog cov plab hnyuv, 4 ob lub raum, cov roj uas lo rau ob sab ntsag, daim roj uas lo rau thooj siab thiab ob lub raum. 5 As Loos cov tub yuav muab tej no hlawv saum lub thaj, ntxiv cov txim hlawv saum lub cub tawg. Ces yuav yog ib taig qav ncho pa tsw qab mus ua kom HUAB TAIS siab nqig. 17 Qhov no yog ib txog cai rau nej tsoom xeeb ntxwv coj mus ib txhis tsis muaj caij kawg, txawm nej yuav nyob teb chaws twg los nej yuav caiv tsis noj roj tsis noj ntshav li.

37 Qhov hais los no yog cov kab ke ua thaj txi Ntuj hlawv tsiaj, thaj txi Ntuj cev qoob loo, thaj txi Ntuj ntxuav txhaum, thaj txi Ntuj them txim, thaj txi Ntuj tsa leej choj thiab thaj txi Ntuj noj cov txim. 38 Ua raws li HUAB TAIS hais rau Mais Xes saum roob Xis Nais, hnub uas HUAB TAIS qhia kom cov His Xas Lais txi HUAB TAIS nyob hauv lub hav suab puam Xis Nais.

1 HUAB TAIS hais rau Mais Xes tias : 2 “Koj coj As Loos thiab nws cov tub tuaj, koj nqa cov ris tsho, cov roj pleev taub hau, tus nyuj them txhaum, ob tug laug tshis, thiab lub tawb ncuav mov tsis xyaw poov xab. 3 Koj hu tsoom pej xeem huv tib si tuaj nyob ntawm qhov rooj Tsev Tsam Phooj Sib Ntsib.” 4 Mais Xes ua raws li HUAB TAIS tau hais, ces tas tsoom pej xeem tuaj sib txoos nyob ntawm lub qhov rooj Tsev Tsam Phooj Sib Ntsib. 5 Mais Xes hais rau lawv tias : “HUAB TAIS ceeb toom kom peb ua li no !” 6 Ces Mais Xes hu As Loos thiab nws cov tub kom txav los, nws muab dej ntxuav lawv. 7 Nws muab lub tsho ntev rau As Loos hnav, muab txoj siv rau nws sia, muab lub tsho tshaj sab rau nws hnav tuaj saud, thiab muab lub tsho teev Ntuj rau nws npua. Ces nws muab txoj siv pav lub tsho teev Ntuj rau ntawm As Loos duav. 8 Nws muab daim npog hauv siab rau As Loos coj, muab ob txwm kuam hu ua Yus Lis thiab Tus Mis tso rau hauv daim npog hauv siab. 9 Nws muab ib txoj phuam rau As Loos ntoo, nws rhais ib lub paj kub rau saum txoj phuam ncaj ntawm hauv pliaj. Yog lub cim ua leej choj raws li HUAB TAIS qhia kom Mais Xes ua. 10 Ces Mais Xes muab roj pleev lub Tsev Nyob thiab tas puas tsav yam toob xib nyob hauv, nws muab lub Tsev Nyob fij rau HUAB TAIS. 11 Nws pov dej xya zaus rau saum lub thaj txi Ntuj, thiab nws muab roj pleev lub thaj thiab pleev cov twj saum lub thaj, pleev lub rhawv rau dej thiab lub taw rhawv, nws muab lub thaj fij rau HUAB TAIS. 12 Ces Mais Xes hliv roj rau saum As Loos taub hau, nws pleev roj fij As Loos rau HUAB TAIS. 13 Mais Xes hu As Loos cov tub kom txav los ze, nws muab tsho ntev rau lawv hnav, muab siv rau lawv sia, thiab nws muab ib co kaus mom rau saum lawv taub hau, raws li HUAB TAIS qhia kom Mais Xes ua. 14 Mais Xes kom lawv cab tus nyuj ntxuav txhaum los. As Loos thiab nws cov tub tso lawv txhais tes rau saum tus nyuj taub hau, 15 ces Mais Xes muab tus nyuj tua. Mais Xes xuas ntiv tes tub nyuj cov ntshav los pleev cov kub uas nyob ntawm plaub ceg kaum thaj txi Ntuj, kom ntshav ntxuav cov kub ntawd tej qhov tsis huv. Nws muab ib qho ntshav los hliv rau hauv lub taw thaj txi Ntuj. Nws ua kab ke ntxuav txhaum saum lub thaj, vim nws yuav muab lub thaj fij rau HUAB TAIS. 16 Thaum nws ua tas, nws laws cov roj qhwv cov plab hnyuv, cov roj ntawm thooj siab, nws hlais ob lub raum thiab cov roj puab ob lub raum, nws muab coj mus hlawv ncho pa lug rau saum lub thaj txi Ntuj. 17 Daim tawv nyuj, cov nqaij nyuj, thiab cov quav mas Mais Xes coj mus hlawv sab nraum lub yeej raws li HUAB TAIS kom ua. 18 Mais Xes kom lawv cab tus tshis uas yuav muab hlawv txi Ntuj los. As Loos thiab nws cov tub tso lawv txhais tes rau saum tus tshis taub hau, 19 ces Mais Xes muab tus tshis tua. Mais Xes muab cov ntshav ywg ib ncig lub thaj. 20 Nws muab tus tshis txiav ua tej ces, nws muab lub taub hau, nrog cov ces thiab cov roj hlawv ncho pa lug. 21 Nws muab dej ntxuav cov plab hnyuv thiab cov tes taw, ces nws coj mus tso xyaw tus tshis lub cev, nws muab hlawv ua ke. Yog ib tug tsiaj hlawv txi kom HUAB TAIS lub siab nqig, thiab yog ib phaj qav ncho pa rau HUAB TAIS hnia, raws li HUAB TAIS hais rau Mais Xes.
22 Mais Xes tseem kom lawv cab lwm tus tshis los, yog tus tshis ua thaj txi Ntuj tsa leej choj. As Loos thiab nws cov tub tso lawv txhais tes rau saum tus tshis taub hau, 23 ces Mais Xes muab tua. Mais Xes tub ib qho ntshav los pleev As Loos daim nplooj ntseg xis, pleev As Loos tus ntiv tes xoo xis thiab pleev nws tus ntiv taw xoo xis. 30 Ua tas, mas Mais Xes muab roj thiab muab cov ntshav uas nyob saum lub thaj txi Ntuj tsuag As Loos thiab As Loos cov ris tsho, nws muab tsuag rau As Loos cov tub thiab lawv cov ris tsho huv tib si. Nws muab As Loos thiab nws cov ris tsho fij rau HUAB TAIS, nws muab As Loos cov tub thiab lawv cov ris tsho cev rau HUAB TAIS li ntawd. 31 Ces Mais Xes hais rau As Loos thiab nws cov tub tias : “Nej muab cov nqaij hau kom siav nyob ntawm lub qhov rooj Tsev Tsam Phooj Sib Ntsib. Nej yuav noj cov nqaij thiab cov ncuav mov hauv lub tawb rau cov ncuav txi Ntuj tsa leej choj nyob ntawd, raws li kuv tau hais rau nej tias : ‘As Loos thiab nws cov tub yuav noj cov ncuav mov no.’ 32 Nej noj mov noj nqaij tas, nej muab cov mov thiab cov nqaij seem hlawv.”

1 HUAB TAIS hais lus rau Mais Xes thiab As Loos nkawd tias : 2 “Neb hais rau tsoom tub ki His Xas Lais tias : Tas cov tsiaj nyob nruab nqhuab mas nej noj tau cov zoo li no : 3 hom tsiaj twg uas txhais taw muaj rau thiab faib ua ob tug rau thiab nws zom zaub, mas nej thiaj noj tau. 4 Cov tsiaj zom zaub muaj ob tug rau taw uas nej noj tsis tau mas tsuas muaj li no : Nej yuav saib tus ntxhuav yog ib tug tsiaj tsis huv, nws yog tsiaj zom zaub, tab sis nws tus rau taw tsis faib ua ob tug rau. 5 Nej yuav saib tus nas ntxhw yog ib tug tsiaj tsis huv, nws yog tsiaj zom zaub, tiam sis nws tsis muaj ob tug rau taw. 6 Nej yuav saib tus luav yog ib tug tsiaj tsis huv, txawm nws yog tsiaj zom zaub, los nws tus rau taw tsis faib ua ob tug. 7 Nej yuav saib tus npua yog ib tug tsiaj tsis huv, nws muaj ob tug rau taw tiam sis nws tsis zom zaub. 8 Nej yuav tsis txhob noj cov tsiaj ntawd tej nqaij, tsis txhob kov cov qauv li, nej yuav saib lawv yog tsiaj tsis huv.

1 HUAB TAIS hais rau Mais Xes thiab As Loos nkawd tias : 2 “Yog ib tug neeg daim tawv xoo pob, voos kiav txhab, los tej tawv nqaij pheej txaij, mas yuav ceev faj tsam yog mob ruas. 45 Yog ib tug neeg mob ruas lawm, mas nws yuav tsum hnav tej ris tsho khaub hlab, cia plaub hau ntxhov, nws yuav npog nws sab di ncauj saud, thiab nws yuav qw tias : ‘Tsis huv! Tsis huv!’ 46 Nws mob ntev li cas, mas nws tsis huv ntev li ntawd, vim nws tsis huv, mas nws yuav nyob twm zeej, nws yuav tsum tawm mus nyob sab yeej nraud.”

1 HUAB TAIS hais rau Mais Xes tias : 2 “Koj hais rau As Loos, rau nws cov tub thiab rau tas tsoom tub ki His Xas Lais tias : HUAB TAIS tau ceeb toom li no : 3 Txhua tus neeg hauv haiv His Xas Lais, tus nyob sab yeej hauv, thiab tus nyob sab yeej nraud huv tib si, yog nws tua nyuj, tua yaj los tua tshis txi Ntuj, 4 nws tsis coj los tua ntawm lub qhov rooj Tsev Tsam Phooj Sib Ntsib, ze ntawm HUAB TAIS qhov chaw nyob, mas tus ntawd yuav tsum ris cov ntshav uas tau nchuav ntawd, ces nws yuav raug ntiab tawm hauv nws haiv neeg mus. 5 Li ntawd, cov His Xas Lais yuav tsum coj cov tsiaj uas lawv xav tua txi Ntuj tuaj rau leej choj txi rau HUAB TAIS nyob ntawm lub qhov rooj Tsev Tsam Phooj Sib Ntsib. Lawv yuav ua raws li ib thaj txi Ntuj noj cov txim. 6 Leej choj yuav muab cov ntshav hliv rau saum HUAB TAIS lub thaj uas nyob ntawm lub qhov rooj Tsev Tsam Phooj Sib Ntsib. Nws yuav muab cov roj hlawv ncho pa mus rau HUAB TAIS, kom nws lub siab nqig. 10 Txhua leej txhua tus hauv cov yim neeg His Xas Lais, los txhua tus qhua tuaj nyob hauv nej, yog leej twg noj ntshav, tsis hais ntshav dab tsi, mas kuv yuav tawm tsam ntaus nws, vim nws tau noj ntshav, ces kuv yuav ntiab nws tawm hauv kuv haiv neeg mus. 11 Vim cev nqaij txoj sia yog cov ntshav. Cov ntshav ntawd kuv muab rau nej ua kab ke them txim txhaum nyob saum lub thaj txi Ntuj kom cawm tau nej txoj sia, vim kawg yog ntshav thiaj them tau txim txhaum, thiab cawm tau ib txog sia. 12 Vim li ntawd, kuv hais rau tsoom His Xas Lais tias : ‘Nej yuav tsis txhob noj ntshav li, tus qhua uas tuaj nyob hauv nej los yuav tsis txhob noj ntshav.’ 13 Nej leej twg, tsis hais tus His Xas Lais los tus qhua uas tuaj nyob hauv nej, yog nws mus yos hav zoov tua tau nqaij, txawm yog tsiaj los xij noog los xij uas nws noj tau, nws yuav tsum muab cov ntshav hliv pov tseg thiab muab av los npoog rau. 14 Vim txhua yam nqaij txoj sia yog nws cov ntshav, kuv thiaj hais rau tsoom His Xas Lais tias : ‘Nej yuav tsis txhob noj ib qho ntshav dab tsi li, vim txhua yam nqaij txoj sia yog nws cov ntshav, leej twg noj ntshav yuav raug ntiab tawm mus.’ 15 Nej leej twg, txawm yog tus pej xeem los tus qhua, yog nws noj ib tug tsiaj tuag los ib tug tsiaj raug lwm tus tsiaj tom tuag, mas nws yuav tsum ntxhua nws cev khaub ncaws thiab yuav tsum muab dej los ntxuav nws, nws yuav tsis huv txwm hnub ntawd txog tsaus ntuj, ces nws mam rov huv tuaj. 16 Tiam sis yog nws tsis ntxhua nws cov khaub ncaws thiab tsis ntxuav nws lub cev, mas nws yuav ris lub nra txhaum.

1 HUAB TAIS hais rau Mais Xes tias : 2 “Koj yuav hais rau tsoom tub ki His Xas Lais tias : Nej yuav ua neeg ntshiab, vim kuv yog nej tus HUAB TAIS, nej tus Tswv Ntuj, kuv yog Tus Ntshiab. 17 Koj yuav tsis txhob ntxub koj tus kwv tij nyob hauv koj nruab siab. Koj yuav qhuab qhia tus uas nrog koj ua ib haiv neeg, koj thiaj yuav tsis tau ris nws qhov txhaum. 18 Koj yuav tsis txhob rob caub thiab yuav tsis txhob chim ntev rau tus uas nws yog koj haiv neeg. Koj yuav nyiam tus nyob ze koj ib yam li koj nyiam koj. Vim kuv yog HUAB TAIS.

1 HUAB TAIS hais rau Mais Xes hais tias : 4 HUAB TAIS cov hnub nyoog nqaum paj nqaum nruas yog tej lub txoos ntshiab. Thaum txog caij txog nyoog, mas nej yuav hu cov His Xas Lais tuaj sib txoos ua ke, raws li no : 5 Lub ib hlis, xiab kaum plaub tsaus ntuj, yog Hmo Hla uas nej yuav muab qee rau HUAB TAIS. 6 Lub hlis ntawd tim kaum tsib, yog hnub nco txog cov mov tsis xyaw poov xab ; nej yuav noj mov tsis xyaw poov xab xya hnub sib law. 7 Thawj hnub, nej yuav sib sau ua lub txoos ntshiab, nej yuav tsis txhob ua ib yam hauj lwm hnyav li. 8 Xya hnub sib law, nej yuav niaj hnub txi ib pluas qav rau HUAB TAIS. Hnub xya, yog hnub sib sau ua lub txoos ntshiab dua, nej yuav tsis txhob ua ib yam hauj lwm hnyav li.
9 HUAB TAIS hais rau Mais Xes tias : 10 “Koj hais rau Tsoom tub ki His Xas Lais tias : Thaum nej mus txog lub teb chaws uas kuv muab rau nej nyob, nej cog qoob loo siav, nej sau, mas nej yuav nqa thawj tes nplej tuaj rau tus leej choj. 11 Leej choj yuav muab cev rau HUAB TAIS kom nws saib nej xis nws siab. Hnub lawv qab Xas Npas Tos, mas leej choj yuav cev cov qoob tshiab ntawd rau Ntuj.
15 Txij hnub lawv qab xas npas tos uas nej tuaj cev thawj rev nplej txi Ntuj, nej yuav suav xya lub lis piam txwm nkaus. 16 Nej yuav suav tsib caug hnub, txog hnub lawv qab xas npas tos dua, ces nej rov qab nqa dua ib co qoob loo tuaj ua dua cov kab ke cev qoob loo txi Ntuj rau HUAB TAIS.”
26 HUAB TAIS hais rau Mais Xes tias : 27 “Lub xya hli xiab kaum, yog hnub them txim txhaum. Nej yuav sib sau ua lub txoos ntshiab. Nej yuav yoo mov thiab nej yuav hlawv ib phaj qav txi HUAB TAIS. 28 Hnub ntawd, nej yuav tsis txhob ua ib yam hauj lwm dab tsi li, vim hnub ntawd yog hnub them txim txhaum, uas luag ua kab ke them txim txhaum rau nej nyob ntawm nej tus HUAB TAIS Tswv Ntuj xub ntiag. 29 Kuv hais tseeb, yog leej twg tsis yoo mov hnub ntawd, mas nws yuav raug ntiab tawm hauv nws tsev neeg mus. 30 Yog leej twg ua ib yam hauj lwm hnub ntawd, mas kuv yuav ua kom nws ploj hauv nws haiv neeg mus. 31 Nej yuav tsis txhob ua ib yam hauj lwm dab tsi li, yog ib txog cai rau nej tsoom xeeb ntxwv coj mus ib txhis, txawm nej nyob lub teb chaws twg, los nej yuav tsum coj. 32 Hnub ntawd yog ib hnub uas nej yuav tsum so tiag. Nej yuav yoo mov, pib yoo hnub xiab cuaj lub hli ntawd, txij yav tsaus ntuj mus txog hnub xiab kaum tsaus ntuj, nej yuav tso hauj lwm tseg huv tib si.”
33 HUAB TAIS hais rau Mais Xes tias : 34 “Koj hais rau cov tub ki His Xas Lais tias : Lub xya hli tim kaum tsib, nej yuav pib ua HUAB TAIS cov kab ke nco txog cov Tsev Tsam Phooj xya hnub. 35 Thawj hnub, nej ua lub txoos ntshiab, nej yuav tsis txhob ua ib yam hauj lwm hnyav li. 36 Nej yuav niaj hnub hlawv ib phaj qav txi HUAB TAIS puv xya hnub sib law. Hnub yim, nej yuav sib sau ua lub txoos ntshiab, nej yuav hlawv ib phaj qav txi HUAB TAIS. Hnub nej sib sau ua ke, nej yuav tsis txhob ua ib yam hauj lwm hnyav. 37 Cov hnub nyoog no yog hnub nyoog qee cia nco txog HUAB TAIS, mas nej yuav hu cov His Xas Lais tuaj sib sau ua lub txoos ntshiab, hlawv tej phaj qav txi HUAB TAIS, hlawv tsiaj txi Ntuj, cev qoob loo txi Ntuj, ua thaj txi Ntuj noj cov txim, hliv dej hliv cawv txi Ntuj, raws li nyias tej kab ke kav nyias lub hnub nyoog. 38 Nej yuav txi Ntuj ua cov ntees nqaum paj nqaum nruas no rau HUAB TAIS ntxiv rau cov hnub xas npas tos huv tib si, thiab tseem ntxiv rau tej hnub uas nej tuaj yeem xav cev paj tshab rau Ntuj, thiab xav ua Ntuj tsaug, los xav pauj tej lub yeem rau HUAB TAIS.

1 HUAB TAIS hais rau Mais Xes saum lub roob Xis Nais hais tias : 2 “Koj hais rau tsoom tub ki His Xas Lais tias : Thaum nej mus txog lub teb chaws uas kuv muab rau nej nyob lawd, mas tej av yuav tsum so ib xyoos xas npas tos cia hwm HUAB TAIS. 3 Koj yuav cog noob qoob noob loo rau xyoo hauv koj daim teb, koj yuav tav koj cov hmab txiv cawv rau xyoo, thiab koj yuav sau qoob rau xyoo. 4 Tab sis thaum txog Xyoo Xya, mas tas lub teb chaws, tej av yuav so ib xyoos xas npas tos hwm HUAB TAIS. Koj yuav tsis cog noob qoob rau hauv koj daim teb thiab koj yuav tsis tav koj cov hmab txiv cawv li. 5 Koj yuav tsis hlais cov ntxaib nplej uas koj tsis tau cog, thiab koj yuav tsis de cov txiv cawv saum cov hmab uas koj tsis tau tav. Yog xyoo rau av so. 6 Xyoo Xya, cia av so xyoo xas npas tos, mas koj yuav siv tas puas tsav yam uas tuaj hauv nruab teb ua txhiam xws rau koj, rau koj tus tub txib, tus ntxhais txib, koj tus tub zog, tus qhua tuaj so hauv koj tsev, rau tas txhua leej txhua tus uas nyob hauv koj tsev tib si. 7 Koj cov tsiaj thiab tas cov tsiaj hauv lub teb chaws los yuav noj tej yam uas tuaj hauv nruab teb tib si thiab.
8 Koj yuav suav xya ntu xya xyoo, uas yog xya zaus xya xyoo, yam li plaub caug cuaj xyoos. 9 Thaum txog lub xya hli xiab kaum, koj yuav tshuab hom nrov. Hnub them txim txhaum, mas tas lub teb chaws yuav tshuab hom nrov nrov. 10 Nej yuav muab xyoo tsib caug ua Xyoo Ntshiab. Nej yuav tshaj rau cov neeg nyob hauv lub teb chaws tias sawv daws dim ntawm txoj kev ua qhev. Yog ib lub caij rau nej sawv daws hom khaj : nej nyias yuav rov mus nyob hauv nyias lub tsev, nyias yuav rov mus nyob hauv nyias lub xeem. 11 Xyoo tsib caug yuav yog ib xyoos nej hom khaj dhia daj dhia luag : Nej yuav tsis tseb noob qoob noob loo, nej yuav tsis sau cov nplej uas nej tsis tau cog, nej yuav tsis de txiv cawv saum cov hmab uas nej tsis tau tav ntsis. 12 Vim yog ib xyoos hom khaj dhia daj dhia luag, yog ib Xyoos Ntshiab. Mas nej yuav noj tej txhiam xws uas tuaj nruab teb.
13 Xyoo hom khaj ntawd, mas nej nyias yuav rov mus nyob hauv nyias tsev. 14 Yog koj muag ib yam dab tsi rau ib tug neeg hauv koj lub teb chaws, los koj muas dab tsi ntawm nws los, mas yuav tsis txhob muaj ib tug noj paj ntawm nws tus kwv tij. 15 Koj yuav suav saib lub xyoo hom khaj dhau tau pes tsawg xyoo lawm, ces koj yuav them tus nqi muas raws li ntawd. Tus muag rau koj kuj yuav suav saib yuav sau tau pes tsawg cim qoob, ces nws yuav hais tus nqi rau koj them raws li ntawd. 16 Yog tseem tshuav ntau xyoo, mas tus nqe yuav kim, yog tshuav tsawg xyoo, mas tus nqe yuav pheej yig, vim tias nws yuav xam saib nws muag pes tsawg cim qoob rau koj. 17 Nej ib leeg yuav tsis txhob dag ib leeg noj. Nej yuav ntshai Tswv Ntuj, vim kuv yog nej tus HUAB TAIS Tswv Ntuj. 18 Nej ua raws li kuv cov cai lij choj thiab nej mloog kuv tej kev cai mog. Nej ua raws kuv cov cai lij choj, ces nej yuav nyob nyab xeeb hauv lub teb chaws. 19 Tej av yuav txi txiv, nej yuav tau noj txaus siab, thiab nej yuav tau nyob nyab xeeb hauv lub teb chaws. 20 Nej hais tias : “Yog peb tsis tseb noob qoob noob tsa thiab tsis sau qoob sau loo, mas peb yuav muab dab tsi los noj Xyoo Xya ?” 21 Nej nco ntsoov tias Xyoo Rau, kuv yuav tsuag kuv lo lus foom hmoov zoo rau nej, ces Xyoo Rau nej yuav tau qoob loo txaus noj peb xyoos. 22 Thaum txog Xyoo Yim, nej rov tseb nplej, nej tseem noj cov qoob uas nej sau Xyoo Rau tsis tau tas, nej tseem yuav noj mus txog Xyoo Cuaj, nej yuav noj cov qoob qub mus txog thaum cov qoob tshiab siav.

3 Yog nej coj raws li kuv cov kev cai lij choj, yog nej khaws kuv tej lus qhuab lus qhia thiab ua raws nraim li ntawd, 4 mas kuv yuav ua kom nag los rau nej raws caij raws nyoog kom txaus nej siv, tej av yuav ntsu qoob, tej ntoo yuav txi txiv ncw ncw. 5 Yuav muaj nplej rau nej ntaus hauv lub tshav ntaus nplej mus txog lub caij de txiv cawv. Nej yuav de txiv cawv mus txog lub caij tseb nplej. Nej yuav muaj mov txaus noj, thiab nej yuav tau nyob nyab xeeb hauv nej lub teb chaws. 6 Kuv yuav xa kev thaj yeeb tuaj rau lub teb chaws, ces nej yuav pw tsaug zog, tsis muaj leej twg yuav tuaj ua kom nej txhawj. Kuv yuav ua kom tej tsiaj nyaum ploj hauv nej lub teb chaws mus. Kuv yuav tsis pub ib rab ntaj tuaj hauv nej lub teb chaws. 7 Nej yuav caum nej cov yeeb ncuab, thiab nej cov ntaj yuav ua lawv vau tas. 8 Nej tsib leeg yuav caum yeej lawv ib puas leej, nej ib puas leej yuav caum yeej lawv kaum txhiab leej, nej cov ntaj yuav ua nej cov yeeb ncuab vau tas. 9 Kuv yuav tig ntsej muag rau nej, kuv yuav ua kom nej coob thiab huam vam. Kuv yuav khaws lo lus kuv tau nrog nej cog cia nyob mus li tsis rhuav. 10 Nej noj ib cim qoob, nej yuav tsum thau cov qoob laus rau nraum zoov, nej thiaj yuav tau chaw ntim cov qoob tshiab. 11 Kuv yuav tsa tsev nyob nruab nrab nej, kuv yuav tsis tso nej pov tseg. 12 Kuv yuav nrog nej nyob, kuv yuav ua nej tus Tswv Ntuj, nej yuav ua kuv haiv neeg. 13 Kuv yog nej tus HUAB TAIS, nej tus Tswv Ntuj, yog tus coj nej tawm Hais Nkws Tos teb los, kom nej tsis txhob tau ua luag qhev ntxiv. Kuv dam nej rab quab pov tseg, kuv ua kom nej tsa taub hau siab mus kev.

1 HUAB TAIS hais lus rau Mais Xes nyob hauv lub hav suab puam Xis Nais, hauv lub Tsev Tsam Phooj Sib Ntsib. Yog xyoo ob txij hnub lawv tawm Hais Nkws Tos teb los, thaum lub ob hlis xiab ib . HUAB TAIS hais tias : 2 “Koj txheeb tsoom tub ki His Xas Lais, txheeb raws cov xeem thiab cov yim neeg, txheeb cov txiv neej cov npe, suav ib lub npe zuj zus. 3 As Loos neb yuav sau cov tub His Xas Lais muaj nees nkaum xyoo rov saud tas huv si, uas txawj mus ntaus rog cov npe, muab los ua tej pab raws lawv txoj kev kawm ua tub rog. 4 Neb yuav xaiv ib lub xeem ib tug txiv neej pab neb, yuav xaiv ib tug uas yog tus txiv tsev.
17 Mais Xes thiab As Loos nkawd hu cov txiv neej uas muaj npe tuaj. 18 Ces nkawd hu tas tsoom sid tuaj sib sau lub ob hlis, hnub xiab ib. Cov His Xas Lais sib zeem ua kwv tij raws lawv lub xeem thiab lawv tsev neeg. Lawv sau cov txiv neej muaj nees nkaum xyoo rov saud cov npe, pib sau ib leeg zuj zus. 19 Mais Xes txheeb lawv cov npe nyob hauv lub hav suab puam Xis Nais, raws li HUAB TAIS kom nws ua.

1 HUAB TAIS hais rau Mais Xes hais tias : 2 “Koj hais rau tsoom tub ki His Xas Lais tias : Yog ib tug txiv neej los ib tug poj niam xav pauj ib lub yeem, hu ua lub yeem nas xis las, uas nws cog lus rov muab nws qee rau HUAB TAIS, 3 mas nws yuav tsum yoo cawv, tsis haus ib yam uas xyaw cawv li. Nws yuav tsis txhob haus cawv qaub, tsis txhob haus kua txiv cawv, tsis noj cov txiv cawv de tshiab los txiv cawv qhuav li. 4 Thaum nws nyob hauv lub caij pauj yeem nas xis las ntawd mas nws yuav tsis txhob noj ib yam uas los ntawm txiv cawv los, tsis hais kua los phuas li. 5 Tas lub caij nws pauj yeem ntawd, txawm yuav ntev li cas los nws yuav tsis txhob chais plaub hau. Lub caij ntawd nws yog ib tug neeg qee rau HUAB TAIS, mas nws yuav tsum cia plaub hau ntev. 6 Tas lub caij ntawd, nws yuav tsis txhob txav mus ti ib tug tuag li. 7 Txawm yog nws txiv tuag, los nws niam tuag, los nws tus kwv tus tij tuag, los tus muam tuag, mas nws yuav tsis txav ze, vim yuav tsis txhob cia nws tsis huv, vim nws yog ib tug neeg qee rau nws tus Tswv Ntuj lawm. 8 Tas lub sij hawm nws pauj lub yeem nas xis las, nws rov muab nws qee rau HUAB TAIS.
9 Yog muaj ib tug neeg nyob nyob cia li tuag tam sim ntawd ze nws, mas tus tuag ntawd tsuas nws cov plaub hau tsis huv lawm, ces nws yuav tsum chais plaub hau dawb paug hnub uas nws ua cov kab ke ntxuav huv. Hnub nws chais nws cov plaub hau mas yog hnub xya.
10 Hnub yim, nws yuav tsum nqa ob tug nquab, hom soob los hom loj kuj tau, tuaj rau tus leej choj ntawm lub qhov rooj Tsev Tsam Phooj Sib Ntsib. 11 Leej choj yuav muab ib tug nquab ua kab ke txi Ntuj ntxuav txhaum, hos muab ib tug ua kab ke hlawv txi Ntuj. Ua li ntawd tas, leej choj mam li ua cov kab ke ntxuav qhov tsis huv uas nws tau kis ntawm tus tuag los. Hnub ntawd nws yuav ua kab ke muab nws lub taub hau fij rau Ntuj.
12 Nws kuj yuav ua cov kab ke muab nws rov fij rau HUAB TAIS dua, ces nws rov nyob hauv lub caij pauj yeem nas xis las dua kom puv tsug. Nws yuav coj ib tug yaj muaj ib xyoos tuaj ua kab ke txi Ntuj them txim txhaum. Tsis txhob suav lub caij nws xub pib pauj yeem los lawd, vim nws cov plaub hau tau tsuas tsis huv lawm.
22 HUAB TAIS hais cov lus no rau Mais Xes : 23 “Koj hais lus rau As Loos thiab nws cov tub, koj hais rau lawv tias : Nej yuav foom hmoov zoo rau cov His Xas Lais, nej yuav foom lus zoo li no rau lawv : 24 ‘Thov kom HUAB TAIS foom hmoov zoo rau koj thiab pov hwm koj ! 25 Thov kom HUAB TAIS lub ntsej muag ci ntsa iab rau saum koj thiab pub nws lub txiaj lub ntsim rau koj ! 26 Thov kom HUAB TAIS qhib nws lub ntsej muag rau koj pom thiab pub kev thaj yeeb rau koj !’
27 Koj qhia kom lawv siv kuv lub npe rau saum cov His Xas Lais li no, ces kuv yuav foom hmoov zoo rau lawv.”

5 HUAB TAIS hais rau Mais Xes hais tias: 6 “Koj yuav hu cov Les Vis hauv tsoom His Xas Lais tuaj, koj yuav ua cov kab ke ntxuav lawv. 7 Koj ua kab ke ntxuav lawv zoo li no : Koj yuav tsuag dej ntshiab rau saum lawv, lawv yuav chais lawv ib ce thoob plaws thiab lawv yuav ntxhua lawv tej ris tsho, ces lawv yuav huv. 8 Lawv yuav tua ib tug heev nyuj txi Ntuj, thiab lawv yuav txi ib co ncuav mov xyaw roj. Koj tseem yuav tua ib tug heev nyuj los ua cov kab ke ntxuav txhaum. 9 Ces koj coj cov Les Vis los nyob ntawm lub Tsev Tsam Phooj Sib Ntsib, koj nqua hu tsoom His Xas Lais sawv daws tuaj. 10 Koj kom cov Les Vis los sawv ntawm HUAB TAIS xub ntiag, ces tsoom tub ki His Xas Lais yuav tsa tes rau saum lawv. 11 As Loos muab cov Les Vis fij rau Ntuj, nws tsa nws ob txhais tes ua lub ntim cev cov Les Vis rau HUAB TAIS. Nws sawv tas tsoom His Xas Lais chaw ua qhov ntawd. Ces cov Les Vis thiaj li yog ib co tub qee cia tsob hwb HUAB TAIS.

4 Tsoom pej xeem thiab tas haiv neeg sawv daws tshaib plab. Cov His Xas Lais rov qab quaj quaj yws yws tias : “Leej twg yuav muab nqaij rau peb noj ?
5 Ua cas peb yuav nco tej nqaij ntses uas peb tau noj dawb nyob Hais Nkws Tos teb ua luaj ! Nco tej dib ntsuab, tej dib pag, tej zaub, tej dos tej qij tib si !
6 Nyem no ces peb nyob yoo tshaib yoo nqhis, peb qaug zog zuj zus, peb ntsia qhov twg los tsuas pom mov Mas Nas xwb !”
7 Cov Mas Nas ntawd ua tej lub li noob zaub txhwb qaib, khov ntseeg nkaws zoo li ib cov txab ntoo. 8 Tsoom pej xeem niaj hnub mus ncig khaws Mas Nas los noj, lawv xuas zeb zom thiab muab tuav hauv qhov cos, ces lawv muab hau rau hauv lauj kaub, lawv mam puab ua ncuav noj. Cov ncuav Mas Nas qab li ncuav nplej xyaw roj. 9 Hmo ntuj, thaum lwg poob los, cov Mas Nas kuj nrog lwg poob los thiab.
10 Mais Xes hnov tsoom pej xeem quaj quaj, nyias quaj ntawm nyias lub qhov rooj tsev tsam phooj. Ces HUAB TAIS npau taws heev, hos Mais Xes ntxhov siab kawg. 11 Mais Xes hais rau HUAB TAIS tias : “Vim li cas koj ua phem rau koj tus tub txib ? Vim li cas koj saib kuv tsis xis koj siab, koj thiaj muab lub nra uas coj haiv neeg no rau kuv ris ? 12 Puas yog kuv tau xeeb haiv neeg no, thiab tau yug haiv neeg no ? Ua cas koj thiaj hais rau kuv tias: ‘koj puag haiv neeg no rau ntawm koj xub ntiag xws li leej niam pub mis puag nws tus me nyuam noj mis ? Koj puag lawv mus kom txog lub teb chaws uas kuv cog lus muab rau lawv cov yawg koob ?’ 13 Kuv yuav nrhiav nqaij qhov twg rau haiv neeg no noj ? Lawv ua kuv ntxhov siab kawg vim lawv quaj tsis tseg rau kuv tias ‘Koj muab nqaij rau peb noj!’
14 Kuv ib leeg ris tsis taus haiv neeg no, hnyav kuv dhau. 15 Yog koj ua nyuaj kuv li no, thov koj muab kuv tua kom tuag zoo dua ! Ab ! kheev lam koj hlub kuv mas, kuv yuav tsis pom txoj kev txom nyem no ntxiv lawm !”
24 Mais Xes tawm mus hais HUAB TAIS cov lus qhia rau tsoom pej xeem. Nws hu xya caum leej txwj laus tuaj sib sau nyob ntawm lub Tsev Tsam Phooj,
25 HUAB TAIS nqes los nyob saum twv huab. Mais Xes nrog nws tham, ces Tswv Ntuj tso nws lub Tswv Yim nqes los tsaws saum xya caum leej txwj laus ntawd. Thaum Tswv Ntuj lub Tswv Yim nyob saum lawv, mas lawv ua yaj saub thaum ntawd, tiam sis lawv tsis rov qab ua ntxiv lawm.
26 Muaj ob tug txiv neej nyob hauv yeej, ib tug hu ua Es Das, ib tug hu ua Mes Das, Tswv Ntuj lub Tswv Yim los nyob saum nkawd thiab, txawm tias nkawd tsis tuaj nyob ntawm lub Tsev Tsam Phooj, thiab nkawd tsis nrog lawv muaj npe. Tsis kav nkawd pib ua yaj saub nyob hauv lub yeej. 27 Ib tug tub hluas khiav tuaj hais qhia Mais Xes tias : “Es Das thiab Mes Das nkawd ua yaj saub nyob hauv yeej lawm.”
28 Yos Xuas uas yog Nuv tus tub, nws ib txwm pab Mais Xes txij thaum yau los, nws teb ntua hais tias : “Leej Hlob Mais Xes, koj tsis txhob pub nkawd ua li ntawd !”
29 Mais Xes teb tias : “Koj puas sawv kuv chaw khib ? Ntawm kuv, mas kuv xav kom tas HUAB TAIS haiv neeg txawj ua yaj saub, kom HUAB TAIS pub nws lub Tswv Yim rau lawv !”
30 Ces Mais Xes rov mus hauv lub yeej, cov txwj laus nrog nws mus.
31 HUAB TAIS ua ib nthwv cua sawv tom dej hiav txwv tuaj, nthwv cua tshuab tau ib co yij los rau ntawm lub yeej. Cua tshuab yij ntau kawg los, mus ib hnub ke deb ntawm lub yeej los tseem muaj, hos tuab npaum li ob tshim saum npoo av.
32 Tsoom pej xeem tsis pw li, lawv nyob hnub ntawd ib hnub, hmo ntawd ib hmos thiab tag kid ib hnub, lawv ntes cov yij ntawd cia : tus ntes tau tsawg yog kaum tawb. Ces lawv coj los ziab ncig lub yeej.
33 Lawv noj cov nqaij ntawd. Lawv nyuam qhuav ntxo ntawm hniav xwb, tsis tau xo hauv qhov ncauj, HUAB TAIS twb npau taws rau lawv lawm. HUAB TAIS ua kom lawv raug ib phaum mob tuag aws loj kawg. 34 Lawv tis npe rau thaj chaw ntawd hu ua Kis Nplos Has Tas Vas, vim nyob ntawd, lawv faus cov neeg noj nqaij yij tuag. 35 Tsoom pej xeem thiaj tshais chaw ntawm Kis Nplos Has Tas Vas ntawd los rau Has Xes Los. Lawv los tsa tsev nyob Has Xes Los.

1 Mis Lias thiab As Loos nkawd yws yws txog Mais Xes, vim Mais Xes poj niam yog ib tug Kws Xis.
2 Nkawd hais tias : “HUAB TAIS puas hais lus rau Mais Xes ib leeg xwb ? Nws tsis hais lus rau peb thiab lod ?”
Ces HUAB TAIS hnov. 3 Mais Xes yog ib tug neeg nyiam ua tus me, yog tus neeg nyiam ua neeg me tshaj txhua leej hauv lub ntiaj teb no. 4 Ib sij huam, HUAB TAIS hais rau Mais Xes, As Loos thiab Mis Lias lawv tias : “Nej peb leeg tuaj tom lub Tsev Tsam Phooj Sib Ntsib.”
Ces lawv peb leeg mus. 5 HUAB TAIS nrog ib twv huab nqes los nyob ze ntawm lub qhov rooj Tsev Tsam Phooj. Nws hu As Loos thiab Mis Lias nkawd, ces nkawd ob leeg txav mus ze. 6 HUAB TAIS hais tias : “Neb mloog kuv cov lus no : Yog muaj ib tug yaj saub nyob hauv nej, mas kuv cia nws pom kuv nyob hauv npau suav, kuv hais lus rau nws nyob hauv npau suav xwb. 7 Tiam sis kuv tsis ua li ntawd rau kuv tus tub txib Mais Xes, kuv tso tas nrho kuv lub tsev rau nws saib. 8 Kuv nrog nws hais lus tim ntsej tim muag kiag, kuv hais lus tseeb, tsis ua paj lug hais rau nws, nws tau pom kiag HUAB TAIS tus duab. Vim li cas neb thiaj muaj cuab kav hais lus thuam kuv tus tub txib Mais Xes ?”
9 HUAB TAIS npau taws rau nkawd heev, ces nws rov mus. 10 Twv huab kuj ploj ntawm lub Tsev Tsam Phooj lawm. Ua ciav Mis Lias cia li mob ruas, nws ib ce dawb paug cuag daus. As Loos tig mus ntsia nws, As Loos pom nws twb mob ruas lawm.
11 As Loos hais rau Mais Xes tias : “Leej Tij Hlob, thov koj txhob muab txim rau wb qhov txhaum uas wb tsis tau ua zoo xav, wb cia li ua lawm. 12 Thov koj tsis txhob cia nws zoo li ntawd, xws li tus me nyuam tuag hauv nws niam plab, uas thaum nws nchuav tawm los nws tej nqaij twb lwj tas ib nrab lawm !”
13 Ces Mais Xes thiaj thov HUAB TAIS tias : “Tswv Ntuj, Kuv thov koj, koj kho nws kom nws zoo !”
14 HUAB TAIS hais rau Mais Xes tias : “Yog nws txiv nti aub ncaug rau nws ntsej muag no, nws yuav tau ris kev txaj muag xya hnub puas yog ? Ua li mas nej coj nws mus nrauj zoo rau sab yeej nraud kom puv xya hnub, ces nej mam rov qab txais nws los nyob hauv yeej dua.”
15 Ces lawv thiaj coj Mis Lias mus nrauj zoo tau xya hnub nyob sab yeej nraud. Haiv neeg tsis sawv kev mus ntxiv, lawv tos nws rov los tso. 16 Lawv mam tso Has Xes Los tseg, lawv tshais chaw mus tsa tsev nyob hauv lub hav suab puam Pas Las.

1 HUAB TAIS hais cov lus no rau Mais Xes : 2 “Koj xa ib co neeg mus xyuas Kas Nas Has teb, xyuas lub chaws uas kuv muab rau cov His Xas Lais. Koj xa cov thawj coj, ib lub xeem ib tug neeg mus.”
3 Ces Mais Xes thiaj xa lawv ntawm lub hav suab puam Pas Las mus, raws li HUAB TAIS kom ua. Cov mus yog cov coj tsoom His Xas Lais. 25 Lawv mus xyuas teb chaws tau plaub caug hnub, lawv mam rov qab los txog. 26 Lawv los cuag Mais Xes, As Loos, thiab tsoom His Xas Lais nyob hauv lub hav suab puam Pas Las, hauv Kas Des. Lawv piav rau Mais Xes thiab rau tas tsoom pej xeem mloog. Lawv muab tej qoob loo, tej txiv hmab txiv ntoo uas lawv nqa los rau sawv daws saib.
27 Lawv piav li no : “Peb mus txog lub teb chaws uas koj xa peb mus. Muaj tseeb tiag, yog ib lub teb chaws uas mis nyuj thiab zib ntab zib mu ntws lug. Peb nqa tej yam no los rau nej saib. 28 Tab sis haiv neeg nyob lub teb chaws ntawd muaj peev xwm kawg, lawv tej nroog loj dav thiab xov ntsa zeb ntsa tsua, peb tau pom As Nav cov xeeb ntxwv. 29 Cov As Mas Les Xis nyob hauv lub xeev Nes Zes sab Naj, cov His Tis, cov Yes Npus Xis, thiab cov As Mos nyob pem roob, hos cov neeg Kas Nas Has nyob raws ntug hiav txwv thiab raws tus ntug dej Yos Las Das.”
30 Kas Les txhib tsoom pej xeem uas tuaj sib sau ncig Mais Xes tias : “Peb yuav tsum sawv kev mus, peb mus ntaus kom tau lub teb chaws : peb muaj peev xwm ua tau xwb.”
31 Tiam sis cov txiv neej uas tau nrog nws mus, teb tias : “Peb yuav ntaus tsis yeej haiv neeg ntawd li, vim lawv muaj zog dua peb.”
32 Ces lawv thuam lub teb chaws uas lawv tau mus xyuas rau cov His Xas Lais, lawv hem tias : “Lub teb chaws uas peb mus xyuas mas yog ib lub teb chaws noj neeg. Cov neeg peb tau pom yog ib cov neeg siab siab.
33 Peb pom ib co neeg loj loj kawg (yog As Nav cov tub uas lawv yog cov neeg loj loj cov xeeb ntxwv). Peb zoo nkaus li cov kooj nyob ntawm lawv ib sab, lawv los yeej saib peb zoo ib co kooj xwb.”

1 Ces tas tsoom pej xeem tsa suab nthe zom zaws. Hmo ntawd lawv quaj ib hmos. 2 Tas tsoom His Xas Lais yws yws Mais Xes thiab As Loos nkawd, tas sawv daws hais rau nkawd tias : “Ua cas peb tsis tuag nyob teb chaws Hais Nkws Tos ! Thiab ua cas peb tsis tuag nyob lub hav suab puam no ! 3 Vim li cas HUAB TAIS thiaj yuav coj peb mus nyob lub teb chaws ntawd kom peb raug ntaj tua tuag tas, ces peb tej poj niam me nyuam yuav raug luag yuam yuav tas ? Cia peb rov mus Hais Nkws Tos teb mas zoo dua !”
4 Ces lawv sib hais lawv zom zaws tias : “Peb tsa peb ib tug thawj coj peb, ces peb rov mus Hais Nkws Tos teb.”
5 Mais Xes thiab As Loos nkawd thiaj pe, ntsej muag ti nkaus av, ntawm tsoom His Xas Lais xub ntiag. 6 Cov uas tau mus xyuas teb chaws los, muaj Yos Xuas uas yog Nuv tus tub, thiab Kas Les, uas yog Yes Fus Nes tus tub, nkawd dua rhe nkawd tej ris tsho. 7 Nkawd hais rau tsoom His Xas Lais tias :
“Lub teb chaws uas peb tau mus soj los, yog ib lub teb chaws zoo, yog ib lub teb chaws zoo tiag tiag. 8 Yog HUAB TAIS tuaj peb tog, nws yuav ua kom peb mus txeem tau hauv lub teb chaws, thiab nws yuav muab pub rau peb nyob. Yog ib lub teb chaws uas mis nyuj thiab zib ntab zib mu ntws lug tiag. 9 Nej tsis txhob maj npau taws rau HUAB TAIS. Nej tsis txhob ntshai haiv neeg uas nyob txawm hauv lub teb chaws ntawd, vim lawv tsis txaus peb nqos xws li ib lo mov. Lawv cov dab tsis pov hwm lawv lawm. Hos ntawm peb, mas peb muaj HUAB TAIS nrog nraim peb. Nej tsis txhob txhawj li.”
10 Tas tsoom His Xas Lais tab tom tham zom zaws tias lawv yuav txawb pob zeb tua Mais Xes, As Loos, Yos Xuas, thiab Kas Les lawv kom tuag. Ces HUAB TAIS lub hwj chim tawm los nyob ntawm lub Tsev Tsam Phooj Sib Ntsib rau cov His Xas Lais pom. 11 HUAB TAIS hais rau Mais Xes tias : “Haiv neeg no yuav thuam kuv txog thaum twg ? Lawv yuav tsis ntseeg kuv ntev li cas ntxiv ? Txawm kuv tau ua tej yam hwj huam loj rau lawv pom los lawv tseem tsis ntseeg. 12 Kuv yuav tso ib tug mob aws tuaj tua lawv, kuv yuav rho lub cuab tam ntawm lawv los. Ces kuv yuav coj koj mus tsim ib haiv neeg loj, muaj hwj chim dua lawv.”
13 Mais Xes teb HUAB TAIS tias : “Tab sis cov Hais Nkws Tos twb paub lawm tias yog koj lub zog ua kom haiv neeg no tawm hauv lawv lub teb chaws los. 14 Lawv twb qhia cov neeg nyob txawm hauv lub teb chaws no paub tas.
HUAB TAIS, sawv daws twb paub tas tias koj yog tus nrog nraim haiv neeg no nyob. Koj tau ua kom lawv pom koj lub ntsej muag, koj tau los nyob hauv twv huab, nyob saum lawv ; nruab hnub koj nyob hauv ib twv huab mus ua lawv ntej, hmo ntuj koj nyob hauv cov hluav taws.
15 Yog koj ua kom haiv neeg no ib teg tuag nthi, mas cov pej kum haiv neeg uas tau hnov hais txog koj, yuav hais tias : 16 ‘HUAB TAIS coj tsis tau haiv neeg no mus hauv lub teb chaws uas nws cog lus pub rau lawv nyob, mas nws thiaj muab lawv tua tuag tas nyob hauv teb chaws suab puam.’ 17 Koj tsis txhob ua li ntawd, Huab Tais, zaum no koj cia li nthuav koj lub zog loj tawm los ! Raws li koj lo lus hais tias : 18 ‘HUAB TAIS npau taws qeeb, nws txoj kev hlub dav dav meem mias, nws ua siab ntev nyiaj tej kev tsis zoo kev txhaum. Tiam sis nws yuav tsis pub tus txhaum dim nws lub txim, nws yog tus muab txim rau phaj tub mus txog tiam peb tiam plaub vim phaj txiv tau ua txhaum.’
19 Thov koj zam txhaum rau haiv neeg no, vim koj lub siab loj siab zoo tas nrho, koj ua rau lawv raws li koj tau ua txij puag Hais Nkws Tos teb los txog tav no.”
20 HUAB TAIS hais tias : “Kuv yuav zam rau lawv raws li koj thov. 21 Tiam sis vim kuv yog tus muaj txoj sia, kuv lub hwj chim nyob puv ntiaj teb, 22 mas cov neeg uas tau pom kuv lub hwj chim thiab cov hwj huam uas kuv tau ua nyob Hais Nkws Tos teb, thiab nyob hauv teb chaws suab puam, tab sis lawv tau sim kuv kaum zaus lawm, tsis kav lawv tseem tsis xav mloog kuv lus, 23 mas lawv yuav tsis pom lub teb chaws uas kuv tau cog lus pub rau lawv cov yawg koob. Cov neeg thuam kuv, tsis muaj ib tug yuav tau pom lub teb chaws ntawd. 24 Kuv tus tub txib Kas Les, mas nws tsis ntaus tswv yim phem, nws tau mloog kuv lus zoo, kuv yuav ua kom nws tau tsuj lub teb chaws uas nws tau mus xyuas, thiab nws tsoom xeeb ntxwv yuav tau lub teb chaws ua lawv tug.”

1 Kos Les yog Yi Tshas tub, yog Kes Has xeeb ntxwv thiab Les Vis tsev neeg. Das Taas thiab As Npis Las yog Es Lias tub, thiab Oos uas yog Pes Les tub (Es Lias thiab Pes Les nkawd yog Lus Npees tub), lawv yog neeg muab hlob, tsis txo hwj chim. 2 Lawv nrog ib pab ob puas tsib caug leej thawj coj His Xas Lais muaj koob nto npe sawv tiv Mais Xes. Lawv pab no yog luag rub rau qhov siab, thaum muaj ib yam tseem ceeb. 3 Lawv koom siab cem Mais Xes thiab As Loos nkawd tias : “Neb ua dhau kev cai lawm ! Tas tsoom neeg, txhua leej txhua tus uas nyob hauv lub txoos puav leej yog neeg qee rau HUAB TAIS. HUAB TAIS twb nrog sawv daws nyob. Vim li cas neb thiaj tsa neb siab dua HUAB TAIS haiv neeg huv tib si ?”
4 Mais Xes hnov nws cov lus no, Mais Xes tso cev vau hlo rau hauv av. 5 Ces Mais Xes hais rau Kos Les thiab nws pab neeg tias : “Tag kis sawv ntxov, HUAB TAIS yuav qhia sawv daws tias leej twg yog nws tug tiag, leej twg yog tus nws xaiv, thiab tus nws yuav cia txav los ze nws. HUAB TAIS cia leej twg txav los ze nws, mas tus ntawd yog tus Huab Tais xaiv.”
8 Mais Xes hais rau Kos Les tias : “Les Vis cov tub, nej mloog mog !
9 Puas yog nej xav tias cov His Xas Lais tus Tswv Ntuj pub tsawg dhau rau nej ? HUAB TAIS twb xaiv nej hauv tas tsoom His Xas Lais los ua tub tsob hwb nyob hauv nws lub Tuam Tsev, kom nej sawv tas tsoom neeg chaw coj lub txoos teev Ntuj, qhov no tsis txaus nej thiab lod ? 10 HUAB TAIS tau hu koj mus nyob ze ntawm nws, koj thiab koj cov kwv tij Les Vis tib si. Zaum no, nej tseem xav kom nej tau ua leej choj thiab !
11 Koj thiab koj pab neeg, nej tau tuav tswv yim tiv HUAB TAIS. As Loos yuav ua tau dab tsi, yog nws ua nws tib leeg kheej xwb ? Ua cas nej thiaj li yws yws txog nws ?”
23 HUAB TAIS hais rau Mais Xes tias : 24 “Koj hais rau tsoom pej xeem tias : ‘Nej txav mus deb ntawm Kos Les lub tsev.’”
25 Mais Xes sawv tsees, nws khiav mus cuag Das Taas thiab As Npis Las nkawd. Cov txwj laus His Xas Lais kuj lawv nws qab mus thiab. 26 Mais Xes hais rau tsoom pej xeem tias : “Nej sawv daws kaj tsij tawm sai sai mus deb ntawm cov neeg phem no lub tsev tsam phooj. Nej tsis txhob kov ib yam uas yog lawv tug, tsam lawv tej txhaum rub tau nej nrog lawv mus thiab.”
27 Ces sawv daws txav mus deb ntawm Kas Les lub tsev. Das Taas thiab As Nplis Las nkawd tawm tuaj nrog nkawd poj niam, nkawd cov tub, thiab cov me nyuam me nyob ntawm qhov rooj tsev ntaub. 28 Mais Xes hais tias : “Thaum nej pom tej no, nej yuav paub tias yog HUAB TAIS xa kuv tuaj ua tej hauj lwm no, tsis yog kuv lam ua kuv xwb. 29 Yog tias cov neeg ntawd tuag xws li ntiaj teb tib neeg txoj kev tuag, mas tsis yog HUAB TAIS xa kuv tuaj.
30 Tab sis yog HUAB TAIS ua ib yam txawv txawv : Yog av txawj rua ncauj nqos cov neeg ntawd, thiab nqos lawv lub cuab tam, kom lawv cia li tuag nyoos, mas nej yuav paub tias cov neeg ntawd tau ntxeev siab rau HUAB TAIS lawm.”
31 Mais Xes hais cov lus no tas nrho, ces av pib tawg pleb nris hauv lawv ko taw, 32 av rua hlo ncauj nqos lawv thiab lawv tsev neeg, nqos Kos Les cov neeg thiab nws lub cuab tam tas huv si.

21 Mais Xes hais lus rau tas tsoom tu ki His Xas Lais, ces lawv cov thawj coj ib leeg muab ib tug ceg ntoo rau nws, muaj kaum ob tug ceg ntoo taj kaum ob lub xeem. As Loos kuj muaj ib tug ceg ntoo nyob hauv thiab.
22 Mais Xes coj mus tso rau ntawm HUAB TAIS xub ntiag, hauv lub Tsev Tsam Phooj ua Tim Khawv. 23 Tag kis, Mais Xes mus xyuas hauv lub Tsev Tsam Phooj ua Tim Khawv, pom As Loos tus ceg ntoo sawv tsev neeg Les Vis chaw tawg paj, muaj ib co cos paj tab tom nthaw, muaj ib co paj twb tawg nthuav lawm, thiab muaj ib co txiv twb txi siav siav lawm. 24 Mais Xes nqa cov ceg ntoo ntawm HUAB TAIS xub ntiag tib si los, nws coj los rau cov His Xas Lais, lawv mus xyuas thiab nyias muab nyias tus ceg ntoo rov los. 25 Ces HUAB TAIS hais rau Mais Xes tias : “Koj rov muab As Loos tus ceg ntoo mus tso rau ntawm lub Tsev Tsam Phooj ua Tim Khawv, muaj ib qho chaw cia tus ceg ntoo nyob ntawd, ua ib lub cim rau cov neeg ntxeev siab pom. Ces lawv yuav tsis muaj chaw yws ntxiv rau kuv hnov, mas lawv thiaj yuav tsis tuag.”
26 Mais Xes ua raws li HUAB TAIS kom nws ua. Nws ua tas ib puas tsav yam li ntawd.

1 Lub ib hlis, tsoom tub ki His Xas Lais sawv daws los txog lub teb chaws suab puam Xees. Tsoom pej xeem los tsa tsev nyob Kas Des. Thaum lawv los txog ntawd, ces Mis Lias tuag, lawv muab nws faus rau ntawd. 2 Tsoom neeg sawv daws tsis tau dej haus, ces lawv koom siab tuaj ib tog cem Mais Xes thiab As Loos nkawd. 3 Lawv tuaj cem Mais Xes tias : “Kheev peb lam nrog peb cov kwv tij tuag thaum HUAB TAIS tuaj rhuav lawv mas ! 4 Vim li cas koj thiaj coj HUAB TAIS haiv neeg los nyob lub suab puam no kom peb thiab peb cov tsiaj tuag tas tib si ? 5 Vim li cas koj thiaj coj peb tawm hauv Hais Nkws Tos teb los nyob lub niag teb chaws qhuav no ? Tsis zoo ua noj ua haus, tsis muaj ntoo txiv cev, tsis muaj hmab txiv cawv, tsis muaj ntoo txi txiv muaj noob, thiab tsis muaj dej haus li !”
6 Mais Xes thiab As Loos ncaim ntawm cov neeg, nkawd mus nyob ze lub qhov rooj Tsev Tsam Phooj Sib Ntsib. Nkawd pe HUAB TAIS, nkawd tsa suab hlo hais tias : HUAB TAIS Tswv Ntuj, thoj mloog koj haiv neeg hu txog koj. Thov koj qhib koj cov paj tshab. Thov koj qhib ib lub qhov dej txhawv rau peb haus. Thaum lawv tau dej haus lawd, ces yuav tsis muaj leej twg yws ntxiv.”
7 Ces HUAB TAIS lub hwj chim tawm tuaj nyob saum Mais Xes thiab As Loos nkawd. HUAB TAIS hais rau Mais Xes tias : 8 “Koj tuav As Loos tus ceg ntoo, As Loos neb nqua hu tsoom pej kom tuaj nyob ua ke. Ces koj ua rau lawv ntsia ntsoov ntawm lawv qhov muag, koj hais lus rau phab tsua no, ces phab tsua yuav muab dej rau nej sawv daws haus. Thaum koj ua dej txhawv ntawm phab tsua los lawm, koj yuav cia tsoom pej xeem haus, thiab cia lawv cov tsiaj tib si haus.”
9 Mais Xes thiaj muab tus ceg ntoo ntawm HUAB TAIS xub ntiag los, raws li HUAB TAIS kom ua. 10 Mais Xes thiab As Loos nkawd hu tas tsoom pej xeem tuaj nyob ntawm phab tsua, ces Mais Xes hais rau lawv tias : “Cov neeg qig lus, nej mloog mog. Peb puas ua tau kom dej txhawv hauv phab tsua no los rau nej haus ?”
11 Ces Mais Xes tsa nws txhais tes, nws muab tus ceg ntoo nplawm phab tsua ob teg : Dej txhawv ntws lug tawm los, txaus tas tsoom sid thiab lawv cov tsiaj haus pov khawv.
12 HUAB TAIS hais rau Mais Xes thiab As Loos tias : “Vim neb tsis ntseeg tias kuv muaj peev xwm ua tau kom cov His Xas Lais pom kuv lub hwj huam ntshiab, mas neb yuav tsis tau coj tsoom neeg ntawd mus tsuj lub teb chaws uas kuv muab rau lawv nyob.”
13 Cov dej ntawd hu ua dej Mes Lis Npas, vim nyob ntawd cov His Xas Lais ntxeev siab rau HUAB TAIS, ces HUAB TAIS muab nws lub hwj huam ntshiab rau lawv pom.

4 Cov His Xas Lais tso lub Roob Hos tseg, lawv taug txoj kev mus rau lub hiav txwv Xus, vim lawv xav lug Es Dos teb. Thaum lawv mus txog ib tog kev, tsoom pej xeem npau taws. 5 Lawv cem Tswv Ntuj thiab cem Mais Xes tias : “Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm !”
6 Tswv Ntuj thiaj tso ib cov nab muaj taug tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem mus hais rau Mais Xes tias : “Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov niag nab ntawd khiav mus deb peb.”
Ces Mais Xes thiaj thov kom Ntuj zam rau lawv. 8 HUAB TAIS teb tias : “Koj nchuav ib tug nab muaj taug, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag.”
9 Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

1 Ces cov tub ki His Xas Lais mus ntxiv, lawv mus tsa tsev nyob hauv lub tiaj nqeeb Muas, nyob sab dej Yos Las Das tim ub, ncaj rau lub tsheej Yes Lis Kos. 2 Npas Las, uas yog Xis Pos tub, paub tas puas tsav yam uas cov His Xas Lais ua rau cov As Mos.
3 Ces tas teb chaws Muas ntshai lawv, vim lawv coob heev. Teb chaws Muas ntshai cov His Xas Lais. 4 Tus vaj hais rau cov txwj laus Mas Dias tias :
“Saib pab neeg coob coob ntawd tab tom tuaj noj teb noj chaw ncig peb xws li nyuj noj zaub hauv tej teb.”
Lub zim txwv ntawd, Npas Las uas yog Xis Pos tub, ua vaj kav cov Muas. 5 Tus vaj Npas Las xa neeg mus hu Npas Las Has, uas yog Npes Os tub, nyob Pes Tos, ze tus Niam Dej, hauv lub teb chaws As Mas Vas. Nws tso xov hais tias : “Haiv neeg ntawd khiav Hais Nkws Tos teb los, lawv los nyob puv lub teb chaws lawm ; lawv los ua zos nyob ze ze kuv. 6 Kuv thov koj tuaj ntawm no, koj tuaj foom lus phem rau lawv, vim lawv muaj zog dua kuv. Yog koj tuaj foom lawv, mas peb thiaj li yuav ntaus yeej lawv thiab yuav ntiab tau lawv tawm hauv lub teb chaws no mus. Vim kuv paub tias : koj foom hmoov zoo rau leej twg mas nws yeej tau qhov zoo, koj foom phem rau leej twg mas nws yeej tau qhov phem.”
12 Tswv Ntuj hais rau Npas Las Has tia : “Koj tsis txhob nrog cov neeg ntawd mus. Koj tsis txhob foom hmoov phem rau haiv neeg tod, vim lawv yog ib haiv neeg Ntuj foom hmoov zoo rau lawm. 13 Thaum kaj ntug, Npas Las Has sawv los, nws hais rau cov txwj laus uas Npas Las tso tuaj hais tias : “Nej rov mus nej lub teb chaws, nej mus nej xwb, vim HUAB TAIS tsis pub kuv nrog nej mus.”
14 Cov txwj laus Muas thiaj sawv kev rov qab, lawv los cuag Npas Las, lawv hais rau nws tias : “Npas Las Has tsis kam nrog peb tuaj.”
15 Npas Las rov xa ib pab neeg coob dua thiab muaj hwj chim dua thawj pab tuaj.
16 Lawv mus cuag Npas Las Has dua, lawv hais rau nws tias : “Npas Las uas yog Xis Pos tub hais li no : Thov koj tsis txhob yig, koj cia li tuaj kom txog kuv. 17 Kuv muab koj saib rau saum lub sam xeeb, yog koj hais dab tsi mas kuv yuav ua tas tib si. Thov koj tuaj foom hmoov phem rau haiv neeg ntawd.”
18 Npas Las Has teb rau cov tuaj ntawd tias : “Tab txawm Npas Las muab nyiaj muab kub puv nws lub tsev rau kuv, los kuv hla tsis tau kuv tus HUAB TAIS Tswv Ntuj lo lus, txawm tias ua ib yam me, los ib yam loj, kuv hla tsis tau li. 19 Hmo no nej pw ntawm no, tag kis mas kuv thiaj paub tias HUAB TAIS yuav hais dab tsi rau kuv ntxiv.”
20 Hmo ntuj, Tswv Ntuj hais rau Npas Las Has tias : “Vim tias cov neeg ntawd tuaj hu koj mus, mas koj cia li sawv, koj nrog lawv mus. Tab sis koj yuav ua raws li kuv kom koj ua xwb.”
21 Thaum kaj ntug, Npas Las Has sawv, nws nog nws tus maum luj, ces nws nrog cov txwj laug Muas mus.
22 Npas Las Has nrog lawv mus, ces HUAB TAIS npau taws, HUAB TAIS tus Tshiab tuaj sawv thaiv nws kev. Nws caij nws tus maum luj mus, nws ob tug tub kuj nrog nws mus. 23 Tus maum luj pom HUAB TAIS tus Tshiab sawv hauv plawv kev, tuav rab ntaj ntawm tes; tus maum luj lug kev hauv cov teb mus, tiam sis Npas Las Has nplawm maum luj kom rov los taug kev. 24 HUAB TAIS tus Tshiab mus tos dua ib ntus uas txoj kev ti ti hla ib cov vaj txiv cawv, muaj ob lub laj kab nyob sab xis thiab nyob sab laug.
25 Maum luj pom HUAB TAIS tus Tshiab, ces maum luj mus ti ti lub laj kab, Npas Las Has txhais taw txhuam laj kab, Npas Las Has rov muab maum luj nplawm dua. 26 HUAB TAIS tus Tshiab hloov chaw, nws mus nyob ntawm ib qho nqaim nqaim, tsis muaj chaw mus sab xis los sab laug li. 27 Maum luj pom HUAB TAIS tus Tshiab, maum luj txawm cia li pw hauv av lawm. Npas Las Has npau taws ceev ceev, nws muab pas ob peb nlpawg maum luj. 28 Ces HUAB TAIS qhib maum luj qhov ncauj kom txawj hais lus, maum luj hais rau nws tias : “Kuv tau ua dab tsi rau koj, koj thiaj muab kuv ntaus peb zaug li no ?”
29 Npas Las Has teb maum luj tias : “Vim koj ua saib tsis taus kuv ! Yog kuv muaj ib rab ntaj ntawm tes, mas kuv twb muab koj tua pov tseg lawm !”
30 Maum luj hais rau Npas Las Has tias : “Kuv puas yog koj tus maum luj ib txwm thauj koj txog hnub no ? Kuv puas niaj zaus ua li no rau koj ?”
Npas Las Has teb tias : “Koj ua tsis ua.”
31 Ces HUAB TAIS qhib Npas Las Has qhov muag. Nws pom HUAB TAIS tus Tshiab sawv ntawm txoj kev, tuav rawv rab ntaj ntawm tes. 32 HUAB TAIS tus Tshiab hais rau nws tias : “Vim li cas koj thiaj ntaus koj tus maum luj peb zaug li ntawd ? Yog kuv tuaj sawv thaiv koj txoj hauv kev, thaum kuv thaiv ces koj tsis muaj kev mus lawm. 33 Koj tus maum luj pom kuv, ces nws thiaj tau lug kev peb zaug. Koj hmoov zoo kawg nws tau lug kev, tsis li ntawd ces kuv twb muab koj tua lawm, tab sis kuv txuag nws txoj sia.”
34 Npas Las Has teb rau HUAB TAIS tus Tshiab tias : “Kuv ua txhaum lawm. Vim kuv tsis paub tias koj nyob ntawm kev thaiv kuv hauv ntej. Zaum no, yog tias koj tsis txaus siab, kuv mam rov qab mus tsev.”
35 HUAB TAIS tus Tshiab hais rau Npas Las Has tias : “Koj nrog cov neeg ntawd mus kuj tau. Tab sis koj tsis txhob hais ib los tshaj qhov kuv yuav qhia koj hais.”
Ces Npas Las Has nrog cov txwj laus uas Npas Las xa mus ntxiv.

1 Npas Las Has hais rau Npas Las tias : “Koj tsa xya lub thaj txi Ntuj rau ntawm no, thiab koj coj xya tus heev nyuj thiab xya tus laug yaj tuaj rau kuv.”
2 Npas Las ua raws nraim li Npas Las Has hais, nws coj ib tug heev nyuj thiab ib tug txiv yaj tuaj hlawv txi Ntuj rau saum txhua lub thaj. 3 Ces Npas Las Has hais rau Npas Las tias : “Koj sawv ntsug twj ywm ntawm koj cov tsiaj hlawv txi Ntuj, hos kuv yuav mus kuv ib qho. Tej zaum HUAB TAIS yuav tuaj ntsib kuv. HUAB TAIS ua kom kuv pom dab tsi, kuv mam qhia koj paub.” Ces Npas Las Has mus nyob saum ib lub pov roob do do. 4 Tswv Ntuj tuaj ntsib Npas Las Has, Npas Las Has hais tias : “Kuv npaj tau xya lub thaj txi Ntuj thiab kuv tau hlawv ib tug heev nyuj thiab ib tug laug yaj rau saum txhua lub thaj.”
5 Ces HUAB TAIS tso ib lo lus rau hauv Npas Las Has qhov ncauj tas, nws hais tias : “Koj rov qab mus ntawm Npas Las, koj yuav hais cov lus ntawd .”
6 Ces Npas Las Has rov los ntawm Npas Las. Nws pom Npas Las tseem sawv ntsug ntawm nws cov tsiaj txi Ntuj, thiab tas cov txwj laus Muas kuj nrog nws sawv ntawd. 7 Ces Npas Las Has thiaj hais nws zaj lus paj huam tias: “Npas Las hu kuv tuaj As Las teb tuaj, tus vaj Muas nyob saum cov pov roob Kes Des hu tias : ‘Koj tuaj pab kuv foom lus phem rau Yas Kos tsev neeg, koj tuaj tsawm His Xas Lais.’
8 Kuv yuav foom lus phem li cas, yog tias Tswv Ntuj tsis foom phem ? Kuv yuav foom lus tsis zoo li cas, yog tias Tswv Ntuj tsis foom lus tsis zoo ?
9 Kuv pom tseeb tiag, kuv nyob saum hauv tsua ntsia pom, kuv nyob saum ncov roob ntsia ntsoov.
Kuv pom ib haiv neeg ua neej nyob ib cag. Haiv neeg ntawd tsis nrog tsoom kuj cuab nyob sib xyaws.
10 Leej twg yuav suav tau Yas Kos tsev neeg uas coob npaum li hmoov av ? Leej twg yuav suav tau ib feem plaub ntawm cov His Xas Lais ? Kheev lam kuv tus plig txawj tuag raws li cov neeg ncaj ! Kheev kuv lam muaj ib txog hmoov zoo li lawv ! 11 Npas Las hais rau Npas Las Has tias : “Koj ua dab tsi li ko rau kuv ? Kuv thov koj tuaj foom hmoov phem rau kuv cov yeeb ncuab, ua cas koj foom lus zoo rau lawv ?”
12 Npas Las Has hais ntxiv tias : “Kuv yuav tsum hais raws li cov lus HUAB TAIS muab rau kuv hais xwb.”
13 Npas Las hais rau nws tias : “Koj nrog kuv mus nyob lwm qhov chaw ntsia. Haiv neeg uas koj tuaj ntawm no ntsia pom, koj tsuas pom me me xwb, koj pom tsis tas. Koj mam nyob nrad foom lus phem rau lawv.”
14 Npas Las coj nws mus saum daim teb Zov Hmo nyob saum lub ncov roob Pis Nkas. Nws kuj mus tsa xya lub thaj txi Ntuj rau saud thiab hlawv ib tug nyuj thiab ib tug yaj rau saum ib lub thaj. 18 Ces Npas Las Has hais nws zaj lus paj huam tias : Npas Las, koj sawv los mloog mog, Xis Pos tus tub, koj tig ntsej los mloog.
19 Tswv Ntuj tsis yog tib neeg, nws tsis dag, nws tsis yog tib neeg tub, nws tsis thim nws lo lus. Nws tsis yog tus uas hais tas, tab sis tsis ua raws, qhia tas tab sis tsis ua raws.
20 Ntuj txib kuv kom foom lus zoo, mas kuv yuav foom zoo, kuv thim tsis tau kuv cov lus.
21 Kuv tsis pom ib qho txhaum nyob hauv Yas Kos lub tsev, los ib qho phem nyob hauv cov His Xas Lais. HUAB TAIS, lawv tus Tswv Ntuj, nrog nraim lawv. Lawv qw ntsuag qees cav txog nws ua lawv tus vaj. 22 Tswv Ntuj coj lawv tawm Hais Nkws Tos teb los. Tswv Ntuj yog zoo tus phaw twm qus cov kub nrau neeg thaiv lawv.
23 Tsis muaj khawv koob nyob hauv Yas Kos, tsis muaj dab nyob hauv His Xas Lais. Thaum txog sij hawm, luag yuav hais rau Yas Kos thiab His Xas Lais tias : ‘Tswv Ntuj yuav ua dab tsi ?’ 24 Lawv yog ib haiv neeg uas sawv tsees xws li tus maum tsov tsiv tsiv, tawm plaws los xws li tsov ntxhuav : yog lawv tsis tau noj tus tsiaj uas lawv tom, thiab tsis tau haus nws cov ntshav, mas lawv tsis pw.”
25 Npas Las hais rau Npas Las Has tias : “Koj foom tsis tau lus phem rau lawv los cia li, tiam sis koj txhob foom hmoov zoo rau lawv mas !”
26 Npas Las Has teb Npas Las tias : “Kuv tsis tau hais rau koj los ? Kuv twb hais tias : Kuv yuav tsum ua tas puas tsav yam uas HUAB TAIS hais kom ua.”
27 Npas Las hais rau Npas Las Has tias : “Mus, kuv coj koj mus nyob lwm qhov chaw. Tej zaum nyob ntawd, Tswv Ntuj ho yuav pom zoo foom hmoov phem rau lawv.”
28 Npas Las coj Npas Las Has mus txog saum lub ncov roob Pes Os, uas sawv siab tshaj cov nyob teb chaws suab puam.
29 Npas Las Has hais rau Npas Las tias : “Koj tsa xya lub thaj txi Ntuj nyob ntawm no, thiab koj coj xya tus nyuj thiab xya tus yaj tuaj rau kuv.”
30 Npas Las ua raws li Npas Las Has hais : nyob saum ib lub thaj, nws hlawv ib tug nyuj thiab ib tug yaj txi Ntuj.

1 Npas Las Has pom tias HUAB TAIS pom zoo kom foom hmoov zoo rau His Xas Lais. Nws tsis mus nyob lwm qhov chaw mloog Tswv Ntuj hais lus xws li thawj ob zaug lawm, nws tig ntsej muag mus rau lub hav suab puam.
2 Nws tsa muag ntsia, nws pom cov His Xas Lais nyob ua tej pawg, raws lawv cov xeem. Tswv Ntuj lub tswv yim los nyob hauv nws, 3 ces nws hais nws cov lus paj huam li no : “Npas Las Has, uas yog Npes Os tub, nws tshaj nws cov lus.
Tus uas pom tau hauv neeg nruab siab tshaj nws cov lus, 4 tus mloog Tswv Ntuj hais, tshaj nws cov lus. Nws pom raws li Sas Dais pub nws pom, nws hnov Tswv Ntuj lo lus teb, ces nws qhov muag qhib los.”
5 Yas Kos, koj cov tsev tsam phooj zoo tis ua zoo, His Xas Lais, koj tej tsev nyob zoo saib tas npaud !
6 Zoo cuag li tej lub tiaj dav, cuag li tej lub vaj ntsuab xiab ntawm ntug dej, zoo cuag li tej hav tshuaj uas HUAB TAIS cog cia, zoo nkauj puav tam li cov ntoo ciab loj siab uas txawm nyob ze dej !
7 Muaj ib tug thawj sawv hauv koj tsoom xeeb ntxwv los, nws yuav kav ntau haiv ntau xeem neeg . Koj tus vaj loj dua vaj As Nkas, nws lub hwj chim hlob zuj zus lawm.
17 Kuv pom His Xas Lais tus Vaj, tab sis nws tseem tsis tau ua vaj tam sis no, kuv pom nws, tab sis nws tsis nyob ze : Ib lub hnub qub sawv hauv Yas Kos tuaj, ib rab cwj ua vaj sawv hauv His Xas Lais los. Nws ntaus cov Muas ob sab ntsos, nws tsoo Xes cov tub taub hau tawg tas.

1 Cov His Xas Lais mus nyob Sis Tis. Thaum lawv nyob ntawd, lawv mus nrog cov ntxhais Muas ua dev ua npua. 2 Cov ntxhais coj lawv mus txi cov dab Muas. Ces tsoom pej xeem mus nrog lawv noj cov txim txi dab thiab nrog lawv pe cov dab Muas. 3 Cov His Xas Lais ua txhaum, vim lawv teev tus dab Npas Has nyob Pes Os li ntawd. HUAB TAIS npau taws rau lawv. 4 HUAB TAIS hais rau Mais Xes tias : “Koj muab cov hau zos coj tsoom pej xeem tua, koj xuas pas chob lawv ziab tshav ntxeev tiaj rau lub hnub ntsia. Koj ua qhov ntawd rau HUAB TAIS, ces HUAB TAIS yuav tsis npau taws rau cov His Xas Lais.”
5 Mais Xes hais rau cov txwj laus txiav txim His Xas Lais tias : “Nej nyias yuav tsum muab nyias cov neeg uas tau mus teev dab Npas Has nyob Pes Os tua pov tseg.”
6 Thaum ntawd, muaj ib tug txiv neej His Xas Lais coj tau ib tug poj niam Mas Dias los txog ntawm nws cov kwv tij.
Mais Xes ntsia ntsoov nkawd los, thiab tas tsoom His Xas Lais uas quaj zom zaws ntawm lub qhov rooj Tsev Tsam Phooj Sib Ntsib puav leej pom tib si.
7 Thaum pom li ntawd, Pis Has uas yog Es Les Ntxas tub, yog tus leej choj As Loos xeeb ntxwv, sawv tsees hauv tsoom neeg los, nws nthos nkaus ib rab hmuv, 8 raws nkawd qab mus hauv txaj, nws nkaug nkawd plab mog, nkaug tus txiv neej His Xas Lais thiab tus poj niam.
Cov His Xas Lais thiaj li tso lawv txoj kev phem pov tseg. 9 Nees nkaum plaub txhiab leej His Xas Lais tuag tas vim txoj kev phem ntawd.

HUAB TAIS hais cov lus no rau Mais Xes : 10 “Koj hais rau cov His Xas Lais tias : Thaum nej hla Dej Yos Las Das mus txog Kas Nas Has teb lawm, 11 mas nej yuav pom ntau lub tsheej. Nej yuav xaiv ib co tsheej cia ua tsheej cawm siav rau cov tua neeg uas lawv tua yuam kev, tsis yog txhob txwm tua, kom lawv tau chaw khiav nkaum. 12 Cov tsheej ntawd yuav ua chaw cawm nej txoj sia, nej thiaj yuav dim ntawm tus rob caub pauj ntshav. Nej ua li ntawd kom tus tua yuam kev tsis txhob xub tuag ua ntej zej zog txiav txim rau nws.
13 Nej yuav muab rau lub tsheej tshwj tseg cia ua tsheej cawm siav.
14 Peb lub nyob sab dej Yos Las Das tim ub, hos peb lub nyob hauv Kas Nas Has teb yuav ua chaw cawm siav rau nej. 15 Rau lub tsheej ntawd yuav ua chaw cawm siav rau nej, rau cov pej kum neeg, thiab cov qhua uas tuaj nyob hauv nej huv tib si, kom tus uas tua yuam kev ib tug neeg tau kev khiav mus cawm nws txoj sia. 16 Yog tus tua neeg ntawd tau xuas hlau ntaus luag kom tuag, mas nws yog ib tug txhob txwm tua neeg . Tus neeg tua neeg yuav tsum tuag.

1 Cov lus no yog Mais Xes cov lus uas nws hais rau tsoom His Xas Lais huv tib si, thaum lawv nyob sab dej Yos Las Das tim ub, hauv teb chaws suab puam, ntawm As Las Npas, ncaj rau Xus, yog nruab nrab ntawm Pas Laas thiab Tos Fes, Las Npaas, Has Xes Los thiab Dis Zas Has. 2 Txij lub roob Hos Les txog lub roob Xes Is, mus rau Kos Des Npas Nes, muaj kaum ib hnub ke. 3 Yog xyoo plaub caug, lub kaum ib hlis xiab ib, mas Mais Xes hais cov lus no rau cov His Xas Lais, raws li HUAB TAIS kom nws qhia lawv ua lawv lub neej. 4 Mais Xes ntaus rog yeej Xis Hoos, uas yog tus vaj As Mos, nyob lub nroog Hes Saws Npoos. Mais Xes tseem ntaus yeej tus vaj Os, uas yog tus vaj kav Npas Saas, nyob ob lub nroog As Tas Los thiab Es Nres Is. 5 Mais Xes pib tshaj txoj cai lij choj no nyob sab ntug dej Yos Las Das tim ub, hauv cov Muas lub teb chaws.

1 “Cov His Xas Lais, zaum no nej mloog txoj cai lij choj, thiab tej kab lis kev cai uas kuv qhia nej hnub no, kom nej coj raws nraim txoj cai ntawd. Ces nej yuav muaj txoj sia, thiab nej yuav tau mus nyob hauv lub teb chaws uas nej cov yawg koob tus HUAB TAIS Tswv Ntuj muab rau nej nyob, kom nej tau txais los ua nej tug. 2 Nej yuav tsis txhob ntxiv ib lo lus rau qhov kuv qhia nej ua, tsis txhob tso ib lo lus pov tseg. Nej yuav khaws nej tus HUAB TAIS Tswv Ntuj cov lus qhuab qhia raws nraim li kuv ceeb toom rau nej. 6 Nej yuav mloog, yuav coj raws nraim cov lus qhia ntawd, nej thiaj yuav ua neeg thoob tsib, ua neeg ntse nyob ntawm cov pej kum neeg xub ntiag. Thaum lawv hnov hais txog txoj cai no, lawv yuav tsa suab hlo hais tias : Tsuas muaj ib haiv neeg xwb thiaj thoob tsib thiab ntse, yog haiv neeg loj ntawd !” 7 Haiv neeg twg thiaj muaj ib tug Huab Tais nyob ze lawv li peb tus HUAB TAIS Tswv Ntuj nyob ze peb niaj zaus peb hu txog nws ? 8 Haiv neeg twg thiaj muaj ib txog cai lij choj thiab ib co kab lis kev cai ncaj npaum li Txoj Cai uas kuv muab cev rau nej hnub no ?”
32 “Nej sim nug tej laus saib, txij hnub Tswv Ntuj tsim neeg los nyob ntiaj teb, los txog hnub no, txij qab ntug mus txog hauv ntuj, puas muaj ib lo lus muaj hwj chim npaum li Tswv Ntuj lo lus ? Puas muaj neeg tau hnov dua ib lo lus zoo li ntawd ? 33 Puas muaj lwm haiv neeg tau hnov tus Tswv Ntuj muaj txoj sia lub suab hais lus hauv hluav taws tuaj li nej tau hnov tas, thiab lawv tseem muaj txoj sia nyob ntxiv ? 34 Puas muaj lwm tus Tswv Ntuj uas tuaj xaiv ib haiv neeg hauv lwm cov haiv neeg los ua nws tug ? Puas muaj lwm tus Tswv Ntuj tau ua tej yam los sim neeg siab, tej lub cim loj thiab tej yam txaus qhuas, tau sawv ntaus tej tsam rog, tau siv nws txhais tes muaj hwj huam thiab xyab nws txhais npab muaj zog, tau siv nws lub peev xwm ua tej yam txaus ntshai kawg, xws li nej tus HUAB TAIS Tswv Ntuj tau ua pab nej nyob Hais Nkws Tos teb, rau nej qhov muag pom ? 35 HUAB TAIS pub nej pom tej yam ntawd kom nej paub tias HUAB TAIS yog tus tseem Tswv Ntuj tiag, yeej tsis muaj dua lwm tus tswv ntuj ntxiv. 36 Nyob saum ntuj, nws kheev nej hnov nws lub suab qhuab qhia nej, nyob ntiaj teb, nws pub kom nej pom nws cov hluav taws thiab kom nej hnov nws cov lus nrov hauv hluav taws tuaj. 37 Vim HUAB TAIS hlub nej cov yawg koob thiab lawv cov xeeb ntxwv tom qab, nws thiaj tuaj nrog nej nyob thiab siv nws lub zog loj thau nej tawm Hais Nkws Tos teb los. 38 Nws ntiab tej haiv neeg loj, thiab muaj zog dua nej kom khiav ntawm nej xub ntiag mus. Nws ua kom nej txeeb tau lawv lub teb chaws los ua nej lub cuab tam los txog tav no. 39 Hnub no, nej yuav tsum paub, yuav tsum nco ntsoov rau nruab siab tias : HUAB TAIS yog Tswv Ntuj tiag, nws yog Tswv Ntuj nyob saum ntuj thiab nyob ntiaj teb no tib si. Tsis muaj dua lwm tus Tswv Ntuj. 40 Nej yuav khaws Huab Tais txoj cai thiab nws cov lus qhia uas kuv ceeb toom rau nej, kom nej thiab nej cov tub ki tau txoj hmoov zoo, thiab tau nyob ntev niaj ntau xyoo hauv lub teb chaws uas nej tus HUAB TAIS Tswv Ntuj muab pub rau nej nyob mus ib txhis.”

12 “Koj cia hnub Xas Npas Tos ua hnub ntshiab, koj yuav caiv raws li HUAB TAIS, koj tus Tswv Ntuj tau qhia. 13 koj yuav ua hauj lwm rau hnub, koj yuav lis txhua yam dej num kom tas. 14 Tab sis hnub xya, yog koj tus HUAB TAIS Tswv Ntuj Hnub Xas Npas Tos. Hnub ntawd, koj yuav tsis txhob ua ib yam hauj lwm li, koj tsis ua, koj tus tub koj tus ntxhais, koj tus tub txib, thiab ntxhais txib, koj tus nyuj, koj tus luj, thiab tas koj cov tsiaj huv tib si, tus qhua uas tuaj nyob hauv koj tsev, nej sawv daws yuav tsis txhob ua ib txoj hauj lwm li. Li no, ces koj tus tub txib thiab tus ntxhais txib thiaj yuav tau so ib yam li koj. 15 Koj yuav nco ntsoov tias koj tau ua luag qhev nyob Hais Nkws Tos teb, tiam sis koj tus HUAB TAIS Tswv Ntuj siv nws txhais tes muaj zog, thiab xyab nws txhais npab mus rub koj tawm los. Vim li ntawd, koj tus HUAB TAIS Tswv Ntuj thiaj qhia koj kom caiv Hnub Xas Npas Tos.”

2 Li ntawd, yog koj niaj hnub hwm HUAB TAIS koj tus Tswv Ntuj, yog koj ua raws li nws tej kev cai lij choj thiab nws cov lus qhia uas kuv hais rau koj hnub no, mas koj yuav ua neej nyob ntev, koj tus tub thiab koj tus tub cov tub kuj yuav ua neej nyob ntev. 3 His Xas Lais, koj mloog mog : Koj yuav ua raws cov lus qhia, kom koj tau nyob kaj siab, thiab huam vam raws li koj cov yawg koob tus HUAB TAIS Tswv Ntuj tau cog lus. Kom koj tau nyob hauv lub teb chaws uas mis nyuj thiab zib ntab ntws lug, lub teb chaws Huab Tais muab rau koj. 4 His Xas Lais, koj mloog mog : HUAB TAIS, peb tus Tswv Ntuj yog tus tseem HUAB TAIS, tsis muaj dua lwm tus tswv ntuj. 5 Koj yuav nyiam HUAB TAIS, koj tus Tswv Ntuj. Koj yuav muab tas koj siab ntsws, koj tus ntsuj plig thiab koj lub peev xwm los nyiam nws. 6 Koj yuav khaws cov lus uas kuv hais rau koj hnub no rau nruab siab. 7 Koj yuav muab cov lus no cog rau hauv koj cov tub ki. Thaum koj nyob hauv tsev, thaum koj taug kev, thaum koj pw, los thaum koj sawv hauv lub lav, koj yuav qhia lawv tsis tseg. 8 Koj yuav muab khi rau koj txhais tes coj xws li ib lub cim, koj yuav muab ntoo saum koj hauv pliaj xws li ib txog phuam. 9 Koj yuav muab sau rau ntawm koj tej ncej tse thiab ncej qhov rooj. 10 Koj tus HUAB TAIS tswv Ntuj yuav coj koj mus txog lub teb chaws uas nws tau cog lus muab rau koj cov yawg koob Has Nplas Has, His Xas Has thiab Yas Kos, thiab cog lus muab rau koj. Koj yuav pom tej lub nroog loj thiab zoo nkauj uas koj tsis tau txhim, 11 pom tej tsev muaj toob xib txhij txhua puv, uas koj tsis tau muab tso rau hauv, tej qhov dej uas koj tsis tau khawb, tej hmab txiv cawv thiab tej txiv ntoo roj uas koj tsis tau cog. Thaum koj tau noj tsau, haus txaus lawm, mas 12 koj yuav ceev faj, tsis txhob hnov qab HUAB TAIS uas tau coj koj tawm Hais Nkws Tos teb, tawm hauv lub teb chaws ua qhev los. 13 Tus koj yuav hwm yog HUAB TAIS koj tus Tswv Ntuj, koj yuav tsob hwb nws tib leeg xwb. Koj yuav tuav txog nws lub npe los cog lus.

6 Koj yog ib haiv neeg qee rau HUAB TAIS koj tus Tswv Ntuj ; koj yog haiv neeg uas HUAB TAIS, koj tus Tswv Ntuj tau xaiv hauv tas txhua haiv neeg nyob hauv ntiaj teb, los ua nws haiv neeg. 7 Yog HUAB TAIS nyiam nej thiab xaiv nej, tsis yog vim nej coob dua lwm haiv neeg, rau qhov nej tseem yog ib haiv neeg tsawg dua cov. 8 Tab sis, vim HUAB TAIS hlub nej, thiab nws xav ua raws li lo lus uas nws tau cog rau nej cov yawg koob, ces nws thiaj siv nws txhais tes muaj zog rho nej tawm ntawm lub teb chaws ua luag qhev los, thiab npo nej ntawm Fas Las Oos, uas yog tus vaj Hais Nkws Tos lub hwj huam. 9 Li no koj yuav tsum paub tias HUAB TAIS koj tus Tswv Ntuj yog tus tseem Tswv Ntuj tiag, yog tus Tswv Ntuj tsis fav xeeb uas cog lus ruaj, thiab hlub cov neeg nyiam nws, thiab khaws nws cov lus qhia txheej dhau txheej. 10 Tab sis nws muab txim rau cov neeg ntxub nws. Nws ua kom tus neeg ntxub nws tuag tam sid ntawd, nws tsis ncua lub txim. 11 Li ntawd, koj yuav coj cov lus qhia, cov kev cai lij choj uas kuv ceeb toom rau koj hnub no.

2 Koj nco ntsoov txog txoj kev uas HUAB TAIS koj tus Tswv Ntuj kom koj taug tau plaub caug xyoo nyob hauv teb chaws suab puam. Vim nws xav cob qhia koj kom ua neeg me, nws xav sim koj thiab xav paub koj lub siab kom thoob ; nws xav paub saib koj puas coj nraim nws cov lus qhia los tsis coj. 3 Nws tau cia koj poob ntsej muag, tau cia koj tshaib plab, nws tau muab mov Mas Nas rau koj noj, ib co mov uas koj thiab koj cov yawg koob tsis tau pom dua li. Nws ua li ntawd qhia kom koj paub tias neeg tsis kawg yuav noj mov los yug nws txoj sia xwb, neeg tseem yuav tsum txais tas puas tsav yam uas tawm ntawm HUAB TAIS lub ncauj los yug nws txoj sia thiab. 4 Plaub caug xyoo ntawd, koj hnav tsis tau ntuag ib ce ris tsho, hos koj ko taw tsis tau o li ! 5 Koj yuav tsum to taub tias HUAB TAIS koj tus Tswv Ntuj tsuas xav cob qhia koj xws li leej txiv cob qhia nws cov me nyuam. 6 Koj yuav khaws HUAB TAIS koj tus Tswv Ntuj cov lus qhia, ces koj thiaj taug tau nws txoj kev, thiab koj yuav txawj hwm nws.
11 Koj yuav ceev faj kom koj tsis txhob hnov qab HUAB TAIS koj tus Tswv Ntuj, tsam koj tsis ua raws nws tej lus qhia, tej kab ke thiab tej kev cai uas kuv ceeb toom rau koj hnub no. 12 Thaum koj tau noj tsau plab, thaum koj txhim tau vaj tse zoo nkauj nyob, 13 thaum koj pom koj cov tsiaj loj tsiaj me huam vam tuaj, koj cov nyiaj cov kub ntau zuj zus, koj lub cuab tam loj zuj zus, 14 mas koj ceev faj kom tej ntawd tsis txhob ua rau koj lub siab muab hlob tuaj mog ! Tsam koj hnov qab HUAB TAIS koj tus Tswv Ntuj uas tau coj koj tawm Hais Nkws Tos teb, tawm hauv lub tsev ua qhev los. 15 Nws yog tus tau coj koj hla lub teb chaws suab puam loj dav thiab muaj chaw ntshai ntau kawg, lub teb chaws uas nab muaj taug, thiab laum kiv tshooj khiav ua ntshua niab, lub teb chaws tuag dej vim yeej tsis muaj dej qhov twg li. Yog Huab Tais ua kom dej txhawv hauv ib phab tsua zeb xob hnia rau koj haus. 16 Yog nws muab cov mov Mas Nas, uas nej cov yawg koob tsis tau pom dua rau koj noj nyob hauv teb chaws suab puam. Nws ua li ntawd qhia koj kom koj ua neeg me, thiab yog vim nws xav sim koj siab, kom yav tom ntej, koj lub neej zoo.

12 His Xas Lais, HUAB TAIS koj tus Tswv Ntuj xav kom koj ua dab tsi ? Nws tsuas xav kom koj hwm HUAB TAIS koj tus Tswv Ntuj, kom koj taug nws tej kev, kom koj nyiam nws, kom koj muab tas koj lub siab, koj tus ntsuj plig los tsob hwb HUAB TAIS koj tus Tswv Ntuj, 13 kom koj khaws HUAB TAIS tej lus qhia thiab nws cov kev cai lij choj uas hnub no kuv qhia koj, ces koj yuav tau lub neej kaj siab. 14 Lub ntuj, thiab cuaj txheej ntuj, lub ntiaj teb thiab tas puas tsav yam nyob hauv ntiaj teb, yog koj tus HUAB TAIS Tswv Ntuj tug. 15 Tsis kav Huab Tais tsuas xaiv koj cov yawg koob xwb, vim nws nyiam lawv, thiab hlub lawv. Thaum dua lawv tas lawd, nws tau xaiv nej uas yog lawv cov xeeb ntxwv. Nyob hauv tas txhua haiv neeg, nws tsuas xaiv nej xws li niaj hnub no. 16 Nej ua lub cim txiav daim plhaub qhwv nej lub siab thiab lub xwb qwb, kom tsis txhob txhav ntxiv lawm. 17 Vim HUAB TAIS nej tus Tswv Ntuj yog tus Tswv Ntuj kav tsoom tswv ntuj, tus Huab Tais kav tsoom huab tais. Nws yog tus Tswv Ntuj loj, yog Tus Yeej, thiab Tus Muaj Hwj Xyeej tas nrho. Nws tsis xyeej leej twg, tab sis nws tsis txais leej twg cov paj tshab los xiab nws. 18 Nws ua ncaj rau tus me nyuam ntsuag thiab tus poj ntsuam. Nws hlub tus pej kum neeg, nws pub mov thiab pub ris tsho rau tus pej kum neeg. 19 Nej yuav nyiam cov pej kum neeg, vim nyob Hais Nkws Tos teb nej kuj yog ib co pej kum neeg thiab. 20 Tus koj yuav hwm thiab yuav tsob hwb yog HUAB TAIS koj tus Tswv Ntuj. Koj yuav npuab nws, koj yuav tuav txog nws lub npe los cog lus. 21 Tus koj yuav cav txog, yog nws, vim nws yog koj tus Tswv Ntuj : nws tau ua tej yam loj tas nrho thiab muaj hwj xyeej kawg rau koj qhov muag pom. 22 Thaum koj cov yawg koob tsiv mus nyob Hais Nkws Tos teb, lawv tsuas muaj xya caum leej xwb. Nyem no, HUAB TAIS koj tus Tswv Ntuj ua kom koj coob npaum li cov hnub qub nyob saum ntuj.

22 Yog nej khaws thiab nej ua raws nraim cov lus qhia uas kuv muab rau nej, yog nej nyiam HUAB TAIS nej tus Tswv Ntuj, nej taug nws txoj kev thiab nej npuab nws mus li, 23 mas HUAB TAIS yuav ua kom cov haiv neeg ntawd swb nej, ces nej yuav ntaus yeej tej haiv neeg loj dua nej thiab muaj zog dua nej. 24 Nej lub qab xib taws tsuj qhov twg, mas qhov ntawd yuav los ua nej tug, txij cov teb chaws suab puam mus rau Lis Npaas teb, txij tus niam dej Aws Fas Tes mus rau lub hiav txwv Hnub Poob yuav yog nej teb chaws tas huv si. 25 Tsis muaj leej twg yuav tiv yeej nej. Nej tsuj txog lub teb chaws twg, mas lub teb chaws ntawd yuav ntshai nej, raws nraim li HUAB TAIS tau hais. 26 Saib ! Hnub no kuv tso txoj hmoov zoo thiab txoj hmoov phem rau ntawm nej xub ntiag. 27 Txoj hmoov zoo, yog thaum nej mloog HUAB TAIS nej tus Tswv Ntuj cov lus qhia uas hnub no, kuv muab rau nej. 28 Txoj hmoov phem yog thaum nej tsis mloog HUAB TAIS nej tus Tswv Ntuj cov lus qhia, yog thaum nej ncaim ntawm txoj kev uas hnub no kuv qhia nej, thiab thaum nej mus tsob hwb lwm cov tswv ntuj uas nej tsis paub.

9 Thaum koj mus txog lub teb chaws uas koj tus HUAB TAIS Tswv Ntuj muab pub rau koj lawd, mas koj tsis txhob xyaum ua tej yam phem tsiv saib, xws li cov haiv neeg nyob txawm teb chaws ntawd. 10 Nyob hauv koj, yuav tsis txhob muaj leej twg muab nws tus tub los tus ntxhais hlawv hauv hluav taws. Yuav tsis txhob muaj leej twg ua saub, xam hnub qub, ua txwv khawv, tso dab, 11 ua khawv koob, tsawv dab ntxoog, nug cov tuag. 12 Tej no yog tej yam phem tsiv saib tshaj rau HUAB TAIS. Vim muaj tej kev phem tsiv saib kawg no nyob hauv cov haiv neeg ntawd, mas HUAB TAIS thiaj rhuav lawv rau ntawm nej xub ntiag. 13 Koj yuav ua neeg zoo txhij zoo txhua rau HUAB TAIS koj tus Tswv Ntuj. 14 Vim cov haiv neeg uas koj yuav yeej, mas lawv mloog cov kws xam hnub qub thiab cov ua saub. Tiam sis koj, mas HUAB TAIS koj tus Tswv Ntuj tsis pub ua li ntawd. 15 Koj tus HUAB TAIS Tswv Ntuj yuav tshoj ib tug neeg hauv nruab nrab nej, hauv koj tsoom kwv tij, kom nws sawv ua Yaj Saub zoo li kuv. Nej yuav mloog nws hais. 16 Qhov ntawd, yog qhov uas koj tau thov ntawm HUAB TAIS koj tus Tswv Ntuj thaum tsoom His Xas Lais ua lub txoos nyob saum roob Hos Les, koj hais tias : “Kuv tsis xav hnov HUAB TAIS, kuv tus Tswv Ntuj lub suab ntxiv, kuv tsis xav ntsia lub cub tawg loj loj ntawd ntxiv lawm, tsam kuv tuag.” 17 HUAB TAIS thiaj hais rau kuv tias : “Lawv hais yog lawm. 18 Kuv yuav tsa ib tug Yaj Saub zoo li koj, hauv nruab nrab lawv tsoom kwv tij los. Kuv yuav muab kuv cov lus tso rau hauv nws lub ncauj, ces nws yuav hais tas puas tsav yam rau lawv raws li kuv qhia. 19 Yog leej twg tsis mloog kuv cov lus uas tus Yaj Saub hais, mas kuv yuav nug nws txog qhov ntawd. 20 Yog tus Yaj Saub twg muaj cuab kav tuav txog kuv lub npe hais tej lo lus kuv tsis tau qhia kom hais, los yog nws tuav txog lwm tus tswv ntuj lub npe los hais lus, mas tus Yaj Saub ntawd yuav tuag xwb.

4 Niaj xyoo koj yuav ris ib kawg nplej tshiab tuaj rau tus Leej Choj. Tus Leej Choj yuav txais lub kawm ntawm koj tes mus txo rau hauv HUAB TAIS koj tus Tswv Ntuj lub taw thaj txi Ntuj. 5 Ces koj yuav hais cov lus no rau HUAB TAIS koj tus Tswv Ntuj : “Thaum ub, kuv txiv yog ib tug neeg As Las Mais nyob tsis ruaj chaw. Nws nqes mus Hais Nkws Tos teb, nws coj ib pab neeg tsawg mus. Ntev mus lawv coob tuaj ua ib haiv neeg loj thiab muaj zog. 6 Cov Hais Nkws Tos hiam peb thiab tsis saib peb li. Lawv kom peb ua lawv qhev ces peb txom nyem tas nrho. 7 Peb thiaj hu txog HUAB TAIS, peb cov yawg koob tus Tswv Ntuj. HUAB TAIS hnov peb lub suab, thiab ntsia peb txoj kev txom nyem, nws pom peb lub neej raug luag yuam. 8 HUAB TAIS tsa tes coj peb tawm Hais Nkws Tos teb los. Nws pab peb, nws hem cov Hais Nkws Tos kom lawv ntshai thiab nws ua hwj huam yees ntxwv. 9 Nws coj peb los txog qhov no, nws muab lub teb chaws no rau peb. Teb chaws no muaj mis nyuj thiab zib ntab ntws lug. 10 HUAB TAIS, ntawm no yog thawj phaum qoob uas koj pub rau kuv, mas kuv nqa tuaj cev rau koj.” Koj yuav tso cov qoob ntawd rau ntawm HUAB TAIS koj tus Tswv Ntuj xub ntiag, thiab koj yuav pe HUAB TAIS koj tus Tswv Ntuj.
16 “Hnub no, HUAB TAIS, koj tus Tswv Ntuj ceeb toom rau koj tias koj yuav coj nws tej kev cai lij choj. Koj yuav coj tej kev cai ntawd, koj yuav muab tas koj lub siab lub tswv yim los ua raws li ntawd. 17 Hnub no, koj tau hnov HUAB TAIS hais tias nws yuav ua koj tus Tswv Ntuj, tab sis yuav yog koj taug nws txoj kev, coj nws tej kev cai lij choj, khaws nws cov lus qhia thiab mloog nws lub suab. 18 Hnub no HUAB TAIS hnov koj teb tias koj yuav ua nws haiv neeg, xws li nws tau hais, tiam sis koj yuav tsum coj nws tej lus qhia tas huv tib si. 19 Koj ua li ntawd, mas HUAB TAIS yuav ua kom koj muaj ntsej muag, nto koob meej, muaj hwj chim loj tshaj lwm cov haiv neeg uas nws tsim los. Koj yog haiv neeg uas HUAB TAIS qee ua nws tug, xws li HUAB TAIS tau hais rau koj.

9 Yog koj mloog HUAB TAIS, koj tus Tswv Ntuj cov lus qhia, yog koj coj nws tej kev cai lij choj ua nyob hauv no, yog koj lub siab lub plawv rov los cuag koj tus HUAB TAIS, mas nws yuav ua kom tas txhua yam koj ua huam vam : koj yuav yug tau tub tau kiv, koj yuav tu tau tsiaj tau txhuv, koj tej qoob loo yuav ntsu. 10 HUAB TAIS yuav zoo siab pom koj ua lub neej kaj siab xws li nws zoo siab rau koj cov yawg koob thaud. 11 Txoj cai uas hnub no kuv qhia koj, tsis yog ib txog cai nruj rau koj, uas koj yuav coj tsis taus. 12 Tsis yog ib txog cai nyob puag qaum ntuj, koj yuav hais tsis tau tias: “Leej twg yuav sawv peb chaw mus nrhiav txoj cai qaum ntuj los qhia peb, peb thiaj coj tau ?” 13 Kuv txoj cai kuj tsis yog nyob puag ntug hiav txwv sab tim ub, koj yuav hais tsis tau tias : “Leej twg yuav sawv peb cev mus nrhiav txoj cai sab ntug hiav txwv puag tim ub los qhia peb, peb thiaj coj tau ? ” 14 Vim tias lo lus nyob ze koj. Lo lus xeeb txawm rau hauv koj lub ncauj, thiab hauv koj nruab siab. Koj yuav coj tau lo lus ntawd. 15 Koj saib ! Hnub no yog kuv muab kev ua neej thiab kev kaj siab, kev tuag thiab kev puas tsuaj tso ntawm koj xub ntiag. 16 Yog koj mloog HUAB TAIS, koj tus Tswv Ntuj cov lus qhia uas hnub no kuv muab rau koj no, thiab yog koj nyiam HUAB TAIS, koj tus Tswv Ntuj, koj taug nws txoj kev ua neej, thiab koj ua raws nws tej lus qhia, mloog nws txoj cai lij choj, mas koj yuav muaj txoj sia thiab koj yuav huam vam. HUAB TAIS koj tus Tswv Ntuj yuav foom hmoov zoo rau koj hauv lub teb chaws uas koj yuav tau los ua koj tug. 17 Tab sis yog koj ntxeev siab, koj tsis mloog HUAB TAIS thiab koj cia luag ntxias koj mus nrog luag pe lwm cov dab, 18 mas hnub no kuv hais rau koj : koj yuav tuag xwb, koj yuav tsis tau nyob ntev xyoo hauv lub teb chaws uas nej hla tus dej Yos Las Das mus txeeb los ua nej tug. 19 Hnub no, kuv thov kom lub ntuj lub teb nrog kuv ua tim khawv tias : kuv cia koj xaiv saib koj xav yuav txoj sia, los txoj kev tuag, lo lus zoo los lo lus phem. Koj xaiv kev ua neej mog ! Koj thiab koj cov xeeb ntxwv thiaj yuav muaj txoj sia nyob. 20 Nej yuav ua neej nyiam HUAB TAIS, nej tus Tswv Ntuj, nej yuav mloog nws lub suab, thiab yuav npuab nws. Vim koj txoj sia yog qhov ntawd, yog qhov uas yuav ua kom koj tau ua neej ntev xyoo hauv lub teb chaws uas HUAB TAIS tau cog lus muab pub rau koj cov yawg koob Has Nplas Has, His Xas Has thiab Yas Kos lawv.

l Mais Xes hais cov lus no rau tas tsoom His Xas Lais : 2 “Hnub no kuv muaj ib puas nees nkaum xyoo lawm. Kuv ncig mus ncig los tsis tau lawm. HUAB TAIS hais rau kuv tias : ‘Koj yuav tsis tau hla tus dej Yos Las Das.’ 3 Ua li mas yog HUAB TAIS, koj tus Tswv Ntuj yuav ua koj ntej coj koj kev, nws yuav rhuav cov haiv neeg koj yuav mus ntaus, ces koj yuav tau lawv lub teb chaws rau koj yuav. Yos Xuas yog tus yuav mus ua koj ntej coj koj raws li HUAB TAIS tau hais. 4 HUAB TAIS yuav ua rau cov haiv neeg ntawd ib yam li nws tau ua rau ob tug vaj As Mos, Xis Hoos thiab Os, thiab nkawd ob lub teb chaws. Nws muab lawv rhuav puas tsuaj tas. 5 HUAB TAIS yuav muab lawv rau hauv nej tes ces nej yuav ua rau lawv raws li cov lus qhia uas kuv tau qhia rau nej. 6 Nej ua siab loj tiv lawv, nej txhob ntshai lawv, nej txhob txhawj. Vim HUAB TAIS nrog nej, nws yuav tsis tso nej pov tseg.” 7 Ces Mais Xes hu Yos Xuas los. Nws hais rau Yos Xuas nyob ntawm tas tsoom His Xas Lais xub ntiag tias : ” Koj ua siab loj mog ! Koj ua siab tawv qhawv. Koj yuav nrog haiv neeg no mus txog lub teb chaws uas HUAB TAIS tau cog lus rau lawv cov yawg koob tias nws yuav muab rau lawv. Koj yuav coj lawv mus txeeb lub teb chaws ntawd los ua lawv lub. 8 HUAB TAIS yuav ua koj ntej, nws yuav nrog koj nyob, nws yuav tsis tso koj pov tseg, nws yuav tsis ncaim ntawm koj. Koj txhob txhawj, txhob ntshai mog !”
22 Thaum Mais Xes yuav tuag, Mais Xes sau tau ib zaj lus paj huam seev, nws muab los qhia tsoom tub ki His Xas Lais. 23 Mais Xes hais rau Yos Xuas uas yog Nuv tus tub tias: “Koj yuav ua siab loj siab tawv. Koj yuav coj cov His Xas Lais mus tsuj lub teb chaws uas HUAB TAIS tau cog lus muab rau lawv. HUAB TAIS yuav nrog koj nyob.” 24 Thaum Mais Xes sau Txoj Cai rau hauv ntawv tiav tas, 25 nws hais rau cov Les Vis uas kwv HUAB TAIS lub Xab Cog Lus tias : 26 “Nej txais Phau Ntawv Txoj Cai no, nej coj mus cia ze ntawm HUAB TAIS nej tus Tswv Ntuj lub Xab Cog Lus. Phau Ntawv no yuav ua tim khawv muab txim rau nej sawv daws. 27 Vim kuv paub nej yog ib co neeg nyiam ntxeev siab, kuv paub nej lub xwb qwb txhav npaum li cas. Nyem no, kuv tseem nrog nej nyob nej twb ntxeev siab rau HUAB TAIS. Dua kuv lawm mas nej haj yam yuav ua phem. 28 Nej mus hu cov txwj laus thiab cov thoob xwm sawv daws tuaj nyob ncig kuv. Kuv hu txog lub ntuj lub teb, kuv yuav qhia kuv cov lus rau lawv. 29 Kuv paub tias dua kuv lawm, mas nej yuav cheem tsis tau nej, ces nej yuav ua phem, nej yuav ncaim ntawm txoj kev kuv qhia kom nej taug : ces yav tom ntej, nej yuav raug kev puas tsuaj, vim nej ua phem rau ntawm HUAB TAIS qhov muag. Nws yuav npau taws rau nej vim tej hauj lwm phem nej ua.” 30 Ces Mais Xes hu nws zaj lus paj huam seev rau tas tsoom His Xas Lais mloog.

1 Mais Xes sawv kev ntawm teb chaws quav poj Muas, nws nce mus saum lub roob Nes Npos, mus txog lub ncov roob Pis Nkas uas nyob ncaj Yes Lis Kos. HUAB TAIS muab lub teb chaws huv tib si rau Mais Xes ntsia : txij Nkas Las As teb mus txog ntua rau Daas teb, 2 Nes Tas Lis teb, uas yog Es Fais thiab Mas Nas Xes nkawd lub teb chaws, tas Yus Das teb mus txog lub hiav txwv Xib Fab, 3 lub teb chaws suab puam Nes Zes, lub tiaj Yes Lis Kos uas yog ib lub tsheej muaj kuj yem ntau, mus txog ntua Xos As teb. 4 HUAB TAIS hais rau Mais Xes tias : “Koj ntsia lub teb chaws uas kuv cog lus muab rau Has Nplas Has, His Xas Has thiab Yas Kos raws li cov lus no : ‘Kuv yuav muab rau koj tsoom xeeb ntxwv nyob.’ Kuv pub rau koj qhov muag pom, tiam sis koj yuav hla tsis tau mus txog cov teb chaws ntawd.” 5 Mais Xes, HUAB TAIS tus tub txib tuag nyob ntawd, nws tuag hauv Muas teb chaws, raws li HUAB TAIS tau txiav. 6 Lawv muab Mais Xes faus rau hauv lub hav ncaj Npes Pas Os, nyob Muas teb. Los txog tav no tsis muaj leej twg paub tias Mais Xes lub ntxa nyob qhov twg. 7 Thaum Mais Xes tuag, nws muaj ib puas nees nkaum xyoo, nws qhov muag tseem pom kev, thiab nws lub zog tseem tsis tau ntaug. 8 Tsoom tub ki His Xas Lais pam Mais Xes tau peb caug hnub nyob hauv teb chaws quav poj Muas, ces lawv thiaj ua lub ntees tuag tiav. 9 Nuv tus tub Yos Xuas lub tswv yim thoob tsib, vim Mais Xes tau tiag tes rau saum nws. Cov His Xas Lais mloog Yos Xuas lus. Lawv ua raws li HUAB TAIS tau ceeb toom rau Mais Xes. 10 Txij thaum ntawd los txog tav no, tsis muaj ib tug Yaj Saub zoo li Mais Xes, uas sawv hauv His Xas Lais teb los ntxiv. Mais Xes yog tus tau pom HUAB TAIS lub ntsej muag. 11 HUAB TAIS tau txib Mais Xes kom ua tej lub cim thiab tej yam hwj huam yees ntxwv loj tas nrho nyob Hais Nkws Tos teb, tiv tus vaj Fas Las Oos thiab Fas Las Oos cov tub ncig, thiab nws tsoom pej xeem huv tib si. 12 Mais Xes tau muab nws lub hwj huam loj thiab nws lub hwj xyeej txaus ntshai rau tas tsoom His Xas Lais pom.

1 Thaum HUAB TAIS tus tub txib Mais Xes tuag tas lawm, HUAB TAIS hu Yos Xuas uas yog Nuv tus tub thiab yog tus pab Mais Xes. HUAB TAIS hais rau Yos Xuas tias : 2 “Kuv tus tub txib Mais Xes tuag lawm. Nyem no, koj sawv mas ! Koj hla tus dej Yos Las Das ntawd mas ! Koj yuav nrog haiv neeg no mus lawm hauv lub teb chaws uas kuv muab rau tsoom His Xas Lais. 3 Thaj chaw twg tsuav yog nej lub qab xib taws tau mus tsuj txog mas kuv yuav muab rau nej, raws li kuv tau hais rau Mais Xes. 4 Txij teb chaws suab puam thiab Lis Npaas teb mus rau tus dej loj Aws Fas Tes mus txog lub hiav txwv loj nyob rov sab hnub poob, mas yuav yog nej teb chaws huv si. 5 Tas koj sim neej yuav tsis muaj ib tug neeg tiv tau koj, vim kuv yuav nrog koj ib yam li kuv tau nrog Mais Xes. Kuv yuav tsis tso koj pov tseg ib zaug, kuv yuav tsis ncaim ntawm koj.”

7 HUAB TAIS hais rau Yos Xuas tias : “Hnub no, kuv yuav ua kom koj loj tuaj rau tas tsoom His Xas Lais pom, kom lawv paub tias kuv yuav nrog koj ib yam li kuv nrog Mais Xes. Koj yuav ceeb toom rau cov Leej Choj kwv lub Xab Cog Lus li no : thaum nej mus txog ntawm ntug dej Yos Las Das lawm, nej yuav mus nyob hauv nruab nrab tus dej.” Ces Yos Xuas hais rau cov His Xas Lais tias : “Nej txav los mloog HUAB TAIS Tswv Ntuj cov lus !” 10 Yos Xuas hais tias : “Nej yuav pom tias Tswv Ntuj yog ib tug Tswv Ntuj muaj txoj sia nyob hauv nruab nrab nej, vim nej yuav pom ib yam zoo li no : 11 HUAB TAIS uas yog tus Tswv kav tas lub ntiaj teb, nws lub Xab Cog Lus yuav hla tus dej Yos Las Das ua nej ntej. 13 Thaum cov Leej Choj kwv HUAB TAIS lub Xab Cog Lus mus tsuj cov dej Yos Las Das, mas tam sim ntawd dej yuav tsis ntws ntxiv. Cov dej yuav nres ua ib pawg nyob pem hauv dej ! 14 Thaum tsoom pej xeem His Xas Lais sawv kev mus hla tus dej Yos Las Das, mas cov Leej Choj kwv lub Xab Cog Lus mus ua sawv daws ntej. 15 Thaum ntawd yog lub caij sau nplej, tus dej Yos Las Das phwj dhau ob sab ntug. 16 Cov kwv lub Xab Cog Lus nyuam qhuav txog ntawm ntug dej Yos Las Das xwb, cov Leej Choj ko taw nyuam qhuav tsuj cov dej, ces cov dej ntws pem hauv los theem kiag, thiab dej teev kiag ua ob lub pas dej siab siab nyob ob sab, txij As Das mus txog lub yeej Xas Taas. Hos cov dej nram hav ntws mus txog lub hiav txwv daw ntsev hu ua hiav txwv As Las Npas. Tsoom pej xeem hla dej ncaj ntawm lub tsheej Yes Lis Kos. 17 Cov Leej Choj uas lawv kwv lub Xab Cog Lus, lawv sawv ntsug nyob hauv nruab nrab tus dej Yos Las Das, lawv ko taw qhuav tsis ntub dej, thiab tas tsoom His Xas Lais kuj hla dej, ko taw tsis ntub dej li. Tas haiv His Xas Lais hla dej zoo li ntawd.

9 HUAB TAIS hais rau Yos Xuas tias : “Hnub no, kuv hle nej lub koob meej phem nyob Hais Nkws Tos teb pov tseg.” Ces qhov chaw ntawd thiaj hu ua Ntsis Nkas los txog tav no. 10 Cov His Xas Lais tsa tsev tsam phooj nyob ntawm Ntsis Nkas. Thaum txog hnub tim kaum plaub tsaus ntuj lawv thiaj ua lub Ntees Hla. Yog nyob hauv lub tiaj Yes Lis Kos. 11 Ua lub Ntees Hla tas, tag kis lawv noj cov txhiam xws uas lawv cog nyob hauv lub teb chaws. Lawv noj cov mov tsis xyaw poov xab thiab cov noob nplej kib. 12 Tsis muaj cov mov mas nas lawm, vim lawv twb tau cov mov hauv lub teb chaws noj lawm. Cov His Xas Lais tsis muaj cov mov mas nas lawm ces txij xyoo ntawd los lawv noj cov txhiam xws nyob hauv lub teb chaws Kas Nas Has.

1 Cov neeg nyob Yes Lis Kos lawv thaiv lub tsheej zoo kawg kom cov His Xas Lais txeeb tsis tau. Tsis muaj neeg tawm thiab kuj tsis muaj neeg chaws mus hauv li. 2 HUAB TAIS hais rau Yos Xuas tias : “Koj saib, kuv muab lub tsheej Yes Lis Kos thiab nws tus vaj tso rau hauv koj txhais tes. 3 Nej cov ntaus rog uas muaj lub siab tawv, nej mus ncig ib lwm kom thoob lub tsheej. Nej yuav ua li ntawd rau hnub sib law. 4 Xya tus Leej Choj yuav nqa xya lub hom ua lub Xab Cog Lus ntej. Hnub xya, nej yuav mus ncig lub tsheej xya lwm. Hnub ntawd cov Leej Choj yuav tshuab hom ua ntej. 5 Thaum nej hnov suab hom nrov, tas tsoom sid sawv daws yuav qw ib tsaug loj loj xws li neeg ntaus tsam. Mas tam sim ntawd lub ntsa loog yuav vau. Ces tas sawv daws yuav nias tsam mus txeeb lub tsheej, nyias mus ncaj nraim ntawm nyias hauv ntej.” 6 Ces Yos Xuas hu cov Leej Choj tuaj, nws hais rau lawv tias : “Nej kwv lub Xab Cog Lus. Thiab xya tus Leej Choj yuav nqa xya lub raj kub tshis ua HUAS TAIS lub Xab Cog Lus ntej.” 7 Yos Xuas hais rau tsoom sid tias : “Nej mus ua ib ncig vij lub nroog.” 10 Yos Xuas ceeb toom rau tsoom sid tias : “Nej tsis txhob qw, tsis txhob pub kom luag tej hnov nej lub suab. Nej yuav tsis txhob hais ib los lus mus txog hnub kuv hais rau nej tias : ‘Nej qw lub suab nias tsam !’ Mas thaum ntawd nej yuav qw tiag.” 14 Hnub ob, lawv ua ib ncig lub tsheej tas, lawv rov mus hauv yeej. Lawv ua li ntawd rau hnub sib law. 15 Hnub xya, lawv sawv ntxov ntxov mus ncig lub tsheej. Lawv ua xya lwm zoo li qhov qub. Kawg yog hnub ntawd xwb lawv thiaj ncig xya lwm. 16 Lwm xya, cov Leej Choj thiaj tshuab hom. Yos Xuas hais rau tsoom sid tias : “Nej qw lub suab nias tsam ! Vim HUAB TAIS muab lub tsheej no rau nej lawm !” 20 Ces tsoom sid qw thiab suab hom nrov doog diaj. Thaum suab hom nrov, tsoom sid qw ib suab nias tsam nrov loj tas nrho ua lub ntsa loog vau hlo. Tam sim ntawd sawv daws nce mus pem lub tsheej, nyias mus ncaj nyias xub ntiag. Lawv txeeb tau lub tsheej. 21 Lawv muab lub txim tsawm lub tsheej, lawv rhuav tas puas tsav yam nyob hauv lub tsheej. Txiv neej, poj niam, laus hluas, me nyuj, me yaj, me luj. Lawv xuas ntaj tua pov tseg tas tib si.

3 Yos Xuas npaj yuav coj cov tub rog tas huv tib si mus ntaus lub tsheej Ais. Nws xaiv peb caug txhiab leej yog cov txawj tshaj, nws kom lawv mus hmo ntuj. 4 Nws xub ceeb toom rau lawv tias : “Nej yuav muab siab rau ! Nej yuav mus nkaum nyob nram qab tsheej tos. Nej siv tom txwv ntaus lub nroog. Nej tsis txhob mus nyob deb heev. Nej mloog ntsoov mus li. 5 Kuv yuav nrog sawv daws txav mus kom txog lub tsheej. Ces thaum cov neeg nyob hauv Ais tawm tuaj ntaus peb mas peb yuav khiav.” 9 Ces Yos Xuas tso lawv mus. Lawv thiaj mus nrhiav chaw nkaum nyob ntawm Ais xib fab, nyob hauv Ais thiab Npes Thes kis nruab nrab. Yos Xuas nrog tsoom sid pw ib hmos. 10 Tag kis nws sawv ntxov ntxov. Nws mus txheeb tsoom sid tib si, ces nws coj lawv nce mus pem Ais, nws nrog cov txwj laus His Xas Lais ua ntej. 14 Thaum tus vaj Ais pom tias cov His Xas Lais vij nws lub tsheej lawm, mas tus vaj tawm ceev ceev tuaj nrog lawv sib tua. Nws coj nws cov tub rog tuaj nyob ntawm phab toj ntsia ntsoov mus rau lub tiaj As Las Npas, nws tsis paub tias muaj ib pab His Xas Lais nkaum nyob nram qab tsheej. 15 Yos Xuas thiab tsoom His Xas Lais cia tus vaj tuaj ntaus lawv. Lawv khiav taug txoj kev mus rau teb chaws suab puam. 16 Tas tsoom neeg nyob hauv lub tsheej tawm tuaj caum cov His Xas Lais, lawv qw ntsuag qees. Lawv caum Yos Xuas mus deb lub tsheej. 17 Tsis tshuav ib tug txiv neej nyob hauv Ais uas yuav tsis tuaj caum cov His Xas Lais. Lawv tuaj tas tib si thiab lawv cia lub rooj loog tsheej qhib tseg. 18 Ces HUAB TAIS hais rau Yos Xuas tias : “Koj tsa rab hmuv nyob hauv koj txhais tes mus rau Ais, vim kuv yuav tso lub tsheej rau hauv koj tes.” Yos Xuas tsa hlo rab hmuv nws tuav mus rau lub nroog. 19 Thaum nws xyab tes kiag, cov tub rog nkaum nram qab tsheej tawm plaws los, lawv khiav mus hauv lub tsheej thiab lawv zes taws tam sid rau lub tsheej. 20 Cov neeg Ais tig loo los saib, lawv pom pa taws twb ncho nto ntuj. Lawv tsis muaj ib tug yuav muaj lub zog khiav mus lawm ib qho li. Hos cov His Xas Lais uas lawv caum mus teb chaws suab puam tig loo rov los ntaus lawv. 21 Yos Xuas pom tias cov tub rog lawv xub mus nkaum lawv txeeb tau lub tsheej lawm, thiab nws pom pa taws ncho nto ntuj plaws, mas nws coj cov His Xas Lais tig loo rov los ntaus cov Ais. 22 Cov mus hlawv lub tsheej kuj tawm tuaj pab Yos Xuas lawv thiab. Ces cov Ais nyob hauv ob pab His Xas Lais kis nruab nrab. Cov His Xas Lais muab lawv tua tuag tas, tsis tshuav ib tug ciaj los ib tug dim khiav li.

6 Cov Nkas Npas Oos xa lus mus rau Yos Xuas nyob hauv lub yeej Zis Nkas tias : “Koj tsis txhob tso koj cov tub txib pov tseg ! Koj tsuag tsuag tuaj cawm peb thiab tuaj pab peb, vim cov vaj As Mos uas nyob pem toj siab sib koom tuaj ntaus peb lawm.” 7 Yos Xuas thiaj mus. Nws coj nws pab tub rog txawj tshaj tas tib si nrog nws mus. 8 HUAB TAIS hais rau Yos Xuas tias : “Koj tsis txhob ntshai lawv ! Kuv muab lawv los ua neeg zwm rau koj tas tib si. Tsis muaj ib tug yuav tiv tau koj.” 9 Yos Xuas mus ib hmos kev, nws mus ntsib cov As Mos, cov As Mos tsis nco qab ceev faj dab tsi. 10 Yog HUAB TAIS ua kom lawv swb His Xas Lais nyob Nkas Npas Oos. Ces lawv poob tsam loj kawg. Yos Xuas tseem caum lawv mus raws phab toj Npes Hos Loos, nws ntaus lawv mus txog As Xes Kas thiab txog Mas Kes Das. 11 Thaum lawv tab tom khiav nqes phab toj Npes Hos Loos, HUAB TAIS tseem tso ib co lawg loj loj poob saum ntuj los ntaus lawv mus txog As Xes Kes. Cov raug lawg ntaus tuag coob dua cov raug His Xas Lais tej ntaj tua tuag. 12 Hnub ntawd HUAB TAIS muab lub teb chaws As Mos rau cov His Xas Lais kav. Hnub ntawd Yos Xuas tsa suab hais rau HUAB TAIS tias : “Lub hnub, koj los tus ncaj saum Nkas Npas Oos mas ! Lub hli, koj los theem ncaj saum lub hav As Yas Loos mas !” 13 Ces lub hnub tus thiab lub hli kuj nres twj ywm saum ntuj mus txog thaum haiv His Xas Lais pauj rau lawv cov yeeb ncuab tas.

1 Yos Xuas hu tas nrho cov xeem His Xas Lais tuaj nyob Xis Kes. Nws hu cov txwj laus His Xas Lais, cov nom tswv, cov txiav txim thiab cov thoob xwm ntawv tuaj sawv ua tej phiaj nyob ntawm Tswv Ntuj xub ntiag. 2 Ces Yos Xuas hais rau tsoom sid sawv daws tias : “Tsoom His Xas Lais tus HUAB TAIS Tswv Ntuj hais li no : Thaum ub, nej cov yawg koob nyob sab dej tid. Yog Tes Las uas nws yog Has Nplas Has thiab Nas Hos nkawd txiv. Thaud, lawv teev lwm cov dab. 3 Kuv tau hu Has Nplas Has thiab tau coj nws mus hla tas nrho cov teb chaws Kas Nas Has. Kuv tau pub kom nws muaj tub ki, muaj xeeb zeej xeeb ntxwv huam vam. Kuv pub His Xas Has rau nws. 4 Kuv pub Yas Kos thiab Es Xas Ws rau His Xas Has. Kuv muab lub roob Xes Is rau Es Xas Ws yuav ua nws tug. Yas Kos thiab nws cov tub tsiv mus nram Hais Nkws Tos teb. 5 Ces kuv thiaj tau xa Mais Xes thiab As Loos nkawd tuaj thiab tau tso xwv txheej los raug Hais Nkws Tos teb. Kuv mam li pab kom nej tawm los. 6 Kuv coj nej cov yawg koob tawm los. Thaum lawv los txog ntawm lub Hiav Txwv, mas cov Hais Nkws Tos caij tsheb caij nees tuaj caum lawv txog ntawm lub Hiav Txwv Tauj. 7 Lawv hu txog HUAB TAIS, ces HUAB TAIS tso huab tuaj thaiv nej ntawm cov Hais Nkws Tos thiab nws tso dej hiav txwv nphau los nyab lawv. Nej qhov muag tau pom tej yam kuv ua nyob Hais Nkws Tos teb. Nej tau los nyob ntev xyoo nyob hauv teb chaws suab puam. 8 Ces kuv tau coj nej los nyob hauv lub teb chaws As Mos uas nyob sab dej Yos Las Das tim ub. Lawv sawv ua rog ntaus nej, tab sis kuv muab lawv rau hauv nej tes, ces nej tau lawv lub teb chaws los ua nej lub cuab tam, vim kuv tau ua kom lawv ploj ntshis nyob ntawm nej xub ntiag. 9 Tus vaj Muas kuj tau sawv ua rog rau His Xas Lais. Nws tso neeg mus hu Npas Las Has tuaj tsawm nej. 10 Tab sis kuv tsis kam mloog Npas Las Has, ces Npas Las Has tseem tau foom lus zoo txog nej thiab kuv tau cawm nej dim ntawm nws txhais tes. 11 Thaum nej hla dej Yos Las Das los txog Yes Lis Kos, cov neeg kav Yes Lis Kos ua rog rau nej. Cov As Mos, cov Pes Lis Xis, cov Kas Nas Has, cov His Tis, cov Zis Nkas Sis, cov His Vis thiab cov Zes Npws kuj sawv ntaus nej, tab sis kuv tau muab lawv los zwm rau nej huv tib si. 12 Kuv tau tso ib co nkawj ua nej ntej mus caum ob tug vaj As Mos. Ces nej tsis tau siv ntaj los siv hneev. 13 Lub teb chaws kuv muab rau nej mas tsis yog nej tau khwv txhim. Cov tsheej uas nej mus nyob hauv mas tsis yog nej tau khwv ua. Cov txiv cawv thiab txiv roj uas niaj hnub nej noj mas tsis yog nej tau khwv cog.”
14 Nyob Xis Kes, Yos Xuas hais rau cov His Xas Lais tias : “Tsoom His Xas Lais, nyem no, nej yuav hwm thiab tsob hwb HUAB TAIS raws txoj kev ntshiab kev ncaj. Cov dab uas thaum ub nej cov yawg koob teev nyob ntawm tus dej sab tid thiab nyob Hais Nkws Tos teb mas nej muab tso pov tseg, nej los tsob hwb HUAB TAIS. 15 Tab sis yog nej tsis zoo siab tsob hwb HUAB TAIS, mas nej cia li xaiv ib co dab uas nej xav tsob hwb. Nej puas xaiv nej cov yawg koob thaud cov dab los puas xaiv cov As Mos cov dab, uas nyem no nej nyob hauv lawv teb chaws ? Ntawm kuv thiab kuv tsev neeg mas peb xav tsob hwb HUAB TAIS.” 16 Ces tsoom sid teb tias : “Peb tsis tso HUAB TAIS pov tseg mus teev lwm cov dab li ! 17 Peb tus HUAB TAIS Tswv Ntuj tsis yog tus tau coj peb cov yawg koob thiab coj peb tawm hauv Hais Nkws Tos teb los lod ? Nws cawm peb dim ntawm lub tsev ua qhev. Nws tau ua hwj huam loj rau peb qhov muag pom xyeem. Thaum peb mus kev thiab peb hla pej kum teb chaws, nws tau txuag peb. 18 Cov haiv neeg thiab cov As Mos uas lawv xub nyob teb chaws no, mas HUAB TAIS caum lawv khiav. Peb kuj yuav tsob hwb HUAB TAIS, vim nws yog peb tus Tswv Ntuj.” 19 Ces Yos Xuas hais rau tsoom sid tias : “Nej yuav tsob hwb HUAB TAIS tsis tau, vim nws yog ib tug Tswv Ntuj ntshiab, nws yog ib tug Tswv Ntuj muaj khib, nws yuav tsis zam nej cov txhaum rau nej. 20 Yog nej tso HUAB TAIS pov tseg mus tsob hwb pej kum dab, mas HUAB TAIS kuj yuav hiam nej. Nws yog tus tau ua zoo rau nej, tab sis nws yuav ua kom nej ploj tas.” 21 Tsoom sid teb rau Yos Xuas tias : “Peb tsis xav teev dab. Tus peb xav tsob hwb yog HUAB TAIS.” 22 Ces Yos Xuas hais rau tsoom sid tias : “Nej rov ua tim khawv zeem tias nej tau xaiv txoj kev tsob hwb HUAB TAIS.” Lawv teb tias : “Peb ua tim khawv zeem li ntawd !” 23 Yos Xuas hais tias : “Ua li mas nej ntiab pej kum neeg cov dab uas nyob hauv nruab nrab nej. Nej tig los cuag His Xas Lais tus HUAB TAIS Tswv Ntuj.” 24 Tsoom sid teb rau Yos Xuas tias : “Peb tus HUAB TAIS Tswv Ntuj yog tus peb xav tsob hwb. Peb xav mloog nws lub suab qhia peb !” 25 Hnub ntawd Yos Xuas nrog tsoom sid cog lus. Nws tsa ib co txhooj thiab ib txog cai rau lawv coj nyob Xis Kes. 26 Yos Xuas sau cov lus ntawd tseg rau hauv phau ntawv hais txog Tswv Ntuj Txoj Cai. Nws ua li ntawd tas ces nws muab ib lub pob zeb loj los tsa nyob hauv tsob qab ntoo uas nyob hauv HUAB TAIS lub loog. 27 Yos Xuas hais rau tsoom sid tias : “Nej ntsia, lub pob zeb no ua tim khawv txog peb vim nws tau hnov cov lus uas HUAB TAIS hais rau peb tas tib si. Lub pob zeb no yuav ua tim khawv txiav txim rau peb, vim nws tau hnov cov lus uas HUAB TAIS hais rau peb.” 28 Ces Yos Xuas tso sawv daws nyias rov mus nyias tsev. 29 Thaum tej xwm no tshwm sim tuaj tas lawm, mas Yos Xuas uas yog Nuv tus tub thiaj tuag, nws muaj ib puas kaum xyoo.

1 Thaum Yos Xuas tuag lawm, cov His Xas Lais nug HUAB TAIS tias : “Peb leej twg yuav ua tus thawj mus ntaus cov Kas Nas Has ?” 2 HUAB TAIS teb tias : “Yus Das yuav ua tus thawj. Kuv yuav tso lub teb chaws rau hauv nws tes.” 3 Ces Yus Das hais rau nws tus kwv Xis Mes Oos tias : “Koj nrog kuv mus txeeb lub teb chaws uas Ntuj muab rau kuv. Wb mus ntaus cov Kas Nas Has kom tawg tas tso, ces kuv yuav los nrog koj txeeb lub teb chaws Ntuj muab rau koj thiab.” HUAB TAIS tso cov Kas Nas Has thiab cov Pes Lis Ntxis rau hauv Yus Das tes. Nkawd ntaus yeej kaum txhiab leej nyob Npes Ntxes. 5 Yus Das tog tub rog mus ntsib As Dos Nis Npes Ntxes tog nyob Npes Ntxes, lawv sib tua ib cuam nyob ntawd, ces cov Kas Nas Has thiab cov Pes Lis Ntxis tawg. 6 As Dos Nis Npes Ntxes tso tes khiav, tab sis Yus Das caum tau nws, lawv muab nws ntiv tes thiab ntiv taw xoo txiav. 7 Ces As Dos Nis Npes Ntxes hais tias : “Xya caum tus vaj uas kuv tau txiav lawv ntiv tes ntiv taw xoo tas, lawv niaj hnub khaws cov tsig mov poob hauv kuv lub qab rooj noj mov. Nyem no, Ntuj tau ua rau kuv xws li kuv tau ua rau lawv.” Lawv coj nws mus txog Yes Lus Xas Les ces nws tuag nyob ntawd.

11 Cov His Xas Lais ua tsis ntxim HUAB TAIS siab, lawv mus tsob hwb cov dab Npas Has. 12 Lawv tso lawv cov yawg koob tus HUAB TAIS Tswv Ntuj pov tseg. Twb yog HUAB TAIS coj lawv tawm hauv Hais Nkws Tos teb los. Lawv mus nrog cov pej kum haiv neeg nyob ib ncig ntawm lawv teev dab. Lawv mus pe cov dab ntawd, lawv ua HUAB TAIS npau taws. 13 Lawv tso HUAB TAIS tseg, lawv mus tsob hwb Npas Has thiab As Tas Tes. 14 Ces HUAB TAIS thiaj npau taws rau cov His Xas Lais. HUAB TAIS cia tub sab tuaj lwg lawv thiab nws tso lawv rau cov yeeb ncuab uas nyob ib ncig ntawm lawv. Lawv tiv tsis taus cov yeeb ncuab. 15 Thaum twg lawv sawv mus ntaus teb chaws mas HUAB TAIS tsis pab lawv, nws ua kom lawv tau txoj hmoov phem raws li HUAB TAIS tau hais rau lawv thiab tau cog lus rau lawv lawm. Nws cia lawv raug kev txom nyem loj li ntawd. 16 Ces HUAB TAIS mam li tso ib co Txwj Laus Tiv Thaiv sawv tuaj cawm cov His Xas Lais ntawm cov neeg tuaj lwg lawv. 17 Tab sis cov His Xas Lais kuj tsis mloog cov Txwj Laus Tiv Thaiv lus thiab. Lawv tseem ntxeev siab mus teev thiab mus pe lwm cov dab. Lawv ncaim ntawm lawv cov yawg koob tej kev lawm. Lawv tsis taug lawv cov yawg koob txoj kev, tsis mloog HUAB TAIS cov lus qhia.
18 Thaum twg HUAB TAIS tsa ib tug Txwj Laus Tiv Thaiv tuaj pab lawv, mas HUAB TAIS nrog tus Txwj Laus Tiv Thaiv ntawd nyob. Thaum ib tug Txwj Laus Tiv Thaiv ua neej nyob, mas nws txuag cov His Xas Lais. Vim thaum lawv nroo tias luag tej hiam lawv mas HUAB TAIS zoo siab hlub lawv. 19 Tab sis thaum tus Txwj Laus Tiv Thaiv nyuam qhuav tuag kiag xwb mas lawv twb rov qab ua phem tuaj. Lawv tseem ua phem dua lawv phaj yawg lawm thiab. Lawv mus teev lwm cov dab, lawv mus tsob hwb thiab mus pe lwm cov dab li ntawd. Lawv ua siab tawv dhau raws nkaus li lawv cov yawg koob tus yam ntxwv.

11 HUAB TAIS tus Tshiab nqes los zaum hauv tsob qab ntoo nyob Os Fas uas yog Yuas As Npis Xes tsob. Yuas As Npis Xes tus tub Zes Des Oos tab tom zom txhuv kom cov Mas Dias tsis txhob nyiag tau. 12 HUAB TAIS tus Tshiab yees tawm los rau Zes Des Oos pom, nws hais tias : “Tub rog siab tawv ! HUAB TAIS nrog koj nyob !” 13 Zes Des Oos teb rau nws tias : “Thov txim, HUAB TAIS ! Yog HUAB TAIS nrog peb, tim li cas peb thiaj raug tas puas tsav yam zoo li no ? Tej hwj huam uas peb niam peb txiv lawv piav rau peb tias HUAB TAIS ua kom peb tau tawm ntawm Hais Nkws Tos teb los, tej hwj huam ntawd nyob qhov twg ? Nyem no HUAB TAIS tso peb pov tseg rau hauv cov Mas Dias txhais tes.” 14 Ces HUAB TAIS tig los hais rau Zes Des Oos tias : “Koj muaj ib lub zog nres koj ! Koj mus, koj yuav cawm tau His Xas Lais ntawm cov Mas Dias tes. Tsis yog kuv xa koj mus lod ?” 15 Zes Des Oos teb tias : “Thov txim, HUAB TAIS ! Kuv yuav ua li cas cawm tau His Xas Lais ? Kuv lub xeem yog xeem me tshaj nyob Mas Nas Xes teb. Thiab kuv yog tus tub ntxawg nyob hauv kuv txiv tsev.” 16 HUAB TAIS teb tias : “Kuv yuav nrog koj. Koj yuav ntaus yeej cov Mas Dias, yam li lawv muaj ib leeg xwb.” 17 Zes Des Oos hais tias : “Yog kuv tau ua neeg xis koj siab, mas thov koj ua ib lub cim qhia kuv kom kuv paub tias yog koj hais lus rau kuv tiag. 18 Thov koj tsis txhob txav mus deb ntawm no, koj tos kom kuv rov tuaj cuag koj tso. Kuv yuav tuaj txi koj, kuv yuav nqa txim tuaj tso ntawm koj xub ntiag.” Ces HUAB TAIS teb tias : “Kuv yuav nyob tos koj rov tuaj txog tso.” 19 Zes Des Oos mus lawm. Nws tua ib tug tshis thiab nws yeem ib ntim hmoov nplej ua ib co mov tsis xyaw poov xab. Nws muab co nqaij tso rau hauv ib lub tawb, hos cov kua nws muab rau hauv ib lub tais. Ces nws nqa tuaj rau HUAB TAIS nyob hauv ib tsob qab ntoo. 20 Thaum nws tuaj yuav txog, HUAB TAIS tus Tshiab hais rau nws tias : “Koj muab nqaij thiab muab cov mov tsis xyaw poov xab tso rau saum lub pob zeb no, thiab koj hliv cov kua rau.” Zes Des Oos ua li ntawd tas. 21 Ces HUAB TAIS tus Tshiab cev tus ntsis pas uas tuav ntawm nws tes mus chwv cov nqaij thiab cov ncuav mov. Hluav taws cia li cig hauv lub pob zeb tuaj kub cov nqaij thiab cov mov tas tib si.
Ces HUAB TAIS tus Tshiab ploj ntais ntawm Zes Des Oos xub ntiag lawm. 22 Zes Des Oos paub tias yog HUAB TAIS tus Tshiab tiag. Nws txawm hais tias : “Kuv tus HUAB TAIS Tswv Ntuj, aib ! Kuv txawm tau pom koj tus Tshiab lub ntsej muag tiag !” 23 HUAB TAIS teb tias : “Koj nyob kaj siab lug mog ! Tsis txhob ntshai ! Koj yuav tsis tuag.” 24 Zes Des Oos ua ib lub thaj txi HUAB TAIS nyob ntawd, thiab nws hu qhov chaw ntawd ua “HUAB TAIS Kev Thaj Yeeb.”
36 Zes Des Oos hais rau Tswv Ntuj tias : “Yog koj xav vam txog kuv txhais tes pab cawm His Xas Lais tiag raws li koj hais, mas kuv yuav muab ib daig tawv yaj los pua rau saum lub tshav no. 37 Yog muaj lwg ntsu nyob saum cov plaub yaj xwb, thaj av nyob hauv qhuav qhawv tib si, mas kuv thiaj yuav paub tseeb tias koj yuav vam txog kuv txhais tes los cawm His Xas Lais raws li koj hais tiag.” 38 Ces txawm muaj tuaj raws li hais ntawd. Tag kis kaj ntug Zes Des Oos sawv ntxov ntxov los muab daim tawv yaj tso kua, nws tso tau ib khob dej puv puv. 39 Zes Des Oos tseem hais rau Tswv Ntuj tias : “Thov koj txhob npau taws ! Kuv tseem yuav thov koj ib zaug ntxiv. Thov koj rov qab pub kuv sim daim tawv yaj no ib zaug ntxiv. Nyem no kuv xav kom tsuas qhuav nyob saum cov plaub yaj xwb hos ib ncig tom tej av xav kom ntub lwg tas huv tib si !” 40 Hmo ntawd, Tswv Ntuj ua raws li ntawd. Tsuas tshuav daim tawv yaj xwb thiaj qhuav, tej av nyob ib ncig mas ntsu lwg tas huv tib si.

2 HUAB TAIS hais rau Zes Des Oos tias : “Haiv neeg nrog koj mus ntaus rog coob dhau. Yog kuv pub kom nej ntaus tau cov Mas Dias mas cov His Xas Lais yuav rov qab qhuas lawv xwb. Lawv yuav nco tsis txog kuv. Lawv yuav hais tias ‘Yog peb txhais tes rov cawm tau peb !’ 3 Ua li mas koj yuav hais li no rau tsoom sid mloog. Yog leej twg ntshai mas kom nws rov qab mus tsev.” Zes Des Oos sim lawv, ces muaj nees nkaum ob txhiab leej rov mus tsev, tshuav kaum txhiab leej xwb. 4 HUAB TAIS hais rau Zes Des Oos tias : “Cov neeg ntawd tseem coob dhau. Koj coj lawv nqes mus nram ntug dej, kuv yuav sim lawv nyob ntawd. Tus twg uas kuv hais rau koj tias nws nrog koj mus, mas tus ntawd thiaj yuav nrog koj mus. Yog tus twg uas kuv hais tias tsis txhob cia tus ntawd nrog koj mus, mas tus ntawd yuav tsis tau mus.” 5 Pab tub rog ntawd mus nram ntug dej. HUAB TAIS hais rau Zes Des Oos tias : “Cov uas lawv haus dej, lawv xuas nplaig yaim li dev mas koj muab lawv rau ib cag. Hos cov uas lawv txhos caug haus dej mas koj muab lawv rau ib cag.” 6 Cov uas lawv xuas nplaig yaim dej li dev, muaj peb puas leej. Hos dua li cov tib si txhos caug haus dej.
7 Ces HUAB TAIS hais rau Zes Des Oos tias : “Yog nrog peb puas leej ntawd mas kuv yuav cawm nej thiab kuv yuav muab Mas Dias rau hauv nej tes. Dua li cov mas kom lawv rov qab mus tsev tas tib si.” 16 Zes Des Oos faib peb puas leej tub rog ntawd ua peb pab. Nws faib ib leeg ib lub hom thiab ib leeg ib lub hub qhuav ntim ib teg tsau. 17 Zes Des Oos hais rau lawv tias : “Nej ntsia kuv, nej ua raws kuv qab ! Thaum peb mus txog ze lub yeej lawm mas yog kuv ua li cas nej yuav ua li cas thiab ! 18 Thaum kuv tshuab hom mas tas nej sawv daws huv si yuav tshuab hom ncig lub yeej thiab nej yuav qw tias : Ua rau HUAB TAIS thiab rau Zes Des Oos !” 19 Thaum yuav txog ib tag hmo, cov Mas Dias lawv nyuam qhuav tso peeb zov hmo tas nrho xwb. Zes Des Oos nrog nws pab tub rog ib puas leej tuaj txog ze lub yeej, lawv tshuab hom thiab lawv muab lawv cov hub tsoo tawg tas. 20 Ces tas peb pab tub rog lawv tshuab hom thiab lawv tsoo lawv cov hub tawg tas huv tib si. Lawv txhais tes laug tuav cov tsau hos lawv txhais tes xis tuav cov hom. Lawv qw tias : Ua rau HUAB TAIS thiab rau Zes Des Oos !” 21 Thaum ntawd lawv nyias sawv nres nroos ntawm nyias qhov chaw nyob ncig lub yeej. Ces nyob hauv lub yeej cov Mas Dias sawv daws tsim dheev los. Cov Mas Dias qw tej suab thiab lawv tso tes khiav. 22 Thaum Zes Des Oos peb pab tub rog tab tom tshuab hom, HUAB TAIS ua kom nyob hauv lub yeej cov tub rog Mas Dias nyias rov tig nyias rab ntaj los tua tus npawg nyob ze ntawm lawv. Sawv daws khiav tas.

6 Tas cov nom tswv nyob Xis Kes thiab nyob Npes Mis Los tuaj sib sau thiab tsa As Npis Mes Les ua vaj nyob ze tsob ntoo ntawm daim txiag zeb nyob Xis Kes. 7 Muaj neeg mus fi xov rau Yos Tas. Ces Yos Tas tuaj nyob saum lub ncov roob Nkas Lis Xis. Nws qw nrov nrov rau lawv tias : “Cov txwj laus nyob Xis Kes, nej mloog kuv mog ! Tswv Ntuj thiaj yuav mloog nej. 8 Muaj ib hnub cov ntoo sawv kev mus, lawv xav mus pleev roj tsa ib tug vaj los kav lawv. Lawv hais rau tsob txiv ntoo roj tias : Koj ua peb tus vaj ! 9 Tsob txiv ntoo roj teb lawv tias : Vim li cas kuv thiaj yuav tso kuv cov roj uas txawj ua kom neeg thiab dab zoo tuaj pov tseg ? Ua cas kuv yuav mus piav cev yuj yeev nyob saum cov ntoo ? 10 Ces cov ntoo mus hais rau tsob txiv cev tias : Koj los ua peb tus vaj mas ! 11 Tsob txiv cev teb lawv tias : Vim li cas kuv thiaj yuav tsis txi txiv qab zib ntxiv ? Ua cas kuv yuav mus piav cev yuj yeev nyob saum cov ceg ntoo ? 12 Cov ntoo txawm mus hais rau tsob txiv cawv tias : Koj los ua peb tus vaj mas ! 13 Tsob txiv cawv teb tias : Kuv puas yuav tseg tsis ua cawv ntxiv ? Ua cas kuv yuav tsis tau ua kom neeg thiab dab sov siab ntxiv ? Ua cas kuv yuav mus piav cev yuj yeev nyob saum cov ceg ntoo ? 14 Ces cov ntoo mus hais rau tsob pos tias : Koj los ua peb tus vaj mas !
Tsob pos teb tias : Yog nej ua siab ncaj tsa kuv los ua vaj kav nej mas nej yuav los nkaum hauv kuv tau. 15 Tsis li ntawd, mas hluav taws yuav tawm hauv tsob pos tuaj kub tas cov faj khaum nyob Lis Npaas. 19 Cov His Xas Lais, nej thov li no, yog nej ua siab ncaj rau As Npis Mes Les tsev, mas As Npis Mes Les yuav ua nej chaw zoo siab thiab nej yuav ua nws chaw zoo siab. 20 Tsis li ntawd, mas ib co hluav taws yuav tawm hauv As Npis Mes Les los kub cov nom tswv nyob Xis Kes, thiab ib co hluav taws yuav tawm hauv cov nom tswv mus kub As Npis Mes Les.”

29 HUAB TAIS lub tswv yim nyob saum Zes Faws Tas. Zes Faws Tas mus ncig Nkas Las teb thiab Mas Nas Xes teb, nws hla Mis Pes nyob Nkas Las teb los mus txog As Mos teb sab tod. 30 Zes Faws Tas fiv ib lub yeem rau HUAB TAIS tias : “Yog koj cia kuv yeej cov As Mos, 31 mas thaum kuv rov qab los tsev, thawj tug neeg tawm hauv kuv tsev tuaj tos kuv mas tus ntawd yuav yog HUAB TAIS li. Kuv yuav muab nws txi rau HUAB TAIS.” 32 Zes Faws Tas mus ntaus cov As Mos, HUAB TAIS muab lawv rau hauv nws txhais tes. 33 Nws ntaus lawv txij ntawm lub nroog As Los Es mus txog Mis Nis. Cov As Mos swb loj kawg, thiab poob ntsej muag. 34 Thaum Zes Faws Tas rov los tsev nyob Mis Pes, nws tus ntxhais ntaus nruas khiav yeev tuaj tos nws. Yog nws tus ntxhais twm zeej, nws tsis muaj tub muaj ntxhais ntxiv lawm. 35 Zes Faws Tas pom dheev nws tus ntxhais, Zes Faws Tas dua rhe nws lub tsho, nws hais tias : “Kuv me ntxhais, cas koj yuav coj xwv txheej tuaj raug kuv ? Ua cas thiaj yuav yog koj ? Kuv txoj hmoov phem lawm ! Kuv tau cog lus rau HUAB TAIS , kuv thim tsis tau !” 36 Tus ntxhais teb tias : “Txiv, koj cog lus rau HUAB TAIS lawm, mas koj ua rau kuv xws li koj tau fiv yeem, vim HUAB TAIS twb pub koj pauj rau cov yeeb ncuab As Mos lawm.” 37 Tus ntxhais hais rau nws txiv tias : “Kuv thov koj kheev kuv ua li no : koj cia kuv mus ob hlis. Kuv yuav nrog kuv cov viv ncaus mus nyob saum roob quaj txog kuv lub cev nkauj xwb.” 38 Nws txiv hais tias : “Koj mus tau.” Ces nws cia tus ntxhais mus tau ob hlis. Nws mus nyob pem roob nrog nws cov viv ncaus quaj txog nws lub cev nkauj xwb. 39 Thaum puv ob hlis lawm, tus ntxhais rov los cuag nws txiv, ces nws txiv thiaj ua rau tus ntxhais raws li lub yeem nws tau fiv. 40 Yog vim li ntawd mas cov His Xas Lais muaj txoj kev cai zoo li no : niaj xyoo cov ntxhais His Xas Lais yuav tsum mus quaj plaub caug hnub txog Zes Faws Tas tus ntxhais.

2 Muaj ib tug txiv neej xeem Daas nyob Kos Les As, nws hu ua Mas Nos As. Nws poj niam tsis muaj me nyuam. 3 HUAB TAIS tus Tshiab tuaj xyuas tus poj niam thiab hais rau nws tias : “Koj tsis tau muaj me nyuam. 4 Tab sis, nyem no, koj yuav ceev faj. Koj yuav tsis txhob haus cawv txiv ntoo los cawv txhuv, tsis txhob noj tej yam tsis huv. 5 Koj yuav xeeb tub, koj yuav yug ib tug tub. Koj yuav tsis txhob chais nws plaub hau ib zaug li. Tus me nyuam ntawd, txij nruab thiab los, nws yuav ua Tswv Ntuj ib tug Nas Ntxis. Yog nws yuav cawm cov His Xas Lais ntawm cov Fis Lis Tis.” 6 Tus poj niam thiaj mus hais rau nws tus txiv tias : “Tswv Ntuj ib tug neeg tau hais lus rau kuv. Zoo li yog ib tug Tshiab, vim nws tus yam ntxwv muaj hwj chim kawg. Kuv tsis tau nug nws tias nws tuaj qhov twg tuaj. Nws tsis tau qhia nws npe rau kuv paub. 7 Tab sis nws hais rau kuv tias : Koj yuav xeeb tub, koj yuav yug ib tug tub. Mas koj yuav txhob haus cawv txiv ntoo los cawv txhuv li. Tsis txhob noj tej yam tsis huv. Koj tus me nyuam, txij nruab thiab los, nws yuav ua Tswv Ntuj ib tug Nas Ntxis mus txog hnub tuag !” 24 Tus poj niam yug tau ib tug tub, nws tis npe hu ua Xas Xoos. Tus tub hlob zuj zus. HUAB TAIS pub txoj hmoov zoo rau nws. 25 HUAB TAIS lub tswv yim tuaj tshoj nws nyob hauv lub yeej Daas uas nyob ib nrab ke ntawm Xos Les As mus rau Es Tas Os.

1 Xas Xoos mus txog Tis Nas. Nyob hauv cov ntxhais Fis Lis Tis, nws pom ib tug ntxhais xis nws siab. 2 Nws rov los txog tsev, nws hais qhia nws niam nws txiv tias : “cov ntxhais Fis Lis Tis uas nyob Tis Nas kuv pom ib tug ntxhais xis kuv siab kawg. Neb mus yuav nws los ua kuv poj niam.” 3 Xas Xoos niam thiab txiv hais tias : Nyob hauv koj lub xeem thiab koj haiv neeg tsis muaj poj niam yuav lod ? Ua cas koj thiaj yuav mus nrhiav poj niam nyob hauv cov Fis Lis Tis uas lawv tsis txais lub Cim Txiav ntawd ?” Tab sis Xas Xoos teb nws txiv tias : “Koj mus yuav tus ntawd rau kuv xwb, vim yog tus kuv nyiam.” 4 Nws niam thiab nws txiv nkawd tsis paub tias yog HUAB TAIS xav kom Xas Xoos ua li ntawd. HUAB TAIS xav kom cov His Xas Lais thiab cov Fis Lis Tis muaj plaub muaj ntug, vim thaum ntawd cov Fis Lis Tis yuam cov His Xas Lais. 5 Xas Xoos mus nram Tis Nas. Thaum nws mus txog ntawm cov hav txiv cawv, nws ntsib ib tug thav tsov nyooj laws rau nws. 6 Tam sim ntawd HUAB TAIS lub tswv yim nqes los nyob saum Xas Xoos, ces Xas Xoos muab tus tsov dua rhe yam li yus dua ib tug me nyuam tshis. Tab sis Xas Xoos tsis piav qhov ntawd qhia nws niam thiab nws txiv nkawd li. 7 Xas Xoos mus nram Tis Nas, nws mus nrog tus ntxhais tham, tus ntxhais ntawd xis nws siab. 8 Tau ob peb hnub tom qab, Xas Xoos rov tuaj yuav tus ntxhais. Xas Xoos lug kev rov mus xyuas tus tsov tuag. Muaj ib xub muv uas muaj muaj zib los nyob hauv tus tsov lub khauj khaum pob txha. 9 Xas Xoos xuas tes mus de tau ib qho zib los. Thaum nws mus kev nws muab ib qho los noj. Thaum nws los txog tsev nws kuj muab rau nws niam nws txiv noj. Tab sis nws tsis hais qhia nws niam nws txiv nkawd tias yog nws muab cov zib muv ntawd hauv lub khauj khaum pob txha tsov los.
10 Nws rov mus nram nws tus poj niam tsev, ces lawv ua tshoob tau xya hnub xya hmo rau Xas Xoos, vim lawv kev cai cov hluas yeej ua li ntawd. 11 Tab sis tog neej tsa ntshai Xas Xoos. Lawv xaiv peb caug tus txiv neej nrog nws nyob rawv. 12 Ces Xas Xoos hais rau lawv tias : “Kuv txhiaj ib qho rau nej txhais. Kuv muab xya hnub nqaum paj nqaum nruas no rau nej txhais. Yog nej txhais tau mas kuv muab peb caug thooj ntaub tsuj ntaub npuag rau nej thiab peb caug cev khaub ncaws zoo nkauj rau nej. 13 Tab sis yog nej txhais tsis tau mas nej yuav tsum muab peb caug thooj ntaub tsuj ntaub npuag thiab peb caug cev khaub ncaws zoo nkauj rau kuv.” Lawv teb nws tias : “Koj txhiaj. Peb mloog.” 14 Ces nws hais rau lawv tias : “Tej yam zoo noj tawm hauv tus noj luag los, tej yam qab zib tawm hauv tus muaj zog los.” Tau peb hnub lawv txhais tsis tau li. 15 Ces hnub plaub lawv mus hais rau Xas Xoos tus poj niam tias : “Koj ntxias koj tus txiv kom nws qhia lo lus txhais rau koj. Yog koj tsis ua li ntawd mas peb yuav muab koj hlawv thiab muab koj txiv tsev neeg hlawv huv si. Puas yog vim nej xav lwg peb, nej thiaj hu peb tuaj nyob ntawm no ?” 16 Ces Xas Xoos poj niam ua txuj quaj quaj khawm lias Xas Xoos caj dab hais tias : “Yog koj ntxub ntxub kuv xwb ! Koj twb tsis nyiam kuv ! Koj txhiaj ib qho rau kuv cov neej tsa txhais, tab sis koj twb tsis tau piav rau kuv paub li.” Xas Xoos teb rau nws tias : “Kuv twb tsis tau hais qhia kuv niam kuv txiv nkawd. Ua cas kuv yuav hais qhia koj ?” 17 Xya hnub uas lawv ua lom zem ntawd, nws tus poj niam quaj xya hnub nyob ntawm nws xub ntiag. Ces hnub xya Xas Xoos nyiaj tsis taus, nws qhia lo lus txhais rau nws poj niam. Ces tus poj niam qhia lo lus txhais rau nws cov neej tsa. 18 Hnub xya, thaum Xas Xoos tsis tau nkag hauv kem tsev pw, cov neeg hauv lub nroog tuaj hais rau Xas Xoos tias : “Tsis muaj ib yam qab zib cuag zib ntab ! Tsis muaj ib yam muaj zog cuag tsov ntxhuav!” Xas Xoos teb ntua tias : “Yog nej tsis tau nrog kuv tus maum nyuj laij liag, mas nej yeej tsis paub kuv lo lus txhais.” 19 Ces HUAB TAIS lub tswv yim tuaj nyob saum Xas Xoos. Nws ya ntxiag mus nram As Kes Loos, nws muab peb caug tus txiv neej tua, nws hle lawv cov khaub ncaws nqa los rau peb caug tus txiv neej uas lawv txhais tau nws cov lus. Nws npau taws ces nws rov mus tsev. 20 Lawv muab Xas Xoos tus poj niam rau tus phij laj yuav.

1 Ib ntus tom qab, thaum txog lub caij hlais nplej, Xas Xoos rov tuaj xyuas nws poj niam. Nws nqa ib tug tshis tuaj rau nws poj niam. Xas Xoos hais tias : “Kuv xav mus xyuas kuv poj niam nyob hauv nws kem tsev.” Tab sis nws yawm txiv tsis kheev. 2 Nws yawm txiv hais tias : “Kuv xav tias koj ntxub nws lawm ces kuv muab nws rau koj tus phooj ywg yuav lawm. Tab sis nws tus niam hluas tsis zoo dua nws lod ? Koj yuav nws ua koj poj niam mas !” 3 Xas Xoos teb tias : “Nyem no yog kuv tsis tau ua phem rau cov Fis Lis Tis mas kuv lub siab yuav nyob tsis tus !” 4 Ces Xas Xoos mus ntes tau peb caug tus hma los. Nws npaj ib co tsau. Nws muab cov hma tig ko tw los sib npuab, ces nws pav ib teg tsau rau ntawm nruab nrab ob tug hma ko tw. 5 Nws zes taws rau cov tsau, nws tso cov hma mus hauv cov Fis Lis Tis tej teb qoob. Cov nplej twb hlais pav ua tej tes, los cov nplej tseem tsis tau hlais, nws muab hlawv tib si. Nws kuj hlawv lawv cov vaj txiv cawv, txiv ntoo roj huv tib si. 6 Cov Fis Lis Tis nug tias : “Yog leej twg ua li ntawd ?” Muaj neeg teb tias : “Yog Xas Xoos uas yog tus neeg nyob Tis Nas tus vauv. Vim tus neeg ntawd muab Xas Xoos tus poj niam rau Xas Xoos tus phooj ywg lawm.” Ces cov Fis Lis Tis mus muab Xas Xoos poj niam thiab nws tsev neeg hlawv. 7 Xas Xoos hais rau lawv tias : “Yog nej ua li no mas kuv yuav tsis tso nej tseg li. Kuv yuav ua pauj rau nej tas tso !” 8 Xas Xoos ntaus cov Fis Lis Tis, lawv swb nws loj kawg. Ces Xas Xoos mus nram lub qhov tsua Es Tas. Nws mus nyob ntawd.
9 Cov Fis Lis Tis mus ua yeej nyob Yus Das teb, lawv mus soj ntsuam txog Les His. 10 Cov Yus Das hais rau lawv tias : “Vim li cas nej thiaj tuaj ntaus peb ?” Lawb teb tias : “Yog peb tuaj ntes Xas Xoos khi, thiab tuaj ua phem rau nws xws li nws ua rau peb.” 11 Muaj peb txhiab leej Yus Das mus hais rau Xas Xoos nyob hauv lub qhov tsua Es Tas tias : “Koj tsis paub tias cov Fis Lis Tis yog peb cov tswv lod ? Koj ua dab tsi li ntawd rau peb ?” Xas Xoos teb lawv tias : “Kuv pauj rau lawv raws li lawv ua rau kuv xwb.” 12 Lawv hais rau Xas Xoos tias : “Peb tuaj khi koj cab mus rau cov Fis Lis Tis.” Xas Xoos hais rau lawv tias : “Nej cog lus rau kuv tias nej yuav tsis tua kuv.” 13 Lawv teb tias : “Peb tsis tua ! Peb xav ntes koj mus rau lawv xwb, tab sis peb tsis xav ua kom koj tuag.” Ces lawv muab ob txog hlua tshiab los khi Xas Xoos thiab lawv rub nws hauv qhov tsua los. 14 Thaum Xas Xoos los txog Les His, cov Fis Lis Tis qw qw khiav ntsuag qees tuaj tos nws. HUAB TAIS lub tswv yim rwg ntxiag los nyob hauv Xas Xoos. Ob txog hlua khi nws tes cia li tu yam li cov hlua maj kub hnyiab, thiab zoo li yaj tas nyob hauv nws tes. 15 Nws pom ib tug pob txha puab tsaig luj tseem tshiab tshiab. Nws cev tes mus khaws nkaus tus pob txha puab tsaig ntawd ntaus tuag ib txhiab leej neeg.

1 Xas Xoos mus txog Nkas Xas. Nws pom ib tug poj ntiav, nws chaws mus hauv tus poj ntiav tsev. 2 Muaj neeg tuaj hais rau cov neeg nyob Nkas Xas tias Xas Xoos tuaj txog ntawm no lawm. Ces lawv tso tej pab neeg mus zov lub tsheej thiab tos Xas Xoos nyob ntawm rooj loog. Lawv tos nyob ntawd ntsiag to ib hmos. Lawv xav tias : Peb tos mus txog kaj ntug ces peb muab nws tua. 3 Tab sis Xas Xoos pw txog ib tag hmo, ces nws sawv los. Nws nthos ob daig txiag qhov rooj thiab ob tug ncej ntawm rooj loog, nws rho hlo tau daim taw rooj los huv tib si. Nws muab kwv saum xub pwg mus txog pem lub ncov roob uas nyob ncaj Hes Plhoos, nws tso lub qhov rooj rau ntawd.
4 Ua li ntawd tas, Xas Xoos mus nyiam ib tug poj niam nyob hauv lub vos hav Xos Les. Tus poj niam ntawd hu ua Das Lis Las. 5 Cov nom tswv Fis Lis Tis mus hais rau Das Lis Las tias : “Koj ntxias Xas Xoos kom nws qhia koj saib nws muab nws lub zog ntawd qhov twg los, kom peb paub tias yuav ua cas thiaj ntes tau nws thiab khi tau nws kom nws tsis txhob muaj zog ntxiv lawm. Tso peb ib leeg yuav muab ib txhiab thiab ib puas lub txiag rau koj.” 6 Ces Das Lis Las hais rau Xas Xoos tias : “Thov koj qhia kuv saib koj muab koj lub zog loj tas npaud qhov twg los ? Yuav muab dab tsi khi koj thiaj yuav pav tau koj ?” 7 Xas Xoos teb tias : “Yog nej muab xya txoj hlua hneev tshiab tshiab uas tsis tau qhuav los khi kuv mas kuv lub zog yuav ploj, kuv yuav zoo li luag tej xwb.” 8 Cov nom tswv Fis Lis Tis nqa tau xya txoj hlua hneev tshiab tshiab tsis tau qhuav tuaj rau Das Lis Las. Das Lis Las muab coj los khi Xas Xoos. 9 Nws zais ib co neeg nkaum nyob hauv nws tsev. Ces nws qw tias : “Xas Xoos, cov Fis Lis Tis tuaj ntes koj !” Xas Xoos ua cov hlua tu mos nyoos yam li ib co xov maj kub hnyiab. Ces lawv tsis paub Xas Xoos lub zog txhawv qhov twg los. 10 Das Lis Las hais rau Xas Xoos tias : “Koj lam dag kuv xwb. Nyem no, thov koj qhia kuv tiag tiag saib kuv yuav muab dab tsi los khi koj ?” 11 Xas Xoos teb tias : “Yog nej muab ib co hlua tshiab tshiab tsis tau siv ib zaug los khi kuv, mas kuv lub zog yuav ploj, kuv yuav zoo li luag tej xwb.” 12 Ces Das Lis Las muab ib co hlua tshiab tshiab tsis tau siv dua los khi Xas Xoos, thiab nws qw tias : “Xas Xoos, cov Fis Lis Tis tuaj ntes koj !” Das Lis Las zais ib co neeg nkaum nyob hauv nws kem tsev. Tab sis Xas Xoos ua cov hlua tu mos nyoos ib yam li ib txog xov. 13 Ces Das Lis Las hais rau Xas Xoos tias : “Los txog tav nod koj thuam kuv xwb, koj dag kuv xwb. Koj qhia kuv saib yuav muab dab tsi los khi koj mas ?” Xas Xoos teb tias : “Yog koj muab kuv xya tus moj tuam khi rau cov xov ntawm lub ntos ntaub thiab koj muab lub ntos txhos rau hauv av mas kuv lub zog yuav ploj, kuv yuav zoo li luag tej xwb.”
14 Das Lis Las ntxias Xas Xoos tsaug zog lawm, ces nws muab Xas Xoos xya tus moj tuam los ntos xyaw rau nws cov xov thiab muab lub ntos ntaub los txhos rau hauv av. Das Lis Las qw tias : “Xas Xoos, cov Fis Lis Tis tuaj ntes koj !” Xas Xoos tsim dheev nruab dab ntub los, nws dua rhe daim ntaub thiab muab lub ntos ntaub rho hlo. 15 Das Lis Las hais rau Xas Xoos tias : “Ua cas koj thiaj hais tau tias koj nyiam kuv ? Koj lub siab twb tsis nrog kuv nyob. Koj twb dag kuv peb zaug lawm thiab koj tsis tau qhia tias tim li cas koj lub zog thiaj loj tas npaud.” 16 Niaj hnub, Das Lis Las pheej hais tas zog, ces Xas Xoos nyiaj tsis taus. 17 Xas Xoos thiaj qhib nws lub siab tas tib si rau Das Lis Las. Nws hais tias : “Rab chais tsis tau chwv kuv taub hau ib zaug li, vim kuv yog Tswv Ntuj tus Nas Ntxis txij thaum kuv nyob hauv kuv niam plab los. Yog leej twg txiav kuv cov plaub hau mas kuv lub zog yuav tso kuv tseg, kuv yuav tsis muaj zog ntxiv lawm, kuv yuav zoo li luag tej xwb.” 18 Das Lis Las paub tias nyem no Xas Xoos qhib tas Xas Xoos lub siab rau nws lawm, ces Das Lis Las mus hu cov nom Fis Lis Tis tuaj, nws hais rau lawv tias : “Zaum no nej tuaj. Nws qhib nws lub siab rau kuv tas tib si lawm.” Ces cov nom tswv Fis Lis Tis nqa nyiaj tuaj rau Das Lis Las. 19 Das Lis Las ua kom Xas Xoos tsaug zog nyob ntawm nws hauv caug, ces nws hu ib tug txiv neej tuaj txiav Xas Xoos cov moj tuam. Ces Xas Xoos lub zog ntaug zuj zus, nws tsis muaj zog lawm. 20 Das Lis Las qw tias : “Xas Xoos, cov Fis Lis Tis tuaj ntes koj !” Xas Xoos tsim dheev los, nws xav tias : Kuv yuav ua tau xws li niaj zaus, kuv yuav dim. Nws tsis paub tias HUAB TAIS fee nws lub ntsej muag lawm. 21 Ces cov Fis Lis Tis ntes nws, lawv tshum nws ob lub qhov muag thiab lawv coj nws mus nyob Nkas Xas. Lawv muab ib txog saw hlau txooj los khi nws, lawv kom nws zom lub zeb nyob hauv tsev loj faj.
22 Tab sis Xas Xoos cov plaub hau uas lawv txiav tas nws kuj maj mam ntev tuaj. 23 Cov nom tswv Fis Lis Tis tuaj sib sau, lawv xav ua ib zag txi dab loj rau lawv tus dab Das Nkoos, thiab lawv yuav noj yuav haus. Lawv hais tias : “Peb tus tswv ntuj muab Xas Xoos uas yog peb thawj tug yeeb ncuab rau hauv peb tes lawm.” 24 Thaum tsoom sid pom lawv tus tswv ntuj, lawv qw cav txog lawv tus tswv ntuj tias : “Peb tus tswv ntuj muab Xas Xoos uas yog peb tus yeeb ncuab rau hauv peb tes lawm. Xas Xoos yog tus ua kom peb lub teb chaws lwj liam tas, thiab yog tus ua kom peb cov neeg tuag pawg lug.” 25 Lawv zoo siab heev, lawv qw tias : “Nej coj Xas Xoos los kom peb tau kev ua si !” Ces lawv mus coj Xas Xoos hauv tsev loj faj los. Nws ua si rau lawv ntsia. Lawv coj nws mus sawv ntsug nyob ntawm cov kis ncej zeb. 26 Xas Xoos hais rau tus tub uas tuav nws tes cab nws mus kev tias : “Koj coj kuv mus tuav cov ncej pob zeb uas txheem lub tsev, kuv xav mus ib ntawd.”
27 Hauv lub tsev ntawd muaj neeg coob coob, poj niam txiv neej nyob ntsawm nkaus. Tas cov nom tswv Fis Lis Tis nyob ntawd tib si. Muaj peb txhiab tawm leej poj niam txiv neej nyob txheej tsev saud ntsia Xas Xoos ua si. 28 Xas Xoos thov HUAB TAIS tias : “HUAB TAIS Tswv Ntuj, thov koj nco txog kuv ! Koj muab zog rau kuv kom zaum no kuv ua ib zaug pauj rau cov Fis Lis Tis uas lawv tshum kuv ob lub qhov muag dig lawm.” 29 Xas Xoos muab tes xuas tau ob tug ncej uas txheem nruab nrab lub tsev, nws thawb ob tug ncej, nws txhais tes xis thawb ib tug, txhais tes laug thawb ib tug. 30 Nws qw tias : “Cia kuv nrog cov Fis Lis Tis tuag ua ke !” Ces Xas Xoos siv tas nws lub zog thawb. Lub tsev vau hlo los tsuam cov nom tswv thiab cov neeg nyob ntawd tas huv tib si. Zaum ntawd cov Fis Lis Tis nrog nws tuag coob dua thawj zaug uas nws ciaj. 31 Xas Xoos cov kwv tij thiab nws tsev neeg tuaj coj nws lub cev mus. Lawv muab nws faus nyob hauv nws txiv Mas Nos As lub ntxa, nyob ntawm txoj kev mus Xos Les As rau Es Tas Os. Xas Xoos tau ua Txwj Laus Tiv Thaiv rau cov His Xas Lais nees nkaum xyoo.

1 Lub caij uas cov Txwj Laus Tiv Thaiv kav teb chaws, lub teb chaws tau tshaib plab ib ntus. Thaum ntawd muaj ib tug txiv neej nyob Npes Les Hes, nws coj nws poj niam thiab nws ob tug tub lawv tsiv mus nyob nram cov nras tiaj Muas. 2 Tus txiv neej ntawd hu ua Es Lis Mes Les, nws tus poj niam hu ua Nos Es Mis thiab nws ob tug tub ib tug hu ua Mas Loos, ib tug hu ua Kis Lis Yoos. Lawv yog ib co Es Fas Tas, nyob Npes Les Hes, Yus Das teb. Lawv tuaj txog cov tiaj Muas, lawv tsa tsev nyob ntawd. 3 Es Lis Mes Les uas yog Nos Es Mis tus txiv, tuag nyob ntawd. Tshuav Nos Es Mis nrog nws ob tug tub nyob xwb. 4 Ob tug tub ntawd yuav poj niam nyob hauv cov Muas. Ob tug poj niam ntawd ib tug hu ua Os Pas, ib tug hu ua Luv. Lawv nyob ntawd tau kaum tawm xyoo. 5 Ces Mas Loos thiab Kis Lis Yoos nkawd kuj tuag. Tshuav Nos Es Mis ib leeg xwb nws tsis muaj tub muaj txiv lawm. 6 Nos Es Mis thiaj npaj nrog nws ob tug nyab yuav rov los rau Yus Das teb. Nws hnov tias Tswv Ntuj tuaj xyuas nws haiv neeg thiab pub mov rau lawv noj lawm. 7 Ces Nos Es Mis thiab nws ob tug nyab yuav tso lub teb chaws lawv nyob txawm tseg, lawv sawv kev yuav rov los rau teb chaws Yus Das. 8 Nos Es Mis hais rau nws ob tug nyab tias : “Neb mus mog ! Neb rov mus nrog neb niam neb txiv nyob. Kuv thov kom HUAB TAIS hlub neb xws li neb tau hlub cov uas tuag lawd thiab tau hlub kuv. 9 Thov kom HUAB TAIS pub rau neb ob leeg tib si kom neb nrhiav tau ib lub neej kaj lug nrog ib tug txiv nyob.” Ces Nos Es Mis puag nkaus nws ob tug nyab, nws nwj nkawd, tab sis nkawd quaj quaj. 10 Nkawd hais rau nws tias : “Wb nrog koj mus ua koj haiv neeg.” 11 Nos Es Mis teb tias : “Neb rov mus tsev mog, ob tug me ntxhais ! Neb yuav nrog kuv mus ua dab tsi ? Kuv twb tsis muaj ib tug tub yuav los qaws neb ua neej lawm. 12 Neb cia li rov mus mog ! Kuv laus laus lawm, kuv tsis xav rov yuav txiv. Tab txawm hais tias hmo no kuv yuav tau ib tug txiv thiab kuv yuav xeeb tub no, los neb puas yuav tos tau kom lawv hlob ? 13 Yog neb ua li ntawd mas ntshai yog neb tsis xav yuav txiv ntxiv xwb. Neb tsis txhob ua li ntawd mog ! Yog neb ua li ntawd mas kuv yuav tu siab. Kuv yuav xav tias HUAB TAIS pub hmoov tsis zoo rau kuv.” 14 Ob tug nyab rov qab quaj quaj dua, ces Os Pas nwj nws niam pog, nws ua ib siab rov mus nrog nws neej nws tsav nyob lawm. Tshuav Luv nrog Nos Es Mis nyob, nws tsis tso Nos Es Mis tseg li. 15 Nos Es Mis hais rau Luv tias : “Koj saib Os Pas twb rov mus hauv nws haiv neeg thiab nws cov dab lawm. Koj ua li nws thiab koj rov mus mog !” 16 Luv teb tias : “Koj tsis txhob ntiab kuv kom kuv tso koj tseg mas ! Koj mus qhov twg, kuv yuav nrog koj mus. Koj nyob qhov twg, kuv yuav nrog koj nyob. Koj haiv neeg yuav yog kuv haiv neeg. Koj tus Tswv Ntuj yuav yog kuv tus Tswv Ntuj. 17 Koj tuag qhov twg kuv xav tuag qhov ntawd. Koj ntxa nyob qhov twg, kuv ntxa yuav nyob ntawd thiab. Yog kuv tsis tuag nyob qhov chaw koj tuag mas kuv thov kom HUAB TAIS muab txoj hmoov phem rau kuv !” 18 Nos Es Mis pheej pom Luv nrog nws nraim, nws tsis hais dab tsi rau Luv ntxiv. 19 Ces nkawd ob leeg tsiv mus txog Npes Les Hes. Nkawd mus txog, lub moo ncha tas lub teb chaws. Cov poj niam hauv nruab zog tuaj hais zom zaws tias : “Koj puas yog Nos Es Mis tiag ?” 20 Nos Es Mis teb lawv tias : “Nej tsis txhob hu kuv ua Nos Es Mis ntxiv. Nej hu kuv ua ‘Niam Pog Iab’, vim Sas Dais muab kev lwj siab rau kuv xwb ! 21 Thaum kuv mus, kuv puv siab. HUAB TAIS coj kuv rov los qhuav nquas. Nej puas tseem yuav hu tau kuv ua Nos Es Mis ? Vim HUAB TAIS tsis nrog kuv. Sas Dais muab kev txom nyem rau kuv.” 22 Nos Es Mis coj nws tus nyab ntawm Muas rov los. Nkawd los txog Npes Les Hes, twb yog lub caij pib sau nplej lawm.

1 Nos Es Mis tshuav nws tus txiv ib tug kwv tij txheeb. Yog ib tug neeg nyob chaw siab hauj sim. Nws yog Es Lis Mes Les xeem. Nws hu ua Npuag Oos. 2 Luv hais rau Nos Es Mis tias : “Thov koj kheev kuv mus nkawg ntxaib nplej nyob hauv lawv tej teb. Kuv mus hais. Yog leej twg kheev ces kuv mus khaws tom nws qub qab.” Nos Es Mis teb tias : “Me ntxhais, koj mus kuj tau.” 3 Luv thiaj mus. Nws mus ncaj rau hauv Npuag Oos daim teb. 4 Npuag Oos nyuam qhuav los Npes Les Hes los txog ntua. Nws hais rau cov sau nplej tias HUAB TAIS nrog nej nyob ! 5 Npuag Oos nug tus tub txib saib cov neeg sau nplej tias : “Tus poj niam hluas hluas ntawd yog leej twg tus ?” 6 Tus tub txib saib cov neeg sau nplej teb tias : “Tus poj niam hluas hluas yog ib tug poj niam Muas, uas nws nrog Nos Es Mis los ntawm cov tiaj Muas los. 7 Nws tuaj hais rau kuv tias ‘Kuv tuaj khaws cov hnab nplej poob nram neb qub qab puas tau ?’ Ces tag kis no sawv ntxov ntxov nws yeej tuaj nyob ib hnub ntawm no.” 8 Npuag Oos hais rau Luv tias : “Me ntxhais, koj tsis txhob mus khaws nplej nyob hauv lwm daim teb mog ! Koj tsis txhob khiav, koj raws nraim kuv cov tub txib qab. 9 Koj ntsia ntsoov lawv hlais nplej nyob qhov twg ces koj raws nraim lawv qab. Kuv txwv tsis kheev lawv ua phem rau koj. Yog koj nqhis dej mas koj mus hliv hauv cov plhuaj taub lawv ce tau lawm los haus.” 10 Ces Luv khoov ti av pe Npuag Oos tias : “Vim li cas koj thiaj ua zoo rau kuv ? Kuv yog ib tug pej kum neeg xwb !” 11 Npuag Oos teb tias : “Vim kuv tau hnov luag tej hais txog koj rau kuv. Lawv piav tej koj tau ua rau koj niam pog thaum koj tus txiv tuag lawm. Koj tso koj niam koj txiv vaj tsev tseg thiab koj tuaj nyob ib lub teb chaws uas koj tsis tau paub dua li. 12 Thov kom HUAB TAIS pub rau koj raws li koj tau ua ! Thov kom His Xas Lais tus Tswv Ntuj uas koj los nkaum hauv nws qab tis pub paj tshab ntau ntau rau koj.” 13 Luv hais tias : “Txiv hlob, thov koj ua zoo rau kuv mus li mog ! Koj hais lus zoo rau koj tus ntxhais txib mas kuv tso siab vim kuv twb tsis txij koj ib tug ntxhais txib.” 14 Thaum txog caij noj su, Npuag Oos hais rau Luv tias : “Koj cia li los ntawm no, los noj cov mov thiab cov zaub no ntxuag. Ces Luv los zaum nrog cov neeg sau nplej noj mov, thiab Npuag Oos tseem kib ib taig noob rau nws noj. Thaum Luv noj tas tseem seem ib co. 15 Ces Luv sawv mus khaws nplej. Npuag Oos hais rau nws cov tub txib tias : “Nej cia nws khaws tej uas hlauv ntawm tes nplej los huv si, nej tsis txhob cem nws. 16 Thiab nej tseem yuav txhob txwm rho ob peb hnab nplej ntawm nej cov tes nplej tso poob rau hauv av kom nws tau khaws. Nej yuav tsis txhob nthe lawv nws qab.” 17 Luv khaws nplej txog tsaus ntuj. Thaum Luv ntaus nws cov nplej, kwv yees nws ntaus tau ib tawb. 18 Ces Luv nqa cov nplej ntawd nws rov mus hauv lub nroog. Nws muab cov nplej nws khaws tau rau nws niam saib thiab muab qhov nws noj tsis tas thaum tav su rau nws niam. 19 Nws niam hais tias : “Hnub no koj mus khaws nplej qhov twg ? Thov kom Ntuj foom hmoov zoo rau tus uas nws ua zoo rau koj !” Luv qhia nws niam tias nws ua hauj lwm nyob hauv leej twg daim teb, nws hais tias : “Hnub no kuv ua hauj lwm nyob hauv ib tug txiv neej hu ua Npuag Oos daim teb.” 20 Ces Nos Es Mis hais rau nws tus nyab tias : Thov kom HUAB TAIS foom lus zoo rau nws. HUAB TAIS hlub cov tseem nyob thiab cov tuag lawm ! Tus ntawd yog peb ib tug kwv tij. Yog ib tug muaj cai cawm peb.” 21 Luv hais rau nws niam tias : “Nws tseem hais rau kuv tias : Koj tuaj nrog kuv cov tub txib ua hauj lwm mus txog thaum lawv sau kuv cov nplej tas tso.” 22 Nos Es Mis hais rau nws tus nyab tias : “Me ntxhais, zoo kawg ! Koj mus nrog nws cov tub txib mog, koj thiaj li tsis tau mus nrhiav dua lwm daim teb uas ntshai lawv yuav tsis txais koj zoo.” 23 Ces Luv niaj hnub mus nrog Npuag Oos cov tub txib muab nplej mus txog lub caij lawv muab nplej tas. Thiab nws nrog Nos Es Mis nyob.

1 Nos Es Mis hais rau Luv tias : “Me ntxhais, kuv yuav tsum nrhiav tus yuav los tsa koj lub neej kom koj tau zoo. 2 Npuag Oos yog peb ib tug kwv tij. Koj tau nrog nws cov tub txib khaws nplej tau ntev los. Hmo no, tej zaus nws yuav nyob yaj nplej tom tshav ntaus nplej. 3 Koj ntxuav cev thiab koj pleev tshuaj tsw qab. Koj hloov khaub ncaws, koj mus lawm nram nws daim teb. Tab sis koj txhob xub ua nws paub tias koj tuaj. Koj cia nws noj hmo tas tso. 4 Thaum nws mus pw, koj cim ntsoov nws qhov chaw pw. Ces koj mus pw nyob ntawd. Koj yuav pom muaj ib qho chaw nyob nram nws ko taw txaj. Koj mus pw nyob ntawd. Ces nws yuav nug koj tias koj xav ua dab tsi. 5 Koj yuav teb tias : Kuv yuav ua tas huv si raws li koj qhia ! 6 Ces Luv mus nram tshav ntaus nplej, nws ua tau tib si raws li nws niam qhia. 7 Npuag Oos noj mov haus dej tas, nws luag nyav mus pw nyob ntawm pawg nplej. Ces Luv maj mam txav mus. Nws pom muaj ib qho chaw nyob ntawm Npuag Oos ko taw, nws mus pw nyob ntawd. 8 Thaum ib tag hmo, Npuag Oos hnov no, nws tsim dheev los. Nws ntsia ncig lees, nws pom ib tug poj niam pw ntawm nws ko taw. 9 Nws nug tias : “Koj yog leej twg ?” Luv teb tias : “Kuv yog Luv, koj tus ntxhais txib. Thov koj muab koj lub tsho rau kuv vov, vim koj muaj cai cawm kuv.” 10 Npuag Oos teb tias : “HUAB TAIS foom hmoov rau koj, me ntxhais ! Koj txoj hauj lwm hwm niam hwm txiv no loj kawg, loj tshaj thawj zaug. Koj tsis nrhiav ib tug neeg hluas, ib lub neej muaj los pluag. 11 Koj tsis txhob txhawj mog ! Koj thov dab tsi mas kuv yuav muab dab tsi rau koj. Tas cov neeg nyob hauv Npes Les Hes no paub tias koj yog ib tug poj niam tsim txiaj. 12 Kuv muaj cai tiag. Tab sis tseem tshuav ib tug kwv tij txheeb dua kuv. 13 Koj pw qhov no mog. Cia tag kis tso. Yog nws xav cawm koj, mas zoo kawg. Yog nws tsis xav mas kuv yuav cawm koj. Koj pw ib hmos ntawm no txog kaj ntug tso.” 14 Ces Luv pw ntawm Npuag Oos taw ib hmos. Tag kis kaj ntug, Npuag Oos sawv ntxov ntxov thaum tseem zeem tsis tau neeg. Vim nws xav tias yuav tsis txhob pub leej twg paub tias tus poj niam ntawd tuaj pw hauv nws lub tshav ntaus nplej. 15 Npuag Oos hais rau Luv tias : “Koj cug koj lub tsho uas koj hnav thiab koj tuav zoo zoo.” Luv cug Luv lub tsho, ces Npuag Oos hliv rau tais nplej rau hauv. Nws tsaws rau Luv ris. Ces Luv rov los hauv nroog lawm. 16 Thaum Luv los txog tsev, nws niam hais rau nws tias : “Me ntxhais ! Koj nyob li cas lawm ?” Luv piav qhia nws niam txog tej Npuag Oos hais rau nws huv si. 17 Thiab Luv tseem hais ntxiv tias : “Cov nplej no nws muab rau kuv, nws hais tias : koj tsis txhob mus tsev tes qhuav nquas.” 18 Nos Es Mis hais rau Luv tias : “Me ntxhais, koj nyob twj ywm tos saib yuav muaj li cas mog ! Tus neeg ntawd yeej yuav tsis tso tseg, yog nws hais tsis tiav hnub no.”

1 Npuag Oos mus pem nroog, nws mus zaum ntawm qhov rooj. Tus kwv tij uas Npuag Oos hais txawm hla ze ntawd. Npuag Oos hu nws tias : “Koj los ntawm no, koj los zaum.” Ces nws los zaum ntawd. 2 Npuag Oos xaiv kaum leej txwj laus nyob hauv nroog, nws hais rau lawv tias : “Nej zaum ntawm no.” Ces lawv zaum. 3 Npuag Oos hais rau tus kwv tij muaj cai cawm tias : “Daim teb uas yog peb tus kwv tij Es Lis Mes Les daim, mas nyem no Nos Es Mis rov ntawm cov tiaj Muas los txog, nws xav muab muag no. 4 Kuv xav tias yuav tsum hais rau koj tus txheeb ze heev paub. Yog koj yuav, mas cov uas zaum ntawm no thiab cov txwj laus yuav ua tim khawv. Yog koj xav cawm nws mas koj cawm. Yog koj tsis yuav mas koj hais rau kuv paub. Vim tias koj yog thawj tug muaj cai cawm. Kuv tsuas lawv koj qab xwb.” Ces tus neeg ntawd teb tias : “Yuav cawm los kuj cawm thiab.” 5 Npuag Oos hais ntxiv tias : “Yog hnub twg koj txais daim teb ntawd ntawm Nos Es Mis lawm, mas koj kuj yuav tsum txais Luv uas yog tus ntxhais Muas. Nws yog peb tus kwv tij tuag lawm tus poj niam, kom xwv peb tus kwv tij lub npe tsis txhob ploj nyob hauv nws tsev neeg.” 6 Tus muaj cai cawm teb tias : “Yog li mas kuv yuav cawm tsis tau, rau qhov kuv ntshai tsam tsis zoo rau kuv lub cuab tam. Ces cia koj cawm vim kuv cawm tsis tau.” 7 Thaum ub, His Xas Lais txoj cai qhia tias thaum yuav sib hloov li ntawd mas ob tug neeg ntawd, ib tug hle nws txhais khau ntxig rau lwm tus. Nkawd ua li ntawd nyob ntawm cov tim khawv xub ntiag. 8 Tus muaj cai cawm thiaj hle nws txhais khau rau Npuag Oos, thiab hais tias : “Koj cawm nws rau koj yuav.” 9 Npuag Oos hais rau cov txwj laus thiab tsoom sid tias : “Hnub no, nej ua tim khawv tias kuv txais Es Lis Mes Les lub cuab tam thiab Kis Lis Yoos thiab Mas Loos nkawd lub cuab tam ntawm Nos Es Mis txhais tes. 10 Thiab nej ua tim khawv tias kuv txais Luv uas yog Mas Loos tus poj niam los ua kuv poj niam kom xwv tus uas tau tas sim neej lub npe tsis txhob ploj nyob hauv nws cov kwv tij thiab nyob hauv nws lub teb chaws. Hnub no, nej sawv daws nrog kuv ua tim khawv li ntawd.” 11 Tas tsoom sid nyob ntawm qhov rooj teb tias : “Peb ua tim khawv.” Cov txwj laus teb tias : “Thov kom HUAB TAIS pub rau tus poj niam yuav los hauv koj tsev, kom nws zoo li Las Ses thiab Les As nkawd. Yog nkawd tsa His Xas Lais lub tsev. 12 Koj muaj hwj chim nyob hauv Es Pos Tas. Koj lub npe yuav nto moo nyob hauv Npes Les Hes. Thov kom cov xeeb ntxwv uas HUAB TAIS yuav pub rau koj ua koj tsev neeg xws li Pes Les tsev neeg, Pes Les uas Tas Mas yug rau Yus Das.” 13 Ces Npuag Oos yuav Luv los ua nws poj niam. Thaum nkawd tau los nyob ua ke lawm, HUAB TAIS pub kom Luv xeeb tub, ces Luv yug tau ib tug tub. 14 Cov poj niam tuaj hais rau Nos Es Mis tias : “HUAB TAIS lub siab zoo ! Nws pub kom hnub no ib tug txheeb ze ua kom koj tus tub uas tas sim neej lawm lub npe tsis txhob ploj nyob hauv haiv His Xas Lais. 15 Nws yuav nplij koj thiab yuav yug koj thaum koj laus. Nws niam yog koj tus nyab uas hlub koj tshaj xya leej tub.” 16 Ces Nos Es Mis puag nkaus tus me nyuam rau hauv nws xub ntiag. Thiab yog nws tu tus me nyuam kom hlob. 17 Cov poj niam tis npe rau tus me nyuam. Lawv hais tias : “Ib tug tub yug los rau Nos Es Mis lawm.” Ces lawv tis npe rau tus me nyuam hu ua Os Npes. Os Npes yog Yes Xes txiv, ces Yes Xes yog Das Vis txiv.

1 Thaud, muaj ib tug txiv neej nyob Las Mas. Nws tuaj ntawm lub roob Es Fais tuaj. Nws hu ua Es Kas Nas. 2 Nws yuav ob tug poj niam. Ib tug hu ua As Nas, ib tug hu ua Pes Nis Nas. Pes Nis Nas muaj me nyuam, tab sis As Nas tsis muaj. 3 Niaj xyoo tus txiv neej ntawd mus teev Ntuj thiab txi Ntuj pem Xis Laus. Nyob ped, yog Es Lis ob tug tub hu ua Hos Nis thiab Pis Nas nkawd ua Leej Choj. 4 Muaj ib hnub Es Kas Nas mus txi Ntuj. Thaum nws txi Ntuj nws faib kam tej thooj nqaij rau Pes Nis Nas, rau Pes Nis Nas cov tub thiab cov ntxhais. 5 Nws tsuas tseg ib thooj rau As Nas xwb. Nws nyiam As Nas dua, tab sis HUAB TAIS ho tsis pub As Nas xeeb tub. 6 Pes Nis Nas ua tej yam kom tu As Nas siab, ua kom As Nas npau taws, vim As Nas tsis muaj me nyuam. 7 Niaj xyoo thaum lawv mus pem lub tsev txi Ntuj mas Pes Nis Nas ua zoo li ntawd kom tu As Nas siab. Ces As Nas quaj quaj, nws tsis noj mov. 8 Ces nws tus txiv Es Kas Nas hais rau nws tias : “As Nas, vim li cas koj quaj quaj koj tsis noj mov ? Vim li cas koj tu siab ? Koj tau kuv, tsis zoo dua koj tau kaum leej tub lod ?”
9 Thaum lawv noj mov hauv kem tsev pw tas, As Nas sawv, nws mus nyob ntawm HUAB TAIS xub ntiag. Tus Leej Choj Es Lis zaum nyob hauv nws lub rooj zaum uas ib ntawm lub qhov rooj tsev txi Ntuj. 10 As Nas tu siab tas nrho, nws thov HUAB TAIS thiab nws quaj heev kawg. 11 As Nas thiaj fiv ib lub yeem zoo li no : “HUAB TAIS Xas Npas Os ! Yog koj xav ntsia koj tus ntxhais txib txoj kev txom nyem, yog koj nco txog nws, yog koj muab ib tug tub rau kuv, mas kuv yuav muab nws rau HUAB TAIS tas nws sid. Rab chais yuav tsis chwv nws taub hau.” 12 As Nas teev Ntuj ntev loo. Es Lis ntsia ntsoov As Nas qhov ncauj. 13 As Nas hais lus ntxhi xwb. Pom nws di ncauj ua zog, tab sis tsis hnov nws lub suab. Ces Es Lis xav tias As Nas vwm cawv. 14 Es Lis mus hais rau As Nas tias : “Koj yuav vwm cawv txog thaum twg ? Koj ua kom koj zoo cawv sai mas !” 15 Tab sis As Nas teb tias : “Txiv tswv, kuv kawg yog ib tug poj niam ua neej lwj siab ntsuav xwb. Kuv tsis tau haus cawv txiv ntoo los cawv txhuv li. Kuv hais kuv txoj kev lwj siab rau HUAB TAIS xwb. 16 Thov koj tsis txhob xav tias koj tus ntxhais txib yog neeg tsis tsim txiaj dab tsi. Yog vim tu kuv siab dhau thiab mob kuv siab dhau mas kuv thiaj hais lus txog tav no.” 17 Ces Es Lis teb tias : “Koj mus, koj ua siab kaj lug. His Xas Lais tus Tswv Ntuj yuav pub rau koj raws li koj thov.” 18 Tus poj niam hais tias : “Thov kom koj tus ntxhais txib tau ua neeg xis koj siab.” Ces As Nas mus lawm. Nws mus hauv kem tsev pw, nws noj mov tas nws lub ntsej muag tsis zoo li lub qub lawm.
19 Lawv sawv ntxov ntxov, lawv pe Tswv Ntuj tas ces lawv rov qab mus tsev nyob Las Mas lawm. Es Kas Nas nrog nws poj niam As Nas koom cev. HUAB TAIS nco txog As Nas. 20 Ces As Nas xeeb tub, nws yug tau ib tug tub, nws muab tis npe hu ua Xas Muas. As Nas hais tias : “Kuv hu li ntawd, vim kuv thov ntawm HUAB TAIS los.” 21 Thaum tau ib xyoos lawm, Es Kas Nas thiab nws tsev neeg nce mus txi HUAB TAIS thiab mus pauj yeem. 22 Tab sis As Nas tsis mus, nws hais rau nws tus txiv tias : “Kuv tos txog lub caij kuv tus me nyuam tseg taus mis tso. Kuv yuav coj nws mus cev rau HUAB TAIS ces nws yuav nyob ntawd mus li.” 23 Es Kas Nas teb tias : “Koj ua raws li koj siab, koj nyob kom txog thaum nws cais taus mis tso. Thov kom HUAB TAIS ua raws li koj lo lus !” Ces tus poj niam nyob tu tus me nyuam mus txog lub caij cais nws mis. 24 Thaum tus me nyuam txawj noj mov lawm, As Nas coj nws mus hauv HUAB TAIS lub tsev txi Ntuj uas nyob Xis Laus. As Nas cab ib tug heev nyuj muaj peb xyoos, ib tawb hmoov nplej thiab ib hwj cawv nrog. 25 Lawv muab tus heev nyuj tua txi Ntuj tas ces As Nas mus hauv Es Lis tsev. 26 Nws hais tias : “Txiv tswv, kuv yog tus poj niam uas tau txhos caug nyob ze koj ntawm no thov HUAB TAIS. 27 Thaum ntawd kuv thov kom Ntuj pub tus me nyuam no rau kuv. HUAB TAUS tau mloog kuv lo lus thov. 28 Mas nyem no kuv tso tus me nyuam no rau HUAB TAIS kom nws nrog HUAB TAIS mus txog hnub tuag. Kuv muab nws rau HUAB TAIS.” Ces tus poj niam cia tus me nyuam nyob ntawd, nws muab pub rau Tswv Ntuj.

1 Tus me nyuam Xas Muas tsob hwb HUAB TAIS nyob ntawm Es Lis xub ntiag. Lub zim txwv ntawd, HUAB TAIS hais lus tsawg zaus kawg. Nws tsis tawm tuaj rau neeg pom xyeem ntau zaus. 2 Tab sis muaj ib hnub, Es Lis pw hauv nws lub paim. Thaum ntawd, nws qhov muag tsis tshua pom kev lawm. 3 Tswv Ntuj lub teeb tseem tsis tau tuag. Xas Muas pw hauv HUAB TAIS Kem Ntshiab uas Tswv Ntuj lub Xab Cog Lus nyob. 4 HUAB TAIS hu Xas Muas tias : “Xas Muas ! Xas Muas !” Tus me nyuam teb tias : “Kuv nyob ntawm no !” 5 Ces nws khiav mus hais rau Es Lis tias : “Koj hu kuv, kuv thiaj los.” Es Lis hais tias : “Tub, kuv tsis tau hu koj. Koj rov mus pw.” Xas Muas rov mus pw. 6 HUAB TAIS rov hu nws dua tias : “Xas Muas ! Xas Muas !” Ces Xas Muas mus txog ntawm Es Lis, nws hais rau Es Lis tias : “Koj hu kuv, kuv thiaj los ntawm no.” Es Lis hais tias : “Tub, kuv tsis tau hu koj. Koj rov mus pw.” 7 Xas Muas tseem tsis tau paub HUAB TAIS. Vim tsis tau muaj leej twg qhia HUAB TAIS lo lus rau nws. 8 HUAB TAIS rov hu Xas Muas zaum peb. Xas Muas sawv mus txog ntawm Es Lis, nws hais tias : “Koj hu kuv, kuv thiaj los ntawm no.” 9 Ces Es Lis thiaj mam to taub tias yog HUAB TAIS hu tus me nyuam ntawd. Es Lis hais rau Xas Muas tias : “Koj mus pw. Yog muaj tus hu koj mas koj yuav hais tias : HUAB TAIS, koj hais lus mas. Koj tus tub txib mloog koj !” Ces Xas Muas rov mus pw qhov chaw qub. 10 HUAB TAIS tuaj nyob ntawd. HUAB TAIS hu nws xws li thawj peb zaug ua ntej tias : “Xas Muas ! Xas Muas !” Xas Muas teb tias : “Koj hais lus mas ! Koj tus tub txib mloog koj !” 11 HUAB TAIS hais rau Xas Muas tias : “Kuv yuav ua tej yam txawv kawg nyob hauv His Xas Lais. Tus twg tau hnov mas tus twg pob ntseg yuav quaj. 12 Hnub ntawd, tas txhua yam xwm kuv tau tsawm txog Es Lis thiab nws tsev neeg, mas kuv yuav ua kom tshwm sid tuaj tas huv si txij lub hauv paus los txog qhov kawg. 13 Koj yuav ceeb toom rau Es Lis tias kuv txiav txim rau Es Lis tsev neeg mus li. Vim nws yeej paub tias nws cov tub thuam Tswv Ntuj tsis kav nws tsis qhuab qhia lawv. 14 Li ntawd, mas kuv hais lus khov lus ruaj tias tsis muaj ib thaj txi Ntuj, tsis muaj ib yam paj tshab yuav ntxuav tau Es Lis tsev neeg cov txhaum li.” 15 Xas Muas pw tsaug zog txog kaj ntug. Ces nws qhib HUAB TAIS lub tsev cov qhov rooj. Xas Muas txhawj, nws ntshai piav qhov nws tau pom xyeem rau Es Lis. 16 Tab sis Es Lis hu nws los, Es Lis hais rau nws tias : “Tub Xas Muas !” Xas Muas teb tias : “Kuv nyob ntawm no !” 17 Es Lis nug nws tias : “Lo lus HUAB TAIS hais rau koj yog dab tsi ? Koj txhob zais dab tsi mog ! Cov lus HUAB TAIS hais rau koj, yog koj zais ib lo mas kom HUAB TAIS coj yim cuaj yam xwv txheej tuaj rau koj !” 18 Ces Xas Muas piav tas puas tsav yam, nws tsis zais dab tsi li. Es Lis hais tias : “HUAB TAIS yog HUAB TAIS ! Kom nws ua raws li nws pom zoo.” 19 Xas Muas hlob. HUAB TAIS nrog nws nyob. HUAB TAIS tau hais dab tsi rau Xas Muas lawm mas HUAB TAIS tsis ua yam ntawd poob li ! 20 Txij Daas mus txog Npes Xas Npes mas, tas tsoom His Xas Lais paub tias Xas Muas yog tus yuav nce ua HUAB TAIS tus Yaj Saub.

1 Es Lis laus heev lawm. Nws cov tub coj tus yam ntxwv phem rau HUAB TAIS li qhov qub. Thaum ntawd, cov Fis Lis Tis sib sau los ua rog ntaus cov His Xas Lais. Cov His Xas Lais thiaj sawv kev mus ua rog. Lawv tuaj tsa lawv tej tsev tsam phooj nyob ze Es Npees Has Ntxes. Cov Fis Lis Tis tsa lawv tej tsev tsam phooj nyob As Fes. 2 Cov Fis Lis Tis nthuav ua ib leej tuaj vij cov His Xas Lais. Lawv nias tsam qees, ces cov His Xas Lais swb cov Fis Lis Tis. His Xas Lais tog kwv yees muaj plaub txhiab leej tuag nyob nruab liaj nruab teb. 3 Tsoom tub rog His Xas Lais rov los hauv lub yeej. Tas tsoom kev txwj kev laus hais tias : “Ua cas hnub no HUAB TAIS cia peb swb cov Fis Lis Tis ? Peb yuav mus tom Xis Laus mus kwv Tswv Ntuj lub Xab Cog Lus tuaj nyob hauv nruab nrab peb kom nws cawm peb ntawm tsoom yeeb ncuab.” 4 Cov tug rog xa neeg mus tom Xis Laus, lawv mus muab HUAB TAIS lub Xab uas nws lub theej kiab yog cov Tshiab Kes Lus Npis kwv tuaj. Es Lis ob tug tub hu ua Hos Nis thiab Pis Nas, nkawd nrog lub Xab Cog Lus mus. 5 Thaum lub Xab Cog Lus tuaj txog lub yeej, tas tsoom His Xas Lais qw suab nrov nroo ntws, tas ib cheeb tsam ze ntawd nrov ntsuag qees, qeeg tas. 6 Cov Fis Lis Tis hnov cov suab nrov nroo ntws lawv hais tias : “Vim li cas yuav hnov suab nrov npaum no hauv cov His Xas Lais tuaj.” Ces lawv hnov moo tias HUAB TAIS lub Xab Cog Lus tuaj txog hauv cov His Xas Lais lub yeej lawm. 7 Cov Fis Lis Tis thiaj ntshai. Lawv hais tias : “Tswv Ntuj tuaj nyob hauv lawv lub yeej. Peb yuav raug xwv txheej xwb. Tsis zoo li thaud lawm ! 8 Peb yuav raug xwv txheej ! Leej twg yuav pab peb dim ntawm tus Tswv Ntuj muaj hwj huam ntawd txhais tes ? Nws yog tus xa tas puas tsav yam xwv txheej tuaj rau Hais Nkws Tos teb. 9 Tsoom Fis Lis Tis, nej sawv daws ua siab loj mas ! Nej ua tseem txiv neej mas ! Kom nej txhob poob ua cov His Xas Lais qhev xws li thaud lawv ua nej qhev. Nej ua siab tawv qhawv ntaus tsam. 10 Ces cov Fis Lis Tis pib tuaj nias tsam. Cov His Xas Lais swb, lawv tso tes khiav rov mus tom lawv tej tsev tsam phooj. Lawv raug kev poob tsag loj kawg. Tog His Xas Lais tuag peb caug txhiab leej. 11 Cov Fis Lis Tis txeeb tau Tswv Ntuj lub Xab Cog Lus. Es Lis ob tug tub Hos Nis thiab Pis Nas nkawd kuj tuag.
12 Tib hnub ntawd, ib tug neeg xeem Npes Yas Mis khiav mus txog Xis Laus. Nws muab nws tej ris tsho dua, nws nphoo plua av rau saum nws taub hau. 13 Thaum nws tuaj txog, Es Lis zaum saum nws lub kim txwv ib ntawm qhov rooj. Nws ntsia ntsoov txoj xub ke, vim nws txhawj kawg txog Tswv Ntuj lub Xab Cog Lus. Tus neeg khiav los ntawd nws xub mus xa lub moo rau hauv lub tsheej tso, ces tas sawv daws qw ntsuag qees hauv lub tsheej. 14 Es Lis hnov suab qw ntsuag qees, nws nug tias : “Ua cas sawv daws qw ntsuag qees li no ?” Tus neeg khiav los ntawd thiaj maj nrawm nroos tuaj xa lub moo rau Es Lis. 15 Es Lis muaj cuaj caum yim xyoo lawm, nws tsis pom kev li. 16 Tus neeg khiav los hais rau Es Lis tias : “Hnub no kuv khiav ntawm lub yeej los.” Es Lis hais tias : “Tub, muaj xwm dab tsi tshwm sim tuaj ?” 17 Tus xa xov teb tias : “His Xas Lais swb cov Fis Lis Tis, lawv khiav tas lawm ! Peb tsoom tub rog raug kev poob tsag loj. Koj ob tug tub tuag lawm. Cov Fis Lis Tis txeeb tau Tswv Ntuj lub Xab Cog Lus lawm.” 18 Thaum tus xa xov hais txog Tswv Ntuj lub Xab, mas Es Lis cia li vau hlo saum nws lub kim txwv ntxeev mus rau ntawm lub qhov rooj, nws lub xwb qwb lov, ces nws tuag, vim nws laus thiab nws yog neeg muaj ceeb thawj. Es Lis tau saib xyuas tsoom His Xas Lais plaub caug xyoo.

4 Tas tsoom txwj laus His Xas Lais sib sau tuaj cuag Xas Muas nyob Las Mas. 5 Lawv hais rau Xas Muas tias : “Koj laus lawm, koj cov tub tsis raws koj tus lwj lwm. Thov koj tsa ib tug vaj rau peb kom nws coj peb xws li luag tej haiv neeg.” 6 Xas Muas tsis zoo siab rau qhov lawv hais tias : ‘Koj muab ib tug vaj rau peb kom nws coj peb.’ Ces Xas Muas hu txog HUAB TAIS. 7 HUAB TAIS hais tias : “Koj ua tas puas tsav yam raws li tsoom pej xeem thov. Tsis yog lawv yuav tso koj tseg. Yog lawv yuav tso kuv tseg. Lawv tsis xav kom kuv ua vaj kav lawv ntxiv.” 10 Xas Muas hais tas HUAB TAIS cov lus rau tsoom pej xeem uas lawv thov ib tug vaj ntawm nws. 11 Nws hais tias : “Ntawm tus vaj yuav kav nej mas nws yuav muaj cai ua zoo li no. Tus vaj yuav sau nej tej tub mus saib nws cov tsheb rog thiab tu nws cov nees. Lawv khiav mus ua tus vaj ntej. 12 Nws yuav vam txog nej cov tub los pab nws tswj tej pab txhiab leej neeg, tswj tej pab tsib caug leej neeg. Tus vaj yuav kom nej cov tub laij nws cov teb, hlais nws cov nplej, ntaus ntaj ntaus hmuv ua rog. 13 Tus vaj yuav coj nej cov ntxhais mus ua cov poj niam pleev tshuaj tsw qab rau nws, ua zaub ua mov rau nws noj. 14 Tus vaj yuav muab nej tej teb tej vaj txiv cawv zoo tshaj los pub rau nws cov tub rog. 15 Nws yuav kom nej them cov se ib feem kaum ntawm nej tej qoob loo thiab ntawm cov txiv cawv, nws yuav muab pub rau nws cov neeg sam thiab nws cov thawj tub rog. 16 Nej tej ntxhais txib tub txuas nquag dua cov, nej tej nyuj tej nees, tus vaj yuav coj mus ua hauj lwm rau nws. 17 Nej yuav tsum them cov se ib feem kaum ntawm nej tej tsiaj, thiab nej haj tseem yuav ua nws cov qhev thiab. 18 Ces hnub ntawd nej yuav qw suab vim tus vaj uas nej tau xaiv. Tab sis hnub ntawd HUAB TAIS yuav tsis teb rau nej !” 19 Tsoom sid tsis mloog Xas Muas cov lus ntuas lawv. Lawv hais tias : 20 “Peb yuav tsum muaj ib tug vaj xwb, kom xwv peb thooj li luag tej haiv neeg. Peb tus vaj yuav txiav txim rau peb. Nws yuav mus ua peb ntej coj peb mus ntaus rog.” 21 Xas Muas hnov cov lus ntawd tas tib si, nws hais qhia rau HUAB TAIS. 22 Tab sis HUAB TAIS hais tias : “Koj ua raws li lawv hais. Koj tsa ib tug vaj kav lawv.” Ces Xas Muas hais rau cov His Xas Lais tias : “Nej sawv daws nyias rov mus nyias lub nroog.”

1 Nyob hauv lub xeem Npes Yas Mis, muaj ib tug txiv neej hu ua Kis, nws yog ib tug neeg siab loj. 2 Nws muaj ib tug tub hu ua Xas Ws tab tom tiav hluas, thiab zoo nraug. Tsis muaj ib tug tub His Xas Lais zoo nraug npaum nws. Nws siab dua sawv daws tib si. Nws lub xub pwg siab tshaj sawv daws huv tib si.
3 Muaj ib zaug Xas Ws txiv cov maum luj ploj lawm. Ces leej txiv hais rau nws tus tub Xas Ws tias : “Koj coj ib tug tub txib nrog koj, neb mus nrhiav cov maum luj.” 4 Nkawd mus hla lub roob Es Fais thiab lub teb chaws Sas Lis Sas, nkawd tsis pom dab tsi. Nkawd hla teb chaws Sas As Lis los tsis pom, teb chaws Npes Yas Mis los tsis pom. 5 Thaum nkawd tuaj txog lub teb chaws Xws, Xas Ws hais rau tus tub txib tias : “Wb rov qab ! Nyob tsam kuv txiv tsis ntxhov siab rau cov maum luj lawm, hos nws ntxhov siab rau wb.” 6 Tab sis tus tub txib hais tias : “Tswv Ntuj muaj ib tug neeg nyob hauv lub nroog tid. Yog ib tug neeg nto koob meej zoo : nws hais dab tsi mas yuav muaj tuaj xwb. Wb mus xyuas nws saib nws hais dab tsi rau wb tuaj li no.” 14 Ces nkawd nce mus pem lub nroog ntawd. Lawv tab tom yuav chaws mus hauv lub rooj loog, Xas Muas tawm tuaj ntsib lawv, nws yuav mus saum lub ncov roob. 15 Hnub ua ntej uas Xas Ws tseem tsis tau tuaj txog, mas HUAB TAIS twb qhia Xas Muas tias : “Tag kis, tav li lub caij no, kuv yuav xa ib tug neeg nyob Npes Yas Mis tuaj. 16 Koj yuav pleev nws ua tus tswj kuv haiv His Xas Lais. Nws yuav cawm lawv ntawm cov Fis Lis Tis txhais tes. Kuv pom kuv haiv neeg lawv txoj kev txom nyem thiab lawv lub suab qw nrov tuaj txog kuv lawm.” 17 Thaum Xas Muas pom Xas Ws, HUAB TAIS qhia Xas Muas tias : “Tus ntawd, yog tus kuv hais rau koj tias nws yuav ua tus tswj kuv haiv neeg.” 18 Txog ntawm qhov rooj, Xas Ws txawm hais rau Xas Muas tias : “Kuv thov koj qhia tus neeg txawj ua hwj huam lub tsev rau kuv.” 19 Xas Muas teb Xas Ws tias : “Kuv yog tus ua hwj huam ntawd ntag. Koj nce ua ntej mus saum lub ncov roob. Hnub no, neb yuav nrog kuv noj mov. Tag kis sawv ntxov kuv mam tso koj mus thiab qhia koj tias koj lub siab ntxhov txog dab tsi. 20 Ntawm cov maum luj uas twb poob zoo tau peb hnub lawm, mas koj txhob txhawj txog. Lawv nrhiav tau lawm.

1 Tag kis kaj ntug, Xas Muas muab lub tais roj los hliv rau saum Xas Ws taub hau thiab nws puag Xas Ws, nws hais tias : “Yog HUAB TAIS pleev koj ua tus tswj nws lub cuab tam. Koj yuav ua tus txiav txim rau HUAB TAIS haiv neeg. Koj yuav cawm lawv ntawm cov yeeb ncuab uas nyob ncig lawv.”
17 Xas Muas hu tsoom pej xeem tuaj cuag HUAB TAIS nyob Mis Pas. 18 Xas Muas hais rau tsoom His Xas Lais tias : “His Xas Lais tus HUAB TAIS Tswv Ntuj hais li no : Kuv, HUAB TAIS, kuv yog tus coj His Xas Lais nram Hais Nkws Tos teb los pem no. Kuv tau cawm nej ntawm cov Hais Nkws Tos thiab ntawm cov haiv neeg hiam nej. 19 Tab sis hnub no nej xyeeb nej tus Tswv Ntuj uas yog tus cawm nej ntawm kev txhawj xeeb. Nej hais rau nws tias : ‘Peb tsis yuav koj ! Koj tsa ib tug vaj kav peb mas !’ Li ntawd, nyem no, nej sawv daws tuaj nyob ntawm HUAB TAIS xub ntiag mas !” 20 Xas Muas kom cov xeem His Xas Lais tib si txav los ze ntawm HUAB TAIS xub ntiag. Nws ntaus txheeb, ces raug lub xeem Npes Yas Mis. 21 Nws hu cov tuam yim neeg Npes Yas Mis tib si txav los. Nws rov ntaus txheeb, ces raug lub tuam yim neeg Mas This. Nws tseem hu lub tuam yim neeg Mas This ib leeg txav los zuj zus. Nws ntaus txheeb ces raug Xas Ws, yog Kis tus tub. Lawv nrhiav tsis tau Xas Ws. 22 Lawv nug HUAB TAIS tias : “Tus neeg ntawd puas tuaj nyob ntawm no ?” HUAB TAIS teb tias : “Nws tsiv nraim nyob hauv cov toob xib tod.” 23 Lawv khiav mus nthos Xas Ws. Lawv coj nws los nyob hauv nruab nrab tsoom sid. Nws siab tshaj tas tsoom sid, tas tsoom sid txij nws xub pwg xwb. 24 Xas Muas hais rau tsoom pej xeem tias : “Nej puas tau pom tus uas HUAB TAIS xaiv los ? Nyob tas hauv tsoom pej xeem tsis muaj tus zoo npaum nws.” Tas tsoom sid tsa suab qw tias : “Kom peb tus vaj nyob mus txog txhiab niag tim puas xyoo !”

16 Xas Muas hais rau Xas Ws tias : “Koj nyob twj ywm ! Cia kuv qhia koj txog qhov HUAB TAIS hais rau kuv nag hmo.” Xas Ws hais tias : “Koj hais.” 17 Ces Xas Muas hais tias : “Koj yog ib tug neeg me kawg, tab sis koj tsis yog tus tswj cov xeem His Xas Lais lod ? HUAB TAIS tsis tau pleev koj ua vaj kav His Xas Lais lod ? 18 Nws xa koj mus ntaus rog, nws hais rau koj tias koj mus muab lub txim rhuav cov As Mas Les kom lawv ploj tas huv si. 19 Vim li cas koj tsis mloog HUAB TAIS lus ? Vim li cas koj tau nyiag khaws lawv tej cuab yeej cuab tam ? Koj ua tej yam tsis ntxim HUAB TAIS siab.” 20 Xas Ws teb tias : “Kuv twb mloog HUAB TAIS ! Kuv twb mus ntaus rog raws li HUAB TAIS qhia, kuv coj tau tus vaj As Mas Les hu ua As Nkas los lawm. Thiab kuv muab lub txim rhuav cov As Mas Les kom lawv ploj tas tib si. 21 Nyob hauv cov As Mas Les tej cuab yeej cuab tam kuv tsoom pej xeem kawg khaws cov tsiaj me thiab loj zoo tshaj coj los txi rau koj tus HUAB TAIS Tswv Ntuj nyob Zis Nkas xwb.” 22 Tab sis Xas Muas teb tias : “Yog dab tsi yuav xis HUAB TAIS siab zoo dua ? Puas yog cov thaj tua tsiaj thiab hlawv tsiaj txi Ntuj ? Los puas yog txoj kev mloog lus thiaj muaj nqis dua cov thaj txi Ntuj zoo nkauj ? Txoj kev ua siab sib muaj nqis dua cov roj tshis ! 23 Koj tau nug cov txiv yaig txiv muam. Koj hla Tswv Ntuj lus. Yog zoo li koj tau teev dab. Vim koj tso HUAB TAIS lo lus tseg, ces HUAB TAIS thiaj tso koj tseg. Nws tsis cia koj ua vaj ntxiv !”

1 HUAB TAIS hais rau Xas Muas tias : “Koj tseem yuav quaj txog Xas Ws hov ntev ntxiv ? Kuv twb tso nws pov tseg lawm. Kuv tsis xav kom nws kav His Xas Lais ntxiv. Koj ntim roj puv tus kub nyuj, koj mus. Kuv xa koj mus tom Yes Xes tsev nyob Npes Les Hes, vim nyob hauv nws cov tub kuv xaiv ib tug los ua vaj.” 2 Xas Muas hais tias : “Kuv yuav ua zoo li cas mus ? Yog Xas Ws hnov, mas nws yuav muab kuv tua.” HUAB TAIS teb tias : “Koj yuav cab ib tug xyuas nyuj. Koj hais tias koj mus txi tus nyuj rau HUAB TAIS. 3 Koj yuav caw Yes Xes tuaj txi Ntuj. Kuv yuav qhia koj tias koj yuav ua zoo li cas. Koj yuav sawv kuv chaw pleev tus kuv yuav qhia rau koj.” 4 Xas Muas ua raws li HUAB TAIS qhia. Thaum nws tuaj txog Npes Les Hes, cov txwj laus nyob hauv tsheej sawv daws ntshai tshee na, lawv tuaj cuag Xas Muas, lawv nug nws tias : “Yaj Saub, koj tuaj li no. Koj puas coj txoj hmoov zoo tuaj rau peb ?” 5 Xas Muas teb tias : “Kuv coj txoj hmoov zoo tuaj, kuv tuaj cev ib thaj txi HUAB TAIS.” 6 Xas Muas kom Yes Xes thiab nws cov tub huv tib si tuaj, ces nws caw lawv tuaj txi Ntuj. Thaum lawv tuaj txog, Xas Muas xub pom Es Lis, nws xav tias : “Yog HUAB TAIS tus pleev tuaj txog lawm.” 7 Tab sis HUAB TAIS hais rau Xas Muas tias : “Koj txhob saib nws tus yam ntxwv sab nraud los nws lub cev siab. Kuv tsis yuav nws. HUAB TAIS nws ntsuas tas txhia yam, nws tsis ntsuas zoo li neeg. Neeg saib tus yam ntxwv sab nraud, hos HUAB TAIS saib hauv lub siab lub plawv.” 8 Yes Xes hu As Npis Nas Das tuaj nyob ntawm Xas Muas xub ntiag. Xas Muas hais tias : “Tsis yog tus uas HUAB TAIS xaiv thiab !” 9 Yes Xes coj Sas Mas tuaj, Xas Muas hais tias : “Tsis yog tus HUAB TAIS xaiv.” 10 Yes Xes coj nws xya leej tub ib tug zuj zus tuaj nyob ntawm Xas Muas xub ntiag, tab sis Xas Muas hais tias : “HUAB TAIS tsis xaiv cov no ib tug li.” 11 “Koj puas tshuav tub ntxiv ?” Yes Xes teb tias : “Tshuav tus tub ntxawg. Nws zov cov tsiaj nyob tom tshav zaub.” Xas Muas hais rau Yes Xes tias : “Koj tso neeg mus hu nws los. Peb yuav zaum ntawm tsum mov no tos nws los tso.” 12 Yes Xes thiaj tso neeg mus hu tus tub ntxawg los. Tus tub ntawd cov plaub hau liab daj. Nws lub ntsej muag zoo nraug. Nws sawm txhiaj kawg ! HUAB TAIS hais rau Xas Muas tias : “Yog tus no. Koj pleev nws mas !” 13 Xas Muas nthos nkaus tus kub ntim roj, nws pleev tus tub ntxawg nyob hauv nruab nrab nws cov kwv tij. Txij hnub ntawd los HUAB TAIS lub tswv yim ya los nyob hauv Das Vis. Ces Xas Muas mam sawv kev rov mus Las Mas.

32 Das Vis hnov Nkaus Lias tsawm haiv His Xas Lais, nws hais rau tus vaj Xas Ws tias : “Peb txhob muaj leej twg ntaus siab me vim tus Fis Lis Tis ntawd. Koj tus tub txib yuav mus ntaus nws.” 33 Xas Ws teb Das Vis tias : “Kuv mus ntaus tsis tau tus Fis Lis Tis ntawd. Koj yog ib tug me nyuam yaus, hos tus neeg ntawd txij nws yav hluas los nws yeej yog ib tug tub rog.” 34 Das Vis hais rau Xas Ws tias : “Yav nram ntej, koj tus tub txib zov nws txiv cov tsiaj nog zaub, yog muaj ib tug tsov los ib tug dais los tom ib tug yaj lawm, 35 mas kuv caum tus tsiaj ntawd, kuv txeeb tus tsiaj nyeg ntawm nws qhov ncauj los. Yog tus tsiaj qus sawv ntsug tiv kuv mas kuv nthos nkaus nws cov hwj txwv ces kuv ntaus nws kom tuag. 36 Koj tus tub txib twb tua tau tsov tau dais. Tus Fis Lis Tis tsis txais lub Cim Txiav ntawd kuv kuj yuav muab nws tua thiab, vim nws thuam tus Tswv Ntuj muaj txoj sia tsoom tub rog.” 37 Das Vis tseem hais tias : “HUAB TAIS twb npo kuv ntawm tsov thiab dais cov rau tes rau taw, nws yeej yuav npo kuv ntawm tus Fis Lis Tis ntawd txhais tes thiab.” 38 Ces Xas Ws thiaj muab nws tej tsoos ua rog rau Das Vis hnav, muab ib lub mom tooj rau nws ntoo, muab ib lub tsho hlau rau nws hnav. 39 Xas Ws muab nws rab ntaj rau Das Vis sia tuaj saum lub tsho hlau. Tab sis thaum Das Vis hnav tas nws tshais ruam tsis tau, vim nws hnav tsis kam tej yam hnyav li ntawd. Nws hais rau Xas Ws tias : “Kuv coj ntau yam li ntawd, mas kuv mus tsis taus kev, kuv hnav tsis kam li ntawd.” Ces lawv thiaj pab nws rov hle txhua yam ntawd tseg. 40 Das Vis nthos nkaus nws rab qws. Nws xaiv tsib lub qe zeb du du nram hav dej los ntim rau hauv lub hnab uas nws ris zov yaj, nws cia li mus cuag tus Fis Lis Tis. 41 Tus Fis Lis Tis txav los ze Das Vis zuj zus. Muaj ib tug nqa ib lub vab hlau ua nws ntej. 42 Tus Fis Lis Tis tig los pom Das Vis, nws cem Das Vis vim Das Vis hluas hluas, Das Vis cov plaub hau daj liab, thiab nws zoo nraug zoo saib kawg. 43 Tus Fis Lis Tis hais rau Das Vis tias : “Kuv puas yog ib tug dev. Ua cas koj nqa ib rab qws tuaj tiv kuv ?” Ces tus Fis Lis Tis tuav txog nws cov dab lub npe los tsawm Das Vis. 44 Tus Fis Lis Tis hais rau Das Vis tias : “Koj txav los ze kuv mas ! Kuv yuav muab koj tej nqaij rau cov noog ya saum ntuj thiab cov tsiaj nyob nruab nrag noj.” 45 Das Vis teb rau tus Fis Lis Tis tias : “Koj tuav ntaj tuav hmuv tuaj tiv kuv, hos kuv tuav txog HUAB TAIS Xas Npas Os lub npe tuaj tiv koj. HUAB TAIS yog tsoom tub rog His Xas Lais tus Tswv Ntuj uas koj thuam. 46 Hnub no HUAB TAIS yuav muab koj rau hauv kuv txhais tes. Kuv yuav muab koj tua, kuv yuav txiav koj taub hau. Hnub no kuv yuav muab koj lub cev thiab tsoom tub rog Fis Lis Tis lub cev rau cov noog ya saum ntuj thiab cov tsiaj nruab nrag noj. Ces tas lub qab ntuj neeg yuav paub tias muaj ib tug Tswv Ntuj saib His Xas Lais. 47 Tas ib zeej tsoom nyob ntawm no yuav pom tias tsis tas HUAB TAIS yuav siv ntaj siv hmuv los pub txoj kev yeej, vim HUAB TAIS yog tus tswv coj tsam rog no. Nws yuav muab nej rau hauv peb xib teg.” 48 Tus Fis Lis Tis Nkaus Lias pib tshais ruam tuaj cuag Das Vis. Das Vis thiaj txav tawm ntawm phiaj tub rog His Xas Lais khiav mus thawj tus Fis Lis Tis. 49 Nws cev tes hauv nws lub hnab, nws thau tau ib lub qe zeb los, nws xuas hlua txawb lub qe zeb mus raug tus Fis Lis Tis hauv pliaj. Lub pob zeb nkag kiag hauv tus Fis Lis Tis Nkaus Lias hauv pliaj, Nkaus Lias cia li vau hlo khwb rwg ntsuav rau hauv av. 50 Ces Das Vis xuas hlua thiab pob zeb xwb, nws ntaus yeej tus Fis Lis Tis. Das Vis tua tus Fis Lis Tis tuag, nws txhais tes tsis tau tuav ntaj tuav hmuv li.

6 Thaum Das Vis mus tua tus Fis Lis Tis Nkaus Lias rov qab los, mas cov poj niam tuaj txhua lub nroog His Xas Lais tuaj cuag tus vaj Xas Ws. Lawv dhia daj dhia luag hu nkauj, ntaus nruas, ntaus thaj cheej thiab nqua suab lom zem. 7 Cov poj niam hu nkauj dhia tias : “Xas Ws tua ntau txhiab leej neeg. Hos Das Vis tua ntau vam leej neeg.” 8 Xas Ws npau taws heev kawg vim tej lus ntawd tsis ntxim nws siab. Nws hais tias : “Lawv muab ntau vam leej neeg rau Das Vis, muab txhiab leej neeg rau kuv xwb. Tshuav qhov lawv tsis tau hu nws ua vaj xwb !” 9 Ces txij hnub ntawd los, Xas Ws pib khib thiab ntxub Das Vis. 10 Tag kis, Tswv Ntuj ib tug dab phem los nyob hauv Xas Ws. Ces Xas Ws vwm. Thaum Das Vis tab tom qoj nws rab nkauj nog ncas li niaj hnub, mas Xas Ws tuav nws rab hmuv ntawm tes, 11 Xas Ws tsa hlo nws rab hmuv, nws hais tias : “Kuv yuav muab Das Vis nkaug kom mus lo rau tim phab ntsa !” Tab sis Das Vis maim dhau Xas Ws rab hmuv ob zaug.

1 Xas Ws hais rau nws tus tub Yos Nas Thas thiab rau cov thawj tub rog tias nws xav muab Das Vis tua pov tseg. Tab sis Xas Ws tus tub Yos Nas Thas nyiam Das Vis kawg. 2 Nws qhia Das Vis tias : “Kuv txiv Xas Ws nrhiav kev tua koj. Koj yuav ceev faj zoo. Tag kis sawv ntxov koj tsiv nraim nyob twj ywm. 3 Kuv yuav nrog kuv txiv tawm mus nraum daim teb. Kuv yuav hais zoo txog koj rau nws. Saib nws yuav ua dab tsi kuv mam rov los hais qhia koj.” 4 Yos Nas Thas hais zoo txog Das Vis rau nws txiv Xas Ws. Yos Nas Thas hais tias : “Tus vaj yuav tsis txhob ua txhaum rau nws tus tub txib Das Vis, vim Das Vis tsis tau ua txhaum dab tsi rau koj. Qhov nws tau ua mas yog ib yam pab koj ntau kawg xwb. 5 Nws muab nws txoj sia mus tiv rog, nws tua tus Fis Lis Tis, ces HUAB TAIS pub kom His Xas Lais yeej loj kawg. Koj pom tias His Xas Lais yeej mas koj yuav zoo siab. Vim li cas koj thiaj yuav ua txhaum ? Ua cas koj yuav ua kom ib tug neeg siab dawb tej ntshav ntws ? Ua cas koj yuav lam tau lam muab Das Vis tua ?” 6 Xas Ws mloog Yos Nas Thas, nws cog lus tias : “Yog HUAB TAIS muaj txoj sia tiag, mas Das Vis yuav tsis tuag.” 7 Ces Yos Nas Thas hu Das Vis tuaj, nws hais tej ntawd qhia Das Vis tib si. Tas ces Yos Nas Thas coj Das Vis mus cuag Xas Ws. Das Vis rov ua nws txoj hauj lwm li qub.

1 Das Vis khiav tawm mus nkaum hauv lub qhov tsua As Dus Las. Nws cov kwv tij thiab nws tsev neeg hnov lub moo ntawd ces lawv nqes mus nrog nws nyob. 2 Cov neeg txom nyem, cov neeg tshuav uag nuj nqes, cov tsis txaus siab, sawv daws khiav tuaj khaub zig Das Vis, ces nws ua lawv tus thawj coj. Nws muaj 400 tawm leej neeg nrog nws. 3 Das Vis tseem tso qhov chaw ntawd tseg, nws mus rau Mis Pes uas nyob Muas teb. Nws hais rau tus vaj Muas tias : “Thov koj pub kuv niam thiab kuv txiv nkawd nrog koj nyob ntawm no tos txog hnub kuv paub tias Tswv Ntuj yuav ua dab tsi rau kuv tso.” 4 Das Vis tso nws niam thiab nws txiv nkawd nyob hauv tus vaj Muas tsev. Nkawd nyob ntawd tas lub caij uas Das Vis khiav mus tsiv nraim. 5 Tus Yaj Saub Nkas hais rau Das Vis tias : “Koj tsis txhob nkaum twj ywm hauv lub qhov tsua no xwb. Koj mus hauv Yus Das teb.” Ces Das Vis sawv kev mus txog hauv cov hav zoov nyob Hes Les.

1 Das Vis tso thaj tsam ntawd tseg, nws mus nyob pem cov qhov tsua Es Nkas Dis. 2 Xas Ws mus caum cov Fis Lis Tis. Thaum nws rov qab los, luag hais rau nws tias : “Das Vis mus pem thaj suab puam Es Nkas Dis lawm.” 3 Xas Ws thiaj sau peb txhiab leej neeg nyob hauv tsoom His Xas Lais, nws kom lawv mus nrhiav Das Vis thiab Das Vis pab neeg ntawm cov pob tsuas Sai. 4 Xas Ws tuaj txog ntawm cov nkuaj yaj uas nyob ntawm ntug kev. Nyob ntawd muaj ib lub qhov tsua. Xas Ws mus so nyob hauv. Das Vis thiab nws pab tub rog twb nkaum hauv lub qhov tsua ntawd lawm thiab. 5 Cov tub rog hais rau Das Vis tias : “Txog hnub HUAB TAIS qhia koj tias : ‘Kuv tso koj tus yeeb ncuab rau hauv koj txhais tes. Koj ua rau nws ywj koj siab mas.” Das Vis sawv, nws nyiag mus txiav Xas Ws ib sab tw tsho tshaj sab. 6 Nws ntshai, nws lub plawv dhia heev, vim nws txiav tau Xas Ws ib sab tw tsho tshaj sab lawm. 7 Nws hais rau nws pab tub rog tias : “Thov kom HUAB TAIS txhob cia kuv ua phem rau kuv tus Huab Tais ! Kuv txhob tua Xas Ws, vim Xas Ws yog HUAB TAIS tus pleev.” 8 Ces Das Vis hais tej lo lus tawv txwv tsis pub nws pab tub rog dhia mus tua Xas Ws. Xas Ws sawv, nws tawm hauv qhov tsua, nws mus taug nws txoj kev ntxiv. 9 Das Vis thiaj sawv, nws kuj tawm hauv qhov tsua mus, nws hu Xas Ws nrov nrov tias : “Kuv tus tswv huab tais !” Xas Ws tig ntsia rov tom qab. Das Vis khoov thiab pe Xas Ws. 10 Das Vis hais rau Xas Ws tias : “Ua cas koj ntseeg cov neeg uas lawv hais rau koj tias Das Vis nrhiav ua phem rau koj ? 11 Hnub no, koj qhov muag pom tias HUAB TAIS muab koj rau hauv kuv txhais tes lawm nyob hauv lub qhov tsua no. Kuv tsis kam muab koj tua. Kuv cia koj ciaj. Kuv tau hais tias kuv txhais tes yuav tsis tua kuv tus huab tais, vim nws yog HUAB TAIS tus pleev. 12 Txiv, koj ntsia koj lub tsho ib sab nyob hauv kuv txhais tes no. Kuv tau txiav koj lub tsho ib sab, tab sis kuv tsis tau muab koj tua. Koj yuav tsum lees tias kuv lub siab tsis xav ua phem rau koj, tsis xav muab neeg tua. Kuv tsis tau ua txhaum rau koj, hos koj nrhiav kev ntes kuv thiab txo kuv txoj sia. 13 Kuv thov kom HUAB TAIS txiav saib puas yog kuv los yog koj muaj txhaum. Kuv thov kom HUAB TAIS pauj rau koj. Tab sis kuv txhais tes yuav tsis kov koj li. 14 Tej laus qhia hais tias: Cov neeg phem rho txoj kev phem tawm los. Ua li mas kuv yuav tsis tsa tes ntaus koj. 15 Vaj His Xas Lais, koj taug txoj kev ntaus rog, koj xav tua leej twg ? Koj caum leej twg ? Koj caum ib tug dev lod ? Los koj caum ib tug nyuag dev mub ? 16 Cia HUAB TAIS ua tus txiav txim rau wb. Kuv thov kom nws ntsuas kuv cai thiab npo kuv ntawm koj txhais tes.” 17 Thaum Das Vis hais li ntawd tas rau Xas Ws, mas Xas Ws hais tias : “Kuv me tub Das Vis, puas yog koj lub suab tiag ?” 18 Ces Xas Ws quaj nrov nrov. Nws hais rau Das Vis tias : “Koj siab ncaj dua kuv. Vim koj ua zoo rau kuv, hos kuv kawg ua phem rau koj xwb. 19 Hnub no koj tseem tau ua zoo tshaj rau kuv, vim HUAB TAIS twb muab kuv rau hauv koj txhais tes, tab sis koj tsis muab kuv tua. 20 Thaum ib tug neeg ntsib nws tus yeeb ncuab, nws puas yuav cia nws tus yeeb ncuab mus taug nws txoj kev ntxiv ? Kuv thov kom HUAB TAIS pub paj tshab rau koj pauj qhov zoo uas hnub no koj tau ua rau kuv. 21 Nyem no kuv paub tseeb tias koj yuav ua vaj, thiab txoj kev ua vaj tswj His Xas Lais yuav nyob ruaj nreb hauv koj txhais tes.”

2 Xas Ws sawv kev mus nram lub hav suab puam Xis Fes. Peb txhiab leej tub rog His Xas Lais zoo tshaj nrog nws mus caum Das Vis nyob hauv lub hav suab puam Xis Fes. 7 Das Vis thiab As Npis Sais nkawd maub mus soj Xas Ws pw tsaug zog nyob hauv nws lub yeej, nws rab hmuv txhos hauv av ze ntawm nws. Cov tub rog pw ncig Xas Ws. 8 Ces As Npis Sais hais rau Das Vis tias : “Hnub no, HUAB TAIS tso koj tus yeeb ncuab rau hauv koj txhais tes. Koj cia kuv mus muab nws rab hmuv rov hno nws rau hauv av. Kuv nkaug ib teg xwb ces txaus lawm, tsis tas kuv yuav nkaug ob teg !” 9 Tab sis Das Vis hais rau As Npis Sais tias : “Koj tsis txhob tua nws ! Leej twg tua HUAB TAIS tus pleev, mas nws yuav nyob tsis raug txim puas tau ?” 12 Ces Das Vis mus ze ntawm Xas Ws taw, nws muab Xas Ws rab hmuv thiab lub plhuaj taub dej. Ces nkawd khiav lawm. Tsis muaj leej twg pom nkawd. Sawv daws tsaug zog tas. Tsis muaj tus hnov li. 13 Das Vis hla hav dej mus sab tim ub, nws mus saum lub ncov roob nrug deb ntawm Xas Ws. 22 Das Vis mam li hu Xas Ws nrov nrov tias : “Tus vaj rab hmuv nyob ntawm no ! Koj tso koj ib tug tub txib hla tuaj nqa mas ! 23 Cia HUAB TAIS txiav txim rau nyias raws li nyias lub siab ncaj siab ncees. Hnub no HUAB TAIS muab koj rau hauv kuv tes, tab sis kuv tsis kam tsa tes tua koj, HUAB TAIS tus pleev !”

1 Thaum Xas Ws tuag tas, mas Das Vis mus tua cov As Mas Les rov los txog. Nws nyob Xis Las teb ob hnub. 2 Hnub peb, ib tug neeg khiav ntawm Xas Ws lub yeej los. Nws cov khaub ncaws ntuag tas, nws taub hau paug hmoov av tas. Thaum nws los txog ntawm Das Vis, nws txhos caug hauv av pe Das Vis. 3 Das Vis hais rau nws tias : “Koj tuaj qhov twg tuaj ?” Nws teb tias : “Kuv khiav ntawm lub yeej His Xas Lais los.” 4 Das Vis nug tias : “Ua cas lawm ? Koj qhia kuv saib !” Tus khiav los teb tias : “Tsoom pej xeem khiav tas tso tsam rog tseg. Muaj coob leej kawg tuag. Xas Ws thiab nws tus tub Yos Nas Thas kuj tuag huv tib si lawm.” 11 Ces Das Vis dua rhe nws lub tsho. Cov neeg nrog nws lawv kuj dua lawv tej tsho. 12 Sawv daws nyiav, sawv daws quaj thiab yoo mov mus txog tsaus ntuj. Lawv quaj Xas Ws thiab nws tus tub Yos Nas Thas. Lawv quaj txog HUAB TAIS haiv neeg thiab txog cov His Xas Lais uas lawv poob tsam. 19 Das Vis thiaj nyiav zoo li no : “Aub ! His Xas Lais lub koob meej koj nyob lwj ntsuav saum koj cov roob ! Cov tub rog, ua cas nej thiaj ploj tas lawm ? 23 Xas Ws thiab Yos Nas Thas, thaud, nkawd ua nkawd lub neej zoo nyiam thiab zoo hlub. Nyem no, nkawd tuag, nkawd tuag ua ke. Nkawd nrawm dua dav. Nkawd muaj zog dua tsov. 24 Cov ntxhais His Xas Lais, Xas Ws yog tus muab ntaub tsuj ntaub npuag rau nej hnav. Nws dai lias nyiaj lias kub rau nej tej tsoos tsho. Zaum no nej nyiav Xas Ws mas ! 25 Cov tub rog, ua li cas lawv thiaj tuag nyob hauv tsam rog ntawd ? Yos Nas Thas, koj tuag lawm, cas yuav mob kuv lub siab ua luaj no ! 26 Kuv tu siab vim koj, kuv tus kwv Yos Nas Thas ! Kuv hlub koj tas nrho. Kuv nrog koj ua phooj ywg ! Kuv tseem hlub koj heev dua hlub ib tug poj niam. 27 Vim li cas cov tub rog thiaj li tuag ? Vim li cas rab ntaj thiab rab hmuv thiaj poob ntawm lawv tes ?”

1 Cov xeem His Xas Lais tib si tuaj cuag Das Vis nyob Hes Nploos. Lawv hais rau nws tias : “Peb nrog koj koom ib co pob txha ib ce nqaij. 2 Yav thaud, Xas Ws ua vaj, twb yog koj coj His Xas Lais mus los. HUAB TAIS tau hais rau koj tias : koj yuav coj kuv tsoom pej xeem His Xas Lais mus nog zaub. Koj yuav ua His Xas Lais tus tswv.” 3 Tsoom txwj laus His Xas Lais thiaj tuaj cuag Das Vis nyob Hes Nploos. Tus vaj Das Vis nrog lawv cog lus nyob Hes Nploos, nyob ntawm Tswv Ntuj xub ntiag. Lawv pleev roj tsa Das Vis ua vaj His Xas Lais. 4 Thaum Das Vis nce ua vaj, nws lub hnub nyoog muaj peb caug xyoo. Nws tswj lub teb chaws plaub caug xyoo. 5 Nws ua vaj nyob Hes Nploos kav cov Yus Das xya xyoo thiab rau hli. Nws ua vaj nyob Yes Lus Xas Les kav cov His Xas Lais thiab cov Yus Das peb caug peb xyoos. 6 Das Vis nrog nws pab tub rog sawv kev mus pem Yes Lus Xas Les, lawv mus ntaus cov Zes Npws uas ib txwm nyob txawm teb chaws ntawd. Cov Zes Npws hais rau Das Vis tias : “Koj txhob tuaj teb chaws no ! Tab yog cov dig muag thiab cov ceg tawv los, lawv yeej ntiab tau koj.” 7 Tab sis Das Vis mus txeeb tau lub yeej Xis Yoos. Yog Das Vis lub tsheej.

12 Luag hais rau Das Vis tias HUAB TAIS tso txoj hmoov zoo rau Os Npes Es Doos yim neeg thiab lub cuab tam tib si, vim Tswv Ntuj lub Xab Cog Lus nyob ntawd. Ces Das Vis mus, nws kom lawv coj Tswv Ntuj lub Xab Cog Lus hauv Os Npes Es Doos tsev mus rau saum Das Vis lub loog. Sawv daws zoo siab tas. 13 Thaum cov nqa HUAB TAIS lub Xab mus kaum ruam kev lawm, mas Das Vis txi ib tug nyuj thiab ib tug yaj rog. 14 Das Vis siv zog dhia ua si nyob ntawm HUAB TAIS xub ntiag, nws npua ib daig ntaub pag. 15 Das Vis thiab tas tsoom His Xas Lais coj HUAB TAIS lub Xab Cog Lus los rau pem Yes Lus Xas Les, ces sawv daws qw suab thiab tshuab hom. 16 Thaum HUAB TAIS lub Xab Cog Lus los hauv Das Vis lub tsheej, mas Xas Ws tus ntxhais hu ua Mis Kas uas yog Das Vis poj niam, nws nyob ntawm qhov rooj xauj, nws pom Das Vis dhia thiab hom khaj nyob ze HUAB TAIS. Mis Kas thuam Das Vis nyob hauv nws siab. 17 Lawv coj HUAB TAIS lub Xab Cog Lus los nyob hauv lub Tsev Tsam Phooj uas Das Vis tau npaj txais lub Xab Cog Lus. Lawv tso lub Xab Cog Lus rau hauv lub tuam Tsev Tsam Phooj ntawd. Das Vis hlawv tsiaj txi Ntuj nyob ntawm HUAB TAIS xub ntiag, thiab nws ua tej thaj txi Ntuj uas sawv daws noj cov txim ua ke. 18 Thaum Das Vis hlawv tsiaj thiab ua thaj txi Ntuj tas mas nws tuav txog HUAB TAIS lub npe los foom hmoov zoo rau cov His Xas Lais. 19 Das Vis faib txhiam xws rau tsoom His Xas Lais, tsis hais txiv neej los poj niam huv tib si. Nws faib ib leeg ib lub mov, ib co txiv ntoo thiab ib lub ncuav qab zib. Tas ces sawv daws nyias rov mus nyias tsev.

1 Thaum Das Vis tuaj nyob hauv nws tsev thiab HUAB TAIS pab nws rhuav cov yeeb ncuab nyob ib ncig ntawm nws tib si, ces tus vaj Das Vis hais rau tus Yaj Saub Nas Taas tias : “Koj ntsia saib ! Kuv nyob hauv ib lub tsev ntoo faj khaum, hos Tswv Ntuj lub Xab Cog Lus nyob hauv ib lub Tsev Tsam Phooj xwb!” 3 Nas Taas teb rau tus vaj tias : “Koj ua raws li koj siab nyiam, vim HUAB TAIS nrog koj nyob.” 4 Hmo ntawd, Nas Taas hnov Tswv Ntuj lo lus no : 5 “Koj mus hais rau kuv tus tub txib Das Vis tias HUAB TAIS hais li no : Puas yog koj yuav txhim ib lub tsev rau kuv nyob txawm hauv ? 6 Txij hnub kuv tau coj tsoom His Xas Lais nyob Hais Nkws Tos teb los rau ntawm no los txog tav no, kuv tsis tau nyob hauv ib lub tsev ib zaug. Kuv tau tshais chaw mus li. Kuv kawg tau nyob hauv ib lub Tsev Tsam Phooj xwb. 7 Tas lub zim txwv kuv tau nrog tas tsoom His Xas Lais tshais chaw mus los, kuv puas tau hais rau ib tug nom tswv His Xas Lais uas coj cov His Xas Lais kev tias : ‘Ua cas nej tsis txhim ib lub tsev ntoo faj khaum rau kuv nyob ?’ 8 Nas Taas, nyem no koj mus hais rau kuv tus tub txib Das Vis tias : HUAB TAIS Xas Npas Os hais li no : Kuv yog tus tau rho koj hauv cov tshav zaub thiab hauv nruab nrab pab yaj los tsa ua tus tswv saib kuv tsoom pej xeem His Xas Lais. 9 Kuv tau nrog koj ua tas puas tsav yam hauj lwm. Kuv tau rhuav koj cov yeeb ncuab tib si nyob ntawm koj xub ntiag. Kuv yuav pub kom koj lub npe nto moo loj cuag li cov vaj loj tshaj nyob thoob tas ntiaj teb. 11 HUAB TAIS yuav ua kom koj loj. HUAB TAIS yuav tsim ib tsev neeg los pub rau koj. 12 Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb. 14 Kuv yuav ua nws txiv, nws yuav yog kuv leej tub. Yog nws ua qhov phem, kuv yuav xuas ib tug pas los muab txim rau nws, kuv yuav ntaus nws xws li neeg ntaus neeg. 15 Tab sis kuv yuav tsis thau kuv lub txiaj ntsim ntawm nws los xws li kuv tau thau tus xub ua vaj dua koj. 16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.” 17 Nas Taas qhia cov lus nws tau hnov ntawm HUAB TAIS los tib si rau Das Vis mloog. 18 Ces Das Vis mus hauv HUAB TAIS lub Tsev Tsam Phooj, nws zaum nyob ntawm HUAB TAIS xub ntiag, nws hais tias : “HUAB TAIS Tswv Ntuj, kuv yog ib tug neeg zoo li cas, kuv tsev neeg yog ib tse neeg zoo li cas, koj thiaj yuav coj kuv mus taug ib txog kev zoo cuag li no ? 19 Koj ua zoo li ntawd rau kuv, tseem tsis tau txaus koj siab ! Koj tseem cog lus rau koj tus tub txib tsev neeg mus rau yav tom ntej. 22 HUAB TAIS Tswv Ntuj, koj loj. Tsis muaj dua lwm tus yuav loj cuag li koj. Tsis muaj dua lwm tus Tswv Ntuj. Kawg koj tib leeg thiaj ua Tswv Ntuj, raws li ib txwm los peb tau hnov. 23 Nyob ntiaj teb no, puas muaj lwm haiv neeg zoo li haiv His Xas Lais? Puas muaj dua lwm haiv neeg uas Tswv Ntuj tau txhiv los ua nws tug, tau pub koob meej loj rau, tau ua tej yam hwj huam loj los pab lawv, tau caum ntau tus vaj, ntau tus dab khiav mus deb, xws li Tswv Ntuj tau ua los pab His Xas Lais txog tav no ? 24 HUAB TAIS, koj tau tsa His Xas Lais ua koj haiv neeg mus li. Koj yog lawv tus Tswv Ntuj. 25 Nyem no, HUAB TAIS, koj nco ntsoov lo lus koj tau cog rau koj tus tub txib thiab rau nws caj ces. Thov koj ua raws nraim li koj tau hais. 26 Koj lub npe yuav nto moo lug mus li. Luag yuav hais tias HUAB TAIS Xas Npas Os ua Tswv Ntuj nyob saum His Xas Lais. Koj tus tub txib Das Vis tsev neeg yuav nyob mus li nyob ntawm koj xub ntiag. 27 HUAB TAIS, His Xas Lais tus Tswv Ntuj, koj yog tus tau qhia koj tus tub txib tias koj yuav tsim ib tsev neeg rau nws. Yog vim li ntawd kuv thiaj muaj cuab kav thov koj.
28 HUAB TAIS Tswv Ntuj, koj yog Tswv Ntuj, koj cov lus yog lus tseeb. Koj tau cog lus zoo li ntawd rau koj tus tub txib. 29 Thov koj tso lus foom hmoov zoo rau koj tus tub txib tsev neeg, kom nws tsev neeg nyob ntawm koj xub ntiag mus li. HUAB TAIS Tswv Ntuj, yog koj tau hais cov lus no. Koj lo lus foom hmoov yuav ua kom koj tus tub txib tsev neeg muaj txoj hmoov zoo mus ib txhiab ib txhis.”

1 Thaum rov qab chiv xyoo tshiab, yog lub caij cov vaj sawv kev rov mus ntaus rog. Das Vis tso Yuas thiab cov tub rog huv tib si mus. Lawv tua cov As Mos thiab mus vij lub tsheej Las Npas. Hos Das Vis, mas nws nyob Yes Lus Xas Les. 2 Muaj ib hnub yuav tsaus ntuj, Das Vis nyuam qhuav sawv ntawm nws lub txaj los, nws mus mus los los nyob saum txheej tsev siab, nws ntsia pom ib tug poj niam da dej. Tus poj niam ntawd zoo nkauj kawg. 3 Das Vis nug tias tus poj niam ntawd yog leej twg. Lawv teb tias : “Yog Npes Txas Npes, Es Lis tus ntxhais, uas yogUs Lis poj niam.” 4 Ces Das Vis tso neeg mus hu Npes Txas Npes tuaj. Npes Txas Npes tuaj nrog Das Vis pw tas, ces nws rov mus tsev. 5 Tsis ntev Npes Txas Npes xeeb tub. Nws xa lus tuaj rau Das Vis tias : “Kuv xeeb tub lawm !” 6 Ces Das Vis fi xov mus rau Yuas tias : “Koj xa tus His Tis hu ua Us Lis los rau kuv.” Yuas xa Us Lis rov los rau Das Vis. 7 Thaum Us Lis los txog, Das Vis nug tias Yuas nyob zoo li cas lawm, kev ntaus rog mus zoo li cas. Ces Das Vis hais rau Us Lis tias : 8 “Koj mus tsev mog ! Koj mus ntxuav taw.” Us Lis thiaj tawm hauv Das Vis lub tuam tsev mus, muaj ib tug nqa tus vaj cov paj tshab lawv Us Lis qab. 9 Tab sis Us Lis mus tsis txog tsev. Nws nrog tus vaj cov tub rog pw ntawm tus vaj lub rooj loog. 10 Muaj neeg mus qhia Das Vis tias : “Us Lis mus tsis txog tsev.” Das Vis nug Us Lis tias : “Koj twb mus tawm rooj rov los, ua cas koj mus tsis txog koj tsev ?” 11 Us Lis teb Das Vis tias : “Lub Xab Cog Lus thiab haiv His Xas Lais thiab cov Yus Das pw nyob hauv tsev tsam phooj xwb, hos kuv tus tswv Yuas thiab huab tais cov peeb zeej pw nraum tshav puam. Ua cas kuv tseem yuav mus hauv tsev, mus noj mov haus cawv thiab nrog kuv poj niam pw lod ? Koj muaj txoj sia, thiab kuv muaj txoj sia ! Mas kuv yuav tsis ua li ntawd ib zaug !” 12 Das Vis hais rau Us Lis tias : “Hnub no koj nyob ib hnub ntawm no, tag kis kuv mam tso koj mus.” Ces hnub ntawd Us Lis nyob Yes Lus Xas Les ib hnub. 13 Tag kis, Das Vis caw nws tuaj nrog Das Vis noj mov, ces Das Vis muab cawv rau nws haus kom qaug. Hmo ntawd Us Lis tawm mus pw nraum zoov. Nws tus tswv cov peeb zeej zov nws xwb. Us Lis tsis nqes mus nram nws tsev. 14 Hnub tom qab, Das Vis sau ib tsab ntawv mus rau Yuas, nws muab rau Us Lis nqa mus. 15 Nyob hauv tsab ntawv nws hais rau Yuas tias : “Nej muab Us Lis mus rau hauv qhov chaw uas rog ceev tshaj tej, nej cia nws mus xwb, nej sawv daws thaub rov qab. Nej cia lawv tua nws kom nws tuag.” 16 Yuas coj nws pab tub rog mus vij lub nroog, nws muab Us Lis tshem mus rau ntawm qhov chaw uas nws paub tias muaj cov tub rog siab loj. 17 Cov neeg nyob hauv nroog tawm tuaj ntaus Yuas. Cov tub rog His Xas Lais tuag ntau leej, Das Vis cov peeb zeej kuj tuag ob peb leeg. Us Lis, tus His Tis, kuj tuag thiab.

1 HUAB TAIS xa tus Yaj Saub Nas Taas tuaj cuag Das Vis. Nas Taas chaws mus hauv Das Vis tsev, nws hais rau Das Vis tias : “Muaj ob tug txiv neej nyob hauv ib lub nroog, ib tug yog neeg nplua nuj, ib tug yog neeg pluag. 2 Tus nplua nuj muaj tsiaj txhu coob, muaj tsiaj loj tsiaj me, muaj nyuj muaj tshis coob kawg. 3 Hos tus pluag nws kawg muaj ib tug yaj nkaus xwb uas nws muas los. Nws yug nws tus yaj ntawd hlob, nws cia tus yaj nrog nws thiab nws cov me nyuam nyob. Tus yaj nrog nws noj mov, nrog nws haus dej, nrog nws pw ua ib txag, cuag li yog nws tus ntxhais. 4 Muaj ib tug qhua tuaj hauv tus nplua nuj tsev, tus nplua nuj tsis xav siv nws ib tug tsiaj los tua rau tus qhua noj. Ces nws mus nyiag tus pluag tus yaj los tua txais tus qhua ntawd.” 5 Das Vis hnov Nas Taas lo lus, nws npau taws heev, nws hais rau Nas Taas tias : “Yog HUAB TAIS muaj txoj sia tiag mas tus niag ua li ntawd tsim nyog tuag ! 6 Nws yuav tsum them tus yaj ntawd plaub npaug, vim nws tau ua phem thiab nws tsis txawj hlub neeg.” 7 Nas Taas hais rau Das Vis tias : “Tus neeg ntawd yog koj ! HUAB TAIS Tswv Ntuj hais li no : Kuv pleev koj. Kuv tsa koj ua His Xas Lais tus vaj. Kuv cawm koj dim ntawm Xas Ws tes. 8 Kuv tau muab koj tus vaj tsev neeg rau hauv koj txhais tes. Kuv tau pub tsoom His Xas Lais thiab tsoom Yus Das rau koj. Yog tseem tsis tau txaus koj siab mas tab yog yam twg los kuv tseem zoo siab muab rau koj tib si. 9 Tab sis vim li cas koj thiaj li ua qhov uas HUAB TAIS tsis nyiam ? Koj xuas ntaj tua Us Lis, koj yuav nws poj niam los ua koj poj niam, koj txhob txwm ua kom cov As Mos rab ntaj tua Us Lis. 10 Ua li mas txij no mus, hniav ntaj yuav tsis zam koj tsev neeg ntxiv lawm, vim koj tsis nco txog kuv. Koj coj tus His Tis Us Lis poj niam los ua koj poj niam. 11 HUAB TAIS hais li no : Kuv yuav ua kom muaj ib co xwv txheej tawm hauv koj tsev neeg tuaj raug koj. Kuv yuav ua kom cov txheeb ze koj txeeb koj cov poj niam los ua lawv poj niam rau ntiaj teb neeg pom. 12 Ntawm koj, mas koj nyiag zais ntshis ua txhaum, tab sis kuv yuav tab meeg ua tej yam ntawd kom tawm los rau tsoom His Xas Lais pom thiab rau lub ntiaj teb pom.” 13 Ces Das Vis hais rau Nas Taas tias : “Kuv ua txhaum rau HUAB TAIS lawm !” Nas Taas hais rau Das Vis tias : “HUAB TAIS zam rau koj, koj yuav tsis tuag. 14 Tab sis koj tau ua kom HUAB TAIS tu siab li no, mas koj tus me nyuam yuav tuag.” 15 Nas Taas hais li ntawd tas nws rov mus lawm. HUAB TAIS tso xwv txheej tuaj rau Das Vis tus me nyuam uas yug ntawm Us Lis tus poj niam los. Tus me nyuam pib mob heev. 16 Das Vis thov Ntuj rau nws tus me nyuam. Nws yoo tsis noj ib lub mov. Nws nyob hauv tsev. Hmo ntuj nws muab ib lub hnab tsaj pua nws pw xwb. 17 Cov nom nyob hauv nws tsev, lawv sawv daws tuaj sawv ntsug ncig nws, xav tsa kom nws sawv, tab sis nws tsis kam. Nws tsis nrog lawv noj ib lub mov li.

7 Plaub xyoos tom qab, As Ntxas Loos hais rau tus vaj Das Vis tias : “Thov koj kheev kuv mus Hes Nploos. Kuv yuav mus pauj lub yeem uas kuv tau fiv rau HUAB TAIS. 8 Thaum kuv tseem nyob Zes Xus nyob As Las teb, kuv tau fiv yeem tias yog HUAB TAIS coj kuv rov los txog Yes Lus Xas Les mas kuv yuav mus ua ib thaj teev HUAB TAIS nyob Hes Nploos.” 9 Tus vaj hais rau nws tias : “Koj tso siab lug mus mog !” Ces As Ntxas Loos sawv kev mus Hes Nploos. 10 As Ntxas Loos tso neeg mus hais rau cov xeem His Xas Lais tib si tias : “Thaum nej hnov suab hom nrov, nej yuav hais tias : yog As Ntxas Loos nce ua vaj nyob Hes Nploos.” 11 Muaj ob puas leej neeg nyob Yes Lus Xas Les nrog As Ntxas Loos mus rau Hes Nploos. As Ntxas Loos caw lawv kom lawv mus, ces lawv cia li mus xwb, lawv tsis tau hnov hais txog dab tsi li. 12 As Ntxas Loos tso neeg mus hu As His Tos Fes nyob Zis Los, uas nws yog Das Vis tus tim xyoob kom tuaj nrog nws mus txi Ntuj. Li ntawd, ces pab neeg nrog nws ntxeev siab muaj zog tuaj thiab lawv coob zuj zus.
13 Muaj ib tug neeg tuaj qhia Das Vis tias : “Cov His Xas Lais cia siab rau As Ntxas Loos lawm.” 14 Ces Das Vis hais rau nws cov thawj tub txib nyob Yes Lus Xas Les tias : “Peb khiav mus ! Yog tsis khiav mas peb yuav tsis dim ntawm As Ntxas Loos. Nej tsuag tsuag mus, tsam As Ntxas Loos tuaj ntaus peb sai, ces peb raug xwv txheej thiab nws yuav xuas ntaj tua tas lub nroog huv tib si.” 30 Das Vis quaj nce phab toj pem Roob Txiv Ntoo Roj. Nws qhwv taub hau thiab mus ko taw do. Tas tsoom pej xeem sawv daws nrog nws nce mus pem lub roob. Lawv kuj muab ntaub npog taub hau thiab lawv quaj.

5 Thaum Das Vis tuaj txog Npas Hus Lis, muaj ib tug txiv neej tawm tuaj. Nws yog Xas Ws xeem. Nws hu ua Xis Mes Is. Nws hais tej lo lus tsawm Das Vis. 6 Nws txawb pob zeb rau Das Vis thiab rau Das Vis cov tub txib siab loj. Sawv daws thaiv tus vaj zoo, lawv thaiv ntawm nws sab xis thiab sab laug huv si. 7 Xis Mes Is tsawm Das Vis tias : “Khiav mus ! Kav tsij khiav mus, Niag tes lo ntshav ! Niag neeg tsis tsim txiaj ! 8 HUAB TAIS ua kom Xas Ws tsev neeg cov ntshav rov poob los tsuam koj, vim koj tau txeeb nws tus vaj ua. Nyem no HUAB TAIS thiaj cia koj tus tub As Ntxas Loos ua vaj. Nyem no koj yuav raug txom nyem vim koj tes lo ntshav.” 9 As Npis Sais, hais rau tus vaj tias : “Ua cas yuav cia niag dev tuag aws no tsawm tus vaj ? Cia kuv mus txiav nws taub hau saib !” 10 Tab sis Das Vis teb tias : “Xes Lus Yas, kuv yog ib tug tsis muaj tsim dab tsi rau nej ! Nws tsawm los ntshai yog HUAB TAIS hais rau nws tias : ‘Koj tsawm Das Vis.’ Li ntawd, mas leej twg kuj hais tsis tau rau nws tias : ‘Ua cas koj ua li ntawd ?” 11 Das Vis hais rau As Npis Sais thiab nws cov tub txib tias : “Nej saib ! Tus tub kuv yug kiag twb xav muab kuv tua, mas phim tus Npes Yas Mis ntawd haj yam yuav ntxub kuv ! Nej cia nws tsawm kuv ntxiv. Ntshai yog HUAB TAIS qhib nws ncauj kom tsawm. 12 Nyaj tej zaud HUAB TAIS yuav pom kuv txoj kev txom nyem ces nws yuav muab ib yam zoo los pauv cov lus tsawm uas hnub no kuv raug.” 13 Ces Das Vis thiab nws cov neeg mus ntxiv.

6 Das Vis tsoom pej xeem khiav mus nyob nruab liaj nruab teb. Lawv mus tiv cov His Xas Lais uas mloog As Ntxas Loos. Lawv sib ntsib nyob hauv lub hav zoov Es Fais. 7 Tsoom tub rog His Xas Lais swb Das Vis cov tub txib. Cov His Xas Lais raug sab kawg. Lawv tuag muaj nees nkaum txhiab leej. 9 As Ntxas Loos khiav mus thawj tau Das Vis ib co neeg. As Ntxas Loos caij ib tug luj, tus luj cia li chaws mus hauv ib tsob qab ntoo qhib loj ces As Ntxas Loos lub taub hau daig saum cov ceg qhib, nws dai viav vias nyob ib nta ntoo. Hos tus luj dhia mus lawm. 10 Muaj ib tug neeg pom, nws mus hais qhia Yuas tias : “Kuv nyuam qhuav pom As Ntxas Loos dai saum ib tsob ceg qhib.” 14 Ces Yuas nqa peb rab hmuv, nws nkaug As Ntxas Loos hauv siab uas As Ntxas Loos tseem ciaj dai saum cov ceg qhib. 24 Das Vis zaum nyob ze ntawm lub qhov rooj. Tus peeb zov yeej nce mus tuaj saum ntsa zeb ntsia, nws pom ib tug neeg khiav khiav los. 25 Tus peeb qw rau tus vaj, tus vaj hais tias : “Yog nws ib leeg xwb mas yog nws coj ib lub moo zoo los xwb.” 31 Ces tus Kus Xis los txog ze ntawm tus vaj, nws hais rau tus vaj tias : “Vaj, koj mloog lub moo no. Hnub no HUAB TAIS ua zoo rau koj, nws cawm koj ntawm cov neeg sawv ntxeev siab rau koj.” 32 Tus vaj nug tus Kus Xis tias : “Tus hluas As Ntxas Loos puas nyob zoo ?” Tus Kus Xis teb tias : “Xav kom HUAB TAIS cov yeeb ncuab thiab cov neeg xav ntxeev siab rau koj tau tuag xws li tus hluas ntawd !”

1 Ces tus vaj Das Vis ib ce muag tas. Nws nce mus saum kem tsev siab, ces nws quaj quaj. Nws quaj hu quaj hu tias : “Kuv me tub As Ntxas Loos ! Kuv me tub ! Kheev lam kuv sawv koj chaw tuag ! As Ntxas Loos ! Kuv tus me tub !” 2 Lawv mus hais qhia Yuas tias : “Tus vaj quaj quaj txog As Ntxas Loos.” 3 Hnub ntawd lawv yeej, tab sis sawv daws zoo li ntoo xyom tas, vim cov tub rog hnov tias tus vaj quaj quaj txog nws tus tub.

2 Tus vaj hais rau Yuas uas yog nws tus thawj tub rog tias : “Nej mus ncig xyuas cov xeem His Xas Lais txij Das mus rau Npes Xas Npes, nej txheeb cov neeg tas tib si, kom kuv paub meej saib muaj pes tsawg leej neeg.” 9 Yuas mus txheeb neeg tas, nws los hais qhia rau Das Vis tias muaj pes tsawg leej. Cov His Xas Lais muaj yim pua txhiab leej tub rog uas lawv leeg muaj rab ntaj. Cov Yus Das muaj tsib puas txhiab leej. 10 Das Vis kom Yuas txheeb neeg li ntawd tas mas Das Vis lub siab nyob tsis tus, nws hais rau HUAB TAIS tias : “Kuv tau ua ib qho txhaum loj kawg ! Nyem no, HUAB TAIS, thov koj zam rau koj tus tub txib, vim kuv tau yuam kev loj kawg.” 11 Tag kis sawv ntxov, thaum Das Vis sawv los, tus Yaj Saub Nkas hnov HUAB TAIS lo lus qhia nws tias : 12 “Koj mus hais rau Das Vis tias HUAB TAIS hais li no : Kuv hais peb yam rau koj. Koj xaiv ib yam ces kuv yuav ua yam ntawd rau koj.” 13 Ces tus Yaj Saub Nkas mus cuag Das Vis, nws hais rau Das Vis tias : “Koj puas nyiam cia koj lub teb chaws tshaib plab xya xyoo ? Los koj puas yeem swb cov yeeb ncuab peb hlis, cia koj khiav lawv ? Los koj puas yeem cia koj lub teb chaws raug mob aws peb hnub ? Nyem no, koj xav tswv yim ces koj thiaj hais saib kuv yuav teb dab tsi rau tus xa kuv tuaj.” 14 Das Vis hais rau Nkas tias : “Kuv nyuaj siab kawg ! Ntshai yeem cia peb poob nyob hauv HUAB TAIS txhais tes zoo dua. Vim nws kheev hlub neeg kawg. Kuv tsis xav poob nyob hauv neeg txhais tes.” 15 Ces Das Vis yeem xaiv tus mob aws. Thaum ntawd yog lub caij hlais nplej. HUAB TAIS tso aws los rau cov His Xas Lais txij thaum sawv ntxov mus txog lub caij nws teem. Tas sawv daws raug tus mob aws. Muaj xya caum txhiab leej neeg tuag nyob hauv lub teb chaws Das mus rau Npes Xas Npes. 16 Tus Tshiab xyab tes tso aws mus rau Yes Lus Xas Les thiab. Tab sis HUAB TAIS ho rov khuv leej, nws hais rau tus Tshiab rhuav txoj sia tias : “Txaus lawm ! Nyem no koj nkaum koj txhais tes rov qab.” Tus Tshiab thiaj mus nyob ze ntawm As Laus Nas uas yog cov Zes Npws lub tshav ntaus nplej. 17 Thaum Das Vis pom tus Tshiab uas tso aws tuaj rau tsoom pej xeem, Das Vis hais rau HUAB TAIS tias : “Yog kuv tau ua txhaum, yog kuv tau ua tsis zoo xwb. Cov ntawd yog pab yaj. Lawv tsis tau ua phem dab tsi. Thov kom koj txhais tes ntaus kuv thiab kuv tsev neeg xwb mas !”

1 Das Vis saib yuav txog nws lub caij tuag, ces nws qhuab qhia nws tus tub Xas Los Moos tias : 2 “Kuv yuav mus taug txoj kev sawv daws taug. Koj nyob, koj ua siab loj mog ! Koj ua kom phim ib tug tseem txiv neej. 3 Koj yuav coj HUAB TAIS cov kev cai, koj yuav taug nws tej kev, mloog nws tej lus qhia lus ntuas, raws li lawv sau tseg nyob hauv Mais Xes txoj cai, ces koj thiaj yuav ua dab tsi los ua tau raws li koj lub siab xav mog ! 4 Thiab koj ua kom muaj tuaj tiag raws li lo lus HUAB TAIS tau hais rau kuv no : ‘Yog koj cov tub coj lawv lub neej zoo, yog lawv coj tus yam ntxwv zoo nyob ntawm kuv xub ntiag, yog lawv muab tas lawv lub siab lub tswv yim los taug txoj kev ncaj, mas koj lub theej kiab saib cov His Xas Lais yuav tsis nyob qhuav ib zaug.” 10 Ces Das Vis tuag, nws mus cuag nws cov yawg koob lawm. Lawv muab Das Vis lub cev los nyob hauv Das Vis lub tsheej. 11 Das Vis tau ua vaj kav His Xas Lais tas plaub caug xyoo. Nws ua vaj xya xyoo nyob Hes Nploos, thiab peb caug peb xyoos nyob Yes Lus Xas Les. 12 Xas Los Moos nce zaum nws txiv Das Vis lub theej kiab. Nws txoj kev ua vaj ruaj ntseg tuaj tiag.

4 Tus vaj Xas Los Moos mus nram Nkas Npas Oos. Nws mus txi Ntuj nyob ntawd, vim yog lub ncov roob teev Ntuj loj tshaj nyob ntawd. Xas Los Moos twb tau hlawv ib txhiab tus tsiaj los txi Ntuj nyob saum lub thaj ntawd lawm. 5 Nyob Nkas Npas Oos, hmo ntuj Xas Los Moos ua npau suav pom HUAB TAIS tawm tuaj rau nws pom xyeem thiab hais tias : “Koj thov qhov koj xav kom kuv muab rau koj.” 6 Xas Los Moos teb tias : “Koj tau hlub koj tus tub txib Das Vis uas yog kuv txiv. Nws nyob ntawm koj xub ntiag. Nws mus taug txoj kev mloog lus, txoj kev ncaj kev ncees hauv nws nruab siab. Koj tau ua zoo rau nws. Koj tau cia kom hnub no nws ib tug tub zaum nyob saum nws lub theej kiab. 7 HUAB TAIS, nyem no koj tau tsa koj tus tub txib ua vaj hloov nws txiv Das Vis chaw. Kuv yog ib tug me nyuam tub hluas xwb, kuv tsis txawj ntaus thawj. 8 Koj tus tub txib nyob nruab nrab haiv neeg uas koj tau xaiv, yog ib haiv neeg coob tas nrho suav tsis txheeb tshuaj tsis txhua. 9 Thov koj pub ib lub siab thoob tsib txawj xav tom ntej tom qab zoo rau koj tus tub txib kom nws txawj pom tias qhov twg yog zoo, qhov twg yog phem. Vim tias leej twg thiaj yuav txawj coj koj haiv neeg coob tas npaud ?” 10 Xas Los Moos thov li ntawd mas xis HUAB TAIS siab. 11 HUAB TAIS hais rau Xas Los Moos tias : “Koj tau thov li ntawd, koj tsis thov kom koj tau ua neej laus nkoos, tsis tau thov kom muaj nyiaj muaj kub, tsis thov kom tau rhuav koj cov yeeb ncuab txoj sia. Koj tau thov ib lub tswv yim thoob tsib txawj xav tom ntej tom qab zoo. 12 Li ntawd, mas kuv yuav ua raws li koj thov. Kuv pub ib lub siab ntse thiab thoob tsib rau koj. Yav tas los lawm tsis tau muaj leej twg muaj ib lub siab zoo li ntawd, thiab yav tom ntej kuj tsis muaj leej twg yuav tau lub siab zoo npaum no. 13 Tab yog tej yam koj tsis tau thov los kuv tseem yuav muab rau koj tib si. Koj yuav nplua nuj, koj yuav nto koob meej tshaj tas txhia tus vaj.”
16 Muaj ib zaug uas ob tug poj niam coj lub neej phem tuaj cuag Xas Los Moos. 17 Muaj ib tug poj niam txawm hais rau tus vaj tias : “Huab tais, thov koj mloog nyuag yaus hais tso. Kuv thiab tus poj niam ntawd wb koom nyob ua ib tse. Kuv xub yug tau ib tug me nyuam puv peb tag kis, ces tus poj niam ntawd nws kuj tau ib tug thiab. 18 Nyob hauv lub tsev wb nyob, tsis muaj leej twg nrog wb nyob, kawg muaj wb ob leeg xwb. 19 Muaj ib hmos tus poj niam uas nrog kuv nyob ntawd nws pw nws muab nws tus me nyuam tsuam tuag. 20 Thaum ib tag hmo, nws sawv, nws pom kuv tsaug zog. Nws nyiag tsaws kuv tus tub nyob hauv kuv xub ntiag, nws muab nws tus tub uas tuag lawm tso rau hauv kuv xub ntiag. 21 Ib me ntsis kuv sawv, kuv muab mis rau kuv tus me nyuam noj. Ua cas kuv pom kuv tus me nyuam tuag lawm. Tab sis thaum kaj ntug, kuv muab tus me nyuam tuag tsaws los saib zoo zoo, mas kuv pom tias tus me nyuam ntawd tsis yog tus uas kuv yug.” 22 Ces lwm tus poj niam hais tias : “Tsis yog li koj hais ! Kuv tus tub yog tus tseem ciaj. Koj tus yog tus tuag lawm.” Thawj tug poj niam teb tias : “Tsis yog ! Koj tus tub yog tus tuag. Kuv tus yog tus ciaj.” Ob tug poj niam sib ceg nyob ntawm tus vaj xub ntiag. 23 Ces tus vaj hais tias : “Tus poj niam no los tias : Kuv tus yog tus ciaj. Tus tod los hais tias : Tsis yog ! Koj tus yog tus tuag. Kuv tus yog tus ciaj.” 24 Ces tus vaj hais rau lawv tias : “Nej mus nqa ib rab ntaj los rau kuv.” Lawv thiaj nqa ib rab ntaj los rau tus vaj. 25 Tus vaj hais tias : “Nej muab tus me nyuam ciaj los phua ua ob sab. Nej muab rau ob tug poj niam ntawd ib leeg ib sab.” 26 Ces tus poj niam uas yog tus me nyuam niam hais rau tus vaj tias : “Huab Tais, thov koj txhob muab kuv tus me nyuam tua ! Koj muab kuv tus me nyuam rau tus poj niam ntawd.” Ces lwm tus poj niam hais tias : “Muab phua xwb ! Tus me nyuam ntawd thiaj tsis ua leej twg tus !” 27 Ces tus vaj hais tias : “Nej tsis txhob muab tus me nyuam tua. Nej muab rau thawj tug poj niam ntawd.” 28 Tas tsoom His Xas Lais hnov tias Xas Los Moos tu plaub tu ntug zoo li ntawd, mas sawv daws hwm Xas Los Moos, vim lawv pom tias Ntuj lub tswv yim thoob tsib nyob saum Xas Los Moos thiab pab Xas Los Moos tu plaub tu ntug.

1 Thaum Xas Los Moos txhim tau lub tuam Tsev Teev Ntuj tiav lawm, nws hu cov txwj laus His Xas Lais sawv daws tuaj sib sau nyob Yes Lus Xas Les, vim yuav nqa HUAB TAIS lub Xab Cog Lus ntawm Das Vis lub tsheej Xis Yoos mus rau hauv lub Tuam Tsev Teev Ntuj. 2 Tas tsoom txiv neej His Xas Lais tuaj sib sau nyob ib ncig ntawm tus vaj. Yog thaum nqaum paj nqaum nruas lub xya hli. 3 Cov Leej Choj nqa lub Xab Cog Lus thiab lub Tsev Tsam Phooj sib ntsib, 4 thiab cov twj txi Ntuj huv si mus txog hauv lub Tuam Tsev. 5 Tus vaj Xas Los Moos thiab tas tsoom His Xas Lais sawv daws nrog nws tua yaj tua nyuj suav tsis txheeb los txi Ntuj nyob ze ntawm lub Xab Cog Lus. 6 Cov Leej Choj coj HUAB TAIS lub Xab Cog Lus los txawb rau nws qhov chaw, nyob hauv lub Tuam Tsev Teev Ntuj hauv Kem Ntshiab, hauv cov Tshiab Kes Lus Npis qab tis. 7 Cov Tshiab Kes Lus Npis nthuav lawv cov tis los roos qhov chaw uas txawb lub Xab Cog Lus. 9 Tsis muaj dab tsi nyob hauv lub Xab Cog Lus, kawg muaj ob daim txiag zeb uas Mais Xes muab rau hauv thaum nyob saum lub roob Hos Les xwb. Yog ob daim txiag zeb uas thaum cov His Xas Lais tawm ntawm Hais Nkws Tos teb los, HUAB TAIS nrog lawv cog lus 10 Thaum cov Leej Choj tawm hauv Kem Ntshiab los, muaj ib twv huab los roos HUAB TAIS lub Tuam Tsev tas tib si. 11 Cov Leej Choj ua tsis tau cov kab ke ntxiv mus, vim twv huab. HUAB TAIS lub hwj chim los nyob puv HUAB TAIS lub Tuam Tsev ! 12 Ces Xas Los Moos hais tias : “HUAB TAIS pom zoo tsa tsev nyob hauv twv huab dub. 13 HUAB TAIS, kuv ua tau ib lub tsev rau koj nyob lawm, yog lub tsev koj yuav nyob mus li.”
22 Xas Los Moos sawv nyob ze HUAB TAIS lub thaj txi Ntuj, nyob ntawm tsoom His Xas Lais xub ntiag. Nws tsa tes rau saum Ntuj. 23 Nws hais tais : “HUAB TAIS, His Xas Lais tus Tswv Ntuj ! Nyob saum ntuj thiab nyob ntiaj teb no, tsis muaj lwm tus Tswv Ntuj zoo cuag li koj. Koj ua raws li lo lus koj tau cog. Thaum koj cov tub txib mloog koj tas siab tas ntsws, mas koj ua zoo rau lawv mus li. 27 Tswv Ntuj puas yuav nrog neeg nyob ntiaj teb no tiag ? Cuaj txheej ntuj saud twb ntim tsis tau Tswv Ntuj, mas lub tsev kuv ua no haj yam yuav ntim tsis tau lod ? 28 HUAB TAIS Tswv Ntuj, thov koj mloog koj tus tub txib lub suab hu txog koj hnub no ! 29 Thov koj dauv muag saib ntsoov lub tsev no uas koj hais tias : ‘Kuv lub npe yuav nyob ntawm no !’ Thov koj mloog cov lus uas koj tus tub txib hais nyob ntawm no. 30 Thov koj mloog koj tus tub txib thiab mloog koj haiv His Xas Lais thov koj nyob ntawm no. Nyob saum ntuj uas yog thaj chaw koj nyob txawm, mas thov koj mloog peb thiab zam txhaum rau peb.”
41 “Tswv Ntuj, yog muaj ib tug neeg pej kum teb, tsis yog koj haiv neeg, los tsuav yog nws tuaj teev koj nyob hauv lub tsev no, mas thov koj uas koj nyob txawm saum ntuj, koj mloog nws cov lus thov mas ! 42 Tswv Ntuj, tas ntiaj teb yuav hnov koj lub npe nto moo, yuav hnov cav txog koj txhais tes muaj muaj zog. 43 Tswv Ntuj uas nyob txawm saum ntuj, koj mloog tus pej kum neeg cov lus thov tas tib si, kom cov haiv neeg nyob tas ntiaj teb paub koj lub npe thiab hwm koj zoo li koj haiv His Xas Lais, thiab kom lawv paub tias qhov chaw zoo hwm koj lub npe yog nyob hauv lub Tuam Tsev uas kuv tau txhim no.”

1 Xas Los Moos lub koob meej ncha mus txog tus poj vaj nyob Xas Npas. Tus poj vaj xav tuaj nug tej zaj txhais los sim Xas Los Moos. 2 Nws coj ib npoj ntxhais txib tub txuas coob tuaj. Nws xuas ntxhuav thauj tej nras nyiaj nras kub, thauj tej nras tshuaj tsw qab, tej nras hlaws npliag deg muaj nqi tuaj. Thaum tus poj vaj tuaj txog Xas Los Moos, nws piav rau Xas Los Moos txog tas puas tsav yam uas tau ntev los nws tau xav nyob hauv nws nruab siab. 3 Tab sis Xas Los Moos piav meej pem txog tas txhia yam nws nug, tsis muaj ib lo lus uas Xas Los Moos yuav piav tsis tau kom meej. 4 Tus poj vaj Xas Npas pom tias Xas Los Moos yog ib tug neeg thoob tsib kawg, nws pom Xas Los Moos lub tsev, 5 pom cov thawj tub rog, pom cov tub txib tej tsoos, thiab pom Xas Los Moos ua tej thaj txi Ntuj nyob hauv lub Tuam Tsev Teev Ntuj, mas nws poob siab. 6 Nws hais rau Xas Los Moos tias : “Tej yam uas kuv tau hnov hais nyob hauv kuv lub teb chaws txog koj thiab txog koj lub tswv yim thoob tsib, mas muaj tiag ! 7 Thaum kuv qhov muag tsis tau pom mas kuv tsis xav ntseeg. Tab sis luag hais txog ib nrab xwb. Koj tseem nplua nuj thiab thoob tsib dua qhov kuv tau hnov. 8 Koj cov poj niam muaj txoj hmoov zoo, thiab koj cov tub txib muaj txoj hmoov zoo vim lawv tau nyob ze koj mus li, lawv tau mloog koj cov lus thoob tsib ! 9 Koj tus HUAB TAIS Tswv Ntuj nto koob meej ! Nws tsa koj tswj tsoom His Xas Lais, vim HUAB TAIS nyiam His Xas Lais. Nws tsa koj ua vaj mus li kom koj tswj lawv mus raws txoj kev ncaj kev ncees.” 10 Tus poj vaj muab ib puas nees nkaum nras keev kub, muab tshuaj tsw qab, los pub ua tshav ntuj rau Xas Los Moos. Tus poj vaj Xas Npas pub tshuaj tsw qab ntau ntau tsis tau pom dua ib zaug ntau npaum li ntawd.

4 Thaum Xas Los Moos laus lawm, nws cov poj niam coj nws ntxeev siab mus teev lwm cov dab, nws lub siab tsis hwm HUAB TAIS tib leeg xws li nws txiv Das Vis. 5 Xas Los Moos mus teev cov neeg nyob Xis Doos tus dab As Tas Tes, thiab teev cov As Mos tus dab Mis Kos. 6 Xas Los Moos ua tej yam tsis ntxim HUAB TAIS siab, nws tsis mloog HUAB TAIS lus xws li nws txiv Das Vis. 7 Ces Xas Los Moos txhim ib lub tsev teev tus dab Kes Mos uas yog cov Muas tus dab. Nws txhim lub tsev ntawd nyob saum lub roob, nyob ntawm Yes Lus Xas Les toob fab. Nws kuj txhim ib lub tsev teev cov As Mos tus dab Mis Kos. 8 Nws ua li ntawd rau nws cov poj niam uas nws yuav nyob pej kum teb los. Nws cov poj niam hlawv xyab thiab ua tej lub thaj txi lawv cov dab. 9 HUAB TAIS npau taws rau Xas Los Moos, vim Xas Los Moos fee plhu rau HUAB TAIS, uas yog His Xas Lais tus Tswv Ntuj. Tswv Ntuj tawm tuaj xyuas Xas Los Moos ob zaug. 10 Tswv Ntuj twb tau qhia Xas Los Moos kom nws tsis txhob mus teev pej kum dab. Tab sis Xas Los Moos tsis mloog lo lus qhia ntawd. 11 Ces HUAB TAIS hais rau Xas Los Moos tias : “Koj ua li ntawd, koj tsis mloog kuv cov lus kuv tau qhia koj, kuv yuav thau koj lub teb chaws ntawm koj tes thiab kuv yuav muab rau koj ib tug tub txib kav. 12 Kuv tsis xav kom koj txiv Das Vis poob ntsej muag mas kuv yuav tsis ua li ntawd thaum koj tseem ua neej nyob. 13 Tab sis kuv yuav thau koj lub teb chaws ntawm koj tus tub tes. Kuv yuav tso ib xeem rau koj tus tub kav, vim kuv nco kuv tus tub txib Das Vis thiab vim Yes Lus Xas Les uas kuv xaiv los ua kuv lub tsheej.”
26 Yes Los Npuag yog tus Es Fais hu ua Nes Npas tus tub. Nws niam yog ib tug poj ntsuam hu ua Xes Luas. Yes Los Npuag yog Xas Los Moos ib tug tub txib, nws ntxeev siab rau nws tus vaj. 29 Muaj ib zaug, Yes Los Npuag nyuam qhuav tawm hauv lub tsheej Yes Lus Xas Les mus, nws mus ntsib tus Yaj Saub As His Yas uas nyob Xis Laus. Tus Yaj Saub hnav ib lub tsho tshaj sab tshiab tshiab. Thaum ntawd muaj nkawd ob leeg nyob ntawm kev xwb. 30 As His Yas hle hlo nws lub tsho tshaj sab tshiab thiab nws muab dua rhe ua kaum ob daig. 31 Ces nws hais rau Yes Los Npuag tias : “Koj yuav kaum daim. Vim HUAB TAIS hais li no : Kuv yuav thau Xas Los Moos lub teb chaws ntawm Xas Los Moos tes, kuv yuav muab kaum lub xeem His Xas Lais rau koj kav. 32 Xas Los Moos tsuas muaj ob lub xeem ua nws tug xwb, vim kuv hwm txog kuv tus tub txib Das Vis thiab lub tsheej Yes Lus Xas Les uas kuv tau xaiv hauv cov xeem His Xas Lais tib si.”

19 Ces His Xas Lais ncaim ntawm Das Vis tsev neeg los txog tav no.
26 Yes Los Npuag xav nyob hauv nws siab tias : “Yog zoo li nyem no xwb mas kuv lub teb chaws yuav rov mus zwm rau Das Vis tsev neeg xwb. 27 Yog tsoom pej xeem niaj hnub mus txi Ntuj pem HUAB TAIS lub Tuam Tsev Teev Ntuj nyob Yes Lus Xas Les, mas lawv yuav rov mus zwm rau Los Npuag, tus vaj Yus Das, ces lawv yuav muab kuv tua.” 28 Nws xav tswv yim tas. Nws muab kub los nchuav tau ob tug mlom nyuj, thiab nws hais rau tsoom pej xeem tias : “Nej mus pem Yes Lus Xas Les ntev dhau lawm. Tsoom His Xas Lais, nej ntsia ntawm no, yog tus Tswv Ntuj coj nej tawm ntawm Hais Nkws Tos teb los.” 29 Yes Los Npuag tsa ib tug mlom nyob Npes Thes thiab ib tug nyob Daas. 30 Tsoom pej xeem nqaum paj nqaum nruas coj tus mlom mus txog Daas. 31 Nws tsa ib lub tsev teev Ntuj nyob ib qhov chaw siab, thiab nws muab ib co neeg xws luag uas tsis yog cov Les Vis los tsa ua Leej Choj. 32 Hnub tim 15 lub yim hli, Yes Los Npuag kom lawv nqaum paj nqaum nruas zoo li cov Yus Das ua kam, thiab nws nce mus txog lub thaj txi Ntuj. Yes Los Npuag txi Ntuj li ntawd nyob Npes Thes rau ob tug mlom nyuj nws ua, thiab nws tsa ib co Leej Choj teev Ntuj nyob Npes Thes.

33 Yes Los Npuag kuj tsis tig los coj tus yam ntxwv tshiab. Nws tseem xaiv tej tus neeg xws li luag los tsa ua Leej Choj nyob saum cov ncov roob. Tus twg xav ua Leej Choj nws cia li tsa ua. 34 Tej ntawd ua kom Yes Los Npuag tsev neeg poob hauv kev txhaum ntau. Vim li ntawd lawv thiaj raug kev ploj, lawv tsis nyob ntiaj teb no ntxiv.

1 Es Lias uas yug los nyob Tis Npis, nyob Nkas Las teb, nws hais rau As Kas tias : “Kuv tuav txog HUAB TAIS lub npe uas kuv tsob hwb, nws yog tus muaj txoj sia, yog His Xas Lais tus Tswv Ntuj. Kuv ceeb toom tias yuav tsis muaj lwg muaj nag los ob peb xyoos. Tsuas kawg yuav muaj thaum kuv kom muaj xwb.” 2 HUAB TAIS hais rau Es Lias tias : 3 “Koj tso thaj chaw no tseg, koj mus rau sab hnub tuaj, koj mus tsiv nraim nyob hauv lub hav dej Kes Lis, nyob ntawm tus dej Yos Las Das toob fab. 4 Koj yuav haus tus dej ntawd. Kuv yuav kom cov uab lag nqa mov rau koj noj nyob ntawd.” 5 Ces Es Lias ua raws li HUAB TAIS hais, nws mus nyob hauv lub hav dej Kes Lis nyob ntawm tus dej Yos Las Das toob fab. 6 Thaum sawv ntxov cov uab lag nqa mov tuaj rau nws noj. Thaum tsaus ntuj lawv nqa nqaij tuaj rau nws noj. Nws haus tus dej ntawd yug siav.
7 Tab sis tau ib ntus los ces tus dej qhuav tas, vim ntuj tsis los nag nyob hauv lub teb chaws. 8 Ces Es Lias hnov HUAB TAIS ib lo lus hais rau nws tias : 9 “Koj sawv kev mus tom lub zos Xas Les Tas uas zwm rau Xis Doos. Koj yuav mus nyob ntawd. Tam sim no kuv qhia ib tug poj ntsuam nyob tod kom nws pub mov rau koj noj.” 10 Es Lias thiaj li sawv kev mus Xas Les Tas. Thaum nws tuaj txog ntawm ntug zos, nws ntsib ib tug poj ntsuam tab tom nrhiav taws rauv. Nws thov tus poj ntsuam tias : “Thov koj mus nqa ib qho dej tuaj pub rau kuv haus mog !” 11 Tus poj ntsuam txawm tig hlo yuav rov mus nqa dej. Es Lias txawm qw rau tus poj ntsuam ntxiv tias : “Thov koj nqa ib qho ncuav mov nyob hauv koj txhais tes tuaj rau kuv noj thiab !” 12 Tus poj ntsuam teb tias : “Kuv tuav txog koj tus HUAB TAIS Tswv Ntuj muaj txoj sia lub npe, kuv hais qhov tseeb tiag ! Kuv tsis muaj ib lub ncuav mov siav lawm. Kuv kawg tshuav me ntsis hmoov nplej nyob hauv lub qab hub xwb. Thiab tshuav me ntsis roj nyob hauv lub qab taig xwb. Zaum no, kuv tseem tab tom yuav tuaj mus nrhiav ib tsuag taws los rauv, tso kuv yuav ua ib lub ncuav mov rau kuv tus tub wb noj. Ces wb yuav nyob tos txog lub caij wb tuag tshaib xwb.” 13 Es Lias hais rau tus poj ntsuam tias : “Koj txhob txhawj, koj xub mus nrhiav taws rauv tso. Ces koj los ua ib lub ncuav mov nqa tuaj rau kuv noj. Koj mam li mus ua rau neb ob niam tub noj. 14 Vim His Xas Lais tus Tswv Ntuj cog lus tias lub hub hmoov nplej yuav tsis txawj tas, lub tais ntim roj yuav tsis txawj qhuav mus txog hnub Tswv Ntuj yuav tso dej los ywg lub ntiaj teb.” 15 Ces tus poj ntsuam mus ua raws li Es Lias qhia. Lawv peb leeg tau noj ncuav mov tsau. 16 Ib ntus ntev loo lub hub rau hmoov nplej tsis txawj tas, lub tais ntim roj tsis txawj qhuav, xws li Tswv Ntuj tau kom Es Lias hais rau tus poj ntsuam.
17 Dua tej xwm ntawd tas, thaum Es Lias tseem nyob hauv lub zos Xas Les Tas, tus niam tsev uas Es Lias mus so hauv, nws tus tub mob heev, ces nws tus tub tuag lawm. 18 Tus niam tsev hais rau Es Lias tias : “Tswv Ntuj tus neeg, puas yog vim koj nyob hauv kuv tsev, ces Ntuj thiaj pom kuv tej txhaum, kuv tus tub thiaj tuag lawd ?” 19 Es Lias hais rau tus poj ntsuam ntawd tias : “Koj muab koj tus tub rau kuv saib.” Ces Es Lias txais tus tub hauv nws niam xub ntiag los, nws puag tus tub mus rau hauv lub paim uas nws pw nyob txheej tsev saud. Nws tso tus me nyuam rau saum txaj. 20 Nws hu txog HUAB TAIS tias : “Kuv tus HUAB TAIS, tus poj ntsuam ntawd txais kuv nyob hauv nws tsev, puas phim yuav cia nws tus tub tuag li ntawd ? Puas yuav cia nws raug txom nyem ?” 21 Ces Es Lias tso cev pw peb zaug rau saum tus me nyuam thiab nws thov HUAB TAIS tias : “HUAB TAIS, kuv tus Tswv Ntuj, kuv thov koj kom tus me nyuam no tus plig rov los nyob hauv nws mas !” 22 HUAB TAIS mloog Es Lias hu txog nws, ces tus me nyuam tus plig rov los nyob hauv tus me nyuam, tus me nyuam ciaj rov los. 23 Es Lias nqa tus me nyuam, nws nqes los, nws muab tus me nyuam rau nws niam, nws hais tias : “Koj ntsia, koj tus tub ciaj lawm.” 24 Tus poj niam teb tias : “Nyem no, kuv paub tseeb tias koj yog Tswv Ntuj tus neeg tiag. Cov lus tawm hauv koj lub ncauj los yog HUAB TAIS cov lus, yog lus tseeb.”

20 Tus vaj As Kas hu tas tsoom His Xas Lais thiab lawv cov yaj saub tuaj nyob saum lub roob Kas Mes. 21 Es Lias txav los ze tsoom sid, nws hais tias : “Nej yuav xuas ob txhais ceg deeg pauv mus txog thaum twg ? Yog tias HUAB TAIS yog Tswv Ntuj ces nej raws nws mas ! Yog tias Npas Has yog Tswv Ntuj ces nej raws Npas Has mas !” Tsoom sid teb tsis tau dab tsi rau Es Lias. 22 Es Lias hais ntxiv tias : “Tshuav kuv ib leeg ua HUAB TAIS tus Yaj Saub xwb, hos Npas Has cov yaj saub muaj plaub puas tsib caug leej. 23 Nej coj ob tug thav nyuj tuaj rau peb. Cov yaj saub Npas Has yuav xaiv ib tug rau lawv. Thaum lawv tua thiab phais tas lawm, mas lawv yuav muab tso rau saum ib co taws, tab sis tsis txhob rauv taws li. Kuv kuj yuav npaj ib tug ntsuag nyuj thiab, kuv kuj yuav tsis rauv taws hlawv. 24 Nej yuav xub hu txog nej tus tswv ntuj lub npe, hos kuv yuav hu txog HUAB TAIS lub npe. Tus tswv ntuj uas tso hluav taws los hlawv cov tsiaj mas tus ntawd thiaj yog tus tseem Tswv Ntuj tiag.” Tsoom sid teb tias : “Zoo kawg.” 25 Ces Es Lias hais rau Npas Has cov yaj saub tias : “Nej xaiv ib tug ntsuag nyuj, nej ua ua ntej vim nej yog cov coob. Nej hu txog nej tus tswv ntuj lub npe xwb, nej tsis txhob rauv taws li.” 26 Lawv muab tus nyuj tua, thaum lawv tseev tas, mas lawv hu txog Npas Has lub npe txij sawv ntxov mus txog tav su, lawv hais tias : “Npas Has, thov koj teb peb mas !” Tab sis tsis hnov ib lub suab li. Lawv dhia, lawv kim caug ntawm lub thaj txi ntuj uas lawv txhim. 27 Thaum txog tav su, Es Lias thuam lawv tias : “Nej qw nrov dua mas ! Nws yog ib tug tswv ntuj, ntshai nws muaj chaw ntxhov siab ntau los nws muaj hauj lwm ntau. Los ntshai nws muaj chaw tawm rooj lawm. Los tej zaus nws tsaug zog lawm. Nej hu tiag mas nws yuav tsim los, nws yeej yuav teb nej xwb !” 28 Lawv haj yam qw nrov dua tuaj thiab lawv xuas ntaj xuas riam los hlais lawv kom ntshav los raws li lawv kev cai ua kam. 29 Thaum tav su dua lawm, lawv cov yaj saub hais li ub li no mus txog lub caij yuav cev cov txim. Tab sis tsis hnov ib lub suab los ib lo lus teb li. 30 Es Lias thiaj hais rau tsoom sid tias : “Nej sawv daws txav los ze kuv.” Sawv daws thiaj txav los ntawm Es Lias. Es Lias thiaj rov tsa HUAB TAIS lub thaj uas puas tas lawm. 31 Es Lias muab kaum ob lub pob zeb raws li Yas Kos kaum ob leeg tub. Yas Kos yog tus uas HUAB TAIS hais rau nws tias : Koj lub npe yuav hu ua His Xas Lais. 32 Es Lias muab cov pob zeb ntawd los txhim ua ib lub thaj rau HUAB TAIS. Nws khawb ib tug kwj ntim taus ob kawg noob ncig lub thaj. 33 Nws teeb cov taws rauv, nws muab tus thav nyuj phais thiab tso rau saum cov taws. 34 Ces nws hais tias : “Nej ntim plaub hub dej thiab nej nqa los nchuav rau saum tus nyuj thiab cov taws.” Lawv ua li ntawd tas. Es Lias hais tias : “Nej ua zaum ob mas !” Lawv tseem ywg dej zaum ob. Es Lias tseem rov hais tias : “Nej ua zaum peb ntxiv mas !” Lawv thiaj ua zaum peb ntxiv. 35 Dej nyab lub thaj txi Ntuj tas, tus kwj kuj puv dej tas. 36 Thaum txog lub caij txi Ntuj, tus Yaj Saub Es Lias txav los hais tias : “HUAB TAIS, uas koj yog Has Nplas Has, His Xas Has thiab His Xas Lais tus Tswv Ntuj, koj ua kom tsoom sid paub tias koj yog tus Tswv Ntuj nyob hauv His Xas Lais mas ! Koj ua kom lawv paub tias kuv yog koj tus tub txib ! Yog vim koj qhia mas kuv thiaj ua tej no. 37 HUAB TAIS, thov koj teb kuv ! Ces tas tsoom pej xeem nyob ntawm no thiaj yuav paub tias koj yog Tswv Ntuj, koj yog tus ua kom lawv lub siab rov tig los cuag koj.” 38 Ces HUAB TAIS cov hluav taws nqes los hlawv tus nyuj thiab cov taws thiab los nqus cov dej nyob hauv tus kwj tas. 39 Tas tsoom sid ntshai poob siab nthav. Tas sawv daws ntog khwb rwg hauv av, lawv hais tias : “HUAB TAIS yog Tswv Ntuj tiag ! HUAB TAIS yog tus tseem Tswv Ntuj tiag !” 40 Es Lias hais rau lawv tias : “Nej ntes Npas Has cov yaj saub, txhob cia ib tug dim !” Lawv ntes cov yaj saub. Es Lias kom lawv coj cov yaj saub mus nram tus kwj deg Kis Soos. Ces Es Lias muab lawv txiav caj dab tas nyob ntawd.

1 As Kas qhia rau nws poj niam Zes Xas Npes txog tas puas tsav yam uas Es Lias tau ua. Nws qhia tias Es Lias tau xuas ntaj tua cov yaj saub cuav tas tib si. 2 Ces Zes Xas Npes tso ib tug neeg xa xov mus rau Es Lias tias : “Yog tag kis tav li lub caij no kuv tseem tsis tau ua kom koj raug tua li lawv, mas tseev kom cov dab tso tas ib puas tsav yam xwv txheej txom nyem los raug kuv !” 3 Ces Es Lias tau ntshai. Nws thiaj khiav mus kom tau cawm nws txoj sia. Thaum nws mus txog Npes Xas Npes nyob Yus Das teb, nws tso nws tus tub txib nyob ntawd. 4 Nws mus ib hnub ke nyob hauv teb chaws suab puam ntxiv. Nws thiaj mus so hauv ib tsob qab ntoo. Nws xav tuag, nws hais tias : “HUAB TAIS, kuv txom nyem txaus lawm ! Thov koj thau kuv txoj sia rov qab mas ! Vim kuv kuj tsis zoo dua kuv cov yawg koob !” 5 Es Lias cia li tso cev pw pem teb ces nws tsaug zog. Tab sis ib tug Tshiab los tsa nws thiab hais rau nws tias : “Sawv los noj mov.” 6 Es Lias rua muag ntsia, nws pom ib lub ncuav mov nyob saum cov pob zeb thiab pom ib plhuaj taub dej. Nws noj lub ncuav mov thiab haus dej tas ces nws rov qab pw dua. 7 Tab sis HUAB TAIS tus Tshiab rov qab los tsa nws tias : “Sawv los noj mov ! Koj tseem tshuav ib ntus kev deb kawg.” 8 Es Lias thiaj sawv tsees los noj mov thiab haus dej tas ces nws rov muaj zog tuaj. Nws thiaj mus kev plaub caug hnub thiab plaub caug hmo, ces nws mus txog Tswv Ntuj lub roob Hos Les.
9 Thaum Es Lias mus txog ntawm Tswv Ntuj lub roob, nws chaws mus hauv lub qhov tsua. Nws pw nyob ntawd. 11 Muaj ib lub suab hais rau nws tias : “Koj tawm mus saum lub roob, koj tos HUAB TAIS.” Ces HUAB TAIS tuaj. Muaj ib nthwv cua ua HUAB TAIS ntej. Yog ib nthwv cua hlob tas nrho phua cov roob thiab ua cov pob tsuas tawg tas. Tab sis HUAB TAIS tsis nyob hauv nthwv cua. Dua li ntawd mas ntiaj teb qeeg tas, tab sis HUAB TAIS tsis nyob hauv qhov qeeg ntawd thiab. 12 Thaum ntiaj teb qeeg dua lawm, muaj ib co hluav taws hla ze ntawd, tab sis HUAB TAIS tsis nyob hauv cov hluav taws. Cov hluav taws dua tas, muaj ib nthwv cua tuaj ntxuj ntxiag. 13 Thaum Es Lias hnov cov cua ntawd mas tam sim ntawd nws muab nws lub tsho tshaj sab los thaiv nws ntsej muag. Ces Es Lias tawm los nyob ntawm rooj tsuas. Nws hnov ib lub suab hu nws tias : “Es Lias, koj ua dab tsi ntawm no ?” 14 Es Lias teb tias : “Kuv kub siab lug rau HUAB TAIS Xas Npas Os, vim cov His Xas Lais tso koj pov tseg. Lawv rhuav koj cov thaj txi Ntuj thiab lawv xuas ntaj tua koj cov Yaj Saub tas. Tshuav kuv ib leeg xwb. Lawv tseem nrhiav kuv tua thiab.” 15 HUAB TAIS hais rau Es Lias tias : “Koj rov mus, koj taug txoj qub ke rov qab mus tom lub hav suab puam Das Mas. Koj mus tsa Has Xas Es ua vaj kav As Las. 16 Koj tsa Yes Hus ua vaj kav His Xas Lais thiab koj pleev Es Lis Xais ua Yaj Saub hloov koj.”
19 Ces Es Lias sawv kev mus. Nws mus nrhiav tau Es Lis Xais uas yog Xas Fas tus tub. Es Lis Xais tab tom laij ib thaj teb uas muaj kaum ob plag. Nws tab tom laij plas kawg. Es Lias hla mus ze ntawm Es Lis Xais, nws pov rhees nws lub tsho tshaj sab rau saum Es Lis Xais xub pwg. 20 Ces Es Lis Xais tso plhuav nws cov nyuj tseg, nws khiav khiav mus caum Es Lias. Nws hais tias : “Koj cia kuv mus hais ob peb lo lus nplij kuv niam thiab kuv txiv tso, ces kuv yuav nrog koj mus.” Es Lias teb tias : “Koj rov mus. Kuv tau ua dab tsi rau koj ?” 21 Es Lis Xais thiaj rov mus, nws muab nws nkawm nyuj tua. Nws muab rab voom los rauv hau nqaij kom siav, ces nws muab faib rau cov neeg nrog nws ua hauj lwm noj, ces nws sawv mus nrog Es Lias, nws ua Es Lias tus tub txib.

1 Nas Npos nyob Yis Les Ees. Nws muaj ib lub vaj txiv cawv nyob puab tus vaj Xas Mas Lias hu ua As Kas lub tsev. 2 As Kas hais zoo li no rau Nas Npos tias : “Koj muab koj lub vaj txiv cawv rau kuv ua kuv lub vaj cog zaub. Vim koj lub vaj txiv cawv twb nyob ze ze kuv tsev. Kuv mam li muab dua ib lub vaj txiv cawv zoo dua rau koj. Los puas yog koj xav yuav nyiaj mas kuv yuav muab nyiaj rau koj.” 3 Tab sis Nas Npos hais rau As Kas tias : “Thov kom HUAB TAIS tsis txhob cia kuv tso kuv cov yawg koob tej qub txeeg qub teg rau koj !” 4 As Kas rov mus tsev, nws chim, nws ua ntsej muag dub nciab, nws tsis zoo siab rau lo lus Nas Npos hais rau nws tias : ‘Kuv yuav tsis tso kuv cov yawg koob tej qub txeeg qub teg rau koj.’ Nws mus pw saum txaj, nws fee plhu, nws tsis xav noj mov. 5 Nws tus poj niam Zes Xas Npes los hais rau nws tias : “Vim li cas koj thiaj chim siab ? Koj tsis noj mov !”
6 As Kas teb tias : “Vim kuv hais rau Nas Npos tias : ‘Muab koj lub vaj txiv cawv rau kuv, kuv mam muab nyiaj rau koj. Los yog koj nyiam, kuv muab dua lwm lub vaj txiv cawv los pauv.’ Tab sis nws hais tias : ‘kuv tsis muab kuv lub vaj txiv cawv rau koj.” 7 Ces Zes Xas Npes hais rau As Kas tias : “Koj kam yog ib tug vaj His Xas Lais diam ! Kav tsij sawv tsees los noj mov. Koj kav tsij zoo siab ! Kuv yuav muab Nas Npos lub vaj rau koj.” 8 Zes Xas Npes yuav As Kas lub npe los sau ib tsab ntawv. Nws ntaus tus vaj lub thwj rau saum tsab ntawv. Nws xa mus rau cov txwj laus thiab cov nom nrog Nas Npos nyob. 9 Nyob hauv tsab ntawv ntawd, Zes Xas Npes sau tias : “Nej tshaj ib lub caij yoo mov. Nej cia Nas Npos mus zaum ntawm tsoom sid hauv ntej. 10 Nej coj ob tug tim khawv los nyob ntawm Nas Npos xub ntiag. Ob tug tim khawv ntawd nkawd yuav liam tias : ‘Koj tau thuam Tswv Ntuj thiab thuam tus vaj !’ Ces nej coj Nas Npos tawm mus nraum zoov thiab nej xuas pob zeb txawb kom nws tuag.” 11 Cov nom tswv thiab cov txwj laus nyob hauv Nas Npos lub nroog sawv daws ua zoo li Zes Xas Npes qhia kom ua nyob hauv nws tsab ntawv nws sau tuaj rau lawv. 12 Lawv yoo mov thiab lawv kom Nas Npos mus zaum ntawm tsoom sid hauv ntej. 13 Ces ob tug tim khawv tuaj sawv ntawm Nas Npos xub ntiag thiab liam tias Nas Npos tau thuam Tswv Ntuj thiab thuam tus vaj. Ces lawv coj Nas Npos tawm ntawm lub nroog mus thiab lawv txawb pob zeb ntaus nws tuag. 14 Lawv ua li ntawd ces lawv tso neeg mus hais rau Zes Xas Npes tias : “Peb tau xuas pob zeb txawb tua Nas Npos tuag lawm.” 15 Thaum Zes Xas Npes hnov tias Nas Npos tuag lawm, nws hais rau As Kas tias : “Koj sawv mus yuav Nas Npos lub vaj txiv cawv los ua koj tug. Nws tsis xav muab rau koj kom nws tau nyiaj. Zaum no nws tsis nyob, nws tuag lawm.” 16 Thaum As Kas hnov tias Nas Npos tuag lawm, ces nws sawv. Nws nqes mus nram Nas Npos lub vaj, nws yuav Nas Npos lub vaj los ua nws tug.
17 HUAB TAIS hais rau Es Lias tias : 18 “Koj sawv mus cuag tus vaj His Xas Lais hu ua As Kas nyob Xas Mas Lias teb. Tam sim no nws nyob hauv Nas Npos lub vaj txiv cawv, nws mus txeeb lub vaj los ua nws tug. 19 Koj yuav mus hais li no rau nws : “HUAB TAIS hais li no: ‘Koj tua neeg thiab koj tseem txeeb nws tug yuav ! Vim li ntawd, Tswv Ntuj hais tias nyob ntawm qhov chaw uas cov dev yaim Nas Npos cov ntshav, mas dev kuj yuav yaim koj cov ntshav thiab.” 20 As Kas hais rau Es Lias tias : “Kuv tus yeeb ncuab, koj caum tau kuv lawm lod ?” Es Lias teb tias : “Kuv caum tau koj lawm, vim koj ua phem. Koj ua qhov tsis ntxim HUAB TAIS siab. 21 Kuv yuav tso kev txom nyem tuaj raug koj. Kuv yuav cheb koj caj ces neeg pov tseg. Kuv yuav rhuav koj cov txiv neej, tsis hais cov ua qhev los cov ua tswv. 22 Kuv yuav ua kom koj tsev neeg raug xwv txheej xws li Yes Los Npuag thiab Npas Sas nkawd ob tsev neeg, vim koj ua kom kuv npau taws thiab ua kom His Xas Lais ua txhaum.” 23 HUAB TAIS kuj foom ib lo lus phem rau Zes Xas Npes tias dev yuav sib huas dua Zes Xas Npes lub cev nyob hauv thaj teb nyob Yis Les Ees. 24 Nyob hauv As Kas lub tsev, tus twg tuag nyob hauv nroog mas dev yuav noj nws, tus twg tuag nyob tom hav xub tsuag mas cov dav yuav noj nws. 25 Tsis muaj ib tug neeg ua phem xws li As Kas ua. Nws ua tej yam tsis haum HUAB TAIS siab vim yog nws tus poj niam ntxias nws. 26 Nws ua raws ib txog kev phem kawg, nws teev dab zoo li cov As Mos uas HUAB TAIS ntaus lawv tawg tas. 27 Thaum As Kas hnov cov lus ntawd, As Kas dua rhe nws cev khaub ncaws, nws mus hnav ntaub tsaj ntxhib npog nws cev nqaij xwb, nws yoo mov thiab nws pw hauv cov ntaub tsaj. Nws maj mam mus kev qeeb qeeb. 28 Ces HUAB TAIS hais rau Es Lias tias : 29 “Koj puas pom tias As Kas yeem ua tus neeg me nyob ntawm kuv xub ntiag ? Vim nws yeem ua tus me li ntawd mas kuv yuav tsis tso xwv txheej los nphav nws. Yog thaum nws tus tub yuav nce ua vaj mas kuv thiaj yuav tso xwv txheej los nphav nws tus tub tsev neeg.”

1 HUAB TAIS xa ib lub khaub zeeg cua tuaj nqa Es Lias mus saum ntuj mas yog zoo li no : Es Lias thiab Es Lis Xais nkawd yuav tawm hauv Zis Nkas mus. 6 Es Lias hais rau Es Lis Xais tias : “Koj nyob ntawm no. HUAB TAIS xa kuv mus txog tus dej Yos Las Das xwb.” Tab sis Es Lis Xais teb tias : “Kuv cog lus tias kuv yuav tsis tso koj tseg li.” Ces nkawd ob leeg mus ntxiv. 7 Thaum nkawd tab tom mus sawv ze ntawm ntug dej Yos Las Das, muaj tsib caug tus tij yaj saub tuaj. Lawv tuaj nres nyob deb ntawm nkawd. 8 Es Lias hle nws lub tsho tshaj sab, nws muab kauv zoj thiab nws muab nplawm cov dej. Tus dej cia li faib ua ob sab, ces nkawd hla dej ko taw tsis ntub dej li. 9 Thaum nkawd hla dhau lawm, Es Lias hais rau Es Lis Xais tias : “Koj thov saib kuv ua puas tau dab tsi rau koj, cheem kuv tseem tsis tau ncaim koj mus ?” Es Lis Xais teb tias : “Kuv thov koj muab koj lub tswv yim ib feem loj los pub rau kuv ua kuv lub cuab tam.” 10 Es Lias hais tias : “Koj thov ib yam nyuaj ! Yog koj pom kuv nce mus saum ntuj mas koj yuav tau txais kuv lub tswv yim. Yog koj tsis pom kuv mas koj yuav tsis tau txais.” 11 Nkawd ke tham li ntawd ke mus kev. Cia li muaj ib lub tsheb hluav taws thiab ob tug nees hluav taws tuaj nyob ntawm nkawd kis nruab nrab. Ces Es Lias nce mus saum lub tsheb ntawd thiab nrog lub khaub zeeg cua mus lawm saum ntuj. 12 Es Lis Xais pom Es Lias mus, nws qw tias : “Txiv ! Txiv ! His Xas Lais lub tsheb thiab nws cov nees !” Ces Es Lis Xais tsis pom ntxiv lawm. Es Lis Xais nthos nkaus nws lub tsho muab dua rhe ua ob daig. 13 Nws khaws nkaus Es Lias lub tsho tshaj sab uas poob rau hauv av. Thiab nws rov qab los ntawm ntug dej Yos Las Das. 14 Es Lis Xais muab Es Lias lub tsho los nplawm cov dej nws hais tias : “Es Lias tus HUAB TAIS Tswv Ntuj nyob qhov twg ?” Nws ntaus cov dej, dej cia li faib kiag ua ob sab, ces Es Lis Xais hla dej.

1 Muaj ib hnub, muaj ib tug poj niam tuaj cuag tus Yaj Saub Es Lis Xais, nws qw qw tias : “Nyuag yaus tsis muaj txiv lawm. Koj paub tias nyuag yaus tus txiv yog ib tug neeg hwm HUAB TAIS zoo. Muaj ib tug neeg uas kuv tau mus txais nyiaj ntawm nws. Zaum no, nws yuav tuaj coj kuv ob tug tub mus ua nws cov qhev.” 2 Es Lis Xais nug nws tias : “Koj xav kom kuv ua dab tsi pab koj ? Koj qhia kuv saib nyob hauv koj tsev tshuav dab tsi ?”
Tus poj niam teb tias : “Nyob hauv nyuag yaus tsev tsis muaj dab tsi kiag li, tsuas tshuav ib qho roj me me xwb.” 3 Es Lis Xais rov hais rau nws tias : “Koj mus qiv kom tau ntau lub hub ntawm koj cov neeg nyob ib ncig ntawd, ces nej peb niam tub los hauv tsev, nej kaw qhov rooj. 4 Koj muab cov roj hliv rau hauv cov hub ntawd. Thaum cov hub puv lawm mas koj nqa mus txawb rau ib qho.” 5 Ces tus poj ntsuam rov mus tsev. Lawv peb niam tub los hauv tsev, lawv kaw qhov rooj xws li tus Yaj Saub qhia. Ob tug tub cev cov hub, leej niam hliv roj rau. 6 Thaum cov hub puv roj tas lawm, leej niam hais rau ob tug tub tias : “Neb nqa ib lub hub los rau kuv ntxiv mas !” Ob tug tub teb tias : “Tsis muaj hub lawm !” Ces tam sim ntawd cov roj thiaj li tu nrho, tsis los ntxiv lawm. 7 Tus poj niam mus qhia tus Yaj Saub Es Lis Xais tias muaj roj zoo li ntawd. Tus Yaj Saub hais rau nws tias : “Koj muab cov roj ntawd muag, koj muab cov nyiaj mus them tus uas koj tau mus txais nws nyiaj. Tshuav npaum li cas nyiaj seem mas koj muab muas noj yug koj tsev neeg.”
8 Muaj ib hnub, Es Lis Xais mus so nyob Xws Nes. Muaj ib tug poj niam nyob txawm ntawd tuaj hu Es Lis Xais mus noj mov. Txij hnub ntawd los, thaum twg Es Lis Xais hla lub zos ntawd mas nws mus so noj mov hauv tus poj niam ntawd lub tsev. 9 Tus poj niam hais rau nws tus txiv tias : “Koj ntsia saib, tam li kuv xav mas tus niaj zaus tuaj so hauv wb tsev, nws yeej yog Tswv Ntuj ib tug neeg siab ntshiab xwb. 10 Cia wb ua ib kem tsev me me nyob saum ru tsev rau nws tau so. Wb muab ib lub txaj, ib lub rooj ua hauj lwm, ib lub rooj zaum thiab ib lub teeb rau hauv kem tsev ntawd. Thaum twg nws tuaj ces cia nws so nyob hauv kem tsev ntawd.” 11 Muaj ib hnub, Es Lis Xais rov tuaj so ntawd, nws thiaj mus pw nyob saum kem tsev siab. 14 Es Lis Xais pom tus poj niam ua zoo rau nws, nws tso nws tus tub txib mus nug tus poj niam Xws Nes tias : “Kuv yuav pab dab tsi rau koj ?” Tus tub txib Zes Has Xis coj tus poj niam lo lus teb los hais tias : “Nws tsis muaj tub ki, thiab nws tus txiv twb laus lawm.” 15 Es Lis Xais hais tias : “Koj mus hu nws los saib !” Tus tub txib mus hu tus poj niam los sawv ntawm qhov rooj. Es Lis Xais hais rau nws tias : “Lwm xyoo rov txog lub caij no mas koj yuav tau ib tug tub los puag.” Tus poj niam teb tias : “Tswv Ntuj tus neeg, koj txhob tso dag rau koj tus ntxhais txib mas !” 16 Xyoo ntawd tus poj niam xeeb tub, rov txog lub caij uas Es Lis Xais hais mas nws yug tau ib tug tub.
25 [Muaj ib hnub, Es Lis Xais nrog nws tus tub txib Zes Has Xis nyob saum lub roob Kas Mes.] Ces tus poj niam Xws Nes uas nws txais kam Es Les Xais nyob hauv nws tsev, nws tuaj txog ze ntawm lub roob Kas Mes. Es Lis Xais pom tus poj niam tuaj txog deb deb, nws hais rau Zes Has Xis tias : “Koj ntsia tus poj Xws Nes tuaj txog ntawd. 26 Koj khiav mus tos nws. Koj nug nws tias : ‘Koj tus txiv thiab koj tus tub nkawd puas noj qab nyob zoo ?” Zes Has Xis nug, ces tus poj niam teb rau Zes Has Xis tias : “Nkawd noj qab nyob zoo thiab.” 27 Tab sis thaum nws tuaj txog ntawm Tswv Ntuj tus neeg xub ntiag nyob saum lub roob, mas nws pe, nws quaj qawm lias Es Lis Xais ob txhais taw. Zes Has Xis xav chua ntia tus poj niam rov qab. Tab sis Tswv Ntuj tus neeg hais tias : “Cia nws ua li ntawd tso, vim nws tu siab kawg. HUAB TAIS tsis tau xub qhia dab tsi txog nws rau kuv.” 28 Tus poj Xws Nes hais tias : “Txiv tswv, thaum ub kuv tau thov ib tug tub ntawm koj. Zaum no kuv tus tub tsis nyob lawm. Ua li cas koj dag kuv ?” 29 Es Lis Xais hais rau Zes Has Xis tias : “Koj sia siv. Koj nthos kuv rab pas nrig. Koj tsuag tsuag mus tsa tus me nyuam. Koj ntsib leej twg ntawm kev koj txhob nrog tham. Leej twg xav nrog koj hais lus mas koj txhob teb rau nws. Koj mus txog lawv tsev, koj yuav tsa kuv rab pas nrig rau saum tus me nyuam uas tuag.” 30 Tab sis tus me nyuam niam hais rau Es Lis Xais tias : “Kuv tuav txog tus HUAB TAIS muaj txoj sia lub npe, kuv cog lus tias yog koj tsis mus mas kuv yuav tsis tso koj tseg.” Ces Es Lis Xais sawv kev mus. 31 Zes Has Xis uas nws ua nkawd ntej, nws xub tuaj txog lawv tsev. Nws mus tsa rab pas nrig rau saum tus me nyuam. Tab sis tus me nyuam tsis hais ib lo lus, nws tsis nti li. Zes Has Xis thiaj rov los cuag Es Lis Xais. Nws hais rau Es Lis Xais tias : “Tus me nyuam tsis xeev los li.” 32 Es Lis Xais tuaj txog hauv lawv tsev, nws pom tus me nyuam tuag pw saum lub txaj uas Es Lis Xais pw kam. 33 Es Lis Xais thiaj mus hauv lub paim, nws kaw qhov rooj, nws thov Tswv Ntuj. 34 Nws nce saum txaj, nws muab nws lub qhov ncauj npuav tus me nyuam lub qhov ncauj. Nws ob lub qhov muag twb tus me nyuam ob lub qhov muag. Nws ob txhais tes tuav tus me nyuam ob txhais tes. Nws lub cev npuab tus me nyuam lub cev. Ib me ntsis tus me nyuam lub cev cia li rov qab sov tuaj. 35 Ces Es Lis Xais mus ncig hauv tsev ob peb lwm, nws rov los hauv lub paim. Nws rov khoov rau saum tus me nyuam lub cev. Ces tus me nyuam txawm txham xya suab tas tus me nyuam thiaj rua muag. 36 Es Lis Xais hu Zes Has Xis los, nws hais rau Zes Has Xis tias : “Koj mus hu tus poj Xws Nes los ntawm no.” Thaum tus poj Xws Nes los txog, Es Lis Xais hais rau nws tias : “Koj coj koj tus tub rov mus.” 37 Tus poj Xws Nes los hauv lub paim, nws pe Es Lis Xais tas ces nws coj nws tus tub mus.
42 Muaj ib tug neeg tuaj ntawm Npas Sas Lis Sas tuaj. Nws nqa ib co mov nplej tshiab tuaj rau tus Yaj Saub Es Lis Xais, yam li nws nqa nees nkaum lub ncuav mov thiab tej tes nplej. Es Lis Xais hais rau nws tus tub txib tias : “Koj muab cov mov no pub rau cov neeg nyob ntawm no noj.” 43 Tab sis tus tub txib teb tias : “Kuv yuav ua zoo li cas faib cov mov no rau ib puas leej neeg noj ?” Es Lis Xais hais tias : “Koj cev rau tsoom neeg ntawd noj mas ! Vim HUAB TAIS tau hais tias sawv daws yuav noj thiab tseem yuav tshuav ib co mov seem.” 44 Tus tub txib cev rau sawv daws noj tsau tas tseem tshuav ib co mov seem, raws li HUAB TAIS hais.

1 Nas Maas, yog tus tswj saib tus vaj As Las Mais pab tub rog nyob Xis Lias teb. Yog ib tug neeg uas tus vaj hwm nws thiab nyiam nws zoo. Yog HUAB TAIS pab nws mas cov As Las Mais thiaj ua rog yeej. Tab sis tus neeg siab loj ntawd mob ruas. 2 Muaj ib zaug cov As Las Mais tuaj lwg His Xas Lais teb. Lawv coj tau ib tug me nyuam ntxhais mus lawm. Tus ntxhais ntawd mus ua Nas Maas tus poj niam tus ntxhais txib. 3 Nws hais rau nws tus niam tsev hais tias : “Kuv tus tswv kheev lam mus thov tus Yaj Saub nyob Xas Mas Lias teb, mas tus Yaj Saub yuav cawm nws dim ntawm nws tus mob xwb !” 4 Nas Maas mus qhia nws tus huab tais tias : “Tus ntxhais tuaj teb chaws His Xas Lais tuaj hais qhov no thiab qhov no.” 5 Tus vaj As Las Mais teb tias : “Koj mus, kuv yuav xa ib tsab ntawv mus rau tus vaj His Xas Lais.” Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam. 6 Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no : “Kuv xa kuv tus tub txib Nas Maas nrog tsab ntawv no. Thov koj kho nws tus mob kom zoo.” 7 Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias : “Kuv puas yog ib tug tswv ntuj txawj ua kom neeg ciaj los tuag ywj kuv siab ? Ua cas tus ntawd thiaj yuav kom kuv kho ib tug neeg mob ruas ? Qhov tseeb mas yog nws xav nrhiav lus rau kuv xwb.” 8 Tab sis thaum Es Lis Xais hnov tias tus vaj dua nws cov ris tsho, mas nws tso neeg mus hais rau tus vaj tias : “Vim li cas koj dua koj cov ris tsho ? Kom nws tuaj cuag kuv saib ! Nws thiaj yuav paub tias muaj ib tug Yaj Saub nyob His Xas Lais teb.” 9 Nas Maas caij tsheb tuaj txog, nws theem ntawm Es Lis Xais qhov rooj. 10 Es Lis Xais tso neeg mus hais rau nws tias : “Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab huv tuaj.” 11 Nas Maas npau taws. Nws rov mus. Nws hais tias : “Kuv vam tias ntshai nws yuav tawm tuaj, nws yuav hu txog nws tus HUAB TAIS Tswv Ntuj lub npe thiab nws yuav plhws kuv qhov nqaij mob, ces kuv yuav zoo hlo no. 12 Tus dej As Npas Nas thiab tus dej Pas Pas nyob Das Mas teb tsis zoo dua cov dej nyob His Xas Lais teb lod ? Yog kuv mus da cov dej nyob Das Mas teb kuv yuav tsis zoo tuaj sai dua lod ?” Ces Nas Maas lem loo nees rov qab. Nws npau taws heev. 13 Tab sis nws cov tub txib txav los hais rau nws tias : “Txiv, yog tus Yaj Saub kom koj ua ib yam nyuaj dua mas koj twb yuav ua xwb puas yog ? Tab yog nws hais tias koj mus da dej ces koj yuav zoo mas koj haj yam yuav zoo siab ua lod ?” 14 Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Es Lis Xais hais, ces nws cov nqaij rov zoo tuaj xws li tus me nyuam mos tej nqaij. Nws huv tas lawm. 15 Nas Maas nrog nws cov tub txib rov los tom Tswv Ntuj tus neeg xub ntiag, nws hais tias : “Txij no mus, kuv paub tias tsis muaj dua lwm tus Tswv Ntuj nyob tas ntiaj teb. Tsuas kawg muaj ib tug xwb nyob His Xas Lais teb ! Nyem no, kuv thov koj txais cov paj tshab uas koj tus tub txib cev rau koj no !” 16 Es Lis Xais teb tias : “Kuv tuav txog HUAB TAIS lub npe, yog tus muaj sia, yog tus kuv teev. Kuv cog lus tseeb tias kuv yuav tsis txais ib yam paj tshab li !” Nas Maas txhob txhob Es Lis Xais kom txais cov paj tshab. Tab sis Es Lis Xais tsis kam txais. 17 Ces Nas Maas hais tias : “Yog koj tsis kam txais ib yam paj tshab, mas thov koj pub ib co av txaus kuv ob tug luj thauj, vim txij no mus koj tus tub txib yuav tsis txi lwm cov tswv ntuj ntxiv, nws tsuas txi HUAB TAIS tib leeg xwb.”

1 Thaum As Thas Lias uas yog Os Kos Xias niam hnov hais tias nws tus tub tuag lawm, mas As Thas Lias pib muab caj ces vaj tua tu noob nrho. 2 Tab sis Yes Hos Xes Npas nyiag nqa Os Kos Xias tus tub Yuas khiav. Nws muab Yuas rau nws ib tug niam yug mov tu nyob hauv kem tsev uas muaj cov poj niam cov txaj pw. Ces As Thas Lias thiaj tua tsis tau Yuas. 3 Yes Hos Xes Npas zais Yuas li ntawd tau rau xyoo nyob hauv HUAB TAIS lub Tuam Tsev. Rau xyoo ntawd yog As Thas Lias kav lub teb chaws. 4 Thaum lub xya xyoo nqig, tus Leej Choj Yes Hos Yas Das tso neeg mus hu cov xab txheeb Kas Lias thiab cov peeb tuaj cuag nws nyob hauv HUAB TAIS lub Tuam Tsev. Nws nrog lawv cog lus ces nws muab tus vaj tus tub Yuas rau lawv pom. 9 Cov xab txheeb ua tas raws li tus Leej Choj Yes Hos Yas Das qhia lawv. Lawv nyias coj nyias cov neeg tuaj cuag tus Leej Choj Yes Hos Yas Das. 10 Tus Leej Choj muab tus vaj Das Vis cov hmuv thiab cov leem phiaj rau lawv. 11 Cov tub rog sawv ua tej leej ntawm lub tuam tsev ces kaum sab nrad mus rau ces kaum sab ped, lawv tuav hmuv ntawm tes, lawv sawv ncig lub thaj txi Ntuj thiab ncig lub Tuam Tsev. 12 Ces Yes Hos Yas Das coj tus vaj tus tub Yuas tawm los, Yes Hos Yas Das muab lub mom teev kub rau tus me nyuam vaj ntoo, muab cov kauj tes rau nws coj, thiab pleev roj tsa nws ua vaj. Ces sawv daws npuaj teg thiab qw tias : “Tus vaj siav ntev ! Tus vaj nyob txhiab niag vam nyeej !” 13 As Thas Lias hnov tsoom pej xeem thiab cov tub rog suab qw ntsuag qees, nws tuaj xyuas tsoom pej xeem nyob tom lub Tuam Tsev. 14 Thaum As Thas Lias pom tus vaj sawv ntsug saum lub sam thiaj raws li txoj cai, thiab pom cov neeg tshuab hom nyob ze tus vaj, tas tsoom pej xeem ke qw ke tshuab hom, mas As Thas Lias dua rhe nws cev khaub ncaws, nws qw tias : “Lawv ntxeev siab tso kuv pov tseg ! Lawv ntxeev siab tso kuv pov tseg !” 15 Ces tus Leej Choj Yes Hos Yas Das ceeb toom rau cov thawj tub rog tias : “Nej coj As Thas Lias tawm ntawm lub Tuam Tsev mus. Yog leej twg raws nws nej xuas ntaj tua leej twg !” Tus Leej Choj hais li no vim nws xav tias yuav tsis txhob cia As Thas Lias tuag nyob hauv lub Tuam Tsev Teev Ntuj. 16 Lawv ntes As Thas Lias, coj nws los txog nws lub tsev ntawm lub qhov rooj nees, lawv thiaj muab nws tua nyob ntawd. 17 Yes Hos Yas Das nrog tus vaj thiab tsoom pej xeem cog lus rau HUAB TAIS tias lawv yuav ua HUAB TAIS haiv neeg. Tus vaj thiab tsoom pej xeem kuj sib cog lus. 18 Lawv ua li ntawd tas ces sawv daws mus tom lub tsev teev Npas Has. Lawv muab lub tsev rhuav, muab cov mlom cov duab, cov thaj txi Npas Has tsoo pov tseg tas. Lawv muab tus Leej Choj Npas Has hu ua Mas Taas tua nyob ntawm cov thaj txi Npas Has. 20 Tas tsoom sid sawv daws zoo siab. Thiab lub nroog nyob ntsiag to. Lawv muab As Thas Lias tua nyob hauv tus vaj lub Tuam Tsev.

5 Tus vaj As Xis Lias tuaj txeeb tas lub teb chaws thiab nws vij lub tsheej Xas Mas Lias tau peb xyoos. 6 Thaum Os Xes ua vaj tau cuaj xyoos lawm, tus vaj As Xis Lias ntaus tau lub tsheej Xas Mas Lias. Nws coj cov His Xas Lais mus nyob txim nyob As Xis Lias teb. Nws coj lawv mus nyob Has Las, nyob ntawm tus ntug dej Has Npos thiab nyob hauv cov nroog Mes Dias. 7 Cov xwm tshwm sim li ntawd yog vim cov His Xas Lais ua txhaum rau lawv tus HUAB TAIS Tswv Ntuj. HUAB TAIS twb yog tus coj lawv tawm ntawm Hais Nkws Tos teb los, thiab pab lawv dim ntawm tus vaj Fas Las Oos tes. Hos cov His Xas Lais mus teev lwm cov dab. 8 HUAB TAIS tau ntiab cov pej kum haiv neeg khiav, HUAB TAIS ua kom lawv swb cov His Xas Lais. Hos cov His Xas Lais teev lawv cov dab. 13 HUAB TAIS twb tau kom cov Yaj Saub xub ceeb toom rau His Xas Lais thiab rau Yus Das tias : “Nej tso nej tus yam ntxwv phem pov tseg, nej tig los coj kuv cov kev cai lij choj raws li txoj cai kuv kom kuv cov tub txib Yaj Saub ceeb toom rau nej cov yawg koob los.” 14 Tab sis cov His Xas Lais tsis mloog. Lawv ua caj qwb txhav xws li lawv cov poj yawm txwv koob uas tsis ntseeg txog HUAB TAIS Tswv Ntuj. 15 Lawv thuam Tswv Ntuj cov kev cai lij choj thiab lo lus nws tau nrog lawv cov yawg koob cog. Lawv thuam HUAB TAIS cov lus ceeb toom. 18 Ces HUAB TAIS tu siab heev rau cov His Xas Lais. Nws muab His Xas Lais txav deb ntawm nws ntsej muag. Tsuas tshuav tib lub xeem Yus Das xwb.

9 Xes Nas Kes Lis rov qab tso dua ib co tiam lis tuaj cuag Es Xes Kias, nws hais rau lawv tias : “Nej mus hais zoo li no rau Es Xes Kias. Vaj Yus Das, koj tso siab rau koj tus Tswv Ntuj dhau, koj yuav ceev faj kom nws txhob dag koj. Vim koj tus Tswv Ntuj hais rau koj tias Yes Lus Xas Les yuav tsis poob rau hauv tus vaj As Xis Lias txhais tes. 11 Vaj Yus Das, koj twb hnov luag piav tej yam uas cov vaj As Xis Lias ua rau pej kum teb lawm. Lawv muab pej kum teb rhuav tas ! Koj puas xav tias koj yuav dim ? 12 Kuv cov yawg koob tau rhuav ntau lub teb chaws, yam li Nkos Xas teb, Has Laas teb, Les Xes teb thiab cov Es Des uas nyob Tes Npas Xas. 13 Lawv tej dab qhuas tau pab lawv tej teb chaws zoo li cas lawm ? Cov vaj kav Has Mas teb, kav As Pas teb, Xes Fas Vas Yis teb thiab Hes Nas teb, lawv sawv daws tib si dua qhov twg tas lawm ?” 14 Thaum cov tiam lis cev tsab ntawv ntawd rau Es Xes Kias, mas Es Xes Kias txais los nyeem. Ces nws mus pem HUAB TAIS lub Tuam Tsev, nws nthuav tsab ntawv nyob ntawm HUAB TAIS xub ntiag. 15 Es Xes Kias thov zoo li no nyob ntawm HUAB TAIS xub ntiag. “HUAB TAIS, His Xas Lais tus Tswv Ntuj, koj yog tus zaum nyob saum cov Tshiab Kes Lus Npis, koj tib leeg yog tus Tswv Ntuj saib tas ib puas xyeem teb chaws muaj vaj nyob ntiaj teb no. Koj yog tus tau tsim lub ntuj lub teb. 16 HUAB TAIS, koj tig ntsej los mloog ! HUAB TAIS, koj rua muag los ntsia ! Koj hnov Xes Nas Kes Lis cov lus, nws tso neeg tuaj tsawm tus Tswv Ntuj muaj txoj sia. 17 “HUAB TAIS, cov As Xis Lias tau rhuav cov kuj cuab thiab cov teb chaws. Qhov ntawd, muaj tseeb tiag ! 18 Lawv muab pej kum cov dab qhuas pov rau hauv hluav taws, vim cov dab qhuas ntawd lawv tsis yog ib co tswv ntuj. Yog neeg txhais tes tau ua cov dab ntawd. Cov dab ntawd yog ntoo, yog pob zeb. Cov vaj As Xis Lias thiaj tau rhuav lawv tib si. 19 Tab sis nyem no, HUAB TAIS, peb tus Tswv Ntuj, thov koj cawm peb dim ntawm Xes Nas Kes Lis tes. Kuv thov koj ! Ces txhua lub teb chaws muaj vaj nyob ntiaj teb no yuav paub tias koj tib leeg yog Tswv Ntuj, HUAB TAIS !” 20 Ces His Xais, As Mos tus tub tso neeg mus hais rau Es Xes Kias tias : “His Xas Lais tus HUAB TAIS Tswv Ntuj hais li no : kuv hnov koj zaj thov Ntuj uas koj hais txog tus vaj As Xis Lias Xes Nas Kes Lis lawm. 21 HUAB TAIS hais li no txog Xes Nas Kes Lis : Xis Yoos hnyos koj thiab thuam koj ! Yes Lus Xas Les co hau luag koj ! 31 Vim tias yuav muaj ib pab seem tawm hauv Yes Lus Xas Les los. Ib co neeg yuav dim ntawm lub roob Xis Yoos. HUAB TAIS lub siab nyiam peb zoo dua luag tej, nws yuav ua li ntawd rau peb. 32 HUAB TAIS hais txog tus vaj As Xis Lias tias tus vaj As Xis Lias yuav tsis tau chaws mus hauv lub nroog. Nws yuav tsis tau tua xub mus rau hauv. Nws yuav tsis tau tuav leem phiaj mus ntaus lub nroog.
Nws yuav tsis tau nqa av los meem ib txog kev mus txeeb lub ntsa zeb. 33 Nws yuav rov mus taug txoj kev coj nws tuaj rov qab mus. Nws yuav tsis tau chaws mus hauv lub nroog no. Yog HUAB TAIS lo lus ceeb toom. 34 Kuv yuav txuag Yes Lus Xas Les, thiab yuav cawm Yes Lus Xas Les, vim kuv thiab vim kuv tus tub txib Das Vis.” 35 Hmo ntawd HUAB TAIS tus Tshiab tawm mus ntaus ib puas yim caum tsib txhiab tus As Xis Lias tuag nyob hauv lawv lub yeej. Thaum kaj ntug ntsia qhov twg los tsuas pom neeg tuag pawg lug xwb. 36 Ces Xes Nas Kes Lis tso lub yeej tseg, nws khiav rov mus nyob Nis Nis Vas.

8 Tus thawj Leej Choj His Kis Yas Hus hais rau tus ceev ntawv hu ua Xas Fas tias : “Kuv nrhiav tau phau ntawv Txoj Cai no nyob hauv lub Tuam Tsev teev HUAB TAIS.” Ces His Kis Yas Hus muab phau ntawv rau Xas Fas nyeem. 9 Xas Fas mus ntawm tus vaj thiab hais rau nws tias : “Koj cov tub txib muab cov nyiaj nyob hauv lub Tuam Tsev nchuav tas lawm thiab muab faib rau cov neeg ua hauj lwm kho HUAB TAIS lub Tuam Tsev Teev Ntuj lawm.” 10 Xas Fas kuj hais rau tus vaj tias : “Tus Leej Choj His Kis Yas Hus muab tau ib phau ntawv rau kuv.” Ces nws nyeem phau ntawv rau tus vaj mloog. 11 Tus vaj hnov cov lus nyob hauv phau ntawv Txoj Cai, mas nws dua nws cov khaub ncaws. 12 Nws ceeb toom rau tus Leej Choj His Kis Yas Hus, rau As His Kas, rau As Npos, rau Xas Fas thiab rau As Xas Yas tias : 13 “Nej mus pab kuv thiab tsoom pej xeem nug HUAB TAIS txog cov lus nyob hauv phau ntawv nyuam qhuav nrhiav tau no. Ntshai HUAB TAIS npau taws heev kawg rau peb, vim peb cov yawg koob tsis tau mloog nws lus xws li nyob hauv phau ntawv, thiab tsis tau ua raws li lawv sau tseg.”

1 Ces tus vaj hu tas tsoom txwj laus nyob Yus Das teb thiab nyob Yes Lus Xas Les tuaj. 2 Tus Vaj nce mus pem HUAB TAIS lub Tuam Tsev. Tas tsoom neeg nyob Yus Das teb thiab nyob Yes Lus Xas Les, tas cov Yaj Saub, cov Leej Choj, tas tsoom pej xeem me hlob me yau kuj nrog tus vaj mus. Tus vaj nyeem tas phau ntawv cog lus uas nrhiav tau nyob hauv HUAB TAIS lub Tuam Tsev rau sawv daws mloog. 3 Tus vaj sawv nyob ze saum lub sam thiaj, nws cog lus rau HUAB TAIS tias nws yuav raws HUAB TAIS txoj kev, nws yuav coj HUAB TAIS lus qhia thiab mloog cov lus ceeb toom. Nws yuav muab tas nws lub siab thiab nws tus plig los ua raws li lo lus cog sau tseg nyob hauv phau ntawv ntawd. Tas tsoom pej xeem kuj npuab tus vaj cog lus.

8 Zos Yas Kis muaj kaum yim xyoo ces nws ua vaj. Nws kav Yes Lus Xas Les tau peb hlis xwb. Nws niam hu ua Nes Hus Tas. Nws nyob Yes Lus Xas Les. 9 Zos Yas Kis ua tsis ntxim HUAB TAIS siab ib yam li nws txiv. 10 Thaum ntawd tus vaj Nas Npws Kos Dos Nos Xos cov thawj tub rog tuaj ntaus Yes Lus Xas Les. Lawv tuaj vij lub nroog tas. 11 Tus vaj Nas Npws Kos Dos Nos Xos kuj tuaj ntaus Yes Lus Xas Les, hos nws cov neeg vij lub tsheej. 12 Ces tus vaj Yus Das Zos Yas Kis thov swb tus vaj Npas Npis Los. Tus vaj nws niam, nws tus thawj tub rog, cov tub ncig thiab nws cov neeg sam sawv daws nrog tus vaj thov swb tus vaj Npas Npis Los. Tus vaj Npas Npis Los coj lawv mus kaw hauv tsev loj faj. Yog xyoo yim uas Nas Npws Kos Dos Nos Xos ua vaj los lawm. 13 Nas Npws Kos Dos Nos Xos nqa tas cov nyiaj cov kub uas nyob hauv HUAB TAIS lub Tuam Tsev, thiab nyob hauv tus vaj lub tuam tsev. Tej twj nyiaj thiab kub uas Xas Los Moos tau nchuav los ua kab xwm rau HUAB TAIS lub Tuam Tsev mas Nas Npws Kos Dos Nos Xos muab tsoo tawg tas, thiaj muaj raws li HUAB TAIS lo lus ceeb toom. 14 Nws coj tas tsoom nom tswv, cov kws nyiaj kws hlau mus tas. Nws coj ib vam leej nyob Yes Lus Xas Les mus, nws tseg cov neeg pluag nyob hauv lub teb chaws xwb. 15 Nws coj tus vaj Zos Yas Kis mus nyob txim nyob Npas Npis Los, nws coj tus vaj niam, cov poj niam, nws coj cov nom, tus vaj cov neeg sam huv si mus nyob txim nyob Npas Npis Los. 17 Tus vaj Npas Npis Los tsa Zos Yas Kis tus txiv ntxawm hu ua Mas Tas Nyas ua vaj hloov Zos Yas Kis. Tus vaj Npas Npis Los hloov Mas Tas Nyas npe hu ua Xes Des Xias.

1 Xes Des Xias ntxeev siab rau tus vaj Npas Npis Los. Thaum Xes Des Xias ua vaj tau cuaj xyoos lawm. Nas Npws Kos Dos Nos Xos coj tas nws tsoom tub rog tuaj ntaus Yes Lus Xas Les. Nws tuaj tsa yeej ncig Yes Lus Xas Les tas. 2 Nws khawb qhov taub ncig lub tsheej. Nws vij lub nroog li ntawd mus txog xyoo 11 uas Xes Des Xias ua vaj. 3 Lub plaub hlis xiab cuaj, lub nroog tshaib plab, tsoom pej xeem tsis muaj dab tsi noj lawm. 4 Ces lawv tho ib lub qhov qhib lub ntsa zeb. Hmo ntuj tus vaj nrog nws cov tub rog khiav. Lawv tawm ntawm lub qhov rooj nyob ze tus vaj lub loog. Cov Kas Ntes puav lub nroog tas, ces tus vaj Xes Des Xias taug txoj kev mus nram lub hav As Las Npas. 5 Cov tub rog Kas Ntes caum tus vaj mus txog lub tiaj Yes Lis Kos. Thaum ntawd tus vaj cov tub rog tawg khiav mus deb tus vaj. 6 Cov Kas Ntes thiaj ntes tau tus vaj, lawv coj tus vaj rov los nyob Lis Nplas, lawv coj nws tuaj cuag tus vaj Npas Npis Los kom tau txiav txim rau nws. 7 Tus vaj Npas Npis Los txiav Xes Des Xias cov tub caj dab rau Xes Des Xias ntsia, lawv ua li ntawd tas lawv muab Xes Des Xias qhov muag tshum kom dig, muab nws khi ces lawv coj nws mus Npas Npis Los teb. 8 Thaum Nas Npws Kos Dos Nos Xos ua vaj nyob Npas Npis Los tau kaum cuaj xyoos lawm, lub tsib hlis xiab xya, tus lwm txheeb Nes Npws Xas Las Das mus hauv lub tsheej Yes Lus Xas Les. 9 Nws hlawv HUAB TAIS lub Tuam Tsev, hlawv tus vaj lub tuam tsev thiab tas cov tsev nyob hauv Yes Lus Xas Les. 10 Cov tub rog Kas Ntes rhuav lub ntsa zeb xov lub tsheej Yes Lus Xas Les. 11 Tus thawj tub rog Nes Npws Xas Las Das muab cov neeg tseem nyob hauv lub nroog thiab cov ntxeev siab rau tus vaj Npas Npis Los huv si, nws coj lawv sawv daws mus nyob txim nyob Npas Npis Los. 12 Nws tseg cov ua liaj ua teb ib nrab xwb, cia lawv nyob ua qoob loo thiab zov cov vaj txiv cawv.

3 Das Vis hu tas tsoom His Xas Lais tuaj sib sau nyob Yes Lus Xas Les. Lawv yuav kwv HUAB TAIS lub Xab Cog Lus mus rau pem qhov chaw uas Das Vis tau npaj tseg. 4 Nws hu As Loos cov tub thiab hu cov Les Vis tuaj. 15 Cov Les Vis muab ib co nqaj kwv Tswv Ntuj lub Xab Cog Lus nyob saum lawv xub pwg, xws li Mais Xes tau ceeb toom tseg raws li HUAB TAIS lo lus. 16 Ces Das Vis hais rau cov ua thawj nyob hauv cov Les Vis kom cov kws hu nkauj nqa lawv cov twj ua paj nruag los nyob hauv qhov chaw uas sawv daws yuav hnov cov zaj nkauj nrog paj nruag ua kom sawv daws zoo siab lom zem.

1 Lawv coj Tswv Ntuj lub Xab mus hauv lub Tsev Tsam Phooj uas Das Vis txhob txwm npaj cia txais lub Xab. Lawv muab lub Xab txawb nyob hauv nruab nrab lub Tsev Tsam Phooj. Lawv hlawv tsiaj txi Tswv Ntuj thiab lawv ua tej thaj txi Ntuj noj cov txim. 2 Thaum Das Vis hlawv tsiaj txi Ntuj thiab ua cov thaj txi Ntuj noj txim tas mas Das Vis tuav txog HUAB TAIS lub npe, thiab nws foom hmoov zoo rau tsoom sid.

6 Tus vaj Xas Los Moos thiab tas tsoom His Xas Lais tuaj sib txoos nyob ze ntawm lub Xab. Lawv txi nyuj txi yaj ntau tas nrho suav tsis txheeb. 7 Cov Leej Choj coj HUAB TAIS lub Xab Cog Lus los txawb rau ntawm qhov chaw, nyob hauv nruab nrab lub Tuam Tsev Teev Ntuj, nyob hauv Kem Ntshiab, nyob hauv cov Tshiab Kes Lus Npis cov qab tis. 8 Cov Tshiab Kes Lus Npis nthuav lawv cov tis los roos lub Xab thiab cov nqaj. 9 Cov nqaj ntawd ntev txaus kom yus tuaj ntawm Kem Ntshiab yus pom tus ntsis nqaj, tab sis nyob deb mas tsis pom. Cov nqaj ntawd tseem nyob ntawd los txog tav no. 10 Tsis muaj dab tsi nyob hauv lub Xab, tsuas muaj ob daig txiag zeb uas thaum cov His Xas Lais tawm ntawm Hais Nkws Tos teb los. Tswv Ntuj tau nrog lawv cog lus. Nyob ntawm lub roob Hos Les Mais Xes thiaj muab ob daig txiag zeb ntawd tso nyob hauv lub Xab. 13 Cov tshuab hom thiab cov hu nkauj lawv sawv daws ib txhij hu nkauj thiab siv cov twj paj nruag cav txog HUAB TAIS. Vim nws siab zoo, nws hlub neeg mus ib txhiab ib txhis.”

2 Xas Los Moos hais tias : “HUAB TAIS, koj tau txiav siab tias koj yuav nyob hauv ib twv huab tsaus nti. Kuv tau ua ib lub tsev zoo rau koj, thiab koj nyob hauv lub tsev no mus ib txhiab ib txhis.”

17 Yes Hos Yas Das tuag tas, cov ntaus thawj Yus Das tuaj pe tus vaj. Zaum ntawd, mas tus vaj mloog lawv cov lus thov. 18 Cov Yus Das tso HUAB TAIS lub Tuam Tsev pov tseg, tso lawv cov yawg koob tus Tswv Ntuj pov tseg. Lawv mus teev cov dab tej ncej tej mlom. Vim lawv ua txhaum li ntawd mas Tswv Ntuj npau taws rau Yus Das thiab rau Yes Lus Xas Les. 19 Ib co Yaj Saub sawv tuaj hais rau cov Yus Das kom lawv rov qab los cuag HUAB TAIS. Tab sis thaum cov Yaj Saub cev Tswv Ntuj cov lus rau lawv. Cov Yaj Saub zeem tseeb kawg. Tab sis cov Yus Das tsis quav ntsej rau. 20 Tswv Ntuj lub tswv yim los nyob hauv Ntxas Kas Lias uas nws yog tus Leej Choj Yes Hos Yas Das tus tub. Ntxas Kas Lias sawv ntsug hais rau tsoom sid tias : “Tswv Ntuj hais li no : Vim li cas nej hla HUAB TAIS cov lus qhia ? Nej ho tsis tau ib yam dab tsi zoo li ! Vim nej tso HUAB TAIS pov tseg lawm mas HUAB TAIS tso nej pov tseg thiab.” 21 Ces cov Yus Das sib koom siab hiam Ntxas Kas Lias. Lawv mloog tus vaj qhia lawv kom lawv xuas pob zeb los tua nws tuag nyob ntawm HUAB TAIS lub Tuam Tsev qhov rooj. 22 Tus vaj Yuas hnov qab Ntxas Kas Lias txiv lub txiaj ntsim, nws muab Ntxas Kas Lias tua. Thaum Ntxas Kas Lias yuav tuag nws qw tias : “HUAB TAIS pom, nws yuav nug nej txog qhov nej ua no.” 23 Xyoo tshiab tuaj, cov tub rog As Las Mais sawv los ntaus Yuas. Lawv mus txog Yes Lus Xas Les thiab Yus Das teb. Lawv tua tas cov thawj tub rog thiab xa cov qauv mus rau tus vaj Das Mas. 24 Cov tub rog As Las Mais tuaj tsawg leej kawg, tab sis HUAB TAIS cia lawv yeej ib pab tub rog coob, vim cov Yus Das tso HUAB TAIS pov tseg, lawv tso lawv cov yawg koob tus Tswv Ntuj pov tseg. Cov As Las Mais muab txim rau Yuas. 25 Thaum lawv tso Yuas mas Yuas mob heev. Yuas cov tub txib koom siab hiam Yuas, lawv xav pauj rau nws vim nws tua tus Leej Choj Yes Hos Yas Das tus tub pov tseg. Ces lawv muab Yuas tua nyob hauv nws lub txaj. Nws tuag tas, lawv muab nws faus nyob hauv Das Vis lub tsheej. Tab sis lawv tsis faus nyob ze cov vaj tej ntxa.

14 Lub caij ntawd nyob Yus Das teb, cov Thawj Leej Choj, thiab tsoom pej xeem sawv daws ua tsis ncaj rau Tswv Ntuj. Lawv ua tej yam phem xws li cov pej kum haiv neeg. Lawv ua ntau yam tsis huv rau lawv cov yawg koob tus HUAB TAIS Tswv Ntuj lub Tuam Tsev uas Tswv Ntuj qee ua nws tug nyob Yes Lus Xas Les. 15 Lawv cov yawg koob tus HUAB TAIS Tswv Ntuj xa ib co tiam lis tuaj tsis tseg rau lawv, vim nws xav txuag nws haiv neeg thiab nws lub Tuam Tsev. 16 Lawv luag cov neeg uas nws xa tuaj. Lawv thuam nws cov lus. Lawv hnyos nws cov Yaj Saub. Ces Tswv Ntuj lub siab thiaj npau tsis muaj dab tsi yuav cheem tau nws. 19 Tswv Ntuj xa tus vaj Kas Ntes tuaj hlawv Tswv Ntuj lub Tuam Tsev, lawv rhuav lub ntsa zeb xov Yes Lus Xas Les, lawv zes hluav taws hlawv cov tuam tsev kom kug tas, lawv muab tej toob xib muaj nqis kim kim ua piam tseem tas. 20 Ces cov uas lawv tau dim ntawm ntsis ntaj ntsis hmuv mas Nas Npws Kos Dos Nos Xos coj lawv mus nyob txim nyob Npas Npis Los teb. Ces His Xas Lais ua tus vaj Npas Npis Los qhev, lawv tseem ua nws cov tub thiab nws cov xeeb ntxwv qhev los txog lub caij uas cov vaj Pes Xis tuaj nyob Npas Npis Los. 22 Thawj xyoos uas Kws Los ua vaj Pes Xis mas Tswv Ntuj tuaj tshoj Kws Los siab. Ces Kws Los ua raws li lo lus uas HUAB TAIS qhia rau Yes Les Mias. Kws Los tshaj lus ceeb toom mus thoob nws lub teb chaws tias : 23 “Tus vaj Pes Xis Kws Los hais li no : HUAB TAIS, tus Tswv kav lub ntuj, nws tso tas txhua haiv neeg nyob ntiaj teb no rau hauv kuv xib teg. Nws muab txoj hauj lwm no rau kuv ua, kuv yuav txhim ib lub Tuam Tsev teev nws nyob Yes Lus Xas Les nyob Yus Das teb. Li ntawd, nyob hauv kuv tsoom pej xeem, leej twg yog haiv His Xas Lais mas kom Tswv Ntuj nrog nws nyob, thiab kom nws rov mus pem Yes Lus Xas Les mas !”

1 Thawj xyoo uas Kws Los pib ua vaj nyob Pes Xis teb, HUAB TAIS xav ua raws li nws lo lus uas Yes Les Mias tau hais. HUAB TAIS tuaj tshoj Kws Los lub tswv yim ces Kws Los tus vaj Pes Xis thiaj tshaj ceeb toom rau nws lub teb chaws tas tib si tias : 2 “Tus vaj Kws Los uas kav Pas Xis teb hais li no : HUAB TAIS Tswv Ntuj, muab tas cov teb chaws nyob ntiaj teb rau kuv kav. Nws xav kom kuv ua txoj haum lwm no : kuv yuav txhim ib lub Tuam Tsev teev nws nyob Yes Lus Xas Les nyob Yus Das teb. 3 Nyob hauv nej, leej twg yog Tswv Ntuj haiv neeg mas kom Tswv Ntuj nrog nej nyob ! Thiab kom nws mus pem Yes Lus Xas Les uas nyob Yus Das teb, kom nws mus txhim lub Tuam Tsev teev HUAB TAIS uas yog His Xas Lais tus Tswv Ntuj. Yog tus Tswv Ntuj nyob Yes Lus Xas Les. 4 Tas txhia haiv neeg uas nej muaj ib co His Xas Lais nrog nej nyob, mas nej yuav muab nyiaj, muab kub, muab toob xib los muab tsiaj thauj nra tuaj pab cov His Xas Lais. Nej kuj nqa paj tshab tuaj pab ua Tswv Ntuj lub Tuam Tsev nyob Yes Lus Xas Les.” 5 Ces cov txiv tsev Yus Das thiab Npes Yas Mis, cov Leej Choj, cov Les Vis thiab tas cov neeg uas Tswv Ntuj tshoj lawv lub tswv yim, sawv daws sawv mus pem Yes Lus Xas Les kom tau txhim HUAB TAIS lub Tuam Tsev. 6 Cov neeg nyob ob cag kuj pab lawv. Lawv muab nyiaj muab kub, muab toob xib, muab tsiaj thauj nra thiab pub ntau yam muaj nqes thiab paj tshab pab lawv dawb dawb. 7 Cov twj nyob hauv HUAB TAIS lub Tuam Tsev uas Nas Npws Kos Dos Nos Xes nqa ntawm Yes Lus Xas Les mus rau hauv lub Tuam Tsev teev nws tus tswv ntuj, mas Kws Los tso neeg mus nqa cov twj ntawd rov los. 8 Kws Los uas yog tus vaj Pes Xis, nws muab cov twj ntawd rau tus saib nyiaj Mis This Das, Mis This Das suav cov twj ntawd thiab nws muab rov rau tus nom Yus Das Xes Npas Xas. 11 Tas huv tib si lawv suav muaj 5,400 lub twj taig nyiaj thiab kub. Thaum cov His Xas Lais nyob txim rov los rau Yes Lus Xas Les, mas Xes Npas Xas nqa cov twj ntawd tib si rov los rau Yes Lus Xas Les.

1 Hnub ntawd lawv ua raws li tus vaj Das Lis Yus cov lus ceeb toom. Lawv mus tshawb cov tsev ceev ntawv nyob Npas Npis Los. 2 Ces nyob hauv lub tsheej Es Npas Tas uas nyob hauv cov Mes Dias lub xeev, lawv nrhiav tau ib kauj ntawv muaj cov lus sau tseg zoo li no : “Yuav nco ntsoov qhov no : 3 Thawj xyoos uas tus vaj Kws Los ua vaj, tus vaj Kws Los tau hais tias : hais txog Tswv Ntuj lub Tuam Tsev uas nyob Yes Lus Xas Les, mas yuav rov qab tsa lub Tuam Tsev kom muaj ib qho chaw txi Ntuj thiab ib qho chaw nqa paj tshab tuaj hlawv. Lub tsev ntawd qhov siab yuav siab li rau caum tshim, qhov dav yuav dav li rau caum tshim. 4 Yuav muaj peb txheej phab ntsa, yuav muaj ob txheej ntoo. Nyiaj txiag, yog tus vaj yuav siv kom tau ua. 5 Tseem hais qhov no ntxiv : cov twj kub thiab nyiaj uas ib txwm nyob hauv lub Tuam Tsev tas tib si uas Nas Npws Kos Dos Nos Xos tau nqa ntawm Yes Lus Xas Les mus rau Npas Npis Los lawm, mas yuav xa cov twj ntawd tib si rov qab. Tas puas tsav yam yuav rov qab mus nyob nws qhov qub chaw, nyob hauv Tswv Ntuj lub Tuam Tsev nyob Yes Lus Xas Les.” 13 Ces tus nom Pes Xis uas hu ua Tas Tes Nais thiab cov nrog nws ua ib pab, lawv ua raws nraim li cov lus uas tus vaj Das Lis Yus xa tuaj. 14 Cov txwj laus Yus Das txhim lub Tuam Tsev ntxiv. Ob tug Yaj Saub As Nkais thiab Ntxas Kas Lias pab txhib sawv daws. Lawv txhim lub Tuam Tsev Teev Ntuj kom tiav raws li tsoom His Xas Lais tus Tswv Ntuj thiab raws li cov vaj Kws Los thiab Das Lis Yus qhia. 16 Cov His Xas Lais ua ib lub hnub nyoog lom zem, lawv ua cov kab ke qee lub Tuam Tsev ntawd rau Tswv Ntuj. 17 Lawv muab ib puas tus heev nyuj, ob puas tus laug yaj, plaub puas tus yaj me los txi Ntuj, thov kom Tswv Ntuj zam His Xas Lais cov txhaum. 18 Ces lawv tsa kom muaj cov Leej Choj thiab muaj cov Les Vis raws li cov txheej neeg ua kab xwm tsob hwb Tswv Ntuj lub Tuam Tsev nyob Yes Lus Xas Les, raws li cov lus sau tseg nyob hauv Mais Xes cov ntawv. 19 Cov neeg mus nyob txim uas lawv rov los lawv ua lub hnub nyoog Hla, yog lub ib hlis xiab kaum plaub.

1 Ua li ntawd tas, mas cov ua thawj los hais rau Es Nras tias : “Tsoom His Xas Lais cov Leej Choj, thiab cov Les Vis tsis txiav cov neeg nyob hauv lub teb chaws uas lawv mus taug kev teev dab, yam li cov Kas Nas Has, cov His Tis, cov Pes Lis Ntxis, cov Zes Npus, cov Muas, cov Hais Nkws Tos thiab cov As Mos. 2 Cov His Xas Lais ntawd thiab lawv tsoom tub mus yuav poj niam nyob hauv cov haiv neeg ntawd cov ntxhais. Li ntawd, haiv neeg ntshiab nrog cov neeg ib txwm nyob hauv lub teb chaws no sib xyaws tas lawm. Cov nom tswv, cov txwj laus yog cov xub ua thawj ntxeev siab li ntawd.” Thaum kuv hnov cov lus ntawd, kuv dua rhe kuv lub tsho, 3 kuv dob kuv cov plaub hau, kuv rho kuv cov hwj txwv. Kuv zaum, kuv lub siab ntxhov hnyo. 4 Tas cov neeg uas lawv hwm tsoom His Xas Lais tus Tswv Ntuj, lawv pom qhov ntxeev siab ntawd mas lawv tuaj nyob ncig kuv. Ntawm kuv, mas kuv zaum twj ywm, kuv lub siab ntxhov hnyo mus txog lub caij txi Ntuj yav tsaus ntuj.

3 Ces Ses Kas Nias hais rau Es Nras tias : “Peb tau hla peb tus Tswv Ntuj lus, peb tau yuav ib co poj niam pej kum neeg. Tab yog peb ua li ntawd mas tseem tshuav chaw tso siab rau His Xas Lais. 4 Peb yuav cog lus nyob ntawm Tswv Ntuj xub ntiag tias peb yuav nrauj cov poj niam pej kum tib si thiab nrauj lawv tej me nyuam tib si. Peb xav mloog txiv tswv lus ntuas thiab mloog cov neeg hwm peb tus Tswv Ntuj tej lus qhia. Peb kav tsij ua raws txoj cai ntag !”

1 Xyoo nees nkaum uas As Tas Xes Ntxes ua vaj, yog lub 4 hlis (Nis Xaas). Thaum ntawd kuv ua tus kav xwm saib cawv, ces kuv mus ce cawv rau tus vaj. Los txog tav no kuv tsis tau ua ntsej muag mluas ib zaug li. 2 Ces hnub ntawd tus vaj thiaj hais rau kuv tias : “Vim li cas koj ua ntsej muag mluas li kod ? Koj twb tsis mob. Ntshai yog muaj ib yam dab tsi nyob hauv koj siab xwb !” Kuv txawm ntshai. Ces kuv hais rau tus vaj tias : 3 “Thov kom vaj nyob ntev niaj mus ntau xyoo ! Ua cas kuv thiaj yuav tsis mluas li no ? Vim lub tsheej uas kuv niam kuv txiv lawv tej ntxa nyob twb puas tas lawm, tej rooj loog kub hnyiab tas.” 4 Tus vaj hais rau kuv tias : “Koj xav thov dab tsi ?” 5 Kuv thov Tswv Ntuj thiab kuv teb tus vaj tias : “Yog vaj zoo siab thiab pom zoo, mas kuv xav thov koj kheev kuv mus Yus Das teb, kuv yuav rov qab mus txhim lub tsheej uas kuv cov yawg koob lawv tej ntxa nyob hauv.” 6 Tus vaj nug kuv tias : “Koj yuav mus ho ntev ? Thaum twg koj mam rov los ?” Tus poj vaj kuj zaum nyob ntawm nws tus txiv ib sab thiab. Kuv teem ib lub hnub nyoog uas zoo li haum tus vaj siab, ces nws kheev kuv mus. 7 Kuv tseem thov tus vaj tias : “Yog tus vaj zoo siab mas thov muab ntawv rau kuv nqa mus rau cov vaj txheeb nyob ntawm tus dej Aws Fas Tes sab tim ub, lawv thiaj yuav kheev kuv hla lawv teb chaws mus txog Yus Das teb. 8 Thiab muab ib daig ntawv mus rau As Xas uas yog tus saib vaj lub loog kom nws muab ntoo rau kuv ua lub yeej cov qhov rooj nyob ze lub Tuam Tsev Teev Ntuj thiab ua lub ntsa loog thiab lub tsev kuv yuav nyob.” Tus vaj tso lus rau kuv ua. Vim kuv tus Tswv Ntuj siab zoo txhais tes nyob saum kuv.

33 Thaum tus nom saib Xas Mas Lias teb hu ua Xas Npas Las hnov tias peb cov Yus Das rov qab los tsa lub ntsa loog, mas nws npau taws heev thiab meem txom kawg. 34 Nws thuam cov Yus Das, nws hais rau nws cov kwv tij thiab rau cov Xas Mas Lias nplua nuj tias : “Cov Yus Das ntawd lawv pib ua dab tsi li ntawd ? Lawv xav ua ib hnub kom tas nrho lod ? Lawv puas yuav ua tau kom cov pob zeb ntawd ciaj sia tuaj ? Cov pob zeb ntawd lawv khawb hauv tej pawg av lwj los xwb thiab cov pob zeb twb po tas lawm !”

2 Cov yeeb ncuab sawv daws cog lus tias lawv yuav tuaj ntaus Yes Lus Xas Les thiab yuav tuaj rhuav kuv. 3 Ces peb hu txog peb tus Tswv Ntuj tuaj pov hwm lub tsheej thiab peb tsa ib co zov keeb nruab hnub hmo ntuj kom tau txuag peb ntawm cov yeeb ncuab. 4 Tsoom Yus Das kuj hais tias : “Cov nqa pob zeb lawv qaug zog dhau. Tej pob zeb tawg tas tsis zoo yuav muaj ntau dhau, ntshai peb yuav tsa tsis tau lub ntsa loog li !” 5 Nyob tog ub, cov yeeb ncuab hais tias : “Tos thaum lawv tsis nco ceev faj mas peb cia li mus tshwm plaws hauv lawv. Ces peb yuav muab lawv tua kom tag. Ces lawv txoj hauj lwm yuav tas li ntawd !” 6 Tab sis muaj ib co Yus Das nyob ze cov yeeb ncuab tuaj hais qhia peb kaum zaus tias : “Lawv tuaj tas qhov txhia chaw tuaj ntaus nej !” 7 Ces peb tso neeg mus zov nyob rov theem nram hav, nram tej thaj chaw do, nram qab ntsa loog. Kuv cia tsoom sid nyias nrog nyias tsev neeg thiab nyias tuav nyias cov ntaj, nyias cov hmuv thiab cov hneev. 8 Kuv pom tias lawv ntshai, ces kuv sawv, kuv hais rau cov nom, cov xov thawj thiab rau tas tsoom sid tias : “Nej tsis txhob ntshai cov neeg ntawd. Nej nco txog Tswv Ntuj uas nws loj tas nrho thiab muaj zog tas nrho. Nej ntaus rog thaiv nej cov kwv tij, nej cov tub cov ntxhais, nej cov poj niam thiab nej tsev neeg !” 9 Thaum peb cov yeeb ncuab hnov tias peb paub txhua yam lawm, Tswv Ntuj ua kom peb hnov lawv tus txheej txheem lus uas lawv yuav tuaj ntaus peb, mas lawv khiav rov qab. Ces peb sawv daws rov qab mus ua peb tej hauj lwm tsa lub ntsa loog. 10 Tab sis txij hnub ntawd los, kuv cov neeg ib nrab xwb thiaj ua hauj lwm. Ib nrab mas lawv tuav ntaj tuav hmuv nqa leem phiaj thiab hnav lub tsho hlau thaiv hauv siab, lawv nyob txuag tas tsoom Yus Das uas ua hauj lwm tsa lub ntsa loog. 11 Cov neeg nqa nra kuj tuav ntaj tuav hmuv, lawv ib txhais tes ua hauj lwm, ib txhais tes tuav rawv ntaj. 12 Tab cov ua hauj lwm tsa lub ntsa loog tsis kav lawv nyias txib nyias rab ntaj ntawm duav. Ib tug tshuab raj kub twg sawv ntawm kuv ib sab. 13 Kuv hais rau cov ntaus thawj, cov xov thawj thiab rau tsoom sid sawv daws tias : “Peb qhov chaw ua hauj lwm dav thiab loj heev, peb ib leeg nyob ib ncua deb luag tej, 14 mas yog nej hnov suab hom nrov sab twg tuaj, mas nej yuav khiav los sib sau nyob ua ke ntawm sab ntawd. Ces peb tus Tswv Ntuj yuav pab nej ntaus cov yeeb ncuab kom nej yeej.” 15 Peb ua hauj lwm li ntawd txij thaum kaj ntug txoog mus txog thaum tsaus ntuj cov hnub qub tawm tuaj.

1 Tas tsoom pej xeem sawv daws tuaj sib sau nyob ntawm lub tshav ntawm lub qhov rooj dej. Lawv kom tus thoob xwm Es Nras nqa phau ntawv Mais Xes txoj cai uas HUAB TAIS qhia kom His Xas Lais coj. 2 Ces tus Leej Choj Es Nras nqa phau ntawv txoj cai tuaj tso ntawm lub Txoos hauv ntej. Nyob hauv lub Txoos muaj cov txiv neej, cov poj niam thiab cov me nyuam paub tab. Hnub ntawd yog hnub xiab ib lub xya hli. 3 Nyob ntawm lub tshav ncaj lub qhov rooj dej, Es Nras nyeem ntawv txij thaum nyuam qhuav kaj ntug mus txog hnub ntseg. Nws nyeem rau cov poj niam cov txiv neej thiab cov me nyuam paub tab sawv daws mloog. Sawv daws cug pob ntseg zoo mloog txoj cai. 4 Tus thoob xwm ntawv Es Nras sawv nyob saum ib lub sam thiaj uas lawv txhob txwm npaj rau nws sawv. 5 Es Nras qhib phau ntawv, sawv daws pom nws zoo. Vim nws nyob qhov chaw siab dua sawv daws. Thaum nws pib qhib phau ntawv mas tsoom sid sawv tsees. 6 Es Nras pib cav txog tus HUAB TAIS Tswv Ntuj nyob siab. Tas sawv daws tsa tes rau saum ntuj thiab teb tias : “Ua li ! Ua li !” Ces tas tsoom pej xeem pe HUAB TAIS, lawv ntsej muag khoov ti av. 7 Cov Les Vis piav txoj cai rau tsoom sid uas sawv ntsug mloog nyob ntawd. 8 Ces Es Nras nyeem Tswv Ntuj txoj cai nyob hauv ntawv. Nws txhais lub ntsiab kom sawv daws to taub zoo. 9 Tus Leej Choj Thoob Xwm Es Nras hais rau tsoom pej xeem tias : “Hnub no, yog ib hnub ntshiab rau nej tus HUAB TAIS Tswv Ntuj ! Nej tsis txhob nyob tej tug mluas mlob, nej tsis txhob quaj !” Nws hais li no vim thaum sawv daws hnov cov lus nthuav txoj cai mas sawv daws quaj. 10 Nws tseem hais ntxiv tias : “Nyem no, nej mus noj nqaij noj mov, haus dej haus cawv, nej nqa ib feem mus faib rau cov tsis tau npaj dab tsi. Hnub no yog ib hnub ntshiab rau peb tus HUAB TAIS ! Nej tsis txhob tu siab ! HUAB TAIS chaw zoo siab yog nej lub loog zeb !” 11 Cov Les Vis kom tsoom sid nyob twj ywm, lawv hais tias : “Nej tswm seeb mas ! Nej tsis txhob quaj ! Vim hnub no yog hnub ntshiab, nej txhob tu siab.” 12 Ces tas tsoom sid mus noj mov haus cawv, lawv xa txhiam xws noj rau cov tsis muaj. Sawv daws ua tej yam lom zem loj, vim lawv to taub cov lus uas cov Les Vis tshaj rau lawv mloog.

1 Tos Npis zaj kwv huam. Tos Npis yog Tos Npis Es tus tub. Tos Npis Es yog As Nas Nis Es tus tub. As Nas Nis Es yog As Dus Es tus tub. As Dus Es yog Nkas Npas Es tus tub. Lawv yog As Xis Es cov xeeb ntxwv. Tos Npis yog xeem Nes Tas Lis. 2 Thaum Xas Mas Nas Xas ua vaj nyob As Xis Lias teb, ces lawv coj Tos Npis mus nyob txim. Tos Npis lub teb chaws yog nyob Tis Npes, uas nyob naj fab Kes Des Nes Tas Lis, nyob pem toj siab Nkas Lis Lais teb. 3 Kuv yog Tos Npis. Tas kuv sim neej kuv ua raws txoj kev tseeb thiab kuv xyaum ua qhov zoo xwb. Kuv tau muab ntau yam pub rau kuv cov kwv tij, thiab rau kuv haiv neeg nrog kuv nyob txim nyob Nis Nis Vas, nyob As Xis Lias teb. 4 Yav kuv hluas, kuv nyob His Xas Lais teb. Kuv lub xeem Nes Tas Lis ncaim ntawm Das Vis tsev, ces lawv tsis mus pem Yes Lus Xas Les. Tab sis Yes Lus Xas Les yog lub nroog uas tas cov xeem His Xas Lais xaiv los ua lawv qhov chaw txi Ntuj. Thiab yog nyob Yes Lus Xas Les thiaj muaj lub Tuam Tsev uas sawv daws txhim rau HUAB TAIS mus li txheej dhau txheej. HUAB TAIS nyob hauv lub Tuam Tsev ntawd. 5 Kuv cov kwv tij thiab kuv lub xeem Nes Tas Lis sawv daws txi tus mlom nyuj uas tus vaj His Xas Lais Yes Los Npuag tau ua nyob lub zos Das nyob pem cov hauv roob Nkas Lis Lais. 6 Ntau zaus kawg, kuv ib leeg xwb mus teev Ntuj pem Yes Lus Xas Les, kom kuv tau ua raws li txoj kev cai uas ib tug His Xas Lais yuav tsum coj mus li. Kuv mus pem Yes Lus Xas Les, kuv coj thawj phaum txiv ntoo thiab thawj phaum tsiaj txhu, nrog cov nyuj uas kuv muab rau cov Leej Choj. Thiab kuv nqa thawj phaum plaub yaj mus. 7 Kuv muab tej ntawd rau cov Leej Choj xeem As Loos kom lawv muab txi Ntuj. 8 Thiab kuv pub cawv pub nplej pub txiv ntoo rau cov Les Vis ua hauj lwm nyob Yes Lus Xas Les. 9 Thaum kuv hlob tiav hluas lawm, kuv yuav ib tug poj niam nyob hauv peb cov kwv tij, nws hu ua As Nas. Wb muaj ib tug tub uas kuv tis npe rau nws hu ua Tos Npias. 10 Thaum lawv coj peb tuaj txog As Xis Lias teb, mas kuv tuaj nyob txim nyob Nis Nis Vas. Kuv cov kwv tij thiab kuv haiv neeg sawv daws lam tau lam noj xws li cov neeg teev dab. 11 Kuv li mas kuv caiv tsis noj lawv tej zaub tej mov. 12 Vim kuv npuab kuv tus Tswv Ntuj tas siab, 13 mas nws thiaj ua kom Xas Mas Nas Xas nyiam kuv. Kuv mus muas cov toob xib uas Xas Mas Nas Xas xav siv, kuv mus pab nws ua luam. 14 Kuv mus muas toob xib rau nws txog Mes Dias teb. Kuv ua txoj hauj lwm ntawd mus txog hnub nws tuag. Kuv tso ib co hnab nyiaj rau hauv Nkas Npas Es tsev, uas nws yog Nkas Nplis tus kwv, nyob hauv lub zos Las Nkes nyob Mes Dias teb. Cov hnab ntawd ntim tau kaum nras nyiaj. 15 Thaum Xas Mas Nas Xas tuag, nws tus tub Xes Nas Kes Lis nce ua vaj. Ces luag tsis pub hla ciam teb ntxiv. Yus xav mus Mes Dias teb tsis tau. 16 Thaum Xas Mas Nas Xas tseem nyob, kuv pub ntau yam rau kuv cov kwv tij His Xas Lais. 17 Kuv muab mov rau cov neeg tshaib noj thiab muab khaub ncaws rau cov liab qab hnav. Thaum kuv pom tej tus qauv tuag uas luag muab pov tseg rau ntawm lub ntsa loog Nis Nis Vas sab nraud mas kuv kuj tau coj mus faus. 18 Kuv kuj tau faus peb cov neeg uas Xas Mas Nas Xas muab tua thaum nws khiav Yus Das teb rov los. 19 Muaj ib tug neeg nyob Nis Nis Vas mus taug xaiv qhia tus vaj tias kuv yog tus nyiag faus cov qauv tuag ntawd. Ces thaum kuv hnov tias tus vaj paub lawm thiab nws tso neeg nrhiav kuv tua, mas kuv ntshai kuv thiaj nyiag kev khiav. 20 Tus vaj tuaj lwg kuv me cuab yeej cuab tam yuav tas tib si. Kuv me nyiaj txiag, tas puas tsav yam poob tas. Kuv tsuas tshuav kuv poj niam As Nas thiab kuv tus tub Tos Npias xwb. 21 Kuv khiav tsis tau muaj plaub caug hnub, tus vaj ob tug tub rov los muab nkawd txiv tua, ces nkawd khiav mus pem cov roob As Las Las. Nws tus tub As Xas Las Doos sawv ua vaj. As Xas Las Doos hu kuv tus kwv As Nas Es tus tub hu ua As His Kas los nrog nws ua thoob xwm saib koob ncuab txhab nyiaj thiab nws tswj kev ua luam nyob hauv lub teb chaws. 22 As His Kas pab kuv, ces kuv rov qab los nyob Nis Nis Vas.

1 Thaum As Xas Las Doos ua vaj, kuv thiaj tau kev rov los tsev nyob Nis Nis Vas. Lawv thiaj tso kuv poj niam As Nas thiab kuv tus tub Tos Npias rov los nrog kuv nyob. Thaum txog peb lub Ntees Tsib Caug, peb ua ib pluag qav loj. Lawv npaj ib roog qav loj rau kuv noj. Kuv tso cev pw ntawm rooj mov. 2 Lawv nqa lub rooj los rau kuv thiab nqa ob peb yam nqaij los rau kuv noj. Ces kuv hais rau kuv tus tub Tos Npias tias : “Me tub, koj mus nrhiav nyob hauv peb cov kwv tij nyob txim nyob Nis Nis Vas saib puas muaj ib tug pluag uas nws tseem muaj lub siab ntseeg txog Ntuj, koj coj nws los nrog kuv noj kuv pluas mov. Koj mus mog, me tub ! Kuv nyob ntawm no tos koj rov los tso.” 3 Tos Npias thiaj mus nrhiav ib tug neeg pluag nyob hauv peb cov kwv tij lawm. Tab sis ib me ntsis nws rov los hu kuv tias : “Txiv !” Kuv teb tias : “Dab tsi, me tub ?” Nws hais tias : “Txiv, lawv nyuam qhuav muab peb ib tug neeg tua lawm, lawv muab nws zawm caj dab tuag, lawv muab nws coj tuaj pov rau ntawm tshav kiab, nws lub cev tseem nyob ntawd.” 4 Ces kuv tso plhuav kuv pluas mov tseg tsis kov li. Kuv khiav ceev ceev mus txog ntua, kuv nkaus hlo tus neeg tuag kwv tom kiab los. Kuv muab zais rau hauv ib kem tsev pw tos kom lub hnub poob qho tso, kuv mam coj mus faus. 5 Kuv thiaj mus ntxuav cev tas, kuv los noj kuv pluas mov ntxuag kua muag. 6 Kuv nco txog tus Yaj Saub As Mos cov lus uas nws seev txog Npes Thes tias : “Nej tej hnub nyoog nqaum paj nqaum nruas yuav hloov ua hnub nyoog ntoo xyom. Nej tej suab hu nkauj yuav hloov ua suab nyiav.” 7 Ces kuv quaj. Thaum hnub poob qho lawm, kuv mus khawb tau ib lub qhov, kuv muab kuv tus tuag faus rau hauv. 8 Cov neeg nyob ze kuv luag luag kuv tias : “Saib ! Nws rov qab tsis ntshai lawm. Thawj zaug nws twb tau khiav, nyem no, nws tseem rov qab nyiag faus cov neeg tuag dua !” 9 Hmo ntawd, kuv da dej tas, kuv mus nraum peb lub tshav, kuv mus pw ntawm taw ntsa loog. Sov sov ces kuv pw las tshav. 10 Kuv tsis paub tias nyob ncaj saum qhov chaw kuv pw, muaj ib co noog ua zes rau saum phab ntsa. Txawm muaj ib tawb quav noog poob nthav sov so los rau hauv kuv ob lub qhov muag. Kuv ob lub qhov muag thiaj qaus. Kuv coj mus rau cov kws tshuaj kho. Tab sis pheej rau tshuaj rau mas pheej haj yam mob heev tuaj. Ces kuv cia li ua neeg dig muag. Kuv tsis pom kev li ntawd tau plaub xyoos los. Kuv cov kwv tij nrog kuv tu siab kawg. As His Kas yug kuv tau ob xyoos ces nws mus dua Es Lis Mais teb lawm. 11 Thaum ntawd kuv poj niam As Nas ua hauj lwm, nws muab plaub yaj los tooj ua xov thiab nws ntos ntaub. 12 Lawv tuaj thov nws ua ces lawv them nqi rau nws. Hnub tim 7 lub peb hlis, kuv poj niam ua tiav tus ntaub rau lawv. Lawv them nqe rau nws tas tib si thiab lawv tseem pub ib tug tshis rau nws coj los ua noj ib pluag. 13 Thaum nws los txog tsev, kuv hnov tus tshis quaj. Kuv hu kuv poj niam tias “Tus tshis ntawd los qhov twg los ? Yog nyiag xwb mas coj tam sim no rov mus rau nws tus tswv. Peb tsis muaj cai noj tej yam nyiag los.” 14 Kuv poj niam hais tias : “Yog lawv pub rau kuv, ntxiv kuv tus nqi zog xwb !” Kuv tsis ntseeg. Kuv kom kuv poj niam cab rov mus rau cov tswv vim tias kuv pab kuv poj niam txaj muag rau tus tshis ntawd. Ces kuv poj niam teb tias : “Koj niaj hnub pub rau cov neeg thov khawv, koj niaj hnub ua zoo zoo xwb, tej koj ua ntawd dua qhov twg tas lawm ? Sawv daws paub tias koj tau ib niag thooj ntag ?”

1 Kuv poj niam hais li ntawd mas tu kuv siab tas nrho, kuv xyu tej suab thiab kuv kua muag poob. Kuv thiaj hais zaj teev Ntuj no tias : 2 “HUAB TAIS, koj siab ncaj, koj ua qhov twg yog qhov ncaj. Koj tej kev tsuas yog txiaj ntsim thiab qhov tseem ceeb xwb. Koj yog tus txiav txim rau lub ntiaj teb. 6 Nyem no, koj ua rau kuv raws li koj nyiam. Thov koj thau kuv ntawm lub neej no mus. Kuv xav dim ntawm lub ntiaj teb no, kuv xav rov qab mus ua av xwb. Yog kuv tuag mas zoo dua kuv ciaj. Rau qhov kuv raug lawv lam tau lam cem kuv, tu kuv siab loj tas nrho ! HUAB TAIS, kuv tos koj tuaj cawm kuv ntawm txoj kev txom nyem no. Thov koj cia kuv mus nyob lub teb chaws kuv yuav so mus li. HUAB TAIS, thov koj tsis txhob fee koj lub ntsej muag rau kuv.”
7 Tib hnub ntawd, Xas Las uas yog Las Nkus Es tus ntxhais nyob Es Npas Tas nyob Mes Dias teb kuj raug nws txiv ib tug ntxhais txib thuam nws thiab. 8 Vim tias lawv twb muab nws pub tshoob rau xya tus txiv lawm, tab sis tus dab phem As Mos Des uas nws phem tshaj plaws hauv cov dab phem, muab nws cov txiv tua tuag tas tib si, tsis pub lawv tau nrog Xas Las ua neej li. Ces tus ntxhais txib hais tias : “Yog koj tua koj cov txiv xwb mas ! Koj twb yuav txiv xya zaus lawm, koj txoj hmoov tsis zoo ib zaug li ! 9 Tsis yog vim koj cov txiv tuag tas ces koj thiaj yuav muaj cai ua ntxhov rau peb ! Koj cia li mus raws koj cov txiv qab mas ! Kom xwv peb tsis txhob tau pom koj ib tug tub los ib tug ntxhais li !” 10 Hnub ntawd, Xas Las tu siab, nws quaj ib hnub. Nws nce mus saum nws txiv lub paim, nws npaj tias nws yuav mus dai tuag nyob saud. Tab sis nws ho xav tau tias : “Nyob tsam ib me ntsis luag tej yuav hiam kuv txiv ! Lawv yuav hais tias : ‘Koj muaj ib tug nyuag ntxhais rau koj hlub xwb, koj tseem tsis muaj hmoo, nws tseem dai tuag lawm thiab !’ Kuv tsis xav ua kom kuv txiv tu siab li ntawd. Nws twb laus laus lawm. Ntshai kuv yuav tsis txhob dai tuag. Kuv yuav thov HUAB TAIS ua kom kuv tuag, kom kuv thiaj tsis hnov luag tej thuam kuv ntxiv.” 11 Tam sim ntawd, Xas Las tsa tes tig mus ntawm qhov rais, nws thov Ntuj tias : “HUAB TAIS siab zoo, koj nto koob meej ! Xav kom koj lub npe nto moo mus ib txhiab ib txhis. 15 Kuv twb muaj xya tus txiv tsis nyob lawm. Kuv tseem yuav nyob hauv ntiaj teb no ntxiv ua tus dab tsi ? Yog koj tsis xav kheev kom kuv tuag mas thov koj hlub kuv thiab. Kuv tsis xav hnov luag tej hais lus tub qaug kuv ntxiv lawm !” 16 Hnub ntawd, Tos Npis thiab Xas Las nkawd ob zag thov ntuj nce mus txog pem Tswv Ntuj lub hwj chim. 17 Tswv Ntuj thiaj xa Las Fais tuaj kho nkawd kom zoo. Las Fais yuav tuaj laws tej tawv dawb dawb nyob saum Tos Npis qhov muag kom zoo thiab rov pom kev tuaj. Thiab Las Fais tuaj yuav Las Nkus Es tus ntxhais los ua Tos Npias poj niam, nws tuaj cawm Xas Las ntawm tus dab phem As Mos Des uas phem tshaj plaws lwm cov dab. Vim Tos Npias yog tus muaj cai xub yuav Xas Las dua lwm cov tib si. Thaum lub caij Tos Npis los nraum tshav puam los rau hauv tsev, Xas Las kuj tab tom nqes saum nws txiv kem tsev pw los thiab.

1 Hnub ntawd, Tos Npis nco txog cov nyiaj uas nws muab tso tseg rau hauv Nkas Npais tsev nyob lub zos Las Nkes nyob Mes Dias teb. 2 Nws xav twj ywm hauv siab tias : “Kuv twb nyuam qhuav thov kom Ntuj sau kuv txoj sia mus, ntshai kuv yuav tsum hu kuv tus tub Tos Npias los, kuv yuav qhia kuv cov nyiaj rau nws tso kuv mam li tuag.” 3 Tos Npis hu nws tus tub los ntawm nws, nws hais tias : “Thaum kuv tuag lawm, koj ua ib lub ntees tuag zoo thiab loj rau kuv. Koj yuav hwm koj niam, koj yuav hlub nws thiab yuav tsis txhob tso nws pov tseg ib hnub li mog ! Koj yuav ywj nws siab tsis txhob ua kom nws muaj chaw tu siab. 4 Koj yuav nco ntsoov tias koj niam tau txom nyem npaum li cas los nqa koj nyob hauv nws plab, thiab tu koj hlob. Thaum twg nws nyob puv ib puas nees nkaum xyoo, koj yuav muab nws coj mus los nrog kuv nyob hauv ib lub ntxa xwb mog ! 7 Koj yuav nco txog luag tej thiab. Koj yuav qee tej yam uas koj muaj los pub rau luag tej. Koj tsis txhob fee ib zaug rau tus neeg pluag, ces Tswv Ntuj yuav tsis fee ntsej muag rau koj thiab. 12 “Me tub, koj yuav tsis txhob ua tej yam tsis zoo los tsis raws kev cai mog !
Yog koj yuav poj niam, mas koj yuav mus yuav ib tug nyob hauv peb haiv neeg, uas nws muaj tib co roj ntsha zoo li peb. Tsis txhob mus xaiv dua lwm haiv neeg uas tsis txheeb peb, vim peb yog cov Yaj Saub cov xeeb ntxwv. 14 Koj yuav tsis txhob tos txog tag kis tso koj mam them nqe zog rau cov koj ntiav ua hauj lwm rau koj, koj yuav them tam sim ntawd kiag. 15 Koj tsis txhob haus cawv kom qaug, tsis txhob coj lub neej tsis txawj cheem yus lub cev. Tsis txhob ua tej yam uas koj tsis nyiam kom luag ua rau koj. 16 Koj pub mov rau cov neeg tshaib noj, pub ris tsho rau cov liab qab hnav. 18 Ib tug neeg thoob tsib hais ib lo lus qhia koj mas koj yuav mloog nws lo lus. Tsis txhob hla luag lo lus zoo. 20 “Me tub ! Nyem no kuv hais qhia koj tias kuv tau tso kaum nras nyiaj tseg rau hauv Nkas Npais tsev nyob Las Nkes nyob Mes Dias teb. 21 Tab peb txawm poob ua neeg pluag lawm los koj tsis txhob ntshai mog ! Yog koj hwm Tswv Ntuj, yog koj tsis ua txhaum thiab koj ua yam ntxim Tswv Ntuj siab xwb mas koj twb muaj nyiag kawg lawm.”

1 Ces Tos Npias teb nws txiv tias : “Txiv, kuv yuav ua tas puas tsav yam raws li koj qhia kuv. 2 Tab sis yuav ua zoo li cas kuv thiaj yuav mus nqa tau cov nyiaj ntawd los ? Nkas Npas Es tsis paub kuv, thiab kuv kuj tsis paub nws. Kuv yuav muab dab tsi mus ua tim khawv zeem tseeb rau Nkas Npas Es kom nws ntseeg tau kuv thiab nws tso siab muab cov nyiaj ntawd rau kuv. Kuv kuj tsis paub txoj kev mus Mes Dias teb thiab.” 3 Ces Tos Npis teb rau nws tus tub Tos Npias tias : “Nkas Npas Es wb tau sau yuas tseg rau hauv ib daig ntawv, kuv muab daim ntawv ntawd txiav ua ob daig rau wb ib leeg ceev ib daig tseg. Kuv nqa ib daig los lawm, kuv tso ib daig xyaw cov nyiaj. Nyem no, twb muaj nees nkaum xyoo uas kuv tau tso cov nyiaj ntawd rau Nkas Npas Es ceev lawm ! Nyem no, me tub, tshuav qhov koj yuav mus nrhiav ib tug neeg tsim txiaj ua koj luag mus xwb. Peb mam li them nws nqe taw mus los huv tib si. Ces koj yuav mus nqa cov nyiaj nyob ntawm Nkas Npas Es los mog !” 4 Ces Tos Npias tawm mus nrhiav ib tug neeg ua nws luag thiab yuav coj tau nws kev mus txog Mes Dias teb. Nws tawm mus ntsib tus Tshiab Las Fais nyob nraum zoov. Tab sis nws tsis paub tias yog Tswv Ntuj ib tug Tshiab. 5 Tos Npias hais rau tus Tshiab tias : “Npawg, koj nyob qhov twg tuaj ?” Tus Tshiab teb tias : “Kuv yog koj ib tug kwv tij His Xas Lais, kuv tuaj nrhiav hauj lwm ntawm no ua xwb.” Tus Tshiab tseem hais tias nws lub npe hu ua As Ntxas Lias. Ces Tos Npias nug nws tias : “Ua li koj puas paub kev mus Mes Dias teb ?” 6 Tus Tshiab teb tias : “Kuv paub kawg mas ! Kuv twb tau mus ntau zaus lawm, kuv paub tej kev tas tib si nyob hauv siab. Kuv nquag mus Mes Dias teb kawg, kuv twb tau mus so nyob hauv Nkas Npas Es tsev uas nws yog peb ib tug kwv tij nyob Las Nkes nyob Mes Dias teb. Txij ntawm Es Npas Tas mus yuav tsum mus ob hnub ke thiaj mus txog rau Las Nkes. Las Nkes nyob rov pem toj siab hos Es Npas Tas nyob nram plawv tiaj nrag.” 7 Tos Npias hais rau Las Fais tias : “Npawg, koj tos kuv, kuv mus hais rau kuv txiv paub tso. Kuv xav kom koj nrog kuv mus, kuv mam li them nqe zog rau koj mus los huv tib si.” 8 Las Fais teb tias : “Tau xwb ! Kuv nyob ntawm no tos koj. Tab sis koj tsis txhob mus ntev.” 9 Tos Npias mus hais rau nws txiv tias nws nrhiav tau ib tug kwv tij His Xas Lais ua nws luag mus lawm. Ces nws txiv hais tias : “Koj coj nws los ntawm no. Kuv yuav nug txog nws tsev neeg thiab nws lub xeem tso, saib peb puas yuav tso tau siab rau nws.” Tos Npias thiaj tawm tuaj hu tias : “Npawg, koj los hauv tsev tso, kuv txiv xav paub koj.” 10 Tus Tshiab chaws los hauv tsev. Tos Npis xub hu tus Tshiab, tus Tshiab foom tej lo lus zoo rau Tos Npis. Tos Npis hais tias : “Kuv puas tseem yuav muaj txoj hmoov zoo ? Kuv yog neeg dig muag, kuv twb tsis pom lub ntuj kaj li. Kuv nyob hauv qhov tsaus ntuj nti yam li cov neeg tuag uas tsis pom kev lawm. Kuv zoo li luag muab kuv faus ciaj rau hauv ntxa, kuv tsuas hnov neeg lub suab xwb, kuv tsis tau pom neeg li.” Tus Tshiab teb nws tias : “Koj tso siab ! Tshuav tsis ntev Tswv Ntuj yuav ua kom koj zoo. Koj tso siab mog !” Tos Npis hais rau tus Tshiab tias : “Kuv tus tub Tos Npias xav mus Mes Dias teb. Koj puas xav ua nws luag coj nws kev mus ? Kuv mam li them nqe mus kev rau koj tib si.” Tus Tshiab teb tias : “Kuv zoo siab ua nws luag mus. Kuv paub tej kev tas tib si, kuv tau mus ntau zaus nyob Mes Dias teb, kuv tau hla txhua tej roob tej hav, kuv paub tas tej kev me kev loj sib tshuam.” 15 Tos Npis hais tias : “Kuv ntiav koj ib hnub ib lub txiag, thiab kuv pub mov rau koj noj ib yam li kuv tus tub. Ua li mas koj nrog kuv tus tub mus mog ! 16 Kuv yuav them tshaj tus nqe rau koj.” Tus Tshiab teb tias : “Kuv yuav nrog koj tus tub mus. Koj tsis txhob ntshai, wb yuav tau mus kev zoo thiab wb yuav tau rov los zoo. Ntawm txoj kev tsis muaj dab tsi yuav txaus txhawj.”

2 Tos Npias nrog tus Tshiab mus, ib tug dev lawv nkawd qab. Nkawd mus ib hnub ke tsaus ntuj. Hmo ntawd nkawd pw ntawm kev ntawm tus ntug dej Tis Nqis. 3 Tos Npias nqes mus ntxuav taw hauv dej, ib tug ntses loj loj tib plhaw hauv dej tuaj nqos yuav luag tau nws txhais taw. Ces nws qw ib suab. 4 Tus Tshiab hais rau nws tias : “Koj ntes ntho tus ntses mas ! Koj tuav ruaj ruaj tsis txhob tso nws !” Tos Npias txhom ntho tau tus ntses, nws muab cab los rau ntawm ntug dej. 5 Tus Tshiab hais rau Tos Npias tias : “Koj muab tus ntses ntawd phais, koj hlais lub tsib, lub plawv thiab thooj siab, koj muab cia rau ib qho. Cov plab hnyuv koj muab pov tseg. Vim tias lub tsib, lub plawv thiab thooj siab zoo ua tshuaj.” 6 Ces Tos Npias muab tus ntses phais, nws khaws lub tsib, lub plawv thiab thooj siab tseg. Nws muab me ntsis nqaij los ua hmo rau nkawd noj, qhov seem nws muab las ntsev tseg. Ces nkawd rov mus kev ntxiv, nkawd mus yuav txog Mes Dias teb. 7 Ces Tos Npias nug tus Tshiab tias : “Tij laug As Ntxas Lias, tus ntses lub tsib, lub plawv thiab thooj siab zoo ua tshuaj dab tsi ?” 8 Tus Tshiab teb tias : “Thaum ib tug txiv neej los ib tug poj niam raug ib tug dab phem, ces muab lub plawv thiab thooj siab ntses los hlawv, ces cov pa ntawd ncho ua kom tej yam phem ntawd ploj tas huv tib si. 9 Hos lub tsib zoo ua tshuaj pleev qhov muag. Thaum neeg qhov muag qaus, muab pleev tas ces tshuab pa rau xwb lub qhov muag cia li zoo tuaj.”

1 Thaum nkawd tuaj txog ntawm lub rooj loog Es Npas Tas, Tos Npias hais tias : “Tij laug As Ntxas Lias, koj coj kuv ncaj qha mus so hauv peb tus kwv tij Las Nkus Es tsev.” Las Fais coj Tos Npias ncaj qha mus txog Las Nkus Es tsev, nkawd ntsib nws zaum ntawm qhov rooj ntawm lub tshav. Nkawd xub hu nws, nws teb tias : “Nyob zoo, ob tug kwv tij. Neb tuaj los, los tsev mas !” Ces nws coj nkawd nkag mus hauv tsev. 2 Nws hais rau nws tus poj niam Es Nas tias : “Ua cas tus hluas ntawd yuav zoo xws li kuv tij laug Tos Npis ua luaj !” 3 Es Nas nug nkawd tias nkawd nyob qhov twg tuaj, nkawd teb tias : “Wb yog cov kwv tij xeem Nes Tas Lis uas tau mus ua neeg thoj nam nyob Nis Nis Vas.” 4 “Neb puas paub peb tus kwv tij Tos Npis ?” “Tus ntawd, wb paub zoo los mad !” 5 “Nws nyob zoo li cas lawm ?” “Nws tseem muaj txoj sia nyob thiab nws nyob zoo.” Tos Npias hais ntxiv tias : “Twb yog kuv txiv ntag.” 6 Las Nkus Es sawv tsees tam sid, nws puag lias Tos Npias, ces nws quaj. 7 Nws hais rau Tos Npias tias : “Me tub, koj txoj hmoov zoo ua luaj ! Koj txiv yog ib tug neeg zoo tas nrho ! Tab sis tu siab rau qhov tias ib tug neeg siab ncaj tas npaud, thiab siab dav tas nrho, ua cas nws yuav dig muag li ntawd lawm !” Ces Las Nkus Es rov qab puag lias Tos Npias thiab nws quaj. Nws tus poj niam Es Nas kuj quaj thiab nkawd tus ntxhais Xas Las kuj quaj. 9 Las Nkus Es ntes ib tug yaj los tua, nws ua ib pluag mov txais nkawd zoo. Thaum nkawd da dej ntxuav cev tas, nkawd los noj mov, Tos Npias hais rau Las Fais tias : “Tij laug As Ntxas Lias, thov koj pab kuv mus thov Las Nkus Es kom nws muab kuv tus muam Xas Las rau kuv yuav yuad ?’ 10 Las Nkus Es hnov nws cov lus no, Las Nkus Es hais rau nws tias : “Koj noj mov haus dej tso ! Koj tsis txhob txhawj, cav tsis muaj leej twg xav yuav kuv tus ntxhais Xas Las, tsuas yog koj tib leeg xwb uas koj yog kuv tus kwv. Kuv muab tsis tau rau lwm tus, vim koj twb yog tus ze nws tshaj. Me tub ! Kuv yuav hais tseeb tseeb rau koj. Kuv twb nrhiav nyob hauv peb cov kwv tij xya tus txiv rau nws lawm. 11 Tab sis cov txiv ntawd puav leej tuag tas tib si thawj hmo uas lawv nyuam qhuav mus txog hauv nws txaj. Ua li mas nyem no koj rau siab noj mov haus cawv mog ! HUAB TAIS yuav pub nws lub txiaj ntsim rau koj thiab nws txoj kev kaj lug rau koj xwb.” Tos Npias hais tias : “Kuv tsis xav noj mov, tsis xav haus cawv. Yog koj tsis xub hais tias koj yuav txiav zoo li cas tso.” 12 Las Nkus Es hu nws tus ntxhais Xas Las los, nws muab tus ntxhais txhais tes rau Tos Npias tuav, nws hais tias : “Kuv muab kuv tus ntxhais rau koj. Mais Xes Txoj Cai yeej qhaib nws los ua koj poj niam. Koj yuav nws, koj coj nws mus nrog koj nyob hauv koj txiv tsev, koj ua siab kaj lug. Thov kom Tswv Ntuj pub neb rov mus tsev. Nyob ntawm kev los neb tau mus dawb mus huv mog !” 13 Las Nkus Es hais rau nws poj niam kom mus muab ib daig ntawv los rau nws sau. Ces Las Nkus Es sau ntawv cog lus cia tias nws muab nws tus ntxhais rau Tos Npias yuav ua Tos Npias poj niam raws li Mais Xes kev cai. 14 Ua li ntawd tas sawv daws thiaj noj mov haus cawv. 15 Las Nkus Es hu nws poj niam Es Nas tias : “Koj npaj kem tsev ob, koj coj wb tus ntxhais mus pw.” 16 Es Nas mus kho tau chaw, nws los coj nws tus ntxhais mus pw. Nws quaj quaj rau nws tus ntxhais tas, nws so kua muag thiab nws hais tias : “Kuv me ntxhais, koj tso siab mog ! Tswv Ntuj yuav hloov koj txoj kev tu siab los ua kev zoo siab mog !” Ces leej niam tawm rov los.

1 Thaum noj hmo tas, sawv daws hais txog yuav mus pw. Lawv coj Tos Npias mus txog ntawm kem tsev pw. 2 Tos Npias nco dheev txog qhov Las Fais qhia nws. Nws muab nws lub hnab, nws thau lub plawv thiab thooj siab ntses los. Nws muab hlawv rau saum cov txab txiv yoov. 3 Tus dab phem hnia tsis tau cov pa ntses kub hnyiab ntawd, nws thiaj khiav ya ntxiag mus txog Hais Nkws Tos teb. Tab sis Las Fais caum tau nws thiab muab nws khi pav tes taw tam sid. 4 Ob tug niam txiv laus tawm hauv Tos Npias thiab Xas Las nkawd kem tsev mus, nkawd kaw qhov rooj rau. Ces Tos Npias sawv tsees saum txaj los, nws hais rau Xas Las tias : “Leej muad, wb sawv ! Wb yuav tsum teev Ntuj tso, wb yuav thov kom HUAB TAIS pub nws lub txiaj ntsim pab wb thiab kom nws pov hwm wb.” 5 Ces Xas Las sawv thiab nkawd ob leeg teev Ntuj thov kom Ntuj pov hwm nkawd. Tos Npias thiaj pib hais tias : “Tswv Ntuj uas xaiv peb lub keeb, koj lub npe ntoo moo zoo mus txheej dhau txheej ! 6 Yog koj hais tias : ‘Yuav tsis txhob cia txiv neej nws nyob nws ib leeg, peb yuav tsim ib tug los pab nws kom zoo li nws.’ 7 Nyem no kuv yuav kuv tus muam no, tsis yog kuv yuav los ua si. Kuv yuav vim kuv hlub nws tiag. Thov koj hlub wb. Thiab thov koj pub wb ua wb lub neej laus nkoos mas !” 8 Nkawd ob leeg ua ke teb tias : “Ua li !” 9 Ces nkawd mus pw. Thaum ntawd, Las Nkus Es sawv los, nws hu nws cov tub txib kom nrog nws mus khawb qhov ntxa. 10 Vim nws xav tias : “Kheev Tos Npias lam tsis txhob tuag xwb ! Yog nws tuag mas peb yuav poob ntsej muag loj kawg !” 11 Thaum lawv khawb tau lub qhov ntxa lawm, Las Nkus Es los hauv tsev, nws hu nws tus poj niam tias : 12 “Koj tso ib tug ntxhais txib mus xyuas saib Tos Npias puas tseem ciaj. Yog nws tuag lawm mas peb yuav muab nws faus twj ywm tsis pub leej twg paub li.” 13 Es Nas hu tus ntxhais txib los. Nws taws lub teeb thiab qhib rooj paim twj ywm rau tus ntxhais txib kom chaws mus xyuas kem tsev ob tug hluas pw. Tus ntxhais txib pom nkawd ob leeg tsaug tsaug zog ua qaj qaug nyos. 14 Nws tawm twj ywm rov los, nws hais tias : “Tos Npias tsis tau tuag, tsis muaj dab tsi txaus txhawj.” 15 Ces Las Nkus Es cav txog Tswv Ntuj tia : “Tswv Ntuj, kuv cav txog koj ! Sawv daws yuav cav lus zoo txog koj mus txog txhiab niag tim puas xyoo ! 17 Kuv cav txog koj vim koj tau hlub kuv tus tub thiab tus ntxhais twm zeej no. Tswv Ntuj thov koj pub koj lub txiaj ntsim rau nkawd thiab koj pov hwm nkawd, koj pub nkawd ua nkawd lub neej nyob hauv txoj kev kaj lug thiab nyob hauv koj lub txiaj ntsim ! 17 Ces Las Nkus Es kom cov tub txib mus muab lub qhov ntxa txhub cheem tseem tsis tau kaj ntug. 19 Nws kom nws poj niam ci mov mog ib qhov txos loj loj, hos nws mus xyuas cov tsiaj thiab nws ntes ob tug nyuj thiab plaub tug yaj coj los tua. Nws coj mus rau tom tsev ua zaub kom lawv npaj noj. 20 Las Nkus Es hu Tos Npias los, nws hais rau Tos Npias tias : “Koj yuav nyob kaum plaub hnub ntawm no, peb tsis pub koj txav taw li. Koj yuav nyob noj mov haus cawv tso. Yog koj nyob mas kuv tus ntxhais yuav zoo siab, vim los txog tav no nws tsuas kawg muaj kev tu siab xwb. 21 Thaum noj nqaij haus cawv tas koj mam rov mus tsev, koj yuav thauj kuv lub cuab tam ib nrab mus. Thaum wb ob tug laus nyob puv ib puas nees nkaum xyoo lawm, mas neb mam tuaj txais kom tas mus. Me tub ! Koj tso siab mog ! Kuv yog koj txiv lawm thiab. Es Nas kuj yog koj niam. Txij no mus, wb yog koj niam koj txiv ib yam li wb yog koj tus muam niam thiab txiv. Ua li mas me tub, koj tso siab mog !”

1 Ces Tos Npias hais rau Las Fais tias : 2 “Tij laug As Ntxas Lias, koj coj plaub tug tub txib thiab koj thauj ob tug ntxhuav, koj mus kom txog Las Nkes. 3 Koj mus hauv Nkas Npas Es tsev, koj cev daim ntawv no rau nws, ces koj yuav tu cov nyiaj thiab koj caw Nkas Npas Es nrog koj tuaj haus kuv cawv.” Nkas Npas Es suav cov hnab nyiaj rau Las Fais, cov thwj uas thaum ub lawv ntaus rau cov hnab nyiaj tseem tshiab li qub. Ces nkawd muab nog rau ob tug ntxhuav thauj. 6 Nkas Npas Es nrog lawv sawv ntxov ntxov rov qab los mus ua tshoob. Thaum lawv rov los txog Las Nkus Es tsev Tos Npias tseem tab tom noj hmo. Tos Npias sawv tsees tuaj hu Nkas Npas Es, ces Nkas Npas Es quaj, nws foom lus zoo rau Tos Npias tias : “Ib tug tub zoo li koj muaj ib tug txiv siab ntshiab siab ncaj thiab siab zoo li koj txiv ! Thov kom HUAB TAIS foom hmoov zoo rau koj thiab rau koj tus poj niam thiab rau nws niam nws txiv ! Kuv ua Ntuj tsaug, vim Tswv Ntuj tau pub kuv pom kuv tus tij laug Tos Npis lub ntsej muag nyob hauv koj !”

1 Tab sis ntawm Tos Npis mas nws niaj hnub suav hnub suav hmo ntsoov ib hnub dhau ib hnub. Nws suav npaum li cas hnub mus thiab npaum li cas hnub yuav rov los txog. Nws suav twb dhau lawm, pheej tsis pom tus tub rov los tshwm li. 2 Ces nws xav tau tias : “Ntshai tsam nws khuam ntev nyob tod xwb ! Thiab ntshai tsam Nkas Npas Es lam tuag lawm mas ! Los tej zaum yog vim tsis muaj neeg nyob hauv tsev yuav muab nyiaj rau nws !” 3 Ces Tos Npis pib txhawj. 4 Nws poj niam As Nas nroo nroo tias : “Kuv tus me tub tuag lawm xwb ! Nws yeej tsis muaj sia nyob lawm !” Ces As Nas quaj quaj txog nws tus tub. 7 Thaum Tos Npias ua tshoob kaum plaub hnub tas lawm, raws li Las Nkus Es tau hais, Tos Npias los hais rau Las Nkus Es tias : “Thov koj tso kuv rov mus tsev. Ntshai kuv niam thiab kuv txiv nkawd yuav xav tias nkawd yuav tsis tau rov pom kuv ntxiv lawm. Txiv, ua li mas kuv thov koj cia kuv rov mus tsev. Kuv twb qhia koj tas tias kuv tuaj lawm kuv cia kuv txiv zoo li cas rau hauv tsev.” 8 Las Nkus Es hais rau Tos Npias tias : “Me tub, koj nrog kuv nyob ib ntus ntxiv tso mas ! Kuv mam tso neeg mus fi xov rau koj txiv Tos Npis paub.” 9 Tos Npias hais tias : “Kuv tsis xav nyob lawm, kuv thov koj cia kuv rov mus xyuas tsev tso !” 10 Ces tam sim ntawd Las Nkus Es muab Tos Npias poj niam Xas Las rau Tos Npias thiab nws faib nws lub cuab tam ib nrab rau Tos Npias, faib tub txib tub txuas, faib nyuj faib yaj, faib ntxhuav faib luj, thiab phij cuam tsoos tsho, nyiaj txiag, twj taig rau Tos Npias nkawd. 11 Ces nws tso nkawd mus, nkawd zoo siab. 13 Tos Npias tau rov mus tsev nws zoo siab kawg. Nws cav txog tus HUAB TAIS kav lub ntuj lub teb, tus Vaj kav tas lub sim ceeb. Nws ua Ntuj tsaug vim nws muaj txoj hmoov zoo nyob ntawm kev. Nws foom lus zoo rau Las Nkus Es thiab nws niam Es Nas nkawd tias : “Niaj hnub tas kuv sim neej, kuv xav kom kuv tau tsob hwb neb lub npe, mas kuv yuav zoo siab.”

1 Lawv rov los txog ntawm Kas Xes Lis uas ze Nis Nis Vas lawm. 2 Las Fais hais rau Tos Npias tias : “Koj paub tias wb cia koj txiv nyob zoo li cas rau hauv tsev. 3 Nyem no wb mus ua koj tus poj niam ntej, wb xub mus tu vaj tu tsev tos nws.” 4 Ces nkawd mus ua ntej. Las Fais kom Tos Npias nqa lub tsib ntses thiab. Tus dev lawv nkawd qab. 5 As Nas zaum ntawm qhov rooj ntsia ntsoov txoj xub ke uas nws tus tub yuav rov los. 6 Nws ntsia pom deb zoo li yog nws tus tub, nws hais rau nws tus txiv tias : “Koj tus tub nrog tus ua nws luag los txog lawm !” 7 Thaum Tos Npias nkawd los tsis tau txog ntawm nws txiv tsev, Las Fais hais rau Tos Npias tias : “Kuv hais rau koj tias koj txiv yuav rov pom kev tuaj. 8 Koj yuav muab lub tsib ntses no los pleev nws qhov muag. Cia cov tshuaj tom me ntsis ces yuav muaj tej daim tawv dawb dawb me me nti ntawm nws lub qhov muag los. Ces koj txiv yuav rov qab pom kev tuaj.” 9 Tos Npias niam khiav khiav tuaj puag lias nws tus tub caj dab, nws hais tias : “Nyem no, kuv tuag kuj tau, kuv rov tau pom koj lawm !” Ces nws niam quaj ! 10 Tos Npis sawv hauv tsev tawm tuaj, nws dawm ub dawm no, tab sis nws kuj xuas hla tuaj dhau lub qhov rooj loog thiab. 11 Tos Npias nqa lub tsib ntses ntawm tes. Nws tshuab pa rau nws txiv qhov muag thiab nws tuav nws txiv tes, nws hais tias : “Txiv, koj txhob ntshai !” Ces nws muab lub tsib ntses pleev nws txiv qhov muag, nws tos ib me ntsis, 12 ces nws xuas nws ob txhais tes mus nti daim tawv ntawm nws txiv lub kaum muag los. 13 Nws txiv puag lias nws tus tub caj dab thiab nws txiv quaj. 14 Nws txiv hais tias : “Me tub, kuv pom koj lawm ! Koj yog kuv qhov pom kev !” Tos Npis tseem hais ntxiv tias : “Tswv Ntuj lub npe nto moo zoo ! Nws lub npe loj tas nrho ! 15 Vim nws tau pub kuv txom nyem, thiab nws tau hlub kuv. Nyiam no, kuv tau pom kuv tus tub Tos Npias tiag !” Tos Npias chaws mus hauv tsev, nws tsa suab hlo nrov nrov cav txog Tswv Ntuj. Thiab nws tham qhia nws txiv tias nws tau mus kev zoo thiab nws nqa tau cov nyiaj los lawm. Nws twb yuav tau poj niam lawm thiab, nws yuav Las Nkus Es tus ntxhais hu ua Xas Las. Xas Las lawv nws qab los txog tsis deb cov rooj loog Nis Nis Vas lawm. 16 Ces Tos Npis sawv tsees mus tos nws tus nyab nyob ntawm cov rooj loog Nis Nis Vas. Nws mus, nws cav txog Tswv Ntuj vim nws zoo siab. Thaum cov neeg nyob Nis Nis Vas pom tsis muaj neeg cab nws tes mus kev thiab pom nws rov muaj zog zoo li thaum ub, mas lawv poob siab. 17 Tos Npis mus tos tau Xas Las, nws foom lus zoo rau Xas Las tias : “Me ntxhais, kuv zoo siab txais koj tas nrho ! Kuv ua Ntuj tsaug, vim nws tau pub koj los nrog peb nyob ! Thov kom koj txiv tau txoj hmoov zoo thiab kom kuv tus tub Tos Npias thiab koj, neb tau txoj hmoov zoo mog ! Me ntxhais, koj los nyob hauv koj tsev, thov kom koj tau zoo mus li mog !” Hnub ntawd, tas cov neeg nyob Nis Nis Vas zoo siab. 18 Tos Npis ob tug kwv tij As His Kas thiab Nas Das kuj tuaj nrog nws zoo siab.

1 Thaum lawv los ua tshoob hauv tsev tas, Tos Npis hu nws tus tub los, hais rau nws tias : “Me tub, koj yuav nco ntsoov them nqi rau tus ua koj luag. Koj yuav muab tshaj tus nqi uas peb tau hais tseg.” 2 Tos Npias nug tias : “Txiv, kuv yuav muab npaum li cas them nws tus nqe zog ? Tab yog kuv muab tas tej wb mus nqa los ib nrab rau nws los kuv tsis poob dab tsi. 3 Nws coj kuv rov los zoo zoo tsis tau raug dab tsi, nws tau tu kuv poj niam, nws nrog kuv mus nqa tau cov nyiaj los thiab nws tseem kho koj qhov muag zoo lawm ! Ua li mas yuav muab dab tsi ntxiv rau nws thiab ?” 4 Tos Npis hais rau nws tus tub tias : “Nws tau ua tej yam kom txaus faib cov neb nqa los ib nrab rau nws.” 5 Tos Npias hu tus ua nws luag los, Tos Npias hais rau nws tias : “Koj yuav ib nrab tej yam uas wb tau thauj los, koj ua siab kaj lug rov mus mog !” 6 Ces Las Fais coj nkawd mus ntawm ib qho chaw xu kev me ntsis, nws hais rau nkawd tias : “Nej yuav ua Tswv Ntuj tsaug, nej yuav cav txog nws rau tsoom neeg ciaj mloog tias nws tau ua zoo rau nej. Nej yuav hu nkauj cav txog nws lub npe. 12 Nyem no, nej yuav paub tias, thaum koj thiab Xas Las neb tab tom teev Ntuj, mas yog kuv cev thiab kuv nyeem neb zaj thov nyob ntawm Tswv Ntuj xub ntiag. Thaum koj mus faus cov neeg tuag los kuj yog kuv cev koj cov yeeb koob rau Tswv Ntuj. 13 Thaum koj tsis ua xyem xyav, koj cia li tso diav plhuav sawv tsees mus faus ib tug neeg tuag, los kuj yog Ntuj xa kuv tuaj sim koj siab. 14 Thiab yog Tswv Ntuj xa kuv tuaj kho koj kom zoo hlo thiab kho koj tus nyab Xas Las. 15 Kuv yog Las Fais, yog ib tug hauv xya leej Tshiab uas nyob ntawm Tswv Ntuj lub hwj chim mus li.” 16 Ces nkawd ob txiv tub ntshai kawg, nkawd khoov pe tus Tshiab. 17 Tab sis Las Fais hais rau nkawd tias : “Neb tsis txhob ntshai, neb nyob kaj lug ! Neb yuav cav txog Tswv Ntuj tas neb sid.” 21 Thaum nkawd tsa muag ntsia nkawd tsis pom Las Fais lawm. Nkawd hu nkauj cav txog Tswv Ntuj. Nkawd ua Ntuj tsaug rau tej yam loj tas nrho ntawd. Ib tug Tshiab tau yees tawm tuaj rau nkawd pom lawm.

1 Tos Npis muaj ib puas kaum ob xyoos, nws thiaj li tuag nyob hauv txoj kev kaj siab lug. Lawv ua ib lub ntees tuag loj rau nws thiab muab nws los nyob Nis Nis Vas. 2 Thaum lub caij nws dig muag nws muaj rau caum ob xyoos. Txij thaum nws rov pom kev tuaj nws ua neej nplua nuj, tab sis nws pub rau cov neeg pluag, thiab nws nco ntsoov txog Tswv Ntuj, nws cav txog Tswv Ntuj lub hwj chim loj. 11 Lawv tso nws pw saum txaj, ces nws tuag. Lawv pam nws zoo thiab faus nws. 12 Thaum Tos Npias niam tuag, nws muab nws niam faus ze nws txiv.

1 Hnub ntawd, Yus Dis hnov tias cov tub rog His Xas Lais nyob Npes Thus Lias yuav tiv tsis tau cov yeeb ncuab ntxiv. Yus Dis yog Mes Las Lis tus ntxhais. 2 Yus Dis tus txiv hu ua Mas Nas Xes. Nws nyuam qhuav tuag thaum lub caij sau nplej. 3 Yog thaum nws saib cov tub zog pav tes nplej, mas nws raug tshav ntuj kub nws dhau, ces nws pw nws cia li tuag nyob hauv lub tsheej Npes Thus Lias. Lawv muab nws faus nrog nws cov poj yawm txwv koob nyob hauv daim teb nyob ntawm Dos Tais thiab Npas Las Moos kis nruab nrab. 4 Ces Yus Dis ua poj ntsuam. Nws nyob hauv nws lub tsev li qhov qub peb xyoos thiab plaub lub hlis. 5 Nyob saum nws lub ru tsev nws tau npaj ib kem tsev. Nws pw nyob ntawd ntau. Nws hnav ntaub tsaj, nws hnav tsoos tsho xws li cov neeg coj xyom. 6 Niaj hnub Yus Dis ua cov kab ke yoo, vim nws ua poj ntsuam. Tsuas yog cov hnub Xas Npas Tos thiab tej hnub lom zem uas cov His Xas Lais nqaum paj nqaum nruas mas nws thiaj tsis yoo mov xwb. 7 Yus Dis yog ib tug poj ntsuam zoo nkauj, nws muaj tus yeeb yam zoo nyiam. Thaum Yus Di tus txiv Mas Nas Xes tuag, tus txiv tso nyiaj tso kub, tso cov ntxhais txib tub txuas, tso tej pab tsiaj, tej thaj liaj teb ntau rau nws tus poj niam. Yus Dis nyob hauv ib lub tsev muaj lub cuab tam loj. 8 Tab sis Yus Dis tsis kheev leej twg tuaj zes nws vim nws hwm Tswv Ntuj zoo.

17 Tas tsoom pej xeem pom Yus Dis nqa Hos Los Fes lub taub hau tuaj nyob hauv lub tsheej Npes Thus Lias, mas sawv daws pe Tswv Ntuj thiab qw suab cav txog Yus Dis tias : “HUAB TAIS tau foom hmoov zoo rau koj. Nws muab nws lub zog rau koj kom koj yuam tau peb cov yeeb ncuab. 18 Tus HUAB TAIS Tswv Ntuj nyob siab tau foom lus zoo rau nws tus ntxhais Yus Dis. Nws tau foom ib lo lus zoo dua tas txhua leej poj niam nyob ntiaj teb no, peb cav txog tus HUAB TAIS tsim lub ntuj lub teb, vim nws tau pab koj txiav tus tswj peb cov yeeb ncuab taub hau. 19 “Yus Dis hnub no, HUAB TAIS tau ua kom koj lub npe nto moo loj. Tas lub qab ntuj neeg yuav cav txog koj tsis muaj caij kawg, lawv yuav nco ntsoov txog HUAB TAIS lub hwj huam mus li. Yus Dis koj tsis tau ntshai raug txoj kev txom nyem, vim koj xav pab koj haiv neeg uas ntxhov siab thiab raug luag hiam.

9 Yus Dis koj tau npo peb ntawm txoj kev tuag. Koj yog Yes Lus Xas Les lub koob meej. Koj tau mloog Tswv Ntuj coj koj kev. Koj yog His Xas Lais txoj kev kaj lug. Koj yog tus ua kom peb haiv neeg muaj koob meej.”

8 Thaum cov His Xas Lais nyob txim nyob Npas Npis Los teb, luag hais lus xaiv txog cov His Xas Lais rau tus vaj Npas Npis Los. Tus vaj yuav muab cov His Xas Lais tua kom tas huv tib si. Ces ib tug His Xas Lais hu ua Mas Ntos Kes thov Tswv Ntuj zoo li no : 9 “HUAB TAIS, HUAB TAIS, koj ua Vaj muaj hwj huam loj tas nrho. Tas ib puas tsav yam zwm rau koj. Yog vim koj txiav tias koj yuav cawm His Xas Lais, mas tsis muaj leej twg yuav tiv tau koj. 10 Koj yog tus tsim lub ntuj lub teb thiab tas ib puas tsav yam nyob hauv lub sim ceeb no. 11 Koj yog sawv daws tus Tswv. Tsis muaj leej twg yuav yeej tau koj lub hwj xyeej.”
15 Ua li mas, zaum no, HUAB TAIS Tswv Ntuj, Has Nplas Has tus Tswv Ntuj, thov koj hlub koj haiv neeg. Peb cov yeeb ncuab xav muab peb tua, lawv xav rhuav koj tsoom pej xeem huab hwm.
16 Haiv neeg no yog haiv neeg koj twb tau cawm ntawm Hais Nkws Tos teb los lawm. Koj tsis txhob thuam koj haiv neeg. 17 Koj mloog kuv lo lus thov koj. Koj ua siab zoo rau koj cuab koj yim. Niaj hnub peb quaj peb nyiav. Thov koj ua kom peb nyob luag ntxhi. HUAB TAIS, koj ua kom peb muaj txoj sia nyob, ces peb yuav cav txog koj lub npe. Peb tus HUAB TAIS Tswv Ntuj, peb yog cov neeg hu nkauj cav txog koj, koj tsis txhob kaw peb lub ncauj mus li.”

1 Tus poj vaj Es Thes nrhiav kev nraim ntawm lub txim uas yuav tuaj raug nws. 3 Nws nrhiav chaw nraim nyob hauv HUAB TAIS Tswv Ntuj. Nws yuam nws lub cev. Nws hle nws cov plaub hau cuav pov tseg, nws muab tso puv tej chaw uas niaj hnub lawv pom nws hnav zam zoo. Es Thes thov His Xas Lais tus HUAB TAIS Tswv Ntuj li no : 4 “HUAB TAIS, koj tib leeg yog peb tus Vaj ! Thov koj tuaj pab kuv mas ! Vim kuv nyob kuv ib leeg xwb, kuv tsuas vam txog koj tuaj pab kuv. Txog lub caij kuv yuav tuag los kuv txoj sia yuav dim, los kuv tsis paub ! 5 HUAB TAIS, thaum kuv tseem nyob hauv kuv niam xub ntiag kuv twb tau kawm tias yog koj xaiv His Xas Lais nyob hauv tas txhia haiv neeg los, yog koj xaiv peb cov yawg koob nyob hauv lawv cov neeg txheej thaud los kom lawv ua koj tug mus li. Koj tau qhia tau coj lawv xws li koj yeej ib txwm cog lus.
12 HUAB TAIS, nyem no peb raug txom nyem, thov koj nco ntsoov tuaj pab peb ! Thov koj txhab zog rau kuv. HUAB TAIS Tswv Ntuj, uas koj lub hwj chim kav tas txhia leej muaj hwj chim. 13 Thaum kuv nyob ze tus tsov, thov koj pub tswv yim rau kuv kom kuv txawj hais lus ua kom tus tsov siab nqig. Thov koj ua kom nws lub siab tig mus ntxub peb tus yeeb ncuab, kom peb tus yeeb ncuab nrog nws cov neeg lawv sawv daws ploj mus. 14 Thov koj cev tes tuaj cawm peb. HUAB TAIS, koj tuaj pab kuv, vim kuv nyob kuv ib leeg xwb, kuv tsuas tshuav koj ib leeg xwb yog tus yuav tuaj pab kuv.

10 Ib tug ntsuag coj kev txhaum hlav hauv Xis Lias teb tuaj : yog As Nthias Kus Es Pis Fas, yog tus vaj As Nthias Kus tus tub. Nws yog ib tug neeg tau mus nyob txim nyob Los Mas. 11 Lub caij ntawd, muaj ib tiam neeg tsis tsim txiaj sawv hauv tsoom His Xas Lais tuaj. Lawv ntxias tau ntau leej. Lawv hais tias : “Peb kav tsij mus nrog lwm cov haiv neeg uas nyob ncig peb sib fim. Vim tias txij thaum peb ncaim ntawm lawv los lawm, mas peb tau raug ntau yam xwv txheej.” 12 Cov pej xeem ntau leej nyiam cov lus ntxias no. 13 Lawv maj nroos mus thov tus vaj kom nws kheev lawv coj cov kev cai teev cov pej kum dab. 14 Lawv ua ib lub tshav sib twv nyob Yes Lus Xas Les xws li nyob pej kum teb. Lawv thim lub Cim Txiav, thiab lawv nrauj kev nrog Tswv Ntuj cog lus. 15 Lawv mus nrog cov pej kum neeg coj dab sib fim. Lawv ntxeev siab mus taug txoj kev phem.
41 Tus vaj As Nthias Kus tshaj rau nws lub teb chaws tas tib si kom sawv daws koom ua ib haiv neeg xwb. 42 Ces sawv daws ua raws li tus vaj cov lus ceeb toom. Nyias tso nyias cov kev cai pov tseg. 43 Muaj coob leej His Xas Lais txais tus vaj txoj kev teev hawm. Lawv txi dab thiab tsis caiv hnub xas npas tos.
54 Hnub kaum tsib lub hlis Kis Laws xyoo 145, tus vaj tsa lub thaj txi dab rau saum cov Yus Das lub thaj txi Ntuj, thiab nyob hauv cov nroog nyob ib ncig lawv kuj tsa ib co thaj txi dab. 55 Nyob ntawm tej tshav puam, ntawm tej rooj loog, sawv daws hlawv txab txiv yoov. 56 Hos cov phau ntawv hais txog Mais Xes Txoj Cai mas lawv muab dua thiab muab hlawv tas. 57 Yog luag pom ib phau ntawv hais txog Mais Xes Txoj Cai nyob hauv ib tug tsev los luag pom ib tug neeg coj Txoj Cai mas tus vaj ceeb toom kom muab tus ntawd tua.
62 Tsis kav muaj coob leej His Xas Lais kuj nyob ruaj nreb, lawv muaj peev xwm tiv tsis kam noj tej yam tsis huv. 63 Lawv yeem tuag zoo dua noj tej yam tsis huv thiab ua txhaum rau Txoj Cai. Ces muaj tus puav tau tuag tiag. 64 Nyob hauv cov His Xas Lais thiaj muaj kev npau taws loj.

15 Tus vaj kom nws cov tub rog mus hauv lub nroog Mos Dis. Lawv tuaj yuam cov His Xas Lais kom thim kev ntseeg thiab kom txi dab. 16 Muaj coob leej His Xas Lais mloog cov tub rog. Tshuav Mas Tas Thias thiab nws cov tub thiaj tsis mus nrog lawv txi dab. 17 Tus vaj cov tub rog thiaj hais rau Mas Tas Thias tias : “Koj yog ib tug neeg nto koob meej thiab muaj hwj chim nyob hauv lub nroog no, koj coj tau sawv daws vim koj muaj tub muaj kwv tij pab koj. 18 Ua li mas koj ua sawv daws ntej mus raws li tus vaj cov lus ceeb toom. Koj ua zoo li tas txhia haiv neeg, zoo li cov nom Yus Das thiab cov uas peb tso nyob Yes Lus Xas Les. Ces koj thiab koj cov tub yuav nrog tus vaj ua phooj ywg zoo. Nej yuav tau txais nyiaj txais kub thiab txais ntau yam ua paj tshab.” 19 Mas Tas Thias teb nrov nrov rau lawv tias : “Tab yog tas txhua haiv neeg mloog tus vaj thiab ua raws li nws cov lus ceeb toom, thiab tso lawv cov yawg koob tej kev cai pov tseg, 20 los kuv thiab kuv cov tub cov kwv tij peb yuav ua raws li peb cov yawg koob tau cog lus xwb. 21 Thov kom Ntuj txuag peb, tsis txhob pub peb tso Txoj Cai thiab tej kev lij choj pov tseg ! 22 Peb yuav tsis mloog tus vaj cov lus. Peb yuav tsis txhob ncaim ntawm peb cov kev cai, peb tsis kam ncaim mus sab xis los sab laug li.” 23 Thaum Mas Tas Thias lus tu nrho, muaj ib tug Yus Das tab meeg txav los rau sawv daws pom, nws txi dab nyob saum lub thaj nyob Mos Dis, raws li tus vaj cov lus ceeb toom. 24 Thaum Mas Tas Thias pom li ntawd mas nws siab mob ib zag thiab ua nws ib ce tshee tas. Nws npau taws heev, ces nws tib sas mus muab tus Yus Das caj dab txiav kiag nyob saum lub thaj. 25 Nws kuj tua tus neeg uas tus vaj xa tuaj yuam kom lawv txi dab. Ces nws rhuav lub thaj pov tseg. 26 Nws lub siab kub lug rau Txoj Cai xws li thaud Pis Nas siab kub lug ntaus Ntxis Lis uas yog Xas Lws tus tub. 27 Mas Tas Thias thiaj qw nrov nrov rau lub nroog tias : “Yog leej twg kub siab rau Txoj Cai thiab tseem nco txog cov lus cog, mas kom nws tuaj raws kuv mus !” 28 Mas Tas Thias thiab nws cov tub khiav mus nyob pem roob, lawv tso lawv tej cuab yeej cuab tam rau hauv nroog. 29 Ces muaj coob leej uas nrhiav kev ncaj thiab nyiam Txoj Cai, lawv tsiv mus nyob hauv teb chaws suab puam.

36 Ces Yus Das thiab nws cov kwv tij hais tias : “Peb cov yeeb ncuab tawg tas lawm, peb yuav mus ntxuav lub Tuam Tsev Teev Ntuj thiab rov muab rau Tswv Ntuj.” 37 Tas tsoom tub rog tuaj sib sau thiab lawv nce mus pem lub roob Xis Yoos.
52 Lub hli Kis Laws hnub tim 25, xyoo 148, lawv sawv ntxov ntxov. 53 Lawv txi Ntuj nyob saum lub thaj txi Ntuj tshiab uas lawv ua tau. 54 Lawv foom hmoov zoo rau lub thaj, lawv ntaus thaj cheej, ntaus nkauj nog ncas, ntaus nruas. Thaum ntawd yog lub caij thiab lub hnub nyoog uas cov neeg teev pej kum dab tau ua tsis zoo rau lub thaj txi Ntuj. 55 Tas tsoom sid txhos caug hawm Tswv Ntuj. Lawv cav txog tus tau coj lawv mus rau txoj kev yeej. 56 Lawv ua lub txoos lom zem yim hnub los tsa lub thaj. Lawv hlawv tsiaj txi Ntuj, lawv ua tej thaj noj cov txim thiab ua Ntuj tsaug. Lawv zoo siab kawg. 57 Lawv muab nyiaj muab kub los tu kom lub Tuam Tsev sab nraud zoo nkauj. Lawv kho cov qhov rooj thiab lawv ua qhov rooj rau cov kem tsev pw. 58 Tas tsoom sid sawv daws zoo siab luag ntsuag qees. Lawv tsis nco qab lawv qhov txaj muag uas cov pej kum neeg ua rau lawv lawm. 59 Yus Das Mas Kas Npes nrog nws cov kwv tij thiab tas tsoom His Xas Lais txiav tias niaj xyoo thaum txog lub caij ntawd lawv yuav rov ua lub hnub nyoog tsa lub thaj txi Ntuj. Lawv nqaum paj nqaum nruas puv yim hnub, txij tim 15 Kis Laws mus. Lawv txiav tias lawv yuav ua lub hnub nyoog ntawd nyob hauv txoj kev lom zem thiab zoo siab.

1 Tus vaj As Nthias Kus mus ncig xyuas cov xeev nyob pej fab. Nws hnov tias nyob Pes Xis teb muaj ib lub nroog hu ua Es Lis Mais uas nto koob meej kawg, vim lub nroog ntawd nplua nuj thiab muaj nyiaj muaj kub ntau. 2 As Les Xas Nros uas yog thawj tug vaj Mas Xes Dos Nias tau kav cov Hes Las, nws tau tso nws cov hmuv cov ntaj, cov cuab yeej ua rog nyob hauv lub Tuam Tsev nyob Es Lis Mais. 3 Tus vaj As Nthias Kus xav sim mus ntaus lub nroog ntawd kom nws tau cov nyiaj cov kub, tab sis nws ntaus tsis tau, vim cov neeg nyob hauv lub tsheej xub paub nws zaj tswv yim lawm. 4 Lawv xuas hmuv xuas ntaj tiv nws. Lawv ntaus nws tawg, ces nws khiav rov mus nyob Npas Npis Los, nws tu siab kawg. 5 Thaum As Nthias Kus nyob Pes Xis, luag tuaj hais rau nws tias nws cov tub rog tawg tas nyob Yus Das teb. 6 Lis Xias uas nws tau coj ib pab tub rog coob tau khiav vim nws ntshai cov Yus Das. Cov Yus Das muaj hmuv muaj ntaj thiab lawv muaj ntau yam uas lawv txeeb tau ntawm cov tub rog pej kum los. 7 Cov Yus Das ntawd tau rhuav lub thaj txi dab uas As Nthias Kus tau tsa rau saum lub thaj txi Ntuj nyob Yes Lus Xas Les. Lawv tau tsa tej lub ntsa siab siab ib yam li thaum ub xov thaj chaw Ntshiab thiab xov lub nroog Npes Txus. 8 Tus vaj hnov li ntawd mas nws ntshai heev thiab nws ntxhov siab kawg. Ces nws pib mob thiab nws pw vim nws tu siab rau qhov nws ua tsis tau raws li nws xav. 9 Tus vaj nyob ob peb hnub li ntawd hauv txoj kev tu siab. 10 Thaum nws paub tias nws yuav tuag, nws hu nws cov phooj ywg tuaj tas huv tib si, nws hais rau lawv tias : “Kuv lub qhov muag yuav qi me me tsis tau li, kuv lub siab ntxhov hnyo. 11 Kuv hais tias : Cas kuv thiaj tau txoj kev mob chim siab ? Cas thaum kuv tseem muaj hwj chim mas kuv ua zoo, thiab luag nyiam kuv kawg ! 12 Tab sis nyem no kuv rov nco txog tias kuv tau ua phem rau Yes Lus Xas Les. Kuv tau nyiag tej cuab yeej nyiaj los kub nyob hauv Yes Lus Xas Les, thiab kuv tau xa cov Yus Das mus nyob txim dawb dawb, lawv tsis tau ua txhaum dab tsi li. 13 Kuv lees tias yog vim kuv tau ua li ntawd, mas nyem no kuv thiaj tau raug txoj kev txom nyem. Kuv tuag, kuv tu siab loj tas nrho nyob hauv ib lub teb chaws tsis yog kuv lub.”

18 Es Les As Ntxas yog ib tug nyob hauv cov thawj kws Txoj Cai. Nws muaj hnub nyoog nchav lawm thiab nws coj ib lub meej mom muaj tsim. Cov nom tswv pej kum nyom nws qhov ncauj kom qhib, lawv yuam nws noj nqaij npuas. 19 Tab sis nws yeem muaj koob meej hauv txoj kev tuag dua ua lub neej muaj txhaum. Nws yeem nyiaj cia lawv ntaus nws. 20 Ces nws nti cov nqaij nyob hauv nws qhov ncauj pov tseg. Nws tsis ua zoo li cov uas noj tej yam caiv vim lawv nyiam lawv txoj sia. kuv dag li ntawd, vim kuv ntshaw yav nyuag neej me me ntxiv, mas lawv thiaj tau xav tswv yim yuam kev. Kuv qhov txhaum ntawd yuav coj kev txaj muag thiab kev poob koob meej tuaj rau kuv yav neej laus. 21 Cov uas npaj rooj mov ntawd coj Es Les As Ntxas mus rau ib qho, vim lawv paub nws tau ntev los lawm. Lawv ntxias nws kom nws npaj ib co nqaij tsis caiv tso, thiab kom nws noj cov nqaij tsis caiv ntawd. Nws yuav ua txuj noj cov nqaij txi dab raws li tus vaj cov lus ceeb toom. 22 Yog nws ua li ntawd mas nws yuav tsis raug kev tuag, nws thiaj li yuav tau nyob nrog lawv ua phooj ywg ntev. 23 Tab sis Es Les As Ntxas yeem ua raws txoj kev ncaj uas nws tau taug los laus li no, txij thaum yau los lawm, thiab nws yeem ua raws Txoj Cai ntshiab uas Tswv Ntuj qhia. Ces nws teb rau lawv kom lawv xa nws mus hauv lub teb chaws tuag sai sai. 24 Es Les As Ntxas hais tias : “Laus li peb no lawm tsis phim yuav dag, tsis phim yuav zais. Nyob tsam ntau leej hluas yuav to taub tias thaum Es Les As Ntxas muaj cuaj caum xyoo nws tau txais pej kum kev cai. 25 Ces yog vim qhov Thaum Es Les As Ntxas hais li ntawd tas, nws cia li txav los ze ntawm lawv kom lawv ntaus nws. 26 Tab nyem no kuv tsis raug neeg tua kuv, los ciaj tuag kuv yeej yuav dim tsis tau ntawm tus muaj hwj huam txhais tes. 27 Yog kuv ua siab tuag nyem no mas kuv lub neej laus thiaj yuav tsim nyog dua. 28 Kuv thiaj yuav tso tau ib tug piv txwv zoo rau cov hluas pom. Kuv tuaj yeem tuag nyob hauv Txoj Cai ntshiab.” 29 Cov neeg uas puag ta xav pab nws, nyem no lawv hloov siab tas lawm, vim lawv xav tias nws cov lus yog lus vwm xwb. 30 Thaum lawv ntaus Es Les As Ntxas, nws yuav tu siav txog tes, nws ncia ib suab thiab hais tias : “Tus HUAB TAIS paub tas puas tsav yam, nws pom tseeb tias kuv tsis xav tuag los tau. Tab sis kuv tuaj yeem nyiaj mob nyob hauv kuv lub cev, kuv tus plig zoo siab nyiaj li ntawd vim kuv hwm HUAB TAIS.” 31 Es Les As Ntxas tuag li ntawd. Nws ua siab tawv. Nws tso ib tug piv txwv zoo rau cov hluas thiab rau peb haiv neeg tib si.

1 Tus Vaj As Nthias Kus ntes tau xya leej kwv tij nrog lawv niam. Tus vaj yuam lawv kom lawv noj nqaij npuas uas lawv Txoj Cai txwv tsis pub noj. Nws kom xuas pas thiab xuas leeg nyuj plawm lawv. 2 Ib tug tub txawm sawv xya leej kwv tij thiab lawv niam chaw hais rau tus vaj tias : “Koj xav paub saib peb xav li cas. Mas peb yeem tuag zoo dua qhov hla peb cov yawg koob Txoj Cai.” 3 Tus vaj npau taws heev, nws kom lawv muab ib lub yias los hlawv kom liab liab saum hluav taws. 4 Thaum cov yias kub kub lawm, nws kom lawv muab tus tub ntawd hlais nplaig thiab laws nws daim tawv taub hau thiab txiav nws cov tes taw rau nws niam thiab nws cov kwv tij ntsia. 5 Thaum lawv ua li ntawd tas rau tus tub lawm, tus vaj kom lawv coj nws mus kib hauv yias, nws tseem ciaj. Thaum nws cov pa ncho hauv yias tuaj, mas nws cov kwv tij thiab nws niam lawv sib txhob tias kom sawv daws ua siab loj siab tawv tuag li ntawd thiab. 6 Lawv hais tias : “HUAB TAIS Tswv Ntuj pom peb, nws hlub peb raws li Mais Xes tau hais nyob hauv zaj Nkauj Paj Nruag tias nws yuav hlub nws cov tub txib.” 7 Thawj tug tub tuag li ntawd tas, lawv coj tus ob mus. Lawv muab nws plaub hau dob, lawv laws nws daim tawv taub hau, lawv nug nws tias : “Cheem peb tseem tsis tau hlais koj ib ceg zuj zus tuaj, koj puas xav noj nqaij npuas ?” 8 Nws hais nws xeem lus tias : “Kuv tsis noj !” Ces lawv coj nws mus txhiab hluav taws kom tuag. 9 Thaum nws yuav tuag, nws hais tias : “Ib tug neeg siab phem li koj, koj tsis pub peb ua neej nyob. Tab sis tus vaj kav lub ntiaj teb yuav tsa peb sawv rov los kom peb tau ib lub neej tsis txawj kawg, rau qhov peb tuag vim nws Txoj Cai.” 10 Tus ob no tuag tas, lawv coj tus peb los. Lawv kom nws hlev nplaig, ces nws hlev nplaig tam sim ntawd thiab nws xyab nws ob txhais caj npab tam sim rau lawv. 11 Nws tseem muaj cuab kav hais tias : “Kuv txais kuv ob txhais tes no ntawm Ntuj los, vim nws tej kev cai mas kuv ntxub kuv ob txhais tes. Kuv tso siab tias nws yuav rov muab kuv ob txhais tes no rau kuv.” 12 Tus vaj thiab nws cov neeg sawv daws ceeb tas tias vim li cas tus tub hluas ntawd yuav muaj lub siab loj kawg. Nws saib nws qhov txom nyem zoo li tsis muaj nqis dab tsi. 13 Nws txoj sia tu lawm, lawv kuj coj tus plaub los ua phem li ntawd rau thiab. 14 Thaum tus plaub yuav tuag, nws hais tias : “Kuv yeem tuag nyob hauv neeg txhais tes. Kuv tso siab tias Tswv Ntuj yuav tsa kuv ciaj rov los. Ntawm koj, mas koj yuav tsis tau ciaj rov los muaj txoj sia.” 15 Ces lawv coj tus tsib los ua phem rau nws. 16 Nws ntsia tus vaj nruj nruj nws hais tias : “Koj kuj txawj tuag thiab. Tab sis koj muaj cai nyob saum neeg, koj ua rau neeg raws li koj nyiam. Tab sis koj tsis txhob xav tias peb haiv neeg no yog ib haiv neeg Tswv Ntuj tsis saib xyuas. 17 Tos tsis ntev, koj yuav tau pom Tswv Ntuj lub hwj chim loj. Koj yuav pom nws muab kev txom nyem rau koj thiab rau koj haiv neeg.” 18 Tus tsib tuag, ces lawv mus coj tus rau los. Thaum nws yuav tuag txog tes, nws hais tias : “Koj tsis txhob xav tias koj yuav tau nyob kaj lug. Peb raug txom nyem them peb cov txim txhaum, vim peb ua txhaum rau Tswv Ntuj. Vim li ntawd mas peb thiaj tau raug tej yam loj li no. 19 Tab sis ntawm koj mas koj txhob xav tias koj yuav tau zoo nyob li no mus li, vim koj tau tsa rog ntaus Tswv Ntuj.” 20 Lawv niam kuj ua tej yam txaus qhuas kawg thiab tsim nyog yuav piav txog. Nws ntsia nws xya leej tub ib tug tuag zuj zus nyob hauv tib hnub nkaus. Tsis kav nws ua ntsej muag luag ntxhi ris qhov ntawd vim nws tso siab rau Tswv Ntuj. 21 Leej niam hais nws niam nws txiv xeem lus ntuas nws cov tub ib leeg dhau ib leeg. Nws txawj xav zoo thiab txawj ntuas tej lo lus zoo kom nws cov tub muaj zog tuaj. 22 Leej niam hais rau lawv tias : “Kuv tsis paub nej xeeb zoo li cas los nyob hauv kuv lub cev. Tsis yog kuv muab txoj sia thiab lub tswv yim rau nej ! Tsis yog kuv tau tsim nej los zoo li nej nyem no. 23 Tus Tswv tsim lub ntiaj teb nws tsim kom neeg txawj yug los. Nws ua kom tas puas tsav yam muaj ib lub hauv paus chiv. Tswv Ntuj siab zoo, nws yuav rov muab txoj sia thiab lub tswv yim rau nej, vim nej tsis hlub nej lub cev nyem no, nej tsuas nyiam Tswv Ntuj Txoj Cai tshaj tas puas tsav yam.” 24 Tus vaj As Nthias Kus xav tias cov lus ntawd yog lus thuam nws thiab cem nws. Thaum ntawd, tus tub yau tseem tsis tau tuag. Ces tus vaj thiaj ntxias tus tub yau tias yog nws tso nws cov yawg koob tej kev cai pov tseg mas tus vaj yeej cog lus tias yuav ua kom tus tub yau nplua nuj thiab kom nws tau zoo, yuav nrog nws ntaus phooj ywg zoo thiab yuav muab ib txog hauj lwm siab rau nws ua. 25 Tab sis tus tub ntxawg tsis mloog tus vaj cov lus. Ces tus vaj kom nws niam los ntuas nws tus tub kom tus tub rov cawm nws txoj sia. 26 Tus vaj hais ntev loo, ces leej niam thiaj ua siab mus ntuas nws tus tub. 27 Nws ua txuj ua raws li tus vaj hais, nws khoov mus siv nws xeem lus hais lus rau nws tus tub tias : “Me tub, koj hlub koj niam mog ! Koj niam tau nqa koj cuaj hlis nyob hauv nws xub ntiag, tau pub mis rau koj noj peb xyoos, tau tu koj qhia koj los txog nyem no. 28 Me tub, koj ntsia lub ntuj thiab lub ntiaj teb, tas puas tsav yam nyob hauv. Koj yuav paub tias Tswv Ntuj muab tej yam me me los tsim xwb. Nws tsim neeg ib yam li ntawd. 29 Koj tsis txhob ntshai tus xav tua neeg ntawd, koj yuav ua raws li koj cov tij laug kom tsim nyog ua lawv tus kwv, koj ua siab tuag mog ! Thaum txog lub caij Ntuj zam kuv thiaj tau pom koj nrog lawv ua ke .” 30 Nws niam tseem hais tsis tau tas, tus tub twb hais tias : “Nej tseem tos dab tsi ntxiv ? Kuv tsis mloog tus vaj cov lus, kuv yuav mloog Txoj Cai uas Mais Xes qhia rau peb cov yawg koob. 31 Koj uas yog tus coj txoj kev txom nyem tuaj rau cov Hes Nplaws, koj yuav tsis dim ntawm Tswv Ntuj txhais tes.” 39 Tus vaj npau taws heev. Nws ua heev tshaj cov rau tus tub ntxawg. 40 Tus tub yau tso nws txoj sia tseg li ntawd, nws lub siab dawb paug. Nws tso siab lug rau Tswv Ntuj. 41 Ces leej niam tuag lawv nws cov tub qab.

43 Yus Das sau tau ob txhiab tawm lub txiag, nws xa mus rau Yes Lus Xas Les, kom tau pub ib thaj txi Ntuj them txim txhaum. Nws ua zoo li ntawd, vim nws nco txog txoj kev yuav sawv rov qab los. 44 Yog nws tsis ntseeg tias cov tub rog tuag lawm yuav sawv rov qab los, mas kev thov Ntuj rau cov tub tuag yog nkim caij nkim zog xwb. 45 Thiab nws xav tias, cov neeg tuag nyob hauv txoj kev teev Ntuj mas lawv yuav tau txais paj tshab zoo nkauj. 46 Yus Das xav tau tswv yim zoo, ces nws thiaj li ua ib thaj txi Ntuj them cov tuag txim txhaum.

1 Puag txheej thaud, nyob Ws Xaws teb, muaj ib tug txiv neej hu ua Yob. Nws yog ib tug neeg siab ncaj thiab ua ncaj ua ncees, nws hwm Tswv Ntuj. 2 Nws zam kev txhaum. Nws yug tau xya leej tub thiab peb leeg ntxhais. 3 Nws muaj xya txhiab tus yaj, peb txhiab tus ntxhuav, tsib puas nkawm nyuj, tsib puas tus luj. Ntxhais txib tub txuas los nws muaj coob kawg. 6 Muaj ib hnub Tswv Ntuj cov tub tuaj cuag HUAB TAIS, Xas Tas kuj nrog lawv tuaj thiab. 7 HUAB TAIS hais rau Xas Tas tias : “Koj mus qhov twg lod ?” Xas Tas teb tias : “Kuv mus ncig ua si hauv ntiaj teb los.” 8 HUAB TAIS hais tias : “Koj puas nco pom kuv tus tub txib Yob ? Nyob ntiaj teb, tsis muaj lwm tus zoo cuag li nws. Nws yog ib tug neeg ncaj, nws tsis muaj ib qho xyeej thiab nws hwm Tswv Ntuj, nws tsis ua phem !” 9 Ces Xas Tas teb zoj tias : “Tos Yob hwm Tswv Ntuj yog vim nws tau zoo. 10 Koj twb cog xyoob ntoo thaiv nws vaj tse, thaiv nws tej liaj teb dav tas. Koj foom hmoov zoo rau nws tej hauj lwm, nws cov tsiaj huam vam puv lub teb chaws. 11 Yog koj rhuav nws lub cuab tam tas, mas kuv yeej cog lus tau tias nws yuav ntxeev siab, nws yuav tsawm koj nyob ntawm koj xub ntiag.” 12 HUAB TAIS hais rau Xas Tas tias : “Ua li lod ! Koj xav ua dab tsi rau nws lub cuab tam kuj tau nyob ntawm koj siab. Tab sis koj tsis txhob kov nws .” 13 Hnub ntawd Yob cov tub thiab cov ntxhais tab tom mus noj nqaij haus cawv tom tus tub hlob tsev, 14 muaj ib tug khiav tuaj fi xov rau Yob tias : “Koj cov nyuj tseem tab tom laij teb, cov luj nog zaub nyob ntawm ib sab, 15 ib sij huam cov Xas Npes cia li tuaj muab cab mus tas lawm. Lawv xuas ntaj tua koj cov tub txib tas tshuav kuv ib leeg thiaj dim khiav los hais rau koj xwb.” 16 Tus xa xov tseem hais lus, txawm siv muaj lwm tus khiav los txog ntua, nws hais tias : “Tswv Ntuj tso hluav taws poob saum Ntuj los hlawv koj cov yaj thiab cov neeg tuag tas. Tshuav kuv ib leeg thiaj dim los hais rau koj xwb.” 17 Tus ntawd tseem hais lus txawm siv muaj dua ib tug los hais tias : “Muaj peb pab Kas Ntes tuaj nyiag koj cov ntxhuav tas lawm. Lawv xuas ntaj tua koj cov tub txib tuag tas. Tshuav kuv ib leeg dim los hais rau koj xwb.” 18 Nws tseem hais lus, twb muaj dua ib tug khiav los hais tias : “Koj cov tub thiab cov ntxhais tseem tab tom noj nqaij haus cawv tom koj tus tub hlob tsev. 19 Muaj ib nthwv cua hlob hlob cia li tuaj ntsawj lub tsev, ces tsev vau los tsuam lawv tuag tas. Tshuav kuv ib leeg dim los hais rau koj paub xwb.” 20 Ces Yob sawv tsees dua rhe nws lub tsho, nws mus chais plaub hau. Nws da hauv av, nws hais tias : 21 “Kuv tawm hauv kuv niam cev los kuv liab qab. Kuv yuav liab qab rov mus hauv av. Txhia yam uas HUAB TAIS pub rau kuv, nyem no nws rov qab sau rov mus tas. HUAB TAIS lub npe nto koob meej !”
22 Yob raug kev txom nyem npaum li cas los nws tsis ua txhaum li, tsis kam cem phem txog Tswv Ntuj.

1 Yob qhib ncauj tsawm lub hnub nyoog nws yug los. 2 Nws hais 3 “Thov kom hnub kuv yug los ploj mus. Thiab hmo uas qhia tias ib tug tub nyuam qhuav xeeb los, thov kom hmo ntawd yaj ntshis mus. 11 Kuv kheev lam tuag thaum nyob nruab thiab. Thaum kuv yug poob nthav cas kuv txoj sia tsis tu ? 12 Tim li cas thiaj muaj ob lub hauv caug los cug kuv, ob lub mis los pub kuv ? 13 Yog txhob muaj li ntawd mas ntshai nyem no kuv twb pw ntsiag to, tau zoo puag tes puag taw so tsaug zog. 14 Kuv twb mus nrog ntiaj teb tej vaj, tej nom tswv nyob ntsiag to hauv lawv tej ntxa zeb lawm. 15 Kuv twb tau nrog cov tub vaj ntxwv nyob hauv lawv tej tsev nyiaj tsev kub lawm. 16 Kheev lam kuv zoo li tus me nyuam nchuav los tsis puv hli, thiab zoo li cov me nyuam uas tsis tau pom lub ntuj. 17 Kheev lam kuv tau mus nyob hauv lub teb chaws uas tsis muaj neeg siab phem ua ntxhov hnyo, kheev lam kuv tau mus nrog cov neeg sab so nyob ntawd. 20 Tus neeg txom txom nyem, thiab tu siab loj tas npaum no, ua cas yuav hu nws los nyob ntiaj teb no ? 21 Xav tuag los tuag tsis taus. Ntshaw hnub tuag mas tseem ntshaw tshaj ib thooj kub. 22 Yog thaum twg paub tias pawg av ntawd yog lub qhov ntxa, mas yuav zoo siab. Yog hnub twg kuv tau mus nyob hauv ntxa, mas ntshai yuav zoo kuv siab. 23 Tim li cas thiaj muab txoj sia rau tus neeg uas nrhiav tsis tau nws txoj kev tuag ? Tim li cas yuav muab txoj sia rau tus uas Ntuj pub ib daim ntawv tsis zoo rau nws ?”

1 “Ib tug neeg ua hauj lwm nyob ntiaj teb no, nws tsis zoo li ib tug tub txib xwb lod ? Nws lub neej tsis zoo li ib tug neeg ntiav zog xwb lod ? 2 Kuv zoo li ib tug qhev ntshaw mus so nyob hauv qhov ntxoov ntxoo. Kuv zoo li ib tug tub zog tos nws tus nqi zog. 3 Kuv tos ntev hli, kuv tsis tau raws li kuv tos. Kuv nyob ntau hmo hauv kev txom nyem. 4 Yog kuv pw saum kuv daim lev, kuv hais tias thaum twg thiaj yuav kaj ntug ? Kuv nyuam qhuav sawv, kuv hais tias : ceeb laj tos txog tsaus ntuj. Kuv lub tswv yim ntxhov, xav ub xav no mus txog thaum lub hnub poob qho. 7 HUAB TAIS, thov koj nco tias kuv lub neej tsuas ntev li nqus ib pas cua xwb. Thov koj nco tias kuv yuav tsis tau rov pom txoj kev noj qab nyob zoo. 8 Txij no mus, neeg qhov muag yuav pom tsis tau kuv ntxiv, kuv yuav ploj mus. Tsuas tshuav koj lub qhov muag thiaj yuav ntsia ntsoov kuv xwb.”

1 Yob qhib ncauj hais lus li no : 2 “Qhov tseeb tiag mas kuv paub tias neeg cav tsis yeej Tswv Ntuj. 3 Leej twg sim khav mus nrog Tswv Ntuj sab laj saib, ib txhiab zaus Tswv Ntuj twb tsis tau teb nws ib zaug. 4 Tswv Ntuj lub siab thoob tsib, nws lub zog loj. Leej twg yuav cav yeej nws ? 5 Tswv Ntuj ua kom tej roob tej hav tshais chaw tau, nws tsis xub nug lawv. Thaum nws npau taws, nws muab lawv nphau. 6 Nws diaj lub ntiaj teb kom ua zog, nws qaij cov ncej txheem lub ntiaj teb. 7 Yog nws txwv lub hnub mas lub hnub yuav tsis tawm tuaj. Nws yuav thaiv cov hnub qub tsis pub lawv ci kuj tau. 8 Yog nws nthuav lub ntuj nyob saud, yog nws ua kom tej roob vau los ua hiav txwv. 9 Tswv Ntuj tsim lub hnub qub kaj ntuj, thiab tsim txhiaj txiv mim. 10 Yog nws tsim tej yam loj yus ntsuas tsis tau, nws tsim tej yam zoo tas nrho. Yus suav tsis thoob. 11 Tab yog nws hla saum kuv, los kuv pom tsis tau nws, kuv tsis hnov nws. 12 Tab nws nqa ib yam mus, leej twg yuav cheem tau, tsis muaj leej twg muaj cuab kav hais tias : koj ua dab tsi ? 14 Ua cas kuv tseem yuav nrhiav lus teb rau nws thiab ? 15 Tab kuv txawm muaj cai npaum twg, los teb tsis tau dab tsi. Kuv kawg yuav thov tus uas txiav txim rau kuv kom nws hlub kuv xwb. 16 Yog kuv hu Tswv Ntuj, nws teb kuv, kuv tseem ntseeg tsis tau tias nws puas yuav mloog kuv lub suab ?”

21 Nej uas yog kuv cov phooj ywg, nej hlub kuv mog ! Yog Tswv Ntuj txhais tes ntaus kuv. 22 Vim li cas nej tseem nrog Tswv Ntuj ua nyuaj siab rau kuv tsis txawj tag thiab ? 23 Kuv xav kom muaj ib tug sau kuv cov lus cia ! 24 Kuv xav kom nws muab rab txaug hlau thiab tus cwj mem los txaug kuv cov lus nyob hauv ib daig txiag zeb, cia rau saum phab tsua kom nyob mus li. 25 Kuv paub tias tus txhiv kuv nws muaj txoj sia, hnub kawg nws yuav sawv tsees los txiav txim rau lub ntiaj teb. 26 Thaum kuv yuav xeev rov los, mas nws yuav tsa kuv sawv nyob ze nws, ces kuv cev nqaij yuav tau pom Tswv Ntuj. 27 Tus kuv yuav pom, yog kuv ib tug swm neeg. Tus kuv qhov muag yuav ntsia, tsis yog ib tug qhua.

1 HUAB TAIS nyob hauv nag xob nag cua teb rau Yob tias : “Thaum cov dej hiav txwv txhawv hauv tiv txwv nroo ntws tawm los, yog leej twg muab cov dej hiav txwv kaw thiab xov ? Puas yog koj ? 9 Thaum kuv tso ib co huab dawb los ua tsho vov lub hiav txwv, koj nyob qhov twg ? Thaum kuv tau ua tej twv huab dub los npog lub hiav txwv, koj ua dab tsi ? 10 Thaum kuv tu ciam teb rau dej kom txhob hla, thiab kuv tsa ntsa zeb ntsa tsua xov lub hiav txwv, koj nyob qhov twg ? 11 Thaum kuv tau hais rau cov hiav txwv tias : koj yuav tsis txhob mus dhau qhov no. Koj cov dej nphau muaj hwj chim ntxiag, yuav tsum nyob twj ywm ntawm no, mas thaum ntawd koj nyob qhov twg ? 12 Nyob hauv koj lub neej, koj puas tau hais ib zaug kom lub ntuj kaj thaum sawv ntxov ? 13 Koj puas tau hais kom lub hnub tuaj ziab lub ntiaj teb thiab tuaj kub cov neeg siab phem ? 14 Koj ua puas tau kom hnub tuaj zas lub ntiaj teb liab tas zoo li zas tsoos tsho ? 15 Koj ua puas tau kom lub hnub tuaj rho qhov pom kev ntawm cov neeg siab phem mus tsoo sab npab xav tua neeg ? 16 Koj puas tau mus txog lub hauv dej hiav txwv, thiab mus yos nyob hauv qab thu dej ? 17 Koj puas tau pom cov qhov rooj mus hauv tub tuag teb. Koj puas tau pom cov qhov rooj mus hauv teb chaws tsaus ntuj ? 18 Koj puas paub me ntsis tias lub teb chaws dav li cas ? Yog koj paub tas tej no, mas koj hais. 19 Lub hnub nyob sab twg ? Qhov tsaus ntuj nyob qhov twg ? 20 Koj coj puas tau qhov pom kev, thiab qhov tsaus ntuj rov mus rau lawv tej chaw nyob ? 21 Yog koj paub tej ntawd, mas yog vim koj xub nyob dua qhov pom kev. Yog li ntawd mas koj nyob ntev xyoo kawg !

3 Yob teb rau HUAB TAIS tias : “Kuv lam tau lam cav xwb ! Kuv cov lus tsis tseem ceeb dab tsi ! Kuv yuav teb dab tsi rau koj ? 4 Kuv yuav muab tes los npog kuv qhov ncauj, kom kuv txhob cav koj ntxiv. 5 Kuv tau hais ib zaug. Kuv tsis hais ntxiv lawm. Kuv tau hais ib zaug, Kuv tsis rov hais zaum ob ntxiv.”

1 Yob teb HUAB TAIS tias : 2 “Kuv paub tias koj muaj hwj huam tas nrho. Koj xav dab tsi koj ua tau tas. 3 Kuv yog tus muab koj tej lus sib xyaws tas, kuv hais tej lo lus tsis muaj ntsiab. Kuv lam kwv yees hais tej yam loj loj uas kuv tsis to taub thiab kuv tsis paub. 5 Thaud, kuv paub koj vim kuv hnov luag tej hais xwb. Tab sis nyem no, kuv paub koj vim kuv tau pom koj lawm. 6 Ua li mas kuv rov thim kuv cov lus, kuv them txim nyob hauv plua av thiab plua tshauv.” 10 Ces HUAB TAIS rov hlub Yob. HUAB TAIS rov tsa Yob nyob hauv txoj kev vam meej. 12 HUAB TAIS foom hmoov zoo rau Yob lub neej tshiab kom tau zoo dua yav thaud. Yob muaj nto 14,000 tus yaj, 6,000 tus ntxhuav, 1,000 nkawm nyuj thiab 1,000 tus luj. Nws yug tau xya leej tub thiab peb leeg ntxhais. 14 Tus ntxhais hlob hu ua Me Nkauj Nquab, tus nrab hu ua Me Tsw Qab, tus peb hu ua Me Kub Rau Tshuaj. 15 Nyob thoob hauv lub teb chaws tsis muaj ib tug poj niam zoo nkauj npaum li Yob cov ntxhais. Lawv txiv kuj faib cuab tam rau lawv ib yam li faib rau cov tub. 16 Yob zoo los, nws tseem ua neej ntev txog ib puas plaub caug xyoo. Nws tau pom nws cov tub cov nyab, pom nws cov tub xeeb ntxwv mus txog phaj plaub. 17 Nws tau ua neej ntev niaj ntau xyoo txaus nws siab, ces nws mam li tuag.

1 Tus tau txoj hmoov zoo yog tus tsis ua raws cov siab phem zaj tswv yim, tsis nres tauv pem hauv cov neeg txhaum txoj kev, tsis zaum ntawm cov neeg thuam Ntuj lub rooj. 2 Nws xyiv fab npuab HUAB TAIS txoj cai. Nruab hnub hmo ntuj nws qog HUAB TAIS txoj cai. 3 Nws zoo puav tam li tsob ntoo cog ze kwj deg, nws txi txiv raws caij, nws cov nplooj tsis ntsws li, nws ua yam twg tau yam ntawd raws siab xav. 4 Cov neeg phem tsis zoo li ntawd : lawv zoo li tej npluag nplej uas cua tshuab ya rau txhua qhov. 5 Thaum txog lub caij txiav txim, cov neeg siab phem thiab cov neeg txhaum yuav sawv tsis taus nyob hauv tsoom siab ncaj lub txoos. 6 Vim HUAB TAIS zov cov siab ncaj txoj hauv kev, hos cov neeg txhaum txoj kev yuav ploj.

1 Vim li cas tsoom haiv neeg yuav ua ntxhov hnyo li ntawd? Cas tsoom kuj cuab yuav nyooj laws tsis muaj qab hau? 2 Cov vaj nyob ntiaj teb sawv ntxeev siab, cov nom tswv ua tej pab tuav xam nrhiav kev tawm tsam tiv HUAB TAIS thiab nws leej pleev tias : 3 “Peb muab nkawd cov hlua ua kom tu mas ! “Peb muab nkawd tej saw hlau pov tseg !” 4 Tus zaum saum txheej ntuj siab tuaj dab ros. HUAB TAIS thuam lawv. 5 Nws hais lus npau taws rau lawv. Nws lub siab ceev ua lawv ntshai, nws hais tias : 6 “Kuv tau pleev kuv tus vaj nyob saum kuv lub roob ntshiab Xis Yoos”. 7 “Kuv yuav tshaj HUAB TAIS txoj cai tawm. HUAB TAIS hais rau kuv tias : ‘Koj yog kuv leej tub. Hnub no kuv xeeb koj. 8 Koj thov kuv, mas kuv yuav muab tsoom kuj cuab los pub ua cuab tam rau koj, kuv yuav muab lub ntiaj teb mus txog tim npoo ntuj los ua koj tug. 9 Koj yuav xuas ib tug cwj hlau los tswj lawv. Koj tsoo kom lawv ntsoog tas xws li lub lauj kaub av.” 10 Tsoom vaj, txij no mus nej ua neeg ntse ! Cov txwj laus txiav txim, nej cia luag qhuab qhia nej mog ! 11 Nej ua tib zoo tsob hwb HUAB TAIS ! Nej cia li pe tshee na ntawm nws ko taw! 12 Tsam nws npau taws, ces nej tuag hauv nej txoj kev. Ib nyuag yam me ua nws lub siab npau tawm plaws tuaj. Cov los nkaum hauv Huab Tais, lawv puav leej tau txoj hmoov zoo.

1 Das Vis zaj nkauj paj nraug. Thaum nws khiav nkaum nws tus tub As Ntxas Loos ntxeev siab.
2 HUAB TAIS, kuv cov yeeb ncuab coob tas nrho ! Cov sawv los ntxeev siab rau kuv coob kawg !
3 Coob leej hais txog kuv tias : Txhob pub kom nws tau kev cawm siav nyob hauv Tswv Ntuj !
4 HUAB TAIS, koj yog daim leem phiaj thaiv kuv, koj yog kuv lub koob meej, yog tus tsa kuv taub hau.
5 Kuv tsa suab nrov hu HUAB TAIS. Nws nyob saum nws lub roob ntshiab teb tuaj rau kuv.
6 Kuv mus pw, kuv tsaug zog. Kuv tsim rov los : vim HUAB TAIS nres kuv.
7 Kuv tsis ntshai cov neeg coob coob uas sawv vij ncig kuv.
8 HUAB TAIS, koj sawv ! Kuv tus Tswv Ntuj, thov koj cawm kuv mas ! Koj ntaus kuv cov yeeb ncuab sab plhu, thiab tsoo cov neeg phem cov kaus hniav lov.
9 Txoj kev cawm neeg yog HUAB TAIS tug. Koj foom hmoov zoo rau koj haiv neeg !

1 Ua rau tus coj nkauj. Nkauj nog ncas. Das Vis zaj nkauj paj nruag.
2 Tswv Ntuj, koj yog tus ua ncaj rau kuv, thaum kuv hu txog koj, koj teb kuv. Thaum kuv raug kev txhawj xeeb, koj daws kuv kev txhawj. Thov koj khuv leej kuv. Koj mloog kuv lo lus thov koj.
3 Leej tib neeg, nej yuav thuam kuv lub koob meej txog thaum twg?
Nej yuav nyiam qhov cuav thiab nrhiav kev dag txog thaum twg? 4 Nej yuav paub tias HUAB TAIS qee tus ntseeg nws rau ib cag. Thaum kuv hu txog HUAB TAIS, nws mloog kuv. 5 Nej yuav tshee, nej txhob ua txhaum ! Nej xav tswv yim nyob hauv nej txaj, nej nyob ntsiag to. 6 Nej cev cov txim txi Ntuj raws li txoj cai, nej cia li tso siab rau HUAB TAIS. 7 Muaj coob leej hais tias : “Leej twg yuav ua kom peb pom txoj kev kaj siab lug?” HUAB TAIS, koj ua koj lub ntsej muag ci tuaj rau peb. 8 Koj ua kom kuv zoo siab dua lawv thaum lawv sau tau nplej thiab cub tau cawv ntau. 9 Kuv lub siab kaj ! Kuv mus pw, kuv tsaug zog. HUAB TAIS, vim koj tib leeg thiaj ua tau kom kuv nyob nyab xeeb.

Ua rau tus coj nkauj. Raws suab raj. Das Vis zaj nkauj paj nruag. 2 HUAB TAIS, koj tig ntsej los mloog kuv tej lus. Koj yuav hnov kuv lub suab seev.. 3 Kuv tus vaj, kuv tus Tswv Ntuj, koj ua tib zoo mloog kuv lub suab hu txog koj, vim koj yog tus uas kuv teev. 4 HUAB TAIS, thaum sawv ntxov, koj hnov kuv lub suab. Sawv ntxov tsees, kuv npaj kuv zaj teev koj, ces kuv tos… 5 Koj tsis yog ib tug Tswv Ntuj nyiam kev phem. Tus neeg phem tuaj nyob tsis tau hauv koj tsev. 6 Cov neeg muab hlob sawv tsis taus ntsug ntawm koj xub ntiag. Koj ntxub tas tsoom neeg nrhiav ua phem rau luag. 7 Koj ua kom cov neeg dag tuag. Cov neeg nkhaus, cov txo luag ntshav, thiab cov neeg dag, mas HUAB TAIS ntxub lawv tas siab. 8 Hos ntawm kuv, vim koj hlub kuv ces kuv los hauv koj tsev. Kuv hwm koj, kuv txhos caug pe tig rau koj lub tuam tsev ntshiab 9 HUAB TAIS, luag tej nyas ntshis kuv, tab sis koj coj kuv kev vim koj siab ncaj. Koj ncaws koj txoj kev kom tiaj nyob tom kuv hauv ntej. 10 Tsis muaj ib yam tseeb nyob hauv lawv lub ncauj. Muaj kev rhuav nyob puv hauv lawv nruab siab. Lawv lub qa, yog ib lub qhov ntxa qhib lug, lawv tus nplaig txawj haub txawj ntxias. 11 Tswv Ntuj, koj ua kom lawv raug txim mas ! Koj ua kom lawv plam lawv tus nru lus. Koj ntiab lawv khiav mus deb, vim lawv hla koj lus, thiab ntxeev siab rau koj. 12 Ces cov tuaj nkaum hauv koj yuav zoo siab, lawv yuav xyiv fab hlo hu nkauj, vim koj txuag lawv. Cov neeg nyiam koj lub npe yuav hom khaj nyob hauv koj. 13 HUAB TAIS, koj foom lus zoo rau tus siab ncaj. Koj lub siab hlub thaiv nws xws li ib daig leem phiaj.

1 Ua rau tus coj nkauj. Thaj cheej yim txoj hlua. Das Vis zaj nkauj paj nruag. 2 HUAB TAIS, thaum koj npau taws, koj tsis txhob muab txim rau kuv. Thaum koj meem txom, koj tsis txhob cob qhia kuv. 3 HUAB TAIS, koj khuv leej kuv mas ! Kuv txoj sia yau zuj zus lawm. HUAB TAIS, thov koj kho kuv vim kuv tshee ti txha nkaus. 4 Kuv tus plig ntshai tshee na. HUAB TAIS, koj yuav tos txog thaum twg? 5 HUAB TAIS, koj rov qab los mas ! Thov koj npo kuv tus plig ! Koj cawm kuv, vim koj hlub kuv ! 6 Vim nyob hauv tub tuag teb, tsis muaj leej twg yuav nco qab txog koj; nyob hauv ntuj txias teb tsaus, leej twg yuav ua koj tsaug? 7 Kuv ntsaj ntsaj, kuv qaug zog tas ! Niaj hmo, kua muag ntxaum kuv lub txaj, kuv kua muag nyab kuv chaw pw. 8 Kev lwj siab ua kuv qhov muag tsis pom kev, kuv pom kev zem zuag lawm xwb, vim cov neeg ntxub kuv coob tas nrho. 9 Tas nej cov uas nyiam ua phem, nej txav mus deb kuv, vim HUAB TAIS hnov kuv lub suab quaj. 10 HUAB TAIS hnov kuv cov lus thov. HUAB TAIS txais kuv zaj thov nws. 11 Tas kuv cov yeeb ncuab yuav ntshai tshee na, thiab yuav txaj muag ! Ib sij huam lawv poob ntsej muag tas, lawv cia li thim rov qab.

1 Ua rau tus coj nkauj. Raws li Nkis Tis. Das Vis zaj nkauj paj nruag. 2 HUAB TAIS, peb tus HUAB TAIS, koj lub npe muaj hwj xyeej mus puv tas ntiaj teb. Koj tsa koj lub koob meej nyob siab dua cuaj txheej ntuj. 3 Koj ua kom cov me nyuam yaus thiab cov me nyuam mos lub ncauj cav lus zoo txog koj, kom lawv tiv cov sawv los ntaus koj, kom tus yeeb ncuab rob caub nyob qhov ncauj kaw nti cia. 4 Thaum kuv ntsia cuaj txheej ntuj uas koj ntiv tes tsim los, ntsia lub hli, cov hnub qub uas koj muab dai saud, 5 neeg yog dab tsi, koj thiaj nco txog? Leej tib neeg yog dab tsi, koj thiaj txhawj txog? 6 Koj muab neeg tsa siab yuav luag cuag ib tug tswv ntuj. Koj muab koob meej phim qhov zoo nkauj zoo saib los rau neeg ntoo. 7 Koj tsa neeg kav txhua yam koj txhais tes tsim los, koj tso tas puas tsav yam rau hauv neeg qab xib taws : 8 tas tej me yaj, me nyuj huv tib si, tas tsoom tsiaj qus nyob nruab nrag, 9 me noog ya saum ntuj, me ntses nyob hauv dej ntuj, tas txhua hom tsiaj khiav hauv dej ntuj. 10 HUAB TAIS, peb tus Huab Tais, koj lub npe muaj hwj xyeej mus puv tas ntiaj teb !

1 Ua rau tus coj nkauj. Almouth Labben. Das Vis zaj nkauj paj nruag. Alef 2 HUAB TAIS, kuv muab tas kuv siab ntsws los ua koj tsaug, kuv yuav hais txog koj cov hauj lwm zoo nkauj zoo saib. 3 Kuv zoo siab, kuv hom khaj nyob hauv koj, uas yog Tus Nyob Siab Tshaj, kuv hu nkauj cav txog koj lub npe. Bet 4 Thaum kuv cov yeeb ncuab thim rov qab, lawv dawm ko taw, lawv tuag ntawm koj xub ntiag. 5 Vim koj txiav txim ncaj, koj txiav txim raws kev haum pheej rau kuv, koj zaum saum theej kiab txiav txim ncaj. Guimel 6 Koj tsawm cov kuj cuab, koj ua kom tus tsis hwm Ntuj tuag, koj rhuav lawv lub npe kom ploj mus ib txhis. 7 Tus yeeb ncuab piam sij tas, tuag tu noob mus ib txhis. Koj rhuav lawv cov nroog vau ti av, tsis muaj leej twg nco qab txog cov nroog ntawd. He 8 Hos HUAB TAIS zaum ua vaj mus ib txhiab, nws ua kom nws lub theej kiab ruaj nreb tos lub caij txiav txim. 9 Nws txiav txim rau lub sim ceeb raws txoj kev ncaj. Nws txiav txim ncaj rau tsoom haiv neeg. Waw 10 HUAB TAIS yog lub yeej zeb thaiv tus raug luag tsim ! Lub caij raug xwv txheej, Huab Tais yog lub yeej khov ! 11 Cov neeg paub koj lub npe, lawv tso siab rau koj ! HUAB TAIS, vim tias koj tsis tso cov neeg nrhiav koj pov tseg. Zain 12 Nej hu nkauj cav txog tus HUAB TAIS nyob pem Xis Yoos. Nej tshaj nws cov hauj lwm loj rau txhia haiv neeg paub ! 13 Vim tus pauj neeg cov ntshav nco ntsoov txog lawv, nws tsis hnov qab cov txom nyem lub suab hu. Het 14 HUAB TAIS, koj khuv leej kuv mas ! Ntsia saib : yeeb ncuab ua kuv txom nyem npaum li cas. Koj rub kuv dim ntawm lub qhov rooj mus hauv qhov tuag. 15 Kuv yuav cav txog koj nyob ntawm tus ntxhais Xis Yoos cov rooj loog. Kuv yuav hom khaj vim koj cawm kuv. Tet 16 Tsoom kuj cuab zom rau hauv lub qhov lawv tau khawb, lawv ko taw daig hauv lub vas uas lawv zais. 17 HUAB TAIS ua kom peb paub nws, nws txiav txim lawm, nws cia tus tsis hwm Ntuj rov mag rooj ntxhiab uas nws cuab. Yod 18 Cov tsis hwm Ntuj thiab tsoom kuj cuab uas hnov qab Tswv Ntuj nqes rov mus rau hauv ntuj txias teb tsaus. 19 Ntuj yuav tsis hnov qab tus pluag ib zaug li, cov neeg txom nyem chaw tso siab yuav tsis ploj mus li. 20 HUAB TAIS, koj sawv mas ! Txhob kheev kom neeg yeej koj ! Cia ib tsoom kuj cuab raug txiav txim nyob ntawm koj lub ntsej muag ! 21 HUAB TAIS, koj tso kev ntshai loj tuaj raug lawv mas ! kom tsoom kuj cuab paub tias lawv kawg yog ib co neeg txawj tuag xwb.

1 HUAB TAIS, ua cas koj nyob deb? Lub caij peb ntsib kev txhawj xeeb, ua cas koj tsiv nraim, ? 2 Tus tsis hwm Ntuj, lub siab muab hlob noj cov neeg txom nyem. Nws rov mag rooj ntxiab uas nws cuab. 3 Tus tsis hwm Ntuj khav tias nws tau raws li nws lub siab ntshaw. Noun Tus siab hlob, foom phem, thiab thuam Tswv Ntuj. 4 Tus tsis hwm Ntuj tau txaus nws siab, nws tsis txhawj dab tsi, nws hais tias : “Tsis muaj Tswv Ntuj !” 5 Txhua zaus, nws ua yam twg, nws tau yam ntawd raws siab xav. Tswv Ntuj, koj tej lus txiav txim nyob puag saum ntuj ub, deb deb ntawm nws. Nws thuam txhua tus uas tiv nws. 6 Tus tsis hwm Ntuj xav hauv nruab siab tias : “Kuv ruaj khov lawm, yuav tsis muaj xwv txheej tuaj raug kuv ib zaug li !” Phe 7 Nws lub ncauj hais tej lus foom phem, lus dag, lus chob neeg. Nws tus nplaig tsuas hais kev lim hiam, kev ua phem rau luag. 8 Tus tsis hwm Ntuj nyas nraim nkoos hauv cov zos: Nws muab tus tsis txhaum tua rau hauv nws qhov chaw nkaum, Ain nws qhov muag nyas ntshis tus txom nyem. 9 Tus tsis hwm Ntuj tsiv nraim, nws nyas xws li tus tsov ntxhuav nraim hauv koog nroj, nws nyas yuav ntes tus pluag. Nws nthos nkaus tus pluag, rub rhe tus pluag rau hauv lub vas. 10 Nws zaum quav ceg nyas, nws nraim pliab lua: tus txom nyem poob nthav rau hauv nws lub hwj huam. 11 Nws xav hauv siab tias : “Tswv Ntuj hnov qab lawm ! Tswv Ntuj thaiv nws lub ntsej muag, nws tsis pom dab tsi li.” Qof 12 HUAB TAIS, koj sawv tsees mas ! Tswv Ntuj, koj tsa tes ! Koj txhob hnov qab cov txom nyem mas ! 13 Vim li cas tus tsis hwm Ntuj ua tub qaug Tswv Ntuj? Nws xav hauv siab tias : “Koj yuav tsis tuaj nplua kuv!” Rech 14 HUAB TAIS, tab sis koj twb pom lawm. Koj pom kev nyuaj thiab kev tu siab. Koj txhais tes yuav tuav tas txhia yam ntawd.
Tus txom nyem tso cev rau koj. Koj pab tus ntsuag nos. Chin 15 Koj tsoo tus tsis hwm Ntuj thiab tus siab phem sab npab lov ! Koj nplua tus ua phem, kom tsis txhob pom ib zaug ntxiv li. 16 HUAB TAIS ua vaj mus ib txhiab ib txhis. Cov kuj cuab yuav ploj ntais ntawm nws lub teb chaws. Taw 17 HUAB TAIS, koj hnov cov neeg me lub siab ntshaw. Koj ua kom lawv lub siab khov kho, koj ua tib zoo tig ntsej los mloog lawv, 18 koj tsa cai rau tus ntsuag nos, thiab tus raug luag tsim, kom nyob ntiaj teb no, txhob muaj kev lim hiam ntxiv.

1 Ua rau tus coj nkauj. Das Vis zaj. Kuv muab HUAB TAIS los ua kuv lub chaw nkaum. Ua cas nej thiaj hais tau rau kuv tias: Me nyuam noog, khiav lawm pem nej tej roob mas! 2 Ntsia saib, cov neeg siab phem nta hneev, rub xib xub rau saum txoj hlua hneev, lawv nyob hauv qhov tsaus ntuj tua cov siab ncaj. 3 Thaum luag muab cov taw ntsa rhuav pob tas, tus siab ncaj yuav ua tau dab tsi ? 4 HUAB TAIS nyob hauv nws lub tuam tsev ntshiab; HUAB TAIS lub theej kiab nyob saum ntuj. Nws qhov muag ntsia ntsoov, nws lub ntsiab muag ntsia zeej tsoom. 5 HUAB TAIS sim tus neeg ncaj thiab tus neeg phem, nws ntxub tus lim hiam, ntxub tus nyiam kev sib ntaus sib tua. 6 Thov kom HUAB TAIS tso hluav ncaig thiab leej faj nqes los rau saum cov neeg phem. Nyob hauv lawv lub ntim, muaj ib nthwv cua kub cuag hluav taws. 7 Vim HUAB TAIS siab ncaj, nws nyiam cov hauj lwm ncaj ncees, cov neeg siab ncaj yuav ntsia HUAB TAIS lub ntsej muag.

1 Ua rau tus coj nkauj. Xuas thaj cheej yim txoj hlua. Das Vis zaj nkauj paj nruag.
2 Thov pab mas, HUAB TAIS ! Tsis tshuav ib tug neeg ntseeg li lawm. Leej tib neeg txoj kev ua ncaj ploj tas lawm. 3 Lawv ib leeg dag rau ib leeg, lawv di ncauj ntxias neeg, thaum lawv hais lus, lawv muaj ob lub siab. 4 Xav kom HUAB TAIS txiav cov niag di ncauj ntxias neeg, txiav tus nplaig muab hlob. 5 Vim lawv hais tias : “Peb tus nplaig txawj cav yeej; peb di ncauj yog peb tug; leej twg yuav ua tau tswv kav peb”. 6 HUAB TAIS hais tias : ” Vim cov neeg me raug luag yuam, hos cov pluag ntsaj, mas zaum no kuv yuav sawv los coj lawv mus rau hauv qhov chaw nyob nyab xeeb, raws li lawv tau ntshaw”. 7 HUAB TAIS lo lus yog lus meej, yog tseem nyiaj nchuav tawm hauv lub yeej vub av los. Yog cov tseem nyiaj uas muab nchuav xya zaus. 8 HUAB TAIS, koj pov hwv peb. Koj txuag peb ntawm caj ces neeg ntawd mus li. 9 Thaum kev phem yeej leej tib neeg, mas cov tsis hwm Ntuj mus los nplawg ntia ntawm tej.

1 Ua rau tus coj nkauj. Das Vis zaj nkauj paj nruag. 2 Yuav ntev li cas HUAB TAIS ? Koj yuav tsis nco qab txog kuv tas ib sid lod ? Koj yuav zais koj lub ntsej muag nyob deb kuv hov ntev ? 3 Kuv yuav tso kev txhawj rau kuv tus plig ris txog thaum twg? Kuv yuav tu siab nruab hnub hmo ntuj txog thaum twg? Kuv tus yeeb ncuab yuav yeej txog thaum twg? 4 HUAB TAIS, kuv tus Tswv Ntuj, koj ntsia, koj teb kuv saib ! Koj cia qhov pom kev ci tuaj rau hauv kuv qhov muag, kom kuv txhob tsaug zog hauv kev tuag tus dab ntub, 5 Kuv tus yeeb ncuab thiaj tsis tau kev hais tias : ” Kuv yeej nws lawm”. Cov neeg ntxub kuv thiaj tsis tau kev zoo siab pom kuv tshee. 6 Tab sis kuv tso siab rau koj txoj kev hlub ruaj. Kuv lub siab yuav hom khaj vim koj cawm kuv. kuv hu nkauj rau HUAB TAIS vim nws ua zoo rau kuv.

1 Ua rau tus coj nkauj. Das vis zaj.. Cov neeg vwm xav hauv nruab siab tias : “Tsis muaj Tswv Ntuj”. Lawv nyiam kev ua dev ua npua, lawv ua tej yam tsiv saib tas nrho. Tsis muaj ib tug ua qhov zoo. 2 Nyob saum ntuj, HUAB TAIS khoov los xauj neeg, saib puas muaj ib tug neeg ntse uas nrhiav Tswv Ntuj. 3 Txhua leej txhua tus yuam kev, sawv daws ua txhaum ib yam nkaus, tsis muaj leej twg ua zoo, tsis muaj ib tug kiag li. 4 Tas cov neeg ua phem ntawd, puas yog neeg tsis paub tab? Lawv noj kuv haiv neeg xws li noj mov. Lawv tsis hu txog HUAB TAIS. 5 Lawv yuav ntshai tshee na loj, vim Tswv Ntuj tuaj cov siab ncaj tog. 6 Nej thuam tus txom nyem kev tso siab, Tab sis Tswv Ntuj yog tus txom nyem qhov chaw nkaum. 7 Ab ! Thov kom txoj kev cawm His Xas Lais tawm pem Xis Yoos tuaj ! Thaum HUAB TAIS tshem nws haiv neeg txoj kev txom nyem, Yas Kos hom khaj, His Xas Lais zoo siab.

1 HUAB TAIS leej twg yuav tau mus nyob hauv koj lub tsev tsam phooj? Leej twg yuav tau mus nyob saum koj lub roob ntshiab? 2 Tus coj tus yeeb yam tsis muaj chaw xyeej, Tus ua ncaj rau luag, Tus xav qhov tseeb nyob nruab siab. 3 Nws tsis cia nws tus nplaig hais lus dag. Nws tsis ua phem rau luag, Nws tsis ua tub qaug tus nyob ze nws. 4 Nws tsis nrog tus uas HUAB TAIS muab xyeeb pov tseg ntaus phooj ywg. Nws hwm cov neeg teev HUAB TAIS. Thaum nws lees ib lo lus, tab yog nws yuav swb, nws tsis hloov nws lo lus. 5 Nws qiv nyiaj txiag, nws tsis noj paj. Nws tsis txais luag cov nyiaj xiab kom muab txim rau tus tsis txhaum. Leej twg ua li hais los no, mas nws yuav nyob ruaj nreb.

1 Miktam. Das vis zaj. Tswv Ntuj, thov koj txuag kuv, vim kuv tuaj khaub zig koj. 2 Kuv hais rau HUAB TAIS tias: ” Koj yog kuv tus HUAB TAIS ! Kuv tsis muaj lwm qhov chaw kaj siab dua ntawm koj.” 3 Cov ntshiab nyob hauv lub teb chaws no, yog cov muaj zog, ntxim kuv siab tas nrho. 4 Cov neeg teev dab, rov nrhiav kev txom nyem rau lawv. Kuv yuav tsis hliv ntshav los txi lawv. Kuv di ncauj yuav tsis tuav txog lawv lub npe. 5 HUAB TAIS yog lub cuab tam kuv tau txais los, yog kuv lub ntim, koj tuav kuv txoj hmoov. 6 Txoj hlua ntsuas ciam av uas poob saum kuv raug qhov chaw zoo. Kuv tau txais lub cuab tam zoo tshaj. 7 Kuv cav lus zoo txog tus HUAB TAIS uas qhia kuv xav tswv yim, Tab yog hmo ntuj kuv siab ntsws tseem qhia kuv. 8 Kuv cia HUAB TAIS nyob ntawm kuv xub ntiag tsis tseg, Vim nws nyob ntawm kuv sab xis, kuv yuav tsis qaij tsis qaug. 9 Vim li ntawd, kuv lub siab luag ntxhi, kuv tus plig hom khaj, kuv cev nqaij nyob nyab xeeb. 10 Vim koj tsis tso kuv pov tseg rau ntuj txias teb tsaus. Koj tsis kheev tus ntseeg koj mus pom lub qhov ntxa. 11 Koj qhia txoj kev muaj txoj sia rau kuv, Kev zoo siab txhawv tsis tu ntawm koj lub ntsej muag los. Nyob ntawm koj sab xis, muaj kev nplij siab tsis txawj tsuag mus ib sid.

1 HUAB TAIS, thov koj mloog ib zag lus ncaj ncees; Koj muab siab rau txais kuv lub suab quaj, Koj tig ntsej los rau kuv lo lus thov. Kuv di ncauj tsis dag. 2 Cia cov lus txiav txim rau kuv tawm hauv koj los: 3 kom koj qhov muag pom qhov ncaj! Yog koj tshawb hauv kuv nruab siab; yog hmo ntuj, koj tuaj tshuaj xwm txog kuv; yog koj sim kuv siab, mas koj yuav tsis pom dab tsi phem. Kuv lub ncauj tsis tau hais tej lus tub qaug. 4 Kuv tsawm neeg tej hauj lwm raws li cov lus tawm ntawm koj lub ncauj los, kuv tsis ua raws li tus siab ceev. 5 Kuv taug koj hneev taw, Kuv tsis npleem ko taw. 6 Kuv tus Tswv Ntuj, kuv hu txog koj, vim koj yeej yuav teb kuv; thov koj qaij pob ntseg los rau kuv, thiab koj mloog kuv lo lus! 7 Qhib koj lub siab hlub ruaj kom pom xyeem, koj cawm cov neeg khiav los nkaum hauv koj phab xis, kom lawv dim ntawm cov neeg caum lawv. 8 Koj txuag kuv zoo li txuag lub ntsiab muag. Koj zais kuv rau hauv koj phab tis qhov ntxoov. 9 Koj zais kuv deb ntawm cov neeg phem uas tuaj lwg kuv, deb ntawm cov yeeb ncuab tsiv tsaim uas sawv vij kuv. 10 Lawv kaw lawv lub siab tsiv tsaim. Lawv lub ncauj hais lus muab hlob. 11 Lawv nyas ntshis kuv. Nyem no lawv vij kuv. Lawv qhov muag ntsia ntsoov kuv, yuav muab kuv thawb rau pem teb. 12 Lawv zoo li tus tsov ntxhuav rawm rawm dua kuv. Lawv zoo li tus me nyuam tsov ntxhuav nyas pliab lua hauv nws lub chaw nkaum. 13 HUAB TAIS, koj sawv mas ! Koj tiv tus siab heev, koj ua kom nws vau hlo ! Siv koj rab ntaj los npo kuv tus plig kom dim ntawm tus phem, 14 HUAB TAIS, thov koj txhais tes tshem lawv tawm hauv tsoom neeg, tawm hauv ntiaj teb thiab hauv lub qab ntuj no mus ! Lawv tsis tsim nyog ua neeg. Koj muab qhov koj tshwj tseg rau lawv nqos kom lawv tsau plab! lawv tej tub ki kuj yuav tau haus kom plab nrha, thiab tseem yuav tseg ib feem rau lawv cov me nyuam mos ! 15 Ntawm kuv, mas kuv yuav tau pom koj lub ntsej muag : vim yog kev ncaj. Kuv tsim dheev, koj tus duab nyob puv kuv siab ntsws.

1 Ua rau tus coj nkauj. HUAB TAIS tus tub txib Das Vis zaj. Yog hnub uas HUAB TAIS tau cawm nws dim ntawm nws cov yeeb ncuab lub nrig thiab dim ntawm Xas Ws txhais tes, nws thiaj hais cov lus no rau HUAB TAIS.
2 Nws hais li no : HUAB TAIS, kuv nyiam koj, koj yog kuv lub zog. 3 HUAB TAIS yog kuv phab tsua, yog kuv lub yeej ntsa zeb, nws yog tus npo kuv dim. Nws yog kuv tus Tswv Ntuj, yog lub tsua uas kuv khiav los nkaum hauv, nws yog kuv daim leem phiaj, yog rab ntaj ua kom kuv yeej, nws yog kuv lub yeej xov ntsa zeb. 4 Peb cav lus zoo txog nws ! Kuv hu txog HUAB TAIS, ces kuv yeej kuv cov yeeb ncuab.
5 Tub tuag cov hlua zawm kuv, Npes Lias cov dej sab siv nyab kuv, 6 ntuj txias teb tsaus cov hlua khaub zig kuv, tub tuag cov nta npuj tsi ntsees tuaj rau kuv. 7 Thaum kuv txhawj xeeb, kuv hu txog HUAB TAIS kuv quaj qw rau kuv tus Tswv Ntuj. Nws nyob hauv nws lub tuam tsev hnov kuv lub suab. Kuv cov lus quaj qw nrov txog nws pob ntseg. 8 Ces lub ntiaj teb qeeg thiab av ntxeev, cov taw roob ua zog koog, av qeeg vim Tswv Ntuj npau taws. 9 Ib co pa taws ncho lug hauv nws qhov ntswg los, ib co nplaim taws noj tas txhia yam thiab ib co hluav ncaig kub lug tawm ntawm nws qhov ncauj los. 10 HUAB TAIS qaij hlo lub ntuj ntsuab, ces nws nqes los, ib tw huab tuab tuab ua rooj rau nws tiag taw. 11 Nws caij ib lub tsheb huab cua, nws ya, nws yuj saum cua ob phab tis. 12 nws tsiv nraim hauv qhov tsaus ntuj, hauv tej kis tsaus ntuj, nws nraim hauv cov nag huab zig tsaus nti, hauv cov huab dub nciab. 13 Ib qho kaj ci ua nws ntej, cov huab ya mus txia ua lawg thiab hluav taws kub lug ! 14 HUAB TAIS ua xob quaj saum ntuj tuaj, Tus Nyob Siab ua suab nrov nroo ntws. 15 Nws tua nws cov xub ya mus, nws ua cov yeeb ncuab tawg, nws tua nws cov kab xob laim, yeeb ncuab thim rov qab. 16 HUAB TAIS, koj lub suab nroo thiab cov pa taws hauv koj qhov ntswg ua qab thu dej tawm plaws los, ua cov ncej txheem ntiaj teb tshwm los rau pom xyeem. 17 HUAB TAIS nyob saud, nws xa neeg tuaj npo kuv. nws rub kuv tawm ntawm cov dej tob. 18 Nws npo kuv dim ntawm cov yeeb ncuab muaj hwj huam, dim ntawm cov neeg tiv kuv uas lawv muaj zog dua kuv. 19 Hnub kuv raug xwv txheej, lawv tuaj ntaus kuv. Tab sis HUAB TAIS txheem kuv.
20 Nws muab kuv rub kiag, coj kuv mus rau qhov chaw khab seeb. Nws npo kuv vim nws nyiam kuv. 21 HUAB TAIS ua rau kuv raws li kuv lub siab ncaj; nws pub rau kuv raws li kuv txhais tes dawb tes huv tau ua, 22 vim kuv taug HUAB TAIS tej kev, kuv tsis fav xeeb rau kuv tus Tswv Ntuj. 23 Nws nthuav tas nrho nws cov lij choj rau ntawm kuv xub ntiag, kuv tsis nrauj nws cov lus qhia pov tseg. 24 Kuv ua ncaj ncees rau nws. Kuv ceev faj kom kuv txhob ua ib qho txhaum li. 25 Li ntawd, HUAB TAIS ua rau kuv raws li kuv lub siab ncaj. raws li qhov dawb huv nws pom ntawm kuv tes. 26 HUAB TAIS, koj ua ncaj rau tus neeg ncaj. Koj ua ncaj ncees rau tus tsis muaj chaw xyeej. 27 Koj ua siab huv rau tus muaj lub siab huv. Koj ua tus ntse rau tus siab nkhaus. 28 Koj muab kev yeej rau haiv neeg poob ntsej muag. Koj txo tus muab hlob kom nyob dauv muag lawv. 29 HUAB TAIS, koj taws kuv lub teeb cig. Kuv tus Tswv Ntuj, kaj kuv txoj kev tsaus. 30 Kuv nrog koj, kuv thiaj dhia mus ntaus ib pab coob coob. Kuv nrog kuv tus Tswv Ntuj, ces kuv dhia dhau lub ntsa zeb siab. 31 Tus Tswv Ntuj no, nws txoj kev zoo tas, HUAB TAIS lo lus tsis muaj yam cuav txuam xyaw. HUAB TAIS yog daim leem phiaj thaiv cov tuaj nkaum hauv nws. 32 Dhau ntawm peb tus HUAB TAIS, leej twg yog Tswv Ntuj? Dhau ntawm peb tus Tswv Ntuj, leej twg yog lub Tsua? 33 Tus Tswv Ntuj no muab nws lub zog los sia kuv duav. Nws ua kom kuv txoj kev zoo tas. 34 Nws ua kom kuv taw nrawm xws taw mos lwj. Nws ua kom kuv sawv tau saum tej ntav toj ntxhab. 35 Nws xyaum kuv ob txhais tes kom txawj ntaus rog, kom kuv ob sab npab muaj zog nta tau hneev tooj. 36 Koj pub koj daim leem phiaj cawm neeg rau kuv, koj sab xis txheem kuv, koj lub siab hlub nqee ua kom kuv hlob. 37 Koj ua kom kuv rhais tej kauj ruam ntev, kuv qij taw tsis qaug zog. 38 Kuv raws cov yeeb ncuab, kuv caum tau lawv, yog kuv tsis tau tua lawv tuag tas, mas kuv tsis tig rov qab. 39 Kuv txo lawv txoj sia tas, lawv rov sawv tsis tau lawm. Lawv vau hauv kuv qab xib taws. 40 Koj muab lub zog los sia kuv duav mus ntaus rog. Koj ua kom cov tuaj ntaus kuv khoov ntawm kuv xub ntiag.
41 Koj cia cov yeeb ncuab tig nraub qaum rau kuv, kuv tua cov neeg ntxub kuv kom tu noob. 42 Lawv qw, tab sis tsis muaj leej twg cawm lawv. Lawv hu HUAB TAIS, nws kuj tsis teb lawv. 43 Kuv muab lawv ua plua tshauv rau cua tshuab, kuv tsuj lawv zoo li tsuj av nkos hauv tej kev. 44 Thaum tsoom pej xeem sawv ntxeev siab, koj npo kuv. Koj tsa kuv ua tsoom kuj cuab tus ntaus thawj. Ib co pej xeem uas kuv tsis paub, sawv los tsob hwb kuv. 45 Kuv hais thawj lo lus, lawv mloog kuv; ib co pej kum neeg tuaj ua tub txib hauv kuv lub loog; 46 Cov neeg pej kum cuab qaug zog, lawv khiav tawm tshee na ntawm lawv lub chaw nkaum. 47 HUAB TAIS muaj txoj sia ! Kuv lub tsua nto koob meej ! Tus Tswv Ntuj uas pub kev cawm rau kuv, nws nto koob meej loj ! 48 Tus Tswv Ntuj no cia kuv ua pauj rau luag, nws coj ib co haiv neeg los zwm rau kuv. 49 Koj npo kuv dim ntawm cov yeeb ncuab ; koj ua kom kuv yeej cov neeg tuaj ntaus kuv. Koj npo kuv ntawm cov neeg siab ceev tes nrawm. 50 Li ntawd, HUAB TAIS, kuv ua koj tsaug ntawm tsoom kuj cuab xub ntiag. Kuv yuav hu nkauj cav txog koj lub npe. 51 HUAB TAIS muab kev yeej loj kawg rau nws tus vaj, nws hlub nws tus pleev, Nws hlub Das Vis thiab Das Vis caj ces mus li.

1 Ua rau tus coj nkauj. Das Vis zaj nkauj paj nruag. 2 Cuaj txheej ntuj piav txog Tswv Ntuj lub koob meej, lub ntuj ntsuab tshaj cov hauj lwm nws txhais tes tsim los. 3 Nruab hnub rov hais txog Tswv Ntuj lub koob meej rau nruab hnub mloog, Ntuj tsaus qhia rau hmo ntuj paub. 4 Tsis yog ib co lus los ib zaj lus piav, leej tib neeg hnov tsis tau lawv lub suab. 5 Lub sim ceeb tej suab xwm yeem ncha puv ntiaj teb, lawv lo lus nrov txog tim npoo ntuj. Tswv Ntuj tsa ib lub tsev tsam phooj rau lub hnub nyob sab ntuj puag tim ub. 6 Lub hnub tawm plaws, xws tus nraug vauv tshiab tawm hauv nws lub paim los. Nws zoo li tus hluas khiav kev, uas zoo siab hlo khiav nws txoj kab. 7 Lub hnub tawm plaws pem hauv ntuj, nws qaij lias mus rau qab ntug, tsis muaj dab tsi dim ntawm nws cov sab hnub ci. 8 HUAB TAIS txoj cai zoo tas nrho, nws ntxiv siav rau ntsuj plig; HUAB TAIS tus txhooj nyob ruaj nreb, nws ua kom tus neeg ruam thoob tsib tuaj. 9 HUAB TAIS cov lus qhuab qhia yog lus ncaj ua kom neeg lub siab kaj. HUAB TAIS lo lus qhia ntshiab si, ua kom neeg pom kev. 10 Kev hwm HUAB TAIS yog txoj kev dawb huv, kev hwm Huab Tais yuav nyob mus li. HUAB TAIS cov lus txiav txim yog lus tseeb, yog cov lus txiav txim ncaj. 11 HUAB TAIS cov lus txiav txim, tsim nyog ntshaw dua kub, los ib txhab tseem kub. qab dua zib ntab, thiab qab dua zib nas muv. 12 Vim li ntawd, koj tus tub txib thiaj kawm koj cov cai. Tus twg mloog koj tej cai, nws tau koob haum loj. 13 Leej twg thiaj txawj pom nws qhov yuam kev? Thov koj ntxuav kuv cov txhaum uas kuv zais. 14 Koj txuag koj tus tub txib ntawm cov neeg muab hlob: kom lawv txhob kav tau kuv, ces kuv yuav zoo tas, yuav tsis paub txog qhov txhaum hnyav. 15 HUAB TAIS, kuv lub tsua, koj yog tus txhiv kuv ! Xav kom cov lus tawm ntawm kuv lub ncauj thiab lub suab seev hauv nruab plawv raug koj siab.

1 Ua rau tus coj nkauj. Das Vis zaj nkauj paj nruag. 2 Hnub koj txhawj xeeb, thov kom HUAB TAIS teb koj ! Thov kom Yas Kos tus Tswv Ntuj lub npe pov hwm koj ! 3 Thov kom nws xa neeg pem nws Kem Tsev Ntshiab tuaj pab koj. Thov kom nws nyob saum Xis Yoos txheem koj. 4 Kom nws nco ntsoov cov txim koj tau cev rau nws, kom tus tsiaj koj hlawv rau nws, xis nws siab ! 5 Kom nws muab yam uas koj lub siab nyiam rau koj yuav, kom nws pub rau koj raws li koj tus nru lus ! 6 Ces peb yuav qw cav txog koj txoj kev yeej, peb yuav nqaum chij cav txog peb tus Tswv Ntuj lub npe. Tas txhia yam koj thov, xav kom Tswv Ntuj ua tiav hlo rau koj ! 7 Zaum no kuv paub lawm : HUAB TAIS pub kev yeej rau nws tus pleev. Nws nyob hauv nws lub tsev ntshiab saum ntuj teb rau nws tus pleev. HUAB TAIS txhais tes xis ua hauj lwm pab nws tus pleev yeej. 8 Ib txhia tso siab rau tsheb rog, ib txhia tso siab rau nees. Hos peb, mas peb tuav rawv peb tus HUAB TAIS Tswv Ntuj lub npe : peb hu nws pab peb. 9 Lawv khoov, lawv ntog, hos peb, mas peb sawv ntsug, peb tiv lawv. 10 HUAB TAIS, thov koj pub kev yeej rau tus vaj, thiab thaum peb hu txog koj, thov koj teb rau peb.

1 Ua rau tus coj nkauj. Das Vis zaj nkauj paj nruag. 2 HUAB TAIS, tus vaj zoo siab vim koj lub zog loj : koj kev yeej ua nws zoo siab tas nrho. 3 Koj pub rau nws raws nraim nws lub siab ntshaw. Koj tsis nrauj lo lus thov uas nws di ncauj hais tawm los. 4 Koj xub foom hmoov zoo thiab pub paj tshab rau nws; koj muab ib lub teev kub rau nws ntoo. 5 Nws thov kom tau txoj sia, koj muab rau nws: koj pub ntev niaj ntau xyoo tsis txawj tas rau nws. 6 Vim koj yeej lawm, nws lub koob meej thiaj nto moo loj; koj muab hwj xyeej thiab kev nplua nuj ci ntsa iab rau nws. 7 Koj muab nws ua ib lub cim foom hmoov zoo txheej dhau txheej. Koj ua kom nws siab kaj lug nyob ze koj lub ntsej muag. 8 Muaj tseeb ! Tus vaj tso siab rau HUAB TAIS, tus Nyob Siab hlub tus vaj, Nws txuag tus vaj kom txhob ntog. 9 Koj txhais tes yuav nrhiav tau cov ntxub koj tas huv tib si, koj sab xis yuav nrhiav tau koj cov yeeb ncuab. 10 Thaum koj lub ntsej muag tawm los, koj yuav hlawv lawv ua hluav, HUAB TAIS npau taws, nws yuav nqos lawv, hluav taws yuav hlawv lawv kug tas. 11 Koj yuav ua kom lawv tej xeeb ntxwv tu noob nyob ntiaj teb. kom lawv caj ces piam sij ntawm zeej tsoom. 12 Yog lawv khav tias lawv ua phem rau koj, yog lawv npaj ntxeev siab rau koj: lawv ua tsis tau dab tsi. 13 Koj xuas koj hneev tua nruab nrab lawv ntsej muag. lawv tig nraub qaum khiav. 14 HUAB TAIS, koj cuab zog, koj sawv tsees mas ! Peb hu ib zag nkauj paj nruag cav koj txoj hauj lwm loj !

1 Ua rau tus coj nkauj, raws li ” tus mos lwj kaj ntug”. Das Vis zaj nkauj paj nruag. 2 Kuv tus Tswv Ntuj, kuv tus Tswv Ntuj, ua cas koj tso kuv pov tseg ? Ua cas koj nyob deb ? Kuv nyooj npaum twg, los koj tsis pab. 3 Kuv tus Tswv Ntuj, nruab hnub kuv hu koj, koj tsis teb; hmo ntuj, kuv tsis tau chaw so. 4 Tsis kav, koj yog tus Ntshiab. Koj zaum saum vaj theej kiab, koj yog His Xas Lais lub koob meej ! 5 Peb cov yawg koob tso siab rau koj; lawv tso siab rau koj, koj npo lawv dim. 6 Lawv quaj qw hu txog koj, lawv tau kev dim. lawv tso siab rau koj, koj tsis cia lawv poob ntsej muag. 7 Hos kuv, kuv zoo li cua nab, kuv tsis zoo li neeg lawm, txhua leej txhua tus tsawm kuv, tsoom pej xeem muab kuv xyeeb pov tseg. 8 Leej twg pom kuv, mas nws thuam kuv; lawv luag kuv, lawv co taub hau hnyos kuv : 9 “Tig mus cuag HUAB TAIS los mas! Cia HUAB TAIS npo nws dim. Nws pom xeeb nyiam HUAB TAIS! Cia HUAB TAIS npo nws dim. 10 Koj yog tus rub kuv tawm hauv kuv niam plab los, koj muab kuv tso pw tus yees hauv kuv niam xub ntiag. 11 Kuv tawm plaws hauv kuv niam plab los, lawv muab kuv cev rau koj ; txij nruab thiab los, koj yog kuv tus Tswv Ntuj. 12 Koj txhob nyob deb kuv mas, vim xwv txheej tuaj txog ze lawm, tsis muaj neeg pab. 13 Ib pab heev nyuj sawv ncig kuv, Npas Sas cov tsiaj muaj zog, puav kuv kev. 14 Lawv rua ncauj yuav tom kuv xws li tus tsov ntxhuav nyooj laws maj dua nqaij. 15 Kuv ib ce muag zoo li dej ntws; kuv tej pob txha txhauj tas, kuv lub plawv yaj hauv kuv nrog cev xws li ciab ntab. 16 Kuv lub qa qhuav xws daim txhais hub tawg. Kuv tus nplaig nplaum hauv kuv puab tsaig. Koj tso kuv pw hauv tub tuag cov plua av. 17 Vim tias ib pab dev coob sawv ncig kuv; ib pab neeg phem puav kuv kev: lawv nkaug kuv tej tes taw. 18 Kuv suav tau kuv cov pob txha tas tib si. luag tej pom kuv, luag ntsia kuv. 19 Lawv muab kuv cov khaub ncaws los sis faib, lawv twv saib leej twg yuav tau kuv cov ris tsho. 20 Hos koj, HUAB TAIS, thov koj txhob txav mus deb kuv ! Koj yog kuv lub zog, koj pab kuv mas! Tsuag tsuag tuaj pab. 21 Koj npo kuv tus plig ntawm hniav ntaj, npo kuv txoj sia ntawm dev cov rau tes. 22 Koj cawm kuv ntawm tsov ntxhuav lub ncauj, cawm kuv lub neej txom nyem ntawm twm hauv kub. 23 Kuv xav tshaj koj lub npe rau kuv cov kwv tij. Kuv yuav cav txog koj nyob hauv nruab nrab lub txoos. 24 Nej cov uas hwm HUAB TAIS, nej cav lus zoo txog nws mog ! Tas Yas Kos tsoom tub ki, nej ua kom nws nto koob meej ! Tas His Xas Lais tsoom tub ki, nej ntshai nws mog ! 25 Vim tias, nws tsis thuam, tsis ntiab tus pluag, nws tsis thaiv nws lub ntsej muag rau tus kob huam. Thaum tus txom nyem quaj hu txog HUAB TAIS, mas HUAB TAIS mloog nws. 26 Koj pub tej lo lus qhuas rau kuv nyob hauv lub txoos loj ! Kuv yuav pauj lub yeem nyob ntawm cov neeg hwm HUAB TAIS xub ntiag. 27 Cov pluag yuav tau mov noj, lawv yuav tau noj txaus siab; cov neeg nrhiav HUAB TAIS, yuav cav txog HUAB TAIS : “Xav kom lawv lub siab lub plawv ciaj mus li”. 28 Tas npoo ntuj npoo ntiaj teb yuav rov nco txog HUAB TAIS, lawv yuav rov los cuag nws ; tas ib tsoom haiv neeg yuav txhos caug pe ntawm HUAB TAIS xub ntiag. 29 Vim tias kev ua vaj yog HUAB TAIS tug ! Yog nws tswj fwm tsoom kuj cuab. 30 Tas ib tsoom neeg muaj hwj chim nyob ntiaj teb yuav txhos caug pe nws ib leeg : Tas ib tsoom neeg uas mus zwm av yuav khoov cev nyob ntawm HUAB TAIS xub ntiag : 31 Tus dua nra lawd cov xeeb ntxwv yuav tsob hwb Huab Tais. Luag yuav qhia txog Huab Tais rau tiam neeg uas yuav hlob tuaj. 32 Luag yuav tshaj HUAB TAIS txoj kev ncaj rau haiv neeg uas yuav yug los, lawv yuav qhia tas txhia yam uas Tswv Ntuj tau ua.

1 Das Vis zaj nkauj paj nruag. HUAB TAIS yog kuv tus tswv zov yaj, kuv tsis tshaib tsis nqhis dab tsi. 2 Nws tso kuv nyob hauv tej tshav zaub mos; nws coj kuv mus nyob ze tus dej uas sawv daws so. 3 Nws rov ntxiv siav rau kuv tus plig. Nws coj kuv mus taug tej kev ncaj, vim nws lub npe nto koob meej. 4 Tab yog kuv taug kev mus hauv lub kwj ha dub tsaus nti, kuv tsis ntshai dab tsi phem, vim koj nrog kuv ua ke, koj rab qws, thiab koj rab pas nrig yog kuv chaw tso siab. 5 Koj npaj ib roog qav rau ntawm kuv xub ntiag, nyob tom cov neeg ntxub kuv hauv ntej, koj muab roj tsw qab pleev kuv taub hau. Kuv lub khob phwj cawv. 6 Muaj tseeb tiag ! Txhua hnub hauv kuv sim neej, kev kaj siab thiab kev hlub raws nraim kuv. Tas kuv sim neej, kuv yuav mus nyob tsheej hnub hauv HUAB TAIS tsev.

1 Das Vis zaj nkauj paj nruag. Lub ntiaj teb thiab txhua yam uas nyob hauv lub sim ceeb yog HUAB TAIS li ! Lub qab ntuj khwb thiab tas tsoom neeg nyob hauv yog HUAB TAIS tug. 2 HUAB TAIS yog tus txawb lub ntiaj teb rau saum dej hiav txwv, nws teeb lub ntiaj teb ruaj rau saum npoo dej. 3 Leej twg yuav tau nce mus saum HUAB TAIS lub roob? Leej twg yuav sawv taus nyob hauv nws lub chaw ntshiab? 4 -Yog tus neeg siab huv, uas txhais tes tsis lo txhaum, -tus uas tsis xib rau txoj kev dag, -tus tsis twv ntuj twv teb cog lus cuav. 5 Nws tau HUAB TAIS lo lus foom hmoov zoo, nws txais kev ncaj ntawm nws tus Tswv Ntuj cawm neeg. 6 Haiv neeg nrhiav Tswv Ntuj, lawv zoo li ntawd, Lawv nrhiav koj lub ntsej muag , Yas Kos tus Tswv Ntuj !
7 Qhov rooj, nej tshoom kom siab siab mas ! Rooj loog txheej thaud, nej tshoom kom siab ! Tus vaj nto koob meej yuav chaws los hauv nej ! 8 Tus vaj nto koob meej yog leej twg? – Yog tus HUAB TAIS muaj zog thiab siab tawv. – yog tus HUAB TAIS siab tawv ntaus rog. 9 Qhov rooj, nej tshoom kom siab siab mas ! Rooj loog txheej thaud, nej nyob qhib lug tos ! Cia tus vaj nto koob meej chaws los ! 10 -Tus vaj nto koob meej no yog leej twg ? -tus Vaj nto koob meej yog tus HUAB TAIS muaj hwj huam tas nrho.

1 Das Vis zaj nkauj paj nruag. Alef HUAB TAIS, kuv cev kuv tus plig nce tuaj rau koj. Bet 2 Kuv tus Tswv Ntuj, kuv tso siab rau koj; koj txhob cia kuv poob ntsej muag. Xav kom kuv cov yeeb ncuab txhob yeej kuv. Guimel 3 Cov neeg tos koj, tsis muaj ib tug poob ntsej muag li, hos cov neeg ntxeev siab poob ntsej muag, lawv nyob tes dawb tes npliag. Dalet 4 HUAB TAIS, koj ua kom kuv paub koj tej kev; qhia koj tej xub ke rau kuv paub. He 5 Koj coj kuv mus taug koj txoj kev tseeb, koj qhia kuv mas ! vim koj yog tus Tswv Ntuj cawm kuv. Kuv niaj hnub tos koj. Zain 6 HUAB TAIS, koj xav txog koj lub siab hlub mos nyoos, thiab koj lub siab nyiam ruaj, uas koj ib txwm muaj. Het 7 Koj txhob nco txog kuv tej txhaum yav hluas. HUAB TAIS, koj nco txog kuv vim koj hlub kuv, koj xav txog kuv vim koj siab zoo. Tet 8 HUAB TAIS siab zoo, siab ncaj tas nrho, nws qhia nws txoj kev rau cov neeg txhaum. Yod 9 Nws coj cov neeg me mus taug txoj kev ncaj, nws qhia nws txoj kev rau cov neeg me paub. Kaf 10 Cov neeg ua raws nraim li lawv tau nrog HUAB TAIS cog lus, paub tias HUAB TAIS cov kev yog kev nyiam ruaj thiab kev tseem ceeb. Lamed 11 HUAB TAIS, thov koj zam kuv qhov txhaum uas loj tas nrho, Vim koj lub npe nto koob meej !
Mem 12 Tus twg hwm HUAB TAIS, mas HUAB TAIS qhia nws kom paub xaiv txoj kev nws yuav taug. Noun 13 Nws tus plig yuav nyob hauv lub chaw kaj siab, nws cov xeeb ntxwv yuav tau lub ntiaj teb los ua lawv tug. Samek 14 HUAB TAIS pub kom cov ntshai nws nrog nws sib paub sib swm, nws qhia lawv paub tias nws tau nrog lawv cog lus. Ain 15 Kuv qhov muag ntsia ntsoov HUAB TAIS, vim nws daws lub vas rig kuv ko taw. Pe 16 Thov koj tig los ntsia kuv ! thov koj khuv leej kuv, vim kuv ib leeg twm zeej, kuv tu siab. Sade 17 Tej kev txhawj xeeb nyob hauv kuv nruab siab loj kawg; thov koj rub kuv tawm ntawm kuv tej kev ntxhov siab. Qof 18 Koj ntsia kuv txoj kev txom nyem thiab kev tu siab, thov koj so kuv cov txhaum tas tib si ! Resh 19 Koj ntsia kuv cov yeeb ncuab coob tas nrho, koj saib lawv lub siab ntxub nyoos tsias, lawv ntxub kuv hnyav. Shin 20 Koj txuag kuv txoj sia ! Koj npo kuv mog ! Kuv muab koj los ua kuv lub chaw nkaum, koj txhob cia kuv poob ntsej muag ! Taw 21 Thov kom kev ncaj ncees thiab kev siab dawb txuag kuv vim kuv tos koj. 22 Aub, Tswv Ntuj, koj txhiv His Xas Lais mog ! Thov koj npo nws dim ntawm nws tej kev txhawj xeeb mas !

1 HUAB TAIS, koj ua ncaj rau kuv, vim kuv taug kuv txoj kev ncaj ncees ! kuv tso siab rau HUAB TAIS, kuv yuav tsis qaij. 2 HUAB TAIS, koj tshawb kuv siab ntsws, koj sim kuv siab mog. Koj lim kuv tej siab ntsws. 3 Koj lub siab hlub ruaj nyob rawv ntawm kuv qhov muag; kuv taug kev raws li koj lub siab pheej xeeb. 4 Kuv tsis tau nrog cov neeg khav theeb zaum ua ke; kuv tsis nkag hauv cov neeg zoo nraum daim tawv lub tsev. 5 Kuv ntxub pab niag neeg ua phem rau luag; kuv tsis nrog cov tsis hwm ntuj zaum ua ke. 6 HUAB TAIS, kuv ntxuav tes ntaus cim tias kuv siab dawb, kuv ncig koj lub thaj txi ntuj. 7 kuv hu nkauj nrov nrov ua koj tsaug, kuv rov cav tsis tseg txog koj tej hauj lwm zoo nkauj zoo saib. 8 HUAB TAIS, kuv nyiam lub tsev uas koj nyob, kuv nyiam thaj chaw uas koj lub koob meej nyob txawm. 9 Koj tsis txhob loj xov muab kuv tus plig rho nrog cov neeg txhaum tus plig. Koj tsis txhob loj xov muab kuv txoj sia rho nrog cov neeg txo luag ntshav txoj sia. 10 Lawv ob txhais tes qias neeg. Lawv sab xis tuav nyiaj xiab puv nkaus tes. 11 Kuv coj tus cwj pwm ncaj ncees, thov koj hlub, koj npo kuv kom dim ! 12 Kuv ko taw tsuj saum av tiaj. nyob hauv cov txoos, kuv yuav cav lus zoo txog HUAB TAIS.

1 HUAB TAIS yog kuv qhov pom kev, nws yog tus cawm kuv. Kuv yuav ntshai leej twg? HUAB TAIS yog lub yeej ntsa zeb thaiv kuv lub neej, kuv yuav ntshai tshee na ntawm leej twg xub ntiag? 2 Thaum ib pab neeg phem tuaj ntaus kuv, lawv yuav dhuas kuv cev nqaij, tab sis yog cov ntxub kuv thiab cov yeeb ncuab ntawd lawv dawm lawv taw, ces lawv ntog. 3 Txawm muaj ib pab tub rog tuaj tsa tsev tsam phooj npaj tua kuv, kuv lub plawv tsis ntshai dab tsi. Tab yog lawv sawv ntaus rog tua kuv, kuv tseem tso siab li qub. 4 Kuv thov ib yam ntawm HUAB TAIS, yog yam kuv nrhiav : thov kom tas kuv sim neej, kuv niaj hnub tau nyob hauv HUAB TAIS tsev, kom kuv tau nuam ntsia saib HUAB TAIS zoo npaum li cas, kuv xav ntsuam xyuas nws lub tuam tsev. 5 Vim tias hnub kev txom nyem tuaj, nws zais kuv rau hauv nws qhov chaw nraim, nws coj kuv mus nkaum hauv nws lub tsev tsam phooj, hauv qhov chaw uas neeg tsis paub, nws tsa kuv siab rau saum hauv tsua. 6 Zaum no kuv taub hau tshoom siab, khav tas cov yeeb ncuab uas nyob ncig kuv. Kuv cev ib co txim ntxuag suab nkauj thiab suab raj, nyob hauv HUAB TAIS lub tsev tsam phooj, kuv seev ib zag txuj pag rau HUAB TAIS.
7 HUAB TAIS, koj mloog kuv lub suab hu txog koj ! Thov koj hlub, koj teb kuv ! 8 Kuv nco txog koj lo lus tias : “Nej nrhiav kuv lub ntsej muag !” HUAB TAIS, kuv nrhiav koj lub ntsej muag. 9 Koj txhob thaiv koj lub ntsej muag rau kuv ! Koj txhob npau taws, txhob thawb koj tus tub txib mus deb ! Koj yog tus tau pab kuv, koj txhob txav deb kuv. Koj txhob tso kuv pov tseg, Tswv Ntuj, koj yog tus cawm kuv. 10 Yog kuv niam thiab kuv txiv muab kuv pov tseg, los HUAB TAIS yuav khaws kuv. 11 HUAB TAIS, thov koj qhia koj txoj kev rau kuv ! koj hwj kuv mus hauv txoj kev tiaj, koj txuag kuv ntawm cov nyas ntshis kuv. 12 Koj txhob tso kuv rau cov neeg ntxub noj. vim ib co tim khawv cuav sawv los liam rau kuv. lawv ua ncauj liab vog txhib kom tsim txom kuv. 13 Kuv paub tseeb tias kuv yuav tau pom HUAB TAIS lub siab zoo nyob hauv tsoom neeg ciaj lub teb chaws. 14 Koj tos ntsoov HUAB TAIS mog ! Koj ua tus muaj zog, koj ua siab loj ! koj tos ntsoov HUAB TAIS mog !

1 HUAB TAIS kuv hu txog koj. Kuv lub tsua, koj txhob ua ntsej lag ! Yog koj ua twj ywm, mas kuv zoo li tus neeg uas nqes mus zwm av. 2 Thaum kuv hu txog koj thaum kuv tsa tes rau tim koj kev tsev ntshiab, koj mloog kuv lub suab thov. 3 Koj tsis txhob loj xov cab kuv nrog cov siab ceev thiab cov ua phem: lawv hais lus thaj yeeb rau cov nyob ze lawv, tab sis kev phem nyob hauv lawv nruab siab. 4 Koj ua rau lawv raws li lawv cov hauj lwm ! raws li lawv qhov phem. Koj ua rau lawv raws li lawv cov dej num, koj pauj rau lawv kom haum qhov lawv tau ua ! 5 Lawv tsis quav ntsej txog HUAB TAIS tej qav tej num, tsis quav ntsej txog cov hauj lwm tawm ntawm nws txhais tes los: HUAB TAIS yuav muab lawv rhuav, nws yuav tsis rov txhim lawv dua. 6 HUAB TAIS nto meej nto moo, vim nws tau mloog kuv lub suab thov. 7 HUAB TAIS yog kuv lub zog, yog kuv daim leej phiaj. kuv lub siab vam txog nws, nws tuaj pab kuv. Kuv lub siab hom khaj, kuv hu nkauj ua nws tsaug. 8 HUAB TAIS yog nws haiv neeg lub zog, nws yog lub yeej ntsa zeb cawm nws tus pleev. 9 Koj cawm koj haiv neeg mog ! Koj foom hmoov zoo rau koj lub cuab tam, koj ua tus tswv zov yaj saib lawv mog ! koj ris lawv mus li.

1 Nej, uas yog qaum ntuj cov tub, nej tshaj HUAB TAIS lub koob meej thiab lub zog mog. 2 Nej cav tus HUAB TAIS muaj hwj chim lub npe mog ! thaum nws lub hwj xyeej ntshiab tawm plaws tuaj, nej txhos caug pe ntawm HUAB TAIS xub ntiag. 3 HUAB TAIS lub suab nrov dua suab dej. -Tus Tswv Ntuj muaj hwj chim ua xob quaj nroo ntws- HUAB TAIS lub suab nrov dua cov dej loj. 4 HUAB TAIS lub suab muaj hwj huam, HUAB TAIS lub suab nrov qeeg nkaws. 5 HUAB TAIS lub suab tsoo ntoo ciab lov, HUAB TAIS ua cov ntoo ciab nyob Lis Npas dam ntsoog ntxaws. 6 Nws ua lub roob Lis Npas dhia paj paws xws li tus xyuas nyuj, nws ua lub roob Xis Lis Yoos dhia xws li tus thav twm. 7 HUAB TAIS lub suab txaws txua ua tej kab nplaim taws. 8 HUAB TAIS lub suab ua teb chaws suab puam tshee qeeg nkaws. HUAB TAIS ua lub hav suab puam Kas Des tshee qeeg nkaws. 9 HUAB TAIS lub suab ua cov maum mos lwj daws cev ceeb tshee na; nws lub suab ua tej hav zoov do cuas. Nyob hauv nws lub tuam tsev, puas tsav puas yam hais tias: “Koj muaj koob meej !” 10 HUAB TAIS zaum lub theej kiab saum cov dej nyab ntiaj teb, nws zaum lub theej kiab xws li tus vaj nyob ib txhiab ib txhis. 11 Thov kom HUAB TAIS cuab zog rau nws haiv neeg, thov kom HUAB TAIS foom hmoov zoo, thiab pub kev thaj yeeb rau nws haiv neeg.

1 Nkauj paj nruag. Zaj nkauj foom hmoov zoo rau Das Vis lub tuam tsev. 2 HUAB TAIS kuv cav lus zoo txog koj, vim koj rub kuv tawm hauv lub qhov tim thaj, koj tsis cia kuv ua yeeb ncuab lub chaw zoo siab. 3 HUAB TAIS, kuv tus Tswv Ntuj, kuv hu txog koj, koj cia li kho kuv zoo hlo. 4 HUAB TAIS koj rub kuv tus plig tawm hauv ntuj txias teb tsaus los, kuv nrog lawv nqes hauv qhov ntxa, koj ua kom kuv rov muaj sia. 5 Cov ntseeg HUAB TAIS, nej hu nkauj rau nws, nej nqaum paj nqaum nruas cav txog nws lub siab ntshiab : 6 Nws npau taws, tsuas npau ib pliag, nws hlub neeg, nws hlub ib sid. Hmo ntuj kua muag poob tsis tu, tab sis, kaj ntug txoog lub suab zoo siab rov ntxhe dua. 7 Hos ntawm kuv, kuv lub siab tus yees, kuv hais tias: “Yuav tsis muaj dab tsi txo tau kom kuv qaug.” 8 HUAB TAIS , koj pub txiaj ntsim, koj thiaj tsa kuv nyob txawm saum lub roob khov muaj zog. Tab sis koj zais koj lub ntsej muag, ces kuv ntshai loj kawg. 9 HUAB TAIS kuv hu txog koj; Kuv tus Tswv Ntuj, thov koj khuv leej kuv : 10 “Yog kuv cov ntshav nchuav, kuv nqes mus hauv ntxa, koj yuav tau dab tsi? Plua av puas txawj cav txog koj, puas txawj tshaj tias koj hlub neeg mos nyoos? 11 HUAB TAIS, koj mloog mas ! thov koj hlub ! HUAB TAIS, thov koj pab kuv!” 12 Koj muab kuv lub caij quaj nyiav los hloov ua caij dhia lom zem, koj muab kuv tsoos ntaub tsaj hloov ua tsoos nqaum paj nqaum nruas. 13 Li ntawd, kuv tus ntsuj plig hu nkauj tsis so; HUAB TAIS, kuv tus Tswv Ntuj, kuv yuav ua koj tsaug mus li.

1 Ua rau tus coj nkauj. Das Vis zaj Nkauj Paj Nruag 2 HUAB TAIS, kuv muab koj los ua kuv lub chaw nkaum, thov kom kuv txhob poob ntsej muag ib zaug li ! Koj npo kuv kom dim vim koj siab ncaj. 3 Koj tig ntsej los rau kuv! Tsuag tsuag, kav tsij tuaj npo kuv dim mas ! Koj yog kuv lub tsua muaj zog, Koj yog lub tuam loog cawm kuv. 4 Koj yog kuv lub tsua, kuv lub yeej ntsa zeb. Koj tuav kuv tes, koj coj kuv kev, kom koj lub npe nto koob meej. 5 Koj daws kuv tawm hauv lub vas uas luag cuab tos kuv, vim koj yog kuv lub yeej ntsa zeb. 6 Kuv tso kuv txoj sia rau hauv koj txhais tes. HUAB TAIS, koj yog tus tseem Tswv Ntuj, koj txhiv kuv. 7 Kuv ntxub cov neeg teev tej mlom dab tsis muaj nqes; hos kuv, mas kuv tso siab rau HUAB TAIS. 8 Kuv hom khaj zoo siab vim koj hlub kuv, koj pom kuv txoj kev txom nyem, koj paub kuv txoj kev txhawj xeeb. 9 Koj tsis tso kuv rau yeeb ncuab txhais tes, koj tsa kuv rov sawv, koj pub chaw dav rau kuv mus los. 10 HUAB TAIS thov koj hlub kuv ! kuv raug kev txhawj xeeb loj : kev lwj siab ntsim kuv qhov muag, kuv caj pas, thiab kuv plab. 11 Kuv lub neej xaus nyob hauv txoj kev chim siab, kuv yav laus xaus hauv txoj kev ntsaj. Vim kuv tau ua txhaum, kuv lub zog tso kuv tseg, kuv tej pob txha yaig. 12 Tas cov neeg ntxub tsawm kuv ; kuv cov txheeb ze haj yam tsawm ! kuv cov swm neeg rov ntshai kuv: Yog lawv pom kuv nraum zoov, lawv khiav. 13 Luag hnov qab kuv, xws li tus neeg tuag uas ploj ntais hauv neeg lub siab. Kuv zoo li ib lub twj taig uas tawg khis tas. 14 Kuv hnov zeej tsoom hais lus xaiv lus ncua tias: “Nws ua zej zog lub chaw ntshai !” Lawv sib koom txuv kuv, Lawv npaj siab yuav nyiag txo kuv siav.
15 Tab sis kuv tso siab rau koj, HUAB TAIS. Kuv hais tias:” koj yog kuv tus Tswv Ntuj.” 16 Kuv lub hnub nyoog nyob hauv koj txhais tes; Koj npo kuv dim ntawm cov yeeb ncuab uas nam qees ntxub. 17 Ua kom koj lub ntsej muag ci rau koj tus tub txib mas, Koj cawm kuv vim koj hlub kuv ! 18 HUAB TAIS, thov txhob cia kuv poob ntsej muag vim kuv hu txog koj ! Xav kom cov tsis hwm Ntuj poob ntsej muag, xav kom lawv nplaig txhav xws li cov nqes mus hauv ntuj txias teb tsaus ! 19 Xav kom cov di ncauj uas dag luag ntawd txhav. vim lawv hais lus muab hlob, khav theeb thuam tus siab ncaj ! 20 Koj tshwj zias ib co paj tshab loj tas nrho rau cov neeg hwm koj. Koj pub koj cov paj tshab rau txhua leej uas tuaj nkaum hauv koj. Koj tab meeg pub rau sawv daws pom. 21 Koj coj cov neeg hwm koj mus zais hauv qhov chaw uas koj zais koj lub ntsej muag. Koj coj lawv mus zais deb ntawm neeg tej kev nkhaus. Koj coj lawv mus nraim deb ntawm tus nplaig tsawm neeg. 22 HUAB TAIS nto meej nto moo, vim thaum nyob hauv lub nroog xov ntsa zeb, nws lub siab hlub tau ua hwj huam yees ntxwv pab kuv, 23 Kuv tau kev tws kev ntxhov, kuv thiaj hais tias : “Koj pom tsis cuag kuv.” Tsis kav, thaum kuv hu koj, koj hnov kuv lub suab thov. 24 Tas tsoom neeg hwm HUAB TAIS, nej nyiam nws mog ! HUAB TAIS txuag cov ntseeg txog nws, hos nws nplua tus muab hlob ti txha nkaus. 25 Tas nej ib tsoom uas tso siab rau HUAB TAIS, nej ua neeg muaj zog, nej ua siab loj mog !

1 Tus tau txoj hmoov zoo, yog tus uas Ntuj rho nws qhov txhaum pov tseg, yog tus uas Ntuj npog nws qhov txhaum ! 2 Tus tau txoj hmoov zoo, yog tus uas HUAB TAIS tsis suav nws cov txhaum, yog tus uas lub tswv yim tsis dag tias nws tsis lo txhaum. 3 Yav kuv tsis qhib ncauj, kuv lub cev qaug zog, kuv niaj hnub ntsaj. 4 Vim nruab hnub hmo ntuj, koj txhais tes tsuam hnyav saum kuv, kuv roj ntsha qhuav xws li tej quav nplej raug tshav kub lub caij ntuj sov. 5 Kuv qhia kuv qhov txhaum rau koj, Kuv tsis zais kuv qhov yuam kev. Kuv hais tias : “Kuv yuav lees kuv cov txhaum ntawm HUAB TAIS”. Ces koj tshem lub nra txhaum ntawm kuv. 6 Li ntawd, txhua tus neeg hwm Ntuj, thiaj teev koj thaum lawv muaj kev txhawj xeeb. Tab yog cov dej nphau nphwv tuaj, dej nyab tsis tau lawv. 7 Koj yog kuv qhov chaw nkaum, Koj txuag kuv ntawm txoj kev txhawj xeeb, koj kom sawv daws hu nkauj ncig kuv, cav txog kuv txoj kev dim. 8 -Kuv yuav qhia txuj rau koj, kuv yuav qhia kev rau koj taug, kuv yuav pab koj xav tswv yim, kuv qhov muag yuav ntsia ntsoov koj : 9 Koj txhob yoog raws li tus nees los tus luj, uas tsis txawj to taub, uas looj thawb thiab hlua thiaj pwv tau thiab cheem tau nws lub siab ceev. Yuav tsis muaj dab tsi tuaj raug koj”! 10 Kev mob ntsaj ntau yam nyas tos tus tsis hwm Ntuj, hos HUAB TAIS lub siab hlub puag tus tso siab rau nws. 11 Nej sawv daws hom khaj vim HUAB TAIS, tsoom neeg ncaj, nej zoo siab luag ntxhi, tas tsoom siab ncaj, nej qw suab nrov, nej zoo siab !

1 Cov neeg siab ncaj, nej hu nkauj nrov nrov, nej cav txog HUAB TAIS! Lo lus qhuas phim cov neeg ncaj. 2 Nej ntaus nkauj nog ncas ua HUAB TAIS tsaug. Nej ntaus nkauj nog ncas kaum txoj hlua rau nws! 3 Nej hu ib zag nkauj tshiab rau nws, nej muab siab rau ntaus nkauj nog ncas thaum sawv daws qw cav. 4 HUAB TAIS lo lus yog lus ncaj, nws tej num yog num ruaj. 5 Nws nyiam kev ncaj thiab kev haum pheej; HUAB TAIS txoj kev hlub ntws puv lub ntiaj teb. 6 HUAB TAIS siv nws lo lus los tsim yim cuaj txheej ntuj, nws xuas nws txoj pa los tsim tsoom hnub qub saud. 7 Nws sau cov dej, nws muab tauv rau hauv dej ntuj; nws sau cov hiav txwv los ua ib co txhab ntim dej. 8 Thov kom tas lub ntiaj teb hwm HUAB TAIS, xav kom tas lub qab ntuj neeg ntshai nws. 9 Nws hais ib lo lus, ces txhua yam tshwm sim tuaj; nws txib, ces txhua tsav puas yam tsheej xeeb tau tuaj. 10 HUAB TAIS rhuav cov hauj lwm tsoom kuj cuab npaj ua nws ua cov haiv neeg tus nru lus ploj. 11 Cov hauj lwm HUAB TAIS npaj ua ciaj sia mus li, nws tus nru lus nyob txheej dhau txheej. 12 Haiv neeg uas tau HUAB TAIS los uaTswv Ntuj, nws txoj hmoov zoo! Haiv neeg Ntuj xaiv los ua HUAB TAIS lub cuab tam, lawv txoj hmoov zoo! 13 Nyob txheej ntuj saud, HUAB TAIS dauv muag los ntsia, nws pom tas ib tsoom neeg. 14 Nws zaum saum nws lub rooj, nws dauv muag ntsia ib tsoom neeg nyob ntiaj teb. 15 Nws yog tus puab txhua leej txhua tus lub siab, nws ua tib zoo soj ntsuam txhua txoj hauj lwm neeg ua. 16 Ib pab tub rog coob cawm tsis tau tus vaj; tsis yog lub zog loj cawm tau tus tub rog siab tawv. 17 Tus nees yuav ua kom yus yeej yog npau suav, tab yog tus nees siv tas nws lub zog kuj tseem pab tsis tau yus khiav dim. 18 HUAB TAIS zov cov neeg hwm nws, nws zov cov tso siab rau nws lub siab hlub. 19 Nws npo lawv dim ntawm kev tuag, nws txuag lawv txoj sia thaum teb chaws tshaib plab. 20 Ntawm peb, peb tos ntsoov HUAB TAIS: nws yog tus pab peb, nws yog peb daim leem phiaj ! 21 Txoj kev zoo siab nyob hauv peb, yog tuaj ntawm nws tuaj, peb chaw tso siab yog nyob hauv nws lub npe ntshiab. 22 HUAB TAIS, thov kom koj lub siab hlub roos peb, vim koj yog peb qhov chaw vam khom !

1 Das Vis zaj. Das Vis ua txuj ua neeg vwm nyob ntawm As Npis Mes Lev xub ntiag, As Npis Mes Lev ntiab nws, ces nws khiav. Alef 2 Kuv cav lus zoo txog HUAB TAIS txhua lub sij hawm, lo lus cav txog nws nyob rawv hauv kuv lub ncauj. Bet 3 Kuv muaj ntsej muag vim HUAB TAIS, xav kom cov me neeg zoo siab mloog kuv hais. Guimel 4 Nej nrog kuv cav txog HUAB TAIS, peb sawv daws ua ke qhuas nws lub npe. Dalet 5 Kuv nrhiav HUAB TAIS; nws teb kuv, Nws daws kuv dim ntawm tas txhia yam uas kuv ntshai. He 6 Cov neeg tig ntsia HUAB TAIS muaj lub ntsej muag ci tshiab khiv, lawv yuav tsis txaj muag. Zain 7 Tus txom nyem quaj qw, HUAB TAIS mloog nws, Huab Tais cawm nws ntawm kev txhawj xeeb. Het 8 HUAB TAIS tus tshiab tsa tsev tsam phooj ncig cov neeg hwm HUAB TAIS, nws npo lawv. Tet 9 Nej ntsia thiab nej saj saib HUAB TAIS siab zoo npaum li cas. Tus muaj hmoov zoo yog tus tau HUAB TAIS los ua nws lub chaw nkaum ! Yod 10 Nej, uas yog tsoom neeg ntshiab, nej hwm HUAB TAIS mas, vim cov neeg hwm HUAB TAIS tsis tshaib tsis nqhis li. Kaf 11 Tsov ntxhuav yoo tshaib yoo nqhis; hos cov nrhiav HUAB TAIS tsis tshaib tsis nqhis dab tsi. Lamed 12 Kuv cov tub, nej tuaj mloog kuv ! Kuv yuav qhia txoj kev hwm HUAB TAIS rau nej. Mem 13 Nej leej twg nyiam txoj sia? Nej leej twg xav pom lub neej kaj siab? Noun 14 Koj txwv koj tus nplaig kom txhob hais phem, koj txwv koj di ncauj kom txhob hais lus xaiv. Samek 15 Koj zam kev phem, koj ua qhov zoo, koj nrhiav kev thaj yeeb, koj taug kev thaj yeeb qab. Ain 16 HUAB TAIS dauv muag ntsia cov neeg ncaj, nws tig ntsej mloog cov neeg ncaj lub suab hu. Pe 17 HUAB TAIS tiv cov neeg ua phem, nws ua kom ntiaj teb neeg txhob nco qab txog lawv. Cade 18 Cov neeg siab ncaj quaj qw, HUAB TAIS mloog lawv lub suab, nws npo lawv ntawm lawv tej kev ntxhov siab. Qof 19 HUAB TAIS nyob ze cov neeg ntxhov siab lwj plawv, nws cawm cov ntsuj plig qaug zog. Resh 20 Tus siab ncaj raug ntau hom kev iab kev puas, HUAB TAIS niaj zaus npo nws ntawm kev puas tsuaj. Shin 21 Nws zov tus siab ncaj cov pob txha. nws tsis kheev kom ib tug pob txha lov li. Taw 22 Kev puas tsuaj puas ntsoog tua tus neeg phem, tus neeg ncaj cov yeeb ncuab yuav raug txim. 23 HUAB TAIS txhiv nws cov tub txib txoj sia: cov tuaj nkaum hauv HUAB TAIS, tsis raug nplua ib tug li.

1 HUAB TAIS, koj liam rau cov neeg liam rau kuv, koj ntaus cov neeg tuaj ntaus kuv ! 2 Koj nthos nkaus koj daim leem phiaj thiab lub vab hlau tiv hmuv, koj sawv tsees los pab kuv mas ! 3 Rho hlo koj rab hmuv thiab rab taus thaiv cov neeg caum kuv, thov koj hais rau kuv tias : “Kuv yog tus cawm koj !” 4 Thov koj cia cov neeg uas xav txo kuv txoj sia txaj muag thiab poob ntsej muag. Thov koj ua kom cov neeg npaj qhov phem rau kuv, thim rov qab, kom lawv tsis muaj ntsej muag. 5 Kom lawv zoo li cov npluag nplej uas cua tshuab, kom HUAB TAIS tus tshiab caum lawv rov qab. 6 Thaum HUAB TAIS tus tshiab caum lawv, xav kom lawv txoj kev tsaus ntuj nti thiab nplua. 7 Lawv khawb ib lub qhov taub tos kuv, lawv muab ib lub vas los cuab saum ncauj qho. 8 Xav kom ib yam xwv txheej los raug lawv, thaum lawv tsis ceev faj, kom lawv rov mag lub vas uas lawv cuab, kom lawv poob rau hauv lub qhov ntawd ! 9 Ces kuv yuav hom khaj nyob hauv HUAB TAIS, kuv yuav dhia zoo siab vim koj cawm kuv. 10 Tas kuv cev nqaij pob txha yuav hais tias : “HUAB TAIS, leej twg thiaj zoo li koj ? Koj npo tus pluag ntawm tus muaj zog tshaj nws, koj npo tus kob huam ntawm tus noj luag taub hau.” 11 Ib co tim khawv cuav sawv tsees, lawv nug kuv txog yam uas kuv tsis paub. 12 Lawv ua phem pauj qhov zoo kuv ua rau lawv; nyem no, kuv tib leeg twm zeej lawm xwb. 13 Thaum lawv mob, kuv hnav ntaub tsaj, kuv yuam kuv lub cev, kuv yoo tshaib kuv thov Ntuj tsis tseg hauv nruab siab. 14 Kuv ua rau lawv xws li lawv yog kuv phooj ywg, los yog kuv kwv, kuv mus mus los los. Kuv tu siab cuag li yog kuv niam lub ntees tuag. kuv ntsoos ntsoos, kuv khoov cev. 15 Thaum kuv plam taw kuv ntog, lawv zoo siab, lawv los ntsauv kuv, lawv los ntsauv tsawm kuv.
Kuv tsis paub vim li cas, lawv dua kuv tej nqaij tsis tseg. 16 Lawv nrog cov neeg tsis huv ntsauv ncig kuv, lawv zim hniav qawv rau kuv. 17 HUAB TAIS, koj yuav ntsia kuv txoj kev poob tsag no hov ntev? Koj rho kuv txoj sia ntawm lawv txoj kev lim hiam no mas, koj npoj kuv txoj sia ntawm cov tsov ntxhuav no mas ! 18 Kuv yuav ua koj tsaug nyob hauv lub txoos loj, kuv yuav cav txog koj nyob hauv nruab nrab pab neeg coob. 19 Thov koj txhob cia kuv ua chaw zoo siab rau cov neeg lam nrhiav ua phem rau kuv, kom cov neeg lam ntxub kuv txhob tau kev sib txiav muag. 20 Lawv tsis muaj lus thaj yeeb los hais ib zaug li; Lawv xev ib co lus xaiv txog cov neeg tsis thab plaub hauv lub teb chaws. 21 Lawv qhib ncauj loj cem kuv, lawv hais tias : “Haj, haj ! Peb twb pom kiag ntawm qhov muag”. 22 HUAB TAIS, koj twb pom lawm, koj txhob kaw qhov ncauj ntxiv ! HUAB TAIS, koj txhob txav deb ntawm kuv ! 23 Kuv tus Tswv Ntuj, kuv tus HUAB TAIS, Thov koj tsim dheev los, thov koj sawv tsees txheem kuv cai, thiab tuaj kuv tog ! 24 HUAB TAIS, kuv tus Tswv Ntuj, koj tiv thaiv kuv cai vim koj siab ncaj, kom lawv txhob tau kev zoo siab vim kuv ! 25 Kom lawv txhob tau kev hais tias: ” Ab yaub ! Peb tau raws li peb lub siab xav lawm lauj”. Kom lawv txhob tau kev hais tias: ” Peb muab nws nqos kiag.” 26 Kom cov uas zoo siab rau kuv txoj kev txom nyem, lawv ua plhu liab tas vim lawv poob ntsej muag. Kom cov neeg yeej kuv tau txaj muag thiab poob ntsej muag tas tus. 27 Hos cov uas xav kom kuv tau txais kev ncaj, yuav qw zoo siab, lawv yuav hais tsis tseg tias : “HUAB TAIS loj, vim nws zoo siab pom nws tus tub txib txais kev kaj siab.” 28 Ces kuv tus nplaig yuav rov piav txog koj txoj kev ncaj, kuv yuav cav lus zoo txog koj tsheej hnub.

1 Ua rau tus coj nkauj. HUAB TAIS tus tub txib Das Vis zaj. 2 Kev txhaum hais lus nyob hauv tus tsis hwm Ntuj nruab siab. Ces nws qhov muag pom tias tsis tas yuav ntshai Tswv Ntuj li. 3 Nws rov khav rau nws tias tsis muaj leej twg pom nws qhov txhaum,
tsis muaj leej twg ntxub nws qhov txhaum. 4 Nws lub ncauj tsuas hais lus phem lus dag, nws tsis paub qhov zoo yog dab tsi. 5 Nws npaj qhov phem nyob saum nws lub txaj, nws nam qees mus taug txoj kev tsis zoo, nws tsis tso kev phem pov tseg. 6 HUAB TAIS, koj lub siab hlub neeg siab txij lub ntuj, koj lub siab pheej xeeb sawv siab siab rau puag saum huab. 7 Koj txoj kev ncaj siab li cov roob ntshiab, koj txoj kev txiav txim tob li qab thu hiav txwv. HUAB TAIS, koj cawm neeg thiab cawm tsiaj txhu. 8 Tswv Ntuj, koj lub siab hlub neeg muaj nuj nqis ua luaj ! Neeg tuaj nkaum hauv koj qab tis ntxoov ntxoo. 9 Neeg tau noj seem noj sos hauv koj tsev, koj pub lawv haus koj tus dej qab tsis txawj dhuav. 10 Vim lub pas dej pub txoj sia txhawv ntawm koj los, koj qhov pom kev ua kom peb pom kev kaj nrig. 11 Koj hlub cov neeg paub koj mus li, koj pub kev haum pheej mus li rau cov neeg siab ncaj. 12 Xav kom tus muab hlob txhais taw txhob tsuj tau kuv, kom cov teev dab mlom txhais tes txhob ntiab tau kom kuv khiav mus. 13 Cov neeg nyiam kev phem ntog nyob ntawd : lawv vau, lawv sawv tsis tau.

Alef 1 Koj txhob npau taws rau cov neeg lim hiam, txhob khib rau cov neeg ua phem. 2 Vim lawv yuav ntsws sai cuag li nroj, lawv yuav qhuav li tej hav zaub nyob tom nras. Bet 3 Koj tso siab rau HUAB TAIS, koj ua qhov zoo, koj yuav tau nyob hauv lub teb chaws, tau ua neej nyob nyab xeeb. 4 Koj nrhiav kev kaj siab hauv HUAB TAIS, nws yuav pub rau koj raws li koj lub siab thov. Guimel 5 Koj tig koj txoj hauv kev mus rau HUAB TAIS, koj tso siab rau nws, nws yuav lis dej num rau koj. 6 Nws yuav ua kom koj txoj kev ncaj ci li hauv ntuj ntsa, ua kom koj txoj cai ncaj ziab li lub hnub thaum tav su. Dalet 7 Cia koj lub siab tus yees nyob ze HUAB TAIS, koj tso siab rau nws ; koj txhob npau taws rau tus uas nws ua yam twg tau yam ntawd, txhob npau rau tus neeg nkhaus. He 8 Tso lub siab npau siab ceev pov tseg. txhob npau taws, tej ntawd yuav coj koj ua phem. 9 Vim Ntuj yuav rhuav cov neeg tsiv tsaim, hos cov tos HUAB TAIS yuav tau lub teb chaws ua lawv tug. Wau 10 Tshuav tsis ntev ntxiv, tus tsis hwm Ntuj yuav ploj, koj nrhiav nws ntawm nws tej chaw nyob, nws tsis nyob lawm. 11 Hos cov me neeg yuav tau lub teb chaws ua lawv lub, lawv yuav zoo siab nyob thaj yeeb. Zain 12 Tus tsis hwm Ntuj npaj ua phem rau tus siab ncaj; nws zim hniav zog rau tus siab ncaj. 13 Tab sis HUAB TAIS luag tus tsis hwm Ntuj, vim nws pom lub caij txiav txim rau tus tsis hwm Ntuj los yuav txog. Het 14 Cov tsis hwm Ntuj rho ntaj, nta hneev txo tus me neeg, thiab tus pluag, lawv yuav hno tus siab ncaj txoj hlab pas. 15 Tab sis lawv rab ntaj yuav rov nkaug lawv hauv siab, lawv rab hneev yuav lov. Tet 16 Qhov tsawg tsawg uas tus siab ncaj tau, zoo dua cov tsis hwm Ntuj tej nyiaj txiag. 17 Vim cov tsis hwm Ntuj npab yuav lov, hos HUAB TAIS txheem cov siab ncaj. Yod 18 HUAB TAIS paub cov coj ncaj ncees lub hnub nyoog ua neej, lawv lub cuab tam yuav nyob mus li. 19 Lub caij txom nyem lawv yuav tsis poob ntsej muag, lub caij teb chaws tshaib plab, lawv yuav tau noj tsau. Kaf 20 Cov tsis hwm Ntuj yuav tuag ; HUAB TAIS cov yeeb ncuab yuav zoo li tej paj nroj hauv tej nras teb, lawv ploj tas, ya mus ua pa taws. Lamed 21 Tus tsis hwm Ntuj txais nyiaj, tsis them rov qab; tus siab ncaj hlub luag, nws pub dawb. 22 Cov uas HUAB TAIS foom hmoov zoo rau yuav tau lub teb chaws ua lawv lub, hos cov uas HUAB TAIS foom phem rau yuav raug luag rhuav. Mem 23 Vim muaj HUAB TAIS pab, neeg thiaj mus tau kev khov kho, txoj kev nws taug xis nws siab. 24 Yog nws dawm taw, nws tsis ntog, vim HUAB TAIS tuav rawv nws tes. Noun 25 Txij kuv yav hluas los txog hnub kuv laus, kuv tsis pom Ntuj tso tus neeg ncaj pov tseg ib zaug li, tsis pom nws cov xeeb ntxwv thov khawv noj. 26 Tus neeg ncaj niaj hnub hlub luag, nws qiv rau luag, nws cov xeeb ntxwv yog ib txog hmoov zoo. Samek 27 Koj lug txoj kev phem, koj ua qhov zoo, koj yuav muaj vaj muaj tsev nyob mus li. 28 Vim HUAB TAIS nyiam txoj kev ncaj, nws tsis tso cov neeg ntseeg nws pov tseg. Ain HUAB TAIS pov hwm cov ntseeg nws mus li, hos cov tsis hwm Ntuj tsoom xeeb ntxwv raug luag rhuav. 29 Cov neeg ncaj yuav tau lub teb chaws ua lawv tug, lawv yuav tau nyob hauv lawv lub teb chaws mus li. Pe 30 Tus neeg ncaj lub ncauj qog lo lus thoob tsib, nws tus nplaig tshaj txoj kev ncaj. 31 Nws tus Tswv Ntuj txoj cai nyob rawv hauv nws nruab siab, nws mus kev, nws yuav tsis ntshaus raws. Cade 32 Cov tsis hwm Ntuj nyas tus neeg ncaj, lawv nrhiav kev tua nws. 33 Tab sis HUAB TAIS tsis tso tus neeg ncaj pov tseg rau hauv lawv txhais tes; yog luag txiav txim rau nws, HUAB TAIS tsis cia nws raug txim. Qof 34 Koj tos HUAB TAIS, koj tsom ntsoov nws txoj kev; nws yuav tsa koj ua tswv teb tswv chaw, koj yuav pom cov tsis hwm Ntuj raug kev rhuav. Resh 35 Kuv pom tus tsis hwm Ntuj quab yuam luag, nws sawv ntsug xws li cov ntoo ciab Lis Npas. 36 Kuv rov mus ze ntawm nws : nws tsis nyob lawm ; Kuv nrhiav nws, tsis muaj leej twg nrhiav tau nws li lawm. Shin 37 Koj ntsuam tus neeg siab dawb, koj ntsia tus siab ncaj : tus neeg tsim kev thaj yeeb muaj ib pab xeeb ntxwv. 38 Hos cov ntxeev siab puav leej raug rhuav ploj tas, cov tsis hwm Ntuj tsoom tub ki kuj tuag tu noob. Taw 39 Cov siab ncaj txoj kev cawm tuaj ntawm HUAB TAIS tuaj : lub caij kev txhawj xeeb, HUAB TAIS yog lawv lub chaw cawm siav. 40 HUAB TAIS pab lawv thiab npo lawv nws npo lawv dim ntawm cov tsis hwm Ntuj, nws cawm lawv, vim lawv tuaj nkaum hauv nws.

1 Das Vis zaj Nkauj Paj Nruag. Hais rau hnub cawv xeeb. 2 HUAB TAIS, thaum koj npau taws, koj txhob nplua kuv. Thaum koj qhuab qhia kuv, koj txhob ua siab ceev.
3 Vim koj cov xub nkaug kuv lawm, koj txhais tes nias kuv. 4 Nyob hauv kuv lub cev, tsis tshuav ib thaj nqaij uas yuav tsis mob, vim koj npau taws rau kuv. Tsis tshuav ib tug pob txha uas yuav tsis raug mob, vim kuv ua txhaum rau koj. 5 Vim tias kuv cov txhaum siab tshaj kuv taub hau, kuv cov txhaum tsuam hnyav li ib lub nra, uas hnyav heev dhau. 6 Kuv cov qhov txhab voos, ua paug tas, vim kuv txoj kev ruam. 7 Kuv nyo taub hau, kuv lub cev khoov nkoos, kuv niaj hnub ncig, ntsej muag ntsoos. 8 Tus mob kub cev ri mus hauv kuv tej plab hnyuv, tsis tshuav ib thaj nqaij uas yuav tsis mob nyob hauv kuv. 9 Kuv ib ce caus yaum, lov ua qob qis : kuv lub plawv nroo laws, kuv nyooj. 10 HUAB TAIS, txhua yam kuv ntshaw, mas yeej nyob ntawm koj xub ntiag lawm, kuv tsis zais kub lub suab ntsaj rau koj. 11 Kuv lub plawv dhia, kuv lub zog tso kuv tseg, kuv qhov muag tsis pom kev lawm. 12 Kuv cov phooj ywg thiab cov npawg pom kuv tej qhov txhab, lawv nyob ib cag ntsia, kuv cov txheeb ze txav deb kuv. 13 Cov xav txo kuv txoj sia cuab ntxiab tos kuv, cov nrhiav ua phem rau kuv, tham tias yuav muab kuv tua, lawv niaj hnub tham tuj taws txog tej kev ntxeev siab. 14 Hos kuv, zoo li tus lag ntseg, tsis hnov dab tsi; kuv zoo li tus nplaig txhav, tsis qhib ncauj. 15 Kuv zoo li tus tsis hnov lus, zoo li tus uas lub ncauj tsis paub teb lus tiv luag. 16 HUAB TAIS, kuv tso siab rau koj. HUAB TAIS, kuv tus Tswv Ntuj, koj teb kuv. 17 Kuv hais tias : “Thov kom cov neeg yeej kuv txhob tau kev zoo siab, vim kuv yuav ntog.” 18 Kuv twb yuav vau, tus mob nyob nraim hauv kuv. 19 Kuv lees kuv qhov txhaum, kuv txhawj rau qhov txhaum kuv tau ua. 20 Kuv cov yeeb ncuab tau noj qab nyob zoo, lawv muaj zog; cov neeg uas lam ntxub kuv coob heev. 21 Lawv ua qhov phem los pauj qhov zoo, thaum kuv nrhiav txoj kev zoo, lawv tseem liam rau kuv.
22 HUAB TAIS, koj txhob tso kuv pov tseg, kuv tus Tswv Ntuj, thov koj txhob nyob deb kuv. 23 HUAB TAIS, koj tsuag tsuag tuaj pab kuv ! Koj yog tus cawm kuv.

1 Ua rau tus coj nkauj, tus hu ua Yedoutoun. Das Vis zaj nkauj paj nruag. 2 Kuv hais tias : “kuv yuav taug kuv txoj kev, yuav tsis tso tus nplaig hais lus yuam kev. Yog muaj ib tug tsis ntseeg Ntuj nyob ntawm kuv xub ntiag, kuv yuav xuas ntaub npog kuv qhov ncauj. 3 Kuv kaw qhov ncauj, kuv nyob ntsiag to, kuv ua twj ywm, kuv tsis tau dab tsi, kuv txoj kev txom nyem haj yam hlob. 4 Kuv lub plawv kub lug ntawm hauv siab. hnov ntsoov ib ce kub cuag hluav taws, kuv thiaj cia tus nplaig hais tawm : 5 “HUAB TAIS, thov qhia kuv paub kuv lub caij kawg, saib lub hnub nyoog koj luj rau kuv tshuav hov ntev, kuv thiaj paub tias kuv dua sai npaum li cas. 6 Ntsia saib, lub hnub nyug uas koj muab rau kuv ua neej tsuas ntev li ib tsawj teg. Kuv sim neej tsis ntev dab tsi nyob ntawm koj xub ntiag, Tas ib tsoom neeg tsuas kawg zoo li tshuab pas. 7 Neeg mus zoo li ib tug duab, Lub cuab tam nws khaws tsub cia, dua mus li cua tshuab ! nws tsis paub leej twg yuav khaws xyeem yuav.” 8 HUAB TAIS, zaum no, kuv yuav tos dab tsi ? Kuv qhov chaw tso siab yog nyob hauv koj : 9 koj daws kuv dim ntawm kuv cov txhaum, koj txhob cia cov neeg vwm luag kuv. 10 Kuv kaw kuv lub ncauj, yuav tsis qhib ncauj ntxiv, vim koj yog tus lis qav lis num . 11 Tshem koj lub nrig uas ntaus kuv, kuv ntog, vim koj txhais tes ntaus kuv. 12 Koj cob qhia neeg, koj nplua neeg qhov txhaum. Koj rhuav tej yam uas neeg saib muaj nqis, xws li kab rws yaim. Txhua leej tib neeg tsuas zoo li ib nthwv me cua. 13 HUAB TAIS, koj mloog kuv zaj thov koj.
Koj tig pob ntseg los mloog kuv lub suab hu. Koj txhob ua ntsej lag rau kuv lub kua muag, vim kuv tsuas yog ib tug qhua tuaj nyob hauv koj tsev, kuv tsuas yog ib tug neeg dua kev xws li kuv cov yawg koob. 14 Thov koj tig qhov muag mus deb ntawm kuv, cheem kuv tseem tsis tau dua mus, thiab tseem tsis tau ploj, kom kuv rov muaj cuab kav luag ntxhi.

1 Ua rau tus coj nkauj. Das Vis zaj nkauj paj nruag. 2 Kuv tos, kuv tos ntsoov HUAB TAIS : nws khoov los ze kuv, nws hnov kuv lub suab. 3 Nws rub kuv tawm hauv lub qhov ntuj tuag tob, nws rub kuv tawm ntawm lub pas av nkos. Nws tsa kuv sawv, nws muab kuv ob txhais taw txawb rau saum pob zeb, nws hwj kuv rhais ruam. 4 Nws tso ib zag nkauj tshiab rau hauv kuv lub ncauj, yog zaj nkauj cav peb tus Tswv Ntuj. Coob leej pom, lawv yuav hwm, lawv yuav tso siab rau HUAB TAIS: 5 Tus tau txoj hmoov zoo, yog tus tso siab rau HUAB TAIS, yog tus uas tsis tig mus rau cov neeg teev cov tswv Ntuj cuav, yog tus tsis tig rau kev dag ! 6 HUAB TAIS, kuv tus Tswv Ntuj, cov hauj lwm thiab hwj huam yees ntxwv koj ua rau peb loj tas nrho ! Tsis muaj leej twg luaj li koj. Kuv xav tshaj rau ntiaj tog qaum pes, kuv xav hais tag hais thiab, tab sis ntau dhau, hais tsis tag. 7 Koj kaus kuv qhov ntsej kom hnov lus : Koj tsis xav yuav tsiaj txi, los txhiam xws cev rau koj, Koj tsis kom kuv hlawv tsiaj los daws txim txhaum. 8 Kuv thiaj hais tias : ” Koj saib, kuv tuaj, kuv nqa kauj ntawv uas tau sau rau kuv. 9 Kuv tus Tswv Ntuj, kuv xav ua yam xis koj siab, koj txoj cai nyob rawv hauv kuv nruab siab. 10 Kuv tshaj koj txoj kev ncaj nyob hauv lub txoos loj; kuv tsis cheem kuv di ncauj, HUAB TAIS, koj paub ! 11 Kuv tsis muab koj txoj kev ncaj zais rau nruab siab, kuv piav koj txoj kev ncaj thiab kev cawm neeg, Kuv tsis zais koj txoj kev hlub thiab kev tseem ceeb rau lub txoos loj. 12 HUAB TAIS, koj tsis cia koj lub siab txawj zam nyob deb kuv, koj kev hlub thiab kev tseem ceeb txuag kuv mus li. 13 Kev phem kev ntxhov ntau hom los raug kuv, ntau yam kuv ua yuam kev tsuam kuv, ua kom kuv tsis pom kev li; kev phem kev ntxhov ntau tshaj kuv tej plaub hau, kuv lub plawv txhawj tuav siav rawv. 14 HUAB TAIS, koj ua siab ntev npo kuv ! HUAB TAIS, tsuag tsuag tuaj pab kuv ! 15 Xav kom cov neeg nrhiav txo kuv txoj sia tau txaj muag, thiab ua plhu liab ! Xav kom cov uas zoo siab pom kuv raug txom nyem thim rov qab, thiab poob ntsej muag tas ! 16 Cov neeg uas hnyos tias ” haj haj !” ntawd, xav kom lawv yoob tas, vim poob ntsej muag loj. kom txaj muag ti txha nkaus. 17 Hos cov nrhiav Koj, xav kom lawv hom khaj thiab zoo siab, kom cov neeg nyiam koj txoj kev cawm, hais tsis tseg tias :” HUAB TAIS loj”. 18 Kuv pluag, kuv kob huam, HUAB TAIS nco txog kuv, Kuv tus Tswv Ntuj, koj yog tus pab kuv, koj yog tus npo kuv dim; koj txhob ua siab hnyav !

1 Ua rau tus coj nkauj. Das Vis zaj nkauj paj nruag. 2 Tus txawj hlub cov pluag, mas nws txoj hmoov zoo : hnub nws txom nyem, HUAB TAIS npo nws dim. 3 HUAB TAIS txuag nws kom muaj txoj sia, kom nws zoo siab ua neej nyob ntiaj teb. thiab yuav tsis tso nws rau cov yeeb ncuab hu dab lub ncauj. 4 Thaum nws mob qaug txaj, HUAB TAIS nres nws, HUAB TAIS ntxeev nws daim pam pua tsis tseg. 5 Kuv hais tias ; “HUAB TAIS, thov koj hlub, koj kho kuv, vim kuv txhaum rau koj.”
6 Kuv cov yeeb ncuab hais phem txog kuv : ” Thaum twg nws mam tuag ? ” thaum twg nws lub npe mam ploj ?” 7 Yog muaj ib tug tuaj xyuas kuv, nws xav txog qhov phem, nws ntim qhov phem rau nruab siab; tawm plaws mus, nws tham. 8 Thaum cov neeg ntxub kuv sib sau los ua ke, lawv ua lus ntxhi hais phem txog kuv, lawv sib tham txog tej yam phem rau kuv : 9 ” Nws tau ib tug mob qias neeg, ” tus twg pw nthi hauv tus mob ntawd, ” yeej tsis sawv ib zaug li.” 10 Tab yog tus phooj ywg uas kuv ib txwm tso siab rau, tus tau noj kuv cov mov, nws tig luj taws rau kuv. 11 HUAB TAIS, koj ne, thov koj hlub, thov koj rov tsa kuv sawv, kuv yuav pauj lawv txoj kev phem rau lawv. 12 Yog tus yeeb ncuab tsis nthe khav tias nws yeej, mas kuv paub tias koj hlub kuv lawm. 13 Koj tau txheem kuv, koj kho kuv zoo hlo, koj rov tsa kuv rau ntawm koj xub ntiag, tas ib sim neej. 14 HUAB TAIS, His Xas Lais tus Tswv Ntuj, Nws nto meej nto moo txij puag thaum chiv keeb mus tas ib txhis. Ua li ! ua li !

1 Ua rau tus coj nkauj. Kos Les cov tub zaj. Nkauj qhuab qhia. 2 Kuv tus Tswv Ntuj, kuv tus plig seev yees txog koj puav tam li mos lwj seev yees txog qhov dej txhawv. 3 Kuv tus plig nqhis Tswv Ntuj, nqhis tus Tswv Ntuj muaj txoj sia : thaum twg kuv mam tau mus pom nws lub ntsej muag? 4 Nruab hnub hmo ntuj, kua muag yog kuv pluas mov, vim luag niaj hnub hais rau kuv tias : ” Koj tus Tswv Ntuj nyob qhov twg ?” 5 Kuv rov nco txog lub caij thaud, kuv tus plig khooj rau saum kuv, kuv hla lub rooj vag coj zeej tsoom nqaum paj nqaum nruas, hu nkauj lom zem, thiab cav lus zoo mus hauv Tswv Ntuj tsev. 6 Kuv tus plig, vim li cas koj qaug zog? Cas koj seev yees rau kuv ? Koj tso siab rau Tswv Ntuj mog ! Kuv yuav rov qab cav txog nws, cav txog nws lub ntsej muag cawm neeg, 7 cav txog kuv tus Tswv Ntuj. Kuv tus plig rov los khooj rau kuv, li ntawd, kuv thiaj nco txog koj : nco txog lub teb chaws Yos Las Das mus txog cov ncov roob Hes Moos, thiab lub roob Mis Xes As. 8 Koj cov dej hauv hiav txwv tsa suab sib hu, dej tsaws tsag nrov nroo ntws. Koj cov dej nphau tuaj sib tsoo, kauv zog tuaj nyab kuv. 9 Nruab hnub, HUAB TAIS txib nws lub siab hlub, hmo ntuj, kuv hu nkauj qhuas nws, kuv teev tus Tswv Ntuj uas yog kuv txoj sia. 10 Kuv xav hais rau tus Tswv Ntuj uas yog kuv lub tsua tias : “Vim li cas koj hnov qab kuv ? vim li cas kuv thiaj mus ntsej muag ntshaus, vim tus yeeb ncuab yuam kuv ?” 11 Cov neeg ntxub kuv cov lus tsawm chob kuv ti nkaus txha, lawv niaj hnub hais rau kuv tias : ” Koj tus Tswv Ntuj nyob qhov twg ?” 12 Kuv tus plig, vim li cas koj qaug zog? Cas koj seev yees rau kuv ? Koj tso siab rau Tswv Ntuj mog ! Kuv yuav rov qab cav txog nws tias : nws yog tus Tswv Ntuj cawm kuv lub ntsej muag.

1 Tswv Ntuj, thov koj txiav txim rau kuv, thov koj tsa kuv cai ntawm cov neeg tsis ntseeg. Thov koj daws kuv dim ntawm tus neeg dag thiab tus tua neeg. 2 Tswv Ntuj, koj yog kuv lub chaw nkaum, vim li cas koj ntiab kuv? vim li cas kuv thiaj mus, lub ntsej muag ntshaus tas, rau tus yeeb ncuab yuam kuv ? 3 Koj xa qhov pom kev thiab qhov tseem ceeb tuaj coj kuv kev mus txog saum koj lub roob ntshiab, txog qhov chaw koj nyob txawm. 4 Kuv yuav mus txog ntawm Tswv Ntuj lub thaj, mus txog tus Tswv Ntuj uas ua kom kuv dhia zoo siab. Tswv Ntuj, kuv tus Tswv Ntuj, kuv yuav ntaus nkauj nog ncas cav qhuas koj. 5 Kuv tus plig, vim li cas koj qaug zog? Cas koj seev yees rau kuv? Koj tso siab rau Tswv Ntuj mog ! kuv yuav rov qab cav txog nws tias : nws yog tus Tswv Ntuj cawm kuv lub ntsej muag.

1 Ua rau tus coj nkauj, Kos Les cov tub zaj. Nkauj qhuab qhia. 2 Tswv Ntuj, cov hauj lwm loj uas koj tau ua pab peb cov yawg koob txheej thaud, lawv tau qhia peb paub lawm, peb twb tau hnov ntawm pob ntseg. 3 Koj xuas koj txhais tes ntiab cov kuj cuab tawm, koj muab peb cov yawg koob los cog rau, koj quab yuam lwm cov haiv neeg, kom peb cov yawg koob tau kev huam vam ri mus. 4 Tsis yog lawv rab ntaj tsa lawv ua tswv teb tswv chaw, tsis yog lawv txhais npab ua kom lawv yeej, yog koj sab tes xis, koj sab npab thiab koj lub ntsej muag ci ntsa ua lawv yeej, vim koj nyiam lawv. 5 Tswv Ntuj, koj yog kuv tus vaj, koj yog tus txiav txim kom Yas Kos yeej. 6 Vim koj pab, peb thiaj nrau yeej cov tiv peb, vim koj lub npe, peb thiaj tsuj tau cov tuaj ntaus peb. 7 Kuv tsis tso siab rau kuv rab hneev, kuv rab ntaj tsis pub kev yeej rau kuv. 8 Tus ua kom peb yeej cov neeg tiv peb, yog koj, koj ua peb cov yeeb ncuab poob koob meej. 9 Peb niaj hnub hu nkauj cav txog Tswv Ntuj, peb qhuas nws lub npe tsis tseg. 10 Tsis kav, koj tseem tso peb pov tseg, rhuav peb ntsej muag. Koj tsis nrog peb cov tub rog tawm mus ntaus tsam ntxiv, 11 Koj cia peb thaub qab ntawm cov neeg ntxub peb, yeeb ncuab txeeb peb tej cuab yeej cuab tam nqa tas. 12 Koj muab peb muag xws li me nyuam yaj uas luag cab mus tua, koj cia peb sib ncaim mus xyaw lwm cov kuj cuab. 13 Koj tso plhuav koj haiv neeg rau luag, tsis ntaus nqi, koj muag koj haiv neeg, tsis tau dab tsi. 14 Koj cia peb rau cov nyob ze thuam, cov nyob ib ncig peb tuaj dab ros, lawv luag peb. 15 Koj cia tsoom kuj cuab muab peb ua dab neeg hais, lwm cov haiv co taub hau ntawm peb xub ntiag. 16 Niaj hnub, kev poob ntsej muag nyob nraim ntawm kuv xub ntiag, kuv txaj muag, kuv tsis muaj ntsej muag lawm. 17 Niaj hnub, kuv nyob ntawm tus yeeb ncuab rob caub xub ntiag mloog nws cov lus tub qaug neeg, thiab lus thuam Ntuj. 18 Peb twb tsis tau ntxeev siab rau cov lus peb tau cog rau koj, peb tsis hnov qab koj li, tab sis tas ib puas tsav yam ntawd tshwm sim tuaj raug peb. 19 Peb lub siab tsis tau ntxeev, peb txhais taw tsis tau ncaim ntawm koj txoj kev, 20 Tab sis thaum nyob pem hav hma, koj muab peb tsuj nthi, koj cia kev tuag los npog nkaus peb. 21 Yog peb ho tau hnov qab peb tus Tswv Ntuj lub npe, los tau tsa tes hwm lwm tus dab tom luag qhua, 22 Tswv Ntuj tsis pom lov ? nws twb yog tus paub puag hauv neeg nruab siab? 23 Yog vim koj, luag thiaj niaj hnub tua peb, vim koj, luag thiaj saib peb li cov me nyuam yaj uas yuav cab mus tua. 24 HUAB TAIS, ua cas koj tsaug zog ? koj tsim nruab dab ntub los mas ! Sawv tsees ntawm koj tus dab ntub los ! Koj txhob tso peb pov tseg mus li. 25 Vim li cas koj thaiv koj ntsej muag, Koj hnov qab peb txoj kev txom nyem thiab kev raug luag tsim txom lawm los ? 26 Peb lub cev da hauv qhov tshauv, peb lub plab lo lua rau hauv av. 27 Koj sawv tsees mas, thov koj tuaj pab !

1 Ua rau tus coj nkauj, raws li cov “paj qoov dawb”. Kos Les cov tub zaj. Lus paj huam seev. Nkauj cav txog kev sib nyiam Kuv lub plawv txhawv lus zoo nroo ntws tawm tuaj : kuv seev lus paj huam cav txog tus vaj lub npe. 3 kuv tus nplaig zoo xws li kws txawj tus mem kos ntawv. Koj yog tus zoo nraug tshaj ib tsoom txiv neej, txiaj ntsim zoo saib sais zim ntawm koj di ncauj. Li ntawd, Tswv Ntuj foom koob hmoov rau koj tas ib sid.
4 Tub siab tawv, sia koj rab ntaj ntawm duav, hnav koj cev zam nplua nuj ci ntsa iab ! 5 Koj rag nees ntws, ci laim tsias, mus txais kev yeej, koj mus txheem zaj tswv yim tseem ceeb, mus txheem txoj kev zam, thiab kev haum pheej. 6 Koj sab xis ua luag ntshai tshee na : vim koj cov xub vos zuag. Cov haiv neeg ntog ntawm koj taw, tus vaj cov yeeb ncuab raug koj nkaug ntawm hauv siab. 7 Tswv Ntuj lub theej kiab, yuav nyob mus ib txhiab ib txhis. koj tus cwj vaj ntxwv tswj pej xeem hauv txoj kev ncaj. 8 Koj nyiam kev haum pheej, koj ntxub kev phem, li ntawd Tswv Ntuj, koj tus Tswv Ntuj thiaj nyiam koj dua koj cov kwv luag, nws muab cov roj pub kev zoo siab los pleev koj. 9 Pa txab txiv yoov, txab ntoo xeeb leej tsav thiab pa ntoo txiv qab, ntxaum koj lub zam, tsw qab ntxiag. Koj tawm plaws hauv cov tuam tsev plooj kaus ntxhw, suab raj suab nkauj nrov deev koj siab. 10 Vaj ntxwv cov ntxhais coj npauj kub npauj nyiag, sawv ntsug tos, tus ntxais vaj ntxwv coj npauj kub Os Fis sawv ntawm koj sab xis. 11 Kuv me ntxhais, mloog mog ! Koj ntsia, koj tig ntsej los mloog : Koj txhob nco koj haiv neeg, koj niam koj txiv ; 12 kom tus vaj qaug siab hlo nyiam koj lub cev zoo nkauj ! Nws yog koj tus huab tais, koj mus txhos caug pe ntawm nws xub ntiag. 13 Ntxhais nyob Tws Los, cov pej xeem nplua nuj tshaj yuav nqa paj tshab tuaj nplij koj. 14 Tus ntxhais vaj muaj xom lees, hnav tiab paj ntaub ntos xov kub nyob hauv nws chav tsev. 15 Nws ua zam paj ntaub ntos ntau hom tsos xov, luag coj nws mus cob rau tus vaj; ib pab nkauj xwb lawv nws qab, luag coj lawv mus sawv ze nws. 16 Lawv ua ib pab zoo siab, sib law sib liag, chaws mus hauv tus vaj lub tuam tsev. 17 Koj cov tub yuav los sawv phaj txiv chaw, koj yuav tsa lawv ua vaj txheeb kav ntiaj teb ; 18 Kuv yuav tuav koj npe kom luag nco txog koj mus txheej dhau txheej ; kom tsoom haiv neeg cav koj mus li.

1 Ua rau tus coj nkauj ; Kos Les cov tub zaj ; Ib zag lus paj huam seev ; al-alamoth. 2 Tswv Ntuj yog peb lub chaw nkaum, yog peb lub yeej ntsa zeb. Thaum kev txhawj xeeb tuaj, nws cev nws lub zog mus li los pab peb. 3 Li ntawd, tab yog lub ntiaj teb ua zog koog, toj roob hauv pes nphau rau hauv tiv txwv, los peb tsis ntshai. 4 Dej nroos ntws ua npuas dhi tuaj, dej ntsawj nphau nphwv siab siab, cov roob ua zog koog. 5 Tab sis muaj ib tug dej ntws ncau ntau ceg, mus ua chaw zoo siab rau Tswv Ntuj lub tsheej, lub tsheej ntawd yog tus Nyob Siab lub tuam tsev uas ntshiab tshaj lwm cov. 6 Tswv Ntuj nyob hauv nruab nrab lub tsheej ; lub tsheej yuav tsis tshee, tsis co. Kaj ntug txoog, Tswv Ntuj pab nws : 7 Ib co haiv neeg quaj seev yees, lawv cov tuam ceeb co ua zog koog; Tswv Ntuj lub suab nrov, ces lub ntiaj teb yaj ua kua. 8 Tus HUAB TAIS muaj hwj huam tas nrho nrog peb nyob. Yas Kos tus Tswv Ntuj yog peb lub yeej ntsa zeb. 9 Nej mus xyuas HUAB TAIS cov hauj lwm saib, xyuas tej kev puas tsuaj nws ua rau ntiaj teb. 10 Nws cheem kev sib ntaus sib tua mus txog tim npoo ntiaj teb, nws muab cov hneev lov, nws tsoo cov hmuv, nws hlawv cov tsheb tua rog. 11 Tso nej tej ntaj riam tseg ! Nej lees hais tias kuv yogTswv Ntuj ! Kuv yeej ib tsoom kuj cuab, kuv yeej tas lub ntiaj teb. 12 Tus HUAB TAIS muaj hwj huam tas nrho, nrog peb nyob. Yas Kos tus Tswv Ntuj yog peb lub yeej ntsa zeb.

1 Tus coj nkauj ; Kos Les cov tub zaj nkauj paj nruag. 2 Cov haiv neeg, nej txhua leej txhua tus npuaj teg, nej nrog suab puab suab hom lom zem qw cav txog Tswv Ntuj. 3 Tus HUAB TAIS Nyob Siab Tshaj yog tus nej yuav ntshai ; vim nws yog tus vaj loj kav tas ntiaj teb. 4 Nws coj cov haiv neeg los zwm rau peb, nws tso cov kuj cuab rau hauv peb qab xib taws. 5 Nws xaiv ib lub cuab tam los ua ntsej muag rauYas Kos, tus nws nyiam. nws muab lub cuab tam ntawd cev rau peb. 6 Tswv Ntuj sawv los nyob nruab nrab, zeej tsoom qw suab los zem. HUAB TAIS sawv los nyob nruab nrab cov suab hom. 7 Nej hu nkauj cav txog Tswv Ntuj, nej hu nkauj mas ! nej hu nkauj rau peb tus vaj, nej hu nkauj mas ! 8 Vim tus vaj kav tas ntiaj teb, yog Tswv Ntuj. Nej hu nkauj qhia kom luag paub nws. 9 Tswv Ntuj ua vaj saib ib tsoom kuj cuab ; Tswv Ntuj zaum saum nws lub theej kiab ntshiab. 10 Cov vaj txheeb hauv txhua haiv neeg tuaj sib sau ua ke : yog Has Nplas Has tus Tswv Ntuj haiv neeg. Vim ntiaj teb cov leem phiaj yog Tswv Ntuj tug, Nws nce siab dua tas txhia yam.

1 Zaj paj huam seev. Nkauj paj nruag. Kos Les cov tub zaj. 2 Nyob hauv peb tus Tswv Ntuj lub tsheej, saum nws lub roob ntshiab, HUAB TAIS yog tus loj, nws txais ntau vam lus cav ncha ntws txog nws. 3 Nws lub roob zoo nkauj, muaj koob meej, ua ntiaj teb lub chaw sov siab. Nyob pem qaum tsheej kawg nkaus, yog lub roob Xis Yoos, yog tus vaj loj lub tsheej. 4 Nyob hauv cov tuam tsev, pem Xis Yoos, sawv daws paub tias Tswv Ntuj yog lub tuam yeej ntsa zeb. 5 Ntsia saib, cov vaj teem caij sib sau ; lawv tib txhij sawv kev tuaj mus. 6 Lawv pom dheev, ib sij huam lawv ceeb tas. lawv ntshai heev kawg, lawv tso tes khiav. 7 Lawv ceeb nkaus rau ntawm chaw, lawv ntswj cuag li tus poj niam yuav daws cev. 8 Yog zoo li cov cua toob fab ntsawj, ua kom cov nkoj tuaj ntawm Tas Xis tuaj tawg ntsoog ntxaws. 9 Tej yam peb hnov luag hais, zaum no peb pom nyob hauv tus HUAB TAIS muaj hwj huam lub tsheej, hauv peb tus Tswv Ntuj lub tsheej : Tswv Ntuj ua kom nws lub tsheej khov ruaj mus li. 10 Tswv Ntuj, nyob hauv koj lub tuam tsev, peb rov nco txog koj lub siab hlub neeg. 11 Tswv Ntuj, koj lub npe thiab lo lus cav koj nto moo lug mus txog npoo ntiaj teb. Kev ncaj nyob puv koj txhais tes xis. 12 Lub roob Xis Yoos zoo siab, cov nroog hauv Yus Das teb dhia lom zem vim koj txiav txim ncaj. 13 Nej mus taug saum Xis Yoos cov phab ntsa xov tsheej saib, nej suav cov yeej zeb zov tsheej. 14 Nej ntsuam, nej qhuas nws lub phab ntsa pob zeb, suav nws cov tuam tsev vaj ntxwv, kom nej tau qhia rau tsoom xeeb ntxwv tom qab, 15 paub tias tus Tswv Ntuj no yog peb tus Tswv Ntuj mus ib txhiab ib txhis. Nws coj peb kev.

1 Tus coj nkauj. Kos Les cov tub zaj nkauj paj nruag. 2 Cov haiv neeg, nej sawv daws mloog qhov no ; tsoom neeg nyob qab ntuj khwb, nej tig pob ntseg mog. 3 Tsoom laj mej pej xeem, tsoom muaj koob nto npe, cov muaj, cov pluag, nej txhua leej txhua tus tib si. Nej mloog mog ! 4 Kuv lub ncauj paiv lus thoob tsib, kuv lub plawv ua lus ntxhi qhia cov lus ntse. 5 Kuv qhib pob ntseg mloog cov zaj paj lug. Kuv ke ntaus nkauj nog ncas, ke txhais zaj paj lug lub ntsiab. 6 Thaum tsiv hnub tsiv nyoog, vim li cas thiaj ntshai cov neeg nkhaus uas nyob ncig kuv txoj kev phem? 7 Vim li cas ntshai cov neeg uas tso siab rau lawv peev nyiaj txiag ? Ntshai cov khav hais tias lawv nplua nuj loj kawg ? 8 Ib tug neeg rov txhiv lwm tus tsis tau, nws them tus nqi txhiv nws ntawm Tswv Ntuj kuj tsis tau. 9 Txawm muab tus nqi loj npaum twg pauv ib txog sia, tus nqi ntawd yuav tsis txaus ib zaug. 10 Leej tib neeg puas yuav muaj txoj sia nyob, tsis txawj ploj ? Nws yuav tsis pom lub qhov ntxa ib zaug li lov ? 11 Sawv daws twb pom cov neeg thoob tsib tuag, ib yam li cov neeg ruam thiab cov neeg tsiv tsaim, lawv tso lawv tej nyiaj txiag rau lwm cov neeg yuav. 12 Lawv xav tias lawv cov tsev yuav nyob mus li, lawv tej vaj tse yuav tsis txawj puas, lawv muab lawv lub npe los tis rau tej thaj av ! 13 Leej tib neeg, tab yog muaj koob nto npe, nws kuj pw tsis dhau hmo, nws zoo li tus tsiaj tsis txawj hais lus. 14 Cov uas tso siab tag nrho rau lawv tus kheej, thiab cov neeg nyiam lawv tej lus, yav tom ntej lawv sawv daws yuav zoo li no : 15 Lawv yuav raug kaw hauv ntuj txias teb tsaus zoo li cov yaj. Kev Tuag ua tswv coj lawv mus noj zaub. Cov neeg siab ncaj yuav ua tswv kav lawv. Tag kis sawv ntxov, lawv lub ntsej muag ploj rau hauv ntuj txias teb tsaus, lawv nyob deb lawv cov tuam tsev. 16 Tab sis, Tswv Ntuj yuav txhiv kuv txoj sia ntawm ntuj txias teb tsaus lub hwj huam ; nws yuav coj kuv nrog nws mus. 17 Thaum ib tug neeg nplua nuj tuaj thiab nws tsev neeg nto koob meej huam vam, mas koj txhob txhawj. 18 Vim tias hnub tuag, nws nqa tsis tau dab tsi li, nws lub koob meej kuj tsis nrog nws nqes mus lawm hauv. 19 Thaum ua neej nyob, nws rov qhuas nws tias : “Luag npuaj teg rau koj, vim koj ua tau txhua yam zoo ! ” 20 Nws mus cuag nws cov yawg koob, lawv tsis pom lub hnub ci tas ib txhiab ib txhis. 21 Tus muaj koob nto npe, yog nws tsis to taub, nws zoo li tus tsiaj uas tsis txawj hais lus.

1 Nkauj paj nruag. As Xas zaj. Tus HUAB TAIS Tswv Ntuj kav ib tsoom dab, nws qhib ncauj hais lus; nws hu tas ntiaj teb neeg, txij hnub tuaj txog hnub poob, los sib sau. 2 Tswv Ntuj ci ntsa iab tawm tuaj 21 Ntsia saib, koj ua tej yam phem li ntawd, kuv yuav nyob ntsiag to puas tau? Koj puas xav tias kuv zoo li koj thiab? Kuv liam, kuv nthuav tas txhua yam ntawd rau ntawm koj qhov muag. 22 Nej yuav tsum to taub : nej cov uas hnov qab Tswv Ntuj ! Tsis li, kuv npaw taws, ces yuav tsis muaj leej twg npo tau nej. 23 Leej twg cev lo lus cav zoo los txi Ntuj, tus ntawd ua kuv nto koob meej. kuv yuav pub tus neeg ncaj pom Tswv Ntuj txoj kev cawm neeg.

1 Ua rau tus coj nkauj. Das Vis zaj nkauj paj nruag. 2 Das Vis yuav Npes Xas Npes, tus yaj saub Nas Tas tuaj xyuas Das Vis. 3 Tswv Ntuj, koj lub siab zoo, thov koj khuv leej kuv. Koj lub siab dav tas nrho hlub mos nyoos, koj so kuv qhov txhaum. 4 Thov koj ntxuav kuv qhov phem kom tag, yaug kuv qhov txhaum kom kuv huv tuaj. 5 Kuv paub kuv qhov txhaum, kuv qhov yuam kev nyob ntawm kuv xub ntiag mus li. 6 Kuv ua txhaum rau koj, txhaum koj tib leeg xwb, yam phem ntawm koj qhov muag, kuv tau ua lawm. Li ntawd, thaum koj tu plaub, koj qhib koj lub siab ncaj tawm los, thaum koj txiav txim, neeg xyeej tsis tau. 7 Koj ntsia saib, thaum kuv yug los kuv yeej phem lawm, txij thaum kuv niam xeeb kuv, kuv xib rau txoj kev txhaum. 8 Koj nyiam qhov tseeb hauv neeg nruab siab, koj qhia kev thoob tsib hauv kuv nruab plawv. 9 Koj muab tshuaj his xos txhuam qhov tsuas kuv pov tseg, ces kuv yuav huv tuaj; koj ntxuav kuv, mas kuv yuav dawb dua daus. 10 Thov koj pub kuv hnov suab lom zem thiab suab nqaum paj nqaum nruas, kom cov pob txha uas koj tsoo rov dhia daj dhia luag. 11 Thov koj fee ntsej muag deb ntawm kuv cov txhaum, koj so kuv cov txhaum pov tseg huv tib si. 12 Tswv Ntuj, thov koj tsim ib lub siab huv rau kuv ; koj tso dua ib lub tswv yim khov rau hauv kuv. 13 Koj txhob ntiab kuv mus deb ntawm koj lub ntsej muag, txhob thau koj lub tswv yim ntshiab ntawm kuv.
14 Koj ua kom kuv rov zoo siab, vim koj cawm kuv, koj txheem kuv lub tswv yim kom dav. 15 Kuv yuav qhia koj txoj kev rau cov ntxeev siab, cov neeg txhaum yuav rov los cuag koj. 16 Kuv tus Tswv Ntuj, tus Tswv Ntuj Cawm neeg, thov koj npo kuv dim ntawm ntshav ; kuv tus nplaig yuav cav txog koj txoj kev ncaj ! 17 HUAB TAIS, koj qhib kuv di ncauj, kuv lub ncauj yuav cav lus zoo txog koj. 18 Koj tsis nyiam tej thaj txi Ntuj. Cov tsiaj neeg hlawv, koj tsis xav yuav. 19 Thaj txi Ntuj uas Tswv Ntuj xav yuav, yog lub tswv yim ntuag ; Tswv Ntuj, koj tsis thuam lub siab ntuag, lub siab lwj. 20 Koj ua siab zoo rau Xis Yoos, koj rov txhim Yes Lus Xas Les cov phab ntsa xov tsheej. 21 Ces koj yuav nyiam cov txim txi Ntuj haum txoj cai nyiam cov tsiaj hlawv, cov tsiaj kheej ; sawv daws yuav cev ib co heev nyuj rau saum koj lub thaj.

1 Tus coj nkauj. Das Vis zaj qhuab qhia. 2 Yog thaum tus Es Dos Mis Doeg mus qhia Xas Us tias : ” Das Vis nkag dua hauv Ahimelek lub tsev lawm.” 3 Neeg khav nruab chaw do, vim li cas koj qhuas tias koj tau ua phem ? Tswv Ntuj niaj hnub hlub neeg ! 4 Koj tus nplaig zoo li rab chais ntse, npaj ua tej yam phem ; nws txawj dag tas nrho. 5 Koj nyiam qhov phem dua qhov zoo, koj nyiam qhov dag tshaj qhov tseeb. 6 Nplaig nkhaus ! Koj nyiam cov lus chob neeg. 7 Tswv Ntuj yuav muab koj rhuav puas tsuaj mus li, Nws yuav rub koj, chua koj tawm hauv tsev tsam phooj, nws yuav ntiab koj tawm hauv cov neeg ciaj lub teb chaws mus. 8 Cov neeg ncaj pom, lawv ntshai ; lawv yuav luag nws. 9 Nej ntsia tus neeg khav nruab chaw do ntawd, nws tsis cia Tswv Ntuj ua nws lub yeej ntsa zeb, nws tso siab rau nws peev nyiaj txiag,
nws saib tias nws muaj zog vim nws txawj ua txhaum loj. 10 Hos kuv zoo li tsob txiv ntoo roj ntsuab ntsuab nyob hauv Tswv Ntuj tsev, kuv tso siab mus li rau Tswv Ntuj lub siab hlub neeg. 11 Kuv yuav ua koj tsaug mus li, vim koj lis qav lis num ; kuv tso siab rau koj lub npe, nyob ntawm cov neeg ntseeg txog koj xub ntiag. vim koj lub npe zoo.

1 Ua rau tus coj nkauj, al-mahalath. Das Vis zaj nkauj qhuab qhia. 2 Cov neeg vwm xav hauv nruab siab tias : ” Tsis muaj Tswv Ntuj !” Lawv lub siab xib rau kev qias, lawv siab ntxeev mus nyiam yam tsiv saib, tsis muaj tus ua qhov zoo. 3 Nyob saum ntuj, Tswv Ntuj khoov los xauj neeg, saib puas muaj ib tug neeg ntse nrhiav Tswv Ntuj. 4 Txhua leej txhua tus yuam kev, sawv daws sib koom siab nyob hauv kev txhaum; tsis muaj tus ua zoo, tsis muaj ib tug kiag li. 5 Cov neeg ua phem ntawd, puas yog vim lawv tsis paub tab? Lawv noj kuv haiv neeg xws li noj mov, lawv tsis hu txog Tswv Ntuj ! 6 Nyob ntawd, lawv cia li tshee , tsis muaj dab tsi txaus tshee. Vim Tswv Ntuj muab cov tuaj vij koj, lawv cov pob txha pov tseg rau txhua qhov. Koj thuam lawv, vim Tswv Ntuj ntiab lawv rov qab. 7 Leeg twg nyob saum Xis Yoos pub kev yeej rau His Xas Lais? Thaum Tswv Ntuj coj nws haiv neeg raug txim pej kum teb rov qab los, Yas Kos hom khaj, His Xas Lais zoo siab.

1 Ua rau tus coj nkauj, nkauj nrog ncas hlua.
Das Vis zaj nkauj qhuab qhia. 2 Thaum cov Zes Fis tuaj qhia Xas Ws tias:” Das Vis tsis nkaum hauv peb lod ?” 3 Tswv Ntuj, thov kom koj lub npe cawm kuv; muab koj lub hwj huam los ua ncaj rau kuv. 4 Tswv Ntuj, thov koj mloog kuv zaj thov, tig ntsej mloog cov lus tawm ntawm kuv lub ncauj ! 5 Vim cov neeg pej kum ntaus kuv cov quab yuam kuv xav txo kuv txoj sia. Lawv tsis saib tias muaj Tswv Ntuj li. 6 Nej ntsia saib, Tswv Ntuj tuaj pab kuv, HUAB TAIS nrog cov neeg txheem kuv tuaj ib tog. 7 Xav kom nws pauj kev phem rau cov neeg tshuaj kuv ! Vim koj hlub kuv, koj tua lawv tu noob. 8 Kuv zoo siab cev ib co txim los txi koj, HUAB TAIS, kuv cav lus zoo txog koj lub npe vim yog lub npe zoo. 9 Koj lub npe cawm kuv dim ntawm kev cov nyom, kuv thiaj sawv siab ntsia kuv cov yeeb ncuab.

1 Ua rau tus coj nkauj, nkauj nrog ncas tis hlua. Das Vis zaj nkauj qhuab qhia. 2 Tswv Ntuj, thov tig pob ntseg los mloog kuv zaj teev Ntuj ; thaum kuv thov koj, koj txhob khiav twj ywm mus. 3 Thov koj mloog kuv thiab teb kuv yuad. Kuv lub siab nphau npog, kuv seev tsis paub meej tias kuv hais dab tsi: 4 vim tus yeeb ncuab nthe kuv, thiab tus tsis hwm Ntuj cov lus laum kuv siab, lawv nchuav nthwv cov hauj lwm phem rau kuv, lawv npau taws, lawv ntaus kuv. 5 Kuv lub siab mob ntswj pes yos ntawm hauv siab ; kev ntshai tuag los zawm nkaus kuv. 6 Kuv ntshai, kuv tshee ti txha nkaus. Tas kuv ib ce xob. 7 Kuv thiaj hais tias : “Ab, kheev kuv muaj tis ya li nquab ! Kuv yuav ya plho mus nkaum.” 8 Kuv yuav khiav mus deb mus pw hauv teb chaws suab puam. 9 Kuv yuav mus tsuag tsuag kom txog chaw nkaum, kom txhob raug nag xob nag cua. 10 HUAB TAIS, koj ua kom lawv txhob hais sib haum, kom lawv cov lus ua lawv sib ncaim. Vim kuv pom kev sib ntaus sib tua, tsis sib haum nyob hauv tsheej. 11 Nruab hnub hmo ntuj, kev sib ceg sib ncaim nyas ncig tej ntsa zeb tsheej: Nyob nruab tsheej tsuas muaj kev sib tua thiab kev txom nyem. 12 Nyob nruab tsheej, muaj kev piam sij: Nyob ntawm tej tshav puam, neeg sib ntaus sib tua, sawv daws ua neeg dag. 13 Yog tus yeeb ncuab tsawm kuv, mas kuv nyiaj taus. Yog tus ntxub kuv sawv tiv kuv, thiab yeej kuv, mas kuv yuav khiav mus tsiv nraim. 14 Tab sis, tus tsawm kuv, tus sawv tiv kuv, yog koj, yog tus nrog kuv sib txig, kuv tus swm neeg, tus nyob hauv kuv nruab siab. 15 Yav thaud, wb sib tham ntau yam zais tuaj nruab siab, wb ua ib ntxaig mus hauv Tswv Ntuj tsev. 16 Thov kom kev tuag poob los saum lawv ! Kom lawv nqes ciaj rau ntuj txias teb tsaus, vim txoj kev phem nyob hauv lawv vaj tsev, nyob hauv lawv nruab siab. 17 Ntawm kuv, kuv hu txog Tswv Ntuj, HUAB TAIS yuav cawm kuv. 18 Tsaus ntuj, sawv ntxov, tav su, kuv seev yees, kuv yws tuj taws, nws hnov kuv lub suab. 19 Thaum luag ua rog rau kuv, muaj neeg coob tuaj ntaus kuv. Nws npo kuv dim, nws thaiv kuv lub cev tsis raug mob. 20 Tswv Ntuj ua vaj txij thaum lub hauv paus los ! Nws yuav hnov, nws yuav ua kom lawv poob ntsej muag. Lawv yuav tsis hloov siab, vim lawv tsis ntshai Tswv Ntuj. 21 Tus neeg ntawd, tsa tes ntaus nws cov phooj ywg, nws hla lo lus nws tau cog. 22 Lo lus mos lus muag ntws hauv nws lub ncauj los, tab sis nws lub siab ntaus rog, nws cov lus mos dua roj, tab sis chob neeg li riam ntse hau. 23 Cev koj lub nra rau HUAB TAIS ris, nws yuav ntxiv zog rau koj, nws tsis cia tus neeg ncaj vau ib zaug li. 24 Hos koj, Tswv Ntuj, koj yuav thawb kom lawv poob hauv lub qhov ntxa uas qhib lug tos, Cov tua neeg thiab cov neeg dag, yuav tsis ciaj mus dhau nta zag neej. Hos kuv, kuv tso siab rau koj.

1 Ua rau tus coj nkauj. Al yonath elem rehoqim. Das Vis zaj, miktam. Thaum cov Fis Lis Tis ntes Das Vis nyob Nkav. 2 Tswv Ntuj, thov koj hlub kuv ! Vim muaj neeg tuaj thab kuv : lawv niaj hnub tuaj tua kuv, lawv yuam kuv. 3 Ib co neeg tshuaj xwm niaj hnub tuaj thab plaub, Muaj neeg coob tuaj ntaus kuv. 4 Hnub kuv ntshai, kuv tso siab rau koj. 5 Kuv tso siab rau Tswv Ntuj, rau tus uas kuv cav txog nws lo lus. Kuv tso siab rau Tswv Ntuj, kuv tsis ntshai : Tus muaj lub cev nqaij yuav ua tau dab tsi rau kuv ? 6 Lawv niaj hnub ua kuv nyob txom nyem ntsuav, lawv tsuas xav txog qhov yuav ua phem rau kuv. 7 Lawv qw zom zaws tuaj, lawv nyas, lawv soj kuv hneev taw yuav rhuav kuv txoj sia. 8 Tswv Ntuj, tso koj lub siab npau taws los ntov cov neeg ntawd pov tseg ! Vim lawv ua phem li ntawd, koj ntiab lawv. 9 Koj suav kuv tej ruam kev loj leeb ; koj cug kuv cov kua muag rau hauv koj lub hnab rau dej. 10 Hnub kuv tsa suab hu, kuv cov yeeb ncuab yuav thim rov qab, kuv paub tias Tswv Ntuj tuaj kuv tog. 11 Kuv tso siab rau Tswv Ntuj, rau tus uas kuv cav txog nws lo lus. -kuv tso siab rau HUAB TAIS, rau tus uas kuv cav txog nws lo lus. 12 Kuv tso siab rau Tswv Ntuj, kuv tsis ntshai ; leej tib neeg yuav muaj peev xwm ua dab tsi rau kuv tau ? 13 Tswv Ntuj, kuv nco ntsoov cov yeem kuv tau fiv, kuv ua cov thaj cav lus zoo rau koj. 14 Vim koj cawm kuv dim ntawm qhov tuag. Koj tau txuag kuv ko taw kom txhob ntog, kom kuv tau taug kev nyob ntawm koj xub ntiag, mus hauv tsoom neeg ciaj txoj kev kaj.

1 Ua rau tus coj nkauj. “Txhob rhuav”. Das Vis zaj, miktam Thaum Das Vis khiav Xas Us, nws tsiv nraim nyob hauv lub qhov tsua. 2 Tswv Ntuj, thov koj hlub ! Thov koj hlub kuv mas ! vim kuv tuaj nkaum hauv koj ; kuv khiav los nkaum hauv koj qab tis ntxoov ntxoo, kuv yuav nyob hauv txog thaum xwv txheej dhau mus. 3 Kuv hu txog tus Tswv Ntuj Nyob Siab Tshaj, hu txog tus Tswv Ntuj uas yuav ua txhij ua txhua rau kuv. 4 Thov kom nws xa kev cawm nqes saum ntuj los ! Tus tuaj thab kuv, nws thuam Ntuj, thov Tswv Ntuj xa nws kev hlub thiab kev tseem ceeb tuaj ! 5 Kuv muaj cuab kav pw ntawm ib pab tsov dhuas nqaij. hom neeg ntawd cov kaus hniav, yog hmuv thiab xub, lawv tus nplaig, yog ib rab ntaj ntse hau. 6 Tswv Ntuj, koj sawv ntsug siab siab rau saum ntuj mas ; cia koj lub hwj chim khav tas lub ntiaj teb ! 7 Lawv cuab ib lub vas tos kuv kev ; lawv kom kuv khoov taub hau. Lawv khawb ib lub qhov cuab ntxiab tom kuv hauv ntej : lawv rov poob hauv lub qhov ntawd. 8 Kuv lub siab rov tus yees, kuv tus Tswv Ntuj, kuv lub siab rov tus yees, kuv yuav hu ib zag nkauj : 9 kuv lub hwj chim, koj tsim dheev los mas ; nkauj nog ncas thiab thaj cheej, nej tsim dheev hauv dab ntub los, kuv yuav tsa lub hnub kom tawm tuaj. 10 HUAB TAIS, kuv yuav ua koj tsaug hauv nruab nrab tsoom haiv neeg ; kuv yuav hu nkauj rau koj nyob hauv nruab nrab tsoom kuj cuab. 11 Vim koj lub siab hlub sawv siab txij ntuj koj txoj kev tseem ceeb sawv siab txij txheej huab saud. 12 Tswv Ntuj, koj sawv ntsug siab siab rau saum ntuj mas ; cia koj lub hwj chim khav tas lub ntiaj teb !

1 Ua rau tus coj nkauj.al-tasheheth. ” Txhob rhuav”. Das Vis zaj, miktam. 2 Qaum ntuj cov tub, thaum nej hais plaub, nej tsis siv kev ncaj los hais. Puas muaj tseeb? Leej tib neeg tsoom tub, nej puas txiav txim ncaj? 3 Nej ua tsis ncaj li ! Nej txhob txwm ua tej yam txhaum loj : nej txhais tes ua kom kev sib ntaus sib tua ri mus puv ntiaj teb. 4 Cov neeg phem xib rau qhov tsis zoo, txij nruab thiab los, cov neeg dag, pib dag txij hnub yug poob nthav los. 5 Lawv muaj ib co taug lom neeg cuag li nab cov taug. Lawv zoo li nab raj, uas nws pos pob ntseg, 6 kom txhob hnov lub suab raj ntxias nws, thiab txhob hnov tus kws txawj lub raj ua khawv koob mooj nws. 7 Tswv Ntuj ! Koj tsoo cov kaus hniav hauv lawv lub ncauj mas ; HUAB TAIS, koj lov cov tsov ntxhuav ntawd cov kaus saib. 8 Kom lawv yaj ntshis xws li dej ntws mus ! Kom lawv ntsws zoo li nrog tsuag raug neeg tsuj. 9 Kom lawv zoo li tus qwj yeeg uas yaj ua npuas ! Kom lawv zoo li tus me nyuam tuag nruab thiab, uas nws tsis pom lub hnub ! 10 Thaum nej cov lauj kaub tseem tsis tau hnov cov pos cig ua nplaim taws kub, nws lub siab npau ceev yuav cheb lawv. 11 Tus siab ncaj pom Ntuj nplua li ntawd, nws zoo siab : nws yuav ntxuav taw hauv tus neeg phem cov ntshav. 12 Ces sawv daws yuav hais tias : ” tus siab ncaj txi lub txiv zoo : muaj ib tug Tswv Ntuj txiav txim nyob ntiaj teb no tiag.”

1 Ua rau tus coj nkauj, al-tasheheth. ” Txhob rhuav”. Das Vis zaj, miktam. Yog thaum Xas Ws xa neeg mus zov Das Vis lub tsev, yuav muab Das Vis tua. 2 Tswv Ntuj, thov koj npo kuv dim ntawm cov yeeb ncuab ; thov koj txuag kuv ntawm cov tuaj tua kuv. 3 Thov npo kuv ntawm cov neeg ua phem rau kuv, cawm kuv ntawm cov neeg siab nyoos. 4 Ntsia saib, lawv tuaj nyas tua kuv, cov neeg muaj hwj huam tuaj ntaus kuv, HUAB TAIS, kuv tsis tau ua ib qho yuam kev, los ib qho txhaum li. 5 Kuv tsis txhaum dab tsi, tsis kav lawv cia li mus nrhiav chaw nraim tos. Koj tsim dheev nruab dab ntub los mas ! Koj tuaj xyuas kuv, koj yuav pom ! 6 HUAB TAIS Tswv Ntuj, tus muaj hwj huam tas nrho, His Xas Lais tus Tswv Ntuj, Koj sawv tsees los muab txim rau tsoom kuj cuab no ; koj txhob hlub cov ntxeev siab ua phem. 7 Hmo ntuj, lawv rov los txog, nqov ntuj zoo li ib pab dev ; lawv mus yos thoob nroog. 8 Ntsia saib, lawv qhov ncauj ua npuas tas, ntaj riam nyob saum lawv di ncauj : ” Leej twg yuav hnov ?” 9 Hos koj, HUAB TAIS, koj luag lawv, koj thuam tsoom kuj cuab ntawd. 10 Tswv Ntuj, koj yog kuv lub zog, yog kuv lub yeej ntsa zeb, kuv ntsia ntsoov koj. 11 Tus Tswv Ntuj hlub neeg, tuaj tos kuv ; Tswv Ntuj tsa kom kuv sawv siab ntsia cov neeg nyas kuv. 12 Koj tsis txhob muab lawv tua, tsam kuv haiv neeg ho hnov qab txog. Siv koj lub zog los diaj lawv, thiab txo kom lawv poob hwj chim, HUAB TAIS, koj yog peb daim leem phiaj ! 13 Lawv pib hais lus thaum twg, qhov txhaum tawm hauv lawv lub ncauj thaum ntawd ; thov kom lawv rov mag lawv txoj kev muab hlob, vim lawv foom phem rau luag, lawv dag. . 14 Koj tso koj lub siab npau ceev rhuav lawv, koj rhuav kom txhob tshuav dab tsi li, kom txog tim npoo ntiaj teb kawg, sawv daws paub tias Tswv Ntuj yog Yas Kos tus vaj. 15 Hmo ntuj, lawv rov los txog, nqov ntuj zoo li ib pab dev ; lawv mus yos thoob nroog. 16 Lawv yos nrhiav noj ; yog lawv tsis tsau plab, lawv nyooj ib hmos kaj ntug. 17 Ntawm kuv, kuv hu nkauj cav koj lub zog, sawv ntxov tsees, kuv qw cav koj lub siab hlub neeg, vim koj yog kuv lub yeej ntsa zeb. Hnub kuv txom nyem, koj yog qhov chaw nkaum. 18 Kuv yuav hu nkauj rau koj, koj yog kuv lub zog. kuv lub yeej ntsa zeb, yog Tswv Ntuj, yog tus Tswv Ntuj hlub kuv !

1 Ua rau tus coj npoj hu nkauj. Raws li “Ib lub Paj Ntoos ua tim khawv cog lus.” Das Vis ib zaj.. Nkauj qhuab qhia. 2 Thaum Das Vis ua rog tiv cov As Las Mias tuaj Mes Xos Pos Tas Mias teb thiab tuaj Xos Vas teb tuaj. Ces Yuas rov los, nws ntaus rog rau Es Doos, nyob hauv lub Hav Ntsev, muaj kaum ob txhiab leej neeg. 3 Tswv Ntuj, koj ntiab peb,ua peb tawg tas, koj tau npau taws : zaum no, koj rov los cuag peb mas ! 4 Koj ua lub ntiaj teb qeeg, koj ua av tawg tej kab pleb : thov koj kho cov kab pleb ntawd, vim av xaub lug. 5 Koj cia koj haiv neeg raug tej yam nyuaj. koj muab ib co cawv ntsim rau peb haus. 6 Koj qhia cov neeg hwm koj kom paub lub sij hawm yuav tsum khiav ntawm tus tub tua hneev. 7 Thov koj muab koj sab xis los cawm peb, thov koj teb peb, cov neeg koj nyiam thiaj yuav dim. 8 Tswv Ntuj hais lus nyob hauv lub tsev ntshiab : ” kuv hom khaj ; kuv muab Xis Kes faib, ” kuv ntsuas lub Hav Xus Kos. 9 ” Nkas Las As yog kuv li ; Mas Nas Xes kuj yog kuv li ; ” Es Fais yog kuv lub kaus mom ; ” Yus Das yog kuv tus cwj ua vaj ; 10 ” Muas, yog kuv lub tais da dej, ” Nyob saum Es Doos, kuv pov kuv txhais khau ; ” Nyob Fis Lis Tis, kuv qw tias kuv yeej ! 11 Leej twg yuav coj kuv mus txog lub tsheej xov ntsa zeb? Leej twg yuav coj kuv mus txog Es Doos ? 12 Tus yuav coj kuv kawg yog koj, tus Tswv Ntuj uas ntiab peb, tus Tswv Ntuj uas tsis kam nrog peb cov tub rog tawm mus ntaus tsam ntxiv . 13 Thov koj tuaj pab ntaus cov tiv peb, vim neeg rov pab neeg tsis tau. 14 Tswv Ntuj nrog peb, peb yuav ua tau tej yam loj : nws yuav tsuj cov quab yuam peb.

1 Ua rau tus coj nkauj. Siv Das Vis rab nkauj nog ncas tis hlua. 2 Tswv Ntuj, koj mloog kuv lub suab qw, koj ua tib zoo txais kuv lo lus thov. 3 Kuv nyob puag tim qab ntug, thaum kuv qaug zog, kuv hu koj. Lub tsua siab dhau, kuv nce tsis tau, koj coj kuv mus saud. 4 Vim koj yog kuv qhov chaw nkaum, koj yog lub yeej thaiv yeeb ncuab. 5 Kuv xav kom koj txais kuv los nyob hauv koj lub tsev tsam phooj mus ib txhiab ib txhis, kuv xav mus nkaum hauv, xav nraim hauv koj phab tis. 6 Tswv Ntuj, koj tau pub rau kuv raws li kuv ntshaw, koj pub lub cuab tam rau cov neeg hwm koj lub npe. 7 Thov koj ntxiv hnub nyug ntev rau tus vaj, kom nws lub hnub nyoog ntev li ntau tiam. 8 Kom nws tau zaum theej kiab ntawm Tswv Ntuj xub ntiag ! Koj txhib kom kev hlub thiab kev tseem ceeb txuag nws. 9 Kuv yuav hu nkauj qhuas koj lub npe tsis tseg, kuv yuav niaj hnub pauj yeem.

1 Tus tsim yog tus coj nkauj. Das Vis zaj nkauj paj nruag. 2 Kuv tus plig nyob tiaj tus ntawm Tswv Ntuj xub ntiag; txoj kev cawm kuv tuaj ntawm nws tuaj. 3 Nws yog kuv lub tsua, yog tus cawm kuv, yog kuv lub yeej ntsa zeb, kuv yuav tsis vau. 4 Nej sawv daws yuav ua ke dhia mus ntaus ib tug ntev li cas ntxiv ? Nej puas yuav thawb nws xws li thawb ib lub phab ntsa qaij, los xws li ib lub laj kab ua zog ? 5 Lawv tsuas xav ua kom nws poob hwj chim. Lawv nyiam txoj kev dag : nyob saum ncauj lawv foom lus zoo rau luag, hauv nruab siab, lawv foom lus phem. 6 Kuv tus plig, koj nyob tiaj tua ze Tswv Ntuj, nws yog kuv lub chaw tso siab. 7 Nws yog kuv lub tsua, yog tus cawm kuv, yog kuv lub yeej ntsa zeb : kuv tsis vau. 8 Txoj kev cawm kuv thiab kuv lub koob meej nyob ze Tswv Ntuj ; Kuv lub tsua khov, kuv lub chaw nkaum nyob hauv Tswv Ntuj. 9 Nej uas yog nws haiv neeg, nej tso siab rau nws txhua lub sij hawm mog ! Nej qhib nej lub siab rau nws mog ; Tswv Ntuj yog peb qhov chaw nkaum. 10 Tsoom pej xeem yog zoo li tshuab ib pas; tsoom muaj koob nto npe yog koob meej dag. Thaum yus luj lawv saum rab teev, lawv hnyav tsis cuag ib pas cua. 11 Nej txhob vam txog kev sib ntaus sib tua : nej txhob txog siav mus ua tub sab. Yog nej muaj nyiaj zuj zus, txhob cia nej lub siab dai dhuam rau nyiaj txiag. 12 Tswv Ntuj hais ib yam, kuv tau hnov ob yam : yam ib : lub zog yog Tswv Ntuj li, 13 kev hlub yog koj tug, HUAB TAIS ! Yam ob : koj them rau nyias raws li nyias cov hauj lwm.

1 Das Vis zaj nkauj paj nruag. Thaum nws nyob hauv teb chaws suab puam Yus Das. 2 Tswv Ntuj, koj yog kuv tus Tswv Ntuj ! kuv nrhiav koj ; kuv tus plig nqhis koj ; kuv lub cev seev txog koj zoo puav tam li av qhuav qhawv, nkig nkuav, tsis tau dej. 3 Kuv mus ntsia koj hauv lub tuam tsev, kuv pom koj lub zog, thiab koj lub hwj chim. 4 Koj kev hlub muaj nqis dua txoj sia, kuv di ncauj yuav cav lus zoo txog koj. 5 Kuv yuav cav txog koj tas kuv sim neej, kuv yuav tsa tes hawm koj lub npe. 6 Kuv txaus siab li tus tau noj nqaij thiab noj roj, kuv di ncauj zoo siab, kuv lub ncauj qhuas txog koj. 7 Nyob saum txaj, kuv nco txog koj, kuv teev koj txog tej tag hmo. 8 Vim koj tau pab kuv. Kuv qw zoo siab hauv koj phab tis qhov ntxoov. 9 Kuv siab ntsws dai dhuam rau koj, koj txhais xis hwj kuv. 10 Cov uas nrhiav kev txo kuv txoj sia, mas lawv yuav nqes lawm puag hauv plawv av ! 11 Kom hniav ntaj txiav lawv ! Kom lawv ua hma zaub ! 12 Ces tus vaj yuav zoo siab hauv Tswv Ntuj ; leej twg tuav txog nws lub npe los cog lus, tus ntawd yuav txais koob meej ; hos cov neeg dag lub ncauj yuav kaw nti cia.

1 Ua rau tus hu nkauj. Das Vis zaj nkauj paj nruag. 2 Tswv Ntuj ! Koj mloog kuv tej lus yws ; thov koj txuag kuv txoj sia ntawm tus yeeb ncuab tsiv tsaim; 3 Thov koj zais kuv deb ntawm cov neeg tsiv tsaim rooj ntxiab, deb ntawm npoj neeg koom nrhiav ua phem. 4 Lawv hov lawv tus nplaig ntse li ntaj, lawv rub lawv cov xub kom ncaj, lawv hais lus muaj taug. 5 Lawv nyas tua hneev rau tus neeg ncaj ncees : ib sij huam lawv tua kiag hneev rau nws, lawv tsis ntshai leej twg li. 6 Lawv sib pab ua phem. Lawv xam saib yuav zais lawv rooj ntxiab li cas ; lawv hais tias : ” leej twg yuav pom peb tej ntxiab ?” 7 Lawv tuav xam zoo zoo txog tej kev txhaum loj : ” Peb tau npaj peb qhov hauj lwm ntawd zoo tas nrho lawm : ” tsis muaj leej twg nkag tau rau puag ” hauv neeg lub siab lub plawv !” 8 Tab sis Tswv Ntuj tua hneev tuaj rau lawv : ib sij huam, xib xub poob los : twb yog lawv cov ntxiab ntag ! 9 Lawv tus nplaig rov tig los tua lawv. Txhua leej pom li ntawd, txhua leej ncaws taub hau ; 10 Txhua tus neeg ntshai ruj rwg, txhua tus tshaj qhov uas Tswv Ntuj tau ua, sawv daws nco ntsoov qhov ntawd cia ua ib zag qhuab qhia. 11 Xav kom tus neeg ncaj zoo siab rau HUAB TAIS, kom nws muab HUAB TAIS los ua chaw nkaum. Ces tas cov siab ncaj yuav cav txog nws.

1 Ua rau tus coj nkauj, nkauj paj nruag. Das Vis zaj lus paj huam seev. 2 Tswv Ntuj, koj yog tus nyob saum Xis Yoos, lo lus cav zoo phim koj. Leej tib neeg tuaj pauj yeem rau koj. 3 Koj yog tus mloog peb lo lus thov, txhua leej txhua tus uas muaj lub cev nqaij yuav tuaj cuag koj. 4 Kev txhaum muaj zog dua peb, tab sis koj zam txhaum rau peb. 5 Tus koj xaiv, tus uas koj coj los nyob hauv koj lub loog , mas nws txoj hmoov zoo. Peb yuav tau noj txhiam laj txhiam xws txaus siab hauv koj tsev, peb yuav noj koj lub tuam tsev cov txhiam xws ntshiab. 6 Koj siab ncaj, koj muab tej yam muaj hwj xyeej los teb rau peb. Tswv Ntuj, koj yog tus cawm peb, koj ua kom tas lub ntiaj teb nyob nyab xeeb mus txog ntug dej ntuj. 7 Koj lub zog ua kom cov roob khov ; koj muab lub hwj huam los sia ntawm duav. 8 Koj ua kom dej ntuj lub suab nroo ntws rov tus, koj ua kom dej nphau lub suab rov tus. koj ua kom tsoom haiv neeg lub suab nyooj rov tus. 9 Nyob tim npoo ntiaj teb, sawv daws ntshai tej lub cim uas koj ua, koj ua kom cov teb chaws nyob hnub tuaj txog hnub poob zoo siab qw lom zem. 10 Koj tuaj xyuas lub ntiaj teb, koj ywg dej rau; koj ua kom lub ntiaj teb nplua nuj. Tswv Ntuj tus dej rov muaj dej ntws puv nkaus kwj, koj npaj mov nplej mos rau neeg. Koj npaj qoob loo zoo li no : 11 Koj ua kom muaj dej puv hauv kwj liag, koj ua kom tej av tiaj, koj tso nag los ywg kom av phom. koj foom hmoov zoo rau cov noob kom ua kaus. 12 Koj pub txiaj ntsha txiaj ntsim phwj yaws thawm xyoo, roj ntws sis laub sis lug hauv koj txoj lw. 13 Dej txhawv ntawm tej tshav zaub hauv teb chaws suab puam los, cov taw roob hlav mos nyoos nyob hauv kev lom zem. 14 Tsiaj txhu noj zaub puv tshav, nplej siav hauv cov nras tiaj : txhua yam qw, txhua tsav hu nkauj.

1 Ua rau tus coj nkauj ;Paj huam seev, nkauj paj nruag. 2 Tas ntiaj teb, nej qw cav txog Tswv Ntuj ; Nej hu nkauj cav txog nws lub npe nto koob meej, nej hais tej zaj lus cav txog nws. 3 Nej hais rau Tswv Ntuj tias : ” Koj tej num muaj hwj xyeej ua luaj ! ” Koj cov yeeb ncuab pom koj lub hwj huam loj tas nrho, ” lawv ua txuj ntxias koj. 4 ” Tas lub ntiaj teb txhos caug pe ntawm koj xub ntiaj, ” nws hu nkauj rau koj, ” nws hu nkauj qhuas koj lub npe.” 5 Nej tuaj, nej yuav pom Tswv Ntuj cov hauj lwm, nws cov hwj huam txawj ntse ua neeg yoog : 6 Nws ua kom dej ntuj hloov ua av khov, peb hla dej, dej tsis ntub peb taw ; nyob ntawd, peb nqaum paj nqaum nruas cav txog nws. 7 Nws lub hwj huam yuav tswj txheej dhau txheej. Nws qhov muag nyas ntshis tsoom kuj cuab. Kom cov ntxeev siab txhob rov sawv. 8 Tsoom haiv neeg, nej cav lus zoo txog peb tus Tswv Ntuj mas ! Nej ua kom lub suab cav nws ncha mus deb. 9 Tus pub txoj sia rau peb, nws tsis kheev peb ko taw vau. 10 Tswv Ntuj, koj sim peb, koj lim peb xws li luag lim nyiaj. 11 Koj coj peb mus nkag hauv ib rooj ntxiab, koj muab rab ciaj los cuam peb duav ; 12 Koj cia luag caij nees saum peb taub hau. Peb nkag hauv hluav taws thiab hauv dej, tab sis koj coj peb tawm mus rau qhov chaw uas peb tau noj seem noj sos. 13 Kuv coj tsiaj los hlawv txi koj hauv koj tsev ; kuv pauj yeem rau koj. 14 Vim kuv tau qhib ncauj fiv koj thaum kuv txhawj, kuv tau tsa ncauj fiv koj. 15 Kuv cev cov tsiaj rog rog los hlawv rau koj, pa nqaij tshis yuav nce tuaj txog koj ; kuv npaj cov heev nyuj thiab cov laug tshis los txi. 16 Tas nej tsoom uas hwm Tswv Ntuj, nej tuaj mas, nej yuav hnov kuv piav qhov uas nws ua rau kuv. 17 Thaum kuv lub ncauj hu txog nws, zaj cav lus zoo txhib kuv tus nplaig. 18 Yog kuv xav qhov phem tuaj nruab siab, HUAB TAIS yuav tsis mloog kuv. 19 Tab sis Tswv Ntuj mloog kuv, nws ua tib zoo txais kuv zaj thov. 20 Tswv Ntuj nto meej nto moo, nws tsis xyeeb kuv zaj thov, nws tsis tshem nws lub siab hlub mus deb kuv.

1 Ua rau tus coj nkauj, xuas cov nkauj nog ncas tis hlua. nkauj paj nruag. Ib zag paj huam seev. 2 Thov kom Tswv Ntuj hlub peb thiab foom hmoov zoo rau peb ! Thov nws ua nws lub ntsej muag ci tuaj rau saum peb. 3 Lub ntiaj teb, thiaj paub koj txoj kev, cov kuj cuab yuav paub koj txoj kev cawm neeg. 4 Kom tsoom haiv neeg ua koj tsaug, Tswv Ntuj ! Kom tas txhia haiv neeg ua koj tsaug ! 5 Xav kom cov kuj cuab hom khaj thiab qw zoo siab, vim koj txiav txim rau cov haiv neeg raws kev ncaj, koj fwj cov kuj cuab nyob ntiaj teb. 6 Xav kom cov haiv neeg ua koj tsaug, Tswv Ntuj ! Xav kom cov haiv neeg ua ke ua koj tsaug ! 7 Lub ntiaj teb pub qoob loo : Tswv Ntuj, peb tus Tswv Ntuj foom hmoov zoo rau peb. 8 Thov kom Tswv Ntuj foom hmoov zoo rau peb, kom tas npoo ntuj npoo ntiaj teb hwm Tswv Ntuj.

1 Ua rau tus coj nkauj, Das Vis zaj ; nkauj paj nruag. Ib zag paj huam seev. 2 Tswv Ntuj sawv tsees, nws cov yeeb ncuab tawg sib ncaim tas, cov ntxub Tswv Ntuj khiav mus deb ntawm nws lub ntsej muag. 3 Koj ua kom lawv yaj zoo li pa taws : cov neeg teev dab teev mlom tuag ntawm Tswv Ntuj xub ntiag, zoo li ciab ntab yaj saum hluav taws. 4 Hos cov siab ncaj zoo siab, lawv hom khaj nyob ntawm Tswv Ntuj xub ntiag, lawv zoo siab tas nrho : 5 Nej hu nkauj rau Tswv Ntuj, nej hu nkauj cav txog nws lub npe ; Nej hu nkauj cav txog tus caij tsheb rog mus saum huab, Nws lub npe hu ua : HUAB TAIS ; nej hom khaj ntawm nws xub ntiag. 6 Tus Tswv Ntuj nyob hauv lub tsev ntshiab, yog cov ntsuag nos txiv, nws txiav txim ncaj pab cov poj ntsuam. 7 Tswv Ntuj pub ib lub tsev rau tus tsis muaj kwv tij nyob, nws daws cov neeg raug txim kom mus ntsib kev vam meej, tab sis, cov ntxeev siab tau nyob hauv tej chaw kub nkig nkuav. 8 Tswv Ntuj, thaum koj ua koj haiv neeg ntej tawm mus, thaum koj ntaus ntej hauv teb chaws quav poj, 9 lub ntiaj teb qeeg, lub ntuj nchuav dej nag nyob ntawm Tswv Ntuj xub ntiag, nyob ntawm His Xas Lais tus Tswv Ntuj xub ntiag. 10 Tswv Ntuj, koj hliv dej nag hlob los, koj lub cuab tam nkig nkuav lawm, koj rov tsa nws khov kho. 11 Tswv Ntuj, koj cov yaj los nyob hauv lub teb chaws uas koj pub rau lawv, vim koj lub siab zoo hlub tus pluag. 12 HUAB TAIS txib nws cov ntxhais xa xov yeej rog, coob txog vam leej. 13 Tsoom tub rog cov vaj tso tes khiav, tso tes khiav, cov niam tsev sib faib cov toob xib uas cov tub rog txeeb tau. 14 Txawm tias nej nrog nej cov yaj pw, los nquab ob sab tis twb nphoo hmoov nyiaj nws cov plaub twb nphoo hmoov kub. 15 Thaum tus Muaj Hwj Huam ntaus cov vaj tawg tas, los daus saum lub Roob Tsaus. 16 Roob ntshiab, Roob Npas Saas, roob tuaj kub, Roob Npas Saas, 17 cov ncov roob tuaj kub, vim li cas nej khib rau lub roob uas Tswv Ntuj xaiv los ua nws lub tsev ? HUAB TAIS yeej yuav nyob saud mus tiam dhau tiam. 18 Tswv Ntuj tsoom peeb zeej muaj ntau vam leej ntxiv rau ntau pua txhiab leej. HUAB TAIS tawm saum Xis Nais tuaj mus nyob hauv nws lub chaw ntshiab. 19 HUAB TAIS Tswv Ntuj, Koj nce saum ncov roob ; koj ntes neeg mus nyob txim. koj txais paj tshab ntawm neeg, thiab ntawm cov ntxeev siab, kom tau txhim ib lub tsev rau koj nyob. 20 HUAB TAIS nto koob meej txhia niaj txhia hnub ! Tus Tswv Ntuj uas Cawm peb, nws yug peb. 21 Tus Tswv Ntuj no yog tus Tswv Ntuj pub kev yeej, txoj kev tuag cov rooj vag yog HUAB TAIS Tswv Ntuj li. 22 Tswv Ntuj tsuj nws cov yeeb ncuab taub hau, nws tsuj tus ua txhaum loj lub khauj khaum taub hau uas tseem muaj plaub hau npws loo. 23 HUAB TAIS hais tias : “Kuv yuav coj lawv pem Npas Saas rov los, kuv yuav coj lawv puag hauv qab tiv txwv rov los, 24 kom koj ko taw tsuj lawv cov ntshav thiab kom koj cov dev tus nplaig tau yaim yeeb ncuab cov ntshav.” 25 Tswv Ntuj, luag pom koj nquam paj nqaum nruas tuaj, yog kuv tus Tswv Ntuj, kuv tus Vaj nqaum paj nqaum nruas mus hauv lub tuam tsev ntshiab : 26 Cov tub hu nkauj qhib lub hauv ntej, cov tub ntaus paj nruag tuaj tom qab, hauv nruab nrab yog cov ntxhais ntaus nruas npuaj nruas tawv. 27 Nej cav lus zoo txog Tswv Ntuj nyob hauv lub txoos loj, nej cav txog HUAB TAIS, cav txog His Xas Lais lub qhov dej txhawv. 28 Muaj Npes Yas Mis, uas yog tus tub ntxawg, ua tus ntaus thawj. Muaj cov vaj txheeb Yus Das, hnav tsho tsuj ntos xov nyiaj xov kub. Muaj cov vaj txheeb Xas Npws Loos thiab cov vaj txheeb Nes Tas Lis. 29 Tswv Ntuj, thov kom koj lub hwj xyeej nthe nqho mas. Nthuav lub zog uas koj tau siv los pab peb. 30 Thaum cov vaj pom koj lub tuam tsev siab siab saum Yes Lus Xas Les, lawv yuav nqa paj tshab tuaj rau koj. 31 Koj hem niag tsiaj uas nyob tom hav tauj, Hem pab niag heev nyuj uas kav cov haiv neeg. Kom lawv txhos caug ris lawv cov nyiaj choj. Koj ua kom cov haiv neeg uas nyiam sib ntaus sib tua ncaim rau txhua qhov. 32 Cov nom loj yuav tuaj Hais Nkos teb tuaj ; Nws Npis teb yuav cev tes tuaj rau Tswv Ntuj. 33 Ib tsoom ceeb tsheej nyob ntiaj teb, nej hu nkauj rau Tswv Ntuj ; 34 Nws yog tus caij tsheb rog nce siab dua cuaj txheej ntuj uas ib txwm nyob, Nej mloog saib, nws tsa suab hu, yog ib lub suab muaj hwj huam. 35 Nej yuav paub Tswv Ntuj lub hwj huam. Nws lub hwj chim nyob saum His Xas Lais nws lub zog nyob saum huab. 36 Tswv Ntuj, koj muaj hwj xyeej loj nyob hauv koj lub tsev ntshiab. His Xas Lais tus Tswv Ntuj yog tus pub zog thiab pub hwj huam rau nws haiv neeg. Tswv Ntuj nto koob meej.

1 Ua rau tus coj nkauj. Raws lub suab cov ” paj qoov dawb ” Das Vis zaj. 2 Tswv Ntuj, koj cawm kuv mas : dej nyab txog kuv caj dab. 3 Kuv zom rau hauv cov av nyam tsis muaj av khov tiag taw, tsis muaj dab tsi ruaj tuav kuv cia. Kuv tog rau hauv dej tob, dej ceev ntsawj kuv. 4 Kuv qw tas nrho kuv lub zog, kuv sab, kuv lub qa kub lug ; kuv tos Tswv Ntuj, kuv qhov muag nkees tas. 5 Cov neeg ntxub kuv ntau tshaj cov plaub hau saum kuv taub hau, lawv ntxub kuv tsis muaj hauv paus hauv ntsis. Cov neeg uas xav muab kuv tua coob tas nrho , Kuv cov yeeb ncuab liam cuav rau kuv. – yam kuv tsis tau nyiag, kuv puas yuav tsum xa rov qab? 6 Tswv Ntuj koj paub kuv txoj kev vwm. Tej yam kuv tau ua txhaum lawm, kuv zais tsis tau rau koj. 7 HUAB TAIS Tswv Ntuj muaj hwj huam tas nrho, thov koj txhob cia cov neeg tso siab rau koj tau txaj muag vim kuv. His Xas Lais tus Tswv Ntuj, thov koj txhob cia cov nrhiav koj poob ntsej muag vim kuv. 8 Yog vim koj : Kuv thiaj raug luag tsawm, yog vim koj, kuv thiaj tau txaj muag. 9 Kuv cov kwv tij saib kuv yog ib tug qhua, kuv niam cov tub tsis paub kuv yog leej twg. 10 Vim kuv kub siab rau koj lub tsev, lawv tsawm koj, lawv tej lus tsawm poob los saum kuv. 11 Kuv yuam kuv tus plig kom yoo mov, luag tsawm kuv. 12 Kuv muab ntaub hnab tsaj los hnav, lawv muab kuv los ua chaw thuam chaw hais. 13 cov neeg zaum ntawm lawv tej taw rooj muab kuv ua lus tham pem. Cov neeg haus dej haus cawv, qw dog dig txog kuv. 14 HUAB TAIS, kuv zaj teev Ntuj yog zoo li no ; txog zoo sij hawm lawm ; Tswv Ntuj, koj lub siab hlub loj tas nrho, thov koj teb kuv, vim koj yog txoj kev cawm tseem ceeb. 15 Thov koj rub kuv tawm ntawm cov av nyam, kom kuv txhob zom rau hauv. Thov koj rub kuv dim ntawm cov ntxub kuv, thiab dim ntawm dej tob. 16 Kom cov dej ceev txhob ntsawj kuv mus, kom kuv txhob poob rau hauv lub qhov ntuj uas nqos kuv, kom lub qhov dej txhob kaw ncauj nqhos kuv. 17 HUAB TAIS, thov koj teb kuv, vim koj hlub thiab koj siab zoo. Thov koj zam rau kuv, koj tig ntsia kuv. 18 Txhob thaiv koj ntsej muag rau koj tus tub txib ntxiv. Kuv poob rau hauv kev txom nyem ; thov koj teb kuv sai. 19 Thov koj txav los ze kuv, koj txhiv kuv ; kuv muaj ib co yeeb ncuab, thov koj daws kuv dim ntawm lawv. 20 Koj paub tias luag tsawm kuv, rhuav kuv lub koob meej, kuv txaj muag ; cov neeg ntxub kuv nyob ntawm koj xub ntiag. 21 Kuv raug luag tsawm ua kuv tu siab nrho, kuv siab ntsws puas tas : kuv vam ib yam zoo, tab sis tsis muaj dab tsi tshwm sim ; kuv vam tias yuav muaj tus nplij kuv, tab sis kuv nrhiav tsis tau leej twg. 22 Lawv muab tshuaj lom rau kuv noj ; thaum kuv nqhis dej, lawv muab kua qaub rau kuv haus. 23 Xav kom lawv rooj mov hloov ua ib rooj ntxiab rau lawv, xav kom lawv rooj mov tig ua ib roog hmuv cuab tos lawv cov phooj ywg ! 24 Xav kom lawv qhov muag tsaus zuj zus, kom lawv txhob pom kev, koj qhau lawv duav kom lawv khoov tsis so. 25 Tso koj lub siab npau taws los rau saum lawv ; cia koj lub siab kub siab ceev los raug lawv. 26 Kom lawv tej tsev ntaub raug luag rhuav, kom txhob muaj ib tus neeg nyob hauv lawv cov tsev tsam phooj. 27 Vim lawv tsim txom tus uas koj ntaus ; lawv suav saib tus neeg uas koj ntaus mag pes tsawg nplawm. 28 Koj muab txim ntxiv rau lawv lub txim. kom lawv txhob tau kev tuaj vam khom hauv koj txoj kev ncaj ! 29 Kom lawv lub npe ploj hauv phau ntawv txheeb cov neeg ciaj, kom lawv txhob muaj npe hauv cov neeg ncaj phau ntawv. 30 Ntawm kuv, kuv poob ntsej muag thiab tu siab, Tswv Ntuj, koj txoj kev cawm tsa kuv rov sawv. 31 Kuv yuav hu ib zag nkauj cav Tswv Ntuj lub npe, kuv yuav ua nws tsaug kom nws nto npe loj. 32 Qhov ntawd yuav xis HUAB TAIS siab dua ib tug nyuj, los ib tug txiv xob nyuj tuaj kub tuaj rau. 33 Cov me neeg pom li ntawd, lawv zoo siab : “Nej cov uas nrhiav Tswv Ntuj, “thov kom nej ua neej ntev niaj ntau xyoo.” 34 Vim HUAB TAIS pub rau cov pluag raws li lawv thov, thaum nws cov neeg raug luag ntes nyob pej kum teb, nws tsis tso lawv pov tseg. 35 Lub ntuj, lub teb, dej ntuj thiab tsoom tsiaj txhu mus los hauv hiav txwv, nej cav lus zoo rau nws. 36 Vim Tswv Ntuj yuav cawm Xis Yoos, nws yuav rov txhim cov tsheej hauv Yus Das teb. Sawv daws yuav tau cov tsheej los ua lawv tug, lawv yuav nyob hauv cov tsheej ntawd. 37 Tswv Ntuj cov tub txib tej xeeb ntxwv yuav txais cov tsheej ntawd los ua lawv lub cuab tam. Cov nyiam Tswv Ntuj lub npe yuav txhim vaj tse rau hauv.

1 Ua rau tus coj nkauj, Das Vis zaj, lub hnub nyoog nco txiaj ntsim. 2 Tswv Ntuj, thov koj tuaj npo kuv, HUAB TAIS, koj tsuag tsuag tuaj pab kuv ! 3 Xav kom cov neeg uas nrhiav ua kom kuv tuag, tau txaj muag ua plhu liab. Cov nrhiav ua phem rau kuv, kom lawv thaub qab, poob ntsej muag. 4 Xav kom cov uas hais tias : “Haj, haj !” thim rov qab, txaj muag tas nrho. 5 Xav kom cov neeg nrhiav koj, dhia hom khaj nyob hauv koj, xav kom cov neeg nyiam koj txoj kev cawm, hais tsis tseg tias : “Tswv Ntuj loj tas nrho.” 6 Kuv pluag, thiab kuv kob huam ; Tswv Ntuj, thov koj los ntawm kuv sai ! Koj yog tus pab kuv, thiab yog tus npo kuv dim. HUAB TAIS, koj txhob tos ntxiv !

1 HUAB TAIS, koj yog kuv qhov chaw nkaum; thov kom kuv tsis txhob poob ntsej muag ib zaug ntxiv ! 2 Koj yuav cawm kuv, daws kuv kom dim vim koj siab ncaj, koj tig ntsej rau kuv, koj cawm kuv mas. 3 Thov koj ua lub tsua rau kuv tuaj nkaum, koj yog lub tsua khov uas cawm kuv : vim kuv lub Tsua thiab kuv lub Yeej Ntsa Zeb yog koj. 4 Kuv tus Tswv Ntuj, thov koj txuag kuv kom dim ntawm tus neeg siab phem, thiab tus neeg tsiv tsaim lub nrig. 5 HUAB TAIS Tswv Ntuj, koj yog kuv lub chaw tso siab txij thaum hluas los, koj yog kuv chaw nyob nyab xeeb. 6 Txij thaum kuv yug los kuv ib rau koj, koj rub kuv tawm hauv kuv niam plab los. Kuv cav lus zoo txog koj tsis txawj tas. 7 Coob leej ntsia kuv zoo li ib lub pov haum ; vim koj yog kuv lub chaw nkaum khov. 8 Lo lus cav txog koj nyob nraim hauv kuv lub ncauj, koj lub koob meej nyob nraim hauv tsheej hnub. 9 Zaum no kuv laus, koj txhob ntiab kuv ; kuv lub zog ntaug zuj zus, koj txhob tso kuv pov tseg. 10 Cov yeeb ncuab tham txog kuv, lawv nyas ntshis kuv, lawv sib tuav xam : 11 Lawv hais tias : “Tswv Ntuj tso nws pov tseg ; nej puav nws kev, nej ntes nws, yeej tsis muaj neeg yuav tuaj npo nws dim !” 12 Tswv Ntuj, koj txhob nrug deb kuv, kuv tus Tswv Ntuj, thov koj tuaj pab kuv sai sai ! 13 Xav kom cov neeg nrhiav txo kuv txoj sia poob rau hauv txoj kev txaj muag ! Cov neeg uas xav ua kom kuv txom nyem, xav kom lawv raug luag rhuav plhu thiab poob tsim ! 14 Hos kuv, kuv tso siab tsis tseg. Kuv yuav hu nkauj cav koj tsis muaj caij tag. 15 Cov zaj lus piav txog koj txoj kev ncaj thiab kev cawm neeg niaj hnub nyob hauv kuv lub ncauj, kuv suav tsis tas tias muaj pes tsawg zaj. 16 Kuv yuav los cav txog HUAB TAIS Tswv Ntuj cov hauj lwm loj ; kuv cav lus zoo txog txoj kev ncaj uas tuaj ntawm koj tib leeg tuaj. 17 Tswv Ntuj, koj tau qhuab qhia kuv puag thaum yau los, los txog tav no kuv kuj tau tshaj koj tej dej num zoo nkauj zoo saib. 18 Tab yog kuv laus, plaub hau dawb tas, Tswv Ntuj, koj txhob tso kuv pov tseg mog ! Kom kuv tau tshaj cov hauj lwm tawm ntawm koj npab koj tes rau tsoom tub ki no paub, tshaj koj lub hwj huam rau tsoom xeeb ntxwv tom ntej. 19 Tswv Ntuj, koj txoj kev ncaj siab tas nrho ! Koj tau ua tej yam loj kawg li. Tswv Ntuj, leej twg thiaj zoo li koj? 20 Koj tau kheev kom peb ntsib ntau hom kev txom nyem thiab kev cov nyom, koj ho yuav rov qab tuaj ua kom peb rov muaj sia dua. Koj yuav rov tsa kuv sawv dua, koj yuav rov rub kuv tawm hauv ntiaj teb cov qhov ntuj tob. 21 Koj yuav rov muab meej mom rau kuv, koj yuav rov ntxiv zog rau kuv. 22 Kuv yuav siv nkauj nog ncas los ua koj tsaug, kuv tus Tswv Ntuj, kuv yuav cav txog koj lub siab hlub; His Xas Lais tus Ntshiab, kuv yuav ntaus thaj cheej cav lus zoo txog koj. 23 Thaum kuv ntaus paj nruag rau koj, kuv di ncauj yuav zoo siab hu nkauj, kuv tus plig kuj yuav zoo siab, vim koj txhiv kuv txoj sia. 24 Kuv tus nplaig yuav niaj hnub hais txog koj txoj kev ncaj, vim cov neeg uas nrhiav ua kom kuv raug txom nyem lawv tau txaj muag thiab poob tsim.

1 Tswv Ntuj, thov muab koj txoj kev haum pheej los pub rau tus vaj, thov pub koj txoj kev ncaj rau vaj ntxwv tus tub. 2 Kom tus vaj ntxwv tswj koj haiv neeg raws kev ncaj, tswj koj cov me neeg raws kev haum pheej. 3 Thov kom tej roob siab muab kev vam meej rau koj haiv neeg ! kom tej roob qis pub kev haum pheej. 4 Kom tus vaj no tuaj cov me neeg tog hauv nws tsoom pej xeem ; kom nws cawm cov pluag, kom nws muab tus neeg quab yuam luag tsuj ! 5 Nws yuav nyob ntev li lub hnub, nws yuav kav ntev li lub hli, mus tiam dhau tiam. 6 Thov kom nws nqes los zoo li nag los ywg nyom, zoo li nag huab zig los ntxaum av ! 7 Lub caij nws ua vaj, txoj kev haum pheej yuav tawg paj, yuav muaj kev thaj yeeb mus txog thaum tsis muaj hli xiab hli nqig. 8 Nws yuav ua vaj kav ib lub hiav txwv dhau ib lub hiav txwv. Kav txij tus Niam Dej mus txog tim npoo ntiaj teb ! 9 Cov neeg ntxub nws yuav txhos caug ntawm nws xub ntiag, nws cov yeeb ncuab yuav yaim plua av. 10 Cov vaj nyob Tas Xis thiab cov vaj kav cov pov txwv yuav them se tuaj. Cov vaj nyob Xas Npas thiab Xes Vas yuav tuaj cev paj tshab rau nws. 11 Tas ib tsoom vaj yuav txhos caug pe ntawm nws xub ntiag, ib tsoom kuj cuab yuav tsob hwb nws. 12 Vim nws npo tus pluag uas hu txog nws, npo cov me neeg uas tsis muaj chaw khaub zig. 13 Nws yuav hlub tus pluag thiab tus tsis muaj zog, nws yuav cawm cov pluag txoj sia : 14 Nws yuav txhiv lawv txoj sia ntawm luag txoj kev lim hiam thiab luag txoj kev tsim txom. Nws yuav saib lawv roj ntsha muaj nqis. 15 Thov kom nws txoj sia ntev ! Luag yuav nqa Xas Npas cov kub tuaj pub rau nws. Sawv daws yuav thov Ntuj rau nws tsis tseg. Zeej tsoom yuav niaj hnub foom koob foom hmoov rau nws ! 16 Kom muaj nplej ntau ntau puv nkaus lub teb chaws, cov hnab nplej yuav laim ntxuj ntxiag saum tej ncov roob, nplej yuav txhawv xws li lub roob Lis Npas. Hos tsoom pej xeem yuav tawg paj xws li paj nroj hauv nruab teb. 17 Thov kom nws lub npe ciaj nyob mus li. Kom nws lub koob meej ncha ntev li lub hnub. Ib tsoom haiv neeg yuav muab nws lub npe los sib foom hmoov zoo. Ib tsoom kuj cuab yuav tshaj tias nws txoj hmoov zoo. 18 HUAB TAIS Tswv Ntuj, His Xas Lais tus Tswv Ntuj nto koob meej, nws tib leeg muaj peev xwm ua tau hwj huam yees ntxwv ! 19 Kom nws lub npe muaj hwj xyeej nto koob meej mus ib txhiab ib txhis ! Kom nws lub koob meej nto lug mus thoob ntiaj teb ! Ua li. Ua li ! 20 Das Vis, Yes Xes tus tub cov zaj teev ntuj xaus rau ntawm no.

1 Hais tseeb tiag mas, Tswv Ntuj siab zoo, Nws hlub His Xas Lais, nws hlub cov neeg siab huv. 2 Tsis kav, kuv tseem yuav luag lem ko taw, ib nyuag yam tsis hlob tsis yau ntxiv, ces kuv rhais ruam yuam kev. 3 Vim kuv khib hau cov neeg muab hlob, kuv pom cov tsis hwm ntuj nyob nyab xeeb. 4 Lawv tsis muaj mob, lawv noj qab nyob zoo, lawv lub cev rog. 5 Lawv tsis khwv li zeej tsoom, lawv tsis nrog luag raug xwv txheej. 6 Lawv lub siab muab hlob dai daub xws li ib phiaj xauv, Kev lim hiam, ua tsoom tsho rau lawv thaiv lawv. 7 Kev txhaum tawm hauv lawv lub tswv yim ruam los, lawv lub siab phwj kev phem. 8 Lawv luag, lawv thuam, lawv tham txog kev yuam cai txeeb tawv qhawv. Lawv tsa taub hau siab hais khav txiv. 9 Lawv qhib ncauj lug thuam ntuj, lawv tus nplaig xav yaim tas ntiaj teb. 10 Li ntawd, Tswv Ntuj haiv neeg tig mus rau lawv sab, Tswv Ntuj haiv neeg qhib ncaug lug nqos lawv cov dej. 11 Lawv hais tias : ” Ua cas Tswv Ntuj thiaj yuav paub tau? Tus Nyob Siab puas muaj txuj ci paub? ” 12 Cov tsis hwm ntuj ua zoo li ntawd, lawv tau nyob tiaj tus, muaj nyiaj muaj txiaj loj zuj zus ! 13 Hos kuv, kuv siv zog txuag kuv lub siab kom huv, ntxuav kuv tes ua neeg siab dawb, tab sis kuv txuag tsis tau ? 14 Niaj hnub kuv raug mob raug ntsaj, niaj tag kis sawv ntxov tsees, kuv raug txim raug nplua. 15 Yog kuv ho hais tias : ” Kuv yuav hais zoo li lawv “, mas kuv ntxeev siab rau koj cov tub haiv neeg. 16 Kuv rau siab xav tswv yim kom to taub tej yam uas kuv ceeb laj pom ntawd. 17 Mus txog hnub kuv chaws los hauv Tswv Ntuj lub tuam tsev, kuv thiaj li mem tau tseeb txog lawv yav tom ntej. 18 Qhov tseeb, koj yuav tso lawv rau saum qhov chaw nplua kom lawv xaub rau hauv kev liam txwv. 19 Ib sij huam, yog kev puas tsuaj puas ntsoog ! Lawv piam sij tas, lawv ntshai ti txha nkaus. 20 HUAB TAIS, koj caum lawv tus duab tawm hauv tsheej, kom ploj zoo li ib zag npau suav thaum yus tsim nruab dab ntub los. 21 Kuv twb chim ua siab iab qhi, plab plaw mob tsheej zag. 22 Kuv ruam tas nrho, tsis to taub dab tsi li, kuv zoo li tus tsiaj. Tab sis kuv nrog koj nyob ! 23 Vim kuv nrog koj nraim mus li : koj nthos kuv sab xis los tuav. 24 Koj coj kuv mus raws nraim qhov koj xav, koj rub kuv los raws koj lub hwj chim qab. 25 Nyob saum ntuj, leej twg thiaj hlub kuv ; dhau ntawm koj ? Nyob ntiaj teb, kuv tsis ntshaw dab tsi , tsuas ntshaw koj. 26 Kuv lub cev thiab lub siab qaug zog ; Tswv Ntuj yog lub zog nyob hauv kuv lub siab thiab hauv kuv lub cuab tam mus ib txhiab ib txhis. 27 Li ntawd, leej twg txav mus deb koj, tus ntawd yuav tuag ; koj rhuav tus tso koj pov tseg. 28 Kuv txoj kev kaj siab, yog tau nyob ze Tswv Ntuj ; kuv los nkaum hauv HUAB TAIS Tswv Ntuj kom kuv tau tshaj koj cov hauj lwm.

1 Tswv Ntuj, vim li cas koj muab peb nrauj tseg tu moo nrho, vim li cas koj npau taws ncho pa lug rau pab yaj uas nog zaub hauv koj lub nras? 2 Thov koj rov nco txog pab neeg uas thaum lub hauv paus, koj tau yuav los ua koj tug, koj tau txhiv haiv neeg no los ua koj lub cuab tam, thov koj nco ntsoov txog lub roob Xis Yoos uas koj xaiv los ua koj lub chaw nyob. 3 Tig koj ko taw mus ncig tej qub vaj tse uas vau tas. Yeeb ncuab lwg koj lub tsev ntshiab tas lawm du lug. 4 Cov neeg tiv koj tuaj qw lom vab vab ntawm thaj chaw uas koj tuaj ntsib peb ; lawv tsa lawv tus chij hom cim rau thaj chaw no. 5 Lawv ua zoo li hauv tej hav ntoo, lawv tsa ko taus, 6 lawv xuas hniav taus phua, xuas roob rauj tsoo cov ncej uas neeg txhais tes txaug. 7 Lawv hlawv koj lub tuam tsev kub hnyiab tas. Lawv tsoo, lawv thuam lub tsev teev koj lub npe. 8 Pab neeg ntawd sib koom siab tias lawv yuav hlawv txhua lub chaw uas neeg tuaj ntsib Tswv Ntuj nyob hauv lub teb chaws. 9 Peb tsis pom peb cov cim ntxiv. Tsis muaj yaj saub lawm. Tsis muaj ib tug nyob hauv peb yuav paub tias peb yuav zoo li no txog thaum twg. 10 Tswv Ntuj, tus neeg quab yuam yuav hais cov lus thuam Ntuj txog tav twg? Puas muaj ib lub caij uas tus yeeb ncuab yuav tsis ua tub qaug koj lub npe ntxiv? 11 Vim li cas koj cheem koj txhais tes? Vim li cas nkaum koj sab tes xis rau ntawm koj? 12 Tswv Ntuj, koj twb yog kuv tus vaj txij thaum ntuj tsim teb raug los, koj yog tus coj peb ntaus rog yeej nyob hauv lub teb chaws no. 13 Koj tau xuas koj lub zog los tswj dej ntuj, koj tau phua zaj taub hau saum nplaim dej. 14 Koj tau tsuj Les Vias Taas cov taub hau, koj muab nws pov rau cov tsiaj qus noj. 15 Koj khawb tej qhov dej txhawv thiab tej dej sab siv. Koj ua kom tej niam dej hlob hlob qhuav qhawv. 16 Nruab hnub yog koj li, hmo ntuj los yog koj tug : koj txawb hli rau hli chaw, txawb hnub rau hnub chaw. 17 Koj tu ciam kem npoo ntiaj teb ; koj tsim kom muaj ntuj sov ntuj no ! 18 HUAB TAIS, koj nco ntsoov : yeeb ncuab tau thuam Ntuj. Ib haiv neeg vwm ua tub qaug koj lub npe. 19 Txhob muab koj tus nquab rau tus tsiaj tshaib plab, koj txhob hnov qab koj cov pluag txoj sia mus txog hnub kawg. 20 Koj ntsia txog lo lus koj tau cog. Tas sawv daws khiav mus nkaum hauv koj tej chaw tsiv nraim, nyob sib tsub sib nias, lub teb chaws hloov ua chaw sib nkaug sib tua. 21 Thov kom tus uas raug luag quab yuam txhob poob ntsej muag ntxiv, kom tus pluag thiab tus txom nyem cav lus zoo txog koj lub npe ! 22 Tswv Ntuj, thov koj sawv mas ! Sawv tiv txuag koj lub npe ! Thov koj nco ntsoov tias pab neeg vwm no thuam koj tas mus li. 23 Koj txhob hnov qab cov neeg tiv koj lub suab qw, koj nco ntsoov tias cov tuaj ntaus koj nthe nrov zuj zus.

1 Ua rau tus coj nkauj, al-tashesheth. Txhob rhuav. As Xas zaj nkauj paj nruag. Ib zag txuj pag seev. 2 Tswv Ntuj, peb ua koj tsaug, peb ua koj tsaug, vim koj lub npe nyob ze peb, leej tib neeg tshaj koj cov hauj lwm zoo nkauj zoo saib. 3 Thaum txog lub hnub nyoog uas kuv teem tseg, kuv yuav txiav txim ncaj. 4 Lub ntiaj teb yuav ntxeev, ib tsoom neeg nyob hauv ntiaj teb yuav nrog nws vau. Tus txhos cov ncej txheem ntiaj teb tsis yog kuv lov? 5 Kuv hais rau cov neeg khav theeb tias : ” Nej txhob khav ntxiv ! ” Kuv hais rau cov tsis hwm ntuj tias : ” Nej txhob tsa hauv pliaj siab .” 6 Nej txhob tsa nej lub hauv pliaj siab cuag li no. Nej txhob hais lus muab hlob, ua xwb qwb txhav qhe. 7 Kev tsa neeg siab, tsis tuaj xib fab tuaj, los toob fab tuaj, nws tsis tuaj hauv teb chaws suab puam tuaj. 8 Tus txiav txim yog Tswv Ntuj : nws yuav txo ib tug qis, tsa lwm tus siab. 9 HUAB TAIS txhais tes tuav ib lub ntim, nws hliv ib co cawv iab cawv ntsim, cov tsis hwm ntuj nyob tas ntiaj teb yuav haus cov cawv ntawd, thiab yuav yaim cov txo. 10 Ntawm kuv, kuv yuav tshaj rau sawv daws paub, thiab hu nkauj rau Yas Kos tus Tswv Ntuj mus li : 11 “Kuv yuav ntaus tsoom tsis hwm ntuj lub hauv pliaj kom tawg, kuv yuav tsa tus siab ncaj lub hauv pliag kom siab.”

1 Ua rau tus coj npoj hu nkauj, xuas nkauj nog ncas tis hlua. As Xas zaj nkauj paj nruag. Txuj pag seev. 2 Nyob Yus Das teb Tswv Ntuj qhia kom sawv daws paub nws, nws lub npe loj nyob hauv His Xas Lais. 3 Nws tsa nws lub tsev tsam phooj nyob Xas Les, txhim nws lub tuam tsev nyob saum Xis Yoos. 4 Nyob ntawd, nws lov cov xub ya cuag xob laim, nws lov lawv daim leem phiaj, lawv rab ntaj thiab lawv cov twj ua rog. 5 Koj ci ntsa iab, muaj meej mom zoo saib, vim tej toob xib koj lwg tau ua tej pawg. 6 Cov neeg siab tawv no, raug lwg thaum lawv tseem tsaug zog, tas cov neeg muaj peev xwm no, tsa tsis taus lawv txhais tes. 7 Yas Kos tus Tswv Ntuj, koj tso hem thawj, ces nees thiab tsheb rog cia li txhav nyob ntawm chaw. 8 Koj yog tus muaj hwj xyeej uas neeg ntshai. Thaum koj npau taws, leej twg yuav muaj peev xwm sawv taus ntawm koj xub ntiag? 9 Koj lo lus txiav txim nrov saum ntuj tuaj ; ntiaj teb ntshai, ntiaj teb nyob ntsiag to, 10 Vim Tswv Ntuj sawv txiav txim, nws cawm tas tsoom me neeg nyob ntiaj teb. 11 Tab yog neeg lub siab ceev npau taws, tseem ua kom koj nto koob meej. Cov uas khiav dim ntawm tus siab ceev ntawd, koj muab lawv sia koj duav. 12 Nej fiv yeem thiab pauj yeem rau HUAB TAIS, nej tus Tswv Ntuj. Nej uas yog cov nyob ncig tus Tswv Ntuj muaj hwj xyeej, nej nqa paj tshab tuaj rau nws. 13 Vim nws txiav cov vaj txheeb txoj pa. Nws ua cov vaj kav ntiaj teb ntshai.

1 Ua rau tus coj npoj hu nkauj. Hais txog Yeditoun ; As Xas zaj nkauj paj nruag. 2 Kuv hu txog Tswv Ntuj, kuv quaj hu txog Tswv Ntuj. Kuv hu txog Tswv Ntuj, nws yuav mloog kuv. 3 Thaum kuv txom nyem, kuv nrhiav HUAB TAIS. Hmo ntuj, kuv tsa tes thov, tsis nkees, tsis kam leej twg nplij kuv. 4 Kuv nco txog Tswv Ntuj, ces kuv quaj seev yees. Kuv rov nco txog nws, kuv lub tswv yim qaug zog. 5 Koj rua kuv ob daim tawv muag. Kuv siab nphau npog, kuv hais tsis tau ib lo lus. 6 Kuv xav tswv yim txog yav thaum ub, txog cov niaj xyoo uas dhau los. 7 Hmo ntuj, kuv nco txog kuv zaj seev, kuv lub siab rov nco tas zog, kuv lub tswv yim nug tias : 8 HUAB TAIS puas nrauj peb mus li? Nws yuav tsis rov khuv leej dua li lod? 9 Nws lub siab hlub puas txawj ploj ntais mus li? Nws lo lus puas yuav cia li ntsiag mus ib txhiab ib txhis? 10 Puas yog Tswv Ntuj tsis nco qab zam lawm? Nws puas kaw nws lub siab vim nws npau taws? 11 Ces kuv hais tias : “Qhov ua kuv ntxhov siab yog li no : tus Nyob Siab txhais tes xis hloov lawm !” 12 Kuv nco txog cov hauj lwm loj HUAB TAIS ua ; kuv nco txog koj zaj hwj huam yees ntxwv thaum ub. 13 Kuv rov qab hais txog tas puas tsav yam koj tau ua, kuv rov hais txog koj cov hauj lwm loj. 14 Tswv Ntuj, koj txoj kev yog txoj ntshiab xwb ! Tus dab twg thiaj loj luaj li Tswv Ntuj? 15 Koj yog tus Tswv Ntuj ua hwj huam zoo ntsa iab, koj tau muab koj lub zog rau cov haiv neeg pom. 16 Koj xuas koj txhais npab los txhiv koj haiv neeg, Txhiv Yas Kos thiab Yos Xes cov tub. 17 Tswv Ntuj, cov dej pom koj ! Dej pom dheev koj, dej ntshai tshee na, lub qab ti txwv kuj ua zog tas. 18 Huab tso dej nag nchuav nthwv nqes los. Lub ntuj huab dub ua suab nrov nroo laws. Koj cov xib xub ya ncig lees rau txhua qhov. 19 Thaum koj ua xob nthe, nroo ntws, cov kab xob laim ci pom kev nrig rau qab ntuj, lub ntiaj teb tshee thiab qeeg. 20 Koj ua koj txoj kev hauv dej ntuj, koj txoj kev hla dej tob, tsis muaj leej twg pom koj hneev taw. 21 Koj xuas Mais Xes thiab As Loos nkawd txhais tes coj koj haiv neeg zoo li ib pab yaj.

1 Kuv haiv neeg, koj mloog kuv txoj cai lij choj mas ! Koj tig ntsej los mloog cov lus tawm ntawm kuv lub ncauj los ! 2 Kuv yuav qhib ncauj hais ib zag paj lug, txhais tej zaj lus qhuab qhia hais txog lub caij thaud. 3 Tej yam peb hnov thiab peb paub, yog tej uas peb phaj txiv thiab phaj yawg qhia tseg. 4 Peb yuav tsis zais rau lawv cov xeeb ntxwv, peb yuav qhia HUAB TAIS cov npe muaj koob meej, qhia nws lub hwj huam thiab cov dej num zoo nkauj zoo saib uas nws tau ua, kom tsoom tub ki tom ntej paub. 5 Nws tau tsim ib co kab ke coj Yas Kos tsev Neeg, nws tsa ib txoj cai lis choj rau His Xas Lais. Nws hais kom peb phaj yawg koob qhia tas puas tsav yam rau lawv tej tub ki. 6 Kom cov xeeb ntxwv thiab cov tub ki uas tseem yuav yug los kawm, kom lawv sawv los qhia rau lawv cov tub. 7 kom lawv tso siab rau Tswv Ntuj, kom lawv nco ntsoov Tswv Ntuj cov hauj lwm loj, kom lawv mloog nws cov lus qhia. 8 Lawv thiaj yuav tsis zoo li lawv phaj txiv, uas yog phaj neeg qig lus thiab fav xeeb, yog phaj neeg uas lub siab ywj fab ywj fwj, lawv lub tswv yim tsis tso siab rau Tswv Ntuj. 9 Es Fais cov tub, yog cov tub tua hneev uas muaj txhij txhua ntawm tes, hnub sib tua, lawv tso tes khiav. 10 Vim lawv tsis tau khaws lo lus uas Tswv Ntuj cog rau lawv, lawv tsis kam mloog nws txoj cai lis choj. 11 Lawv tsis nco qab nws cov hauj lwm loj, tsis nco qab tej num zoo nkauj zoo saib nws ua rau lawv pom : 12 Nyob Hais Nkws Tos thaj av, hauv teb chaws Tas Nis, nws ua hwj huam yees ntxwv nyob ntawm lawv phaj txiv xub ntiag. 13 Nws phua dej ntuj ua ob sab, nws tsa dej sawv ntseg li phab ntsa, kom lawv tau kev hla dhau mus. 14 Nruab hnub, nws ua ib tw huab coj lawv kev, niaj hmo, nws ua ib cub tawg ci ci coj lawv. 15 Nyob teb chaws suab puam, nws phua tej niag phab tsua, kom lawv tau dej haus npaum li dej txhawv tawm hauv qab thu dej hiav txwv. 16 Nws ua kom tej tus dej me txhawv ntawm pob tsuas los, nws ua kom dej ntws loj luaj li tej niam dej. 17 Tsis kav, lawv tseem ua txhaum qees rau nws, lawv ntxeev siab hauv teb chaws quav poj rau tus Nyob Siab Tshaj. 18 Lawv txhob txwm sim Tswv Ntuj, lawv taij kom nws muab mov rau lawv noj raws lawv siab. 19 Lawv twv Tswv Ntuj tias : “Tswv Ntuj puas muaj peev xwm rau ib rooj mov hauv teb chaws suab puam? 20 Saib ! Nws ntaus pob tsuas, ua dej txhawv loj luaj li dej sab siv ntws, nws puas muaj peev xwm muab tau mov, pub tau nqaij rau nws haiv neeg noj thiab?” 21 HUAB TAIS hnov cov lus ntawd, nws npau taws : ib co hluav taws hlawv Yas Kos, nws npau taws ceev rau His Xas Lais. 22 Vim tias lawv tsis ntseeg Tswv Ntuj, lawv tsis tso siab tias nws muaj peev xwm cawm tau lawv. 23 Nws txib cov huab dub nyob txheej saud, nws qhib rooj ntug. 24 Nws ua kom cov mov mas nas poob li dej nag los yug lawv siav, nws muab qaum ntuj cov mov rau lawv : 25 Neeg tau noj cov mov yug tsoom Tshiab, nws xa txhiam laj txhiam xws rau lawv noj seem noj sos. 26 Nws ua kom nthwv cua toob fab tshuab tuaj rau saum ntuj, Nws lub hwj huam ua kom cua tuaj naj fab tuaj. 27 Nws ua kom nqaij poob rau lawv li dej nag, ntau npaum plua av. Nws ua kom noog poob coob npaum suab puam ntawm ntug dej ntuj. 28 Nws ua kom noog los tsaws nruab nrab lawv tej chaw so, ncig lawv tej tsev. 29 Lawv noj tas, lawv tsau plab : Tswv Ntuj pub txhua yam lawv nqhis rau lawv. 30 Lawv noj tsis tau dhuav, mov thiab nqaij tseem nyob hauv lawv lub ncauj, 31 Tswv Ntuj twb npau taws rau lawv, nws tua cov muaj zog, nws ua kom cov hluas hauv His Xas Lais ntog. 32 Tab txawm muaj li ntawd, lawv tseem ua txhaum tsis tseg, lawv tsis ntseeg nws cov hauj lwm loj zoo saib. 33 Nws ua kom lawv lub neej luv li tshuab ib pas, ua kom lawv lub hnub nyoog muaj kev txhawj kev ntshai. 34 Thaum Tswv Ntuj tua lawv, ces lawv nrhiav nws ; lawv yuav lub siab tshiab, lawv tig los rau nws. 35 Lawv rov nco tias Tswv Ntuj yog lawv lub tsua, nco tias tus Tswv Ntuj Nyob Siab Tshaj yog tus txhiv lawv. 36 Tab sis lawv lam ntxias nws ntawm ncauj xwb, lawv tus nplaig dag nws. 37 Lawv lub siab tsis npuab nws ruaj, lawv tsis tso siab rau cov lus nws cog rau lawv. 38 Tab sis, Tswv Ntuj lub siab hlub mos nyoos zam rau lawv, nws tsis rhuav lawv, nws ntxuav lawv cov txhaum. Nws cheem nws lub siab npau tsis tseg, nws tsis pub nws lub siab ceev tsim nruab dab ntub los. 39 Nws rov nco tias lawv yog ib lub cev nqaij xwb, yog ib txoj pa uas yuav dua mus tsis rov. 40 Muaj pes tsawg zaus, lawv ntxeev siab rau nws hauv teb chaws suab puam, lawv ua tub qaug nws hauv ntuj nrag teb do. 41 Lawv tseem rov sim Tswv Ntuj, lawv ua His Xas Lais tus Ntshiab tu siab. 42 Lawv tsis nco qab qhov nws txhais tes tau ua, tsis nco qab hnub uas nws txhiv lawv ntawm cov neeg ntxub lawv : 43 Nws ua ib co cim los yuam Hais Nkws Tos, nws ua hwj huam loj hauv teb chaws Tas Nis. 44 Nws ua kom cov dej hauv cov niam dej hloov ua ntshav. Lawv haus tsis tau cov dej ntws hauv lawv cov kwj deg. 45 Nws xa nkawj tuaj phev lawv. nws xa qav tuaj ua vuab tsuab puv lawv vaj tse. 46 Nws tso plhuav lawv tej qoob loo rau kooj noj, tej uas lawv lub zog khwv tau, nws tso rau kooj txom fav. 47 Nws tso lawg los ntaus lawv cov hmab txiv cawv, nws tso te los tua lawv cov txiv cev. 48 Nws tso plhuav lawv tej tsiaj loj rau lawg ntaus, tso lawv npoj tsiaj rau xob tua. 49 Nws tso nws lub siab npau tawm plaws tuaj rau lawv : nws chim, nws npau ceev, nws tso xwv txheej, nws cov tshiab rhuav siav nqes tes ua hauj lwm. 50 Nws qhib rooj rau nws lub siab npau tawm los, nws tsis txuag lawv ntawm qhov tuag ntxiv, nws tso lawv txoj sia rau tus mob aws tua. 51 Nws tua txhua tus tub hlob nyob Hais Nkws Tos teb, tua thawj phaum tub uas lawv yug thaum lawv nyuam qhuav nto zog, hauv cov tsev tsam phooj nyob Kaas. 52 Nws lawv nws haiv neeg tawm mus zoo li ib pab yaj, nws lawv nws npoj yaj mus hauv teb chaws suab puam. 53 Nws ntaus ntej coj kev mus dawb mus huv, lawv tsis ntshai, hos dej ntuj nphau nphwv los nyab lawv cov yeeb ncuab. 54 Nws coj lawv los txog nws lub chaw ntshiab, txog lub roob uas nws txhais tes xis txeeb los ua nws tug. 55 Nws caum lwm cov kuj cuab ntawm lawv hauv ntej, nws faib teb faib chaw rau lawv, ua lawv lub cuab tam. Nws coj cov xeem His Xas Lais los nyob hauv lawv cov tsev tsam phooj. 56 Lawv tseem ntxeev siab, lawv sim tus Tswv Ntuj Nyob Siab Tshaj, lawv tsis hwm Tswv Ntuj cov lus zeem tseeb. 57 Lawv ncaim, lawv ntxeev siab xws li lawv phaj yawg. lawv lem cees xws rab hneev nkhaus. 58 Lawv tej chaw siab txi dab ua tub qaug nws. Lawv cov mlom ua khib nws. 59 Tswv Ntuj hnov, nws npau taws ceev, nws muab His Xas Lais xyeeb hlo pov tseg. 60 Nws tsiv ntawm lub chaw nws nyob txawm hauv Xis Laus uas yog lub tsev tsam phooj nws tsa rau hauv nruab nrab tsoom neeg. 61 Nws tso nws lub zog rau luag ntes, tso nws lub hwj chim rau yeeb ncuab txhais tes. 62 Nws tso nws haiv neeg rau hniav ntaj hlais, nws npau taws rau nws lub cuab tam. 63 Ib co hluav taws hlawv cov tub hluas, tsis muaj leej twg hais zaj tshoob rau cov ntxhais. 64 Cov leej choj raug ntsis ntaj nkaug lawv, cov poj ntsuam tsis nyiav lawv 65 HUAB TAIS sawv tsees, xws li tus tsim dheev nruab dab ntub, xws li tus tub rog tau cawv haus tas, siab tawv qhawv tuaj. 66 Nws sawv tom cov yeeb ncuab nraub qaum tua lawv, nws rhuav lawv kom poob ntsej muag mus ib txhiab ib txhis. 67 Nws xyeeb Yos Xes tsev neeg, nws tsis kam xaiv lub xeem Es Fais. 68 Nws xaiv lub xeem Yus Das, xaiv lub roob Xis Yoos uas nws nyiam. 69 Nws txhim nws lub tsev ntshiab xws li ib lub ncov roob siab. nws tsa nws lub tsev kom nyob mus li xws li lub ntiaj teb. 70 Nws xaiv nws tub tub txib Das Vis, nws coj Das Vis hauv lub nkuaj yaj los. 71 Thaum Das Vis lawv nws pab yaj qab, Tswv Ntuj hu Das Vis los, nws tsa Das Vis ua tswv zov nws haiv neeg, zov Yas Kos, zov His Xas Lais, nws lub cuab tam. 72 Das Vis ua tus tswv zov yaj tsis muaj chaw xyeej, Das Vis muab nws txhais tes xyuam xim los coj lawv.

1 Tswv Ntuj, cov kuj cuab tuaj txeeb koj lub cuab tam, lawv ua tsis huv rau koj lub tuam tsev ntshiab, lawv tsoo rhuav Yes Lus Xas Les pob tas. 2 Lawv muab koj cov tub txib lub cev pov rau cov noog ya saum ntuj noj, muab koj cov ntseeg lub cev pub rau ntiaj teb cov tsiaj qus dhuas. 3 Cov kuj cuab ua koj cov ntseeg tej ntshav ntws sis laub sis lug ncig Yes Lus Xas Les, tsis muaj leej twg faus lawv. 4 Cov nyob ze peb ua tub qaug peb, cov nyob ncig peb thuam peb, luag peb. 5 HUAB TAIS, koj yuav npau taws hov ntev? Koj puas yuav npau taws tsis txawj tag? Koj puas yuav khib li hluav taws kub hnyiab? 6 Tig koj lub siab ceev siab npau mus rau cov kuj cuab uas tsis paub koj, mus rau cov teb chaws uas tsis hu ntxog koj lub npe ! 7 Vim lawv noj Yas Kos, rhuav nws tej chaw nyob. 8 Koj txhob rov nco txog tej txhaum uas tej laus thaud tau ua, txhob muab rau peb ris. Thov xa koj lub siab hlub tuaj txog peb sai, vim peb poob rau qhov qis tshaj lawm. 9 Tswv Ntuj, tus cawm peb, koj pab peb mas, kom koj lub npe muaj koob meej ! Koj npo peb dim, koj ntxuav peb cov txhaum mas ! Kom koj lub npe nto meej nto moo. 10 Vim li cas cov kuj cuab tau kev hais tias : “Lawv tus Tswv Ntuj nyob qhov twg?” Thov koj qhia cov kuj cuab paub tias yuav muaj kev rob caub los pauj koj cov tub txib cov ntshav ntws. Thov koj ua kom peb pom ! 11 Thov kom cov neeg nyob txim lub suab seev nrov tuaj txog koj. Thov koj txhais npab muaj hwj huam, txuag cov raug lub txim tuag kom lawv muaj txoj sia nyob. 12 HUAB TAIS, xav kom koj pauj qhov tub qaug uas cov nyob ze peb ua rau koj, xav kom koj pauj xya zaus chob nkaus lawv lub siab. 13 Ces peb uas yog koj haiv neeg, yog pab yaj nog zaub hauv koj lub nras, peb yuav cav txog koj mus li, peb yuav tshaj koj lub koob meej mus txheej dhau txheej.

1 Ua rau tus coj nkauj. El-shoshannim, los cov paj qoov dawb. As Xas cov lus ua pov thawj. Nkauj paj nruag. 2 Tswv zov His Xas Lais, koj mloog mog. Koj cab Yos Xes xws li ib pab yaj. Koj zaum saum cov Tshiab Kes Lus Npis, koj ci ntsa iab ! 3 Koj tawm los ntawm Es Fais, Npes Yas Nis thiab Mas Nas Xes xub ntiag ! Koj tsa koj lub siab tawv kom xeev nruab dab ntub, koj tuaj cawm peb mas ! 4 Tswv Ntuj, thov koj coj peb rov los. Thov cia koj lub ntsej muag ci tuaj, ces peb yuav txais kev cawm. 5 HUAB TAIS Tswv Ntuj, tus muaj hwj huam tas nrho, koj yuav npau taws rau koj haiv neeg cov zaj thov koj hov ntev? 6 Koj yuav cia nws noj mov ntxuag kua muag, haus dej ntxuag peb siab kua muag ntev li cas ntxiv? 7 Cov nyob ze peb sib nug txog peb, peb cov yeeb ncuab tau kev luag peb. 8 Tswv Ntuj, tus muaj hwj huam tas nrho, thov koj coj peb rov los. Thov cia koj lub ntsej muag ci tuaj, ces peb yuav txais kev cawm. 9 Tsob txiv cawv, koj rho ntawm Hais Nkws Tos teb, koj coj los cog, koj ntiab cov kuj cuab khiav. 10 Koj ncaws av ua nws ntej, nws nrhau cag, nws hlob mus puv teb chaws. 11 Nws ntxoov cov roob, nws cov ceg hlav vov Tswv Ntuj cov ntoo ciab. 12 Nws cab hmab mus ti nkaus ntug dej ntuj, nws hlav ntsuag mus ti nkaus tus niam Dej. 13 Ua cas koj rhuav lub laj kab xov nws, cia cov neeg dua kev cev tes de nws cov txiv? 14 Tus npua teb tom hav zoov muab nws noj liam txwv, cov tsiaj tom teb xawb nws tej ntsuag mos noj. 15 Tswv Ntuj, tus muaj hwj huam tas nrho, koj rov los mas ! Koj tuaj saum ntuj ntsia, ces koj pom. Thov koj nqes los xyuas koj vaj txiv cawv no. 16 Koj xyuas tus cag uas koj sab xis tau cog, xyuas tus tub uas txais koj lub zog. 17 Saib, luag hlawv lub vaj txiv cawv kub hnyiab, muab nws ntov tas. Lawv tuag ntawm koj lub ntsej muag npau taws. 18 Thov tso koj txhais tes rau saum tus nyob ntawm koj sab xis, rau saum tus tub uas txais koj lub zog. 19 Ces peb yuav tsis txav mus deb koj ib zaug ntxiv ; koj ua kom peb muaj txoj sia nyob, peb yuav hu txog koj lub npe. 20 HUAB TAIS Tswv Ntuj, tus muaj hwj huam tas nrho, thov koj coj peb rov los ; thov cia koj lub ntsej muag ci tuaj, ces peb yuav txais kev cawm.

1 Ua rau tus coj npoj hu nkauj. Raws li guitth. As Xas zaj. 2 Nej qw zoo siab rau Tswv Ntuj, nws yog peb lub zog, nej qw cav txog Yas Kos tus Tswv Ntuj. 3 Nej qhib paj nruag, ntaus nruas npuaj, koom suab thaj cheej zoo mloog nrog nkauj nog ncas. 4 Txog thawj lub hli nra, peb nqaum paj nqaum nruas, nej tshuab kub nyuj thaum qhib lub hli tshiab. 5 Yog His Xas Lais txoj cai lis choj, yog Yas Kos tus Tswv Ntuj txiav txoj cai ntawd. 6 Yog txoj cai nws muab rau Yos Xes coj hnub nws tawm mus ntaus Hais Nkws Tos teb. Kuv hnov ib xeem lus uas kuv tsis paub. 7 “Kuv txo lub nra ntawm nws xub pwg, nws ob txhais tes tso lub tawb tseg”. 8 Thaum koj txom nyem, koj quaj qw, kuv tuaj npo koj dim. Kuv nraim hauv nag xob nag cua, kuv teb koj. Kuv sim koj siab nyob ntawm cov dej Mes Lis Npas. 9 Kuv haiv neeg, kuv taij koj, koj mloog mog ! His Xas Lais, koj kheev lam mloog kuv lus ! 10 Nyob hauv koj, yuav tsis txhob muaj luag pej kum neeg ib tug dab qhuas, koj yuav tsis txhos caug pe lwm tus dab qhuas. 11 Koj tus HUAB TAIS Tswv Ntuj, yog kuv. Kuv tau coj koj tawm ntawm Hais Nkws Tos teb los. Rua koj qhov ncauj kom dav dav, kuv yuav ntim kom puv. 12 Tab sis kuv haiv neeg tsis mloog kuv lub suab, His Xas Lais tsis xav yuav kuv. 13 Kuv ntiab lawv rov qab mus hauv lawv lub siab cam thawj. Cia lawv ua raws li lawv lub siab ntshaw ! 14 Ab ! Kheev kuv haiv neeg mloog kuv mas ! Kheev His Xas Lais mus raws kuv txoj kev mas ! 15 Ib sij huam kuv yuav tua nws cov yeeb ncuab, kuv yuav tig kuv txhais tes mus txo cov neeg yuam lawv. 16 Cov uas ntxub HUAB TAIS, yuav swb nws, qhov ntawd yuav yog lawv txoj hmoov. 17 Kuv yuav muab hmoov nplej mos los yug His Xas Lais, muab zib ntab zib mu qus los rau lawv noj tsau.

1 Tswv Ntuj sawv ntsug hauv lub txoos qaum ntuj, nws txiav txim hauv nruab nrab ib tsoom tswv ntuj. 2 Nej yuav txiav txim yuam kev, thiab yuav tuaj cov neeg txhaum tog ntev li cas ntxiv? 3 Nej cia li txiav txim ncaj rau tus neeg me thiab tus ntsuag nos, nej txiav ncaj rau tus txom nyem thiab tus pluag. 4 Nej tso tus neeg me thiab tus pluag mus, nej daws kom lawv dim ntawm tus neeg txhaum tes. 5 Lawv tsis paub thiab tsis to taub, lawv maub hauv qhov tsaus ntuj, tas cov ncej txawb lub ntiaj teb co ua zog. 6 Kuv tshaj rau nej paub, nej yog ib co tswv ntuj, nej yog tus Nyob Siab Tshaj cov tub. 7 Tab sis nej yuav tuag zoo li tej tib neeg, nej yuav ntog ib yam li cov vaj txheeb. 8 Tswv Ntuj, koj sawv mas ! Koj txiav txim rau ntiaj teb, vim tas ib tsoom kuj cuab yog koj lub cuab tam.

1 Ib zag paj huam seev. As Xas zaj nkauj paj nruag. 2 Tswv Ntuj, koj txhob ntsiag to ntxiv ; Tswv Ntuj, txhob nyob twj ywm, kaw ncauj nti. 3 Vim koj cov yeeb ncuab nyooj nyooj tuaj, cov tiv koj tsa taub hau siab. 4 Lawv tuav xam nchuav koj haiv neeg, lawv npaj kev tua cov uas koj tshwj zias zais cia. 5 Lawv hais tias : “Nej tuaj ! peb luaj zus tua lawv haiv neeg, kom tsis muaj leej twg hais txog lub npe His Xas Lais ntxiv!” 6 Lawv koom ib lub siab, lawv tuav xam haum, sib cog lus tuaj tua koj : 7 Cov Es Doos thiab cov Is Mas Es, cov Muas thiab As Nkas cov me nyuam, 8 Nkes Vas, As Moos, As Mas Les, Fis Lis Tis teb nrog cov neeg nyob Tws Los. 9 Tab yog As Xus, nws kuj nrog lawv tuaj ib tog, nws cev tes pab Los cov tub. 10 Koj ua rau lawv xws li koj ua rau Mas Dias, xws li koj ua rau Xis Xes Las thiab Yas Vees nyob tom kwj deg Kis Soos. 11 Lawv tuag tu noob nyob Ees Dos, lawv ciaj quav chiv rau thaj av ntawd. 12 Koj ua kom lawv cov vaj txheeb raug ib yam li Os Les thiab Ntxes Es, ua kom lawv cov thawj coj raug zoo li Ntxes Vas thiab Xas Mus Nas. 13 Lawv yog cov uas hais tias : “Peb mus txeeb Tswv Ntuj daim av !” 14 Kuv tus Tswv Ntuj, koj muab lawv kiv xws li cov quav nplej uas khaub zeeg cua ntsawj. 15 Koj caum lawv xws li hluav taws noj hav zoov, xws li nplaim taws kub hauv sab. 16 Koj tso koj nthwv khaub zeeg cua caum lawv khiav, tso koj cov nag xob cua hem lawv mas ! 17 Thov koj ua kom lawv txaj muag, kom lawv nrhiav koj lub npe, HUAB TAIS. 18 Koj cia lawv ntshai ti txha thiab txaj muag mus li, kom lawv tuag tsis muaj koob meej. 19 Kom lawv to taub tias koj lub npe yog HUAB TAIS, koj tib leeg yog tus Nyob Siab Tshaj hauv lub ntiaj teb.

1 Ua rau tus coj nkauj ; suab raj Nkis Tis, Kos Les cov tub zaj nkauj paj nruag. 2 Tswv Ntuj muaj hwj huam, koj cov tuam tsev zoo xis siab ua luaj ! 3 Kuv tus plig xyu, seev yees yuj plaws rau HUAB TAIS cov tshav loog. Kuv lub siab lub cev qw lom zem rau tus Tswv Ntuj muaj txoj sia. 4 HUAB TAIS muaj hwj huam, kuv tus vaj, kuv tus Tswv Ntuj, me noog ntxias nrhiav tau tsev nyob, noog luv nrhiav tau zes puag nws cov me nyuam : ntawm koj cov thaj txi ntuj. 5 Cov neeg nyob hauv koj tsev lawv txoj hmoov zoo : lawv tau kev cav txog koj tsis tseg. 6 Cov uas nrhiav lawv lub zog hauv koj, lawv txoj hmoov zoo : cov uas nco ntsoov txog txoj kev nce mus pem Xis Yoos rau nruab siab, lawv txoj hmoov zoo. 7 Lawv hla lub hav Ntoo Tsw Qab, nyob ntawd, luag ua ib lub qhov dej, thawj phaum nag xa koob hmoov los vov lawv. 8 Lawv hla ib lub roob dhau ib lub roob : Tswv Ntuj tawm plaws rau lawv pom saum Xis Yoos. 9 HUAB TAIS Tswv Ntuj muaj hwj huam, thov koj mloog kuv zaj thov ! Yas Kos tus Tswv Ntuj, thov tig ntsej los mloog ! 10 Tswv Ntuj, thov koj ntsia tus ua leem phiaj thaiv peb, thov ntsia koj tus pleev lub ntsej muag. 11 Vim nyob ib hnub hauv koj cov tshav puam zoo dua nyob ib txhiab hnub lwm qhov chaw, kuv thiaj tau xaiv : nyob ntawm kuv tus Tswv Ntuj taw rooj zoo dua nyob hauv cov tsis hwm ntuj tej tsev tsam phooj. 12 Vim HUAB TAIS Tswv Ntuj yog ib lub hnub, yog ib daig leem phiaj ; HUAB TAIS pub txiaj ntsim thiab koob meej, nws pub kev kaj siab rau cov neeg taug txoj kev zoo. 13 HUAB TAIS muaj hwj huam, tus tso siab rau koj, nws txoj hmoov zoo !

1 Ua rau tus coj nkauj. Kos Les cov tub zaj. Nkauj paj nruag. 2 HUAB TAIS, koj nyiam koj lub teb chaws ! Koj coj Yas Kos cov neeg nyob txim pej kum teb rov qab los. 3 Koj daws koj haiv neeg qhov yuam kev. Koj zam nws cov txhaum. 4 Koj tshem koj lub siab npau, koj thim koj lub siab ceev. 5 Tswv Ntuj, tus cawm peb, thov koj coj peb rov qab los ! Koj txhob chib nyeej rau peb. 6 Koj puas yuav npau taws rau peb mus li, puas yuav npau rau peb mus tiam dhau tiam? 7 Tus yuav ua kom peb muaj sia muaj zog, tsis yog koj lod? Tus yuav yog koj haiv neeg lub chaw zoo siab, tsis yog koj lod? 8 HUAB TAIS, koj ua kom peb pom koj hlub peb mas ! Koj pub koj txoj kev cawm rau peb ! 9 Kuv mloog saib HUAB TAIS Tswv Ntuj hais li cas. Nws hais tias : “Nej nyob thaj yeeb” rau nws haiv neeg thiab rau cov ntseeg nws. Tab sis lawv yuav tsis txhob rov qab mus taug lawv txoj kev vwm. 10 Nws txoj kev cawm los txog ze cov hwm nws. Lub koob meej yuav tsa tsev nyob hauv peb teb chaws. 11 Kev hlub thiab kev tseeb los sib ntsib, kev Thaj Yeeb thiab kev Haum Pheej los sib qawm. 12 Kev Tseeb hlav kaus hauv ntiaj teb, hos kev Haum Pheej dauv muag saum ntuj los. 13 HUAB TAIS pub kev kaj siab, peb cov av pub qoob loo. 14 Kev Haum Pheej mus ua Huab Tais ntej, nws hneev taw rhawv ib txog kev.

1 Das Vis zaj nkauj teev ntuj. HUAB TAIS, koj tig ntsej los mas ! Koj teb kuv ! Vim kuv txom nyem, thiab kuv pluag. 2 Thov koj txuag kuv txoj sia, vim kuv npuab koj. Kuv tus Tswv Ntuj, thov koj cawm koj tus tub txib uas tso siab rau koj. 3 Huab Tais, thov koj khuv leej kuv, kuv hu koj tas hnub. 4 Huab Tais, thov koj ua kom koj tus tub txib lub siab kaj, vim kuv siab ntsws dai ncuv rau koj. 5 Huab Tais, koj siab zoo thiab txawj zam, koj ua siab dav hlub cov neeg hu txog koj. 6 HUAB TAIS, thov koj tig ntsej los mloog kuv zaj thov mas ! Thov koj ua siab ntev mloog kuv lub suab taij! 7 Hnub kuv txom nyem loj, kuv hu txog koj, koj teb kuv. 8 Huab Tais, hauv tas tsoom tswv ntuj tsis muaj leej twg zoo li koj! Tsis muaj ib yam hauj lwm yuav piv tau rau koj cov. 9 Huab Tais, tas ib tsoom kuj cuab uas koj tsim los yuav tuaj pe ntawm koj xub ntiag, Lawv yuav cav txog koj lub npe muaj koob meej. 10 Tswv Ntuj koj yog tus loj, Koj ua yam zoo nkauj zoo saib. Koj tib leeg yog Tswv Ntuj. 11 HUAB TAIS, qhia koj txoj kev rau kuv, kuv yuav mus raws nraim koj txoj kev tseem ceeb. Thov koj ua kom kuv sau siab zog los hwm koj lub npe. 12 HUAB TAIS, kuv tus Tswv Ntuj, kuv ua koj tsaug tas siab tas ntsws, kuv yuav cav txog koj lub npe nto moo mus ib txhiab ib txhis. 13 Vim koj kev hlub kuv loj tas nrho. Kuv nyob puag hauv qab ntuj txias teb tsaus, koj rub kuv tawm los. 14 Tswv Ntuj, ib co neeg muab hlob tuaj ntaus kuv, ib pab neeg txhav khem xav txo kuv txoj sia, lawv tsis quav ntsej koj. 15 Tab sis koj, HUAB TAIS yog tus Tswv Ntuj txawj zam thiab khuv leej neeg, npau taws qeeb, hlub neeg thiab ua ncaj rau neeg. 16 Thov koj tig los rau kuv; thov koj khuv leej kuv, pub koj lub zog rau koj tus tub txib, cawm koj tus ntxhais txib leej tub. 17 HUAB TAIS, thov koj ua ib lub cim tias koj nyiam kuv ; ces kuv cov yeeb ncuab pom, lawv yuav txaj muag, Tswv Ntuj, vim koj pab kuv thiab nplij kuv.

1 HUAB TAIS txhim Xis Yoos rau saum cov roob ntshiab. 2 Nws nyiam Xis Yoos cov qhov rooj tshaj Yas Kos cov tsev. 3 Tswv Ntuj lub tsheej, luag tej hais ntau zaj kwv huam qhuas koj lub koob meej ! 4 Kuv xam tias Las Has thiab Npas Npis Los yog ib co uas paub kuv. Luag tham tias : “Tus neeg ntawd yug los nyob Fis Lis Tis, nyob Tws Los, nyob Es Thias Pias”. 5 Hos thaum hais txog Xis Yoos, luag hais tias : “Txhua tus neeg puav leej yug los nyob hauv Xis Yoos. Tus Nyob Siab Tshaj txhim nws khov kho.” 6 HUAB TAIS sau rau hauv phau ntawv txheeb npe neeg li no : “Tus neeg no yug los nyob qhov no !” 7 Nws sau cov vaj txheeb thiab cov me nyuam lub npe : “Sawv daws puav leej nyob txawm hauv koj.”

1 Paj huam seev. Kos Les cov tub zaj nkauj paj nruag.. Ua rau tus coj nkauj. Al-mahalath le-annoth. Zaj qhuab qhia. Hes Maas, tus Es Las His zaj. 2 HUAB TAIS, tus Tswv Ntuj cawm kuv, hmo ntuj, kuv quaj hu txog koj. 3 Thov cia kuv cov lus thov nce tuaj txog koj. thov koj tig ntsej los mloog kuv lub suab nroo. 4 Vim kev nyuaj ntxhov tsuam kuv ntsuj plig hnyav qees, kuv txoj sia chwv ntuj txias teb tsaus. 5 Luag saib kuv yog ib tug neeg mus zwm av. Kuv zoo li tus neeg uas tu siav lawm. 6 Kuv pw hauv cov tub tuag lub lav, zoo li tus uas luag muab tua pov tseg pw hauv qhov ntxa, tus uas koj twb hnov qab nws, vim nws ploj mus deb koj. 7 Koj tso kuv pw hauv lub qhov tob tob, nyob teb chaws Tsaus Ntuj nti, hauv lub qhov ntuj. 8 Koj lub siab npau tsuam kuv hnyav, koj hliv koj cov dej nphau nphwv rau saum kuv. 9 Koj ua kom kuv cov swm neeg txav deb kuv ; koj muab kuv ua ib yam qias, rhiab neeg rau lawv ntsia. Kuv nyob kaw nti, tsis muaj kev tawm qhov twg. 10 Kev txom nyem ua kuv qhov muag nkees nkees. HUAB TAIS, kuv niaj hnub hu koj ! Kuv cev tes tuaj rau koj. 11 Koj puas yuav ua hwj huam yees ntxwv pab cov tub tuag? Cov dua nra puas yuav sawv los cav txog koj? 12 Nyob hauv qhov ntxa, lawv puas hais txog koj lub siab hlub neeg? Nyob hauv qhov ntuj, lawv puas hais txog koj lub siab ncaj? 13 Nyob teb chaws Tsaus Ntuj, puas muaj neeg paub txog yam zoo nkauj zoo saib uas koj ua? Hauv teb chaws Hnov Qab, puas muaj neeg paub txog koj txoj kev ncaj? 14 HUAB TAIS, hos kuv, mas kuv hu txog koj ! Thaum sawv ntxov, kuv zaj thov twb xub nce tuaj rau koj. 15 HUAB TAIS, vim li cas koj xyeeb kuv? Vim li cas koj zais koj ntsej muag rau kuv? 16 Txij thaum yau los, kuv txom nyem, kuv tshuav txoj sia xwb, kuv ntshai heev, kuv qaug zog. 17 Koj lub siab ceev npau taws tsuam saum kuv, koj tej lus nthe ntxhib ntxhib rhuav kuv. 18 Hnub dhau hnub, cov lus koj nyab kuv zoo li dej, lawv thaiv kuv kev. 19 Koj ua kom kuv cov npawg, cov phooj ywg txav deb kuv, tsuas tshuav qhov tsaus ntuj ua kuv luag.

1 Es Taas, tus Es Las His ib zag qhuab qhia. 2 Kuv yuav hu nkauj cav txog HUAB TAIS txoj kev hlub, kuv lub ncauj yuav tshaj kom sawv daws paub koj lub siab ncaj txheej dhau txheej. 3 Kuv hais tias : “Koj txoj kev hlub nyob ruaj nreb mus li ; koj tsa koj txoj kev ncaj rau saum ntuj.” 4 Kuv cog ib co lus rau tus kuv xaiv, kuv hais khov rau kuv tus tub txib Das Vis tias : 5 Kuv tsa koj caj ces kom nyob mus li, kuv txhim ib lub theej kiab rau koj zaum tiam dhau tiam. 6 HUAB TAIS, cuaj txheej ntuj ua tsaug rau yam zoo nkauj zoo saib koj ua, ua tsaug rau koj txoj kev tseem ceeb nyob hauv lub txoos ntshiab. 7 Nyob saum ntuj, leej twg thiaj loj luaj li HUAB TAIS? Hauv tsoom tswv ntuj, leej twg thiaj zoo li HUAB TAIS? 8 Nyob hauv tsoom ntshiab lub rooj tuav xam, Tswv Ntuj yog tus loj tas nrho tsim nyog hwm, nws yog tus muaj hwj xyeej tshaj nws ib tsoom tub ncig. 9 HUAB TAIS, Tswv Ntuj muaj hwj huam ! Leej twg thiaj muaj zog li koj? HUAB TAIS, txoj kev ncaj nyob ncig koj. 10 Koj tswj dej ntuj muab hlob, thaum dej nphau nphwv siab siab, koj cheem nws kom rov tus. 11 Koj tsuj zaj Las Has xws li tsuj ib lub cev tuag. Koj sab npab muaj zog ntaus koj cov yeeb ncuab tawg sib ncaim. 12 Cuaj txheej ntuj yog koj li ! Lub ntiaj teb yog koj tug ! Koj yog tus tsim lub sim ceeb thiab tas puas tsav yam muaj nqe nyob hauv nws. 13 Yog koj tsim sab ntuj Ped thiab sab ntuj Nrad ; roob Tas Npos thiab roob Hes Moos qw zoo siab rau koj lub npe. 14 Sab npab siab tawv ntawd, txhais tes muaj hwj huam thiab sab tes tsa siab no yog koj li. 15 Koj lub theej kiab ruaj cag rau hauv kev haum pheej thiab kev ncaj ; kev hlub thiab kev tseem ceeb mus ua koj ntej. 16 HUAB TAIS, haiv neeg uas paub npuaj teg rau koj, nws txoj hmoov zoo ! Koj lub ntsej muag ci ntsa yuav kaj nws txoj kev ! 17 Niaj hnub, thaum lawv hnov koj lub npe, lawv yuav dhia zoo siab. Koj txoj kev haum pheej tsa lawv sawv. 18 Koj yog lawv lub zog ci ntsa iab, koj lub txiaj ntsim tsa peb hauv pliag ntseg. 19 Peb daim leem phiaj tuaj ntawm HUAB TAIS tuaj, peb tus vaj yog His Xas Lais tus Ntshiab tug. 20 Yav thaud, koj yees tawm tuaj, koj hais rau koj cov ntseeg li no : “Kuv tau pab ib tug tub siab tawv, kuv tau tsa ib tug hluas hauv kuv haiv neeg. 21 Kuv nrhiav tau kuv tus tub txib Das Vis, kuv muab kuv cov roj ntshiab los pleev nws. 22 Kuv txhais tes muaj zog yuav nyob ze nws. kuv sab npab yuav ua kom nws muaj zog. 23 Tus yeeb ncuab yuav tuaj nyas tsis tau nws tua, tus ntxeev siab yuav ua tsis tau nws poob ntsej muag. 24 Vim kuv yuav tsuj cov tiv nws rau ntawm nws xub ntiag, kuv yuav ntaus cov ntxub nws. 25 Kuv txoj kev ncaj thiab kev hlub nyob ze nws, kuv lub npe yuav tsa nws hauv pliaj. 26 Kuv yuav tso dej ntuj rau hauv nws xib teg, tso cov niam dej rau hauv nws phab xis. 27 Nws yuav hu kuv tias : “Kuv txiv ! Kuv tus Tswv Ntuj ! Phab Tsua cawm kuv !” 28 Hos kuv yuav tsa nws ua tij, ua tus nyob siab tshaj tsoom vaj hauv ntiaj teb. 29 Kuv yuav hlub nws mus li. Lo lus kuv cog rau nws yuav khov. 30 Kuv tsa nws caj ces nyob ib txhis, tsa nws lub theej kiab nyob ntev li lub ntuj. 31 Yog nws cov tub tso kuv txoj cai lis choj pov tseg, tsis mus taug kuv tej kev cai, 32 yog lawv hla kuv tej lus qhuab qhia lawv, tsis khaws kuv cov lus qhia. 33 Kuv yuav xuas qws rau txim rau lawv txoj kev ntxeev siab, xuas hlua nplawm lawv qhov txhaum. 34 Tsis kav, kuv yuav tsis txiav kuv txoj kev hlub lawv, kuv yuav tsis thim cov lus kuv cog rau nws. 35 Kuv yuav tsis hla cov lus kuv cog, kuv yuav tsis hloov cov lus tawm hauv kuv lub ncauj. 36 Kuv muab kuv lub siab ntshiab los cog lus rau lub ntuj tias : kuv yuav tsis dag Das Vis ib zaug. 37 Nws caj ces yuav nyob txheej dhau txheej ; nws lub theej kiab yuav txawb ntawm kuv xub ntiag zoo li lub hnub, 38 thiab zoo li lub hli, ruaj mus li, saum ntuj ua tim khawv tsis fav xeeb saum cov huab. 39 Tab sis, tus tso koj tus pleev pov tseg, thuam nws, npau lwj npau liam rau nws, twb yog koj. 40 Koj tsis lees cov lus koj tau cog rau koj tus tub txib, koj muab nws lub kaus mom kub pov pem teb, koj ua tub qaug nws. 41 Koj rhuav nws cov laj kab, koj tsoo nws cov tuam ntsa loog zeb pob. 42 Cov neeg dua kev lwg nws ; cov nyob ze nws ua tub qaug nws. 43 Koj txhawb kom cov ntxub nws muaj zog, koj ua kom nws cov yeeb ncuab zoo siab. 44 Koj haj tseem ua kom nws rab ntsis ntaj tig rov qab, thaum nws ntaus rog, koj tsis tuaj txheem nws. 45 Koj tshem nws rab cwj ua vaj, nchuav nws lub theej kiab rau pem teb. 46 Koj txiav nws yav hluas kom luv, koj cia nws txaj muag loj. 47 HUAB TAIS, koj yuav tos txog thaum twg? Ua cas thaiv koj rau peb mus li? Koj puas yuav cia koj lub siab npau kub li hluav taws? 48 Thov koj nco ntsoov tias kuv lub neej luv npaum li cas : vim koj tsim neeg los nyob ib nyuag ntu li yaj ntshis. 49 Ua neeg nyob, leej twg thiaj li tsis pom txoj kev tuag? Leej twg thiaj dim ntawm ntuj txias teb tsaus cov rau tes? 50 HUAB TAIS, koj lub siab zoo thaud, dua twg lawm? Koj tau cog lus rau Das Vis tias koj hlub nws. 51 HUAB TAIS, thov nco txog koj cov tub txib uas luag saib tsis taus, nco txog cov haiv neeg uas kuv puag lawv hauv xub ntiag. 52 HUAB TAIS, koj cov yeeb ncuab ua tub qaug koj tus pleev. lawv nto aub ncaug saum nws hneev taw. 53 HUAB TAIS nto koob meej mus ib txhiab ib txhis ! Ua li ! Ua li !

1 Mais Xes, Tswv Ntuj tus neeg, zaj teev ntuj. HUAB TAIS, koj yog peb qhov chaw vam khom, tiam dhau tiam los txog tav no. 2 Puag thaum cov hauv roob siab tsis tau yug, koj tsis tau xeeb kom muaj av luaj thiab lub sim ceeb, koj yog Tswv Ntuj txij hnub txheej tshoj thaud ub mus rau fab lwm txheej. 3 Koj kom neeg rov mus ua av, koj hais tias : “As Das cov tub, nej rov mus ua plua av !” 4 Koj saib ib txhiab xyoo zoo li nag ib hnub, zoo li ib hnub uas dhau mus, zoo li ib teev thaum hmo ntuj. 5 Koj cheb zeej tsoom zoo li ua npau suav nruab dab ntub, lawv dua mus zoo li nroj tsuag, thaum sawv ntxov. 6 Zoo li nroj tsuag tawg paj yav sawv ntxov, ib pliag xwb dua, yav tsaus ntuj, paj nroj twb ntsws, twb qhuav tas. 7 Koj lub siab ceev siab npau ntaus peb yuav tuag, peb ntshai tshee nas vim koj npau taws ceev. 8 Koj nthuav peb cov txhaum rau ntawm koj xub ntiag, koj tso tas txhia yam peb nyiag ua rau ntawm koj lub ntsej muag ci ntsa. 9 Koj lub siab npau ceev ua kom peb lub hnub nyoog yaj ; peb sim neej tsuas ntev li xyu ib suab. 10 Zaum puav, peb lub caij ua neej ntev xya caum xyoo, yog lub cev muaj zog, nyob txog yim caum xyoo, lub caij ua neej, tsuas yog kev khwv thiab kev txom nyem ; ib pliag ntshis niaj xyoos dhau mus, ces peb ya mus thiab. 11 Leej twg thiaj paub koj qhov npau taws loj npaum li cas ? Tus yim ntshai koj, nws yim paub koj qhov npau taws muaj zog. 12 Thov koj qhia kom peb xyaum suav peb lub hnub nyoog ua neej, ces peb yuav tau ib lub siab thoob tsib. 13 HUAB TAIS, thov koj rov qab los ! Koj yuav tos ntev li cas ntxiv ? Thov koj hloov siab rov hlub koj cov tub txib. 14 Sawv ntxov tsees, thov koj pub koj lub siab hlub rau peb saj kom tsau, ces peb yuav qw zoo siab tas ib sim neej. 15 Thov koj muab kev lom zem los pauj lub caij koj cia peb raug txim, pauj cov niaj xyoo uas peb ntsib kev txom nyem. 16 Thov koj qhib koj tes dej num rau koj cov tub txib pom xyeem, qhib koj lub hwj chim ci iab rau lawv cov tub ntsia. 17 Thov kom HUAB TAIS lub siab hlub mos nyoos nqes los roos peb ! Thov koj ua kom cov hauj lwm peb txhais tes ua khov tuaj, kom cov num peb txhais tes khwv khov tuaj.

1 Tus tsa tsev rau hauv tus Nyob Siab Tshaj lub chaw tsiv nraim, hmo ntuj, nws pw hauv tus Muaj Hwj Huam qhov ntxoov. 2 Kuv hais txog HUAB TAIS, kuv hais tias : “Nws yog kuv qhov chaw nkaum, yog kuv lub yeej ntsa zeb, yog kuv tus Tswv Ntuj : kuv tso siab rau nws !” 3 Nws yog tus npo koj dim ntawm tus cuab noog lub vas, thiab cawm koj ntawm tus mob aws tsis zam siav. 4 Nws muab nws ob phab tis los vov koj. Koj khiav los nkaum hauv nws cov plaub. Nws lub siab hlub yog daim leem phiaj, yog lub tsho hlau. 5 Koj yuav tsis ntshai ntuj teb tag hmo tej vij sub vij sw, tsis ntshai xib xub ya nruab hnub nrig tuaj. 6 Koj yuav tsis ntshai tus mob aws yuj hauv qhov tsaus, tsis ntshai xwv txheej rhuav teb chaws thaum tav su. 7 Tab yog ib txhiab leej ntog ntawm koj ib sab, ib vam leej ntog ntawm koj sab xis, yuav tsis muaj dab tsi tuaj raug koj. 8 Tsuav yog koj qhib qhov muag los ntsia, koj yuav pom cov tsis hwm Ntuj raug nplua li cas, 9 vim koj hais tias : “HUAB TAIS, koj yog kuv qhov chaw nkaum !” Koj muab tus Nyob Siab Tshaj los ua koj lub tsev. 10 Qhov phem yuav tuaj tsis txog koj, yuav tsis muaj xwv txheej txav los ze koj lub tsev pheeb suab. 11 Vim HUAB TAIS yuav txib nws cov tshiab kom zov koj hauv txhua txoj kev koj mus. 12 Lawv yuav nqa koj hauv lawv txhais tes, kom koj taw txhob dawm pob zeb. 13 Koj yuav mus kev saum tsov ntxhuav thiab nab muaj taug, koj yuav tsuj tsov, tsuj zaj. 14 Vim nws npuab kuv, kuv npo nws dim. Kuv yuav pov hwm nws, vim nws paub kuv lub npe. 15 Yog nws hu txog kuv, kuv yuav teb nws, thaum nws txom nyem, kuv yuav nrog nws nyob. Kuv yuav npo nws dim, kuv yuav ua kom nws nto koob meej. 16 Kuv yuav pub nws ua neej nyob ntev xyoo kom txaus nws siab, kuv yuav cia nws pom kuv txoj kev cawm neeg.

1 Nkauj paj nruag. Nkauj seev hnub Xas Npas Tos. 2 Tsim nyog yuav ua HUAB TAIS tsaug, Tswv Ntuj Nyob Siab, tsim nyog yuav hu nkauj cav txog koj lub npe ! 3 Sawv ntxov tsees, tsim nyog yuav tshaj koj txoj kev hlub. Hmo ntuj, phim yuav tshaj koj lub siab pheej xeeb : 4 tshuab raj, ntaus nkauj nog ncas ntxuag suab qeej cav txog koj. 5 HUAB TAIS, koj cov hauj lwm ua kuv siab ntsws hom khaj. Kuv qw zoo siab rau cov dej num koj txhais tes ua. 6 HUAB TAIS, koj cov dej num loj tas nrho ! Koj zaj tswv yim tob tas nrho ! 7 Tus neeg ruam tsis paub dab tsi, tus neeg tswv yim yau, tsis to taub tias: 8 Cov tsis hwm Ntuj hlob zoo li nroj, cov ua phem rau luag tawg paj tshiab nra, tab sis lawv yuav raug rhuav pov tseg mus li. 9 Hos, koj ua HUAB TAIS nyob txheej ntuj saud mus ib txhiab ib txhis. 10 HUAB TAIS, koj ntsia koj cov yeeb ncuab saib, lawv yuav tuag, cov neeg ua phem tawg, sib ncaim tas. 11 Koj tsa kuv lub hauv pliaj ntseg, zoo li twm lub, koj muab roj tshiab los ywg kuv. 12 Kuv qhov muag pom cov tuaj nyas kuv ; kuv pob ntseg hnov cov neeg phem uas tuaj tua kuv. 13 Tus siab ncaj hlob zoo li tsob kuj yem, nws tshoom siab li tsob ntoo ciab nyob Lis Npas. 14 Lawv nrhau cag ruaj rau hauv HUAB TAIS tsev, lawv hlob hauv peb tus Tswv Ntuj cov tshav loog. 15 Tab yog laus lawm, lawv tseem txi txiv, lawv tus txha ntoo muaj dej yug, lawv cov nplooj ntsuab mos nyoos. 16 Lawv tshaj HUAB TAIS txoj kev ncaj, lawv hais tias : “Huab Tais yog kuv phab tsua ! Tsis muaj ib yam nkhaus nyob hauv nws !”

1 HUAB TAIS ua vaj, nws hnav hwj chim muaj tsim. HUAB TAIS hnav zam, nws muab lub zog los sia duav. Lub ntiaj teb ruaj nreb, tsis txav chaw. 2 Txij txheej tshoj thaum ub los, koj lub theej kiab khov kho. Koj ib txwm nyob. 3 HUAB TAIS, cov dej sawv tsees nphau tuaj ! Cov dej qhib suab nroo nrov nrov tuaj ! Cov dej nthe ua suab nrov ntxhe doog diaj. 4 HUAB TAIS nyob saum txheej ntuj siab, nws muaj hwj xyeej tshaj cov dej loj lub suab nroo, tshaj hiav txwv cov nplaim dej lub suab nroo. 5 Koj cov cai tswj fwm meej tas nrho. HUAB TAIS, txoj kev ntshiab ntim koj lub tsev zoo nkauj mus txhiab niag tim puas xyoo.

1 HUAB TAIS, tus Tswv Ntuj rob caub, tus Tswv Ntuj pauj qhov phem, koj ua kom peb paub koj mas ! 2 Tus txiav txim rau ntiaj teb, thov koj sawv mas ! Koj muab tus nqe txhaum pauj rau cov neeg muab hlob. 3 HUAB TAIS, cov neeg tsis hwm ntuj no yuav nyob hov ntev ? Cov tsis hwm ntuj yuav yeej txog thaum twg ? 4 Cov neeg phem no cuab lus, hais lus siab luag tej, nyiam khav theeb. 5 HUAB TAIS, lawv tsuj koj haiv neeg ! Lawv ua koj lub cuab tam poob ntsej muag. 6 Lawv tua tus poj ntsuam thiab tus vaim kum neeg, lawv txo cov ntsuag nos siav. 7 Lawv hais tias : “HUAB TAIS tsis pom txog tej ntawd. Yas Kos tus Tswv Ntuj tsis paub txog dab tsi. 8 Tsoom neeg ruam, nej yuav tsum paub ! Tsoom neeg hlwb tsis nthuav, hnub twg nej mam yuav to taub ? 9 Tus cog pob ntseg rau neeg, nws tsis txawj hnov lus lod ? Tus puab qhov muag rau neeg, nws tsis txawj ntsia lod ? 10 Tus cob ib tsoom kuj cuab, nws tsis txawj nplua txim lod ? Twb yog nws pub kev txawj ntse rau neeg. 11 HUAB TAIS paub zaj tswv yim neeg xav, nws paub tias yam neeg xav yog cua. 12 HUAB TAIS, tus uas koj qhuab qhia, nws txoj hmoov zoo, tus koj muab koj txoj cai lij choj rau nws coj, nws txoj hmoov zoo. 13 Hnub muaj kev ntxhov, nws yuav so. Hos lub qhov faus cov tsis hwm ntuj tob zuj zus. 14 Vim HUAB TAIS tsis nrauj nws haiv neeg, nws tsis muab nws lub cuab tam laim pov tseg. 15 Sawv daws yuav rov txiav txim raws kev haum pheej, tas tsoom siab ncaj yuav mus raws kev haum pheej. 16 Leej twg yuav daws kuv ntawm cov neeg phem no ? Leej twg yuav tuaj kuv tog hais tiv cov neeg ua phem no ? 17 Yog HUAB TAIS tsis tuaj pab kuv, mas tshuav tsis ntev kuv yuav poob hauv teb chaws ntsiag to. 18 Thaum kuv hais tias : “Kuv yuav ntog !” HUAB TAIS, koj lub siab hlub txheem kuv. 19 Thaum kev txhawj laum kuv, koj tej lus nplij ua kom kuv zoo siab. 20 Lub theej kiab tua neeg ntawd tsim kev txom nyem, tsis quav ntsej cov cai lij choj, nws puas nrog koj koom siab ? 21 Lawv txo tus neeg ncaj txoj sia, lawv muab txim rau tus tsis txhaum. 22 Tab sis HUAB TAIS yog kuv lub yeej ntsa zeb, kuv tus Tswv ntuj yog lub tsua kuv khiav los nkaum. 23 Nws ua kom lawv qhov phem rov rhuav lawv. Nws ua kom lawv nyob ntsiag to vim lawv siab phem. Peb tus HUAB TAIS Tswv Ntuj ua kom lawv nyob ntsiag to.

1 Nej tuaj ! Peb qw zoo siab rau HUAB TAIS, peb qw cav txog lub tsua cawm peb ; 2 Peb txav los ntawm nws xub ntiag, ua nws tsaug, peb qw npuaj teg hu nkauj cav txog nws. 3 Vim HUAB TAIS yog tus Tswv Ntuj loj, tus vaj loj nyob siab dua txhua tus tswv ntuj. 4 Nws tuav cov qhov ntuj tob hauv ntiaj teb rau hauv nws txhais tes. Cov hauv roob siab yog nws li. 5 Dej ntuj yog nws li, yog nws tsim, cov tuam teb yog nws tug, yog nws ob txhais tes puab ! 6 Nej chaws los ! Peb khoov cev, peb pe ; peb txhos caug pe tus HUAB TAIS uas tsim peb los ! 7 Nws yog peb tus Tswv Ntuj. Peb yog nws haiv neeg, uas nws hwj mus noj zaub, yog pab yaj uas nws zov rawv. 8 Hnub no, nej cia li mloog nws lub suab ! Txhob cia nej lub siab tawv ncauj zoo li nyob Mes Lis Npas, zoo li nyob Mas Xas, hauv teb chaws suab puam, 9 Nyob ntawd, nej phaj yawg tab tom pom kuv cov hauj lwm muaj hwj huam, tsis kav lawv tseem twv kuv thiab sim kuv. 10 Tiam neeg ntawd ua dhuav kuv plaub caug xyoo, kuv thiaj hais tias : “Haiv neeg no lub tswv yim poob zoo lawm, lawv tsis to taub kuv tej kev.” 11 Ces kuv npau taws rau lawv, kuv txiav tias : “Lawv yuav tsis tau mus txog kuv lub teb chaws so.”

1 Nej hu ib zag nkauj tshiab rau HUAB TAIS, tas lub ntiaj teb, nej hu nkauj rau HUAB TAIS mas ; 2 Nej hu nkauj rau HUAB TAIS, nej foom koob hmoov rau nws ! Hnub dhau hnub, nej tshaj nws txoj kev cawm. 3 Nej ceeb toom nws lub koob meej rau tsoom kuj cuab paub, piav nws cov dej num nto moo rau tsoom haiv neeg ! 4 Nws yog tus HUAB TAIS loj, nws nto meej nto moo , nws muaj hwj xyeej, nws nyob siab tshaj ib tsoom dab : 5 Tsoom dab qhuas uas lwm cov haiv neeg teev, tsis muaj nqi dab tsi. Hos HUAB TAIS yog tus tsim yim txheej cuaj txheej ntuj. 6 Hwj chim thiab koob meej ci ntsa iab ntawm nws xub ntiag. Nws lub zog thiab lub hwj xyeej nyob hauv nws lub tsev ntshiab. 7 Tsoom haiv neeg cov cuab cov yim, nej cav lus zoo txog HUAB TAIS, nej foom koob meej thiab hwj huam rau nws. 8 Nej foom lub npe nto moo rau HUAB TAIS . Nqa nej cov paj tshab, nej chaws mus hauv nws lub loog. 9 Nej txhos caug hawm HUAB TAIS vim nws kev ntshiab tawm ntsa iab. Tas ntiaj teb, nej tshee na ntawm nws xub ntiag mas ! 10 Nej hais rau cov kuj cuab tias : “HUAB TAIS ua vaj. Lub ntiaj teb thiaj nyob ruaj, tsis qeeg tsis co. Nws txiav txim rau txhua haiv neeg raws kev haum pheej.” 11 Kom lub ntuj zoo siab, lub teb dhia daj dhia luag, kom dej ntuj thiab cov tsiaj uas nyob hauv luag ua suab ntas ntua ! 12 Kom cov liaj cov teb nqaum paj nqaum nruas, kom txhua hom xyoob ntoo tom hav zoov nqee suab lom zem 13 rau ntawm HUAB TAIS xub ntiag, vim nws tuaj lawm, nws tuaj tswj fwm lub ntiaj teb, nws tswj fwm lub sim ceeb raws txoj kev haum pheej, nws tswj fwm cov haiv neeg nyob hauv txoj kev ncaj.

1 HUAB TAIS ua vaj. Kom lub ntiaj teb hom khaj, kom tas cov ntug hiav txwv dhia daj dhia luag ! 2 Cov huab thiab qhov tsaus ntuj dub nciab nyob ncig nws ; kev haum pheej thiab kev ncaj yog chaw txawb nws lub theej kiab. 3 Hluav taws mus ua nws ntej, cig mus kub cov neeg ntxub nws uas nyob ze nws txoj kev. 4 Nws cov kab xob laim ci tuaj kaj lub qab ntuj ; ntiaj teb av pom, av tshee na ; 5 Cov toj roob siab yaj xws ciab ntab nyob ntawm HUAB TAIS xub ntiag, ntawm tus HUAB TAIS kav ntiaj teb xub ntiag. 6 Yim txheej cuaj txheej ntuj tau tshaj nws txoj kev ncaj, tas ib tsoom haiv neeg tau pom nws lub hwj chim : 7 “Kom tsoom neeg teev mlom txaj muag, vim lawv qhuas tej yam cuav. Tas nej ib tsoom dab, nej txhos caug pe ntawm HUAB TAIS xub ntiag mas !” 8 Xis Yoos hnov, nws zoo siab ; HUAB TAIS, cov tsheej nyob Yus Das teb hom khaj, vim koj txiav txim lawm ! 9 HUAB TAIS, koj yog tus nyob siab dua ntiaj teb. Koj nyob siab dua tas cov dab tib si. 10 Nej cov uas nyiam HuabTais, nej ntxub kev phem mas ! Nws txuag cov neeg ntseeg txog nws txoj sia, nws npo lawv dim ntawm cov tsis hwm ntuj txhais tes. 11 Qhov pom kev sawv los ziab tus neeg ncaj ; Kev kaj siab sawv los ziab cov siab dawb. 12 Cov neeg ncaj, nej zoo siab vim HUAB TAIS, nej cav txog nws txoj kev ntshiab kom sawv daws nco ntsoov txog.

1 Nej hu ib zag nkauj tshiab rau HUAB TAIS, vim nws ua dej num muaj tsim nto moo. Nws sab xis, nws sab npab ntshiab ua kom nws yeej. 2 HUAB TAIS ua kom sawv daws paub nws txoj kev yeej ; nws muab nws txoj kev ncaj rau cov kuj cuab pom. 3 Nws rov nco txog nws txoj kev hlub thiab npuab neeg, uas nws muab los hlub His Xas Lais lub cuab lub yig. Tas npoo ntuj npoo ntiaj teb tau pom peb tus Tswv Ntuj txoj kev yeej. 4 Tas Ntiaj teb, nej qw cav txog HUAB TAIS ! Nej qhib suab hu nkauj lom zem ntxuag suab paj nruag ! 5 Nej ntaus nkauj nog ncas rau HUAB TAIS, ntaus nkauj nog ncas ntxuag suab raj suab qeej, 6 Nej tshuab xyu tshuab hom ntxuag suab kub nyuj, nej dhia daj dhia luag cav txog tus vaj, txog tus HUAB TAIS. 7 Kom dej ntuj thiab cov tsiaj uas nyob hauv rag kev lom zem nroo ntws, Kom lub qab ntuj thiab tsoom neeg ua lom zem ntsuag zees ! 8 Kom cov niam dej npuaj teg ! Kom cov roob nrog lawv qw lom zem 9 nyob ntawm HUAB TAIS xub ntiag, vim nws tuaj tswj fwm lub ntiaj teb. Nws yuav tswj fwm qab ntuj neeg raws kev haum pheej, tswj fwm cov haiv neeg raws kev ncaj.

1 HUAB TAIS ua vaj : kom cov haiv neeg tshee ! Nws zaum saum cov tshiab Kes Lus Npis, kom ntiaj teb qeeg. 2 HUAB TAIS loj nyob saum Xis Yoos nws nyob siab dua ib tsoom haiv neeg : 3 Xav kom lawv cav txog koj lub npe loj thiab muaj hwj xyeej ! Nws ntshiab ! 4 Tus vaj lub zog, yog nyiam kev ncaj. Koj tsim txhua hom cai tswj. Koj txhim kev ncaj thiab kev haum pheej nyob hauv Yas Kos. 5 Nej qhuas, nej khav txog HUAB TAIS, peb tus Tswv Ntuj, nej pe ntawm nws lub rooj tiag taw ! Nws ntshiab ! 6 Mais Xes thiab As Loos nkawd yog ob tug hauv nws tsoom leej choj, Xas Muas yog ib tug hauv cov uas vam txog nws lub npe, thaum lawv hu txog HUAB TAIS, nws teb lawv. 7 HUAB TAIS nrog lawv tham hauv tus ncej huab. Lawv coj nws tej kev cai. Lawv mloog cov cai lij choj uas nws muab rau lawv. 8 HUAB TAIS, peb tus Tswv Ntuj, koj teb lawv, koj yog ib tug Tswv Ntuj siab ntev rau lawv, tab sis koj pauj lawv qhov phem . 9 Nej qhuas, nej cav txog HUAB TAIS, peb tus Tswv Ntuj ; nej pe tig rau pem nws lub roob ntsiab, vim peb tus HUAB TAIS Tswv Ntuj ntshiab tiag !

1 Tas lub ntiaj teb, nej qw cav txog HUAB TAIS ! 2 Nej xyiv fab hlo tsob hwb HUAB TAIS ; nej luag ntxhi chaws los ntawm nws xub ntiag ! 3 Nej cia li lees tias HUAB TAIS yog Tswv Ntuj. Nws tsim peb los, peb yog nws tug, peb yog nws haiv neeg, yog pab yaj hauv nws lub tshav zaub. 4 Nej chaws mus hauv nws cov rooj loog, nej ua nws tsaug, mus hauv nws cov tshav loog, nej cav txog nws ; nej npuaj teg hu nkauj, nej foom koob hmoov rau nws lub npe. 5 Vim HUAB TAIS siab zoo : nws hlub peb mus li, nws npuab peb txheej dhau txheej.

1 Tas lub ntiaj teb, nej qw cav txog HUAB TAIS ! 2 Nej xyiv fab hlo tsob hwb HUAB TAIS ; nej luag ntxhi chaws los ntawm nws xub ntiag ! 3 Nej cia li lees tias HUAB TAIS yog Tswv Ntuj. Nws tsim peb los, peb yog nws tug, peb yog nws haiv neeg, yog pab yaj hauv nws lub tshav zaub. 4 Nej chaws mus hauv nws cov rooj loog, nej ua nws tsaug, mus hauv nws cov tshav loog, nej cav txog nws ; nej npuaj teg hu nkauj, nej foom koob hmoov rau nws lub npe. 5 Vim HUAB TAIS siab zoo : nws hlub peb mus li, nws npuab peb txheej dhau txheej.

1 Tus neeg txom nyem zaj thov ntuj, nws tsaus muag, nws nthuav nws cov lus tu siab rau ntawm HUAB TAIS xub ntiag. 2 HUAB TAIS, koj mloog kuv zaj thov, thov kom kuv lub suab hu nrov tuaj txog koj ! 3 Thaum kuv txom nyem, thov koj txhob thaiv ntsej muag rau kuv. Hnub kuv hu txog koj, thov koj tig pob ntseg rau kuv, thov koj tsuag tsuag teb kuv. 4 Kuv txoj sia yaj zuj zus xws li pa taws, kuv cov pob txha kub hnyiab li hluav taws ciaj ncaig. 5 Kuv lub siab qhuav zuj zus zoo li cov nroj uas luag txiav. Kuv tsis nco qab noj mov. 6 Kuv niaj hnub ntsaj, kuv tsuas tshuav daim tawv qhwv pob txha. 7 Kuv zoo li tus uab lag hauv teb chaws suab puam, zoo li tus plas zov qub vaj qub tsev. 8 Kuv tsis tuaj ib tug dab ntub, kuv zoo li tus noog twm zeej nyob saum ru tsev. 9 Kuv cov yeeb ncuab niaj hnub hais lus siab kuv, lawv npau taws rau kuv, lawv siv kuv lub npe mus foom phem rau luag. 10 Tshauv yog cov mov kuv noj, kuv haus dej ntxuag kua muag. 11 Koj meem txom rau kuv, koj npau taws heev rau kuv, koj nqa kuv siab, koj muab kuv pov tseg. 12 Kuv txoj sia txav zuj zus mus xws li duab ntxoov ntxoo, kuv lub cev qhuav zuj zus xws li nroj tsuag. 13 Hos koj, HUAB TAIS, koj zaum saum theej kiab mus li, txhua tiam neeg yuav nco txog koj. 14 Koj yuav sawv, vim koj hlub Xis Yoos, zaum no, txog lub caij koj yuav khuv leej nws. Txog lub sij hawm lawm tiag ! 15 Koj cov tub txib nyiam Xis Yoos cov pob zeb, lawv hlub Xis Yoos cov plua tshauv. 16 Cov kuj cuab yuav ntshai HUAB TAIS lub npe, cov vaj nyob ntiaj teb yuav ntshai koj lub koob meej, 17 vim HUAB TAIS yuav rov txhim Xis Yoos, sawv daws yuav rov pom nws nyob hauv nws lub hwj chim, 18 nws yuav tig los mloog cov neeg poob cuab tam tej lus thov, nws yuav tsis ntiab lawv. 19 Nej sau qhov no cia rau phaj tub ki uas tseem yuav yug los, ces ib haiv neeg tshiab yuav cav txog HUAB TAIS : 20 Nws nyob saum nws lub tsev ntshiab, nws dauv muag los saib ; HUAB TAIS nyob saum txheej ntuj siab, nws ntsia ntiaj teb, 21 nws mloog cov neeg nyob txim lub suab ntsaj, cov uas luag txiav txim yuav muab tua, nws tso lawv dim. 22 Nyob Xis Yoos, sawv daws yuav tshaj HUAB TAIS lub npe, nyob Yes Lus Xas Les, sawv daws yuav cav lus zoo txog nws. 23 Thaum ntawd, cov haiv neeg thiab cov ceeb tsheej yuav sib txoos tsob hwb HUAB TAIS. 24 Nws txo kuv lub zog tom ib tog kev ; nws txiav kuv txoj sia kom luv. 25 Kuv hais tias , kuv tus Tswv Ntuj, thov txhob thau kuv hauv ib nrab neej ! Koj lub hnub nyoog nyob txhiab niag tim puas xyoo. 26 Txheej thaud, koj txawb lub ntiaj teb, lub ntuj yog dej num tawm ntawm koj txhais tes los. 27 Lawv yuav ploj, hos koj nyob. lawv yuav qub, yuav ntuag tas zoo li lub khaub tsho, koj hloov lawv zoo li hloov ris tsho, lawv yuav tseg lawv qhov chaw rau lwm tus. 28 Hos koj zoo li qhov qub mus li, koj hnub nyoog tsis muaj hnub kawg. 29 Koj cov tub txib tej me nyuam yuav muaj chaw nyob ruaj, lawv cov xeeb ntxwv yuav ua neej ntawm koj xub ntiag mus li.

1 Das Vis zaj. Kuv tus plig, koj cav lus zoo txog HUAB TAIS, kuv tej siab ntsws, nej cav lus zoo txog nws lub npe ntshiab ! 2 Kuv tus plig, koj cav lus zoo txog HUAB TAIS, txhob hnov qab nws tej paj tshab ib qho li ! 3 Nws zam koj qhov txhaum tas, nws kho koj cov mob tas tib si. 4 Nws txeeb koj txoj sia ntawm qhov ntxa los, nws lub siab hlub nqee mos nyoos roos koj. 5 Nws pub tej yam zoo los yug koj lub zog, ces koj rov hluas tuaj zoo li tus dav. 6 HUAB TAIS ua cov hauj lwm ncaj, cov raug luag tsuj, nws tsa lawv cai. 7 Nws qhia nws tej kev rau Mais Xes, nws qhia nws cov hauj lwm nto koob meej rau tsoom His Xas Lais. 8 HUAB TAIS hlub mos nyoos, nws khuv leej neeg, nws npau taws qeeb, nws hlub neeg tas nrho. 9 Nws tsis nrog neeg ua plaub mus li, nws tsis chib nyeej ntev. 10 Nws tsis nplua peb xws li peb tau txhaum, nws tsis pauj rau peb raws li tej txhaum peb ua. 11 Nws lub siab hlub cov neeg hwm nws npaum li lub ntuj nyob siab lub ntiaj teb. 12 Nws xyeeb peb cov txhaum mus deb peb, deb cuag li sab hnub tuaj nyob deb sab hnub poob. 13 HUAB TAIS hlub nqee mos nyoos rau cov hwm nws, zoo li ib leeg txiv tsev hlub nqee mos nyoos nws cov me nyuam. 14 Nws paub tias nws xuas dab tsi los puab peb, nws nco ntsoov tias peb yog plua av. 15 Leej tib neeg lub hnub nyoog ua neej nyob zoo li tsob nroj ; nws nthuav li tsob paj tawg nra tom teb : 16 cua tshuab ib nthw tuaj, lub paj ploj lawm, qhov chaw uas puas ta nws ciaj sia, twb tsis nco qab nws lawm. 17 Tab sis, HUAB TAIS txoj kev hlub roos cov hwm nws, txij puag hnub txheej tshoj thaud los, tsis muaj hnub kawg, nws ua ncaj rau lawv tsoom tub ki cov xeeb ntxwv. 18 Nws ua ncaj rau cov uas khaws tej lus nws cog, thiab rau cov ua raws li nws txib kom ua. 19 HUAB TAIS tsa nws lub theej kiab rau txheej ntuj saud, nws lub hwj chim ua vaj kav tas txhia yam. 20 Nej uas yog nws cov Tshiab, nej uas yog cov tub muaj peev xwm loj, nej mloog nws lus, nej uas xyiv fab mloog nws lub suab, nej cav lus zoo txog HUAB TAIS. 21 Nej uas yog nws tsoom tub rog, nej uas yog nws cov tub txib ua raws nws lub siab xav, nej cav lus zoo txog HUAB TAIS. 22 Nej uas yog cov hauj lwm tawm ntawm nws txhais tes los, nej uas nyob hauv tas txhia lub teb chaws nws kav, nej cav lus zoo txog nws. kuv tus plig, koj foom lus zoo txog HUAB TAIS.

1 Kuv tus plig, koj cav lus zoo txog HUAB TAIS ! HUAB TAIS, kuv tus Tswv Ntuj, koj loj tas nrho ! Koj hnav hwj chim ci ntsa iab : 2 koj hnav qhov pom kev zoo li ib lub tsho, koj nthuav lub ntuj zoo li ib chaws ntaub. 3 Nws txhim nws cov tsev ua ntau txheej rau saum cov dej nyob txheej ntuj saud. Nws muab huab ua nws lub tsheb ; nws mus kev saum cua ob phab tis. 4 Nws muab cua ua nws cov tub coj xo, muab nplaim taws ua nws cov tub txib. 5 Nws tsim ntiaj teb txawb rau chaw ruaj, ntiaj teb nyob ib sid tsis ua zog. 6 Koj muab dej hiav txwv los vov ntiaj teb xws li daim tsoos tsho, dej nyob tus yees saum cov roob. 7 Thaum koj tso hem thawj rau dej, dej khiav, thaum koj tso xob quaj, dej dhia tawm plaws. 8 Dej dhia nce roob, khiav nqes hav mus txog qhov chaw uas koj npaj rau nws nyob. 9 Koj txwv tsis pub dej hla dhau ciam, dej yuav tsis rov los vov ntiaj teb. 10 Nws xa cov dej txhawv mus rau hauv tej kwj : dej ntws nruab nrab tej kis roob. 11 Dej yug cov tsiaj txhu nyob nruab liaj nruab teb, cov luj qus tau dej los daws lawv qhov nqhis. 12 Cov noog ya saum ntuj khiav los nkaum ze dej, noog quaj hauv cov nplooj ntoos tuaj. 13 Koj tso nag saum koj cov tsev siab los ywg cov roob, ntiaj teb tau noj tsau haus txaus, vim cov hauj lwm koj ua. 14 Koj ua kom nroj tsuag hlob los yug tsiaj, ua kom neeg cov qoob loo hlob, kom neeg tau mov tawm nruab av los. 15 Koj ua cawv los nplij neeg lub siab, ua roj los pleev neeg lub ntsej muag kom ci tshiab. Koj ua kom mov ntxiv zog rau neeg lub plawv. 16 HUAB TAIS cov ntoo tau noj tau haus ib yam li cov ntoo mej ciab nyob Lis Npas uas nws cog. 17 Noog tuaj ua zes nyob hauv cov ntoo ntawd, os qus ua tsev rau hauv cov thuv. 18 Roob siab yog sai tej chaw nyob, roob zeb roob tsuas yog nas maum kawv tej chaw nkaum. 19 Nws tsim lub hli los cia tau xam hnub xam nyoog, tsim tau lub hnub, hnub paub nws lub caij poob qho. 20 Koj tso plhuav kev tsaus ntuj nqes los, ces yog hmo ntuj, yog lub caij tsiaj qus hauv hav xub tsuag nkag zom zaws. 21 Tsov ntxhuav nyooj laws caum nqaij taij nqaij taij hno ntawm Tswv Ntuj. 22 Thaum hnub tawm plaws tuaj, cov tsov nyias mus nraim nyias, lawv mus pw hauv lawv tej chaw nkaum. 23 Tib neeg tawm mus pib nws lub luag hauj lwm, ua nws tej qoob loo txog tsaus ntuj. 24 HUAB TAIS, koj cov hauj lwm ntau ua luaj ! Koj tsim tas txhua yam raws kev thoob tsib, cov tsiaj koj tsim los nyob puv tas ntiaj teb. 25 Nej ntsia ntawd, yog dej ntuj, loj los loj dav los dav rau txhua fab, nyob hauv, muaj tsiaj loj tsiaj me coob suav tsis tau, ntaug leev rau txhua qhov. 26 Nyob hauv dej ntuj, nkoj mus mus los los, tus Les Vis Taas uas koj tsim los nrog koj ua si, kuj nyob hauv. 27 Txhua leej txhua tus tso siab rau koj, vam ntsoov tias koj yuav pub txhiam xws rau lawv raws caij raws nyoog : 28 koj pub, lawv cev tes txais. Koj qhib koj txhais tes, lawv tau noj tsau. 29 Koj zais koj lub ntsej muag, lawv ntshai ua plhu thim xem tas ; koj thau txoj pa ntawm lawv, lawv txoj sia tu lawv rov mus ua hmoov av. 30 Koj tshuab koj txoj pa tuaj, lawv ciaj muaj sia, koj ua kom npoo av rov tshiab tuaj. 31 Xav kom HUAB TAIS lub koob meej nyob mus li, kom HUAB TAIS zoo siab rau nws tej qav tej num ! 32 HUAB TAIS tig ntsia ntiaj teb, ntiaj teb tshee ua zog koog ; nws kov cov roob, roob ncho pa lug. 33 Kuv yuav hu nkauj rau HUAB TAIS tas kuv sim neej, kuv yuav ntaus paj nruag rau kuv tus Tswv Ntuj txog hnub kawg. 34 Xav kom kuv cov lus paj huam ntxim nws siab ! Xav kom HUAB TAIS yog kuv qhov chaw zoo siab ! 35 Thov kom cov neeg txhaum ploj hauv ntiaj teb, kom txhob muaj cov neeg tsis hwm ntuj ntxiv ! Kuv tus plig, koj cav lus zoo txog HUAB TAIS ! As Les Lus Yas !

1 Nej cav lus zoo txog HUAB TAIS, nej hu txog nws lub npe, nej qhia nws cov hauj lwm nto koob meej rau txhua haiv neeg paub. 2 Nej seev nkauj rau HUAB TAIS, nej ntaus paj nruag rau nws ; nej piav nws cov hwj huam yees ntxwv tas tib si. 3 Nej cav txog HUAB TAIS lub koob meej, nej cov uas nrhiav Huab Tais, nej zoo siab mog. 4 Nej nrhiav HUAB TAIS, nrhiav nws lub zog, nrhiav nws lub ntsej muag mus li. 5 Nej nco ntsoov txog cov hwj huam yees ntxwv nws tau ua, nco ntsoov nws cov hauj lwm nto moo, nco ntsoov cov lus txiav txim tawm ntawm nws lub ncauj los. 6 Vim nej yog nws tus tub txib Has Nplas Has cov xeeb ntxwv, yog Yas Kos cov tub, yog cov nws xaiv. 7 Nws yog peb tus HUAB TAIS Tswv Ntuj, yog tus tswj fwm tas ntiaj teb. 8 Nws nco ntsoov cov lus nws cog cia, yog lus cog ruaj rau txhiab tiam tub ki. 9 Yog cov lus nws nrog Has Nplas Has cog, nws rov zeem tseeb rau His Xas Has. 10 Nws muab nws cov lus cog tsa ua cai lij choj rau Yas Kos, nws nrog His Xas Lais cog lus kav ib txhiab ib txhis. 11 Vim nws hais tias : “Kuv muab lub teb chaws Kas Nas Has pub koj, yog lub cuab tam uas kuv tshwj zias rau nej !” 12 Yav thaud, lawv tsis coob, lawv suav tau lawv cov neeg, lawv yog ib pab neeg tsawg tsiv teb tsaws chaw. 13 Lawv tsiv ib lub kuj cuab rau lwm lub kuj cuab, hla ib lub teb chaws mus rau lwm haiv neeg. 14 HUAB TAIS tsis pub leej twg quab yuam lawv, nws rau txim loj rau cov vaj vim lawv. 15 “Nej txhob kov kuv cov pleev, txhob ua phem rau kuv cov yaj saub.” 16 HUAB TAIS ua kom lub teb chaws tshaib plab ; nws ua kom txhiam laj txhiam xws tu nrho. 17 Nws xa ib tug neeg mus ua lawv ntej, yog Yos Xes uas lawv muab nws muag ua luag qhev. 18 Luag muab saw khi nws ko taw, muab khawb hlau xauv nws caj dab. 19 HUAB TAIS lo lus sim nws siab li ntawd mus txog hnub nws qhib yav tom ntej tawm los. 20 Tus vaj txib kom luag daws cov hlua khi nws, tus tswv tsoom neeg kom luag tso nws. 21 Tus vaj tsa nws ua huab tais saib tus vaj lub tsev, tsa nws ua tswv kav tus vaj lub cuab tam, 22 kom nws rub cov tub huab tais los npuab nws, kom nws qhia kev thoob tsib rau cov txwj laus. 23 Li ntawd His Xas Lais thiaj los nyob Hais Nkws Tos, Yas Kos tsiv los hauv teb chaws Kas. 24 Tswv Ntuj ua kom nws haiv neeg huam vam, muaj zog dua haiv neeg uas ntxub lawv. 25 Nws ntxeev cov Hais Nkws Tos lub siab, kom Hais Nkws Tos ntxub nws haiv neeg, kom Hais Nkws Tos hiam nws cov tub txib. 26 HUAB TAIS xa nws tus tub txib Mais Xes thiab As Loos uas nws xaiv. 27 Nkawd Huab Tais co cim muaj hwj xyeej nyob Hais Nkws Tos, ua Tswv Ntuj cov hwj huam yees ntxwv nyob teb chaws Kas. 28 Nws xa qhov tsaus ntuj tuaj, ces lub teb chaws tsaus ntuj nti, lawv tseem tiv nws lo lus. 29 Nws kom dej txia ua ntshav, lawv tej ntses tuag tas. 30 Qav dhia ua npoj ntws puv lawv lub teb chaws qav dhia npoj ntws hauv cov vaj tej chav pw. 31 Nws tso lus, nkawj ya ntxiag txhua qhov los, yoov tshaj cum ya thoob teb chaws. 32 HUAB TAIS tso lawg nqes los, nws tso xob laim cig liab vog thoob lawv teb chaws. 33 Nws ntaus lawv cov txiv cawv thiab txiv ncuav pias, nws tsoo cov ntoo hauv lawv teb chaws dam. 34 Nws qhib ncauj, ces kooj ya los, kooj txom fav coob coob suav tsis tau. 35 Kooj txom tas txhua hom nroj tsuag hauv lub teb chaws, noj tas ib puas tsav yam txiv ntoo uas txi hauv teb chaws ntawd. 36 Nws tua cov tub hlob hauv lawv lub teb chaws, tua cov tub uas yug thaum lawv nto zog plaws. 37 Nws coj nws haiv neeg tsiv mus, nqa tau nyiaj tau kub, tsis muaj ib tug hauv cov xeem yuav ntog li. 38 Hais Nkws Tos zoo siab pom lawv tawm mus, vim cov Hais Nkws Tos ntshai lawv kawg. 39 HUAB TAIS rub ib tw huab los thaiv lawv xws li ib daim ntaub, nws tso hluav taws cig kom pom kev hmo ntuj. 40 Lawv taij, nws tso ib co yij los ; nws muab qaum ntuj cov mov rau lawv noj txaus siab. 41 Nws qhib phab tsua, dej ntws sis laub sis lug tawm los, dej ntws hauv teb chaws quav poj hlob npaum li ib tug niam dej. 42 Vim HUAB TAIS rov nco txog nws lo lus ntshiab uas nws hais rau nws tus tub txib As Nplas Has. 43 Nws coj nws haiv neeg tawm luag ntxhi, nws coj nws cov xaiv mus, lawv hu nkauj ua suab ntas ntua. 44 Nws muab lwm cov kuj cuab tej av los pub rau lawv, lawv khaws xyeem lwm haiv neeg lub cuab tam los ua lawv tug. 45 Tsuav yog lawv khaws nws cov cai tswj thiab mloog nws txoj cai. As Les Lus Yas !

1 As Les Lus Yas ! Nej cav lus zoo txog HUAB TAIS, vim nws siab zoo, nws hlub neeg mus ib txhiab ib txhis. 2 Leej twg yuav hais tau HUAB TAIS lub peev xwm, leej twg yuav hais tau cov lus cav txog nws rau sawv daws hnov ? 3 Cov neeg tsom txoj kev ncaj taug, cov neeg ua raws kev haum pheej mus li, lawv txoj hmoov zoo ! 4 HUAB TAIS, thaum koj yuav hlub koj haiv neeg, thov koj nco txog kuv ! Thaum koj npo koj haiv neeg, thov koj pab kuv. 5 Kom kuv tau pom koj cov xaiv puv siab, Kom kuv lub siab kaj, vim pom koj haiv neeg zoo siab. Kom kuv tau nrog koj lub cuab tam txais koob meej. 6 Peb ua txhaum zoo li peb cov yawg koob, peb lem ntawm koj txoj kev, peb tau ua txhaum. 7 Nyob Hais Nkws Tos, peb phaj yawg tsis to taub koj cov hwj huam yees ntxwv ib qho li. Lawv tsis nco qab tej txiaj ntsim ntau ntau uas koj pub rau lawv, lawv ntxeev siab rau koj nyob ze dej ntuj, ze dej ntuj Hav Tauj. 8 Tab sis nws cawm lawv kom nws lub npe nto koob meej, kom nws tau muab nws lub zog rau lawv pom. 9 Nws hem dej ntuj Hav Tauj, ces dej qhuav ; nws coj lawv mus hauv qab thu dej zoo li taug kev hauv teb chaws suab puam. 10 Nws cawm lawv ntawm txhais tes uas ntxub lawv, nws txuag lawv ntawm yeeb ncuab txhais tes : 11 Dej rov ntws los nyab cov ntxub lawv, tsis muaj ib tug dim li. 12 Lawv thiaj ntseeg txog nws cov lus, lawv hu nkauj cav txog nws. 13 Tau tsis ntev, lawv txawm siv hnov qab tej txuj nws nyuam qhuav ua, lawv tsis tos tej dej num uas nws npaj ua rau yav pem suab ; 14 Nyob teb chaws suab puam, lawv ntshaw noj ntshaw haus, nyob tom ntuj nrag teb do, lawv sim Tswv Ntuj. 15 Nws pub yam lawv thov rau lawv, tab sis nws xa los tsawg dhau, tsis tsau lawv plab. 16 Nyob hauv lawv lub yeej so, lawv khib Mais Xes khib As Loos, uas yog leej neeg HUAB TAIS qee. 17 Av qhib plho qhov ncauj, av nqos Das Tas, av luaj quas As Npis Las pab neeg. 18 Hluav taws kub pab neeg ntawd, nplaim taws hlawv cov ntxeev siab. 19 Nyob ntawm roob Hos Les, lawv puab ib tug mlom nyuj ; lawv txhos caug pe tus mlom hlau uas lawv nchuav. 20 Lawv muab lawv lub Koob Meej pauv ib tug mlom nyuj uas yog tsiaj noj zaub. 21 Lawv tsis nco qab Tswv Ntuj, tus tau cawm lawv, tus ua tej yam loj nyob Hais Nkws Tos, 22 tus ua hwj huam yees ntxwv loj nyob teb chaws Kas, tus ua tej yam uas neeg ntshai tas nrho nyob ze dej ntuj Hav Tauj. 23 Nws txiav tias nws yuav tua lawv tu noob tab sis Mais Xes, tus nws xaiv, nyob ntawm Tswv Ntuj xub ntiag, rau siab ntso ua kom Tswv Ntuj tig nws lub siab npau tsis txuag siav rau lwm qhov. 24 Lawv thuam lub teb chaws xis neeg siab, lawv tsis ntseeg Huab Tais lo lus. 25 Nyob hauv lawv cov tsev tsam phooj, lawv cem, lawv yws, tsis mloog HUAB TAIS lub suab. 26 Nws tsa tes, nws cog lus tias nws yuav tua lawv nyob teb chaws suab puam, 27 nws yuav ua kom lawv cov xeeb zeej xeeb ntxwv ncaim mus rau txhua lub teb chaws, nws yuav tua lawv nyob hauv cov teev dab lub teb chaws. 28 Lawv mus ua tus Npas Has nyob Pes Os qhev, lawv noj cov txim laig rau cov neeg tuag. 29 Lawv ua tas puas tsav yam mob Tswv Ntuj siab, ces xwv txheej loj tawm plaws hauv lawv. 30 Ces Phis Nes Has sawv ntsug, nws txiav txim, xwv txheej tu nrho. 31 Qhov nws ua ntawd luag muab xam ua kev ncaj tiam dhau tiam mus li. 32 Lawv ua meem txom Tswv Ntuj nyob ze cov dej Mes Lis Npas. lawv ua kom Mais Xes raug txoj hmoov phem. 33 Lawv cav ncauj, tsis mloog nws zaj tswv yim, Mais Xes thiaj hais tsis xyuam xim. 34 Lawv tsis rhuav lwm cov haiv neeg raws li HUAB TAIS tau xub qhia lawv. 35 Lawv nrog cov neeg teev dab sib fim, lawv xyaum luag tej kev teev dab pe mlom . 36 Lawv tsob hwb lwm haiv neeg cov mlom, luag cov mlom ua rooj ntxiab cuab lawv. 37 Lawv muab lawv cov tub tua txi dab, muab lawv cov ntxhais pub rau dab phem. 38 Lawv hno cov ntshav tsis txhaum ntws tawm los, yog lawv tej tub tej ntxhais cov ntshav uas lawv muab tua txi cov dab mlom Kas Nas Has, cov ntshav tsuas lub teb chaws vuab tsuab tas. 39 Lawv tej kev txhaum ua kom lawv tsis huv tuaj, lawv tej hauj lwm coj lawv mus ua niam ntiav. 40 HUAB TAIS lub siab npau kub lug hlawv nws haiv neeg ces nws ntxub nws lub cuab tam. 41 Nws tso plhuav lawv rau lwm kuj cuab txhais tes, cov ntxub lawv tuaj tsuj tuaj kav lawv ; 42 Yeeb ncuab tuaj quab yuam lawv, lawv khoov cev hauv yeeb ncuab xib teg. 43 Ntau zaus, nws npo lawv dim rov los, tab sis lawv cam thawj rov mus hauv lawv txoj kev ntxeev siab lawv zom tob zuj zus rau hauv txoj kev txhaum. 44 Thaum nws hnov lawv quaj qw, nws ntsia lawv txoj kev txom nyem. 45 Nws rov nco txog cov lus nws cog rau lawv, nws hloov lub tswv yim tshiab, nws rov hlub lawv. 46 Nws ua kom cov neeg uas ntes lawv mus nyob txim khuv leej lawv. 47 HUAB TAIS, peb tus Tswv Ntuj, koj cawm peb mas ! Thov koj sau peb ntawm lwm cov kuj cuab rov los ua ke. Ces peb yuav cav lus zoo txog koj lub npe ntshiab, peb yuav muaj koob meej vim peb cav txog koj. 48 His Xas Lais tus HUAB TAIS Tswv Ntuj nto koob meej txij hnub txheej tshoj thaum ub mus rau txhiab niag tim puas xyoo ! Ib tsoom pej xeem hais tias : “Ua li ! As Les Lus Yas !”

1 Nej cav lus zoo txog HUAB TAIS, vim nws siab zoo, nws hlub neeg tas ib txhiab ib txhis. 2 Cov uas HUAB TAIS npo lawv dim, cov uas nws npo lawv dim ntawm cov neeg quab yuam txhais tes, kom lawv rov hais txog qhov ntawd ! 3 Cov uas nws tau sau lawv ntawm pej kum teb rov los, txij sab hnub tuaj mus txog sab hnub poob, txij pej fab mus txog ntug dej hiav txwv, kom lawv rov hais txog tej ntawd ! 4 Muaj ib txhia poob zoo rau teb chaws suab puam, lawv yuam kev mus rau txoj uas tsis muaj neeg taug, lawv nrhiav tsis tau ib lub zos muaj neeg nyob. 5 Lawv tshaib tshaib, nqhis dej heev, txoj sia yuav tso lawv tseg. 6 Thaum lawv txom nyem, lawv quaj hu HUAB TAIS, nws cawm lawv ntawm kev txhawj xeeb. 7 Nws coj lawv mus taug txoj kev ncaj kom txog ib lub tsheej muaj neeg nyob. 8 Kom lawv cav lus zoo txog HUAB TAIS, vim nws hlub, nws ua hwj huam yees ntxwv pab neeg : 9 Vim tias nws muab dej los cawm lub qa qhuav, thiab pub rau lub plab tshaib noj tsau. 10 Muaj ib txhia zaum nyob hauv qhov tsaus ntuj, nyob hauv kev tuag tus duab ntxoov ntxoo, lawv raug txim txom nyem khi rawv rau txoj saw hlau, 11 Yog vim lawv ntxeev siab rov taw tuam Tswv Ntuj cov lus qhia, lawv hnyos tus Nyob Siab Tshaj lub sim xeeb. 12 Nws tso kev txom nyem los pwv lawv, lawv ntog pem teb, tsis muaj leej twg pab lawv. 13 Thaum lawv txom nyem, lawv quaj hu HUAB TAIS, nws cawm lawv ntawm kev txhawj xeeb : 14 Nws rub lawv tawm hauv qhov tsaus ntuj, tawm hauv kev tuag tus duab ntxoov ntxoo, nws txiav cov saw khi lawv kom tu. 15 Kom lawv cav lus zoo txog HUAB TAIS vim nws hlub neeg, nws ua hwj huam yees ntxwv pab neeg ; 16 Nws tsoo tej qhov rooj tooj tawg, nws ntaus cov liaj rooj hlau plam. 17 Muaj ib txhia cia li ruam vim lawv yuam cai ua tsis ncaj, lawv cov txhaum ua kom lawv phem zuj zus. 18 Lawv dhuav txhiam xws noj, lawv twb nyob ze tub tuag lub rooj vag lawm. 19 Thaum lawv txom nyem, lawv quaj hu HUAB TAIS, nws cawm lawv ntawm kev txhawj xeeb : 20 Nws xa nws lo lus tuaj kho lawv zoo hlo nws cawm lawv dim ntawm lub qhov ntxa. 21 Kom lawv cav txog HUAB TAIS vim nws hlub, nws ua hwj huam yees ntxwv pab neeg. 22 Kom lawv txi tej thaj ua ntuj tsaug. Kom lawv qw zoo siab, tshaj nws tej hauj lwm. 23 Cov neeg uas caij nkoj mus saum dej ntuj mus ua qav ua num hauv dej loj ; 24 cov ntawd tau pom HUAB TAIS cov hauj lwm pom nws cov hwj huam yees ntxwv tom plawv hiav txwv. 25 Nws lo lus ua kom cua daj cua dub sawv tsees los nyom nplaim dej nphau nphwv. 26 Lawv nce siab rau saum ntuj, lawv rov nqes puag hauv qab thu, lawv xeev siab yuav tuag ; 27 Lawv khiv, lawv viag ped viag nrad xws li qaug cawv, lawv kev txawj tog hauv dej. 28 Thaum lawv txom nyem, lawv quaj hu HUAB TAIS, nws cawm lawv ntawm kev txhawj xeeb : 29 Nws ua kom cua daj cua dub rov nyob ntsiag to, cov dej uas nphau nphwv rov nyob tus yees. 30 Thaum lawv tau pom dej thiab cua rov ntsiag, lawv zoo siab, Tswv Ntuj coj lawv los txog lub chaw nqes nkoj uas lawv nrhiav. 31 Kom lawv cav txog HUAB TAIS vim nws hlub, nws ua hwj huam yees ntxwv pab neeg. 32 Kom lawv cav qhuas txog nws rau hauv nws haiv neeg lub txoos thiab cav txog nws hauv cov txwj laus lub rooj tuav xam. 33 Nws ua kom tej niam dej loj hloov ua teb chaws suab puam, ua kom tej qhov dej txhawv hloov ua teb chaws tshaib dej. 34 Ua kom thaj av zoo qoob loo hloov ua ib thaj av ntsev, vim cov neeg nyob txawm hauv thaj av ntawd lub siab phem. 35 Nws ua kom teb chaws suab puam hloov ua pas dej, ua kom teb chaws quav poj hloov ua dej txhawv.
36 Nws coj cov neeg tshaib plab los nyob ntawd, lawv txhim ib lub nroog xis nyob. 37 Lawv tseb nplej rau nram liaj lawv cog tej thaj txiv cawv, lawv tau de cov txiv uas lawv cog. 38 HUAB TAIS foom hmoov zoo rau lawv ces lawv huam vam, nws tsis pub kom lawv tej pab tsiaj tsawg zuj zus. 39 Yav tas lawd, lawv cob pob, tsis muaj zog zuj zus, vim txoj kev yoo tshaib yoo nqhis, kev puas kev rhuav, los kev mob kev ploj. 40 HUAB TAIS hais lus thuam cov nom tswv, nws coj lawv mus nrauj zoo rau hauv hav pos tsis muaj kev. 41 Hos nws txuag tus pluag kom txhob txom nyem, nws ua kom cov yim neeg huam vam coob ib yam li tej pab yaj. 42 Cov neeg ncaj pom li ntawd lawv zoo siab hos cov neeg dag kaw qhov ncauj. 43 Leej twg xav ua neeg thoob tsib ? Kom nws ceev faj txog tej no huv tib si, kom nws soj pom HUAB TAIS cov txiaj ntsha txiaj ntsim.

1 Ib zag paj huam seev. Das Vis zaj nkauj paj nruag. 2 Kuv tus Tswv Ntuj, kuv siab tus yees, kuv yuav hu ib zag nkauj : Kuv tus plig, koj tsim los mas ! 3 Nkauj nog ncas, thaj cheej, nej tsim nruab dab ntub los mas ! kuv yuav seev suab tsa niam nkauj hnub sawv. 4 HUAB TAIS, kuv yuav ua koj tsaug nyob hauv cov haiv neeg, kuv yuav hu nkauj rau koj nyob hauv nruab nrab cov kuj cuab ; 5 Vim koj lub siab hlub neeg loj dua lub ntuj, koj txoj kev tseem ceeb sawv siab dua txheej huab saud. 6 Tswv Ntuj, koj sawv siab siab saum txheej ntuj saud, thov kom koj lub koob meej khav tas ntiaj teb . 7 Thov koj tsa koj sab xis tuaj cawm, thov koj teb kuv, ces cov neeg uas koj nyiam yuav tau kev dim. 8 Tswv Ntuj hais li no hauv nws lub chaw ntshiab : Kuv hom khaj ! Kuv muab Xis Kes los faib, kuv ntsuas lub hav Xus Kos. 9 Nkas Las As yog kuv li lawm ; Mas Nas Xes yog kuv tug ; Es Fais yog lub kaus mom hlau saum kuv taub hau. Yus Das yog kuv tus cwj tswj pej xeem. 10 Muas yog kuv lub tais ntxuav muag. Nyob hauv Es Doos, kuv pov kuv sab khau . Kuv qw mus ntaus Fis Lis Tis. 11 Leej twg yuav coj kuv mus txog lub tsheej xov lag zeb siab ? Leej twg yuav coj kuv mus txog Es Doos ? 12 Tus ntawd tsis yog koj lod, tus Tswv Ntuj uas tso peb pov tseg, tus Tswv Ntuj uas tsis nrog peb cov tub rog tawm mus ntaus tsam ntxiv ? 13 Koj los mas, los pab peb ntaus cov ntxub peb, vim neeg rov cawm neeg tsis tau li. 14 Tswv Ntuj nrog peb, peb thiaj yuav ua tshwm yam loj : nws yog tus yuav tsuj cov ntxub peb.

1 Ua rau tus coj nkauj. Das Vis zaj nkauj paj nruag. 2 Tus Tswv Ntuj uas kuv cav lus zoo txog, thov koj txhob nyob ntsiag to. Vim lawv qhib lawv lub ncauj tsiv tsaim hais phem. Lawv tus nplaig dag hais lus txog kuv. 3 Lawv hais ib co lus ntxub kuv lawv cem kuv tsis muaj hauv paus hauv ntsis. 4 Kuv nyiam kuv hlub lawv, hos lawv liam rau kuv, tab sis kuv tseem teev Ntuj rau lawv. 5 Lawv muab qhov phem los pauj kuv cov txiaj ntsim, muab kev ntxub los pauj kuv kev phooj ywg. 6 Lawv cem li no : “Koj nrhiav ib tug tim khawv liam rau nws mas ! “Koj nrhiav ib tug neeg phem los sawv ntawm nws sab xis ! 7 “Thaum hais nws rooj plaub, thov kom luag txiav tias nws txhaum, “kom luag saib nws cov lus thov yog ib qho txhaum ntxiv. 8 “Kom nws txhob tau ua neej ntev, “cia lwm tus los sawv nws qhov chaw, 9 “Kom nws cov tub ua me nyuam ntsuag, “kom nws poj niam ua poj ntsuam ! 10 “Kom nws cov tub ua neeg loj leeb thov khawv, “kom luag caum lawv tawm hauv lawv lub tsev khaub hlab ! 11 “Kom tus tau txais nyiaj rau nws tuaj txeeb nws tej cuab yeej cuab tam, “kom cov pej kum neeg tuaj lwg tus nqe zog uas nws khwv tau ! 12 “Kom txhob muaj ib tug neeg tuaj nws tog li, “kom txhob muaj neeg hlub nws cov me nyuam ntsuag. 13 “Kom nws cov xeeb ntxwv tuag tu noob, “kom nws lub npe ploj rau nws phaj tub tiam. 14 “Kom sawv daws rov hais txog nws phaj yawg “cov txhaum rau HUAB TAIS, “kom nws niam cov txhaum txhob ploj li ! 15 “Kom ib puas tsav yam ntawd nyob nraim ntawm “HUAB TAIS xub ntiag, “thov HUAB TAIS rhuav tshem kom txhob muaj neeg nco txog “lawv nyob ntiaj teb ! 16 “Vim tias nws tsis nco ua ncaj ua ncees, “nws tsim txom tus pluag kom tuag, “ua lim hiam rau tus txom nyem, ua nws tu siab, 17 “nws nyiam kev foom tsawm, “kev tsawm rov los raug nws, “nws tsis nyiam lus foom hmoov zoo, “lo lus foom zoo txav mus deb nws, 18 “Nws npua lo lus foom phem zoo li ib lub tsho tshaj sab, “cov lus foom phem ntxaum nws lub cev zoo li dej, “ntxaum mus thawm nws tej tes taw zoo li roj. 19 “Cia qhov phem qhwv nws zoo li ib ce ris tsho, “zoo li ib txog hlab si niaj hnub zawm nws ! 20 Tej ntawd yog tus nqi ntawm lub txim txhaum uas HUAB TAIS ua pauj cov neeg liam rau kuv, thiab rau cov hais phem txog kuv ! 21 Koj ne, HUAB TAIS Tswv Ntuj, thov koj pab kuv, koj lub npe thiaj nto koob meej. Koj lub siab hlub neeg ua zoo rau kuv, Koj npo kuv dim mas ! 22 Kuv pluag, kuv txom nyem, nyob sab hauv, kuv nplooj siab ntuag. 23 Kuv dua zuj zus mus zoo li duab ntxoov ntxoo, luag caum kuv xws li caum kooj tshuab. 24 Kuv yoo mov ntau, kuv ob sab ceg tshee tshee ; tsis noj roj, kuv ib ce yuag. 25 Lawv saib kuv zoo li ib tug neeg qias teb qias chaw ; thaum lawv pom kuv, lawv co taub hau. 26 HUAB TAIS, kuv tus Tswv Ntuj, koj pab kuv mas ! Koj cawm kuv vim koj hlub. 27 Kom lawv pom tias yog koj txhais tes ua tej ntawd HUAB TAIS, tej ntawd yog koj cov dej num. 28 Lawv foom phem, hos koj, koj foom lus zoo. Lawv sawv los ntaus, lawv poob ntsej muag ! hos koj tus tub txib zoo siab. 29 Xav kom kev poob tsim los qhwv cov uas liam rau kuv, kom kev txaj muag los qhwv lawv xws li ib lub tsho tshaj sab. 30 Kuv seev suab ua HUAB TAIS tsaug, kuv yuav cav txog nws hauv nruab nrab tsoom neeg. 31 Vim nws sawv ntsug ntawm tus pluag sab xis, nws cawm tus pluag ntawm cov txwj laus txiav txim.

1 Das Vis zaj. Nkauj paj nruag. HUAB TAIS hais rau kuv tus Huab Tais hais tias : “Koj zaum ntawm kuv sab xis ! mus txog hnub kuv muab koj cov yeeb ncuab los ua rooj rau koj tiag taw !” 2 HUAB TAIS yuav tsa koj rab cwj ua vaj muaj hwj chim nyob saum Xis Yoos ! Koj kav hauv nruab nrab cov yeeb ncuab ! 3 Txij hnub koj yug los, koj muaj vaj ntxwv lub hwj chim, txij nruab thiab, txog koj yav hluas, koj txais lub koob meej ntshiab. 4 HUAB TAIS tau cog lus cia, nws tsis khuv xim nws lo lus : “Koj ua leej choj mus li, raws nraim Mes Kis Xes Des txoj kev.” 5 HUAB TAIS nyob ntawm koj sab xis : hnub nws npau taws, nws rhuav cov vaj ; 6 Nws txiav txim rau cov kuj cuab, neeg tuag sib tsub sib nias : nws tsuj neeg tej taub hau nyob thoob ntiaj teb. 7 Thaum nws mus kev, nws haus dej hauv hav, nws tsa taub hau.

1 As Les Lus Yas. Alef Kuv yuav cav txog HUAB TAIS tas siab tas ntsws Beth nyob hauv cov neeg ncaj lub rooj tuav xam thiab hauv lub txoos. Guimel 2 HUAB TAIS cov hauj lwm loj tas nrho ! Daleth Cov neeg nyiam HUAB TAIS cov hauj lwm, lawv kawm nws tej dej num. He 3 HUAB TAIS cov hauj lwm muaj hwj xyeej ntsa iab, Waw nws txoj kev ncaj nyob ib txhiab ib txhis. Zain 4 Nws xav kom peb rov hais txog nws cov hwj huam yees ntxwv ; Heth HUAB TAIS hlub neeg mos nyoos, nws nyiam zam txhaum. Teth 5 Nws pub txhiam laj txhiam xws rau cov hwm nws, Yod nws nco ntsoov cov lus nws cog. Kaf 6 Nws muab nws cov dej num muaj hwj huam rau nws haiv neeg pom, Lamed nws muab lwm cov kuj cuab lub cuab tam los pub rau nws haiv neeg. Mem 7 Cov hauj lwm tawm ntawm nws txhais tes los yog hauj lwm tseem ceeb thiab ncaj nces. Noun Nws cov lus qhuab qhia yog cov lus tsim nyog tso siab rau. Samek 8 Nws cov lus qhuab qhia nyob ruaj mus ib sid, Ain xab xeeb rau hauv kev ncaj thiab kev tseem ceeb. Pe 9 Nws xa kev dim tuaj rau nws haiv neeg, Cade nws ceeb toom lo lus nws cog kom nyob mus. Nws lub npe ntshiab muaj hwj xyeej. Resh 10 Kev thoob tsib lub hauv paus, yog hwm HUAB TAIS : Shin cov neeg hwm HUAB TAIS, lawv xyuam xim. Taw Lo lus cav txog HUAB TAIS nyob mus txheej dhau txheej.

1 As Les Lus Yas. Alef Tus hwm HUAB TAIS thiab nyiam Huab Tais cov lus qhia, Beth nws txoj hmoov zoo : Guimel 2 Nws caj ce yuav muaj zog nyob ntiaj teb, Daleth ntuj yuav foom hmoov zoo rau haiv neeg siab ncaj. He 3 Nyob hauv nws vaj tsev muaj toob xib, muaj nyiaj muaj txiaj, Waw nws txoj kev ncaj yuav nyob mus li. Zain 4 Tus neeg ncaj sawv hauv qhov tsaus ntuj. Heth Nws yog lub teeb kaj cov neeg ncaj, nws khuv leej luag, nws zam rau luag, nws ua haum pheej. Teth 5 Tus neeg txawj hlub luag, thiab qiv rau luag mas nws txoj hmoov zoo. Yod Nws tswj nws tej nyiaj txiag raws kev ncaj. Kaf 6 Tus neeg ncaj yuav nyob ruaj, Lamed sawv daws yuav nco ntsoov txog nws mus li. Mem 7 Nws yuav tsis ntshai cov lus cuav lim hiam ; Noun nws lub siab ruaj, nws tso siab rau HUAB TAIS. Samek 8 Nws lub siab tawv, nws tsis txhawj, Ain nws sawv, nws tsa taub hau ntsia nws cov yeeb ncuab. Pe 9 Nws siab dav, nws pub ntau rau cov pluag : Cade nws txoj kev ncaj yuav nyob mus li, Qof nws muaj ntsej muag, nws yuav tsa hauv pliaj, Resh 10 Tus tsis hwm ntuj pom tus siab ncaj, nws meem txom, Shin nws zim hniav rau, tab sis nws qaug zog. Taw Qhov uas cov tsis hwm ntuj ntshaw yaj tas rau nruab cua.

1 As Les Lus Yas. HUAB TAIS cov tub txib, nej cav txog nws mas, nej cav txog HUAB TAIS lub npe. 2 Kom HUAB TAIS lub npe nto moo lug, txij no mus txheej dhau txheej ! 3 Kom HUAB TAIS lub npe nto koob meej, txij thaum hnub tawm txog hnub poob qho. 4 HUAB TAIS kav ib tsoom kuj cuab, nws lub koob meej nyob siab dua txheej ntuj saud. 5 Leej twg thiaj zoo li HUAB TAIS, peb tus Tswv Ntuj? Nws zaum lub theej kiab puag saud. 6 Nws dauv muag los ntsia hauv no, nws pom lub ntuj thiab lub ntiaj teb. 7 Nws tsa tus pluag hauv plua tshauv los, nws rub tus txom nyem hauv qhov qias los. 8 Nws rub tus pluag los nrog cov tub huab tais sawv sib txig, nrog cov tub huab tais hauv nws haiv neeg ua ke. 9 Nws coj tus poj niam tsis muaj me nyuam los zaum ua niam tsev, xeeb tub xeeb kiv, siab puv npo ua ib leeg niam. As Les Lus Yas !

1 Thaum His Xas Lais tawm ntawm Hais Nkws Tos teb mus, thaum Yas Kos lub cuab lub yig tso ib haiv neeg qus tseg, 2 Yus Das ciaj ua chaw ntshiab rau HUAB TAIS so, His Xas Lais ciaj ua tsev rau nws nyob. 3 Dej ntuj pom, dej ntuj zam kev khiav, Dej Yos Las Das ntws rov qab, 4 Cov roob dhia xws li txiv laug tshis, cov pov roob dhia paj paws xws li me nyuam tshis. 5 Dej ntuj, vim li cas koj khiav ? Yos Las Das, vim li cas koj ntws rov qab ? 6 Roob siab, vim li cas nej dhia xws li txiv laug tshis, Thiab nej, pov roob, vim li cas nej dhia paj paws xws me nyuam tshis ? 7 Ntiaj teb, koj hom khaj nyob ntawm tus Tswv xub ntiag, ntawm Yas Kos tus Tswv Ntuj xub ntiag. 8 Nws yog tus muab phab tsua hloov ua pas dej, muab phab zeb xob hnia hloov ua qhov dej txhawv.

1 HUAB TAIS, txhob muab koob meej rau peb, txhob pub kom peb nto koob meej, tab sis thov ua kom koj lub npe nto koob meej, vim koj hlub neeg, vim koj yog tus coj ncaj. 2 Vim li cas cov kuj cuab thiaj hais tias : ” Lawv tus Tswv Ntuj nyob qhov twg ?” 3 Peb tus Tswv Ntuj nyob txheej ntuj saud ; nws ua tau tas ib puas tsav yam nws xav ua. 4 Lawv cov mlom dab yog nyiaj yog kub, yog neeg ob txhais tes puab : 5 Cov mlom muaj qhov ncauj, tab sis tsis txawj hais lus ; lawv muaj qhov muag, tab sis tsis pom kev. 6 Lawv muaj pob ntseg, tab sis lawv tsis hnov lus ; lawv muaj qhov ntswg, uas lawv hnia tsis tau ntxhiab ; 7 Muaj ob txhais tes, uas tsis txawj xuas dab tsi ; muaj ob txhais taw, uas tsis txawj mus kev ; tsis muaj ib lub suab tawm hauv lawv lub qa los. 8 Xav kom cov puab mlom ntawd, zoo ib yam li lawv cov mlom, xav kom cov tso siab rau cov mlom, zoo ib yam li lawv cov mlom ! 9 His Xas Lais cov tub, nej tso siab rau HUAB TAIS mas ! Nws yog tus pab lawv, yog lawv daim leem phiaj. 10 As Loos tsev neeg, nej tso siab rau HUAB TAIS mas ! Nws yog tus pab lawv, yog lawv daim leem phiaj. 11 Nej cov uas hwm HUAB TAIS, nej tso siab rau HUAB TAIS ! Nws yog tus pab lawv, yog lawv daim leem phiaj. 12 HUAB TAIS rov nco txog peb ; nws yuav foom hmoov zoo : nws yuav foom hmoov zoo rau His Xas Lais tsev neeg, nws yuav foom hmoov zoo rau As Loos tsev neeg. 13 HUAB TAIS yuav foom hmoov zoo rau cov hwm nws, nws yuav foom hmoov rau cov yau ib yam li rau cov hlob. 14 Thov kom HUAB TAIS ua nej vam meej, nej thiab nej cov me nyuam tib si ! 15 Thov kom nej tau txais koob hmoov ntawm HUAB TAIS, ntawm tus xeeb ntuj xeeb teb. 16 Yim txheej cuaj txheej ntuj yog HUAB TAIS li, hos lub ntiaj teb, nws muab pub rau neeg. 17 Cov neeg tuag, cov uas twb nqes rau hauv teb chaws Ntsiag To, tsis txawj cav txog HUAB TAIS lawm. 18 Tab sis peb, mas peb foom lus zoo rau HUAB TAIS, txij hnub no mus tas ib txhiab ib txhis. As Les Lus Yas !

1 Kuv nyiam HUAB TAIS, vim HUAB TAIS hnov kuv lub suab taij. 2 Nws tig pob ntseg los ze kuv, kuv yuav hu txog nws tas kuv sim neej. 3 Tub tuag cov hlua zoj kuv ib ce ceev, ntuj txias teb tsaus cuab hlua ntes kuv ; kev txhawj xeeb, kev tu siab laum kuv. 4 Ces kuv hu txog HUAB TAIS, kuv tuav txog nws lub npe : “HUAB TAIS ! thov koj hlub, thov koj npo kuv !” 5 HUAB TAIS hlub neeg, HUAB TAIS siab ncaj ; peb tus Tswv Ntuj txawj zam. 6 HUAB TAIS txuag cov neeg me, kuv qaug zog, nws cawm kuv. 7 Kuv tus plig, koj rov nyob tus, rov so los siav mog, vim HUAB TAIS ua zoo rau koj. 8 Koj npo kuv dim ntawm qhov tuag, koj txuag kom kuv kua muag txhob poob, hwj kuv ko taw kom txhob ntog, 9 kom kuv tau taug kev hauv cov neeg ciaj lub teb chaws nyob ntawm HUAB TAIS xub ntiag. 10 Tab yog thaum kuv hais tias : “Kuv txom nyem dhau lawm, tsis kav kuv tseem tso siab rau koj !” 11 Tsis tau chaw cuab zog li, kuv thiaj hais tias : “Txhua leej txhua tus yog neeg dag .” 12 Kuv yuav muab dab tsi los pauj ib puas tsav yam zoo uas HUAB TAIS ua rau kuv ? 13 Kuv yuav cev lub ntim cawm neeg, kuv yuav hu txog HUAB TAIS, kuv yuav tuav txog nws lub npe. 14 Kuv yuav pauj kuv lub yeem rau HUAB TAIS nyob ntawm nws haiv neeg xub ntiag. 15 Thaum HUAB TAIS pom nws cov ntseeg tuag, Huab Tais mob siab heev. 16 HUAB TAIS, thov koj hlub kuv, vim kuv yog koj tus tub txib, yog koj tus tub txib tiag, yog koj tus ntxhais txib tus tub. 17 Koj tau daws cov hlua khi kuv. Kuv yuav cev ib co txim los cav txog koj, kuv yuav tuav txog HUAB TAIS lub npe. 18 Kuv yuav pauj kuv lub yeem rau HUAB TAIS nyob ntawm nws haiv neeg xub ntiag, 19 nyob ntawm cov tshav loog hauv HUAB TAIS tsev, nyob hauv nruab nrab koj Yes Lus Xas Les ! As Les Lus Yas !

1 Tas ib tsoom kuj cuab, nej cav lus zoo txog HUAB TAIS. Tas ib tsoom haiv neeg, nej cav txog nws lub koob meej. 2 Vim nws lub siab hlub muaj zog tas nrho. HUAB TAIS lub siab pheej xeeb mus ib txhiab ib txhis. As Les Lus Yas !

1 Nej cav lus zoo txog HUAB TAIS, vim nws siab zoo, Nws hlub peb tas ib txhiab ib txhis. 2 Xav kom His Xas Lais rov hais tias : Nws hlub peb tas ib txhiab ib txhis. 3 Xav kom As Loos tsev neeg rov hais tias : Nws hlub peb tas ib txhiab ib txhis. 4 Xav kom cov neeg hwm HUAB TAIS rov hais tias : Nws hlub peb tas ib txhiab ib txhis. 5 Thaum kuv txhawj xeeb, kuv hu txog HUAB TAIS : HUAB TAIS teb kuv, nws coj kuv mus rau qhov chaw nyab xeeb. 6 HUAB TAIS tuaj kuv tog, kuv tsis ntshai. Ib tug neeg ua tau dab tsi rau kuv. 7 HUAB TAIS tuaj kuv tog, nws pab kuv zoo tshaj lwm tus, kuv tsa taub hau siab ntsia kuv cov yeeb ncuab. 8 Khiav los nkaum hauv HUAB TAIS, zoo dua tso siab rau neeg ! 9 Khiav los nkaum hauv HUAB TAIS, zoo dua tso siab rau cov muaj peev xwm loj. 10 Tas cov kuj cuab tuaj puav kuv kev : kuv tuav txog HUAB TAIS lub npe, kuv xuas ntaj tsuav lawv. 11 Lawv puav kuv kev, lawv vij kuv : kuv tuav txog HUAB TAIS lub npe, kuv xuas ntaj tsuav lawv. 12 Lawv puav kuv zoo li ib xub nkawj ; lawv cig plaws zoo li ib cub tawg pos, kuv tuav txog HUAB TAIS lub npe, kuv xuas ntaj tsuav lawv. 13 Koj siv zog phoom kuv, thawb kuv mus tua, tab sis HUAB TAIS pab kuv. 14 “Kuv lub zog, kuv lo lus hawv tsa rog, yog HUAB TAIS !” “Nws yog tus cawm kuv.” 15 Muaj suab zoo siab, suab yeej rog nrov ntsuag qees hauv tsoom neeg siab ncaj cov tsev tsam phooj : 16 “HUAB TAIS txhais xis ua hauj lwm loj ! “HUAB TAIS txhais xis yeej ! “HUAB TAIS txhais xis ua hauj lwm loj. 17 Kuv yuav tsis tuag, kuv yuav muaj txoj sia nyob kuv yuav piav qhia txog HUAB TAIS cov dej num : 18 HUAB TAIS muab txim hnyav rau kuv, tab sis nws tsis tso kuv raug kev tuag. 19 Nej qhib rooj vag rau kuv mus hauv txoj kev ncaj, kuv yuav chaws mus cav txog HUAB TAIS. 20 – Yog HUAB TAIS lub rooj vag : kom cov siab ncaj chaws hauv nws lub rooj vag mas ! 21 Kuv cav lus zoo txog koj, vim koj teb kuv, koj yog tus cawm kuv. 22 Lub pob zeb uas cov txhim tsev muab pov tseg, yog lub pob zeb txheem kaum tsev. 23 Qhov ntawd yog tuaj ntawm HUAB TAIS tuaj yog yam zoo nkauj tshaj rau peb qhov muag pom ! 24 Hnub no yog hnub uas HUAB TAIS tsim los rau peb : peb zoo siab, peb lub siab kaj. 25 HUAB TAIS, thov koj pub, thov koj pub kev cawm ! HUAB TAIS, thov koj pub, thov koj pub kev yeej ! 26 Tus tuaj, nws nto koob meej nyob hauv HUAB TAIS lub npe ! -Peb nyob hauv HUAB TAIS tsev foom koob hmoov rau nej ! 27 HUAB TAIS yog Tswv Ntuj, nws ua kom peb pom kev : nej tuav rev nplooj ntawm tes, nej nqaum paj nqaum nplooj ua kab sab, mus txog cov kub nyuj pem thaj txi ntuj. 28 – Koj yog kuv tus Tswv Ntuj ! Kuv ua koj tsaug, Kuv tus Tswv Ntuj kuv cav txog koj. 29 Nej cav lus zoo txog HUAB TAIS vim nws siab zoo nws hlub peb tas ib txhiab ib txhis.

Alef 1 Cov tau txoj hmoov zoo yog cov neeg coj tus cwj pwm ncaj ncees, yog cov ua raws nraim HUAB TAIS Txoj Cai. 2 Cov tau txoj hmoov zoo yog cov ua qhov uas HUAB TAIS xav kom ua, yog cov nrhiav nws tas siab tas ntsws. 3 Lawv tsis tau ua txhaum hnyav, lawv taug nws tej kev. 4 Koj tshaj koj cov lus qhuab qhia tuaj kom sawv daws khaws cia zoo. 5 Thov kom kuv coj tus cwj pwm ruaj kuv thiaj yuav coj tau koj cov lij choj. 6 Thaum kuv qhov muag tsom ntsoov koj cov lus qhia, kuv tsis txaj muag. 7 Thaum kuv kawm tej kev koj tau txiav cia, kuv muab ib lub siab ncaj los cav txog koj. 8 Kuv khaws koj cov lij choj cia, thov koj txhob muab kuv pov tseg tu moo nrho. Beth 9 Yuav ua cas ib tug hluas txoj kev thiaj ntshiab ? Nws yuav ua raws li koj cov lo lus. 10 Kuv nrhiav koj tas siab tas ntsws, koj txhob cia kuv ua loj leeb mus deb koj cov lus qhia. 11 Kuv khaws cov lus koj cog rau nruab siab kom kuv tsis txhob ua txhaum rau koj. 12 HUAB TAIS, koj nto koob meej ! Thov koj qhia koj tej lij choj rau kuv. 13 Kuv di ncauj qog cov cai cob qhia tawm ntawm koj lub ncauj los. 14 Thaum kuv ua raws li koj xav kom ua, mas kuv kaj siab dua tus uas nrhiav tau pov haum. 15 Kuv yuav ua tib zoo xav txog koj cov lij choj kuv qhov muag yuav tsom koj tej kev. 16 Kuv nyiam koj cov lij choj, kuv tsis hnov qab koj lo lus. Guimel 17 Thov koj ua zoo rau koj tus tub txib : kom kuv muaj txoj sia, kuv thiaj yuav khaws koj lo lus. 18 Koj qhib kuv qhov muag, kuv thiaj yuav pom yam zoo nkauj tshiab khiv hauv koj Txoj Cai. 19 Kuv yog ib tug neeg tuaj ua qhua hauv ntiaj teb, koj txhob zais koj cov lus qhia rau kuv. 20 Kuv tus plig yuj plaws rau ntawm koj cov cai mus li. 21 Koj npau taws rau cov muab hlob, uas lawv khiav mus deb ntawm koj cov lus qhia. 22 Thov koj tshem txoj kev raug luag cem thiab raug luag thuam mus deb kuv, vim kuv ua qhov koj xav kom ua. 23 Tab yog cov tub huab tais zaum theej kiab sab laj liam rau kuv, koj tus tub txib tseem xav ntsoov txog koj cov lij choj. 24 Koj cov lus zeem tseeb qhia tswv yim rau kuv, ua kom kuv sov siab. Daleth 25 Zaum no, kuv da luj luam hauv qhov tshauv, thov koj ua kom kuv rov muaj txoj sia dua, raws li koj lo lus. 26 Thaum kuv qhib kuv tej kev rau koj, koj twb teb kuv, thov koj qhia koj txoj lij choj rau kuv. 27 Thov koj ua kom kuv to taub txoj kev mus txog koj cov lus qhuab qhia, kuv yuav ua tib zoo xav txog koj cov dej num zoo nkauj zoo saib. 28 Kev tu siab ua kuv kua muag poob, thov koj rov tsa kuv raws li koj lo lus. 29 Thov koj tshem txoj kev dag mus deb kuv, koj muab koj Txoj Cai pub ua txiaj ntsim rau kuv. 30 Kuv xaiv txoj kev npuab koj, kuv ua raws nraim koj cov cai tswj siab. 31 Kuv muab kuv khi rau cov hauj lwm koj xav kom ua ; HUAB TAIS, thov koj txhob cia kuv poob ntsej muag. 32 kuv khiav taug txoj kev mus hauv koj cov lus qhia vim koj qhib kuv lub siab. He 33 HUAB TAIS, thov koj qhia txoj kev mus hauv koj cov lij choj rau kuv kawm, kuv yuav mus raws nraim koj cov lij choj. 34 Thov koj ua kom kuv to taub, ces kuv yuav coj koj Txoj Cai, kuv yuav muab tas kuv lub siab lub ntsws los mloog koj Txoj Cai 35 Thov koj coj kuv kev mus hauv koj cov lus qhia, vim kuv xis siab nyob hauv koj cov lus qhia. 36 Thov koj hwj kuv lub siab kom xib rau cov hauj lwm koj xav kom ua, txhob pub qaij rau kev nrhiav nyiaj txiag. 37 Thov koj tig kuv qhov muag mus deb txoj kev npau suav dag, koj tsa kuv ciaj rov los nyob hauv koj txoj kev. 38 Koj ua raws li cov lus koj cog rau koj tus tub txib, vim koj cog lus rau cov hwm koj. 39 Thov koj tshem lo lus tsawm uas kuv ntshai, vim koj cov kev cai kho kuv zoo tas. 40 Koj ntsia saib, kuv nyiam koj cov lij choj tiag, thov koj rov muab txoj sia rau kuv nyob hauv koj txoj kev ncaj. Waw 41 HUAB TAIS, thov tso koj cov txiaj ntsha txiaj ntsim nqes los saum kuv, thov koj tso txoj kev cawm raws li koj cov lus. 42 Ces kuv yuav muaj ib lo lus teb rau tus cem kuv, vim kuv vam ntsoov koj lo lus. 43 Koj txhob rho koj lo lus tseeb ntawm kuv lub ncauj mus, vim kuv tso siab rau koj cov cai tswj siab. 44 Kuv yuav khaws koj Txoj Cai mus li, khaws tsis muaj caij tas, mus ib txhis. 45 Ces kuv yuav mus khab seeb, hauv tej qhov chaw dav, vim kuv nrhiav koj cov lij choj. 46 Kuv yuav piav txog cov hauj lwm koj xav kom ua nyob ntawm cov vaj ntxwv xub ntiag, kuv tsis txaj muag hais. 47 Kuv zoo siab tas nrho rau koj cov lus qhia, uas kuv nyiam tas siab. 48 Kuv tsa tes tuaj rau koj cov lus qhia uas kuv nyiam, thiab kuv ua tib zoo xav txog koj cov lij choj. Zain 49 Thov koj nco ntsoov lo lus koj tau hais rau koj tus tub txib, koj lo lus yog kuv lub chaw cia siab. 50 Koj lo lus nplij kuv nyob hauv kev txom nyem, koj cov lus tswj siab rov muab txoj sia rau kuv. 51 Txawm tias cov neeg muab hlob thuam kuv ti txha nkaus, los kuv tsis ncaim ntawm koj Txoj Cai. 52 HUAB TAIS, kuv rov nco txog koj tej kev cai thaum ub, tej kev cai ntawd nplij kuv siab. 53 Kuv pom cov tsis hwm Ntuj tso koj Txoj Cai pov tseg, kuv meem txom. 54 Hauv kuv tsev, kuv nyob xws li ib tug qhua, koj cov lij choj yog kuv cov txuj pag seev. 55 HUAB TAIS, hmo ntuj, kuv rov nco txog koj lub npe, ces kuv xav mloog koj Txoj Cai. 56 Kuv txoj hmoov yog mloog koj cov lij choj. Heth 57 HUAB TAIS, kuv hais tias : kuv txoj hmoov, yog ua raws li koj tej lus. 58 Kuv rau siab ntso ua kom koj lub ntsej muag luag nyav, thov koj hlub kuv raws li koj tau cog lus. 59 Kuv xav tswv yim txog kuv txoj kev, ces kuv tig kauj ruam rau yam uas koj tos kom ua. 60 Kuv maj zeeg mloog koj cov lus qhia, tsis ncua ntev li. 61 Cov neeg tsis hwm Ntuj cuab hlua khi kuv, tab sis, kuv tsis hnov qab koj Txoj Cai. 62 Ntuj teb tag hmo, kuv tseem sawv los cav lus zoo txog koj, vim cov lus ncaj ncees koj txiav. 63 Kuv nrog cov neeg hwm koj thiab ua raws li koj cov lij choj, koom ib lub siab. 64 HUAB TAIS, koj lub siab hlub phwj mus puv lub qab ntuj, koj qhia koj cov lij choj rau kuv mas. Teth 65 HUAB TAIS, koj ua kom koj tus tub txib puv siab raws li lo lus koj hais. 66 Koj qhia kev thoob tsib thiab kev txawj ntse rau kuv, vim kuv tso siab rau koj cov lus qhia. 67 Thaud, kuv tsis tau poob ntsej muag, kuv ua loj leeb ; nyiam no, kuv mloog koj cov lus tswj siab. 68 Koj yog tus siab zoo, koj ua qhov zoo, thov koj qhia koj cov lij choj rau kuv. 69 Ib co neeg muab hlob dag kom tau xyav kuv moo, hos kuv, kuv rau siab ntso tsom koj cov lus qhuab qhia. 70 Lawv lub siab khov zoo li ib co roj, hos, kuv xyiv fab vim tau saj koj Txoj Cai. 71 Kev poob ntsej muag tau coj qhov zoo rau kuv, vim kev poob ntsej muag mas kuv thiaj kawm koj cov lij choj. 72 Txoj Cai uas tawm hauv koj lub ncauj los, muaj nqe rau kuv dua ib txhab nyiaj. Yod 73 Koj ob txhais tes tsim kuv los, puab kuv khov kho ; thov koj ua kom kuv ntse, kuv yuav kawm koj cov lus qhia. 74 Cov neeg hwm koj pom kuv, lawv zoo siab, vim kuv tso siab rau koj lo lus. 75 HUAB TAIS, zaum no kuv lees tias koj txiav lus haum pheej, kuv lees tias thaum koj cia kuv poob ntsej muag, koj tau xav zaj zoo. 76 Thov koj lub siab hlub nplij kuv raws li koj tau cog lus rau koj tus tub txib. 77 Thov kom koj lo lus nqes los nyob hauv kuv, ces kuv yuav muaj txoj sia, vim kuv siab xib rau koj Txoj Cai. 78 Cov muab hlob nchuav nthwv lawv tej lus dag rau kuv ris, lawv yuav txaj muag, hos kuv, mas kuv txais koj cov lus qhia tuaj nruab siab. 79 Thov kom cov neeg hwm koj tig los cuag kuv, lawv thiaj yuav paub tej hauj lwm koj tos ntawm lawv. 80 Thov kom kuv mus raws nraim koj cov lij choj, kuv yuav tsis poob ntsej muag. Kaf 81 Kuv qaug zog, kuv seev yees tos koj txoj kev cawm, kuv tso siab rau koj lo lus. 82 Kuv nrhiav koj cov lus tswj siab, qhov ntawd ua kuv qhov muag plooj, kuv hais tias : “Thaum twg koj li tuaj nplij kuv ?” 83 Kuv zoo puav tam li lub hnab tawv qha saum pa taws, tab sis kuv tseem nco ntsoov koj cov lij choj. 84 Koj tus tub txib yuav taug txoj kev ntxhov no hov ntev? Thaum twg, koj mam li txiav siab ntaus cov neeg hiam kuv ? 85 Ib co neeg muab hlob khawb qhov tos kuv, lawv thuam koj Txoj Cai. 86 Tas koj cov lus qhia, puav leej yog lus tsis fav xeeb ; cov neeg nkhaus caum kuv, thov koj pab kuv mas. 87 Tab txawm lawv yuam kuv npaum li cas nyob ntiaj teb, kuv tsis tso koj cov lus qhia pov tseg. 88 Thov koj txuag kuv txoj sia, vim koj hlub kuv, kuv yuav khaws cov lij choj uas koj lub ncauj tshaj tawm los. Lamed 89 HUAB TAIS, koj lo lus nyob mus li, nws sawv ruaj nreb saum ntuj. 90 Koj kev hlub kav tiam dhau tiam : koj teeb lub ntiaj teb kom khov kho. 91 Tas ib puas tsav yam nyob khov kho los txog tav no, raws li koj tau teem, vim lub sim ceeb yog koj ntxhais txib tub txuas. 92 Yog koj txoj cai txhob xis kuv siab, mas kuv twb tuag hauv kev txom nyem lawm. 93 Kuv yuav tsis hnov qab koj cov lus qhia ib zaug li, koj cov lus qhia ua kom kuv ciaj ua neeg. 94 Kuv yog koj tug ! koj cawm kuv mas ! Vim kuv nrhiav koj cov lus qhia. 95 Cov tsis hwm ntuj nyas yuav tua kuv, hos kuv rau siab ntso mloog koj cov lus qhia. 96 Kuv pom nyob hauv txhua txoj kev zoo, muaj ib lub ntsis. hos koj lo lus qhia, yog txoj kev dav tsis muaj ntug. Mem 97 Kuv nyiam koj Txoj Cai tas nrho, niaj hnub, kuv rov ua tib zoo xav tuaj nruab siab. 98 Koj lo lus qhia ua kom kuv thoob tsib dua kuv cov yeeb ncuab, kuv txais los ua kuv tug mus li. 99 Kuv ntse dua kuv cov xib hwb huv si, vim kuv txais koj lo lus qhia tuaj hauv nruab siab. 100 Kuv txawj xav tom ntej tom qab dua cov txwj laus, vim kuv khaws koj cov lus qhia. 101 Kuv maim txhua txoj kev phem, vim kuv xav coj koj cov lus. 102 Kuv tsis ncaim ntawm cov lus koj tau txiav, vim koj yog tus qhia kuv. 103 Cov lus koj txib qab zib rau saum kuv tus nplaig, qab dua zib ntab hauv kuv lub ncauj ! 104 Vim koj cov lus qhuab qhia, kuv thiaj txawj xav tom ntej tom qab, kuv ntxub tej kev dag kev cuav. Noun 105 Koj lo lus yog lub teeb tsom hauv txoj kev kuv mus, yog qhov pom kev kaj kuv txoj lw. 106 Kuv cog lus, kuv rov hais meej tias : kuv yuav mloog cov lus ncaj koj tau txiav. 107 Kuv txom nyem ti txha nkaus, HUAB TAIS, thov koj ua kom kuv muaj txoj sia raws li koj lo lus. 108 HUAB TAIS, thov koj txais cov lus kuv cev rau koj, koj qhia kuv paub cov lus koj txiav. 109 Kuv tus plig nyob rawv hauv kuv xib teg, kuv tsis hnov qab koj Txoj Cai. 110 Cov neeg tsis hwm ntuj cuab ib rooj ntxiab rau kuv, tab sis, kuv tsis nrug deb ntawm koj cov lus qhia. 111 Koj lo lus zeem tseeb, yog kuv ntiag tug : yog kuv txoj kev sov siab. 112 Kuv xyaum ua raws li koj cov lij choj, vim yog cov koob haum koj pub rau kuv mus li . Samek 113 Kuv ntxub cov neeg muaj ntau lub siab, kuv nyiam koj Txoj Cai. 114 Koj yog kuv lub chaw nkaum, yog kuv daim leem phiaj, kuv tso siab rau koj lo lus. 115 Cov neeg phem, nej tig mus deb ntawm kuv, kuv yuav coj kuv tus Tswv Ntuj cov lus qhia. 116 Thov koj ua kuv lub chaw ib raws li koj tau cog lus, ces kuv yuav muaj txoj sia nyob ; kuv vam ntsoov koj, koj txhob cia kuv poob ntsej muag. 117 Koj txheem kuv, mas kuv yuav dim, kuv yuav tsis cia koj cov lij choj plam ntawm kuv qhov muag. 118 Koj ntiab cov neeg uas tawm mus deb ntawm koj cov lij choj, vim qhov lawv xam, lawv ua, yog kev dag. 119 Koj saib cov tsis hwm ntuj nyob thoob ntiaj teb zoo li ib co quav hlau, li ntawd, kuv nyiam lo lus koj zeem tseeb. 120 Kuv cev nqaij ntshai tshee na ntawm koj xub ntiag kuv pom cov lus koj txiav, kuv ntshai. Ain 121 Kuv tau ua raws kev ncaj thiab kev haum pheej ; koj txhob tso kuv rau cov hiam kuv. 122 Thov koj hais meej tias yuav pub txoj kev kaj lug rau koj tus tub txib ; kom cov muab hlob txhob yuam kuv. 123 Kuv qhov muag tos koj txoj kev cawm neeg txog tav no, qhov muag plooj, kuv qhov muag nrhiav cov lus qhia tuaj ntawm koj lub siab ncaj tuaj. 124 Thov koj ua rau koj tus tub txib raws li koj lub siab hlub, koj qhia koj cov lij choj rau kuv. 125 Kuv yog koj tus tub txib ; koj pub kom kuv txawj xav tom ntej tom qab, ces kuv yuav paub yam koj tos ntawm kuv. 126 HUAB TAIS, txog caij lis koj tes dej num lawm : vim luag twb hla koj Txoj Cai. 127 Vim li ntawd, kuv nyiam koj cov lus qhia tshaj kub, nyiam tshaj cov tseem kub zoo nkauj. 128 Li ntawd, kuv saib txhua lo lus qhia yog kev ncaj ncees ; kuv ntxub txhia txoj kev dag. Pe 129 Koj tej kev tswj fwm, zoo mloog tas nrho, vim li ntawd kuv thiaj mloog. 130 Thaum kuv nrhiav tau koj cov lus, kuv pom kev tuaj, koj cov lus ua kom cov neeg me txawj xav tom ntej tom qab. 131 Kuv rua ncauj, kuv nqus koj cov lus, kuv tshaib koj cov lus qhia. 132 Thov koj tig los rau kuv thiab hlub kuv : yog kev ncaj uas koj pub rau cov neeg nyiam koj lub npe. 133 Thov koj hwj kuv txhais taw khov, kom haum lo lus koj cog, txhob kheev kom kev phem tuaj kav tau kuv. 134 Thov koj txhiv kuv ntawm neeg txoj kev lim hiam, kuv yuav khaws koj tej lus qhia. 135 Thov koj lub ntsej muag ci tuaj rau koj tus tub txib : koj qhia koj cov lij choj rau kuv. 136 Kuv kua muag ntws, vim luag tsis coj koj Txoj Cai. Cade 137 HUAB TAIS, koj siab ncaj, koj txiav yam twg, koj txiav ncaj. 138 Koj tau hais meej koj cov lus tswj siab : yog txoj kev ncaj, yog txoj kev tseeb. 139 Thaum cov ntxub kuv tsis nco qab koj cov lus, kuv lub siab kub lug hlawv kuv kug tas. 140 Koj sim koj cov lus txib nyob hauv hluav taws, koj tus tub txib nyiam koj tej lus txib. 141 Tab txawm kuv cob pob thiab raug luag thuam, kuv tsis hnov qab koj cov lus qhia. 142 Koj txoj kev ncaj yog kev ncaj nyob ib txhiab ib txhis, koj Txoj Cai yog kev tseem ceeb. 143 Kev txom nyem thiab kev txhawj xeeb nthos nkaus kuv, tab sis, koj cov lus qhia yog kuv chaw sov siab. 144 Koj txoj cai tswj siab, yog txoj kev ncaj uas nyob ib txhiab ib txhis ; thov koj ua kom kuv txawj xav tom ntej tom qab, ces kuv yuav muaj txoj sia. Qof 145 Kuv hu koj tas siab tas ntsws, HUAB TAIS, thov koj teb kuv ; Kuv yuav mloog koj cov lus qhia. 146 Kuv hu txog koj, thov koj cawm kuv, kuv yuav hwm koj cov lus tswj siab. 147 Ntuj tsis tau kaj, kuv twb hu txog koj, kuv tso siab rau koj lo lus. 148 Hmo ntuj, kuv tsim los, kuv xav tswv yim txais koj cov lus qhia hauv nruab siab. 149 HUAB TAIS, koj hlub kuv, Koj mloog kuv lub suab, thov koj ua kom kuv ciaj ua neeg raws li koj txiav. 150 Cov neeg phem taug kev lim hiam, tuaj txog ze lawm, lawv txav mus deb ntawm koj Txoj Cai. 151 HUAB TAIS, koj nyob ze kuv, tas koj cov lus qhia yog lus tseem ceeb. 152 Kuv paub tias koj ib txwm txhim koj cov lus tswj siab kom ruaj nreb mus ib txhiab ib txhis. Resh 153 Koj ntsia kuv txoj kev txom nyem, koj npo kuv vim kuv nco ntsoov txog koj Txoj Cai. 154 Thov koj txheem kuv, koj hais lus zoo los txuag kuv ; koj ua kom kuv ciaj ua neeg, raws li koj tau cog lus. 155 Txoj kev cawm nyob deb cov tsis hwm ntuj, vim lawv tsis nrhiav koj cov lij choj. 156 HUAB TAIS, koj txoj kev zam dav tas nrho, thov koj ua kom kuv ciaj ua neeg raws li koj tau txiav. 157 cov neeg lim hiam, thiab cov ntxub kuv coob kawg, tab sis kuv tsis txav taw mus deb ntawm koj cov lus tswj siab. 158 Kuv pom cov neeg ntxeev siab, kuv dhuav lawv tas nrho, vim lawv tsis mloog koj cov lus qhia. 159 Koj ntsia saib, kuv nyiam koj cov lus qhuab qhia npaum li cas, HUAB TAIS, thov koj ua kom kuv ciaj ua neeg, vim koj hlub kuv. 160 Koj lo lus yog qhov tseem ceeb txij lub hauv paus txog lub ntsis, tas txhia yam koj lub siab ncaj tau txiav, yuav nyob ib txhiab ib txhis. Shin 161 Ib co huab tais tsim txom kuv tsis muaj hauv paus hauv ntsis, tab sis kuv lub siab tsuas ntshai koj cov lus xwb. 162 Kuv sov siab rau koj cov lus txib, zoo puav tam li tus tub rog uas txeeb tau toob xib ntau. 163 kuv tsis nyiam kev dag, kuv ntxub tas nrho, qhov kuv nyiam yog koj Txoj Cai. 164 Ib hnub, kuv cav txog koj xya zaus, vim koj txiav yam twg, koj txiav ncaj. 165 Cov neeg nyiam koj Txoj Cai, lawv txais ib txog kev thaj yeeb loj, tsis muaj dab tsi tav lawv kev. 166 HUAB TAIS, kuv tos txoj kev cawm neeg tuaj ntawm koj tuaj, kuv ua raws li koj cov lus qhia. 167 Kuv mloog thiab ua raws li koj cov lus tswj siab, kuv nyiam koj cov lus tswj siab tiag. 168 Kuv mloog koj cov lus qhia thiab lus tswj siab, tej kev kuv taug puav leej nyob ntawm koj xub ntiag. Taw 169 HUAB TAIS, thov kom kuv lub suab nrov tuaj txog koj lub ntsej muag. Thov koj ua kom kuv txawj xav tom ntej tom qab raws li koj tau hais. 170 Kom kuv lo lus thov tuaj txog koj lub ntsej muag ! thov koj npo kuv raws li koj tau qhia. 171 Kom kuv di ncauj khav txog koj lub koob meej, vim koj qhia koj cov lij choj rau kuv. 172 Kom kuv tus nplaig hu nkauj qhuas koj cov lus txib, vim tas koj cov lus qhia, yog lus ncaj. 173 Thov koj txhais tes tuaj pab kuv, vim kuv tau xaiv koj cov lus qhuab qhia. 174 HUAB TAIS, kuv ntshaw txoj kev cawm tuaj ntawm koj tuaj, koj Txoj Cai yog kuv qhov chaw sov siab. 175 Xav kom kuv muaj txoj sia nyob, kuv thiaj yuav tau cav txog koj, Cov lus koj tau txiav yuav tuaj txhawb nqa kuv. 176 Kuv poob zoo, xws li tus yaj ploj, koj tuaj nrhiav koj tus tub txib, vim kuv tsis hnov qab koj cov lus qhia.

1 Ib zag nkauj nce. Thaum kuv txhawj xeeb, kuv hu txog HUAB TAIS, nws teb kuv. 2 “HUAB TAIS, thov koj cawm kuv ntawm cov di ncauj dag, ntawm tus nplaig nkhaus !” 3 Nplaig nkhaus ! Yuav muab dab tsi rau koj ? Yuav ua dab tsi rau koj ntxiv ? 4 Yuav muab tub rog cov xub vos ntse hau, xyaw ib co hluav ncaig liab. 5 Txoj hmoov phem poob los raug kuv ! Kuv yuav tsum tsiv mus Mes Ses, mus nyob hauv Kes Das cov tsev tsam phooj. 6 Kuv nrog cov neeg ntxub kev thaj yeeb nyob ntev dhau. 7 Kuv nyiam kev thaj yeeb, tab sis thaum kuv hais txog kev thaj yeeb, lawv tsuas nyiam kev tsov kev rog.

1 Ib zag nkauj nce. Kuv tsa muag ntsia toj roob hauv pes saib : Txoj kev pab kuv yuav tuaj qhov twg tuaj ? 2 Txoj kev pab kuv tuaj ntawm HUAB TAIS tuaj, tuaj ntawm tus tsim lub ntuj lub teb tuaj. 3 Thov kom nws txhob cia koj txhais taw qaij, kom tus zov koj, txhob qaug dab ntub ! 4 Tus zov His Xas Lais, tsis qaug dab ntub tsis tsaug zog. 5 HUAB TAIS yog tus zov koj, HUAB TAIS yog tus duab ntxoov ntxoo roos koj. Nws nyob ntawm koj sab xis. 6 Nruab hnub, lub hnub yuav tsis ntaiv koj, hmo ntuj, lub hli yuav tsis dub rau koj. 7 HUAB TAIS yuav txuag koj ntawm txhua hom kev phem. Nws yuav txuag koj txoj sia. 8 HUAB TAIS yuav zov koj, thaum koj mus thiab thaum koj los,. Nws zov koj nyem no mus ib txhiab ib txhis.

1 Ib zag nkauj nce. Das Vis zaj. Thaum lawv hais rau kuv tias : “Peb mus pem HUAB TAIS tsev !” Kuv zoo siab hlo ! 2 Yes Lus Xas Les, peb ko taw nres ntawm koj cov qhov rooj ! 3 Luag txhim Yes Lus Xas Les xws li ib lub tsheej, txhua yam sib dhos ua ke. 4 Yog qhov chaw uas cov xeem nce tuaj, HUAB TAIS cov xeem neeg nce tuaj raws li txoj cai coj His Xas Lais, lawv tuaj cav lus zoo txog HUAB TAIS lub npe. 5 Yog qhov chaw uas cov theej kiab txiav txim nyob txawm, Das Vis tsev neeg cov theej kiab nyob ntawd. 6 Nej thov kom Yes Lus Xas Les tau nyob thaj yeeb : kom cov nyiam Yes Lus Xas Les tau nyob tiaj tus, 7 kom kev thaj yeeb nyob hauv koj cov ntsa loog, kom koj cov tuam tsev tau nyob nyab xeeb. 8 Vim kuv nyiam kuv cov kwv tij thiab cov phooj ywg, kuv hais tias : ” Thov kom kev thaj yeeb nyob hauv koj !” 9 Vim kuv nyiam peb tus HUAB TAIS Tswv Ntuj lub tsev, kuv thov kom koj tau nyob kaj lug.

1 Ib zag nkauj nce. Kuv tsa muag ntsia koj, tus zaum saum lub theej kiab nyob txheej ntuj saud. 2 Peb tsa muag ntsia peb tus HUAB TAIS Tswv Ntuj zoo puav tam li cov tub txib tsa muag ntsia lawv tus tswv txhais tes, zoo puav tam li tus ntxhais txib tsa muag ntsia nws niam tsev txhais tes, peb vam tias nws yuav pab. 3 HUAB TAIS, thov koj hlub, thov koj hlub peb ! Vim luag thuam peb, ua dhuav peb kawg. 4 Peb tus plig tsau, ntim tsis taus cov neeg tau nyob zoo cov lus thuam. Cov neeg muab hlob txawj thuam.

1 Ib zagj nkauj nce. Das Vis zaj. His Xas Lais, koj nco nraim mas ! Yog HUAB TAIS tsis txhob tuaj peb tog, 2 yog HUAB TAIS tsis txhob tuaj peb tog, thaum cov neeg tuaj tua peb, 3 lawv npau taws cuag dej kub, mas lawv yeej yuav muab peb nqos ciaj. 4 Dej los tshoob peb, dej sab siv tuaj nyab peb ; 5 Dej sab siv npau npuas nyab peb. 6 Peb kav tsij cav lus zoo txog HUAB TAIS, nws tsis pub peb lub cev rau lawv kaus hniav xo ! 7 Peb zoo puav tam li noog dim ntawm tus cuab ntxiab lub vas ; lub vas ntuag, peb dim plaws lawm. 8 Peb qhov chaw vam khom, yog nyob hauv HUAB TAIS lub npe, tus tswv tsim ntuj tsim teb.

1 Ib zag nkauj nce. Tus neeg tso siab rau HUAB TAIS nws zoo puav tam li lub roob Xis Yoos : nws nyob ruaj nreb tsis ua zog, nws khov mus li tas ib sid 2 HUAB TAIS nyob ncig nws haiv neeg zoo li cov roob nyob ncig Yes Lus Xas Les txij no mus, tas ib txhiab ib txhis. 3 Tus cwj vaj phem yuav tsis yuam cov siab ncaj thaj av, cov neeg ncaj yuav tsis cev tes mus taum txoj kev txhaum. 4 HUAB TAIS, thov koj ua zoo rau cov neeg zoo, rau cov neeg siab ncaj. 5 Thov kom HUAB TAIS caum cov neeg xib rau kev nkhaus, kom nws ntiab lawv mus nrog cov neeg phem nyob. Thov kom kev thaj yeeb roos His Xas Lais !

1 Ib zag nkauj nce. Thaum HUAB TAIS coj Xis Yoos cov neeg nyob txim rov los, peb xav tias yog npau suav. 2 Peb lub ncauj muaj suab luag nqhua, peb tus nplaig qw kev zoo siab, hos luag pej kum cuab hais zom zaws tias : “HUAB TAIS ua yam loj tas nrho rau lawv !” 3 HUAB TAIS ua tej yam loj rau peb tiag, peb zoo siab tas nrho. 4 HUAB TAIS, koj coj peb cov neeg nyob txim rov qab los xws li dej sab siv huam nyob teb chaws suab puam Nes Nkes. 5 Cov neeg tseb nplej, tseb ntxuag kua muag, lawv sau nplej ntxuag suab nkauj. 6 Thaum mus, lawv quaj, vim lawv ris seev noob, thaum lawv rov los, lawv hu nkauj, vim lawv ris cov rev nplej tshiab los.

1 Ib zag nkauj nce. Xas Los Moos zaj. Yog HUAB TAIS tsis txhim tsev, mas cov tub txhim tsev nkim zog pov tseg. Yog HUAB TAIS tsis zov lub tsheej, mas cov zov keeb zov hmo dag. 2 Ntuj tsis tau kaj, nej twb sawv, ntuj tag hmo nej tsis tau pw, nej noj mov ntxuag hws iab hws daw ! Hos HUAB TAIS pub txhua tsav txhua yam rau nws tus phooj ywg uas pw tsaug zog. 3 Me tub me nyuam yog lub cuab tam HUAB TAIS pub, lub txiv txi ntawm leej niam lub cev, yog koob haum. 4 Cov tub uas koj yug yav koj hluas, zoo puav tam li tej xub vos nyob hauv tub rog txhais tes. 5 Tus muaj hmoov zoo, yog tus ntim puv nws lub raj xub, yog nws nrog yeeb ncuab sib ntsuas zog ntawm cov qhov rooj tsheej, nws yuav tsis poob ntsej muag.

1 Ib zag nkauj nce. Cov neeg hwm HUAB TAIS, thiab cov mus taug nws txoj kev, lawv txoj hmoov zoo. 2 Koj tau noj tej txhiam xws koj ob txhais tes khwv, Koj txoj hmoov zoo ! Koj tau lub neej kaj siab ! 3 Koj poj niam yog zoo li tsob txiv cawv txi ncw ncw nyob hauv koj tsev. Koj cov tub zoo li cov ntsuag txiv ntoo roj, ncig koj rooj mov. 4 HUAB TAIS foom koob hmoov zoo li ntawd rau tus hwm nws. 5 Thov kom HUAB TAIS nyob saum Xis Yoos foom hmoov zoo rau koj, niaj hnub tas koj sim neej, koj yuav pom Yes Lus Xas Les vam meej, Koj yuav pom koj cov tub, lawv tej tub tej ki tom qab. Kev thaj yeeb nyob hauv His Xas Lais !

1 Ib zag nkauj nce. His Xas Lais, koj nco ntsoov mog ! Yav kuv hluas, luag tuaj ntaus kuv ntau zaus kawg, 2 Yav kuv hluas, luag tuaj ntaus kuv ntau zaus kawg, lawv ua tsis tau dab tsi rau kuv. 3 Cov tub qoob tub loo, laij teb saum kuv nraub qaum, lawv khawb tej tus kwj teb ntev ntev rau saud. 4 HUAB TAIS ua ncaj, nws txiav cov tsis hwm ntuj cov hlua tu. 5 Thov kom tas tsoom neeg uas ntxub Xis Yoos, poob ntsej muag, kom lawv thaub qab. 6 Kom lawv zoo li cov nroj uas tuaj saum tej ru tsev, nroj tsis tau hlob, nroj twb qhuav. 7 Kom tus hlais nplej, tsis tau nplej puv nws tes, tus pav nplej tsis tau cov teg nplej txaus puag ib tsuag. 8 Ces cov neeg dua kev yuav tsis hais tias : “HUAB TAIS foom hmoov zoo rau nej.” Peb tuav txog HUAB TAIS lub npe los foom koob hmoov rau nej.

1 Ib zag nkauj nce. Kuv nyob hauv qab tiv txwv, HUAB TAIS, kuv hu txog koj : 2 HUAB TAIS, thov koj mloog kuv lub suab, koj tig ntsej los mloog kuv lub suab taij. 3 HUAB TAIS, yog koj nco ntsoov tej txhaum, HUAB TAIS, leej twg thiaj yuav nyob taus ? 4 Tab sis, nyob ze koj muaj txoj kev zam, ces sawv daws hwm koj. 5 Kuv tos txog HUAB TAIS, kuv tos txog nws tas siab tas ntsws, kuv tso siab rau nws lo lus. 6 Kuv tus plig tos txog HUAB TAIS heev dua tus zov keeb tos lub caij kaj ntug, heev dua tus zov keeb tos lub caij kaj ntug. 7 His Xas Lais, koj tso siab rau HUAB TAIS mog, vim nyob ze HUAB TAIS, muaj lub txiaj ntsim, nyob ze nws, muaj kev txhiv neeg loj. 8 Nws yog tus yuav txhiv His Xas Lais ntawm lub txim txhaum tas huv si.

1 Ib zag nkauj nce. Das Vis zaj. HUAB TAIS, kuv lub siab tsis ntshaw txoj hauj lwm loj ; kuv tsis tsa muag tsom tej yam siab dhau. Kuv tsis nrhiav tej yam loj nto koob meej, tsis nrhiav tej yam uas kuv lub tswv yim tsis duav. 2 Kuv cia kuv tus plig nyob thaj yeeb, ntsiag to zoo li tus me nyuam khooj rau nws niam. Kuv tus plig nyob hauv kuv zoo li tus me nyuam. 3 His Xas Lais, koj tso siab rau HUAB TAIS, txij no mus tas ib txhiab ib txhis.

1 Ib zag nkauj nce. HUAB TAIS, thov koj nco ntsoov txog Das Vis, nco txog nws txoj kev khwv ; 2 nco txog lo lus nws cog rau HUAB TAIS, nco txog lub yeem nws fiv rau Yas Kos tus Huab Tais Muaj Hwj Huam : 3 “Kuv yuav tsis chaws mus hauv kuv lub tsev tsam phooj, yuav tsis qhau cev pw saum kuv lub txaj, 4 kuv yuav tsis pub kuv ob lub qhov muag qi, tsis kheev kuv ob daim tawv muag swb tus dab ntub, 5 yog kuv tsis xub nrhiav ib qho chaw rau HUAB TAIS nyob, tsis tau txhim ib lub tsev rau Yas Kos tus HUAB TAIS Muaj Hwj Huam so.” 6 Peb hnov tias lub Xab Cog Lus nyob Es Fas Tas, peb nrhiav tau nws tom cov nras teb Yas As. 7 “Peb kav tsij mus txog Huab Tais lub tsev, peb txhos caug pe ntawm nws lub rooj tiag taw. 8 HUAB TAIS, koj sawv los mus nyob hauv koj lub chaw so mas, koj sawv nrog lub Xab Cog Lus uas yog koj lub zog chaw nyob. 9 Kom koj cov leej choj hnav txoj kev ncaj, kom cov hwm koj qw lom zem ! 10 Vim koj tus tub txib Das Vis, koj txhob fee rau koj tus pleev !” 11 HUAB TAIS tau cog lus rau Das Vis ; yog ib lo lus tseem ceeb, nws yuav tsis thim nws lo lus : “Tus kuv yuav tsa los zaum saum koj lub theej kiab, yog ib tug tawm hauv koj los 12 Yog koj cov tub khaws cov lus kuv nrog lawv cog, thiab ua raws li cov lus kuv qhia kom lawv ua, mas lawv phaj tub kuj yuav tau zaum saum koj lub theej kiab mus li.” 13 Vim HUAB TAIS tau xaiv Xis Yoos, nws xav yuav Xis Yoos los ua nws chaw nyob. 14 “Xis Yoos yog kuv qhov chaw so mus txheej dhau txheej, kuv yuav nyob txawm saum Xis Yoos, vim kuv xav yuav nws. 15 Kuv yuav foom koob hmoov ntau rau nws tej qoob loo, kuv yuav muab mov rau nws cov pluag kom tau noj tsau. 16 Kuv yuav muab kev cawm ua tsho rau nws cov leej choj hnav, ces cov hwm nws yuav qw lom zem. 17 Nyob hauv Xis Yoos, kuv yuav ua kom Das Vis hlav ib tug kub, Kuv yuav npaj ib lub teeb cig rau kuv tus pleev. 18 Kuv yuav muab kev txaj muag rau nws cov yeeb ncuab hnav, hos lub teev kub nyob saum nws taub hau yuav tawg paj.”

1 Ib zag nkauj nce. Das Vis zaj. Thaum ib pab kwv tij nyob ua ke, lawv zoo siab tas nrho, xis lawv siab kawg ! 2 Zoo puav tam li hliv roj tsw qab rau saum lawv taub hau, ntws los ntxaum tej hwj txwv, ntxaum As Loos cov hwj txwv, ntws los ntub nws tej caj dab tshos. 3 Zoo puav tam li cov dej lwg saum lub roob Hes Moos, uas nqes los ntub cov hauv roob Xis Yoos. HUAB TAIS txiav tias nws yuav foom koob hmoov rau saud : ces nyob saud, txoj sia yuav ciaj nyob tiam dhau tiam !

1 Ib zag nkauj nce. Nej tuaj ! Tas nej sawv daws uas yog HUAB TAIS tsoom tub txib, nej uas zov hmo nyob hauv HUAB TAIS tsev, nej cav lus zoo txog HUAB TAIS. 2 Nej tsa tes rau tim thaj chaw ntshiab, nej cav txog HUAB TAIS. 3 Thov kom HUAB TAIS, tus tswv tsim ntuj tsim teb, tus nyob saum Xis Yoos foom hmoov zoo rau koj.

1 As Les Lus Yas ! Nej cav txog HUAB TAIS lub npe. HUAB TAIS cov tub txib, nej cav txog nws mas. 2 Nej uas sawv nyob hauv HUAB TAIS tsev, nej uas nyob hauv peb tus Tswv Ntuj cov tshav loog, nej cav txog nws mas. 3 As Les Lus Yas ! HUAB TAIS siab zoo ua luaj ! Nej hu nkauj cav txog nws lub npe, nws zoo nyiam tas nrho ! 4 Vim HUAB TAIS xaiv Yas Kos ua nws tug, xaiv His Xas Lais ua nws ntiag tug. 5 Kuv mas, kuv paub tias: HUAB TAIS loj ; peb tus HUAB TAIS nyob siab dua tas ib tsoom tswv ntuj. 6 HUAB TAIS tau ua tas puas tsav yam xis nws siab, nyob saum ntuj thiab nyob ntiaj teb, nyob hauv dej ntuj thiab hauv qab thu hiav txwv. 7 Nws ua kom huab sawv puag tim npoo ntiaj teb los, nws tsim cov kab xob laim ua kom dej nag nqes los ; nws tso cua tawm hauv nws cov txhab cua los. 8 Nws yog tus tua cov tub hlob nyob Hais Nkws Tos teb, tsis hais neeg los tsiaj txhu. 9 Hais Nkws Tos, nyob hauv koj teb chaws, Huab Tais xa ib co cim thiab ib co hwj huam tuaj yuam Fas Las Oos thiab yuam nws cov tub txib tas huv si. 10 Nws ntaus ib co kuj cuab coob kawg, nws tua ib co vaj muaj peev xwm loj : 11 cov As Mos Lis tus vaj Xis Hoos ; cov Npas Sas tus vaj Os, thiab tas cov vaj nyob Kas Nas Has teb. 12 Nws muab lawv cov teb chaws los pub ua cuab tam rau nws haiv neeg His Xas Lais. 13 HUAB TAIS, tas zeej tsoom yuav hais txog koj lub npe mus li. HUAB TAIS, tas zeej tsoom yuav nco txog koj tiam dhau tiam. 14 HUAB TAIS ua ncaj rau nws haiv neeg, nws ua siab muag, nws rov hlub nws cov tub txib. 15 Pej kum cuab cov mlom dab, yog xuas nyiaj thiab kub ua, yog neeg ob txhais tes puab. 16 Lawv muaj qhov ncauj, tab sis tsis txawj hais lus ; lawv muaj qhov muag, tab sis tsis pom kev ; 17 lawv muaj pob ntseg, tab sis tsis hnov lus ; tsis muaj ib txog pa tawm hauv lawv qhov ncauj los ! 18 Xav kom cov neeg puab mlom, thiab cov tso siab rau mlom, lawv zoo li cov mlom ntawd kiag ! 19 His Xas Lais tsev neeg, nej cav lus zoo txog HUAB TAIS. As Loos tsev neeg, nej cav lus zoo txog HUAB TAIS. 20 Les Vis tsev neeg, nej cav lus zoo txog HUAB TAIS. Nej cov uas hwm HUAB TAIS, nej cav lus zoo txog HUAB TAIS. 21 Nej uas nyob Xis Yoos, nej cav lus zoo txog HUAB TAIS, uas yog tus nyob txawm pem Yes Lus Xas Les. As Les Lus Yas !

1 Nej cav lus zoo txog HUAB TAIS, nws siab zoo vim nws lub siab hlub nyob tas ib txhiab ib txhis. 2 Nej cav lus zoo txog tus Tswv Ntuj kav tas tsoom tswv ntuj, vim nws lub siab hlub nyob tas ib txhiab ib txhis. 3 Nej cav lus zoo txog tus HUAB TAIS kav tas tsoom huab tais, vim nws lub siab hlub nyob tas ib txhiab ib txhis. 4 Nws tib leeg ua cov hauj lwm loj zoo nkauj zoo saib, vim nws lub siab hlub nyob tas ib txhiab ib txhis. 5 Nws muaj laj lim tswv yim ntse tsim cuaj txheej ntuj, vim nws lub siab hlub nyob tas ib txhiab ib txhis. 6 Nws txawb lub ntiaj teb khov rau saum dej, vim nws lub siab hlub nyob tas ib txhiab ib txhis. 7 Nws tsim cov teeb loj : vim nws lub siab hlub nyob tas ib txhiab ib txhis ; 8 lub hnub uas kav lub caij pom kev, vim nws lub siab hlub nyob tas ib txhiab ib txhis ; 9 lub hli thiab cov hnub qub kav lub caij tsaus ntuj, vim nws lub siab hlub nyob tas ib txhiab ib txhis. 10 Nws ntaus Hais Nkws Tos cov tub hlob, vim nws lub siab hlub nyob tas ib txhiab ib txhis. 11 Nws coj His Xas Lais tawm ntawm Hais Nkws Tos teb, vim nws lub siab hlub nyob tas ib txhiab ib txhis. 12 Nws siv nws txhais tes muaj zog, nws tsa nws txhais npab, vim nws lub siab hlub nyob tas ib txhiab ib txhis. 13 Nws phua dej ntuj Tiaj Tauj ua ob thooj, vim nws lub siab hlub nyob tas ib txhiab ib txhis. 14 Nws coj His Xas Lais hla hauv nruab nrab, vim nws lub siab hlub nyob tas ib txhiab ib txhis. 15 Nws ntxeev Fas Las Oos thiab nws tsoom tub rog rau hauv dej, vim nws lub siab hlub nyob tas ib txhiab ib txhis. 16 Nws hwj nws haiv neeg nyob hauv teb chaws suab puam, vim nws lub siab hlub nyob tas ib txhiab ib txhis. 17 Nws ntaus cov vaj loj, vim nws lub siab hlub nyob tas ib txhiab ib txhis. 18 Nws tua tej tus vaj muaj hwj xyeej, vim nws lub siab hlub nyob tas ib txhiab ib txhis, 19 Nws tua cov As Mos tus vaj Xis Hoos, vim nws lub siab hlub nyob tas ib txhiab ib txhis, 20 Nws tua Npas Sas teb tus vaj Os, vim nws lub siab hlub nyob tas ib txhiab ib txhis. 21 Nws muab lawv teb chaws los pub ua cuab tam, vim nws lub siab hlub nyob tas ib txhiab ib txhis, 22 ua cuab tam rau nws tus tub txib His Xas Lais, vim nws lub siab hlub nyob tas ib txhiab ib txhis. 23 Thaum peb poob qis, nws nco txog peb, vim nws lub siab hlub nyob tas ib txhiab ib txhis, 24 nws rub rhe peb ntawm yeeb ncuab los, vim nws lub siab hlub nyob tas ib txhiab ib txhis. 25 Nws muab mov pub rau txhua tus muaj lub cev nqaij, vim nws lub siab hlub nyob tas ib txhiab ib txhis. 26 Nej cav lus zoo txog tus Tswv Ntuj nyob txheej ntuj saud vim nws lub siab hlub nyob tas ib txhiab ib txhis.

1 Peb zaum ze ntawm cov ntug dej Npas Npis Los, peb nco txog Xis Yoos, peb quaj. 2 Peb muab peb tej nkauj nog ncas dai saum tej ceg lwg zaj uas nyob ib ncig ntawd. 3 Nyob ntawm no, cov tub rog uas zov peb, taij kom peb seev nkauj, cov neeg uas ntes peb, taij kom peb ua lom zem : lawv hais tias : Nej seev ib zag nkauj Xis Yoos rau peb mloog.” 4 Yuav ua cas seev tau HUAB TAIS zaj nkauj nyob vaim kum teb ? 5 Yes Lus Xas Les, yog kuv hnov qab koj, thov kom kuv sab tes xis qhuav. 6 Yes Lus Xas Les, yog kuv tsis nco txog koj ntxiv, yog kuv tsis muab koj ua kuv qhov chaw zoo siab tshaj, thov kom kuv tus nplaig kum rau hauv kuv qab yiag. 7 HUAB TAIS, koj nco ntsoov tias hnub uas Yes Lus Xas Les poob, Es Doos cov tub hais tias : “Nej rhuav, nej tsoo kom ti nkaus taw ntsa !” 8 Ntxhais Npas Npis Los, kev tuag qhaib tau koj lawm, tus yuav ua rau koj xws li koj tau ua rau peb, nws txoj hmoov yuav zoo ! 9 Tus yuav ntes koj cov me nyuam mos coj mus tsoo saum pob tsuas, nws txoj hmoov yuav zoo.

1 Das Vis zaj. Huab Tais, Kuv muab tas kuv siab ntsws los ua koj tsaug ; kuv hu nkauj rau koj nyob ntawm ib tsoom dab xub ntiag. 2 Kuv pe tig tuaj rau koj lub tuam tsev ntshiab kuv ua tsaug rau koj lub npe, vim koj hlub thiab npuab neeg, vim cov lus koj cog rau peb mus deb tshaj koj lub koob meej. 3 Hnub kuv hu txog koj, koj teb kuv, koj txhab zog rau kuv tus plig. 4 HUAB TAIS, tas ib tsoom vaj ntxwv nyob ntiaj teb ua koj tsaug, vim lawv tau hnov cov lus koj lub ncauj cog. 5 Lawv cav lus zoo txog HUAB TAIS txoj kev : “HUAB TAIS lub koob meej loj tas nrho ! 6 Tab txawm, HUAB TAIS nyob siab, nws tseem pom tus me, nws tuaj deb zeem tau tus muab hlob.” 7 Tab yog kuv nyob hauv nruab nrab qhov nyuaj ntxhov, koj nres kuv txoj sia, koj tsa tes ntaus cov ntxub kuv, koj sab xis ua kom kuv yeej. 8 HUAB TAIS yuav ua tas puas tsav yam rau kuv. HUAB TAIS, koj lub siab hlub nyob mus ib txhiab ib txhis ! Koj txhob tso cov hauj lwm tawm ntawm koj txhais tes pov tseg.

1 Ua rau tus coj nkauj. Das Vis zaj nkauj paj nruag. HUAB TAIS, koj tsom kuv, koj paub kuv : 2 koj paub thaum kuv sawv thiab thaum kuv zaum ; koj nyob deb tsom pom tas tej kuv xav. 3 Koj zov txoj kev kuv mus, zov lub chaw kuv pw, koj paub txhua txoj kev kuv taug. 4 HUAB TAIS, lo lus uas tsis tau nyob saum kuv tus nplaig, koj twb xub paub lawm. 5 Koj vij kuv, koj paub tom kuv qab thiab tom kuv hauv ntej, koj tso koj txhais tes rau saum kuv. 6 Koj txoj kev paub ntau yam, tob dhau rau kuv , siab dua qhov kuv ncav tau ! 7 Kuv yuav mus qhov twg thiaj nyob deb ntawm koj txoj pa? Kuv yuav khiav mus qhov twg, thiaj nyob deb ntawm koj lub ntsej muag? 8 Yog kuv nce saum ntuj, koj twb nyob saud ! Yog kuv nqes mus pw hauv ntuj txias teb tsaus, koj nyob hauv ! 9 Yog kuv qiv lub caij kaj ntug ob phab tis kuv ya mus nyob puag dej ntuj sab tim ub, 10 los tseem yog koj txhais tes coj kuv mus, yog koj sab xis tuav kuv. 11 Kuv hais tias : “Sim cia qhov tsaus ntuj vov kuv, cia qhov pom kev uas nyob ncig kuv hloov ua hmo ntuj !” 12 Tab sis, qhov tsaus ntuj tsis dub tsis tsaus rau koj, hmo ntuj pom kev nrig xws nruab hnub : qhov tsaus ntuj nti zoo ib yam li qhov pom kev. 13 Koj yog tus tsim kuv tej plab plaw ; koj xaws kuv hauv kuv niam plab. 14 Kuv cav lus zoo txog koj, vim koj tej dej num zoo nkauj : koj tsim kuv zoo saib ua luaj, koj cov dej num zoo tas nrho : Koj paub kuv tus plig thoob plaws. 15 Koj puab kuv hauv qhov chaw nraim, koj xaws kuv lub cev hauv plawv av. tsis muaj ib tug pob txha uas koj tsis paub. 16 Kuv tsis tau xeeb nruab thiab, koj qhov muag yeej ntsia ntsoov kuv, thaum kuv tseem tsis tau paub nruab hnub los hmo ntuj, koj twb sau kuv cov hnub cov hmo rau hauv koj phau ntawv, 17 Tswv Ntuj ! Yam koj xav tob ua luaj rau kuv, koj cov tswv yim, muaj ntau tas nrho ! 18 Kuv xav suav, tab sis koj cov tswv yim ntau dua cov suab puam. Kuv suav tas, yog kuv nrog koj nyob. 19 Tswv Ntuj ! Kheev lam koj pom zoo tua tus tsis hwm koj ! Neeg nyiam hno ntshav, nej txav mus deb kuv ! 20 Cov neeg ntxub koj, lam tuav koj lub npe kom tau dag, lawv lam hu txog koj lub npe kom tau ua phem. 21 HUAB TAIS, ua cas tseem tsis ntxub cov neeg ntxub koj, ua cas tseem tsis dhuav cov neeg tawm tsam ntaus koj? 22 Kuv ntxub lawv tas siab, kuv saib lawv yog kuv cov yeeb ncuab ntag ! 23 Tswv Ntuj ! Xav kom koj tsom kuv, paub kuv lub siab, sim kuv, paub kuv kev ntxhov siab. 24 Koj saib kuv puas mus taug txoj kev tuag, thov koj coj kuv mus taug txoj kev muaj sia nyob mus li.

1 Ua rau tus coj nkauj. Das Vis zaj nkauj paj nruag. 2 HUAB TAIS, thov koj cawm kuv ntawm tus neeg phem, thov koj txuag kuv ntawm tus neeg siab ceev, 3 ntawm tus npaj ua phem hauv nruab siab, ntawm tus niaj hnub thab ua tsov ua rog. 4 Lawv hliav lawv tus nplaig ntse li nplaig nab, lawv ntim taug nab rau ntawm di ncauj. 5 HUAB TAIS, thov koj thaiv kuv ntawm tus tsis hwm ntuj txhais tes, txuag kuv ntawm tus neeg siab ceev, ntawm cov neeg uas nrhiav ua kom kuv ntog. 6 Cov neeg muab hlob caws tej rooj ntxiab tom kuv hauv ntej, lawv cuab hlua, cuab vas ntawm ntug kev, lawv cuab hmuv tos kuv. 7 Kuv hais rau HUAB TAIS tias : “Koj yog kuv tus Tswv Ntuj !” HUAB TAIS, koj tig ntsej los mloog kuv lub suab taij. 8 Tswv Ntuj, HUAB TAIS, koj yog lub zog cawm kuv, hnub kuv ntaus rog, koj thaiv kuv taub hau. 9 HUAB TAIS, koj txhob kheev tus tsis hwm ntuj ua raws li nws xav, txhob kheev qhov phem uas lawv npaj tsheej xeeb tau, tsam lawv rov tsa taub hau. 10 Cov neeg vij kuv ntawd : xav kom qhov txhaum tawm hauv lawv di ncauj, rov tsuam lawv. 11 Thov kom hluav ncaig liab nchuav nthwv los rau saum lawv, xav kom lawv poob hauv tej qhov ntuj tob uas lawv sawv tsis taus ! 12 Cov hais lus xaiv yuav tsis nyob hauv lub teb chaws ; sawv daws yuav caum tus siab ceev thiab tus lim hiam kom ploj. 13 Kuv paub tias HUAB TAIS yuav ua haum tus txom nyem, nws yuav ua ncaj rau cov pluag. 14 Cov neeg siab ncaj yuav ua tsaug rau koj lub npe, cov siab dawb siab huv yuav ua neej nyob ntawm koj xub ntiag.

1 Nkauj paj nruag. Das Vis zaj. HUAB TAIS, kuv hu txog koj : tsuag tsuag tuaj pab kuv ! Thaum kuv hu txog koj, thov koj tig ntsej los mloog kuv lub suab. 2 Thov kom kuv zaj teev Ntuj nce xws li pa xyab tuaj rau ntawm koj xub ntiag. Kom ob txhais tes kuv tsa tuaj, zoo li cov txim txi rau koj yav tsaus ntuj. 3 HUAB TAIS, thov koj zov kuv lub ncauj, zov kuv di ncauj lub qhov rooj. 4 Koj txhob pub kuv lub siab qaug rau kev phem, txhob nrog cov neeg phem koom tes nyob hauv tej num tub qaug ntuj : kuv yuav tsis saj lawv tej nqaij tej hno. 5 Xav kom tus siab ncaj ntaus kuv, vim nws hlub kuv, kom nws qhuab qhia kuv. Kom tus neeg phem cov roj tsw qab txhob pleev tau kuv taub hau. Vim kuv thov Ntuj tas zog tiv thaiv lawv tej kev phem. 6 Lawv cov nom tswv raug luag thawb poob pob tsuas, ces lawv yuav mloog kuv cov lus mos lus zoo. 7 Luag muab lawv cov pob txha cuam mus pov rau ntuj txias teb tsaus lub ncauj qho, xws li luag laij teb hlais av.” 8 HUAB TAIS Tswv Ntuj, kuv qhov muag tig ntsia ntsoov koj, kuv khiav tuaj nkaum hauv koj, koj txhob cia kuv txoj sia rau luag rhuav. 9 Thov koj txuag kuv ntawm lub vas luag cuab rau kuv, ntawm cov neeg phem rooj hmuv. 10 Cov tsis hwm Ntuj yuav rov mag lawv rooj ntxiab, hos kuv, mas kuv yuav hla dhau.

1 Das Vis cov lus qhuab qhia. Nws zaj teev Ntuj thaum nws nyob hauv lub qhov tsua. 2 Kuv tsa suab hu txog HUAB TAIS ; kuv tsa suab taij HUAB TAIS. 3 Kuv nchuav kuv txoj kev txhawj rau ntawm Huab Tais xub ntiag, kuv nthuav kuv txoj kev txom nyem rau nws. 4 Thaum kuv txog siav, koj paub kuv mus qhov twg : luag zais rooj ntxiab rau txoj kev kuv mus. 5 Koj ntsia sab xis, koj yuav pom : tsis muaj leej twg zeem tau kuv li ! Tsis muaj chaw rau kuv nkaum, tsis muaj leej twg txhawj txog kuv lub neej ! 6 HUAB TAIS, kuv tsa suab hu txog koj ! kuv hais tias : “Nyob hauv tsoom neeg ciaj lub teb chaws, koj yog kuv qhov chaw nkaum, koj yog kuv tug !” 7 Thov koj muab siab rau mloog kuv lub suab, kuv qaug zog dhau lawm ! Cov neeg hiam kuv, muaj zog dua kuv, thov koj npo kuv ntawm lawv tes. 8 Thov koj thau kuv dim ntawm tsev loj faj, kuv yuav cav lus zoo txog koj lub npe. Cov neeg siab ncaj yuav tuaj ntsauv ncig kuv vim koj ua zoo rau kuv.

1 Nkauj paj nruag. Das Vis zaj. HUAB TAIS, koj mloog kuv zaj thov, koj tig ntsej los mloog kuv tej lus taij koj, koj yog tus hlub, yog tus siab ncaj, thov koj teb kuv ! 2 Koj txhob txiav txim rau koj tus tub txib, vim hauv tsoom neeg ciaj, tsis muaj ib tug ncaj nyob ntawm koj xub ntiag. 3 Yeeb ncuab hiam kuv, nws thawb kuv ntog, nws tsuj kuv ; nws tso kuv rau hauv qhov tsaus, xws li cov tuag yav thaud. 4 Kuv tus ntsuj pa yuav tu, kuv nplooj siab ntshai tshee na. 5 Kuv nco txog yav thaud, kuv rov hais txog tas ib puas tsav yam koj tau ua, kuv ntuas tuj taws cov hauj lwm koj txhais tes ua. 6 Kuv cev tes tuaj rau koj ; kuv nyob ntawm koj xub ntiag, zoo puav tam li av qhuav nqhis dej. 7 HUAB TAIS, koj tsuag tsuag teb kuv ! Kuv txoj pa tu lawm. Txhob zais koj lub ntsej muag rau kuv, yog koj zais, mas kuv zoo li tus neeg nqes mus hauv qhov ntxa. 8 Sawv ntxov tsees, koj ua kom kuv hnov tias koj hlub, vim kuv tso siab rau koj. Koj qhia txoj kev rau kuv taug vim kuv lub siab dai dhuam rau koj. 9 HUAB TAIS, thov koj npo kuv ntawm cov yeeb ncuab ; nyob ze koj, kuv tsis txhawj. 10 Koj qhia kuv ua raws koj lub siab xav, vim koj yog kuv tus Tswv Ntuj. Thov kom koj tus ntsuj pa hlub neeg coj kuv mus hauv thaj av tiaj tus. 11 HUAB TAIS, koj ua kom kuv ciaj ua neeg, kom xwv koj lub npe nto koob meej ; vim koj yog tus ncaj, koj rub kuv tawm ntawm kev txom nyem. 12 Vim koj hlub kuv, koj tua kuv cov yeeb ncuab tu noob, koj rhuav cov ntxub kuv tas huv si, vim kuv yog koj tus tub txib.

1 Das Vis zaj. Tus HUAB TAIS nto koob meej yog kuv lub tsua, nws qhia kuv ob txhais tes xyaum ntaus rog, nws qhia kuv ntiv tes xyaum ntaus tsam. 2 Nws yog kuv lub zog, yog kuv lub yeej xov ntsa zeb, yog kuv lub loog zeb ruaj, yog tus npo kuv dim, yog kuv daim leem phiaj, kuv khiav mus nkaum hauv nws ; nws rub cov haiv neeg los zwm rau kuv. 3 HUAB TAIS, neeg yog dab tsi, koj thiaj muab nws saib hlob, leej tib neeg uas txawj tuag, yog leej twg, koj thiaj nco txog nws? 4 Leej tib neeg zoo li ib nyuag pa cua, nws lub neej zoo li tus duab ntxoov ntxoo dua mus. 5 HUAB TAIS, koj nthuav lub ntuj, koj nqes los mas. Koj kov cov roob, ces cov roob ncho pa lug. 6 Koj ua tej kab xob laim, koj muab nrom puv ntuj, koj tua koj cov xib xub mus caum yeeb ncuab tawg. 7 Koj nyob saud, koj cev tes tuaj cawm kuv, koj npo kuv ntawm dej hlob, ntawm vaim kum haiv neeg, 8 uas lub ncauj txawj dag, ntawm lawv txhais tes xis uas txawj ntxeev lus. 9 Tswv Ntuj, kuv yuav hu ib zag nkauj tshiab rau koj, kuv yuav ntaus lub thaj cheej kaum txoj hlua rau koj. 10 Koj yog tus pub kev yeej rau cov vaj, yog tus cawm koj tus tub txib Das Vis ntawm rab ntaj tua neeg. 11 Thov koj cawm kuv, thov npo kuv ntawm vaim kum neeg txhais tes, uas lub ncauj txawj dag, hos lawv txhais xis txawj ntxeev lus. 12 Kom peb cov tub zoo puav tam li cov yub ntoo uas hlob zoo txij thaum yau los, kom peb cov ntxhais zoo puav tam li tej ncej zeb txaug, txheem tuam tsev vaj ntxwv. 13 Peb tej txhab yeej meem puv kom nto ncauj, ntim txhua yam txhiam laj txhiam xws. Peb cov tsiaj yeej meem huam vam nto txhiab mus puv peb tej nras teb. 14 Kom peb cov nyuj yeej meem rog, tej ntsa loog tsis to qhov, tsis muaj tus yuav tsum khiav, tsis muaj suab quaj hauv peb cov tshav puam. 15 Haiv neeg uas tau txhua yam li no, yog haiv neeg tau txoj hmoov zoo ! Haiv neeg uas tau Tswv Ntuj ua lawv tus HUAB TAIS yog haiv neeg tau txoj hmoov zoo !

1 Zaj cav lus zoo. Das Vis zaj. Alef Kuv tus Tswv Ntuj, kuv tus vaj, kuv cav lus zoo txog koj, kuv yuav foom koob meej rau koj lub npe mus ib txhiab ib txhis. Beth 2 Kuv xav niaj hnub foom koob meej rau koj, kuv xav cav lus zoo txog koj lub npe mus ib txhiab ib txhis. Guimel 3 HUAB TAIS loj tas nrho, tsim nyog cav txog nws ; nws loj tas nrho, neeg ntsuas tsis tau. Daleth 4 Sawv daws yuav cav txog koj tej hauj lwm txheej dhau txheej, yuav tshaj koj cov dej num muaj hwj xyeej. He 5 kuv yuav hais tag hais thiab txog koj cov dej num zoo nkauj zoo saib, piav txog koj lub hwj chim nto koob meej ci ntsa iab. Waw 6 Sawv daws yuav hais txog koj lub hwj xyeej muaj hwj huam, kuv yuav tshaj koj cov hauj lwm loj. Zaim 7 Sawv daws yuav cav txog koj lub siab zoo dav tas nrho, luag yuav npuaj teg cav txog koj lub siab ncaj. Heth 8 HUAB TAIS yog tus hlub mos nyoos thiab khuv leej, nws npau taws qeeb, nws lub siab phwj kev hlub. Teth 9 HUAB TAIS ua siab zoo rau txhua leej txhua tus, nws lub siab hlub mos nyoos puag nws tej num. Yod 10 HUAB TAIS, koj tej num yuav ua ke cav txog koj, hos cov ntseeg txog koj yuav foom lus zoo rau koj. Kaf 11 Lawv yuav hais txog koj txoj kev ua vaj nto koob meej. lawv yuav piav koj cov hauj lwm muaj hwj xyeej. Lamed 12 Lawv yuav qhib koj cov hauj lwm muaj hwj xyeej rau zej tsoom paub, thiab qhib koj txoj kev ua vaj muaj koob meej ci ntsa. Mem 13 Koj lub ceeb tsheej nyob txhiab niag tim puas xyoo, lub teb chaws koj kav nyob txheej dhau txheej. Tswv Ntuj cov lus puav leej hais qhov tseeb tas huv si, nws cov hauj lwm tas huv si, yog nws lub siab hlub ua. Samek 14 HUAB TAIS txheem cov neeg ntog txhua leej txhua tus, nws tsa cov neeg khoov nkoos. Ain 15 Sawv daws ntsia koj, vam ntsoov koj, koj pub txhiam xws rau lawv raws caij raws nyoog. Pe 16 Koj qhib koj txhais tes, koj pub kom txhua tus muaj sia tau noj tsau. Cade 17 HUAB TAIS ua ncaj hauv txhua txoj kev, nws pheej xeeb nyob hauv txhua txoj hauj lwm. Qof 18 HUAB TAIS nyob ze cov neeg tuav txog nws lub npe, nws nyob ze cov neeg uas muab hlo lub siab los tuav txog nws lub npe. Resh 19 Nws pub rau cov neeg hwm nws raws li lawv xav yuav, nws mloog lawv lub suab quaj qw, nws cawm lawv. Shin 20 HUAB TAIS txuag nws cov phooj ywg, nws rhuav tshem cov tsis hwm nws huv tib si. Taw 21 Kuv lub ncauj yeej meem cav txog HUAB TAIS, kom txhua lub cev nqaij foom lus zoo rau nws lub npe ntshiab mus ib txhiab ib txhis !

1 As Les Lus Yas ! Kuv tus plig, koj cav lus zoo txog HUAB TAIS ! 2 Kuv yuav cav txog HUAB TAIS tas kuv sim neej, kuv txoj sia ntev li cas, mas kuv yuav ntaus paj nruag rau kuv tus Tswv Ntuj ntev li ntawd. 3 Nej txhob tso siab rau cov vaj txheeb, txhob tso siab rau leej tib neeg cov tub, lawv tsis muaj hwj huam cawm tau nej : 4 Lawv txoj pa yaj, ces lawv rov mus ua av luaj, thaum ntawd, lawv tus nrhu lus kuj nrog lawv ploj. 5 Tus tau Yas Kos tus Tswv Ntuj nres nws, mas nws txoj hmoov zoo, tus tso siab rau nws tus HUAB TAIS Tswv Ntuj, nws txoj hmoov zoo. 6 Tswv Ntuj yog tus tsim ntuj tsim teb, tsim dej ntuj thiab ib puas tsav yam uas nyob hauv dej, nws pheej xeeb mus ib txhiab ib txhis : 7 cov raug luag quab yuam, nws tsa lawv cai. nws pub mov rau cov neeg tshaib noj. HUAB TAIS tso cov neeg raug txim. 8 HUAB TAIS qhib cov dig muag qhov muag, HUAB TAIS tsa cov khoov nkoos kom sawv, HUAB TAIS nyiam cov neeg ncaj. 9 HUAB TAIS pov hwm cov vaim kum neeg nws txhawb tus ntsuag nos thiab tus poj ntsuam, nws mooj tus siab phem ob txhais taw kom yuam kev. 10 HUAB TAIS ua vaj mus li. Xis Yoos, nws yog koj tus Tswv Ntuj mus txheej dhau txheej ! Peb cav lus zoo txog Huab Tais !

1 As Les Lus Yas ! Peb cav lus zoo txog Tswv Ntuj, vim qhov ntawd zoo tas nrho ! Kev cav txog Huab Tais, yog tej lus qab zib phim kawg ! 2 HUAB TAIS txhim Yes Lus Xas Les, nws sau cov His Xas Lais raug txim vaim kum teb huv tib si rov los. 3 Nws nplij cov neeg uas lub siab ntuag, nws qhwv lawv cov qhov txhab. 4 Nws txheeb tau cov hnub qub : nws tis lawv ib leeg ib lub npe. 5 Peb tus HUAB TAIS loj, nws muaj peev xwm tas nrho ; nws lub tswv yim ntse dav tsis muaj ciam. 6 HUAB TAIS txheem cov neeg me, nws txo cov tsis hwm Ntuj poob hauv av. 7 Nej hu nkauj cav txog HUAB TAIS, nej ntaus thaj cheej rau peb tus Tswv Ntuj ; 8 vim nws ua kom huab vov lub qab ntuj, nws npaj dej nag rau ntiaj teb nws ua kom nroj tsuag hlob puv tej hauv roob. 9 Nws pub zaub rau tsiaj txhu noj pub mov rau cov me nyuam uab lag thaum lawv taij mov. 10 Huab Tais tsis qhuas tus xob nees muaj zog, nws tsis quav ntsej rau tus tib neeg khiav nrawm. 11 HUAB TAIS lub siab dai ncuv rau cov neeg hwm nws, dai ncuv rau cov uas tso siab rau nws lub siab hlub. 12 Yes Lus Xas Les, koj cav txog HUAB TAIS ! Xis Yoos, koj cav lus zoo txog koj tus Tswv Ntuj mog ! 13 Vim nws ua kom koj cov ntsia liaj rooj hlau khov ; nws foom hmoov zoo rau cov tub hauv koj lub loog. 14 Nws pub kev thaj yeeb rau koj lub teb chaws, nws pub mov nplej mog rau koj noj txaus siab. 15 Nws txib nws lo lus tuaj rau ntiaj teb, nws lo lus khiav yeev tam sis ntawd. 16 Nws nchuav daus xws li tej ntshua plaub yaj, nws nphoo npuv xws li tshauv. 17 Nws nchuav lawg los xws li qe ; leej twg yuav tiv tau nws cov te txias? 18 Nws xa nws lo lus tuaj, ces npuv thiab daus yaj ; nws kom cua tshuab, ces dej ntws ntxhee yees. 19 Nws qhia nws lo lus rau Yas Kos, qhia nws cov lij choj thiab cov lus qhia rau His Xas Lais. 20 Nws tsis tau ua li ntawd rau ib haiv neeg twg li, lwm cov haiv neeg tsis paub nws cov lus qhia. Peb cav lus zoo txog Huab Tais !

1 Peb cav lus zoo txog Huab Tais ! Nej uas nyob saum cuaj txheej ntuj, nej cav lus zoo txog HUAB TAIS : nej cav txog nws nyob saum cov txheej ntuj siab. 2 HUAB TAIS tsoom Tshiab, nej cav lus zoo txog nws ; HUAB TAIS tsoom tub rog, nej cav lus zoo txog nws. 3 Nkauj hnub nraug hli, neb cav lus zoo txog nws ; tas ib tsoom hnub qub ci ntsa iab, nej cav lus zoo txog nws. 4 Cov txheej ntuj siab tshaj, cov dej nyob txheej ntuj saud, nej cav lus zoo txog nws. 5 Kom lawv yeej meem cav txog HUAB TAIS lub npe, vim nws txib ib los, ces lawv tsheej xeeb los. 6 Nws teeb lawv ruaj mus li ; nws teeb ib txog cai, ces lawv tsis hla ciam. 7 Nej uas nyob ntiaj teb, nej cav lus zoo txog HUAB TAIS : cov zaj laug, thiab cov qab thu hiav txwv, 8 hluav taws, lawg, daus, huab pw hav, nag xob nag cua, uas nej sawv daws ua raws nws lo lus. 9 Toj roob siab, ncov roob qis, cov ntoo txi txiv, cov ntoo ciab, 10 tas tsoom tsiaj qus, tsiaj nyeg, me nab, me noog, 11 cov vaj ntxwv kav ntiaj teb, thiab ib tsoom haiv neeg, cov vaj txheeb, thiab ib tsoom nom tswv tswj lub ntiaj teb, 12 tsoom nkauj hluas, tub nraug xwb, cov laus, thiab cov me nyuam yaus ! 13 Kom lawv sawv daws yeej meem cav txog HUAB TAIS lub npe, vim nws tib leeg muaj lub npe nto loj tshaj, nws lub hwj xyeej khav tas lub ntuj thiab lub ntiaj teb. 14 Nws tsa nws haiv neeg lub peev xwm kom siab : kom cov ntseeg nws, cov tub His Xas Lais uas yog haiv neeg nyob ze nws, muaj koob meej ! Peb cav lus zoo txog Huab Tais !

1 Nej cav lus zoo txog Huab Tais. Nej seev ib zag lus paj huam tshiab rau HUAB TAIS ; nej seev nkauj cav txog nws nyob hauv cov ntseeg lub txoos. 2 kom His Xas Lais zoo siab nyob hauv tus Tsim lawv, kom Xis Yoos cov tub hom khaj nyob hauv lawv tus vaj. 3 Kom lawv dhia daj dhia luag cav txog nws lub npe ; yeej meem ntaus nruas zoj nruas tawv, ntaus thaj cheej rau nws. 4 Vim HUAB TAIS txaus siab tas nrho rau nws haiv neeg ; nws muab kev cawm los ntim cov neeg me. 5 Kom cov ntseeg ua lom zem nyob hauv lawv lub koob meej, kom lawv luag nqhua zoo siab hauv lawv lub chaw pw. 6 Lo lus cav txog Tswv Ntuj phwj rau saum lawv di ncauj, lawv txhais tes tuav rawv rab ntaj ob sab ntse 7 yuav rob caub ntaus cov kuj cuab, yuav muab txim rau cov haiv neeg. 8 Lawv yuav xuas saw hlau pav luag cov vaj, xuas khawb hlau xauv luag cov nom tswv. 9 Lawv yuav nqes tes pauj lub txim raws li Ntuj tau sau tseg, qhov ntawd yuav ua kom HUAB TAIS cov ntseeg muaj koob meej ! Peb cav lus zoo txog Huab Tais !

1 As Les Lus Yas ! Nej cav txog Tswv Ntuj hauv nws Kem Ntshiab ; Nej cav txog nws hauv lub ntuj hnub qub muaj hwj huam. 2 Nej cav txog nws vim nws cov hauj lwm muaj hwj xyeej ; nej cav txog nws vim nws loj tas nrho. 3 Nej cav txog nws thaum lub suab raj kub tshis nrov. Nej ntaus nkauj nog ncas, ntaus thaj cheej cav txog nws. 4 Nej ntaus nruas zoj nruas tawv, dhia daj dhia luag cav txog nws ; nej ntaus nkauj nog ncas tis hlua, thiab tshuab qeej cav txog nws. 5 Nej ntaus nruas npuaj doog diaj cav txog nws ; nej ntaus nruas npuaj ncha ncha cav txog nws. 6 Kom txhua tsav txhua yam uas txawj nqus pa, kav tsij cav txog HUAB TAIS ! Peb cav lus zoo txog Huab Tais !

1 Xas Los Moos cov Paj Lug. Xas Los Moos yog Das Vis leej tub, yog ib tug vaj His Xas Lais. 2 Xas Los Moos cov paj lug ua kom neeg paub txoj kev thoob tsib thiab paub Txoj Cai, ua kom to taub cov lus tob, 3 ua kom paub cov txuj, ua kom pom kev, ua kom mus taug kev ncaj kev ncees kev haum pheej. 4 Pub kev ntse rau cov neeg me, pub kev txawj kev xyuam xim rau cov hluas, 5 ua kom to tsib cov paj lug cov lus tob, ua kom to taub cov neeg thoob tsib lawv tej lus txhais. 6 Tus xav tau tej yam saum no mas kom nws mloog cov lus nram no, nws thiaj yuav paub ntau yam ntxiv. 7 Txoj kev hwm HUAB TAIS yog kev txawj kev ntse lub hauv paus. Yog cov neeg ruam xwb thiaj thuam kev thoob tsib thiab thuam Txoj Cai.
20 Txoj kev thoob tsib qw nyob ntawm tej kev hauv cov tsheej, nws tsa suab nyob hauv tej tshav puam. 21 Txoj kev thoob tsib nqua hu sawv daws tom tej ncauj ke, nws ntuas sawv daws nyob ntawm tej rooj loog, nws hais tias : 22 Cov neeg tswv yim mos dhau, nej yuav nyiam txoj kev tsis txawj xav mus txog tav twg ? Cov neeg hnyos luag, lawv puas yuav nyiam txoj kev hnyos mus li ? Cov neeg tsis muaj tswv yim, lawv puas yuav ntxub txoj kev paub txuj mus li ? 23 Nej tig rov los mloog kuv cov lus ntuas mas ! Kuv yuav qhib kuv lub siab rau nej. Kuv yuav qhia kuv cov lus rau nej. 32 Cov neeg tsis paub tab, lawv yuam kev, lawv yuav mus ntsib kev tuag. Cov neeg ruam tsis xav tom ntej tom qab, lawv yuav ntsib kev ploj. 33 Tab sis cov neeg mloog kuv yuav nyob hauv kev kaj siab lug. Lawv yuav tau nyob nyab xeeb, lawv yuav tsis txhawj txog kev raug xwv txheej.

10 Thaum txoj kev thoob tsib chaws mus hauv koj lub siab, mas koj xib rau kev txawj kev ntse. 11 Kev xyuam xim saib koj, lub tswv yim txuag koj. 12 Kev thoob tsib coj koj mus deb ntawm kev phem, deb ntawm cov neeg hais lus nkhaus, 13 deb ntawm cov neeg tso kev ncaj pov tseg, deb ntawm cov neeg khiav mus taug kev tsaus.

13 Tus neeg nrhiav tau txoj kev thoob tsib, tus tau kev txawj kev ntse mas nws txoj hmoov zoo. 14 Thaum yus tau txoj kev thoob tsib mas yog zoo dua yus tau nyiaj los tau kub. 15 Kev thoob tsib muaj nqes dua cov pov haum. Puas tsav yam toob xib uas koj ntshaw txog mas tsis muaj ib yam muaj nqes cuag li kev thoob tsib. 16 Tus thoob tsib txhais tes tuav ib lub neej ntev loo, nws txhais tes laug tuav nyiaj txiag thiab yeeb koob. 17 Txoj kev nws taug yog txoj kev noj qab nyob zoo. Txoj kev nws mus yog txoj kev kaj siab lug. 18 Tus tuav tau txoj kev thoob tsib, mas yog zoo li nws tuav tau tus ntoo pub txoj sia. Tus tuav rawv txoj kev thoob tsib nws yuav nyob dawb nyob huv mus li.
27 Thaum muaj ib tug thov ib yam ntawm koj, yog koj pab tau mas koj txhob ua tus tsis kam pab. 28 Thaum koj pab tus nyob ze koj tau, mas koj txhob hais rau nws tias : “Koj rov mus. Tag kis koj rov tuaj kuv mam muab rau koj.” 29 Thaum cov nyob ze tab tom tso siab rau koj, mas koj txhob nrhiav ua phem rau lawv. 30 Thaum neeg tseem tsis tau ua dab tsi phem rau koj, mas koj txhob nrog nws nrhiav chaw sib cav. 31 Koj txhob ntshaw ua xws li tus siab ceev, koj txhob yoog nws tus piv txwv. 32 Vim HUAB TAIS ntsia tsis taus cov neeg siab nkhaus. Nws yuav cov neeg siab ncaj los ua nws tsev neeg.

18 Cov neeg ncaj txoj kev yog zoo li lub hnub tawm tuaj kaj lub ntiaj teb. Nws txoj kev kaj loj zuj zus mus txog tav su. 19 Cov neeg lim hiam txoj kev yog zoo li qhov tsaus ntuj. Lawv tsis paub tias lawv taw dawm raug dab tsi. 23 Koj yuav xub muab siab rau txuag koj lub siab zoo dua txhua yam, vim txoj sia txhawv hauv neeg lub siab los xws li dej txhawv hauv lub qhov los.

3 Tus poj niam di ncauj hais lus qab zib xws li zib ntab, nws lo lus mos dua roj nplua. 4 Tab sis qhov kawg nws iab dua cawv. Yog zoo li rab rauj ntse hau raug yus. 8 Koj khiav mus deb ntawm tus poj niam ntawd, txhob txav los ze ntawm nws qhov rooj. 9 Tsam koj lub koob meej ploj mus. 10 Tsam koj lub cuab tam mus yug luag tej, 11 tsam qhov kawg koj lub cev kub hnyiab xws li ib tug taws nyob hauv qhov cub. 15 Koj haus cov dej nyob hauv koj lub qhov tim thaj, koj lub qhov tim thaj txhawv ib co dej ntshiab. 16 Koj txhob tso koj cov dej ntws phwj mus sab nraud xws li tej tus dej ntws mus puv tej tshav puam. 18 Koj yuav zoo siab nrog koj tus poj niam uas yav hluas koj tau xaiv nws. 19 Nws zoo li ib tug niam nkauj kauv zoo nyiam, zoo puav tam li tus niam nkauj sai zoo saib. Nws yuav zoo siab nrog koj tham. Koj yuav cia nws ob lub mis yug koj mus li, koj yuav hlub nws tas siab tas ntsws txhua lub caij nyoog. 20 Kuv leej tub, vim li cas koj yuav cia luag poj luag sev coj koj mus poob qhov ? Vim li cas koj yuav puag lub mis uas koj tsis paub ? 22 Tus neeg phem yuav mag nws cov hauj lwm lim hiam, nws txoj kev txhaum cov hlua yuav khi nws.

6 Neeg tub nkeeg, koj mus xyuas saib tus ntsaum nws ua zoo li cas. Koj saib nws tus yam ntxwv, koj yuav thoob tsib tuaj. 7 Tus ntsaum tsis muaj tus txawj tu plaub tu ntug, tsis muaj tus saib nws ua hauj lwm, tsis muaj tus tswj nws. 8 Lub caij sov nws khaws qoob loo, lub caij hlais nplej, nws sau txhiam laj txhiam xws. 9 Neeg tub nkeeg, koj yuav pw hauv txaj txog tav twg ? Thaum twg koj thiaj yuav tsim meej thiab sawv tsees los ? 10 Koj xav tias : pw me ntsis tso, tsaug zog ib ntsis tso, da saum lev puag tes me ntsis tso ! 11 Ces ib tsam kev pluag tuaj nyiag koj xws li tus tub sab, kev tshaib poob los txog koj xws li tus neeg thov khawv.
16 Muaj rau yam uas HUAB TAIS ntxub, xya yam uas HUAB TAIS tus plig saib phem tshaj plaws. 17 Yog lub ntsej muag muab hlob, yog tus nplaig dag, yog txhais tes hliv luag ntshav dawb. 18 Yog lub siab npaj ua tej yam txhaum, yog txhais taw rawm mus ua phem. 19 Yog tus tim khawv cuav hais tej zaj dag, yog tus ua kom cov kwv tij muaj plaub muaj ntug.
20 Me tub, koj khaws txiv lo lus qhia, koj tsis txhob tso koj niam lo lus ntuas pov tseg. 23 Lo lus qhia yog zoo li ib lub teeb. Lo lus ntuas yog qhov pom kev. Tej lus qhuab qhia lus cem yog txoj kev coj koj mus ua koj lub neej. 24 Cov lus ntawd txuag koj ntawm luag tus poj sev siab nkhaus, txhob mag luag poj sev cov lus qab zib. 25 Koj txhob ntshaw txog nws lub cev zoo nkauj nyob hauv koj nruab siab, txhob swb thaum nws ua tav muag tuaj ntsia koj. 27 Yus yuav muab ib co hluav taws zais hauv yus xub ntiag, tsis pub kom yus tej tsho kub hnyiab puas tau ? 28 Yus tsuj hluav ncaig, tsis pub hluav ncaig kub yus taw puas tau ? 29 Tus raws luag poj luag sev nws ua zoo li ntawd. Nws tau mus pib kov tej kev ntawd lawm mas nws yuav mag sab thiaj dim tau. 30 Tus neeg tshaib plab ua tub sab kom tau noj, luag tsis ntxub nws. 31 Thaum luag ntes nws mas nws them rov qab xya npaug. 32 Tab sis tus mus zes luag poj luag sev mas nws ruam tiag. Tus zes luag poj luag sev mas nws txhob txwm nrhiav kev ploj. 33 Luag yuav ntaus nws thiab thuam nws. Nws txoj kev txaj muag yuav tsis ploj li. 34 Vim luag tus txiv yuav npau heev, luag yuav pauj nws, yuav tsis kam zam. 35 Tab yog koj them npaum li cas mas nws yuav tsis saib, koj pub paj tshab npaum li cas mas nws lub siab yuav tsis nqig.

22 Tus neeg raug luag poj luag sev ntxias, nws raug luag mooj lawm, nws raws tus poj niam qab xws li ib tug heev nyuj uas luag coj mus tua, 23 xws li tus muas lwj mag hlua, xws li tus noog mus mag tsig. Nws tsis paub tias nws txoj sia yuav ploj nyob ntawd.

2 Kev thoob tsib mus nyob saum cov hauv roob hauv pes, nws nyob ntawm tej kev sib tshuam. 3 Nws nyob ntawm lub tsheej cov rooj loog, nws nyob ntawm tej txoj xub ke hauv cov nroog, nws hais nrov rau sawv daws tias : 4 “Tas ib zeej tsoom, kuv hu nej sawv daws ! Kuv hu tas ib tsoom tub nraug xwb, ib tsoom ntxhais nkauj xwb ! 5 Cov neeg tsis paub txuj, nej yuav tsum kawm kev ntse ! Cov neeg tsis xav tom ntej tom qab, nej yuav ua neeg txawj xav. 8 Cov lus tawm ntawm kuv lub ncauj los puav leej yog lus ncaj lus raug, tsis muaj ib lo lus cuav los nkhaus. 10 Nej yuav xub nrhiav kuv cov kev cai dua nrhiav nyiaj, nej yuav xub nrhiav kev txawj dua nrhiav cov tseem kub. 11 Kev thoob tsib muaj nqes dua pov haum, tsis muaj lwm yam yuav txaus ntshaw cuag li kev thoob tsib.”
22 Leej thoob tsib hais tias : “Thaum HUAB TAIS thawj cov hauj lwm tseem tsis tau tsheej xeeb mas HUAB TAIS tsim kuv, kuv yog nws thawj txoj hauj lwm. 23 Txij lub hauv paus los, thaum tseem tsis tau muaj cov hnub nyoog, thaum lub ntiaj teb tseem tsis tau xeeb los, mas kuv twb nyob lawm. 24 Thaum tseem tsis muaj cov tiv txwv, tseem tsis tau muaj cov qhov dej txhawv, kuv twb yug los. 25 Thaum tseem tsis tau muaj cov toj roob hauv pes sawv, kuv twb nyob lawm. 26 Thaum tseem tsis tau muaj ntiaj teb, tsis muaj lub sim ceeb thawj cov plua av plua tshauv, kuv twb yug los. 27 Thaum HUAB TAIS tsim cuaj txheej ntuj, thaum nws kos lub voj xov npoo ntuj, kuv twb nyob ntawd. 28 Thaum nws sau cov huab nyob txheej ntuj saud, thaum nws ua kom cov qhov dej hauv tiv txwv phwj los, kuv nyob ntawd. 29 Thaum HUAB TAIS tu ciam teb rau cov dej ntuj kom lawv txhob hla dhau lawv tej ntug, kuv nyob ntawd. 30 Kuv nyob rawv ntawm HUAB TAIS xws li ib leeg ntxhais. Txhua txhia hnub kuv dhia hom khaj nyob ntawm HUAB TAIS xub ntiag, ua nws chaw kaj siab lom zem.”

1 Txoj kev thoob tsib txhim tau nws lub tsev lawm. Nws tsa xya tus ncej. 2 Nws muab tej tsiaj tua, nws npaj cawv, npaj rooj mov tas. 3 Kev thoob tsib tso nws cov ntxhais txib mus tshaj saum tej tshav suab puam siab, hauv tej tsheej tias : 4 “Cov neeg siab ncaj, nej tuaj ntawm no mas !” 5 Nws hais rau cov neeg ruam tias : “Nej tuaj noj kuv rooj mov, nej haus cov cawv kuv npaj. 6 Nej tso kev ruam tseg, nej thiaj yuav muaj txoj sia. Nej mus taug txoj kev ncaj kev muaj tswv yim.”
7 Koj xav qhuab qhia tus thuam luag mas ib me ntsis nws yuav ua yeeb ncuab rau koj. Koj xav cem tus neeg phem mas koj yuav raug nws ua tub qaug rau koj. 8 Koj txhob ntuas tus thuam luag, tsam nws nrhiav lus rau koj. Koj ntuas tus neeg thoob tsib mas nws yuav nyiam koj. 9 Koj pub rau tus neeg thoob tsib, nws tseem yuav thoob tsib ntxiv tuaj. Koj qhia txuj rau tus neeg ncaj, nws kev txawj kev ntse yuav hlob tuaj. 12 Yog koj ua neeg thoob tsib, mas koj yuav txais kev thoob tsib cov txiv zoo. Yog koj ua ib tug neeg thuam luag, mas koj yuav raug xwv txheej.
13 Tus neeg vwm, nws mloog nws lub siab nrawm dhau, nws hais lus xws li tus tsis paub tab tsis paub txuj dab tsi. 14 Nws zaum ntawm nws qhov rooj, nws zaum saum ib lub theej kiab nyob saum qhov chaw siab nyob hauv lub nroog. 15 Nws hu cov neeg dua kev kom tuaj. 16 Nws hais tias : “Leej twg yog neeg siab ncaj ? Kom nws tuaj ntawm no mas !” 17 Tus neeg vwm hais rau tus tsis txawj xav tias : “Cov dej uas yus nyiag yog ib co dej qab zib. Cov mov uas yus tau ntawm txoj kev tsis ncaj los, mas yog ib co mov qab ncauj.”

1 Tus tub thoob tsib yog nws txiv chaw zoo siab. Tus me nyuam ruam yog nws niam chaw tu siab. 2 Ib cov nyiaj uas yus tau ntawm txoj kev nkhaus los yuav tsis txi txiv zoo rau yus. Hos kev ncaj cawm yus dim ntawm qhov tuag. 4 Txhais tes tub nkeeg ua kom neeg pluag tuaj. Txhais tes nquag ua kom neeg muaj tuaj. 7 Tus neeg siab ncaj, sawv daws cav txog nws lub npe mus li. Cov neeg phem lub npe ploj mus. 9 Tus neeg ua tas puas tsav yam ncaj, nws mus taug ib txog kev ruaj nreb. Tus neeg ua nkhaus, tsoom sid yuav pom sai tias nws ua nkhaus. 10 Tus neeg ua tav muag ntsia yus, nws ua yus ntxhov siab. Tus neeg qhuab qhia yus ncaj, ua yus siab kaj lug. 12 Kev ntxub luag, zes plaub ntug cig xws li hluav taws. Kev hlub luag rhuav txhua yam kev txhaum. 17 Tus coj txoj kev nruj, nws mus taug txoj kev muaj txoj sia. Tus tsis mloog tej lus qhuab qhia, nws yuam kev. 19 Tus hais lus ntau nws yeej yuav ua txhaum. Tus cheem nws di ncauj, nws xyuam xim. 20 Tus neeg siab ncaj, nws tus nplaig yog tseem nyiaj. Cov neeg phem lawv lub siab tsis muaj nqi.

1 Ib yam uas HUAB TAIS ntxub yog rab teev cuav. Hos rab teev luj raug xis nws siab. 11 Cov neeg ncaj cov lus zoo ua kom lub tsheej sawv los sai. Hos cov neeg phem lub ncauj rhuav lub tsheej. 13 Tus neeg kheev hais lus xaiv, hais cov lus npog rau sawv daws hnov. Tus neeg tswv yim xyuam xim txawj khaws lus cia. 14 Thaum tsis muaj tus coj, txhua haiv neeg yau mus zuj zus. Thaum muaj ntau leej sib pab tuav xam, cov hauj lwm thiaj mus zoo. 16 Cov poj niam zoo nkauj nto koob meej. Cov txiv neej siab loj tau kev nplua nuj.
22 Ib tug poj niam zoo nkauj tab sis nws tsis txawj xav tom ntej tom qab, mas nws zoo li ib lub kaus mom kub chob ntawm npua qhov ntswg. 25 Tus neeg nyiam ua zoo rau tsoom txheeb ze, nws yuav vam meej mus. Tus twg ywg dej rau luag, luag kuj yuav ywg dej rau nws. 28 Tus neeg tso siab rau nyiaj txiag, nws yuav ntsib kev ploj nyob hauv nyiaj txiag. Cov neeg ncaj yuav ntsuab xiab tuaj xws li nplooj ntoos.

4 Ib tug poj niam siab dawb siab huv, nws yog nws tus txiv lub mom nyiaj mom kub. Ib tug poj niam tsis txawj txaj muag nws yog zoo li tus kab noj tus txiv cov pob txha. 9 Ib tug me neeg nws noj nws tug, nws muaj tsim. Tus neeg nto koob meej tab sis nws tshaib plab, nws tsis muaj tsim. 15 Tus neeg tsis txawj xav nws saib tias txoj kev nws taug yog txoj kev ncaj. Hos tus neeg thoob tsib, nws mloog luag tej ntuas nws. 23 Tus neeg xyuam xim muab nws kev txawj kev ntse khaws cia. Cov neeg ruam muab lawv txoj kev ruam rau sawv daws pom. 24 Tus muaj txhais tes nquag yuav tswj luag tes dej num. Tus muaj tes tub nkeeg nws yuav ua luag qhev.

Tus txawj cheem nws lub ncauj, nws txuag nws txoj sia. Tus hais lus ntau dhau nws ntsib kev puas tsuaj. 4 Tus neeg tub nkeeg nyob tos, tsis muaj dab tsi tuaj daws nws kev tshaib. Cov neeg nquag tau noj tsau. 7 Muaj tej tug ua txuj tsab ua neeg muaj, tab sis lawv tsis muaj dab tsi. Muaj tej tus ua txuj tsab ua neeg pluag, lawv ho muaj ib lub cuab tam loj. 10 Kev muab hlob ua kom muaj lus sib cav sib ceg. Kev thoob tsib nyob hauv cov neeg mloog luag qhuab qhia. 20 Koj mus fim cov neeg thoob tsib, koj yuav thoob tsib tuaj. Hos tus mus fim cov neeg tsis txawj xav, nws phem zuj zus tuaj. 24 Tus tsis xav siv rab nplawm, nws ntxub nws tus tub. Tus hlub nws tus tub, nws yuav qhuab qhia.

13 Tab yog lub caij yus luag mas yus lub siab kuj tseem muaj chaw ntxhov, chaws zoo siab txawj hloov ua chaw tu siab. 23 Txoj kev iab kev khwv yeej txawj txi txiv zoo. Kev ua neeg ncauj ntau tsuas txawj txi kev tshaib. 31 Tus twg hiam tus neeg pluag, nws ua tub qaug rau tus tsim ntuj tsim teb. Tus twg ua siab zoo rau cov neeg txom nyem nws hwm tus tsim ntuj tsim teb. 34 Kev ncaj ua kom lub teb chaws nto moo zuj zus. Kev ua txhaum yog cov haiv neeg kev txaj muag.

1 Lo lus mos ua kom tus neeg npau taws lub siab nqig. Lo lus meem txom ua kom luag npau. 3 HUAB TAIS qhov muag ntsia pom thoob tas qhov txhia chaw. Nws ntsia ntsoov cov neeg phem thiab cov neeg zoo. 8 HUAB TAIS ntxub cov neeg lim hiam thaj txi Ntuj. Cov neeg ncaj zaj teev Ntuj xis HUAB TAIS siab. 33 Txoj kev hwm HUAB TAIS qhia kev thoob tsib. Kev nyiam ua neeg me xub mus ua ntej ces kev nto koob meej mam lawv qab.

2 Tib neeg saib nws tej kev yog kev huv. Tab sis HUAB TAIS ntsuas neeg lub tswv yim. 3 Koj tso koj tes dej num rau HUAB TAIS lis, mas koj tes dej num yuav tsheej xeeb tau. 9 Neeg lub siab nrhiav txoj kev nws yuav taug, tab sis yog HUAB TAIS hwj nws mus kev. 19 Yus yuav nyiam ua neeg me fim cov neeg me, zoo dua nrog cov neeg muab hlob sib huas nyiaj txiag.

3 Luag nchuav nyiaj nyob hauv lub yeej vub, nchuav kub nyob hauv lub qhov. Hos tus tsom neeg lub siab yog HUAB TAIS. 5 Tus hnyos tus pluag nws thuam tus tsim neeg. Tus luag cov neeg raug txom nyem, nws yuav muaj ib lub caij raug txim. 10 Ib lo lus cem qhia tus neeg ntse zoo dua ib puas nplawm rau tus neeg tsis txawj xav. 22 Ib lub siab luag ntxhi zoo li tshuaj ntxiv zog. Kev ntaus siab me ua kom yus tej pob txha tsis muaj sia zuj zus. 28 Tus neeg ruam, yog nws nyob ntsiag to, mas luag xav tias nws thoob tsib. Yog nws tsis qhib ncauj, luag xav tias nws txawj nws ntse.

2 Tus neeg ruam nws tsis nyiam ntaus tswv yim. Nws tsuas nyiam tshaj nws lub siab. 4 Neeg cov lus yuav zoo li ib lub pas dej tob, zoo li ib tug dej phwj, zoo li ib lub qhov dej txhawv kev thoob tsib. 7 Tus neeg ruam lub ncauj yog nws chaw xyob txhiaj. Nws di ncauj yog zoo li ib roog ntxiab uas nws txoj sia yuav mag hauv. 10 HUAB TAIS lub npe zoo li ib lub yeej zeb. Tus neeg ncaj vam khom rau HUAB TAIS lub npe, luag ntaus tsis txog nws. 14 Thaum ib tug neeg raug mob mas nws lub tswv yim nres nws. Hos thaum tus neeg lub tswv yim qaug zog lawm leej twg yuav rov tsa tau ? 19 Thaum ib tug kwv tij pab nws tus kwv tij, nkawd muaj zog li lub yeej zeb. Ib cov phooj ywg sib nres yog zoo li nqaj hlau liaj yeej zeb lub qhov rooj. 22 Tus nrhiav tau tus zoo poj niam, nws ntsib kev kaj siab lug. Nws tau Tswv Ntuj ib lub txiaj ntsim. 23 Tus neeg pluag cov lus yog lus thov. Tus neeg nplua nuj teb ib lo lus tshawv tshawv rau nws.

4 Txoj kev nplua nuj ua kom yus muaj phooj ywg coob. Hos tus neeg pluag, nws tus phooj ywg tso nws pov tseg. 6 Muaj ntau leej hais lus zoo rau tus muaj hwj chim. Txhua leej txhua tus hais tias lawv yog tus neeg pub paj tshab ib tug txheeb phooj ywg . 11 Tus neeg txawj neeg ntse yog tus tsis npau taws sai. Yog thaum nws txoj kev zam rau luag. 17 Tus pub paj tshab rau tus neeg pluag, yog nws txais nyiaj rau Tswv Ntuj. Tswv Ntuj yuav pub txiaj ntsim los pauj nws. 22 Neeg chaw zoo nyiam yog nws lub siab zoo, luag nyiam ib tug pluag dua ib tug neeg dag.

13 Koj txhob nyiam kev tsaug zog, tsam koj pluag zuj zus tuaj, koj yuav rua muag pliav koj thiaj yuav tau noj seem noj so. 17 Cov mov uas neeg tau ntawm kev ua tub sab tub nyiag los, chiv thawj zoo li qab, tab sis ib me ntsis mas zoo li qe zeb nyob hauv qhov ncauj. 19 Tus neeg ncauj ntau nws qhib tej yam zais ntshis rau sawv daws paub, koj txhob mus fim tus neeg hais lus ntau dhau. 29 Cov hluas chaw zoo siab yog lawv lub cev muaj zog, cov laus chaw zoo siab yog lawv lub taub hau dawb.

3 Tswv Ntuj ntsia txoj kev ua ncaj ua ncees yog ib yam zoo dua qhov mus ua tej thaj txi Ntuj. 9 Yus yeem nyob hauv ib lub me nyuam khaub tsev, zoo dua nrog ib tug poj niam tawv ncauj siab phem nyob ua ib tse. 13 Tus uas nws pos pob ntseg tsis xav hnov tus neeg pluag lub suab hu, muaj hnub nws kuj yuav tau qw nrov nrov luag kuj yuav tsis teb nws. 22 Tus neeg thoob tsib txeeb tau ib lub tsheej muaj tub rog coob zov. Nws rhuav tau lub ntsa zeb uas yog cov neeg nyob hauv tsheej chaw tso siab. 23 Tus neeg txawj cheem nws lub ncauj thiab nws tus nplaig, yog zoo li nws txuag nws tus plig kom txhob raug kev piam tseem. 30 Nyob ntawm HUAB TAIS xub ntiag tsis muaj ib tug neeg yuav khav tau tias nws thoob tsib, nws xyuam xim, nws txawj xav tom ntej tom qab.

2 Cov neeg pluag los cov neeg muaj, Tswv Ntuj saib lawv sib luag zos, vim yog Tswv Ntuj tsim lawv tib si. 8 Tus twg tseb txoj kev nkhaus cov noob. Nws yuav sau xwv txheej ua qoob. Nws rab qws ntaus luag tej yuav rov raug nws. 13 Tus neeg tub nkeeg hais tias : “Ib tug tsov nyob nraum zoov ! Yog kuv tawm mas tsov yuav tom kuv ntawm kev.”
22 Koj txhob lwg tus pluag vim nws pluag. Koj txhob hiam tus txom nyem, 23 vim Tswv Ntuj tsa lawv cai, nws rho txoj sia ntawm cov neeg thuam luag. 24 Koj txhob mus fim ib tug neeg siab ceev, txhob mus nrog tus neeg siab heev. 25 tsam koj yoog tau nws tus yam ntxwv, ces koj rov cuab ntxiab tos koj txoj sia.

13 Koj txhob ntshai qhuab qhia koj tus me nyuam. Koj xuas pas nplawm los nws yeej yuav tsis tuag ! 14 Koj xuas pas ntaus nws lub cev, koj yuav cawm nws tus plig ntawm txoj kev puas tsuaj. 27 Ib tug poj ntiav yog zoo li ib lub qhov tob. Luag tus poj niam yog zoo li lub qhov tim thaj nqaim. 31 Koj txhob ntsia cawv txiv ntoo, koj yuav qhuas tias : cas cawv liab ploog ci laim txias hauv lub khob ! Ntsia nws ntws mas cas yuav ntxim qab ua luaj ! 32 Qhov kawg, cawv tsuas muaj yuav lom koj thiab yuav tom koj xws li ib tug nab.

16 Tus neeg siab ncaj txawm ntog xya zaus, los zaum twg nws rov sawv tau. Cov neeg siab phem dawm taw, lawv poob nthav rau hauv qhov phem mus li. 17 Yog koj tus yeeb ncuab ntog mas koj txhob luag, koj txhob zoo siab tias nws poob, 18 tsam HUAB TAIS pom koj ua li ntawd, nws tsis zoo siab, ces nws tsis npau rau koj tus yeeb ncuab ntxiv. 24 Leej twg sim hais rau tus siab phem tias : ‘Koj siab ncaj !’ mas tas tsoom sid tsawm nws, cov haiv neeg ntxub nws. 26 Thaum ib tug neeg teb ib lo lus raug yus siab, yog zoo li nws nwj yus di ncauj.

6 Thaum koj nyob ntawm tus vaj xub ntiag, koj txhob ua ib lub ntsej muag xws li tej neeg loj, koj txhob mus zaum ntawm cov hlob qhov chaw. 7 Yog yus hnov luag hais rau yus tias : ‘Koj nce los pem no.’ Mas yus yuav zoo siab dua poob hauv chaw qis nyob ntawm tus vaj xub ntiag. 14 Tus neeg cog lus tias nws yuav pub ntau yam, tab sis nws tsis ua raws li nws cov lus, mas zoo muab piv rau thaum muaj huab dub nciab, muaj cua hlob nplawm ntws, tab sis nag tsis los. 17 Txhob mus ntau zaus dhau hauv luag tsev. Yog luag pom dhuav lawm mas luag yuav pib ntxub. 20 Thaum yus hais kwv txhiaj rau ib tug neeg tu siab mloog, yog zoo li yus hliv kua qaub rau saum ib lub qhov txhab. 25 Ib lub moo zoo tuaj ntawm ib lub teb chaws deb tuaj, yog zoo li ib co dej txias nyob hauv yus lub qa uas nqhis dej qhuav qhawv. 27 Noj zib mu ntau dhau yog ib yam tsis zoo. Koj txhob hais ntau lo lus zoo cav txog luag. 28 Ib tug neeg tsis txawj kav nws lub siab, yog zoo li ib lub tsheej tsis muaj ntsa zeb xov.

11 Tus neeg ruam rov mus raws nws txoj kev ruam, xws li tus dev rov los noj qhov nws ntuav. 13 Tus neeg tub nkeeg hais tias : Muaj tsov nyob tom kev ! Muaj tsov nyob ntawm lub tshav ! 17 Thaum luag tab tom hais plaub yus mus txais luag lus, yog zoo li yus mus tuav tus dev ko tw. 20 Thaum tsis muaj taws, hluav taws tuag. Thaum tsis muaj tus liam ntxiv, plaub ntug tu. 24 Ib tug neeg ncauj qab zib nplaig qab ntsev, tab sis laj lim plab plaw lim hiam, yog zoo li ib lub lauj kaub av sam txhim. 27 Tus khawb qhov cuab ntxiab yuav poob hauv lub qhov. Tus dov ib lub pob zeb, lub pob zeb yuav rov ntog los tsuam nws.

6 Tus phooj ywg tej lus tshawv, mas yus yuav saib tias yog lus ncaj. Tus yeeb ncuab yws yus, mas yus yuav ceev faj. 7 Lub qhov ncauj tau noj seem noj so, nws xyeej zib mu. Hos lub qhov ncauj tshaib nqhis, mas yam iab nws saib yog qab zib. 8 Tus neeg mus ua loj leeb deb lub teb chaws nws yug los, nws zoo li tus noog nrhiav tsis tau nws lub zes. 15 Ib tug poj niam siab phem yws taus, zoo nkaus li tus ciav dej uas thaum ntuj los nag dej tsis txawj tu. 17 Hlau hov hlau thiaj yuav ntse. Neeg yuav mus fim luag, nws thiaj yuav txawj. 18 Tus zov tsob txiv ncuav pias tau noj lub txiv. Tus saib xyuas nws tus tswv yuav pom luag hwm nws. 19 Neeg pom nws lub ntsej muag nyob hauv pas dej. Neeg rov pom nws lub siab nyob hauv luag tej. 22 Tab koj muab tus neeg vwm tuav hauv qhov cos kom ntsoog tas, los nws txoj kev vwm tsis ncaim ntawm nws.

7 Tus tus coj Txoj Cai, nws yog ib tug tub ntse. Hos tus tub mus fim cov neeg xib rau kev tsis tsim txiaj, nws ua nws txiv poob ntsej muag. 13 Tus neeg zais nws cov txhaum yuav hloov siab tsis tau. Tus lees nws cov txhaum thiab nrauj kev txhaum, nws yuav pom luag khuv leej nws, ces nws tau txais kev zam.

2 Thaum cov neeg ncaj coob tuaj, tsoom pej xeem luag ntxhi zoo siab. Thaum tus neeg phem ua tus tswj, tsoom pej xeem ntsaj. 13 Tus neeg pluag thiab tus neeg noj luag zog sib ntsib. Tswv Ntuj ua kom nkawd qhov muag pom kev. 15 Rab nplawm thiab cov lus qhuab qhia coj kev thoob tsib tuaj. Cov me nyuam uas niam txiv cia ua ywj siab nws ua rau nws niam nws txiv txaj muag.

7 Tswv Ntuj, kuv thov koj ob yam, koj tsis txhob qia dub rau kuv, cheem kuv tsis tau tuag. 8 Thov koj tshem txoj kev hais lus dag lus cuav mus deb ntawm kuv. Koj tsis txhob pub kom kuv pluag dhau los kuv muaj dhau : koj pub mov txaus kuv noj xwb. 9 Tsam kuv muaj dhau lawm mas kuv yuav hais tias : HUAB TAIS yog leej twg ? Los yog pluag dhau mas kuv ua tub sab, ces kuv tsis hwm kuv tus Tswv Ntuj lub npe.
18 Muaj peb yam uas kuv lub tswv yim tsis duav, muaj plaub yam uas kuv tsis paub. 19 Yog txoj kev uas tus dav ya nyob saum ntuj, yog txoj kev uas tus nab nkag nyob saum lub pob tsuas, yog txoj kev uas lub nkoj mus saum nplaim dej hiav txwv, yog txoj kev uas tus txiv neej taug mus rau hauv tus poj niam hluas tsev. 20 Tus poj niam tsis tsim txiaj coj tus yam ntxwv zoo li no : nws noj mov tas, nws so qhov ncauj nws hais tias : kuv tsis tau ua dab tsi phem ! 24 Muaj plaub tug tsiaj me tas nrho nyob ntiaj teb no, tab sis lawv thoob tsib tshaj cov thoob tsib. 25 Cov ntsaum yog ib hom tsiaj zog me, tab sis lub caij ntuj sov lawv sau qoob loo tseg. 26 Cov nas yog ib tsav tsiaj tsis muaj zog, tab sis lawv nkaum hauv tej qhov tsua. 27 Cov kooj tsis muaj vaj, tab sis lawv ya ua npoj. 28 Cov nab qa tsiav uas yus nthos tau ntawm tes, lawv nyob txawm hauv cov vaj tej tsev.

2 Kuv me tub, kuv roj ntsha, tus uas kuv xeeb, 3 koj tsis txhob muab koj lub zog pub rau luag poj luag sev, txhob muab koj lub cev rau cov uas lawv ua cov vaj puas tsuaj.
10 Leej twg yuav nrhiav tau ib tug niam tsev nquag ? Tus niam tsev nquag muaj nqi dua tej hlaws npliag deg ! 11 Nws tus txiv tso siab lug rau nws, tus txiv yuav tsis tshaib tsis ntshaw. 12 Nws ua zoo rau nws tus txiv tas ib sim neej, nws tsis ua phem rau tus txiv. 13 Nws tooj xov plaub yaj, saws ntuag, nws ob txhais tes ua hauj lwm nrawm nroos. 14 Nws zoo li lub nkoj ua luam, uas mus yuav toob xib txog luag pej kum teb rov los. 15 Ntuj tsis tau kaj, nws sawv los faib mov rau nws tsev neeg noj, faib hauj lwm rau nws cov ntxhais txib ua. 16 Nws ntshaw ib daig teb, nws mus yuav, nws ob txhais tes mus cog hmab txiv cawv rau. 17 Nws sia siv khov kho, loj npab ntshuas siv zog ntsos ua num.
18 Nws paub tias nws lag luam yuav tau paj, nws lub teeb ci lam lug tas hmo. 19 Nws ob txhais tes tuav leg xov, nws ntiv tes nthos nkaus ntxaiv los qaiv. 20 Nws cev tes pab cov neeg txom nyem, nws pub mov rau cov neeg pluag noj. 21 Lub caij ntuj no nws tsis ntshai daus, vim tas nws tsev neeg tau tsho txooj hnav. 22 Nws hnav ntaub maj mos, thiab ntaub liab tsam xem. 23 Nws tus txiv nto moo nyob ntawm cov qhov rooj tsheej. Tau nrog cov txwj laus hauv lub teb chaws zaum ua ke. 24 Nws ntos ntaub mos coj mus muag, nws ua siv muag rau cov tub lag tub luam. 25 Nws muaj zog, muaj hwj chim, nws luag nyav tos yav tom ntej.
26 Nws hais lus saib qab saib hau, nws lub ncauj tsuas qhia kev hwm Ntuj hwm neeg. 27 Nws saib cov neeg ua hauj lwm hauv nws tsev, nws tsis nyob dag noj luag mov luag zog. 28 Nws cov tub sawv los cav tias : nws txoj hmoov zoo. Nws tus txiv kuj qhuas nws tias : 29 Muaj ntau tus poj niam tau ua ntau yam zoo, tab sis koj tseem ua zoo tshaj sawv daws ! 30 Tus muaj xom lees nws xav ntxias luag, tus zoo nkauj kuj tsis muaj nqis dab tsi. Tus poj niam hwm Tswv Ntuj mas luag yuav cav txog nws. 31 Nej pub cov txiv txi ntawm nws txhais tes rau nws. Kom nws cov hauj lwm rov cav lus zoo txog nws nyob ntawm cov qhov rooj tsheej.

1 Phau ntawv no yog cov lus Kos Es Les xav. Kos Es Les yog Das Vis tus tub. Das Vis ua vaj nyob Yes Lus Xas Les. 2 Kos Es Les hais tias : “Txhua yam txawj yaj ntshis, yog zoo li ib co pa yuav yaj mus.” 3 Tib neeg nyob hauv lub qab hnub, tib neeg khwv khwv ua luaj, neeg tau tus qab hau dab tsi ? 4 Ib tiam dhau lawm, lwm tiam tuaj. Lub ntiaj teb nyob li qhov qub. 5 Lub hnub tawm tuaj, lub hnub poob qho, nws ho mus tawm rau lwm qhov. 6 Cua tuaj naj fab tuaj, cua tshuab mus lawm pej fab, cua kiv thiab kiv, cua rov qab mus txog qhov chaw qub uas nws tuaj. 7 Tus dej twg kuj ntws mus hauv hiav txwv, tab sis lub hiav txwv tsis txawj puv, cov dej kuj ntws tas zog mus rau qhov qub. 8 Tas puas tsav yam ceeb laj ua ub ua no, tib neeg piav tsis tau. Qhov muag ntsia ntsoov, los qhov muag tseem ntsia tsis txaus nws siab. Pob ntseg mloog ntsoov los yeej mloog tsis pov khawv. 9 Qhov twb muaj lawm tseem yuav muaj dua tuaj. Qhov twb ua lawm tseem yuav ua ntxiv. Tsis muaj ib yam tshiab nyob hauv lub qab ntuj no. 10 Muaj tej yam uas yus hais tias : “Qhov no yog ib qho tshiab !” Tab sis yam ntawd twb muaj tau ntau tiam ua ntej lawm. 11 Yus tsis nco txog thaum ub lawm, thiab lwm hnub luag yuav tsis nco txog nyem no.

21 Ntsia tus neeg no : nws tau khwv ua hauj lwm, nws thoob tsib thiab paub txuj, tab sis nws yuav tsum tso tej yam ntawd tseg rau lwm tus khaws xyeem yuav. Li ntawd nws cov hauj lwm kuj txawj yaj ntshis, yog ib yam xwv txheej loj. 22 Tib neeg tau ua hauj lwm hnyav hnyav, nws lub siab siv zog nrhiav ub nrhiav no, nws txoj kev khwv nyob hauv lub qab hnub, tau tus qab hau dab tsi ?
23 Nws niaj hnub txom nyem, nws niaj hmo tu siab, nws lub siab tsis tau kev so. Tej ntawd kuj yog yaj ntshis thiab.

1 Nyob hauv lub qab ntuj no, muaj ib lub sij hawm cia ua tas puas tsav yam, muaj ib lub caij cia ua tas puas tsav yam. 2 Muaj ib lub caij yug los, thiab ib lub caij tuag, muaj ib lub caij cog, ib lub caij rho yub. 3 Muaj ib lub caij tua, thiab ib lub caij kho kom zoo, muaj ib lub caij rhuav, ib lub caij txhim. 4 Muaj ib lub caij quaj, ib lub caij luag, muaj ib lub caij ntsaj, ib lub caij dhia. 5 Muaj ib lub caij txawb pob zeb, ib lub caij khaws pob zeb. Muaj ib lub caij sib puag, ib lub caij tsis txhob sib puag. 6 Muaj ib lub caij nrhiav, ib lub caij ploj, muaj ib lub caij muab khaws cia, ib lub caij muab pov tseg.
7 Muaj ib lub caij dua ntaub, ib lub caij xaws ntaub, muaj ib lub caij nyob twj ywm, ib lub caij hais lus. 8 Muaj ib lub caij nyiam, ib lub caij ntxub. Muaj ib lub caij ua rog, ib lub caij thaj yeeb. 9 Tab txawm khwv npaum twg mas yus tau tus qab hau dab tsi ? 10 Kuv pom txoj hauj lwm Tswv Ntuj muab rau tib neeg cov tub ua. 11 Tswv Ntuj tau ua txhua yam kom dhos rau lub sij hawm. Tswv Ntuj muab ib lub siab txawj ntsuas lub sij hawm rau tib neeg. Tab sis tib neeg xav txog tej sij hawm tiam dhau tiam mas tib neeg tsis to taub tias Tswv Ntuj ua dab tsi txij thaum lub hauv paus mus txog hnub kawg.

9 Me hluas, koj yuav xyiv fab rau lub caij hluas. Koj yuav ua lub siab kaj lug thaum koj tseem hluas. Koj mus qhov chaw koj lub siab pus koj mus, mus qhov chaw koj qhov muag ntsia. Tab sis koj yuav tsum paub tias Tswv Ntuj yuav txiav txim rau koj txog tej ntawd tib si. 10 Koj muab kev tu siab tshem mus deb ntawm koj, koj tshem kev mob mus deb ntawm koj cev nqaij, vim lub caij hluas thiab lub caij nplooj hlav txawj yaj ntshis mus.

1 Thaum koj hluas, koj yuav nco txog tus tsim koj. Thaum tseem tsis tau muaj tej hnub koj raug xwv txheej, thiab thaum tsis tau txog cov xyoo uas koj hais tias : “Tej ntawd tsis zoo dab tsi rau kuv !” Mas koj xub nco txog tus tsim koj mog ! 2 Thaum lub hnub, lub hli, cov hnub qub thiab qhov pom kev tseem tsis tau tsaus, thaum ntuj los nag tas huab tseem tsis tau sawv, koj yuav xub nco txog tus tsim koj mog ! 3 Thaum tseem tsis tau txog lub caij uas cov zov tsev tshee, tsis tau txog lub caij cov txiv neej cus plaws khoov. Thaum tsis tau txog lub caij cov poj niam zom zeb tsawg zuj zus, cov ntsia ntawm qhov rais pom tsis meej, 4 thiab lawv kaw cov qhov rooj qhib ncaj txoj kev, mas koj xub nco txog tus tsim koj mog ! Thaum tseem tsis tau txog lub caij lub zeb zom ntsiag zuj zus, thaum yus tsim dheev vim me noog quaj, thaum cov ntxhais nkauj xwb lub suab kwv txhiaj ntsiag tsis tau tu qab, koj yuav nco txog tus tsim koj. 5 Thaum tseem tsis tau ntshai kev nce toj, tseem tsis tau txhawj ntawm ib tog kev, thaum me kooj tshuab tsis tau tshaib, mas koj xub nco txog tus tsim koj mog ! Thaum tib neeg tseem tsis tau nrhiav qhov chaw zwm av mus li, thaum cov neeg nyiav tseem tsis tau sawv los nyiav. 6 Thaum txoj xov nyiaj tseem tsis tau tu, lub ntim kub tseem tsis tau tawg, lub hub ce dej hauv qhov dej tsis tau ntais, txoj hlua tseem tsis tau plam saum lub log hlua rub dej, mas koj xub nco txog tus tsim koj mog ! 7 Thaum av luaj tseem tsis tau rov mus ua av, thaum txoj pa tseem tsis tau rov mus cuag tus Tswv Ntuj uas pub txoj pa, mas koj xub nco txog tus tsim koj mog ! 8 Kos Es Les hais tias : “Tas puas tsav yam txawj yaj ntshis, yog zoo li ib co pa yaj ntshis mus.”

8 Kuv hnov tus kuv hlub ! Saib ! Nws tuaj lawm ! Nws dhia hla toj roob hauv pes khiav tuaj. 9 Tus kuv hlub zoo puav tam li tus kauv, puav tam li tus muas lwj. Ntsia saib ! Nws tuaj sawv nraum ntsa loog. Nws xauj nraum qhov rais tuaj. Nws nyob nraum laj kab ntsia ntsoov tuaj. 10 Tus kuv hlub tsa suab hais rau kuv tias : “Koj sawv tsees ! Kuv leej muam zoo nkauj ! Los mas ! 11 Nyem no lub caij ntuj no dhau lawm, nag twb tu lawm. 12 Paj tawg puv tas lub teb chaws. Yog lub caij seev lus paj lus taum. Tus nquab tsug twb pib quaj hauv peb cov teb tuaj. 13 Cov txiv cev ua cos ntsuab vog, cov paj txiv cawv tsw qab ntxiag. Sawv tsees los mas ! Kuv leej muam zoo nkauj, sawv los ! 14 Kuv me nkauj nquab, koj los hauv cov qhov tsua, hauv tej toj ntxhab. Cev koj lub ntsej muag los rau kuv pom yuad ! Pub kuv hnov koj lub suab mas ! Koj lub suab zoo mloog, koj lub ntsej muag zoo nyiam !” 16 Tus kuv hlub yog kuv tug, kuv yog nws tug. Nws saib nws pab yaj nog zaub xyaw cov paj ntoos.

1 Ntuj teb tag hmo, kuv nrhiav tus uas kuv lub siab nyiam saum kuv lub lav. Kuv nrhiav nws, tab sis kuv nrhiav tsis tau. Kuv sawv mus ncig lub nroog. Kuv nrhiav ntawm tej kev, ntawm tej tshav puam. Kuv nrhiav tus uas kuv lub siab nyiam. Kuv nrhiav, tab sis nrhiav tsis tau. 3 Cov tub zov keeb ncig mus ncig los, lawv ntsib kuv, kuv nug lawv tias : “Nej puas pom tus kuv lub siab nyiam ?” 4 Kuv nyuam qhuav mus dhau plaws ntawm lawv, ces kuv nrhiav tau tus kuv lub siab nyiam. Kuv nthos nkaus nws, kuv yuav tsis tso nws tseg li. Kuv yuav coj nws los hauv kuv niam lub tsev, los hauv kem tsev uas kuv niam xeeb kuv. 5 Cov ntxhais nyob Yes Lus Xas Les, kuv thov nej ! Kuv muab cov sai thiab cov kauv nyob nruab teb los ua tim khawv, nej tsis txhob tsa kuv tus hlub, txhob ua nws tsim los, cia nws tsaug zog kom txaus nws siab.

2 Kuv tsaug zog, tab sis kuv nplooj siab nyob zov hmo. Kuv hnov tus kuv hlub khob qhov rooj. 6 Kuv qhib rooj rau tus kuv hlub, tab sis nws tig hlo, nws cia li ploj ntais lawm. Nws khiav lawm, mas kuv tus plig yuav luag tuag. Kuv nrhiav nws, tab sis nrhiav tsis tau. Kuv hu nws npaum twg, los nws tsis teb. 8 Tsoom ntxhais nyob Yes Lus Xas Les, kuv thov nej, yog nej nrhiav tau kuv tus hlub, nej yuav hais dab tsi rau nws ? Nej hais tias kuv mob vim kev hlub.

6 Koj tso kuv nyob saum koj lub hauv siab xws li ib lub thwj, xws li ib lub thwj nyob saum koj txhais npab. Vim txoj kev hlub muaj zog cuag li kev tuag. Txoj kev hlub kub lug nyaum cuag li ntuj txias teb tsaus, zoo puav tam li hluav taws, zoo puav tam li Huab Tais ib tug nplaim taws. 7 Cov dej hlob tua tsis tau kev sib hlub, cov niam dej ntws nyab tsis duav kev sib hlub. Yog ib tug neeg muab tas nrho nws lub cuab tam huv tib si los muas kev sib hlub, los nws kawg yuav tau txais luag lo lus thuam.

1 Nej cov uas txiav txim rau lub ntiaj teb, nej nyiam txoj kev ncaj mog ! Nej kav tsij xav tswv yim ncaj txog Tswv Ntuj ! Nej ua siab ncaj nrhiav nws. 2 Tswv Ntuj cia cov neeg tsis twv nws nrhiav tau nws xwb. Nws ua kom cov neeg zoo siab ntseeg tau pom xyeem nws. 3 Cov zaj tswv yim nkhaus coj neeg mus deb ntawm Tswv Ntuj. Tus muaj hwj huam pom cov ruam sim nws mas nws ua kom lawv poob ntsej muag. 4 Tus thoob tsib tsis chaws mus hauv ib lub tswv yim phem, nws nyob tsis ruaj hauv ib lub cev zwm rau kev txhaum. 5 Lub tswv yim ntshiab qhia peb, nws ncaim kev nkhaus, nws txav nrug deb ntawm tej zaj tswv yim tsis ntse. Nws tsis xav pom kev txhaum tshwm tuaj. 6 Kev thoob tsib yog ib lub tswv yim nyiam tib neeg. Kev thoob tsib muab txim rau tus neeg hais lus thuam Ntuj. Tswv Ntuj ua tim khawv, nws pom hauv tus thuam Ntuj lub nrog cev thiab pom tseeb hauv nruab siab. Cov lus uas nws tus nplaig hais Tswv Ntuj hnov tas. 7 Huab Tais lub tswv yim nyob puv lub sim ceeb, nws yog tus ua kom tas puas tsav yam nyob ruaj. Nws paub tas puas tsav yam lus uas neeg hais.
12 Nej tsis txhob nrhiav txoj kev tuag nyob hauv ib lub neej yuam kev, nej tsis txhob nrhiav kev puas tsuaj rau nej nyob hauv nej tej hauj lwm. 13 Tswv Ntuj tsis tau tsim txoj kev tuag. Nws tsis xav pom cov muaj txoj sia ploj. 14 Tswv Ntuj tsim txhua yam kom muaj txoj sia nyob. Txhua yam Ntuj tsim los nyob ntiaj teb no xav noj qab nyob zoo. Tsis muaj tshuaj lom neeg nyob hauv txhua yam. Ib txwm txoj kev tuag tsis ua vaj kav lub ntiaj teb no. 15 Vim kev ncaj ncees muaj txoj sia nyob mus li.

12 Cov neeg tsis hwm Ntuj hais tias : Peb kav tsij cuab ntxiab rau tus neeg ncaj, vim nws ua ntxhov peb siab, nws txiav txim rau peb tus yam ntxwv, nws cem peb tias peb ua txhaum rau Txoj Cai, ua txhaum rau txoj kev peb tau kawm. 13 Nws khav tias nws paub Tswv Ntuj, nws rov hu nws ua Huab Tais tus me nyuam. 14 Tus siab ncaj yog ib tug txiav txim rau peb zaj tswv yim, peb ceeb laj pom nws hwv lawm. 15 Nws txoj kev ua neej tsis xws luag txoj, nws tej xub ke txawv luag. 16 Nws saib peb zoo li tej yam cuav. Nws txav ntawm peb txoj kev cuag li peb txoj kev yog tej yam qias. Nws tshaj tias hnub kawg cov neeg ncaj yuav tau txoj hmoov zoo, nws khav tias nws txiv yog Tswv Ntuj. 17 Peb sim saib qhov nws hais saib puas muaj tseeb. Peb sim ntsia saib nws yuav tuag zoo li cas. 18 Yog tus siab ncaj yog Tswv Ntuj tus tub tiag, mas Tswv Ntuj yuav pab nws, thiab yuav npo nws ntawm cov ntxub nws txhais tes.
19 Peb yuav sim nws, peb ua tub qaug nws, peb hiam nws saib. Kom peb paub nws lub siab zoo npaum li cas, thiab saib nws puas ua siab ntev nyiaj kom dhau. 20 Peb kav tsij txiav txim kom nws tuag raws ib txog kev poob koob meej, vim nws twb hais tias yuav muaj tus tuaj npo nws. 21 Cov tsis hwm Ntuj xav tswv yim li ntawd, tab sis lawv yuam kev, lawv lub siab phem mooj lawv lub qhov muag. 22 Lawv tsis paub Tswv Ntuj cov txuj zais tob tob. Lawv tsis tso siab tias Ntuj yuav pub nqi zog rau cov neeg ntshiab, lawv tsis ntseeg tias cov neeg siab huv yuav tau txais paj tshab.
23 Muaj tseeb ! Tswv Ntuj tsim neeg tsis txawj tuag tsis txawj lwj. Tswv Ntuj tsim neeg muaj lub meej yim raws li Tswv Ntuj lub meej yim. 24 Vim dab phem khib mas txoj kev tuag thiaj txeem los nyob hauv lub sim ceeb. Cov neeg uas yog dab phem tug, mas muaj ib hnub lawv yuav paub.

1 Cov neeg ncaj tus plig nyob hauv Tswv Ntuj txhais tes. Tsis muaj ib yam xwv txheej dab tsi yuav raug tau lawv. 2 Cov neeg tsis muaj tswv yim xav tias cov neeg ncaj tuag lawm, hos lawv txoj kev ncaim mus yog ib yam xwv txheej loj, 3 thiab lawv txoj kev tawm rooj mus deb ntawm peb, yog ib txog kev puas tsuaj loj. Tab sis cov neeg ncaj ntawd nyob hauv kev thaj yeeb lawm. 4 Tib neeg xav tias cov siab ncaj tuag, mas yog lawv raug txim, tab sis lawv tso siab lug tias lawv muaj txoj sia nyob mus li. 5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj. Tswv Ntuj sim lawv, nws pom tias lawv tsim nyog ua nws tug. 6 Tswv Ntuj sim lawv, zoo li sim kub nyob hauv lub yeej vub. Tswv Ntuj txais lawv zoo li thaj txi Ntuj zoo txhij zoo txhua. 7 Thaum Tswv Ntuj tuaj xyuas lawv, mas lawv ci ntsa iab. Lawv yuav khiav nrawm cuag li hluav taws ri mus kis tej roob nqeeb qhuav. 8 Lawv yuav txiav txim rau cov kuj cuab, lawv yuav tswj cov haiv neeg. Huab Tais yuav ua vaj kav cov siab ncaj mus ib txhis. 9 Cov neeg tso siab rau Huab Tais yuav paub txoj kev tseeb. Cov neeg npuab Huab Tais yuav nyob ze nws hauv txoj kev nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, nws tuaj xyuas cov nws xaiv.

1 Thaum txog hnub txiav txim, tus neeg siab ncaj yuav sawv ntsug, nws nyob ruaj nreb ntawm cov neeg uas thaum ub hiam nws thiab thuam nws cov hauj lwm. 2 Cov neeg thuam tus siab ncaj pom nws txais kev cawm, lawv yuav ntshai, lawv poob siab vim lawv xav tias tus siab ncaj yuav tsis dim ntawm txoj kev txom nyem. 3 Lawv yuav rov khuv xim, lawv ntsaj, lawv lub siab ntxhov txoog, lawv yuav rov sib tham tias : 4 Saib ! Nws yog tus peb tau hnyos, tus peb tau ua tub qaug nws. Peb tswv yim ploj lawm, peb xav tias nws coj ib lub neej vwm, hnub kawg nws yuav poob koob meej. 5 Ua cas nyem no Tswv Ntuj txais nws nyob hauv Tswv Ntuj cov tub ? Ua cas nws yog ib tug nyob hauv cov neeg ntshiab ? 16 Cov neeg ncaj muaj txoj sia nyob mus li. Lawv txais koob haum loj, lawv nyob ze ntawm Huab Tais. Tus Huab Tais nyob siab saib xyuas lawv. Huab Tais txhais tes yuav pub cov vaj lub mom teev kub zoo nkauj rau lawv. Huab Tais txhais tes xis txuag lawv. Nws txhais npab pab thaiv lawv xws li daim leem phiaj. 17 Huab Tais txoj kev hlub yog cov neeg siab ntshiab lub tsho hlau. Huab Tais muab ntaj muab hmuv rau cov ntshiab tuav, cov ntshiab thiaj yeej cov yeeb ncuab. 18 Tus neeg siab ntshiab muab txoj kev ncaj los ua nws lub tsho hlau. Nws muab lub tswv yim tsis dag los ua kaus mom tooj. 19 Nws muab txoj kev ntshiab los ua daim leem phiaj thaiv nws. 20 Nws muab nws lub siab ceev los ua rab ntaj ntse. Tas lub qab ntuj nrog nws ntaus tsam tiv cov neeg tsis muaj tswv yim.

1 Cov vaj, nej mloog mas, nej yuav tsum to taub ! Cov nom txiav txim rau cov teb chaws tim npoo ntiaj teb, nej kawm txuj mas ! 2 Nej cov uas tswj zeej tsoom, thiab nej cov uas khav tias nej kav ntau lub kuj cuab, nej tig ntsej los mloog mog ! 3 Yog Huab Tais muab hwj huam rau nej, yog Tus Nyob Siab pub kom nej muaj hwj chim. Nws yuav saib nej cov hauj lwm thiab nws yuav tsom nej tus nru lus. 4 Nej yog ib co tub txib leg Huab Tais cov hauj lwm ua vaj. Yog nej txiav txim tsis ncaj, yog nej coj Txoj Cai, yog nej tsis ua raws li Tswv Ntuj nyiam, 5 mas Tswv Ntuj yuav tuaj muab txim rau nej sai sai. Cov ua hlob yuav raug txim hnyav. 6 Tus neeg me, mas Ntuj yuav zam rau nws thiab khuv leej nws. Tab sis cov muaj peev xwm loj yuav raug lub txim loj. 7 Tswv Ntuj tsis thaub qab, nws tsis ntshai leej twg. Kev loj hem tsis tau nws. Loj me los yog nws tsim tib si. Nws saib xyuas sawv daws zoo ib yam. 8 Tab sis nws yuav nug cov muaj hwj huam nruj nruj ! 9 Cov vaj, kuv hais tej no mas yog hais rau nej kom nej kawm tau kev thoob tsib, kom nej tsis txhob ntog. 10 Cov ua ncaj taug kev ntshiab mas Ntuj yuav saib lawv yog neeg ntshiab. Cov txiav siab kawm kev ntshiab, lawv yuav ntsib chaw vam khom. 11 Nej yuav tshaib thiab nqhis txog kuv cov lus ! Nej thiaj thoob tsib thiab paub txuj.
12 Kev thoob tsib ci ntsa iab tsis txawj nphob ib zaug. Cov neeg nyiam kev thoob tsib, mas nws cia lawv ntsia ntsoov nws. Cov neeg nrhiav kev thoob tsib, mas nws cia lawv ntsib nws. 13 Kev thoob tsib xub tuaj thawj cov neeg ntshaw txog nws, nws tawm tuaj rau lawv paub nws. 14 Thaum nyuam qhuav kaj ntug, yog leej twg mus nrhiav kev thoob tsib mas nws tsis tas yuav khwv. Nws yuav pom kev thoob tsib zaum nraum nws qhov rooj tos nws. 15 Nrhiav kev thoob tsib mas yog txoj kev ntse zoo tshaj. Leej twg uas zov hmo kawm kev thoob tsib, mas nws yuav dim ntawm kev ntxhov siab sai. 16 Kev thoob tsib tawm mus tas qhov txhia chaw, nws nrhiav cov neeg tsim nyog txais nws. Kev thoob tsib tshwm ntawm tej xub ke, nws ua ntsej muag luag nyav rau cov uas tsis thuam nws. Kev thoob tsib mus cuag lawv lub tswv yim tsis tseg.

7 Kuv tau thov Ntuj ces Ntuj pub kev txawj kev ntse rau kuv. Kuv hu txog Ntuj ces lub tswv yim thoob tsib los nyob saum kuv. 8 Kuv nyiam kev thoob tsib dua tsoom vaj cov cwj thiab cov theej kiab. Kuv muab nyiaj txiag los piv rau kev thoob tsib ces kuv saib nyiaj txiag yog tej yam khoob ntshuv. 9 Kuv saib lub hlaws npliag deg uas zoo nkauj tshaj cov, muaj nqes tsis npaum kev thoob tsib. Yog muab tas cov kub huv tib si los piv rau kev thoob tsib, mas tej kub ntawd tsuas yog zoo li xuab zeb. Muab nyiaj tso ze ntawm kev thoob tsib, nyiaj yog zoo li av nkos. 10 Kuv nyiam kev thoob tsib dua kev noj qab nyob zoo thiab kev zoo nkauj zoo nraug. Kuv nyiam kev thoob tsib dua qhov pom kev, vim kev thoob tsib ci ntsa mus li tsis muaj caij nphob. 11 Kev thoob tsib coj tas puas tsav yam zoo nrog nws tuaj rau kuv. Nws txhais tes pub ib lub cuab tam nplua nuj ntsuas tsis tau rau kuv.
22 Kev thoob tsib yog ib lub tswv yim ntse thiab ntshiab. Kev thoob tsib ib txhij qhia txog tib yam thiab txog ntau yam. Nws ntse hau, txav mus los sai, nkag thoob plaws, tsis muaj yam qias. Kev thoob tsib ntshiab li dej, nws ua siab ntev nyiaj txhua yam, nws nyiam kev zoo. 23 Kev thoob tsib yog ib lub tswv yim yus cheem tsis tau, ua zoo rau luag, ua tib neeg phooj ywg, ruaj nreb khov kho, tsis paub kev nyuaj siab, yog ib lub tswv yim ruaj nreb, thiab tsis paub kev ntxhov siab. Kev thoob tsib ua tau tas puas tsav yam, nkag thoob plaws sawv daws lub tswv yim, tsis hais cov tswv yim txawj los ntse hau npaum li cas. 24 Kev thoob tsib txawj mus los nrawm dua txhua yam uas mus los, nws nkag thiab hla thoob plaws dhau txhua yam, vim nws heev kawg. 25 Kev thoob tsib yog ib lo pa tawm ntawm Tswv Ntuj lub hwj huam los, yog ib yam ntshiab huv ncho ntawm tus muaj hwj huam los. Li ntawd, tsis muaj ib tee dub yuav txeem tau mus hauv nws. 26 Kev thoob tsib yog ib kab pom kev tuaj ntawm qhov pom kev nyob mus li tuaj, yog ib daig tsom iav huv tsom tau Tswv Ntuj cov hauj lwm, yog daim duab theej Tswv Ntuj lub hwj chim. 27 Kev thoob tsib nyob twm zeej, tsis kav nws ua tau tas puas tsav yam. Nws nyob nws li qub mus li, tsis kav nws ua tau kom txhua yam hauv lub sim ceeb tshiab tuaj. Tiam dhau tiam nws mus ntxaum cov neeg ntshiab tus ntsuj plig ib txheej dhau ib txheej. Nws tsa lawv ua Tswv Ntuj cov phooj ywg thiab cov Yaj Saub. 28 Tswv Ntuj nyiam cov neeg nrog kev thoob tsib nyob swm. 29 Kev thoob tsib zoo nkauj dua lub hnub, nws zoo tshaj ib tsoom hnub qub, nws zoo dua lub hnub qhov pom kev, nws tseem zoo dua qhov pom kev. 30 Vim lub hnub qhov pom kev txawj hloov ua qhov tsaus ntuj, hos kev phem yeej tsis tau kev thoob tsib.

1 Txoj kev thoob tsib lub zog mus thoob ntuj thoob teb, nws coj lub sim ceeb mus taug kev zoo.

13 Tus neeg twg thiaj yuav paub tau Tswv Ntuj tus nru lus ? Leej twg yuav mem tau qhov uas Huab Tais nyiam ? 14 Leej tib neeg uas txawj tuag, nws zaj tswv yim yog tswv yim txhawj. Neeg zaj tswv yim tsis ruaj. 15 Neeg lub cev txawj lwj, ua nra hnyav qees rau neeg tus plig, neeg lub cev zoo li ib lub tsev av nkos tsuam tus plig uas muaj kev txhawj nyob puv hauv. 16 Peb yuav luag mem tsis tau tias muaj dab tsi nyob ntiaj teb no. Peb siv siv zog thiaj nrhiav tau tej yam uas nyob ze ntawm peb txhais tes, ua li mas yog leej twg thiaj yuav nrhiav tau tej yam uas nyob saum Ntuj ? 17 Huab Tais, leej twg yuav paub tau koj lub siab, yog koj tsis pub kev thoob tsib thiab koj tsis tso koj lub tswv yim ntshiab tuaj saum ntuj tuaj ? 18 Vim muaj li ntawd, mas cov neeg nyob ntiaj teb no tej xub ke ncaj tuaj, tib neeg thiaj tau paub tej yam ntxim koj siab. Kev thoob tsib tau cawm lawv.

10 Thaum tus neeg siab ncaj Yas Kos tab tom khiav mus deb ntawm nws tus tij laug npau taws, mas kev thoob tsib coj Yas Kos mus taug tej txoj kev ncaj. Kev thoob tsib muab Tswv Ntuj lub ceeb tsheej rau nws pom. Kev thoob tsib qhia txuj kom nws paub yam ntshiab. Kev thoob tsib nres nws kom nws ua tau nws cov hauj lwm, thiab ua kom Yas Kos tej kev khwv txi tau txiv. 11 Muaj ib co neeg ntshaw lub cuab tam loj, lawv hiam tus siab ncaj Yas Kos, kev thoob tsib nres nws, ua kom nws nplua nuj tuaj. 12 Kev thoob tsib thaiv nws ntawm cov yeeb ncuab, thiab txuag nws kom dim ntawm cov neeg phem uas cuab ntxiab rau nws. Tus siab ncaj ntawd nrog kev thoob tsib sib ntsuas zog, kev thoob tsib cia nws ua tus yeej. Tus siab ncaj thiaj paub tias kev hwm Ntuj muaj zog dua tas puas tsav yam. 13 Thaum luag muab tus siab ncaj Yos Xes muag, kev thoob tsib tsis tau tso nws pov tseg. Kev thoob tsib txuag nws kom nws txhob ua txhaum. 14 Kev thoob tsib nrog tus siab ncaj Yos Xes nqes mus hauv lub qhov tim thaj. Kev thoob tsib tsis tso tus siab ncaj pov tseg rau hauv cov saw hlau. Kev thoob tsib nqa tus cwj vaj ntxwv tuaj rau tus siab ncaj Yos Xes tuav. Kev thoob tsib pub kom tus siab ncaj muaj peev xwm tswj luag, kom sawv daws pom tias cov neeg xyav tus siab ncaj lub moo yog ib co neeg dag. Kev thoob tsib pub kom tus neeg ncaj nto koob meej mus ib txhiab ib txhis.

23 Tswv Ntuj, koj khuv leej sawv daws, vim koj ua tau tas puas tsav yam. Koj qi muag tsis ntsia neeg cov txhaum, kom lawv tu siab tiag rau lawv cov txhaum.
24 Koj nyiam tas puas tsav yam uas muaj txoj sia nyob, koj tsis thuam ib yam uas koj tau tsim los. Yog koj ntxub yam twg mas koj tsis tsim yam ntawd kom muaj txoj sia nyob. 25 Yam uas koj tsis tau hais kom muaj, mas nws yuav ua zoo li cas thiaj ciaj taus ? 26 Tab sis koj txuag tas puas tsav yam, vim puas tsav yam yog koj tug, vim koj yog tus Tswv nyiam txoj sia.

1 Koj lub tswv yim tsis txawj puas, nws nyob hauv tas puas tsav yam. 2 Koj thiaj maj mam qhuab qhia cov neeg ntog. Koj xub ntuas lawv, koj ua kom lawv paub tias lawv ua qhov twg txhaum. Kom lawv nrauj qhov phem ntawd pov tseg, thiab kom lawv los ntseeg txog koj, Huab Tais !
13 Tswv Ntuj, dhau ntawm koj lawm tsis muaj lwm tus yuav saib xyuas tau txhua leej xws li koj. Tsis muaj lwm tus uas koj yuav tsum lees ntawm nws xub ntiag tias koj txiav txim tsis ncaj. 16 Yog vim koj muaj hwj huam koj thiaj muaj lub siab ncaj. Yog vim koj lub hwj chim tswj tas puas tsav yam thiab txuag tau tas puas tsav yam. 17 Yog muaj tej tus neeg tsis ntseeg tias koj lub hwj huam loj tas nrho, mas koj muab koj lub zog rau lawv pom. Yog muaj neeg muaj cuab kav hla koj, mas koj qhau lawv. 18 Tab sis, Tswv Ntuj koj txawj cheem koj lub zog, koj tsis txiav txim hnyav rau peb. Koj tswj peb, tab sis koj maj mam ua. Tsuav yog koj xav ua yam twg, mas koj lub hwj huam nyob ntawd, koj ua tau tam sim ntawd. 19 Yog vim koj maj mam ua li ntawd, mas koj thiaj li tau qhia koj haiv neeg tias tus siab ncaj yuav ua tib neeg tus phooj ywg. Koj ua kom koj cov tub ki tau kev tso siab tias thaum lawv ua txhaum tas lawm, mas koj pub kom lawv txawj tig los yuav lub siab tshiab.

1 Muaj tseeb tiag ! Cov neeg tsis paub Tswv Ntuj, mas lawv tsis tsim nqi dab tsi ! Lawv pom lub sim ceeb, tab sis lawv tsis txawj zeem tus ib txwm nyob, lawv ntsia cov hauj lwm ua tiav lawm, mas lawv zeem tsis tau tus ua cov hauj lwm ntawd. 2 Ces lawv saib hluav taws, saib cua, saib huab, saib lub ntuj hnub qub, saib cov dej nphau nphwv thiab saib cov hnub qub yog ib co dab tswj hwm lub sim ceeb. 3 Lawv qhuas tias lawv pom tej ntawd zoo nkauj ces lawv muab ua ib cov dab. Tab sis lawv yuav tsum paub tias tus Tswv tau tsim tej ntawd nws tseem loj tshaj tej ntawd. Vim tus tsim tej yam ntawd yog tus tsim qhov zoo nkauj. 4 Yog cov tsis paub Tswv Ntuj qhuas tias tej yam ntawd muaj hwj huam thiab ua tau hauj lwm loj, mas phim lawv yuav xav tias tus tau tsim tej ntawd tseem muaj hwj huam loj dua tej ntawd. 5 Vim lub hwj huam thiab qhov zoo nkauj uas nyob hauv tej yam Ntuj tsim los ua kom peb pom tau me ntsis tus Tswv tsim tej ntawd los. 6 Tsis kav cov neeg tsis paub Tswv Ntuj, mas tsis phim yuav thuam lawv hnyav, tej zaum lawv yuam kev tab sis kuj yog lawv nrhiav Tswv Ntuj thiab lawv xav paub nws, 7 lawv nyob xyaw tej yam Tswv Ntuj tsim, lawv nrhiav kom lawv to taub txhua yam, tab sis lawv pom tias tej yam ntawd zoo nkauj tas nrho, ces lawv teev tej ntawd. 8 Txawm yog li ntawd los yuav zam rau lawv tsis tau, 9 vim lawv paub txuj kom lawv tsom tau lub sim ceeb, vim li cas lawv tsis ntxov ntsib tus Tswv ?

6 Tswv Ntuj, peb cov yawg koob twb xub paub txog hmo uas koj yuav muab cov Hais Nkws Tos tua. Koj ua kom lawv xub paub vim koj xav pab lawv tso siab rau cov lus koj cog, koj xav pab lawv ua siab loj. 7 Koj haiv neeg thiaj tos ntshis tias cov neeg ncaj yuav dim, cov yeeb ncuab yuav ploj. 8 Vim tias koj ib txhij rob caub rau cov ntxub peb, thiab koj muab koob meej rau peb, koj xaiv peb los ua koj tug. 9 Vim li ntawd tas tsoom tub ki ntshiab thiaj txi Ntuj twj ywm nyob hauv nyias tsev, thiab lawv koom cog lus tsa ib txog cai zoo li no : yam li cov ntshiab lawv yuav sib faib lawv cuab tam, lawv yuav sib pab ris xwv txheej. Lawv ua ke hu cov yawg koob cov nkauj.
14 (Thaum txog Hmo Hla nyob Hais Nkws Tos teb), tas puas tsav yam nyob ntsiag to, yog hmo ntuj ib tag hmo lawm. 15 Ces nyob saum txheej ntuj siab, koj lo lus muaj hwj huam tas nrho sawv tsees ntawm lub theej kiab los. Koj lo lus zoo li tus peeb zeej tsis txawj hlub, nws tuaj nyob hauv ib lub teb chaws uas yuav tuag tu noob. Nws tuav koj cov lus ceeb toom, yog nws rab ntaj ntse hau. 16 Nws nres, nws ua kom muaj kev tuag ri mus puv tas lub sim ceeb. Koj lo lus mus chwv lub ntuj thiab tsuj ntiaj teb.

6 (Thaum koj haiv neeg hla hiav txwv). Koj xav txuag koj tsoom me nyuam kom lawv txhob raug yam phem, kom tas lub sim ceeb mloog koj cov lus qhia. Koj rov puab dua lub sim ceeb kom tshiab tuaj. Lawv pom huab tuaj ntsauv lub yeej. Lawv pom av qhuav tshwm hauv tiv txwv dej los. Lub hiav txwv Liab txia ua ib txog kev zoo mus. Cov dej nphau nphwv txia ua ib lub tiaj ntsuab xiab. 8 Koj txhais tes pov hwm koj haiv neeg hla lub tiaj ntawd. Lawv qhuas koj cov hauj lwm zoo nkauj zoo saib. 9 Lawv zoo li cov nees nog zaub tom nras. Lawv dhia paj paws xws li ib pab yaj. Lawv cav txog koj, Huab Tais, vim koj yog tus npo lawv dim.

1 Txhua txoj kev thoob tsib tuaj ntawm HUAB TAIS tuaj. Kev thoob tsib nrog HUAB TAIS nyob mus li. 2 Leej twg yuav suav txheeb cov suab puam hauv lub hiav txwv, los suav tau cov teev dej nag, los suav saib tshuav pes tsawg hnub lub ntiaj teb yuav kawg ? 3 Leej twg yuav ntsuas tau tias lub ntuj siab li cas, lub ntiaj teb dav li cas, qab tiv txwv tob li cas ? 4 Ntuj tsim kev thoob tsib ua ntej txhua tsav txhua yam, lub tswv yim ntse xyuam xim yeej ib txwm nyob txawm. 5 Kev thoob tsib txhawv ntawm Tswv Ntuj lo lus, puag saum cov txheej ntuj siab tuaj. 6 Leej twg tau pom kev thoob tsib cov cag tawm tuaj rau pom xyeem ? Leej twg paub kev thoob tsib cov nru lus zais tob tob ?
7 Ntuj qhib kev thoob tsib cov txuj ci rau leej twg pom xyeem ? Leej twg paub nws tej xub ke ? 8 Tsuas muaj ib tug thoob tsib xwb. Nws muaj hwj xyeej, nws zaum saum nws lub theej kiab. 9 Tus tau tsim kev thoob tsib yog Huab Tais, nws pom kev thoob tsib, nws ntsuas tau kev thoob tsib, thiab tso tau kev thoob tsib nyob hauv nws cov hauj lwm tib si. 10 Huab Tais ua siab dav faib kev thoob tsib rau txhua tus neeg. Nws muab pub rau cov neeg nyiam kev thoob tsib.

1 Me tub, yog koj txav los tsob hwb Huab Tais mas koj npaj koj tus plig mus tiv kev ceeb laj. 2 Koj ua neeg siab ncaj thiab khov kho. Thaum txog lub caij raug txom nyem koj txhob txhawj. 3 Koj khaub zig Huab Tais, tsis txhob txav mus deb ntawm nws, ces thaum txog koj hnub kawg Huab Tais yuav tsa koj siab. 4 Tas puas tsav yam uas tuaj raug koj, mas koj txais mog ! Thaum koj raug kev poob tsim, mas koj ua siab ntev. 5 Luag nchuav kub nyob hauv hluav taws kom huv tuaj. Cov neeg uas ntuj xaiv, mas Ntuj nchuav lawv nyob hauv txoj kev ua neeg poob tsim. 6 Koj tso siab rau Huab Tais, nws yuav tuaj pab koj. Koj taug txoj kev ncaj, koj cia siab rau Huab Tais. 7 Nej cov uas hwm Huab Tais, nej vam txog nws lub siab khuv leej neeg. Nej tsis txhob ncaim ntawm nws tsam nej ntog. 8 Nej cov uas hwm Huab Tais, nej tso siab rau nws, ces nej yuav txais koob haum xwb. 9 Nej cov neeg uas hwm Huab Tais, nej rau siab vam txog nws cov paj tshab. Nej vam tias nws pub kev kaj siab lug mus li. Nej vam tias nws khuv leej neeg. 10 Nej ntsia cov phaj neeg dua tas lawm, nej saib cov neeg tso siab rau Huab Tais, puas muaj ib tug raug txoj kev poob ntsej muag ? Cov hwm Huab Tais, puas muaj ib tug uas Huab Tais tso nws pov tseg ? Los puas muaj ib tug tau thov Huab Tais, tab sis Huab Tais tsis teb nws ? 11 Vim Huab Tais hlub thiab khuv leej neeg. Nws zam txhaum thiab nws cawm tus txom nyem. 12 Tus neeg ntaus siab me, tus neeg txhais tes tub nkeeg muaj ob lub siab, coj ob tug yam ntxwv mas nws txoj hmoov yuav phem. 13 Tus neeg ntaus siab me, nws txoj hmoov yuav phem vim nws tsis ntseeg. Nws tsis muaj Huab Tais pov hwm nws.

1 Cov me nyuam, nej mloog kuv, kuv yog nej txiv, nej coj tus yam ntxwv ua kom nej tau txais kev cawm. 2 Huab Tais ua kom leej txiv muaj koob meej nyob hauv nws cov me nyuam, nws ua kom leej niam muaj cai saib nws tej tub ki. 3 Tus hwm nws txiv nws them nws cov txim txhaum. 4 Tus cav txog nws niam lub koob meej nws zoo li tus neeg sau ib txhab nyiaj. 5 Tus hwm nws txiv, yav tom ntej nws yuav ntsib chaw zoo siab nyob hauv nws cov me nyuam. Thaum nws thov Ntuj, Ntuj yuav mloog nws lus thov. 6 Tus cav txog nws txiv lub koob meej, nws yuav nyob ntev xyoo. Tus ua xis nws niam siab, nws mloog lus. 7 Tus hwm Huab Tais, nws kuj hwm nws niam nws txiv, thiab nws tsob hwb nws niam nws txiv xws li ib co tswv. 8 Koj yuav hwm koj txiv ntawm lub ncauj, ntawm tej tes taw tib si, nws lo lus foom hmoov zoo thiaj yuav tuaj txog koj. 9 Leej txiv lo lus foom hmoov zoo ua kom nws tej tub ki cov tsev neeg nyob ruaj nreb. Leej niam lo lus foom hmoov phem rhuav nws cov tub ki tej vaj tse. 10 Yog koj txiv poob ntsej muag mas koj txhob khav tias koj muaj koob meej, vim thaum yus txiv poob ntsej muag mas yus tsis tau koob meej. 11 Ib tug neeg lub koob meej tuaj ntawm nws txiv lub meej mom tuaj. Thaum ib leeg niam raug luag thuam, mas nws cov me nyuam kuj raug kev txaj muag.
17 Me tub, thaum koj ua koj tes dej num, koj txhob muab hlob, ces cov neeg uas ntuj xaiv yuav nyiam koj. 18 Koj yim yog tus loj, koj yim yuav nyiam ua tus me, koj thiaj yuav yog tus neeg xis Huab Tais siab. 20 Vim Huab Tais lub hwj huam loj tas nrho, thiab yog cov neeg me thiaj cav lus zoo txog nws. 28 Thaum tus neeg muab hlob raug txom nyem mas tsis muaj tshuaj kho tau nws zoo, vim ib tug yub phem nrhau cag tob nyob hauv nws lawm. 29 Tus neeg xyuam xim xav ntsoov txog cov paj lug nyob hauv nruab siab. Tus neeg thoob tsib ntshaw ib lub pob ntseg qhib lug mloog.

11 Kev thoob tsib tsa nws cov me nyuam nyob siab, nws saib xyuas cov nrhiav nws. 12 Tus nyiam kev thoob tsib kuj nyiam ua neeg me. Cov uas sawv ntxov tsees los, nrhiav kev thoob tsib mas lawv yuav ntsib kev zoo siab. 13 Tus muaj kev thoob tsib nws yuav muaj koob meej los ua nws lub cuab tam. Nws mus txog twg, yuav muaj tus foom hmoov zoo rau nws. 14 Cov uas tsob hwb kev thoob tsib lawv kuj tsob hwb Tus Ntshiab. Cov uas lawv nyiam kev thoob tsib, mas Huab Tais kuj nyiam lawv. 15 Tus mloog kev thoob tsib yuav txiav txim rau cov kuj cuab. Tus muab siab rau nrhiav kev thoob tsib nws yuav tau nyob nyab xeeb. 16 Yog nws tso siab rau kev thoob tsib, nws yuav tau txais kev thoob tsib los ua nws tug, nws cov xeeb ntxwv kuj yuav tau txais. 17 Chiv thawj, kev thoob tsib coj nws mus taug tej txoj kev com kawb, ua kom nws ntshai thiab tshee. Kev thoob tsib ua nruj ua tsiv cob qhia nws. 18 Tab sis kev thoob tsib yuav coj nws rov los taug txoj kev ncaj, thiab qhia txhua yam tob rau nws paub. 19 Yog nws txhob txwm ua yuam kev, mas kev thoob tsib tso nws pov tseg thiab cia nws mus raws kev ploj kev tuag.

1 Koj txhob tso siab rau koj cov nyiaj txiag. Koj txhob hais tias : ‘Kuv muaj txhua yam txaus kuv siab lawm.’ 2 Koj tsis txhob cia koj lub zog thiab koj lub siab coj koj mus ua raws koj lub siab ntshaw. 3 Koj txhob hais tias : ‘Leej twg yuav tswj tau kuv ?’ Vim Huab Tais yuav muab txim rau koj. 4 Koj tsis txhob hais tias : ‘Kuv ua txhaum, tab sis tsis muaj xwv txheej dab tsi tuaj raug kuv !’ Vim Huab Tais maj mam ua siab ntev tos. 5 Koj txhob tso siab dhau tias Ntuj yeej zam txhaum rau koj mus li, ces koj ua txhaum tsis tseg. 6 Koj txhob hais tias : ‘Huab Tais siab zoo tas nrho, kuv ua txhaum ntau, nws yuav zam rau kuv !’ Vim HUAB TAIS txawj hlub thiab txawj npau taws. Nws npau taws rau cov neeg txhaum. 7 Koj txhob ua siab qeeb tsis rov los cuag Huab Tais, txhob ncua hnub dhau hnub. Tsam ib sij huam Huab Tais npau taws ces hnub txiav txim koj yuav tuag. 8 Koj txhob tso siab rau tej yam koj tau ntawm txoj kev ua tsis ncaj los. Thaum txog hnub raug txom nyem, tej ntawd pab tsis tau koj dab tsi li.

5 Kev hais lus mos ua kom yus tau phooj ywg coob. Thaum yus hais lus luag ntxhi rau luag, luag kuj teb luag ntxhi rau yus. 6 Koj yuav nrog coob leej sib fim. Tab sis nyob hauv ib txhiab leej ntawd koj tsuas xaiv tau ib leeg xwb ua tus pab koj xav tswv yim. 7 Yog koj xav nrog ib tug ntaus phooj ywg, koj sim nws tso. Txhob rawm qhib koj lub siab rau nws. 8 Vim thaum nws zoo siab nws nrog koj ntaus phooj ywg, tab sis lwm hnub nws tsiv siab tuaj mas nws tsis nrog koj ua phooj ywg ntxiv. 9 Muaj tej tus phooj ywg txawj hloov mus ua yeeb ncuab, ces lawv qhia neb tej lus tsis sib haum, nws ua kom koj poob ntsej muag. 10 Muaj tej tus uas lawv zoo siab ua phooj ywg nrog koj zaum noj ib rooj qav. Tab sis thaum txog hnub nyuaj lawv fav xeeb rau koj. 11 Thaum koj nyob vam meej ntws, nws npuab koj ti txha, nws hais lus zoo rau koj cov tub txib. 12 Tab sis thaum koj pluag lawm, nws ua tus tiv koj, nws tsis xav ntsib koj. 13 Koj txav mus deb ntawm koj cov yeeb ncuab mog ! Koj ceev faj rau koj cov phooj ywg. 14 Ib tug phooj ywg pheej xeeb yog ib qho chaw nkaum khov kho, tus nrhiav tau zoo phooj ywg, mas nws tau ib txhab kub. 15 Ib tug phooj ywg pheej xeeb, yus ntsuas tsis tau nws tus nqi. Tsis muaj ib rab teev luj tau nws tus nqi. 16 Ib tug phooj ywg zoo yog ib hwj cawv tshuaj nres siav. Cov hwm HUAB TAIS nrhiav tau tus phooj ywg zoo. 17 Tus hwm Huab Tais tau tseem phooj ywg. Vim tias Huab Tais zoo li cas mas nws tus phooj ywg kuj zoo li ntawd.

7 Koj tsis tau tshuaj xwm zoo, mas koj txhob rawm cem lawv. Koj xub xav tswv yim tso, koj mam qhuab qhia lawv. 8 Koj tsis tau hnov lawv lus kom tag, koj txhob rawm teb rau lawv. Thaum lawv tab tom piav lawv zaj, mas koj txhob pib hais lus. 9 Thaum luag hais rooj plaub tsis haum koj siab, koj txhob nrog luag sib cav. 10 Koj txhob nrog cov neeg nkhaus zaum txiav txim. Leej tub, koj txhob pib ua ntau yam hauj lwm. Yog koj ua ntau yam dhau mas koj yuav tsis dim ntawm luag lo lus cem koj. Tab yog koj leg npaum li cas, mas koj to taub tsis thoob. Yog koj khiav los koj yuav tsis dim. 11 Muaj ib txhia neeg khwv khwv, lawv sab kawg, lawv ua maj ua ceev. Qhov kawg lawv kuj ua tsis tau dab tsi tiav.

1 Tus hwm Huab Tais nws ua ib co num zoo. Tus mloog Txoj Cai nws yuav txais txoj kev thoob tsib. 2 Txoj kev thoob tsib tuaj cuag nws xws li ib leeg niam. Txoj kev thoob tsib txais nws xws li ib tug poj niam tsim txiaj. 3 Txoj kev thoob tsib yug mov rau nws kom nws ntse. 4 Tus neeg hwm Huab Tais ib rau txoj kev thoob tsib, nws tsis ntog. Nws khaub zig txoj kev thoob tsib, nws tsis poob ntsej muag. 5 Txoj kev thoob tsib tsa tus neeg hwm Huab Tais nyob siab dua nws cov phooj ywg. Txoj kev thoob tsib pab nws qhib ncauj hais lus nyob hauv cov rooj ncauj lus. 6 Tus neeg hwm Huab Tais nrhiav tau kev xyiv fab thiab kev zoo siab ua lub kaus roos nws, nws txais lub zoo npe los ua nws lub cuab tam nyob mus li.
15 Yog koj xav mas koj yeej coj cov lus qhia tau. Koj yuav ua xis Huab Tais siab. 16 Huab Tais tso dej thiab hluav taws rau ntawm koj xub ntiag. Koj xyab tes mus kov dej los kov hluav taws tau raws li koj nyiam. 17 Txoj sia thiab txoj kev tuag nyob ntawm neeg xub ntiag. Ntuj pub txoj sia thiab txoj kev tuag rau neeg raws li neeg nyiam. 18 Txoj kev thoob tsib loj tas nrho, nws muaj zog, nws muaj hwj huam. Nws pom tas ib puas tsav yam. 19 Huab Tais ntsia ntsoov cov neeg hwm nws. Nws paub txhua yam neeg ua. 20 Huab Tais tsis tau kom leej twg mus taug txoj kev tsis hwm Ntuj, nws tsis tau tso lus rau leej twg ua txhaum.

1 Huab Tais muab av luaj los tsim neeg, nws xa neeg rov mus ua av. 2 Huab Tais pub kom tib neeg nyob npaum no hnub npaum no xyoo, nws muab tas puas tsav yam nyob ntiaj teb rau neeg kav. 3 Nws muab ib lub zog zoo li nws lub rau neeg, nws tsim neeg xws li nws tus duab. 4 Huab Tais ua kom tas puas tsav yam ntshai neeg, kom neeg tswj tau me tsiaj me noog.
6 Nws tsim neeg muaj ib lub ncauj ib tug plig, ob lub qhov muag, ob lub pob ntseg, nws muab ib lub siab txawj xav rau neeg. 7 Huab Tais tsim neeg txawj thiab ntse, nws pub kom neeg paub qhov phem qhov zoo. 8 Nws kaj neeg lub siab kom neeg pom tias nws tej hauj lwm zoo, 10 kom lawv cav txog nws lub npe ntshiab, kom lawv piav yam loj nws tau ua. 11 Huab Tais pub kom neeg paub txuj, thiab nws muab Txoj Cai pub txoj sia rau lawv. 12 Huab Tais nrog neeg cog ib co lus nyob mus li. Nws qhia neeg kom neeg paub nws Txoj Cai. 13 Neeg qhov muag tau pom Huab Tais lub hwj chim loj. Neeg pob ntseg tau hnov Huab Tais lub suab muaj hwj chim. 14 Huab Tais tau hais rau neeg tias : ‘Nej ceev faj kom nej txhob ua nkhaus.’ Huab Tais qhia Txoj Cai rau neeg kom lawv ua zoo rau cov nyob ze lawv. 15 Neeg tej xub ke nyob ntawm Huab Tais xub ntiag mus li. Neeg tej xub ke zais tsis tau rau Huab Tais qhov muag.
24 HUAB TAIS pub kom cov neeg thov txhaum tau kev rov los cuag nws. Nws ntxiv zog rau cov neeg tsis rau siab xwm yeem. 25 Koj rov los cuag HUAB TAIS mas ! Koj tso kev txhaum pov tseg ! Koj thov nws lub ntsej muag, koj ua kom kev txhaum yau mus mog ! 26 Koj rov los cuag tus Nyob Siab Tshaj. Koj tig nraub qaum rau txoj kev tsis ncaj. Koj kav tsij ntxub txoj kev phem tas siab tas ntsws. 27 Yog cov neeg tseem ciaj tsis cav txog HUAB TAIS, mas cov neeg nyob hauv lub lam theeb puam leej twg yuav cav lus zoo tau txog Huab Tais ? 28 Tus neeg tuag, tus uas tsis ua neej nyob lawm, nws cav lus zoo tsis tau. Tus neeg muaj txoj sia thiab noj qab nyob zoo yuav tsum cav txog Huab Tais. 29 HUAB TAIS txoj kev nyiam loj ua luaj ! Nws kev zam txhaum rau cov neeg tig rov los cuag nws loj ua luaj !

1 Kev thoob tsib rov cav lus zoo txog nws. Nws cav txog nws lub koob meej nyob nruab nrab nws haiv neeg. 9 Ib txwm thaum lub hauv paus, thaum tseem tsis tau muaj lub zim txwv, mas Huab Tais twb tsim kuv lawm. Kuv yuav nyob mus li txheej dhau txheej tis dhau tis. 10 Kuv ua kuv txoj kab xwm nyob ntawm Huab Tais xub ntiag, nyob hauv nws lub tsev tsam phooj ntshiab. 11 Kuv tau tsa tsev nyob pem Xis Yoos. Huab Tais tsa kuv so dhuav nyob hauv lub tsheej zoo nyiam. Kuv muaj hwj huam nyob hauv Yes Lus Xas Les. 12 Kuv nrhau cag nyob hauv ib haiv neeg muaj koob meej, nyob hauv HUAB TAIS lub tsev, nyob hauv nws lub cuab tam.

4 Thaum yus xuas vab tshaus los tshau, mas tshuav tej yam tsis huv nyob hauv lub vab. Yog yus tshau neeg cov lus, yus kuj pom muaj tej yam tsis zoo. 5 Tus puab lauj kaub thiaj sim nws cov lauj kaub nyob hauv qhov txos. Luag kuj tsom tau tib neeg lub siab nyob hauv tib neeg cov lus tham. 6 Ib tsob ntoo cov txiv qhia yus kom paub tias lub vaj puas yog ib lub vaj zoo los tsis zoo. Tib neeg cov lus kuj qhia tias tib neeg lub siab puas zoo los tsis zoo. 7 Tus neeg twg tseem tsis tau hais lus mas koj txhob cav lus zoo txog nws, vim lub chaw tsom tib neeg yog nws cov lus.

8 Tus neeg nplua nuj uas sawv daws pom tias nws tsis muaj txhaum, nws tsis ntshaw txog nyiaj txog kub mas nws txoj hmoov zoo. 9 Tus neeg ntawd, yog leej twg ? Peb xav cav lus zoo txog nws. Vim nws tau ua tej yam tsim nyog qhuas txog nws nyob hauv nws haiv neeg. 10 Nws tau raug kev sim siab, thiab nws tau ua zoo tiag. Nws muaj chaw hais tau tias nws muaj koob meej. Nws xav hla cov lus qhia kuj tau, tab sis nws tsis hla. Nws yuav ua qhov phem kuj tau, tab sis nws tsis ua. 11 Nws lub cuab tam yuav khov kho. Tas zeej tsoom yuav cav txog cov paj tshab uas nws pub los pab luag.

1 Tus ua raws Txoj Cai yog zoo li nws cev ntau yam rau Ntuj, tus muab siab rau coj cov lus qhia yog zoo li nws cev cov thaj txi Ntuj koom siab. 2 Tus ua Ntuj tsaug yog zoo li nws cev ib co hmoov nplej los txi Ntuj. Pub nyiaj rau tus pluag yog zoo li ib thaj cav txog Ntuj. 3 Qhov ntxim Tswv Ntuj siab yog txav mus deb ntawm txoj kev phem. Thaum yus txav mus deb ntawm txoj kev tsis ncaj yog zoo li yus cev ib thaj txi Ntuj them txim txhaum. 4 Koj tsis txhob mus tes dawb tes do ntawm Huab Tais xub ntiag, vim Txoj Cai qhia kom ua tej yam hais saum no. 5 Qhov uas tus neeg ncaj cev rau Ntuj yog zoo li ib co roj pleev lub thaj txi Ntuj. Qhov uas tus siab ncaj cev rau Ntuj ncho ib co pa tsim kev thaj yeeb nyob ntawm Tus Nyob Siab Tshaj xub ntiag.
12 Huab Tais yog ib tug txiav txim tsis kws leej twg cai. 13 Nws tsis kws leej twg cai los muab txim rau tus pluag. Thaum tus raug luag hiam thov Huab Tais mas Huab Tais mloog nws. 14 Huab Tais tsis thuam tus me nyuam ntsuag lo lus thov, nws tsis thuam tus poj ntsuam nws cov lus ntsaj. 16 Leej twg tsob hwb Huab Tais thiab ua raws li Huab Tais nyiam, mas Huab Tais mloog tus ntawd. Tus ntawd lub suab nrov mus txog txheej huab saud. 17 Tus neeg txheej qis cov lus thov hla mus dhau txheej huab saud. Tus neeg txheej qis zaj thov Ntuj tseem mus tsis tau txog Huab Tais, mas tus neeg txheej qis lub siab nyob tsis tus. 18 Yog tus Nyob Siab Tshaj tseem tsis tau tuaj xyuas tus neeg txheej qis, mas tus neeg txheej qis thov tsis tseg. Nws thov mus txog lub caij tus Nyob Siab Tshaj txiav txim thiab ua ncaj rau cov neeg siab ncaj.

1 Txiv Tswv, thov koj khuv leej peb. Tswv Ntuj kav tas puas tsav yam, thov koj ntsia peb. Koj ua kom tas txhia haiv neeg hwm koj. 4 Kom cov pej kum haiv neeg zeem koj, ib yam li peb zeem tias dua koj Huab Tais lawm, tsis muaj lwm tus Tswv Ntuj. 5 Thov koj rov ua cov cim, koj rov ua cov hauj lwm zoo nkauj. Koj ua kom koj txhais tes thiab koj txhais npab xis nto koob meej. 10 Koj sau tas cov xeem Yas Kos. Koj rov muab lub cuab tam rau lawv xws li thaum lub hauv paus. 11 HUAB TAIS, thov koj khuv leej haiv neeg uas coj koj lub npe mas ! Koj khuv leej His Xas Lais uas yog koj tus tub hlob. 12 Thov koj hlub koj lub tsheej ntshiab Yes Lus Xas Les, uas yog koj lub chaw so. 13 Koj ua kom Xis Yoos piav cov zaj cav koj cov hauj lwm loj, koj ua kom koj haiv neeg cav koj lub koob meej. 14 Koj ua tim khawv lees thawj cov neeg koj xaiv. Koj ua raws li cov lus uas cov Yaj Saub ceeb toom txog koj lub npe. 15 Koj pub paj tshab rau cov neeg tos txog, sawv daws thiaj pom tias koj cov Yaj Saub tau hais qhov tseeb tiag. 16 Huab Tais, koj mloog zaj uas cov tub txib taij ntawm koj. Koj ua raws li As Loos cov lus foom hmoov zoo rau koj haiv neeg. 17 Koj ua kom tas tsoom neeg nyob ntiaj teb paub tseeb tias koj yog tus Tswv Ntuj nyob tiam dhau tiam.

15 Kuv rov hais txog Huab Tais cov hauj lwm. Kuv yuav piav txog tej yam kuv tau pom. Huab Tais hais lus, ces nws tej hauj lwm thiaj tsheej xeeb. 16 Lub hnub ci rau tas puas tsav yam. Tswv Ntuj lub hwj chim nyob puv hauv nws tej hauj lwm. 17 Huab Tais cov Ntshiab tsis tau cav txog Huab Tais tej hauj lwm zoo nkauj zoo saib tas huv tib si. Tus Huab Tais muaj hwj huam tas nrho tsa nws tej hauj lwm kom ruaj nreb, kom tas lub sim ceeb nyob khov kho hauv Huab Tais lub hwj chim. 18 Huab Tais tsom hauv qab tiv txwv thiab tsom hauv nruab siab. Nws nkag mus hauv cov nru lus zais tob tob. Tus Nyob Siab Tshaj paub txhua yam txuj, nws qhov muag ntsia ntsoov cov xwm tab tom tshwm tsis tseg. 19 Tus Nyob Siab ceeb toom yav dhau los lawm thiab yav tom ntej. Nws qhia yam zais ntshis tej hneev taw rau sawv daws paub. 20 Tsis muaj ib zag tswv yim uas nws yuav paub tsis tau, tsis muaj ib lo lus uas nws yuav tsom tsis tau. 21 Nws tu zoo tas txhua yam loj uas nws lub tswv yim thoob tsib tsim los. Tsis muaj ib yam dab tsi uas yuav ntxiv tau rau nws. Tsis muaj ib yam dab tsi uas yuav thau tau ntawm nws. Huab Tais tsis tas yuav vam txog lwm tus pab nws xav tswv yim. 22 Tas nws cov hauj lwm huv tib si zoo nyiam tas nrho, qhov yus pom yog ib feem me me xwb. 23 Tas puas tsav yam ntawd muaj txoj sia, lawv nyob mus li, txhua yam nyob muaj chaw siv, txhua yam mloog lus.

1 Peb yuav cav txog cov neeg nto moo loj, uas yog peb cov yawg koob. 9 Muaj ib txhia uas tsis muaj leej twg nco txog lawv. Lawv dua tas, xws li lawv tsis tau xeeb los ua neeg ib zaug. Lawv tej me nyuam los kuj ib yam, yog zoo li lawv tsis tau yug los ib zaug. 10 Tab sis muaj ib co zoo, sawv daws tsis hnov qab lawv tej hauj lwm ncaj. 11 Lawv tej xeeb ntxwv yog zoo li ib lub cuab tam zoo nyob mus li. 12 Lawv tsoom xeeb ntxwv, lawv tej tub ki coj nraim cov lus uas lawv cog. 13 Lawv tsoom xeeb ntxwv yuav nyob mus li ib txhis, lawv lub koob meej yuav tsis ploj. 14 Lawv lub cev mus zwm av nyob hauv txoj kev thaj yeeb, lawv lub npe yuav ciaj mus txheej dhau txheej. 15 Cov haiv neeg yuav cav lawv kev thoob tsib. Lub txoos yuav tshaj lus zoo txog lawv.

1 Tswv Ntuj ua kom ib tug neeg zoo tawm hauv Has Nplas Has los. Tas zeej tsoom tau saib nws zoo. Tswv Ntuj nyiam nws, tas tsoom sid kuj nyiam nws. Tus twg tuav txog nws lub npe tus twg kuj cav lus zoo txog nws. 2 Tus ntawd yog Mais Xes. Tswv Ntuj pub ib lub hwj chim loj cuag li tsoom ntshiab lub rau nws. Tswv Ntuj ua kom nws yog tus loj. Tswv Ntuj muab hwj huam rau nws. Nws cov yeeb ncuab ntshai nws. 3 Mais Xes cov lus ua kom luag cov hwj huam yaj ntshis. Tswv Ntuj ua kom Mais Xes muaj koob meej nyob ntawm cov vaj xub ntiag. Tswv Ntuj muab ib co lus qhia rau nws, kom zoo coj nws haiv neeg. Tswv Ntuj pub kom nws tau pom Tswv Ntuj lub hwj chim me ntsis. 4 Vim Mais Xes ntseeg thiab nws muaj lub siab hlub neeg mos nyoos, mas Tswv Ntuj thiaj qee nws los ua Tswv Ntuj tug. Tswv Ntuj xaiv Mais Xes nyob hauv tas ib zeej tsoom. 5 Tswv Ntuj pub kom Mais Xes hnov tau Tswv Ntuj lub suab. Tswv Ntuj coj Mais Xes mus hauv twv huab tsaus ntuj nti. Tswv Ntuj hu Mais Xes tuaj nyob ntawm Tswv Ntuj xub ntiag, nws pub cov lus qhia rau Mais Xes, yog ib txog cai pub txoj sia thiab qhia txuj.

2 Thaum lawv ua thaj txi Ntuj thaj yeeb, lawv thau cov zaj. Tswv Ntuj kuj thau Das Vis ntawm tsoom His Xas Lais zoo li ntawd thiab. 3 Das Vis yeej tus tsov, zoo li yeej ib tug thav tshis, nws yeej cov dais zoo li yeej ib co thav yaj. 4 Thaum nws tseem hluas nws tua tau tus neeg loj loj, nws daws nws haiv neeg chaw txaj muag. Nws xuas tes txawb lawj xeeb mus raug tus muab hlob Nkaus Lias ntog. 5 Das Vis hu txog tus Nyob Siab kom pub nws sab tes xis muaj zog tua tau ib tug tub rog muaj peev xwm, Das Vis tau tsa His Xas Lais lub hwj chim kom rov sawv. 6 Vim li ntawd tsoom sid thiaj cav nws lub koob meej tias nws tua ib vam leej. Sawv daws cav tias Huab Tais foom hmoov zoo rau nws. Huab Tais pub ib lub mom teev muaj hwj chim rau nws. 7 Nws tua cov yeeb ncuab nyob ib ncig kom tu noob. Cov Fis Lis Tis uas lawv tiv nws, nws ua kom lawv yaj ntshis. 8 Das Vis ua yam twg nws hais lus muaj hwj chim hawm Tus Ntshiab Nyob Siab, nws rau siab hu nkauj, nws nyiam tus tsim nws. 9 Das Vis teem kom muaj tej pab txiv nkauj nyob ze ntawm lub thaj txi Ntuj, kom lawv cov suab nkauj nrov zoo mloog. 10 Nws ua kom cov ntees lom zem muaj hwj chim thiab zoo saib. Nws ua kom cov hnub nyoog nqaum paj ci ntsa iab, lawv cav lus zoo txog Huab Tais lub npe ntshiab, txij sawv ntxov mus, suab qeej suab nruas nrov ncha ntws hauv lub tsev teev Ntuj tuaj. 11 Huab Tais ntxuav Das Vis cov txhaum pov tseg. Nws ua kom Das Vis lub hwj huam hlob mus li. Huab Tais nrog Das Vis cog lus tias yuav cia nws ua vaj. Huab Tais muab ib lub theej kiab nto koob meej rau Das Vis nyob hauv haiv His Xas Lais.

1 Tus Yaj Saub Es Lias sawv tsees xws li ntshua nplaim taws, nws lo lus kub cuag li ib teg tsau. 2 Nws ua kom kev tshaib tuaj raug cov His Xas Lais, nws lub siab kub lug ua kom lawv tshuav tsawg. 3 Nws hais Huab Tais lo lus los muab cov dej nag saum ntuj kaw ntom nti. Nws kuj ua hluav taws nqes saum ntuj los peb zaug. 4 Es Lias, koj cov hwj huam yees ntxwv ua kom koj muaj koob meej loj. Leej twg yuav khav tau tias nws loj ib yam li koj ? 5 Koj hais tus Nyob Siab Tshaj lo lus los tsa ib tug tuag kom sawv hauv ntuj txiag teb tsaus los. 6 Koj tau ua kom ib co vaj poob hauv kev xyob txhiaj. Koj tau ua kom tej tus nto moo tuag hauv lawv txaj pw. 7 Nyob saum lub roob Xis Nais koj tau hnov Huab Tais cov lus qhuab qhia koj. Nyob saum lub roob Hos Les, koj tau hnov Tswv Ntuj ceeb toom tias nws yuav muab txim rau luag. 8 Koj tau pleev roj rau tej tus vaj kom lawv ua kws txiav txim. Koj tau pleev roj rau tej tus Yaj Saub los hloov koj. 9 Ib lub khaub zeeg hluav taws nqa koj mus, koj caij ib lub tsheb uas yog ib co nees hluav taws luab. 10 Ntuj xaiv koj ua tus qhuab qhia tib neeg thaum lub caij kawg. Thaum Ntuj yuav npau taws, koj yuav yog tus ua kom Ntuj siab nqig. Koj yog tus coj phaj txiv lub siab rov los npuab phaj tub. Koj yuav rov tuaj tsav cov xeem Yas Kos. 11 Cov neeg uas yuav pom koj, mas lawv txoj hmoov zoo. Cov neeg uas tuag nyob hauv kev sib hlub lawv txoj hmoov kuj zoo, vim peb yuav muaj txoj sia nyob tiag. 12 Thaum Es Lias mus nkaum hauv lub khaub zeeg hluav taws lawm, mas Es Lis Xais txais tau Es Lias lub tswv yim los nyob puv nws. Tas Es Lis Xais sim neej tsis muaj ib tug nom yuav qhau tau nws, tsis muaj leej twg hiam tau nws. 13 Tsis muaj ib yam yuav loj dhau rau Es Lis Xais. Nws twb tuag lawm los nws lub cev tseem ua Yaj Saub. 14 Thaum nws ua neej nyob nws ua hwj huam yees ntxwv. Thaum nws tuag lawm, nws tseem tau ua tej yam hauj lwm loj. 15 Tab txawm muaj li ntawd, tsis kav tsoom sid tsis tig los hloov dua siab tshiab. Lawv tsis ncaim ntawm lawv cov txhaum, mus txog hnub lawv raug luag coj mus kaw nyob deb ntawm lawv lub teb chaws, lawv sib ncaim mus nyob puv ntiaj teb.

13 Thaum kuv hluas, thaum kuv tseem tsis tau mus pla ua loj leeb, kuv yeej tab meeg nrhiav kev thoob tsib nyob hauv txoj kev teev Ntuj. 14 Nyob ntawm lub tsev ntshiab hauv ntej kuv tau txais kev txawj kev ntse, kuv nyiam kev thoob tsib. Kuv yuav nrhiav kev thoob tsib mus txog kuv hnub kawg. 15 Kev thoob tsib lub paj yog zoo li ib re txiv cawv liab ua kom kuv zoo siab. Kuv txhais taw taug txoj kev ncaj. Txij kuv yav hluas los kuv raws nws tus lwj lwm. 16 Kuv ib nyuag tig ntsej mloog xwb, ces kuv tau txais kev thoob tsib, ces kuv nrhiav tau ib co txuj loj. 17 Vim kev thoob tsib mas kuv thiaj ua zoo tuaj, kuv yuav cav koob meej txog tus muab kev thoob tsib rau kuv. 18 Kuv txiav siab tias kuv yuav coj kev thoob tsib. Kuv mob siab nrhiav qhov zoo, kuv yuav tsis txaj muag. 19 Kuv tus plig tau ntaus rog kom tau kev thoob tsib. Kuv tau muab siab coj raws Txoj Cai, kuv tau tsa tes siab thov Ntuj, thiab kuv tu siab vim tshuav tej yam thoob tsib uas kuv tsis paub. 20 kuv tig kuv lub siab rau kev thoob tsib ces kuv nrhiav tau nws nyob hauv kev huv.

1 His Xais uas yog As Mos tus tub yees hnov Ntuj tshoj nws txog Yus Das teb thiab txog Yes Lus Xas Les, thaum lub caij uas Os Xias, Yos Tas, As Kas thiab Es Xes Kias ua vaj nyob Yus Das teb.
2 Cov txheej ntuj nej mloog mas ! Ntiaj teb koj tig ntsej los mloog ! Vim Tswv Ntuj hais tias : “Kuv tau tu ib co tub kom hlob, kuv qhuab qhia lawv, tab sis lawv ntxeev siab rau kuv. 2 Tus nyuj nco tau nws tus tswv, tus luj cim tau nws tus tswv lub dab. His Xas Lais tsis paub dab tsi li. Kuv haiv neeg tsis to taub. 4 Ab ! Nej yog ib lub kuj cuab muaj txhaum, nej yog ib co pej xeem yuam kev loj ! Nej yog ib haiv neeg ua phem, nej yog ib co tub xib rau kev phem ! Nej tso HUAB TAIS Tswv Ntuj pov tseg, nej thuam His Xas Lais tus Ntshiab. Nej cia li khiav thaub qab. 5 Yuav ntaus nej qhov twg ntxiv ? Vim nej pheej fav xeeb tsis tseg ! Nej lub taub hau mob tas huv tib si, nej lub siab txom nyem thoob plaws. 6 Txij qab xib taws mus txog saum tiaj hau, yeej tsis muaj ib qho uas nej yuav tsis mob, nej cov qhov nqaij raug mob, tej thaj doog ntshav ua qhov txhab liab ploog, nej yeej tsis qhwv, tsis zawm, tsis siv roj los pleev kom loog li.
10 Cov nom tswv tswj Xos Dos Mas, nej mloog Huab Tais cov lus mog ! Pej xeem nyob Nkos Mos Las, nej mloog peb tus Tswv Ntuj cov lus qhia mog ! 11 HUAB TAIS hais tias : “Nej cov txim txi Ntuj uas muaj ntau ntau suav tsis txheeb, zoo dab tsi rau kuv ? Cov laug tshis uas nej muab los hlawv mas dhuav kuv kawg. Cov xyuas nyuj tej roj uas nej cev rau kuv kuj dhuav kuv. Cov laug tshis, cov yaj thiab cov heev nyuj tej roj ntsha, kuv tsis xav yuav. 12 Thaum nej tuaj nyob ntawm kuv xub ntiag, yog leej twg kom nej tuaj tsuj kuv lub tshav ? 13 Nej tsis txhob nqa tej txim tuaj rau kuv ntxiv ! Pa xyab yog ib yam kuv ntxub. Nej tej hli xiab tshiab, nej cov hnub xas npas tos, nej cov txoos, nej cov hnub nyoog nqaum paj nqaum nruas, mas kuv nyiaj tsis taus lawm. 14 Nej tej hli xiab tshiab, nej tej kev tawm rooj mus teev Ntuj, kuv ntxub tas siab nrho. Kuv ceeb laj ris kawg, sab kuv tas nrho, kuv nyiaj tsis taus lawm. 15 Thaum nej tsa tes hu txog kuv, kuv fee plhu. Txawm nej hais nej tej zaj teev Ntuj ntau npaum li cas, los kuv tsis mloog li. Nej txhais tes lo ntshav puv tas. 16 Nej rov ntxuav nej kom nej huv tuaj mas ! Nej dawj nej lub siab phem mus kom kuv qhov muag txhob pom. Nej tso txoj kev ua phem tseg ! 17 Nej xyaum ua zoo, nej nrhiav kev haum pheej, nej pab tus raug luag hiam, nej txiav txim ncaj rau tus tub ntsuag, nej tuaj tus poj ntsuam tog.”
18 HUAB TAIS hais tias : “Nej tuaj ! Nej txiav plaub txiav ntug mog ! Txawm tias nej tej txhaum liab ploog, los nej yuav rov dawb li daus. Tab yog nej tej txhaum liab vog, los kom tej txhaum cia li hloov xws li plaub yaj. 19 Yog nej muaj siab tiag thiab nej mloog lus, mas nej yuav tau noj lub teb chaws cov qoob. 20 Tiam sis yog nej nyob hauv kev ntxeev siab, mas hniav ntaj yuav hlais nej.” HUAB TAIS lub ncauj hais li ntawd.

1 Lo lus ua tus Yaj Saub His Xais, As Mos tus tub paub txog Yus Das teb thiab Yes Lus Xas Les. 2 Yav tom ntej, yuav muaj ib hnub lub roob uas HUAB TAIS tsa tsev nyob yuav txawb saum cov roob lub ncov, nws yuav sawv siab dua cov pov roob. Tas ib tsoom kuj cuab yuav khiav ua npoj ntws tuaj saum HUAB TAIS lub roob ; 3 ntau haiv neeg yuav tuaj. Lawv yuav hais tias : “Nej tuaj ! Peb nce mus pem Yas Kos tus Tswv Ntuj lub tsev ! Kom nws qhia nws tej kev rau peb, thiab kom peb mus taug nws tej kev.” 4 Tswv Ntuj yuav txiav txim hauv nruab nrab cov kuj cuab. Nws yuav xaiv nyob hauv ntau haiv neeg. Lawv yuav muab lawv rab ntaj ob sab ntse los ntaus ua voom, muab lawv rab hmuv ntaus ua liag. Thaum ib lub kuj cuab sawv los ntaus lwm lub kuj cuab, lawv yuav tsis tsa rab ntaj ob sab ntse. Lawv yuav tsis kawm kev ntaus rog ntxiv.
10 Koj nkag mus hauv qhov tsua mas ! Koj mus nkaum rau hauv cov hmoov av. Koj nyob deb ntawm txoj kev ntshai HUAB TAIS mog, koj nyob deb ntawm nws lub hwj chim ci ntsa. 11 Cov neeg uas tsa hauv pliaj siab yuav dauv muag. Cov neeg txawj tuag uas muab hlob yuav poob tsim. Hnub ntawd, HUAB TAIS tib leeg xwb yuav sawv siab. 12 Vim tus HUAB TAIS kav tsoom tub rog muaj ib lub hnub nyoog, uas nws yuav ntaus txhua tus neeg muab hlob thiab txhua leej uas tsa hauv pliaj siab, nws yuav ntaus txhua yam nyob puag saud uas sawv siab, 13 nws yuav ntaus roob Lis Npas cov ntoo ciab muab hlob thiab sawv siab, yuav ntaus Npas Sas cov ntoo ntseej, 14 yuav ntaus cov roob tsa hauv pliaj siab, yuav ntaus cov hauv pes sawv siab, 15 yuav ntaus cov sam thiaj siab zov tsheej tas tib si, yuav ntaus cov ntsa zeb xov nroog tas tib si, 16 yuav ntaus Tas Xis cov nkoj tas tib si, yuav ntaus cov toob xib muaj nqis tas tib si. 17 Tib neeg txoj kev muaj ntsej muag yuav poob tsim. Cov tib neeg txawj tuag kev muab hlob yuav raug txo qis. Hnub ntawd, HUAB TAIS tib leeg xwb yuav sawv siab. 18 Cov dab cuav yuav ploj tas, tsis tshuav ib tug kiag. 19 Thaum HUAB TAIS sawv tsees los ua kom ntiaj teb poob plig, mas sawv daws yuav nkag hauv cov qhov tsua, yuav nqes mus hauv cov qhov ntuj, kom txav deb ntawm kev ntshai HUAB TAIS, kom tau nyob deb ntawm nws lub hwj chim ci ntsa.

2 Hnub ntawd, HUAB TAIS lub noob tuaj kaus yuav hloov ua lub zam nto koob meej. Cov txiv ntoo hauv lub teb chaws yuav ua kom cov His Xas Lais uas dim rov los tau ntsej muag thiab muaj meej mom. 3 Cov nyob Xis Yoos, thiab cov yuav nyob ruaj hauv Yes Lus Xas Les, cov uas lawv sau npe nyob Yes Lus Xas Les tas ib sim neej, luag yuav hu lawv ua cov ntshiab.
4 Huab Tais xub tshuab ib pas txiav txim, ib pas rhuav nroog. Nws ntxuav Xis Yoos tej txhaum qias, nws xub yaug cov ntshav uas nyob hauv plawv Yes Lus Xas Les. 5 Ces nruab hnub Huab Tais yuav tsim ib tw huab thiab ib co pa taws vov lub roob Xis Yoos thiab vov cov neeg sib txoos nyob ntawd, hmo ntuj Huab Tais yuav tsim ib lub cub tawg cig cig pom kev lam lug. 6 Nyob puag saud, Huab Tais lub hwj chim yuav ua ib lub kaus ntaub thiab ib lub tshuav, ua ntxoov ntxoo roos tshav ntuj kub nruab hnub, ua chaw nkaum nag thiab thaiv nag xob nag cua.

1 Kuv yuav hu nkauj rau tus kuv nyiam. Yog kuv tus phooj ywg zaj nkauj hais txog nws lub vaj txiv cawv. Tus kuv nyiam muaj ib lub vaj txiv cawv nyob saum ib plag toj av zoo. 2 Nws ncaws, nws dawj pob zeb pov tseg, nws xaiv ib co ceg zoo los cog. Nyob nruab nrab, nws txhim ib lub sam thiaj. Nws khawb ib lub qhov xwv cawv. Nws vam tias nws yuav tau sau ib co txiv zoo nkauj. Tab sis lub vaj txi ib co txiv caws maum. 3 Nyem no, cov pej xeem nyob Yes Lus Xas Les, cov neeg nyob Yus Das teb, kuv thov nej txiav txim saib puas yog kuv txhaum, los yog kuv lub vaj txhaum ? 4 Tshuav dab tsi uas kuv tsis tau ua rau nws ? Kuv vam tias nws yuav txi tej ntwg txiv zoo nkauj, vim li cas nws txi ib co txiv caws maum ? 5 Vim li ntawd, kuv qhia nej paub tias kuv yuav ua dab tsi rau kuv lub vaj txiv cawv. Kuv yuav rhuav cov ntoo xov vaj, ces tsiaj yuav ntxo nws, kuv yuav rhuav nws cov laj kab, kom neeg tsuj nws. 6 Kuv yuav ua kom kuv lub vaj puas tsuaj. Yuav tsis muaj neeg tav ntsis, tsis muaj neeg dob nroj, ces pos thiab nroj yuav laum, kuv yuav ua kom huab txhob tso nag los ywg lub vaj. 7 Tus HUAB TAIS kav tsoom tub rog lub vaj txiv cawv, yog His Xas Lais lub cuab, yog Yus Das lub yig, lawv yog cov ceg txiv cawv nws hlub. Nws vam tias lawv yuav ua ncaj, tab sis nws tsuas pom lawv ua ntshav ntws. Nws vam tias lawv yuav mloog Txoj Cai, tab sis nws tsuas hnov neeg ntshai lub suab quaj qw.

1 Xyoo tus vaj Os Xias tuag, kuv pom Huab Tais zaum saum ib lub theej kiab siab siab. Nws tw tsho dauv mus puv nkaus lub Tuam Tsev tas huv tib si. 2 Nyob ntawm nws txheej saud, muaj ib co Tshiab Xes Las Fis sawv ntsug. Lawv nyias muaj nyias rau txhais tis. Ob txhais thaiv ntsej muag, ob txhais vov ko taw, ob txhais cia ya. 3 Lawv ib leeg hu nkauj nrov nrov rau ib leeg tias : “Tsoom tub rog tus HUAB TAIS ntshiab, ntshiab, ntshiab. Nws lub koob meej nyob puv lub ntiaj teb.” 4 Lub suab ntawd nrov ua cov taw ncej qhov rooj ua zog koog, pa taws ncho puv lub tsev. 5 Kuv hais tias : “Kuv hmoov phem ! Kuv yuav tuag ! Kuv yog ib tug neeg di ncauj tsis huv. Kuv nyob nruab nrab ib haiv neeg di ncauj tsis huv. Kuv qhov muag tau pom tus Vaj, tus HUAB TAIS kav tsoom tub rog !” 6 Ib tug Tshiab Xes Las Fis ya ntxiag los txog ntawm kuv, nws txhais tes tuav ib lub pob zeb kub lug uas nws xuas ib rab ciaj tais ntawm lub thaj txi Ntuj los. 7 Nws coj lub pob zeb los so kuv di ncauj, nws hais tias : “Saib ! Qhov no twb chwv koj di ncauj lawm, nws tshem koj qhov yuam kev tas huv si. Nws them koj cov txhaum tas lawm.” 8 Ces kuv hnov Huab Tais lub suab hais tias : “Kuv yuav xa leej twg mus ? Leej twg yuav sawv peb cev mus ?” Kuv teb tias : “Kuv nyob ntawm no. Koj xa kuv mus.” Huab Tais hais rau kuv tias : 9 “Koj mus ! Koj yuav hais rau haiv neeg no tias : Nej mloog ! Nej mloog mas ! Nej tsis to taub ! Nej ntsia ! Nej ntsia mas ! Nej pom kev tsis tseeb !” 10 Koj ua kom haiv neeg no lub siab tuab ! Koj ua kom lawv pob ntseg hnyav. Koj pos lawv qhov muag mas ! Tsam haiv neeg no qhov muag pom, lawv pob ntseg hnov, lawv lub siab to taub, ces lawv yuav tig los hloov ib lub siab tshiab, thiab lawv yuav zoo hlo.” 11 Kuv hais tias : “Huab Tais, kuv yuav ua mus txog thaum twg ?” Huab Tais hais tias : “Koj ua mus txog hnub cov tsheej piam tas, tsis muaj neeg nyob hauv, cov tsev tsis muaj neeg, liaj teb rhuav tas, sawv daws tu siab nrho.” 12 Huab Tais yuav ua kom neeg khiav mus deb, kom sawv daws tso lub teb chaws pov tseg. 13 Yog tias tshuav ib feem kaum, feem ntawd kuj yuav puas tsuaj. Yuav zoo li tsob ntoo tsw qab thiab tsob ntoo ntseej. Thaum ntov tsob ntoo los tseem tshuav lub hauv paus. Nws lub hauv paus yog ib lub noob ntshiab.

1 lub caij As Kas ua vaj mas tus vaj Las Xoos uas kav As Las teb thiab tus vaj Pes Kas uas kav His Xas Lais teb, nkawd mus pem Yes Lus Xas Les. Nkawd xav ntaus Yes Lus Xas Les, tab sis nkawd ntaus tsis tau. 2 Luag tuaj qhia Das Vis tsev neeg paub tias tus vaj As Las tsa yeej tub rog nyob hauv lub xeev Es Fais. Ces tus vaj thiab tsoom pej xeem lub siab tshee cuag li cov nplooj ntoos hauv hav zoov raug cua tshuab. 3 HUAB TAIS hais rau His Xais tias : “Koj nrog koj tus tub tawm mus cuag As Kas pem lub hauv kwj deg uas ntws mus rau lub pas dej nyob pem toj, ze ntawm txoj kev mus rau daim teb ntxhua seb.” 4 Koj hais rau As Kas tias : “Koj ceev faj, koj ua siab tus yees txhob ntshai. Txhob ua siab muag nyob ntawm ob tug vaj xub ntiag : nkawd yog ob ya hluav ncaig ncho pa xwb. 5 Ob tug vaj npaj siab ua phem rau koj, nkawd tau hais tias : 6 “Wb mus ped, wb ntaus Yus Das, wb hem nws kom nws swb wb. Wb tsa Tas Npes Ees tus tub ua vaj nyob Yus Das teb.”
7 HUAB TAIS Tswv Ntuj hais li no : Yuav tsis muaj li ntawd. Yuav tsis yog li ntawd. 8 Tus ua hau kav As Las teb yog tus vaj Das Mas. Tab sis tos 65 xyoos saum no mas lawv yuav tsoo Es Fais, Es Fais yuav tsis yog ib haiv neeg ntxiv. 9 Yog nej tsis ntseeg mas nej yuav tsis tau ua neej nyob ntxiv.
10 HUAB TAIS kom His Xais rov mus hais rau As Kas : 11 “Koj thov koj tus HUAB TAIS Ntuj kom nws ua ib lub cim rau koj nyob puag hauv qab ntuj txias teb tsaus, los nyob saum cov chaw siab, puag saum ub.” 12 As Kas hais tias : “Kuv yuav tsis thov. Kuv yuav tsis sim HUAB TAIS.” 13 His Xais hais tias : “Das Vis tsev neeg, nej mloog mas ! Nej ua kom tej tib neeg sab tas nrho, los tsis txaus nej siab ! Nej tseem yuav ua kom Tswv Ntuj sab thiab. 14 Vim li ntawd, Huab Tais yuav pub ib lub cim rau nej. Nej ntsia saib ! Tus poj niam hluas xeeb tub lawm. Nws yuav yug ib tug tub. Nws yuav tis npe rau nws tus tub hu ua Es Mas Nus Es. 15 Thaum nws txawj xyeeb qhov phem thiab xaiv qhov zoo, mas nws yuav noj mis nyuj thiab zib mu. 16 Thaum tus me nyuam tseem tsis tau txawj xyeeb qhov phem thiab xaiv qhov zoo, mas lub teb chaws uas ob tug vaj hem koj, yuav tsis muaj tus saib xyuas.

1 Thaum ntawd tsoom pej xeem uas lawv maub hauv qhov tsaus ntuj, lawv pom ib qho pom kev loj. Ib qho pom kev ci tuaj rau saum cov nyob hauv lub teb chaws tsaus ntuj nti. 2 HUAB TAIS, koj tau ua kom kev hom khaj hlob mus, kom muaj chaw zoo siab ntau. Sawv daws zoo siab nyob ntawm koj xub ntiag, ib yam li cov sau qoob loo zoo siab, ib yam li co tub rog sib faib cov toob xib lawv txeeb tau lawv dhia lom zem. 3 Tus quab uas tsuam lawv, tus ntas nyob saum lawv xub pwg, tus zov cov neeg nyob txim rab qws, koj muab tsuj, xws li thaum Mas Dias lub hnub nyoog. 4 Cov suab khau tub rog nrov ncha tas huv si, cov tsho tshaj sab lo ntshav tas huv si, nplaim taws yuav noj, hluav taws yuav hlawv. 5 Vim ib tug me nyuam yug los rau peb, Ntuj pub ib tug tub rau peb. Lub tuam teb nyob saum nws xub pwg. Luag tis nws npe hu ua : tus qhia tswv yim zoo tas nrho, tus Tswv Ntuj siab loj, tus vaj txheeb pub kev thaj yeeb. 6 Das Vis lub theej kiab thiab lub teb chaws nws yuav kav yog ib lub tuam teb dav thiab nyob thaj yeeb tsis muaj caij kawg. Nws yuav muab Txoj Cai thiab kev ncaj los tsa thiab nres nws lub tuam teb, txij no mus txog ib txhiab ib txhis. Tus HUAB TAIS kav tsoom tub rog nws lub siab hlub muaj khib yuav ua tej ntawd.

5 As Xws yuav raug txoj hmoov phem ! As Xws yog kuv lub siab npau taws rab pas, yog rab qws uas kuv txhais tes tuav thaum kuv npau taws. 6 Kuv xa As Xws mus ntaus lub kuj cuab tsis hwm Ntuj. Kuv tso nws mus ntaus haiv neeg kuv npau taws rau, mus lwg lawv cov toob xib poob pem teb, nws khaws puas tsav yam cov tub rog txeeb tau, nws tsuj haiv neeg ntawd xws li cov av nkos nyob ntawm tej kev hauv nroog. 7 Tab sis As Xws tsis xav ua li ntawd, nws lub siab tsis xav zoo li ntawd. Nws tsuas rau siab tua neeg kom tu noob, nws xav rhuav ntau lub kuj cuab. 13 As Xws hais tias : yog kuv txhais tes muaj zog thiaj ua tau tej hauj lwm ntawd, yog kuv lub tswv yim ua tej ntawd, vim kuv ntse ! Kuv tau nam cov haiv neeg ciam teb, kuv tau lwg cov toob xib lawv tshwj zias cia. Kuv ua tus muaj peev xwm, kuv thawb cov vaj zaum saum theej kiab kom poob qis. 14 Kuv txhais tes nthos nkaus cov haiv neeg tes nyiaj txiag xws ib lub zes, xws li sau cov qe hauv lub zes luag tso pov tseg. Kuv tau khaws tas ntiaj teb los ua kuv tug, tsis muaj leej twg nthuav tis, rua ncauj los quaj ib suab. 15 Rab taus puas khav tiv tus tuav nws ? Rab kaw puas tig los kaw tus siv nws ? Puas yog rab pas ua kom tus tsa nws ua tau zog ? Puas yog rab qws muab zog rau tus tuav nws ? 16 Yog vim tej ntawd tus HUAB TAIS kav tsoom tub rog yuav ua kom cov muaj zog tshaj mob tas huv si. Tas txhua yam yuav swb nws lub hwj chim thiab yuav kub hnyiab tas.

1 Ib tug ceg yuav hlav ntawm Yes Xes lub hauv paus los, ib tug ntsuag yuav hlav ntawm Yes Xes cov cag los. 2 HUAB TAIS lub tswv yim yuav nyob txawm saum nws. Yog ib lub tswv yim thoob tsib thiab ntse, ib lub tswv yim pab xav tom ntej tom qab thiab pab ua siab loj, ib lub tswv yim paub txuj thiab hwm HUAB TAIS. 3 Nws yuav nrhiav kev hwm HUAB TAIS. Nws yuav tsis txiav txim raws li qhov muag pom sab nraud, nws yuav tsis xaiv kev taug raws li hnov lus moo cua hais. 4 Nws yuav txiav txim ncaj rau cov tsis muaj zog, nws yuav pab cov neeg hauv txheej qis nyob hauv lub teb chaws, nws lub ncauj cov lus txiav yuav ntaus cov siab ceev, nws di ncauj yuav tshuab pa tua cov lim hiam. 5 Kev ncaj yuav yog nws txoj siv sia duav, kev hais qhov muaj tseeb yuav yog nws txoj siv sia ntawm ntsag. 6 Tus hma yuav nrog tus thav yaj nyob, tus tsov pom txwv yuav nrog tus thav tshis nyob ib nkuaj. Tus xyuas nyuj thiab tus tsov ntxhuav yuav ua ke nog zaub, ib tug me nyuam tub yuav caij nkawd. 7 Tus maum nyuj thiab tus maum dais ntaus phooj ywg, nkawd cov me nyuam yuav nyob hauv ib lub nkuaj, tus tsov ntxhuav yuav noj quav nplej xws li tus nyuj. 8 Tus me nyuam mos yuav ua si nyob ze ntawm tus nab liab tsaig, tus me nyuam nyuam qhuav cais mis yuav cev tes mus hauv nab ntsuab lub qhov. 9 Nyob saum kuv lub roob ntshiab, yuav tsis ua phem tsis ua nkhaus, vim kev paub HUAB TAIS yuav nyob puv ntiaj teb, ib yam li dej vov lub hiav txwv.

1 Hnub ntawd koj yuav hais tias : “HUAB TAIS, kuv cav lus zoo txog koj. Yav tas koj npau taws rau kuv. Tab sis koj lub siab tig mus ces koj nplij kuv. 2 Nej ntsia tus Tswv Ntuj uas cawm kuv. Kuv tso siab rau nws, kuv tsis txhawj ntxiv. Kuv lub zog thiab kuv zaj nkauj yog HUAB TAIS. Nws yog tus cawm kuv. 3 Nej yuav zoo siab luag ntxhi mus ce dej hauv cov qhov dej cawm neeg.” 4 Hnub ntawd nej yuav hais tias : “Nej cav txog HUAB TAIS mas ! Nej hu txog nws lub npe ! Nej tshaj nws tej hauj lwm loj nyob hauv cov haiv neeg, nej rov hais rau lawv, kom lawv nco tias nws lub npe zoo tas nrho. 5 Nej ntaus paj nruag rau HUAB TAIS ! Vim nws tau ua kom nws lub hwj chim loj nrov ncha ntws kom ntiaj teb paub. 6 Tsoom neeg nyob Xis Yoos, nej seev suab lom zem zoo siab, vim His Xas Lais tus Ntshiab loj nyob nruab nrab hauv koj.”

19 Kuv yuav caum koj tawm ntawm koj lub chaw mus, kuv yuav rho koj ntawm koj tej chaw ua dej num. 20 Hnub ntawd, kuv yuav hu kuv tus tub txib Es Lias Kis tuaj. 21 Kuv yuav muab koj lub tsho tshaj sab rau nws hnav, kuv yuav muab koj txoj siv rau nws sia, kuv yuav muab koj tus nom rau nws ua, nws yuav sawv ua cov neeg nyob Yes Lus Xas Les txiv thiab ua Yus Das tsev neeg txiv. 22 Kuv yuav muab Das Vis tsev neeg tus yawm sij tso saum nws xub pwg. Yog nws qhib mas tsis muaj leej twg yuav kaw, yog nws kaw mas tsis muaj leej twg yuav qhib. 23 Kuv cog nws xws li ib tug ntsia nyob hauv ib qho chaw khov, nws yuav hloov ua ib lub theej kiab muaj koob meej rau nws txiv tsev neeg.”

6 Nyob saum lub roob no, tsoom tub rog tus HUAB TAIS yuav ua ib rooj nqaij ib rooj hno rau tas cov haiv neeg huv tib si, yog ib rooj qav muaj hlwb puv pob txha, ib rooj cawv ntshiab tsis muaj txo. 7 Nyob saum lub roob no, HUAB TAIS yuav yaws daim ntaub vov tsoom neeg tib si, yuav rhuav chaws ntaub qhwv tsoom kuj cuab. 8 Nws yuav rhuav kev tuag ib txhiab ib txhis. HUAB TAIS Tswv Ntuj yuav so cov kua muag ntws saum sawv daws lub ntsej muag, nws yuav thau nws haiv neeg chaw poob tsim nyob thoob ntiaj teb, vim HUAB TAIS tau hais li ntawd. 9 Hnub ntawd sawv daws yuav hais tias : “Nej ntsia peb tus Tswv Ntuj uas peb vam tias nws yuav cawm peb, yog tus HUAB TAIS uas peb tos. Peb kav tsij dhia hom khaj, kav tsij xyiv fab lom zem ! 10 Vim HUAB TAIS yuav tso nws txhais tes nyob saum lub roob no.

1 Hnub ntawd, nyob Yus Das teb lawv yuav hu zaj nkauj no : “Peb muaj ib lub tsheej khov, HUAB TAIS tsom kwm, nws tsa ntsa zeb ntsa tsua thiab tsa phab ntsa siab. 2 Nej qhib rooj loog mas ! Cia lub kuj cuab siab ncaj thiab ncawg Tswv Ntuj chaws los hauv. 3 Nws tus xeeb ceem khov, koj cia nws nyob thaj yeeb, vim nws tso siab rau koj.
4 Nej tso siab rau HUAB TAIS mus ib txhiab ib txhis ! Vim HUAB TAIS yog lub tsua nyob tiam dhau tiam. 5 HUAB TAIS ua kom cov nyob chaw siab poob rau hauv qhov chaw qis, nws ua kom lub tsheej uas neeg ncav tsis cuag poob hauv pem teb. Nws muab pov hauv plua tshauv. 6 Cov neeg me thiab cov neeg pluag tsuj lawv.”
7 Tus siab ncaj txoj kev yog txoj kev ua ncaj. Koj fawb kev rau tus neeg siab ncaj taug. 8 Muaj tseeb tiag ! Peb tos koj nyob ntawm koj txoj kev txiav txim, peb tus plig ntshaw koj lub npe thiab nco txog koj. 9 Hmo ntuj, kuv tus plig nqhis txog koj, kuv lub tswv yim nrhiav koj nyob hauv kuv nruab siab. Vim thaum koj txiav txim rau lub ntiaj teb, mas cov neeg nyob hauv lub qab ntuj xyaum taug kev ncaj. 16 HUAB TAIS, thaum peb txhawj, mas peb nrhiav koj. Thaum luag quab yuam, thiab thaum koj nplua, mas peb nrhiav koj. 17 HUAB TAIS, peb tau nyob ntawm koj xub ntiag xws li tus poj niam suab me nyuam yuav daws cev, nws ntsaj thiab tshee. 18 Peb tau xeeb tub, peb daws cev, peb tsuas yug tau cua, peb tsis tau coj kev cawm rau lub ntiaj teb, tsis muaj neeg yug los nyob hauv lub qab ntuj. 19 Koj cov neeg tuag yuav ciaj rov los, lawv lub cev yuav sawv rov los. Tsoom tib neeg nyob hauv plua av, nej kav tsij tsim dheev los mas, nej seev suab qw zoo siab. HUAB TAIS, koj cov lwg yog lwg pom kev nrig, lub ntiaj teb yuav rov pub txoj sia rau cov neeg nyob hauv ntuj txias teb tsaus.

17 Tshuav tsis ntev ntxiv lawm, ces lub roob zoov Lis Npaas yuav hloov ua ib lub vaj txiv ntoo, hos lub vaj txiv ntoo yuav hloov ua hav zoov. 18 Hnub ntawd, cov neeg lag ntseg yuav hnov cov lus nyob hauv phau ntawv, cov dig muag qhov muag yuav pom kev, yuav dim ntawm qhov tsaus ntuj dub nciab. 19 Cov neeg me yuav zoo siab tuaj nyob hauv HUAB TAIS, cov pluag yuav dhia daj dhia luag nyob hauv His Xas Lais tus Ntshiab. 20 Yuav tsis muaj neeg ua nruj ua tsiv ntxiv, tus thuam luag yuav ploj mus, tsoom neeg nyas kev phem yuav ploj ntais. 21 Cov neeg uas hais ib lo lus ua tau kom luag raug txim, cov neeg cuab ntxiab rau tus txiav txim nyob ntawm lub rooj loog, cov lam ua phem rau tus siab ncaj, lawv yuav ploj tas huv tib si. 22 Vim li ntawd, HUAB TAIS, Yas Kos tsev neeg tus Tswv Ntuj, tus cawm Has Nplas Has dim nws hais li no : Txij no mus, Yas Kos yuav tsis raug kev txaj muag ntxiv. 23 Lawv yuav pom cov hauj lwm kuv ob txhais tes ua nyob nruab nrab hauv Yas Kos, lawv yuav tshaj tias kuv lub npe ntshiab. Lawv yuav tshaj tias Yas Kos tus Ntshiab nws Ntshiab tiag. Lawv yuav ntshai His Xas Lais tus Tswv . 24 Cov tswv yim yuam kev yuav rov thoob tsib. Cov neeg yws taus yuav paub txuj.

18 HUAB TAIS npaj siab zam rau nej, nws yuav sawv tsees los hlub nej, vim HUAB TAIS yog ib tug Tswv siab ncaj. Cov neeg tso siab rau nws sawv daws muaj txoj hmoov zoo. 19 Muaj tseeb, Xis Yoos haiv neeg uas nyob Yes Lus Xas Les, tsis tas koj yuav quaj ntxiv : nws hnov koj lub suab quaj quaj. Nws nyuam qhuav hnov koj, nws yuav teb rau koj sai. 20 Thaum Huab Tais muab cov mov txhawj xeeb thiab cov dej iab dej daw rau koj tas lawm, mas tus qhia koj yuav tsis nyob nrug deb ntawm koj ntxiv, koj qhov muag yuav pom tus qhia koj. 21 Koj pob ntseg yuav hnov ib lo lus ntawm koj nraub qaum tuaj tias : “Ntsia txoj kev ntawm no, koj taug mus mas ! Koj mus rau sab xis los mus rau sab laug kuj tau.” 22 Cov nyiaj vov koj, cov kub plooj koj thiab cov mlom dab nchuav, koj yuav saib yog tsis huv. Koj yuav muab laim pov tseg, koj yuav hais tias : “Nej tawm ntawm no mus mas !” 23 Tswv Ntuj yuav pub nag los ywg cov noob koj tseb rau hauv av. Ces cov mov ntawd yuav qab thiab zoo yug koj lub cev. 24 Tas koj cov tsiaj yuav noj cov npluag qab ntsev uas xuas vab tsoov. 25 Thaum txog hnub sib tua ua lwj liam uas cov sam thiaj siab vau tas, mas yuav muaj tej qhov dej thiab tej kwj deg ntws saum cov roob siab thiab saum cov hauv pes tib si los. 26 Lub hli qhov pom kev yuav zoo li lub hnub qhov pom kev. Lub hnub qhov pom kev yuav muaj zog dua xya npaug, ib yam li xya hnub qhov pom kev. Hnub ntawd HUAB TAIS yuav qhwv nws haiv neeg cov pob txha lov, yuav kho lawv cov qhov txhab.

1 Cov teb chaws suab puam thiab teb quav poj, nej kaj tsij zoo siab mog. Lub tiaj maj sab, koj kav tsij dhia daj dhia luag, thiab tawg paj xws li cov paj iab, tawg ib phaum tas, ib phaum tuaj ! Kom nws kav tsij dhia hom khaj zoo siab luag ntxhwb ntxhi, ua suab ntas ntua. 2 Ntuj pub Lis Npas lub koob meej rau lub tiaj maj sab. Lawv yuav pom Lis Npas lub koob meej, yuav pom peb tus Tswv Ntuj lub hwj chim ci ntsa iab. 3 Nej ua kom cov tes qaug zog rov muaj zog, ua kom cov hauv caug ntshaus raws rov khov. 4 Nej hais rau cov siab muag tias : “Nej ua siab loj ! Nej txhob ntshai ! Ntsia saib ! Nej tus Tswv Ntuj nyob ntawm no !” Kev rob caub tab tom tuaj, Tswv Ntuj cov txim pauj neeg cov txhaum tuaj cawm peb. 5 Ces cov dig muag ob lub qhov muag rov rua hlo, cov pob ntseg lag yuav qhib plho. 6 Tus neeg ceg tawv dhia nrawm xws li tus muas lwj. Tus nplaig txhav qw tej suab zoo siab. Vim ib co dej txhawv hauv cov teb chaws suab puam los, tej tus dej ntws hla cov teb chaws maj sab. 7 Thaj av kub ntaiv yuav hloov ua pas dej. Lub teb chaws tuag dej yuav txhawv tej tus kaus dej txaws txua tawm los. Thaj chaw uas hma ua zes nyob, yuav hloov ua tiaj tauj thiab tiaj ncaug zom ntawv. 8 Nyob ntawd, yuav muaj ib txog kev ntshiab huv, tis npe hu ua “Kev Qee.” Tsis muaj ib tug neeg tsis huv yuav mus tau txoj kev ntawd, 9 yuav tsis muaj tsov, tsis muaj tsiaj tom neeg taug txoj kev ntawd ntxiv, cov uas Ntuj txhiv lawv thiaj tau taug xwb. 10 Cov neeg uas HUAB TAIS txhiv yuav rov qab los, lawv yuav chaws mus hauv Xis Yoos thiab nqua suab zoo siab, ib txog kev zoo siab ib txhiab ib txhis roos lawv taub hau. Kev luag ntsuag qees thiab kev lom zem ua lawv luag, kev iab kev khwv thiab kev ntsaj ploj ntais mus.

1 Muaj ib hnub, tus vaj Es Xes Kias tau ib tug mob hnyav kawg. Yaj Saub His Xais tuaj xyuas nws, His Xais hais rau nws tias : “HUAB TAIS hais li no : koj tu koj lub tsev, vim koj yuav tuag, koj yuav tsis tau ua neej nyob ntxiv.” 2 Ces Es Xes Kias tig hlo rau tim phab ntsa, nws thov HUAB TAIS tias : 3 “Ab ! HUAB TAIS, thov koj nco ntsoov tias kuv tau taug kev nyob ntawm koj xub ntiag, kuv npuab koj, tsis ua ntau lub siab, kuv tau ua yam uas koj pom zoo.” Es Xes Kias quaj tas los quaj thiab. 4 HUAB TAIS hais rau His Xais tias : 5 “Koj mus hais rau Es Xes Kias tias : HUAB TAIS hais li no : Kuv tau hnov koj zaj thov, kuv tau pom koj cov kua muag. Koj ntsia, kuv ntxiv kaum tsib xyoos rau koj lub hnub nyoog. 6 Kuv yuav npo koj thiab npo lub tsheej no kom dim ntawm tus vaj As Xws txhais tes. Kuv yuav pov hwm lub tsheej no.” Tus Tswv Ntuj muaj hwj huam hais li ntawd. 21 His Xais hais tias : “Nej muab ib lub ncuav txiv ncuav pias los npuab lub qhov txhab, ces nws yuav zoo.” 22 Es Xes Kias hais tias : “Yuav muaj lub cim twg ua kom kuv paub tias kuv yuav mus pem HUAB TAIS lub tsev ?” 7 His Xais teb tias : “HUAB TAIS yuav ua li no rau koj paub tias nws ua raws li lo lus nws hais ntawd. Nws hais tias : 8 Nyob ntawm As Kas daim txiag zeb ntsuas hnub, kuv yuav ua kom duab ntxoov ntxoo thaub rov qab kaum teev.”

1 Nej tus Tswv Ntuj hais tias : “Nej nplij kuv haiv neeg, nej nplij lawv mas ! 2 Nej hais lus rau hauv Yes Lus Xas Les nruab siab. Nej hais nrov nrov rau nws tias nws lub caij ua qhev dhau lawm. Nws them txim txhaum tas lawm. Cov xwm uas nws txais ntawm HUAB TAIS txhais tes los them nws cov txhaum twb tshaj nws cov txhaum ob npaug lawm.” 3 Muaj ib lub suab qw tias : “Nej npaj ib txog kev hauv teb chaws suab puam rau Tswv Ntuj taug. Nej ncaws ib txog kev ncaj hauv cov teb chaws quav poj rau peb tus Tswv Ntuj. 4 Nej txhub cov hav tob kom siab, kom cov roob thiab cov hauv toj cia li qis, kom cov tiaj muaj pov toj, hloov ua hav tiaj tus yees, kom cov toj ntxhab hloov ua tshav puam. 5 HUAB TAIS lub hwj chim yuav tawm los. Txhua tus muaj lub cev nqaij puav leej yuav pom lub hwj chim, vim HUAB TAIS lub ncauj tau hais lus. 6 Ib lub suab nrov tuaj tias : “Koj qw mas !” Kuv hais tias : “Kuv yuav qw dab tsi ?” HUAB TAIS hais tias : “Txhua tus muaj lub cev nqaij zoo ib yam li lub paj nroj tom tej nras. 7 Thaum HUAB TAIS tshuab pa tuaj mas tsob nroj qhuav, ces lub paj ntsws. 8 Tsob nroj qhuav, lub paj zeeg, tab sis peb tus Tswv Ntuj lo lus yuav nyob mus li.” 9 Koj yog tus fi tsab xov zoo no mus rau Xis Yoos. Koj nce mus saum ib lub roob siab, koj tsa suab qw nrov nrov mas ! Koj yog tus fi tsab xov zoo mus rau Yes Lus Xas Les