-1-
1 Paj Lug, thiab Xis Vas Nus thiab Tis Mos Tes, sau ntawv tuaj rau lub Koom Txoos nyob Tes Xas Los Nis, uas nyob hauv Leej Txiv Tswv Ntuj thiab nyob hauv Huab Tais Yes Xus Pleev. Thov kom lub txiaj ntsim thiab txoj kev thaj yeeb tuaj txog nej.
2 Thaum peb teev Ntuj, mas peb nco txog nej thiab peb ua Tswv Ntuj tsaug tsis tseg, vim nej sawv daws. 3 Peb nyob ntawm peb Txiv Tswv Ntuj xub ntiag, peb nco ntsoov tias, nej kub siab nyob hauv txoj kev ntseeg, nej rau siab ntso ua hauj lwm nyob hauv txoj kev nyiam, nej nyob ruaj nreb hauv txoj kev tso siab, vim peb tus Huab Tais Yes Xus Pleev.
4 Cov kwv tij uas Tswv Ntuj nyiam, peb paub tias nej yog cov neeg Tswv Ntuj xaiv. 5 Peb lub Moo Zoo tuaj txog nej, tsis yog ib co lus qhuav xwb : peb lub Moo Zoo muaj ib co hauj lwm tuaj nrog, thiab muaj Leej Ntuj Plig Ntshiab lub zog nyob hauv. Lub Moo Zoo tuaj khov kho. Nej paub tias thaum peb tuaj tsob hwb nej, peb tau coj tus yam ntxwv zoo li cas nyob nruab nrab hauv nej. 6 Nej thiaj yoog raws peb tus piv txwv, thiab yoog raws Huab Tais tus lwj lwm, vim nej tau txais Lo Lus. Nej tau raug ntau txoj kev txhawj xeeb, tab sis nej zoo siab nyob hauv Leej Ntuj Plig Ntshiab. 7 Ces nej tau ua ib tug piv txwv zoo rau cov neeg ntseeg nyob Mas Xes Dos Nias teb, thiab As Kas Yas teb tas huv si.
8 Huab Tais Lo Lus nrov ncha ntws tim nej, mus txog Mas Xes Dos Nias thiab As Kas Yas teb ; nej txoj kev ntseeg ri mus tas qhov txhia chaw ; nyem no, tsis tas peb yuav hais txog qhov ntawd ntxiv. 9 Luag tej ob cag piav tias peb tuaj txog tim nej zoo li cas, thiab nej ua li cas tig los ntseeg txog Tswv Ntuj, tso cov mlom pov tseg, nej los tsob hwb tus Tswv Ntuj muaj txoj sia uas yog tus tseeb. 10 Vim nej tos Tswv Ntuj Leej Tub yuav rov saum ntuj los. Leej Tub ntawd, yog Yes Xus, uas Tswv Ntuj tsa hauv cov neeg tuag sawv rov los : Yes Xus yog tus npo peb dim ntawm txoj kev npau taws, uas tab tom tuaj.
-2-
1 Kwv tij sawv daws, nej yeej paub tias peb tuaj txog tim nej zoo li cas. Peb tsis tau nkim zog tuaj.
2 Nej paub tias, thaum peb tuaj txog, peb xub tau raug luag hiam thiab raug luag tsawm nyob Fis Lis Pos. Tab sis, peb tus Tswv Ntuj tau pub ib lub siab tawv qhawv, kom peb tiv kev iab kev daw tshaj Tswv Ntuj lub Moo Zoo rau nej mloog. 3 Thaum peb qhia nej, peb tsis muab kev cuav thiab kev tsis huv los txuam rau, peb tsis muab dab tsi los ntxias nej. 4 Tswv Ntuj twb xub sim peb lawm, nws mam muab lub Moo Zoo rau peb tshaj. Li ntawd nyem no, peb tshaj lus, mas peb tsis nrhiav ua xis neeg siab, peb tsuas nrhiav ua xis Tswv Ntuj siab, vim nws yog tus tsom peb lub siab. 5 Nej kuj paub tias, peb tsis tau hais ib lo lus mos ntxias nej ib zaug, peb tsis tau ntshaw dab tsi : Tswv Ntuj ua tim khawv pom.
6 Peb tsis tau nrhiav koob meej nyob ntawm neeg, nrhiav koob meej nyob hauv nej, los nyob tom lwm cov neeg. 7 Peb yog Leej Pleev cov Hauv Paus Xa Lus, peb yuav ua kom nej raug peb hnyav kuj tau, tab sis peb tsis ua.
Thaum peb nyob nruab nrab hauv nej peb tau ua ib co neeg me ! 8 Peb tau hlub nej xws li ib leej niam tu thiab txuag nws cov me nyuam. Peb ib txhij xav pub Tswv Ntuj lub Moo Zoo rau nej, thiab xav pub peb txoj sia rau nej : vim peb lub siab tau nyiam tiag. 9 Kwv tij, nej nco ntsoov txog peb tej hauj lwm, thiab txog peb tej kev iab kev khwv. Thaum peb tshaj Tswv Ntuj lub Moo Zoo rau nej, mas peb tau ua hauj lwm nruab hnub thiab hmo ntuj, vim peb tsis xav ua ib lub nra hnyav rau nej ib tug twg ris li. 10 Nej tau ua tim khawv pom, thiab Tswv Ntuj kuj ua tim khawv pom tias peb tau coj tus yam ntxwv ntshiab thiab ncaj, tus yam ntxwv tsis muaj chaw xyeej nyob hauv nruab nrab nej cov ntseeg.
11 Nej paub tias, peb tau ua xws li ib leeg txiv ua rau nws tej tub ki. 12 Peb tau ntuas nej sawv daws, tau txhawb nej lub siab kom loj, tau qhuab qhia nej tas zog, kom nej coj ib lub neej tsim nyog Tswv Ntuj hu nej los nyob hauv nws lub Ceeb Tsheej, thiab nyob hauv nws lub hwj chim.
13 Yog vim tej ntawd, mas peb ua Tswv Ntuj tsaug tsis tseg, vim thaum nej txais Tswv Ntuj Lo Lus uas peb tau qhia nej, mas nej tsis txais Lo Lus ntawd xws li neeg lo lus ; nej txais raws nraim li Tswv Ntuj Lo Lus, vim yeej yog Tswv Ntuj Lo Lus tiag. Lo Lus ntawd tseem ua hauj lwm nyob hauv nej, cov ntseeg. 14 Nyob hauv Yes Xus Pleev, nej pib yoog raws li Tswv Ntuj cov Koom Txoos, uas nyob Yus Das teb. Nej tau raug cov neeg hauv nej zej zog hiam nej, xws li cov ntseeg nyob Yus Das teb, uas lawv raug cov Yus Das hiam. 15 Cov Yus Das ntawd tau muab Huab Tais Yes Xus thiab cov Yaj Saub tua, lawv hiam peb. Lawv ua tsis xis Tswv Ntuj siab. 16 Thaum cov Yus Das txwv tsis kheev peb tshaj txoj kev cawm rau cov pej kum neeg, mas lawv yog ntiaj teb neeg cov yeeb ncuab, lawv ua kom lawv qhov txhaum hlob ntxiv. Thaum kawg, mas txoj kev npau taws tuaj raug lawv.
17 Cov kwv tij, tau ib ntus los peb tsis muaj nej ua peb luag, peb tsis pom nej ntsej muag ; tsis kav, nej nyob nraim hauv peb nruab siab. Peb rawm rov pom nej ntsej muag kawg, peb xav rov pom nej tas nrho.
18 Peb xav tuaj xyuas nej. Kuv, Paj Lug, twb xav tuaj ob peb zaug, tab sis Xas Tas txiav peb kev tuaj. 19 Thaum peb tus Huab Tais Yes Xus yuav rov los, leej twg yuav ua peb lub chaw tso siab, chaw zoo siab, thiab ua peb lub kaus mom kub muaj koob meej nyob ntawm peb tus Huab Tais Yes Xus xub ntiag ? Kawg yog nej xwb. 20 Nej yog peb lub koob meej, thiab peb chaw zoo siab.
-3-
1 Li ntawd mas peb nyob tsis taus, peb thiaj tau txiav tias, cia kuv nyob kuv ib leeg nyob As Thes Nas. 2 Peb tso Tis Mos Tes tuaj. Nws yog peb tus kwv, nws yog tus nrog Tswv Ntuj ua hauj lwm, nyob hauv Leej Pleev lub Moo Zoo ; nws tuaj pab nej, kom nej nyob ruaj nreb ; nws tuaj nres nej, kom nej muaj zog nyob hauv txoj kev ntseeg ; 3 kom txhob muaj ib tug ua xyem xyav, thaum txoj kev hiam tuaj raug nej. Vim nej paub zoo tias, tej no yog peb txoj hmoov. 4 Thaum peb tseem nrog nej nyob, peb xub hais rau nej paub tias, peb yuav raug luag hiam. Nyem no, nej paub tias tej kev hiam ntawd tshwm sim tuaj lawm tiag. 5 Yog vim li ntawd, mas kuv nyob tsis taus, kuv thiaj xa Tis Mos Tes tuaj saib xyuas nej txoj kev ntseeg. Thaum ntawd, kuv ntshai tsam tus niag ntxias neeg ntxias tau nej, tsam nws rhuav peb lub luag hauj lwm ploj tas.
6 Nyem no, Tis Mos Tes tuaj xyuas nej, nws nyuam qhuav rov los txog peb. Nws piav lus zoo txog nej txoj kev ntseeg, thiab nej txoj kev nyiam, rau peb mloog. Nws hais tias, nej nco ntsoov txog peb mus li, nej xav rov pom peb, ib yam li peb xav rov pom nej. 7 Kwv tij, yog vim nej txoj kev ntseeg, mas peb thiaj rov ua siab loj nyob hauv peb txoj kev txhawj xeeb, thiab kev txom nyem.
8 Nyem no, peb rov muaj sia, vim nej nyob ruaj nreb hauv Huab Tais. 9 Peb yuav ua li cas ua Tswv Ntuj tsaug kom txaus rau nej, vim nej ua kom peb muaj chaw zoo siab ntau nyob ntawm Tswv Ntuj xub ntiag ? 10 Nruab hnub hmo ntuj, peb thov Tswv Ntuj tsis tseg, kom peb tau rov pom nej lub ntsej muag, thiab kom peb tau kev txhab tej yam uas nej lub siab ntseeg tsis tau muaj.
11 Thov kom Tswv Ntuj, uas yog peb Txiv, thiab peb tus Huab Tais Pleev Txiv, coj peb txoj hauv kev tuaj txog nej. 12 Thov kom Huab Tais ua nej hlob mus, thiab vam meej nyob hauv txoj kev sib nyiam, thiab kev nyiam zeej tsoom, ib yam li peb nyiam nej. 13 Thov kom Huab Tais ua nej lub siab nyob ruaj nreb hauv txoj kev ntshiab, tsis muaj chaw xyeej, nyob ntawm peb Txiv Tswv Ntuj xub ntiag, tos txog hnub peb tus Huab Tais Yes Xus yuav nrog tas tsoom Leej Ntshiab rov los.
-4-
1 Peb thov nej thiab txhib nej nyob hauv Huab Tais Yes Xus kom nej coj ib lub neej li cas thiaj ntxim Huab Tais siab, raws li nej tau kawm ntawm peb. Ces nej kuj coj ib lub neej li ntawd : nej muab siab rau ua zoo zuj zus mus mog. 2 Nej twb paub cov lus peb qhia rau nej lawm, yog Yes Xus kom peb qhia nej zoo li ntawd.
3 Tswv Ntuj xav kom nej ua li no : kom nej ua neeg siab ntshiab, kom nej caiv txoj kev ua plees ua yi, 4 kom nyias txuag nyias lub cev kom ntshiab thiab tsim txiaj. 5 Nyias yuav tsis txhob mloog nyias lub cev ntshaw qhov tsis huv, xws li cov teev dab uas tsis paub Tswv Ntuj. 6 Hais txog txoj kev tsis huv ntawd, mas yuav tsis txhob muaj leej twg ua phem los ua tub qaug nws ib tug kwv tij. Peb twb hais rau nej tias, thaum muaj neeg ua phem li hais no, mas Huab Tais yuav pauj qhov phem rau cov neeg tau ua phem. 7 Tswv Ntuj tsis tau hu peb kom mus nyob hauv txoj kev tsis huv. Nws hu peb kom mus nyob hauv txoj kev ntshiab, hauv peb tus Huab Tais Yes Xus Pleev. 8 Li ntawd, tus twg xyeeb cov lus ntawd pov tseg, tsis yog nws xyeeb neeg pov tseg, yog nws xyeeb Tswv Ntuj pov tseg, vim Tswv Ntuj pub Leej Ntuj Plig Ntshiab ua txiaj ntsim rau nej.
9 Hais txog txoj kev sib nyiam li ib co kwv tij, mas tsis tas kuv yuav sau txog qhov ntawd rau nej, vim nej twb tau kawm kev sib nyiam sib hlub ntawm Tswv Ntuj los. 10 Nej nyiam thiab hlub tas tsoom kwv tij nyob Mas Xes Dos Nias teb tib si. 11 Kwv tij, peb tseem thov ntuas nej, kom nej ua siab dav ntxiv ; yam li, nej yuav muab siab rau ua neeg thaj yeeb ; nyias muab siab rau saib nyias txoj hauj lwm, nyias xuas nyias txhais tes ua hauj lwm, xws li peb tau qhia nej. 12 Li ntawd, mas nej yuav coj ib lub neej tsim nyog, ib lub neej muaj ntsej muag rau cov nyob sab nraud pom ; ces nej yuav tsis vam txog leej twg.
13 Kwv tij sawv daws, peb tsis xav kom nej tsis paub dab tsi txog cov neeg uas pw tsaug zog mus li. Thaum nej muaj ib tug neeg tuag, nej yuav tsis txhob tu siab xws li cov neeg uas tsis muaj kev tso siab. 14 Vim peb ntseeg tias, Yes Xus tuag thiab sawv rov los ; peb kuj tso siab tias, cov neeg mus pw tsaug zog nyob hauv Yes Xus, mas Tswv Ntuj yuav coj lawv mus nrog nws nyob. Huab Tais qhia ib lo lus rau peb, peb xav hais lo lus ntawd rau nej paub. 15 Yam li, hnub Huab Tais rov los txog, mas peb cov neeg ciaj yuav tsis xub mus cuag Huab Tais dua cov uas tuag ntxov lawd. 16 Vim, thaum txog lub caij teem, sawv daws yuav hnov thawj tug Tshiab lub suab, thiab hnov Tswv Ntuj lub puab nrov. Ces Huab Tais yuav nqes saum ntuj los. Cov neeg tuag nyob hauv Yes Xus Pleev yuav xub sawv rov los.
17 Hos peb cov uas tseem ciaj, mam li yuav tau mus nrog cov tuag sawv rov los ntawd sib txoos ua ke ; ces Ntuj yuav nqa peb nrog lawv nce mus saum cov huab, peb yuav mus cuag Huab Tais nyob saum ntuj. Peb yuav mus nrog Huab Tais nyob mus li. 18 Peb sawv daws nco ntsoov txog cov lus no, peb thiaj rov sib pab ua siab loj.
-5-
1 Kwv tij, tsis tas kuv yuav qhia nej txog lub zim txwv thiab lub hnub nyoog uas Huab Tais yuav rov los. 2 Nej twb paub meej tias, Huab Tais lub hnub nyoog yuav los txog xws li ib tug tub sab uas tuaj thaum ib tag hmo.
3 Thaum zeej tsoom hais zom zaws tias : ‘Peb tau nyob kaj lug, thiab nyob nyab xeeb’, ces ib sij huam, txoj kev ploj yuav ya ntxiag tuaj raug lawv, xws li tus poj niam cev hnyav, uas ib sij huam nws cia li mob. Lawv yuav tsis tau kev dim.
4 Kwv tij, ntawm nej, mas nej tsis nyob hauv qhov tsaus ntuj ; lub hnub nyoog ntawd yuav tsis tuaj muab nej, xws li ib tug tub sab. 5 Nej sawv daws puav leej yog qhov pom kev cov me nyuam, nej yog cov me nyuam mus nruab hnub. Peb tsis yog cov neeg maub hmo ntuj, nyob hauv qhov tsaus ntuj. 6 Li ntawd, mas peb tsis txhob tsaug zog xws li luag tej : peb yuav zov hmo ; peb yuav noj me haus tsawg. 7 Cov neeg tsaug zog, mas lawv tsaug zog hmo ntuj ; cov neeg haus cawv kom qaug, lawv kuj qaug cawv hmo ntuj. 8 Hos peb mas, peb yog cov neeg mus nruab hnub. Peb yuav noj me haus tsawg. Peb yuav hnav txoj kev ntseeg thiab txoj kev nyiam xws li lub tsho hlau. Peb yuav muab txoj kev tso siab txoj kev cawm neeg los ua kaus mom ntoo.
9 Tswv Ntuj tsis muab peb tshwj tseg ua nws lub chaw npau taws. Tswv Ntuj tshwj zias peb cia kom peb tau txais txoj kev cawm neeg, nyob hauv peb tus Huab Tais Yes Xus Pleev, uas nws tuag kom tau pab peb. 10 Vim li no, tab yog peb zov hmo, los peb tsaug zog, mas peb tau nrog nws muaj txoj sia.
11 Ua li mas, nej yuav rov sib pab ua siab loj, sib txhawb thiab sib tsa rau txoj kev zoo, xws li nej ua los lawm.
12 Kwv tij, peb thov kom nej hwm cov neeg uas siv siv zog khwv nyob hauv nej, thiab hwm cov thawj coj uas saib xyuas nej thiab qhuab qhia nej nyob hauv Huab Tais. 13 Nej yuav muab lawv saib siab, thiab nyiam lawv zoo, vim lawv lub luag hauj lwm.
14 Peb thov qhia nej : nej qhuab qhia cov neeg tub nkeeg, nej txhawb zog rau cov neeg ntaus siab me, nej nres cov neeg tsis muaj zog, nej ua siab ntev rau sawv daws. 15 Nej ceev faj, kom tsis txhob muaj leej twg ua phem los pauj cov tau ua phem. Nej yuav nrhiav txoj kev zoo : nej ib leeg yuav ua zoo rau ib leeg, thiab nej yuav ua zoo rau luag.
16 Nej ua siab kaj lug mus li. 17 Nej teev ntuj tsis tseg. 18 Tab txawm muaj xwm dab tsi tshwm sim tuaj, los nej yuav ua Ntuj tsaug mus li. Tswv Ntuj lub siab xav kom nej ua li ntawd nyob hauv Yes Xus Pleev.
19 Nej txhob tua Leej Ntuj Plig xws li tua teeb. 20 Nej txhob thuam lub txiaj ntsim ua Yaj Saub. Nej hnov yam twg, mas nej tshuaj saib puas tseeb tso : yam twg zoo, mas nej khaws tseg. 22 Nej caiv txhua txoj kev phem mog.
23 Thov kom tus Tswv Ntuj siab kaj lug ua kom nej ntshiab tuaj. Thov kom nej txuag tau nej lub tswv yim, nej tus plig, kom nej lub cev txhob muaj chaw xyeej, mus txog lub caij peb tus Huab Tais Yes Xus Pleev rov los. 24 Tus hu nej, nws pheej xeeb : nws yuav ua xws li kuv hais saum no.
25 Kuv cov kwv tij, nej thov Ntuj rau peb thiab. 26 Nej xa peb cov lus hmov tshua mus rau cov kwv tij huv tib si ; nej sawv peb chaw nwj lawv hauv txoj kev ntshiab. 27 Kuv thov nej nyob hauv Huab Tais kom nej nyeem tsab ntawv no rau tas tsoom kwv tij huv tib si mloog. 28 Thov kom peb tus Huab Tais Yes Xus Pleev lub txiaj ntsim nrog nej nyob.