1 Cov xwm uas tau tshwm sim thaum lub hauv paus, cov xwm peb tau hnov, cov xwm peb tau pom xyeem ntawm qhov muag, thiab peb txhais tes tau kov, cov xwm no hais txog Leej Lo Lus muaj txoj sia. 2 Txoj sia tawm tuaj rau peb pom. Peb tau pom txoj sia lawm, peb ua tim khawv hais txog txoj sia no, vim nws nyob mus li. Txoj sia nyob ze Leej Txiv, nws tawm tuaj rau peb pom, ces peb tshaj txoj sia rau nej paub.
3 Yam uas peb tau pom thiab tau hnov, mas peb tshaj rau nej paub, kom nej nrog peb koom ib lub siab. Peb txoj kev nrog nej koom siab, kuj yog ib txog kev nrog Leej Txiv thiab nws Leej Tub Yes Xus Pleev koom siab.
4 Peb sau tas puas tsav yam no, kom txoj kev zoo siab puv phwj yaws hauv nej.
5 Lub xov uas peb tau hnov ntawm Yes Xus los, thiab peb tshaj rau nej paub, yog lub no : Tswv Ntuj yog qhov pom kev. Nyob hauv Tswv Ntuj tsis muaj ib yam tsaus li.
6 Yog peb hais tias peb nrog nws koom siab, tab sis peb tseem mus taug txoj kev tsaus ntuj, mas peb dag xwb, peb tsis nyob hauv qhov tseeb.
7 Hos yog peb mus taug txoj kev kaj, mas peb nrog sawv daws koom siab, vim Tswv Ntuj nyob hauv txoj kev kaj. Ces nws Leej Tub Yes Xus cov ntshav ntxuav peb ntawm txhua yam txhaum kom peb huv.
8 Yog peb hais tias peb tsis muaj txhaum, mas peb rov dag rau peb, qhov tseeb tsis nyob hauv peb lawm. 9 Yog peb lees peb cov txhaum, mas Tswv Ntuj uas yog tus pheej xeeb thiab tus siab ncaj yuav daws peb cov txhaum, nws yuav ua kom peb huv tuaj thiab ncaj tuaj.
10 Yog peb hais tias peb tsis tau ua txhaum, mas yog zoo li peb hais tias Tswv Ntuj yog tus dag, nws lo lus tsis nyob hauv peb.

1 Kuv cov me nyuam, kuv sau tej yam ntawd tuaj rau nej, kom nej tsis txhob ua txhaum. Txawm tias yog muaj ib tug tau ua txhaum lawm, los peb muaj ib tug cev peb lus nyob ze Leej Txiv, tus ntawd yog Yes Xus Pleev, tus siab ncaj.
2 Yes Xus raug tuag kom nws tau ua nqi txhiv peb ntawm peb cov txhaum. Tsis yog txhiv peb xwb, nws txhiv tas lub qab ntuj neeg ntawm lawv cov txhaum huv tib si.
3 Qhov ua kom peb pom tias peb paub Leej Txiv, yog qhov no : yog peb coj nws cov lus qhia. 4 Tus hais tias : “Kuv paub Leej Txiv,” tab sis nws tsis coj Leej Txiv cov lus qhia, mas nws yog ib tug neeg dag, qhov tseeb tsis nyob hauv nws.
5 Hos tus coj Leej Txiv lo lus, mas txoj kev nyiam Tswv Ntuj hlob tiav nyob hauv nws. Yog peb ua li ntawd, mas peb paub tias peb nyob hauv Leej Txiv. 6 Tus uas nws hais tias nws nyob hauv Leej Txiv, mas nws yuav tsum coj ib tug yam ntxwv xws li Yes Xus tau coj.
7 Cov zoo nyiam, qhov kuv sau tuaj rau nej, tsis yog ib lo lus qhia tshiab. Yog ib lo lus qhia qub qub, uas nej tau txais puag thaum lub hauv paus los lawm. Lo lus qhia qub ntawd, yog lo lus qhia nej twb tau hnov lawm.
8 Tsis kav, qhov kuv sau tuaj rau nej no, kuj yog ib lo lus qhia tshiab thiab. Yog qhov tseeb uas nyob hauv Yes Xus thiab nyob hauv nej. Vim qhov tsaus ntuj dua lawm, hos qhov pom kev uas yog qhov tseeb twb ci tuaj lawm.
9 Tus hais tias nws nyob hauv qhov pom kev, tab sis nws ntxub nws tus kwv, mas nws tseem nyob hauv qhov tsaus ntuj.
10 Tus nyiam nws tus kwv, nws nyob hauv txoj kev pom kev. Ces nyob hauv nws tsis muaj dab tsis yuav ua tau kom nws ntog.
11 Hos tus ntxub nws tus kwv, nws nyob hauv qhov tsaus ntuj, thiab nws maub hauv qhov tsaus ntuj, nws tsis paub tias nws mus qhov twg, vim qhov tsaus ntuj ua kom nws qhov muag tsis pom kev.
12 Cov me nyuad, kuv sau ntawv tuaj rau nej, vim nej cov txhaum daws tas rau hauv Yes Xus lub npe lawm.
13 Cov ua txiv, kuv sau ntawv tuaj rau nej, vim nej paub Tus Nyob txij lub hauv paus los.
Cov hluas, kuv sau ntawv tuaj rau nej, vim nej yeej tus Dab Phem lawm.
14 Kuv cov me nyuam, kuv sau ntawv tuaj rau nej, vim nej paub Leej Txiv lawm.
Cov ua txiv, kuv sau ntawv tuaj rau nej, vim nej paub tus ib txwm nyob txij lub hauv paus los.
Cov hluas, kuv sau ntawv tuaj rau nej, vim nej muaj zog, thiab vim Tswv Ntuj lo lus nyob hauv nej, nej ntaus yeej tus dab Phem lawm. 15 Nej txhob nyiam lub qab ntuj neeg, txhob nyiam yam uas nyob hauv lub qab ntuj no. Yog muaj ib tug nyiam lub qab ntuj neeg, mas txoj kev nyiam Tswv Ntuj tsis nyob hauv nws.
16 Txhua yam nyob hauv lub qab ntuj no tsis tuaj ntawm Tswv Ntuj tuaj, yam li lub cev nqaij txoj kev ntshaw, qhov muag txoj kev ntshaw pom, txoj kev khav theeb vim yus nplua nuj : txhua yam ntawd tuaj ntawm lub qab ntuj neeg tuaj xwb.
17 Lub qab ntuj neeg thiab nws txoj kev ntshaw yuav dua. Hos tus ua raws li Tswv Ntuj lub siab, mas nws nyob mus li tas ib txhiab ib txhis.
18 Cov me nyuad, twb txog lub zim txwv kawg lawm. Nej tau hnov hais tias ib tug tiv Leej Pleev yuav tuaj. Twb muaj ntau tus tiv Leej Pleev tuaj txog lawm, vim li ntawd peb thiaj paub tias txog lub zim txwv kawg lawm.
19 Cov neeg tiv Leej Pleev tawm hauv peb tuaj, tab sis lawv tsis yog peb cov neeg. Yog lawv nrog peb ua ib pab neeg tiag, mas lawv yuav nrog peb nyob. Lawv tawm mus kom sawv daws pom xyeem tias lawv tsis yog peb pab neeg.
20 Ntawm nej, mas nej tau txais cov roj ntawm tus Ntshiab los pleev nej. Nej sawv daws thiaj paub qhov tseeb.
21 Kuv sau ntawv tuaj rau nej, tsis yog vim nej tsis paub qhov tseeb. Kuv sau tuaj, mas yog vim nej paub qhov tseeb lawm, nyob hauv qhov tseeb tsis muaj ib yam dag.
22 Tus dag yog leej twg ? Tsis yog tus tsis kam lees tias Yes Xus yog Leej Pleev lod ? Tus tiv Leej Pleev yog tus tsis lees Leej Txiv thiab Leej Tub.
23 Tus tsis lees Leej Tub, mas nws tsis tau Leej Txiv los ua nws Txiv. Tus lees paub Leej Tub, mas nws tau Leej Txiv los ua nws txiv.
24 Ntawm nej, mas nej yuav cia cov lus qhia uas nej tau hnov txij thaum chiv lub hauv paus los, nyob ruaj rau hauv nej. Yog cov lus qhia uas nej tau hnov txij lub hauv paus los nyob ruaj hauv nej, mas nej kuj yuav nyob hauv Leej Tub thiab Leej Txiv.
25 Qhov uas Leej Txiv cog lus tias nws yuav pub, yog txoj sia nyob mus li.
26 Kuv sau cov lus no hais txog cov neeg xav coj nej mus rau txoj kev yuam kev.
27 Ntawm nej, mas cov roj uas nej tau txais ntawm Leej Pleev yuav nyob hauv nej mus li. Tsis tas yuav muaj tus qhia nej, vim cov roj uas nws pleev nej txawj qhia txhua yam rau nej. Nws cov roj pleev qhia qhov tseeb, tsis muaj ib yam dag txuam rau. Nws cov roj pleev qhia nej kom nej nyob ruaj hauv Leej Pleev.
28 Cov me nyuam, nyem no nej nyob hauv Leej Pleev mog. Li ntawd, yog nws tawm tuaj rau pom xyeem, mas peb yuav nyob ruaj nreb, peb tsis txaj muag tias peb nyob deb deb ntawm lub zim txwv nws rov los.
29 Yog nej paub tias Leej Pleev siab ncaj, mas nej kuj yuav paub tias tus twg coj txoj kev ncaj, tus ntawd yug ntawm Leej Pleev los.

1 Nej ntsia saib, Leej Txiv txoj kev nyiam peb loj tas npaum no : yam li peb hu ua Tswv Ntuj cov me nyuam, peb yog Tswv Ntuj cov me nyuam tiag ! Lub ntiaj teb neeg tsis paub peb, vim ntiaj teb neeg tsis paub Leej Txiv.
2 Cov zoo nyiam, nyem no, peb yog Tswv Ntuj cov me nyuam. Qhov uas yav tom ntej peb yuav plhis mus zoo li cas, tseem tsis tau tawm los rau qhov muag pom xyeem. Peb paub tias, thaum Leej Pleev yuav tawm los rau qhov muag pom xyeem, mas peb yuav zoo li Nws, vim nws zoo li cas, mas peb yuav pom Nws zoo li ntawd.
3 Tus twg tso siab rau Leej Pleev, mas nws yuav ua kom nws huv tuaj, vim Leej Pleev yog tus huv. 4 Tus twg ua txhaum, mas nws ua tsis haum txoj cai, vim kev txhaum yog kev hla txoj cai. 5 Nej paub tias Leej Pleev tawm los rau pom xyeem, vim nws tshem cov txhaum pov tseg. Tsis muaj ib qho txhaum nyob hauv nws. 6 Tus twg nyob hauv Leej Pleev, mas nws tsis txhaum. Tus twg ua txhaum, mas nws tsis pom thiab tsis paub Leej Pleev.
7 Cov me nyuad, nej txhob cia luag tej ua kom nej yuam kev. Tus coj txoj kev ncaj, nws lub siab ncaj ib yam li Leej Pleev uas yog tus ncaj.
8 Tus ua txhaum, nws tuaj ntawm dab phem tuaj, vim txij lub hauv paus los, dab phem yog tus ua txhaum. Tswv Ntuj Leej Tub tawm tuaj rhuav dab phem cov hauj lwm.
9 Leej twg yug ntawm Tswv Ntuj los, nws tsis ua txhaum, vim Tswv Ntuj lub noob tseb rau hauv nws. Nws ua txhaum tsis tau, vim nws yug ntawm Tswv Ntuj los. 10 Peb paub tias, cov twg yog Tswv Ntuj cov me nyuam, thiab cov twg yog dab phem cov me nyuam : tus tsis ua raws txoj kev ncaj, mas nws tsis tuaj ntawm Tswv Ntuj tuaj ; tus tsis nyiam nws tus kwv, nws kuj tsis tuaj ntawm Tswv Ntuj tuaj.
11 Lub moo uas txij lub hauv paus los nej hnov, yog zoo li no : peb yuav sib nyiam sib hlub. 12 Peb tsis yoog raws li Kas Ees, uas nws mloog tus Phem, nws zawm nws tus kwv caj dab. Vim li cas nws thiaj zawm nws tus kwv caj dab ? Yog vim nws cov hauj lwm phem, hos nws tus kwv cov hauj lwm ncaj.
13 Kwv tij, yog lub ntiaj teb neeg ntxub nej, mas nej tsis txhob poob siab. 14 Peb li, mas peb paub tias, peb twb hla ntawm txoj kev tuag los nyob hauv txoj sia, vim peb nyiam thiab peb hlub peb cov kwv tij. Tus tsis nyiam, nws nyob hauv kev tuag. 15 Leej twg ntxub nws tus kwv, mas nws yog ib tug tua neeg. Nej paub tias, tsis muaj ib tug tua neeg yuav tau txoj sia nyob mus li los rau nws.
16 Peb paub txoj kev nyiam vim qhov no : yog qhov tias Yes Xus siv nws txoj sia los pab peb. Peb kuj yuav siv peb txoj sia los pab peb cov kwv tij.
17 Tus uas muaj lub ntiaj teb cov cuab yeej cuab tam, thiab nws pom nws tus kwv nyob hauv txoj kev tshaib kev nqhis, tab sis nws kaw nti nws lub siab lub ntsws rau nws tus kwv, mas txoj kev nyiam Tswv Ntuj yuav ua li cas nyob tau hauv nws ?
18 Cov me nyuam, peb txhob muab peb lo lus thiab tus nplaig los nyiam xwb. Peb ua kiag tej yam hauj lwm los nyiam kom tseeb mog ! 19 Peb ua li ntawd, mas peb thiaj paub tias peb nyob hauv txoj kev tseeb. Peb lub siab yuav tiaj tus nyob ntawm Tswv Ntuj xub ntiag. 20 Yog peb lub siab rov muab txim rau peb, mas Tswv Ntuj loj tshaj peb lub siab, thiab nws paub tas puas tsav yam.
21 Cov zoo nyiam, yog peb lub siab tsis muab txim rau peb, mas peb tso siab lug nyob ze ntawm Tswv Ntuj. 22 Yog peb thov yam twg ntawm Tswv Ntuj, mas peb yuav tau txais yam ntawd ntawm nws, vim peb coj nws cov lus qhia, thiab peb ua qhov xis nws siab.
23 Tswv Ntuj Lo Lus qhia yog lo lus no : kom peb ntseeg txog nws Leej Tub Yes Xus Pleev lub npe, thiab peb yuav rov sib nyiam, raws li nws qhia kom peb ua.
24 Tus coj Tswv Ntuj cov lus qhia, nws nyob hauv Tswv Ntuj, thiab Tswv Ntuj nyob hauv nws.
Peb paub tias Tswv Ntuj nyob hauv peb, vim qhov no : vim Leej Ntuj Plig uas Tswv Ntuj pub rau peb.

1 Cov zoo nyiad, nej txhob ntseeg txhua leej txhua tus zaj tswv yim mog. Nej yuav sim tib neeg tej zaj tswv yim ntawd saib puas yog tuaj ntawm Tswv Ntuj tuaj. Vim ntau tus yaj saub cuav tau ri mus nyob puv lub qab ntuj lawm. 2 Nej yuav paub Tswv Ntuj lub tswv yim raws li no : lub tswv yim twg zeem tseeb tias Yes Xus Pleev nqes los ua ib lub cev neeg, mas lub tswv yim ntawd tuaj ntawm Tswv Ntuj tuaj.
3 Lub tswv yim twg tsis zeem tseeb txog Yes Xus, mas nws tsis tuaj ntawm Tswv Ntuj tuaj, yog tus tiv Leej Pleev lub tswv yim. Nej tau hnov tias tus tiv Leej Pleev tuaj lawm. Nyem no, nws twb nyob hauv lub qab ntuj neeg lawm.
4 Cov me nyuam, nej tuaj ntawm Tswv Ntuj tuaj, nej twb yeej cov tiv Leej Pleev lawm. Vim Tus nyob hauv nej, nws loj dua tus nyob hauv lub qab ntuj neeg.
5 Lawv, mas lawv tuaj hauv lub qab ntuj neeg tuaj. Lawv hais lus raws li lub qab ntuj neeg, ces lub qab ntuj neeg mloog lawv.
6 Ntawm peb, mas peb tuaj ntawm Tswv Ntuj tuaj. Leej twg paub Tswv Ntuj, mas nws mloog peb. Tus tsis tuaj ntawm Tswv Ntuj tuaj, mas nws tsis mloog peb.
Li ntawd, peb thiaj paub lub tswv yim twg mus raws txoj kev tseeb, thiab lub tswv yim twg nyob hauv qhov yuam kev.
7 Cov zoo nyiam, peb yuav rov sib nyiam sib hlub mog ! Vim txoj kev nyiam tuaj ntawm Tswv Ntuj tuaj, ua li mas tus twg nyiam, tus ntawd yug ntawm Tswv Ntuj los, thiab nws paub Tswb Ntuj. 8 Tus tsis txawj nyiam, mas nws tsis paub Tswv Ntuj, vim Tswv Ntuj yog txoj kev nyiam.
9 Tswv Ntuj txoj kev nyiam peb tawm los rau qhov muag pom xyeem li no : Tswv Ntuj xa nws Leej Tub Twm Zeej tuaj nyob ntiaj teb no, kom peb ciaj nyob hauv nws Leej Tub.
10 Nws txoj kev nyiam yog zoo li no : tsis yog peb tau nyiam Tswv Ntuj, yog Tswv Ntuj tau nyiam peb, thiab yog nws xa nws Leej Tub tuaj ua nqi txhiv peb ntawm peb cov txhaum.
11 Cov zoo nyiam, yog Tswv Ntuj nyiam peb npaum li ntawd, mas peb kuj yuav rov sib nyiam sib hlub thiab. 12 Tsis muaj leej twg tau ntsia ntsoov Tswv Ntuj ib zaug li. Yog peb sib nyiam sib hlub, mas Tswv Ntuj nyob hauv peb, thiab nws txoj kev nyiam uas zoo txhij zoo txhua hlob tiav nyob hauv peb.
13 Peb paub tias peb nyob hauv Tswv Ntuj, thiab nws nyob hauv peb yog vim qhov no : yog qhov nws pub nws Leej Ntuj Plig rau peb. 14 Ntawm peb, mas peb tau ntsia ntsoov, ces peb ua tim khawv zeem tias Leej Txiv tau xa Leej Tub tuaj cawm lub qab ntuj neeg.
15 Tus lees tias Yes Xus yog Tswv Ntuj Leej Tub, mas Tswv Ntuj nyob txawm hauv nws, thiab nws nyob hauv Tswv Ntuj. 16 Peb paub Tswv Ntuj txoj kev nyiam peb lawm, ces peb ntseeg. Tswv Ntuj yog txoj kev nyiam : tus twg nyob hauv txoj kev nyiam, mas nws kuj nyob hauv Tswv Ntuj, thiab Tswv Ntuj nyob hauv nws.
17 Thaum txoj kev nyiam hlob tiav hauv peb, mas yuav zoo li no : thaum txog hnub txiav txim, mas peb yuav tso siab lug, vim tias Yes Xus zoo li cas, mas peb kuj yuav zoo li nws nyob ntiaj teb no thiab. Txoj kev nyiam tsis muaj qhov ntshai. 18 Txoj kev nyiam uas hlob tiav lawm tshem qhov ntshai, vim thaum muaj qhov ntshai, mas kuj muaj kev raug txim thiab : li ntawd, tus twg ntshai, mas nws txoj kev nyiam tsis tau hlob tiav. 19 Peb, mas peb kav tsij nyiam mog ! Vim Leej Txiv xub tau nyiam peb ua ntej.
20 Yog muaj ib tug hais tias “Kuv nyiam Tswv Ntuj,” tab sis nws ntxub nws tus kwv, mas nws yog ib tug neeg dag. Tus tsis nyiam nws tus kwv uas qhov muag pom tau, mas nws nyiam tsis tau Tswv Ntuj uas nws qhov muag tsis pom. 21 Lo lus qhia uas peb tau txais ntawm Leej Txiv los yog lo lus no : tus nyiam Tswv Ntuj, mas nws yuav tsum nyiam nws tus kwv.

1 Leej twg ntseeg tias Yes Xus yog Leej Pleev, mas tus ntawd yug ntawm Tswv Ntuj los. Leej twg nyiam tus xeeb Leej Tub, mas nws kuj nyiam tus yug ntawm Tswv Ntuj los thiab.
2 Peb paub tias peb nyiam Tswv Ntuj cov me nyuam, vim peb nyiam Tswv Ntuj, thiab peb coj nws cov lus qhia. 3 Txoj kev nyiam Tswv Ntuj yog coj nws cov lus qhia, vim Tswv Ntuj cov lus qhia tsis hnyav. 4 Vim yam twg yug ntawm Tswv Ntuj los, mas yam ntawd yeej lub qab ntuj neeg. Lub zog yeej lub qab ntuj neeg yog peb txoj kev ntseeg.
5 Tus yeej lub qab ntuj neeg yog tus ntseeg tias Yes Xus yog Tswv Ntuj Leej Tub.
6 Tus tuaj nyob hauv dej thiab nyob hauv ntshav, yog Yes Xus. Nws tsis tuaj nyob hauv dej xwb, nws tuaj nyob hauv dej thiab nyob hauv ntshav, yog Leej Ntuj Plig ua tim khawv zeem li ntawd, vim Leej Ntuj Plig yog qhov tseeb. 7 Vim muaj peb tug no ua tim khawv zeem : 8 muaj Leej Ntuj Plig, dej thiab ntshav. Peb tug no puav leej hais tib los lus zeem tseeb.
9 Peb twb txais neeg cov lus zeem tseeb. Hos Tswv Ntuj lo lus zeem tseeb loj dua neeg lo lus zeem tseeb. Tswv Ntuj lo lus zeem tseeb uas Tswv Ntuj hais txog nws Leej Tub yog zoo li no : 10 tus twg ntseeg xog Tswv Ntuj Leej Tub, mas nws tau lo lus zeem tseeb ntawd los nyob hauv nws lub siab lawm. Hos tus tsis ntseeg Tswv Ntuj, mas nws saib tias Tswv Ntuj dag, vim nws tsis ntseeg lo lus zeem tseeb uas Tswv Ntuj hais txog nws Leej Tub.
11 Tswv Ntuj ua tim khawv zeem tseeb li no : Tswv Ntuj pub txoj sia nyob mus li rau peb, yog txoj sia nyob hauv nws Leej Tub. 12 Tus twg tau Leej Tub, ces nws tau txoj sia lawm. Tus twg tsis tau Tswv Ntuj Leej Tub, mas nws kuj tsis tau txoj sia.
13 Kuv sau tej ntawd tuaj rau nej, kom nej paub tias nej tau txoj sia nyob mus li, vim nej ntseeg txog Tswv Ntuj Leej Tub lub npe.
14 Peb muaj kev tso siab lug nyob hauv Tswv Ntuj : yog peb thov ib yam raws li Tswv Ntuj lub siab xav, mas nws mloog peb. 15 Yog peb paub tias nws mloog peb thov txhua tsav txhua yam, mas peb kuj paub tias peb tau txhua yam los ua peb tug.
16 Yog nej leej twg pom nws tus kwv ua ib qho txhaum tsis coj neeg mus txog qhov tuag, mas nws yuav thov Ntuj rau nws tus kwv, ces Tswv Ntuj yuav pub txoj sia rau nws tus kwv, rau cov uas tsis tau ua cov txhaum coj lawv mus txog qhov tuag.
Vim muaj ib hom kev txhaum coj neeg mus rau qhov tuag : Kuv tsis hais kom thov Ntuj rau tus neeg ua qhov txhaum ntawd. 17 Yus ua tsis ncaj thaum twg, mas yus ua txhaum thaum ntawd. Tab sis muaj ib hom txhaum mus tsis txog qhov tuag.
18 Peb paub tias tus yug ntawm Tswv Ntuj los, mas nws tsis ua txhaum. Yes Xus yog tus xeeb ntawm Tswv Ntuj los, ces nws thiaj pov hwm tus yug ntawm Tswv Ntuj los. Tus Phem kov tsis tau tus yug ntawm Tswv Ntuj los.
19 Peb paub tias peb tuaj ntawm Tswv Ntuj tuaj, hos tas lub qab ntuj neeg pw hauv tus Phem lub hwj huam.
20 Tab sis peb kuj paub tias Tswv Ntuj Leej Tub tuaj txog lawm, nws pub lub tswv yim ntse rau peb, kom peb tsom tau tus Tseem Huab Tais. Peb nyob hauv tus Tseem Huab Tais, hauv nws Leej Tub Yes Xus Pleev. Yes Xus yog tus Tseem Tswv Ntuj, nws yog txoj sia nyob mus li.
21 Cov me nyuad, nej ceev faj rau cov tswv ntuj cuav mog !