PAJ LUG TSAB NTAWV XA MUS RAU COV NTSEEG NYOB LOS MAS

1 Kuv yog Paj Lug, Yes Xus Pleev tus tub txib. Ntuj hu kuv los ua Hauv Paus Xa Lus, Ntuj qee kuv los tshaj Tswv Ntuj lub Moo Zoo. 2 Tau ntev los lawm Tswv Ntuj tau cog lus tias nws yuav xa nws lub Moo Zoo, 3 nws tso cov Yaj Saub thiab cov Ntawv Ntshiab tuaj hais txog nws Leej Tub, uas yug hauv Das Vis caj ces los. 4 Leej Ntuj Plig Ntshiab tsa peb tus Huab Tais Yes Xus Pleev uas tuag lawd kom sawv rov los ua Tswv Ntuj Leej Tub muaj hwj huam. 5 Peb txais txiaj ntsim ntawm Yes Xus los, nws tsa peb ua Hauv Paus Xa Lus kom peb mus tshaj txoj kev mloog lus, thiab txoj kev ntseeg rau pej kum neeg paub. 6 Nej kuj yog pab neeg ntawd : Yes Xus Pleev hu nej los ua nws tug.
7 Kuv, Paj Lug, sau ntawv tuaj rau nej, uas nej yog cov neeg Tswv Ntuj nyiam nyob Los Mas, nws hu nej los ua neeg ntshiab : thov kom peb Txiv Tswv Ntuj, thiab Huab Tais Yes Xus Pleev pub txiaj ntsim thiab kev thaj yeeb rau nej.
8 Kuv xub ua kuv tus Tswv Ntuj tsaug txog nej sawv daws nyob hauv Yes Xus Pleev, vim luag tej ob cag cav txog nej txoj kev ntseeg mus thoob ntiaj teb. 9 Tswv Ntuj, uas kuv lub tswv yim teev nws vim kuv tshaj nws Leej Tub lub Moo Zoo, nws ua tim khawv tau tias kuv tuav txog nej lub npe tsis tseg, 10 thiab kuv thov nws tas zog tias : yog nws pom zoo, mas kom nws pub ib lub sij hawm rau kuv tuaj xyuas nej. 11 Vim kuv xav pom nej kawg, kuv xav pub ib lub txiaj ntsim rau nej lub tswv yim, kom nej nyob ruaj nreb. 12 Kuv xav nrog nej nyob, kom nej nres kuv lub siab, vim kuv nrog nej coj tib txoj kev ntseeg.
13 Kwv tij sawv daws, kuv xav kom nej paub tias kuv twb xav tuaj tim nej ntau zaus lawm, tab sis txog tav no, kuv tsis tau kev tuaj. Kuv xav de cov txiv uas txi hauv nej, ib yam li kuv tau de ntawm lwm cov neeg teev pej kum dab. 14 Kuv yuav pab cov Hes Las ib yam li cov haiv neeg qus, pab cov neeg paub txuj ib yam li cov neeg tsis paub dab tsi. 15 Yog vim li ntawd kuv thiaj maj xa lub Moo Zoo tuaj rau nej cov uas nyob Los Mas.
16 Kuv tsis txaj muag txog lub Moo Zoo : lub Moo zoo yog Tswv Ntuj lub zog cawm tas tsoom neeg ntseeg : yam li xub cawm cov Yus Das, thiab cov Hes Las. 17 Vim nyob hauv lub Moo Zoo Tswv Ntuj txoj kev ncaj tawm tuaj rau yus pom raws li yus ntseeg. Ntawv sau tseg tias : ‘Tus neeg siab ncaj txoj sia tawm hauv txoj kev ntseeg los.’
18 Tswv Ntuj lub siab npau tawm saum ntuj los raug tas tsoom neeg tsis ncaj, vim lawv muab txoj kev tseeb kaw rau hauv txoj kev tsis ncaj. 19 Vim tias yam uas txawj qhia txog Tswv Ntuj rau neeg , mas Tswv Ntuj tau tso tawm los rau lawv pom xyeem. 20 Txhua yam uas neeg pom tsis tau, txij thaum ntuj tsim teb raug los, tab sis neeg lub tswv yim tsom tau nyob hauv Tswv Ntuj cov hauj lwm ; neeg tsom tau Tswv Ntuj lub hwj huam nyob mus li, tsom tau tias nws yog Tswv Ntuj. Vim li ntawd, cov neeg tsis ncaj hais tsis tau tias lawv tsis muaj txhaum. 21 Lawv paub Tswv Ntuj, tab sis lawv tsis tshaj Tswv Ntuj lub koob meej, lawv tsis ua Tswv Ntuj tsaug xws li tsim nyog yuav ua. Lawv tuav xam ntau xws li cov neeg uas lub tswv yim puas ; ces lub siab nyob tsaus ntuj nti.
22 Lawv khav tias lawv paub kev thoob tsib, tab sis lawv vwm tas lawm. 23 Lawv muab ib co duab los txauv tus Tswv Ntuj tsis txawj tuag lub hwj chim : yog tej duab neeg txawj tuag, duab noog, duab tsiaj txhu muaj plaub txhais tes taw, duab nab.
24 Vim li ntawd Tswv Ntuj thiaj tso lawv pov tseg rau lawv lub siab ntshaw ua phem : lawv ua neeg lwj, lawv rov ua tsis tsim txiaj rau lawv lub cev. 25 Lawv cia txoj kev dag los pauv Tswv Ntuj txoj kev tseeb. Lawv mus teev tej yam uas Tswv Ntuj tsim. Lawv nyiam ua li ntawd dua teev thiab tsob hwb tus tsim tas txhua yam, uas nws nto koob meej mus ib txhiab ib txhis, ua li. 26 Vim li ntawd Tswv Ntuj thiaj tso lawv zwm rau lawv lub siab tsis tsim txiaj. Lawv cov poj niam tsis ua xws li poj niam tus yeeb yam: lawv ua ke rov ua dev. 27 Cov txiv neej kuj ua ib yam thiab : lawv tsis nrog poj niam nyob, cov txiv neej rov nrog txiv neej ua dev ua npua ; lawv taug tej txoj kev phem li ntawd, lawv lub cev thiaj raug tej tus mob phem uas los ntawm kev txhaum los. 28 Vim lawv tsis ceev kev paub Tswv Ntuj tseg, mas Tswv Ntuj thiaj cia lawv zwm rau lawv lub tswv yim tsis txawj xav, lawv thiaj ua tej yam tsis zoo. 29 Kev tsis ncaj, kev nkhaus, kev ntshaw, thiab kev lim hiam, nyob puv lawv lub siab. Lawv thiaj muaj khib, tua neeg, sib ceg, muaj ob lub siab, thiab dag. 30 Lawv xyav luag lub moo, mus kom luag rau nom, ua yeeb ncuab rau Tswv Ntuj, tsawm luag tej, muab hlob, khav theeb, nrhiav ua phem, ntxeev siab rau niam thiab txiv. 31 Lawv tsis txawj xav, lawv ua tsis ncaj, tsis txawj nyiam tsis txawj hlub luag. 32 Lawv twb paub tias Tswv Ntuj txiav txim rau cov neeg ua phem li ntawd, tsim nyog lawv yuav raug txim ; tsis kav lawv tseem ua phem, thiab qhuas cov neeg ua phem.

1 Koj txiav txim rau luag tej. Koj yog leej twg, koj thiaj hais tias koj tsis muaj txhaum ? Vim tias, thaum koj txiav txim rau luag, mas koj rov txiav txim rau koj. Vim koj txiav txim, tab sis koj twb coj tus yam ntxwv xws li lawv. 2 Peb paub tias thaum Tswv Ntuj muab txim rau sawv daws mas nws ua ncaj ncees raws li tus cwj pwm uas yus coj. 3 Koj txiav txim rau cov neeg ua txhaum, tab sis koj twb ua cov txhaum ntawd thiab ; ua cas koj thiaj vam tias koj yuav dim ntawm Tswv Ntuj lub txim ? 4 Koj puas thuam Tswv Ntuj lub siab zoo tas nrho ? Los thuam nws lub siab ntev txawj zam mus li ? Koj puas yuav ua tus tsis lees pom tias Tswv Ntuj siab zoo ? Nws tshoj koj kom koj tig los yuav lub siab tshiab.
5 Koj cia koj lub siab txhav qhi, tsis tuaj yeem thov txhaum li. Koj niaj hnub tib tej pawg txhaum ua Tswv Ntuj chaw thoj chim mus txog hnub Tswv Ntuj npau taws. Thaum ntawd Tswv Ntuj txoj kev txiav txim ncaj yuav tawm plaws los : 6 nws yuav pauj rau nyias raws li nyias cov hauj lwm. 7 Cov uas muab siab rau mus taug txoj kev zoo, lawv nrhiav lub hwj chim thiab lub koob meej thiab txoj kev tsis tuag, mas Tswv Ntuj yuav muab txoj sia nyob mus li los pauj rau lawv. 8 Lwm cov, uas lawv tau ntxeev siab, thiab twm xeeb tsis txais txoj kev tseeb, mas lawv mloog txoj kev nkhaus sai, Tswv Ntuj yuav muab txoj kev npau taws thiab txoj kev meem txom los pauj rau lawv. 9 Tus twg mus taug txoj kev phem, mas nws kawg yuav raug txom nyem, thiab txhawj xeeb. Cov Yus Das yuav xub raug, cov Hes Las kuj yuav raug thiab. 10 Tus twg ua txoj kev zoo, mas nws yuav txais lub hwj chim, lub koob meej, thiab txoj kev thaj yeeb : cov Yus Das yuav xub txais, cov Hes Las kuj yuav txais thiab. 11 Vim Tswv Ntuj tsis tsa tus twg cai.
12 Leej twg ua txhaum, nws tsis muaj Txoj Cai, mas thaum nws yuav tuag nws kuj yuav tsis muaj Txoj Cai txiav txim rau nws. Tus twg ua txhaum, thiab nws zwm rau Txoj Cai, mas Txoj Cai yuav txiav txim rau nws. 13 Tsis yog cov neeg uas lawv pob ntseg hnov Txoj Cai, ces lawv cia li yog neeg siab ncaj nyob ntawm Tswv Ntuj xub ntiag : yog cov neeg coj Txoj Cai, thiaj yuav ncaj tuaj. 14 Vim tias cov neeg teev pej kum dab tsis muaj Txoj Cai, tsis kav lawv yeej ua raws li Txoj Cai qhia ; mas cov neeg ntawd txawm tias lawv tsis muaj Txoj Cai, tab sis lawv yeej txawj txiav Txoj Cai rau lawv. 15 Lawv ua kom sawv daws paub tseeb tias neeg yeej muaj Txoj Cai sau tseg nyob hauv neeg nruab siab : lawv twb muaj lawv lub siab ua tim khawv txog txoj kev zoo ; thiab nyob hauv lawv nruab siab lawv txawj rov sib txiav txim, thiab txawj qhuas txog qhov zoo. 16 Hnub uas Tswv Ntuj yuav txiav txim rau cov hauj lwm zais ntshis hauv neeg nruab siab raws kuv lub Moo Zoo nyob hauv Yes Xus Pleev, mas lawv yuav ntshiab tuaj.
17 Tab sis koj, uas koj khav tias koj muaj lub npe hu ua Yus Das, koj tso siab rau txoj cai, koj cav tias koj muaj Tswv Ntuj. 18 Koj yeej paub Tswv Ntuj lub siab ; muaj Txoj Cai qhia koj tias yam twg zoo dua. 19 Koj khav tias koj yog tus coj cov neeg dig muag kev, koj yog qhov pom kev txeem tau mus hauv qhov tsaus ntuj. 20 Koj yog tus kws qhia cov nom ; koj yog tus xib hwb qhia cov neeg siab muag. Vim koj muaj Txoj Cai, mas koj muaj kev txawj ntse, thiab kev tseeb ua koj tug ! 21 Tab sis koj, uas yog tus qhuab qhia luag, mas koj tsis rov qhuab qhia koj ! Koj tshaj tias yuav tsis txhob ua tub sab, tab sis koj twb ua tub sab ! 22 Koj txwv tsis kheev zes luag txij luag nkawm, tab sis koj zes luag txij luag nkawm ! 23 Koj khav, vim koj muaj Txoj Cai ; tsis kav koj hla Txoj Cai, ces koj thuam Tswv Ntuj. 24 Ntawv sau hais tias : ‘Lwm cov haiv neeg tsawm Tswv Ntuj lub npe, vim nej.’
25 Yog koj coj Txoj Cai tiag, mas lub cim txiav yog ib yam muaj nqe rau koj. Tab sis yog koj hla Txoj Cai, mas tab yog koj tau txais lub cim txiav lawm, los koj tseem yog zoo li ib tug neeg tsis tau txais lub cim txiav. 26 Hos yog ib tug tsis tau txais lub cim txiav, tab sis nws coj raws li Txoj Cai qhia, mas nws txoj kev tsis ua lub cim txiav kuj muaj nqe cuag li txoj kev txais lub cim txiav thiab ? 27 Tus uas nws tsis muaj lub cim txiav nyob hauv nws lub cev, tab sis nws coj Txoj Cai, mas nws yuav txiav txim rau koj, uas koj yog tus muaj Ntawv thiab muaj lub cim txiav, tab sis koj hla Txoj Cai. 28 Tus Yus Das tsis yog ua Yus Das nyob sab nraud xwb ; lub cim txiav tsis yog ib lub cim nyob ntawm lub cev sab nraud xwb. 29 Tus tseem Yus Das, nws ua Yus Das nyob sab hauv ; lub cim txiav yog nyob hauv nruab siab, raws li lub tswv yim, tsis raws li ib co ntawv xwb. Tus tseem Yus Das zoo li ntawd, tab yog tsis muaj neeg qhuas txog nws, mas Tswv Ntuj qhuas txog nws.

1 Cov Yus Das txoj kev zoo txhij zoo txhua nyob qhov twg ? Lub cim txiav muaj qab hau dab tsi ? 2 Lub cim txiav muaj qab hau ntau yam kawg ! Yam li Tswv Ntuj pub nws cov lus qhuab qhia rau cov Yus Das. 3 Ib txhia ua tsis ncaj ; lawv txoj kev ua tsis ncaj puas yuav rhuav tau Tswv Ntuj txoj kev ncaj ? 4 Rhuav tsis tau, vim Tswv Ntuj yog tus tseeb, hos neeg yog tus dag. Ntawv hais tias : ‘Tswv Ntuj, koj hais yam twg mas sawv daws pom tias koj hais ncaj. Tab yog leej twg txiav txim rau koj, los koj yog tus yeej xwb.’
5 Tab sis, yog peb lub siab tsis ncaj ua kom sawv daws pom tias Tswv Ntuj yog tus ncaj, mas peb puas hais tau tias thaum Tswv Ntuj npau taws rau peb nws ua tsis ncaj ? Thaum kuv hais zoo li ntawd, mas kuv hais zoo li ib tug neeg. 6 Peb tsis hais tias Tswv Ntuj ua tsis ncaj. Yog Tswv Ntuj ua tsis ncaj, mas nws yuav ua cas txiav txim rau lub ntiaj teb tau ? 7 Yog tias yus txoj kev dag ua kom Tswv Ntuj txoj kev tseeb nto moo loj dua, yog li ntawd, ua cas Ntuj thiaj yuav txiav tias yus yog ib tug neeg txhaum ? 8 Los yuav hais zoo li tej tus uas lawv liam tias peb xav li no : yam li peb yuav txhob txwm ua txoj kev phem, kom muaj ib yam zoo tawm ntawm peb txoj kev phem tuaj ? Cov hais zoo li ntawd mas lawv tsim nyog raug txim.
9 Li ntawd, peb puas yeej luag tej ? Peb tsis yeej li ! 10 Vim peb tau piav tseeb kawg tias tsis hais cov Yus Das los cov Hes Las, tas sawv daws zwm rau kev txhaum. Raws li lo lus sau tseg tias : 11 ‘Tsis muaj ib tug siab ncaj li. Tsis muaj ib tug txawj xav tswv yim. Tsis muaj ib tug nrhiav Tswv Ntuj. 12 Sawv daws yuam kev, sawv daws sib pus mus ua phem. Tsis muaj ib tug ua txoj zoo ! 13 Lawv lub qhov ncauj yog zoo li ib lub qhov ntxa qhib lug. Lawv tus nplaig hais lus nkhaus. Lawv di ncauj muaj taug. 14 Cov lus tsawm lus foom nyob puv lawv qhov ncauj. 15 Lawv ko taw mus nrawm nroos rau hauv txoj kev tua neeg . 16 Nyob hauv lawv txoj xub ke, tsuas pom muaj kev puas tsuaj, thiab kev txom nyem. 17 Lawv tsis paub kev thaj yeeb. 18 Lawv qhov muag tsis pom txoj kev hwm Tswv Ntuj.’
19 Peb paub tias Txoj Cai hais yam twg, mas yog Txoj Cai hais rau cov neeg zwm rau Txoj Cai ; ces tsis muaj ib lub ncauj cav tau ib lo lus, li ntawd sawv daws tau pom tseeb tias tas lub qab ntuj neeg muaj txhaum nyob ntawm Tswv Ntuj xub ntiag. 20 Tsis muaj ib tug neeg ncaj tuaj nyob ntawm Tswv Ntuj xub ntiag vim nws coj Txoj Cai. Txoj Cai tsuas pab kom paub tias qhov twg yog qhov txhaum.
21 Nyem no, Tswv Ntuj txoj kev ncaj tsis tas vam txog Txoj Cai ; Tswv Ntuj txoj kev ncaj tawm tuaj rau neeg pom xyeem. Tswv Ntuj txoj kev ncaj yog qhov uas Txoj Cai thiab cov Yaj Saub tau zeem tseeb txog. 22 Kev ntseeg txog Yes Xus Pleev pub Tswv Ntuj txoj kev ncaj rau tas txhua leej uas ntseeg. 23 Vim tsis muaj ib co neeg txawv lwm cov : sawv daws ua txhaum tas huv tib si, yeej tsis muaj ib tug tau Tswv Ntuj lub hwj chim li. 24 Yog lub txiaj ntsim ua kom sawv daws ncaj tuaj, vim Yes Xus Pleev tau txhiv sawv daws. 25 Tswv Ntuj tso Yes Xus tuaj muab nws cov ntshav los them cov neeg ntseeg lub txim. Tswv Ntuj muab nws txoj kev ncaj rau peb pom li no : Tswv Ntuj ua siab ntev, nws tsis nco txog cov txhaum neeg ua . 26 Lub zim txwv no, Tswv Ntuj muab nws txoj kev ncaj rau peb pom : nws ib txhij yog tus ncaj, thiab tus pub kev ncaj rau cov neeg ntseeg txog Yes Xus.
27 Peb puas muaj cai khav ? Peb tsis muaj. Peb yuav khav vim ib Txog Cai zoo li cas ? Peb puas yuav khav tias peb Txoj Cai qhia cov hauj lwm zoo ? Tsis yog ! Peb yuav khav tias peb Txoj Cai yog kev ntseeg. 28 Peb pom tias neeg ncaj tuaj tau vim txoj kev ntseeg, tsis yog vim nws coj Txoj Cai. 29 Los Tswv Ntuj puas yog cov Yus Das tus Tswv Ntuj xwb, nws tsis yog cov neeg teev pej kum dab tus Tswv Ntuj ? Nws yog cov neeg teev pej kum dab tus Tswv ntuj thiab. Vim muaj ib tug Tswv Ntuj xwb. 30 Tswv Ntuj ua kom cov neeg txais lub cim txiav ncaj tuaj vim kev ntseeg ; nws ua kom cov neeg tsis tau txais lub cim txiav ncaj tuaj vim kev ntseeg thiab. 31 Peb puas muab kev ntseeg los ua kom Txoj Cai tsis muaj nqi tuaj ? Peb tsis ua li ntawd ! Peb tsuas ua kom Txoj Cai muaj zog tuaj.

1 Peb yuav hais zoo li cas txog Has Nplas Has, peb tus yawg koob uas yug peb ? 2 Yog Has Nplas Has ncaj tuaj vim nws cov hauj lwm mas nws muaj chaw khav. Tab sis Tswv Ntuj tsis pom zoo li ntawd. 3 Ntawv hais dab tsi ? Ntawv hais tias : ‘Has Nplas Has ntseeg txog Tswv Ntuj, ces Tswv Ntuj saib Has Nplas Has yog neeg ncaj.’
4 Thaum ib tug neeg ua ib txog hauj lwm, mas yus tsis saib nws tus nqe zog yog ib qho paj tshab pub dawb : tus nqe zog yog ib qho uas nws khwv los ua nws tug. 5 Tab sis thaum ib tug tsis tau ua hauj lwm, nws ntseeg txog tus ua kom tus neeg phem ua neeg siab ncaj, mas yus yuav saib tias nws txoj kev ntseeg yog nws txoj kev ncaj. 6 Das Vis kuj tau hais zoo li ntawd : nws hais tias tus muaj txoj hmoov zoo yog tus uas Tswv Ntuj tsis saib nws cov hauj lwm, Tswv Ntuj cia li pub kev ncaj rau nws : 7 ‘Cov tau txoj hmoov zoo yog cov uas Ntuj zam txhaum rau lawv, thiab Ntuj vov lawv cov txhaum. 8 Tus tau txoj hmoov zoo yog tus uas Tswv Ntuj tsis saib nws cov txhaum.’
9 Lo lus tshaj txog cov tau txoj hmoov zoo no puas yog ib lo lus hais txog cov txais lub cim txiav xwb, los hais txog cov tsis txais thiab ? Vim peb hais tias Has Nplas Has ntseeg ces Tswv Ntuj saib Has Nplas Has yog tus ncaj. 10 Thaum twg Tswv Ntuj thiaj saib Has Nplas Has ncaj ? Puas yog thaum nws txais lub cim txiav, los yog thaum nws tseem tsis tau txais ? Tsis yog thaum nws txais tas. Yog thaum nws tseem tsis tau txais. 11 Nws txais lub cim txiav tom qab : lub cim txiav yog zoo li lub thwj hais txog kev ncaj uas nws twb tau txais ntawm kev ntseeg tuaj, thaum nws tseem tsis tau txais lub cim txiav. Li ntawd nws ua txiv rau tas tsoom neeg ntseeg uas lawv tsis muaj lub cim txiav, kom Ntuj saib lawv yog neeg ncaj. 12 Thiab nws ua txiv rau cov neeg txais lub cim txiav, vim lawv tsis yog txais lub cim xwb, lawv kuj mus taug txoj kev ntseeg, uas peb Txiv Has Nplas Has taug, thaum nws tsis tau txias lub cim txiav.
13 Tswv Ntuj cog lus tias nws yuav muab lub sim ceeb los pub ua ib lub cuab tam rau Has Nplas Has thiab Has Nplas Has Has tsoom xeeb ntxwv : Tswv Ntuj niaj hnub ua raws li lo lus nws cog, tsis yog vim Txoj Cai, yog vim kev ncaj tuaj ntawm kev ntseeg tuaj. 14 Yog tias lub cuab tam tsuas yog cov neeg zwm rau Txoj Cai tug xwb, mas kev ntseeg tsis zoo dab tsi, Tswv Ntuj lo lus cog tsis muaj nqi. 15 Txoj Cai ua kom muaj kev npau taws. Thaum tsis muaj Txoj Cai kuj tsis muaj kev hla Txoj Cai thiab. 16 Yog vim lub cuab tam tuaj ntawm kev ntseeg tuaj, mas lub cuab tam thiaj yog ib lub txiaj ntsim pub dawb. Thiab lo lus uas Tswv Ntuj cog, mas nws pub rau tas tsoom xeeb ntxwv : yog cov xeeb ntxwv nyob hauv Txoj Cai, thiab cov xeeb ntxwv nyob hauv peb txiv Has Nplas Has txoj kev ntseeg. 17 Muaj raws li lo lus sau tseg tias : ‘Kuv tsa koj ua txiv rau tej haiv neeg coob kawg.’ Has Nplas Has yog peb txiv nyob ntawm Tswv Ntuj xub ntiag : Tus Tswv Ntuj uas Has Nplas Has ntseeg txog yog tus Tswv Ntuj pub txoj sia rau cov neeg tuag, thiab nws hu tej yam tseem tsis tau xeeb, kom xeeb los muaj txoj sia.
18 Tab yog Has Nplas Has tsis pom muaj chaw tso siab, tsis kav nws tseem tso siab, nws ntseeg, ces nws tau ua ntau haiv neeg txiv, raws nraim li Tswv Ntuj lo lus hais tias : ‘koj tsoom xeeb ntxwv yuav coob npaum no.’ 19 Thaum ntawd Has Nplas Has muaj ib puas xyoo lawm nws pom nws lub cev twb tuag lawm, thiab Xas Las lub xub ntiag kuj tuag lawm. Tsis kav nws ntseeg, nws tsis ua xyem xyav. 20 Thaum nws hnov Tswv Ntuj cog lus, kev tsis ntseeg tsis tuaj nphav nws, nws tsis ua xyem xyav ; nws txoj kev ntseeg ua kom nws muaj hwj huam puv nws lub cev, ces nws ua Tswv Ntuj tsaug. 21 Nws ntseeg khov ntseeg ruaj tias thaum Tswv Ntuj cog lus ib zaug, mas Tswv Ntuj muaj hwj huam txaus ua raws li lo lus nws cog. 22 Yog vim qhov ntawd Tswv Ntuj thiaj saib Has Nplas Has yog tus ncaj. 23 Ntawv hais tias Has Nplas Has kev ntseeg ua kom Tswv Ntuj saib Has Nplas Has yog tus ncaj, tab sis tsis yog hais txog Has Nplas Has tib leeg xwb. 24 Lo lus ntawd kuj hais txog peb sawv daws huv tib si : kev ntseeg ua kom Tswv Ntuj saib peb yog neeg ncaj ; vim peb ntseeg txog tus tau tsa peb tus Huab Tais Yes Xus sawv hauv cov tub tuag rov los, tsa tus uas raug luag muab muag vim peb cov txhaum, thiab nws sawv rov los kom peb ncaj tuaj.

1 Yog vim peb txais kev ncaj ntawm kev ntseeg tuaj, mas peb thiaj nrog Tswv Ntuj nyob kaj siab lug nyob hauv peb tus Huab Tais Yes Xus Pleev. 2 Yes Xus Pleev pub kev ntseeg, ces peb tau txais txiaj ntsim ; peb tau los nyob hauv lub txiaj ntsim ; peb cav lus zoo thiab peb tso siab tias peb yuav txais Tswv Ntuj lub hwj chim. 3 Tab yog peb raug kev txom nyem, peb tseem cav lus zoo thiab, vim peb paub tseeb tias txoj kev txom nyem rub lub siab kom ntev, 4 lub siab ntev tsim tus yam ntxwv zoo xwm yeem, tus yam ntxwv zoo xwm yeem tsim kev tso siab. 5 Kev tso siab ua kom peb tsis muaj chaw khuv xim, vim Leej Ntuj Plig Ntshiab, uas Ntuj pub rau peb, nws hliv Tswv ntuj txoj kev nyiam rau hauv peb lub siab.
6 Vim li ntawd, lub sij hawm peb tsis muaj zog, thaum txog lub hnub nyoog teem, Leej Pleev thiaj raug luag tua kom tau pab cov neeg tsis hwm Ntuj. 7 Yus yuav luag tsis kam tuag kom tau pab ib tug neeg ncaj ; nyaj tej zaus yus yuav muaj peev xwm tuag kom tau pab ib tug neeg siab zoo. 8 Yam uas zeem tseeb tias Tswv Ntuj nyiam peb yog qhov tias thaum peb tseem yog neeg txhaum, Leej Pleev tuag kom tau pab peb.
9 Nyem no peb twb ncaj tuaj nyob hauv Leej Pleev cov roj ntsha lawm, mas nws haj yam yuav cawm peb ntawm kev npau taws. 10 Thaum peb tseem ua yeeb ncuab rau Tswv Ntuj, nws Leej Tub kev tuag ua kom peb nrog Tswv Ntuj rov sib haum xeeb ; nyem no peb nrog Tswv Ntuj rov sib haum xeeb lawm, mas Tswv Ntuj Leej Tub txoj sia haj yam cawm peb. 11 Peb qhuas tau tias tam sim no, peb tau kev rov sib haum xeeb nyob hauv Tswv Ntuj, vim peb tus Huab Tais Yes Xus Pleev.
12 Yog vim tib tug neeg xwb, mas kev txhaum tau tshwm los nyob hauv lub ntiaj teb, ces kev txhaum coj kev tuag los. Txoj kev tuag thiaj raug tas zeej tsoom, vim sawv daws ua txhaum.
13 Kev txhaum xub tshwm los nyob ntiaj teb ua ntej Txoj Cai, tab sis thaum tsis muaj Txoj Cai, mas yus tsis ris lub txim txhaum. Txij As Das los txog Mais Xes, kev tuag ua vaj kav sawv daws : 14 tab yog cov neeg tsis tau ua tej yam txhaum zoo nkaus li As Das mas lawv kuj zwm rau kev tuag, vim As Das yog tus duab qhia txog tus yuav tuaj. 15 Tab sis lub txiaj ntsim tsis zoo li kev txhaum. Vim ib tug xwb ua txhaum mas tas zeej tsoom tuag. Nyem no Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev haj yam ntws los ntau rau zeej tsoom. 16 Lub txiaj ntsim uas tau coj yam zoo los, tsis zoo li yav thaum ub, uas ib tug neeg xwb ua txhaum : thaud, ib leej tib neeg tau ua ib qho txhaum xwb, mas Ntuj txiav tias neeg yuav raug txim ; hos nyem no neeg tau ua ntau yam txhaum ntev ntev los, tsis kav lub txiaj ntsim ua kom neeg ncaj tuaj. 17 Vim ib tug neeg tau ua txhaum, ces kev tuag tau ua vaj. Nyem no, cov txais lub txiaj ntsim thiab txais kev ncaj tej paj tshab, mas lawv haj yam yuav ua vaj nyob hauv txoj sia, vim Yes Xus Pleev tib leeg .
18 Li ntawd, ib tug neeg qhov txhaum pus tas ib zeej tsoom neeg mus rau kev raug txim ; ib tug neeg txoj kev ncaj kuj pub kev ncaj thiab pub txoj sia rau ib tsoom neeg. 19 Vim ib tug neeg txoj kev tsis mloog lus, ces tas zeej tsoom thiaj ua neeg txhaum ; vim ib tug neeg kev mloog lus, ces tas zeej tsoom yuav tau nce mus ua neeg ncaj.
20 Txoj Cai tawm tuaj, ces kev txhaum muaj chaw huam vam. Tab sis kev txhaum huam ntau, mas lub txiaj ntsim haj yam tuaj ntau tshaj tej kev txhaum. 21 Kev txhaum tau ua vaj kav neeg nyob hauv txoj kev tuag ; lub txiaj ntsim kuj yuav ua vaj kav neeg nyob hauv txoj kev ncaj, kom tau txoj sia mus li nyob hauv peb tus Huab Tais Yes Xus Pleev.

1 Peb puas xav hais tias peb yuav txhob txawm nyob hauv kev txhaum kom lub txiaj ntsim huam loj dua ? Txhob xav li ntawd ! 2 Yog peb lub siab txhaum tuag lawm tiag, mas peb yuav coj ib lub neej mus taug kev txhaum puas tau ? 3 Peb cov uas tau txais lub Cim Ntxuav nyob hauv Yes Xus Pleev, mas yog peb txais lub Cim Ntxuav nyob hauv Yes Xus txoj kev tuag. 4 Thaum peb txais lub Cim Ntxuav peb nrog Yes Xus tuag, peb nrog nws mus hauv nws lub ntxa.
5 Ua li mas peb yuav coj ib lub neej tshiab xws li Leej Pleev sawv hauv yeeb ceeb rov los, vim Leej Txiv lub hwj huam tau tsa nws. 6 Peb nrog Leej Pleev koom. Peb nrog Leej Pleev tuag, peb thiaj yuav nrog nws sawv rov los. Peb paub tseeb tias peb muab peb tus qub neeg nrog Yes Xus ntsia saum ntoo cuam, vim peb xav muab peb lub cev xib rau kev txhaum tua. Mas peb thiaj tsis ua kev txhaum cov qhev ntxiv. 7 Vim tias tus neeg tuag, tsis zwm rau txoj kev txhaum ntxiv.
8 Tab sis, yog peb nrog Leej Pleev tuag mas peb ntseeg tias peb yuav nrog nws muaj txoj sia. 9 Peb paub tias Leej Pleev sawv hauv qhov tuag los lawm, nws yuav tsis rov tuag dua, txoj kev tuag tsis muaj cuab kav tuaj raug nws ib zaug ntxiv. 10 Nws tuag ib zaug kom txoj kev txhaum tuag. Nyem no, nws ciaj rov los nws npuab Tswv Ntuj mus li.
11 Nej, mas nej kuj zoo li ntawd thiab : nej yuav saib tias nej tus neeg txhaum tuag lawm, tshuav nej tus neeg tshiab npuab Tswv Ntuj uas muaj txoj sia nyob hauv Huab Tais Yes Xus Pleev mus li. 12 Nej txhob cia kev txhaum ua vaj kav nej lub cev txawj tuag ; nej txhob mloog nej lub cev ntshaw. 13 Nej txhob cia nej tes taw ua ib co cuab yeej txhawb kev tsis ncaj thiab pab kev txhaum. Nej yuav rov muab nej cev rau Tswv Ntuj, ib yam li ib co neeg ciaj sawv hauv qhov tuag rov los. Nej muab nej tes taw ua ib co cuab yeej txhawb kev ncaj thiab ua Tswv Ntuj tub txib. 14 Kev txhaum yuav kav tsis tau nej, vim nej tsis zwm rau Txoj Cai. Nej zwm rau lub txiaj ntsim.
15 Peb puas yuav txhob txwm ua txhaum vim peb zwm rau lub txiaj ntsim, peb tsis zwm rau Txoj Cai lawm ? Txhob ua li ntawd ! 16 Nej yeej paub tias thaum nej rov muab nej cev rau ib tug, kom nej ua nws qhev, thiab mloog nws lus, mas nej yog tus tswv ntawd cov qhev : yog nej mloog kev txhaum, mas nej ua kev txhaum qhev, ces nej yuav txais kev tuag. Yog nej ua kev mloog lus cov tub txib, mas nej yuav txais kev ncaj. 17 Peb yuav ua Tswv Ntuj tsaug : vim yav thaud nej ua kev txhaum qhev, nej tuaj yeem mloog Txoj Cai uas Ntuj pub rau nej ntseeg, 18 nej dim ntawm kev txhaum, nej los ua kev ncaj cov tub txib.
19 Kuv siv neeg tej lus los piav, vim nej lub tswv yim tsuas paub txog tej ntawd xwb. Thaum ub, nej muab nej tes taw los ua qhev mloog kev phem, kev tsis tsim txiaj. Ces nej thiaj tau ua tsis tsim txiaj, hos txij hnub no mus, nej yuav muab nej tes taw cev rau kev ncaj kom nej ntshiab tuaj.
20 Thaum nej tseem ua kev txhaum qhev, mas nej tsis zwm rau txoj kev ncaj. Thaud, nej ua phem, nej tau dab tsi ?
21 Nyem no, nej rov xav txog tej yam nej tau ua los lawm, mas nej rov txaj muag rau nej. Qhov kawg, nej tej hauj lwm phem ntawd yuav coj nej mus rau hauv txoj kev tuag xwb. 22 Tiam sis, nyem no, nej dim ntawm txoj kev ua txhaum los ua Tswv Ntuj cov tub txib lawm, mas nej lub siab yuav ntshiab zuj zus tuaj, ces nej yuav txais txoj sia nyob mus li. 23 Tus nqi uas tawm ntawm kev txhaum los, yog txoj kev tuag. Hos cov paj tshab uas Ntuj pub, yog txoj sia nyob mus li nyob hauv Huab Tais Yes Xus Pleev.

1 Kwv tij sawv daws, cov lus kuv hais no yog hais rau cov uas paub Txoj Cai lawm : nej paub tias Txoj Cai tsuas kav neeg thaum neeg tseem ua neej nyob xwb. 2 Yog li ntawd, tus poj niam muaj txiv, mas Txoj Cai muab nws khi rau nws tus txiv mus txog hnub tus txiv tas sim neej. Txij hnub tus txiv tuag lawm, mas Txoj Cai tsis khi nws rau nws tus txiv ntxiv lawm. 3 Thaum nws tus txiv tseem ua neej nyob, yog nws mus yuav lwm tus txiv, mas luag hu nws ua poj niam deev hluas. Tab sis yog nws tus txiv tuag, Txoj Cai tsis khi nws ntxiv lawm. Yog nws yuav dua lwm tus txiv, nws kuj tsis yog ib tug poj niam deev hluas.
4 Li ntawd, kuv cov kwv tij, nej kuj tuag thiab, vim leej Pleev lub cev, mas Txoj Cai tsis khi nej ntxiv lawm, nej yog lwm tus tug, nej yog tus sawv hauv cov tub tuag rov los tug, kom peb txi tau ib co txiv zoo cev rau Tswv Ntuj. 5 Yav thaud, peb cia peb lub cev coj peb ua neej, peb lub siab ntshaw ua txhaum thiaj coj peb tej tes taw mus ua cov hauj lwm uas txi tau ib co txiv phim kev tuag, vim Txoj Cai. 6 Tab sis nyem no, muaj tus npo peb ntawm Txoj Cai lawm ; peb dim ntawm tej uas muab peb khi rau hauv kev tuag. Nyem no, peb tau txais ib lub tswv yim tshiab los tsob hwb Tswv Ntuj. Peb tsis mloog lub tswv yim hauv tej qub Ntawv ntxiv.
7 Peb puas yuav hais tias Txoj Cai yog kev txhaum ? Peb tsis hais li ntawd ! Tab sis yog vim muaj Txoj Cai mas kuv thiaj paub kev txhaum. Yog Txoj Cai tsis txhob qhia kuv tias : ‘Koj txhob tso koj lub siab mus ntshaw ub ntshaw no,’ mas kuv tsis paub tias muaj kev ntshaw. 8 Yog vim muaj Txoj Cai mas kev txhaum thiaj khaws nkaus los lus ntxias kom muaj ntau yam kev ntshaw nyob hauv kuv. Yog tsis muaj Txoj Cai mas kev txhaum tsaug zog xws li tuag lawm. 9 Ab ! Yav thaud kuv nyob tsis muaj Txoj Cai. Tab sis Txoj Cai tshwm sim los, ces kev txhaum thiaj ciaj sia, hos kuv tuag. 10 Vim Txoj Cai uas pub txoj sia, ua kom kuv mus thawj kev tuag. 11 Vim kev txhaum tos ntsoov nws lub sij hawm ; kev txhaum siv Txoj Cai rov los ntxias kuv, nws siv Txoj Cai rov los tua kuv.
12 Txoj Cai yog ib txog kev ntshiab. Cov lus qhia kuj yog lus ntshiab, lus ncaj thiab lus zoo. 13 Ua li, yam zoo puas txia ua ib yam tua kuv ? Tsis yog li ntawd thiab ! Tab sis kev txhaum yeej rov qhia meej txog kev txhaum ! Kev txhaum thiaj siv ib txog kev zoo kom mus coj txoj kev tuag los rau kuv. Ces kev txhaum muaj zog : yog vim muaj cov lus qhia ua kom kev txhaum muaj zog li ntawd.
14 Peb yeej paub tias Txoj Cai yog ib yam nyob hauv lub tswv yim. Tab sis kuv yog ib leej tib neeg muaj lub cev nqaij, kuv thiaj li mag txoj kev txhaum. 15 Hais tiag mas kuv tsis to taub tej yam uas kuv niaj hnub ua : yam li, kuv tsis ua qhov kuv xav ua, hos kuv ua qhov kuv ntxub. 16 Tab yog kuv ua tej yam kuv tsis xav ua, tsis kav kuv lees tias Txoj Cai zoo. 17 Hais qhov tseeb mas tsis yog kuv ua hauj lwm, yog txoj kev txhaum, uas nyob txawm hauv kuv ua hauj lwm. 18 Vim kuv paub tias tsis muaj ib yam zoo nyob txawm hauv kuv lub cev, kuv lub cev nqaij xav ua yam zoo uas kuv xav tau, tab sis kuv ua tsis tau yam zoo ntawd : 19 vim tias kuv tsis ua qhov zoo uas kuv xav ua, kuv ua qhov phem uas kuv tsis xav ua. 20 Yog kuv tsis ua qhov kuv xav ua, mas tsis yog kuv ua txoj hauj lwm, yog txoj kev txhaum uas nyob hauv kuv, ua txoj hauj lwm ntawd.
21 Kuv thiaj pom ib yam zoo li no : thaum kuv xav ua qhov zoo, mas qhov phem tawm plaws tam sim ntawd los cuag kuv. 22 Nyob puag hauv nruab siab, thaum kuv txaus siab rau Tswv Ntuj Txoj Cai, 23 mas kuv pom tias muaj dua lwm txoj cai tswj kuv tej tes taw, txoj cai ntawd sawv tsees los tawm tsam tiv kuv lub tswv yim. Txoj cai ntawd muab kuv khi rau tej kev phem uas nyob hauv kuv cov tes taw. 24 Ua li mas kuv txom nyem tas nrho tiag ! Leej twg yuav npo kuv dim ntawm lub cev uas pus kuv mus rau txoj kev tuag ntawd tau ? 25 Kuv ua Tswv Ntuj tsaug nyob hauv peb tus Huab Tais Yes Xus Pleev. Tab yog kuv lub cev nqaij tseem ua kev txhaum qhev, tsis kav kuv muab kuv lub tswv yim los tsob hwb Tswv Ntuj Txoj Cai.

1 Nyem no tsis muaj txim tuaj raug cov neeg nyob hauv Yes Xus Pleev lawm, 2 vim tias Leej Ntuj Plig Txoj Cai yog Txoj Cai pub txoj sia nyob hauv Yes Xus Pleev, nws txhiv koj ntawm kev txhaum thiab kev tuag. 3 Thaum Tswv Ntuj xa nws Leej Tub tuaj yug ua ib lub cev xws li peb lub cev muaj txhaum, mas nws tau muab txim rau txoj kev txhaum uas nyob hauv neeg lub cev. Tswv Ntuj ua tej yam uas Txoj Cai ua tsis tau, vim lub cev ua kom Txoj Cai tsis muaj zog ua dab tsi. 4 Ces txoj kev ncaj uas Txoj Cai qhia, tshwm sim los nyob hauv peb, vim peb tsis coj tus yam ntxwv mloog lub cev, peb coj tus yam ntxwv mloog lub tswv yim.
5 Cov neeg ua neej mloog lub cev, mas lawv nrhiav yam uas lub cev nyiam. Cov neeg ua neej mloog lub tswv yim, mas lawv nrhiav yam uas lub tswv yim nyiam. 6 Yam uas lub cev ntshaw txog, yog txoj kev tuag. Yam uas lub tswv yim ntshaw txog, yog txoj sia thiab txoj kev kaj siab lug. 7 Lub cev ntshaw tej yam ua yeeb ncuab rau Tswv Ntuj. Lub cev ntshaw tsis zwm rau Tswv Ntuj Txoj Cai, vim lub cev ntshaw yeej zwm tsis tau li. 8 cov neeg mloog lub cev, lawv ua xis Tswv Ntuj siab tsis tau.
9 Ntawm nej, mas nej tsis zwm rau lub cev, nej zwm rau lub tswv yim, vim Tswv Ntuj Leej Tswv Yim nyob txawm hauv nej. Tus twg tsis muaj Leej Pleev lub tswv yim nyob hauv nws mas nws tsis yog Leej Pleev tug. 10 Yog Leej Pleev nyob hauv nej, tab yog lub cev tuag vim kev txhaum, mas lub tswv yim muaj txoj sia vim kev ncaj. 11 Yog tus tau tsa Yes Xus tuag sawv rov los, nws lub tswv yim nyob txawm hauv nej, mas nws yuav pub txoj sia rau nej lub cev tuag, vim Leej Ntuj Plig nyob txawm hauv nej.
12 Kuv cov kwv tij, yog li ntawd mas peb tshuav luag nuj nqis, tab sis peb tsis tshuav lub cev nuj nqis. Tsis tas peb yuav ua neej mloog lub cev. 13 Yog nej ua neej mloog lub cev mas nej yuav tuag. Tab sis yog nej cia Leej Ntuj Plig muab lub cev cov hauj lwm tua pov tseg, mas nej yuav muaj txoj sia.
14 Txhua leej txhua tus uas Tswv Ntuj Leej Ntuj Plig coj, mas lawv yog Tswv Ntuj cov me nyuam tas huv tib si. 15 Nej tsis tau txais ib lub tswv yim ua qhev ; nej tsis txhob rov qab poob rau hauv txoj kev ntshai. Nej tau txais ib lub tswv yim ua tub ki tshiab, mas nej hu Tswv Ntuj tias : ‘As Npas ! Txiv !’
16 Leej Ntuj Plig nrog peb lub tswv yim zeem tseeb tias peb yog Tswv Ntuj cov me nyuam tiag. 17 Vim peb yog Ntuj cov me nyuam, mas peb yog cov txais lub cuab tam : peb yog cov txais Tswv Ntuj lub cuab tam ; peb nrog Leej Pleev txais ib lub cuab tam, vim peb nrog nws raug txom nyem, peb yuav tau nrog nws muaj hwj chim.
18 Kuv pom tias txoj kev txom nyem uas peb ris lub caij no, yuav muab los piv tsis tau rau lub hwj chim uas yuav tawm tuaj rau luag pom xyeem nyob hauv peb. 19 Tas puas tsav yam uas Ntuj tsim los tos ntshis txog lub caij Tswv Ntuj cov me nyuam yuav tawm los rau sawv daws pom xyeem. 20 Tas puas tsav yam Ntuj tsim los puav leej zwm rau kev cuav : tsis yog vim lawv txhob txwm xav zwm rau kev cuav ; yog vim muaj ib tug coj lawv mus zwm rau kev cuav. 21 Tas puas tsav yam Ntuj tsim los, tso siab tias lawv kuj yuav dim ntawm txoj kev ua qhev thiab txoj kev ploj : lawv tso siab tias lawv yuav tau kev twj lij mus hauv Tswv Ntuj tsoom tub ki lub hwj chim.
22 Peb paub tias, los txog tav no, tas puas tsav yam ntuj tsim los ntsaj xws li ib tug poj niam daws cev. 23 Tsis yog tas puas tsav yam ntsaj xwb ; tab txawm peb twb tau txais Leej Ntuj Plig cov txiaj ntsim los ua peb tug, tsis kav peb tseem ntsaj nyob hauv nruab siab thiab, vim peb tos lub caij txhiv peb lub cev. 24 Txoj kev cawm peb yog qhov uas peb tos ntsoov txog. Thaum yus tau yam uas yus tos lawm, mas yus tsis tos ntxiv ; yam uas yus tau lawd, mas yus yuav ua li cas tos ntxiv ? 25 Tab sis thaum peb tos yam peb tsis pom, mas peb ua siab ntev tos.
26 Leej Ntuj Plig tuaj nres peb cov neeg tsis muaj zog. Peb tsis paub thov dab tsi kom peb txoj kev teev Ntuj ntxim Tswv Ntuj siab. Tab sis Leej Ntuj Plig sawv peb chaw thov Ntuj rau peb : nws hais cov lus uas neeg piav tsis tau. 27 Tus Tswv Ntuj uas tsom hauv neeg nruab siab, nws paub tias Leej Ntuj Plig xav kom tau dab tsi : vim li no, Leej Ntuj Plig sawv cov ntshiab chaw thov Ntuj raws nraim li Tswv Ntuj lub siab xav.
28 Peb paub tias Tswv Ntuj nres cov neeg nyiam nws, nws nrog cov uas mloog nws lub suab hu ua hauj lwm, kom lawv tau qhov zoo, raws li tus nru lus uas nws npaj. 29 Cov neeg uas Tswv Ntuj xub hu, nws faib txoj hmoov rau lawv kom nws Leej Tub tus duab tshwm los nyob hauv lawv. Leej Tub thiaj ua tij coj ib tsoom kwv coob coob. 30 Cov uas Tswv Ntuj hu lawv, mas nws faib txoj hmoov rau lawv. Cov uas Tswv Ntuj hu lawv, mas nws ua kom lawv ncaj tuaj. Cov uas Tswv Ntuj ua kom lawv ncaj tuaj, mas nws kuj ua kom lawv muaj hwj chim.
31 Peb yuav hais dab tsi ntxiv ? Yog Tswv Ntuj tuaj peb tog, mas leej twg yuav tiv peb ? 32 Tswv Ntuj twb tsis txuag nws Leej Tub ; nws cia nws Leej Tub raug kev ploj, kom nws pab tau peb txhua leej : yog tias peb nrog Leej Tub, ua cas Tswv Ntuj thiaj yuav tsis pub nws cov txiaj ntsim rau peb ? 33 Leej twg yuav muaj cuab kav muab txim rau cov neeg uas Tswv Ntuj xaiv ? Tswv Ntuj yog tus saib tias lawv ncaj tuaj. 34 Leej twg yuav muab txim ? Puas yog Yes Xus Pleev uas nws tuag, nws sawv rov los, nws nyob ntawm Tswv Ntuj sab xis thov Tswv Ntuj rau peb tsis tseg ?
35 Leej twg yuav cais tau kom peb ncaim ntawm Leej Pleev uas nyiam peb ? Puas yog kev raug xwv txheej ? Puas yog kev txhawj xeeb ? Puas yog kev tshaib kev nqhis ? Puas yog kev pluag ? Puas yog kev poob tsag ? Puas yog kev raug luag hiam ? Puas yog txoj kev tuag ?
36 Tsis muaj dab tsi yuav ua tau kom peb ncaim ntawm Yes Xus, vim niaj hnub peb nco ntsoov txog lo lus nyob hauv Ntawv tias : ‘Huab Tais, vim peb nyiam koj, mas niaj hnub lawv thiaj muab peb tua. Sawv daws saib peb yog ib co yaj uas lawv yuav muab tua.’ 37 Tab yog peb raug tej yam li ntawd, mas peb kuj yeej sawv daws, vim Yes Xus nyiam peb. 38 Kuv paub tseeb tias tsis muaj dab tsi yuav cais tau peb ntawm Tswv Ntuj txoj kev nyiam. Txawm yog txoj kev tuag los txoj sia, yim phiaj cuaj phiaj Tshiab, txhua yam uas nyem no ua neej nyob thiab txhua yam uas tseem yuav xeeb los nyob rau yav tom ntej, 39 tas txhua yam nyob saum ntuj thiab nyob nruab yeeb, txhua yam uas Ntuj tsim los : yeej tsis muaj ib yam yuav cais tau peb ntawm tus Tswv Ntuj uas nyiam peb nyob hauv peb tus Huab Tais Yes Xus Pleev.

1 Kuv hais qhov tseeb nyob hauv Leej Pleev, kuv tsis dag : kuv lub siab qhia kuv tseeb nyob hauv Leej Ntuj Plig Ntshiab zoo li no : 2 Kuv tu siab thiab chim siab tas nrho. 3 Kuv tuaj yeem cia luag tsawm kuv, los cia luag muab kuv cais ntawm Leej Pleev, tsuav yog kuv tau pab kuv tsoom kwv tij, pab haiv neeg uas muaj ib hom ntshav xws li kuv : 4 haiv neeg ntawd yog cov His Xas Lais, lawv twb yog cov yuav txais txoj hmoov ua Tswv Ntuj tub ki, lawv yog cov yuav txais lub hwj chim, txais cov lus Ntuj cog, txais Txoj Cai, txais txoj kev teev Ntuj, txais Ntuj cov lus ruaj, 5 vim lawv muaj cov yawg koob yawg suab, muaj Leej Pleev uas yog tus nyob siab dua txhua leej, thiab yog tus Tswv Ntuj muaj koob meej mus li : nws lub cev yug hauv lawv haiv neeg los. Ua li.
6 Tswv Ntuj Lo Lus tsis tau swb, vim His Xas Lais tsoom xeeb ntxwv tsis yog tseem haiv His Xas Lais.
7 Sawv daws yog Has Nplas Has xeeb ntxwv, tab sis sawv daws tsis yog Has Nplas Has cov me nyuam. Vim muaj lus sau cia tias : ‘Cov neeg yuav hu ua koj tsoom xeeb zeej, yog cov tuaj ntawm His Xas Lais tuaj.’
8 Lo lus ntawd txhais tias : tsis yog cov neeg yug ntawm lub cev nqaij los, thiaj yog Tswv Ntuj cov me nyuam : yog cov me nyuam yug ntawm kev cog lus los, lawv thiaj li yog tsoom xeeb ntxwv.
9 Cov lus Ntuj cog, yog zoo li no : ‘Thaum rov txog lub caij no, kuv yuav rov tuaj, ces Xas Las yuav muaj ib tug tub.’
10 Tshuav Les Npes Kas, uas nws xeeb tub ntawm peb txiv His Xas Has. 11 Thaum nws cov me nyuam tseem tsis tau yug los, nkawd tsis tau ua ib qho zoo los ib qho phem, mas Ntuj hais rau His Xas Has tias : ‘Tus tij yuav ua tus kwv qhev.’
Thiab muaj lus sau tseg tias : ‘Kuv nyiam Yas Kos. Kuv tsis nyiam Hes Xas Ws.’
12 Li ntawd, Tswv Ntuj qhia meej tias nws xaiv neeg nyob ntawm nws siab.
13 Tswv Ntuj xaiv tus nws pom zoo, nws tsis xaiv raws li tus neeg cov hauj lwm.
14 Puas yuav hais tias Tswv Ntuj siab tsis ncaj ? Tsis yog ! 15 Tswv Ntuj hais rau Mais Xes tias : ‘Kuv zam rau tus uas kuv xav zam. Kuv khuv leej tus kuv xav khuv leej.’
16 Li ntawd, mas Tswv Ntuj khuv leej neeg tsis yog tim qhov neeg xav, thiab qhov neeg ua tau ; yog vim Tswv Ntuj txoj kev zam thiab txoj kev khuv leej neeg xwb.
17 Ntawv Ntshiab tseem hais rau tus Vaj Fas Las Oos tias : “Kuv tsa koj siab, kom sawv daws pom kuv lub hwj huam, thiab cav txog kuv lub npe mus thoob ntiaj teb.”
18 Li ntawd, mas Tswv Ntuj zam rau tus uas nws pom zoo zam. Nws xav kom leej twg lub siab txhav tsis mloog, mas tus ntawd lub siab txhav qhi tsis mloog li.
19 Nej yuav hais tias : ‘Ua cas Tswv Ntuj cem neeg? Twb tsis muaj leej twg tiv tau Tswv Ntuj !’
20 Ua li mas, neeg, koj yog leej twg, koj thiaj nrog Tswv Ntuj sib cav ? Ib yam toob xib puas yuav hais tau rau tus puab toob xib tias : ‘Ua cas koj puab kuv zoo li no ?’ 21 Tus puab lauj kaub, nws tsis yog cov av nkos tus tswv lod ? Nws yuav muab cov av nkos los puab ib lub lauj kaub zoo nkauj, los ib lub zoo raws li kev cai nyob ntawm nws siab, tsis tau lod ? 22 Tswv Ntuj ua siab ntev nyiaj cov neeg phem : lawv tsim nyog tuag, tab sis Tswv Ntuj ua siab ntev nyiaj, kom sawv daws pom nws lub siab npau thiab nws lub hwj huam, 23 thiab kom sawv daws pom tias nws pub paj tshab loj rau cov neeg nws hlub, thiab nws pub hwj chim rau lawv : 24 peb yog cov neeg ntawd. Tswv Ntuj xaiv peb hauv tsoom Yus Das thiab hauv tsoom neeg teev pej kum dab los.
25 Tus Yaj Saub Os Xes twb tau hais li ntawd. Nws hais tias : ‘Haiv neeg uas tsis yog kuv haiv neeg, kuv yuav hu lawv ua kuv haiv neeg. Tus ntxhais uas kuv tsis nyiam, mas kuv yuav hu nws ua tus kuv hlub. 26 Nyob hauv qhov chaw uas luag hais tias : ‘Nej tsis yog kuv haiv neeg, mas lawv yuav hnov hais tias : ‘Nej yog tus Tswv Ntuj muaj txoj sia tsoom tub.’
27 His Xais kuj tau hais zoo li no txog cov His Xas Lais : ‘Tab yog cov His Xas Lais txawm coob npaum li cov suab puam ntawm ntug hiav txwv, mas tsuas yog ib pab seem thiaj yuav txais kev cawm xwb. 28 Vim Huab Tais yuav tsis ncua ntev : nws yuav ua sai raws li nws lo lus nyob ntiaj teb no.’
29 His Xais tseem hais ntxiv tias : ‘Yog tsoom tub rog tus Huab Tais txhob tseg ib tug kaus nyob hauv peb, mas peb twb raug xws li Xos Dos Mas thiab Nkos Mos Las.’
30 Qhov kawg, yuav hais dab tsi ? Peb yuav hais tias muaj tej pab neeg teev pej kum dab, lawv tsis nrhiav txoj kev ncaj, tab sis lawv ntsib txoj kev ncaj ; yog txoj kev ncaj tuaj ntawm kev ntseeg tuaj.
31 Tab sis tsoom His Xas Lais, uas lawv nrhiav ib txog cai pub kev ncaj, lawv nrhiav tsis tau Txoj Cai. 32 Yog vim li cas ? Yog vim lawv tsis txais kev ntseeg ; lawv vam txog cov hauj lwm. Lawv dawm lub pob zeb dawm ko taw. 33 Ntawv sau tseg tias : “Kuv tso ib lub pob zeb dawm taw rau pem Xis Yoos, kuv tsa ib lub tsua ua kom neeg ntog. Tus ntseeg txog lub tsua yuav tsis poob ntsej muag.’

1 Kwj tij sawv daws, kuv xav kom cov His Xas Lais ntsib kev cawm. Kuv niaj hnub thov Tswv Ntuj rau lawv. 2 Vim kuv zeem tseeb tias lawv kub siab hwm Tswv Ntuj ; tab sis yog ib txog kev kub siab tsis pom kev. 3 Vim lawv tsis paub Tswv Ntuj txoj kev ncaj ; lawv nrhiav lawv txoj kev ncaj xwb. Lawv tsis kam los nyob hauv Tswv Ntuj txoj kev ncaj. 4 Vim tias Txoj Cai los xaus rau tib leeg xwb, yog Leej Pleev, mas Ntuj yuav pub kev ncaj rau cov ntseeg.
9 Yog koj di ncauj lees tias Yes Xus yog Huab Tais, thiab koj lub siab ntseeg tias Tswv Ntuj tsa Yes Xus tuag sawv rov los, mas koj yuav txais kev cawm neeg. 10 Lub siab ntseeg tau txais kev ncaj los ua nws tug. Lub ncauj uas lees ntseeg txog Yes Xus tau txais kev cawm. Vim Ntawv sau cia tias : ‘Tus ntseeg txog Huab Tais, nws yuav tsis poob ntsej muag.’
12 Li ntawd, txhob hais tias muaj cov Yus Das thiab muaj cov Hes Las ; lawv tsis sib txawv. Sawv daws muaj ib tug Huab Tais xwb, yog tus Huab Tais pub paj tshab ntau rau cov neeg hu txog nws.
13 Vim Ntawv yeej sau cia tias : ‘Leej twg hu txog Huab Tais lub npe, nws yuav ntsib kev cawm neeg.’
14 Cov uas tsis tau ntseeg txog Huab Tais, mas lawv yuav ua cas hu txog nws ? Cov tsis tau hnov Huab Tais lo lus, mas lawv yuav ua cas ntseeg ? Yog tsis muaj neeg tshaj Ntuj lus, luag yuav ua li cas hnov tau Ntuj lo lus ? 15 Yog tsis muaj tus xa yus mus tshaj Ntuj lus mas yus yuav ua li cas tshaj ? Ntawv sau cia tias :
‘Cov neeg xa moo zoo, mas lawv ko taw zoo nkauj.’ 16 Tab sis tsis yog sawv daws tau mloog lub moo zoo. Vim His Xais hais tias : ‘Huab Tais, leej twg mloog cov lus peb tshaj ?’ 17 Li ntawd, kev ntseeg yug ntawm kev tshaj Ntuj lus los. Kev tshaj Ntuj lus yog kev tshaj Leej Pleev lo lus.
18 Ces kuv nug tias ; ‘Tej zaus, cov His Xas Lais tsis tau hnov Ntuj Lo Lus ? Tab sis Ntawv hais tias : ‘Cov tub tshaj Ntuj lus lub suab ntxhe mus thoob ntiaj teb. Lawv cov lus nrov mus txog tim npoo ntuj.’ 19 Kuv rov nug ntxiv tias : ‘Puas yog vim cov His Xas Lais tsis to taub ?’ Tab sis Mais Xes twb hais tias : ‘Kuv yuav ua kom nej khib txog haiv neeg uas tsis yog ib haiv neeg. Kuv yuav ua kom nej khib txog haiv neeg uas tsis muaj tswv yim.’ 20 His Xais tseem muaj cuab kav hais ntxiv tias : ‘Cov neeg uas tsis nrhiav kuv, lawv cia li tau ntsib kuv. Cov neeg tsis taij dab tsi ntawm kuv, mas kuv cia li muab kuv rau lawv.’ 21 Hos His Xais hais txog His Xas Lais, nws hais tias : ‘Kuv niaj hnub cev tes rau ib haiv neeg qig lus thiab ntxeev siab.’

1 Kuv nug tias : ‘Tswv Ntuj puas xyeeb nws haiv neeg pov tseg ?’ Nws tsis muab xyeeb pov tseg ! Kuv yog ib tug His Xas Lais. Kuv yog Has Nplas Has ib tug xeeb ntxwv, yug hauv lub xeem Npes Yas Mis. 2 Tswv Ntuj tsis nrauj haiv neeg nws ib txwm xaiv. Nej puas paub lo lus Ntawv hais txog Es Lias ? Thaum Es Lias nrog Tswv Ntuj tham, nws kom cov His Xas Lais rau Tswv Ntuj, mas Ntawv hais tias : 3 ‘Huab Tais, lawv muab cov Yaj Saub tua ; lawv rhuav cov thaj txi Ntuj ; tshuav kuv tib leeg xwb, lawv xav txo kuv txoj sia thiab.’ 4 Tswv Ntuj teb dab tsi rau Es Lias ? Tswv Ntuj teb tias : ‘Kuv qee
7,000 leej uas tsis tau txhos caug hwm Npas Has : lawv tseem yog kuv tug.’ 5 Lub zim txwv no, kuj tshuav ib pab seem, yog pab uas Ntuj lub txiaj ntsim tau xaiv. 6 Lub txiaj ntsim xaiv lawv, mas tsis yog vim lawv cov hauj lwm. Yog lawv raug xaiv vim lawv tej hauj lwm, mas Ntuj lub txiaj ntsim tsis yog txiaj ntsim lawm.
7 Hais tas lus nrho, mas yuav hais zoo li cas ? Qhov uas His Xas Lais nrhiav, mas lawv tsis ntsib. Tab sis cov uas lawv tau ntsib, mas yog Ntuj xaiv lawv. Lwm cov mas lub siab haj yam txhav qhi tuaj, raws nraim li Ntawv hais tias : 8 ‘Tswv Ntuj muab ib lub siab qaug dab ntub rau lawv, muab ob lub qhov muag tsis pom kev rau lawv, muab ob lub pob ntseg tsis hnov lus rau lawv los txog tav no.’ 9 Das Vis kuj hais tias : ‘Xav kom lawv lub rooj noj mov hloov ua ib rooj ntxiab, ua hlua tsig, thiab ua chaw ntog, kom lawv tau txais lawv tus nqi txhaum. 10 Thov kom lawv qhov muag tsaus tuaj, kom lawv txhob pom. Koj ua kom lawv nraub qaum khoov pob mus li !’
11 Kuv tseem nug ntxiv tias : ‘Cov His Xas Lais puas ntog mus li tiag ?’ Tsis ntog mus li ! Lawv tsuas rhais ib ruam yuam kev, kom cov neeg teev pej kum dab tau txais kev cawm, thiab kom ntev mus lawv khib. 12 Lub sij hawm cov His Xas Lais rhais ruam yuam kev, mas lub qab ntuj neeg txais paj tshab loj. Thaum cov His Xas Lais pluag, mas cov neeg teev pej kum dab nplua nuj tuaj. Ua li, yog cov His Xas Lais tig los ntseeg, mas lub qab ntuj neeg yuav zoo npaum li cas ntxiv ? 13 Kuv hais rau nej cov neeg teev pej kum dab hais tias : kuv yog tus Hauv Paus Xa Lus rau cov neeg teev pej kum dab tiag. Kuv saib kuv txoj hauj lwm muaj nqi. 14 Tab sis, kuv ua kom cov uas nrog kuv koom ib hom roj ntsha khib, vim kuv xav cawm lawv ib txhia. 15 Yog lub sij hawm uas Ntuj tshem lawv rau ib cag, ces lub qab ntuj neeg rov sib haum xeeb, yog li, thaum Ntuj txais lawv rov los, mas lawv yuav zoo cuag li txoj kev sawv hauv cov tuag rov los.
16 Yog cov poov ntshiab, mas tas cov hmoov nkos kuj yuav ntshiab tuaj thiab. Yog tus cag ntshiab, mas cov ceg kuj yuav ntshiab thiab. 17 Muaj tej tus ceg ntoo tau raug txiav pov tseg, hos koj yog ib tug ceg txiv ntoo roj qus, koj tau los txuas rau cov ceg txiv ntoo roj nyeg, koj thiaj tau haus tsob ntoo roj nyeg cov txab : mas koj txhob khav tias koj zoo dua cov ceg nyeg. 18 Yog koj xav khav, mas koj yuav nco ntsoov tias, tsis yog koj ris tus cag ntoo, yog tus cag ntoo ris koj. 19 Koj yuav hais tias : ‘Ntuj txiav ib co ceg pov tseg kom tau kev txuas kuv rau.’ 20 Koj hais raug thiab. Lawv raug txiav pov tseg vim lawv tsis ntseeg. Yog kev ntseeg ua kom koj sawv ruaj nrees. Tab sis koj txhob khav. Phim koj yuav txhawj. 21 Vim tias Tswv Ntuj twb tsis tau zam rau cov ceg uas ib txwm tuaj, mas koj yuav ceev faj, tsam nws tsis zam rau koj thiab. 22 Koj ntsia ntsoov Tswv Ntuj : nws ib txhij yog tus siab zoo thiab siab nruj. Nws ua nruj rau cov neeg ntog. Nws ua siab zoo rau koj, tsuav yog koj nyob ruaj hauv txoj kev zoo. Yog koj tsis ua li ntawd, mas Ntuj yuav muab koj txiav pov tseg thiab. 23 Yog cov His Xas Lais txhob nyob hauv txoj kev tsis ntseeg mus li, mas Ntuj yuav txuas lawv rau tus kav : Tswv Ntuj muaj hwj huam, nws rov txuas lawv tau. 24 Koj ib txwm yog ceg ntoo roj qus, tab sis Ntuj muab koj txuas rau tsob ntoo roj nyeg. Ntuj haj yam yuav rov txuas tau lawv rau tsob ntoo roj nyeg, vim lawv yeej ib txwm yog tsob ntoo roj nyeg cov ceg.
25 Kwv tij sawv daws, kuv tsis xav cia nej tsis paub dab tsi txog zaj txuj ci tob tob zais ntshis : tsam nej khav tias nej yog neeg thoob tsib. Zaj txuj ci tob zais ntshis yog zaj no : 26 Ib txhia His Xas Lais ua siab hnyav mus txog lub caij uas tas tsoom neeg teev pej kum dab los txais kev ntseeg. Thaum ntawd tas tsoom His Xas Lais mam li txais kev cawm, raws li cov lus sau tseg tias : ‘Tus npo nej yuav tuaj pem Xis Yoos tuaj ; nws yuav rho Yas Kos cov txhaum pov tseg. 27 Thaum kuv rho lawv cov txhaum tas, mas kuv yuav nrog lawv cog lus.’
28 Cov His Xas Lais ua yeeb ncuab, rau lub Moo Zoo, vim nej. Tab sis Tswv Ntuj hlub lawv vim lawv cov yawg koob, thiab vim lawv yog haiv neeg Ntuj xaiv lawv. 29 Vim tias thaum Tswv Ntuj tau pub txiaj ntsim thiab hu nws haiv neeg, mas nws tsis thim nws lo lus.
30 Thaum ub, nej tsis tau mloog Tswv Ntuj lus, tsis kav, nyem no Tswv Ntuj zam rau nej, vim cov His Xas Lais tsis mloog lus. 31 Nyem no, cov His Xas Lais tsis mloog Ntuj lus, tab sis muaj ib hnub Tswv Ntuj yuav zam rau lawv, vim nws twb zam rau nej. 32 Tswv Ntuj cia ib tsoom neeg kaw rau hauv txoj kev tsis mloog lus, kom nws tau kev zam rau ib tsoom.
33 Tswv Ntuj cov paj tshab muaj nqis tas nrho ! Tswv Ntuj lub tswv yim thoob tsib tas nrho ! Tswv Ntuj cov txuj tob tas nrho ! Neeg tsom tsis tau Tswv Ntuj cov lus qhia. Neeg tsis to taub Tswv Ntuj tej kev.
34 Leej twg yuav paub tau zaj uas Huab Tais xav ? Leej twg yuav qhia tswv yim tau rau Huab Tais ? 35 Leej twg xub tau pub txiaj ntsim paj tshab rau Tswv Ntuj, ces nws yuav kom Tswv Ntuj them rov rau nws ? 36 Txhua yam tuaj ntawm Tswv Ntuj tuaj. Yog nws ua kom txhua yam tshwm sim los. Txhua yam yog nws tug. Lub hwj chim yog Tswv Ntuj tug mus ib txhiab ib txhis. Ua li.

1 Kuv tuav txog tus Tswv Ntuj khuv leej neeg lub npe, kuv thov qhuab ntuas nej, kom nej muab nej lub cev los txi rau Tswv Ntuj, zoo li ib co txim ntshiab muaj txoj sia ntxim Tswv Ntuj lub siab. Qhov ntawd yog txoj kev teev Ntuj nyob hauv nruab siab.
2 Nej tsis txhob coj ib tug cwj pwm raws li lub ntiaj teb : vim nej twb hloov ib lub tswv yim tshiab lawm. Lub tswv yim tshiab ntawd yuav ua kom nej hloov txhua yam, kom nej txawj tsom Tswv Ntuj lub siab xav, tsom qhov zoo, tsom qhov ntxim Tswv Ntuj siab, tsom qhov zoo tshaj plaws.
3 Yog vim kuv tau txais Ntuj lub txiaj ntsim, mas kuv thiaj hais rau nej sawv daws tias : ‘Nej txhob xav tias nej yog ib co neeg zoo dua qhov muaj tiag. Nej yuav ua neeg thoob tsib, ntsuas saib nej muaj tsim li cas : nyias muaj tsim raws nyias lub siab ntseeg, uas Tswv Ntuj pub rau nyias. 4 Peb sawv daws muaj ib lub cev ; peb lub cev muaj tes muaj taw, peb tes taw tsis ua ib txog hauj lwm xwb : 5 peb muaj coob leej nyob hauv Leej Pleev, peb ua ib lub cev, peb sawv daws yog nws cov tes taw rov sib pab, nyias ua nyias txoj hauj lwm. 6 Peb nyias txais nyias zaj txuj ci raws li lub txiaj ntsim Ntuj pub rau nyias. Ua li mas tus ua Yaj Saub nws yuav ua raws li kev ntseeg. 7 Tus ua tub txib, nws yuav tsob hwb. Tus qhia luag, nws yuav qhia. 8 Tus ntuas luag, nws yuav ntuas. Tus pub cuab yeej rau luag, mas nws yuav pub dawb. Tus thawj coj, mas nws yuav kub siab coj. Tus pab cov neeg txom nyem, nws yuav ua ntsej muag luag ntxhi. 9 Nej tsis txhob ua txuj nyiam luag tej. Nej yuav ntxub txoj kev phem. Nej muab nej lub siab khi ruaj nreb rau hauv txoj kev zoo. 10 Nej yuav sib hlub vim nej yog ib co kwv tij. Nej ib leeg yuav saib ib leeg tsim nyog qhuas. 11 Thaum nej pab luag tej, mas nej txhob ua neeg tub nkeeg. Nej ua neeg siab kub : vim nej tsob hwb Huab Tais. 12 Nej yuav xyiv fab nyob hauv txoj kev tso siab rau Ntuj. Thaum nej raug txom nyem, mas nej ua siab ntev mog. Nej yuav nquag teev Ntuj. 13 Nej yuav pab cov ntshiab. Nej yuav xyiv fab txais cov qhua tuaj so hauv nej tsev.
14 Nej yuav foom lus zoo rau cov neeg hiam nej. Foom lus zoo xwb, txhob foom lus phem. 15 Thaum nej nrog cov neeg zoo siab nyob ua ke, mas nej kuj yuav nrog lawv zoo siab luag ntxhi. Thaum nej nrog cov neeg quaj ntsuag nyob ua ke, mas nej kuj yuav nrog lawv quaj. 16 Nej nrog sawv daws muaj ib lub siab ib lub tswv yim. Nej txhob nyiam ua neeg muab hlob. Nej yuav cia nej lub siab xib rau cov neeg me. Txhob xav tias nej paub txuj ci dua luag tej. 17 Nej txhob pauj qhov phem uas luag tau ua rau nej. Nej yeej meem muab siab rau ua tej yam zoo nyob ntawm sawv daws xub ntiag. 18 Nej nrog sawv daws nyob haum pheej, raws li nej ua tau. 19 Kwv tij zoo nyiam, nej tsis txhob pauj qhov phem uas luag ua rau nej mog. Nej cia Tswv Ntuj npau taws rau lawv. Vim nyob hauv ntawv, Huab Tais Ntuj hais tias : ‘Kuv yog tus yuav pauj kev chim, thiab yog tus yuav muab txim.’
20 Li ntawd, ‘yog koj tus yeeb ncuab tshaib plab, mas koj yuav pub mov rau nws noj, yog nws nqhis dej, mas koj yuav muab dej rau nws haus. Yog koj ua li no, mas koj tshem ib pawg hluav ncaig kub kub saum koj tus yeeb ncuab taub hau pov tseg.’ 21 Koj tsis txhob cia txoj kev phem yeej koj. Koj ua zoo, ces koj yeej txoj kev phem.

1 Sawv daws yuav mloog cov nom tswv. Vim txoj kev ua thawj tuaj ntawm Tswv Ntuj tuaj. Yog Tswv Ntuj tsa lawv ua thawj coj. 2 Li ntawd, mas tus twg tiv cov thawj coj nws kuj ntxeev siab rau txoj kev tswj hwm uas Tswv Ntuj tsa. Cov ntxeev siab yeej yuav raug txim. 3 Thaum koj ua zoo mas koj tsis ntshai tej nom tej tswv ; yog koj ua phem mas koj thiaj ntshai. Yog koj tsis xav muaj chaw ntshai cov nom tswv mas koj ua txoj zoo : lawv yuav qhuas koj. 4 Kev nom kev tswv yog ib txog kev uas Tswv Ntuj siv los hwj koj mus taug kev zoo. Tab sis yog koj ua phem, mas phim koj yuav ntshai ; vim tias tsoom nom tswv tuav riam tuav hmuv. Tswv Ntuj siv kev nom kev tswv los txiav txim, thiab muab tus ua phem nplua. 5 Yog vim li ntawd, peb thiaj yuav mloog tsoom nom tswv : yus tsis mloog vim yus ntshai lawv xwb ; yus mloog vim yus lub siab pom tias yog kev zoo.
6 Yog vim qhov ntawd, mas nej thiaj them se. Vim Tswv Ntuj tsa kom muaj cov sau se ua txoj hauj lwm ntawd. 7 Nej yuav them txhua hom se raws li yuav tsum them. Yuav them se nyiaj hli rau tus sau se, them se toob xib rau tus tsob se toob xib. Tus yuav tsum hwm, mas nej yuav hwm. Tus muaj meej mom, mas nej yuav muab nws lub meej mom saib siab.
8 Nej tsis txhob tshuav luag nuj luag nqi. Yam nuj nqis uas nej tshuav ntawm luag tej, mas yog lub siab nyiam luag. Vim tus nyiam luag tej, mas nws ua raws li Ntuj Txoj Cai tas huv tib si lawm.
9 Ntuj cov lus qhia hais tias : “Koj txhob zes luag txij luag nkawm, koj txhob tua neeg, koj txhob ua tub sab, koj lub siab yuav tsis txhob ntshaw” : cov lus qhuab qhia no thiab lwm cov lus qhia tas huv tib si lub ntsiab txhais tias : “Koj yuav nyiam luag tej ib yam li koj nyiam koj.”
10 Tus twg nyiam luag tej, mas nws tsis ua ib qho phem rau luag. Ua li mas Txoj Cai lub ntsiab yog txoj kev nyiam.
11 Nej paub tias nyem no txog lub caij peb yuav tsim hauv nruab dab ntub los. Nyem no tus cawm peb tuaj txog ze peb dua hnub peb pib ntseeg. 12 Nyem no, hmo yuav dhau, twb yuav kaj ntug. Peb tso txoj hauj lwm tsaus ntuj pov tseg. Peb tuav ntaj tuav hmuv mus ua rog nyob hauv txoj kev kaj. 13 Peb yuav coj ib tug xeeb ceem muaj tsim, thiaj li phim cov neeg ua neej nruab hnub. Peb tsis txhob ua neeg hu dab, quav dej quav cawv, txhob ua plees ua yi, txhob ua yam qias, txhob sib ceg sib khib. 14 Nej hnav peb tus Huab Tais Yes Xus Pleev. Nej tsis txhob ntxhov siab txog nej lub cev, thiab txhob ua raws lub cev ntshaw.

1 Nej yuav xyiv fab txais tus uas lub siab ntseeg tseem muag. Txhob nrog nws sib cav. 2 Muaj ib txhia xav tias lawv noj yam twg kuj tau tas huv tib si. Tab sis tus siab muag, nws tsuas noj zaub xwb. 3 Tus noj tas txhia yam txhob thuam tus yoo txhiam xws ; tus yoo txhob txiav txim rau tus noj : vim Tswv Ntuj zoo siab txais sawv daws. 4 Koj yog leej twg, koj thiaj li muaj cuab kav txiav txim rau lwm tus tswv tus tub txib ? Txawm tus tub txib ntawd sawv ntsug los ntog lawm, mas yog nws tus tswv txoj hauj lwm. Nws yeej yuav sawv ntsug tau, vim Huab Tais muaj zog txaus nres nws.
5 Ib txhia nyiam ib lub hnub nyoog heev dua lwm cov hnub nyoog, hos ib txhia ho saib tias lub hnub nyoog twg los zoo huv tib si. Cia nyias xav nyias tswv yim nyob ntawm nyias siab. 6 Tus saib hnub xam nyoog mas nws yuav saib los hwm Huab Tais. Tus noj tas txhua hom txhiam xws, nws yuav noj los hwm Huab Tais : nws ua Tswv Ntuj tsaug. Tus yoo tshaib kuj yuav yoo los hwm Huab Tais : vim nws ua Tswv Ntuj tsaug thiab.
7 Peb tsis muaj ib tug uas nws ua neej vim nws xav rov tsob hwb nws xwb ; tsis muaj ib tug tuag uas nws xav tuag rau nws xwb. 8 Yog peb ua neej nyob, mas peb nyob tsob hwb Huab Tais ; yog peb tuag, mas peb kuj tuag rau Huab Tais. Txawm peb ua neej nyob, los peb tuag, mas peb yog Huab Tais tug. 9 Vim Leej Pleev tuag, thiab nws rov muaj txoj sia kom tau ua tsoom neeg ciaj neeg tuag tus Huab Tais. 10 Ua cas koj thiaj txiav txim rau koj tus kwv ? Ua cas koj thuam koj tus kwv ? Muaj ib hnub, peb sawv daws yuav mus nyob ntawm Tswv Ntuj lub chaw txiav txim. 11 Ntawv sau cia tias : ‘Huab Tais hais tias : txhua leej txhua tus yuav txhos caug nyob ntawm kuv xub ntiag. Txhua xeem lus yuav cav txog kuv lub koob meej.’
12 Li ntawd, peb nyias yuav tsum piav nyias txoj hauj lwm rau Tswv Ntuj. 13 Ua li mas, peb yuav tsum tso txoj kev rov sib txiav txim pov tseg. Nej tsis txhob ua tej yam dawm taw rau ntawm ib tug kwv tij xub ntiag, tsam nws dawm, ces nws ntog. 14 Kuv yeej paub tseeb nyob hauv Huab Tais Yes Xus tias tsis muaj ib yam uas ib txwm yeej yog yam tsis huv : tsuas yog neeg xwb thiaj xav tias muaj tej hom txhiam xws tsis huv. Ces hom txhiam xws ntawd txia ua ib hom tsis huv rau nws tiag. 15 Yog koj tus kwv ntxhov siab vim yam txhiam xws uas koj noj, mas koj tsis taug txoj kev nyiam. Koj txhob muab txhiam xws noj los ua kom ib tug neeg ploj : vim Leej Pleev twb tuag cawm tus neeg ntawd. 16 Nej txhob muab nej txoj kev ywj siab los ua chaw rau luag thuam. 17 Vim Tswv Ntuj lub Ceeb Tsheej tsis yog txhiam xws noj, los dej caw. Tswv Ntuj lub Ceeb Tsheej yog kev ncaj, kev thaj yeeb, kev kaj siab nyob hauv Leej Ntuj Plig Ntshiab. 18 Tus tsob hwb Leej Pleev zoo li ntawd, mas nws ua xis Tswv Ntuj siab, thiab tsoom sid saib nws zoo. 19 Peb nrhiav tej yam pab txhim kev thaj yeeb thiab txhawb kev sib nres. 20 Koj txhob rhuav Tswv Ntuj txoj hauj lwm, vim txhiam xws noj. Tas ib puas tsav yam puav leej huv ! Tab sis, thaum yus noj, yog yus ua luag chaw dawm taw, mas yam huv uas yus noj hloov ua yam phem. 21 Qhov zoo, yog yoo nqaij yoo cawv thiab txhua yam ua kom yus tus kwv dawm ntog, thiab ua siab muag.
22 Lub siab ntseeg uas koj muaj : mas koj yuav txuag zoo nyob ntawm Tswv Ntuj xub ntiag. Tus uas thaum nws txiav siab ua ib yam, nws pom tias nws tsis txhaum mas nws txoj hmoov zoo. 23 Tab sis tus ua xyem xyav, tab yog nws noj txhua hom txhia xws, los nws yuav raug txim, vim nws ua yam uas nws tsis pom zoo : yog yus ua yam uas tsis txhawv hauv lub siab ntseeg los, mas yam ntawd yog kev txhaum.

1 Peb, mas peb yog cov muaj zog, peb yuav ris cov tsis muaj zog : peb txhob nrhiav yam xis peb siab. 2 Peb sawv daws yuav ua kom haum tus nyob ze peb, peb thiaj pab tau nws ua qhov zoo. 3 Vim Leej Pleev tsis nrhiav yam xis nws siab. Ntawv sau tseg tias : ‘Cov cem koj, lawv tej lus cem poob rau saum kuv.’ 4 Tas txhua yam thaud, lawv muab sau tseg, mas yog vim lawv xav qhia peb : Ntawv qhia kom paub Tswv Ntuj lub siab ntev, paub Tswv Ntuj txoj kev nplij neeg, peb thiaj tso siab rau Ntuj. 5 Kuv thov tus Tswv Ntuj siab ntev txawj nplij neeg zoo li ntawd, kom nws ua peb lub siab ntshaw sib nyiam sib hlub raws li Yes Xus Pleev tus lwj lwm. 6 Ces nej yuav koom siab koom ntsws, thiab koom suab hu nkauj cav txog Tswv Ntuj uas yog peb tus Huab Tais Yes Xus Pleev Leej Txiv.
7 Ua li mas, nej ib leeg yuav txais ib leeg zoo, xws li Yes Xus tau txais nej tuaj hwm Tswv Ntuj. 8 Kuv hais tias, thaum Yes Xus Pleev tuaj nws tau pab haiv His Xas Lais, vim nws xav kom Tswv Ntuj nto moo tias Tswv Ntuj siab ncaj, nws xav ua kom muaj raws li Tswv Ntuj tau cog lus rau cov yawg koob His Xas Lais. 9 Nyem no, tas txhia haiv neeg thiaj cav txog tus Tswv Ntuj khuv leej neeg. Raws nraim li Ntawv lo lus hais tias : ‘Kuv yuav cav txog koj nyob hauv nruab nrab txhua haiv neeg, kuv yuav hu nkauj cav txog koj lub npe.’
10 Ntawv tseem hais tias : ‘Tas ib tsoom haiv neeg, nej yuav nrog Tswv Ntuj haiv neeg dhia zoo siab. 11 Txhua haiv neeg, nej cav txog Huab Tais mog !’ 12 His Xais hais tias : ‘Yes Xes tus xeeb ntxwv yuav tawm tuaj. Nws yuav sawv los kav tas ib tsoom haiv neeg. Txhua haiv neeg yuav tso siab rau nws.’
13 Kuv thov tus Huab Tais pub kev tso siab, kom nws muab kev zoo siab nyob hauv txoj kev ntseeg, kuv thov kom nws pub lub siab kaj lug rau nej, ces nej yuav muaj chaw tso siab loj, vim Leej Ntuj Plig Ntshiab lub zog tuaj nres nej.
14 Kuv cov kwv tij, nyob hauv kuv nruab siab kuv paub tseeb tias nej lub siab xav ua tej yam zoo xwb, nej muaj lub txiaj ntsim sib qhuab sib qhia, nej txawj sib ntuas.
15 Tsis kav kuv tseem muaj cuab kav sau tej yam ntxhib me ntsis rau nej, yog vim kuv xav kom nej rov nco tej ntawd meej. 16 Tos kuv muaj cuab kav ua li ntawd yog vim lub txiaj ntsim uas Tswv Ntuj pub rau kuv ; nws tsa kuv ua tus cev Yes Xus Pleev cov lus rau cov neeg teev pej kum dab, ua tus Leej Choj xa Tswv Ntuj lub Moo Zoo rau cov neeg teev pej kum dab, kom lawv ua ib co txim xis Tswv Ntuj siab, thiab kom lawv ntshiab tuaj nyob hauv Leej Ntuj Plig Ntshiab.
17 Hais txog Tswv Ntuj txoj hauj lwm, mas kuv yuav khav tias kuv tau ua ntau nyob hauv Yes Xus Pleev. 18 Kuv tsuas muaj cuab kav hais txog tej yam uas Leej Pleev txib kuv mus coj cov haiv neeg los mloog Ntuj lus : 19 ces kuv thiaj hais txog cov lus, coj hauj lwm, cov hwj huam yees ntxwv, thiab Leej Ntuj Plig lub hwj huam. Li ntawd, mas txij Yes Lus Xas Les mus txog Is Lis Lias teb, kuv tau ua kom Leej Pleev lub Moo Zoo tawm tuaj. 20 Kuv tsuas tau muab siab rau tshaj Ntuj lus rau cov teb chaws uas neeg tsis tau hu txog Leej Pleev lub npe ib zaug li : vim kuv tsis xav txhim tsev rau saum tej taw ntsa uas luag xub txhim lawm. 21 Kuv tau ua raws li lo lus sau tseg tias : ‘Cov neeg uas tsis tau hnov tshaj txog lub Moo Zoo, mas lawv yuav pom lub Moo Zoo. Cov neeg uas tseem tsis tau hnov hais txog lub Moo Zoo, mas lawv yuav to taub lub Moo Zoo !
22 Qhov no yog qhov tav kuv kev, kuv thiaj tsis tau kev tuaj xyuas nej. 23 Tab sis nyem no, kuv tsis muaj hauj lwm ua nyob teb chaws no ; tau ob peb xyoos los kuv xav tuaj xyuas nej kawg. 24 Thaum kuv yuav mus Xyis Pas Yas teb, kuv yuav tuaj xyuas nej. Kuv vam tias thaum kuv tuaj txog ib tog kev, kuv yuav nrog nej nyob me ntsis kom zoo kuv siab, ces nej yuav pab kuv nrhiav kev mus ntxiv.
25 Tab sis nyem no, kuv yuav xub mus Yes Lus Xas Les, kuv yuav mus tsob hwb cov ntshiab nyob tid tso. 26 Vim tias Mas Xes Dos Nias teb thiab As Kas Yas teb tau pom zoo pab cov ntshiab raug kev tshaib nyob Yes Lus Xas Les. 27 Lawv zoo siab ua li ntawd, thiab phim lawv yuav ua li ntawd : cov neeg teev dab tau txais lub cuab tam yug lub tswv yim ntawm cov nyob Yes Lus Xas Les ; phim lawv yuav qee lub cuab tam yug lub cev mus tsob hwb cov nyob Yes Lus Xas Les.
28 Thaum kuv ua txoj hauj lwm ntawd tas, thiab kuv cev cov nyiaj sawv daws sau tau rau lawv tas lawm, mas kuv thiaj yuav sawv kev mus Xyis Pas Yas teb, kuv mam nres xyuas nej. 29 Thaum kuv yuav tuaj xyuas nej, kuv yuav coj Leej Pleev cov lus foom hmoov tuaj.
30 Kwv tij sawv daws, kuv tuav txog peb tus Huab Tais Yes Xus Pleev lub npe, thiab txog Leej Ntuj Plig Ntshiab txoj kev nyiam : kuv thov nej kom nej thov Tswv Ntuj rau kuv, 31 kom kuv dim ntawm cov neeg tsis ntseeg nyob Yus Das teb, thiab kom cov ntshiab pom zoo txais cov nyiaj kuv nqa mus pab lawv nyob Yes Lus Xas Les. 32 Ua li mas thaum kuv tuaj tim nej, kuv yuav zoo siab. Tswv Ntuj yuav pub ib lub caij rau kuv so nyob hauv nej. 33 Kuv thov kom tus Tswv Ntuj pub kev thaj yeeb nrog nej sawv daws nyob. Ua li !

1 Kuv thov kom nej txais peb tus muam Fes Npes zoo : nws yog tus niam tsob hwb lub Koom Txoos nyob Xees Khes Yas. 2 Nej ua zoo txais nws kom phim cov ntshiab nyob hauv Huab Tais ; nws xav ua yam twg, mas nej yuav xyiv fab pab nws, vim nws tau pov hwm cov Pleev ntau leej, thiab nws tau pab kuv.
3 Nej xa kuv cov lus hmov tshua rau Plis Xis Las thiab As Kis Las : nkawd yog ob tug tau nrog kuv ua hauj lwm nyob hauv Yes Xus Pleev. 4 Muaj ib zaug nkawd yuav luag tuag vim nkawd xav npo kuv ; tsis yog kuv tib leeg xwb yuav nco nkawd txiaj ntsim : tas cov Koom Txoos tib si nyob hauv cov neeg teev pej kum dab kuj yuav nco nkawd txiaj ntsim. 5 Nej xa kuv cov lus hmov tshua rau cov neeg uas sib sau kam nyob hauv nkawd tsev.
Nej xa kuv cov lus hmov tshua rau Es Pais Nes Tas, tus kuv nyiam : nws yog thawj tug uas As Xias teb cev rau Leej Pleev. 6 Nej xa kuv cov lus hmov tshua mus rau Mab Liab, nws tau khwv khwv pab nej .
7 Nej xa kuv cov lus hmov tshua rau As Nros Nis Kos thiab Yus Nias : nkawd yog kuv ob tug kwv tij uas tau ua kuv luag nyob hauv tsev loj faj ; nkawd yog ob tug Hauv Paus Xa Lus nto moo zoo, xub tau nyob hauv Leej Pleev dua kuv.
8 Nej xa kuv cov lus hmov tshua rau As Nplias Tos, tus kuv nyiam nyob hauv Huab Tais.
9 Nej xa kuv cov lus hmov tshua rau Us Npas Nos, tus tau nrog kuv ua hauj lwm nyob hauv Leej Pleev, thiab Xaws Tas Kws, uas kuv nyiam.
10 Nej xa kuv cov lus hmov tshua rau As Pes Les, uas nws tau ua hauj lwm loj nyob hauv Leej Pleev. Nej xa kuv cov lus hmov tshua rau cov neeg nyob hauv As Lis Tos Npus Los lub tsev. 11 Nej xa kuv cov lus hmov tshua rau kuv tus kwv Hes Los Dis Yos. Nej xa kuv cov lus hmov tshua rau cov neeg nyob hauv Nas Kis Xos tsev, nyob hauv Huab Tais. 12 Nej xa kuv cov lus hmov tshua rau Rhis Fais Nas thiab Rhis Faus Xas, uas nkawd khwv khwv nyob hauv Huab Tais. Nej xa kuv cov lus hmov tshua rau Pes Xis, tus kuv nyiam, nws khwv kawg nyob hauv Huab Tais. 13 Nej xa kuv cov lus hmov tshua rau Lus Fus, tus uas Huab Tais xaiv, thiab lus hmov txog nws niam uas yog kuv niam thiab. 14 Nej xa kuv cov lus hmov tshua rau As Xws Khis Tos, Plhos Nkos, Es Mes, Pas Thos Npas, Es Mas, thiab cov kwv tij uas nrog lawv nyob.
15 Nej xa kuv cov lus hmov tshua rau Fis Los Los Nkos thiab Yus Lias, Nes Les As thiab nws tus muam, thiab Os Lws Npas thiab cov ntshiab uas nrog lawv nyob tib si. 16 Nej sawv daws rov sib foom lus hmov tshua, sib nwj raws kev ntshiab. Leej Pleev cov Koom Txoos tib si xa lawv cov lus hmov tshua tuaj rau nej.
17 Kwv tij sawv daws, kuv thov qhia nej kom nej ceev faj mog, txhob mloog cov neeg tuaj ua kom sawv daws muaj lus sib ceg thiab muaj chaw ntog : lawv qhia txawv cov lus qhia uas nej txais. Nej txhob nrog lawv sib fim. 18 Vim cov neeg ntawd tsis tsob hwb peb tus Huab Tais Pleev ; lawv tsob hwb lawv lub plab xwb. Lawv hais tej lo lus qab zib, thiab lawv cav lus zoo txog luag tej kom tau kev ntxias cov neeg ncaj.
19 Nyob tas qhov txhia chaw, nej nto moo tias nej mloog lus zoo, nej yog kuv qhov chaw zoo siab. Tab sis kuv xav kom nej ua neeg ntse nyob hauv txoj kev ua zoo, thiab kom nej ua neeg siab dawb, tsis paub mus taug txoj kev phem. 20 Tus Tswv Ntuj pub kev thaj yeeb yuav tsuj nias nthi Xas Tas rau hauv nws qab xib taws sai. Kuv thov kom peb tus Huab Tais Yes Xus Pleev lub txiaj ntsim nrog nej nyob.
21 Tis Mos Tes, tus nrog kuv ua hauj lwm, xa nws cov lus hmov lus nco tuaj rau nej, Lus Xyus thiab Yas Xoos thiab Xos Xis Pas Rhos, uas yog kuv cov kwv tij, lawv kuj xa lawv cov lus hmov tshua tuaj rau nej. 22 Kuv, Tes Xyus, kuv xa kuv cov lus hmov tshua tuaj rau nej : yog kuv sau tsab ntawv no.
23 Nkas Yus xa nws cov lus hmov tshua tuaj rau nej : kuv txais nws los nyob hauv kuv tsev, thiab tas lub Koom Txoos txais nws. Es Las Tos, tus saib lub tsheej lub tsev ceev nyiaj, thiab peb tus kwv Kuas Tus, nkawd kuj xa nkawd cov lus hmov tshua tuaj rau nej. [24…]
25 Tswv Ntuj yog tus muaj hwj huam, nws ua kom peb nyob ruaj nreb, raws li lub Moo Zoo kuv xa tuaj, thiab raws li tus Yes Xus Pleev uas kuv tshaj txog . Yog txoj kev qhib ib yam tob, uas Ntuj muab zais tob tob txij lub hauv paus los.
26 Tiam sis, nyem no, Ntuj muab rau sawv daws pom xyeem. Cov Ntawv twb xub hais txog zaj txuj ci tob tob zais ntshis ntawd. Tswv Ntuj yeej ib txwm txiav tias, yuav ceeb toom zaj txuj ci tob tob ntawd rau txhua haiv neeg paub,
kom rub tau sawv daws los ua neeg mloog lus nyob hauv txoj kev ntseeg.
27 Tswv Ntuj ua li ntawd, vim nws tib leeg yog tus thoob tsib. Thov kom nws muaj koob meej nyob hauv Yes Xus Pleev, mus txog txhiab niag tim puas xyoo. Ua li !