-1-
1 Paj Lug, thiab Xis Vas Nus, thiab Tis Mos Tes sau ntawv tuaj rau lub Koom Txoos nyob Tes Xas Los Nis, uas nyob hauv peb Txiv Tswv Ntuj, thiab nyob hauv Huab Tais Yes Xus Pleev.
2 Thov kom Leej Txiv Tswv Ntuj, thiab Huab Tais Yes Xus Pleev, pub txiaj ntsim thiab kev thaj yeeb tuaj rau nej.
3 Kwv tij, peb yuav tsum ua Tswv Ntuj tsaug tsis tseg vim nej ; tsim nyog yuav ua tsaug, vim nej txoj kev ntseeg hlob mus zoo, thiab nej sawv daws sib nyiam sib hlub zoo zuj zus. 4 Nej ua li ntawd, mas peb muaj ntsej muag nyob hauv Tswv Ntuj cov Koom Txoos, vim tias, tab txawm nej raug luag hiam thiab raug txom nyem, mas nej nyob ruaj nreb, thiab nej ntseeg.
5 Li ntawd, Tswv Ntuj txoj kev txiav txim ncaj, tawm tuaj rau pom xyeem : nej raug txom nyem, vim Tswv Ntuj lub Ceeb Tsheej. Mas Ntuj yuav pom nej tsim nyog mus hauv lub Ceeb Tsheej.
6 Tswv Ntuj siab ncaj, cov neeg uas tau ua kom nej raug txom nyem, mas Tswv Ntuj yuav muab txoj kev txom nyem los pauj lawv. 7 Hos nej, uas nej raug txom nyem, mas Tswv Ntuj yuav pub chaw so rau nej, ib yam li nws pub rau peb. Thaum Huab Tais Yes Xus, yuav nrog cov Tshiab muaj hwj huam tawm saum ntuj los rau pom xyeem, 8 mas nws yuav nyob hauv nruab nrab ib co nplaim taws ntaiv, nws yuav ua pauj cov neeg tsis paub Tswv Ntuj, thiab tsis mloog peb tus Huab Tais Yes Xus lub Moo Zoo.
9 Thaum Huab Tais yuav rov los txais hwj chim nyob hauv nws tsoom Leej Ntshiab, thiab txais koob meej nyob hauv tsoom ntseeg, mas cov tsis mloog lub Moo Zoo thiab tsis paub Tswv Ntuj yuav raug txim mus ib txhiab ib txhis. Lawv yuav nyob deb ntawm Huab Tais xub ntiag, thiab yuav txav deb nws lub zog muaj hwj chim. 10 Hos nej yog cov neeg ntseeg peb lus zeem tseeb. Hnub ntawd, mas yuav muaj li ntawd.
11 Yog vim peb xav txog tej yam li ntawd, mas peb thiaj thov Ntuj rau nej tsis tseg ; Tswv Ntuj yuav ua kom nej tsim nyog Tswv Ntuj hu nej, nws lub hwj huam yuav pab nej ua qhov zoo, thiab pab nej ua cov hauj lwm tawm hauv kev ntseeg los. 12 Li ntawd, peb tus Huab Tais Yes Xus lub npe yuav muaj koob meej nyob hauv nws, raws li peb tus Tswv Ntuj thiab Huab Tais Yes Xus Pleev lub txiaj ntsim.
-2-
1 Kwv tij sawv daws, hais txog thaum peb tus Huab Tais Yes Xus Pleev yuav tawm los, thiab peb yuav sib sau nyob ze nws, mas kuv thov nej, kom nej txhob ntxhov siab sai. 2 Luag lam ua Yaj Saub qhia ub qhia no, nej txhob txhawj. Luag khaws tej lo lus los tej tsab ntawv, uas luag dag tias yog kuv sau. Tej lo lus ntawd ua kom nej xav tias twb txog Huab Tais lub Hnub Nyoog lawm.
3 Nej txhob cia leej twg ua kom nej yuam kev.
Yuav xub muaj ib lub caij thim Ntuj lo lus tso. Tus neeg tsis hwm Ntuj, tus niag ploj, 4 tus yeeb ncuab tiv Ntuj yuav xub tawm los rau sawv daws pom tso : nws yuav tsa nws siab dua Tswv Ntuj, siab dua txhia tus uas luag teev hawm. Nws yuav mus zaum kiag hauv lub tsev teev Tswv Ntuj, nws yuav tsa nws ua Tswv Ntuj. 5 Nej puas nco tias, thaum kuv tseem nrog nej nyob, kuv twb tau hais tej ntawd rau nej hnov ?
6 Nej twb paub tias, lub zim txwv no, yog dab tsi cheem nws, kom nws tos nws lub sij hawm, nws mam yuav tawm tau los rau pom xyeem. 7 Nyem no, kev tsis hwm Ntuj twb pib nqes tes ua hauj lwm lawm. 8 Thaum tus cheem tus tsis hwm Ntuj txav mus lawm, mas tus tsis hwm Ntuj yuav tawm tuaj rau pom. Tab sis, Huab Tais lub ncauj yuav tshuab pa rau nws, ces nws yuav ploj. Thaum Huab Tais los txog, nws lub hwj chim yuav rhuav tus tsis hwm Ntuj.
9 Thaum tus tsis hwm Ntuj yuav tuaj, yuav muaj ntau lub cim tshwm sim : yuav pom Xas Tas lub hwj huam, yuav pom ntau yam hwj huam yees ntxwv cuav. 10 Yuav pom txoj kev phem thiab txhua tsav txhua yam uas dag neeg. Cov raug kev ploj, lawv yuav txais cov lus dag ntawd, vim lawv tsis nyiam txais qhov muaj tseeb uas yuav cawm tau lawv.
11 Yog vim li ntawd, Tswv Ntuj thiaj xa ib lub hwj huam tuaj ua kom lawv yuam kev thiab coj lawv mus ntseeg tej yam dag. 12 Ces txhua leej uas tsis kam ntseeg qhov muaj tseeb, thiab txhua leej uas txais kev phem yuav raug txim.
13 Cov kwv tij uas Huab Tais nyiad, ntawm peb, mas peb yuav ua Tswv Ntuj tsaug tsis tseg vim nej. Vim txij lub hauv paus los, Tswv Ntuj xaiv nej kom nej txais kev cawm. Tswv Ntuj cawm nej nyob hauv Leej Ntuj Plig, uas yog tus ua kom neeg ntshiab tuaj, thiab Tswv Ntuj cawm nej vim nej ntseeg. 14 Tswv Ntuj hu nej los txais kev ntseeg nyob hauv peb lub Moo Zoo, kom nej tau txais peb tus Huab Tais Yes Xus Pleev lub koob meej.
15 Kwv tij sawv daws, nej nyob ruaj nreb mas ! Tej lus nej tau txais ntawm peb los, (tsis hais cov lus nej txais ntawm peb lub ncauj, los txais ntawm peb cov tsab ntawv), mas nej khaws tseg khov kho cia tas huv tib si mog !
16 Thov kom peb tus Huab Tais Yes Xus Pleev, thiab peb Txiv Tswv Ntuj nkawd nplij nej siab. Tswv Ntuj yog tus hlub peb, nws pub kev nplij mus li, thiab pub kev tso siab lom zem. 17 Thov kom nkawd nplij nej lub siab thiab nres nej tej hauj lwm, thiab nej tej lus huv tib si kom khov kho.
-3-
1 Kwv tij sawv daws, nej thov Ntuj rau peb thiab mog ! Nej thov kom Huab Tais Lo Lus mus taug nws txoj kev ntxiv, thiab kom Lo Lus nto koob meej ntxiv, ib yam li Lo Lus tau nto koob meej nyob hauv nej. 2 Nej thov Ntuj, kom peb dim ntawm cov neeg siab phem yuam kev : vim Ntuj tsis pub kev ntseeg rau sawv daws. 3 Tiam sis Huab Tais pheej xeeb : nws yuav nres nej kom ruaj nreb, nws yuav txuag nej ntawm tus phem.
4 Nyob hauv Huab Tais, peb tso siab rau nej kawg. Txhia yam peb qhia, mas nej ua raws, thiab nej yuav ua ntxiv mus. 5 Kuv thov kom Huab Tais coj nej lub siab, mus txog Tswv Ntuj txoj kev nyiam, thiab txog Leej Pleev txoj kev ruaj nreb.
6 Kwv tij sawv daws, peb tuav txog Huab Tais Yes Xus Pleev lub npe, peb thov qhia nej, kom nej txav mus deb ntawm cov kwv tij uas coj lub neej tsis haum txoj cai, thiab lawv tsis mloog txoj kev cai nej tau txais ntawm peb los. 7 Vim nej paub zoo tias, nej yuav yoog peb li cas. Thaum peb nyob tim nej, peb tsis tau coj lub neej tsis haum txoj cai.
8 Peb tsis tau kom leej twg pub mov rau peb noj dawb : peb tau ua hauj lwm nruab hnub hmo ntuj ; peb tau khwv iab khwv daw, vim peb tsis xav ua ib lub nra hnyav rau nej leej twg ris. 9 Tsis yog vim peb tsis muaj cai kom nej saib peb hnyav, tab sis, yog vim peb xav muab ib tug piv txwv rau nej yoog.
10 Thaum peb tseem nyob ze nej, peb kuj tau tsa ib txog cai tias, yog muaj ib tug neeg tsis kam ua hauj lwm, mas nws tsis txhob noj mov thiab. 11 Tiam sis nyem no, peb hnov tias, nyob tim nej muaj tej tus coj lub neej tsis haum txoj cai ntawd, lawv tsis ua hauj lwm dab tsi li, lawv tsuas xav kov tas puas tsav yam. 12 Peb thov ntuas cov neeg ntawd nyob hauv Huab Tais Yes Xus Pleev kom lawv ua hauj lwm thiab nyob twj ywm, thiab kom lawv noj cov mov uas lawv tau khwv ua.
13 Kwv tij sawv daws, ntawm nej, mas nej txhob nkees ua qhov zoo mog. 14 Yog muaj ib tug tsis ua raws li cov lus kuv qhia nyob hauv tsab ntawv no, mas nej nco ntsoov tseg, nej txhob nrog nws sib fim ntxiv kom nws txaj muag. 15 Tab sis, nej txhob saib nws yog ib tug yeeb ncuab. Nej qhuab qhia nws xws li ib tug kwv tij.
16 Thov kom kev thaj yeeb tus Huab Tais pub txoj kev thaj yeeb rau nej txhua lub sij hawm nyob hauv txhua txoj kev. Thov kom Huab Tais nrog nej sawv daws nyob.
17 Lo lus foom hmoov zoo no, yog kuv txhais tes sau, yog Paj Lug txhais tes sau. Yog lub cim ua kom paub kuv cov tsab ntawv meej. Kuv sau ntawv zoo li no.
18 Thov kom peb tus Huab Tais Yes Xus Pleev lub txiaj ntsim nrog nej sawv daws nyob.