Yes Xus, Tswv Ntuj tus cawm yog cov zaj kuv tau npaj tseg thiab tshaj lus tawm nyob hauv lub tshaj xo ZOO TSWV ZOV YAJ txij hnub tim 3 lub 12 hlis 2024 mus txog hnub tim 27 lub 5 hlis 2025. Cov lus hauv no yog muab hauv phau Ntawv Ntshiab 2002 los. Cov zaj muaj tag nrho 50 zaj hais txog puag thaum lub hauv paus Tswv Ntuj tsim lub ntuj lub teb, ces Tswv Ntuj tsim ob niam txiv hauv paus. Nkawd tsis mloog Tswv Ntuj hais, mas nkawd tau ua txhaum, ces txoj kev tuag thiaj poob los raug ntiaj teb neeg. Tab sis Tswv Ntuj hlub neeg, Tswv Ntuj thiaj li cog lus tseg tias muaj ib hnub yuav xa tus tuaj cawm neeg ntawm txoj kev txhaum, txhiv neeg hauv txoj kev tuag. 
Tswv Ntuj tau npaj ib haiv neeg mloog Tswv Ntuj lus los ua haiv neeg Tswv Ntuj yuav xa tus cawm seej yug los hauv haiv neeg ntawd. Haiv neeg ntawd yog haiv His Xas Lais.
Thaum txog lub caij teem, Tswv Ntuj xa nws Leej Tub Twm Zeej tuaj yug hauv haiv His Xas Lais, yog ‘Yes Xus’.
Yes Xus tuaj tshaj Tswv Ntuj lub Ceeb Tsheej 3 xyoos rau nws haiv neeg, tab sis cov nom thiab cov thawj coj tsis mloog Yes Xus, lawv muab nws tua zaum ntoo cuam. Yes Xus txoj kev tuag saum ntoo cuam thiaj yog qhov txhiv tus ntseeg txog nws hauv lawv txoj kev tuag.
Yes Xus tuag 3 hnub, nws sawv rov los thiab nce mus saum ntuj. Yes Xus hais txib cov thwj tim kom tawm mus tshaj lub Moo Zoo kom thoob qab ntuj. Tus ntseeg txog Yes Xus thiab ua raws li Yes Xus qhia, Yes Xus yuav ua tus cawm lawv.
Vam tias cov zaj hauv no yuav pab tau rau tus nyeem kom nws to taub txog cov xwm hais txog Yes Xus lub neej zoo dua tuaj.