-1-
1 Wb yog Paj Lug thiab Tis Mos Tes, Yes Xus Pleev ob tug tub txib. Wb sau ntawv tuaj rau cov ntshiab hauv Yes Xus Pleev, uas nyob Fis Lis Pos, thiab rau cov txiv saib lub Koom Txoos, thiab cov tub tsob hwb. 2 Thov kom peb Txiv Tswv Ntuj, thiab Huab Tais Yes Xus Pleev, pub txiaj ntsim thiab kev thaj yeeb rau nej.
3 Kuv nco txog nej thaum twg, mas kuv ua kuv tus Tswv Ntuj tsaug thaum ntawd. 4 Kuv zoo siab thov Ntuj rau nej tsis tseg, 5 vim kuv nco tias, txij thawj hnub los txog tav no, nej tau nrog kuv tshaj lub Moo Zoo. 6 Kuv paub tseeb tias, tus tau pib ua hauj lwm nyob hauv nej, nws tau ua ib txoj hauj lwm zoo kawg, thiab nws yuav ua kom tiav, mus txog Yes Xus Pleev lub Hnub Nyoog. 7 Tsim nyog kuv yuav zoo siab rau nej, vim kuv puag nej rau hauv kuv nruab siab. Tab yog thaum saw hlau khi rawv kuv, los kuv qhia lub Moo Zoo, mas nej nrog kuv koom ib lub siab, thiab nrog kuv txais Tswv Ntuj lub txiaj ntsim.
8 Tswv Ntuj ua tim khawv tau tias, kuv hlub nej mos nyoos nyob hauv Yes Xus Pleev lub siab. 9 Kuv thov Ntuj li no : thov kom nej txoj kev nyiam Ntuj hlob zuj zus, thiab nej paub zaj txuj ci tseeb, kom nej txawj xav, 10 mas nej thiaj li yuav pom tau qhov zoo tshaj, thiab yuav ua neeg siab dawb siab huv, kom tsis txhob muaj ib qho xyeej nyob hauv nej, mus txog Leej Pleev lub Hnub Nyoog. 11 Nej yog ib co txiv ntoo siav hauv txoj kev ncaj, uas Leej Pleev muab rau peb ris kom Tswv Ntuj nto koob meej, thiab kom sawv daws cav lus zoo txog Tswv Ntuj.
12 Kwv tij, kuv xav kom nej paub tias, zaum no, mas rooj plaub, uas lawv ua rau kuv, tau pab lub Moo Zoo lawm. 13 Nyob hauv lub loog txiav txim, thiab nyob tas qhov txhia chaw, kuv cov saw hlau tau koob meej nyob hauv Leej Pleev. 14 Hos cov kwv tij coob leej, lawv lub siab kuj loj tuaj nyob hauv Huab Tais, yog vim cov saw hlau ntawd. Lawv tsis ntshai, lawv haj yam muaj cuab kav tshaj Lo Lus rau sawv daws hnov. 15 Hais qhov tseeb, mas muaj ib txhia tshaj Lo Lus vim lawv khib, ces vim lawv xav twv kom yeej. Tab sis, lwm cov, mas yog lub siab ncaj ua kom lawv tshaj txog Yes Xus. 16 Ntawm cov siab ncaj no, mas yog txoj kev nyiam txhib lawv ua hauj lwm : lawv paub tias, kuv tau txoj hmoov txuag lub Moo Zoo nyob hauv cov saw hlau. 17 Hais txog cov neeg khib, thiab cov xav twv, mas lawv siv ib lub tswv yim nkhaus los tshaj txog Leej Pleev. Lawv lub siab tsis dawb, lawv xav tias, lawv ua li ntawd, mas kuv cov saw hlau yuav hnyav dua. 18 Xij peem ! Tab txawm muaj tus ua zoo nraum daim tawv, los muaj tus siab ncaj, mas tsuav tsoom sid tau hnov tshaj txog Leej Pleev. Ces kuv zoo siab lawm. 19 Kuv yuav zoo siab mus li, vim kuv paub tias, tej xwm ntawd yuav pab cawm kuv, vim nej thov Ntuj rau kuv, thiab kuv muaj Yes Xus Pleev lub Tswv Yim pab kuv. 20 Kuv tso siab tas zog tias, yuav muaj li ntawd tiag : tsis muaj dab tsi yuav ua tau kom kuv poob ntsej muag. Kuv yuav muaj lub siab ruaj mus li. Tab yog kuv ciaj los tuag, mas Leej Pleev yuav muaj hwj chim nyob hauv kuv lub cev.
21 Kuv saib Leej Pleev yog kuv txoj sia. Kuv saib txoj kev tuag yog ib yam paj tshab. 22 Tsis kav, yog kuv lub cev ua neej nyob ntxiv, nws tseem yuav ua ib yam hauj lwm txi txiv ; mas kuv tsis paub tias, kuv yuav xaiv txoj kev ua neej nyob ntxiv, los txoj kev tuag. 23 Kuv hnov ob lub siab ua xyem xyav muab kuv dua ua ob sab : ib lub siab xav mus nrog Leej Pleev nyob, qhov ntawd yog qhov kuv nyiam dua. 24 Tiam sis, yog kuv lub cev ua neej nyob ntxiv, mas yuav zoo dua rau nej. 25 Li ntawd, kuv tsis ua xyem xyav lawm : kuv paub tias, kuv yuav ua neej nyob ntxiv, kuv yuav nyob ze nej sawv daws, kuv yuav pab nej, kom nej ntseeg tob dua, thiab kom nej zoo siab ntseeg. 26 Ua li mas thaum kuv rov tuaj, nrog nej nyob, nej yuav rov muaj ntsej muag, nyob hauv Yes Xus Pleev.
27 Nej yuav coj ib lub neej kom tsim nyog Leej Pleev lub Moo Zoo, txawm tias kuv tuaj txog hauv nej, los kuv tseem nyob deb nej kuj xij, kuv yuav pom thiab yuav hnov tias nej koom ib lub tswv yim, koom siab koom ntsws tawm tsam pab txoj kev ntseeg txog lub Moo Zoo. 28 Nej tsis ntshai cov neeg sawv tiv nej. Nej yuav paub tias, cov neeg ntawd yeej yuav ploj, hos nej yuav txais kev cawm. 29 Tej ntawd tuaj ntawm Tswv Ntuj tuaj. Vim Ntuj tau pub lub txiaj ntsim rau nej kom nej ntseeg txog Leej Pleev, thiab kom nej raug txom nyem rau nws.
30 Vim nej ua li ntawd, mas nej tau tawm tsam ntaus ib ntsug rog, ib yam li nej tau pom kuv ua los txog tav no, thiab nej paub tias, nyem no, kuv tseem tawm tsam tiv ntsug rog ntawd.
-2-
1 Kuv taij nej tsis tseg kom nej rov sib nplij nyob hauv Leej Pleev, sib nres nyob hauv txoj kev nyiam, sib koom nyob hauv Leej Ntuj Plig, kom nej muaj kev sib hlub thiab sib khuv leej. 2 Nej ua kom kuv txoj kev zoo siab puv phwj yaws : ua li mas nej yuav muaj tib lub siab xav, tib lub siab nyiam, tib tug plig, thiab tib lub tswv yim xwb. 3 Nej tsis txhob swb txoj kev ua ob peb lub siab, txhob swb lub koob meej cuav : nej nyias yuav saib nyias yog tus me dua cov, yuav saib luag tej loj dua nej. 4 Nej nyias txhob nrhiav yam zoo rau nyias ; yuav nrhiav yam zoo rau luag.
5 Nyob hauv nej, sawv daws yuav muaj tib lub tswv yim zoo li Yes Xus Pleev lub.
6 Yes Xus Pleev yog Tswv Ntuj ; tiam sis nws tsis cia nws lub hwj chim Tswv Ntuj rau luag hawm : nws muab nws lub hwj chim hle.
7 Nws yeem ua ib tug qhev, nws yug los ua neeg xws li ib tsoom neeg. Luag pom nws tus yam ntxwv yog yam ntxwv tib neeg.
8 Nws txo nws qis : nws tuaj yeem mloog Ntuj lus mus txog qhov tuag, thiab tseem xaiv txoj kev tuag saum ntoo cuam.
9 Vim li ntawd, mas Tswv Ntuj thiaj tsa Yes Xus ua ib tug loj nyob siab siab. Tswv Ntuj muab lub npe uas nyob siab dua lwm cov rau nws.
10 Li ntawd, tus twg hnov tuav txog Yes Xus lub npe, tsis hais nyob saum cov txheej ntuj, los nyob ntiaj teb no, los nyob nruab yeeb, mas tus ntawd cia li txhos caug hawm.
11 Txhua xeem lus yuav tsum cav tias Yes Xus Pleev yog Huab Tais : Leej Txiv Tswv Ntuj thiaj muaj koob meej nto moo lug.
12 Kuv cov kwv tij zoo nyiam, los txog tav no, nej tau mloog lus zoo kawg ; tsis yog thaum kuv nrog nej nyob xwb, thaum kuv nyob deb lawm, mas nej haj yam yuav coj tus yam ntxwv mloog lus zoo. Nej rau siab ntso nrhiav txoj kev cawm neeg : nej yuav txhawj tshee na tsam nej tsis tau txais kev cawm. 13 Tswv Ntuj nrog nej nyob, nws ua hauj lwm nyob hauv nej ; nws txhib nej kom nej xav ua zoo, thiab kom nej ua tau raws li tus nru lus nws npaj rau nej.
14 Nej ua yam dej num twg los nej tsis txhob yws, tsis txhob cav ncauj ; 15 kom nej tau ua ib co neeg siab dawb siab huv, tsis muaj chaw xyeej. Nej ua Tswv Ntuj cov me nyuam tsis lo txhaum, nyob nruab nrab ib tiam neeg siab nkhaus thiab xib rau kev phem ; nej yuav ci li tej lub hnub qub ci pom kev kaj lub ntiaj teb, nej yuav cev Lo Lus pub txoj sia rau ntiaj teb neeg. 16 Yog nej ua li ntawd, mas nej npaj kom thaum txog lub Hnub Nyoog Leej Pleev rov los txog, kuv tau koob meej, vim kuv tsis tau khiav dag, thiab tsis tau nkim zog khwv. 17 Tab yog kuv cov ntshav yuav tsum ntws tawm los ua ib co txim txi Ntuj pab nej ntseeg, los kuv zoo siab, vim kuv nrog nej zoo siab.
18 Ntawm nej, los nej kuj txaus siab thiab nrog kuv zoo siab.
19 Kuv muaj chaw vam ntsoov nyob hauv Huab Tais Yes Xus tias, tshuav tsis ntev, kuv yuav xa Tis Mos Tes tuaj xyuas nej, vim kuv xav hnov nej moo, kuv lub siab thiaj nqig. 20 Kuv tsis muaj lwm tus neeg uas yuav muaj lub siab ncaj, thiab yuav xyiv fab npuab nej txoj kev ua neej. 21 Lwm cov, mas sawv daws nyias nrhiav yam zoo rau nyias xwb, tsis nrhiav yam zoo rau Yes Xus Pleev. 22 Hos Tis Mos Tes, mas nej yeej paub lawm, nws ua ntau yam txaus peb tso siab rau nws. Thaum nws nrog kuv tsob hwb lub Moo Zoo, mas nws ua xws li ib leeg tub ua rau nws txiv. 23 Li ntawd, cia kuv hauj lwm sib me ntsis thiab pom kev zoo nyob hauv kuv tej hauj lwm tso, ces kuv yuav tso Tis Mos Tes tuaj xyuas nej. 24 Kuv tso siab lug nyob hauv Huab Tais tias, kuv yuav tau tuaj xyuas nej thiab.
25 Kuv xav tias yuav tsum xa Es Pas Fos Dis rov los tim nej ; tus kwv ntawd tau ua kuv luag ua hauj lwm thiab ntaus rog. Nej tau tso nws tuaj sawv nej chaw pab kuv lub caij kuv tshaib nqhis. 26 Nws nco nej kawg, txij hnub nws hnov tias nej paub nws muaj mob, mas nws nyob tsis tswm ntawm no li lawm. 27 Nws mob hnyav kawg, nws twb yuav luag tuag, qhov no muaj tseeb. Tab sis Tswv Ntuj khuv leej nws, thiab khuv leej kuv : mas Tswv Ntuj thiaj txuag kom kuv tsis txhob raug ntau txoj kev tu siab.
28 Li ntawd, kuv xa nws rov qab los rau nej. Thaum nej pom nws, nej yuav zoo siab, thiab kuv txoj kev ntxhov siab yuav yau mus. 29 Nej xyiv fab txais Es Pas Fos Dis nyob hauv Huab Tais mog ; tej tus neeg zoo li ntawd, mas nej yuav saib lawv muaj nqis. 30 Yog vim nws ua Leej Pleev cov hauj lwm, mas nws thiaj yuav luag tuag : yog vim nws sawv nej chaw tuaj ua ib txog hauj lwm uas nej ua tsis tau, mas nws thiaj yuav luag plam nws txoj sia.
-3-
1 Kuv cov kwv tij, qhov kawg no, mas nej nyob kaj siab lug hauv Huab Tais mog ! Rov qab ntuas nej zoo li qub, mas tsis yog ib qho nyuaj rau kuv. Tej lus ntuas no, kuj ua kom nej nyob nyab xeeb dua qub. 2 Nej ceev faj rau cov dev ! Nej ceev faj rau cov tub zog phem ! Nej ceev faj rau cov txais lub cim txiav cuav ! 3 Cov txais lub cim txiav yog peb, vim peb cev ib txoj hauj lwm teev Ntuj raws li Tswv Ntuj Leej Ntuj Plig ; peb tau lub hwj chim hauv Yes Xus Pleev los ; peb tsis tso siab rau lub cev nqaij.
4 Kuv muaj chaw tso siab rau lub cev nqaij ; yog muaj tej tus xav tias, lawv muaj chaw tso siab rau lub cev nqaij, mas kuv haj yam muaj chaw tso siab ! 5 Kuv nyuam qhuav yug tau puv yim tag kis, ces kuv txais lub cim txiav, kuv yog haiv neeg His Xas Lais, yog xeem Npes Yas Mis. Kuv yog ib tug Hes Nplaws, yug ntawm ib tug Hes Nplaws los. Hais txog Txoj Cai, mas kuv yog ib tug Fas Lis Xais. 6 Hos hais txog txoj kev kub siab, mas kuv yog ib tug tau hiam lub Koom Txoos. Hais txog txoj kev ncaj, uas Txoj Cai pub tau, mas kuv yog ib tug neeg tsis muaj chaw xyeej. 7 Tej yam zoo uas kuv tau txais no, mas kuv saib xws li yog tej yam tsis zoo, vim Leej Pleev.
8 Nyem no, kuv saib txhua yam tsis muaj nqis, vim kuv muab piv rau ib yam muaj nqe tas nrho, yog txoj kev paub Yes Xus Pleev, kuv tus Huab Tais. Vim nws, mas kuv tau tso tas ib puas tsav yam pov tseg ; kuv saib tas puas tsav yam tsis muaj qab hau, vim kuv xav tau Leej Pleev. 9 Kuv xav kom Tswv Ntuj ntsib kuv nyob hauv Leej Pleev. Kuv tsis muaj ib txog kev ncaj ua kuv tug ; kuv tsis muaj txoj kev ncaj tuaj ntawm Txoj Cai tuaj. Kuv tsuas muaj txoj kev ncaj tuaj ntawm txoj kev ntseeg txog Leej Pleev thiab ntawm Tswv Ntuj tuaj xwb, yog txoj kev ncaj uas nrhau cag rau hauv txoj kev ntseeg. 10 Kuv xav paub Leej Pleev, xav paub nws txoj kev sawv rov los muaj zog npaum li cas, xav npuab nws nyob hauv nws txoj kev raug txom nyem, thiab kuv xav yoog nws tus piv txwv nyob hauv txoj kev tuag, 11 saib kuv puas yuav sawv tau hauv cov tub tuag rov los.
12 Kuv tsis hais tias, kuv twb mus txog chaw lawm, los kuv twb zoo txhij zoo txhua tas lawm. Kuv khiav ntxiv kom kuv tuav tau Leej Pleev, vim Yes Xus Pleev twb tuav tau kuv lawm. 13 Kwv tij, kuv tsis khav tias, kuv tuav tau Leej Pleev lawm. Kuv tsuas hais li no : kuv hnov qab tias, kuv tau khiav kev deb li cas lawm. 14 Kuv khoov cev ncaj qha khiav mus rau tom hauv ntej, kuv tso sas ntws kom mus txog chaw, vim kuv pom cov paj tshab, uas Tswv Ntuj hu peb mus txais nyob txheej saud, nyob hauv Yes Xus Pleev.
15 Peb sawv daws yog neeg hlob tiav lawm, mas peb yuav xav tswv yim zoo li ntawd. Yog nej xav tswv yim txawv, mas Tswv Ntuj yuav qhia nej, kom nej pom txog qhov ntawd. 16 Tab txawm peb khiav mus txog qhov twg, mas peb tsuas rhais ruam mus taug tib txog kev li qub.
17 Kwv tij sawv daws, nej yoog raws li kuv tus lwj lwm mog. Nej ntsia ntsoov cov neeg ua raws li peb tus piv txwv. 18 Kuv hais zoo li ntawd rau nej, yog vim muaj ntau leej ua xws li lawv yog cov yeeb ncuab ntxub Yes Xus tus ntoo cuam. Thaum kuv hais qhov ntawd rau nej, mas kuv kua muag poob. 19 Cov neeg ntawd, lawv kawg yuav poob rau hauv txoj kev tuag xwb. Lawv tus huab tais, yog lawv lub plab. Lawv muab tej yam phim yuav txaj muag los khav. Lawv tsuas nyiam tej yam nyob ntiaj teb no xwb. 20 Ntawm peb, mas peb lub tsheej nyob saum ntuj, vim peb tos Huab Tais Yes Xus Pleev yuav los cawm peb ; 21 nws yuav muab peb lub cev txom nyem no hloov ua ib lub cev muaj hwj chim, xws li nws lub. Nws ua li ntawd tau, vim nws muaj hwj huam tswj txhua tsav txhua yam.
-4-
1 Kuv cov kwv tij zoo nyiam, nej yog kuv qhov chaw zoo siab, yog kuv lub koob meej. Nej nyob ruaj nreb hauv Huab Tais mog .
2 Kuv thov ntuas Es Vos Dias thiab Xws Nthws Kes, kom nkawd sib haum xeeb nyob hauv Huab Tais. 3 Thiab koj, koj yog tus tseem phooj ywg, koj pab ob tug poj niam ntawd, vim nkawd tau pab kuv ntaus tsam xa lub Moo Zoo. Nkawd pab kuv, ib yam li Khes Mees, thiab cov tau nrog kuv ua hauj lwm, uas lawv lub npe tshwm nyob hauv phau ntawv txheeb txoj sia. 4 Nej yuav zoo siab mus li nyob hauv Huab Tais. Kuv rov hais dua tias nej zoo siab tiag mog !
5 nej yuav ua kom sawv daws paub tias, nej txawj yuav luag siab, vim Huab Tais los txog ze lawm. 6 Nej tsis txhob txhawj dab tsi. Thaum nej thov Ntuj, thiab nej teev Ntuj, mas nej kuj yuav ua Ntuj tsaug. Thiab tej yam nej xav tau, nej yuav hais rau Tswv Ntuj paub.
7 Tswv Ntuj txoj kev thaj yeeb zoo tshaj qhov yus xav tau : nws txoj kev thaj yeeb yuav txuag nej lub siab thiab nej lub tswv yim kom nyob hauv Yes Xus Pleev.
8 Kwv tij sawv daws, tej yam muaj tsim, tej yam ncaj, tej yam huv, tej yam zoo nyiam, tej yam tsim nyog hwm, tas txhia yam zoo uas neeg ua thiab neeg cav txog, mas nej yuav ntshaw tas zog. 9 Txhua yam nej tau kawm ntawm kuv, thiab nej tau txais, los nej hnov ntawm kuv, thiab nej pom nyob hauv kuv, mas nej yuav xyaum coj tas huv tib si. Ces tus Tswv Ntuj pub kev thaj yeeb yuav nrog nej nyob.
10 Kuv pom nej rov xyiv fab pab kuv, mas kuv zoo siab hauv Huab Tais : nej lub siab yeej xav pab kuv, tab sis, tau ntev los, nej nrhiav tsis tau ib txog kev pab kuv.
11 Kuv hais li no, kuj tsis yog vim kuv txoj kev tshaib nqhis ; vim tias, kuv tau xyaum ua neeg txaus siab rau yam tsawg uas kuv muaj. 12 Kuv txawj yoo mov, ib yam li kuv txawj noj kom tsau thaum muaj txhiam xws txaus noj seem noj so. Tsis hais thaum twg, kuv tau xyaum yoog lub caij muaj noj muaj haus ib yam li yoog lub caij tshaib nqhis, kuv yoog txoj kev nplua nuj, ib yam li yoog txoj kev pluag. 13 Kuv ua tau tas puas tsav yam nyob hauv tus ua kom kuv muaj zog. 14 Tab sis, thaum kuv raug kev txom nyem, nej tau pab kuv, mas nej tau ua zoo kawg.
15 Cov Fis Lis Pos, nej yeej paub tias, thaum lub Moo Zoo nyuam qhuav tuaj txog, kuv tso Mas Xes Dos Nias tseg, tsis muaj ib lub Koom Txoos xa nyiaj txiag tuaj pab kuv, tsuas muaj nej xwb. 16 Thaum kuv nyuam qhuav tuaj txog Tes Xas Los Nis, nej tau xa ob zaug, xa ntau yam zoo tuaj rau kuv siv. 17 Kuv tsis nrhiav paj tshab : kuv tsuas xav kom nej txi ib lub txiv zoo, hlob zuj zus.
18 Tam sis no, kuv muaj txhij txhua, txaus kuv siv, tseem muaj ntau dua kuv tej chaw siv. Txij thaum Es Pas Fos Dis muab nej cov paj tshab rau kuv lawm, mas kuv muaj ntau yam dhau : nej cov paj tshab yog zoo li ib co tshauj tsw qab, thiab ib thaj txi Ntuj uas Tswv Ntuj txais, thiab xis nws siab. 19 Kuv tus Tswv Ntuj pom tias, nej yuav tsum muaj dab tsi, ces nws yuav pub tej ntawd rau nej, nws yuav pauj qhov nej pub rau kuv, vim nws nplua nuj, thiab nws siab dav nyob hauv Yes Xus Pleev. 20 Tus Tswv Ntuj no yog peb Leej Txiv, nws muaj koob meej nto moo mus txog txhiab niag tim puas xyoo. Ua li.
21 Nej xa peb cov lus hmov tshua mus rau cov ntshiab hauv Yes Xus Pleev huv tib si. Cov kwv tij nrog kuv nyob, lawv sawv daws xa lawv cov lus hmov tshua tuaj rau nej. 22 Cov ntshiab kuj xa lawv cov lus hmov tshua tuaj rau nej. Cov nyob hauv Xes Ntxas tsev, sawv daws xa lawv cov lus hmov tshua tuaj.
23 Huab Tais Yes Xus Pleev lub txiaj ntsim nrog nej tus ntsuj plig nyob !