HMONG CATHOLIC

HMOOB KAV TOS LIV

    • QHIB HNUB

    A: Kuv tus Tswv Ntuj, thov koj qhib kuv qhov ncauj.
    B: Kom kuv tau cav txog koj lub koob meej.
    C: Huab Tais Leej Txiv, Huab Tais Leej Tub, Huab Tais Leej Ntuj Plig, muaj koob meej nto moo lug lub zim txwv no mus txog fab lwm txheej xws li txheej laus thaud los.

    CAIJ TOS HUAB TAIS

    1. CUAB ZAJ
    A: Huab Tais muaj hwj huam, koj coj peb rov los cuag koj.
    B: Koj ua koj lub ntsej muag ci tuaj txog lub ntiaj teb, peb yuav dim.
    C: Koj yog tus tuaj rov ntxiv zog rau peb.
    D: Koj cov pej xeem huab hwm zoo siab nyob hauv koj.
    E: Tas lub ntuj lub teb cav lus zoo txog tus tuaj ntawm Huab Tais tuaj.
    F: Sawv daws cav lus zoo txog lub Ceeb Tsheej tab tom tuaj.

    2. ZAJ HU NKAUJ
    A: Leej Lo Lus tawm ntawm Leej Txiv lub xub ntiag los.
    Yav kawg no Yes Yus ci nyob saum ntuj tuaj.
    Nws tsa peb ntsuj plig tsaug zog nyob nruab a,
    kom peb nyiam nws lub Ceeb Tsheej nyob mus li.
    B: Ntuj tso nws tus Yaj tuaj them peb nuj nqes,
    peb khaub zig thov nplawg ntia tus Yaj siab zoo,
    peb tsis saib tsis nyiam tej yam txawj ploj nyob saum yaj no,
    txoj kev kaj thiaj tuaj nyab peb tej siab ntsws.
    C: Thaum Yes Xus rov los ci vog xws li xob laim.
    Lub ntiaj teb yuav ntshai mus raug txim nyob hauv nplaim taws.
    Peb yuaav hnov tus Yaj lub suab nqee
    hu peb mus pom Tswv Ntuj lub ntsej muag.
    D: Peb cav txog Huab Tais Leej Txiv nrog Leej Tub thiab Leej Nplij Neeg
    muaj hwj huam koob meej nto moo lug mus tiam dhau tiam. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Ib lub suab nrov hauv teb chaws suab puam tuaj tias:
    Nej npaj txoj kev ncaj kev du rau tus Huab Tais yuav tuaj.
    Peb sawv daws thov Huab Tais,
    Huab Tais, koj tuaj mas, koj muab koj lub hwj huam rau peb pom, koj npo peb ntawm peb cov txhaum.
    Koj pov hwm peb, peb thiaj yuav tsis raug xwv txheej vij peb.
    Koj cawm peb, peb thiaj yuav dim.
    Peb vam txog koj uas koj nrog Leej Txiv thiab nrog Leej Ntuj Plig Ntshiab muaj txoj sia, thiab ua vaj nyob mus li tas txhiab niag tim puas xyoo. Ua li.

    CAIJ HUAB TAIS YUG LOS

    1. CUAB ZAJ
    A: Qhov pom kev ci tuaj nyob hauv qhov tsaus ntuj.
    B: Tswv Ntuj lub txiaj ntsim tawm tuaj.
    C: Nws cawm tau txhua leej txhua tus.
    D: Nws qhia peb tso txoj kev thuam Ntuj,kev ntshaw ntiaj teb tej yam phem tseg.
    E: Kom peb coj lub neej yoog noj yoog haus,ua ncaj ua ncees, hwm Ntuj hwm neeg.
    F: Kom peb tso siab tos txog hnub nyoogYes Xus Pleev rov muaj hwj chim.

    2. ZAJ HU NKAUJ
    A: Kuv xa Moo Zoo tuaj tias tus cawm lub ntiaj teb yug los nyob ze nej.
    Hmo no lub ntuj tso lub txiaj ntsig nyiaj ntsig kub nqes los.
    Lub ntiaj teb nrhau tus Txoov Kaus, lub ntuj tawg lub paj tshiab nra.
    Cov neeg siab ncaj pom txoj kev kaj tawm hauv nruab tsaus ntuj tuaj.
    B: Cov phooj ywg zov yaj, nej pom tsav tsim nuj dab tsi,
    pom Ntuj Saub Nraug Suav muaj Leej Txiv lub txiaj ntsim
    sais zim sua yeev tuaj saum di ncauj.
    Tus faib noj rau lub sim ceeb
    tuaj pw hauv Nkauj Tsim Txiaj xub ntiag.
    Tus pheej toj roob hauv pes tsim nkauj hnub nraug hli
    tsaug zog saum nroj saum tsuag.
    C: Ntxhais zag nkauj sua tau Ntuj txoj hmoov ntxoov koj,
    tus lub ntuj ntim tsis tau koj suab nws ua koj Leej Tub.
    Koj yog tus vaj muaj lub npe nto moo mus li.
    Vim koj tuaj yeem ua Tswv Ntuj ntxhais txib,
    koj tau ua Tswv Ntuj niam.
    D: Yes Xus uas koj yug ntawm Nkauj Ntshiab los,
    koj nrog Leej Txiv thiab Leej Ntuj Plig
    muaj koob meej nto moo lug mus txheej dhau txheej. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Leej Lo Lus yuav ib lub cev neeg.
    Leej Lo Lus tuaj nrog peb nyob.
    Peb sawv daws thov Huab Tais,
    Tswv Ntuj muaj hwj huam, peb thov kom koj Leej Tub yug los ua neeg cawm peb, vim txij lub hauv paus los peb ua neeg raug txim zwm kev txhaum.
    Peb vam txog peb tus Huab Tais Pleev. Ua li.

    YES XUS TAWM TUAJ

    1. CUAB ZAJ
    A: Yes Lus Xas Les, koj sawv! Koj lub hnub tawm tuaj.
    B: Koj txais nws qhov pom kev tuaj ziab txog koj.
    C: Koj tsa muag ntsia ib ncig koj,
    D: koj cov tub sawv kev deb tuaj cuag koj,
    koj cov ntxhais khiav nplawg ntia tuaj.
    E: Koj pom lawv tuaj koj puv siab.
    F: Koj lub ntsej muag ci ntsa luag nyav.

    2. ZAJ HU NKAUJ
    A: Hnub no Leej Pleev tawm tuaj puav tam li tus vaj tswj tas tsoom vaj,
    nws lub hnub qub ci dua nkauj hnub coj cov kws txuj tuaj txog lub zos Npes Les Hes.
    Rooj ntug qhib ncaj saum Tswv Ntuj tus Yaj nqes hauv dej Yos Las Das.
    Rau hnub dej mloog Leej Pleev lus txia ua cawv nyob Kas Nas.
    B: Tswv Ntuj tsoom tub, nej nqa paj tshab tuaj rau Huab Tais.
    Nej muab nyiaj muab kub lost sob hwb nej tus vaj.
    Nej cev txab txiv yoov rau Tswv Ntuj tus Thawj Leej Choj.
    Nej npaj nqa tshuaj qhwv tuag rau tus tuaj yeem mus zwm ntxa.
    C: Tas ntiaj teb cov haiv neeg cov Huab Tais nej tso kev khib kev muab hlob tseg.
    Txhob ua tus vaj tsis hwm ntuj muab cov me nyuam siab dawb tua.
    Nej taug lub hnub qub qhia kev mus txog Leej Pleev nrog nws niam tos nej.
    Nej thau paj tshab zoo ntawm nej siab los cev rau nws.
    D: Yes Xus uas koj tab meeg tawm tuaj rau tas txhua haiv neeg pom,
    koj nrog Leej Txiv thiab Leej Ntuj Plig Ntshiab muaj txoj sia thiab ua vaj nyob mus li tas txhiab niag tim puas xyoo.
    Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Tas Xis, As Las Npias, Xas Npas lawv cov vaj nqa nyiaj nqa kub tuaj rau Huab Tais.
    Cov vaj kav pov txwv nqa paj tshab tuaj cev rau nws.
    Peb sawv daws thov Huab Tais,
    Tswv Ntuj, lub hnub nyoog no koj ib lub hnub qub coj cov haiv neeg tuaj mus pom koj Leej Tub. Peb cov neeg ntseeg txog koj thov koj coj peb mus ntsia koj lub hwj chim mus li.
    Peb vam txog peb tus Huab Tais Yes Xus Pleev uas nws yog koj tus tub, nws nrog koj thiab nrog Leej Ntuj Plig Ntshiab muaj txoj sia, thiab ua vaj nyob mus li tas txhiab niag tim puas xyoo. Ua li.

    CAIJ PLAUB CAUG

    1. CUAB ZAJ
    A: Koj lub siab zoo Huab Tais, koj zam rau kuv.
    Koj lub siab hlub neeg Huab Tais, koj so kuv cov txhaum.
    B: Kuv ua txhaum rau koj ib leeg xwb, muaj tej yam koj ntsia yog tsis zoo kuv twb ua lawm.
    C: Kuv paub kuv cov txhaum kuv tsis zais, kuv cia li lees kuv cov txhaum nyob ntawm kuv xub ntiag tsis tseg.
    D: Koj ntsia, txij thaum kuv niam xeeb kuv los kuv siab dub.
    Koj ntsia, txij thaum kuv yug los kuv muaj txim.
    E: Koj ntxuav kuv kom kuv dawb dua daus, koj muab koj cov dej los yaug kuv kom kuv ntshiab tuaj.
    F: Kuv lub siab ntxhov hnyo, kuv cov pob txha ntsoov lis ntxaws, koj hais tej lo lus zoo rau kuv mloog kuv lub siab yuav kaj.
    G: Huab Tais, koj tsis txhob ntiab kuv mus deb ntawm koj xub ntiag, koj tsim ib lub siab huv lis si los cog rau kuv.
    H: Koj cawm kuv mas, kuv rov paub txoj kev lom zem; koj pub ib lub siab loj rau kuv mas, kuv rov paub txoj kev kaj lug.
    I: Kuv yuav qhia koj txoj kev zam rau cov neeg txhaum; cov neeg yuam kev yuav rov qab los cuag koj.
    J: Kuv muab yam twg txi koj lost sis xis koj lub siab, kuv hlawv yam twg rau koj los koj tsis yeem yuav.
    K: Koj tsis luag ib tug neeg kho siab, koj tsis thuam ib tug neeg lwj plawv.
    Qhov kuv yuav txi rau koj yog kuv lub plab plaw lwj.
    L: Koj lub siab zoo, koj pub txiaj ntsim rau Xis Yoos, koj rov qab tsa Yes Lus Xas Les nyob hauv nws lub yeej.
    M: Peb rov tuaj ncig koj lub thaj, peb muab tus yaj ntshiab los txi koj rov zoo siab txais.

    2. ZAJ HU NKAUJ
    A: Lub hnub tawm tuaj yuam qhov tsaus ntuj khiav,
    lub ntiaj teb rov sawv tshiab mos nyoos tuaj.
    Yes Xus, koj yog lub hnub cawm lub qab ntuj neeg,
    koj ci iab tuaj kaj peb lub tswv yim.
    B: Koj coj peb rov qab los txog lub sij hawm zoo no,
    yog lub sij hawm peb rov tig los npuab koj.
    Koj pab peb yuam peb lub siab tsis zoo,
    koj thiab peb lub tswv yim kom nyob siab.
    C: Peb lub siab ua txhaum xws li lub qhov dej txhawv.
    Lub sij hawm no peb cov hauj lwm them txim
    yuav zuaj peb lub siab tawv kom muag,
    thiab tsim nyog peb yuav muab txi rau Ntuj.
    D: Rov txog lub caij tas txhua yam hlav nplooj tawg paj,
    txoj sia tshiab rov tuaj yug tas lub qab ntuj.
    Vaj Peb Leeg, nej hwj peb rov los taug txoj kev zoo.
    Peb zoo siab hlo ua nej tsaug mus li. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Huab Tais tso lus rau nws cov Tshiab,
    kom lawv zov koj nyob ntawm koj txoj kev.
    Peb sawv daws thov Huab Tais,
    Huab Tais, koj yog tus ntxuav koj lub Koom Txoos kom dawb tuaj. Lub sij hawm Plaub Caug no koj lub Koom Txoos ua cov kab ke yoo, thov koj pab koj cuab koj yim tsim koob hmoov.
    Peb vam txog peb tus Huab Tais Pleev. Ua li.

    YES XUS RAUG TXOM NYEM

    1. CUAB ZAJ
    A: Tswv Ntuj tus Tub Txib lub meej mom tsis zoo saib lawm.
    B: Tas lub qab ntuj neeg thuam nws, tso nws pov tseg.
    C: Peb saib nws raug txim, tab sis yog vim peb cov txhaum nws thiaj raug luag nkaug.
    D: Nws txoj kev raug txom nyem coj txoj kev kaj lug tuaj rau peb.
    E: Cov neeg pluag yuav tau noj tsau, cov nrhiav Huab Tais yuav ntsib Huab Tais, lawv yuav muaj txoj sia nyob mus txheej dhau txheej.
    F: Tas txhua leej nyob plaub ceg kaum ntuj yuav tig los cuag Huab Tais, tas txhua haiv neeg yuav pe nws.

    2. ZAJ HU NKAUJ
    A: Tus cawm lub qab ntuj neeg muaj peb caug peb xyoos, txog lub caij nws haus lub ntim cawv iab cawv daw.
    Tus Zoo Tswv Zov Yaj siv nws txoj sia los cawm nws pab yaj.
    Nws ua siab tuag nyob saum ntoo cuam.
    B: Pos, ntsia hlau, hmuv chob Yes Xus lub cev, dej tawm txaws txua ntawm nws lub plawv los,
    ntshav los si laim ntawm nws tej tes taw, puav tam li tus dej ntws los ntxuav lub sim ceeb.
    C: Luag muab tus Yaj Txi Ntuj tua, peb txais nws lus tias thaum luag tsa kuv siab kuv yuav rub sawv daws los raws kuv, leej twg nqhis kom nws tuaj haus kuv cov dej tshuaj, tus dej muaj txoj sia yuav txhawv hauv nws siab tuaj.
    D: Leej Txiv Leej Tub Leej Ntuj Plig, nej muaj koob meej ntoo moo lug loj sib luag, tas lub sim ceeb cav txog nej peb leeg ua Tswv Ntuj. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Huab Tais, koj thau kuv ntawm cov neeg txhaum txhais tes.
    Koj thau kuv ntawm cov nrhiav ua txhaum.
    Peb sawv daws thov Huab Tais,
    Tswv Ntuj muaj hwj huam nyob mus li, koj xav kom lub ntiaj teb neeg tau ib tug piv txwv zoo coj, koj thiaj kheev kom tus cawm lub ntiaj teb raug tuag nyob saum ntoo cuam. Thov koj pab peb txais kev iab kev khwv raws li nws, koj pub peb nrog nws sawv rov los.
    Peb vam txog peb tus Huab Tais Pleev. Ua li.

    CAIJ HLA

    1. CUAB ZAJ
    A: Leej Pleev sawv hauv yeeb ceeb rov los, nws yuav tsis rov tuag. Txoj kev tuag yuav tsis raug nws dua.
    B: Nws rov muaj txoj sia; yog ib txog sia nyob hauv Huab Tais Ntuj.
    C: Kwv tij, nej nrog Yes Xus sawv rov los, nej yuav nrhiav tej yam nyob saum ntuj.
    D: Nej yuav xis tej yam nyob txheej ntuj saud, txhob xis tej yam nyob ntiaj teb no.
    E: Vim Leej Pleev zaum nyob ntawm Tswv Ntuj sab xis. As Les Lus Yas.
    F: Txij no mus Leej Pleev ua vaj muaj hwj huam mus li. As Les Lus Yas.

    2. ZAJ HU NKAUJ
    A: Ua cas tag kis no qab ntuj yuav ntsa iab lub ntuj huv si, cov suab hu nkauj nrov qeeg tas lub sim ceeb,
    tas lub qab ntuj zoo siab hom khaj, ua dab phem teb ntshai tshee na.
    B: Yog Huab Tais lub rooj ntxa qhib los, Tswv Ntuj muab txoj kev tuag los rau hauv nws lub ntxa, nws sawv los mus qhib rooj ntug, nws coj cov yawg koob tos nws mus pem nws lub Ceeb Tsheej.
    C: Yes Xus, koj yog tus Zoo Tswv Zov Yaj nyob ib txhiab ib txhis. Koj ntxuav koj pab yaj nyob hauv dej thiab nyob hauv Leej Ntuj Plig. Koj lub pas dej yog lub pas dej ntxuav neeg lub siab, yog lub ntxa los neeg cov txhaum.
    D: Koj rov qab muab tau txoj sia rau peb lawm. Thaum peb hla lub teb chaws suab puam no, koj saib peb kom peb txhob rov tuag nyob hauv txoj kev txhaum, koj thiaj yuav yog tus pab peb kom tau nyob kaj lug. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Lub ntuj lub teb pom Huab Tais sawv rov los. As Les Lus Yas.
    Lub ntuj lub teb zoo siab hlo. As Les Lus Yas.
    Peb sawv daws thov Huab Tais,
    Huab Tais muaj hwj huam, peb thov koj pub koj cov txiaj ntsim rau peb cov neeg ua hnub nyoog Hla. Peb thiaj yuav coj ib tug yeeb yam phim cov neeg rov yug los tshiab.
    Peb vam txog peb tus Huab Tais Pleev. Ua li.

    YES XUS MUS SAUM NTUJ

    1. CUAB ZAJ
    A: Ntuj pub hwj huam rau kuv ua tau tas puas tsav yam nyob saum ntuj thiab nyob ntiaj teb no.
    B: Nej mus, nej coj tas txhua haiv neeg los ua kuv cov thwj tim.
    C: Nej hu txog Leej Txiv thiab Leej Tub thiab Leej Ntuj Plig lub npe, nej ua lub Cim Ntxuav rau cov neeg ntseeg.
    D: Kuv nrog nej nyob mus li txog lub caij ntuj teb kawg.
    E: Cov Nkas Lis Lais ua cas nej nyob ntsia saum ntuj? As Les Lus Yas.
    F: Yes Xus uas nej pom nws mus saum ntuj nws yuav rov tuaj.
    As Les Lus Yas.

    2. ZAJ HU NKAUJ
    A: Huab Tais kav txheej ntuj siab mus ib txhiab ib txhis, koj yog tus coj lub qab ntuj neeg dim ntawm txoj kev tuag, yog tus nplij cov neeg tsa muag vam txog koj, yog lub hnub tuaj kaj ib zeej tsoom neeg nyiam koj.
    B: Yes Xus, koj rov mus nyob txheej hnub qub saud, tas yim txheej cuaj txheej ntuj pe koj mloog koj lus, koj yog txoj kev coj peb mus saum ntuj, nyob ntiaj teb no peb lub siab yuj plaws tuaj ntawm koj.
    C: Thov koj lub zog tuaj thiab peb lub siab, thaum koj lib hwj chim ci ntsa iab rov tuaj, koj yuav cais txoj kev raug txim mus deb peb,
    koj yuav tsa peb nrog koj ua vaj nyob pem peb Txiv lub Ceeb Tsheej. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Huab Tais nce mus saum ntuj. As Les Lus Yas.
    Tas tsoom Leej Ntshiab nrog tsoom Tshiab hom khaj. As Les Lus Yas.
    Peb sawv daws thov Huab Tais,
    Tswv Ntuj muaj hwj huam, peb ntseeg tias koj Leej Tub yog tus cawm peb, nws rov mus saum ntuj. Peb thov koj, koj coj peb tsoom neeg mus nrog koj nyob pem koj Leej Tub lub Ceeb Tsheej.
    Peb vam txog peb tus Huab Tais Pleev. Ua li.

    LEEJ NTUJ PLIG NQES LOS

    1. CUAB ZAJ
    A: Peb cav txog Huab Tais Leej Txiv lub koob meej.
    B: Peb cav txog nws Leej Tub Yes Xus Pleev lub koob meej.
    C: Peb cav txog Leej Ntuj Plig Ntshiab.
    D: Vim nws tsa tsev nyob hauv peb lub siab.
    E: Peb cav txog Tswv Ntuj mus txog txhiab niag tim puas xyoo.
    As Les Lus Yas.
    F: Nws ib txwm nyob, lub zim txwv no nws nyob, nws tab tom tuaj.
    As Les Lus Yas.

    2. ZAJ HU NKAUJ
    A: Leej Ntuj Plig Ntshiab, koj tuaj mas!
    Ib txwm koj qhov pom kev ziab nyob txheej ntuj saud.
    Koj tso qhov pom kev tuaj ziab txog peb.
    B: Cov neeg ntxhov siab vam txog koj tuaj nplij lawv, cov ntsuag nos tos koj tuaj ua lawv luag,
    cov neeg nqhis qhuav siab qhawv saib koj xws li lub qhov dej txhawv.
    C: Peb ua neeg khwv tas sim neej koj yog peb qhov chaw so.
    Peb lub neej tiv tshav tiv nag koj yog peb qhov chaw nkaum tshav nkaum nag.
    Peb ua neej sab neej see, koj yog peb qhov chaw tshav ntuj nrig.
    D: Leej Ntuj Plig pub txoj kev kaj lug, koj tuaj nyob hauv cov neeg vam txog koj.
    Koj yog cov neeg pluag txiv faib txiaj ntsim rau lub qab ntuj neeg. Ua li.

    3. ZAJ NKAUJ PAJ NRUAG
    – Hnub Chiv.
    – Hnub Ob.
    – Hnub Peb.
    – Hnub Plaub.
    – Hnub Tsib.
    – Hnub Rau.
    – Hnub Xya.

    4. ZAJ THOV HUAB TAIS
    Tswv Ntuj lub tswv yim tuaj nyob puv tas lub ntiaj teb. As Les Lus Yas.
    Nws qhia Ntuj zaj txuj ci rau txhua leej txhua tus. As Les Lus Yas.
    Peb sawv daws thov Huab Tais,
    Huab Tais, koj yog tus tso Leej Ntuj Plig los qhia txoj kev pom kev rau cov neeg ntseeg txog koj. Peb thov koj, koj tso Leej Ntuj Plig los pab peb nyiam qhov ncaj, koj tso Leej Ntuj Plig los nplij peb kom peb zoo siab mus li.
    Peb vam txog peb tus Huab Tais Pleev. Ua li.

    CAIJ NYOB NRUAB XYOO
    HNUB CHIV

    1. CUAB ZAJ
    A: Huab Tais, thov koj qhib kuv lub ncauj.
    B: Kuv yuav cav lus zoo txog koj.
    C: Huab Tais, koj muab siab rau nres kuv.
    D: Tswv Ntuj, koj tuaj pab kuv.
    E: Peb qhov chaw vam khom yog nyob hauv Huab Tais.
    F: Tus Huab Tais tsim lub ntuj lub teb.

    2. ZAJ HU NKAUJ
    A: Vaj ib txwm coj tas ib puas tsav yam, vaj tsim cov hnub pom kev nrig, vaj tsim cov hmo tsaus ntuj nti,
    koj ua lub ntuj lub teb xis neeg lub siab.
    B: Peb sawv lis tsees los mas! Lau qaib cooj kais tsa cov neeg pw, nws qhuab qhia cov neeg kheev tsaug zog, nws ntuas cov neeg tsis tau hwm Tswv Ntuj.
    C: Lau qaib cooj kais qua, sawv daws rov tso siab, cov neeg mob rov qab pom txoj kev dim, cov tub sab rov ntxig ntaj, cov neeg thim ntuj rov tig los ntseeg.
    D: Yes Xus, koj tig los ntsia peb cov neeg muaj txhaum, peb quaj koj daws peb txim, peb cov txhaum yaj ntshis nyob ntawm koj xub ntiag, koj pub dua ib lub siab tshiab rau peb coj.
    E: Yes Xus, koj yog peb lub hnub, peb sawv peb lub suab xub hu txog koj, koj tuaj ziab rau peb tej tes taw koj pom kev tuaj, koj tsa peb lub tswv yim kom tsim meej.
    F: Huab Tais Leej Txiv thiab Huab Tais Leej Tub Twm Zeej, nkawd nrog Leej Ntuj Plig nplij neeg muaj koob meej nto moo lug, lub zim txwv no mus txog txhiab niag tim puas xyoo. Ua li.

    3. ZAJ NKAUJ PAJ NRUAG

    4. ZAJ THOV HUAB TAIS
    Huab Tais, koj mloog kuv lo lus thov koj.
    Peb lub suab xav mus txog koj.
    Peb sawv daws thov Huab Tais,
    Huab Tais Tswv Ntuj muaj hwj huam tas nrho, koj saib peb ib hmos los txog tag kis no. Peb thov koj lub zog tuaj thiab peb, ces hnub no peb yuav tsis poob hauv kev txhaum, peb lub ncauj yuav hais qhov tseeb, peb lub tswv yim yuav xav qhiv ncaj, peb tes taw yuav ua raws nraim koj txoj cai.
    Peb vam txog peb tus Huab Tais Pleev. Ua li.

    HNUB OB

    1. CUAB ZAJ
    A: Tas txhua haiv neeg nej cav txog Huab Tais mas.
    B: Nyob pej kum teb nej cav txog nws lub npe.
    C: Ib txwm nws hlub peb sawv daws.
    D: Nws tsis fav xeeb, nws yuav pab peb tas ib txhiab ib txhis.
    E: Tswv Ntuj, txij sawv ntxov mus koj ua kom peb lub siab yuj plaws tuaj rau koj.
    F: Tas hnub peb yuav nyob hauv txoj kev lom zem cav txog koj lub npe.

    2. ZAJ HU NKAUJ
    A: Yes Xus, qhov pom kev ci ntsa iab tuaj ntawm Leej Txiv tuaj, peb qhov pom kev tawm ntawm koj los,
    koj yog lub hnub tseem ceeb ci tuaj rau lub qab ntuj neeg, thov koj ci ntsa iab nyob mus li.
    B: Txoj kev ntseeg yog cov cawv koj pub rau peb haus, koj lub cev yog cov mov koj pub rau peb noj,
    koj yog qhov pom kev ci dawb vog ua peb ntej, peb tus plig yuav tsis pom peb lub hnub poob qho.
    C: Leej Txiv, peb hu txog koj, koj yog tus pub cov txiaj ntsim txhab zog, thov koj tshem txoj kev txhaum mus deb ntawm peb, thov koj pub ib lub zog pab peb ua neeg nquag.
    D: Leej Ntuj Plig, koj ua peb luag mus dhau txoj kev txias, koj coj peb zam txoj kev txhaum xws li peb zam nab ntsuab kev, koj pab peb ua neeg tsim txiaj tsis nrhiav kev plees, koj ua peb kub siab ntseeg txog koj. Ua li.

    3. ZAJ NKAUJ PAJ NRUAG

    4. ZAJ THOV HUAB TAIS
    Huab Tais, koj mloog kuv lo lus thov koj.
    Peb lub suab xav mus txog koj.
    Peb sawv daws thov Huab Tais,
    Tswv Ntuj, peb paub tias niaj hnub muaj ntau yam xwv txheej vij peb, vim peb yog ib co neeg txhaum. Thov koj cev koj txhais tes muaj hwj chim los vov peb, koj pub kom tas txhua teb chaws tau nyob hauv koj txoj kev thaj yeeb.
    Peb vam txog peb tus Huab Tais Pleev.
    Ua li.

    HNUB PEB
    CUAB ZAJ

    A: Kuv nyob ntiaj teb no zoo puav tam li kuv nyob pej kum teb.
    B: Tswv Ntuj txob cia kuv dig muag tsis pom koj cov lus qhia.
    C: Kuv tus plig nkag pem teb, thov koj tsa kuv.
    D: Ntxhov kuv siab, kuv seev yees txog koj, kuv tsis tuaj dab ntub.
    E: Thov koj pub txoj sia txoj cai rau kuv.
    F: Koj pab kuv dim ntawm txooj kev dag kev cuav.

    ZAJ HU NKAUJ

    A: Kaj ntug tej sib zus, me noog liaj noog luv quaj tsa hnub tawm tuaj,
    Leej Pleev tsa peb lub siab, nws hu peb tuaj txais nws txoj sia.
    B: Nws hais tias “Kuv tuaj txog ze lawm, nej sawv los mas!
    Nej tso dab ntub ntev, nej lub siab yuav hnyav.
    Nej ua neeg tsim txiaj neeg ncaj yoog noj yoog haus.”
    C: Yes Xus Pleev, koj tuaj diaj peb cov neeg tsaug zog,
    koj txo cov hlua khi peb hauv qhov tsaus ntuj,
    koj cawm peb dim ntawm peb tej txhaum,
    koj coj peb los raws txoj kev kaj.
    D: Huab Tais Leej Txiv thiab nws Leej Tub Twm Zeej,
    nkawd nrog Leej Ntuj Plig nplij neeg muaj koob meej nto moo lug,
    lub zim txwv no mus txog txhiab niag tim puas xyoo.
    Ua li.

    NKAUJ PAJ NRUAG

    NPN HNUB PEB

    ZAJ THOV HUAB TAIS
    • Huab Tais, koj mloog kuv lo lus thov koj.
    • Peb lub suab xav mus txog koj.
    • Peb sawv daws thov Huab Tais,
    • Tswv Ntuj, koj yog tus pov hwm cov neeg tso siab rau koj. Yog tsis muaj koj pab koj nres, yuav tsis muaj yam twg ruaj nreb yam twg ntshiab; thov koj khuv leej peb mus li, koj hwj peb hla lub ntiaj teb no, koj coj peb mus kom peb txhob plam ntawm koj lub Ceeb Tsheej nyob mus li.
    • Peb vam txog peb tus Huab Tais Pleev.
    • Ua li.
    HNUB PLAUB
    CUAB ZAJ

    A: Tswv Ntuj, thov koj nco nraim cov lus koj tau hais rau koj cov tub txib.
    B: Koj cov lus yog kuv chaw tso siab.
    C: Koj cov lus nplij kuv nyob hauv txoj kev txom nyem.
    D: Kuv nco txog cov lus thaum ub koj cog, kuv rov zoo siab.
    E: Thaum kuv pom cov neeg tsis hwm Ntuj tso koj cov lus tseg, kuv lub siab npau.
    F: Koj cov lus qhia zoo puav tam li tej zaj hu nkauj deev kuv siab nyob ntiaj teb no.

    ZAJ HU NKAUJ

    A: Qhov tsaus ntuj cov huab dub,
    tas txhua yam ua nphoo ntxoj nphoo ntxuas,
    nej zam kev Leej Pleev tuaj yuav txog,
    qhov pom kev nqes los hauv ntiaj teb,
    lub npoo ntuj ntsa dawb vog tas.
    B: Huab Tais Pleev, peb tus plig yuj pluj plaws rov tuaj rau koj tib leeg,
    peb ua ib lub siab dawb siab huv tuaj hais qhov tseeb rau koj.
    Peb hu nkauj seev yees tuaj thov koj.
    Peb thov koj mloog peb tej lus vam txog koj.
    C: Qhov pom kev tseeb tuaj saum ntuj tuaj,
    koj lub ntsej muag luag nyav ci tuaj kaj peb,
    peb thiaj paub ntiaj teb lub cuab tam
    yog lub cuab tam cuav cia ntxias neeg.
    Peb tso ntiaj teb lub cuab tam pov tseg.
    D: Huab Tais Leej Txiv thiab nws Leej Tub Twm Zeej,
    nkawd nrog Leej Ntuj Plig nplij neeg muaj koob meej nto moo lug,
    lub zim txwv no mus txog txhiab niag tim puas xyoo.
    Ua li.

    NKAUJ PAJ NRUAG

    NPN HNUB PLAUB

    ZAJ THOV HUAB TAIS
    • Huab Tais, koj mloog kuv lo lus thov koj.
    • Peb lub suab xav mus txog koj.
    • Peb sawv daws thov Huab Tais,
    • Tswv Ntuj, koj yog tus txawj tu tas ib puav tsav yam nyob hauv lub sim ceeb, koj tsis yuam kev. Peb nyo taub hau thov kom koj tshem tej yam tsis tsim mus deb peb, thov koj pub tej yam tsim txiaj rau peb.
    • Peb vam txog peb tus Huab Tais Pleev.
    • Ua li.
    HNUB TSIB
    CUAB ZAJ

    A: Tswv Ntuj, yog koj txhais tes tsim kuv.
    B: Thov koj pab kom kuv to taub koj cov lus qhia.
    C: Kuv paub tias koj txiav yam twg yog txiav ncaj.
    D: Tab yog koj cia kuv raug txom nyem los yog vim koj nyiam kuv.
    E: Cov neeg muab hlob hiam kuv, koj ua kom lawv txaj muag.
    F: Koj ua kuv lub siab nyiam nyob hauv koj, koj txhob cia kuv mus ua txhaum, kuv thiaj yuav tsis raug kev txaj muag.

    ZAJ HU NKAUJ

    A: Hnub tuaj qab ntug ntsa daj,
    hmo ntuj hmo teb nti neeg dig muag yuam kev,
    neeg tig los nrhiav sab ntuj ntsa.
    B: Yes Xus nrog lub hnub ziab txog peb,
    tsa peb nyob hauv txoj kev kaj.
    Nws lub hwj chim ntxuav peb huv si.
    Peb lub ncauj txhob hais lus xaiv lus ncua,
    peb lub tswv yim txhob xyaw qhov tsaus.
    C: Tas hnub peb tus nplaig txhob dag,
    qhov muag txhob nrhiav txoj kev lwj,
    txhais tes txhob raus txoj kev txhaum,
    lub cev txhob cia yam phem txaws tuaj ntub.
    D: Tus saib tus xyuas peb nws sawv ntsug nyob pem Ceeb,
    tas niaj tas hnub nws saib peb,
    txij thaum pom kev los txog tsaus ntuj nws ntsuas peb cov hauj lwm.
    E: Huab Tais Leej Txiv thiab nws Leej Tub Twm Zeej,
    nkawd nrog Leej Ntuj Plig nplij neeg muaj koob meej nto moo lug,
    lub zim txwv no mus txog txhiab niag tim puas xyoo. Ua li.

    NKAUJ PAJ NRUAG

    NPN HNUB TSIB

    ZAJ THOV HUAB TAIS
    • Huab Tais, koj mloog kuv lo lus thov koj.
    • Peb lub suab xav mus txog koj.
    • Peb sawv daws thov Huab Tais,
    • Huab Tais Tswv Ntuj, peb thov koj pab peb lub tswv yim kom txawj xav thiab txawj mus raws txoj kev ncaj. Yog tsis muaj koj lub zog nres, mas peb nyob tsis taus, thov koj pab peb coj ib tug yam ntxwv xis koj lub siab.
    • Peb vam txog peb tus Huab Tais Pleev.
    • Ua li.
    HNUB RAU
    CUAB ZAJ

    A: Tswv Ntuj, kuv nyiam koj txoj cai.
    B: Koj cov lus qhia ua kom kuv xyuam xim dua cov yeeb ncuab.
    C: Koj txoj cai ua kom kuv ntse dua cov hlob.
    D: Kuv muaj tswv yim dua cov txwj laus vim kuv coj koj cov lus qhia.
    E: Koj tej lus zoo puav tam li lub teeb coj kuv kev.
    F: Kuv cog lus tias kuv yuav mloog koj lus qhia, kuv tsis tso koj lus tseg.

    ZAJ HU NKAUJ

    A: Tswv tsim xob Leej Tub, koj lub koob meej ncha nyob saum ntuj mus ib txhiab ib txhis.
    Nkauj tsim txiaj Leej Tub, koj yog ntiaj teb qhov chaw vam khom.
    B: Thov koj cev tes tuav cov neeg sawv hauv nruab dab ntub los,
    koj tsa lawv lub siab lub cev,
    kom lawv xyiv fab cav txog Tswv Ntuj,
    zoo siab ua Tswv Ntuj tsaug.
    C: Ntuj tsaus yaj ntshis, hnub tuaj tshiab khiv ci peb.
    Peb rov nco txog Yes Xus yog peb lub hnub kaj peb lub tswv yim.
    Nws tshem ntiaj teb qhov tsaus ntuj mus deb peb,
    nws coj peb lub siab kom ntshiab mus txog fab lwm tiam.
    D: Yes Xus, koj ua kom peb lub siab nrhau cag ntseeg khov ntseeg ruaj,
    nyob thaj yeeb tsis paub txoj kev txhawj xeeb,
    muaj lus nyiam zoo li koj xub nyiam peb.
    Ua li.

    NKAUJ PAJ NRUAG

    NPN HNUB RAU

    ZAJ THOV HUAB TAIS
    • Huab Tais, koj mloog kuv lo lus thov koj.
    • Peb lub suab xav mus txog koj.
    • Peb sawv daws thov Huab Tais,
    • Huab Tais, yog koj tsis tuaj pab peb, mas peb ua tsis tau dab tsi ntxim koj lub siab, peb thov koj ua siab zoo coj peb lub siab mus raws txoj kev nyiam koj.
    • Peb vam txog peb tus Huab Tais Pleev.
    • Ua li.
    HNUB XYA
    CUAB ZAJ

    A: Tswv Ntuj, kuv ntsia cov lus koj cog,
    kuv zoo siab xws li tus nrhiav tau qhov nyiaj qhov kub.
    B: Kuv ntxub cov lus dag, kuv nyiam koj txoj kev cai.
    C: Niaj hnub kuv cav txog koj yim cuaj zaug vim koj txiav txim ncaj.
    D: Cov nyiam koj txoj kev cai lawv nyob kaj siab lug.
    E: Tswv Ntuj, kuv vam tias koj yuav cawm kuv.
    F: Kuv zoo puav tam li tus yaj poob zoo, koj tuaj npo koj tus tub txib mog.

    ZAJ HU NKAUJ

    A: Hauv ntuj kaim zaj zees ci ntsa lis iab,
    peb txaum yim tuaj thov Tswv Ntuj,
    kom hnub no nws saib peb tej hauj lwm,
    peb thiaj yuav tsis nphav xwv txheej.
    B: Thov nws cheem peb lub ncauj,
    thiaj yuav tsis muaj lus sib cav sib ceg nyob hauv peb.
    Thov nws dauv tis los ntis peb ntsej muag,
    peb thiaj yuav tsis pom tej yam tsis tseeb.
    C: Peb yuav xav tej zaj huv tuaj nruab siab,
    peb yuav zam txoj kev lim hiam ncauj ncab.
    Peb ua neeg ncauj xim noj me haus tsawg,
    peb lub cev thiaj tsis muaj feem.
    D: Peb txuag peb tus ntsuj plig ntshiab tas niaj tas hnub,
    thaum hnub hlauv qhov nthav tim npoo ntuj,
    lub ntuj rov tsaus nti, lub teb rov tsaus ntais,
    peb yuav rov hu nkauj cav txog Huab Tais lub npe.
    Ua li.

    NKAUJ PAJ NRUAG

    NPN HNUB XYA

    ZAJ THOV HUAB TAIS
    • Huab Tais, koj mloog kuv lo lus thov koj.
    • Peb lub suab xav mus txog koj.
    • Peb sawv daws thov Huab Tais,
    • Huab Tais, peb yog cov neeg ntseeg txog koj, thov koj txhib peb lub siab, peb thiaj yuav yoog koj ua hauj lwm nyob hauv peb, thiab peb yuav txawj txais cov txiaj ntsim uas koj lub siab zoo xav pub rau peb.
    • Peb vam txog peb tus Huab Tais Pleev.
    • Ua li.

    Translate »