KOOM TXOOS LIV XWM (3)

Xyoo 1547 Xas Vis Yes nyob Mas Las Kas, muaj ib hnub nws pom ib lub nkoj coj ib co neeg txawv tuaj txog, lawv tsis yog neeg tawv dub xws li cov Mas Las Yas, lawv yog neeg tawv dawb; lawv yog haiv Zis Pees (Japanise). Muaj 3 tug neeg nyob hauv pab ntawd ua phooj ywg nrog Xas Vis Yes; ib tug hu ua ‘Yas Zis Los’ (Yajirō). Nws yog ib tug neeg txawj ntse tab sis tsis yog ib tug neeg paub txuj ci ntau, nws yog ib tug tub sab lwg cov nkoj Suav.

Yas Zis Los piav rau Xas Vis Yes mloog tias cov Zis Pees muaj ib co Leej Choj hnav daj, lawv coj tus yam ntxwv zoo li cov Txiv Plig, lawv teev ib tug huab tais hu ua ‘Dais Nis Sis’ (Dainichi). Yas Zis Los tseem hais rau Xas Vis Yes tias yog Xas Vis Yes mus tshaj Yes Xus lub Moo Zoo nyob Zis Pees teb, mas cov Zis Pees yuav zoo siab txais lub Moo Zoo. Xas Vis Yes xav kawm xeem lus Zis Pees vim nws xav mus tshaj Ntuj Lus rau lawv lub teb chaws. Tab sis nws yuav tsum rov mus Nkos As tso, ces Xas Vis Yes thiaj coj Yas Zis Los lawv nrog nws mus nyob Nkos As ib xyoos.

Thaum lub 4 hlis xyoo 1549 Xas Vis Yes nrog Yas Zis Los caij nkoj ua ke mus rau Zis Pees teb. Muaj ob tug tub koom haum Yes Xus Is nrog Xas Vis Yes tuaj; yog Tos Les thiab Fes Nas Ntes. ‘Tos Les’ (Cosme de Torres) yog ib tug Leej Choj Is Npes Lias nyob hauv lub koom haum Yes Xus Is. Thaum nws muaj 28 xyoo, nws xub mus nyob Mes Xis Kos teb tau 4 xyoos. Thaum ntawd nws coj ib lub neej dog dig, nws ua si pov khaw nkaus, ces nws lub siab nyob tsis tus. Xyoo 1542 nws ntsib Xas Vis Yes, ces nws nrog Xas Vis Yes mus txog Nkos As nyob Is Ntias teb. Xyoo 1548 Xas Vis Yes txais Tos Les los nyob hauv lub koom haum Yes Xus Is. ‘Fes Nas Ntes’ (Juan Fernández) yog Leej Tij, nws yug los nyob hauv lub nroog Kos Dos Npas, nyob Is Npes Lias qab teb. Nws txiv yog ib tug laus pav muag ntaub ntsuj ntaub npuag. Thaum Fes Nas Ntes muaj 22 xyoos, muaj ib hnub nws nrog ib cov hluas nplua nuj thiab zoo nraug mus hauv ib lub tsev teev Ntuj, lawv mloog ib tug Leej Choj uas nyob hauv tub koom haum Yes Xus Is ntuas lawv, ces cov hluas ntawd xuas hlua los nplawm lawv lub cev vim lawv tu siab rau qhov lawv tau coj lub neej dog dig. Fes Nas Ntes thiaj mus thov cov hlob hauv lub koom haum Yes Xus Is kom lawv txais nws ua Leej Tij nyob hauv lub koom haum. Tus tswj lub koom haum nyob Pos Tws Nkas teb muaj lub tswv yim txawv, nws xav sim Fes Nas Ntes siab, ces nws kom Fes Nas Ntes caij ib tug luj hla lub tuam ceeb Lis Npos. Nws kom Fes Nas Ntes caij tus luj tab sis tig nraub qaum rau pem tus luj taub hau thiab tuav tus luj ko tw. Fes Nas Ntes kuj kam hla lub tuam ceeb zoo li ntawd, ces tus txwj lub koom haum Yes Xus Is nyob Pos Tws Nkas teb thiaj kheev cia nws ua Leej Tij.

Hnub tim 15 lub 8 hli xyoo 1549 lawv mus txog hauv lub nroog Kas Nkos Sis Mas (Kagoshima) hauv lub pov txwv Kis Yus Sus uas yog lub nroog Yas Zis Los cov kwv tij nyob. Tus Dais Mis Yos tswj lub nroog Kas Nkos Sis Mas tso lus rau Xas Vis Yes tshaj Ntuj Lus ywj siab nyob hauv nws lub xeev, vim nws xav tias cov laus pav Pos Tws Nkas tej nkoj ua luam yuav tuaj ua luam nyob hauv lub xeev, ces nws yuav tau nyiaj ntau.

Thaum Xav Vis Yes tuaj txog Zis Pees teb, nws pom tias yuav qhia kev cai rau cov Zis Pees xws li qhia rau cov Is Ntias tsis tau, vim cov Zis Pees yeej muaj kev cai teev hawm, yeej muaj kev cai sib fim ntau, thiab lawv paub txuj ci ntau. Yog nws qhia raws tus piv txwv Rooj Khoom mas cov Zis Pees yuav tsis kam txais Ntuj kev cai, tab sis yog nws maj mam nrhiav saib cov Zis Pees yuav coj lub Moo Zoo kom haum lawv txoj qub kev cai uas yeej muaj hwj chim mas nyaj ntau leej nyiam dua thiab Ntuj kev cai yuav tsis hem lawv; ces cov Zis Pees thiaj tsis ntshai coj Ntuj kev cai vim lawv pom tias lub Moo Zoo nrog lawv cov qub kev cai sib haum ntau thiab lawv tseem yuav pom tias Ntuj kev cai pab ua kom lawv teb chaw zoo dua yav thaud tuaj thiab.

Yog li mas Xas Vis Yes thiaj tshaj lub Moo Zoo raws tus piv txwv ‘Yoog Luag Txuj’; yog nws tsum kawm xeem lus Zis Pees, kawm kom paub cov Zis Pees tej kev cai, nws yuav tau yoog lawv tej kev cai teev hawm tab sis yuav tsis txhob ntseeg raws li lawv cov kev cai teev hawm ntawd, nws yuav tau hloov Koom Txoos cov kev cai lub hauv paus hauv ntsis kom haum cov Zis Pees tiam sis nws yuav tsis hloov lub Moo Zoo lub ntsiab.

Xas Vis Yes tseem pom tias nyob hauv cov Zis Pees cov kab ke qub kev cai mas muaj tej yam zoo siv, hauv lawv cov lus kuj muaj tej lo zoo hais, hauv lawv zaj tswv yim muaj tej zaj zoo yuav, tej yam uas cov Zis Pees ib txwm tsim thiab muab los teev lawv cov dab, mas Xas Vis Yes muab los teev Tswv Ntuj raws li lub Moo Zoo. Xas Vis Yes kawm saib yam twg yog zoo khaws tseg los yam twg yuav tsum tso pov tseg; tej yam yuav ua kom cov neeg yuam kev tsis to taub Yes Xus lub Moo Zoo mas yuav tsum tso pov tseg, tej yam zoo pab cov neeg hwm Ntuj mas yuav khaws tseg.

Xas Vis Yes kuj yoog cov Zis Pees tej kev cai kav teb chaws, ua zoo rau cov nom tswv, hwm lawv, ua kom zoo lawv siab, tsis hla cov nom tswv kav teb chaws lus, nws tsis ua ib yam dab tsi kom cov nom tswv xav tias nws yog pej kum neeg tuaj ua ntxhov nyob hauv lub teb chaws.

Xas Vis Yes sau piav txog cov Zis Pees zoo li no tias:

“Cov Zis Pees uas kuv tau ntsib txog tav no, mas lawv zoo dua lwm cov haiv neeg uas tsis tau txais kev ntseeg, lawv yog ib co neeg kheev tham. Lawv feem coob muaj lub siab zoo. Lawv rau siab txuag lawv koob meej. Cov ntau yog ib co neeg pluag. Tab sis lawv tsis thuam kev pluag. Cov Zis Pees txheej siab uas lawv nplua nuj lawv kuj tsis thuam cov neeg txheej siab uas lawv pluag. Cov txheej siab hwm tus txheej siab pluag zoo ib yam li cov nplua nuj. Cov Zis Pees txheej siab tsis kam yuav ib tug ntxhais txheej qis nplua nuj los ua lawv poj niam: tab txawm tus ntxhais txheej qis nplua nuj npaum li cas mas cov txheej siab tsis kam yuav nws. Cov Zis Pees saib lawv lub koob meej muaj nqis dua nyiaj txiag. Cov Zis Pees nyiam coj ntaj thiab phom. Cov txiv neej Zis Pees, tsis hais cov txheej siab los txheej qis, lawv puav leej nyiam tuav ntaj. Tsoom tub hluas nto 14 xyoos sawv daws tuav ntaj thiab sia riam luv ntawm duav. Lawv nyiaj tsis taus luag tej hais ib lo lus thuam lawv.

Cov Zis Pees feem coob txawj nyeem ntawv thiab sau ntawv, lawv thiaj kawm tau cov zaj teev Ntuj sai thiab lawv nyeem tau cov ntawv hais txog kev ntseeg. Vim lawv nyiam kev kawm txuj.”

Thaum ntawd, Yas Zis Los pab Xas Vis Yes qhia Ntuj kev cai rau cov neeg Zis Pees hauv lub nroog Kas Nkos Sis Mas. Yas Zis Los qhia lawv kom lawv hu Tswv Ntuj ua Dais Nis Sis, tab sis Dais Nis Sis yog ib tug huab tais nyob hauv Phus Thas kev cai, tsis yog cov ua Ntuj kev cai tus Huab Tais Tswv Ntuj. Thaum Xas Vis Yes pom cov Zis Pees tus mlom Dais Nis Sis mas nws thiaj pom tias yuav hu Tswv Ntuj ua Dais Nis Sis tsis tau, ces Xas Vis Yes tis npe rau Tswv Ntuj ua ‘Des Os’ (Deus) raws li cov Pos Tws Nkas hu. Xas Vis Yes pom tias cov Leej Choj uas Yas Zis Los hais txog mas yog cov hauj sam teev hawm Phus Thas.

Thaum chiv thawj tej tus hauj sam zoo siab tuaj mloog Xas Vis Yes cov lus qhia txog Yes Xus lub Moo Zoo tab sis thaum Xas Vis Yes ntuas cov hauj sam kom lawv tso lawv tus yam ntxwv phem nrog txiv neej sib deev tseg, mas lawv pib ntxub Xas Vis Yes tas siab.

Tau ib xyoos tus Dais Mis Yos tsis pom ib lub nkoj Pos Tws Nkas tuaj ua luam nyob hauv lub xeev Kas Nkos Sis Mas li. Hos hnov hais tias cov nkoj Pos Tws Nkas tuaj ua luam nyob hauv lwm lub xeev, cov hauj sam los tuaj liam txog Xas Vis Yes tsis tseg rau nws thiab, ces tus nws thiaj npau taws, nws txwv tsis pub ib tug pej xeem hauv Kas Nkos Sis Mas kawm Yes Xus lub Moo Zoo ntxiv; yog tus twg yuav txais lub Cim Ntxuav, mas tus ntawd yuav tsum raug tua pov tseg.

Xas Vis Yes thiaj cia Yas Zis Los saib cov ntseeg nyob Kas Nkos Sis Mas. Xas Vis Yes, Tos Les thiab Fes Nas Ntes sawv kev mus cuag tus Saus Nkus nyob Kis Yos Taus. Lawv caij nkoj hla dej mus txog lub pov txwv loj hu ua Hoos Sus. Lawv mus txog lub nroog His Las Dos (Hirado) tab tom yog lub sij hawm ib lub nkoj Pos Tws Nkas nyuam qhuav tuaj txog, cov laus pav Pos Tws Nkas pom Xas Vis Yes ces lawv tuaj hwm nws, vim Xas Vis Yes nto moo tias yog ib tug Leej Choj muaj lub siab kub lug tshaj lub Moo Zoo. Cov Zis Pees pom cov laus pav Pos Tws Nkas hwm Xas Vis Yes mas lawv ntau leej zoo siab mloog Xas Vis Yes qhia tias Yes Xus yog tus Huab Tais cawm ntiaj teb neeg. Xas Vis Yes nyob hauv lub nroog His Las Dos hnub puav xwb, muaj ze ntawm 100 tus neeg Zis Pees thov txais lub Cim Ntxuav.

Xas Vis Yes lawv sawv kev ntawm His Las Dos mus ntxiv kom txog Kis Yos Taus. Lub caij ntawd, lawv txom nyem kawg. Leej Tij Fes Nas Ntes piav zoo li no tias:

“Tej hnub peb caij nkoj, nyob txhua qhov chaw muaj tub sab coob. Peb yog ib co pej kum neeg, ces peb yuav tsum khiav mus tsiv nraim nyob hauv qab nkoj. Tej hnub peb taug kev mas peb haj yam txom nyem, vim peb ev tej lub hnab ntim 4 lub tsho tiv no thiab ib daim pam vov. Hmo ntuj peb koom vov ib daig pam xwb. Nyob hauv cov tsev ntiav pw zoo tshaj, lawv muaj ib daig lev pua chaw pw thiab muaj tog hauv ncoo uas yog ntoo. Muaj tej hnub los daus, mas peb ob txhais ceg o tag. Muaj tej lub zos uas luag pom tias peb yog ib co pej kum neeg pluag pluag, mas luag txais peb tsis zoo. Lawv cov me nyuam txawb pob zeb rau peb thiab qw tej suab cem peb.”

Xas Vis Yes lawv mus txog Kis Yos Taus, nws xav tias yuav pom ib lub tuam tsev zoo nkauj tab sis nws kawg pom ib lub tuam tsev phem hauj sim xwb, vim lub caij ntawd tus Saus Nkus tsis muaj hwj chim li, nws muaj lub npe loj tab sis cov Dais Mis Yos nyias kav nyias xeev ntuj, lawv tsis mloog tus Saus Nkus nyob Kis Yos Taus.

Thaum nyob Is Ntias teb, mas cov Pos Tws Nkas thiab cov pej xeem Is Ntias sawv daws pom Xas Vis Yes coj lub neej pluag mas lawv hwm nws, tab sis nyob Zis Pees teb tsis zoo li ntawd. Tus Saus Nkus hnov tias ib tug neeg tawv dawb pluag pluag xav tuaj nrog nws tham, mas tus Saus Nkus tsis kam txais, ces Xas Vis Yes thiaj tsis tau ntsib tus Saus Nkus, nws rov qab los Kas Nkos Sis Mas.

Xas Vis Yes paub tias muaj ib tug Dais Mis Yos muaj hwj chim dua cov nyob sab qab teb, nws yog tus kav lub tsheej Yas Mas Kus Sis (Yamaguchi) hauv lub pov txwv Hoos Sus, ces Xas Vis Yes thiaj xav tias txawm ib tug tsis txais nws, los tej zaum lwm tus yuav txais nws, ces Xas Vis Yes lub siab loj tuaj.

Xas Vis Yes tseem pom tseeb kawg tias cov neeg tshaj Ntuj Lus nyob Zis Pees teb yuav tsum muaj ib co Dais Mis Yos pov hwm lawv, cov tub tshaj Ntuj Lus yuav tsum hnav tsoos tsho zoo xws li cov Dais Mis Yos mas lwm tus Dais Mis Yos thiaj hwm lawv. Thaum Xas Vis Yes tseem nyob hauv lub nroog Mas Las Kas uas yog cov nom Pos Tws Nkas lub chaw nyob, mas tus thawj tswj cov Pos Tws Nkas tau pub paj tshab ntau rau Xas Vis Yes. Xas Vis Yes thiaj thau nws tej tsoos tsho zoo nkauj los hnav, nws thau tus thawj tswj Pos Tws Nkas cov tsab ntawv pab cev Xas Vis Yes rau tus Saus Nkus. Xas Vis Yes nqa ib lub teev muaj tswb qhia tias txog pes tsawg teev, nws nqa cov twj paj nruag muaj 70 txoj hlua, nws nqa ib rab phom muaj 3 lub qhov, nws nqa tej daim tsom iav thiab tej yeeb yaj tsom zoo nkauj; nws sawv kev mus cuag tus Dais Mis Yos nyob Yas Mas Kus Sis.

Xyoo 1550 Xas Vis Yes thiab Fes Nas Ntes caij nkoj mus txog lub nroog Yas Mas Kus Sis. Tus Dais Mis Yos hu ua ‘Yos Sis Tas Kas’ (Ōuchi Yoshitaka) txais nkawd zoo, nws nrog Xas Vis Yes ua phooj ywg, nws tau muab ib thaj av rau Xas Vis Yes tsa tsev, thiab ua ntawv tso lus rau Xas Vis Yes tshaj Ntuj Lus.

Xas Vis Yes nyob Yas Mas Kus Sis 5 lub hlis mas muaj cov Zis Pees 500 tawm leej tuaj kawm kev ntseeg lub ntsiab thiab txais lub Cim Ntxuav. Nyob hauv cov txais lub Cim Ntxuav, kuj muaj tug puav hauj sam thiab tej tus kws ntaus rog Zis Pees, tab sis muaj ib tug nto moo loj dua cov, nws yog ib tug kws hais kwv txhiaj ncig zos, nws ib sab qhov muag dig, lwm sab pom kev zem zuag, nws tsim tej zaj hu nkauj qhia Ntuj kev cai ncig zos; nws lub npe yog ‘Laus Lees Ntxos’ (Lorenzo Ryosai).

Laus Lees Ntxos yug los xyoo 1526 nws txais lub Cim Ntxuav ntawm Xas Vis Yes nyob hauv xyoo 1551. Laus Lees Ntxos nrog Xas Vis Yes kawm kev ntseeg, nws niaj hnub nug ntau yam, ces nws paub kev ntseeg zoo. Ze ntawm xyoo 1555 nws cog lus ua Leej Tij nyob hauv lub koom haum Yes Xus Is. Laus Lees Ntxos niaj hnub hu nkauj taug tej kev nyob hauv lub nroog. Nws mus tsham cov kws ntaus rog Zis Pees hauv lawv tsev, mus hu tej zaj nkauj ua si thiab piav tej zaj kwv huam lom zem rau lawv mloog.

Xas Vis Yes tsis paub lus Zis Pees zoo tab sis nws kom cov neeg txais lub Cim Ntxuav niaj hnub sib sau teev Ntuj ua ke thiab nquag sib hlub, sib pab. Xas Vis Yes tso Tos Les thiab Fes Nas Ntes nyob Yas Mas Kus Sis saib cov ua Ntuj kev cai, ntawm nws mas nws rov los nyob hauv lub xeev Npus Nkos (Bungo) hauv lub pov txwv Kis Yus Sus, vim tus Dais Mis Yos ‘Os Tos Mos Xaus Lis’ (Ōtomo Sōrin) kav Npus Nkos hu kom Xas Vis Yes mus nyob hauv nws lub xeev.

Xas Vis Yes txiav siab tias nws yuav rov mus Is Ntias teb, vim nws yog tus thawj tswj saib kev tshaj Ntuj Lus rau cov Koom Txoos zwm rau lub tsheej Nkos As nyob Is Ntias teb. Xas Vis Yes xav mus thov kom lub koom haum Yes Xus Is nyob Aws Los Pas xa ib co tub koom haum mus pab kev tshaj Ntuj Lus nyob Zis Pees teb, yog li hnub tim 20 lub 11 hlis xyoo 1551 Xas Vis Yes thiaj caij nkoj ncaim ntawm Zis Pees teb mus. Xas Vis Yes tso Zis Pees teb tseg tsuas tshuav Leej Choj Tos Les thiab Leej Tij Fes Nas Ntes lawm xwb. Tos Les tsis txawj hais lus Zis Pees tab sis nws lub siab hlub neeg mos nyoos, ces cov neeg hwm nws zoo. Ntawm Fes Nas Ntes mas nws paub lus Zis Pees zoo, ces tsoom pej xeem Zis Pees nyiam tuaj mloog nws tshaj Yes Xus cov lus nyob ntawm tej tshav puam. Fes Nas Ntes tau tsim thawj phau ntawv Pos Tws Nkas txhais ua lus Zis Pees.

Xas Vis Yes rov los txog Nkos As, nws txiav siab meej tias yuav sawv kev mus tshaj lub Moo Zoo nyob Suav teb mas nws xa ‘Txiv Plig Nkas Nkos’ (Balthasar Gago), ‘Leej Tij Xis Vas’ (Duarte da Silva) thiab ‘As Kas Kos Vas’ (Pedro de Alcacova) tuaj pab Tos Les thiab Fes Nas Ntes nkawd. Lawv tuaj txog Kas Nkos Sis Mas yog xyoo 1552 lub 8 hli, tim 14. Lawv nyob ntawd 2 lis piam ces mam tshais chaw mus rau Npus Nkos.

Txiv Plig Tos Les hnov tias Nkas Nkos lawv tuaj txog Npus Nkos lawm, nws thiaj xa Leej Tij Fes Nas Ntes tuaj pab txhais lus rau lawv. Xis Vas tau mus pab Txiv Plig Tos Les tshaj Ntuj Lus nyob Yas Mas Kus Sis, hos As Kas Kos Vas coj Txiv Plig Tos Les cov tsab ntawv rov mus rau tus tswj nyob Is Ntias teb.

Txiv Plig Nkas Nkos rau siab kawm lus Zis Pees, nws nrhiav saib cov lus uas Yas Zis Los tau siv los piav txog kev ntseeg puas yog ib co lus zoo siv los puas yog ib co lus ua kom cov kawm kev ntseeg yuam kev mus ntseeg tej yam nyob hauv Phus Thas kev teev hawm vim tias Yas Zis Los kub siab qhia Yes Xus lub Moo Zoo, tab sis zaum puav nws siv cov hauj sam tej lo lus los qhia txog Yes Xus lub Moo Zoo. Txiv Plig Nkas Nkos nrhiav tau 50 lo lus uas muaj lub ntsiab tsis meej pes tsawg, ces nws xav tias yuav tsis txhob siv 50 lo lus ntawd. Tab sis yuav siv cov lus twg?

Nws nug cov neeg ntseeg, ces lawv sawv daws xav tias yuav siv ib co lus zoo li cov lus Pos Tws Nkas. Cov ntseeg thiab Txiv Plig Nkas Nkos sib qhia plaub tsib xyoos, ces lawv sawv daws hais tias yuav siv cov lus tuaj ntawm xeem lus Pos Tws Nkas tuaj, vim cov xeem lus ntawd thiaj qhia lub Koom Txoos kev ntseeg tau meej dua.

Xyoo 1554 muaj ib tug laus pas Pos Tws Nkas hu ua ‘As Mes Das’ (Luis de Almeida) tuaj ua luam txog lub nroog Npus Nkos thiab Yas Mas Kus Sis. Nws tau ntsib Txiv Plig Nkas Nkos nyob Npus Nkos, mas Txiv Plig Nkas Nkos piav rau nws mloog tias nyob Npus Nkos muaj ntau tus poj niam pluag txom nyem heev, lawv yug tej tus me nyuam tab sis lawv pom tias tsis muaj peev xwm tu kom tus me nyuam hlob, ces lawv muab lawv tus me nyuam tua.

As Mes Das nrog Txiv Plig Nkas Nkos hais sib haum tias nws yuav mus cuag Dais Mis Yos Xaus Lis thiab thov kom Xaus Lis pab tsim ib lub tsev tu cov me nyuam yug los tshiab nyob hauv tej tsev neeg pluag. Dais Mis Yos Xaus Lis cog lus tias nws yuav pab kom muaj tej tus poj niam ua tus tu cov me nyuam yug los tshiab ntawd, ces As Mes Das thiaj qhib thawj lub tsev tu cov me nyuam ntsuag nyob hauv lub xeev Npus Nkos. Xyoo tom qab nws kuj qhib ib lub tsev kho cov neeg mob. Xyoo 1559 nws rov tsim dua ib lub tsev kho mob ntxiv thiab. Lub Koom Txoos tau pab cov neeg pluag zoo li ntawd, mas yog ib txog hauj lwm phim Yes Xus lub Moo Zoo, tab sis tsoom pej xeem Zis Pees feem coob thuam lub Koom Txoos; lawv hais tias tsoom neeg ua Ntuj kev cai nyob hauv lub xeev Npus Nkos yog ib pab neeg kob huam. Yog zoo li ntawd, mas cov kws ntaus rog Zis Pees feem coob thiaj thuam tsoom neeg ntseeg.

Nyob Yas Mas Kus Sis, Txiv Plig Tos Les thiab Leej Tij Xis Vas siv zog tshaj lub Moo Zoo, ces xyoo 1554 muaj cov neeg ua Ntuj kev cai coob. Muaj ib tug yog tus tub rog hu ua Tos Los Zas Es Moos (Watanabe Torozaemon), ib tug yog Kis Yos Zes (Paul Kyozen) thiab Xes Nis Yos (Barnabas Senyö); lawv 3 tug no kub siab pab tshaj lub Moo Zoo. Ntuj kev cai tab tom ri mus sai, tab sis xyoo 1556 cov yim neeg Mos Lis (Mori) txeeb tau Yas Mas Kus Sis, lawv tsis nyiam cov ua Ntuj kev cai mas Tos Les lawv thiaj tsiv los nyob Npus Nkos.

Xyoo 1556 lub koom haum Yes Xus Is xa ‘Txiv Plig Vis Les Las’ (Gaspar Vilela) tuaj txog Zis Pees teb. Nws xub ntsib Txiv Plig Tos Les nyob Npus Nkos, nws kawm lus Zis Pees thiab kawm cov Zis Pees tus cuj pwm, tab sis nws tshaj Ntuj Lus raws tus piv txwv Rooj Khoom. Vis Les Las tshaj Ntuj Lus txog qhov twg mas nws rhuav cov Phus Thas tej tsev teev hawm pov tseg thiab muab hloov ua tsev teev Ntuj ua rau cov neeg coj kev cai Phus Thas ntxub nws, ces xyoo 1558 tus Dais Mis Yos thiaj tsis pub cov tub tshaj Ntuj Lus nyob hauv lub nroog His Las Dos (Hirado) hauv lub xeev Nas Nkas Xas Kis (Nagasaki) ntxiv.

Xyoo 1559 tus thawj tswj lub koom haum Yes Xus Is nyob Is Ntias teb mus xyuas cov tub koom haum nyob Zis Pees teb. Lawv sab laj nyob hauv lub pov txwv Kis Yus Sus, lawv paub meej tias yog tsis muaj ib tug Dais Mis Yos txais lub Cim Ntxuav li mas yav tom ntej tus Saus Nkus yuav ntiab cov tub tshaj Ntuj Lus kom tawm ntawm Zis Pees teb mus. Cov tub tshaj Ntuj Lus ua siab loj, lawv xav kom tau qhib ib lub tsev teev Ntuj nyob Kis Yos Taus, ces lawv xa Txiv Plig Vis Les Las thiab Leej Tij Laus Lees Ntxos mus tshaj Ntuj Lus nyob hauv lub tuam ceeb Kis Yos Taus.

Thaum Vis Les Las thiab Laus Lees Ntxos mus tshaj Yes Xus lub Moo Zoo nyob Kis Yos Taus, tseem muaj ib tug Xib Hwb thiab ib tug neeg ntseeg nrog nkawd mus thiab. Chiv thawjlawv 4 leeg mus cuag cov hauj sam saum lub roob His Es (Hieizan) nyob Kis Yos Taus sab pej. Lawv nrog cov hauj sam nyob tsis ntev vim cov hauj sam muab hlob, lawv tsis kam ua ntawv kheev tshaj Yes Xus lub Moo Zoo nyob hauv lub tsheej Kis Yos Taus.

Txiv Plig Vis Les Las pom tias lawv tab kaum nrog cov hauj sam nyob dag, ces nws cia li sim saib puas yuav nrhiav tau kev tshaj Yes Xus lub Moo Zoo nyob hauv lub tuam ceeb Kis Yos Taus. Lawv 4 leeg mus nyob 15 hnub hauv ib kem tsev qis qis uas yog ib tug laus pav Zis Pees lub chaw rau toob xib. Tsis ntev Txiv Plig Vis Les Las nrhiav tau ib lub tsev dav dua, ces nws rau siab tu lub tsev kom cov neeg taug kev mus los ib laj muag pom thiab nkag mus hauv. Lawv muab lawv daim pam rwb los dai rau ntawm phab ntsa, lawv muab ntawv txiav ua ib tug ntoo cuam thiab muab lo rau ntawm daim pam.

Nyob hauv lawv lub tsev, Txiv Plig Vis Les Las zaum ze ntawm ib lub me rooj sau ntawv, nws hnav ib lub qub tsho tshaj sab, nws ntoo ib lub kaus mom liab xws li cov kws txuj Zis Pees. Leej Tij Laus Lees Ntxos zaum ntawm Vis Les Las sab xis, nws tuav ib txog saw Mab Liab loj. Tus Xib Hwb zaum ntawm Vis Les Las sab laug. Thaj chaw uas lawv tshaj lub Moo Zoo rau cov neeg chaws los mloog yog zoo li ntawd. Niaj hmo thaum tsaus ntuj, lawv txo daim pam los vov.

Cov hauj sam pom cov pej xeem tuaj mloog Vis Les Las coob zuj zus. Lawv pib hais lus xaiv lus ncua txog Vis Les Las, lawv thuam Txiv Plig Vis Les Las tias nws yog ib tug liab, ib tug hma, ib tug raug dab phem, thiab lawv 4 leeg noj nqaij neeg. Vim li ntawd, mas thaum lawv tawm mus hauv nroog thiaj muaj ib cov me nyuam caum lawv qab tsawm lawv thiab txawb pob a rau lawv.

Vis Les Las lawv tuaj nyob Kis Yos Taus tau 2 hlis xwb, lawv yuav tsum rov tshais chaw ib zaug ntxiv. Ib tug neeg ua luam muag cawv kheev lawv 4 leeg nyob hauv ib kem tsev phem tas nrho. Yog lub 1 hlis huab cua no no, cov phab ntsa, cov qhov rais, cov qhov rooj piam tag. Lawv nyob 3 lub hlis hauv kem tsev phem ntawd, lawv tiv no, lawv tshaib plab. Txiv Plig Vis Les Las tsis xis nyob, Laus Lees Ntxos ntuav ntshav thiab nws sawv ntsug tsis tau, tsis kav nws tseem tshaj Yes Xus lub Moo Zoo. Lub caij ntawd muaj 100 leej thov txais lub Cim Ntxuav.

Cov hauj sam ntxub Vis Les Las lawv tsis tseg, cov hauj sam tshaj rau tsoom pej xeem kom txhob mus muas cawv nyob hauv lub tsev uas pab neeg tshaj Yes Xus lub Moo Zoo nyob, ces tus tswv tsev ntiab lawv thiab tsis pub lawv nyob hauv nws tsev. Lawv mus nyob ib hlis hauv ib lub khaub tsev. Txiv Plig Vis Les Las lawv 4 leeg nrhiav tau ib lub tsev zoo nkauj nyob hauv thaj av hu ua ‘Npos Moos’.

Lub 12 hlis, 1559 Txiv Plig Vis Les Las thiab Leej Tij Laus Lees Ntxos mus cuag ‘Nos Npus Nas Nkas’ kav xeev ntuj ib ncig lub tsheej Kis Yos Taus pej fab. Vis Les Las xav kom Nos Npus Nas Nkas saib nws yog ib tug muaj hwj chim xws li cov hauj sam, ces Vis Les Las hnav hauj sam cov tsho daj, nws ntoo cov neeg paub txuj Zis Pees lub kaus mom liab, nws tes tuav ib phau ntawv loj, nws tseem hnav lub tsho tshaj sab Pos Tws Nkas tuaj saud. Laus Lees Ntxos hnav Txiv Plig Vis Les Las ib lub tsho tshaj sab ntev ntev, nws ua tus pab Txiv Plig Vis Les Las txhais lus rau Nos Npus Nas Nkas.

Ib xyoos tom qab Nos Npus Nas Nkas ua ntawv tso lus rau Vis Les Las lawv tab meeg qhia Ntuj kev cai, thiab nws kuj tsis pub lawv them se. Tab sis cov hauj sam ntxias tsoom pej xeem kom txhob ntseeg Yes Xus lub Moo Zoo, ces tsis tshua muaj neeg muaj cuab kav ua Ntuj kev cai. Lub 9 hlis xyoo 1561 Vis Les Las lawv thiaj txiav siab mus nyob hauv lub nroog Xas Kais (Sakai), nyob nrug deb ntawm Kis Yos Taus 3 txog 4 hnub kev. Nyob Xas Kais muaj ib tug neeg ntseeg uas 10 xyoo ua ntej nws tau txais Xas Vis Yes hauv nws tsev, nws zoo siab txais Vis Les Las lawv 4 leeg tau yam sov siab, ces lawv nyob Xas Kais ib xyoos.

Xyoo tom qab, Vis Les Las lawv 4 leeg rov mus Kis Yos Taus. Lawv ib tug mus nqa cov tsoos tsho ua Thaj Txi Ntuj nyob hauv lub pov txwv Kis Yus Sus, ces hnub tim 8 lub 9 hlis Txiv Plig Vis Les Las ua Thaj Txi Ntuj ua hmoov lub hnub nyoog Mab Liab yug los; yog Txiv Plig Vis Les Las thawj Thaj Txi Ntuj nyob Zis Pees.

Xyoo 1563 thaum lub 5 hlis cov ntxub Ntuj kev cai vam txog ob tug kws txoj cai kom nkawd txiav txim tias Yes Xus txoj cai puas qhia yam zoo los yam phem nyob hauv Zis Pees teb. Ob tug kws txoj cai ntawd kuj tsis nyiam Yes Xus txoj cai thiab. Hnub lawv ua rooj plaub, ib tug neeg ntseeg tuaj cav lus zoo txog Yes Xus. Leej Tij Laus Lees Ntxos siv zog pab thiab, ces ob tug kws txoj cai cia li tig los ntseeg tias Yes Xus lub Moo Zoo yog tseem txoj kev cawm neeg. Nkawd thov txais lub Cim Ntxuav, nkawd muaj ib tug phooj ywg ua nom txheej siab kuj thov txais lub Cim Ntxuav thiab.

Lawv ua rooj plaub tag lawm, Txiv Plig Vis Les Las thiaj rov ntawm Xas Kais los nyob Kis Yos Taus. Cov neeg txheej siab nyuam qhuav ntseeg txog Yes Xus, lawv ua tej kab sab coj Txiv Plig Vis Les Las mus txog nws lub tsev nyob Kis Yos Taus. Tsoom pej xeem pom cov neeg txheej siab ua tej kab sab li ntawd, sawv daws kuj saib cov neeg tshaj Ntuj Lus muaj hwj chim.

Cov neeg txheej siab nyuam qhuav txais lub Cim Ntxuav kuj tshaj Yes Xus lub Moo Zoo rau lawv cov kwv tij thiab lawv cov phooj ywg nyob cov nroog uas lawv nyob txawm. Lawv coj Txiv Plig Vis Les Las mus txog lawv tej tuam tsev zoo nkauj nyob hauv cov xeev ib ncig Kis Yos Taus. Xyoo ntawd, muaj 73 tus kws ntaus rog Zis Pees txais lub Cim Ntxuav. Ib tug kws ntaus rog yog ‘Mis Kis’ (Miki) hauv lub nroog Is Mos Lis. Ntev mus mas nws tus tub Paj Lug Mis Kis yuav tuag ua Yes Xus tim khawv.

Tib lub xyoo ntawd, Txiv Plig Nkas Nkos tshais chaw hauv Npus Nkos mus rau Mas Kaus (Macau) hos Leej Tij Fes Nas Ntes mus nyob His Las Dos hauv Nas Nkas Xas Kis. Tus Dais Mis Yos ‘Os Mus Las Xus Mis Tas Das’ (Ōmura Sumitada) hauv xeev ntuj Nas Nkas Xas Kis kuj tig los ua Ntuj kev cai, nws xaiv Leej Ntshiab Npas Tos Los Mas Yos ua tus pov hwm, nws yog thawj tug Dais Mis Yos ua Ntuj kev cai. Nws sau Yes Xus lub npe rau ntawm nws lub tsho ntaus rog, nws coj ib tug Ntoo Cuam dai ntawm nws caj dab. Nws sau nws cov tub rog mus ntaus nws cov yeeb ncuab, nyob ntawm kev yog nws pom ib lub tsev teev Phus Thas mas nws muab tus mlom Phus Thas qhau kom vau, nws muab lub tsev teev hawm Phus Thas hlawv, ces nws muab ib tug Ntoo Cuam siab siab txhos nyob ntawd, ces nws nrog nws cov tub rog kim caug pe tus Ntoo Cuam. Thaum nws rov los tsev, mas nws tshaj lus ceeb toom kom muab cov tsev teev Phus Thas nyob hauv nws lub xeev Os Mus Las hlawv tas huv tib si. Tsis hais nruab hnub hmo ntuj yog thaum twg nws xyeej mas nws qhia kev teev Ntuj rau nws cov tub rog, thaum lawv paub kev ntseeg lawm mas nws xa lawv ua tej pab mus txais lub Cim Ntxuav ntawm cov Txiv Plig. Tej tus pej xeem tsis kam kawm kev ntseeg, mas nws tsis kheev kom lawv nyob hauv nws lub xeev. nws qhia sawv daws ntev xyoo, ces xyoo 1571 nws cov pej xeem 5,000 leej tau txais lub Cim Ntxuav. 6 xyoo tom qab muaj 60,000 leej tau txais lub Cim Ntxuav lawm.

Os Mus Las pub ib thaj av thiab lub tsev hauv lub tsheej nkoj theem Yos Kos Ses Us Las (Yokoseura) rau Txiv Plig Tos Les, tab sis Txiv Plig Tos Les tau muab thaj av no ua cov neeg ntseeg lub toj ntxas. Nws caij nkoj hla mus nyob hauv lub nroog Sis Kis hauv lub pov txwv As Mas Kus Xas (Shiki, Amakusa).

Nyob hauv lub pov txwv As Mas Kus Xas, muaj ib tug Dais Mis Yos kav lub xeev Kos Sis Nos Txus (Kuchinotsu) xav txais lub Cim Ntxuav ces As Mes Das nrog nws tus Xib Hwb pib qhia kev ntseeg rau tus Dais Mis Yos thiab nws poj niam. Niaj hnub nkawd ob niam txiv txais 250 leej tuaj kawm kev ntseeg nyob hauv lub tuam tsev. Lawv sawv daws kub siab tas nrho. Lawv kawm hnub puav xwb, ces As Mes Das pub lub Cim Ntxuav rau lawv 250 leej. As Mes Das hnov hais tias muaj ib co pej xeem pluag xav txais lub Cim Ntxuav thiab. Lawv ntshai tuaj kawm hauv tus Dais Mis Yos lub tuam tsev, vim lawv hnav khaub hlab, lawv ntshai ua sw lub tuam tsev. Tus Dais Mis Yos txais cov neeg laus, cov poj niam thiab cov me nyuam pluag tuaj kawm nyob hauv lwm lub tsev, mas thiaj muaj cov neeg pluag 170 leej txais lub Cim Ntxuav.

Xyoo 1576 Dais Mis Yos As Lis Mas hu ua ‘Yos Sis Xas Das’ (Arima Yoshisada) uas yog Xus Mis Tas Das tij laug, kuj txais lub Cim Ntxuav.

Lub caij ntawd, muaj ntau pua lub zos coj kev ntseeg Yes Xus, tab sis cov tub tshaj Ntuj Lus tsis coob, lawv tsis muaj caij nrog cov kawm kev ntseeg nyob ntev, ces lawv pub lub Cim Ntxuav sai hauj sim. Tab txawm tias cov tub tshaj Ntuj Lus mus rau lwm lub xeev lawm, tsis kav niaj hmo cov txais lub Cim Ntxuav sib sau los teev Ntuj ua ke. Nyob hauv tej xeev ntuj muaj neeg ua Ntuj kev cai nyob ua ke coob mas cov tub tshaj Ntuj Lus xav tias lawv yuav pub tau lub Cim Ntxuav sai rau cov neeg xav txais. Lawv tso siab tias cov xub ntseeg nrog lawv cov xib hwb yuav xyiv fab pab qhia cov txais lub Cim Ntxuav sai.

Txiv Plig Vis Les Las paub tias yuav tsum ua yam zoo rau cov nom tswv mas lawv thiaj yuav tig los ua Ntuj kev cai, ces txij xyoo 1563 ntawd los mus, niaj xyoo rov txog hnub ua lub ntees qhib xyoo tshiab, nws caw cov nom tuaj noj ib roog qav hauv lub Koom Txoos tsev. Nws siv zog tas nrho tau 11 xyoo ces thaum nws lub hnub nyoog muaj 40 xyoo xwb, nws plaub hau twb dawb tas xws li ib tug neeg muaj 70 xyoo, ces xyoo 1570 tus tswj lub koom haum Yes Xus Is hu Txiv Plig Vis Les Las mus so nyob Is Ntias teb thiab xa ‘Txiv Plig Kas Nplas’ (Francisco Cabral) tuaj hloov ua tus tswj cov dej num tshaj Ntuj Lus nyob Zis Pees teb.

Xyoo 1568 Nos Npus Nas Nkas txeeb tau Kis Yos Taus, ces nws ua tus kav Zis Pees teb.Nos Npus Nas Nkas fim kam cov Leej Choj Pos Tws Nkas tshaj Ntuj Lus ntau hauj sim. Muaj ib hnub Nos Npus Nas Nkas caw cov Leej Choj thiab cov hauj sam tuaj sib cav nyob hauv nws lub tuam tsev. Nos Npus Nas Nkas nug ib tug tub tshaj Ntuj Lus tias vim li cas cov hauj sam thiaj ntxub lawv. Tus tub tshaj Ntuj Lus hais tias yog vim cov tub tshaj Ntuj Lus ua kom cov nom thiab cov paub txuj pom meej tias kev teev Phus Thas yog yuam kev, thiab cov tub tshaj Ntuj Lus qhia tsoom pej xeem tias cov hauj sam coj tus yam ntxwv tsis tsim txiaj. Tus thawj hauj sam hnov cov lus no, mas nws npau taws heev, nws qw tias yuav tsum caum cov neeg Aws Los Pas tawm ntawm Zis Pees teb mus xwb.

Lawv sib cav ntxiv txog tib neeg tus plig tsis txawj tuag. Tus hauj sam cav tsis yeej, nws nthos nws rab ntaj yuav muab Leej Tij Laus Lees Ntxos tua kom pom nws tus plig ua dab tsi. Tab sis ‘His Des Yos Sis’ nyob ntawd, nws tsis kheev kom tus hauj sam muab Leej Tij Laus Lees Ntxos tua.

Xyoo 1576 Nos Npus Nas Nkas txhib cov tub tshaj Ntuj Lus kom txhim ib lub tsev loj nyob hauv lub tuam ceeb Kis Yos Taus, ces Kas Nplas thiaj nrog cov Leej Choj txhim ib lub tsev teev Ntuj loj, muaj 3 txheej. Cov Zis Pees uas nyiam lub Koom Txoos Kav Tos Liv lawv nto koob meej, tab sis cov yeeb ncuab haj yam ntxub txoj kev ntseeg txog Yes Xus.

Nyob hauv lub nroog Kis Yos Taus muaj 500,000 tus pej xeem nyob txawm. Tab txawm Nos Npus Nas Nkas saib cov tub tshaj Ntuj Lus zoo, tsis kav tsoom pej xeem nyob hauv lub nroog feem coob tsis quav ntsej rau cov tub tshaj Ntuj Lus.

Nos Npus Nas Nkas pom tias muaj tej tus hauj sam kub siab ntaus rog dua lawv txoj kev teev hawm Phus Thas, ces nws sau tub rog thiab nyiag muab lawv tua. Nws muab 1,000 tawm lub tsev hauj sam rhuav pov tseg. Nws muab cov hauj sam thiab lawv tsoom tub txib tua tuag tas huv tib si. Txiv Plig Kos Es Los (Gaspar Coelho) sau ib co lus zoo li no txog Nos Npus Nas Nkas tias:

“Yog zoo li Tswv Ntuj xaiv Nos Npus Nas Nkas los rhawv kev rau Yes Xus lub Moo Zoo ri mus, nws ntaus tsam txeeb cov hauj sam tej thaj chaw uas lawv muaj tub rog coob. Peb tsis paub tias vim li cas nws thiaj muab cov hauj sam tua tuag coob.”

Cov Dais Mis Yos txais lub Cim Ntxuav nyiam kom tsoom pej xeem nyob hauv lawv lub xeev txais lub Cim Ntxuav xws li lawv, mas lawv lub xeev thiaj yuav sib haum xeeb zoo. Li ntawd, thaum Txiv Plig Kas Nplas tswj kev tshaj Ntuj Lus mas cov Dais Mis Yos ntau leej tig los ntseeg txog Yes Xus, ces muaj ntau lub xeev uas tsoom pej xeem sawv daws los ua Ntuj kev cai nyob hauv lub Koom Txoos Kav Tos Liv. Cov xeev ntawd yog nyob hauv lub pov txwv Kis Yus Sus, nyob Zis Pees qab teb, yam li xyoo 1578 ‘Xaus Lis’ tus Dais Mis Yos hauv Npus Nkos txais lub Cim Ntxuav. Xaus Lis yog tus pab cov tub tshaj Ntuj Lus tau 27 xyoo los lawm tab sis nws tsis txiav siab txais lub Cim Ntxuav li. Nws tsoom pej xeem tsuas muaj 2,500 leej ntseeg txog Yes Xus, tab sis thaum nws txais lub Cim Ntxuav tas lawm mas ib xyoos tom qab muaj 6,000 tus neeg ua Ntuj kev cai nyob hauv nws lub xeev.

Cov ntseeg nyob hauv Npus Nkos lawv nquag txais lub Cim Daws Txhaum thiab txais Yes Xus lub Cev nyob hauv Thaj Txi Ntuj. Lawv muaj ib phau ntawv nthuav txog Yes Xus raug kev txom nyem thiab tuag nyob saum Ntoo Cuam, lawv niaj hnub nyeem phau ntawv ntawd kom thoob. Niaj Hnub Chiv, thaum ua Thaj Txi Ntuj tas, mas sawv daws sau nyiaj pab lawv cov neeg uas txom nyem dua cov. Thaum ib yim neeg pib npaj txais lub Cim Ntxuav, nws sau ib tug ntoo cuam nyob hauv ib daig ntawv thiab nws muab dai rau ntawm lub qhov rooj chaws mus hauv tsev.

Xyoo 1573 tus thawj tswj lub koom haum Yes Xus Is xaiv ‘Vas Lis Nyas Nos’ (Alessandro Valignano) ua tus thawj saib lub koom haum Yes Xus Is cov tub tshaj Ntuj Lus (Visitor of Missions) txij As Fis Kas teb mus txog Zis Pees teb. Xyoo tom qab Vas Lis Nyas Nos nrog 41 tug tub koom haum caij nkoj deg nyob Lis Npos uas yog Pos Tws Nkas teb lub tuam ceeb mus txog Nkos As hauv Is Ntias teb.

Vas Lis Nyas Nos nyob Is Ntias teb 3 xyoos, ces xyoo 1579 nws caij nkoj mus Zis Pees teb. Nws xub mus tsham tus Dais Mis Yos As Lis Mas tshiab hu ua ‘Has Lus Nos Npus’ (Arima Harunobu). Has Las Nos Npus tsis nyiam Ntuj kev cai ces nws hiam cov neeg ntseeg, ces Vas Lis Nyas Nos nrog nws tham zoo zoo ua rau nws nrog cov tub tshaj Ntuj Lus sib haum xeeb, ces xyoo 1580 Has Lus Nos Npus txais lub Cim Ntxuav. Nws tsoom tub rog 4,000 leej nrog nws txais lub Cim Ntxuav thiab tsoom pej xeem 7,000 leej rov kawm kev ntseeg ntxiv nyob hauv lub Koom Txoos. Tos ob peb xyoos ntxiv ces tas tsoom pej xeem nyob hauv lub xeev As Lis Mas coj Ntuj kev cai.

Thaum Txiv Plig Vas Lis Nyas Nos tuaj rau Zis Pees teb, muaj ib tug tub txib As Fis Kas nrog nws tuaj thiab; nws tau ua Nos Npus Nas Nkas ib tug tub ntaus rog, lawv tis lub npe Zis Pees rau nws hu ua ‘Yas Xus Kes’ (Yasuke).

Vas Lis Nyas Nos pom cov Leej Choj tshaj Ntuj Lus raws tus piv txwv ‘Yoog Luag Txuj’ mas nws tsis to taub cov Leej Choj tus yam ntxwv ntawd. Nws saib lawv tshaj Ntuj Lus tau 3 xyoos ces nws thiaj pom tseeb tias txoj kev yoog luag txuj yog ib txog kev zoo rau tshaj Ntuj Lus, ces nws muab siab rau kom cov tub tshaj Ntuj Lus nyob As Xias Toob Fab siv tus piv txwv yoog luag txuj.

Vas Lis Nyas Nos pom tias Txiv Plig Kas Nplas tsis tshua coj cov Zis Pees kev cai sib fim, nws tsis hwm cov nom Zis Pees raws li Zis Pees kev cai, nws tsis coj cov Zis Pees kev cai noj mov, tsis hnav li cov nom Zis Pees thiab tseem ua ob peb yam tsis tshua ntxim cov Zis Pees lub siab; ces Vas Lis Nyas Nos nrog Txiv Plig Kas Nplas sib cav. Vas Lis Nyas Nos hais kom Txiv Plig Kas Nplas thiab cov tub tshaj Ntuj Lus coj Zis Pees kev cai huv tib si, thiab kom lawv hnav ntaub npuag. Tab sis Kas Nplas cav tias yuav tsum hnav ntaub paj thiaj haum txoj kev pluag. Vas Lis Nyas Nos xav tsa tej tus Zis Pees ua Leej Choj vim cov tub tshaj Ntuj Lus tuaj pej kum teb tuaj lawv coob tsis txaus thiab cov Leej Choj Zis Pees paub lawv lus zoo ces yuav pab tau kev tshaj Ntuj Lus tab sis Txiv Plig Kas Nplas tsis pom zoo, nws hais tias cov Zis Pees muab hlob mas thaum tsa lawv ua Leej Choj ces yuav tswj tsis tau lawv ntxiv. Yog li mas ib ntus ntev li 10 xyoo Txiv Plig Kas Nplas tsuas tau txais 5 tug Zis Pees los nyob hauv lub koom haum Yes Xus Is xwb, hos nyob hauv ib xyoos xwb mas Vas Lis Nyas Nos tau txais 10 leej Zis Pees los nyob hauv lub koom haum Yes Xus Is.

Vas Lis Nyas Nos xyuam xim, nws xav qhia cov neeg ntseeg nram qab teb hauv lub pov txwv Kis Yus Sus kom lawv coj kev ntseeg raws lub Koom Txoos txoj cai tso. Tshuav ib xyoos xwb yuav txog lub caij nws rov mus tswj cov tub koom haum Yes Xus Is nyob Is Ntias teb, cov tub tshaj Ntuj Lus hais tas zog kom nws mus xyuas tsoom ntseeg nyob qaum teb, ces lub 3 hlis xyoo 1581 nws mus txog lub nroog Xas Kais uas nyob tsis deb ntawm Kis Yos Taus. Nws mus txog Kis Yos Taus thiab ntsib Nos Npus Nas Nkas. Nos Npus Nas Nkas saib Vas Lis Nyas Nos yog ib tug muaj tsim thiab muaj hwj chim. Thaum Nos Npus Nas Nkas ua tej lub ntees loj, mas nws caw Vas Lis Nyas Nos tuaj, nws nrog Vas Lis Nyas Nos tham ntau, thiab nws pub paj tshab rau Vas Lis Nyas Nos.

Cov Zis Pees pom cov nkoj Pos Tws Nkas tuaj tsis tseg, yog muaj ib co Zis Pees mus txog Xib Fab mas haj yam yuav zoo, ces Vas Lis Nyas Nos thiaj tawm tswv yim yuav coj ib cov tub hluas Zis Pees nrog nws mus kom txog Aws Los Pas tuam teb. Nws nrog Nos Npus Nas Nkas thiab 3 tug Dais Mis Yos ua Ntuj kev cai yam li Os Mus Las, Xaus Lis, thiab As Lis Mas tuav xam. Lawv xaiv ‘Is Tos’ (Mancio Itō), ‘Tshis Ntsis Vas’ (Miguel Chijiwa), ‘Nas Kas Us Las’ (Julião Nakaura), thiab ‘Has Las’ (Martinho Hara) ua tiam lis nrog Vas Lis Nyas Nos mus.

xyoo 1582 Vas Lis Nyas Nos coj pab tiam lis Zis Pees sawv kev mus. Lawv mus so nyob Nkos As, ces mam li caij nkoj mus ntxiv txog Pos Tws Nkas thiab Is Npes Lis. Vas Lis Nyas Nos kuj coj lawv mus ntsib Vaj Qhia nyob Los Mas.

Ua ntej Vas Lis Nyas Nos yuav mus Aws Los Pas, nws tsa ‘Txiv Plig Kos Es Los’ (Gaspar Coelho) ua tus tswj cov dej num tshaj Ntuj Lus nyob Zis Pees teb. Kos Es Los yug los nyob Pos Tws Nkas teb xyoo 1530. Kos Es Los yav hluas, nws ua lag ua luam ces nws thiaj mus txog lub nroog Nkos As. Thaum Kos Es Los hnub nyoog muaj 24 xyoos, nws txiav siab ua tub tshaj Ntuj Lus nyob hauv lub koom haum Yes Xus Is. Yog thaum Kos Es Los muaj 42 xyoos ces nws thiaj mus nyob Zis Pees teb. Nws nrog Txiv Plig Kas Nplas tshaj Ntuj Lus 9 xyoos nyob hauv lub pov txwv Kis Yus Sus, nws yog tus ua lub Cim Ntxuav rau tus Dais Mis Yos As Lis Mas. Thaum ntawd Kos Es Los muaj 51 xyoos. Kos Es Los sau ib tsab ntawv zoo li no tias:

“Nyem no, Yes Xus lub Koom Txoos ri los txog Zis Pees teb tau 33 xyoos lawm. Niaj xyoo muaj kev tsov kev rog nyob Zis Pees teb, tab sis tsis tshua raug tej thaj chaw uas tsoom ntseeg nyob. Peb muaj 200 lub tsev teev Ntuj, ib txhia loj hos ib txhia me. Peb lub Koom Txoos muaj 22 tug Txiv Plig, muaj 46 tus tub kawm ua Leej Choj, ua Leej Tij, los ua Xib Hwb. Muaj 500 leej ua dej num tuav peb cov tsev teev Ntuj. Xyoo 1582 no, muaj tshaj 5,000 leej txais lub Cim Ntxuav. Nos Npus Nas Nkas kuj saib peb cov dej num tshaj Ntuj Lus zoo thiab.”

Txiv Plig Kos Es Los tso siab rau Nos Npus Nas Nkas, tab sis lub 6 hli Nos Npus Nas Nkas raug ib tug thawj tub rog hu ua ‘Mis Xus His Des’ (Akechi Mitsuhide) ntxeev siab thiab muab nws tua tuag. Tus hloov Nos Npus Nas Nkas ua chaw nyob Kis Yos Taus yog ‘His Des Yos Sis’. His Des Yos Sis xav kom nto moo ib yam Nos Npus Nas Nkas, ces nws thiaj txhim ib lub tuam tsev xov ntsa zeb ntev 4 kis los mev nyob hauv lub nroog Os Xas Kas. Thaum Nos Npus Nas Nkas tuag tas tau 2 xyoos xwb, ces His Des Yos Sis lub hwj chim twb loj dua Nos Npus Nas Nkas lub. Tus tuam vaj nyob Kis Yos Taus thiaj pub lub npe muaj hwj chim rau His Des Yos Sis ua tus tuam vaj tus thawj tim xyoob (Kanpaku).

Txiv Plig Kos Es Los nrog His Des Yos Sis ua phooj ywg, tab sis nws pib yuam kev loj tas nrho, nws pom tias lub caij nws tswj kev tshaj Ntuj Lus, mas cov Koom Txoos nyob hauv lub pov txwv Kis Yus Sus hlob sai, ces nws tsis xyuam xim lawm, vim nws siab loj dhau.

Kos Es Los yog ib tug neeg pob ntseg sib thiab tsis xyuam xim, nws ntseeg luag tej sai dhau. Thaum His Des Yos Sis hais tias nws yuav mus ntaus rog txeeb Suav teb, mas Kos Es Los xav tias His Des Yos Sis yuav txeeb Suav teb tsis tau ib zaug, ces nws khav theeb hais tias nws yuav vam txog cov tub rog Pos Tws Nkas tuaj pab His Des Yos Sis. Cov Pos Tws Nkas yuav xa lawv cov nkoj ntaus rog tuaj pab His Des Yos Sis. His Des Yos Sis ntse dua Kos Es Los, ces nws ua txuj ntseeg Kos Es Los sai. Tab sis His Des Yos Sis siab nkhaus, qhov tiag nws mloog tus hauj sam Xees Xos, vim tus hauj sam Xees Xos yog tus kws kho mob, nws kho His Des Yos Sis kev mob nkeeg thiab nws yog tus nrhiav cov poj niam uas His Des Yos Sis niaj hnub nrog lawv ua plees ua yi.

His Des Yos Sis sau 250 txhiab tus tub rog mus ntaus tsam nyob hauv lub pov txwv Kis Yus Sus uas nyob nram Zis Pees qab teb. Xyoo 1587 nws yeej tus Dais Mis Yos Yos Sis His Xas (Shimazu Yoshihisa) nyob Kis Yus Sus. Nws rov faib cov teb chaws hauv lub pov txwv Kis Yus Sus rau cov Dais Mis Yos me ywj nws siab, nws kuj tau ntiab cov tub tshaj Ntuj Lus kom tawm hauv lub pov txwv mus.

Xyoo 1587 tim 24 lub 7 hli, His Des Yos Sis xa nws ib tug neeg mus ceeb toom kom cov tub tshaj Ntuj Lus kom tawm ntawm Zis Pees teb mus. Cov Leej Choj sib sau mus nyob Nas Nkas Xas Kis, lawv ua twj ywm ib ntus. Ntawm Kos Es Los mas nws fi xov rau cov nkoj rog Is Npes Lias uas nyob Fis Lis Pees teb kom tuaj hem His Des Yos Sis. His Des Yos Sis kuj vam txog cov tuam phom Pos Tws Nkas, ces nws thiaj tso cov lus ceeb toom tseg. 

Xyoo 1588 Vas Lis Nyas Nos coj cov tiam lis Zis Pees rov los txog Mas Kaus, nws tshuaj saib His Des Yos Sis puas kam txais nws vim nws xav nrog His Des Yos Sis tham. His Des Yos Sis cog lus tias yuav tsis ua dab tsi rau Vas Lis Nyas Nos, mas Vas Lis Nyas Nos thiaj nrog 4 tug tiam lis caij nkoj los rau Zis Pees teb. His Des Yos Sis txais Vas Lis Nyas Nos zoo thiab nws tso tseg tsis hiam cov neeg ua Ntuj kev cai.

Txiv Plig Kos Es Los tas sim neej, ces Vas Lis Nyas Nos tsa ‘Txiv Plig Os Kas Tis Nos’ (Gnecchi-Soldo Organtino) ua tus coj tsoom tub tshaj Ntuj Lus nyob Zis Pees teb. Os Kas Tis Nos tuaj nyob Zis Pees teb hauv xyoo 1567. Nws rau siab kawm lus Zis Pees nyob Kis Yos Taus. Nos Npus Nas Nkas nyiam nws kawg, ces xyoo 1576 Nos Npus Nas Nkas kom nws ua tus txhim lub tsev teev Ntuj nyob Kis Yos Taus. Txiv Plig Os Kas Tis Nos kuj tau qhib ib lub tsev qhia txuj rau cov nom tswv lawv tej me nyuam nyob As Xus Sis (Azuchi) ntawm ntug pas dej Npis Vas (Biwa lake).

Thaum His Des Yos Sis txeeb tau cov teb chaws yuav luag tag nyob hauv lub pov txwv Kis Yus Sus, mas nws mus txeeb tej xeev ntuj nyob qaum teb ze ntawm cov Hos Zos (Hojo) hauv Kaas Tos (Kanto), ces xyoo 1590 Zis Pees teb nyob thaj yeeb tsis muaj ib tug Dais Mis Yos muaj cuab kav sawv ntaus rog, vim His Des Yos Sis tsis kheev kom lawv sib ntaus rog, thiab sawv daws kuj ntshai His Des Yos Sis.   

Thaum ntawd, lub Koom Txoos nyob Zis Pees teb kuj tau tsa ntau pua tus Zis Pees ua Tub Tshaj Ntuj Lus los pab coj cov Koom Txoos nyob Zis Pees teb. Muaj 4 hom neeg Zis Pees pab coj cov Koom Txoos; yog cov Txiv Plig, cov Leej Tij, cov Dos Zus Kus, thiab cov tswj Koom Txoos

Cov Txiv Plig Zis Pees muaj 30 Leej, cov Leej Tij muaj 74 tus, cov Dos Zus Kos muaj txog 300 tawm leej.

Cov Dos Zus Kos yog ib co hluas, los ib co laus, uas lawv chais plaub hau tib si, ua lub cim tias lawv tsis nrhiav koob meej, lawv tsob hwb cov Koom Txoos. Lawv tu cov tsev teev Ntuj, lawv pab cov Leej Choj ua Thaj Txi Ntuj, pab ua lub Cim Ntxuav, thiab pab ua cov kab ke pam tuag. Cov Dos Zus Kos coj lub neej nyob tab seeb tsis yuav poj niam. Hnub uas lub Koom Txoos tsa ib tus neeg ntseeg ua Dos Zus Kos, mas ib tug Txiv Plig ua ib Thaj Txi Ntuj loj, cov ntseeg hu nkauj nrog suab paj nruag. Tus yuav ua Dos Zus Kus khoov pe ti av, ib tug neeg ntseeg txiav tus Dos Zus Kos tus moj tuam. Tus Dos Zus Kos hnav ib lub tsho tshaj sab txawv cov Txiv Plig lub tsho tshaj sab. Cov Dos Zus Kos niaj hnub qee ib lub caij txais Ntuj Lus thiab lawv muaj ib lub caij tso siab.

Ib lub zos muaj ib pab neeg ntseeg coob lawv ua ib lub Koom Txoos. Nyob hauv txhua lub Koom Txoos, cov Txiv Plig tsa ib tug tswj lub Koom Txoos, yog ib tug neeg ntseeg txawj qhia kev ntseeg, txawj qhuab qhia cov ntseeg. Cov tswj cov Koom Txoos paub ua lub Cim Ntxuav, txawj pab cov ntseeg thaum lawv muaj txiab muaj nkeeg thiab lawv ua cov kab ke pam tuag.

Cov neeg ntseeg tseem tsim ntau lub koom haum; muaj cov koom haum uas cov hluas sib pab kawm kev ntseeg, muaj cov koom haum uas cov poj niam sib qhia, muaj cov koom haum kawm phau ntawv qhia kev ntseeg lub ntsiab, tseem muaj cov koom haum xyaum ua tim khawv.

Thaum ib yim neeg pib npaj txais lub Cim Ntxuav, nws sau ib tug ntoo cuam nyob hauv ib daig ntawv thiab nws muab dai rau ntawm lub qhov rooj chaws mus hauv tsev. Nyob hauv cov Koom Txoos, cov me nyuam sawv daws paub hauv nruab siab tas phau ntawv ntim kev ntseeg lub ntsiab.

Yog thaum cov neeg ntseeg ua tej lub ntees pam tej tus neeg ntseeg nto moo, thiab yog thaum cov neeg ntseeg ua tej lub ntees loj cav txog Yes Xus, mas cov neeg ntseeg tuaj sib txoos ua ke coob.Cov ntees loj ntawd pab kom cov neeg ntseeg muaj lub siab ntseeg khov kho. Thaum cov neeg ntseeg ua tej lub ntees pam ib tug ntseeg nto moo loj mas lawv ua zoo li no: Cov txiv neej kwv tus tuag mus rau saum ib lub sam thiaj siab siab. Cov ntseeg muab ntaub tsuj ntaub npuag los vov lub hleb. Tsoom ntseeg ib txhiab tawm leej tuav tswm ciab, ua kom hmo ntuj pom kev cuag li nruab hnub. Lawv sawv daws taug cov kev loj hla lub nroog. Thaum cov ntseeg kwv tus tuag mus txog ntawm toj ntxas, lawv xuas ib co txiag ntoo zoo nkauj los xov lub qhov ntxa. Cov ntseeg ua tej lub ntees pam tuag zoo li ntawd mas lawv zoo siab nyob ruaj hauv lub Koom Txoos.

His Des Yos Sis xav kom muaj 2 haiv neeg tuaj sib twv ua zoo rau nws, ces nws tso neeg mus thov cov nkoj rog Is Npes Lias tuaj xyuas Zis Pees teb. Muaj tej pab tub tshaj Ntuj Lus Is Npes Lias nrog cov nkoj rog tuaj, lawv tauj tshaj Ntuj Lus raws tus piv txwv Rooj Khoom xws li lawv ua nyob Fis Lis Pees teb. Lawv qhib tej lub tsev kho cov neeg mob, lawv pab tsoom pej xeem, tab sis lawv tsis kam coj txoj cai hwm cov nom xws li tsoom pej xeem Zis Pees ua kam los, lawv tsis pub paj tshab rau cov nom tswv kav teb chaws.

Xyoo 1596 lub 9 hlis, ib lub nkoj Is Npes Lias ua luam thauj 1,500,000 lub txiaj nyiag sawv kev ntawm Mas Nis Las mus rau Mev Xis Kos, tab sis cua tshuab tsis zoo ces lub nkoj tuaj raug cov pob tsua ntawm ntug hiav txwv Zis Pees. His Des Yos Sis hais tias kev cai thaum ib lub nkoj tuaj poob nyob ze nws lub teb chaws mas nws muaj cai khaws xyeem yuav tib si, ces His Des Yos Sis yuav cov nyiaj Is Npes Lias ntawd tas huv tib si.

Cov Is Npes Lias thiaj tso hem thawj tias lawv tus vaj yuav xa nkoj rog tuaj ntaus cov Zis Pees, ua rau His Des Yos Sis npau taw ces nws tso neeg mus ntes 6 tus tub tshaj Ntuj Lus Is Npes Lias thiab 17 tus neeg Zis Pees kawm Ntuj kev cai ntawm cov Leej Choj Is Npes Lias.

His Des Yos Sis cov tub rog tau mus ntes 3 tug tub koom haum Yes Xus Is nyob hauv lub nroog Os Xas Kas (Osaka). Tus laus dua cov hu ua Kis Xais (James Kisai), nws muaj 64 xyoos. Tus hu ua Nkaus Tos (John Soan de Goto) muaj 18 xyoo. Tus hu ua Mis Kis (Paul Miki) muaj 31 xyoos.

Mis Kis paub cov hauj sam txoj kev teev hawm Phus Thas zoo. Nws tau nrog cov Leej Choj sau tej phau ntawv tiv cov hauj sam txoj kev ntseeg thiab qhia lawv tus yam ntxwv phem rau tsoom pej xeem paub. Thaum Mis Kis muaj 30 xyoo, cov tub koom haum Yes Xus Is xaiv Mis Kis nrog lawv mus tshaj Ntuj Lus. Niaj hnub Mis Kis kuj qhia kev ntseeg rau cov pej xeem. Thaum nws raug dai nyob saum ntoo cuam, nws tseem qhia kev ntseeg rau cov ntseeg thiab rau cov tuaj ntsia lawv tab tom yuav tuag.

Cov tub rog coj lawv 3 leeg mus txog lub nroog Kis Yos Taus, nrog 3 tug Leej Choj Is Npes Lias thiab 17 tus neeg kawm Ntuj kev cai. Cov tub rog txiav lawv sawv daws ib sab pob ntseg thiab coj lawv 26 leej mus taug tej kev hauv lub nroog Kis Yos Taus. Cov tub rog hu tsoom pej xeem tuaj tsawm lawv 26 leej, ces cov tub rog coj lawv 26 leej mus txog lub nroog Nas Nkas Xas Kis (Nagasaki).

Cov nom Zis Pees muab cov neeg ua Ntuj kev cai tua.

Hnub tim 5 lub 2 hlis xyoo 1597 His Des Yos Sis cov tub rog muab lawv 26 leej pav rau cov ntoo cuam, cov tub rog ua zoo li no: Nyob ntawm taw ntoo cuam cov tub rog ntsia ib daig txiag cia rau tiag taw. Nyob nruab nrab tus ntoo cuam, lawv ntsia ib yav ntoo luv cia rau zaum. Cov tub rog xuas hlua pav ob txhais plab hlaub, pav lub duav thiab ob txhais caj npab khi rau tus ntoo cuam, lawv sib zog zawm. Nyob ntawm caj dab, cov tub rog xuas xov hlau khi rau tus ntoo cuam. Thaum cov tub rog muab cov neeg pav tas rau saum ntoo cuam zoo li ntawd, lawv mam li tsa cov ntoo cuam sawv, lawv khawb qhov thiab muab cov ntoo cuam txhos sawv ntsug.

Cov neeg ntseeg coob leej tuaj pab cov dai saum ntoo cuam kom ua siab loj. Cov dai saum ntoo cuam kuj qhuab qhia lawv tsoom kwv tij phooj ywg kom sawv daws nyob ruaj nreb hauv txoj kev ntseeg. Lawv puav leej hu tej zaj nkauj lom zem teev Ntuj. Cov tub rog yuav ua lawv tej dej num kom tag mas lawv xuas hmuv nkaug cov dai saum ntoo cuam ntawm sab tav tshwm rau xub pwg kom lawv tuag.

Cov tub tshaj Ntuj Lus Yes Xus Is pom li ntawd, lawv ntshai tsam His Des Yos Sis hiam lub Koom Txoos ntxiv, tab sis lub caij ntawd Zis Pees teb vam meej ntau vim lawv nrog cov Pos Tws Nkas thiab cov Is Npes Lias ua luam thiab vim lawv xyaum cov txuj Xib Fab. His Des Yis Sis tsis xav nrog lawv muaj plaub muaj ntug, ces nws ua twj ywm cia cov Leej Choj tshaj Ntuj Lus ntxiv. Yog vim li ntawd lub Koom Txoos thiaj rov nyob thaj yeeb.

His Des Yos Sis xav mus txeeb Suav teb, cov tub rog Zis Pees yuav tsum xub txeeb Kos Lim teb tso thiaj tau kev mus txog Suav teb. Xyoo 1595 His Des Yos Sis xa cov tub rog ua Ntuj kev cai mus txeeb Kos Lim teb. Lawv cov no yuav yog cov tseb lub noob ntseeg txog Yes Xus rau cov Kos Lim. 

Xyoo 1598 His Des Yos Sis tas sim neej, ces Is Es Yas Xus (Tokugawa Ieyasu) ua rog ntaus His Des Yos Sis tus tub, vim nws pom tias cov Dais Mis Yos ua Ntuj kev cai nyiam His Des Yos Sis tus tub.

His Des Yos Sis tus tub hnov tias Is Es Yas Xus yuav tuaj ntaus nws, ces nws vam txog cov Das Mis Yos ua Ntuj kev cai pab nws. Xyoo 1600 Is Es Yas Xus muab His Des Yos Sis tus tub thiab cov Dais Mis Yos pab nws tua tuag tas, ces nws kav lawv cov xeev ntuj.

Lub caij ntawd, cov Aas Kiv thiab cov Hos Laas tuaj ua luam nyob Zis Pees teb. Cov Aas Kis thiab cov Hos Laas ua Ntuj kev cai nyob hauv lub Koom Txoos Plos Tes Taas, ces lawv hais lus xaiv lus ncua txog lub Koom Txoos Kav Tos Liv rau cov Zis Pees hnov. Cov Pos Tws Nkas tuaj nyob Zis Pees teb, lawv coj tus yam ntxwv tsis zoo thiab lawv ua luam neeg nyob Nas Nkas Xas Kis, ces Is Es Xas Yus thiaj pib tab meeg thuam cov ua Ntuj kev cai nyob hauv lub Koom Txoos Kav Tos Liv.

Xyoo 1609 ib lub nkoj Is Npes Lias tog hauv dej nyob hauv lub tsheej Nas Nkas Xas Kis. Tus Is Npes Lias kav Fis Lis Pees teb tso ib co tiam lis tuaj cem Is Es Yas Xus. Thaum ntawd, Is Es Yas Xus yuav luag ntiab cov tub tshaj Ntuj Lus tawm hauv lub teb chaws mus, tab sis nws tseem xav kom lub teb chaws nrog cov Pos Tws Nkas thiab Is Npes Lias ua luam ntxiv.

Xyoo 1613 ib tug Dais Mis Yos tso ib co tiam lis mus xyuas tus vaj Is Npes Lias. Is Es Yas Xus xav tias tus Dais Mis Yos vam txog tus vaj Is Npes Lias tuaj pab nws ntaus Is Es Yas Xus. Is Es Yas Xus kuj mloog cov hauj sam hais lus xaiv txog cov Leej Choj thiab cov Dais Mis Yos ua Ntuj kev cai. Lawv hais tias yog Phus Thas kev cai coj txoj kev thaj yeeb tuaj rau Zis Pees teb, Ntuj kev cai yog ib co kev cai phem tuaj ntawm pej kum teb tuaj. Is Es Yas Xus thiaj xav tias yuav tsum rhuav lub Koom Txoos hauv nws lub teb chaws.

Xyoo 1614 tim 27 lub 1 hlis Is Es Yas Xus ceeb toom txoj cai tshiab tias yuav ntiab cov tub tshaj Ntuj Lus kom txhob nyob Zis Pees teb ntxiv, thiab quab yuam tsoom pej xeem Zis Pees kom lawv thim kev ntseeg txog Yes Xus. Cov tub tshaj Ntuj Lus thiaj khiav mus nkaum hauv tej lub tsev pheeb suab nyob raws ntug dej hiav txwv, lawv tos kom cov nkoj Pos Tws Nkas tuaj thauj lawv tawm ntawm Zis Pees teb mus. Tsuas muaj 47 tus tub tshaj Ntuj Lus thiaj nrhiav tau kev nkaum nyob hauv Zis Pees teb ntxiv mus xwb. Is Es Yas Xus tseem xa nws cov tub rog mus rhuav cov tsev teev Ntuj nyob Zis Pees teb huv tib si.

Xyoo 1615 Is Es Yas Xus txeeb tau lub nroog Os Xas Kas, ces nws tua tus qub Saus Nkus tsev neeg thiab cov xeeb zeej xeeb ntxwv huv tib si, nws sawv ua Saus Nkus.

Is Es Yas Xus txhim lub tsheej Tos Kis Yaus (Es Dos) los ua lub tuam ceeb tshiab. Nws kom cov Dais Mis Yos sawv daws coj lawv cov tsev neeg mus nyob Tos Kis Yaus huv si. Nws tso lawv mus saib cov nroog ywj lawv siab, tab sis lawv tsev neeg nyob hauv Tos Kis Yaus. Nws tau tsim lub tuam ceeb Tos Kis Yaus kom vam meej thiab muaj chaw ua lag luam loj.

Ob xyoos tom qab nws tuag, nws tus tub hu ua ‘His Des Tas Das’ (Tokugawa Hidetada) sawv ua Saus Nkus, nws haj yam tsim txom cov neeg ntseeg heev dua. Xyoo 1622 nws tso cov tub rog mus nrhiav cov Leej Choj thiab cov Xib Hwb qhia kev ntseeg. Cov qhia kev ntseeg khiav tsiv nraim nyob hauv tej lub zos muaj cov ua Ntuj kev cai nyob. His Des Tas Das ceeb toom tias yog leej twg pab zais cov qhia Ntuj kev cai mas nws yuav muab lawv tsev neeg tua huv tib si, ces niaj xyoo muaj ntau pua tus neeg raug kev tuag. His Des Tas Das pub nyiaj txiag rau cov neeg kom cov tub tshaj Ntuj Lus. Cov neeg ntseeg tshaj 20,000 leej nyob ib ncig ntawm Kis Yos Taus thiaj tsiv mus ua lub neej ntseeg nyob Zis Pees qaum teb.

His Des Tas Das txawm hiam cov ua Ntuj kev cai npaum li cas tsis kav niaj xyoo muaj ntau txhiab leej txais kev ntseeg ntxiv. Cov hauj sam teev Phus Thas pom tias muaj cov pej xeem coob txais lub Cim Ntxuav, cov hauj sam meem txom ces lawv thiaj txw His Des Tas Das kom nws ua ib zaug muab cov ua Ntuj kev cai ntes tsim txom thiab tua pov tseg.

His Des Tas Das xub ntes cov neeg ntseeg 50 leej mus kaw nyob hauv ib lub tsev loj faj nyob saum lub roob Os Mus Las. Lawv nyob hauv tej kem tsev nqaim nqaim, lawv liab qab, tsuas muaj ib daig pam khaub hlab qhwv lawv lub cev. Luag tsis pub siv tej daim ntaub los thaiv cua, thaiv nag thiab thaiv daus. Tsis pub cov neeg tawm mus plob nyob sab nraud, sawv daws tso quav tso zis nyob ntawm tej chaw pw ua tsw phem ntxiag. Luag tsuas pub me ntsis mov noj kom txhob tuag tshaib xwb. Lawv raug kev txom nyem nyob hauv tsev loj faj li ntawd 1 xyoos ntau.

Hnub tim 9 lub 9 hlis xyoo 1622 cov tub rog coj cov ua Ntuj kev cai nyob Os Mus Las mus nyob txim nyob Nas Nkas Xas Kis. Tag kis, tus thawj tswj kav lub nroog Nas Nkas Xas Kis sau 30,000 tus pej xeem tuaj nyob saum lub Ncov Roob Ntshiab. Cov tub rog xub muab cov neeg ntseeg 25 leeg khi rau 25 tug ncej, thiab lawv rauv ib cub tawg nyob ncaj tus ncej. Lawv khi xoob xoob kom tus neeg ntseeg tau kev dim ntawm tus ncej. Cov tub rog txiav 30 tus neeg ua Ntuj kev cai caj dab rau 30,000 leej ntsia ntsoov, lawv muab cov taub hau chob rau saum ib co tswg. Cov ua Ntuj kev cai pom cov taub hau, mas lawv hu tej zaj nkauj thov kom Tswv Ntuj pab 25 tus neeg uas raug khi nyob ntawm 25 tug ncej nyob ze cov cub tawg, kom lawv ua siab loj txhob hloov siab nti plam ntawm cov ncej. Cov cub tawg maj mam txhiab cov neeg ntseeg lub cev. Muaj 3 leeg daws lawv cov hlua, tab sis ib tug khiav rov mus sawv nyob ntawm nws tus ncej. Hauv lawv 30 leej uas raug khi txhiab hluav taws, mas muaj 28 leej raug kub hnyiab tuag zoo li ntawd ua tim khawv. Cov tub rog hlawv lawv lub cev thiab muab cov tshauv pov tseg rau hauv hiav txwv nyob ze lub Ncov Roob Ntshiab.

Xyoo 1623 His Des Tas Das tuag, ces nws tus kwv hu ua ‘Is Es Mis Txus’ (Tokugawa Iemitsu) ua tus Saus Nkus tshiab. Nws kav Zis Pees teb mus txog xyoo 1651. Nws yog ib tug neeg lim hiam tas nrho, nws tsim tej txoj kev tsim txom cov neeg ua Ntuj kev cai heev tshaj. Thaum Is Es Mis Txus tas sim neej lawm, mas tsis muaj ib tug neeg nyob Zis Pees teb yuav tab meeg teev Ntuj tau, tsuas muaj tej pab neeg nyiag teev Ntuj ib ntus ntev li 200 xyoo mus txog lub caij ib tse neeg tshiab pib ua Saus Nkus kav Zis Pees teb.

Hnub tim 4 lub 12 hlis xyoo 1623 Is Es Mis Txus muab 50 leej neeg ntseeg hlawv ciaj nyob Taus Kis Yos (Tokyo) thiab nws hlawv tej pab neeg ntseeg nyob thoob Zis Pees qab teb thiab qaum teb.

Is Es Mis Txus yog ib tug Saus Nkus lim hiam thiab tsis tso siab rau tsoom pej xeem kiag li. Nws pom cov Dais Mis Yos leej puav thim kev ntseeg vim lawv ntshai poob nom, tab sis tsoom pej xeem uas yog tub qoob tub loo thiab cov kws ntaus rog tsis kam tso kev ntseeg txog Yes Xus pov tseg; nws txhawj tias tsam lawv yuav koom siab sawv ntaus rog tiv nws, ces nws xav tsim ib yam hauj lwm loj hem cov ua Ntuj kev cai nyob thoob Zis Pees teb, nws tsa 50 tug ncej nyob hauv ib lub tshav puam dav dav nyob hauv plawv tuam ceeb Tos Kis Yaus.

Cov ua Ntuj kev cai xub raug kaw nyob hauv tsev loj faj ib xyoos. Yog ib lub tsev ntev 10 mev dav li 4 mev, xov txiag ntoo nqaim nqaim tsaus ntuj nti. Nyob hauv lub tsev muaj 150 leej. Lawv liab qab, lawv nyob sib ti heev; thaum lawv tsaug zog mas lawv yuav tsum sib ib. Muaj txhua yam me kab tom neeg, tab sis lawv tsis pom kev muab cov kab tua, vim tsaus ntuj nti xwb. Muaj tej tus neeg xav tuag sai, lawv muab lawv taub hau tsoo phab ntsa kom tuag. Tej hnub muaj txog 30 leej tuag tshaib tuag nqhis. Lawv tso quav tso zis nyob ntawm chaw pw. Cov tuag tuag tau 7 hnub ntawm chaw mas cov tub rog mam nqa tawm mus pov tseg. Tab sis lawv kuj muab ib co neeg tshiab los kaw txhab ntxiv rau kem tsev nqaim nqaim ntawd thiab. Thaum yuav txog hnub Is Es Mis Txus xav muab 50 leej tua, nws ua zoo li no:

Ib co tub ceev xwm muab cov neeg ntseeg faib ua tej pab 16 leej, muab hlua khi lawv tib si. Cov tub ceev xwm kom Txiv Plig Zes Laus ua npoj 16 leej ntej. Txiv Plig Nkas Ves caij nees ua lwm npoj 16 leej ntej. Thiab tseem muaj npoj tim peb lawv qab sib txuas zws. Cov tub ceev xwm coj lawv 50 leej taug tej kev hauv lub tuam ceeb Tos Kis Yaus, lawv mus txog lub tshav uas lawv txhos 50 tug ncej. Cov tub ceev xwm tsa ib daig txiag uas muaj cov lus sau ias ‘Tus Saus Nkus Is Es Mis Txus muab pab 50 leej no tua txom nyem tshaj, vim lawv yog ib co neeg ntseeg txog Yes Xus.’

Cov tub ceem xwm muab lawv 50 leej khi rau 50 tus ncej. Lawv mus zes cov cub tawg nyob sib ze, ib cub tawg kis rau lwm cub, ces kub mus txog cov ncej uas lawv muab cov ntseeg khi rau. Muaj cov pej xeem coob tas nrho tuaj ntsia nyob ntawd.

Thaum cov ntseeg kub hnyiab tas, cov tub ceev xwm kom ob tug Txiv Plig caij nees nqes nees, muab nkawd khi rau nkawd ob tug ncej thiab pib hlawv nkawd. Ces ob tug Txiv Plig muaj lub siab kub lug qhuab qhia tsoom pej xeem kom lawv saib Yes Xus yog tus Huab Tais cawm ntiaj teb neeg. Nkawd hais lus mus txog lub caij nkawd txoj sia tu nrho.

Is Es Mis Txus ua txoj hauj lwm lim hiam zoo li ntawd yog hnub tim 4 lub 12 hlis xyoo 1623 nyob hauv lub tuam ceeb Tos Kis Yaus. Is Es Mis Txus tseem qhia kom tib hnub ntawd cov tub rog hlawv tej pab neeg ciaj nyob hauv cov nroog loj nyob thoob Zis Pees qab teb thiab qaum teb, mus txog lub nroog Xees Dais.

Xyoo 1624 Is Es Mis Txus hlawv ib pab neeg ntseeg ciaj nyob hauv lub nroog Xees Dais (Sendai), nyob Zis Pees qaum teb.

Tus tau xub mus tshaj lub Moo Zoo nyob ib ncig ntawm Xees Dais yog ‘Txiv Plig Xos Tes Los’ (Luis Sotelo). Xyoo 1611 Txiv Plig Xos Tes Los mus cuag tus Dais Mis Yos kav lub xeev Xees Dais. Tus Dais Mis Yos sau ib tsab ntawv kheev tshaj Yes Xus lub Moo Zoo nyob hauv nws lub xeev. Txiv Plig Xos Tes Los qhia kev ntseeg 2 xyoos, nws qhib ob lub tsev teev Ntuj nyob hauv lub nroog Xees Dais, thiab nws qhib 5 lub tsev teev Ntuj nyob 5 lub me nroog tsis deb tsis ze ntawm Xees Dais.

Txiv Plig Xos Tes Los rov mus nyob Tos Kis Yaus, yog xyoo 1613 uas Is Es Mis Txus tab tom muab ib co ntseeg hlawv ciaj. Txiv Plig Xos Tes Los raug kaw nyob hauv tsev loj faj. Tus Dais Mis Yos nyob Xees Dais thov Is Es Mis Txus, ces Is Es Mis Txus thiaj tso Txiv Plig Xos Les Tos tawm ntawm tsev loj faj mus.

Txiv Plig Xos Tes Los mus txog Mes Xis Kos teb thiab mus cuag tus Vaj Qhia nyob Los Mas. Vaj Qhia thiaj tsa ib co Tswv Qhia tshiab saib tsoom neeg ntseeg nyob Zis Pees teb. Vaj qhia xaiv Txiv Plig Xos Tes Los ua thawj tug Tswv Qhia saib lub Ceeb Koom Txoos nyob Xees Dais.

Xyoo 1622 Txiv Plig Xos Tes Los caij nkoj rov mus Zis Pees teb. Nws ib tug phooj ywg Zis Pees nrog nws caij nkoj mus. Thaum Txiv Plig Xos Tes Los nqes nkoj nyob Zis Pees teb, mas nws tus phooj ywg mus kom nws rau Is Es Mis Txus.

Is Es Mis Txus muab Txiv Plig Xos Tes Los kaw nyob hauv lub tsev loj faj phem tshaj uas nyob Os Mus Las (Omura) nrog 4 tug tub tshaj Ntuj Lus; yam li Txiv Plig Vas Nqes (Pedro Vásquez), Txiv Plig Kas Vas Los (Miguel de Carvalho), Txiv Plig Xas Xas Das (Ludovicus Sasada), thiab Leej Tij Npas Npas (Ludovicus Baba). Hnub tim 25 lub 8 hli xyoo 1624 Is Es Mis Txus muab Txiv Plig Xos Tes Los lawv hlawv ciaj.

Xyoo 1627 tus Dais Mis Yos tswj lub nroog Nas Nkas Xas Kis hu ua ‘Us Nes Maws’ muab cov hluav taws saum lub roob hluav taws hu ua ‘Us Ntxes’ (Uzen) los hlawv cov neeg ntseeg kom tuag. Nyob hauv cov raug hlawv ntawd, muaj ib tug yog Leej Choj Zis Pees hu ua ‘Is Sis Das’ (Antonius Ishida Kyūtaku).

Is Sis Das yug xyoo 1570 nws xub ua Xib Hwb qhia Ntuj kev cai rau cov ntseeg nyob hauv lub nroog His Los Sis Mas. Nws nyiag qhia Ntuj kev cai nyob Nas Nkas Xas Kis tau 10 xyoo. Hnub tim 5 lub 11 hlis 1629 Us Nes Maws ntes Txiv Plig Is Sis Das. Us Nes Maws xav ntxias Txiv Plig Is Sis Das kom thim kev ntseeg Yes Xus, ces Us Nes Maws kom Txiv Plig Is Sis Das hnav tsoos tsho ua Leej Choj, thiab nws kom Txiv Plig Is Sis Das nthuav kev ntseeg txog Yes Xus rau sawv daws mloog nyob hauv lub tsev hais plaub. Txiv Plig Is Sis Das rau siab nthuav kev ntseeg. Thaum Txiv Plig Is Sis Das nthuav kev ntseeg tas, mas Us Nes Maws hais rau nws tias “Nyem no yog koj tsis xav raug kev tuag txom nyem, mas koj yuav thim koj txoj kev ntseeg Yes Xus.”

Txiv Plig Is Sis Das teb tias nws yuav tsis thim Ntuj kev cai, ces Us Nes Maws thiaj hais tias “Nej cov neeg ntseeg txog Yes Xus yog cov neeg siab ncaj tshaj nyob Zis Pees teb. Peb tsoom nom sawv daws yog neeg dag ntxias cov hlob tej nyiaj txiag. Peb hais rau cov Saus Nkus tias peb hwm lawv, tab sis qhov tseeb mas peb yog ib co neeg dag. Thaum cov hlob xav kom peb ua ib co dej num ceeb laj ua, mas peb tig nraub qaum rau lawv.”

Hnub tim 10 lub 12 hlis 1629 Us Nes Maws muab Txiv Plig Is Sis Das nrog nws 4 tug phooj ywg coj mus kaw nyob hauv ib lub tsev loj faj nyob Os Mws Las. Lawv nyob hauv tsev loj faj 2 xyoos, ces Us Nes Maws hu Txiv Plig Is Sis Das rov los nyob Nas Nkas Xas Kis. Us Nes Maws xav rov qab ntxias Txiv Plig Is Sis Das ib zaug ntxiv. Us Nes Maws tau hu tus kws txuj uas paub Khoov Fum Txws txoj cai zoo tshaj nyob Nas Nkas Xas Kis tuaj. Tus kws txuj nrog Txiv Plig Is Sis Das sib cav ntev loo, nws tsis yeej Txiv Plig Is Sis Das, nws hais cov lus kawg yog zoo li no tias “Txiv Plig, koj teev koj tus Tswv Ntuj nyob hauv koj nruab siab kuj tau. Tsuav yog koj lub ncauj hais tias koj zoo siab mloog tus Saus Nkus xwb, ces koj yuav tsis raug kev tuag.”

Txiv Plig Is Sis Das hais tias “Kuv ib txwm tsis yog ib tug neeg dag zoo li ntawd.”

Us Nes Maws thiaj kom lawv coj Txiv Plig Is Sis Das mus tua nyob pem lub roob Us Ntxes cov hluav taws. Us Nes Maws xa ib co neeg ntseeg mus nrog Txiv Plig Is Sis Das tuag nrog cov hluav taws thiab. Yog hnub tim 5 lub 12 hlis xyoo 1631.

Luag siv ib lub thoob los hliv cov kua hluav taws uas npau dug dam rau saum cov ntseeg lub cev. Tam sim ntawd, lawv lub cev tej nqaij kub hnyiab tas, tab sis luag tsis kheev kom cov ntseeg tuag tam sim ntawd.

Hnub tim 5 lub 1 hlis xyoo 1632 luag coj cov ntseeg rov mus nyob Nas Nkas Xas Kis, cov ntseeg nyob hauv tsev loj faj 9 lub hlis. Lawv tsis kam thim kev ntseeg Yes Xus. Muaj ib co neeg ntseeg nyob hauv tsev loj faj twb xub thim lawv txoj kev ntseeg lawm. Tab sis thaum lawv pom Txiv Plig Is Sis Das ua siab loj, mas lawv rov ntseeg txog Yes Xus.

Hnub tim 3 lub 9 hlis xyoo 1632 luag coj Txiv Plig Is Sis Das nrog nws cov phooj ywg rov mus pem lub roob hluav taws Us Ntxes. Thaum lawv mus txog thaj chaw uas lawv yuav raug kev tuag, mas lawv puav leej tsa suab qw tias “Peb zoo siab ntseeg tias Yes Xus yog peb tus Vaj Pleev.” Ces cov kua hluav taws hlab lawv tej nqaij thiab tej pob txha tag huv si. Luag muab lawv cov pob txha tshauv pov tseg rau hauv hiav txwv.

Us Nes Maws ntes ntau txhiab tus neeg ntseeg, tsis hais txiv neej, poj niam, los me nyuam. Ib txhia nws muab lawv hlawv ciaj. Ib txhia nws xuas hmuv los nkaug kom lawv tuag. Ib txhia nws siv tej rab kaw los muab lawv txiav. Nws siv tej rab kaw uas yog xuas hlau ua, xuas ntoo ua, thiab xyuas xyoob ua, los txiav cov neeg ntseeg. Lawv pib kaw ntawm tus neeg caj dab, ces lawv muab ntsev los nphoo rau cov qhov nqaij. Thiab lawv maj mam kaw tus neeg lub caj dab kom mus txog lub caij nws txoj sia tu.

Us Nes Maws pom tias tej tus pej xeem pom cov ntseeg muaj lub siab loj ua tiag nyiaj tiv kev txom nyem, mas tej tus pej xeem qhuas cov ntseeg thiab lawv nyiag kawm Yes Xus lub Moo Zoo. Us Nes Maws thiaj tsim lwm txoj kev hiam cov ntseeg. Muaj ib zaug Us Nes Maws ntiab 430 tus neeg ntseeg kom lawv khiav mus nyob hav zoov hav tsuag, ces lawv raug kev tshaib kev nqhis, tiv tshav tiv no. Thiab nws txwv tsis kheev tsoom pej xeem pub dab tsi rau 430 tus neeg ntseeg noj thiab haus. Tsis kav cov ntseeg tsis muaj ib tug thim kev ntseeg Yes Xus. Tiam sis muaj ib feem tuag tshaib vim lawv tsis muaj dab tsi noj.

Us Nes Maws tawm ib lub tswv yim los tsim txom cov neeg ntseeg. Lawv xuas hlua los muab cov ntseeg lub cev zoj ceev ceev, txij ntawm ko taw mus txog pem duav. Lawv muab tus neeg ntseeg dai taub hau tuaj hauv. Tus ntseeg cov hnyuv tsuam tej siab ntsws. Ntshav nqes puv taub hau, ces luag maj mam muab tus ntseeg txo kom lub taub hau mus twb lub pas quav. Lawv tseg tus neeg ntseeg ib txhais tes tuav ib txog hlua. Thaum twg tus ntseeg thov swb thiab nws zoo siab thim kev ntseeg, mas nws rub txoj hlua ces lawv tso kom nws dim. Tsis tas li ntawd, lawv xuas tej rab chais los suam tus neeg ua Ntuj kev cai tej hauv pliaj thiab tej plhu, kom ntshav tau kev tawm me ntsis ces tus neeg thiaj tsis tuag sai. Tej tus neeg ntseeg raug dai li ntawd 3 hnub 3 hmos ces lawv txoj sia mam li tu.

Us Nes Maws muab 55 tus Leej Choj dai hnia cov pas quav zoo li ntawd. Muaj coob leej swb Us Nes Maws txoj kev hiam zoo li ntawd, mas lawv thim txoj kev ntseeg Yes Xus.

Xyoo 1637 tus Dais Mis Yos (Matsukura Katsuie) kav lub xeev Sis Mas Npas Las (Shimabara) hauv lub pov txwv Kis Yus Sus sau se hnyav tas nrho, ces ib tug neeg uas nws yog tub qoob tub loo tsis kam them se, nws khiav mus nkaum nyob hauv hav zoov. Tus Dais Mis Yos tso ib co tub rog mus ntes tus neeg ntawd tus ntxhais los hlawv. Cov tub qoob tub loo ob peb vam leej tawm tsam tiv tus Dais Mis Yos cov tub rog. Tus Dais Mis Yos tsis yeej tsoom tub qoob tub loo, nws thiaj hu tus Saus Nkus Is Es Mis Txus kom tuaj pab tiv cov tub qoob tub loo, vim cov tub qoob tub loo sawv los tiv nws coob zuj zus lawm. Qhov kawg Is Es Mis Txus yuav tsum xa 10 vam tus tub rog tuaj pab tus Dais Mis Yos.

Xyoo 1638 tim 15 lub 4 hlis, Is Es Mis Txus cov tub rog yeej cov tub qoob tub loo nyob hauv lub yeej Has Las (Hara). Is Es Mis Txus muab cov tub qoob tub loo cov taub hau txiav tas huv tib si. Nyob hauv cov tub qoob tub loo uas raug Is Es Mis Txus tua tuag mas muaj 35,000 leej yog neeg ua Ntuj kev cai. Tib lub caij ntawd, Is Es Mis Txus kuj muab 60 tus Pos Tws Nkas tua pov tseg thiab. Hnub ntawd lawv tuaj ua luam muag toob xib nyob Nas Nkas Xas Kis. Is Es Mis Txus muab lawv tua, vim lawv yog ib co neeg ntseeg txog Yes Xus.

Lub xyoo ntawd, Is Es Mis Txus tshaj txoj cai tshiab txwv tsis kheev kom muaj ib tug pej kum neeg nkag mus nyob Zis Pees teb. Cov nom Zis Pees muab lub teb chaws kaw nti li ntawd mus txog xyoo 1854.

Cov tseem hwvkom tej tus kws kos duab sau Yes Xus lub ntsej muag kom meej, thiab loj ib yam li neeg lub ntsej muag. Lawv muab cov duab los ntim rau hauv tej lub txws zoo nkauj. Niaj xyoo lub 1 hlis, cov tub tseem hwv ua dej num txheeb txhua leej nyob hauv txhua txoj kev hauv nroog. Lawv hu tas tsoom pej xeem tuaj sib sau nyob hauv cov tseem hwv ib lub tsev; tsis hais cov txiv neej, cov poj niam, cov me nyuam, cov tub mab tub qhe los cov qhua yuav tsum tuaj. Cov tseem hwv tso Yes Xus daim duab rau saum ib daig lev nyob hauv pem teb, lawv kom tsoom pej xeem ib tug tsuj Yes Xus tus duab zuj zus.

Cov tseem hwv ua cov kab ke tsuj Yes Xus tus (Fumi-e) duab nyob hauv txhua lub nroog Zis Pees, tab sis nyob Nas Nkas Xas Kis mas muaj Yes Xus cov duab ntau dua lwm lub nrrog vim tias lub caij uas lub Koom Txoos Kav Tos Liv vam meej nyob Zis Pees teb, mas nyob hauv lub nroog Nas Nkas Xas Kis muaj cov neeg ntseeg txog Yes Xus coob tshaj.

Cov tseem hwv Zis Pees kom tsoom pej xeem tsuj Yes Xus tus duab 200 tawm xyoo, ces tsoom pej xeem ua li ntawd 7 los 8 tiam neeg sib law, mas lawv feem coob tso kev ntseeg txog Yes Xus pov tseg, lawv twb tsis paub Yes Xus lub neej thiab Yes Xus lub Moo Zoo, tab sis muaj ntau txhiab leej neeg Zis Pees lam tsuj Yes Xus tus duab kom txhob raug plaub ntug, tab sis lawv tseem nyiam Yes Xus nyob hauv nruab siab, lawv nyiag ua Ntuj kev cai nyob hauv lawv tsev. Nyob hauv lawv tsev mas muaj ib tug mlom ‘Niam Nkauj Kab Yeeb’ (Guanyin). Tab sis nyob hauv nruab nrab tus mlom Niam Nkauj Kab Yeeb, mas muaj Yes Xus tus duab los yog Mab Liab tus duab nyob sab hauv.

Hnub tim 8 lub 6 hli xyoo 1853 Pes Lis (Matthew Calbraith Perry) coj ib cov nkoj As Mes Lis Kas ua luam tuaj nres nyob ze ntawm lub tuam ceeb Tos Kis Yaus. Cov nom tswj lub tuam ceeb Tos Kis Yaus tso ib lo lus nruj rau Pes Lis kom cov nkoj As Mes Lis Kas rov qab mus tam sim ntawd. Pes Lis teb tias yog cov Zis Pees siv tuam phom ntiab cov nkoj As Mes Lis Kas, mas cov nkoj As Mes Lis Kas kuj yuav siv phom thiab. Pes Lis tos 7 hnub, ces nws xa tus Txoov Tim Tswv As Mes Lis Kas ib tsab ntawv mus rau tus vaj Zis Pees nyob Nas Nkas Xas Kis.

Tus Txoov Tim Tswv As Mes Lis Kas hais ib co lus zoo li no rau tus vaj Zis Pees “Tos kuv xa tus thawj tswj nkoj Pes Lis tuaj, tsuas yog kuv xav thov lus kheev kom As Mes Lis Kas teb nrog Zis Pees teb ua phooj ywg thiab tau koom siab ua luam. Txoj cai kav As Mes Lis Kas teb tsis kheev kom cov nom As Mes Lis Kas kov lwm cov kuj cuab tej kev teev hawm thiab tej kev tseev tsim. Kuv tau qhia tus thawj tswj nkoj Pes Lis kom nws txhob ua ib yam dab tsi coj kev ntxhov tuaj raug tus vaj Zis Pees lub kuj cuab.”

Pes Lis xa tsab ntawv tas, nws coj nws cov nkoj rov mus nyob As Mes Lis Kas teb, cia tus vaj Zis Pees xav tswv yim ib xyoos. Hnub tim 31 lub 5 hlis 1854 As Mes Lis Kas teb thiab Zis Pees teb sib cog lus tias lawv yuav pib ua luam nyob hauv lub nroog Sis Mos Das (Shimoda). Cov xyoo tom qab, lawv sib cog lus tias lawv ua luam nyob hauv lwm lub nroog.

Kuj muaj lwm cov kuj cuab Aws Los Pas, xws li Lav Xias teb, Aas Kiv teb, Hos Laas teb thiab Fab Kis teb. Cov tseem hwv Zis Pees kuj kheev cov pej kum neeg txhim tej lub tsev teev Ntuj rau lawv cov pej kum neeg. Cov tseem hwm Zis Pees kuj rhuav lawv txoj cai yuam kom cov pej xeem Zis Pees niaj xyoo tsuj Yes Xus tus duab, ces xyoo 1862 lub 6 hli tim 8 Vaj Qhia Pis Yus Cuaj (Pope Pius IX) tsa 26 tus neeg tuag ua tim khawv hauv xyoo 1597 ua Leej Ntshiab thiab xyoo 1867 rov tsa 205 tus neeg ua Ntuj kev cai raug tua tuag txij xyoo 1617-1632 ua Tim Khawv.

Cov Dais Mis Yos thiab cov kws ntaus rog puav leej yog ib co neeg paub txuj, lawv paub tias lwm cov kuj cuab uas nyob hauv cov teb chaws Xib Fab tsim ntau yam tshiab muaj hwj chim kawg, hos Zis Pees teb yog ib lub kuj cuab twm zeej thiab kaw nti. Cov Dais Mis Yos thiab cov kws ntaus rog ntxub cov Saus Nkus. Cov laus pav Zis Pees nplua nuj, kuj ntxub cov Saus Nkus vim lawv tsis tau kev nrog lwm lub kuj cuab ua lag luam. Tsoom tub qoob tub loo them se hnyav, lawv ntxub cov tseem hwv Zis Pees tas siab.

Xyoo 1868 cov neeg paub txuj hauv Yas Mas Kus Sis (Tshos Su <Choshu>) hauv thiab hauv Kas Nkos Sis Mas (Sas Txus Mas <Satsuma>) rhuav cov Saus Nkus txoj kev cai kav teb chaws, lawv rov muab lub hwj chim rau tus tuam vaj Mes Zis (Emperor Meiji) ua tus tswj lub teb chaws. Mes Zis xaiv lub nroog Tos Kis Yaus los ua lub tuam ceeb, nws hu cov kws txuj nyob hauv cov teb chaws Xib Fab tuaj qhia txhua yam txuj tshiab, ces thiaj mam muaj tej pab tub tshaj Ntuj Lus rov qab tab meeg tshaj Yes Xus lub Moo Zoo.

Ib tug Leej Choj Fab Kis hu ua ‘Paws Tis Zas’ (Bernard Thaddée Petitjean) mus txog ib lub zos nyob tsis deb ntawm Nas Nkas Xas Kis hu ua Us Las Kas Mis (Urakami). Nyob ntawd muaj ib lub tsev teev Ntuj me me. Txiv Plig Paws Tis Zas mus hauv lub tsev teev Ntuj, ces muaj ib tug pog laus tuaj kim caug nyob ze Txiv Plig thiab hais lus ntxhi tias “Peb sawv daws uas nyob ntawm no muaj ib lub siab zoo li nej lub.”

Txiv Plig Paws Tis Zas nug tias “Ua li, nej nyob qhov twg?” Tus pog laus teb tias “Peb nyob hauv lub zos Us Las Kas Mis no. Nyob hauv lub zos no, tas sawv daws yuav luag muaj ib lub siab zoo li peb.” Tus pog laus xav sim tus Txiv Plig, ces nws nug tias “Hauv peb tsev no, Leej Ntshiab Mab Liab tus duab nyob qhov twg?”

Txiv Plig Paws Tis Zas coj cov neeg tuaj nyob hauv lub tsev, nws hais rau lawv tias “Tus duab no yog Leej Ntshiab Mab Liab. Nej saib, nyob saum nws caj npab nws puag nws Leej Tub Yes Xus.”

Txij hnub ntawd los, cov ua Ntuj kev cai nyob hauv cov pov txwv ze ntawm Us Las Kas Mis tuaj xyuas Txiv Plig Paws Tis Zas. Tus ua lub Cim Ntxuav rau tsoom sid tuaj nug Txiv Plig Zam txog tus thawj tswj nyob hauv lub tsheej Los Mas, yam li tus Vaj Qhia.

Ob peb tug Leej Choj Fab Kis tuaj xyuas cov ua Ntuj kev cai, lawv pom tias nyob hauv txhua pawg ntseeg muaj ob tug tswj coj sawv daws. Thawj tug tswj yog tus coj cov ntseeg kev teev Ntuj, niaj Hnub Chiv nws coj sawv daws ua lub Txoos Teev Ntuj, thaum ib tug neeg ntseeg mob txaus txhawj mas tus tswj mus pab tus neeg mob thov kom Tswv Ntuj zam txhaum rau nws. Lwm tus tswj pab coj cov pawg ntseeg yog tus ua lub Cim Ntxuav; raws lawv txoj cai, thaum tus tswj ua lub Cim Ntxuav nws yuav tsum muaj ib tug xyaum ua lub Cim Ntxuav nyob ze nws. Cov ntseeg kuj muaj tej phau ntawv qhia kev ntseeg thiab qhia cov zaj teev Ntuj. Cov Leej Choj Fab Kis saib lawv tej phau ntawv ntawd, lawv qhuas kawg.

Xyoo 1867 cov tseem hwv Zis Pees rov tsim txom cov ua Ntuj kev cai, vim lawv tsis kam yuav cov hauj sam pab lawv pam lawv cov neeg tuag. Lawv raug kev tsim txom 20 xyoo mus txog xyoo 1873.

Tuam Txoj Cai Zis Pees tshiab hais tias nyem no nyob Zis Pees teb txhua txoj kev teev hawm muaj cai sib npaug zos, ces Yes Xus lub Moo Zoo maj mam ri mus. Tab sis lub caij ntawd, Zis Pees teb raug tej yam xwv txheej loj; muaj ib xyoo uas tsoom pej xeem sib kis tus mob zawv plab, ua kom coob leej tuag. Cov ntseeg ntau txhiab leej kuj tuag thiab.

Xyoo 1874 ib nthwv khaub lig cua loj tas nrho ua kom cov ntseeg nyob ib thaj tsam Yos Kos Has Mas raug kev tshaib plab loj. Lub khaub lig cua ntawd rhuav tas huv si lub Koom Txoos cov Tsev Teev Ntuj, cov tsev kawm ntawv thiab cov tsev nyob. Tib lub caij ntawd, cov tub hluas kawm txuj ua Leej Choj sib kis tus mob ntsws, ua kom lawv leej puav tas sim neej.

Lub Koom Txoos raug ntau yam xwv txheej, tsis kav xyoo 1891 Vaj Qhia Les Os Kaum Peb (Pope Leo XIII) tsa 4 tug Txiv Plig ua Tswv Qhia saib cov Koom Txoos nyob Zis Pees teb. Lub caij ntawd muaj 20 tus Txiv Plig Zis Pees, 88 tus Txiv Plig tuaj pej kum teb tuaj, 25 leeg tub koom haum cog lus, 76 tus Leej Phauj cog lus, 169 lub tsev teev Ntuj, 46 leej tub hluas kawm ua Leej Choj, 70 lub tsev kawm ntawv qhia txuj rau 5,000 tus me nyuam. Muaj tshaj 50,000 tus neeg ntseeg.

Xyoo 1927 Vaj Qhia Pis Yus Kaum Ib (Pope Pius XI) tsa Txiv Plig ‘Has Yas Xas Kas’ (Hayasaka Kyunosuke) uas thawj tug Tswv Qhia Zis Pees coj lub Koom Txoos nyob Nas Nkas Xas Kis.

Xyoo 1940 cov Tswv Qhia pej kum puav leej tso cov dej num Tswv Qhia tseg, ib co Zis Pees nce ua Tswv Qhia hloov cov Tswv Qhia pej kum. 5 xyoos tom qab, thaum qhib lub xyoo 1945 Zis Pees teb tab tom ntaus rog txeeb tau ntau lub teb chaws nyob As Xias Toob Fab Naj, muaj 116 txhiab tus neeg ntseeg nyob Zis Pees teb. Tab sis lub 8 hli, cov tub rog As Mes Lis Kas tso 2 lub hoob pob As Tos Mis rau saum 2 lub nroog His Los Sis Mas thiab Nas Nkas Xas Kis. Hnub tim 9 lub 8 hli, muaj 9 txhiab tus neeg ntseeg tuag nyob hauv lub nroog Nas Kas Xas Kis.

Xyoo 1981 Vaj Qhia Zam Paj Lug Ob (Pope John Paul II) tawm rooj tim Los Mas tuaj xyuas lub Koom Txoos nyob Zis Pees, nws mus hwm cov neeg ua Ntuj kev cai raug 2 lub hoob pob As Tos Mis hauv lub nroog His Los Sis Mas thiab Nas Nkas Xas Kis.

Muaj ib tug laus pav Is Tas Lias hu ua ‘Mas Kos Pos Los’ (Marco Polo) mus nyob Suav teb 35 xyoos. Yog xyoo 1275 Mas Kos Pos Los nrog nws txiv thiab nws tus txiv ntxawm mus txog lub nroog Khas Npas Lis (Khanbalik), nyob Suav teb. Tus ua vaj kav Suav teb lub caij ntawd yog tus vaj Moos Kus hu ua ‘Kus Npis Lais’ los yog ‘Kus Lais Khas’ (Kublai Khan). Thaum ntawd, Kus Npis Lais kav Suav teb tau 16 xyoo lawm. Kus Npis Lais nrog Mas Kos Pos Los ua phooj ywg zoo, nws tso siab rau Mas Kos Pos Los thiab vam txog Mas Kos Pos Los ua tej yam hauj lwm loj. Kus Npis Lais xa Mas Kos Pos Los ua nws tus tiam lis mus nyob Cob Tsib teb, mus nyob hauv lub pov txwv Xis Laas Kas, thiab mus nyob Pes Xis teb. Kus Npis Lais coj Mas Kos Pos Los nrog nws mus ntaus rog nyob hauv lub xeev Yeej Naj thiab lub xeev Fuj Ceeb.

Kus Npis Lais yog ib tug neeg Moos Kus kav Suav teb, cov tseem Suav ntau leej tsis nyiam nws, tab sis Kus Npis Lais zoo siab uas nws muaj ib tug phooj ywg ntse thiab muaj hwj chim xws li Mas Kos Pos Los pab nws. Thaum Mas Kos Pos Los nyob Suav teb, Kus Npis Lais xa ntawv thov Vaj Qhia kom Vaj Qhia xa tej tus neeg tuaj qhia Yes Xus lub Moo Zoo nyob Suav teb vim Kus Npis Lais siab dav, nws pab tas txhia txoj kev teev hawm.

Xyoo 1287 txog 1289 nyob tsis deb ntawm cov vaj Moos Kus uas nyob Kas Las Kos Lus, tseem muaj ib tug vaj Moos Kus kav ib haiv neeg hu ua Us Is Nkus (Uyghur). Nyob hauv haiv neeg Us Is Nkus ntawd muaj ntau tus pej xeem ua Ntuj kev cai tau ntev xyoo los lawm. Yog kev ntseeg Yes Xus raws cov tub tshaj Ntuj Lus Nes Tos Lis Yus. Lawv kuj nyiam kev tshaj Ntuj Lus tuaj ntawm Vaj Qhia nyob Los Mas tuaj, ces tus vaj kav haiv neeg Us Is Nkus thiaj xa ib tug tub tshaj Ntuj Lus Nes Tos Lis Yus hu ua ‘Las Npaas Npas Xaus Mas’ (Rabban Bar Sauma) mus tsham tus vaj Fab Kis thiab tsham tus Vaj Qhia Nis Kos Las Plaub (Pope Nicolas IV) nyob tim Los Mas.

Thaum ua cov ntees cav txog Yes Xus sawv rov los, Las Npaas Npas Xaus Mas nrog Vaj Qhia koom thaj txi Ntuj thiab txais Yes Xus lub Cev ntawm Vaj Qhia txhais tes.

Xyoo 1291 Vaj Qhia Nis Kos Las Plaub xa ib pab tub tshaj Ntuj Lus mus rau Suav teb, yog cov tub koom haum Fas Ntshis Kas. Tus coj lawv mus yog tus hu ua ‘Zam Kos Vis Nos’ (Giovanni da Monte Corvino).

Kos Vis Nos caij nkoj mus txog Is Ntias qab teb sab hnub tuaj, nyob ze ntawm lub nroog Mes Lias Pus (Mylapore) hauv Is Ntias teb, uas yog xeev ntuj cov ntseeg hais tias yog tus Hauv Pauv Xa Lus Tos Mas mus tshaj lub Moo Zoo rau lawv teb chaws. Kos Vis Nos nyob Mes Lias Pus 13 lub hlis, nws pub lub Cim Ntxuav rau ntau pua tus neeg Is Ntias.

Kos Vis Nos tuaj txog Khas Npas Lis nyob Suav teb, yog lub qab xyoo 1293. Ib tug laus pav Is Tas Lias muab tej thaj av rau Kos Vis Nos. Kos Vis Nos txhim ib lub tsev teev Ntuj. Thaum ntawd muaj ob peb txhiab leej txais lub Cim Ntxuav. Tus vaj Kus Npis Lais tseem nyob, nws nyeem Vaj Qhia tsab ntawv uas Kos Vis Nos nqa tuaj. Kus Npis Lais zoo siab txais Kos Vis Nos, tab sis nws tsis txiav siab ntseeg Yes Xus lub Moo Zoo. Xyoo 1294 Kus Npis Lais tas sim neej. Nyob ntawm Khas Npas Lis mas cov coj Nes Tos Lis Yus kev cai tiv Kos Vis Nos heev kawg, ces Kos Vis Nos mus tshaj lub Moo Zoo rau haiv neeg Oos Nkus (Ongud), nyob ze ntawm Suav qaum teb.

Cov Oos Nkus coob leej ntseeg Yes Xus raws Nes Tos Lis Yus kev cai los tau ntau pua xyoo lawm. Lawv tus vaj zwm rau cov vaj Moos Kus. Thawj xyoo uas Kos Vis Nos mus nyob Khas Npas Lis, mas tus vaj Oos Nkus nrog Kos Vis Nos ntaus phooj ywg. Nws thov kom Kos Vis Nos tuaj qhia tseem txoj kev ntseeg Yes Xus nyob hauv nws teb chaws. Kos Vis Nos mus ces muaj 6,000 leej neeg Oos Nkus txais lub Cim Ntxuav nyob hauv lub Koom Txoos Kav Tos Liv. Tus vaj txhim ib lub tsev teev Ntuj zoo nkauj.

Xyoo 1298 Kos Vis Nos rov qab los qhia kev ntseeg nyob lub nroog Khas Npas Lis. Cov Suav thiab cov Moos Kus pib kawm Yes Xus lub Moo Zoo coob. Thaum txog xyoo 1305 twb muaj 4,000 leej tau txais lub Cim Ntxuav. Kos Vis Nos txais ib co tub hluas los nrog nws nyob, nws qhia txuj rau lawv, lawv kawm lus Las Tis Nas. Kos Vis Nos txhais cov Nkauj Paj Nruag los ua lus Moos Kus, nws kuj txhais cov ntawv Qhib Hnub thiab Xaus Hnub.

Hnub tim 8 lub 1 hlis xyoo 1305 Kos Vis Nos xa ib tsab ntawv rau Vaj Qhia. Kos Vis Nos sau tias:

Kuv yog Kos Vis Nos, kuv yog tub Koom Haum Fas Ntshis Kas. Xyoo tim 1291 kuv tau ncaim ntawm lub nroog Taus Lis, nyob Pes Xis teb, ces kuv tuaj txog Is Ntias teb. Kuv nyob Is Ntias teb 13 lub hlis, kuv nyob hauv cov Koom Txoos uas thaum ub tus Hauv Paus Xa Lus Tos Mas tsim. Nyob hauv lawv teb chaws kuv tau pub lub Cim Ntxuav rau 3,000 leej. Ces kuv rov sawv kev mus ntxiv. Kuv tuaj txog Suav teb chaws uas yog tus tuam vaj Moos Kus kav. Kuv tau muab Vaj Qhia tsab ntawv rau nws nyeem thiab kuv qhia kev ntseeg lub ntsiab rau nws mloog. Nws ib txwm yog neeg teev dab qhuas, mas nws hloov tsis tau tswv yim. Tab sis nws ua zoo kawg rau cov neeg ntseeg Yes Xus. Kuv nrog nws nyob tau 12 xyoos los lawm.
Cov Nes Tos Lis Yus hais tias lawv yog neeg ntseeg Yes Xus, tab sis lawv ncaim ntawm kev ntseeg Yes Xus ntau hauj sim. Nyob hauv cov teb chaws no cov Nes Tos Lis Yus muaj zog.
Nyob hauv cov teb chaws uas cov Nes Tos Lis Yus nyob, lawv tsis kheev kom lwm cov neeg ntseeg Yes Xus txhim ib lub tsev teev Ntuj me me, los sis qhia kev ntseeg me ntsis rau zeej tsoom li. Cov Nes Tos Lis Yus tau nrhiav lus rau kuv ntau kawg. Lawv kuj pub nyiaj rau luag kom luag ua teeb meem rau kuv. Lawv hais lus xaiv lus ncua txog kuv ntau.
Lawv hais tias tsis yog Vaj Qhia xa kuv tuaj. Lawv liam tias kuv yog ib tug neeg tshuaj xwm, lawv hais tias kuv yog ib tug txiv dab txiv muam. Lawv hais tej lo lus zoo li ntawd ib ntus ntev li 5 xyoos.
Ntawm kuv mas kuv tsis tau txais lub Cim Daws Txhaum tau 11 xyoos los lawm. Yog thaum tus tub koom haum Zes Mas Nias hu ua As Nos tuaj txog teb chaws no ces kuv thiaj tau kev txais lub Cim Daws Txhaum.
Nyob hauv lub tsheej Pej Ceeb los hais tias Khas Npas Lis, kuv tau txhim ib lub tsev teev Ntuj. Lub tsev teev Ntuj ntawd txhim tiav tau 6 xyoo lawm. Nyob ntawm lub tsev teev Ntuj muaj 3 lub tswb loj. Kuv tau pub lub Cim Ntxuav rau 6,000 tawm leej. Yog txhob muaj cov Nes Tos Lis Yus ua teeb meem xws li kuv hais saum no mas ntshe muaj 3 vam leej txais lub Cim Ntxuav lawm.
Kuv kuj tau siv nyiaj los txhiv ib co tub hluas ua qhev kom lawv los nrog kuv nyob. Thaum kuv yuav lawv mas lawv muaj lub hnub nyoog 10 xyoo tej. Thaum kuv txais lawv mas lawv tsis coj ib txog kev teev dab tsi.
Kuv tau qhia lawv, pub lawv txais lub Cim Ntxuav, qhia lus Las Tis Nas rau lawv, qhia peb cov ntawv teev Ntuj rau lawv xyaum.
Lawv twb muaj 11 leeg nrog kuv txawj hu nkauj Qhib Hnub, Xaus Hnub. Thaum yuav hu lawv tuaj sib sau teev Ntuj xws li cov tub koom haum, mas kuv khob tswb. Peb teev Ntuj raws cov tub koom haum Fas Ntshis Kas txoj cai. Zaum puav tus vaj Suav tuaj mloog peb teev Ntuj. Muaj ib tug vaj uas nyob tsis deb ntawm no pes tsawg, nws yog cov ntseeg Yes Xus raws Nes Tos Lis Yus txoj kev. Thawj xyoos kuv tuaj nyob teb chaws no, nws nrog kuv ua phooj ywg. Nws xav txais lub Cim Ntxuav, kuv qhia peb txoj kev ntseeg rau nws. Nws txais lub Cim Ntxuav. Nws coj ntau yam xws li peb cov tub koom haum Fas Ntshis Kas. Nws hwj kuv ua thaj txi Ntuj. Cov Nes Tos Lis Yus liam ntau yam rau nws. Nws coj nws cov pej xeem coob leej tuaj nyob hauv peb lub Koom Txoos. Nws txhim ib lub tsev teev Ntuj zoo nkauj.
Kuv thov nej uas nrog kuv ua tub koom haum Fas Ntshis Kas nyob Is Tas Lias teb, thaum tsab ntawv no tuaj txog nej, mas nej pab xa mus rau Vaj Qhia, rau cov Tswv Qhia tuav kab xwm, rau thawj tswj koom haum Fas Ntshis Kas.
Kuv thov nej pab xa ib co ntawv teev Ntuj tuaj rau kuv. Tam sim no, kuv tab tom txhim ib lub tsev teev Ntuj ntxiv. Kuv xav faib cov hluas ua ob peb npoj, yuav xa lawv mus tshaj Ntuj Lo Lus nyob ob peb qhov chaw. Kuv ua raws li kuv ua tau. Tab sis kuv plaub hau dawb tas, kuv lub hnub nyoog twb muaj 58 xyoo lawm. Vim kuv tej kev khwv mas kuv thiaj laus sai. Kuv kawm xeem lus Moos Kus tau zoo hauj sim, kom txawj hais lus thiab txawj sau ntawv Moos Kus, uas tsoom nom tswv siv nyob ntawm no.
Kuv tau txhais phau Ntawv Ntshiab Cog Lus Qub thiab phau ntawv Nkauj Paj Nruag los ua lus Moos Kus. Kuv tau nrhiav ib tug kws txawj sau txwm ntawv zoo nkauj. Cov Ntawv Ntshiab uas kuv tau txhais los ua lus Moos Kus nws muab los sau ua ib phau ntawv zoo nkauj. Kuv muab phau ntawv ntawd rau zeej tsoom saib, kuv siv phau ntawv ntawd los tshaj lub Moo Zoo. Yog kuv txoj kev ua tim khawv zeem Yes Xus.
Thaum kuv nyob hauv tus vaj Oos Nkus, uas nws tau txais lub Cim Ntxuav tsev, wb tau hais haum tias yuav txhais tas huv si phau ntawv Qhib Hnub, Xaus Hnub, thiab yuav faib rau cov ntseeg nyob hauv nws teb chaws. Peb kuj tau txhais Thaj Txi Ntuj ua lus Moos Kus thiab.

 Xyoo 1305 Kos Vis Nos tsab ntawv tuaj txog Los Mas, mas sawv daws zoo siab ntau. Vaj Qhia Nkes Mees Tsib (Pope Clement V) thiaj pub lub Cim Tiag Tes tsa 6 tus tub koom haum Fas Ntshis Kas ua Tswv Qhiav. Lawv yuav mus tsa Kos Vis Nos ua Tswv Qhia nyob Pej Ceeb. Lawv xub mus nyob Is Ntias teb, tsuas muaj 3 leeg thiaj mus txog Pej Ceeb xwb. Yog xyoo 1313 lawv thiaj mus txog. Lawv ua cov kab ke tsa Kos Vis Nos ua thawj tug Tswv Qhia nyob Suav teb. Lawv 3 tug Tswv Qhia tuaj tshiab ntawd zwm rau Tswv Qhia Kos Vis Nos.

Kos Vis Nos qhia kom lawv mus nyob hauv lub nroog Ntxais Toos (Zaiton/ Quanzhou), nyob ze lub hiav txwv Pes Xis Fis. Kos Vis Nos xav tsa tus Tswv Qhia As Nres Pes Lus Zias (Andrew of Perugia) ua thawj tus Tswv Qhia nyob Ntxais Toos. Tab sis As Nres Pes Lus Zias tsis kam ua, ces Kos Vis Nos tsa Zes Las Dos (Gerardo Albuini) ua tus Tswv Qhia qhib lub tsev tshaj Ntuj Lus nyob Ntxais Toos.

Muaj ib tug poj niam nws yog haiv neeg As Mes Nias, nws ua laus pav nyob Ntxais Toos. Nws pab cov Tswv Qhia tuaj tshiab kom tau kev txhim ib lub tsev teev Ntuj. Tab sis cov Tswv Qhia lawv muaj lawv ib lub tsev uas nyob tsis deb ntawm Ntxais Toos. Yog lub tsev uas lawv coj lawv lub neej raws cov tub koom haum Fas Ntshis Kas txoj cai. Li ntawd, lawv nyob Ntxais Toos mas lawv muaj ob qho chaw nyob. Thawj qhov chaw lawv nyob ntau dua yog lawv lub tsev nyob ua tub koom haum, lawv teev Ntuj raws cov tub koom haum txoj kev. Lawv lub tsev ntawd nyob ib thaj chaw ntsiag to nyob ntawm ntug nroog. Thiab lawv mus saib lub tsev teev Ntuj nyob hauv lug nroog Ntxais Toos.

Xyoo 1318 thaum Tswv Qhia Zes Las Dos tuag lawm, mas yog Tswv Qhia Pes Les Nqees (Pereginus da Castello) coj cov dej num tshaj Ntuj Lus nyob Ntxais Toos. Tswv Qhia Pes Les Nqees sau ib tsab ntawv mus rau Vaj Qhia thiab rau cov tub koom haum Fas Ntshis Kas uas nyob Los Mas. Tsab ntawv muaj lub ntsiab lus zoo li no tias:

“Nyob Ntxais Toos, cov neeg ntseeg hais ntau xeem lus sib txawv. Cov nom tswv tso lus rau peb tshaj lub Moo Zoo ywj siab. Peb ua tas txhia yam kab ke teev Ntuj ywj siab kuj tau. Zaum puav, peb mus tshaj Huab Tais Yes Xus lub Moo Zoo nyob hauv cov tsev Mawv Xim Lim. Peb kuj vam txog tej tus neeg pab txhais lus mus qhia cov neeg teev dab qhuas thiab. Yog peb txawj hais lawv xeem lus mas ntshe yuav pom Tswv Ntuj lub txiaj ntsim tawm tuaj tshoj cov neeg ntawd lub siab.
Cov qoob loo zoo sau muaj ntau, tab sis tsis muaj cov tub zog txaus, thiab peb tsis muaj zoo liag sau qoob. Peb cov tub koom haum tshaj Ntuj Lus tsawg dhau, peb laus laus, peb kawm tsis tau luag xeem lus.
Nyem no, kuv ua Tswv Qhia nyob Ntxais Toos. Muaj peb tug tub koom haum nrog kuv nyob. Peb muaj ib lub tsev teev Ntuj zoo nkauj thiab ib thaj av uas ib tug poj niam As Mes Nias muab los pub rau peb.
Peb tsuas tshuav ib yam uas peb tsis muaj thiab peb xav kom tau heev; yog ib co tub koom haum Fas Ntshis Kas tuaj nrog peb nyob ntxiv. Peb laus lawm, peb yuav tsis nyob ntev xyoo ntxiv. Yog tsis muaj leej twg tuaj pab mas lub Koom Txoos yuav tsis muaj tus ua lub Cim Ntxuav nyob hauv peb lub tsev teev Ntuj nyob Ntxais Toos, thiab yuav tsis muaj neeg tuaj teev Ntuj nyob hauv lub tsev teev Ntuj hlo li.
Lub nroog Ntxais Toos uas peb nyob nws nyob ze ntawm lub hiav txwv. Peb mus ko taw yuav luag 3 lub hlis peb thiaj mus txog Pej Ceeb.”

Tswv Qhia Pes Les Nqees tsab ntawv tsis zoo li Kos Vis Nos tsab ntawv. Kos Vis Nos paub lus Suav zoo thiab nws paub lus Moos Kus zoo, mas nws tau zoo kev tshaj Ntuj Lus. Hos Pes Les Nqees hais tias ‘Peb tsis muaj zoo liag sau qoob’, yam li nws tsis paub lus Suav ces nws vam txog tej tus neeg pab txhais lus mus qhia kev ntseeg rau cov haiv neeg nyob Ntxais Toos xwb. Pes Les Nqees kuj laus lawm, nws tsis nquag xws li Kos Vis Nos, ces nws kawg yuav thov cov hlob nyob Los Mas kom tsuag tsuag xa ib co tub koom haum mus pab xwb. Tsis li ntawd mas tos tsis ntev yuav tsis muaj tus ua lub Cim Ntxuav rau cov ntseeg nyob Ntxais Toos.

Yog xyoo 1318 Pes Les Nqees sau nws tsab ntawv. 4 xyoos tom qab ces nws tau tas sim neej, yog xyoo 1322. Tswv Qhia Pes Les Nqees tsis nyob lawm, ces As Nres Pes Lus Zias thiaj pib ua Tswv Qhia nyob Ntxais Toos.

Tau 4 xyoos tom qab ntxiv ces tus Tswv Qhia As Nres Pes Lus Zias thiaj xa ib tsab ntawv mus rau cov tub koom haum Fas Ntshis Kas nyob Pes Lus Zias. Yog lub 1 hlis xyoo 1326 As Nres Pes Lus Zias thiaj xa nws tsab ntawv sau tej lo lus zoo li no:

“Peb nyob deb ntawm nej tas nrho, muaj tej lub tuam teb dav thiab tej lub hiav txwv loj quas peb. Kuv tsis tshua tso siab tias muaj ib hnub nej yuav tau txais kuv tsab ntawv no. Ntshe nej twb tau hnov piav tias thaum peb ncaim ntawm nej tas lawm, peb taug tej kev tuaj txog Suav teb no, peb tau raug ntau yam xwv txheej saum av thiab nruab deg.
Muaj ob lub caij uas peb raug tub sab nyiag peb tej toob xib tas. Tab txawm yog peb tej khaub ncaws los kuj raug luag nyiag.
Ntuj pab ces qhov kawg peb tuaj txog Khas Npas Lis. Peb tau tsa Kos Vis Nos ua thawj tus Tswv Qhia saib tsoom ntseeg nyob As Xias toob fab. Peb tau nyob Khas Npas Lis 5 xyoos. Lub caij ntawd, tus vaj Moos Kus muab ib tsab ntawv rau peb, kom tseem hwv pub txhiam xws txaus yug peb 8 leej mus li.
Peb los nyob Ntxais Toos, muaj ib tug poj niam As Mes Nias tau pab txhim ib lub tsev teev Ntuj zoo nkauj rau cov neeg ntseeg teev Huab Tais Yes Xus. Peb tus Thawj Tswv Qhia uas nyob Khas Npas Lis tau tsa Zes Las Dos ua Tswv Qhia nyob txawm hauv peb lub tsev teev Ntuj.
Thaum tus Tswv Qhia Zes Las Dos tuag lawm, peb tau muab nws faus nyob hauv lub tsev teev Ntuj. Thaum tus Tswv Qhia Kos Vis Nos xav kom kuv ua Tswv Qhia nyob Ntxais Toos mas kuv tsis kam ua. Tswv Qhia Kos Vis Nos thiaj xa tus Tswv Qhia Pes Les Nqees tuaj ua Tswv Qhia nyob Ntxais Toos.
Xyoo 1322 Pes Les Nqees tuag, ces Tswv Qhia Kos Vis Nos rov xa ntawv tuaj qhia kuv kom kuv txais txoj hauj lwm ua Tswv Qhia saib tsoom ntseeg nyob teb chaws no.
Xav mus xav los tas ces kuv thiaj txais txoj hauj lwm ntawd. Nyem no, muaj tej ntu uas kuv nyob hauv lub tsev teev Ntuj nyob hauv lub nroog Ntxais Toos, hos muaj tej ntu kuv nyob hauv peb lub koom haum Fas Ntshis Kas lub tsev, nyob hauv plawv zoov, tsis deb ntawm lub nroog Ntxais Toos.
Kuv noj qab nyob zoo, yog kuv muaj zog ntev li cas mas kuv yuav ua dej num sau Tswv Ntuj cov qoob ntev li cas. Tab sis kuv plaub hau twb dawb lawm, vim kuv laus lawm thiab kuv khwv ua cov dej num tshaj Ntuj Lus.
Nyob Suav teb no, muaj txhia haiv neeg hais txhia xeem lus. Muaj cov neeg tshaj ntau yam kev ntseeg sib txawv. Tseem hwv tso lus rau sawv daws teev Ntuj los teev dab ywj siab. Nyob hauv cov neeg coj Mawv Xim Lim kev cai los cov coj Yus Das kev cai mas tsis muaj leej twg ua Ntuj kev cai ib tug li. Hos cov neeg teev dab qhuas coob leej thov txais lub Cim Ntxuav. Tsis kav nyob hauv cov neeg tau txais lub Cim Ntxuav tshiab muaj tej tus kuj coj tus yam ntxwv tsis haum Huab Tais Yes Xus lub Moo Zoo.
Kuv tau sau ob peb lo lus ntawd tuaj rau nej cov tub koom haum Fas Ntshis Kas. Kuv tsis xa ntawv tuaj rau cov tub koom haum uas thaum ub kuv paub lawv zoo, vim tias kuv tsis paub tias leej twg tseem muaj txoj sia nyob.
Ua li mas 6 tus Tswv Qhia uas Vaj Qhia xa tuaj nyob Khas Npas Lis, mas lawv sawv daws twb mus cuag Tswv Ntuj lawm. Tshuav kuv tib leeg thiaj tseem muaj txoj sia nyob xwb.”

Vaj Qhia tseem xa ntau tus tub tshaj Ntuj Lus tuaj pab Tswv Qhia Kos Vis Nos, tab sis ntau pab tuaj tsis txog, lawv raug mob raug ntsaj, raug tua thiab tuag hauv tiv txwv dej. Tab sis muaj ib tug tuaj txog, yog ‘Pos Des Nos Nes’ (Odoric of Pordenone).

Pos Des Nos Nes thiab nws cov phooj ywg xub tuaj tshaj lub Moo Zoo nyob Pes Xis teb, nws mus xyuas cov Mas Las Npas nyob Is Ntias teb uas tau txais lub Moo Zoo ntawm tus Hauv Paus Xa Lus Tos Mas. Lawv kuj caij nkoj mus txog Xes Laas teb (Ceylon, Sri Lanka) thiab Zas Vas teb (Java) ces lawv caij nkoj ntxiv mus txog Suav teb; lawv nqes ntawm lub nroog Kuav Tsawb (Guangzhou) yog xyoo 1325.

Pos Des Nos Nes lawv mam sawv kev ntawm Kuav Tsaw mus rau Khas Npas Lis. Tus vaj Moos Kus txais nws zoo. Nws sau piav tias tus vaj Moos Kus hwm tus Tswv Qhia Kos Vis Nos thiab ntau zaus tus vaj tuaj xyuas Kos Vis Nos ua Thaj Txi Ntuj, nws tseem pom cov neeg ua Ntuj kev cai nquam paj nquam nruas nyob hauv tus vaj Moos Kus lub loog. Tus vaj kuj caw cov Leej Choj nrog nws mus ua si tua nqaij.

Pos Des Nos Nes mus nrog Kos Vis Nos nyob 3 xyoos. Pos Des Nos Nes pom tus vaj Moos Kus saib Kos Vis Nos thiab saib kev ntseeg Kav Tos Liv muaj tsim. Thaum twg tus vaj yuav tawm rooj mus deb mas nws thov kom tus Tuam Tswv Qhia Kos Vis Nos foom hmoov zoo rau nws. Muaj ib zaug, tus vaj mus tsham tsoom pej xeem nyob deb ntawm Khas Npas Lis. Thaum nws yuav rov qab los nyob Khas Npas Lis, tus Tswv Qhia Kos Vis Nos nrog ib pab neeg ntseeg mus ob hnub kev tos tus vaj yuav los. Lawv ntsib tus vaj Moos Kus zaum saum nws lub theej kiab siab siab muaj hwj chim, cov ntseeg hu zaj nkauj ‘Leej Ntuj Plig, koj los mas’. Tus vaj hnov cov ntseeg hu nkauj, nws hais kom lawv txav los ze ntawm nws, nws hle nws lub mom teev, nws ua tib zoo maj mam nwj Yes Xus dai ntawm tus Ntoo Cuam.

Xyoo 1330 Tswv Qhia Kos Vis Nos tas sim neej, tus vaj hu tsoom pej xeem teev hawm Yes Xus thiab cov coj lwm txoj kev teev hawm tuaj sib koom ua ib lub ntees pam tuag muaj hwm chim rau tus Tswv Qhia Kos Vis Nos uas tau ua dej num loj ib ntus ntev li 30 tawm xyoo nyob Suav Teb.

Xyoo 1333 lub 9 hlis mas Vaj Qhia nyob Los Mas thiaj paub tias Kos Vis Nos tsis muaj txoj sia nyob lawm. Vaj qhia thiaj xa ib tug Tswv Qhia mus hloov Kos Vis Nos, tab sis zoo li tus Tswv Qhia ntawd mus tsis txog Khas Npas Lis los yog Pej Ceeb. Yog li mas xyoo 1338 tus vaj Moos Kus thiaj rov thov kom Vaj Qhia xa ib co tub tshaj Ntuj Lus mus nyob Khas Npas Lis. Vaj Qhia thiaj xa ib co tub koom haum Fas Ntshis Kas mus txog Khas Npas Lis. Cov coj lawv yog Zam Mas Lis Nyos Lis (John of Marignolli). Nws tsis yog ib tug Tswv Qhia. Zam Mas Lis Nyos Lis tsuas yog Vaj Qhia ib tug tiam lis tuaj xyuas tus vaj Moos Kus nyob Khas Npas Lis xwb. Zam Mas Lis Nyos Lis rov los cuag Vaj Qhia nyob Los Mas yog xyoo 1352.

Xyoo 1350 cov tub tshaj Ntuj Lus tso siab tias lub Moo Zoo yuav ri mus puv Suav teb. Cov tub tshaj Ntuj Lus tso siab li ntawd, yog vim lub koom haum Fas Ntshis Kas nyob Aws Los Pas teb xa ib co tub koom haum coob mus tshaj Ntuj Lus, thiab yog vim cov tub tshaj Ntuj Lus pom tias cov vaj kav Suav teb zoo siab txais cov tub tshaj Ntuj Lus, lawv pab cov tub tshaj Ntuj Lus kom tau txaus noj txaus haus. Tab sis cov tub tshaj Ntuj Lus tsis paub lus Suav zoo, lawv tsuas hnov cov nom kav teb chaws cov lus xwb, lawv tsis hnov tsoom pej xeem Suav niaj hnub ntxub cov vaj Moos Kus uas tuaj kav Suav teb tau 100 xyoo los lawm. Cov tseem hwv Suav tsis nyiam cov vaj Moos Kus, lawv tos kom ib tug tseem Suav sawv los ua vaj kav Suav teb.

Xyoo 1368 ib tug vaj Suav Meej Tshoj sawv los nyob Pej Ceeb, ces txog tiam 15 cov ua Ntuj kev cai nyob Suav teb pib ploj zuj zus.

Xyoo 431 cov Tswv Qhia ua Rooj Ncauj Lus nyob Es Fes Xos, lawv txiav txim rau Nes Tos Lis Yus vim nws qhia tej yam tsis raug qhov tseeb txog Yes Xus. Cov Tswv Qhia nyob Es Fes Xos tsis pub Nes Tos Lis Yus nyob hauv cov teb chaws uas Npis Xaas kav, ces Nes Tos Lis Yus tsiv mus nyob Xis Lias teb. Nes Tos Lis Yus nyiam Yes Xus tas siab, ces nws tsim nws lub Koom Txoos Nes Tos Lis Yus thiab nws qhia nws zaj tswv yim rau ntau leej. Nws tsa lawv ua Leej Choj thiab ua Tswv Qhia. Nws xa lawv mus tshaj Yes Xus lub Moo Zoo nyob hauv ntau lub teb chaws nyob As Xias tuam teb.

Thaum Nes Tos Lis Yus tas sim neej, mas nws cov thwj tim mus qhia Yes Xus lub Moo Zoo txog Is Ntias teb thiab nyob nruab nrab tuam teb As Xias.Lawv mus txog Suav teb. Xyoo 636 ib tug Tswv Qhia Nes Tos Lis Yus hu ua ‘As Los Pees’ (Alopen) mus txog lub nroog Tshaas Aas (Chang’an) los yog Xis Aas (Xi’an) uas yog lub nroog cov vaj Suav Thaj Tshoj (Tang Dynasty) lawv nyob. As Los Pees nqa ib co ntawv thiab ib co duab hais txog kev ntseeg txog Yes Xus.

Cov tub tshaj Ntuj Lus Nes Tos Lis Yus qhia ntau yam txog Yes Xus; xws li lawv hu Ntuj Kev Cai ua ‘Txoj Cai Ntshiab’ (Luminous Religion/ Jingjiao <景教>), hu Leej Ntuj Plig ua ‘Txoj Pa Huv’, hu Yes Xus Pleev ua ‘Xib Hwb paub txhua yam’, hu Tswv Ntuj ‘Tus Tseem Tswv’ (Zhēnzhǔ <真主>).

Cov vaj Thaj Tshoj tau pab cov tub tshaj Ntuj Lus Nes Tos Lis Yus ntau tas nrho mus txog xyoo 780. Lawv pab txhim tej lub tsev teev Ntuj, pub tej thaj av rau cov tub tshaj Ntuj Lus Nes Tos Lis Yus ua tsev rau lawv nyob thiab ua tej lub tsev qhia kev ntseeg.

Tiam 8 thiab tiam 9 yog lub caij uas cov Koom Txoos Nes Tos Lis Yus vam meej tshaj nyob tas As Xias tuam teb, lawv muaj ntau pua tus Tswv Qhia thiab ntau plhom tus neeg ntseeg.

Xyoo 845 tus vaj Thaj Tshoj hu ua ‘Vwj Ntxoov’ (Emperor Wuzong of Tang) txiav txoj cai txwv tsis pub kom muaj cov kev teev hawm tuaj ntawm pej kum teb tuaj nyob Suav teb. Cov kev teev hawm tuaj pej kum teb tuaj ntawd yog kev teev hawm Phus Thas, kev teev hawm Mawv Xis Lim thiab kev teev hawm Nes Tos Lis Yus. Tus vaj ntiab kom lawv sawv daws rov mus nyob lawm pej kum teb. Cov Nes Tos Lis Yus mas lawv tsiv mus tshaj Ntuj Lus nyob hauv cov teb chaws zwm rau cov vaj Moos Kus.

Xyoo 960 cov vaj Suav Xoom Tshoj (Song dynasty) hloov cov vaj Thaj Tshoj kav Suav teb, ces txoj kev tshaj Ntuj Lus Nes Tos Lis Yus maj mam poob hwj chim zuj zus.

Lub caij cov Moos Kus kav Suav teb, cov tub tshaj Ntuj Lus rau siab tshaj Ntuj Lus tas zog, tab sis yog zoo li lawv tsis nco pom tiastsoom pej xeem Suav feem ntau tsuas nyiam Khoov Fum Txws txoj kev cai xwb, ces txij xyoo 1368 mus txog xyoo 1644 cov vaj Meej Tshoj kav Suav teb, Ntuj kev cai thiaj ploj mus ib ntus.

Txij xyoo 1405 txog xyoo 1433 tus Mawv Xis Lim hu ua ‘Tsees Hes’ (Zheng He) tau ua thawj tswj coj 20,000 tus tub rog Suav caij nkoj mus txog Is Ntias teb thiab As Fis Kas teb. Nws coj lawv mus ntaus rog 7 zaus. Cov vaj Suav thiaj saib cov Mawv Xis Lim muaj tsim. Kev teev hawm Mawv Xis Lim thiaj ri mus sai. Cov neeg teev hawm Mawv Xis Lim txhim tej lub tsev teev As Las muaj hwm chim.

Xyoo 1521 thawj pab Fos Laas Kis (Hollanda) tuaj txog lub nroog Kuav Tsaus (Guǎngzhōu), nyob hauv lub xeev Kuav Toob (Guangdong), nyob Suav qab teb. Tab tom yog ib lub caij uas tus tuam vaj Suav nyob Pej Ceeb tuaj tsham lub xeev Kuav Tooj. Nws kheev kom cov Fos Laas Kis mus tso lawv cov paj tshab nyob hauv lub tsev txais cov pej kum neeg cov paj tshab.

Hnub uas tus tuam vaj tuaj txog Kuas Tsaus, nws zaum saum nws lub theej kiab, hos cov Fos Laas Kis tsis txhos caug pe nws. Tus tuam vaj thiaj kom muab tus Fos Laas Kis txhais lus tua tuag kiag, thiab nws ntiab cov Fos Laas Kis kom tawm ntawm lub xeev Kuav Tooj mus. Cov Fos Laas Kis thov kom cov nom Suav kheev lawv nyob hauv ib lub pov txwv me nyob tsis deb ntawm Kuav Tsaus. Tab sis cov nom Suav tsuas kheev kom lawv niaj xyoo nyob tau 3 hlis hauv lub pov txwv xwb. Cov Fos Laas Kis thov tas zog, ces cov nom Suav kheev kom cov Fos Laas Kis nyob txawm hauv lub pov txwv. Cov Fos Laas Kis muaj cai mus tsham Kuav Tsaus, tab sis tsis muaj cai pw hauv lub nroog.

Tos cov Suav ua nruj rau cov Fos Laas Kis yog vim cov Fos Laas Kis tsis yog tuaj ua luam xwb, hos lawv xav qhia txoj kev ntseeg txog Yes Xus.

Lub caij ntawd, Xas Vis Yes qhib kev tshaj Ntuj Lus nyob Zis Pees tau 3 xyoos lawm.Nws sau ib tsab ntawv rau Los Yos Las tus thawj tswj lub koom haum Yes Xus Is nyob Los Mas tias “Nyob Suav teb muaj ntau tug kws txuj nto moo loj. Kuv xav kom peb cov tub koom haum paub cov kws txuj Suav. Kuv xav mus tsham Suav teb.”   

Xyoo uas Xas Vis Yes ncaim ntawm Zis Pees teb, nws nrhiav kev mus tsham Suav teb. Nws thov kom cov laus pav Pos Tws Nkas thauj nws mus txog lub nroog Kuav Tsaus uas nyob hauv lub xeev Kuav Tooj. Tab sis cov laus pav tsis tshua xav pab thauj Xas Vis Yes, vim lawv twb nrog cov nom Suav muaj teeb meem ntau lawm. Cov laus pav tsis muaj cuab kav hais meej tias lawv yuav tsis pab nws. Xas Vis Yes tos lawv hli puav, tsuas muaj ib tug tub txib Suav hu ua ‘As Nthos Nis’ ua nws luag tos cov laus pav yuav tuaj thauj nws mus.

Xas Vis Yes nkawd tos ntev hnub, Xas Vis Yes raug ib tug mob npaws hnyav ces hnub tim 3 lub 12 hlis xyoo 1552 Xas Vis Yes thiaj tuag.

Muaj ib tug tub sab Suav kheev tuaj lwg cov zos nyob hauv lub xeev Kuav Tooj. Cov Pos Tws Nkas tau pab cov nom Suav ntes tus tub sab ntawd, ces xyoo 1553 tseem hwv Suav pub tus kaum av ntev li 4 km, dav li 1 km thiab 600 mev hu ua Mas Kaus (Macau) rau cov Pos Tws Nkas nyob. Cov neeg ua Ntuj kev cai thiaj tsiv los nyob Mas Kaus

Xyoo 1557 muaj 400 tus neeg ntseeg nyob Mas Kaus. Xyoo 1582 muaj 1,000 leej. Feem ntau yog cov laus pav Pos Tws Nkas nrog lawv tsev neeg. Xyoo 1576 pib muaj Tswv Qhia saib cov neeg ntseeg nyob Mas Kaus.

Xyoo 1577 Txiv Plig Vas Lis Nyas Nos mus nyob Mas Kaus 9 lub hlis. Vas Lis Nyas Nos yog ib tug tub koom haum Yes Xus Is. Nws yog tus ntaus thawj saib cov tub koom haum Yes Xus Is nyob Zis Pees teb.

Vas Lis Nyas Nos pom tias cov tub koom haum Yes Xus Is nyob Mas Kaus tau 25 xyoos lawm, tab sis lawv tsis muaj ib tug kawm lus Suav thiab lawv tsis ntseeg tias cov Suav yuav txais tau Ntuj kev cai. Vas Lis Nyas Nos qhuab qhia lawv ntau lub hlis, tab sis lawv tsuas xav mus tshaj Ntuj Lus nyob Zis Pees teb xwb.

Vas Lis Nyas Nos tshuaj txog Suav teb tej keeb kwm. Nws thiaj xav tswv yim xws li Xas Vis Yes hais tias haiv neeg Suav yog ib haiv neeg muaj hwj chim tau qhia txuj rau Zis Pees teb thiab Kos Lim teb. Vas Lis Nyas Nos xa ib tsab ntawv rau lub koom haum Yes Xus Is nyob Nkos As, Is Ntias teb; kom lawv xa ib tug tub tshaj Ntuj Lus tshiab tuaj nyob Mas Kaus. Lub koom haum thiaj xa ‘Lus Zes Lis’ (Michele Ruggieri) tuaj. Thaum Lus Zes Lis tuaj txog Mas Kaus mas Vas Lis Nyas Nos twb mus Zis Pees teb lawm, tab sis nws tso ib tsab ntawv nyob Mas Kaus, qhia Lus Zes Lis tias Lus Zes Lis yuav rau siab kawm lus Suav, kawm ntawv Suav, kawm cov txuj thiab tus yam ntxwv Suav.

Lub 7 hli ntuj xyoo 1579 Lus Zes Lis tuaj txog Mas Kaus. Nws xyaum ua ib tug neeg Suav xws li Vas Lis Nyas Nos tau qhia. Nws rau siab kawm lus Suav ib xyoos ntau. Lus Zes Lis muab 3 phau ntawv los txhais ua lus Suav. Phau ib yog qhia kev ntseeg lub ntsiab, phau ob yog nthuav ib co Leej Ntshiab lub neej, thiab phau peb yog pab txais lub Cim Daws Txhaum.

Niaj xyoo, cov tseem hwv Suav tso lus rau cov laus pav Pos Tws Nkas mus muag toob xib ob zaug nyob hauv lub nroog Kuas Tsaus. Lus Zes Lis nrog cov laus pav mus. Nws ntuas cov laus pav kom lawv hwm cov tub tseem hwv Suav raws li Suav kev cai. Cov Suav zoo siab, ces lawv xav kom Lus Zes Lis ua tus cev tsoom laus pav cov lus rau tsoom tub tseem hwv Suav.

Xyoo 1581 lub 4 hlis, Lus Zes Kis nrog cov laus pav rov mus. Cov Suav txais nws zoo, lawv cheem nws kom nws nyob hauv lub tsev txais cov tiam lis pej kum teb. Lub 11 hlis Lus Zes Lis tseem rov qab mus Kuav Tsaus ib zaug ntxiv. Cov tub tseem hwv Suav thov mus xyuas Lus Zes Lis ua Thaj Txi Ntuj. Yog vim Lus Zes Lis hwm Suav thiab saib Suav tej kev cai muaj nqis, ces Suav thiaj maj mam qhib lawv teb chaws rau cov pej kum neeg leej puav mus nyob Suav teb.

Cov tub koom haum Yes Xus Is nyob Mas Kaus tsis pom zoo kom Lus Zes Lis kawm lus Suav. Lawv hais tias tus Suav yuav txais kev ntseeg txog Yes Xus tseem tsis tau yug los. Lus Zes Lis kawm lus Suav, nws nkim zim txwv dag, ces tus thawj tswj nyob Mas Kaus kom Lus Zes Lis ua lwm yam hauj lwm, Lus Zes Lis tsis tau kev kawm Suav cov txuj ywj siab, ces xyoo 1582 Vas Lis Nyas Nos rov qab los nyob Mas Kaus, nws txiav txoj cai tshiab tias txij no mus cov tub koom haum Yes Xus Is ua dej num nyob Suav teb tsis zwm rau cov tub koom haum Yes Xus Is nyob Mas Kaus.

Xyoo 1582 lub 8 hli, tus tub tshaj Ntuj Lus hu ua ‘Lim Mas Taum’ (Matteo Ricci) tuaj txog Mas Kaus. Lim Mas Taum pib kawm Suav cov lus thiab cov txuj, ces nws nrog Lus Zes Lis sib koom tes npaj ua ib txog hauj lwm loj nyob hauv Suav teb. Xyoo 1582 ntawd, muaj ib co tub koom haum Yes Xus Is tuaj Is Npes Lias teb tuaj nyob hauv lub nroog Kuav Tsaus, lawv tsis xub thov lus kheev ntawm tseem hwv Suav ces thiaj muaj teeb meem. Thaum ntawd, Vas Lis Nyas Nos xa Lus Zes Lis mus pab daws teeb meem. Lus Zes Lis coj ib tug tub tshaj Ntuj Lus hu ua ‘Pas Xias’ ua nws luag mus. Yog lub 9 hlis xyoo 1582 Lus Zes Lis nkawd thiaj mus txog Tsos Chees (Zhaoqing), nkawd mus cuag tus vaj txheeb. Lus Zes Lis cev ib lub teev loj muaj tswb nrov qhia tias yog pes tsawg teev. Yog ib lub teev uas Lim Mas Taum nyuam qhuav muab rau nws. Lus Zes Lis hais rau tus vaj txheeb tias nws xav kawm lus Suav ntxiv, nws thov nyob Tsos Chees xyoo puav, ces tus vaj txheeb kheev. Tus vaj txheeb kom Lus Zes Lis nkawd nyob hauv ib lub tsev hauj sam.

Lub caij ntawd ib co Leej Choj tuaj Fis Lis Pees teb tuaj, tseem hla Suav txoj cai ib zaug ntxiv. Lawv nyiag mus nyob hauv lub xeev Fus Cees. Cov tub tseem hwv Suav muab lawv ntes kaw hauv tsev loj faj. Cov tub koom haum Yes Xus Is nyob Mas Kaus thiab Lus Zes Lis vam txog tus vaj txheeb kav Tsos Chees kom nws nrog lawv thov tus vaj txheeb kav lub xeev Fus Cees kom tso cov tub tshaj Ntuj Lus tuaj Fis Lis Pees teb tuaj uas raug kaw nyob hauv tsev loj faj, mas tus vaj txheeb kav lub xeev Fus Cees thiaj tso cov cov tub tshaj Ntuj Lus mus. Tab sis cov pwm tsav nyob Pej Ceeb hnov cov xwm ntawd, mas lawv tsis pom zoo, lawv txo tus vaj txheeb kav Tsos Chees. Tus vaj txheeb ntshai tsam nws tseem yuav raug txim hnyav dua, vim nws txais Lus Zes Lis nyob hauv nws lub nroog, ces nws thov kom Lus Zes Lis nkawd rov mus Mas Kaus. Nkawd rov los txog Mas Kaus, ces Pas Xias thiaj mus tshaj Ntuj Lus nyob Zis Pees teb.

Lus Zes Lis rov los nyob Mas Kaus 6 lub hli, ces nws txais tus vaj txheeb tshiab hu ua Vaj Phas (Wang Pan) ib tsab ntawv caw nws kom nws rov qab los nyob Tsos Chees. Tus vaj txheeb tseem ua ntawv faib ib thaj av rau Lus Zes Lis nyob Tsos Chees mus li. Hnub tim 10 lub 8 hli ntuj 1583 Lus Zes Lis thiaj coj Lim Mas Taum nrog nws mus nyob txawm hauv lub nroog Tsos Chees.

Nyob Tsos Chees, muaj ib tug Suav ntseeg Yes Xus uas Lus Zes Lis paub nws zoo, vim ntau lub hlis ua ntej Lus Zes Lis tau qhia kev ntseeg rau nws. Thaum Lus Zes Lis yuav rov mus Mas Kaus, nws tau muab nws lub rooj ua thaj txi Ntuj rau tus Suav ntawd saib. Thaum Lus Zes Lis thiab Lim Mas Taum nkawd tuaj txog, nkawd pom tias tus hluas Suav tau tu lub Rooj Txi Ntuj huv kawg. Tus hluas tsis muaj ib daig duab Yes Xus ces nws tau sau ob tug txwm ntawv Suav loj hais tias ‘Theeb Tswv’ (Tiānzhǔ <天主> txhais lo lus Aas Kiv tias ‘Lord of Heaven’). Yav tom ntej, cov tub tshaj Ntuj Lus yuav siv lub npe Theeb Tswv los hais txog tus Huab Tais uas cov ua Ntuj kev cai nyob hauv lub Koom Txoos Kav Tos Liv yuav siv mus li.

Lus Zes Lis nrog Lim Mas Taum mus ua tus vaj txheeb tsaug, vim nws tau pub ib thaj av rau nkawd ua tsev. Nkawd pe tus vaj txheeb xws cov Suav ua kam. Nkawdpe hauv pliaj ti av peb zaug,nkawd hais rau tus vaj txheeb tias nkawd tuaj ntawm ib lub teb chaws deb deb tuaj vim nkawd hnov  hais tias Suav teb yog ib lub teb chaws muaj hwj chim. Tus vaj txheeb Vaj Phas muab ob daig duab zoo nkauj los pub rau nkawd. Yog ob daig duab yoog cov hauj sam zaj tswv yim. Lus Zes Lis thiab Lim Mas Taum muab ib daig duab los dai saum qhov rooj tsev thiab lwm daim duab dai hauv kem tsev txais qhua. Nkawd piav tias daim duab saum qhov rooj muaj cov lus txhais tias “Tsoom Ntshiab lub Paj”, nkawd piav tias lub paj yog niam Mab Liab. Daim duab hauv kem tsev txais qhua muaj hauj sam cov lus cav txog ‘Thaj Av Ntshiab Tuaj Xib Fab Tuaj’, nkawd piav tias yog cav txog Yes Xus lub Koom Txoos nyob Xib Fab.

Ob tug pib kawm lus Suav. Nkawd kuj pib qhia kev ntseeg txog Yes Xus thiab. Nkawd tab meeg hais rau cov ntseeg tias ib txwm Suav teb hwm Khoov Fum Txws zoo dua Phus Thas. Lim Mas Taum nrog Lus Zes Lis kho nws phau ntawv ‘Tswv Ntuj cov kwv huam’ (Tiānzhǔ shílù <天主實錄>). Phau ntawv no piav tej yam zoo li no tias: Vim li cas peb thiaj paub tias muaj Tswv Ntuj? Tswv Ntuj yog ib tug Huab Tais zoo li cas? Tswv Ntuj kav lub ntuj lub teb li cas? Neeg tus plig thiab neeg lub tswv yim zoo li cas? Vim li cas tas ib zeej tsoom neeg yeej paub kev zoo kev phem? His Xas Lais kev cai zoo li cas? Yes Xus kev cai thiab Yes Xus lub Moo Zoo yog zoo li cas? Lub Cim Ntxuav thiab lub Koom Txoos cov kab ke zoo li cas?

Thaum Lim Mas Taum kho Lus Zes Lis phau ntawv, nws muaj 2 lo lus Suav yuav los ntxeev lo lus Las Tis Nas ‘Des Us’ (Deus). Lo lus ib yog lo tias ‘Theeb Tswv’ raws li cov kws txuj Khoov Fus Txws siv thiab nkawd pom tus hluas Suav sau rau ntawm lub Rooj Txi Ntuj; lo lus ob yog lo lus ‘Saas Tis’ (Shangdi <上帝>) raws li cov kwv huam Suav ib txwm siv. Qhov kawg, Lim Mas Taum siv lo lus ‘Theeb Tswv’ vim tias Lus Zes Lis twb ua ntej siv lo lus no nyob hauv nws cov ntawv hais txog Huab Tais 10 Lo Lus lawm.

Lo lus ‘Theeb Tswv’ ntxeev ua lus Hmoob mas yog ‘Tswv Ntuj’ txhais tias ‘tus kav Ntuj ceeb tsheej’ los yog ‘Ntuj Ceeb Tsheej tus Huab Tais’. Los lus ‘Saas Tis’ mas Hmoob hais tias ‘Faj Tim’ muaj lub ntsiab tias ‘tus Huab Tais nyob siab’.

 Nkawd tseem tau ua phau ntawv txheeb lus Suav thiab txhais ua lus Pos Tws Nkas los pab cov tub tshaj Ntuj Lus kawm lus Suav.

Thaum tseem nyob Los Mas, Lim Mas Taum tau kawm cov txuj ntsuas hnub qub thiab ua ntawv theej teb, ces xyoo 1584 nws tau sau ib daig duab theej teb. Lim Mas Taum paub tias ntiaj teb yog ib lub yeem kheej, ua li mas yog yus xav sau ntiaj teb tus duab mas yuav sau lub teb chaws twg nyob nruab nrab kuj tau, ces nws daim ntawv theej teb thiaj muaj Suav teb nyob hauv plawv ntiaj teb. Tos Lim Mas Taum sau ib daig theej teb muaj Suav teb nyob nruab nrab, yog vim tsoom pej xeem nyob Tsos Chees tsis nyiam nkawd, cov hauj sam kuj txw cov pej xeem kom ntxub nkawd. Lawv hu nkawd ua ob tug dab phem pej kum. Thaum cov pej xeem Suav pom Lis Mas Taum daim duab theej teb, mas lawv zoo siab kawg, vim los txog tav no lawv tsuas pom cov duab theej teb tuaj pej kum teb tuaj, Suav teb nyob ib ceg kaum xu kev, tsis muaj hwj chim dab tsi li. Nyem no lawv pom Lim Mas Taum daim duab ua kom Suav teb muaj hwj chim tshaj lwm teb chaws.

Lus Zes Lis thiab Lim Mas Taum paub tias yav tom ntej yuav tsum mus txog Pej Ceeb, thiab thov kom tus vaj Suav tshaj ib lo lus kheev kom tsoom pej xeem Suav coj kev cai Ntuj.

Xyoo 1586 tus vaj txheeb hloov Vaj Phas yog Tsees Yis Lis (Cai Yilong). Nws yaum Lus Zes Lis nrog nws mus txog lub xeev Tsaws Caas. Thiab zaum puav tus vaj txheeb mus txog Pej Ceeb, ces tej zaum Lus Zes Lis yuav tau kev nrog tus vaj txheeb mus txog Pej Ceeb. Lus Zes Lis kav xyeem nrog tus vaj txheeb Tsees Yis Lis mus, muaj ib tug tub tshaj Ntuj Lus hu ua ‘As Mes Das’ (Almeida) ua nws luag. Lawv caij nkoj mus. Hnub tim 5 lub 1 hlis xyoo 1586 lawv mus txog lub nroog Kos Lees uas yog qhov chaw lub nkoj mus tsis tau ntxiv. Lus Zes Lis thiab As Mes Das ua thaj txi Ntuj nyob ntawd. Lus Zes Lis piav tias:

“Cov pej xeem coob tas nrho khiav tuaj vij peb. Ib tug neeg teev Phus Thas tuaj nqua hu wb ob tug Txiv Plig, vim nws ua ib rooj qav. Wb nrog cov hauj sam noj mov. Lawv txais tos wb zoo heev. Wb tau muab ib phau ntawv teev Ntuj rau lawv saib. Lawv ntseeg cov lus wb hais. Yog vim li cas sawv daws thiaj nyiam tham txog kev ntseeg? Yog vim peb hnav tsoos tsho hauj sam, peb ncaj qha tham txog cov kev ntseeg tau.”

Lus Zes Lis hnov cov Suav hais tias nyob hauv lub xeev Huj Pej (Hubei), nyob saum lub ncov roob Vus Taas muaj ib lub tsev kawm kev cai Tauv (Taoism) los yog ‘Taw Kev’. Cov Leej Choj xyaum tso pa thiab nqus pa xwm yeem raws lawv txoj cai, lawv thiaj ua neej ntev xyoo.

Thaum Lus Zes Lis tau nyob Kos Lees ob xyoos lawm, nws xav coj ib lub neej nyob xyaw tsoom pej xeem, tab sis cov hlob tswj lub koom haum Yes Xus Is tsis pom zoo tso lus rau nws ua li ntawd, thiab tseem muaj lwm yam ntxhov tshwm sim; yam li tus vaj txheeb Tsees Yis Lis uas yog tus txheem Lus Zes Lis, nws rov qab los nrog nws tsoom kwv tij nyob hauv lub xeev nws yug, mas nws tsoom kwv tij ua kub ntxhov rau nws, ces tus vaj txheeb pab tsis tau Lus Zes Lis ntxiv.

Lus Zes Lis thiab As Mes Das pom tseeb tias nkawd tes dej num yuav tsis daig ntawm cov nom kav cov xeev Suav, mas nkawd yuav tsum muaj tus tuam vaj Suav txheem nkawd, ces nkawd thiaj muaj peev xwm ua dej num ywj siab.

Xyoo 1588 Vas Lis Nyas Nos thiaj xa Lus Zes Lis mus thov Vaj Qhia nyob Los Mas kom Vaj Qhia xa ib co tiam lis mus ntsib tus tuam vaj Suav nyob Pej Ceeb. Lus Zes Lis mus txog Los Mas, tab sis muaj 4 tug Vaj Qhia sib hloov sai vim lawv puav leej tuag sai, ces nws tsis tau kev mus thov ib co tiam lis. Xyoo 1607 Lus Zes Lis thiaj tuag nyob Is Tas Lias teb.

Ntawm Lim Mas Taum mas thaum Lus Zes Lis mus dua lwm lub xeev lawm, nws tseem nyob hauv Tsos Chees kawm lus Suav thiab qhia kev ntseeg rau cov neeg Suav xav ua Ntuj kev cai.

Muaj ib tus vaj txheeb tshiab tuaj saib lub nroog Tsos Chees, nws tsis nyiam cov pej kum neeg, mas Vas Lis Nyas Nos thiaj txiav tias yuav xa Lim Mas Taum mus tshaj Ntuj Lus rau lwm lub teb chaws, tab sis Lim Mas Taum tsis xav mus, nws mus cuag tus vaj txheeb. Tus vaj txheeb pom tias Lim Mas Taum paub Suav kev cai zoo kawg, mas nws xav cheem Lim Mas Taum nyob ntxiv. Lim Mas Taum tsis xav kom tus vaj txheeb hla nws cov lus ceeb toom tias yuav ntiab cov pej kum neeg tawm hauv nws lub nroog, ces Lim Mas Taum thiaj thov tshais chaw mus rau Sos Tsaus (Shaozhou) los sis hais tias Sos Kuas (Shaoguan) nyob ntawm Tsos Chees sab pej.

Hnub tim 15 lub 8 hli 1589 Lim Mas Taum thiab As Mes Das thiaj tso 18 tus neeg Suav ua Ntuj kev cai nyob Tsos Chees tseg. Hnub tim 24 lub 8 hli ntuj, nkawd mus txog Sos Tsaus. Vim nkawd hnav tsoos tsho hauj sam, mas cov Suav coj nkawd mus txog lub tsev teev hawm Phus Thas. Cov hauj sam Suav tuaj ntsauv ob tug hauj sam tawv dawb coob coob npaum li ib xub muv. Hauv lawv nruab siab, cov hauj sam ntxub nkawd vim nkawd yog pej kum neeg, thiab lawv xav tias yog cov tseem hwv Suav xa nkawd tuaj qhuab qhia cov hauj sam vim lawv nto moo tias lawv taug kev plees kev yi heev.

Lim Mas Taum thiab As Mes Das kuj tsis kam tsa tes hawm cov mlom Phus Thas. Nkawd hais rau cov tub tseem hwv tias nkawd tsis xav nyob hauv cov tsev hauj sam, ces cov tub tseem hwm thiaj pub ib thaj av rau nkawd tsa tsev nyob; yog ib thaj av nyob tom ntug nroog, tab sis kuj yog ib thaj av zwm rau ib pab hauj sam.

Muaj ob tug tub koom haum Yes Xus Is haiv neeg Suav tuaj nrog nkawd nyob Sos Tsaus; yog Tsoos Mees Zees thiab Huas Mees Sas.

Xyoo 1591 As Mes Das tuag, ces lub koom haum Yes Xus Is xa Pes Rhis tuaj nrog Lim Mas Taum nyob. Xyoo 1593 Pes Rhis kuj tuag tiab, ces lub koom haum thiaj xa Kas Tas Nos (Lazzaro Cattaneo) tuaj pab Lim Mas Taum.

Lim Mas Taum xav kawm cov txuj Suav tseeb tiag, ces nws vam txog ib tug xib hwb hu ua Cus Thais Xus (Qu Taisu <瞿太素>) uas yog ib tug nom nto moo tus tub pab nws. Cus Thais Xus tseem muaj ib lub npe hu ua Tshws Zus Khuas (Qu Rukui <瞿汝夔>). Cus Thais Xus hnov tias Lim Mas Taum yog ib tug kws txuj Xib Fab, ces nws tuaj xyuas Lim Mas Taum. Nws saib Lim Mas Taum yog zoo li ib leej txiv, mas niaj hnub nws tuaj kawm txuj Xib Fab ntawm Lim Mas Taum. Nws kuj coj Lim Mas Taum mus tsham cov nom tswv Suav nyob Sos Tsaus thiab nyob tsis deb tsis ze tas huv si. Nws kuj nug txog Ntuj kev cai ntau yam tsis hais tej yam tob los tej yam loj nyob hauv Ntuj kev cai, ces thaum kawg Tshws Zus Khuas txais lub Cim Ntxuav.

Cus Thais Xus thiab Cus Thais Xus txiv qhia Lim Mas Taum tias Lim Mas Taum twb yog ib tug xib hwb paub ntau yam txuj thiab txawj hais lus Suav zoo heev lawm mas phim Lim Mas Taum yuav hnav tsoos tsho xws li cov kws txuj Suav, ces Lim Mas Taum thiaj xub nug Vas Lis Nyas Nos uas nyob Zis Pees teb tias puas kheev cia nws hnav tsoos tsho Suav. Vas Lis Nyas Nos tso lus, mas Lim Mas Taum thiaj hle nws tej tsoos tsho hauj sam uas nws twb hnav kam tau 12 xyoos los lawm. Nws tsis chais hwj txwv ntxiv, nws tseg hwj txwv ntev. Nws ntoo ib lub kaus mom siab muaj ntsis xws li cov Tswv Qhia lub kaus mom. Lim Mas Taum xyaum coj tus cwj pwm phim cov tseem kws txuj Suav, yog ib tug cwj pwm muaj hwj chim zoo dua cov hauj sam tus cwj pwm.

Txij xyoo 1591 los, Lim Mas Taum rau siab muab 4 phau ntawv Suav nthuav Khoov Fum Txws cov txuj (四書; Sìshū) uas nto moo tshaj nyob Suav teb los txhais ua lus Las Tis Nas. Lim Mas Taum pom tias Khoov Fum Txws cov txuj mas hais txog Ntuj ntau, ces nws nrhiav tas puas tsav yam haum Ntuj kev cai nyob hauv Khoov Fum Txws cov txuj. Nws kuj tau kawm cov txuj ntawd kom paub hauv nruab siab. Thaum Lim Mas Taum nrog cov Kws Txuj Suav ua rooj sib tw txhais Khoov Fum Txws cov txuj, nws muaj peev xwm hais tau tej zaj ntev uas nws paub hauv nruab siab. Cov Suav saib nws yog ib tug tseem xib hwb tiag. Nws tsis tau mus kawm cov txwm ntawv Suav nyob hauv tseem hwv cov tsev qhia ntawv Suav, tab sis nws paub Khoov Fum Txws cov ntawv zoo dua cov tau kawm ntev xyoo nyob hauv tseem hwv cov tsev qhia txuj.

Tsis ntev tom qab Cus Thais Xus tso Sos Tsuas mus ua kab xwm nyob rau lwm lub xeev, ces xyoo 1595 Lim Mas Taum nrog ib tug lwm txheeb sawv kev mus rau Pej Ceeb (Beijing).

Nkawd tuaj txog Naj Ceeb (Nanjing) ces Lim Mas Taum raug khuam nyob ntawd vim lub caij ntawd tus tuam vaj Suav tsis xav pom cov pej kum neeg tuaj nyob hauv lub teb chaws. Lim Mas Taum nyob ntawd tau ib hlis txhais (ib hlis thiab ib nrab hli) tsis muaj ib tug nom twg kam txais nws, ces nws tshais chaw mus rau lub tsheej Naj Tshaas (Nanchang) hauv Cees Xib (Jiangxi).

Nyob Naj Tshaas, mas sawv daws yeej tau hnov Lim Mas Taum lub moo lawm vim Tshws Zus Khuas tau tuaj nyob Naj Tshaas ib ntus mas nws piav txog Lim Mas Taum rau cov kwj txuj mloog. Thaum Lim Mas Taum tuaj txog, tus kws tshuaj Va Tsis Lus thiaj ua tus txais nws.

Lim Mas Taum qhia kev ntseeg txog Yes Xus rau cov kws txuj Suav thov kawm Yes Xus lub Moo Zoo. Tab sis cov Suav tuaj tsham Lim Mas Taum feem coob nug tas zog txog lwm yam, ces niaj hnub Lim Mas Taum siv zim txwv ntev los qhia cov Suav kom lawv txawj siv cov twj tshuaj cov hnub qub nyob saum ntuj. Nws qhia tej tus kom lawv txawj tsim ib co twj tshuaj cov hnub qub. Nws sau ib phau ntawv pab neeg lub cim xeeb kom nco tau txhia yam. Nws kuj sau ib phau ntawv qhia kev sib cog phooj ywg (On Friendship).

Tus vaj txheeb saib lub xeev Cees Xib xav kom Lim Mas Taum nyob txawm hauv nws lub xeev, nws nrog Lim Mas Taum ua phooj ywg zoo, ces Lim Mas Taum thiaj tsis ntshai tab meeg mus tsham sawv daws. Nws rau siab nrog sawv daws sib cog phooj ywg, vim yog ib txog kev zoo pab kom Yes Xus lub Moo Zoo ri mus, thiab yog ib txog kev zoo pab kom tau mus txog Pej Ceeb.

Lim Mas Taum sau ib tsab ntawv mus rau tus thawj tswj lub koom haum Yes Xus Is nyob Los Mas. Nws hais tias:

“Peb maj mam tshais ruam qhia kev ntseeg, vim peb zoo li ib co neeg ko taw hnyav ncawv. Peb xub qhia tej yam loj. Peb xub hais txog Tswv Ntuj tsim lub ntuj lub teb. Peb hais txog neeg tus ntsuj plig nyob mus li. Peb hais txog Tswv Ntuj pub koob haum rau cov neeg ua zoo, muab txim rau cov neeg ua txhaum. Cov kws txuj Suav tsis paub dab tsi meej txog tej ntawd. Peb tsis ncaj qha hais sai txog Yes Xus tuag nyob saum Ntoo Cuam.”

Lim Mas Taum tau paub tus kws txuj Tsab Huas (Zhang Huang <章潢>), ces nkawd ua phooj ywg. Nkawd sib tham txog Khoov Fus Txws cov txuj thiab Ntuj kev cai, ces Lim Mas Taum thiaj sau nws phau ntawv loj uas cov kws txuj Suav txheej siab yuav rau siab kawm ntau tshaj, yog phau ntawv hu ua “Tswv Ntuj Zaj Tswv Yim Tseem Ceeb” (The True Meaning of the Lord of Heaven <Tiānzhŭ Shíyi> <天主實義>). Phau ntawv no yog ib phau ntawv muaj 600 phab, tsuas muaj 20 phab tom qab thiaj piav txog lub Koom Txoos, piav txog Yes Xus kev cawm neeg thiab piav txog lub Cim Ntxuav. Lim Mas Taum nyiam nthuav tias Khoov Fum Txws kev thoob tsib haum ntau lo lus uas Tswv Ntuj tau qhia rau ntiaj teb neeg. 

Xyoo 1598 muaj 2 tug tub tshaj Ntuj Lus tuaj hloov Lim Mas Taum nyob Naj Tshaas, ces txog lub 6 hli Lim Mas Taum thiaj nrog Kas Tas Nos thiab ob tug Leej Tij Suav mus rau Pej Ceeb.

Thaum lawv tuaj txog Naj Ceeb (Nanjing) hauv Cias Sus (Jiangsu) mas tus vaj txheeb tau cheem Lim Mas Taum nyob ib lis piam hauv lub nroog. Lim Mas Taum ntsib tus hauj sam nto moo ncha hu ua Huas Hoos (Hongan). Cov hauj sam npaj ib rooj qav loj sib cav txog hauj sam kev ntseeg. Sawv daws pom Lim Mas Taum yeej tus hauj sam Huas Hoos. Cov kws txuj Suav uas lawv nyiam Khoov Fum Txws kev thoob tsib, lawv zoo siab txog qhov uas Lim Mas Taum yeej cov hauj sam.

Lawv nyob tau ib lis piam ces tus vaj txheeb pub nyiaj thiab tso cov tub ncig xa Lim Mas Taum lawv mus txog tus tuam kwj deg (Dà Yùnhé). Lawv yuav caij nkoj raws tus tuam kwj deg mus kom txog Pej Ceeb.

Lub 9 hli tim 7 Lim Mas Taum lawv mus txog Pej Ceeb. Lim Mas Taum pom nyob ib ncig ntawm tus tuam vaj Vam Lis (Wanli Emperor <萬曆>) lub loog mas yog cov nom sam thiab cov nom siab nkhaus nrhiav nyiaj nrhiav kev ua nom. Lub caij ntawd lawv muaj zog, lawv tsis xav cia cov kws txuj siab ncaj tuaj ua kab xwm nyob Pej Ceeb. Lim Mas Taum pom tseeb tias tsis yog lub sij hawm zoo tuaj nyob txawm ze tus tuam vaj Suav lub tuam tsev. Lub 11 hlis Lim Mas Taum thiaj rov los nyob Naj Ceeb.

Lub caij ntawd, Lim Mas Taum muab cov twj ntsuas ntuj ntsuas teb los ntsuas meej tias Pej Ceeb nyob qhov twg hauv daim ntawv theej teb, ces nws thiaj mem tau tias Pej Ceeb yog lub tsheej ‘Kas Thais’ (Cathay) uas thaum ub Mas Kos Pos Los tau tuaj nyob. Lim Mas Taum nrog Kas Tas Nos tsim cov ntawv Los Mas Suav sau muaj 5 lub cim.

Thaum lawv los txog Lis Txees (Liaocheng) nyob Saas Toob (Shandong) pem toj, tab tom yog lub caij ntuj no mas cov nkoj txheem nyob ntawd. Lim Mas Taum lawv thiaj taug taw los txog Tsu Tsau (Xuzhou). Lim Mas Taum ntsib Cus Thais Xus nyob ntawd, ces nws so hauv Cus Thais Xus tsev ib ntus.

Cus Thais Xus ua hauj lwm nyob Naj Ceeb mas nws thiaj coj Lim Mas Taum rov mus xyuas Naj Ceeb dua. Lub caij ntawd, Zis Pees tus Dais Mis Yos His Des Yos Sis tuag lawm, cov Zis Pees tso tseg tsis tuaj ntaus Kos Lim thiab Suav teb mas cov Suav lub siab thiaj rov kaj, lawv zoo siab txais cov pej kum neeg. Tus vaj txheeb saib lub nroog Naj Ceeb pom Lim Mas Taum thiab Cus Thais Xus mas nws txais nkawd nyob hauv nws lub tuam tsev.

Lim Mas Taum thov tau ib thaj av nyob hauv ib koog zoov cia ua tsev nyob thiab txhim lub tsev teev Ntuj. Tus vaj txheeb tuaj nrog Lim Mas Taum thiab Cus Thais Xus ua Thaj Txi Ntuj thiab nqaum paj nqaum nruas nyob hauv lub tsev teev Ntuj.

Lim Mas Taum niaj hnub qhib nws lub tsev tos txais cov kws txuj tuaj tsham nws, thiab nws ua cov ntawv theej teb pub rau cov nom tswv. Muaj ib tug nom hu ua ‘Vus Tsoos Mees’ sau ib co ntawv Suav rau saum Lim Mas Taum daim ntawv theej teb tias: Leej Choj Lim Mas Taum uas nws tsim daim ntawv theej teb mas nws yog ib tug neeg tsis muab hlob. Nws tsis nrhiav nyiaj, nws ua hauj lwm dawb, nws nyiam teev Ntuj thiab mloog Ntuj kev cai. Niaj tag kis thiab niaj hmo, nws cev nws tej hauj lwm rau Ntuj thiab thov kom Ntuj pab nws coj tus yam ntxwv zoo. Peb tsis tshua to taub txog nws txoj kev xam phaj txog lub ntuj thiab lub ntiaj teb, tab sis peb tsuas pom tias nws qhia yam twg mas yam twg kuj yog kawg.

Txawm tias Lim Mas Taum nto moo ntawm cov nom tswv thiab ntawm cov kws txuj, tsis kav nws kuj paub tias cov tsis nrhiav lus rau Ntuj kev cai mas tseem coob tsis cuag cov uas lawv ntxub pej kum neeg, ces Lim Mas Taum sau ntawv tuaj rau nws ib tug phooj ywg nyob Los Mas tias “Tseem tsis tau txog lub caij sau qoob, tseem tsis tau txog lub caij tseb nplej; tseem yog lub caij npaj daim teb xwb.”

Lim Mas Taum tso siab tias txoj kev nws taug yog txoj kev haum Suav teb. Nws xav tias cov tub tshaj Ntuj Lus xav ua ntxim cov Suav lub tswv yim mas txhob ua raws tus piv txwv Rooj Khoom. Nws pom tias nws txoj kev tshaj Ntuj Lus mus qeeb kawg, tab sis nws tsis kam hloov vim nws paub tseeb tias thaum chiv hauv paus yuav tsum zoo li ntawd, ces yav tom ntej thiaj yuav yooj yim. Tsoom pej xeem yuav tau kev txais Ntuj kev cai sai dau vim cov ntaus thawj ntau leej pom Ntuj kev cai zoo lawm; tab yog cov ntxub los lawv yuav rhuav Ntuj kev cai nyob Suav teb tsis tau sai vim muaj ntau leej pov hwm cov tub tshaj Ntuj Lus.

Cov nom tswv nyob Naj Ceeb ua ntawv pab Lim Mas Taum mus txog tus tuam vaj Suav nyob Pej Ceeb. Lim Mas Taum npaj ib co paj tshab coj mus pub rau tus tuam vaj Suav raws li kev cai ua kam. Lub 6 hli 1600 Lim Mas Taum, Pas Nthos Yas (Diego de Pantoja) thiab Leej Tij Suav hu ua Tsoos Mees Zees nrog cov nkoj thauj ntaub npuag sawv kev rov mus Pej Ceeb.

Cov nkoj taug tus tuam kwj deg mus txog lub tsheej Txis Nees (Jining) nyob Saas Toob (Shandong), ces mam mus ntxiv rau Lis Txees (Liaocheng). Nyob Lis Txees muaj ib tug nom sam hu ua Mas Thaas (Ma Tang), nws yog tus sau se. Mas Thaas tshawb cov phij xab. Nws pom ib tug Ntoo Cuam, nws liam tias yog ib yam twj los foom hmoov phem rau neeg, ces nws thau tus Ntoo Cuam, thau lub ntim ua thaj txi Ntuj, thiab thau cov toob xib uas Lim Mas Taum npaj muab los ua paj tshab rau tus tuam vaj Suav. Mas Thaas muab Lim Mas Taum lawv kaw hauv tsev loj faj.

Mas Thaas sau ntawv mus rau tus tuam vaj Suav tias ib tug pej kum neeg xav tuaj cev paj tshab rau tus tuam vaj, saib tus tuam vaj puas zoo siab txais. Tos tau 6 hli mas thiaj muaj ntawv teb tuaj tias cia Lim Mas Taum coj cov paj tshab mus rau tus tuam vaj. Yog li xyoo 1601 lub 1 hlis ntuj tim 9 Lim Mas Taum lawv thiaj dim hauv tsev loj faj.

Tim 24 lub 1 hlis xyoo ntawd, Lim Mas Taum lawv tuaj txog Pej Ceeb. Raws kev cai mas tus nom yuav txais Lim Mas Taum lawv yog tus pwm tsav kab ke, tab sis cov nom sam tsis kam xa Lim Mas Taum lawv mus cuag tus pwm tsav kab ke, lawv nqa Lim Mas Taum cov paj tshab mus cev rau tuam vaj Vam Lis.

Nyob hauv Lim Mas Taum cov paj tshab muaj ib daig duab yog niam Mab Liab thiab ob tug me nyuam yog Yes Xus thiab Zam Ntxuav Plig, muaj phau ntawv teev Ntuj, cov tsom iav zoo nkauj, ib lub thaj cheej ntswj, thiab ob lub teev saib sij hawm. Tus tuam vaj Suav pom Mab Liab daim duab mas nws qhuas kawg, rau qhov tias daim duab mas zoo cuag li muaj sia.

Tus pwm tsav kab ke pom tias cov nom sam cheem Lim Mas Taum kom nyob hauv lawv tsev, ces nws tso ib pab tub rog mus ntes Lim Mas Taum los nyob hauv nws lub tsev. Nws cem Lim Mas Taum vim Lim Mas Taum tsis tuaj cuag nws. Lim Mas Taum hais qhov tseeb rau tus pwm tsav kab ke paub ces tus pwm tsav kab ke siab nqeg, nws thiaj tso Lim Mas Taum mus nyob hauv cov pej kum neeg lub loog. Nyob hauv lub loog, Lim Mas Taum lawv tau ib lub tsev zoo nyob dua cov, lawv tau ib kem tsev cia rau txi Ntuj.

Tus pwm tsav kab ke tsis tshua xav pom Lim Mas Taum nyob Pej Ceeb, nws sau 5 zaug ntawv mus rau tus tuam vaj kom ntiab Lim Mas Taum rov mus nram qab teb. Cov kws txuj uas nyiam Lim Mas Taum, lawv ua kom muaj neeg hais rau tus tuam vaj tias Lim Mas Taum yog ib tug neeg nto moo loj, ces tus tuam vaj thiaj tsis teb tus pwm tsav kab ke cov tsab ntawv, nws tseem pub ib thaj av rau Lim Mas Taum thiab cov tub koom haum Yes Xus Is txhim ib lub tsev rau lawv nyob ntawm lub tsheej Pej Ceeb Xib Fab Naj thiab.

Niaj hnub, Lim Mas Taum txais cov qhua tuaj xyuas nws, nws nrog lawv tham kev ntseeg txog Yes Xus, ces muaj tej tus pwm tsav yuav Ntuj kev cai thiab txais lub Cim Ntxuav.

Muaj tej tus tub tshaj Ntuj Lus xav kom Lim Mas Taum thov tus tuam vaj ua ntawv tso lus ua Ntuj kev cai nyob ntawm siab nyob Suav tev, tab sis nws tsis kam thov vim nws pom tias tseem tsis tau txog lub caij uas tus tuam vaj yuav tso lus. Tab yog tus tuam vaj tso lus mas cov tsis nyiam Ntuj kev cai tseem coob dhau, lawv yuav meem txom ces lawv yuav txhob txwm nyiag hiam cov neeg ua Ntuj kev cai. Lim Mas Taum hais rau lawv tias tseem yuav tsum muab siab rau qhia Ntuj kev cai twj ywm 20 los 30 xyoo ntxiv, thaum muaj ntau tus Suav tig los ntseeg txog Yes Xus mas thiaj yuav thov kom tus tuam vaj tso lus ua Ntuj kev cai.

Hnub tim 22 lub 8 hlis ntuj xyoo 1608 Lim Mas Taum sau ib tsab ntawv mus rau tus thawj tswj lub koom haum Yes Xus Is nyob Los Mas, nws hais tias nyob Pej Ceeb muaj 300 tus neeg ntseeg, lawv feem coob yog cov kws txuj txheej siab. Tsoom pej xeem txheej qis coob zuj zus hnov zeej tsoom cav lus zoo txog kev ntseeg txog Yes Xus.

Lim Mas Taum siv lub sij hawm tsis muaj neeg tuaj tsham los sau cov phau ntawv xws li phau ntawv ‘Kaum yam tseem ceeb uas tas tsoom sid tsis tshua kam txais’. Nyob hauv phau ntawv no mas yog ob tug Suav sib tham; ib tug nug txog Ntuj kev cai ntawm ib tug txwj laus, nkawd sib tham sib cav thiab sib pab nrhiav tswv yim txog qhov tseeb, xws li tus hluas nug tus txwj laus tias ‘ua li cas Ntuj kheev kom neeg raug txoj kev txom nyem?, ua cas yus yuav tsim hmoov tseg mus txog hnub yus tuag?, Ntuj puas yuav txiav txim rau neeg?, ua li cas yus yuav muab siab rau ua neeg tsim txiaj?’

Tas Lim Mas Taum sid, nws tau siv zog ua hauj lwm, tas niaj tas xyoo nws txais cov neeg tuaj xyuas nws, hmo ntuj nws teev Ntuj thiab sau ntawv, ces xyoo 1610 Lim Mas Taum qaug zog kawg. Niaj hnub nws rov saib nws cov ntawv, tej yam tsis muaj nqes mas nws muab hlawv pov tseg. Niaj hmo nws teev Ntuj ntev ntev npaj siab mus cuag Tswv Ntuj. Lim Mas Taum hais rau cov nrog nws nyob tias “Yog lub noob nplej tsis lwj nyob hauv av mas cov qoob tsis muaj.”

Lub 5 hlis ntuj tim 3 ces Lim Mas Taum pib mob, cov phooj ywg Suav xa nws rau tus kws tshuaj. Cov neeg nyob Pej Ceeb xav tuaj xyuas Lim Mas Taum, mas cov tub tshaj Ntuj Lus thiaj npaj ib lub txaj rau Lim Mas Taum pw hauv kem tsev txais qhua.

Tim 9 Lim Mas Taum txais lub Cim Yug ua zaum kawg, tag kis nws txais lub Cim Pleev, ces tim 11 yav tsaus ntuj Lim Mas Taum foom hmoov zoo rau cov tub koom haum nyob ntawd tas, ces Lim Mas Taum txoj sia tu.

Cov nom tswv Suav nyob Pej Ceeb tuaj sib pab pam Lim Mas Taum coob kawg ua lub tsev ntim tsis tas, vim lawv saib Lim Mas Taum yog lawv ib tug phooj ywg nto moo loj.

Cov nom tswv Suav thiab Pas Nthos Yas taij kom tus tuam vaj Suav kheev ib thaj av rau tso Lim Mas Taum tus qauv, ces tus tuam vaj thiaj kheev kom muab Lim Mas Taum zais hauv thaj av nyob ze lub ntsa zeb xov Pej Ceeb sab hnub poob hu ua Sas Las (Zhalan). Lawv txaug txwm ntawv saum Lim Mas Taum lub ntxa tias ‘Tas tsoom nom tswv Suav yuav nyiav tus kws txuj Toob Fab Lim Mas Taum mus li vim nws txais peb tej kev cai Suav tas tib si.’

Lim Mas Taum nrog cov tub tshaj Ntuj Lus ua kws txuj txheej siab tau qhia kev ntseeg rau 100 tawm tus kws txuj Suav. Cov kws txuj Suav ntawd tau mus ua tseem hwv Suav cov dej num nyob hauv ntau lub xeev. Lawv pab cov tub tshaj Ntuj Lus nyob hauv ntau lub xeev, ces Ntuj kev cai ri mus txog 10 tawm lub xeev. Xyoo 1627 lawv txheeb tau 13,000 tus neeg ntseeg nyob Suav teb. Xyoo 1637 lawv txheeb tau 100 txhiab tus neeg ntseeg nyob Suav teb.

Lub Koom Txoos nyob Suav teb thawj tus tuam ncej yog ‘Xus Kuas Chis’ (Xu Guangqi <徐光啟>) yug los xyoo 1562 nyob Saas Hais (Shanghai). Thaum nws hnub nyoog muaj 36 xyoo, tseem hwv ti npe rau nws tias yog ib tug xib hwb txheej siab tshaj. Tseem hwv xa nws mus ua xib hwb qhia txuj nyob hauv lub nroog Sos Tsaus, nyob hauv lub xeev Kuas Toob. Nyob Sos Tsaus, nws ntsib tus tub tshaj Ntuj Lus ‘Kas Tas Nos’ uas yog Lim Mas Taum ib tug phooj ywg.

Xyoo 1600 Xus Kuas Chis muaj 38 xyoo, nws mus txog Naj Ceeb, nws mus tsham Lim Mas Taum. Lim Mas Taum muab phau ntawv Mas Kos Ntawv Moo Zoo rau nws. Lim Mas Taum tseem muab nws phau ntawv hu ua ‘Tswv Ntuj Zaj Tswv Yim Tseem Ceeb’ rau Xus Kuas Chis thiab.

Xus Kuas Chis rov mus txog Sos Tsaus, nws xyaum nco txog Ntuj thiab coj Ntuj kev cai raws li Lim Mas Taum qhia rau nws. Peb xyoos tom qab, Xus Kuas Chis rov thov tuaj txais lub Cim Ntxuav nyob Naj Ceeb. Tus pub lub Cim Ntxuav rau nws yog ‘Txiv Plig Los Sas’. Txiv Plig Los Sas kom Xus Kuas Chis nrog nws rov kawm Ntuj kev cai 7 hnub tso. Kawm tas 7 hnub lawm, mas Xus Kuas Chis txais lub Cim Ntxuav, nws yuav lub npe raws li Leej Ntshiab Paj Lug.

Xus Kuas Chis yog ib tug kws txuj Khoov Fum Txws, nws paub Yes Xus txoj kev cawm neeg, ces nws xub muab siab rau mus qhia Yes Xus txoj kev cawm neeg rau nws tsev neeg, nyob Saas Hais. Nws txiv thiab tas nws tsev neeg txais lub Cim Ntxuav.

Txij xyoo 1604 txog 1607 Xus Kuas Chis nrog Lim Mas Taum nyob Pej Ceeb. Nws kawm cov txuj uas Lim Mas Taum qhia rau nws, thiab nws pab Lim Mas Taum txhais tej phau ntawv los ua lus Suav. Yog tej phau ntawv qhia ua xam phaj, tej phau ntawv qhia cov txuj tshuaj cov hnub qub nyob saum ntuj, tej phau ntawv qhia txog cov teb chaws nyob tas ntiaj teb, thiab tej phau ntawv qhia cov txuj siv dej los ywg cov liaj cov teb kom zoo ua qoob ua loo.

Xyoo 1608 Xus Kuas Chis muaj 46 xyoo, ib co tub tseem hwv xyav nws moo mas nws tsis ua tseem hwv cov dej num, nws rov qab los nyob hauv nws tsev, nyob Saas Hais. Nws siv nws lub caij los sau ntau phau ntawv qhia tej yam txuj tob. Nws txais Kas Tas Nos tuaj nyob txawm hauv nws tsev. Xus Kuas Chis txhim ib lub tsev teev Ntuj nyob hauv nws thaj av nyob Ntxis Kas Ves (Zikawei, ziag no yog Xujiahui). 

Xus Kuas Chis cov xeeb ntxwv tau sau lawv tsev neeg ib phau ntawv cim xwm piav tias Xus Kuas Chis tau pab lub Koom Txoos zoo li cas. Phau ntawv cim xwm hais tias Xus Kuas Chis xyiv fab saib kom nws cov neeg uas tau txais lub Cim Ntxuav lawv kub siab txais lub Koom Txoos cov Cim Nqa Txiaj Ntsim. Nws nrhiav kom muaj Leej Choj ua Thaj Txi Ntuj nyob Ntxis Kas Ves. Thaum cov tub tshaj Ntuj Lus pej kum raug luag tsim txom, nws pov hwm thiab txuag lawv.

Xyoo 1616 nyob hauv lub nroog Naj Ceeb, cov pej xeem teev dab hiam cov neeg ntseeg. Lub caij ntawd Xus Kuav Chis sau ib phau ntawv teb rau luag cov lus xaiv lus ncua. Nws muab cov lus teb los txaug rau hauv daim txiag zeb.

Xus Kuas Chis kuj sau ib co txuj paj seev cav lus zoo txog Yes Xus, txog Mab Liab, txog Tswv Ntuj 10 lo lus qhia, txog cov neeg muaj txoj hmoov zoo raws li Yes Xus tau tshaj. Yog cov lus nyob hauv Mas Tais Ntawv Moo Zoo, zaj 25.

Xus Kuas Chis ntseeg tas siab tias Suav teb yuav vam meej tau yog tuaj ntawm ob yam no: yam li ua qoob loo ntau thiab tsim tsoom tub rog muaj zog. Xus Kuas Chis thiaj rau siab qhia cov txuj siv dej pab kev cog qoob loo.

Xyoo 1619 tus tuam vaj Suav hu Xus Kuas Chis kom rov mus nyob Pej Ceeb, yog vim haiv neeg Maas Sus cov tub rog tuaj ntaus cov tub rog Suav nyob qaum teb, cov Maas Sus tau muab 45,000 tus tub rog Suav tua tuag. Tus vaj Suav Meej Tshoj pom tias nws cov tub rog yuav tiv tsis tau cov Maas Sus. Nws thiaj hu Xus Kuas Chis kom tuaj tsim ib tsoom tub rog Suav muaj zog. Xus Kuas Chis thiaj rov tuaj nyob Pej Ceeb. Xub Kuas Chis xav kom cov tub rog Suav muaj cov phom loj. Nws xav muas phom loj ntawm cov Pos Tws Nkas nyob Mas Kaus. Tus vaj Suav hais tias nws tsis muaj nyiaj txaus muas phom loj. Xus Kuas Chis thiaj rov mus tsev.

Kaum xyoo tom qab, tus vaj Suav sawv los tshiab hu Xus Kuas Chis rov mus nyob Pej Ceeb. Tus vaj Suav xav kom Xus Kuas Chis kho cov twj xam nyoog, vim cov twj xam nyoog uas cov kws txuj Mawv Xis Lim tsim 300 xyoo ua ntej tsis txawj xam nyoog meej pem, ces tus vaj Suav tsim txoj cai kav teb chaws kom lub ntuj thiab lub ntiaj teb sib haum xeeb tsis tau. Xus Kuas Chis hu cov tub tshaj Ntuj Lus hauv lub koom haum Yes Xus Is paub txuj tuaj pab nws; xws li As Das Sas (Johann Adam Schall von Bell) thiab Los (Giacomo Rho), ces nws kho tus vaj cov twj xam nyoog kom meej pem.

Xyoo 1632 Xus Kuas Chis muaj 70 xyoo, nws yog ib tug thawj pwm tsav nyob hauv tus vaj Suav lub tuam tsev nyob Pej Ceeb. Tab sis tus vaj tsis kam mloog cov neeg siab ncaj hais rau nws tias nws teb chaws raug ntau yam xwm phem, nws tsuas mloog cov neeg nquag pe nws xwb. Tus vaj tsis pom tias haiv neeg Maas Sus muaj zog kawg, cov Maas Sus muaj peev xwm heev lawv yuav mus txeeb Suav teb xyoo twg kuj tau. Tus vaj tsis txawj pom tias tsoom tub qoob tub loo nyob hauv nws teb chaws xav ntxeev siab rau tus vaj, vim tus vaj sau se hnyav dhau.

Xus Kuas Chis ua nws cov dej num nyob hauv tus vaj lub tsev thiab nws rau siab teev Ntuj. Niaj hnub nws mus nrog ib tug Txiv Plig ua thaj txi Ntuj. Niaj hmo nws rov tsom nws siab saib puas tau ua dab tsi tsis ntxim Tswv Ntuj siab. Nws coj cov tub tshaj Ntuj Lus mus los hauv tus vaj lub tuam tsev ywj siab.

Xyoo 1633 lub 11 hlis tim 8 Xus Kuas Chis tuag nyob Pej Ceeb. Lawv nqa nws tus qauv rov mus faus nyob Ntxis Kas Ves.

Tus tuam ncej ob yog ‘Lis Tswv Txos’ (Lǐ Zhīzǎo <李之藻>), nws yog Xus Kuas Chis tus tseem phooj ywg. Nws nrog Xus Kuaa Chis ua ntau yam hauj lwm. Lis Tswv Txos nyiam kawm txuj txheej siab xws li Xus Kuas Chis thiab nyiam siv nws cov txuj los tsim tej yam zoo pab tsoom pej xeem ua neej. Lis Tswv Txos kuj nrog Lim Mas Taum ua phooj ywg xws li Xus Kuas Chis.

Lis Tswv Txos yug los xyoo 1565 nyob Haas Tsaus (Hangzhou). Nws kawm txuj nyob hauv tseem hwv Suav cov tsev qhia txuj txheej siab. Xyoo 1594 thiab 1598 nws twv tau ntawv ua xib hwb txheej siab. Tseem hwv thiaj muab hauj lwm rau nws ua nyob Naj Ceeb. Xyoo 1599 nws mus tuav ib co hauj lwm siab dua nyob Pej Ceeb.

Lis Tswv Txos nyob Pej Ceeb ob xyoos, nws pom ntau tus kws txuj tuaj twv ntawv nyob hauv lub Tuam Ceeb Suav, leej puav cav txog ib tug pej kum neeg tawv dawb hu ua Lim Mas Taum, paub ntau yam txuj txheej siab, Lis Tswv Txos thiaj mus tsham Lim Mas Taum nyob hauv cov tub koom haum Yes Xus Is lub tsev. Nws pom ntiaj teb daim theej teb thiab pom cov ntawv piav txog ntiaj teb cov kuj cuab. Lis Tswv Txos qhuas kawg, nws thiaj kawm cov txuj tuaj ntawm Aws Los Pas tuaj. Nws nrog Lim Mas Taum ua hauj lwm, nws sau tej zaj cev cov tub tshaj Ntuj Lus 50 phau ntawv qhia txuj.

Lis Tswv Txos sau ib zag cev phau ntawv “Tswv Ntuj zaj tswv yim tseem ceeb”, nws muab zaj cev lus txaug nyob hauv ib daig txiag zeb. Xyoo 1607 nws xa daim txiag zeb mus rau cov neeg nyob hauv lub nroog Haas Tsaus uas yog lub nroog nws yug los.

Lis Tswv Txos kuj sau ib zag cev phau ntawv hu ua “Kaum zaj kwv huam nthuav 10 tug Leej Ntshiab lub neej.” Nyob hauv nws zaj cev phau ntawv ntawd, Lis Tswv Txos sau ib co lus qhuas txog Tswv Ntuj cov tub txib.

Thaum Lis Tswv Txos lub hnub nyoog muaj 42 xyoos lawm. Nws xam tias nws paub Yes Xus txoj kev cawm neeg zoo hauj sim lawm, nws thov txais lub Cim Ntxuav. Tab sis cov tub tshaj Ntuj Lus hais rau nws tias nws yuav tsum nrauj nws niam yau tso. Lis Tswv Txos tsis yeem nrauj, nws thiaj txais tsis tau lub Cim Ntxuav.

Thaum Lis Tswv Txos raug ib tug mob hnyav, Lim Mas Taum twb laus heev thiab raug ntau yam mob, tsis kav Lim Mas Taum rau siab tuaj xyuas thiab kho Lis Tswv Txos tus mob hnyav. Lis Tswv Txos thiaj cog lus tias yog nws dim ntawm tus mob, mas nws yuav nrauj nws niam yau.

Lis Tswv Txos zoo, mas Lim Mas Taum thiaj ua lub Cim Ntxuav rau thiab xaiv Leej Ntshiab Les Os ua tus pov hwm Lis Tswv Txos.

Lim Mas Taum ua lub Cim Ntxuav rau Lis Tswv Txos tas, ces Lim Mas Taum tas sim neej. Thaum ntawd yog xyoo 1610.

Lis Tswv Txos saib Lim Mas Taum yog nws ib tug tseem txiv uas pub kom nws lub cev rov muaj sia thiab pub kom nws tus plig muaj txoj sia nyob mus li. Lis Tswv Txos xav ua tus tseem thwj tim mloog txiv, nws xav kom Suav teb ua txhua yam los pam Lim Mas Taum kom tsim nyog. Lis Tswv Txos ua ib lub hleb zoo thiab khov rau tus tuag. Nws thiab tus tub koom haum Yes Xus Is hu ua Pas Nthos Yas taij kom tus vaj Suav kheev ib thaj av rau cov tub tshaj Ntuj Lus ua toj ntxa.

Tus vaj Suav thiaj kheev thaj av hu ua Sas Las (Zhalan) rau ua toj ntxas rau cov tub tshaj Ntuj Lus ua kws txuj nyob hauv tus vaj Suav lub tsev.

Xyoo 1624 Lis Tswv Txos txais ib daig ntawv sau cov lus uas xyoo 781 tus Leej Choj Nes Tos Lis Yus txaug rau daim txiag zeb nyob Xis Aas (Xi’an Stele). Lis Tswv Txos zoo siab tas nrho. Nws pom tias daim txiag ze nyob Xis Aas zoo pab cov kws txuj tshaj Ntuj Lus tiam 17 vim tias cov kws txuj ntau leej qhuas txog cov tub tshaj Ntuj Lus xws li Lim Mas Taum, tab sis lawv xyeej tias “Lim Mas Taum lawv tshaj ib txog kev ntseeg zoo, tab sis txoj kev ntseeg ntawd nyuam qhuav tshwm nyob Suav teb tau 30 xyoo tej xwb. Puas tsim nyog peb cov neeg xyuam xim txais kev ntseeg tshiab ntawd sai sai?”

Lis Tswv Txos tau kev teb rau cov ua xyem xyav tias “Txoj kev ntseeg tias Yes Xus yog tus cawm ntiaj teb neeg tshwm los nyob Suav teb muaj tshaj ib txhiab xyoo lawm.”

Thaum nws yav laus lawm, Lis Tswv Txos mus nyob hauv nws lub nroog Haas Tsaus. Nws muab 19 phau ntawv sau los ua ib phau ntawv loj. Nws phau ntawv no yog thawj phau ntawv uas lub Koom Txoos nyob Suav teb txhob txwm sau los pab tsoom neeg ntseeg. Nyob hauv 19 phau ntawv ntawd; tej phau yog qhia txuj txheej siab, tej phau yog qhia kev ntseeg txog Yes Xus. Nws txhob txwm muab ob yam ntawv sib xyaws, vim nws xav tswv yim ib yam li Lim Mas Taum. Lim Mas Taum kheev hais tias “Kev paub txuj coj yus mus ntseeg txog Tswv Ntuj, thiab kev ntseeg txog Tswv Ntuj ua kom yus kev paub txuj khov kho.”

Xyoo 1629 Lis Tswv Txos muaj 65 xyoos lawm thiab nws muaj mob. Xus Kuas Chis hu nws kom nws mus pab kho cov ntawv xam nyoog uas tus vaj xav siv los kav Suav teb, ces nws mus pab Xus Kuas Chis ua phau ntawv xam nyyog. Hli puav tom qab nws tas sim neej nyob hauv nruab nrab cov kws txuj thiab cov tub tshaj Ntuj Lus.

Tus tuam ncej tim peb yog ‘Yaj This Yeej’ (Yáng Tíngyún <楊廷筠>), nws yog Lis Tswv Txos tus phooj ywg. Lis Tswv Txos rau siab qhia Ntuj kev cai rau nws ces xyoo 1611 Yaj This Yeej txiav siab nrauj nws niam yau, thiab txais lub Cim Ntxuav.

Xyoo 1611 ntawd, Lis Tswv Txos txiv tas sim neej. Yaj This Yeej mus nrog lawv pam tuag thiab nws hais ib co lus nplij Lis Tswv Txos siab. Lis Tswv Txos nug Yaj This Yeej tias “Koj puas yuav txais lub Cim Ntxuav?” 

Yaj This Yeej teb tias “Kuv xav txais, tab sis cov Txiv Plig xav kom kuv nrauj kuv niam yau tso. Kuv tsis xav nrauj, vim kuv niam yau yug ob tug tub rau kuv. Kuv hlub nws. Cov Txiv Plig lawv yog ib co neeg pej kum tiag tiag! Kuv muaj ib tug niam yau xwb. Vim li cas lawv thiaj tsis kheev kuv niam yau nrog kuv nyob? Cov hauj sam tsis ua nyuaj npaum no.”

Lis Tswv Txos xyu ib suab thiab hais rau nws tus phooj ywg Yaj This Yeej tias “Yuav muab cov Txiv Plig los piv rau cov hauj sam tsis tau! Tus tau qhia 10 lo lus thaum ub yog Tswv Ntuj. Yog yus ua raws li Tswv Ntuj 10 lo lus qhia mas yus nyob hauv txoj keb ntshiab. Yog yus hla ib lo lus qhia mas yus yog ib tug neeg txhaum yuav raug txim. Yog koj mloog koj lub siab ntshaw xwb, mas koj yuav mloog Tswv Ntuj 10 Lo Lus Qhia puas tau? Cov Txiv Plig tsuas xav qhia kev cawm neeg xwb, lawv tsis vam tias tib neeg yuav cav lus zoo txog lawv. Lawv yog ib co neeg siab ntshiab huv. Koj yuam kev mus yuav ob tug poj niam nrog koj nyob. Koj tsis kam kho koj txoj kev ua neej. Koj ua li ntawd, koj tau ib qho zoo dab tsi?”

Lis Tswv Txos hais tas cov lus no rau Yaj This Yeej, ces Yaj This Yeej tsis ua xyem xyav ntxiv, nws muab ib lub tsev thiab muab nyiaj txiag pab niam yau ua neej ces nws nrauj nws niam yau tiag.

Thaum cov ntseeg ua lub Ntees Hla cav txog Yes Xus sawv rov los, Yaj This Yeej txais lub Cim Ntxuav. Nws hnub nyoog mus 45 xyoos. Tus Leej Ntshiab pov nws yog Mis Kas.

Yaj This Yeej yog ib tug kws txuj txheej siab thiab ib tug ua tseem hwv cov hauj lwm loj ib yam li Lis Tswv Txos. Tab sis lub caij nws tseem tsis tau txais lub Cim Ntxuav mas nws tau nrog cov hauj sam nyob Haas Tsaus ua ntau yam dej num pab tsoom pej xeem pluag thiab txom nyem.

Yaj This Yeej txais lub Cim Ntxuav lawm, nws tsim ib lub koom haum pab cov neeg txom nyem. Nws poj niam hu ua Lwg, nws ob tug ntxhais thiab nws ob tug tub kuj pab nws tsim nws lub koom haum. Tau ntev xyoo los lawm, nyob Haas Tsaus cov hauj sam muaj ib lub koom haum tu tsiaj txhu, lawv siv nyiaj ntau los muas ib co ntses thiab ib co noog vim niaj xyoo lawv xav ua ib hnub lom zem tso cov ntses thiab cov noog mus ua lawv lub neej twj lij ya saum ntuj thiab khiav ywj siab hauv dej. Yaj This Yeej txais kev ntseeg txog Yes Xus, nws pom tias tib neeg muaj nqi dua tsiaj txhu, ces nws tsev neeg thiaj nrog cov ntseeg nyob Haas Tsaus sau nyiaj npaj pab cov neeg pluag. Niaj lub hlis lawv muab ib co nyiaj tso nyob hauv ib lub phij xab. Ib tug neeg ntseeg siab ncaj ua tus saib lub phij xab. Niaj xyoo cov ntseeg muab cov nyiaj nyob hauv lub phij xab los ua txhuv pub rau tej tus neeg tshaib plab, pub ris tsho rau tej yim neeg kom tau hnav tiv no, pub tshuaj kho cov neeg mob, them nyiaj npo tej tug neeg dim ntawm tsev loj faj, pab tej yim neeg pam lawv cov neeg tuag. Yaj This Yeej lub Koom Haum pab cov ntseeg kom lawv ua tau cov hauj lwm uas Yes Xus qhia nyob hauv Mas Tais ntawv Moo Zoo zaj 25.

Thaum Yaj This Yeej tseem tsis tau paub Yes Xus, nws ua ncaj rau tsoom pej xeem. Nws ua tseem hwv cov hauj lwm nyob hauv lub xeev Caas Xus, nws xav pab tsoom pej xeem kom tau noj qab nyob zoo, ces nws ua kom lawv them se tsis hnyav, nws txhim tej lub txhab nplej, tej lub tsev rau cov me nyuam kawm ntawv. Cov pej xeem nyob hauv lub xeev Caas Xus hu Yaj This Yeej ua Kev Hlub Neeg tus Thawj Tswv.

Thaum lub 3 hlis ntuj xyoo 1602 tseem hwv Suav hu Yaj This Yeej tuaj ua tus txheeb tsoom pej xeem lub cuab tam thiab ntsuas cov se lawv yuav them. Lub caij ntawd nws ntsib Xus Kuas Chis thiab Lis Tswv Txos. Nkawd coj nws mus xyuas Lim Mas Taum. Yaj This Yeej nrog Lim Mas Taum tham thawm hnub ntau zaus. Nws hais tias thaum Lim Mas Taum piav cov txuj xam phaj mas nws tsis to taub. Tab sis Yaj This Yeej hais tias nws nrog Lim Mas Taum ua tseem phooj ywg.

Yaj This Yeej sau ib co ntawv hais tias nyob hauv Lim Mas Taum cov txuj mas cov lus nws to taub zoo dua cov; yog qhov no “Qhov loj nyob hauv txoj cai tshiab yog nyiam Tswv Ntuj thiab hlub neeg. Tswv Ntuj yog Peb Niam Peb Txiv Loj Nyob Saum Ntuj. Peb yuav nyiam peb niam peb txiv uas tau yug peb, mas peb haj yam yuav rau siab nyiam tus Huab Tais ua peb niam txiv nyob saum ntuj.”

Yaj This Yeej sau ib co lus zoo li no tseg tias:

“Txij hnub txheej tshoj thaud los, tib neeg siab ntshiab thiab thoob tsib. Hos tom qab mas tib neeg lub tswv yim mooj zuj zus. Ces tus Huab Tais khuv leej neeg thiaj nqes saum ntuj los. Nws lub npe hu ua ‘Yes Suas’, txhais tias ‘Tswv Ntuj cawm’. Nws yug los nyob ib lub teb chaws hu ua Yus Das teb. Yus Das teb yog ib lub teb chaws uas leej twg xav mus xyuas kuj tau. Yes Suas muaj ib tug niam hu ua Mab Liab. Tej xwm ntawd tshwm sim lub caij uas cov vaj Ham Tshoj yuav dua tas. Tus cawm ntiaj teb neeg rov qhia txoj kev ncaj. Cov Txiv Plig tuaj Xib Fab tuaj yog Yes Suas cov tiam lis. Ib ntus ntev li ib txhiab thiab rau pua xyoo, mas txoj kev hwm Ntuj nphob xuav. Txiv Plig Lim Mas Taum hla hiav txwv mus. Nws paub thiab txawj nthuav txoj kev tseeb tiag. Tsis tshuav chaw ua xyem xyav lawm.”

Hnub uas Yaj This Yeej txais lub Cim Ntxuav nws txiav tu nrho kev teev Phus Thas. Nws muab kem tsev teev Phus Thas los ua kem tsev teev tus Cawm Seej Siab Ntshiab.

Thaum Yaj This Yeej laus lawm, nws muas ib thaj av nyob ntawm Haas Tsaus pej fab. Nws txhim ib lub tsev rau cov tub tshaj Ntuj Lus nyob thiab ib lub tsev ua Thaj Txi Ntuj. Nws xuas nws tes nqa pob zeb thiab ntoo txhim cov tsev. Ib sij huam nws tuag. Nws tus tub txhim cov tsev kom tiav. Yog lub caij ntuj tsaug xyoo 1627.

Lub Koom Txoos nyob Suav teb saib Xus Kuas Chis, Lis Tswv Txos thiab Yaj This Yeej lawv 3 leeg yog lub Koom Txoos 3 tug tuam ncej (Three Pillars of Chinese Catholicism), vim lawv peb leeg yog cov piv txwv uas cov Suav ua Ntuj kev cai, lawv xav yoog. Cov Suav coj ua Ntuj kev cai yoog lawv 3 leeg ua 6 yam no: 1) Mus taug txoj kev ncaj ncees tas ib sim neej, 2) Ua cov dej num pab zeej tsoom, 3) Mloog lub Koom Txoos cov lus qhia, 4) Rau siab txais lub Koom Txoos cov Cim Nqa Txiaj Ntsim, 5) Niaj hnub nquag teev Ntuj, 6) Yus qhia yus tsev neeg kom sawv daws ntseeg Yes Xus lub Moo Zoo.