1 Kuv yog Paj Lug, tus uas Tswv Ntuj pom zoo tsa ua Yes Xus Pleev tus Hauv Paus Xa Lus. Kuv sau ntawv tuaj rau cov ntshiab thiab cov ntseeg nyob hauv Yes Xus Pleev. 2 Thov kom peb Txiv Tswv Ntuj, thiab Huab Tais Yes Xus Pleev pub txiaj ntsim thiab kev thaj yeeb tuaj rau nej.
3 Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv, vim nws foom hmoov zoo rau peb,
thiab pub txiaj ntsim yug peb tus ntsuj plig, nws tau pub txhij pub txhua, nyob saum cov txheej ntuj, hauv Leej Pleev.
4 Thaum tseem tsis tau tsim lub ntuj lub teb, Tswv Ntuj twb xaiv peb nyob hauv Leej Pleev, kom peb ntshiab huv, tsis lo txhaum rau ntawm nws xub ntiag,
thiab kom peb tau los nyob hauv txoj kev nyiam. 5 Nws ib txwm xaiv peb ua nws cov tub ki tshiab, nyob hauv Yes Xus Pleev.
Nws lub tswv yim pom zoo ua li ntawd, 6 kom peb cav txog nws lub hwj chim thiab nws lub txiaj ntsim, vim nws pub txiaj ntsim dawb rau peb nyob hauv tus Zoo Nyiam.
7 Nyob hauv Tus Zoo Nyiam, peb tau txais kev txhiv peb ntawm nws cov roj ntsha.
8 Peb tau kev daws peb cov txhaum ntawm lub txiaj ntsim nplua nuj uas Leej Txiv pub dawb rau peb.
Leej Txiv lub tswv yim thoob tsib thiab ntse 9 qhia yam zais puag hauv nws lub siab xav rau peb paub, thiab qhia nws tus nru lus xav ua zoo uas nws ib txwm npaj rau peb paub.
10 Thaum txog lub caij teem, nws ua kom zaj nru lus zoo no tsheej xeeb :
nws yuav coj txhua tsav txhua yam thiab coj txhua leej txhua tus nyob saum ntuj thiab nyob ntiaj teb rov los zwm rau Leej Pleev.
11 Ntuj xaiv peb thiab qee peb nyob hauv Leej Pleev,
raws li Tswv Ntuj tus txheej txheem uas nws ib txwm tsa los coj txhua tsav txhua yam kom haum nws lub siab xav.
12 Ntuj qee peb los ua pab neeg xub tso siab rau Leej Pleev,
thiab xub cav txog Tswv Ntuj lub koob meej. 13 Nyob hauv Leej Pleev, nej hnov Lo Lus tseeb, uas yog lub Moo Zoo cawm nej, ces nej ntseeg lub Moo Zoo.
Leej Ntuj Plig Ntshiab uas Ntuj cog lus pub, thiaj muab ib lub thwj ntaus cim rau nej. 14 Leej Ntuj Plig Ntshiab yog thawj feem hauv lub cuab tam uas peb yuav txais. Nws npaj txoj kev txhiv txhua haiv neeg uas Tswv Ntuj muas los ua nws tug thiab los cav txog Tswv Ntuj lub koob meej.
15 Yog vim kuv hnov luag tej cav lus zoo txog nej txoj kev ntseeg nyob hauv Huab Tais Yes Xus, thiab cav txog nej lub siab nyiam tas tsoom ntshiab, 16 kuv thiaj ua Tswv Ntuj tsaug tsis tseg vim nej, thiab kuv nco ntsoov txog nej thaum kuv teev Ntuj. 17 Kuv thov kom peb tus Huab Tais Yes Xus Pleev tus Tswv Ntuj, Leej Txiv muaj koob meej, pub ib lub tswv yim thoob tsib, thiab ib lub tswv yim txawj mem tau tej yam uas Ntuj qhib tawm los, nej thiaj yuav paub Tswv Ntuj tiag. 18 Kuv thov Tswv Ntuj tso qhov pom kev ci tuaj rau hauv nej lub siab, kom nej pom tias txoj kev tso siab uas Ntuj hu nej los nyob hauv, zoo npaum li cas, kom nej pom tias lub cuab tam nto koob meej nplua nuj npaum li cas nyob hauv cov ntshiab. 19 Nej tseem yuav pom Tswv Ntuj lub hwj huam uas peb ntsuas tsis tau. Nej thiaj yuav pom tias lub hwj huam no pab peb cov ntseeg heev npaum li cas, vim nws lub zog muaj peev xwm loj. 20 Tswv Ntuj nthuav nws lub zog nyob hauv Leej Pleev : nws tsa Leej Pleev sawv hauv cov tuag los, nws kom Leej Pleev zaum ntawm nws sab xis, nyob saum cov txheej ntuj, 21 nyob siab dua cov Tshiab ua vaj, siab dua cov Tshiab muaj hwj huam, siab dua cov Tshiab muaj zog, siab dua cov Tshiab ua huab tais, siab dua txhua leej nto npe, hauv lub zim txwv no mus dhau txhiab tiam tom ntej. 22 Tswv Ntuj tso tas puas tsav yam rau hauv nws qab xib taws. Tswv Ntuj tsa Leej Pleev ua lub Koom Txoos tus Hau siab tshaj : 23 lub Koom Txoos yog nws lub Cev. Leej Pleev lub Cev Hlob Tiav, nws nyob puv hauv txhua leej txhua tus, nws nyob puv lub sim ceeb.

1 Yav thaud, nej yog neeg tuag, vim kev yuam kev thiab kev txhaum kav nej lub neej. 2 Thaud, nej mloog lub qab ntuj neeg, thiab mloog tus ua hau muaj hwj huam kav saum cua. Tus dab phem ntawd tseem ua nws tej hauj lwm ntxiv nyob hauv cov neeg tiv Tswv Ntuj. 3 Ntawm peb, mas yav thaud peb kuj yog cov neeg ntawd thiab : peb tau ua lub neej mloog lub cev nqaij txoj kev ntshaw, peb ywj mloog peb lub cev ua tsias, thiab peb xav ntsoov txoj kev phem rau hauv nruab siab : ces peb thiaj raug Ntuj kev npau taws xws li sawv daws… 4 Tab sis, Tswv Ntuj lub siab zam txhaum dav tis ua dav, nws muab nws txoj kev nyiam los hlub peb. 5 Li ntawd, txawm tias peb twb tuag lawm, vim peb cov txhaum, tsis kav, Tswv Ntuj ua kom peb nrog Leej Pleev rov muaj txoj sia : qhov no, yog Ntuj lub txiaj ntsim cawm peb. 6 Tswv Ntuj tsa peb nrog Leej Pleev sawv rov los, nws tso peb zaum saum cov txheej ntuj, nyob hauv Yes Xus Pleev.
7 Tswv Ntuj xav qhia meej rau cov tiam tom ntej pom tias nws lub txiaj ntsim nplua nuj tas nrho, nyob hauv Yes Xus Pleev, ces nws thiaj ua siab zoo rau peb.
8 Yog lub txiaj ntsim cawm peb tiag, vim peb ntseeg. 9 Txoj kev cawm tsis tuaj hauv peb tuaj, vim txoj kev cawm yog Tswv Ntuj pub ua paj tshab rau peb. Txoj kev cawm kuj tsis tuaj ntawm cov hauj lwm tuaj thiab, kom tsis txhob muaj ib tug tau kev khav. 10 Peb yog cov hauj lwm tawm ntawm Tswv Ntuj txhais tes los ; Tswv Ntuj tsim peb nyob hauv Yes Xus Pleev, kom peb ua cov hauj lwm zoo, uas Tswv Ntuj ib txwm npaj rau peb ua.
11 Nej nco ntsoov tias yav thaud, cov Yus Das rov hu lawv ua : ‘cov txiav tawv’, hos lawv hu nej cov teev dab ua : ‘cov tsis txiav tawv.’ Lub cim txiav tawv yog neeg txhais tes ua rau ntawm lub cev nqaij. 12 Nej nco ntsoov tias, thaum ntawd, nej tsis muaj Leej Pleev, mas nej nyob nraum lub tsheej His Xas Lais sab nraud, nej yog ib co qhua, Ntuj cov lus cog tsis hais txog nej, nej tsis muaj kev tso siab, vim nej tsis muaj Tswv Ntuj nyob ntiaj teb no. 13 Hos nyem no, nej nyob hauv Leej Pleev. Thaud, nej nyob deb, nyem no, Leej Pleev cov roj ntsha coj nej los nyob ze lawm.
14 Leej Pleev yog peb txoj kev thaj yeeb. Nws muab ob haiv neeg los ua ib haiv rau hauv nws lub cev, nws rhuav lub laj kab cais ob haiv neeg, nws lub cev rhuav kev ntxub pov tseg. 15 Leej Pleev rhuav Txoj Cai, thiab cov lus qhia, nws muab ob hom neeg los tsim Tus Neeg Tshiab nyob hauv nws, kom tsa tau kev thaj yeeb. 16 Nws tus Ntoo Cuam sau ob hom neeg rov los nrog Tswv Ntuj sib haum xeeb, nyob hauv tib lub Cev xwb : nws lub Cev muab txoj kev ntxub rhuav pov tseg. 17 Nws tuaj tshaj txoj kev thaj yeeb : tshaj txoj kev thaj yeeb rau nej cov nyob deb, thiab tshaj txoj kev thaj yeeb rau lawv cov nyob ze. 18 Vim Leej Pleev, mas peb ob hom neeg no koom ib lub tswv yim, ces peb tau kev mus cuag Leej Txiv.
19 Li ntawd, nej tsis yog ib co pej kum neeg, los ib co qhua ntxiv : nej nyob hauv cov ntshiab lub tsheej, nej yog Tswv Ntuj tsev neeg. 20 Nej yog ib lub tuam tsev, cov Hauv Paus Xa Lus thiab cov Yaj Saub yog taw ntsa, Yes Xus Pleev yog lub pob zeb txheem tas lub tsev. 21 Nyob hauv Leej Pleev, lub tuam tsev sib dhos thiab hlob ua ib lub Tuam Tsev teev Ntuj Ntshiab, rau Huab Tais. 22 Nyob hauv Leej Pleev, nej kuj txuas rau lub Tuam Tsev uas hloov ua Tswv Ntuj lub tsev nyob hauv Leej Ntuj Plig.

1 Yog vim tej ntawd, kuv, Paj Lug, thiaj ua Yes Xus Pleev tus tub nyob txim, vim nej, cov neeg teev pej kum dab… 2 Kuv xav tias nej yeej tau hnov piav txog qhov Tswv Ntuj pub txiaj ntsim zoo li cas rau kuv, kom kuv tau kev pab nej. 3 Tswv Ntuj qhib nws cov txuj ci zais tob tob los rau kuv pom xyeem : yog cov lus kuv nyuam qhuav piav me ntsis rau nej ntawd. 4 Nej twm kuv cov lus no, nej yuav pom tias, kuv kuj to taub Leej Pleev cov txuj zais tob tob thiab. 5 Ntuj tsis tau qhib cov txuj zais tob no rau txheej laus thaud, xws li nws nyuam qhuav qhib rau nws cov Hauv Paus Xa Lus ntshiab, thiab rau nws cov Yaj Saub, nyob hauv Leej Ntuj Plig : 6 yog qhov tias cov neeg teev pej kum dab txais ib lub cuab tam xws luag, lawv ua tes taw nyob hauv tib lub Cev, lawv txais Ntuj cov lus cog ib yam li luag, nyob hauv Yes Xus Pleev, vim lawv mloog lub Moo Zoo.
7 Kuv yog tus tub tsob hwb lub Moo Zoo ntawd : yog Ntuj lub txiaj ntsim coj kuv los tsob hwb : Tswv Ntuj nthuav nws lub hwj huam los pub lub txiaj ntsim ntawd rau kuv. 8 Ntuj pub lub txiaj ntsim no rau kuv, tus me dua cov hauv tsoom ntshiab, kom kuv tshaj Leej Pleev cov paj tshab uas neeg ntsuas tsis tau rau cov teev pej kum dab, 9 kom kuv qhia sawv daws paub tseeb tias cov txuj ci zais tob tob yog dab tsi : cov txuj no nyob zais ntshis tau txhiab tiam hauv Tswv Ntuj, hauv tus tsim tas ib puas tsav yam. 10 Nyem no, cov Tshiab ua vaj txheeb, thiab cov Tshiab muaj hwj huam saum cov txheej ntuj pom Tswv Ntuj lub Koom Txoos, lawv thiaj paub Tswv Ntuj txoj kev thoob tsib uas tsis txawj kawg. 11 Vim Tswv Ntuj ib txwm npaj tej no nyob hauv peb tus Huab Tais Yes Xus Pleev. 12 Yog vim li no, peb muaj cuab kav tso siab lug txav los ze txoj kev ntseeg txog Leej Pleev. 13 Ua li mas, kuv thov nej : nej txhob ntaus siab me rau txoj kev txom nyem uas los raug kuv, vim nej. Kuv tej kev txom nyem, yog nej lub koob meej.
14 Vim tej uas tau hais no, mas kuv txhos caug nyob ntawm Leej Txiv xub ntiag, 15 yog Leej Txiv uas tas ib tsoom ua txiv nyob saum ntuj, thiab nyob ntiaj teb no, txais lub npe txiv ntawm nws los. 16 Kuv thov kom Leej Txiv pub nws lub zog loj zog nchav los pab nej txoj sia sab hauv, nyob hauv Leej Ntuj Plig, thov nws pub raws nraim li nws lub hwj chim nplua nuj.
17 Kuv thov kom Leej Pleev los nyob txawm hauv nej lub siab, vim nej ntseeg, ces nej yuav nrhau cag rau hauv txoj kev nyiam, thiab nej cog lub siab rau hauv txoj kev nyiam. 18 Nej yuav txais ib lub zog pab nej, kom nej nrog tsoom ntshiab to taub Leej Pleev txoj kev nyiam dav npaum li cas, ntev li cas, siab li cas, tob li cas. 19 Nej yuav paub Leej Pleev txoj kev nyiam, uas tob tshaj txhua txoj kev paub txuj. Ces txhua hom txiaj ntsim hauv Tswv Ntuj yuav los nyob puv hauv nej.
20 Tus Tswv Ntuj muaj hwj huam ua hauj lwm nyob hauv peb, nws ua ntau tshaj qhov peb thov, thiab qhov peb xav tau.
21 Vim li ntawd, lub koob meej hauv lub Koom Txoos, thiab hauv Yes Xus Pleev, yog nws tug mus txog vam xyoo rau txhiab tiam ! Ua li !

1 Kuv yog tus raug txim hauv Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob ; nej yuav ua neeg siab mos siab zoo. Nej yuav ua siab ntev. Nej yuav ua siab ntev ib leeg txhawb ib leeg nyob hauv txoj kev nyiam. 3 Nej yuav siv zog txuag kev thaj yeeb kom sawv daws koom ua ib pab, nyob hauv ib lub tswv yim. 4 Tsuas muaj tib lub cev thiab tib lub tswv yim xwb, vim Ntuj hu nej los taug tib txoj kev tso siab. 5 Tsuas muaj tib tug Huab Tais, tib txoj kev ntseeg, tib lub cim ntxuav. 6 Tsuas muaj tib tug Tswv Ntuj ua sawv daws Txiv. Nws nyob siab dua sawv daws, nws sau sawv daws, nws nyob hauv sawv daws.
7 Peb nyias tau txais Ntuj lub txiaj ntsim, raws li Yes Xus Pleev pub rau nyias.
8 Li ntawd luag thiaj hais tias : ‘Nws nce mus puag saud. Nws coj tus raug txim mus, nws pub paj tshab rau nws haiv neeg.’
9 Ntawv hais tias : ‘nws nce’, txhais tias nws tau xub nqes mus puag hauv yeeb ceeb. 10 Tus tau nqes mus puag hauv, kuj yog tus nce mus nyob siab dua cov txheej ntuj. Nws ua li ntawd, mas nws thiaj nyob puv hauv txhua yam. 11 Thiab Yes Xus Pleev tseem pub paj tshab kom ib txhia ua Hauv Paus Xa Lus, ib txhia ua Yaj Saub, ib txhia tshaj lub Moo Zoo, ib txhia ua tswv zov yaj, ib txhia ua xib hwb. 12 Yes Xus tsa cov ntshiab ua ntau txoj kab xwm, kom lawv txhim Leej Pleev lub Cev. 13 Thaum txhim tau Leej Pleev lub Cev tiav lawm, mas peb sawv daws yuav ua ib leeg xwb, nyob hauv txoj kev ntseeg, thiab txoj kev paub Tswv Ntuj Leej Tub. Ces peb yuav yog tus tib neeg zoo txhij zoo txhua : vim Yes Xus Pleev lub Cev hlob tiav lawm.
14 Peb yuav tsis raug txhua yam txuj cov tswv yim muab peb ntsawj rau sab ub sab no ; peb yuav tsis mloog cov neeg ntse siab nkhaus ntxias kom peb yuam kev. 15 Peb yuav ua neej raws qhov tseeb, thiab nyob nraim hauv txoj kev nyiam. Peb yuav hlob nyob hauv txhua txoj kev uas mus tshwm rau Leej Pleev, vim nws yog lub Taub Hau.
16 Tas lub Cev huv tib si, sib dhos thiab sib txuas ua ke hauv Leej Pleev, vim muaj ntau txoj leeg yug thiab tuav lub cev, cov leeg txhib lub cev kom ua zog, kom nyias ua nyias txoj hauj lwm yug lub cev kom hlob ; ces lub cev nws maj mam rov txhim nws, nyob hauv txoj kev nyiam.
17 Kuv xav hais rau nej, kuv xav taij nej nyob hauv Huab Tais, kom nej txhob coj ib tug yam ntxwv xws li cov neeg teev dab. Cov teev dab, lawv nyob hauv zaj tswv yim tsis muaj qab hau. 18 Lawv lub siab lub tswv yim nyob kaw nti rau hauv qhov tsaus ntuj. Lawv ua ib co qhua nyob deb deb Tswv Ntuj txoj sia, vim lawv lub siab txhav muab lawv khi rau hauv txoj kev tsis paub Ntuj. 19 Lawv lub siab txawj xaiv qhov zoo ploj lawm. Lawv ywj yoog lawv lub siab xib rau kev lwj ; lawv ua txhua yam tsis huv, tsis muaj dab tsi cheem tau lawv. 20 Nej, mas nej tsis tau kawm tias Yes Xus zoo li ntawd. 21 Nej tau txais ib txoj kev, thiab ib co lus qhia raws nraim li qhov tseeb nyob hauv Yes Xus. 22 Yam li, nej yuav tso nej tus yam ntxwv thaud tseg, nej yuav hle nej tus qub neeg uas lwj zuj zus pov tseg, vim tus qub neeg ntshaw ntau yam tsis muaj nqis. 23 Nej tso nej lub siab qub pov tseg, nej cia zaj tswv yim tshiab los nyob hauv nruab siab. 24 Nej yuav hnav tus Neeg Tshiab : Ntuj tsim tus Neeg Tshiab ntawd raws li Huab Tais tus duab. Ntuj tsim nws nyob hauv txoj kev ncaj, kev ntshiab, thiab kev tseeb. 25 Ua li mas txij no mus, nej tsis txhob dag. Txhua leej txhua tus yuav tsum hais qhov muaj tseeb rau cov nyob ze, peb tsis yog ib co tes taw hauv tib lub cev lod ?
26 Yog nej npau taws, mas nej npau kuj tau, tiam sis nej tsis txhob ua txhaum ; tsis txhob npau taws tsheej hnub, mus txog thaum hnub poob qho. 27 Nej txhob cia dab phem tau kev kav nej lub siab. 28 Tus twg ua kam tub sab, mas nws txhob ua ntxiv lawm. Nws yuav nrhiav hauj lwm ua, kom nws txhais tes pab tau ib qho zoo rau cov neeg txom nyem. 29 Tsis txhob pub ib lo lus phem tawm hauv nej lub ncauj los. Nej yuav hais lo lus zoo, kom txhim kho tau lwm tus. Lo lus zoo yuav tsum tawm los thaum muaj chaw siv, nej lo lus thiaj pab tau lwm tus mus taug txoj kev zoo.
30 Nej txhob ua kom Tswv Ntuj Leej Ntuj Plig Ntshiab tu siab : vim nws muab nws lub thwj los ntaus cim rau nej, nws hom nej cia hnub uas Ntuj txhiv neeg. 31 Tej kev hais lus iab siab, kev tsiv tsaim, kev npau taws, kev nthe, kev hais tub qaug : mas nej yuav muab rho pov tseg tas huv tib si, nej yuav dawj tas puas tsav yam nkhaus pov tseg. 32 Nej sawv daws yuav rov sib ua zoo, sib hlub, nej yuav ib leeg zam rau ib leeg, ib yam li Tswv Ntuj zam rau nej nyob hauv Leej Pleev.

1 Nej yuav yoog raws li Huab Tais, xws li cov me nyuam zoo nyiam. 2 Nej yuav taug txoj kev nyiam, raws li Leej Pleev tus lwj lwm, uas nws nyiam peb, nws siv nws txoj sia los pab peb ; nws rov muab nws cev xws li ib tug tsiaj hlawv txi Ntuj tsw qab mus rau Tswv Ntuj.
3 Hais txog kev tsis tsim txiaj, thiab kev tsis huv uas muaj ntau hom, los kev nyiam nyiaj txiag, mas nej tsis txhob tham ib lo txog li, thiaj phim ib co neeg siab ntshiab. 4 Tej lus dev, tej lus ruam, tej lus plhom moj, txhua yam ntawd tsis zoo mloog. Nej hais tej zaj ua Ntuj tsaug, mas zoo dua. 5 Nej paub zoo tias tus ua dev ua npua, tus ywj nws lub cev ua phem, tus nyiam nyiaj txiag, (tus nyiam nyiaj txiag yog ib tug teev dab), mas nws yuav tsis tau txais Yes Xus Pleev thiab Tswv Ntuj lub Ceeb Tsheej.
6 Nej tsis txhob cia luag tej cov lus dag ntxias tau nej. Yog tim tej kev phem ntxhov hnyo zoo li no, mas Tswv Ntuj thiaj npau taws rau cov neeg tiv nws. 7 Nej tsis txhob nrog cov neeg zoo li ntawd sib fim. 8 Yav thaum, nej yog qhov tsaus ntuj nti. Zaum no, nej nyob hauv Huab Tais, nej yog qhov pom kev nrig. 9 Nej ua lub neej phim txoj kev pom kev cov me nyuam. Cov txiv txi hauv qhov pom kev : yog lub siab zoo, lub siab ncaj, thiab lub siab zeem tau qhov tseeb. 10 Nej ua tib zoo nrhiav saib, yog dab tsi xis Huab Tais siab.
11 Nej txhob nrog luag koom tes ua hauj lwm hauv qhov tsaus ntuj, vim cov hauj lwm hauv qhov tsaus ntuj txi tsis tau cov txiv zoo, nej yuav muab qhib tawm los mas zoo dua. 12 Tej hauj lwm phem uas luag nyiag ua, mas yus twb txaj muag hais txog. 13 Tab sis, thaum muaj tus muab qhib tawm los rau nraum qhov pom kev lawd, mas sawv daws nrog pom qhov tseeb. 14 Vim tas txhua yam uas tawm los rau qhov muag pom, yog qhov pom kev. Vim li ntawd thiaj muaj lo lus hais tias : ‘Neeg tsaug zog, koj tsim los mas ! Koj sawv hauv cov tuag rov los, Leej Pleev yuav ziab koj.’
15 Ua li mas nej ceev faj rau nej tus yam ntxwv kom txhob ua neeg tsis muaj tswv yim, tsuas ua neeg thoob tsib xwb. 16 Nyem no, nej kav tsij rau siab leg cov hauj lwm zoo, vim lub zim txwv no phem heev. 17 Nej txhob ua neeg tsis paub tab. Nej nrhiav kom pom saib, Huab Tais xav kom nej ua dab tsi.
18 Nej tsis txhob haus cawv kom qaug, kev haus dej haus cawv kom qaug kawg coj nej mus rau kev tsis tsim txiaj. Nej cia Leej Ntuj Plig los nyob puv hauv nej.
19 Nej ua ke hais tej zaj nkauj paj nruag, tej zaj hu nkauj, tej zaj paj huam seev uas Leej Ntuj Plig tshoj. Nej muab tas nej lub siab los hu nkauj, thiab cav lus zoo txog Huab Tais. 20 Nej tuav txog peb tus Huab Tais Yes Xus Pleev lub npe txhua lub sij hawm, nej ua Leej Txiv Tswv Ntuj tsaug tsis muaj caij so, tas mus li.
21 Nej yuav rov sib mloog hais, vim nej hwm Leej Pleev.
22 Cov poj niam yuav mloog lawv tus txiv lus, ib yam li mloog Huab Tais. 23 Tus txiv yog poj niam tus tswv, ib yam li Leej Pleev yog lub Koom Txoos tus Tswv, thiab yog tus cawm lub cev. 24 Lub Koom Txoos mloog Leej Pleev lus. Ua li mas cov poj niam kuj yuav mloog lawv tus txiv lus.
25 Nej cov ua txiv, nej yuav hlub nej cov poj niam xws li Leej Pleev hlub lub Koom Txoos. Leej Pleev muab nws txoj sia los cawm lub Koom Txoos. 26 Leej Pleev ua kom lub Koom Txoos ntshiab tuaj thiab huv tuaj, nyob hauv cov dej uas ntxuav lawv, nrog lo lus ib txhij hais. 27 Vim Yes Xus xav cev ib lub Koom Txoos ci ntsa iab rov rau nws, ib lub Koom Txoos uas tsis tsuas ib tee qias, lub ntsej muag tsis muaj ib kab txoom, tsis muaj ib yam xyeej. Ces nws thiaj yuav tau ib lub Koom Txoos ntshiab, tsis tsuas ib tee. 28 Ua li mas, cov ua txiv yuav hlub lawv cov poj niam, ib yam li lawv lub cev kiag. Nyiam yus tus poj niam, yog rov nyiam yus kiag. 29 Tsis muaj leej twg yuav ntxub nws lub cev : yus yug yus lub cev, thiab yus tu kom zoo. Leej Pleev ua zoo li ntawd rau lub Koom Txoos : 30 peb tsis yog cov tes taw hauv Leej Pleev lub Cev lod ?
31 Vim li ntawd, ‘Tus txiv neej yuav tso nws niam nws txiv tseg, mus nrog nws poj niam ua ib nkawm. Nkawd ob leeg yuav ua ib lub cev xwb’ : 32 lo lus tob no muaj ib lub ntsiab loj ; kuv xav qhia tias, lo lus tob no, hais txog Leej Pleev thiab lub Koom Txoos.
33 Hos, hais txog nej, mas nyias yuav nyiam nyias tus poj niam, ib yam li nws nyiam nws lub cev. Tus poj niam kuj yuav hwm tus txiv.

1 Cov me nyuam, nej yuav mloog nej niam nej txiv, nyob hauv Huab Tais : qhov no yog txoj kev ncaj. 2 ‘Koj yuav hwm koj niam koj txiv’, yog thawj lo lus qhia ; Ntuj cog lus tias, yuav pub koob haum rau cov neeg mloog lo lus qhia ntawd. 3 Ntuj cog lus tias : ‘Koj hwm koj niam koj txiv, koj thiaj yuav tau nyob zoo, thiab koj yuav ua neej nyob ntev xyoo nyob ntiaj teb no’. 4 Cov ua niam ua txiv, nej txhob qhuab qhia nej cov me nyuam nruj dhau kev cai. Nej yuav siv tej lo lus ntuas, los tej lus qhia, tej txoj kev cob qhia tuaj ntawm Huab Tais tuaj.
5 Cov qhev, nej yuav mloog nej cov tswv nyob ntiaj teb no lus ib yam li mloog Leej Pleev. Nej yuav ntshai, yuav hwm lawv ; nej txhob ua ntau lub siab. 6 Nej txhob lam mloog lus sab nraud xwb, xws li tus uas lam nrhiav ua kom haum neeg siab xwb. Nej mloog lus ib yam li Leej Pleev cov qhev, uas lawv muab siab rau ua raws li Tswv Ntuj lub siab xav. 7 Nej txoj kev kub siab tsob hwb luag, mas yuav muab cev rau Huab Tais, tsis cev rau neeg. 8 Nej yeej paub lawm tias Huab Tais yuav them rau nyias raws li nyias cov hauj lwm zoo, tsis hais tus qhev, los tus neeg twj lij.
9 Cov ua tswv, nej kuj yuav ua zoo li ntawd rau nej cov qhev thiab : nej tsis txhob tso hem thawj rau lawv. Nej nco ntsoov tias, cov qhev thiab cov tswv, tas sawv daws puav leej muaj tus tseem Tswv nyob saum Ntuj : tus Tswv ntawd tsis tsa leej twg cai.
10 Qhov kawg no, nej yuav ua kom nej muaj zog nyob hauv Huab Tais. Nej yuav txais Huab Tais lub hwj huam nyob hauv nej. 11 Nej thiaj tiv yeej dab phem tej cuab yeej nws muab los ntxias nej, nej yuav hnav Tswv Ntuj lub tsho hlau. 12 Peb tsis tsa rog ntaus ib co yeeb ncuab muaj nqaij muaj ntshav zoo li peb. Peb tsa rog ntaus cov vaj dab phem, cov dab phem muaj hwj huam, cov dab phem kav lub sim ceeb tsaus ntuj. Peb tsa rog ntaus cov tim tswv phem, ya saum cov txheej ntuj. 13 Vim li ntawd, peb thiaj yuav tsum hnav Tswv Ntuj lub tsho hlau ; ces thaum txog hnub phem, nej thiaj tiv tau dab phem, nej siv zog, nej thiaj nyob ruaj.
14 Nej sawv ntsug tos ! Nej muab qhov tseeb los sia nej duav. Nej muab txoj kev ncaj ua tsho hlau hnav. 15 Nej muab lub siab kub los ua khau rau mus xa lub Moo Zoo txoj kev thaj yeeb. 16 Nej tuav rawv txoj kev ntseeg ntawm tes xws li ib daim leem phiaj, ces nej yuav tua tau tus Phem cov xub tswm faj. 17 Qhov kawg, nej yuav txais kev cawm los ua kaus mom hlau tiv, thiab txais Leej Ntuj Plig rab ntaj, uas yog Tswv Ntuj lo lus. 18 Nej yuav coj ib lub neej teev Ntuj, thiab thov Ntuj tsis tseg. Nej yuav teev Ntuj tsis muaj caij muaj thaum, nyob hauv Leej Ntuj Plig. Nej yuav teev Ntuj tsis paub sab tsis paub nkees : nej thov Ntuj rau Tsoom ntshiab. 19 Kuv kuj vam nej thov Ntuj rau kuv thiab, kom kuv tau kev qhib ncauj hais lus, tsis ntshai tshaj cov txuj zais tob tob hauv lub Moo Zoo. 20 Vim kuv yog lub Moo Zoo tus Tiam Lis nyob hauv cov saw hlau no. Nej thov Ntuj, kom kuv muaj cuab kav hais txog lub Moo Zoo, raws li kuv yuav tsum hais.
21 Kuv xav kom nej paub tias kuv ua dab tsi, thiab kuv nyob zoo li cas : Tws Sis Kos yuav qhia rau nej paub tib si. Tws Sis Kos yog tus kwv zoo nyiam, tus tsis hloov siab, uas nrog kuv, thiab pab kuv ua hauj lwm nyob hauv Huab Tais. 22 Kuv txhob txwm xa nws tuaj fi peb lub moo rau nej, thiab pab nej ua siab loj.
23 Kuv thov kom Leej Txiv Tswv Ntuj, thiab Huab Tais Yes Xus Pleev, pub kev thaj yeeb rau tsoom kwv tij, pub kev nyiam, thiab kev ntseeg. 24 Thov kom lub txiaj ntsim, tuaj nrog cov neeg nyiam peb tus Huab Tais Yes Xus Pleev nyob, kom lawv tau txoj sia tsis txawj ploj li.