7. Tswv Ntuj pub kom kuv pom Cim Cog Lus lub txiaj ntsim
Kuv xav hais txog Cim Cog Lus lub txiaj ntsim me ntsis. Hnub peb sib sau ua txij nkawm, peb chaws mus hauv lub tsev teev Ntuj, peb sib cog lus tias yuav sib nyiam yuav sib hlub mus kom tas peb sid, peb yuav ncaj ncees rau peb tus txij nkawm ib leeg xwb, txawm yuav nyob rau lub caij txom nyem los xyiv fab, thaum ib tug raug mob los nyob khov kho. Nej puas paub tias nej tab tom cog lus cia rau leej twg?
Yog ob tug txij nkawm tab tom cog lus ua ke cia nrog Leej Txiv Tswv Ntuj. Huab Tais Tswv Ntuj tus nyob mus li, nws ua pov thawj rau nkawd.
Thaum peb thiab tus txij nkawm sib cog lus zoo li hais, thaum txog lub caij peb dua nras, peb yuav rov pom tej yam peb tau sib cog lus tseg no nyob hauv phau ntawv niaj ntawv xyoo. Peb yuav pom Tswv Ntuj ntim peb lo lus sib cog tseg no cia ci ntsa cuag tsos kub nyob hauv peb phau ntawv niaj ntawv xyoo.
Thaum peb txais Leej Pleev lub Cev thiab cov Ntshav nyob hauv lub Txoos teev Ntuj sib sau ua txij nkawm, mas peb tau nyob npuab Tswv Ntuj thiab npuab peb tus txij nkawm, peb tau koom ua ib lub cev nqaij tiag. Peb lo lus sib cog tseg no yog peb cog cia nyob hauv Huab Tais Peb Leeg.
Kuv pom kuv thiab kuv tus txiv wb rooj tshoob, thaum wb ua ke txais lub Cim Yug, wb tsis yog ob leeg ntxiv lawm, tiam sis yog peb leeg koom ua ib tug; yog kuv, kuv tus txiv, thiab Huab Tais Yes Xus.
Qhov tseeb yog zoo li no: Tswv Ntuj sau wb los ua tib lub cev, thiab muab wb tso cia hauv Huab Tais Yes Xus lub plawv, ces wb thiaj koom tau nrog Huab Tais Yes Xus ua ib tug. Li ntawd, Huab Tais Yes Xus thiaj hais tias ‘qhov uas Tswv Ntuj sau los ua ke, mas neeg tsis txhob muab cais’. (MT 19: 6)
Kuv thov nug nej tias leej twg thiaj yuav muaj peev xwm cais ob tug neeg koom ua ib lub cev tau?
Cov nus cov viv ncaus, tsis muaj leej twg yuav muaj cuab kav cais tau, tsis muaj li. Lub Cim Cog Lus sau nkawd los koom tib lub cev, thiab thaum nkawd tsis tau sib yuav, nkawd ob lub cev ntshiab txaus, mas Tswv Ntuj yuav hliv txiaj ntsim ntau rau nkawd.
Kuv pom kuv niam thiab kuv txiv rooj tshoob; kuv txiv muab ntiv nplhaib looj rau kuv niam txhais tes, ces Txiv Plig tshaj nrov nrov kom cov qhua sawv daws hnov tias hnub no nkawd tau ua niam txiv lawm tiag. Tswv Ntuj ua pov thawj txog nkawd rooj tshoob, Tswv Ntuj foom hmoov zoo rau tus txiv, kom nws muaj peev xwm coj tau nws pab yaj uas yog nws cov me nyuam, kom nws muaj zog tiv thaiv nws cov yaj kom txhob poob mus rau txoj kev phem.
Tswv Ntuj foom hmoov zoo rau tus niam thiab tso ib lub teeb me me cia rau ntawm nws hauv siab, lub teeb no yog Tswv Ntuj kev nyiam.
Kuv pom tias kuv niam lub cev mas ntshiab txaus, ces Tswv Ntuj zoo siab thiab xyiv fab rau kuv niam.
Kuv pom tias hnub ntawd, muaj cov sw los tuav kuv txiv cia, lawv zoo xws li cov kas tab tom noj kuv txiv cov nqaij tiag.
Nej puas paub tias thaum muaj ib tug neeg twg, nws sib deev ua ntej tsis tau sib yuav, ces nws lub cev tsis ntshiab lawm, mas txog hnub nws rooj tshoob yuav muaj cov sw los looj koov los ua phem rau nws; pib ntawm nws qhov chaw mos, nws cev nqaij, nws cov kuab roj kuab ntshav, nws lub paj hlwb, tas nws ib ce; ua rau tus ntawd lub siab poob qis tsis ntshiab tsis huv. Nws txia ua nws lub cev tus qhev, nws mloog nws lub siab ntshaw, nws nyiam kev plees, ces nws yuav hais tias ‘kuv yuav nrhiav kev lom zem los yug kuv txoj sia’.
Yog nkawd ob leeg lub cev ntshiab huv mas yog nkawd tab tom cav txog Tswv Ntuj lub koob meej, Tswv Ntuj yuav pub kom nkawd ntshiab vim neeg ua poj los txiv, mas yog Tswv Ntuj li txiaj ntsim pub rau tib neeg.
Tswv Ntuj sawv nyob hauv rooj tshoob thiab foom hmoov zoo rau cov txhiaj xws, Tswv Ntuj zoo siab luag ntxhi rau nkawd lub neej tshiab.
Txaus tub siab kawg, vim muaj ntaus nkawm ntxhais vauv tsis paub txog qhov no, lawv tsis xav txog thiab lawv tsis nco txog Tswv Ntuj. Lawv tsuas xav tias rooj tshoob yog ib lub ntees lom zem, yog lub ntees ua raws kab lis kev cai xwb, lawv tsis muaj kev ntseeg nyob hauv lawv rooj tshoob, hauv lub Cim Cog Lus. Lawv tos tias thaum twg thiaj yuav tau tawm hauv lub Txoos mus noj rooj qav lom zem, mus haus dej cawv, mus ncig ua si nrog tus hlub.
Kom nej cim cia tias qhov no tsis tau yog kev phem. Kev phem yuav tshwm tuaj thaum peb khiav deb ntawm Tswv Ntuj, xws li kuv tau ua. Kuv khiav deb ntawm Tswv Ntuj, kuv tsis kheev cia Tswv Ntuj los nyob hauv kuv lub neej ua txij nkawm, kuv tsis txais Tswv Ntuj los so hauv kuv lub tsev tshiab.
Tswv Ntuj zoo siab koom nyob nrog peb mus tas ib sid, txawm peb yuav poob hauv kev txom nyem los yog thaum peb muaj kev zoo siab, Tswv Ntuj vam tias peb yuav nco txog Tswv Ntuj thiab.
Hauv peb rooj tshoob, peb tsis caw los Tswv Ntuj yeej yuav nkag los koom, tab sis puas yuav zoo dua yog tias peb nco ntsoov tias muaj Huab Tais Tswv Ntuj tuaj ua pov thawj txog peb lo lus sib cog cia nyob hauv peb rooj tshoob.
Muaj ib yam zoo nkauj nyob hauv kuv niam thiab kuv txiv rooj tshoob, yog Tswv Ntuj tau pub lub txiaj ntsim kuv txiv tau ua ploj lawd rov rau kuv txiv, vim kuv niam txoj kev coj lub cev ntshiab. Kuv ntsia kuv txiv, kuv pom nws tus xeeb ceem qias, tab sis vim yog kuv txiv xav tias nws yog txiv neej thiab vim cov phooj ywg tej lus haub ntxias kom kuv txiv txhob pub kuv niam ua tus loj nyob hauv lub cuab, mas kuv txiav yuav tau coj lub neej thiab tus xeeb ceem xws li thaum tseem ua hluas. Yog li mas 2 lub lisp iam tom qab nkawd sib yuav tas, kuv txiv thiaj mus khav rau luag tej tias nws yog tus loj dua kuv niam.
Nej puas paub? Lub txiaj ntsim thiab hwj chim Tswv Ntuj pub rau kuv txiv, mas cia li yaj ntshis lawm. Dab phem tuaj txeeb mus ces cov sw thiaj rov los looj koov kuv txiv dua. Kuv txiv txia ua tus hma nyob hauv nws pab yaj, yog nws lub cuab.
Leej twg tsis ncaj ncees rau nws kev sib yuav, mas yog nws tsis ncaj rau Tswv Ntuj, nws hla nws cov lus cog cia rau Tswv Ntuj thiab hais tseg rau nws tus txij nkawm. Yog nej xav tias muaj ib hnub mas kuv yuav tsis ua ncaj rau kuv tus txij nkawm, mas nej txhob sib yuav mog!
Tswv Ntuj hais tias ‘yog koj ua neeg tsis ncaj, mas yog koj rov foom lo lus phem rau koj xwb; yog koj coj lub siab tsis ncaj, mas koj txhob lam nrhiav txij nkawm. Cov me nyuad, nej yuav thov kuv pub lub txiaj ntsim rau nej kom nej muab lib siab ncaj ncees rau nej tus poj niam, rau nej tus txiv, thiab rau nej tus Tswv Ntuj mog’.
Yog thaum peb tsis ncaj ncees rau peb kev sib yuav, mas muaj ntau yam phem yuav nkag los rau hauv peb lub neej. Piv txwv li tus txiv tsev tawm rooj mus ua hauj lwm, nws mus ua hluas ua plees nrog lwm tus poj niam, nws tsis ceev faj ces nws kis mob rov los. Nws coj tus mob los poob rau hauv nws lub tsev, tshwj xeeb mas yog nws tus poj niam. Yog li no nej xav saib, kev plees puas tua tau tib neeg?
Muaj ib yam txaus ntshai dua thiab, kev plees kev sib deev ua rau muaj puas tsawg tus me nyuam raug kaus tawm hauv lub cev mus, puas tsawg txoj sia raug txo pov tseg?
Kev tsis ua siab ncaj rau yus tus txij nkawm tua tau neeg coob npaum cas, es peb tseem muaj cuab kav tawm mus raws tej kev nqua hu kom nom tswv kheev pub txoj cai ntaus cev rho me nyuam no raug cai, yog tej yam tsim nyog cia rau sawv daws ua thiab lod?
Tej no yog peb tab tom tsis mloog Tswv Ntuj, tab tom tawm tsam Tswv Ntuj tiag. Thaum muaj plaub ntug, thaum raug xwv txheej, thaum peb muaj mob, mas tsim nyog lawm vim peb tau ua txhaum, puas yog mas? Dab phem zais nram kev txhaum nraub qaum, peb tau qhib rooj caw lawv los nyob hauv peb, es peb tseem niaj hnub yws tias ‘Tswv Ntuj, ua cas koj tsis hlub kuv! Tswv Ntuj, koj nyob qhov twg na! Tswv Ntuj, ua cas koj thiaj tso tej xwm no los nphav kuv os!’, puas yog peb vwm lawm?
Peb yuav tsum paub tias Tswv Ntuj yog lub ntsa zeb thaiv peb kev sib yuav kom txhob raug xwv txheej. Li ntawd, xwv txheej yuav poob rau tus rhuav txoj kev sib yuav mog! Tus twg cais qhov Tswv Ntuj sau los ua ke, mas nws yuav pom Tswv Ntuj lub ntsa zeb mas.
Kuv xav hais rau nej ntxiv tias nyob hauv nej lub cuab mas muaj muaj lus ntawm niam pog thiab nyab, ntawm niam tais thiab vauv puas yog? Qhov nej ua tau mas yog thov Ntuj rau lawv, niam pog thov Ntuj rau nyab, nyab thov Ntuj rau niam pog, niam tais thov Ntuj rau vauv, vauv los kom nws thov Ntuj rau niam tais. Nej txhob npaus taws, txhob sib chim mog!