4. Kuv pom kuv niam kuv txiv
Thaum kuv hais tias kuv yog Kav Tos Liv, ces kuv txawm pom ib qhov ci me me nyob hauv qhov tsaus ntuj nti ntawd. Kuv pom cov theem ntaiv nyob siab saud lub qhov tsaus ntuj nti no. Kuv pom kuv txiv ci zam zuag sawv nyob ntawd, dhau mus saum toj mas yog kuv niam, nws ci tshiab dua kuv txiv.
Kuv pom nkawd ua rau kuv zoo siab heev, kuv pib quaj hu nkawd tias ‘kuv txiv, kuv niam; nej pab kuv thiab mog! Thov neb nqes los coj kuv tawm hauv qhov chaw no os! Kuv thov neb, pab kuv mas!’
Thaum kuv ntsib tej xwv txheej no, mas kuv lub cev tab tom yuav tuag tsis tuag, cov kws tshuaj tso pa rau kuv lub cev lawm xwb. Txawm li ntawd los, kuv lus npawv tsis ua hauj lwm, ces cov pa mus tsis txog kuv lub ntsws. Kuv tus niam hluas thiab cov phooj ywg sib sab laj tias lawv yuav tso tseg kev pab cawm kuv cia li no xwb. Kuv tus niam hluas hais rau cov kwv tij neej tsa tias qhov zoo mas cia kuv tuag mus yuav zoo dua. Ces sawv daws cia nws ua tus rho txoj pa ntawm kuv lub cev, thaum nws chaws los hauv kem tsev cia kuv lub cev, nws hnov kuv lub suab quaj hu nrhiav kuv niam thiab kuv txiv. Nws zoo siab kawg nkaus, nws xav tias zaum no mas tej zaum kuv yuav rov muaj sia tuaj. Thiab ib siab mas nws kuj xav tias yog kuv niam kuv txiv tab tom los tos kuv. Nws pib hais rau sawv daws tias nws hnov kuv lub suab tiag tiag, ces cov kws kho mob xav tias yog nws vwm lawm, lawv cab nws tawm hauv chav pw ntawd mus.
Kuv rov los piav txog thaum kuv pom kuv niam kuv txiv, mas kuv twb zoo siab heev li lawm. nkawd hnov kuv lub suab ces nkawd dauv muag los ntsia pom kuv nyob hauv qhov txom nyem. Nkawd mob siab thiab tu siab.
Tos kuv paub li ntawd, vim thaum peb tus plig nyob rau nruab yeeb mas peb paub tias tus neeg peb pom nws xav li cas. Kuv paub tias nkawd tu siab heev, kuv txiv pib quaj tu siab thiab hais tias ‘kuv tus me ntxhais, koj yog kuv tus me ntxhais tiag! Ntuj es, tus ntawd yog kuv tus me ntxhais tiag tiag os!’, ntawm kuv niam, mas nws pib tsa suab thov Ntuj, txawm nws ob lub qhov muag los los kua muag, tsis kav nws sawv ntsiag to thov Ntuj nyob hauv kev kaj siab lug, nws tsa muag ntsia txheej ntuj siab saud thiab ib ke dauv muag los saib kuv, ces kuv to taub tam sim ntawd tias nkawd tsis muaj peev xwm txaus yuav pab kuv dim hauv thaj chaw ntawd tau.