Cov zaj hauv no yog tus kws kho hniav Nkos Lis Pos Los (Dr. Gloria Polo) tham txog nws lub neej tau tuag thiab sawv rov los nyob hauv xyoo 1995.
1. Thaum kuv tau mus pom Yeeb Ceeb
Nyob zoo kuv cov nus cov muam sawv daws, kuv zoo siab hnub no tau tuaj faib Ntuj lub txiaj ntsim pub rau nej mloog. Kuv tab tom piav txog yam xwm tshwm tuaj raug kuv nyob hauv hnub tim 5 lub 5 hlis xyoo 1995 hauv lub tsev kawm ntawv txheej siab nyob Npos Nkos Tas, peb lub teb chaws Kos Loos Npias. Hnub ntawd thaum yav hnub qaij sij hawm 4 teev 30 fiab, kuv thiab kuv tus xeeb ntxwv muaj 23 xyoos, wb ua kws kho mob hniav thiab tab tom kawm kom tau nce mus rau qib siab dua qhov hauj lwm wb ua. Thaum ntawd, ntuj los nag thiab muaj xob nroo, wb thiab kuv tus txiv, peb mus ko taw mus rau hauv lub tsev kawm. Kuv thiab tus xeeb ntxwv roos ib lub kaus, hos kuv tus txiv hnav lub tsho tiv nag. Thaum peb mus txog ze ib tsob ntoo, xob cia li tua los rau saum kuv thiab tus xeeb ntxwv, wb ob leeg kub hnyiab dub tas. kuv tu xeeb ntxwv tuag kiag tam sim ntawd, hos kuv, mas txawm tsis tau tuag, tab sis kuv ib cov nqaij ntsoog tas thiab dhia tas.
Lawv xa kuv mus kho tom tsev kho mob, kuv tsis ua pa thiab lub cev tuag lawm. kuv lub cev nej pom nyob ntawm no yog lub cev tshiab uas Huab Tais Yes Xus tau pub rau kuv.
Thaum kuv tus qauv pw tuag nyob ntawd, kuv pom ib lub qhov ci ntsa iab zoo ntsia kawg nkaus. Qhov ci ntsa no ua rau kuv muaj kev zoo siab thiab xyiv fab yam tsis muaj dab tsi yuav los hloov tau. Kuv chaws mus sab hauv mus raws cov kab sab ci ntawd. Kuv hais rau kuv tias ‘puas yog kuv tuag lawm!’, ces kuv nco txog kuv cov me nyuam, kuv pib quaj, kuv hais tias ‘Tswv Ntuj! Kuv cov me nyuam tseem yau, lawv yuav hais li cas vim lawv niam ua neeg qia dub tsis quav ntsej nrog lawv nyob li.’ Tos kuv hais li no mas vim txhua txhua hnub kuv sawv ntxov mus ua hauj lwm thiab rov los tsev ces twb yog tom qab 11 teev yuav ib tag hmo lawm.
Kuv ntsia pom kuv lub neej yav dhau los, mas kuv tu siab kawg nkaus. Kuv tsuas nrhiav kom tau txhua yam, tab sis qhov kawg yog kuv tau dab tsi mas. Kuv tsuas tau lub tsev nyob thiab cov me nyuam xwb.
Kuv pom li ntawd, ces kuv nco txog cov me nyuam.
Cov neeg kuv paub lawv, tsis hais cov muaj sia nyob los cov dua nras, lawv tus duab tawm rau kuv pom ib ntsaim muag. Kuv pom kuv pog thiab kuv yawg, kuv pom kuv niam thiab kuv txiv. Lub sij hawm ntawd yog lub sij hawm kuv zoo siab tshaj.
Kuv pom lawv, ces kuv mam to taub tias yav tas los mas yog kuv rov dag rau kuv tus kheej tias lawv sawv daws tau mus thawj thiab tas lawm. kuv nkag siab yuam kev vim nyob ntawd, kuv tau rov pom kuv pog, kuv tau mus khawm nws thiab lwm tus neeg uas kuv paub txog lawv tsis hais tus tuag los txawm muaj sia.
Kuv mus khawm kuv tus ntxhais hnub nyoog 9 xyoos, ces ib sij huam nws ceeb thiab nws hnov tias kuv tab tom khawm nws cia. Yog hais raws li peb pom mas peb yuav tsis hnov tias muaj tej tus ntsuj tus plig los khawm los kov peb.
Thaum ntawd, kuv tsis muaj lub cev lawm, yog li thiaj yog ib qho tsis txaus ntseeg tiag tiag li.
Thaum kuv khawm tus neeg twg mas kuv paub tias lawv yog tus neeg zoo li cas, lawv lub siab zoo los phem. Kuv ntsia pom tag nrho txhua yam nyob hauv lawv lub siab lub tswv yim.
Kuv tshais chaw mus ntxiv, kuv pom ib lub pas dej zoo nkauj nyob sab hauv, pom cov xyoob ntoo, paj hmab paj ntoo zoo nkauj uas nrhiav tsis tau nyob hauv ntiaj teb. Txhua yam ntawd yog kev nyiam kev hlub.
Muaj 2 tsob ntoo sawv ua ob tug ncej qhov rooj. Kuv tawm pom kuv tus yeeb ntxwv chaws mus rau sab hauv lub vaj lom zem ntawd. Kuv txawm xav tias kuv yuav tsis chaws mus hauv.