Tus sau: Meej Lauj, zos Nav Qham, Thaib teb. TSEB NPLEJ 2014
Nyob zoo ib tsoom niam txiv kwv tij neej tsa Hmoob cov uas hmov thiab tshua sawv daws nyob rau txhua lub teb chaws, uas nej tau nyeem phau ntawv Tseb Nplej 2014 no. Kuv lub npe hu ua Meej xeem Lauj. Kuv hnub nyoog muaj 27 xyoo. Peb tsev neeg muaj huv si 7 leej me nyuam. 3 tug tub, 4 tug ntxhais. Kuv yog tus me nyuam tim 4. Peb nyob hauv lub zos Nav Qham, nroog Nakhonthai, xeev Phitsanoulok. Hnub no, kuv yuav piav txog kuv tsev neeg txoj kev ntseeg tias yog vim li cas peb tsev neeg thiaj li los txais ntseeg Kav Tos Liv?
Chiv thawj, los sis yog yav thaum kuv tseem yau, peb tseem nyob lub zos Nav Cuas. Kuv niam thiab kuv txiv tseem coj qub kev cai xws li Hmoob kev cai dab qhuas. Lub sij hawm ntawd, kuv tsev neeg kuj tau ntsib teeb meem ntau yam, xws li tsis muaj tus pab thaum txog lub caij ua dab ua qhua, thaum muaj kev ploj kev tuag los tsis muaj neeg pab, vim yog nyob tsis muaj kwv tij, nyob xyaw lwm xeem Hmoob xwb. Muaj qee zaus yog muaj plaub ntug, ces luag tsis hais raws txoj cai qhov ncaj nruab nrab li. Tsis tas li ntawd, haj tseem mus tuaj ib tog cem, hiam thiab yuam kom yus ua tus swb txoj cai mus li.
Lub sij hawm ntawd, kuv tseem yau heev hnub nyug yog 12 los 13 xyoos xwb, tsis tau paub tab thiab pab tsis tau dab tsi li. Tau ob peb xyoos tom qab, vim yog kev nrhiav teb chaws ua noj ua haus, peb thiaj tau tsiv ntawm lub zos Nav Cuas mus nyob rau lub zos Mes Vuaj, xeev Tseej Maim. Thaum ntawd, peb mus 5 yig kwv tij xwb, peb mus nyob tau 5 xyoos xyaw cov phooj ywg lwm xeem Hmoob. Lub sij hawm ntawd, kuv niam thiab kuv txiv paub cov Xib Hwb qhia Ntuj kev cai Plos Tes Taas uas tsis yog Kav Tos Liv. Yog vim kev tsawg kwv tsawg tij thiab tsis muaj tus pab kuv niam thiab kuv txiv, ces peb thiaj tau txiav txim siab mus ntseeg cov Plos Tes Tas tau 1 xyoos. Tiam sis tus Xib Hwb ntawd hais lus tsis zoo, thiab coj tsis ncaj, nws muab txhua yam uas cov ntseeg sawv daws pab rau tsev teev Ntuj coj mus siv ua nws li ntiag tug tas huv tib si.
Ua rau peb cov ntseeg sawv daws tag dej siab, tsis pom qab yuav ua li cas. Peb ntseeg tau 1 xyoos xwb, ces peb txawm tsiv los ua ntawv tsev raug cai rau nram lub zos Nav Qham, lub nroog Nakhonthai, lub xeev Phitsanoulok.
Kuv niam thiab kuv txiv tau hais rau peb cov me tub me nyuam tias : kom peb txhob tso txoj kev ntseeg pov tseg.
Tswv Ntuj thiaj yuav yog tus uas hlub peb cov neeg txom nyem, thiab yuav tsom kwm saib xyuas peb txhua leej txhua tus. Peb yuav tso siab thiab cia nws ua tus coj peb tsev neeg mus txog hnub tsis muaj txoj sia nyob hauv lub ntiaj teb no. Lub sij hawm ntawd, nyob rau hauv kuv tus kheej los kuj tsis tau to taub dab tsi txog kev cai Ntuj li, tsuas yog ua raws li kuv niam thiab kuv txiv hais thiab coj xwb.
Tom qab peb los nyob rau lub zos Nav Qham li 1 xyoos, tsis muaj cov Xib Hwb Plos Tes Taas tuaj saib xyuas thiab qhia Ntuj kev cai li, tsuas yog nyias thov Ntuj rau nyias tsev xwb. Ces kuv niam thiab kuv txiv thiaj li txiav txim siab los txais kev ntseeg Kav Tos Liv uas yog muaj Txiv Plig thiab cov Xib Hwb. Vim muaj Txiv Plig thiab muaj Xib Hwb tuaj saib xyuas cov ntseeg nyob hauv zos Nav Qham. Txij li peb los nrog cov kwv tij uas lawv yeej ib txwm nyob hauv lub zos Nav Qham nyob, cov kwv tij kuj tsis hlub peb. Muaj xaiv muaj lus los kwv tij tsis pab, tsuas yog yuam kom yus ua tus swb luag xwb. Hais txog ntawm kuv niam cov neej tsa, los lawv kuj tsis hlub peb yam li cov kwv tij thiab . Muaj noj los lawv tsis hu, muaj plaub muaj ntug los lawv pab luag xwb. Vim li ntawd, kuv thiaj xav tias yuav tsis kawm ntawv ntxiv lawm. Kuv yuav los pab niam thiab txiv ua teb, vim yog tsis muaj nyiaj kawm ntawv txuas ntxiv rau qib siab. Vim kev kawm ntawv qib siab yuav tsum siv nyiaj ntau los pab thiaj li yuav kawm tiav. Lub sij hawm ntawd, kuv tsuas yog thov Tswv Ntuj pab kuv tsev neeg, thiab kom muaj tus pab kuv tau kawm ntawv ntxiv. Tau 2 lub lis piam tom qab, txawm muaj ib tug Txiv Plig hu ua Txiv Plig Pov Yaj, nws tuaj ua tus saib xyuas peb cov ntseeg nyob rau lub zos Nav Qham. Txiv Plig thiaj nug kuv tias : kuv puas xav kawm ntawv ntxiv ? Yog kuv xav kawm, mas nws yuav nrhiav tsev ntawv rau kuv mus kawm txuas. Kuv thiaj teb Txiv Plig tias : kuv xav kawm thiab tiam sis yog kuv tsis muaj nyiaj kawm lawm xwb. Ces Txiv Plig thiaj coj kuv mus kawm ntawv nyob rau pem Tsev Hauv Paus Hmoob nyob Tseej Maim. Kuv nrog cov Xib Hwb nyob tau 3 xyoo, ces kuv kawm tiav txheej nrab qib 3. Lub sij hawm kuv nyob Tseej Maim, kuv kuj tau kawm txog Ntuj kev cai me ntsis thiab. Tom qab ntawd, kuv thiaj rov qab los kawm txuas ntxiv qib 4 txog qib 6 nyob rau hauv ib lub tsev kawm xyaum ua hauj lwm, nyob hauv lub nroog Nakhonthai, xeev Phitsanoulok.
Vim nyob Tseej Maim, mas lawv pab kuv kawm txog txheej nrab qib 3 xwb. Kuv thiaj nkag siab zuj zus txog qhov kuv thov thiab txoj kev ntseeg tias Huab Tais Yes Xus thiaj yog tus yuav pab thaum peb cov neeg muaj kev nyuaj siab los ntsib kev txom nyem, nyob rau hauv yus lub neej. Kuv thiaj mam nco txog kuv niam cov lus uas kuv niam hais rau kuv thaum yau tias kom yus tso siab rau Huab Tais Yes Xus, vim nws yog tus cawm seej.
Lub sij hawm uas kuv tsev neeg raug kev txom nyem thiab ntsib teeb meem, mas kuv thov Tswv Ntuj pab txhua txhua zaus. Kuv kuj tau txais kev pab txhua zaus thiab tsis swb txoj cai rau leej twg li. Vim yog yus coj raws txoj kev ncaj, ces Tswv Ntuj thiaj pab kom yus yeej txhua zaus. Nyob ntawm kuv tus kheej, mas kuv tso siab rau Tswv Ntuj thiab cia Tswv Ntuj ua tus coj nyob hauv kuv lub neej lawm yav tom ntej. Kuv thiaj li txiav txim siab los ua hauj lwm pab txoj kev ntseeg nyob hauv lub Koom Txoos Kav Tos Liv. Kuv pib mus xyaum hauj lwm nyob hauv Koom Haum Zoo Tswv Zov Yaj, nyob hauv lub nroog Lomsak.
Tam sim no kuv tab tom kawm ua Xib Hwb xyoo 1 nyob rau lub tsev kawm ua Xib Hwb NCC (National Catechetical Center). Tseem tshuav 2 xyoos ntxiv thiab kuv thiaj kawm tiav. Kuv muaj lub hom phiaj xav los pab cov Hmoob ntseeg Ntuj nyob hauv lub xeev Phitsanoulok. Vim zim txwv no, peb cov Xib Hwb Hmoob muaj tsawg heev thiab saib xyuas tsis txhua cov neeg ntseeg. Muaj ntau lub zos uas lawv xav kom muaj Xib Hwb pab lawv. Ces kuv pib nrog 2 tug Txiv Plig sib hloo mus tsham xyuas cov neeg ntseeg nyob hauv cov zos no : xws li zos Nav Cuas, zos Looj Kauj, Zos Pam Dees, zos Phus Qham, zos Npaj Maim, zos Thab Npawm, zos Nav Xais, zos Nav Qham thiab zos Tum Qhov.
Tej zaum muaj qee leej ntsib teeb meem zoo li kuv, ces kuj ua rau lawv tag dej siab. Los yog thaum ib tug neeg twg muaj kev nyuaj siab, mas lawv kuj hu xov tooj tuaj nrog peb tham. Peb zoo siab mloog thiab txhawb sawv daws lub zog.
Kwv tij Hmoob sawv daws! Tsis hais nyob rau sab ntuj twg kuj xij, txawm yog cov ntseeg thiab tsis yog los peb Koom Haum Zoo Tswv Zov Yaj zoo siab yuav ua dej siab txhawb nej txhua leej txhua tus lub zog. Tsis hais tus hlob tus yau, tus laus los tus hluas, thov kom sawv daws txawj sib hlub thiab sib pab, sib nres.
Thov kom peb nco ntsoov tias tsuas yog peb Hmoob thiaj pab Hmoob xwb.
Luag lwm haiv neeg yeej tsis paub thiab tsis nkag siab txog peb Hmoob.
Peb yog ib co kwv tij Hmoob, thov kom peb sib hlub thiab sib pab. Ua dab tsi los thov kom tau raws li lub siab xav. Ua tsawg los kom txaus noj, ua ntau los thov kom nplua nuj ntxiv mus.
Qhov tseem ceeb thiab loj tshaj, mas yog qhov peb yuav tsum txhob tso Huab Tais Yes Xus cov lus tseg. Vim Huab Tais Yes Xus tau qhia kom peb txawj coj lub neej raws li cov lus nws tau qhia tseg nyob hauv Ntawv Ntshiab tias : “Tsis muaj dab phem uas yuav kov yeej Tswv Ntuj cov me nyuam, uas coj raws txoj kev ncaj thiab muaj kev ntseeg ruaj nyob rau ntawm Tswv Ntuj xub ntiag ib zaug li.”
Hnub no, kuv piav luv luv li no rau nej sawv daws tau mloog xwb. Thov ua tsaug rau txhua tus uas nej muaj lub siab zoo pab txhawb nqa Koom Haum Zoo Tswv Zov Yaj. Thov kom Tswv Ntuj foom koob hmoov zoo thiab pov hwm nej txhua leej txhua tus, kom nej sawv daws tsuas ntsib kev noj qab nyob zoo mus li. Ua yam twg los thov kom tau raws li lub siab xav.
Kuv ntsib nej sawv daws li no xwb! Lwm zaus peb mam rov los sib ntsib dua !
