Tus sau: Hmoov Zoo Ham, Zoo Tswv Zov Yaj, Thaib teb. TSEB NPLEJ 2014
Nyob zoo tsoom phooj ywg sawv daws! Kuv zoo siab uas tau tuaj ntsib nej nyob hauv phau ntawv Tseb Nplej 2014 no. Kuv hu ua Nyob Zoo xeem Haam. Nyob hauv lub zos Mes Pov, xeev Chiangrai, Thaib teb. Tam sim no kuv ua hauj lwm nyob hauv Zoo Tswv Zov Yaj. Zaum no, yog thawj zaug uas kuv tau tuaj ntsib nej. Txawm kuv sau tau tsis zoo thiab hais siab nej me ntsis lawm los thov nej zam lub txim pub rau kuv thiab. Kuv yog ib leeg ntxhais Hmoob uas tseem coj qub kev cai. Kuv xav piav txog kuv txoj kev xav thiab qhov kuv txiav txim siab tuaj ua hauj lwm nrog cov tij laug nyob hauv Zoo Tswv ZooYaj, uas lawv cov coob yog neeg ntseeg.
Ua ntej uas kuv yuav tuaj nyob hauv Zoo Tswv Zoo Yaj, kuv tau ua ib txoj hauj lwm nyob hauv lub xeev Samutprakan, ze tuam ceeb Bangkok. Kuv lub luag hauj lwm yog xam nyiaj txiag (Accounting). Yav tag los, niaj hnub tom qab ntawm kuv ua hauj lwm tas, kuv kuj nkag mus ua si hauv lub Tsev Vas (Website) facebook. Muaj ib hnub xyov kuv xav li cas, kuv thiaj nkag mus hauv lub Tsev Vas Toj Siab, mus ua si haud. Kuj muaj phooj ywg coob leej tuaj ua si thiab nrog kuv tham. Kuv tau ntsib ib tug tij laug uas nyob hauv Zoo Tswv Zov Yaj, tab sis kuv tseem tsis tau paub nws. Cov phooj ywg coob leej kuj thov kuv li facebook thiab xov tooj, tab sis kuv tsis kam muab rau leej twg, vim kuv xav tias ib leeg tsis paub ib leeg, xyov luag xav puas zoo rau yus, ces cia ua phooj ywg nyob hauv Toj Siab xwb. Ntxiv mus yog sib ntsib los ho nug moo, yog tsis ntsib los kav liam. Tus tij laug nyob hauv Zoo Tswv Zov Yaj kuj thov kuv thiab, ces tus tij laug no kuv ho xav dua yam tias ua phooj ywg xwb nyaj tsis ua cas thiab nws kuj yuav tsis xav li cas rau kuv. Ces kuv thiaj muab kuv tus facebook rau nws. Thaum kuv pom nws daim duab nyob hauv facebook, ces kuv thiaj nug nws tias “Koj ua hauj lwm dab tsi?”
Nws thiaj qhia kuv txog nws lub luag hauj lwm. Kuv thiaj hais nws tias “Tij laug! Ua li es nej puas txais tib neeg nrog nej ua hauj lwm thiab? Yog nej txais thaum twg, ces thov hais qhia kuv, vim kuv xav ua txoj hauj lwm ko. Lub luag hauj lwm ko, yog kuv lub hom phiaj.”
Tus tij laug no nws teb kuv tias “Tam sim no, peb yeej txais los mas! Nyob ntawm koj, saib koj puas xav ua txoj hauj lwm no tiag xwb. Vim cov tij laug hauv no, lawv puav leej yog neeg ntseeg tas nrho. Thiab koj yog Hmoob, tab sis koj nyob loj hlob nram nroog xwb, ntshai tsam koj nyob tsis taus. Tab sis yog koj xav ua tiag, mas koj xub nrhiav sij hawm tuaj mus saib ua ntej tso, koj mam txiav txim siab dua.”
Wb sib tham li ntawd tas, ces hnub tim 12 lub 10 hli xyoo 2013, kuv thiaj teem caij mus tsham Zoo Tswv Zov Yaj thiab sib tham txog lub luag hauj lwm, seb puas ntxim kuv siab tiag thiab kuv puas yuav ua tau. Tab sis thaum txog lub caij teem tseg, kuv kuj tsis mus thiab. Kuv hais rau tus tij laug kuv xub tau nrog nws tham tias thov lub sij hawm rau kuv xav me ntsis tso, ces kuj cia li ntawd lawm. Vim qhov chaw kuv ua hauj lwm, lawv tsis pub kuv tawm. Thiab txoj hauj lwm no nws yog ib txoj hauj lwm uas kuv tsuas xav ua kom nrhiav kev paub xwb, tsis yog yam hauj lwm uas kuv nyiam tiag. Ces txog sij hawm kuv thiaj tsis xav mus. Lub 10 hli twb yuav dhau mus, muaj ib hmos kuv txawm ua npau suav tias kuv mus ntawm ib lub kwj ha qhuav, ces pom ib tug moj zeej ntoo nyob ntawd. Tus moj zeej ntoo cia li sawv los thiab hais kuv tias “Tswv Ntuj hlub txhua leej.”
Thaum kuv tsim dheev, los kuv xav tias ua cas kuv lam npau suav txawv txawv ne. Zaj npau suav ntawd, nyob rawv hauv kuv lub hlwb tau 2 hnub. Hnub tim 3 thaum tav su, tus tij laug hauv Zoo Tswv Zov Yaj txawm hu xov tooj tuaj. Kuv thiaj li piav kuv zaj npau suav rau nws mloog tag, ces nws teb kuv tias “Yog li tej zaum ntshai koj yuav tau tuaj nrog peb nyob tiag pob! Vim Tswv Ntuj hu koj lawm ne.” Thaum ntawd, kuv kuj tsis xav li cas thiab, ib qho los yog kuv tseem coj qub kev cai, ces kuv xav tias tej zaum Tswv Ntuj yuav tsis hu txog kuv, Tswv Ntuj yuav tsis paub txog kuv. Tej zaum ntshai Tswv Ntuj tsuas lam tso dag tso luag kuv xwb. Ces kuv kuj ua kuv txoj hauj lwm li qub mus txog lub 11 hlis 2013. Kuv thiaj tawm kuv txoj hauj lwm los mus so pem tsev 1 lub hlis.
Noj Peb Caug tas, lub 1 hlis 2014 kuv thiaj txiav txim siab rov qab mus ua kuv txoj hauj lwm qub, vim qhov qub chaw lawv tseem tos kuv. Tab sis tsis paub ua cas kuv lub siab pheej nyob tsis tswm li. Niaj hnub kuv kuj tham piav txog kuv txoj kev nyuaj siab rau kuv niam mloog thiab. Twb txog lub 1 hlis nrab lawm, kuv niam pom tias kuv nyuaj siab heev, ces kuv niam thiaj hais rau kuv tias “Yog koj nyob tsis tswm thiab tsis muaj siab ua hauj lwm, ces koj rov qab los tsev. Kuv mam li nrog koj mus saib lub tsev Zoo Tswv Zov Yaj, saib koj puas xav nyob.”
Hmo ntawd, kuv thiaj rov los mus tsev. Kuv niam thiaj li nrog kuv ua ke mus saib lub tsev Zoo Tswv Zov Yaj. Thaum kuv niam wb mus txog, muaj cov tij laug nyob hauv Zoo Tswv Zov Yaj tos txais wb. Lawv kuj piav txog lub luag hauj lwm rau kuv mloog, tab sis kuv tsis nyiam pes tsawg. Lub chaw nyob kuj tsis xis kuv siab kiag, vim txawv teb txawv chaw. Tab sis qhov kawg, kuv cia li txiav txim siab nyob no lawm.
Thaum wb rov mus txog tsev, thiab txog lub sij hawm uas teem cia kuv pheej niaj hmo ua npau suav tsis zoo, ces ua rau kuv tsis nyiam thiab tsis kaj siab kiag li. Kuv thiaj li tsis xav rov mus hauv Zoo Tswv Zov Yaj. Lub sij hawm uas teem cia twb dhau mus lawm 1 lub lis piam, kuv niam thiaj hais tias yog kuv pheej tsis kaj siab, ces cia kuv niam coj kuv mus saib hmoov. Wb thiaj mus saib hmoov. Thaum saib tas, lawv hais rau kuv tias : yog kuv mus ua hauj lwm hauv Zoo Tswv Zov Yaj, mas yog qhov zoo thiab tsis muaj teeb meem dab tsi. Kom kuv ceev faj, tsam ho muaj kev caij tsheb, ntog tsheb tej xwb. Vim li ntawd, thiaj ua rau kuv npau suav tsis zoo thiab tsis kaj siab. Dhau ntawd los, kuv tso siab phluav. Hnub 7 lub 2 hli 2014, kuv thiaj txiav txim siab ua ib siab mus ua hauj lwm hauv Zoo Tswv Zov Yaj. Thaum kuv rov mus txog hauv Zoo Tswv Zov Yaj, cov tij laug txhua tus tos txais kuv zoo. Peb nyob hauv Zoo Tswv Zov Yaj, tsis yog nyob li ib pab neeg tuaj ua hauj lwm ua ke xwb. Peb nyob yam li ib tsev neeg, yam li ib pab nus muag, peb nyob sov siab. Kuv ib leeg thiaj li tuaj kev deb tuaj xwb, tab sis kuv kuj tuaj nyob kaj siab, tsis nco qab nco vaj tsev pes tsawg. Peb nyob ua ke muaj 7 – 8 leej, muaj kuv ib leeg thiaj yog poj niam xwb. Cov tij laug txhua tus hlub kuv ib yam lawv ib tug muam ntag. Thaum kuv muaj kev nyuaj siab, los cov tij laug kuj tsis tso kuv tseg. Lawv pab nrog kuv daws kuv tej kev nyuaj siab thiab sib tuav xam ua ke.
Kawg no, thov ua Tswv Ntuj tsaug uas tau hu txog kuv. Ua tsaug rau cov tij laug nyob hauv Zoo Tswv Zov Yaj txhua leej uas tos txais kuv, thiab qhia ntau yam pub rau kuv. Kuv cog lus tias kuv yuav muab siab rau thiab maj mam ua Tswv Ntuj cov hauj lwm raws li qhov kuv ua tau, thiab yuav ua kom zoo tshaj plaws.
Ib tsoom phooj ywg sawv daws! Hnub no, kuv tham txog kuv tus kheej li no pub rau nej sawv daws tau paub xwb. Yog nej leej twg muaj tej yam zoo uas yuav pab txhawb nqa peb txoj kev ntseeg kom loj hlob, thiab qhia kom neeg txawj sib nyiam sib hlub, mas thov caw nej sau tuaj tham pub rau peb mloog. Peb zoo siab tos txais nej sawv daws txhua zaj tswv yim. Lwm zaus peb mam rov sib ntsib dua rau Tseb Nplej tsab tom ntej.
Sawv daws nyob zoo!
