Tus sau: Ntxhw Lis, Zoo Tswv Zov Yaj, Thaib teb. TSEB NPLEJ 2014
Nyob zoo ib tsoom phooj ywg sawv daws! Zoo siab hnub no rov qab tau tuaj ntsib nej dua. Cov phooj ywg sawv daws, ua ntej kuv yuav los nrog sawv daws sib fim, kuv thov qhia kuv lub npe rau sawv daws paub. Kuv lub npe hu ua Ntxhw xeem Lis. Kuv yog ib tug uas tsis tau los txais txoj kev ntseeg Tswv Ntuj. Tab sis kuv muaj txoj hmoov zoo uas Tswv Ntuj tau hu kuv los mus ua Tswv Ntuj txoj hauj lwm nyob rau hauv lub xov tooj cua Zoo Tswv Zov Yaj. Kuv txoj hauj lwm yog zom cov zaj lus tshaj tawm nyob rau hauv lub xov tooj cua Zoo Tswv Zov Yaj, uas niaj hnub tshaj tawm nyob rau Fis Lis Pees teb.
Ua ntej uas Tswv Ntuj yuav hu kuv los ua Tswv Ntuj txoj hauj lwm no, kuv kuj yog ib tug neeg ua liaj ua teb xws li zeej tsoom thiab xwb. Chiv thawj kiag, Txiv Plig Tos Mas Thossapon uas tam sim no nws yog tus thawj tswj saib lub xov tooj cua Zoo Tswv Zov Yaj, kuj xav tau ib tug uas txawj ntawv Hmoob los qhia tus Ntawv Hmoob Thoob Teb rau ib tsoom niam txiv kwv tij neej tsa sawv daws. Tshwj xeeb yog xav tau ib tug uas yog cov neeg ntseeg Ntuj. Txog qhov kawg kuj nrhiav tsis tau tug uas yog neeg ntseeg Ntuj los qhia ntawv Hmoob rau sawv daws, vim cov tub ntxhais nyem no mus kawm ntawv nyob rau nram nroog lawm xwb. Tsis tas li ntawd, feem coob yog cov tsis paub ntawv Hmoob zoo. Txog qhov kawg, thiaj tau sab laj tias yog li no txais tus sab nraud uas tsis yog neeg ntseeg Ntuj los ua txoj hauj lwm no ne puas yuav tau? Nyob rau hauv lub rooj sab laj thiaj tau pom zoo txais kuv los ua ib tug xib hwb qhia ntawv Hmoob. Txij ntawd los, thiaj yog ib qho kev tso siab uas Txiv Plig Tos Mas muaj rau kuv. Txog qhov kawg lub xov tooj cua Zoo Tswv Zov Yaj thiaj tau hu kuv los ua hauj lwm nyob rau hauv lub xov tooj cua Zoo Tswv Zov Yaj. Li no mas, kuv thiaj xav tias yog Huab Tais Tswv Ntuj hu kuv thiab xaiv kuv los ua Huab Tais Tswv Ntuj txoj hauj lwm no. Yog li ntawd, kuv thiaj ntseeg tias Tswv Ntuj yog tus hlub neeg tiag. Tswv Ntuj tsis yog hlub cov neeg ntseeg txog nws xwb. Tswv Ntuj hlub cov neeg uas tsis tau paub txog Tswv Ntuj xws li kuv. Thiaj hais tau tias Huab Tais Tswv Ntuj yog tus hlub thiab khuv leej neeg tiag, nws tsis cais tsis xaiv neeg.
Cov phooj ywg sawv daws! Txij hnub kuv tau los ua txoj hauj lwm no lawd, zoo li kuv lub siab pib nyiam Tswv Ntuj zuj zus tuaj. Kuv nyuam qhuav los txais txoj hauj lwm no tau 1 xyoos ntau no xwb. Ua ntej kuv yuav los ua txoj hauj lwm no, kuj ua rau kuv xav nyuaj ntau tsav ntau yam. Kuv xav tias xyov kuv puas yuav ua tau los ua tsis tau, vim kuv yog ib tug neeg uas tsis paub txog txoj kev ntseeg hlo li. Xyov kuv yuav pib li cas thiaj zoo haum rau sawv daws. Vim txoj hauj lwm uas kuv los txais ua, yog zom lus hais txog Tswv Ntuj cov dej num uas Tswv Ntuj tau ua los cawm ntiaj teb neeg. Kuv yuav hais li cas thiaj zoo thiab haum rau cov neeg uas mloog lub tshaj xo Zoo Tswv Zov Yaj. Tab sis los txog rau hnub no, kuv ntseeg thiab tso siab tias Huab Tais Yes Xus khuv leej kuv thiab hlub kuv. Nws pub lub tswv yim zoo los rau kuv, kom kuv ua tau txoj hauj lwm uas nws xaiv kuv los ua. Ua rau kuv muaj lub siab kub lug los ua cov hauj lwm no, vim nyob hauv qhov chaw ua hauj lwm kuv muaj cov kwv, cov tij los cov muam uas Tswv Ntuj tau xaiv sawv daws los ua Tswv Ntuj cov hauj lwm, sawv daws muaj lub siab zoo sib pab qhia. Thaum kuv tsis nkag siab qhov twg, los lawv puav leej qhia kuv. Yog li ntawd, kuv thiaj xav hais qhia rau peb ib tsoom kwv tij Hmoob sawv daws paub tias
“Yog thaum Huab Tais Tswv Ntuj hu txog nej leej twg thiab pom zoo xaiv nej los ua Tswv Ntuj txoj hauj lwm lawd, nej yuav tsum txhob ua xyem xyav nawb mog! Vim nej yog tus muaj txoj hmoov zoo uas Tswv Ntuj xaiv. Zoo xws li kuv uas tsis paub txog Tswv Ntuj ib qho hlo li, los Tswv Ntuj kuj pom zoo rau kuv los ua Tswv Ntuj txoj hauj lwm tshaj Tswv Ntuj lub Moo Zoo rau sawv daws. Kuv yuav muab siab rau thiab maj mam ua raws li qhov Tswv Ntuj pom zoo rau kuv ua.”
Cov phooj ywg sawv daws! Hnub no, kuv tuaj nrog nej sib fim nyob rau hauv tsab ntawv xov xwm Tseb Nplej li no xwb. Lwm zaus peb mam rov sib ntsib sib fim dua. Kawg no, kuj thov ua tsaug rau cov phooj ywg uas nej tau muab nej lub sij hawm muaj nqis los nyeem kuv tsab ntawv no. Thov kom Huab Tais Tswv Ntuj foom hmoov zoo pub rau nej txhua leej txhua tus, kom nej khwv noj khwv haus los tau txaus noj txaus haus raws li nej lub siab nyiam. Nyob zoo sawv daws!
