KAWM NTAWV NTSHIAB

Lus Hes Nplaws hu phau ntawv Hauv Paus ua ‘Npes Les Tshis’ (Bereshit) txhais tias ‘Thaum lub hauv paus’. Lus Hes Las thiab lus Las Tis Nas hu tias ‘Ntses Nes Xis’ (Genesis).
Cov kws txuj tshuaj xwm txog cov kwv huam txheej thaud nyob Toob Fab Nrab muab txhua yam uas phau ntawv Hauv Paus piav txog Has Nplas Has los piv rau lwm haiv neeg tej kwv huam, ces lawv sawv daws hais tias phim Has Nplas Has tau nyob Kas Nas Has ze xyoo 1850 ua Yes Xus ntej. Yos Xes thiab nws cov tij tsiv los nyob Hais Nkws Tos teb ze xyoo 1700.
Nyob hauv phau ntawv Hauv Paus muaj 3 txog kwv huam. Txoj kwv huam Yas Ves ua phau ntawv Hauv Paus tus txheej txheem, zoo li tej zaj Tswv Ntuj tsim tib neeg, neeg ua txhaum, zaj piav txog Kas Es thiab As Npes, ntiaj teb neeg ua txhaum, dej nyab ntiaj teb. Zaj puav yog tuaj ntawm txoj kwv huam Es Los His tuaj, lawv hu Tswv Ntuj ua ‘Es Los His’ tab sis thaum nyias muab txhais los ua nyiam xeem lus mas sawv daws tsis tshua xav sau Es Los His; ces lawv sau ua ‘Tswv Ntuj’. Muaj tej zaj tuaj ntawm txoj kwv huan Leej Choj tuaj, yog txoj kwv huam tuaj tom qab dua cov; lawv ntxiv tej zaj rau txoj kwv huam Yas Ves thiab Es Los His vim lawv xav pab tsoom His Xas Lais mloog Mais Xes txoj cai; zoo li lawv ua ib zag piav tias Tswv Ntuj ua hauj lwm 6 hnub ces hnub 7 Tswv Ntuj so; vim lawv xav ntuas cov His Xas Lais kom muab Hnub Xya ua hnub Xas Npas Tos; yog hnub caiv; lawv sau tej zaj Tswv Ntuj nrog Nos Hes cog lus kom tau pab cov His Xas Lais nco txog Tswv Ntuj nrog Mais Xes cog lus.
Lawv sau phau ntawv Hauv Paus tseg xws li peb nyeem nyem no tiag tab sis txheej laus thaud tau piav tas txhua yam phim tiam 19 ua Yes Xus ntej zoo kawg, lawv xuas ib co lus uas cov His Xas Lais to taub los qhia cov His Xas Lais. Thaum ib txheej neeg tau qhia lwm txheej neeg mas lawv cev lus raws li lawv tau txais xwb, lawv tsis hloov.
Phau ntawv Hauv Paus tsis qhia peb tias Tswv Ntuj ua zoo li cas tsim tas txhua yam. Ntawv Hauv Paus tsuas qhia tias Tswv Ntuj yog tus tsim tas txhua yam thiab qhia tej yam li nram no:
– Qhia tias Tswv Ntuj nyob mus li.
– Qhia tias Tswv Ntuj yog tus tsim tas puas tsav yam.
– Qhia tias Tswv Ntuj tsim neeg muaj ntsis zoo li Tswv Ntuj me ntsis.
– Qhia tias poj niam zwm rau txiv neej tab sis poj niam yog ib tug zoo li txiv neej thiab ua txiv neej luag thiab pab txiv neej.
– Qhia tias neeg lub keeb thaud mas lawv hla Tswv Ntuj lus vim lawv muab hlob.
– Qhia tias vim neeg ua txhaum thiaj muaj kev mob kev tuag nyob ntiaj teb no.
– Qhia tias Tswv Ntuj yuav cawm lub ntiaj teb neeg.
– Qhia tias neeg yuav tsum tswj nws lub siab tsis zoo.
– Qhia tias neeg yuav tsum hwm luag txoj sia, yuav hwm niam hwm txiv.
– Qhia tias Kas Es yog tus tua neeg, nws yug ib co neeg ua txhaum ntau dua cov; yog nyob hauv nws cov xeeb ntxwv mas lawv thiaj pib yuav ntau tus poj niam.
– Qhia tias muaj ib tug Tswv Ntuj xwb, yog Has Nplas tus Tswv Ntuj.
– Qhia tias Tswv Ntuj hlub nws haiv neeg, nws pub ib lub teb chaws rau lawv nyob.
– Qhia tias Tswv Ntuj siab ncaj, nws cog lus thiab ua raws li lo lus nws cog.
– Qhia tias neeg yuav tsum hwm Tswv Ntuj thiab txi Tswv Ntuj.
– Qhia tias Tswv Ntuj tsis xav kom neeg rov muab neeg los txi rau Tswv Ntuj.
Phau Ntawv Hauv Paus faib ua 4 ntu loj li no: ntu 1 piav txog Tswv Ntuj tsim ntuj tsim teb thiab neeg ua txhaum (HP 1-11), ntu 2 hais txog tus yawg koob Has Nplas Has (HP 12-25), ntu 3 hais txog Yas Kos (HP 26-36), thiab ntu 4 yog Yos Xes thiab nws cov kwv tij (HP 37-50).
Ntu 1. Tswv Ntuj tsim ntuj tsim teb thiab neeg ua txhaum (HP 1-11).
Nyob hauv ntu no yog cov lus qhib phau Ntawv Ntshiab, cov His Xas Lais xav qhia tias Tswv Ntuj yog tus tsim lub sim ceeb, tas txhua tsav Tswv Ntuj tsim los mas tsuas muaj tib neeg xwb thiaj yog tsav muaj ntsuj plig (Soul) thiab lub siab txawj xaiv, tib neeg xaiv qhov tsis nyiam thiab tsis mloog Tswv Ntuj.
Cov zaj hauv ntu ib no, yog cov His Xas Lais muab txoj kwv huam Leej Choj thiab txoj kwv huam Yas Ves los piav sib xyaw ua tib zag kwv huam.
Txoj kwv huam Leej Choj qhia tias Tswv Ntuj yog lub hauv paus chiv txhua tsav yam, Tswv Ntuj yog ‘qhov zoo’. Li ntawd, txhua yam txhawv hauv Tswv Ntuj tuaj mas thiaj zoo. Tswv Ntuj yog tus muaj hwj huam loj tas nrho, Tswv Ntuj hais ib lo lus xwb mas txhua yam tsheej xeeb tuaj. Thaum Tswv Ntuj tsim lub ntuj thiab lub ntiaj teb mas Tswv Ntuj muab 3 hnub los cais qhov zoo tawm ntawm qhov ntxhov, thiab muab 3 hnub los kho qhov zoo kom zoo txhij tuaj, ces txog Hnub Xya mas Tswv Ntuj so. Tswv Ntuj tsim tib neeg raws li Tswv Ntuj tus duab. Txoj kwv huam Leej Choj piav zoo li no:
Thaum chiv lub keeb, Tswv Ntuj tsim lub ntuj thiab lub ntiaj teb, mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej. Tswv Ntuj hais tias “Kom muaj qhov pom kev.” Ces txawm muaj qhov pom kev tuaj. Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. Tswv Ntuj hu qhov pom kev ua “nruab hnub” thiab hu qhov tsaus ntuj ua “hmo ntuj.” Txawm muaj tsaus ntuj thiab muaj kaj ntug; yog thawj hnub.
Tswv Ntuj hais tias “Kom muaj ib lub ntuj ntsuab nyob hauv nruab nrab cov dej thiab kom nws quas cov dej ntawm cov dej”. Ces txawm muaj li ntawd tuaj. Tswv Ntuj ua lub ntuj ntsuab los quas cov dej nyob hauv qab ntuj ntsuab ntawm cov dej nyob saum qaum ntuj ntsuab. Tswv Ntuj hu lub ntuj ntsuab ua “ntuj.” Txawm muaj tsaus ntuj thiab muaj kaj ntug; yog hnub ob.
Tswv Ntuj hais tias “Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los.” Ces txawm muaj li ntawd tuaj. Tswv Ntuj hu cov av qhuav ua “ntiaj teb” thiab hu cov dej ua “hiav txwv.” Tswv Ntuj pom tias qhov ntawd zoo. Tswv Ntuj hais tias “Kom lub ntiaj teb tuaj nroj tsuag ntsuab xiab; kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob.” Ces txawm muaj li ntawd tuaj. Ntiaj teb tuaj nroj tsuag ntsuab xiab; tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. Txawm muaj tsaus ntuj thiab muaj kaj ntug; yog hnub peb.
Tswv Ntuj hais tias “Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo, kom tej lub ci ci nyob saum lub ntuj ntsuab ua kom ntiaj teb pom kev.” Ces txawm muaj li ntawd tuaj. Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. Tswv Ntuj muab lawv txawb rau saum lub ntuj ntsuab saud kom ntiaj teb pom kev, cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. Txawm muaj tsaus ntuj thiab muaj kaj ntug; yog hnub plaub.
Tswv Ntuj hais tias “Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab.” Ces txawm muaj li ntawd tuaj. Tswv Ntuj tsim cov nab hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. Tswv Ntuj foom lus zoo rau lawv tias “Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb.” Txawm muaj tsaus ntuj thiab muaj kaj ntug; yog hnub tsib.
Tswv Ntuj hais tias “Kom lub ntiaj teb txawj muaj tej yam tsiaj muaj sia, nyias muaj raws nyias hom; tsiaj nyeg, kab ntsaum, tsiaj qus, nyias muaj raws nyias hom.” Ces txawm muaj li ntawd tuaj. Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo.
Tswv Ntuj hais tias “Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. Tswv Ntuj foom lus zoo rau nkawd thiab hais rau nkawd tias “Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av.”
Tswv Ntuj hais tias “Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb; tej ntawd yuav yog neb tej txhiam laj txhiam xws. Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj.” Ces txawm muaj li ntawd tuaj. Tswv Ntuj ntsia tas txhua yam nws tau ua; txhua yam ntawd zoo kawg. Txawm muaj tsaus ntuj thiab muaj kaj ntug; yog hnub rau (HP 1: 1-31).
Txoj kwv huam Leej Choj piav ntxiv tias tos dej nyab ntiaj teb mas yog vim ntiaj teb neeg ua phem dhau, tsuas tshuav Nos Hes tib tug xwb yog tus neeg ncaj. Tswv Ntuj thiaj cog lus nrog Nos Hes tias yuav tsis tso dej nyab ntiaj teb ntxiv.
Nos Hes yog ib tug neeg ncaj dua tas tsoom neeg ua neej nyob lub sij hawm ntawd, thiab nws nrog Tswv Ntuj sib raug zoo. Nos Hes yug tau peb tug tub, Xees, Has thiab Zas Fes. Lub ntiaj teb ua phem zuj zus rau Tswv Ntuj thiab muaj kev ua nruj ua tsiv ntau zuj zus.
Tswv Ntuj pom tias ntiaj teb phem thiab qias kawg nkaus, vim txhua tus neeg uas muaj lub cev nqaij coj tus yeeb yam phem nyob ntiaj teb. Tswv Ntuj hais rau Nos Hes tias “Lub caij uas txhua tus muaj lub cev nqaij yuav ploj mus los txog lawm. Kuv tau txiav li ntawd, vim lub ntiaj teb muaj kev phem ntau dhau los ntawm neeg los, ces kuv yuav muab lawv rhuav kom ploj ntais hauv ntiaj teb mus. Koj yuav xuas ntoo xwb cob txua ib lub nkoj. Koj yuav muab tauj los xov thiab muab roj hmab los leem sab hauv sab nraud rau.
Ntawm kuv mas kuv yuav ua kom dej loj loj los nyab lub ntiaj teb, kom txhua yam muaj txoj sia hauv lub qab ntuj ploj tas mus; tas puas tsav yam nyob hauv ntiaj teb yuav tsum tuag kom tas mus. Tiam sis kuv yuav nrog koj cog lus. Koj yuav nkag mus lawm hauv lub nkoj, koj thiab koj cov tub, koj poj niam thiab koj cov tub cov poj niam nrog koj. Tas puas tsav yam muaj txoj sia, tas puas tsav yam muaj lub cev nqaij, koj yuav muab kom tau ib hom ob tug nrog koj mus lawm hauv lub nkoj kom txuag lawv txoj sia; yuav tsum yog ib tug maum thiab ib tug txiv. Ib hom ib nkawg ntawm cov noog, ib hom ib nkawg ntawm cov tsiaj nyeg, ib hom ib nkawg ntawm tej kab ntsaum nkag hauv av yuav nrog koj nkag mus kom txuag lawv txoj sia. Ntawm koj, mas koj yuav tsum nrhiav tas puas tsav yam zoo noj coj los khaws cia kom ntau, ces thiaj li yuav muaj txhiam xws noj rau koj thiab rau lawv.” Nos Hes ua raws li ntawd; tas puas tsav yam uas Tswv Ntuj kom ua, mas nws cia li ua.
Thaum Nos Hes muaj rau pua xyoo txwm nkaus, lub ob hlis, hnub tim kaum xya, hnub ntawd, txhua tus dej txhawv phwj hauv tiv txwv tuaj, hos cov qhov rooj thaiv dej saum ntuj qhib plho rau dej nchuav nthwv sis laub sis lug nqes los.
Hnub ntawd kiag, Nos Hes thiab nws cov tub, Xees, thiab Has, thiab Zas Fes, nrog Nos Hes poj niam thiab nws cov tub peb tug poj niam, lawv nkag hauv lub nkoj. Txhua hom tsiaj qus, tsiaj nyeg, kab nkag hauv av, txhua yam tsiaj ya saum ntuj, txhua hom noog, txhua yam muaj tis nrog Nos Hes nkag mus rau hauv nws lub nkoj. Cov nyob ze ntawm Nos Hes muaj ib hom ib nkawg ntawm txhua yam tsiaj muaj lub cev nqaij thiab muaj txoj sia ua pa. Txhua nkawm muaj lub cev nqaij nkag hauv nkoj ntawd muaj ib tug txiv nrog ib tug maum raws li Tswv Ntuj tau hais.
Los nag tsaus nti nyab ntiaj teb tau plaub caug hnub, cov dej nce tuaj, ces dej tshoom lub nkoj rau saum nplaim dej. Cov dej puv zuj zus thiab ntau zuj zus tuaj, ua kom lub nkoj ntab yeev rau saum nplaim dej. Cov dej nce tuaj puv ntiaj teb, ces cov roob siab tshaj nyob hauv lub qab ntuj txawm ploj hauv qab deg tas.
Dej tseem nce kaum tsib tshim siab tshaj cov ncov roob, thiab nyab cov roob tas huv tib si. Ces txhua yam muaj lub cev nqaij txawj ua zog nyob hauv ntiaj teb tuag tas huv si; me noog, me tsiaj nyeg tsiaj qus, tas puas tsav yam muaj sia npau xi nyob hauv av, thiab tas ib tsoom tib neeg huv tib si. Dej puv tuaj nyab ntiaj teb tau ib puas tsib caug hnub txwm nkaus.
Tiam sis Tswv Ntuj nco ntsoov txog Nos Hes thiab tas cov tsiaj qus thiab tsiaj nyeg uas nrog Nos Hes nyob hauv lub nkoj, Tswv Ntuj tso ib nthwv cua tuaj tshuab lub ntiaj teb, ces cov dej thiaj nqig tas. Cov dej txhawv hauv tiv txwv txhaws tas, hos cov qhov rooj thaiv dej saum ntuj kuj kaw tas huv tib si.
Dej siv ib puas tsib caug hnub thiaj mam nqig tas. Ces thaum lub xya hli, hnub tim kaum xya hauv lub hli, lub nkoj los khuam rau saum cov ncov roob As Las Las.
Dej nqig mus txog lub kaum hli, ces hnub tim ib lub kaum hli cov ncov roob mam li tshwm tuaj.
Thaum Nos Hes muaj rau pua ib xyoos, lub ib hlis, xiab ib, dej qhuav tas hauv ntiaj teb lawm.
Lub ob hlis, hnub tim nees nkaum xya, ntiaj teb qhuav tas lawm. Ces Tswv Ntuj hais rau Nos Hes tias “Koj tawm hauv nkoj los, koj thiab koj poj niam, nrog koj cov tub thiab koj cov tub cov poj niam. Nej yuav coj tas puas tsav yam tsiaj muaj sia muaj lub cev nqaij nrog nej tawm los: cov noog, cov tsiaj txhu, tas puas tsav yam txawj nkag uas nkag hauv av huv tib si, kom txhua yam coob mus puv ntiaj teb, kom txhua yam tsim noob thiab huam vam puv hauv ntiaj teb.”
Ces Nos Hes tawm hauv nkoj los, nrog nws cov tub thiab nws poj niam thiab nws cov tub thiab lawv cov poj niam. Thiab txhua yam tsiaj, txhua yam txawj nkag, txhua yam noog, txhua yam txawj ua zog nyob hauv ntiaj teb, sawv daws tawm hauv nkoj los, nyias raws nyias npoj nyias pawg.
Tswv Ntuj foom hmoov zoo rau Nos Hes thiab rau nws cov tub, nws hais rau lawv tias “Nej yeej meem tsim noob, kav tsij huam vam mus puv lub ntiaj teb. Tas puas tsav yam tsiaj hauv ntiaj teb, puas tsav yam noog ya saum ntuj, puas tsav yam tsiaj nkag hauv av thiab puas tsav yam ntses hauv hiav txwv, sawv daws yuav hwm nej thiab ntshai nej. Lawv nyob hauv nej lub xib teg tas huv si. Txhua yam txawj ua zog thiab muaj sia yog txhiam xws rau nej noj. Kuv tseem muab cov nroj ntsuab rau nej siv thiab txhua tsav puas yam tas tib si rau nej siv.
Tshuav ib qho xwb; Nej yuav tsis txhob noj nqaij nrog nws txoj sia, uas yog cov ntshav. Vim hais tias, kuv yuav nug txog nej txhua tus cov ntshav, kuv yuav nug ntawm tsiaj thiab ntawm neeg, yuav nug ib tug txog lwm tus cov ntshav, kuv yuav nug txog tib neeg txoj sia. Leej twg txo tib neeg txoj sia, yuav raug tib neeg txo nws txoj sia. Vim hais tias Tswv Ntuj tau tsim neeg los zoo xws li nws tus ntsuj duab. Ntawm nej, mas nej yeej meem tsim noob, yeej meem huam vam coob puv ntiaj teb thiab kav ntiaj teb.”
Tswv Ntuj hais li no rau Nos Hes thiab rau nws cov tub “Ntawm no, kuv nrog nej cog lus cia, nrog nej thiab nej caj ces puag tom qab, nrog txhua yam uas muaj txoj sia nyob, nrog cov noog, cov tsiaj nyeg, nrog txhua tsav txhua hom tsiaj hauv ntiaj teb uas tawm hauv lub nkoj los, cog lus.
Kuv cog lus rau nej tias tas puas tsav yam muaj sia yuav tsis raug dej nyab rhuav siav kom tu noob ib zaug ntxiv. Yuav tsis muaj dej los nyab ntiaj teb thiab rhuav ntiaj teb ib zaug ntxiv.”
Tswv Ntuj hais tias “Lub cim no yuav qhia rau cov tiam neeg tom ntej paub tias kuv tau nrog nej thiab tas puas tsav yam muaj sia uas nrog nej muaj sia cog lus. Kuv ua zaj sawv rau saum cov huab; nws yuav ua lub cim nco txog tias kuv thiab lub ntiaj teb tau cog lus cia lawm. Thaum kuv sau cov huab los ncaj rau saum lub ntiaj teb thiab pom zaj sawv saum cov huab, ces kuv yuav nco dheev txog kuv cov lus cog rau nej thiab rau tas puas tsav yam muaj lub cev nqaij, ces dej yuav tsis hlob thiab tsis nyab tas puas tsav yam muaj sia ib zaug ntxiv. Thaum muaj zaj sawv saum cov huab, kuv yuav pom thiab yuav nco txog tias Tswv Ntuj nrog txhua tsav puas yam muaj lub cev nqaij nyob ntiaj teb tau cog lus cia ib txhis mus li.”
Tswv Ntuj hais rau Nos Hes tias “Qhov ntawd yog lub cim qhia tias kuv tau nrog txhua yam muaj lub cev nqaij nyob ntiaj teb cog lus lawm.”
Thaum dej nyab ntiaj teb tas, Nos Hes tseem nyob peb puas tsib caug xyoo ntxiv. Nos Hes lub neej ntev txog cuaj puas tsib caug xyoo. Ces nws tuag (HP 6-9).
Nyob hauv txoj kwv huam Yas Ves, qhia tias txoj kev phem yog lub txiv txi hauv neeg kev ua txhaum tuaj. Txawm tias txoj kev phem huam mus puv ntiaj teb tsis kav Tswv Ntuj tseem hlub neeg mas Tswv Ntuj thiaj cawm neeg kom dim hauv txoj kev ua phem.
Txoj kwv huam Yas Ves piav tias Tswv Ntuj zoo li tus kws puab lauj kaub, nws muab av luaj los puab ua leej tib neeg, ces Tswv Ntuj tshuab pa nqa txoj sia tuaj rau tib neeg mas tib neeg thiaj mam muaj siav. Tib neeg muaj Tswv Ntuj txoj sia mas tib neeg thiaj yog Tswv Ntuj tug thiab tib neeg thiaj yuav tau sib pab sib nres. Tswv Ntuj tsim tus poj niam los pab tus txiv neej saib xyuas txhua tsav Tswv Ntuj tau tsim los. Li ntawd, txiv neej thiab poj niam thiaj muaj tsim luaj tib yam. Vim Tswv Ntuj tsim neeg los kom neeg muaj lub siab twj lij txawj xaiv mas neeg thiaj xaiv tsis mloog Tswv Ntuj, ces kev txhaum poob los raug lub ntiaj teb; tib neeg thiaj muaj mob muaj ntsaj. Txoj kev tuag yog kev txom nyem lub qhov xaus. Txawm tias tib neeg poob ua kev txhaum qhev, tsis kav Tswv Ntuj muab kev vam khom rau neeg tias muaj ib hnub yuav muaj ib tug tuaj txhiv neeg hauv txoj kev txhaum.
Thaum lub caij Yas Ves Tswv Ntuj tsim lub ntiaj teb thiab lub ntuj, tseem tsis tau muaj ib tug me yub ntoo, ib tug nroj tsuag tuaj li, vim Yas Ves Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av. Tab sis muaj dej txhawv hauv av los ywg tas nrho daim npoo av. Yas Ves Tswv Ntuj muab ib thooj av nplaum los puab ua tib neeg. Yas Ves Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia.
Yas Ves Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj. Yas Ves Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem. Ib tug dej txhawv hauv Es Dees ntws mus ywg lub vaj. Tus dej ntawd ncau ua plaub ceg. Thawj tus dej, hu ua Dej Pis Soos. Nws chev hla thoob lub teb chaws Has Vis Las uas muaj kub. Hom kub teb chaws ntawd yog tseem kub. Kuj muaj ib hom txab ntoo zoo thiab muaj hom pob zeb dub muaj nqis nyob ntawd. Tus dej ob hu ua Dej Ntsis Hoos. Nws chev ncig lub teb chaws Kus Saws. Tus dej peb hu ua Dej Tis Nkis; nws ntws nyob As Xws teb sab hnub tuaj. Tus dej plaub yog tus Dej Aws Fas Tes.
Yas Ves Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj. Yas Ves Tswv Ntuj qhia tus txiv neej li no “Koj noj tau cov txiv txi ntawm tas txhua tsob ntoo hauv lub vaj no tib si. Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj hnub twg, mas hnub ntawd koj yuav tuag.”
Yas Ves Tswv Ntuj hais tias “Cia txiv neej nyob ib leeg mas tsis zoo. Kuv yuav ua ib tug pab nws kom phim nws.” Yas Ves Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj yuav muaj lub npe raws li tus txiv neej tis rau. Tus txiv neej tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis nws nrhiav tsis tau ib tug pab nws thiab phim nws.
Yas Ves Tswv Ntuj tso ib tug dab ntub hlob laum tus txiv neej, ces nws tsaug zog lawm. Tswv Ntuj rho nws ib tug tav tawm los, nws rov kaw lub qhov zoo li qub. Yas Ves Tswv Ntuj muab tus tav uas nws rho ntawm tus txiv neej los puab ua ib tug poj niam. Tswv Ntuj coj los rau tus txiv neej saib. Tus txiv neej nqua suab hlo tias “Zaum no, tus no yog tseem txha ntawm kuv txha thiab tseem nqaij ntawm kuv nqaij tiag! Tus no yuav hu ua ‘poj niam,’ vim tus no tawm ntawm txiv neej los!”
Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb. Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd ib leeg tsis txaj muag rau ib leeg.
Tus nab yog tus ntse tshaj tas txhua hom tsiaj Yas Ves Tswv Ntuj tau tsim los nyob nruab nrag. Nab hais rau tus poj niam tias “Li ntawd, Tswv Ntuj hais tias neb yuav tsis txhob noj txhua yam txiv ntoo hauv lub vaj no puas yog?”
Tus poj niam teb rau tus nab tias “Wb noj tau cov txiv txi saum cov ntoo hauv lub vaj no tib si. Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias “Neb tsis txhob noj, tsis txhob kov, yog neb noj neb kov, mas neb yuav tuag.”
Tus nab teb ntua tus poj niam tias “Tsis muaj li ntawd ib zaug! Neb yuav tsis tuag. Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.”
Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua.
Thaum cua tuaj ntxiag, nkawd hnov Yas Ves Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim Yas Ves Tswv Ntuj hauv cov ntoo nyob hauv lub vaj. Yas Ves Tswv Ntuj hu tus txiv neej hais tias “Koj nyob qhov twg?”
Tus txiv neej teb tias “Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim.”
Tswv Ntuj rov hais ntxiv tias “Leej twg qhia koj tias koj liab qab? Yog koj noj lub txiv uas kuv txwv tsis pub noj lawm puas yog?”
Tus txiv neej teb tias “Yog tus poj niam uas koj tso nyob ze kuv, muab lub txiv rau kuv, ces kuv thiaj noj!”
Yas Ves Tswv Ntuj hais rau tus poj niam tias “Koj ua dab tsi li ntawd?”
Tus poj niam teb tias “Yog niag nab ntxias kuv, kuv thiaj noj.” Ces Yas Ves Tswv Ntuj hais rau tus nab hais tias “Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws.”
Tswv Ntuj hais rau tus poj niam hais tias “Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj.”
Tswv Ntuj hais rau tus txiv neej hais tias “Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj! Koj yuav siv zog khwv tas koj lub neej koj thiaj tau noj. Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb. Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj.”
Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.
Yas Ves Tswv Ntuj muab tawv los ua tsoos rau tus txiv neej thiab nws poj niam hnav. Thiab Yas Ves Tswv Ntuj hais tias “Zaum no tib neeg zoo li peb lawm, nws paub qhov phem thiab qhov zoo. Yuav tsis pub kom nws cev tes mus de tau tsob txiv muaj txoj sia los noj ntxiv, tsam nws muaj txoj sia nyob mus li.”
Yas Ves Tswv Ntuj thiaj tshem neeg tawm hauv lub vaj Es Dees, kom neeg mus cog cov av uas muab los puab nws. Tswv Ntuj ntiab tib neeg tawm, nws tso ib co Tshiab Kes Lus Npis zov lub vaj Es Dees. Tswv Ntuj tsa ib rab ntaj nplaim taws thaiv txoj kev mus txog tus ntoo muaj txoj sia (HP 2-3).
Thaum Kas Ees muab As Npes tua ua rau kev txhaum ri mus thoob ntiaj teb. Thaum tib neeg yug tau ntxhais coob, mas Tswv Ntuj cov tub pom tias tib neeg cov ntxhais zoo ntxim lawv siab, ces lawv mus yuav tib neeg cov ntxhais los ua lawv poj niam. Tswv Ntuj thiaj tso dej nyab ntiaj teb.
As Das paub nws poj niam. Ces tus poj niam xeeb tub thiab yug tau Kas Ees. Nws hais tias “Kuv tau ib tug tub ntawm Yas Ves los.” Nws kuj yug tau As Npes, yog Kas Ees tus kwv. As Npes hlob, nws ua ib tug tub yug tsiaj hos Kas Ees ua liaj ua teb. Ntev tom qab, Kas Ees txawm muab nws cov qoob los txi rau Yas Ves. Hos As Npes, nws kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si.
Yas Ves zoo siab rau As Npes, ces nws txais As Npes cov txim. Tab sis Yas Ves tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab. Yas Ves hais rau Kas Ees tias “Vim li cas koj thiaj npau taws thiab ua ntsej muag dub nciab li ko? Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.”
Tab sis muaj ib zaug, Kas Ees hais rau nws tus kwv As Npes tias “Wb mus yos.” Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua.
Yas Ves nug Kas Ees hais tias “Koj tus kwv As Npes nyob qhov twg?” Kas Ees teb tias “Kuv tsis paub. Kuv puas yog tus zov rawv kuv tus kwv?”
Yas Ves rov hais tias “Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv! Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. Yog koj ua teb, av yuav tsis txi qoob rau koj lawm. Koj yuav ua neeg loj leeb ncig ntiaj teb.”
Kas Ees hais rau Yas Ves tias “Kuv lub txim hnyav dhau, kuv ris tsis taus. Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb!”
Yas Ves teb tias “Yog leej twg tua Kas Ees mas yuav muaj tus ua pauj rau nws xya zaus.” Ces Yas Ves ntaus ib lub cim rau Kas Ees kom thawj tug neeg ntsib nws txhob muab nws tua. Kas Ees thiaj txav mus deb ntawm Yas Ves xub ntiag. Nws mus nyob lub teb chaws Nos Daws, nyob ntawm lub vaj Es Dees, sab hnub tuaj.
As Das paub nws poj niam, ces nws poj niam yug tau ib tug tub ntxiv, thiab tis nws npe hu ua Xes Thes, nws hais tias “Tswv Ntuj pub dua ib tug tub rau kuv los sawv As Npes chaw, vim Kas Ees muab nws tua lawm.” Xes Thes kuj yug tau ib tug tub, hu ua Es Nos. Nws yog thawj tus neeg pib teev Yas Ves lub npe.
Thaum tib neeg pib coob tuaj nyob hauv ntiaj teb lawm, thiab tib neeg yug tau ntxhais coob lawm, mas Tswv Ntuj cov tub pom hais tias tib neeg cov ntxhais zoo ntxim lawv siab, ces lawv mus yuav tas nrho cov uas lawv nyiam coj los ua poj niam.
Yas Ves hais tias “Kuv lub tswv yim yuav tsis nyob hauv tib neeg, yog vim tib neeg yog ib lub cev nqaij. Vim nws yog ib lub cev nqaij, mas nws lub neej yuav ntev ib puas nees nkaum xyoo xwb.”
Thaum ntawd, cov neeg Nes Fis Lis twb nyob lawm, (lawv kuj tseem nyob yav tom qab ntxiv thiab), yog lub sij hawm uas Tswv Ntuj cov tub yuav tib neeg cov ntxhais coj los yug me nyuam rau lawv, ces thiaj tau cov neeg muaj peev xwm thiab muaj koob meej nto lug txheej thaud. Yas Ves pom hais tias nyob ntiaj teb, neeg siab phem tas nrho, thiab neeg lub siab tsuas xav qhov phem tas hnub xwb. Yas Ves khuv xim hais tias nws tau tsim neeg los nyob ntiaj teb. Yas Ves tu siab. Ces Yas Ves hais tias “Kuv yuav muab cov neeg uas kuv tau tsim ntawd rhuav kom ploj tas saum daim npoo av, tsis hais neeg, los tsiaj nyeg, kab ntsaum los noog ya saum ntuj huv tib si, vim kuv khuv xim tias kuv tau tsim lawv los.”
Tiam sis Nos Hes yog ib tug neeg zoo xis Yas Ves siab. Yas Ves hais rau Nos Hes tias “Koj nkag mus hauv lub nkoj, koj thiab tas nrho koj tsev neeg, vim nyob hauv tiam neeg no, kuv tsuas pom koj ib leeg xwb thiaj li ncaj ncees. Ntawm tas nrho cov tsiaj huv, koj yuav khaws xya nkawm, tus txiv nrog tus maum, ntawm cov tsiaj tsis huv, koj yuav khaws ib nkawg, ib tug txiv thiab ib tug maum. Hos cov noog ya saum ntuj, koj khaws xya nkawm, ib tug lau nrog tus poj, kom tau ua noob rau ntiaj teb. Tshuav xya hnub ntxiv xwb kuv yuav tso nag los nyab ntiaj teb plaub caug hnub plaub caug hmo, kuv yuav rhuav tas puas tsav yam kuv tau tsim los kom ploj ntais saum daim npoo av mus.”
Nos Hes ua tas puas tsav yam raws li Yas Ves kom nws ua. Nag los tsaus nti tau plaub caug hnub thiab plaub caug hmo rau ntiaj teb. Tas puas tsav yam ua pa ntawm qhov ntswg, los yog tas puas tsav yam nyob saum nruab nqhuab tuag tas. Tas puas tsav yam muaj sia nyob saum npoo av, tsis hais tib neeg los tsiaj txhu, tej kab thiab tej noog saum ntuj, sawv daws ploj hauv ntiaj teb tas huv si, tsuas tshuav Nos Hes thiab puas tsav yam uas nrog nws nyob hauv nkoj xwb.
Nos Hes tos plaub caug hnub, ces nws qhib lub qhov rai uas nws tau ua rau ntawm lub nkoj, nws tso tus uab lag tawm mus. Uab lag ya mus ya los, tos kom dej qhuav hauv ntiaj teb tso. Ces Nos Hes tso tus nquab tawm ntawm nws mus xyuas saib dej puas tau nqhuab hauv av. Tiam sis tus nquab nrhiav tsis tau chaw tsaws li, ces nquab ya rov los rau ntawm lub nkoj, vim dej tseem nyab cov av hauv ntiaj teb thoob plaws. Nos Hes thiaj li xyab tes mus txais tus nquab thiab coj nquab los nrog nws nyob hauv lub nkoj. Nws tos tau xya hnub ntxiv, nws rov qab tso tus nquab tawm ntawm lub nkoj mus dua. Thaum tsaus ntuj, nquab ya rov los, ntawm nws kaus ncauj muaj ib tug ntsis txiv ntoo roj uas tus nquab nyuam qhuav de tshiab tshiab. Ces Nos Hes paub tias dej nqig lawm. Nws rov tos tau xya hnub ntxiv, nws mam rov tso tus nquab tawm mus dua. Tus nquab tsis rov los ntxiv lawm.
Ces Nos Hes tsa ib lub thaj txi Yas Ves. Nws muab txhua yam tsiaj huv thiab txhua yam noog huv los hlawv txi Ntuj saum lub thaj. Thaum Yas Ves hnov cov pa ncho tsw qab, Yas Ves hais hauv nws nruab siab tias “Txawm tias yog tim tib neeg, los kuv yuav tsis foom phem rau av ib zaug ntxiv lawm, vim tias neeg lub siab yeej xeeb tau phem puag thaum yau los. Thiab kuv yuav tsis ua kom txhua yam muaj sia tu noob li kuv tau ua no ib zaug ntxiv. Tsuav yog tseem muaj lub ntiaj teb, mas yuav muaj caij cog qoob thiab caij sau qoob, yuav muaj txias thiab muaj kub, yuav muaj caij sov caij no, yuav muaj nruab hnub thiab muaj hmo ntuj mus li” (HP 4, 6: 1-8, 7: 1-5, 8: 6-12+ 20-22).
Txoj kwv huam Yas Ves tseem piav txog tus pej thuam Npas Npes; yog ib zag ntuas sawv daws kom txhob ua neeg muab hlob mas ua neej nyob thiaj tsis ntxhov quav niab.
Thaum ntawd, tas ntiaj teb sawv daws hais ib xeem lus xwb thiab siv ib cov lus xwb. Thaum lawv tsiv sab toob fab los mus, lawv los txog ib lub tiaj nyob hauv teb chaws Sis Nes As, ces lawv los nyob ntawd. Lawv sib hu tias “Tuaj peb puab thwv cib, peb muab ci hauv hluav taws!”
Ces lawv siv cov thwv cib ntawd los ua pob zeb txhim tsev thiab siv roj hmab dub los leem. Lawv hais tias “Tuaj peb txhim ib lub nroog rau peb thiab ib tug pej thuam kom lub ntsis siab siab mus txog saum ntuj, ces peb lub npe yuav nrov thiab peb thiaj li tsis sib tawg mus nyob thoob ntiaj teb.”
Yas Ves nqes los xyuas lub nroog thiab tus pej thuam uas neeg tau tsa sawv. Ces Yas Ves hais tias “Ntsia saib, lawv yog ib haiv neeg thiab hais ib xeem lus xwb, ces lawv muaj peev xwm kawg, qhov no tsuas yog qhov lawv nyuam qhuav pib ua xwb, txij no mus yog lawv xav ua dab tsi thaum twg ces yuav tsis muaj ib yam uas lawv yuav ua tsis tau lawm. Mus, peb sim nqes mus xyuas saib. Peb yuav ua kom lawv hais lus tsis sib to taub, ces lawv yuav tsis sib haum ntxiv lawm.”
Yas Ves ua kom lawv sib tawg mus nyob thoob ntiaj teb ces lawv tso tseg tsis txhim lub nroog ntxiv. Vim li ntawd thiaj hu ua pej thuam Npas Npes, vim yog nyob ntawd, Yas Ves ua kom ntiaj teb neeg hais lus tsis sib to taub, thiab yog nyob ntawd, Yas Ves ua kom neeg tawg mus nyob thoob ntiaj teb (HP 11: 1-9).
Ntu 2. Tus yawg koob Has Nplas Has (HP 12-25).
Ntu no piav txog Has Nplas Has ntseeg txog Tswv Ntuj mas nws tso kwv tij thiab vaj tse tseg, ces nws mus rau lub teb chaws Tswv Ntuj cog lus tias yuav pub ua nws tug. Tswv Ntuj tseem hais rau Has Nplas Has tias nws cov xeeb ntxwv yuav coob li cov hnub qub saum ntuj, lawv yuav ua ib haiv neeg loj thiab coj txoj hmoov zoo mus rau txhua haiv neeg. Dhau ntawm Has Nplas Has lawm, tseem piav txog His Xas Has, Es Xas Ws thiab Yas Kos.
Phau ntawv Hauv Paus piav tias chiv thawj tsoom His Xas Lais tus yawg koob hu ua Has Nplas. Tswv Ntuj tseem tsis tau tis npe tshiab rau Has Nplas kom nws hu ua Has Nplas Has. Chiv thawj Has Nplas nyob tsis deb tsis ze ntawm lub nroog Us nyob Kas Ntes teb. Lub nroog Us thaum ub yog ib lub nroog loj muaj vaj. Has Nplas txiv nrog nws cov tub thiab nrog nws cov xeeb ntxwv xub tsiv mus nyob Has Laas uas nyob Is Las qaum teb. Has Nplas txiv tuag nyob Has Laas. Yog 1800 xyoo ua Yes Xus ntej. Thaum ntawd Has Nplas tseem teev nws txiv Tes Las cov dab qhuas. Yog thaum Tes Las tuag tas lawm mas Has Nplas thiaj hnov Tswv Ntuj lub suab tshoj nws kom nws txiav siab teev Tswv Ntuj tib leeg xwb.
Tswv Ntuj hu Has Nplas thiab hais rau Has Nplas tias “Koj tso koj lub teb chaws no tseg, tso koj cov kwv tij neej tsa, tso koj txiv tsev neeg tseg. Koj mus nyob lub teb chaws uas kuv yuav qhia rau koj. Kuv yuav koj los ua ib haiv neeg loj. Kuv yuav pub ib txog hmoov zoo rau koj. Kuv yuav ua kom koj lub npe nto moo loj. Tas tsoom sid yuav muab koj lub npe los sib foom hmoov zoo. Kuv yuav foom hmoov zoo rau koj. Cov neeg tsawm koj, kuv yuav saib lawv yog neeg tsis zoo.”
Has Nplas thiaj sawv kev mus, Los kuj nrog nws sawv kev mus. Thaum Has Nplas tso Has Laas tseg nws lub hnub nyoog muaj 75 xyoos lawm. Has Nplas coj nws poj niam Xas Lais thiab nws tus kwv tus tub hu ua Los nrog nws mus. Nws sau nws lub cuab tam uas nws tau tsim nyob Has Laas los. Lawv sawv daws sawv kev mus txog Kas Nas Has teb. Has Nplas hla lub teb chaws mus txog qhov chaw ntshiab hu ua Xis Kes, nyob ze tus ntoo faj khaum. Thaum ntawd cov neeg haiv Kas Nas Has nyob hauv lub teb chaws.
Tswv Ntuj yees tawm tuaj rau Has Nplas pom thiab hais rau nws tis “Kuv yuav muab lub teb chaws no rau koj tsoom xeev ntxwv.”
Ces Has Nplas ua ib lub thaj txi Tswv Ntuj nyob Xis Kes. Has Nplas tseem hla mus tim lub roob nyob Npes Thes toob fab. Nws tsa nws lub tsev tsam phooj rau ntawd. Npes Thes nyob rau xib fab thiab Ais nyob rau toob fab. Has Nplas ua ib lub thaj txiv Ntuj. Thiab nws tuav txog Tswv Ntuj lub npe. Has Nplas tshais chaw zuj zus qhov mus rau qhov nyob ncig Npes Thes.
Has Nplas nplua nuj kawg, nws muaj tsiaj txhu muaj nyiaj muaj kub ntau kawg. Los uas nrog Has Nplas nraim, nws kuj muaj tsiaj me tsiaj loj tib si, nws kuj muaj nws cov tsev tsam phooj thiab. Lub teb chaws txais nkawd ob leeg nyob ua ke tsis tau, nkawd lub cuab tam loj dhau. Muaj ib zaug, cov tub txib zov Has Nplas cov tsiaj nrog cov tub txib zov Los tej tsiaj sib ceg ib cuam. Li ntawd, Has Nplas thiaj hais rau los tias “Wb cov tub txib zov tsiaj kuj yuav tsis txhob muaj lus sib ceg ntxiv, vim wb yog kwv tij. Koj ntsia saib tas lub teb chaws nyob ntawm koj xub ntiag. Koj ncaim ntawm kuv mog! Yog koj yuav lub nyob sab laug mas kuv yuav lub nyob sab xis.”
Los tsa muag ntsia lub hav tiaj Yos Las Das. Muaj dej ntws tas qhov txhia chaw. Thaum ntawd Tswv Ntuj tseem tsis tau rhuav Xos Dos Mas thiab Nkos Mos Las. Los xaiv tas lub hav tiaj Yos Las Das ua nws tug.
Cov neeg nyob Xos Dos Mas thiab Nkos Mos Las yog ib co neeg ua phem tas nrho. Lawv ua kam txhaum ntau zaus nyob ntawm Tswv Ntuj xub ntiag.
Thaum Los ncaim ntawm Has Nplas tas lawm, Tswv Ntuj hais rau Has Nplas tias “Koj tsa muag ntsia txij qhov chaw koj nyob no mus txog pej fab thiab naj fab, mus rau toob fab thiab xib fab. Tas lub teb chaws uas koj pom no mas kuv yuav muab rau koj thiab rau koj tsoom xeeb ntxwv mus li. Kuv yuav ua kom koj tsoom xeeb zeej xeeb ntxwv lawv coob ib yam ntiaj teb cov plua av. Thaum neeg suav tau ntiaj teb cov tsig av, mas neeg thiaj yuav suav tau koj cov xeeb zeej zeeb ntxwv. Koj sawv tsees mog! Koj mus ncig teb ncig chaw, vim kuv yuav muab los pub rau koj tib si.”
Ces Has Nplas tso nws cov tsev tsam phooj nyob ib ncig tus ntoo faj khaum Mas Nples, nws mus nyob tom Hes Nploos. Nyob ntawd, nws txhim ib lub thaj txi Ntuj.
Thaum ntawd Has Nplas muaj 86 xyoo, Has Nplas tus poj niam hu ua Xas Lais tsis yug tub ki rau Has Nplas. Xas Lais muaj ib tug ntxhais txib Hais Nkws Tos hu ua Has Nkas. Xas Lais pub Has Nkas rau Has Nplas ua poj niam, ces Has Nkas xeeb tub. Has Nkas yug ib tug tub rau Has Nplas, Has Nplas tis npe rau tus tub hu ua Is Mas Es.
Muaj ib hnub Tswv Ntuj Lo Lus nrov tuaj rau Has Nplas mloog zoo li no tias “Has Nplas, koj txhob txhawj. Kuv yog daim leem phiaj thaiv koj. Koj yuav txais koob haum loj tas nrho.”
Has Nplas teb tias “Kuv tus Huab Tais, koj yuav muab dab tsi los pub rau kuv? Kuv twb yuav dua mus, kuv tsis muaj ib tug tub ki li! Yog ib tug tub txib nyob hauv kuv tsev neeg yuav txais kuv lub cuab tam.” Ces Tswv Ntuj Lo Lus no nrov tuaj rau Has Nplas tias “Tsis yog ib tug tub txib yuav txais koj lub cuab tam. Yog ib tug yug ntawm koj roj ntsha los.”
Tswv Ntuj coj Has Nplas mus nraum zoov thiab hais rau nws tias “Koj tsa muag ntsia saum ntuj. Yog koj suav tau cov hnub qub mas koj suav mog! Koj tsoom xeeb zeej xeeb ntxwv yuav coob npaum no.” Has Nplas ntseeg Tswv Ntuj. Tswv Ntuj hais rau Has Nplas tias “Kuv yog Tswv Ntuj. Yog kuv coj koj tawm ntawm Us nyob Kas Ntes teb tuaj vim kuv xav muab lub teb chaws no rau koj ua koj tug.”
Has Nplas teb tias “Kuv tus Huab Tais Tswv Ntuj, yuav muaj dab tsi tshwm sim kom kuv thiaj yuav paub tias lub teb chaws no yog kuv tug?”
Tswv Ntuj hais tias “Koj mus cab ib tug maum nyuj muaj peb xyoos, ib tug maum tshis muaj peb xyoos, ib tug poj nquab thiab ib tug me nyuam nquab los rau kuv.” Has Nplas coj cov tsiaj ntawd tib si los rau Tswv Ntuj. Has Nplas muab cov tsiaj ntawd los phua ua ob sab tib si, nws tso ib phab rau sab xis ib sab rau phab laug. Nws tsis phua cov noog.
Thaum hnub poob qho tsaus ntuj nti lawm, mas muaj ib cub tawg ncho pa thiab ib teg tsau hla hauv cov tsiaj uas nyob ob sab kis nruab nrab mus. Hnub ntawd, Tswv Ntuj nrog Has Nplas cog lus zoo li no “Tas lub teb chaws no, txij tus niam dej Hais Nkws Tos teb mus txog tus niam dej loj Aws Fas Tes, mas kuv yuav muab rau koj tsoom xeeb zeej xeeb ntxwv.”
Thaum Has Nplas lub hnub nyoog muaj 99 xyoos lawm, Tswv Ntuj yees tawm tuaj rau Has Nplas pom xyeem thiab hais rau nws tias “Kuv yog Es Sas Dais. Koj yuav mus nyob ntawm kuv xub ntiag. Koj yuav ua tus neeg ntshiab. Kuv yuav ua kom koj huam vam tas nrho.”
Has Nplas kim caug hauv av pe. Tswv Ntuj hais rau nws tias “Kuv nrog koj cog lus zoo li no; koj yuav ua txiv rau ntau haiv neeg kawg. Txij no mus, luag yuav tsis hu koj ua Has Nplas ntxiv. Koj lub npe yuav hu ua ‘Has Nplas Has’, vim kuv tsa koj ua txiv rau ntau haiv neeg. Ib co vaj yuav tawm hauv koj los. Kuv cog ib lo lus nyob mus li tias kuv yog koj tus Tswv Ntuj thiab kuv yog koj haiv neeg lawv koj qab tus Tswv Ntuj.”
Tswv Ntuj hais rau Has Nplas Has tias “Koj yuav coj lo lus kuv nrog koj cog. Lo lus cog uas koj thiab koj haiv neeg yuav coj mas yog zoo li no; nej cov txiv neej tas huv si yuav ua lub Cim Txiav.”
Tswv Ntuj tseem hais rau Has Nplas Has tias “Koj tus poj niam Xas Lais mas koj yuav tsis hu nws ua Xas Lais ntxiv. Koj yuav tis nws npe hu ua Xas Las. Kuv yuav foom hmoov zoo rau nws. Kuv yuav muab ib tug tub yug ntawm nws los rau koj. Tej tus vaj thiab tej haiv neeg yuav tawm ntawm Xas Las los.”
Has Nplas Has kim caug pe ntsej muag khoov ti av. Nws tuaj dab ros vim nws xav hauv siab tias “Ib tug tub yuav yug ntawm ib tug txiv neej muaj 100 xyoo los puas tau? Xas Las, nws muaj 90 xyoo, nws yuav xeeb tub puas tau?”
Tswv Ntuj hais ntxiv tias “Koj tus poj niam Xas Las yuav muaj ib tug tub rau koj. Koj yuav tis nws npe hu ua His Xas Has. Koj tau thov kuv rau Is Mas Es uas yog koj tus ntxhais txib tus me nyuam mas kuv mloog koj. Kuv foom lus zoo rau Is Mas Es. Kuv yuav ua kom nws huam vam ntau. Tab sis lo lus uas hnub no kuv cog mas yog cog rau His Xas Has, uas rov txog lwm xyoo Xas Las yuav yug los rau koj.”
Lub npe ‘Has Nplas’ txhais tias ‘Txiv nto moo.’ Lub npe ‘Has Nplas Has’ txhais tias ‘Tsoom neeg coob leej txiv.’ Has Nplas Has poj niam thawj lub npe hu ua ‘Xas Lais’ txhais tias ‘Poj Vaj.’ Hos lub npe tshiab ‘Xas Las’ txhais tias ‘Cov vaj leej niam.’
Muaj ib hnub, Has Nplas Has zaum nyob ntawm qhov rooj tsev tsam phooj nyob ntawm tsob ntoo faj khaum nyob Mas Nples. Has Nplas Has tsa muag ntsia, nws pom dheev peb tug txiv neej sawv ntsug nyob ntawm nws xub ntiag. Nws pom lawv, nws cia li khiav ntawm lub qhov rooj mus cuag lawv, nws pe lawv. Has Nplas Has hais tias “Kuv tus Huab Tais, kuv thov koj! Yog koj saib kuv zoo mas koj tsis txhob hla mus deb tsis tau tuaj so hauv koj tus tub txib tsev. Peb yuav nqa dej rau nej ntxuav taw; nej yuav tso cev pw hauv tsob qab ntoo no. Kuv yuav mus nqa ib thooj mov mog los, nej yuav noj kom nej rov muaj zog, ces nej mam yuav mus ntxiv.” Lawv teb tias “Koj ua raws li koj nyuam qhuav hais mog!”
Has Nplas Has khiav mus cuag Xas Las nyob hauv tsev tsam phooj. Nws hais tias “Koj tsuag tsaug mus muab peb tawb hmoov nplej, koj muab do, koj ua ib co ncuav.” Ces Has Nplas Has khiav mus tom nkuaj tsiaj, nws ntes ib tug xyuas nyuj mos mos thiab qab, nws muab rau tus tub txib kom tsuag tsuag npaj ua noj.
Ua li tas, mas nws muab mis tshis, muab tus xyuas nyuj uas nws npaj tas lawm los tso rau ntawm peb tug txiv neej xub ntiag. Nws sawv ntsug nyob ze lawv, nyob hauv tsob qab ntoo. Lawv thiaj noj.
Lawv nug nws tias “Koj poj niam Xas Las nyob qhov twg?” Has Nplas Has teb tias “Nws nyob hauv tsev tsam phooj.” Tus qhua hais tias “Lwm xyoo kuv yuav rov qab tuaj ntawm no, thiab thaum ntawd koj poj niam Xas Las yuav muaj ib tug tub.”
Xas Las nyob ntawm qhov rooj tsev tsam phooj mloog; lub tsev nyob sab ntawm tus qhua nraub qaum. Has Nplas Has thiab Xas Las nkawd twb laus lawm. Xas Las lub cev xeeb tsis taus tub ntev xyoo los lawm. Xas Las thiaj luag twj ywm tias “Nyem no, kuv lub cev qub lawm; kuv yuav rov qab paub txoj kev zoo puas tau! Kuv tus txiv kuj yog ib tug neeg laus laus thiab!”
Tab sis Tswv Ntuj hais rau Has Nplas Has tias “Vim li cas Xas Las luag zoo li ntawd? Vim li cas nws thiaj li hais tias nws laus laus lawm nws yuav xeeb tub tsis tau? Tsis muaj ib yam hwj huam yees ntxwv loj dhau uas Tswv Ntuj yuav ua tsis tau. Lwm xyoo rov txog lub caij no, kuv yuav rov qab tuaj ntawm no, Xas Las yuav muaj ib tug tub.” Ces Xas Las tsis lees, nws hais tias “Kuv tsis tau luag.”
Ib xyoos tom qab Xas Las xeeb tub, nws yug tau tus tub ces Has Nplas Has muab tis npe hu ua ‘His Xas Has’ txhais tias ‘Luag ntxhi’, vim Xas Las tau hais tias “Tswv Ntuj tau pub kom kuv muaj chaw zoo siab luag ntxhi. Txhua leej uas tau hnov txog kuv yuav luag ntxhi thiab.” Thaum ntawd, Has Nplas Has muaj 100 xyoo.
Muaj ib hnub Tswv Ntuj xav sim Has Nplas Has siab. Tswv Ntuj hu Has Nplas Has tias “Has Nplas Has! Has Nplas Has!” Has Nplas Has teb tias “Kuv nyob ntawm no!”
Tswv Ntuj hais tias “Koj yuam His Xas Has, koj tus tub twm zeej uas koj nyiam kawg. Koj coj nws mus txog Mos Lis Yas teb. Nyob ntawd koj yuav muab koj tus tub ua txim txi rau kuv saum ib lub roob uas kuv yuav qhia rau koj.”
Has Nplas Has nyob xyaw haiv neeg Kas Nas Has. Nws pom cov neeg Kas Nas Has, thaum lawv xav thov ib yam loj ntawm lawv cov dab mas lawv muab lawv ib tug tub los tua txi rau lawv cov dab. Has Nplas Has pom cov Kas Nas Has ua li ntawd ces nws xav hauv nws nruab siab tias yog Tswv Ntuj hais kom nws muab tus tub tua txi rau Tswv Ntuj. Has Nplas Has tso siab tias Tswv Ntuj yuav tsis txawj dag rau nws, Tswv Ntuj tau cog lus tias Has Nplas Has yuav tsim ib haiv neeg loj. Has Nplas Has ntseeg tas siab, ces Has Nplas Has thiaj coj nws tus tub mus txog lub roob uas Tswv Ntuj qhia rau nws.
Has Nplas Has muab cov taws yuav cia hlawv thaj txi Ntuj los rau His Xas Has kwv. Nws nqa hluav taws thiab nqa riam. Nkawd ob leeg mus ua ke. His Xas Has nug nws txiv tias “Txiv.” Has Nplas Has teb tias “Tub, koj xav hais dab tsi?”
His Xas Has hais ntxiv tias “Kuv pom cov hluav taws, pom cov taws rauv, tab sis tus yaj uas yuav txi rau Ntuj mas nws nyob qhov twg?” Has Nplas Has teb tias “Me tub, Tswv Ntuj yuav npaj ib tug yaj rau wb hlawv.”
Ces nkawd ua ke mus ntxiv. Thaum nkawd tuaj txog thaj chaw uas Tswv Ntuj qhia rau Nkawd, mas Has Nplas Has tsa ib lub thaj, nws tso ib co taws rau saum lub thaj. Nws muab nws tus tub pav tes pav taw thiab tso saum cov taws saum lub thaj txi Ntuj. Has Nplas Has tsa tes nthos nws rab riam yuav tua nws tus tub los txi rau Ntuj. Tab sis Tswv Ntuj tus Tshiab nyob saum ntuj hu Has Nplas Has tias “Has Nplas Has! Has Nplas Has!” Has Nplas Has teb tias “Kuv nyob ntawm no!”
Tus Tshiab hais tias “Koj txhob tsa tes tua tus me nyuam. Koj txhob ua yam twg phem rau nws! Nyem no, kuv paub tias koj hwm Tswv Ntuj. Koj tsis yig, koj twb yuav muab koj tus tub twm zeej rau Tswv Ntuj txais.” Ces Has Nplas Has paub tias tib neeg tsis muaj cai muab tib neeg tua. Cov haiv neeg uas nyob ib ncig ntawm Has Nplas Has lawv xav tias txij thaum lawv ua tswv tsev mas lawv muaj cai tua cov neeg nyob hauv lawv tsev neeg. Yam li lawv muaj cai muab lawv tus poj niam tua, los lawv muaj cai muab lawv tej tug me nyuam tua.
Nyem no Tswv Ntuj tsis kheev kom Has Nplas Has muab nws tus tub tua, ces Has Nplas Has paub tias Tswv Ntuj tsis pub kom ib tug tswv tsev muab nws ib tug neeg tua. Neeg txoj sia yog Tswv Ntuj tug. Tus pub kom neeg muaj txoj sia yog Tswv Ntuj, ces Tswv Ntuj tib leeg thiaj muaj cai pub txoj sia los thau txoj sia xwb.
Has Nplas Has tsa muag ntsia pom ib tug laug tshis uas ob tug kub daig ib tsob pos. Has Nplas Has mus ntes tus tshis los hlawv hloov nws tus tub chaw. Tswv Ntuj tus Tshiab nyob saum ntuj rov hu Has Nplas Has dua tias “Kuv cog lus ruaj. Yog Tswv Ntuj Lo Lus; vim koj tau ua zoo li ntawd, yam li koj tsis yig, koj twb yuav muab koj tus tub twm zeej rau kuv mas kuv yuav pub txoj hmoov zoo loj rau koj. Kuv yuav ua kom koj tsoom xeeb zeej xeeb ntxwv coob ib yam li cov hnub qub nyob saum ntuj, ib yam li cov xuab zeb nyob ntawm ntug hiav txwv. Koj tsoom xeeb zeej xeeb ntxwv yuav yeej cov yeeb ncuab cov rooj loog. Tas txhia haiv neeg nyob ntiaj teb no yuav tuav txog koj tsoom xeeb zeej xeeb ntxwv lub npe los sib foom hmoov zoo. Kuv ua kom muaj zoo li ntawd los pauj rau koj vim koj mloog kuv lus.”
Txoj kwv huam piav txog Has Nplas Has txi Ntuj no qhia ntau yam rau peb paub tias peb tsis yog neeg txoj sia tus tswv, Tswv Ntuj tib leeg xwb thiaj yog neeg txoj sia tus tswv. Li ntawd, peb tsis muaj cai yuav muab lwm tus neeg txoj sia txo.
Tswv Ntuj ua kom Has Nplas Has pom ib tug laug tshis uas ob tug kub daig ntawm ib tsob pos. Has Nplas Has muab tus tshis los tua thiab hlawv rau Tswv Ntuj txais. Tswv Ntuj xav qhia haiv His Xas Lais tias yog lawv xav ua ib thaj txi Ntuj mas lawv muab ib tug tsiaj los tua, txhob muab neeg tua.
Nyem no, cov neeg ntseeg txog Yes Xus paub tias Tswv Ntuj tsis xav yuav cov tsiaj txhu los ua thaj txi Ntuj thiab. Vim Yes Xus tau ua thaj txi Ntuj muaj nqis tshaj cov. Nws tau rov muab nws los txi rau Leej Txiv nyob saum Ntoo Cuam, ces nyem no cov ntseeg txog Yes Xus xav thov dab tsi ntawm Leej Txiv Tswv Ntuj, mas lawv vam txog Yes Xus thaj txi Ntuj. Tsis muaj lwm thaj txi Ntuj uas Tswv Ntuj zoo siab txais. Lawv yuav tuav txog Yes Xus lub npe los thov Huab Tais Leej Txiv, ces Leej Txiv pub nws tej txiaj ntsim rau lawv.
Peb tsoom Hmoob txhob tua qaib, tua tshis, tua npua los tua nyuj los cev rau Tswv Ntuj. Tswv Ntuj tsis yuav. Tswv Ntuj tsuas yuav peb lub siab npuab nws Leej Tub Yes Xus tuag nyob saum Ntoo Cuam thiab sawv rov qab los. Peb yuav tsum nco ntsoov qhov no:

“Yog peb xav ua Tswv Ntuj tsaug los xav thov Tswv Ntuj mas Tswv Ntuj tsis yuav peb cov tsiaj txhu li. Peb hu peb tsoom kwv tij neej tsa los nrog peb ua Tswv Ntuj tsaug los thov Tswv Ntuj, peb tua ib tug npua los pub rau peb cov neeg noj kuj tau, peb thiaj tau ua ib roog qav lom zem, tab sis peb txhob muab peb tus tsiaj los cev rau Tswv Ntuj; yog peb ua li ntawd mas peb txhaum rau Tswv Ntuj, vim Tswv Ntuj tsuas saib tib thaj txi Ntuj muaj nqis, yog thaj txi Ntuj uas nws Leej Tub cev rau nws nyob saum Ntoo Cuam xwb.”

Li ntawd, thaum peb hu luag tuaj nrog peb noj ib tug tsiaj mas peb nrog luag sawv daws zaum ntawm rooj mov hais ib zag thov Tswv Ntuj pab. Peb tuav txog Yes Xus lub npe ces Tswv Ntuj txais cov lus uas peb cev rau nws. Tswv Ntuj txais cov lus uas nws Leej Tub pab peb cev rau nws.
Xas Las ua neej txog 127 xyoo, ces nws tuag nyob Hes Nploos, nyob teb chaws Kas Nas Has. Has Nplas Has muas daim teb uas nyob Mas Pes Las nyob ze ntawm Mas Nples. Daim teb thiab lub qhov ntxa nyob ntawd thiab tas cov ntoo nyob hauv daim teb huv tib si yog Has Nplas Has tug lawm. Ces Has Nplas Has coj Xas Las mus los rau hauv lub qhov ntxa nyob hauv daim teb Mas Pes Las, nyob ze ntawm Mas Nples, nyob teb chaws Kas Nas Has.
Thaum ntawd Has Nplas Has yog ib tug yawg laus laus, muaj hnub nyoog nchav. Tswv Ntuj tau foom hmoov zoo rau Has Nplas Has tas tib si. Has Nplas Has hais rau nws tus tub txib laus dua cov uas saib nws lub cuab tam kom mus xaiv ib tug ntxhais hauv Has Nplas Has tsev neeg nyob teb chaws Has Laas rau His Xas Has yuav ua poj niam.
Tus tub txib cog lus tias nws yuav ua txoj hauj lwm ntawd. Tus tub txib thauj kaum tus ntxhuav, nws nqa nws tus tswv cov toob xib zoo tib si ces nws sawv kev mus txog lub nroog Nas Hos. Nws tso cov ntxhuav txhos caug nyob sab nroog nraud, nyob ze lub qhov tim thaj. Yog thaum tsaus ntuj lub caij uas cov poj niam yuav tuaj nqa dej. Tus tub txib hais tias “Kuv tus tswv Has Nplas Has tus Huab Tais, hnub no kuv thov koj pab kuv. Koj ua rau kuv pom tias koj hlub kuv tus tswv Has Nplas Has! Kuv sawv nyob ze tus dej uas cov ntxhais nyob hauv nroog yuav tuaj ce dej. Yog kuv hais rau ib tug hluas nkauj hais tias ‘Koj qaij koj lub thoob rau kuv haus.’ Yog nws teb tias ‘Koj haus mas, thiab kuv tseem yuav muab dej rau koj cov ntxhuav haus thiab’, mas tus ntawd yog tus uas koj xaiv rau His Xas Has ntag.”
Tus tub txib tseem hais lus tsis tau tas, Les Npes Kas twb tuaj lawm. Les Npes Kas nqa lub thoob saum xub pwg. Nws nqes mus hauv hav dej, nws ce dej puv nws lub thoob ces nws rov qab los. Has Nplas Has tus tub txib khiav mus tos nws kev, hais rau nws tias “Thov koj pub me ntsis dej hauv koj lub thoob rau kuv haus yuad.”
Les Npes Kas teb tias “Txiv hlob, koj haus mas!” Nws txo plhuav lub thoob los rau ntawm nws txhais npab thiab nws muab rau tus tub txib haus. Thaum nws muab dej rau tus tub txib haus tas, nws hais tias “Kuv yuav mus nqa dej los rau koj cov ntxhuav haus kom pov khawv thiab.”
Ces nws nchuav kiag nws thoob dej rau hauv lub dab thiab nws khiav ntsuj rov mus nram hav dej mus ce dej los rau cov ntxhuav haus huv tib si. Tus tub txib ua twj ywm ntsia tus hluas nkauj, nws ua xyem xyav tias Tswv Ntuj puas tau qhia tus hluas nkauj rau nws lawm los tsis tau. Thaum cov ntxhuav haus dej tas lawm, tus tub txib muab ib lub kauj kub loj ntxig rau tus hluas nkauj qhov ntswg thiab nws muab ob lub kauj toog ntxig rau tus ntxhais ob txhais npab. Nws hais tias “Koj yog leej twg ntxhais? Thov koj qhia kuv paub. Puas muaj chaw nyob hauv koj txiv tsev rau peb so ib hmos?”
Les Npes Kas teb tias “Kuv yog Npes Tus Es tus ntxhais.” Nws tseem hais tias “Nyob hauv peb tsev muaj quav nplej, muaj zaub pub tsiaj noj ntau kawg, thiab muaj chaw nyob.”
Ces Has Npls Has tus tub txib txhos caug pe thiab hawm Tswv Ntuj. Nws hais tias “Kuv tus tswv Has Nplas Has tus Tswv Ntuj nto koob meej. Tswv Ntuj tau ua siab dav siab zoo hlub kuv tus tswv. Tswv Ntuj tau coj kuv tuaj txog kuv tus tswv tus kwv lub tsev.”
Les Npes Kas khiav mus qhia tej ntawd rau nws niam. Les Npes Kas muaj ib tug nus hu ua Las Npaas. Las Npaas khiav mus nraum zoov. Thaum Las Npaas pom lub kauj ntswg thiab ob lub kauj toog uas nws tus muam coj thiab thaum nws hnov Les Npes Kas hais tias “Tus txiv neej ntawd hu kuv zoo li no.”
Las Npaas khiav mus xyuas tus tub txib. Tus tub txib tseem sawv ntawm cov ntxhuav nyob tom hav dej. Las Npaas hais rau tus tub txib tias “Koj yog tus uas Tswv Ntuj foom hmoov zoo rau. Koj los tsev mas! Tsis txhob nyob nraum zoov. Kuv twb tu tau tsev npaj tau chaw rau koj cov ntxhuav lawm.”
Tus tub txib los hauv tsev, ces Las Npaas daws cov ntxhuav tej nra thiab nws muab dej rau tus tub txib thiab rau cov neeg nrog nws tuaj sawv daws ntxuav taw. Muaj neeg nqa mov los rau tus tub txib noj, tab sis tus tub txib hais tias “Kuv yuav xub hais cov lus uas kuv tuaj hais tso, ces kuv mam yuav noj mov tom qab.” Las Npaas teb tias “Koj hais mas!”
Tus tub txib piav rau Las Nppas mloog tas, Las Npaas thiab Pes Tus Es hais tias “Tej ntawd yog tuaj ntawm Tswv Ntuj tuaj, peb hais tsis tau dab tsi li. Les Npes Kas nyob ntawm koj xub ntiag. Koj coj nws mus ua koj tus tswv tus tub poj niam raws li Tswv Ntuj hais.”
Thaum Has Nplas Has tus tub txib hnov cov lus ntawd, nws txhos caug hauv av pe Tswv Ntuj. Nws thau ib co npauj nyiag npauj kub thiab ib co tsoos, nws muab rau Les Npes Kas. Nws kuj muab tej yam paj tshab muaj nqes rau Les Npes Kas tus nus thiab rau nws niam. Ces lawv ua tshoob thiab lawv nyob ib hmos. Tag kis thaum lawv sawv, tus tub txib hais tias “Nej cia kuv rov mus kuv tus tswv tsev.”
Ces Les Npes Kas tus nus thiab nws niam hais tias “Cia tus ntxhais nrog peb nyob ob peb hnub los kaum hnub tej tso nws mam mus.” Tab sis tus tub txib teb tias “Nej tsis txhob khuam kuv ntev, yog Tswv Ntuj coj kuv kev tuaj txog nej, nej tso kuv rov qab mus cuag kuv tus tswv.”
Nkawd hais tias “Peb hu nws los thiab peb nug nws saib.” Lawv hu Les Npes Kas los thiab hais rau nws tias “Koj puas xav nrog tus txiv neej ntawd mus?”
Les Npes Kas teb tias “Kuv xav.” Ces lawv cia lawv tus ntxhais nrog tus niam pub nws mis hlob thiab nrog Has Nplas Has tus tub txib thiab nws cov neeg mus. Lawv foom lus zoo rau Les Npes Kas tias “Peb tus muad, koj huam vam tuaj nto txhiab nto vam mog! Koj tsoom xeeb ntxwv yuav txeeb tau lawv cov yeeb ncuab lub rooj loog!”
Les Npes Kas thiab nws cov ntxhais txib caij cov ntxhuav thiab lawv raws tus tub txib mus. Ces tus tub txib coj Les Npes Kas los ua His Xas Has poj niam.
Has Nplas Has ua neej ntev li 175 xyoos, Has Nplas Has thiaj li tuag. His Xas Has thiab Is Mas Es muab His Xas Has los rau hauv lub qhov ntxa nyob Mas Pes Las, nyob hauv daim teb Es Plhoos uas nyob ze Mas Nples. Yog daim teb uas Has Nplas Has muas ntawm Hes cov tub los. Has Nplas Has thiab nws poj niam Xas Las nkawd ob lub ntxa nyob ntawd.
Phau ntawv Hauv Paus piav Has Nplas Has zaj kwv huam xaus tas, ces mam piav txog His Xas Has nkawm tub ntxaib Es Xas Ws thiab Yas Kos tias His Xas Has muaj 40 xyoo nws thiaj yuav Les Npes Kas uas yog Npes Tws Es tus ntxhais. His Xas Has thov Tswv Ntuj rau nws poj niam vim nws poj niam tsis muaj me nyuam.
His Xas Has muaj 60 xyoo, Tswv Ntuj mloog His Xas Has zaj thov, ces nws poj niam Les Npes Kas xeeb tub. Ob tug me nyuam nti nti nyob hauv Les Npes Kas lub cev, ces nws hais tias “Yog zoo li no xwb mas puas tsim nyog ua neej nyob?” Les Npes Kas mus nug Tswv Ntuj. Tswv Ntuj teb nws tias “Muaj ob haiv neeg nyob hauv koj lub cev. Ob haiv neeg tawm ntawm koj los yuav sib ncaim. Ib haiv neeg yuav kav ib haiv, tus hlob yuav ua tus tsob hwb tus yau.”
Thaum txog Les Npes Kas lub caij daws cev, nws yug tau ob tug me nyuam ntxaib. Tus hlob tawm los, nws yog neeg liab hau, thiab nws lub cev tuaj plaub tas tib si, zoo li lub tsho tuaj plaub. Lawv tis nws npe hu ua ‘Es Xas Ws’. Es Xas Ws tus kwv tawm los, nws txhais tes tuav rawv Es Xas Ws luj taws. Lawv tis nws npe hu ua ‘Yas Kos’.
Ob tug tub hlob zuj zus. Es Xas Ws ua ib tug neeg txawj tua nqaij, nws nquag mus yos hav zoov. Yas Kos yog ib tug neeg nyob twj ywm, nws zov nws cov tsev tsam phooj. His Xas Has hlub Es Xas Ws dua vim nws nyiam noj nqaij. Hos Les Npes Kas hlub Yas Kos dua.
Muaj ib zaug, Yas Kos tab tom ua zaub, Es Xas Ws mus yos rov los txog nws sab kawg. Es Xas Ws hais rau Yas Kos tias “Kuv qaug zog npaum no! Thov koj muab cov taum daj daj ntawd rau kuv noj.” Yas Kos hais tias “Ua li mas koj muag tus tub hlob lub cuab tam rau kuv tso mas!”
Es Xas Ws hais tias “Kuv twb tshaib yuav tuag! Tus tub hlob lub cuab tam ntawd tsis tsim mus luaj twg rau kuv!” Es Xas Ws noj mov haus dej tas ces nws sawv mus lawm.