Tom qab Yos Xuas tuag tas, Tswv Ntuj xaiv tej tus neeg siab loj siab tawv los cawm cov His Xas Lais mus txog lub caij cov His Xas Lais yuav muaj vaj los kav lawv haiv neeg. Cov neeg no mas cov ntawv piav kwv huam hu lawv ua ‘Txwj Laus Tiv Thaiv’.
Tos cov Txwj Laus Tiv Thaiv yuav tsum cawm cov His Xas Lais vim lawv tig mus teev cov dab Npas Has thiab As Tas Tes, ces Tswv Ntuj qhuab qhia lawv; yam li Tswv Ntuj cia lawv raug xwv txheej, raug cov haiv neeg nyob ib ncig hiam. Cov Txwj Laus Tiv Thaiv siab ncaj rau Tswv Ntuj tuaj ntuas cov His Xas Lais kom tso kev teev dab pov tseg, kom lawv rov ua siab loj sawv mus tiv cov neeg hiam lawv.
Cov Txwj Laus Tiv Thaiv tsis yog ib co vaj, lawv tsuas yog cov neeg tiv thaiv cov His Xas Lais kom tsis txhob mus teev dab, lawv ntuas cov His Xas Lais kom tso siab rau Tswv Ntuj thiab coj cov His Xas Lais mus tiv cov yeeb ncuab.
Cov Txwj Laus Tiv Thaiv lawv tsis kav cov His Xas Lais, lawv tsuas pab cov His Xas Lais nyob tsis deb tsis ze xwb.
Cov Txwj Laus Tiv Thaiv muaj 12 tus yog txiv neej, ib tus yog poj niam. Lawv 13 tug no yog Os Nis Es, Es Hus, Des Npos Las, Npas Las, Zes Des Oos, Zes Faws Tas, Xas Xoos, Tshas Kas, Tos Las, Yas Is, Is Xas, Es Loos, thiab As Doos.
Chiv thawj mas cov His Xas Lais piav txog cov Txwj Laus Tiv Thaiv xws li Hmoob piav kwv huam. Txij thaum lub teb chaws tawg ua 2 lub, mas cov His Xas Lais nyob qaum teb thiaj pib muab cov kwv huam sau tseg ua tej phau.
Ntawv cov Txwj Laus Tiv Thaiv sau hais txog tas 305 xyoos ua cov His Xas Lais tso kev teev Tswv Ntuj pov tseg txog 7 zaus, lawv poob rau hauv 7 tus yeeb ncuab txhais tes, thiab Tswv Ntuj tuaj pab cov His Xas Lais 7 zaus.
Ntawv cov Txwj Laus Tiv Thaiv muaj tag nrho 21 zaj:
Zaj 1 thiab zaj 2 yog ob zag qhib; piav txog cov His Xas Lais tuaj nyob Kas Nas Has teb, lawv teev dab thiab raug xwv txheej.
Zaj 3 txog 16 piav cov Txwj Laus Tiv Thaiv cov hauj lwm.
Zaj 17 txog 21 yog cov zaj xaus; yam li cov xeem Daas tsiv mus nyob pem qaum teb, lawv ua rog ntaus lub xeem Npes Yas Mis.
Thaum peb nyeem ntawv cov Txwj Laus Tiv Thaiv mas peb yuav pom tias thaum neeg ua tsis ncaj rau Tswv Ntuj mas neeg raug xwv txheej, peb yuav pom tias thaum neeg thov txhaum ntawm Tswv Ntuj mas Tswv Ntuj xa tej tus tuaj pab neeg.
Peb yuav pom tias thaum cov His Xas Lais tseem tsis tau muaj vaj mas lawv nyob zoo li cas thiab Tswv Ntuj pab lawv ntseeg txog Tswv Ntuj zoo li cas.
