Ntawv Yos Xuas yog cov Leej Choj uas tau sau ntawv Txoj Cai Ob ua cov sau, lawv sau piav txog cov xwm tshwm sim tiam 13 ua Yes Xus ntej, yog lub caij cov His Xas Lais tso teb chaws suab puam tseg, lawv ua tej pab tej pawg los nyob Kas Nas Has.
Ntawv Yos Xuas piav zoo li Yos Xuas tib leeg coj haiv His Xas Lais mus txeeb cov teb chaws huv tib si, tab sis qhov tseeb yog cov His Xas Lais ua tej pab nyias nyob nyias thiab nyias nrhiav nyias ib lub teb chaws nyob; muaj tej qhov chaw yog Yos Xuas coj tiag.
Thaum Yos Xuas tuag mas cov His Xas Lais tseem tsis tau ua tswv chaw tiag, lawv tseem yuav tsum tos li 200 txog 300 xyoo ntxiv, mas lawv mam tau ua tswv teb thiab muaj vaj kav tas Kas Nas Has teb.
Tos cov His Xas Lais thaud ua ntawv piav zoo li Yos Xuas coj mas yog vim lawv xav hais tias thaum cov His Xas Lais mus nyob Kas Nas Has teb, mas Tswv Ntuj nrog lawv nyob thiab pab lawv kom lawv tau ib lub teb chaws; yog Tswv Ntuj pub ib tug hlob coj lawv mus txeeb teb chaws. Tus ntawd yog ‘Yos Xuas’.
Yos Xuas lub npe txhais tias ‘Yas Ves yog tus cawm’ los yog ‘Tswv Ntuj cawm’ ib yam li lub npe ‘Yes Xus’ (Yeshua).
Ntawv Yos Xuas faib ua 3 ntu:
1. Cov His Xas Lais txeeb tau Kas Nas Has teb (YX 1-11).
2. Kaum ob lub xeem His Xas Lais sib faib lub teb chaws (YX 12-21).
3. Yos Xuas cov hnub kawg (YX 22-24).
cov His Xas Lais ntau leej pom cov Kas Nas Has teev dab mas lawv xav ua zoo li cov Kas Nas Has, ces Yos Xuas hu cov nom tswv His Xas Lais tuaj sib sau thiab cog lus nyob Xis Kes tias lawv yuav teev Yas Ves tib leeg ua lawv tus Tswv Ntuj.
