(1XM 1: 9-20; MK 1: 21-28)
Nyob hauv thawj zaj nyeem yog cov lus hauv ntawv Xas Muas piav txog As Nas tu siab dhau, ces nws thov Tswv Ntuj kom pub ib tug me nyuam rau nws. Peb los saib, saib As Nas thov Ntuj li cas.
Thaum As Nas thov Ntuj, nws ua ib tug neeg me, nws tsis yws tias tim li cas Tswv Ntuj tsis pub nws muaj me nyuam, nws tsis yws tias txog luag lwm tus qhov tsis zoo rau Tswv Ntuj mloog, nws tsis yws tias ua cas nws txoj hmoov phem. As Nas thov Tswv Ntuj kom khuv leej nws, thiab nws thov saib Tswv Ntuj puas pom zoo pub ib tug me nyuam rau nws. Nws cog lus tias yog Tswv Ntuj pub kom nws muaj me nyuam, nws yuav muab tus me nyuam ntawd rov cev rau Tswv Ntuj.
Ntawv Xas Muas hais ntxiv tias thov Ntuj tas, As Nas lub ntsej muag tsis zoo li qub lawm, nws xeeb tub. Qhov no qhia tias yog peb muab siab thov Ntuj, mas Tswv Ntuj yuav hloov peb ua tus neeg tshiab, thiab Tswv Ntuj yuav mloog peb cov lus thov.
Hais txog Yes Xus lub Moo Zoo, Mas Kos hais txog thaum Huab Tais Yes Xus tuaj tshaj lub Moo Zoo nyob Kas Fas Naus. Tos Huab Tais Yes Xus tuaj tshaj lub Moo Zoo nyob Kas Fas Naus vim tias Kas Fas Naus yog thaj tsam muaj cov Yus Das thiab pej kum neeg tuaj nyob coob.
Hnub Xas Npas Tos yog cov Yus Das hnub caiv, lawv so tsis ua hauj lwm txij Hnub Rau hnub poob mus txog Hnub Xya hnub poob. Hnub Xas Npas Tos, cov Yus Das yuav sib txoos teev Ntuj (worship) nyob hauv lawv cov tsev txoos. Thaum teev Ntuj, lawv koom siab ‘thov Ntuj’ (pray) thiab ‘kawm Ntawv Cog Lus Qub’ (study the Old Testament). Tus xib hwb yuav nyeem thiab nthuav (explain) txog zaj lus nws nyeem rau lub txoos mloog. Lub tsev txoos twg tsis muaj xib hwb, mas tus tswj lub tsev txoos yuav caw tej tus xib hwb nyob lwm lub thaj chaw tuaj nthuav qhia sawv daws. Li ntawd, thaum Huab Tais Yes Xus tuaj txog, lawv thiaj caw nws kom sawv mus nyeem Ntawv Cog Lus Qub thiab nthuav qhia lawv.
Cov Kws Ntawv Ntshiab los yog cov Thoob Xwm (Scribe) yog cov tau kawm Ntawv Cog Lus Qub, tshwj xeeb mas yog Thawj Tsib Phau uas cov Yus Das hu ua ‘Tos Las’ (Torah) los ‘Txoj Cai’ (Law). Ntawv Tos Las muaj ntawv Hauv Paus, Kev Tsiv, Les Vis, Xam Phaj, thiab Txoj Cai Ob. Thaum lawv kawm, lawv tsis muaj cuab kav xav tswv yim txog cov lus lawv tau kawm, lawv tsuas nco thiab qhia raws li cov xib hwb nto moo cov lus nthuav tseg xwb. Muaj ntau tus xib hwb nrhuav ntau zaj tswv yim, ces thaum lawv qhia, lawv thiaj qhia ua ntau zaj thiab, yim ua kev tsis to taub rau zeej tsoom. Ntawm Yes Xus, nws paub Ntawv Ntshiab (Scripture) zoo, nws tseem paub cov ntsiab hauv cov zaj lus thiab. Li ntawd, thaum Yes Xus nthuav qhia sawv daws, nws thiaj li qhia raw li qhov nws paub thiab to taub, zeej tsoom thiaj qhuas cov lus Yes Xus qhia. Lawv hais tias Yes Xus cov lus muaj zog (power) thiab muaj hwj chim (authority).
Mas Kos hais tias nyob ntawd, muaj ib tug neeg raug ib tug dab tsis huv (evil spirit). Muaj tej tus neeg hais tias lo lus no yog ib lo lus hais txog ib tug mob puas hlwb (mental illness), lawv tsis ntseeg tias muaj dab tsis huv. Cov neeg zim txwv peb nyob no coob leej tsis kam ntseeg tias muaj dab. Luag tsis kam ntseeg tias yus raug mob yog vim dab ua kom yus mob. Luag hais tias neeg raug mob vim muaj ib co kab mob nkag hauv neeg lub cev; yuav tsum nrhiav cov tshuaj tua cov kab mob ces yus tus mob thiaj yuav zoo. Tab sis nyob rau Huab Tais Yes Xus lub zim txwv, sawv daws ntseeg tias muaj dab, lawv hais tias dab muaj peev xwm looj koov tau neeg. Nyob rau lub zim txwv no, ntau leej neeg tseem ntseeg li ntawd. Peb tsoom Hmoog ntseeg hais tias yus muaj mob yog vim ib tug dab ntxias yus tej ntsuj plig, ces Hmoob hu cov txiv dab txiv muam los kho cov neeg mob.
Dab tsis huv paub tias Huab Tais Yes Xus yog leej twg, nws hais tias “Koj yog Tswv Ntuj tus Ntshiab” (the holy one of God). Lo lus no txhais tias Huab Tais Yes Xus yog Leej Pleev. Dab tsis huv paub Huab Tais Yes Xus, mas nws ntshai vim Huab Tais Yes Xus muaj zog dua dab tsis huv, ces dab tsis huv thov Huab Tais Yes Xus tsis txhob ua dab tsi rau lawv.
Thaum dab tsis huv nug Huab Tais Yes Xus tias “Koj xav ua dab tsi rau wb?” mas Huab Tais Yes Xus tsis teb, vim ntawm Tswv Ntuj thiab dab, tsis muaj dab tsi yuav sib tham.
Huab Tais Yes Xus hais ib lo lus xwb, ces tus neeg ntawd cia li zoo hlo. Qhov no qhia tau tias Huab Tais Yes Xus muaj hwj chim loj dua dab tsis huv, ces dab mloog Huab Tais Yes Xus, dab thiaj tawm ntawm tus neeg mus.
Huab Tais Yes Xus yog Tswv Ntuj, nws hlub peb, yog peb vam txog Huab Tais Yes Xus lub npe thov dab tsi ntawm Tswv Ntuj, mas Tswv Ntuj yeej yuav pub rau peb. Tswv Ntuj yuav tsis pub rau peb tas txhua yam raws li peb thov, tab sis Tswv Ntuj yuav pub yam tseem ceeb dua ntawd rau peb. Yam li Tswv Ntuj ntiab tus dab tsis huv hauv peb mus, Tswv Ntuj nplij peb kev tu siab, ces peb rov tau txais lub neej tshiab, peb lub siab rov kaj ntsej muag rov tshiab ib yam li tus neeg raug dab hauv lub Moo Zoo hnub no thiab ib yam li As Nas hauv ntawv Xas Muas.
