(1XM 1: 1-8; MK 1: 14-20)
Nyob hauv xyoo txooj lub caij Nyob Nruab Xyoo, mas thawj 5 lis piam lub Koom Txoos yuav cev cov lus hauv phau ntawv Xas Muas hais txog tus vaj Das Vis rau cov ntseeg tau khaws xav tswv yim. Tab sis ua ntej yuav hais txog Das Vis, phau ntawv Xas Muas tau xub hais txog tus Yaj Saub Xas Muas.
Hnub no ntawv Xas Muas piav txog Xas Muas niam hu ua As Nas, nws tsis muaj me nyuam, ces nws ua neej nyob nrog luag tej lo lus thuam. Tshwj xeeb mas As Nas tus txuv tus niam tshiab. As Nas tu siab, nws tus txiv tsuas hais rau nws tias “Vim li cas koj tu siab? Koj tau kuv, tsis zoo dua koj tau kaum leej tub lod?” Nws tsis paub xyos yuav pab As Nas li cas.
Lub Moo Zoo hnub no yog cov lus hauv Mas Kos phau Ntawv Moo Zoo. Mas Kos piav txog Huab Tais Yes Xus pib nws txoj hauj lwm tshaj lub Moo Zoo nyob hauv Nkas Lis Lais.
Huab Tais Yes Xus hais tias “Txog lub caij teem lawm, Tswv Ntuj lub Ceeb Tsheej los txog ze lawm; nej hloov siab, nej ntseeg txog lub Moo Zoo mog.”
Lub Moo Zoo (Euaggelion) Huab Tais Yes Xus hais ntawd, yog lub Moo Zoo hais txog dab tsi?
1. Lub Moo Zoo hais txog qhov tseeb raws li Leej Ntshiab Paj Lug hais tias “Yav thaud, nej twb tau hnov lawv txoj kev tso siab nyob hauv ‘Lo Lus Tseeb’ (The Word of the Truth) uas yog lub Moo Zoo” (KLX 1: 5).
Ua ntej Huab Tais Yes Xus yuav xeeb los ua neeg, ntiaj teb neeg tsis paub txog Tswv Ntuj, lawv kuj nrhiav tsis tau txoj kev rov mus cuag Tswv Ntuj. Huab Tais Yes Xus tuaj tshaj lub Moo Zoo txog qhov tseeb, ces ntiaj teb neeg thiaj paub Tswv Ntuj. Ntiaj teb neeg paub qhov tseeb lawm tias Tswv Ntuj nyiam qab ntuj neeg, thiab Tswv Ntuj nyob nruab nrab ntiaj teb neeg.
2. Lub Moo Zoo hais txog txoj kev tso siab raws li Leej Ntshiab Paj Lug hais rau cov ntseeg nyob Kos Los Xais tias “Nej nyob hauv txoj kev ntseeg ntxiv mog, nej cog ruaj nreb rau saum cov tawm ntsa khov, nej txhob cia luag coj nej ncaim ntawm ‘txoj kev tso siab’ (The Hope) uas lub Moo Zoo cog lus tias yuav pub rau nej” (KLX 1: 23).
Thaud, ntiaj teb neeg xav qhov phem ntau tuaj nruab siab, ces ntiaj teb neeg thiaj ua qhov zoo tsis tom thawj. Tab sis Huab Tais Yes Xus coj lub Moo Zoo txog txoj kev tso siab tuaj cog rau hauv neeg nruab siab, ces neeg rov tso siab rau txoj kev ua zoo.
3. Lub Moo Zoo hais txog kev thaj yeeb raws li Leej Ntshiab Paj Lug hais tias “Nej muab lub siab kub los ua khau rau mus xa lub Moo Zoo txoj kev thaj yeeb (The Peace)” (EFX 6: 15).
Nyob hauv neeg muaj ob tug cwj pwm taw neeg ua neej; ib tug cwj pwm kaj, thiab ib tug cwj pwm tsaus. Li ntawd, nyob hauv neeg lub neej thiaj muaj tej zaus ua neeg zoo thiab tej zaus ua neeg phem. Huab Tais Yes Xus tuaj pab ntiaj teb neeg tawm tsam yeej tus cwj pwm tsaus, ces neeg thiaj nyob ‘kaj lug’ (Peace), ntiaj teb thiaj nyob ‘thaj yeeb’ (Peace).
4. Lub Moo Zoo hais txog Ntuj cov lus cog raws li Leej Ntshiab Paj Lug hais tias “Cov neeg teev pej kum dab txais ib lub cuab tam xws luag, lawv ua tes taw nyob hauv tib lub cev, lawv txais Tswv Ntuj cov lus cog (God’s Promise) ib yam li luag nyob hauv Yes Xus Pleev, vim lawv mloog lub Moo Zoo” (EFX 3: 6).
Cov neeg teev dab lawv xav tias Tswv Ntuj nyiam yuam ntiaj teb neeg, thiab Tswv Ntuj txhib ntiaj teb neeg kom muab yam ub yam no txi rau Tswv Ntuj. Tab sis Huab Tais Yes Xus tuaj qhia tias Tswv Ntuj siab zoo, thiab Tswv Ntuj txaus siab pub yam zoo tshaj rau ntiaj teb neeg.
5. Lub Moo Zoo hais txog txoj sia tsis txawj tuag raws li Leej Ntshiab Paj Lug hais rau Tis Mos Tes tias “Nyem no lub txiaj ntsim ntawd tawm tuaj rau pom xyeem nyob hauv Yes Xus Pleev, tus cawm peb. Yes Xus rhuav kev tuag thiab nws lub Moo Zoo ua kom txoj sia tsis txawj tuag (Immortality) ci tuaj” (2TMT 1: 10).
Cov neeg teev dab qhia tias txoj sia (life) yog kev tshais ruam mus rau kev tuag. Tab sis Huab Tais Yes Xus qhia tias txoj sia yog kev tshais ruam mus rau kev muaj sia.
6. Lub Moo Zoo hais txog kev cawm raws li Leej Ntshiab Paj Lug hais tias “Nyob hauv Leej Pleev, nej hnov Lo Lus tseeb uas yog lub Moo Zoo cawm nej (Your Salvation), ces nej ntseeg lub Moo Zoo” (EFX 1: 13).
Txoj kev cawm uas Huab Tais Yes Xus pub rau peb ntawd, tsis yog kom peb ‘dim’ ntawm peb cov txhaum xwb, tseem ‘thiab’ peb kom muaj zog ua lub neej xws li tus neeg yeej kev txhaum ntxiv mus lawm tom ntej.
Huab Tais Yes Xus lub Moo Zoo yog lub moo hais txog cov li saum no.
Huab Tais Yes Xus hais tias “Nej hloov siab mog.” Tseev kom peb hloov siab tau, peb tsum xub ‘tu siab’ rau peb kev txhaum tso. Tab sis ntau zaus peb to taub yuam kev txog lo lus ‘tu siab rau yus kev txhaum’ thiab lo lus ‘tu siab rau yus cov txhaum’.
Peb ntau leej hais tias thaum peb pom yam peb ua ntawd tsim xwv txheej rau luag lwm tus, ces peb tu siab tias ua cas peb tau ua txhaum li ntawd, yog xav tau, mas ntshai yuav tsis ua. Li no mas tsis yog peb tu siab rau peb kev txhaum, yog peb tu siab rau peb cov txhaum xwb, ces peb thiaj rov mus ua txhaum li qhov qub ntxiv.
Piv txwv li peb hais lus tsis zoo rau tej me nyuam, ua rau me nyuam khiav tawm hauv tsev mus. Peb tu siab tias ua cas peb ua li ntawd. Qhov no yog peb tu siab rau peb cov txhaum.
Piv txwv li peb ntiav neeg mus nrog peb ua hauj lwm, ua rau cov neeg ntawd tsis muaj nyiaj txaus yug lawv tsev neeg. Peb pom, ces peb tu siab tias ua cas peb ntxias noj lawv zog dag. Li no tsis yog kev tu siab rau peb kev txhaum.
Piv txwv li peb pom zoo cia tus ntxhais raug deev muaj me nyuam mus muab me nyuam ntaus pov tseg, peb mam pom tias kev ntaus me nyuam ua rau tus ntxhais ntawd tsob ntshav. Peb coj los xav, ces peb tu siab tias ua cas tau ua li ntawd. Li no yog tu siab rau peb cov txhaum, tsis yog kev txhaum.
Kev hloov siab yog ‘ntxub kev txhaum’. Kev hloov siab yog ‘yuav dua siab tshiab’. Li ntawd, tus neeg hloov siab thiaj li yog tus neeg uas thaum nws nyiam ua txhaum, nyem no nws ntxub kev ua txhaum.
Huab Tais Yes Xus yuav txhim Tswv Ntuj lub Ceeb Tsheej nyob hauv ntiaj teb, nws thiaj li hu cov neeg tau mloog nws lus los ua nws cov thwj tim. Huab Tais Yes Xus hais rau lawv tias “Nej raws kuv mus.” Huab Tais Yes Xus hais li no, tsis yog tias nws ntsib kiag lawv, ces nws hais rau lawv tam sid. Lawv twb xub tau hnov Huab Tais Yes Xus cov lus thiab nrog Huab Tais Yes Xus tham los dua lawm. Huab Tais Yes Xus twb pom tias lawv kub siab rau nws cov lus, mas Huab Tais Yes Xus thiaj li hais li ntawd rau lawv.
Yog lawv nyiam Huab Tais Yes Xus tiag, mas lawv yuav raws Huab Tais Yes Xus mus. Yog lawv tsis nyiam, mas lawv yuav tsis raws mus. Ib yam li thaum peb thov ib tug poj niam los txiv neej twg kom nrog peb tsa cuab tsa yim, peb hais tias “Koj puas kam yuav kuv?” Yog tus ntawd nyiam peb tiag, nws yuav lees tias nws kam, ces nws yuav los nrog peb ua neej ua ke.
Peb nug tus kheej, saib peb paub Huab Tais Yes Xus lawm, peb puas nyiam Huab Tais Yes Xus tiag. Yog peb nyiam Huab Tais Yes Xus, peb yuav mloog Huab Tais Yes Xus cov lus, peb hloov siab tshiab los ntxub kev txhaum, peb raws Huab Tais Yes Xus mus.
