Tsis txhob ua neeg twm xeeb (MT 19: 3-12)
Kwv tij Hmoob sawv daws, thaum ub cov txiv neej His Xas Lais lawv tsis nyiam lawv tus poj niam lawm, mas lawv ua tej yam phem phem los txov lawv tus poj niam kom nyob tsis txhob tau, kom nyob txom nyem nrog kua muag. Mais Xes pom txog qhov no, nws hlub cov poj niam zoo li ntawd, mas Mais Xes thiaj kheev cia cov txiv tsev ua ntawv nrauj lawv tus poj niam yog cov txiv tsev pom tias lawv tus poj niam zoo tsis tas.
Hnub no cov Fas Lis Xais thiaj tuaj nug Huab Tais Yes Xus saib ntawm nws ne, nws xav li cas txog qhov no. Huab Tais Yes Xus teb rau lawv tias thaum lub hauv paus Tswv Ntuj muab txiv neej ib tug tav los tsim tus poj niam, Tswv Ntuj muab tus poj niam ntawd rov los cob rau tus txiv neej kom nkawd rov ua ib lub cev nqaij. Yog li mas txiv neej yuav nrauj tsis tau tus poj niam, vim txoj kev sib yuav tsis yog tib neeg tsim, tus tsim kom muaj kev sib yuav yog Tswv Ntuj. Tab sis vim tib neeg tsis mloog Tswv Ntuj hais, mas kev txhaum thiaj tuaj raug tib neeg, ces txoj kev sib yuav thiaj li raug tib neeg muab hloov. Cov txiv neej His Xas Lais twm xeeb dhau, mas Mais Xes thiaj kom lawv ua ntawv nrauj tau poj niam.
Cov txiv neej His Xas Lais twm xeeb, yog lawv txoj kev nyiam lawv tus poj niam tsuag, lawv siab tsis ntev txaus rau lawv tus poj niam, lawv tsuas nyiam lawv tus kheej xwb lawv tsis nco txog lawv tus poj niam li.
Nyob hauv lub neej ua txij nkawm, ntau zaus nkawd ntsib teeb meem tsis yog vim luag sab nraud tshum tab sis yog nkawd ib leeg twm xeeb rau ib leeg, ces nkawd nyias muab nyias saib hlob, thaum nkawd ua txhaum mas nkawd tsis txawj txo hwj chim los sib zam.
Huab Tais Yes Xus hais tias “Tus twg nrauj nws poj niam, nws ho rov yuav dua ib tug, nws yog ib tug muaj txij nkawm mus deev hluas.” Yog li mas niaj hnub no lub Koom Txoos txoj cai thiaj txwv tsis kheev cia tus txiv neej los tus poj niam nrauj txij nkawm mus yuav dua tus tshiab txais lub Cim Yug. Yog nws ua neej nyob ua ke txog qhov ib leeg nrauj ib leeg, mas nws yuav tau xaiv lub neej tab seeb mus tas nws sid, nws thiaj txais tau lub Cim Yug.
Cov thwj tim hnov Huab Tais Yes Xus cov lus teb, mas lawv thiaj sib tham tias yog li mas cia tsis txhob yuav poj niam ntshai yuav zoo dua.
Huab Tais Yes Xus hnov txog qhov no, nws thiaj qhia lawv txog kev nyob tab seeb tias tsis yog ib txog kev khiav kom dhau teeb meem, los yog vim lawv saib tias kev sib yuav tsis zoo. Tab sis kev nyob tab seeb yog Tswv Ntuj hu lawv los nyob tab seeb, kom tau muab tas lawv lub sij hawm los ua cov hauj lwm tsob hwb Tswv Ntuj thiab zeej tsoom.
Kwv tij Hmoob sawv daws, hnub no xav muab 2 lo lus los rau peb khaws xav:
1. Ntawm peb cov xaiv lub neej tsa cuab muaj txij nkawm, peb puas tseem niaj hnub nco txog cov lus peb tau sib cog nyob ntawm Tswv Ntuj xub ntiag tias tab txawm noj qab nyob zoo los txom nyem luaj twg, los peb yuav sib nyiam sib hlub, sib pab sib nres mus kom txog hnub ib leeg ncaim ib leeg. Los niaj hnub no peb tsuas ib leeg twm xeeb rau ib leeg, tsis pheej xeeb rau cov lus tau cog tseg?
2. Ntawm peb cov xaiv lub neej tab seeb tsis sib yuav, mas peb puas qee lub sij hawm kom tau pab tshaj txog Tswv Ntuj lub Ceeb Tsheej, kom tau pab lis cov dej num tsob hwb Tswv Ntuj, puas muab sij hawm rau mus pab cov neeg txom nyem?
