LUB MOO ZOO RAWS LI MAS TAIS

-3-

1Muaj ib ntus, Zam Ntxuav Plig mus ntuas tsoom sid nyob hauv teb chaws suab puam Yus Das. 2Nws hais tias “Nej hloov siab1 mog, vim Ntuj lub Ceeb Tsheej2 los txog ze lawm.” 3Nws yog tus uas yaj saub His Xais hais txog tias “Tus qw hauv teb chaws quav poj lub suab hais tias ‘Nej npaj txoj kev rau Huab Tais, nej ua kom nws txoj kev ncaj tuaj’.” 4Zam cov ris tsho yog xuas plaub ntxhuav ua, nws sia ib daim siv tawv tsiaj ncig nws lub duav; nws noj kooj thiab zib mu qus. 5Tas cov nyob Yes Lus Xas Les, cov nyob Yus Das teb, thiab cov nyob ib thaj tsam raws tus dej Yos Las Das puav leej tuaj cuag Zam. 6Lawv lees txhaum, thiab thov nws ntxuav.3 lawv nyob hauv tus dej Yos Las Das. 7Thaum Zam pom coob tus Fas Lis Xais4 thiab ntau tus Xas Dus Kais5 tuaj txais kab ke ntxuav, nws hais rau lawv tias “Caj ces nab muaj taug, leej twg qhia nej khiav kom nej dim ntawm Ntuj Txoj Kev Npau Taws uas tuaj yuav txog? 8Nej kav tsij txi ib co txiv tsim nyog tus neeg hloov siab. 9Nej txhob khav rau nruab siab tias ‘Peb muaj Has Nplas Has ua peb txiv.’ Kuv hais rau nej tias, Tswv Ntuj yuav ua kom Has Nplas Has ib co xeeb ntxwv tawm hauv cov pob zeb no los kuj tau. 10Zaum no, rab taus twb nyob ntawm cag ntoo lawm, tsob ntoo twg tsis txi txiv zoo, yuav tsum muab txiav pov hlawv hauv hluav taws. 11Ntawm kuv, mas kuv ntxuav nej nyob hauv dej kom nej tig los yuav ib lub siab tshiab; hos tus lawv kuv qab tuaj, nws muaj zog dua kuv, kuv tsis tsim nyog hle nws nkawm khau. Tus ntawd yuav ntxuav nej nyob hauv Leej Ntuj Plig Ntshiab6 thiab nyob hauv hluav taws. 12Nws txhais tes tuav rawv ib lub vab, nws yuav ntxuaj nws lub tshav ntaus nplej, nws yuav yawm cov nplej qoos rau hauv txhab, hos cov npluag, nws yuav muab hlawv hauv cov hluav taws tsis txawj tuag.”7
13Lub zim txwv ntawd, Yes Xus tawm hauv xeev Nkas Lis Lais mus cuag Zam ntawm tus dej Yos Las Das, kom Zam ua kab ke ntxuav rau nws. 14Zam tsis kam, Zam hais tias “Kuv yog tus yuav tsum thov koj ntxuav kuv, ua cas koj ho tuaj cuag kuv?” 15Tab sis Yes Xus teb rau Zam tias “Nyem no, cia koj ua rau kuv, wb thiaj tau ua raws txoj kev ncaj.” Ces Zam ua raws li Yes Xus hais. 16Yes Xus txais kab ke ntxuav tas, nws tawm hauv dej los tim ntug nqhuab tam sis ntawd, ces lub ntuj qhib plho, pom Tswv Ntuj tus Plig nqes xws li ib tug nquab los rau saum Yes Xus. 17Ib lub suab nrov saum ntuj tuaj hais tias “Tus no yog kuv Leej Tub uas kuv nyiam.8 Nws yog kuv qhov chaw zoo siab.”9

  1. Lo lus ‘hloov siab’ (Repent) lus Hes Las siv lo lus tias ‘Metanoia’ txhais tias ‘tu siab rau yus cov txhaum ces yus txiav siab hloov tswv yim thiab tso txoj kev ua txhaum pov tseg. Yog li ‘hloov siab’ thiaj yog ‘tu siab rau cov txhaum thiab tig los nrhiav Tswv Ntuj’. Zam ua kab ke ntxuav rau tsoom sid mas thiaj tsis yog ntxuav sab nraud xwb, Zam kom lawv ntxuav lub siab thiab hloov tus cuj pwm. ↩︎
  2. Mas Tais hais tias ‘Ntuj lub Ceeb Tsheej’ (Kingdom of Heaven), nws tsis hais tias ‘Tswv Ntuj lub Ceeb Tsheej’ (Kingdom of God)vim cov Yus Das ntshai tuav txog Tswv Ntuj lub npe, lawv thiaj hais tias ‘Ntuj’. Mas Tais sau nws phau ntawv rau cov Yus Das nyeem, nws thiaj hais xws li cov Yus Das hais kam; yog ‘Ntuj lub Ceeb Tsheej’. ↩︎
  3. Thaum Zam ua kab ke ntxuav mas nws ntuas tus tuaj txais kab ke ntxuav kom ‘tu siab, hloov siab, thiab thov kev zam’. ↩︎
  4. ‘Cov Fas Lis Xais’ yog cov coj Mais Xes txoj cai nruj, lawv sau tej ntawv piav txoj cai, lawv qhia sawv daws kom ua raws li lawv piav. Cov Fas Lis Xais yuav txoj cai raws li sau nyob hauv ntawv thiab lawv tseem yuav cov txheej laus thaud tej kab ke. ↩︎
  5. ‘Cov Xas Dus Kais’ mas lawv yog tus Leej Choj Xas Dus thaud cov thwj tim, lawv ua nom tswv nyob hauv rooj txwj lus Xas Nes Nrees; lawv nyiam hwm cov nom Los Mas. Cov Xas Dus Kais tsuas yuav txoj cai raws li sau nyob hauv ntawv xwb. ↩︎
  6. ‘Leej Ntuj Plig Ntshiab’ (Holy Spirit) lus Hes Nplaws hais tias ‘Ruach’ lus Hes Las yog ‘Pneuma’ txhais tias ‘pa nqa txoj sia’ los yog ‘cua’. Cov Yus Das hais tias Leej Ntuj Plig coj Tswv Ntuj qhov tseeb tuaj rau tib neeg, Leej Ntuj Plig qhia cov Yaj Saub hais txog Tswv Ntuj qhov tseeb. Leej Ntuj Plig kaj neeg lub tswv yim kom pom qhov tseeb. Leej Ntuj Plig nqa txoj sia tuaj rau tus tuag. ↩︎
  7. Lo lus ‘cov hluav taws tsis txawj tuag’ yog hais txog cov hluav taws hauv dab teb; cov neeg uas Leej Pleev cov ntshav ntxuav lawv kom ntshiab tuaj tsis tau, mas lawv yuav poob mus rau dab phem teb chaws mus li. Nyob ntawd, lawv yuav raug tsim txom quaj tom hniav nkawv. ↩︎
  8. Lo lus no yog hais raws li nqe lus hauv Nkauj Paj Nraug 2: 7 tias “Kuv yuav tshaj HUAB TAIS txoj cai tawm. HUAB TAIS hais rau kuv tias ‘Koj yog kuv leej tub, hnub no kuv xeeb koj’.” Cov Yus Das paub tias nqe lus no hais txog tus pleev yog Tswv Ntuj Leej Tub. Li ntawd, Tswv Ntuj lo lus no thiaj yog lo lus ua pov thawj tias Yes XUs yog ‘vaj’ yog ‘Leej Pleev’ thiab yog ‘Tswv Ntuj Leej Tub’. ↩︎
  9. Lo lus no yog nyob hauv His Xais zaj 42 qib 1 tias “Nej ntsia! Kuv tus tub txib uas kuv nres, tus kuv xaiv, tus kuv nyiam tas siab.” Tswv Ntuj tub tub txib no yuav yog tus raug txom nyem, yuav yog tus Yaj Txi Tswv Ntuj. ↩︎
Translate »