(1XM 4: 1-11; MK 1: 40-45)
Ntawv Xas Muas piav txog thaum cov His Xas Lais nrog cov Fis Lis Tis ntaus rog, lawv swb, ces lawv xav tias yog lawv coj Tswv Ntuj lub Xab Cog Lus nrog lawv mus ntaus rog, mas Tswv Ntuj yuav pab lawv kom yeej cov Fis Lis Tis. Lawv xav li ntawd, lawv tso neeg los kwv Tswv Ntuj lub Xab Cog Lus tom Xis Laus mus tso rau hauv lawv lub yeej. Cov His Xas Lais muaj Tswv Ntuj lub Xab Cog Lus nrog lawv nyob, tsis kav lawv tseem swb cov Fis Lis Tis thiab. Zaj no pom tias cov His Xas Lais muaj lub tswv yim xav zoo, lawv vam khom Tswv Ntuj pab lawv; tab sis muaj ib yam tsis phim yuav tshwm tuaj nyob hauv lawv lub tswv yim, yog qhov lawv xav tias Tswv Ntuj lub Xab Cog Lus yuav muaj hwj chim ua tau kom lawv yeej cov Fis Lis Tis. Lawv muab Tswv Ntuj lub Xab Cog Lus saib ua pov haum pov hwm lawv.
Nyob hauv peb cov neeg ntseeg, tshwj xeeb peb cov npuam lub Koom Txoos Kav Tos Liv, peb muaj 7 lub Cim Ntshiab (Sacraments), peb muaj cov cim nco txog (Sacramentals) yam li Yes Xus tus Ntoo Cuam, cov duab ntshiab, cov mlom ntshiab, txoj saw Mab Liab, cov dej ntshiab. Peb tsis txhob xav tias peb vam txog tej no pab, ces peb tsis tas yuav hloov siab tshiab ntxiv, los peb tsis txhob muab tej no saib loj dua Tswv Ntuj, los yog ua qhov chaws tam Tswv Ntuj. Yog peb ua zoo li ntawd, mas yog peb tab tom yuam kev li thaud cov His Xas Lais muab tus mlom nyuj tam Tswv Ntuj, ces lawv teev tus mlom nyuj ua lawv tus Huab Tais.
Hnub no Mab Kos piav tias muaj ib tug neeg mob ruas tuaj cuag Huab Tais Yes Xus, nws txhos caug thov Huab Tais Yes Xus pab cawm nws. Tus mob ruas hais tias “Yog koj xav, mas koj yeej ua tau kom kuv rov huv.” Huab Tais Yes Xus hlub nws, Yes Xus cev tes tuav nws thiab hais lus rau nws, ces nws zoo hlo tam sid.
Nyob rau lub zim txwv ntawd, tus mob phem thiab txaus ntshai tshaj plaws yog ‘tus mob ruas’ (Leprosy). Muaj 3 yam mob ruas;
1) Tus mob ruas ua rau lub cev nce pob thiab ua kua paug,
2) Tus mob ruas ua rau tej nqaij txhav tej leeg caws tej yas txha o ua tej lub pob ces pom tias yas tes yas taw los yog ntiv tes luv tuaj,
3) Tus mob ruas ua rau cev nqaij ua kua paug nti thiab mob pob qij txha.
Tus neeg twg tau tub mob ruas tsis hais yam twg los xij, nws yuav nyob hauv kev txom nyem mus tas nws sid. Nws ua neej zoo li ib tug neeg tuag los yog poob rau dab phem cov hluav taws.
Nyob hauv phau ntawv Les Vis hais tias tus neeg daim tawv xoo pob, voos kiav txhab, tawv nqaij pheej txaij; mas ceev faj tsam yog mob ruas (LV 13: 1-2) vim tias txheej thaud sawv daws tseem tshuaj tsis tau tias tus mob twg yog mob ruas thiab tus mob twg yog mob cev. Tab sis txoj cai tsis pub lawv nyob xyaw zeej tsoom, tus neeg mob tsum tau tawm mus nyob sab yeej nrawd, nws yuav tsum hnav tej ris tsho khaub hlab, cia plaub hau ntxhov, nws yuav npog sab di ncauj saud thiab qw tias ‘tsis huv! tsis huv!’ kom sawv daws paub (LV 13: 45-46).
Yog vim li ntawd, tus neeg mob ruas tsis yog nws ntsib kev txom nyem sab cev nqaij xwb, hauv nws tus plig tseem haj yam txom nyem thiab vim tias nws raug sawv daws cais tawm, nws raug sawv daws thuam, nws tsis txhob txav mus ze lwm tus neeg. Lawv nyob tau txom nyem tiag tiag!
Tus mob ruas tsis muaj tshuaj kho tau, tsuas vam txog Tswv Ntuj lub hwj huam xwb. Yog li mas tus mob ruas no ntseeg tias Huab Tais Yes Xus tuaj ntawm Tswv Ntuj tuaj, Huab Tais Yes Xus muaj Tswv Ntuj lub hwj huam yuav cawm tau nws dim hauv tus mob ruas. Nws ntseeg li ntawd, nws thiaj thov Huab Tais Yes Xus kho nws.
Zaj no peb pom Huab Tais Yes Xus ua 3 yam li nram no:
1) Tus neeg mob ruas txav los ze Huab Tais Yes Xus thiaj hais lus rau Huab Tais Yes Xus, nws hla Mais Xes txoj cai, tab sis Huab Tais Yes Xus tsis xyeej nws. Huab Tais Yes Xus zoo siab txais tus neeg tag kev cia siab, Huab Tais Yes Xus to taub lawv kev txom nyem thiab Huab Tais Yes Xus hlub lawv.
2) Huab Tais Yes Xus tsis ntxub tus neeg mob ruas, Huab Tais Yes Xus cev tes mus tuav nws thiab hais lus rau nws, vim Huab Tais Yes Xus tsis ntsia neeg qhov tsis huv, Huab Tais Yes Xus tsuas ntsia neeg lub siab xav txais kev pab ntawm nws xwb.
3) Huab Tais Yes Xus ua raws Mais Xes txoj cai, nws hais rau tus neeg mob ruas kom mus thws lub cev thiab cev paj tshab raws li Mais Xes qhia. Huab Tais Yes Xus tsis ua neeg xib qwb txhav thiab nyiam hla txoj cai.
Li ntawd, hnub no Tswv Ntuj Lo Lus thiaj xav ntuas peb kom muab Huab Tais Yes Xus ua qhov chaw tso siab, niaj hnub peb cia siab rau Huab Tais Yes Xus ua tus npo peb ntawm peb kev txom nyem, ua tus cawm peb ntawm peb kev mob ruas sab ntsuj plig.
