9. Dab phem kev ntxias
Yog nej tau saib zaj xyam hais txog Huab Tais Yes Xus kev txom nyem, mas nej yuav pom tias thaum cov tub rog muab saw hlau nplawm Huab Tais Yes Xus ntawd, dab phem puag ib tug me nyuam mos ntsia ntsoov Huab Tais Yes Xus, dab phem luag thiab tab tom thuam Huab Tais Yes Xus.
Ziag no tus me nyuam dab ntawd loj lawm, nws ntse kawg, nws siab phem thiab txawj ntxias neeg kawg. Nws ntxias tau neeg coob mus ua nws qhev yam neeg tsis nco txog. Piv txwv li nws ntxias kom neeg zeem tseeb tias nyob hauv lub sim ceeb no tsis muaj dab phem ntxias neeg. Nej xav mas nws puas ntse? Nws muaj peev xwm tsis kam lees tias muaj nws. Nws ntxias tau peb kom ntseeg li ntawd, mas thiaj yuav tsis muaj dab tsi thaiv tau nws. Nws ntxias kom peb ua xyem xyav txog peb txoj kev ntseeg Ntuj, piv txwv li nws ntxias kom peb txhob ntseeg tias niam Mab Liab tau tshwm tuaj rau ntau leej pom. Dab ntxias neeg siv neeg kev tsis muaj zog rov los haub neeg kom poob rau nws txoj kev ntxias.
Cov ntseeg hauv lub Koom Txoos Kav Tos Liv coob tus, txawm tias lawv muaj txoj kev ntseeg thiab ua raws li lawv kev ntseeg, lawv mob siab mus teev Ntuj, tsis kav lawv tseem raug ntxias kom ua ntau yam kab ke yuam kev, siv khawv koob, vim lawv raug haub ntxias tias lawv ua li ntawd mas tsis txhaum rau Ntuj. Lawv hais tias lawv tsis tau ua khawv koob mus tsim txom leej twg.
Dab phem mas nws qhia thiab coj peb kev raws li nws tau npaj tseg cia zoo heev. Thaum nws hais kom peb ua ntau yam yuam kev xws li tso siab rau tej pov haum, kev saib hmoov, saib caij nyoog, saib kab teg. Thaum peb ua li hais mas yog dab phem tau ntau thwj cia rau saum peb lawm. Thaum peb mus cuag cov txiv yaig, txiv neeb thov lawv saib peb, ces yog peb tab tom raug ntaus thwj ntag.
Kuv mas tau mus rau tej chav chaw li hais tiag! Kuv hais kom ib tug phooj ywg coj kuv mus cuag ib tug txiv saib yaig, thov nws saib hmoov rau kuv, ces muaj ib tug dab phem tau ntaus nws lub thwj cia rau saum kuv. Txij hnub ntawd los, zoo li kuv raug dab tsi looj koov, kuv npau suav phem, kuv siab fab, ntxhov siab, ntshai thiab xav txo kuv txoj sia tas li. Kuv kuj tsis paub tias ua cas kuv thiaj xav li ntawd. Kuv quaj, kuv lub siab tsis kaj tsis xyiv fab. Kuv thov Ntuj pab kuv, tab sis zoo li Tswv Ntuj nyob deb kuv, ces kuv tau qhib rooj loog rau dab phem los tsim txom kuv lub neej!
Thaum kuv tseem yau, kuv paub tias yog tsis xav kom raug kuv niam muab txim, mas kuv yuav hais lus dag rau kuv niam, ces kuv pib xyaum dag kuv niam. Kuv cov txhaum loj zuj zus tuaj.
Kuv niam hwm Huab Tais Yes Xus tshaj tas ib puas tsav yam, kuv niam saib Huab Tais Yes Xus lub npe yog qhov Ntshiab tshaj plaws, ces kuv txawm xav tias kuv yuav siv kuv niam lub siab ntseeg los ua twj tiv thaiv kuv. Kuv hais rau kuv niam tias ‘Niad! Kuv cog lus rau Huab Tais Yes Xus lub npe tias kuv yuav tsis ua qhov no ntxiv lawm’, ces kuv niam tsis muab txim rau kuv. Kuv pib ua txhauj ntau zuj zus tuaj.
Kuv pom tias ntev mus ces kuv niam paub tias kuv hais dag rau kuv niam xwb, ces kuv niam tsis mloog kuv cov lus, kuv ho pib dag dua tshiab tias ‘Kuv Niad! Thov kom xob tua kuv, yog tias kuv tau hais lus dag rau koj os.’ Kuv tau hais li ntawd ntau zaus.
Dhau los ntev xyoo, xob tua kuv tiag tiag! Hnub no kuv tseem muaj sia nyob ntawm no, vim Tswv Ntuj khuv leej kuv.
Muaj ib hnub, kuv tus phooj ywg Es Tes Las hais rau kuv tias ‘Phooj ywg! Koj twb muaj 13 xyoos lawm, ua cas koj tseem tsis tau nrog txiv neej pw thiab nas?’
Kuv ntsia nws, kuv xav tias ua li cas nws thiaj hais tej lus ntawd, nws tab tom hais dab tsi ned?
Kuv niam qhuab ntuas kuv txog kev txuag lub cev kom ntshiab, tsum ua nkauj xwb mus kom txog hnub yus yuav txiv, yus mam nrog tus txiv pw. Tab sis kuv tus phooj ywg hais rau kuv tias ‘Kuv niam coj kuv mus nrhiav kws tshuaj thaum kuv pib ua poj niam, ces kws tshuaj muab tshuaj cia rau kuv tau noj thaum nrog txiv neej pw.’ Thaum ntawd mas kuv tsis to taub tej yam nws hais no li, ces nws thiaj qhia kuv tias yog thaum yus noj tshuaj ces yus nrog txiv neej pw los yus yuav tsis muaj me nyuam. Nws hais txog kev sib deev rau kuv mloog, nws kuj hais tias ‘Phooj ywg! Ua cas koj yuav tsis to taub dab tsi li nas.’ Nws hais ntxiv tias muaj tej hnub nws mam coj kuv mus sim kom kuv paub xws li nws.
Ces kuv tus phooj ywg coj kuv mus saib cov xyam sib deev, nej xav mas ua cas yuav ntxim txaus ntshai ua luaj? Tus me ntxhais 13 xyoos xwb, thaum pom cov xyam li hais yuav zoo li cas?
Kuv yuav luag tuag tiag tiag, vim kuv poob siab. Thaum ntawd mas zoo li kuv poob rau hauv dab teb, kuv xav khiav tawm los, tab sis kuv tsis khiav vim kuv txaj muag tias tsam kuv tus phooj ywg thuam kuv.
Hnub ntawd, kuv nrog kuv niam mus tom tsev teev Ntuj, kuv xav mus daws txhaum. Thaum kuv daws txhaum mas kuv hais kuv tej txhaum rau tus Leej Choj thiab kuv lees tias kuv tau mus saib cov xyam sib deev thiab kuv tsis qhia rau kuv niam paub. Tus Leej Choj poob siab nthav, nws nthe kuv tias ‘Koj mus saib qhov twg los?’
Kuv ntsia kuv niam uas zaum tom nws qhov chaw zaum, kuv pom tias kuv niam tsis hnov cov lus tus Leej Choj nthe kuv, ces kuv sawv rov los, kuv npau taws rau tus Leej Choj uas nws nthe kuv li ntawd.
Qhov no yog dab phem txoj kev pib haub pib ntxias kuv. Txij hnub ntawd los, kuv pib xyaum zais kuv tej txhaum, kuv lees tsis tas rau tus Leej Choj. Kuv pib xaiv tias yuav lees yam txhaum twg thiab yuav zais yam txhaum twg cia. Kuv pib mus txais lub Cim Yug txawm kuv paub tias kuv lees txhaum tsis tas. kuv tsis tsim nyog yuav mus txais Huab Tais Yes Xus lub Cev zoo li ntawd.
Huab Tais Yes Xus qhia kuv kom pom tias kuv tus plig poob mus rau qhov chaw qis, kuv pib tuag hauv sab ntsuj plig. Qhov kawg kuv tus plig poob rau qib tsis tshuav kev ntseeg ntxiv, tsis ntseeg tias muaj dab phem ntxias neeg. Huab Tais Yes Xus qhib rau kuv pom tias thaum kuv tseem me mas Tswv Ntuj tuav kuv tes cia, kuv tus plig khaub zig Tswv Ntuj. Kuv pib muaj hnub nyoog ces kuv cov txhaum pib ntau tuaj, kuv txhais tes plam ntawm Tswv Ntuj txhais tes. Huab Tais Yes Xus hais rau kuv tias ‘Leej twg noj kuv lub Cev thiab haus kuv cov Ntshav, tab sis nws tus plig tsis tau huv, mas yog nws tab tom noj thiab haus nws cov lus tsawm nws tus kheej.’
Kuv noj thiab haus kuv cov lus tsawm, kuv tab tom foom lus phem rau kuv. Kuv pom tias dab phem cais kuv ntawm Huab Tais Yes Xus tau li cas, vim thaum kuv muaj 12 xyoos mas kuv ntseeg Ntuj, kuv nyiam nrog kuv niam mus zov Leej Pleev lub Cev Ntshiab hauv Tsev Tsam Phooj.
Thaum kuv pib ua neej nyob hauv kev txhaum, kuv lub siab pib tsis kaj, pib muaj kev tawm tsam nyob hauv kuv lub tswv yim. Kuv cov phooj ywg nyiam hais lus rau kuv tias ‘Koj hais dab tsi? Ua cas koj thiaj mus lees txhaum nas? Koj mas ruam tiag tiag li, koj ces caum tsis cuag peb li os, koj mus lees txhaum ntawm Txiv Plig lod? Koj tsis paub los cas tias cov Txiv Plig mas lawv haj yam ua txhaum ntau dua peb nas?’
Kuv cov phooj ywg mas lawv tsis muaj ib tug yuav mus daws txhaum li, tsuas muaj kuv xwb, ces nyob hauv kuv siab pib muaj kev sib ntaus rog, yog kuv niam lo lus thiab cov phooj ywg li lus, kuv lub siab pib xib mus rau cov phooj ywg, ces kuv thiaj ua ib siab tsis mus daws txhaum li lawm. Kuv hais tias kuv yuav tsis mus lees txhaum kom raug Txiv Plig cem ntxiv lawm, kuv mus saib cov xyam xwb thiaj yuav zoo kuv siab.
Nej sib nrog xav txog dab phem lub tswv yim ntxias neeg mas! Thaum kuv muaj 13 xyoo ces dab phem tau ntxias kom kuv txav dem hauv kev daws txhaum. Dab phem mas nws yog tus kws ntxias neeg tiag tiag li, nws muab lub tswv yim phem tswv yim tsis tseeb dhos rau hauv yus lub taub hau. Kuv Nkos Lias Pos Los tau txia ua lub qauv tuag muaj sia txij thaum muaj 13 xyoos los.
Thaum kuv muaj 13 xyoos mas kuv xav tias kuv paub tas txhua yam lawm, txhua yam txuj hais txog Tswv Ntuj mas yog cov txuj qub dhau thiab yog ib zaj tswv yim phim rau cov neeg ruam xwb.
Kuv tseem tsis tau piav rau nej tias thaum Huab Tais Yes Xus lub suab nrov tawm tuaj, thiab dab phem khiav tawm mus mas tseem tshuav ib tug nyob ntawd. Yog Huab Tais Yes Xus hais kom nws nyob, nws quaj qw txaus ntshai kawg tias ‘Niag poj niam no yog kuv tug, yog kuv tug!’ Tos Huab Tais Yes Xus tsis kheev nws tawm mus vim nws yog tus tuaj haub ntxias kuv ntag, yog nws ntxias kom kuv tawm hauv txoj kev daws txhaum, vim li ntawd Huab Tais Yes Xus thiaj hais kom nws zaum nyob ib sab ntawm kuv. Nws hais tsis tseg tias kuv tus plig yog nws tug lawm vim kuv tus plig poob hauv kev txhaum txij hnub nws ntxias tau kuv lawm. Nws yuav nyob zov kuv hnub kuv tus plig raug txiav txim.
Ntxim txaj muag kawg os cov nus muam, thaum kuv pom tias kuv cov txhaum mas ntau tis ntau thiab muab ib tug dab hais tsis tseg tias kuv yog nws tug.
Tus dab no rub kuv tawm hauv kev daws txhaum, ces kuv tus plig thiaj tsis tau txais kev cawm thiab ntxuav kom huv. Kuv cov txhaum tsis yog yuav pub dawb dawb, tab sis nws tau ua tee tsuas dub rau kuv tus plig dawb.
Kuv txais Huab Tais Yes Xus lub Cev yam tsis tsim nyog, txij thaum kuv tsis quav ntsej mus lees txhaum. Li ntawd, thaum peb yuav mus lees txhaum, mas peb yuav thov Leej Ntuj Plig Ntshiab tshoj peb lub siab kom peb lub siab pom kev kaj, txhob cia peb cov txhaum los ntxoov peb siab kom peb xav tias peb tsis muaj txhaum, peb tsis yuav mus lees rau tus Leej Choj thiab thov Leej Choj zam rau peb. Peb cov txhaum yuav rov dag rau peb tias tus Leej Choj ntawd mas nws muaj txhaum ntau dua peb, nws haub peb tias kev daws txhaum yog kab ke qub qub thiab ceeb laj mus daws txhaum.