Lub Tuam Tsev Teev Ntuj Zam Las Tes Laas (Archbasilica of Saint John Lateran/ San Giovanni in Laterano) rau Tswv Ntuj. Lub Tuam Tsev Teev Ntuj no lub Koom Txoos Kav Tos Liv muab saib ua leej niam ntawm tas nrho cov tsev teev Ntuj nyob qab ntuj no.
Lub Tuam Tsev Teev Ntuj Zam Las Tes Laas lub keeb yog li no: Lub caij Nes Los ua Tuam Vaj tswj Los Mas Tuam Teb, nws tau saws tus nom Plaus Tis Yus Las Tes Las Nus (Plautius Lateranus) daim av los ua tseem hwv ntiag tug, ces txog xyoo 313 tus Tuam Vaj Koos Taas Tis Nus (Constantine the Great) pom zoo cia txoj kev teev hawm Yes Xus yog ib txog kev teev hawm raug cai, thiab nws tseem pub Plaus Tis Yus Las Tes Las Nus lub tuam tsev nrog rau thaj av rau Vaj Qhia Mis Tis As Des (Pope Miltiades) tau ua chaw nyob thiab teev Ntuj.
Xyoo 324 Vaj Qhia Xis Ves Taws tau muab Las Tes Las Nus lub tuam tsev fij rau tus Cawm Seej (The Most Holy Saviour). Los txog tiam 10 lub Koom Txoos muab lub Tuam Tsev Teev Ntuj no ua chaw hwm Leej Ntshiab Zam Ntxuav Plig. Tiam 12 muab hloov los ua chaw hwm Leej Ntshiab Hauv Paus Xa Lus Zam. Yog li thiaj li hu lub Tuam Tsev Teev Ntuj no ua ‘Tuam Tsev Teev Ntuj Zam Las Tes Laas’. Zim txwv no lub Tuam Tsev Teev Ntuj no yog Vaj Qhia lub tsev teev Ntuj.
Nyob hauv lub Tuam Tsev Teev Ntuj muaj ib yam tseem ceeb thiab muaj nuj nqes heev; yog Leej Ntshiab Pob Zeb lub Rooj Txi Ntuj (The High Altar). Nyob saum lub Rooj Txi Ntuj lub ruv yog chaw khaws Leej Ntshiab Pob Zeb thiab Leej Ntshiab Paj Lug nkawd ob lub khauj khaum taub hau.