Cov zaj hauv no yog Txiv Plig Nyiaj Pov cov lus hais nyob hauv cov Hmoob ntseeg nyob Thaib teb lub Rooj Sab Laj nyob Khej Me xyoo 2001 tim 14 lub 11 hlis.
Tswv Ntuj pom ntiaj teb neeg ua ntau yam phem los ntau txhiab ntau vam xyoo, mas Tswv Ntuj tsuas npaj tib txog kev cawm ntiaj teb neeg. Tswv Ntuj txiav siab tias nws yuav xa nws Leej Tub nqes los ua neeg nyob hauv ntiaj teb no.
Nws Leej Tub uas ib txwm nrog nws tsim tas lub sim ceeb yuav nqes los qhia tas ib zeej tsoom neeg tias Tswv Ntuj txoj kev cawm neeg yog zoo li cas.
Tab sis Tswv Ntuj yuav tsum xub npaj ib haiv neeg xyaum tig los yuav ib lub siab tshiab tso, ces haiv neeg ntawd yuav txais tau nws Leej Tub cov lus qhia tias Tswv Ntuj txoj kev cawm neeg yog zoo li cas.
1850 xyoo ua Yes Xus ntej, Tswv Ntuj tshoj tus yawg koob ‘Has Nplas Has’ (Abraham) kom nws tso txoj kev teev dab tseg thiab pib tig los teev Tswv Ntuj tib leeg, pib xyaum ua lub neej mloog Tswv Ntuj lus, xyaum tso siab rau Tswv Ntuj. Thaum Tswv Ntuj hais rau Has Nplas Has tias nws cov xeeb zeej xeeb ntxwv yuav coob ib yam li cov hnub qub nyob saum ntuj. Has Nplas Has ntseeg Tswv Ntuj, ces nws poj niam Xas Las xeeb tub. Has Nplas Has muaj tub, muaj xeeb ntxwv; yog His Xas Has, Yas Kos thiab Yos Xes.
Ze ntawm 1700 xyoo ua Yes Xus ntej, lawv tsiv mus nyob Hais Nkws Tos teb 400 xyoo. Nyob Hais Nkws Tos teb lawv huam vam zoo. Nyob nyob, cov vaj Hais Nkws Tos yuam kom Has Nplas Has cov xeeb ntxwv ua qhev. Tswv Ntuj pom nws haiv neeg raug yuam ua qhev, nws xav npo lawv dim ntawm txoj kev ua qhev, ces Tswv Ntuj thiaj ua kom ib tug me tub His Xas Lais tau kev mus kawm txuj nrog tus vaj Hais Nkws Tos cov tub, thiab kom nws nrog tus vaj cov tub ua nom. Tus tub His Xas Lais ntawd hu ua ‘Mais Xes’ (Moses). Thaum Mais Xes muaj 40 xyoo, Tswv Ntuj hu Mais Xes kom nws mus cuag Tswv Ntuj nyob hauv ib tsob pos cig cig nyob saum lub roob Xis Nais. Tswv Ntuj xa Mais Xes mus npo haiv neeg His Xas Lais kom dim ntawm kev ua tus vaj Hais Nkws Tos cov qhev. Mais Xes rov mus tos cov His Xas Lais ua qhev nyob Hais Nkws Tos teb, nws coj lawv tuaj txais Tswv Ntuj cov lus qhia nyob ntawm lub roob Xis Nais. Tswv Ntuj tshaj 10 lo lus qhia rau cov His Xas Lais xyaum coj. Yog 1250 xyoo ua Yes Xus ntej Tswv Ntuj thiaj tshaj 10 lo lus qhia.
Tswv Ntuj thawj lo lus qhia yog kom cov His Xas Lais xyaum teev thiab mloog nws tib tug ua lawv tus Huab Tais, thiab xyaum sib nyiam sib hlub ib yam li yus nyiam yus. Tswv Ntuj cog lus tias “Yog nej coj kuv 10 lo lus qhia mas kuv yuav yog nej tus Tswv Ntuj tiag, thiab nej yuav yog kuv haiv neeg tiag.” Tswv Ntuj thiab cov His Xas Lais sib cog lus nyob ntawm taw roob Xis Nais.
Tab sis cov His Xas Lais feem coob tsis coj 10 lo lus qhia. Lawv nyiag teev lwm haiv neeg cov dab, lawv sib ntxub, lawv sib kom ua plaub ua ntug, lawv zes luag poj luag sev thiab ua tub sab tub nyiag. Tswv Ntuj ua siab ntev tas nrho rau cov His Xas Lais.
1250 xyoo nws pub kom lawv muaj tej tus vaj siab ncaj coj lawv, pub kom muaj Yaj Saub qhuab qhia lawv. Cov His Xas Lais yeej muaj ib txhia nyiam Tswv Ntuj tiag, hos ib txhia tsis nyiam thiab tsis mloog, ces thaum Tswv Ntuj Leej Tub nqes los ua neeg kom tau qhia Tswv Ntuj txoj kev cawm ntiaj teb neeg mas muaj ntau leej zoo siab txais Tswv Ntuj thiab mloog nws lus.
Yes Xus kev cawm neeg tsis yog ib txog kev ua si. Hais lub ntsiab luv luv mas txoj kev cawm neeg uas Yes xus cev rau peb yog ua raws li 5 yam no :
1. Yog coj tus yam ntxwv ntshiab huv xws li Yes Xus tau coj tas nws sid 30 tawm xyoo.
2. Yog coj tus yam ntxwv haum cov lus qhia cov neeg muaj txoj hmoov (MT 5: 1 – 12).
3. Yog coj tus yam ntxwv haum Yes Xus cov lus uas nws cov thwj tim khaws tseg nyob hauv 4 phau ntawv Moo Zoo.
4. Yog tuaj yeem siv yus txoj sia los pab luag tej, xws li Yes Xus ua nyob saum ntoo cuam.
5. Yog ua raws li cov lus kawg uas Yes Xus hais rau nws cov thwj tim mloog (Z 17: 1-26).