11. Kev rho me nyuam yog kev txhaum hnyav
Txhua zaus thaum ib tug me nyuam mos hauv neeg lub cev ntshav ntws tawm hauv nws txoj sia mas yog kev txi Dab Phem thiab Dab Phem yuav tau txais tus me nyuam ntawd lub zog mus ntxiv rau nws lub kom yim muaj zog loj tuaj. Tus me nyuam ntawd tus nplij quaj qw. Kuv thov hais rau nej tias peb tab tom hais txog tus nplig hlob tiav lawm txawm tias cov nqaij tsis tau xeeb qhov muag, tsis tau ua lub cev neeg. Yog li nws thiaj quaj qw tau thaum lub cev raug kev puas. Thaum tus plig quaj li ntawd mas lub ntuj qeeg tab sis dab teb dhia hom khaj nyob hauv lawv txoj kev yeej. Kuv muab hais ua piv txwv zoo li thaum neeg ncaws pob hauv lub tshav. Dab Phem yuav dhia zoo siab tas tus xws li thaum lawv tog ncaws lub pob nkag lub qhov rooj.
Kuv pom tus Dab Phem muab kuv tus me nyuam cov ntshav ntov rov los ywg kuv thiab cov kws kho mob, ces kuv tus plig txia ntshis ua ib tug plig dub nciab.
Kuv kaus tus me nyuam pov tseg tas, kuv xav tias ziag no kuv lub cev tsis muaj txhaum lawm tiag. Tab sis yog yam txaus tu siab tshaj plaws, Huab Tais Yes Xus kom kuv pom tias kuv tau txaus siab tua lwm txoj sia zoo li cas. Kuv siv txoj xov ntsaws cia hauv kuv lub qhov yug me nyuam txij thaum ntawd los txog hnub kuv raug xob tua no. Kuv tau nro tawm yog ib zaug xwb, yog thaum kuv xav muaj me nyuam.
Kuv xav hais rau cov poj niam siv txoj xov pab kom txhob muaj me nyuam xws li kuv no tias thaum nej siv mas yuav muaj ib co ntshav tuag nyob hauv nej lub cev, ces yuav ua rau nej mob tshaj qhov qub tuaj, thaum mob ces peb mus nrhiav kws kho mob, lawv yuav muab tshuaj rau peb noj kom qhov mob ntaug, lawv yuav hais tias txhob ntxhov siab, tsis muaj dab tsi os. Tab sis nej puas paub tias tiag tiag yog zoo li cas? Yog peb tab tom kaus me nyuam pov tseg. Txoj xov no yog yam twj pab kaus me nyuam, vim tias thaum tus kab thiab lub qe sib txuam mas yog lub sij hawm Tswv Ntuj tsim tus ntsuj duab ntsuj plig. Tab sis txoj xov tsis pub kom lub qe mus khuam ntawm lub tsev me nyuam ces lub qe thiaj maj mam saus mus, ces tus plig thiaj raug rhuav tawm hauv lub qe ntawd. Yog peb tab tom kaus me nyuam pov tseg, yog peb tab tom muab tus plig tua kom tuag, yog peb tab tom txwv tsis pub kom txoj sia tsheej xeeb tau.
Yog qhov mob tshaj uas pom tias muaj cov me nyuam coob npaum cas raug tua pov tseg zoo li hais. Lub hnub me me Tswv Ntuj tsim los tsis muaj peev xwm khuam tau ntawm lub tsev me nyuam, lawv quaj lawv kom rau Tswv Ntuj tias ua cas lawv thiaj raug tua nyob hauv Tswv Ntuj txhais tes zoo li no.
Nej puas muaj cuab kav lees tias nej tsis tau ua li kuv tau hais, nej tsis paub txog mas!
Thaum kuv mus tom tsev teev Ntuj mas kuv tsis muab siab mloog tus Leej Choj nthuav Tswv Ntuj Lo Lus. Yog muaj neeg nug kuv tias hnub no Ntawv Moo Zoo hais txog dab tsi, mas kuv tsis paub yuav teb li cas rau nws. Kom nej to taub tias txawm yog lub sij hawm teev Ntuj los Dab Phem yeej nrog peb nyob ntsoov, nws ntxias kom peb xav txog lwm yam, kom peb txhob muab siab rau mloog Tswv Ntuj Lo Lus. Muaj ib zaug kuv tsis kub siab koom thaj txi Ntuj ces tus Tshiab pov hwm kuv tau los diaj kuv lub cev thiab qhib kuv pob ntseg kom kuv hnov Txiv Plig nthuav Tswv Ntuj Lo Lus. Kuv hnov Txiv Plig hais txog kev siv txoj xov kom txhob muaj me nyuam xws li txoj kuv tab tom siv no, Txiv Plig hais tias tus neeg siv li hais mas yog nws tab tom tua txoj sia me me hauv nws lub cev. Koom Txoos txoj hauj lwm yog txuag txoj sia, yog li mas tus neeg twg tsis txuag nws thiab lwm tus txoj sia mas nws yuav txais tsis tau Yes Xus lub Cev.
Kuv hnov Txiv Plig hais li mas kuv npau taws rau nws, kuv xav twj ywm tias nws hais txog dab tsi, nws muaj cai txwv tsis pub cov poj niam siv lod, ua cas lub Koom Txoos yuav caum tsis cuag lub ntiaj teb li, lub Koom Txoos mas tsis nrhiav qhov tiag li, cov Leej Choj lawv xav tias lawv yog leej twg, lawv puas yuav nrhiav rau cov me nyuam peb yug los noj mas! Kuv tawm kiag hauv lub tsev teev Ntuj los tam sim ntawd.
Thaum kuv sawv ntawm Tswv Ntuj xub ntiag mloog Tswv Ntuj txiav txim rau kuv, kuv yuav hais tias kuv tsis paub txog tej yam no tsis tau, thiab kuv tseem niaj hnub siv txoj xov tsis pub muaj me nyuam, kuv tsis mloog tus Txiv Plig cov lus ntuas.
Muaj puas tsawg tus me nyuam kuv tau muab tua tuag zoo li ntawd? Tim tej no mas kuv thiaj ua neej nyob nrog kev mob hlwb, kuv lub tsev me nyuam txia ntshis ua lub tsev txo txoj sia. Leej niad yog tus Tswv Ntuj pub lub txiaj ntsim rau kom nws ua tus xeeb txoj sia thiab tu nws cov me nyuam, tiv thaiv nws cov me nyuam ntawm tej xwv txheej yuav tuaj nphav lawv. Tab sis leej niam ntawd rov yog tus muab nws cov me nyuam tua pov tseg.
Dab Phem lub tswv yim mas zoo li no, ces tib neeg thiaj muaj peev xwm tua tau lawv tej me nyuam tiag. Ziag no kuv nkag siab lawm tias ua cas kuv thiaj niaj hnub iab siab, mob hlwb thiab siab tsis kaj. Ua cas kuv lub ntsej muag thiaj ntshaus tas mus li. Ua cas kuv thiaj npau taws rau yam ub yam no. Yeeb vim kuv tau muab kuv ua lub twj tua neeg, mas kuv tus plig thiaj nyob hauv Dab Phem lub hiav txwv.
Kev ntaus cev kaus me nyuam pov tseg, yog kev txhaum hnyav tshaj plaws vim yog kev tua neeg thaum tseem nyob hauv leej niam plab. Tus me nyuam tseem ntshiab tsis muaj peev xwm pab tau tus kheej, nws txoj sia ntxiv lub zog loj rau Dab Phem. Tus me nyuam mos hauv neeg lub cev zoo puav tam li tus yaj dawb tsis muaj ib qho dub txuag. Leej twg thiaj yog tus zoo tswv zov tus me yaj no, kawg yog Huab Tais Yes Xus. Thaum ntawd mas cov me nyuam hauv leej niad plab yog Tswv Ntuj tus duab thiab zoo xws li Huab Tais Yes Xus ntag. Leej niam txo tau nws tus me nyuam txoj sia, mas nws tau muab nws khi nyob hauv qhov tsaus ntuj, nws tau qhib dab teb lub rooj loog cia Dab Phem tawm los rhuav ntiab teb neeg. Txhua zaus thaum muaj neeg kaus me nyuam mas yog lawv tab tom qhib dab teb qhov rooj kom cov Dab tawm los nyob saum ntiaj teb. Cov Dab mas lawv tawm los ntxias thiab coj neeg mus ua kev txhaum tus qhev, ua qhev tsob hwb kev phem, tsob hwb neeg cev nqaij.
Yog peb tau cev tus yawm sij rau Dab Phem, ces thiaj muaj kev ze luag txij nkawm, kev plees, kev teev hawm Xas Tas, kev tsis ntseeg tias muaj Tswv Ntuj, kev tua tus kheej, kev tsis haum xeeb, txhua yam phem nyob puag ncig peb. Lub ntiaj teb no qias mus zuj zus vim niaj hnub muaj kev txo cov me nyuam mos hauv neeg lub cev. Qhov no yog Dab Phem kev yeej, yog tus nqe them rau cov me nyuam mos cov ntshav.
Peb ua txhaum yam tsis paub dab tsi li thiab peb tau hloov peb txoj sia ua hluav taws kub tsis txawj kug, ces peb thiaj ntsib teeb meem, kev mob nkeeg, kev phem kev tsis zoo. Txhua yam no yog peb qhib lub qhov rooj caw Dab Phem coj los tso rau hauv peb xwb. Peb tso cai rau Dab Phem los koom ua neej nrog peb.
Tsis yog kev kaus me nyuam xwb, peb tseem tsa ncauj yws Tswv Ntuj cem Tswv Ntuj tias ua cas thiaj pub kom kuv raug mob, ua cas thiaj cia kev txom nyem tuaj chwv kuv, ua cas kuv txoj hmoov thiaj phem li no.
Tiam sis Tswv Ntuj siab zoo, nws pub lub Cim Sib Haum Xeeb rau peb, yog Cim Daws Txhaum. Peb muaj cib fib tu siab rau peb tej txhaum thiab mus thov Tswv Ntuj zam lub txim rau peb, kom Tswv Ntuj ntxuav peb hauv peb cov txhaum, kom Tswv Ntuj daws txoj hlua Dab Phem muab khi peb ntawd. Peb daws txhaum ces peb tus plig thiaj yuav raug ntxuav kom ntshiab tuaj.
Tab sis ntawm kuv, mas kuv ua tsis tau!