10. Kev ntaus cev nchuav me nyuam
Es Tes Las, kuv tus phoo ywg, nws lub cev xeeb me nyuam thaum muaj 13 xyoos. Nws hais qhia rau kuv, ces kuv nug nws tias “Koj tsis noj tshuaj los cas?” Nws teb tias “Noj mas, tab sis tshuaj pab tsis tau ne.”
“Ua li koj yuav ua li cas mas?” Kuv nug nws ntxiv, ces nws teb kuv tias nws tsis paub yuav ua li cas thiab.
Txog lub 5 hlis, nws plab me nyuam muaj 5 hlis lawm, nws nrog nws niam caij tsheb mus so ua si. Thaum nws rov los txog, kuv pom nws mas kuv poob siab tas vim tias nws yuag yuag daj ntseg kawg li.
Yav ua ntej no mas Es Tes Las yog ib tug nyiam tham pem tso dag tso luag, nws kiab heev. Tab sis ziag no nws nyob ntshaus ntsho ntsoo ntsoo, tsis hais lus lom zem li yav thaud.
Muaj ib hnub kuv mus xyuas nws tom tsev ces nws mam hais qhia tias thaum nws niam paub tias nws muaj me nyuam mas nws niam npau taws heev, nws niam coj nws mus nrhiav kws tshuaj, kom kws tshuaj pab ntaus tus me nyuam hauv nws lub cev. Hais li tas mas Es Tes Las qhib nws lub phij xab rau kuv saib nws tus me nyuam. Tus me nyuam raug ntim cia hauv lub fwj ntim dej puv phwj yaws. Nyob ze ze ntawd muaj ib co tshuaj noj kom txhob muaj me nyuam thiab.
Saib mas! Txoj kev txhaum ua rau neeg dig muag tiag. Kev txhaum ua kom leej niam coj tus ntxhais mus ntaus cev kaus tus me nyuam hauv nws lub plab. Tseem khaws tus me nyuam cia saib kom nco tias yog tsis xav muaj me nyuam mas tsum noj tshuaj ua ntej yuav nrog txiv neej pw. Nej puas pom yam Dab Phem tau ua rau neeg mas!
Kuv nug Es Tes Las tias nws puas tu siab rau tej xwm no, nws hais tias “Ua cas kuv thiaj tsum tu siab mas, kuv haj yam zoo siab vim thaum kuv rho tus me nyuam tawm hauv kuv plab lawm, mas zoo li kuv dim hauv kuv qhov teeb meem lawm tiag.”
Nws lo lus no yog lus dag xwb, kuv paub, vim txij hnub ntawd los mas nws tsis zoo li qub lawm. Nws pib xav ntau, nws pib tig mus siv tshuaj pab kom nws lub hlwb txhob xav ntau ntau. Es Tes Las hais tias yog nws noj tshuaj mas zoo li nws lub hlwb tsis xav txog dab tsi, ces nws lub cev sib tuaj zoo li nws tab tom nrog huab cua ya rau qhov ub qhov no, nws pom ntau yam nws xav pom.
Es Tes Las muab tshuaj rau kuv, nws xav kom kuv nrog nws noj tshuaj ua ke, kuv xav sim saib puas yuav zoo li nws hais, tab sis kuv ntshai tsam kuv niam paub ces kuv tsis kam.
Huab Tais Yes Xus ua kom kuv to taub tias tsis yog vim kuv ntshai kuv niam cem, tiam sis yog Tswv Ntuj lub txiaj ntsim pab kuv, mas kuv thiaj cheem tau kuv lub siab. Ntuj lub txiaj ntsim pab tau kuv vim kuv niam niaj hnub thov Ntuj thiab hais saw Mab Liab pub rau kuv.
Thaum kuv cov phooj ywg paub tias kuv tsis kam nrog Es Tes Las noj tshuaj mas lawv cem kuv thiab saib tsis taus kuv. Lawv hais npaum cas thiab txhib kuv kom nrog lawv haus tshuaj ua ke, los kuv lub siab ua tsis tau li lawv hais. Qhov no yog ib lub txiaj ntsim hauv ntau lub txiaj ntsim uas kuv niam thov rau kuv tiag tiag.
Ib xyoos dhau ib xyoos, kuv muaj 16 xyoo ces kuv pib muaj hluas nraug, kuv tawm mus nrog nws ua si. Kuv cov phooj ywg nyiam nyiam hais tias tshuav kuv xwb thiaj tsis tau nrog txiv neej pw, ua rau kuv zoo li yog tus yaj hauv pab tshis. Kuv tau hais rau lawv tias yog kuv ntsib tus kuv nyiam tiag mas kuv mam nrog nws pw, tab sis tsis yog ziag no, tsis yog thaum kuv thiab nws tsis tau sib yuav. Kuv hais rau Es Tes Las tias “Tsam kuv muaj ib plab xws li koj ne, kuv yuav ua li cas mas?” Es Tes Las maj zeeg hais tias txhob hais txog tej dhau los, ziag no mas muaj cov hnab looj kom txhob muaj me nyuam lawm. Nws tseem hais tias cia nws mam nrhiav tshuaj 5 lub rau kuv noj thiab nrhiav hnab rau kuv tau siv.
Thaum ntawd mas kuv tsis xav kom cov phooj ywg hais lus saib tsis taus ces kuv thiaj yuav tau ua raws li lawv hais.
Thaum kuv nrog thawj tug txiv neej pw tas, kuv ras tau kuv niam tej lus ntuas tias ‘cov me ntxhais tau nrog txiv neej pw lawm, lawv lub siab lub ntsws yuav tsis kaj.’ Ziag no kuv zoo li ntawd tiag, zoo li muaj tej yam plam ntawm kuv mus, kuv yuav rub yam ntawd rov los nyob hauv kuv tsis tau lawm. Kuv tu siab, kuv xav tsis thoob tias ua cas thiaj muaj coob leej hais tias kev sib deev yog yam zoo nkauj? Ua cas tej hluas pheej cav zog zaws tias kev pw ua ke yog qhov ntxim siab? Ua cas kuv sim tas mas tsis zoo li lawv cav txog?
Nyob hauv peb teb chaws no, sawv daws hais txog kev sib deev, kev nrog lwm tus pw li cas thiaj tsis kis mob los muaj me nyuam thiab tseem txhawb kom sawv daws siv cov hnab thaum yuav pw ua ke. Tej no mas tseem hwv thiab cov kws txuj tshaj tawm raws tej xov xwm thiab tej xyam hauv TV. Yog li tej no thiaj ua rau muaj kev sib deev coob nyob hauv peb lub teb chaws. Kuv tu siab thaum pom tej yam no, kuv xav kom lawv to taub qhov tseeb.
Kuv tu siab heev ces kuv tsis xav mus tsev, vim tej zaum kuv niam ntsia kuv ces nws yuav paub tias muaj tej xwm li no tshwm tuaj rau kuv. Kuv yuav ntsia tsis taus kuv niam ob lub qhov muag vim nws yuav pom yam kuv ua tawm hauv kuv qhov muag los.
Kuv npau taws rau kuv cov phooj ywg thiab kuv chim rau kuv tus kheej, kuv chim tias ua cas kuv yuav ua siab muag cia kuv lub cev mus ua tej yam kuv tsis xav ua, ua cas kuv thiaj yeem ua kom xwv kuv cov phooj ywg txaus siab rau kuv xwb.
Nej tsum paub tias vim kuv tsis cheem kuv lub siab kom txhob ua raws li kuv cov phooj ywg txw, thiab vim kuv tsis paub npaj ua ntej yuav nrog kuv tus hluas nraug pw, ces kuv thiaj muaj me nyuam.
Nej xav mas, ib tug ntxhais 16 xyoo thaum nws paub tias nws lub cev xeeb tub lawm, nws yuav poob siab npaum cas! Kuv pom tias muaj ntau yam nyob hauv kuv lub cev hloov mus. Txawm tias kuv ntshai, tsis kav kuv tseem muaj lub siab hlub txoj sia xeeb nyob hauv kuv lub cev.
Kuv hais rau kuv tus hluas uas ziag no yog kuv tus txij nkawm kom nws paub tias kuv muaj nws tus me nyuam rau hauv kuv lub cev lawm. Nws poob siab, kuv xav tias nws yuav hais tias ‘wb los sib yuav ua niam txiv yuad.’ Tab sis nws hais rau kuv tias “Wb txhob ua kom lub neej no ntxhov.” Tsis tas li, nws tseem txhib kom kuv mus muab tus me nyuam hauv kuv lub cev kaus pov tseg thiab.
Kuv yim ntxhov siab thiab lub siab tsis kaj ces kuv thiaj mus hais qhia rau Es Tes Las. Es Tes Las hais rau kuv tias “Txhob ntxhov siab mas, tsis muaj dab tsi txaus ntshai. Koj tsis nco qab tias kuv noj tshuaj ntaus me nyuam thiab kaus me nyuam pov tseg ntaus zaus lawm lod. Zaum ib mas koj lub siab yeej tsis kaj tiag, tab sis ntev mus ces koj yuav tsis nco tej ntawd lawm.”
Kuv hais ntxiv tias “Kuv ntshai tsam kuv niam pom kuv lub nplab ces kuv niam yuav muab kuv tua.”
Es Tes Las nplij kuv tias “Tsis txhob ntxhov siab txog dab tsi mas, koj lub nplab twb tsis tau loj ned. Tos kuv niam paub tias kuv muaj me nyuam mas yog kuv tus me nyuam hauv plab loj lawm, tab sis koj mas tus me nyuam tseem me me. Li ntawd mas koj txhob ua siab fab ntxhov siab cuag ko. Koj niam yuav tsis pom thiab nws yuav tsis paub tias koj muaj me nyuam nas!”
Kuv cov nus thiab cov viv ncaus sawv daws es! Tu siab kawg li, mob siab tiag tiag li os. Niag Dab Phem ntxias kom peb xav li ntawd tau li cas, peb xav tias tsis muaj dab tsi li, tsis tseem ceeb rau peb kiag li. Xws li kev kaus me nyuam ntaus kom me nyuam nchuav yog yam neeg ib txwm ua tau yooj yim. Cov neeg ruam mas lawv xav tias kev sib deev zoo li ib pluag hmo yuav tsum noj, yog qhov tsis txhaum. Tab sis nej puas paub tias ua cas Dab Ntxias Neeg thiaj ua li ntawd? Ua cas nws thiaj haub neeg kom ua li ntawd? Vim nws xav kom neeg muab txoj sia los txi rau nws, vim thaum muaj ib tug neeg twg txo lwm tus txoj sia ces Dab yuav muaj zog loj tuaj.
Koj yuav xav tsis txog tias thaum kuv mus txog tom tsev kho mob mas kuv ntshai thiab tu siab npaum li cas. Kws tshuaj kom kuv hnia tshuaj tsaug zog, ces thaum kuv lub cev rov hnov mas kuv tsis zoo li qhov qub lawm, lawv tau muab kuv tus me nyuam tua tuag lawm, zoo xws li kuv tau nrog kuv tus me nyuam tuag mus ua ke tas ib txhis.
Huab Tais Yes Xus cia kuv pom hauv daim ntawv txheeb kuv txoj sia, yam peb lub qhov muag no tsis pom mas thaum ntawd peb yuav pom. Kuv pom tias tus kws kho mob muab ib rab twj hlau me me cev mus tais tus me nyuam mos thiab nias kom nws lub cev tawg tas. Tus me nyuad tsa suab quaj thov los tus kws kho mob tsis tseg, nws tseem rau siab ntso ua nws qhov hauj lwm kaus tus me nyuam lub cev kom tawm tas. Tus me nyuam txawm nws tseem yog lub qe xwb los nws tus plig twb yog neeg lawm, vim ntsuj plig tsis loj hlob zoo xws li neeg lub cev. Neeg tus plig mas yog Tswv Ntuj tsim los txij thaum txiv neej tus kab txuam nrog poj niam lub qe nyob hauv lub tsev me nyuam. Tej no yog kuv pom nyob hauv daim ntawv txheeb kuv txoj sia. Thaum tus kab thiab lub qe sib txuam kiag mas yuav muaj ib kab ci laim txias xws li lub hnub qhov pom kev, thaum ntawd yog muaj tus ntsuj plig xeeb kiag nyob hauv lub qe ntag. Tus ntsuj tus plig no mas Tswv Ntuj tsim kom zoo xws li Tswv Ntuj tus duab. Tswv Ntuj tau nqes los nyob hauv lub qe txia ua me nyuam ntawd lawm.
Thaum tus me nyuam raug kaus raug ntaus kom ntsoog tas no mas kuv pom tias Tswv Ntuj poob siab nthav vim tus ntsuj plig hauv Tswv Ntuj ob txhais tes tab tom raug dua ua sab ua sua. Tus me nyuam quaj qw ces tas lub Ntuj qeeg tas. thaum kuv tua kuv tus me nyuam, kuv hnov nws lub suab quaj, kuv pom Huab Tais Yes Xus dai saum tus Ntoo Cuam tab tom los kua muag thiab raug txom nyem loj vim muaj ib tug plig tab tom raug luag tua, tas Huab Tais Yes Xus lub siab mas mob thiab tu siab tshaj plaws. Yog nej tau pom xws li kuv pom, mas tas nej lub neej nej yuav tsis kam kaus me nyuam pov tseg li lawm.
Kuv xav nug nej tias nyob tas qab ntuj no muaj neeg kaus me nyuam pov tseg coob npaum cas? Ib hnub muaj puas tsawg leej tau mus kaus lawv tus me nyuam tawm hauv lawv lub cev? Ib hlis ne muaj puas tsawg tus plig raug tua zoo li ntawd?
Nej puas to taub txog tej txhaum peb tau ua mas? Kev txom nyem lwj plawv ntau npaum cas uas peb tau ua rau Tswv Ntuj?
Tab sis Tswv Ntuj siab zoo npaum cas, Tswv Ntuj hlub peb npaum cas, nws thiaj tsis txheeb txog peb tej txhaum. Tab sis saib yam peb tau ua rov los tsim txom peb saib! Dab Phem los tswj tau peb txoj sia li cas?