12. Lub tswv yim phem haub kom yuam kev
Muaj puas tsawg zaus peb tau txo lwm tus txoj sia? Peb puas tsawg leej ntxhov siab tsis paub tias tej me nyuam yuav hnav ris tsho dab tsi, lawv puas yuav tau noj tsau plab, lawv puas yuav tau kawm ntawv, lawv puas muaj mob? Tab sis muaj puas tsawg zaus peb tau tua peb tej me nyuad?
Muaj coob tus me nyuam tu siab, npau taws, chim siab vim lawv tsis tau nyob ze niam thiab txiv, lawv tsis tau txais niam txiv kev nyiam kev hlub.
Thaum tus niam tsev mus hauv lub tsev Txoos mas nws hais tias “Kuv tus Tswv Ntuj, kuv ua koj tsaug vim koj pub cov me nyuam mloog lus rau kuv, thaum lawv txiv tso peb tseg ua ntsuag mas kuv cov me nyuam tau ua neeg zoo, lawv hlub kuv thiab ntxub lawv txiv.”
Tus niam tsev no tau ua dab tsi? Nws tab tom tua nws cov me nyuam lub siab vim kev ntxub yog kev txo txoj sia.
Muaj puas tsawg zaus peb tau pub tshuaj muaj taug rau peb tej me nyuam noj? Koj yuav tsis paub tias Tswv Ntuj tu siab npaum cas? Tswv Ntuj tsis xav kom peb ua li ntawd.
Huab Tais Yes Xus pub kuv pom qhov tseeb tias kuv yog tus kws tua neeg siab lim hiam, vim tsis yog kuv tau txo txoj sia hauv kuv lub cev xwb, kuv tseem pub nyiaj pab lwm tus kaus me nyuam pov tseg thiab. Qhov no yog nyiaj txiag lub hwj chim kuv tau txais. Kuv tau koom nrog lawv ua txhaum. Kuv tau hais tias poj niam muaj cai xaiv tias lawv xav muaj los tsis muaj me nyuam yeej tau.
Kuv ntsia hauv daim ntawv txheeb txoj sia ces kuv tu siab rau yam kuv tau ua. Kuv loj tuaj, kuv ntim ib hwj tshuaj muaj taug cia hauv nruab siab, ces kuv thiaj tsis muaj peev xwm yuav cev yam zoo rau lwm tus tau, thiab tus neeg tuaj cuag yus lawv raug yus cov tshuaj lom lawv.
Muaj ib pab me ntxhais, yog kuv cov txheeb ze, lawv thiab lawv cov hluas nyiam tuaj nrhiav kuv. Kuv nrog lawv tham thiab qhia lawv tias yuav tu lub cev li cas thiaj ntxim txiv neej siab. Kuv tau hais tej lo lus ntxiv lub tswv yim phem rau hauv lawv. Qhov no yog ib yam txhaum txaus ntshai. Kuv hais rau lawv tias “Txhob ua neeg ruam, me ntxhais mas tsis thas yuav mloog niam txiv lus qhia txog qhov zoo thiab kev txuag tus kheej kom ntshiab, vim tej lus qhia ntawd yog tej lus qub dhau. Tej niam txiv mas lawv nyiam hais txog Ntawv Ntshiab uas yog cov lus dhau los tau ob txhiab xyoo los lawm. Cov Txiv Plig mas lawv caum tsis cuag lub ntuj tiam no, lawv thiaj hais tias txhob ua li ub li no vim Vaj Qhia tau txwv cia. Nej twb paub tias Vaj Qhia los nws kuj yog tus caum tsis cuag lub ntuj xws li cov Txiv Plig thiab.”
Nej xav mas, kuv tau hliv tshuaj muaj taug rau hauv cov me ntxhais lub siab kom lawv ntxees lub tswv yim. Kuv hais rau lawv tias lawv yuav ua li cas rau lawv lub cev los yeej ua tau, lawv tsum txawj xav tias yuav ua li cas lawv thiaj yuav tsis muaj me nyuam nrog tus hluas.
Kuv ib tug xeeb ntxwv txiv neej nws tus hluas nkauj muaj 14 xyoo xwb, nws tuaj nrhiav kuv tom kuv chav kho mob, nws quaj thiab hais qhia rau kuv tias “Nkos Lias, kuv tseem yog me nyuam ntxhais tab sis kuv tab tom muaj ib plab lawm os.”
Kuv nthe nws tias “Ua cas koj yuav ruam tas npaud, kuv tsis tau qhia rau koj lod, kuv twb hais tias yuav ua li cas thiaj tsis muaj me nyuam!”
Nws teb tias “Koj qhia mas, kuv ua li koj hais lawm tiag, tab sis pab tsis tau kuv ne!”
Nej puas xav paub tias thaum ntawd Tswv Ntuj xav kom kuv ua dab tsi? Tswv Ntuj xav kom kuv cev tes mus pab tus me ntxhais ntawd kom txhob poob mus rau dab teb, kom kuv txhob pub nws mus muab tus me nyuam rho pov tseg.
Kev kaus me nyuam pov tseg yuav rub yus mus hauv dab teb, ua rau peb ntxhov siab, mob siab vim peb tau tua peb tus me nyuam.
Kuv tsis yog yuav pab kom nws txhob ua li hais, kuv tseem muab nyiaj rau nws thiab hais kom nws mus muab tus me nyuam kaus pov tseg thiab!
Tsis yog tus me ntxhais no xwb, kuv tseem tau pub nyiaj rau ntau tus me ntxhais coj mus ntiav kws kho mob kaus lawv cov me nyuam thiab.
Kuv twb tau pab lwm tus tua neeg zoo li no, mas thaum kuv nyob ntawm Huab Tais Yes Xus xub ntiag kuv tseem muaj cuab kav hais tias kuv tsis tau txo lwm tus txoj sia, kuv mas yog neeg zoo, kuv yog cov ntseeg hauv Koom Txoos Kav Tos Liv, tsis tsim nyom kuv yuav poob rau dab teb.
Dhau ntawd, kuv tau ua tsis zoo rau cov neeg kuv tsis nyiam lawv, kuv tau tawm tsam lawv, kuv hais lus tsis zoo txog lawv. Kuv tau ua txhaum.
Tsis yog tej cuab yeej tej twj xwb thiaj tua tau neeg, tiam sis lub siab ntxub, siab khib, lo lus saib tsis tau luag, lus xyav, lus tsawm, mas kuj tua tau neeg thiab.
Kuv twb hais tias Tswv Ntuj saib kev kaus me nyuam yog txoj kev txhaum hnyav tshaj plaws, yog li thiaj muaj coob leej nug kuv tias ua li peb yuav ua li cas thiaj them lub txim tau, vim peb tsis yuav rov tsa tau cov me nyuam peb rho lawv txoj sia ntawd sawv los tau.
Nyob hauv lub Koom Txoos mas muaj ib lub txiaj ntsim loj, yog Cim Daws Txhaum los peb hais tias Cim Sib Haum Xeeb. Thaum peb mus lees peb cov txhaum, mas Tswv Ntuj ua tus daws txhaum rau peb vim tias yam twg tus Leej Choj daws hauv ntiaj teb no mas yog daws nyob saum Ntuj thiab. Peb yuav tau nqua suab cav txog Tswv Ntuj mog! Peb yuav cav txog Huab Tais Yes Xus tus siab zoo. Huab Tais Yes Xus zam lub txim txhaum rau peb, tab sis peb yuav tau nco Huab Tais Yes Xus lo lus hais rau tus poj niam deev hluas tias ‘koj rov mus, txij no mus koj txhob ua txhaum ntxiv lawm mog.’
Ib txoj kev daws txhaum yog ua lub Cim Ntxuav rau cov me nyuam raug kaus pov tseg. Yog ua li hais mas cov me nyuam ntawd tus ntsuj plig yuav dim hauv kev tos. Qhov no mas yog Koom Txoos kev thoob tsib. Yog peb ua Cim Ntxuav rau lawv mas lawv yuav tau mus koom Tswv Ntuj lub hwj chim nto moo, lawv yuav txias ntshis ua ib tug Tshiab pab thov Ntuj rau peb. Yam no yog qhov zoo nkauj nyob hauv Tswv Ntuj kev zoo.
Thaum tus poj niam tau kaus tus me nyuam ntawd mus daws txhaum thiab nws txiav siab tias yuav tsis ua ntxiv lawm, mas nws muaj feem pab tau lwm tus kom txhob ua li nws, nws tau ua hauj lwm them txim.
Kuv tsis muaj kev khaub zig Tswv Ntuj, kuv yuav nrhiav Tswv Ntuj yog thaum kuv ntsib teeb meem xwb, tshwj xeeb mas yog kev lag luam. Kuv muab Tswv Ntuj saib puav tam li yog tsev ceev nyiaj. Kuv thov Ntuj kom pub nyiaj rau kuv, kuv vam tias yog Tswv Ntuj nyiam kuv mas Tswv Ntuj yuav pub rau kuv raws li kuv tau fiv. Kuv tsis nyiam kom muaj neeg hais rau kuv tias yog ua li koj ua mas tsis zoo, koj tab tom ua txhaum.
Ntau zaus kuv ntsib teeb meem kev lag luam mas kuv mus txog ntawm tus mlom me nyuam Yes Xus, kuv yuav cev tes mus kov thiab hais tias “Huab Tais koj mloog kuv mas, koj muab nyiaj rau kuv mas, ziag no kuv xav tau ib pob nyiaj tiag tiag li os.”
Kuv tab tom ua zoo li cov neeg teev mlom uas lawv mus txhuam tus mlom, lawv mus thov tus mlom kom pub nyiaj rau lawv. Ua cas kuv yuav tsis hwm Ntuj kiag li.
Huab Tais Yes Xus qhia kuv tias thaum kuv ua li no mas yog kuv tab tom ua rau nws tu siab.
Thaum kuv tau nyiaj, ces kuv cov nyiaj yaj ntshis, thiab kuv pom tias kuv lag luam yim poob qis dua qhov qub.
Muaj ib tug poj niam tab tom ntsib teeb meem xws li kuv, nws mus nrhiav ib tug xib hwb Plos Tes Taas, ces zoo li nws cov teeb meem daws tag. Thaum kuv hnov mas kuv mus nrhiav nws thiab nug nws tias “Tus xib hwb nyob qhov twg nas, kuv xav mus cuag nws.” Nej saib mas kuv lub siab ncaj ces zoo li no ntag.
Tsis ntev ces kuv tau ntsib tus xib hwb no, nws thov Ntuj rau kuv, nws muab nws txhais tes tso cia saum kuv thiab hais kom kuv ua xws li ntawd ces kuv yuav tau txais Huab Tais Yes Xus lub Cev thiab cov Ntshav xws li cov Kav Tos Liv txais nyob hauv lub Cim Yug.
Kuv pom tias lawv cov kab ke teev hawm mas lom zem thiab muaj sia kawg, lawv dhia hom khaj, ntaus tes. Ces kuv hais rau tus kheej tias yog muab piv rau cov Kav Tos Liv mas ua cas cov Leej Choj nyob tus txhav cuag pob ntoos, cov Kav Tos Liv tej kab ke mas ceeb laj koom kawg li, cov Kav Tos Liv mas zoo tsis cuag cov Plos Tes Taas txoj. Thaum ntawd mas kuv zoo siab kawg.
Lawv tsis hwm cov duab mlom, lawv hais tias tus twg hwm cov duab mlom mas tus ntawd tab tom hawm dab, ces txij nkawd los kuv thiaj tsis kim caug hwm tus Ntoo Cuam lawm. Kuv pib mus koom nrog cov Plos Tes Taas teev hawm Tswv Ntuj. Muaj ib tug pog laus nyob ze kuv lub tsev, kuv niaj zaus pab nws them nqes hluav taws xob, nqes dej, thiab nyiam yuav yam ub yam no mus pub rau nws kom nws tau noj tau haus.
Tab sis thaum kuv tsis muaj Tswv Ntuj nrog kuv, ces kuv tsis quav ntsej ua zoo rau tus pog laus ntawd ntxiv lawm.
Ib yam li kuv tau hais, kuv pib mus nrog cov Plos Tes Taas teev hawm, kuv nyiam lawv pawg ntseeg kawg, thaum kuv nrog lawv teev hawm mas zoo kuv siab. Lawv hais tias yog kuv koom nrog lawv mas kuv lub siab uas lwj tas ntawd yuav rov tshiab tuaj.
Hais txog tus pog laus nyob ze kuv tsev, nws yog neeg ntseeg Kav Tos Liv. Kuv tau hais rau nws ntxias nws kom tig los nyob hauv lub Koom Txoos Plos Tes Taas. Kuv tau rhuav nws txoj kev ntseeg, ces thaum nws tuag mas nws thiaj tsis tau txais lub Cim Ntshiab. Nws hais tias nws tsis xav txais vim nws ntsia pom tias lub Cim Ntshiab tsis muaj txiaj ntsim thiab qab hau dab tsi rau nws.
Saib mas! Kuv muaj feem rau lwm tus npaum cas thaum muaj kev phem nyob puv hauv kuv lub cev. Kev phem hauv yus yuav rub cov neeg nyob puag ncig yus kom los nrhiav nws thiab haub kom lawv yuam kev xws li kuv tau ua rau tus pog laus no.
Tom qab tsis ntev, tus xib hwb nug kuv txog cov nyiaj qab nas kuv tsum pub rau lub tsev teev hawm yog ib feem kaum, ces kuv npau rau tus xib hwb, vim kuv tej lag luam tab tom raug teeb meem loj. Ces kuv thiaj tso tseg tsis mus koom nrog lawv ntxiv.