Lub caij Nyob Nruab Xyoo yog lub caij ntev kav li 33 los 34 lub lis piam. Lub caij Nyob Nruab Xyoo faib ua 2 ntu: ib ntu yog txij Hnub Ob tom qab ua Hmoov Yes Xus Txais Cim Ntxuav mus txog Hnub Peb ua ntej Hnub Plaub Txais Tshauv, thiab ib ntu yog txij Hnub Ob tom qab hnub hwm Leej Ntuj Plig Ntshiab Nqes Los mus txog Hnub Xya sawv ntxov ua ntej yuav txog Hnub Chiv thawj lub lis piam caij Tos Huab Tais.
Nyob hauv lub caij Nyob Nruab Xyoo, mas lub Koom Txoos Kav Tos Liv txhib sawv daws kom mloog Tswv Ntuj Lo Lus thiab sib txoos ua Thaj Txi Ntuj nco txog Leej Pleev kev tuag thiab sawv rov los. Lub caij Nyob Nruab Xyoo yog lub caij tshwj cia rau cov neeg ntseeg txog Yes Xus txais Tswv Ntuj Lo Lus los yug lub siab ntseeg kom hlob tiav, txhim kho lub neej kom zoo txhij mus raws qhov tseeb. Lub caij Nyob Nruab Xyoo yog lub caij cov neeg ntseeg txog Yes Xus tso siab tias lawv yuav muaj txoj sia mus ntxiv txawm tias nyob hauv lawv lub neej yuav raug xwv txheej thiab ntsib teeb meem ntau tsav. Lub caij Nyob Nruab Xyoo yog lub caij cov neeg ntseeg txog Yes Xus ua neej nyob hauv kev sib nyiam txawm tias lawv nyob nruab nrab hauv cov yeeb ncuab. Yog vim li ntawd, lub caij Nyob Nruab Xyoo thiaj yog lub qhov rooj qhib tos txais txhua tsav yam tuaj nphav cov neeg ntseeg txog Yes Xus lub neej; yog lub caij cov neeg ntseeg yuav hlob loj nyob hauv txoj kev ntseeg, kev tso siab, thiab kev nyiam.
Nyob hauv lub Txoos Txi Ntuj hauv Hnub Chiv, mas lub Koom Txoos yuav cev Tswv Ntuj Lo Lus 3 zaj hauv Ntawv Ntshiab rau lub Txoos tau mloog li no:
- Zaj nyeem ib; yog cov lus hauv Ntawv Ntshiab Cog Lus Qub uas muaj lub ntsiab phim Yes Xus lub Moo Zoo.
- Zaj nyeem ob; yog cov tsab ntawv xa mus rau cov ntseeg.
- Zaj nyeem peb; yog Yes Xus lub Moo Zoo.
Yuav muaj cov zaj Nkauj Paj Nruag quas zaj nyeem ib thiab zaj nyeem ob, thiab yuav hais zaj Cav Txog Lub Moo Zoo los yog ‘As Les Lus Yas’ ua ntej yuav nyeem Yes Xus lub Moo Zoo.
Yes Xus lub Moo Zoo faib ua 3 xyoos sib law; yog Xyoo A (Xyoo Ib), Xyoo B (Xyoo Ob), thiab Xyoo C (Xyoo Peb). Nyob hauv lis piam 2 yuav nyeem lub Moo Zoo raws li Zam li no: Xyoo A yog Z 1: 29-34, Xyoo B yog Z 1: 35-42, thiab Xyoo C yog Z 2: 1-12.
1. XYOO A
Yes Xus lub Moo Zoo hauv xyoo no yog cov lus hauv Mas Tais Ntawv Moo Zoo. Nyob hauv Mas Tais Ntawv Moo Zoo muaj tag nrho 28 zaj 1,064 qib, tab sis lub Koom Txoos tsuas xaiv 593 qib los cev rau lub Txoos nyeem xwb; yog pib hauv zaj 4 hais txog Yes Xus tshaj txog Ntuj lub Ceeb Tsheej nyob xeev Nkas Lis Lais mus txog zaj 25 yog Yes Xus hais txog kev txiav txim zaum kawg.
Nyob hauv thawj zaj nyeem, mas lub Koom Txoos xaiv 15 phau hauv Ntawv Cog Lus Qub kom phim rau lub Moo Zoo li no:
- Kev Tsiv 2 zaj,
- Les Vis 1 zaj ,
- Txoj Cai Ob 1 zaj,
- Vaj Phau Ib 2 zaj,
- Vaj Phau Ob 1 zaj,
- Cov Paj Lug 1 zaj,
- Thoob Tsib 2 zaj,
- Npes Xis Las 2 zaj,
- His Xais 12 zaj,
- Yes Les Mias 2 zaj,
- Es Xes Kias 3 zaj,
- Os Xes 1 zaj,
- Xos Fos Nias 1 zaj,
- Ntxas Kas Lias 1 zaj,
- Mas Las Kis 1 zaj.
Nyob hauv zaj nyeem 2 yog cov tsab ntawv, mas lub Koom Txoos xaiv Leej Ntshiab Paj Lug cov tsab ntawv 4 tsab li no:
- Tsab ntawv xa mus rau cov ntseeg nyob Kos Lis Nthos tsab Ib 8 zaj,
- Tsab ntawv xa mus rau cov ntseeg nyob Los Mas 16 zaj,
- Tsab ntawv xa mus rau cov ntseeg nyob Fis Lis Pos 4 zaj,
- Tsab ntawv xa mus rau cov ntseeg nyob Tes Xas Los Nis 5 zaj.
2. XYOO B
Nyob hauv xyoo no, lub Koom Txoos cev Yes Xus lub Moo Zoo raws li Leej Ntshiab Mas Kos phau ntawv rau lub Txoos tau nyeem. Tab sis vim tias Mas Kos Ntawv Moo Zoo tsuas muaj 16 zaj xwb tsis ntxaws rau lub caij Nyob Nruab Xyoo, mas nyob hauv lis piam 17 txog 21 lub Koom Txoos thiaj muab Zam Ntawv Moo Zoo ntu hais txog Yes Xus yog cov mov pub txoj sia (Z 6: 1-69) los ntxiv rau.
Nyob hauv cov Ntawv Cog Lus Qub hauv thawj zaj nyeem hauv lub Txoos muaj li nram no:
- Hauv Paus 2 zaj,
- Kev Tsiv 1 zaj,
- Les Vis 1 zaj,
- Xam Phaj 1 zaj,
- Txoj Cai Ob 4 zaj,
- Yos Xuas 1 zaj,
- Xas Muas Phau Ib 1 zaj,
- Vaj Phau Ib 2 zaj,
- Vaj Phau Ob 1 zaj,
- Yob 2 zaj,
- Cov Paj Lug 1 zaj,
- Thoob Tsib 3 zaj,
- His Xais 4 zaj,
- Yes Les Mias 2 zaj,
- Es Xes Kias 2 zaj,
- Das Nias 2 zaj,
- Os Xes 1 zaj,
- As Mos 1 zaj,
- Yos Nas 1 zaj.
Cov tsab ntawv hauv zaj nyeem ob li no:
- Paj Lug tsab ntawv xa mus rau cov ntseeg nyob Kos Lis Nthos tsab Ib 5 zaj,
- Paj Lug tsab ntawv xa mus rau cov ntseeg nyob Kos Lis Nthos tsab Ob 8 zaj,
- Paj Lug tsab ntawv xa mus rau cov ntseeg nyob Es Fes Xos 7 zaj,
- Tsab ntawv xa mus rau cov Hes Nplaws 7 zaj,
- Yas Kos tsab ntawv 5 zaj,
- Qhib Yav Tom Ntej 1 zaj.
3. XYOO C
Nyob hauv xyoo no, lub Koom Txoos cev Yes Xus lub Moo Zoo raws li Leej Ntshiab Lus Kas.
Zaj nyeem ib yog cov zaj hauv Ntawv Cog Lus Qub:
- Hauv Paus 2 zaj,
- Kev Tsiv 2 zaj,
- Txoj Cai Ob 1 zaj,
- Xas Muas Phau Ib 1 zaj,
- Xas Muas Phau Ob 2 zaj,
- Vaj Phau Ib 3 zaj,
- Vaj Phau Ob 1 zaj,
- Nes Has Mis 1 zaj,
- Mas Kas Npes Phau Ib 1 zaj,
- Kos Es Les 1 zaj,
- Thoob Tsib 3 zaj,
- Npes Xis Las 3 zaj,
- His Xais 4 zaj,
- Yes Les Mias 3 zaj,
- As Mos 2 zaj,
- Has Npas Kws 1 zaj,
- Ntxas Kas Lias 1 zaj,
- Mas Las Kis 1 zaj.
Zaj nyeem ob yog Leej Ntshiab Paj Lug cov tsab ntawv:
- Kos Lis Nthos tsab Ib 7 zaj,
- Nkas Las Tias 6 zaj,
- Kos Los Xais 4 zaj,
- Tes Xas Los Nis tsab Ob 3 zaj,
- Tis Mos Tes tsab Ib 3 zaj,
- Tis Mos Tes tsab Ob 4 zaj,
- Fis Les Moos 1 zaj,
- Hes Nplaws 4 zaj.
Nyob hauv lub Txoos Txi Ntuj faib ua 2 ntu; yog ntu ‘Txais Tswv Ntuj Lo Lus’ thiab ntu ‘Cav Txog Lub Txiaj Ntsim’. Tus Leej Choj yuav hais 3 zaj thov Ntuj ua ke; yog zaj thov Ntuj qhib lub Txoos, zaj thov Ntuj txais cov txim, thiab zaj thov Ntuj xaus lub Txoos. Nyob hauv 3 zaj thov Ntuj no puav leej yog thov nyob hauv Huab Tais Yes Xus lub npe, ces tus Leej Choj thiaj hais tias “Peb vam txog peb tus Huab Tais Pleev.”
1. Ntu Txais Tswv Ntuj Lo Lus cais tau li no:
- Mloog Tswv Ntuj Lo Lus,
- Leej Choj ntuas lub Txoos kom rov mus ua raws li Tswv Ntuj Lo Lus (Homilia),
- Hais zaj lees ntseeg (Credo),
- Thov Ntuj rau lub ntiaj teb.
2. Ntu Cav Txog Lub Txiaj Ntsim muaj li no:
- Cev cov txim,
- Cav txog Yes Xus lub txiaj ntsim,
- Txais Yes Xus lub Cev.
Zaj thov Ntuj qhib lub Txoos yog zaj tus Leej Choj hais tom qab lub Txoos hais zaj ‘Nyob pem ntuj Tswv Ntuj nto meej nto moo’. Zaj thov Ntuj no yuav cav txog Huab Tais Tswv Ntuj cov hauj lwm ua rau ntiaj teb neeg raws li cov ntsiab lus hauv lub Moo Zoo. Thaum pib tus Leej Choj yuav hais tias “Peb sawv daws thov Huab Tais”. Thaum xaus tus Leej Choj yuav hais tias “Peb vam txog peb tus Huab Tais Yes Xus Pleev uas nws yog koj tus tub, nws nrog koj thiab nrog Leej Ntuj Plig Ntshiab muaj txoj sia thiab ua vaj nyob mus li txog txhiab niag tim puas xyoo.” Sawv daws teb tias “Ua li.”
Zaj thov Ntuj txais cov txim yog zaj thov Huab Tais Tswv Ntuj txais cov txim lub Txoos coj tuaj txi Ntuj.
Zaj thov Ntuj xaus lub Txoos yog zaj ua Leej Txiv Tswv Ntuj tsaug vim cov txiaj ntsim paj tshab Leej Txiv pub rau lub Txoos nyob hauv lub Cim Yug thiab thov kom Tswv Ntuj cov txiaj ntsim paj tshab tawg paj nyob hauv sawv daws lub neej.
Cov lus qhib zaj cav txiaj ntsim ‘Leej Txiv Ntshiab’ nyob hauv lub caij Nyob Nruab Xyoo muaj 8 zaj:
Zaj 1. Hais txog lub txiaj ntsim Hla thiab Tswv Ntuj haiv neeg.
Zaj 2. Hais txog Leej Pleev txoj kev cawm neeg.
Zaj 3. Hais txog Yes Xus yug los ua neeg kom tau cawm peb lub neej.
Zaj 4. Hais txog 4 yam loj uas Leej Pleev tau ua los cawm peb.
Zaj 5. Hais txog Tswv Ntuj muab lub sim ceeb los zwm rau neeg.
Zaj 6. Hais txog Tswv Ntuj pub kom nyob ntiaj teb no peb pib muaj txoj sia nyob mus li.
Zaj 7. Hais txog Tswv Ntuj Leej Tub ua neeg ces Tswv Ntuj nyiam peb hauv nws Leej Tub.
Zaj 8. Hais txog Huab Tais Peb Leeg hu tsoom ntseeg kom los nyob ua tib lub Koom Txoos.
Thaum tus Leej Choj hais cov lus qhib zaj cav txiaj ntsim tas, mas lub Txoos koom suab hu cov Tshiab zaj nkauj ‘Faj Tim Huab Tais Ntshiab’.
Nyob hauv lub caij Nyob Nruab Xyoo tseem muaj cov hnub hwm thiab ua hmoov xyaw nrog li no: Hnub Hwm Peb Leeg Huab Tais (Hnub Chiv tom qab hwm Leej Ntuj Plig nqes los), Hnub Hwm Lub Cim Yug (Hnub Tsib tom qab Hnub Chiv hwm Huab Tais Peb Leeg), Hnub Hwm Yes Xus Lub Siab (Hnub Rau lub lis piam 3 tom qab hwm Leej Ntuj Plig nqes los), Hnub Hwm Yes Xus ua Vaj (Hnub Chiv lis piam 34 caij Nyob Nruab Xyoo), Hnub Ua Hmoov Cav Txog Yes Xus Tus Ntoo Cuam (Lub 9 hlis tim 14), Hnub Hwm Pob Zeb thiab Paj Lug (Lub 6 hli tim 29), Hnub Hwm Mab Liab Mus Saum Ntuj (Lub 8 hli tim 15), Hnub Hwm Tsoom Leej Ntshiab (Lub 11 hlis tim 1).
1. Hnub Hwm Peb Leeg Huab Tais.
Xyoo A yuav nyeem cov lus hauv phau ntawv Kev Tsiv (KT 34: 4-6, 8-9) hais txog Huab Tais Tswv Ntuj yog tus Tswv Ntuj siab zoo khuv leej neeg, yog tus Tswv Ntuj npau taws qeeb thiab tsis fav xeeb. Lub Txoos yuav nyeem Leej Ntshiab Paj Lug tsab ntawv xa mus rau cov ntseeg nyob Kos Lis Nthos tsab Ob (2KLN 13: 11-13) hais tias sawv daws yuav nyob kaj lug nyob hauv Peb Leeg Huab Tais. Yes Xus lub Moo Zoo yog cov lus nyob hauv Zam Ntawv Moo Zoo (Z: 16-18) hais txog Huab Tais Leej Txiv nyiam lub qab ntuj neeg, mas nws thiaj yeem tso Huab Tais Leej Tub los tuag kom tau cawm neeg hauv kev tuag.
Xyoo B lub Txoos yuav nyeem cov lus hauv phau ntawv Txoj Cai Ob (TCO 4: 32-34, 39-40) hais txog Huab Tais Tswv Ntuj hlub nws haiv neeg, ces Huab Tais Tswv Ntuj npo lawv tawm hauv Hais Nkws Tos teb los. Lub Txoos yuav nyeem Leej Ntshiab Paj Lug tsab ntawv xa mus rau cov ntseeg nyob Los Mas (LM 8: 14-17) hais tias lub Cim Ntxuav ua kom peb txia ua Tswv Ntuj cov me nyuam, Leej Ntuj Plig pab peb ntseeg tias peb yog Tswv Ntuj me nyuam tiag. Lub Moo Zoo yog raws li Leej Ntshiab Mas Tais (MT 28: 16-20) cov lus hais tias Yes Xus qhia cov thwj tim kom hu txog Huab Tais Leej Txiv, Huab Tais Leej Tub, thiab Huab Tais Leej Ntuj Plig los ntxuav cov neeg txais lub Moo Zoo.
Xyoo C lub Txoos nyeem cov lus hauv phau ntawv Cov Paj Lug (CPL 8: 22-31) hais tias kev thoob tsib yog Tswv Ntuj Leej Tub ib txwm nrog Leej Txiv Tswv Ntuj nyob. Zaj nyeem ob yog cov lus Leej Ntshiab Paj Lug sau mus rau cov ntseeg nyob Los Mas (LM 5: 1-5) hais tias yog peb txawj saib peb lub neej nyob hauv Yes Xus, mas tas txhua yam xwm pab peb kom hlob mus nyob hauv txoj kev tso siab rau Tswv Ntuj, thiab pab peb nco txog Leej Ntuj Plig uas nyob hauv peb. Yes Xus lub Moo Zoo kuj hais tias Leej Ntuj Plig nyob hauv peb, nws pab peb xav tswv yim kom to taub tias Tswv Ntuj ua hauj lwm nyob hauv lub ntiaj teb thiab Leej Ntuj Plig qhia peb tias peb yuav ua dab tsi raws li cov lus hauv Zam Ntawv Moo Zoo (Z 16: 12-15).
2. Hnub Hwm Lub Cim Yug (Yes Xus lub Cev thiab cov Ntshav)
Xyoo A lub Txoos nyeem cov lus hauv phau ntawv Txoj Cai Ob (TCO 8: 2-3, 14-16) hais tias lub Cim Yug yog cov mov pab hla lub ntiaj teb thiab pab tiv tas puas tsav yam xwv txheej. Cov lus Leej Ntshiab Paj Lug sau mus rau cov ntseeg nyob Kos Lis Nthos tsab Ib (1KLN 16: 16-17) hais txog cov ntseeg nyob Kos Lis Nthos ntseeg txog lub Cim Yug tias yog lub cim tshaj tias lawv koom siab koom ntsws nyob hauv Huab Tais Yes Xus. Yes Xus lub Moo Zoo raws li Leej Ntshiab Zam (Z 6: 51-58) hais tias Huab Tais Yes Xus yog lub Cim Yug pub txoj sia.
Xyoo B mas lub Txoos yuav nyeem zaj nyeem hauv phau ntawv Kev Tsiv (KT 24: 3-8) hais txog thaum Mais Xes muab cov ntshav tsiaj los nrog Huab Tais Tswv Ntuj cog lus. Lub Txoos nyeem cov lus hauv tsab ntawv sau mus rau cov Hes Nplaws (HN 9: 11-15) tias Huab Tais Yes Xus muab nws cov ntshav los ntxuav peb thiab txhiv peb, ces nws cev peb rau Tswv Ntuj. Mas Kos Ntawv Moo Zoo (MK 14: 12-16, 22-28) yog hais txog thaum Yes Xus qhia cov thwj tim ua lub Cim Yug, Yes Xus hais tias “Qhov no yog kuv lub Cev, qhov no yog kuv cov Ntshav.”
Xyoo C phau ntawv Hauv Paus (HP 14: 18-20) piav txog thaum Mes Kis Xes Des nqa cov ncuav thiab cov cawv tuaj rau Has Nplas Has tias yog ib yam qhia txog Huab Tais Yes Xus thiab lub Cim Yug. Leej Ntshiab Paj Lug cov lus sau mus rau cov ntseeg nyob Kos Lis Nthos tsab Ib (1KLN 11: 23-26) hais tias lub Cim Yug yog lub cim nco txog Huab Tais Yes Xus kev tuag ces Paj Lug hais tias “Nej noj thiab haus cov mov cov cawv no thaum twg, mas nej tshaj tias Huab Tais raug kev tuag.” Lus Kas Ntawv Moo Zoo (LK 9: 11-17) hais txog thaum Yes Xus ua kom tsib lub ncuav mov thiab ob tug ntses ntsu tuaj.
3. Hnub Hwm Yes Xus Lub Siab.
Xyoo A mas lub Txoos nyeem cov lus hauv phau ntawv Txoj Cai Ob (TCO 7: 6-11) hais tias Huab Tais Tswv Ntuj siab zoo nws nyiam cov neeg ntseeg txog nws, ces nws npo cov His Xas Lais ntawm cov Hais Nkws Tos txhais tes. Lub Txoos nyeem tus Hauv Paus Xa Lus Zam tsab ntawv tsab Ib (1Z 4: 7-16) Zam ntuas cov Koom Txoos kom xyaum nyiam lwm tus mas lawv thiaj nyiam tau Tswv Ntuj, tus twg nyob hauv txoj kev nyiam mas nws nyob hauv Tswv Ntuj. Lub Txoos nyemm Yes Xus lub Moo Zoo raws li Leej Ntshiab Mas Tais (MT 11: 25-30) tau sau tseg tias Yes Xus caw cov neeg me los so hauv nws, ces yog peb tuaj cuag Yes Xus mas peb yuav paub Yes Xus lub siab, ces peb yuav paub Tswv Ntuj lub siab tau.
Xyoo B sawv daws yuav nyeem tus Yaj Saub Os Xes cov lus (OX 11: 1, 3-4, 8-9) hais tias Huab Tais Tswv Ntuj hlub nws haiv neeg xws li leej txiv hlub nws leej tub. Sawv daws nyeem Leej Ntshiab Paj Lug cov lus sau mus rau cov ntseeg nyob Es Fes Xos (EFX 3: 8-11, 14-19) hais tias peb yuav nrhiav kev kaj siab lug tau mas yog thaum peb paub Yes Xus lub siab nyiam peb xwb. Sawv daws kuj yuav nyeem Zam Ntawv Moo Zoo (Z 19: 31-37) hais txog cov xwm thaum tus tub rog xuas hmuv nkaug Yes Xus sab hauv siab ces muaj ib co ntshav thiab ib co dej tawm los.
Xyoo C tus Yaj Saub Es Xes Kias (EXK 34: 11-16) hais txog tus tswv zov yaj siab zoo. Cov lus Leej Ntshiab Paj Lug sau mus rau cov ntseeg nyob Los Mas (LM 5: 5-11) Huab Tais Yes Xus nyiam peb, nws zoo siab tuag kom tau pab peb. Lus Kas sau nyob hauv nws phau Ntawv Moo Zoo (LK 15: 3-7) tias tab yog peb ua txhaum tsis kav Huab Tais Yes Xus zam rau peb thiab tsis tso peb pov tseg vim Huab Tais Yes Xus siab zoo.
