Txhua xyoo thaum txog lub 12 hlis tim 25 tsoom neeg ntseeg yuav ua hmoov Yes Xus yug los, lus Aas Kiv hu ua ‘Christmas’. Lo lus no txia lo ntawm lo lus tias ‘Chistes Maesse’ txhais tias ‘Leej Pleev lub Thaj Txi Ntuj’.

Lus Kas piav tias Yes Xus yug lub zim txwv Xes Ntxas Aus Nkus Tus ua vaj kav Los Mas teb chaws, Kis Lis Nyus ua nom tswj Xis Lias teb (LK 2: 1-3). Ntawv Moo Zoo tsis tau ceev tseg tias yog hnub twg, lub hli twg; cov ntseeg thiaj ua hmoov nyob hauv hnub tim 25 lub 12 hlis vim lawv saib raws cov ntawv txheeb tsoom mej hwm uas Kis Lis Nyus khaws cia, tab sis tsis muaj ib tug tub tshuaj xwm yuav nrhiav tau cov ntawv ntawd lawm. Cov tub tshuaj xwm tom qab no txhawb nrhiav saib yog vim li cas tiag cov ntseeg txheej thaud thiaj tshwj hnub tim 25 los ua hmoov Yes Xus yug, lawv pom tias nyob hauv xyoo 274 Xes Ntxas Aws Les Lias Nus (Aurelian) tau muab hnub tim 25 los ua hmoov tsuj xeeb Los Mas tus tuam dab txiv nraug hnub, vim tias hnub tim 25 lub 12 hlis yog lub caij lub hnub nyob deb lub ntiaj teb tshaj txhua lub caij thiab txoj kab hnub khiav txav mus rau sab pej ua rau yav pom kev ntev dua yav tsaus ntuj. Yog li mas cov neeg Los Mas thiaj ua hmoov lom zem thiab cav txog tus vaj Xes Ntxas nyob hauv hnub no, lawv saib tus vaj Xes Ntxas zoo li lub hnub tsom kev kaj rau lub teb chaws.

Cov ua Ntuj Kev Cai raug yuam kom ua hmoov hwm lub hnub mas lawv tsis zoo siab, tab sis yuav ua li cas lawv thiaj tsis ntsib teeb meem. Thaum txog hnub cov Los Mas ua hmoov, mas cov neeg ntseeg tsis hwm lub hnub tab sis lawv nco txog Yes Xus ntsiag ntsiag. Lawv tau ua li ntawd los txog xyoo 330 tus vaj Koos Taas Tis Nus tso cai rau lub teb chaws ua Ntuj Kev Cai, mas cov neeg ntseeg thiaj ua hmoov Yes Xus yug los ntawm tej tshav puam rau sawv daws pom.

Nyob rau lub zim txwv no, lub Koom Txoos qee lub caij Yes Xus yug los ua 2 ntu:

1. Lub caij Tos Huab Tais, yog lub caij ua ntej Yes Xus yug los li 4 lub lis piam. Ua ntej yuav txog lub caij Yes Xus yug los li 9 hnub, xws li hnub tim 17 txog 25 mas yuav tshwj cia ua lub Txoos Txi Ntuj npaj siab npaj ntsws tos txais tus me nyuam Yes Xus. Lub Koom Txoos saib caij Tos Huab Tais yog lub caij pib lub xyoo teev Ntuj. Leej Choj yuav hnav tsoos tsho tsam xem.

2. Lub caij Huab Tais yug los, yuav pib txij hmo 24 mus txog hnub chiv Yes Xus ua kab ke ntxuav. Hnub tom qab Yes Xus yug, lub Koom Txoos yuav ua cov kab ke teev Ntuj li 8 hnub sib law. Lub caij Huab Tais yug los, Leej Choj yuav hnav tsoos tsho dawb.

Lub caij Yes Xus yug, peb cov neeg ntseeg yuav coj tus yam ntxwv zoo li no:

1. ‘Zov Hmo’ yog yuav feeb meej nyob hauv txoj kev ntseeg, kev teev Ntuj mas peb thiaj yuav pom lub cim qhia rau peb tias Huab Tais Yes Xus yug los nyob hauv peb lawm.

2. ‘Taug Kev’ mus raws txoj kev Huab Tais Ntuj npaj tseg rau peb, yog txoj kev hloov siab tshiab los raws Huab Tais Yes Xus.

3. ‘Xyiv Fab’ txais Huab Tais Yes Xus, xws li nyiam thiab hlub luag tej.

4. ‘Pluag’ hauv nruab siab thiab ‘Pluag’ lub Moo Zoo mas peb thiaj yuav tshuav chaw cia rau Huab Tais Yes Xus los nyob hauv peb siab tau.

Hais txog cov nkauj cav txog Yes Xus yug los, mas cov neeg ntseeg pib hu nyob hauv tiam 5 los. Thaum ntawd, lawv hu ua lus Las Tis Nas kom zoo mloog, lub ntsiab hais txog Yes Xus los xeeb ua neeg.

Txog tiam 12 Leej Ntshiab Fas Ntshis Kus thiab cov tub koom haum Fas Ntshis Kas pib tsim cov nkauj tshiab muaj lub yas saub lom zem los cav txog Huab Tais yug los. Cov nkauj cav txog Yes Xus yug los xws li zaj ‘tuaj mas cov kwv tij phooj ywg’ (O come, all ye faithful) hais txog cov neeg ntseeg zoo siab thiab ua siab kaj lug mus xyuas tus me nyuam Yes Xus yug los nyob lub zos Npes Les Hes.

Zaj nkauj no yog ib co lus caw peb kom peb mus hawm tus me nyuam Yes Xus. Cov neeg zov yaj yog ib co me nyuam neeg xwb, lawv yog neeg nyob nruab liaj nruab teb ib yam li peb tsoom Hmoob. Tiam sis Tswv Ntuj pub txoj hmoov zoo rau lawv, lawv yog thawj pab neeg tau mus pom Tswv Ntuj Leej Tub.

Tswv Ntuj tsis xaiv neeg nyiam, nws kuj hlub cov neeg me me zoo li peb sawv daws ntag. Niaj hnub no Tswv Ntuj hu kom peb mus cuag nws Leej Tub Yes Xus Pleev. Peb kav tsij zoo siab ntsib Yes Xus mus li.

Niaj hnub no peb kuj tau txais ib lub siab kaj zoo li cov neeg zov yaj thaud. Peb zoo siab ua Tswv Ntuj tsaug vim Tswv Ntuj tau ua siab zoo rau peb, nws hu peb los ntseeg txog nws Leej Tub.

Tas txhua lub teb chaws uas muaj cov neeg ntseeg mas lub 12 hlis thiab lub 1 hlis lawv sawv daws nco txog cov txiaj ntsim uas Tswv Ntuj tau xa nws Leej Tub tuaj cawm ntiaj teb neeg. Tswv Ntuj pub kom nws Leej Tub yug los ua neeg, Tswv Ntuj Leej Tub xaiv ib lub neej pluag zoo li peb sawv daws. Thaum nws muaj 33 xyoos mas nws raug tuag nyob saum ntoo Cuam. Tswv Ntuj Leej Tub yeem raug txom nyem zoo li ntawd kom tau cawm peb dim ntawm peb tej txhaum. Yes Xus sawv rov los nws coj ib txog sia tshiab tuaj rau peb. Niaj hnub no Huab Tais Yes Xus nrog peb nyob nraim, nws tseem nyob ze peb sawv daws huv tib si, Yes Xus ua tus coj peb lub neej, nws txhim kho peb lub siab kom zoo tuaj.

Niaj zaus uas peb hu zaj nkauj ‘Tuaj mas cov kwv tij phooj ywg’, mas peb txais ib lub siab kaj zoo nkaus li 3 tus kws hnub qub, tuaj pom tus me nyuam Yes Xus.

Thaum ub, Tswv Ntuj xuas ib lub hnub qub los coj kev rau cov kws hnub qub tuaj hawm Yes Xus. Hos nyem no Tswv Ntuj kuj tseem qhia kev rau peb taug, kom peb mus cuag Tswv Ntuj.

Niaj hnub no Tswv Ntuj vam txog lub Koom Txoos qhia Ntuj kev cai rau peb, kom peb pom kev mus cuag Tswv Ntuj tau.

Peb paub tias Yes Xus lub Koom Txoos mas Tswv Ntuj cia Vaj Qhia, cia  tsoom Tswv Qhia, cia cov Leej Choj, cov Leej Phauj, cov Xib  Hwb, kom lawv tshaj Yes Xus lub Moo Zoo thiab qhia Tswv Ntuj txoj kev rau sawv daws taug. Peb cov neeg ntseeg, mas peb kuj tau txais txoj hauj lwm tshaj Ntuj lus thiab.

Tas nrho cov neeg hauv Yes Xus lub Koom Txoos mas sawv daws zoo li lub hnub qub ci kaj, kom coj lwm tus mus cuag Tswv Ntuj.

Yes Xus twb hais tias “Nej yog lub teeb ci rau lub ntiaj teb. Nej lub teeb yuav tsom ci nyob ntawm zeej tsoom xub ntiag. Sawv daws pom nej cov hauj lwm zoo, sawv daws thiaj yuav cav lus zoo txog nej Txiv nyob saum ntuj” (MT5: 14-16).

Peb tsoom ntseeg uas tau txais lub Cim Ntxuav, mas peb tau txais ib co hauj lwm tuaj ntawm Tswv Ntuj tuaj. Peb tab meeg ua tim khawv txog Yes Xus lub Moo Zoo. Peb yog lub hnub qub coj lwm tus los cuag Huab Tais Yes Xus thiab los ntseeg Huab Tais Yes Xus. Peb muab siab rau ua cov hauj lwm zoo, kom luag tej tau kev pom Tswv Ntuj nyob hauv peb tej hauj lwm zoo.

Tswv Ntuj hais tias “Qhov kuv tos ntawm nej mas yog nej lub siab nyiam Tswv Ntuj thiab nej txoj kev sis nyiam sis hlub.”

Yes Xus qhia tias yuav xub muab siab rau nyiam Tswv Ntuj tas siab tas ntsws, tas tswv yim, tas zog, thiab yuav nyiam luag tej ib yam li yus nyiam yus (MK12: 28-33).

Qhov uas peb niaj hnub teev Ntuj mas yog ib yam zoo lawm, tiam sis tseem muaj ib yam tseem ceeb uas peb yuav tsum nco ntsoov ua mas yog qhov uas peb yuav tsum nyiam thiab hlub luag tej li yus nyiam yus. Peb pab sawv daws huv tib si. Vim qhov Tswv Ntuj tos ntawm peb mas yog peb lub siab nyiam Tswv Ntuj thiab nyiam neeg ntag.

Yes Xus hais tias koj yuav nyiam lwm tus li koj nyiam koj, mas yog ib lo lus tseem ceeb kawg, peb yuav tsum ua raws li Yes Xus qhia.

Niaj Hnub Chiv peb tsis muaj ib co nyiaj, ib co kub los cev rau Tswv Ntuj, tab sis peb muab peb lub siab nyiam Tswv Ntuj, thiab muab peb lub siab nyiam neeg los cev rau Tswv Ntuj. Niaj hnub, peb rau siab mloog Tswv Ntuj Lo Lus mus li.

Ntawv Ntshiab muaj tej lo lus ntuas kom peb coj ib lub siab ntshiab, thiab sib nyiam sis hlub. Tus Hauv Paus Xa Lus Paj Lug sau cov lus ntawd mus ntuas cov ntseeg nyob Kos Los Xais tias “Nej xyeeb txoj kev chim, kev siab ceev, kev nkhaus, kev tsawm, kev hais lus phem. Txhua yam kev phem no yuav tsum khiav deb ntawm nej di ncauj. Nej txhob ib leeg dag rau ib leeg. Yog nej ib tug muaj lus rau ib tug mas nej yuav sib zam. Nej yuav xub muab siab rau nrhiav txoj kev nyiam, vim txoj kev nyiam yuav ua kom nej hlob tiav” (KLX 3).

Paj Lus ntuas ntxiv tias “Tej lus dev, tej lus ruam, tej lus plhom moj, txhua yam ntawd tsis zoo mloog. Nej tsis txhob cia luag tej cov lus dag ntxias tau nej. Nej ua lub neej phim txoj kev pom kev cov me nyuam. Cov txiv txi hauv qhov pom kev yog lub siab zoo, lub siab ncaj thiab lub siab zeem tau qhov tseeb” (EFX 5).

Tseem muaj 2 zaj nkauj hu nyob hauv lub caij Yes Xus yug los; yog zaj ‘hmo ntuj hmo teb ntsiag to’, thiab zaj ‘hmo ci ntsa’.

Zaj nkauj ‘hmo ntuj hmo teb ntsiag to’ (The first Nowell) hais txog Tswv Ntuj cog lus tias yuav xa Leej Tub tuaj cawm neeg, ces Leej Tub thiaj tuaj nyob nruab nrab hauv cov neeg muaj lub siab ntseeg. Tswv Ntuj Leej Tub yuav los ua lub teeb tsom kev rau tus ntseeg txog nws. Hos zaj nkauj ‘hmo ci ntsa’ (Silent Night Holy Night) hais txog hmo Yes Xus yug, mas tas sawv daws muaj kev kaj siab vim peb chaw tso siab tuaj txog lawm.

Lub caij ntawd cov nom tswv hauv lub tsheej Yes Lus Xas Les thiab cov pej xeem hauv lub zos Npes Les Hes, lawv sawv daws saib cov neeg zov yaj yog ib co neeg me, yog ib co neeg qis qis. Vim tas niaj tas xyoo, tas hnub tas hmo, cov neeg zov yaj nyob nruab liaj nruab teb mus li, lawv zov lawv cov yaj. Cov neeg zov yaj lub neej khuam rau lawv cov yaj. Li ntawd, hnub Xas Npas Tos lawv tsis xyeej mus teev Ntuj. Luag tej saib tias cov zov yaj hla Tswv Ntuj txoj cai, vim hnub Xas Npas Tos yog Tswv Ntuj hnub. Tswv Ntuj txoj cai lo lus 3 hais tias koj yuav caiv Huab Tais Ntuj hnub. 

Yog vim qhov ntawd, mas luag thiaj saib cov neeg zov yaj qis qis, lawv xav tias cov zov yaj yog cov neeg muaj txhaum. Tab sis Tswv Ntuj hlub cov neeg me, hlub cov neeg uas lawv lees tias lawv yog neeg txhaum. Tswv Ntuj pub txoj hmoov zoo rau cov neeg zov yaj. Tsuas yog cov zov yaj xwb, thiaj li xub tau ntsib Yes Xus dua.

Hmo Yes Xus yug los, mas thawj pab neeg uas Tswv Ntuj caw tuaj xyuas Tswv Ntuj Leej Tub, tus Huab Tais Cawm Seej, yog cov neeg me ntawd. Cov zov yaj sib yaum tias “Peb mus Npes Les Hes, mus xyuas yam xwm uas Huab Tais tuaj qhia peb.” Ces lawv maj zeeg mus. Ntawv Moo Zoo tsis hais tias thaum cov neeg zov yaj tuaj txog ntawm tus me nyuam Yes Xus mas lawv tau ua dab tsi. Tab sis peb mem tau tias cov zov yaj ntawd tau piav tej xwm uas Ntuj tus Tshiab hais txog tus me nyuam rau Mab Liab mloog. Tej zaus lawv kuj thov puag tus me nyuam mos liab ib pliag. Peb mem tau tias cov zov yaj zoo siab kawg. Tej zaum, lawv nco cov lus hauv zaj Nkauj Paj Nruag 45 tias: Koj yog tus zoo nraug tshaj ib tsoom txiv neej. Txiaj ntsim zoo saib ntws ntawm koj di ncauj los.  Li ntawd, Tswv Ntuj foom koob hmoov rau koj tas ib sid (NPN 45:3).

Cov zov yaj kuj qhuas txog Mab Liab tias Mab Liab tau ib txoj hmoov zoo, raws li lo lus hauv ntawv Moo Zoo hais tias: Lub plab uas tau nqa koj thiab lub xub ntiag uas pub mis rau koj, tau txoj hmoov zoo (LK 11: 27).

HmoYes Xus yug los, mas cov neeg zov yaj tau txais kev zoo siab loj kawg. Tsis tau muaj ib zaug uas lawv zoo siab npaum li no.

Cov neeg uas Tswv Ntuj xub hu los cuag Yes Xus mas yog cov neeg me, yog cov neeg pluag, yog cov neeg khwv ua noj ua haus, yog cov uas luag tej saib tias yog neeg txheej qis. Tswv Ntuj hlub cov neeg qhib siab los txais lub Moo Zoo, Tswv Ntuj hlub tas nrho sawv daws huv tib si. Tswv Ntuj zam txhaum rau cov neeg uas tu siab rau nws tej txhaum.

Hmo Huab Tais Yes Xus yug los, yog ib hmo zoo uas peb muab peb lub siab los cev rau Huab Tais Yes Xus, ces peb hu zaj nkauj ‘Peb mus hawm’.